The post tst appeared first on Budkulo.

ಬೆಂಗ್ಳುರ್ ಆರ್ಚ್ ದಿಯೆಸೆಜಿಂತ್ ತಶೆಂ ಕರ್ನಾಟಕಾಚ್ಯಾ ಹೆರ್ ದಿಯೆಸೆಜಿಂನಿಯೀ ಚಡ್ ಸಂಖ್ಯಾನ್ ಕೊಂಕ್ಣಿ ಕಥೊಲಿಕ್ ಆಸ್‍ಲ್ಲ್ಯಾ ಫಿರ್ಗಜಾಂನಿ ಕೊಂಕ್ಣಿ ಮಿಸಾಂ ಖಾತಿರ್ ಲೊಕಾನ್ ಆನಿಕೀ ಕಿತ್ಲೆಂ ರಂದಿಜೆ ಗೊವ್ಳಿ ಬಾಪಾನೊಂ? ಹ್ಯಾ ಆಂದೋಲನಾಂತ್ ಭಾಗಿದಾರ್ ಜಾಲ್ಲೆ ಮುಖೆಲಿ ಮ್ಹಾಕಾ ಸಾಂಗ್ತಾತ್, “ಆಮ್ಚೆ ಬಿಸ್ಪ್ ಮಿಸಾಂ ದಿಂವ್ಚೆಂ ಸೊಡ್ಯಾಂ, ಏಕ್ ಮುಲಾಖಾತ್ ಕರುಂಕ್ ಸಯ್ತ್ ಅವ್ಕಾಸ್ ದೀನಾಂತ್” ಮ್ಹಣ್. ಕಿತ್ಯಾಕ್ ಹೆಂ ನಿಷ್ಠುರ್ಪಣ್ ಬಿಸ್ಪಾನೊಂ?

ಹ್ಯಾ ಬರ್ಪಾ ಸಂಗಿಂ ತುಮ್ಚೆ ಲಾಗಿಂ ಮಾನೆಸ್ತ್ ಡೊಲ್ಫಿ ಡಿಕುನ್ಹಾನ್ ಕೆಲ್ಲ್ಯಾ ಸಂವಹನಾಚ್ಯೊ ಪ್ರತಿಯೊ ಆನಿ ತುಮ್ಚಿ ಜಾಪ್‍ಯೀ ಚಿಡ್ಕಾಯ್ಲ್ಯಾ. ತುಮಿ, ಫೆಬ್ರವರಿ 20, 2025ವೆರ್ ಇಮೈಲ್ ಮುಖಾಂತ್ರ್, ಧಾಡ್‍ಲ್ಲಿ ತುಮ್ಚಿ ಜಾಪ್‍ಯೀ ದಿಲ್ಯಾ.

ಬಿಸ್ಪಾನೊಂ, ತುಮಿ ಸಾಂಗ್ತಾತ್, “ತುಮಿ ಬಿಸ್ಪಾಂಕ್ ಕಿತ್ಯಾಕ್ ಮೆಳೊಂಕ್ ಅಪೇಕ್ಷಿತಾತ್ ಮ್ಹಳ್ಳೆಂ ಹಾಂವ್ ನೆಣಾಂ” ಮ್ಹಣೊನ್. ಡೊಲ್ಫಿ ಡಿಕುನ್ಹಾನ್ ಫೆಬ್ರವರಿ 17ವೆರ್ ಧಾಡ್‍ಲ್ಲ್ಯಾ ಪತ್ರಾಂತ್, ತ್ಯಾ ಆದಿಂ ತಾಣೆಂ ಧಾಡ್‍ಲ್ಲ್ಯಾ ಚಾರ್ ಪತ್ರಾಂಚೊ ಸ್ಪಷ್ಟ್ ಉಲ್ಲೇಖ್ ಆಸಾ. ಆನಿ ತಾಣಿಂ ತುಮ್ಚೆ ಲಾಗಿಂ ಸಂವಹನ್ ಕೆಲ್ಲೆಂ ಎಕ್‍ಚ್ ಇರಾದ್ಯಾನ್ – ಕೊಂಕ್ಣಿ ಮಿಸಾಂ ಖಾತಿರ್. ತರೀ ತುಮಿ ಕಿತೆಂಚ್ ಕಳಿತ್ ನಾ ಮ್ಹಣ್ತಾತ್ ತರ್ ಕಿತೆಂ ಅರ್ಥ್? ವಿಜೆಪಿಚ್ಯಾ ಉತ್ರಾಂನಿ ಸಾಂಗ್ಚೆಂ ತರ್, ‘ಹೊ ಕಸಲೊ ಅಪಾಲಿಪಾ ಖೆಳ್?’

ರಾಜ್ಯಾಚ್ಯಾ ಸಬಾರ್ ದಿಯೆಸೆಜಿಂನಿ ಕೊಂಕ್ಣಿ ಲೋಕ್ ವ್ಹಡ್ ಮಾಪಾನ್ ಆಸಾ. ತ್ಯಾ ದೆಕುನ್ ಸರ್ವ್ ಬಿಸ್ಪ್ ಸಾಂಗಾತಾ ಮೆಳ್ತಾನಾ ತಾಂಚೆ ಸಂಗಿಂ ಲಾಯಿಕ್ ಮುಖೆಲ್ಯಾಂನಿ ಏಕ್ ಚರ್ಚಾ/ಸಂವಾದ್ ಕೆಲ್ಯಾರ್ ಪರಿಹಾರ್ ಜೊಡ್ಯೆತ್. ತೀನ್ ದೀಸ್ ಸರ್ವ್ ಬಿಸ್ಪಾಂನಿ ಸಾಂಗಾತಾ ಮೆಳ್ತಾನಾ ಏಕ್ ವಾ ಅರ್ಧೊ ಘಂಟೊ, ಆಪ್ಲ್ಯಾಚ್ ಪರ್ಜೆ ಲಾಗಿಂ, ಉಲಂವ್ಕ್ ಸಯ್ತ್ ಪುರ್ಸತ್ ಆಸನಾಂಗೀ? ತಾಣಿಂ ವಿಚಾರ್ಚೆಂ ತಿತ್ಲೆಂಚ್. ಜರ್ ತುಮಿ ಬಿಸ್ಪ್ ತಾಂಕಾಂ ನೆಗಾರ್ತಾತ್, ಇನ್ಕಾರ್ ಕರ್ತಾತ್ ತರ್ ತಾಣಿಂ ಕೊಣಾ ಲಾಗಿಂ ವಚಜೆ? ಹಿ ಕಸಲಿ ಕರಾಳ್ ನೀತ್ ತುಮ್ಚಿ?

ಕೊಂಕ್ಣಿ ಕಥೊಲಿಕಾಂ ತರ್ಫೆನ್ ಡೊಲ್ಫಿ ಡಿಕುನ್ಹಾಚ್ಯಾ ಮುಖೇಲ್ಪಣಾರ್ ತುಮ್ಚೆ ಲಾಗಿಂ (ತಶೆಂಚ್ ಹೆರ್ ಬಿಸ್ಪಾಂ ಲಾಗಿಂ) ಉಲಂವ್ಕ್ ಅಪೇಕ್ಷಿಲ್ಲೆಂ ತಾಣಿಂ ಪತ್ರಾಂಚೆರ್ ಸ್ಪಷ್ಟ್ ಲಿಖ್ಲಾಂ. (ತೊಂಡ್ಪಾಶಿಂಚೆಂ ವೆಗ್ಳೆಂ). ತ್ಯಾ ವಿಶಿಂ ತುಮ್ಕಾಂ ಬರೆಂಚ್ ಕಳಿತ್ ಆಸಾ. ತರೀ, ಲಿಖ್ಣೆ ರುಪಾರ್ ಜಾಪ್ ದಿತಾನಾಂಯೀ, ‘ಕಾಂಯ್ ಕಳಿತ್ ನಾ’ ಮ್ಹಣ್ ತುಮಿ ಸಾಂಗ್ಚ್ಯಾಕ್ ಆಧಾರ್ ಕಿತೆಂ?

ಇತ್ಲ್ಯಾಕೀ, ತುಮಿ ಏಕ್ ಗೊವ್ಳಿ ಜಾವ್ನಾಸ್ತಾನಾ, ತುಮ್ಚ್ಯಾ ಪರ್ಜೆನ್ ತುಮ್ಚೆ ಲಾಗಿಂ ಮುಲಾಖಾತ್, ಉಲವ್ಣ್ಯಾಕ್ ಏಕ್ ಅವ್ಕಾಸ್ ದಿಯಾ ಮ್ಹಣ್ ಇತ್ಲೆಂಯೀ ಪರಾತ್ತಿಜೆಗೀ ಬಿಸ್ಪಾನೊಂ? ವಾತಿಕಾನ್ ಪವಿತ್ರ್ ಸಭೆನ್ ದಿಲ್ಲೆಂ, ಪಾಪ್‍ಸಾಯ್ಬಾನ್ ಜಾರಿ ಕೆಲ್ಲೆಂ ಹಕ್ಕ್ ತುಮ್ಚ್ಯಾ ಆದ್ಲ್ಯಾಂನಿ ನಿರಾಕರಣ್ ಕೆಲ್ಲೆಂ; ತೆಂ ತುಮಿ ಸಾರ್ಕೆಂ ಕರಿಜೆ ಆಸ್‍ಲ್ಲೆಂ. ಪುಣ್ ತುಮಿ ಉಲಂವ್ಕ್ ಸಯ್ತ್ ಇನ್ಕಾರ್ ಕರ್ತಾತ್ ಮ್ಹಳ್ಯಾರ್ ಕಿತೆಂ ಅರ್ಥ್?

ತುಮ್ಕಾಂ ಜಾಯ್ ತರ್ ಕಿತೆಂಯೀ ತುಮಿ ಕರ್ತಾತ್ ನ್ಹಯ್ಗೀ ಗೊವ್ಳಿ ಬಾಪಾಂನೊ! ಹಾಂಗಾ, ಫೊಟೊ ಆನಿ ತ್ಯಾ ಖಬ್ರೆಂಚೆಂ ಲಿಂಕ್‍ಯೀ ದಿಲಾಂ. ಪ್ರಸ್ತುತ್ ಮುಖೆಲ್ ಮಂತ್ರಿ ಸಿದ್ಧರಾಮಯ್ಯಾಕ್ ತುಮಿ ದಿಲ್ಲಿ ಏಕ್ ಭೆಟ್ ಆನಿ ಆದ್ಲೊ ಸಿಎಂ ಬಸವರಾಜ್ ಬೊಮ್ಮಾಯಿಕ್ ತುಮಿ, ಬಿಸ್ಪಾಂನಿ ಸಾಂಗಾತಾ, ದಿಲ್ಲಿ ಭೆಟ್ ತಾಂತುಂ ಆಸಾ.

ಸಿಎಂ ಬೊಮ್ಮಾಯಿಕ್ ತುಮಿ ಸರ್ಕಾರಾಚ್ಯಾ ಪ್ರಸ್ತಾವಿತ್ ಮತಾಂತರ್ ನಿಷೇಧ್ ಕಾನೂನಾಕ್ ವಿರೋಧ್ ಕರುಂಕ್ ಗೆಲ್ಲ್ಯಾತ್. ತುಮ್ಕಾಂ ತುಮ್ಚ್ಯಾಚ್ ಲೊಕಾಕ್ ಉಲಂವ್ಕ್ ಅವ್ಕಾಸ್ ದೀಂವ್ಕ್ ನಾಕಾ, ತರ್ ತುಮಿ ಸರ್ಕಾರಾಚ್ಯಾ ಮುಖೆಲ್ಯಾಂಕ್ ಕಿತ್ಯಾಕ್ ಭೆಟ್ ದಿತಾತ್? ಹೆಂ ದೊಡೆಂ ಧೋರಣ್ ನ್ಹಯ್ಗೀ ಮೊಗಾಳ್ ಬಿಸ್ಪಾನೊಂ?

ಗರ್ಜೆಕ್ ವಾ ಮರ್ಜೆಕ್, ಸರ್ಕಾರಾಕ್‍ಚ್ ತುಮಿ ವಿರೋಧ್ ವೆತಾತ್, ಖಂಡನ್ ಕರ್ತಾತ್, ಪ್ರತಿಭಟನ್ ಕರ್ತಾತ್ (ಸೋಮಶೇಖರ್ ವರ್ದಿ ತಿರಸ್ಕಾರ್ ಕರುನ್ ಕೊಡ್ಯಾಳಾಂತ್ ನೆಹರೂ ಮೈದಾನಾರ್ ರ್‍ಯಾಲಿಚ್ ಕೆಲ್ಲಿ). ಸರ್ಕಾರಾ ವಿರೋಧ್ ಝುಜೊಂಕ್‍ಯೀ ತಯಾರ್. ಪುಣ್ ಮುಗ್ಧ್ ಲೊಕಾಕ್ ಮಾತ್ರ್ ಸತಾಯ್ತಾತ್. ಹಿಚ್‍ಗೀ ಜೆಜು ಕ್ರಿಸ್ತಾಚಿ ನೀತ್?

ಚಡ್ತಿಕ್ ಸಾಂಗ್ಚೆಂ ಕಿತೆಂಯೀ ನಾ. ಸಕ್ಕಡ್ ಚರ್ಚಿತ್ ಜಾಲಾಂ. ಸಂವಿಧಾನಾನ್ ದಿಲ್ಲೆಂ ಹಕ್ಕ್ ಎದೊಳ್ ತುಮಿ ಆನಿ ಹೆರಾಂನಿ ಮಸ್ತಿಲಾಂ. ಪಾಟ್ಲ್ಯಾ ದಿಸಾಂನಿ ಕೊಡ್ತಿಂನಿಯೀ ಕೊಂಕ್ಣಿ ಮಿಸಾಂ ಆಪ್ಣಾಂವ್ಚೆಂ ಲೊಕಾಚೆಂ ಮುಳಾವೆಂ ಹಕ್ಕ್ ಉಕಲ್ನ್ ಧರ್ಲಾಂ. ಆತಾಂ ಪುಣೀ ತುಮ್ಚೆಂ ಹಟ್ ಸೊಡಾ ಆನಿ ಕೊಂಕ್ಣಿ ಮಿಸಾಂ ವಿಚಾರ್ತೆಲ್ಯಾಂಕ್ ತಿಂ ಮೆಳಶೆಂ ಕರಾ. ತುಮಿಂಚ್ ಘಾಲ್ಲ್ಯೊ ಅಡ್ಕಳಿ, ನಿರ್ಬಂಧ್ ನಿವ್ರಾಯಾ.

News 1: Catholic Bishops of Karnataka Meet Chief Minister Siddaramaiah

News 2: Karnataka Bishops Meet CM Bommai over Anti Conversion Law

ತುಮ್ಚ್ಯಾ ಉತ್ರಾಂ ಆನಿ ಕರ್ನ್ಯಾಂನಿ, ತುಮಿ ಸರ್ವ್ ಫಕತ್ ಪ್ರಜಾಪ್ರಭುತ್ವಾಚೆ, ಕಥೊಲಿಕ್ ಪರ್ಜೆಚೆ ‘ದುಸ್ಮಾನ್’ ಮಾತ್ರ್ ನ್ಹಯ್, ಬಗಾರ್ ಭಾರತಾಚ್ಯಾ ಸಂವಿಧಾನಾಚೆ, ಕಾನೂನಾಚೆ ಆನಿ ಕಥೊಲಿಕ್ ಪವಿತ್ರ್ ಸಭೆಚೆ, ತ್ಯಾ ಮುಖಾಂತ್ರ್ ಪಾಪ್‍ಸಾಯ್ಬಾಚೆಯೀ ವಿರೋಧಿ ಮ್ಹಣ್ ತುಮಿ ಗದ್ದಾಳಾಯೆನ್ ಸಾಬೀತ್ ಕರುನ್ ಆಸಾತ್, ನ್ಹಯ್ಗೀ?

“ಕರ್ನಾಟಕಾಂತ್ ಕನ್ನಡ ಭಾಸ್‍ಚ್ ಅಧಿಕೃತ್, ತುಮ್ಕಾಂ ಎದೊಳ್ ಥೊಡಿಂ ಮಿಸಾಂ ಕೊಂಕ್ಣೆಂತ್ ದಿಲ್ಲೆಂಚ್ ವ್ಹಡ್… ಕೊಡ್ಯಾಳಾಂತ್ ಕನ್ನಡ ಮಿಸಾಂ ದಿತಾತ್‍ಗೀ..?” ಮ್ಹಣ್ ತುಮಿ ಸಾಂಗ್ತಾತ್ ಖಂಯ್! ತರ್ ತುಮಿ ಬೆಂಗ್ಳುರ್, ಮೈಸೂರಾಂತ್ ತಮಿಳ್ ಭಾಶೆಂತ್ ಕಿತ್ಯಾಕ್ ಮಿಸಾಂ ದಿತಾತ್? ಪೂನ್‍ಶೆತಾಂನಿ ಮಲಯಾಳಿ ಆನಿ ಹೆರ್ ಭಾಶೆಂನಿ ಮಿಸಾಂ ದೀನಾಂತ್‍ಗೀ?

ವಾತಿಕಾನ್ ದುಸ್ರ್ಯಾ ಮಹಾಸಭೆನ್‍ಂಚ್ ಮಾಂಯ್/ಸ್ಥಳೀಯ್ ಭಾಶೆನ್ ಲಿತುರ್ಜೆಕ್ ಅವ್ಕಾಸ್ ದಿಲಾ ಆಸ್ತಾಂ, ಹೊ ತುಮ್ಚೊ ಬಾಲಿಶ್ ವಾದ್ ಕಿತ್ಯಾಕ್? ಕರ್ನಾಟಕಾಂತ್ ಹೆರ್ ಭಾಶೆಂನಿ ಮಿಸಾಂಚ್ ನಾಂತ್‍ಗೀ? ಇಂಗ್ಲಿಶಾಂತ್ ಮಿಸಾಂಚೊ ಸಂಖೊ ಚಡೊನ್ ಆಸಾ. ತರ್ ಕಿತ್ಯಾಕ್ ಫಿಂರ್ಗಿ ಭಾಶೆನ್ ಮಿಸಾಂ, ಬಿಸ್ಪಾನೊಂ? ಹೆಂ ಕಿತೆಂ ಇಂಗ್ಲೆಂಡ್‍ಗೀ? ವಾತಿಕಾನಾಚ್ಯಾ ರೂಲಿಂಗಾಕ್‍ಚ್ ನೆಗಾರಿನಾಕಾತ್, ಗೊವ್ಳಿ ಬಾಪಾನೊಂ.

ಚೂಕ್ ತಿದ್ವುನ್ ನವಿ ವಾಟ್ ಉಗ್ತಿ ಕರಾ

ಎದೊಳ್ಚೆಂ ಜಾಲೆಂ, ಮೊಗಾಳ್ ಗೊವ್ಳಿ ಬಾಪಾನೊಂ, ಹ್ಯಾ ಫುಡೆಂ ಪುಣೀ ಆದ್ಲ್ಯೊ ಚುಕಿ ಸಾರ್ಕೆಂ ಕರಾ. ಹಟ್ ಆನಿ ಕರ್ಮಿಪಣ್ ನಾಕಾ. ಆಮಿ ನಾಗರಿಕ್ ಸಂಸಾರಾಂತ್, ತಿಸ್ರ್ಯಾ ಮಿಲ್ಲೇನಿಯಮಾಂತ್ ಆಸಾಂವ್ ಮ್ಹಳ್ಳೆಂ ಉಡಾಸ್ ಕರಾ. ಚಡ್ತಿಕ್ ಘಳಾಯ್ ಕರಿನಾಸ್ತಾನಾ, ಕೊಂಕ್ಣಿ ಮಿಸಾಂ ವಿಚಾರ್ಚ್ಯಾ ಬೆಂಗ್ಳುರ್ ಆರ್ಚ್ ದಿಯೆಸೆಜ್ ಆನಿ ಕರ್ನಾಟಕಾಚ್ಯಾ ಹೆರ್ ದಿಯೆಸೆಜಿಂಚ್ಯಾ ಫಿರ್ಗಜಾಂನಿ ಕೊಂಕ್ಣಿ ಮಿಸಾಂ ದೀಂವ್ಕ್ ಸೂಕ್ತ್ ಕ್ರಮಾಂ ಘೆಯಾ. ತಶೆಂ ತುಮಿ ಕೆಲ್ಲ್ಯಾ ವೆಳಾರ್, ಸಕ್ಡಾಂ ಪ್ರಾಸ್ ಪಯ್ಲೆಂ ಹಾಂವ್ ತುಮ್ಕಾಂ, ಆಖ್ಖ್ಯಾ ಕೊಂಕ್ಣಿ ಕಥೊಲಿಕ್ ಪರ್ಜೆ ತರ್ಫೆನ್ ಉಲ್ಲಾಸಿತಾಂ ಆನಿ ಧಿನ್ವಾಸ್ತಾಂ. ತಶೆಂ ಜಾಂವ್ಕ್ ತುಮಿ ಫುಡೆಂ ಸರ್ತಾತ್ ಮ್ಹಣ್ ಭರ್ವಸ್ತಾಂ.

ಸರ್ವಾಂಚೆಂ ಬರೆಂ ಜಾಂವ್. ದೇವ್ ಬರೆಂ ಕರುಂ, ತುಮ್ಕಾಂ ಆನಿ ಆಮ್ಕಾಂ, ಸರ್ವ್ ಸಮೇಸ್ತಾಂಕ್.

ಜೈ ಕ್ರಿಸ್ತಾಕ್
ಜೈ ಕೊಂಕ್ಣಿ ಮಾಯೆಕ್

ಡೊನಾಲ್ಡ್ ಪಿರೇರಾ
ಸಂಪಾದಕ್, ಬುಡ್ಕುಲೊ ಮೀಡಿಯಾ
www.Budkulo.com

Read our Previous Writings 👇

ಶಿವಮೊಗ್ಗ ಬಿಸ್ಪಾಕ್ ಉಗ್ತೆಂ ಪತ್ರ್

Kindly Allow Us to Pray in Konkani

ಸರ್ವ್ ಕೊಂಕ್ಣಿ ಲೊಕಾಕ್ ಉಲೊ: ಸಕ್ಕಡ್ ಸಾಂಗಾತಾ…

ಕಥೋಲಿಕ ಕ್ರೈಸ್ತ ಕನ್ನಡ ಸಂಘಕ್ಕೆ ಬಹಿರಂಗ ಪತ್ರ

ಮೀಸ್ ಅಭಿಯಾನ್ – ಕೊಂಕ್ಣೆಕ್ ಲಾಭ್ಲಿ ಜೀಕ್

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

The post ಬೆಂಗ್ಳುರ್ ಆರ್ಚ್ ಬಿಸ್ಪಾಕ್ ಉಗ್ತೊ ಉಲೊ: ಕೊಂಕ್ಣಿ ಮಿಸಾಂಚೆರ್ ಆಸ್ಚೊ ನಿರ್ಬಂಧ್ ಕಾಡಾ, ಪ್ಲೀಸ್ appeared first on Budkulo.

ಗಜಾಲ್ ಸ್ಪಷ್ಟ್ ಆನಿ ಎಕ್‍ಚ್ – ಕೊಂಕ್ಣಿ ಲೊಕಾಕ್ ಕೊಂಕ್ಣಿ ಮಿಸಾಂ ಜಾಯ್. ತಿತ್ಲೆಂಚ್. ಅಶೆಂ ಹಾಂವೆಂ ಪತ್ರ್ ಬರಂವ್ಕ್ ತುಮ್ಚೆಂ ನಕಾರಾತ್ಮಕ್ ಧೋರಣ್‍ಂಚ್ ಕಾರಣ್; ತುಮ್ಚಿ ಚುಕಿಚಿ ನೀತ್‍ಚ್ ಪ್ರೇರಣ್! ಸ್ವತಃ ಏಕ್ ಕೊಂಕ್ಣಿ ಸುಪುತ್ರ್ ಜಾವ್ನಾಸ್‍ಲ್ಲ್ಯಾ ತುಮಿ, ಆನಿ ತುಮ್ಚೆ ಸವೆಂ ಹೆರ್ ಪುರ್ವಿತಾಂನಿ, ಕೊಂಕ್ಣಿ ಭಾಸ್ ನೆಗಾರುಂಕ್ ಹಟ್ ಧರ್ಚೆಂ ಪಳೆತಾನಾ ರಾಗ್ ನ್ಹಯ್, ಬಗಾರ್ ಆಕ್ರೋಶ್ ಉದೆತಾ. ಆಪ್ಲ್ಯಾಚ್ ಪರ್ಜೆಕ್ ಅಶೆಂ ನಿಷ್ಠುರಾಯೆನ್ ಆನಿ ಅಮಾನವೀಯ್ ರಿತಿನ್ ಟ್ರೀಟ್ ಕರ್ಚೆಂ ಧಾರ್ಮಿಕ್ ಮುಖೆಲ್ಯಾಂಕ್ ಬಿಲ್ಕುಲ್ ಸೊಭನಾ.

ಉತ್ರಾಂ ಕಠಿಣ್ ಮ್ಹಣ್ ಭೊಗ್ಲೆಂ!? ಸಾಯ್ಬಾನೊಂ, ಆಮ್ಚಿಂ ಉತ್ರಾಂ ನ್ಹಯ್, ಬಗಾರ್ ತುಮ್ಚ್ಯೊ ನಿರಂತರ್ ಕರ್ನ್ಯೊಂಚ್ ತಿತ್ಲ್ಯೊ ಕಠಿಣ್, ಕ್ರೂರ್ ಆನಿ ಅನೀತಿಚ್ಯೊ ಆಸಾತ್. ಎಕಡ್ಚ್ಯಾನ್ ತುಮಿ ತುಮ್ಚ್ಯಾಚ್ ಲೊಕಾಕ್ ಅಕ್ಮಾನ್ ಕರ್ತಾತ್, ನೆಗಾರ್ತಾತ್ ಮಾತ್ರ್ ನ್ಹಯ್ ತೆವ್ಶಿಲ್ಯಾನ್ ಭಾರತಾಚ್ಯಾ, ಆಮ್ಚ್ಯಾ ರಾಷ್ಟ್ರಾಚ್ಯಾ ಸಂವಿಧಾನಾಕ್‍ಯೀ ಇನ್ಕಾರ್ ಕರ್ತಾತ್. ಪಾವನಾತ್‍ಲ್ಲ್ಯಾಕ್ ಆಮ್ಚ್ಯಾ ಸಮಡ್ತಿಚೊ ಅಂತಿಮ್ ಸ್ಥಾನ್ ಜಾವ್ನಾಸ್ಚ್ಯಾ ಪಾಪ್‍ಸಾಯ್ಬಾಕ್, ಮ್ಹಣ್ಜೆ ವಾತಿಕಾನಾಕ್‍ಯೀ ತುಮಿ ನೆಗಾರ್ತಾತ್. ಇತ್ಲೆಂ ಸರ್ವ್ ಪಳೆತಾನಾ ಆಮಿಯೀ ಇಲ್ಲೆಶೆಂ ಎಗ್ರೆಸಿವ್ ಜಾಯ್ಜೆ ಪಡ್ಲೆಂ. ಬೆಜಾರ್ ಕರಿನಾಕಾತ್.

ಸಾಯ್ಬಾನೊಂ, ವಾತಿಕಾನ್ ದುಸ್ರ್ಯಾ ಮಹಾಸಭೆನ್, 1965ವ್ಯಾ ವರ್ಸಾ, ಮ್ಹಣ್ಜೆ 60 ವರ್ಸಾಂ ಆದಿಂಚ್ ಸಂಸಾರಾಂತ್ಲ್ಯಾ ಸರ್ವ್ ಕಥೊಲಿಕಾಂಕ್ ಆಪಾಪ್ಲ್ಯಾ ಮಾಂಯ್‍ಭಾಶೆಂತ್‍ಚ್ ಲಿತುರ್ಜಿ/ಮಾಗ್ಣಿಂ/ಮಿಸಾಂ ಕರುಂಕ್ ಅವ್ಕಾಸ್ ಕರ್ನ್ ದಿಲಾ. ತರೀ ಇತ್ಲ್ಯಾ ವರ್ಸಾಂ ಉಪ್ರಾಂತ್‍ಯೀ, ಲೊಕಾನ್ ತ್ಯಾ ಖಾತಿರ್ ಕಿತ್ಲೆಂ ಮಾಗ್ಣೆಂ ಕೆಲ್ಯಾರೀ, ತುಮಿ ಥೊಡೆ ಬಿಸ್ಪ್ ತಾಂಚೆಂ ಹಕ್ಕ್ ಮಸ್ತಿತಾತ್ ಆನಿ ತ್ಯಾ ಖಾತಿರ್ ಸರ್ವ್ ‘ಶಿಂತ್ರ್ಯೊ’ ಆಧಾರ್ತಾತ್ ಮ್ಹಳ್ಯಾರ್ ತುಮ್ಚೊ ಖರೊ ಇರಾದೊ ಕಿತೆಂ ಮ್ಹಣ್ ಕಳವ್ಯೆತ್‍ಗೀ?

ಮ್ಹಾಕಾ ಮೆಳ್‍ಲ್ಲ್ಯಾ ದಾಖ್ಲ್ಯಾಂ ಪರ್ಮಾಣೆಂ ತುಮ್ಚ್ಯಾ ದಿಯೆಸೆಜಿಚ್ಯಾ 22 ಫಿರ್ಗಜಾಂ ಪಯ್ಕಿ 16 ಫಿರ್ಗಜಾಂನಿ ಕೊಂಕ್ಣಿ ಕ್ರಿಸ್ತಾಂವಾಂಚೊ ಸಂಖೊ ಭರ್ಪೂರ್ ಆಸಾ. ದೋನ್ ಫಿರ್ಗಜಾಂನಿ ಲಗ್ಬಗ್ 40-50% ಫಿರ್ಗಜ್‍ಗಾರ್ ಕೊಂಕ್ಣಿ ತರ್, ದೋನ್ ಫಿರ್ಗಜಾಂನಿ ಲಗ್ಬಗ್ 60% ಆನಿ ಉರ್‌ಲ್ಲ್ಯಾ 12 ಫಿರ್ಗಜಾಂನಿ 90 ಥಾವ್ನ್ 99% ಭಾವಾಡ್ತಿ ಕೊಂಕ್ಣಿ ಕಥೊಲಿಕ್ ಜಾವ್ನಾಸಾತ್!

ಆನಿ ತುಮ್ಚ್ಯಾ ದಿಯೆಸೆಜಿಚ್ಯಾ ಪಾದ್ರಿಂ ಪಯ್ಕಿಯೀ ಬಹುತೇಕ್ ಜಣ್ ಕೊಂಕ್ಣಿ ಮನಿಸ್‍ಚ್!!

ತರೀ ತುಮ್ಕಾಂ ಕೊಂಕ್ಣೆಂತ್ ಮೀಸ್, ಲೋಕ್ ಡಿಮಾಂಡ್ ಕರ್ನ್ ಆಸಾ ತರೀ, ದೀಂವ್ಕ್ ನಾಕಾ ವಾ ಪುಟ್ವನಾ ಮ್ಹಳ್ಯಾರ್ ತುಮ್ಚೊ ಇರಾದೊ ಕಿತೆಂ, ಮ್ಹಣ್ಜೆ ತುಮ್ಕಾಂ ‘ಜಾಯ್ ಕಿತೆಂ’ ತೆಂ ಸಾಂಗ್ಯೆತ್‍ಗೀ ಬಿಸ್ಪ್ ಸಾಯ್ಬಾನೊಂ?

ಉಲಂವ್ಕ್ ಅವ್ಕಾಸ್ ದೀನಾಂತ್ ಕಿತ್ಯಾಕ್?!?

ಮೊಗಾಳ್ ಬಿಸ್ಪಾನೊಂ, ಶಿವಮೊಗ್ಗ ದಿಯೆಸೆಜಿಚ್ಯಾ ಥೊಡ್ಯಾ ಕೊಂಕ್ಣಿ ಕಥೊಲಿಕ್ ಸಂಘಟನಾಂ ಆನಿ ಮುಖೆಲ್ಯಾಂನಿ ಆಮ್ಕಾಂ ಬರ್ಪಿನಿಶಿಂ ಕಳಯಿಲ್ಲೆ ಪ್ರಕಾರ್, ಕೊಂಕ್ಣಿ ಮಿಸಾಂ ವಿಶಿಂ ಕಸಲಿಚ್ ಚರ್ಚಾ ಕರುಂಕ್ ವಾ ಪ್ರಸ್ತಾಪ್ ಕಾಡುಂಕ್ ಸಯ್ತ್ ತುಮಿ ಅವ್ಕಾಸ್ ದೀನಾಂತ್. ತಿ ಗಜಾಲ್ ಮ್ಹಾಕಾ ಹೆರ್ ಮುಖೆಲ್ಯಾಂ ಥಾವ್ನ್‌ಯೀ ಕಳಿತ್ ಜಾಲ್ಯಾ.

ಅಶೆಂ ಕಿತ್ಯಾಕ್ ಗೊವ್ಳಿ ಬಾಪಾನೊಂ? ತುಮಿ ಕಿತೆಂ ಸರ್ವಾಧಿಕಾರಿಗೀ? ಸಕ್ಕಡ್ ತುಮ್ಚ್ಯಾ ಖುಶೆ ಪರ್ಮಾಣೆಂ ಚಲಂವ್ಕ್ ಹಿ ಕಿತೆಂ ತುಮ್ಚಿ ಖಾಸ್ಗಿ ‘ಪ್ರಾಪರ್ಟಿ’ ಮ್ಹಣ್ ತುಮಿ ಚಿಂತಾತ್‍ಗೀ ಕಿತೆಂ?? ತುಮ್ಕಾಂ ವಾತಿಕಾನಾ ಥಾವ್ನ್ ‘ತುಮಿ ಖುಷಿ ಆಯಿಲ್ಲೆ ಪರ್ಮಾಣೆಂ ಚಲ್ಯೆತ್, ತುಮ್ಕಾಂ ಜಾಯ್ ತಶೆಂ ಕರ್ಯೆತ್’ ಮ್ಹಣ್ ಪ್ರತ್ಯೇಕ್ ಫರ್ಮಾಣ್ ಕಾಂಯ್ ಧಾಡ್ಲಾಂಗೀ?

ಕೊಂಕ್ಣೆಚಿ ಹತ್ಯಾ ಕರ್ಚೊ ಹುನ್ನಾರ್?!?

ಫಿರ್ಗಜಾಂಚೊ ಲೋಕ್ ಆಪ್ಣಾಕ್ ಕೊಂಕ್ಣಿ ಭಾಷೆ ಥಾವ್ನ್ ತುಮಿ ಜಾಯ್ತ್ಯಾ ಪುರ್ವಿತಾಂನಿ (ಆದಿಂ ಥಾವ್ನ್ ಆತಾಂ ಪರ್ಯಾಂತ್‍ಯೀ) ವಂಚಿತ್ ಕೆಲ್ಲೆಂ ತಾಂಕಾಂ ಸಮ್ಜೊಂಕ್ ವರ್ಸಾಂಚ್ ಲಾಗ್ಲಿಂ. ತಾಣಿಂ ಫಕತ್ ಧಾರ್ಮಿಕ್ ಭೊಗ್ಣಾಂಕ್ ಚಡ್ ಮಾನ್ ದೀವ್ನ್ ಆಪ್ಲ್ಯಾ ಮಾಂಯ್‍ಭಾಸ್ ಆನಿ ಸಂಸ್ಕೃತೆ ಥಾವ್ನ್ ಪಯ್ಸ್ ಉರಶೆಂ ತುಮಿ ಕೆಲೆಂ. ಹೆರ್ ಕಡೆನ್‍ಯೀ ಹಿಚ್ ಗಜಾಲ್. ತಡವ್ ಜಾಲ್ಯಾರೀ ತೆಣೆಂಚ್ಯಾ ಸಬಾರಾಂಕ್ ತುಮ್ಚೆ ತಸಲ್ಯಾಂನಿ ಆಧಾರ್ಲೆಲ್ಯಾ ಘೋರ್ ಚುಕಿಂಚೊ ವಾಯ್ಟ್ ಪರಿಣಾಮ್ ಆನಿ ಉಬ್ಜಲ್ಲಿ ಗಂಭೀರ್ ಪರಿಸ್ಥಿತಿ ಸಮ್ಜಲ್ಲ್ಯಾನ್ ತೆ ಜಾಗೃತ್ ಜಾಲೆ, ಎಕ್ವಟ್ಲೆ ಆನಿ ಕೊಂಕ್ಣೆಂತ್ ಮಿಸಾಂ ಜಾಯ್ ಮ್ಹಣ್ ಮಾಗೊನ್ ಆಸಾತ್. ಮಾಗ್ಣ್ಯಾಕ್ ತುಮಿ ಕುಸ್ಕುಟಾಚೆಂ ಮೋಲ್ ದೀನಾತ್ಲೆಲ್ಯಾನ್ ತೆ ಝುಜೊಂಕ್ ಲಾಗ್ಲ್ಯಾತ್.

ಹೆಂ ಸರ್ವ್ ಜಾಣಾಂ ಆಸೊನ್‍ಯೀ, ತುಮ್ಚೆ ತಸಲ್ಯಾಂಕ್ ಕಿತ್ಯಾಕ್ ತಿತ್ಲೆಂಯೀ ಹಟ್ ಮ್ಹಣ್ ಆಮ್ಕಾಂ ಕಳನಾ. ಕಿತೆಂ ಜಾಲಾಂ ತುಮ್ಕಾಂ ಸಕ್ಡಾಂಕ್? ತುಮಿ ಧರ್ಮ್ ಚಲಯ್ತಾತ್‍ಗೀ ವಾ ಅನಾಚಾರ್ ಆಧಾರ್ತಾತ್? ದಯಾ ಕರ್ನ್ ಸ್ಪಷ್ಟ್ ಕರಾ. ತುಮ್ಚ್ಯಾ ಅಂತಸ್ಕರ್ನಾಕ್ ಜಾಗಯಾ.

ಶಿವಮೊಗ್ಗ ಜಿಲ್ಲ್ಯಾಂತ್ಲ್ಯಾ 16 ಫಿರ್ಗಜಾಂನಿ ಕೊಂಕ್ಣಿ ಕಥೊಲಿಕ್‍ಚ್ ತಿತ್ಲ್ಯಾ ಮಜ್ಭೂತ್ ಸಂಖ್ಯಾನ್ ಆಸ್ಲ್ಯಾರೀ, ತಾಣಿಂ ಮಾಗ್ಲ್ಯಾರೀ, ಆಂದೋಲನ್ ಕೆಲ್ಯಾರೀ ತುಮಿ ಕಾನ್ ಹಾಲಯ್ನಾಂತ್, ಬಗಾರ್ ತಾಂಕಾಂ ತಿರಸ್ಕಾರ್ ಕರ್ನ್, ಕೊಂಕ್ಣೆಕ್ ನೆಗಾರ್ನ್ ಚಲ್ತಾತ್. ತಿತ್ಲೆಂಚ್ ನ್ಹಯ್, ವ್ಯವಸ್ಥಿತ್ ರಿತಿನ್ ಕೊಂಕ್ಣಿ ಭಾಸ್-ಸಂಸ್ಕೃತಿ-ಲೊಕಾಕ್ ಮಸ್ತುಂಕ್ ತುಮಿ ಷಡ್ಯಂತ್ರ್ ರಚುನ್ ಆಸಾತ್!? ತೆಂ ತಶೆಂ ನ್ಹಯ್ ತರ್, ಕಿತೆಂ ತುಮ್ಚಿ ಅಪೇಕ್ಷಾ ಮ್ಹಣ್ ತರೀ ಕಳಯಾ, ಪ್ಲೀಸ್.

ಸರ್ಕ್ಯುಲರ್ ವಾ ಮರಣ್ ಶಾಸನ್?

2022 ಫೆಬ್ರವರಿ 22 ತಾರಿಕೆಚ್ಯಾ ತುಮ್ಚ್ಯಾ ಸರ್ಕ್ಯುಲರಾಚೆರ್ ತುಮಿ ಸಾಂಗ್‍ಲ್ಲೆಂ ವಾಚ್ತಾನಾ ನಿಜಾಯ್ಕೀ, ‘ಕೊಂಕ್ಣಿ ಮಿಸಾಂಕ್ ಬಿಲ್ಕುಲ್ ಅವ್ಕಾಸ್ ದೀನಾಂವ್’ ಮ್ಹಳ್ಳೆಂ ತುಮ್ಚೆಂ ಹಟ್ ಉಟೊನ್ ದಿಸ್ತಾ. ಇಂಗ್ಲಿಷ್ ಆನಿ ಕನ್ನಡ ಭಾಶೆಂತ್ಲ್ಯಾ ತ್ಯಾ ತುಮ್ಚ್ಯಾ, ಲಿತುರ್ಜಿಚ್ಯಾ ಭಾಶೆಚ್ಯಾ ಸಂಗ್ತಿಂಚೆರ್ ದಿಲ್ಲಿಂ ‘ಫರ್ಮಾಣಾಂ’ ಫಕತ್ ನಕಾರಾತ್ಮಕ್/ಶಿಂತ್ರ್ಯಾಳಿಂ ಮ್ಹಳ್ಳೆಂ ಲ್ಹಾನ್ ಭುರ್ಗಿಂಯೀ ಸಮ್ಜತಿತ್. (ಏಕ್ ಕಡೆನ್ ಕನ್ನಡ ಅನುವಾದ್ ಚೂಕ್ ಜಾಲಾ. ತೆಂ ಉದ್ದೇಶ್‍ಪೂರ್ವಕಿಂ ವಾ ಚುಕೊನ್, ತುಮಿಂಚ್ ಸಾಂಗಜೆ).

ದೋನ್ ಪಾನಾಂಚ್ಯಾ ಪರಿಪತ್ರಾಂತ್ ಎಕ್‍ಚ್ ಏಕ್ ಕಡೆನ್ ‘Konkani/ಕೊಂಕಣಿ’ ಮ್ಹಣ್ ಉಲ್ಲೇಖ್ ಕರುಂಕ್ ನಾ ತೆಂ ಪಳೆತಾನಾ, ಕೊಂಕ್ಣಿ ಭಾಸ್ ಆನಿ ಮನ್ಶ್ಯಾಂಚೆರ್ ತುಮ್ಕಾಂ ಆಸ್ಚೊ ತಿರಸ್ಕಾರ್, ವಾ ಹಗೆಂ, ನ್ಹಯ್ ತರ್ ಭಿರಾಂತ್, ಕೊಣಾಯ್ಕೀ ಸಮ್ಜತಾ! ಪಯ್ಲ್ಯಾನ್ ಪಯ್ಲೆಂ ಹೆಂ ತುಮ್ಚೆಂ ಪರಿಪತ್ರ್ ಉದೆಲ್ಲೆಂಚ್ ಕೊಂಕ್ಣಿ ಲೊಕಾನ್ ಕೊಂಕ್ಣೆಂತ್ ಮಿಸಾಂ ಜಾಯ್ ಮ್ಹಣ್ ಆಂದೋಲನ್ ಸುರು ಕರ್ನ್, ತೆಂ ಬಳ್ ಜಾಲ್ಯಾ ಉಪ್ರಾಂತ್. ಹೆರ್ ಖಂಚ್ಯಾಯೀ ಭಾಶೆಚ್ಯಾ ಲೊಕಾನ್ ಅಸಲೊ ಡಿಮಾಂಡ್ ದವರುಂಕ್ ನಾ. ‘ಕೊಂಕ್ಣಿ ಮಿಸಾಂ ಜಾಯ್’ ಮ್ಹಣ್ ಲೋಕ್ ಹಟ್ ಧರ್ತಾ ತರ್, ತುಮಿ ಪುರ್ವಿತ್ ‘ಖಂಚ್ಯಾಯ್ ಕಾರಣಾಕ್ ಕೊಂಕ್ಣಿ ಮಿಸಾಂಕ್ ಪ್ರೋತ್ಸಾಹ್ ಆನಿ ಅವ್ಕಾಸ್ ದೀಂವ್ಕ್ ತಯಾರ್ ನಾಂತ್’ ಮ್ಹಳ್ಳೆಂ ಹ್ಯಾ ಪರಿಪತ್ರಾಂತ್ ಸಾಬೀತ್ ಜಾಲಾಂ.

ತುಮ್ಚ್ಯಾ ಕಾಥೆದ್ರಲಾಂತ್, ಶಿವಮೊಗ್ಗಾಚ್ಯಾ, ಕೊಂಕ್ಣಿ ಆನಿ ತಮಿಳ್ ಫಿರ್ಗಜ್‍ಗಾರ್ ಸಮಾಸಮ್ ಸಂಖ್ಯಾನ್, ವ್ಹಡ್ ಮಾಪಾನ್ ಆಸಾತ್, ಕನ್ನಡ ಲೋಕ್ ಭೋವ್ ಉಣೊ. ಆಮ್ಕಾಂ ಮೆಳ್‍ಲ್ಲ್ಯಾ ಮಾಹೆತಿ ಪರ್ಮಾಣೆಂ, ಕಾಥೆದ್ರಾಲಾಂತ್ ಕೊಂಕ್ಣಿ ಮಾಗ್ಣಿಂ ವಾ ಕಂತಾರಾಂ ಮ್ಹಣೊಂಕ್ ಬಿಲ್ಕುಲ್ ಆಡ್ವಾರ್ಲಾಂ. ಪುಣ್ ತಮಿಳ್ ಲೋಕ್ ತಮಿಳಾಂತ್ ಕಂತಾರಾಂ ಮ್ಹಣ್ತಾ! ತಾಂಕಾಂ ತೊ ಅವ್ಕಾಸ್ ಆಸಾ, ಪುಣ್ ಕೊಂಕ್ಣಿ ಭಾವಾಡ್ತ್ಯಾಂಕ್ ನಾ!! ಹೆಂ ಕಸಲೆಂ ಧೋರಣ್? ಕಿತ್ಯಾಕ್ ತಶೆಂ? ಕೊಂಕ್ಣೆ ಥಂಯ್ ತಿತ್ಲೆಂಯೀ ಹಗೆಂ ಖಂಚ್ಯಾ ಕಾರಣಾನ್ ಬಿಸ್ಪಾನೊಂ? ಆನ್ಯೇಕ್ ಫಿರ್ಗಜೆಂತ್ ತಮ್ಳಾಂಚೆಚ್ ಚಡುಣೆಂ ಪೂರ್ಣ್ ಮಾಪಾನ್ ಆಸಾತ್. ತರೀ ತಮಿಳ್ ಲೊಕಾನ್ ಆಪ್ಣಾಕ್ ತಮಿಳ್ ಭಾಷೆಂತ್‍ಚ್ ಮೀಸ್ ಜಾಯ್ ಮ್ಹಣ್ ಆಂದೋಲನ್ ಕೆಲ್ಲೆಂ ನಾ.

ಆಂದೋಲನ್ ಕೆಲ್ಲೆಂ ಫಕತ್ ಕೊಂಕ್ಣಿ ಕ್ರಿಸ್ತಾಂವಾಂನಿ.

ತರ್, ಕಿತ್ಯಾಕ್ ಹೆಂ ಸರ್ಕ್ಯುಲರ್? ತುಮ್ಚೊ ಕರಾಳ್ ಉದ್ದೇಶ್ ತುಮ್ಚ್ಯಾ ಉತ್ರಾಂನಿ ಆನಿ ಕರ್ನ್ಯಾಂನಿ ಪುರ್ತೊ ಉಜ್ವಾಡಾಕ್ ಆಯ್ಲಾ, ಬಿಸ್ಪಾನೊಂ. ಕಿತ್ಯಾಕ್ ಅಸಲಿ (‘ಕ್ರಿಮಿನಲ್’ ಕಾಲೆತಿಚಿ) ಆಲೋಚನ್?!!

ಖುದ್ ಏಕ್ ಕೊಂಕ್ಣಿ ಮಾಂಯ್‍ಭಾಶೆಚೊ ವ್ಯಕ್ತಿ ಜಾವ್ನ್, ಗೊವ್ಳಿ ಬಾಪಾನೊಂ, ತುಮ್ಕಾಂ ಕೊಂಕ್ಣಿ ಮ್ಹಣ್ ಉಚಾರುಂಕ್ ಕಿತ್ಯಾಕ್ ತಿತ್ಲೊಯೀ ಕಾಂಠಾಳೊ? ತೆಂ ಜಾಲೆಂ, ಲೊಕಾಕ್ ಧಾರಾಳ್ ವಾ ಉದಾರ್ ಮನಾನ್ ತುಮಿ ಥೊಡಿಂ ‘ಹಕ್ಕಾಂ’ ಪ್ರಾಪ್ತ್ ಕೆಲ್ಯಾಂತ್. ತಿಂ ನಿಜಾಯ್ಕೀ ಹಾಸ್ಯಾಸ್ಪದ್. ಕೊಂಪ್ರಾಕ್ ಮ್ಹೊಂವ್ ಸಾರಂವ್ಚೆಂ ಮ್ಹಳ್ಯಾರ್ ಹೆಂಚ್.

ಮ್ಹಯ್ನ್ಯಾಕ್ ಏಕ್ ಆಯ್ತಾರ್, ಹೆರ್ ಕೊಣಾಕ್?

ಮಹಿನ್ಯಾಚ್ಯಾ ಪಯ್ಲ್ಯಾ ಆಯ್ತಾರಾ, ತೆಂಯೀ ನಿಗದಿತ್ ನ್ಹಯ್ ಆಸ್‍ಲ್ಲ್ಯಾ ವೆಳಾರ್, Vernacular – ತಿ ಕೊಂಕ್ಣಿಚ್ ಮ್ಹಣ್ ಧರುಯಾಂ, ಭಾಷೆಂತ್ ಮೀಸ್ ಭೆಟವ್ಯೆತ್ ಮ್ಹಳಾಂ! ಏಕ್ ಪ್ರಮುಖ್ ಲೀಡರ್, ಮ್ಹಜೆ ಲಾಗಿಂ, “ತರ್ ಆಮಿ ಉರ್ಲೆಲ್ಯಾ ಆಯ್ತಾರಾಂನಿ ಕಿತೆಂ ಪಳ್ಳೆಕ್ ವಚಜೆಗೀ?” ಮ್ಹಣ್ ವಿಚಾರ್ತಾ. ತಾಚೆಂ ರಾಜಾಂವ್ ಸಾರ್ಕೆಂಚ್. ಆನಿಕೀ ಕ್ರೂರ್ ವ್ಯಂಗ್ಯ್ ಮ್ಹಳ್ಯಾರ್, ‘ಫಿರ್ಗಜ್ ವಿಗಾರಾನ್ ಮಾತ್ರ್ ನ್ಹಯ್ ಫಿರ್ಗಜೆಚ್ಯಾ ವ್ಯಾಪ್ತಿಂತ್ಲ್ಯಾ ಖಂಚ್ಯಾಯೀ ಯಾಜಕಾನ್ ತೆಂ ಮೀಸ್ ಭೆಟಂವ್ಕ್ ನಜೊ’ ಮ್ಹಣ್ ತುಮಿ ಫರ್ಮಾಯ್ತಾತ್ ಮ್ಹಳ್ಯಾರ್ ತುಮ್ಚಿಂ ಮನಾಂ ಕಿತ್ಲಿಂ ‘ವಿಕೃತ್’ ಮ್ಹಳ್ಳೆಂ ಜಾಹೀರ್ ಕೆಲಾಂ, ತುಮಿಂಚ್. ಕಿತ್ಯಾಕ್ ತಿತ್ಲಿಂಯೀ ವಿಕಾರ್ ಚಿಂತ್ನಾಂ, ಗೊವ್ಳಿ ಬಾಪಾನೊಂ?!

ಆಮಿ ಸರ್ವಾಂ, ಆಮ್ಚೆ ಧಾರ್ಮಿಕ್ ಮ್ಹಣಿಯಾರಿ ಸರ್ವ್ – ದೇವ್‍ಚ್ ಮ್ಹಳ್ಳೆಪರಿಂ ಲ್ಹಾನ್‍ಪಣಾರ್ ಪಾತ್ಯೆತಾಲ್ಯಾಂವ್. ಆಮ್ಚಿಂ ವ್ಹಡಿಲಾಂ ಧಾರ್ಮಿಕಾಂಕ್, ತೆಂಯೀ ಯಾಜಕಾಂಕ್, ದೆವಾಕ್‍ಚ್ ಪಳೆಲ್ಲೆಪರಿಂ ದೆಖ್ತಾಲಿಂ. ಪುಣ್ ಖರೆಪಣಿಂ, ಸಮ್ಜಣಿ ಯೆತಾನಾ, ಧಾರ್ಮಿಕ್ (ಸಕ್ಕಡ್ ನ್ಹಯ್) ಕಿತ್ಲ್ಯಾ ಮಾಪಾನ್ ‘ಭಿರಾಂಕುಳ್’ ಮ್ಹಳ್ಳೆಂ ಆಮ್ಚ್ಯಾಚ್ ದೇಶಾಂತ್ ಮಾತ್ರ್ ನ್ಹಯ್, ಆಮ್ಚ್ಯಾಚ್ ಗಾಂವಾಂನಿಯೀ ಥೊಡ್ಯಾ ಪುರ್ವಿತಾಂನಿ ಕರ್ಚಿಂ ಕಾಮಾಂ (ಕುಕೃತ್ಯಾಂ) ಪಳೆವ್ನ್ ಲೊಕಾಕ್ (ಸಂಸಾರಾಕ್) ಕಳಿತ್ ಜಾಲಾಂ. ಹಕೀಗತ್ ಸಕ್ಡಾಂಕ್ ಸಮ್ಜಲ್ಯಾ.

ಮಹಿನ್ಯಾಕ್ ಎಕಾ ಆಯ್ತಾರಾ, ತೆಂಯ್ ಮೀಸ್ ಭೆಟಂವ್ಕ್ ಯಾಜಕ್ ಆನಿ ಸರ್ವ್ ಮಾಂಡಾವಳ್ ಲೊಕಾನ್‍ಂಚ್ ಕರಿಜೆ ತರ್, ತುಮಿ ಕಿತ್ಯಾಕ್ ಬಿಸ್ಪಾಚ್ಯಾ ಹುದ್ದ್ಯಾರ್ ಬಸೊನ್ ಆಸಾತ್ ಗೊವ್ಳಿ ಬಾಪಾನೊಂ? ಆಪ್ಲ್ಯಾಚ್ ಭಾವಾಡ್ತಿ ಲೊಕಾಕ್ ಹ್ಯಾ ನಮೂನೆರ್ ಧಣ್ಸಿತಾತ್ ಮ್ಹಳ್ಯಾರ್ ತುಮಿ ಏಕ್ ಪುರ್ವಿತ್ ಮ್ಹಣ್ ಆಮಿ ಪಾತ್ಯೆವ್ಯೆತ್‍ಗೀ!! ಭಿಕ್ ಉಡಯಿಲ್ಲೆಪರಿಂ ಏಕ್ ಅವ್ಕಾಸ್ ದೀವ್ನ್, ಆನಿ ತೆಂ ‘ಸಾಧ್ಯ್ ಜಾಂವ್ಕ್ ನಜೊಚ್’ ಮ್ಹಳ್ಳ್ಯಾ ಇರಾದ್ಯಾನ್ ನಮೂನ್ಯಾವಾರ್ ವಿದ್ರೂಪ್ ಕಂಡೀಶನಾಂ (ದಿಗ್ಬಂಧನಾಂ ಮ್ಹಳ್ಯಾರ್ ಸೂಕ್ತ್) ಘಾಲ್ತಾತ್ ಮ್ಹಳ್ಯಾರ್, ತೆಂ ‘ಕ್ರಿಮಿನಲ್ ಮೆಂಟಾಲಿಟಿ’ ನ್ಹಯ್ ತರ್ ದುಸ್ರೆಂ ಕಿತೆಂ ಮ್ಹಣ್ ತುಮಿಂಚ್ ಸಾಂಗಜೆ, ಭೋವ್ ಮೊಗಾಳ್ ಗೊವ್ಳಿ ಬಾಪಾನೊಂ.

ಮ್ಹಾಕಾ ಕಳಿತ್ ಕೆಲ್ಲ್ಯಾ ಪರ್ಮಾಣೆಂ, ತುಮ್ಚ್ಯಾ ದಿಯೆಸೆಜಿ ಭಾಯ್ಲ್ಯಾ, ಮಂಗ್ಳುರ್ ಥಾವ್ನ್ ಬೆಂಗ್ಳುರ್ ಪರ್ಯಾಂತ್ಲ್ಯಾ ಆಮ್ಚ್ಯಾ ಥೊಡ್ಯಾ ಮುಖೆಲ್ಯಾಂನಿ ತುಮ್ಚೆ ಲಾಗಿಂ, ಕೊಂಕ್ಣಿ ಮಿಸಾಂಕ್ ಅವ್ಕಾಸ್ ದಿಂವ್ಚ್ಯಾ ಬಾಬ್ತಿನ್ ತುಮ್ಚೆ ಕಡೆನ್ ಉಲಂವ್ಕ್ ಅವ್ಕಾಸ್ ದೀಜೆ ಮ್ಹಣ್ ಕಿತ್ಲೆಂ ಮಾಗ್ಲ್ಯಾರೀ, ರಂದಿಲ್ಯಾರೀ, ಪರಾತ್ಲ್ಯಾರೀ ತುಮಿ ಬಿಲ್ಕುಲ್ ಅವ್ಕಾಸ್ ‘ದೀನಾಂತ್’ ಖಂಯ್!! ತೆಂ ಕಿತ್ಯಾಕ್ ದಯಾಳ್ ಬಿಸ್ಪಾನೊಂ?

ದಿಯೆಸೆಜಿ ಭಾಯ್ಲೆ ಮ್ಹಣೊನ್ ಅಸ್ಪೃಶ್ಯ್ ಜಾಲೆಗೀ ಆಮ್ಚೆಚ್ ಜಣ್ ತುಮ್ಕಾಂ? ತಶೆಂ ತರ್ ತುಮಿ ಹೆರ್ ದಿಯೆಸೆಜಿಂಕ್ ವಚೊನ್, ಕೊಂಕ್ಣೆಂತ್‍ಚ್ ಮೀಸ್ ಭೆಟವ್ನ್, ದರಬಸ್ತ್ ‘ಕಲೆಕ್ಷನ್’ ಕರ್ನ್ ವೆತಾತ್‍ಮೂ? ತುಮಿಂಚ್ ಕೊಡ್ಯಾಳ್ಚ್ಯಾ ಎಕಾ ಪ್ರಮುಖ್ ಇಗರ್ಜೆಂತ್ ಕೊಂಕ್ಣೆಂತ್‍ಚ್ ಮೀಸ್-ರಜಾರ್ ಕರ್ನ್, ಭಕ್ತಿಪಣಾನ್ ‘ಮಾಗೊನ್’ ವ್ಹಡ್ಲಿ ಏಕ್ ‘ಕಾಣಿಕ್’ ಘೆವ್ನ್ ವಚೊಂಕ್ ನಾಂತ್‍ಗೀ? ಜಾಯ್ತೆ ಕೊಂಕ್ಣಿ ಪಾದ್ರಿ, ತೆ ಕೊಂಕ್ಣೆಂತ್ ಮಿಸಾಂ, ಸೆರ್ಮಾಂವ್, ರೆತಿರ್ ದಿತಾತ್, ತರೀ, ಕಿತ್ಯಾಕ್ ಆಪ್ಲ್ಯಾ ಫಿರ್ಗಜೆಂತ್ ಕೊಂಕ್ಣೆಕ್ ತಶೆಂಯೀ ನೆಗಾರ್ತಾತ್? ಆಮ್ಚೆ ತೆಣೆಂ ಯೇವ್ನ್ ವೆವೆಗ್ಳ್ಯಾ ಫಿರ್ಗಜಾಂನಿ ಸೊಭಿತ್ ರಿತಿನ್ ಕೊಂಕ್ಣೆಂತ್‍ಚ್ ಮಿಸಾಂ ಭೆಟವ್ನ್, ಆಪುರ್ಬಾಯೆನ್ ‘ಮಾಗೊನ್’ ದರಬಸ್ತ್ ‘ಕಾಣಿಕೊ’ ವ್ಹರ್ತಾತ್!

ಆಮ್ಚ್ಯಾ ಲೊಕಾಕ್ ತೆ ಕಿತ್ಲೆ ಬರೆ ‘ಕೊಂಕ್ಣಿ’ ಪಾದ್ರಿ! ಮ್ಹಳ್ಯಾರ್ ಕೊಂಕ್ಣಿ ಭಾಶೆಚೆ ಮೊಗಿ ಮ್ಹಣ್ ಹೆಣೆಂಚ್ಯಾಂಕ್ ಫಟವ್ನ್ ‘ಮಾಗ್ತಾತ್’ ಆನಿ ತೆಣೆಂ ವಚೊನ್ ಮನಃಪೂರ್ವಕಿಂ ಕೊಂಕ್ಣೆಕ್ ಘಾತ್ ಕರ್ತಾತ್??! ‘ಮಾಂಕೊಡ್ ಕರ್ಚೆಂ’ ಮ್ಹಣ್ ಕೊಂಕ್ಣೆಂತ್ ಆಪುರ್ಬಾಯೆಚಿಂ ಉತ್ರಾಂ ಆಸಾತ್, ತಿಂ ಕಿತ್ಯಾಕ್ ಘಡ್ಲ್ಯಾಂತ್ ಮ್ಹಣ್ ಆತಾಂ ಸಮ್ಜತಾ.

ಕಿತ್ಯಾಕ್ ಆಪ್ಲ್ಯಾಚ್ ಮಾಂಯ್‍ಭಾಷೆಚೆರ್ ಇತ್ಲೊಯೀ ದ್ವೇಷ್? ಕಿತ್ಯಾಕ್ ಹೆಂ ಅನುಪ್ಕಾರ್ಪಣ್? ಕಿತ್ಯಾಕ್ ಹಿ ಕೃತಘ್ನತಾ? ಕೋಣ್ ತರೀ ಜಾಪ್ ದಿಶ್ಯಾತ್‍ಗೀ?

ದಿಯೆಸೆಜಿಕ್ ಏಕ್ ರೂಲ್, ತೀರ್ಥಹಳ್ಳಿಕ್ ವೆಗ್ಳಿಚ್?

ಶಿವಮೊಗ್ಗ ದಿಯೆಸೆಜಿಚಿ ಫಿರ್ಗಜ್ ಜಾವ್ನಾಸ್ಚ್ಯಾ ತೀರ್ಥಹಳ್ಳಿಂತ್ ಹರ್ ಆಯ್ತಾರಾ ಸಕಾಳಿಂ ಏಕ್ ಮೀಸ್ ಕೊಂಕ್ಣೆಂತ್‍ಚ್ ಭೆಟಯ್ತಾತ್. ತೆಂ ಪಯ್ಲೆಂ ಥಾವ್ನ್ ಆಸಾ. ವಿಶೇಸ್ ಮ್ಹಳ್ಯಾರ್ ಫಿರ್ಗಜ್ ವಿಗಾರ್‌ಚ್ ಹೆಂ ಕೊಂಕ್ಣಿ ಮೀಸ್ ಭೆಟಯ್ತಾ. ಹೆಂ ಕಶೆಂ ಬಿಸ್ಪಾನೊಂ? ತುಮ್ಚಿಚ್ ರೂಲ್, ರೆಗ್ರ್ಯೊ ಥಂಯ್ ಲಾಗು ಜಾಯ್ನಾಂತ್‍ಗೀ? ಮ್ಹಳ್ಯಾರ್ ತುಮ್ಚಿ ನೀತ್, ಧೋರಣ್ ಕಿತ್ಲೆಂ ತದ್ವಿರುದ್ಧ್ ಮ್ಹಣ್ ತುಮಿಂಚ್ ಉಚಾರ್ನ್ ಸಾಂಗ್‍ಲ್ಲೆಪರಿಂ ಜಾಲೆಂಗೀ ನಾ? ಆನಿ ಆತಾಂ, ಥಂಯ್ಚೆಂ ಕೊಂಕ್ಣಿ ಮೀಸ್ ರದ್ದ್ ಕರುಂಕ್ ಕ್ರಮ್ ಘೆನಾಕಾತ್, ಪ್ಲೀಸ್.

ಸಾಗರ ಇಗರ್ಜೆಂತ್ ಪಯ್ಲೆಂ ಕೊಂಕ್ಣಿ ಮೀಸ್ ಆಸ್‍ಲ್ಲೆಂ, ಚಿಕ್‍ಮಗ್ಳುರ್ ದಿಯೆಸೆಜಿಂತ್ ಆಸ್ತಾನಾ. ಪುಣ್ ‘ಶಿವಮೊಗ್ಗ ದಿಯೆಸೆಜ್ ರಚ್ಲ್ಯಾ ಉಪ್ರಾಂತ್ ಥಂಯ್ಚೆಂ ಕೊಂಕ್ಣಿ ಮೀಸ್ ರದ್ದ್ ಜಾಲೆಂ’ ಮ್ಹಣ್ ಫಿರ್ಗಜ್‍ಗಾರ್ ದುರ್ಸತಾತ್. ಹೆಂ ಸರ್ವ್ ಕಿತೆಂ ಗೊವ್ಳಿ ಬಾಪಾನೊಂ? ಕೊಂಕ್ಣಿ ಮ್ಹಳ್ಳೆಕ್ಷಣ್ ತುಮ್ಕಾಂ ಕಿತ್ಯಾಕ್ ತಾತ್ಸಾರ್?

ಸಮಸ್ಸೊ ಸುಟಯಾ, ಪರಿಹಾರ್ ಲಾಭಯಾ

ಮೊಗಾಳ್ ಬಿಸ್ಪಾನೊಂ, ಇಗರ್ಜ್‌ಮಾತಾ/Church ಮ್ಹಳ್ಯಾರ್ ಫಕತ್ ಧಾರ್ಮಿಕ್ ಮಾತ್ರ್ ನ್ಹಯ್, ಲಾಯಿಕಾಂಕ್‍ಯೀ ತಿತ್ಲಿಚ್ ಪ್ರಾಮುಖ್ಯತಾ ಆಸಾ. ಧಾರ್ಮಿಕ್ ನಾಸ್ತಾನಾಂಯೀ ಪವಿತ್ರ್ ಸಭಾ ಚಲೊಂಕ್ ಸಕ್ತಾ, ಪುಣ್ ಲಾಯಿಕ್ ನಾಸ್ತಾನಾ ಪವಿತ್ರ್ ಸಭೆಕ್ ಅಸ್ತಿತ್ವ್ ನಾ ಮ್ಹಳ್ಳೆಂ ಸತ್ ಚರಿತ್ರೆಂತ್ ಸಾಬಿತ್ ಜಾಲಾಂ. (ಟಿಪ್ಪುನ್ ಹ್ಯಾ ಸಗ್ಳ್ಯಾ ಪ್ರದೇಶಾಂನಿ ಕ್ರಿಸ್ತಾಂವ್ಪಣ್ ನಾಸ್ ಕೆಲ್ಲೆಂ. ತೆಂ ಪರತ್ ಜಿವಾಳಾಯಿಲ್ಲೆಂ ಆಮ್ಚ್ಯಾ ಪುರ್ವಜಾಂನಿ. ಧಾರ್ಮಿಕ್, ಉಪ್ರಾಂತ್‍ಚ್ – ಸರ್ವ್ ಸುಖಾಳ್ ಆಸಾ ಮ್ಹಣ್ ಸಮ್ಜೊನ್ – ಆಯಿಲ್ಲೆ. ತೆಂ ಉಡಾಸ್ ದವರಾ). ತುಮಿ ಆಸ್ಚೆಂ ಅಧಿಕಾರ್ ಚಲಂವ್ಕ್, ತೆಂಯೀ ಲೌಕಿಕ್ ಸಂಗ್ತಿಂಕ್ ಲಬ್ದೊಂಕ್, ಖಂಡಿತ್ ನ್ಹಯ್. ತುಮಿ ಫಕತ್ ಕಸ್ಟೋಡಿಯನ್ ಮಾತ್ರ್. ಏಕ್ ಇಗರ್ಜ್ ಧರುನ್ ಹರ್ ಸಂಗ್ತಿ ಲೊಕಾಚ್ಯಾಚ್ ಪೈಶ್ಯಾಂನಿ ಉಬೆಂ ಜಾಂವ್ಚ್ಯೊ. ತುಮ್ಕಾಂ ದುಡು ದಿಂವ್ಚ್ಯಾ ಮನ್ಶ್ಯಾಂಕ್‍ಚ್ ಇತ್ಲ್ಯಾ ಕಠಿಣಾಯೆನ್ ತುಮಿ ಚಲ್ತಾತ್ (ಅನುಪ್ಕಾರ್ ದಾಕಯ್ತಾತ್) ಮ್ಹಳ್ಯಾರ್ ತುಮಿ ‘ಜೆಜುಚೆಚ್ ಪ್ರತಿನಿಧಿ’ಗೀ ಮ್ಹಣ್ ದುಬಾವ್ ಜಾತಾ! ಮೋಗ್, ದಯಾ, ಕಾಕುಳ್ತ್, ಭೊಗ್ಸಾಣೆಂ, ಸತ್, ನೀತ್, ನ್ಯಾಯ್… ಮ್ಹಣ್ ಅವಿರತ್ ಸೆರ್ಮಾಂವ್ ದಿಂವ್ಚೆ ಖರೆ ಯಾಜಕ್‍ಗೀ ತುಮಿ ಮ್ಹಣ್ ಚಿಂತುಂಕ್ ಇಡೆಂ ಜಾತಾ!! ಸಕ್ಕಡ್ ದಿಂವ್ಚ್ಯಾ ಲೊಕಾಕ್‍ಚ್ ಹ್ಯಾ ಪರಿಂ ತುಮಿ ಚಲಯ್ತಾತ್ ತರ್, ಶೆಕ್ಡ್ಯಾಂ ಆದಿಂ ಆಸ್‍ಲ್ಲೆಪರಿಂ, ‘ತಲ್ವಾರ್’ (ಮ್ಹಣ್ಜೆ ರಾಜಕೀಯ್ ಅಧಿಕಾರ್) ಧರುಂಕ್‍ಯೀ ತುಮ್ಕಾಂ ಆಜ್ ಅವ್ಕಾಸ್ ಆಸ್‍ಲ್ಲೊ ತರ್ ಕಿತೆಂ ಸರ್ವ್ ತುಮಿ ಕರ್ತೆ ನಾಂತ್, ನ್ಹಯ್ವೇ???

ದಯಾ ಕರ್ನ್, ಗೊವ್ಳಿ ಬಾಪಾನೊಂ, ಕರ್ಮಿಪಣ್ ಫಾಪುಡ್ನ್ ಉಡಯಾ ಆನಿ ಕೊಂಕ್ಣಿ ಮಾಂಯ್‍ಭಾಶೆಚ್ಯಾ ಫಿರ್ಗಜ್‍ಗಾರಾಂಕ್ ಕೊಂಕ್ಣೆಂತ್ ಮಿಸಾಂ ದಿಯಾ. ತ್ಯಾ ದಿಶೆನ್ ಜಾಯ್ ತಿ ಚರ್ಚಾ, ಜಮಾತ್ ಕರುಂಕ್ ಅವ್ಕಾಸ್ ದಿಯಾ. ಸಕ್ಡಾಂಕ್ ಸಾಂಗಾತಾ ಹಾಡಾ ಆನಿ ಏಕ್ ಆದರ್ಶ್ ಗೊವ್ಳಿ ಜಾಯಾ. ಸೊಮ್ಯಾ ಜೆಜು ಕ್ರಿಸ್ತಾಚಿ ಖರಿ ಶಿಕವ್ಣ್ ಪಾಳುನ್, ತಾಣೆಂ ದಾಕಯಿಲ್ಲಿ ವಾಟ್ ಧರಾ. ತುಮ್ಕಾಂ ಬೂದ್‍ಬಾಳ್ ವಾ ಸಲಹಾ ದಿಂವ್ಚೆ ತಿತ್ಲೊ ಮ್ಹಾತ್ಭಾರಿ ನ್ಹಯ್, ಹಾಂವ್ ವಾ ಕೊಣೀ. ವಾತಿಕಾನಾಕ್ ಮಾನ್ ದಿಯಾ, ಆಮ್ಚ್ಯಾ ದೇಶಾಚ್ಯಾ ಸಂವಿಧಾನಾಕ್ ಗೌರವ್ ದಿಯಾ, ಆನಿ ಲೊಕಾಚ್ಯಾ ನೈಸರ್ಗಿಕ್/ಮೂಳ್ ಹಕ್ಕಾಂಕ್ ಜಾಗೊ ದಿಯಾ.

ವೆಗಿಂಚ್, ಕೊಂಕ್ಣಿ ಭಾಷೆಂತ್ ಮೀಸ್ ಮಾಗ್ಲೆಲ್ಯಾಂಕ್, ತಾಂಚೆಂ ಮಾಗ್ಣೆಂ ಜಾರಿ ಜಾಂವ್ಕ್ ಅವ್ಕಾಸ್ ರಚುನ್ ದಿಯಾ, ಆನಿ ತ್ಯಾ ಖಾತಿರ್ ಜೊಕ್ತೆಂ ಸರ್ಕ್ಯುಲರ್ ಧಾಡಾ ಮ್ಹಣ್ ತಾಂಚೆ ತರ್ಫೆನ್ ಹಾಂವ್ ತುಮ್ಚೆ ಲಾಗಿಂ ಖಾಲ್ತೆಪಣಿಂ ಉಪ್ಕಾರ್ ಮಾಗ್ತಾಂ. ಭಿಕ್ ದಿಲ್ಲೆಪರಿಂ ಮ್ಹಯ್ನ್ಯಾಕ್ ಏಕ್, ತೆಂಯೀ ಖಾಸ್ಗಿ, ಕಂಡೀಶನಾಂಚೆಂ ಆನಿ ಖಂಚ್ಯಾ ಖಂಚ್ಯಾ ವೆಳಾರ್ ನ್ಹಯ್, ಬಗಾರ್, ಹರ್ ಆಯ್ತಾರಾ ಪ್ರೈಮ್ ಮೀಸ್‍ಚ್ ದೀಜೆ. 90% ಪ್ರಾಸ್ ಚಡ್ ಕೊಂಕ್ಣಿ ಲೋಕ್ ಆಸ್ಚ್ಯಾ ಫಿರ್ಗಜಾಂನಿ ತೀನ್/ಚಾರ್ ಮಿಸಾಂಯೀ ಕನ್ನಡಾಂತ್‍ಚ್ ಮ್ಹಳ್ಯಾರ್ ತಾಚೆ ವರ್ತೆಂ ಫಿತಿಸ್ಪಣ್ ದುಸ್ರೆಂ ನಾ. ಶಿವಾಯ್, ಲೊಕಾಚ್ಯಾ ಆಗ್ರಹಾ ಪರ್ಮಾಣೆಂ, ಭುರ್ಗ್ಯಾಂಕ್ ಕನಿಷ್ಠ್ ಕುಮ್ಗಾರಾಚಿ ದೊತೊರ್ನ್ ಪುಣೀ ಕೊಂಕ್ಣೆಂತ್ ದಿಯಾ.

ಗುಮಾನಾಕ್/Disclaimer: ಹೆಂ ಏಕ್ ಪ್ರಾತಿನಿಧಿಕ್ ಬರಪ್. ಸಂದರ್ಭಾಕ್ ಲಾಗೊನ್ ಶಿವಮೊಗ್ಗ ಬಿಸ್ಪಾಕ್ ಸಂಬೋಧನ್ ಕೆಲಾಂ ತರೀ, ಕೊಂಕ್ಣಿ ಮಿಸಾಂಕ್ ನೆಗಾರ್ಲೆಲ್ಯಾ, ಆಡ್ವಾರ್ಲೆಲ್ಯಾ, ಅನ್ಯಾಯ್ ಕೆಲ್ಲ್ಯಾ ಆದ್ಲ್ಯಾ ಆನಿ ಆತಾಂಚ್ಯಾ ಸರ್ವ್ ಪುರ್ವಿತಾಂಕ್ ಹೆಂ ಪ್ರತಿನಿಧಿತ್ವ್ ಕರ್ತಾ ಮ್ಹಣ್ ಸಮ್ಜೊಂಚೆಂ. ತಾಂಚ್ಯಾ ಅನೀತೆ ವರ್ವಿಂ ಏಕ್ ಸುಂದರ್ ಭಾಸ್, ಆಮ್ಚಿ ಕೊಂಕ್ಣಿ, ಆನಿ ತಿಕಾ ಲಗ್ತಿ ಜಾಲ್ಲ್ಯೊ ಸರ್ವ್ ಸಂಗ್ತಿ ಚಡಾವತ್ ನಾಸ್ ಜಾವ್ನ್ ಗೆಲ್ಯಾತ್. ಮನ್ಶ್ಯಾಂಕೀ ಲುಕ್ಸಾಣ್ ಜಾಲಾ, ಅನ್ಯಾಯ್ ಜಾಲಾ. ಪಿಳ್ಗ್ಯೊಚ್ ಅತಂತ್ರ್ ಜಾಲ್ಯಾತ್. ಆಮಿ ತಾಚೆಂ ಅಧ್ಯಯನ್ ಕೆಲಾಂ. ತ್ಯಾ ಕಾರಣಾನ್ ಮಾತ್ರ್ ಹೆಂ ಲೇಖನ್ ಇಲ್ಲೆಂ ತಿಕ್ಶೆಂ. ಸಕ್ಡಾಂಚೆಂ ದುಖ್ ಹಾಂತುಂ ವ್ಯಕ್ತ್ ಜಾಲಾಂ. ಅಗೌರವ್ ಬಿಲ್ಕುಲ್ ನಾ. ದಯಾ ಕರ್ನ್, ಕೊಣೀ, ಅಪಾರ್ಥ್ ಕರಿನಾಕಾತ್. ಆಮಿ ಸರ್ವಾಂ ಎಕ್‍ಚ್, ಸದಾಂಚ್ ಏಕ್ ಜಾವ್ನ್ ಉರೊಂಯಾಂ; ಮೊಗಾ ಮಯ್ಪಾಸಾನ್ ಜಿಯೆವ್ಯಾಂ. ಆಮೆನ್.

ಸರ್ವಾಂಚೆಂ ಬರೆಂ ಜಾಂವ್. ದೇವ್ ಬರೆಂ ಕರುಂ, ತುಮ್ಕಾಂ ಆನಿ ಆಮ್ಕಾಂ, ಸರ್ವ್ ಸಮೇಸ್ತಾಂಕ್.

ಜೈ ಕ್ರಿಸ್ತಾಕ್
ಜೈ ಕೊಂಕ್ಣಿ ಮಾಯೆಕ್

ಡೊನಾಲ್ಡ್ ಪಿರೇರಾ
ಸಂಪಾದಕ್, ಬುಡ್ಕುಲೊ ಮೀಡಿಯಾ
www.Budkulo.com

Read our Previous Writings 👇

Kindly Allow Us to Pray in Konkani

ಸರ್ವ್ ಕೊಂಕ್ಣಿ ಲೊಕಾಕ್ ಉಲೊ: ಸಕ್ಕಡ್ ಸಾಂಗಾತಾ…

ಕಥೋಲಿಕ ಕ್ರೈಸ್ತ ಕನ್ನಡ ಸಂಘಕ್ಕೆ ಬಹಿರಂಗ ಪತ್ರ

ಮೀಸ್ ಅಭಿಯಾನ್ – ಕೊಂಕ್ಣೆಕ್ ಲಾಭ್ಲಿ ಜೀಕ್

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

The post ಶಿವಮೊಗ್ಗ ಬಿಸ್ಪಾಕ್ ಉಗ್ತೆಂ ಪತ್ರ್: ಸಾಯ್ಬಾನೊಂ, ಕೊಂಕ್ಣಿ ಮಿಸಾಂಚೆರ್ ಕಿತ್ಯಾಕ್ ತಿತ್ಲೊಯೀ ಶಿಣ್? appeared first on Budkulo.

ಪುಣ್ ಖರ‍್ಯಾನ್ ದಿಯೆಸೆಜಿಚ್ಯಾ ವ್ಹಡಿಲಾಂನಿ ವಾತಿಕಾನಾಕ್, ಮ್ಹಣ್ಜೆ ‘ಕ್ಯಾನನ್ ಲಾ’ಕ್‍ಚ್ ನೆಗಾರ್ಲಾಂ!! ವಾತಿಕಾನ್ ದುಸ್ರ್ಯಾ ಮಹಾಸಭೆನ್‍ಂಚ್ ಸಂಸಾರ್‌ಭರ್ ಲೊಕಾಕ್ ಆಪ್ಲ್ಯಾ ಸ್ಥಳೀಯ್ ಆನಿ ಮಾಂಯ್‍ಭಾಶೆಂತ್‍ಚ್ ಮೀಸ್ ಭೆಟಂವ್ಕ್ ಅವ್ಕಾಸ್ ದಿಲಾ ಆಸ್ತಾಂ, 70%, 80%, 90% ವಾ ಚಡ್ ಕೊಂಕ್ಣಿ ಕಥೊಲಿಕ್ ಫಿರ್ಗಜ್‍ಗಾರ್ ಆಸ್ಚ್ಯಾ ಚಿಕ್‍ಮಗ್ಳುರ್ ದಿಯೆಸೆಜಿಚ್ಯಾ ಫಿರ್ಗಜಾಂನಿ ಕೊಂಕ್ಣಿ ಭಾಶೆಕ್ ಅವ್ಕಾಸ್ ದೀನಾತ್‍ಲ್ಲೆಂ ವಾತಿಕಾನಾಕ್‍ಚ್ ಅಕ್ಮಾನ್ ಆನಿ ವಿರೋಧ್ ಕೆಲ್ಲೊ ಮಹಾಪ್ರಾಧ್. ರೊಮಾಂತ್ಲ್ಯಾ, ಪವಿತ್ರ್ ಸಭೆಚ್ಯಾ ವ್ಹಡಿಲಾಂಕ್‍ಚ್ ದಾಕಯಿಲ್ಲೆಂ ಅವಿಧೇಯ್ಪಣ್ ಹೆಂ. ತೆಂ ಇತ್ಲಿಂ ವರ್ಸಾಂ ಪರ್ಯಾಂತ್‍ಯೀ ಲಾಂಬಯಿಲ್ಲೆಂ ಮಹಾನ್ ದುರಂತ್.

ಲಿತುರ್ಜೆಂತ್ ಕೊಂಕ್ಣೆಕ್ ಇನ್ಕಾರ್ ಕೆಲ್ಲ್ಯಾನ್ ತೆಣೆಂ ಕೊಂಕ್ಣಿ ಭಾಸ್ ಫಕತ್ ಲೊಕಾಚ್ಯಾ ಉಲವ್ಪಾಂತ್ ಮಾತ್ರ್ ಉರ್ಲಿ. ತಾಚೊ ಪರಿಣಾಮ್ ಭೋವ್ ಗಂಭೀರ್ ಆನಿ ಮಾರೆಕಾರ್. ಭುಗ್ರ್ಯಾಂಕ್ ದೊತೊರ್ನ್, ಮಿಸಾಂ ಸರ್ವ್ ಕನ್ನಡಾಂತ್ (ವಾ ಇಂಗ್ಲಿಶಾಂತ್) ಜಾಲ್ಲ್ಯಾನ್ ತಾಂಚೆ ಖಾತಿರ್ ಘರಾಂತ್‍ಯೀ ವ್ಹಡಿಲಾಂನಿ ಮಾಗ್ಣಿಂ ಕನ್ನಡಾಂತ್ ಮ್ಹಣಜೆ ಪಡ್ಲೆಂ. ಲಿತುರ್ಜೆಂತ್ ಕೊಂಕ್ಣಿ ನಾತ್‍ಲ್ಲ್ಯಾನ್ ಘರಾಂನಿಯೀ ಕೊಂಕ್ಣಿ ಮಾಯಾಗ್ ಜಾಯ್ಶೆಂ ಕೆಲ್ಲೆಂ ಮಹಾಪ್ರಾಧ್ ಅಕ್ಷಮ್ಯ್..! ಹ್ಯಾ ವರ್ವಿಂ, ಕೊಂಕ್ಣಿ ಸಮುದಾಯ್ ಮ್ಹಣ್ತಾನಾ ಘಾಟಾ ವಯ್ಲೊ ಲೋಕ್ ಲೆಕಾಕ್‍ಚ್ ನಾ ವಾ ತೆ ಪರ್ಕಿಚ್ ಜಾವ್ನ್ ಉರ್ಲ್ಯಾತ್!!

ಭಾರತಾಚೆಂ ಸಂವಿಧಾನ್‍ಂಚ್ ಶ್ರೇಷ್ಠ್

ಆಬ್ಳೆ, ಭಾರತಾಚ್ಯಾ ನ್ಯಾಯಾಂಗ್ ವ್ಯವಸ್ಥೆ ಮುಖಾಂತ್ರ್ ಥಂಯ್ಚ್ಯಾ ಕೊಂಕ್ಣಿ ಲೊಕಾಚ್ಯಾ ಮಾಗ್ಣ್ಯಾಕ್ ಏಕ್ ಮಹತ್ತರ್ ಜೀಕ್ ಲಾಭ್ಲ್ಯಾ. ಚಿಕ್‍ಮಗ್ಳುರ್ ಕೊಡ್ತಿನ್ ಕೊಂಕ್ಣಿ ಮಿಸಾಂ ಬಾಬ್ತಿನ್ ಘಾಲ್ಲಿ ಅರ್ಜಿ ಸ್ವೀಕಾರ್ ಕರುಂಕ್ ನಜೊ ಮ್ಹಣ್ ಬಿಸ್ಪಾನ್ ಕೆಲ್ಲಿ ಮನವಿ ರದ್ದ್ ಕೆಲ್ಯಾ. ಲಾಂಬ್ ಕಾಳಾಚ್ಯಾ ಝುಜಾಂತ್ ಹಿ ಖಂಡಿತ್ ಜಾವ್ನ್ ಏಕ್ ನಿರ್ಣಾಯಕ್ ಜೀಕ್.

ಮೇ 2, 2025ವೆರ್ ಚಿಕ್‍ಮಗ್ಳುರ್ ಕೊಡ್ತಿನ್ ಹೆಂ ತೀರ್ಪ್ ದಿಲಾಂ. ಕೊಂಕಣ್ ರಾಕಣ್ ಸಂಚಾಲನಾನ್, ದಿಯೆಸೆಜಿಚ್ಯಾ ಫಿರ್ಗಜೆಂನಿ ಕೊಂಕ್ಣಿ ಮಿಸಾಂ ಚಲಂವ್ಕ್ ಬಿಸ್ಪಾಕ್ ಆದೇಶ್ ದೀಜೆ ಮ್ಹಣ್ ಕೊಡ್ತಿಂತ್ ಕೇಜ್ ಘಾಲ್ಲಿ. ಹಿ ಕೇಜ್ ರದ್ದ್ ಕರಿಜೆ, ಆನಿ ಕೊಡ್ತಿನ್ ಇಗರ್ಜೆಚ್ಯಾ ವ್ಯವಹಾರಾಂನಿ ಮೆತೆರ್ ಜಾಂವ್ಕ್ ನಜೊ ಮ್ಹಣ್ ಬಿಸ್ಪಾನ್ ಎಪೀಲ್ ಕೆಲ್ಲೆಂ. ಆಬ್ಳೆ, ಬಿಸ್ಪಾಚೊ ವಾದ್ ಕೊಡ್ತಿನ್ ತಿರಸ್ಕಾರ್ ಕೆಲಾ.

ಹ್ಯಾಚ್ ತಕ್ರಾರಾ ಬಾಬ್ತಿನ್ ಕರ್ನಾಟಕ ಹೈ ಕೋರ್ಟ್ ಪರ್ಯಾಂತ್ ಕೇಜಿ ಚಲೊನ್, ಬೆಂಗ್ಳುರ್ ಶ್ಹೆರ್ ಆನಿ ಹೆರ್ ಕಡೆನ್ ಎದೊಳ್‍ಚ್ ಕೊಂಕ್ಣೆಂತ್ ಮಿಸಾಂ ಜಾರಿಯೆಕ್ ಆಯ್ಲ್ಯಾಂತ್. “ಕರ್ನಾಟಕ ಹೈ ಕೋರ್ಟಾನ್ ದಿಲ್ಲೆಂ ತೀರ್ಪ್ ಸಗ್ಳ್ಯಾ ರಾಜ್ಯಾಕ್ (ರಾಷ್ಟ್ರಾಕ್‍ಯೀ) ಲಾಗು ಜಾತಾ ತರೀ, ಚಿಕ್‍ಮಗ್ಳುರ್ ದಿಯೆಸೆಜಿನ್ ತೆಂ ಮಾಂದುಂಕ್ ನಾ” ಮ್ಹಣ್ತಾತ್ ಕೊಂಕಣ್ ರಾಕಣ್ ಸಂಚಾಲನಾಚೆ ಕಾರ್ಬಾರಿ.

ಹ್ಯಾ ಇಡ್ಯಾಂತ್‍ಯೀ ಥೊಡೆಂ ವಿಪರ್ಯಾಸ್ ಘಡ್ಲಾಂ!

ಚಿಕ್‍ಮಗ್ಳುರ್ ದಿಯೆಸೆಜಿಚ್ಯಾ ಕೊಪ್ಪ ಸವೆಂ ಕಡಬಗೆರೆ, ಬಸ್ರೀಕಟ್ಟೆ, ಬಾಳೆಹೊನ್ನೂರ್, ಜಯಪುರ, ಹಿರೇಬೈಲ್, ಮಾಗುಂಡಿ, ಕೂವೆ, ಸುಂಡೆಕೆರೆ, ಸಕ್ಲೇಶ್‍ಪುರ್, ಮಲ್ಲಂದೂರ್ ಫಿರ್ಗಜೆಂನಿ ಎದೊಳ್‍ಚ್ ಆಯ್ತಾರಾಚೆಂ ಕೊಂಕ್ಣಿ ಮಿಸಾಂ ಆಸಾತ್. ಹ್ಯಾ ಪಾಟ್ಲ್ಯಾನ್ ಲಾಂಬ್ ಕಾಳಾಚೆಂ ಝುಜ್ ಚಲ್ಲಾಂ. ಹ್ಯಾ ಸರ್ವ್ ಕಡೆನ್ ಕೊಂಕ್ಣಿ ಮಿಸಾಂಕ್ ಪರ್ವಣ್ಗಿ ಮೆಳ್ಳ್ಯಾ. “ಕೊಪ್ಪ ಫಿರ್ಗಜೆಂತ್ ಕೊಂಕ್ಣಿ ಮೀಸ್ ಭೆಟಂವ್ಕ್ ಬಿಸ್ಪಾನ್ ಬರ್ಪಿನಿಶಿಂ, ತುರ್ತಾನ್, ಪರ್ವಣ್ಗಿ ದಿಲ್ಯಾ… ತರೀ ಹೈ ಕೊಡ್ತಿಚೆಂ ತೀರ್ಪ್ ಆಮ್ಕಾಂ ಲಾಗು ಜಾಯ್ನಾ ಮ್ಹಣ್ತಾತ್ ದಿಯೆಸೆಜಿಚೆ ವ್ಹಡಿಲ್..!” ಮ್ಹಣ್ತಾ ರಾಕಣ್ ಸಂಚಾಲನಾಚೊ ಎಕ್ಲೊ ಪ್ರಮುಖ್.

ಶಾಭಾಸ್ ಕೊಂಕ್ಣಿ ರಾಕಣ್ ಸಂಚಾಲನ್

19 ವರ್ಸಾಂ ಆದಿಂ ಸ್ಥಾಪನ್ ಜಾಲ್ಲ್ಯಾ ಕೊಂಕ್ಣಿ ರಾಕಣ್ ಸಂಚಾಲನಾನ್ ಚಿಕ್‍ಮಗ್ಳುರ್ ಆನಿ ಹಾಸನ್ ಜಿಲ್ಲ್ಯಾಂನಿ ಕೊಂಕ್ಣೆ ಖಾತಿರ್ ದರಬಸ್ತ್ ವಾವ್ರ್ ಕೆಲಾ ಆನಿ ಕೊಂಕ್ಣಿ ಮಿಸಾಂ ಬಾಬ್ತಿಂ ಬರಿಚ್ ಜಾಗೃತಿ ಉಟವ್ನ್, ಪರಿಣಾಮ್‍ಕಾರಿ ಆಂದೋಲನ್ ಚಲಯ್ಲಾಂ. (ಲೇಖನಾಚ್ಯಾ ನಿಮಾಣೆಂ ದಿಲ್ಲೆ ಲಿಂಕ್ ಉಗ್ತೆ ಕರ್ನ್ ತ್ಯಾ ಲಗ್ತಿ ಆದ್ಲಿಂ ಲೇಖನಾಂ/ವರ್ದಿ ವಾಚಾ).

2017 ಇಸ್ವೆಂತ್, ಬಸ್ರೀಕಟ್ಟೆಚೊ ಪ್ರಮೋದ್ ಪಿಂಟೊ ಅಧ್ಯಕ್ಷ್, ಸಿಲ್ವೆಸ್ಟರ್ ಸಲ್ಡಾನ್ಹಾ ಕಾರ್ಯದರ್ಶಿ ಆನಿ ಜೋಕಿಂ ಡಿಸೋಜ ಖಜಾಂಚಿ ಆಸ್ತಾನಾ ಹಿ ಕೇಜ್ ಘಾಲ್ಲಿ. ಆಟ್ ವರ್ಸಾಂ ಉಪ್ರಾಂತ್ ಕೊಡ್ತಿನ್ ಆತಾಂ ತೀರ್ಪ್ ದಿಲಾಂ.

ರಾಕಣ್ ಸಂಚಾಲನಾಚೆ ಪ್ರಸ್ತುತ್ ಪ್ರಮುಖ್ ಹುದ್ದೆದಾರ್: ಜೋಕಿಂ ಡಿಸೋಜ, ಅಧ್ಯಕ್ಷ್; ವಿವಿಯನ್ ಡಿಸೋಜ, ಕಾರ್ಯದರ್ಶಿ ಆನಿ ಸಿಲ್ವೆಸ್ಟರ್ ಸಲ್ಡಾನ್ಹಾ, ಖಜಾಂಚಿ. ವೆವೆಗ್ಳ್ಯಾ ಫಿರ್ಗಜಾಂನಿ ರಾಕಣ್ ಸಂಚಾಲನಾಚೆ 20 ಘಟಕ್ ಆಸೊನ್, ತಾಂಚೆ ಸರ್ವ್ ಹುದ್ದೆದಾರ್ ಆನಿ ಸಾಂದೆ ಎಕೀನ್ಪಣಿಂ ವಾವುರ್ನ್ ಆಸಾತ್. ಚಿಕ್‍ಮಗ್ಳುರ್ಚೊ ಸ್ಟ್ಯಾನಿ ಡಿಸಿಲ್ವಾ ಹ್ಯಾ ಮಿಸಾಂವಾಂತ್ ಏಕ್ ವ್ಯಕ್ತಿ ಜಾವ್ನ್ ನ್ಹಯ್ ಬಗಾರ್ ವಿಶೇಸ್ ಸಕತ್ ಜಾವ್ನ್ ದೇಣ್ಗಿ ದೀವ್ನ್ ಆಯ್ಲಾ. ತಾಚಿ ಸೆವಾ ಆನಿ ಆಧಾರ್ ಶ್ಲಾಘನೀಯ್.

‘ಬುಡ್ಕುಲೊ’ ಇ-ಪತ್ರ್, ಘಾಟಾ ವಯ್ರ್, ಕೊಂಕ್ಣೆ ಪಾಸತ್ ಆನಿ ಲೊಕಾ ಖಾತಿರ್ ಖಳ್ಮಿತ್ ನಾಸ್ತಾನಾ ವಾವುರ್ಚ್ಯಾ ಸರ್ವ್ ಸೊಜೆರಾಂಕ್ ಆನಿ ಕೊಂಕ್ಣಿ ರಾಕಣ್ ಸಂಚಾಲನಾಕ್ ಮಾನ್ ಬಾಗಯ್ತಾ ಆನಿ ಸಮುದಾಯಾ ತರ್ಫೆನ್ ಧಿನ್ವಾಸ್ತಾ.

ದಯಾ ಕರ್ನ್, ಪ್ಲೀಸ್… ಬಿಸ್ಪಾಕ್ ಉಲೊ

ಇತ್ಲಿಂ ದಶಕಾಂ ಪರ್ಯಾಂತ್ ಕೊಂಕ್ಣೆಕ್ ಇನ್ಕಾರ್ ಕರುನ್ ಚಿಕ್‍ಮಗ್ಳುರ್ ದಿಯೆಸೆಜಿನ್ ವ್ಹಡ್ ಪ್ರಮಾದ್ ಕೆಲಾ. ವಾತಿಕಾನಾನ್ ಮಾಂಯ್‍ಭಾಶೆಕ್ ಅಲ್ತಾರಿರ್ ಚಡಯ್ತಾನಾ ಮಂಗ್ಳುರ್ ಆನಿ ಕಾರವಾರ್ ದಿಯೆಸೆಜಿಂನಿ ಭಾವಾಡ್ತ್ಯಾಂಚಿ ಭಾಸ್ ಜಾವ್ನಾಸ್‍ಲ್ಲ್ಯಾ ಕೊಂಕ್ಣೆಕ್ ಮಾನ್ ದೀವ್ನ್ ಲಿತುರ್ಜಿಂತ್ ಸ್ಥಾನ್ ದಿಲ್ಲೆಂ. ಪುಣ್ ಕೊಂಕ್ಣಿ ಮಾಂಯ್‍ಭಾಶೆಚೊಚ್ ಬಿಸ್ಪ್ ಜಾವ್ನಾಸ್‍ಲ್ಲ್ಯಾ ಅಲ್ಫೋನ್ಸ್ ಮಥಾಯಸಾನ್ ಚಿಕ್‍ಮಗ್ಳುರ್ ದಿಯೆಸೆಜಿಂತ್ (ಆತಾಂಚಿ ಶಿವಮೊಗ್ಗ ದಿಯೆಸೆಜ್ ತೆದ್ನಾಂ ಚಿಕ್‍ಮಗ್ಳುರಾಚೊಚ್ ವಾಂಟೊ) ಕೊಂಕ್ಣೆಕ್ ಬಿಲ್ಕುಲ್ ರೀಗ್ ದೀನಾತ್‍ಲ್ಲೆಂ ವಿಪರ್ಯಾಸ್‍ಚ್ ನ್ಹಯ್, ವ್ಹಡ್ ದುರಂತ್‍ಯೀ ವ್ಹಯ್. ತಾಣೆಂ ತಶೆಂ ಕೆಲ್ಲೆಂ ಮಹಾಪ್ರಾಧ್ ಆನಿ ವ್ಹಡ್ ದ್ರೋಹ್‍ಚ್ ಮ್ಹಣಜೆ.

ವಾತಿಕಾನಾಚೆಂ ನಿರ್ದೇಶನ್ ಆಸೊನ್‍ಯೀ ಬಹುಸಂಖ್ಯಾತ್ ಲೊಕಾಚ್ಯಾ ಮಾಂಯ್‍ಭಾಶೆಕ್ ನೆಗಾರ್ಚೆಂ ಅಸಾಂವಿಧಾನಿಕ್‍ಚ್ ಸಯ್. ಅಮಾನವೀಯ್ ಕ್ರಮ್ ತೆಂ. ಶಿವಾಯ್, ತಶೆಂ ಕರುನ್ ವಾತಿಕಾನಾಕ್‍ಚ್ ನೆಗಾರ್ಲೆಲೆಪರಿಂ ಜಾಲಾಂ. ಪ್ರಜಾಸತ್ತಾತ್ಮಕ್ ಹಕ್ಕಾಂಕ್‍ಯೀ ಮಸ್ತಿಲ್ಲೆಪರಿಂ ತೆಂ. ಇತ್ಲ್ಯಾ ಲಾಂಬ್ ಕಾಳಾರ್ ಜಾಲ್ಲೊ ಅನ್ಯಾಯ್ ಆತಾಂ ಪುಣೀ ಸಾರ್ಕೊ ಕರಿಜೆ.

ದೆಕುನ್, ಚಿಕ್‍ಮಗ್ಳುರ್ಚ್ಯಾ ಗೊವ್ಳಿ ಬಾಪಾಕ್, ವ್ಹಡಿಲಾಂಕ್ ಆನಿ ಸರ್ವ್ ಯಾಜಕಾಂಕ್, ಕೊಂಕ್ಣಿ ಮಿಸಾಂಕ್ ಅವ್ಕಾಸ್ ಕರುನ್ ದೀಂವ್ಕ್ ಕೊಂಕ್ಣಿ ಲೊಕಾ ತರ್ಫೆನ್ ‘ಬುಡ್ಕುಲೊ’ ಇ-ಪತ್ರ್ ಉಲೊ ದಿತಾ. ಕೊಂಕ್ಣಿ ಪರ್ಜಾ ಚಡ್ ಆಸ್ಚ್ಯಾ ಫಿರ್ಗಜಾಂನಿ ಆನಿ ಲೊಕಾನ್ ಕೊಂಕ್ಣಿ ಮಿಸಾಂ ಜಾಯ್ ಮ್ಹಣ್ ಮಾಗ್‍ಲ್ಲ್ಯಾ ಇಗರ್ಜಾಂನಿ ಆಯ್ತಾರಾಚೆಂ ಕೊಂಕ್ಣಿ ಮೀಸ್ ಚಾಲು ಕರುಂಕ್ ತಕ್ಷಣ್ ಕ್ರಮ್ ಘೆಂವ್ಕ್ ಆಮಿ ಮಾಗ್ತಾಂವ್.

ಯಾಜಕಾಂಕ್ ನಾ ಮನ್! ಮ್ಹಣ್ತಾತ್ ಬರ್ಡನ್?!

ಆಮ್ಕಾಂ ಕಳೊನ್ ಆಯಿಲ್ಲ್ಯಾ ಪರ್ಮಾಣೆಂ, ಚಿಕ್‍ಮಗ್ಳುರ್ ದಿಯೆಸೆಜಿಚೆ ಜಾಯ್ತೆ ಯಾಜಕ್, ಜೆ ಕೊಂಕ್ಣಿ ಮಾಂಯ್‍ಭಾಶೆಚೆ, ಕೊಂಕ್ಣಿ ಮಿಸಾಂಕ್ ಪಾಟಿಂಬೊ ದಿತಾತ್ (ಚಡಾವತ್ ಖಾಸ್ಗೆನ್). ಪುಣ್ ಥೊಡ್ಯಾ ಯಾಜಕಾಂನಿ, ಕನ್ನಡ ಆನಿ ಕೊಂಕ್ಣೆಂತ್ ಮಿಸಾಂ ಭೆಟಂವ್ಚೆಂ ಚಡ್ತಿಕ್ ‘ಕಾಮ್’ ಜಾತಾ ದೆಕುನ್ ಕೊಂಕ್ಣಿ ಮಿಸಾಂಕ್ ವಿರೋಧ್ ಕರ್ಚೆಂ ಖಂಯ್!

ಹೆಂ ರಾಜಾಂವ್ ವಾಜ್ಭಿ ನ್ಹಯ್. ಫಕತ್ ನೀಬ್ ಮ್ಹಣ್ಯೆತ್. ಕಿತ್ಯಾಕ್ ಮ್ಹಳ್ಯಾರ್ ಎಕಾ ಪ್ರಾಸ್ ಚಡ್ ಭಾಶೆಂನಿ ಮಿಸಾಂ ಆಸ್ಚೆಂ ಭಾರತಾಂತ್ ಸಾಮಾನ್ಯ್. ಮೈಸೂರ್ ತಶೆಂ ಬೆಂಗ್ಳುರಾಂತ್ ಕನ್ನಡ ಆನಿ ತಮಿಳ್ ಭಾಶೆಂತ್ ಮಿಸಾಂ ಭೆಟಯ್ನಾಂತ್‍ಗೀ? ಮಂಗ್ಳುರಾಂತ್ ಕೊಂಕ್ಣೆಂತ್ ಆನಿ ಇಂಗ್ಲಿಶಾಂತ್, ತಶೆಂಚ್ ಅಪ್ರೂಪ್ ಕನ್ನಡಾಂತ್ ಮಿಸಾಂ ಭೆಟಯ್ನಾಂತ್‍ಗೀ? ಫೆಸ್ತಾಂ, ಉತ್ಸವಾ ವೆಳಾರ್ ಮಲಯಾಳಂ, ತಮಿಳ್ ಆನಿ ಹೆರ್ ಭಾಶೆಂನಿ ಮೀಸ್ ಭೆಟಯ್ತಾತ್… ಮನಸ್ಸಿದ್ದರಷ್ಟೇ ಮಾರ್ಗ!!

ಕೊಂಕ್ಣಿ ಪಾದ್ರಿಚ್ ಕೊಂಕ್ಣೆಕ್ ವಿರೋಧ್?

ವಿಪರ್ಯಾಸ್ ಆನಿ ದುರಂತ್ ಮ್ಹಳ್ಯಾರ್ ಘಾಟಾ ವಯ್ರ್ ಕೊಂಕ್ಣಿ ಮಿಸಾಂಕ್ ಆಮ್ಚ್ಯಾಚ್ ಸಮುದಾಯಾಚೆ ಕೊಂಕ್ಣಿ ಯಾಜಕ್ ವಿರೋಧ್ ಆಸ್ಚೆಂ!? ಸಂಘಟಕಾಂ ಪರ್ಮಾಣೆಂ, ದಿಯೆಸೆಜಿಚ್ಯಾ ಆಡಳ್ತ್ಯಾಂತ್ ಆಸ್ಚ್ಯಾ ಹೆರ್ ಭಾಶೆಂಚ್ಯಾ ಪುರ್ವಿತಾಂ ಸಂಗಿಂ ‘ಆಮ್ಚೆಚ್’ ಕೊಂಕ್ಣಿ ಪಾದ್ರಿಯೀ ಕೊಂಕ್ಣಿ ಮಿಸಾಂಕ್ ವಿರೋಧ್ ಆಸಾತ್! ಹೆಂ ಕಿತ್ಯಾಕ್ ಅಶೆಂ, ಕಳನಾ.

ಬಿಸ್ಪ್ ಜಾವ್ನಾಸ್‍ಲ್ಲ್ಯಾ ಅಲ್ಫೋನ್ಸ್ ಮಥಾಯಸ್ ಆನಿ ಉಪ್ರಾಂತ್ಲ್ಯಾ ಬಿಸ್ಪಾಂನಿ, ಆಜೂನ್ ಪರ್ಯಾಂತ್, ಕೊಂಕ್ಣಿ ಲೋಕ್‍ಚ್ ಆಸ್ಚ್ಯಾ ದಿಯೆಸೆಜಿಂತ್ ಕೊಂಕ್ಣಿ ಮಿಸಾಂಕ್ ವಿರೋಧ್ ಆಸ್‍ಲ್ಲೆಂ/ಆಸ್ಚೆಂ ಕಿತ್ಯಾಕ್ ಸಮ್ಜನಾ. ಲಾಯಿಕಾಂ ಸಂಗಿಂ ದುಸ್ಮಾನಾಂಪರಿಂ ವ್ಯವಹಾರ್ ಕರ್ಚೆಂ ಕಿತ್ಲೆಂ ಸಾರ್ಕೆಂ? ಅಲ್ಫೋನ್ಸ್ ಮಥಾಯಸ್ ಬೆಂಗ್ಳುರ್ಚೊ ಆರ್ಚ್ ಬಿಸ್ಪ್ ಜಾಲ್ಲೊ ತರೀ ತಾಚ್ಯಾ ಧೋರಣಾಂತ್ ಕಸಲಿಚ್ ಬದ್ಲಾವಣ್ ನಾತ್‍ಲ್ಲೆಂ ವಿಚಿತ್ರ್ ದಿಸ್ತಾ.

ಲೋಕ್ ಆಪ್ಲೊಚ್, ಸರ್ವ್ ದಿಂವ್ಚೆಂ ತ್ಯಾಚ್ ಲೊಕಾನ್, ತರೀ ತ್ಯಾಚ್ ಲೊಕಾಕ್ ದೆವಾಚೆ ಸೆವಕ್ ಜಾವ್ನಾಸಜೆ ಜಾಲ್ಲೆ ಪುರ್ವಿತ್ ದುಸ್ಮಾನಾಂಪರಿಂ ಚಲಯ್ತಾತ್ ಮ್ಹಳ್ಯಾರ್ ಪಾತ್ಯೆಂವ್ಕ್ ಜಾಯ್ನಾ. “ಥೊಡೆ ಪಾದ್ರಿ, ತೆ ಚಡಾವತ್ ಮಂಗ್ಳುರ್ ದಿಯೆಸೆಜಿಂತ್ ಜಲ್ಮಲ್ಲೆ, ಗಾಂವ್ಚ್ಯಾ (ಮಂಗ್ಳುರ್ ಆನಿ ಉಡುಪಿ ದಿಯೆಸೆಜಿಂಚ್ಯಾ) ಫಿರ್ಗಜಾಂಕ್ ಕಲೆಕ್ಷನಾಕ್ ಯೆತಾತ್. ಹಾಂಗಾಸರ್ ಯೇವ್ನ್ ಕೊಂಕ್ಣೆಂತ್‍ಚ್ ಆಪುರ್ಬಾಯೆನ್ ಮೀಸ್ ಭೆಟಯ್ತಾತ್, ಕಲೆಕ್ಷನ್ ಜಮಯ್ತಾತ್ ಆನಿ ಥಂಯ್ ವಚೊನ್ ಕೊಂಕ್ಣೆಕ್‍ಚ್ ಘಾತ್ ಕರ್ತಾತ್!” ಮ್ಹಣ್ತಾ ಎಕ್ಲೊ ಸಾಮಾಜಿಕ್ ಕಾರ್ಯಕರ್ತ್. ಪಾದ್ರಿಂಚೆಂ ನಡ್ತೆಂ ತಶೆಂಚ್ ಆಸಾ ತರ್ ಅಶೆಂ ಸಾಂಗ್ಚ್ಯಾಂತ್ ಚೂಕ್ ದಿಸನಾ. ನ್ಹಯ್ವೇ?

ಘಾಟಾ ವಯ್ಲ್ಯಾ ಕೊಂಕ್ಣಿ ಪಾದ್ರಿಂನಿ ಹ್ಯಾ ಉಪ್ರಾಂತ್ ಪುಣೀ ಕೊಂಕ್ಣಿ ಮಿಸಾಂಕ್ ಪಾಟಿಂಬೊ ದೀಜೆ ಮ್ಹಣ್ ಆಮಿ ಉಪ್ಕಾರ್ ಮಾಗ್ತಾಂವ್. ಹ್ಯಾ ಆದಿಂ ಜಾಲ್ಲೊ ಅನ್ಯಾಯ್‍ಚ್ ಪುರೊ. ಫುಡಾರಾಂತ್ ತೊ ಜಾಯ್ನಾಶೆಂ ಕೊಂಕ್ಣಿ ಪಾದ್ರಿ-ಧಾರ್ಮಿಕ್ ವ್ಹಡಿಲಾಂನಿ ಪಳೆಜೆ ಆನಿ ಕೊಂಕ್ಣಿ ಲೊಕಾಚ್ಯಾ ಹಕ್ಕಾಂಕ್ ಗೌರವ್ ದಿಂವ್ಚ್ಯಾಕ್ ಮ್ಹಿನತ್ ಕಾಡಿಜೆ ಮ್ಹಣ್ ಆಮ್ಚಿ ಮನವಿ. ಹೆಂ ಆಖ್ಖ್ಯಾ ಕರ್ನಾಟಕಾಕ್ ಲಾಗು ಜಾತಾ.

ಸಂಘರ್ಷ್ ಆಡಾಯಾ, ಸಮಾಧಾನಾನ್ ವಿವಾದ್ ಸಂಪಯಾ

ಕರ್ನಾಟಕ ಹೈ ಕೋರ್ಟ್ ಆನಿ ಹೆರ್ ಕೊಡ್ತಿಂನಿ ಎದೊಳ್‍ಚ್ ಕೊಂಕ್ಣಿ ಮೀಸ್ ಭೆಟಂವ್ಕ್ ತೀರ್ಪಾಂ ಆಯ್ಲ್ಯಾಂತ್. ವಾತಿಕಾನಾಚಿ ನೀತ್, ಧೋರಣ್ ಆನಿ ಕಾನೂನ್‍ಯೀ ತೆಂಚ್. ಇತ್ಲೆಂ ಆಸೊನೀ ಧಾರ್ಮಿಕಾಂನಿ ಹಟ್ ಧರ್ಚೆಂ, ಸಮುದಾಯಚ್ಯಾ ಲೊಕಾ ವಿರೋಧ್ ಝುಜ್ಚೆಂ, ಅಸಹಕಾರ್ ದಾಕಂವ್ಚೆಂ ಸಾರ್ಕೆಂ ನ್ಹಯ್. ಮಾತ್ರ್ ನ್ಹಯ್ ತೆಂ ಪ್ರಜಾಪ್ರಭುತ್ವಾ ವಿರೋಧ್, ವಾತಿಕಾನಾ ವಿರೋಧ್, ಮನ್ಶ್ಯಾಪಣಾ ವಿರೋಧ್ ಆನಿ ದೇಶಾಚ್ಯಾ ಕಾನೂನಾಕ್‍ಯೀ ವಿರೋಧ್. ಜೆಜುಚ್ಯಾ ಶಿಕವ್ಣೆಕ್‍ಯೀ ತದ್ವಿರುದ್ಧ್. ಹೊ ಕಾಂಯ್ ಶಿಲಾಯುಗ್ ವಾ ಹರಪ್ಪ ಮೊಹೆಂಜೆದಾರೋ ಕಾಳ್ ನ್ಹಯ್ ಆನಿ ಹೆಂ ಟಿಪ್ಪು ಸುಲ್ತಾನಾಚೆಂ ರಾಜ್‍ಯೀ ನ್ಹಯ್. ಧಾರ್ಮಿಕ್ ವರ್ಗಾನ್ ಅಶೆಂ ಕಠೋರ್ ಜಾಂವ್ಕ್ ನಜೊಚ್.

ದೆಕುನ್, ಚಿಕ್‍ಮಗ್ಳುರ್ ದಿಯೆಸೆಜಿಚ್ಯಾ ಆಡಳ್ತ್ಯಾನ್ ಸಂಘರ್ಷ್ ಆಡಾವ್ನ್ ಶಾಂತಿಯುತ್ ಜಾವ್ನ್ ಹ್ಯಾ ಸಮಸ್ಯಾಕ್ ಪರಿಹಾರ್ ಒದಗ್ಸಿಜೆ. ಪವಿತ್ರ್ ಸಭೆಕ್ ಧಾರ್ಮಿಕ್ ವರ್ಗಾಚೆ ‘ತುಂಡುರಾಯ್’ ಖಂಡಿತ್ ನ್ಹಯ್. ಭಾವಾಡ್ತಿ ಲೋಕ್ ನಾಸ್ತಾಂ ವಾ/ಆನಿ ತಾಂಕಾಂ ಮಾನ್ ದೀನಾಸ್ತಾಂ ಇಗರ್ಜ್ ಮಾತಾ ಚಲಂವ್ಕ್ ಜಾಯ್ನಾ. ಫಕತ್ ಸೆರ್ಮಾಂವಾಂನಿ ‘ಮೋಗ್, ದಯಾ, ಕಾಕುಳ್ತ್, ಎಕ್ವಟ್, ಶಾಂತಿ…’ ಮ್ಹಣ್ ಫರ್ಮಾಣ್ ದಿಂವ್ಚೆಂ ನ್ಹಯ್, ಬಗಾರ್ ತೆಂ ಸ್ವತಃ ಕಾರ್ಯಾನ್ ಪಾಳಿಜೆ. ಜೆಜುನ್‍ಯೀ ಸಾಂಗ್ಲಾಂ ನ್ಹಯ್ಗೀ, “ತುಮಿ ಮನ್ಶ್ಯಾಚ್ಯಾ ಉತ್ರಾಂಕ್ ನ್ಹಯ್ ಬಗಾರ್ ಕೃತ್ಯಾಂಕ್ ಪರಿಗಣನ್ ಕರಿಜೆ” ಮ್ಹಣ್? ಉತ್ರಾಂಕ್ ಆನಿ ಕರ್ನ್ಯಾಂಕ್ ಫರಕ್ ಆಸ್ಲ್ಯಾರ್ ಹಿಪೊಕ್ರಿತ್‍ಪಣ್ ಜಾತಾ.

ಪರತ್, ಘಾಟಾ ವಯ್ಲ್ಯಾ, ಚಿಕ್‍ಮಗ್ಳುರ್ ಆನಿ ಶಿವಮೊಗ್ಗ ದಿಯೆಸೆಜಿಂಚ್ಯಾ ವ್ಹಡಿಲಾಂಕ್ ಥಂಯ್ಚ್ಯಾ ಕೊಂಕ್ಣಿ ಕ್ರಿಸ್ತಾಂವಾಂ ತರ್ಫೆನ್ ತಾಂಚಿಂ ಮಾಗ್ಣಿಂ ಆಯ್ಕೊನ್ ಕೊಂಕ್ಣಿ ಮಿಸಾಂಕ್ ಅವ್ಕಾಸ್ ಕರುನ್ ದೀಂವ್ಕ್ ‘ಬುಡ್ಕುಲೊ’ ಒತ್ತಾಯ್ ಕರ್ತಾ. ಆಯ್ತಾರಾಚೆಂ ಪ್ರಧಾನ್ ಮೀಸ್ ಕೊಂಕ್ಣೆಂತ್ ದಿಲ್ಯಾರ್ ಮಾತ್ರ್ ನ್ಯಾಯ್ ಮೆಳ್ತಾ, ಶಿವಾಯ್ ಜೊಕ್ತೊ ನ್ಹಯ್ ಆಸ್‍ಲ್ಲ್ಯಾ ವೆಳಾರ್ ದಿಲ್ಯಾರ್ ಸಾರ್ಕೆಂ ಜಾಯ್ನಾ. ಲೊಕಾಚಿಂ ಪ್ರಾಥಮಿಕ್ ಆನಿ ಮೂಳ್‍ಭೂತ್ ಹಕ್ಕಾಂ ಮಾಂದುನ್ ಘೆಂವ್ಕ್ ಆನಿ ನ್ಯಾಯ್ ಲಾಭಂವ್ಕ್ ಆತಾಂ ಪುಣೀ ದಿಯೆಸೆಜಿಚ್ಯಾ ವ್ಹಡಿಲಾಂನಿ, ಸಹಕಾರಿ ಮನೋಭಾವಾನ್, ಮುಖಾರ್ ಸರಜೆ. ಹ್ಯಾ ಬಾಬ್ತಿಂ ನ್ಯಾಯ್‍ಯುತ್ ಪರಿಹಾರ್ ವೆಗಿಂಚ್ ಲಾಭ್ತಲೊ ಮ್ಹಣ್ ‘ಬುಡ್ಕುಲೊ’ ಭರ್ವಸ್ತಾ.

ಜೈ ಕ್ರಿಸ್ತಾಕ್

ಜೈ ಕೊಂಕಣಿ

-ಡೊನಾಲ್ಡ್ ಪಿರೇರಾ, ಸಂಪಾದಕ್
www.Budkulo.com

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ತುಮಿ ವಾಚಿಜೆ ಜಾಲ್ಲಿಂ ಅಮೊಲಿಕ್ ಬರ್ಪಾಂ 👇👇

ಜಯ್ತಾಚ್ಯಾ ವಾಟೆರ್ ಕೊಂಕ್ಣಿ ಮಿಸಾಂಚಿ ಚಳ್ವಳ್

ಬಸ್ರಿಕಟ್ಟೆಂತ್ ಜಬರ್ದಸ್ತ್ ಕೊಂಕ್ಣಿ ಉತ್ಸವ್

ಬಸ್ರೀಕಟ್ಟೆಚೆಂ ವಂಡರ್‌ಫುಲ್ ಹಿಮಗಿರಿ ಹೋಮ್‍ಸ್ಟೇ

The post Wow! ಮಾಂಯ್‍ಭಾಶೆಂತ್ ಮೀಸ್ ಅಭಿಯಾನ್ – ಕೊಂಕ್ಣೆಕ್ ಲಾಭ್ಲಿ ಮಹತ್ತರ್ ಜೀಕ್ appeared first on Budkulo.

ಭಾರತ್ ವೈವಿಧ್ಯತೆಚೊ ಏಕ್ ಮಹಾನ್ ದೇಶ್. ನೈಸರ್ಗಿಕ್ ಆನಿ ಮನ್ಶ್ಯಾಕ್ ಸಂಬಂಧ್ ಜಾಲ್ಲ್ಯಾ ಹರ್ ಗಜಾಲಿಂನಿ ಥರಾವಳ್ ವೈವಿಧ್ಯತಾ ಹಾಂಗಾಚಿ ಗ್ರೇಸ್ತ್‌ಕಾಯ್. ಮನ್ಶ್ಯಾನ್ ಉಲಂವ್ಚ್ಯಾ ಭಾಶೆಂಕೀ ವೈವಿಧ್ಯತಾ ಸಹಜ್. ಹಜಾರೊಂ ಭಾಸೊ ಭಾರತಾಂತ್ ಲೋಕ್ ಉಲಯ್ತಾ. ಸ್ವಾತಂತ್ರ್ಯ್ ಮೆಳ್‍ಲ್ಲ್ಯಾ ಉಪ್ರಾಂತ್ ರಾಜ್ಯಾಂಚೆಂ ರಚನ್ ಜಾತಾನಾಂಯೀ ಭಾಷಾವಾರ್ ಪ್ರಾಂತ್ಯ್ ರಚ್ಲೆ ಮ್ಹಣ್ತಚ್ ಭಾಸ್ ಸಮಾಜೆಂತ್ ಕಿತ್ಲ್ಯಾ ಉನ್ನತ್ ಸ್ತರಾರ್ ಆಸಾ ಮ್ಹಣ್ ಕಳ್ತಾ.

ಆಮ್ಚಿ ಕೊಂಕ್ಣಿ ವಿಭಿನ್ನ್, ವಿಶೇಸ್ ಭಾಸ್. ಸಕ್ಕಡ್ ಧರ್ಮಾಂಚೆ ಉಲಯ್ತಾತ್, 42 ವಯ್ರ್ ಪಂಗಡ್ ಆಸಾತ್ ಮಾತ್ರ್ ನ್ಹಯ್ 6 ಲಿಪಿಂನಿ ಕೊಂಕ್ಣಿ ಬರಯ್ತಾತ್. ಹೆಂ ಸರ್ವ್ ತುಮಿ ಜಾಣಾಂತ್. ಪುಣ್ ಸಬಾರ್ ಲೊಕಾಕ್ ಕಳಿತ್ ನಾತ್‍ಲ್ಲೆಂ ಕಿತೆಂಗೀ ಮ್ಹಳ್ಯಾರ್, ಆಮ್ಚ್ಯಾ ಕೊಂಕ್ಣೆಂತ್ ಅಸ್ಪೃಶ್ಯತೆಚೆಂ ಅಧಿಕೃತ್ ಆಚರಣ್ ಚಲ್ತಾ ಮ್ಹಣ್!

ವ್ಹಯ್. ಅಗೋಸ್ತ್ 20ವೆರ್ ಮಾನ್ಯತಾ ದಿವಸ್ ಮ್ಹಣ್ ಕೊಂಕ್ಣಿ ಪರ್ಜಾ ಸಂಭ್ರಮ್ತಾ. ಮಂಗ್ಳುರಾಂತ್‍ಯೀ ಆಚರಣ್ ಜಾತಾ. ಭಾರತಾಚ್ಯಾ 22 ರಾಷ್ಟ್ರೀಯ್ ಭಾಸಾಂ ಪಯ್ಕಿ ಆಮ್ಚಿ ಕೊಂಕ್ಣಿಯೀ ಏಕ್ ಮ್ಹಣ್ ಉತ್ಸವ್ ಚಲಯ್ತಾಂವ್. ಪುಣ್ ಖರ್‍ಯಾನ್ ಹ್ಯಾ ಸಂಭ್ರಮಾಕ್ ಅರ್ಥ್‌ಚ್ ನಾ ಮ್ಹಳ್ಯಾರ್ ತುಮಿ ಪಾತ್ಯೆಜೆಚ್.

ಲಿಪಿಚ್ಯಾ ನಾಂವಾನ್ ಸಾಹಿತ್ಯಾಚೆರ್ ಅಸ್ಪೃಶ್ಯತಾ!

ಕೊಂಕ್ಣಿ ಭಾಸ್, ಲಾಂಬ್ ಕಾಳಾಚ್ಯಾ ಆಂದೋಲನ್, ಸಾಕ್ರಿಫಿಸಾ ಮುಖಾಂತ್ರ್, ಗೊಂಯಾಂತ್ 1987ವ್ಯಾ ವರ್ಸಾ ಅಧಿಕೃತ್ ರಾಜ್ಯ್ ಭಾಸ್ ಜಾಲ್ಲಿ. ತ್ಯಾ ಪ್ರಾಸ್ ಪಯ್ಲೆಂ, 1975 ಇಸ್ವೆಂತ್ ಡೆಲ್ಲಿ ಸಾಹಿತ್ಯ್ ಅಕಾಡೆಮಿನ್ ಕೊಂಕ್ಣೆಕ್ ಪರಿಗಣನ್ ಕೆಲ್ಲೆಂ. 1992 ಇಸ್ವೆಂತ್ ಅತೀ ವ್ಹಡ್ ಮಾನ್, ರಾಷ್ಟ್ರಾಚ್ಯಾ ಸಂವಿಧಾನಾಚ್ಯಾ 8ವ್ಯಾ ವೊಳೆರಿಂತ್ ಬಸ್ಕಾ ಲಾಭೊನ್ ಕೊಂಕ್ಣಿ ಕರೆನ್ಸಿ ನೋಟಾಂನಿ ಸೊಭ್ಲಿ, ರಾಷ್ಟ್ರೀಯ್ ಭಾಸ್ ಜಾಲಿ.

ಹೆಂ ಭಾಯ್ಲೆಂ ಶೃಂಗಾರ್ ಮಾತ್ರ್. ಕಿತ್ಯಾಕ್ ಮ್ಹಳ್ಯಾರ್ ಭಾಶೆಚ್ಯಾ ನಾಂವಾಂನ್ ಮೆಳ್ಚ್ಯೊ ಸರ್ವ್ ಸವ್ಲತ್ಯೊ, ಅನುದಾನ್ ಆನಿ ಪ್ರಶಸ್ತ್ಯೊ ಫಕತ್ ಎಕಾ ವರ್ಗಾಕ್ ಮಾತ್ರ್ ಸೀಮಿತ್ ಜಾಲ್ಯೊ! ಹೆಂ ಅಪ್ರಜಾಸತ್ತಾತ್ಮಕ್ ಮಾತ್ರ್ ನ್ಹಯ್ ಅಸಾಂವಿಧಾನಿಕ್‍ಯೀ ವ್ಹಯ್. ಹೊ ಉದ್ದೇಶ್‍ಪೂರ್ವಕಿಂ ಜಾಲ್ಲೊ ಅನ್ಯಾಯ್ ಶಿವಾಯ್ ಫರಾಮಸ್ ನ್ಹಯ್.

ತುಮಿ ಜಾಣಾಂತ್ ಕೊಂಕ್ಣಿ ಲೋಕ್ ಫಕತ್ ಗೊಂಯಾಂತ್ ಮಾತ್ರ್ ನಾ. ಗೊಂಯ್ಕಾರಾಂ ಪ್ರಾಸ್ ಚಡ್ ಮಾಪಾನ್, ವ್ಹಡ್ ಮೊಗಾನ್ ಆನಿ ಅಭಿಮಾನಾನ್ ಕೊಂಕ್ಣಿ ಭಾಸ್ ಜಗವ್ನ್ ದವರ್‌ಲ್ಲಿ ಗೊಂಯ್ ಸಾಂಡುನ್ ಹೆರ್ ಪ್ರದೇಶಾಂನಿ ವಸ್ತೆಕ್ ಲಾಗ್‍ಲ್ಲ್ಯಾ ಪುರ್ವಜಾಂನಿ. ಗುಜರಾತ್, ಮಹಾರಾಷ್ಟ್ರ, ಕರ್ನಾಟಕ ಆನಿ ಕೇರಳಾಚ್ಯಾ ಕರಾವಳಿ ಪ್ರದೇಶಾಂನಿ ಕೊಂಕ್ಣಿ ಲೋಕ್ ಭರ್ಲಾ. ತ್ಯಾ ಸರ್ವಾಂನಿ ಆಜೂನ್ ಕೊಂಕ್ಣಿಚ್ ಆಪ್ಲಿ ಮಾಂಯ್‍ಭಾಸ್ ಜಾವ್ನ್ ಜಿವಾಳ್ ದವರ್ಲ್ಯಾ.

ಇತ್ಲ್ಯಾ ಶೆಕ್ಡ್ಯಾಂನಿ, ತೆಂಯೀ ಸ್ಥಳೀಯ್ ಬಳ್ವಂತ್ ಭಾಶೆಂಚ್ಯಾ ಪ್ರಭಾವಾ ಮಧೆಂಯೀ, ಲೊಕಾನ್ ಕೊಂಕ್ಣಿ ಜಗಯ್ಲಿ ಮ್ಹಳ್ಯಾರ್ ತೆಂ ವರ್ತೆಂ ಸಾಧನ್. ತುಳುನಾಡುಂತ್ ತುಳು, ಕನ್ನಡ ಆನಿ ಮಲಯಾಳಿ ಭಾಸೊ ಪ್ರಧಾನ್ ತರೀ ಇತ್ಲಿಂ ವರ್ಸಾಂಭರ್ ಕೊಂಕ್ಣಿ ಫುಲ್ಲಿ ಆನಿ ಗ್ರೇಸ್ತ್ ಜಾಲಿ ತರ್ ತಾಕಾ ಆಮ್ಚ್ಯಾ ಮಾಲ್ಗಡ್ಯಾಂಚಿ ಬದ್ಧತಾ ಕಾರಣ್.

ಪುಣ್ ಇತ್ಲ್ಯಾ ಶ್ರದ್ಧೆನ್ ಕೊಂಕ್ಣೆಕ್ ಜೀವ್ ದಿಲ್ಲ್ಯಾ ಲೊಕಾಕ್ ಕಸಲೊಚ್ ಮಾನ್ ನಾ ಮ್ಹಣ್ತಾನಾ ತುಮ್ಕಾಂ ಕಶೆಂ ಭೊಗ್ತಾ?

ಸಾಹಿತ್ಯಾಕ್ ನ್ಹಯ್ ಲಿಪಿಯೆಕ್ ಮಾನ್!?

ಭಾಸ್ ಉಲಯ್ಲ್ಯಾರ್ ಜಿವಂತ್ ಉರ್ತಾ. ಪುಣ್ ಸಾಹಿತ್ಯಾಂತ್ ಏಕ್ ಭಾಸ್ ನಾತ್ಲ್ಯಾರ್ ತಾಚಿ ಗ್ರೇಸ್ತ್‌ಕಾಯ್ ಉಜ್ವಾಡಾಕ್ ಯೇನಾ. ಕೊಂಕ್ಣಿ ಭಾಶೆಚೆಂ ಸಾಹಿತ್ಯಿಕ್ ಭಂಡಾರ್ ಕಾಂಯ್ ಉಣ್ಯಾಚೆಂ ನ್ಹಯ್. ವೆವೆಗ್ಳ್ಯಾ ಪ್ರದೇಶಾಂಕ್ ಪಾವ್ಲೆಲ್ಯಾ ಲೊಕಾಚ್ಯಾ ಪಿಳ್ಗೆನ್ ಕೊಂಕ್ಣಿ ಬರಂವ್ಕ್ ಧರ್ತಾನಾ, ಸ್ವಾಭಾವಿಕ್‍ಪಣಿಂ ಸ್ಥಳೀಯ್ ಲಿಪಿಚ್ ಆಪ್ಣಾಯ್ಲಿ. ತ್ಯಾ ವರ್ವಿಂಚ್ ಕನ್ನಡ, ಮಲಯಾಳಂ, ಪರ್ಸೋ ಅರೇಬಿಕ್ ಆನಿ ಗುಜರಾತಿ ಲಿಪಿಂನಿ ಕೊಂಕ್ಣಿ ಬರಪ್ ಉದೆಲ್ಲೆಂ.

ಕನ್ನಡ ಲಿಪಿಂತ್ ಕರ್ನಾಟಕಾಚ್ಯಾ ಕೊಂಕ್ಣಿ ಬರವ್ಪ್ಯಾಂನಿ ರಚ್‍ಲ್ಲೆಂ ಸಾಹಿತ್ಯ್ ಆಮಿ ಚಾಕ್ಲಾಂ. 20ವ್ಯಾ ಶೆಕ್ಡ್ಯಾಂತ್ ಹಾಂಗಾ ಸಾಹಿತ್ಯ್, ಪತ್ರಿಕೋದ್ಯಮ್, ಸಂಗೀತ್, ನಾಟಕ್, ಧಾರ್ಮಿಕ್ ಆನಿ ಹೆರ್ ಶೆತಾಂನಿ ಕೊಂಕ್ಣೆಚೆಂ ಸಾಹಿತ್ಯ್ ರಚನ್ ಶಿಖರಾಕ್ ಪಾವ್‍ಲ್ಲೆಂ. 1950 ಇಸ್ವೆಂತ್ ಜೊ.ಸಾ. ಅಲ್ವಾರಿಸಾಚಿ ‘ಆಂಜೆಲ್’ ಕಾದಂಬರಿ ಕನ್ನಡ ಲಿಪಿಚಿ ಪಯ್ಲಿ ಕಾದಂಬರಿ ಜಾವ್ನ್ ಪಾಟಾರ್ ಚಡ್ತಚ್, ಒಲಿಂಪಿಕ್ಸಾಂತ್ ಜಿಕ್ಚ್ಯಾಕ್ ಕಶೆಂ ಸ್ಪರ್ಧೊ ಚಲ್ತಾ ಪಳೆ, ತಶೆಂ ಹಾಂಗಾ ಆಮ್ಚೆ ಮಾಲ್ಗಡೆ ಬರವ್ಪಿ ಕೊಂಕ್ಣಿ ಸಾಹಿತ್ಯ್ ರಚನಾಂತ್ ವ್ಯಸ್ತ್ ಜಾಲ್ಲೆ.

ತಶೆಂ ಕನ್ನಡ ಲಿಪಿಚ್ಯಾ ಕೊಂಕ್ಣೆಂತ್ ಹಜಾರೊಂ ಹಜಾರ್ ಕೃತಿಯೊ ಉದೆಲ್ಯೊ. ಹಜಾರಾಂನಿ ಲೇಖಕ್, ಸಾಹಿತಿ ಉಬ್ಜಲೆ. ಕೊಂಕ್ಣಿ ಪತ್ರಾಂನಿ, ಪ್ರಕಾಶಕಾಂನಿ ತಾಂಚೆಂ ಸಾಹಿತ್ಯ್ ಲೊಕಾಕ್ ಪಾವಯ್ಲೆಂ. ಲೋಕ್ ಪತ್ರಾಂ, ಬೂಕ್ ವಾಚುಂಕ್ ಅತ್ರೆಗ್ಲೆ. ಹಿ ಏಕ್ ರೋಚಕ್ ಚರಿತ್ರಾ. ಕೊಂಕ್ಣಿ ಭಾಶೆಚೊ ಪೋಸ್ ದಳ್ಬಾರಾನ್ ಸಾದರ್ ಜಾಲೊ.

ಅಶೆಂ ಜೊ.ಸಾ. ಅಲ್ವಾರಿಸ್ ‘ಕೊಂಕ್ಣಿ ಸಾಮಾಜಿಕ್ ಕಾದಂಬರಿಂಚೊ ಬಾಪಯ್’ ಮ್ಹಣ್ ಪಾಟಾರ್ ಚಡ್ಲ್ಯಾರ್, ವಿ.ಜೆ.ಪಿ. ಸಲ್ಡಾಞ (ಖಡಾಪ್) ‘ಚಾರಿತ್ರಿಕ್ ಕಾದಂಬರಿಂಚೊ ಬಾಪಯ್’ ಜಾವ್ನ್ ವರ್ತವ್ಲೊ. ಎ.ಟಿ. ಲೋಬೊ ಸುದೀರ್ಘ್ ಕಾದಂಬರಿಂಕ್ ನಾಂವಾಡ್ಲೊ. ತಾಣಿಂ ರಚುನ್ ದಿಲ್ಲಿ ವಾಟ್ ಹಜಾರೊಂ ಬರವ್ಪ್ಯಾಂಕ್ ದೇಖ್ ಜಾಲಿ. ಹರ್ ವರ್ಸಾ ಕಾಣಿ, ಕಾದಂಬರಿ, ನಾಟಕ್, ಪದಾಂ ಉಬ್ಜೊನ್ ವ್ಹಾಳ್ಳಿಂ, ಪರ್ಜಳ್ಳಿಂ.

ಪುಣ್, ಹಾಯ್ ಕಟಾ, ಹ್ಯಾ ಸಕ್ಡಾಕ್ ಕಿತೆಂಚ್ ಮೋಲ್ ನಾ ಮ್ಹಳ್ಯಾರ್ ತುಮಿ ಪಾತ್ಯೆತಾತ್‍ಗೀ? ಕೊಂಕ್ಣಿ ಭಾಶೆಕ್ ಸಾಂವಿಧಾನಿಕ್ ಮಾನ್ಯತಾ ಮೆಳೊನ್‍ಯೀ ಹ್ಯಾ ಕೊಣಾಯ್ ಬರ್ಪಿಂಚ್ಯಾ ಕೊಂಕ್ಣಿ ಸಾಹಿತ್ಯಾಕ್, ಖಂಡಿತ್ ಜಾವ್ನ್, ಕುಸ್ಕುಟಾಚೆಂ ಮೋಲ್ ನಾ ಜಾಲೆಂ!

ಕಾರಣ್, ಕೊಂಕ್ಣಿ ಸಾಹಿತ್ಯಾಕ್ ಮಾನ್ಯತಾ ದೀನಾಸ್ತಾನಾ, ಎಕಾ ಲಿಪಿಕ್ ಮಾತ್ರ್ ಲೆಕಾಕ್ ಧರ್ಚೊ ಮತ್ಲಬ್ ಜಾರಿಯೆಕ್ ಹಾಡ್‍ಲ್ಲೆಂ ಕ್ರಮ್. ಗೊಂಯಾಂತ್ ಕೊಂಕ್ಣಿ ರಾಜ್ಯ್ ಭಾಸ್ ಜಾತಾನಾ ಹೊ ಅನ್ಯಾಯ್ ‘ಅಧಿಕೃತ್’ ಜಾಲೊ. ಡೆಲ್ಲಿ ಸಾಹಿತ್ಯ್ ಅಕಾಡೆಮಿನ್‍ಯೀ ತಶೆಂಚ್ ಕೆಲೆಂ. ಹೆರ್ ಕಡೆನ್‍ಯೀ ತೆಂಚ್ ಥಿರ್ ಕೆಲೆಂ. ಆನಿ ತಶೆಂ ಕೊಂಕ್ಣಿ ಭಾಶೆಕ್ ಮೆಳ್ಚಿ ಮಾನ್ಯತಾ ಫಕತ್ ‘ಎಕಾ ಸೀಮಿತ್ ವರ್ಗಾಕ್ ಮಾತ್ರ್’ ಮ್ಹಣ್ ಮ್ಹೊರ್ ದಾಂಬ್ಲಿ.

ಹೆಂ ತುಮ್ಕಾಂ ವಿಚಿತ್ರ್ ದಿಸೊಂಕ್ ಪುರೊ. ಪುಣ್ ವಾಸ್ತವ್ ಸತ್. ಕೊಂಕ್ಣಿ ಭಾಶೆಚ್ಯಾ ಸಾಹಿತ್ಯಾಕ್ ಜ್ಞಾನಪೀಠ ಪ್ರಶಸ್ತಿ, ಅಕಾಡೆಮಿ ಪ್ರಶಸ್ತಿ ಧರುನ್ ಹರ್ ಪುರಸ್ಕಾರ್, ಮಾನ್ ಮೆಳ್ತಾನಾ ಹೆಂ ಕಸಲೆಂ ನವೆಂಚ್ ಸಂಶೋಧನ್ ಮ್ಹಣ್ ತುಮಿ ಕೊಣೀ ವಿಚಾರ್ಲ್ಯಾರ್, ತುಮಿ ಜಾಣಾಂ ಜಾಂವ್ಕ್ ಜಾಯ್ತೆಂ ಆಸಾ ಮ್ಹಣ್ ಅರ್ಥ್. ಕಿತ್ಯಾಕ್ ಮ್ಹಳ್ಯಾರ್ ವಯ್ಲೆಂ ರಾಜಾಂವ್ ವಾ ದೃಷ್ಟಾಂತಾಂ ಸಾರ್ಕೆಂ ಸಮ್ಜಜೆ ಪಡ್ತಾ.

ಪ್ರಶಸ್ತಿ ಕೊಣಾಕ್ ಮ್ಹಣ್ ಪಯ್ಲೆಂಚ್ ಫಿಕ್ಸ್!

ವ್ಹಯ್, ವಯ್ಲ್ಯೊ ಪ್ರಶಸ್ತ್ಯೊ ಕೊಂಕ್ಣೆಕ್ ಮೆಳ್ಳ್ಯಾತ್. ಮಂಗ್ಳುರಿ, ಕನ್ನಡ ಲಿಪಿಂತ್ ಬರಯ್ಲೆಲ್ಯಾಂಕೀ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ ಮೆಳ್ಳ್ಯಾತ್. ಅಜ್ಯಾಪ್ ಪಾವನಾಕಾತ್, ತಾಂಚ್ಯಾ ಸಾಹಿತ್ಯಾಕ್ ತ್ಯೊ ಪ್ರಶಸ್ತ್ಯೊ ಸೊಧುನ್ ಆಯಿಲ್ಲ್ಯೊ ಬಿಲ್ಕುಲ್ ನ್ಹಯ್! ಪರತ್ ವಾಚಾ, ಆಮ್ಚ್ಯಾ ಸಾಹಿತಿಂನಿ ಲಿಖ್‍ಲ್ಲ್ಯಾ ಸಾಹಿತ್ಯಾಕ್ ಹ್ಯೊ ಪ್ರಶಸ್ತ್ಯೊ ಮೆಳ್‍ಲ್ಲ್ಯೊ ನ್ಹಯ್.

ತರ್ ಕಿತ್ಯಾಕ್ ಮೆಳ್ಳ್ಯೊ ಮ್ಹಳ್ಯಾರ್ ತಾಣಿಂ ಕನ್ನಡ ಲಿಪಿಂತ್ ಬರಯಿಲ್ಲೆಂ ಸಾಹಿತ್ಯ್ ಪ್ರಶಸ್ತೆ ಖಾತಿರ್, ವ್ಯವಸ್ಥೆಂತ್ ಅಧಿಕೃತ್ ಮ್ಹಣ್ ಥಿರಾಯಿಲ್ಲ್ಯಾ ಲಿಪಿಯೆಂತ್ ತಿ ಕೃತಿ ಪ್ರಕಟ್ ಕೆಲ್ಲ್ಯಾನ್ ಮಾತ್ರ್ ಮೆಳ್‍ಲ್ಲ್ಯೊ. ಎಕ್ಲ್ಯಾನ್ ಬರಯಿಲ್ಲ್ಯಾ ಸಾಹಿತ್ಯಾಕ್ ಲೆಕಾಕ್ ಧರಿನಾಸ್ತಾನಾ, ತಿ ಫಲಾಣ್ಯಾ ಎಕಾ ಲಿಪಿಂತ್ ಪ್ರಕಟ್ ಕೆಲ್ಯಾರ್ ಮಾತ್ರ್ ಪ್ರಶಸ್ತಿ, ಅನುದಾನ್ ಇತ್ಯಾದಿ ದೀಜೆ ಮ್ಹಣ್ ಖಂಚ್ಯಾ ಪ್ರಜಾಪ್ರಭುತ್ವಾಂತ್ ಆನಿ ಸಂವಿಧಾನಾಂತ್ ಸಾಂಗ್ಲಾಂ?

ಆನ್ಯೇಕ್ ವಿಪರ್ಯಾಸ್ ಮ್ಹಳ್ಯಾರ್, ಹೆಂ ಸಬಾರಾಂನಿ ಉಗ್ತ್ಯಾನ್ ಸಾಂಗ್ಲಾಂ, ಕೊಣಾಕ್ ಮುಖ್ಲಿ ಪ್ರಶಸ್ತಿ ದಿಂವ್ಚೆಂ ಮ್ಹಣ್ ಥೊಡೆಚ್ ಜಣ್ ಇತ್ಯರ್ಥ್ ಕರ್ತಾತ್. ಫಲಾಣ್ಯಾ ಮನ್ಶ್ಯಾಕ್ ತೆ ವಿಂಚ್ತಾತ್ ಆನಿ ಪ್ರಶಸ್ತೆ ಖಾತಿರ್ ಜಾಯ್ ತೊ ವ್ಯವಹಾರ್ ಚಲ್ತಾ. ಮ್ಹಳ್ಯಾರ್, ಸಾಹಿತ್ಯಾಕ್ ಸೊಧುನ್ ಪ್ರಶಸ್ತಿ ದಿಂವ್ಚೆಂ ನ್ಹಯ್. ಹಾಂಗಾ ಪ್ರಶಸ್ತಿ ‘ಕೊಣಾಕ್’ ದೀಜೆ ಮ್ಹಣ್ ಥೊಡೆ, ಪಯ್ಲೆಂಚ್, ನಿರ್ಧಾರ್ ಕರ್ತಾತ್ ಆನಿ ತ್ಯಾ ತೆಕಿದ್ ಕ್ರಮಾಂ ಉಪ್ರಾಂತ್ ಚಲ್ತಾತ್.

ವಿಚಿತ್ರ್ ಮ್ಹಳ್ಯಾರ್ ಕನ್ನಡ ಆನಿ ಹೆರ್ ಲಿಪಿಂಕ್ ಜಾಲ್ಲ್ಯಾ ಅನ್ಯಾಯಾ ವಿರೋಧ್ ಘಟ್ಟ್ ಝುಜ್ ಚಾ.ಫ್ರಾ. ಡಿಕೋಸ್ತಾ ಆನಿ ಎಡ್ವಿನ್ ಜೆ.ಎಫ್. ಸೊಜಾನ್ ಮಾಂಡ್‍ಲ್ಲೆಂ. ನಿಮಾಣೆಂ ತಾಣಿಂಚ್ ತೆಂ ಧೋರಣ್ ಮೊಡುನ್ ಬೂಕ್ ನಾಗರಿಂತ್ ಛಾಪುನ್ ಪ್ರಶಸ್ತಿ ಘೆಜೆ ಪಡ್‍ಲ್ಲೆಂ ದುರಂತ್ ಕೊಂಕ್ಣೆಚೆಂ. ಹಾಂಚೆಂ ಸಾಹಿತ್ಯ್ ರಚನ್ ಜಾಲ್ಲೆಂ ಕನ್ನಡ ಲಿಪಿಂತ್. ಪುಣ್ ಪ್ರಶಸ್ತೆ ಖಾತಿರ್‌ಚ್ ಮ್ಹಣ್ ನಾಗರಿ ಲಿಪಿಂತ್ ಪ್ರಕಟ್ ಕರಿಜೆ. ನಾ ತರ್ ಪ್ರಶಸ್ತಿ ಮೆಳನಾ! ಇತ್ಲೆಂ ತುಮಿ ಸಮ್ಜಲ್ಯಾರ್ ಪುರೊ.

ಅಶೆಂ ಕನ್ನಡ ಲಿಪಿಚ್ಯಾ ಬರವ್ಪ್ಯಾಂಕ್ ಕಿತೆಂಯೀ ಪ್ರಶಸ್ತಿ, ಪುರಸ್ಕಾರ್ ವಾ ಅನುದಾನ್, ಅಕಾಡೆಮಿ ವಾ ಗೊಂಯ್ ವಿಶ್ವವಿದ್ಯಾಲಯಾ ಥಾವ್ನ್ ಮೆಳ್ಳಾ, ಮೆಳ್ತಾ ತರ್ ತೆಂ ಫಕತ್ ‘ನಾಗರಿ ಲಿಪಿಕ್’ ಮಾತ್ರ್. ಹೆಂ ಅಕ್ರಮ್ ತಾರತಮ್ಯ್ ಅಧಿಕೃತ್ ರಿತಿನ್ ಸಂಭ್ರಮ್ಚೆ, ಸಮರ್ಥನ್ ಕರ್ಚೆ, ಜುದಾಸಾಚ್ಯಾ ಕಾಸ್ತಾಚೆ ಮನಿಸ್, ಆಮ್ಚ್ಯಾ ಮಧೆಂಚ್ ಆಸಾತ್ ಮ್ಹಳ್ಳೆಂ ಆನ್ಯೇಕ್ ದುರಂತ್.

ಹಾಂತುಂ ಕಿತೆಂ ಉಣೆಂಪಣ್, ನಾಗರಿ ‘ಅಧಿಕೃತ್’ ತರ್ ತಾಂತುಂಚ್ ಛಾಪ್ಚ್ಯಾಂತ್ ಕಿತೆಂ ಬಾಧಕ್ ಮ್ಹಣ್ತಿತ್ ಕೊಣೀ. ಹಿ ವ್ಯವಸ್ಥಾ ಜಾರಿಯೆಕ್ ಹಾಡುನ್ ಕೊಂಕ್ಣಿ ಸಾಹಿತ್ಯಾಕ್ ಆನಿ ಸಾಹಿತಿಂಕ್ ಮಸ್ತುನ್ ಘಾಲ್ಚೆಂ ಮಿಸಾಂವ್‍ಯೀ ಚಲ್ಲಾಂ. ಕೊಂಕ್ಣೆಚ್ಯಾ ಒಟ್ಟುಕ್ ಸಾಹಿತ್ಯ್ ನಿರ್ಮಾಣಾಂತ್ 75-80% ವಾಂಟೊ ಕನ್ನಡ ಲಿಪಿಚೊ ತರ್, 15% ರೋಮಿ ಲಿಪಿಚೊ ಆಸಾ. ಮ್ಹಳ್ಯಾರ್ 90+% ವಾವ್ರ್, ರಚನ್ ಹ್ಯಾ ಲಿಪಿಂನಿ ಜಾಲಾಂ. ಬಹುಮತಾಚ್ಯಾ ಆಧಾರಾನ್ ಧರ್ಲೆಂ ತರೀ ಕನ್ನಡ ಲಿಪಿಕ್ ಪಯ್ಲೊ ಮಾನ್ ಮೆಳಜೆ ನ್ಹಯ್ವೇ? ಪುಣ್ ಹಾಂಗಾ ತದ್ವಿರುದ್ಧ್! ಹೆಂ ಕೊಣೆಂಯೀ ಸಾರ್ಕೆಂ ಮ್ಹಣ್ಚೆಂ ಕಶೆಂ?

ಅತೀ ಉತ್ಕೃಷ್ಟ್ ಸಾಹಿತ್ಯ್ ಕೃತಿಯೊ ಹಾಂಗಾ ಉದೆಲ್ಯಾತ್. ವಿ.ಜೆ.ಪಿ. ಸಲ್ಡಾನ್ಹಾ, ಎ.ಟಿ. ಲೋಬೊ ಆನಿ ಜೊ.ಸಾ. ಅಲ್ವಾರಿಸ್ ಸಂಸಾರಾಚ್ಯಾ ಶ್ರೇಷ್ಠ್ ಸಾಹಿತಿಂಚ್ಯಾ ಪಂಕ್ತೆರ್ ಸೊಭ್ಜೆ ಕೃತಿಕಾರ್. ತಾಂಕಾಂ ಕೊಣಾಯ್ಕೀ ಅಕಾಡೆಮಿ ಪ್ರಶಸ್ತಿ ಮೆಳೊಂಕ್ ನಾ. ಮೆಳೊಂಕ್ ನಾ ಮ್ಹಣ್ಚ್ಯಾ ಪ್ರಾಸ್ ‘ದೀಂವ್ಕ್ ನಾ’ ಮ್ಹಣ್ಚೆಂಚ್ ಸೂಕ್ತ್.

ಭಾಂಗಾರ್ ಸಾಹಿತ್ಯಾಕ್ ನೆಗಾರ್ಲೆಂ!

ಎ.ಟಿ. ಲೋಬೊಚಿ ‘ವೇಳ್-ಘಡಿ’ ಕೃತಿ ವಿಶ್ವ್ ಮಾನ್ಯತೆಕ್ ಫಾವೊ ಜಾಲ್ಲಿ ಅತ್ಯದ್ಭುತ್ ಕಾದಂಬರಿ. ವಿ.ಜೆ.ಪಿ. ಸಲ್ಡಾನ್ಹಾಚ್ಯೊ ‘ದೆವಾಚ್ಯೆ ಕುರ್ಪೆನ್’ (7) ಆನಿ ‘ಸಾಯ್ಬಾ ಭೊಗೊಸ್’ (5) ಚಾರಿತ್ರಿಕ್ ಕಾದಂಬರಿ ಶಿಂಕ್ಳ್ಯೊ ಉತ್ಕೃಷ್ಟ್ ಸಾಹಿತ್ಯ್ ದಾಯ್ಜ್. ಐರಿನ್ ಪಿಂಟೊಚಿ ‘ಮ್ಹಜೆಂ ಅಂತಸ್ಕರ್ನ್ ವಿಸರ್ಚೆಂ ನಾ’ ಆನ್ಯೇಕ್ ಅದ್ಭುತ್. ಡೊ. ಎಡ್ವರ್ಡ್ ನಜ್ರೆತಾಚ್ಯೊ ಮಟ್ವ್ಯೊ ಕಾಣಿಯೊ ಕೊಂಕ್ಣೆಂತ್ಲೆಂ ಅಮೊಲಿಕ್ ಸಾಹಿತ್ಯ್. ಹಿಂ ಥೊಡಿಂಚ್ ದೃಷ್ಟಾಂತಾಂ. ಅಸಲ್ಯಾ ಸಕ್ಕಡ್ ಅವ್ವಲ್ ಭಾಂಗ್ರಾಳ್ಯಾ ಸಾಹಿತ್ಯಾಕ್ ಸಾಹಿತ್ಯ್ ಅಕಾಡೆಮಿ ಮಾಂದಿನಾ! ಹೆಂ ಕಸಲೆಂ ಧೋರಣ್?

ಅಸಲೊ ಅನ್ಯಾಯ್, ಉದ್ದೇಶ್‍ಪೂರ್ವಕ್ ಅನಾದರ್/ವಂಚನ್ ಆಜೂನ್ ಚಾಲ್ತೆರ್ ಆಸಾ. ಹ್ಯಾ ವರ್ವಿಂ ಚಿಮ್ಟಿಭರ್ ರಚ್ತೆಲ್ಯಾಂಕ್ ಸರ್ಕಾರಾಚೆಂ ಸಗ್ಳೆಂ ಫಾವೊ ಜಾತಾ. ಲೊಕಾಚ್ಯಾ ಟ್ಯಾಕ್ಸಾಚೊ ದುಡು ಫಕತ್ ಮೂಟ್‍ಭರ್ ಮನ್ಶ್ಯಾಂಚ್ಯಾ ಫಾಯ್ದ್ಯಾಕ್!? ಕಾಂಟ್‍ಭರ್ ರಚ್ಲೆಲ್ಯಾಂಕ್ ಕುಸ್ಕುಟಾಚೊ ಮಾನ್, ಕಾಸಾಚೆಂ ಮೋಲ್ ನಾ. ಹೆಂ ಎಕಾ ಪ್ರಜಾಪ್ರಭುತ್ವಾಂತ್ ಘಡ್ತಾ ಮ್ಹಳ್ಯಾರ್ ತಾಚೆ ತಸಲೆಂ ವಿಚಿತ್ರ್ ಆನಿ ದುರಂತ್ ಹೆರ್ ಕಿತೆಂ ಆಸ್ಯೆತ್?

ಝುಜ್ಲ್ಯಾ ಶಿವಾಯ್ ಮೆಳನಾ ಪರಿಹಾರ್

ಸರ್ವ್ ಸಕ್ಕಡ್ ಫಾಯ್ದೊ ಫಕತ್ ಎಕಾ ಲಿಪಿಕ್ ಮೆಳ್ಚೊ ದ್ರೋಹ್ ಆನಿ ಹೆರಾಂಕ್ ಜಾಂವ್ಚೊ ಅನ್ಯಾಯ್ ಇತ್ಲಿಂ ವರ್ಸಾಂ ಸೊಸ್‍ಲ್ಲೆಂಚ್ ಮಿಸ್ತೆರಾಚೆಂ. ಸರ್ಕಾರಾಚ್ಯಾ ನಿತಿಂತ್, ಯೋಜನಾಂನಿ ಹರ್ಯೆಕ್ಲ್ಯಾಕ್ ಹಕ್ಕ್ ಆಸಾ. ಕೊಣಾಯ್ಕೀ ಇನ್ಕಾರ್ ಕರುಂಕ್ ಫಾವೊ ನಾ. ಪುಣ್ ಇತ್ಲಿಂ ವರ್ಸಾಂ ಘೋರ್ ಅನ್ಯಾಯ್ ಸೊಸುನ್ ಆಮ್ಚ್ಯಾ ಬರವ್ಪ್ಯಾಂನಿ ಸೊಡ್‍ದೊಡ್ ಕೆಲ್ಲೆಂ ಪಾತ್ಯೆಂವ್ಕ್ ಜಾಯ್ನಾ. ಕಿತೆಂಚ್ ಕರುಂಕ್ ನಾ ಮ್ಹಣ್ ನ್ಹಯ್. ವೆಳಾ, ಕಾಳಾ, ಸಂದರ್ಭಾ ಪರ್ಮಾಣೆಂ ಥೊಡ್ಯಾಂನಿ ವೈಯಕ್ತಿಕ್ ಜಾವ್ನ್ ಆವಾಜ್ ಉಟಯ್ಲಾ. ಪುಣ್ ತೊ ನಿರ್ಣಾಯಕ್ ಜಾಂವ್ಕ್ ನಾ. ಮುಖ್ಯ್ ಜಾವ್ನ್, ಪರಿಹಾರ್ ಲಾಭ್ಚೆ ಖಾತಿರ್ ತೆಂ ಸಕೊಂಕ್ ನಾ.

ಕೊಂಕ್ಣಿ ಬರವ್ಪಿ ನಿರ್ಲಿಪ್ತ್?!

ಎಕಾಚ್ ಲಿಪಿಕ್ ಉಕಲ್ನ್ ಧರುನ್ ಹೆರ್ ಲಿಪಿಚ್ಯಾ ಸಮಗ್ರ್ ಸಾಹಿತ್ಯಾಕ್ ನೆಗಾರ್ಚೊ ಅನ್ಯಾಯ್ ವರ್ಸಾಂ ಥಾವ್ನ್ ಚಲ್ತಾ ತರೀ ಕನ್ನಡ ಲಿಪಿಚೆ ಬರವ್ಪಿ ನಿರ್ಲಕ್ಷ್ಯಾ ಕರುನ್ ಬಸ್ಲ್ಯಾತ್. ಅಪ್ರೂಪ್ ಥೊಡ್ಯಾಂನಿ ಪ್ರತಿಭಟನ್ ಕೆಲಾಂ. ಎಕ್ವಟಿತ್ ಜಾವ್ನ್, ಸಂಕಲ್ಪ್ ಆಪ್ಣಾವ್ನ್ ಶೆವಟಾಕ್ ಪಾಂವ್ಚ್ಯಾಕ್ ಝುಜಜೆ ಮ್ಹಣ್ ತಾಂಕಾಂ ಭೊಗ್‍ಲ್ಲೆಂ ದಿಸನಾ. ಆವಾಜ್ ಉಟಯಿಲ್ಲೆಚ್ ನಿಮಾಣೆಂ ‘ಪ್ರಶಸ್ತಿ ಜೊಡ್ಚ್ಯಾ ಖಾತಿರ್‌ಚ್ ಝುಜ್‍ಲ್ಲೆಗೀ?’ ಮ್ಹಣ್ ದುಬಾವ್ ಉಬ್ಜಶೆಂ ರಾಜಿ ಜಾಲೆ!? ಬರವ್ಪಿ ನ್ಹಯ್ ಆಸ್ಲೆಲ್ಯಾಂನಿಂಚ್ ಸಾಹಿತ್ಯ್ ಆನಿ ಸಾಹಿತಿಂಕ್ ಜಾಲ್ಲ್ಯಾ ಅನ್ಯಾಯಾ ವಿರೋಧ್ ಝುಜಜೆ ಪಡ್ಲೆಂ. ಆಪ್ಲ್ಯಾಚ್ ಹಕ್ಕಾಂ ಖಾತಿರ್ ಕಿತೆಂಯೀ ಕರಿನಾತ್‍ಲ್ಲ್ಯಾಂ ಥಾವ್ನ್ ಲೊಕಾನ್ ಕಿತೆಂ ಅಪೇಕ್ಷಿಯೆತ್?!!

ಗೊಂಯ್ಕಾರ್ ಉಟ್ಲ್ಯಾತ್, ಮಂಗ್ಳುರ್‌ಗಾರ್ ಜ್ಹೆಮೆತಾತ್?

ಹ್ಯಾ ದಿಸಾಂನಿ ಗೊಂಯಾಂತ್ ರೋಮಿ ಲಿಪಿಕ್ ರಾಜ್ಯ್ ಸರ್ಕಾರಾನ್ ಸಮಾಸಮ್ ಮಾನ್ಯತಾ ದೀಜೆ ಮ್ಹಣ್ ಪರತ್ ಆಂದೋಲನ್ ಸುರು ಜಾಲಾಂ. ವಿಧಾನ್‍ಸಭೆಂತ್ ತ್ಯಾ ವಿಶಿಂ ಕ್ರಮಾಂ ಘೆಂವ್ಕ್ ದಬಾವ್ ಘಾಲ್ಚೆಂ ಕಾಮ್ ಚಲೊನ್ ಆಸಾ. ಪುಣ್ ಕನ್ನಡ ಲಿಪಿಚೆ ಬರವ್ಪಿ ಸದಾಂಚೆಪರಿಂ ಕಿತೆಂಚ್ ಘಡೊಂಕ್ ನಾ ಮ್ಹಳ್ಳೆಪರಿಂ ನಿರ್ಲಿಪ್ತ್ ಆಸಾತ್!

ಪ್ರಜಾಪ್ರಭುತ್ವಾಂತ್ ಲೊಕಾಚೊ ತಾಳೊ ಮಹತ್ವಾಚೊ. ಲೊಕಾಚ್ಯಾ ಹಕ್ಕಾಂಕ್ ಇನ್ಕಾರ್ ಕರುಂಕ್ ಜಾಯ್ನಾ. ಮೋದಿ ಸರ್ಕಾರಾನ್ ಪಾರ್ಲಿಮೆಂಟಾಂತ್ ಜಾರಿಯೆಕ್ ಹಾಡ್‍ಲ್ಲೆಂ ಕಾನೂನ್‍ಂಚ್ ರೈತಾಂಚ್ಯಾ ಆಂದೋಲನಾ ವರ್ವಿಂ ರದ್ದ್ ಕರಿಜೆ ಪಡ್ಲೆಂ. ಹಕ್ಕಾಂ ಖಾತಿರ್ ಝುಜನಾತ್ಲೆಲ್ಯಾಂಕ್ ಕಿತೆಂಚ್ ಮೆಳನಾ. ಅದ್ಭುತ್ ಸಾಹಿತ್ಯ್ ರಚ್ಲೆಲ್ಯಾ ಕನ್ನಡ ಲಿಪಿಕ್ ಮಾನ್ ಮೆಳಜೆ ತರ್ ಆಮ್ಚ್ಯಾ ಬರವ್ಪ್ಯಾಂನಿ ಎಕ್ವಟಜೆ ಆನಿ ಝುಜಜೆ.

ನಾತ್ಲ್ಯಾರ್ ಫಕತ್ ಹರ್ ವರ್ಸಾ ಕೊಂಕ್ಣಿ ಮಾನ್ಯತಾ ದಿವಸ್ ಸಂಭ್ರಮುನ್ ಜೈ ಕೊಂಕಣಿ ಮ್ಹಣ್ ಉದ್ಗಾರೊನ್ ಘರಾ ವಚಜೆ. ತಿತ್ಲೆಂಚ್.

ಹ್ಯಾ ಲೇಖನಾಚೊ ಥೊಡೊ ವಾಂಟೊ ‘ರಾಕ್ಣೊ’ ಹಫ್ತ್ಯಾಳ್ಯಾಚ್ಯಾ ಅಗೋಸ್ತ್ 16-22, 2024ವ್ಯಾ ಆಂಕ್ಯಾಂತ್ ಪ್ರಕಟ್ ಜಾಲಾ.

ತುಮಿ ವಾಚಿಜೆಚ್ ಜಾಲ್ಲಿಂ ಆನಿ ಲಿಪಿ ಪೊಲಿಟಿಕ್ಸಾಚೊ ವಿವರ್ ಆನಿ ಮಹತ್ವ್ ಸಮ್ಜೊಂಕ್ ತುಮ್ಕಾಂ ಉಪ್ಕಾರ್ಚಿಂ ಹೆರ್ ಬರ್ಪಾಂ ಸಕಯ್ಲ್ ದಿಲ್ಯಾಂತ್. ಪುರ್ಸತ್ ಕರುನ್ ವಾಚಾ 👇👇

ನಾಗರಿ ಪೊಲಿಟಿಕ್ಸಾ ವಿರೋಧ್ ಚಾಟಿ ಬಿಜಾಯ್ತಾ ಚಾ.ಫ್ರಾ!

ಮಾನ್ಯತಾ ಮೆಳ್ಳ್ಯಾ ಖರೆಂ, ಪುಣ್ ಮಾನ್ ಹಾಡ್ಚೊ ಕೊಣೆಂ?

ಕರ್ನಾಟಕಾಂತ್ಲ್ಯಾ ಕೊಂಕ್ಣಿ ಭಾಶಿಕಾಂಚೆ ಸಮಸ್ಸೆ

ಕೊಂಕ್ಣೆಂತ್ ನಾಗರಿ ಲಿಪಿ ಥಾಪ್ಚ್ಯಾಕ್ ತೀವ್ರ್ ವಿರೋಧ್

ನಾಗರಿ ಲಿಪಿ ಆಮ್ಚೆರ್ ತಿ ಥಾಪ್ಚಿ ನಾಕಾ

ಆಮಿ ನಿತಿ ಖಾತಿರ್ ಝುಜ್ತಾಂವ್, ಪುಣ್..! ಎರಿಕ್

ಕರ್ನಾಟಕಾಂತ್ ಕೊಂಕ್ಣಿ ಭಾಶೆಕ್ ಕನ್ನಡ ಲಿಪಿಚ್ ಸೊಭ್ತಾ: ವಲ್ಲಿ ವಗ್ಗ

ಲಿಪಿ ರಾಜಕೀಯಾಚಿ ದಗಲ್ಬಾಜಿ ಚರಿತ್ರಾ!

ಕನ್ನಡ ಲಿಪಿ ಕೊಂಕ್ಣಿ ಭಾಷೆಚಿ ಸೈಂಭಿಕ್ ಲಿಪಿ: ಉಗ್ತೆಂ ಪತ್ರ್

ನಾಗರಿ ಲಿಪಿವಾದಿಂಚೆಂ ಗತ್ತಿಗಟ್ ಆನಿ ಪೊಕೊಳ್ ವಾದ್!

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

The post ಭಾಶೆಕ್ ಮಾನ್ಯತಾ ಮೆಳ್ಳ್ಯಾ ಮ್ಹಣ್ ಸಾಹಿತ್ಯಾಕ್ ಮಾನ್ ದೀನಾತ್‍ಲ್ಲೊ ಅನ್ಯಾಯ್ ಕಿತ್ಯಾಕ್ ಸೊಸಿಜೆ? appeared first on Budkulo.

ತಿತ್ಲೆಂಚ್ ನ್ಹಯ್, ‘ಎಲ್ಲಾ ಬಣ್ಣ ಮಸಿ ನುಂಗಿತು’ ಮ್ಹಳ್ಳೆಪರಿಂ ‘ಮಾಂಡ್ ಸೊಭಾಣ್’ ಆನಿ ಎರಿಕ್ ಒಝೇರಿಯೊನ್ ಚಾರ್ ದಶಕಾಂಚ್ಯಾ ಲಾಂಬ್ ಕಾಳಾ ಥಾವ್ನ್ ಬಾಂಧುನ್ ಹಾಡ್‍ಲ್ಲ್ಯಾ ಗೌರವಾಕ್ ಆನಿ ಘನತೆಕ್ ಹ್ಯಾ ಸಿನೆಮಾನ್ ಕರಿ ಪುಸ್ಲ್ಯಾ. ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಸಿನೆಮಾಂತ್ ಆಸಾ ಫಕತ್ ಕಸ್ತಳ್! ಎಫೀಶಿಯಂಟ್ ಮನ್ಶ್ಯಾಂನಿ ಅದ್ಭುತ್ ರಚಿಜೆ ಆಸ್‍ಲ್ಲೆ ಕಡೆನ್ ಡಿಫೀಶಿಯೆನ್ಸಿಚ್ ಅರ್ಹತಾ ಜಾವ್ನಾಸ್ಲೆಲ್ಯಾಂನಿ ಉತ್ಪನ್ನ್ ಕೆಲಾಂ ‘ಅಸ್ಮಿತಾಯ್’ ನ್ಹಯ್ ಬಗಾರ್ ‘ನಾಲಿಸಾಯ್’ ಮ್ಹಣ್ ತೀರ್ಪ್ ದಿವ್ಯೆತ್…

ಅಜ್ಯಾಪ್ತಾತ್? ಕಿತ್ಯಾಕ್ ಮ್ಹಣ್ ವಿಚಾರಾ… ಸಗ್ಳೆಂ ವಿವರಿಲಾಂ. ಸಂಪೂರ್ಣ್ ವಿವರ್ ದಿಲಾ. ಹೆಂ ಪುರ್ತೆಂ ಲೇಖನ್ ವಾಚ್ಲ್ಯಾರ್ ಅಶೆಂ ಕಿತ್ಯಾಕ್ ತೀರ್ಪ್ ದಿಲಾಂ ಮ್ಹಣ್ ತುಮ್ಕಾಂ ಸಮ್ಜತೆಲೆಂ ಮಾತ್ರ್ ನ್ಹಯ್, ಸಿನೆಮ್ ಪಳೆಲ್ಲೆಂ ತರ್ ತುಮಿಯೀ ಹ್ಯಾ ಸಂಗ್ತಿಂಕ್ ಸಹಮತ್ ವ್ಯಕ್ತ್ ಕರ್ತೆಲ್ಯಾತ್. ‘ಮಾಂಡ್ ಸೊಭಾಣ್’ ಆನಿ ಎರಿಕ್ ಒಝೇರಿಯೊಚೆರ್ ಅಪರಿಮಿತ್ ಮಾನ್, ಗೌರವ್ ಆಸೊನ್‍ಂಚ್ ಹೆಂ ಬರಯ್ಲಾಂ. ವ್ಯಕ್ತಿಗತ್ ಕಿತೆಂಯೀ ನಾ. ಪುಣ್, ಭಾಸ್, ಸಂಸ್ಕೃತೆಚ್ಯಾ ನಾಂವಾರ್ ನಿಕೃಷ್ಠ್ ಸಂಗ್ತಿ ಆಧಾರ್ಲ್ಯಾರ್, ಕೊಣೆಂಯೀ ತರೀ, ತೆಂ ಸೊಸುಂಕ್ ಆಮಿ ತಯಾರ್ ನಾಂವ್. ಹ್ಯಾ ಸಿನೆಮಾನ್ ಆನಿ ತಾಕಾ ಲಗ್ತಿ ವ್ಯಕ್ತಿಂನಿ ‘ಬಡಾಯ್’ ಉಲಯಿಲ್ಲೆಂಚ್ ಚಡ್ ಜಾಲೆಂ. ತೆಂ ಆಮ್ಕಾಂ ಅಶೆಂ ಖಡಾಖಡ್ ವಿಮರ್ಸೊ ಬರಂವ್ಕ್ ಪ್ರೇರಣ್.

-ಬರಯ್ಣಾರ್ ಡೊನಾಲ್ಡ್ ಪಿರೇರಾ
ಸಂಪಾದಕ್, ಬುಡ್ಕುಲೊ ಇ-ಪತ್ರ್

ಸುರ್ವೆರ್ ಹಾಂವೆಂ – “ಹೆಂ ಫಿಲ್ಮ್ ಕೊಂಕ್ಣಿ/ಕ್ರಿಸ್ತಾಂವ್ ಸಮುದಾಯಾಚ್ಯಾ ನದ್ರೆನ್ ಪಳೆವ್ಯೆತ್, ಪಳೆಜೆ ಜಾಲ್ಲೆಂ ಸಿನೆಮ್. ತ್ಯಾ ದೃಷ್ಟಿಕೋನಾಂತ್ ಹೆಂ ಬರೆಂ ಆಸಾ” – ಮ್ಹಣ್ ಸಾಂಗ್‍ಲ್ಲೆಂ, ಆನಿ ಲೊಕಾನ್ ಜರೂರ್ ಪಳೆಜೆ ಮ್ಹಣ್‍ಂಚ್ ಉಲೊ ದಿಲ್ಲೊ. ವಿಮರ್ಸೊ ಬರಂವ್ಚೆಂ ಹಕ್ಕ್ ಮ್ಹಾಕಾ ಆಸಾ, ತೆಂ ಕರಿಜೆಚ್ ಮ್ಹಣ್ ಭೊಗ್ಲ್ಯಾರ್ ಪರತ್ ಸಿನೆಮ್ ಪಳೆತಾಂ ಮ್ಹಳ್ಳೆಂ. ಹಾಂವೆಂ ಕಿತ್ಲೆ ಪಾವ್ಟಿಂ ಸಿನೆಮಾ ಪಳೆಲಾಂ ಮ್ಹಳ್ಯಾರ್ ತುಮಿ ಅಜ್ಯಾಪ್ತೆಲ್ಯಾತ್…

ಕೊಂಕ್ಣಿ ಪ್ರೇಕ್ಷಕ್ ಖಂಚ್ಯಾ ವರ್ಗಾಚೆ?

ಸಕಯ್ಲ್ ಹಾಂವೆಂ ಟಿಪಿಕಲ್ ಕೊಂಕ್ಣಿ ಪ್ರೇಕ್ಷಕ್ ಖಂಚ್ಯಾ ವರ್ಗಾಚೆ ಮ್ಹಣ್ ವಿವರಿಲಾಂ. ತ್ಯಾ ಪಯ್ಲೆಂ ಆಮ್ಚೆ ಯುವಜಣ್ ಆಸಾತ್, ತೆ ಕಸಲೆ ಮ್ಹಣ್ ಸಾಂಗ್ತಾಂ. ಮಂಗ್ಳುರ್ ಆಜ್ ಭಾರತಾಂತ್‍ಚ್ ಪ್ರಮುಖ್ ಕೇಂದ್ರ್; ರಾಜಕೀಯ್, ಆರ್ಥಿಕ್, ವ್ಯವಹಾರ್, ಶಿಕ್ಷಣ್, ಇಂಡಸ್ಟ್ರಿ, ಬ್ಯಾಂಕಿಂಗ್, ಮೆಡಿಕಲ್, ಧಾರ್ಮಿಕ್, ಪತ್ರಿಕೋದ್ಯಮ್ ಇತ್ಯಾದಿ ಧರುನ್ ಹರ್ ಸಂಗ್ತಿಂನಿ ಏಕ್ ಪೊಟೆನ್ಶಿಯಲ್ ಮಾರ್ಕೆಟ್ ಆಸ್ಚೆಂ ಕಮರ್ಶಿಯಲ್ ಸಕ್ತೆ ಕೇಂದ್ರ್. ಸ್ಟಾರ್‌ಡಮ್ ಆಸ್ಚಿಂ ತಶೆಂ ದೇಶ್ ವಿದೇಶೀ ಸಿನೆಮಾಂ ಹಾಂಗಾ ದಿಸಾಕ್ 100+ ಶೋ ಪ್ರದರ್ಶನ್ ಜಾತಾತ್. ಪ್ರಸ್ತುತ್ ತೀನ್ ಮಲ್ಟಿಪ್ಲೆಕ್ಸ್ (ನವೆಂ ಏಕ್ ಉದೆತಾ – ಜ್ಯೋತಿ ಕಾಂಪ್ಲೆಕ್ಸ್) ಆಸಾತ್. ಹಾಂಗಾ ಸಂಸಾರಾಂತ್ಲಿಂ ಸಕ್ಕಡ್ ಸಿನೆಮಾಂ ರಿಲೀಸ್ ಜಾತಾತ್ ಆನಿ ಬರೆಂಚ್ ಕಲೆಕ್ಷನ್ ಜಾತಾ. ಹಾಂವೆಂ ಪಳೆಲ್ಲ್ಯಾ ಪ್ರಕಾರ್ ಆಮ್ಚೆ ಕ್ರಿಸ್ತಾಂವ್ ವಿದ್ಯಾರ್ಥಿ, ಭುರ್ಗಿಂ, ಯುವಜಣಾಂ ವ್ಹಡ್ ಸಂಖ್ಯಾನ್ ಸಿನೆಮಾಂ ಪಳೆತಾತ್. ಅತ್ಯದ್ಭುತ್ ಹಾಲಿವುಡ್ (Avengers – Spiderman ಸೀರೀಸ್, ಅವತಾರ್ ಆನಿ ಹೆರ್ ಕ್ಲಿಷ್ಟ್ ವರ್ಗಾಚಿಂ) ಸಿನೆಮಾಂ ಹಿಂ ಭುರ್ಗಿಂ ಪಳೆತಾತ್. ಮ್ಹಳ್ಯಾರ್ ತಾಂಚೆಂ ಇಂಟೆಲೆಕ್ಚುವಲ್ ಮಟ್ಟ್ ಖಂಚ್ಯಾ ಲೆವೆಲಾರ್ ಆಸಾ ಮ್ಹಣ್ ಕಳ್ತಾ. ಅಸಲಿಂ ಇಂಟೆಲಿಜೆಂಟ್ ಸಿನೆಮಾಂ ಪಳೆಂವ್ಚಿಂ ಯುವಜಣಾಂ ಆಮ್ಚ್ಯಾಚ್ ಸಮುದಾಯಾಂತ್‍ಯೀ ಆಸಾತ್.

ಆನಿ ಹೊ ಕಾಳ್ ತರೀ ಕಸಲೊ? ಬಸ್‍ಲ್ಲೆ ಕಡೆನ್ ಯೂಟ್ಯೂಬ್, ಓಟಿಟಿಂತ್ ಸಂಸಾರಾಂತ್ಲಿಂ ಹರ್ಯೆಕ್ ಸಿನೆಮಾಂ ಸುಶೆಗಾತ್ ಪಳೆಂವ್ಚೊ ಕಾಳ್. ಲ್ಹಾನ್ ಭುರ್ಗಿಂ ಸಯ್ತ್ ಸಿನೆಮಾಂ ವಿಶಿಂ ಪಾಂಡಿತ್ಯ್ ಆಪ್ಣಾಯ್ತಾತ್. ಘರಾಂತ್‍ಚ್ ಆಸೊನ್ ಹರ್ ದೀಸ್ ನವಿಂ ನವಿಂ ಸಿನೆಮಾಂ ತುಮಿ ಪಳೆವ್ಯೆತ್ ಆನಿ ಸಂಸಾರಾಂತ್ಲಿ ಕ್ರಿಯೇಟಿವ್ ಗ್ರೇಸ್ತ್‌ಕಾಯ್ ಚಾಕ್ಯೆತ್.

ಪುಣ್ ಆಮ್ಚೆ ಕೊಂಕ್ಣಿ ಮನಿಸ್… ಆಜೂನ್ ಕೊಂಡಾಂತ್ ಲೊಳ್ತಾತ್. ಹಾ! ದೆವಾನ್‍ಂಚ್ ರಾಕಜೆ!!!

‘ಅಸ್ಮಿತಾಯ್’ ಸಿನೆಮಾ ಖಂಚ್ಯಾ ಮಟ್ಟಾರ್ ಆಸಾ ಮ್ಹಣ್ ಸಾರ್ಕೆಂ ಕಳಜೆ ತರ್ ತುಮಿ ಹ್ಯಾ ಭುರ್ಗ್ಯಾಂ ಕಡೆನ್ ವಿಚಾರಿಜೆ. ತಾಂಕಾಂಚ್ ಏಕ್ ಶೋ ದವರುನ್ ತಾಂಚೆಂ ಫೀಡ್‍ಬ್ಯಾಕ್ ಘೆಜೆ…

ಎಂಟ್ರಿ ಲೆವೆಲ್ ವಿಮರ್ಸೊ – ಫಿಲ್ಮ್ ಸೂಪರ್!

ಆಮ್ಚ್ಯಾ ಕೊಂಕ್ಣಿ ಕಥೊಲಿಕ್ ಸಮುದಾಯಾಚ್ಯಾ ದೃಷ್ಟಿಕೋನಾಂತ್, ಮ್ಹಣ್ಜೆ ಲೊಕಾಚ್ಯಾ ನದ್ರೆನ್ ಘೆತ್ಲ್ಯಾರ್ ‘ಅಸ್ಮಿತಾಯ್’ ಸಿನೆಮ್ ಬರೆಂಚ್ ಆಸಾ ಮಾತ್ರ್ ನ್ಹಯ್ ‘ವಂಡರ್‌ಫುಲ್’ಚ್ ಮ್ಹಣ್ಯೆತ್. ‘ಮಾಂಡ್ ಸೊಭಾಣ್’ ಸಂಸ್ಥ್ಯಾನ್ ಅಭಿಮಾನಾನ್ ನಿರ್ಮಿಲ್ಲೆಂ ಸಿನೆಮ್ ಮ್ಹಣ್ತಾನಾ ಲೊಕಾಕ್ ಏಕ್ ನಿರೀಕ್ಷಾ ಆಸ್‍ಲ್ಲಿ. ಸಾಂಸ್ಕೃತಿಕ್ ಶೆತಾಂತ್ ಮಾಂಡ್ ಸೊಭಾಣಾನ್ ಕೆಲ್ಲೊ ವಾವ್ರ್, ಸಾಧನ್ ಲೋಕ್ ಜಾಣಾಂ. ಮಾಂಡ್ ಸೊಭಾಣಾಕ್ ಆನಿ ತಾಚ್ಯಾ ಕಾರ್ಬಾರ್‍ಯಾಂಕ್ ತಶೆಂ ಕಲಾಕಾರಾಂಕ್ ಜಾಯ್ ಪುರ್ತೊ ಮೋಗ್, ಸಹಕಾರ್ ಆನಿ ಪಾಟಿಂಬೊ ಮೆಳ್ಳಾ. ಗುರ್ಕಾರ್ ಎರಿಕ್ ಒಝೇರಿಯೊ ಹಜಾರೊಂ ಅಭಿಮಾನಿಂಕ್ ಜೊಡುಂಕ್ ಸಕ್ಲಾ. ಎರಿಕಾಚಿಚ್ ಕಾಣಿ, ಭಾರೀ ವರ್ಸಾಂಚೆಂ ಸಪಣ್, ದರಬಸ್ತ್ ಪ್ರೊಮೋಶನ್, ಪ್ರಚಾರ್ ಮ್ಹಣ್ತಾನಾ ಲೊಕಾನ್ ಜಾಯ್ತೆಂ ಅಪೇಕ್ಷಿಲ್ಲೆಂ ಸಹಜ್.

ಸಪ್ತೆಂಬರ್ 15, 2023ವೆರ್ ‘ಅಸ್ಮಿತಾಯ್’ ಸಿನೆಮ್ ರಿಲೀಸ್ ಜಾಲೆಂ ಆನಿ ಪಳೆಲ್ಲ್ಯಾಂನಿ ತೆಂ ಅದ್ಭುತ್ ಆಸಾ ಮ್ಹಣ್‍ಂಚ್ ಸಾಂಗ್‍ಲ್ಲೆಂ. ಲೊಕಾನ್ ಆನಿ ಸಿನೆಮಾ ವಿಶಿಂ ಇಲ್ಲಿ ತರೀ ಜಾಣ್ವಾಯ್ ಆಸ್ಚ್ಯಾಂನಿಯೀ ಸಿನೆಮ್ ಭೋವ್ ಅದ್ಭುತ್ ಜಾಲಾಂ, ‘ಕಾಂತಾರ’ ಸಿನೆಮಾಕ್ ಉಣೆಂ ನಾ ಮ್ಹಣ್ ಸಾಂಗ್ತಾನಾ ಮ್ಹಾಕಾ ಅಜ್ಯಾಪ್ ಜಾಲ್ಲೆಂ! ಕೊಂಕ್ಣೆಂತ್ ತ್ಯಾ ಮಟ್ಟಾಚೆಂ ಅದ್ಭುತ್ ಘಡ್ತಾ ನೆ ಮ್ಹಣ್ ಹಾಂವ್ ಥಟಾಕ್‍ಲ್ಲೊಂ…

ಲೊಕಾನ್ ಸಿನೆಮ್ ಫೆಂಟಾಸ್ಟಿಕ್ ಆಸಾ ಮ್ಹಣ್ತಾನಾ ಮ್ಹಾಕಾ ನಿರೀಕ್ಷಾ ಚಡ್‍ಲ್ಲಿ.

ಸಿನೆಮ್ ಪಳೆತಾನಾ ತಾಂತುಂ ಕೆಲ್ಲ್ಯಾ ಪ್ರಯತ್ನಾಕ್ (ಚಾರಿತ್ರಿಕ್ ಸಂಗ್ತಿ ಆನಿ ಲಗ್ತಿ ಗಜಾಲಿಂಚೆರ್ ಝಳಕ್ ಘಾಲ್ಚೆಂ ಮಿಸಾಂವ್) ಪಳೆವ್ನ್, ‘ವ್ಹಯ್, ಹೆಂ ಲೊಕಾನ್ ಪಳೆಜೆ’ ಮ್ಹಣ್‍ಂಚ್ ಹಾಂವೆಂ ಸಾಂಗ್‍ಲ್ಲೆಂ. ತಾಂತ್ರಿಕ್ ಉಣೆಂಪಣಾಂ ಧಾರಾಳ್ ಆಸ್ಲ್ಯಾರೀ ಸಿನೆಮಾಚೊ ಫ್ಲೋ ಬರೊಚ್ ಆಸಾ, ಖಂಯ್ಸರೀ ಬೋರಿಂಗ್ ಜಾಯ್ನಾ, ಗದ್ದಾಳಾಯೆನ್ ‘ಸೆಲೆಬ್ರೇಟ್’ ಕೆಲ್ಲೆಂ ದಿಸ್ತಾ ಮ್ಹಣ್ತಾನಾ ಪ್ರೇಕ್ಷಕಾಂಕ್ ಸಿನೆಮ್ ರುಚ್‍ಲ್ಲ್ಯಾಂತ್ ನವಾಲ್ ನಾ.

ಸಂಗೀತಾನ್ ಉಕಲ್ನ್ ಧರ್‌ಲ್ಲೆಂ ಸಿನೆಮ್

ಸಿನೆಮ್ ನಿಜಾಯ್ಕೀ ಪ್ರೇಕ್ಷಕಾಂಚೆರ್ ಭುಲ್ ಘಾಲ್ತಾ ಕಿತ್ಯಾಕ್ ಮ್ಹಣ್ ಹಾಂವ್ ವಿಜ್ಮಿತ್ ಪಾವ್ತಾಲೊಂ. ಉಪ್ರಾಂತ್ ಕಳ್ಳೆಂ ತೆಂ ಫಕತ್ ಬ್ಯಾಕ್‍ಗ್ರೌಂಡ್ ಮ್ಯೂಸಿಕಾಚ್ಯಾ ಮಹಿಮೆನ್ ಮ್ಹಣ್. ವ್ಹಯ್. ‘ಅಸ್ಮಿತಾಯ್’ ಸಿನೆಮ್ ಪಳೆತಾನಾ ತೆಂ ವೀಕ್ಷಕಾಂಕ್ ಜಿಕುನ್ ಧರ್ತಾ ತರ್ ತಾಕಾ ಮುಖ್ಯ್ ಕಾರಣ್ ಕ್ಯಾಜೆಟನ್ ಡಯಾಸಾನ್ ದಿಲ್ಲೆಂ ಸಂಗೀತ್ (ಬಿಜಿಎಂ). ಹೆಂ ಅದ್ಭುತ್ ಸಂಗೀತ್ ನಾತ್‍ಲ್ಲೆಂ ತರ್ ಫಿಲ್ಮ್ ವೊಮ್ತೆ ಪಡ್ತೆಂ. ತಿತ್ಲೆಂ ಫೆಂಟಾಸ್ಟಿಕ್ ಸಂಗೀತ್ ಆನಿ ಸೌಂಡ್ಸ್ ಲಾಭ್‍ಲ್ಲ್ಯಾನ್‍ಂಚ್ ಹೆಂ ಸಿನೆಮ್ ಪ್ರೇಕ್ಷಕಾಂಕ್ ಧರ್ನ್ ದವರ್ಚ್ಯಾಂತ್ ಸಕ್ಲಾಂ.

ತರ್ ದುಸ್ರೆಂ ಕಿತೆಂಯೀ ಬರೆಂ ನಾಂಗೀ ಮ್ಹಣ್ತಾತ್ ತರ್, ಖಂಡಿತ್ ಆಸಾ ಮ್ಹಣ್ತಾಂ. ದುಸ್ರ್ಯೊ ತೀನ್ ಸಂಗ್ತಿ ಆಸಾತ್. ಏಕ್ ಆಡಿಯೋ ಕ್ವಾಲಿಟಿ. ದುಸ್ರೆಂ ಮುಖ್ಯ್ ಪಾತ್ರ್‌ಧಾರಿಂಚೆಂ ನಟನ್. ತಿಸ್ರೆಂ ಎಡಿಟಿಂಗ್ (ಸಂಕಲನ್). ಆನಿ ಹೆರ್ ಥೊಡೆಂ. ಪದಾಂಯೀ ಪರಿಣಾಮ್‍ಕಾರಿ ಜಾಲ್ಯಾಂತ್.

ಸಿನೆಮಾ ಸುರ್ವಾತೆ ಥಾವ್ನ್ ಆಖೇರ್ ಪರ್ಯಾಂತ್ ರಿಚ್ ಮ್ಹಣ್ ಭೊಗ್ತಾ ತರ್ ತಾಕಾ ಸಂಗೀತಾ ಸವೆಂ ಸಂಭಾಷಣಾಂ ಆನಿ ಹೆರ್ ಆವಾಜ್ ಕಾರಣ್. ಹ್ಯಾ ವಿಭಾಗಾಂತ್ ಫಿಲ್ಮ್ ನಿಜಾಯ್ಕೀ ಆಪುರ್ಬಾಯೆನ್ ಉದೆಲಾಂ. ಆನಿ ಹಾಕಾ ಕಾರಣ್ ‘ಕ್ಯಾಡ್’ ಸ್ಟುಡಿಯೊ. ಮಂಗ್ಳುರ್ಚೊ ಸಂಸ್ಥೊ ‘ಕ್ಯಾಡ್ ಮೀಡಿಯಾ’ ಏಕ್ ಹೈ ಕ್ಲಾಸ್ ಸ್ಟುಡಿಯೊ. ‘ಕಾಂತಾರ’ ಸಿನೆಮಾಚೆಂ ಆಡಿಯೊ ರೆಕಾರ್ಡಿಂಗ್‍ಯೀ (ಹೆವ್ಶಿಲ್ಯಾ ಕಲಾಕಾರಾಂಚೆಂ ಡಬ್ಬಿಂಗ್) ಹಾಂಗಾಚ್ ಚಲ್‍ಲ್ಲೆಂ. ಆನಿ ತಾಣಿಂ ತೆದ್ನಾಂ ಏಕ್ ನವೆಂ ಯಂತ್ರ್ ತ್ಯಾಚ್ ಖಾತಿರ್ ಹಾಡ್‍ಲ್ಲೆಂ. ‘ಕ್ಯಾಡ್’ ಸ್ಟುಡಿಯೊಂತ್ ರೆಕಾರ್ಡಿಂಗ್ ಕರುಂಕ್ ನಿಚೆವ್ ಕೆಲ್ಲ್ಯಾಕ್ ‘ಅಸ್ಮಿತಾಯ್’ ಪಂಗ್ಡಾಕ್ ಶಾಭಾಸ್ಕಿ ಫಾವೊ. ತಾಂಚ್ಯಾ ತ್ಯಾ ನಿರ್ಧಾರಾನ್ ಸಿನೆಮಾಕ್ ಜೀವ್ ಲಾಭ್ಲಾ. ರಿಯಲ್ಲಿ ಫೆಂಟಾಸ್ಟಿಕ್.

ಆನ್ಯೇಕ್ ಪ್ರಮುಖ್ ಕಾರಣ್ ನಾಯಕ್, ನಾಯಕಿ ಆನಿ ಹೆರ್ ಪ್ರಮುಖ್ ಪಾತ್ರ್ ನಟನ್ ಕೆಲ್ಲ್ಯಾಂಚೆಂ ಅಭಿನಯನ್. ಹೀರೊ, ಹೀರೋಯಿನ್ ಧರುನ್ ಸಬಾರಾಂನಿ ಆ್ಯಕ್ಟಿಂಗ್ ಕರ್ಚೆಂ ಪಯ್ಲೆ ಪಾವ್ಟಿಂ. ಪುಣ್ ಹೀರೊ ಆನಿ ಹೀರೊಯಿನ್ ಜಾವ್ನ್ ಅಶ್ವಿನ್ ಡಿಕೋಸ್ಟ ಆನಿ ವೆನ್ಸಿಟಾ ಡಯಾಸಾನ್ ನಿಜಾಯ್ಕೀ ಪ್ರೇಕ್ಷಕಾಂಚೆರ್ ಭುಲ್ ಘಾಲ್ಯಾ. ಪಾತ್ರಾ ತೆಕಿದ್ ತಾಂಚೆಂ ಲವಲವಿಕೆಚೆಂ ನಟನ್ ಆನಿ ತಾಂಕಾಂ ಮೆಳ್‍ಲ್ಲೆಂ ಸ್ಕ್ರೀನ್ ಪ್ರೆಸೆನ್ಸ್ ಮೆಚ್ವಣೆಚೆಂ. ಲೊಕಾನ್ ಸಿನೆಮ್ ಮೆಚ್ವಲ್ಲ್ಯಾಚೆಂ ಪ್ರಮುಖ್ ಕಾರಣ್ ತಿಂಚ್.

ಅಶ್ವಿನ್ ಡಿಕೋಸ್ಟಾಚೆಂ ಹೈ ಪರ್ಫಾರ್ಮೆನ್ಸ್

ಅಶ್ವಿನ್ ಡಿಕೋಸ್ಟಾಕ್ ಚಡ್ ಶಾಭಾಸ್ಕಿ ಫಾವೊ. ತಾಣೆಂ ಫಕತ್ ಬರೆಂ ನಟನ್ ಕೆಲಾಂ ಮಾತ್ರ್ ನ್ಹಯ್, ಡಯಲೊಗ್ ಡೆಲಿವರಿ ಕೆಲ್ಲಿ ರೀತ್ ತಾಚಿ ವ್ಹಡ್ವಿಕಾಯ್ ರುಜು ಕರ್ತಾ. ತಾಚ್ಯಾ ಉತ್ರಾಂನಿ ಸಂದರ್ಭಾಕ್ ತೆಕಿದ್ ಫೀಲ್ ಉದೆಲಾಂ. ತೊ ಏಕ್ ವೃತ್ತಿಪರ್ ಸಂಗೀತ್‍ಗಾರ್, ಹೆಳ್‍ಲ್ಲೊ ಗಾವ್ಪಿ ಜಾಲ್ಲ್ಯಾನ್ ತಾಚೆಂ ಎಡ್ವಾಂಟೇಜ್ ತೆಂ. ನಿಜಾಯ್ಕೀ Lovely ನಟನ್. ಸಂಭಾಷಣ್ ಉಚಾರ್ಣಿಯೀ ಉತ್ತೀಮ್. ಪ್ರತ್ಯೇಕ್ ಕರ್ನ್ ಗೊಂಯಾಂತ್ಲ್ಯಾ ದೃಶ್ಯಾಂತ್, ಹೀರೊಕ್ ಲಗಾಡ್ ಕಾಡುಂಕ್ ವಾಹನಾ ಪಂದಾ ಘಾಲ್ಚೆಂ ಪ್ರಯತ್ನ್ ವಿಫಲ್ ಜಾಲ್ಲ್ಯಾ ವೆಳಿಂ ತಾಣೆಂ ಉಚಾರ್ಲೆಲಿಂ ಉತ್ರಾಂ, “(Did) You saw that..?” ಅಶ್ವಿನಾನ್ ಭಾವ್ ಆನಿ ತೀವ್ರತಾ ಭರುನ್ ತಾಳೊ ದಿಲಾ ಮ್ಹಣ್ಚ್ಯಾಕ್ ಅಪ್ರತಿಮ್ ದೃಷ್ಟಾಂತ್. ವೆನ್ಸಿಟಾನ್‍ಯೀ ಸಂಭಾಷಣಾಂನಿ ಜೀವ್ ಭರ್ಲಾ.

ಏಕ್ ಚೂಕ್ ಅಶ್ವಿನಾನ್ ಕೆಲ್ಯಾ. ರುಜಾಯ್ಚ್ಯಾ ಶಿಲಾ ಶಾಸನಾ ಮುಖಾರ್ ಉಲಯ್ತಾನಾ ತೊ, ‘ಪುಡ್ತುಗೆಜಾಂಚಿ ಮೋರ್…’ ಮ್ಹಣ್ತಾ. ತಿ ‘ಮ್ಹೊರ್’ (ಮೊಹರು/ಸೀಲ್/ಎಂಬ್ಲೆಮ್) ಜಾಯ್ಜೆ. ಮೋರ್ ಮ್ಹಳ್ಯಾರ್ ನವಿಲು/Peacock.

ಪ್ರೇಕ್ಷಕಾಂನಿ ಪಡ್ದ್ಯಾಚೆರ್ ನದರ್ ಖಂಚವ್ನ್ ರಾವೊಂಕ್ ಎಡಿಟಿಂಗ್, ನಿರೂಪಣ್‍ಯೀ ಯಶಸ್ವಿ ಜಾಲಾಂ. ಅಶೆಂ ಜಾಂವ್ಕ್ ತ್ಯಾ ಎಡಿಟರಾನ್ ಕಿತ್ಲಿ ವಾಂವ್ಟ್ ಕಾಡ್ಲ್ಯಾ ಮ್ಹಣ್ ಕಳ್ತಾ. ನಿಜಾಯ್ಕೀ ಕಾಣಿ ಆನಿ ನಿರೂಪಣ್ ಗೊಂದೊಳಾಭರಿತ್ ಆಸಾ ಮಾತ್ರ್ ನ್ಹಯ್ ಘುಸ್ಪಡ್ ಕರ್ಚೆಪರಿಂ ಎಕಾ ಉಪ್ರಾಂತ್ ಏಕ್ ದೃಶ್ಯಾಂ, ಸನ್ನಿವೇಶಾಂ ಚೆಪ್ಲ್ಯಾಂತ್, ತರೀ ಮುಖಾರ್ ಕಿತೆಂ ಜಾತಾ, ಘಡತ್ ಮ್ಹಣ್ ಕುತೂಹಲ್ ಉಬ್ಜಂವ್ಚಿಂ ದೃಶ್ಯಾಂ ಪಾಶಾರ್ ಜಾತಾತ್. ಪ್ರತ್ಯೇಕ್ ಕರ್ನ್ ವಿಲನ್ ಪಾತ್ರ್ ಹ್ಯಾ ಸಂಗ್ತಿಂತ್ ಉಪ್ಕಾರ್ಲಾ. ತ್ಯಾ ವರ್ವಿಂ ಪ್ರೇಕ್ಷಕಾಂಕ್, Distraction ಭೊಗ್ಲ್ಯಾರೀ, ಸಿನೆಮ್ ಸರಾಗ್ ಪಳೆಶೆಂ ಕರ್ತಾ.

ಎಂಟ್ರಿ ಲೆವೆಲ್ ರೇಟಿಂಗ್ – ‘ಆಮ್ಚ್ಯಾ’ ಪ್ರೇಕ್ಷಕಾಂಚ್ಯಾ ನದ್ರೆನ್

ಸಿನೆಮಾಕ್ 5 ಅಂಕಾಂತ್ – 2½ ಅಂಕ್ (ಬರೆಂ, ಪಳೆವ್ಯೆತ್ ಜಾಲ್ಲೆಂ)
ಬ್ಯಾಕ್‍ಗ್ರೌಂಡ್ ಮ್ಯೂಸಿಕ್ – 4 ಅಂಕ್ (ಉತ್ಕೃಷ್ಠ್)
ಆಡಿಯೋ, ಸೌಂಡ್ಸ್ – 3½ ಅಂಕ್ (ಅತ್ಯುತ್ತಮ್)
ನಟನ್/ಅಭಿನಯನ್/ಸಂಕಲನ್ – 3 ಅಂಕ್ (ಉತ್ತಮ್)
ಕಾಣಿ, ನಿರೂಪಣ್ – 2 ಅಂಕ್ (ಸಾಧಾರ್ಣ್)

ವಯ್ಲೆಂ ರೇಟಿಂಗ್ ಕೊಂಕ್ಣಿ ಕ್ರಿಸ್ತಾಂವ್ ಸಮುದಾಯಾಚ್ಯಾ ದೃಷ್ಟಿಕೋನಾಚೆರ್ ದಿಲಾಂ. ಮ್ಹಣ್ಜೆ ಆಮ್ಚ್ಯಾ ಪ್ರೇಕ್ಷಕಾಂಚ್ಯಾ ಲೆವೆಲಾರ್ ಮೆಳ್ಯೆತ್ ಜಾಲ್ಲೆ ಅಂಕ್ ತೆ.

ವೃತ್ತಿಪರ್ ವಿಶ್ಲೇಷಣ್: ಸಿನೆಮ್ ನ್ಹಯ್, ಹೆಂ ಅಸ್ಕತ್ಕಾಯೆಚೆಂ ಸಮ್ಮಿಲನ್

ವಯ್ರ್ ಸಾಂಗ್‍ಲ್ಲ್ಯೊ ಗಜಾಲಿ ತಿತ್ಲ್ಯಾರ್‌ಚ್ ಸಂಪ್ತಾತ್. ಲೋಕ್ ಸಿನೆಮಾ ಪಳೆತಾ, ತ್ಯಾ ಘಡಿಯೆಚ್ಯಾ ಉದ್ವೇಗಾನ್ Wonderful ಮ್ಹಣ್ತಾ, ಘರಾ ಗೆಲ್ಲೊಚ್ ಸಗ್ಳೆಂ ವಿಸರ್ತಾ. ಸಿನೆಮಾಚ್ಯಾ ನೀಜ್ ಆಶಯಾಕ್ ಆನಿ ಇರಾದ್ಯಾಕ್ (ಸಿನೆಮಾ ಕರ್ತಾಂನಿ Claim ಕೆಲ್ಲೆಪರಿಂ) ತೆಕಿದ್ ಕಿತೆಂಯೀ ವಾಡಾವಳ್ ಜಾಂವ್ಚಿ ಸಾಧ್ಯತಾ ಬಿಲ್ಕುಲ್ ನಾ. ಕಿತ್ಯಾಕ್ ಮ್ಹಳ್ಯಾರ್ ಸಿನೆಮಾಂತ್ ಉಡಾಸಾಂತ್ ಉರ್ಚೆ ತಸಲೆಂ ಕಿತೆಂಯೀ ನಾ! ಆಮ್ಚೊ ಪ್ರೇಕ್ಷಕ್ ವರ್ಗ್ ಕಸಲೊ ಮ್ಹಳ್ಯಾರ್, ಫಕತ್ ಮನರಂಜನ್ ಆಶೆಂವ್ಚೊ. ತ್ಯಾ ತೆಕಿದ್ ಪಾಟ್ಲ್ಯಾ ವರ್ಸಾಂನಿ ಫುಂಕ್ಯಾಕ್‍ಚ್ ಕಾರ್ಯಿಂ ಪಳೆವ್ನ್ ಸವಯೆರ್ ಪಡ್‍ಲ್ಲೊ ವರ್ಗ್ ಹೊ. ನಾಟಕ್ ಫುಂಕ್ಯಾಕ್, ಸಂಗೀತ್ ಕಾರ್ಯಿಂ ಫುಂಕ್ಯಾಕ್, ಕಸಲಿಂಯೀ ಕಾರ್ಯಿಂ ದವರ್ಲ್ಯಾರೀ ತಿಂ ಸರ್ವ್ ಫುಂಕ್ಯಾಕ್. ಟಿಕೆಟ್ ಕಾಡ್ನ್ ವೆಚಿ ಸಂಸ್ಕೃತಿ ಆಮ್ಚ್ಯಾಚ್ ಮನ್ಶ್ಯಾಂನಿ ನಾಸ್ ಕೆಲ್ಯಾ. ತಾಂತುಂಯೀ ಚಡಾವತ್ ಜಣಾಂನಿ ಒತ್ತಾಯೆಕ್ ಹಾಜರ್ ಜಾಂವ್ಚೆಂ.

ಕೊಡ್ಯಾಳಾಂತ್ ಜಾಂವ್ಚ್ಯಾ ಚಡಾವತ್ ಕಾರ್ಯಾಂಕ್ ಪಂಗ್ಡಾಂನಿ ಪ್ರೇಕ್ಷಕ್ ಹಾಜರ್ ಜಾತಾತ್. ಕೋಣ್ ತೆ? ಕೊವೆಂತಾಂಚಿಂ ಸಿಸ್ಟರಾಂ ಹಾಂತುಂ ಪ್ರಮುಖ್. ತಾಂಕಾಂ ‘ವಿಶೇಸ್ ಆಪವ್ಣೆಂ’ ಆಸ್ತಾ. ತಿಂ ವೆಳಾರ್ ಯೆತಾತ್, ಕಾರ್ಯೆಂ ಸುರು ಜಾತಾನಾ ತಾಂಚಿ ಭುಕ್ ಉಮಾಳ್ತಾ. ದೆಕುನ್ ತಿಂ ಉಟೊನ್ ವೆತಾತ್. ತಡವ್ ಕೆಲ್ಯಾರ್ ಜೆವಣ್ ಮೆಳನಾ. ಅಸಲೊಚ್ ಲೋಕ್ ಚಡ್ ಆಸ್ತಾ. ದೆಕುನ್ ಲೇಟ್ ಕರುನ್ ಸುರು ಕೆಲ್ಲಿಂ ಕಾರ್ಯಿಂ ಆಖೇರ್ ಜಾತಾನಾ ಪ್ರೇಕ್ಷಕ್ ಆಸನಾಂತ್. ಮ್ಹಳ್ಯಾರ್ ನೀಜ್ ಆಸಕ್ತ್, ಅಭಿರುಚ್, ಬದ್ಧತಾ ಆಸೊನ್ ಕೊಂಕ್ಣಿ ಕಾರ್ಯಾಂಕ್ ಯೆಂವ್ಚ್ಯಾ ಪ್ರೇಕ್ಷಕಾಂಚೊ ಸಂಖೊ ಉಣೊ. ಕೊಡು ಸತ್ ಮ್ಹಳ್ಯಾರ್, ಪ್ರೇಕ್ಷಕಾಂಕ್ ಆಕರ್ಸುಂಚಿಂ (ಟಿಕೆಟ್ ಘೆಂವ್ಕ್) ಕಾರ್ಯಿಂಚ್ ಉಣಿಂ. ಹೆಂ ಆಪುಟ್ ಸತ್.

‘ಅಸ್ಮಿತಾಯ್’ ಸಿನೆಮಾ ಪಳೆಲ್ಲ್ಯಾ, ಪಳೆಂವ್ಚ್ಯಾ ಪ್ರೇಕ್ಷಕಾಂ ಪಯ್ಕಿ ಅಸಲ್ಯಾ ವರ್ಗಾಚೊ ಲೋಕ್‍ಚ್ ಚಡ್ ಮ್ಹಣ್ಯೆತ್. ಹೆರ್ ಸಿನೆಮಾಂಚಿ ಗತ್‍ಯೀ ತಿತ್ಲಿಚ್. ತಾಂತುಂಯೀ ಜೀಣ್‍ಭರ್ ಸಿನೆಮಾ ಮ್ಹಳ್ಯಾರ್ ಕಿತೆಂ ಮ್ಹಣ್‍ಂಚ್ ಕಳಿತ್ ನಾತ್‍ಲ್ಲೆ, ಕೊಣಾಚ್ಯಾಗೀ ದಬಾವಾಕ್ ಪಡೊನ್ ಯೆತಾತ್. ತಾಂಕಾಂ ಹೊ ‘ದಳ್ಬಾರ್’ ಪಳೆವ್ನ್ ಸರ್ಗಾಪರಿಂಚ್ ಭೊಗ್ತಾ. ಅಸಲ್ಯಾ ಪ್ರೇಕ್ಷಕಾಂಕ್ ಕಿತೆಂ ದಾಕಯ್ಲ್ಯಾರೀ ತಾಂಕಾಂ ತೆಂ ಅದ್ಭುತ್‍ಚ್. ಆಮ್ಚ್ಯಾ ಮನ್ಶ್ಯಾಂಚೆಂ, ಆಮ್ಚ್ಯಾ ಭಾಶೆಚೆಂ, ವಳ್ಕಿಚ್ಯಾಚ್ ತೊಂಡಾಂಚೆಂ ಮ್ಹಣ್ತಾನಾ ತಾಂಚಿ ತಿ ಪ್ರತಿಕ್ರಿಯಾ ಸಹಜ್.

ತರ್ ಕೊಂಕ್ಣಿ ಸಮುದಾಯ್ ತಿತ್ಲ್ಯಾಕ್‍ಚ್ ಸೀಮಿತ್‍ಗೀ? ಆದಿಂ ಥಾವ್ನ್ ಆಯ್ಕೊಂಚೆಂ ರುದಾನ್ – ‘ಆಮ್ಚೊ ಲೋಕ್ ಸಾಧೊ, ಆಮ್ಚೆ ಮನಿಸ್ ಪಾಪ್, ತಾಂಕಾಂ ಹಳ್ತಾಚೆಂ, ಸಾಧೆಂಚ್ ದೀಜೆ…’ ಅಸಲೆಂ ಅಸಹಾಯಕ್ಪಣ್ ಘೆವ್ನ್, ಕಿತೆಂಯೀ ರಚ್ಚ್ಯಾ ಪಯ್ಲೆಂಚ್ ಸ್ವತಃ ಅಪರಿಪಕ್ವ್ ಚಿಂತ್ನಾಂ, ಇಮ್ಯೆಚೂರ್ ಪರಿಕಲ್ಪನಾಂನಿ ಭರ್ಲ್ಯಾರ್ ಫಲಿತಾಂಶ್ ಕಿತೆಂ ಉದೆತ್? ತಸಲ್ಯಾಕ್ ಅಪ್ರತಿಮ್ ರುಜ್ವಾತ್‍ಚ್, ಹೆಂ ‘ಅಸ್ಮಿತಾಯ್’ ಸಿನೆಮ್!

ಇತ್ಲೆಂ ನಿಷ್ಠುರ್‌ಪಣ್ ಕಿತ್ಯಾಕ್ ಮ್ಹಣ್ಯೆತ್. ಆಮಿ ಕೊಂಕ್ಣಿ ಕೊಂಕ್ಣಿ ಮ್ಹಣ್ ವಿಳಾಪ್ ದಿಂವ್ಚೆಂ ಆನಿ ಕರ್ಚೆಂ ಸದಾಂಚೆಂ ಸಬ್‍ಸ್ಟ್ಯಾಂಡರ್ಡ್ ಉತ್ಪನ್ನ್ ಮಾತ್ರ್. ಕೊಣೆಂಯೀ ಎಕಾ ವ್ಯಕ್ತಿನ್ ಸಿನೆಮ್ ಕಾಡ್‍ಲ್ಲೆಂ ತರ್ ಸೊಡ್ನ್ ಸೊಡ್ಯೆತ್. ಕಿತ್ಯಾಕ್ ಮ್ಹಳ್ಯಾರ್ ತೆಂ ಏಕ್ ವ್ಯಕ್ತಿ ಪ್ರದರ್ಶನ್. ತಸಲಿಂ ಫಿಲ್ಮಾಂ ಕೊಂಕ್ಣೆಂತ್ ಆಯ್ಲ್ಯಾಂತ್. ಸಂಸಾರಾಂತ್ ಹಜಾರಾಂನಿ ಸಿನೆಮಾ ತಯಾರ್ ಜಾತಾತ್. ತೆಂ ತಾತಾಂಚೆಂ. ಬರೆಂ ಆಸ್ಲ್ಯಾರ್ ಜಿಕ್ತಾತ್. ಪುಣ್ ‘ಅಸ್ಮಿತಾಯ್’ ಸಿನೆಮ್ ಕೊಣಾ ಎಕಾ ವ್ಯಕ್ತಿಚೆಂ ಸ್ವತ್ತ್ ನ್ಹಯ್. ತೆಂ ಎಕಾ ಮಹಾನ್ ಸಂಸ್ಥ್ಯಾಚೆಂ, ತ್ಯಾ ಸಂಸ್ಥ್ಯಾಚ್ಯಾ ನಾಂವಾನ್ ಸಬಾರ್ ಜಣಾಂಚೆಂ ಖಾಶೆಲೆಂ ಪ್ರೊಜೆಕ್ಟ್ ಹೆಂ.

ತಿತ್ಲೆಂಚ್ ನ್ಹಯ್. ‘ಹೆಂ ಫಕತ್ ಏಕ್ ಖಾಸ್ಗಿ ಉತ್ಪನ್ನ್ ನ್ಹಯ್, ಬಗಾರ್, ಸಮುದಾಯಾಚೆಂ, ಲೊಕಾಚೆಂಚ್’ ಮ್ಹಳ್ಳೆಪರಿಂ ಸಿನೆಮಾಚ್ಯಾ ತಾಂಡೆಲ್ಯಾಂನಿ ಉಚಾರ್ಲಾಂ. ತ್ಯಾ ಶಿವಾಯ್ ಪ್ರೊಮೋಶನ್, ಪ್ರಚಾರ್ ಕರ್ತಾನಾ ‘ಎ ಮೂವಿ ಟು ಮೂವ್‍ಮೆಂಟ್’ ಮ್ಹಣ್‍ಂಚ್ ಸಾಂಗ್ಲಾಂ! ಹರ್ದ್ಯಾರ್ ಬ್ಯಾಡ್ಜಾಂ ಶಿರ್ಕಯ್ಲ್ಯಾಂತ್.

ಹಾಂವ್ ಪಯ್ಲೆ ಪಾವ್ಟಿಂ ಸಿನೆಮ್ ಪಳೆವ್ನ್ ಸಮಾಜೆಚಿ ಪ್ರತಿಕ್ರಿಯಾ ಕಶಿ ಆಸ್ತಾ ಮ್ಹಣ್ ರಾಕ್‍ಲ್ಲೊಂ. ಸಹಜ್ ಜಾವ್ನ್ ಮಾಂಡ್ ಸೊಭಾಣ್ ಆನಿ ಎರಿಕಾಚ್ಯಾ ದುಸ್ಮಾನ್-ವಿರೋಧಿಂನಿ ಅಪಪ್ರಚಾರ್ ಸುರು ಕೆಲೊ. ತೆಂ ಫಕತ್ ಫ್ರಸ್ಟ್ರೇಶನ್ – ಮೊಸ್ರಾನ್; ಥೊಡ್ಯಾಂನಿ ಆಪ್ಣಾಕ್ ಅವ್ಕಾಸ್ ಮೆಳೊಂಕ್ ನಾ ಮ್ಹಣ್ ಹಗ್ಯಾನ್. ಸಿನೆಮಾ ವಿಶಿಂ ಚಿಂತಾನಾ ಉಣೆಂಪಣಾಂಚೊ ಪುರ್ಶ್ಯಾಂವ್‍ಚ್ ಮತಿಂತ್ ಉದೆತಾಲೊ. ಸಬಾರಾಂನಿ ಸಿನೆಮಾಂತ್ಲ್ಯಾ ಚುಕಿಂಚೆರ್ ಪ್ರಸ್ತಾಪ್ ಕೆಲ್ಲೆಂಯೀ ಆಸಾ. ವಿಮರ್ಸೊ ಕೆಲ್ಯಾರ್ ಭೆಷ್ಟೆಂಚ್ ಮನಸ್ತಾಪ್, ರಾಗ್ ಫುಡ್ ಕರಿಜೆ ಪಡ್ತಾ ಮ್ಹಣ್ ಥಂಡ್ ಬಸ್‍ಲ್ಲೊಂ.

ಪುಣ್ ಥೊಡ್ಯೊ ಸಂಗ್ತಿ ಮ್ಹಜ್ಯಾ ಗುಮಾನಾಕ್ ಗೆಲ್ಯೊ. ‘ಉಜ್ವಾಡ್’ ಪತ್ರಾಂತ್ಲೆಂ ಸಂದರ್ಶನ್ ತಾಂತುಂ ಏಕ್. ತಾಚ್ಯಾ ಸಪ್ತೆಂಬರ್ 1-15, 2023 ಆಂಕ್ಯಾರ್ (ಸಂದರ್ಶನಾಚೆಂ ಲಿಂಕ್ – https://online.fliphtml5.com/nttej/jigc/#p=12) ಸಿನೆಮಾಚ್ಯಾ ಮುಖ್ಯ್ ಕರ್ತಾಂಚೆಂ ಸಂದರ್ಶನ್ ಪ್ರಕಟ್ ಜಾಲಾಂ. ತೆಂ ಪೋರ್ ವಾಚ್ಲೆಂ. ಎರಿಕ್ ಒಝೇರ್ ಆನಿ ಜೊಯೆಲ್ ಪಿರೇರಾನ್ ತಾಂತುಂ ಉಚಾರ್ಲೆಲೆಂ ವಾಚ್ತಚ್ ಹಾಂವ್ ಅಜ್ಯಾಪ್ಲೊಂ. ತಾಣಿಂ ಉಚಾರ್ಲಾಂ ಕಿತೆಂ ಆನಿ ಕೆಲಾಂ ಕಿತೆಂ? ಉತ್ರಾಂಕ್ ಆನಿ ಕರ್ನ್ಯಾಂಕ್ ರಾತ್ ದೀಸ್ ಫರಕ್!? ತೆಂ ಸಂದರ್ಶನ್ ವಾಚುನ್ ಕೊಣೆಂಯೀ ಸಿನೆಮ್ ಪಳೆಲಾಂ ತರ್ ಕಿತ್ಲಿ ನಿರಾಶಾ ಭೊಗ್ಲ್ಯಾ ಆಸ್ಯೆತ್.

ದೆಕುನ್ ಹಾಂವೆಂ ಪರತ್ ಪರತ್ ಸಿನೆಮ್ ಪಳೆಲೆಂ. ಬರಯ್ಜೆಚ್ ಮ್ಹಣ್ ಭೊಗ್ಲೆಂ. ಸಿನೆಮಾ ಮ್ಹಜೊ ಫೇವರಿಟ್ ಸಂಸಾರ್. ‘ಅಸ್ಮಿತಾಯ್’ ಸಿನೆಮಾಚೆ ಚಡಾವತ್ ಜಣ್ ಮ್ಹಜೆ ಮೊಗಾಚೆ ಈಶ್ಟ್, ವಳ್ಕಿಚೆಚ್. ತಾಂಚೆ ಮುಖಾಂತ್ರ್ ಆನಿ ಹೆರಾಂ ಮುಖಾಂತ್ರ್ ‘ಭಿತರ್ಲ್ಯೊ’ ಜಾಯ್ತ್ಯೊ ಗಜಾಲಿ ಹಾಂವ್ ಸಮ್ಜಲಾಂ (ಆಮ್ಕಾಂ ತೆಂ ಗರ್ಜೆಚೆಂಚ್). ಸಿನೆಮಾಂ ವಿಶಿಂ ರಾಸ್ ರಾಸ್ ಬರಂವ್ಚ್ಯಾ ಹಾಂವೆಂ ಹ್ಯಾ ಫಿಲ್ಮಾಚೆರ್ ಬರಯ್ನಾತ್ಲ್ಯಾರ್ ಜವಾಬ್ದಾರೆ ಥಾವ್ನ್ ಪೊಳಾಪಳ್ ಘೆತ್‍ಲ್ಲೆಪರಿಂ ಜಾತಾ ಮ್ಹಣ್ ಖಚಿತ್ ಜಾತಚ್ ಮ್ಹಜಿ ಲಿಖ್ಣಿ ಪಾಜ್ಲಿ.

ಡಿಫೀಶಿಯೆಂಟ್ ಕಾಣಿಯೆಂತ್ ಹೀರೊ ಜಾಲಾ ಝೀರೊ?!

‘ಅಸ್ಮಿತಾಯ್’ ಸಿನೆಮಾಂತ್ ಪಾರ್ಕಿಲ್ಯಾರ್ ಶೆಂಬರಾ ವಯ್ರ್ ಬ್ಲಂಡರ್ಸ್ ದಿಸ್ತಾತ್. ತೆ ಸಕ್ಕಡ್ ಬರಂವ್ಕ್ ಗೆಲ್ಯಾರ್ ಬೂಕ್‍ಚ್ ಕಾಡಿಜೆ. ದೆಕುನ್ ಥೊಡ್ಯೊ ಪ್ರಮುಖ್ ಗಜಾಲಿ ಸಾಂಗ್ತಾಂ. ಸಿನೆಮಾಂತ್ಲ್ಯಾ ಅತೀ ಹಾಸ್ಯಾಸ್ಪದ್ ಸಂಗ್ತಿಂ ಪಯ್ಕಿ ಏಕ್, ತಾಚ್ಯಾ ಕಥಾನಾಯಕಾಚಿ ಅವಸ್ಥಾ!

ವ್ಹಯ್. ಸಿನೆಮಾಂತ್, ತಾಚೊ ಸಪ್ಣೆಲಿ ಆನಿ ರಚ್ಪಿ, ಎರಿಕ್ ಒಝೇರಿಯೊ ಆಪ್ಲ್ಯಾಚ್ ಪಾತ್ರಾಚೆರ್ ಬಿಲ್ಡಪ್ ದೀವ್ನ್ – “ಕಾಣಿಯೆಚೊ ನಾಯಕ್ ವಾದಾಳ್ ಉಟಂವ್ಚೊ ತರ್ನಾಟೊ…” ಮ್ಹಣ್ ಶಿಫಾರಸ್ ಉಚಾರ್ತಾ. ಸಗ್ಳೆಂ ಸಿನೆಮಾ ಚಾಚಾರ್ ಪಾವ್ಟಿಂ ಪಳೆಲ್ಯಾರೀ ತ್ಯಾ ಹೀರೊನ್ ಖಂಯ್ಸರ್ ವಾದಾಳ್ ಉಟಯ್ಲಾಂ ಮ್ಹಳ್ಳೆಂಚ್ ದಿಸನಾ. ತರ್ ಕಸಲೊ ಹೀರೊ ತೊ???

ಪಯ್ಲ್ಯಾ ದೃಶ್ಯಾ ಥಾವ್ನ್ ಕ್ಲೈಮ್ಯಾಕ್ಸಾಂತ್ಲ್ಯಾ ನಿಮಾಣ್ಯಾ ದೃಶ್ಯಾ ಪರ್ಯಾಂತ್ ಕಥಾನಾಯಕ್ ವಿವೇಕ್ (ಅಶ್ವಿನ್ ಡಿಕೋಸ್ಟಾನ್ ಖೆಳ್‍ಲ್ಲೊ ಪಾತ್ರ್) ಏಕ್ ನಾಯಕ್ ನ್ಹಯ್, ಬಗಾರ್ ಅಸ್ಕತ್ ವ್ಯಕ್ತಿತ್ವ್ ಜಾವ್ನ್ಂಚ್ ಸೊಭ್ಲಾ ಶಿವಾಯ್ ಹೀರೊಪರಿಂ ಖಂಯ್ಸರೀ ಪರ್ಜಳೊಂಕ್ ನಾ. ತಾಚಿ ಎಂಟ್ರಿ ಜಾಂವ್ಚಿಚ್ ವೈಫಲ್ಯತಾ ಆನಿ ನಿರಾಶೆಚ್ಯಾ ಬಾಂಧ್ಪಾಸಾಂತ್. ಅಮೆರಿಕಾಂತ್‍ಚ್ ಜಲ್ಮೊನ್ ವಾಡ್‍ಲ್ಲ್ಯಾ ವಿವೇಕಾಕ್ ಸಂಸ್ಕೃತೆ ವಿಶಿಂ ಶಿಕೊಂಕ್ ಕಿತ್ಯಾಕ್, ಕಶೆಂ ಪ್ರೇರಣ್ ಮೆಳ್ಳೆಂ ಮ್ಹಳ್ಳೆಂಚ್ ವಿಚಿತ್ರ್. ತಾಚೊ ಪ್ರೊಫೆಸರ್ ತಾಕಾ ಅಕ್ಮಾನ್ ಕರ್ತಾ. ತಶೆಂ ತೊ ಫ್ರಸ್ಟ್ರೇಟ್ ಜಾಲ್ಲೆಂ ದಾಕಂವ್ಚ್ಯಾ ಮುಖಾಂತ್ರ್ ಹೀರೊಚಿ ಎಂಟ್ರಿ ಜಾತಾ.

ಉಪ್ರಾಂತ್, ನಿಮಾಣೆಂ ಪರ್ಯಾಂತ್ ತೊ ತಸಲ್ಯಾಚ್ ಅಸಹಾಯಕ್ ಪರಿಸ್ಥಿತೆಂನಿ ಬಿಗ್ದತಾ. ದಾಖ್ಲ್ಯಾಕ್, ತೊ ಹೀರೊಯಿನಿಚೆರ್ ಮೊಗಾರ್ ಪಡೊನ್ ತಾಕಾ ಜಿಕೊಂಕ್ ಹುಳ್ವುಳ್ತಾ. ದೆಖಿಕ್ ನೆಗಾರ್ಚೆಂ ನಟನ್ ಕರ್ಚಿ ನಾಯಕಿಯೀ (ವೆನ್ಸಿಟಾ ಡಾಯಸಾಚೊ ಪಾತ್ರ್) ನಾಯಕಾಚೆರ್ ಮೊಗಾರ್ ಪಡ್ತಾ. ಪುಣ್ ರಾತಿಕ್ ಹೀರೊನ್ ಫೋನ್ ಕೆಲ್ಯಾರ್ ತಿಚೆಂ ಮೊಬೈಲ್ ಸ್ವಿಚ್ ಆಫ್! ತರ್ ತೆಂ ಕೊಣಾ ಕಡೆನ್ ತಿತ್ಲೆಂಯೀ ಉಲಯ್ಲಾಂ, ಬ್ಯಾಟ್ರಿ ಖಾಲಿ ಜಾಂವ್ಕ್?! ಹೀರೊಕ್ ಸರಸ ಸಲ್ಲಾಪ ಕರುಂಕೀ ಅವ್ಕಾಸ್ ನಾ, ಪಾಪ್! ಹಾಚ್ಯಾ ವರ್ತಿ ಕ್ಷುಲ್ಲಕ್ ಸಂಗತ್ ಆಸಾಗೀ? ಹೀರೊಚೆರ್ ಬಿರ್ಮತ್ ಉಬ್ಜತಾ…

ಘಾಟಾಚ್ಯಾ ತ್ಯಾ ನಿಗೂಢ್ ಪರ್ವತಾಚ್ಯಾ ತುದಿಯೆಕ್ ಹೀರೊ ಆನಿ ಹೀರೊಯಿನ್ ದೊಗಾಂಯ್ ಚಡೊನ್ ವೆತಾತ್. ಥಂಯ್ ತೊ ತಿಕಾ ಮೆಚ್ವಂವ್ಕ್ ಪೆಚಾಡ್ತಾ. ವಯ್ರ್ ‘ದಾರ್ಶನಿಕ್’ ಸಿಮಾಂವ್ಚೆಂ ದರ್ಶನ್ ಜಾತಾ. ಸಾವ್ಕಾರಾಚೊ ಚಾಕೊರ್ ತುಕ್ರಾ ಆನಿ ‘ವಿಲನ್’ ಮಾರ್ಕು ತಾಂಕಾಂ ‘ಸೊಧುನ್’ ವಯ್ರ್ ಚಡ್ತಾತ್. ಥಂಯ್ ಉಲೊಣೆಂ, ದುರ್ಸೊಣೆಂ ಜಾತಚ್ ನಾಯಕಿಚೊ ಹಾತ್ ಧರ್ನ್ ವಿಲನ್ ವೋಡ್ನ್ ವ್ಹರ್ತಾ. ಹೀರೊ ಅಸಹಾಯಕ್ಪಣಿಂ ಪಳೆತಾ. ಬಿರ್ಮತ್ ನಿರಾಶೆನ್ ಬದಲ್ತಾ…

ಸಿಮಾಂವ್ಚ್ಯಾ ದಿಗ್ದರ್ಶನಾನ್ ನಾಯಕ್ ಗೊಂಯಾಂ ಭಾಯ್ರ್ ಸರ್ತಾ, ನಾಯಕಿಕ್ ಘೆವ್ನ್. ಸುರ್ವಾತಿಚ್ಯಾ ಕಾಜಾರ್ ಸಂಭ್ರಮಾಚ್ಯಾ ಕಾರ್ಯಾಂನಿ ಹೀರೊ ವಾ ಹೀರೊಯಿನಿಕ್ ವ್ಹಡ್ಪಣ್ ಹಾಡ್ಚೆಂ ಕಸಲೆಂಯೀ ದೃಶ್ಯ್ ನಾ. ರೋಚಕ್ ಘುಂವ್ಡಿ ಆಪ್ಣಾವ್ನ್ ಗೊಂಯಾಂ ಪಾವ್ಲ್ಯಾ ಉಪ್ರಾಂತ್‍ಯೀ ತಶೆಂಚ್. ವಾಟೆರೀ ತಿತ್ಲೆಂಚ್. ಗೊಂಯಾಂತ್ ವಿಲನಾಚ್ಯಾ ಹುಕ್ಮೆನ್ ವಿವೇಕಾಕ್ ಲಗಾಡ್ ಕಾಡುಂಕ್ ಸುಪಾರಿ ಘೆತ್‍ಲ್ಲೆ ಒದ್ದಾಡ್ತಾತ್. ಚೇಸಿಂಗ್ ದೃಶ್ಯಾಂತ್ ಹೀರೊ ಆನಿ ಹೀರೊಯಿನ್ ಪಲಾಯನ್ ಕರ್ನ್ ಧಾಂವ್ತಾತ್ ಶಿವಾಯ್ ಹೀರೊಯಿಸಂ ಮ್ಹಳ್ಳೆಂಚ್ ನಾ. ಫೈಟಿಂಗ್ ದೃಶ್ಯ್ ಉದೆತಾ ಮ್ಹಣ್ತಾನಾ ಭಾರತೀಯ್ ಸಿನೆಮಾಂಚ್ಯಾ ಇತಿಹಾಸಾಂತ್ ಪಯ್ಲೆ ಪಾವ್ಟಿಂ, ಜಟ್‍ಪಟ್ ಪೊಲಿಸ್ ಯೆತಾತ್. ತಶೆಂ ಫೈಟಿಂಗ್ ಕ್ಯಾನ್ಸಲ್, ಹೀರೊ ಸೇಫ್! ಹೀರೊಕ್ ದೇವ್‍ಚ್ ಗತ್ ಮ್ಹಣ್ ಭೊಗ್ಚಿ ಪರಿಗತ್…

ಸಕ್ಡಾ ಪ್ರಾಸ್ ವಾಯ್ಟ್ ಮ್ಹಳ್ಯಾರ್ ಕ್ಲೈಮ್ಯಾಕ್ಸ್ ಸೀನ್. ವಿಲನ್ ನಾಯಕಿಕ್ ಆಪ್ಣಾಂವ್ಚ್ಯಾಕ್ ಹೀರೊಕ್ ಮುಗ್ದುಂಚೆಂಚ್ ಪರಿಹಾರ್ ಮ್ಹಣ್ ವಿವೇಕಾಕ್ ಶಿಂತ್ರ್ಯಾಂನಿ ಘರಾ ಭಾಯ್ರ್ ಯೇಶೆಂ ಕರ್ತಾ. ತಶೆಂ ತೆ ಸಕ್ಕಡ್ ಸಿಮಾಂವ್ಚ್ಯಾ ಖೊಮ್ಟ್ಯಾಕ್ ಪಾವ್ತಾತ್. ಥಂಯ್ ಖಂಚ್ಯಾಚ್ ರಿತಿನ್ ಸಮರ್ಥನ್ ಕರುಂಕ್ ಜಾಯ್ನಾತ್‍ಲ್ಲ್ಯಾ ಪರಿಸ್ಥಿತೆಚಿಂ, ನಿಕೃಶ್ಟ್ ದೃಶ್ಯಾಂ ವಿಣ್ಲ್ಯಾಂತ್. ವಿಲನಾಚ್ಯಾ ಬಂದೂಕೆಕ್ ಸಿಮಾಂವ್ ಬಲಿ ಜಾತಾ. ಹಾಸ್ಯಾಸ್ಪದ್‍ಪಣಾಚೆಂ ಅತಿರೇಕ್ ಪಳೆಯಾ, ತಿತ್ಲೆಂ ಸರ್ವ್ ಜಾತಾನಾಂಯೀ ಹೀರೊ ಮೊಡ್ಯಾಚೆರ್ ಹಾತ್ ಚರವ್ನ್ ‘ಊಟ್ ಸಿಮಾಂವ್, ಊಟ್ ಸಿಮಾಂವ್’ ಮ್ಹಣ್ ಭುರ್ಗ್ಯಾಂಪರಿಂ ರಡ್ತಾ. ಶಿವಾಯ್, ಉಪ್ರಾಟ್ತಾ ಎಕ್ಲೊ ನಿಮ್ನ್ ಜಾತಿಚೊ ಚಾಕೊರ್!

ಕ್ಲೈಮ್ಯಾಕ್ಸ್ ದೃಶ್ಯಾಂತ್ ಪುಣೀ ಹೀರೊ ಜಾವ್ಯೆತೆಂ. ನಾ! ನಾಯಕಾನ್ ತ್ಯಾ ಸಂದರ್ಭಾರ್ ವಿಲನಾಕ್ ಬೂದ್ ಶಿಕಯ್ಜೆ ಆಸ್‍ಲ್ಲೆಂ. ಸಾಹಸ್ ದೃಶ್ಯ್ ವಿಣುನ್ ಹೀರೊಚೆಂ ಜಯ್ತ್ ದಾಕಯ್ಜೆ ಆಸ್‍ಲ್ಲೆಂ. ತಶೆಂ ನಾ. ಫೈಟ್ ಜಾತಾ, ವಿಲನ್ ಆನಿ ಪಂಗಡ್ ಶೆವ್ಟತಾ. ತಿತ್ಲೆಂ ಸರ್ವ್ ಜಾಲ್ಯಾ ಉಪ್ರಾಂತೀ ಆಮ್ಚೊ ಹೀರೊ ಬೋಳ್‍ಬೆಪ್ಪಾಪರಿಂ ಮೆಲ್ಲ್ಯಾ ಸಿಮಾಂವ್ಚ್ಯಾ ಹರ್ದ್ಯಾರ್ ಪೊಶೆವ್ನ್ಂಚ್ ಆಸ್ತಾ..!

ಹೆಂಚ್‍ಗೀ ಹೀರೊಯಿಸಂ? ಅಸಲ್ಯಾ ಅಸಹಾಯಕ್ ಆನಿ ಅಸ್ಕತ್ ಪಾತ್ರಾಕ್ ರಚುನ್ ತೊ ಹೀರೊ, ಕಥಾನಾಯಕ್ ಮ್ಹಣ್ ಆಪಯ್ತೆಲ್ಯಾಂಕ್ ಕಿತೆಂ ಮ್ಹಣಜೆ? ‘ವಾದಾಳ್ ಉಟಂವ್ಚೊ’ ಹೀರೊ ಕಿತ್ಯಾಕ್ ಹರ್ ಕಡೆನ್ ಫೈಲ್? ಕಿತ್ಯಾಕ್ ತಾಕಾ ತಿತ್ಲೊಯೀ ನಾಲಾಯಕ್ ಮ್ಹಣ್ ಪಿಂತ್ರಾಯ್ಲಾಂ? ನಿಜಾಯ್ಕೀ ತ್ಯಾ ಪಾತ್ರಾಕ್ ಅಕ್ಮಾನ್ ಕರ್ಚ್ಯಾಕ್‍ಚ್ ರಚ್ಲಾಂ ಮ್ಹಳ್ಳೆಪರಿಂ ಸಗ್ಳೆಂ ಘಡ್ತಾ. ಅಶ್ವಿನ್ ಡಿಕೋಸ್ಟಾನ್ ಭೋವ್ ಬರೆಂ ನಟನ್ ಕೆಲಾಂ, ತರೀ, ಅಸಲ್ಯಾ ನಿಕೃಶ್ಟ್ ಪಾತ್ರಾ ಮುಖಾಂತ್ರ್ ತಾಕಾಯೀ ಅಕ್ಮಾನ್ ಕೆಲಾಂ. ಎಕಾ ಹೀರೊಕ್ ಅಸಲೆಂ Humiliation ಹೆರ್ ಖಂಯ್ಸರೀ ಆಸ್ಚೆಂ ನಾ.

ತರ್ ಅಸಲೊ ಅಸಹಾಯಕ್ ಪಾತ್ರ್ ರಚ್‍ಲ್ಲೊ ಕೊಣೆಂ? ಎಕೆಕ್ಲ್ಯಾಚಿ ಎಕೇಕ್ ಜಾಪ್. ಎರಿಕಾನ್‍ಂಚ್ ಸಗ್ಳೆಂ ಬರವ್ನ್ ದಿಲ್ಲೆಂ ಮ್ಹಣ್ ಥೊಡೆ ಸಾಂಗ್ತಾತ್ ತರ್, ಎರಿಕ್ ಮ್ಹಣ್ತಾ ಆಪ್ಣೆಂ ಬರಯಿಲ್ಲ್ಯಾ ಕಾಣಿಯೆಚೆರ್ ಜೊಯೆಲಾನ್ ಪಾತ್ರ್ ರಚನ್ ಕೆಲಾಂ ಮ್ಹಣ್. ಸಿನೆಮಾಂತ್ಲೊ ಎರಿಕ್ ಅಭಿಮಾನಾನ್ ತಾಕಾ ಉತ್ವಾರ್ ಚಡಯ್ತಾ. ತಾಣೆಂ ಸಾಂಗ್‍ಲ್ಲೆಂ ವಾದಾಳ್ ಫಕತ್ ದರ್ಯಾಂತ್ ಮಾತ್ರ್ ದಿಸ್ತಾ! ಹೀರೊಕ್ Demean ಕೆಲ್ಲೆಂ ಕೊಣೆಂ ಆನಿ ಕಿತ್ಯಾಕ್ ಮ್ಹಳ್ಳೆಂಚ್ ನವಾಲ್.

ಕ್ಯಾಮೆರಾ ವರ್ಕ್ (ಸಿನೆಮಾಟೊಗ್ರಫಿ) ಅತೀ ನಿಕೃಷ್ಟ್

ಸಿನೆಮಾಂತ್ಲಿ ಅತೀ ಚಡ್ ದುಬ್ಳಿಕಾಯ್ ಮ್ಹಳ್ಯಾರ್ ಕ್ಯಾಮೆರಾ ವಾವ್ರ್. ಕ್ಯಾಮೆರಾಮ್ಯಾನ್ ಮ್ಹಳ್ಳೊ ಆಸ್‍ಲ್ಲೊಗೀ ಮ್ಹಳ್ಳೆಂಚ್ ದುಬಾವಾಚೆಂ! ಫಕತ್ ಎಕಾ ದೃಶ್ಯಾಂತ್ ಸೊಡ್ಲ್ಯಾರ್ ಸಗ್ಳ್ಯಾ ಸಿನೆಮಾಂತ್ ಪಿಕ್ಚರೈಸೇಶನ್ ಮ್ಹಳ್ಳೆಂಚ್ ನಾ. ಭುರ್ಗಿಂ ಸಯ್ತ್, ಫಕತ್ ಮೊಬೈಲಾಂತ್, ಅದ್ಭುತ್ ಟೆಲಿಫಿಲ್ಮಾಂ, ಡೊಕ್ಯುಮೆಂಟರಿ ಕಾಡ್ಚ್ಯಾ ಹ್ಯಾ ಕಾಳಾರ್ ಎಕಾ ಸಿನೆಮಾಚೆಂ ಚಿತ್ರೀಕರಣ್, ಕ್ಯಾಮೆರಾ ಧರುಂಕ್ ಕಳಿತ್ ನಾತ್‍ಲ್ಲ್ಯಾಂಕ್ ವಹ್ಸಿಲಾಂ ಕಿತ್ಯಾಕ್ ಕಳನಾ. ‘ಅಸ್ಮಿತಾಯ್’ ಸಿನೆಮಾಚ್ಯಾ ಕ್ಯಾಮರಾಮ್ಯಾನಾನ್ ಫಕತ್ ಸ್ವಿಚ್ ಆನ್ ಕೆಲ್ಯಾ ಶಿವಾಯ್ ದುಸ್ರೆಂ ಕಿತೆಂಯೀ ಕೆಲ್ಲೆಂ ಖಂಯ್ಸರೀ ದಿಸನಾ.

ಆಡಿಶನ್, ಟ್ರೈನಿಂಗ್ ಪೂರಾ ಆಸ್‍ಲ್ಲೆಂ ಖಂಯ್. ತರ್ ಡೈರೆಕ್ಟರ್, ಕ್ಯಾಮೆರಾಮ್ಯಾನಾಚಿ ಅರ್ಹತಾ ಪರೀಕ್ಷಾ ಕರಿನಾಸ್ತಾನಾ ತೆದಿ ವ್ಹಡ್ ಜವಾಬ್ದಾರ್ ಕಶೆಂ ವಹ್ಸಿಲಿ? ಸೊಡ್ಯಾಂ, ದೋನ್ ದೀಸ್ ತಾಂಚೆಂ ಕಾಮ್ ಪಳೆತೆಲ್ಯಾಕೀ ತೆ ವೃತ್ತೆಕ್ ಅಯೋಗ್ಯ್ ಮ್ಹಣ್ ಕಳೊಂಕ್ ನಾ? ತಾಂಡೆಲ್ಯಾಂಕ್ ತಿತ್ಲಿಯೀ ಅಸ್ಕತ್ಕಾಯ್???

ಕ್ಯಾಮೆರಾ ವರ್ಕ್ ಕಿತ್ಲ್ಯಾ ಗತ್ತಿಗಟಾಚೆಂ ಮ್ಹಣ್ಚ್ಯಾಕ್ ಏಕ್ ದೃಷ್ಟಾಂತ್ ಸಾಂಗ್ತಾಂ. ನಾಯಕ್-ನಾಯಕಿ ಗುಡೊ ಚಡೊನ್ ವೆಚೆಂ ದೃಶ್ಯ್ ಆಸಾ, ತಾಂತುಂ ತಿಂ ಸಂಭಾಷಣ್ ಕರ್ತಾನಾ ಕ್ಲೋಸಪ್ Shots ದಾಕಯ್ಜೆ ಮ್ಹಳ್ಳೆಂ ಮಿನಿಮಮ್ ಸೆನ್ಸ್ ಕೊಣಾಯ್ಕೀ ನಾತ್‍ಲ್ಲೆಂ ಕಶೆಂ? ಕ್ಯಾಮೆರಾ ಸೆಟ್ ಉಕಲ್ನ್ ವ್ಹರುಂಕ್ ಕಷ್ಟ್ ದೆಕುನ್ ಪಯ್ಸ್ ಥಾವ್ನ್ ಶೂಟ್ ಕರ್ನ್ ಹರಕೆ ಸಂದಾಯ ಕೆಲ್ಲೆಪರಿಂ ಕಾಡ್ಲಾಂ ತೆಂ ದೃಶ್ಯ್. ಝೂಮ್ ಕರಿಜೆ ಕೆದಾಳಾ, ಫೋಕಸ್ ಕರ್ಚೆಂ ಕಿತ್ಯಾಕ್, ವೈಡ್ ಆ್ಯಂಗಲ್ ಕೆದ್ನಾಂ ಮ್ಹಳ್ಳ್ಯೊ ಮೂಳ್ ಗಜಾಲಿಚ್ ಕಳಿತ್ ನಾತ್‍ಲ್ಲ್ಯಾಂನಿ ‘ಅಸ್ಮಿತಾಯ್’ ಪಿಕ್ಚರೈಸ್ ಕೆಲಾಂ! ಕಿತ್ಲೆಂ ವಂಡರ್‌ಫುಲ್ ನ್ಹಯ್ಗೀ?

ಸಿನೆಮಾ ಮ್ಹಳ್ಯಾರ್ ವೆದಿ ಕಾರ್ಯೆಂ ನ್ಹಯ್. ಹಾಂತುಂ ಫಕತ್ ರಿಪೋರ್ಟರಾಂನಿ ವೆದಿ ಕಾರ್ಯೆಂ ಶೂಟ್ ಕೆಲ್ಲೆಪರಿಂ ಆಸಾ ಶಿವಾಯ್ ಸಿನೆಮಾ ಚಿತ್ರೀಕರಣಾಚಿ ಕುಸ್ಕುಟಾಚಿ ಕಲಾ, ಕೌಶಲ್ಯತಾ ನಾ. ಹಾಚ್ಯಾಕೀ ಧಾ ವಾಂಟ್ಯಾಂನಿ ಬರೆಂ ಕರ್ನ್ ಕಾಜಾರಾಚೆಂ ಚಿತ್ರೀಕರಣ್ ಕರ್ಚೆ ಫೊಟೊಗ್ರಾಫರ್ ದರಬಸ್ತ್ ಮೆಳ್ತಾತ್. ಗೊಂಯಾಂತ್ ಚೇಸಿಂಗ್ ದೃಶ್ಯಾಚೆಂ ಏಕ್ ಸನ್ನಿವೇಶ್ ಸೊಡ್ಲ್ಯಾರ್ (ತ್ಯಾ ವೆಳಾರ್ ಕ್ಯಾಮೆರಾಮ್ಯಾನ್ ಬದ್ಲಲ್ಲೊ ಆಸ್ತಲೊ) ಸಗ್ಳೆಂ ಸಿನೆಮ್ ಇತ್ಲೆಂ ನಿಕೃಶ್ಟ್ ರಿತಿನ್ ಚಿತ್ರೀಕರಣ್ ಕೆಲಾಂಗೀ, ತೆಂ ಪಳೆತಲೊ ದೆದೆಸ್ಪರ್ ಜಾತಾ.

ಹಾಸ್ಯಾಸ್ಪದ್ ಸಂಭಾಷಣಾಂ ಆನಿ ಪ್ರಹಸನಾಂ

ಸಿನೆಮಾಕ್ ಗ್ರೇಸ್ತ್ ಕರ್ಚ್ಯಾ ಸಂಗ್ತಿಂ ಪಯ್ಕಿ ಸಂಭಾಷಣಾಂಯೀ ಪ್ರಮುಖ್. ಅಸ್ಮಿತಾಯ್ ಸಿನೆಮಾಚಿಂ ಸಂಭಾಷಣಾಂಗೀ, ದೆವಾ, ಇತ್ಲೆಂ ನಾಪಾಸ್‍ಪಣ್ ದುಸ್ರೆ ಖಂಯ್ಸರೀ ಪಳೆಂವ್ಕ್ ಮೆಳನಾ. ಅಸಲಿ ತಕ್ಲಿ ಕೊಣಾಚಿ ಮ್ಹಣ್ ಸೊಧುನ್ ತಾಕಾ ‘ಅಜ್ಞಾನಪೀಠ’ ಪ್ರಶಸ್ತಿ ದಿಂವ್ಚೆಂ ಬರೆಂ!

ಸಂಭಾಷಣ್ ಮ್ಹಳ್ಯಾರ್ ತಾಂತುಂ ಕಾಣಿ, ಪಾತ್ರ್, ವಿಷಯ್ ಆನಿ ತಾಚೊ ಆಶಯ್, ಕಾನ್ಸೆಪ್ಟ್, ಥೀಮ್, ಗಂಭೀರತಾ, ಸಸ್ಪೆನ್ಸ್, ಹಿಶಾರೊ, ದೂರ್‌ದೃಶ್ಟಿ ಇತ್ಯಾದಿ ಸಕ್ಕಡ್ ಆಟಾಪ್ತಾ. ಸಂಭಾಷಣಾಂನಿಂಚ್ ಏಕ್ ಸಿನೆಮ್ ಜಿಕವ್ಯೆತ್. ಪುಣ್ ಹಾಂಗಾಸರ್ ಸಾರ್ಕಿ ಕಾಣಿಂಚ್ ನಾ, ಪಾತ್ರಾಂಕೀ ತಾಳ್‍ಮೂಳ್ ನಾ, ದೃಶ್ಯಾಂಕ್ ‘ದಿಕ್ಕುದೆಸೆ’ ನಾ. ತರ್ ಸಂಭಾಷಣಾಂ ಬರಿಂ ಉದೆಂವ್ಚಿಂ ಕಶೆಂ? ಸಗ್ಳೆಂ ಅಸ್ತವ್ಯಸ್ತ್ (Just Chaos).

ಗುಡ್ಯಾಚ್ಯಾ ತುದಿಯೆರ್ ಸಿಮಾಂವ್ಚೆಂ ದರ್ಶನ್ ಜಾತಚ್, ತೊ ಕೋಣ್ ಆಸ್ಯೆತ್ ಮ್ಹಣ್ ತರ್ಕ್ ಚಲ್ತಾ, ಹೀರೊ-ಹೀರೊಯಿನಿ ಮಧೆಂ. ನಾಯಕಿಚ್ ಸಿಮಾಂವ್ಕ್ ವಳ್ಕತಾ, ತೊ ಏಕ್ ಕಲಾಕಾರ್ ಮ್ಹಣೊನ್. ತಾಚ್ಯಾ ಬಾಪಾಯ್ನ್ ಘರಾಂತ್ ಫಿಚಾರ್ ಕೆಲ್ಲೆಂ ಸಿಮಾಂವ್ಚೆಂ ಪೈಂಟಿಂಗ್ ತಾಕಾ ತಿ ವಳಕ್ ಸಾಂಗ್ತಾ. ಮ್ಹಣ್ತಚ್ ಸಿಮಾಂವ್ಚ್ಯಾ ಕಲೆಚಿ ಇಲ್ಲಿ ಪುಣೀ ಝಳಕ್ ತಾಕಾ ಆಸಾ.

ಪುಣ್, ತೊಚ್ ಪಾತ್ರ್ ಸಿಮಾಂವ್ಚ್ಯಾ ಖೊಮ್ಟ್ಯಾಂತ್ ರಿಗ್ತಚ್ ಕಿತೆಂ ಮ್ಹಣ್ತಾ? “ಜಲ್ಮಾಂತ್ ಅಸಲೆಂ ಪಳೆಂವ್ಕ್ ನಾ” ಮ್ಹಣ್ತಾ ನಾಯಕಿ! ಹೆಂ ಕಶೆಂ? ತರ್ ಆದಿಂ ಪಳೆಲ್ಲ್ಯಾ ಪೈಟಿಂಗಾ ವರ್ವಿಂಚ್ ಸಿಮಾಂವ್ ಕೋಣ್ ಮ್ಹಣ್ ಸಾಂಗೊಂಕ್ ಸಕ್‍ಲ್ಲಿ ನಾಯಕಿ, ತ್ಯಾಚ್ ಸಿಮಾಂವ್ಚ್ಯಾ ಘರಾ ಗೆಲ್ಲೆಂಚ್ ಸಗ್ಳೆಂ ವಿಸರ್ತಾ? ಹೆಂ ಸಂಭಾಷಣ್ ಬರಯಿಲ್ಲೊ ಮಹಾನ್ ಬರವ್ಪಿ ಕೋಣ್? ಕೊಣಾಚೆಂ ಸಂಭಾಷಣ್, ಕಿತ್ಯಾಕ್ ಬರಯ್ತಾ ಮ್ಹಳ್ಳೆಂಚ್ ತೊ ನೆಣಾಂ? ವಿಚಿತ್ರ್.

ಹೀರೊ ಹೀರೊಯಿನ್ ಬೈಕಾಚೆರ್ ಗೊಯಾಂ ಪಾವ್ತಾತ್. ಥಂಯ್ ಮೊರ್ಗನ್ (ಪ್ರಿನ್ಸ್ ಜೇಕಬಾಚೊ ಪಾತ್ರ್) ತಾಂಚೊ ಸತ್ಕಾರ್ ಕರ್ತಾ. ಭೋವ್ಶ್ಯಾ ತಿಂ ಗೊಂಯ್ಚಿ ಗಡ್ ಉತರ್ತಚ್ ಫಕತ್ ರಸ್ತ್ಯಾಚೆರ್ ಕೇಂದ್ರೀಕೃತ್ ಕರ್ನ್ ಶೀದಾ ಮೊರ್ಗನಾಚ್ಯಾ ಘರಾ ಪ್ರವೇಶ್ ಜಾಲ್ಲಿಂ ಕೊಣ್ಣಾ! ದೊನ್ಪಾರಾಂ ಜೆವಣ್, ವಿಶೆವ್ ಜಾತಚ್ ಮೊರ್ಗನ್‍ಂಚ್ ತಾಂಕಾಂ ಗೊಂಯ್ಚೆ ನಾಚ್/ಪದಾಂ ದಾಕಂವ್ಕ್ ಆಪವ್ನ್ ವ್ಹರ್ತಾ. ರಾತಿಕ್ ಪಾಟಿಂ ಪಾವ್‍ಲ್ಲೆಂಚ್ ಹೀರೊ ಕಿತೆಂ ಮ್ಹಣ್ತಾ?

“ಆಮಿ ಗೊಂಯಾಂ ಆಯ್ಲ್ಯಾಂವ್, ಇಲ್ಲೆಂ ಭಾಯ್ರ್ ವಚಜೆ ನೆ…” ಮ್ಹಣ್ತಾ ತೊ. ಅರೆ, ತರ್ ತೆದೊಳ್ ಪರ್ಯಾಂತ್ ತೊ ಕಿತೆಂ ಬೆಳ್‍ಗಾಂವ್ ಭೊಂವೊಂಕ್ ಗೆಲ್ಲೊಗೀ?

ಹೊಚ್ ಹೀರೊ ಅಮೆರಿಕ ಥಾವ್ನ್ ಗಾಂವಾಕ್ ಪಾವ್ತಾ ಕಿತ್ಯಾಕ್? ಭಾವಾಚ್ಯಾ ಪುತಾಚ್ಯಾ ಕಾಜಾರಾಕ್ ತಾಚೊ ಬಾಪಯ್ (ರೊಯ್ ಕಾಸ್ತೆಲಿನೊ ಪಾತ್ರ್) ತಾಕಾ ಧಾಡ್ತಾ. ಆಪ್ಲ್ಯಾ ಪಾಳಾ-ಮುಳಾ ವಿಶಿಂ ಶಿಕೊಂಕ್ ತೊ ಆಯಿಲ್ಲೊ ವ್ಹಯ್ ತರೀ, ಕಾಜಾರಾ ವೆಳಾರ್ ಕಾಜಾರ್‌ಚ್ ಪ್ರಮುಖ್. ತೆಂಯೀ ಕಸಿನಾಚೆಂ. ಪುಣ್ ಆಮ್ಚೊ ಹೀರೊ ಕಸಿನಾಗೆರ್ ಪಾವ್‍ಲ್ಲೊ ಪರ್ಕಿ ಕಸೊ ಕಿತ್ಯಾಕ್ ವರ್ತವ್ತಾ? ಬಾಪ್ಪು ಬಾಲ್ತು ಪೈನ್ (ಸ್ಟ್ಯಾನಿ ಅಲ್ವಾರಿಸ್ ಪಾತ್ರ್) ಪುತ್ನ್ಯಾಕ್ (ಹೀರೊಕ್) ಆಪ್ಲ್ಯಾ ಪುತಾಚಿ ವಳಕ್ ಸಾಂಗ್ಚಿ ರೀತ್ ಪಳೆಜೆ… ‘ತೊ ತುಜೊ ಕಸಿನ್’ ಮ್ಹಣ್ ಸಾಂಗ್ತಾ ಪರ್ಯಾಂತೀ ವಿವೇಕಾಕ್ ನೊವ್ರೊ ಮ್ಹಳ್ಳೊ ಆಸಾ, ತಾಚ್ಯಾಚ್ ಕಾಜಾರಾಕ್ ಆಪುಣ್ ಅಮೆರಿಕಾ ಥಾವ್ನ್ ಆಯ್ಲಾಂ ಆಸ್ತಾಂ ತಾಕಾ ಭೆಟ್ತಾನಾ ಕಿತೆಂಚ್ ವಿಶೇಸ್ ಭೊಗನಾ ಮ್ಹಳ್ಯಾರ್ ವಿಚಿತ್ರ್.

ಭಾವಾಂನಿ ಪೊಟ್ಲುನ್ ಧರ್ನ್ ಸಂಬಂಧ್ ಉಮಾಳಜೆ ಜಾಲ್ಲೆಂ ದೃಶ್ಯ್ ರಚಿಜೆ ಆಸ್‍ಲ್ಲೆಂ. (ಸಂಬಂಧ್ ಸಂಸ್ಕೃತಿಚೊ ವಾಂಟೊ ನ್ಹಯ್ಗೀ?). ತೆಂ ಸೊಡ್ನ್, “Ho, ya. I know him…” ಮ್ಹಣಯ್ಲಾಂ. ಹೊ ಕಸಲೊ ಡೈಲಾಗ್?

ಅಸಲಿಂ ಅಪಕ್ವ್ ಸಂಭಾಷಣಾಂ ಕಿತೆಂ ರುಜು ಕರ್ತಾತ್? ಮೂಳ್ ಕಾಣಿಂಚ್ ಅಸ್ಕತ್, ತಾಂತ್ಲೆ ಪಾತ್ರ್ ದಿಶಾ ನಾತ್‍ಲ್ಲೆ ಆನಿ ತಾಂಚೆಂ ಸಂಭಾಷಣ್ ತಾಳ್ ಮೂಳ್ ನಾತ್‍ಲ್ಲೆಂ – ಇತ್ಲೆಂಚ್ ಸಾಬಿತ್ ಜಾತಾ.

ಲೈಟಿಂಗ್ ನಾತ್‍ಲ್ಲೆಂ ಚಿತ್ರೀಕರಣ್ – ಕಾಳೊಕಾಚೆಂ ನರ್ತನ್!

ಕ್ಯಾಮೆರಾ ವರ್ಕ್ ಕಶೆಂಯೀ ಬುರ್ನಾಸ್‍ಮೂ? ಸಗ್ಳ್ಯಾ ಸಿನೆಮಾಚ್ಯಾ ಚಿತ್ರೀಕರಣಾಕ್ ಎಕ್ಲೊ ಸೂತ್ರ್‌ಧಾರ್ ಆಸ್‍ಲ್ಲೊಗೀ ಮ್ಹಳ್ಳೆಂಚ್ ಮಿಸ್ತೆರಾಚೆಂ ಸವಾಲ್. ನಾಂವಾಕ್ ಏಕ್ ನಿರ್ದೇಶಕ್ ಆಸಾ ಪುಣ್ ತಾಣೆಂ ಕಿತೆಂಯೀ ಕಾಮ್ ಕೆಲಾಂಗೀ ಮ್ಹಳ್ಳೆಂಚ್ ಸಮ್ಜನಾ. ಸಗ್ಳೆಂ ಸಿನೆಮಾ ಕಾಳೊಕಾಕ್ ಉಕಲ್ನ್ ದಾಕಂವ್ಚ್ಯಾ ಇರಾದ್ಯಾನ್ ರಚ್ಲಾಂ ತಶೆಂ ದಿಸ್ತಾ. ಸಿನೆಮಾ ಶೂಟಿಂಗಾಚೆಂ ಆರು ಮೂರು ಕಳಿತ್ ನಾತ್ಲೆಲ್ಯಾಂನಿ ಚಿತ್ರೀಕರಣ್ ಕೆಲಾಂ.

ದಿಸಾ ಉಜ್ವಾಡಾಚ್ಯಾ ದೃಶ್ಯಾಂನಿಚ್ ಪಾತ್ರಾಂಚಿಂ ತೊಂಡಾಂ ಪರ್ಜಳನಾಂತ್ (ರುಕಾ ಮುಳಾಂತ್ ಏಕ್ ಪಾವ್ಟಿಂ ಮಾತ್ರ್ ನಾಯಕ್-ನಾಯಕಿಚಿಂ ತೊಂಡಾಂ ಪರ್ಜಳ್ತಾತ್). ಲೈಟಿಂಗ್ ಸಿಸ್ಟಮ್‍ಂಚ್ ಹಾಡುಂಕ್ ವಿಸ್ರಲ್ಲೆಗೀ ವಾ ತ್ಯಾ ಯೂನಿಟಾಚೆ ಕೊಣೀ ಮೆಳೊಂಕ್ ನಾತ್‍ಲ್ಲೆಗೀ! ಹೀರೊ ಹೀರೊಯಿನಿಚ್ಯಾ ತೊಂಡಾಚೆರೀ ಲೈಟ್ ಪಡನಾಂತ್. ಖಂಯ್ ಪರ್ಯಾಂತ್ ಮ್ಹಳ್ಯಾರ್ ಗೊಂಯಾಂತ್ಲ್ಯಾ ಪದಾಂಚ್ಯಾ ಸನ್ನಿವೇಶಾಂನಿ ನಾಯಕ್-ನಾಯಕಿ ಬಸ್ತಾತ್ ಆನಿ ನಾಚ್ತಾತ್. ತಿಂ ಕಾಳೊಕಾಂತ್‍ಚ್ ಸಾಸ್ಪತಾತ್. ಡ್ಯಾನ್ಸ್ ಕರ್ತಾನಾಂಯೀ ತಾಂಚ್ಯಾ ಮುಖಮಳಾಚೆರ್ ಲೈಟ್ ಘಾಲುಂಕ್ ನಾ.

ಖಂಯ್ಗೀ ರೊಸಾಂತ್ ನಾಚ್ತಾನಾ ಕರೆಂಟ್ ಗೆಲ್ಲ್ಯಾ ವೆಳಾರ್ ಕೊಣೆಂಗೀ ಪೊಟ್ಟು ಮೊಬೈಲಾಂತ್ ಬೈಲಾ ಡ್ಯಾನ್ಸ್ ಶೂಟ್ ಕೆಲ್ಲೆಪರಿಂ ಹಿಂ ದೃಶ್ಯಾಂ ಆಸಾತ್. ಸಿನೆಮಾಂತ್ಲ್ಯಾ ಚಡಾವತ್ ದೃಶ್ಯಾಂನಿ ಹಿಚ್ ಪರಿಸ್ಥಿತಿ. ಪ್ರೊಡಕ್ಷನಾ ವೆಳಾರ್ ನಿರ್ದೇಶಕ್, ಕ್ಯಾಮರಾಮ್ಯಾನ್ ಆನಿ ಅಸಿಸ್ಟೆಂಟ್ಸ್ ಸಕ್ಕಡ್ ಬಿಡಿ ವೊಡುಂಕ್ ಗೆಲ್ಲೆಗೀ, ಸುರ್ ಪಿಯೆವ್ನ್ ಬಸ್‍ಲ್ಲೆಗೀ ದೆವಾಕ್‍ಚ್ ಕಳಿತ್.

ವಯ್ರ್ ಏಕ್ ಚಿತ್ರ್ ದಿಲ್ಲೆಂ ನೆ, ಲುವಿ ಪಿಂಟೊನ್ ಉಲಂವ್ಚೆಂ. ತೆಂ ಹ್ಯಾ ಸಿನೆಮಾಚ್ಯಾ ದುಬ್ಳಿಕಾಯೆಕ್ ಅದ್ಭುತ್ ಸಾಕ್ಸ್. ಸಗ್ಳ್ಯಾ ಸಿನೆಮಾಚೆಂ ಚಿತ್ರೀಕರಣ್ ಕಶೆಂ ಜಾಲಾಂ ಆಸ್ಯೆತ್ ಮ್ಹಣ್ ಹಿಶಾರೊ ದಿಂವ್ಚ್ಯಾಕ್‍ಚ್ ಹೆಂ ದೃಶ್ಯ್ ಆಸಾ ಕೆಲ್ಲೆಪರಿಂ ಭೊಗ್ತಾ. ಹೆಂ ಎಕ್ ಇಂಡೋರ್ ಚಿತ್ರೀಕರಣ್. ಹ್ಯಾ ಮನ್ಶ್ಯಾಂಕ್ ಮಿನಿಮಮ್ ಬೇಸಿಕ್ಸ್ ಕಶೆಂಯೀ ಕಳಿತ್ ನಾಂತ್, ಕಾಮನ್‌ಸೆನ್ಸ್‌ಯೀ ನಾ ಮ್ಹಳ್ಳೆಂ ಹಾಂತುಂ ಕಳ್ತಾ. ನಿರ್ಮಾಪಕಾಂ ತರ್ಫೆನ್ ಸಿನೆಮಾ ಸುರ್ವಾತ್ತಾನಾ ದಿಂವ್ಚ್ಯಾ ಸಂದೇಶಾಚೆಂ ಚಿತ್ರೀಕರಣ್ ಕರ್ತಾನಾ ಹೆ ತಾಂತ್ರಿಕ್ ಮನಿಸ್ ನಿದ್‍ಲ್ಲೆಗೀ? ನಿರ್ಮಾಪಕ್ ಕಾಳ್ಯಾ ಸುಟಾರ್ ಆಯ್ಲಾ (ತಾಕಾ ತಶೆಂ ಸಾಂಗ್‍ಲ್ಲೆಂಗೀ, ಕಾಸ್ಟ್ಯೂಮ್ ಡಿಸೈನರ್ ರಜೆರ್ ಆಸ್‍ಲ್ಲೊಗೀ ತಾಣಿಂಚ್ ಸಾಂಗಜೆ). ಬ್ಯಾಕ್‍ಗ್ರೌಂಡಾರೀ ಡಾರ್ಕ್ ರಂಗ್‍ಚ್ ಆಸಾ. ಜರ್ ಬ್ಯಾಕ್‍ಗ್ರೌಂಡ್ ಪಯ್ಲೆಂಚ್ ಫಿಕ್ಸ್ ಕೆಲ್ಲೆಂ ತರ್ ಸೂಟ್ ಬದ್ಲುಂಕ್ (ಬ್ರೈಟ್ ಕಲರಾಚೊ) ಸಾಂಗಜೆ ಆಸ್‍ಲ್ಲೆಂ. ವಾ ಗ್ರೀನ್ ಸ್ಕ್ರೀನಾರ್ ಶೂಟ್ ಕೆಲ್ಲೆಂ ತರ್ ಎಡಿಟಿಂಗಾ ವೆಳಾರ್ ಬ್ಯಾಕ್‍ಗ್ರೌಂಡಾಕ್ ಕಾಂಟ್ರಾಸ್ಟ್ ಕಲರ್ ದೀಜೆ ಆಸ್‍ಲ್ಲೊ. ಸಗ್ಳೆಂ ಕಾಳೆಂ ಕಾಳೆಂ. ಖಾಂದ್ಯಾರ್ ಘಾಲ್ಲೊ ಶಾಲ್ ಆನಿ ತೋಂಡ್ ಪುಣೀ ದಿಸ್ತಾ ಜಾಲ್ಲ್ಯಾನ್ ಬಚಾವ್. ಕಾತಿಚೊ ರಂಗ್‍ಯೀ ಡಾರ್ಕ್ ಆಸ್‍ಲ್ಲೊ ತರ್ ಮನಿಸ್‍ಚ್ ದಿಸ್ತೊ ನಾ ಪಡ್ದ್ಯಾರ್!

ಅಸಲೆಂ ಚಿತ್ರೀಕರಣ್ ಖಂಚ್ಯಾ ಕಾಲೆತಿಚೆಂ? ಅಸ್ಮಿತಾಯೆಚೆಂಗೀ? ಗ್ರೇಸ್ತ್‌ಕಾಯೆಚೆಂಗೀ? ಅಸ್ಕತ್ಕಾಯೆಚೆಂಗೀ? ವಾ ಗತ್ತಿಗಟಾಚೆಂ? ವಾ ಕಿತೆಂಯೀ ದಿಲ್ಯಾರ್ ಚಲ್ತಾ, ಕೊಣಾಕೀ ಕಳನಾ ಮ್ಹಳ್ಳ್ಯಾ ನೆಣಾರ್ಪಣಾಚೆಂಗೀ ವಾ ಆಮ್ಚೆಂಚ್ ಸಾರ್ಕೆಂ ಮ್ಹಳ್ಳೆಂ ಹಂಕಾರ್ಪಣಾಚೆಂ ಅತಿರೇಕಿ ವರ್ತನ್? ಹ್ಯಾ ಮನ್ಶ್ಯಾಂನಿ ಸಮಾಜೆಕ್ ಜಾಪ್ ದೀಜೆ.

ವಾಟ್ ಚುಕ್‍ಲ್ಲಿ ಚರಿತ್ರಾ, ಐತಿಹಾಸಿಕ್ ಪ್ರಮಾದ್

ಸಿನೆಮಾಚೊ ಮೂಳ್ ಶೆವಟ್‍ಚ್ ಸಮುದಾಯಾಚಿ ಚರಿತ್ರಾ ಸಾಂಗ್ಚಿ. ಐಡಿಯಾ ನಿಜಾಯ್ಕಿ ಬರಿ; ವರ್ಣುಂಕ್ ಜಾಯ್ನಾತ್‍ಲ್ಲೆಂ ರಿಸ್ಕೀ ಸಾಹಸ್ ತೆಂ. ಪುಣ್ ತಾಕಾ ಜಾಯ್ ಪುರ್ತಿ ತಯಾರಾಯ್ ಗರ್ಜ್. ಎಕಾ ದೊಗಾಂಚೆಂ ಅಧ್ಯಯನ್ ಪಾವನಾ, ಪರಿಣತಾಂಚೊ ಪಂಗಡ್‍ಚ್ ಜಾಯ್. ಪುಣ್ ‘ಅಸ್ಮಿತಾಯ್’ ಸಿನೆಮಾ ಕರ್ತಾಂಕ್ ಚರಿತ್ರಾ ಮ್ಹಳ್ಯಾರ್ ಭುರ್ಗ್ಯಾಂಚೆಂ ಭಾಷಣ್ ಬರಯಿಲ್ಲೆ ತಿತ್ಲೆಂ ಸಸಾರ್ ಮ್ಹಣ್ ಭೊಗ್ಲಾಂ! ತಾಂಚೆಂ ಸಿನೆಮ್ ತಶೆಂಚ್ ಆಸಾ.

ಮಂಗ್ಳುರಿ ಕೊಂಕ್ಣಿ ಕ್ರಿಸ್ತಾಂವ್ (ಫಕತ್ ಕೊಂಕ್ಣಿ ನ್ಹಯ್, ಬಗಾರ್ ಕೊಂಕ್ಣಿ ಕ್ರಿಸ್ತಾಂವ್. ಎರಿಕಾನ್ ಫಕತ್ ‘ಕೊಂಕ್ಣಿ’ ಮ್ಹಣ್ ಘೆತ್‍ಲ್ಲೆಂಚ್ ವ್ಹಡ್ ಡಿಫೆಕ್ಟಿವ್ ಪರಿಕಲ್ಪನ್) ಸಮುದಾಯಾಚ್ಯಾ ಚರಿತ್ರೆಕ್ ದೋನ್ ಪ್ರಮುಖ್ ಆಯಾಮ್ ಆಸಾತ್. ಪಯ್ಲೆಂ ಗೊಂಯ್ಚೆಂ ಇಂಕ್ವಿಜಿಸಾಂವ್ ಆನಿ ದುಸ್ರೆಂ ಟಿಪ್ಪುಚಿ ಬಂದಡ್. ಹಿಂ ದೊನೀ ಕರಾಳ್ ಘಡಿತಾಂ. ಮಾರೆಕಾರ್ ಅಧ್ಯಾಯ್ ತೆ. ತ್ಯಾ ಶಿವಾಯ್ ಪೂರಕ್ ಸಂಗ್ತಿ ಆಸಾತ್. ತಾಂತುಂ ಪ್ರಮುಖ್ ಆಸಾ ಕ್ರಿಸ್ತಾಂವಾಂನಿ ಕೆನರಾಕ್ ಆಯಿಲ್ಲಿ ಮಹತ್ವಾಚಿ ವಾಡಾವಳ್.

ಸಿನೆಮಾಚ್ಯಾ ಕಥಾವಸ್ತುಚೆರ್, ಮ್ಹಣ್ಜೆ ಚಾರಿತ್ರಿಕ್ ಗಜಾಲಿಂಚೆರ್, ಸಾಂಗೊಂಕ್ ಗೆಲ್ಯಾರ್ ಹಜಾರೊಂ ಪಾನಾಂ ಜಾಯ್. ದೆಕುನ್, ಥೊಡೆಂ ಗರ್ಜೆಚೆಂ ಮಾತ್ರ್ ಸಾಂಗ್ತಾಂ. ಸಿನೆಮಾಂತ್ ಕೊಣಾಚಿ ಚರಿತ್ರಾ ಸಾಂಗೊಂಕ್ ಅಪೇಕ್ಷಿಲಾಂ ಮ್ಹಳ್ಳ್ಯಾ ಗೊಂದೊಳಾಂತ್ ಮೂಳ್ ಬರವ್ಪಿ ಸಾಸ್ಪಲಾ. ದೆಕುನ್ ತಾಚಿ ಕಾಣಿ ಭಿಗಡ್ಲ್ಯಾ. ಕೊಂಕ್ಣಿ ಏಕ್ ಭಾಸ್ ವ್ಹಯ್, ಪುಣ್ ಕೊಂಕ್ಣೆಂತ್ ವೆವೆಗ್ಳೆ ಸಮುದಾಯ್ ಆಸಾತ್. ಹ್ಯಾ ವೆವೆಗ್ಳ್ಯಾ ಸಮುದಾಯಾಂಚಿ ಚರಿತ್ರಾಯೀ ವೆಗ್ಳಿಚ್. ಫಕತ್ ಕೊಂಕ್ಣಿ ಕೊಂಕ್ಣಿ ಮ್ಹಣ್ ಖರ್ಶೆಂವ್ಚೆಂ ಅಪಕ್ವ್ ರಾಜಾಂವ್ ದಾಕಯ್ತಾ.

ಬುನ್ಯಾದ್‍ಚ್ ಪೊಕೊಳ್ ಜಾಲ್ಯಾರ್ ಕಟ್ವಣ್ ಕಿತ್ಲೆಂ ಸ್ಥಿರ್ ಉರತ್? ಸಿನೆಮಾಂತ್ ತಶೆಂಚ್ ಘಡ್ಲಾಂ.

ಇಂಕ್ವಿಜಿಸಾಂವ್ ದಾಕಯಿಲ್ಲಿ ರೀತ್ ಚುಕಿಚಿ ಆನಿ ಅವಾಸ್ತವಿಕ್. ಗೊಂಯಾಂತ್ ಪುಡ್ತುಗೆಜಾಂನಿ (ರಾಜಕೀಯ್ ಆನಿ ಧಾರ್ಮಿಕ್ ವ್ಯವಸ್ಥೆಂನಿ) ಜಾಯ್ತೆಂ ದಗ್ದಿಲಾಂ. ತೆಂಚ್ ವೆಗ್ಳೆಂ; ಇಂಕ್ವಿಜಿಸಾಂವಾಚ್ಯಾ ಕೊಡ್ತಿ ಮುಖಾಂತ್ರ್ ಕಷ್ಟಿಲ್ಲೆಂಚ್ ವೆಗ್ಳೆಂ. ಕಾಣಿ ಘಡ್ಣಾರಾಕ್ ಹಾಚಿ ಮಾಹೆತ್ ನಾ ತೆಂ ಉಟೊನ್ ದಿಸ್ತಾ. ಸಗ್ಳೆಂ ದಾಕಂವ್ಕ್ ಬಜೆಟ್ ಪಾವನಾ ಮ್ಹಣ್ ಸಿಂಬಾಲಿಕ್ ಜಾವ್ನ್ ದಾಕಯ್ಲಾಂ ಮ್ಹಳ್ಯಾರೀ ತೆಂ ಬಸನಾ. ಕಲಾತ್ಮಕ್ ಲಿಬರ್ಟಿ ಘೆತ್ಲ್ಯಾ ಮ್ಹಣೀ ಜಾಯ್ನಾ. ಸಗ್ಳೆಂ ಸಜ್ಜಿಗೆ ಬಜಿಲ್ ಕೆಲಾಂ. ತಾಣಿಂ ಆಪ್ಲ್ಯಾಚ್ Knowledge Deficiencyಕ್ ನಾಗ್ಡೆಂ ಕೆಲಾಂ. ಕಾಣಿಯೆಗಾರಾನ್ ಆನಿ ಉಪ್ರಾಂತ್ ಸ್ಕ್ರಿಪ್ಟ್ ಬರಯಿಲ್ಲ್ಯಾನ್ ಕಿತೆಂ ಬರಯ್ಲಾಂ, ತೆಂ ನಿರ್ದೇಶಕಾಕ್ ಕಶೆಂ ವಿವರಿಲಾಂ, ತಾಣೆಂ ತೆಂ ಕಿತೆಂ ಅರ್ಥ್ ಕೆಲಾಂ, ಪ್ರೊಡಕ್ಷನ್ ಟೀಮಾಕ್ ಕಶೆಂ ಸಮ್ಜಲಾಂ ಮ್ಹಳ್ಳೆಂಚ್ ಅಂದಾಜ್ ಕರುಂಕ್ ಕಷ್ಟ್. ಸಕ್ಡಾಂನಿ ಮೆಳೊನ್ ಬಾಲಿಶ್ & ಅಸ್ತವ್ಯಸ್ತ್ ದೃಶ್ಯಾಂ ಉಬ್ಜಯ್ಲ್ಯಾಂತ್.

ಆಸೊಂ, ಇಂಕ್ವಿಜಿಸಾಂವಾಚಿ ಗಜಾಲ್ ಸೊಡ್ಯಾಂ. ತ್ಯಾ ಖರ್ಗಾಕ್ ಲಾಗೊನ್ ದಕ್ಷಿಣಾಕ್ ಆಯಿಲ್ಲಿ ಚರಿತ್ರಾಚ್ ಚಡ್ ಮಹತ್ವಾಚಿ. ಹಿಂದೂ ಕೊಂಕ್ಣಿ ಲೋಕ್ ದಕ್ಷಿಣಾಕ್ ಆಯಿಲ್ಲ್ಯಾಂತ್ ನವಾಲ್ ನಾ. ಪುಣ್ ಕ್ರಿಸ್ತಾಂವ್ ಜಾಲ್ಲೊ ಕೊಂಕ್ಣಿ ಲೋಕ್‍ಯೀ ಕಿತ್ಯಾಕ್ ದಕ್ಷಿಣಾಕ್‍ಚ್ ಆಯಿಲ್ಲೊ? ತೆಂ ಫಕತ್ ಎಕಾಚ್ ಮುಖ್ಯ್ ಕಾರಣಾನ್ – ಕೆಳದಿ ಸಾಮ್ರಾಜ್ಯಾಕ್ ಲಾಗೊನ್ ತೆ ಆಯಿಲ್ಲೆ. ಕೆಳದಿ ರಾಯಾಂನಿ, ತೆ ಹಿಂದೂ, ಕ್ರಿಸ್ತಾಂವಾಂಕ್ ಸುರಕ್ಷಿತ್, ಮೊಗಾಚೊ ಆಸ್ರೊ ದಿಲ್ಲ್ಯಾನ್‍ಂಚ್ ಉಪ್ರಾಂತ್ ಹಾರಿಂಹಾರಿಂನಿ ಕ್ರಿಸ್ತಾಂವ್ ಲೋಕ್ ಹ್ಯಾ ಪ್ರದೇಶಾಕ್ ಪಾವ್‍ಲ್ಲೊ. ತಶೆಂ 100-200 ವರ್ಸಾಂನಿ ಹಾಂಗಾ ಎಕಾ ಲಾಖಾ ವಯ್ರ್ ಕ್ರಿಸ್ತಾಂವ್ ಪರ್ಜಾ ವಾಡ್‍ಲ್ಲಿ. (ಟಿಪ್ಪುಚ್ಯಾ ಬಂದಡೆ ಪರ್ಯಾಂತ್).

ಪುಣ್ ಚರಿತ್ರೆಚಿಂ ಸೊಧ್ನಾಂ, ಪಾಳಾಂ-ಮುಳಾಂ ಉಸ್ತುಂಚೆಂ ಪ್ರಯತ್ನ್ ಮ್ಹಣ್ಚ್ಯಾ ಸಿನೆಮಾಂತ್ ಹಿ ಗಜಾಲ್‍ಚ್ ನಗಣ್ಯ್! ತಾಚೊ ಪ್ರಸ್ತಾಪ್‍ಚ್ ನಾ. ನಿಜಾಯ್ಕೀ ಅಜ್ಯಾಪ್‍ಚ್ ಸಯ್… ಕೊಂಕ್ಣಿ ಆನಿ ಕ್ರಿಸ್ತಾಂವಾಂಚ್ಯಾ ಚರಿತ್ರೆ ವಿಶಿಂ ವಿವರಿತಾನಾ ಕೆಳದಿ ನಾಯಕಾಂಚ್ಯಾ ಉದಾರ್ ಪ್ರೋತ್ಸಾಹಾಕ್ ಉಲ್ಲೇಖ್ ಕರಿನಾ ತರ್ ಪ್ರಮಾದ್‍ಚ್ ನ್ಹಯ್, ತೆಂ ಅನುಪ್ಕಾರ್‌ಪಣ್‌ಯೀ ಜಾತಾ. ಹಿ ಗಜಾಲ್ ಕಶೆಂ ‘ಅಸ್ಮಿತಾಯೆ’ಚ್ಯಾಂಕ್ ಕಳನಾ ಜಾಲಿ? (ಸಂದರ್ಶನಾಂತ್ ‘Expert Panel’ ರಚ್‍ಲ್ಲೆಂ ಮ್ಹಳಾಂ, ಕೋಣ್ ತೆ ತಿತ್ಲೆಯೀ ಬುದ್ವಂತ್?).

ದುಸ್ರೆಂ, ಬಂದೆಡೆಚಿ ಪರಿಗತ್. ಕೊಂಕ್ಣೆಕ್ ಆನಿ ಟಿಪ್ಪುಚ್ಯಾ ಬಂದಡೆಕ್ ಕಸಲೊಚ್ ಗಾಂಚ್, ಸಂಬಂಧ್ ನಾ. ವ್ಹಯ್. ಟಿಪ್ಪುನ್ ಫಕತ್ ಕ್ರಿಸ್ತಾಂವಾಂಕ್ ಬಂದಡೆಕ್ ಘಾಲ್ಲೆಂ ಶಿವಾಯ್ ತೆ ಕೊಂಕ್ಣಿ ಉಲಯ್ತಾತ್ ಮ್ಹಣ್ ಬಿಲ್ಕುಲ್ ನ್ಹಯ್. ಬಂದಡೆ ವರ್ವಿಂ ಕ್ರಿಸ್ತಾಂವ್ ಲೋಕ್ ಮರಣ್ ಪಾವ್ಲೊ, ಮಾರೆಕಾರ್ ಖರ್ಗಾಕ್ ಬಲಿ ಜಾಲೊ ಆನಿ ತ್ಯಾ ವರ್ವಿಂ ಕೊಂಕ್ಣಿಯೀ ಆಳ್ವಲಿ ವ್ಹಯ್. ಪುಣ್ ಫಕತ್ ಕೊಂಕ್ಣಿ ಮಾತ್ರ್ ಉಲ್ಲೇಖ್ ಕರ್ಚೆಂ, ಲೊಕಾಕ್‍ಚ್ ಸೊಡ್ಚೆಂ, ನೀಜ್ ಕಾರಣಾಂ ನೆಗಾರ್ಚೆಂ ವಾ ವಿಕಾರ್ಚೆಂ ಪಿಶೆಂಪಣ್‍ಂಚ್ ಶಿವಾಯ್ ತಾಕಾ ಚರಿತ್ರಾ ವಾ ಜನಾಂಗಾಚಿ ಅಸ್ಮಿತಾಯ್ ಮ್ಹಣನಾಂತ್. ಹೆಂ ಬಿಲ್ಕುಲ್ ಅನಪೇಕ್ಷಿತ್.

ಸಿನೆಮಾಕ್ ತಾಳ್‍ಮೂಳ್ ನಾ ಮ್ಹಣ್ಚ್ಯಾಕ್ ಆನ್ಯೇಕ್ ದೃಷ್ಟಾಂತ್, ನಂತೂರ್ ಪದ್ವಾಚೆಂ ಸನ್ನಿವೇಶ್. ನಿರೂಪಕ್ ಸಾಂಗ್ತಾ ಹಜಾರಾಂನಿ ಲೊಕಾಕ್ ನಂತೂರ್ ಪದ್ವಾರ್ ಥಾವ್ನ್ ಖಂದ್ಕಾಕ್ ಲೊಟುನ್ ಜಿವೆಶಿಂ ಮಾರ್ಲೆಂ ಮ್ಹಣ್. ಪುಣ್ ಸಬ್‍ಟೈಟಲಾಂನಿ 60,000 ಜಣಾಂಕ್ ಮ್ಹಣ್ ದಾಕಯ್ಲಾಂ. ತಿ ಏಕ್ ಫರಾಮಸ್ ಮ್ಹಣ್ ಘೆತ್ಲ್ಯಾರೀ, ನಂತೂರಾಂತ್ಲೆಂ, ಸಿನೆಮಾಂತ್ ಸಾಂಗ್‍ಲ್ಲೆಂ ದೃಶ್ಯ್, ವಾಟ್ ಚುಕಂವ್ಚೆಂ. ನಂತೂರಾಂತ್ ಲೊಕಾಕ್ ಕುಡಾಯಿಲ್ಲೆಂ, ಥೊಡ್ಯಾಂಕ್ ಥಂಯ್ ಜಿವೆಶಿಂ ಮಾರ್ಲಾಂ ವ್ಹಯ್, ಪುಣ್ ಸಿನೆಮಾಂತ್ ಸಾಂಗ್‍ಲ್ಲೆ ತಿತ್ಲ್ಯಾಂಕ್ ನ್ಹಯ್.

ಚಡ್ ಕ್ರಿಸ್ತಾಂವಾಂಕ್, ಆನಿ ಪಿಂತುರಾಂತ್ ದಾಕಯಿಲ್ಲೆಪರಿಂ, ಲೊಟುನ್ ಘಾಲ್ನ್ ಜಿವೆಶಿಂ ಮಾರ್‌ಲ್ಲೆಂ ಬೆಳ್ತಂಗಡಿಚ್ಯಾ ಗಡಾಯ್ ಫಾತ್ರಾರ್. ಥಂಯ್ ಟಿಪ್ಪುಚ್ಯಾ ಸೈನಾಚೆಂ ಠಾಣೆಂ ಆನಿ ಕ್ಯಾಂಪ್ ಆಸ್‍ಲ್ಲೆಂ. ಬಂಧಿ ಕೆಲ್ಲ್ಯಾ ಕ್ರಿಸ್ತಾಂವಾಂ ಪಯ್ಕಿ ಉಪ್ರಾಟ್ಲೆಲ್ಯಾಂಚಿ ಥಂಯ್ ಝಡ್ತಿ ಕರ್ತಾಲೆ. ತಶೆಂ ಅಪ್ರಾಧ್ ಥಾಪ್‍ಲ್ಲ್ಯಾಂಕ್ ವಯ್ರ್ ವ್ಹರ್ನ್ (ಥಂಯ್ ಫಾಶಿ ಗುಂಡಿ ಮ್ಹಳ್ಳೆ ಕಡೆನ್) ಜಿರಿಯೆಂತ್ ಲೊಟುನ್ ಘಾಲ್ತಾಲೆ. ಕ್ರಿಸ್ತಾಂವಾಂಚಿ ಚರಿತ್ರಾ ಮ್ಹಣ್ತಾನಾ ಗಡಾಯ್ ಫಾತ್ರಾಕ್ ವಿಸ್ರೊಂಕ್ ಜಾಯ್ನಾ. ಗಡಾಯ್ ಫಾತ್ರಾಚಿ ಏಕ್ ಫೊಟೊ ದಾಕಯಿಲ್ಲಿ ತರೀ ಪಾವ್ತೆಂ.

ಚಾ.ಫ್ರಾ.ಕ್ ಪಿಂತ್ರಾಯ್ಲಾಂ ವಾ ಖುರ್ಸಾಯ್ಲಾಂ?

ಸಕ್ಡಾ ಪ್ರಾಸ್ ಘೋರ್ ಗಜಾಲ್ ಹಿ. ಹಾಂವೆಂ ಸಿನೆಮ್ ಪಯ್ಲೆಂ ಪಳೆತಾನಾ ಪಾತ್ರ್ ಫಕತ್ ಕಾಲ್ಪನಿಕ್ ಮ್ಹಣ್ ಚಿಂತ್‍ಲ್ಲೆಂ. ತರೀ ಸಿಮಾಂವ್ಚೊ ಪಾತ್ರ್ ಖಂಚ್ಯಾ ಕಲಾಕಾರಾಚೆಂ Inspiration ಘೆವ್ನ್ ರಚ್ಲಾ ಆಸ್ಯೆತ್ ಮ್ಹಣ್ ಕಲ್ಪನ್ ಕರ್ತಾಲೊಂ. ಪುಣ್ ‘ಉಜ್ವಾಡ್’ ಪತ್ರಾಂತ್ಲೆಂ ಸಂದರ್ಶನ್ ವಾಚ್ತಾನಾ ಹಾಂವ್ ಶೆರ್ಮೆಲೊಂ. ಎರಿಕ್ ಸಾಂಗ್ತಾ ತೊ ಪಾತ್ರ್ ಚಾ.ಫ್ರಾ.ಚೊ ಮ್ಹಣ್. ಸಿನೆಮಾಂತ್‍ಯೀ ತಾಣೆಂ ತೆಂಚ್ ಸಾಂಗ್ಲಾಂ.

ಶೆರ್ಮೆಂವ್ಕ್ ಕಾರಣಾಂ ಆಸಾತ್. ಚಾ.ಫ್ರಾ. ಡಿಕೋಸ್ತ ಎರಿಕಾಚೊ ಸಾಂಗಾತಿ ಜಾವ್ನಾಸ್‍ಲ್ಲೊ ಮಾತ್ರ್ ನ್ಹಯ್ ಗುರು ತಸೊ ಆಸ್‍ಲ್ಲೊ. ಆನಿ ಅಮರ್ ಚಾ.ಫ್ರಾ. ವರ್ವಿಂಚ್ ಮಾಂಡ್ ಸೊಭಾಣಾಕ್ ತಶೆಂ ಎರಿಕಾಕ್, ಅಸ್ತಿತ್ವ್ ಆನಿ ಜಿವಿತ್ ಮೆಳ್ಳಾಂ. ತ್ಯಾ ವಿಶಿಂ ಕೊಣಾಯ್ಕೀ ದುಬಾವ್ ನಾ. ಪುಣ್ ತಸಲ್ಯಾ ಎಕಾ ಮಹಾನ್ ವ್ಯಕ್ತಿತ್ವಾಕ್ ದರಬಸ್ತ್ ಭಿಗ್ಡಾವ್ನ್, ವಿದ್ರೂಪ್ ರಿತಿನ್ ಪಿಂತ್ರಾವ್ನ್ ಅಕ್ಮಾನ್ ಕೆಲ್ಲೆಂ ಸಿನೆಮಾಂತ್ ದಿಸ್ತಾ.

ಪಯ್ಲ್ಯಾನ್ ಪಯ್ಲೆಂ ಖಂಚ್ಯಾಯ್ ಕಲಾಕಾರಾಕ್ ವಾ ಸಾಹಿತಿಕ್ ಸಮಾಜೆನ್ ಕಷ್ಟಿಲ್ಲೆಂ, ಅಕ್ಮಾನ್ ಕೆಲ್ಲೆಂ ಆಸಾಗೀ? ಕಲಾಕಾರಾಂಕ್, ಸಾಹಿತಿಂಕ್ ತಶೆಂ ಭಾಷೆಚ್ಯಾ ವಾವ್ರಾಂತ್ ಜಿವಿತ್ ಸಾರ್ಲೆಲ್ಯಾಂಕ್ ಕಷ್ಟ್, ದುಬ್ಳಿಕಾಯ್ ಫುಡ್ ಜಾಲ್ಯಾ. ತಿ ತಾಂಚಿ ವಿಂಚವ್ಣ್. ಕೊಂಕ್ಣೆಂತ್ ತೆಂ ಇಲ್ಲೆಂ ಚಡ್‍ಚ್ ಆಸ್‍ಲ್ಲೆಂ. ತಾಂಚಿ ಆರ್ಥಿಕ್ ಪರಿಗತ್ ಪಾಡ್ ಜಾಂವ್ಕ್ ಲೊಕಾಚಿ ಕಾಂಯ್ ಪುಣೀ ದೇಣ್ಗಿ ಆಸಾ ಮ್ಹಣ್ಯೆತ್ (ಉದಾ: ಬೂಕ್, ಪತ್ರಾಂ ಮೊಲಾಕ್ ಘೆನಾತ್ಲ್ಯಾರ್, ಜಾಹೀರಾತಾಂ ದೀನಾತ್ಲ್ಯಾರ್ ಪ್ರಕಾಶಕ್, ಬರಯ್ಣಾರ್ ಖರ್ಶೆತಾತ್), ಪುಣ್ ಲೊಕಾನ್ ಖಂಚ್ಯಾಯ್ ಕಲಾಕಾರಾಕ್ ಟಾರ್ಗೆಟ್ ಕರ್ನ್ ಧೊಸ್ಲಾಂ, ಅನ್ಯಾಯ್ ಕೆಲಾ ಮ್ಹಣ್ಚೆಂ ಫಟ್.

ಚಾ.ಫ್ರಾ. ಜಾಂವ್ ಹೆರ್ ಕೊಣೀ, ಕೊಂಕ್ಣೆಚ್ಯಾ ಸೆವೆಂತ್ ಸಂತೃಪ್ತ್ ಆಸ್‍ಲ್ಲೆಚ್. ತಾಣಿಂ ಸರ್ವಾಂನಿ ನಿಸ್ವಾರ್ಥ್‍ಪಣಿಂ, ತಾಚ್ಯಾಕೀ ಮಿಕ್ವೊನ್ ಸ್ವಖುಶೆನ್, ಮೊಗಾನ್ ಕಿತೆಂಯೀ ಕೆಲ್ಲೆಂ. ಸಮಾಜೆನ್ ವ್ಹಡ್ ಮಾಪಾನ್ ತಾಂಕಾಂ ರೆಕಗ್ನೈಸ್ ಕರ್ಯೆತೆಂ, ಮಾನ್ ದಿವ್ಯೆತೆಂ ಮ್ಹಳ್ಳೆಂ ಸೊಡ್ಲ್ಯಾರ್ ಕಿತೆಂಚ್ ದೀಂವ್ಕ್ ನಾ ಮ್ಹಣೊಂಕ್ ಜಾಯ್ನಾ (ಖಾಸ್ಗಿ ಮನ್ಶ್ಯಾಂನಿ, ವೃತ್ತೆಂತ್ಲ್ಯಾಚ್ ವ್ಯಕ್ತಿಂನಿ ಮೊಸ್ರಾನ್ ಧೊಸ್ಲಾಂ ಆಸ್ಯೆತ್). ತವಳ್ ಆನಿ ಆತಾಂಯೀ ಕೊಂಕ್ಣೆಂತ್ ಜೆ ಕೋಣ್ ವಾವ್ರ್ ಕರ್ತಾತ್, ತೆಂ ಫಕತ್ ಅಭಿಮಾನಾನ್‍ಂಚ್. ಯಶಸ್ವಿ ಥೊಡ್ಯಾಂಕ್ ಮಾತ್ರ್ ಮೆಳ್ತಾ ಜಾವ್ಯೆತ್. ಪುಣ್ ಸಮಾಜೆಕ್ ಅನುಪ್ಕಾರಿ ಮ್ಹಣೊಂಕ್ ಜಾಯ್ನಾ.

ಎರಿಕ್ ಒಝೇರಿಯೊಕ್‍ಚ್ ಪಳೆಲ್ಯಾರ್, ತೊ ಕೊಂಕ್ಣೆಕ್ ಉಡ್ಕಿ ಮಾರ್ಲೆಲ್ಯಾನ್‍ಂಚ್ ಆಜ್ ಹಜಾರೊಂ ಅಭಿಮಾನಿಂಕ್ ಆಪ್ಣಾಂವ್ಕ್ ಸಕ್ಲಾ. ತಾಚ್ಯಾ ಬಂಡಾಯ್ ಸ್ವಭಾವಾನ್, ಪಯ್ಲೆಂ ಕೆಲ್ಲ್ಯಾ ಪ್ರತಿಭಟನ್ (ಕಾಮೆಲ್ಯಾಂಚ್ಯಾ ಯೂನಿಯನಾಂ ಮುಖಾಂತ್ರ್) ಆನಿ ವಿರೋಧಾಕ್ ಲಾಗೊನ್ ತೊ ‘ವಿಲನ್’ ಕಸೊ ಜಾಲ್ಲೊ. ಪುಣ್ ಕೊಂಕ್ಣಿ ಸಂಗೀತ್ ಶೆತಾಂತ್ಲೊ ವಾವ್ರ್ ಆನಿ ಮಾಂಡ್ ಸೊಭಾಣಾ ಮುಖಾಂತ್ರ್ ಕೆಲ್ಲ್ಯಾ ಸಾಧನಾಂಕ್ ಲಾಗೊನ್ ಸಮಾಜೆನ್ ತಾಕಾ ಉಕಲ್ನ್ ಧರ್ಲಾಂ. ಅಪರಿಮಿತ್ ಸಾಹಸಾಂ ತಾಣೆಂ ಆಧಾರ್ಲ್ಯಾಂತ್ ತರ್ ತಾಕಾ ಲೊಕಾನ್ ದಿಲ್ಲೊ ವರ್ತೊ ಸಹಕಾರ್, ಮಜತ್‍ಚ್ ಕಾರಣ್.

ತಿತ್ಲೆಂ ಆಸೊನೀ ಕೊಂಕ್ಣೆ ಖಾತಿರ್ ವಾವ್ರ್ ಕೆಲ್ಲ್ಯಾ ವಾವ್ರಾಡ್ಯಾಕ್, ತೆಂಯೀ ಪ್ರಧಾನ್ ವ್ಯಕ್ತಿಕ್, ತ್ಯಾ ಪರಿಂ ವಿರೋಧ್ ಉಬ್ಜತಾ, ಸಮಸ್ಸೆ ಫುಡ್ ಕರಿಜೆ ಪಡ್ತಾತ್ ಆನಿ ಜಿವಿತ್‍ಚ್ ಬರ್ಬಾದ್ ಜಾತಾ ಮ್ಹಣ್ ಪಾತ್ರ್ ರಚ್‍ಲ್ಲೆಂ ಕ್ರಿಯೇಟಿವಿಟಿ ನ್ಹಯ್ ಬಗಾರ್ ವಿಕಾರ್ ಮನಸ್ಥಿತಿ ಮ್ಹಣ್‍ಂಚ್ ಆಪಯ್ಜೆ ಪಡ್ತಾ.

‘ಅಸ್ಮಿತಾಯೆಂತ್ಲೊ’ ಸಿಮಾಂವ್ ಕಿತ್ಯಾಕ್ ಕಷ್ಟತಾ? ದೇವ್‍ಚ್ ಜಾಣಾಂ. ತೊ ಏಕ್ ಕಲಾಕಾರ್, ಸವೆಂ ಜಾಗೃತಿ ಉಟಂವ್ಕ್ ಪೆಚಾಡ್ಚೊ ಕಾರ್ಯಕರ್ತ್. ತಾಚ್ಯಾ ಪೈಂಟಿಂಗಾಕ್ ಗಿರಾಯ್ಕ್ ಆಸ್‍ಲ್ಲೆ (ಹೀರೊಯಿನಿಚೊ ಬಾಪಯ್ ತಾಂತುಂ ಎಕ್ಲೊ), ನಾಂವ್ ಆಸ್‍ಲ್ಲೆಂ. ತಾಚ್ಯಾ ವರ್ಕ್‍ಶಾಪಾಂತ್ ದರಬಸ್ತ್ ಪೈಂಟಿಂಗಾಂ ಆಸಾತ್ ಮ್ಹಣ್ತಚ್ ತಾಕಾ ‘ಬಿಸ್ನೆಸ್’ ಉಣೆಂ ನಾ ಮ್ಹಣ್ ಜಾಲೆಂ ನ್ಹಯ್ವೇ?

ಕೊಂಕ್ಣೆಚಿ ಜಾಗೃತಿ ಉಟಂವ್ಚ್ಯಾ ಮಿಸಾಂವಾಂತ್ ತಾಕಾ ದುಸ್ಮಾನ್ ಉಬ್ಜಲೆ ಮ್ಹಣ್ ಸಿನೆಮಾ ದಾಕಯ್ತಾ.

ನಿಜಾಯ್ಕೀ ಸಿಮಾಂವ್ಚೆ ದುಸ್ಮಾನ್ ಕೋಣ್? ಕಿತ್ಯಾಕ್? ಕೋಣ್‍ಗೀ ದೋಗ್ ಜಣ್ ಸ್ಕೂಟರಾರ್ ಯೆತಾತ್, ತೆಚ್ ದುಸ್ಮಾನ್ ವಾ ದುಸ್ಮಾನಾಂಚೆ ಜಣ್. ಪುಣ್ ಲೊಕಾಚ್ಯಾ ಇಂಗ್ಲಿಶ್ ಮರ್ಜೆಕ್ ಖೆಂಡುನ್ ಕಿತೆಂಯೀ ಸಾಂಗ್ಲ್ಯಾರ್ ಕೋಣ್ ಖುಬಾಳ್ತಾ? ಇಂಗ್ಲಿಶ್ ಆಪ್ಣಾಚಿ ಮ್ಹಣ್ ಕೊಣೆಂಯೀ ಫುಡೆಂ ಯೇವ್ನ್ ಕ್ಲೈಮ್ ಕರುಂಕ್ ಜಾತಾ? ವಾ ಇಂಗ್ಲಿಶ್ ಉಲಯ್ತೆಲೆ ಸಕ್ಕಡ್ ಯೂನಿಯನ್ ಕರ್ನ್ ಆಕ್ರಮಣ್ ಕರ್ತಾತ್? ಎಕಾ ಡ್ರೈವರಾಚೆರ್ ಹಲ್ಲೊ ಕೆಲ್ಯಾರ್ ಸಕ್ಕಡ್ ಡ್ರೈವರ್ ಸ್ಟ್ರೈಕ್ ಕರ್ತಾತ್. ಹರ್ಯೆಕ್ ವೃತ್ತಿ, ಉದ್ಯೋಗಾಚ್ಯಾಂಚೆ ಸಂಘ್ ಆಸಾತ್. ತಾಂಚ್ಯಾ ಮನ್ಶ್ಯಾಂಕ್ ಕೊಣೆಂಯೀ ಅಕ್ಮಾನ್-ಹಲ್ಲೊ ಕೆಲ್ಯಾರ್ ತೆ ಪ್ರತಿಭಟನ್ ಕರ್ತಾತ್. ಪುಣ್ ಇಂಗ್ಲಿಶ್ ಭಾಸ್-ಸಂಸ್ಕೃತೆಕ್ ಖಂಡನ್ ಕೆಲ್ಯಾರ್ ಕೋಣ್ ವಿರೋಧ್ ಕರ್ತಾ?

ಸಿಮಾಂವ್ ಏಕ್ ಕಲಾಕಾರ್. ತಾಕಾ ಕಲಾಕಾರ್ ಜಾವ್ನ್ ಪಿಂತ್ರಾಂವ್ಚ್ಯಾ ಪ್ರಾಸ್ ಚಳ್ವಳೆಗಾರ್ ಜಾವ್ನ್ ಚಡ್ ಘೊಳಯ್ಲಾಂ, ಪಲಾಯನ್‍ವಾದಿಪರಿಂ ವಾಟೆರ್ ಧಾಂವ್ಡಾಯ್ಲಾಂ ಆನಿ ಭಿಕಾರ್‍ಯಾಪರಿಂ ಧರ್ಣಿರ್ ಲೊಳಯ್ಲಾಂ… ಆನಿ ತಾಚ್ಯಾ ಸಲ್ವಣೆಕ್ ಸಮಾಜೆಕ್, ಲೊಕಾಚೆರ್ ಬದ್ಲಾಮ್ ಘಾಲಾ! ಮ್ಹಳ್ಯಾರ್ ಸಿಮಾಂವ್ಕ್ ‘Victim’ ಮ್ಹಳ್ಳೆಪರಿಂ ದಾಕಯ್ಲಾಂ. ‘ಸಮಾಜೆ ವರ್ವಿಂ ಸಿಮಾಂವ್ ಕಷ್ಟಾಂ-ನಷ್ಟಾಂಕ್ ವಳಗ್ ಜಾಲೊ, ತಾಕಾ ದಗ್ದಿಲೆಂ ಆನಿ ನಿಮಾಣೆಂ ತೊ ಘರ್-ಗಾಂವ್ ಸೊಡ್ನ್ ಧಾಂವ್ಲೊ… ಆಖೇರಿಕ್ ಅನಾಥ್ ಜಾವ್ನ್ ಮೆಲೊ!’ – ಅಸಲೆಂ ವಿಕೃತ್ ಚಿತ್ರಣ್ ದಿಲ್ಲೆಲ್ಯಾಂಕ್ ಭೊಗ್ಸುಂಕ್ ಫಾವೊ ನಾ.

ಸಿಮಾಂವ್ಚಿ ಬಾಯ್ಲ್: ಪತಿಣ್ ವಾ ನಾಗಿಣ್?

ಆನ್ಯೇಕ್ ಹಾಸ್ಯಾಸ್ಪದ್ ಗಜಾಲ್ ಮ್ಹಳ್ಯಾರ್, ನಿರಾಪ್ರಾಧಿ ಪತಿಣೆಕ್ ಕಳಂಕ್ ಹಾಡ್‍ಲ್ಲೆಂ. ಸಿಮಾಂವ್ಚಿ ಪತಿಣ್ (ಝೀನಾ ಬ್ರ್ಯಾಗ್ಸ್ ಪಾತ್ರ್) ಅಮಾಯಕಿ ಮ್ಹಣ್ ದಾಕಯ್ಲಾಂ. ತಿ ಕಲಾಕಾರಾಚ್ಯಾ ಖ್ಯಾತೆ ವರ್ವಿಂಚ್ ತಾಚೆರ್ ಮೊಗಾರ್ ಪಡ್‍ಲ್ಲಿ (ಸಂಭಾಷಣ್ ಸಾಂಗ್ತಾ). ಪುಣ್ ತಿಕಾ ಸುಖ್ ಮೆಳನಾ. ಕಾಜಾರಾಚ್ಯಾ ವರ್ಸುಗೆ ದಿಸಾಕ್ ಘರಾಂತ್ ಏಕ್ ಮೂಟ್ ತಾಂದುಳ್ ನಾ… ಸಿಮಾಂವ್ ‘ಊರಿಗೆ ಉಪಕಾರಿ, ಮನೆಗೆ ಮಾರಿ’ ಮ್ಹಣ್ ತಿಕಾ ಭೊಗ್ಚೆಂ ಸಹಜ್. ಸಿಮಾಂವ್ಚಿ ಹಾಲತ್, ತಾಚೆರ್ ಹಮ್ಲೊ ಇತ್ಯಾದಿಂ ವರ್ವಿಂ ತಿ ಖಂತಿನ್ ವಳ್ವಳ್ತಾ, ಆಕಾಂತಾಂತ್ ಕಳ್ವಳ್ತಾ. ತರೀ, ಸಿನೆಮಾಂತ್ ತ್ಯಾ ಅಮಾಯಕ್ ಪಾತ್ರಾಕ್ ಕಶೆಂ ವಿಕೃತ್ ಕೆಲಾಂ ಪಳೆಯಾ.

ಸಿಮಾಂವ್ ಭಾಯ್ರ್ ವೆತಾನಾ ಬ್ಯಾಕ್‍ಗ್ರೌಂಡಾರ್ ಘಾಲ್ಲ್ಯಾ ಪದಾಂತ್ ‘ನಾಗಿಣ್’ ಮ್ಹಳಾಂ. ತಾಕಾ ಖಂಚೊ ಆಧಾರ್? ತಿ ನಾಗಿಣ್ ಜಾಲ್ಲ್ಯಾಕ್ ಸಮರ್ಥನ್ ಖಂಯ್ ಆಸಾ? ಚೂಕ್ ಸಿಮಾಂವ್ಚಿ, ತಿ ಫಕತ್ ಬಲಿಪಶು. ಪುಣ್ ಪದ್ ಲಿಖ್ತೆಲ್ಯಾಕ್ ಹೆಂ ಕಳಿತ್ ನಾ? ಕಾಣಿಯೆಗಾರಾಕ್ ಆನಿ ಪಾತ್ರ್ ರಚ್ಲೆಲ್ಯಾಕ್ ತೆಂ ನಗಣ್ಯ್? ತರ್ ಕಶೆಂ ಪದಾಂತ್ ಪತಿಣೆಕ್ ನಾಗಿಣ್, ಮ್ಹಣ್ಜೆ ತಿಚ್ ಚುಕಿದಾರ್, ವಿಲನ್, ತಿಚೆ ವರ್ವಿಂ ಪತಿ ಸಲ್ವಲೊ, ಶೆವ್ಟಲೊ ಮ್ಹಳ್ಳೆಪರಿಂ ವೊಲಾಯ್ಲಾಂ? ಅಪದ್ಧ್, ವೈರುದ್ಧ್ಯ್ ಉತ್ರಾಂ ಬರಯ್ಲ್ಯಾರ್ ತೆಂ ಪದ್ ಜಾತಾಗೀ? (ಹೆಂ ಪದ್ ಬರಯಿಲ್ಲೊ ಅಯೋಗ್ಯ್ ಕೋಣ್?).

ಸ್ವಂತ್ ಘರ್, ಪೈಂಟಿಂಗಾಕ್ ರಾಸ್‍ಭರ್ ಆರ್ಡರ್ ಆಸ್‍ಲ್ಲೊ ಕಲಾಕಾರ್ ದುಬ್ಳೊ ಕಸೊ ಜಾಂವ್ಚೊ? ಕೊಣೆಂಗೀ ಫಾತೊರ್ ಮಾರ್ಲೊ ಮ್ಹಣ್ ಆನಿ ಬಾಯ್ಲೆಕ್ ಆಪ್ಲಿ ಆಸ್ತ್ ತ್ಯಾಗ್ ಕರ್ನ್ ದಿಲಿ ಮ್ಹಣ್ ಸಿಮಾಂವ್ನ್ ಗತ್ ಆಧಾರ್ ನಾತ್ಲೆಲ್ಯಾಂಪರಿಂ ಪೋಳ್ನ್ ವೆಚೆಂ ಕಿತ್ಯಾಕ್? ಭಿಂವ್ಕುರೊ ಜಾಲ್ಲೊ ತೊ ಘಾಟಾರ್ ಪಾವ್‍ಲ್ಲೆಂಚ್ ದಾರ್ಶನಿಕ್ ಕಶೆಂ ಜಾಲೊ? ಎಕಡ್ಚ್ಯಾನ್ ತೊ ಹೀರೊ-ಹೀರೊಯಿನಿಚೆರ್ ಭರ್ವಸೊ ಉಚಾರ್ತಾ, ದುಸ್ರ್ಯಾ ಘಡಿಯೆ ಆಕಾಂತ್ ಪಾವ್ತಾ ಕಿತ್ಯಾಕ್? ಮಹಾಭಾರತಾಚ್ಯಾ ಸಂಜಯಪರಿಂ ತಾಚೆ ಲಾಗಿಂ ‘ಲೈವ್ ಟಿವಿ’ ಆಸ್‍ಲ್ಲಿವೇ?

ಕೊಂಕ್ಣೆಚಿ ಸೆವಾ ಕೆಲ್ಯಾರ್ ಬರ್ಬಾದ್?

ಆತಾಂ ಹೊ ಪಾತ್ರ್ ಚಾ.ಫ್ರಾ.ಚೆಂ ಪ್ರೇರಣ್ ಘೆವ್ನ್ ರಚ್‍ಲ್ಲೊ ಆಸ್ಯೆತ್ ವಾ ಕಾಲ್ಪನಿಕ್‍ಚ್ ಮ್ಹಣ್ ಘೆತ್ಲ್ಯಾರೀ, ಎಕಾ ಕಲಾಕಾರ್-ಕಾರ್ಯಕರ್ತಾಕ್ ಸಮಾಜೆಂತ್ ತಸಲಿ ನಿರ್ದಯತಾ ಮೆಳ್ಚೆಪರಿಂ ಕಠೋರ್ ರಿತಿನ್ ದಾಕಂವ್ಚೆಂ ಖಂಚ್ಯಾ ಅಸ್ಮಿತಾಯೆಚಿ ದಾಖವ್ಣಿ ಜಾಲಿ? ಅಸಲ್ಯಾ ಪಿಂತ್ರಾವ್ಣೆ ವರ್ವಿಂ ಕಿತೆಂ ಸಂದೇಶ್ ದಿತಾ ಸಿನೆಮ್? ಕೊಂಕ್ಣೆಚೆಂ ಝೂಂ ಆನಿ ಸಗ್ಳಿ ಜವಾಬ್ದಾರಿ ವಹಿಸುನ್ ಘೆತ್‍ಲ್ಲೆಪರಿಂ ಕೊಂಕ್ಣೆಚ್ಯಾ ಫುಡಾರಾಕ್, ಜಾಗೃತೆಕ್ ಕಮರ್ ಬಾಂಧ್‍ಲ್ಲ್ಯಾ ಎರಿಕಾ ತಸಲ್ಯಾ ವ್ಯಕ್ತಿನ್ ಅಸಲೆಂ ಚಿತ್ರಣ್ ಕಶೆಂ ರಚ್ಲೆಂ? ಯುವಜಣಾಂಕ್ ಹ್ಯಾ ಮುಖಾಂತ್ರ್ ಕಿತೆಂ ಸಂದೇಶ್ ದಿಲೊ?

ನಿಜಾಯ್ಕೀ ಹೆಂ ಫಿತಿಸ್ಪಣ್. ಖರಿಮಸ್ತ್. ಕೊಂಕ್ಣಿ ಕಾರ್ಯಕರ್ತ್ ಜಾಲ್ಯಾರ್ ಸಮಾಜ್ ನೆಗಾರ್ತಾ, ಗತ್-ಜಿವಿತ್-ಫುಡಾರ್ ಆಸನಾ, ಪೊಟಾಕ್ ಖಾಂವ್ಕೀ ನಾ, ಕುಟ್ಮಾಕ್ ಪೊಸುಂಕೀ ಜಾಯ್ನಾ ಮ್ಹಳ್ಳೊಚ್ ಸಂದೇಶ್ ‘ಅಸ್ಮಿತಾಯ್’ ಸಿನೆಮಾನ್ ದಿಲಾ. ಅಸಲ್ಯಾ ನಕಾರಾತ್ಮಕ್, ಕ್ರೂರ್ ದುರಂತಾಚಿ ಪಿಂತ್ರಾವ್ಣಿ ಎಕಾ ಕೊಂಕ್ಣೆಚ್ಯಾ ಮಹಾನ್ ಸಂಸ್ಥ್ಯಾನ್ ದಿಲ್ಯಾ ಮ್ಹಳ್ಯಾರ್ ವಿಪರ್ಯಾಸ್‍ಚ್ ಸಯ್. ಕೊಂಕ್ಣೆಂತ್ ಯೆಯಾ, ವಾವ್ರ್ ಕರಾ ಮ್ಹಣ್ ಪ್ರೇರಣ್, ಸ್ಫೂರ್ತಿ ದೀವ್ನ್, ಭರ್ವಸೊ ಹಾಡಿಜೆ ಜಾಲ್ಲಿಂಚ್, ವ್ಯತಿರಿಕ್ತ್‌ಪಣಿಂ, ಲೊಕಾಕ್ ವಿಮುಖ್ ಜಾಂವ್ಚ್ಯಾಕ್ Instigate ಕರ್ತಾತ್ ತಶೆಂ ಸಿಮಾಂವ್ಚ್ಯಾ ಪಾತ್ರಾ ವರ್ವಿಂ ದಾಖಯ್ಲಾಂ. ಹೆಂ ನಿಜಾಯ್ಕೀ ದುರಂತ್ ಆನಿ ಅಕ್ಷಮ್ಯ್.

ಸಿನೆಮ್ ಆಸ್ಚೆಂಚ್ ಕೊಂಕ್ಣೆಚಿ ಚರಿತ್ರಾ ಸಾಂಗೊಂಕ್. ಹಜಾರೊಂ, 400-500 ವರ್ಸಾಂ ಆದ್ಲಿ ಚರಿತ್ರಾ ಸೊಡ್ಯಾಂ, ಸ್ವತಃ ಸಾಂಗಾತಾ ವರ್ಸಾಂಭರ್ ಜಿಯೆಲ್ಲ್ಯಾ ವ್ಯಕ್ತಿ ವಿಶಿಂ ಸಾರ್ಕೆಂ ಪಿಂತ್ರಾಂವ್ಕ್ ಕೃತಿಯೆಗಾರ್ ಸಲ್ವಲಾ ಮ್ಹಳ್ಯಾರ್ ಹೆರ್ ಕಿತೆಂ ಅಪೇಕ್ಷಿಯೆತ್? ಚಾ.ಫ್ರಾ. ಸಂಗಿಂ ತಿತ್ಲಿಂ ವರ್ಸಾಂ ಜಿಯೆಲ್ಲ್ಯಾಂನಿ, ತಾಕಾ ‘ಅಮರ್’ ಕರುಂಕ್ ಪೆಚಾಡ್ಚ್ಯಾಂಕ್‍ಂಚ್ ತಾಚೆಂ ವ್ಯಕ್ತಿತ್ವ್, ಸಂಯ್ಬ್ ಆನಿ ಆಶಯ್ ಅರ್ಥ್ ಕರುಂಕ್ ಜಾಯ್ನಾ ಖಂಯ್, ಆನಿ ಹೆ ಶತಮಾನಾಂ ಆದ್ಲಿ ಚರಿತ್ರಾ ಕಶೆಂ ಸಾರ್ಕೆಂ ಸಾಂಗ್ತೆಲೆ? ಆರಾಧನ್ ಕರ್ಚ್ಯಾ ಎಕಾ ಲೆಜೆಂಡಾಚೆಂ ಜಿವಿತ್ ಅಶೆಂ ವ್ಯತಿರಿಕ್ತ್‌ಪಣಿಂ ಸಾದರ್ ಕೆಲ್ಲ್ಯಾನ್ ತಾಕಾ ಮರ್ಯಾದ್ ದಿಲ್ಲೆಪರಿಂ ಜಾತಾಗೀ ವಾ ಖುರ್ಸಾಯಿಲ್ಲೆಪರಿಂ ಜಾಲಾಂ?

ಅಪರಿಪಕ್ವ್ ಪಾತ್ರ್ ಆನಿ ಅವ್ಯವಸ್ಥೆಂಚಿ ಶಿಂಕಳ್

‘ಅಸ್ಮಿತಾಯ್’ ಸಿನೆಮಾಂತ್ ಉಟೊನ್ ದಿಸ್ಚೆಂ ಆನ್ಯೇಕ್ ಪ್ರಮುಖ್ ಉಣೆಂಪಣ್ ಮ್ಹಳ್ಯಾರ್ ಪಾತ್ರೀಕರಣ್ (ಕ್ಯಾರೆಕ್ಟರೈಸೇಶನ್). ಖಂಚಿಯೀ ಕಾಣಿ ಪರಿಣಾಮ್‍ಕಾರಿ ಜಾಂವ್ಚಿಚ್ ತಾಂತ್ಲ್ಯಾ ಪಾತ್ರಾಂ ವರ್ವಿಂ. ಸಿನೆಮಾಂತ್ ಪಾತ್ರ್ ರಚನ್ ಚಡ್ ಪ್ರಭಾವಿ. ಪುಣ್ ಹ್ಯೊ ಸರ್ವ್ ಗಜಾಲಿ ಹ್ಯಾ ಸಿನೆಮಾಚ್ಯಾಂಕ್ ಕಳಿತ್‍ಚ್ ನಾಂತ್ ಮ್ಹಳ್ಳೆಂ ಸ್ಪಷ್ಟ್ ಜಾತಾ.

ಇತ್ಲ್ಯಾಕೀ ಹಾಂತ್ಲೆ ಪಾತ್ರ್ ಕೊಣೆಂ ರಚ್ಲ್ಯಾತ್ ಮ್ಹಳ್ಳೆಂಚ್ ಗೊಂದೊಳಾಚೆಂ. ಎರಿಕಾನ್ ಎಕಡೆನ್ ಸಾಂಗ್ಲಾಂ ಆಪ್ಣೆಂ ಕಾಣಿ ಬರಯಿಲ್ಲಿ, ಪಾತ್ರ್ ರಚ್‍ಲ್ಲೆ ಜೊಯೆಲಾನ್ ಮ್ಹಣ್. ಆನಿ ಥೊಡೆ ಸಾಂಗ್ತಾತ್ ಸಗ್ಳೆಂ ಎರಿಕಾಚೆಂಚ್ ರಚನ್, ಜೊಯೆಲಾನ್ ಸಿನೆಮಾಕ್ ರೂಪಾಂತರ್ ಕೆಲ್ಲೆಂ ಮ್ಹಣ್. ಪುಣ್ ಸಿನೆಮಾಂತ್ಲೊ ಎರಿಕ್ ಸಾಂಗ್ತಾ ಆಪ್ಲೆಚ್ ಪಾತ್ರ್ ಮ್ಹಣ್. ಎಕಾ ಕಾಣಿಯೆಚ್ಯಾ ರಚನಾಂತ್ ಇತ್ಲೊಯೀ ಗೊಂದೊಳ್ ಪಯ್ಲೆ ಪಾವ್ಟಿಂ ಹಾಂವೆಂ ಪಳೆಂವ್ಚೆಂ.

ಮೂಳ್ ಕಾಣಿ ಎರಿಕಾಚಿ ಆನಿ ಜೊಯೆಲಾನ್ ಪಾತ್ರ್ ರಚ್ಲೆ ವ್ಹಯ್ ತರ್ ತಾಚ್ಯಾ ವರ್ತಿ ಬಾಲಿಶ್ ಸಂಗತ್ ದುಸ್ರಿ ನಾ. ಕಾಣಿ ಕಿತೆಂ ಬರಯಿಲ್ಲಿ ಎರಿಕಾನ್? ಪಾತ್ರ್ ನಾಸ್ತಾನಾ ಕಾಣಿ ಕಶೆಂ ಬರಂವ್ಚಿ? ಎಕ್ಲ್ಯಾನ್ ಕಾಣಿ ಬರವ್ನ್ ಆನ್ಯೇಕ್ಲ್ಯಾನ್ ಪಾತ್ರ್ ರಚ್ಚೆಂ ಕಶೆಂ? ಹೊ ಪೂರಾ ಗೊಂದೊಳ್‍ಚ್ ಖಂಚೆಂಯೀ ಕಾಮ್ ಗಂಭೀರ್ ರಿತಿನ್ ಜಾಂವ್ಕ್ ನಾ, ಆನಿ ಕೊಣಾಕೀ ಕಸಲಿಯೀ ವಿದ್ಯಾ, ವೃತ್ತಿಪರತಾ ಆನಿ ಕಲಾ ನಾ ಮ್ಹಣ್ ಸ್ಪಷ್ಟ್ ಕರ್ತಾ. ಡಿಫೀಶಿಯೆನ್ಸಿಚೆಂ ಹೈಟ್ ಹೆಂ.

ತೆಂ ಫಿಲ್ಮಾಂತ್ ಉಟೊನ್ ದಿಸ್ತಾ. ನಾಯಕ್, ನಾಯಕಿ, ಸಿಮಾಂವ್, ವಿಲನ್ ಪಾತ್ರ್ ಕಾಣಿಯೆಕ್ ಸಹಜ್ ಜಾವ್ನ್ ಉದೆಂವ್ಕ್ ನಾಂತ್. ಕಾಣಿಂಚ್ Fractured ಆಸಾ, ಆನಿ ತಾಕಾ ಅಸ್ಕತ್ ಪಾತ್ರ್ ರಚುನ್ ವೀದ್‍ವಾವ್ಳಿ ಕೆಲ್ಯಾ. ಹೀರೊ ಕಿತ್ಲೊ ಅಸ್ಕತ್ ಮ್ಹಣ್ ವಯ್ರ್ ಸಾಂಗ್ಲಾಂ. ತಾಕಾ ರಚ್ಲೆಲ್ಯಾಂನಿ ಕಿತ್ಲೆ ಬ್ಲಂಡರ್ಸ್ ಕೆಲ್ಯಾತ್ ಪಳೆಯಾ.

ಕಥಾನಾಯಕ್ ವಿವೇಕ್ ಪೈ ಅಮೆರಿಕಾಂತ್‍ಚ್ ಜಲ್ಮೊನ್ ವಾಡ್‍ಲ್ಲೊ. ತಾಕಾ ಸಕ್ಕಡ್ ಸೊಡುನ್ ‘ವರ್ಲ್ಡ್ ಕಲ್ಚರ್’ ಕ್ಷೇತ್ರಾಂತ್ ಶಿಕೊಂಕ್ ಕಶೆಂ ಪ್ರೇರಣ್ ಮೆಳ್ಳೆಂ? ಜಸ್ಟಿಫಿಕೇಶನ್ ನಾ. ಆಸೊಂ, ಥಂಯ್ ಗೆಲ್ಲ್ಯಾಕ್ ಎಕಾ ಶಿಕ್ಷಕಾನ್ ಹಿಣ್ಸಿಲೆಂ ಮ್ಹಳ್ಳೆಕ್ಷಣ್ ತಾಣೆಂ ಯೂನಿವರ್ಸಿಟಿ ಸೊಡ್ನ್ ಧಾಂವಜೆಗೀ? ಥಂಯ್ ಲೈಬ್ರೆರಿ ನಾ? ಇಂಗ್ಲಿಶ್‍ಚ್ ಉಲಂವ್ಚ್ಯಾ ತಾಕಾ ಕೊಂಕ್ಣಿ ಐಡೆಂಟಿಟಿ ವಿಶಿಂ ಕಶೆಂ ಸಪಣ್ ಪಡ್ಲೆಂ? Subject Knowledge ಕಿತೆಂಚ್ ನಾಸ್ತಾನಾ ಕಶೆಂ ತೊ ತಾಚೆರ್ ಉನ್ನತ್ ಶಿಕ್ಷಣ್ ಜೊಡುಂಕ್ ಅರ್ಹ್ ಜಾಲೊ?

ಆಸೊಂ, ಗಾಂವಾಕ್ ಪಾವ್‍ಲ್ಲೊ ತೊ ತ್ಯಾಚ್ ಮಹತ್ತರ್ ಉದ್ದೇಶಾನ್. ತ್ಯಾ ಧ್ಯೇಯಾ ಖಾತಿರ್ ತಾಣೆಂ ಕಿತೆಂಯೀ ವಾವ್ರ್ ಕೆಲೊಗೀ? ಖಂಡಿತ್ ನಾ. ಆಯಿಲ್ಲೊಚ್ ತೊ ಚೆಡ್ವಾಚೆರ್ ಮೊಗಾರ್ ಪಡ್ತಾ, ತಾಚ್ಯಾ ಭೊಂವ್ತಣಿಂ ಪಾಸಾಯೊ ಮಾರ್ತಾ. ತರ್ ತ್ಯಾ ಪಾತ್ರಾಕ್ ಗಂಭೀರತಾಚ್ ನಾಂಗೀ? ಗುಡ್ಯಾರ್ ಸಿಮಾಂವ್ ಮೆಳನಾತ್ಲ್ಯಾರ್ ತೊ ತ್ಯಾ ಚೆಡ್ವಾಕ್ ಘೆವ್ನ್ ಅಮೆರಿಕ ಉಬ್ತೊ ಕೊಣ್ಣಾ. ಸಿಮಾಂವ್ಚಿಂ ಮಹಿಮಾ, ತೊ ಗೊಂಯಾ ಗೆಲೊ!

ಬಂದ ಪುಟ್ಟ, ಹೋದ ಪುಟ್ಟ ಮ್ಹಳ್ಳೆಪರಿಂ ನಾಯಕ್-ನಾಯಕಿ ಗೊಂಯ್ಚ್ಯಾ ವಾಟೆರ್ ಥಂಯ್ ಹಾಂಗಾ ಡ್ಯಾನ್ಸ್ ಪ್ರಕಾರ್ ಪಳೆವ್ನ್ ವೆತಾತ್. ತೆಂ ಸರ್ವ್ ಕಾಣಿಯೆಕ್ ಖಂಚ್ಯಾಯ್ ರಿತಿನ್ ಕನೆಕ್ಟ್ ಜಾಯ್ನಾ.

ಕೊಂಕ್ಣಿ ಉಲಂವ್ಕ್ ಕಳನಾತ್‍ಲ್ಲೊ ಹೀರೊ, ಕೊಂಕ್ಣಿ ಸಂಸ್ಕೃತಿ, ಚರಿತ್ರಾ ಉಸ್ತುಂಕ್ ವೆಚ್ಯಾ ಮಿಸಾಂವಾಂತ್ ತರೀ ಕೊಂಕ್ಣಿ ಆಪ್ಣಾಯ್ನಾ. ತಾಚಿಂ ಸಂಭಾಷಣಾಂ ಸಗ್ಳಿಂ ಇಂಗ್ಲಿಶಾಂತ್‍ಚ್! ಪುಣ್ ಗೊಂಯಾಂತ್ ಶಿಣು ಪೈಚೊ ಸಂಪರ್ಕ್ ಜಾವ್ನ್, ತಾಚೆ ಥಾವ್ನ್ ‘ಜ್ಞಾನೋದಯ್’ ಲಾಭ್‍ಲ್ಲೆಂಚ್ ಫಿಂರ್ಗಿ ಚೆಡೊ ಪುರ್ತೊ ‘ಕೊಂಕ್ಣೊ’ ಜಾತಾ! ತಿತ್ಲೆಂಚ್ ನ್ಹಯ್, ಗೊಂಯಾ ವೆತಾ ಪರ್ಯಾಂತ್ ನೆಣ್ತೊ ಆಸ್‍ಲ್ಲೊ ತೊ ಥೊಡೊ ವೇಳ್ ಶಿಣುಚೊ ಸೆರ್ಮಾಂವ್ ಆಯ್ಕಲ್ಲೆಂಚ್ ಕೊಂಕ್ಣಿ ಆನಿ ಚರಿತ್ರೆಚ್ಯಾ ಗಜಾಲಿಂಚೊ Master ಜಾತಾ. ಕೊಂಕ್ಣಿ ಉಲಂವ್ಕ್ ಬಿಕ್ಕೊನ್ ಆಸ್‍ಲ್ಲೊ ವಿದ್ಯಾರ್ಥಿ ಕೊಂಕ್ಣೆಂತ್‍ಚ್ ಲೆಕ್ಚರ್ ದಿತಾ… ಹೆಂ ಕಸಲೆಂ ಅಜ್ಯಾಪ್?

ಗೊಂಯಾ ಥಾವ್ನ್ ಪಾಟಿಂ ಪರ್ತತಾನಾ ನೆಣಾರಿ ವಿವೇಕ್ ಪೈ (ಹೀರೊ) ಏಕ್‍ದಂ ಪಂಡಿತ್‍ಚ್ ಜಾತಾ. ಕಾಳಿ ನ್ಹಯ್ ವಿಶಿಂ ಶಿಣು ಪೈನ್ ಸಾಂಗ್‍ಲ್ಲೆಂ ಮ್ಹಣ್ಯೆತ್. ಪುಣ್ ಬೋಳಾರ್‌ಚ್ಯಾ ಕ್ರಿಸ್ತಾಂವ್ ರೊಜಾರ್ ಮಾಯೆ ವಿಶಿಂ ಕೊಣೆಂ ತರ್ಬೆತಿ ದಿಲ್ಲಿ?

ಹೀರೊಕ್ ಏಕ್ ಹೀರೊಯಿನ್ ಜಾಯ್ಜೆ ಮ್ಹಣ್ ತೊ ಪಾತ್ರ್ ಘಡ್ಲಾ. ಹ್ಯಾ ಮೋಗ್ ಕರ್ಣಾರಾಂಚಿಚ್ ಏಕ್ ಉಪಕಥಾ ರಚ್ಯೆತಿ. ಸಿಮಾಂವ್ಚೊ ಪಾತ್ರ್‌ಯೀ ರಚಿಜೆ ಮ್ಹಳ್ಳ್ಯಾ ಖಾತಿರ್ ರಚ್ಲಾ. ಮಾಡಿಯೆಕ್ ಪೊಣ್ಸಾ ರುಕಾಪರಿಂ ದಾಕಯ್ಜೆ ಮ್ಹಣ್ ಫಾಂಟೆ ಕಾತರ್ನ್ ಬಸಯಿಲ್ಲೆಪರಿಂ ಸಗ್ಳೆಂ ಜಾಲಾಂ. ಕೃತಕತೆಚೆಂ ಎಕ್ಸಿಬಿಶನ್‍ಂಚ್ ಚಲ್ಲಾಂ.

ವಿಲನ್ ಕೊಣಾ ಖಾತಿರ್, ಕೊಣೆಂ ರಚ್‍ಲ್ಲೊ?

ಪಾತ್ರ್ ರಚ್ಚಿ ಕೌಶಲ್ಯತಾ ಕಾಣಿ ಘಡ್ಲೆಲ್ಯಾಂಕ್ ನಾ ಮ್ಹಣ್ಚ್ಯಾಕ್ ಬಳ್ವಂತ್ ಸಾಕ್ಸ್ ವಿಲನಾಚೊ ಪಾತ್ರ್. ಹೊ ಪಾತ್ರ್ ಖಂಚ್ಯಾಚ್ ರಿತಿನ್ ಪಳೆಲ್ಯಾರೀ ಕಾಣಿಯೆಕ್ ವೊಂಬನಾ, ಘಡ್ಸನಾ. ಗರ್ಜ್‍ಚ್ ನಾತ್‍ಲ್ಲೊ ಪಾತ್ರ್ ತೊ. ಆನಿ ತಾಚೊ ಸ್ವಭಾವ್ ಆನಿ ಇರಾದೊಯೀ ಹಾಸ್ಯಾಸ್ಪದ್. ಕುಟ್ಮಾಂತ್ಲಿಂಚ್ ಮೊಗಾರ್ ಪಡ್ತಾತ್, ಕಾಜಾರ್ ಜಾಲ್ಲಿಂಯೀ ಆಸಾತ್. ಪುಣ್ ಹೊ ವಿಲನ್ ಚೆಡ್ವಾಕ್ ಕಸಿನ್ ಮ್ಹಣ್ತಾ, ಪುಣ್ ಕಾಜಾರಾಕ್ ಆಯಿಲ್ಲ್ಯಾ ವೆಳಾರ್ (ಪಯ್ಲೆ ಪಾವ್ಟಿಂ) ಪಳೆಲ್ಲೆಂಚ್ ಪಿಸೊ ಜಾಲೊ ಮ್ಹಣ್ತಾ. ಅಪರಿಚಿತ್‍ಯೀ ವ್ಹಯ್, ಕಸಿನ್‍ಯೀ ವ್ಹಯ್! ಕಾಣಿಯೆಚಿಂ ಮಹಿಮಾಂ ಕಿತ್ಲಿಂ ಅಪಾರ್ ಪಳೆಯಾ…

ಆನಿ ಹ್ಯಾ ವಿಲನಾಚೆಂ ನಟನ್ ಫಕತ್ ನಾಟಕಾಚೆಂ. ನಿರ್ದೇಶಕ್ ಕಿತ್ಲೊ ದುಬ್ಳೊ ಆನಿ ಅಸ್ಕತ್ ಮ್ಹಳ್ಯಾರ್ ಫ್ರಸ್ಟ್ರೇಶನ್ ಸಾದರ್ ಕರುಂಕ್ ಸಕ್ಡಾಂಕೀ ಎಕ್‍ಚ್ ರಿತಿಚೆಂ ಬಿಹೇವಿಯರ್ ಶಿಕಯ್ಲಾಂ. ಹೀರೊಯೀ ಹಾತ್ ಧಾಡಾವ್ನ್ ತಿ ಪರಿಸ್ಥಿತಿ ನಟನ್ ಕರ್ತಾ, ವಿಲನ್‍ಯೀ ತಶೆಂಚ್ ಆ್ಯಕ್ಟಿಂಗ್ ಕರ್ತಾ. ಭೋವ್ಶ್ಯಾ ನಟನಾಚಿ ಏಕ್ ಕ್ಲಾಸ್ ಮಾತ್ರ್ ಶಿಕ್‍ಲ್ಲೊ ಆಸ್ತಲೊ ನಿರ್ದೇಶಕ್!

ಪಾತ್ರ್ ರಚನಾಂತ್ಲಿ ದುರ್ಬಳ್ಕಾಯ್

ಪ್ರಿನ್ಸ್ ಜೇಕಬ್ ಏಕ್ ಅವ್ವಲ್ ನಟ್. ತಾಕಾ, ಫಕತ್ ಗೊಂಯಾಂತ್ ಮಾರ್ಕೆಟ್ ಕರುಂಕ್ ಕುಮಕ್ ಜಾಂವ್ಚ್ಯಾಕ್ ಏಕ್ ನಾಮ್‍ಕೇ ವಾಸ್ತೆ ಪಾತ್ರ್ ದಿಲಾ.

ಆನಿ ಇಂಕ್ವಿಜಿಸಾವಾಚ್ಯಾ ಕಾಳಾಚೆ ಪಾತ್ರ್. ತಾಂತ್ಲೊ ಲಕ್ಷ್ಮಣ್ ಶಿರೋಡಿ ಪೈ ಗಾಂವ್ಚೊ ಮುಖೆಲಿ. ಪೂಜಾರಿ ವೆಗ್ಳೊಚ್ ಎಕ್ಲೊ ಆಸ್ತಾ. ಪುಣ್ ಸೊಜೆರ್ ಪೂಜಾರಿಕ್ ಸೊಡ್ನ್ ಫಕತ್ ಹಾಕಾ ಮಾತ್ರ್ ಬಂಧಿ ಕರ್ತಾತ್. ಪೂಜಾರಿ ಖಂಯ್ ಲಿಪ್ಲೊ? ತಾಕಾ ಕಿತ್ಯಾಕ್ ಸೊಡ್ಲೆಂ?

ಪುಡ್ತುಗೆಜ್ ಪಾತ್ರ್ ಕಿತ್ಲೆ ಅವ್ವಲ್ ರಚ್ಯೆತೆ. ಖಂಚ್ಯಾಯ್ ರಿತಿನ್ – ನ್ಹೆಸಣ್, ಉಲೊಣೆಂ, ನಡ್ತೆಂ ಇತ್ಯಾದಿ – ತೆ ಪಾತ್ರ್ ಯುರೊಪಿ ಮ್ಹಣ್ ದಿಸ್ತಾತ್‍ಗೀ? ಬಿಲ್ಕುಲ್ ನಾ. ತನ್ಖಿ ಕರ್ಚೊ ಅಧಿಕಾರಿ (ಸಂದೀಪ್ ಮಲಾನಿ ಪಾತ್ರ್) ಕೊಂಕ್ಣಿಚ್ ಉಲಯ್ತಾ! ಬಿಸ್ಪ್ ಮೊನೊ ಜಾಲ್ಲ್ಯಾನ್ ಬಚಾವ್. ನಾತ್ಲ್ಯಾರ್ ತೊಯೀ ಕೊಂಕ್ಣಿಚ್ ಉಲಯ್ತೊ ಕೊಣ್ಣಾ!? ಪುಡ್ತುಗೆಜಾಂನಿ ಕೊಂಕ್ಣಿ ಉಲಯಿಲ್ಲ್ಯಾಂತ್ ನವಾಲ್ ನಾ, ಪುಣ್ ಉಚ್ಛಾರ್?

ಆನಿ ತೆ ಸೊಜೆರ್! ತೆ ಸೊಜೆರ್‌ಗೀ ವಾ ಬೆರ್ಚಪ್ಪಾಗೀ ಮ್ಹಣ್ ದುಬಾವ್ ಜಾತಾ. ಪೊರ್ಚುಗೀಸ್ ಸೊಜೆರ್ ಮ್ಹಣ್ ದಾಕಂವ್ಕ್ (ಕಾಸ್ಟ್ಯೂಮ್, ಮೇಕಪಾಕ್) ಖರ್ಚ್ ಬಸ್ತಾ ಮ್ಹಣ್ ಅರ್ಜೆಂಟಾಕ್, ಉಣ್ಯಾಚೆಂ ಪಾತಳ್ ವಸ್ತುರ್ ನ್ಹೆಸಯ್ಲಾಂ… ತ್ಯಾ ಕಾಳ್ಯಾ ನ್ಹೆಸ್ಣಾರ್ ತೆ ನಕ್ಸಲೈಟ್ ವಾ ಲಷ್ಕರಿ ಟೆರರಿಸ್ಟಾಂಪರಿಂ ದಿಸ್ತಾತ್. (ಸಂದರ್ಶನಾಂತ್ ಎರಿಕಾನ್ ಕಸ್ಲೆಂಚ್ ಕೊಂಪ್ರಮೈಸ್ ಕರುಂಕ್ ನಾ, ಸಸಾರ್ ಕರುಂಕ್ ನಾ ಮ್ಹಳಾಂ… ತರ್ ಹೆಂ ಕಿತೆಂ? ಸಿನೆಮಾ ಪಳೆಲ್ಯಾ ಉಪ್ರಾಂತೀ ತಾಚಿ ಅಭಿಪ್ರಾಯ್ ತಿಚ್?).

ಅಕ್ಮಾನ್ ಕರ್ಚ್ಯಾಕ್‍ಚ್ ಪಾತ್ರ್ ರಚ್ಲ್ಯಾತ್?

ರೊಯ್ ಕಾಸ್ತೆಲಿನೊಚೆರ್ ಕೊಣಾಕ್ ತಿತ್ಲೊಯೀ ರಾಗ್? ಸಮಾಜೆಂತ್ಲ್ಯಾ ಎಕಾ ಗಣ್ಯ್ ವ್ಯಕ್ತಿಕ್ ಭರ್ಮಾಚೊ ಪಾತ್ರ್ ದೀಜೆ ಆಸ್‍ಲ್ಲೊ. ತಾಚೆ ವಯ್ರ್ ತೊ ಮಾಂಡ್ ಸೊಭಾಣಾಚೊ ಪಿರ್ಜೆಂತ್. ತೊ ಆನಿ ತಾಚ್ಯಾ ಕುಟ್ಮಾ ಶಿವಾಯ್ ಕಲಾಂಗಣ್ ಉಬೆಂ ಜಾತೆಂ ನಾ. ಪುಣ್ ತಾಕಾ ಪಾತ್ರ್ ದಿಲಾ ತರೀ ಕಸಲೊ? ಬಜೀ ಥರ್ಡ್ ಕ್ಲಾಸ್! ಬಿರ್ಮತ್, ತಾಕಾ ನಟನ್ ಕಳಿತ್ ನಾ. ಆಪುರ್ಬಾಯೆಚೆಂ ದೃಶ್ಯ್ ಪುಣೀ ದಿವ್ಯೆತೆಂ. ಪುಣ್ ತಾಚಿ ಮರ್ಯಾದ್ ಕಾಡಿಜೆಚ್ ಮ್ಹಳ್ಳೆಪರಿಂ ಕೀಳ್ ಪಾತ್ರ್ ದಿಲಾ. ಹಿ ಮಾಂಡ್ ಸೊಭಾಣಾನ್ ಉಕಲ್ನ್ ಧರ್ಚಿ ‘ಸಂಸ್ಕೃತಿ’ ಆನಿ ‘ಅಸ್ಮಿತಾಯ್’ಗೀ?! ಆಪ್ಲ್ಯಾ ದಾನಿಂಕ್ ದಿಂವ್ಚೊ ಗೌರವ್ ಅಸಲೊಚ್‍ಗೀ?

ಕಾಜಾರಾಚೊ ಪ್ರಸಂಗ್ ಫಕತ್ ಏಕ್ ಪ್ರಹಸನ್. ರೋಸ್-ರೆಸ್ಪೆರ್-ಕಾಜಾರಾಚೆಂ ದೃಶ್ಯ್ ಆಸಜೆಚ್ ಮ್ಹಳ್ಳೊ ಇರಾದೊ ಶಿವಾಯ್ ಚಡ್ತಿಕ್ ಕಿತೆಂಯೀ ತ್ಯಾ ದೊಂಬರಾಟಾಂತ್ ದಿಸನಾ.

ಪಿಂಜ್ಕರ್ ನ್ಹೆಸ್ಣಾಂತ್ ಕೊಂಕ್ಣಿ ಸಂಸ್ಕೃತೆಚೆಂ ನಾಗ್ಡೆಂಪಣ್?

ಕೊಂಕ್ಣೆಚ್ಯಾ ಘನತೆಕ್ ಕರಿ ಪುಸುಂಕ್‍ಚ್ ಮ್ಹಣ್ ಏಕ್ ಪಾತ್ರ್ ರಚ್ಲಾ. ಘರ್ಚೊ ನೌಕರ್ (ಆಲ್ವಿನ್ ಬಜಾಲ್ ಪಾತ್ರ್) ಏಕ್ ಕೊಮೆಡಿಯನ್. ಪುಣ್ ತಾಕಾ ಪಿಂದ್‍ಲ್ಲೆಂ ಟಿಶರ್ಟ್ ಕಿತ್ಯಾಕ್ ನ್ಹೆಸಯ್ಲಾಂ? ಕೊಂಕ್ಣೆಚಿ ಮರ್ಯಾದ್ ಉಕಲ್ನ್ ಧರುಂಕ್, ಅಸ್ಮಿತಾಯ್ ಪಾಚಾರುಂಕ್ ನಿರ್ಮಿಲ್ಲ್ಯಾ ಸಿನೆಮಾಂತ್ ಕೊಂಕ್ಣೆಚೆ ಪಾತ್ರ್ ಮ್ಹಳ್ಯಾರ್ ಅಸಲೆ ಭಿಕಾರ್ಪಣಾಚೆಚ್ ಆಸಜೆ ಮ್ಹಣ್ ಕೊಣೆಂ ಸಾಂಗ್ಲಾಂ? ಎಕಾ ಸಾವ್ಕಾರಾಚ್ಯಾ ಘರ್ಚ್ಯಾ ಕಾಜಾರಾಚ್ಯಾ ಮಾಟ್ವಾಂತ್ ವಾವುರ್ತಲೊ ಮುಖ್ಯ್ ಕಾಮೆಲಿ ಮುಸ್ತಾಯ್ಕೆಕ್ ಗತ್ ನಾತ್‍ಲ್ಲೊ ಆನಿ ಅಂಡೆಪಿರ್ಕಿ ಜಾವ್ನಾಸ್ತಾಗೀ? ತಾಚೆ ವಯ್ರ್ ಕುಡ್ಚೆಲಾ! ತಸಲೆಂ ಪ್ರದರ್ಶನ್ ಫಕತ್ ತ್ಯಾ ಪಾತ್ರಾಕ್/ನಟಾಕ್ ಮಾತ್ರ್ ನ್ಹಯ್, ಘರ್ಚ್ಯಾ ಧನ್ಯಾಕ್, ಕಾಜಾರ್-ಸಂಸ್ಕೃತೆಕ್ ಆನಿ ಸಿನೆಮಾಕ್‍ಯೀ ಕೀಳ್ ಕರ್ತಾ ಮ್ಹಳ್ಳಿ ಪ್ರಜ್ಞಾ ಕೊಣಾಯ್ಕೀ ನಾತ್‍ಲ್ಲಿಚ್‍ಗೀ? ಪಾತ್ಯೆಂವ್ಕ್ ಜಾಯ್ನಾ.

ಸೊರೊ ಮ್ಹಳ್ಯಾರ್ ಜಾಯ್ನಾತ್‍ಲ್ಲ್ಯಾ ಎರಿಕಾನ್ ಸಗ್ಳ್ಯಾ ಪಿಂತುರಾಂತ್ ಸೊರೊ ನಾಸ್ತಾನಾ ಖಂಚೆಂಯೀ ದೃಶ್ಯ್ ಅಸಾಧ್ಯ್ ಮ್ಹಳ್ಳ್ಯಾ ನಿಚೆವಾಕ್ ಆಯಿಲ್ಲೆಂ ಕಶೆಂ? ಗಾಂವಾಂತೀ ಗೊಂಯಾಂತೀ ಸೊರೊ ಚಡ್ ಪರ್ಜಳ್ಳಾ. ತಿಯೀ ಆಪುಟ್ ಸಂಸ್ಕೃತಿ ಆನಿ ಅಸ್ಮಿತಾಯ್ ಮ್ಹಣೊನ್‍ಗೀ?

ಸಂಸ್ಕೃತೆಚೆಂ ಸಾದರ್ಪಣ್ ಮಾರ್ಗಾರ್?

ಸಿನೆಮಾಚ್ಯಾ ಕರ್ತಾಂನಿ ಆಪ್ಣೆಂ ಅದ್ಭುತ್ ರಚ್ಲಾಂ ಮ್ಹಣ್ ಗಾಜಯ್ಲಾಂ. ಪುಣ್ ಫಿಲ್ಮಾಂತ್ ಅದ್ಭುತ್ ಸೊಡ್ಯಾಂ ಮರ್ಯಾದಿಚೆಂ ಕಾಂಯ್ ದಿಸನಾ. ಗೊಂಯ್ಚ್ಯಾ ವಾಟೆರ್, ವೆವೆಗ್ಳ್ಯಾ ಸಮುದಾಯಾಂಚೊ ನಾಚ್ ಪ್ರಕಾರ್ ದಾಕಯ್ಲಾ. ತೆಂ ನಿಜಾಯ್ಕೀ ಕಿತ್ಯಾಕ್ ಮ್ಹಣ್ ಸಮ್ಜನಾ. ಫಕತ್ ತೆಂ ದಾಕಯಿಲ್ಲೆ ತಕ್ಷಣ್ ಕೊಂಕ್ಣಿ ಸಂಸ್ಕೃತೆಚೆಂ ವಿಶ್ವರೂಪ ದರ್ಶನ ಕೆಲ್ಲೆಪರಿಂ ಜಾತಾ ಮ್ಹಣ್ ಚಿಂತ್ಲಾಂ ಆಸ್ತೆಲೆಂ! ದಾಕಯಿಲ್ಲೆಂ ಚೂಕ್ ಮ್ಹಣನಾ, ಪುಣ್ ದಾಕಯಿಲ್ಲಿ ರೀತ್ ನಿಜಾಯ್ಕೀ ಆಕ್ಷೇಪಾರ್ಹ್. ಕಾಣಿಯೆಕ್ ಕಶೆಂಯೀ ಸಂಬಂಧ್ ನಾ, ದಾಕವ್ಣೆಂತ್ ತರೀ ಕಾಂಯ್ ಕಲಾತ್ಮಕತಾ ಆಸಾಗೀ? ಖಂಡಿತ್ ನಾ. ಹೆಂಯೀ ಭರ್ಸಿಲ್ಲೆಂಚ್ ಶಿವಾಯ್ ಸಹಜ್ ನ್ಹಯ್.

ಕುಡ್ಮ್ಯಾಂಚೆಂ ಆನಿ ಸಿದ್ಧಿಂಗೆಲೆಂ ಪ್ರದರ್ಶನ್ ತರೀ ಓಕೆ. ಪುಣ್ ಹೆರ್ ದೋನ್ ನಾಚ್ ಪ್ರಕಾರ್ ದಾಕಯ್ಲ್ಯಾತ್, ಏಕ್ ಖಂಯ್ಗೀ ಎಕಾ ಗುಡ್ಯಾಚ್ಯಾ ರಸ್ತ್ಯಾರ್, ಆನ್ಯೇಕ್ ಮ್ಹೆಳ್ಕುಟ್ಯಾ ಪರಿಸರಾಂತ್ (ನ್ಹಂಯ್ ದೆಗೆಚೆಂ ದೃಶ್ಯ್). ತಿಂ ಸರ್ವ್ ವಾಟೆರ್ ನಾಚ್ತಾತ್ ಕಿತ್ಯಾಕ್? ಪಳೆಂವ್ಕ್ ಗೆಲ್ಲಿಂ ಪಯ್ಸ್ ಥಾವ್ನ್ (ಸಾಂಖ್ಯಾಚೆರ್ ರಾವೊನ್) ಪಳೆತಾತ್. ಅಶೆಂ ಎಕೇಕ್ ಪಂಗ್ಡಾಚೊ ಎಕೇಕ್ ನಾಚ್ ದಾಕಯಿಲ್ಲ್ಯಾನ್ ಸಂಸ್ಕೃತಿ ವಿಶಿಂ ಕಿತೆಂ ಜಾಣ್ವಾಯ್ ಪ್ರಸಾರ್ ಜಾತಾ? ಪಾತ್ರಾಂನಿ ವಾ ನಿರೂಪಕಾನ್ ಕಾಂಯ್ ಸಾಂಗ್‍ಲ್ಲೆಂ ತರ್ ಉಪ್ಕಾರ್ತೆಂ.

ಹಾಚ್ಯಾಕೀ ಕಲಾಂಗಣಾಂತ್ಲ್ಯಾ ‘ಮ್ಹಯ್ನ್ಯಾಳಿ ಮಾಂಚಿ’ ಕಾರ್ಯಾಂನಿ ಚಡ್ ಗ್ರೇಸ್ತ್‌ಕಾಯೆಚೆಂ ಪ್ರದರ್ಶನ್ ಜಾಲಾಂ. ಥಂಯ್ಸರ್ ಸರಾಗ್ ಭೆಟ್ ದಿಲ್ಲ್ಯಾಕ್ ಕಿತ್ಲಿಂಗೀ ಊಂಚ್ ಕಾರ್ಯಿಂ ಪಳೆಂವ್ಕ್ ಮೆಳ್ಳ್ಯಾಂತ್. ತಾಂಚೊಚ್ ಏಕ್ ವೀಡಿಯೊ ಕರ್ನ್ ಮಾರ್ಕೆಟಿಕ್ ಘಾಲ್ಯಾರ್ ಕೊಂಕ್ಣೆಚ್ಯಾ ಸಾಂಸ್ಕೃತಿಕ್ ಗ್ರೇಸ್ತ್‌ಕಾಯೆಚಿ ವಳಕ್ ಸಂಸಾರಾಕ್ ದಾಕವ್ಯೆತ್. ಪುಣ್ ಹ್ಯಾ ಫಿಲ್ಮಾಂತ್ ಫಕತ್ ‘ಹರಕೆ ಸಂದಾಯ’ ಕೆಲ್ಲೆಂ ಮಾತ್ರ್ ಉಟೊನ್ ದಿಸ್ತಾ. ದಿಶಾ ನಾತ್‍ಲ್ಲೆಂ ಕಾಮ್.

ಫಕತ್ ನಾಚ್ ವಾ ಪದಾಂ ದಾಕಯಿಲ್ಲೆಂಚ್ ಸಂಸ್ಕೃತಿ ಆನಿ ಅಸ್ಮಿತಾಯ್ ಸಾದರ್ ಕೆಲ್ಲೆಪರಿಂ ಜಾತಾಗೀ? ತಶೆಂ ಕರುಂಕ್ ಏಕ್ ಫೊಟೊ ಆಲ್ಬಮ್ ಪಾವನಾತ್‍ಲ್ಲೊಗೀ? ಉಣ್ಯಾ ಖರ್ಚಾರ್ ಜಾತೆಂ ನೆ?

ಚುಕಿಂಚಿ ರಾಸ್, ಗೊಂದೊಳಾಂಚೆಂ ಭಂಡಾರ್

ಹ್ಯಾ ಸಿನೆಮಾಂತ್ ಹರ್ ವಿಭಾಗಾಂತ್ ಉಣೆಂಪಣಾಂ ಆನಿ ವಿಕೃತಿ ದಿಸೊನ್ ಯೆತಾ. ಉಟೊನ್ ದಿಸ್ಚ್ಯೊ ತಸಲ್ಯೊ ಚುಕಿ:

1. ಸಿಮಾಂವ್ಕ್ ಫಾತೊರ್ ಮಾರ್ಲೊ ‘ಕಿತ್ಯಾಕ್’?

ಸಿಮಾಂವ್ಚೊ ಹಿತೈಶಿ ವಿತೊರಿ (ಸ್ವತಃ ವಿತೊರಿಚೊ ಪಾತ್ರ್ – ಕಾಲ್ಪನಿಕ್ ಪಾತ್ರಾಂಕ್ ನಾಂವಾಂ ದವರ್ಚಿ ಶ್ಯಾಥಿಯೀ ನಾ. ಐವಿಕ್ ಐವಿ ನಾಂವ್‍ಂಚ್ ದಿಲಾಂ) ಏಕ್ ಡೈಲಾಗ್ ಮಾರ್ತಾ – “ಸಿಮಾಂವ್ಕ್ ಫಾತೊರ್ ಮಾರ್‌ಲ್ಲೊ ಕೊಣೆಂ ಮ್ಹಣ್ ಕಳ್ಳೆಂಗೀ?” ಸಾಧಾರ್ಣ್ ಅಮಿತಾಭ್ ಬಚ್ಚನಾಚ್ಯಾ ಲೆವೆಲಾಚೆಂ ಸಂಭಾಷಣ್ ಹೆಂ ಮ್ಹಣ್ ಸಂಬಂಧಿತಾಂನಿ ಚಿಂತ್ಲಾಂ ಆಸ್ತೆಲೆಂ. ತ್ಯಾ ಪಯ್ಲೆಂಚ್ ದೋಗ್ ಜಣ್ ಯೇವ್ನ್ ತ್ಯಾಚ್ ವಿತೊರಿಕ್ ಧಮ್ಕಿ ದಿತಾತ್, ಥಾಪುಡ್ತಾತ್! ದುಸ್ಮಾನ್ ತೆಚ್. ತಿತ್ಲೆಂ ಆಸೊನ್‍ಯೀ ಖಂಚ್ಯಾ ಅದ್ಭುತ್ ತಕ್ಲೆನ್ ಹೊ ಡೈಲಾಗ್ ರಚ್ಲಾ? ಆನಿ ತೊ ವಿಚಾರ್ತಾ ತರೀ ಕೊಣಾ ಲಾಗಿಂ? ಸ್ಕಿಟ್ ಪಾತ್ರ್‌ಧಾರಿ ಭುರ್ಗ್ಯಾಂಕ್! ಪೊಲಿಸಾಂಕ್ ವಿಚಾರಿಜೆ ಆಸ್‍ಲ್ಲೆಂ… ನಿಜಾಯ್ಕೀ ತಾಣೆಂ – “ಸಿಮಾಂವ್ಕ್ ಫಾತೊರ್ ಮಾರ್‌ಲ್ಲೊ ‘ಕಿತ್ಯಾಕ್’ ಮ್ಹಣ್ ಕಳ್ಳೆಂಗೀ?” ಮ್ಹಣಜೆ ಆಸ್‍ಲ್ಲೆಂ.

2. ಚೇಸಿಂಗ್ ದೃಶ್ಯ್ – ಕಾರ್ ಕಶೆಂ ಘುಂವ್ಲೆಂ?

ಗೊಂಯಾಂತ್ ಏಕ್ ಚೇಸಿಂಗ್ ದೃಶ್ಯ್ ಆಸಾ. ನಾಯಕ್-ನಾಯಕಿಚ್ಯಾ ಬೈಕಾಕ್ ದುಸ್ಮಾನ್ ಚೇಸ್ ಕರ್ತಾತ್. ಬೈಕ್ ಮುಖಾರ್, ಕಾರ್ ಪಾಟ್ಲ್ಯಾನ್. ರಸ್ತ್ಯಾರ್ ದಾವ್ಯಾಕ್ ಘುಂವ್ಡಿ ದಿಸ್‍ಲ್ಲಿಚ್ ಬೈಕ್ ತೆಣೆಂ ರಿಗ್ತಾ. ಕಾರ್ ಶೀದಾ ಮುಖಾರ್ ವೆತಾ. ಖಿಣಾನ್ ತೆಂ ಕಾರ್ ಬೈಕಾಕ್ ದಾವ್ಯಾ ಕುಶಿ ಥಾವ್ನ್ ಫುಡ್ ಜಾತಾ! ಹೆಂ ಕಶೆಂ? ಮುಖ್ಲ್ಯಾನ್ ಗೆಲ್ಲೆಂ ಕಾರ್ ಉಜ್ವ್ಯಾಕ್ ಮೆಳಜೆ. ಭೋವ್ಶ್ಯಾ ಕಾರ್ ಲೈಟ್ನಿಂಗ್ ವೆಗಾನ್ ಆಕಾಸಾಂತ್ಲ್ಯಾನ್ ಆಯಿಲ್ಲೆಂ ದಿಸ್ತಾ!!! (ತ್ಯಾ ಡ್ರೈವರಾಕ್ ರಜನೀಕಾಂತಾಚ್ಯಾ ಫಿಲ್ಮಾಂನಿ ಚಾನ್ಸ್ ಮೆಳತ್!).

3. ಕಲಾಕಾರಾಚ್ಯಾ ಖೊಮ್ಟ್ಯಾಂತ್ ಗುಜಿರಿ ದಾಸ್ತಾನ್?

ಕಲಾಕಾರ್ ಸಿಮಾಂವ್ಕ್ ಲಗ್ತಿ ಜಾವ್ನ್ ಕಿತ್ಲ್ಯೊ ಚುಕಿ ಘಡ್ಲ್ಯಾತ್ ತೆಂ ಮೆಜುಂಕ್ ಕಷ್ಟ್. ಗಾಂವಾಂತ್ಲ್ಯಾ ತಾಚ್ಯಾ ಗ್ಯಾಲರಿಕ್ ಆನಿ ರಾನಾಂತ್ಲ್ಯಾ ತಾಚ್ಯಾ ಖೊಮ್ಟ್ಯಾಕ್ ರಾತ್ ದೀಸ್ ಫರಕ್! ಗಾಂವಾಂತ್ ತಾಚಿಂ ಚಡಾವತ್ ಚಿತ್ರಾಂ ಬ್ಲಾಕ್ & ವೈಟ್ ಡ್ರಾಯಿಂಗಾಂ. ಪುಣ್ ಘಾಟ್ ಚಡ್‍ಲ್ಲೆಂಚ್ ಕಲರ್ ಪೈಂಟಿಂಗಾಂಚ್ ದಿಸ್ತಾತ್. ಅದ್ಭುತ್ ಟ್ರಾನ್ಸಿಶನ್! ಕಲಾಕಾರಾನ್ ಹಾತಾಂತ್ ಪೈಂಟ್ ಬ್ರಶ್ ಧರ್ಚಿಂ ದೃಶ್ಯಾಂ, ಚಿತ್ರಾಂ ಸೊಡಂವ್ಚೆಂ ಸನ್ನಿವೇಶ್ ಆಸ್ಲ್ಯಾರ್ ತೆಂ ಸಹಜ್. ತಿ ಐಡಿಯಾ ಕೊಣಾಕೀ ನಾ…

ಸಿನೆಮಾಚಿ ಸಗ್ಳಿ ಅವ್ಯವಸ್ಥಾ ಖೊಮ್ಟ್ಯಾಂತ್ ಸಾದರ್ ಜಾಲ್ಯಾ. ಕೋಣ್ ಕಿತೆಂ ಕರ್ತಾ, ಕೊಣಾಕ್ ಕಸಲಿ ಜವಾಬ್ದಾರಿ ದಿಲ್ಯಾ ಮ್ಹಳ್ಳೆಂಚ್ ಕಳಿತ್ ನಾತ್‍ಲ್ಲೆಂ, ಕಾಣಿಯೆಗಾರ್ ಆನಿ ನಿರ್ದೇಶಕ್ ನಾತ್‍ಲ್ಲೊಚ್ ಮ್ಹಣ್ಚ್ಯಾಕ್ ಹಾಂಗಾಚಿಂ ದೃಶ್ಯಾಂಚ್ ರುಜ್ವಾತ್. ಖೊಮ್ಟ್ಯಾಚೆಂ ಚಿತ್ರೀಕರಣ್ ಕೆಲಾಂ. ತಾಂತುಂ ಕಲಾ ವೃತ್ತೆಕ್ ಗರ್ಜ್ ನಾತ್‍ಲ್ಲ್ಯೊ ಸಾಹೆತಿ ಆಸಾತ್. ಭೋವ್ಶ್ಯಾ ಥಂಯ್ ಏಕ್ ‘ಪರ್ನ್ಯಾ ವಸ್ತುಂಚೆಂ ವಸ್ತು ಸಂಗ್ರಹಾಲಯ್ ಉಬಾರುಂಕ್ ಆಸಾ’ ಮ್ಹಳ್ಳೆಂ ದಿಸ್ತಾ, ಪರ್ನ್ಯೊ, ಕೊನ್ಶ್ಯಾಂತ್ಲ್ಯೊ ಆದ್ಲ್ಯೊ ವಸ್ತು ಹಾಡ್ನ್ ದಾಳ್ಳ್ಯಾತ್. ಅತೀ ಕೃತಕ್ ಆನಿ ನಿಕೃಷ್ಠ್ ಸಂಗತ್ ಮ್ಹಳ್ಯಾರ್, ಚಿತ್ರ್ ಸೊಡಂವ್ಕ್ ಆಸಾ ಮ್ಹಳ್ಳೆಲೆಂ ಖಾಲಿ ಕ್ಯಾನ್ವಾಸ್ ವಣದಿರ್ ಉಬಾರಾಯೆರ್ ಉಮ್ಕಳ್ತಾ!

ಕಲಾಕಾರ್ ಚಿತ್ರ್ ಸೊಡಯ್ತಾನಾ ತೆಂ ತಾಚ್ಯಾ ಸ್ಟ್ಯಾಂಡಾಚೆರ್ ಆಸಜೆ. ಪೂರ್ಣ್ ಜಾಲ್ಯಾ ಉಪ್ರಾಂತ್‍ಚ್ ವಣದಿರ್ ದವರ್ಚೆಂ. ಪುಣ್ ಹಾಂಗಾ ಸ್ಟ್ಯಾಂಡ್ ಆಸಾ, ಪರ್ಕಟ್ ಗುಜರಿಚೆಂ ಏಕ್ ಹಾಡ್ನ್ ದವರ್ಲಾಂ. ಪುಣ್ ತಾಚೆಂ ಮೋಲ್, ಮಹತ್ವ್, ಸನ್ನಿವೇಶಾಕ್ ತಾಚಿ ಗರ್ಜ್ ಇತ್ಯಾದಿ ಕೊಣಾಕೀ ಕಳಿತ್ ನಾ. ದೆಕುನ್ ಕೊಣೆಂಗೀ ಹಾಡ್ನ್ ದವರ್ಲೆಲೆಂ ಕ್ಯಾಮರಾಂತ್ ದಿಸ್ತಾ. ನಟನ್ ಕೆಲ್ಲೆಲ್ಯಾಕೀ ತೆಂ ಕಳಿತ್ ನಾ (ತೊ ಏಕ್ ಹೆಳ್‍ಲ್ಲೊ ನಾಟಕ್‍ಕಾರ್ ಜಾವ್ನೀ ಇತ್ಲೆಂ ನೆಣಾರ್ಪಣ್? ಪಾತ್ಯೆಂವ್ಕ್ ಜಾಯ್ನಾ). ಕಲಾತ್ಮಕ್ ದೃಶ್ಯಾಂ ವಿಣಿಜೆ ಜಾಲ್ಲೆ ಕಡೆನ್ ಅಸಲ್ಯಾ ಇನ್‍ಎಫೀಶಿಯೆನ್ಸಿ ವರ್ವಿಂ ಮರ್ಯಾದ್ ಕಾಡ್ಚೆಂ ಚಿತ್ರಣ್ ಜಾಲಾಂ. ಕಲೆ ಬದ್ಲಾಕ್ ಗುಜಿರಿ ಜಾಹೀರ್ ಜಾಲಾಂ.

4. ಫೈಟಿಂಗ್ ಸೀನ್ – ಬೋತ್ಲ್ ಖಂಯ್ ಥಾವ್ನ್ ಉದೆಲಿ?

ಕ್ಲೈಮ್ಯಾಕ್ಸ್ ದೃಶ್ಯಾಂತ್ ಹೀರೊಕ್ ನಾಲಾಯಕ್ ಕರ್ನ್ ಕಶೆಂಯೀ ದಾಕಯ್ಲಾಂಮೂ? ಚಾಕೊರ್ ಎಕ್ಲೊ ಹೀರೊಪರಿಂ ಸಿಮಾಂವ್ಚಿ ಹತ್ಯಾ ಕೆಲ್ಲ್ಯಾಂಚೆರ್ ಝುಜ್ತಾ. ತ್ಯಾ ವೆಳಿಂ ವಿಲನ್ ಮಾರ್ಕು ಪಯ್ಲೆಂಚ್ ಕಳಿತ್ ಆಸ್‍ಲ್ಲೆಪರಿಂ ಸಲೀಸಾಯೆನ್ ಚಲೊನ್ ಏಕ್ ಬೋತ್ಲ್ ವಿಂಚ್ತಾ (ಆನಿ ತುಕ್ರಾಚ್ಯಾ ತಕ್ಲೆಕ್ ಮಾರ್ತಾ). ಸಿಮಾಂವ್ಚ್ಯಾ ಖೊಮ್ಟ್ಯಾ ಲಾಗಿಂ ತಿ ಬೋತ್ಲ್ ಖಂಯ್ ಥಾವ್ನ್, ಕೊಣೆಂ, ಕಿತ್ಯಾಕ್, ಕೆದಾಳಾ ಹಾಡ್ನ್ ದವರ್‌ಲ್ಲಿ?

5. ಸಿಮಾಂವ್ ಮೆಲೊ… ಅಂತಿಮ್ ಶೆವಟ್ ಕಸಲೊ?

ಸಗ್ಳ್ಯಾ ಕಾಣಿಯೆಕ್ ಕಿತೆಂಚ್ ತಾಳ್‍ಮೂಳ್ ನಾ ಮ್ಹಳ್ಳೆಂ ಸಿನೆಮಾ ಸಂಪ್ತಾನಾ ಗೊಮ್ತಾ. ಸಿಮಾಂವ್ಕ್ ಜಿವೆಶಿಂ ಮಾರ್ಚಿ ಕಸಲಿಚ್ ಗರ್ಜ್ ಉದೆನಾ. ವಿಲನಾಕ್ ಟಾರ್ಗೆಟ್ ವಿವೇಕ್. ಸಿಮಾಂವ್ ಆಡ್ ಆಯ್ಲ್ಯಾರೀ ವಿಲನಾಚ್ಯಾ ಬಂದೂಕೆಕ್ ವಿವೇಕ್ Avoid ಜಾಂವ್ಕ್ ನಾ. ಸಿಮಾಂವ್ನ್ ಕಿತೆಂಯೀ ಕೆಲ್ಯಾರೀ ಕಾಂಯ್ ಜಾತೆಂ ನಾ. ತರೀ ಸಿಮಾಂವ್ಕ್ ಕಿತ್ಯಾಕ್ ಬಲಿ ದಿಲೆಂ? ತಶೆಂ ಕರ್ನ್ ಕಾಣಿಯೆಗಾರಾನ್, ಪಾತ್ರ್ ರಚ್ಲೆಲ್ಯಾನ್ ಕಿತೆಂ ಸಾಧನ್ ಕೆಲೆಂ? ಕಸಲೆಂ ಎಚೀವ್‍ಮೆಂಟ್ ಆಪ್ಣಾಯ್ಲೆಂ? ಅಸ್ಮಿತಾಯೆಕ್ ಕಸಲೆಂ ರೂಪ್ ವಾ ಸಿನೆಮಾಕ್ ಕಸಲಿ ಘುಂವ್ಡಿ ಮೆಳ್ಳಿ? ದೆವಾಕೀ ಕಳ್ಚೆಂ ನಾ!

ಸಿನೆಮಾ ರಚ್ಲೆಲ್ಯಾಂಚಿ ಎಬಿಲಿಟಿ ಕಿತ್ಲಿ ಲಾಚಾರ್ ಮ್ಹಣ್ಚ್ಯಾಕ್ ಸಿಮಾಂವ್ಕ್ ಜಿವೆಶಿಂ ಮಾರ್‌ಲ್ಲೆಂ ದೃಶ್ಯ್, ತಶೆಂಚ್, ತಾಂಚೆಂ ಕಾನ್ಸೆಪ್ಟ್ ರುಜ್ವಾತ್ ದಿತಾತ್. ಎರಿಕಾನ್ ಉಚಾರ್ಲಾಂ ಸಿಮಾಂವ್ ಚಾ.ಫ್ರಾ.ಚೊ ಪ್ರತಿನಿಧಿ ಮ್ಹಣ್. ತ್ಯಾ ಅರ್ಥಾನ್ ಪಳೆಂವ್ಕ್ ಗೆಲ್ಯಾರ್ ಸಿಮಾಂವ್ಚ್ಯಾ ಪಾತ್ರಾ ಮುಖಾಂತ್ರ್ ಚಾ.ಫ್ರಾ.ಕ್ (ಆನಿ ತಾಚ್ಯಾ ಪತಿಣೆಕ್‍ಯೀ) ಖೆಳ್ಕುಳಾಂ ಕೆಲ್ಲೆಂಚ್ ದಿಸ್ತಾ. ಏಕ್ ರೂಪಕ್ ಜಾವ್ನ್ ತೊ ಪಾತ್ರ್ ರಚ್ಲಾ ತರೀ, ಖಂಯ್ಸರೀ Justify ಕರ್ಚ್ಯೊ ಸಂಗ್ತಿ ದಿಸನಾಂತ್. ಅಂತ್ಯ್ ಕೆಲ್ಲಿ ರೀತ್ ಫಕತ್ ಹಾಸ್ಯಾಸ್ಪದ್ ಮಾತ್ರ್ ನ್ಹಯ್ ಥೇಟ್ ಮೂರ್ಖ್‌ಪಣಾಚಿ.

ಸಿಮಾಂವ್ ಪಾತ್ರ್ ಸಿನೆಮಾಚೊ ಅತ್ಮೊ ಮ್ಹಣ್ ತಾಚ್ಯಾ ದಾತಾರಾಂನಿ ಸಾಂಗ್ಲಾಂ, ಪುಣ್ ತೊ ಕಿತ್ಯಾಕ್ ಪೊಳ್ಕುರೊ? ಕಥಾನಾಯಕಾಕ್‍ಯೀ ಅಸಹಾಯಕ್ ಕೆಲಾಂ, ಅತ್ಮೊ ಜಾವ್ನಾಸ್ಚ್ಯಾ ಪ್ರಧಾನ್ ಪಾತ್ರ್ ಸಿಮಾಂವ್ಕ್‌ಯೀ ಪರಾರಿ ವೀರ್ ತಶೆಂ ದಾಕಯ್ಲಾಂ. ಸಿಮಾಂವ್ಕ್ ಮೆಳ್ಚೆ ಕಷ್ಟ್ ದಾಕವ್ನ್, ಕೊಂಕ್ಣೆಂತ್ ಸೆವಾ ದಿತೆಲ್ಯಾಂಕ್ ಫಕತ್ ಕರಂದಾಯ್ ಆನಿ ಕಷ್ಟ್ ಫುಡ್ ಜಾತಾತ್ ಮ್ಹಳ್ಳ್ಯಾ ನಕಾರಾತ್ಮಕ್, ನಾಕಾರಿ ಚಿಂತ್ನಾಂಕ್ ಗ್ಲೋರಿಫೈ ಕೆಲಾಂ. ನಿಮಾಣೆಂ ತಾಚೆಂ ಅಂತ್ಯ್ ಜಾಂವ್ಚೆಂ ತರೀ ಕಶೆಂ ಆನಿ ಕೊಣಾ ಥಾವ್ನ್? ಕೊಂಕ್ಣೆಚೊ ಏಕ್ ಊಂಚಿ ಸರ್ದಾರ್ ಜಾವ್ನಾಸ್‍ಲ್ಲ್ಯಾಕ್ ಸುಣ್ಯಾಚೆಂ ಮರಣ್ ಫಾವೊ ಕೆಲಾಂ ಕಿತ್ಯಾಕ್? ತೆಂಯೀ ಎಕಾ ರೇಪಿಸ್ಟ್ ವಿಲನಾ ಥಾವ್ನ್? ಅತ್ಯಾಚಾರಿ ಮನಸ್ಥಿತೆಚೊ ಮಾರ್ಕು ನಾಲಾಯಕ್ ಸನ್ನಿವೇಶಾಂತ್ ಗರ್ಜ್ ನಾತ್ಲ್ಯಾರೀ ಸಿಮಾಂವ್ಕ್ ಜಿವೆಶಿಂ ಮಾರ್ತಾ.

ತರ್ ಎಕಾ ನೀಚ್ ವ್ಯಕ್ತಿಕ್ ಆನಿ ಖೊಟ್ಯಾ ಇರಾದ್ಯಾಕ್ ಸಿಮಾಂವ್ಕ್ ಬಲಿ ದೀವ್ನ್ ತೊ ‘ಕೊಂಕ್ಣೆಂತ್ ಕಾಮ್ ಕರ್ನ್ ಕಾಬಾರ್ ಜಾಲೊ’ ಮ್ಹಣ್ ವಿಳಾಪ್ ದೀಂವ್ಕ್ ಜಾತಾಗೀ? ಸಿಮಾಂವ್ಚೊ ಪಾತ್ರ್ ಆನಿ ಕಾಣಿ ರಚ್ಲೆಲ್ಯಾಂಕ್ ಕನಿಷ್ಠ್ ಪ್ರಜ್ಞಾಯೀ ನಾಂಗೀ ಮ್ಹಣ್ ದುಬಾವ್ ಧೊಸ್ತಾ.

ಏಕ್ ಪ್ರಧಾನ್ ಪಾತ್ರ್, ಎಕಾ ವ್ಹಡ್ ಧ್ಯೇಯಾ ಖಾತಿರ್ ಜೀವ್ ಝರಂವ್ಚೊ ಮ್ಹಾಲ್ಗಡೊ ಮನಿಸ್, ಮೊರ್ತಾನಾ ಪ್ರೇಕ್ಷಕಾಂನಿ ರಡಜೆ ಆಸ್‍ಲ್ಲೆಂ. ತಿತ್ಲೆಂ ಮಾರ್ಮಿಕ್, ಭಾವನಾತ್ಮಕ್ ಸನ್ನಿವೇಶ್ ಆಸಾ ಕರ್ಯೆತೆಂ. ಪುಣ್ ಸಿಮಾಂವ್ ಮೆಲ್ಲೆಂ ಏಕ್ ಕೊಮೆಡಿ ಸೀನ್ ಮ್ಹಳ್ಳೆಪರಿಂ ಆಸಾ. ಹಾಸ್ಯಾಸ್ಪದ್ ಕರ್ನ್ ಸೊಡ್ಲಾಂ.

6. ಉತ್ತೀಮ್ ನಟಿಕ್‍ಯೀ ಪಂಕ್ಚರ್ ಕೆಲಾಂ!

ಸಗ್ಳ್ಯಾ ಸಿನೆಮಾಂತ್ ಎಕ್ಲ್ಯಾನ್‍ಂಚ್ ಮನೋಜ್ಞ್ ನಟನ್ ಕೆಲಾಂ. ಸಿಮಾಂವ್ಚಿ ಪತಿಣ್ ಜಾವ್ನ್ ನಟನ್ ಕೆಲ್ಲಿ ಝೀನಾ ಬ್ರ್ಯಾಗ್ಸ್ ಏಕ್ ವೃತ್ತಿಪರ್ ನಟಿ. ಏಕ್ ದುರ್ಬಳ್ ಆನಿ ನಿರಾಶಿ ಪತಿಣ್ ಜಾವ್ನ್ ತಿಣೆಂ ನಿಜಾಯ್ಕೀ ಪಾತ್ರಾಕ್ ತೆಕಿದ್, ಸಂದರ್ಭಾಕ್ ಸೂಕ್ತ್ ಅಭಿನಯನ್ ಕೆಲಾಂ. ಪುಣ್ ಸಿನೆಮಾಗಾರ್ ಕಿತ್ಲೆ ಮೂರ್ಖ್ ಮ್ಹಣ್ಚ್ಯಾಕ್ ಹಾಂಗಾಯೀ ಸಾಕ್ಸ್ ಮೆಳ್ತಾ. ಪತಿಚ್ಯಾ ಪೊರಾಜಿತಾಂನಿ ನಿರಾಸ್ ಜಾಲ್ಲಿ ತಿ ಘರ್ ಸೊಡ್ನ್ ವೆತಾಂ ಮ್ಹಣ್ತಾ. ತ್ಯಾ ವೆಳಾರ್ ಅತೀ ಬುದ್ವಂತ್ಕಾಯೆನ್ ಟ್ವಿಸ್ಟ್ ದೀವ್ನ್, ಸಿಮಾಂವ್ ಆಪುಣ್‍ಂಚ್ ಘರ್ ಸೊಡ್ನ್ ವೆತಾಂ, ಘರ್ ಪತಿಣೆಚ್ಯಾ ನಾಂವಾರ್ ಪಯ್ಲೆಂಚ್ ಕೆಲಾಂ ಮ್ಹಣ್ ಅನಿರೀಕ್ಷಿತ್ ಬಾಂಬ್ ಫುಟಯ್ತಾ. ತೆಂ ದೃಶ್ಯ್ ನಿಜಾಯ್ಕೀ ಎಕ್ಸೆಲ್ಲೆಂಟ್ ಕರ್ಯೆತೆಂ. ಪುಣ್ ತ್ಯಾ ಉತ್ರಾಂಕ್ ಕಾಲುಬುಲು ಜಾವ್ನ್, ಚಿಂತಿನಾತ್‍ಲ್ಲಿ ಅನಿರೀಕ್ಷಿತ್ ಸಂಗತ್ ಫುಡ್ ಜಾವ್ನ್ ಘುಸ್ಪಡ್-ದುಬಾವ್-ಆಘಾತ್ ತಸಲ್ಯಾ ಭಾವನಾಂನಿ, ಪ್ರತಿಕ್ರಿಯೆಂನಿ ಭರಜೆ ಆಸ್‍ಲ್ಲ್ಯಾ ಪಾತ್ರಾಕ್ ಅಸಹಾಯಕ್ ಕೆಲಾಂ. ತೆಂ ಸನ್ನಿವೇಶ್ ಖಂಡಿತ್ ಜಾವ್ನ್ ಝೀನಾಕ್ ಶ್ರೇಷ್ಠ್ ಅಭಿನಯನ್ ಕರುಂಕ್ ಅವ್ಕಾಸ್ ದಿತೆಂ. ಪುಣ್ ನಿರ್ದೇಶಕಾಕ್‍ಗೀ ಕ್ಯಾಮೆರಾಗಾರಾಕ್‍ಗೀ ಅರ್ಜೆಂಟ್ ಆಸ್‍ಲ್ಲೆಂ ದಿಸ್ತಾ, ದೃಶ್ಯ್ ಅಧುರೆಂಚ್ ಸಂಪಯ್ಲಾಂ.

7. ಕುಲೆರಾಂ ಪ್ಲಾಸ್ಟಿಕಾಚಿಂ, ಆವಾಜ್ ಸ್ಟೀಲಾಚೊ?!

ಹ್ಯಾ ಗತ್ತಿಗಟಾಚ್ಯಾ ಪಂಗ್ಡಾಚೆಂ ಹಣೆಬರಪ್ ಪಳೆಯಾ, ಕಾಜಾರಾಚ್ಯಾ ದೃಶ್ಯಾಂತ್ ಜೆವ್ಣಾ ವೆಳಾರ್ ಹೀರೊ ಆನಿ ಹೀರೊಯಿನಿಕ್ ಉಬೆ ರಾವವ್ನ್ ಜೆಂವ್ಚೆ ತ್ರಾಸ್ ದಿಲ್ಯಾತ್. ಆನ್ಯೇಕ್ ಅರ್ಜೆಂಟ್ ಚಿತ್ರೀಕರಣ್… ಆನಿ ತಿಂ ಕುಲೆರಾಂತ್ ಜೆವ್ತಾತ್, ಪುಣ್ ಕುಲೆರ್ ತರೀ ಕಸಲೆಂ? ಕೆಟರಿಂಗಾಚ್ಯಾಂನಿ ವೊರ್ನಾಕ್ ದಿಂವ್ಚೆಂ ಎದೆಶೆಂ ಪೊಟ್ಟು ಪ್ಲಾಸ್ಟಿಕ್ ಕುಲೆರ್. ವಿಷಯ್ ತಿ ನ್ಹಯ್. ಸಗ್ಳ್ಯಾ ಸಿನೆಮಾಕ್ ಗ್ರ್ಯಾಂಡ್ ಕೆಲ್ಲೆಂಚ್ ಕ್ಯಾಜೆಟನಾಚ್ಯಾ ಸಂಗೀತ್ ವಿಭಾಗಾನ್. ಪುಣ್ ಹ್ಯಾ ದೃಶ್ಯಾಂತ್ ವಿಚಿತ್ರ್ ಆವಾಜ್ ದಿಲಾ. ಜೆವ್ತಾನಾ ನಾಯಕ್ ಆನಿ ನಾಯಕಿ ಕುಲೆರ್ ವಾಪಾರ್ತಾತ್. ಪುಣ್ ಆವಾಜ್ ಸ್ಟೀಲಾಚೊ (ವಾ ಗ್ಲಾಸಾಚೊ?) ಆಯ್ಕತಾ. ಪ್ಲಾಸ್ಟಿಕ್ ಕುಲೆರಾ ಥಾವ್ನ್ ತಸಲೊ ಆವಾಜ್ ಯೆತಾಗೀ? ದುಸ್ರೆ ಖಂಯ್ ಪುಣೀ ತ್ಯಾ ಆವಾಜಾಕ್ ಜಸ್ಟಿಫೈ ಕರ್ಚೆಂ ಘಡಿತ್ ಪುಣೀ ಆಸಾಗೀ ಮ್ಹಣ್ ಸೊಧ್ಲೆಂ, ಕಿತೆಂಯೀ ಮೆಳ್ಳೆಂ ನಾ. ತರ್ ಹೆಂ ಅಧಿಕಪ್ರಸಂಗ ಕೊಣಾಚೆಂ? (ಹ್ಯಾ ಸಂಗ್ತಿಂತ್ ಹಾಂವ್ ಚುಕ್ಲಾಂ ತರ್ ಮಾಫ್ ಮಾಗ್ತಾಂ).

8. ಮೊರ್ಗನ್ ಬೈಕ್ ಮೆಕ್ಯಾನಿಕ್ ವಾ ಕೊಮೆಡಿಯನ್?

ಪ್ರಿನ್ಸ್ ಜೇಕಬ್ ಗೊಂಯ್ಚೊ ಫಾಮಾದ್ ಕಲಾಕಾರ್, ಏಕ್ ಉತ್ತೀಮ್ ನಟ್. ಮಂಗ್ಳುರಿ ಸಿನೆಮಾಂನಿಯೀ ತಾಣೆಂ ಬರೆಂಚ್ ನಟನ್ ಕೆಲಾಂ. ಗೊಯಾಂತ್ ವ್ಹಡ್ ಅಭಿಮಾನಿಂಚೊ ಸಂಖೊ ತಾಕಾ ಆಸಾ. ತ್ಯಾಚ್ ಕಾರಣಾನ್ ತಾಕಾ ಏಕ್ ಪಾತ್ರ್ ದಿಲಾ. ಸಿನೆಮಾಚಿ ಭಾಸ್ ಕಿತೆಂ ಮ್ಹಣ್ ಕಳಿತ್ ನಾತ್ಲೆಲ್ಯಾಂಚೆಂ ಆನ್ಯೇಕ್ ದೃಷ್ಟಾಂತ್ ತಾಚ್ಯಾ ಪಾತ್ರಾಂತ್ ದಿಸ್ತಾ. ನಾಯಕ್, ನಾಯಕಿ ತಾಚ್ಯಾ ಘರಾ ಪಾವ್ತಾನಾ ತೊ ಬೈಕ್ ರಿಪೇರಿ ಕರುನ್ ಆಸ್ತಾ. ತಶೆಂ ಕಿತ್ಯಾಕ್ ದಾಕಯ್ಲಾಂ? ಸಿನೆಮಾಂತ್ ದಾಕಂವ್ಚ್ಯಾ ಹರ್ ವಸ್ತುಕ್ ಮಹತ್ವ್ ಆಸಜೆ. ಹರ್ ಕೃತ್ಯೆಂ ಕಾಣಿಯೆಕ್ ಕನೆಕ್ಟ್ ಆಸಜೆ. ಪುಣ್ ಹೊ ಮೊರ್ಗನ್ ಬೈಕ್ ಕಿತ್ಯಾಕ್ ರಿಪೇರಿ ಕರ್ತಾ, ತೆಂ ಬೈಕ್ ಕಿತ್ಯಾಕ್ ದಾಕಯ್ಲಾಂ ಮ್ಹಳ್ಳ್ಯಾಕ್ ಸಿನೆಮಾಗಾರಾಂ ಥಂಯ್ ಇಲ್ಲೆಂಯೀ ರಾಜಾಂವ್ ಆಸ್ಚೆಂ ಡೌಟ್. ಹ್ಯಾ ನಟಾಕ್ ಏಕ್ ಬರೊ ಪಾತ್ರ್ ದಿವ್ಯೆತೊ. ಪುಣ್ ತೊ ಏಕ್ ಜೋಕರ್ ಕರ್ನ್ ಸೊಡ್ಲಾ.

9. ಲಕ್ಷ್ಮಣ್ ಶಿರೋಡಿ ಪೈಕ್ ಲಗ್ತಿ ಅಸಂಬದ್ಧತಾ!

ಇಂಕ್ವಿಜಿಸಾಂವಾಚ್ಯಾ ಸಂದರ್ಭಾಚೊ ಪಾತ್ರ್ ಲಕ್ಷ್ಮಣ್ ಶಿರೋಡಿ ಪೈ. ನಿಮಾಣೆಂ ಕಥಾ ನಾಯಕ್ ವಿವೇಕ್ ಪೈ ತಾಚ್ಯಾಚ್ ವಂಶಾಚೊ ಮ್ಹಣ್ ದಾಕಯ್ಲಾಂ. ಶೆಂಬರೊಂ ವರ್ಸಾಂ ಆದ್ಲ್ಯಾ ಎಕಾ ವ್ಯಕ್ತಿಚೆಂ ಸಂತಾನ್/ಕುಳಿ ಮ್ಹಣ್ ಕಶೆಂ ರುಜು ಜಾಲೆಂ? ಡಿಎನ್‍ಎ ಟೆಸ್ಟ್ ಕೆದಾಳಾ ಕೆಲ್ಲೆಂ?! ಸುಶೆಗಾತ್ ಆಸ್‍ಲ್ಲ್ಯಾ ತಾಕಾ ಎಕಾಚ್ಛಾಣೆಂ ಸೊಜೆರ್ ಬಂಧಿ ಕರ್ತಾತ್ ಆನಿ ತಾಕಾ ಸುಟ್ಕಾ ಲಾಭನಾ, ಬಗಾರ್ ತಾಚ್ಯಾ ಹಟಾಕ್ ಉಜ್ಯಾಂತ್ ಹುಲ್ಪಾಯ್ತಾತ್. ತರ್ ತಾಣೆಂ ವೀಲ್ ಕೆದ್ನಾಂ ಬರಯ್ಲೊ? ಕಿತ್ಯಾಕ್? ಬಂಧೆಂತ್ ಆಸ್ತಾನಾ ವೀಲ್ ಬರಂವ್ಕ್ ಸೊಡ್ಲೆಂ? ಹಿ ಕೊಮೆಡಿ ವಾ ಅಧಿಕಪ್ರಸಂಗ?

ನಿಜಾಯ್ಕೀ, ತ್ಯಾ ಕಾಳಾರ್ ವೀಲ್ ಬರಂವ್ಚಿ ಪದ್ಧತಿ ಆಸ್‍ಲ್ಲಿಗೀ?

ಕುತೂಹಲಾನ್ ಹಾಂವೆಂ ಎಕಾ ವಕೀಲಾಕ್ ಫೋನ್ ಕರ್ನ್ ವಿಚಾರ್ಲೆಂ. ತಾಣೆಂ ಸಾಂಗ್ಚ್ಯಾ ಪ್ರಕಾರ್, ಭಾರತಾಕ್ ವೀಲ್ ಬರಂವ್ಚಿ ಪದ್ಧತಿ ಹಾಡ್‍ಲ್ಲಿಚ್ ಬ್ರಿಟಿಶಾಂನಿ, ಕಾಂಯ್ ಪಾಟ್ಲ್ಯಾ 150-200 ವರ್ಸಾಂ ಹಿಶಿನ್. ಆತಾಂ ಲಕ್ಷ್ಮಣ್ ಪೈನ್ ವೀಲ್ ಬರಯಿಲ್ಲೊಚ್ ಮ್ಹಣ್ಯಾಂ, ಪುಣ್ ತೊಚ್ ಕಾಬಾರ್ ಜಾಲಾ ತರ್ ತಾಚೊ ಜಾಗೊ ಕೊಣಾ ಹಾತಿಂ ಗೆಲ್ಲೊ? ತಾಚೊ ವೀಲ್ ಕೊಣೆಂ, ಖಂಯ್ಸರ್ ಜಗವ್ನ್ ದವರ್ಲೊ? ಗೊಂಯ್ ಪುಡ್ತುಗೆಜ್, ಮಧೆಂ ಮಧೆಂ ಹೆರಾಂಚ್ಯಾ ತಾಬೆನ್‍ಯೀ, ಆಸ್‍ಲ್ಲೊ. ಉಪ್ರಾಂತ್ ಭಾರತಾಚ್ಯಾ ಹಾತಿಂ. ತರ್ ಶೆಕ್ಡ್ಯಾ ಆದ್ಲೊ ಖಾಸ್ಗಿ ವೀಲ್ ಕಶೆಂ ಪ್ರಸ್ತುತ್ ಜಾಂವ್ಚೊ?

ಅಸಲ್ಯೊ ಅಸಂಬದ್ಧ್, ಅಪ್ರಬುದ್ಧ್ ಆನಿ ಹಾಸ್ಯಾಸ್ಪದ್ ಪೊಟ್ಟು ಕಾಣಿಯೊ ರಚ್‍ಲ್ಲ್ಯಾಂತ್ ತಿಶಿನ್ ಮನರಂಜನ್‍ಯೀ ಮೆಳನಾ, ಪಳೆಲ್ಲ್ಯಾಚಿ ತಕ್ಲಿಯೀ ಪಿಸಾಂತುರ್. ಹ್ಯಾ ಮನ್ಶ್ಯಾಂಕ್ ಕುಸ್ಕುಟಾಚಿ ಸಮ್ಜಣಿ, ಜಾಣ್ವಾಯ್, ಶಿಕ್ಚಿ ಉರ್ಬಾ ಆನಿ ಕಾಮನ್‍ಸೆನ್ಸ್ ನಾ ಮ್ಹಣ್ಚ್ಯಾಕ್ ಹಾಚ್ಯಾ ವರ್ತಿ ರುಜ್ವಾತ್ ಜಾಯ್ಗೀ?

ಆಸೊಂ, ಆನ್ಯೇಕ್ ಮಹಾನ್ ಸಂಗತ್ ಮ್ಹಳ್ಯಾರ್, ಶಿಣು ಪೈಚಿ ವಳಕ್ ಕಶೆಂ ದಿತಾತ್ ಪಳೆಯಾ. “ಇಂಕ್ವಿಜಿಸಾಂವಾಚಿ ಕರಾಳತಾ ಭೊಗ್‍ಲ್ಲೊ ಆನಿ ಜಾಣಾಂ ಆಸ್‍ಲ್ಲೊ ಎಕ್ಲೊಚ್, ತೊಚ್ ಶಿಣು ಪೈ…” ಮ್ಹಣ್ ಸಾಂಗ್ಲಾಂ. ಜಾಣಾರಿ ಜಾಂವ್ಚೆಂ ಸಾಧ್ಯ್, ಪುಣ್ ಶತಮಾನಾಂ ಆದಿಂ ಘಡ್‍ಲ್ಲೆಂ ಆತಾಂಚ್ಯಾ ಎಕಾ ವ್ಯಕ್ತಿನ್ ಖುದ್ ಭೊಗ್ಚೆಂ ಕಶೆಂ? ಹಿ ಖಂಚಿ ವಿದ್ಯಾ ವಾ ತಂತ್ರಜ್ಞಾನ್? ದೆವಾಕೀ ಕನ್ಫ್ಯೂಶನ್ ಜಾಯ್ತ್…

10. ಸಿನೆಮ್‍ಯೀ ನ್ಹಯ್ ಡೊಕ್ಯುಮೆಂಟರಿಯೀ ನ್ಹಯ್!

ಫೈನಲ್ಲಿ ‘ಅಸ್ಮಿತಾಯ್’ ಏಕ್ ಸಿನೆಮ್ ವಾ ಡೊಕ್ಯುಮೆಂಟರಿ? ಹೆಂ ಸವಾಲ್ ಸಿನೆಮಾ ಸೆಟ್ಟಾಕ್ ವೆಚ್ಯಾ ಖಬ್ರೆ ವೆಳಿಂಚ್ ಉದೆಲ್ಲೆಂ. ಟೀಮಾನ್ ದಾಕಯಿಲ್ಲ್ಯೊ ಸಂಗ್ತಿ ಡೊಕ್ಯುಮೆಂಟರಿಕ್ ಫಿಟ್ ಶಿವಾಯ್ ಸಿನೆಮಾಕ್ ನ್ಹಯ್. ಸಿನೆಮಾಚೆಂ ಕಿತೆಂಚ್ ಕಳಿತ್ ನಾಸ್ತಾನಾಂಯೀ ಖಂಚ್ಯಾ ಧಯ್ರಾನ್ ಸಿನೆಮ್ ಮ್ಹಣ್ ಹಾತ್ ಘಾಲ್ಲೊ ಕಳನಾ. ತಿಶಿಲ್ಯಾನ್ ಡೊಕ್ಯುಮೆಂಟರಿಯೀ ಜಾವ್ನಾಂ, ಹಿಶಿಲ್ಯಾನ್ ಸಿನೆಮ್‍ಯೀ ಜಾಂವ್ಕ್ ನಾ. ಫಕತ್ ಏಕ್ ಗೊಂದೊಳಾಚಿ, ಅಪಹಾಸ್ಯಾಚಿ ಕೃತಿ ಹಿ.

ಹಾಂಚಿ ಅಪ್ರಬುದ್ಧತಾ ಹರ್ಯೆಕಾ ದೃಶ್ಯಾಂತ್ ನಿಶೆತಾ. ಎರಿಕಾಚೆಂ ಸಂದರ್ಶನ್ ಕರುಂಕ್ ಎಕ್ಲಿ ಸ್ತ್ರೀ (ಪತ್ರಕರ್ತ್?) ಯೆತಾನಾ, ಕಲಾಂಗಣಾಂತ್ ಅಸ್ಮಿತಾಯ್ ಪೋಸ್ಟರ್ ದಾಕಯ್ಲಾಂ. ತೆಂ ಪೋಸ್ಟರ್ ಅಸ್ಮಿತಾಯ್ ಬುಕಾಚೆಂ ವಾ ಸಿನೆಮಾಚೆಂ? ಸಿನೆಮಾ ತಯಾರ್ ಜಾಂವ್ಕ್ ನಾತ್‍ಲ್ಲ್ಯಾ ವೆಳಾರ್, ರಿಲೀಸ್ ಜಾತಾನಾ ದಾಕಂವ್ಚೆಂ ಪೋಸ್ಟರ್ ಪಯ್ಲೆಂಚ್ ಕಶೆಂ ಉದೆಲೆಂ? ಒಟ್ಟಾರೆ, Liabilitiesಚ್ ಹ್ಯಾ ಸಿನೆಮಾಚಿ ಆಸ್ತ್!

ಕಾವ್ಯಾಳ್ ಭಾಸ್: ಗ್ರೇಸ್ತ್‌ಕಾಯ್‌ಚ್ ದುಬ್ಳಿಕಾಯೆಚೆಂ ಸಂಕೇತ್?

ಚಡಾವತ್ ಸಕ್ಡಾಂನಿ ಉದ್ಗಾರ್ಲೆಲಿ ಏಕ್ ಗಜಾಲ್ ಮ್ಹಳ್ಯಾರ್ ಸಿನೆಮಾಂತ್ಲಿ ಭಾಸ್. ತೆಂ ಹಾಂವ್‍ಯೀ ಒಪ್ತಾಂ. ಜೊಯೆಲ್ ಪಿರೇರಿನ್ ಬರಯಿಲ್ಲಿಂ ಸಂಭಾಷಣಾಂ ಸೊಭಿತ್ ಆನಿ ಕಾವ್ಯಾತ್ಮಕ್ ಆಸಾತ್. ಸಿನೆಮಾ ವೀಕ್ಷಕಾಂಚೆರ್ ಹೆಂ ಪ್ರಭಾವ್ ಘಾಲುಂಕ್ ಸಕ್ಲಾಂ. ವ್ಹಯ್ ತೆಂ. ಪುಣ್ ಕಾವ್ಯಾಳ್ ಉತ್ರಾಂ ಹರ್ ಕಡೆನ್ ವೊಂಬನಾಂತ್. ಪಾತ್ರ್, ಸನ್ನಿವೇಶಾಕ್ ತೆಕಿದ್ ಆಸ್ಲ್ಯಾರ್ ಬರೆಂ, ಹರ್ಯೆಕಾ ಸಂದರ್ಭಾರ್, ಹರ್ ಪಾತ್ರಾನ್ ಕಾವ್ಯಾಳ್ ಉತ್ರಾಂ ಉಲಂವ್ಚೆಂ ನಾಟಕೀಯ್ ಆನಿ ಅಸ್ವಾಭಾವಿಕ್ ಜಾತಾ. ವೋರ್ನ್ ಗೋಡ್, ರೂಚ್ ಮ್ಹಣ್ ತೆಂಚ್ ಖಾವಯ್ಲ್ಯಾರ್ ಜಾತಾಯೇ? ಖಂಚ್ಯಾಕೀ ಲಿಮಿಟ್ (Context) ಆಸಜೆ. ಘರಾಂತ್ ವೋರ್ನ್ ಮಾತ್ರ್ ರಾಂದ್ಲಾಂ ದೆಕುನ್ ಜೆವ್ಣಾ ಬದ್ಲಾಕ್ ವೋರ್ನ್‍ಂಚ್ ಖಾವಯ್ಲ್ಯಾರ್ ತಿ ದುಬ್ಳಿಕಾಯ್ ಜಾತಾ. ಏಕ್ ಮಾತ್ರ್ ಹಾತೆರ್ ಆಸ್ಲ್ಯಾರ್ ತೆಂ ತಾಚೆಂ ಉಣೆಂಪಣ್‍ಂಚ್ ಜಾಹೀರ್ ಕರ್ತಾ. ಜೊಯೆಲಾಚಿ ತಾಂಕ್ ಕಾವ್ಯಾತ್ಮಕ್ ಉತ್ರಾಂ ಮಾತ್ರ್ ತರ್ ತೆಂ ತಾಚೆಂ Limitation ದಾಕಯ್ತಾ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ.

ಸಂಭಾಷಣಾಂತ್ಲ್ಯೊ ಚುಕಿ, ಅರಾಜಾಂವಿಕ್, ಅವಾಸ್ತವಿಕ್ ಸಂಗ್ತಿ ಕಿತೆಂ ದಾಕಯ್ತಾ? ಕಾಣಿಯೆಕ್, ಸನ್ನಿವೇಶಾಕ್ ಆನಿ ಪಾತ್ರಾಕ್ ಗಾಂಚ್ ನಾತ್‍ಲ್ಲೆ ಡೈಲಾಗ್ಸ್, ಉತ್ರಾಂ ಕಶೆಂ ಉದೆಲಿಂ? ವ್ಹಡ್ ವ್ಹಡ್ ಅಧ್ಯಯನ್ ಸೊಡ್ಯಾಂ, ಮಾಂಡ್ ಸೊಭಾಣಾಚೊಚ್ ಸಾಂದೊ ಜಾವ್ನಾಸ್ಚ್ಯಾ, ಆಪ್ಲ್ಯಾ ವಿಶೇಸ್ ತಾಂಕಿಚ್ಯಾ ನಾಟಕಾಂಚೊ ಬರವ್ಪಿ ಫಾ. ದೊತೊರ್ ಆಲ್ವಿನ್ ಸೆರಾವೊ ಲಾಗಿಂ ಪುಣೀ ಕನ್ಸಲ್ಟ್ ಕೆಲ್ಲೆಂ ತರ್ ತೊ ಚುಕಿ ರಿಪೇರಿ ಕರುಂಕ್ ಸಲಹಾ ದಿತೊ. ಫಾ. ಆಲ್ವಿನಾಚಿ ಭಾಸ್‍ಯೀ ಕಾವ್ಯಾಳ್, ಆಪುಟ್ ಆನಿ ಊಂಚಿ. ತಾಚೆ ನಾಟಕ್ ಸಕ್ಕಡ್ ಸಂಗ್ತಿಂನಿ ಗ್ರೇಸ್ತ್. ತಾಚೆ ಥಾವ್ನ್ ತರ್ಬೆತಿ ಘೆತ್‍ಲ್ಲಿ ತರೀ ಪುರೊ ಆಸ್‍ಲ್ಲೆಂ.

ಹೆಂ ಸಿನೆಮ್ ನ್ಹಯ್, ಫಕತ್ ಭೊಂಗೊಸ್ತೊಳ್!

ನಿಮಾಣೆಂ ಇತ್ಲೆಂಚ್ ಸಾಂಗ್ಯೆತ್‍ಗೀ ‘ಅಸ್ಮಿತಾಯ್’ ಏಕ್ ಸಿನೆಮ್ ನ್ಹಯ್ ಬಗಾರ್ ಕಸಬ್/ವೃತ್ತಿಚೆಂ ಕಿತೆಂಚ್ ಕಳಿತ್ ನಾತ್‍ಲ್ಲ್ಯಾ ಅಪ್ರಬುದ್ಧ್ ವ್ಯಕ್ತಿಂನಿ ಆಸಾ ಕೆಲ್ಲೊ ಭೊಂಗೊಸ್ತೊಳ್ ಮ್ಹಣ್ಯೆತ್. ಕುಡ್ಡ್ಯಾಂನಿ ಹಸ್ತಿಕ್ ಆಪಡ್ನ್ ಹಸ್ತ್ ಮ್ಹಳ್ಯಾರ್ ಕಶೆಂ/ಕಿತೆಂ ಮ್ಹಳ್ಳೆಪರಿಂ ಹೆಂ ಘಡ್ಲಾಂ. ಸಿನೆಮಾಚೆಂ ಆರು ಮೂರು ಕಳಿತ್ ನಾತ್ಲೆಲ್ಯಾಂಕ್ ಆಪವ್ನ್ ಸಗ್ಳೆಂ ಗುಂಡಾಂತರ್ ಕೆಲಾಂ. ತಿತ್ಲೆಂಚ್.

ಉಜ್ವಾಡ್ ಪತ್ರಾಂತ್ಲೆಂ ಸಂದರ್ಶನ್, ಸಿನೆಮಾಂತ್ಲಿ ಗೊವಾಯ್ ಆನಿ ಹೆರ್ ಕಡೆನ್ ಉಚಾರ್ಲೆಲೆಂ ಸಕ್ಕಡ್ ಪರಿಗಣನ್ ಕರುನ್ ಪಳೆತಾನಾ, ‘ಅಸ್ಮಿತಾಯ್’ ಏಕ್ ಊಂಚಿ ಸಿನೆಮ್ ಜಾಯ್ಜೆ ಆಸ್‍ಲ್ಲೆಂ. ಪಂದ್ರಾ ವರ್ಸಾಂ ಥಾವ್ನ್ ಕಸಲಿ ಕಾಣಿ ರಚ್ಲಿ ಮ್ಹಣ್ ಹಾಂವ್‍ಯೀ ವಿಜ್ಮಿತ್ ಪಾವ್‍ಲ್ಲೊಂ. ಆತಾಂ ಪಳೆಲ್ಯಾರ್ ತಾಂತುಂ ಏಕ್ ಕಾಣಿಯೀ ನಾ, ಸಂಸ್ಕೃತೆ ವಿಶಿಂ ಮಾಹೆತ್‍ಯೀ ನಾ, ಚರಿತ್ರೆಚಿ ವಾಟ್‍ಚ್ ಚುಕಯ್ಲ್ಯಾ, ಪಾತ್ರಾಂಕ್ ಹಾಸ್ಯಾಸ್ಪದ್ ಕೆಲಾಂ, ಮುಖ್ಯ್ ಸಂಗ್ತಿಂಚೆರ್ ಅಪಹಾಸ್ಯ್ ಕೆಲಾಂ – ತಿತ್ಲೆಂಚ್.

ಸಿನೆಮಾ ಪ್ರೊಡಕ್ಷನಾಚೊ ಅನುಭವ್, ಕಲಾ, ತಾಲೆಂತ್ ನಾತ್‍ಲ್ಲ್ಯಾಂಕ್ ತಾಂಚೆಂ ಕಿತೆಂ ಪಾತ್ಯೆವ್ನ್ ತಾಂಕಾಂ ಅಸಲಿ ಮಹತ್ವಾಚಿ ಜವಾಬ್ದಾರಿ ದಿಲ್ಯಾ ಮ್ಹಳ್ಳೆಂಚ್ ವಿಚಿತ್ರ್ ಭೊಗ್ತಾ.

‘ಅಸ್ಮಿತಾಯ್’ ಸಿನೆಮಾಚೆರ್ ಪ್ರೊಫೆಶನಲ್ ರೇಟಿಂಗ್

ಬ್ಯಾಕ್‍ಗ್ರೌಂಡ್ ಮ್ಯೂಸಿಕ್ (ಪಾಂಚಾಂತ್) – 4 ಅಂಕ್ (ಉತ್ಕೃಷ್ಠ್)
ಆಡಿಯೋ, ಸೌಂಡ್ಸ್ – 3½ ಅಂಕ್ (ಅತ್ಯುತ್ತಮ್)
ನಟನ್/ಅಭಿನಯನ್ – 2½ ಅಂಕ್ (ಸಾಧಾರ್ಣ್)
ಸಂಕಲನ್-ಎಡಿಟಿಂಗ್ – 3 ಅಂಕ್ (ಉತ್ತೀಮ್)
ಕಾಣಿ, ನಿರೂಪಣ್ – 1½ ಅಂಕ್ (ದುಬ್ಳೆಂ/ನಿಸ್ತೇಜ್)
ಕ್ಯಾಮೆರಾ ವರ್ಕ್ – ½ ಅಂಕ್ (ಅತೀ ನಿಕೃಶ್ಟ್)
ನಿರ್ದೇಶನ್ – ¾ ಅಂಕ್ (ನಿಕೃಶ್ಟ್)
ಸಿನೆಮಾಕ್ – 1 ಅಂಕ್ (ಅಯೋಗ್ಯ್)

ದುಸ್ಮಾನ್ ರಿಗ್ಲೆ ಭಿತರ್, ರಚುಂಕ್ ಷಡ್ಯಂತ್ರ್?

ನಿಜಾಯ್ಕೀ ಎರಿಕಾಚೆಂ ಸಪಣ್ ಅದ್ಭುತ್ ರಿತಿನ್ ಜಾರಿಯೆಕ್ ಹಾಡ್ಯೆತೆಂ. ಖರೆಂಚ್ ಸಾಂಗ್ಚೆಂ ತರ್ ಆಮ್ಚ್ಯಾ ಸಮುದಾಯಾಚಿ ಚರಿತ್ರಾ ಆನಿ ಜಾಯ್ತ್ಯೊ ಗಜಾಲಿ ವಿಣುನ್ ಆಪುರ್ಬಾಯೆನ್ ಸಿನೆಮ್ ಖಂಡಿತ್ ಕಾಡ್ಯೆತೆಂ. ಪುಣ್ ತಾಕಾ ಜೊಕ್ತೆಂ ಅಧ್ಯಯನ್, ವೃತ್ತಿಪರ್ ವಾವ್ರ್ ಜಾಯ್. ಅತೀ ಚಡ್ ಗರ್ಜೆಚೆಂ ಸೃಜನಾತ್ಮಕ್ ಕ್ರಿಯೇಶನ್. ಸಿನೆಮಾ ಸೃಜನಾತ್ಮಕತೆಚೆಂ ಅಪ್ರತಿಮ್ ಉತ್ಪನ್ನ್. ಬರಿ ಕಾಣಿ ಆಸಜೆ, ತಾಚೆರ್ ಫಿಲ್ಮಾಕ್ ಸಹಜ್ ತಶೆಂ ನಿರೂಪಣ್ ಜಾಯ್ಜೆ. ಆನಿ ಪ್ರಮುಖ್ ಜಾವ್ನ್ ಹೆಳ್‍ಲ್ಲ್ಯಾ ವೃತ್ತಿಪರಾಂಚ್ಯಾ ಮಾರ್ಗದರ್ಶನಾ ಖಾಲ್ ಪುಣೀ ನಿರ್ಮಾಣ್ ಕಾರ್ಯೆಂ ಚಲಜೆ (ವ್ಹಡ್ ನಿರ್ದೇಶಕಾಂಕ್ ಧರುಂಕ್ ಕಷ್ಟ್. ಪುಣ್, ತಸಲ್ಯಾ ಕೊಣಾಯ್ಚೆ ಹಿಶಾರೆ ಪುಣೀ ಘೆವ್ಯೆತೆ ನ್ಹಯ್ವೇ?).

ಇತ್ಲಿ ಪೂರಾ ವೀದ್‍ವಾವ್ಳಿ ಕಶೆಂ ಉಬ್ಜಲಿ? ಸಕ್ಡಾಂಕ್ ಹೆಂಚ್ ಮಿಸ್ತೆರ್ ಜಾಲಾಂ. ಎಕಾ ರಿತಿನ್ ಪಳೆತಾನಾ ಹೆಂ ಉತ್ಪನ್ನ್ ಎರಿಕ್ ಒಝೇರಿಯೊಚಿ ಮರ್ಯಾದ್ ಕಾಡ್ಚ್ಯಾ ಇರಾದ್ಯಾಚೆಂ ಆನಿ ಮಾಂಡ್ ಸೊಭಾಣಾಕ್ ಅಕ್ಮಾನ್ ಕರ್ಚೆಂ ಕುತಂತ್ರ್‌ಗೀ ಮ್ಹಣ್ ದುಬಾವ್ ಜಾತಾ. ಅಸಲ್ಯಾ ದುಬಾವಾಂಕ್‍ಯೀ ಜೊಕ್ತಿಂ ಕಾರಣಾಂ ಆಸಾತ್. ಅನುಪ್ಕಾರ್‌ಪಣಾಕ್ ಆನಿ ಘಾತ್ ಕರ್ಚ್ಯಾಂತ್ ನಾಂವಾಡ್‍ಲ್ಲೊ ಎಕ್ಲೊ ‘ಕೊಳೆಂದ್ರ್’ ಭಿತರ್ ಪ್ರವೇಶ್ ಜಾಲ್ಲೆಂಚ್ ಹ್ಯಾ ಸರ್ವ್ ಅನಾಚಾರಾಕ್ ಕಾರಣ್ ಮ್ಹಣ್ ‘ಸಾಕ್ಸ್‌ದಾರಾಂನಿ’ ಉಚಾರ್‌ಲ್ಲಿ ಖಬರ್ ಆಸಾ..! ತೆಂ ವ್ಹಯ್ ವಾ ನ್ಹಯ್ ಮ್ಹಣ್ ಸಂಘಟಕಾಂನಿಂಚ್ ಸಮ್ಜಜೆ.

ಎಕ್ಲೊ ‘ವಿಲನ್’ ಆಪ್ಣಾಕ್‍ಚ್ ಹೀರೊ ಪಾತ್ರ್ ದೀಜೆ ಮ್ಹಣ್ ಸಳ್ ಕರಿಲಾಗ್‍ಲ್ಲೊ ಖಂಯ್. ಆನ್ಯೇಕ್ಲ್ಯಾನ್ ಆಪ್ಣಾಕ್ ಹೀರೊಯಿನ್ ಕರಿಜೆ ಮ್ಹಣ್ ಒತ್ತಾಯ್ ಕೆಲ್ಲಿ ಖಂಯ್. ಅವ್ಕಾಸ್ ಮೆಳನಾತ್‍ಲ್ಲ್ಯಾ ತ್ಯಾ ನಟಿನ್ ಸಿನೆಮಾ ವಿರೋಧ್ ಬರೊಚ್ ಅಪಪ್ರಚಾರ್ ಕೆಲ್ಲೊ ಮಾತ್ರ್ ನ್ಹಯ್, ಗೊಂಯಾಂತ್ ಸಿನೆಮಾ ರಿಲೀಸ್ ಜಾಯ್ನಾಶೆಂ ಕರುಂಕ್ ಜಾಯ್ತೆಂ ಪೆಚಾಡ್‍ಲ್ಲೆಂಯೀ ಕಳಿತ್ ಜಾಲಾಂ. ಪುಣ್ ಹೀರೊ ಪಾತ್ರ್ ಚುಕ್‍ಲ್ಲ್ಯಾಕ್ ತ್ಯಾ ವ್ಯಕ್ತಿನ್ ಫೇಸ್‍ಬುಕಾಂತ್ ನಕ್ಲಿ ನಾಂವಾರ್ ಹೀರೊ ಪಾತ್ರ್‌ಧಾರಿ ವಿರೋಧ್ ಸರ್ಸರಿತ್ ವೊಂಕೊನ್ ಘಾಲ್ಲೆಂಯೀ ಖಬ್ರೆರ್ ಆಸ್‍ಲ್ಲೆಂ… ತಾಚಿ ಚರಿತ್ರಾಚ್ ತಸಲಿ. ಫೇಸ್‍ಬುಕಾಂತ್ ತಾಣೆಂ ವೊಂಕೊನ್ ಘಾಲ್ಲೆಂ ಕಳಿತ್ ಆಸ್ಲ್ಯಾರ್ ತಾಕಾ ಕೊಣೀ ರೀಗ್ ದಿತೆ ನಾಂತ್..!

ಹೀರೊಕ್ ವಿಕ್ರಿತ್ ಕರ್ನ್, ತೊ ಏಕ್ ನಾಲಾಯಕ್ ಪಾತ್ರ್ ಜಾವ್ನ್ ಪರಿವರ್ತನ್ ಕೆಲಾಂಗೀ ಮ್ಹಳ್ಳೊ ದುಬಾವ್ ಮಾರ್ತಾ. ನಾ ತರ್ ಕೊಣೀ ಆಪ್ಲ್ಯಾ ಎಕಾ ಖಾಸ್ ಪಾತ್ರಾಕ್ ತಿತ್ಲೊಯೀ ಅಸ್ಕತ್ ಕರುನ್ ರಚ್ತಾಗೀ? ಕೊಣೀ ಏಕ್ ಬರವ್ಪಿ/ನಿರ್ದೇಶಕ್ ಆಪ್ಲ್ಯಾ ಪಾತ್ರಾಂಕ್ ಜಾತಾ ತಿತ್ಲೆಂ ಅದ್ಭುತ್ ಕರುಂಕ್ ಪೆಚಾಡ್ತಾ. ದೃಶ್ಯಾಂ, ಸನ್ನಿವೇಶಾಂ, ಘಡಿತಾಂ, ಸಂಭಾಷಣಾಂ ದೃಶ್ಯ್‌ಕಾವ್ಯ್ ಜಾಯ್ಶೆಂ ಸಿನೆಮಾಚೆ ಕಿತ್ಲೆಂ ವೊದ್ದಾಡ್ತಾತ್. ಪುಣ್ ‘ಅಸ್ಮಿತಾಯ್’ ಸಿನೆಮಾಂತ್ ಎಕ್‍ಚ್ ಏಕ್ ದೃಶ್ಯ್‌ಕಾವ್ಯ್ ಸೊಧ್ಲ್ಯಾರೀ ದಿಸನಾ. ಫಕತ್ ಉಣೆಂಪಣಾಂ, ಅಪ್ರಬುದ್ಧತಾ, ಬ್ಲಂಡರ್ಸ್, ವಿಕೃತಿ, ಅಧೋಗತಿ… ತೆಂಚ್ ಭರ್ಲಾಂ.

ಅನುಭವ್, ಸಮ್ಜಣಿ ನಾತ್ಲೆಲ್ಯಾಂಕ್ ‘ಕಾಂಟ್ರ್ಯಾಕ್ಟ್’ ಕಿತ್ಯಾಕ್?

ತುಮ್ಕಾಂ ಏಕ್ ಕಾರ್ಯೆಂ ಮಾಂಡುಂಕ್ ಆಸಾ ಮ್ಹಣ್ ಚಿಂತ್ಯಾಂ. 1000 ಜಣಾಂ ಸಯ್ರ್ಯಾಂಕ್ ಜೆವಣ್ ದಿಂವ್ಚೆಂ ಕಾರ್ಯೆಂ ತೆಂ ಜಾಲ್ಯಾರ್ ತುಮಿ ಖರ್ಚ್ ಲೇಕ್ ಘಾಲ್ತಾತ್. ತಿತ್ಲಿ ತಾಂಕ್ ಆಸ್ಲ್ಯಾರ್ ಮಾತ್ರ್ ಫುಡೆಂ ಸರ್ತಾತ್. ಜರ್ ತುಮ್ಕಾಂ ತಿತ್ಲ್ಯಾ ಜಣಾಂಕ್ ವಾಡ್ಚೆಂ ಕಾರ್ಯೆಂ ಆಸಾ ಕರುಂಕ್ ಜಾಯ್ ತರ್ ಸುವಾತ್ (ಹೊಲ್/ಅಂಗಣ್) ವ್ಹಡ್ ಜಾಯ್ಜೆ. ಕೆಟರಿಂಗ್‍ವಾಲೆಯೀ ಜಬರ್ದಸ್ತ್ ಆಸಜೆ. ಸಕ್ಕಡ್ ಸಂಗ್ತಿ ಹೆಳ್‍ಲ್ಲ್ಯಾಂನಿ ತಶೆಂ ಊಂಚಿ ಜಣಾಂನಿ ಸಾಂಬಾಳಿಜೆ.

ವ್ಹಡ್ ಕಾರ್ಯಾಚೆಂ ಜೆವಣ್ ತಯಾರ್ ಕರ್ತಾನಾ ಸಾರ್ಕೊ ಅನುಭವ್ ನಾತ್‍ಲ್ಲ್ಯಾಂಕ್ ರಾಂದ್ಪಾಕ್ ನಮಿಯಾರ್ಲ್ಯಾರ್ ಕಿತೆಂ ಜಾಯ್ತ್? ಜಲ್ಮಾಂತ್ ರಾಂದ್ಪಾ ಕುಡಾಕ್ ರಿಗನಾತ್ಲೆಲ್ಯಾಂಕ್ ಬಸವ್ನ್ ಖಾಣಾಂ, ಪಕ್ವಾನಾಂ, ಜೆವಣ್ ರಾಂದಯ್ಲ್ಯಾರ್ ತೆಂ ಕಶೆಂ ಜಾಯ್ತ್?!

ತಶೆಂಚ್ ಆಸಾ ‘ಅಸ್ಮಿತಾಯ್’ ಸಿನೆಮ್! ಕೊಣೆಂಯೀ ಎಕಾ ವ್ಯಕ್ತಿನ್ ಅಶೆಂ ಕೆಲ್ಲೆಂ ತರ್ ಸೊಸ್ಯೆತೆಂ. ಪುಣ್ ಹೆಂ ಕೊಂಕ್ಣೆಚ್ಯಾ ಎಕಾ ಶ್ರೇಷ್ಠ್ ಸಂಸ್ಥ್ಯಾನ್ ಕಾಡ್ಲಾಂ ಮಾತ್ರ್ ನ್ಹಯ್ ಹೆಂ ಸಿನೆಮ್ ಆಖ್ಖ್ಯಾ ಸಮುದಾಯಾಚೆಂ ‘ಮಿಸಾಂವ್’ ಆನಿ ‘ಕರ್ತವ್ಯ್’ ಮ್ಹಳ್ಳೆಪರಿಂ ವೊಲಾಯ್ಲಾಂ ಆಸ್ತಾಂ, ತ್ಯಾ ತೆಕಿದ್ ಪ್ರೊಡಕ್ಟ್ ಉತ್ಪನ್ನ್ ಕೆಲ್ಲೆಂ ತರ್ ಆಮಿ ಸಕ್ಡಾಂ ಸಂತೊಸ್ತ್ಯಾಂವ್. ಪುಣ್ ಹ್ಯಾ ಫಿಲ್ಮಾಂತ್ ಅಭಿಮಾನ್ ಪಾಂವ್ಚೆಂ ಉಣೆಂ, ನೆಗಾರಿಜೆ ಜಾಲ್ಲೆಂಚ್ ಚಡ್ ಆಸಾ ತರ್ ತೆಂ ಸ್ವೀಕಾರ್ ಕರುಂಕ್ ಅಸಾಧ್ಯ್.

100 ಜಣಾಂಚ್ಯಾ ಬಜೆಟಿರ್ 1000 ಜಣಾಂಕ್ ಖಾವಯ್ತಾಂ ಮ್ಹಣ್ಚೆಂಚ್ ಪಿಶೆಂಪಣ್. ಶಿವಾಯ್, ರಾಂದುಂಕ್‍ಚ್ ಕಳಿತ್ ನಾತ್ಲೆಲ್ಯಾಂಕ್ ಜೆವ್ಣಾಚೆಂ ಆರ್ಡರ್ ದಿಂವ್ಚೆಂ ತಾಚ್ಯಾಕೀ ವ್ಹಡ್ ಮೂರ್ಖ್‍ಪಣ್, ನ್ಹಯ್ವೇ?

ಬಜೆಟ್ ನಾ ಮ್ಹಣ್ಚೆಂ ಕಿತ್ಲೆಂ ಸಾರ್ಕೆಂ?

ಸಿನೆಮಾ ವಿಶಿಂ ಉಲಯ್ತಾನಾ ಸ್ವತಃ ಎರಿಕ್, “ಆಮ್ಚಿ ಬಜೆಟ್ ಲ್ಹಾನ್ ಆಸ್‍ಲ್ಲ್ಯಾನ್…” ಮ್ಹಣ್ ಪಿಂರ್ಗಲ್ಲೊ. ನಿಜಾಯ್ಕೀ ಅಶೆಂ ಉಚಾರ್ಚೆಂ ಕಿತ್ಲೆಂ ಸಾರ್ಕೆಂ? ಖಬ್ರೆಂ ಪರ್ಮಾಣೆಂ ಸಿನೆಮಾಚೆಂ ಕಾಮ್ ಜಾಂವ್ಚ್ಯಾ ಆದಿಂಚ್ ಖರ್ಚಾಚ್ಯಾ ದೊಡೊ ಐವಜ್ ಜಮ್‍ಲ್ಲೊ ಖಂಯ್ (ವ್ಹಡಾ ಮನ್ಶ್ಯಾಂಚಿ ದೇಣ್ಗಿ – ಹಿ ಗಜಾಲ್ ಸಬಾರಾಂನಿ ಸಾಂಗ್ಲ್ಯಾ). ಅಸಲೊ ಸುಯೋಗ್ ಸಂಸಾರಾಂತ್ ಹೆರ್ ಕೊಣಾಯ್ಕೀ ನಾ!

ಮಾಂಡ್ ಸೊಭಾಣ್ ಸಂಸ್ಥ್ಯಾನ್, ತಾಚ್ಯಾ ಕಾರ್ಬಾರಿಂನಿ ಆನಿ ಗುರ್ಕಾರ್ ಎರಿಕ್ ಒಝೇರಿಯೊನ್ 40 ವರ್ಸಾಂ ಥಾವ್ನ್ ಅವಿರತ್ ಸಾಧನ್ ಕರ್ನ್ ಕ್ರಿಸ್ತಾಂವ್ ಸಮಾಜೆಂತ್‍ಚ್ ನ್ಹಯ್, ಭಾಯ್ರ್‌ಯೀ ಬರೆಂ ನಾಂವ್ ಜೊಡ್ಲಾಂ. ಮಾಂಡ್ ಸೊಭಾಣ್ ಕೊಂಕ್ಣೆಂತ್ಲೆಂ ಪ್ರಭಾವಿ ಬ್ರಾಂಡ್ ಜಾಲಾಂ. ತ್ಯಾಚ್ ಖಾತಿರ್ ಇತ್ಲ್ಯಾ ಲೊಕಾನ್ ‘ಅಸ್ಮಿತಾಯ್’ ಪಳೆಲಾಂ. ಶಿವಾಯ್ ದಾನಿಂಚೊ ಜಮೊಚ್ ಆಸಾ.

ಕೊಣಾಯ್ ಎಕಾ ವ್ಯಕ್ತಿನ್ ಸಪ್ಣೆಂವ್ಚ್ಯಾ ಧಾ-ಶೆಂಬರ್ ವಾಂಟ್ಯಾಂನಿ ಮಾಂಡ್ ಸೊಭಾಣ್ ಮ್ಹಳ್ಳ್ಯಾ ಸಂಸ್ಥ್ಯಾಕ್ ತಾಂಕ್ ಆಸಾ – ಕಲೆಕ್ಷನ್ ಕರ್ಚಿ. ತೆಂ ಹ್ಯಾ ಆದಿಂಚ್ ರುಜು ಜಾಲಾಂ (ರೀಣ್ ಮುಕ್ತ್ ಅಭಿಯಾನ್ ತಾಕಾ ಅಪ್ರತಿಮ್ ಸಾಕ್ಸ್). ತಶೆಂ ಆಸ್ತಾಂ ಬರೆಂ ಸಿನೆಮ್ ಕಾಡುಂಕ್ ಖರ್ಚಾಕ್ ಫಿಕಿರ್ ಕರ್ಚಿ ಗರ್ಜ್‍ಚ್ ನಾತ್‍ಲ್ಲಿ. ‘ರಿಣಾರ್ ಆಸಾಂವ್, ದಾನ್ ದಿಯಾ’ ಮ್ಹಣ್ತಾನಾಂಯೀ 30 ಲಾಕ್ ರುಪ್ಯಾಂಚೆಂ ಕಾರ್ ಇನಾಮ್ ದೀಂವ್ಕ್ ತಾಂಕ್ಚ್ಯಾ ಮಜ್ಭೂತ್ ಸಂಸ್ಥ್ಯಾಕ್ ಏಕ್ ಬರೆಂ ಸಿನೆಮ್ ಕಾಡುಂಕ್ ಏಕ್ ದೋನ್ ಕೊರೊಡ್ ಮೆಳನಾಂತ್?!

ಹೆಂ ಕಿತ್ಯಾ ಮ್ಹಣ್ಜೆಂ ಮ್ಹಳ್ಯಾರ್, ಜರ್ ಎರಿಕಾಚೆ ಅತ್ರೆಗ್-ಆಶಾ-ಸಪಣ್ ಸಗ್ಳೆಂ ಎಕ್ಲೊ ಬರೊ ನಿರ್ದೇಶಕ್ ಜಾಣಾಂ ಜಾಲ್ಲೊ ತರ್ ನಿಜಾಯ್ಕೀ ಅದ್ಭುತ್ ಸಿನೆಮ್ ತೊ ಕಾಡ್ತೊ. ಕ್ರಿಯೇಟಿವಿಟಿಕ್ ಬಜೆಟ್ ಅಡ್ಕಳ್‍ಚ್ ನ್ಹಯ್. ವಿಷಯ್ ಆನಿ ಬರಿ ಕಾಣಿ ವಿಣುನ್ ಮನರಂಜನಾ ಸವೆಂ ಮಾಹೆತ್ ದಿಂವ್ಚೆಂ ಶ್ರೇಷ್ಠ್ ಸಿನೆಮ್ ರುತಾ ಜಾತೆಂ. ತಶೆಂ ಜಾಲ್ಲೆಂ ತರ್ ಕೊರೊಡಾಂನಿ ಕಲೆಕ್ಷನ್ ಜಾತೆಂ.

ಕಾಂತಾರ ಸಿನೆಮ್ ತುಳುನಾಡುಚೆಂ ಪರಿಕಲ್ಪನ್. ಸಾಂಗ್ಚೆ ತಿತ್ಲೆಂ ಅಪ್ರತಿಮ್ ಸಿನೆಮ್ ನ್ಹಯ್ ತೆಂ. 16 ಕೊರೊಡ್ ಖರ್ಚುನ್ ತಾಣಿಂ 450 ಕೊರೊಡ್ ಲುಟ್ಲ್ಯಾತ್. ತಿತ್ಲೆಂ ಹೈಪ್ ಜಾಲ್ಲೆಂ ತಾಂಚೆಂ ನಶೀಬ್‍ಚ್. ಕೊಂಕ್ಣೆಂತೀ ತಶೆಂ ಕರ್ಯೆತ್, ತಸಲೆಂ ಮ್ಯಾಜಿಕ್ ಸಾಧ್ಯ್ ಮ್ಹಣ್ ಕೊಣೀ ಸಾಂಗನಾ, ಹಾಂವ್‍ಯೀ ತಶೆಂ ಮ್ಹಣನಾ. ಪುಣ್ 50 ಲಾಖ್ ಎಸ್ಟಿಮೇಟ್ ಮ್ಹಣ್ ಅಸಲೆಂ ಬುರ್ನಾಸ್ ಪಿಂತುರ್ ಕಾಡ್ಚ್ಯಾಕೀ ಏಕ್ ಕೊರೊಡ್ ವಾ ಚಡ್ ಬಜೆಟಿರ್ ಎಫೀಶಿಯೆಂಟ್ ವೃತ್ತಿಪರಾಂಕ್ ಘೆವ್ನ್ ಸಿನೆಮಾ ಕಾಡ್‍ಲ್ಲೆಂ ತರ್ ತೆಂ ಕೊಂಕ್ಣಿ ನ್ಹಯ್ ಆಸ್ತಾಂ ಹೆರ್ ಲೋಕ್‍ಯೀ ಪಳೆವ್ನ್ ಆತಾಂಚ್ಯಾ ಟ್ರೆಂಡಾಪರಿಂ ಹೆರ್ ಭಾಶೆಂಕ್‍ಯೀ ಡಬ್ ಕರ್ನ್ 10-15 ಕೊರೊಡ್ ಸಲೀಸಾಯೆನ್ ಜೊಡ್ಯೆತೆ. ಉಣ್ಯಾ ಬಜೆಟಿರ್ ಅದ್ಭುತ್ ಕ್ರಿಯೇಟಿವ್ ಸಿನೆಮಾಂ ಕಿತ್ಲಿಂಗೀ ಆಯ್ಲ್ಯಾಂತ್. ತಸಲಿ ಸಾಧ್ಯತಾ ಖಂಡಿತ್ ಆಸ್‍ಲ್ಲಿ.

ತಶೆಂ ಜಾಲ್ಲೆಂ ತರ್ ಕಿತ್ಲೆಂ ಬರೆಂ ಆಸ್ತೆಂ. ಆಖ್ಖಿ ಸಮಾಜ್ ಸಂಭ್ರಮ್ತಿ. ಕ್ರಿಯೇಟರಾಂಕ್ ಮಾನ್, ಖ್ಯಾತಿ ಆನಿ ಸರ್ವ್ ಯಶಸ್ವಿ ಪ್ರಾಪ್ತ್ ಜಾತಿ.

ಪುಣ್ ಹಾಣಿಂ ಬಜೆಟ್ ಉಣೆಂ ಮ್ಹಣ್ಚೆಂ ನೀಬ್‍ಚ್ ಶಿವಾಯ್ ಸತ್ ನ್ಹಯ್. ಹೆಂ ಫಿಲ್ಮ್ ಬರೆಂ ಕರಿಜೆ ಮ್ಹಳ್ಳೊ ಉದ್ದೇಶ್‍ಚ್ ಕೊಣಾಯ್ಕೀ ನಾತ್‍ಲ್ಲೊ ಮ್ಹಳ್ಳೆಂ ಸಗ್ಳ್ಯಾ ಸಿನೆಮಾಂತ್ ಪಾರ್ಕಿತಾನಾ ಸಮ್ಜತಾ.

30 ಲಾಖಾಚ್ಯಾ ಸಿನೆಮಾನ್ 4 ಕೊರೊಡ್ ಜೊಡ್ಲೆ!

ಬಜೆಟ್ ಆನಿ ಕ್ರಿಯೇಟಿವಿಟಿಕ್ ಸಂಬಂಧ್ ನಾ ಮ್ಹಣ್ಚ್ಯಾಕ್ ಏಕ್ ಅಪ್ರತಿಮ್ ದೃಷ್ಟಾಂತ್ ಸಾಂಗ್ತಾಂ. 2017 ಇಸ್ವೆಚೆಂ ಕನ್ನಡ ಸಿನೆಮ್ ‘ಒಂದು ಮೊಟ್ಟೆಯ ಕಥೆ’ ಅದ್ಭುತ್ ನವಾಲಾಂ ಕೆಲ್ಲೆಂ ಫಿಲ್ಮ್. ಮಂಗ್ಳುರ್ಗಾರ್ ರಾಜ್ ಬಿ. ಶೆಟ್ಟಿನ್ ಕಾಡ್‍ಲ್ಲೆಂ ಸಿನೆಮ್ ತೆಂ. ಸಾಧಾರ್ಣ್ ಕಾಂತಾರಪರಿಂಚ್ ತಾಚಿ ಗಜಾಲ್. ಫಕತ್ 30 ಲಾಖ್ ಖರ್ಚುನ್ ತಾಣೆಂ ತೆಂ ಫಿಲ್ಮ್ ರೆಡಿ ಕೆಲ್ಲೆಂ. ಪುಣ್ ತಾಚೆಂ ಕಂಟೆಂಟ್ ಪಳೆವ್ನ್ ಪವನ್ ಕುಮಾರಾನ್ (ತೊ ಪ್ರಮುಖ್ ನಿರ್ಮಾಪಕ್) ತೆಂ ಫಿಲ್ಮ್ ಮೊಲಾಯ್ಲೆಂ. ಆನಿ ಥಿಯೇಟರಾಂತ್ ಕಮಾಲ್ ಕೆಲೆಂ. ರು. 2.5 ಕೊರೊಡ್ ಟಿಕೆಟಿಚೆಂಚ್ ಕಲೆಕ್ಷನ್ ಮೆಳ್ಳೆಂ ತರ್ ಉಪ್ರಾಂತ್ ಸೆಟ್‍ಲೈಟ್ ರೈಟ್ಸ್ ಇತ್ಯಾದಿ ಮ್ಹಣ್ 4 ಕೊರೊಡ್ ಪರ್ಯಾಂತ್ ಒಟ್ಟುಕ್ ಜೊಡ್ಲ್ಯಾತ್. ತೆದಾಳಾ ತ್ಯಾ ಫಿಲ್ಮಾ ವಿಶಿಂಚ್ ಖಬರ್. ತಿತ್ಲೆಂ ಮ್ಯಾಜಿಕ್ ರಾಜ್ ಶೆಟ್ಟಿನ್ ತಾಂತುಂ ಕೆಲ್ಲೆಂ. ತೊ ಆತಾಂ ವ್ಹಡ್ ಸ್ಟಾರ್. ಕಾಂತಾರ ಸಿನೆಮಾಚೆಂ ಕ್ಲೈಮ್ಯಾಕ್ಸ್ ದೃಶ್ಯ್ ತಾಣೆಂಚ್ ಡಿಸೈನ್ ಕೆಲ್ಲೆಂ.

ಮ್ಹಳ್ಯಾರ್ ಕಳ್ಳೆಂ ನೆ, ವಿದ್ಯಾ ಆಸಜೆ ಪಯ್ಲೆಂ. ತಾಣೆಂ ಸಾಧಿ ಗಜಾಲ್ ಘೆವ್ನ್ ಒಂದು ಮೊಟ್ಟೆಯ ಕಥೆ ಸಿನೆಮ್ ಕಾಡ್ಲೆಂ, ಪುಣ್ ತೆಂ ಲೊಕಾನ್ ಉಕಲ್ನ್ ಧರ್ಲೆಂ. ತ್ಯಾ ವರ್ವಿಂ ತೊ ಸಿನೆ ಇಂಡಸ್ಟ್ರಿಂತ್ ಥಿರ್ಲೊ.

ತರ್ ತುಮಿಂಚ್ ಚಿಂತಾ, ಮಾಂಡ್ ಸೊಭಾಣಾನ್ ಕಸಲಿಂ ನವಾಲಾಂ ಕರ್ಯೆತಿಂ ಮ್ಹಣ್. ಕಂಟೆಂಟ್ ಬರೆಂ ಆಸ್ಲ್ಯಾರ್ ಪುರೊ, ಹೆರ್ ಭಾಷೆಂಕ್ ಡಬ್ಬಿಂಗ್ ಕರುಂಕ್ ನಿರ್ಮಾಪಕ್, ಓಟಿಟಿ ಪ್ಲ್ಯಾಟ್‍ಫಾರ್ಮಾಚೆ ಮ್ಹಣೊನ್ ಆದಾಯ್ ಜೊಡುಂಕ್ ಲಿಮಿಟ್ ನಾ. ಪುಣ್ ಇತ್ಲಿ ಸರ್ವ್ ಸಮ್ಜಣಿ ಹ್ಯಾ ಮನ್ಶ್ಯಾಂಕ್ ನಾ. ಆಸ್‍ಲ್ಲಿ ತರ್ ಇತ್ಲೆಂ ಗಲೀಜ್ ಸಿನೆಮ್ ಕಾಡ್ತೆ ನಾಂತ್.

ಮಾರ್ಕೆಟಿಂಗ್ ಗಿಮಿಕ್ ಮ್ಹಳ್ಳೆಂ ಫಿತಿಸ್ಪಣ್

ಹೆಂ ‘ಅಸ್ಮಿತಾಯ್’ ಕೊಣೆಂ ಪಳೆಲಾಂ? ಫಕತ್ ಮಂಗ್ಳುರಿ ಕೊಂಕ್ಣಿ ಕಥೊಲಿಕಾಂನಿ ಮಾತ್ರ್. ಕೊಂಕ್ಣೆಚಿ ಗಜಾಲ್, ಚರಿತ್ರಾ ಮ್ಹಣ್ ಹೆರ್ ಸಮುದಾಯಾಚ್ಯಾಂನಿ ಕಿತ್ಯಾಕ್ ಪಳೆಂವ್ಕ್ ನಾ? ಗೊಂಯಾಂತ್ ಕಿತ್ಲೆಂ ಕಲೆಕ್ಷನ್ ಜಾಲೆಂ? ಅಸಲ್ಯೊ ವಾಸ್ತವಿಕ್ ಗಜಾಲಿ ಇಗ್ನೋರ್ ಕರ್ನ್ ಸಕ್ಡಾಂಕ್ ಮೆಚ್ವಯ್ತಾಂ ಮ್ಹಣ್ ಗೆಲ್ಯಾರ್ ಅಶೆಂಚ್ ಜಾಂವ್ಚೆಂ. ಮಾಂಡ್ ಸೊಭಾಣಾಚ್ಯಾ ಅಭಿಮಾನಾನ್ ಇತ್ಲ್ಯಾ ಜಣಾಂನಿ ಸಿನೆಮ್ ಪಳೆಲಾಂ. ನಾತ್ಲ್ಯಾರ್ 5 ಲಾಕ್ ಕಲೆಕ್ಷನ್‍ಯೀ ಜಾತೆಂ ನಾ (ಮಾಗಿರ್ ಫಿರ್ಗಜ್ ಫಿರ್ಗಜಾಂನಿ ಆಡ್ದೊಸ್ ಮಾಗೊನ್ ಶೋ ದಾಕಯ್ಜೆ). ಕೆದ್ನಾಂಯೀ ಎಕಾ ಉತ್ಪನ್ನಾನ್ ಉಲಯ್ಜೆ ಶಿವಾಯ್ ಫಕತ್ ಮಾರ್ಕೆಟಿಂಗ್ ಕರುನ್ ಫಾಯ್ದೊ ಜಾಯ್ನಾ. ತೆಂಯೀ ಉತ್ಪನ್ನ್ ಖರಾಬ್ ಆಸ್ಲ್ಯಾರ್ ಮಾರ್ಕೆಂಟಿಂಗ್ ಕಾಸಾಕ್ ಉಪ್ಕಾರ್ನಾ.

ಸಗ್ಳ್ಯಾ ಇಂಡಿಯಾಂತ್ಲಿ ಉತಳ್ ಇಂಡಸ್ಟ್ರಿ ಜಾವ್ನಾಸ್ಚ್ಯಾ ಕೋಸ್ಟಲ್‍ವುಡ್ಡಾಂತ್ ಅಶೆಂಚ್ ಘಡ್ತಾ. ಥಂಯ್ ಉದೆಲ್ಲಿಂ ಚಡ್‍ಶಿಂ ಸಿನೆಮಾಂ ಬುರ್ನಾಸ್‍ಚ್. ತಾಣಿಂ ಸಿನೆಮ್ ಕಾಡುಂಕ್ ಅಮ್ಸೊರ್ಚೆಂ, ಆನಿ ಉಪ್ರಾಂತ್ ಪ್ರಚಾರಾಚಿ ಗಿಮಿಕ್ ಕರ್ಚೆಂ. ತಸಲೆಂಚ್ ಗಿಮಿಕ್ ಹಾಂಗಾಯೀ ಚಲ್ಲೆಂ. ಪ್ರಚಾರಾಚಿ ‘ಪರ್ಮಿಟ್’ ಘೆತ್‍ಲ್ಲ್ಯಾಂನಿ ಬಕ್ವಾಸ್ ಗಿಮಿಕ್ಸ್ ಕೆಲೆ! ತ್ಯಾ ಖಾತಿರ್ ತಕ್ಲಿ ಖರ್ಚುಂಚ್ಯಾಕೀ ಸಿನೆಮಾಚಿ ಸ್ಕ್ರಿಪ್ಟ್-ಮೇಕಿಂಗ್ ಬರೆಂ ಕರುಂಕ್ ಪೆಚಾಡ್‍ಲ್ಲೆಂ ತರ್ ಕಿತ್ಲೆಂ ಬರೆಂ ಆಸ್ತೆಂ. ನ್ಹಯ್ಗೀ? (ಸಿನೆಮ್ ಬರೆಂ ಕಾಡ್‍ಲ್ಲೆಂ ತರ್ ಗಿಮಿಕ್ಸಾಂಚಿ ಗರ್ಜ್‍ಚ್ ಆಸನಾ).

ಹಿ ‘ಅಸ್ಮಿತಾಯ್’ ಮಾಂಡ್ ಸೊಭಾಣಾಚಿ ನ್ಹಯ್!

ನಿಮಾಣೆಂ ಉತಾರ್. ಇತ್ಲ್ಯೊ ಸಂಗ್ತಿ ನಿರ್ಮಾಪಕಾಂಚ್ಯಾ ನಿರಂತರ್ ಸಾಂಗ್ಣ್ಯಾಂ ವರ್ವಿಂ ಉದೆಲ್ಲ್ಯೊ. ಏಕ್ ಆಪುರ್ಬಾಯೆಚೆಂ ಸಿನೆಮ್ ರಚುನ್, ತೆಂ ಸಮಾಜೆನ್ ಉಕಲ್ನ್ ಧರಿಜೆ ಮ್ಹಳ್ಯಾರ್ ಖಂಡಿತ್ ಸಾರ್ಕೆಂ. ಪುಣ್ ಅಸಲೆಂ ಅಪ್ರಬುದ್ಧ್ ಉತ್ಪನ್ನ್ ರಚುನ್, ತೆಂ ಅದ್ಭುತ್ ಮ್ಹಳ್ಳೆಪರಿಂ ಗಾಜಂವ್ಚೆಂ ಆನಿ ಸಮುದಾಯಾಚೆಂ ಥಿಕ್ ಮ್ಹಣ್ಚೆಂ ಹಾಸ್ಯಾಸ್ಪದ್. ತೆಂ ಖಂಡಿತ್ ಒಪುಂಕ್ ಜಾಯ್ನಾ. ಖಚಿತ್ ಜಾವ್ನ್ ಹೆಂ ಕೊಂಕ್ಣಿ ಸಮುದಾಯಾನ್ ಅಭಿಮಾನ್ ಪಾಂವ್ಚೆಂ ಉತ್ಪನ್ನ್ ನ್ಹಯ್. ಶಿವಾಯ್ ಮಾಂಡ್ ಸೊಭಾಣ್ ಆನಿ ಸ್ವತಃ ಎರಿಕ್ ಒಝೇರಿಯೊನ್ ಆಪ್ಲ್ಯಾ ಉತ್ತೀಮ್ ಸಾಧನಾ ಪಯ್ಕಿ ಹೆಂಯೀ ಏಕ್ ಮ್ಹಣ್ ಸಾಂಗ್ಚೆಂಯೀ ಚೂಕ್. ಖಂಚ್ಯಾಯೀ ರಿತಿನ್ ಹೆಂ ಫಿಲ್ಮ್ ಎರಿಕಾಕ್ ಆನಿ ಮಾಂಡ್ ಸೊಭಾಣಾಚ್ಯಾ ಘನತೆಕ್ ಆನಿ ಮರ್ಯಾದಿಕ್ ಊಂಚ್ ಉಬಾರಿನಾ, ಬಗಾರ್ ಮಾನ್ ಕಾಡ್ಚೆಂಚ್ ಮ್ಹಣ್ಯೆತ್.

ಜಾಲ್ಲೆಂ ಜಾಲಾಂ. ನಿರ್ಮಾಣ್ ಸಂಸ್ಥ್ಯಾಚ್ಯಾ ಕಾರ್ಬಾರಿಂನಿ ಏಕ್ ಜಮಾತ್ ಚಲವ್ನ್ ಕಿತ್ಯಾಕ್ ಅಸಲ್ಯೊ ನಿಕೃಷ್ಠ್ ಚುಕಿ ಘಡ್ಲ್ಯೊ, ಕಿತ್ಯಾಕ್ ಸಗ್ಳೆಂ ನಿಯಂತ್ರಣಾ ಭಾಯ್ರ್ ಗೆಲೆಂ, ಕೊಣೆಂಯೀ ಕಿತ್ಯಾಕ್ ತಿತ್ಲೆ ಪ್ರಮಾದ್ ಪಳೆವ್ನ್‌ಯೀ ಕಳಂವ್ಕ್ ನಾ, ಪ್ರೊಡಕ್ಷನಾ ವೆಳಾರ್ ಕಿತ್ಯಾಕ್ ಸೂತ್ರ್‌ಧಾರ್ ನಾ ಜಾಲೊ ಮ್ಹಳ್ಳ್ಯಾಚೆರ್ ನಿಯಾಳ್ ಆನಿ ಝಡ್ತಿ ಕರಿಜೆ. ಲ್ಹಾನ್ ಭುರ್ಗಿಂ ಸಯ್ತ್ ಹೆಂ ಸಿನೆಮ್ ಪಳೆಲ್ಯಾರ್ ಹಾಸ್ತಿತ್ (ಎಕಾ ಕೊಲೆಜಿಚ್ಯಾ ಕೊಂಕ್ಣಿ ವಿದ್ಯಾರ್ಥಿಂನಿ ಪಳೆಲಾಂ, ತಿಂ ವೊಮ್ತೆಂ ಉದಾರೆಂ ಹಾಸ್ಲ್ಯಾಂತ್). ಸಾರ್ಕೆಂ ಪಳೆಂವ್ಕ್ ಗೆಲ್ಯಾರ್ ಹೆರಾಂಚೆರ್ ಬೋಟ್ ಜೊಕುಂಕ್ ಅವ್ಕಾಸ್‍ಚ್ ನಾ. ಕಿತ್ಯಾಕ್ ಮ್ಹಳ್ಯಾರ್ ಮಾಂಡ್ ಸೊಭಾಣಾಚ್ಯಾ ಸಕ್ಡಾಂನಿ ಹ್ಯಾ ನಿರ್ಮಾಣಾಂತ್ ಆಪ್ಣಾಕ್ ಸಮರ್ಪಿಲಾಂ. ತರೀ ಅಸಲೆಂ ಅಪದ್ಧ್ ಉಬ್ಜಲಾಂ ಮ್ಹಳ್ಯಾರ್…?!

ಆಬ್ಳೆ ಆತಾಂ, ‘ಅಸ್ಮಿತಾಯ್ ಪಾರ್ಟ್ 2’ ಕಾಡ್ಚಿಂ ಘೋಷಣಾಂ ಆಯ್ಕಲಿಂ. ಪಯ್ಲೊ ಪಾರ್ಟ್‍ಚ್ ಇತ್ಲೊ ಬೆಳ್ಶೆಲಾ ತರ್ ದುಸ್ರ್ಯಾಂತ್ ಕಿತೆಂ ಕುಸ್‍ಲ್ಲೆಂ ದಿತಾತ್? ಪಯ್ಲೊ ಪಾರ್ಟ್ ಕಿತ್ಯಾಕ್ ತಿತ್ಲೊಯೀ ಫುಂರ್ಗೆಲ್ಲೊ ಮ್ಹಣ್ ತನ್ಖಿ ಚಲಯಾ. ಉಪ್ರಾಂತ್ ದುಸ್ರೆಂ ಕಿತೆಂಯೀ.

ಕೊಂಕ್ಣೆಂತ್ ಆಖ್ಖ್ಯಾ ಸಮುದಾಯಾನ್ ಆನಿ ಹರ್ ಎಕ್ಲ್ಯಾನ್ ತಕ್ಲಿ ಉಕ್ಲುನ್ ಚಲ್ಚೆ ತಿತ್ಲ್ಯೊ, ಅಭಿಮಾನ್ ಪಾಂವ್ಚ್ಯೊ ಅದ್ಭುತ್ ಸಂಗ್ತಿ ಆಸಾತ್. ‘ಮಾಂಡ್ ಸೊಭಾಣ್’ ಸಂಸ್ಥೊಯೀ ತಾಂತುಂ ಏಕ್. ವಿ.ಜೆ.ಪಿ. ಸಲ್ಡಾನ್ಹಾಚ್ಯೊ ಚಾರಿತ್ರಿಕ್ ಕಾದಂಬರಿ, ಎ.ಟಿ. ಲೋಬೊಚಿ ‘ವೇಳ್-ಘಡಿ’, ಐರಿನ್ ಪಿಂಟೊಚಿ ‘ಮ್ಹಜೆಂ ಅಂತಸ್ಕರ್ನ್ ವಿಸರ್ಚೆಂ ನಾ’, ಡೊ. ಎಡ್ವರ್ಡ್ ನಜ್ರೆತಾಚ್ಯೊ ಮಟ್ವ್ಯೊ ಕಾಣಿಯೊ, ವಿಲ್ಫಿ ರೆಬಿಂಬಸಾಚಿಂ ಪದಾಂ ಕೊಂಕ್ಣೆಂತ್ಲ್ಯಾ ಅಪ್ರತಿಮ್ ಆನಿ ಶ್ರೇಷ್ಠ್ ಕೃತಿಯಾಂ ಪಯ್ಕಿ ಪಯ್ಲ್ಯಾ ಪಂಗ್ತಿರ್ ಸೊಭ್ತಾತ್. ಹ್ಯಾ ಮೆಳಿಂತ್ ಸೊಭ್ಚ್ಯೊ ಹೆರ್ ಕೃತಿಯೊ, ಸಂಗ್ತಿಯೀ ಆಸಾತ್.

ಖಂಡಿತ್ ಜಾವ್ನ್ ‘ಅಸ್ಮಿತಾಯ್’ ಸಿನೆಮ್ ಹ್ಯಾ ವರ್ಗಾಕ್ ಬಿಲ್ಕುಲ್ ಯೇನಾ. ತಶೆಂ ಆಸಾ ಮ್ಹಣ್ ಕೊಣೀ ಸಾಂಗ್ತಾತ್ ತರ್ ತೆಂ ಕೊಂಕ್ಣೆಕ್‍ಚ್ ಅಕ್ಮಾನ್.

ಕಾಣಿ ಆನಿ ಪಾತ್ರ್ ರಚನಾ ವಿಶಿಂ ಶಿಕೊಂಕ್ ಯುನಿವರ್ಸಿಟಿಂಕ್ ವಚಜೆ ಮ್ಹಣ್ ನಾ. ಕೊಂಕ್ಣೆಂತ್ಲ್ಯೊಚ್ ಅದ್ಭುತ್ ಕಾದಂಬರಿ, ಕಾಣಿಯೊ ವಾಚ್ಲ್ಯಾರೀ ಪುರೊ. ಕೊಣೆಂಯೀ ತರೀ ಅರ್ಹತಾ, ಸಾಮರ್ಥಿ ನಾತ್‍ಲ್ಲ್ಯಾ ಕ್ಷೇತ್ರಾಂತ್ ಹಾತ್ ಘಾಲುಂಕ್ ನಜೊ. ತಶೆಂ ಕರುಂಕ್ ಗೆಲ್ಯಾರ್, ಆನಿ ಮುಖಾರ್, “ತೊ ‘ಅಸ್ಮಿತಾಯ್’ಪರಿಂ ಕರ್ತಾ” ಮ್ಹಣ್ಯೆತ್. ತ್ಯಾ ಮಟ್ಟಾಚೆಂ ಸಾಧನ್ ಹ್ಯಾ ಪಂಗ್ಡಾನ್ ಕೆಲಾಂ!

ರೀಲ್ಸ್ ಆನಿ ವಿಡಂಬನ್: ಸಿನೆಮಾ ರಿಲೀಸಾಕ್ ಆಯ್ತೆಂ ಜಾತಾಸ್ತಾನಾ ಪಂಗ್ಡಾಚ್ಯಾಂನಿ ಪ್ರಚಾರಾಚೆ ಗಿಮಿಕ್ಸ್ ಚಲಯ್ಲೆ. ಥೊಡಿಂ ‘ರೀಲ್ಸಾಂ’ಯೀ ಸೊಡ್ಲಿಂ. ಪ್ರಮುಖ್ ನಟನ್ ಕೆಲ್ಲ್ಯಾ ಡೆನಿಸ್ ಮೊಂತೇರೊ ಆನಿ ಜೊಯೆಲ್ ಪಿರೇರಿಚೆಂ ಏಕ್ ರೀಲ್ಸ್ ಆಸ್‍ಲ್ಲೆಂ. ಜೊಯೆಲಾನ್, “ರೀಲ್ಸ್ ಕರುಂಕ್ ಆಸಾತ್ ಡೆನಿಸ್…” ಮ್ಹಣ್ ಸಾಂಗ್‍ಲ್ಲ್ಯಾಕ್ ಟೈಲರ್ ಡೆನಿಸ್ ಸುತಾಚಿಂ ರಿಲಾಂ ಜಮವ್ನ್ ಆಯ್ತೊ ಜಾತಾ! ತಿ ಏಕ್ ಕ್ರಿಯೇಟಿವಿಟಿ ಮ್ಹಣ್ಯೆತ್. ಪುಣ್ ವಾಸ್ತವ್ ಜಾವ್ನ್ ತಸಲೆಂಚ್ ಬ್ಲಂಡರ್ ಸಿನೆಮಾಂತ್ ಜಾಯ್ತೆಂ ಘಡ್ಲಾಂ. ಟೈಲರಾಕ್ ರೀಲ್ಸ್ ಮ್ಹಳ್ಯಾರ್ ಸುತಾಚಿಂ ರೀಲಾಂ ಮ್ಹಣ್ ಭೊಗ್‍ಲ್ಲೆಪರಿಂಚ್, ಸಿನೆಮಾಂತ್ ವಾವ್ರ್ ಕೆಲ್ಲ್ಯಾ ಜಾಯ್ತ್ಯಾಂಕ್ ಸಿನೆಮಾಚಿ ಭಾಸ್, ಸಂಗ್ತಿ ಕಳಿತ್‍ಚ್ ನಾತ್‍ಲ್ಲ್ಯಾನ್ ತೆಂ ಸಿನೆಮ್ ತಿತ್ಲೆಂ ನಿಕೃಷ್ಟ್ ಜಾವ್ನ್ ಉದೆಲಾಂ. ಸಿನೆಮಾಕ್ ಲಗ್ತಿ ಖಂಚಿಯೀ ವಿದ್ಯಾ ಕೊಣಾಯ್ಕೀ ನಾತ್‍ಲ್ಲಿ ಮ್ಹಳ್ಳೆಂ ಸ್ಪಷ್ಟ್ (ಬಿಜಿಎಂ ದಿಲ್ಲೆಲ್ಯಾಕ್ ಸೊಡ್ನ್). ಆನ್ಯೇಕ್ ಅಜ್ಯಾಪ್ ಮ್ಹಳ್ಯಾರ್ ಏಕ್ ಮ್ಹಾಲ್ಗಡೊ ಕಲಾಕಾರ್, ನಾಟಕ್ ನಿರ್ದೇಶಕ್ ಜಾವ್ನಾಸ್‍ಲ್ಲ್ಯಾ ಡೆನಿಸ್ ಮೊಂತೇರೊಕ್ ‘ಪ್ರಾಪರ್ಟಿಸ್’ ವಿಶಿಂ ಕಿತೆಂಚ್ ಜಾಣ್ವಾಯ್ ನಾತ್‍ಲ್ಲಿ ಗಜಾಲ್ (ಖೊಮ್ಟ್ಯಾಂತ್ಲಿಂ ದೃಶ್ಯಾಂ ತಾಕಾ ಸಾಕ್ಸ್). ಹೆಂ ಕಸಲೆಂ ವಿಡಂಬನ್, ದೆವಾಕೀ ಕಳ್ಚೆಂ ನಾ!

Send your Feedback to: budkuloepaper@gmail.com

Like us at: www.facebook.com/budkulo.epaper

Subscribe our YouTube Channel

ಬುಡ್ಕುಲೊ ವಾಟ್ಸಪ್ ಗ್ರೂಪಾಕ್ ಲಿಂಕ್ – Click & Join

The post ಸಿನೆಮಾ ವಿಶ್ಲೇಷಣ್: ಅಸ್ಮಿತಾಯೆಚೆಂ ದರ್ಶನ್ ವಾ ಅಸ್ಕತ್ಕಾಯೆಚೆಂ ಪ್ರದರ್ಶನ್? appeared first on Budkulo.

ಚುನಾವಣೋತ್ಸವ ಎಂಬ ಅದ್ಭುತ ಸಂಗ್ರಾಮದಲ್ಲಿ ಕಾಂಗ್ರೆಸ್ ಪಕ್ಷ ಮಹಾ ವಿಜಯ ಸಾಧಿಸಿದ ತರುವಾಯ ಮತ್ತೊಮ್ಮೆ ಸರಕಾರದ ಚುಕ್ಕಾಣಿ ಹಿಡಿದಿರುವ ಮುಖ್ಯಮಂತ್ರಿ ಸಿದ್ಧರಾಮಯ್ಯನವರೇ ನಿಮಗೆ ಅಭಿನಂದನೆಗಳು. ಸಾಮಾನ್ಯ ಜನರು ನಿಮ್ಮನ್ನು ಬಡವರ ಭಾಗ್ಯ ದೇವತೆ ಎಂದೇ ಭಾವಿಸುತ್ತಾರೆ. ನಿಮ್ಮ ಹಲವು ಜನಪರ ಯೋಜನೆಗಳು ಅದಕ್ಕೆ ಕಾರಣ.

ಪಕ್ಷದ ಪ್ರಣಾಳಿಕೆಯಲ್ಲಿ ಘೋಷಿಸಿದಂತೆ ಇದೀಗ 10 ಕೆಜಿ ಅಕ್ಕಿಯ ಅನ್ನಭಾಗ್ಯ ಯೋಜನೆಗೆ ದಾರಿ ಸುಗಮಗೊಳಿಸಿದ್ದೀರಿ. ಆದರೆ 5 ಕೆಜಿ ಹೆಚ್ಚುವರಿ ಅಕ್ಕಿ ಸಕಾಲದಲ್ಲಿ ಹೊಂದಿಸಿಕೊಳ್ಳಲು ಆಗದ ಕಾರಣ ಅಕ್ಕಿಗೆ ಬದಲಾಗಿ ಕೆಜಿಗೆ ರೂ. 34ರಂತೆ ಓರ್ವ ವ್ಯಕ್ತಿಗೆ ತಿಂಗಳಿಗೆ ರೂ. 170 ಕೊಡುವ ನಿರ್ಧಾರಕ್ಕೆ ಬಂದಿದೆ ನಿಮ್ಮ ಸರಕಾರ. ಇದು ಯುಕ್ತವೂ ಸೂಕ್ತವೂ ಆಗಿದೆ. ಬೇಕಾದಷ್ಟು ಅಕ್ಕಿ ಸಂಗ್ರಹ ಆದ ಮೇಲೆ ಹಣದ ಬದಲು ಅಕ್ಕಿಯನ್ನೇ ಕೊಟ್ಟರಾಯಿತು.

ಆದರೆ ಎಷ್ಟು ಸಮಯ ಹೀಗೆ ಹಣವನ್ನು ಕೊಡುತ್ತೀರಿ? ಹಾಗೆ ನೋಡಿದರೆ ಹೊರಗಿನಿಂದ ಅಕ್ಕಿ ತರುವುದು ಸುಲಭದ ಮಾತಲ್ಲ, ನಿಜ. ರೂ. 34 ಕೆಜಿ ಅಕ್ಕಿಗೆ ಕೊಟ್ಟರೂ ಸಾಗಾಣಿಕೆ, ಪ್ಯಾಕೇಜಿಂಗ್, ದಾಸ್ತಾನು, ಸರಬರಾಜು ಮುಂತಾಗಿ ಇನ್ನೆಷ್ಟು ದುಡ್ಡು ಬೇಕಾಗುತ್ತದೋ ಅದು ನಿಮಗೆ ಚೆನ್ನಾಗಿ ಗೊತ್ತಿದೆ. ಆ ನಿಟ್ಟಿನಲ್ಲಿ ನೇರವಾಗಿ ಹಣವನ್ನೇ ಜನರಿಗೆ ಪಾವತಿಸುವುದು ಸರಕಾರದ ಬೊಕ್ಕಸಕ್ಕೆ ಲಾಭಕರವೇ ಎನ್ನಬಹುದು.

ಆದರೂ, ಹಣವನ್ನು ನೇರವಾಗಿ ಜನರ ಕೈಗೆ ಹೆಚ್ಚು ಸಮಯ ಕೊಡುವ ಬದಲು ಇತರ ಪ್ರಾಯೋಗಿಕ ಮಾರ್ಗೋಪಾಯಗಳತ್ತ ಗಮನ ಹರಿಸುವುದು ಒಳ್ಳೆಯದು. ಅದು ಅಗತ್ಯವೂ ವಿವೇಚನಾಯುಕ್ತವೂ ಆಗುತ್ತದೆ. ಯಾಕೆಂದರೆ ರಾಜ್ಯದಲ್ಲಿರುವ ಎಲ್ಲಾ ಜನರೂ ಕೇವಲ ಅಕ್ಕಿಯನ್ನಷ್ಟೇ ಆಹಾರಕ್ಕೆ ಬಳಸುವುದಿಲ್ಲವಲ್ಲ?

ನಿಮಗೆ ಗೊತ್ತೇ ಇದೆ, ನಿಮ್ಮ ಮೈಸೂರು ಕಡೆ ಹೆಚ್ಚಿನ ಜನರು ರಾಗಿ ಬಳಸುತ್ತಾರೆ. ಉತ್ತರ ಕರ್ನಾಟಕದಲ್ಲಿ ಜೋಳಕ್ಕೆ ಬೇಡಿಕೆ ಹೆಚ್ಚಿದೆ. ಅದೇ ರೀತಿ ಬಹಳ ಜನರು ಗೋಧಿಯನ್ನೂ ಬಳಸುತ್ತಾರೆ. ನಗರಗಳಲ್ಲಂತೂ ಎಲ್ಲಾ ವಿಧದ ಜನರು ವಾಸಿಸುತ್ತಾರೆ. ದಿನದ ಮೂರು ಹೊತ್ತು ತಿಂಡಿ, ಊಟ ಮುಂತಾಗಿ ಕೇವಲ ಅಕ್ಕಿಯ ಪದಾರ್ಥಗಳನ್ನಷ್ಟೇ ಎಲ್ಲಾ ಜನರು ಸೇವಿಸುವುದಿಲ್ಲ. ಹಾಗಿರುವಾಗ ಕೇವಲ ಅಕ್ಕಿಯನ್ನಷ್ಟೇ ಒದಗಿಸಬೇಕು, ಅದೂ ಅಕ್ಕಿ ಲಭ್ಯವಿಲ್ಲದ ಸಮಯದಲ್ಲಿ, ಎನ್ನುವ ತುರ್ತು ಅನಗತ್ಯವಲ್ಲವೇ?

ಈಗಂತೂ ಸಕ್ಕರೆ ಕಾಯಿಲೆ ಇಲ್ಲದ ವ್ಯಕ್ತಿ ಇರುವ ಕುಟುಂಬ ಅಪರೂಪ. ಬಹಳಷ್ಟು ಜನರು ಡಯಾಬಿಟಿಸ್ ಹೊಂದಿದ್ದಾರೆ. ಅಂತಹವರಿಗೆ ಅಕ್ಕಿ ಹೆಚ್ಚು ಬೇಕಾಗಿಲ್ಲ. ಅವರು ಪರ್ಯಾಯ ಆಹಾರ, ಅಂದರೆ ರಾಗಿ, ಗೋಧಿ, ಜೋಳ, ಧಾನ್ಯಗಳು ಮುಂತಾದವನ್ನು ಬಳಸುತ್ತಾರೆ. ಇಂತಹ ಜನರು ಸಾಧ್ಯವಾದಷ್ಟು ಮಟ್ಟಿಗೆ ಅಕ್ಕಿಯ ಉಪಯೋಗವನ್ನು ಕಡಿಮೆ ಮಾಡುತ್ತಿದ್ದಾರೆ. ಜನರಿಗೆ ಆರೋಗ್ಯದ ಕಡೆಗೆ ಹೆಚ್ಚು ಗಮನ ಸಹಜ.

ಹೀಗಿರುವಾಗ ಸರಕಾರ 5 ಕೆಜಿ ಅಕ್ಕಿಯ ಜೊತೆ ಹೆಚ್ಚುವರಿ 5 ಕೆಜಿ ಅಕ್ಕಿಯನ್ನೇ, ಅಥವಾ ಹಣವನ್ನು, ಕೊಡುವುದರ ಬದಲಾಗಿ ಆಯಾ ಜನರಿಗೆ ಬೇಕಾದ ಇತರ ವಸ್ತುಗಳನ್ನು ಒದಗಿಸುವುದು ಸೂಕ್ತವಲ್ಲವೇ ಮುಖ್ಯಮಂತ್ರಿಯವರೇ? ಇದು ಕೇವಲ ಜನರಿಗೆ ಮಾತ್ರ ಅನುಕೂಲ ಮಾಡಿ ಕೊಡುವುದಿಲ್ಲ, ಬದಲಾಗಿ, ಆಯಾ ಬೆಳೆಗಳನ್ನು ಬೆಳೆಯುವವರಿಗೆ ಪ್ರೋತ್ಸಾಹದಾಯಕವೂ ಲಾಭಕರವೂ ಆಗುತ್ತದೆ. ಇತರ ಧವಸ ಧಾನ್ಯಗಳನ್ನೂ ಈ ಪಟ್ಟಿಗೆ ಸೇರ್ಪಡಿಸಬಹುದು. ಹಾಗೆ ಮಾಡುವುದರಿಂದ ರಾಜ್ಯದ ಬೆಳೆಗಾರರಿಗೂ ನೇರವಾಗಿ ಲಾಭ ದೊರಕಿಸಬಹುದು.

ರಾಜ್ಯದ ಒಟ್ಟಾರೆ ಅಭಿವೃದ್ಧಿಗೂ ಇದು ದೊಡ್ಡ ಕಾಣಿಕೆ ನೀಡುವಂತಾಗುತ್ತದೆ.

ಈ ನಿಟ್ಟಿನಲ್ಲಿ ತಮ್ಮ ಸರಕಾರ, ಸಂಬಂಧಿತ ಸಚಿವರು ಮತ್ತು ಅಧಿಕಾರಿಗಳು ಪರಾಮರ್ಶೆ ನಡೆಸಿ ಸೂಕ್ತ ನಿರ್ಧಾರಕ್ಕೆ ಬಂದಲ್ಲಿ ಎಲ್ಲರಿಗೂ ಒಳಿತು ಮಾಡಿದಂತೆ ಆಗುತ್ತದೆ. ಅಲ್ಲದೆ ಅಕ್ಕಿಯ ಅಭಾವದ ಸಮಸ್ಯೆಯನ್ನು ಪರಿಹರಿಸಿದಂತೆಯೂ ಆಗುತ್ತದೆ. ಸಬ್ ಕಾ ಸಾಥ್ ಸಬ್ ಕಾ ವಿಕಾಸ್ ಎನ್ನುವುದು ನೈಜ ಅರ್ಥದಲ್ಲಿ ಸಾಕಾರಗೊಳ್ಳುತ್ತದೆ. ‘ಸರ್ವೇ ಜನಃ ಸುಖಿನೋ ಭವಂತು’ ಎನ್ನುವುದನ್ನು ಜಾರಿಗೊಳಿಸಿದ ಸಾರ್ಥಕತೆ ನಿಮಗೂ ಕಾಂಗ್ರೆಸ್ ಸರ್ಕಾರಕ್ಕೂ ದೊರಕುತ್ತದೆ.

ನೂತನ ಸರಕಾರಕ್ಕೆ ಶುಭ ಕೋರುತ್ತಾ, ನಿಮ್ಮ ಸಿದ್ದು 2.0 ಸರಕಾರ ಕರ್ನಾಟಕವು ಒಳ್ಳೆಯ ಕಾರಣಗಳಿಗಾಗಿ ಸದಾ ಕಾಲ ನೆನಪಿನಲ್ಲಿಡುವಂತಹ ಕಾರ್ಯಗಳನ್ನು ಮಾಡಲಿ ಎಂದು ಆಶಿಸುತ್ತೇನೆ.

ಡೊನಾಲ್ಡ್ ಪಿರೇರಾ
ಸಂಪಾದಕ – ಬುಡ್ಕುಲೊ ಇ-ಪತ್ರಿಕೆ Budkulo.com

Send your Feedback to: budkuloepaper@gmail.com

Like us at: www.facebook.com/budkulo.epaper

The post ಅಕ್ಕಿಯೇ ಏಕೆ ಸಿಎಂ ಸಿದ್ಧರಾಮಯ್ಯನವರೇ, ರಾಗಿ, ಗೋಧಿ, ಜೋಳವನ್ನೂ ಕೊಡಿ appeared first on Budkulo.

ಪಯ್ಲೆಂ: ಹ್ಯಾ ಲೇಖನಾಂತ್ಲೆ ಜಾಯ್ತೆ ವಿಚಾರ್ ಬರಂವ್ಕ್ ಸಬಾರ್ ವರ್ಸಾಂ ಥಾವ್ನ್ ಹಾಂವ್ ಅಪೇಕ್ಷಿತಾಲೊಂ. ಆಮ್ಚ್ಯಾ, ಮ್ಹಣ್ಜೆ ಮಂಗ್ಳುರಿ ಕೊಂಕ್ಣಿ ಕಥೊಲಿಕ್ ಸಮುದಾಯಾಕ್ ಹ್ಯೊ ಗಜಾಲಿ ಚಡ್ ಲಾಗು ಜಾತಾತ್. ಕಾರಣಾಂತರ್ ಜಾವ್ನ್ ಹೆಂ ಬರವ್ನ್ ಕಾಡುಂಕ್ ಜಾಲೆಂ ನಾ. ಪುಣ್, ಆಜ್ ಹೆ ವಿಚಾರ್ ಚಡ್ ಪ್ರಸ್ತುತ್ ದೆಕುನ್, ಆನಿ ಹ್ಯೊ ಗಜಾಲಿ ಸಾರ್ವಕಾಲಿಕ್ ಜಾಲ್ಲ್ಯಾನ್, ಆತಾಂ ಪ್ರಸ್ತುತ್ ಕರುನ್ ಆಸಾಂ.

ದುಸ್ರೆಂ: ಠಿಕಾ ಮ್ಹಳ್ಳೊ ಸಬ್ದ್/ಉತಾರ್ ಕೊಂಕ್ಣೆಂತ್ ಖರ್‍ಯಾ ಅರ್ಥಾ ಥಾವ್ನ್ ವೆಗ್ಳ್ಯಾಚ್ ಥರಾನ್, ಪ್ರತ್ಯೇಕ್ ಕರ್ನ್ ಚೂಕ್ ರಿತಿನ್ ಚಾಲ್ತೆರ್ ಆಸಾ. ಠಿಕಾ ಮ್ಹಳ್ಯಾರ್ ದುರ್ಸೊಂಚೆಂ, ಖೊಡಿ ಕಾಡ್ಚೆಂ, ನಿಂದಾ ಕರ್ಚೆಂ ನ್ಹಯ್. ಠಿಕಾ ಮ್ಹಳ್ಯಾರ್, ಖರ್‍ಯಾನ್, ವಿಷಯಾಧರಿತ್ ವಿಶ್ಲೇಷಣ್ ಕರ್ಚೆಂ, ಆನಿ ಉಣೆಂಪಣ್/ಚುಕಿ ದಾಕವ್ನ್ ದೀವ್ನ್ ತೆಂ ಸಾರ್ಕೆಂ ಜಾಂವ್ಚ್ಯಾಕ್ ಪ್ರೇರಣ್/ಕಾರಣ್ ಜಾಂವ್ಚೆಂ. ಅಸಲಿ ಠಿಕಾ ವಾ ವಿಮರ್ಸೊ ವಸ್ತುನಿಷ್ಠ್, ವಿಷಯಾಧರಿತ್ ಜಾವ್ನಾಸಜೆ. ಆಮಿ ತೆಂಚ್ ಕರ್ಚೆಂ.

ಪಯ್ಲ್ಯಾನ್ ಪಯ್ಲೆಂ ಆಮಿ ಸಮ್ಜಜೆ ಕಿತೆಂಗೀ ಮ್ಹಳ್ಯಾರ್, ಹೆಂ ಸರ್ವ್ ಸಾಧ್ಯ್ ಜಾಂವ್ಕ್ ಪ್ರಜಾಪ್ರಭುತ್ವ್ ಕಾರಣ್. ಜರ್ ಪ್ರಜಾಪ್ರಭುತ್ವ್ ನಾ, ತೆದ್ನಾಂ ಅಸಲ್ಯೊ ಗಜಾಲಿ ಬಿಲ್ಕುಲ್ ಅಪ್ರಸ್ತುತ್. ಆಮಿ ಆಸಾಂವ್ ಪ್ರಜಾಪ್ರಭುತ್ವಾಚ್ಯಾ ಕಾಳಾಂತ್-ದೇಶಾಂತ್. ತ್ಯಾ ವರ್ವಿಂ, ಅಸಲ್ಯಾ ಸಂಗ್ತಿಂಕ್ ಚಡ್ ಬಳ್, Legitimacy ಮೆಳ್ತಾ. ಜಾಂವ್ ಸಾಹಿತ್ಯ್, ಸಮಾಜ್, ರಾಜಕೀಯ್ ವಾ ಧರ್ಮ್ – ಅಸಲ್ಯಾ ಖಂಚ್ಯಾಯ್ ಕ್ಷೇತ್ರಾ ವಿಶಿಂ ಉಚಾರುಂಕ್ ಸಕ್ಡಾಂಕ್ ಹಕ್ಕ್ ಆನಿ ಸ್ವಾತಂತ್ರ್ಯ್ ಆಸಾ.

ಸಂವಿಧಾನಾನ್ ಪ್ರಜಾಪ್ರಭುತ್ವಾಚೊ ಭೋವ್ ಮುಖೆಲ್ ಅಂಶ್ ಜಾವ್ನಾಸ್ಚ್ಯಾ ಅಭಿವ್ಯಕ್ತಿ ಸ್ವಾತಂತ್ರ್ಯಾಚೆಂ ಮೂಲ್‍ಭೂತ್ ಹಕ್ಕ್ ವಾಪ್ರುನ್ ಪತ್ರಿಕಾರಂಗ್ (ಆತಾಂ ಮಾಧ್ಯಮಾಂ) ವಾವುರ್ತಾ. ಸಮಾಜೆಂತ್, ಸಮಾಜೆ ಸಂಗಿಂ ಆನಿ ಸಮಾಜೆ ಖಾತಿರ್ ವ್ಹಡ್ ದೇಣ್ಗಿ ದಿಂವ್ಚ್ಯಾ ಪತ್ರಿಕಾ/ಮಾಧ್ಯಮ್ ರಂಗಾಕ್ ವ್ಹಡ್ ಜವಾಬ್ದಾರಿಯೀ ಆಸಾ. ಹಿ ಜವಾಬ್ದಾರಿ ಆದಿಂ ಥಾವ್ನ್ ಹ್ಯಾ ಅಂಗಾನ್ ಪರಿಣಾಮ್‍ಕಾರಿ ರಿತಿನ್ ಪಾಳ್ಳ್ಯಾ. ಪುಣ್ ಪ್ರಸ್ತುತ್ ಗಜಾಲ್ ವೆಗ್ಳಿಚ್ ಆಸಾ ಮ್ಹಳ್ಳೆಂ ನೆಗಾರುಂಕ್ ಜಾಯ್ನಾ. (ಆಯ್ಚಿಂ ಜಾಯ್ತಿಂ ಪತ್ರಾಂ/ಮಾಧ್ಯಮ್ ಸಂಸ್ಥೆ ವಿಕೊನ್ ಗೆಲ್ಯಾತ್!).

ಅಶೆಂ ಸಂವಿಧಾನಾಚ್ಯಾ ಅನುಗ್ರಹಾನ್‍ಂಚ್ ಅಭಿವ್ಯಕ್ತ್ ಸ್ವಾತಂತ್ರ್ಯ್ ಚಾಲ್ತೆರ್ ಆಸಾ, ಆನಿ ತಾಚೊ ಉಪಯೋಗ್ ಪತ್ರಾಂ/ಮಾಧ್ಯಮಾಂ ಸವೆಂ ಸಾಧೊ ಲೋಕ್‍ಯೀ ಜೊಡುಂಕ್ ಸಕ್ಲಾ. ಆಜ್ ಆಮಿ ಪಳೆಂವ್ಚೆಂ ತರ್, ಹ್ಯಾ ಹಕ್ಕಾ ಸವೆಂ ‘ಮಾಹೆತ್ ಹಕ್ಕಾಂ ಕಾಯ್ದೊ’ ನಾಗರಿಕಾಂಕ್ ಚಡ್ತಿಕ್ ಬಳ್ ಜೊಡುನ್ ದೀಂವ್ಕ್ ಪಾವ್ಲಾ.

ತಶೆಂ ಮ್ಹಣ್ ಫಕತ್ ಸರ್ಕಾರ್, ರಾಜಕೀಯ್ ವ್ಯವಸ್ಥೆಚೆರ್ ಮಾತ್ರ್ ಸವಾಲ್ ಕರುಂಕ್ ಹಕ್ಕ್ ಆಸ್ಚೆಂ ಮ್ಹಣ್ ನ್ಹಯ್. ಸಾರ್ವಜನಿಕ್ ಮ್ಹಳ್ಳೆಂ ಕಿತೆಂ ಆಸಾ ತ್ಯಾ ಸರ್ವಾಚೆರ್ ಸವಾಲ್ ಕರುಂಕ್ ಹರ್ಯೆಕ್ಲ್ಯಾಕ್ ಹಕ್ಕ್ ಆಸಾ. ಪತ್ರಾಂ, ಟಿ.ವಿ. ಆನಿ ಎಲೆಕ್ಟ್ರಾನಿಕ್ ಮಾಧ್ಯಮಾಂನಿ ಹ್ಯಾ ಸಂಗ್ತಿಂತ್ ಆಪಾಪ್ಲ್ಯಾ ತಾಂಕಿ ಆನಿ ಕ್ರಿಯಾಶೀಲತೆ ಪರ್ಮಾಣೆಂ ಕಾಮ್ ಕೆಲ್ಲೆಂ ಆಮಿ ಪಳೆತಾಂವ್. ಗಂಭೀರ್ ರಿತಿನ್ ಮಾತ್ರ್ ನ್ಹಯ್ ಆಸ್ತಾಂ, ಹಾಸ್ಯ್, ವಿಡಂಬನ್ ತಸಲ್ಯಾ ಪ್ರಕಾರಾಂನಿಯೀ ಸಮಾಜೆಚ್ಯಾ ಸಂಗ್ತಿಂಚೆರ್ ಉಜ್ವಾಡ್ ಫಾಂಕಂವ್ಕ್, ಸವಾಲ್ ಕರುಂಕ್ ಆನಿ ವಿಮರ್ಸೊ ಕರುಂಕ್ ಅವ್ಕಾಸ್ ಆಸಾ.

ರಾಷ್ಟ್ರ್, ರಾಜ್ಯಾಚಿ ಗಜಾಲ್ ಸೊಡ್ಯಾಂ. ಆಮಿ ಆಮ್ಚ್ಯಾಚ್ ಸಮುದಾಯಾ ವಿಶಿಂ ಘೆಂವ್ಚೆಂ ತರ್, ಹಾಂಗಾ ಅಸಲಿ ಪ್ರಕ್ರಿಯಾ/ರಿವಾಜ್ ಭೋವ್ ಉಣಿಂ ಆನಿ ಅಸ್ಕತ್. ಮುಖ್ಯ್ ಸಮಾಜೆಕ್ ತುಲನ್ ಕೆಲ್ಯಾರ್ ಆಮ್ಚಿ ಸಮಾಜ್ ಜಾಯ್ತ್ಯಾ ಗಜಾಲಿಂನಿ ಮುಖಾರ್ ಆನಿ ಬಳ್ವಂತ್ ಆಸಾ ತರೀ, ಅಭಿವ್ಯಕ್ತಿ ಸ್ವಾತಂತ್ರ್ಯಾಕ್ ಹಾಂಗಾ ಮೋಲ್ ಸೊಡ್ಯಾಂ, ಅಸ್ತಿತ್ವ್‌ಚ್ ನಾ! ಕಿತ್ಯಾಕ್ ಮ್ಹಳ್ಯಾರ್ ಆಮ್ಚ್ಯಾ ಜಾಯ್ತ್ಯಾಂಕ್ ಪ್ರಜಾಪ್ರಭುತ್ವ್ ವರ್ಗನಾ!

ಹಾಚೊ ಪ್ರಭಾವ್ ಹರ್ಯೆಕ್ ಕಡೆನ್‍ಯೀ ದಿಸ್ಲಾ (ಪ್ರಸ್ತುತ್ ಕೊರೊನಾಕ್ ಲಾಗೊನ್ ಚಡಾವತ್ ಸಂಗ್ತಿ ಸ್ಥಗಿತ್ ಜಾಲ್ಯಾತ್). ಸಾಮಾಜಿಕ್, ಸಾಂಸ್ಕೃತಿಕ್-ಸಾಹಿತ್ಯಿಕ್ ಧರುನ್ ಧಾರ್ಮಿಕ್ ಕಾರ್ಯಿಂ ಆನಿ ಆಚರಣಾಂನಿ ಸಯ್ತ್ ವಿಚಾರ್ತಲೊ ಕೊಣೀ ನಾ ಮ್ಹಳ್ಳ್ಯಾ ಧಯ್ರಾನ್ ಕಿತ್ಲಿಶಿಂಗೀ ಆತರ್ವಣಾಂ, ಖರಿಮಸ್ತ್ ಚಲೊನ್ ಆಯ್ಲ್ಯಾ. ಆದಿಂ ಅಸಲ್ಯಾ ಚಡಾವತ್ ಸಂಗ್ತಿಂಕ್ ಲೊಕಾನ್ ಫಕತ್ ಪ್ರೇಕ್ಷಕ್ ಜಾವ್ನ್ ಉರ್ಚೆಂ ಆಸ್‍ಲ್ಲೆಂ ತರ್, ಅತ್ಯಾಧುನಿಕ್ ತಾಂತ್ರಿಕತೆಕ್ ಲಾಗೊನ್ ಅಸಲ್ಯಾಂಚ್ಯೊ ರುಜ್ವಾತಿ (ಫೊಟೊ, ಆಡಿಯೋ, ವಿಡಿಯೋ) ಲೊಕಾಚ್ಯಾ ಹಾತಿಂ ಸಾಂಪಡ್ತಾತ್.

ಥೊಡಿಂ ದೃಷ್ಟಾಂತಾಂ ದಿಂವ್ಚೆಂ ತರ್, ಕೊಂಕ್ಣಿ ಮನರಂಜನ್ ಕಾರ್ಯಾಂನಿ ವೆಳಾಚೊ ವಿಬಾಡ್ ಆನಿ ಪ್ರೇಕ್ಷಕಾಂಚೊ ಗೋಳ್; ಭಾಸ್-ಸಾಹಿತ್ಯ್-ಕಲೆಚ್ಯಾ ಗಜಾಲಿಂನಿ ಚಲ್ಚೆಂ ಫಿತಿಸ್ಪಣ್, ಖೆಳ್ಕುಳಾಂ, ಅನ್ನಾಡ್ಪಣಾಂ; ಸಾಮಾಜಿಕ್ ಕಾರ್ಯಾಂನಿ ಆನಿ ಕುಟ್ಮಾಚ್ಯಾ ಸಂಭ್ರಮಾಂನಿಯೀ ಪಳೆಂವ್ಕ್ ಮೆಳ್ಚಿ ಅಶಿಸ್ತ್, ಪೊಕೊಳ್ ಆಡಂಬರ್, ಸಂಸ್ಕೃತಿಚಿಂ ಖೆಳ್ಕುಳಾಂ ಇತ್ಯಾದಿ. ಹ್ಯಾ ಚಡಾವತ್ ಸಂಗ್ತಿಂಕ್ ಪ್ರಮುಖ್ ಕಾರಣ್, ಆಮ್ಚ್ಯಾ ಸಮುದಾಯಾಂತ್ ವ್ಯವಸ್ಥಿತ್ ಪತ್ರ್‌ಗಾರಿಕಾ ನಾ ಆಸ್ಚೆಂಚ್ ಕಾರಣ್. ತಶೆಂಚ್, ಸಮಾಜೆಚೆ ಮುಖೆಲಿ (ವ್ಯಕ್ತಿ/ಸಂಸ್ಥೆ) ಮ್ಹಣ್ ಆಸ್ಚ್ಯಾಂಕ್ ಬದ್ಧತಾ, ದೂರ್‌ದೃಷ್ಟಿ ಆನಿ ತಾಂಕ್ ನಾ ಆಸ್ಚೆಂಯೀ ಕಾರಣ್.

ಕೊಂಕ್ಣೆಂತ್ ಪತ್ರಿಕೋದ್ಯಮ್ ಕಿತೆಂಚ್ ನಾ ಮ್ಹಣ್ ನ್ಹಯ್. ಸೀಮಿತ್ ಚೌಕಟ್ಟಾರ್ ನಿಯತ್‍ಕಾಲಿಕಾಂನಿ ಸಮಾಜ್ ಸುಧ್ರಾಂವ್ಚ್ಯಾಕ್ ಜಾಯ್ತಿ ದೇಣ್ಗಿ ದಿಲ್ಯಾ. ಪುಣ್ ಕ್ರಮೇಣ್ ಕೊಂಕ್ಣಿ ಪತ್ರಾಂಯೀ ಆಪ್ಲ್ಯಾಚ್ ಸ್ವಾರ್ಥ್, ಇರಾದ್ಯಾಂನಿ ಅಡ್ಚೊನ್ ಗೆಲಿಂ. ತಾಂಕಾಂ ಸಮಾಜೆಚ್ಯೊ ಗಜಾಲಿ ವಿಶೇಸ್ ಮಹತ್ವಾಚ್ಯೊ ನ್ಹಯ್ ಜಾಲ್ಯೊ ಆನಿ ಆಪಾಪ್ಲ್ಯಾ ಹಿತಾಸಕ್ತೆಚ್ಯೊ ಸಂಗ್ತಿಚ್ ವ್ಹಡ್ ಜಾಲ್ಯಾತ್. ಅಪ್ರೂಪ್ ಕಾಂಯ್ ತರೀ ಆವಾಜ್ ಉಟಯ್ಲೊ ತರೀ ತೊ ಕಿತ್ಲ್ಯಾ ಜಣಾಂಕ್ ಪಾವ್ತಾ ಮ್ಹಳ್ಳೆಂ ಸವಾಲ್!

ಸಂಸಾರಾಂತ್ ತಶೆಂಚ್ ಆಮ್ಚ್ಯಾ ದೇಶ್-ರಾಜ್ಯಾಂತ್ ಆನಿ ಸ್ಥಳೀಯ್ ಮಟ್ಟಾರ್, ಪತ್ರಾಂ-ಮಾಧ್ಯಮಾಂ ಸಮಾಜೆಚ್ಯಾ ಗಜಾಲಿಂಚೆರ್ ಸವಾಲ್ ಕರ್ತಾತ್, ಆವಾಜ್ ಉಟಯ್ತಾತ್; ಗರ್ಜ್ ಪಡ್ಲ್ಯಾರ್ ಝುಜ್ತಾತ್. ತ್ಯಾ ಖಾತಿರ್ ವೆವೆಗ್ಳ್ಯೊ ರಿತಿ, ವಾಟೊಯೀ ಆಸಾತ್. ಹ್ಯಾ ಸರ್ವಾಂ ಪಯ್ಕಿ ಹಾಸ್ಯಾಚೆಂ ರೂಪ್ ಘೆತ್‍ಲ್ಲಿಂ ಬರ್ಪಾಂ, ಕಲಾ (ಕಾರ್ಟೂನಾಂ) ಆನಿ ಹೆರ್ ಪ್ರದರ್ಶನಾಂ ಚಡ್ ಲೊಕಾಕ್ ಆಂವಡ್ತಾತ್. ಬರ್ಪಾ ರುಪಾರ್ ವಿಶೇಸ್ ವರ್ದಿ/ಲೇಖನಾಂ/ಸಂಪಾದಕೀಯ್ ನ್ಹಯ್ ಆಸ್ತಾಂ ವಿನೋದ್, ವಿಡಂಬನಾಂ, ಅಂಕಣಾಂ, ಕವನಾಂ ಮುಖಾಂತ್ರ್ ತರ್, ಟಿ.ವಿ. ಮಾಧ್ಯಮಾಂನಿ ಹ್ಯಾಚ್ ಖಾತಿರ್ ವೆವೆಗ್ಳಿಂ ಕಾರ್ಯಕ್ರಮಾಂ ಪ್ರಸಾರ್ ಜಾತಾತ್. ಸಮಾಜೆಂತ್ ಅನೀತ್, ಅನ್ಯಾಯ್, ಅಕ್ರಮ್ ಚಡ್ತಾನಾ ಚಿಂತ್ಪಿ, ಸಾಹಿತಿ ಆನಿ ಗಣ್ಯ್ ವ್ಯಕ್ತಿಯೀ ತಾಳೊ ಉಬಾರ್ತಾತ್, ಪ್ರತಿಭಟನ್ ಕರ್ತಾತ್.

ತಶೆಂ ಮ್ಹಣೊನ್ ಹೆಂ ಪೂರಾ ಕೆಲ್ಲ್ಯಾನ್ ಸಂಸಾರ್ ಏಕ್ದಮ್ ಸುಧ್ರತಾ, ಬದಲ್ತಾ ಮ್ಹಣೊನ್ ನ್ಹಯ್. ಪುಣ್ ವಿಪ್ರೀತ್ ಅತರ್ವಣಾಂ, ಫಿತಿಸ್ಪಣಾಂ, ಅನಾಚಾರ್ ಚಲ್ತಾನಾ ತಾಕಾ ಖಾಡುಂ ಘಾಲುಂಕ್ ಹಿ ವ್ಯವಸ್ಥಾ ಕುಮ್ಕೆಕ್ ಯೆತಾ. ಕಿತೆಂಯೀ ಕೆಲ್ಯಾರೀ ಚಲ್ತಾ ಮ್ಹಣ್ಚೊ ಮನೋಭಾವ್ ಚಲನಾ ಮ್ಹಳ್ಳೊ ಸಂದೇಶ್ ಸಕ್ಡಾಂಕ್ ಪಾವ್ತಾ. ಪುಣ್, ಆಮ್ಚ್ಯಾ ಸಮಾಜೆಂತ್ ಅಸಲೆಂ ಸರ್ವ್ ನಾತ್‍ಲ್ಲ್ಯಾನ್ ಹಾಂಗಾ ಕಿತೆಂಯೀ ಕಶೆಂಯೀ ಕೆಲ್ಯಾರೀ ಚಲ್ತಾ ಮ್ಹಳ್ಳೆಂ ಧೋರಣ್ ಚಾಲ್ತೆರ್ ಆಸಾ.

ಜಶೆಂ ಸಾಹಿತ್ಯಾಂತ್ ವಿಮರ್ಸೊ (Literary Criticism) ಸಾಹಿತ್ಯಾಚೆಂ ಗುಣಮಟ್ಟ್ ಸಾಂಬಾಳುಂಕ್ ಉಪ್ಕಾರಾಕ್ ಪಡ್ತಾ, ತಶೆಂಚ್ ಹೆರ್ ಗಜಾಲಿಂಚೆರೀ ಅಸಲೆಂ ಕ್ರಮ್ ಫಾಯ್ದ್ಯಾಚೆಂ ಜಾತಾ. ಠಿಕಾ ಕರ್ಚೆಂ, ಸವಾಲ್ ಘಾಲ್ಚೆಂ, ವಿಮರ್ಸೊ-ವಿಶ್ಲೇಷಣ್ ಇತ್ಯಾದಿ ಕರ್ಚೆಂ ಅನಿವಾರ್ಯ್‍ಯೀ ವ್ಹಯ್. ಅಸಲಿ ಪ್ರಕ್ರಿಯಾ ಉಣೆಂಪಣ್-ವಾಯ್ಟ್ ಆಸ್‍ಲ್ಲೆಂ ಪಾರ್ಕುಂಕ್ ಆನಿ ತೆಂ ಸಾರ್ಕೆಂ ಕರುಂಕ್ ಆಧಾರ್ ದಿತಾ. ಖ್ಯಾತ್ ರಾಜಕಾರಣಿ, ಬ್ರಿಟನಾಚೊ ಪ್ರಧಾನಿ ಜಾವ್ನಾಸ್‍ಲ್ಲ್ಯಾ ವಿನ್‍ಸ್ಟನ್ ಚರ್ಚಿಲಾನ್, ‘ವಿಮರ್ಸೊ ಅನಿವಾರ್ಯ್. ವಿಮರ್ಸೊ ಮನ್ಶ್ಯಾಚ್ಯಾ ಕುಡಿಕ್ ಚಿಕಿತ್ಸಾ ದಿಲ್ಲೆಪರಿಂ…’ ಮ್ಹಳಾಂ. (ತೊ ಉಲ್ಲೇಖ್ ಆನಿ ವಿಮರ್ಸೊ ಮ್ಹಳ್ಯಾರ್ ಕಿತೆಂ, ಕಿತ್ಯಾಕ್ ಗರ್ಜ್ ಮ್ಹಳ್ಳೆ ವಿಶಿಂ ಚಲ್‍ಲ್ಲ್ಯಾ ಎಕಾ ವಿಚಾರ್‌ಗೋಷ್ಠಿಚಿ ವರ್ದಿ ವಾಚುಂಕ್ ಕ್ಲಿಕ್ ಕರಾ – ಮನ್ಶ್ಯಾ ಜೀವನಾಂತ್ ವಿಮರ್ಸೊ ಅನಿವಾರ್ಯ್: ದೊ.ಬಾ. ಮೆಲ್ವಿನ್ ಪಿಂಟೊ).

ಪುಣ್, ಮನ್ಶ್ಯಾಚಿ Tendency ಕಿತೆಂ ಮ್ಹಳ್ಯಾರ್, ಸಕ್ಡಾಂಕ್ ಹೊಗ್ಳಿಕ್ ಜಾಯ್. ಬರೆಂ ಕೆಲ್ಯಾರೀ ಚುಕೊನ್ ಪಡ್ಲ್ಯಾರೀ ಹೊಗ್ಳಿಕ್, ಶಾಭಾಸ್ಕಿ ಆಂವ್ಡೆಂವ್ಚೆಂಚ್ ಚಡ್. ಕಾಂಯ್ ತರೀ ಚೂಕ್, ಉಣೆಂಪಣ್ ದಾಕವ್ನ್ ದಿಲ್ಯಾರ್ ಜಾಯ್ತ್ಯಾಂಕ್ ತೆಂ ವರ್ಗನಾ. ಆಮ್ಚ್ಯಾ ಸಮುದಾಯಾಂತ್ ಅಸಲಿಚ್ ಪರಿಗತ್ ಚಡ್ ಆಸಾ. ಏಕ್ ಮೇಟ್ ಕಾಡ್‍ಲ್ಲ್ಯಾಕ್ಷಣ್ ಉಸೈನ್ ಬೋಲ್ಟಾಕ್ ಸರ್ ಕರ್ತಾತ್. ತಸಲ್ಯಾ ಪೊಕೊಳ್ ಹೊಗ್ಳಿಕೆಚ್ಯಾ ಜಡಾಯೆಕ್ ಚಡಾವತ್ ತಾಲೆಂತಾಂ ಉಂಚಾಯೆಕ್ ಪಾಂವ್ಚ್ಯಾ ಬದ್ಲಾಕ್ ಸುರ್ವೆರ್‌ಚ್ ವೊಮ್ತೆ ಪಡ್ತಾತ್! ಹಿ ಪರಿಗತ್ ಕೊಂಕ್ಣಿ ಸಾಹಿತ್ಯಾಂತ್‍ಯೀ ಆಮ್ಕಾಂ ಪಳೆಂವ್ಕ್ ಮೆಳ್ತಾ. ಹೆರ್ ಕ್ಷೇತ್ರಾಂಚಿ ಗತ್‍ಯೀ ಇತ್ಲಿಚ್.

ವ್ಯಕ್ತಿಂಚೆಂ ಸೊಡ್ಯಾಂ, ಆಮ್ಚ್ಯಾ ಸಂಘಟನಾಂಚಿ ಗಜಾಲ್‍ಯೀ ಅಶಿಚ್. ಹಿ ನಿಜಾಯ್ಕೀ ವಿಪರ್ಯಾಸಾಚಿ ಗಜಾಲ್. ಸಕ್ಡಾಂಪರಿಂ, ಆಮ್ಚ್ಯಾ ಸಂಘಟನಾಂಚ್ಯಾ ಕಾರ್ಬಾರಿಂಕ್‍ಯೀ ಹೊಗ್ಳಿಕ್, ಶಾಭಾಸ್ಚಿ, ಮೆಚ್ವಣಿ ಮಾತ್ರ್ ಪಸಂದ್. ಕರ್ಚೆಂ, ಕೆಲ್ಲೆಂ ಕಿತೆಂಯೀ ಆಸ್ಲ್ಯಾರೀ ತೆಂ ಉತ್ತೀಮ್ ಮ್ಹಣಜೆ ಮ್ಹಳ್ಳಿ ಅಪೇಕ್ಷಾ ಸೊಡ್ಲ್ಯಾರ್ ಸಾಧಕ್-ಬಾಧಕ್, ಸುಧ್ರಾಪ್, ಚೂಕ್ ತಿದ್ವಣ್ ಇತ್ಯಾದಿ ವಿಶಿಂ ಕೊಣೆಂಯೀ ಇಲ್ಲೆಶೆಂ ಉಚಾರ್ಲ್ಯಾರೀ ತಕ್ಷಣ್ ವಿರೋಧ್, ಆಕ್ಷೇಪ್ ಉಬ್ಜತಾ. ಉಪ್ರಾಂತ್ ತಿಚ್ ಪರಂಪರಾಗತ್ ಪಿಂರ್ಗೊಣಿ – ‘ಆಮಿ ಕರ್ಚೆಂ ಫಕತ್ ಮೊಗಾನ್, ಅಭಿಮಾನಾನ್. ಪುರ್ಸತ್ ನಾ, ವೇಳ್ ನಾ. ದುಡ್ವಾ ಖಾತಿರ್ ನ್ಹಯ್, ಆಮಿ ಫಕತ್ ಹವ್ಯಾಸಿ..!’ ಪುಣ್ ಮೆಚ್ವಣಿ, ಪಬ್ಲಿಸಿಟಿ, ಕ್ರೆಡಿಟ್, ಪುರಸ್ಕಾರ್ ಇತ್ಯಾದಿ ವ್ಹಡ್ ಮಟ್ಟಾರ್ ಮೆಳಜೆ ಮ್ಹಳ್ಳೆಂ ಧೋರಣ್. ಹಿ ಆಮ್ಚ್ಯಾಂಚಿ ವೃತ್ತಿಪರತಾ ಆನಿ ಬದ್ಧತಾ!

ಧಾರ್ಮಿಕ್ ಪ್ರಶ್ನಾತೀತ್; ತಾಂಚೊ ವಿಚಾರ್ ಕರಿನಾಯೆ?

ಆಯ್ಚ್ಯಾ ಕಾಳಾಕ್ ಹೆಂ ಸವಾಲ್ ಚಡ್ ಪ್ರಸ್ತುತ್ ಮಾತ್ರ್ ನ್ಹಯ್ ಅನಿವಾರ್ಯ್‍ಯೀ ಜಾಲಾಂ. ಕ್ರಿಸ್ತಾಂವ್ ಧರ್ಮಾಂತ್ ಧರ್ಮಾಚ್ಯೊ ಗಜಾಲಿ ಪ್ರಶ್ನಾತೀತ್ ಮ್ಹಳ್ಳಿ ಶಿಕವ್ಣ್ ಬಲಾತ್ಕಾರಾನ್ ಥಾಪ್ಲ್ಯಾ!? ತಾಚೊ ಮೂಳ್ ಇರಾದೊ ಕಿತೆಂಯೀ ಆಸ್‍ಲ್ಲೊ ಜಾಂವ್ಕ್ ಪುರೊ, ಪುಣ್ ವಾಸ್ತವಿಕ್ ಜಾವ್ನ್ ತಾಚೊ ದುರುಪಯೋಗ್‍ಯೀ ಬರೊಚ್ ಜಾಲಾ ಮ್ಹಳ್ಳೆಂ ಸರ್ವ್ ಜಾಣಾಂತ್. ಭಾವಾಡ್ತಾಚ್ಯಾ ಸಂಗ್ತಿಂಚೆರ್ ದುಬಾವ್ ಕರಿನಾಯೆ, ಸವಾಲ್ ವಿಚಾರಿನಜೊ ಇತ್ಯಾದಿ ಮ್ಹಣೊನ್ ಏಕ್‍ಪಕ್ಷೀಯ್ ಆನಿ ಸರ್ವಾಧಿಕಾರ್ಪಣಾಚೆಂ ಧೋರಣ್ ಸಬಾರ್ ಮ್ಹಣಿಯಾರಿಂನಿ ಆಧಾರ್ಲಾಂ. ಭಾವಾಡ್ತಾಚ್ಯಾ ಗಜಾಲಿಂಕ್ ಮ್ಹಣೊನ್ ಸುರ್ವಾತ್ ಕರುನ್ ಹರ್ಯೆಕ್ ಸಂಗ್ತಿಂಕ್‍ಯೀ ತೆಂಚ್ ರಾಜಾಂವ್/ನಿಯಮ್ ವಾಪಾರುನ್/ಥಾಪುನ್ ಫಾಯ್ದೊ ಉಟಯಿಲ್ಲೆಂಯೀ ನಾಂಗೀ?

ಖಂಯ್ಚಿ ಸಂಗತ್ ಪ್ರಶ್ನಾತೀತ್, ಗುಪಿತ್ ಆನಿ ಅಪಾರದರ್ಶಕ್ ಜಾವ್ನಾಸ್ತಾ, ತಿ ಅವೈಜ್ಞಾನಿಕ್, ಅನೈಸರ್ಗಿಕ್, ಅರಾಜಾಂವಿಕ್, ಅಮಾನವೀಯ್ ಆನಿ ಅನೈತಿಕ್‍ಚ್ ಮ್ಹಣಜೆ. ಆಮ್ಚ್ಯಾ ಧರ್ಮಾಂತ್ ಧಾರ್ಮಿಕಾಂಚೆಂಚ್ ರಾಜ್. ತಾಂಚೆಂಚ್ ಬೊಳ್ಕೆಂ ಆನಿ ತಾಂಚೆಂಚ್ ಕೊಳ್ಕೆಂ!? ತಾಚೆ ವಯ್ರ್ ಲೊಕಾಚಿಯೀ ಮತ್ ಕಶೆಂಗೀ ಮ್ಹಳ್ಯಾರ್ ಧಾರ್ಮಿಕಾಂಕ್, ಚಡ್ ಕರ್ನ್ ಯಾಜಕಾಂಕ್, ಸವಾಲ್ ಕರ್ನಜೊ, ತಾಣಿಂ ಕಿತೆಂಯೀ ಕೆಲ್ಯಾರೀ, ಉಲಯ್ಲ್ಯಾರೀ, ಕಶೆಂಯೀ ಚಲ್ಲ್ಯಾರೀ ಲೊಕಾನ್ ವಿಚಾರುಂಕ್ ನಜೊ, ತ್ಯಾ ವಿಶಿಂ ಮೊನೆಂಪಣ್ ಸಾಂಬಾಳಿಜೆ ಮಾತ್ರ್ ನ್ಹಯ್, ಕೊಣೆಂಯೀ ಕಿತೆಂಯೀ ವಿಚಾರ್ ಕೆಲ್ಯಾರ್, ಅಭಿಪ್ರಾಯ್ ಉಚಾರ್ಲ್ಯಾರ್ ಪಾಪ್/ಮಹಾಪ್ರಾಧ್ ಮ್ಹಣ್ ತೀರ್ಪ್ ದಿತಾತ್. ಹೆಂ ಏಕ್ ವ್ಯವಸ್ಥಿತ್ ಪ್ರೊಪಗಾಂಡಾ ಶಿವಾಯ್ ದುಸ್ರೆಂ ಕಿತೆಂಯೀ ನ್ಹಯ್. Accountability ಆನಿ ಪಾರದರ್ಶಕತಾ ನಾಕಾ ಮ್ಹಣ್ಚೆಂ ಖಂಡಿತ್ ಜಾವ್ನ್ ಪ್ರಾಮಾಣಿಕಾಂನಿ ನ್ಹಯ್!

ಅಸಲಿಂ ದಿಗ್ಬಂಧನಾಂ, ನಿರ್ಬಂಧ್ ಘಾಲ್ನ್ ಆಪ್ಲ್ಯಾ ಅವ್ಯವಹಾರ್, ಅನೈತಿಕ್ ಕೃತ್ಯಾಂ, ಸ್ವೇಚ್ಛಾಚಾರಾಚೆರ್ ನಿಯಂತ್ರಣ್ ಆನಿ ವಿರೋಧ್ ಉಬ್ಜನಾಶೆಂ ಕೊಣೆಂಯೀ ಕಿತ್ಯಾಕ್ ತರೀ ಪೆಚಾಡಿಜೆ? ಆತಾಂ ಕಾಂಯ್ ಕ್ರೂರ್ ರಾಯಾಂಚಿ ರಾಜ್ವಟ್ಕಿ ಜಾಂವ್, ಧಾರ್ಮಿಕ್ ವ್ಯವಸ್ಥೆಚೆಂ ರಾಜಕೀಯ್ ಆಡಳ್ತೆಂ (ಎಕಾ ಕಾಳಾರ್ ಯುರೋಪಾಂತ್ ಆಸ್‍ಲ್ಲೆಪರಿಂ) ಜಾಂವ್ ನಾ. ಹ್ಯಾ 21ವ್ಯಾ ಶೆಕ್ಡ್ಯಾಂತ್ ಆದ್ಲ್ಯೊ ಜಾಯ್ತ್ಯೊ ಗಜಾಲಿ ಖಲಾಸ್ ಜಾಲ್ಯಾತ್. ತರೀ, ತಸಲ್ಯಾ ಅಪ್ರಸ್ತುತ್ ರಾಜಾಂವ್, ನಿಯಮ್ ಆನಿ ಇನ್ಸ್‌ಟ್ರುಮೆಂಟ್ಸಾಂಕ್ ಘೆವ್ನ್ ಆಜೂನ್ ಲೊಕಾಚೆರ್ ಅಧಿಕಾರ್ ಚಲಂವ್ಚೆಂ ಮೂರ್ಖ್‍ಪಣ್ ಮಾತ್ರ್ ನ್ಹಯ್, ದಗಲ್ಬಾಜ್‍ಪಣ್‍ಯೀ ವ್ಹಯ್. ತೆಂ ಕೊಣೆಂಯೀ ಕೆಲ್ಯಾರೀ ಚೂಕ್.

ಅಸಲೆಂ ಧೋರಣ್ ಖಂಯ್ಚ್ಯಾಯ್ ಕಾರಣಾಂಕ್ ಲಾಗೊನ್ ಒಪುಂಕ್ ಜಾಯ್ನಾ. ಧಾರ್ಮಿಕಾಂನಿ ಹೆರಾಂ ಪ್ರಾಸ್ ಚಡ್ ಪ್ರಾಮಾಣಿಕ್, ಸರಳ್ ಆನಿ ನಿತಳ್ ಆಸಜೆ. ‘ಹೇಳುವುದು ಶಾಸ್ತ್ರ ಇಕ್ಕುವುದು ಗಾಳ’ ತಸಲೆಂ ನಡ್ತೆಂ ಧಾರ್ಮಿಕಾಂಕ್ ಬಿಲ್ಕುಲ್ ಸೊಭನಾ. ಅಸಲ್ಯೊ ಅಕ್ರಮ್ ವಾಟೊ ಧರ್ನ್ ಕೋಣ್ ಅನ್ಯಾಯ್, ಅಕ್ರಮ್ ಆಧಾರ್ತಾ ತಾಣಿಂ ಬದ್ಲಜೆ. ಧರ್ಮ್ ಕೆದ್ನಾಂಯ್ ಅನೀತೆನ್ ಚಲೊಂಕ್ ನಜೊ.

ಜಶೆಂ ನ್ಯಾಯ್, ನೀತ್, ಕಾನೂನ್ ಮ್ಹಳ್ಳ್ಯೊ ಗಜಾಲಿ ಸಕ್ಡಾಂಕ್ ಲಾಗು ಜಾತಾತ್ ತ್ಯೊ ಧಾರ್ಮಿಕಾಂಕ್‍ಯೀ ಲಾಗು ಜಾತಾತ್. ಫಕತ್ ಫಾಯ್ದೊ ಮಾತ್ರ್ ಜಾಯ್, ಪುಣ್ ಆಪ್ಣೆಂ ಚುಕ್ಲ್ಯಾರ್ ವೆಗ್ಳೆಂಚ್ ನಿಯಮ್ ಮ್ಹಳ್ಳೆಂ ಧೋರಣ್ ಸರ್ವ್ ಕಾಳಾಕ್ ಚಲನಾ! ಭೋವ್ ಮುಖ್ಯ್ ಜಾವ್ನ್ ಪ್ರಜಾಪ್ರಭುತ್ವಾಚಿಂ ಮೌಲ್ಯಾಂ ಆನಿ ಮನ್ಶ್ಯಾಪಣಾಚೆಂ ಮೋಲ್ ಆಪ್ಣಾಯ್ನಾತ್‍ಲ್ಲ್ಯಾ ಖಂಚ್ಯಾಯ್ ವ್ಯವಸ್ಥೆಕ್ ಮೋಲ್‍ಚ್ ನಾ ಮ್ಹಳ್ಳೆಂ ವಿಸ್ರನಾಯೆ.

ಸೆರ್ಮಾಂವ್ ಮ್ಹಳ್ಯಾರ್ ದೊಂಬರಾಟ?!

ಆನ್ಯೇಕ್ ಭೋವ್ ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್ ಸೆರ್ಮಾಂವಾಚ್ಯಾ ನಾಂವಾರ್ ಥೊಡ್ಯಾ ಯಾಜಕಾಂನಿ ಆಧಾರ್ಚೆಂ ಫಿತಿಸ್ಪಣ್. ಭೋವ್ ಥೊಡ್ಯಾಂಚ್ಯಾ ಹ್ಯಾ ಕುಕೃತ್ಯಾಂಕ್ ಲಾಗೊನ್ ಸಗ್ಳ್ಯಾ ಯಾಜಕ್ ವರ್ಗಾನ್ ನಾಲಿಸಾಯ್ ಭೊಗಿಜೆ ಪಡ್ತಾ. (ಹೆರಾಂ ಮುಖಾರ್ ಸಮುದಾಯಾಕೀ ಅಕ್ಮಾನ್). ಆದಿಂ ಹೆಂ ಸರ್ವ್ ದಾಖಲ್ ಜಾಯ್ನಾತ್‍ಲ್ಲೆಂ. ಪುಣ್ ಆತಾಂ ಸಗ್ಳ್ಯಾನಿತ್ಲ್ಯಾನ್ ಲೈವ್ ಆನಿ ರೆಕೊರ್ಡೆಡ್ ಟೆಲಿಕಾಸ್ಟ್ ಮ್ಹಣೊನ್ ದಾಖಲ್ ಜಾತಾ. ಥೊಡ್ಯಾಂನಿ ಸೆರ್ಮಾಂವಾಚ್ಯಾ ನಾಂವಾರ್ ದಾಕಂವ್ಚೆಂ ಪಿಶೆಂಪಣ್, ಉಚಾರ್ಚೆಂ ಮೂರ್ಖ್‍ಪಣ್ ಆನಿ ಪ್ರದರ್ಶನ್ ಕರ್ಚೊ ಪಿಸೊ ಅವ್ತಾರ್ ಆಕ್ಷೇಪಾರ್ಹ್ ಮಾತ್ರ್ ನ್ಹಯ್ ಅಕ್ಷಮ್ಯ್‌ಯೀ ವ್ಹಯ್.

ವಿಪರ್ಯಾಸ್ ಮ್ಹಳ್ಯಾರ್ ಅಸಲ್ಯಾಂಚ್ಯಾ ಕೀಳ್ ಅಭಿರುಚಿಕ್ ಸವಾಲ್ ಕರ್ತಲೊ ವಾ ತಸಲೆಂ ಹಳ್ಶಿಕ್‍ಪಣ್ ಆಡಾಂವ್ಕ್, ರಾವಂವ್ಕ್ ಕೊಣ್‍ಂಚ್ ಮುಖಾರ್ ಸರನಾಂಗೀ ಮ್ಹಳ್ಳಿ ಗಜಾಲ್ ವಿಜ್ಮಿತ್ಕಾಯೆಚಿ. ವಾ ಅಸಲ್ಯಾ ಆನಿ ಹೆರ್ ಪಾದ್ರಿಂಕ್ ಸಯ್ತ್ ಆಪ್ಣೆಂ ಕಶೆಂಯೀ ಚಲ್ಲ್ಯಾರ್, ಕಿತೆಂಯೀ ಉಲಯ್ಲ್ಯಾರ್ ಚಲ್ತಾ ಮ್ಹಳ್ಳೊ ಹಂಕಾರಿ ಮನೋಭಾವ್‍ಗೀ ಕಳಿತ್ ನಾ. ಅಸಲ್ಯಾ ಥೊಡ್ಯಾಂಚೆಂ ಅಸಹ್ಯ್ ವರ್ತನ್ ವಿಪ್ರೀತ್ ಮಟ್ಟಾಕ್ ಮುಂದರುನ್ ಗೆಲಾಂ. ತಾಂಚೆ ವ್ಹಡಿಲ್ ವಾ ದಿಯೆಸೆಜಿಚೆ ಮುಖೆಲಿ ತೆಂ ಮಾಂದ್ತಾತ್ ಆನಿ ತಾಂಕಾಂ ಅಸಲೆಂ ಮುಖಾರುನ್ ವ್ಹರುಂಕ್ ಗ್ರೀನ್ ಸಿಗ್ನಲ್ ದಿತಾತ್‍ಗೀ ಮ್ಹಣ್ ವಿಚಾರಿಜೆ ಪಡ್ಲಾಂ. ಅಸಲ್ಯಾಂನಿ ಆಪ್ಲ್ಯಾ ಕೀಳ್ ಸೆರ್ಮಾಂವಾಂ ವರ್ವಿಂ ಕ್ರಿಸ್ತಾಂವ್ ಧರ್ಮಾಕ್ ಲಜೆಕ್ ಘಾಲಾಂ. ಅಸಲೆಂ ಪಿಶೆಂಪಣ್ ಸೊಸುಂಕ್ ಜಾಯ್ನಾ ತಿತ್ಲೆಂ ವಾಡ್ಲಾಂ. ಪುಣ್ ಆಮ್ಚೆ ಧಾರ್ಮಿಕ್ ವರ್ಗಾಚೆ ಮ್ಹಣಿಯಾರಿ, ಭಾಗೆವಂತ್ ಕಾಸ್ತಾಚೆ ಮ್ಹಾತ್ಭಾರಿ ಕಿತ್ಯಾಕ್ ಹಾಚೊ ವಿರೋಧ್ ಕರಿನಾಂತ್?! ಮೌನಂ ಸಮ್ಮತಿ ಲಕ್ಷಣಂ…ಗೀ?

ಸಂಸಾರಾಂತ್ ಪ್ರಶ್ನಾತೀತ್ ಮ್ಹಳ್ಳೊ ಕೊಣೀ ನಾ. ವಿಪರ್ಯಾಸ್ ಮ್ಹಳ್ಯಾರ್ ಆಮ್ಚ್ಯಾ ಧಾರ್ಮಿಕ್ ವರ್ಗಾಚೆ ಸಂಸಾರಾಂತ್ಲ್ಯಾ ಸರ್ವ್ ಹೆರಾಂಕ್ ಸವಾಲಾಂ ಘಾಲ್ತಾತ್, ತಾಂಚೊ ವಿಮರ್ಸೊ ಕರ್ತಾತ್. (ಹಾಣಿಂ ಹೆರ್ ಧರ್ಮಾಚ್ಯಾಂಕ್ ಕಿತ್ಲ್ಯಾ ಕೀಳ್ ಥರಾನ್ ಮಸ್ಕಿರಿ/ನಿಂದಾ ಕೆಲ್ಲಿ ಮ್ಹಳ್ಳೆಂ ಎಕಾ ಯಾಜಕಾನ್‍ಂಚ್ ಆಯ್ಲೆವಾರ್ ಉಗ್ತ್ಯಾನ್ ಪಾಚಾರ್ಲಾಂ). ಹೆರಾಂಚ್ಯೊ ಚುಕಿ, ಉಣೆಂಪಣಾಂ ಉಕಲ್ನ್ ದಾಕಯ್ತಾತ್, ಖೆಳ್ಕುಳಾಂ ಕರ್ತಾತ್; ಪುಣ್ ತಾಂಕಾಂ, ಆಪ್ಲ್ಯಾ ವಾ ಆಪ್ಲ್ಯಾ ವರ್ಗಾಚ್ಯಾನಿಂ ಕೆಲ್ಲ್ಯಾ ಚುಕಿ, ಉಣೆಂಪಣಾಂಚೆರ್ ಕೊಣೆಂಯೀ ಬೋಟ್ ಜೊಕ್ಲ್ಯಾರ್ ಸೊಸುಂಕ್ ಜಾಯ್ನಾ! ಹೆಂ ಕಸಲೆಂ ಧೋರಣ್? ದಯಾಳ್ ದೆವಾಚ್ಯಾ ಪ್ರತಿನಿಧಿಂಕ್ ಕಿತ್ಯಾಕ್ ತಿತ್ಲೆಂಯೀ Intolerance!?

ಧಾರ್ಮಿಕ್ ಜಾಂವ್ ರಾಜಕೀಯ್ ಮುಖೆಲಿ, ಸಾಹಿತಿ ವಾ ಸಾಮಾಜಿಕ್ ಫುಡಾರಿ, ಕಲಾಕಾರ್, ಸಂಘಟಕ್ ವಾ ಕೊಣೀ – ಅಂತಿಮ್ ನ್ಹಯ್ ಹ್ಯಾ ಸಂಸಾರಾಂತ್. ಎಕಾ ಕಾಳಾರ್ ರಾಯಾಂಚ್ಯಾ ಮುಟಿಂತ್ ಆಸ್‍ಲ್ಲೆಂ ಭಾರತ್ ಆಜ್ ಪ್ರಜಾಪ್ರಭುತ್ವಾಚ್ಯಾ ತತ್ವಾಂ ಖಾಲ್ ಇತ್ಲೆಂ ಮುಖಾರ್ ಪಾವ್ಲಾಂಗೀ, ಪ್ರಧಾನ್ ಮಂತ್ರಿ, ಸರ್ಕಾರಾಚ್ಯೊ ಗಜಾಲಿ ರಾಷ್ಟ್ರಾಚ್ಯಾ ನಾಗರಿಕಾಂನಿ ಮಾಹೆತ್ ಹಕ್ಕಾಂ ಕಾಯ್ದ್ಯಾ ಪ್ರಕಾರ್ ವಿಚಾರ್ನ್/ಆಪ್ಣಾವ್ನ್ ಘೆವ್ಯೆತ್. ಸರ್ಕಾರಾಚಿ ಠಿಕಾ, ವಿರೋಧ್ ಆನಿ ಪ್ರತಿಭಟನ್ ಸಯ್ತ್ ಕರ್ಯೆತ್. ಪುಣ್ ಆಮ್ಚ್ಯಾ ಸಮುದಾಯಾಂತ್ ಮಾತ್ರ್ ಕೊಣೆಂಯೀ ಸವಾಲ್ ಕರುಂಕ್ ನಜೊ, ವಿಮರ್ಸೊ/ಚರ್ಚಾ ಕರುಂಕ್ ನಜೊ ಮ್ಹಳ್ಯಾರ್ ಕಶೆಂ? ತಾಚೆ ವಯ್ರ್, ಆಪ್ಣೆಂ ಮಾತ್ರ್ ಕೊಣಾಯ್ಚೊ (ಕಶೆಂಯೀ) ವಿಮರ್ಸೊ ಕರ್ಯೆತ್, ಆಪ್ಣಾಕ್ ಮಾತ್ರ್ ಕೊಣೆಂಯೀ ವಿಚಾರುಂಕ್‍ಚ್ ನಜೊ ಮ್ಹಳ್ಯಾರ್ ತೆಂ ಒಪುಂಕ್ ಜಾತಾಗೀ?

ಪ್ರಜಾಪ್ರಭುತ್ವಾಚಿಂ ವಾ ಧರ್ಮಾಚಿಂ ಉನ್ನತ್ ಮೌಲ್ಯಾಂ ಫಕತ್ ಭಾಷಣ್/ಸೆರ್ಮಾಂವ್ ದೀಂವ್ಕ್ ಸೀಮಿತ್ ನ್ಹಯ್ ಮ್ಹಳ್ಳೆಂ ಸಕ್ಡಾಂನಿ ಸಮ್ಜಜೆ. ಅನುಕೂಲಸಿಂಧು ರಾಜಕಾರಣ್ ವಾ ಅವ್ಕಾಸ್‍ವಾದಿ ಧೋರಣ್ ಚಡ್ ಕಾಳಾಕ್ ಬಾಳ್ವನಾ. ಮಂಗ್ಳುರಿ ಕೊಂಕ್ಣಿ ಕಥೊಲಿಕ್ ಸಮುದಾಯ್ ಬಳ್ವಂತ್ ಆನಿ ಸಮರ್ಥ್ ಜಾಂವ್ಕ್ ಹ್ಯಾ ಸಂಗ್ತಿಂನಿ ಪರಿಣಾಮ್‍ಕಾರಿ ಸುಧ್ರಾಪ್ ಆನಿ ಬದ್ಲಾವಣ್ ಗರ್ಜ್ ಆಸಾ. ತ್ಯಾ ದಿಶೆನ್ ಸಕ್ಡಾಂನಿ ಪ್ರಾಮಾಣಿಕ್ಪಣಿಂ ವಾವ್ರಿಜೆ.

-ಡೊನಾಲ್ಡ್ ಪಿರೇರಾ, ಸಂಪಾದಕ್, ಬುಡ್ಕುಲೊ ಇ-ಪತ್ರ್

Send Feedback to: budkuloepaper@gmail.com

Like us at: www.facebook.com/budkulo.epaper

The post ಸಾಮಾಜಿಕ್ ಜವಾಬ್ದಾರಿ: ಮಾಧ್ಯಮಾಂನಿ ಸವಾಲಾಂ ವಿಚಾರುಂಕ್ ಆನಿ ಠಿಕಾ ಕರುಂಕ್ ನಜೊ? appeared first on Budkulo.

ಇತ್ಲೆಂಚ್‍ಗೀ ವಾ ಆನಿಕೀ ಕಿತೆಂಯೀ ಉಗ್ಡಾಪೆಂ ಜಾಂವ್ಕ್ ಆಸಾ…!?

ಹೆಂ ಸವಾಲ್, ದುಬಾವ್ ವಾ ನಿರೀಕ್ಷಾ ಜಾಂವ್ಕ್ ಪುರೊ – ಲೊಕಾ ಥಂಯ್ ಆಸಾ. ಇತ್ಲೊ ಕಾಳ್ ರಾಕವ್ನ್ ಆತಾಂ ಏಕ್ ತಾರ್ಕಿಕ್ ಅಂತ್ಯ್ ಹ್ಯಾ ಪ್ರಕರಣಾಕ್ ಲಾಭಯ್ಲಾಂ ಮ್ಹಣ್ಯೆತ್. ದಕ್ಷ್ ಅಧಿಕಾರಿ ಕಾಪು ಸರ್ಕಲ್ ಇನ್ಸ್‌ಪೆಕ್ಟರ್ ಮಹೇಶ್ ಪ್ರಸಾದಾನ್ ಚತ್ರಾಯೆನ್ ಆನಿ ಹುಶಾರ್ಗಾಯೆನ್ ಕೇಜ್ ಹ್ಯಾಂಡಲ್ ಕೆಲ್ಯಾ ಮ್ಹಣ್ಚ್ಯಾಂತ್ ದುಬಾವ್ ನಾ. ಅನಾವಶ್ಯ್ ಪ್ರಚಾರ್ ಆನಿ ಗೊಂದೊಳಾಕ್ ಅವ್ಕಾಸ್ ದೀನಾಸ್ತಾನಾ ತಾಣೆಂ ತನ್ಖಿ ಚಲಯ್ಲ್ಯಾ.

ಪುಣ್ ಇತ್ಲೆಂ ಸರ್ವ್ ಘಡೊಂಕ್ ಫಕತ್ ಎಕಾ ವ್ಯಕ್ತಿಚಿಂ ಕರ್ತುಬಾಂ ಕಾರಣ್‍ಗೀ?

ಖಂಡಿತ್ ಪಾತ್ಯೆಂವ್ಕ್ ಜಾಯ್ನಾ.

ನಿಜಾಯ್ಕೀ ಬಾ. ಮಹೇಶ್ ಡಿಸೋಜಾಚೆಂ ಅಕಾಲಿಕ್ ಮರಣ್ ಕೊಣೆಂಯೀ ಅಪೇಕ್ಸುಂಕ್ ನಾತ್‍ಲ್ಲೆಂ. ತಾಚ್ಯಾ ಮರ್ಣಾ ವರ್ವಿಂ ಸಕ್ಡಾಂಕ್ ಆಘಾತ್ ಜಾಲಾ. ಪುಣ್ ತ್ಯಾ ಉಪ್ರಾಂತ್ ತಾಕಾ ಲಗ್ತಿಂ ಘಡ್‍ಲ್ಲೆಂ ಸರ್ವ್ ಫಕತ್ ತಾಚ್ಯಾ ಮರ್ಣಾಕ್ ಲಾಗೊನ್ ನ್ಹಯ್, ಬಗಾರ್, ತಾಚ್ಯಾ ಮರ್ಣಾ ಥಂಯ್/ವರ್ವಿಂ ಜಾಯ್ತ್ಯಾಂನಿ ಸಾದರ್ ಕೆಲ್ಲೆಂ ವರ್ತನ್, ನಡ್ತೆಂ, ಪ್ರತಿಕ್ರಿಯಾಚ್ ತಿತ್ಲ್ಯಾ ಸರ್ವ್ ಗೊಂದೊಳ್, ದುಬಾವ್ ಆನಿ ಘುಸ್ಪಡೆಕ್ ಕಾರಣ್ ಜಾಲ್ಲೆಂ. ವಿವಾದ್ ಉಬ್ಜಲ್ಲೊ ತ್ಯಾಚ್ ವರ್ವಿಂ.

ಪೊಲಿಸಾಂಚ್ಯಾ ವರ್ದೆಂತ್ ಕಿತೆಂ ಸರ್ವ್ ಆಟಾಪುನ್ ಆಸಾ ತೆಂ ಆನಿ ಕಳಜೆ. ಪುಣ್ ಸದ್ದ್ಯಾಕ್ ಎಕಾ ವ್ಯಕ್ತಿಕ್ ಸರಳಾಂ ಪಾಟ್ಲ್ಯಾನ್ ಧಾಡ್ಲಾಂ. ಹೆರ್ ಕಿತೆಂ ಜಾಂವ್ಕ್ ಆಸಾ ತಾಚಿ ಮಾಹೆತ್ ನಾ. ಬಾ. ಮಹೇಶಾನ್ ಜೀವ್ಘಾತ್ ಕೆಲ್ಲೆಂ ಆನಿ ತಾಕಾ ಪ್ರೇರಣ್ ತ್ಯಾ ವ್ಯಕ್ತಿನ್ ದಿಲ್ಲೆಂ ಜಾಲ್ಲ್ಯಾನ್ ತಾಕಾ ಕೈದ್ ಕೆಲಾಂ ಮ್ಹಣ್ಚೆಂ ಪ್ರಕರಣಾಕ್ ಏಕ್ ತಾರ್ಕಿಕ್ ಅಂತ್ಯ್ ದಿಲ್ಲೆಪರಿಂ ಜಾತಾ. ತಾಂತ್ರಿಕ್ ರಿತಿನ್ ತೆಂ ವ್ಹಯ್ ಮ್ಹಣ್ ಸಾಂಗ್ಯೆತ್. ಭೋವ್ಶಾ ತಿತ್ಲ್ಯಾರ್ ಹಿ ಕೇಜ್ ಅಂತ್ಯ್ ಜಾಯ್ತ್?

ಪುಣ್, ಬಾ. ಮಹೇಶಾನ್ ಜೀವ್ಘಾತ್ ಕೆಲ್ಲೆಂ ವ್ಹಯ್ ತರ್, ತೆಂ ಫಕತ್ ತ್ಯಾ ಎಕಾ ವ್ಯಕ್ತಿಕ್ ಲಾಗೊನ್ ಮಾತ್ರ್‌ಗೀ?

ಖಂಡಿತ್ ನ್ಹಯ್ ಆಸ್ಯೆತ್ ಮ್ಹಳ್ಳೆಂ ಫಕತ್ ಲೊಕಾಚೊ ದುಬಾವ್ ಮಾತ್ರ್ ನ್ಹಯ್; ಸಂಬಂಧ್ ಜಾಲ್ಲ್ಯಾಂಚೊ ಅವ್ತಾರ್, ವರ್ತನ್ ಸಗ್ಳೆಂ ತಾಕಾ ಆಸ್ಪದ್ ದಿತಾ ಮ್ಹಳ್ಳೆಂ ಸಂಸಾರ್ ಜಾಣಾಂ. ಆಪ್ಲ್ಯಾಚ್ ಎಕಾ ಪ್ರಮುಖ್ ವ್ಯಕ್ತಿಕ್ ಕೊಣೆಂಗೀ ಮಾರ್ನ್ ಘಾಲಾಂ ವಾ ಜೀವ್ಘಾತ್ ಕೆಲಾಂ ಮ್ಹಳ್ಳೆಂ ಆಸೊಂಕ್ ಪುರೊ, ತೆಂ ಕಳಿತ್ ಜಾತಾಸ್ತಾನಾ ದಾಕಯಿಲ್ಲೆಂ ನಡ್ತೆಂ, ಉಪ್ರಾಂತ್ ಚಲ್‍ಲ್ಲಿ ರೀತ್, ಉಚಾರ್‌ಲ್ಲೆಂ ಆನಿ ಆಧಾರ್‌ಲ್ಲೆಂ ಸರ್ವ್ ಪಳೆತಾನಾ ಕೊಣೆಂಯೀ ತರೀ ವಯ್ಲ್ಯಾಭಾರ್‌ಚ್  ‘ಹಾಂತುಂ ಕಿತೆಂಗೀ ಮಿಸ್ತೆರ್ ಲಿಪೊನ್ ಆಸಾ!’ ಮ್ಹಣ್ ನಿಚೆವಾಕ್ ಆಯಿಲ್ಲ್ಯಾಂತ್ ನವಾಲ್ ನಾ.

ಸವಾಲಾಂಚಿ ರಾಸ್, ದುಬಾವಾಂಚೊ ಘೊಸ್!

ಪಯ್ಲ್ಯಾನ್ ಪಯ್ಲೆಂ, 2019, ಅಕ್ತೋಬರ್ 11ವೆರ್ ಜೆದ್ನಾಂ ಶಿರ್ವಾಂ ಫಿರ್ಗಜೆಚೊ ಸಹಾಯಕ್ ವಿಗಾರ್ ಆನಿ ಡೊನ್ ಬೊಸ್ಕೊ ಸಿ.ಬಿ.ಎಸ್.ಇ. ಇಸ್ಕೊಲಾಚೊ ಪ್ರಿನ್ಸಿಪಾಲ್ ಬಾ. ಮಹೇಶ್ ಡಿಸೋಜಾ ಮರ್ಣಾಕ್ ವಳಗ್ ಜಾಲಾ ಮ್ಹಣ್ ಕಳ್ತಚ್ ಕಿತ್ಯಾಕ್ ದುಬಾವಾಸ್ಪದ್ ಕೃತ್ಯಾಂ ಘಡ್‍ಲ್ಲಿಂ? ತಾಚ್ಯಾಕೀ ಪಯ್ಲೆಂ, ಥೊಡ್ಯಾಂನಿ ಯೇವ್ನ್ ಬಾ. ಮಹೇಶ್ ಖಂಯ್ ಆಸಾ ವಾ ಗೆಲಾ ಮ್ಹಣ್ ವಿಚಾರ್ತಾನಾ, ಗಲಾಟೊ ಕರ್ತಾನಾ ನಿಜಾಯ್ಕೀ ಕಿತೆಂ ಘಡ್‍ಲ್ಲೆಂ? ತ್ಯಾ ಆನಿ ಉಪ್ರಾಂತ್ಲ್ಯಾ ಸಂದರ್ಭಾರ್ ನಿಜಾಯ್ಕೀ ಥಂಯ್ ಕಿತೆಂ ಘಡ್‍ಲ್ಲೆಂ ಆನಿ ತೆಂ ಕಶೆಂ ಜಾಲ್ಲೆಂ ಮ್ಹಳ್ಳ್ಯಾಚಿ ಖಬರ್ ಲಿಪೊನ್‍ಂಚ್ ಗೆಲ್ಯಾ ವಾ ಪೊಲಿಸಾಂಚ್ಯಾ ತನ್ಖೆಂತ್ ಭಾಯ್ರ್ ಪಡ್ತೆಲಿ? ಪಳೆಯಾಂ, ರಾಕೊನ್ ರಾವ್ಯಾಂ.

ಇತ್ಲ್ಯಾಕೀ, ಅಸಹಜ್ ಆನಿ ಅನಿರೀಕ್ಷಿತ್ ಮರ್ಣಾಕ್ ಎಕ್ಲೊ ನಾಂವಾಡ್ದಿಕ್, ತರ್ನೊ ಯಾಜಕ್ ಸಾಂಪಡ್‍ಲ್ಲ್ಯಾ ಉಪ್ರಾಂತ್ ಪೊಲಿಸಾಂಕ್ ಕಿತ್ಯಾಕ್ ಕಂಪ್ಲೈಂಟ್ ದಿಲೆಂಚ್ ನಾ? ತಾಚೆ ವಯ್ರ್, ತಾಚ್ಯಾ ಕುಟ್ಮಾಚೆರ್ ಕಿತ್ಯಾಕ್ ಆರೋಪ್ ಘಾಲ್ನ್ ಲೊಕಾಕ್ ಘುಸ್ಪಡಾಯಿಲ್ಲೆಂ? (ವಾ ಫಟಯಿಲ್ಲೆಂ?). ಅಸಹಜ್ ಮರಣ್, ತೆಂಯೀ ಎಕಾ ಸಾರ್ವಜನಿಕ್ ಸಂಸ್ಥ್ಯಾಚ್ಯಾ ಕಟ್ವಣಾಂತ್ ಘಡ್‍ಲ್ಲೆಂ, ಪಳೆವ್ನ್‍ಯೀ ಕಿತ್ಯಾಕ್ ದೂರ್ ದೀಂವ್ಕ್ ಇನ್ಕಾರ್ ಕೆಲ್ಲೆಂ? ಕಂಪ್ಲೈಂಟ್ ದೀನಾಸ್ತಾನಾ ರಾವೊಂಕ್ ಖಂಚ್ಯಾ ಸಕತ್ ವಾ ವ್ಯಕ್ತಿನ್ ಅಡ್ಕಳ್ ಹಾಡ್‍ಲ್ಲಿ?

ಜಾಪ್ ಕಳಿತ್ ನಾ. ಹ್ಯಾ ಸರ್ವ್ ಸವಾಲಾಂಕ್ ಪೊಲಿಸಾಂಚ್ಯಾ ತನ್ಖೆಂತ್ ಜಾಪಿ ಮೆಳ್ತಾತ್‍ಗೀ ವಾ ನಾ ಮ್ಹಳ್ಳೆಂ ರಾಕೊನ್ ಪಳೆಜೆ. ಪೊಲಿಸ್ ಅಧಿಕಾರಿ ಖಡಕ್ ಆಸಾ ಮ್ಹಳ್ಳೆಂ ಆಯ್ಕೊಂಕ್ ಮೆಳ್ತಾ, ತ್ಯಾ ವರ್ವಿಂ ತನ್ಖಿ ಸಾರ್ಕಿ ಜಾಲ್ಯಾ ಮ್ಹಣ್ ಭರ್ವಸೊ ಉದೆತಾ. ಸರ್ವ್ ಅಹಸಜ್ ಅನಿ ಅನಪೇಕ್ಷಿತ್ ವಾಡಾವಳಿಂ ಪಾಟ್ಲೊ ಮಿಸ್ತೆರ್ ಉಗ್ಡಾಪೊ ಜಾತಲೊ ಮ್ಹಳ್ಳೊ ಭರ್ವಸೊಯೀ ಆಸಾ.

ನಿಜಾಯ್ಕೀ ಹಾಸ್ಯಾಸ್ಪದ್ ಗಜಾಲ್ ಮ್ಹಳ್ಯಾರ್, ಬಾ. ಮಹೇಶ್ ದಿಸನಾ ಮ್ಹಣ್ ಕಳ್ತಾನಾ ತಾಕಾ ಸೊಧುಂಕ್ ‘ತೊಟಾಂತ್ ಸೊಧ್ಲೆಂ, ಬಾಂಯ್ತ್ ತಿಳ್ಳೆಂ’ ಮ್ಹಳ್ಳೆಂ ಸ್ಟೇಟ್‍ಮೆಂಟ್! ಅಸಲೆಂ ಉತಾರ್ ಕಿತ್ಯಾಕ್ ಆಯ್ಲಾಂ ಆಸ್ಯೆತ್ ಮ್ಹಳ್ಳೆಂಚ್ ವಿಚಿತ್ರ್. ಬಾ. ಮಹೇಶ್ ಚಡಾವತ್, ರಾತಿಚೆಂಯೀ, ತಾಚ್ಯಾ ಇಸ್ಕೊಲಾಚ್ಯಾ ದಫ್ತರಾಂತ್ ವಾವುರ್ತಾಲೊ. ಇಗರ್ಜೆಚ್ಯಾ ದಫ್ತರಾಂತ್ ಆನಿ ವಸ್ತೆಚ್ಯಾ ಕುಡಾಂತ್ ಜಾಂವ್ ತೊ ದಿಸನಾ ಮ್ಹಣ್ತಾನಾ ಎಕ್‍ಚ್ ಇಸ್ಕೊಲಾಚ್ಯಾ ತಾಚ್ಯಾ ಛೇಂಬರಾಕ್ ವಚಜೆ ಆಸ್‍ಲ್ಲೆಂ, ವಾ, ಚಡ್ ಸಲೀಸ್ ಜಾವ್ನ್ ತಾಚ್ಯಾ ಮೊಬೈಲಾಕ್ ಫೋನ್ ಕೆಲ್ಯಾರ್ ಜಾತೆಂ ಆಸ್‍ಲ್ಲೆಂ.

ಹ್ಯಾ ಅತ್ಯಾಧುನಿಕ್, ಸ್ಮಾರ್ಟ್ ಫೊನಾಂಚ್ಯಾ ಕಾಳಾರ್, ಉಟ್‍ಲ್ಲ್ಯಾ ಬಸ್‍ಲ್ಲ್ಯಾಕ್, ಲಾಗಿಂ ವಾ ಪಯ್ಸ್ ಆಸ್ಲ್ಯಾರೀ ಸಂಪರ್ಕ್ ಕರುಂಕ್ ಮೊಬೈಲ್ ಫೊನಾಂ ಆಸ್ತಾನಾ 25-30 ವರ್ಸಾಂ ಆದ್ಲ್ಯಾ ಕಾಳಾರ್ ಘಡ್‍ಲ್ಲೆಪರಿಂ ವರ್ತನ್ ಕೆಲ್ಲೆಂ ತರೀ ಕಿತ್ಯಾಕ್? ಏಕ್ ಮನಿಸ್ ತಾಚ್ಯಾ ಸದಾಂಚ್ಯಾ ಜಾಗ್ಯಾರ್ ಆಸ್ತಾ ಮ್ಹಳ್ಳೆಂ ಕಳಿತ್ ಆಸೊನೀ, ತಾಕಾ ಸೊಧುಂಕ್ ಮೊಬೈಲಾಚೊ ವಾ ತಾಚ್ಯಾ ಜಾಗ್ಯಾಚೊ ಉಡಾಸ್ ಜಾಯ್ನಾ ಮ್ಹಳ್ಯಾರ್ ಕಿತೆಂ ಅರ್ಥ್? ತಾಚೆ ವಯ್ರ್, ತಾಕಾ ಸೊಧುಂಕ್ ತೊಟಾಕ್ ವೆಚೆಂ, ಬಾಂಯ್ತ್ ಲೈಟ್ ಘಾಲ್ನ್ ಪಳೆಂವ್ಚೆಂ ಮ್ಹಳ್ಯಾರ್ ಕಿತೆಂ ಮಿಸ್ತೆರ್?

ಎಕಾ ಸಾಂಗಾತಿ ವ್ಯಕ್ತಿಕ್ ತೊಟಾಂತ್, ಬಾಂಯ್ತ್ ಸೊಧ್ಚೆಂ ಮ್ಹಳ್ಯಾರ್ ತೊ ತೆದೊಳ್‍ಚ್ ತೆಣೆಂ ಕಾಬಾರ್ ಜಾಲಾ (ಆಪ್ಣಾಸ್ತಕಿಂ ವಾ ಹೆರಾಂ ಥಾವ್ನ್) ಮ್ಹಳ್ಳೆಂ ಕಳಿತ್ ಆಸ್‍ಲ್ಲೆಂಗೀ ವಾ ತ್ಯಾ ವಿಶಿಂ ಹಿಶಾರೊ ಮೆಳ್‍ಲ್ಲೊಗೀ? ಎಕಾಚ್ ಕುಟ್ಮಾಪರಿಂ ಜಿಯೆವ್ನ್ ಆಸ್ಚ್ಯಾ ಘರಾಂತ್ ಆಪ್ತ್ ಸಾಂದೊ ಎಕ್ಲೊ ಖಂಯ್ ಗೆಲಾ ಆಸ್ಯೆತ್ ಮ್ಹಳ್ಳೆಂ ಪಾರ್ಕುಂಕ್ ಅಸಲಿ ವಾಟ್ ಕೊಣೀ ಧರ್ತಾತ್‍ಗೀ? ಕಿತೆಂಯೀ ಘಡ್ಬಡ್ ಜಾಲ್ಯಾ ಮ್ಹಣ್ ಮತಿಕ್ ಆಯಿಲ್ಲ್ಯಾ ತಕ್ಷಣ್ ಮೊಬೈಲಾಕ್ ಫೋನ್ ಕರಿಜೆ ಆಸ್‍ಲ್ಲೆಂ ವಾ ಧಾಂವೊನ್ ತಾಚ್ಯಾ ದಫ್ತರಾಕ್ ಪಾವಜೆ ಆಸ್‍ಲ್ಲೆಂ.

ಪುಣ್ ಭುರ್ಗ್ಯಾಂಕ್ ಕಾಣಿಯೊ ಸಾಂಗ್‍ಲ್ಲೆಪರಿಂ ಸ್ಟೇಟ್‍ಮೆಂಟ್ ದಿಲ್ಲೆಂ ಕೊಣೆಂ? ಆನಿ ಕಿತ್ಯಾಕ್? ತಶೆಂ ಘಡ್‍ಲ್ಲೆಂ ಸತ್ ವಾ ಫಟ್? ತಶೆಂ ಘಡ್‍ಲ್ಲೆಂ ತರ್ ತಾಕಾ ಕಸಲೆಂ ರಾಜಾಂವ್ ಆಸಾ? ಕಾರಣ್ ಆನಿ ಇರಾದೊ ಕಸಲೊ? ಅಸಲಿಂ ಪಾತ್ಯೆಂವ್ಕ್ ಜಾಯ್ನಾ ತಸಲಿಂ ಉತ್ರಾಂ ಕಿತ್ಯಾಕ್?

ನಿಜಾಯ್ಕೀ ವ್ಹಡ್ ಮಿಸ್ತೆರ್!

ಜಾಲೆಂ, ಉಪ್ರಾಂತ್ ಬಾ. ಮಹೇಶ್ ದೊರಿಯೆರ್ ಉಮ್ಕಳೊನ್ ಮೆಲಾ ಮ್ಹಣ್ ಕಳ್‍ಲ್ಲ್ಯಾಕ್ಷಣ್ ಕಿತೆಂ ಸರ್ವ್ ಕೆಲೆಂ? ಕಿತೆಂ ಘಡ್ಲೆಂ? ಖಂಡಿತ್ ಜಾವ್ನ್ ತಸಲೆಂ ಸನ್ನಿವೇಶ್ ಕೊಣಾಯ್ಕೀ ಜಿರಂವ್ಕ್, ಪಾತ್ಯೆಂವ್ಕ್ ಜಾಂವ್ಚೆಂ ನ್ಹಯ್. ಆಘಾತ್ ಜಾಂವ್ಚೆಂ ಸಹಜ್. ಥರ್ಥರೊನ್ ವೆಚೆಂಯೀ ಸಾಧ್ಯ್. ಪುಣ್ ತಸಲ್ಯಾ ಸಂದರ್ಭಾರೀ ಕಿತ್ಯಾಕ್ ದುಬಾವಾಸ್ಪದ್ ನಡ್ತೆಂ? ಕಿತ್ಯಾಕ್ ತಸಲ್ಯಾ ಭಿರಾಂಕುಳ್ ಪರಿಸ್ಥಿತೆಂತ್ ಫಿರ್ಗಜ್‍ಗಾರಾಂಕ್ ಆಪಯ್ಲೆಂ ನಾ? ಇಗರ್ಜೆಚಿ ಘಾಂಟ್ ವೊಡುನ್ ಅವ್ಗಡಾಚೊ ಸಂದೇಶ್ ಕಿತ್ಯಾಕ್ ದಿಲೊ ನಾ? (ತ್ಯಾಚ್ ಥೊಡ್ಯಾ ವೆಳಾ ಆದಿಂ ಘಾಂಟ್ ವೋಡ್ನ್ ಲೊಕಾಕ್ ಕಳಂವ್ಚೆ ವಿಶಿಂ ಎಕ್ಲ್ಯಾನ್ ಸಾಂಗ್‍ಲ್ಲೆಂ ತಿತ್ಲ್ಯಾ ವೆಗಿಂ ವಿಸರ್ಲೆಂ?).

ಇಗರ್ಜೆಕ್ ಲಾಗೊನ್ ಮ್ಹಳ್ಳೆಪರಿಂ ಸಬಾರಾಂಚಿಂ ಘರಾಂ ಆಸ್‍ಲ್ಲಿಂ. ತೆ ಮ್ಹಣ್ತಾತ್ ‘ಆಮ್ಕಾಂ ಸಕಾಳಿಂಚ್ ಖಬರ್ ಮೆಳ್‍ಲ್ಲಿ’ ಮ್ಹಣ್. ಫಕತ್ ಭೋವ್ ಥೊಡ್ಯಾಂಕ್ ಮಾತ್ರ್ ‘ಕಳಯಿಲ್ಲ್ಯಾಚೆಂ’ ಕಾರಣ್, ಉದ್ದೇಶ್ ಕಿತೆಂ? ಪಯ್ಲ್ಯಾನ್ ಪಯ್ಲೆಂ ಪೊಲಿಸಾಂಕ್ ಕಳವ್ನ್, ಫಿರ್ಗಜೆಚ್ಯಾ ಪ್ರಮುಖ್ ಜಣಾಂಕ್ ಸಾಂಗೊನ್ ಸಗ್ಳೆಂ ಪಾರದರ್ಶಕ್ ರಿತಿನ್ ಜಾಲಾಂಗೀ? ಆದಿಂ ತ್ಯಾಚ್ ಇಗರ್ಜೆಂತ್ ಏಕ್ ಇಮಾಜ್ ಫುಟ್‍ಲ್ಲ್ಯಾ ವೆಳಾರ್ ಅಪ್ರಾಧಿಂಕ್ ಧರುಂಕ್ ಪೊಲಿಸಾಂಚೆ ಪೆಟೆ ಯೇವ್ನ್ ವಾವ್ರಾಕ್ ಲಾಗ್‍ಲ್ಲೆ! ಪುಣ್ ಎಕಾ ಯಾಜಕಾಚೊ ಜೀವ್ ಇಮಾಜೆ ಪ್ರಾಸ್ ಕೀಳ್ ಜಾಲೊ?

ರಾತ್ ವಾ ದೊನ್ಪಾರ್ ಜಾಲ್ಯಾರ್ ಕಿತೆಂ, ಲೊಕಾಕ್ (ಘಾಂಟ್ ವ್ಹಾಜವ್ನ್ ವಾ ಫೊನಾರ್ ಎಕಾಮೆಕಾ ಕಳವ್ನ್) ಆಪಯಿಲ್ಲೆಂ ತರ್ ತೆ ಕಿತೆಂ ಕೊಣಾಯ್ಕೀ ಧರ್ನ್ ಲಗಡ್ ಕಾಡ್ತೆ ಮ್ಹಳ್ಳೆಂ ಭ್ಯೆಂಗೀ? ವಾ ಅಪ್ರಾಧಿ ಮನೋಭಾವ್? ಲೋಕ್ ತಸಲೆಂ ಸನ್ನಿವೇಶ್ ಜಿರಂವ್ಕ್ ಸಕ್ತೊ ನಾ ಮ್ಹಳ್ಳೆಂ ವ್ಹಯ್ ತರೀ, ಸರ್ವ್ ಪ್ರಕ್ರಿಯಾ ಪಾರದರ್ಶಕ್ ರಿತಿನ್ ಚಲ್ಲ್ಯಾ ಮ್ಹಣ್ ತಾಂಕಾಂ ಕಳಿತ್ ಜಾತೆಂ. ತಶೆಂ ಜಾಂವ್ಕ್ ಉದ್ದೇಶ್‍ಪೂರ್ವಕಿಂ ಸೊಡುಂಕ್ ನಾ? ತಶೆಂ ತರ್ ತಾಚೆಂ ಕಾರಣ್ ಕಿತೆಂ?

ಪೊಲಿಸ್ ಆಯಿಲ್ಲೆ ಮ್ಹಳ್ಳೆಂ ವ್ಹಯ್. ಉಪ್ರಾಂತ್ ಕೂಡ್ ದೆಂವವ್ನ್ ಪೋಸ್ಟ್‍ಮಾರ್ಟಮಾಕ್ ಸರ್ಕಾರಿ ಆಸ್ಪತ್ರೆಕ್ ವ್ಹರಿನಾಸ್ತಾನಾ ಖಾಸ್ಗಿ ಆಸ್ಪತ್ರೆಕ್ ಧಾಡ್‍ಲ್ಲೆಂ ಕಿತ್ಯಾಕ್? ತೊ ನಿರ್ಧಾರ್ ಕೊಣೆಂ ಘೆತ್‍ಲ್ಲೊ? ಆನಿಕೀ ಚಡ್ ಮಹತ್ವಾಚೆಂ ಮ್ಹಳ್ಯಾರ್, ತಸಲಿಂ ದುಬಾವಾಸ್ಪದ್ ವಾ ಅಸಹಜ್ ಮರ್ಣಾಂ ಸಂಭವ್ತಾನಾ ಫಿಂಗರ್ ಪ್ರಿಂಟ್ಸ್ ಕಾಡ್ನ್ ರುಜ್ವಾತಿ ಜಮಂವ್ಚಿ ಪ್ರಕ್ರಿಯಾ ಚಲ್ತಾ. ಶಿರ್ವಾಂತ್ ತಶೆಂ ಚಲ್ಲಾಂಗೀ? ಬಾ. ಮಹೇಶಾನ್ ಮರ್ಣಾಕ್ ವಳಗ್ ಜಾಲ್ಲೆಂ ಪ್ರಿನ್ಸಿಪಾಲಾಚೆಂ ಛೇಂಬರ್ ಕಿತ್ಯಾಕ್ ಸೀಜ್ ಕರುಂಕ್ ನಾ? ತಕ್ಷಣ್ ಜಾಯ್ಜೆ ಆಸ್‍ಲ್ಲಿಂ ಹಿಂ ಸರ್ವ್ ತುರ್ತ್ ಆನಿ ಅನಿವಾರ್ಯ್ ಕ್ರಮಾಂ ಕೆದ್ನಾಂ ಜಾರಿಯೆಕ್ ಆಯಿಲ್ಲಿಂ?

ದುಬಾವಾಸ್ಪದ್ ಮರಣ್ ಮ್ಹಣ್ತಾನಾ ತಾಚೆಂ ಕಾರಣ್ ಕಿತೆಂ ಮ್ಹಳ್ಳೆಂ ಸಕ್ಡಾಂಕ್ ಧೊಸ್ಚೆಂ ಸಹಜ್. ತಸಲ್ಯಾ ಸಂದರ್ಭಾಂನಿ ಫಕತ್ ಚುಕಿದಾರ್ ವಾ ಅಪ್ರಾಧಿ ಜಾವ್ನಾಸ್ಲೆಲ್ಯಾಂಚೆಂ ವರ್ತನ್ ಮಾತ್ರ್ ಸಂಶಯಾಸ್ಪದ್ ಆಸ್ತಾ. ತರ್ನ್ಯಾ ಪ್ರಾಯೆರ್ ತರೀ ಆಪ್ಲ್ಯಾ ಎಕೀನ್ ವಾವ್ರಾನ್ ಆನಿ ಖಾಲ್ತ್ಯಾ, ಮೊಗಾಳ್ ವ್ಯಕ್ತಿತ್ವಾನ್ ಜಾತ್, ಧರ್ಮಾಂಕ್ ಮಿಕ್ವೊನ್ ಸರ್ವ್ ಲೊಕಾಚೊ ಅಭಿಮಾನ್, ಗೌರವ್ ಆಪ್ಣಾಯಿಲ್ಲ್ಯಾ ಎಕಾ ಘನಾಧಿಕ್ ಯಾಜಕ್ ತಶೆಂ ಪ್ರಿನ್ಸಿಪಾಲ್ ಜಾವ್ನಾಸ್‍ಲ್ಲ್ಯಾ ವ್ಯಕ್ತಿಚೆಂ ಅಸಹಜ್ ಮರಣ್ ಘಡ್ತಾನಾ ಕಿತ್ಯಾಕ್ ಜಾಯ್ತ್ಯಾಂಚೆಂ ವರ್ತನ್, ನಡ್ತೆಂ ದುಬಾವಾಸ್ಪದ್ ಆಸ್‍ಲ್ಲೆಂ? ತಾಚ್ಯಾ ಪಾಟ್ಲೊ ನೀಜ್ ಮಿಸ್ತೆರ್ ಕಿತೆಂ?

ಮರ್ಣಾಚಿ ಖಬರ್ ಸಕ್ಡಾಂಕ್ ಆಘಾತಾಚಿ ಜಾಲಿ. ತಾಚ್ಯಾ ಲಾಗ್ಶಿಲ್ಯಾಂಕ್, ಮೊಗಾಚ್ಯಾಂಕ್ ತೆಂ ಜಿರಂವ್ಕ್ ಆಜೂನ್ ಸಾಧ್ಯ್ ಜಾಂವ್ಕ್ ನಾ. ಉಡುಪಿ ದಿಯೆಸೆಜಿಚೊ ಪಯ್ಲೊ ಯಾಜಕ್ ಮ್ಹಳ್ಳೊ ದಾಖ್ಲೊ ಆನಿ ಅಭಿಮಾನ್ ಆಸ್‍ಲ್ಲ್ಯಾ ತ್ಯಾ ಪ್ರತಿಭಾವಂತ್, ಸಾಧಕ್ ಯಾಜಕಾಚ್ಯಾ ಮರ್ಣಾ ಥಂಯ್ ಮಾತ್ರ್ ಕಿತ್ಯಾಕ್ ತಿತ್ಲಿಯೀ ನಿರ್ಲಕ್ಷ್ಯಾ ಪಳೆಂವ್ಕ್ ಮೆಳ್ಳಿ. ಅಂತಿಮ್ ಸಂಸ್ಕಾರ್ ಜಾಲ್ಯಾ ಉಪ್ರಾಂತ್ ತರೀ ಕಿತ್ಯಾಕ್ ಪೊಲಿಸಾಂಕ್ ದೂರ್ ದಿಲೆಂ ನಾ? ತ್ಯಾ ಶಿವಾಯ್, ಪ್ರಿನ್ಸಿಪಾಲ್ ಛೇಂಬರ್ ಧುವ್ನ್ ನಿತಳ್ ಕೆಲ್ಲೆಂ ಮ್ಹಣ್ ಆಯ್ಕೊಂಕ್ ಮೆಳ್ತಾ. ತಶೆಂ ಜಾಲಾಂ ವ್ಹಯ್ ತರ್, ತೆಂ ಕಶೆಂ ಸಾಧ್ಯ್ ಜಾಲೆಂ? ಪೊಲಿಸಾಂನಿ ಸೀಜ್ ಕರಿಜೆ ಜಾಲ್ಲಿ ಸುವಾತ್ ಕಶೆಂ ಸ್ವಾಧೀನಾಕ್ ಘೆತ್ಲಿ ಆನಿ ತಶೆಂ ಕೆಲ್ಲ್ಯಾನ್ ಸಂಭವನೀಯ್ ರುಜ್ವಾತಿ ನಾಸ್ ಜಾಂವ್ಕ್ ನಾಂತ್‍ಗೀ?

ದೀಸ್ ಪಾಶಾರ್ ಜಾಲ್ಲೆಪರಿಂ ಲೊಕಾ ಥಂಯ್ ದುಬಾವಾಚೊ ಮುರ್ಮುರೊ ಚಡೊನ್‍ಂಚ್ ಗೆಲೊ. ಎಕಾ ಆಯಿನ್ನ್ ಸಂದರ್ಭಾರ್ ತಾಂಚ್ಯಾ ಸವಾಲಾಂಚೊ ಕಾಟ್ ತುಟ್ಲೊ. ತೆದ್ನಾಂ ತರೀ ಸೂಕ್ತ್ ಜಾಪ್, ಪ್ರತಿಕ್ರಿಯಾ ಮೆಳ್ಳಿ ನಾ. ಬಗಾರ್ ವ್ಯತಿರಿಕ್ತ್ ಘಡ್ಲೆಂ. ಪಾದ್ರಿಚ್ಯಾ ಕುಟ್ಮಾಚ್ಯಾಂನಿಂಚ್ ತನ್ಖಿ ಕರ್ಚೆಂ ನಾಕಾ ಮ್ಹಳಾಂ ಮ್ಹಣ್ ‘ಉಚಾರ್ಲೆಂ’, ಪುಣ್ ತೆಂ ಸತ್ ನ್ಹಯ್ ಮ್ಹಣ್ ಕುಟ್ಮಾಚ್ಯಾಂನಿ ಸ್ಪಷ್ಟೀಕರಣ್ ದೀಜೆ ಪಡ್ಲೆಂ! ಅಶೆಂ ಕಿತ್ಯಾಕ್ ಜಾಲೆಂ? ಕಿತ್ಯಾಕ್ ಲೊಕಾಕ್ ಘುಸ್ಪಡ್, ಗೊಂದೊಳಾಂತ್ ಫಿಚಾರ್ ಕೆಲೆಂ? ತೆಂ ವಾಟ್ ಚುಕಂವ್ಚೆಂ ವಾ ಫಟಂವ್ಚೆಂ ಪ್ರಯತನ್ ನ್ಹಯ್ ಮ್ಹಣ್ಚೆಂ ಕಶೆಂ?

ಹ್ಯಾ ಸವಾಲಾಂಕ್, ದುಬಾವಾಂಕ್ ಅಂತ್ಯ್ ನಾ. ಕಾರಣ್ ಸೀದಾ ಆನಿ ಸರಳ್ – ಸಂಬಂಧಿತಾಂಚಿ ಪ್ರತಿಕ್ರಿಯಾ. ಗಿಲ್ಟಿ ನಾತ್‍ಲ್ಲ್ಯಾಂನಿ, ಚೂಕ್ ಕರುಂಕ್ ನಾತ್‍ಲ್ಲ್ಯಾಂನಿ ಖಂಚ್ಯಾಯ್ ರಿತಿನ್ ಭಿಯೆಂವ್ಕ್, ಕಾವ್ಜೆಂವ್ಕ್ ಅವ್ಕಾಸ್ ಆಸನಾ. ಆಪ್ಲೊಚ್ ಖಾಸಾ ಏಕ್ ಮನಿಸ್ ಮೆಲಾ ಮ್ಹಳ್ಳೆಂ ದುಖ್, ಆಘಾತ್ ಆನಿ ಖಂತ್ ವ್ಯಕ್ತ್ ಕರ್ಚ್ಯಾ ಪ್ರಾಸ್ ಚಡ್, ಚುಕಾರಿ ಮಾರ್ಚೆಂ ವಾ ವಾಟ್ ಚುಕಂವ್ಚೆಂ ಪ್ರಯತ್ನ್ ಚಲ್ಲಾಂ ಮ್ಹಣ್ ಘಡ್‍ಲ್ಲಿಂ ಘಡಿತಾಂ ಸಾಕ್ಸ್ ದಿತಾತ್ ನ್ಹಯ್ಗೀ? ಅಶೆಂ ಕಿತ್ಯಾಕ್ ಘಡ್ಲೆಂ? ತಾಂಕಾಂ ಅಪ್ರಾಧಿ ಮನೋಭಾವ್ ಧೊಸ್ಲೊ ಆಸ್ಯೆತ್…?!

ಆಖೇರಿಕ್, ಲೊಕಾಚೆಂ ಪ್ರತಿಭಟನ್ ಆನಿ ಉದೆಲ್ಲ್ಯಾ ದಬಾವಾಕ್ ಲಾಗೊನ್, ಉಡುಪಿ ಎಸ್.ಪಿ.ನ್ ಕಾಪು ಸರ್ಕಲ್ ಇನ್ಸ್‍ಪೆಕ್ಟರಾಕ್ ಪ್ರಕರಣಾಚಿ ತನ್ಖಿ ವಹಿಸುನ್ ದಿಲಿ. ಸುದೀರ್ಘ್ ವಿಚಾರಣ್ ಚಲ್ಲಾಂ, ಜಾಯ್ತ್ಯಾಂಚೆಂ ಸ್ಟೇಟ್‍ಮೆಂಟ್ ದಾಖಲ್ ಕೆಲಾಂ. ವಿಶೇಸ್ ಕರ್ನ್ ಬಾ. ಮಹೇಶಾಚ್ಯಾ ಮೊಬೈಲ್ ಫೊನಾಚೊ (ಆನಿ ಲ್ಯಾಪ್‍ಟೊಪಾಚೊ) ಫೊರೆನ್ಸಿಕ್ ಲ್ಯಾಬ್ ರಿಪೋರ್ಟ್ ಯೇಂವ್ಕ್ ತಡವ್ ಜಾಲ್ಲ್ಯಾನ್ ಕಿತೆಂ ಜಾಯ್ತ್, ತನ್ಖಿ ಕಶೆಂ ರಾವತ್ ಮ್ಹಳ್ಳೆಂ ಕುತೂಹಲ್ ಲೊಕಾಕ್ ಆಸ್‍ಲ್ಲೆಂ. ಸಾಡೆ ಚಾರ್ ಮಹಿನ್ಯಾಂ ಉಪ್ರಾಂತ್, ರುಜ್ವಾಂತಿಂಚ್ಯಾ ಬಳಾನ್ ಖಬ್ರೆ ವಿಣೆಂ ಎಕಾ ಆರೋಪಿಕ್ ಪೊಲಿಸಾಂನಿ ಕುಡಾಯ್ಲಾಂ.

ಪ್ರಕರಣ್ ಇತ್ಲ್ಯಾರ್ ಸಂಪ್ತೆಲೆಂ ವಾ ಆನಿಕೀ ಕಿತೆಂಯೀ ಟ್ವಿಸ್ಟ್ ಆಸಾ ತೆಂ ಫಕತ್ ರಾಕೊನ್ ಪಳೆಜೆ. ಸಾಧ್ಯಾ ಲೊಕಾಕ್‍ಚ್ ಅಸಲಿಂ ಸವಾಲಾಂ ಧೊಸ್ತಾನಾ ಹೆಳ್‍ಲ್ಲ್ಯಾ, ವೃತ್ತಿಪರ್ ಪೊಲಿಸ್ ಅಧಿಕಾರಿಂಕ್‍ಯೀ ತಿಂ ಉದೆಲ್ಯಾಂತ್ ಆಸ್ತೆಲಿಂ. ನೀಜ್ ಅಪ್ರಾಧಿಂಕ್ ಸಾವುದ್ ಮಾಂಯ್ ಖಂಡಿತ್ ಶಿಕ್ಷಾ ದಿತೆಲಿ ಮ್ಹಳ್ಳಿ ಪಾತ್ಯೆಣಿ ತಿಚ್ಯಾ ಭಕ್ತಿಕಾಂಚಿ. ತಶೆಂ ಜಾತೆಲೆಂ ಮ್ಹಳ್ಳೊ ಭರ್ವಸೊ ಸಮೇಸ್ತಾಂಚೊ.

Disclaimer: ಹ್ಯಾ ಲೇಖನಾಂತ್ ವ್ಯಕ್ತ್ ಕೆಲ್ಲೆ ವಿಚಾರ್ ಪ್ರಕರಣಾಕ್ ಲಗ್ತಿಂ ಘಡ್‍ಲ್ಲ್ಯಾ ಘಡಿತಾಂಚೆರ್ ಹೊಂದ್ವೊನ್ ಆಸಾತ್. ಸಾಕ್ಷಿ, ರುಜ್ವಾತಿಂ ಸಂಗಿಂ ಸಾರ್ವಜನಿಕಾಂಕ್‍ಯೀ ಲಭ್ಯ್ ಜಾಲ್ಲ್ಯಾ ಸಂಗ್ತಿಂಚೆರ್ ಹಿಂ ಸವಾಲಾಂ, ಜಿಂ ಸಬಾರಾಂಚಿಂ; ತಿಂ ಆಮಿಯೀ ವ್ಯಕ್ತ್ ಕೆಲ್ಯಾಂತ್. ಶಿವಾಯ್ ಕೊಣೀ ವ್ಯಕ್ತಿ ವಾ ಸಂಸ್ಥ್ಯಾ ವಿರೋಧ್ ಹೆ ವಿಚಾರ್ ಖಂಡಿತ್ ನ್ಹಯ್. ಕೊಣಾಯ್ಕೀ ಬೋಟ್ ಜೊಕ್ಚೊ ವಾ ಚುಕಿದಾರ್ ಮ್ಹಣ್ಚೊ ಉದ್ದೇಶ್ ಆಮ್ಕಾಂ ನಾ, ಆನಿ, ಆಮಿ ತಶೆಂ ಬಿಲ್ಕುಲ್ ಕರುಂಕ್ ನಾ. ಜರ್ ಕೊಣಾಯ್ಕೀ ಗಳ್ಯಾಂತ್ ಲಾಸ್ತಾ ತರ್ ತೆಚ್ ತಾಕಾ ಪೂರ್ಣ್ ಜವಾಬ್ದಾರ್.

Send Feedback to: budkuloepaper@gmail.com

Like us at: www.facebook.com/budkulo.epaper

Visit and Watch Videos in our YouTube Channel

The post ಫಾ. ಮಹೇಶಾಚೆಂ ಅಕಾಲಿಕ್ ಮರಣ್: ಏಕ್ ಮಿಸ್ತೆರ್ ಉಗಡ್ಲೊ; ಹೆರ್ ಆಜೂನ್ ಲಿಪೊನ್‍ಂಚ್ ಉರ್ಲ್ಯಾತ್!? appeared first on Budkulo.

ಸತ್ ಸಾಂಗ್ಚೆಂ ತರ್, ಕೊಂಕ್ಣಿ ಕಥೊಲಿಕ್ ಸಮಾಜೆಂತ್ ಪತ್ರಿಕೋದ್ಯಮಾಚೆಂ ವಾತಾವರಣ್ ಬಿಲ್ಕುಲ್ ನಾ. ಕೊಂಕ್ಣೆಂತ್ ಪತ್ರಾಂ ದರಬಸ್ತ್ ಆಸ್‍ಲ್ಲಿಂ, ಆಸಾತ್ ತರೀ, ತಾಕಾ ಜರ್ನಲಿಸಂ ಮ್ಹಣ್ಚೆಪರಿಂ ನಾ. ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣಿ ಪತ್ರಾಂ ಮ್ಯಾಗಜಿನ್ ರುಪಾರ್ ಆಸ್ಚಿಂ. ದಿಸಾಳಿಂ ಹಾಂಗಾ ನಾಂತ್. ಕೊಂಕ್ಣಿ ಪತ್ರಾಂನಿ ಜಾಯ್ತೊ ವಾವ್ರ್ ಕೆಲಾ ತರೀ, ಸೀಮಿತತಾ ಆಸ್‍ಲ್ಲ್ಯಾನ್, ಖರೆಂ ಜರ್ನಲಿಸಂ ಕೊಂಕ್ಣೆಂತ್ ಪಳೆಂವ್ಕ್ ಮೆಳನಾ.

ಸಮಾಜೆಂತ್ಲಿಂ, ಹೆರ್ ಭಾಶೆಂತ್ಲಿಂ ಪತ್ರಾಂ (ದಿಸಾಳಿಂ ಅನಿ ಹೆರ್) ಆಮ್ಚೊ ಜಾಯ್ತೊ ಲೋಕ್ ವಾಚ್ತಾ, ಪಳೆತಾ. ಸಾರಸ್ವತ್ ಕೊಂಕ್ಣ್ಯಾಂನಿ ಕೊಂಕ್ಣೆಂತ್ ವಾವ್ರ್ ಕರ್ಚ್ಯಾ ಬದ್ಲಾಕ್ ಕನ್ನಡಾಂತ್ ಪತ್ರಿಕೋದ್ಯಮ್ ಶೆತಾಂತ್ ಸಾಧನಾಂ ಕೆಲಿಂ. ಕೊಂಕ್ಣಿ ಕ್ರಿಸ್ತಾಂವಾಂಕ್ ಅಪ್ಲೊ ಧರ್ಮ್, ಭಾಸ್ ಇತ್ಯಾದಿಂ ವಿಶಿಂ ಚಡ್‍ಚ್ ಅಭಿಮಾನ್. ದೆಕುನ್ ತಾಣಿಂ ಕೊಂಕ್ಣೆಂತ್‍ಚ್ ಕಿತೆಂಯೀ ಕರ್ಚೆಂ!

ಪುಣ್ ಹಕೀಗತ್ ಪಾರ್ಕಿಲ್ಯಾರ್, ಫಕತ್ ಕೊಂಕ್ಣೆಂತ್ ಉರ್‌ಲ್ಲೆಂ ಕ್ರಿಸ್ತಾಂವ್ ಲೊಕಾಚೆಂ ವ್ಹಡ್‍ಪಣ್ ನ್ಹಯ್, ಬಗಾರ್ ಹೆರ್ ಭಾಶೆಂನಿ ವಾವ್ರ್ ಕರುಂಕ್ ತಾಂಕ್ ನಾತ್‍ಲ್ಲ್ಯಾಚಿ ರುಜ್ವಾತ್ ಮ್ಹಣ್ ಕಳ್ತಾ. ವ್ಹಯ್. ಆಮ್ಚ್ಯಾ ಚಡಾವತ್ ಸಂಗ್ತಿಂಕ್ ಗುಮಾನ್ ದಿಲ್ಯಾರ್ ಹಾಚಿ ಅಸ್ಲಿಯತಾ ಕಳ್ತಾ. ಸಾಹಿತ್ಯ್ ಜಾಂವ್ ಪತ್ರಿಕೋದ್ಯಮ್, ಸಂಘಟನಾಂ ಜಾಂವ್ ರಾಜಕೀಯ್, ಕಿತೆಂಯ್ ತೆಂ ಜಾಂವ್, ಆಮ್ಚೆಂ ಕಿತೆಂ ಆಸ್ಲ್ಯಾರೀ ಆಮ್ಚ್ಯಾಚ್ ಸಮುದಾಯಾಚ್ಯಾ ಪರಿಧಿ ಭಿತರ್ ಮಾತ್ರ್, ಶಿವಾಯ್ ತ್ಯಾ ಗಡಿ, ಮೆರೆ ಭಾಯ್ರ್ ವೆಚಿ ತಾಂಕ್, ಧಯ್ರ್ ಆನಿ ಅಪೇಕ್ಷಾ ಸಯ್ತ್ ಆಮ್ಚ್ಯಾಂಕ್ ಬಿಲ್ಕುಲ್ ನಾ.

ಪತ್ರಿಕೋದ್ಯಮ್ ವಾ ಜರ್ನಲಿಸಂ ಶೆತ್ ಹಾಕಾ ದೃಷ್ಟಾಂತ್. ಆಮ್ಚೆ ಕಾಂಯ್ ಬರವ್ಪಿ ಆನಿ ಪತ್ರಾಂಚೆ ಮನಿಸ್ ಕೊಂಕ್ಣೆಂತ್‍ಚ್ ಲೊಳ್ತಾತ್ ತರ್ ತಾಂಕಾಂ ಕೊಂಕ್ಣೆಂತ್ ಶಿವಾಯ್ ಹೆರ್ ಕಡೆನ್ ತೋಂಡ್ ದಾಕಂವ್ಕ್ ಸಯ್ತ್ ಶ್ಯಾಥಿ ನಾ ಆಸ್ಚಿ ಮ್ಹಳ್ಳೆಂ ನೀಜ್ ಕಾರಣ್. ಹಾಂಗಾ ಮಾತ್ರ್ ಕಿತೆಂಯೀ ಕೆಲ್ಯಾರೀ, ಕಶೆಂಯ್ ಆಸ್ಲ್ಯಾರೀ ಚಲ್ತಾ. ವಿಚಾರ್ತಲೊಯೀ ನಾ. ಪುಣ್, ಕಿತ್ಲೆಂ ಉತಳ್ ಕೆಲ್ಯಾರೀ/ದಿಲ್ಯಾರೀ ಶಾಭಾಸ್ಕಿ ಆನಿ ಪ್ರೋತ್ಸಾಹ್ ಮೆಳ್ತಾ. ನಿಜಾಯ್ಕಿ ಭಾಗಿ ತೆ!

ಕಾಂಯ್ ಥೊಡ್ಯಾ ವಾಜ್ಭಿ ಕಾರಣಾಂಕ್ ಲಾಗೊನ್ (ಪುಣ್ ಚಡಾವತ್ ಅಪಕ್ವ್ ರಾಜಾಂವಾಂ ವರ್ವಿಂ) ಆಮ್ಚ್ಯಾ ಸಮುದಾಯಾನ್, ವ್ಹಡ್ ಮಟ್ಟಾರ್ ಕನ್ನಡ ಪತ್ರಿಕೋದ್ಯಮಾಕ್ ಎಂಟ್ರಿ ಮಾರ್‌ಲ್ಲಿ. 1997 ಇಸ್ವೆಂತ್ ಮಂಗ್ಳುರ್ಚೊ ಬಿಸ್ಪ್ ಅಂತರ್ತಾನಾ ಹ್ಯಾ ಗಾಂವ್ಚ್ಯಾ ದಿಸಾಳ್ಯಾನ್ ತಿ ಖಬರ್ ವ್ಹಡ್ ರಿತಿನ್ ಫಾಯ್ಸ್ ಕರುಂಕ್ ನಾ ಮ್ಹಣೊನ್ ವಿಳಾಪ್ ದಿಲೊ ಥೊಡ್ಯಾಂನಿ (ವ್ಯಂಗ್ಯ್ ಮ್ಹಳ್ಯಾರ್ ಆಜೂನ್ ತಸಲೆಂಚ್ ರುದಾನ್ ಆಮ್ಚೆಂ!). ಅಶೆಂ ತೆಂ ರುದಾನ್ ಉದೆಲೆಂ ಆನಿ ಆಮ್ಚೆಂಚ್ ಏಕ್ ಕನ್ನಡ ದಿಸಾಳೆಂ ಜಾಯ್ ಮ್ಹಣ್ ರಡ್ಣೆಂ ಬಳ್ ಜಾಲೆಂ. ತಶೆಂ ಸುಪ್ತ್ ಆಶಾ ಉಜ್ವಾಡಾಕ್ ಆಯ್ಲಿ ಆನಿ ಕ್ರಿಸ್ತಾಂವಾಂಚೆಂ ದಿಸಾಳೆಂ ‘ಜನವಾಹಿನಿ’ ಪತ್ರ್ ಸುರ್ವಾತ್ ಜಾಲೆಂ.

ಪುಣ್ ಸಬಾರಾಂನಿ ಚಿಂತ್‍ಲ್ಲೆಪರಿಂ ಮಂಗ್ಳುರಿ ಕ್ರಿಸ್ತಾಂವಾಂನಿ ಸುರ್ವಾತ್ ಕೆಲ್ಲೆಂ ಪಯ್ಲೆಂ ಕನ್ನಡ ದಿಸಾಳೆಂ ‘ಜನವಾಹಿನಿ’ ನ್ಹಯ್! ಕಿತ್ಲ್ಯಾಗೀ ವರ್ಸಾಂ ಆದಿಂ ಆಮ್ಚ್ಯಾಚ್ ಎಕ್ಲ್ಯಾನ್ ಕನ್ನಡ ಪತ್ರ್ ‘ಕನ್ನಡವಾಣಿ’ ಮಂಗ್ಳುರಾಂತ್ ಚಾಲು ಕೆಲ್ಲೆಂ. ತೆಂ ಸುರ್ವಾತ್ ಕೆಲ್ಲೆಂ ಕೊಂಕ್ಣೆಂತ್ ಅತ್ಯದ್ಭುತ್ ಸಾಹಿತ್ಯ್ ನಿರ್ಮಾಣ್ ಕೆಲ್ಲ್ಯಾ ವಿ.ಜೆ.ಪಿ. ಸಲ್ಡಾನ್ಹಾನ್. 1950 ಇಸ್ವೆಂತ್ ಆಪ್ಲ್ಯಾ 25 ವರ್ಸಾಂ ಪ್ರಾಯೆರ್ ತಾಣೆಂ ಬೊಂಬೈಂತ್ ‘ಪಯ್ಣಾರಿ’ ಕೊಂಕ್ಣಿ ಹಫ್ತ್ಯಾಳೆಂ ಸುರು ಕೆಲ್ಲೆಂ. (‘ಕನ್ನಡವಾಣಿ’ ಪತ್ರಾ ವಿಶಿಂ ಚಡ್ ಮಾಹೆತ್ ಮೆಳನಾ. ಮಂಗ್ಳುರಾಂತ್ಲೆಂ ಆನ್ಯೇಕ್ ಫಾಮಾದ್ ಕನ್ನಡ ದಿಸಾಳೆಂ ‘ನವಭಾರತ’ ಸಾರಸ್ವತ್ ಕೊಂಕ್ಣ್ಯಾಂನಿ ಸುರು ಕೆಲ್ಲೆಂ ಮ್ಹಣ್ತಾತ್. ವೀಕಿಪೀಡಿಯಾಂತ್ ತೆಂ ಪತ್ರ್ ವಿ.ಜೆ.ಪಿ.ನ್ ಸುರು ಕೆಲ್ಲೆಂ ಮ್ಹಣ್ ಆಸಾ!).

‘ಜನವಾಹಿನಿ’ ಕ್ರಿಸ್ತಾಂವಾಂಚೆಂ ಭರ್ಮಾಚೆಂ ಪತ್ರ್ ಜಾವ್ನ್ ಸುರ್ವಾತ್ ಜಾಲೆಂ ತರೀ, ಖರ್ಯಾನ್, ಕ್ರಿಸ್ತಾಂವಾಂಚ್ಯಾ ಕುರ್ಲೆಚ್ಯಾ ಸ್ವಭಾವಾಕ್ ಅಪ್ರತಿಮ್ ದೃಷ್ಟಾಂತ್ ಮ್ಹಳ್ಳೆಪರಿಂ ಥೊಡ್ಯಾಚ್ ತೆಂಪಾನ್ ತೆಂ ಕುಸ್ಕೊಂಕ್ ಲಾಗ್ಲೆಂ ಆನಿ ಪಾಂಚ್ ವರ್ಸಾಂನಿಂಚ್ ಅಂತ್ಯ್ ಜಾಲೆಂ. ಹಿ ಆಮ್ಚ್ಯಾ ಆಖ್ಖ್ಯಾ ಸಮುದಾಯಾಚಿ ನೀಜ್ ತಾಂಕ್. ಆನಿ ಆಜ್, ಮಾಧ್ಯಮಾಂನಿ ಆಮ್ಕಾಂ ಜೊಕ್ತೊ ಮಾನ್, ಸ್ಥಾನ್ ಆನಿ ಪ್ರಚಾರ್ ಮೆಳನಾ ಮ್ಹಣ್ ಪಿಂರ್ಗತಾಂವ್, ವಿಳಾಪ್ ದಿತಾಂವ್!

ಕನ್ನಡ ಪತ್ರಿಕೋದ್ಯಮಾಚಿ ಗಜಾಲ್ ಸೊಡ್ಯಾಂ, ತಾಕಾ ಮೂಳ್ ಮೇಟ್ ಆನಿ ಪ್ರಾಥಮಿಕ್ ಅರ್ಹತಾ ಜಾವ್ನ್ ಆಮ್ಚ್ಯಾಚ್ ಕೊಂಕ್ಣೆಂತ್ ಆಮ್ಚಿ ಪರಿಸ್ಥಿತಿ ಕಶಿ ಆಸಾ ಮ್ಹಳ್ಯಾರ್, ಏಕ್ದಮ್ ನಿರಾಶೆಚಿಚ್ ಸ್ಥಿತಿ ಪಳೆಂವ್ಕ್ ಮೆಳ್ತಾ. ಇಸ್ಕೊಲಾಂತ್, ತಾಲೂಕ್ ಮಟ್ಟಾರ್ ಸಯ್ತ್ ಧಾಂವೊಂಕ್ ತಾಂಕನಾತ್ಲೆಲ್ಯಾನ್ ರಾಷ್ಟ್ರ್ ಮಟ್ಟಾಚೊ ಖೆಳ್ಗಾಡಿ ಜಾಯ್ಜೆ, ಒಲಿಂಪಿಕ್ಸಾಂತ್ ಜಿಕಜೆ ಮ್ಹಣ್ ಆಂವ್ಡೆಲ್ಯಾರ್, ಸಪ್ಣೆಲ್ಯಾರ್ ಕಶೆಂ? ಆಮ್ಚಿ ಹಕೀಗತ್ ಇತ್ಲಿಚ್! ಚಾಂಪಿಯನ್ ಜಾಯ್ಜೆ ತರ್, ಧಾಂವೊಂಕ್/ಖೆಳೊಂಕ್ ಕಳಜೆ ಮ್ಹಳ್ಳಿ ಕನಿಷ್ಠ್ ಪ್ರಜ್ಞಾ ಸಯ್ತ್ ಆಮ್ಕಾಂ ನಾ. ಪುಣ್, ಸಾಧನ್ ಕರ್ಚಿ ತಾಂಕ್ ನಾತ್ಲ್ಯಾರೀ, ಜಿಕ್ಪಿ ಮ್ಹಣ್ ಇನಾಮಾಂ, ಪುರಸ್ಕಾರ್, ಫಾಯ್ದೊ ಮೆಳಜೆ ಮ್ಹಳ್ಳಿ ಆಶಾ!

ಜರ್ನಲಿಸಮಾಚ್ಯಾ ಪ್ರಮುಖ್ ಸಂಗ್ತಿಂ ಪಯ್ಕಿ, ಸವಾಲ್ ಘಾಲ್ಚೆಂ ಏಕ್. ಆಮ್ಚ್ಯಾ ಸಮುದಾಯಾಂತ್ ಸವಾಲಾಂಕ್ ಆಸ್ಪದ್ ಖಂಯ್ ಆಸಾ? ಆಮ್ಚ್ಯಾ ಸಮಡ್ತಿಂತ್‍ಚ್ ಸವಾಲಾಂ ಕರ್ಚೆಂ ಆಡ್ವಾರ್ಲಾಂ, ಆನಿ ತ್ಯಾಚ್ ಧರ್ಮಾಚ್ಯಾ, ತತ್ವಾಂಚ್ಯಾ ಸಮುದಾಯಾಂತ್ ಸವಾಲಾಂಕ್ ಮೋಲ್ ಕಸಲೆಂ ಆಸತ್? ದೆಕುನ್ ಹಾಂಗಾ ಜರ್ನಲಿಸಮಾಕ್ ಅವ್ಕಾಸ್ ಮೆಳನಾ. ಕಿತೆಂಯೀ ಉದೆಲ್ಯಾರೀ ತೆಂ ಬಾಳ್ವನಾ. ಕಾರಣ್ ಆಮ್ಚೊ ಸ್ವಭಾವ್, ಧೋರಣ್ ಆನಿ ನೀತ್.

ಪತ್ರಿಕೋದ್ಯಮ್ ವಾ ಜರ್ನಲಿಸಂ ನಾತ್‍ಲ್ಲ್ಯಾನ್ ಆಮ್ಚಿ ಸಮಾಜ್ ಕಶೆಂ ಜಾಲ್ಯಾ ಪಳೆಯಾ. ಹಾಂಗಾ ಕೊಣೆಂಯೀ ಕಿತೆಂಯ್ ಉಲಯ್ಲ್ಯಾರೀ ಜಾತಾ, ಕಿತೆಂ ಕೆಲ್ಯಾರೀ ಚಲ್ತಾ. ವಿಚಾರ್ತಲೊ ಕೊಣೀ ನಾ. ಕಿತೆಂಯೀ ತೆಂ ಜಾಂವ್, ಸಾಮಾಜಿಕ್ ವಿಚಾರ್, ಸಾಹಿತ್ಯ್-ಸಂಗೀತ್-ಸಾಂಸ್ಕೃತಿಕ್ ಗಜಾಲ್ ಜಾಂವ್ ವಾ ಕಿತೆಂಯೀ… ಊಹುಂ, ಕೊಣೀ ವಿಚಾರ್ತಲೊ ನಾ. ಕೊಣೆಂಯೀ ವಿಚಾರ್ಚೆಂ ಧಯ್ರ್ ಕೆಲ್ಯಾರ್ ತಾಚೆಂ ಧಯ್ರ್ ಥೊಡ್ಯಾಚ್ ತೆಂಪಾನ್ ಜಿರ್ತಾ (ಎಕ್‍ಚ್ ದಬಾವ್ ಪಡ್ತಾ ವಾ ತೆಚ್ ಅಸ್ಕತ್ ಜಾವ್ನಾಸ್ತಾತ್!).

ಸಮಾಜೆಂತ್ ಲೊಕಾ ತರ್ಫೆನ್ ಉಲಂವ್ಚಿ ಜವಾಬ್ದಾರಿ ಚಿಂತ್ಪ್ಯಾಂಕ್, ಶಿಕ್ಪ್ಯಾಂಕ್ ಬಾಂಧ್ತಾ. ಮನ್ಶ್ಯಾಚ್ಯಾ ಚರಿತ್ರೆಂತ್ ಅಶೆಂಚ್ ಘಡೊನ್ ಆಯ್ಲಾಂ. ಆಧುನಿಕ್ ಸಂಸಾರಾಂತ್ ತಸಲೆಂ ಸ್ಥಾನ್ ಸಾಹಿತಿಂಕ್, ಪತ್ರಾಂ-ಮಾಧ್ಯಮಾಂಕ್ ತಶೆಂ ಜಾಣಾರ್‍ಯಾಂಕ್ ಮೆಳ್ತಾ. ಹ್ಯಾ ವರ್ಗಾಚ್ಯಾಂನಿ ಸಮಾಜೆ ಪಾಸತ್, ಮ್ಹಣ್ಜೆ ಲೊಕಾ ಪಾಸತ್ ಗರ್ಜ್ ಉದೆತಾನಾ, ಅನಿವಾರ್ಯ್ ಸಂದರ್ಭಾರ್ ತಾಳೊ ಉಬಾರಿಜೆ. ತಾಣಿಂ ಉಲಯ್ಲೆಂ ಮ್ಹಳ್ಯಾರ್ ತೆಂ ಲೊಕಾ ತರ್ಫೆನ್ ಮ್ಹಣ್ ಸರ್ಕಾರ್ ಸಯ್ತ್ ಸಮ್ಜತಾ.

ಪುಣ್ ಕೊಂಕ್ಣೆಂತ್ ಪತ್ರಿಕೋದ್ಯಮಾಚ್ಯಾ ಆಶಯಾಕ್‍ಚ್ ಅವ್ಕಾಸ್ ನಾ. ಹಾಂಗಾ ಧುಂಪಯ್ತೆಲ್ಯಾಂಕ್, ಹೊಗೊಳ್ಸಿತೆಲ್ಯಾಂಕ್ ಮಾತ್ರ್ ಜಾಗೊ. ಕುಸ್ಕುಟಾಚೆಂ ಕಾಮ್ ಕೆಲ್ಲ್ಯಾಂಕ್ ಸಾಧಕ್, ಚಾಂಪಿಯನ್ ಮ್ಹಣ್ ವೊಲಾಯ್ಜೆ ಆನಿ ತಶೆಂಚ್ ಪ್ರಚಾರ್ ದೀಜೆ. ತೆದ್ನಾಂ ಮಾತ್ರ್ ಸಕ್ಡಾಂಕ್ ಖುಶಿ. ಕಾರ್ಯೆಂ ವಾ ಕಸಲಿಯೀ ಸಂಗತ್ ತಿ ಜಾಂವ್, ಕಿತ್ಲ್ಯಾಯ್ ಉಣೆಂ ಮಾಪಾನ್ ದಿಲ್ಯಾರೀ, ಸಾದರ್ ಕೆಲ್ಯಾರೀ ಬರೆಂಚ್ ಮ್ಹಣಜೆ. ಏಕ್ ಸವಾಲ್ ಕೆಲ್ಯಾರ್ ವಾ ತಾಂತ್ಲ್ಯಾ ಉಣೆಂಪಣಾ ವಿಶಿಂ ಏಕ್ ಪ್ರಸ್ತಾಪ್ ಕೆಲ್ಯಾರೀ ಸಕ್ಕಡ್ ಗರಮ್ ಜಾತಾತ್! ಹಿ ಆಮ್ಚಿ ಹಕೀಗತ್.

ಸಂಸಾರಾಂತ್ಲ್ಯಾ ವಾ ಆಮ್ಚ್ಯಾಚ್ ದೇಶ್, ರಾಜ್ಯಾಂತ್ಲ್ಯಾ ಪತ್ರಾಂ-ಮಾಧ್ಯಮಾಂ ಕುಶಿನ್ ಪಳೆಯಾ. ತಾಂತುಂ ಸವಾಲ್ ಘಾಲ್ಚೆಂ, ವಿರೋಧ್ ಕರ್ಚೆಂ ತಶೆಂ ಠೀಕಾ ಕರ್ಚೆಂ ಸಾಮಾನ್ಯ್. ತಾಚೆ ಸವೆಂ ಕ್ರಿಯೇಟಿವಿಟಿ ಆನಿ ತೀಕ್ಷ್ಣ್ ವಿಚಾರಾಂಚೆಂ ಸಮ್ಮಿಲನ್ ಜಾವ್ನಾಸ್ಚೆಂ ಹಾಸ್ಯ್, ವಿಡಂಬನ್ ಭರ್ಪೂರ್ ಮಾಪಾನ್ ಆಸ್ತಾ (ಕಾರ್ಟೂನಾಂ, ಕೊಮೆಡಿ ಶೊ, ವಿಡಂಬನ್, ಹಾಸ್ಯ್ ಇತ್ಯಾದಿ). ತೆಂ ಕಿತ್ಯಾಕ್ ಮ್ಹಳ್ಯಾರ್ ಆಮಿ ಜಿಯೆಂವ್ಚೆಂ ಪ್ರಜಾಪ್ರಭುತ್ವಾಂತ್. ರಾಜಕಾರಣಿಂ ಥಾವ್ನ್ ಸಿನೆಮಾ ನಟಾಂ ಪರ್ಯಾಂತ್ ಕೊಣಾಯ್ಚೆರ್ ಕೊಣೆಂಯೀ ಸವಾಲಾಂ ಕರುಂಕ್ ಅವ್ಕಾಸ್ ಆನಿ ಹಕ್ಕ್ ಸಂವಿಧಾನಾನ್ ದಿಲಾಂ.

ಸರ್ಕಾರಾಕ್‍ಚ್ ಸವಾಲ್ ಕರ್ಚೆಂ ಹಕ್ಕ್ ಆಮ್ಕಾಂ ಮೆಳ್ಳಾಂ. ಲ್ಹಾನ್ ಸರ್ಕಾರಿ ದಫ್ತರಾ ಥಾವ್ನ್ ಪ್ರಧಾನ್ ಮಂತ್ರಿಚ್ಯಾ ದಫ್ತರಾ ಪರ್ಯಾಂತ್ ಸವಾಲಾಂ ಕರುಂಕ್ ಪರ್ಜೆಕ್ (ಆರ್.ಟಿ.ಐ. ಆ್ಯಕ್ಟ್ ಮುಖಾಂತ್ರ್) ಹಕ್ಕ್ ಆಸಾ. ಪ್ರಶ್ನಾತೀತ್ ಮ್ಹಳ್ಳೊ ಕೊಣ್‍ಂಚ್ ನಾ. ಸರ್ಕಾರ್, ಅಧಿಕಾರಿ, ಜನಪ್ರತಿನಿಧಿ, ಮಂತ್ರಿ, ಮುಖೆಲ್ ಮಂತ್ರಿ ಧರ್ನ್ ಪ್ರಧಾನಿ ಪರ್ಯಾಂತ್, ಸಕ್ಕಡ್‍ಯೀ ಲೊಕಾಕ್ ಬಾಧ್ಯಸ್ತ್ ಆಸಾತ್. ಹಿ ಪ್ರಜಾಪ್ರಭುತ್ವಾಚಿ ಸೊಭಾಯ್ ಆನಿ ಗ್ರೇಸ್ತ್‌ಕಾಯ್.

ಪುಣ್ ಆಮ್ಚ್ಯಾ ಸಮಾಜೆಂತ್ ತಸಲ್ಯಾಕ್ ಕಿತ್ಲೊ ಅವ್ಕಾಸ್ ಆಸಾ? ಪಾಟ್ಲ್ಯಾ ಸಬಾರ್ ವರ್ಸಾಂ ಥಾವ್ನ್ ಆಮ್ಚ್ಯಾ ಸಮುದಾಯಾಂತ್ಲ್ಯಾ ಖಂಯ್ಚ್ಯಾಯ್ ಗಜಾಲಿಕ್ ಘೆತ್ಲ್ಯಾರೀ, ಥಂಯ್ ಪ್ರಜಾಪ್ರಭುತ್ವಾಕ್ ಕಿತೆಂಯೀ ಮಾನ್ ಆಸಾ ಮ್ಹಳ್ಳೆಂ ದಿಸನಾ. ಲೊಕಾಕ್‍ಚ್ ಮಾಂದಿನಾತ್‍ಲ್ಲೆ ಹಾಂಗಾ ಕಾರ್ಬಾರಾಂ ಕರ್ತಾತ್, ದರ್ಬಾರ್ ಚಲಯ್ತಾತ್. ತಾಣಿಂ ಕಿತೆಂಯೀ ಕೆಲ್ಯಾರೀ ಕೊಣೆಂಯೀ ಸವಾಲ್ ಕರುಂಕ್ ನಜೊ, ಚರ್ಚಾ ಕರುಂಕ್ ನಜೊ.

ಧಾರ್ಮಿಕ್ ವಿಚಾರಾಂಚಿ ದುಸ್ರಿ ಗಜಾಲ್ ಜಾಲಿ. ಸಾಹಿತ್ಯ್, ಸಾಂಸ್ಕೃತಿಕ್, ಸಂಗೀತ್, ಪ್ರಕಾಶನ್, ಸಂಘಟನಾಂಚಿ ಗಜಾಲ್ ಪಳೆಲ್ಯಾರ್ ಹಾಂಗಾ ಸಕ್ಡಾಂಕ್ ಆಪ್ಣೆಂ ಕೆಲ್ಲೆಂ ಹೆರಾಂನಿ ಭೋವ್ ಬರೆಂ, ಅದ್ಭುತ್ ಮ್ಹಣ್ ಸಾಂಗ್ಲ್ಯಾರ್ ಮಾತ್ರ್ ಸಂತೊಸ್. ಕಿತೆಂಯೀ ಅಭಿಪ್ರಾಯ್ ಉಚಾರುಂಕ್‍ಚ್ ಸೊಡಿನಾಂತ್, ಆನಿ ವಿಚಾರ್-ವಿಮರ್ಸೊ ಕರ್ಯೆತ್‍ಗೀ? ಚೂಕ್ ಪುಣೀ ದಾಕವ್ನ್ ದಿಲ್ಯಾರ್ ಖುರ್ಸಾರ್ ಮಾರುಂಕ್‍ಚ್ ಪೆಚಾಡ್ತಾತ್.

ಕೊಂಕ್ಣಿ ಲೇಖಕ್ ಸಂಘಾನ್ ಮಾಂಡುನ್ ಹಾಡ್‍ಲ್ಲ್ಯಾ ಎಕಾ ವಿಚಾರ್‍ಗೋಷ್ಠಿಂತ್ ಪತ್ರ್ ಮಂಡನ್ ಕೆಲ್ಲ್ಯಾ ಸಾಹಿತಿ, ಮಾ.ಬಾ. ಮೆಲ್ವಿನ್ ಪಿಂಟೊನ್ ವಿಮರ್ಸೊ ಮ್ಹಳ್ಯಾರ್ ಕಿತೆಂ ಮ್ಹಣ್ ವಿವರ್ ದಿತಾನಾ ಏಕ್ ವಾಖ್ಮೂಲ್ ಉಲ್ಲೇಖ್ ಕೆಲ್ಲೆಂ. ತೆಂ ಅಶೆಂ ಆಸಾ –“Criticism may not be agreeable, but it is necessary. It fulfills the same function as pain in the human body. It calls attention to an unhealthy state of things…” (ತೆಂ ಕೊಣೆಂ ಸಾಂಗ್‍ಲ್ಲೆಂ ಮ್ಹಳ್ಳೆಂ ಜಾಣಾಂ ಜಾಂವ್ಕ್ ತಾಚಿ ವರ್ದಿ ವಾಚಾ – ಆಜ್ ವಿಮರ್ಸೊ ಚಡ್ ಆನಿ ಚಡ್ ಗರ್ಜೆಚೊ…).

ವಿಮರ್ಸೊ ವಾ ಕ್ರಿಟಿಸಿಸಂ ಮ್ಹಳ್ಯಾರ್ ಕೊಂಕ್ಣಿ ವರ್ತುಲಾಂತ್ ಚೂಕ್ ಚಿಂತ್ಪಾಕ್ ಕಾರಣ್ ಜಾಲ್ಲೆಂಯೀ ಆಸಾ. ಥೊಡ್ಯಾ ಪಿಸಾಂಟಾಂನಿ ಆಪ್ಲ್ಯಾಚ್ ಅಸ್ವಸ್ಥೆತೆಕ್ ಲಾಗೊನ್ ಹಾಂಗಾ ಯೇವ್ನ್ ಮೆಳ್‍ಲ್ಲ್ಯಾ ಮೆಳ್‍ಲ್ಲ್ಯಾ ಸಂಗ್ತಿಂಕ್, ಮನ್ಶ್ಯಾಂಕ್ ‘ವಿಮರ್ಸೊ’ ಮ್ಹಣ್ ಸಾಂಗೊನ್ ಗಾಳಿ ಸೊಂವ್ಕ್, ಯೆಟುಂಕ್ ಸುರು ಕೆಲ್ಲೆಂ! ಅಸಲ್ಯಾಂನಿ ಕೊಂಕ್ಣಿ ಸಂಸಾರಾಂತ್ ಆಸ್‍ಲ್ಲೆಂ ಬರೆಂ ವಾತಾವರಣ್ ಗಲೀಜ್ ಆನಿ ವಿಕಾಳ್ ಕೆಲ್ಲೆಂ. ತೆಂಚ್ ತಾಂಚೆಂ ಸಾಧನ್! ಅಸಲ್ಯಾ ‘ಶೆಣ್’ ಉಡಂವ್ಚ್ಯಾ ಕೀಳ್ ವ್ಯಕ್ತಿಂಕ್ ಆನಿ ತಾಂಚ್ಯಾ ಹಳ್ಶಿಕ್ ಕರ್ತುಬಾಂಕ್ ಎಕಾ ಯಾಜಕಾನ್ (ಸಾಂ ಲುವಿಸ್ ಕೊಲೆಜಿಂತ್ ಚಲ್‍ಲ್ಲ್ಯಾ ಎಕಾ ಪ್ರಶಸ್ತಿ ವಿತರಣ್ ಕಾರ್ಯಾಂತ್ ಉಲವ್ನ್) ಸರ್ಸರಿತ್ ಖಂಡನ್ ಕೆಲ್ಲೆಂ. ತಿ ಗಜಾಲ್ ಕೊಂಕ್ಣಿ ಸಾಹಿತ್ಯಿಕ್ ಸಂಸಾರಾಚಿ.

ಜೆರಾಲ್ ಥರಾನ್ ಆಮ್ಚ್ಯಾ ಸಮುದಾಯಾಂತ್ ವಿಚಾರ್-ವಿಮರ್ಸೊ, ಚರ್ಚಾ ಕೆಲ್ಯಾರ್ ತೆಂ ಚಡ್ ಜಣಾಂಕ್ ಪಸಂದ್ ಜಾಯ್ನಾ. ತಾಚೊ ಪರಿಣಾಮ್ ಜಾವ್ನ್ ಆಜ್ ಆಮ್ಚಿ ಸಮಾಜ್ ಜಾಯ್ತ್ಯಾ ಪ್ರಮುಖ್ ಸಂಗ್ತಿಂನಿ ಪಾಟಿಂ ಆಸೊನ್, ಹೆರ್ ಲೊಕಾ ಮುಖಾರ್ ಅಸ್ಕತ್ ಆನಿ ನಗಣ್ಯ್ ಜಾಂವ್ಕ್ ಪಾವ್ಲ್ಯಾ. ಆಮಿ ಬಲಿಶ್ಟ್ ಜಾಯ್ಜೆ ಜಾಲ್ಯಾರ್, ಪಯ್ಲೆಂ, ಅಸಲ್ಯಾ ಉಣೆಂಪಣಾಂ ಥಾವ್ನ್ ಭಾಯ್ರ್ ಯೇಂವ್ಕ್ ಶಿಕಜೆ.

ಆಯ್ಲೆವಾರ್, ಕಥೊಲಿಕ್ ಸಭೆಚ್ಯಾ ಮುಖೇಲ್ಪಣಾರ್ ಉಡುಪಿ ಆನಿ ಮಡಂತ್ಯಾರಾಂತ್ ಬೃಹತ್ ಸಮಾವೇಶ್ ಚಲ್ಲೆ. ಥಂಯ್ಸರೀ ಹಿಚ್ ಪಿಂರ್ಗೊಣಿ ಆಯ್ಕೊಂಕ್ ಮೆಳ್ಳಿ. ಆಮಿ ಖಂಯ್ಸರ್ ಆಸಾಂವ್, ಕಿತ್ಲೆ ಪಾಟಿಂ ಆಸಾಂವ್, ಖಂಚ್ಯಾಂತ್ ಉಣೆಂಪಣ್ ಆಸಾ ಮ್ಹಳ್ಳೆ ವಿಶಿಂ ಧಾರಾಳ್ ಚರ್ಚಾ ಚಲ್ತಾ. ಪುಣ್ ಪರಿಹಾರ್ ಸೊಧುಂಕ್ ಆಜೂನ್ ಸಕೊಂಕ್ ನಾಂವ್. ಗರ್ಜೆಚಿಂ ಆನಿ ಅನಿವಾರ್ಯ್ ಕ್ರಮಾಂ ಘೆಂವ್ಚೆ ವಿಶಿಂಚ್ ಚಿಂತಾಪ್ ಆಟಯ್ನಾತ್ಲ್ಯಾರ್ ಪರಿಹಾರ್ ಕಶೆಂ ಮೆಳ್ತಲೊ!?

ತಿಕ್ಶೆಂ: ಮಡಂತ್ಯಾರಾಂತ್ 30 ಹಜಾರ್ ಕಥೊಲಿಕ್ ಎಕ್ವಟ್ಲೆ ಆನಿ ಚರಿತ್ರಾ ಘಡ್ಲಿ. ವೆದಿರ್ ಥಾವ್ನ್ ಸರ್ವ್ ಮುಖ್ಯ್ ವಿಚಾರಾಂಚೆರ್ ಉಲವ್ಪಾಂ ಚಲ್ಲಿಂ. ಮಾಧ್ಯಮ್ ಶೆತಾಚೊ ಮಹತ್ವ್‌ಯೀ ಪ್ರಸ್ತಾಪ್ ಜಾಲೊ. ಪುಣ್ ಎದೊ ವ್ಹಡ್ಲೊ ಸಮಾವೇಶ್ ಮಾಧ್ಯಮಾಂ ಮುಖಾರ್ ನಗಣ್ಯ್ ಜಾಲೊ! ಏಕ್ ಸ್ಥಳೀಯ್ ಖಬರ್ ಮ್ಹಳ್ಳೆಪರಿಂ ಪತ್ರಾಂನಿ-ಮಾಧ್ಯಮಾಂನಿ ವರ್ದಿ ಕೆಲಿ. ತಿತ್ಲೆಂಚ್. ಹಾಚ್ಯಾ ಪಾಟ್ಲಿಂ ಕಾರಣಾಂ ಉಸ್ತಿಲ್ಯಾರ್ ಕಳ್ತಾ, ಆಮ್ಚಿ ಸಮ್ಜಣಿ ಆನಿ ತಾಂಕ್ ಕಸಲಿ ಮ್ಹಣೊನ್!

(ಹೆ ಮುಗ್ದನಾತ್‍ಲ್ಲೆ ವಿಚಾರ್; ಮುಂದರುಂಕ್ ಆಸಾತ್…)

Send Feedback to: budkuloepaper@gmail.com

Like us at: www.facebook.com/budkulo.epaper

Visit and Watch Videos in our YouTube Channel

ಸಮುದಾಯಾಚೆಂ Empowerment ಕರ್ಚೆಂ ಆಮ್ಚೊ ಧ್ಯೇಯ್

Kindly Support and Strengthen Budkulo

‘ಬುಡ್ಕುಲೊ’ ಮಜ್ಭೂತ್ ಕರುಂಕ್ ತುಮ್ಚೊ ಆಧಾರ್ ದಿಯಾ

The post ಮಾಧ್ಯಮಾಂಚೆಂ ಮಹತ್ವ್ ಸಮ್ಜನಾತ್‍ಲ್ಲ್ಯಾ ಸಮಾಜೆನ್ ಕಿತ್ಲೆ ಸಮಾವೇಶ್ ಕೆಲ್ಯಾರೀ, ಕಿತ್ಲೆಂ ಬೊಬಾಟ್ಲ್ಯಾರೀ ಫಾಯ್ದೊ ಕಿತೆಂ? appeared first on Budkulo.