ಸಾವೆರಾಮ್ ಮ್ಹಜೊ ಫಿರ್ಗಜ್‍ಗಾರ್. ಮನಿಸ್ ಭಾರೀ ಸಾಧೊ. ದುಬ್ಳೊ ಜಾವ್ನ್ ಜಲ್ಮಲ್ಲೊ. ಪುಣ್ ಕ್ರಮೇಣ್ ಗ್ರೇಸ್ತ್ ಜಾಲೊ. ಕಾರಣ್ ತಾಕಾ ಸಾಮಾನ್ ಸಾಗ್ಸುಂಚ್ಯೊ 15 ಲೊರಿಯೊ (ಟ್ರಕ್ಕಾಂ) ಆಸ್‍ಲ್ಲ್ಯೊ. ಹಿ ಗಜಾಲ್ ಹಾಂವ್ ಬರಯ್ತಾಂ 1980ವ್ಯಾ ವರ್ಸಾಂತ್ಲಿಂ. ಚಡ್ ಶಿಕಾಪ್ ತಾಕಾ ನಾತ್ಲೆಂ ತರೀ ಬುದ್ವಂತ್ ಮನಿಸ್ ತೊ. ಶಿಕಾಪ್ ಉಣೆಂ ಜಾಂವ್ಕ್ ಕಾರಣ್ ತಾಚ್ಯಾ ಘರಾಂತ್ ತೊಚ್ ಮ್ಹಾಲ್ಘಡೊ. ತಶೆಂ ಜಾವ್ನ್ ತಾಚೆಂ ಶಿಕಾಪ್ ತಿಸ್ರಿ ಕ್ಲಾಸ್ ಮಾತ್ರ್. ದುಬ್ಳೆಂ ಕುಟಮ್. ಸಾತ್ ಜಣಾಂ ಭುರ್ಗಿಂ. ಗೇಣಿಚೆ ಗಾದೆ ತಾಂಕಾಂ ಆಸ್‍ಲ್ಲೆ ಮ್ಹಣ್ತಚ್ ಲ್ಹಾನ್ ಪ್ರಾಯೆ ಥಾವ್ನ್ ಸಾವೆರಾಮಾಕ್ ಗಾದ್ಯಾಂತ್ ಕಾಮ್ ಕರ್ನ್ ಸವಯ್ ಜಾಲ್ಲಿ. ಭಾಂವ್ಡಾಂ ವಾಡೊನ್ ಯೆತಾನಾ ಆನಿ ಖರ್ಚ್ ವಾಡ್ತಾನಾಂಚ್ ಗಾದ್ಯಾಂಚ್ಯಾ ಧನಿಯಾನ್ ತೆ ಗಾದೆ ಪಾಟಿಂ ಕಾಣ್ಘೆಲೆ.

ಪೊಟಾಕ್ ಕೊಕ್ಯಾಚಿ ಗತ್ ಜಾಲಿ. ಉಪಾವ್ ನಾಸ್ತಾನಾ ಸಾವೆರಾಮ್ 16 ವರ್ಸಾಂ ಪ್ರಾಯೆರ್ ಎಕಾ ಲೊರಿಯೆರ್ ಕ್ಲೀನರ್ ಜಾವ್ನ್ ಸೆರ್ವಾಲೊ. ಕ್ಲೀನರ್ ಜಾಲ್ಲೊ ಸಾವೆರಾಮ್ ಕ್ಲೀನರ್ ಜಾವ್ನ್ ಉರ್ಲೊ ನಾ ಬದ್ಲಾಕ್ ತ್ಯಾಚ್ ಲೊರಿಯೆರ್ ವಾಹನ್ ಚಲಂವ್ಕ್ ಶಿಕ್ಲೊ! ಉಪ್ರಾಂತ್ ಲೈಸನ್ಸ್ ಕಾಡ್ಲೆಂ. ಉಪ್ರಾಂತ್ಲ್ಯಾ ಥೊಡ್ಯಾ ಮ್ಹಯ್ನ್ಯಾಂನಿ ತಾಣೆಂ ತಾಚಿ ಸ್ವತಾಚಿ ಲೊರಿ ಘೆತ್ಲಿ! ಆಪ್ಲ್ಯಾ ಕಾಮಾ ಥಂಯ್ ತೊ ನಿಸ್ವಾರ್ಥಿ ಜಾವ್ನ್ ಆಸೊನ್ ಬರಿ ಸೆವಾ ಗ್ರಾಹಕಾಂಕ್ ದಿಲ್ಲ್ಯಾನ್ ತಾಚಿ ಕಮಾಯ್ ಚಡ್ಲಿ. ತ್ಯಾ ಬಳಾರ್ ಭೋವ್ ಥೊಡ್ಯಾಚ್ ವರ್ಸಾಂ ಭಿತರ್ 15 ಲೊರಿಯಾಂಚೊ ಮ್ಹಾಲಕ್ ಜಾಲೊ! ಏಕ್ ಲೊರಿ ತೊ ಖುದ್ಧ್ ಚಲಯ್ತಾಲೊ ಜಾಲ್ಯಾರ್ ಉರ್ಲೆಲ್ಯಾ 14 ಲೊರಿಯಾಂಕ್ 14 ಚಾಲಕ್ ತಾಣೆಂ ಘೆತ್‍ಲ್ಲೆ! ಅಶೆಂ ತಾಚೊ ವ್ಯವಹಾರ್ ಚಡೊನ್ ಆಖ್ಯಾ ಭಾರತಾಚ್ಯಾ ರಾಜ್ಯಾಂಕ್ ತಾಚ್ಯೊ ಲೊರಿಯೊ ಯೆತಾ-ವೆತಾಲ್ಯೊ. ಆಮ್ಚ್ಯಾಚ್ ಫಿರ್ಗಜೆಚ್ಯಾ ದುಲ್ಸಿನ್‍ಬಾಯೆ ಕಡೆನ್ ಕಾಜಾರ್ ಜಾವ್ನ್ ತೇಗ್ ಚೆರ್ಕೆ ಭುರ್ಗೆ ತಾಂಕಾಂ ಜಲ್ಮಾಲೆ.

ಗ್ರೇಸ್ತ್ ತೊ ಜಾಲ್ಲೊ ಜಾಲ್ಯಾರೀ ಸರ್ವಾಂಕ್, ಚಡ್ ಜಾವ್ನ್ ಗರ್ಜೆವಂತಾಂಕ್ ತೊ ಪಾವ್ತಾಲೊ. ತಾಚ್ಯಾ ದೊಗಾಂ ಭಾವಾಂಕೀ ತಾಣೆಂ ಡ್ರೈವಿಂಗ್ ಶಿಕವ್ನ್ ಎಕೇಕ್ ಲೊರಿ ಕಾಣ್ಘೆವ್ನ್ ದೀವ್ನ್ ತಾಂಚ್ಯಾ ಪಾಯಾಂಚೆರ್ ತಾಣಿಂ ಉಬೆಂ ರಾವಾಶೆಂ ಕೆಲ್ಲೆಂ. ಆತಾಂ ಫೆಡ್ಡಿಯಾಮಾಕಡೆನ್ 11 ಆನಿ ಲೊರಿಯಾಮಾಕಡೆನ್ 8 ಲೊರಿಯೊ ಜಾಲ್ಯೊ. ಹೆಂ ಸಾವೆರಾಮಾಚೆಂ ಸಾಧನ್. ಲೊರಿಯೊ ತಾಂಚೆಂ ಖಾಂದಾನಿ ಬಿಸ್ನೆಸ್ ಜಾವ್ನಾಸ್ಲೆಂ. ಸಾವೆರಾಮ್ ದುಬ್ಳ್ಯಾಂ ಥಂಯ್ ಮೊವಾಳ್. ಸಗ್ಳೆ ತಾಕಾ ಮಾನ್ತಾಲೆ. ಪುಣ್ ತಾಚೆ ಭಾವ್ ಮಾತ್ರ್ ಕಾಂಯ್ಚ್ ಮನ್ಶ್ಯಾಪಣ್ ನಾತ್‍ಲ್ಲೆ ಮ್ಹಣ್ಯೆತ್. ಕೊಣಾಚಿಚ್ ಪಾಪ್ ಬಿರ್ಮತ್ ತಾಂಕಾಂ ನಾತ್‍ಲ್ಲಿ. ಆಪುಣ್ ಆಪ್ಣಾಕ್ ದೇವ್ ಸಮೇಸ್ತಾಂಕ್.

ಸಾವೆರಾಮಾಕ್ ಆನಿ ಮ್ಹಾಕಾ ಸುಮಾರ್ 25 ವರ್ಸಾಂ ಪ್ರಾಯೆಚೊ ಫರಕ್! ತರ್ನಾಟೆ ಆಸ್ತಾನಾ ಇಗರ್ಜೆ ಮೈದಾನಾರ್ ಆಮಿ ಸಾಂಗಾತಾ ಕ್ರಿಕೆಟ್ ಖೆಳ್ತಾಲ್ಯಾಂವ್. ಉಪ್ರಾಂತ್ ದೊರ್‍ಯಾರ್ ಬಸೊನ್ ಪಟ್ಟಾಂಗಾಂ ಮಾರ್ತಾಲ್ಯಾಂವ್. ತಮಾಶೆ, ವಿನೋದ್ ಉಲವ್ನ್ ಹಾಸೊನ್ ಖೆಳೊನ್ ಆಸ್ಲ್ಯಾಂವ್. ತಾಕಾ ಆಮ್ಚೆರ್ ಭಾರೀ ಅಭಿಮಾನ್. ಆಮ್ಚ್ಯಾ ಕ್ಲಬ್ಬಾಕೀ ಜಾಯ್ತಿ ಕುಮಕ್ ದಿತಾಲೊ. ತಾಚೆಂ ನ್ಹೆಸಣ್ ಭಾರೀ ಸಿಂಪಲ್. ಪೊಪ್ಳ್ಯಾಂಚಿ ಲುಂಗಿ, ಖಾಕಿ ಶರ್ಟ್ ಆನಿ ಪಾಯಾಂಕ್ ರಬ್ಬರಾಚ್ಯೊ ವ್ಹಾಣೊ.

ಹಾಂವ್ ತೆದಾಳಾ ಪಣಂಬೂರ್ ರಾಸಾಯನಿಕ್ ಕಂಪೆನಿಂತ್ ಕಾಮ್ ಕರ್ತಾಲೊಂ. ಆಮ್ಚ್ಯಾ ಕಂಪೆನಿ ಥಾವ್ನ್ ರಾಸಾಯನ್ ವ್ಹರುಂಕ್ ಕರ್ನಾಟಕ, ಗೋವಾ, ಕೇರಳಾ, ತಮಿಳ್‍ನಾಡು, ಆಂಧ್ರಪ್ರದೇಶ್ ಥಾವ್ನ್ ಸಬಾರ್ ಲೊರಿಯೊ ಕಂಪೆನಿಚ್ಯಾ ಗೇಟಿ ಭಾಯ್ರ್ ಲೈನ್ ಲಾಗ್ತಾಲ್ಯೊ. ಸಾವೆರಾಮಾಚ್ಯೊ ಲೊರಿಯೊ ಗೇಟಿ ಲಾಗಿಂ ಆಯ್ಲ್ಯೊ ಜಾಲ್ಯಾರ್ ಹಾಂವ್ ತುರಂತ್ ತಾಂಕಾಂ ಇನ್‍ಫ್ಲುಯೆನ್ಸಾರ್ ಮುಕಾರ್ ಆಪವ್ನ್ ಲೋಡ್ ಕರ್ನ್ ಧಾಡ್ತಾಲೊಂ. Queueರ್ ರಾಂವ್ಚಿ ಗರ್ಜ್ ನಾತ್‍ಲ್ಲಿ. ಹ್ಯಾ ವರ್ವಿಂ ಆಮ್ಚಿ ಇಷ್ಟಾಗಾತ್ ಬಳಿಷ್ಟ್ ಜಾಲ್ಲಿ. ಹ್ಯಾ ವರ್ವಿಂ ಮ್ಹಾಕಾ ಆನ್ಯೇಕ್ ಫಾಯ್ದೊ ಜಾತಾಲೊ. ಸಾವೆರಾಮ್ ಲೋಡ್ ಖಾಲಿ ಕರ್ನ್ ಪಾಟಿಂ ಯೆತಾನಾ ಗೊಯಾಂ ಥಾವ್ನ್ ಆಯ್ಲೊ ಜಾಲ್ಯಾರ್ ಫೆನ್ನಿಚಿ ಬಾಟ್ಲಿ, ಘಾಟಾ ಥಾವ್ನ್ ಆಯ್ಲೊ ಜಾಲ್ಯಾರ್ ಬನ್ನೂರ್ ಬೊಕ್ರ್ಯಾಚೆಂ ಮಾಸ್, ಕೆಳ್ಯಾಂಚೆ ಘಡಾಯ್ ಇತ್ಯಾದಿ ಹಾಡ್ನ್ ಆಮ್ಕಾಂ ವಾಂಟ್ತಾಲೊ. ದಿಲ್‍ದಾರ್ ಸಾವೆರಾಮಾಚಿ ಮಟ್ವ್ಯಾನ್ ಪರಿಚಯ್ ಕರ್ನ್ ದಿಲಿ ತುಮ್ಕಾಂ.

1981 ವರ್ಸಾ ಬರ್‍ಯಾ ಫುಡಾರಾ ಖಾತಿರ್ ಹಾಂವೆಂ ಗಾಂವ್ ಸೊಡ್ಲೊ ಆನಿ ದುಬಾಯ್ ಪಾವ್ಲೊಂ. ಹ್ಯಾ ಕಾರಣಾನ್ ಆಮಿ ಸದಾಂ ಮೆಳ್ಚೆಂ ಬಂದ್ ಜಾಲೆಂ. ಪುಣ್ ಇಷ್ಟಾಗಾತ್ ತುಟ್ಲಿ ನಾ. ದುಬಾಯ್ ಥಾವ್ನ್ ರಜೆರ್ ಯೆತಾನಾ ಸಾವೆರಾಮಾಕ್ ಏಕ್ ಸ್ಕೊಚ್ ವ್ಹಿಸ್ಕಿ ಬೊತ್ಲ್ ಹಾಡ್ನ್ ದಿತಾಲೊಂ. ತೆದಾಳಾ ತೊ ಸಾಂಗ್ತಾಲೊ ಕೀ ಆತಾಂ ಲೊರಿಯಾಂಚೆಂ ಬಿಸ್ನೆಸ್ ಬರೆಂ ನಾ, ಸಕ್ಡಾಂಕೀ ಮಾರ್ ಬಸ್ಲಾ-ಕಷ್ಟಾಂನಿ ಚಲವ್ನ್ ವ್ಹರ್ತಾಂವ್.

ಹರ್ಶೆಂಚ್ಯಾಪರಿಂ 1993ವ್ಯಾ ವರ್ಸಾ ಹಾಂವ್ ರಜೆರ್ ಗಾಂವಾಕ್ ಭಾಯ್ರ್ ಸರ್ಲೊಂ. ತೆದಾಳಾ ದುಬಾಯ್ ಥಾವ್ನ್ ಮಂಗ್ಳುರಾಕ್ ಶೀದಾ ವಿಮಾನ್ ಸೆವಾ ನಾತ್ಲಿ. ಮುಂಬಯ್ ದೆಂವೊನ್ ಕನೆಕ್ಟಿಂಗ್ ವಿಮಾನ್ ಧರುನ್ ಯೆಂವ್ಚೆಂ ಪಡ್ತಾಲೆಂ. ಹಾಂವೆಂ ಕ್ಯಾಥೇ ಪೆಸಿಫಿಕ್ ವಿಮಾನಾರ್ ಟಿಕೆಟ್ ಕಾಡ್‍ಲ್ಲಿ. ಮುಂಬೈ ಥಾವ್ನ್ ಸಕಾಳಿಂ ಸಾಡೆ ಆಟಾಂಕ್ ಜೆಟ್ ಏರ್‌ವೇಸ್ ಮಂಗ್ಳುರ್ ವಿಮಾನ್ ಆಸ್ಲೆಂ ಜಾಲ್ಲ್ಯಾನ್ ತಾಚಿ ಟಿಕೆಟ್ ಕಾಡ್‍ಲ್ಲಿ. ದುಬಾಯ್ ಥಾವ್ನ್ ರಾತಿಂಚ್ಯಾ 10.30 ವೊರಾರ್ ವಿಮಾನ್ ಸುಟ್ಲ್ಯಾರ್ ಬೊಂಬಯ್ ಫಾಂತ್ಯಾರ್ 4 ವೊರಾರ್ ಪಾವ್ತಾ. ತ್ಯಾ ವರ್ಸಾ ಮ್ಹಜಿ ಫ್ಯಾಮಿಲಿ ಪಯ್ಲೆಂಚ್ ರಜೆರ್ ಗಾಂವಾಕ್ ಗೆಲ್ಲಿಂ.

ಆಮಿ ಮಂಗ್ಳುರ್‌ಗಾರ್ ದುಬಾಯ್ ಥಾವ್ನ್ ಗಾಂವಾಕ್ ವೆತಾನಾ ಸಾಂತಾಕ್ಲಾಸಾಪರಿಂ ವೆಚೆಂ, ಪಠಾಣ್ ಸೂಟ್‍ಕೇಸಿಂನಿ ದಾಂಬುನ್ ಚೆಪುನ್ ಮ್ಹಳ್ಳೆಪರಿಂ ವಸ್ತು ಭರ್ತಾಲ್ಯಾಂವ್. ವಿಮಾನ್ ಥಳಾರ್ ವಳ್ಕಿಚ್ಯಾಂಕ್ ಮಸ್ಕಾ ಮಾರ್ನ್ ಚಡಿತ್ ಲಗೇಜ್ ಪಾಸ್ ಕರಯ್ತೆಲ್ಯಾಂವ್. ಗಾಂವಾಂತ್ಲ್ಯಾ ವಳ್ಕಿಚ್ಯಾಂಕ್, ಘರ್ಚ್ಯಾಂಕ್ ಮ್ಹಣ್ ‘ಗಿಫ್ಟ್’ ದೀಂವ್ಕ್ ಸಬಾರ್ ವಸ್ತು ಘೆವ್ನ್ ಸೂಟ್‍ಕೇಸಿ ಭರ್ತಾಲ್ಯಾಂವ್. ಆಮ್ಚಿ ರಜಾ ಬರ್‍ಯಾನ್ ವಚಜಾಯ್ ತರ್ ಗಾಂವ್ಚ್ಯಾಂಕ್ ಗೋಡ್ ಕರಿಜೆ ಪಡ್ತಾಲೆಂ! ದುಬಾಯ್ ಥಾವ್ನ್ ಗಾಂವಾಕ್ ಪಾವ್ಲ್ಯಾ ಉಪ್ರಾಂತ್ ಆಮ್ಚೆಂ ದರ್ಬಾರ್ ವ್ಹಡ್ಲೆಂ ದಾಖಂವ್ಚೆ ಖಾತಿರ್ ಜೊಡ್ಲೆಲ್ಯಾ ಜೊಡಿಂತ್ಲೆ ಪಯ್ಶೆ ಮುಲಾಜೊ ನಾಸ್ತಾನಾ ಖರ್ಚಿತಾಲ್ಯಾಂವ್ – ಫಕತ್ ದರ್ಬಾರಾ ಖಾತಿರ್!

ತ್ಯಾ ದಿಸಾ ಮ್ಹಳ್ಯಾರ್ ದುಬಾಯ್ ಥಾವ್ನ್ ಮುಂಬಯ್ ವಿಮಾನ್ ಥಳಾರ್ ದೆಂವ್ತಾನಾ ಖಬರ್ ಮೆಳ್ಳಿ ಕೀ ದಿಲ್ಲಿ ಥಾವ್ನ್ ವಿಶೇಸ್ ಕಸ್ಟಮ್ ಆಫಿಸರ್ ಆಯ್ಲ್ಯಾತ್, ಸಗ್ಳಿ ಲಗೇಜ್ ತಪಾಸ್ತಾತ್ ಮ್ಹಣ್. ಹಾಂವೆಂ ತಕ್ಲೆಕ್ ಹಾತ್ ಮಾರ್ಲೊ. ಕಾರಣ್ ಗಾಂವ್ಚೆಂ ವಿಮಾನ್ ಧರುಂಕ್ ಜಾಯ್ ಆಸ್ಲೆಂ. ಆಮ್ಚೆ ಪ್ಯಾಸೆಂಜರ್‌ಯೀ ಖೂಬ್ ಆಸ್‍ಲ್ಲೆ. ಇಮಿಗ್ರೇಶನ್ ಜಾವ್ನ್ ಲಗೇಜ್ ಘೆವ್ನ್ ಕಸ್ಟಮ್ ಲೈನಿಕ್ ಲಾಗ್ತಾನಾ ವೊರಾಂ ಸಕಾಳಿಂಚಿ ಸಾಡೆ ಪಾಂಚ್ ಜಾಲ್ಲಿಂ. ಹೆ ವಿಶೇಸ್ ಕಸ್ಟಮ್ ಅಧಿಕಾರಿ ಹರ್ಯೆಕ್ ಪ್ಯಾಸೆಂಜರಾಚಿ ಸೂಟ್‍ಕೇಸ್ ಉಗ್ತಿ ಕರುನ್ ಅಡ್ಡಾದಿಡ್ಡಿ ಉಸ್ತುನ್ ಸುಟ್‍ಕೇಸಿಚೊ ಭೊಂಗೊಸ್ತಳ್ ಕರ್ತಾಲೆ. ಪಾಸ್‍ಪೋರ್ಟಾ ಭಿತರ್ ನೋಟ್ ದವರ್ನ್ ದೀಂವ್ಕ್ ತ್ಯಾ ದೀಸ್ ಸಾಧ್ಯ್ ನಾತ್ಲೆಂ. ಮ್ಹಾಕಾ ಟೆನ್ಶನ್. ಜೆಟ್ ಏರ್‍ವೇಸ್ ಫ್ಲೈಟ್ ಕಾಂಯ್ ಚುಕಾತ್‍ಗೀ? ತಿಚ್ಚ್ ಖಂತ್. ಸೀಸನ್ ಜಾಲ್ಲ್ಯಾನ್ ಪೂರಾ ಫ್ಲೈಟಾಂ ಫುಲ್. ತೆದಾಳಾ ಕಸ್ಟಮ್ಸ್ ಲೈನಿರ್ ಆಸ್ತಾನಾ ಸಾವೆರಾಮಾಚ್ಯಾ ಲೊರಿಯಾಂಚೊ ಉಗ್ಡಾಸ್ ಆಯ್ಲೊ. ಕಾಂಯ್ ತಾಚಿ ಲೊರಿ ಬೊಂಬಯ್ ಆಯಿಲ್ಲಿ ಆಸಾ ಜಾಲ್ಯಾರ್ ತಾಕಾ ಫೊನ್ ಕರ್ನ್ ವಿಚಾಲ್ರ್ಯಾರ್ ತೊ ಖಂಡಿತ್ ಮ್ಹಾಕಾ ತಾಚ್ಯಾ ಲೊರಿಯೆರ್ ವ್ಹರುಂಕ್ ಆಸಾ. ಅಶೆಂ ಮ್ಹಾಕಾ ತೊಚ್ಚ್ ಜೋಪ್, ತೆಂಚ್ ಚಿಂತಾಪ್ ಧೊಸ್ತಾಲೆಂ.

ಬೊಕ್ರ್ಯಾಚೊ ಗಳೊ ಕಾಪುಂಕ್ ತಯಾರ್ ರಾವ್ಲೆಲ್ಯಾ ಕಸಾಯ್ಗಾರಾಪರಿಂ ಮ್ಹಜಿ ಸರ್ತಿ ಯೆತಾನಾ 6.30 ವೊರಾಂ. ಸೂಟ್‍ಕೇಸ್ ಪುರ್ತಿ ಉಗ್ತಿ ಕರ್ನ್ ಉಸ್ತುನ್ ಬೊಟಿ ಭಾಯ್ರ್ ಘಾಲ್ಲೆಪರಿಂ ಸಗ್ಳ್ಯೊ ವಸ್ತು ಭಾಯ್ರ್ ಘಾಲ್ನ್, ಪಳೆವ್ನ್ ಲೆಖಾವರ್ತಿ ಡ್ಯೂಟಿ ಘಾಲ್ನ್ ಮ್ಹಾಕಾ ಸೊಡ್ಲೊ, ಉಗ್ತಿ ಕೆಲ್ಲಿ ಸುಟ್‍ಕೇಸ್ re-pack ಕರ್ನ್ ಬಂದ್ ಕರಿಜಯ್ ಜಾಲ್ಯಾರ್ ಮ್ಹಾಕಾ ಜಿವಾರ್ ಆಯ್ಲೆಂ! ಮತಿಂತ್‍ಚ್ ಚಾರ್ ಗಾಳಿ ಮಾಲ್ರ್ಯೊ. ಕಾಂಯ್ ಹಾಡಿನಾಸ್ತಾನಾ ಆಯಿಲ್ಲೊಂ ಜಾಲ್ಯಾರ್ ಬರೆಂ ಆಸ್ಲೆಂ ಮ್ಹಣ್ ಭೊಗ್ಲೆಂ ಮ್ಹಾಕಾ.

ಕಸ್ಟಮ್ ಕ್ಲಿಯರೆನ್ಸ್ ಜಾವ್ನ್ ಡೊಮೆಸ್ಟಿಕ್ ಏರ್‌ಪೋರ್ಟಾಂತ್ ಜೆಟ್ ಏರ್‌ವೇಸ್ ಕೌಂಟರಾಕ್ ಪಾವ್ತಾನಾ ಸಕಾಳ್ಚಿಂ 8.15 ಜಾಲ್ಲಿಂ. ವಿಮಾನಾರ್ ಪಯ್ಣಾರ್‍ಯಾಂಕ್ ಭಿತರ್ ಘೆಂವ್ಚೊ ವೇಳ್ ಉತ್ರಾಲ್ಲೊ! ಟಿಕೆಟಿಕ್ ದಿಲ್ಲೆ ಪಯ್ಶೆ ರು. 3,500 ಉದ್ಕಾಕ್ ಗೆಲೆ. ಉಪ್ರಾಂತ್ ಭಾಯ್ರ್ ಯೇವ್ನ್ ಸಕ್ಕಡ್ ಏರ್‌ಲೈನ್ಸಾಂನಿ ಚೆಕ್ ಕೆಲೆಂ. ಟಿಕೆಟಿ ನಾಂತ್. ಇಂಡಿಯನ್ ಏರ್‌ಲೈನ್ಸಾಂತ್ ವಿಚಾರ್ತಾನಾ ಮಾತ್ರ್ ಚೊವ್ತ್ಯಾ ದಿಸಾಚಿ ಏಕ್ ಟಿಕೆಟ್ ಮಾತ್ರ್ ಆಸಾ ಮ್ಹಣ್ ಸಾಂಗಲಾಗ್ಲೆ. ಟಿಕೇಟಿಕ್ ರು. 4,000. ಸೂಟ್‍ಕೇಸ್ ಘೆವ್ನ್ ಹೆಣೆಂ ತೆಣೆಂ ವಿರಾರ್ ಜಾವ್ನ್ ಹೆವ್ಶಿನ್ ತೆವ್ಶಿನ್ ಭೊಂವ್ತಾನಾ ಆತಾಂ ಕಿತೆಂ ಕರ್ಚೆಂ? ತೀನ್ ಚಾರ್ ದೀಸ್ ಮುಂಬಯ್ತ್ ಖಂಯ್ ರಾಂವ್ಚೆಂ? ರಜಾಯೀ ಭಾರೀ ಉಣಿ ಆಸ್‍ಲ್ಲಿ, ಕಶೆ ದೀಸ್ ಪಾಶಾರ್ ಕರ್ಚೆ? ಅಶೆಂ ಚಿಂತಾನಾ ಮ್ಹಾಕಾ ಸಾವೆರಾಮಾಚೊ ಪರತ್ ಉಡಾಸ್ ಆಯ್ಲೊ – ತಾಚ್ಯೊ ಲೊರಿಯೊ ಮುಂಬಯ್ ಯೆತಾತ್, ಅಶೆಂ ತಾಕಾ ಚಿಂತುನ್ ಮಾತೆಂ ಖೊರ್ಪುನ್ ಆಸ್ತಾನಾ, “ಆಲ್ವಿ… ಆಲ್ವಿ…” ಮ್ಹಣ್ ಉಲೊ ಮಾರ್ಚೊ ತಾಳೊ ಆಯ್ಕಲೊ – ತಾಳೊ ಮ್ಹಾಕಾ ಭಾರೀ ವಳ್ಕಿಚೊಚ್, ಕೋಣ್ ಮ್ಹಾಕಾ ಆಪಯ್ತಾಗಾಯ್ ಮ್ಹಣ್ ಆವಾಜ್ ಆಯಿಲ್ಲ್ಯಾ ಕುಶಿಕ್ ಪಳೆತಾನಾ ಆಮ್ಚೊ ಸಾವೆರಾಮ್ ಮಾತ್ಯಾರ್ ಪೊಲಿಸ್ ಇನ್ಸ್‍ಪೆಕ್ಟರಾಪರಿಂ ಹೆಟ್, ಖಾಕಿ ಪೇಂಟ್ ಆನಿ ಲಾಂಬ್ ಹಾತಾಂಚೆಂ ಶರ್ಟ್ ಘಾಲ್ನ್ ಪಾಯಾಂಕ್ ತಾಂಬ್ಡೆ ಮೊಚೆ ಘಾಲ್ನ್ ರಾವ್ಲಾ! ವರ್ಸಾಂಚ್ಯಾ ವರ್ಸಾಂ ಥಾವ್ನ್ ಪೊಪ್ಳ್ಯಾಂಚಿ ಲುಂಗಿ ನ್ಹೆಸೊನ್ ಆಸ್ಚೊ ಸಾವೆರಾಮ್ ಆಜ್ ಮ್ಹಜೆ ಮುಕಾರ್ ಇನ್ಸ್‌ಪೆಕ್ಟರಾಪರಿಂ ಉಬೊ ಆಸ್‍ಲ್ಲೊ.

“ತುಂ ಕಿತೆಂ ಸಾಯ್ಬಾ ಹಾಂಗಾ? ಕಾಂಯ್ ಪೊಲಿಸ್ ಇಲಾಖ್ಯಾಂತ್ ಕಾಮಾಕ್ ಲಾಗ್ಲಾಯ್ ಕಿತೆಂ? ಇನ್ಸ್‌ಪೆಕ್ಟರಾ ಭಾಶೆನ್ ದಿಸ್ತಾಯ್ ಪಳೆಂವ್ಕ್.”

“ಆಲ್ವಿ, ಹಾಂವ್ ಆತಾಂ ಉಬ್ಚ್ಯಾ ಲೊರಿಯೆಚೊ ಪೈಲೆಟ್! ಮ್ಹಜ್ಯಾ ಲೊರಿಯೆಕ್, ಬೆಂಗ್ಳುರ್ ಎಚ್‍ಎಎಲ್ ಥಾವ್ನ್ ಪರ್ನಿಂ ಇಂಜಿನಾಂ ಹಾಡ್ನ್ ಬಸಯ್ಲ್ಯಾಂತ್, ವಾರ್‍ಯಾರ್ ಉಬ್ಚೆಪರಿಂ ಕೆಲಾಂ. ಪಯ್ಣಾರ್‍ಯಾಂಕ್ ಬಸೊಂಕ್ ಬರ್‍ಯೊ ಬಸ್ಕಾ ಘಾಲ್ಯಾತ್. ಮಂಗ್ಳುರ್ ಮುಂಬೈಕ್ ಸದಾಂ ಎಕೇಕ್ ಟ್ರಿಪ್ ಮಾರ್ತಾಂ. ಏರ್‌ಪೋರ್ಟಾಚ್ಯಾ ಗಡಿ ಭಾಯ್ರ್ ರಾವಯ್ತಾಂ ಆನಿ ಥಂಯ್ ಥಾವ್ನ್ಂಚ್ ಉಬಯ್ತಾಂ. ಟಿಕೆಟ್ ಫಕತ್ 600 ರು. ಮಾತ್ರ್. 20 ಜಣಾಂಕ್ ವ್ಹರ್ಯೆತಾ. ಎದೊಳ್ 19 ಜಾಲ್ಯಾತ್ ಏಕ್ ಸೀಟ್ ಆಸಾ. ಯೆತಾಯ್ ಜಾಲ್ಯಾರ್ ಚಲ್.” ಅಶೆಂ ತೊ ಸಾಂಗ್ತಾನಾ ಹಾಂವ್ ಒಪ್ಲೊಂ. ಅಶೆಂ ಮ್ಹಜಿ ಸೂಟ್‍ಕೇಸ್ ಘೆವ್ನ್ ಸಾವೆರಾಮಾ ಸಂಗಿಂ ಮೆಟಾಂ ಕಾಡ್ಲಿಂ.

ಪಳೆತಾಂ ತರ್ ವಿಮಾನ್ ಥಳಾಚ್ಯಾ ಗಡಿ ಭಾಯ್ಲ್ಯಾನ್ ಆಸ್ಚ್ಯಾ ಮಾರ್ಗಾರ್ ಸಾವೆರಾಮಾಚಿ ಉಬ್ಚಿ ಲೊರಿ ಉಬಿ ಆಸ್‍ಲ್ಲಿ. ಸೆಕ್ಯುರಿಟಿ ಪೊಲಿಸ್ ಆಸ್ಲೆ ತರೀ ಸಾವೆರಾಮಾಚೆಂ ತಾಂಚೆ ಸಂಗಿ ಸೆಟ್ಟಿಂಗ್ ಆಸ್‍ಲ್ಲೆಂ ಜಾಲ್ಲ್ಯಾನ್ ಕಾಂಯ್ ತ್ರಾಸ್ ನಾತ್ಲೆ! ಹಾಂವ್ ಭಿತರ್ ರಿಗ್ತಚ್ – ಪೈಲೆಟ್ ಸಾವೆರಾಮಾ ಸಂಗಿಂ ಬಸೊಂಕ್ ಸೀಟ್ ದಿಲಿ ಆನಿ ಇಂಜಿನ್ ಚಾಲು ಕೆಲೆಂ! ಸುಟ್ಚ್ಯಾ ಪಯ್ಲೆಂ ಏರ್‌ಪೋರ್ಟ್ ಬೌಂಡರಿ ಭಾಯ್ರ್ ಸುಮಾರ್ 4 ಕಿ.ಮೀ. ಮಾರ್ಗಾಚ್ಯಾ ದೊನೀ ಪೊಂತಾಂನಿ ಪೊಲಿಸ್ ಖಂಚಿಚ್ಚ್ ಟ್ರಾಫಿಕ್ ವಚೊಂಕ್ ಸೊಡಿನಾಂತ್.

ಆತಾಂ ಲೊರಿ ಟೇಕ್‍ಆಫಾಕ್ (ಉಬೊಂಕ್) ತಯಾರ್ ಜಾವ್ನ್ ಧಾಂವೊಂಕ್ ಸುರು ಜಾಲಿ. ಧಾಂವ್ತಾಂ ಧಾಂವ್ತಾನಾ ಸಾವೆರಾಮ್ (ಪೈಲೆಟ್) ಗಿಯರ್ ಬದ್ಲುನ್‍ಂಚ್ ಆಸಾ. ಲೊರಿಯೆಚೊ ವೇಗ್ ಚಡ್ಲೊ… ಇತ್ಲೊ ಚಡ್ಲೊಕೀ ಲೊರಿ ಗಡ… ಗಡ… ಕರುನ್ ಹಾಲೊಂಕ್ ಲಾಗ್ಲಿ. ತೊ ರಸ್ತೊ ಕಾಬಾರ್ ಜಾತಾ ಮ್ಹಣ್ತಾನಾ ಲೊರಿ ವಯ್ರ್ ಉಬಾರ್ಲಿ! ಖಂಚಿಂಯೀ ವಿಮಾನಾಂ 30° ಕೋನಾಚೆರ್ ವಯ್ರ್ ವ್ಹೆತಾತ್ ಜಾಲ್ಯಾರ್, ಆಮ್ಚಿ ಲೊರಿ 90° ಕೋನಾಚೆರ್ ವಯ್ರ್ ಉಬ್ಲಿ!! ಮ್ಹಾಕಾ ಭಿಂಯಾನ್ ಕಾಂಯ್ ನಜೊ, ಜಿವಾ ಭಿತರ್ ಆಸ್‍ಲ್ಲೆ ಸಗ್ಳೆ ವಿಶ್ವೆ ತೊಂಡಾಂತ್, ಹಧ್ರ್ಯಾಂತ್ ಆಯ್ಲೆ… 91° ಜಾಲ್ಲಿ ಜಾಲ್ಯಾರ್ Roller Coaster ಭಾಷೆನ್ ಸರ್ಕಸ್ ಜಾತೆಂ! ವಯ್ರ್ ವೆತಾಂ ವೆತಾಂ ಆಮ್ಕಾಂ ಚುಕ್‍ಲ್ಲೆಂ ಜೆಟ್ ಏರ್‍ವೇಸ್ ದಿಸ್ತಾಲೆಂ – ಸಾವೆರಾಮ್ ಮ್ಹಣಾಲೊ, “ಅಳೆ ತುಮ್ಕಾಂ ಚುಕ್‍ಲ್ಲೆಂ ವಿಮಾನ್ ಮುಕಾರ್ ಆಸಾ.” ಹಾಂವೆಂ ಆತಾಂ ದೊಳೆ ಧಾಂಪ್ಲೆ – ಕಾಂಯ್ ಹೊ ಆತಾಂ ಲೊರಿ ವ್ಹರುನ್ ವಿಮಾನಾಕ್ ಡಿಕ್ಕಿ ಮಾರ್ತಾಗಿ ಮ್ಹಣ್ ಚಿಂತುನ್ ಕಾಳಿಜ್ ಹಾತಾಂತ್ ಧರುನ್ ಬಸ್ಲೊಂ!

ಕಶೆಂಯ್ ಸಾವೆರಾಮಾನ್ ಲೊರಿ ಕಂಟ್ರೊಲಾರ್ ಹಾಡ್ಲಿ ಆನಿ ಧಲ್ಚ್ಯಾ ಲೊರಿಯೆಕ್ 0° ಕರ್ನ್ ನೀಟ್ ಕೆಲಿ. ಆತಾಂ ಆಮ್ಚ್ಯೊ ಸುರು ಜಾಲ್ಯೊ ಗಜಾಲಿ ಆನಿ ಖುಶಾಲಾಯ್ ಭರ್‌ಲ್ಲಿಂ ಪಟ್ಟಾಂಗಾಂ.

“ಹ್ಯಾ ನಮುನ್ಯಾಚೆಂ ನವೆಂ ಸರ್ವಿಸ್ ಸುರು ಕೆಲೆಂಯ್ಗಿ?” ಹಾಂವೆಂ ವಿಚಾರ್ಲೆಂ. ವ್ಹಯ್ ತುಜೆ ತಸಲ್ಯಾ ಫ್ಲೈಟ್ ಚುಕ್‍ಲ್ಲ್ಯಾ ಬೊಕ್ರ್ಯಾಂಕ್ ತಶೆಂಚ್ಚ್ ಮುಂಗಡ್ ಬುಕ್ಕಿಂಗ್ ಕೆಲ್ಲ್ಯಾ ಪ್ಯಾಸೆಂಜರಾಂಕ್ ಮ್ಹಜ್ಯಾ ಉಬ್ಚ್ಯಾ ಲೊರಿಯೆರ್ ವ್ಹರ್ಚೆಂ. ಬೊಕ್ರೊ ಮ್ಹಣ್ತಾನಾ ಮ್ಹಾಕಾ insult ಜಾಲೆಂ. ಕಠೀಣ್ ರಾಗ್ ಆಯ್ಲೊ. ತೊ ಮ್ಹಜ್ಯಾ ಉಜ್ವ್ಯಾ ಕುಶಿಕ್ ಪೈಲೆಟ್ ಸಿಟಿಚೆರ್ ಬಸೊನ್ ಆಸಾ. ಹಾಂವೆಂ ದಾವ್ಯಾ ಹಾತಾನ್ ಏಕ್ ಚಟ್ಟ್ ಕರ್ನ್ ಥಾಪಡ್ ಭರ್‌ಲ್ಲಿಂ ಮ್ಹಣ್ ಚಿಂತ್ಲೆಂ. ಹೆಂ ಕಾಮ್ ಕಿತ್ಲೆಂ ಮ್ಹಳ್ಯಾರೀ ಮ್ಹಜ್ಯೆ ವರ್ವಿಂ ಜಾಂವ್ಚೆಂ ನ್ಹಯ್! ಎಕಾದಾವೆಳಾ ಮಾರ್ಲೆಂ ಜಾಲ್ಯಾರ್ ತೊ ರಾಗಾನ್ ಉಬ್ಚಿ ಲೊರಿ ವ್ಹರ್ನ್ ಶೀದಾ ಗುಂಡ್ಯೆಕ್ ಘಾಲಿತ್ ಮ್ಹಣ್ ಹಾಂವ್ ಭಿಯೆಲೊಂ ಆನಿ ಮ್ಹಜೊ ರಾಗ್ ಮ್ಹಜೆಯಿತ್ಲ್ಯಾಕ್‍ಚ್ ನಿವಯ್ಲೊ ಆನಿ ಸಮಾಧಾನ್ ಕಾಣ್ಗೆಲೆಂ. ಕಿತ್ಯಾಕ್ ಮ್ಹಳ್ಯಾರ್ ಆಜ್‍ಕಾಲ್ ಕೊಣಾಯ್ಕೀ ಪಾತ್ಯೆಂವ್ಕ್ ಜಾಯ್ನಾ!

“ಆತಾತಾಂ ಲೊರಿಯಾಂಚೊ ವ್ಯವಹಾರ್ ಉಣೊ ಜಾಲಾ ಆನಿ ಬೆಕಾರ್. ಭಾಡಿಂ ಮೆಳನಾಂತ್ ಪಯ್ಲೆಂಚೆಪರಿಂ. ಘಾಟಾಚಿಂ ಟ್ರಿಪ್ಪಾಂ, ಕಾಫಿ, ಸಾರೆಂ, ನಳೆ ಪೂರಾ ಬಂದ್. ಯೂರಿಯಾ ವ್ಯಾಗನಾಂಚೆರ್ ವೆತಾ. ಲೊರಿಯಾಂಚೆ ಸ್ಪೇರ್‌ಪಾರ್ಟ್ಸ್, ಡೀಸೆಲ್ ಇತ್ಯಾದಿ ಕಠಿಣ್ ಮ್ಹಾರಗ್. ಪಾತ್ಯೆಣೆಚೆ ಡ್ರೈವರ್ ಮೆಳನಾಂತ್. ಮೆಳ್ಚ್ಯಾ ಭಾಡ್ಯಾಂತ್ ಪುರೊ ಪಡನಾ ದೆಕುನ್ 13 ಲೊರಿಯೊ ವಿಕ್ಲ್ಯೊ. ಉರ್ಲೆಲ್ಯಾ ದೊನಾಂತ್ ಏಕ್ ಅಶಿ ಕನ್ವರ್ಟ್ ಕೆಲಿ ತರ್ ಆನ್ಯೇಕ್ ತಯಾರ್ ಜಾವ್ನ್ ಆಸಾ” ಮ್ಹಣಾಲೊ ಸಾವೆರಾಮ್.

“ಹಾಂತುಂ ತುಕಾ ಕಿತ್ಲೆಂ ಕಲೆಕ್ಷನ್ ಜಾತಾ?”

“ಎಕ್ಲ್ಯಾಕ್ ರು. 600 ಲೆಕಾನ್ 20 ಜಣಾಂಕ್ ರು. 12,000/- ಜಾತಾತ್. ಲೊರಿಯೆರ್ ಏಕ್ ಲೋಡ್ ಮುಂಬೈ ಥಾವ್ನ್ ಗಾಂವಾಕ್ ವ್ಹೆಲ್ಯಾರ್ ಮೆಳ್ಚೆ ಕೇವಲ್ ರು. 3,500/-” ಮ್ಹಣಾಲೊ ಸಾವೆರಾಮ್ ಗತ್ತಾನ್.

ತಿತ್ಲ್ಯಾರ್ ದೊಗಾಂ ಬ್ರೇಕ್‍ಫಾಸ್ಟ್ ಹಾಡ್ನ್ ಆಯ್ಲಿಂ. ಗಾಂವ್ಚೆ ಕಡ್ಲೆ ಬಜಿಲ್, ಉಕಡ್ಲೆಲಿ ಕಣ್ಗಿ ಆನಿ ಗೊಡಾಚಿ ಚ್ಹಾ! ಹಾಡ್ನ್ ಆಯ್ಲಿಂ ದೊಗಾಂ ಬಾಯ್ಲ್ ಮನ್ಶಾ ಧವೆಂ ಕಾಪಡ್ ನ್ಹೆಸೊನ್. ತಿಂ ಲೇಡಿಗೋಷನ್ ಆಸ್ಪತ್ರೆಚಿಂ ರಿಟಾಯರ್ಡ್ ನರ್ಸಾಂ. ಎಕ್ಲೆಂ ಯಮುನಕ್ಕ ಆನಿ ದುಸ್ರೆಂ ಜಲಜಕ್ಕ ಲೊರಿ ಏರ್ ಹೊಸ್ಟೆಸ್ ಜಾವ್ನ್ ಆಸ್ಲಿಂ.

ಖಂಚಿಂಯ್ ವಿಮಾನಾಂ ಉಣ್ಯಾರ್ 30 ಥಾವ್ನ್ 40 ಹಜಾರ್ ಫಿಟಿ ಉಂಚಾಯೆರ್ ಉಬ್ತಾತ್ ಜಾಲ್ಯಾರ್ ಸಾವೆರಾಮಾಚಿ ಲೊರಿ ದೇಡ್ ಥಾವ್ನ್ ಅಡೇಜ್ ಹಜಾರ್ ಫಿಟಿ ವಯ್ಲ್ಯಾನ್ ಉಬ್ತಾಲಿ! ಬಸ್‍ಲ್ಲೆಕಡೆ ಥಾವ್ನ್ ಸಕ್ಲಾ ಪಳೆತಾನಾ ರೂಕ್, ಝಾಡಾಂ, ಘರಾಂ, ಮಾರೊಗ್ ಪುರಾ ಸಾರ್ಕೆ ದಿಸ್ತಾತ್! ಘರಾಂತ್ಲೊ ಲೋಕ್ ಭಾಯ್ರ್ ಯೇವ್ನ್ ವಯ್ರ್ ಮೊಳ್ಬಾಕ್ ಪಳೆತಾ, ಸಾವೆರಾಮಾಚಿ ಉಬ್ಚಿ ಲೊರಿ ಪಳೆಂವ್ಕ್ ತಾಂಕಾಂ ಭಾರಿಚ್ ಆತುರಾಯ್. “ಕಿತ್ಯಾಕ್ ಇತ್ಲ್ಯಾ ಸಕಯ್ಲ್ ಉಬಯ್ತಾಯ್?” ಮ್ಹಣ್ ಹಾಂವೆಂ ವಿಚಾರ್ಲೆಂ.

“ಆದಿಂ ಮಂಗ್ಳುರ್ ಮುಂಬೈ ಗೆಲ್ಲಿ ವಾಟ್ ಮ್ಹಾಕಾ ದಿಸಾಜೆ ನೆ, ತ್ಯಾಚ್ ವಾಟೆನ್ ಅಂದಾಜಾಚೆರ್ ವೆಚೆಂ – ಖಂಡಾಲಾ, ಪೂನಾ, ಸತಾರಾ, ಕೊಲ್ಹಾಪುರ್, ಬೆಳ್ಗಾಂವ್, ಯೆಲ್ಲಾಪುರ್, ಹೊನ್ನಾವರ್, ಭಟ್ಕಳ್, ಕುಂದಾಪುರ್, ಉಡ್ಪಿ ಆನಿ ಮಂಗ್ಳುರ್. ಹೆ ಸಗ್ಳೆ ಜಾಗೆ ವಯ್ರ್ ಥಾವ್ನ್ ಮ್ಹಾಕಾಯೀ ಪಳಂವ್ಕ್ ಮೆಳ್ಳೆ.

ಪುಣೆಗೆಲ್ಲ್ಯಾಕ್ ವಾಟೆರ್ ದೋನ್ ತೀನ್ ವ್ಹಡ್ ಜಯ್ತ್ ದೊಂಗೊರ್ ಮೆಳ್ಳೆ. ತ್ಯಾ ದೊಂಗ್ರಾಂಕ್ ಕಾಂಯ್ ಆಪ್ಟಯ್ತಾ ಕೊಣ್ಣಾ ಮ್ಹಣ್ ಜೀವ್ ಹಾತಾಂತ್ ಧರ್ನ್ ಬಸ್‍ಲ್ಲೆ ಸಗ್ಳೆ, ತಾಂಚೆ ಮಧೆಂ ಹಾಂವ್‍ಯೀ! ಪುಣ್ ಸಾವೆರಾಮ್ ಪೈಲೆಟ್ ಭಾರಿಚ್ ಚಾಲಾಕ್ ಆನಿ ಹುಷಾರ್. ತ್ಯಾ ದೊಂಗ್ರಾಂಕ್ ಆಡಾವ್ನ್ ವಯ್ರ್ ಸಕ್ಲಾ ಕರ್ನ್ ಹಾಡ್ನ್ ಆಯ್ಲೊ. ವಿಮಾನ್ ದೇಡ್ ಘಂಟ್ಯಾನ್ ಮಂಗ್ಳುರ್ ಪಾವ್ತಾ ಜಾಲ್ಯಾರ್ ಹಾಚಿ ಲೊರಿ ಆನಿಕೀ ಪೂನಾ ಪಾವೊಂಕ್ ನಾತ್‍ಲ್ಲಿ! ವೊರಾಂ ಪಳೆತಾನಾ ದೋನ್ ಘಂಟೆ ಉತರ್ಲೆಲೆ. ಮ್ಹಜ್ಯಾ ತೊಂಡಾರ್ ಆಕಾಂತ್ ದಿಸ್ಲೊ ಜಾಯ್ಜೆ ಸಾವೆರಾಮಾಕ್. ತಾಚ್ಯಾ ಸಿಟಿಚ್ಯಾ ಬಗ್ಲೆಕ್ ಆಸ್‍ಲ್ಲೆಂ ಲ್ಹಾನ್ ಬುಂಯಾಂವ್ ಮ್ಹಜ್ಯಾ ಹಾತಾಕ್ ದಿಲೆಂ.

“ಹಾಂತ್ಲೆ ದೋನ್ ಘೊಟ್ ಕಾಡ್! ವೇಳ್ ಗೆಲ್ಲೊ ಕಳ್ಚೊಚ್ಚ್ ನಾ-ಆಪುಟ್ ಕಾಜುಚೊ ಮುಚ್ಚೂರ್ ಥಾವ್ನ್ ಹಾಡ್‍ಲ್ಲೊ!” ಮ್ಹಣಾಲೊ ತೊ. ಕಾಜುಚೊ ಮ್ಹಣ್ತಾನಾ ಮ್ಹಾಕಾ ಉರ್ಬಾ ಆಯ್ಲಿ. ಹಾಂವೆಂ ವೋಂಟ್ ಲೆಂವ್ಲೆ ಆನಿ ಬುಂಯಾಂವಾಚೆಂ ಧಾಂಕ್ಣೆ ಕಾಡ್ನ್ ಏಕ್, ದೋನ್ ಆನಿ ತೀನ್ ಘೊಟ್ ಪಾಟಾಪಾಟ್ ಕಾಡ್ಲೆ! ತಿಸ್ರ್ಯಾ ಘೊಟಾನ್ ಕಾಮ್ ಸುರು ಕೆಲೆಂಚ್. ಹಾಂವ್ ಬಸ್‍ಲ್ಲೆ ಕಡೆನ್ ಧಲೊಂಕ್ ಲಾಗ್ಲೊಂ – ದೊಳೆ ಗಯ್ರೆ ಗಯ್ರೆ ಜಾಲೆ. ಸಾವೆರಾಮಾಚಿ ಲೊರಿ ಉಬ್ತಾಗೀ ವಾರ್ಯಾರ್ ಯಾ ಧಾಂವ್ತಾಗೀ ರಸ್ತ್ಯಾರ್ ಮ್ಹಣ್ ಕಳ್ಳೆಂನಾ!

ಹ್ಯೊ ತ್ಯೊ ಗಜಾಲಿ ಕರ್ನ್ ಆಸ್‍ಲ್ಲೊ ಸಾವೆರಾಮ್ ಬುಂಯಾವಾಂತ್ಲೊ ಏಕ್ ಘೊಟ್ ಕಾಡಿಲಾಗ್ಲೊ ಆನಿ ಎಕಾ ಘೊಟಾನ್‍ಂಚ್ ತಾಚಿ ಜೀಬ್, “ಲಾಂಬ್ಡಿ ಜುವಾನಾ ತುಕಾ ನವ್ರೊ ಪಾವನಾ…” ಮ್ಹಳ್ಳೆಂ ಪದ್ ಗಾಂವ್ಕ್ ಲಾಗ್ಲೊ. ತಾಚೆಂ ರಾವ್ತಾನಾ ಹಾಂವೆಂ, “ತೆಂಡ್ಲೆ ತುಜೊ ಬೇಲ್‍ಗೇ…” ಮ್ಹಳ್ಳೆಂ ಪದ್ ಸುರು ಕೆಲೆಂ. ಪಾಟ್ಲ್ಯಾನ್ ಬಸ್‍ಲ್ಲ್ಯಾ ಪ್ಯಾಸೆಂಜರಾಂಕ್ ಕೊಣಾಕ್ ಜಾಯ್ ಪಳೆ ತಾಂಕಾಂ ಎಕೇಕ್ ಡರಮ್ ಸೊರೊ ದಿಲೊ. ಆತಾಂ ತಾಂಣಿಂಯೀ ಖುಶೆನ್ ತಾಳಿಯೊ ಪೆಟುಂಕ್ ಸುರು ಕೆಲ್ಯೊ. ಯಮುನಕ್ಕ ಆನಿ ಜಲಜಕ್ಕ ಪೆಂಕ್ಡಾಂ ಧಲಯ್ತಾಲಿಂ! “ವ್ಹಾ! ಹಿ ಮಜಾ ಜೆಟ್ ಏರ್‌ವೇಸಾರ್ ಗೆಲ್ಲೊಂ ಜಾಲ್ಯಾರ್ ಮೆಳ್ತಿನಾ!”

ಗಜಾಲಿ ಮುಖಾರ್ ವೆತಾಂ ಫೆಡ್ಡಿಯಾಮ್ ಆನಿ ಲೊರಿಯಾಮ್ ಕಶೆ ಆಸಾತ್? ತಾಂಚೆಂ ಬಿಸ್ನೆಸ್ ಕಶೆಂ ಆಸಾ? ತಾಂಚ್ಯೊಯ್ ಪೂರಾ ಲೊರಿಯೊ ವಿಕುನ್ ಗೆಲ್ಯೊ ಆನಿ ಆತಾಂ ದೊಗಾಂಯ್ ಕಡೆನ್ ಎಕೇಕ್ ಉಲ್ರ್ಯಾತ್. ತೆಯೀ ಆತಾಂ ಮ್ಹಜೆಂ ಸಕ್ಸೆಸ್ ಪಳವ್ನ್ ವಾರ್ಯಾರ್ ಉಬೊಂಕ್ ಚಿಂತಾತ್. ಹಾಂವೆಂ ತಾಂಕಾಂ ವಾಟ್ ದಾಕವ್ನ್ ತಾಂಕಾಂ ವಯ್ರ್ ಹಾಡ್ನ್ ಆತಾಂ ವ್ಹಡ್ಲ್ಯಾ ಭಾವಾಕ್ ಕೊಂಪೀಟ್ ಕರುಂಕ್ ಭಾಯ್ರ್ ಸಲ್ರ್ಯಾತ್ ಮ್ಹಣ್ ಶಿಣ್ ಉಚಾರಿಲಾಗ್ಲೊ.

“ಅಳೆ, ಸುರತ್ಕಲ್ ಆಯ್ಲೆಂ!!” ಅಶೆಂ ಗಜಾಲಿ ಮಾರ್ನ್ ವೆತಾಂ ವೆತಾಂ ಮ್ಹಣಾಲೊ ಸಾವೆರಾಮ್. “ತರ್ ಬಜ್ಪೆ ಆತ್ತಾಂ ಪಾವ್ತಾಂವ್. ತುಂ ಏರ್‌ಪೋರ್ಟಾ ಭಿತರ್ ದೆಂವ್ತಾಯ್ಗೀ ಯಾ ಗಡಿಚ್ಯಾ ಭಾಯ್ರ್?” ಹಾಂವೆಂ ವಿಚಾರ್ಲೆಂ ಪೈಲೆಟ್ ಸಾವೆರಾಮಾಕ್. ಮಾಗಿರ್ ಮ್ಹಾಕಾ ಕಳ್ಳೆಂಗೀ ವೇಳ್ ಗೆಲ್ಲೊಚ್ಚ್ ಕಳನಾ ಕಿತ್ಯಾಕ್ ಮ್ಹಣ್ತಾಲೊ ಮ್ಹಳ್ಯಾರ್ ಸಾಡೆ ಚಾರ್ ಘಂಟೆ ಲಾಗ್ಲೆ ಕೊಡ್ಯಾಳ್ ಪಾವೊಂಕ್! ದೆಂವೊಂಕ್ ಏರ್‌ಪೋರ್ಟಾ ಭಿತರ್ ಸೊಡಿನಾಂತ್, ಪರ್ಮಿಶನ್ ನಾ. ಭಾಯ್ರ್ ದೆಂವಂಯಾ ಮ್ಹಳ್ಯಾರ್ ಸಮಾಕಟ್ಟ್ ರೂಂದ್ ಮಾರೊಗ್ ನಾ. ರೂಕ್ ಝಾಡಾಂ, ಗುಡೆ, ಜಿರಿಯೊ ದೆಕುನ್ ಸಾಧ್ಯ್ ನಾ. ದೇರೆಬೈಲ್ ಲಾಗ್ಸರ್ ಹರಿಪದ್ವಾರ್ ದೆಂವಯ್ತಾಂ ಮ್ಹಣಾಲೊ. ಮ್ಹಜೆಂ ಘರ್ ಕೊಟ್ಟಾರ್ ಕ್ರಾಸ್ ಕೋಟೆಕಣಿ ಜಾಲ್ಲ್ಯಾನ್ ಮಸ್ತ್ ಖುಶಿ ಜಾಲಿ, ಲಾಗ್ಗಿಂ ಜಾಲೆಂ ಮ್ಹಣ್.

“ಏರ್‌ಪೋರ್ಟಾ ಭಿತರ್ ಸೊಡಿನಾಂತ್, ಹರಿಪದ್ವಾರ್ ದೆಂವಂಯ್ತಾಂ. ಸಕ್ಡಾಂಕೀ ಬರೆಂ” ಮ್ಹಣೊನ್ ತಾಣೆಂ ಲೊರಿಯೆಕ್ ಹರಿಪದ್ವಾಚ್ಯಾ ಕುಶಿಕ್ ಘುಂವ್ಡಾಯ್ಲಿ! ಆದ್ಲೊ ಕ್ಲೀನರ್ ಹರಿಪದ್ವಾರ್ ರಾವ್ಲಾ ಆನಿ ಕಿತೆಂ ಹರಿಪದ್ವಾಚ್ಯಾ ತುದ್ಯೆರ್ ಲೊರಿ ದೆಂವ್ಲಿ, ಪುಣ್ ಉಬ್ಚ್ಯಾ ವೆಗಾರ್ ಆಸ್‍ಲ್ಲಿ ಲೊರಿ – ಲೊರಿಯೆಚೊ ಕ್ಲೀನರ್ ತುವಾಲೊ ಬಿಜಾವ್ನ್ ಡೈರೆಕ್ಷನ್ ದಿತಾಲೊ. ಪುಣ್ ಸಾವೆರಾಮ್ ತಾಚ್ಯಾಚ್ ಮುಖಾರ್ ಆಸ್‍ಲ್ಲೊ ಜಾಲ್ಲ್ಯಾನ್ ಕ್ಲೀನರಾಚೆಂ ಸಿಗ್ನಲ್ ತಾಣೆಂ ಪಳೆಲೆಂನಾ – ಲೊರಿ ದಢಾಕ್ಕ್ ಕರ್ನ್ ಗ್ರೌಂಡಾಕ್ ಆಪ್ಟಾಲಿ! ವಚೊನ್ ತೊಡಾಂತ್ ಡಬಲ್ಲ್ ಕರ್ನ್ ಪಡ್ಲಿ. ಟಯರಾಂ ತೊಡಾಂತ್ ಶಿರ್ಕಲ್ಲ್ಯಾನ್ ಮುಖಾರ್ ಜಿರಿಯೆಂತ್ ಪಡ್ಚೆಂ ಬಾಕಿ. ಡಬ್ಬ್ಯಾಕ್ ಪಯ್ಶೆ ಘಾಲ್ಲ್ಯಾಪರಿಂ ಜಾತೆಂ ಕೊಣ್ಣಾ! ಆತಾಂ ಸಕ್ಕಡ್ ಪ್ಯಾಸೆಂಜರ್ disembark ಜಾಲ್ಯಾಂವ್. ತೋಡ್ ತಿಕ್ಕೆ ಅಶೀರ್ ಆಸ್‍ಲ್ಲ್ಯಾನ್ ಟಯರಾಂ ತಾಂತು ಶಿರ್ಕಲಿಂ ಜಾಲ್ಲ್ಯಾನ್ ಆಮ್ಕಾಂ ಪ್ಯಾಸೆಂಜರಾಂಕ್ ದೆಂವೊಂಕ್ ಕಷ್ಟ್ ಜಾಲೆನಾಂತ್ ಮ್ಹಣ್ಯಾಂ – ಪುಣ್ಯಾನ್ ಕೊಣಾಕ್‍ಯೀ ಮಾರ್ ಜಾಲೆನಾಂತ್.

ವೇಳ್ ದೊನ್ಪಾರಾಂಚೊ ಎಕಾ ವೊರಾಚೊ, ಭಾಯ್ರ್ ಕಠಿಣ್ ವೋತ್. ಏಕ್ ರಿಕ್ಷಾ ಯಾ ಟ್ಯಾಕ್ಸಿ ಪದ್ವಾ ಲಾಗಿಂ ಆಸ್ಚ್ಯಾ ರಸ್ತ್ಯಾರ್ ದಿಸಾನಾತ್ಲಿ. ಥೊಡೆ ಭಟ್ಕಳ್ಚೆ, ಕಾಸರ್‌ಗೋಡ್ಚೆ, ಥೊಡೆ ಕುಲ್ಶೇಕರ್ಚೆ, ಥೊಡೆ ಯೆಯ್ಯಾಡಿ, ಬೊಂದೆಲ್ಚೆ ಪ್ಯಾಸೆಂಜರ್ ಆಸ್ಲೆ, ವೊತಾಚ್ಯಾ ದಾವೆಕ್ ಕರ್ಪೊನ್ ಯೆತಾಲೆ, ತ್ಯಾ ಕಾಳಾರ್ ಮೊಬಾಯ್ಲಾಂ ನಾತ್ಲಿಂ ಜಾಲ್ಲ್ಯಾನ್ ಕಿತೆಂ ಕರ್ಚೆಂ ತೆಂ ಕಳ್ಳೆಂನಾ. ಹರಿಪದ್ವಾ ಥಾವ್ನ್ ಆಮ್ಚ್ಯಾ ಘರಾಕ್ ಉಣೆಂ ಮ್ಹಳ್ಯಾರ್ ದೋನ್ ಕಿ.ಮೀ. ವಾಟ್ ಆಸ್ಲಿ. ಹಾಂವ್ ಮ್ಹಜಿ ಪಠಾಣ್ ಸೂಟ್‍ಕೇಸ್ ಘೆವ್ನ್ 11 (ಇಕ್ರಾ) ನಂಬ್ರಾಚೆರ್ ಆಯ್ಲೊಂ (ಚಲೊನ್!) ಆನಿ ಪದವ್ ದೆಂವೊಂಕ್ ಲಾಗ್ಲೊಂ!

ತೊ ಪದವ್ ದೆಂವ್ತಾನಾ ಮ್ಹಾಕಾ ಕರೆಜ್ಮಾಂತ್ ಖುರ್ಸಾವಾಟ್ ಕೆಲ್ಲೊ ಉಡಾಸ್ ಆಯ್ಲೊ. ಇಗರ್ಜೆ ಥಾವ್ನ್ ಹರಿಪದವ್ ಮ್ಹಣಾಸರ್ ಆಮ್ಕಾಂ ಖುರ್ಸಾ ವಾಟ್ ಆಸ್ತಾಲಿ ಆನಿ ತೆದಾಳಾ ಹಾಂವ್ ಭುರ್ಗೊ ಜಾಲ್ಲ್ಯಾನ್ ತೆಂಯೀ ಆಲ್ತಾರ್ ಭುರ್ಗೊ ಜಾವ್ನ್ ಆಸ್‍ಲ್ಲ್ಯಾನ್ ಮ್ಹಾಕಾ ಖುರಿಸ್ ಘೆವ್ನ್ ಚಲಾಜೆ ಪಡ್ತಾಲೆಂ!

“ಮ್ಹಾಕಾ ಕಿತ್ಯಾಕ್ ಜಾಯ್ ಆಸ್ಲಿ ಸಾವೆರಾಮಾಚಿ ಉಬ್ಚಿ ಲೊರಿ!” ಚಿಂತ್ಲೆಂ ಹಾಂವೆಂ. ಪದ್ವಾಚ್ಯಾ ದೆಂವ್ಣೆರ್ ದೋನ್ ಪಾವ್ಟಿಂ ದಾಂಟೊನ್ ಪಡ್ಲೊಂ ಹಾಂವ್. ತರೀ ಹಟಾನ್ ಮ್ಹಳ್ಳೆಪರಿಂ ಉಟೊನ್ ಚಾಲೆಂಜ್ ಮಾರ್ನ್ ಚಲ್ಲೊಂ. ಸೂಟ್‍ಕೇಸ್ ವೋಡ್ನ್, ಲೊಟುನ್ ಸಾಧಾರಣ್ ಕುಂಟಿಕಾನ್ ಪಾವ್ತಾನಾ ದೋಗ್ ಈಷ್ಟ್ ಮೆಳ್ಳೆ. “ಬಜ್ಪ್ಯಾಂ ಥಾವ್ನ್ ಚಲೊನ್ ಆಯ್ಲೊಯ್ಗೀ ಕಿತೆಂ?” ಮ್ಹಣ್ ತಾಣಿಂ ವಿಚಾರ್ಲೆಂ. ಹಾಂವೆಂ ಮಟ್ವ್ಯಾನ್ ಗಜಾಲ್ ಸಾಂಗ್ಲಿ. ತೆ ಬೆಜಾರ್ ಜಾವ್ನ್ ಚಲ್ಲೆ. ಚಿಕ್ಕೆ ಮುಖಾರ್ ಹೈವೇ ಜಂಕ್ಷನ್ ಆಸಾ. ಚಾರ್ ಮಾರೊಗ್ ಕುಡ್ಸತಾತ್. (Accident zone). ತೆದಾಳಾ ಫ್ಲೈ ಓವರ್ ಜಾಂವ್ಕ್ ನಾ. ತಿತ್ಲ್ಯಾರ್ ಕೇರಳಾ ವೆಚೆಂ ಏಕ್ ಸ್ಪೀಡಾರ್ ಆಯಿಲ್ಲೆಂ ಕಾರ್ ಮ್ಹಜ್ಯಾ ಸುಟ್‍ಕೇಸಿಕ್ ಆನಿ ಮ್ಹಾಕಾ ಹಾಂಡುನ್ ಚಲ್ಲೆಂ! ಸುಟ್‍ಕೇಸ್ ಪಿಟೊ ಪಿಟೊ ಆನಿ ಹಾಂವ್ ತೀನ್ ಪಳ್ಟ್ಯೊ ಮಾರ್ನ್ ಗುಂಡಿಯೆಕ್ ಉಸಾಳ್ಳೊಂ! ಮ್ಹಜೊ ಜೀವ್ ವೆತಾಚೊ ಭೊಗ್ಲೆಂ ಆನಿ ಭಿಂಯಾನ್ ದೋನ್ ಕಿಂಕ್ರಾಟ್ಯೊ ಮಾಲ್ರ್ಯೊ!

ತೆದಾಳಾ ಮ್ಹಜ್ಯಾ ಕುಶಿಕ್ ನಿದೊನ್ ಆಸ್‍ಲ್ಲಿ ಮ್ಹಜಿ ಅರ್ಧಾಂಗಿಣ್ ಎಕಾಚ್ಛಾಣೆಂ ಉಟೊನ್ ಭಿಂಯಾನ್, “ಕಿತೆಂ ಜಾಲೆಂ? ಕಿತೆಂ ಜಾಲೆಂ?” ಮ್ಹಣ್ ಮ್ಹಾಕಾ ಧೊಂಕ್ಳುನ್ ಉಟಯ್ಲಾಗ್ಲಿ! ಹಾಂವ್ ಉಟೊನ್ ಬಸ್ಲೊಂ. ಬಾಯ್ಲ್ ಸಟ್ಟ್ ಕರ್ನ್ ಉಟೊನ್ ಭಿತರ್ ಆಲ್ತಾರಿರ್ ಆಸ್‍ಲ್ಲೆಂ ಆಗ್ಮೆಂತ್ ಹಾಡ್ನ್ ಮ್ಹಜೆರ್ ಶೆಣಾವ್ನ್ ಮಾಗ್ಣೆಂ ಕರಿಲಾಗ್ಲಿ, ತೋಂಡ್ ಧುಲೆಂ ಹಾಂವೆಂ ಆನಿ ಮ್ಹಾಕಾ ಪಡ್‍ಲ್ಲ್ಯಾ ಸಪ್ಣಾಚೊ ಪೂರಾ ವಿವರ್ ಸಾಂಗ್ಲೊ! ಆಯ್ಕಲ್ಲಿ ಮ್ಹಜಿ ಬಾಯ್ಲ್ ಪೋಟ್‍ಭರ್ ಹಾಸ್ಲಿ.

ಹೆಂ ಸ್ವಪಣ್ ಪಡೊಂಕ್ ಕಾರಣ್ ದುಬಾಯ್ ಥಾವ್ನ್ ಮುಂಬಯ್ ದೆಂವ್‍ಲ್ಲ್ಯಾ ಮ್ಹಾಕಾ ಕಸ್ಟಮ್ಸಾಂತ್ ಜಾಲ್ಲ್ಯಾ ತ್ರಾಸಾ ಆನಿ ಆಕಾಂತಾ ವರ್ವಿಂ ಜೆಟ್ ಏರ್‍ವೇಸ್ ಕಾಂಯ್ ಚುಕ್ತಾ ಕೊಣ್ಣಾ ಆನಿ ಮಾಗಿರ್ ಜಾಲ್ಲ್ಯಾ ತ್ರಾಸಾಂ ವರ್ವಿಂ ಬಹುಶ್ಯ ಹೆಂ ಸಪಣ್ ಪಡೊಂಕ್ ಕಾರಣ್.

ತ್ಯಾಚ್ಚ್ ದಿಸಾ ಸಾಂಜೆರ್ ಏಕ್ ಸ್ಕೊಚ್ ಬಾಟ್ಲಿ ಘೆವ್ನ್ ಹಾಂವ್ ಸಾವೆರಾಮಾಕ್ ಮೆಳೊಂಕ್ ಗೆಲೊಂ ಆನಿ ಘಡ್‍ಲ್ಲಿ ಗಜಾಲ್ ತಾಕಾ ಸಾಂಗ್ಲಿ. ತೊ ಬಾವ್ಡೊ ವೊಮ್ತೆಂ ಉದಾರೆಂ ಪಡೊನ್ ಹಾಸ್ಲೊ!

ತಾಣೆಂ ಹಾಂವೆಂ ದಿಲ್ಲಿ ಸ್ಕೊಚ್ ಭಿತರ್ ದವರ್ಲಿ ಆನಿ ಗೊಯಾಂ ಥಾವ್ನ್ ಹಾಡ್‍ಲ್ಲಿ ಫೆನ್ನಿ ಉಗ್ತಿ ಕೆಲಿ. ಜೆವ್ಣಾಕ್ ರಾವ್ ಮ್ಹಣ್ ವತ್ತಾಯ್ ಕೆಲಿ. ನಿಸ್ತ್ಯಾಕ್ ಘಾಟಾ ಥಾವ್ನ್ ಯೆತಾನಾ ಪುಂಜಾಲ್‍ಕಟ್ಟೆ ಲೊರಿಯೆ ಪಂದಾ ಪಡಲ್ಲ್ಯಾ ರಾನ್ ದುಕ್ರಾಚೆಂ ಮಾಸ್! ಘಟ್ಟ್ ಜೆವಾಣ್ ಕರ್ನ್ ರಾತಿಂ ಎಕ್ ವೊರಾರ್ ಮ್ಹಜ್ಯಾ ಘರಾ ಪಾವ್ಲೊಂ!

The post ಸಾವೆರಾಮಾಚಿ ಲೊರಿ ವಾರ್‍ಯಾರ್ ಉಬ್ಲಿ! appeared first on Budkulo.

2004 ಇಸ್ವೆಂತ್ ಮಾರ್ಕ್ ಜುಕರ್‍ಬರ್ಗ್ ಆನಿ ಸಾಂಗಾತ್ಯಾಂನಿ ಸಂಸಾರಾಕ್ ಫೇಸ್‍ಬುಕ್ ಅರ್ಪಿಲೆಂ. ತ್ಯಾ ಉಪ್ರಾಂತ್ ಸಂಸಾರ್’ಚ್ ಬದ್ಲಲೊ. ಫೇಸ್‍ಬುಕಾಚಿಂ ಮಹಿಮಾಂ ವರ್ಣುಂಕ್ ಉತ್ರಾಂ ನ್ಹಯ್, ಹಜಾರೊಂ ಪಾನಾಂ ಪಾಂವ್ಚಿಂ ನಾಂತ್. ಫೇಸ್‍ಬುಕಾ ವರ್ವಿಂ ಜಾಯ್ತ್ಯಾಂಚಿ ಜಿಣಿಂಚ್ ಬದಲ್ಲ್ಯಾ, ಜಾಯ್ತೆ ಫೇಸ್‍ಬುಕ್ ಪಳೆವ್ನ್ ವೇಳ್ ಗೆಲ್ಲೊ ಕಳನಾಸ್ತಾನಾ ಫಸ್ಲ್ಯಾತ್. ಬರ್‍ಯಾನ್ ವಾಪಾರ್ತೆಲ್ಯಾಂಕ್ ಫೇಸ್‍ಬುಕ್ ಬರೊ ಫಲಿತಾಂಶ್ ಹಾಡುಂಕ್ ಸಕ್ಲ್ಯಾರ್, ವಾಯ್ಟ್ ಇರಾದ್ಯಾಂಕ್‍ಯೀ ಫೇಸ್‍ಬುಕ್ ವಾಪಾರ್ನ್ ಥೊಡ್ಯಾಂನಿ ಭೊಂಗೊಸ್ತೊಳ್ ಕೆಲ್ಲೊಯೀ ಆಸಾ.

ಹ್ಯಾ ಫೇಸ್‍ಬುಕಾಂತ್ ಕಿತೆಂ ಚಲ್ತಾ; ಆಮ್ಚೊ ಪೊರ್ಬು ಸಮುದಾಯ್ ಫೇಸ್‍ಬುಕ್ ಕಸೊ ವಾಪಾರ್ತಾ ಮ್ಹಣ್ ಇಲ್ಲೆಶೆಂ ಸಮ್ಜೊನ್ ಘೆಂವ್ಚೆಂ ಬರೆಂ ನ್ಹಯ್‍ಗೀ? ಹ್ಯಾ ಫೇಸ್‍ಬುಕಾ ವರ್ವಿಂ ಕಸಲಿಂ ಪೂರಾ ಕಾಮಾಂ ಜಾತಾತ್, ಕಿತ್ಲ್ಯೊ ಅದ್ಭುತ್ ಗಜಾಲಿ ಘಡ್ತಾತ್ ತೆಂ ಆಮಿ ಸದಾಂನೀತ್ ಮ್ಹಳ್ಳೆಪರಿಂ ಪತ್ರಾಂನಿ ವಾಚ್ತಾಂವ್, ಮಾಧ್ಯಮಾಂನಿ ಪಳೆತಾಂವ್.

ವ್ಹಯ್, ವ್ಹಯ್. ಫೇಸ್‍ಬುಕ್ ವಾಪರ್ಚ್ಯಾಂತ್ ಆಮ್ಕಾಂ ಕಿರಿಸ್ತಾಂವಾಂಕ್ ಆನಿ ಹೆರಾಂಕ್ ಜಾಯ್ತೊ ಫರಕ್ ಆಸಾ! ಖಂಡಿತ್ ಸತ್ ಹೆಂ. ಕಿತ್ಲೆಂ ಮ್ಹಳ್ಯಾರೀ ಆಮಿ ಹೆರಾಂ ಪ್ರಾಸ್ ಭಾರೀ ಊಂಚಿ ಕುಳಿ ನ್ಹಯ್‍ಗೀ? ಆಮ್ಕಾಂ ಗೊತ್ತಾಸ್‍ಲ್ಲೆಂ, ಕಳಿತ್ ಆಸ್‍ಲ್ಲೆಂ ತಾಂಕಾಂ ಕಶೆಂ ಕಳಿತ್ ಜಾಂವ್ಚೆಂ? ಆಮಿ ಸಕ್ಡಾಂತ್‍ಯೀ ಊಂಚ್, ಶ್ರೇಷ್ಠ್. ದೆಕುನ್ ಫೇಸ್‍ಬುಕ್ ವಾಪಾರ್ಚ್ಯಾಂತ್‍ಯೀ ಆಮಿ ಸಕ್ಡಾಂ ಪ್ರಾಸ್ ಅಲಗ್, ವಿಶೇಸ್. ಆಮಿ ಎಜ್ಯುಕೇಟೆಡ್ ಮನಿಸ್, ಕ್ಲಾಸ್ ವರ್ಗಾಚೆ. ಹೆರಾಂಪರಿಂ ಆರ್ಡಿನರಿ ನ್ಹಯ್.

ಎಬ್ಬೆ! ಹೆರ್, ತೆಂಯೀ ಆಮ್ಚ್ಯಾ ಭಾರತಾಂತ್ ಸಯ್ತ್, ಫೇಸ್‍ಬುಕ್ ಏಕ್ ಸಾಮಾಜಿಕ್ ಜಾಳಿಜಾಗೊ ಜಾವ್ನ್ ವಾಪಾರ್ತಾತ್. ತಾಂಕಾಂ ದುಸ್ರೆಂ ಕಾಮ್ ನಾಂಗೀ ಮ್ಹಣ್. ಆಮ್ಚ್ಯಾ ಕರ್ನಾಟಕಾಚೊ ಲೋಕ್‍ಯೀ ತಸೊಚ್. ರಾಜಕೀಯ್, ಸಾಮಾಜಿಕ್ ಗಜಾಲಿ, ಸಾಹಿತ್ಯ್, ವಿಚಾರ್ ಮಂಥನ್ ಆನಿ ಸೃಜನಾತ್ಮಕ್ ಸಂಗ್ತಿಂ ಖಾತಿರ್ ಫೇಸ್‍ಬುಕ್ ವಾಪಾರ್ತಾತ್. ತಾಂಕಾಂ ತಕ್ಲಿ ಸಮಾ ಆಸಾಗೀ?

ಜಿಲ್ಲಿಬಾಯೆಕ್ ಪಳೆಯಾ. ತಿಕಾ ಭುಗ್ರ್ಯಾಂನಿ ಫೇಸ್‍ಬುಕ್ ಎಕೌಂಟ್ ಉಗ್ತೆಂ ಕರ್ನ್ ದಿಲ್ಲೆಂಚ್ ದಿಲ್ಲೆಂ. ಆತಾಂ ತಿಕಾ ದಿಸಾಕ್ ಚಾರ್ ಪಾಂಚ್ ಪಾವ್ಟಿಂ ಫೇಸ್‍ಬುಕ್ ಪಳೆಲ್ಯಾ ಶಿವಾಯ್ ಮತಿಕ್ ಸಮಾಧಾನ್ ಮ್ಹಳ್ಳೆಂ ನಾ. ತಿಕಾಯೀ ಸೆಲ್ಫಿ ಕಾಡುಂಕ್ ಯೆತಾ. ತಿಕಾ ಸೆಲ್ಫಿ ರಾಣಿ ಮ್ಹಣ್‍ಂಚ್ ಆಪಯ್ತಾತ್. ಕರ್ತಾ ಕಿತೆಂ ತಿ ಮ್ಹಳ್ಯಾರ್, ಸಕಾಳಿಂ ಏಕ್ ಸೆಲ್ಫಿ ಕಾಡ್ನ್ ಫೇಸ್‍ಬುಕಾಂತ್ ಘಾಲ್ತಾ. ದುಸ್ರೆ ಪಾವ್ಟಿಂ ಪಳೆತಾನಾ ಕಿತ್ಲೆ ಲೈಕ್ಸ್, ಕಮೆಂಟ್ಸ್ ಪಡ್ಲ್ಯಾತ್ ಮ್ಹಣ್ ಪಳೆತಾ. ಚಡ್ ಲೈಕ್ಸ್, ಕಮೆಂಟ್ಸ್, ಶೇರ್ಸ್ ಆಸ್ಲ್ಯಾರ್ ತಿಕಾ ಸಂತೊಸ್‍ಚ್ ಸಂತೊಸ್. ಉಣೆಂ ಆಸ್ಲ್ಯಾರ್ ಆನ್ಯೇಕ್ ನವ್ಯಾಚ್ ಸ್ಟೈಲಾರ್ ಸೆಲ್ಫಿ ಕಾಡ್ನ್ ಘಾಲ್ತಾ. ಸಗ್ಳೊ ದೀಸ್ ತಿಚೊ, ಸೆಲ್ಫಿ ಆನಿ ಫೇಸ್‍ಬುಕ್ ಮ್ಹಣೊನ್ ಆಪುರ್ಬಾಯೆನ್ ಪಾಶಾರ್ ಜಾತಾ!

ತೊ ಲೊರೆಸಾಬ್ ಆಸಾ ನೆ, ತೊಯೀ ಫೇಸ್‍ಬುಕ್ ಕಿಂಗ್. ಫೇಸ್‍ಬುಕ್ ಗ್ರೂಪಾಂನಿ ತಾಕಾ ಖಂಡಾಪಟ್ಟೆ ಟಿ.ಆರ್.ಪಿ. ಆಸಾ. ಥೊಡೆ ಗ್ರೂಪ್ ಆಸಾತ್ ಮ್ಹಣ್ ಕಳ್ಚೆಂಚ್ ಹ್ಯಾ ಲೊರೆಸಾ ವರ್ವಿಂ. ತಿತ್ಲಿ ಖ್ಯಾತಿ ತಾಚಿ. ತರ್ ತೊ ಕರ್ತಾ ಕಸಲೆಂ ಮ್ಹಣ್ ತುಮಿ ವಿಚಾರ್ತಾತ್‍ಗೀ? ತಾಣೆಂ ಕರ್ಚೆಂ ಕಾಂಯ್ ನಾ, ಪುಣ್ ತೊ ದಿಸಾಕ್ ಏಕ್ ತಸ್ವೀರ್ ಫೇಸ್‍ಬುಕಾಂತ್ ಚಿಡ್ಕಾಯ್ತಾ. ಲೊಣ್ಚೆಂ, ಮೊಗ್ಯಾಚೆಂ ನಿಸ್ತೆಂ, ದುಕ್ರಾ ಮಾಸ್, ಕುಂಕ್ಡಾಚಿ ಕಡಿ, ಮಾಸ್ಳಿ, ಪೊಳಿ ಆನಿ ಕಿತೆಂ ಆನಿ ಕಿತೆಂ. ಹರ್ಯೇಕ್ ದೀಸ್ ಎಕೇಕಾ ನಮೂನ್ಯಾಚೆಂ ನಿಸ್ತೆಂ, ಖಾಣ್, ಜೆವಣ್ ತೊ ಫೇಸ್‍ಬುಕಾಂತ್ ಘಾಲ್ತಾ ಆನಿ ತಾಚೆರ್ ಲೈಕ್ಸ್, ಕಮೆಂಟ್ಸಾಂಚಿ ಸುನಾಮಿ. ಅಶೆಂ ಫೇಸ್‍ಬುಕಾಂತ್‍ಚ್ ಲೊರೆಸ್ ಹಜಾರೊಂ ಹಜಾರ್ ಲೊಕಾಕ್ ಖಾವಯ್ತಾ, ಪೋಟ್ ಭರಯ್ತಾ!

ಲೊರೆಸಾಬಾ ಥಾವ್ನ್ ಪ್ರೇರಣ್ ಘೆತ್‍ಲ್ಲೆ ಹೆರ್‍ಯೀ ಸಬಾರ್ ಜಣ್ ಆಸಾತ್, ತಾಂಕಾಂ ಫೇಸ್‍ಬುಕಾ ಮುಖಾಂತ್ರ್ ಗಾಂವ್ಚ್ಯೊ ರಾಂದ್ವಯೊ, ಫುಲಾಂ-ಝಾಡಾಂ, ಫಳಾಂ ಇತ್ಯಾದಿ ಪ್ರದರ್ಶನ್ ಕರ್ಚಿ ಖೊರೊಜ್. ದೆಕುನ್ ಖಂಯ್ ಖಂಯ್ ಥಾವ್ನ್ ಆಪ್ಣಾಯಿಲ್ಲ್ಯೊ, ಥೊಡ್ಯಾಂನಿ ಆಪ್ಲ್ಯಾ ಮೊಬಾಯ್ಲಾರ್ ಕಾಡ್‍ಲ್ಲ್ಯೊ, ಹೆರಾಂನಿ ಗೂಗಲ್ ಮಾಮಾ ಥಾವ್ನ್ ಘೆತ್‍ಲ್ಲ್ಯೊ, ನಮೂನ್ಯಾವಾರ್ ತಸ್ವೀರ್ಯೊ ಫೇಸ್‍ಬುಕಾಂತ್ ಘಾಲ್ನ್ ಫೇಸ್‍ಬುಕಾಚ್ಯಾ ಸರ್ವರಾಚೆರ್ ವಜನ್ ಘಾಲ್ತಾತ್!

ಫೆಲ್ಸಿಬಾಯೆಕ್ ಹೆ ಪೂರಾ ರಗ್ಳೆಚ್ ನಾಕಾತ್. ತಿ ಅಪ್ರತಿಮ್ ಭಕ್ತಿವಂತ್, ಏಕ್ ಆಪುಟ್ ಕ್ರಿಸ್ತಾಂವ್ ಭಾವಾಡ್ತಿ. ತಿಣೆಂ ಕರ್ಚೆಂ ಭೋವ್ ಆಮೊಲಿಕ್ ಕಾಮ್. ಮರಿಯೆಚೆಂ ಏಕ್ ಚಿತ್ರ್ ಆಪ್ಲ್ಯಾ ಫೇಸ್‍ಬುಕ್ ವೊಣೊದಿರ್ ಚಿಡ್ಕಾಯ್ತಾ ಆನಿ ‘ಟೈಪ್ ಆಮೆನ್’ ಮ್ಹಣ್ ಸ್ಟೇಟಸ್ ಘಾಲ್ತಾ. ಪಾಂಚ್ ಮಿನುಟಾಂ ಜಾಯ್ಜೆ ತರ್, ಝಡ್‍ವಾರೆಂ ಆಯ್ಲ್ಯಾರ್ ರುಕಾ ಥಾವ್ನ್ ಪಿಕೆ ಆಂಬೆ ಝಡ್‍ಲ್ಲೆಪರಿಂ ಶೆಂಬೊರಾ ವಯ್ರ್ ಕಮೆಂಟ್ಸ್ ‘ಆಮೆನ್’ ಮ್ಹಣೊನ್! ಅಶೆಂ ಹಿ ಫೆಲ್ಸಿ ಬಾಯ್ ಭಾವಾಡ್ತ್ ಪಾಚಾರುಂಕ್ ಆನಿ ಪ್ರಸಾರ್ ಕರುಂಕ್ ಫೇಸ್‍ಬುಕ್ ವಾಪಾರ್ತಾ. ಲಾಯಿಕ್ ಆಪೊಸ್ತಲಾದಾಚೆಂ ಮಿಸಾಂವ್ ತಿಚೆಂ ಸೂಪರ್ ಹಿಟ್!

ಫೆಲ್ಸಿ ಬಾಯ್ ದಿಸಾಕ್ ಏಕ್ – ಜೆಜುಚಿ, ಮರಿಯೆಚಿ, ಸಾಂತಾಂಚಿ, ಖುರ್ಸಾಚಿ, ಇಗರ್ಜೆಂಚಿ – ಫೊಟೊ ಫೇಸ್‍ಬುಕಾಂತ್ ಘಾಲ್ತಾ. ಆಪ್ಲಿ ವೊಣದ್ ಪಾವನಾಂ ಮ್ಹಣೊನ್ ಮೆಳ್‍ಲ್ಲ್ಯಾ ಮೆಳ್‍ಲ್ಲ್ಯಾ ಗ್ರೂಪಾಂನಿಯೀ ತಿ ಆಪ್ಲೆಂ ಮಿಸಾಂವ್ ಅಖಂಡ್ ಪಾತ್ಯೆಣೆನ್ ಚಲಯ್ತಾ. ಆನಿ ತಿಚೊ ಭರ್ವಸೊ ಘಟ್ ಕರುಂಕ್ ಶೆಂಬೊರಾಂನಿ ಲೋಕ್ ತಿಕಾ ಪಾಟಿಂಬೊ ದೀಂವ್ಕ್ ‘ಆಮೆನ್’ ಮ್ಹಣ್ತಾ. ತಿಚಿ ದೇಖ್ ಘೆವ್ನ್ ಹೆರ್ ಸಬಾರ್ ಜಣ್ ತಿಚ್ಯೆಪರಿಂಚ್, ಫೇಸ್‍ಬುಕಾಕ್ ಪವಿತ್ರ್ ಕರ್ಚ್ಯಾ ವಾವ್ರಾಂತ್ ಸಾಂಗಾತ್ ದಿತಾತ್!

ಫೆಲ್ಸಿಬಾಯೆಕ್ ಪುರಾಸಣ್ ದಿಂವ್ಚಿ ನಾಕಾ ಮ್ಹಣ್ ಆನ್ಯೇಕ್ ವರ್ಗಾಚೊ ಲೋಕ್, ವೆಗ್ಳೆಂಚ್ ಮಿಸಾಂವ್ ಭರಾನ್ ಚಲವ್ನ್ ಆಸಾ. ಕಿತೆಂ ಮ್ಹಳ್ಯಾರ್, ತಾಂಚೆ ಲಾಗಿಂ ಏಕ್ ಮಾಗ್ಣೆಂ ಆಸ್ತಾ. ತಾಚೆ ಸಂಗಿಂ ಕ್ರಿಸ್ತಾಚಿ, ಮರಿಯೆಚಿ ವಾ ಸಾಂತಾಂಚಿ ತಸ್ವೀರ್ ಚಿಡ್ಕಾವ್ನ್, ಫೇಸ್‍ಬುಕ್ ವೊಣೊದಿಂಚೆರ್ ಉಮ್ಕಳಾಯ್ತಾತ್ ಮಾತ್ರ್ ನ್ಹಯ್ ಮೆಳ್ಳೆ ಮೆಳ್ಳೆಲ್ಯಾಂಕ್ ಇನ್‍ಬಾಕ್ಸಾಕ್‍ಯೀ ಫಾರ್ವರ್ಡ್ ಕರ್ತಾತ್, ಮ್ಹಣೊನ್ ‘ಹೆಂ ಉಣ್ಯಾರೀ ಇತ್ಲ್ಯಾ ಜಣಾಂಕ್ ಫಾರ್ವರ್ಡ್ ಕರ್, ಮೆಜೂನ್ ಇತ್ಲ್ಯಾ ಆವ್ದೆ ಭಿತರ್ ತುಕಾ ತುವೆಂ ಮಾಗ್‍ಲ್ಲೆಂ ಮೆಳ್ತಾ’ ಮ್ಹಣ್ ಆಶಾ ದಾಕಯ್ತಾತ್, ಆನಿ, ‘ಧಾಡಿನಾತ್ಲ್ಯಾರ್ ವಾಯ್ಟ್ ಜಾತಾ’ ಮ್ಹಣ್ ಭೆಷ್ಟಾಯ್ತಾತ್. ಅಶೆಂ ಹೆ ಫೇಸ್‍ಬುಕಾ ಮುಖಾಂತ್ರ್ ಹಜಾರೊಂ, ಲಾಖೊಂ ಲೊಕಾಕ್ ಮಾಗ್‍ಲ್ಲೆಂ ಫಾವೊ ಕರ್ಚ್ಯಾಕ್ ದೆವಾ ವಯ್ರ್ ದಬಾವ್ ಘಾಲ್ತಾತ್!

ಆನಿ ಕಾಂಯ್ ಜಣಾಂಕ್ ವೆಗ್ಳ್ಯೊಚ್ ಪಿಸಾಯೊ. ಕೊಣಾಚಿಗೀ ಅವ್ಘಡಾಂತ್ ಘಾಯೆಲ್ಲಿ ತಸ್ವೀರ್ ಆಪ್ಲ್ಯಾ ವೊಣೊದಿರ್ ಉಮ್ಕಳಾಯ್ತಾತ್. ತಾಂತ್ಲೊ ಮ್ಹನಿಸ್ ಕೋಣ್, ತಾಕಾ ಜಾಲಾಂ ಕಿತೆಂ, ವಾಂಚ್ಲಾ ವಾ ಮೆಲಾ ಮ್ಹಳ್ಳೆಂಯ್ ಕಳಯ್ನಾಂತ್. ಫಕತ್ ತಸ್ವೀರ್ ಘಾಲ್ಚಿ. ಆನಿ ತಸಲಿ ತಸ್ವೀರ್ ಪಳೆಲ್ಲೆಂಚ್ ಜಾಯ್ತ್ಯಾಂಕ್ ಕಿತೆಂ ಭೊಗ್ತಾ ದೇವ್ ಜಾಣಾಂ, ತಟ ಪಟ ಕರ್ನ್ ಕಮೆಂಟ್ಸ್ ಘಾಲ್ತಾತ್ ‘ಆಮೆನ್’ ಮ್ಹಣೊನ್, ಸ್ಪಧ್ರ್ಯಾಕ್ ಪಡ್‍ಲ್ಲೆಪರಿಂ!

ಹಾಂಕಾಂ ಕಸಲಿ ತಸ್ವೀರ್‍ಯೀ ಜಾತಾ, ಕೊಣಾಚಿಯೀ ಜಾತಾ. ಖಂಯ್ ಥಾವ್ನ್ ಫೊಟೊ ಆಪ್ಣಾಯ್ತಾತ್‍ಗೀ! ಘಾಯೆಲ್ಲಿ, ಅವ್ಘಡಾಚಿ, ದುರಂತಾಚಿ ವಾ ಕೋಣ್‍ಗೀ ಮರಣ್ ಪಾವ್‍ಲ್ಲಿ ಫೊಟೊ ಹೆ ಫೇಸ್‍ಬುಕಾಂತ್ ಘಾಲ್ತಾತ್. ಕೋಣ್, ಕಸಲಿ ಗಜಾಲ್, ಕಿತೆಂ ಘಡ್ಲಾಂ, ಖಂಯ್ ಇತ್ಯಾದಿಂಚೊ ಪ್ರಸ್ತಾಪ್‍ಚ್ ನಾ. ಹೆಂ ಪಳೆಲ್ಲ್ಯಾ ಲೊಕಾಕ್‍ಯೀ ಕಸಲಿಚ್ ಫಿಕಿರ್ ನಾ. ತಾಂಕಾಂ ಲೈಕ್ ಕರುಂಕ್, ಕಮೆಂಟ್ ಘಾಲುಂಕ್ ಜಾಯ್. ತಿತ್ಲೆಂಚ್. ದೆಕುನ್ ‘ಆಮೆನ್’ ಮ್ಹಣ್ ಘಾಲ್ತಾತ್ ವಾ ಮನ್ಶ್ಯಾಕ್ ಪೆಟೆಂತ್ ನಿದಾಯಿಲ್ಲಿ ತಸ್ವೀರ್ ತರ್ ಆರ್.ಐ.ಪಿ. ಮ್ಹಣ್ ‘ರಿಪ್’ ಕರ್ತಾತ್!

ಆನ್ಯೇಕ್ ಗಜಾಲ್ ಮ್ಹಳ್ಯಾರ್, ಮರಣ್ ಪಾವ್‍ಲ್ಲಿ ವ್ಯಕ್ತಿ, ತ್ಯಾಚ್ ದಿಸಾ ಮರಣ್ ಪಾವ್‍ಲ್ಲಿಯೀ ಆಸ್ಯೆತ್ ವಾ ವರ್ಸಾಂ ಆದಿಂ ಮೆಲ್ಲಿಯೀ ಆಸ್ಯೆತ್. ಲೊಕಾಕ್ ಹಾಚಿ ಫಿಕಿರ್ ನಾ. ಆಪ್ಲಿ ಕಾಳ್ಜಿ ಆನಿ ಹುಸ್ಕೊ ದಾಕಂವ್ಕ್, ಭುಜಂವ್ಕ್, ತೆಂಯೀ ಪಬ್ಲಿಕ್ಲಿ, ಏಕ್ ಆವ್ಕಾಸ್ ಮೆಳ್ಳ್ಯಾರ್ ಜಾಲೆಂ!

ಕ್ರಿಸ್ತಾಂವಾಂ ಪಯ್ಕಿ ಜಾಯ್ತ್ಯಾಂಕ್ ಫೇಸ್‍ಬುಕ್ ಮ್ಹಳ್ಯಾರ್ ಫ್ಯಾಮಿಲಿ ಫೊಟೊ ಆಲ್ಬಮ್ ಆಸ್‍ಲ್ಲೆಪರಿಂ. ತಾಂಕಾಂ ಆಪ್ಲ್ಯಾ ಕಾಜಾರಾಚ್ಯೊ, ಕುಮ್ಗಾರಾಚ್ಯೊ, ಬರ್ತ್‍ಡೇ ಪಾರ್ಟಿಚ್ಯೊ ಆನಿ ಹೆರ್ ಸಂಭ್ರಮಾಂಚ್ಯೊ ತಸ್ವೀರ್ಯೊ ಪ್ರದರ್ಶನ್ ಕರುಂಕ್ ಫೇಸ್‍ಬುಕ್ ಏಕ್ ಅವ್ವಲ್ ವೆದಿ. ತ್ಯಾ ಮುಖಾಂತ್ರ್ ಆಪ್ಣಾಚಿ ಸ್ಟೇಟಸ್, ಪಬ್ಲಿಸಿಟಿ ಆನಿ ವ್ಯಕ್ತಿತ್ವ್ ಖಂಡಾಪಟ್ಟೆ ಇಂಪ್ರೂವ್ ಜಾಲೆಂ ಮ್ಹಣ್ ತಿಂ ಚಿಂತಾತ್. ಲೊಕಾಕ್‍ಯೀ, ಅಸಲ್ಯೊ ಫೊಟೊ ಪಳೆಂವ್ಕ್ ಭಾರಿಚ್ ಪಸಂದ್. ದೆಕುನ್ ಲೈಕ್ಸ್, ಕಮೆಂಟ್ಸಾಂಚೊ ಶಿಂವರ್‍ಚ್ ಘಾಲ್ತಾತ್. ಥೊಡೆ ಹೆರಾಂಚ್ಯೊ ಖಾಸ್ಗಿ ಫೊಟೊಯೀ ಸೊಡಿನಾಸ್ತಾನಾ ಶೇರ್ ಕರ್ತಾತ್!

ಫೇಸ್‍ಬುಕಾಂತ್ ಪ್ರೊಫೈಲ್ ಆಸ್‍ಲ್ಲಿಂ ಸಕ್ಕಡ್ ಎಕಾಂವ್ಟಾಂ ನೀಜ್ ವ್ಯಕ್ತಿಂಚಿಂ ಮ್ಹಣೊಂಕ್ ಜಾಯ್ನಾ. ಥೊಡೆ ಪೊಕ್ರಿ ಚೆಡೆ ಸಿನೆಮಾ ವಾ ಗೂಗಲಾಂತ್ ಮೆಳ್‍ಲ್ಲ್ಯಾ ನಟಿಂಚ್ಯೊ ತಸ್ವೀರ್ಯೊ ಘಾಲ್ನ್ ಚೆಡ್ವಾಂಚ್ಯಾ ನಾಂವಾರ್ ನಕ್ಲಿ ಪ್ರೊಫೈಲ್ ರಚ್ತಾತ್. ನಕ್ಲಿ ಜಾಂವ್ ಅಸ್ಲಿ ಜಾಂವ್, ಎಕಾ ಚೆಡ್ವಾಚೆಂ ಪ್ರೊಫೈಲ್ ದಿಸ್ಲ್ಯಾರ್ ಪುರೊ, ಆಂಗಾರ್ ಪಡೊನ್ ಮ್ಹಳ್ಳೆಪರಿಂ ಲೋಕ್ ತಾಂಕಾಂ ಫ್ರೆಂಡ್ ರಿಕ್ವೆಸ್ಟ್ ಧಾಡ್ತಾ. ಥೊಡೆ ಪಾವ್ಟಿಂ ಫಲಾಣ್ಯಾ ವ್ಯಕ್ತಿಂಕ್ ಫಸಂವ್ಕ್ ವಾ ಬ್ಲ್ಯಾಕ್‍ಮೈಲ್ ಕರುಂಕ್‍ಚ್ ಮ್ಹಣೊನ್ ಥೊಡ್ಯಾಂನಿ ಅಶೆಂ ಕರ್ಚೆಂ ಆಸಾ ಆನಿ ದಾದ್ಲ್ಯಾಂಚೆಂ ‘ವೀಕ್‍ನೆಸ್’ ಕ್ಯಾಚ್ ಕರ್ಚೆಂಯೀ ಆಸಾ! ಭಾಯ್ಲ್ಯಾನ್ ಸಾಂತಾಂಪರಿಂಚ್ ದಾಕಂವ್ಚ್ಯಾ ಥೊಡ್ಯಾ ಮ್ಹಾತ್ಭಾರ್ಯಾಂಚಿ ಒರಿಜಿನಲ್ ಬೂದ್ ಅಶೆಂ ಉಗ್ತಾಡಾಕ್ ಯೇವ್ನ್ ರೆಡ್‍ಹ್ಯಾಂಡ್ ಜಾವ್ನ್ ಶಿರ್ಕೊನ್ ಪಡ್‍ಲ್ಲೆ ದಾಖ್ಲೆಯೀ ಆಸಾತ್!

ಥೊಡ್ಯಾಂಕ್ ಉಟ್‍ಲ್ಲ್ಯಾ ಬಸ್‍ಲ್ಲ್ಯಾಕ್ ಸ್ಟೇಟಸ್ ಘಾಲ್ಚಿ ಸವಯ್. ಆಪ್ಣಾಕ್ ಹುಶ್ಯಾರ್ ನಾ, ಕಾಂಯ್ ತಾಂಕನಾ ಮ್ಹಣ್ ಘಾಲ್ಯಾರ್ ಬಿರ್ಮತೆಚೊ ಪಾವ್ಸ್‍ಚ್ ಪಡ್ತಾ, ಕಮೆಂಟ್ಸಾಂನಿ. ಚೆಡ್ಯಾಂಕ್ ಗೆನ್ಪಿತಲೊ ಕೊಣೀ ಆಸನಾ. ಪುಣ್ ಎಕಾ ಚೆಡ್ವಾನ್, ತೆಂಯೀ ಸೊಭಿತ್ ಡಿ.ಪಿ. ಆಸ್ಚ್ಯಾ ಚಲಿಯೆನ್ ತಶೆಂ ಘಾಲ್ಯಾರ್ ಮಾತ್ರ್ ಲೋಕ್ ಸಕ್ಕಡ್ ಆಪ್ಲೆಂ ಕಾಮ್ ಬಾಕಿ ದವರ್ನ್, ಹ್ಯಾ ಚಲಿಯೆಕ್ ಭಲಾಯ್ಕೆಚೆ ಹಿಶಾರೆ ದಿತಾತ್, ನಮೂನ್ಯಾವಾರ್ ವಕ್ತಾಂ, ಕಸಾಯ್, ಗುಳಿಯೊ ಸೆಂವ್ಕ್ ಸಲಹಾ ದಿತಾತ್! ಕನ್ಸರ್ನ್ ದಾಕಂವ್ಚೊ ಸ್ಪರ್ಧೊಚ್ ಚಲ್ತಾ.

ಕ್ರಿಸ್ತಾಂವಾಂ ಥಂಯ್ ಮೋಗ್ ಆನಿ ಮಯ್ಪಾಸ್ ಇಲ್ಲೊಸೊ ಚಡ್‍ಚ್ ಮ್ಹಣ್ಯೆತ್. ಹೆಂ ಫೇಸ್‍ಬುಕಾಂತ್ ದರಬಸ್ತ್ ಮಾಪಾನ್ ಉಟೊನ್ ದಿಸ್ತಾ. ಫೇಸ್‍ಬುಕಾಂತ್ ಖಾಸ್ಗಿ ಸಂದೇಶ್ ಧಾಡುಂಕ್ ಮೆಸೇಜ್ ಬೊಕ್ಸ್ ಮ್ಹಣೊನ್ ಆಸ್ತಾ. ಪುಣ್ ಆಮ್ಚ್ಯಾ ಲೊಕಾಕ್ ಖಾಸ್ಗೆನ್ ಕಿತೆಂಯ್ ಸಾಂಗ್ಲ್ಯಾರ್ ಲೊಕಾಕ್ ಕಳನಾ ಮ್ಹಳ್ಳಿ ಖಂತ್. ದೆಕುನ್ ಕೊಣೆಂಯೀ ಏಕ್ ಫೊಟೊಗೀ ವಾ ಕಿತೆಂಯೀ ಆಪ್ಲ್ಯಾ ವೊಣೊದಿರ್ ದಾಕಯ್ಲ್ಯಾರ್ ತಾಕಾ ಪಡ್‍ಲ್ಲ್ಯಾ ಕಮೆಂಟ್ಸಾಂತ್ ಕೊಣೀ ವಳ್ಕಿಚೊಗೀ, ಕ್ಲಾಸ್‍ಮೇಟ್, ಈಷ್ಟ್ ವಾ ಸಯ್ರೊ ಪುಣೀ ದಿಸ್ಲ್ಯಾರ್ ಜಾಲೆಂ, ಥಂಯ್ಚ್ ಸಂಭಾಷಣ್ ಸುರು ಕರ್ತಾತ್. ಹಾಂಚ್ಯೊ ಖಾಸ್ಗಿ ಗಜಾಲಿ ಉಗ್ತ್ಯಾನ್ ಕಿತ್ಯಾಕ್ ಮ್ಹಣೊನ್ ಲೋಕ್ ಚಿಂತಾ. ಪುಣ್ ಹಾಂಕಾಂ ತಾಚೆಂ ಗಣ್ಣೆಂ ನಾ. ಹಿಂ ಥಂಯ್ ಲೊಕಾನ್ ವಾಚ್ಚೆಪರಿಂ ಎಕಾಮೆಕಾಚ್ಯೊ ಖಾಸ್ಗಿ ಗಜಾಲಿ, ಸುಖ್ ದುಖ್ ವಾಂಟ್ತಾತ್. ತ್ಯಾ ಮುಖಾಂತ್ರ್ ಆಪ್ಣಾಕ್ ಆನ್ಯೇಕ್ಲ್ಯಾಚಿ ಕಿತ್ಲಿ ಕಾಳ್ಜಿ, ಹುಸ್ಕೊ, ಮೋಗ್ ಆಸಾ ಮ್ಹಣ್ ಪಾಚಾರ್ತಾತ್. ಥೊಡ್ಯಾಂನಿ ಝಗಡ್ಚೆಂಯೀ ಆಸಾ. ಮೆಳ್‍ಲ್ಲೊ ಸಂದರ್ಭ್, ಆವ್ಕಾಸ್ ಹೊಗ್ಡಾಂವ್ಚೆಂ ಕಿತ್ಯಾಕ್ ಮ್ಹಣ್ ಆಸ್ತೆಲೆಂ!

ಫೇಸ್‍ಬುಕಾನ್ ಕೆಲ್ಲ್ಯಾ ಕ್ರಾಂತಿಂ ಪಯ್ಕಿ ಜಲ್ಮಾ ದೀಸ್ ದಾಕವ್ನ್ ದಿಂವ್ಚಿ ರಿವಾಜ್ ಪ್ರಮುಖ್. ಹರ್ಯೆಕಾ ದಿಸಾ, ತ್ಯಾ ದಿಸಾ ಕೊಣಾಚೊ ಜಲ್ಮಾ ದೀಸ್ ಆಸಾ ಮ್ಹಣ್ ಸಂಸಾರಾಕ್ ಫೇಸ್‍ಬುಕ್ ಸಾಂಗ್ತಾ ಜಾಲ್ಲ್ಯಾನ್, ಆಪ್ಲ್ಯಾ ಮೊಗಾಚ್ಯಾಂಕ್, ಇಷ್ಟಾಂಕ್, ವಳ್ಕಿಚ್ಯಾಂಕ್ ಆನಿ ನವ್ಯಾನ್ ಫ್ರೆಂಡ್ ಜಾಲ್ಲ್ಯಾಂಕ್ ಜಲ್ಮಾ ದಿಸಾಚೆ ಉಲ್ಲಾಸ್ ಪಾಟಂವ್ಕ್ ಲೊಕಾಕ್ ಸಲೀಸ್ ಜಾಲಾಂ.

ಮಂಗ್ಳುರಿ ಕ್ರಿಸ್ತಾಂವಾಂಚೆ ಥೊಡೆಶೆ ಗ್ರೂಪ್ ಆಸಾತ್. ಥೊಡ್ಯಾಂನಿ ಲಾಖಾಂಗಟ್ಲ್ಯಾನ್ ಸಾಂದೆ ಆಸ್ಲ್ಯಾರ್ ಥೊಡ್ಯಾಂನಿ ಪನ್ನಾಸ್ ಹಜಾರ್ ತರ್, ಪಂಚ್ವೀಸ್-ಧಾ-ಪಾಂಚ್ ಹಜಾರ್ ಜಣ್ ಸಾಂದೆ ಆಸ್ಚೆ ಪಂಗಡ್ ಸಬಾರ್ ಆಸಾತ್. ಹ್ಯಾ ಗ್ರೂಪಾಂಚ್ಯಾ ಆಡ್ಮಿನಾಂಕ್ ಆಪ್ಲೆಂ ಕಾಮ್, ಜವಾಬ್ದಾರಿ ಬಾಕಿ ದವರುನ್ ಆಪ್ಲ್ಯಾ ಪಂಗ್ಡಾಂತ್ಲ್ಯಾ ಸಾಂದ್ಯಾಂಚಿ ತಸ್ವೀರ್ ಘಾಲ್ನ್ ತಾಂಕಾಂ ಜಲ್ಮಾ ದಿಸಾಚೆ ಉಲ್ಲಾಸ್ ಪಾಟಂವ್ಚೆಂ ಏಕ್ ಆಮೊಲಿಕ್ ಮಿಸಾಂವ್ ಜಾಲಾಂ. ಅಶೆಂ ಥೊಡೆ ಕಳಿತ್ ಆಸ್‍ಲ್ಲೆ, ಥೊಡೆ ಆಸಾತ್ ಮ್ಹಣೊನೀ ಕಳಿತ್ ನಾತ್‍ಲ್ಲೆ, ಥೊಡ್ಯಾ ಸೆಲೆಬ್ರಿಟಿಂಕ್‍ಯೀ, ಜಲ್ಮಾ ದಿಸಾಚೆ ಉಲ್ಲಾಸ್ ಪಾಟಂವ್ಕ್ ಲೊಕಾಕ್ ಆವ್ಕಾಸ್ ಮೆಳ್ತಾತ್. ಕೊಣಾ-ಕೊಣಾಚೆ ಸಂದೇಶ್, ಥೊಡೆ ಖಾಸ್ಗೆನ್‍ಯೀ ಧಾಡ್ತಾತ್, ಉಲ್ಲಾಸ್ ರಾಸ್ ರಾಸ್ ಯೇವ್ನ್ ಪಡ್ತಾತ್. ಕ್ರಿಸ್ತಾಂವಾಂಚೆಂ ಬರೆಂ ಮನ್, ಮೊಗಾಳ್ ವ್ಯಕ್ತಿತ್ವ್ ಫೇಸ್‍ಬುಕ್ ಮುಖಾಂತ್ರ್ ಸಂಸಾರಾಕ್‍ಚ್ ಕಳಿತ್ ಜಾತಾ!

ಥೊಡೆ ಪಾವ್ಟಿಂ ಕೋಣ್‍ಗೀ ಫಿಲ್ಮ್ ಸ್ಟಾರಾಂಚಿ ತಸ್ವೀರ್ ಘಾಲ್ನ್ ಬರ್ತ್‍ಡೇ ವಿಶ್ ಕರಾ ಮ್ಹಣ್ ಉಲೊ ದಿತಾತ್. ಹಾಂತುಂಯೀ ಆಮ್ಚೊ ಲೋಕ್ ಉದಾರ್. ತೊ ನಟ್ ವಾ ನಟಿ, ಗಳ್ಯಾಂತ್ ಖುರಿಸ್ ಆಸ್ಚಿ ಚೇಯ್ನ್, ಕೋಂತ್ ಪುಣೀ ಘಾಲ್ನ್ ಆಸಾ ಜಾಲ್ಯಾರ್ ಮಾಗಿರ್ ಸಾಂಗಜೆ ಮ್ಹಣೊನ್ ನಾ. ತಿ ವ್ಯಕ್ತಿ ಕ್ರಿಸ್ತಾಂವ್ ಮ್ಹಣ್ ಚಿಂತುನ್ ಸಂಭ್ರಮಾನ್ ತಾಕಾ ಉಲ್ಲಾಸಿತಾತ್, ಬರೆಂ ಮಾಗ್ತಾತ್!

ಕ್ರಿಸ್ತಾಂವ್ ಹೆರಾಂಪರಿಂ ನ್ಹಯ್. ಸಂಸಾರಾಂತ್ ಕಿತ್ಲೊಗೀ ಜಣ್ ಮೊರ್ತಾ, ಥೊಡೆ ಅವ್ಘಡಾಂನಿ, ಥೊಡೆ ಜೀವ್ಘಾತ್ ಕರ್ನ್ ಮೊರ್ತಾತ್. ಪುಣ್ ಅಶೆಂ ಮೆಲ್ಲ್ಯಾ ಸಕ್ಡಾಂಕ್ ಶ್ರದ್ಧಾಂಜಲಿ ಪಾಟಂವ್ಕ್ ಆಮ್ಚ್ಯಾಂಕ್ ಖಂಯ್ ಪುರ್ಸತ್ ಆಸಾ ಮ್ಹಣೊನ್?! ದೆಕುನ್ ಫಕತ್ ಕ್ರಿಸ್ತಾಂವಾಂಚೆ ಅವ್ಘಡಾಕ್ ಸಾಂಪಡ್ಲ್ಯಾರ್, ಮರಣ್ ಪಾವ್ಲ್ಯಾರ್ ಆಮ್ಚ್ಯಾ ಕ್ರಿಸ್ತಾಂವ್ ಲೊಕಾಕ್ ದುಖ್ ಭೊಗ್ತಾ. ಫಕತ್ ಕ್ರಿಸ್ತಾಂವಾಂಚ್ಯೊ ಖಬ್ರೊ, ಮರ್ಣಾಂ, ದುರಂತಾಂ ತೆ ಫೇಸ್‍ಬುಕಾಂತ್ ಘಾಲ್ನ್ ಆಪ್ಲಿ ಬೆಜಾರಾಯ್, ಆಘಾತ್, ಖಂತ್ ವ್ಯಕ್ತ್ ಕರ್ತಾತ್. ಆಪ್ಲ್ಯಾ ಸಮುದಾಯಾಚೊ ಇತ್ಲೊಯೀ ಮೋಗ್ ಹಾಂಕಾಂ!

ತಶೆಂ ಮ್ಹಣ್, ಯೆಟ್ಚ್ಯಾಂತ್ ಆಮ್ಚೊ ಲೋಕ್ ಪಾಟಿಂ ಆಸತ್ ಮ್ಹಣ್ ಚೂಕ್ ಚಿಂತ್ಚೆಂ ಬಿಲ್ಕುಲ್ ನಾಕಾ. ಯೆಟ್ಚ್ಯಾಂತ್‍ಯೀ ಆಮ್ಚಿ ಕ್ರಿಸ್ತಾಂವ್ ಪರ್ಜಾ ಊಂಚಿ. ಕೊಣೆಂಯೀ ಖರ್‍ಯಾನ್‍ಗೀ ವಾ ಭೆಷ್ಟೆಂ ಖುಷಾಲಾಯೆಕ್ ವಾ ತುಕ್ಲಾಂವ್ಕ್ ಮ್ಹಣೊನ್ ಕೊಣಾಯ್ಕೀ ಸೊವ್ನ್, ದುರ್ಸೊನ್ ವಾ ಆರೋಪ್ ಘಾಲ್ನ್ ಏಕ್ ಸ್ಟೇಟಸ್ ಘಾಲೆಂ ಮ್ಹಣ್ ಚಿಂತ್ಯಾಂ. ತೆಂ ಪಳೆವ್ನ್ ಆಪ್ಣಾಚೆಂಯೀ ಆಸೊಂದಿ ಮ್ಹಣ್ ಲೋಕ್, ಗಜಾಲ್ ಕಿತೆಂ ಮ್ಹಣ್ ಕಳಿತ್ ನಾತ್ಲ್ಯಾರ್‍ಯೀ, ಯೆಟುನ್ ಕಮೆಂಟ್ಸ್ ಘಾಲ್ತಾ. ಗಜಾಲ್ ಸಾರ್ಕಿಗೀ, ಘಡಿತ್ ನೀಜ್‍ಗೀ ಮ್ಹಳ್ಳೆಂ ಸಮ್ಜೊಂಕ್ ಕುಸ್ಕುಟಾಚಿ ಆಸಕ್ತ್ ವಾ ಸೈರಾಣ್ ನಾಸ್ತಾನಾ ಅಶೆಂ ಕೊಣಾ ಕೊಣಾಕ್ ಜಾಲ್ಯಾರೀ ಖುರ್ಸಾರ್ ಮಾರ್ತಾತ್!

ಆಪ್ರೂಪ್ ಥೊಡೆ ಜಣ್ ಹೆರ್ ಖಬ್ರೆ ಮಾಧ್ಯಮಾಂನಿ ಆಯಿಲ್ಲೆಂ ಶೇರ್ ಕರ್ತಾತ್. ತಶೆಂ ಕರ್ತಾನಾ, ಖಬರ್ ವಾ ಲೇಖನಾಚೆಂ ತಕ್ಲೆ ನಾಂವ್, ತಸ್ವೀರೆ ಸವೆಂ ಫೇಸ್‍ಬುಕಾಂತ್ ಝಳ್ಕತಾ. ತೆಂ ಕ್ಲಿಕ್ ಕೆಲ್ಯಾರ್ ಬರಪ್ ಪ್ರತ್ಯೇಕ್ ವಿಂಡೋಂತ್ ಉಗ್ತೆಂ ಜಾತಾ. ಪುಣ್ ಆಮ್ಚ್ಯಾಂಕ್ ತಶೆಂ ಕರ್ನ್ ವೇಳ್ ವಿಭಾಡ್ ಕರುಂಕ್ ನಾಕಾ. ದೆಕುನ್ ಫಕತ್ ಟೈಟಲ್ ಪಳೆವ್ನ್‍ಂಚ್ ಸಗ್ಳೆಂ ವಾಚ್ಲಾಂ ಮ್ಹಳ್ಳೆಪರಿಂ ಚಿಂತಾತ್. ಟೈಟಲಾಂತ್ ವಿವಾದಿತ್ ವಾ ನಕಾರಾತ್ಮಕ್ ಉತ್ರಾಂ ಪುಣೀ ಆಸ್ಲ್ಯಾರ್ (ಥೊಡೆ ಪಾವ್ಟಿಂ ವಾಚ್ಪ್ಯಾಕ್ ಟೆಂಪ್ಟ್ ಕರುಂಕ್ ಕ್ರಿಯೇಟಿವ್, ಆಕರ್ಷಕ್ ಟೈಟಲಾಂ ದಿತಾತ್) ಗಾಳಿ ಯೆಟುಂಕ್ ಸುರು ಕರ್ಚೆಯೀ ಜಾಯ್ತೆ ಆಸಾತ್!

ಮನ್ಶ್ಯಾಂಚೊ ಸಂಸಾರ್ ಮ್ಹಣ್ತಾನಾ ಥಂಯ್ ವಾಯ್ಟ್ ಆಧಾರ್ಚೆ ಖೊಟೆ ಆಸ್ತಾತ್‍ಚ್. ಫೇಸ್‍ಬುಕ್‍ಯೀ ಮನ್ಶ್ಯಾಂಚೊಚ್ ನ್ಹಯ್‍ಗೀ? ದೆಕುನ್ ಹಾಂಗಾಯೀ ಖೊಟೆ ಆಸಾತ್. ತಾಂಕಾಂ ಫೇಸ್‍ಬುಕಾಂತ್ ಕೊಣಾಯ್ಚೊಯೀ ಮಾನ್ ಕಾಡ್ಚೆಂ ಮ್ಹಳ್ಯಾರ್ ಭಾರೀ ಖುಷಿ. ದೆಕುನ್ ಫಟ್ಕಿರ್ಯೊ ಕಾಣಿಯೊ ಗುಂತುನ್ ಆಪ್ಣಾಕ್ ಜಾಯ್ನಾತ್‍ಲ್ಲ್ಯಾಂಚೆರ್ ಆಪ್ವಾದ್ ಮಾಂಡುನ್, ನಿಂದಾ, ಅಪಪ್ರಚಾರ್ ಕರ್ತಾತ್.

ಥೊಡ್ಯಾಂಕ್ ಅಸಲೆಂ ಮ್ಹಳ್ಯಾರ್ ಭಾರೀ ಖಾಯ್ಸ್. ಆನ್ಯೇಕ್ಲ್ಯಾಕ್ ಕೊಣೆಂಯೀ ದುರ್ಸೊನ್ ವಾ ಯೆಟುನ್ ಕಿತೆಂಯ್ ಘಾಲ್ಯಾರ್ ಆಪುಣ್‍ಯೀ ಯೆಟುಂಕ್ ಫುಡೆಂ ಸರ್ತಾತ್. ಪುಣ್ ತೆಂಚ್ ಕೊಣಾಯ್ ವಿಶಿಂ ಬರೆಂ ಬರಯ್ಲ್ಯಾರ್ ತೆಂ ವಾಚುಂಕ್ ಆನಿ ಬರೆ ಕಮೆಂಟ್ಸ್ ಘಾಲುಂಕ್ ವಚನಾಂತ್. ತಿ ಜವಾಬ್ದಾರಿ ಲೊಕಾಚಿ, ಆಪ್ಣಾಚಿ ನ್ಹಯ್ ಮ್ಹಳ್ಳೊ ಪ್ರ್ಯಾಕ್ಟಿಕಲ್ ಮನೋಭಾವ್ ಆಮಾ ಸಮೇಸ್ತಾಂಚೊ!

ಕ್ರಿಸ್ತಾಂವಾಂಕ್ ಸಂಸಾರಾಚಿ ಜವಾಬ್ದಾರಿ ಕಿತ್ಯಾಕ್? ದೆವಾನ್‍ಂಚ್ ಸಂಸಾರ್ ರಚ್‍ಲ್ಲೊ ಆಸ್ತಾಂ, ಸಂಸಾರಾಚಿ, ದೇಶಾಚಿ, ರಾಜ್ಯಾಚಿ ಆನಿ ಗಾಂವಾಚಿ ಗಜಾಲ್ ದೇವ್‍ಚ್ ಪಳೆವ್ನ್ ಘೆತಾ, ಆಪ್ಣೆಂ ಕಿತ್ಯಾಕ್ ಖಂತ್ ಕರಿಜೆ, ತ್ಯಾ ವಿಶಿಂ ಚರ್ಚಾ ಕರಿಜೆ ಮ್ಹಳ್ಳೊ ವಿಶಾಲ್ ಮನೋಭಾವ್ ಆಮಾ ಕ್ರೀಸ್ತಿ ಪರ್ಜೆಚೊ. ಹೆರ್ ಲೋಕ್ ಸಮ್ಜಣಿ ನಾಸ್ತಾಂ, ಭೋವ್‍ಶಾ ದೆವಾಚ್ಯಾ ಸಕ್ತೆಚೆರ್ ಪಾತ್ಯೆಣಿ, ಭರ್ವಸೊ ನಾಸ್ತಾಂ ಸಂಸಾರಾಚ್ಯೊ ಗಜಾಲಿ ಫೇಸ್‍ಬುಕಾಂತ್ ಚರ್ಚಾ ಕರ್ತಾ. ಪಿಶೆ ಖಂಚೆ!

ದೇಶಾಂತ್ ಕಿತೆಂ ಘಡ್ಲೆಂ, ರಾಜ್ಯಾಂತ್ ಕಿತೆಂ ಜಾತಾ, ಗಾಂವಾಂತ್ ಕಸಲೆಂ ಜಾಲಾಂ ಇತ್ಯಾದಿ ಅಕ್ರಿಸ್ತಾಂವ್ ಲೋಕ್ ಫೇಸ್‍ಬುಕಾಂತ್ ಚರ್ಚಾ ಕರ್ತಾ. ತಾಂಕಾಂ ಸಮ್ಜಣಿ ಆಸಾಗಿ? ತಾಣಿಂ ಕ್ರಿಸ್ತಾಂವಾಂ ಥಾವ್ನ್ ಶಿಕಜೆ, ಫೇಸ್‍ಬುಕ್ ಕಸೊ ವಾಪಾರ್ಚೊ ಮ್ಹಣೊನ್! ರಾಜಕೀಯ್, ಸಾಹಿತ್ಯ್, ಖೆಳ್, ಸಂಗೀತ್, ಸಿನೆಮಾ, ಖಬ್ರೊ, ದೇಶ್-ವಿದೇಶೀ ಗಜಾಲಿ, ವಾಡಾವಳಿ, ಪರಿಸರ್, ಪಾವ್ಸ್-ಆವ್ರ್, ವೋತ್-ದುಕೊಳ್… ಛೆ, ಛೆ! ಹ್ಯೊ ಸರ್ವ್ ಗಜಾಲಿ ಕ್ರಿಸ್ತಾಂವಾಂಕ್ ಸಾಂಗ್‍ಲ್ಲ್ಯೊಚ್ ನ್ಹಯ್. ಆದಿಂ ಥಾವ್ನ್ ದೇವ್‍ಚ್ ಆಮ್ಚ್ಯಾ ಪರ್ಜೆಕ್ ರಾಕೊನ್ ಆಸಾ. ದೆಕುನ್ ಸಂಸಾರ್ ವೊಮ್ತೆಂ ಉದಾರೆಂ ಜಾಂವ್ದಿ, ಗಾಂವ್-ರಾಜ್ಯ್-ದೇಶಾಂತ್ ಕಿತೆಂಯೀ ಘಡೊಂದಿ, ಕ್ರಿಸ್ತಾಂವಾಂಕ್ ಫರಕ್ ಪಡನಾ. ಆಮ್ಕಾಂ ದೇವ್ ರಾಕ್ತಾ. ಹೆರಾಂಕ್ ಎಕಾ ನಿಜಾ ದೆವಾಚೆರ್ ಪಾತ್ಯೆಣಿ ನಾ ದೆಕುನ್ ಫೇಸ್‍ಬುಕಾಂತ್ ತೆ ಚರ್ಚಾ ಕರ್ತಾತ್. ಮೂರ್ಖ್ ತೆ. ಹಿ ಆಮ್ಚಿ ಅಖಂಡ್ ಕ್ರೀಸ್ತಾಂವ್ ಪರ್ಜೆಚಿ ಅಭಿಪ್ರಾಯ್!

ಫೇಸ್‍ಬುಕಾಂತ್ ಹೆರ್ ಸರ್ವ್ ಲೋಕ್ ಏಕ್ ಥರ್ ತರ್, ಆಮಿ ಕ್ರೀಸ್ತಾಂವ್ ವೆಗ್ಳೆಚ್. ಕಿತ್ಯಾಕ್ ಮ್ಹಳ್ಯಾರ್ ಆಮಿ ‘ಲ್ಹಾನ್’ ಕ್ರಿಸ್ತಾಂವ್ ಸಮುದಾಯ್ ಬಾಂಧ್ಚೆ. ಖಾಲ್ತೆಂಪಣ್, ಮೊನೆಂಪಣ್, ಕುಡ್ಡೆಂಪಣ್‍ಯೀ ಆಮ್ಚೆಂ ಖಾಶೆಲೆಂಪಣ್ ನ್ಹಯ್‍ಗೀ? ದೆಕುನ್ ಫೇಸ್‍ಬುಕಾಂತ್‍ಯೀ ಆಮಿ ‘ಲ್ಹಾನ್’ ಜಾವ್ನ್ ಉರ್ತೆಲ್ಯಾಂವ್!

Send Feedback to: budkuloepaper@gmail.com

Like us at: www.facebook.com/budkulo.epaper

The post ಫೇಸ್‍ಬುಕಾಂತ್‍ಯೀ ಆಸಾ ‘ಲ್ಹಾನ್’ ಕ್ರಿಸ್ತಾಂವ್ ಸಮುದಾಯ್! appeared first on Budkulo.

ಭಾರೀ ಸಂತೊಸ್ ಮ್ಹಳ್ಯಾರ್ ಭಾರೀ ಸಂತೊಸ್. ತಾಚ್ಯಾ ಖುಷೆಕ್ ಗಡ್ ಮೇರ್ ನಾತ್‍ಲ್ಲಿ. ಸ್ವಪ್ಣಾಂತ್‍ಯೀ ಚಿಂತುಂಕ್ ನಾತ್‍ಲ್ಲೊ ಗೌರವ್ ತಾಕಾ ಮೆಳ್‍ಲ್ಲೊ. ಥಂಯ್ ಹಾಂಗಾ ಕೊಣಾಚ್ಯಾ ಖಾಂದ್ಯಾಕ್‍ಗೀ, ಪಾಕಾಟ್ಯಾಕ್‍ಗೀ ಉಮ್ಕಳೊನ್ ದೀಸ್ ಕಾಡುನ್ ಆಸ್ಲೆಲ್ಯಾಕ್ ಹ್ಯಾ ಪಾಂವ್ಡ್ಯಾಕ್ ಪಾಂವ್ಚೆಂ ಮ್ಹಣ್ತಾನಾ ಸಂತೊಸ್ ಜಾಂವ್ಚೊ ಸಹಜ್‍ಚ್.

ಕೊಂಕ್ಣಿ ಬಿಗ್ ಬಾಸ್ 2 ಸೀಸನಾಂತ್ ತಾಕಾ ಭಾಗ್ ಘೆಂವ್ಕ್ ಆವ್ಕಾಸ್ ಲಾಭ್‍ಲ್ಲೊ. ಕೊಂಕ್ಣಿ ಬಿಗ್ ಬಾಸ್ 1 ಸೀಸನ್ ಸುರು ಜಾಲ್ಲ್ಯಾ ದಿಸಾಚ್ಚ್ ವೊಮ್ತೆಂ ಪಡ್‍ಲ್ಲೆಂ. ಖಂಡಾಪಟ್ಟೆ ಪ್ರಚಾರ್ ದೀವ್ನ್ ರೆಕೊರ್ಡಿಂಗ್ ಕರಿನಾಸ್ತಾನಾ ಶೀದಾ ಲೈವ್ ಪ್ರಸಾರ್ ಕರ್ನ್ ಮರ್ಯಾದ್ ಹೊಗ್ಡಾಯ್ಜೆ ಪಡ್‍ಲ್ಲಿ! ನಿರೂಪಕ್ ಜಾವ್ನ್ ಆಯಿಲ್ಲ್ಯಾ ವ್ಯಕ್ತಿನ್ ಪೆದಂಬು ಉಲವ್ನ್ ಅಪಚಾರ್ ಕೆಲ್ಲೊ. ಇಂಟರ್’ನ್ಯಾಶನಲ್ ಟಿವಿ ನಿರೂಪಕ್ ಜಾಂವ್ಚ್ಯಾ ಸ್ವಪ್ಣಾಂನಿ ಭರ್’ಲ್ಲ್ಯಾ ತಾಣೆಂ ಟೈಟ್ ಜಾವ್ನ್ ಯೇವ್ನ್ ಪೊಜ್ಡೆಂ ಉಲಯಿಲ್ಲ್ಯಾನ್ ಕಾರ್ಯೆಂ ಸುರು ಜಾಲ್ಲ್ಯಾ ಥೊಡ್ಯಾಚ್ ಮಿನುಟಾಂಕ್ ಸ್ತಬ್ದ್ ಜಾಲ್ಲೆಂ.

ಥೊಡ್ಯಾ ತೆಂಪಾ ಉಪ್ರಾಂತ್ ‘ಟಿವಿ420’ನ್ ಪರತ್ ಬಿಗ್ ಬಾಸ್ ಆಪುಣ್ ಕರ್ತಾಂವ್ ಮ್ಹಣ್ ಫುಡೆಂ ಯೇವ್ನ್ ವ್ಯವಸ್ಥಿತ್ ರಿತಿನ್ ಮಾಂಡಾವಳ್ ಕೆಲ್ಲಿ. ತಾಚೆಂ ರೆಕೊರ್ಡಿಂಗ್ ಭರಾನ್ ಚಲ್ತಾಲೆಂ. ಬಿಗ್ ಬಾಸ್ ಘರಾಂತ್ ವೆವೆಗ್ಳ್ಯಾ ವ್ಯಕ್ತಿಂಕ್ ವಿಂಚ್‍ಲ್ಲೆಂ. ಲೊಕಾಕ್ ವಳ್ಕಿಚೆ, ಫಾಮಾದ್ ಥೊಡೆ ತರ್ ಕೊಣಾಕೀ ಕಳಿತ್ ನಾತ್‍ಲ್ಲೆಯೀ ಆಸ್‍ಲ್ಲೆ. ತಸಲ್ಯಾಂ ಪಯ್ಕಿ ಹೊ ಮನಿಸ್ ಎಕ್ಲೊ. ನವೆ ನವೆ ಜಣ್‍ಯೀ ಯೇವ್ನ್ ವೆತಾಲೆ.

ನಿರೂಪಕಾನ್, “ಆಯ್ಚೊ ಆಮ್ಚೊ ಸಯ್ರೊ – ಕೇಡಿ ತಿಗುರ್ ಯಾನೆ ಲದ್ದಿ ತಿಗುರ್ ಯಾನೆ ಮೊಸ್ರಿ ದೊತೊರ್! ಸಬಾರ್ ನಾಂವಾಂನಿ ಫಾಮಾದ್ ಜಾಲ್ಲೊ ‘ಎಂಪ್ಟಿ’ ಕಲಾಕಾರ್ ಹೊ! ಲಾಗ್ಶಿಲ್ಯಾನ್ ವಳ್ಕೊಂಚೆ ತಾಕಾ ನಂಜೆಲಾ, ಮೊಸ್ರಾಳೊ, ಶಿಂತ್ರ್ಯಾಳೊ ಮ್ಹಣೊನ್ ಮೊಗಾನ್ ಆಪಯ್ತಾತ್. ತಾಚಿ ಚರಿತ್ರಾ ಭೋವ್ ವಂಡರ್’ಫುಲ್! ಆಮ್ಚೊ ಸಯ್ರೊ ಜಾವ್ನ್ ಆಯಿಲ್ಲ್ಯಾ ತಾಕಾ ಸ್ವಾಗತ್, ಸುಸ್ವಾಗತ್!” ಮ್ಹಣ್ ಬಿಗ್ ಬಾಸ್ ಘರಾಂತ್ ಪ್ರವೇಶ್ ದಿಲ್ಲೊ.

ಅಸಲೊ ಗೌರವ್ ಮೆಳ್ಚೊ ನಿಜಾಯ್ಕೀ ಶ್ರೇಷ್ಟ್ ವ್ಯಕ್ತಿಂಕ್. ಆಪ್ಣಾಕ್ ಹ್ಯಾ ಮೆಳಿಂತ್ ಆವ್ಕಾಸ್ ದಿಲಾ ಮ್ಹಳ್ಯಾರ್ ಆಪ್ಣಾಕ್‍ಯೀ ಶ್ರೇಷ್ಟ್ ಸ್ಥಾನ್ ಫಾವೊ ಜಾಲಾಂ. ಚಿಂತುಂನ್‍ಂಚ್ ‘ಕೇಡಿ ತಿಗುರ್’ ಸರ್ಗಾರ್ ಉಪ್ಯೆಂವ್ಕ್ ಲಾಗ್‍ಲ್ಲೊ.

ದುಸ್ರ್ಯಾಚ್ ಸಕಾಳಿಂ ಬಿಗ್ ಬಾಸಾನ್ ತಿಗುರಾಕ್ ಕನ್ಫೆಶನ್ ರೂಮಾಕ್ ಆಪಯಿಲ್ಲೆಂ. ತಿಗುರಾಕ್ ಆಜ್ಯಾಪ್ ಜಾಲ್ಲೆಂ ತರೀ, ಧನ್ಯಾಚ್ಯಾ ಉಲ್ಯಾಕ್ ಪಾಳೊ ದಿಂವ್ಚೆಂ ಅವಶ್ಯ್ ದೆಕುನ್ ಚಿಕ್ಕೆಶೆ ಕಾವ್ಜೆಣೆನ್‍ಶೆಂ ತೊ ಭಿತರ್ ಸರ್ಲೊ. “ಆತಾಂ ತುಕಾ ತುವೆಂ ಜಿಣ್ಯೆಂತ್ ಕೆಲ್ಲ್ಯಾ ‘ಸಾಧನಾಂ’ ವಿಶಿಂ ಕುಮ್ಸಾರ್ ಜಾಂವ್ಚೊ ವೇಳ್. ತುಜಿಂ ವಿಶಿಷ್ಟ್ ಕಾರ್ಯಿಂ ತುವೆಂ ಉಚಾರಿಜೆ. ತುಕಾ 30 ಮಿನುಟಾಂಚೊ ವೇಳ್ ದಿತಾಂ” ಮ್ಹಣ್ ಫರ್ಮಾಣ್ ಆಯ್ಲೆಂ.

“ಹ್ರೇಂ… ಹ್ರೇಂ… ಹಾಂವ್ ವ್ಹಡ್ ಕಾರ್ಬಾರಿ… ಬುದ್ವಂತ್…” ಮ್ಹಣ್ ಸಾಂಗ್ತಾನಾಂಚ್ ಬಿಗ್ ಬಾಸ್ ಮಧೆಂ ಉಲಯ್ಲೊ. “ರಾವ್, ರಾವ್! ತುಜಿ ಸಗ್ಳಿ ಚರಿತ್ರಾ ಆಮ್ಚೆ ಕಡೆನ್ ಆಸಾ. ಆತಾಂ ತುಜ್ಯಾ ಪ್ರಾಮಾಣಿಕತೆಚಿ ಪರೀಕ್ಷಾ ಚಲ್ತೆಲಿ. ದೆಕುನ್ ಪಯ್ಲೆಂ ತುವೆಂ ಕೆಲ್ಲಿಂ ಸರ್ವ್ ವಾಯ್ಟ್ ಕಾಮಾಂ, ಅನ್ನಾಡ್ಪಣಾಂ ಸಾಂಗಜೆ. ಕುಮ್ಕೆಕ್ ತುಕಾ ತುಜೆ ತಸಲೊಚ್ ಎಕ್ಲೊ ಸಾಂಗಾತಿ ದಿತಾಂ. ತೊ ಸರ್ಪ್ರೈಜ್ ವಿಸಿಟರ್. ತುಮಿ ದೊಗಾಂಯ್ನಿ ಕುಮ್ಸಾರ್ ಜಾಯ್ಜೆ. ಫಟ್ ಉಲಯ್ಶಿ ತರ್ ಚತ್ರಾಯ್, ಘರಾಂತ್ಲೆಂ ಭಾಯ್ರ್ ಘಾಲ್ತಾಂವ್. ಆಲ್ ದ ಬೆಸ್ಟ್!” ಮ್ಹಣಾಲೊ ಬಿಗ್ ಬಾಸ್ ಅಧಿಕಾರಾಚ್ಯಾ ತಾಳ್ಯಾನ್.

‘ತಿಗುರ್’ ಚಾಪ್ಪೆ ಜಾಲೊ. ಪುಣ್ ಮತಿಂತ್ ತಾಣೆಂ ಚಿಂತ್ಲೆಂ – ‘ಆಪ್ಣೆಂ ಕೆಲ್ಲೆಂ ಅನ್ನಾಡ್ಪಣ್‍ಂಚ್ ಚಡ್. ಬರ್ಯಾಚ್ಯಾಕೀ ವಾಯ್ಟ್ ಚಡ್. ಎಕಾ ಲೆಕಾನ್ ಬರೆಂಚ್ ಜಾಲೆಂ – ಫಟಿ ಸಾಂಗಜೆ ಮ್ಹಣ್ ನಾ. ಆಸ್‍ಲ್ಲೆಂಚ್ ಸಾಂಗ್ಲ್ಯಾರ್ ಜಾಲೆಂ’ ಮ್ಹಣ್ ತೃಪ್ತಿ ಜಾಲಿ ತಾಕಾ. ತರ್ ಆತಾಂ ಯೆಂವ್ಚೊ ನವೊ ವ್ಯಕ್ತಿ ಕೋಣ್ ಆಸ್ಯೆತ್ ಮ್ಹಣ್ ತಾಣೆಂ ಅಂದಾಜ್ ಕರ್ತಾಸ್ತಾನಾ ಬಾಗಿಲ್ ಉಗ್ತೆಂ ಜಾಲೆಂ.

ಪಯ್ಲೆಂ ನಾಕ್ ಭಿತರ್ ರಿಗ್ಲೆಂ. ಕಿತೆಂಗೀ ಹುಂಕ್ಚೆಪರಿಂ ದಿಸ್ಲೆಂ. ಸವ್ಕಾಸ್ ತೋಂಡ್ ಭಿತರ್ ಆಯ್ಲೆಂ. ಖಂಯ್ಗೀ ಪಳೆಲ್ಲೊ ಉಡಾಸ್! ತಕ್ಲಿ ಮುಖಾರ್ ವೊಡ್ಡುನ್ ಬಾಗ್ಗೊನ್‍ಶೆಂ ತೊ ಸವ್ಕಾಸ್ ಮುಖಾರ್ ಆಯ್ಲೊ. ಹೊ ಕೋಣ್ ಕುಂಟ ಪಾಸ್ಕು ಮ್ಹಣ್ ಚಿಂತುಂಕ್ ಲಾಗ್ಲೊ ತಿಗುರ್. ಆಯಿಲ್ಲೊ ವ್ಯಕ್ತಿ ತಿಶಿನ್ ಹಿಶಿನ್ ಚೊರ್ಯಾಂ ಪಳೆವ್ನ್ ಆಂಯ್ಡೆ ಘೊಟುನ್‍ಶೆಂ ತಿಗುರಾ ಸರ್ಶಿನ್ ಆಯ್ಲೊ.

“ಥಂಯ್ ಖಾಲಿ ಆಸ್‍ಲ್ಲ್ಯಾ ಕದೆಲಾರ್ ಬಸ್!” ಫರ್ಮಾಣ್ ಆಯ್ಲೆಂ ಬಿಗ್ ಬಾಸಾಚೆಂ. ತೊ ಘಣ್ಗಣಿತ್ ತಾಳೊ ಆಯ್ಕಲ್ಲೆಂಚ್ ಏಕ್ ಪಾವ್ಟಿಂ ಕಾಂಪ್ಲೊ ನವೊ ಸಯ್ರೊ. ತಿಗುರ್ ಬಸ್‍ಲ್ಲ್ಯಾ ಸಾಮ್ಕಾರ್ ಕದೆಲ್ ಆಸ್‍ಲ್ಲೆಂ. ಥಂಯ್ ವಚೊನ್ ಪರತ್ ತಿಶಿನ್ ಹಿಶಿನ್ ಕುಂಯ್ಕಾಪರಿಂ ಪಳೆವ್ನ್ ಶೆರ್ಮೆವ್ನ್ ಕದೆಲಾರ್ ಬಸ್ಲೊ.

“ಆತಾಂ ತುಮಿಂ ದೊಗಾಂಯ್ನಿ ಕುಮ್ಸಾರ್ ಜಾಂವ್ಚೆಂ. ತುಮ್ಚ್ಯಾ ಪಾತ್ಕಾಂಚಿ ಪಟ್ಟಿ ವಾಚ್ಚಿ. ಫಟ್ ಸಾಂಗ್ಲ್ಯಾರ್ ಜಾಗ್ರುತ್…” ತಾಳೊ ಸಾದ್ಲೊ ಬಿಗ್ ಬಾಸಾಚೊ. ಹೊ ಕಿತೆಂ ಸರ್ಗಾಕ್ ಪ್ರವೇಶ್ ದಿಂವ್ಚೊ ದೂತ್‍ಗೀ ವಾ ಸಾಂ ಪೆದ್ರುಗೀ ಮ್ಹಣ್ ದುಬಾವ್ ಜಾಲೊ ದೊಗಾಂಯ್ಕೀ. ಬೆಲ್ ವ್ಹಾಜ್ಲಿ.

ತಿಗುರ್ ಪಯ್ಲೆಂ ಉಲಯ್ಲೊ. “ಯೆಂ… ತೂಂ…?” ಸವಾಲ್ ತಾಚೆಂ.

“ಹಾಂವ್ ಗೊತ್ತುನಾಂಗೀ ತುಕಾ? ಪ್ರಬುದ್ಧ..!” ಜಾಪ್ ದಿಲಿ ಪುನೆಕೆಲ್ಲ್ಯಾನ್.

“ಕಾಲೆಂ… ಬುದ್ಧ?” ವಿಚಾರಿಲಾಗ್ಲೊ ತಿಗುರ್.

“ಬುದ್ಧ ನ್ಹಯ್. ಹಾಂವ್ ‘ಪ್ರಬುದ್ಧ ಮೂಸೆಲ’ ಬಿರುದಾಂಕಿತ್ ಕಂತ್ರಿ ನಂಜೆಲ ಯಾನೆ ಪಿರ್ಕಿ ಬಿಂಡೊ ಅಂಡೆಲೊರ್!”

ತಿಗುರಾಕ್ ಆಜ್ಯಾಪ್. ಕಿತೆಂಗೀ ಝಳ್ಕಲೆಂ ತಾಕಾ. “ಹಾಂ! ತುಂಯೀ ಫೇಮಸ್ ನಂಜೆಲ! ಕಳ್ಳೆಂ, ಕಳ್ಳೆಂ. ತುಂ ವ್ಹಡ್ ಮೊಸ್ರಾಳೊ..!”

“ತುಂ ಕಿತೆಂ ಉಣ್ಯಾಚೊಗೀ. ತುಜೆ ತಿತ್ಲಿ ಡಿಗ್ರಿ ಮ್ಹಾಕಾ ನಾ!” ಮ್ಹಣಾಲೊ ಕುಂಟ.

“ತುಂ ಅಂಡೆಲೊರ್‍ಚೊ ಅಂಡೆಪಿರ್ಕಿ ಮ್ಹಣ್ ಸಕ್ಡಾಂಕ್ ಕಳಿತ್ ಆಸಾ. ತುಜಿಂ ಕಾರ್ಬಾರಾಂ ಮ್ಹಾಕಾ ಕಳಿತ್ ನಾಂತ್‍ಗಿ? ನಂಜಿ ವೊಂಕ್ಚ್ಯಾಂತ್ ತುಂ ಭಾರೀ ಮುಖಾರ್..!”

ತಿತ್ಲ್ಯಾರ್ ಸೈರನ್ ಜಾವ್ನ್ ಗಡ್ಗಡ್ಯಾಪರಿಂ ತಾಳೊ ಆಯ್ಕಲೊ – “ತುಮಿ ಎಕಾಮೆಕಾಚಿಂ ಖೆಳ್ಕುಳಾಂ ಕೆಲ್ಲೆಂ ಪುರೊ. ತುಮ್ಕಾಂ ಸಾಂಗ್‍ಲ್ಲೆಂ ತುಮ್ಚಿಂ ಪಾತ್ಕಾಂ ಉಚಾರುಂಕ್. ಚತ್ರಾಯ್!” – ಮ್ಹಣಾಲೊ ಬಿಗ್‍ಬಾಸ್.

ದೊಗೀ ಚುಪ್ ಜಾಲೆ. ಸೀನಿಯರ್ ತಿಗುರ್ ಎಕಾ ಥರಾನ್… ಹ್ರೇಂ… ಹ್ರೇಂ… ಮ್ಹಣ್ ಪಿಂರ್ಗಲೊ. ಮೂಸೆಲ ದೊಳೆ ಪಿಳಿಪಿಳಿ ಕರಿಲಾಗ್ಲೊ.

“ಹ್ಹಿ-ಹ್ಹಿ-ಹ್ಹೀ!” ಕಿಡ್ಕಿಡ್ಲೊ ತಿಗುರ್. “ಹಾಂವ್ ವ್ಹಡ್ ಮೊಸ್ರಿ. ಮ್ಹಜೆಂ ಮೊಸ್ರಿ ಪುರಾಣ್ ವ್ಹಡ್ ಆಸಾ. ಸಾಂಗೊಂಕ್ ಗೆಲ್ಯಾರ್ ಸಂಸಾರ್ ವೊಮ್ತೆ ಉದಾರೆಂ ಜಾಯ್ತ್. ಹೆರಾಂನಿ ವಯ್ರ್ ಆಯಿಲ್ಲೆಂ ಮ್ಹಾಕಾ ಪಳೆಂವ್ಕ್ ಜಾಯ್ನಾ…” ಸಾಂಗಲಾಗ್ಲೊ ತೊ.

ತಿತ್ಲ್ಯಾರ್, “ಹ್ಹೆ-ಹ್ಹೇ! ಹಾಂವ್ ತುಜ್ಯಾಕೀ ಪ್ರಾಯೆನ್ ಲ್ಹಾನ್ ತರೀ ಮೊಸ್ರಾಂತ್ ಉಣೊಂ ನಾ! ಮ್ಹಾಕಾಯೀ ಹೆರಾಂನಿ ಉದ್ಧಾರ್ ಜಾಲ್ಲೆಂ ಪಳೆಂವ್ಕ್ ಜಾಯ್ನಾ. ಪೊರ್ಚೆ ಪೋರ್ ತ್ಯಾ ‘ಕೇಕ್ ಆಸ್ಲ್ಯಾರ್ ವಾಯ್ನ್ ನಾ’ ಸಿನೆಮಾ ವಿಶಿಂ ನಂಜಿ ವೊಂಕ್‍ಲ್ಲೊಂ ಹಾಂವ್‍ಂಚ್ ಫಸ್ಟ್..!” ಮ್ಹಣಾಲೊ ಪ್ರಬುದ್ಧ ಮೂಸೆಲ.

“ಹ್ರೇಂ… ಹ್ರೇಂ… ವ್ಹಯ್ಗೀ? ಸಾಂಗ್‍ಲ್ಲೆಪರಿಂ ತುಂ ಕಿತ್ಯಾಕ್ ಮೊಸೊರ್ ವೊಂಕ್ಲೊಯ್ ತ್ಯಾ ಫಿಲ್ಮಾಚೆರ್? ಕಾರಣ್ ಕಿತೆಂ?” ತಿಗುರಾಚೆಂ ಸವಾಲ್.

“ಪಯ್ಲೆಂ ಕಾರಣ್ ಹಾಂವ್ ನಂಜ್ಯಾಳೊಂ. ಮೊಸೊರ್ ವೊಂಕ್‍ಲ್ಲೆಂ ಮಾತ್ರ್ ನ್ಹಯ್, ಸರ್ಸರಿತ್ ಅಪಪ್ರಚಾರ್’ಯೀ ಕೆಲೊ. ಕಾರಣಾಂ ಸಬಾರ್. ಏಕ್ ತಾಂತುಂ ಜಾಯ್ತೆ ಯುವಜಣ್ ಆಸ್‍ಲ್ಲೆ. ತಾಣಿಂ ಶೈನ್ ಜಾಂವ್ಚೆಂ ಪಳೆವ್ನ್ ಪಳೆವ್ನ್ ಮ್ಹಾಕಾ ಪೊಟಾಂತ್ ಜಾಳ್ ಭರೊನ್ ವೊಮ್ತಲೆಂ. ಸಿನೆಮಾ ರಿಲೀಸ್ ಜಾಂವ್ಚ್ಯಾ ವೆಳಾರ್ ಹಾಂವ್ ತಾಚ್ಯಾ ಪ್ರೊಡ್ಯೂಸರಾಲಾಗಿಂ ಆಂಯ್ಡೆ ಘೊಟುನ್ ಹಾತ್ ವೊಡ್ಡಾವ್ನ್ ಗೆಲ್ಲೊಂ. ಹಾಂವ್ ಕಮಿಶನರ್ ನೆಂ, ದೆಕುನ್…”

ಮೂಸೆಲಾ ತಿತ್ಲೆಂ ಸಾಂಗ್ತಾನಾ ತಿಗುರಾನ್ ಮಧೆಂಚ್ ವಿಚಾರ್ಲೆಂ. “ಕಮಿಶನರ್! ಖಂಚೊ ಕಮಿಶನರ್? ತುಂ ಕೆದಾಳಾ ಕಮಿಶನರ್ ಜಾಲ್ಲೊಯ್..?” ಮ್ಹಣಾಲೊ ತಿಗುರ್.

“ಹ್ಹಿ-ಹ್ಹೀ! ಹಾಂವ್ ಕಮಿಶನ್ ಘೆಂವ್ಚೊ ಏಜೆಂಟ್ ನೆ, ದೆಕುನ್ ಕಮಿಶನರ್ ಮ್ಹಳೆಂ! ಹ್ಹಿ-ಹ್ಹೀ! ಹಾಂವೆಂ ಎಕಾ ಸಂಸ್ಥ್ಯಾಕ್ ‘ಕಲೆಕ್ಷನ್’ ಕರ್ನ್ ದಿಂವ್ಚೆಂ. ತೆ ಮ್ಹಾಕಾ ತಾಂತುಂ ಕಮಿಶನ್ ದಿತಾತ್” ಮ್ಹಣ್ ಸ್ಪಷ್ಟೀಕರಣ್ ದಿಲೆಂ ಮೂಸೆಲಾನ್.

“ಹ್ಹೊ, ಹ್ಹೊ! ನಿಜಾಯ್ಕೀ ತುಂ ಪ್ರಬುದ್ಧ ಚಿಂತ್ಪಿ!” ಮ್ಹಣಾಲೊ ತಿಗುರ್, ಮತಿಂತ್ ‘ಪ್ರಬುದ್ಧ ಖಂಯ್ ಪ್ರಬುದ್ಧ, ನಂಜ್ಯಾಳೊ. ಅಪ್ರಬುದ್ಧ ಮಾಗ್ತಲೊ!’ ಮ್ಹಣ್ ಯೆಟಿಲಾಗ್ಲೊ.

“ಕುಂಟನಿಗೆ ಎಂಟು ಬುದ್ಧಿ ಮ್ಹಣ್ತಾತ್ ತಶೆಂ ಹಾಂವ್‍ಯೀ ಪ್ರಬುದ್ಧ ನಂಜ್ಯಾಳೊಂ! ತ್ಯಾ ನಿರ್ಮಾಪಕಾನ್ ಮ್ಹಾಕಾ ಆಕ್ಮಾನ್ ಕೆಲೆಂ ಮ್ಹಣ್ತಾಂ. ಪಬ್ಲಿಸಿಟಿ ಖಾತಿರ್ ಹಾಂವೆಂ ವ್ಹಡ್ ಎಮೌಂಟ್ ದೀ ಮ್ಹಣ್ ಆಡ್ದೊಸ್ ಮಾಗ್ಲೊ. ಪುಣ್ ತೊ ಗರಂ ಜಾವ್ನ್, ‘ಅಳೆ, ತುಜ್ಯಾ ಸಂಸ್ಥ್ಯಾಕ್ ಹಾಂವೆಂ ಧಾರಾಳ್ ದುಡು ದಿಲಾ. ಹೆಂ ಫಿಲ್ಮಾಚೆಂ ರಿಲೀಸ್. ಸಕ್ಡಾಂಕ್ ವಾಂಟುಂಕ್ ಆಸಾ. ಹರ್ಯೆಕ್ಲ್ಯಾಕ್‍ಯೀ ದಿತಾನಾ ಚಡ್ ದೀಂವ್ಕ್ ಜಾಯ್ನಾ. ಧರ್ ಹೆ ಪೈಶೆ, ಘೆವ್ನ್ ಚಲ್!’ ಮ್ಹಳೆಂ. ಮ್ಹಾಕಾ ರಾಗ್‍ಯೀ ಆಯ್ಲೊ, ಆಕ್ಮಾನ್‍ಯೀ ಜಾಲೊ. ಕ್ರೋಧಾನ್ ಪೆಟ್ಲೊಂ. ಚಡ್ ಮೆಳ್‍ಲ್ಲೆ ತಿತ್ಲೆಂ ಕಮಿಶನ್ ಚಡ್ ಮೆಳ್ತಾ. ಹಾಣೆಂ ಮ್ಹಾಕಾ ನಿರಾಸ್ ಕೆಲೊ. ವ್ಹಡ್ಲಿ ಗಾಂಟ್ ಮೆಳ್ತಾ ಮ್ಹಣ್ ಆಶೆವ್ನ್ ಗೆಲ್ಲೊಂ. ತ್ಯಾ ರಾಗಾನ್ ಫಿಲ್ಮ್ ಪಳೆವ್ನ್ ಯೇವ್ನ್, ತೆಂಯೀ ಧರ್ಮಾಕ್ ಪಳೆಲ್ಲೆಂ, ಥೊಡ್ಯಾಚ್ ಮಿನುಟಾಂನಿ ಫಿಲ್ಮಾಕ್ ಯೆಟುನ್, ನಾಕಾ ಜಾಲ್ಲೆಂ ಬರವ್ನ್ ಹಾಂವೆಂ ಸಕ್ಡಾಂಕ್ ಮೆಸೇಜ್ ಧಾಡ್ಲಿ. ತೆಂ ಪಳೆವ್ನ್ ಹೆರ್ ಮೊಸ್ರಾಳ್ಯಾಂನಿಯೀ ಆಪಾಪ್ಲ್ಯಾ ಶೈಲೆರ್ ಗಾಳಿ ಸೊವ್ನ್ ಫಿಲ್ಮಾಕ್ ಖೆಂಡುನ್ ಅಪಪ್ರಚಾರ್ ಕೆಲೊ” ಆಪ್ಲ್ಯಾ ಪಾತ್ಕಾಂಚಿ ಲದಿನ್ ಸಾಂಗೊನ್‍ಂಚ್ ಗೆಲೊ ಅಂಡೆಪಿರ್ಕಿ ಮೂಸೆಲ.

“ತುವೆಂ ಧಾಡ್‍ಲ್ಲೆಂ ಸ್ಕ್ರೀನ್‍ಶೊಟ್ ಕರ್ನ್ ತುಜಿ ‘ಸ್ತುತಿ’ ಕೆಲ್ಲಿಯೀ ಆಸಾ ಥೊಡ್ಯಾಂನಿ, ನ್ಹಯ್ಗೀ? ಮ್ಹಾಕಾ ಖಬರ್ ಆಸಾ. ಪುಣ್ ತುಮ್ಚೊ ಅಪಪ್ರಚಾರ್ ವರ್ಕ್ ಜಾಲೊನಾಂಮೂ? ಫಿಲ್ಮಾಕ್ ಯುವಜಣಾಂನಿ ಪಾಟಿಂಬೊ ದಿಲೊಮೂ..!” ತಿಗುರ್ ಉಸ್ಮಡ್ಲೊ.

ತೋಂಡ್ ಆಮ್ಶೆಲ್ಲೆಪರಿಂ ಕರುನ್ ಮೂಸೆಲ, “ತ್ಯಾ ವರ್ವಿಂ ಮ್ಹಾಕಾ ಆನಿಕೀ ಮೊಸೊರ್ ಚಡ್ಲೊ. ಆಮಿ ನಂಜಾಳ್ಯಾಂನಿ ಲೊಕಾನ್ ಫಿಲ್ಮ್ ಪಳೆನಜೊ ಮ್ಹಣ್ ವಾಯ್ಟ್ ಉಲಯ್ಲ್ಯಾರ್, ಲೊಕಾನ್ ನವೆಂ ಫಿಲ್ಮ್ ಆಯಿಲ್ಲಿ ಖಬರ್ ಕಳೊನ್ ಟೊಕಿಸಾಂಕ್ ವೆಚೆಂಗೀ! ಛೆ!” ಮ್ಹಣೊನ್ ದಾಂತ್ ಖರ್ಲಿಲೆ.

“ತೆಂ ವ್ಹಡ್ಲೆಂ ಕಾಲೆಂ. ಮ್ಹಜೆಂ ಆಯ್ಕ್. ಹಾಂವ್ ಫೇಮಸ್ ‘ಎಂಪ್ಟಿ’ ಕಲಾಕಾರ್ ಜಾವ್ನಾಸ್‍ಲ್ಲೊಂ. ತ್ಯಾ ಬೃಹತ್ ಕೊಗುಳೆಚ್ಯಾ ಕಾರ್ಯಾಂನಿ, ವೋ ತೊ ಬಜೀ ಸುಮಾರ್ ಕಲಾಯ್‍ಗಾರ್ ‘ಬೊಲ್ಲಾ’ ಶೈನ್ ಜಾತಾನಾ ಮ್ಹಾಕಾ ಮೊಸ್ರಾನ್ ವೊರೊಡ್ ಆಯ್ಲೆ. ದೆಕುನ್ ಹಾಂವೆಂ ಸರ್ವ್ ರಿತಿಂನಿ ಆಡ್‍ಪಾಂಯ್ ಘಾಲೊ ತರೀ ತೆಂ ವರ್ಕವ್ಟ್ ಜಾಲೆಂ ನಾ! ಬೊಲ್ಲಾ ಶೈನ್ ಜಾಲೊ, ಕಲಾಯ್ ಕಾಡ್ನ್‍ಂಚ್ ರೈಸಲೊ. ಹಾಂವ್ ಪಾಟಿಂ ಪಡ್ಲೊಂ” ಹಾತ್ ಬಿಗ್ದುನ್ ಅಸಮಾಧಾನ್ ವ್ಯಕ್ತ್ ಕೆಲೆಂ ತಿಗುರಾನ್.

“ವ್ಹಯ್ಗೀ? ತುಂಚ್‍ಗೀ ತೊ ಮೊಸ್ರಾಳೊ? ದೆಕುನ್‍ಂಚ್‍ಗೀ ಕೊಗುಳೆನ್ ಮೊಸ್ರಾಚೆರ್’ಚ್ ಗೀತ್ ಬರಯಿಲ್ಲೆಂ?” ವಿಚಾರಿ ಮೂಸೆಲ, ದಾಂತ್ ಸೊಡ್ನ್.

“ಮೊಸೊರ್..! ಹ್ರೇಂ… ಹ್ರೇಂ… ತೆಂ ಮ್ಹಜೆರ್ ನ್ಹಯ್ ಸಾಯ್ಬಾ! ತುವೆಂ ಉಡಾಸ್ ಕಾಡುನ್ ದಿಲೊಯಿಚ್ಚ್‍ಮೂ. ತೊ… ತೊ ಹರಾಮಿ ‘ಬಾಬ್’ ಆಸಾ ಪಳೆ… ತಾಚ್ಯೊ ಶಿಂತ್ರ್ಯೊ. ತೊ ಮೊಸ್ರಾಳೊ. ತಾಣೆಂ ಕೊಗುಳೆಕ್ ಧೊಸ್ಲೆಂ, ಅಪಪ್ರಚಾರ್ ಕೆಲೊ. ದೆಕುನ್ ತಾಚೆರ್ ಕೊಗುಳೆನ್ ಪದ್ ಘಡ್ಲೆಂ, ಮ್ಹಜೆರ್ ನ್ಹಯ್. ಹಾಂವ್ ಕಿತ್ಲೊ ಮೊಸ್ರಿ ಮ್ಹಣ್ ತಾಕಾ ಕಳಿತ್ ನಾತ್‍ಲ್ಲೆಂ!” ತಿಗುರ್ ಗರಂ ಜಾಲೊ.

“ಪೊರ್ಚೆ ಪೋರ್ ತುವೆಂ ಪರತ್ ಏಕ್ ಪಾವ್ಟಿಂ ತ್ಯಾ ಬಾಬಾಕ್ ಗಾಳಿ ಯೆಟ್‍ಲ್ಲೆಂಯ್‍ನೇ, ಉಗ್ತ್ಯಾ ಸಭೆರ್? ತುಜೊ ಮೊಸೊರ್ ನಿಂವೊಂಕ್ ನಾಂಗೀ..?” ಮುಗ್ಧ್ ಸವಾಲ್ ವಿಚಾರ್ಲೆಂ ಪ್ರಬುದ್ಧ ಅಂಡೆಪಿರ್ಕಿನ್.

ತಿಗುರ್ ಉಚಾಂಬಳ್ ಜಾಲೊ. ತಕ್ಲಿ ಹಿಶಿನ್ ತಿಶಿನ್ ಕರ್ನ್, ಹಾತ್ ಘಸ್ಟುನ್ ಉಸ್ಮಡ್ಲೊ. “ತಾಚೆರ್ ಮ್ಹಜೊ ರಾಗ್ ಕೆದ್ನಾಂಯ್ ನಿಂವ್ಚೊನಾ. ಬಿಲ್ಕುಲ್ ನಾ. ತೊ ಅನ್ನಾಡಿ! ತಾಚಿ ಚರಿತ್ರಾ ಸಾಂಗನ್ ತರ್…” ತಿಗುರಾನ್ ತಿತ್ಲೆಂ ಸಾಂಗ್ತಾನಾ ಕುಡಾಂತ್ ತಾಂಬ್ಡೊ ಉಜ್ವಾಡ್ ಪಡ್ಲೊ ಆನಿ ಏಕ್ ಬೀಪ್ ಸೌಂಡ್ ಜಾಲೊ. ಚತ್ರಾಯೆಚೊ ಸಂಕೇತ್ ತೊ. “ಹ್ಹಾಂ… ಕಳ್ಳೆಂ. ಸೊರ್ರಿ ಬಿಗ್ ಬಾಸ್. ಹೆರಾಂ ವಿಶಿಂ ಹಾಂವ್ ಕಿತೆಂಯ್ ಉಲಯ್ನಾಂ. ಸೊರ್ರಿ!” ಮ್ಹಣ್ ಪಿಂರ್ಗಲೊ ತೊ.

ಮೂಸೆಲಾಯೀ ಚಾಪ್ಪೆ ಜಾಲೊ. ಹೆರಾಂವಿಶಿಂ ಖಬ್ರೊ ಉಲಂವ್ಚೆಂ, ಅಪಪ್ರಚಾರ್ ಕರ್ಚೆಂ ಮ್ಹಳ್ಯಾರ್ ತಾಕಾಯೀ ಖುಷಿ. ಪುಣ್ ಬಿಗ್ ಬಾಸಾನ್ ದೊಗಾಂಯ್ಕೀ ನಿರಾಸ್ ಕೆಲೊ.

“ಮ್ಹಜೊ ರಾಗ್ ಕಾಡುಂಕ್ ತ್ಯಾ ದೀಸ್ ಭಾರೀ ಖುಷಿ ಜಾಲಿ. ಲೊಕಾಚೊ ಜಮೊ ಪಳೆವ್ನ್ ಹಾಂವ್ ಥ್ರಿಲ್ ಜಾಲೊಂ. ತಿತ್ಲ್ಯಾ ಲೊಕಾ ಮುಖಾರ್ ಕೊಣಾಯ್ಚೊ ಮಾನ್ ಕಾಡ್ಚೆಂ, ಮೊಸೊರ್ ವೊಂಕ್ಚೆಂ ಮ್ಹಳ್ಯಾರ್ ಕಸಲೆಂ ಥ್ರಿಲ್! ದೆಕುನ್ ಸರ್ಸರಿತ್ ನಂಜಿ ವೊಂಕ್ಲೊಂ. ಮ್ಹಜ್ಯಾ ಇಷ್ಟಾಂನಿ ‘ಪರತ್ ಏಕ್ ಪಾವ್ಟಿಂ ಮೊಸ್ರಾಳೊ ನಂಜಿ ವೊಂಕ್ಲೊ’ ಮ್ಹಣ್ ಮ್ಹಾಕಾ ಶಾಭಾಶ್ಕಿ ದಿಲಿ. ಮ್ಹಜ್ಯಾ ಖುಷೆಕ್ ಮೀತ್ ನಾತ್‍ಲ್ಲಿ. ಕೆದ್ನಾಂ ಆವ್ಕಾಸ್ ಮೆಳ್ತಾ, ಸಂದರ್ಭ್ ಯೆತಾ ತೆದ್ನಾಂ ಹಾಂವ್ ‘ಬಾಬ್’ಸಾಯ್ಬಾಚೊ ಮಾನ್ ಕಾಡುಂಕ್ ಪಾಟಿಂ ಪಳೆನಾ. ಅಸಲೆಂ ಕಾಮ್ ಕರುಂಕ್ ಮ್ಹಾಕಾ ಆತಾಂ ತ್ರಾಸ್ ನಾ, ಭ್ಯೆಂ ನಾ. ಮ್ಹಜೆ ತಸಲ್ಯಾ ನಂಜ್ಯಾಳ್ಯಾಂಚೊ ಪಂಗಡ್‍ಚ್ಚ್ ಉದೆಲಾ. ಕೊಣಾಯ್ಚೊ ಮಾನ್ ಕಾಡ್ಚ್ಯಾಂತ್, ಫಟ್ಕಿರ್ಯೊ ಖಬ್ರೊ ಪ್ರಸಾರ್ ಕರ್ಚ್ಯಾಂತ್, ಅಪಪ್ರಚಾರ್, ನಿಂದಾ, ವ್ಯಕ್ತಿತ್ವ್‍ಹನನ್ ಇತ್ಯಾದಿ ವಾವ್ರಾಂತ್ ತಾಂಚೆಂ ಸಾಧನ್ ಇತ್ಲೆಂಗೀ ತಾಂಕಾಂ ‘ಗೋಬೆಲ್ಸ್’ ಎವಾರ್ಡ್ ದಿವ್ಯೆತ್. ಥೊಡೆ ಪಾವ್ಟಿಂ ತಾಂಚೆರೀ ಮ್ಹಾಕಾ ಮೊಸೊರ್ ಜಾತಾ..!” ಮ್ಹಣಾಲೊ ತಿಗುರ್.

“ಮ್ಹಾಕಾಯೀ ತಶೆಂಚ್! ತೆ ಇತ್ಲೆ ಊಂಚ್ ರಿತಿನ್ ಮೊಸೊರ್ ವೊಂಕ್ತಾತ್, ಫಟಿ ಸಾಂಗ್ತಾತ್… ಮ್ಹಾಕಾ ತಶೆಂ ಕರುಂಕ್ ಜಾಯ್ನಾ ಮ್ಹಣ್ ಗಿಲ್ಟಿ ಫೀಲಿಂಗ್ ಜಾಂವ್ಚೆಂಯೀ ಆಸಾ. ತೆಂ ಆಸೊಂ. ತುಜೆ ವರ್ವಿಂ ಆನ್ಯೇಕ್ ‘ನಿರ್ವಾಹಕ್’ ಭಾಯ್ರ್ ಪಡ್ಲಾ ಮ್ಹಣ್ ಖಬರ್!” ಆತುರಾಯೆನ್ ವಿಚಾರಿ ಮೂಸೆಲ.

“ಹ್ಹೆ-ಹ್ಹೆ-ಹ್ಹೇ! ತುಕಾಯೀ ಕಳ್ಳೆಂಗೀ ತೆಂ? ಹಾಂವ್ ಕಸೊಯೀ ಮೊಸ್ರಿ ಮೂ, ತೊ ಕಠಿಣ್ ಹಟ್ಟಿ. ಧರ್’ಲ್ಲೆಂ ಕಾಮ್ ಪೊಂತಾಕ್ ಪಾವಂವ್ಚ್ಯಾಂತ್ ಹಟ್ಟಿ. ಪುಣ್ ತಾಕಾ ಸುಂಕಾಣ್ ದಿಲ್ಯಾರ್ ತೊ ಶೈನ್ ಜಾತಾ. ಮ್ಹಾಕಾ ಆವ್ಕಾಸ್‍ಯೀ ಮೆಳನಾ. ದೆಕುನ್ ಶಿಂತ್ರ್ಯೊ ಕರುನ್ ತಾಕಾ ತೊಂದ್ರೆ ದಿಲೆ. ತಾಕಾ ಬೆಚ್ಚ ಜಾಲೆಂ. ದೆಕುನ್ ತೊ ಪಯ್ಸ್ ರಾವ್ಲೊ. ಮ್ಹಾಕಾ ಬರೇಂ ಚಾನ್ಸ್ ಮೆಳ್ಳೆಂ. ಪುಣ್ ಹಾಂವ್‍ಂಚ್ ಫಸ್ಲೊಂ. ಎಕಾ ಕಾರ್ಯಾಂತ್ ಗೊವ್ಳಿ ಬಾಪಾಕ್ ಮಕ್ಕರ್ ಕರ್ನ್ ತಾಚೆ ಥಾವ್ನ್ ಲೆಕ್ಚರ್ ಆಯ್ಕಜೆ ಪಡ್ಲೆಂ. ಮ್ಹಜಿಂ ಉತ್ರಾಂ ನಿಯಂತ್ರಣ್ ಚುಕೊನ್ ಖಂಯ್ ಖಂಯ್ ಗೆಲಿಂ. ಕಾರ್ಯೆಂ ಫ್ಲಾಪ್ ಜಾಲೆಂ. ಪುಣ್ ಹಾಂವೆಂ ಮಾತ್ರ್ ‘ತಯಾರಿ ನಾತ್ಲ್ಯಾರೀ ಹಾಂವೆಂ ಕಾರ್ಯೆಂ ಸೂಪರ್ ಹಿಟ್ ಕೆಲೆಂ’ ಮ್ಹಣ್ ಮ್ಹಜಿಚ್ ಶಾಭಾಸ್ಕಿ ಉಚಾರ್ಲಿ” ತಿಗುರ್ ಉರ್ಬೆನ್ ನೀಟ್ ಬಸ್ಲೊ.

“ತುಂ ಕೆದಾಳಾಯ್ ತುಜೆಂಚ್ ಕೊಚ್ಚಿತಾಯ್, ತುಕಾಚ್ ಫುಗಾರ್ನ್ ಆಸ್ತಾಯ್ ನೆ? ಕೊಗುಳೆಕ್ ಹೊಗೊಳ್ಸಿತಾಯ್. ಲೋಕ್ ಮ್ಹಣ್ತಾ ತುಂ ಫಕತ್ ಕೊಗುಳೆಕ್ ಉಮ್ಕಳೊನ್ ಆಸ್‍ಲ್ಲೊಯ್ ಶಿವಾಯ್ ತುಜೆವರ್ವಿಂ ತಾಕಾ ಫಾಯ್ದೊ ಜಾಲ್ಲೊ ನಾ, ಬಗಾರ್ ಜಾಲ್ಲೊ ಲುಕ್ಸಾಣ್‍ಂಚ್ ಮ್ಹಣ್..!?” ಮೂಸೆಲಾ ನಂಜ್ಯಾಳಿ ಉತ್ರಾಂ ಉಚಾರಿಲಾಗ್ಲೊ.

“ಸತ್ ಸಾಂಗ್ಚೆಂ ತರ್ ವ್ಹಯ್! ಫಟ್ ಮಾರ್ಲ್ಯಾರ್ ಬಿಗ್ ಬಾಸ್ ಖೊಟ್ ಘಾಲಿತ್. ಕೊಗುಳೆಕ್ ಹೊಗೊಳ್ಸಿನಾತ್ಲ್ಯಾರ್ ಮ್ಹಾಕಾ ಕಿತೆಂಯ್ ಮೆಳ್ತಾಯೆ? ಕಾಂಯ್ ಪುಣೀ ಮೆಳಜೆ ನೆ, ದೆಕುನ್ ಭಾಟಿ ಧರ್ಚಿ! ಹಾಂವೆಂ ಕೊಗುಳೆಕ್ ಆನಿ ಬಾಬಾಕ್ ಲಾಗವ್ನ್ ಘಾಲ್ಲೆಂ ಕೊಣಾಯ್ಕೀ ಕಳಿತ್ ನಾ. ತ್ಯಾ ವರ್ವಿಂ ಹಾಂವೆಂ ಮನಸ್ತಾಪ್ ಉಬ್ಜವ್ನ್, ತುಟಾಫುಟ್ ಕರವ್ನ್, ಎಕಾಮೆಕಾ ಥಂಯ್ ಝಗ್ಡೆಂ ಜಾಯ್ಶೆಂ ಕೆಲೆಂ. ಸಕ್ಕಡ್ ಮ್ಹಜ್ಯೊ ಕಿತಾಪತಿ. ಶಿಂತ್ರ್ಯೊ ಕರ್ನ್ ಹಾಂವೆಂ ಲಾಗವ್ನ್ ಘಾಲೆಂ. ತ್ಯಾ ವರ್ವಿಂ ಮ್ಹಾಕಾ ಫಾಯ್ದೊ ಜಾಲೊ. ಆನಿ ಉಗ್ತ್ಯಾನ್ ಬಾಬಾಚೆರ್ ಮೊಸೊರ್ ವೊಂಕೊಂಕ್ ಬರೇಂ ಜಾತಾಲೆಂ. ತಾಚೆರ್ ನಾನಾಂತೆ ಅಪ್ವಾದ್ ಮಾಂಡುನ್ ತಾಕಾ ಖುರ್ಸಾಂವ್ಕ್ ಪ್ರಯತ್ನ್ ಕೆಲೆಂ. ಪುಣ್ ತೊಯೀ ಶೈನ್ ಜಾಲೊ. ವ್ಹಡ್ ವ್ಹಡ್ ಕಾರ್ಬಾರಾಂ, ಸಾಧನಾಂ ಕರುಂಕ್ ಸಕ್ಲೊ. ತೆಂ ಪಳೆತಾನಾ ಮ್ಹಜಿ ಮೊಸ್ರಾಚಿ ಫ್ಯಾಕ್ಟರಿ ರಾತ್ ಆನಿ ದೀಸ್ ವಾವುರ್ತಾ. ಹಾಂವ್ ರಾಗಾನ್ ಪೆಟ್ತಾಂ..! ಮ್ಹಾಕಾ ಏಕ್ ಪ್ರಶಸ್ತಿಗೀ ಬಿರುದ್‍ಗೀ ದಿಲ್ಲೆಂ ತರ್ ಹಾಂವ್ ತಾಕಾಚ್ ಶರಣ್ ಜಾತೊಂ..!” ತಿಗುರ್ ಮ್ಹಣಾಲೊ, ಮೂಟ್ ಬಿಗ್ದುನ್.

ಮೂಸೆಲಾಕ್ ಕಿತೆಂಗೀ ಝಳ್ಕಲೆಂ ಮ್ಹಣ್ ದಿಸ್ತಾ. ಚುರುಕ್ ಜಾವ್ನ್, “ತೆಂ ವ್ಹಯ್. ತುವೆಂ ಮ್ಹಳೆಂಯ್ ತ್ಯಾ ಬಾಬಾಚೆರ್ ತುಜೊ ರಾಗ್, ಮೊಸೊರ್ ಕೆದ್ನಾಂಯ್ ನಿಂವ್ಚೊನಾ ಮ್ಹಣ್. ಪುಣ್ ತುಂಚ್ ಥಂಯ್ ಗೆಲ್ಲೊಯ್ ನೆ ಆಡ್ದೊಸ್ ಮಾಗೊನ್? ತಾಚ್ಯಾ ಕ್ಯಾಂಪಾಂತ್ ವಚೊನ್ ತಂಗಣೆ ಮಂಗಣೆ ಕರ್ನ್ ಆಯಿಲ್ಲೆಂ ವಿಸ್ರಲೊಯ್ಗೀ? ತೆದಾಳಾ ತುಜೊ ರಾಗ್ ಖಂಯ್ ಗೆಲ್ಲೊ? ತಾಚೆರ್ ಅಪ್ರಾಧ್ ಮಾಂಡುನ್ ಆಸ್ಲೆಲ್ಯಾಕ್, ಖೆಳ್ಕುಳಾಂ ಕರ್ತೆಲ್ಯಾಕ್, ನಿಂದಾ ಕರ್ತೆಲ್ಯಾಕ್ ಸಗ್ಳೆಂ ವಿಸ್ರಲೆಂ ಕಶೆಂ? ತುಕಾ ಮಾನ್ ಮರ್ಯಾದ್, ಲಜ್ ಕಿತೆಂಯೀ ನಾಂಗೀ ಲಜ್ಮಾಂಡ್ಯಾ..?!” ಪ್ರಬುದ್ಧ್‍ಪಣಿಂ ಕಠಿಣ್ ಉತ್ರಾಂನಿ ಉಲಯ್ಲೊ ಅಂಡೆಪಿರ್ಕಿ ಮೂಸೆಲ.

ತೆಂ ಆಯ್ಕೊನ್ ಸಗ್ಳೆಚ್ ಶೆರ್ಮೆಲೊ ತಿಗುರ್. ಕಾಲುಬುಲು ಜಾವ್ನ್, ಹಿಂಗ್ ಕೆಲ್ಲ್ಯಾ ಮಾಂಕ್ಡಾಪರಿಂ ಕರಿಲಾಗ್ಲೊ. ತಿಶಿನ್ ಹಿಶಿನ್ ಪಳೆವ್ನ್ ಥಿಂಪಿ ಗಿಳುನ್ ಕಂಗಾಲ್ ಜಾಲ್ಲೆಪರಿಂ ಆವ್ತಾರ್ ಕರಿಲಾಗ್ಲೊ. ತಾಣೆಂ, ಅಶೆಂ ಕೊಣೀ ವಿಚಾರಿತ್ ಮ್ಹಣ್ ಚಿಂತ್‍ಲ್ಲೆಂಚ್ ನಾ. ಪುಣ್ ಹೆಂ ಬಿಗ್ ಬಾಸ್ ರೂಮ್. ಜಾಪ್ ದೀಜೆಚ್ಚ್!

“ಹ್ರೇಂ… ಹ್ರೇಂ… ಹ್ರೇಂ… ಹ್ಹಿ-ಹ್ಹೀ! ಯೆಂ… ತೆಂ ಕಾಲೆಂ ಮ್ಹಳ್ಯಾರ್ ಪಯ್ಲೆಂ ಹಾಂವ್ ಪಯ್ಸ್ ಆಸ್‍ಲ್ಲೊಂ. ಥಂಯ್ ಥಾವ್ನ್ ಗಾಳಿ ಯೆಟುಂಕ್ ಸುಲಭ್. ಹಾಂಗಾ ಯೆತಾನಾ ತೆಂ ಸೊಡಿಜೆ ಪಡ್ಲೆಂ. ಮ್ಹಾಕಾ ಕಾಂಯ್ ಮೆಳತ್‍ಗೀ ಮ್ಹಣ್ ಥಂಯ್ ಹಾಂಗಾ ವಚೊನ್ ತಿಳ್ಳೆಂ. ಕೊಣೆಂಯೀ ಹುಂಗ್ಲೆಂ ನಾ. ಮ್ಹಜಿ ಗತ್ ಕಿತೆಂ ತರ್? ದೆಕುನ್ ಲೋವ್ ಮೆಟಾಂ ಕಾಡುನ್ ಬಾಬಾಚ್ಯಾ ಆಂಗ್ಣಾಕ್ ಪಾವ್ಲೊಂ. ಖಾಲ್ತೆಪಣಿಂ ಹಾತ್ ಜೊಡ್ಲೆ. ತಾಣೆಂ ಮ್ಹಾಕಾ ಬರ್ಯಾ ರಿತಿನ್ ಸತ್ಕಾರ್ ಕೆಲೊ. ಮ್ಹಾಕಾ ಆಜ್ಯಾಪ್. ತಾಚೆಂ ಥಂಯ್ ಕಿತೆಂಚ್ ರಾಗ್ ನಾತ್‍ಲ್ಲೊ. ಹಾಂವೆಂ ಚಿಂತ್‍ಲ್ಲೆಂ ಮ್ಹಾಕಾ ಸರ್ಸರಿತ್ ಮಾರ್ ಪಡ್ತಿತ್ ಮ್ಹಣ್. ಭಿಂಯಾನ್‍ಂಚ್ ಗೆಲ್ಲೊಂ. ಪುಣ್ ತಾಣಿಂ ಮ್ಹಾಕಾ ಗೌರವ್, ಮಾನ್ ದಿಲೊ. ಮ್ಹಾಕಾ ಭಾರೀ ಖುಷಿ ಜಾಲಿ. ಮ್ಹಜೆಂ ಗಿಲ್ಟಿ ಫೀಲಿಂಗ್ ಸಂಪದ್ಲೆಂ ಮ್ಹಣ್ ಆಂಯ್ಡೆ ಗಿಳ್ಳೆ. ಥಂಯ್ ಮ್ಹಾಕಾ ಆವ್ಕಾಸ್ ಮೆಳ್ಳೊ. ಫುಡಾರ್ ಚಿಂತುನ್ ಸಪ್ಣೆಲೊಂ. ಮ್ಹಜಿಂ ತಾಲೆಂತಾಂ ಪ್ರದರ್ಶನ್ ಕರುಂಕ್ ವ್ಹಡ್ ವೆದಿ ತಯಾರ್ ಆಸ್‍ಲ್ಲಿ…” ಸಪ್ಣಾಂತ್ ಉಲಯಿಲ್ಲೆಪರಿಂ ರೊಮ್ಯಾಂಟಿಕ್ ಜಾವ್ನ್ ಸಾಂಗೊನ್ ಆಸ್‍ಲ್ಲೊ ಲದ್ದಿ ತಿಗುರ್.

“ಛೆಕ್! ಲಜ್ಮಾಂಡ್ಯಾ. ತುಜೆ ತಸಲ್ಯಾಂಕ್ ವ್ಯಕ್ತಿತ್ವ್‍ಯೀ ನಾ, ಸಿದ್ಧಾಂತ್‍ಯೀ ನಾ, ಕಿತೆಂಯೀ ನಾ. ಪಿಸಾಂಟಾ! ಥಂಯ್ ವಚೊನ್ ತರೀ ಉದ್ಧಾರ್ ಜಾಲೊನಾಂಯ್! ಥಂಯ್ಸರ್’ಯೀ ನಂಜ್ಯೊಚ್ ವೊಂಕ್ಲೊಯ್ ನೆ ಅನುಪ್ಕಾರ್ಯಾ?” ರಾಗಾನ್ ಖಡ್ಕಡ್ಲೊ ಮೂಸೆಲ. ತಿಗುರ್ ಇತ್ಲೊಯೀ ‘ಚಾಲಾಕಿ’ ಮ್ಹಣ್ ತಾಕಾ ಪಯ್ಲೆಂ ಕಳಿತ್ ನಾತ್‍ಲ್ಲೆಂ.

ಉತ್ಸಾಹ್ ಸಗ್ಳೊ ದೆಂವೊನ್ ಗೆಲೊ ತಿಗುರಾಚೊ. “ತೆಂ ಕಿತೆಂ ಮ್ಹಳ್ಯಾರ್ ಮ್ಹಜೊ ಜಲ್ಮಾ ಗೂಣ್ ಪಳೆ. ಹಗೆಂ ಕಾಡ್ಚೊ ಸಂದರ್ಭ್ ಮೆಳ್ತಾನಾ ಸೊಡ್ತಾಂಯೇ. ದೆಕುನ್ ಮೊಸೊರ್ ವೊಂಕ್ಲೊಂ, ಪರತ್ ಏಕ್ ಪಾವ್ಟಿಂ! ಪುಣ್ ಹ್ಯಾ ಪಾವ್ಟಿಂ ಇಲ್ಲೆಂ ಉಲ್ಟಾಪಲ್ಟಾ ಜಾಲ್ಲೆಂ. ಆದಿಂ ಬಾಬಾಕ್ ಸಯ್ತಾನ್ ಮ್ಹಣ್ತಾಲೊಂ, ಮ್ಹಜೆ ಸಾಂಗಾತಿ ಮ್ಹಾಕಾ ಹೊಗೊಳ್ಸಿತಾಲೆ. ಪುಣ್ ಆತಾಂ ತ್ಯಾಚ್ ಬಾಬಾಚ್ಯಾ ಪಾಯಾಂಕ್ ಪಡ್ಲಾಂ. ಕೊಣಾಚೆರ್ ನಂಜಿ ವೊಂಕ್ಚೆಂ? ಮ್ಹಜೆ ಸಾಂಗಾತಿಚ್ ಸಾಂಪ್ಡಲೆ. ತಾಂಚೆರ್ ಆಸ್‍ಲ್ಲೊ ಮೊಸೊರ್, ನಂಜಿ ವೊಂಕೊಂಕ್ ವೆದಿ ಮೆಳ್ಳಿ. ಥಂಯ್ ಬಾಬಾನ್ ಮ್ಹಾಕಾ ವೆದಿ ಫಾವೊ ಕೆಲಿ, ಪುಣ್ ತಿ ಹಾಂವೆಂ ಮ್ಹಜ್ಯಾಚ್ ಸ್ವಾರ್ಥಾಕ್ ವಾಪಾರ್ಲಿ. ಆನಿ ಮ್ಹಜ್ಯಾಚ್ ಸಾಂಗೊಡ್ಯಾಂಚಿಂ ಖೆಳ್ಕುಳಾಂ ಕೆಲಿಂ, ಆಕ್ಮಾನ್ ಕರ್ನ್ ಉಲಯ್ಲೊಂ…” ದೀಷ್ಟ್ ಪಯ್ಸ್ ಪಯ್ಸ್ ಕರ್ನ್ ಉಲಯ್ತಾಲೊ ತಿಗುರ್. ತೊಂಡಾರ್ ವಿಷಾದ್ ಭಾವ್ ನಿಶೆತಾಲೊ.

“ಹ್ಹ-ಹ್ಹ-ಹ್ಹಾ! ತುವೆಂ ತುಜಿಚ್ ಮರ್ಯಾದ್ ಕಾಡ್ಲಿಯ್ ಆನಿ ತುಜ್ಯಾ ಸಾಂಗಾತ್ಯಾಂಚಿಯೀ. ಆನಿ ತುಮಿ ಎಕಾಚ್ ಕ್ಯಾಂಪಾಂತ್ಲೆ ಉಗ್ತ್ಯಾನ್ ಸುಣ್ಯಾಂಪರಿಂ ಝಗಡ್ಲ್ಯಾತ್. ಥುಕ್ ತುಜ್ಯಾ ಜಲ್ಮಾಕ್!” ಮೂಸೆಲ ಪರತ್ ಪ್ರಬುದ್ಧ್ ಜಾವ್ನ್ ಖೆಂಡಿಲಾಗ್ಲೊ.

“ಮೊಸ್ರಾಕ್ ವಕತ್ ನಾ ಪಳೆ! ಪುಣ್ ತಾಂತುಂ ಮ್ಹಾಕಾಚ್ ಕಠಿಣ್ ಜಖಮ್ ಜಾಲೊ. ಹಾಂವೆಂ ಉಲಯಿಲ್ಲೆಂ ಮಾಧ್ಯಮಾಂನಿ ಪ್ರಸಾರ್ ಜಾಲೆಂ. ವಾಚುನ್ ಮ್ಹಜೆ ಸಾಂಗಾತಿ ಖುಬಾಳ್ಳೆ. ಹಾಂವ್ ಬಾಬಾ ಸರ್ಶಿನ್ ಗೆಲ್ಲೊಂ ತಾಂಕಾಂ ಜಾಲೆಂ ನಾ, ತಾಚೆ ವಯ್ರ್ ಥಂಯ್ ವಚೊನ್ ಹಾಂಚೊ ಮಾನ್ ಕಾಡ್ನ್ ಉಲಯ್ಲೊಂ ಮ್ಹಣೊನ್ ತೆ ರಾಗಾನ್ ಕಡ್ಕಡ್ಲೆ. ಮ್ಹಾಕಾ ಬಹಿರಂಗ್‍ಪಣಿಂ ನಾಗ್ಡೊ ಕೆಲೊ. ಮ್ಹಜೆ ಫಾತರ್ ಮ್ಹಾಕಾಚ್ ಪಾಟಿಂ ಉಡಯ್ಲೆ. ಹೆರಾಂಚೆಂ ವಸ್ತುರ್ ನಿಕ್ಳಾಂವ್ಕ್ ವಚೊನ್ ಹಾಂವ್‍ಂಚ್ ಪುರ್ತೊ ನಾಗ್ಡೊ ಜಾಲ್ಲೊಂ. ವೊಟ್ರಾಶಿ ಖಂಯ್ ಗೆಲ್ಯಾರೀ ಬರ್ಕತ್ ನಾ ಮ್ಹಣ್ತಾತ್ ಪಳೆ ತಶೆಂ. ಥೊಡ್ಯಾಂಕ್ ಮಾತ್ರ್ ಕಳಿತ್ ಆಸ್‍ಲ್ಲೆಂ ಮ್ಹಜೆಂ ಬುರ್ಶೆಂಪಣ್ ಸಂಸಾರಾಕೀ ಕಳಿತ್ ಜಾಲೆಂ…” ತಿಗುರ್ ನಿರಾಸ್ಪಣಿಂ ಉಲಯ್ಲೊ.

ಮೂಸೆಲಾಕ್ ಸಂತೊಸ್ ಜಾಲೊ. “ಜಾಯ್ಜೆ ತುಕಾ. ನ್ಹಯ್, ತುಂ ಏಕ್ ಖಂಚ್ಯಾ ಥರಾಚೊ ಮನಿಸ್? ಆದಿಂ ತುಂ ತ್ಯಾ ಬಾಬಾಕ್ ಯೆಟ್ತಾಲೊಯ್, ಘರ್ಜತಾಲೊಯ್, ಘುರ್ಕಿತಾಲೊಯ್. ಪುಣ್ ತ್ಯಾಚ್ ಬಾಬಾ ಸರ್ಶಿನ್ ಸರ್ಪಡೊನ್ ಪಡ್ಲೊಯ್. ಆನಿ ತುಜ್ಯಾಚ್ ಕರ್ಮಾಂನಿ ತುಂ ಥಂಯ್ ಥಾವ್ನ್ ಭಾಯ್ರ್ ಪಡ್ಲೊಯ್. ಆಸ್‍ಲ್ಲೊಯ್ ತರ್ ತಾಕಾ ಹೊಗೊಳ್ಸುನ್ ವರ್ಣಿತೊಯ್, ಪತ್ರಾಂ ಬರಯ್ತೊಯ್! ಪ್ರಶಸ್ತಿಯೀ ಆಪ್ಣಾಯ್ತೊಯ್! ಚಾನ್ಸ್ ಚುಕ್ಲೆಂ. ತಿತ್ಲೆಂ ಆಸೊನ್‍ಯೀ ತುಂ ಪೋರ್ ಕಿತ್ಯಾಕ್ ತಾಚೆರ್ ಪರತ್ ಏಕ್ ಪಾವ್ಟಿಂ ಮೊಸೊರ್ ವೊಂಕ್ಲೊಯ್? ಬಹಿರಂಗ್ ವೆದಿರ್ ಕಿತ್ಯಾಕ್ ತ್ಯಾ ನಮೂನೆರ್ ನಂಜಿ ಭಾಯ್ರ್ ಘಾಲಿಯ್? ತಶೆಂ ತರ್, ತುಂ ತ್ಯಾಚ್ ಬಾಬಾ ಸರ್ಶಿನ್ ಕಶೆಂ ಆನಿ ಕಿತ್ಯಾಕ್ ಗೆಲ್ಲೊಯ್? ತೆದಾಳಾ ತುಕಾ ತೊ ಕ್ಲೀನ್ ದಿಸ್‍ಲ್ಲೊ, ಉಪ್ರಾಂತ್ ಪರತ್ ಕಿತ್ಯಾಕ್ ಮ್ಹೆಳೊ ದಿಸ್ಲೊ? ತುಕಾ ಕಿತ್ಲ್ಯೊ ಜಿಬೊ ಸಾಯ್ಬಾ? ತುಕಾ ತಿತ್ಲಿ ತಾಂಕ್ ಆಸ್‍ಲ್ಲಿ ಜಾಲ್ಯಾರ್ ತಾಚೆ ಲಾಗಿಂ ವಚೊನ್ ಝುಜಜೆ ಆಸ್‍ಲ್ಲೆಂ, ತಾಚೆಂ ಕೊಲರ್ ಧರ್ನ್ ಆದ್ಲೊ ರಾಗ್ ಕಾಡಿಜೆ ಆಸ್‍ಲ್ಲೊ. ಜರ್ ತಾಣೆಂ ಕೊಗುಳೆಕ್ ಅಕ್ಮಾನ್ ಕೆಲಾ, ಧೊಸ್ಲಾಂ ತರ್ ತಾಚೆಂ ರುಸ್ತುರುಸಾಂವ್ ತೆದಾಳಾಚ್ ಕಿತ್ಯಾಕ್ ಘೆಂವ್ಕ್ ನಾಯ್? ನ್ಯಾಯಾ ಖಾತಿರ್ ಕಿತ್ಯಾಕ್ ಝುಜೊಂಕ್ ನಾಂಯ್? ಪೋರ್ ತಾಚೆ ಕಡೆನ್ ಗೆಲ್ಲೊಯ್ ನೆ, ತೆದ್ನಾಂ ಕಿತ್ಯಾಕ್ ತಾಚೆ ಕಡೆನ್ ಸಗ್ಳೆಂ ಉಲವ್ನ್ ವಾ ಝಗ್ಡೊನ್ ಇತ್ಯರ್ಥ್ ಕೆಲೆಂ ನಾಂಯ್? ಸಂಸಾರಾಕ್ ದುಸ್ರೆಂಚ್ ಸಾಂಗೊನ್ ಫಟಯ್ತಾಯ್ ನೆ? ವರ್ಸಾಂಗಟ್ಲ್ಯಾನ್ ತಾಚಿ ನಿಂದಾ ಕರ್ನ್ ಲೊಕಾಕ್ ಬಾನಾಯಿಲ್ಲೊ ತುಂ ತಾಚೆಚ್‍ಲಾಗಿಂ ವಚೊನ್ ದೋಸ್ತಿ ಕೆಲಿಯ್ ನ್ಹಯ್ಗೀ? ಆನಿ ತಾಕಾ ಧುಂಪಂವ್ಕ್ ಗೆಲ್ಲೊಯ್. ನ್ಹಯ್, ತುಜಿ ಅವಸ್ಥಾ ಕಸಲಿ? ತಕ್ಲಿ ಕಿತೆಂ ಜಾಲ್ಯಾ ತುಜಿ? ತುಕಾ ಫಟ್ಕಿರ್ಯಾಕ್ ಪಾತ್ಯೆವ್ನ್ ಲೊಕಾನ್ ಕಿತ್ಲ್ಯೊ ಗಾಳಿ ಯೆಟ್ಲ್ಯೊ. ತುಂ ಪಳೆಲ್ಯಾರ್ ಅಸ್ಸಲ್ ಠಕ್ಕಿ ಮನಿಸ್..!” ಅಸಮಾಧಾನಿ ಸವಾಲಾಂಚೊ ಭೊರೊಚ್ ಸುಟಯ್ಲೊ ಅಂಡೆಪಿರ್ಕಿ ಮೂಸೆಲಾನ್. ತಿಗುರಾಚ್ಯಾ ಡಬ್ಬಲ್ ಗೇಮಾ ವರ್ವಿಂ ತೊಯೀ ಇರಾರ್ ಜಾಲ್ಲೊ.

ತಿಗುರ್ ಪುರ್ತೊ ಕಂಗಾಲ್ ಜಾಲೊ. “ಹ್ರೇಂ… ಹ್ರೇಂ… ಹ್ರೇಂ… ಕಿತೆಂ ಕರ್ಚೆಂ, ಹಾಂವ್ ಮೊಸ್ರಾಚಿ ಫ್ಯಾಕ್ಟ್ರಿ ಪಳೆ. ಆದಿಂ ಹಾಂವೆಂಚ್ ಲಾಗವ್ನ್ ಘಾಲ್ಲೆಂ. ಲೊಕಾಕ್ ಫಟಿ ಗಜಾಲಿ ಗುಂತುನ್ ಸಾಂಗ್ಲ್ಯೊ. ಕಲ್ಪಿತ್ ಆರೋಪ್ ಘಾಲೆ. ಪುಣ್ ಮ್ಹಾಕಾ ಮ್ಹಜೊ ಸ್ವಾರ್ಥ್ ಮಾತ್ರ್ ಮುಖ್ಯ. ದೆಕುನ್ ಚಿಂವ್ಡಾಂ ಪುಣೀ ಮೆಳ್ತಾತ್ ಮ್ಹಣೊನ್ ಬಾಬಾ ಲಾಗಿಂ ಗೆಲೊಂ. ಉಪ್ರಾಂತ್ ಹಾಂವ್ ಭಾಟಿ ಧರ್ನ್ ಥಂಯ್ಚ್ ಪಲ್ತಡಿ ಎಕಾ ಕ್ಯಾಂಪಾಕ್ ಗೆಲೊಂ. ಥಂಯ್ ಪಳೆಲ್ಯಾರ್ ತೆ ಮ್ಹಾಕಾಚ್ ರಾಕೊನ್ ಆಸ್‍ಲ್ಲೆಪರಿಂ, ಹಾಂವ್ ಡೊಂಬರಾಟ ಕರ್ಚ್ಯಾಂತ್ ಶಾಣೊ ದೆಕುನ್ ಮಣಯ್ ಘಾಲಿಚ್ಚ್. ತೆ ಗ್ರೇಸ್ತ್, ಥಂಯ್ ಮ್ಹಾಕಾ ಹಾಡಾಂ ಮೆಳ್ಳಿಂ. ಪುಸ್ಕಾಟ್ ಚಿಂವ್ಡಾಂ ಪ್ರಾಸ್ ಹಾಡಾಂ ಚಡ್ ರುಚಿಕ್. ಹಾಡಾಂ ಖಾತಿರ್ ಮ್ಹಜಿ ನಿಷ್ಠಾ ಬದ್ಲಲಿ. ಹಾಂವೆಂ ಬೆರ್ಚಪ್ಪಪರಿಂ ಕೆಲ್ಯಾರೀ ತೆ ‘ಕಸಲೆಂ ಪರ್ಫೊರ್ಮೆನ್ಸ್, ವ್ಹಾ ವ್ಹಾ!’ ಮ್ಹಣ್ತಾಲೆ. ಮ್ಹಜೆ ಬರೆ ದೀಸ್ ಆಯ್ಲೆ ಮ್ಹಣ್ ಚಿಂತ್ಲೆಂ” ಸಂತೃಪ್ತೆನ್ ಪೋಟ್ ಪೊಶೆವ್ನ್ ಮ್ಹಣಾಲೊ ತಿಗುರ್.

“ತರ್ ತುಂ ತುಕಾ ಉಷ್ಟೆಂ ದಿಲ್ಯಾರ್ ಕೊಣಾಯ್ ಸರ್ಶಿನ್ ವೆತಾಯ್ ಮ್ಹಣ್ ಜಾಲೆಂ. ಥೂ ತುಜ್ಯಾ ಸುರ್ಪಾಕ್. ತುಜೆಂ ನಾಂವ್ ಕೇಡಿ ಮ್ಹಳ್ಳೆಂ ಕರೆಕ್ಟ್! ತುಜ್ಯಾಕೀ ಹಾಂವ್‍ಂಚ್ ಜಾವ್ಯೆತ್. ಮ್ಹಾಕಾ ನಂಜಿ ವೊಂಕೊಂಕ್ ಜಾಯ್ ತರೀ ಉಗ್ತ್ಯಾನ್ ತಶೆಂ ಕರುಂಕ್ ಹಾಂವ್ ಭಿಂಯೆತಾಂ. ಹಾಂವ್ ಇಲ್ಲೊಸೊ ಪುಕ್ಕೆಲಾ ಜಾಲ್ಲ್ಯಾನ್ ತುಜೆಪರಿಂ ಕಂತ್ರಿ ಕಾಮಾಂ ಉಗ್ತ್ಯಾನ್ ಕರುಂಕ್ ವಚನಾಂ…” ಮೂಸೆಲಾ ತಿಕ್ಕೆ ನರ್ವಸ್ ಜಾವ್ನ್ ಮ್ಹಣಾಲೊ.

“ಥೂ ಮಾಗ್ತೆಲ್ಯಾ… ತುಂ ಮಾಗೊಂಕ್‍ಚ್ ಸಯ್ ಭಿಂವ್ಕುರ್ಯಾ. ತುಜ್ಯಾಕೀ ಹಾಂವ್ ಕಸಲೊ ವೀರ್ ಆನಿ ಧೀರ್ ಪಳೆ. ಉಗ್ತ್ಯಾನ್‍ಂಚ್ ಖೆಂಡ್ತಾಂ, ಮಾನ್ ಕಾಡ್ತಾಂ, ನಿಂದಾ ಕರ್ತಾಂ. ಕಸಲ್ಯಾಯೀ ಖೊಟ್ಯಾಂ ಸಂಗಿಂ ಭರ್ಸತಾಂ, ಖಂಚ್ಯಾಯ್ ಫಟ್ಟಿಂಗಾಚೊ ಹಾತ್ ಧರ್ತಾಂ… ಹಾಂವ್ ಅತೀ ಊಂಚ್ ಮೊಸ್ರಾಳೊ, ಶ್ರೇಷ್ಟ್ ನಂಜ್ಯಾಳೊ… ತುಜೆರ್‍ಯೀ ವೊಂಕ್ತಾಂ… ಜಾಗ್ರುತ್!” ಮ್ಹಣ್ಮುನೊನ್‍ಂಚ್ ಗೆಲೊ ಕೇಡಿ ತಿಗುರ್.

* * * * *

ಧೊನ್ಪಾರಾಂ ಜೇವ್ನ್ ಈಸಿಚೆರಾರ್ ಪಡೊನ್ ನೀದ್ ಕಾಡುನ್ ಆಸ್‍ಲ್ಲೊ ಘೊವ್ ತೊಂಡಾ ಭಿತರ್ ಕಿತೆಂಗೀ ಮಂತ್ರಾಂ ಘಾಲುನ್ ಆಸ್‍ಲ್ಲೆಂ ಪಳೆಲೆಂ ಬಾಯ್ಲೆನ್. ಸ್ವಪ್ಣೆತಾ ಕೊಣ್ಣಾ ಮ್ಹಣ್ ಚಿಂತುನ್ ತಿ ಕುಜ್ನಾಕ್ ಗೆಲಿ. ಘೊವ್ ಹಾತ್ ಬಿಜಾವ್ನ್, ಪಾಯ್ ಧಲವ್ನ್ ಮ್ಹಣ್ಮುನೊಂಚ್ ಆಸ್‍ಲ್ಲೊ. ಹುನ್ ಚ್ಹಾಯೆಚೊ ಗೊಬ್ಳೊ ಹಾಡ್ನ್ ತಿಣೆಂ ಟಿಪಾಯ್ಚೆರ್ ದವರುಂಕೀ ಘೊವಾನ್ ದೊಳೆ ಸೊಡುಂಕೀ ಸಾರ್ಕೆಂ ಜಾಲೆಂ. ಬಾಯ್ಲೆಕ್ ಪಳೆಲ್ಲೆಂಚ್ ಘಡ್ಬಡೊನ್ ನೀಟ್ ಜಾಲೊ ಕೇಡಿ!

ಆಪುಣ್ ಟಿವಿಚೆರ್ ಯೆತಲೊಂ, ಫಾಮಾದ್ ಜಾತಲೊಂ ಮ್ಹಣ್ ಸ್ವಪ್ಣೆವ್ನ್ ಆಸ್‍ಲ್ಲೊ ತಿಗುರ್, ಜಾಗ್ ಜಾಲ್ಲೆಂಚ್ ನಿರಾಸ್ ಜಾಲೊ. ಆಪುಣ್ ಉಲವ್ನ್ ಆಸ್‍ಲ್ಲೊಂ ಸ್ವಪ್ಣಾಂತ್ ಮ್ಹಣ್ ಕಳೊನ್ ನಿರಾಸ್ಲೊ. ಆಜ್ಯಾಪ್‍ಯೀ ಜಾಲೆಂ ತಾಕಾ. ದುಸ್ರ್ಯಾ ಘಡ್ಯೆ ಕಾವ್ಜೆಲೊ. ದೊಳೆ ಧಾಂಪುನ್ ಚಿಂತಾನಾ ತಾಕಾ ಸಂತೊಸ್ ಜಾಲೊ. ಸ್ವಪಣ್ ಜಾಲ್ಲ್ಯಾನ್ ಜಾಲೆಂ, ನಾ ತರ್ ಆಪ್ಲೆಂ ಹಣೆಬರಪ್ ಸಂಸಾರಾಕ್ ಕಳಿತ್ ಜಾತೆಂ. ಆಪುಣ್ ಕಿತ್ಲೊ ಕುಸ್ಡೊಂ, ಮೊಸ್ರಾಳೊ, ನಂಜ್ಯಾಳೊ ಮ್ಹಣ್ ಲೊಕಾಕ್ ಕಳಿತ್ ಜಾಂವ್ಕ್ ಆವ್ಕಾಸ್‍ಚ್ ನಾ ಮ್ಹಣ್ ಚಿಂತುನ್ ತಾಕಾ ಸಮಾಧಾನ್ ಜಾಲೆಂ.

ಹುನೊನಿ ಚ್ಹಾ ಪಿಯೆತಾನಾ ತಾಕಾ ಆಪ್ಲಿ ಚರಿತ್ರಾ ಚಿಂತುನ್ ಹಾಸೊಂಕ್ ಆಯ್ಲೆಂ. ಬಾಯ್ಲೆ ಮುಖಾರ್ ಅಪ್ರಾಧಿ ಮನೋಭಾವ್ ಭೊಗ್ಲೊ ತರೀ ಹ್ರೇಂ… ಹ್ರೇಂ… ಹ್ರೇಂ… ಕರಿಲಾಗ್ಲೊ. ಸ್ವಪ್ಣಾಂತ್ಲ್ಯಾ ಬಿಗ್ ಬಾಸಾಕ್ ಯೆಟುಂಕ್ ಲಾಗ್ಲೊ.

ವಾಚ್ಪ್ಯಾಂಚ್ಯಾ ಗುಮಾನಾಕ್: ಹೆಂ ಏಕ್ ಸಂಪೂರ್ಣ್ ಕಾಲ್ಪನಿಕ್ ಪ್ರಸಂಗ್. ಫಕತ್ ಹಾಸ್ಯ್ ಬರಪ್. ವಾಚುನ್ ತುಮ್ಚೆಂ ಟೆನ್ಶನ್ ಪರಿಹಾರ್ ಜಾತೆಲೆಂ ಆನಿ ಹಾಸೊನ್ ದಾದೊಸ್ ಜಾತೆಲ್ಯಾತ್ ಮ್ಹಣ್ ಆಮ್ಚೊ ಭರ್ವಸೊ. ಸದಾಂಯ್ ಪರ್ನೆ ಜೋಕ್ಸ್ ಫಾರ್ವರ್ಡ್ ಜಾಂವ್ಚ್ಯಾ ಕಾಳಾರ್ ಹೊ ಏಕ್ ನವೊಚ್ ಒರಿಜಿನಲ್ ಜೋಕ್ – ಏಕ್ ಅಧಿಕ್, ಉತ್ತೀಮ್ ಹಾಸ್ಯ್ ಪ್ರಸಂಗ್ – ಪ್ಯೂರ್ ಕೊಮೆಡಿ!

Feedback can be sent to: budkuloepaper@gmail.com

Like us at: www.facebook.com/budkulo.epaper

The post ಕೊಂಕ್ಣಿ ಬಿಗ್ ಬಾಸ್ 2: ಕನ್ಫೆಶನ್ ರೂಮಾಂತ್ ಸರ್ಸರಿತ್ ಕುಮ್ಸಾರ್! appeared first on Budkulo.

ಇತ್ಲೆಂ ಮ್ಹಣ್ತಾನಾ ಕೊಂಕ್ಣೆಂತ್‍ಯೀ ‘ಬಿಗ್ ಬಾಸ್’ ನಾಕಾಗಿ? ಅಶೆಂ ಮ್ಹಣ್ ಥೊಡ್ಯಾಂಕ್ ಪುಣೀ ಧೊಸ್‍ಲ್ಲೆಂ ಆಸಾ. ಕೊಂಕ್ಣಿ ಲೋಕ್ ಲಾಖಾಂಗಟ್ಲ್ಯಾನ್ ಆಸಾ, ಸಂಸಾರ್‌ಭರ್ ಆಸಾ. ಕೊಂಕ್ಣೆಂತ್ ಸಿನೆಮಾಂಯೀ ಯೇವ್ನ್ ಆಸ್ತಾನಾ, ಏಕ್ ರಿಯಾಲಿಟಿ ಶೋ ಪ್ರಸಾರ್ ಜಾಲ್ಯಾರ್ ಲೋಕ್ ಖಂಡಿತ್ ಪಸಂದ್ ಕರ್ತಲೊ ಮ್ಹಳ್ಳೊ ಭರ್ವಸೊ ತಾಂಚೊ.

ದೀಸ್ ಪಾಶಾರ್ ಜಾಲ್ಲೆಚ್ ಜಾಲ್ಲೆ. ಏಕ್ ದೀಸ್ ಅಚಾನಕ್ ಮ್ಹಳ್ಳೆಪರಿಂ ಜಾಹೀರಾತ್ ಪ್ರಗಟ್ ಜಾಲೆಂ. ತೆಂ ಒರಿಜಿನಲ್ಲಿ ಖಂಚ್ಯಾ ಪತ್ರಾಂತ್ ವಾ ಮಾಧ್ಯಮಾಂತ್ ಫಾಯ್ಸ್ ಜಾಲ್ಲೆಂ ಕೊಣೀ ನೆಣಾಂತ್. ಪುಣ್ ದೀಸ್ ಬುಡಜೆ ತರ್ ಹರ್ಯೆಕ್ಲ್ಯಾಚ್ಯಾ ಮೊಬೈಲಾಂನಿ ವಾಟ್ಸಾಪ್ಪಾಚೆರ್ ತಶೆಂಚ್ ಫೇಸ್‍ಬುಕ್ ಆನಿ ಇತರ್ ಸಾಮಾಜಿಕ್ ಮಾಧ್ಯಮಾಂನಿ ತೆಂ ಜಾಹೀರಾತ್ ಝಗ್ಲಾಣ್ಯಾ ವೆಗಾನ್ ಪ್ರಸಾರ್ ಜಾಲೆಂ.

ಕೊಂಕ್ಣೆಂತ್‍ಯೀ ಬಿಗ್ ಬಾಸ್!

ತ್ಯಾ ಜಾಹೀರಾತಾಚೆಂ ತಕ್ಲೆಂ ನಾಂವ್ ಪಳೆವ್ನ್ಂಚ್ ಕೊಂಕ್ಣಿ ಲೋಕ್ ಫಿದಾ ಜಾಲೊ. ಚಡ್ತಿಕ್ ವಿವರ್ ಕಿತೆಂಚ್ ನಾತ್‍ಲ್ಲೊ ದೆಕುನ್ ಲೊಕಾಚ್ಯಾ ತಕ್ಲ್ಯಾಂನಿ ರಾಂದ್ಣಿಂತ್ ಕೊಲಿದ್ ಪೆಟ್‍ಲ್ಲೆಪರಿಂ ಚಟಪಟ ಕರ್ನ್ ಸವಾಲಾಂ, ದುಬಾವ್, ಅಂದಾಜ್, ಕಲ್ಪನ್ ಆನಿ ಅಭಿಪ್ರಾಯೊ ಉಬ್ಜೊಂಕ್ ಲಾಗ್ಲ್ಯೊ. ಕೋಣ್ ಹೋಸ್ಟ್ ಕರ್ತಾ, ಪಾತ್ರ್ ಘೆತೆಲೆ ಕೋಣ್ ಮ್ಹಣ್ ಥರಾವಳ್ ವ್ಯಕ್ತಿ ಆನಿ ನಾಂವಾಂ ವಯ್ರ್ ಪಡ್ಲಿಂ, ಘಾಜ್ಲಿಂ. ಗಾಸಿಪ್ ಕರ್ತೆಲ್ಯಾಂಕ್ ಬರೊಚ್ ವಿಷಯ್ ಮೆಳ್ಳೊ.

ಸುರ್ವೆರ್ ಥೊಡ್ಯಾಂನಿ ಹೆಂ ಕೊಣಾಚಿಗೀ ಮಸ್ಕಿರಿ ಆಸ್ತೆಲಿ ಮ್ಹಣ್ ಚಿಂತ್ಲೆಂ. ದೀಸ್ ಗೆಲ್ಲೆಂಚ್ ಸಕ್ಡಾಂಕ್ ಅಶೆಂಚ್ ಭೊಗ್ಲೆಂ ಆನಿ ವಿಸರ್ ಪಡ್ಲೊ. ದಿಸಾಕ್ ಹಜಾರಾಂಗಟ್ಲ್ಯಾನ್ ಖಬ್ರೊ, ಜೋಕ್ಸ್ ಆಶಾರ್ ಪಾಶಾರ್ ಜಾಂವ್ಚ್ಯಾ ಹ್ಯಾ ಕಾಳಾರ್ ಕೊಂಕ್ಣಿ ಬಿಗ್ ಬಾಸ್ ಎನೌನ್ಸ್‌ಮೆಂಟ್‍ಯೀ ಖಂಯ್ ವ್ಹಾಳೊನ್ ಗೆಲೆಂ ಮ್ಹಣ್ ಕೊಣಾಕೀ ಕಳ್ಳೆಂ ನಾ.

ಪರತ್ ತಿಚ್ ಖಬರ್ ಘಾಜ್ಲಿ. ಹ್ಯಾ ಪಾವ್ಟಿಂ ಫಲಾಣ್ಯಾ ಟಿ.ವಿ. ಚಾನೆಲಾಚೆರ್, ಅಮ್ಕ್ಯಾಚ್ ತಾರಿಕೆರ್ ‘ಕೊಂಕ್ಣಿ ಬಿಗ್ ಬಾಸ್’ ಸುರ್ವಾತ್ ಜಾತೆಲೆಂ ಮ್ಹಣ್ ವಿವರ್ ಆಸ್‍ಲ್ಲೊ. ತ್ಯಾ ದಿಸಾಕ್‍ಚ್ ಜಾಯ್ತೆ ಜಣ್ ರಾಕೊನ್ ರಾವ್ಲೆ. ಆನಿ ನಿಮಾಣೆಂ ತೊ ಭಾಗಿ ದೀಸ್ ಉದೆಲೊಚ್.

ಕೊಂಕ್ಣಿ ಪ್ರೇಕ್ಷಕ್ ಮ್ಹಣ್ಜೆ ಟಿ.ವಿ.ಚೆ ವೀಕ್ಷಕ್ ಭಾರಿಚ್ ಆತುರಾಯೆನ್ ಟಿ.ವಿ. ಮುಖಾರ್ ಬಸೊನ್ ವೆಳಾಕ್ ರಾಕೊನ್ ರಾವ್ಲೆ. ತೊ ದೀಸ್ ಆಯ್ತಾರ್. ಸಾಂಜೆರ್ 8 ವೊರಾರ್ ಕೊಂಕ್ಣಿ ಬಿಗ್ ಬಾಸ್ ಸುರು ಜಾಂವ್ಚೆಂ ಆಸ್‍ಲ್ಲೆಂ. ಜಾಯ್ತೊ ಲೋಕ್ ತ್ಯಾ ದೀಸ್ ಹೆರ್ ಕಿತೆಂಯ್ ಆಸ್‍ಲ್ಲೆಂ ಸಕ್ಕಡ್ ಬಾಕಿ ದವರ್ನ್ ಟಿ.ವಿ.ರ್ ಕೊಂಕ್ಣೆಚಿ ಮಝಾ ಪಳೆಂವ್ಕ್ ಉರ್ಬೆನ್ ರಾಕ್ತಾಲೆ.

ಜಾಹೀರಾತಾಂ ಆನಿ ತೆಂ ಹೆಂ ಮಾತ್ತಿಗೊಬೊರ್ ಮ್ಹಣೊನ್ ಭರ್ತಿ 8 ವೊರಾರ್ ಘಾಂಟ್ ವಾಜ್ಲಿಚ್. ಪಳೆಲ್ಲೆ ಪಳೆಲ್ಲೆಪರಿಂಚ್ ಟೈಟಲ್ ಮ್ಯೂಸಿಕಾ ಸವೆಂ ‘ಕೊಂಕ್ಣಿ ಬಿಗ್ ಬಾಸ್’ ಲೋಗೊ ಪಡ್ದ್ಯಾರ್ ಉದೆತಾನಾ ಬಸೊನ್ ಪಳೆವ್ನ್ ಆಸ್‍ಲ್ಲೊ ಲೋಕ್ ಸಗ್ಳೊ ಉಟೊನ್ ಸಂತೊಸಾನ್ ನಾಚೊಂಕ್ ಲಾಗ್ಲೊ.

* * * * *

ಕ್ಯಾಮೆರಾ ಆನ್ ಜಾವ್ನ್, ವೆದಿಚೆರ್ ಸಕ್ಕಡ್ ಲೈಟ್ಸ್ ಪೆಟೊನ್ ಪ್ರಕಾಸ್‍ಭರಿತ್ ಉಜ್ವಾಡ್ ಫಾಂಕ್ಲಾ. ವೆದಿ ರಂಗ್ ರಂಗಾಳ್ ರಿತಿನ್ ಸೊಭಯ್ಲ್ಯಾ. ‘ಕೊಂಕ್ಣಿ ಬಿಗ್ ಬಾಸ್’ ಮ್ಹಣ್ ಆಕರ್ಷಕ್ ಅಕ್ಷರಾಂನಿ ಬರವ್ನ್ ಲೋಗೊ ಸೊಡಯಿಲ್ಲೊ ಆನಿ ಪಳೆಂವ್ಕ್ ಸೊಭಿತ್ ದಿಸ್ತಾಲೆಂ. ಡೈರೆಕ್ಟರಾನ್ ‘ತ್ರೀ, ಟೂ, ವನ್… ಸ್ಟಾರ್ಟ್’ ಮ್ಹಣ್ತಾನಾ ಪ್ರಕಾಸ್‍ಭರಿತ್ ಲೈಟ್ಸ್ ಆಫ್ ಜಾವ್ನ್ ಮಂದ್ ಉಜ್ವಾಡ್ ಫಾಂಕ್ಲೊ. ಕೊನ್ಶ್ಯಾರ್ ಕಾಳೊಕಾಂತ್ಲ್ಯಾನ್, ಎಕಾ ಬಾಗ್ಲಾಂತ್ಲ್ಯಾನ್ ಏಕ್ ವ್ಯಕ್ತಿ ಸವ್ಕಾಸ್ ಚಲೊನ್ ವೆದಿಕ್ ಪ್ರವೇಶ್ ಜಾಲಿ.

ವ್ಹಡ್ ಸಂಗೀತ್ ಆನಿ ಕ್ರ್ಯಾಕರಾಂ ಮಧೆಂಗಾತ್ ತಿ ವ್ಯಕ್ತಿ ಚಲೊನ್ ಆಯ್ಲಿ. ಹಾಜರ್ ಆಸ್‍ಲ್ಲೊ ಪ್ರೇಕ್ಷಕ್ ವರ್ಗ್ ತೊ ಕೋಣ್ ಆಸ್ಯೆತ್ ಮ್ಹಣ್ ಚಿಂತುಂಕ್ ಲಾಗ್ಲೊ. ತಾಣೆಂ ಆಂಗಾರ್ ಮುಸ್ತಾಯ್ಕೆ ವಯ್ರ್ ಏಕ್ ಜಾಕೆಟ್ ಘಾಲ್ಲಿ. ವಿಶೇಸ್ ಎಕಾ ಸ್ಟೈಲಿರ್ ಚಲೊನ್ ಯೇವ್ನ್ ತಾಕಾಚ್ ಮ್ಹಣ್ ಸಜಯಿಲ್ಲ್ಯಾ ಉಬಾರ್ ಜಾಗ್ಯಾಕ್ ಗೆಲ್ಲೆಂಚ್ ಡೈರೆಕ್ಟರಾನ್ ‘ಲೆಟ್ಸ್ ಬೆಗಿನ್’ ಮ್ಹಣೊನ್ ಹಿಶಾರೊ ದಿಲೊ. (ಉಬಾರ್ ಸುವಾತೆಕ್ ಚಡ್ತಾನಾ Anchor ಇಲ್ಲೊಸೊ ಲಕ್ಲೊ!). ಸುರ್ವೆರ್ ತಾಚೆ ಶೂ ಆನಿ ಪಾಯ್ ದಾಕಯ್ಲೆ, ಕ್ಯಾಮರಾ ಸವ್ಕಾಸ್ ವಯ್ರ್ ವಚೊನ್ ತಕ್ಲೆ ಲಾಗಿಂ ವ್ಹೆಲ್ಯಾರ್… ತಾಣೆಂ ತೊಂಡಾರ್ ಮಾಸ್ಕ್ ಘಾಲಾಂ! ಎಕಾಚ್ಛಾಣೆಂ ಲೈಟ್ಸ್ ಆಫ್ ಜಾಲೆ ಆನಿ ತಾಚ್ಯಾ ತೊಂಡಾಚೆರ್ ಮಾತ್ರ್ ಫೋಕಸ್ ಲೈಟ್ ಪಡ್ಲೊ.

ಸವ್ಕಾಸ್ ತಿ ವ್ಯಕ್ತಿ ಮುಖಾರ್ ಬಾಗ್ವಲಿ ಆನಿ ಸ್ಟೈಲ್ ಕರ್ನ್ ನೀಟ್ ಜಾತಾನಾ ತಾಣೆಂ ಮಾಸ್ಕ್ ಕಾಡ್‍ಲ್ಲೆಂ! ಹೋ… ಹೋ… ಮ್ಹಣ್ ಲೊಕಾಚಿ ಬೋಬ್… ತಾಳಿಯೊ… ಶಿಲೊಣ್ಯೊ… ಥೊಡ್ಯಾಂಕ್ ತಾಚಿ ವಳಕ್ ಮೆಳ್ಳಿ. ಪುಣ್ ಜಾಯ್ತ್ಯಾಂಕ್ ತೊ ದಾದ್ಲೊ ವಾ ಸ್ತ್ರೀಗೀ ಮ್ಹಣ್ ಕನ್‌ಫ್ಯೂಸ್ ಜಾಲ್ಲೆಂ!! ಉಪ್ರಾಂತ್ ತಾಚೆಂ ತೊಂದ್ಯಾ ತೆದೆಂ ಪೋಟ್ ಪಳೆವ್ನ್ ದಾದ್ಲೊಚ್ ಮ್ಹಣ್ ಖಚಿತ್ ಜಾಲೆಂ.

“ಮೊಗಾಳ್ ಕೊಂಕ್ಣಿ ಮಹಾಜಣಾಂನೊ…” ಮ್ಹಣೊನ್ ಡೈಲಾಗ್ ಸುರು ಕೆಲ್ಲೆಂಚ್ ತೊ ಫುಡೆಂ ಉಲಂವ್ಕ್ ಜಾಯ್ನಾಸ್ತಾನಾ ಸಾಸ್ಪಲೊ. ಡೈರೆಕ್ಟರಾಕ್ ತೆದಾಳಾಚ್ ಕಿತೆಂಗೀ ದುಬಾವ್ ಉದೆಲ್ಲೊ. ಥೊಡೊ ವೇಳ್ ಸಾಸ್ಪೊನ್‍ಶೆಂ ಆನಿ ಕಾವ್ಜೆಣಿಗೀ ಕಿತೆಂಗೀ ಜಾವ್ನ್ ಇಲ್ಲೊಸೊ ನರ್ವಸ್ ಜಾಲ್ಲೊ ಧಯ್ರ್ ಘೆವ್ನ್ ಪರತ್ ಉಲಯ್ಲೊ. ಎದೊ ವ್ಹಡ್ಲೊ ಶೋ ಮ್ಹಣ್ತಾನಾ ಇಲ್ಲೆಶೆಂ ನರ್ವಸ್ ಜಾಂವ್ಚೆಂ ಸಹಜ್ ಮ್ಹಣ್ ಸಬಾರಾಂನಿ ಚಿಂತ್ಲೆಂ.

“ಮೊಗಾಳ್ ಕೊಂಕ್ಣಿ ಮಹಾಜಣಾಂನೊ… ಆಜ್ ಉದೆಲ್ಯಾ ಕೊಂಕ್ಣೆಚ್ಯಾ ಚರಿತ್ರೆಂತ್ಲಿ ಭಾಂಗ್ರಾಳಿ ಘಡಿ… ಇತ್ಲ್ಯಾ ದಿಸಾಂಚ್ಯಾ ತುಮ್ಚ್ಯಾ ನಿರೀಕ್ಷಣಾಕ್ ಪಡ್ದೊ ಪಡ್ಲಾ… ಆನಿ ಆತಾಂ ನವೊ ಪಡ್ದೊ ಉಜ್ವಾಡಾಕ್ ಆಯ್ಲಾ… ಹೆಂ ಏಕ್ ಚಾರಿತ್ರಿಕ್ ಘಡಿತ್… ಆಜ್ ಥಾವ್ನ್ ತುಮ್ಚ್ಯಾ ಹ್ಯಾ ‘ಟಿವಿ-420’ ಚಾನೆಲಾರ್ ಸುರ್ವಾತ್ ಜಾತಾ…”

ತಾಚೊ ತಾಳೊ ಗಂಭೀರ್ ಜಾಲೊ ಆನಿ ಆವಾಜ್ ಚಡ್ ಜಾಲೊ.

“…ಆಜ್ ಥಾವ್ನ್ ಸುರು ಜಾತಾ… ಕೊಂಕ್ಣೆಂತ್ಲೊ ಅತೀ ಮಹಾನ್ ರಿಯಾಲಿಟಿ ಶೋ… ಬಿಗ್… ಬಿಗ್… ಬಿಗ್….. ಬಿಗ್ ಬೂಬ್ಸ್… ಬಿಗ್ ಬೂಬ್ಸ್… ಕೊಂಕ್ಣಿ ಬಿಗ್ ಬೂಬ್ಸ್..!”

“ಕಟ್, ಕಟ್, ಕಟ್” ಬೊಬಾಟ್ಲೊ ಡೈರೆಕ್ಟರ್. ಶೂಟಿಂಗಾಂತ್ ಭಾಗ್ ಘೆವ್ನ್ ಆಸ್‍ಲ್ಲೆ ಆನಿ ಆತುರಾಯೆನ್ ಪ್ರೇಕ್ಷಕಾಂಚ್ಯಾ ಸಾಲಾಂತ್ ಬಸೊನ್ ಆಸ್‍ಲ್ಲೆ ಸಗ್ಳೆ ಥಟಕ್ ಜಾಲೆ. ತಿತ್ಲ್ಯಾರ್ ನಿರ್ದೇಶಕ್ ತ್ಯಾ ನಿರೂಪಕಾಚ್ಯಾ ಲಾಗಿಂ ಪಾವ್‍ಲ್ಲೊ. ತಾಕಾ ಗಜಾಲ್ ಕಳ್‍ಲ್ಲಿ. ನಿರೂಪಕ್ ಮಾಮ್ ‘ಟೈಟ್’ ಜಾವ್ನ್ ಆಯಿಲ್ಲೊ. ಮತಿಂತ್‍ಚ್ ತೊ ‘ಹಲ್ಕಾ ಸೂ… ಮಗನೆ…’ ಮ್ಹಣ್ ಯೆಟುನ್ ಪರತ್ ಶೂಟಿಂಗ್ ಕರ್ಚ್ಯಾಕ್ ನಿರ್ದೇಶನ್ ದೀಂವ್ಕ್ ಲಾಗ್ಲೊ.

ಲೈವ್ ಪ್ರಸಾರ್ ಚಲೊನ್ ಆಸಾ ಮ್ಹಣ್ ನಿರಾಳ್ ಆಸ್‍ಲ್ಲೆ ಟಿ.ವಿ. ಸ್ಟೂಡಿಯೊಂತ್ಲೆ ಶಿಬಂದಿ ಘಡ್ಬಡ್ಲೆ. ತಕ್ಷಣ್ ತಾಣಿಂ ಪೇಮೆಂಟ್ ದೀನಾತ್ಲ್ಯಾರೀ ಅರ್ಜೆಂಟಾಕ್ ಜಾತಾ ಮ್ಹಣ್ ಪರ್ನಿಂ ಥೊಡಿಂ ಜಾಹೀರಾತಾಂ ಪ್ರಸಾರ್ ಕೆಲಿಂ. ಕೊಂಕ್ಣಿ ಶೋ ಪಳೆಂವ್ಕ್ ಅತ್ರೆಗಾನ್ ರಾಕ್‍ಲ್ಲ್ಯಾಂಕ್ ಶೆಳೆಂ ಉದಾಕ್ ವೊತ್‍ಲ್ಲೆಪರಿಂ ಜಾಲ್ಲೆಂ.

ಕೊಂಕ್ಣೆಂತ್ ಬಿಗ್ ಬಾಸ್ ರಿಯಾಲಿಟಿ ಶೋ ಸುರು ಕರ್ತಾತ್, ತಾಂತ್ರಿಕ್ ಮಾರ್ಗದರ್ಶನ್ ದೀಜೆ ಮ್ಹಣ್ ಫಾಮಾದ್ ಡೈರೆಕ್ಟರ್ ಪ್ರಸಾದ್‍ಚಂದ್ರಾಕ್ ವಿನತಿ ಆಯಿಲ್ಲಿ. ಪ್ರಸಾದ್‍ಚಂದ್ರ ಕನ್ನಡ ಟಿ.ವಿ. ಇಂಡಸ್ಟ್ರಿಂತ್ ವ್ಹಡ್ಲೆಂ ನಾಂವ್. ತಾಚ್ಯೊ ಧಾರಾವಾಹಿ ಆನಿ ಇತರ್ ರಿಯಾಲಿಟಿ ಶೋ ಭಾರಿಚ್ ಲೊಕಾ ಮೊಗಾಳ್ ಜಾಲ್ಲ್ಯೊ. ತಾಚ್ಯಾ ಲಾಗ್ಶಿಲ್ಯಾ ಎಕಾ ಕೊಂಕ್ಣಿ ಮನ್ಶ್ಯಾನ್, ಜೊ ಆಪುಣ್ ಎಕ್ಲೊ ಪ್ರೊಡ್ಯೂಸರ್ ಜಾವ್ನಾಸ್‍ಲ್ಲೊ, ‘ಕೊಂಕ್ಣಿ ಬಿಗ್ ಬಾಸ್ ಕಾಡ್ತಾಂ, ತುವೆಂಚ್ ಡೈರೆಕ್ಷನ್ ದೀಜೆ’ ಮ್ಹಣ್ ಒತ್ತಾಯ್ ಕೆಲ್ಲ್ಯಾಕ್ ಹೆಂ ಎಸೈನ್‍ಮೆಂಟ್ ಘೆಂವ್ಕ್ ತೊ ಮುಖಾರ್ ಸರ್‌ಲ್ಲೊ.

ಆಪ್ಲ್ಯಾ ಇಷ್ಟಾಂ ಲಾಗಿಂ ತಾಣೆಂ ಆಪುಣ್ ಮಂಗ್ಳುರಾಕ್, ತೆಂಯೀ ಏಕ್ ಕೊಂಕ್ಣಿ ರಿಯಾಲಿಟಿ ಶೋ ಕರುಂಕ್ ವೆತಾಂ ಮ್ಹಣ್ತಾನಾ, ಥೊಡ್ಯಾಂನಿ ‘ಅಲ್ಲಿ ಮಂಗಳೂರಿನಲ್ಲಿ ಅಂಡೆದುರ್ಸುಗಳಿಗೆ ಕಮ್ಮಿ ಇಲ್ಲ, ಸ್ವಲ್ಪ ಜಾಗ್ರತೆ ವಹಿಸಿ’ ಮ್ಹಣ್ ಚತ್ರಾಯ್ ದಿಲ್ಲಿ ತಾಣೆಂ ವಿಶೇಷ್ ಗುಮಾನಾಕ್ ವ್ಹರುಂಕ್ ನಾತ್‍ಲ್ಲೆಂ. ಆತಾಂ ಶೂಟಿಂಗ್ ಸುರ್ವಾತ್ ಜಾತಾನಾಂಚ್ ತೆಂ ತಾಕಾ ಉಗ್ಡಾಸಾಕ್ ಆಯ್ಲೆಂ.

ಟೈಟ್ ಮಾಮಾಕ್ ಚತ್ರಾಯ್ ಸಾಂಗೊನ್ ಡೈಲಾಗ್ ಪರತ್ ಉಗ್ಡಾಸ್ ಕರವ್ನ್ ಕಶೆಂಯೀ ತಯಾರ್ ಕೆಲೆಂ. ಮಾಮ್ ನಿರ್ದೇಶಕಾ ಲಾಗಿಂ, “ನಾನು… ನಾನು ತಯಾರಾಗಿದ್ದೇನೆ ಸಾರ್… ಶೂಟಿಂಗ್ ಸ್ಟಾರ್ಟ್ ಮಲ್ಪಿ…” ಮ್ಹಣಾಲೊ. ಸಗ್ಳೆ ಪರತ್ ಅಲರ್ಟ್ ಜಾವ್ನ್ ಶೂಟಿಂಗ್ ಚಾಲು ಕೆಲೆಂ.

ಟಿ.ವಿ. ಪಡ್ದ್ಯಾರ್ ಪರತ್ ಲೈವ್ ಪ್ರಸಾರ್ ಸುರು ಜಾಲ್ಲೊ ಪಳೆವ್ನ್ ಆಸಕ್ತ್ ಹೊಗ್ಡಾಯ್ಲೆಲೆ ವೀಕ್ಷಕ್‍ಯೀ ಆತುರಾಯೆನ್ ಪಳೆಂವ್ಕ್ ಲಾಗ್ಲೆ.

“ಮೊಗಾಳ್ ಕೊಂಕ್ಣಿ ಮಹಾಜಣಾಂನೊ… ವೇಳ್ ಘಡಿ ಆಯ್ಲ್ಯಾ ಕೊಂಕ್ಣೆಂತ್ ಪಯ್ಲೆ ಪಾವ್ಟಿಂ ಸುರು ಜಾಂವ್ಚ್ಯಾಕ್ ಏಕ್ ವಿಶೇಸ್ ರಿಯಾಲಿಟಿ ಶೋ…” ಮ್ಹಣಾಲೊ ತೊ ಹಾತ್ ರುಂದಾವ್ನ್. “ಆನಿ ತೊ ಜಾವ್ನಾಸಾ… ಬಿಗ್… ಬಿಗ್… ಬಿಗ್… ಬಿಗ್ ಬೂ….!” ಮ್ಹಣೊನ್ ಜೀಬ್ ಚಾಬ್ಲಿ ತಾಣೆಂ. ತೊಂಡಾಂತ್ಲ್ಯೊ ಹಾಸೊ ಮಾಯಾಗ್ ಜಾಲ್ಯೊ. ತಕ್ಷಣ್ ಸನಿನ್ ಜಾವ್ನ್, “ನೋ ನೋ. ಇಟ್ಸ್ ಬಿಗ್ ಬಾಸ್… ಬಿಗ್ ಬಾಸ್… ಕೊಂಕ್ಣಿ ಬಿಗ್ ಬಾಸ್” ಮ್ಹಣಾಲೊ ಎಕಾಚ್ಚ್ ಮಾರಾಕ್, ಜಪಾನಾಂತ್ ಬುಲೆಟ್ ಟ್ರೈನ್ ಪಾಶಾರ್ ಜಾಲ್ಲೆಪರಿಂ.

“ಶಿಟ್! ಕಟ್ ಇಟ್” ಪರತ್ ಕಿಂಕ್ರಾಟ್ಲೊ ನಿರ್ದೇಶಕ್. ಕ್ಯಾಮೆರಾ ಬಂದ್ ಪಡ್ಲೊ. ಲೈಟ್ಸ್ ಆಫ್ ಜಾಲೆ.

ಟಿ.ವಿ. ಪಳೆವ್ನ್ ಆಸ್‍ಲ್ಲ್ಯಾಂನಿ ನಿರಾಶೆನ್ ಆನಿ ರಾಗಾನ್ ಟಿ.ವಿ. ಆಫ್ ಕೆಲಿ, ಥೊಡ್ಯಾಂನಿ ರಿಮೋಟ್ ಕಾಡ್ನ್ ಧರ್ಣಿಕ್ ಮಾರ್ಲೊ!

ಕಾಳೊಕಾಂತ್ ರಾವ್‍ಲ್ಲೊ ‘ಮಾಮ್’ ಕಿತೆಂಗೀ ಆಪ್ಣಾಸ್ತಕಿಂ ಪಿಂರ್ಗತಾಲೊ. ಕಾಲೆಂಗೀ ‘ಟೆನ್ಶನ್… ಟೆನ್ಶನ್… ಟೆನ್ಶನ್..!’ ಮ್ಹಣ್ತಾಲೊ ತೆಂ ಡೈರೆಕ್ಟರಾಕ್ ಆಯ್ಕಲೆಂ. ತಾಚೊ ರಾಗ್ ತಕ್ಲೆಕ್ ಚಡ್‍ಲ್ಲೊ. ತಾಚೆಂಯೀ ಟೆನ್ಶನ್ ಚಡೊನ್ ಹೈಟೆನ್ಶನ್ ಜಾಲ್ಲೆಂ, ಬಿ.ಪಿ. ಚಡ್‍ಲ್ಲಿ. ಬೆಂಗ್ಳುರಾಂತ್ ವ್ಹಡ್ ವ್ಹಡ್ ಕಾರ್ಯಿಂ ಡೈರೆಕ್ಟ್ ಕೆಲ್ಲ್ಯಾ ತಾಕಾ ಅಸಲೊ ಅನುಭವ್ ಫುಡ್ ಜಾಂವ್ಕ್ ನಾತ್‍ಲ್ಲೊ. ರೀ ಟೇಕ್ ಕರ್ಚೆಂ ಆಸ್‍ಲ್ಲೆಂ ತರೀ, ‘ಡಿಂಗ್’ ಜಾವ್ನ್ ಯೇವ್ನ್ ತೊಂಡಾಕ್ ಆಯಿಲ್ಲೆಂ ಉಲಂವ್ಚೆಂ ತಾಣೆಂ ಪಯ್ಲೆ ಪಾವ್ಟಿಂ ಪಳೆಲ್ಲೆಂ. ಪ್ರೊಡ್ಯೂಸರಾಂನಿ ಶಿಫಾರಸ್ ಕೆಲ್ಲೆ ಪರ್ಮಾಣೆಂ ಏಕ್ದಮ್ ಊಂಚಿ ಕಲಾಕಾರಾಂಕ್ ವಿಂಚುನ್ ಕಾಡ್ಲಾಂ, ಶೂಟಿಂಗ್ ಕರುಂಕ್ ಕಾಂಯ್ ಕಷ್ಟ್ ನಾಂತ್ ಮ್ಹಣ್ ಸಾಂಗ್‍ಲ್ಲೆಂ ಸತ್ ಆಸ್ಯೆತ್ ಮ್ಹಣ್ ತೊ ಪಾತ್ಯೆಲ್ಲೊ. ಹಾಂಗಾ ಪಳೆಲ್ಯಾರ್ ನೀಟ್ ರಾವೊಂಕ್ ತಾಂಕನಾತ್‍ಲ್ಲ್ಯಾ ನಾಕಾರಿ ಬೆಬ್ದ್ಯಾಕ್ ಆಪವ್ನ್ ಹಾಡ್ಲಾಂ!

ಅಸಿಸ್ಟೆಂಟ್ ಡೈರೆಕ್ಟರಾ ಲಾಗಿಂ, “ಯಾವ ಹಲ್ಕಾ ನನ್ ಮಗ ಇವ್ನು ಕಣ್ಲಾ… ಕುಡುಕ ಸೂ… ಮಗನಿಗೆ ನಾಲ್ಗೆ ಸರಿಯಾಗಿ ಅಲ್ಗಾಡ್ತಿಲ್ಲ. ಇಂತಾ ಬೇ…ವಾ… ರ್ಶಿಗಳನ್ನು ಹಿಡ್ಕೊಂಡು ಇವ್ರು ಯಾವ್ ಸೀಮೆ ಪ್ರೋಗ್ರಾಮ್ ನಡೆಸ್ತಾರೋ..?” ಮ್ಹಣ್ ಶಿಣೊನ್ ಸಾಂಗಲಾಗ್ಲೊ ಡೈರೆಕ್ಟರ್. ಪ್ರೊಡ್ಯೂಸರಾಂನಿ ತಾಕಾ ‘ಆಮ್ಚೆ ಕಡೆ International ಟಾಲೆಂಟ್ಸ್ ಆಸಾತ್, ತುಕಾ ಶೂಟಿಂಗ್ ಕರುಂಕ್ ಭಾರೀ ಸುಲಭ್’, ‘ಹೋಸ್ಟ್ ಕರ್ತಲೊ ಮಲ್ಟಿ ಟ್ಯಾಲೆಂಡೆಡ್ ಜೀನಿಯಸ್ ಬುದ್ಧಿಜೀವಿ, ಅದ್ಭುತ್ ನಟ್ಟ್, ಮ್ಹಳ್ಯಾರ್ ಊಂಚಿ ನಟ್…’ ಮ್ಹಣ್ ಕೊಚ್ಚಿತಾಲೆ. ಹಾಂಗಾ ಪಳೆಲ್ಯಾರ್, ಗತ್ ಗಂಗಾಗತ್!

ಪ್ರೇಕ್ಷಕಾಂಚ್ಯಾ ಮುಖ್ಲ್ಯಾ ಸಾಲಾಂತ್ ಸೀರಿಯಲಾಚೆ ಪ್ರೊಡ್ಯೂಸರ್ಸ್ ಆನಿ ಹೆರ್ ಗಣ್ಯ್ ವ್ಯಕ್ತಿ ಬಸ್‍ಲ್ಲೆ. ತಾಂಕಾಂ ಹೊ ಮಹಾನ್ ಚಿಂತ್ಪಿ, ಭಯಂಕರ್ ಟ್ಯಾಲೆಂಟೆಡ್ ಮನಿಸ್ ಕಿತ್ಯಾಕ್ ಅಶೆಂ ಪೊಜ್ಡೆಂ ಉಲಯ್ಲೊ ಮ್ಹಣ್ ಖಂತ್ ಜಾಲಿ. ಲಜ್‍ಯೀ ಭೊಗ್ಲಿ. ತೊ ಸದಾಂಯ್ ಟೈಟ್ ಜಾಂವ್ಚೊ ಮ್ಹಣ್ ತಾಂಚೆ ಪಯ್ಕಿ ಜಾಯ್ತ್ಯಾಂಕ್ ಕಳಿತ್ ಆಸ್‍ಲ್ಲೆಂ. ಪುಣ್ ಅಸಲ್ಯಾ ಎಕಾ ಗಂಭೀರ್ ಆನಿ ಪ್ರಮುಖ್ ಕಾರ್ಯಾಕ್ ಯೆತಾನಾಂಯೀ ಅಸೊ ಯೆತಲೊ ಮ್ಹಣ್ ಕೊಣೆಂಯೀ ಚಿಂತುಂಕ್ ನಾತ್‍ಲ್ಲೆಂ.

ಡೈರೆಕ್ಟರಾಕ್ ರಾಗ್ ತಕ್ಲೆಕ್ ಚಡ್‍ಲ್ಲೊ. ಸಕ್ಕಡ್ ಎಕಾಮೆಕಾ ಉಲವ್ನ್ ಆಸ್‍ಲ್ಲ್ಯಾನ್ ಸಾಲಾಂತ್ ತಶೆಂ ವೆದಿರ್ ಉಲಂವ್ಚೊ ಆವಾಜ್ ಜೋರ್ ಜಾಲ್ಲೊ. ಹೊಚ್ ಬರೊ ಆವ್ಕಾಸ್ ಮ್ಹಣ್ ಚಿಂತುನ್ ಡೈರೆಕ್ಟರ್ ನಿರೂಪಕಾ ಲಾಗಿಂ ಗೆಲೊ.

“ರೀ… ಏನ್ರೀ ಇದು ನಿಮ್ಮ ಅವತಾರ? ತಲೆ ಗಿಲೆ ನೆಟ್ಟಗಿದ್ಯಾ ಇಲ್ವಾ? ಇಷ್ಟೊಂದು ಒಳ್ಳೆಯ ಕಾರ್ಯಕ್ರಮಕ್ಕೆ ಶೂಟಿಂಗ್‍ಗೆ ಬರುವಾಗ ಈ ರೀತಿ ಬರೋದೇನ್ರೀ? ಥೂ ನಿಮ್ ಜನ್ಮಕ್ಕೆ. ನಿಮ್ಮನ್ನು ಸೆಲೆಕ್ಟ್ ಮಾಡಿದ್ದು ಯಾವನವ್ನು ಲೋ…ಫ…ರ್… ಶಿಟ್… ಛೆಕ್!”

“ಸಾರ್… ಸಾರ್. ನಾನು… ನಾನು… ನನಗೆ…” ಮನಿಸ್ ಕಂಗಾಲ್ ಜಾಲ್ಲೊ. ಆಪುಣ್ ಖಂಡಾಪಟ್ಟೆ ಶೈನ್ ಜಾತಾಂ ಮ್ಹಣ್ ಸಪ್ಣೆಲ್ಲೊ ‘ನಿರೂಪಕ್’ ಪ್ಯಾಚ್ ಜಾಲ್ಲೊ. ತಾಕಾ ಕಿತೆಂ ಜಾಪ್ ದೀಜೆ ಮ್ಹಣ್ ಕಳ್ಳೆಂ ನಾ. ಡೈರೆಕ್ಟರಾಕ್ ರಾಗ್ ಆಯ್ಲಾ, ಆಪ್ಣಾಕ್ ಖೊಟ್ ಘಾಲ್ನ್ ಭಾಯ್ರ್ ಘಾಲ್ತಿತ್ ಮ್ಹಣ್ ಭಿರಾಂತ್ ದಿಸ್ಲಿ ತಾಕಾ. ಕಿತೆಂಯ್ ಉಲಯ್ಜೆ ವಾ ಚಿಂತಿಜೆ ಜಾಲ್ಯಾರೀ ಏಕ್ ದೋನ್ ಪೆಗ್ಗ್ ಕಾಣ್ಗೆವ್ನ್ ತಾಕಾ ಸವಯ್ ಜಾಲ್ಲಿ. ಆಜ್ ‘ಬಿಗ್ ಬಾಸ್’ ಶೂಟಿಂಗ್ ಸುರ್ವಾತ್ ಜಾತಾ, ಫ್ರೆಂಡ್ ಪ್ರೊಡ್ಯೂಸರಾನ್ ಇನ್‍ಫ್ಲೂಯೆನ್ಸ್ ಕರ್ನ್ ಆಪ್ಣಾಕ್ ಹೋಸ್ಟ್ ಕೆಲಾ, ಆಪುಣ್ ಸಂಸಾರಾಂತ್ ಫಾಮಾದ್ ಟಿ.ವಿ. ನಿರೂಪಕ್ ಜಾತಲೊಂ, ಕೊಂಕ್ಣಿ ಲೊಕಾ ಮುಖಾರ್ ಸೂಪರ್ ಸ್ಟಾರ್ ಜಾತಲೊಂ ಮ್ಹಣ್ ಚಿಂತುನ್‍ಂಚ್ ತಾಕಾ ಖಂಡಾಪಟ್ಟೆ ಖುಷಿ ಜಾಲ್ಲಿ, ತೊಂಡಾಂತ್ ಲಾಳ್ ಗಳ್‍ಲ್ಲಿ! ತ್ಯಾ ಸಂತೊಸಾನ್ ಎಕೆಕ್‍ಚ್ ಪೆಗ್ ಮ್ಹಣೊನ್ ಸದಾಂಚ್ಯಾಕೀ ಚಡ್ ಪೆಗ್ ಗಳ್ಯಾಕ್ ವೊತ್‍ಲ್ಲೆ ತಾಣೆಂ. ಆತಾಂ ತೆಂಚ್ ಉಲ್ಟಾ ಮಾರ್‌ಲ್ಲೆಂ. ದಿಸಾಕ್ ಪಳೆಲ್ಲಿಂ ಸಪ್ಣಾಂ ಕ್ಯಾನ್ಸಲ್ ಜಾಂವ್ಚ್ಯಾರ್ ಆಸಾತ್ ಮ್ಹಣ್ ತಾಕಾ ನಿರಾಸ್ ಜಾಲೊ. ಜಾಲ್ಯಾರೀ ನಿರ್ದೇಶಕಾಕ್ ಇಲ್ಲೆಶೆಂ ಇಂಪ್ರೆಸ್ ಕರ್ನ್ ತಾಚೊ ರಾಗ್ ನಿವಂವ್ಕ್ ಪ್ರಯತ್ನ್ ಕರ್‍ಯಾಂ ಮ್ಹಣ್,

“ಸಾರ್… ನಾನು… ನಂದು ತಪ್ಪಾಯ್ತು. ನೀವು ದೇವರು… ನಾನು ಮರ್ಲ, ನಾನೇ ಮರ್ಲ, ನಾನೊಬ್ನೇ ಮರ್ಲ… ನಂಗೆ ಹುಚ್ಚು ಸಾರ್. ಸೀರಿಯಸ್‍ನೆಸ್ಸೇ ಇಲ್ಲ… ತಪ್ಪಾಯ್ತು… ಕ್ಷಮಿಸಿ ಸಾರ್… ಇನ್ನೊಮ್ಮೆ ಚಾನ್ಸ್ ಕೊಡಿ ಸಾರ್… ಪ್ಲೀಸ್… ಟೆನ್ಶನ್… ಟೆನ್ಶನ್… ಟೆನ್ಶನ್…” ಮ್ಹಣೊನ್ ತೊ ಡೈರೆಕ್ಟರಾಚ್ಯಾ ಪಾಯಾಂಕ್ ಪಡ್ಲೊಚ್.

ಡೈರೆಕ್ಟರಾಚ್ಯಾ ಪಾಯಾಂಕ್ ಪಡೊಂಕ್ ಬಾಗ್ವಲ್ಲೊ ನಿರೂಪಕ್ ಥಂಯ್ಚ್ ವೊಮ್ತೆಂ ಪಡ್ಲೊ. ಪುಣ್ ಧರ್‌ಲ್ಲೆ ಪಾಯ್ ತಾಣೆಂ ಸೊಡುಂಕ್ ನಾಂತ್. ಘಟ್ಟ್ ಧರುನ್… “ಬಿಗ್ ಬಾಸ್… ಬಿಗ್ ಬೂಬ್ಸ್… ಬಿಗ್ ಬೂಬ್ಸ್… ಬಿಗ್ ಬಾಸ್…” ಮ್ಹಣೊನ್ ಅನಿಯಂತ್ರಿತ್ ರಿತಿನ್ ಮಂತ್ರಾಂ ಘಾಲುನ್‍ಂಚ್ ಆಸ್‍ಲ್ಲೊ.

* * * * *

ಆಪ್ಲೆ ಪಾಯ್ ಧರ್ನ್ ಪಿಶ್ಯಾಂಪರಿಂ ಪೊಜ್ಡೆಂ ಉಲವ್ನ್ ಆಸ್‍ಲ್ಲ್ಯಾ ಘೊವಾಕ್ ಪಳೆವ್ನ್ ನೀದ್ ಪಿಡ್ಡ್ಯಾರ್ ಜಾಲ್ಲಿ ಬಾಯ್ಲ್ ಘೊವಾಚೆ ಹಾತ್ ಧೊಂಕ್ಳುನ್ ಉಟ್ಲಿ ಆನಿ ತಿಣೆಂ ಘಾಲ್ಲ್ಯಾ ಖೊಟೆಕ್ ‘ಅಂತಾರಾಷ್ಟ್ರೀಯ್ ನಿರೂಪಕ್’ ಖಟ್ಲ್ಯಾರ್ ಥಾವ್ನ್ ಸಕಯ್ಲ್ ಉಸಳ್ಳೊ. ಭಿತರ್ ವಚೊನ್ ಸಾರೊಣ್ ಹಾಡ್ನ್ ತಾಕಾ ಮೆಳ್‍ಲ್ಲೆ ಮೆಳ್‍ಲ್ಲೆ ಕಡೆನ್ ‘ಪುಜಾ’ ಕರ್ತಾನಾ ತಿ ಪುರ್ಪುರೊನ್ ಆಸ್‍ಲ್ಲಿ:

“ಹಡ್ಬೊ ಖಂಚೊ… ಮೂತ್ ಪಿಯೆವ್ನ್ ಯೆತಾ ಆನಿ ಕೊಣಾ ಕೊಣಾಕ್ ಯೆಟುನ್ ಕಿತೆಂ ಕಿತೆಂ ಸಾಂಗೊನ್ ಆಸ್ತಾ ತೀನ್ ಕಾಸಾಂಚೊ… ಹಡ್ಬೊ… ಆತಾಂ ಪಳೆಲ್ಯಾರ್ ಘಾಲ್ಲೆಂ ಪಿರ್ವನಾಸ್ತಾನಾ ಮ್ಹಜೆರ್ ಬಲಾತ್ಕಾರ್ ಕರುಂಕ್ ಆಯ್ಲಾ ಹಿಜ್ಡೊ ಖಂಚೊ… ಸಕ್ಡಾಂಕ್ ಏಕ್ ಘೊವ್ ಮ್ಹಣೊನ್ ಮ್ಹಾಕಾಯೀ ಏಕ್ ಘೊವ್ ಮೆಳ್ಳಾ ಪಳೆ… ಕಂತ್ರಿ ನಾಲಾಯಕ್!”

ತಿಚಿ ಲದಿನ್ ಜಾಯ್ತೊ ವೇಳ್ ಕಂಟಿನ್ಯೂ ಜಾಲಿ. ಸಪ್ಣಾಂತ್ ‘ಬಿಗ್ ಬಾಸ್’ ಹೋಸ್ಟ್ ಕರ್ಚೊ ನಿರೂಪಕ್ ಮಾತ್ರ್ ಧರ್ಣಿರ್‌ಚ್ ಮ್ಹಣ್ಮುಣೊನ್ ಆಸ್‍ಲ್ಲೊ! ಬಿಗ್ ಬಾಸ್ ಜಾಂವ್ಕ್ ಸಪ್ಣೆಲ್ಲೊ ಬಿಗ್ ಬೂಸ್ ಜಾವ್ನ್ ಗಳ್‍ಲ್ಲೊ.

ಬರಯ್ಣಾರ್: ಬಾಲ್ತಜಾರ್, ಮಂಗ್ಳುರ್

ವಾಚ್ಪ್ಯಾಂಚ್ಯಾ ಗುಮಾನಾಕ್: ಹೆಂ ಏಕ್ ಸಂಪೂರ್ಣ್ ಕಾಲ್ಪನಿಕ್ ಪ್ರಸಂಗ್. ಫಕತ್ ಹಾಸ್ಯ್ ಬರಪ್. ವಾಚುನ್ ತುಮ್ಚೆಂ ಟೆನ್ಶನ್ ಪರಿಹಾರ್ ಜಾತೆಲೆಂ ಆನಿ ಹಾಸೊನ್ ದಾದೊಸ್ ಜಾತೆಲ್ಯಾತ್ ಮ್ಹಣ್ ಆಮ್ಚೊ ಭರ್ವಸೊ. ಸದಾಂಯ್ ಪರ್ನೆ ಜೋಕ್ಸ್ ಫಾರ್ವರ್ಡ್ ಜಾಂವ್ಚ್ಯಾ ಕಾಳಾರ್ ಹೊ ಏಕ್ ನವೊಚ್ ಒರಿಜಿನಲ್ ಜೋಕ್ – ಏಕ್ ಅಧಿಕ್, ಉತ್ತೀಮ್ ಹಾಸ್ಯ್ ಪ್ರಸಂಗ್ – ಪ್ಯೂರ್ ಕೊಮೆಡಿ!

Feedback can be sent to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

The post ಫುಲ್ ಕೊಮೆಡಿ: ಆಬ್ಳೆ, ಕೊಂಕ್ಣೆಂತ್‍ಯೀ ಸುರ್ವಾತ್ಲೆಂ ಬಿಗ್ ಬಾಸ್! appeared first on Budkulo.

ತಿತ್ಲ್ಯಾರ್ ಲೊಕಾಚಿ ಬೊಬಾಟ್ ಜಾಲಿ. ಎಕ್ಸಿಲರೇಟರಾಚೊ ಪಾಂಯ್ ಪಾಟಿಂ ಆಯಿಲ್ಲ್ಯಾನ್ ವೇಗ್ ಉಣೊ ಜಾವ್ನ್ ಗಾಡಿ ರಾವ್ಲಿ. ಬಚಾವೆಚೊ ಉಸ್ವಾಸ್ ಸೊಡ್ಲೊ ಲವಿಟಾನ್. ತಾಣೆಂ ದೆಂವ್ಚೆಂಚ್ ರಾಕೊನ್ ಆಸ್‍ಲ್ಲಿ ಲೀನಾಬಾಯ್ ಗಾಡ್ಯೆರ್ ಚಡ್ಲಿ ಆನಿ ಗಾಡಿ ಚಾಲು ಕರಿಲಾಗ್ಲಿ. ಡ್ರೈವರ್ ರೊಬಿನ್ ಆಪುಣ್ಂಚ್ ಗಾಡಿ ವ್ಹರ್ತಾಂ ಮ್ಹಣಾಲೊ. ಪುಣ್, ತಿಣೆಂ ಸೊಡ್ಲೆಂನಾ.

ತೊಂಡಾಚೊ ಘಾಮ್ ಆನಿ ಹಾತಾಚೊ ಚಿಕೊಲ್ ಪುಸುನ್ ಲವಿಟಾ ಜಮ್ಯಾಂತ್ ಲಿಪ್ಲೆಂ. ತಾಕಾ ಆಕ್ಮಾನ್ ಜಾಲ್ಲೊ. ನಿರಾಶೆನ್, ಸಲ್ವಣೆನ್ ರಾಗ್ ಆಯಿಲ್ಲೊ. ಗಾಡಿ ಸೊಡುನ್ ತಕ್ಲಿ ಉಬಾರಿಜೆ ಆಸ್‍ಲ್ಲೆಂ; ಪುಣ್ ಅಸಲಿ ಲಜ್!? ಛೆ! ತೆಂ ಆಪ್ಣಾಸ್ತಕಿಂ ಸುಸ್ಕಾರ್ಲೆಂ.

ಸ್ತ್ರೀಯಾಂನಿ ಮರ್ಣಾಚಿ ಪೇಟ್ ಕಿತ್ಯಾಕ್ ವ್ಹಾವಂವ್ಕ್ ನಜೊ ಮ್ಹಣ್ ಆಯ್ಲೆವಾರ್ ಕೊಣೆಂಗೀ ಎಕ್ಲ್ಯಾನ್ ಸವಾಲ್ ಕೆಲ್ಲೆಂ. ತಿ ಗಜಾಲ್ ವಿಶೇಸ್ ವಾದ್ ವಿವಾದಾಕ್ ಬಲಿ ಜಾಲಿ. ಚಡಾವತ್ ಸಂಘ್ ಸಂಸ್ಥ್ಯಾಂನಿ ಸ್ತ್ರೀಯಾಂಚೆಂ ಬಳ್ ವಾಡ್‍ಲ್ಲೆಂ. ಫಿರ್ಗಜೆಂತ್ ಜಾಯ್ತ್ಯೊ ಜಮಾತಿ ಜಾವ್ನ್, ಸ್ತ್ರೀಯೊ ಹ್ಯಾ ಎಕಾ ಸಂಗ್ತಿಂತ್ ಪಾಟಿಂ ಆಸಾತ್, ತಾಂತುಂನೀ ಪಾತ್ರ್ ಘೆಜೆ ಮ್ಹಣೊನ್ ಚರ್ಚಾ ಚಲ್ಲಿ.

ನವ್ಯಾನ್ ಆಯಿಲ್ಲೊ ಕಾಜಿತೊರ್ ಸ್ತ್ರೀಯಾಂಕ್ ಚಡ್ ಪ್ರೋತ್ಸಾಹ್ ದಿಂವ್ಚೊ. ತೊ ಆಯ್ಲ್ಯಾ ಉಪ್ರಾಂತ್ ಚಡ್ ಸಂಖ್ಯಾನ್ ಸ್ತ್ರೀಯೊ, ಚಲಿಯೊ ಮೆಳಾಕ್ ಭರ್ತಿ ಜಾಲ್ಲಿಂ. ಸ್ತ್ರೀಯಾಂಚ್ಯಾ ಖಂಚ್ಯಾಯ್ ವಿನತೆಕ್ ತಾಚೊ ಪಾಟಿಂಬೊ ಆಸ್ತಾಲೊ.

ಜಾಯ್ತೊ ವಾದ್, ವಿವಾದ್ ಜಾವ್ನ್ ಆಖೇರಿಕ್ ಫಿರ್ಗಜೆಂತ್ ಸ್ತ್ರೀಯಾಂಚೆಂ ಮರ್ಣ್ ಜಾಲ್ಯಾರ್, ಸ್ತ್ರೀಯಾಂನಿಚ್ ಸಗ್ಳೆಂ ಸಾಂಬಾಳ್ಚೆಂ ಮ್ಹಣ್ ನಿರ್ಣಯ್ ಕೆಲೊ. ವಿಗಾರಾಕ್ ಹ್ಯಾ ವಿಶಿಂ ಸಮಾಧಾನ್ ನಾತ್‍ಲ್ಲೆಂ. ಲೊಕಾನ್ಂಚ್ ಘೆತ್ಲೆಲ್ಯಾ ನಿರ್ಧಾರಾಕ್ ತಾಣೆಂ ಕಬ್ಲಾತ್ ದಿಲಿ.

ಸ್ತ್ರೀ ಸಂಘಾಚ್ಯಾಂಕ್ ಸಂತೊಸ್‍ಚ್ ಸಂತೊಸ್. ಅಧ್ಯಕ್ಷ್ ಸೆಲಿನ್ ಪಿಂಟೊ, ಕಾರ್ಯದರ್ಶಿ ಲೀನಾ ಸೊಜ್, ಟ್ರೆಶರರ್ ಸಿಲ್ವಿಯಾ ಫೆರ್ನಾಂಡಿಸ್ ಆನಿ ಸಾಂದ್ಯಾಂನಿ ವಿಶ್ವಕಪ್ ಜಿಕ್ಲೆಲ್ಯಾ ಪರಿಂ ಸಂಭ್ರಮ್ ಚಲಯ್ಲೊ. ಪುಣ್ ಮರ್ಣಾಕ್ ಸಂಬಂಧ್ ಜಾಲ್ಲಿ ಗಜಾಲ್ ದೆಕುನ್, ಕೊಣೆಂಗೀ ಚತ್ರಾಯ್ ದಿಲ್ಲ್ಯಾನ್, ಅಧ್ಯಕ್ಷಾಚ್ಯಾ ಘರಾ ಗುಪಿತ್ ಜಮಾತ್ ಚಲವ್ನ್, ಮರ್ಣಾವೆಳಿಂ ಕೊಣೆಂ ಕಸಲಿ ಜವಾಬ್ದಾರ್ ಘೆಂವ್ಚಿ ಮ್ಹಣ್ ಇತ್ಯರ್ಥ್ ಕೆಲೆಂ.

ತ್ಯಾ ಉಪ್ರಾಂತ್ಲ್ಯಾ ವೀಸ್ ದಿಸಾಂನಿ ತೀನ್ ಮರ್ಣಾಂ ಚಲ್ಲಿಂ, ಸಕ್ಕಡೀ ದಾದ್ಲ್ಯಾಂಚಿಂ. ಸೆಲಿನ್ ಬಾಯೆಚ್ಯಾ ಪಂಗ್ಡಾಕ್ ನಿರಾಸ್! ಆಖೇರಿಕ್, ಮಹಿನೊ ಜಾತಾ ಮ್ಹಣ್ತಾಸ್ತಾನಾ ಏಕ್ ಸ್ತ್ರೀ ಸರ್ಲಿ. ಸಾಂ ತೆರೆಜ್ ವಾಡ್ಯಾಚಿ ಫಿಲೊಮಿನಾ ಟಿಚೆರ್ ಸರ್‌ಲ್ಲಿ. ಖಬರ್ ಮೆಳ್ತಚ್ ಪಂಗ್ಡಾಚಿಂ ಸಾಂಗಾತಾ ಮೆಳ್ಳಿಂ.

ನಿಚೆವಾ ಪರ್ಮಾಣೆಂ ಸರ್ಲೆಲ್ಯಾಚ್ಯಾ ಘರಾ ಮಾಗ್ಣೆಂ ಜಾವ್ನ್ ಇಗರ್ಜೆಕ್ ಮರ್ಣ್ ವ್ಹರ್ಚ್ಯಾ ಥಾವ್ನ್ ಫೊಂಡಾ ಕಡೆನ್ ದವರ್ತಾ ಮ್ಹಣಸರ್ ಸಗ್ಳಿ ಜವಾಬ್ದಾರಿ ಸ್ತ್ರೀಯಾಂಚಿ. ಜಾಯ್ತ್ಯಾಂಕ್ ಡ್ರೈವಿಂಗ್ ಕರುಂಕ್ ಯೆತಾಲೆಂ. ಮೆಲ್ಲಿ ಕೂಡ್ ವ್ಹಾವಂವ್ಚಿ ಗಾಡಿಯೀ ಸ್ತ್ರೀಯಾಂನಿಚ್ ವ್ಹರುಂಕ್ ಯೆವ್ಜಿಲ್ಲೆಂ.

ಫಿಲೊಮಿನ್ ಟಿಚೆರಿಕ್ ದೊನೀ ಭುರ್ಗಿಂ ಚೆಡ್ವಾಂಚ್. ತಿಚೊ ಘೊವ್ ಸರ್‌ಲ್ಲೊ. ಮಾಲ್ಗಡ್ಯಾ ಧುವ್-ಜಾಂವ್ಯಾಕ್ ಆಪ್ಣಾಕೆರ್‌ಚ್ ರಾವಯಿಲ್ಲೆಂ. ದುಸ್ರೆಂ ಗಲ್ಫಾಂತ್ ಆಸ್‍ಲ್ಲೆಂ. ತಾಚೆಂ ಕುಟಮ್ ಯೆಂವ್ಚ್ಯಾ ಪಾಸತ್ ದೋನ್ ದೀಸ್ ತಿಚಿ ಕೂಡ್ ಮೊರ್ಚುವರಿಂತ್ ದವರ್‌ಲ್ಲಿ. ನಮಿಯಾರ್‌ಲ್ಲ್ಯಾ ದಿಸಾ ದೊನ್ಪಾರಾಂ ಬಾರಾಂಕ್ ಕೂಡ್ ಘರಾ ಎಂಬುಲೆನ್ಸಾರ್ ಹಾಡ್ಲಿ. ತೀನ್ ವೊರಾರ್ ಇಗರ್ಜೆಕ್ ಸುಟೊನ್, ಸಾಡೆ ತೀನಾಂಕ್ ಮೀಸ್.

ಎಂ.ಬಿ.ಎ. ಶಿಕೊನ್ ಕಾಮಾಕ್ ಲಾಗ್‍ಲ್ಲ್ಯಾ ಲವಿಟಾಲಾಗಿಂ ಐ10 ಕಾರ್ ಆಸ್‍ಲ್ಲೆಂ. ಕಾಜಿತೊರಾಚ್ಯಾ ವಿನಂತೆನ್ ತೆಂ ಸಂಘಾಕ್ ಸೆರ್ವಲ್ಲೆಂ. ಡ್ರೈವಿಂಗಾಂತ್ ಹೆಳ್ಳ್ಯಾಂ ದೆಕುನ್ ಮರ್ಣಾಚಿ ಗಾಡಿ ಆಪುಣ್‍ಚ್ ಸೊಡ್ತಾಂ ಮ್ಹಣಾಲೆಂ ತೆಂ. ಕಾರ್ಯದರ್ಶಿ ಲೀನಾನ್ ತಾಕಾ ವಿರೋಧ್ ಕೆಲ್ಲೊ. ತಿಕಾಯ್ ಡ್ರೈವಿಂಗ್ ಯೆತಾಲೆಂ. ಆಪುಣ್ ಸೀನಿಯರ್, ಆಪ್ಣಾಕ್ ತಿ ಜವಾಬ್ದಾರಿ ದೀಜೆ ಮ್ಹಣ್ ತಿಣೆಂ ಆವಾಜ್ ಕೆಲ್ಯಾರೀ, ತರ್ನಾಟ್ಯಾ ಲವಿಟಾಕ್ ಚಡ್ ಜಣಾಂಚೊ ಪಾಟಿಂಬೊ ಮೆಳ್‍ಲ್ಲೊ.

ಫಿಲು ಟಿಚೆರಿಚ್ಯಾ ಧಾಕ್ಟ್ಯಾ ಜಾಂವ್ಯಾಕ್ ಹಿ ಮಾಂಡಾವಳ್ ಪಸಂದ್ ಜಾಲಿ ನಾ. ಫಿರ್ಗಜೆಂತ್ಲ್ಯಾ ವ್ಯವಸ್ಥೆ ವಿಶಿಂ ಕಳ್ತಚ್ ಖುಶೆ ವಿಣೆಂ ತೊ ಒಪ್ಲೊ.

ಪಾವ್ಣೆ ತೀನಾಂಕ್‍ಚ್ ಪೇಟ್ ವ್ಹರ್ಚಿ ಗಾಡಿ ಘರಾ ಆಯಿಲ್ಲಿ. ಡ್ರೈವರಾನ್ ಗಾಡಿ ರಿವರ್ಸ್ ಕಾಡ್ನ್ ಮೆಟಾಂ ಕಡೆನ್‍ಚ್ ದವರ್ಲೆಲ್ಯಾನ್ ಭಿತರ್ ಥಾವ್ನ್ ಪೇಟ್ ಹಾಡ್ನ್ ದವರುಂಕ್ ಸಲೀಸ್ ಜಾಲೆಂ. ಡ್ರೈವರ್ ರೊಬಿನ್ ಗಾಡಿ ಹೆರಾಂಕ್ ದೀಂವ್ಕ್ ತಯಾರ್ ನಾತ್‍ಲ್ಲೊ ತರೀ, ಗುರ್ಕಾರಾನ್ ಸಾಂಗ್ಲೆಲ್ಯಾನ್ ದೆಂವ್ಲೊ.

ಸಕ್ಕಡ್ ಇಗರ್ಜೆಕ್ ಭಾಯ್ರ್ ಸರ್ಲೆ. ಲವಿಟಾನ್ ಗಾಡಿ ಸ್ಟಾರ್ಟ್ ಕರ್ನ್ ಗೇರ್ ಘಾಲ್ನ್ ಎಕ್ಸಿಲರೇಟರ್ ದಾಂಬ್ಲೆಂ. ಊಹುಂ! ಗಾಡಿ ಮುಖಾರ್ ವಚನಾ! ಆನಿಕೀ ದಾಂಬ್ಲೆಂ ತಾಣೆಂ. ಪುಣ್ ಗಾಡಿ ಬಿಲ್ಕುಲ್ ಹಾಲನಾ. ಆನಿಕೀ ದಾಂಬ್ತಚ್ ಗಾಡಿ ಕಾಂಪೊಂಕ್ ಸುರು ಜಾಲಿ. ಪಾಟ್ಲಿಂ ರೊದಾಂ ಘುಂವ್ತಾತ್, ಘರ್ಷಣ್ ಜಾಲ್ಲೊ ಆವಾಜ್ ಜಾವ್ನ್, ಧುಂವೊರ್ ಉಟ್ಲೊ. ರಬ್ಬರಾಚಿ ಘಾಣ್ ಉಟ್ಲಿ. ಪುಣ್ ಗಾಡಿ ಮುಖಾರ್ ಗೆಲಿನಾ!

ಆಸ್‍ಲ್ಲೆ ಥೊಡೆಚ್ ಜಣ್ ತರೀ, ವ್ಹಡ್ ಗಲಾಟೊ ಜಾಲೊ. ರೊಬಿನ್ ಧಾಂವೊನ್ ಯೇವ್ನ್ ಲವಿಟಾಕ್ ದೆಗೆಕ್ ಲೊಟುನ್ ಪಳೆತಾ ತರ್ ಕಿತೆಂ? ಗಾಡಿ ರಿವರ್ಸ್ ಗೇರಿರ್‌ಚ್ ಆಸಾ! ಲವಿಟಾನ್ ಗೇರ್ ಹಾಲವ್ನ್ ಮುಖಾರ್ ಲೊಟ್‍ಲ್ಲಿ. ಲಿವರ್ ಹಾಲ್‍ಲ್ಲೆಂ, ಪುಣ್ ಗೇರ್ ಬದ್ಲೊಂಕ್ ನಾತ್‍ಲ್ಲಿ. ಪಾಟ್ಲ್ಯಾನ್ ಉಬಾರ್ ಮೆಟಾಂ ಆಸ್ಲೆಲ್ಯಾನ್ ಬಚಾವ್. ನಾ ತರ್ ಆಪಾಯ್ ಜಾತೆಂ.

ಲವಿಟಾ ಪವರ್ ಸ್ಟೇರಿಂಗಾಚಿ ಗಾಡಿ ಸೊಡ್ನ್ ಜಾಣಾ ಆಸ್‍ಲ್ಲೆಂ. ಅಸಲ್ಯೊ ಗಾಡ್ಯೊ ಆಸ್ತಾತ್ ಮ್ಹಣ್ ತೆಂ ಕಿತೆಂ ಜಾಣಾ! ರೊಬಿನ್ ಯೇವ್ನ್ ದೆಗೆನ್ ಬಸ್ಲೊ, ಉಜ್ವ್ಯಾ ಹಾತಾನ್ ತಾಣೆಂ ಗೇರ್ ಬದ್ಲಿಲಿ. ಕಶೆಂಯ್ ಗಾಡಿ ಮುಖಾರ್ ಚಲ್ಲಿ. ಇಲ್ಲೆಶೆಂ ಮುಖಾರ್ ಗೇಟ್, ಉಜ್ವ್ಯಾಕ್ ರಸ್ತೊ. ಗೇಟಿ ಲಾಗಿಂ ಪಾವ್ತಚ್ ಸ್ಟೇರಿಂಗ್ ಘುಂವ್ಡಾಯ್ಲೆಂ ಲವಿಟಾನ್. ಕಿತೆಂ ಪಳೆತಾ ತೆಂ! ಗಾಡಿ ನೀಟ್‍ಚ್ ವೆತಾ, ಘುಂವನಾ. ಗಡ್ಬಡೆನ್ ಬ್ರೇಕ್ ದಾಂಬ್ಚ್ಯಾ ಬದ್ಲಾಕ್ ಪಾಂಯಾನ್ ಎಕ್ಸಲರೇಟರ್ ದಾಂಬ್ಲೆಲ್ಯಾನ್ ಗಾಡಿ ಉಡ್ಲಿ. ತಿತ್ಲ್ಯಾರ್ ರೊಬಿನಾನ್ ಸ್ಟೇರಿಂಗ್ ಘುಂವ್ಡಾಯ್ಲೆಲ್ಯಾನ್ ಬಚಾವ್. ನಾ ತರ್ ಗಾಡಿ ಮುಖ್ಲ್ಯಾ ವಣೊದಿಕ್ ಆಪ್ಟತಿ.

ಹೆಂ ಕಸಲೆಂ ಸ್ಟೇರಿಂಗ್ ಮ್ಹಣ್ ಲವಿಟಾ ಭಿಂಯೆಲೆಂ. ತಾಕಾ ಅವ್ಮರ್ಯಾದ್ ಭೊಗ್ಲಿ. ತಿತ್ಲ್ಯಾರ್ ತಾಕಾ ದೆಂವವ್ನ್ ಲೀನಾ ಬಾಯ್ ಡ್ರೈವಿಂಗ್ ಸಿಟಿಚೆರ್ ಬಸ್ಲಿ. ಗಾಡಿ ತಿಕ್ಕೆ ಮುಖಾರ್ ವಚೊನ್ ಆನ್ಯೇಕ್ ಘುಂವ್ಡೆ ಕಡೆನ್ ಬ್ರೇಕ್ ದಾಂಬ್ತಾನಾ ಗಾಡಿ ರಾವ್ಲಿಚ್ ನಾ. ತಿಕಾ ಆಜ್ಯಾಪ್.

ಕಿತ್ಲೆಂ ದಾಂಬ್ಲ್ಯಾರೀ ಗಾಡಿ ರಾವನಾ. ರೊಬಿನ್ ಬಗ್ಲೆನ್‍ಂಚ್ ಆಸ್ಲೆಲ್ಯಾನ್ ಕಶೆಂಯ್ ಗಾಡಿ ರಾವಯ್ಲಿ. ಬ್ರೇಕ್ ಇತ್ಲಿ ಟೈಟ್ ಆಸ್‍ಲ್ಲಿಗೀ ಲೀನಾ ಬಾಯ್ ಖರ್ಶೆಲಿ. ಹ್ಯಾ ಪಾವ್ಟಿಂ ಹೆರ್ ಕೊಣೀ ಮುಖಾರ್ ಆಯ್ಲಿಂ ನಾಂತ್. ರೊಬಿನಾನ್ ದೋನ್ ಗಾಳಿ ಯೆಟುನ್ ಗಾಡಿ ಆಪ್ಣೆಂಚ್ ಇಗರ್ಜೆಕ್ ವ್ಹೆಲಿ. ಲೀನಾ ಬಾಯೆಚ್ಯೊ ವ್ಹಾಣೊ ಗಾಡ್ಯೆರ್‌ಚ್ ಆಸ್‍ಲ್ಲ್ಯೊ!

ಮೀಸ್ ಮುಗ್ದಜೆ ತರ್ ಹಿ ಗಜಾಲ್ ಸಕ್ಡಾಂಕ್ ಕಳೊನ್ ಜಾಲ್ಲಿ. ಲವಿಟಾಕ್ ಪಳೆವ್ನ್ ಸಕ್ಕಡ್ ಹಾಸ್ತಾಲಿಂ. ಲೀನಾ ಬಾಯ್ ವ್ಹಾಣೊ ದಿಸನಾಂತ್ ಮ್ಹಣ್ ಘರಾ ವಚೊನ್ ದುಸ್ರ್ಯೊಚ್ ವ್ಹಾಣೊ ಘಾಲ್ನ್ ಆಯಿಲ್ಲಿ. ಗಾಡಿ ಸೊಡ್ತಾನಾ ಜಾಲ್ಲಿ ಘುಸ್ಪಡ್ ಲೊಕಾಕ್ ಕಳೊನ್ ಇಗರ್ಜೆಂತ್‍ಚ್ ಲೋಕ್ ಪುಸ್ಪುಸ್ತಾಲೊ.

ಫಿಲು ಟಿಚೆರಿಚ್ಯಾ ದುಸ್ರ್ಯಾ ಜಾಂವ್ಯಾಕ್ ಕಠಿಣ್ ರಾಗ್ ಆಯಿಲ್ಲೊ. ವಿಗಾರಾಕ್ ತಾಣೆಂ ದೂರ್ ದಿಲೆಂ. ಪುಣ್ ವಿಗಾರಾನ್ ಕಿತೆಂಚ್ ಜಾಪ್ ದಿಲಿನಾ. ಆತಾಂ ಪೇಟ್ ಇಗರ್ಜೆ ಥಾವ್ನ್ ಫೊಂಡಾಕ್ ವ್ಹರುಂಕ್ ಆಸ್‍ಲ್ಲಿ. ಸಂಘಾಚ್ಯೊ ಸ್ತ್ರೀಯೊ ಆನಿ ಹೆರ್ ಸ್ತ್ರೀಯೊ ಪೇಟ್ ವ್ಹಾವಂವ್ಕ್ ರಾಕ್ತಾಲಿಂ.

ಲೋಕ್ ಆಖೇರಿಚಿ ದೀಶ್ಟ್ ಘಾಲ್ನ್ ವೆತಚ್ ಸ್ತ್ರೀಯಾಂನಿ ಪೇಟ್ ಉಕಲ್ಲಿ. ಪೇಟ್ ವ್ಹಾವವ್ನ್ ಸ್ತ್ರೀಯೊ ದಾರ್ವಟ್ಯಾಲಾಗಿಂ ಪಾವ್ಲ್ಯೊ. ಮೆಟಾಂ ದೆಂವ್ತಾನಾ ತಿಕ್ಕೆ ತ್ರಾಸ್ ಜಾಲೆ. ಮುಖ್ಲ್ಯಾನ್ ತರ್ನಾಟಿಂಚ್ ಆಸ್‍ಲ್ಲಿಂ. ತಿಂ ಮೆಟಾಂ ದೆಂವ್ತಾನಾ ಪೇಟ್ ತಾಂಚೆ ಕುಶಿನ್ ಮಾಲ್ವಲಿ. ಪಾಟ್ಲ್ಯಾನ್ ಆಸ್‍ಲ್ಲ್ಯೊ ಸ್ತ್ರೀಯೊ ಲಾಂಬ್ ಆಸ್‍ಲ್ಲ್ಯೊ. ಕಶ್ಟ್ ಜಾಲೆ ತರೀ, ಹುಮೆದ್ ಆಸ್ಲೆಲ್ಯಾನ್ ಸಾಂಬಾಳ್ಳೆಂ. ತಿಕ್ಕೆ ಮುಖಾರ್ ಪಾವ್ತಚ್ ಹೆರ್ ಸ್ತ್ರೀಯಾಂನಿ ಪೆಟೆಕ್ ಹಾತ್, ಖಾಂದ್ ದೀಂವ್ಕ್ ಸುರು ಕೆಲೆಂ. ಗಡ್ದಿ ಚಡ್ಲಿ.

ತಿತ್ಲ್ಯಾರ್ ದೊಗಿ ಸ್ತ್ರೀಯೊ ಪೆಟೆ ಪಂದಾ ಪಡ್ಲ್ಯೊ. ಹೈಹೀಲ್ಡ್ ಘಾಲ್ಲೆಲ್ಯಾನ್ ಪಾಟ್ಲ್ಯಾ ಸ್ತ್ರೀಯೆಚ್ಯಾ ಪಾಂಯಾಚೆರ್ ಗುಡ್ಡಾಯಿಲ್ಲ್ಯಾನ್ ದೊಗಾಂಯ್ ಪಾಂಯ್ ಚುಕೊನ್ ಪಡ್ಲಿಂ. ತ್ಯಾ ಗಡ್ಬಡೆಂತ್ ಹೆರ್ ದೊಗಾಂ ದಾಂಟೊನ್ ಲಕ್ತಾನಾ ಪೇಟ್ ಎಕಾ ಕುಶಿಕ್ ಮಾಲ್ವಲಿ. ಫಿಲು ಟಿಚೆರ್ ಬಾರೀಕ್ ಜಿವಾಚಿ, ಜಡಾಯ್ ಚಡ್ ನಾತ್ಲೆಲ್ಯಾನ್ ಪೇಟ್ ಕಶೆಂಯ್ ಶಾಬೀತ್ ಉರ್ಲಿ.

ಸಿಮಿಸ್ತ್ರೆಕ್ ಚಡೊಂಕ್ ಮೆಟಾಂ ಆಸ್‍ಲ್ಲಿಂ. ಲೋಕ್ ಚತ್ರಾಯ್ ಸಾಂಗ್ತಾಲೊ. ಅಧ್ಯಕ್ಷಿಣೆನ್ ಡೈರೆಕ್ಷನ್ ದಿಲೆಂ. ಜಾಗ್ರುತ್ಕಾಯೆನ್ ಪೇಟ್ ವ್ಹಾವವ್ನ್ ಮೆಟಾಂ ಚಡ್ಲ್ಯೊ ಸರ್ವ್ ಸ್ತ್ರೀಯೊ. ತಿತ್ಲ್ಯಾರ್ ಸಾಂ ಜುಜೆ ವಾಡ್ಯಾಚ್ಯಾ ತೆರೆಜ್ ಬಾಯೆಕ್, ಇಗರ್ಜೆ ವಾಡ್ಯಾಚ್ಯಾ ಮೇರಿ ಲೋಬೊಕ್ ದೊಳ್ಯಾಂಕ್ ಕಾಳೊಕ್ ಆಯಿಲ್ಲೊ. ತಾಂಕಾಂ ದೊಗಾಂಯ್ಕಿ ಹೈ ಶುಗರ್. ತಿಂ ಮೆಟಾಂ ಉತರ್ತಚ್ ಕುಶಿಕ್ ವಚೊನ್ ಬಸ್ಲಿಂ. ತಿತ್ಲ್ಯಾರ್ ಹೆರ್ ಥೊಡ್ಯಾಂಕ್ ಆಪ್ಲ್ಯೊ ದುಕಿ, ಪಿಡಾ ಉಗ್ಡಾಪ್ಯೊ ಜಾಲ್ಯೊ.

ಸಿಮಿಸ್ತ್ರೆಂತ್ಲ್ಯಾನ್ ಫೊಂಡಾ ಸರ್ಶಿಂ ಪಾವೊಂಕ್ ಕಠಿಣ್ ತ್ರಾಸ್ ಜಾಲೆ. ಸಮಾಧಿ, ಕಾಂಟಿ ಝಡಾಂಕ್ ಆಪ್ಟತಾನಾ, ಸ್ತ್ರೀಯಾಂಕ್ ಹೆಂ ಕಾಮ್ ನಾಕಾ ಆಸ್‍ಲ್ಲೆಂ ಮ್ಹಣ್ ಭೊಗ್ಲೆಂ. ಮತಿಂತ್‍ಚ್ ಪುರ್ಪುರೊನ್ ಫೊಂಡಾ ಸರ್ಶಿನ್ ಪಾವ್ಲಿಂ.

ಫೊಂಡಾ ಕುಶಿನ್ ರಾವೊಂಕ್ ಸಾಧ್ಯ್ ನಾತ್ಲೆಲ್ಯಾನ್ ತೀನ್ ಪೊಂತಾಂನಿ ಪೇಟ್ ದೆವಂವ್ಕ್ ತಯಾರಿ ಜಾಲಿ. ತಿತ್ಲ್ಯಾರ್ ಏಕ್ ಸ್ತ್ರೀ ಬೊಬಾಟುನ್ ಹುಳ್ವುಳ್ಳಿ. ತಿಚ್ಯೊ ಹೈ ಹೀಲ್ಡ್ ವ್ಹಾಣೊ ಜಿವ್ಯಾ ಮಾತ್ಯೆಂತ್ ರೊಂಬ್ಲೆಲ್ಯಾನ್ ತಿಕಾ ಪಾಂಯ್ ಉಕ್ಲುಂಕ್ ಜಾಯ್ನಾತ್‍ಲ್ಲೆಂ. ಥೊಡ್ಯಾಂನಿ ಹಾತ್ ಸೊಡ್ತಾನಾ ಪೇಟ್ ಉಕಲ್ನ್ ಧರ್ಲೆಲ್ಯಾಂಕ್ ಜೀವ್ ವೆಚ್ಯಾ ತಿತ್ಲಿ ಜಡಾಯ್! ತ್ಯಾ ವಯ್ರ್ ಲೊಕಾಚಿ ಬೊಬಾಟ್.

ಪಾಂಯಾಚ್ಯಾ ಕುಶಿನ್ ಪೇಟ್ ಸಕಯ್ಲ್ ಕೆಲಿ. ತೆದಾಳಾ ತಕ್ಲಿ ಆಸ್‍ಲ್ಲ್ಯಾ ಕುಶಿನ್ ಜಡಾಯ್ ಚಡ್ಲಿ. ದೊಗಾ ತೆಗಾಂಕ್ ಹಾತ್ ಚುಕ್ಲೊಚ್. ಪೇಟ್ ಧಡಲ್ಲ್ ಕರ್ನ್ ಮಾಲ್ವೊನ್ ಪಡ್ಲಿ. ಪಳೆಜೆ ಜಾಲ್ಯಾರ್ ಪೆಟೆಂತ್ಲಿ ಫಿಲೊಮಿನ್ ಟಿಚೆರಿಚಿ ಕೂಡ್ ಪೆಟೆ ಥಾವ್ನ್ ಅರ್ಧಿ ಭಾಯ್ರ್!

ಕಿತೆಂ ಪುಣಿ ಗಡ್ಬಡ್ ಜಾಯ್ತ್ ಮ್ಹಣ್ ತೆದೊಳ್‍ಚ್ ತಯಾರ್ ಆಸ್‍ಲ್ಲ್ಯಾ ದಾದ್ಲ್ಯಾಂನಿ ಕೂಡ್ ಧರ್ನ್ ಪೆಟೆಂತ್ ಘಾಲಿ. ತಿತ್ಲ್ಯಾರ್ ಎಕೆಕ್‍ಚ್ ಸ್ತ್ರೀಯೊ, ಚಲಿಯಾಂನಿ ಥಂಯ್ ಥಾವ್ನ್ ಪಾಂಯ್ ಪಾಟಿಂ ಕಾಡ್‍ಲ್ಲೆ.

ಮರ್ಣ್ ಜಾಲ್ಲ್ಯಾ ಉಪ್ರಾಂತ್ಲ್ಯಾ ಆಯ್ತಾರಾ ಆನ್ಯೇಕ್ ಜಮಾತ್ ಚಲ್ಲಿ. ಮರ್ಣಾಂ ವೆಳಾರ್ ಪೇಟ್ ವ್ಹಾವಂವ್ಚಿ ಜವಾಬ್ದಾರಿ ದಾದ್ಲ್ಯಾಂಚಿಚ್ ಮ್ಹಣ್, ಆದ್ಲ್ಯಾ ನಿರ್ಣಯಾಕ್ ತಿದ್ವಣ್ ಕೆಲ್ಲಿ.

ಕಳವ್ಣಿ: ಹೊ ವಿನೋದ್ ಸಕಾಳಿಕ್.ಕೊಮ್ ವೆಬ್‍ಸೈಟಿರ್ ಪ್ರಕಟ್ ಜಾಲಾ.

ತುಮ್ಚಿ ಅಭಿಪ್ರಾಯ್, ಸಲಹಾ ವಾ ಸೂಚನಾಂ ಇಮೈಲ್ ಕರಾ:

budkuloepaper@gmail.com

The post ಸ್ತ್ರೀಯಾಂನಿ ಪೇಟ್ ವ್ಹಾವಯ್ಲಿ! appeared first on Budkulo.

ದೀಸ್ ವೆತಾಂ ವೆತಾಂ ಹ್ಯಾ ಸರ್ಕಾರಾಚಿ ತಕ್ಲಿ ಫಿರ್ವಲ್ಯಾ ಮ್ಹಳ್ಳೆಂ ವೆವೆಗ್ಳೆ ಸಂದರ್ಭಾಂನಿ, ಸಂಗ್ತಿಂನಿ ರುಜು ಜಾಲಾಂ. ಆನಿ ಆತಾಂ ತ್ಯಾ ವೊಳಿಂತ್ ಆನ್ಯೇಕ್ ಭಾಗ್ಯಾಚಿ ಮೆಳವ್ಣಿ ಜಾಲ್ಯಾ.

ತಿಚ್ ಮದಿರಾ ಭಾಗ್ಯ!

ಸಬಾರ್ ತೆಂಪಾ ಥಾವ್ನ್ ಸಿದ್ಧರಾಮಯ್ಯ ಸರ್ಕಾರಾಚ್ಯಾ ಕುಂದ್ಯಾಂ ಆನಿ ವಣದಿಂ ಥಾವ್ನ್ ಹಿ ಗಜಾಲ್ ಆಯ್ಕೊಂಕ್ ಮೆಳ್ತಾಲಿ. ಆತಾಂ ತಿ ಅಧಿಕೃತ್ ಮ್ಹಣ್ ಆಯ್ಚ್ಯಾ ಉದಯವಾಣಿ ದಿಸಾಳ್ಯಾರ್ ಪ್ರಕಟ್ ಜಾಲಾಂ. ಹಿ ಖಬರ್ ಸಂಪೂರ್ಣ್ ಸಾರ್ಕಿ ಮ್ಹಣೊಂಕ್ ಜಾಯ್ನಾ ಮ್ಹಣ್ಯೆತ್ ತರೀ, ಭೆಶ್ಟೆಂ ವಾರ್‍ಯಾರ್ ಥಾವ್ನ್ ಅಸಲ್ಯೊ ಖಬ್ರೊ ಉದೆನಾಂತ್ ಮ್ಹಳ್ಳೆಂ ವಿಸ್ರನಾಯೆ.

ಸರ್ಕಾರಾಕ್ ದುಡ್ವಾಚಿ ಗರ್ಜ್ ಆಸಾ. ಥೊಡ್ಯಾಚ್ ದಿಸಾಂ ಆದಿಂ ಸರ್ಕಾರಾಚಿ ಆರ್ಥಿಕ್ ಪರಿಸ್ಥಿತಿ ಬರಿಚ್ ಆಸಾ ಮ್ಹಣ್ ಸಿ.ಎಂ. ಸಿದ್ಧರಾಮಯ್ಯನ್ ಪರ್ಗಟ್ಲಾಂ. ಬೋವ್ಶಾ ತಾಚ್ಯಾ ತ್ಯಾ ಆತ್ಮವಿಶ್ವಾಸಾಕ್ ಆನಿ ಹ್ಯಾ ಖಬ್ರೆಕ್ ಸಂಬಂಧ್ ಆಸಾ ಮ್ಹಣ್ ದಿಸ್ತಾ.

ಯೆಂವ್ಚ್ಯಾ ಆರ್ಥಿಕ್ ವರ್ಸಾಂತ್ (2016-17) ದೇಡ್ ಹಜಾರ್ (1500) ನವ್ಯಾನ್ ಸೊರೊ ವಿಕ್ಚಿಂ ಲೈಸೆನ್ಸಾಂ ದೀವ್ನ್ ಬರಾಬರ್ ಆದಾಯ್ ಜೊಡುಂಕ್ ಸರ್ಕಾರಾನ್ ಯೆವ್ಜಿಲಾಂ ಖಂಯ್. ಮ್ಹಳ್ಯಾರ್ ವೈನ್ ಶೊಪಾಂ, ಬಾರಾಂ ಆನಿ ವಿಲಾಸಿ ರೆಸೊರ್ಟಾಂಚಿ ಸುರ್ವಾತ್ ಜಾತಾ.

ತೆಂಚ್ ಮದ್ಯ ಭಾಗ್ಯ. ಹಾಕಾ ವೆವೆಗ್ಳ್ಯಾ ಭಾಸಾಂನಿ ಅಮಲು ಭಾಗ್ಯ, ಬಾಟ್ಲಿ ಭಾಗ್ಯ, ಗಂಗಸರ ಭಾಗ್ಯ, ಟೈಟ್ ಭಾಗ್ಯ, ಪಿಡ್ಕ್ ಭಾಗ್ಯ, ಕಿಕ್ ಭಾಗ್ಯ ಮ್ಹಣ್ ವೊಲಾವ್ಯೆತ್. ಆಮ್ಚ್ಯಾ ಗಾಂವಾಂತ್ ಸೊರೊ ಪಿಯೆವ್ನ್ ತಕ್ಲಿ ಆನಿ ಕೂಡ್ ಬಾಗ್ವೊನ್, ಮ್ಹಳ್ಯಾರ್ ನಿಯಂತ್ರಣ್ ಚುಕೊನ್, ಚಲ್ತೆಲ್ಯಾಂಕ್ ‘ಡಿಂಗ್’ ಜಾಲಾ, ‘ಮಾಮ್’ ಜಾಲಾ ಮ್ಹಣ್ತಾತ್ ನೆ? ತಶೆಂ ಆಮಿ, ಆಮ್ಚ್ಯಾ ಸರ್ಕಾರಾಚ್ಯಾ ಹ್ಯಾ ಯೋಜನಾಕ್ ಡಿಂಗ್ ಭಾಗ್ಯ ಮ್ಹಣೊನ್ ಆಪವ್ಯೆತ್!

ಬೋವ್ಶಾ ಹೊ ಸರ್ಕಾರ್, ಮ್ಹಣ್ಜೆ ಮುಖೆಲ್ ಮಂತ್ರಿ ಸಿದ್ಧರಾಮಯ್ಯ ಆನಿ ತಾಚೊ ಪಂಗಡ್, ಕೊಂಗ್ರೆಸಾಕ್ ಕರ್ನಾಟಕಾ ಥಾವ್ನ್ ಆರ್ಬಿ ದರ್ಯಾಕ್ ಕಾಡ್ನ್ ಉಡಂವ್ಕ್ ಪ್ರಯತನ್ ಕರುನ್ ಆಸಾಗೀ ಮ್ಹಣ್ ದುಬಾವ್ ಜಾತಾ. ವೆಚೊ ಕಾಳ್ ವಾ ಪೋಪಿ ಕಾಲ ಮ್ಹಣ್ತಾತ್ ನೆ, ತಶೆಂ ಹ್ಯಾ ಸರ್ಕಾರಾನ್ ಕಾಡ್‍ಲ್ಲಿಂ ಮೆಟಾಂ ಪಾರ್ಕಿಲ್ಯಾರ್ ಹ್ಯಾ ದುಬಾವಾಕ್ ರಾಜಾಂವ್ ಆನಿ ಸಾಕ್ಸ್ ಮೆಳ್ತಾ. ಆಯ್ಲೆವಾರ್ ಶಾಂತೆನ್ ಆಸ್‍ಲ್ಲ್ಯಾ ರಾಜ್ಯಾಂತ್ ಕೋಮು ದಂಗೊ ಉಬ್ಜೊಂಕ್ ಹ್ಯಾಚ್ ಸರ್ಕಾರಾನ್ ನ್ಹಯ್ಗಿ ಆವ್ಕಾಸ್ ಕರ್ನ್ ದಿಲ್ಲೊ – ಟಿಪ್ಪು ಜಯಂತಿ ಆಚರಣ್ ಕರುನ್!?

ಅಸಲೆ ಜಾಯ್ತೆ ದಾಖ್ಲೆ ಆಸಾತ್, ಜೆ ಆಖೇರಿಕ್ ಕೊಂಗ್ರೆಸಾಕ್ ನಿರ್ನಾಮ್ ಕರುಂಕ್ ಸಕ್ತಾತ್ ತೆಂ ಖಂಡಿತ್ ಮ್ಹಣ್ ಪಾತ್ಯೆವ್ಯೆತ್. ತ್ಯಾ ವಿಶಿಂ ಆನ್ಯೇಕ್ ಪಾವ್ಟಿಂ ಪ್ರಸ್ತಾಪ್ ಕರ್ತಾಂ.

ಕ್ರಿಸ್ತಾಂವಾಂಕ್ ಉದೆಲಾ ಭಾಂಗ್ರಾಳೊ ಆವ್ಕಾಸ್, ಭವ್ಯ್ ಫುಡಾರ್!

ಆಮ್ಚ್ಯಾ ಕ್ರಿಸ್ತಾಂವಾಂನಿ ಹ್ಯಾ ಡಿಂಗ್ ಭಾಗ್ಯ ಯೋಜನಾಚೊ ಫಾಯ್ದೊ ಜೊಡ್ಯೆತ್. ಪೊರ್ಬುನಕುಲು ಪರ್ಪುನಕುಲು ಮ್ಹಣೊನ್ ಕಶೆಂಯ್ ಬಿಲ್ಲೊ ಆಸಾ, ಆತಾಂ ಪೊರ್ಬುನಕುಲು ಪರ್ಪವ್ನಕುಲು ಮ್ಹಣೊನೀ ಟೈಟಲ್ ಘೆಂವ್ಕ್ ಆವ್ಕಾಸ್ ಆಸಾ.

ದೇಡ್ ಹಜಾರ್ ನವಿಂ ಸೊರ್‍ಯಾ ದುಕಾನಾಂ ಉಗ್ತೆ ಕೆಲ್ಲ್ಯಾನ್ ಸರ್ಕಾರಾಕ್ ಆದಾಯ್ ಮಾತ್ರ್ ನ್ಹಯ್, ಜಾಯ್ತ್ಯಾಂಕ್ ಕಾಮಾಂಚೆ ಆವ್ಕಾಸ್‍ಯೀ ಮೆಳ್ತಾತ್ ಮ್ಹಣ್ ಸರ್ಕಾರ್ ಕೊಲರ್ ಉಕಲ್ನ್ ಸಾಂಗೊನ್ ಆಸಾ. ನಿರ್ದಿಶ್ಟ್ ಜಾತಿಂಕ್ ಅಮಾನತ್ ಭಾಗ್‍ಯೀ ಆಸಾ ಖಂಯ್. ಹಿ ಆಮ್ಕಾಂ ಪೊರ್ಬುಂಗೆಲ್ಯಾಂಕ್ ಭೋವ್ ಖುಶೆಚಿ ಗಜಾಲ್‍ಚ್!

ಆತಾಂ ಆಮ್ಚೆಂ ರಾಜಕೀಯ್ ಬಳ್ ದೊಡ್ತೆಂ, ತಿದೊಡೆಂ ಜಾಲಾಂ. ಮಂಗ್ಳುರಾಂತ್ ಕ್ರಿಸ್ತಾಂವಾಂಚೆ ಫುಡಾರಿ ವೆವೆಗ್ಳ್ಯಾ ಹುದ್ದ್ಯಾಂನಿ ಸೊಭ್ತಾತ್. ಆಮ್ಚೆಚ್ ಪೊರ್ಬುಂಗೆಲೆ ವಿಧಾನಸೌಧಾಚ್ಯಾ ದೊನೀ ಘರಾಂನಿ ಕಾರ್ಬಾರಾಂ ಚಲಯ್ತಾತ್. ಎಂಎಲ್‍ಎ ಲೊಬಾಮ್ (ಜೆ.ಆರ್. ಲೋಬೊ) ಆನಿ ಎಂಎಲ್ಸಿ ಸೊಜಾಮ್ (ಐವನ್ ಡಿಸೋಜ) ಸಿದ್ಧರಾಮಯ್ಯಾಕ್ ಲಾಗ್ಶಿಲ್ಯಾನ್ ಜಾಣಾಂ ಆಸ್‍ಲ್ಲೆಚ್. ಕ್ರಿಸ್ತಾಂವ್ ಸಮುದಾಯಾಕೀ ಹ್ಯಾ ಡಿಂಗ್ ಭಾಗ್ಯಾಂತ್ ಭರ್ಪೂರ್ ರಿಸರ್ವೇಶನ್ ಮೆಳ್ಚೆಪರಿಂ ಆಮ್ಚ್ಯಾ ಹ್ಯಾ ಮುಖೆಲ್ಯಾಂಕ್ ವತ್ತಾಯ್ ಕರ್‍ಚೆಂ ಬರೆಂ.

ಕ್ರಿಸ್ತಾಂವಾಂಚೊ ಸಂಖೊ ರಾಜ್ಯಾಂತ್ 2% ಮ್ಹಳ್ಯಾರೀ, 30 ಲೈಸೆನ್ಸಾಂ ಕ್ರಿಸ್ತಾಂವಾಂಕ್ ಮೆಳಜೆ. ಕ್ರಿಸ್ತಾಂವಾಂಚೆಂ (ಪಿಯೆಂವ್ಚ್ಯಾಂತ್?) ಸಾಧನ್ ತುಕ್ಲ್ಯಾರ್ ಖಂಡಾಪಟ್ಟೆ ಲೈಸೆನ್ಸಾಂ ಕ್ರಿಸ್ತಾಂವಾಂಕ್ ದೀಜೆ!! ಸ್ಪರ್ಧ್ಯಾರ್ ಜಾಯ್ತ್ಯೊ ಹೆರ್ ಜಾತಿ ಆಸ್ಲೆಲ್ಯಾನ್, 30 ಲೈಸೆನ್ಸಾಂ ಉಣೆಂ ನ್ಹಯ್!

ಕ್ರಿಸ್ತಾಂವಾಂನಿ, ತಾಂತುಂಯ್ ಪೊರ್ಬುಂಗೆಲ್ಯಾಂನಿ ಬಾರಾಂ ಸುರ್ವಾತ್ಲ್ಯಾರ್ ಆಖ್ಖ್ಯಾ ಸಮುದಾಯಾಕ್ ಫಾಯ್ದೊ ಆಸಾ. ದುಕೊರ್ ಪೊಸ್ತೆಲ್ಯಾಂಕ್, ಮಾರ್ತೆಲ್ಯಾಂಕ್ ತಶೆಂಚ್ ರಾಂದ್ವಯ್ ಮ್ಹಣ್ತಾನಾ ಕೃಷಿ ಚಡ್ತೆಲಿ, ಎಕಾಮೆಕಾ ಪೂರಕ್ ವಾಡಾವಳ್ ಜಾವ್ನ್ ಕುಟ್ಮಾಂ ಗ್ರೇಸ್ತ್ ಜಾತೆಲಿಂ. ಕ್ರಿಸ್ತಾಂವ್ ಕುಟ್ಮಾಂ ಗ್ರೇಸ್ತ್ ಜಾಲ್ಯಾರ್ ಫಿರ್ಗಜಾಂಕೀ ಭರ್ಪೂರ್ ಆದಾಯ್. ಯಾಜಕಾಂನಿ, ಬಿಸ್ಪಾನ್ ಪರ್ದೆಶಿ ಗಾಂವಾಂಕ್, ದೇಶಾಂಕ್ ವಚೊನ್ ಮಾಗ್ಚೆಂ ಉಣೆಂ ಕರ್ಯೆತ್ ವಾ ರಾವವ್ಯೆತ್. ಗಾಂವ್ಚೊ ಲೋಕ್ ಉದ್ಧಾರ್ ಜಾಲೊ ಮ್ಹಳ್ಯಾರ್, ಫಿರ್ಗಜಾಂಕ್ ಆನಿ ದಿಯೆಸೆಜಿಕ್ ಕಾಂಟ್, ಕುರ್ಪೊಣೆಂನಿ ಕಾಣಿಕ್, ದಾನ್ ‘ಹೊರೆ ಕಾಣಿಕೆ’ ರುಪಾರ್‌ಚ್ಚ್ ಹಾಡವ್ಯೆತ್.

ದೆಕುನ್, ಪೊರ್ಬು ಮುಖೆಲ್ಯಾಂನಿ, ಸಂಘಟನಾಂನಿ, ಏಜೆಂಟಾಂನಿ, ಧಾರ್ಮಿಕಾಂನಿ ಆನಿ ಲಾಯಿಕಾಂನಿ ಸಾಂಗಾತಾ ಮೆಳೊನ್, ತಾಳೊ ಉಟವ್ನ್, ಬಳ್ ದಾಕವ್ನ್, ಎಕ್ವಟ್ ಸಾಬೀತ್ ಕರ್ನ್ ಸರ್ಕಾರಾ ಥಾವ್ನ್ ಕ್ರಿಸ್ತಾಂವಾಂಕ್ ಜೊಕ್ತ್ಯಾ ಪ್ರಮಾಣಾರ್ ಸೊರೊ ವಿಕ್ಚಿಂ ಲೈಸೆನ್ಸಾಂ ಮೆಳಶೆಂ ವಾವ್ರಿಜಾಯ್. ನಾ ತರ್ ಹೆರ್ ಜಾತಿ, ಧರ್ಮಚ್ಯಾಂನಿ (ಅಧರ್ಮಿಂನಿಯ್ ಆಸ್ಯೆತ್!?) ಸಕ್ಕಡ್ ಲೈಸೆನ್ಸಾಂ ಆಪ್ಣಾವ್ನ್ ವೈನ್‍ಶೊಪಾಂ, ಬಾರಾಂ ಸುರ್ವಾತುನ್ ಕ್ರಿಸ್ತಾಂವಾಂನಿ ಫಕತ್ ತಾಂಚೆ ಗಿರಾಯ್ಕಿ ಜಾವ್ನ್ ಉರಜೆ (ಪಡಜೆ, ಪಿಯೆಲ್ಯಾ ಉಪ್ರಾಂತ್ ಆನಿ ಕಿತೆಂ ಜಾತಾ?) ತಿತ್ಲೆಂಚ್. ಮಾಗಿರ್ ಪೊರ್ಬುನಕುಲು ಪರ್ದ್ ಬೂರುನಕುಲು ಮ್ಹಣ್ ಲೊಕಾನ್ ಪ್ರಶಸ್ತಿ, ಬಿರುದಾಂ ದೀಜೆ ಪಡತ್.

ಡಿಂಗ್ ಭಾಗ್ಯ – ಕ್ರಿಸ್ತಾಂವಾಂಕ್ ಏಕ್ ಆವ್ಕಾಸ್. ಫಕತ್ ಡಿಂಗ್ ಜಾವ್ನ್ ಬಸ್ಚ್ಯಾಕೀ, Entrepreneurship ಸಾಬೀತ್ ಕರುಂಕ್ ಹೊ ಏಕ್ ಭಾಂಗ್ರಾಳೊ ಸುವಾಳೊ. ಕ್ರಿಸ್ತಾಂವ್ ಲೋಕ್, ಪ್ರತ್ಯೇಕ್ ಜಾವ್ನ್ ತರ್ನಾಟೆ ಉದ್ಯಮ್ ಚಲಂವ್ಕ್ ಪಾಟಿಂ ಸರ್ತಾತ್ (ಪಿಯೆಂವ್ಚ್ಯಾಕ್ ನ್ಹಯ್!) ಮ್ಹಣ್ ಕೆದ್ನಾಂಯ್ ಸಕ್ಕಡೀ ದುರ್ಸತಾತ್. ಕ್ರಿಸ್ತಾಂವ್ ಉದ್ಯಮಿ, ವೃತ್ತಿಪರಾಂಚೆಂ ಏಕ್ ಮಾತ್ರ್ ಸಂಘಟನ್ ‘ರಚನಾ’ ಕ್ರಿಸ್ತಾಂವಾಂ ಮಧೆಂ ಉದ್ಯಮ್, ವೆವಹಾರ್ ಚಡೊಂಕ್ ವಾಂವ್ಟ್ ಕಾಡ್ತಾ. ಆತಾಂ ಸರ್ಕಾರಾನ್ ಅಸಲೊ ಏಕ್ ಅದ್ಭುತ್ ಆವ್ಕಾಸ್ ದಿಲಾ. ಸಕ್ಡಾಂನಿ ಸಾಂಗಾತಾ ಮೆಳೊನ್ ಹಾತಾಕ್ ಹಾತ್ ಧರ್ನ್ (ಗ್ಲಾಸ್ ನ್ಹಯ್) ವಾವುರ್ಲ್ಯಾರ್ ಕ್ರಿಸ್ತಾಂವಾಂ ಮಧೆಂ ಜಾಯ್ತೆ ‘ಡಿಂಗ್ ಮಾಸ್ಟರ್ಸ್’ ವಾ ‘ಡಿಂಗ್‍ಮೆನ್’ ವಾ ‘ಡಿಂಗೋದ್ಯಮಿ’ ವಾ ‘ಡಿಂಗ್ ಡೈರೆಕ್ಟರ್ಸ್’ ರುತಾ ಕರ್ಯೆತ್. ಮುಖ್ಲ್ಯಾ ದಿಸಾಂನಿ ಕ್ರಿಸ್ತಾಂವ್ ಬಾರ್ ಎಸೋಸಿಯೇಶನ್, ಪೊರ್ಬು ವೈನ್ ಮರ್ಚೆಂಟ್ಸ್ ಮ್ಹಳ್ಳಿಂ ಸಂಘಟನಾಂ ಬಾಂಧುನ್ ಸಮುದಾಯಾಚ್ಯಾ ಸಕ್ಕಡ್ ಲೊಕಾ ಪಾಸತ್ ವಾವ್ರುಂಕ್, ಸೆವಾ ದೀಂವ್ಕ್ ಆವ್ಕಾಸ್ ಆಸಾ (ಫಕತ್ ಸೊರೊ ವಿಕುಂಕ್ ನ್ಹಯ್!).

ಫಿರ್ಗಜೆ, ವಾರಾಡ್ಯಾ ಮಟ್ಟಾರ್ ಲಾಯಿಕಾಂನಿ ಕ್ರಿಸ್ತಾಂವಾಂಚ್ಯಾ ಫಲಾಣ್ಯಾ ವೈನ್‍ಶೊಪಾಂತ್ ವಾ ಬಾರಾಂತ್‍ಚ್ ವ್ಯಾರ್ ಕರಿಜಾಯ್ ಮ್ಹಣ್ ‘ಪರಿಪತ್ರ್’ ಧಾಡ್ಲ್ಯಾರ್ ಆನಿಕೀ ಬರೆಂ. ಹ್ಯಾ ವರ್ವಿಂ ಸಮುದಾಯಾಚಿ ಸಮಗ್ರ್ ಅಭಿವೃದ್ಧಿ ಜಾತೆಲಿ. ದುಕ್ರಾಂಕ್, ಕುಂಕ್ಡಾಂಕ್‍ಯೀ ವಾಡಾ ಚಡಾ ಸಂಸಾರ್ ಭರಾ ಸ್ಕೀಮಾಚೊ ವಾಂಟೊ ಕರ್ಯೆತ್!

ಕ್ರಿಸ್ತಾಂವಾಂನಿ ಕೊಂಗ್ರೆಸ್ ಪಾಡ್ತಿಕ್ ದೊಳೆ ಧಾಂಪುನ್ ವೋಟ್ ದಾಂಬ್‍ಲ್ಲ್ಯಾನ್ ಕಿತ್ಲೆಂ ಬರೆಂ ಜಾಲೆಂ ನ್ಹಯ್ಗಿ!? ಕ್ರಿಸ್ತಾಂವ್ ಲೊಕಾಚ್ಯಾ ಅಧಿಕ್ ಗರ್ಜೆಚ್ಯಾ, ಮಹತ್ವಾಚ್ಯಾ ಸಂಗ್ತಿಂ ವಿಶಿಂ ಕೊಂಗ್ರೆಸ್‍ಗಾರಾಂಕ್ ನ್ಹಯ್ವೇ ಕಳಿತ್ ಜಾಂವ್ಚೆಂ?! ಸರ್ವ್ ಪೊರ್ಬುಂಗೆಲ್ಯಾಂ ತರ್ಫೆನ್ ಡಿಂಗ್ ಭಾಗ್ಯ ಫಾವೊ ಕೆಲ್ಲ್ಯಾ ಸಿ.ಎಂ. ಸಿದ್ರಾಮಣ್ಣಾಕ್ ಉಲ್ಲಾಸ್, ಅಭಿನಂದನ್ ಆನಿ ದೇ… ದೇ… ದೇಬ್ರೆರುಂ! ಚಿಯರ್ಸ್!!!

ತುಮ್ಚಿ ಅಭಿಪ್ರಾಯ್, ಸಲಹಾ ವಾ ಸೂಚನಾಂ ಇಮೈಲ್ ಕರಾ: budkuloepaper@gmail.com

Like our Facebook Page: www.facebook.com/budkulo.epaper

Join our Budkulo Club in Clubhouse

The post ಓಪನ್ ಬಾರ್: ಅಬ್ಳೆ, ಹಾಂಗಾ ಆಸಾ ಡಿಂಗ್ ಭಾಗ್ಯ! appeared first on Budkulo.

ಬಾತ್ತು ಕಿತೆಂಗೀ ಕುರ್ವಾತಾಲೊ, ಸಾಂಗೊಂಕ್ ಪಾದ್ದೆತಾಲೊ, ಜಾಪ್ ದೀಂವ್ಕ್ ನರ್ಗಾತಾಲೊ, ಚೆಡ್ವಾಂ ಪರಿಂ ಲಜೆತಾಲೊ, ಜವಾಬಿ ಖಾತಿರ್ ಪಾಟಿಂ ಫುಡೆಂ ಕರ್ತಾಲೊ, ಜಾಪ್ ದೀಂವ್ಕ್ ಅಪಧಯ್ರ್ ಭಗ್ತಾ ತಸೆಂ ದಿಸ್ತಾಲೊ, ಉಬೆ ರಾವೊಂಕ್ ದಾಕ್ಶೆತಾಲೊ.

‘ಬಾತ್ತೋ, ಸ್ಟೇಂಡ್ ಅಪ್’ ಮ್ಹಣಾಲಿ ಸಿಸ್ಟರ್.

‘ಎಸ್ ಶಿ..ಶ್ಟ..ರ್ರ್ …’ ಚಿಕ್ಕೆಶೆ ಕಾಂಪೊನ್‍ಶೆಂ ಉಬೆ ರಾವ್ಲೊ ಬಾತ್ತು.

‘ತುಂ ವ್ಹಡ್ ಜಾತಚ್ ಕಿತೆಂ ಜಾತಾಯ್‍ರೇ ?’ ವಿಚಾರಿ ಸಿಸ್ಟರ್.

‘ಹ್… ಹಾಂ…ವ್ ಕಾ…ಜಾ…ರ್ ಜಾತಾಂ !’ ಗಾಗೆಲೊ ಬಾತ್ತು.

ತುಜಿ ತಕ್ಲಿ ! ದಾಡ್ಡ್ಯಾ, ತೆಂ ವ್ಹಯ್, ಪುಣ್ ಜಿಣಿಯೆಂತ್ ತುಂ ಕಿತೆಂ ಜಾಂವ್ಕ್ ಆಶೆತಾಯ್?

ಹಾಂವ್ ಏಕ್ ಬಾಪಯ್ ಜಾಂವ್ಕ್ ಆಶೆತಾಂ.

ತಸೆಂ ನ್ಹಯ್ ರೇ, ತುಂ ಕ್ಹಾಲೆಂ ಜಾತಾಯ್‍ಗೀ ಮ್ಹಣ್ ವಿಚಾರ್ತಾಂ.

ಹಾಂವ್ ಎಕಾ ಸೊಬೀತ್ ಚೆಡ್ವಾ ಕಡೆನ್ ಲಗ್ನ್ ಜಾತಾಂ.

ತುಜೆಂ ಬೋಡ್! ಪೆದ್ದಾ, ಪುಣ್ ವ್ಹಡ್ ಜಾವ್ನ್ ಕಿತೆಂ ಕರ್ತಾಯ್ ರೇ?

ವ್ಹಡ್ ಜಾವ್ನ್ ತೆಗಾಂ ಪುಣೀ ಭುರ್ಗಿಂ ಕರ್ತಾಂ!

ಕಾಜಾರ್, ಬಾಪಯ್, ಭುರ್ಗಿಂ – ಹಿಂ ಸೊಡ್ನ್ ಕಿತೆಂ ಜಾತಲೊಯ್‍ರೇ?

ಮ್ಹಜ್ಯಾ ಪತಿಣೆಚೊ ಹಾಂವ್ ಮೊಗಾಚೊ ಪತಿ ಜಾತಲೊಂ.

ತುಜೊ ಭೆಜೊ ! ಪಾರ್ಪೊಳ್ಯಾ, ಆದರ್ಶ್ ವೆಕ್ತಿ ಜಾವ್ನ್ ಕಿತೆಂ ಜಾತಾಯ್ ರೇ?

ಚೂಡ್ ಕೊತ್ರು ಬಾಯ್ಲೆಚೊ ಆದರ್ಶ್ ಘೊವ್ ಜಾತಾಂ ಶಿಶ್ಟರ್!

ಆದರ್ಶ್ ಮ್ಹಳ್ಯಾರ್ ತಸೆಂ ನ್ಹಯ್, ಮಹಾತ್ಮಾ ಗಾಂಧಿ ಪರಿಂ…

ಹಾಂ, ಗಾಂಧಿ ಪರಿಂ. ಗಾಂಧಿ ಪರಿಂ ಹಾಂವ್ ಚವ್ದಾ ವರ್ಸಾಂಚೆರ್‍ಚ್ ಕಾಜಾರ್ ಜಾತಾಂ.

ತುಜೊ ಮಾಂಡೊ! ಮೂರ್ಕಾ! ಹಾಂವೆಂ ತಸೆಂ ವಿಚಾರುಂಕ್ ನಾ. ಆದರ್ಶ್ ವೆಕ್ತಿ ಮ್ಹಳ್ಯಾರ್ ಬರಿ ಕರ್ನಿ ಕರುನ್ ಮಹಾನ್ ಜಾಂವ್ಚೆಂ. ಮದರ್ ತೆರೆಜಾನ್ ಕೆಲ್ಲೆ ಪರಿಂ ಹೆರಾಂಕ್ ದೇಕ್ ದಿಂವ್ಚಿ.

ಆಂ ತಸೆಂಗೀ? ತರ್ ಹಾಂವ್‍ಯೀ ಮದರ್ ತೆರೆಜಾಚಾ ಬಾಪಾಯ್ ಪರಿಂ ಎಕಾ ಧುವೆಕ್ ಜಲ್ಮವ್ನ್ ಸಂಸಾರಾಕ್ ದೇಕ್ ದಿತಾಂ. ಮ್ಹಜೆಂ ಧುವ್‍ಯೀ ಏಕ್ ಶಿಶ್ಟರ್ ಜಾವ್ನ್ ಕೊಡಾ ಪಿಡೆಸ್ತಾಂಚಿ ಸೆವಾ ಕರುನ್ ಮ್ಹಜೆಂ ನಾಂವ್ ವ್ಹರ್ತೆಲೆಂ.

ತೆಂ ತುಜೆಂ ಧುವ್ ಜಾಲೆಂ, ಪುಣ್ ತುಂಚ್ ಜಾವ್ನ್ ಕಿತೆಂ ಜಾತಾಯ್?

ಹಾಂವ್ ತ್ಯಾ ಧುವೆಚೊ ಆದರ್ಶ್ ಬಾಪ್ ಜಾತಾಂ.

ತುಜೊ ಮೆಂದು! ಪಿರ್ಕಿಸಾ, ಅಳೆರೇ ಮಿಶೆಲ್ ಪಳೆ ದಾಕ್ತೆರ್ನ್ ಜಾತಾ ಖಂಯ್, ತಸೆಂ ತುಂ..?

ಹಾಂವ್ ಮಿಶೆಲಾಚೊ ನವ್ರೊ ಜಾತಾಂ.

ಪರ್ತ್ಯಾನ್ ತೆಣೆಂಚ್ ಘುಂವ್ತಾ ತುಜಿ ಜೀಬ್. ಪಳೆರೇ, ಶಾಲೆಟ್ ಪಾಯ್ಲೆಟ್ ಜಾತಾ, ವಿನಿತಾ ಮೋಡೆಲ್ ಜಾತಾ, ಫೆಲಿಕ್ಸ್ ಪಾದ್ರ್ಯಾಬ್ ಜಾತಾ, ನೆಲ್ಸನ್ ಕವಿ ಜಾತಾ, ರೆನಿಟಾ ಮದರ್ ಸುಪೀರಿಯರ್ ಜಾತಾ…

ಹಾಂವ್ ಫೇಮಿಲಿ ಮೇನ್ ಜಾತಾಂ.

ತುಜಿ ಮೋತ್! ಪಿಸ್ಯಾ, ಪುಣ್ ಖಂಚಿ ವ್ಯಾಪ್ತ್ ಕರ್ತಾಯ್?

ಭುರ್ಗಿಂ ಕರ್ಚಿ!

ಪುಣ್ ಪೊಟಾ ಖಾತಿರ್ ಕಿತೆಂ ಕರ್ತಾಯ್ ರೇ ?

ಪೋಟ್ ಯೆಂವ್ಚೆಂ ಬಾಯ್ಲೆಕ್ ನ್ಯೇಂ? ಆಸ್ಪತ್ರೆಕ್ ವ್ಹರ್ತಾಂ, ವೆಳಾರ್ ಚೆಕ್‍ಅಪ್ ಕರಯ್ತಾಂ…

ತುಜೆಂ ರೂಂಡ್! ಬೆಪ್ಪಾ, ಪೊಟಾಕ್ ಖಾಂವ್ಚ್ಯಾ ಖಾತಿರ್ ಕಿತೆಂ ರೇ?

ಮ್ಹಜಿ ಹೊಕಾಲ್ ಜೊಡುನ್ ಹಾಡ್ತಾ ನ್ಯೇಂ?

ಹೊಕ್ಲೆಚೆಂ ಸೊಡ್, ತುಂ ಸಾಂಗ್, ತುಂ ಕಿತೆಂ ಜೊಡುನ್ ಹಾಡ್ತಾಯ್?

ಹೊಕ್ಲೆನ್ ದಿಲ್ಲ್ಯಾ ದೊತಿಚೆ ಪಯ್ಶೆ ಬೆಂಕಾಂತ್ ಫಿಕ್ಸೆಡಾಂತ್ ದವರ್ನ್ ತಾಚೆ ವಾಡಿನ್…

ಏ ಸಾಯ್ಬಾ ಮ್ಹಜ್ಯಾ! ತುಂ ಜಾವ್ನ್ ಕ್ಹಾಲೆಂ ಕಾಮ್ ಕರ್ತಾಯ್ ರೇ?

ಬಾಯ್ಲೆ ಭುಗ್ರ್ಯಾಂಕ್ ಪೊಸ್ತಾಂ. ತುಕಾ ಕಿತ್ಯಾಕ್ ತಾಂಚಿ ಖಂತ್? ತುಕಾ ನಾಂತ್ ನ್ಯೇಂ?

ತುಜೆಂ ಕಟ್ಟೆಂ! ಫೂಲ್, ಟೆಲ್ ಮಿ, ವೋಟ್ ವಿಲ್ಲ್ ಯು ಬಿ ಇನ್ ಯುವರ್ ಲಾಯ್ಫ್ ಬೇಪ್ಟಿಸ್ಟ್ ?

ಐ ವಿಲ್ ಬೀ ಡೇಡ್!

ಡೇಡ್ ಗೀ ಬೋಡ್ ಗೀ ತುಜೆಂ. ನೋನ್‍ಸೆನ್ಸ್, ಸಮಾಂ ಉಲಯ್ ರೇ. ಕೋಣ್ ಜಾತಲೊಯ್ ಸಾಂಗ್ ರೇ…

ಓ ಕೆ, ಐ ವಿಲ್ ಬಿ ಪೋಪ್!

ತುಜೆಂ ಶಿಂತಿದ್! ಗಾದ್ದಾ, ಸಾರ್ಕೆಂ ಉಲಂವ್ಕ್ ಜಾಯ್ನಾಯೆರೇ ತುಕಾ?

ಸಾರ್ಕೆಂ ಸಾಂಗ್ತಾಂ, ಡೇಡಿ ಯಾ ಪಾಪ್ಪಾ ಜಾತಾಂ.

ಹಾಂವೆಂ ವಿಚಾರ್ಚೆಂ, ತುಜೆಂ ಶಿಕಪ್ ಮುಗ್ದಾಲ್ಯಾ ಉಪ್ರಾಂತ್ ಖಂಚಾ ಕಾಮಾಕ್ ಲಾಗ್ತಾಯ್ ರೇ?

ಚೆಡುಂ ಸೊದ್ಚ್ಯಾ.

ತುಜೊ ಕಟ್ಟೊ! ಗಾಡ್ವಾ, ನೆಹರೂ ಭಾರತಾಚೊ ಪ್ರದಾನ್ ಮಂತ್ರಿ ಜಾಲೊ, ತಾಚೊ ಪೊಣ್ತುರ್ ಸಯ್ತ್ ಫಾಲ್ಯಾಂ ಪ್ರಧಾನ್ ಮಂತ್ರಿ ಜಾಂವ್ಚ್ಯಾರ್ ಆಸಾ, ತಸೆಂ ತೂಂ..?

ಹಾಂವೀಂ ಮ್ಹಜ್ಯಾ ಆಜ್ಯಾಚಾ ಪೊಣ್ತುರಾಕ್ ಎಮ್ಮೆಲ್ಲೆ ನಾ ತರ್ ಕೊರ್ಪೊರೇಟರ್ ಯಾ ಗ್ರಾಮ ಪಂಚಾಯತ್ ಸಾಂದೊ ನ್ಹಯ್ ಜಾಲ್ಯಾರ್ ಗೊವ್ಳಿಕ್ ಪರಿಷದೆಚೊ ಹುದ್ದೆದಾರ್ ಪುಣೀ ಕರುಂಕ್ ಪಳಯ್ತಾಂ.

ಅಯ್ಯೋ, ತುಜೆ ಕಡೆನ್ ಉಲಂವ್ಚೆಂಚ್ ಕಷ್ಟಾಂಚೆಂ. ತುಂ ವ್ಹಡ್ ಜಾತಚ್ ಹ್ಯಾ ದೇಶಾ ಖಾತಿರ್ ಕಿತೆಂ ದೀಂವ್ಕ್ ಆಶೆತಾಯ್ ರೇ ?

ಜನಸಂಕೊ ವಾಡೊಂಕ್ ಮೊಜಿ ತಾಂಕಿ ಪುರ್ತಿ ಸಹಾಯ್ ಕರ್ತಾಂ ಶಿಶ್ಟರ್.

ತುಜೆಂ ಮೋನ್! ರೆಡ್ಯಾ, ತಾಂಕಿ ಪುರ್ತಿ ಮ್ಹಳ್ಯಾರ್?

ಬಾಯ್ಲೆಕ್ ದೊಗಾಂ ಪುಣೀ ಭುರ್ಗಿಂ ಜಾಯ್ಶೆಂ ಪ್ರೇತನ್ ಕರ್ತಾಂ.

ಕಾಜಾರ್, ಭುರ್ಗಿಂ, ಬಾಪಯ್, ಹೆಂ ಸೊಡ್ನ್ ಹೆರ್ ಕಿತೆಂಯ್ ಯೇನಾರೆ ತುಕಾ? ದಾಕ್ತೆರ್, ಇಂಜಿನಿಯೆರ್, ಪಾಯ್ಲೆಟ್, ಫಿಲ್ಮ್ ಕಲಾಕಾರ್, ವಿಗ್ಯಾನಿ, ಸಮಾಜ್ ಸೆವಕ್, ಬೇಂಕರ್, ಖೆಳ್ಗಾಡಿ, ಕ್ರಿಕೆಟರ್, ಮಿನಿಸ್ಟರ್, ಆಫಿಸರ್, ಬಿಜ್ನೆಸ್‍ಮೇನ್, ಬಿಲ್ಡರ್, ಯಾಜಕ್, ಮಾದ್ರ್… ಹಾಂಚೆ ಪಯ್ಕಿ ಕಿತೆಂ ಪುಣೀ ಜಾತಾಂ ಮ್ಹಣೊಂಕ್ ಜಾಯ್ನಾಯೆರೆ ತುಕಾ ?

ಹಾಂವ್ ತುಮಿ ಸಾಂಗ್‍ಲ್ಲ್ಯಾ ಹಾಂಚೆ ಪಯ್ಕಿ ಎಕ್ಲ್ಯಾಚೊ ಪುಣೀ ಜನಮ್ ದಾತಾರ್ ಜಾತಾಂ.

ತುಜೆಂ ಅಟ್ಟೆಂ! ಅಂಡೆ ಖಂಯ್ಚೊ, ಜಾಲೆಂ. ತಾಚೆ ಶಿವಾಯ್ ಕಿತೆಂ ಜಾತಲೊಯ್?

ಜನಮ್ ದಾತಾರ್ ಜಾಲೊಂ ಮ್ಹಳ್ಯಾ ಉಪ್ರಾಂತ್ ಹಾಂವ್ ಜಲ್ಮಾಲ್ಲ್ಯಾ ಭುಗ್ರ್ಯಾಚೊ ಆನ್ ಜಾಲೊಂ ನ್ಯೇಂ? ಪಾವಾನಾಂಯೇ?

ನಾಂ, ಪಾವಾನಾಂ. ಕಸಲೆಂ ಪುಣೀ ಕಾಮ್, ದಂದೊ, ವಾವ್ರ್, ನವ್ಕರಿ, ವ್ಯಾಪ್ತ್, ಜೋಡ್ ಮ್ಹಳ್ಳಿ ಆಸಾಜೆ. ಘರ್ ಚಲಂವ್ಚಾಕ್ ಖಾಲಿ ಆನ್, ಬಾಬ್, ಡೆಡಿ ಯಾ ಪಾಪ್ಪಾ ಜಾಲ್ಯಾರ್ ಪಾವಾನಾ, ಹೆರ್ ಕಿತೆಂ ಪುಣೀ ಜಾಯ್ಜೆ.

ಮ್ಹಳ್ಯಾರ್ ಮ್ಹಜೆ ಸಂಗಿಂ ಲಗಿನ್ ಜಾಲ್ಲ್ಯಾ ಸ್ತ್ರೀಯೆಚೊ ದಾದ್ಲೊ ಜಾಯ್ಜೆ? ತೆಂ ಹಾಂವ್ ಜಾತಾಂಚ್.

ತುಜೊ ಬೊಂಡು! ಅರೇ ಭೆಂಕ್ರ್ಯಾ, ಕಾಜಾರ್ ಜಾತಾಯ್, ಬಾಪಯ್ ಜಾತಾಯ್, ಕುಟಮ್ ಚಲಂವ್ಕ್ ಕಿತೆಂ ಕರ್ತಾಯ್ ರೇ?

ಕುಟಮ್ ಚಲಂವ್ಕ್… ಏಕ್ ಬರೋಸೊ ಭರ್ತಾರ್, ಏಕ್ ಮೊಗಾಚೊ ಘರ್ಕಾರ್, ಪಯ್ಲೆಂ ಬಾಬ್, ಉಪ್ರಾಂತ್ ಮಾಂವ್, ನಂತರ್ ಆಬ್…

ತುಜ್ಯಾ ಮೆಂದ್ವಾಂತ್ಲೊ ಕಿಡೊ. ತುಜ್ಯಾ ಮಾಂಯ್-ಬಾಬಾಕ್ ತುಂ ಕಿತೆಂ ದಿತಾಯ್ರೇ?

ಏಕ್ ಬರೀಶಿ ಸುನ್ ಹಾಡ್ನ್ ದಿತಾಂ.

ತಶೆಂ ನ್ಹಯ್ ರೇ, ಕಿತೆಂ ಜೊಡುನ್ ದಿತಾಯ್ ರೇ ಭೆಂಕ್ರ್ಯಾ?

ದೊಗಾಂ ಪುಣೀ ನಾತ್ರಾಂ ಜಲ್ಮಾವ್ನ್ ದಿತಾಂ.

ಖಂಯ್ಚೊ ಹಲ್ಕಟ್ ರೇ ತುಂ? ತಕ್ಲೆಂತ್ ಶೆಣ್ ಭರ್‍ಲ್ಲೆ ಪರಿಂ ಕರ್ತಾಯ್. ಅಳೆಮಾ, ಸಂಸಾರಿ ಫುಡಾರಾಚಾ ಜಿವಿತಾಂತ್ ತುಂ ಕಸಲೊ ಮನಿಸ್ ಜಾಂವ್ಕ್ ಆಶೆತಾಯ್ ಮಾ ಬ್ಯಾಪ್ತಿಸ್ತಾ?

ಸಂಸಾರಿ ಫುಡಾರಾಚಾ ಜಿವಿತಾಂತ್ ಏಕ್ ಸಂಸಾರಿಕ್ ಮನಿಸ್ ಜಾತಾಂ ಶಿಶ್ಟರ್.

ತುಜೊ ತಕ್ಲೊ! ಮಾಂಕ್ಡಾ, ದಿಸಾಚಾ ಪೊಡಿ ಖಾತಿರ್, ಕುಟ್ಮಾಚಾ ಜೊಡಿ ಖಾತಿರ್, ಭುಕೆಚಾ ವೊಡಿ ಖಾತಿರ್ ಕಿತೆಂ ಪುಣೀ ಕರ್ತಾಂ ಮ್ಹಣ್ ಸಾಂಗ್‍ರೇ.

‘ಜೋಡಿ’ ಖಾತಿರ್ ಸೊಬೀತ್ ತರ್ನೆಂ ಹೊಕಲ್, ‘ಫೊಡಿ’ ಖಾತಿರ್ ಕಾಜಾರಾ ಜೆವ್ಣಾಕ್ ತೀನ್ ಭಗಾ ಮಾಸ್, ಆನಿ ‘ವೊಡಿ’ ಖಾತಿರ್ ದಾಟ್ ಗಜ್ಡೆಚೆಂ ಖಟ್ಲೆಂ…

ಘುಂವೊನ್ ಘುಂವೊನ್ ಥಂಯ್ಚ್ ಪಾವ್ತಾಯ್ ಮೂರೇ, ಪೆಟ್ಯಾಚಿ ಶಿಮ್ಟಿ ತುಂ! ತುಜ್ಯೆ ತಕ್ಲೆಂತ್ ಹೆರ್ ಕಿತೆಂಯ್ ಆಶಾ ನಾಂತ್‍ಯೆರೇ?

ಆಸಾತ್. ಕಾಜಾರಾ ದಿಸಾತ್ತ್ ಹೊಲಾಂತ್ ಖರಾರ್, ರೋಸ್ ಆನಿ ಪರ್ತಾಪಣ್ ಕರ್ಚಿ ಆಶಾ ಆಸಾ ಮ್ಹಾಕಾ.

ತುಜೊ ಕಾರ್ಕು! ಹೆಡ್ಡಾ, ಜಿಣಿಯೆಂತ್ ಉದರ್ಗತೆಕ್ ಪಾಂವ್ಚಿ ಆಶಾ ನಾಂ ಯೆರೇ ತುಕಾ?

ಆಸಾ. ಪುಣ್ ಉದಾರ್ ಗತಿಕ್ ಪಾವ್ಲ್ಯಾರ್ ಮ್ಹಾಕಾ ಚೆಡುಂ ಕೋಣ್ ದಿತಾ?

ಖಂಚೊ ಗತ್ತಿಗಾಟಾಚೊ ಚೆಡೊ ಹಾಬಾ ಹೊ! ತುಂ ತರ್ ಇಂಜ್ನೆರ್, ದಾಕ್ತೆರ್, ಪಾಯ್ಲೆಟ್, ಪಾದ್ರ್ಯಾಬ್ ಜಾಯ್ನಾಂಯ್ ?

ಊಹುಂ. ಹಾಂವ್ ಶೀದಾ ಕಾಜಾರಿ ಭಿಸ್ಪ್ ಜಾತಾಂ. ಬಾಪ್ತಿಸ್ತಾಂ ಪರಿಂ. ತೆದಾಳಾ ಮ್ಹಜ್ಯಾ ಪುತಾಕ್ ಭಿಸ್ಪಾಚೊ ಪೂತ್ ಮ್ಹಣ್ ಆಪಯ್ತೆಲೆ!

ತುಜೆಂ ಕರ್ಲ್! ಮಂಗ, ತುಕಾ ಸಮ್ಜಾಂವ್ಚೆಂ ರೆಡ್ಯಾಚಾ ಪಾಟಿರ್ ಉದಕ್ ವೊತ್‍ಲ್ಲೆ ಪರಿಂ.

ತುವೆಂ ಕೆದಾಳಾಯ್ ಪುಣೀ ರೆಡ್ಯಾಕ್ ನ್ಹಾಣಯ್ಲಾಂಯ್ಗೀ ಶಿಶ್ಟರ್ ?

ಆಮ್ಗೆರ್ ರೆಡೆ-ಪಾಡೆ ನಾಂತ್. ಪಯ್ಲೆಂ ತುಂ ವ್ಹಡ್ ಜಾತಚ್ ಕೋಣ್ ಜಾತಲೊಯ್ ತೆಂ ಸಾಂಗ್.

ವೊಡೊಲ್ ಥಾವ್ನ್ ಸಾಂಗ್ತಾಂ, ತುಂ ಕ್ಹಾಲೆಂ ಘುಂವ್ಡಾವ್ನ್ ಘುಂವ್ಡಾವ್ನ್ ತೆಂತ್ತ್ ಈಸಾರ್ತಾಯ್? ಹದ್ರ್ಯಾಂತ್ ಧಯ್ರ್ ಆಸ್‍ಲ್ಲೊ ಪುರುಷ್ ಜಾತಾಂ. ಮಹಾನ್ ಪುರುಷ್!

ತುಜಿ ಶೆಂಡಿ! ಯೆರು ದೂಮಾ, ಶೆಂಡಿಯೆರ್ ಕಂಡಿ ದವರ್ನಾಕಾರೆ. ಕಿತೆಂ ಪುಣೀ ಬರೊ ವೆಕ್ತಿ ಜಾ ರೇ.

ತಸೆಂ ಜಾಲ್ಯಾರ್ ಹಾಂವ್ ತುಜೊ ಜಾಂವಂಯ್ ಜಾತಾಂ ಶಿಶ್ಟರ್ !

ಮೊಜಿಂ ಕರ್ಮಾಂ! ಅನ್ನಾಡ್ಯಾ!! ಶಿಟ್ ಡಾವ್ನ್!!!

* * * * *

ತುಮ್ಚಿ ಅಭಿಪ್ರಾಯ್, ಸಲಹಾ ವಾ ಸೂಚನಾಂ ಇಮೈಲ್ ಕರಾ: budkuloepaper@gmail.com

The post ಶೆಂಡಿಯೆರ್ ಕಂಡಿ ದವರ್ಚಿ appeared first on Budkulo.

ಆನಿ ಕಿತೆಂ ಆವಯ್ಚ್ಯಾ ಗರ್ಭಾಂತ್ ರೆಡಿಮೇಡ್ ಡ್ರೆಸ್ ಇನ್‍ಸರ್ಟ್ ಕರಿಜೆ ಮ್ಹಣ್ಚೆಂಗಿಂ ತುಂವೆಂ?

ತುಂ ಕಿತೆಂ ಕೊಂಕ್ಣಿ ಬುದ್ವಂತ್ ಕವಿಂಪರಿಂ ಸವಾಲಾಂ ಮಾರ್ತಾಯ್?

ಪೊಕ್ಕಡೆ ಸುಮ್ಮನೆ.

ಆದಿಂ ಮನಿಸ್ ಹೆರ್ ಮನ್ಜಾತಿಂಪರಿಂಚ್ ಜಿಯೆತಾಲೊ. ತೆದಾಳಾ ಸಗ್ಳೆ ನಾಗ್ಡೆಚ್ ಆಸ್ತಾಲೆ. ಪುಣ್ ಸರ್ವ್ ಸಹಜ್ ಜಾವ್ನ್ ಆಸ್ತಾಲೆಂ.

ವಸ್ತುರ್ ನ್ಹೆಸೊಂಕ್ ಮನಿಸ್ ಕೆದಾಳಾ ಶಿಕ್ಲೊ?

ಆದಿಂ ಮನ್ಶಾಚಿ ಕಾತ್ ದಾಟ್ ಆಸ್‍ಲ್ಲಿ. ಮೆಂದು ಪಾತಳ್ ಆಸ್‍ಲ್ಲೊ. ಸವ್ಕಾಸ್ ಮೆಂದು ದಾಟ್ ಜಾವ್ನ್ ಯೆತಾನಾ ಕಾತ್ ಪಾತಳ್ ಜಾಲಿ. ದೆಕುನ್ ಆಂಗಾರ್ ನ್ಹೆಸೊಂಕ್ ಸುರು ಕೆಲೆಂ.

ಪುಣ್ ತೆಂ ಕಿತ್ಲೆಂಗೀ ಹಜಾರೊಂ ವರ್ಸಾಂ ಪಯ್ಲೆಂ ಆಸ್ತೆಲೆಂ. ಆತಾಂಚ್ಯಾ ಕಾಳಾರ್ ವಸ್ತುರ್ ನಾಸ್ತಾನಾ ಬಾಳ್ಶ್ಯಾಂಕೀ ಭಾಯ್ರ್ ವ್ಹರಿನಾಂತ್.

ಸಾರ್ಕೆಂ. ಆತಾಂಚಾಂನಿ ವಸ್ತುರ್ ನ್ಹೆಸ್ಚೆಂಚ್ ಬರೆಂ. ನಾಂ ತರ್ ದೀಸ್ ಕಠೀಣಾಚೆ ಜಾತೆ!

ಕಿತ್ಯಾಕ್ ಮ್ಹಣ್ತಾಯ್?

ಆನಿ ಕಿತೆಂ? ಸಗ್ಳಿಂ ಭಾಯ್ಲ್ಯಾನ್ ಪಳೆಂವ್ಕ್ ಸೊಭಿತ್, ಆಕರ್ಶಕ್ ದಿಸ್ತಾತ್ ಮ್ಹಣೊನ್ ಸಕ್ಡಾಂ ತಶೆಂಚ್ ಆಸ್ತಾತ್ ಮ್ಹಣೊಂಕ್ ಜಾತಾವೆ?

ಮಾಗಿರ್ ಕಶೆಂ ಆಸ್ತಾತ್?

ತುಕಾ ಸಕ್ಕಡೀ explain ಕರ್ನ್ ಸಾಂಗಾಜೆ. ಸಾದ್ಯಾ ಕೊಂಕ್ಣಿ ಬರವ್ಪ್ಯಾಪರಿಂ ಕರ್ತಾಯ್.

ತುಂ ಬುದ್ವಂತ್ ನೆ. ತಿಕ್ಕೆ ಸೊಡವ್ನ್ ಸಾಂಗ್ಶಿಗಿ?

ಖಂಚೆಂ ಸೊಡಯ್ಜೆ?

ಅಯ್ಯೋ. ತುಜೆಂ ವಸ್ತುರ್ ಸೊಡಯ್ನಾಕಾ ಆತಾಂ. ಸಾಂಗೊನ್ ಆಸ್‍ಲ್ಲೆಂ ಮ್ಯಾಟರ್ ವಿವರ್ಸಿ, ಪುರೊ.

ತುಂ ಥೊಡೆ ಪಾವ್ಟಿಂ ‘ಕೊಂಕ್ಣಿ’ ವಿಮರ್ಶಕಾಂಪರಿಂ ಉಲ್ಟೆಂಚ್ ಚಿಂತಾಯ್. ಇಲ್ಲೆಂ ಹ್ಯೂಮರ್ ಗರ್ಜೆಚೆಂ ರೆ.

ಹ ಹ ಹ. ಹ್ಯೂಮರ್ ವಿದ್ ಸೀರಿಯಸ್‍ನೆಸ್! ಹೆಂ ಬರೆಂ ಆಸಾ.

ಕಿತೆಂಯ್ ಆಸೊಂ. ಹಾಂವೆಂ ಮ್ಹಣ್ಚೆಂ ಮನಿಸ್ ಭಾಯ್ಲ್ಯಾನ್ ಕಿತೆಂಯ್ ದಿಸ್ತಾ ತರೀ ತಾಣೆ ಭಿತರ್ಲ್ಯಾನ್ ಕಶೆಂ ಆಸಾ ಮ್ಹಳ್ಳೆಂಚ್ ಇಂಪೊರ್ಟೆಂಟ್.

ಅಂದರ್ ಕೀ ಬಾತ್!

ವ್ಹಯ್, ವ್ಹಯ್.

ತರ್ ಹಾಂತುಂಯೀ ಅಂದರ್ ಬಾಹರ್ ಮ್ಹಣ್ ಆಸಾ?

ವ್ಹಯ್ ತೇಟ್ ಕೊಂಕ್ಣಿ ವಿಮರ್ಶಕಾಪರಿಂ.

ತೆಂ ಕಶೆಂ?

ಮ್ಹಳ್ಳ್ಯಾರ್ ‘ಕೊಂಕ್ಣಿ ವಿಮರ್ಶಕ್’ ಕಶೆಂ ಮುಖ್ಲ್ಯಾನ್ ಏಕ್ ತೋಂಡ್ ದಾಕವ್ನ್ ಪಾಟ್ಲ್ಯಾನ್ ವೆಗ್ಳಿಂಚ್ ಕರ್ತುಬಾಂ ಆಧಾರ್ತಾತ್ ಪಳೆ. ತಶೆಂ.

ಹೋ. ಕಳ್ಳೆಂ. Double standards!!!

ತಾಂಚೆಂ ಡಬ್ಬಲ್ ನ್ಹಂಯ್. ಮಲ್ಟಿಪಲ್ ಸ್ಟ್ಯಾಂಡರ್ಡ್ಸ್ ಮ್ಹಣ್ ರುಜು ಜಾಲಾಂ.

ಹೆರಾಂಚೆಂ ಕೊಂಟ್ರಡಿಕ್ಷನ್ ದಾಕಯ್ತೆಲೆ… ಆಪುಣೀ…!?

ತಾಂಚ್ಯಾ ಕೊಂಟ್ರಡಿಕ್ಷನಾಂಚೆಂ ಕಲೆಕ್ಷನ್ ಪೊಲಿಸಾಂಕ್ ಆನಿ ಕೊಡ್ತಿಕ್ ಪಾವ್ಲಾಂ ಖಂಯ್. ತೆ ಅಸಲ್ಯಾಂಚಿ ಝಡ್ತಿ ಕರ್ನ್ ಸಂಸಾರಾಕ್ ಸತ್ ಉಗ್ತಾಡಾಕ್ ಹಾಡ್ತೆಲೆ ವೆಗಿಂಚ್.

ವೀಕಿ ಲೀಕ್ಸ್ ಆಸ್‍ಲ್ಲೆಪರಿಂ ಕೊಂಕ್ಣೆಂತೀ ಸುರ್ವಾತ್ಲಾಂಗಿ?

ಕೊಂಕ್ಣಿ ಲೀಕ್ಸ್!

ಹ ಹ. ಸ್ಟಿಂಗ್ ಒಪರೇಶನ್ ಪುಣಿ ಕೆಲಾಂಗಿ?

ಸಕ್ಕಡೀ ಜಾಲಾಂ ಮ್ಹಣ್ ಖಬರ್.

ತರ್ ಸದ್ದ್ಯಾಕ್ ಬ್ರೇಕಿಂಗ್ ನ್ಯೂಸ್ ಉಸಳ್ತಾ ಮ್ಹಣ್ ಜಾಲೆಂ.

ವ್ಹಯ್. ಝಗ್ಲಾಣೆಂ, ಗಡ್ಗಡೊ ಮಾರ್ತಲೊ.

ಖಬ್ರಾಂಚೊ ಪಾವ್ಸ್?

ಆವ್ರ್ ಯೇಂವ್ಕೀ ಪುರೊ.

ಜಾಂವ್. ತಶೆಂ ಪುಣಿ ಮೊಸ್ರಾಚೊ ಉಜೊ, ಹಗ್ಯಾಚೆಂ ಕಿಟಾಳ್ ಪಾಲ್ವೊಂದಿ ಆನಿ ಲೊಕಾಕ್ ಬರೆಂ ಜಾಂವ್.

ವ್ಹಯ್. ಜಾತೆಲೆಂ. ತಾಚಿಂ ಖುಣಾಂ ದಿಸೊಂಕ್ ಲಾಗ್ಲ್ಯಾಂತ್.

ತಶೆಂಚ್ ಜಾಂವ್. ಆಮೆನ್.

ದೇವ್ ಪಳೆತಾ ಆನಿ ತೊಚ್ ವಾಟ್ ದಾಕಯ್ತಾ.

ತೆಂ ಸಮಾ. ದೆವಾನ್‍ಚ್ ಮನ್ಶಾಕ್ ರಚುನ್ ಸೊಡ್ಲೆಂ. ಆತಾಂ ಪಳೆ ಮನಿಸ್‍ಚ್ ದೆಂವ್ಚಾರ್ ಜಾಲಾ.

ವ್ಹಯ್. ದೆವಾನ್ ಮನ್ಶಾಕ್ ರಚ್ತಾನಾ ವಸ್ತುರ್ ದೀಂವ್ಕ್ ನಾತ್‍ಲ್ಲೆಂ. ವಸ್ತುರಾ ಭಿತರ್ ಮನಿಸ್ ದೆಂವ್ಚಾರಾಪರಿಂ ಜಾಲಾ.

ಛೆ! ಹೆಂ ಅಂದರ್ ಬಾಹರ್ ಭಾರಿಚ್ ಮಿಸ್ತೆರಾಚೆಂ ಜಾಲೆಂ ನೆ?

ತೆಂಚ್ ಸಾಂಗ್ಚೆಂ ಹಾಂವೆಂ. ಮನಿಸ್ ಭಾಯ್ಲ್ಯಾನ್ ಸುಭಾಗಿ ದಿಸೊಂಕ್ ಪುರೊ. ಪುಣ್ ತಾಚೆ ಭಿತರ್ ಕಸಲಿ ಮನ್ಜಾತ್ ಆಸ್ತಾ ಮ್ಹಣ್ ಸಾಂಗೊಂಕ್ ಕಷ್ಟ್.

ಸಾರ್ಕೆಂ ಮ್ಹಳೆಂಯ್ ತುಂವೆಂ.

ತುಂವೆಂ ಉಪೇಂದ್ರಾಚೆಂ ಕನ್ನಡ ಸಿನೆಮ್ ‘ಉಪೇಂದ್ರ’ ಪಳೆಲಾಂಯೆರೆ?

ತೆಗಾಂ ಜಣಾಂ ಹೀರೊಯಿನಾಂಕ್ ಉಕ್ಲುನ್ ನಾಚಯಿಲ್ಲೆಂ filmಗಿ?

ವ್ಹಯ್.

ಆತಾಂ ಕಿತೆಂ ಜಾಲೆಂ ತಾಕಾ?

ತ್ಯಾ ಫಿಲ್ಮಾಂತ್ ತಾಣೆಂ ಮನ್ಶಾಚೆಂ (ಪಾತ್ರಾಂಚೆಂ) ಅಸ್ಲಿ ರೂಪ್ ದಾಕಂವ್ಚೆ ತಸಲೊ ವಿಶಿಸ್ಟ್ ಪ್ರಯೋಗ್ ಕೆಲ್ಲೊ.

ಉಡಾಸ್ ಯೇವ್ನಾ ಮ್ಹಾಕಾ.

ಉಡಾಸ್ ಕರ್. ತಾಂತುಂ ತಾಣೆಂ ಮನ್ಶಾಚೊ inner voice ಕಸೊ ಆನಿ ಕಿತೆಂ ಆಸ್ತಾ ಮ್ಹಣ್ ದಾಕಯಿಲ್ಲೆಂ.

ಹಾಂ ವ್ಹಯ್. ಮಾಂಯ್ ಸುನೆಚೆಂ ಏಕ್ ದೃಶ್ಯ್ ಉಡಾಸಾಕ್ ಆಯ್ಲೆಂ ಮ್ಹಾಕಾ.

ಕರೆಕ್ಟ್. ಸಗ್ಳ್ಯಾ ಫಿಲ್ಮಾಂತ್ ಮನಿಸ್ ಖರ್ಯಾನ್ ಕಿತೆಂ ಜಾವ್ನಾಸ್ತಾ, ಆನಿ ಭಾಯ್ಲ್ಯಾನ್ ದೆಕಿಕ್ ಕಸಲೊ ವೇಸ್ ಪಾಂಗುರ್ತಾ ಮ್ಹಣ್ ಭಾರಿಚ್ ಅಪುರ್ಬಾಯೆನ್ ದಾಕಯ್ಲಾಂ.

ವ್ಹಯ್. ವ್ಹಯ್. ಮತಿಂತ್ ದುಸ್ರೆಂಚ್ ಆಸ್ತಾ. ಸಾಂಗ್ಚೆಂ ಆನ್ಯೇಕ್‍ಚ್.

ಸಗ್ಳೆ ಮನಿಸ್‍ಚ್ ತಶೆಂ. ಮನ್ಶಾಚೆಂ ಮನ್ ಪಾರ್ಕುಂಕ್ ಜಾಯ್ನಾ. ತಾಚ್ಯಾ ಮತಿಂತ್ ಕಿತೆಂ ಶಿಜ್ತಾ ತೆಂ ಮುಖ್ಲ್ಯಾಕ್ ಕಳಿತ್ ಜಾಯ್ನಾ.

ದೆವಾನ್ ಬರೆಂಚ್ ಕೆಲೆಂ. ತೆಂಯ್ ಉಗ್ತ್ಯಾನ್ ಸಕ್ಡಾಂಕ್ ಕಳ್ಚೆಂ ಆಸ್‍ಲ್ಲೆಂ ತರ್ ಕೊಣೀ ಕೊಣಾಕೀ ಪಾತ್ಯೆತೊಚ್ ನಾತ್ಲೊ.

ವ್ಹಯ್. Privacy ಮ್ಹಳ್ಳಿಚ್ ಆಸ್ತಿ ನಾ. ಸಮಾಧಾನ್‍ಯಿ ಆಸ್ತೆಂ ನಾ.

ದೆವಾನ್ ಬರಿ ತಕ್ಲಿ ಖರ್ಚಿಲ್ಯಾ ತರ್ ಮನ್ಶಾಕ್ ರಚ್ತಾನಾ.

ಆತಾಂ ತಾಚಾಕೀ ಚಡ್ ತಕ್ಲಿ ಮನಿಸ್ ಖರ್ಚಿತಾ.

ಕಶೆಂ ಮ್ಹಣ್ತಾಯ್?

ಆತಾಂ ಮನ್ಶಾಕ್ privacy ಮ್ಹಳ್ಳಿ ಆಸಾಯೆ? ಪ್ರತ್ಯೇಕ್ ಜಾವ್ನ್ ಹ್ಯಾ ಅತ್ಯಾಧುನಿಕ್ ಕಾಳಾರ್?

ಕಿತೆಂ ಜಾಲಾಂ?

ಹಿಯ್ ತಶಿಚ್ ಗಜಾಲ್. ಭಾಯ್ಲ್ಯಾನ್ ಧಾಂಪ್ಚೆಂ, ಭಿತರ್ಲ್ಯಾನ್ ಉಗ್ತೆಂ.

ಪರತ್ ಬ್ರಾ ಆನಿ ಬ್ರ್ಯಾಕೆಟಿವಿಶಿಂ ಉಲಯ್ತಾಯ್ಗಿ ಕಿತೆಂ?

ಮನ್ಶಾಚಿ ಜಿಣಿಚ್ ತಶಿ ಆಸಾ. ಹಾಂವೆಂ ಸಾಂಗ್ಚೆಂ ತೆಂಚ್.

ಮ್ಹಳ್ಳ್ಯಾರ್ ವಸ್ತುರಾ ಭಿತರ್ ಸಗ್ಳೆ ನಾಗ್ಡೆಚ್?

ವ್ಹಯ್. ತಶೆಂಚ್. ತ್ಯಾ ಶಿವಾಯ್ ಆಧುನಿಕ್ ಉಪಕರಣಾಂಕ್ ಲಾಗೊನ್ ಮನ್ಶಾಚೆಂ ಬರೆಂ ಮಾತ್ರ್ ನ್ಹಂಯ್ ವಾಯ್ಟ್‍ಯಿ ಉಗ್ತಾಡಾಕ್ ಪಡೊಂಕ್ ಸುರು ಜಾಲಾಂ.

ತೆಂ ವೊಪ್ತಾಂ ಹಾಂವ್. ಆಜ್ ಕಾಲ್ ಕ್ರಿಮಿನಲಾಂಕ್ ಘಡ್ಯೆ ಭಿತರ್, ವಾ ವೆಗಿಂಚ್ ಧರ್ತಾತ್ ನೆಂ. ಮೊಬೈಲ್ ಆಸ್‍ಲ್ಲ್ಯಾನ್ ಪೊಲಿಸಾಂಕ್ ಸಗ್ಳೆಂ ಸುಲಭ್ ಜಾಲಾಂ ಮ್ಹಣ್ ಚಿಂತಾಂ ಹಾಂವ್.

ಖಂಡಿತ್. ತುಂವೆಂ ಚಿಂತ್ಚೆಂ ಏಕ್ದಮ್ ಸಾರ್ಕೆಂಚ್. ಆದಿಂ ಕ್ರಿಮಿನಲಾಂಕ್, ಚುಕಿದಾರಾಂಕ್ ಸೊಧುನ್ ಕಾಡುಂಕ್, ತಾಣಿಂ ಕೆಲ್ಲಿಂ ಕೃತ್ಯಾಂ ಪಾರ್ಕುಂಕ್  ಮಸ್ತ್ ವಾಂವ್ಟ್ ಕಾಡಿಜೆ ಪಡ್ತಾಲಿ. ಥೊಡ್ಯಾ ಅಪ್ರಾಧಿಂಕ್ ಧರುಂಕ್ ವರ್ಸಾಂಚಿಂ ವರ್ಸಾಂಚ್ ಲಾಗ್ತಾಲಿಂ. ಪುಣ್ ಆತಾಂ ವಿಜ್ಞಾನ್ ಇತ್ಲೆಂ ವಾಡ್ಲಾಂಗಿ, ಸಕ್ಕಡ್ ಸಂಗ್ತಿ ಸಂಪ್ಯಾನ್ ಸೊಧುನ್ ಕಾಡುಂಕ್, ಪರಿಹಾರ್ ಕರುಂಕ್ ಸಾಧ್ಯ್ ಜಾಲಾಂ.

ಪುಣ್ ಅಪ್ರಾಧ್ ಕರ್ಚೆ, ಚೊರಿ ಕರ್ಚೆ ಕ್ರಿಮಿನಲ್‍ಯೀ ತಿತ್ಲೆಚ್ ಬುದ್ವಂತ್, ಚಾಲಾಕಿ ಆಸ್ತಾತೆ ನೆಂ.

ಚಡಾವತ್ ಕ್ರಿಮಿನಲ್ ಬುದ್ವಂತ್‍ಚ್ ಆಸ್ತಾತ್. ತಿಕ್ಕೆ ಚಡ್‍ಚ್ ಬುದ್ವಂತ್ಕಾಯ್ ಆಸ್ತಾ ತಾಂಕಾಂ.

ವಿಕೃತ್ ವಿಮರ್ಶಕಾಂಪರಿಂಗಿ?

ನ್ಹಂಯ್ ಮ್ಹಣೊಂಕ್ ಜಾತಾವೆ? ತೆಯಿ ತಶೆಂಚ್. ಲೆಕಾ ವರ್ತಿ ಬುದ್ವಂತ್ಕಾಯ್ ಆಣ್ವ್ಯಾ ಕಾಮಾಂಕ್, ವಾಯ್ಟ್ ಉದ್ದೇಶಾಂಕ್ ಖರ್ಚಿತಾತ್. ಪುಣ್ ವಿಜ್ಞಾನ್ ತಸಲ್ಯಾಂಚೆಂ ಹಣೆಬರಪ್ ಭಾಯ್ರ್ ಘಾಲುಂಕ್ ಆಧಾರ್ ಜಾಲಾಂ.

ಬದ್ಧತಾ ನಾತ್‍ಲ್ಲೆ ವಿಮರ್ಶಕ್‍ಗಿ?

ತಾಂಕಾಂ ಬದ್ಧತಾ ನಾ. ಆಸ್ಚಿ ಮಲಬದ್ದತಾ ಮಾತ್ರ್!

ಹೊ!!! ದೆಕುನ್‍ಗಿ ಹೆರಾಂಕ್ ಧೊಸ್ಚೆಂ?

ಥೊಡ್ಯಾ ಮಾನಸಿಕ್ ಪಿಡೆಸ್ತಾಂಕ್ ಹೆರಾಂನಿ ಭಲಾಯ್ಕೆಂತ್ ಆಸ್ಚೆಂ ಪಳೆಂವ್ಕ್ ಜಾಯ್ನಾ ನೆ, ಮೊಸ್ರಾನ್. ತಶೆಂ ಥೊಡೆ ಮಾನಸಿಕ್ ಪಿಡೆಸ್ತ್‍ಯಿ ಆಸ್ತಾತ್. ಹೆರಾಂನಿ ಬರೆಂ ಜಾಂವ್ಚೆಂ, ಉಂಚಾಯೆಕ್ ಪಾಂವ್ಚೆಂ, ಯಶಸ್ವಿ ಆಪ್ಣಾಂವ್ಚಿ, ಲೊಕಾ ಥಾವ್ನ್ ಹೊಗ್ಳಿಕ್, ಮಾನ್ ಆಪ್ಣಾಂವ್ಚೆಂ… ಸಕ್ಕಡ್ ತಾಂಕಾಂ ವಿಪ್ರೀತ್ ಮೊಸ್ರಾಕ್ ಕಾರಣ್ ಜಾತಾ.

ದೆಕುನ್ ವಿದ್ರೂಪ್ ರಿತಿನ್ ವೀಕ್ ವೊಂಕ್ಚೆಂ?

ಖರೆಂಚ್ ಸಾಂಗ್ಲೆಂಯ್ ತುಂವೆಂ.

ಪುಣ್ ತಾಂಚೆ ಭಿತರ್ ತಿತ್ಲೆಂ ವೀಕ್ ಕಶೆಂ stock ಜಾಂವ್ಚೆಂ?

ತೆಂ ದೆವಾಕೀ ಆಜ್ಯಾಪಾಂಚೆಂ ಜಾಲಾಂ ಕೊಣ್ಣಾ. ತಸಲ್ಯಾ ಮಾನಸಿಕ್ ಅಸ್ತಸ್ತಾಂಕ್ ಥೊಡ್ಯೊ ಹೆರ್ ಪಿಡಾ, ಸವಯೊ ಆಸ್ತಾತ್. ಹೆರಾಂಚೆಂ ಬರೆಂಪಣ್ ಅನುಸರಣ್ ಕರ್ಚ್ಯಾ ಬದ್ಲಾಕ್ ತಾಂಚೆಂ ಗೂ, ಮೂತ್, ಶೆಣ್, ಕಿರ್ಮೆಂ, ಘಾಮ್ ಸಗ್ಳೆಂ ಹೆ ಆಪ್ಣಾ ಭಿತರ್ ಗಿಳ್ತಾತ್. ಆನಿ ತೆಂಚ್ ಭರೊನ್ ವಿಕಾರ್ ಜಾವ್ನ್ ವೀಕ್ ವೊಂಕ್ತಾತ್.

ತಾಂಕಾಂ ದುಸ್ರೆಂ ಕಿತೆಂಯ್ ಕರುಂಕ್ ಜಾಯ್ನಾಂಗೀ? ಹೆರಾಂಚೆಂ ಶೆಣ್ ಖಾಂವ್ಚ್ಯಾ ಬದ್ಲಾಕ್.

ತೆ ಕೊಣಾಯ್ಚ್ಯಾ ಬೂದ್‍ಬಾಳಿಕ್ ಗಣ್ಣೆಂ ಕರಿನಾಂತ್. ಬದ್ಲಾಕ್ ಆಪ್ಣಾಕ್ ಭಲಾಯ್ಕಿ ದೀಂವ್ಕ್, ಸುಧಾರುಂಕ್, ಬರೆಂ ಕರುಂಕ್ ಆಯಿಲ್ಲ್ಯಾಂಚೆರ್‍ಚ್ ಕೊಯ್ತಿ ಬಿಜಾಯ್ತಾತ್.

ಹಿ ಎಕ್ದಮ್ ಬಾಳ್‍ಬೂದ್ ಜಾಲಿ ಮು?

ಕಿತೆಂ ಕರುಂಕ್ ಜಾತಾ? ತೆ ಸುಧ್ರಾನಾಂತ್.

ತಶೆಂಚ್ ಸೊಡ್ಲ್ಯಾರ್ ಸಕ್ಡಾಂಕ್ ಚಾಬೊಂಕ್ ಆಸಾತ್.

ತಶೆಂಚ್ ಜಾಲಾಂ. ಪುಣ್, ಸುಣೆಂ ಪಯ್ಸ್ ಥಾವ್ನ್ ಭೊಂಕ್ತಾ, ಆಮ್ಕಾಂ ರಗ್ಳೆ ಜಾಯ್ನಾಂತ್ ಮ್ಹಣ್ ವೊಗೆ ರಾವ್ಯೆತ್. ಪುಣ್ ತೆಂಚ್ ಸುಣೆಂ ಚಾಬೊಂಕ್ ಆಯ್ಲ್ಯಾರ್?

ಪಿಶೆಂ ಸುಣೆಂ ತರ್ ಭಾರಿಚ್ ಡೇಂಜರ್.

ಯೆಸ್ ಯೆಸ್. ತೆದಾಳಾ ಕಳ್ತಾ ಸಕ್ಡಾಂಕೀ.

ತಸಲೆ ಆಸ್ತಾತ್ ಮ್ಹಳ್ಳೆಂ ಪಾತ್ಯೆಂವ್ಕ್ ಕಷ್ಟ್ ನ್ಹಂಯ್ಗಿ?

ಪಾತ್ಯೆಂವ್ಕ್ ಕಷ್ಟ್‍ಚ್. ಪುಣ್ ತಿಚ್ ಹಕೀಗತ್. ತಸಲೆ ಆಪ್ಲ್ಯಾ ವೆಕ್ತಿತ್ವಾಕ್ ಮುಖವಾಡ ಘಾಲ್ನ್ ಆಸ್ತಾತ್. ದೆಕುನ್ ಪಾರ್ಕುಂಕ್ ತಿಕ್ಕೆ ಕಷ್ಟ್.

ತೆಂ ಸಮಾ. ಕೊಣಾಕ್ ಅಂದಾಜ್ ಆಸ್ತಾ ಕೋಣ್ ಕಸಲೊ ಮ್ಹಣ್. ಮಾರ್ ಖೆಲ್ಯಾ ಉಪ್ರಾಂತ್‍ಚ್ ಕಳ್ಚೆಂ ನೆ?

ವ್ಹಯ್. ಭಿತರ್ ಏಕ್ ಭಾಯ್ರ್ ಆನ್ಯೇಕ್ ರೂಪ್. ತಾಂಚೆಂ ನಾಗ್ಡೆಂಪಣ್ ಉಗ್ತಾಡಾಕ್ ಯೆತಾನಾ ಸಗ್ಳೆಂ ಕಳ್ತಾ.

ತುಜೆಂ ರಾಜಾಂವ್ ಸಾರ್ಕೆಂ ಆಸಾ. ಅಸಲ್ಯಾಂಚೆಂ ಅಸ್ಲಿಪಣ್ ಸಕ್ಡಾಂಕ್ ಕಳಾಜೆ.

ಕಳ್ತಾ ನೆ. ಆತಾಂಚಿಂ sophisticated ಸಾಧನಾಂ, ಉಪಕರಣಾಂ, ಅನುಭವ್ ಅಸಲ್ಯಾ ದಳ್ದಿರ್ಯಾಂಚಿ ಸಗ್ಳಿ ಚಾಲ್ ಪಾರ್ಕುಂಕ್ ಆನಿ ತಾಂಚಿಂ ಕೃತ್ಯಾಂ expose ಕರುಂಕ್ ಕಾರಣ್ ಜಾಲ್ಯಾಂತ್. ವಿಜ್ಞಾನ್ ಆನಿ ವಿಜ್ಞಾನಿಂಕ್ ನಿಜಾಯ್ಕಿ ಹೊಗ್ಳಿಕ್ ಫಾವೊ.

Lets praise the Scientists!

ಹಿಪ್ ಹಿಪ್ ಹುರ್ರೇ!

ತಶೆಂ ಜಾಲ್ಲ್ಯಾನ್ ಮನ್ಶಾಚೆಂ ನಾಗ್ಡೆಂಪಣ್ ಮನ್ಶಾನ್‍ಚ್ ಉಗ್ತ್ಯಾನ್ ದಾಕಂವ್ಚೆ ತಸಲೆಂ ಸಂಶೋಧನ್ ಜಾಲಾಂ.

ಭಾರಿಚ್ ಬರೆಂ ಹೆಂ.

ಖಂಡಿತ್. ದೆಕುನ್ ಮ್ಹಣ್ಚೆಂ, ಬುದ್ವಂತ್ಕಾಯ್ ಬರ್ಯಾ ಕಾಮಾಂಕ್, ಉದ್ದೇಶಾಂಕ್ ವಾಪಾರಿಜೆ. ವಾಯ್ಟ್ ಕಾಮಾಂಕ್, ಖೊಟ್ಯಾ ಉದ್ದೇಶಾಂಕ್ ಅತಿ ಬುದ್ಧಿವಂತಿಕೆ ವಾಪಾರ್ಲ್ಯಾರ್ ಶಿರ್ಕೊನ್ ಪಡ್ಚೆ ಸಂಭವ್ ಉದೆತಾತ್. ತೆದಾಳಾ ಕಸಲೆಂ ನಿತಳ್, ಶ್ರೇಶ್ಟ್ ವಸ್ತುರ್ ನ್ಹೆಸ್ಲ್ಯಾರೀ ತಾಚೆಂ ನಾಗ್ಡೆಂಪಣ್ ಉಗ್ತ್ಯಾನ್ ದಿಸ್ತಾ.

ತುಂವೆಂ ಸಾಂಗ್ಚೆಂ 100% ಸಾರ್ಕೆಂ. ತುಕಾ ಏಕ್ ನಮಸ್ಕಾರ್.

ದೇವ್ ಬರೆಂ ಕರುಂ ರೆ ತುಕಾಯಿ. ಸಕ್ಡಾಂಕೀ ತುಜೆಪರಿಂ ಖುಶಾಲಿ ಮನ್, ರೊಮ್ಯಾಂಟಿಸಿಟಿ ಆಸಾನಾ.

ತಾಕಾ ಕಿತೆಂ ಕರುಂಕ್ ಜಾತಾ? ಎಕೆಕ್ಲೊ ಎಕೇಕ್ ರೀತ್ ಆಸ್ತಾ. ತಾಂಚಿ ಸೃಷ್ಟಿಚ್ ತಶಿ ಆಸ್ತಾ.

ಸೃಷ್ಟಿ ಕಶಿ ಆಸ್ಲ್ಯಾರೀ ದೆವಾನ್ ಮನ್ಶಾಕ್ ಬೂದ್ ದೀಂವ್ಕ್ ನಾಂಗೀ? ಸಮ್ಜಣಿ ಆಸ್ಚಿ ಕಿತ್ಯಾಕ್ ಮಾಗಿರ್? ಖಂಚೆಂ ಬರೆಂ, ವಾಯ್ಟ್ ಖಂಚೆಂ ಮ್ಹಣ್ ಸಮ್ಜೊನ್ ತ್ಯಾ ಪ್ರಕಾರ್ ಜಿಯೆಂವ್ಚಿ ಜವಾಬ್ದಾರಿ ಹರ್ಯೆಕ್ಲ್ಯಾಚಿ. ಕಾಲ್ಚೆಂ ಉಡಾಸಾಕ್ ಹಾಡ್ನ್, ಆಜ್ ಪಾರ್ಕುನ್, ಫಾಲ್ಯಾಂಚೆಂ ಚಿಂತುನ್, ಪೊರ್ವಾಂ ಖಾತಿರ್ ಜಿಯೆಂವ್ಚೆಂ ಮನ್ಶಾಕ್ ದಿಲ್ಲೆಂ ದೆಣೆಂ.

ಆಯ್ಚೆಂ ಚಿಂತ್ಚೆಂಚ್ ಕಶ್ಟ್. ಆನಿ ಫಾಲ್ಯಾಂ, ಪೊರ್ವಾಂಚೆಂ ಚಿಂತುಂಕ್ ಕೊಣಾಕ್ ಪುರ್ಸತ್ ಆಸಾ.

ವ್ಹಯ್‍ರೆ. ಕೊಣೆಂಗೀ ಎಕ್ಲ್ಯಾನ್ ಫಾಲ್ಯಾಂಗೀ, ಪೊರ್ವಾಂಗೀ ಕೊಣೀ ಆಸಾನಾಂತ್, ಸತ್ತ್ಯಾನಾಸ್ ಜಾತಾ ಮ್ಹಣ್ ಪ್ರವಾದ್ ಉಚಾರ್ಲಾಂ ಖಂಯ್.

ತೊ ಕೋಣೀ ಫಟ್ಕಿರೊ ಪ್ರವಾದಿಗಿ, ಬೊಲ್ಮೆಂ ಸಾಂಗ್ತಲೊಗಿ ಆಸ್ತಲೊ. ವಾ ಜ್ಯೋತಿಷಿ ಪುಣಿ. ಪತ್ರಾಂಚೆಯಿ, ಮಾಧ್ಯಮಾಂಚೆಯೀ ಸಂಸಾರ್ ಆಖೇರ್ ಜಾತಾ ಮ್ಹಣ್ ಭೆಶ್ಟಾವ್ನ್, ಮನ್ಶಾಕ್ ನೀದ್ ನಾತ್‍ಲ್ಲೆಪರಿಂ ಕರ್ತಾತ್. ತೆಂ ಸದಾಂಚೆಂ. ತಾಕಾ ಪೂರಾ ಮಾಂಡೊ ಹುನ್ ಕರಿಜೆ ಮ್ಹಣ್ ನಾ.

ವ್ಹಯ್. ವ್ಹಯ್. ಕೋಣ್‍ಗೀ ನೀದ್ ಯೇನಾತ್ಲೊಚ್ ಖಂಯ್ ತೊ!

ನಿದಾನಾತ್ಲೊ ಸಯ್ತಾನ್?

ಸಯ್ತಾನ್ ಕೆದಿಂಚ್ ನಿದಾನಾ!

(To be continued)

(Originally published on June 06, 2012)

ಭಾಗ್ 1: ಬ್ರಾ ಆನಿ ಬ್ರ್ಯಾಕೆಟ್

ಭಾಗ್ 2: ಹೊಕ್ಲೆಕ್ ಕಿತ್ಯಾಕ್ ಸಾಡೊ ನ್ಹೆಸಂವ್ಚೊ?

ಭಾಗ್ 4: ಒರಿಜಿನಲ್ ಘಾಣ್ ಆನಿ ಕೃತಕ್ ಪರ್ಮಳ್!

The post ವಸ್ತುರಾ ಭಿತರ್ ಸಗ್ಳೆ ನಾಗ್ಡೆಚ್! appeared first on Budkulo.

ಕಾರ್ಯೆಂ ನಿರ್ವಾಹಕ್ ಮೈಕ್ ವೊಂಟಾಂಕ್ ಚಿಡ್ಕಾವ್ನ್ ಆರಾಬಾಯ್ ದಿತಾನಾ ಎಕಾಚ್ಛಾಣೆ ಜಾಗೊ ಜಾಲೊಂ ಹಾಂವ್.

ಮಂತ್ರಿಚೆಂ ಭಾಶಣ್ ಜಾತಚ್, “ಸಮೇಸ್ತ್ ಏಕ್ ಪಾವ್ಟಿಂ ಜೊರಾನ್ ತಾಳಿಯೊ ಪೆಟಾ” ಮ್ಹಣ್ ತಾಣೆಂ ಸಾಂಗ್‍ಲ್ಲೆಂ ಮ್ಹಾಕಾ ‘ಗಾಳಿ ಯೆಟಾ’ ಮ್ಹಣ್ ಕಶೆಂ ಆಯ್ಕಾಲೆಂಗಾಯ್? ಏಕ್ ಪಾವ್ಟಿಂ ತಕ್ಲಿ ಫಾಪುಡ್ಲಿ.

ಆಜ್ಯಾಪ್ ಕಾಂಯ್ ನಾ. ಹಾಂವ್ ‘ಅಚ್ಛೇ ದಿನ್’ ವಿಶಿಂ ಚಿಂತುನ್ ಆಸ್‍ಲ್ಲೊಂ. ಚಿಂತುನ್ ಚಿಂತುನ್ ಖುಶಿ ಜಾಂವ್ಚ್ಯಾ ಬದ್ಲಾಕ್ ಕಂಗಾಲ್‍ಚ್ ಜಾಲ್ಲೊಂ. ಸುರ್ವೆರ್ ‘ಅಚ್ಛೇ ದಿನ್’ ಮಂತ್ರ್ ಆಯ್ಕಾತಾನಾ, ವಾಚ್ತಾನಾ ಖುಶಿ ಜಾತಾಲೆಂ. ಆತಾಂ ಮಾತ್ರ್ ಕಿರಿಕಿರಿ ಜಾತಾ. ಗಿಮಾಚ್ಯಾ ಧಗಿಕ್ ಮ್ಹಾಕಾ ಬಸ್‍ಲ್ಲೆಕಡೆನ್‍ಂಚ್ ನೀದ್. ವಯ್ಲ್ಯಾನ್ ಏಕ್ ಸ್ವಪಣ್!

ಸ್ವಪ್ಣಾಂತ್, ರಾಗಾರ್ ಜಾಲ್ಲೊ ಲೋಕ್ ಮ್ಹಜೆಲಾಗಿಂ ಯೇವ್ನ್ ಬೊಬಾಟ್ತಾ.

ಕಾರಣ್ ಕಿತೆಂ ಮ್ಹಣ್ಚೆಂ? ಅಚ್ಛೇ ದಿನ್ ಮ್ಹಣ್ ಆಶೆಲ್ಲ್ಯಾಂಚಿ ಕಾಶ್ಟಿ ಸುಟೊಂಕ್ ಲಾಗ್‍ಲ್ಲಿ.

ಆಮ್ಕಾಂ ಭಾರತೀಯಾಂಕ್ ನಿರಾಸ್ ಭೊಗ್ಚೆಂ ಜನ್ಮ ಸಿದ್ಧ ಹಕ್ಕು ಮ್ಹಳ್ಯಾರ್ ನೆಗಾರ್ತಲೊ ಕೋಣ್? ತಿತ್ಲೆಂ ಆಸೊನ್‍ಯೀ ಆಮ್ಚೆ ತಿತ್ಲೊ ಖುಶಾಲಿ ಆನಿ ಆಶಾವಾದಿ ಮನಿಸ್ ಹೆರ್ ಕೊಣೀ ಮೆಳ್ಚೆ ನಾಂತ್ ಹ್ಯಾ ಸಂಸಾರಾಂತ್.

ಕಶೆಂ ಮ್ಹಣ್ ವಿಚಾರ್ತಾತ್‍ಗಿ?

ಆಮ್ಚಿಂ ಎಲೆಕ್ಷನಾಂಚ್ ಪಳೆಯಾ. ಹರ್ಯೆಕ್ ಎಲೆಕ್ಷನ್ ಯೆತಾನಾ ಥೊಡ್ಯಾಂಕ್ ಕಲೆಕ್ಷನ್‍ಂಚ್ ಕಲೆಕ್ಷನ್. ರಾಜಕೀಯ್ ಫುಡಾರಿ ಚುನಾವಾಕ್ ಅಭ್ಯರ್ಥಿ ಜಾತಾತ್, ತಾಂಚೆ ಪಾಟ್ಲಾವ್ದಾರಿ ಕಲೆಕ್ಷನಾಕ್ ದೆಂವ್ತಾತ್. ಕಲೆಕ್ಷನ್ ವೊಟಾಂಚೆಂ ಆನಿ ನೋಟಾಂಚೆಂ. ಲೊಕಾಲಾಗಿಂ ವೋಟ್ ಮಾಗ್ಚೆಂ ಆನಿ ಫುಡಾರಿಲಾಗ್ಚೆ ನೋಟ್ ಫಾರ್ಚೆ. ಪಾಟ್ಲಾವ್ದಾರಿಂಕ್ ಹರ್ಯೆಕ್ ಚುನಾವ್ ಅಚ್ಛೇ ದಿನ್. ಪುಣ್ ಲೊಕಾಕ್?

ಭಾರತೀಯ್ ಮತ್‍ದಾರ್ ಸದಾಂಯ್ ಆಶಾವಾದಿ. ಚುನಾವಾ ವೆಳಾರ್ ರಾಜಕೀಯ್ ಪಾಡ್ತಿ, ಫುಡಾರಿಂಚಿಂ ಆಶ್ವಾಸನಾಂ, ಭರ್ವಶ್ಯಾಚಿಂ ಯೋಜನಾಂ ಖರಿಂ ಮ್ಹಣ್ ಸ್ವಪ್ಣೆತಾತ್. ಆನಿ ವೋಟ್ ಘಾಲುನ್ ತಾಂಕಾಂ ಜಿಕಯ್ತಾತ್. ಉಪ್ರಾಂತ್ ಮಾತ್ರ್ ಕಟ್ಟಿಯೀ ಮೆಳನಾ. ತರೀ ಲೋಕ್ ನಿರಾಸ್ ಜಾಯ್ನಾ. ಆನ್ಯೇಕಾ ಎಲೆಕ್ಷನಾ ಮ್ಹಣಾಸರ್ ಥಿರಾಸಣೆನ್ ರಾಕೊನ್ ರಾವ್ತಾತ್. ಪರತ್ ಏಕ್ ಪಾವ್ಟಿಂ ಬೊಕ್ರೊ ಜಾಂವ್ಕ್.

ಹಾಚೆಂ ಅತ್ಯುತ್ತಮ್ ಉದಾಹರಣ್ ಆದ್ಲ್ಯಾ ವರ್ಸಾ ಘಡ್ಲೆಂ. ಲೊಕಾಕ್ ಆಶಾ, ಆಕಾಂಕ್ಷಾ ವಿಪ್ರೀತ್. ತಿ ಆಶಾ ಬರೀ ಕರ್ನ್ ಜಾಣಾ ಆಸ್‍ಲ್ಲೊ ಮ್ಹಳ್ಯಾರ್ ಮೋದಿ. ಮೋದಿ ಮ್ಹಳ್ಯಾರ್ ನರೇಂದ್ರ ಮೋದಿ. ಮ್ಹಳ್ಯಾರ್ ನರೇಂದ್ರ ದಾಮೋದರದಾಸ್ ಮೋದಿ. ಹೆಂ ಕಿತೆಂ ಜೇಮ್ಸ್ ಬೊಂಡ್ ಉಲಯಿಲ್ಲೆಪರಿಂ ಆಯ್ಕತಾ ಮ್ಹಣ್ತಾತ್‍ಗಿ? ವ್ಹಯ್, ವ್ಹಯ್. ಖಂಡಿತ್ ಮೋದಿ ಭಾರತಾಚೊ ಜೇಮ್ಸ್ ಬೊಂಡ್ ಮಾತ್ರ್ ನ್ಹಯ್ ತೊ ಏಕ್ ಸೂಪರ್ ಮ್ಯಾನ್ ಮ್ಹಣ್‍ಚ್ ಲೊಕಾನ್ ಚಿಂತ್ಲೆಂ.

ಅಚ್ಛೇ ದಿನ್!

ಕೊಣಾಕ್ ಆಶಾ ನಾ? ಮೋದಿನ್ ತೆಂ ಬರೆಂ ಕರ್ನ್ ಎನ್‍ಕ್ಯಾಶ್ ಕೆಲೆಂ. ಎಕಾಚ್ಛಾಣೆಂ ತೊ ಬಿಜೆಪಿಚೊ ಪ್ರಧಾನಿ ಅಭ್ಯರ್ಥಿ ಜಾಲೊ. ಬೇತ್ ತೆಂಕುನ್ ಸಾಸ್ಪೊನ್ ಆಸ್‍ಲ್ಲ್ಯಾ ಆಡ್ವಾಣಿಚೆಂ ಬೇತ್ ಮೋಡ್ನ್ ಘಾಲ್ನ್ ಮೋದಿ ಮುಖ್ಲ್ಯಾ ಪಂಗ್ತೆಕ್ ಉಡ್ಲೊಚ್. ಉದ್ಕಾಕ್ ಉಡ್ಲ್ಯಾ ಉಪ್ರಾಂತ್ ಹಿಂವ್ ಕಿತೆಂ, ಗುಂಡಾಯ್ ಕಿತೆಂ! ತೆಂ ಫಿಕಿರ್ ಕರುಂಕ್ ನಜೊ ನೆ, ತಶೆಂ ಆಮ್ಚೊ ಮೋದಿ ಪ್ರಧಾನಿ ಅಭ್ಯರ್ಥಿ ಜಾಲ್ಲೊಚ್ ಪ್ರಧಾನಿ ಜಾವ್ನ್‍ಂಚ್ ಸಯ್ ಮ್ಹಣ್ ಕಾರ್ಯಾಕ್ ದೆಂವ್ಲೊ.

ಭಾರತಾಂತ್ ಲೊಕಾಕ್ ಉತ್ರಾಂನಿಂಚ್ ಮಾಂಕೊಡ್ ಕರ್ಯೆತ್ ಮ್ಹಣ್ ಕಳಿತ್ ನಾತ್ಲೊಲೊ ನೆಣಾರಿಯೆ ತೊ? ಬರೊಚ್ ಜಾಣಾರಿ ತೊ. ದೆಕುನ್ ತಾಣೆಂ ಗೆಲ್ಲೆ ಗೆಲ್ಲೆ ಕಡೆನ್ “ಅಚ್ಛೇ ದಿನ್ ಆನೇವಾಲೆ ಹೇ” ಮ್ಹಣ್ ಬೊಬಾಟ್ಲೊ. ಅಚ್ಛೇ ದಿನ್ ಯೆಂವ್ಚೆ ಕಶೆಂ? ಕೊಣೆಂ ತರೀ ಹಾಡ್ನ್ ದೀಜೆ ನೆ? ಆನಿ ಕೊಣೆಂ, ಆಪುಣ್‍ಂಚ್ ಆಸಾಂ ನೆ ಮ್ಹಳೆಂ ತಾಣೆಂ. ತಶೆಂ ತಾಣೆಂ, “ಮೋದಿ ಆನೇವಾಲಾ ಹೇ, ಅಚ್ಛೇ ದಿನ್ ಆನೇವಾಲೇ ಹೇಂ…” ಮ್ಹಣ್ ದೇಶ್‍ಭರ್ ರುದಾನ್ ಕೆಲ್ಲೆಂ ಸಾರ್ಥಕ್ ಜಾಲೆಂ.

ತ್ಯಾ ವಯ್ರ್ ಮೋದಿನ್ ವಿದೇಶೀ ಬ್ಯಾಂಕಾಂತ್ಲೊ ಲಾಖಾಂನಿ ಕೊರೊಡ್ ರುಪಯ್ ದುಡು ಹಾಡುನ್ ಎಕೆಕ್ಲ್ಯಾಚ್ಯಾ ಎಕೌಂಟಾಕ್ ಪಂದ್ರಾ ಲಾಖ್ ರುಪಯ್ ಘಾಲ್ತಾಂ ಮ್ಹಣ್ ಸಾಂಗ್ಲೆಂ ಪಳೆ, ಲೊಕಾನ್ ಚಿಂತ್ಲೆಂ ಆನಿ ಸ್ವಪ್ಣೆಲ್ಲೆಂ ಎಕ್‍ಚ್ ‘ಆನಿ ಸಗ್ಳಿ ಜೀಣ್ ಅಚ್ಛೇ ದಿನ್’ ಮ್ಹಣ್‍ಂಚ್. ದೆಕುನ್ ಮತ್ ವಾರ್‍ಯಾರ್ ಉಬೊಂಕ್ ಸೊಡುನ್ ಶೀದಾ ವಚೊನ್ ಮೋದಿಚ್ಯಾ ಪಾಡ್ತಿಕ್ ವೋಟ್ ದಾಂಬ್ಲೆಚ್ ದಾಂಬ್ಲೆ. ಪರಿಣಾಮ್ ಬಿಜೆಪಿಕ್ ಬಹುಮತ್, ಮೋದಿ ಪ್ರಧಾನಿ ಗಾದಿಕ್. ತಾಂಕಾಂ ಆಯ್ಲೆಚ್ – ಅಚ್ಛೇ ದಿನ್.

ಪುಣ್, ಲೊಕಾಕ್ ಪರತ್ ಕಟ್ಟಿಚ್!

ದೆಕುನ್ ಸಕ್ಕಡ್ ಯೇವ್ನ್ ಮ್ಹಜೆಲಾಗಿಂ ದುರ್ಸೊನ್ ಆಸಾತ್. ಹಾಂವ್ ಕಿತೆಂ ಕರುಂ? ಸಕ್ಕಡ್ ಬರವ್ನ್ ಘೆತ್ಲೆಂ ಆನಿ ಭಾಯ್ರ್ ಸರ್ಲೊಂ ಆನಿ ಶೀದಾ ಮೋದಿಚ್ಯಾ ಅಭಿಮಾನಿ ಸಂಘಚ್ಯಾ ದಫ್ತರಾಕ್ ಗೆಲೊಂ.

ತಾಂಚೊ ಅಧ್ಯಕ್ಷ್ ಎ.ಸಿ. ರೂಮಾಂತ್ ಥಂಡ್ ಬಿಯರ್ ಚಾಕೊನ್ ಧಗ್ ಎಂಜೊಯ್ ಕರ್ತಾಲೊ. ಹಾಂವೆಂ ಮ್ಹಜ್ಯಾ ಮತಿಂತ್ಲೆ ವಿಚಾರ್ ತಾಕಾ ಸಾಂಗ್ಲೆ ಆನಿ ಲೊಕಾಚಿ ದೂರಾಂ ತಾಕಾ ಒಪ್ಸಿಲಿಂ. ಬಿಯರ್ ಟಿನ್ನ್ ಪುರ್ತೆಂ ಚಿಂವೊನ್ ಡಸ್ಟ್ ಬಿನ್ನಾಕ್ ಉಡವ್ನ್ ಧೆಂಕ್ ಕಾಡ್ನ್ ತೊ ಉಲಯ್ತಚ್ ರಾವ್ಲೊ, ರಾಜಧಾನಿ ಎಕ್ಸ್‍ಪ್ರೆಸ್ ಸುಂಯ್ಪುನ್ ಗೆಲ್ಲೆಪರಿಂ.

“ಆನಿ ಕಿತೆಂ ಮೋದಿ ಆಪ್ಣೆಂ ಎಲೆಕ್ಷನ್ ರ್‍ಯಾಲಿಂತ್ ಉಲಯಿಲ್ಲೆಂ ಸಕ್ಕಡ್ ಉಡಾಸ್ ದವರುಂಕ್ ಬಸ್ಲಾಯೆ? ಎಲೆಕ್ಷನ್ ಮ್ಹಣ್ತಾನಾ ರ್‍ಯಾಲಿ, ಭಾಶಣಾಂ ಆಸ್ತಾತ್‍ಚ್. ತೆಂ ಪೂರಾ ರಾಜಕೀಯಾಂತ್ ಆಸ್‍ಲ್ಲೆಂಚ್. ಉಲಂವ್ಚೆಂ, ಆಶ್ವಾಸನಾಂ ದಿಂವ್ಚೆಂ, ಹೆರಾಂಕ್ ದುರ್ಸೊಂಚೆಂ, ಆಪ್ವಾದ್ ಘಾಲ್ಚೆ ಆಸ್‍ಲ್ಲೆಚ್. ತೆಂ ಸಕ್ಕಡ್ ಎಲೆಕ್ಷನ್ ಸ್ಪೆಶಲ್. ವಿರೋಧ್ ಪಾಡ್ತಿಂಕ್ ದುಸ್ಮಾನಾಂಪರಿಂ ಖೆಂಡ್ಚೆಂ, ಯೆಟ್ಚೆಂಯ್ ಎಲೆಕ್ಷನಾಚೊ ವಾಂಟೊ. ಎಲೆಕ್ಷನ್ ಜಾತಚ್, ‘ಆಮಿ ರಾಜಕೀಯ್ ಪಾಡ್ತಿ ಸಕ್ಕಡ್ ಎಕ್‍ಚ್!’ ಹೆಂ ಲೊಕಾಕ್ ವಿಸರ್ ಪಡ್ಲ್ಯಾರ್ ಮೋದಿಚಿ ಕಸಲಿ ಚೂಕ್ ಸಾಯ್ಬಾ!?

“ಅಧಿಕಾರ್ ಮ್ಹಳ್ಯಾರ್ ತಶೆಂಚ್. ಮೆಳ್ತಾ ಮ್ಹಣಾಸರ್ ಏಕ್ ಉಲಂವ್ಚೆಂ, ಮೆಳ್ತಚ್ ದುಸ್ರೆಂಚ್ ಸಾಂಗ್ಚೆಂ. ಮ್ಹಣ್ತಲೊ ಎಕ್‍ಚ್ ಮನಿಸ್, ಪುಣ್ ತವಳ್ಚೊ ತೊ ವೆಗ್ಳೊ, ಆತಾಂಚೊ ಆನ್ಯೇಕ್ಲೊ. ಹೆಂಚ್ ರಾಜಕೀಯ್. ಲೊಕಾಕ್ ಹೆಂ ಸಮ್ಜನಾ. ದೆಕುನ್ ತಾಣಿಂ ಪಾತ್ಯೆವ್ನ್‍ಂಚ್ ರಾಂವ್ಚೆಂ, ಪಾತ್ಯೆಣೆನ್‍ಂಚ್ ವೋಟ್ ಘಾಲ್ಚೆ. ತೊ ತಾಂಚೊ ಕಾಯ್ದೊ, ತಿತ್ಲೆಂಚ್ ತಾಂಚೆಂ ಹಕ್ಕ್. ತೆಂ ಮಾತ್ರ್ ತಾಣಿಂ ಕರ್ಯೆತ್.

“ವೋಟ್ ಜಾಲ್ಯಾ ಉಪ್ರಾಂತ್ ‘ಆಮ್ಕಾಂ ಅಚ್ಛೇ ದಿನ್ ಕೆದಾಳಾ ಯೆತಿತ್?’ ಮ್ಹಣ್ ಆಂಯ್ಡೆ ಘೊಟುನ್ ರಾಕ್ಚೆಂಚ್ ಮಹಾ ಪಾತಕ್. ತಾಚೆ ವಯ್ರ್ ಮೋದಿಕ್ ದುರ್ಸೊಂಚೆಂ ಅಪ್ರಾಧ್‍ಚ್ ಸಯ್. ಲೊಕಾನ್ ಕೆದ್ನಾಂ ಸುಧ್ರೊಂಚೆಂ? ಎಲೆಕ್ಷನಾ ಆದಿಂ ಕಿತೆಂಯ್ ಸಾಂಗ್ಲೆಂ ಮ್ಹಣ್, ಎಲೆಕ್ಷನ್ ಮುಗ್ದೊನ್ ವರ್ಸ್ ಉಬ್ಲ್ಯಾರೀ ತೆಂಚ್ ವಿಚಾರ್ಚೆಂ ಮ್ಹಳ್ಯಾರ್ ಅರ್ಥ್ ಆಸಾಯೆ? ಕಸಲೊ ಲೋಕ್ ಹಾಬಾ ಹೊ!?

“ಮೋದಿ ಪ್ರಧಾನಿ ಜಾಲೊ. ತಕ್ಷಣ್ ತಾಣೆಂ ಸಕ್ಕಡ್ ಸಮಸ್ಸೆ ಪರಿಹಾರ್ ಕರುಂಕ್ ಕಶೆಂ ಜಾಂವ್ಚೆಂ? ತಾಣೆಂ ಕಿತೆಂ ಕರಿಜೆ ತರೀ ನಿಯಮಾಂ ಪರ್ಮಾಣೆ, ಸಂವಿಧಾನಾಚ್ಯಾ ಹಿಶಾರ್ಯಾಂ ಖಾಲ್‍ಚ್ ಕರಿಜೆ. ತೊ ಕಿತೆಂ ಸೂಪರ್ ಮ್ಯಾನ್‍ಗಿ ಎಕ್‍ಚ್ ಪಾವ್ಟಿಂ ಸಕ್ಕಡ್ ಸಾರ್ಕೆಂ ಕರುಂಕ್, ಲೊಕಾಚಿ ದುಬ್ಳಿಕಾಯ್ ನಿವಾರುಂಕ್? ತೊಯ್ ಆಮ್ಚೆ ತುಮ್ಚೆ ಪರಿಂ ಏಕ್ ಮನಿಸ್ ಮ್ಹಳ್ಳೆಂ ವಿಸ್ರನಾಯೆ!

“ಅರೆರೆ! ಥೊಡ್ಯಾಚ್ ತೆಂಪಾ ಆದಿಂ ಮೋದಿ ಸೂಪರ್ ಮ್ಯಾನ್ ಮ್ಹಣ್‍ಂಚ್ ಪೆಂಪಾರೆಂ ವ್ಹಾಜಯಿಲ್ಲೊ ಉಡಾಸ್ ಮ್ಹಣ್ತಾತ್‍ಗಿ? ಆರೇ! ಕಿತ್ಲೆ ಪಾವ್ಟಿಂ ಸಾಂಗ್ಚೆಂ? ತೆಂ ಪೂರಾ ಎಲೆಕ್ಷನಾ ಪಯ್ಲೆಂ. ತೆ ದೀಸ್ ವೆಗ್ಳೆ. ಆತಾಂಚೆ ದೀಸ್ ವೆಗ್ಳೆ. ಇಲ್ಲೆಶೆಂ ಪುಣೀ ಪ್ರಾಕ್ಟಿಕಲ್ ಚಿಂತಪ್ ನಾ ಮ್ಹಳ್ಯಾರ್! ಸಮ್ಜನಾಂಗಿ? ಕಾಲೆಂಗಿ ಹಾಬಾ, ಲೊಕಾಕ್ ತಿತ್ಲೆಂಯ್ ಕಳನಾ ಮ್ಹಳ್ಯಾರ್!

“ಅಚ್ಛೇ ದಿನ್ ಮ್ಹಳ್ಳೆಂ ಮೋದಿನ್. ಆತಾಂ ದೀಂವ್ಕ್ ನಾಂತ್‍ಗಿ ಅಚ್ಛೇ ದಿನ್? ಅಂಬಾನಿ ಲಾಗಿಂ ವಿಚಾರಾ, ಅದಾನಿ ಕಡೆನ್ ವಿಚಾರಾ. ತೆ ಸಾಂಗ್ತಾತ್ ಮೋದಿನ್ ಕಶೆಂ ಪೂರಾ ಅಚ್ಛೇ ದಿನ್ ಒದಗ್ಸುನ್ ದಿಲ್ಯಾತ್ ಮ್ಹಣ್. ತಾಂಚ್ಯಾ ಸಂತಾನ್ ಕುಟ್ಮಾಂಕ್ ಆನಿ ಪಿಳ್ಗೆನ್ ಪಿಳ್ಗೆಕ್ ಅಚ್ಛೇ ದಿನ್ ಮೋದಿನ್ ಕಿತ್ಲ್ಯಾ ವೆಗಿಂ ದಿಲ್ಯಾತ್ ಮ್ಹಳ್ಳೆಂ ಕಿತ್ಯಾಕ್ ಲೊಕಾಕ್ ದಿಸನಾ?

“ಪೆಟ್ರೋಲಿಯಂ ಕಂಪೆನಿಂಕ್ ಅಚ್ಛೇ ದಿನ್ ಮೋದಿನ್‍ಂಚ್ ನಂಯ್ಗೀ ದಿಲ್ಲೆ? ಆದಿಂ ಸರ್ಕಾರಿ ಕಂಪೆನಿಚೆ ಮಾತ್ರ್ ಪೆಟ್ರೋಲ್, ಡೀಸಿಲ್ ವಿಕ್ತಾಲೆ. ಆನಿ ಮುಖಾರ್ ಖಾಸ್ಗಿ ಕಂಪೆನಿಚೆ, ಮ್ಹಳ್ಯಾರ್ ಅಂಬಾನಿ ತಸಲ್ಯಾಂಚ್ಯೊ ಕಂಪೆನಿಯ್ ವಿಕ್ತಾತ್. ವಿದೇಶಾಂತ್ ಉಣ್ಯಾ ಮೊಲಾಕ್ ಕ್ರೂಡ್ ಆಯಿಲ್ ಘೆವ್ನ್ ಡಬ್ಬಲ್ ಮೊಲಾಕ್ ತಾಣಿಂ ಪೆಟ್ರೋಲ್, ಡೀಸಿಲ್ ವಿಕ್ತಾನಾ ತಾಂಕಾಂ ಅಚ್ಛೇ ದಿನ್ ಮಾತ್ರ್ ನಂಯ್ ಅಚ್ಛೇ ಸಾಲ್! ಹೆಂ ಕಿತ್ಯಾಕ್ ಠಿಕಾ ಕರ್ತೆಲ್ಯಾಂಕ್ ದಿಸನಾ? ಕಿತ್ಲೆ ಪಕ್ಷಪಾತಿ ತೆ, ಛೆ!

“ಆದಿಂ ಕೃಷಿ ಜಾಗೆ, ಹಳ್ಳ್ಯೊ, ರಾನ್, ನಂಯೊಂ ಸಗ್ಳ್ಯೊ ಕೃಶಿಕಾಂಕ್ ಆಸ್‍ಲ್ಲ್ಯೊ. ತಾಂಕಾಂಚ್ ಕಿತ್ಯಾಕ್? ಮೋದಿನ್ ತೆಂ ಸಗ್ಳೆಂ ಉದ್ಯಮಿಂಕ್, ಪ್ರತ್ಯೇಕ್ ಜಾವ್ನ್ ಅಂಬಾನಿ, ಅದಾನಿ ತಸಲ್ಯಾಂಕ್ ಉಣ್ಯಾ ಮೊಲಾಕ್ ಆನಿ ಬೋವ್ ಸಲೀಸಾಯೆನ್ ಘೆಂವ್ಕ್ ಕಾನೂನ್ ಹಾಡ್ಚೆಂ ಮೋದಿಚೆಂ ವ್ಹಡ್‍ಪಣ್ ಮ್ಹಳ್ಳೆಂ ಕಿತ್ಯಾಕ್ ಕೊಣೀ ಸಾಂಗನಾ? ಕಿತ್ಲೆ ಬರೆ ಅಚ್ಛೇ ದಿನ್ ನಂಯ್ಗೀ ಹೆ? ಕೃಶಿಕಾಂಕ್ ಫಕತ್ ಕಾಶ್ಟಿ ನ್ಹೆಸೊಂಕ್ ತಿತ್ಲೊ ಜಾಗೊ ಕಿತ್ಯಾಕ್? ಉದ್ಯಮಿ, ಕಂಪೆನ್ಯೊ ತ್ಯಾ ಜಾಗ್ಯಾಂನಿ ರಸ್ತೆ, ಕಾರ್ಖಾನೆ, ಕೈಗಾರಿಕೊ, ಕೊಂಪ್ಲೆಕ್ಸಾಂ, ಮೊಲಾಂ, ಮಲ್ಟಿಪ್ಲೆಕ್ಸಾಂ ಆನಿ ಎಪಾರ್ಟ್‍ಮೆಂಟಾ ಬಾಂಧುನ್ ದೇಶ್ ಉದ್ಧಾರ್ ಕರಿನಾಂತ್‍ಗಿ? ಕಿತ್ಯಾಕ್ ಹೆಂ ದುರ್ಸೊಣೆಂ? ಲೊಕಾನ್ ಹಾಡ್ ನಾತ್ಲೆಲ್ಯಾ ಜಿಬೆನ್‍ಂಚ್ ಕಿತೆಂ ಕಿತೆಂ ಉಲಂವ್ಚೆಂ ನಂಯ್ಗಿ? ಶ್ಯಿ!

“ಆದಿಂ ಯುಪಿಎ ಸರ್ಕಾರಾನ್ ಕೆಲ್ಲಿಂ-ಕರ್ಚಿಂ ಹರ್ಯೆಕ್ ಕಾಮಾಂ, ಯೋಜನಾಂ, ಕಾನುನಾಂ ಖೊಟಿಂ, ಬುರ್ಶಿಂ, ಪಾಡ್, ದೇಶ್‍ದ್ರೋಹಾಚಿಂ ಮ್ಹಣ್ ಮೋದಿನ್, ಬಿಜೆಪಿನ್ ಆರಾಬಾಯೊ ದಿಲ್ಲ್ಯೊ, ಕಿಂಕ್ರಾಟ್ಯೊ ಮಾರ್’ಲ್ಲ್ಯೊ. ಕಿತೆಂ ಜಾಲೆಂ? ತವಳ್ ತೆ ವಿರೋಧ್ ಪಾಡ್ತಿಚೆ ಜಾವ್ನಾಸ್‍ಲ್ಲೆ. ತಾಂಚೆಂ ಕಾಮ್ ತೆಂಚ್ ನೆ? ಆತಾಂ ಅಧಿಕಾರಾರ್ ಆಸಾತ್, ವೆಗ್ಳೆಂಚ್ ಕರ್ತಾತ್ ಆನಿ ಉಲಯ್ತಾತ್ ಮ್ಹಣ್ ನಿಂದಾ ಕಿತ್ಯಾಕ್? ಕೊಂಗ್ರೆಸಾಚ್ಯಾಂಕ್ ಆನಿ ಕಿತೆಂ ಕಾಮ್? ತಾಣಿಂ ನೆಂ ಆತಾಂ ಅಧಿಕಾರ್ ಹೊಗ್ಡಾವ್ನ್ ವಿರೋಧ್ ಪಾಡ್ತಿಂಚ್ಯಾ ಮೆಳಿಂತ್ ಆಸ್ಚೆಂ? ಆತಾಂ ತಾಣಿಂಚ್ ದುರ್ಸಜೆ, ಆಮಿಂ ನಂಯ್. ಖೊಡಿ ಕಾಡ್ತೆಲ್ಯಾಂಕ್ ಹೆಂ ಕಳನಾ!

“ಕೊಂಗ್ರೆಸಾಚೆ ಆಮ್ಚ್ಯಾ ಮೋದಿಚೊ ಸರ್ಕಾರ್ ಯೂ ಟರ್ನ್ ಸರ್ಕಾರ್ ಮ್ಹಣ್ ಹೆಡಾಯ್ತಾತ್. ಆನಿ ಕಿತೆಂ ಕರಿಜೆ ಆಸ್ಲೆಂ ಆಮಿ? ತಾಣಿಂ ವಿದೇಶೀ ಕಂಪೆನಿಂನಿ ಭಾರತಾಂತ್ ವಿನಿಯೋಜನ್ ಕರ್ಚೆಂ ಆಮಿ ‘ತುಮಿ ಕೊಂಗ್ರೆಸ್‍ಗಾರ್ ದೇಶ್ ವಿಕ್ತಾತ್’ ಮ್ಹಣ್ ಆರೋಪ್ ಘಾಲ್ನ್ ವಿರೋಧ್ ಕೆಲೊ. ಆಮಿ ತಾಂಚೆಪರಿಂ ಬಿಲ್ಕುಲ್ ನಂಯ್. ಆಮಿ ದೇಶ್‍ಚ್ ವಿದೇಶಿ ಕಂಪೆನಿಂಕ್ (ಇನ್‍ವೆಸ್ಟ್ ಕರುಂಕ್) ದಿತಾಂವ್. ತಾಂಕಾಂ ಹೆಂ 50 ವರ್ಸಾಂನಿ ಜಾಂವ್ಕ್ ನಾ. ಆಮಿ ಎಕಾಚ್ ವರ್ಸಾನ್ ಕೆಲೆಂ. ಹೆಂ ಆಮ್ಚೆಂ ಸಾಧನ್ ನಂಯ್ಗಿ? ವಚ್, ವಚ್. ಲೋಕ್ ದುರ್ಸೊನ್‍ಂಚ್ ಆಸ್ತಾ. ತಾಂಕಾಂ ಆನಿ ಕಿತೆಂ ಕಾಮ್? ಎಲೆಕ್ಷನಾಕ್ ಆನಿಕೀ ಚಾರ್ ವರ್ಸಾಂ ಆಸಾತ್. ತೆದಾಳಾ ಬಿಫಾಚೆಂ ಮಾಸ್ ಆಸಾ, ರಾಮ್ ಆಸಾ, ಮಂದಿರ್ ಆಸಾ. ಪಾವನಾತ್ಲ್ಯಾರ್ ಲವ್ ಜಿಹಾದ್ ಆಸಾ, ಘರ್ ವಾಪಸಿ ಆಸಾ, ಮತಾಂತರ್ ಆಸಾ. ಲೊಕಾಕ್ ಆಮಿಂಚ್ ಜಾಯ್. ತವಳ್ ಪರ್ಯಾಂತ್ ಆಮ್ಕಾಂ ಅಚ್ಛೇ ದಿನ್. ಲೊಕಾಕ್ ಚಾರ್ ವರ್ಸಾಂ ರಾಕೊಂಕ್ ಸಾಂಗ್. ವಚ್, ವಚ್!” ಮ್ಹಣೊನ್ ಆನ್ಯೇಕಾ ಬಿಯರ್ ಟಿನ್ನಾಕ್ ಹಾತ್ ಘಾಲೊ ಅಧ್ಯಕ್ಷಾನ್.

ವ್ಹಯ್ ನಂಯ್ಗೀ? ಮ್ಹಾಕಾಯೀ ತಾಣೆ ಸಾಂಗ್‍ಲ್ಲೆಂ ಸಾರ್ಕೆಂ ಮ್ಹಣ್ ದಿಸ್ಲೆಂ. ಲೊಕಾಕ್ ಸಮ್ಜಣಿ ಉಣಿ ಆಸ್‍ಲ್ಲ್ಯಾನ್‍ಂಚ್ ನಂಯ್ಗೀ ತಾಣಿಂ ಹರ್ಯೆಕ್ ಪಾವ್ಟಿಂ ದುರ್ಸೊಂಚೆ, ನಿರಾಸ್ ಜಾಂವ್ಚೆಂ, ಯೆಟ್ಚೆಂ? ತಾಂಕಾಂ ಚುನಾವಾಕ್ ಆನಿ ಹೆರ್ ದಿಸಾಂಕ್ ಫರಕ್ ಕೆದ್ನಾಂ ಕಳ್ಚೊ? ಅಚ್ಛೇ ದಿನ್ ತುಮ್ಕಾಂ ಸಕ್ಡಾಂಕ್ ದಿತಾಂ ಮ್ಹಣ್ ಮೋದಿನ್ ಅಫಿದಾವಿತ್ ಬರವ್ನ್ ಲೊಕಾಕ್ ದಿಲಾಂವೆ? ನಾ ನೆ?

ತರ್ ಕಿತ್ಯಾಕ್ ಅಚ್ಛೆ ದಿನ್ ಕೆದ್ನಾಂ, ಕೆದಾಳಾ ಯೆತಿತ್ ಮ್ಹಣ್ ರಾಕ್ಚೆಂ? ಅಚ್ಛೇ ದಿನ್ ನಹೀಂ ಆನೇವಾಲೆ. ಅಭೀ ಚಾರ್ ಸಾಲ್ ಬಾಕೀ ಹೆ. ತವಳ್ ಪರ್ಯಾಂತ್ ಜೊರಾನ್ ಗಾಳಿ ಯೆಟ್ಚೆಂಚ್ ಬಾಕಿ ಉರ್ಲಾಂ.

ಎಂ.ಸಿ.ನ್ ಮೈಕಾರ್ ಬೊಬಾಟ್ತಾನಾ ಹಾಂವ್ ಉಟ್ಲೊಂ. ತಾಣೆ ತಾಳಿಯೊ ಪೆಟಾ ಮ್ಹಳ್ಳೆಂ ‘ಗಾಳಿ ಯೆಟಾ’ ಮ್ಹಣ್ ಮ್ಹಾಕಾ ಕಿತ್ಯಾಕ್ ಆಯ್ಕಲೆಂ ಮ್ಹಣ್ ತುಮ್ಕಾಂಯ್ ಕಳ್ಳೆಂ ನೆ? ಮೋದಿ ಜಿಂದಾಬಾದ್!

ಕುರ್ಪಾ: ನಮಾನ್ ಬಾಳೊಕ್ ಜೆಜು ಮಹಿನ್ಯಾಳೆಂ (ಜೂನ್ 2015 ಅಂಕ್ಯಾಂತ್ ಹೆಂ ವಿಡಂಬನ್ ಫಾಯ್ಸ್ ಜಾಲಾಂ)

Send Feedback to: budkuloepaper@gmail.com

Like us at: www.facebook.com/budkulo.epaper

The post ಅಚ್ಛೇ ದಿನ್! ನಹೀಂ ಆನೇವಾಲೇ ಹೇಂ!!! appeared first on Budkulo.

ಅರೆ, ಹೆಂ ಕಾಜಾರ್ ಮನ್ಶಾಚೆಂಗಿ ವಾ ಮೊನ್ಜಾತಿಂಚೆಂ ಮ್ಹಣ್ ತುಮ್ಕಾಂ ದುಬಾವ್ ಯೇತ್. ವಿಷಯ್ ಪಯ್ಲೆಂಚ್ ಸ್ಪಷ್ಟ್ ಕರ್ತಾಂ – ಹೆಂ ಕಾಜಾರ್ ಮನ್ಶಾಂಚೆಂಚ್. ತರ್ ಮೊನ್ಜಾತಿಂಕ್ ವೊವ್ಳಿಕ್ ಪುಣಿ ದಿಲ್ಲಿಗೀ ಮ್ಹಣ್ ವಿಚಾರಿನಾಕಾತ್. ತಶೆಂ ಪೂರಾ ಕಾಂಯ್ ನಾ. ಹೆಂ ಏಕ್ ಮಾಮೂಲಿ ಕಾಜಾರ್. ಕೊಣಾಚೆಂ ಮ್ಹಳ್ಯಾರ್ ಮ್ಹಜ್ಯಾ ಎಕಾ ಮಾಮಾಚೆಂ. ಥೊಡ್ಯಾ ವರ್ಸಾಂ ಆದ್ಲೆಂ ಕಾಜಾರ್ ತೆಂ, ಆಮ್ಚ್ಯಾಚ್ ಘರಾ ಜಾಲ್ಲೆಂ. ಗೊಂದೊಳ್ ಕೆಲ್ಲೊ ಮಾತ್ರ್ ಮೊನ್ಜಾತಿಂನಿ. ಸತ್ತ್.

ಮ್ಹಜ್ಯಾ ಮಾಮಾಚೆಂ ಘರ್ ಪಯ್ಶಿಲ್ಯಾ ಹಳ್ಳೆಂತ್ ಆಸ್ಲೆಲ್ಯಾನ್, ಆಮ್ಚ್ಯಾಚ್ ಘರಾ ಕಾಜಾರ್ ದವರ್‌ಲ್ಲೆಂ. ಆಮ್ಚೆಂ ಘರ್‌ಯೀ ಹಳ್ಳೆಂತ್‍ಚ್ ಆಸ್‍ಲ್ಲೆಂ. ಗಾದೆ, ಮಾಡ್, ಮಾಡಿ, ಕೆಂಳ್ಬೆ ಆನಿ ರೂಕ್ ಝಡಾಂಚಿ ಸುವಾತ್. ಘರಾ ಬಗ್ಲೆನ್‍ಂಚ್ ಕೊಡ್ಕೆಂ, ನ್ಹಾಣಿ ಆನಿ ಗೊಟೊ. ಕಾಜಾರಾಚೊ ದೀಸ್ ಲಾಗಿಂ ಯೆತಾನಾ ಜಾಲಾಂತ್ ಮಾಟೊವ್ ಘಾಲುಂಕ್ ಆನಿ ಹೆರ್ ತಯಾರಿ ಭರಾನ್ ಚಲ್ಲಿ. ಮಾಟೊವ್ ಘಾಲೊ. ಆನಿ ರೊಸಾಚೊ ದೀಸ್ ಆಯ್ಲೊಚ್.

ಗೊಂದೊಳ್ ಮ್ಹಳೆಂಮೂ ಹಾಂವೆಂ? ಹೊ ಗೊಂದೊಳ್ ಕಸಲೊ ಮ್ಹಣ್ಚ್ಯಾ ಪಯ್ಲೆಂ ತಾಕಾ ಕಾರಣ್ ಕಿತೆಂ ಮ್ಹಣ್ ಸಾಂಗ್ತಾಂ. ಆದಿಂ ಕಾಜಾರಾಂನಿ ಮನೋರಂಜನ್ ದೀಂವ್ಕ್ ಆಸ್‍ಲ್ಲೆಂ ಮ್ಹಳ್ಯಾರ್ ಬ್ಯಾಂಡ್. ಬೆಂಡ್ಕಾರ್ ಕಾರ್ಯಾಕ್ ಆಯ್ಲೆ ಮ್ಹಣ್ತಾನಾಂಚ್ ಸಗ್ಳ್ಯಾ ಗಾಂವಾಂಕ್ ಕಳ್ತಾಲೆಂ. ತೆ ಮಾಟ್ವಾಕ್ ಪ್ರವೇಶ್ ಜಾತಾನಾಂಚ್ ಸಕ್ಡಾಂಕ್ ಖುಶಿ. ಬ್ಯಾಂಡ್ ಆನಿ ಬೆಂಡ್ಕಾರ್ ಆಮ್ಕಾಂ ಭುರ್ಗ್ಯಾಂಕ್ ವಿಶೇಸ್ ಆಕರ್ಶಣ್ ಆನಿ ವಿಜ್ಮಿತಾಚಿ ಸಂಗತ್. ಮಾಮಾಚ್ಯಾ ರೊಸಾಕ್ ಬೆಂಡ್ಕಾರ್ ಆಯ್ಲೆ ನೆ ಆನಿ ತಾಣಿಂ ಬ್ಯಾಂಡ್ ಬಡಂವ್ಕ್ ಆನಿ ಫುಂಕುಂಕ್ ಸುರು ಕೆಲೆಂ ಪಳೆ, ತೆದಾಳಾ ಹೊ ಗೊಂದೊಳ್ ಸುರು ಜಾಲೊ. ವ್ಹಯ್, ವ್ಹಯ್. ಬೆಂಡಾಚೊ ಆವಾಜ್‍ಚ್ ಹ್ಯಾ ಸರ್ವ್ ಗೊಂದೊಳಾಕ್ ಕಾರಣ್!

ತ್ಯಾ ಸಾಂಜೆರ್ ಬೆಂಡ್ಕಾರಾನಿಂ ವಯ್ರ್ ವಯ್ರ್, ಆಪ್ಣಾಚಿ ಸಗ್ಳಿ ತಾಂಕ್ ವಾಪಾರ್ನ್ ವ್ಹಾಜಾಂತ್ರಾಂ ಖೆಳ್ಳಿಂ ಪಳೆ, ತ್ಯಾ ಆವಾಜಾಕ್ ಮಾಟ್ವಾಂತ್ ಸಕ್ಡಾಂ ತಕ್ಲಿ ಹಾಲವ್ನ್, ಹಾತ್ ಪಾಂಯ್ ಧಲವ್ನ್ ಮಜಾ ಮಾರುನ್, ಗಿತಾಂ ಗಾವುನ್ ಆನಂದ್ ಭೊಗುನ್ ಆಸ್ತಾನಾ ಆನ್ಯೇಕಡ್ಚ್ಯಾನ್ ಸುರು ಜಾಲ್ಲೊ ಗೊಂದೊಳ್ ಕೊಣಾಕೀ ಕಳ್ಳೊಚ್ ನಾ!

ವ್ಹಯ್ಗಾ ಮ್ಹಣ್ತಾನಾ. ಮನ್ಶಾಂಕ್ ಕಾಜಾರ್ ಸೊಭಾಣಾಂ ನವಿಂ ನ್ಹಯ್ ಪಳೆ. ಆನಿ ಹೊ ಆವಾಜ್, ಬೊಬಾಟ್, ಲೊಕಾ ಜಮೊ ಸಮೇಸ್ತಾಂಕ್ ಉಲ್ಲಾಸಾಚೆಂ ಕಾರಣ್. ಸಯ್ರ್ಯಾಂಕ್ ತಶೆಂ ಆಪ್ರೂಪ್ ಭೆಟ್ತೆಲ್ಯಾಂಕ್ ಸುಖ್ ದೂಖ್ ಉಲಂವ್ಕ್, ಗಜಾಲಿ ಕಾಂತಂವ್ಕ್ ಮೆಳ್ಚೊ ಭಾಂಗ್ರಾಳೊ ಆವ್ಕಾಸ್. ತೆಂ ಸಹಜ್ ಪಳೆ. ಸೆಜಾರ್ಚ್ಯಾಂಕ್, ವಾಡ್ಯಾಗಾರಾಂಕ್ ಆನಿ ಪ್ರತ್ಯೇಕ್ ಜಾವ್ನ್ ಭುರ್ಗ್ಯಾಂಕ್ ವಿಶೇಸ್ ಸಂಭ್ರಮ್ ಆನಿ ಆತುರಾಯ್. ಅಶೆಂ ರೊಸಾಚ್ಯಾ ಮಾಟ್ವಾಂತ್, ಘರ್ಚ್ಯಾ ಆಂಗ್ಣಾಂತ್, ಕುಡಾಂನಿ ಆನಿ ಥೊಡೆ ಗುಡ್ಯಾಂ-ಗಾದ್ಯಾಂ ಮೆರೆಂನಿ ಆಪ್ಣಾಯಿತ್ಲ್ಯಾಕ್ ಕಾಮಾಂತ್ ವಾ ಉಲವ್ನ್, ಬಿಡಿ ವೊಡುನ್‍ಗೀ ಪಾನ್ ಪೊಡ್ ಖಾವ್ನ್‌ಗೀ ಆನಿ ಥೊಡೆ ಘುಟಾನ್ ಸೊರೊ ಚಾಕೊನ್‍ಗೀ ಆಸ್ತಾನಾ ಆಮ್ಗೆಲ್ಯಾ ಪೊಸ್ಕ್ಯಾ ಮೊನ್ಜಾತಿಂಕ್ ಸಂಸಾರ್ ನಾ!

ಕಿತೆಂ ಮ್ಹಣ್ ಸಾಂಗ್ಚೆಂ?! ತವಳ್ ಮ್ಹಣಾಸರ್ ಅಸಲೊ ಆವಾಜ್ ತಾಂಣಿ ಆಯ್ಕಾಲಾಗಿ? ಬಿಲ್ಕುಲ್ ನಾ. ಆಮ್ಗೆರ್ ದುದಾಚಿಂ ಗಾಯ್ರಾಂ, ಕೊಸುಂಕ್ ರೆಡೆ, ಮಾಜಾರ್, ಪೆಟೊ, ಕುಂಕ್ಡಾಂ ಆನಿ ದುಕೊರ್ ಮ್ಹಣ್ ಲ್ಹಾನ್ಶೆಂ ಏಕ್ ಪ್ರಾಣಿ ಸಂಗ್ರಹಾಲಯ್‍ಚ್ ಆಸ್‍ಲ್ಲೆಂ. ತಾಂಕಾಂ ತ್ಯಾ ದೀಸ್ ತಕ್ಲಿ ಗಿರ್ಮಿಟ್ ಜಾಲ್ಲಿ! ನ್ಹಂಯ್ವೇ ತರ್! ತಾಣಿಂ ತವಳ್ ಪರ್ಯಾಂತ್ ಘರ್ಚ್ಯಾಂನಿ ಬೊಬಾಟ್ಚೆಂ, ಚಡ್ಡ್ ಮ್ಹಳ್ಯಾರ್ ಕಿಂಕ್ರಾಟ್ಚೆಂ ಆಯ್ಕಾಲ್ಲೆಂ. ವ್ಹಡ್ಲೊ ಆವಾಜ್ ತಾಣಿಂ ಆಯ್ಕಾಲ್ಲೊ ಮ್ಹಳ್ಯಾರ್ ಪಾವ್ಸಾಂತ್ಲೆ ಘಡ್ಗಡೆ ಮಾತ್ರ್. ತೆಂ ತರೀ ನೈಸರ್ಗಿಕ್. ಪುಣ್ ಆಸಲೊ ಏಕ್ ಆವಾಜ್ ಆಸೊಂಕ್ ಪುರೊ ಮ್ಹಣ್ ತಾಣಿಂ ಸಪ್ಣೆಂವ್ಕ್ ಸಯ್ತ್ ಸಾಧ್ಯ್ ನಾತ್‍ಲ್ಲಿ ಗಜಾಲ್. ನ್ಹಂಯ್ಗಿ?

ಬೆಂಡಾಚೊ ತೊ ವಿಚಿತ್ರ್ ಆವಾಜ್ ಆಯ್ಕೊನ್ ಹ್ಯಾ ಮೊನ್ಜಾತಿಂಕ್ ವಿಪ್ರೀತ್ ಗಡ್ಬಡ್ ಜಾಲಿ. ಬೆಂಡ್ಕಾರಾಂನಿ ಟೆರೆ ಟೆರೆ, ಬೆಡೆ ಬೆಡೆ, ಬೆಟ್ಟೆ ಬೆಡೆ, ಪೇಂಪೇಂ, ಝಲ್ಲ್ ಝಿಲ್ಲ್ ಆನಿ ಢಂ ಢುಂ ಢಾಂ ಮ್ಹಣ್ ಎಕೇಕ್ ವ್ಹಾಜಾಂತ್ರಾಂಚೆಂ ಇಂಟ್ರಡಕ್ಷನ್ ಪ್ರೆಸೆಂಟೇಶನ್ ಕರ್ತಾಸ್ತಾನಾ ಆಮ್ಗೆಲ್ಯಾ ಮೊನ್ಜಾತಿಂಚೆ ಪಾಂಯ್ ಕಾಂಪೊಂಕ್ ಸುರು ಜಾಲೆ. ಆನಿ ಸಕ್ಡಾಂನಿ ಸಾಂಗಾತಾ ಮೆಳೊನ್ ಉಟಯಿಲ್ಲ್ಯಾ ಬ್ಯಾಂಡಾಚ್ಯಾ ಭಿರಾಂಕುಳ್ ಆನಿ ಭಯಾನಕ್ ಆವಾಜಾಕ್ ತಾಂಕಾಂ ಜೀವ್ ಆಸಾಗಿ? ಕುಂಕ್ಡಾಂಕ್ ಪಯ್ಲೆಂಚ್ ಘುಡಾಂತ್ ಘಾಲ್ಲೆಂ. ದಾರ್ ಧಾಂಪ್‍ಲ್ಲ್ಯಾನ್ ತಾಂಚಿ ಆಕಾಂತಾಚಿ ಬೊಬಾಟ್ ಭಾಯ್ರ್ ಚಡ್ ಆಯ್ಕಾಲಿ ನಾ. ದುಕ್ರಾಕ್ ಪಾಪ್ ಪಯ್ಲೆಂಚ್ ಧರ್ನ್ ತಾಚಿ ಸೊಂಡಿ, ಹಾತ್ ಪಾಂಯ್ ಬಿಗ್ದುನ್ ಘಾಲ್ಲೆಂ – ರಾತಿಂ ಮಾರುಂಕ್ ಮ್ಹಣ್. ಭಿರ್ಮತ್, ಜಿವಾಚ್ಯಾ ಆಕ್ಲಾಸಾಕ್ ತಾಣೆ ಕಿತ್ಲೆಂ ಪೆಚಾಡ್ಲ್ಯಾರೀ ಸುಟೊಂಕ್ ಜಾಯ್ನಾತ್ಲೆಪರಿಂ ಘಟ್ಟ್ ಬಾಂಧುನ್ ಘಾಲ್ಲೆ ವರ್ವಿಂ, ದುಕಿನ್, ಭಿಂಯಾನ್ ಆನಿ ಆಪ್ಲೊ ಫುಡಾರ್ ಚಿಂತುನ್ ಕಂಗಾಲ್ ಜಾವ್ನ್ ತಾಣೆ ಘಾಲ್ಲಿ ಕಿಂಕ್ರಾಟ್ ಉಣಿ ಜಾವ್ನ್ ಪಿಂರ್ಗೊಣಿ ಮಾತ್ರ್ ಆಯ್ಕಾತಾಲಿ. ದೀಸ್ ಬುಡ್ಚ್ಯಾ ಆದಿಂಚ್ ತಾಕಾ ಧರ್ನ್ ಬಾಂಧ್‍ಲ್ಲೆಂ. ಆತಾಂ ತಾಕಾ ಉಸ್ವಾಸ್ ಸೊಡುಂಕೀ ಕಶ್ಟಾಂಚಿ ಪರಿಸ್ಥಿತಿ ಜಾಲ್ಲಿ. ತಶೆಂ ಜಾಲ್ಲ್ಯಾನ್ ತಾಕಾ ಬ್ಯಾಂಡಾಚೊ ಆವಾಜ್ ಕಸೊ ಪರಿಣಾಮ್ ಘಾಲ್ಲೊ ಮ್ಹಣ್ ಕೊಣೆಂ ಪಾರ್ಕುಂಚೆಂ? ತಾಕಾ ಕಸಲಿಯ್ ಪ್ರತಿಕ್ರಿಯಾ ದೀಂವ್ಕ್ ಸಾಧ್ಯ್ ನಾತ್‍ಲ್ಲೆಂ ಮ್ಹಣ್ಯಾಂ. ಪಾಪ್!

ದೊನ್ಪಾರಾಂ ತೀನ್ ವ್ಹಾಜ್ತಾನಾಂಚ್ ಗರ್ನಾಳಿ ಮಾರ್‌ಲ್ಲ್ಯೊ. ಹ್ಯಾ ಮೊನ್ಜಾತಿಂನಿ ತೆದಾಳಾ, ಕಾಂಯ್ ಖಂಯ್ಗೀ ಘಡ್ಗಡೊ ಮಾರ್ಲಾ ಆಸ್ತಲೊ ಮ್ಹಣ್ ಚಿಂತ್‍ಲ್ಲೆಂ ಕೊಣ್ಣಾ. ಪುಣ್ ಕಾಳೊಕ್ ಜಾವ್ನ್ ಯೆತಾಸ್ತಾನಾ, ತೇಂಯ್ ರಾವನಾಸ್ತಾನಾ ಮಾಟ್ವಾ ಭಿತರ್ ಥಾವ್ನ್ ಯೆಂವ್ಚೊ ಬ್ಯಾಂಡಾಚೊ ಸರ್ಸರಿತ್ತ್ ಆವಾಜ್, ತಾಂಕಾಂ ಕಾಂಯ್ ಭುಂಯ್‍ಕಾಂಪ್ಣಿ ಜಾಲಿಗೀ ಕೊಣ್ಣಾ ಮ್ಹಣ್ ಭ್ಯೆಂ ಹಾಡಂವ್ಕ್ ಕಾರಣ್ ಜಾಲೆಂ. ಮಾಜಾರ್ ಘರಾ ಭಿತರ್ ಪೋಟ್ ಭರ್ನ್ ಖಾಂವ್ಕ್ ಮೆಳ್ತಾನಾ ಆನಿ ಶೇಲೆ ಕರುಂಕ್ ಜಣಾಂ ಆಸ್ತಾನಾ, ತಾಕಾ ಹ್ಯಾ ಆವಾಜಾಚೆರ್ ಕಾಂಯ್ ವಿಶೇಸ್ ಆಸಕ್ತ್ ನಾತ್‍ಲ್ಲಿ. ಕುಜ್ನಾಂತ್ ಜಮ್ಲೆಲ್ಯಾ ಸ್ತ್ರೀಯಾಂಚ್ಯಾ ಪಾಂಯಾಂಕ್ ಲೆಂವೊನ್, ರೆವೊಡ್ ಘಾಲ್ನ್, ಆಂಗ್ ಘಸ್ಟುನ್ ತಾಕಾ ಧಾದೊಶಿ ಸುಖ್, ಸಂತೊಸ್ ಆನಿ ತೃಪ್ತಿ ಮೆಳ್ತಾಲಿ. ತ್ಯಾ ವರ್ವಿಂ ಘರಾ ಭಾಯ್ರ್ ಕಸಲೊ ಗಲಾಟೊ ಜಾಂವ್, ಕಿತೆಂ ವೊಮ್ತೆಂ ಉದಾರೆಂ ಪಡೊಂ ವಾ ಬುಡ್ತುಗೋಲ್ ಯೇಂವ್, ಆಪ್ಣೆಂ ಆಕಾಂತ್ ಪಾಂವ್ಚಿ ಗರ್ಜ್ ನಾ ಮ್ಹಣ್ ತಾಕಾ ನಖ್ಖಿ ಜಾಲ್ಲೆಂ.

ಪುಣ್ ಮನ್ಶಾಂನಿ ಆಕಾಂತ್ ಪಾಂವ್ಚಿ ಪರಿಸ್ಥಿತಿ ಉಬ್ಜಲ್ಲಿ ಗೊಟ್ಯಾಂತ್. ಥೊಡ್ಯಾ ದಾದ್ಲ್ಯಾಂನಿ ಬೀಡಿ ವೊಡುಂಕ್‍ಗೀ ವಾ ಗಳೊ ಭಿಜಂವ್ಕ್ ಮ್ಹಣ್ ಬೊತ್ಲಿಂತ್ಲೆಂ ತಾಳ್ಯಾಕ್ ದೆಂವಂವ್ಕ್ ಪೊಣ್ಸಾ ರುಕಾ ಮುಳಾಂತ್ ತಂಬು ಮಾರ್‌ಲ್ಲೊ. ಥಂಯ್ಚ್ ಸಾಮ್ಕಾರ್ ಆಸ್‍ಲ್ಲ್ಯಾ ಗೊಟ್ಯಾಂತ್ ಸದಾಂಚೆ ಪ್ರಾಸ್ ಚಡ್ ಸುಂಯ್ಪುಂಚೊ, ಹಾಂಡ್ಚೊ ಆವಾಜ್ ಆಯ್ಕೊನ್ ಎಕ್ಲ್ಯಾನ್ ಗೊಟ್ಯಾಂತ್ ತಿಳ್ತಾನಾ ಥಂಯ್ ಪರಿಸ್ಥಿತಿ ಗಂಭೀರ್ ಜಾಲ್ಲಿ. ಗೊಟ್ಯಾ ನಿವಾಸಿಂಕ್ ಬೆಂಡಾಚೊ ಆವಾಜ್ ವಿಪ್ರೀತ್ ಭಿರಾಂತಿಚೊ ಜಾಲ್ಲೊ. ಗಾಯೊ ಆನಿ ವಾಸ್ರಾಂ ಕಶಿಂಯ್ ಸಾದಿಂ ಪಳೆ, ಆಪ್ಲ್ಯಾ ಧನ್ಯಾಚ್ಯಾ ಆಸ್ರ್ಯಾಂತ್ ಆಪುಣ್ ಕೆದ್ನಾಂಯ್ ಶಾಬಿತ್ ಮ್ಹಣ್ ತಾಂಕಾ ಕಳಿತ್ ಆಸ್‍ಲ್ಲೆಂ. ಹೊ ಆವಾಜ್ ತಾಂಕಾಂ ಕರ್ಕರ್‍ಯಾಂಚೊ ಜಾಲ್ಲೊ ತರೀ, ಹೆಣೆ ತೆಣೆಂ ಪಾಶಾರ್ ಜಾಂವ್ಚ್ಯಾ ಮನ್ಶಾಂ ಥಂಯ್ ಆಕಾಂತ್ ತಾಂಕಾಂ ದಿಸನಾತ್ಲೊ, ಬಗಾರ್ ಸುಡಾಳ್‍ಪಣ್ ದಿಸ್ತಾಲೆಂ. ತಿಂ ಭಾತೆಣ್ ಚಾಬೊನ್ ಖಂತ್ ನಾಸ್ತಾನಾ ಆಸ್‍ಲ್ಲಿಂ. ಪುಣ್ ರೆಡ್ಯಾಂಕ್ ಮಾತ್ರ್ ತಕ್ಲಿ ಫಿರ್ವಾಲ್ಲಿ.

ಆಮ್ಗೆರ್ ರೆಡ್ಯಾಂಚೆಂ ಏಕ್ ಜೋತ್ ಆಸ್‍ಲ್ಲೆಂ. ಎಕ್ಲೊ ರೆಡೊ ಸಾಧೊ ತರ್ ಆನ್ಯೇಕ್ಲೊ ತಿಕ್ಕೆ ರಾಗಿಶ್ಟ್. ತೊ ಕೆದ್ನಾಂಯ್ ಉಪ್ರಾಳಿ. ತಾಕಾ ಸಾಂಬಾಳುಂಕ್ ಭಾರಿಚ್ ಕಶ್ಟ್ ಮಾರ್ತಾಲೆ. ತಾಂಕಾಂ ತ್ಯಾ ದೀಸ್ ಸಕಾಳಿಂ ನ್ಹಾಣವ್ನ್, ಆಂಗಾಕ್ ತೇಲ್ ಪುಸುನ್ ಬಾಂದ್‍ಲ್ಲೆಂ. ಗರ್ನಾಳಿ ಫುಟ್ತಾನಾಂಚ್ ತಾಂಚೆ ಕಾನ್ ನೀಟ್ ಜಾಲ್ಲೆ. ಪಾಟಾಪಾಟ್ ಗರ್ನಾಳಿ ಫುಟ್ತಾನಾ ತಾಂಚಿ ಲೋಂವ್ ಉಬಿ ರಾವ್‍ಲ್ಲಿ. ಭಿಂಯಾನ್‍ಚ್ ತಾಂಕಾಂ ಉದ್ಕಾಡೆ ಗೆಲ್ಲೆ. ಪುಣ್ ಬೆಂಡಾಚ್ಯಾ ಆವಾಜಾಕ್ ತಾಂಕಾಂ ಪಿಶೆಂಚ್ ಸುರು ಜಾಲ್ಲೆಂ. ಸಾದೊ ರೆಡೊ ಶೆರ್ಮೆವ್ನ್ ಗೆಲ್ಲೊ ವ್ಹಯ್ ತರೀ, ವಿಶೇಸ್ ಜಾವ್ನ್ ರಿಯಾಕ್ಷನ್ ತಾಣೆಂ ದಾಕಂವ್ಕ್ ನಾತ್‍ಲ್ಲೆಂ. ಪುಣ್ ಉಪ್ರಾಳಿ ರೆಡೊ ಮಾತ್ರ್ ಕಠಿಣ್ ಧೆದೆಸ್ಪರ್ ಜಾಲ್ಲೊ. ತಾಕಾ ಗಜಾಲ್ ಕಿತೆಂ, ಹೊ ಆವಾಜ್ ಕಸಲೊ ಮ್ಹಣ್ ಅರ್ಥ್‌ಚ್ ಜಾಂವ್ಕ್ ನಾ. ಕಿತೆಂಗಿ ಅಸಹಜ್ ಜಾಲ್ಲೆಂ ಘಡೊನ್ ಆಸಾ, ಆಜ್ ಕಿತೆಂಗೀ ದುರ್ಗಟನ್ ಘಡ್ಚ್ಯಾರ್ ಆಸಾ ಮ್ಹಣ್ ತಾಣೆಂ ಅಂದಾಜ್ ಕೆಲ್ಲೊ ಜಾಯ್ಜೆ. ಆಜ್ ಆಪ್ಣಾಕ್ ಬರ್ಕತ್ ನಾ, ಧನಿ ಯೇವ್ನ್ ಆಪ್ಣಾಚಿ ಕಾತ್ ಶಿಂದುನ್ ಘಾಲಿತ್ ಕೊಣ್ಣಾ ಮ್ಹಣ್ ತಾಣೆ ಚಿಂತ್ಲೆಂಗೀ ಕಿತೆಂಗಿ. ತೊಂಡಾಂತ್ ತಾಚ್ಯಾ ಫೆಂಡ್ ದೆಂವ್ತಾಲೊ. ಶಿಮ್ಟಿ ತಾಚಿ ನೀಟ್ ಜಾವ್ನ್ ಹುಳ್ವುಳ್ತಾಲಿ ತರ್, ಪಾಟ್ಲೆ ಪಾಂಯ್ ತಾಚೆ ಧರ್ಣಿರ್ ರಾವಾನಾತ್ಲೆ. ಸುಂಯ್ಪುನ್ ಆವಾಜ್ ಕರ್ನ್, ರಾವ್‍ಲ್ಲೆಕಡೆ ರಾವನಾಸ್ತಾನಾ ಹಿಶಿನ್ ತಿಶಿನ್ ಉಸ್ಮಡೊನ್ ಸರ್ಪಳೆಂತ್ಲೆಂ ಸುಟೊನ್ ಧಾಂವೊಂಕ್ ತೊ ಪ್ರಯತ್ನ್ ಕರ್ತಾಲೊ. ಭಿಂಯಾಚ್ಯಾ ಆಕ್ಲಾಸಾಕ್ ಖಾಂವ್ಣೆಕ್ ಹಾಂಡೊನ್, ಶಿಂಗಾಂನಿ ತೊಪುನ್ ರಾಗ್ ಕಾಡ್ತಾಲೊ. ಹ್ಯಾ ತಾಚ್ಯಾ ಆವ್ತಾರಾಕ್, ಕುಶಿಚೊ ರೆಡೊ ಭಿಂಯೆವ್ನ್ ಗೆಲ್ಲೊ. ತಾಕಾ ಆತಾಂ ಬೆಂಡಾಚ್ಯಾ ಆವಾಜಾಚಾಕೀ ಆಪ್ಲ್ಯಾ ಸಾಂಗಾತಿ ಹಾಂಡ್ಕೊರ್ ರೆಡ್ಯಾ ಥಾವ್ನ್ಂಚ್ ಚಡ್ ಅಪಾಯ್ ದಿಸ್ತಾಲೊ. ಉಚಾಂಬಳ್ ರೆಡ್ಯಾನ್ ಖೊಟಾಯ್ತಾನಾ ತಾಕಾ ಲಾಗ್ತಾಲೆಂ ಆನಿ ತೆ ಮಾರ್ ಚುಕಂವ್ಕ್ ತೊ ಪ್ರಯತ್ನ್ ಕರ್ತಾಲೊ.

ಬಿಡಿ ವೊಡುನ್ ಆಸ್‍ಲ್ಲೊ ಎಕ್ಲೊ ಆಮ್ಚೊ ಸೆಜಾರ್ಚೊ. ಆಮ್ಗೆರ್ ಕೊಸುಂಕ್ ತೊ ಯೆತಾಲೊ. ತೊ ಗಟ್ಟ್ ಜಿವಾಚೊ ಆನಿ ಹ್ಯಾ ರೆಡ್ಯಾಂಕ್ ಆಟಾಪುಂಕ್ ತೊ ಮಾತ್ರ್ ಸಕ್ತಾಲೊ. ರೆಡ್ಯಾಚೊ ಹೊ ಆವ್ತಾರ್ ತಾಕಾ ವಿಶೇಸ್ ದಿಸೊಂಕ್ ನಾ. ಹಾಂಡ್ಕೊರ್ ರೆಡೊ ಹರಾಮಿ ಜಾಲಾ ಮ್ಹಣ್ ತಾಕಾ ಭೊಗ್ಲೆಂ. ತಾಚ್ಯಾ ತಕ್ಲೆಕ್ ಸೊರ್‍ಯಾಚೊ ದಮ್ಮ್ ಚಡ್ತಾಲೊ ಮಾತ್ರ್. ಧಯ್ರಾನ್ ವಚೊನ್ ತಾಣೆ ಎಕಾ ಹಾತಾಂತ್ ಬೊಡಿ ಕಾಡ್ಲಿ ಆನಿ ದುಸ್ರ್ಯಾ ಹಾತಾಂತ್ ರೆಡ್ಯಾಚಿ ನಾಕಾ ದೊರಿ ವೊಡ್ಲಿ. ತಾಚ್ಯಾ ಸಂಗಿಂ ಹೆರ್ ದಾದ್ಲೆಯಿ ಕುಡ್ಸಾಲೆ ಆನಿ ಮೊಟಿ ದೊರಿ ಸೊಧುನ್ ಹಾಡ್ನ್ ಉಚಾಂಬಳ್ ರೆಡ್ಯಾಚೆ ಪಾಂಯ್ ಬಿಗ್ದುನ್ ಬಾಂಧುನ್ ಘಾಲೆಂ. ಭಿರ್ಮತ್. ರೆಡ್ಯಾನ್ ಕಿತ್ಲೆ ಪಾವ್ಟಿಂ ಇಂಫೆರ್ನಾಕ್ ಗೆಲ್ಲೊ ಅನುಭವ್ ಭೊಗ್ಲೊ ಕೋಣ್ ಜಾಣಾ!

ಗೊಂದೊಳಾ ವಯ್ರ್ ಗೊಂದೊಳ್ ಜಾಲ್ಲೊ ಮ್ಹಳ್ಯಾರ್ ಆಮ್ಚ್ಯಾ ಪೆಟ್ಯಾಕ್ – ಟೊಮಿಕ್. ತಿ ಗಜಾಲ್ ಮಾತ್ರ್ ಥೊಡ್ಯಾ ದಿಸಾಂ ಉಪ್ರಾಂತ್ ಕಳ್ಳಿ. ರೆಡ್ಯಾಕ್ ನಿಯಂತ್ರಣಾರ್ ಹಾಡ್ಲ್ಯಾ ಉಪ್ರಾಂತ್ ದುಸ್ರೆಂ ಕಿತೆಂಯ್ ಆಕಾಂತಾಚೆಂ ಘಡೊಂಕ್ ನಾ. ರೋಸ್, ಕಾಜಾರ್ ಗಡ್ದಾನ್ ಜಾಲೆಂ, ಸಯ್ರಿಂ ಗೆಲಿಂ ಆನಿ ಮಾಟೊವ್ ಸಯ್ತ್ ಕಾಡ್ಲೊ. ಖಂಚ್ಯಾಯ್ ಘರಾ ಕಾರ್ಯೆಂ ಆಸ್ತಾನಾ ಸಗ್ಳ್ಯಾ ಗಾಂವ್ಚೆ ಪೆಟೆ ರಾಸ್ ಪಡ್ತಾಲೆ. ಜೆವ್ಣಾಚಿ ಶಿರೊತಿ ಖಂಯ್‍ತರೀ ಉಡಯ್ತಾಲೆ, ದೆಕುನ್ ಪೆಟ್ಯಾಂಕ್ ಖಾಂವ್ಕ್ ದರಬಸ್ತ್ ಮೆಳ್ತಾಲೆಂ. ಕ್ರಿಸ್ತಾಂವ್ ಕಾರ್ಯಾಂನಿ ಮಾಸಾಂಚೆಂ ನಿಸ್ತೆಂ ಚಡ್ತಿಕ್ ಆಕರ್ಶಣ್. ಪರ್ಮಳಾಕ್‍ಚ್ ಪೆಟೆ ಆಂಯ್ಡೆ ಘಾಲ್ನ್ ವೊವ್ಳಿಕ್ ನಾಸ್ತಾನಾ ಪಾವ್ತಾಲೆ! ತಾಂಕಾಂ ಸ್ಪರ್ದೊ ದೀಂವ್ಕ್ ಮಾಜ್ರಾಂ, ಕಾವ್ಳೆ, ಕುಂಕ್ಡಾಂಚಿ ಖಾತಡ್! ತ್ಯಾ ಗಡ್ದೆಂತ್ ಆಮ್ಚ್ಯಾ ಟೊಮಿಚೆರ್ ಕೊಣಾಕೀ ಗುಮಾನ್ ನಾತ್ಲೆಂ. ಕಾಜಾರಾಚ್ಯಾ ದುಸ್ರೆ ದಿಸಾ ಟೊಮಿ ನಾ! ಕಿತ್ಲೆಂ ಆಪಯ್ಲ್ಯಾರೀ, ಖಂಯ್ ಸೊಧ್ಲ್ಯಾರೀ ತಾಚೊ ಪತ್ತೊ ನಾ!

ಟೊಮಿಕ್‍ಯೀ ಸಾಂಕ್ಳಿನ್ ಬಾಂಧುನ್ ಘಾಲ್ಲೆಂ. ಗರ್ನಾಳಿಚ್ಯಾ ಆವಾಜಾಕ್ ತಾಚಿ ಕಾಂಪ್ ಸುಟ್‍ಲ್ಲಿ. ಪುಣ್ ಬೆಂಡಾಚ್ಯಾ ಆವಾಜಾಕ್ ತಾಚೆಂ ಕಾಳಿಜ್ ರಾವನಾತ್‍ಲ್ಲೆಂ ವ್ಹಡ್! ಹೊ ವಿಚಿತ್ರ್ ಆವಾಜ್ ತಾಕಾ ಆಜ್ ಸಂಸಾರ್ ಅಂತ್ಯ್ ಜಾತಾ ಮ್ಹಳ್ಯಾಚಿ ನಿಶಾನಿ ಮ್ಹಣ್ ಭೊಗ್ಲೆಂ ಆಸ್ತೆಲೆಂ. ಭಿಂಯಾನ್ ತಾಣೆಂ ಕಿತ್ಲೆಂ ಬೊಂಕ್ಲ್ಯಾರೀ ತೆಂ ಆಯ್ಕಾತಾ ಕೊಣಾಕ್? ಸಾಂಕ್ಳಿ ಥಾವ್ನ್ ಮೆಕ್ಳೊ ಜಾಂವ್ಕ್ ತಾಣೆಂ ಆಪ್ಲೆಂ ಸಗ್ಳೆಂ ಬಳ್ ಘಾಲ್ನ್ ವೊಡ್ಲ್ಯಾರೀ ಸಾಧ್ಯ್ ಜಾಲೆಂ ನಾ. ಬೆಂಡಾಚೊ ಆವಾಜ್ ಚಡ್ ಚಡ್ ಜಾವ್ನ್, ಥರಾವೊಳ್ ಶ್ರುತಿಂತ್ ಕಾನಾಂಕ್ ಆಪ್ಟತಾನಾ ಟೊಮಿಕ್ ಆಕಾಂತ್ ಚಡ್ಲೊ ಆನಿ ಏಕ್ ಪಾವ್ಟಿಂ ಆಪ್ಣೆಂ ಹಾಂಗಾ ಥಾವ್ನ್ ಪೊಳ್ಚೆಂ ಅವಶ್ಯ್ ಮ್ಹಣ್ ಭೊಗ್ಲೆಂ. ಪ್ರಾಣ್ ತುಟ್ಚ್ಯಾಕೀ ಹ್ಯಾ ಸಾಂಕ್ಳಿ ಥಾವ್ನ್ ಸುಟ್ಚೆಂಚ್ ಬರೆಂ ಮ್ಹಣ್ ತಾಣೆಂ ಪಾಂಯ್ ಧರ್ಣಿಕ್ ತೆಂಕುನ್ ಸಗ್ಳೆಂ ತ್ರಾಣ್ ಎಕ್ಟಾಂಯ್ ಕರ್ನ್ ಗೊಮ್ಟಿ ವೊಡುಂಕ್ ಪೆಚಾಡ್ನ್ ಕಸೊಯ್ ಜಯ್ತೆವಂತ್ ಜಾಲೊ. ಮರ್ಣಾಚ್ಯಾ ಶಿಕ್ಶೆ ಥಾವ್ನ್ ವಾಂಚ್ಲೊಂ ಮ್ಹಣ್ ಕಳ್ತಚ್, ಗೂ ಖಾವ್ನ್ ತರೀ ಪೋಟ್ ಭರ್ತಲೊಂ, ಹ್ಯಾ ಯೆಮ್ಕೊಂಡಾ ಥಾವ್ನ್ ಪಯ್ಲೆಂ ಧಾಂವ್ಯಾಂ ಮ್ಹಣ್ ತಸೊ ಉಸಳ್‍ಲ್ಲೊ ಪೆಟೊ ಖಂಯ್ ಪಾವ್‍ಲ್ಲೊ ಕೋಣ್ ಜಾಣಾ!

ರಾತ್ ಮಧ್ಯಾನ್ ಜಾತಚ್ ಬೆಂಡಾಚೊ ಆವಾಜ್ ರಾವ್ತಾನಾ ಮಯ್ಲಾಂ ಪಯ್ಸ್ ಪಾವ್‍ಲ್ಲ್ಯಾ ಪೆಟ್ಯಾಕ್ ಇಲ್ಲೆಶೆಂ ಜಿವಾರ್ ಆಯ್ಲೆಂ. ಪುಣ್ ಘರಾ ತೆವ್ಶಿನ್ ಮೇಟ್ ಕಾಡುಂಕ್ ತೊ ನರ್ಗಲೊ. ಫಾಂತೆಂ ಜಾತಾನಾ ವಾತಾವರಣ್ ಥಂಡ್ ಆಸ್‍ಲ್ಲ್ಯಾನ್, ಆಪ್ಲ್ಯಾ ಘರಾ ನಿದೊಂಕ್ ಕಿತ್ಲಿ ಬರಿ ವ್ಯವಸ್ತಾ ಆಸ್‍ಲ್ಲಿ ಮ್ಹಣ್ ತಾಣೆ ನಿಯಾಳ್ ಕೆಲೊ. ಹಿಂವಾನ್ ಕಾಂಪ್ತಾನಾ ಆಪ್ಲೆಂ ಘರ್‌ಚ್ ಬರೆಂ ಮ್ಹಣ್ ನಿಚೆವ್ ಕರ್ನ್ ಸವ್ಕಾಸ್ ತೊ ಘರಾ ಲಾಗಿಂ ಪಾವ್ಲೊ. ಸಗ್ಳೆಂ ಶಾಂತ್ ಭೊಗ್ಲೆಂ ತಾಕಾ. ಧಯ್ರ್ ಆಯ್ಲೆಂ, ಲೋವ್ ಮೆಟಾಂನಿ ಘರಾಕ್ ಲಾಗಿಂ ಪಾವ್ಲೊ. ತಿತ್ಲ್ಯಾರ್ ಸಕಾಳ್ ಜಾಲ್ಲಿ, ಜಣಾಂ ಉಟೊನ್ ಹಿಶಿನ್ ತಿಶಿನ್ ಪಾಶಾರ್ ಜಾತಾಲಿಂ. ಪೆಟ್ಯಾಕ್ ಸುಶೆಗ್ ಭೊಗ್ಲೆಂ. ಆನಿ ಕಿತೆಂಚ್ ಭಿರಾಂತ್ ನಾ ಮ್ಹಣ್ ತಿಕ್ಕೆ ಮುಖಾರ್ ತೊ ಪಾವ್ಲಾ ಮಾತ್ರ್, ಎಕಾಚ್ಛಾಣೆ ಸುರು ಜಾಲೊ ಆವಾಜ್ ಟೆರೆ ಟೆರೆ, ಬೆಡೆ ಬೆಡೆ, ಬೆಟ್ಟೆ ಬೆಡೆ ಕರ್ನ್. ಬೆಂಡ್ಕಾರ್ ವೆಗ್ಗಿಂ ಉಟ್‍ಲ್ಲೆ. ಕಾಜಾರಾ ಮಾಟ್ವಾಂತ್ ನಿದ್ಲೆಲ್ಯಾಂಕ್ ಉಟಂವ್ಕ್ ಆನಿ ಆಪ್ಲಿ ಹಾಜ್ರಿ ದಾಕಂವ್ಕ್ ತಾಣಿಂ ಕಾಮ್ ಸುರು ಕೆಲ್ಲೆಂಚ್.

ಜಾಗ್ರುತ್ಕಾಯೆನ್ ನಾಜೂಕ್ ಮೆಟಾಂನಿ ಘರಾಕ್ ಲಾಗಿಂ ಜಾಲ್ಲ್ಯಾ ಪೆಟ್ಯಾಕ್ ಅನಿರೀಕ್ಶಿತ್ ಜಾವ್ನ್ ಹೊ ಆವಾಜ್ ಆಯ್ಕತಾನಾ ಝಗ್ಲಾಣೆಂ ಮಾರ್‌ಲ್ಲೆಪರಿಂ ಜಾಲ್ಲೆಂ. ತಕ್ಲಿ ತಾಚಿ ಸಯ್ರ್‌ಭಯ್ರ್ ಜಾಲಿ. ಎಕಾ ಘಡ್ಯೆಕ್ ಆಪ್ಣೆಂ ರಾವ್‍ಲ್ಲಿ ಧರ್ಣ್ ಉಗ್ತಿ ಜಾವ್ನ್ ಆಪ್ಣಾಕ್ ಗೀಳ್ನ್ ಸೊಡ್ಲೆಂಚ್ ಮ್ಹಣ್ ಜಾಲೆಂ ತಾಕಾ. ದುಸ್ರ್ಯಾ ಘಡ್ಯೆ ಆಂಗ್ ಫಾಪುಡ್ನ್ ಪಾಟಿಂ ಘುಂವೊನ್ ತಾಣೆಂ ಧಾಂವ್‍ಲ್ಲ್ಯಾ ಆವಾಜಾಕ್ ಥಂಯ್ಚ್ ಬೊಲ್ಯಾ ಪಾಟ್ಲ್ಯಾನ್ ಕುಡಿಚಿ ಗರ್ಜ್ ತಿರ್ಸುಂಕ್ ಬೊಸ್‍ಲ್ಲ್ಯಾ ಎಕ್ಲ್ಯಾಕ್ ಆಂಗಾಂತ್ ಕಾಂಪ್ ಸುಟ್‍ಲ್ಲಿ. ಹಾತಾಂತ್ಲಿ ತಾಚಿ ಬಿಡಿ ಖಂಯ್ ಉಸಳ್ಳಿ ತೊಚ್ ನೆಣಾ! ತಶೆಂ ಗೆಲ್ಲೊ ಆಮ್ಚೊ ಟೊಮಿ ದೋನ್ ಹಫ್ತೆ ನಪಂಯ್ಚ್ ಜಾಲ್ಲೊ. ಪಂದ್ರಾ ದಿಸಾಂ ಉಪ್ರಾಂತ್ ಸಕ್ಕಡ್ ತಪಾಸಣ್ ಕರ್ನ್ ಘರ್ಚಿಂ ಮನ್ಶಾಂ ಮಾತ್ರ್ ದಿಸ್‍ಲ್ಲ್ಯಾನ್ ಘರಾ ಯೆತಾನಾ ಟೊಮಿಚ್ಯಾ ತೊಂಡಾರ್ ಪಯ್ಲೆಂಚೊ ಛಾರೊಚ್ ನಾತ್‍ಲ್ಲೊ. ಅಶೆಂ ಮ್ಹಜ್ಯಾ ಮಾಮಾಚೆಂ ಕಾಜಾರ್ ಸಂಪ್‍ಲ್ಲೆಂ, ವೆಗ್ಳ್ಯಾನ್ ಘಡಿತಾಂಚ್ಯಾ ಅನುಭವಾನ್!

(ಗೊಂದೊಳ್ ಪ್ರಕರಣ್ ಸಮಾಪ್ತ್)

ಕುರ್ಪಾ: ರಾಕ್ಣೊ, ಫೆಬ್ರೆರ್ 26, 2015

Send Feedback to: budkuloepaper@gmail.com

Like us at: www.facebook.com/budkulo.epaper

The post ಕಾಜಾರಾಚ್ಯಾ ಮಾಟ್ವಾಂತ್ ಮೊನ್ಜಾತಿಂಚೊ ಗೊಂದೊಳ್! appeared first on Budkulo.