ಕಾಣಿಯೆಚೆಂ ರೂಪ್ ವಾ ಶೈಲಿ

ಮಟ್ವಿ ಕಾಣಿ ಬರಂವ್ಚ್ಯಾ ರಿತಿಕ್ ಶೈಲಿ ಮ್ಹಣ್ಯೆತಾ. ಹರ್ ಬರಯ್ಣಾರಾನ್ ಮಟ್ವಿ ಕಾಣಿ ಬರಂವ್ಚಿ ಶೈಲಿ ತಾಚಿಚ್ (ಖಾಶೆಲಿ) ಆಸ್ತಾ.

ಥೊಡ್ಯಾ ವರ್ಸಾಂ ಪಯ್ಲೆಂ ಮ್ಹಾಕಾ ಎಕಾ ನೆಮಾಳ್ಯಾನ್ ಯೆವ್ಜಿಲ್ಲ್ಯಾ ಸ್ಪರ್ಧ್ಯಾಚ್ಯಾ ಮಟ್ವ್ಯಾ ಕಾಣಿಯಾಂಚಿ ವರವ್ಣಿ ಕರುಂಕ್ ಆಪವ್ಣೆಂ ದಿಲ್ಲೆಂ. ಏಕ್ ಕಾಣಿ ವಾಚ್ತಾನಾ ಕೊಂಕ್ಣೆಂತ್ಲ್ಯಾ ಫಾಮಾದ್ ಬರಯ್ಣಾರಾಚ್ಯಾ ಕಾಣಿಯೆಪರಿಂ ಆಸ್‍ಲ್ಲಿ. ತ್ಯಾ ಬರಯ್ಣಾರಾನ್ ಸ್ಪರ್ಧ್ಯಾಂತ್ ಪಾತ್ರ್ ಘೆಂವ್ಚೊ ಸಂಭವ್ ನಾತ್‍ಲ್ಲ್ಯಾನ್ ಹಾಂವೆಂ ಹಿ ಗಜಾಲ್ ಸಂಪಾದಕಾಕ್ ಕಳಯ್ಲಿ.

ಸ್ಪರ್ಧಿನ್ ತ್ಯಾ ಫಾಮಾದ್ ಬರಯ್ಣಾರಾಚಿ ಕಾಣಿ ಆಸಾ ತಶಿ ನಕಲ್ ಕೆಲ್ಲಿ!

ಹೆರಾಂಚ್ಯೊ ಕಾಣಿಯೊ ವಾಚುನ್‍ಂಚ್ ಆಸ್ಲ್ಯಾರ್, ಬರಯ್ಣಾರಾಚೆಂ ನಾಂವ್ ನಾತ್ಲ್ಯಾರ್‌ಯೀ ‘ಹಿ ಕಾಣಿ ತಾಚಿಚ್’ ಮ್ಹಣ್ ಸಾಂಗ್ಯೆತಾ. ಅಸಲೆಂ ಖಾಶೆಲೆಂಪಣ್ ಥೊಡ್ಯಾ ಫಾಮಾದ್ ಬರಯ್ಣಾರಾಂಕ್ ಆಸ್ತಾ.

ಜೆರಾಲ್ ಥರಾನ್ ಕಾಣಿ ಬರಂವ್ಚ್ಯಾ ರಿತಿಂತ್ ವಾ ಶೈಲೆಂತ್ ಸಾಂಪ್ರದಾಯಿಕ್, ಪ್ರಗತಿಶೀಲ್ ಆನಿ ನವ್ಯ್ ಮ್ಹಣ್ ತೀನ್ ಥರ್ ಪಳವ್ಯೆತಾ.

ಕನ್ನಡಾಚ್ಯಾ ಆದ್ಲ್ಯಾ ಬರಯ್ಣಾರಾಂಚ್ಯಾ ಕಾಣಿಯಾಂನಿ, ಕೊಂಕ್ಣೆಂತ್ ಜೊ.ಸಾ. ಅಲ್ವಾರೆಸ್ ಆನಿ ತಾಚ್ಯಾ ಸಾವ್ಳೆಂತ್ ಬರಂವ್ಕ್ ಧರ್‌ಲ್ಲ್ಯಾ ಮಾನೆಸ್ತ್ ಎಡಿ ನೆಟ್ಟೊ ಆನಿ ಹೆರ್ ಸಬಾರಾಂಚ್ಯಾ ಕಾಣಿಯಾಂನಿ ಸಾಂಪ್ರದಾಯಿಕ್ ಶೈಲಿ ಆಸಾ. ಜೆರಾಲ್ ಥರಾನ್ ವಿವರಣ್ ಚಡ್ ಆಸ್ತಾ ಜಾಲ್ಲ್ಯಾನ್ ವಾಚ್ಪ್ಯಾಕ್ ಪಾತ್ರ್ ಆಪ್ಣಾ ಭಿತರ್ ಕಲ್ಪನ್ ಕರುಂಕ್ ಅವ್ಕಾಸ್ ಆಸನಾ. ಆತಾಂ ಅಸಲ್ಯಾ ಕಾಣಿಯಾಂಕ್ ವಾಚ್ಪಿ ಚಡ್ ಪಸಂದ್ ಕರಿನಾಂತ್ ಮ್ಹಣ್ ಚಿಂತಪ್ ಆಸಾ.

ಮಾನೆಸ್ತ್ ಎಡ್ವಿನ್ ಜೆ.ಎಫ್. ಸೊಜ್, ಸ್ಟೇನ್ ಅಗೇರಾ ಆನಿ ಹೆರ್ ಸಬಾರ್ ಆಯ್ಲೆವಾರ್ ಫಾಮಾದ್ ಜಾಲ್ಲ್ಯಾ ಬರಯ್ಣಾರಾಂಚ್ಯಾ ಕಾಣಿಯಾಂನಿ ಪ್ರಗತಿಶೀಲ್ ಶೈಲಿ ಆಸಾ. ಕಾಣಿಯೊ ಕುರ್ಕುರಿತ್ ಆಸೊನ್ ವಾಚುಂಕ್ ಚಡ್ ದಾಧೊಸ್ಕಾಯ್ ದಿತಾತ್. ಕಾಣಿಯಾಂನಿ ವಿವರಣ್ ಉಣೆಂ. ಪಾತ್ರ್‌ಚ್ ಕಾಣಿ ರಚುನ್ ವೆತಾತ್.

ಕೊಂಕ್ಣೆಂತ್ ನವ್ಯ್ ಶೈಲಿ ರುತಾ ಜಾಲ್ಲಿ ಮ್ಹಾಕಾ ಕಳಿತ್ ನಾ. ಥೊಡ್ಯಾ ಬರಯ್ಣಾರಾಂನಿ ಪ್ರಯತ್ನ್ ಕೆಲಾಂ. ಹ್ಯಾ ಶೈಲೆಂತ್ ಭೊಗ್ಣಾಂನಿಂಚ್ ಕಾಣಿ ವ್ಯಕ್ತ್ ಜಾತಾ. ಕನ್ನಡಾಂತ್ ತವಳ್ ತವಳ್ ಅಸಲ್ಯೊ ಥೊಡ್ಯೊ ಕಾಣಿಯೊ ವಾಚುಂಕ್ ಮೆಳ್ತಾತ್.

ಶೈಲಿ ಏಕ್ ಖಾಶೆಲಿ ಗಜಾಲ್ ಜಾಲ್ಲ್ಯಾನ್ ಮಟ್ವಿ ಕಾಣಿ ಬರಯ್ತೆಲ್ಯಾ ಬರಯ್ಣಾರಾಕ್ ಶೈಲಿ ಪ್ರಮುಖ್ ನ್ಹಯ್, ಬರ್‍ಯಾನ್ ಮಟ್ವಿ ಕಾಣಿ ಸಾದರ್ ಕರ್ಚೆಂ ಗರ್ಜೆಚೆಂ.

ಸನ್ನಿವೇಶ್ ಪಿಂತ್ರಾವ್ಚೆಂ (Plotting the Action)

ಜೆರಾಲ್ ಥರಾನ್ ಹಾಕಾ ಕಾಣಿ ಜಾಂವ್ಚೊ/ಜಾಲ್ಲೊ ಪರಿಸರ್, ಸನ್ನಿವೇಶ್, ವೇಳ್ ಅಶೆಂ ಸಾಂಗ್ಯೆತಾ. ಸನ್ನಿವೇಶ್ ಆನಿ ಪಾತ್ರ್ ಪಿಂತ್ರಾವ್ಣಿ ಸಾಂಗಾತಾಚ್ ವೆತಾತ್. ಥೊಡ್ಯಾ ಕಾಣಿಯಾಂನಿ ಕಾಣಿಯೆಚೊ ವಿಷಯ್‍ಚ್ ಸನ್ನಿವೇಶ್ ಜಾವ್ಯೆತಾ.

ಹೆರ್ ಕಾಣಿಯಾಂನಿ ಪಾತ್ರ್ ಪಿಂತ್ರಾವ್ಚಿ ವೆದಿ ಮ್ಹಣ್‍ಯಿ ಸನ್ನಿವೇಶಾಕ್ ಸಾಂಗ್ಯೆತಾ. ಸನ್ನಿವೇಶ್ ಸಬಾರ್ ಥರಾಂಚೆ ಆಸ್ಯೆತಾ.

ಸಂಬಂಧ್: ಆಸ್‍ಲ್ಲೆ (ಆವಯ್, ಬಾಪಯ್ ವಾ ಕುಟ್ಮಾ ಮಧೆಂ ವಾ ನವ್ಯಾನ್ ಜಾಲ್ಲೆ – ಘರಾ ಆಯಿಲ್ಲಿಂ ಸಯ್ರಿಂ, ವಾಟೆರ್ ಭೆಟ್‍ಲ್ಲೊ…) ಸಂಬಂಧ್‍ಚ್ ಸನ್ನಿವೇಶ್ ಜಾಲ್ಯಾರ್ ಮಟ್ವಿ ಕಥಾ ಜಾಯಿತ್ತ್ಯಾ ವಾಚ್ಪ್ಯಾಂಕ್ ರುಚ್ತಾ.

ಅಪೇಕ್ಷಿಲ್ಲೆಂ ನ್ಹಯ್ ಆಸ್ಚೆಂ ವಾ ನಾತ್‍ಲ್ಲೆಂ: ಭುರ್ಗೆಂ, ಮೋರ್ನ್, ಉಜೊ ಪೆಟ್ಚೊ, ಅವ್ಘಡ್ – ಹ್ಯಾ ವರ್ವಿಂ ಇತ್ಲ್ಯಾರ್‌ಚ್ ಆಸ್ಚೆಂ ಮನ್ಶ್ಯಾಂಚೆಂ ವರ್ತುಲ್ ಕಶೆಂ ಪ್ರಭಾವಿತ್ ಜಾತಾ ತಾಚೆರ್ ಕಾಣಿ ವ್ಹಾಳೊನ್ ವೆತಾ.

ಆಕಾಂಕ್ಷಾ; ಜಿಣ್ಯೆಚ್ಯಾ ಪಯ್ಣಾಚೆರ್ ಸೊಧ್ಣಿ: ವ್ಯಕ್ತ್ ಜಾಲ್ಲೆ, ವಾ ಅವ್ಯಕ್ತ್ ಇರಾದ್ಯಾಕ್ ಪಾವೊಂಕ್ ಆಡ್ಕಳಿ.

ಬರಯ್ಣಾರಾಕ್ ಜಾಲ್ಲೆ ಅನ್ಭೋಗ್ (dramatic situations or interactions with people):

• ಪ್ರತಿಭಟನ್, ವಿರೋಧ್ಪಣ್ ದಾಕಂವ್ಚೆಂ
• ಹ್ಯಾ ಪರ್ಯಾಂತ್ ಪಾತ್ಯೆವ್ನ್ ಆಯಿಲ್ಲೆಂ ಚೂಕ್ ಮ್ಹಣ್ ಸಾದರ್ ಕರ್ಚೆಂ
• ಆನ್ಯೇಕ್ಲ್ಯಾಚ್ಯಾ ಹಕ್ಕಾಂ ಖಾತಿರ್ ಝುಜ್ಚೆಂ, ತಾಚೊ ಅಸಹಕಾರ್
• ಸಂಬಂಧಾಂತ್ ದುಸ್ಮಾನ್ಕಾಯ್ – ಭಾಂವ್ಡಾಂ ಮಧೆಂ, ವಿಗಾರ್-ಕಾಜಿತೊರ್ ಇತ್ಯಾದಿ
• ದ್ವಂದ್ವ್ ವಾ ವಿರೋಧ್ಪಣ್ – ಮನಿಸ್ ಆನಿ ಪ್ರಕ್ರೃತಿ, ಸಮಾಜೆಚಿಂ ನಿಯಮಾಂ

ಮೋಗ್: ಆಪ್ಲ್ಯಾ ತರ್ನ್ಯಾ ಪ್ರಾಯೆರ್ ಬರಂವ್ಕ್ ಧರ್‌ಲ್ಲ್ಯಾ ಬರವ್ಪ್ಯಾಂನಿ ಅಸಲ್ಯೊ ಕಾಣಿಯೊ ಬರಂವ್ಚ್ಯೊ ಆಸ್ತಾತ್. ತರ್ನಾಟ್ಯಾಂ ಮಧ್ಲ್ಯಾ ಹುನೊನಿ ಮೊಗಾಚ್ಯೊ ಕಾಣಿಯೊ ಜೆರಾಲ್ ವಾಚ್ಪ್ಯಾಂಕ್ ಬರ್‍ಯೊ ಜಾಯ್ನಾಂತ್. ವಾಚ್ಪಿ ಚಡ್ತಾವ್ ತ್ಯಾ ಪ್ರಾಯೆ ವಯ್ಲೆ ಆಸ್ತಾತ್ ಜಾಲ್ಲ್ಯಾನ್ ಮೊಗಾಚ್ಯೊ ಕಾಣಿಯೊ ಯಶಸ್ವಿ ಜಾಂವ್ಚ್ಯೊ ಉಣೆಂ. ಪುಣ್ ಕಾಣಿಯೆಂತ್ ಅನಿರೀಕ್ಷಿತ್ ಕಿತೆಂಯ್ ಆಸ್ಲ್ಯಾರ್ ತಸಲ್ಯೊ ಕಾಣಿಯೊ ಬರ್‍ಯೊ ಜಾತಾತ್.

ಸನ್ನಿವೇಶ್ ಪಿಂತ್ರಾಯ್ತನಾ ಥೊಡಿ ಚತ್ರಾಯ್

ಕಾಣಿಯೆಂತ್ ಯೆಂವ್ಚೆಂ ಪರಿಸರ್ ಬರಯ್ಣಾರಾಚ್ಯಾ ಅನ್ಭೋಗಾಚೆಂ ಆಸೊಂಕ್ ಜಾಯ್. ಕೊಡ್ತಿಕ್ ವಚೊನ್ ನೆಣಾಸ್‍ಲ್ಲ್ಯಾನ್ ಕೊಡ್ತಿಚ್ಯಾ ಸನ್ನಿವೇಶಾಚೆರ್ ಕಾಣಿ ಬರಯ್ಲ್ಯಾರ್ ತಿ ಬರಿ ಜಾಯ್ನಾ. (ಆಮ್ಚ್ಯಾ ಜಾಯಿತ್ತ್ಯಾ ಹಿಂದಿ ಪಿಂತುರಾಂನಿ ದಾಕಂವ್ಚೆಪರಿಂ ಕೋಡ್ತ್ ಆಸನಾ. ಥೊಡೆ ಬರಯ್ಣಾರ್ ಹಿಂದಿ ಪಿಂತುರಾಂತ್ಲ್ಯಾ ಕೊಡ್ತಿಚೆಂ ಚಿತ್ರಣ್ ಆಪ್ಲ್ಯಾ ಕಾಣಿಯಾಂನಿ ಕರ್ತಾತ್). ತಶೆಂಚ್ ಆಸ್ಪತ್ರೆಚೆಂ ಐಸಿಯು ಕಶೆಂ ಆಸ್ತಾ ಮ್ಹಣ್ ಕಳಿತ್ ನಾತ್‍ಲ್ಲ್ಯಾನ್ ಐಸಿಯು ಭಿತರ್ಲೆಂ ಘಡಿತ್ ಬರಯ್ಲ್ಯಾರ್ ತೆಂ ಅವಾಸ್ತವಿಕ್ ಜಾವ್ಯೆತಾ. ವಿಮಾನಾರ್ ಪಯ್ಣ್ ಕರಿನಾತ್‍ಲ್ಲ್ಯಾನ್ ವಿಮಾನಾ ಭಿತರ್ಲೆಂ ಘಡಿತ್ ಕಾಣಿಯೆಂನಿ ಬರಂವ್ಚೆಂ ನ್ಹಯ್.

(ಮುಖಾರುಂಕ್ ಆಸಾ)

Send Feedback to: budkuloepaper@gmail.com

Like us at: www.facebook.com/budkulo.epaper

Join our Budkulo Club in Clubhouse

ದುಸ್ರೊ ಭಾಗ್: ಮಟ್ವಿ ಕಾಣಿ ಕಿತ್ಲಿ ಲಾಂಬ್ ಆಸಜೆ…

The post ಮಟ್ವ್ಯಾ ಕಾಣಿಯೆಚೆಂ ರೂಪ್ ಆನಿ ಸನ್ನಿವೇಶ್ appeared first on Budkulo.

ಕಿಸ್ತ್ 2

ಮಟ್ವಿ ಕಾಣಿ ಕಿತ್ಲಿ ಮಟ್ವಿ?

ಹ್ಯಾ ವಿಶಿಂ ಏಕ್ ಸ್ಪಷ್ಟ್ ನಿಯಮ್ ಮ್ಹಣ್ ನಾ. ಜೆರಾಲ್ ಥರಾನ್ ವಾಚ್ಪ್ಯಾಕ್ ಎಕಾ ಬಸ್ಕೆರ್ ವಾಚುನ್ ಸಂಪಂವ್ಕ್ ಜಾಂವ್ಚೆ ತಿತ್ಲಿ ಲಾಂಬ್ ಆಸ್ಲ್ಯಾರ್ ಮಟ್ವಿ ಕಾಣಿ ಬರಿ ಮ್ಹಣ್ ಜೆರಾಲ್ ಚಿಂತಪ್.

ಥೊಡ್ಯೊ ಮಟ್ವ್ಯೊ ಕಾಣಿಯೊ ಲ್ಹಾನ್ ಕಾದಂಬರಿ ತಿತ್ಲ್ಯೊ ಲಾಂಬ್ ಆಸ್ತಾತ್. ಹಾಕಾ ಕನ್ನಡಾಂತ್ ಲಾಂಬ್ ಕಾಣಿ (ನೀಳ್ಗತೆ) ಮ್ಹಣ್ತಾತ್. ಹಾಕಾ ಮಟ್ವಿ ಕಾಣಿ ಮ್ಹಣ್ಚೆ ಪ್ರಾಸ್ ಮಿನಿ ಕಾದಂಬರಿ ಮ್ಹಣ್ಯೆತಾ.

ಕೊಂಕ್ಣೆಂತ್ ಚಡ್ತಾವ್ ಮಟ್ವ್ಯೊ ಕಾಣಿಯೊ ನೆಮಾಳ್ಯಾಂನಿ ಪ್ರಗಟ್ ಜಾಂವ್ಚ್ಯೊ ಆಸ್‍ಲ್ಲ್ಯಾನ್ ಎಕಾ ನೆಮಾಳ್ಯಾಚ್ಯಾ ಏಕ್ ದೋನ್ ಪಾನಾಂ ಭಿತರ್ ಪ್ರಗಟ್ಚೆ ತಿತ್ಲ್ಯೊ ಲಾಂಬ್ ಆಸ್ಯೆತಾ ಮ್ಹಳ್ಳೆಂ ನಿಯಮ್ ಆಸ್‍ಲ್ಲೆಂ. ಲಗ್ಬಗ್ ಏಕ್ ಹಜಾರ್ ಥಾವ್ನ್ ದೇಡ್ ಹಜಾರ್ ಉತ್ರಾಂ ಭಿತರ್ ಆಸ್ಲ್ಯಾರ್ ಕಾಣಿ ಬರಿ ಮ್ಹಣ್ಯೆತಾ.

ಕಾಣಿ ಮಟ್ವಿ ಆಸೊನ್ ಬರಿ ಆಸ್ಲ್ಯಾರ್ ತಿ ವಾಚ್ಪ್ಯಾಂಕ್ ರುಚ್ತಾ.

ಪ್ರಸ್ತುತ್ ಕಾಣಿ ಜಾಂವ್ ಹೆರ್ ಬರಪ್ ಜಾಂವ್ ಚಡ್ ಲಾಂಬ್ ಆಸ್ಲ್ಯಾರ್ ಜೆರಾಲ್ ಥರಾನ್ ವಾಚ್ಪ್ಯಾಂಕ್ ವಾಚುಂಕ್ ಸಯ್ರಾಣ್ ಆಸನಾ. ಥೊಡ್ಯಾಚ್ ಉತ್ರಾಂನಿ ಸಗ್ಳಿ ಮಟ್ವಿ ಕಾಣಿ ಸಾದರ್ ಕೆಲ್ಯಾರ್ ಬರೆಂ. ಅಂತರ್‌ಜಾಳಿಚೆರ್ ಪ್ರಗಟ್ಚಿ ತರೀ ಚಡ್ ಮ್ಹಳ್ಯಾರ್ ದೇಡ್ ಹಜಾರ್ ಉತ್ರಾಂ ಆಸ್ಯೆತಾ.

ಥೊಡ್ಯೊ ಮಟ್ವ್ಯೊ ಕಾಣಿಯೊ ದೋನ್ ತೀನ್ ಭಾಗಾಂನಿ ಪ್ರಗಟ್ ಜಾಲ್ಲ್ಯೊಯೀ ಆಸಾತ್. ಅಸಲ್ಯಾ ಸಂಧ್ರಾಪಾರ್ ಹರ್ ಭಾಗ್ ವಾಚ್ಪ್ಯಾಕ್ ರುಚ್ಚೆ ತಸಲೊ ಆಸೊನ್, ಮುಖ್ಲ್ಯಾ ಭಾಗಾಕ್ ರಾಕೊನ್ ರಾಂವ್ಚೆ ತಶೆಂ ಪ್ರತ್ಯೇಕ್ ಭಾಗ್ ಆಕೇರ್ ಕೆಲ್ಯಾರ್ ವಾಚ್ಪಿ ಮುಖ್ಲೆ ಭಾಗ್ ವಾಚ್ತಾತ್. ಅಶೆಂ ಬರಯ್ಣರಾನ್‍ಂಚ್ ಸ್ವತಾಃ ಕೆಲ್ಯಾರ್ ಬರೆಂ. ಕಾಣಿ ಮಟ್ವಿ ಕರ್ಚಿ ವಾ ಕಾತ್ರುನ್ ಭಾಗ್ ಕರ್ಚಿ ಜವಾಬ್ದಾರಿ ಸಂಪಾದಕಾಕ್ ಸೊಡುಂಕ್ ನಜೊ.

ಮಟ್ವ್ಯಾ ಕಾಣಿಯೆಕ್ ವಿಷಯ್ ವಿಂಚ್ಚೊ

ಮಟ್ವಿ ಕಾಣಿ ಜೆರಾಲ್ ಥರಾನ್ ಎಕಾಚ್ ವಿಷಯಾಚೆರ್ ಆಸ್ಲ್ಯಾರ್ ಬರಿ. ದೋನ್ ತೀನ್ ವಿಷಯ್ ಭರ್ಸುನ್ ಕಾಣಿ ಬರಯ್ಲ್ಯಾರ್ ತಿ ಚಡ್ ರುಚಿಕ್ ಜಾಯ್ನಾ.

ಜೆರಾಲ್ ಥರಾನ್ ವಿಷಯ್ ವಾಚ್ಪ್ಯಾಂಕ್ ಲಗ್ತಿ ಜಾಲ್ಲೊ ಆಸ್ಲ್ಯಾರ್ ಬರೆಂ. ವಾಚ್ಪ್ಯಾನ್ ಜಿಯೆಂವ್ಚ್ಯಾ ಗಾಂವಾಕ್, ಭೊಂವಾರಾಕ್ ಲಗ್ತಿ ಆಸ್ಲ್ಯಾರ್ ಕಾಣಿ ಬರಿ ಜಾತಾ.

ವಿಷಯ್ ಏಕ್ ಘಡಿತ್, ಏಕ್ ವ್ಯಕ್ತಿ ವಾ ಏಕ್ ಸನ್ನಿವೇಶ್ ಜಾವ್ಯೆತಾ.

ವಿಷಯ್ ಬರಯ್ಣಾರಾಚ್ಯಾ ಅನ್ಭೋಗಾಂತ್ಲೊ ಆಸೊಂಕ್ ಜಾಯ್. ಹೊ ಅನ್ಭೋಗ್ ಸ್ವತಃ ಭೊಗ್‍ಲ್ಲೊ, ಆಯ್ಕಲ್ಲೊ ವಾ ವಾಚ್‍ಲ್ಲೊ ಆಸ್ಯೆತಾ.

ದಾಕ್ಲ್ಯಾಕ್ ಮ್ಹಜ್ಯಾ ಮಟ್ವ್ಯಾ ಕಾಣಿಯಾಂನಿ ‘ಗೊಲಿಮಾರ್’ ಮ್ಹಳ್ಳ್ಯಾ ಎಕಾ ಗಾಂವಾಂತ್ ಲೊಕಾಚ್ಯಾ ಜಿವಿತಾಕ್ ಲಗ್ತಿ ಜಾಲ್ಲಿಂ ಘಡಿತಾಂ ಆಸಾತ್. ಹೊ ಗೊಲಿಮಾರ್ ಗಾಂವ್ ಕಾಲ್ಪನಿಕ್ – ತಾಂತುಂ ಹಾಂವ್ ಲ್ಹಾನ್ ವ್ಹಡ್ ಜಾಲ್ಲೊ ಶಿರ್ವಾಂಚೊ ಗಾಂವ್ ಆಸಾ. ಹ್ಯಾ ಸಾಂಗಾತಾ ಮ್ಹಜ್ಯಾ ಅನ್ಭೋಗಾಕ್ ಆಯಿಲ್ಲೆ ಹೆರ್ ಗಾಂವ್ – ಮೂಡ್‍ಬಿದ್ರಿ, ಉಡುಪಿ, ಕೊಡಿಯಾಳ್‍ಯೀ ಆಸಾತ್. ಹೆ ಸಕ್ಕಡ್ ಗಾಂವ್ ಮಿಸ್ಳೊನ್ ಗೊಲಿಮಾರ್ ಜಾಲಾ.

ಥೊಡ್ಯಾ ಕಾಣಿಯಾಂನಿ ಘಡಿತಾಂ ಆಸಾತ್ – ಆಸ್ಪತ್ರೆಂತ್ ಜಾಲ್ಲಿಂ, ಥೊಡಿಂ ಹೆರಾಂನಿ ಮ್ಹಾಕಾ ಸಾಂಗ್‍ಲ್ಲಿಂ, ಥೊಡಿಂ ಹಾಂವೆಂ ಪತ್ರಾಂನಿ ವಾಚ್‍ಲ್ಲಿಂ…

ಪುಣ್ ಅಶೆಂ ಬರಯ್ತನಾ ಜಾಲ್ಲೆಂ ಘಡಿತ್‍ಚ್ ಕಾಣಿಯೆಂತ್ ಹಾಡ್ಚೆಂ ನ್ಹಯ್. ತೆಂ ಘಡಿತ್ ಏಕ್ ಪ್ರೇರಣ್ ತಶೆಂ ಜಾವ್ಯೆತಾ.

ಹೆರಾಂಚ್ಯಾ ಕಾಣಿಯೆಚೆಂ ಪ್ರೇರಣ್

ಜೆರಾಲ್ ಥರಾನ್ ಹೆರಾಂನಿ ಬರಯಿಲ್ಲ್ಯಾ ಕಾಣಿಯಾಂತ್ಲೆ ವಿಷಯ್ ಆಸಾ ತಶೆ ಘೆಂವ್ಚೆ ನ್ಹಯ್; ಪುಣ್ ತೆ ಪ್ರೇರಣ್ ತಶೆಂ ಜಾವ್ಯೆತಾ. ತಸಲ್ಯಾ ಘಡಿತಾಚ್ಯಾ ಪಾಟ್‍ಥಳಾಚೆರ್ ಕಾಣಿ ಬಾಂಧುನ್ ಹಾಡ್ಯೆತಾ. ಅಶೆಂ ಬರಯ್ತಾನಾ ಖಂಚ್ಯಾ ಕಾಣಿಯೆಚ್ಯಾ ಪ್ರೇರಣಾನ್ ಬರಯ್ಲ್ಯಾ ಮ್ಹಣ್ ಕಳಯ್ಲ್ಯಾರ್ ಬರಯ್ಣಾರ್ ಪ್ರಾಮಾಣಿಕ್ ಮ್ಹಣ್ ವಾಚ್ಪಿ ಸಮ್ಜತಾತ್.

ಬರಯ್ಣಾರ್ ಸದಾಂ ಜಾಗೃತ್

ಮಟ್ವ್ಯೊ ಕಾಣಿಯೊ ಬರಂವ್ಚೆಂ ದೆಣೆಂ ಆಸ್‍ಲ್ಲ್ಯಾ ಬರಯ್ಣಾರಾನ್ ಆಪ್ಲ್ಯಾ ಭೊಂವ್ತಿಂಚ್ಯಾ ವಿಷಯಾಂಚೆರ್ ಜಾಗೃತ್ ಆಸ್ಲ್ಯಾರ್ ಕಾಣಿಯೊ ಬರಂವ್ಕ್ ವಿಷಯ್ ಮೆಳ್ತಾತ್ ಆನಿ ತ್ಯೊ ಚಡ್ ವಾಸ್ತವಿಕ್ ಜಾತಾತ್.

ದಾಖ್ಲ್ಯಾಕ್ ಥೊಡ್ಯಾ ವರ್ಸಾಂ ಪಯ್ಲೆಂ ಪಯ್ಶಿಲ್ಯಾ ಎಕಾ ಫಿರ್ಗಜೆಂತ್, ಇಗರ್ಜೆಚ್ಯಾ ಮಾಟ್ವಾಂತ್ ಆಸ್‍ಲ್ಲಿ ಇಮಾಜ್ ಕೊಣೆಂ ಅನ್ನಾಡ್ಯಾಂನಿ ಫುಟವ್ನ್ ಘಾಲ್ಲಿ ಖಬರ್ ಪತ್ರಾರ್ ಆಯಿಲ್ಲಿ. ಹಾಂವೆಂ ತೊ ಮಾತ್ರ್ ವಿಷಯ್ ಘೆವ್ನ್ ಗೊಲಿಮಾರ್ ಫಿರ್ಗಜೆಚ್ಯಾ ಇಗರ್ಜೆಂತ್ ಇಮಾಜ್ ಫುಟವ್ನ್ ಘಾಲ್ಲಿ ಕಾಣಿ ಬರಯಿಲ್ಲಿ. ಮೂಳ್ ಘಡಿತಾಕ್ ಆನಿ ಮ್ಹಜ್ಯಾ ಕಾಣಿಯೆಕ್ ಕಿತೆಂಚ್ ತಾಳ್ ಪಡನಾತ್‍ಲ್ಲೆಂ.

ಅಶೆಂ ಮ್ಹಜ್ಯಾ ಹರ್ ಕಾಣಿಯೆ ಪಾಟ್ಲ್ಯಾನ್ ಪ್ರೇರಿತ್ ಜಾಲ್ಲೆಂ ಏಕ್ ನಾ ಏಕ್ ಘಡಿತ್ ಆಸ್ತಾ.

ಹರ್ ಬರಯ್ಣಾರಾ ಥಂಯ್‍ಯೀ ಹೆಂ ಸತ್ ಜಾವ್ನಾಸ್ತಾ.

ಪುಣ್ ಅಶೆಂ ಆಪ್ಲ್ಯಾ ಭೊಂವಾರಾಚ್ಯಾ ಗಜಾಲೆಂ ವಿಶಿಂ ಬರಯ್ತಾನಾ, ಕೊಣಾಯ್ಕೀ ಒತ್ತು ದೀವ್ನ್ ವಾ ಕೊಣಾಯ್ಚಿ ವಳಕ್ ಹೆರಾಂಕ್ ಜಾಂವ್ಚೆಪರಿಂ ಬರಂವ್ಕ್ ನಜೊ. ಕಾಣಿಯೆಂತ್ ಪಿಂತ್ರಾಂವ್ಚೊ ವ್ಯಕ್ತಿ ಅನ್ನಾಡಿಚ್ ಜಾವ್ಯೆತಾ, ಪುಣ್ ಬರಯ್ಣಾರಾನ್ ಹೆರಾಂಕ್ ಒತ್ತು ದೀವ್ನ್ ಬರಯ್ಲ್ಯಾರ್ ಕಾನೂನಾಚ್ಯೆ ಸಮಸ್ಸೆ ಯೆವ್ಯೆತಾ.

(ಮುಖಾರುಂಕ್ ಆಸಾ)

Send Feedback to: budkuloepaper@gmail.com

Like us at: www.facebook.com/budkulo.epaper

Join our Budkulo Club in Clubhouse

The post ಮಟ್ವಿ ಕಾಣಿ ಕಿತ್ಲಿ ಲಾಂಬ್ ಆಸಜೆ ಆನಿ ಕಾಣಿಯಾಂಚೊ ವಿಷಯ್ appeared first on Budkulo.

ಪ್ರಕರಣ್ 25 – ಸಾಂಡುನ್ ಗೆಲ್ಲೊ ಗಾಂಚ್

ಇಜಾಬೆಲ್ ತೆರೆಜಾಕ್ ‘ಫಾತಿಮಾಂ’ತ್ ಪಾವ್ನ್ ವೆಗಿಂ ಪಾಟಿಂ ಯೇಜಾಯ್ ಆಸ್‍ಲ್ಲೊ ಸರ್ದಾರ್ ಸಿಮಾಂವ್, ಹಸ್ಸನ್ ಮಹಮ್ಮದಾನ್ ಸಾಂಗ್ಚಿ ಲ್ಹಾನ್ ಕಥಾ ಆಯ್ಕೊಂಕ್ ಚಡ್ ವೇಳ್ ಉರ್ಲೊ. ಹೆವ್ಶಿಲ್ಯಾನ್ ‘ಸ್ತೆಲ್ಲಾಂ’ತ್ ತಾಚೆ ಪಾಟ್ಲಾವ್ದಾರ್ ಚಿಕ್ಕೆ ವಿಜ್ಮಿತ್ ಜಾಲೆ. ಥೊಡ್ಯಾ ವೆಳಾ ಉಪ್ರಾಂತ್, ಆತುರಾಯ್ ತಡ್ವುನ್ ಧರುಂಕ್ ಜಾಯ್ನಾಸ್ತಾಂ, ಅಂತುಲ್ಯಾಚ್ಯಾ ಹುಕ್ಮೆನ್, ಮಂಜೆಚ್ಯಾ ಕೊಂಬಾಗಾರಾನ್ ಶಿಂಗ್ ಫುಂಕ್ಲೆಂ.

ಹಸ್ಸನ್ ಮಹಮ್ಮದ್ ಆನಿ ಸರ್ದಾರ್ ಸಿಮಾಂವ್ ತೊಲ್ದ್ಯಾರ್ ವಯ್ರ್ ಆಯ್ಲೆ. ತಾಣಿಂಯೀ, “ಸರ್ವ್ ಸಮಾಧಾನ್ – ಥೊಡೊ ವೇಳ್ ಸುಶೆಗ್” ಮ್ಹಳ್ಳೊ ಅರ್ಥ್ ದಿಂವ್ಚ್ಯಾ ಜಿನ್ಸಾರ್ ಕೋಂಬ್ ಫುಂಕುನ್ ಸಾಂಗ್ಲೆಂ.

ಉಪ್ರಾಂತ್ ಹಸ್ಸನ್ ಮಹಮ್ಮದಾನ್, ಥಂಯ್ಚ್ ರಾವೊನ್, ಸರ್ದಾರ್ ಸಿಮಾಂವ್ಕ್ ಆಪ್ಲ್ಯಾ ಪೊಸ್ಕ್ಯಾಚಿ, ಮಿರಿಯಮಾಚಿ ಕಥಾ ಮಟ್ವ್ಯಾನ್ ಸಾಂಗ್ಲಿ. ತ್ಯಾ ವೆಳಾರ್, ಇಜಾಬೆಲ್ ತೆರೆಜಾಕ್, ಫರೀದಾ ಬೀಬಿಚ್ಯಾ ಒತ್ತಾಯೆನ್, ಜಾಯ್ತಿ ಶುಶ್ರೂಷಾ ಆನಿ ವಿಶೆವ್ ಲಾಭಯ್ಲೊ. ನಿಜಾಯ್ಕೀ, ಇಜಾಬೆಲ್ ತೆರೆಜ್, ವೀರಾಂಚ್ಯಾ ಕುಳಿಯೆಚಿ ಚಲಿ ಜಾಲ್ಲ್ಯಾನ್, ತೆದೊಳ್ ಪರ್ಯಾಂತ್ ಹಟಾಚ್ಯಾ ಸ್ಥೈರ್ಯಾನ್ ಉಬಿ ರಾವ್‍ಲ್ಲಿ. ಪುಣ್ ನಿಜಾಯ್ಕೀ, ತಿಚೆಂ ಆಂಗ್ ಏಕ್ ರೂಂವ್‍ಶೆಂ ದುಕ್ತಾಲೆಂ, ಆನಿ ನಿತ್ರಾಣ್ ತಿ ಆಸ್‍ಲ್ಲಿ ಮ್ಹಣ್ ಫರೀದಾ ಬೀಬಿನ್ – ತಿಕಾ ಮುಸ್ಲಿಮ್ ಸ್ತ್ರೀಯೆಪರಿಂ ನ್ಹೆಸಯ್ತಾನಾ – ಸಮ್ಜೊನ್ ಘೆತ್‍ಲ್ಲೆಂ.

ಮಿರಿಯಮಾಚಿ ಕಥಾ ಆರಂಭ್ ಕರ್ಚ್ಯಾ ಆದಿಂ, ಹಸ್ಸನ್ ಮಹಮ್ಮದಾನ್ ತ್ಯಾ ಭುರ್ಗ್ಯಾಕ್ ಲಾಗಿಂ ಆಪವ್ನ್, ಸರ್ದಾರಾ ಕಡೆನ್ ಅಶೆಂ ತೊ ಮ್ಹಣಾಲೊ:

“ಹಿಚಿ ಖಬರ್, ಪಯಿಲ್ಲೆ ಪಾವ್ಟಿಂ, ಮ್ಹಜ್ಯಾ ಶಿವಾಯ್ ಭಾಯ್ಲ್ಯಾ ಮನ್ಶ್ಯಾಂಕ್ ಹಾಂವ್ ಸಾಂಗ್ತಾನಾ, ತುಮ್ಕಾಂ ಏಕ್ ವಸ್ತ್ ದಾಕಂವ್ಕ್ ಅಪೇಕ್ಷಿತಾಂ. ಎಕಾದಾವೆಳಾ ಹಾಂವ್ ಸರಾನ್ ಜಾಲ್ಯಾರ್, ಹ್ಯಾ ಆಮ್ಚ್ಯಾ ಬಾಳಾಚಿ ಗತ್ ಪಾಡ್ ಜಾಯ್ನಾ ಜಾಂವ್ಕ್ ತಿಕಾ ಎಕ್ಲೊ ಆಶ್ರಯ್‍ದಾತ್ ವಾ ತಿಚಿ ನೀಜ್ ಖಬರ್ ಜಾಣಾಸ್‍ಲ್ಲೊ ಕೋಣ್ ಪುಣೀ ಎಕ್ಲೊ ಆಸಜಾಯ್. ತೆಂ ಹಕ್ಕ್ ಆಜ್ ಥಾವ್ನ್ ತುಮ್ಚೆಂ. ಕಿತೆಂ ಮ್ಹಣ್ತಾತ್ ತುಮಿ?”

“ತರ್ ತಿಚಿ ಕಥಾ ಆಯ್ಕಯಾಂ. ಜೆಂ ಕಿತೆಂ ತುಂ ಮ್ಹಾಕಾ ಒಪ್ಸುನ್ ದೀಂವ್ಕ್ ಚಿಂತಾಯ್, ತೆಂ, ಮ್ಹಜಿ ಜಿಣಿ ಸರಾ ಪರ್ಯಾಂತ್ ಇನ್ಕಾರ್ ಜಾಯ್ಶೆಂ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ತರ್, ಪಯ್ಲೆಂ ಹಾಂಗಾ ಪಳೆಯಾ” ಮ್ಹಣೊನ್ ಹಸ್ಸನ್ ಮಹಮ್ಮದಾನ್, ಭುರ್ಗ್ಯಾಕ್ ಪೊಟ್ಲುನ್ ಧರ್ನ್, ತಿಚೆಂ ಖೊಮಿಸ್ ಉಕ್ಲುನ್, ‘ಚುರಿದಾರ್’ ಶೈಲೆಚ್ಯಾ ಇಜಾರಾಚ್ಯಾ ಮಿರಿಯಾಂಚ್ಯಾ ನಾಡ್ಯಾಚಿ ಗಾಂಟ್ ಸೊಡವ್ನ್ ಸಕಯ್ಲ್ ನಿಸ್ರಾಯ್ಲಿ.

ಪಯ್ಲೆಂ ಚಿಕ್ಕೆ ವಿಜ್ಮಿತ್ ಜಾಲ್ಲ್ಯಾ ಸರ್ದಾರ್ ಸಿಮಾಂವ್ಕ್ ಉಪ್ರಾಂತ್ ಸಮ್ಜಲೆಂ. ತ್ಯಾ ತೆಕಿತ್ ಹಸ್ಸನ್ ಮಹಮ್ಮದಾನ್ ವಿವರ್ ದಿಲೊ. ಭುರ್ಗ್ಯಾಚ್ಯಾ ಪೆಂಕ್ಡಾಂತ್ ಬಾರೀಕ್ ಸರಿಯಾಂನಿ ವೊಳ್‍ಲ್ಲಿ ರುಪ್ಯಾಚಿ ಡಾಬ್ (ಮೂಂಜ್) ಆಸ್‍ಲ್ಲಿ – ತವಳ್‍ಯೀ ಚೆರ್ಕ್ಯಾ ಭುರ್ಗ್ಯಾಂಚ್ಯಾ ಪೆಂಕ್ಡಾಂತ್ ‘ದಾಡೊ’ ಆನಿ ಚೆಡ್ವಾಂ ಭುರ್ಗ್ಯಾಂಚ್ಯಾ ಪೆಂಕ್ಡಾಂತ್ ‘ಥಾಲಿ’ (ಲಿಂಗಾಕೃತಿ) ಉಮ್ಕಳಾಂವ್ಚಿ ರಿವಾಜ್ ಆಸ್‍ಲ್ಲಿ – ಪುಣ್ ಹ್ಯಾ ಭುರ್ಗ್ಯಾಚ್ಯಾ ಪೆಂಕ್ಡಾಂತ್ ಏಕ್ ಲ್ಹಾನ್ ಭಾಂಗಾರಾಚೊ ಖುರಿಸ್ ಶಿರ್ಕಯಿಲ್ಲೊ ಆಸ್‍ಲ್ಲೊ.

“ಹೆಂ ಭುರ್ಗೆಂ ಅಲ್ಲಾನ್ ಮ್ಹಾಕಾ ದಿಲ್ಲ್ಯಾ ದಿಸಾ, ಹೊ ನಗ್ ತಾಚ್ಯಾ ಗಳ್ಯಾಂತ್, ಎಕಾ ತಾಂಬ್ಡ್ಯಾ ನಾಡ್ಯಾಕ್ ಉಮ್ಕಳೊನ್ ಆಸ್‍ಲ್ಲೊ. ತ್ಯಾ ದಿಸಾ ಥಾವ್ನ್ ಹೊ ಆಮಿ ತಿಚ್ಯಾ ಆಂಗಾ ಥಾವ್ನ್ ವೆಗ್ಳೊ ಕರುಂಕ್ ನಾ” ಸಾಂಗ್ಲೆಂ ಹಸ್ಸನ್ ಮಹಮ್ಮದಾನ್. “ಪುಣ್ ಗಳ್ಯಾಂತ್ ಆಸ್ಲ್ಯಾರ್ ತೊ ಹೆರಾಂಕ್ ದಿಸ್ಚೊ ಅಪಾಯ್ ಚಡ್ ಆಸಾ ದೆಕುನ್, ಅಸೊ ತಿಚ್ಯಾ ಆಂಗಾರ್ ತೊ ಆಮಿ ದವರ್ಲಾ.” ಅಶೆಂ ಮ್ಹಣೊನ್, ಭುರ್ಗ್ಯಾಕ್ ತಾಣೆಂ ಸಕಯ್ಲ್ ಧಾಡ್ಲೆಂ.

“ಆಸೊಂದಿ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತ್ಯಾಚ್ ಘುರ್ತಾ ವರ್ವಿಂ ಹ್ಯಾ ಬಾಳಾಕ್, ಆನಿ ತುಜ್ಯಾ ಕುಟ್ಮಾಕ್ ಬರೆಂಪಣ್ ಜಾತೆಲೆಂ.” ವಯ್ಲ್ಯಾಬಾರ್ ತಾಣೆಂ ಹಿಂ ಉತ್ರಾಂ ಉಚಾರ್ಲ್ಯಾರೀ, ಸರ್ದಾರ್ ಸಿಮಾಂವ್ಕ್ ತ್ಯಾ ಘಡಿಯೆ ಜಾಲ್ಲೊ ಆನಂದ್ ಭೋವ್ ವಿಶೇಸ್. ಖುರ್ಸಾಚಿ ಸಿನೊಲ್, ಘಡಿಯೆನ್ ಘಡಿ ಜಯ್ತೆವಂತ್ ಜಾಲ್ಲೊ ಪ್ರತ್ಯಕ್ಷ್ ಅನುಭವ್ ತಾಕಾ ಜಾಲೊ. ಮಂಗ್ಳುರಾಂತ್ಲ್ಯಾ ಕ್ರಿಸ್ತಾಂವಾಂಕ್ ಗುಪಿತ್ ಮಜತೆಚೊ ಹಾತ್ ತಾಣೆಂ ಭಾಸಾಯಿಲ್ಲ್ಯಾ, ಆನಿ ತ್ಯಾ ತೆಕಿತ್ ಮಾನಿನ್ ವೆರೊನಿಕಾ ಕುವೆಲಿಕ್ ಪ್ರತ್ಯೇಕ್ ಜಾವ್ನ್ ಭರ್ವಸೊ ದಿಲ್ಲ್ಯಾ ನಿಚೆವಾಚೊ ಪ್ರತಿಫಳ್ ಜಾವ್ನ್, ವರ್ತ್ಯಾ ದಾದೊಸ್ಕಾಯೆಚೆಂ ಆಜ್ಯಾಪ್ ಥಂಯ್ಸರ್ ಘಡ್ತಾಲೆಂ.

“ಆಬ್ಳೆ, ದುಮ್ಗಾ ಪಿಂತಾಕ್ ಆನಿ ತಾಚ್ಯಾ ಸಾಂಗಾತ್ಯಾಂಕ್ ಖುರ್ಸಾಚಿ ಸಿನೊಲ್ ತುವೆಂ ದಿಲ್ಲಿಯ್. ಹಾಂಗಾಸರ್ ತೊಚ್ ಖುರಿಸ್ ತುಕಾ ಹ್ಯಾ ಆಂಜ್ ಭುರ್ಗ್ಯಾಚ್ಯಾ ಆಂಗಾರ್ ದಿಷ್ಟಿಕ್ ಪಡೊನ್ ಆಶೀರ್ವಾದ್ ದಿತಾ. ಮಾತ್ರ್ ನ್ಹಯ್, ಕ್ರಿಸ್ತಾಂವ್ ನಹಿಂ ಆಸ್‍ಲ್ಲ್ಯಾಂಕ್‍ಯೀ ಆರಾವ್ನ್ ಲಾಗಿಂ ಹಾಡುಂಕ್ ವರ್ತೆಂ ಪ್ರೇರಣ್ ತೊ ದಿತಾ…” ಅಶೆಂ ಏಕ್ ಅಶರೀರ್ ಸಂದೇಶ್ ಆಯ್ಕಲ್ಲೆಪರಿಂ ಸರ್ದಾರ್ ಸಿಮಾಂವ್ಕ್ ಭೊಗ್ಲೆಂ. ದೆಕುನ್,

“ಹ್ಯಾ ಭುರ್ಗ್ಯಾಚಿ ಕಥಾ?” ವಿಚಾರ್ಲೆಂ ತಾಣೆಂ. ತಶೆಂ ತಾಣೆಂ ಅತ್ರೆಗ್ ದಾಕಯಿಲ್ಲ್ಯಾಂತ್ ಅಜ್ಯಾಪ್ ನಾ. ಕಿತ್ಯಾಕ್, ತ್ಯಾ ಭುರ್ಗ್ಯಾಕ್ ಆಪುಣ್ ಖುದ್ದ್ ವಳ್ಕತಾಂ ಮ್ಹಳ್ಳಿಂ ಚಿಂತ್ನಾಂ ತಾಚ್ಯಾ ಮತಿಂತ್ ಖೆಳೊಂಕ್ ಲಾಗ್ಲಿಂ. ಕೊಣೆಂಗೀ ಖಂಯ್ಗೀ ಉಲಯ್ತಾನಾ ಸಾಂಗ್‍ಲ್ಲೊ ಏಕ್ ‘ಜಲ್ಮಾ ಘುರ್ತ್’ ಹ್ಯಾ ಭುರ್ಗ್ಯಾಚ್ಯಾ ಆಂಗಾರ್ ಆಸ್‍ಲ್ಲೊ ತಾಕಾ ಸ್ಪಷ್ಟ್ ದಿಸ್ಲೊ ಆನಿ ಸಮ್ಜಲೊ. ಮತಿಂತ್‍ಚ್ ದೆವಾಕ್ ತಾಣೆಂ ಅರ್ಗಾಂ ದಿಲಿಂ. ಅಸಲೆಂಯೀ ಏಕ್ ‘ಅಜ್ಯಾಪ್’ ಘಡ್ತಾನಾ, ತಾಂತ್ಲೊ ಪ್ರಮುಖ್ ಪಾತ್ರ್ ತಾಕಾಚ್ ಲಾಭತ್ ಮ್ಹಣ್ ತಾಣೆಂ ಸಪ್ಣಾಂತ್‍ಯೀ ಚಿಂತುಂಕ್ ನಾತ್‍ಲ್ಲೆಂ.

ಕಾಳಿಜ್ ಕಡಂವ್ಚ್ಯಾ ಜಿನ್ಸಾರ್, ಹಸ್ಸನ್ ಮಹಮ್ಮದಾನ್ ಕಥಾ ಸಾಂಗ್ಲಿ. ತಸಲ್ಯಾ ಕಠೋರ್ ಘಡಿತಾಂ ಥಂಯ್ ಕಾಂಟಾಳೊ ಆನಿ ಕಷ್ಟಲ್ಲ್ಯಾಂ ಖಾತಿರ್ ಸಹಾನುಭೂತಿ ಉಚಾರ್ಚ್ಯಾ ಜಿನ್ಸಾರ್, ದರ್ಯಾಂತ್ಲಿಂ ಲಾರಾಂ ಹಳ್ತಾನ್ ಆಪ್ಟೊನ್, ಮಂಜಿ ಧಲ್ತಾಲಿ.

ಬಂದಡ್ ಆರಂಭ್ ಜಾಲ್ಲ್ಯಾ ತ್ಯಾ ಮಾರೆಕಾರ್ ವರ್ಸಾಂತ್, ಕರೆಜ್ಮಾಂತ್ಲ್ಯಾ – ಇಗರ್ಜಾಂನಿ ನೀಜ್ ಕರೆಜ್ಮಾಚಿ ಕಾರ್ಯಾವಳ್ ನಾತ್‍ಲ್ಲಿ ಜಾಲ್ಯಾರೀ – ಪಯ್ಲೆಂಚ್ಯಾ ಸುಕ್ರಾರಾ ದೀಸ್, ಕೊಡಿಯಾಳಾಂತ್ಲ್ಯಾ ನಂತೂರ್ ಫಾಲ್ಕ್ಯಾಂತ್, ಕದ್ಳೆ ಆನಿ ಮಧ್ಳೆ ಮಧ್ಲ್ಯಾ ತ್ಯಾ ದೊಂಗ್ರಿಯೆ ಬಗ್ಲೆನ್, ಲಾಗಿಂ ಲಾಗಿಂ ಏಕ್ ಹಜಾರ್ ಕ್ರಿಸ್ತಾಂವ್ ಸ್ತ್ರೀ-ಪುರುಷಾಂಚೊ ಆನಿ ಭುರ್ಗ್ಯಾಂಚೊ ಸಂಹಾರ್ ಜಾಲ್ಲೊ. ಆದ್ಲ್ಯಾ ತಿನ್ಶಿಂ ವರ್ಸಾಂ ಥಾವ್ನ್ ಕೆನರಾ ಕರಾವಳಿಚೆರ್ ಕಿರ್ಲೊನ್, ಪಾಲೆವ್ನ್ ಆನಿ ಫುಲೊನ್ ಆಸ್‍ಲ್ಲ್ಯಾ ಕ್ರಿಸ್ತಾಂವ್ ಭಾವಾಡ್ತಾ ಖಾತಿರ್, ಆನಿ ಕೆನರಾ ಕಥೊಲಿಕ್ ಸಮಾಜೆ ಖಾತಿರ್, ಜಮ್ಯಾನ್ ಕಾತ್ರೊನ್ ಗೆಲ್ಲೆ ಪ್ರಥಮ್ ಜೀವ್ ತೆ.

ಸಿಂಜಿಚ್ಯಾ ಬುಧ್ವಾರಾಚ್ಯಾ ಫಾಂತ್ಯಾರ್ ಥಾವ್ನ್ ಕೊಡಿಯಾಳಾಂತ್ಲ್ಯಾ ಆನಿ ಆಸ್‍ಪಾಸ್ಚ್ಯಾ ಕ್ರಿಸ್ತಾಂವಾಂಕ್, ಪಯ್ಲೆಂಚ್ ತಯಾರ್ ಕೆಲ್ಲ್ಯಾ ಲೊರಾಂ ಪ್ರಕಾರ್ ಆಡಾವ್ನ್ ಆನಿ ಕುಡಾವ್ನ್, ದೊಳ್ಯಾಂತ್ ರಗತ್ ನಾತ್‍ಲ್ಲ್ಯಾ ಹವಿಲ್ದಾರಾಂ ಖಾಲ್, ಆನಿ ಕ್ರಿಸ್ತಾಂವಾಂಚೊ ಮೊಸೊರ್ ಆನಿ ಹಗೆಂ ಆಸ್‍ಲ್ಲ್ಯಾ ಶಿಪಾಯಾಂಚ್ಯಾ ಪಹರ್‍ಯಾ ಖಾಲ್ ಜಮಯಿಲ್ಲೆ. ದುಸ್ರ್ಯಾ ಆನಿ ತಿಸ್ರ್ಯಾ ದಿಸಾ, ‘ಉಟೊನ್ ಝುಜೊಂಕ್’ ಮನ್ ಕೆಲ್ಲ್ಯಾ ಸಬಾರ್ ದಾದ್ಲ್ಯಾಂಕ್, ತಾಂಚ್ಯಾ ಸ್ತ್ರೀಯಾಂ ಆನಿ ಭುರ್ಗ್ಯಾಂ ಹುಜ್ರಿಂಚ್ ಜಿವ್ಶಿಂ ಮಾರ್‌ಲ್ಲೆಂ. ಪುಣ್ ತ್ಯಾ ಕಾಳ್ಯಾ ಸುಕ್ರಾರಾ ದೀಸ್, ಚಡ್ ಆನಿ ಚಡ್ ಕ್ರಿಸ್ತಾಂವ್ ದಾದ್ಲೆ ಉಪ್ರಾಟೊನ್ ಆಪ್ಲ್ಯಾ ಸ್ತ್ರೀಯಾಂಚೊ ಮಾನ್ ಆನಿ ಭುರ್ಗ್ಯಾಂಚೊ ಜೀವ್ ಉರಂವ್ಚ್ಯಾ ಖಾತಿರ್ ಝುಜ್‍ಲ್ಲ್ಯಾನ್ ಥೊಡ್ಯಾ ಶಿಪಾಯಾಂಚೊ ಜೀವ್ ಗೆಲೊ, ಆನಿ ಹೆರ್ ಥೊಡ್ಯಾಂಚೆ ತಕ್ಲೆ ಫುಟ್ಲೆ ವಾ ಧೊಂಕ್ಳೆ ಮೊಡ್ಲೆ.

ಕ್ರಿಸ್ತಾಂವ್ ದಾದ್ಲ್ಯಾಂಚೆ ಭೊಗ್ಣಾರ್, ಸ್ತ್ರೀಯಾಂಚೊ ಹಾಹಾಕಾರ್ ಆನಿ ಭುರ್ಗ್ಯಾ ಬಾಳಾಂಚೆಂ ರೋದನ್ ದೆಖೊನ್, ಆಯ್ಕೊನ್ ಆನಿ ಭೊಗುನ್, ತ್ಯಾ ಫಾಲ್ಕ್ಯಾಂತ್ಲೆ ರೂಕ್ ಬಾವ್ಲೆ ಆನಿ ಫಾತೊರ್‌ಯೀ ಕಡ್ಲೆ ಆಸ್ತಾಂ, ಹವಿಲ್ದಾರಾಂಚೊ ‘ನಾಕ್ ಕಾತ್ರೊ’ ಮುಖೆಲಿ ಎಕ್ಲೊ ದರಬಸ್ತ್ ಹಾಸ್ತಾಲೊ. (ಥೊಡ್ಯಾ ತೆಂಪಾ ಆದಿಂ, ಕಾಫ್ರಿಗುಡ್ಯಾ ವಯ್ಲ್ಯಾ ಸಾಂತೆಂತ್, ಎಕಾ ಕ್ರಿಸ್ತಾಂವ್ ಸ್ತ್ರೀಯೆಚ್ಯಾ ಆಂಗಾರ್ ಹಾತ್ ಘಾಲ್ಲ್ಯಾ ಖಾತಿರ್, ಫಳ್ನೀರಾಂತ್ಲ್ಯಾ ದಿಗು ಗೊಸಾಲ್ ಮ್ಹಳ್ಳ್ಯಾ ಎಕ್ಲ್ಯಾ ಮಾನಾಯಾನ್ ತಾಚೆಂ ನಾಕ್ ಕಾತರ್‌ಲ್ಲೆಂ ಖಂಯ್).

ಕೈದ್ಯಾಂನಿ ಫುಡೆಂ ಉಪ್ರಾಟ್ನಾಶೆಂ, ಹೆರಾಂಕ್ ಜಾಗ್ವಣ್ ದಿಂವ್ಚ್ಯಾ ಖಾತಿರ್, ನಾಕ್ ಕಾತ್ರ್ಯಾನ್ ನವೆಂಚ್ ಏಕ್ ಪ್ರದರ್ಶನ್ ಕರುಂಕ್ ಚಿಂತ್ಲೆಂ. ತೆದೊಳ್‍ಚ್ ಶೆಂಬೊರಾಂನಿ ಜೀವ್ ಗೆಲ್ಲೆ. ಚಡುಣೆಂ ಪಂದ್ರಾ ವೀಸ್ ಎಕ್ರೆ ವಿಶಾಲಾಯೆರ್ ಥಂಯ್ ಥಂಯ್ ಆಸ್‍ಲ್ಲ್ಯಾ ರಾಕ್ವಲ್ಯಾಂಚ್ಯಾ ಮರ್ಜೆ ಪರ್ಮಾಣೆಂ, ಬೊಬಾಟ್, ಕಿಂಕ್ರಾಟ್ ಆನಿ ಬೃಹತ್ ಸುಸ್ಕಾರಾಂ ಮಧೆಂ, ವಿವಿಧ್ ವೀದ್‍ವಾವ್ಳಿ ಜಾತಾನಾ, ಜೀವ್ ಕಾತ್ರೊನ್ ವೆತಾಲೆ. ಕಾಳ್ಜಾಂ ಫುಟ್ತಾಲಿಂ. ಎಕಾ ಪ್ರತ್ಯೇಕ್ ಪಿಂಪ್ಳಾಚ್ಯಾ ರುಕಾ ಮುಳಾಂತ್, ತ್ಯಾ ಕ್ರೂರ್ ಹವಿಲ್ದಾರಾಚ್ಯಾ ದಿಗ್ದರ್ಶನಾ ಖಾಲ್ ಏಕ್ ಭಿರಾಂಕುಳ್ ನಾಟಕ್ ಆರಂಭ್ ಜಾಲೆಂ:

ದೊಗಾಂ ದಾದ್ಲ್ಯಾಂಕ್ ಥಂಯ್ಸರ್ ಉಬೆ ರಾವಯಿಲ್ಲೆ. ತಾಂಚ್ಯಾ ಪಾಟ್ಲ್ಯಾನ್ ಭಾಲೆ ತಯಾರ್ ಧರ್ನ್ ದೋಗ್ ಶಿಪಾಯ್ ರಾವ್‍ಲ್ಲೆ. ಮುಖ್ಲ್ಯಾನ್, ತಾಂಚ್ಯೊ ದೊಗಿ ಸ್ತ್ರೀಯೊ ಧರ್ಣಿರ್ ಬಸೊನ್, ರಡೊಂಕ್‍ಯೀ ತ್ರಾಣ್ ನಾಸ್ತಾನಾ, ಪಿಂರ್ಗೊನ್ ತಶೆಂ ತಾಳೊ ಪಡೊನ್, “ಜೆಜು… ಜೆಜು…” ಮ್ಹಣ್ತಾಲ್ಯೊ. ಎಕ್ಲ್ಯಾಚ್ಯಾ ಉಸ್ಕ್ಯಾರ್ ಆನಿ ವೆಂಗೆಂತ್ ಚಡುಣೆಂ ಎಕಾ ವರ್ಸಾಚೆಂ ಭುರ್ಗೆಂ, ರಡೊನ್, ಥಕೊನ್ ಆನಿ ಕಂಗಾಲ್ ಜಾವ್ನ್, ಥಂಡ್ ಜಾಲ್ಲೆಂ. ಬೊಕ್ರ್ಯಾಂಪರಿಂ ಕುಡಾಯಿಲ್ಲ್ಯಾ ತ್ಯಾ ಜಮ್ಯಾಂತ್ ಥಂಯ್ ಥಂಯ್ ಶಿಪಾಯ್ ಆಸ್‍ಲ್ಲೆ.

ನಾಕ್ ಕಾತ್ರೊ ಹವಿಲ್ದಾರ್, ಸಂಸಾರ್ ಜಿಕೊನ್ ಆಯಿಲ್ಲ್ಯಾ ಘೊಡ್ಯಾಪರಿಂ ದೋನ್ ತೀನ್ ಪಾವ್ಟಿಂ ತ್ಯಾ ಚವ್ಗಾಂ ಮಧ್ಲ್ಯಾನ್ ಪಾಸಾಯೊ ಮಾರ್ನ್, ದಾದ್ಲ್ಯಾಂಕ್ ಫುಡ್ ಕರ್ನ್ ರಾವ್ಲೊ ಆನಿ ಅಶೆಂ ಮ್ಹಣಾಲೊ:

“ತುಮ್ಕಾಂ ಮರ್ಯಾದಿನ್, ಪುರ್ಶಾಂವಾನ್ ಆಮಿ ಸಿರಿರಂಗಪಟ್ಟಣಾಕ್ ವ್ಹರ್ತಾಂವ್ ಮ್ಹಳ್ಯಾರ್ ತುಮಿ ಆಯ್ಕನಾಂತ್. ತುಮ್ಕಾಂ ಸಮೇಸ್ತಾಂಕ್ ಥಂಯ್ಸರ್ ವ್ಹರ್ನ್ ಮತಾಂತರ್ ಕರುಂಕ್ ಆಸಾ. ಕ್ರಮೇಣ್ ಆಪ್ಲ್ಯಾ ರಾಜಾಂತ್ ಮುಸ್ಲಿಮ್ ಶಿವಾಯ್ ಹೆರ್ ಜಾತ್ ಆಸೊಂಕ್ ನಜೊ ಮ್ಹಣ್ ಬಾದಶಹಾನ್ ಮ್ಹಜೆ ಕಡೆನ್ ಖುದ್ದ್ ಸಾಂಗ್ಲಾಂ. (ಫಟ್!). ತುಮಿ ಗರ್ಜೆ ಶಿವಾಯ್ ಉಚಾಂಬಳ್ ಜಾತಾತ್. ತುಮ್ಚ್ಯಾ ಬಾಯ್ಲಾಂಕ್, ತುಮಿ ಸೊಡ್ಲ್ಯಾರ್ ಹೆರ್, ಆಮಿ ವ್ಹಡ್ ಹುದ್ದೆದಾರ್ ಸಯ್ತ್, ಸಗ್ಳೆ ಕೊಡ್ಕಾರ್! ತುಮ್ಚಿ ಚವ್ಗಾಂಚಿಯೀ ಗೊಮ್ಟಿ ಉಸ್ಳಾಂವ್ಕ್ ಮ್ಹಾಕಾ ಚಡ್ ವೇಳ್ ಲಾಗಾಸೊನಾ. ಪುಣ್ ತುಮಿ ಘಟ್‍ಮುಟ್ ಮಾನಾಯ್, ಕಾಮಾಕ್ ಉಪ್ಕಾರ್ಶ್ಯಾತ್, ಆನಿ ತುಮ್ಚ್ಯೊ ಸ್ತ್ರೀಯೊ…” ಮ್ಹಣೊನ್ ಸ್ತ್ರೀಯಾಂಚೆರ್ ತಾಣೆಂ ದೀಷ್ಟ್ ಭೊಂವ್ಡಾಯ್ಲಿ.

ತಸಲೆಂ ಲಜೆ ಭಿಕಾರಿ ಚೆಡ್ಯಾಳ್ಪಣ್ ತ್ಯಾ ಕ್ರಿಸ್ತಾಂವಾಂಕ್ ಸೊಸುಂಕ್ ಜಾಲೆಂ ನಾ.

“ತುಜೆ ತಸಲ್ಯಾಂಚೆ ದೊಳೆ ಫು… ಏ ದೆವಾ, ತುಂಚ್ ಪಳೆ!” ಮ್ಹಣಾಲೊ ಎಕ್ಲೊ ವಯ್ರ್ ಪಳೆವ್ನ್.

“ದೆವಾನ್‍ಯೀ ಆಮ್ಕಾಂ ಹ್ಯಾ ವೆಳಾರ್ ಸಾಂಡ್ಲ್ಯಾತ್‍ಶೆಂ ದಿಸ್ತಾ” ಮ್ಹಣಾಲೊ ಆನ್ಯೇಕ್ಲೊ. ತಸಲ್ಯಾ ಪರಿಸ್ಥಿತೆಂತ್‍ಯೀ ಜಾಣ್ವಾಯ್ ಉಲವ್ನ್. “ಅಸಲ್ಯಾ ಪೊಜ್ಡ್ಯಾ ಮನ್ಶ್ಯಾಂಕ್, ಭಿಯೆವ್ನ್ ನಹಿಂ ಜಾಲ್ಯಾರೀ, ಕಾಂಟಾಳೊನ್ ಪುಣೀ ದೇವ್ ಪಯ್ಸ್ ರಾವ್ಲಾ ಮ್ಹಣ್ಚೆಂ ವಾಜ್ಭಿ.”

“… ಆನಿ ತುಮ್ಚ್ಯೊ ಸ್ತ್ರೀಯೊಯೀ ಆಮ್ಕಾಂ ಉಪ್ಕಾರ್ತಿತ್ ದೆಕುನ್ ತುಮ್ಚೊ ಜೀವ್ ಹಾಂವ್ ಕಾಡಿನಾ. ಪುಣ್, ಆಮ್ಚ್ಯಾ ಶಿಪಾಯಾಂಕ್ ತುಮಿ ಧಮ್ಕಿಲ್ಲ್ಯಾ ಖಾತಿರ್, ಆನಿ ಹೆರಾಂಕ್‍ಯೀ ಖಬಡ್ದಾರ್ ಕರ್ಚ್ಯಾ ಖಾತಿರ್, ಹಾಂಗಾಚ್, ಆತಾಂಚ್ ತುಮ್ಕಾಂ ಸುಂತಾ ಕರುಂಕ್ ಚಿಂತ್ಲಾಂ ಹಾಂವೆಂ.”

ಶಿಪಾಯ್ ಥೊಡೆ ಹಾಸ್ಲೆ. ಭೊಂವಾರಿಂ ಆಸ್‍ಲ್ಲ್ಯಾ ಕ್ರಿಸ್ತಾಂವಾಂನಿ ಲಜೆಚಿ ಆನಿ ಭಿಯಾಚಿ ಹಾಕ್ ದಿಲಿ.

“ಆಮ್ಚ್ಯಾ ಕುಡಿಂಚೆರ್ ತುಮ್ಕಾಂ ಜಾಯ್ ತಸಲೊ ಅತ್ಯಾಚಾರ್ ತುಮಿ ಚಲವ್ಯೆತ್… ಆಮ್ಚೊ ಜೀವ್ ತುಮಿ ಕಾಡ್ಯೆತ್. ಪುಣ್ ಆಮ್ಚೊ ಭಾವಾಡ್ತ್ ಬದ್ಲುಂಕ್ ತುಮ್ಕಾಂ ತಾಂಕ್ಚೆಂ ನಾ” ಮ್ಹಣಾಲೊ, ಪಯ್ಲೆಂಚೊ ಕ್ರಿಸ್ತಾಂವ್ ದಾದ್ಲೊ.

“ಆನಿ ತ್ಯಾಚ್ ಪ್ರಮಾಣೆಂ…” ಮ್ಹಣಾಲೊ ದುಸ್ರೊ. “ಆಮ್ಚ್ಯಾ ಸ್ತ್ರೀಯಾಂಚಿ ನಿತಳಾಯ್ ಅಪಹರ್ಸುಂಕ್ ತುಮ್ಕಾಂ ಸಾಧ್ಯ್ ಜಾಂವ್ಚೆಂ ನಾ. ತಶೆಂ ಜಾಂವ್ಕ್ ಆಮ್ಚೊ ದೇವ್ ಸೊಡಿಸೊನಾ.”

“ವಿಚಿತ್ರ್ ಮೊನ್ಜಾತಿ ಹ್ಯೊ!” ಮ್ಹಣಾಲೊ ನಾಕ್ ಕಾತ್ರೊ, ತಾಚ್ಯಾ ಶಿಪಾಯಾಂ ಕಡೆನ್. “ಹಾಣಿಂ ಉಲಂವ್ಚೆಂ ಬಂದ್ ಕರುಂಕ್, ಹಾಂಚಿ ಜೀಬ್ ಕಾತರ್ಚ್ಯಾ ಬಗಾರ್ ದುಸ್ರೊ ಕಸಲೊಚ್ ಉಪಾಯ್ ನಾ.” ಉಪ್ರಾಂತ್ ಹಾಸೊನ್, “ಉಲಯ್ತಾತ್, ವ್ಹಡ್ಲಿ ಬಹಾದುರಿ! ಮ್ಹಜ್ಯಾ ತಲ್ವಾರಿಚೆಂ ಕಾಮ್ ಆಖೇರ್ ಜಾತಾನಾ, ತುಮ್ಚೆಂ ನಸ್ರಾನಿಪಣ್‍ಯೀ ತುಮ್ಚೆ ಥಾವ್ನ್ ವೆಗ್ಳೆಂ ಜಾಲೆಂ ಮ್ಹಣ್ ಸಮ್ಜತೆಲ್ಯಾತ್ ತುಮಿ!”

ಅಶೆಂ ಮ್ಹಣೊನ್, ಕೊಶೆಡ್ದ್ ಆನಿ ಕಾಳಿಜ್ ನಾತ್‍ಲ್ಲ್ಯಾ ತ್ಯಾ ಹವಿಲ್ದಾರಾನ್, ತ್ಯಾ ಕ್ರಿಸ್ತಾಂವ್ ಮಾನಾಯಾಂಚೆ ಹಾತ್ ಪಾಯ್ ಬಾಂಧುಂಕ್ ತಾಕಿದ್ ದಿಲಿ. ತಿ ತಾಕಿದ್, ತಾಣೆಂ ಫರ್ಮಾಯಿಲ್ಲೆಪರಿಂ ಜಾಂವ್ಕ್ ನಾ…

ಫುಡ್ಲ್ಯಾ ಥೊಡ್ಯಾಚ್ ಘಡಿಯಾಂ ಭಿತರ್ ಥಂಯ್ಸರ್ ಕಿತೆಂ ಘಡ್ಲೆಂ ಮ್ಹಳ್ಳೆಂ ವಿವರ್ಸುಂಕ್ ಹಸ್ಸನ್ ಮಹಮ್ಮದಾಕ್ ಭೋವ್ ಕಷ್ಟ್ ಮಾರ್ಲೆ. ತಾಚಿ ಜೀಬ್ ಸಾರ್ಕಿ ಘೊಳನಾ ಜಾಲಿ. ದೊಳ್ಯಾಂತ್ಲ್ಯಾನ್ ತಾಚ್ಯಾ ದುಖಾಂ ವ್ಹಾಳ್ತಾಲಿಂ. ತಿ ಖಬರ್ ಆಯ್ಕತಚ್ ಆಸ್‍ಲ್ಲೊ ಸರ್ದಾರ್ ಸಿಮಾಂವ್ ಸಯ್ತ್, ಕ್ರೋಧಾನ್, ಲಜೆನ್ ಆನಿ ಬಿರ್ಮತೆನ್ ಥರ್ಥರ್ಲೊ. ಹಸ್ಸನ್ ಮಹಮ್ಮದಾಚ್ಯಾ ಕುಡ್ಕೆ ಉತ್ರಾಂನಿ ಆಟಾಪುನ್ ಆಸ್‍ಲ್ಲೆ ಆಟೆವಿಟೆ ಆನಿ ಅಕ್ಲಾಸ್ ಗುಂತುನ್, ಸರ್ದಾರಾನ್, ಆಪ್ಲ್ಯಾ ಮತಿಂತ್, ಎಕಾ ವರ್ಸಾ ಆದಿಂ ನಂದೂರ್ ಫಾಲ್ಕ್ಯಾಂತ್ ಜಾಲ್ಲೆಂ ತೆಂ ಭಿರಾಂಕುಳ್ ದೃಶ್ಯ್ ಪಿಂತ್ರಾವ್ನ್ ಘೆತ್ಲೆಂ.

ಹಾತ್ ಪಾಯ್ ಬಾಂಧುಂಕ್ ಹವಿಲ್ದಾರಾನ್ ಹುಕುಮ್ ದಿಲ್ಲಿಚ್ ದಿಲ್ಲಿ, ವಯ್ಲೆ ದೊಗೀ ಕ್ರಿಸ್ತಾಂವ್ ಮಾನಾಯ್, ಗೊಪಿಣೆಂತ್ಲ್ಯಾ ಫಾತ್ರಾಪರಿಂ ಉಡ್ಲೆ. ತಸಲ್ಯಾ ಉಚಾಂಬಳಾಯೆ ವರ್ವಿಂ ಪ್ರಯೋಜನ್ ನಾ ಮ್ಹಣ್ ತಾಂಕಾಂ ಕಳಿತ್ ಆಸ್‍ಲ್ಲೆಂ ಜಾಲ್ಯಾರೀ, ನಾಕ್ ಕಾತ್ರ್ಯಾನ್ ಚಿಂತ್‍ಲ್ಲೆಪರಿಂ ಜಾಂವ್ಕ್ ಸೊಡ್ಲ್ಯಾರ್ ಫಾವೊ ಜಾಂವ್ಚ್ಯಾ ನಾಲಿಸಾಯೆ ಪ್ರಾಸ್ ಝುಜೊನ್ ಜೀವ್ ಸಾಂಡ್ಚೊ ಬರೊ ಮ್ಹಣ್ ತೆ ವೀರ್ ಸಮ್ಜಲೆ. ಥೊಡ್ಯಾಚ್ ವೆಳಾ ಭಿತರ್ ಏಕ್ ದೋಗ್ ಶಿಪಾಯ್ ಘಾಯೆಲೆ ಜಾಲ್ಯಾರೀ, ಹೆರಾಂ ರಾಕ್ವಲ್ಯಾಂನಿ ತ್ಯಾ ದೊಗಾಂ ಕ್ರಿಸ್ತಾಂವಾಂಕ್ ಧರ್ನ್ ದವರ್ಲೆ. “ಸೂಅರ್ ಕಾ… ತುಮಿ ವಾಂಚ್ಲ್ಯಾರ್ ವಾಯ್ಟ್ ಚಡ್ ಆಸಾ!” ಮ್ಹಣೊನ್ ಕಿಂಕ್ರಾಟ್ ದೀವ್ನ್, ಹವಿಲ್ದಾರ್ ಆಪ್ಲಿ ತಲ್ವಾರ್ ಝಳ್ಕಾವ್ನ್ ಲಾಗಿಂ ಧರ್ನ್ ರಾವಯಿಲ್ಲ್ಯಾ ಕ್ರಿಸ್ತಾಂವ್ ಮಾನಾಯಾಕ್ ತೊಪುನ್ ಮಾರುಂಕ್ ಮುಖಾರ್ ಉಡ್ಲೊ. ಪುಣ್ ತಾಚಿ ತಲ್ವಾರ್ ತ್ಯಾ ಮಾನಾಯಾಚ್ಯಾ ಹರ್ದ್ಯಾಂತ್ ರೊಂಬೊಂಕ್ ನಾ. ಆಪ್ಲೊ ದಾದ್ಲೊ ಮೊರ್ತಾ ತೆಂ ಆಡಾಂವ್ಕ್ ತಾಚಿ ಸ್ತ್ರೀ ಮುಖಾರ್ ಉಡೊನ್ ತಾಚ್ಯಾ ಆಂಗಾರ್ ಪಡ್ಲಿ. ಹವಿಲ್ದಾರಾನ್, ಭರಾನ್ ತೊಪ್‍ಲ್ಲಿ ತಲ್ವಾರ್ ತಿಚ್ಯಾ ಆಂಗಾಂತ್ ರಿಗ್ಲಿ. ತಿಚ್ಯಾ ದಾದ್ಲ್ಯಾಚ್ಯಾ ವೆಂಗೆಂತ್ ಗಳೊನ್ ತಿ ಪರ್ತಾತಾನಾ, ಪಿಸಾಂತುರ್ ಜಾಲ್ಲ್ಯಾ ತ್ಯಾ ಹವಿಲ್ದಾರಾನ್, ಪಾಟಿಂ ವೊಡ್‍ಲ್ಲಿ ತಲ್ವಾರ್ ಉಬ್ರಾವ್ನ್ ಪರ್ತ್ಯಾನ್ ಮಾರ್ಲಿ. ತಶೆಂ, ತ್ಯಾ ದೊಗಾಂಯ್ ಪುನೆವಂತಾಂನಿ, ಎಕಾಮೆಕಾಚ್ಯಾ ವೆಂಗೆಂತ್ ಸಾಂಗಾತಾ ಜೀವ್ ಸಾಂಡ್ಲೊ…

ಫುಡೆಂ ಉಲಂವ್ಕ್ ಹಸ್ಸನ್ ಮಹಮ್ಮದಾಕ್ ಫುಗಾಸಾಂವ್ ಜಾಲೆಂ. ಸರ್ದಾರ್ ಸಿಮಾಂವ್ನ್, ಚಿಕ್ಕೆ ಕಷ್ಟಾಂನಿಂಚ್: “ತ್ಯಾ ಆನ್ಯೇಕ್ಲ್ಯಾ ದಾದ್ಲ್ಯಾಚಿ, ತಾಚ್ಯಾ ಸ್ತ್ರೀಯೆಚಿ ಆನಿ ಭುರ್ಗ್ಯಾಚಿ ಖಬರ್ ಕಿತೆಂ ಜಾಲಿ?” ವಿಚಾರ್ಲೆಂ.

“ವಿವರ್ ದೀಂವ್ಕ್, ಲಜೆನ್ ಆನಿ ಖಂತಿನ್, ಮ್ಹಾಕಾ ಜೀಬ್ ಸುಟನಾ. ಪುಣ್ ಗರ್ಜೆಚೆ ವಿಷಯ್ ಮಟ್ವ್ಯಾನ್ ಸಾಂಗ್ತಾಂ” ಮ್ಹಣೊನ್, ಹಸ್ಸನ್ ಮಹಮ್ಮದಾನ್ ಖಬರ್ ಸಾಂಗ್ಲಿ:

“ಪಯ್ಲೆಂಚೊ ಮಾನಾಯ್, ಆನಿ ತಾಚಿ ಸ್ತ್ರೀ ಮೊರ್ಣಾಂತ್‍ಯೀ ಸಾಂಗಾತಾ ಉರೊನ್ ಸರ್ತಾನಾ, ದುಸ್ರ್ಯಾಚಿ ಸ್ತ್ರೀ, ಆಪ್ಲ್ಯಾ ಭುರ್ಗ್ಯಾಕ್ ಹರ್ದ್ಯಾಕ್ ದಾಂಬುನ್ ಧರ್ನ್ ಆಪ್ಲ್ಯಾ ದಾದ್ಲ್ಯಾ ಸರ್ಶಿನ್ ರಾವ್‍ಲ್ಲಿ. ಆಯ್ಕತೆಲ್ಯಾಂಚೆ ಕಾನ್ ಫುಟ್ಚ್ಯಾ ಜಿನ್ಸಾರ್ ಭುರ್ಗೆಂ ಬೊಬಾಟ್ ದಿತಾಲೆಂ.

“ಮ್ಹಜಿ ಹುಕುಮ್ ಮಾಂದಿನಾತ್‍ಲ್ಲ್ಯಾಂಕ್ ಕಿತೆಂ ಜಾತಾ ಮ್ಹಣ್ ತುಮಿ ಖುದ್ ಪಳೆಲೆಂ” ಮ್ಹಣಾಲೊ ನಾಕ್ ಕಾತ್ರೊ. “ಆತಾಂ, ತುಮ್ಚಿ ಖಬರ್ ಘೆತಾಂ ಹಾಂವ್, ಕಿತೆಂ ಮ್ಹಣ್ತಾಯ್ ಬೇವಕೂಫ್?”

“ಹಾಂವೆಂ ಮ್ಹಣ್ಚೆಂ ಕಾಂಯ್ ನಾ” ಮ್ಹಣಾಲೊ ತೊ ಮಾನಾಯ್, ಗಂಭೀರಾಯೆನ್, “ಕಂಯ್, ಆಮ್ಚ್ಯಾ ಮಾಲ್ಗಡ್ಯಾಂ ಥಾವ್ನ್ ಆಮಿ ಮಾತಿ ಮುಡ್ಡುನ್ ಆಸ್‍ಲ್ಲ್ಯಾ ಆಮ್ಚ್ಯಾ ಭುಂಯ್ ಭಾಟಾಂ ಥಾವ್ನ್ ಉಟವ್ನ್ ಆಮ್ಕಾಂ ಹಾಡ್ಲಾಂ, ತ್ಯಾ ದೀಸ್‍ಚ್ ಆಮ್ಚೆಂ ಜಿಣೆಂ ಆಖೇರ್ ಜಾಲಾಂ. ಆಮ್ಚಿ ಕೂಡ್ ಮಾತ್ರ್ ತುಮ್ಚ್ಯಾ ಹಾತಾಂತ್ ಆಸಾ, ಅತ್ಮೊ ನಾ.”

“ತಿ ಕೂಡ್ ವಾಂಚಂವ್ಕ್ ಪುಣೀ…” ಮ್ಹಣಾಲೊ ಹವಿಲ್ದಾರ್.

ಕ್ರಿಸ್ತಾಂವ್ ಮಾನಾಯಾನ್, ಭಿಯೆನಾಸ್ತಾಂ ಜಾಪ್ ದಿಲಿ:

“ತಿ ಕೂಡ್ ವಾಂಚಂವ್ಕ್ ಆಮ್ಚೊ ಭಾವಾಡ್ತ್ ಆಮಿ ಸಾಂಡಿನಾಂವ್. ಆಮ್ಚಿ ಜಾತ್ ಆಮಿ ಬದ್ಲಿನಾಂವ್. ಆಮ್ಚ್ಯಾ ಬಾಯ್ಲ್ ಭುರ್ಗ್ಯಾಂಕ್ ಆಮಿ ವಿಕಿನಾಂವ್.”

“ಬಾಯ್ಲ್ ಭುರ್ಗ್ಯಾಂಕ್ ವಿಕಿನಾಂತ್ ಖಂಯ್, ವ್ಹಾ!” ಮ್ಹಣಾಲೊ ಹವಿಲ್ದಾರ್, ವಾಯ್ಟ್ ಚಿಂತುನ್. “ತುಜ್ಯಾ ಸ್ತ್ರೀಯೆಕ್, ತುಜ್ಯಾ ದೊಳ್ಯಾಂ ಮುಖಾರ್‌ಚ್…”

ತ್ಯಾ ಕ್ರಿಸ್ತಾಂವ್ ವೀರಾಚೆಂ ಧಯ್ರ್ ವರ್ತೆಂ, ಪುಣ್ ಸಂಯಮ್ ತಾಚೆಂ ಚುಕ್ಲೆಂ. ಹವಿಲ್ದಾರಾಚೆಂ ಫುಡ್ಲೆಂ ಉತಾರ್ ಯೆಂವ್ಚ್ಯಾ ಆದಿಂಚ್, ತಶೆಂ ಘಡತ್ ಮ್ಹಣ್ ಕೊಣೆಂಚ್ ಚಿಂತ್‍ಲ್ಲೆಂ ನಾಸ್ತಾಂ, ತೊ ಮಾನಾಯ್, ಆಪ್ಲೆಂ ನಿಮಾಣೆಂ ಸರ್ವ್ ತ್ರಾಣ್ ಜಮವ್ನ್, ತ್ಯಾ ನಾಕ್ ಕಾತ್ರ್ಯಾಚ್ಯಾ ಆಂಗಾರ್ ಉಡ್ಲೊ. ಅನಿರೀಕ್ಷಿತ್ ತಸಲ್ಯಾ ಘರ್ಷಣಾನ್ ಹವಿಲ್ದಾರ್ ಉದಾರೊ ಪರ್ತಲೊ. ತಾಚ್ಯಾ ಹಾತಾಂತ್ಲಿ ತಲ್ವಾರ್ ಆನಿ ಮಾತ್ಯಾಚೊ ಮುಂಡಾಸ್ ಉಸ್ಳೊನ್ ಗೆಲ್ಲೆಪರಿಂಚ್, ತಾಚ್ಯಾ ಹರ್ದ್ಯಾರ್ ದಿಂಬ್ಯೆರ್ ಪಡ್‍ಲ್ಲ್ಯಾ ತ್ಯಾ ಕ್ರಿಸ್ತಾಂವಾನ್, ಹವಿಲ್ದಾರಾಚೊ ತಕ್ಲೊ ದೊನೀ ಹಾತಾಂನಿ ಉಕ್ಲುನ್, ಏಕ್-ದೋನ್-ತೀನ್ ಪಾವ್ಟಿಂ ಧರ್ಣಿಕ್ ಭೆತುನ್ ಜಾಲೊ. ಕೇಸ್ ನಾತ್‍ಲ್ಲ್ಯಾ ತ್ಯಾ ಬಾವ್ಡ್ಯಾಚೆಂ ಕಟ್ಟೆಂ ಫುಟೊನ್ ರಗತ್ ಚಿರ್ಪಟ್ಲೆಂ ಆನಿ ಮೆಂದು ಶಿಂಪಡ್ಲೊ. ಪಾಟಾಪಾಟ್, ತಿತ್ಲ್ಯಾಚ್ ವೆಗಾನ್ ಶಿಪಾಯ್, ತೆಣೆಂ ಎಕ್ಲೊ ಉಡ್ಲೊ, ಹೆಣೆಂ ಎಕ್ಲೊ ಉಡ್ಲೊ, ಆನಿ ಆಪಾಪ್ಲ್ಯಾ ರಾಗಾನ್, ತ್ಯಾ ಕ್ರಿಸ್ತಾಂವ್ ಮಾನಾಯಾಕ್ ಅಜ್ಞಾತಾಂತ್ಲ್ಯಾ ತ್ಯಾ ಎಕ್ಲ್ಯಾ ಮಾಡ್ತಿರಾಕ್, ತಾಣಿಂ ಬೆಂಡ್ಲೊ…

ಹ್ಯಾ ಘಡ್ಬಡೆಂತ್, ತಿ ಕ್ರಿಸ್ತಾಂವ್ ಸ್ತ್ರೀ, ಭುರ್ಗ್ಯಾ ಸಮೇತ್ ತೆವ್ಶಿನ್ ಆಪ್ಟಲ್ಲಿ. ಭುರ್ಗೆಂ ಪಂದಾಕ್ ಪಡ್‍ಲ್ಲೆಂ. ಆಪ್ಟಲ್ಲ್ಯಾ ಭರಾಕ್ ಆನಿ ಆವಯ್ಚ್ಯಾ ಆಂಗಾಚ್ಯಾ ಜಡಾಯೆನ್ ಭುರ್ಗ್ಯಾಚಿ ತಕ್ಲಿ ಧರ್ಣಿರ್ ಬರಿಚ್ ಧಾಡಾಲಿ ಆನಿ ತಾಚಿ ಮತ್ ಚುಕ್ಲಿ. “ಜೆಜು!” ಮ್ಹಳ್ಳ್ಯಾ ರುದಾನಾನ್ ತಿ ಸ್ತ್ರೀ ಉಟ್ತಾನಾ, ತಿಚ್ಯಾ ಪತಿಚೊ ಜೀವ್ ಕಾತ್ರೊನ್ ಗೆಲೊ. “ಸರ್ವೆಸ್ಪರಾ…” ಮ್ಹಳ್ಳ್ಯಾ ಉಲ್ಯಾ ಸಮೇತ್, ಹತ್ ಜಾಲ್ಲ್ಯಾ ತಿಚ್ಯಾ ದಾದ್ಲ್ಯಾಚ್ಯಾ ನಿರ್ಜೀವ್, ಪುಣ್ ಕಾಂಪ್ತಚ್ ಆಸ್‍ಲ್ಲ್ಯಾ ಪಾಯಾಂಕ್ ತಿ ಪಡ್ಲಿ. ಥೊಡೊ ವೇಳ್ ಸಕ್ಕಡ್‍ಯೀ ಥಟಕ್. ಉಪ್ರಾಂತ್ ಎಕ್ಲ್ಯಾ ಶಿಪಾಯಾನ್, ತಿಚ್ಯಾ ಕೆಸಾಂಕ್ ಧರ್ನ್ ತಿಕಾ ಹೆವ್ಶಿನ್ ವೊಡ್ಲಿ. ತ್ಯಾ ಕುಡಿಕ್ ಸ್ವಯಂಪ್ರೇರಿತ್ ಚಲಾವಣೆಚಿ ಸಕತ್ ನಾಸ್ತಾಂ, ಹಾಸ್‍ಲ್ಲ್ಯಾ ಜಿನ್ಸಾರ್ ದಾಂತ್ ಸೊಡುನ್, ಉದಾರಿ ತಿ ಪಡ್ಲಿ. ನಾಕಾ ತೊಂಡಾಂತ್ಲ್ಯಾನ್ ರಗತ್ ಪಾಜಾರ್ತಾಲೆಂ. ಭರ್ಶಿಕ್ ಫೆಂಡ್ ಭಾಯ್ರ್ ಸರ್ತಾಲೊ. ಚಿಕ್ಕೆ ಅಸ್ಕತ್ ಕೂಡ್ ತಿ. ದೋನ್ ತೀನ್ ದಿಸಾಂಚೆ ಕಷ್ಟ್, ಆನಿ ನಿಮಾಣೆಂ, ತಿಚ್ಯಾ ದಾದ್ಲ್ಯಾಚೆರ್ ಆಯಿಲ್ಲ್ಯಾ ಮೊರ್ಣಾಚಿ ರೀತ್ ಸೊಸುಂಕ್ ತಿ ಕೂಡ್ ಸಕನಾ ಜಾಲಿ. ತಿಚೆಂ ಕಾಳಿಜ್ ಫುಟ್‍ಲ್ಲೆಂ. ಮೊರ್ಣಾಂತ್‍ಯೀ ಆಪ್ಲ್ಯಾ ದಾದ್ಲ್ಯಾಚೊ ಪಾಟ್ಲಾವ್, ವಿಶ್ವಾಸಾನ್ ತಿಣೆಂ ಕೆಲ್ಲೊ…

* * * * *

“ಚಡುಣೆಂ ಹ್ಯಾಚ್ ವೆಳಾರ್, ಕ್ರಿಸ್ತಾಂವಾಂಕ್ ಆಡಾವ್ನ್ ಧರ್‌ಲ್ಲ್ಯಾ ತ್ಯಾ ಪ್ರದೇಶಾಚ್ಯಾ ದಕ್ಷಿಣ್ ಪೊಂತಾರ್, ಮದ್ಳೆಚ್ಯಾ ದೊಂಗ್ರಾರ್, ಉಬೆಂ ಕೆಲ್ಲ್ಯಾ ಎಕಾ ಲ್ಹಾನ್ ತಂಬಾಂತ್, ಖಿಲ್ಲೆದಾರ್ ರುಸುಮ್ ಅಲಿ ಬೇಗ್ ಆನಿ ತಾಚ್ಯಾ ರಿಸಾಲಾಂತ್ಲೆ ಥೊಡೆ ಹುದ್ದೆದಾರ್ ಆಸ್‍ಲ್ಲೆ…” ಹಸ್ಸನ್ ಮಹಮ್ಮದಾನ್ ಮುಂದರ್ಸುನ್ ಸಾಂಗ್ಲೆಂ:

“ವೆವೆಗ್ಳ್ಯಾ ಮಾಗಣ್ಯಾಂತ್ಲ್ಯಾ ಕ್ರಿಸ್ತಾಂವಾಂಕ್ ಧರ್ನ್ ಹಾಡುಂಕ್ ಥೊಡ್ಯಾ ಶಿಪಾಯಾಂಕ್ ಎಕೆಕ್ಲ್ಯಾ ಹವಿಲ್ದಾರಾ ಖಾಲ್ ಧಾಡ್‍ಲ್ಲೆ. ತಾಣಿಂ ಜಮಯಿಲ್ಲೆಂ, ಕ್ರಿಸ್ತಾಂವಾಂಚೆಂ ದಿರ್ವೆಂ, ಜಾಂವ್ ದುಡು, ಭಾಂಗಾರ್ ವಾ ವೊರ್ವಿ, ತ್ಯಾ ತ್ಯಾ ಮುಖೆಲ್ಯಾಂನಿ, ಪಟ್ಟೆ ಸಮೇತ್, ವಯ್ಲ್ಯಾ ತಂಬಾಂತ್ ಹಾಡ್ನ್ ಒಪ್ಸುಂಕ್ ಟಿಪ್ಪುಚಿ ತಾಕಿದ್ ಆಸ್‍ಲ್ಲಿ. ತ್ಯಾ ತಂಬಾಂತ್, ಖಿಲ್ಲೆದಾರ್ ರುಸ್ತುಮ್ ಅಲಿ ಬೇಗ್, ಮ್ಹಜೊ ಮಿವ್ಣೊ, ತಾತ್ಕಾಲಿಕ್ ಅಧಿಕಾರಿ ಜಾವ್ನಾಸ್‍ಲ್ಲೊ. ಮ್ಹಜ್ಯಾ ಖಾಸ್ಗಿ ಗರ್ಜೆನ್, ಆನಿ ಸಾಗ್ಸುಂಕ್ ಜಾಯ್ನಾತ್ಲ್ಯೊ, ಲೈಲಾಂವ್ ಕರ್ಚ್ಯೊ ಥೊಡ್ಯೊ ವಸ್ತು ಮೆಳ್ತಾತ್ ಜಾಲ್ಯಾರ್ ಪಳೆಂವ್ಕ್ ಹಾಂವ್‍ಯೀ ಥಂಯ್ಸರ್ ಪಾವ್‍ಲ್ಲೊಂ.

“ಮ್ಹಜ್ಯಾ ಮಿವ್ಣ್ಯಾನ್, ಸಕ್ಡಾಂನಿ ಹಾಡ್ನ್ ಒಪ್ಸುನ್ ದಿಲ್ಲ್ಯಾ ವಸ್ತುಂಚಿ ಪಟ್ಟಿ ತಪಾಸಣ್ ಕರ್ತಾನಾ, ಫಕೀರ ಸಾಬಿ ಮ್ಹಳ್ಳ್ಯಾ ತ್ಯಾಚ್ ನಾಕ್ ಕಾತ್ರ್ಯಾ ಹವಿಲ್ದಾರಾನ್ ವಸ್ತು ಒಪ್ಸಿಲ್ಲೊ ದಾಖ್ಲೊ ಥಂಯ್ಸರ್ ನಾತ್‍ಲ್ಲೊ. ದೆಕುನ್ ತಾಣೆಂ ಫಕೀರ್ ಸಾಬಿಕ್ ಆಪಂವ್ಕ್ ಧಾಡ್‍ಲ್ಲೊ.

“ಆಪಂವ್ಕ್ ಗೆಲ್ಲೊ ಶಿಪಾಯ್, ಖರ್ಶೆವ್ನ್ ಪಾಟಿಂ ಧಾಂವೊನ್ ಆಯ್ಕೊ, ಆನಿ, ‘ಫಕೀರ್ ಸಾಬಿ ಮೆಲೊ’ ಮ್ಹಳ್ಳಿ ಖಬರ್ ತಾಣೆಂ ದಿಲಿ. ಕಸೊ ಆನಿ ಕಿತೆಂ ಮ್ಹಣ್ ರುಸ್ತುಮ್ ಅಲಿನ್ ವಿಚಾರ್ತಚ್, ತ್ಯಾ ಶಿಪಾಯಾನ್, ಗಜಾಲ್ ಸಗ್ಳಿ ಮಾರ್ಮಿಕ್ ಥರಾನ್ ವಿವರ್ಸಿಲಿ. ತಿ ಆಯ್ಕೊನ್ ಮ್ಹಜೆಂ ಕಾಳಿಜ್ ಕೊಚಾಯಿಲ್ಲೆಪರಿಂ ಜಾಲೆಂ.

“ಮ್ಹಜ್ಯಾ ಮಿವ್ಣ್ಯಾಕ್ ನಿಜಾಯ್ಕೀ ಖಂತ್ ಜಾಲ್ಲೆಪರಿಂ ದಿಸ್ಲೆಂ.”

“ತಾಣೆಂ ಕಿತೆಂ ಕೆಲೆಂ?” ವಿಚಾರ್ಲೆಂ ಸರ್ದಾರ್ ಸಿಮಾಂವ್ನ್.

“ಕ್ರಿಸ್ತಾಂವಾಂಕ್ ಬಂದ್ ಕರ್ನ್ ವ್ಹರಿಜಾಯ್ ಮ್ಹಳ್ಳಿ ಹುಕುಮ್ ಮಾತ್ರ್ ದಿಲ್ಯಾ ಶಿವಾಯ್, ಶಿಪಾಯಾಂನಿ ಅಶಿ ನೀತ್ ಆಪ್ಲ್ಯಾಚ್ ಹಾತಾಂತ್ ಘೆವ್ನ್ ಜಿವಾಂಚೊ ಸಂಹಾರ್, ಇತ್ಲ್ಯಾ ಕ್ರೂರ್‌ಪಣಿಂ ಕರಿಜಾಯ್ ಮ್ಹಣ್ ಸಾಂಗೊಂಕ್ ನಾ” ಮ್ಹಣಾಲೊ.

“ಉಪ್ರಾಂತ್ ತಸಲೆಂ ಅನಾಹುತ್ ಘಡ್‍ಲ್ಲ್ಯಾ ಜಾಗ್ಯಾಕ್ ವಚೊನ್ ಯೇಂವ್ಕ್ ತೊ ಭಾಯ್ರ್ ಸರ್ಲೊ. ತಾಚ್ಯಾಚ್ ಘೊಡ್ಯಾರ್ ಪಾಟ್ಲ್ಯಾನ್ ಮ್ಹಾಕಾ ತಾಣೆಂ ಬಸಯ್ಲೊ. ಆಮ್ಚ್ಯಾ ಸಾಂಗಾತಾ, ಪಾಂಚ್ ಸ ಜಣ್ ಅಂಗರಕ್ಷಕ್ ಶಿಪಾಯ್ ಆಸ್‍ಲ್ಲೆ.

“ಪಿಂಪ್ಳಾಚ್ಯಾ ರುಕಾ ಮುಳಾಂತ್ ಆಮಿ ಪಾವ್ಲ್ಯಾಂವ್. ಪಾಂಚ್ ಮೊಡಿಂ ಥಂಯ್ಸರ್ ಆಸ್‍ಲ್ಲಿಂ. ವಿಶೇಸ್ ಕಿತೆಂ ಮ್ಹಳ್ಯಾರ್, ಕ್ರಿಸ್ತಾಂವ್ ದೋಗ್ ದಾದ್ಲೆ ಆನಿ ತಾಂಚ್ಯೊ ದೊಗಿ ಸ್ತ್ರೀಯೊ, ಸಮಾಧಾನಾನ್ ನೀದ್ ಕಾಡ್ಚೆಪರಿಂ ದಿಸ್ತಾನಾ, ತಕ್ಲೊ ಚೆಂಚೊನ್ ಮೆಲ್ಲ್ಯಾ ತ್ಯಾ ಫಕೀರ್ ಸಾಬಿಚೆಂ ಮೊಡೆಂ ಭೋವ್ ವಿದ್ರೂಪ್ ಆನಿ ಭಿರಾಂಕುಳ್ ದಿಸ್ತಾಲೆಂ.

“ಪುಣ್ ಸಕ್ಡಾ ಪ್ರಾಸ್ ಕರುಣಾಜನ್ ದೀಷ್ಟ್ ವರ್ತವ್ಲಿ ತ್ಯಾ ಭುರ್ಗ್ಯಾಚಿ. ತೆಂ ದೃಶ್ಯ್ ಮ್ಹಜ್ಯಾನ್ ವರ್ಣುಂಕ್ ಆನಿ ಚಿಂತುಂಕ್ ಸಾಧ್ಯ್ ನಾ” ಮ್ಹಣ್ತಾನಾಂಚ್, ಹಸ್ಸನ್ ಮಹಮ್ಮದಾಚೆ ದೊಳೆ ಭಿಜ್ಲೆ. “ತೆಂ ಬಾಳ್, ಆವಯ್ ನಿದ್ಲ್ಯಾ ಮ್ಹಣ್ ಚಿಂತುನ್, ತಿಕಾ ಜಾಗಂವ್ಕ್ ಪ್ರಯತ್ನ್ ಕರ್ತಾಲೆಂ, ಆನಿ ಆವಯ್ ಉಟನಾ ದೆಕುನ್, ಚಡ್ ಆನಿ ಚಡ್ ರಡ್ತಾಲೆಂ. ಆಮ್ಕಾಂ ಪಳೆವ್ನ್, ಭಿಯಾನ್ ಜಾವ್ಯೆತ್, ಚಿಕ್ಕೆ ತೆಂ ಥಂಡ್ ಜಾಲೆಂ, ಪುಣ್ ಖಳ್ಣ್ಯೊ ಯೆಂವ್ಚ್ಯಾ ಜಿನ್ಸಾರ್ ಸುಸ್ಕಾರೊನ್, ಆಪ್ಲ್ಯಾ ಭಾಶೆನ್ ಕಿತೆಂಗೀ ಸಾಂಗೊಂಕ್ ಲಾಗ್ಲೆಂ.

“ಮ್ಹಜೆಂ ಮನ್ ತಡ್ವಲೆಂ ನಾ. ಕೊಣೆಂಗೀ ಮ್ಹಾಕಾ ಪಾಟ್ಲ್ಯಾನ್ ಲೊಟ್‍ಲ್ಲ್ಯಾ ಜಿನ್ಸಾರ್ ಹಾಂವ್ ಮುಖಾರ್ ಗೆಲೊಂ. ತ್ಯಾ ಬಾಳ್ಶ್ಯಾಕ್ ಹಾಂವೆಂ ಉಕಲ್ಲೆಂ” ಉಸ್ಮಡ್ಲೊ ಹಸ್ಸನ್ ಮಹಮ್ಮದ್. “ಚಡ್ತಾವ್ ಹಾಂವೆಂ ಸಾಂಗ್ಚಿ ಗರ್ಜ್ ನಾ. ತ್ಯಾ ಭುರ್ಗ್ಯಾಕ್ ಹಾಂವ್ ವ್ಹರ್ತಾಂ ಮ್ಹಣ್ ಆನಿ ಮ್ಹಜೆಂ ಪೊಸ್ಕೆಂ ಕರ್ತಾಂ ಮ್ಹಣ್ ರುಸ್ತುಮ್ ಅಲಿ ಕಡೆನ್ ಹಾಂವೆಂ ಆಡ್ದೊಸ್ ಮಾಗ್ಲೊ. ತಾಣೆಂ ಅಡ್ಕಳ್ ಕರುಂಕ್ ನಾ. ‘ಅಸಲ್ಯಾ ವೀರ್ ಕುಳಿಯೆಚೆಂ ಭುರ್ಗೆಂ, ಮ್ಹಜಿಯೀ ಪೊಸ್ಕಿ ಭಾಚಿ ಜಾಲ್ಯಾರ್ ಮ್ಹಾಕಾಯೀ ಸಂತೊಸ್’ ಮ್ಹಣಾಲೊ ತೊ. ಹಾಂವೆಂ ತಾಕಾ ಘರಾ ಹಾಡ್ಲೆಂ. ಆಮ್ಚ್ಯಾಚ್ ಕುಡಿಂ ಥಾವ್ನ್ ಉದೆಲ್ಲ್ಯಾ ಜಿನ್ಸಾರ್ ಆಮಿ ತಾಚೊ ಮೋಗ್ ಕರ್ತಾಂವ್…”

“ಭಾಯೀ” ಮ್ಹಣಾಲೊ ಸರ್ದಾರ್ ಸಿಮಾಂವ್. ಪುರ್ತೊ ಮೊವಾಳೊನ್. “ನಿಜಾಯ್ಕೀ ತುಂ ಆನಿ ತುಜೆಂ ಘರಾಣೆಂ ಭಾಗಿ. ತುವೆಂ ತ್ಯಾ ಭುರ್ಗ್ಯಾಕ್ ‘ಮಿರಿಯಮ್’ ಮ್ಹಣೊನ್ ಆಪಯಿಲ್ಲೆಂಯೀ ವಿಚಿತ್ರ್‍ಚ್ ಸಯ್. ಆಮ್ಕಾಂಯೀ ಅಧಿಕ್ ಮಾನಾಚೆಂ ನಾಂವ್ ತೆಂ.”

“ತೆಂ ನಾಂವ್ ತ್ಯಾ ಭುರ್ಗ್ಯಾಚ್ಯಾ ಆಂಗಾರ್‌ಚ್ ಆಸ್‍ಲ್ಲೆಂ, ಆತಾಂಯೀ ಆಸಾ.”

“ಮ್ಹಳ್ಯಾರ್?”

“ಮ್ಹಳ್ಯಾರ್, ತುಮಿ ತಾಚ್ಯಾ ಆಂಗಾರ್ ಪಳೆಲ್ಲ್ಯಾ ತ್ಯಾ ನಗಾಚೆರ್ ‘ಮೇರಿ’ ಮ್ಹಳ್ಳಿಂ ದೋನ್ ಕನ್ನಡ ಅಕ್ಷರಾಂ ಕಾಂತವ್ನ್ ಆಸ್‍ಲ್ಲಿಂ, ಆತಾಂಯೀ ಆಸಾತ್. ದೆಕುನ್ ತೆಂಚ್ ನಾಂವ್ ಆಮಿ ಚಿಕ್ಕೆ ಬದ್ಲುನ್ ಘೆತ್ಲೆಂ.”

“ಅಲ್ಲಾಚಿ ದಯಾ ವಿಶೇಸ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತುಮ್ಚೆಂಚ್ ಭುರ್ಗೆಂ ತೆಂ. ತಾಚಿ ಬರಿ ಜತನ್ ಘೆಯಾತ್. ಆನ್ಯೇಕ್ ಕಿತೆಂ ಮ್ಹಳ್ಯಾರ್, ತ್ಯಾ ಭುರ್ಗ್ಯಾಚಿ ಕಥಾ, ದುಸ್ರ್ಯಾ ಕೊಣಾಕ್‍ಚ್ ತುವೆಂ ಸಾಂಗಿನಾಯೆ.”

“ಹಾಂವೆಂ ಹೆರ್ ಕೊಣಾಯ್ಕೀ ತಿ ಸಾಂಗೊಂಕ್ ನಾ. ಹ್ಯಾ ಫುಡೆಂಯೀ ಸಾಂಗ್ಚೆಪರಿಂ ನಾ. ಎವಾಂಚ್ಯಾ…” ಚಿಕ್ಕೆ ನರ್ಗಲೊ ಹಸ್ಸನ್ ಮಹಮ್ಮದ್. “ಮಿರಿಯಮ್, ಆಮ್ಚೆಂ ಬಾಳ್ ಜಾಲ್ಲ್ಯಾ ಉಪ್ರಾಂತ್, ಆಮಿ…”

“ಕಿತ್ಯಾಕ್ ದಾಕ್ಷೆತಾಯ್?”

“ಮಿರಿಯಮ್ ಆಮ್ಚೆಂ ಬಾಳ್ ಜಾಲ್ಯಾ ಉಪ್ರಾಂತ್, ಆಮಿ ಪಯ್ಲೆಂಚೆಪರಿಂ ಜಿಯೆನಾಂವ್, ಮಿರಿಯಮಾ ಖಾತಿರ್ ಆಮಿಯೀ ಕ್ರಿಸ್ತಾಂವಾಂಪರಿಂ ಜಿಯೆತಾಂವ್. ಮ್ಹಣ್ಜೆ ಕ್ರಿಸ್ತಾಂವ್ ಜಾಂವ್ಕ್ ಆಮಿ ತಯಾರ್ ಆಸಾಂವ್.”

“ಹಿ ಖಬರ್ ವೆರೊನಿಕಾಬಿಕ್ ತುವೆಂ ಸಾಂಗ್ಲ್ಯಾಯ್‍ವೇ?”

“ಮಿರಿಯಮಾಚಿ ಕಥಾ ಸಾಂಗೊಂಕ್ ನಾ. ಪುಣ್ ಆಮ್ಚೊ ಇರಾದೊ ಸಾಂಗ್ಲಾ. ಹೆರ್ ಕೊಣಾಯ್ಕೀ ಹಿ ಖಬರ್ ಕಳಿತ್ ನಾ.”

“ಹೆರ್ ಕೊಣಾಯ್ಕಿ ಕಳನಾಶೆಂ ಜಾಗ್ರುತ್ ರಾವಾತ್. ಫಾವೊತೊ ವೇಳ್ ಸಮ್ಜೊನ್, ಜಾಯ್ ತೆಂ ಕಾಮ್ ತಿ ಕರಯ್ತೆಲಿ” ಮ್ಹಣಾಲೊ ಸರ್ದಾರ್ ಸಿಮಾಂವ್. ತಾಚ್ಯಾ ಮತಿಂತ್ ನಿಜಾಯ್ಕೀ ಸಂತೊಸಾಚೊ, ಆನಿ ಹಸ್ಸನಾಚ್ಯಾ ಕುಟ್ಮಾ ಖಾತಿರ್ ಭಿರಾಂತೆಚೊ ಗೊಂದೊಳ್ ಉಟ್‍ಲ್ಲೊ.

ದುಮ್ಗಾ ಪಿಂತಾಚ್ಯಾ ಪಾಟ್ಲಾವ್ದಾರಾಂ ಪಯ್ಕಿ, ಜೊಕಿಮ್ ಸಿಲ್ವಾ ಪೈಕ್ ತೊ ಚಡ್ ಗುಮಾನ್ ಕರುಂಕ್ ಲಾಗ್‍ಲ್ಲೊ. ತಾಚೊ ಭಾವ್, ಭಾವೊಜ್ ಆನಿ ಧುವ್ಡಿ ತಾಕಾ ಅಂತರ್‌ಲ್ಲ್ಯಾ ವರ್ವಿಂ ಚಡ್ ಧಾರುಣ್ ತೊ ಜಾಲ್ಲೊ ಜಾಲ್ಯಾರೀ, ಹೆರಾಂ ಪ್ರಾಸ್ ಜಾಣ್ವಾಯೆಂತ್ ತೊ ಮುಖಾರ್ ಆಸ್‍ಲ್ಲೊ ಮ್ಹಣ್ ಸರ್ದಾರ್ ಸಿಮಾಂವ್ನ್ ಪಾರ್ಕಿಲ್ಲೆಂ. ಆನಿ ಆತಾಂ, ಹಸ್ಸನ್ ಮಹಮ್ಮದಾಚಿ ಪೊಸ್ಕಿ ಧುವ್, ಜಾಕುಲೊ ಪೈಚಿ ಧುವ್ಡಿ ಮ್ಹಳ್ಳೆಂ ತಾಕಾ ಸ್ಪಷ್ಟ್ ಜಾತಚ್, ಸಾಂಡುನ್ ಗೆಲ್ಲೊ ಗಾಂಚ್ ಮೆಳ್‍ಲ್ಲ್ಯಾ ವರ್ವಿಂ, ದುಮ್ಗಾ ಪಿಂತಾಚ್ಯಾ ಆನಿ ವೆರೊನಿಕಾ ಕುವೆಲಿಚ್ಯಾ ಸಾಂಗಾತ್ಯಾಂಕ್ ಚಡ್ ಬರೆಂಪಣ್ ಜಾತೆಲೆಂ ಮ್ಹಳ್ಳೆಂ ಚಿಂತುನ್ ಚಡ್ ಸಂತೊಸ್ ತಾಕಾ ಜಾಲೊ.

ಉಪ್ರಾಂತ್ ಥೊಡೊ ವೇಳ್ ತೆ ಉಲಯ್ಲೆ.

“ಆನಿ ಆಮಿ ಆಮ್ಚೆಂ ಪಯ್ಣ್ ಮುಂದರ್ಸುಂಚೆಂ ಬರೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ದೇವ್ ತುಕಾ ರಾಕೊಂದಿ.”

“ತುಮ್ಕಾಂಯೀ ರಾಕೊಂದಿ ಸರ್ದಾರ್ ಸಾಹೇಬ್.”

“ತಶೆಂ ಜಾಂವ್. ತೆರೆಜಾಬಿಕ್, ಚತ್ರಾಯೆನ್ ವ್ಹರ್ನ್ ಕಾವೂರ್‌ಚ್ ಪಾವಯಾತ್. ‘ತಿ ಘರಾ ನಾತ್‍ಲ್ಲಿ’ ಮ್ಹಳ್ಳಿ ಖಬರ್ ನಾಕಾ. ಪ್ರತ್ಯೇಕ್ ಜಾವ್ನ್, ಮ್ಹಜಿ ಖಬರ್, ತುಮಿ ದೊಗಾಂಯ್ನೀ, ಘುಟಾನ್ ವೆರೊನಿಕಾಬಿಕ್ ಮಾತ್ರ್ ಸಾಂಗ್ಯೆತ್. ಚಡಿತ್ ಕಾಂಯ್ ಆಸ್ಲ್ಯಾರ್, ಹಾಂವ್ ಬಾರ್ಕೂರ್ ಥಾವ್ನ್ ಪಾಟಿಂ ಯೆತಚ್, ತಿಕಾಚ್ ಖುದ್ದ್ ಮೆಳೊನ್ ಸಾಂಗ್ತಾಂ ಮ್ಹಣ್ ಕಳಯಾ.”

“ವೆರೊನಿಕಾಬಿ ಖಾತಿರ್ ಹಾಂವ್ ಸಂತೊಸ್ ಪಾವ್ತಾಂ” ಮ್ಹಣಾಲೊ ಹಸ್ಸನ್ ಮಹಮ್ಮದ್, ಜಾಣ್ವಾಯೆನ್. “ತ್ಯಾ ಚಂದ್ರಾಕ್ ಎಕಾ ಸುರ್ಯಾಚಿ ಗರ್ಜ್ ಆಸ್‍ಲ್ಲಿ.”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಂಚಿ ಸಿನೊಲ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

Send Feedback to: budkuloepaper@gmail.com

Like us at: www.facebook.com/budkulo.epaper

Join our Budkulo Club in Clubhouse

The post ಸರ್ದಾರಾಂಚಿ ಸಿನೊಲ್ – 25: ಸಾಂಡುನ್ ಗೆಲ್ಲೊ ಗಾಂಚ್ appeared first on Budkulo.

ಲೊಕಾಕ್ ಆಪ್ಲಿ ಜಾಣ್ವಾಯ್ ವಾಂಟ್ಚ್ಯಾ ಭೋವ್ ಅಪ್ರೂಪ್ ನಿಸ್ವಾರ್ಥಿಂ ಪಯ್ಕಿ ಡೊ. ಎಡ್ವರ್ಡ್ ಏಕ್. ತೊ ಆತಾಂ, ಮಟ್ವಿ ಕಾಣಿ ಕಶೆಂ ಬರಂವ್ಚಿ ಮ್ಹಣ್ ಲೊಕಾಕ್ ಸಮ್ಜಣಿ ದೀಂವ್ಕ್ ಅತ್ರೆಗ್ತಾ. ಹ್ಯಾ ದಿಶೆನ್ ಬುಡ್ಕುಲೊ ಥಾವ್ನ್ ಜಾಯ್ತೆಂ ಕಾಮ್ ಚಲ್ಲಾಂ. ತೊ ಏಕ್ ಮೇಟ್ ಫುಡೆಂ ಚಮ್ಕಲಾ ಆನಿ ಆಮ್ಚ್ಯಾ ವಾಚ್ಪ್ಯಾಂಕ್ ತರ್ಬೆತಿ ದಿಂವ್ಚ್ಯಾಕ್ ಏಕ್ ಲೇಖನಾಂವಳ್ ತಾಣೆಂ ತಯಾರ್ ಕೆಲ್ಯಾ. ಹಿಂ ತಾಚಿಂ ಬರ್ಪಾಂ ಸಾಹಿತ್ಯ್ ರಚ್ಚ್ಯಾಕ್ ಪ್ರೇರಣ್ ಆನಿ ಮಾರ್ಗದರ್ಶನ್. ಆಮ್ಚ್ಯಾ ಲೊಕಾನ್ ಹಾಚೊ ಫಾಯ್ದೊ ಉಟಯ್ಲ್ಯಾರ್ ಆಮ್ಚ್ಯಾ, ಪ್ರತ್ಯೇಕ್ ಕರ್ನ್ ಡೊ. ಎಡ್ವರ್ಡಾಚ್ಯಾ ಪರಿಶ್ರಮಾಕ್ ಸಾರ್ಥಕತಾ ಮೆಳ್ತಾ.

ಹೆಂ ಅಂಕಣ್ ಬರವ್ನ್ ಬುಡ್ಕುಲೊ ಇ-ಪತ್ರಾಂತ್ ಫಾಯ್ಸ್ ಕರುಂಕ್ ದಿಲ್ಲ್ಯಾ ಡೊ. ಎಡ್ವರ್ಡ್ ನಜ್ರೆತಾಕ್ ಆಮಿ ಆಭಾರಿ ಆಸಾಂವ್ ಆನಿ ಧಿನ್ವಾಶಿ ಮನಾನ್ ದೇವ್ ಬರೆಂ ಕರುಂ ಮ್ಹಣ್ತಾಂವ್.

-ಸಂಪಾದಕ್

ಕಿಸ್ತ್: 1

ಜಾಯಿತ್ತ್ಯಾ ಜಣಾಂಕ್ ಮಟ್ವ್ಯೊ ಕಾಣಿಯೊ ಬರಂವ್ಚಿ ಉರ್ಬಾ ಆಸ್ತಾ ಆನಿ ಸ್ಪರ್ಧೆ ಆಸ್ತಾನಾ ಸಬಾರ್ ಜಣ್ ಮಟ್ವ್ಯೊ ಕಾಣಿಯೊ ಬರಂವ್ಕ್ ಪ್ರಯತ್ನ್ ಕರ್ತಾತ್. ನೆಮಾಳ್ಯಾಂನಿ ಆನಿ ಆತಾಂ ಅಂತರ್‌ಜಾಳಾಚೆರ್‌ಯೀ ಮಟ್ವ್ಯಾ ಕಾಣಿಯಾಂಕ್ ಖಾಯ್ಸ್ ಆಸಾ.

ಮಟ್ವಿ ಕಾಣಿ ಕಶಿ ಬರಯ್ಜೆ ಮ್ಹಣ್ ಸ್ಪಷ್ಟ್ ಏಕ್ ನಿಯಮ್ ವಾ ರೇಗ್ರ್ ದಿಂವ್ಕ್ ಜಾಯ್ನಾ. ಮಟ್ವ್ಯಾ ಕಾಣಿಯಾಂಕ್ ಏಕ್ ಸಂವಿಧಾನ್ ಮ್ಹಣ್ ನಾ. ತ್ಯಾಚ್ ಕಾರಣಾನ್ ಕಾಂಯ್ ಬರಯ್ಣಾರ್ ಹ್ಯಾ ಲೇಖನಾಂವಳಿಂತ್ ಬರಯಿಲ್ಲ್ಯಾ ವಿಷಯಾಂಚೆರ್ ಅಪ್ವಾದ್ ಮಾಂಡ್ತಿತ್. ತೆಂ ಸಹಜ್.

ತ್ಯಾ ಪಾಸತ್, ಮಟ್ವಿ ಕಥಾ ಕಶಿ ಬರವ್ಯೆತಾ ಮ್ಹಳ್ಳ್ಯಾ ವಿಷಯಾಚೆರ್ ಥಂಯ್ ಹಾಂಗಾ ಥಾವ್ನ್, ಥೊಡ್ಯಾ ನಾಂವಾಡ್ದಿಕ್ ಬರಯ್ಣಾರಾಂ ಥಾವ್ನ್ ಆಪ್ಣಾಯಿಲ್ಲಿ ಥೊಡಿ ಮಾಹೆತ್ ಹಾಂಗಾಸರ್ ದಿಲ್ಯಾ. ನವ್ಯಾನ್ ಮಟ್ವ್ಯೊ ಕಾಣಿಯೊ ಬರಯ್ತೆಲ್ಯಾಂಕ್ ಹೆಂ ಫಾಯ್ದ್ಯಾಚೆಂ ಜಾಯ್ತ್, ಅಶೆಂ ಆಮ್ಚೆಂ ಚಿಂತಪ್.

ಕಾಣಿ ಬರಂವ್ಚೆಂ ದೆಣೆಂ ಆಸೊಂಕ್ ಜಾಯ್

ಸಾಹಿತ್ಯಾಂತ್ ಮಟ್ವಿ ಕಾಣಿ ಸೃಜನ್ ಸಾಹಿತ್ಯಾಚ್ಯಾ ಪಂಗ್ಡಾಂತ್ ಯೆತಾ. ತಶೆಂ ಮ್ಹಳ್ಯಾರ್ ಮಟ್ವಿ ಕಾಣಿ ಬರಯ್ತೆಲ್ಯಾಕ್ ‘ಕಾಣಿ ಬರಂವ್ಚೆಂ ದೆಣೆಂ’ ಆಸೊಂಕ್ ಜಾಯ್.

ಮಟ್ವ್ಯಾ ಕಾಣಿಯೆಂತ್ ಪಾತ್ರ್ ಆನಿ ಸನ್ನಿವೇಶ್ ಪಿಂತ್ರಾಂವ್ಕ್ ಆಸಾತ್. ತೆ ಕಾಲ್ಪನಿಕ್ ತರೀ ವಾಚ್ಪ್ಯಾಕ್ ವಾಸ್ತವಿಕ್ ಮ್ಹಣ್ ಭೊಗುಂಕ್ ಜಾಯ್. ಅಶೆಂ ಪಿಂತ್ರಾಯ್ಜೆ ತರ್, ಖಂಚೆಂಯ್ ಕಾಲ್ಪನಿಕ್ ಘಡಿತ್ ವಾ ಕಾಲ್ಪನಿಕ್ ವ್ಯಕ್ತಿಕ್, ಕಾಣಿಯೆಂತ್ ವಾಸ್ತವಿಕ್ ವಾ ನೀಜ್ ತಶೆಂ ಬರಂವ್ಚೆಂ ದೆಣೆಂ ಆಸೊಂಕ್ ಜಾಯ್. ನ್ಹಯ್ ತರ್ ಮಟ್ವಿ ಕಾಣಿ ಉತಳ್ ಜಾತಾ. ದೆಣೆಂ ನಾತ್‍ಲ್ಲ್ಯಾಂನಿ ಕಾಣಿ ಬರಯ್ಲ್ಯಾರ್ ತಾಳೊ ನಾತ್‍ಲ್ಲ್ಯಾನ್ ಗಾಯನ್ ಕೆಲ್ಲೆಪರಿಂ ಜಾತಾ.

ದೆಣೆಂ ನಾತ್‍ಲ್ಲ್ಯಾಂನಿ ಶಿಕೊನ್ ಕಾಣಿ ಬರಂವ್ಕ್ ಜಾಯ್ನಾ. ತಶೆಂಚ್ ಕಾದಂಬರಿ, ನಾಟಕ್, ಕವಿತಾಯೀ ಸೃಜನ್‍ಶೀಲ್ ಸಾಹಿತ್ಯಾಚ್ಯಾ ಪಂಗ್ಡಾಂತ್ ಯೆತಾತ್. ದೆಣೆಂ ನಾತ್‍ಲ್ಲ್ಯಾಂನಿ ಕಿತ್ಲೆಂ ಪ್ರಯತ್ನ್ ಕೆಲ್ಯಾರೀ ಬರೆಂ ಕವನ್ ಜಾಂವ್ ಗೀತ್ ಜಾಂವ್ ರಚುಂಕ್ ಜಾಯ್ನಾ.

ಲೇಖನಾಂ ಸೃಜನ್‍ಶೀಲ್ ಸಾಹಿತ್ಯ್ ನ್ಹಯ್. ಲೇಕನ್ ಬರಂವ್ಚಿ ಕಲಾ ಶಿಕ್ಯೆತಾ.

ಹೆರಾಂಚ್ಯೊ ಕಾಣಿಯೊ ಶಿಕೊಂಕ್ ಜಾಯ್

ಮಟ್ವ್ಯೊ ಕಾಣಿಯೊ ಬರಂವ್ಕ್ ಆಶೆಂವ್ಚ್ಯಾಂನಿ ವಾ ತಸಲೆಂ ದೆಣೆಂ ಆಸ್‍ಲ್ಲ್ಯಾಂನಿ ಹೆರ್ ಬರಯ್ಣರಾಂನಿ ಬರಯಿಲ್ಲ್ಯೊ ಕಾಣಿಯೊ ವಾಚುನ್ ಶಿಕೊಂಕ್ ಜಾಯ್ ಆನಿ ಆಪ್ಲೆಂ ದೆಣೆಂ ವೃದ್ಧಿ ಕರುಂಕ್ ಜಾಯ್. ಹರ್ ದೆಣಿಂ ವೃದ್ಧಿ ಕರ್ಚಿ ಗರ್ಜ್ ಆಸಾ ಆನಿ ಮಟ್ವ್ಯೊ ಕಾಣಿಯೊ ಬರಂವ್ಚೆಂ ದೆಣೆಂಯ್ ವೃದ್ಧಿ ಕರುಂಕ್ ಜಾಯ್. ಅಶೆಂ ಆಸ್‍ಲ್ಲ್ಯಾ ಆಸಕ್ತ್‍ವಂತಾಂನಿ ಮಟ್ವ್ಯೊ ಕಾಣಿಯೊ ಬರಂವ್ಚೆಂ ದೆಣೆಂ ಬರೆಂ ಕರುಂಕ್ ಹೆರಾಂಚ್ಯೊ ಕಾಣಿಯೊ ವಾಚುನ್ ಶಿಕೊಂಕ್ ಜಾಯ್.

ಎಕಾ ಸಾಮಾನ್ಯ್ ವಾಚ್ಪ್ಯಾನ್ ಕಾಣಿ ವಾಚ್ಚ್ಯಾಕ್ ಆನಿ ಕಾಣಿ ಬರಂವ್ಚ್ಯಾ ಬರಯ್ಣಾರಾನ್ ಕಾಣಿ ವಾಚ್ಚ್ಯಾಕ್ ಫರಕ್ ಆಸಾ.

ಕಾಣಿ ಬರಂವ್ಕ್ ಆಶೆಂವ್ಚೊ, ಹೆರಾಂಚಿ ಕಾಣಿ ವಾಚುನ್ ಶಿಕ್ತಾ. ಕಾಣಿ ಕಶಿ ಸುರ್ವಾತಿಲ್ಯಾ, ಪಾತ್ರ್ ಆನಿ ಸನ್ನಿವೇಶ್ ಕಶೆ ಜಿವಾಳ್ ಆನಿ ವಾಸ್ತವೀಕ್ ಕೆಲ್ಯಾತ್, ಕಾಣಿಯೆಚಿ ಘಡಾವಳ್ ಕಶಿ ಮುಖಾರುನ್ ಗೆಲ್ಯಾ ಆನಿ ಕಾಣಿ ಕಶಿ ಆಖೇರ್ ಕೆಲ್ಯಾ ಮ್ಹಣ್ ವಾಚುನ್ ತೊ ಶಿಕ್ತಾ.

ಆಪ್ಣಾಕ್ ಕೊಣಾಯ್ಚಿಯ್ ಕಾಣಿ ಬರಿ ಲಾಗ್ಲಿ ತರ್, ತಿ ಕಿತ್ಯಾಕ್ ಬರಿ ಲಾಗ್ಲಿ ಮ್ಹಣ್ ವಿಮರ್ಸುನ್, ಸಮ್ಜೊಂಕ್ ಸಕ್ತಾ.

ಚಡ್ ಆನಿ ಚಡ್ ಹೆರ್ ಬರಯ್ಣಾರಾಂಚ್ಯೊ ಕಾಣಿಯೊ ಶಿಕ್‍ಲ್ಲೊ ಬರೊ ಬರಯ್ಣಾರ್ ಜಾತಾ. ಆಪ್ಲ್ಯಾ ಭಾಶೆಚ್ಯೊ ಮಾತ್ರ್ ನ್ಹಯ್ ಹೆರ್ ಭಾಶೆಂತ್ಲ್ಯೊ ಕಾಣಿಯೊಯೀ ವಾಚುನ್ ಶಿಕೊಂಕ್ ಜಾಯ್.

(ಮುಖಾರುಂಕ್ ಆಸಾ)

Send Feedback to: budkuloepaper@gmail.com

Like us at: www.facebook.com/budkulo.epaper

Join our Budkulo Club in Clubhouse

The post ಮಟ್ವಿ ಕಾಣಿ ಕಶೆಂ ಬರವ್ಯೆತಾ? appeared first on Budkulo.

ಮೊಗಾಳ್ ಆಸ್ಟಿನ್, ವ್ಹಯ್, ಖಂಡಿತ್ ಜಾವ್ನ್ ತುಕಾ ಶಾಭಾಸ್ಕಿ ಫಾವೊ. ಭೋವ್ ಲ್ಹಾನ್ ಪ್ರಾಯೆರ್‌ಚ್, ಗಾಂವಾಂತ್, ತುವೆಂ ರಚ್‍ಲ್ಲೆ ಸಬಾರ್ ದಾಖ್ಲೆ ಮ್ಹಜೆ ತಸಲೆ ಜಾಯ್ತೆ ಜಣ್ ಆಯ್ಕೊನ್ ತರೀ ಜಾಣಾಂತ್. ಕೊಂಕ್ಣೆಂತ್ ವಾವ್ರುಂಕ್ ಧರ್ಲ್ಯಾ ಉಪ್ರಾಂತ್ ತುಜಿ ವಳಕ್ ಮ್ಹಾಕಾ ಲಾಗ್ಶಿಲ್ಯಾನ್ ಜಾಲ್ಲಿ ಆನಿ ತುಜೆ ವಿಶಿಂ ತುಜೆ ಥಾವ್ನ್, ಹೆರಾಂ ಮುಖಾಂತ್ರ್ ಜಾಯ್ತೆಂ ಜಾಣಾಂ ಜಾಲಾಂ. ತಾಂತುಂ, ತುಜೆ ವಿಶಿಂ ಭೋವ್ ಅಭಿಮಾನ್ ಪಾಂವ್ಚಿ ಗಜಾಲ್ ಮ್ಹಳ್ಯಾರ್, ತುಜೆಂ ಧಯ್ರ್, ಭಾಷೆಚೊ ಮೋಗ್ ಆನಿ ಝುಜ್ಚೊ ಮನೋಭಾವ್.

ತುವೆಂ ತುಜ್ಯಾ ‘ವೀಜ್’ ಪತ್ರಾರ್ ಲಿಖ್‍ಲ್ಲೆಂ, ಹಾಂಗಾ ಲಗ್ತಿ ಕೆಲ್ಲೆಂ, ಸಂಪಾದಕೀಯ್ ತುಜ್ಯಾ ಹ್ಯಾ ಮನೋಭಾವಾಕ್ ಆನಿ ಕಾಲೆತಿಕ್ ಏಕ್ ಉತ್ತೀಮ್ ದೃಷ್ಟಾಂತ್. ಆದಿಂ ತುವೆಂ ಸಂಪಾದಕ್ ಜಾವ್ನಾಸ್‍ಲ್ಲ್ಯಾ ಪತ್ರಾಂಕ್ ಪಳೆಂವ್ಚೊ ಅವ್ಕಾಸ್ ನಾತ್‍ಲ್ಲೊ, ಪುಣ್ ಆತಾಂ ‘ವೀಜ್’ ಪಾವ್ತಾ. ತಾಂತುಂ ತುಜಿ ಸರ್ವ್ ಮ್ಹಿನತ್ ಆನಿ ಸಾಮರ್ಥಿ ಪಳೆಂವ್ಕ್ ಮೆಳ್ತಾ. ಅಭಿನಂದನ್ ತುಕಾ, ತುವೆಂ ತುಜೊ ಅಮೊಲಿಕ್ ವೇಳ್ ಕೊಂಕ್ಣೆ ಖಾತಿರ್ ಸಮರ್ಪಿಲ್ಲ್ಯಾಕ್. ತುಂ ಕೊಂಕ್ಣೆಚೊ ಏಕ್ ಅಖಂಡ್ ಸೊಜೆರ್, ನಿರಂತರ್ ವಾವುರ್ಚೊ ಸುಪುತ್ರ್. ತುಜ್ಯಾ ಹ್ಯಾ ಸೆವೆಕ್ ಹಾಂವ್ ಮಾನ್ ಬಾಗಯ್ತಾಂ.

ಖರೆಂಚ್ ಸಾಂಗ್ಲಾಂಯ್ ತುವೆಂ ಆಸ್ಟಿನ್ – ಭಾಸ್, ಸಾಹಿತ್ಯ್ ಆನಿ ಲಿಪಿಚ್ಯಾ ನಾಂವಾಂನ್ ದಂಧೊ ಕರ್ತೆಲ್ಯಾಂಕ್ ತುವೆಂ ಚಾಟಿ ಭಿಜಾಯ್ಲ್ಯಾಯ್. ಅಸಲ್ಯಾ ಕಪಟ್ಯಾಂಕ್, ಆಪ್ಲ್ಯಾ ಅನ್ಕೂಲಾಕ್ ತೆಕಿದ್ ಜೀಬ್ ಘುಂವ್ಡಾಯ್ತೆಲ್ಯಾ ಮಾಲುಂಡಾಂಕ್ ಸರ್ಸರಿತ್ ಘಾಸ್ಲಾಂಯ್. ಆಪ್ಲ್ಯಾ ಸ್ವಾರ್ಥಾ ಖಾತಿರ್ ಕೊಣಾಕೀ/ಕಿತೆಂಯೀ ನೆಗಾರ್ ಕರುಂಕ್ ಆನಿ ಕೊಣಾಯ್ಚಿಯೀ ಗುಲಾಮ್‍ಗಿರಿ ಕರುಂಕ್ ಫುಡೆಂ ಸರ್ತೆಲ್ಯಾ ದಗಲ್ಬಾಜಿಂಕ್ ಪಂಥಾಹ್ವಾನ್ ದಿಲಾಂಯ್! ಬರೆಂಚ್ ಕೆಲಾಂಯ್ ತುವೆಂ.

ಪುಣ್ ಆಸ್ಟಿನ್, ತುಂ ಜಾಣಾಂಯ್ ವಾ ನೆಣಾಂಯ್ ತೆಂ ಗರ್ಜೆಚೆಂ ನ್ಹಯ್, ಹೆ ಕಪಟಿ ತುಜ್ಯಾ ಉತ್ರಾಂಚೆಂ ಗಣ್ಣೆಂ ಕರ್ಚೆ ವ್ಯಕ್ತಿ ಬಿಲ್ಕುಲ್ ನ್ಹಯ್. ಮಾನ್ ಮರ್ಯಾದ್ ಆಸ್ಲೆಲ್ಯಾಂಕ್ ಮಾತ್ರ್ ಕೊಣೆಂಯೀ ಕಿತೆಂಯೀ ಸಾಂಗ್ಲ್ಯಾರ್ ಲಾಗ್ತಾ-ಬಾಂಧ್ತಾ. ಪುಣ್ ಹಾಂಕಾಂ ಖಾಸ್ಗೆನ್ ಜಾಂವ್ ಉಗ್ತ್ಯಾನ್, ಕೊಣೆಂಯೀ ಬೂದ್‍ಬಾಳ್ ಸಾಂಗ್ಲ್ಯಾರೀ ವರ್ಗನಾ. ತಾಂಚ್ಯಾ ಬರ್‍ಯಾಕ್‌ಚ್ ಸಾಂಗ್ಲ್ಯಾರೀ ತೆ ಖುಬಾಳ್ತಾತ್. ಆಪ್ಣಾಕ್ ಶಿತ್ ಘಾಲ್ಲ್ಯಾ ಹಾತಾಂಕ್‍ಚ್ ಘಾಸ್ ಮಾರ್ತೆಲೆ, ಉಪ್ಕಾರ್ ಕೆಲ್ಲ್ಯಾಂಚ್ಯಾ ಬೊಶಿಯೆಕ್ ವೀಕ್ ಘಾಲ್ಚೆ ಅನ್ನಾಡಿ ಕೊಣೆಂಯೀ ಚತ್ರಾಯ್ ದಿಲ್ಯಾರೀ ಲೆಕಿನಾಂತ್, ಹಿತವಚನ್ ಸಾಂಗ್ಲ್ಯಾರೀ ಆಯ್ಕನಾಂತ್. ತ್ಯಾಚ್ ಪರ್ಮಾಣೆಂ ತುವೆಂ ದಿಲ್ಲೊ ಉಲೊ ಹೆ ಹಿಪೊಕ್ರಿತ್, ಸದಾಂಚೆಪರಿಂ, ತಿರಸ್ಕಾರ್ ಕರ್ತಾತ್. ತಾಂಕಾಂ ತಾಚಿ ಸವಯ್ ಜಾಲ್ಯಾ.

ತುವೆಂ ತುಲನ್ ಕೆಲ್ಲಿ ಗಜಾಲ್ ಮ್ಹಣೀ ಭೋವ್ ಬರಿಚ್; ಮಾರ್ಮಿಕ್ ಆನಿ ಪರಿಣಾಮ್‍ಕಾರಿ. ವ್ಹಯ್, ಸಂಸಾರಾಂತ್ ಜಾಯ್ತೊ ಲೋಕ್ ಆಪ್ಲ್ಯಾ ಭಾಶೆಕ್ ‘ಆವಯ್’ ಮ್ಹಣ್‍ಂಚ್ ಘೆತಾ. ತ್ಯಾಚ್ ಗೌರವಾನ್, ಅಭಿಮಾನಾನ್, ಮೊಗಾನ್ ಆಪ್ಲ್ಯಾ ಮಾಂಯ್‍ಭಾಶೆಚಿ ವ್ಹಡ್ವಿಕಾಯ್ ಗಾಜ್ತಾ. ಆಪುಟ್ ಕೊಂಕ್ಣಿ ರಾಯ್‍ಭಾರಿ, ಆಮ್ಚ್ಯಾ ಸರ್ವಾಂಚೊ ಮೊಗಾಚೊ ಕವಿ, ವಿಲ್ಫಿ ರೆಬಿಂಬಸಾನ್ ಕೊಂಕ್ಣಿ ಭಾಶೆಕ್ ಆವಯ್ಚೆಂ ಸ್ಥಾನ್‍ಮಾನ್ ದಿಲಾಂ. ಮಾಂಯ್‍ಭಾಸ್‍ಯೀ ಆವಯ್‍ಚ್ ಮ್ಹಣ್ ತಾಣೆಂ ಘೆತ್ಲಾಂ, ಆನಿ ತಿಚೆ ಖಾತಿರ್ ತಾಣೆಂ ರಚ್‍ಲ್ಲಿಂ ಅವ್ವಲ್ ಪದಾಂ ಲಾಖೊಂ ಲೊಕಾನ್ ಸ್ವೀಕಾರ್ ಕೆಲ್ಯಾಂತ್. ಆಮ್ಚಿ ಕೊಂಕ್ಣಿ ಆಮಾ ಸರ್ವಾಂಕ್ ಆವಯ್ ಜಶೆಂ. ಹಿ ಆಮ್ಚಿ ಸಂಸ್ಕೃತಿ. ಹೆಂ ಭಾರತಾಂತ್ ಸಕ್ಕಡ್ ಭಾಸಾಂಕ್ ಲಾಗು ಜಾತಾ. ಕನ್ನಡ ಲೋಕ್‍ಯೀ ಆಪ್ಲ್ಯಾ ಮಾಂಯ್‍ಭಾಶೆಕ್ ‘ತಾಯಿ ಭುವನೇಶ್ವರಿ’ ಮ್ಹಣೊನ್ ದೇವಿಕ್ ಸರ್ ಕರ್ತಾ.

ಆತಾಂ, ತುಜ್ಯಾ ಸಂಪಾದಕೀಯಾಂತ್ಲ್ಯಾ ಮುಖ್ಯ್ ಗಜಾಲಿಕ್ ಯೆಂವ್ಚೆಂ ತರ್, ಆಪ್ಲ್ಯಾಚ್ ಮ್ಹಳ್ಳ್ಯಾ ವ್ಹರ್ತ್ಯಾ ಸಂಗ್ತಿಂಕ್, ಫಕತ್ ಆಪ್ಲ್ಯಾ ಸ್ವಾರ್ಥ್ ಆನಿ ಅಬ್ಲೆಸಾ ಖಾತಿರ್ ನೆಗಾರ್ ಕರ್ತೆಲ್ಯಾಂಕ್ ಖಂಯ್ಚಿ ಸಂಸ್ಕೃತಿ ಲಾಗ್ತಾ ಮ್ಹಣ್ಚೆಂ? ತುವೆಂ ಸಾಂಗ್‍ಲ್ಲ್ಯೊಚ್ ಗಜಾಲಿ ಹ್ಯಾ ಆದಿಂಯೀ ಉಲ್ಲೇಖ್ ಜಾಲ್ಯಾತ್, ಸಬಾರಾಂನಿ ಸಾಂಗ್ಲ್ಯಾತ್. ತಾಕಾ ತುವೆಂ ಆತಾಂ ಪರತ್ ಮಹತ್ವಾಚೆಂ ಮ್ಹಣೊನ್ ರುಜು ಕೆಲಾಂಯ್. ಜಿವಿತಾಂತ್ ಕುಸ್ಕುಟಾಚಿ ಲಜ್, ಮರ್ಯಾದ್, ಬದ್ಧತಾ, ಪ್ರಾಮಾಣಿಕತಾ, ಭಾಷೆಚೊ ಮೋಗ್, ಸಾಹಿತ್ಯಾಚೆರ್ ಅಭಿಮಾನ್, ಬರೆಂ ಕರ್ಚೊ ಶೆವಟ್ ಇತ್ಯಾದಿ ಕಿತೆಂಚ್ ನಾಸ್ತಾನಾ, ಫಕತ್ ಆಪ್ಲೆಂ ಧೊಲ್ಕೆಂ ಭರಜೆ, ತೆಂಯೀ ಅನ್ನಾಡ್ಪಣಾಂ ಮುಖಾಂತ್ರ್‌ಚ್ ಆಪ್ಣಾಯ್ಜೆ, ದಗಲ್ಬಾಜಿ ಕರುನ್‍ಂಚ್ ಜೊಡಿಜೆ ಮ್ಹಣ್ ಪೆಚಾಡ್ತೆಲ್ಯಾಂಕ್ ತುಂ ಕಶೆಂ ಸಾರ್ಕ್ಯಾ ವಾಟೆಕ್ ಹಾಡ್ಶಿ?

ತುವೆಂ ದಿಲ್ಲೆ Dollars ಖುಷೆನ್ ಘೆತಿತ್, ಪುಣ್ ತುಜ್ಯಾ ಬರ್‍ಯಾ, ಖರ್‍ಯಾ ಉಲ್ಯಾಕ್ ಪಾಳೊ ದೀಂವ್ಕ್ ಹಾಂಕಾಂ ಪುಟ್ವನಾ ಮ್ಹಳ್ಳೆಂ ತುಂಚ್ ಜಾಣಾಸ್ತಲೊಯ್, ನ್ಹಯ್ಗೀ ಆಸ್ಟಿನ್?

ಜಶೆಂ ತುವೆಂ ಉಚಾರ್ಲಾಂಯ್, ತಶೆಂ, ‘ನಾಗರಿ ಲಿಪಿಚೆಂ ಪ್ರೊಮೋಶನ್ ಆನಿ ಮಾರ್ಕೆಟಿಂಗ್ ಕರ್ತೆಲ್ಯಾ’ ಹ್ಯಾ So Called ಬರವ್ಪ್ಯಾಂಕ್ (ಹೆ ಬರವ್ಪಿ ನ್ಹಯ್ ವಿಕಾಳ್ ಮನಿಸ್) ಆನಿ Self Proclaimed ಚಿಂತ್ಪ್ಯಾಂಕ್ (ಹೆ ಚಿಂತ್ಪಿ ನ್ಹಯ್ ವಿಕಾರ್, ವಿದ್ರೂಪ್ ವೈರಸ್) ತಶೆಂ ಕರುಂಕ್ ಭೋವ್ ಜೊಕ್ತಿಂ ಕಾರಣಾಂ ಆಸಾತ್. ತೆ ಬುದ್ವಂತ್ ದೆಕುನ್ ತೆ ಅಶೆಂ ಕರ್ತಾತ್ ಶಿವಾಯ್ ಭೆಷ್ಟೆಂ ತರೀ ದುಸ್ರೆಂ ಕಾಮ್ ನಾ ಮ್ಹಣೊನ್ ಕರಿನಾಂತ್ – ಹಿ ಗಜಾಲ್ ತುಂಯೀ ಜಾಣಾಸ್ತಲೊಯ್ ಮ್ಹಣ್ ಪಾತ್ಯೆತಾಂ. ತುವೆಂ ಬರಯಿಲ್ಲೆಪರಿಂ, ಆನಿ ಜಾಯ್ತ್ಯಾಂನಿ ಎದೊಳ್ ವ್ಯಕ್ತ್ ಕೆಲ್ಲೆಪರಿಂ, ಹೆ ನಾಗರಿ ಲಿಪಿಚೆ ‘ದಲ್ಲಾಳಿ’ ಜಾಲ್ಯಾತ್ ಮಾತ್ರ್ ನ್ಹಯ್, ಕನ್ನಡ ಲಿಪಿಕ್ ನೆಗಾರ್ತಾತ್ ಆನಿ ತಿಚೆಂ ಅಸ್ತಿತ್ವ್‌ಚ್ ಪುಸುನ್ ಕಾಡುಂಕ್ ಸರ್ವ್ ಸಕ್ತೆನ್ ಪೆಚಾಡ್ತಾತ್ ಮ್ಹಳ್ಳೆಂ ಲೊಕಾ ಸಮೊರ್ ತಾಣಿಂ ದಾಕವ್ನ್ ದಿಲಾಂ.

ಹ್ಯಾ ಸರ್ವಾಚಿ ಜಾಪ್ ತುಜ್ಯಾ ನಿಮಾಣ್ಯಾ ಉತ್ರಾಂನಿ ಲಿಪ್ಲ್ಯಾ, ಆಸ್ಟಿನ್. ತುಂ ತಾಂಕಾಂ ‘ಬಕ್ವಾಸ್ ಉಲವ್ನ್ ಅಸ್ತಿತ್ವ್ ಹೊಗ್ಡಾಯ್ನಾಕಾತ್ ವಾ ವಿಕುಂಕ್ ವಚನಾಕಾತ್’ ಮ್ಹಣ್ ಚತ್ರಾಯ್ ಸಾಂಗ್ತಾಯ್. ಪುಣ್, ಖರಿ ಗಜಾಲ್ ಮ್ಹಳ್ಯಾರ್, ತೆ ಕಾಂಯ್ ನೆಣಾರ್ಪಣಾನ್ ವಾ ಫರಾಮಶೆನ್ ಬಕ್ವಾಸ್ ಉಲಯ್ನಾಂತ್. ತಾಣಿಂ ತಶೆಂ ಉಲಂವ್ಚೆಂ ಆಪ್ಲ್ಯಾ ‘ಬೊಲ್ಪ್ಯಾಂನಿ’ (ಧನಿಯಾಂನಿ) ಶಿಕವ್ನ್ ದಿಲ್ಲ್ಯಾ ಪರ್ಮಾಣೆಂ, ಆನಿ ತಾಣಿಂ ನಾಚ್ಚೆಂಯೀ ತ್ಯಾಚ್ ವ್ಹಡಿಲಾಂಚ್ಯಾ ಹಿಶಾರ್‍ಯಾಂಕ್ ಲಾಗೊನ್. ತಿ ತಾಂಚಿ ಅನಿವಾರ್ಯತಾ. ಹ್ಯಾ ‘ಉಂದ್ರಾಂಕ್’ ಬೊಲ್ಪ್ಯಾಂಚೆಂ ಪೋಟ್ ಚಡ್ ಸುಶೆಗ್ ದಿತಾ ಮ್ಹಣ್ ತಾಂಚೆಂ ನಡ್ತೆಂ ರುಜು ಕರಿನಾಂಗೀ, ಆಸ್ಟಿನ್?! ಮಾಜ್ರಾನ್ ಉಂದ್ರಾಂಕ್ ಧರ್ನ್ ಖಾಂವ್ಚೆಂ ನೈಸರ್ಗಿಕ್. ಪುಣ್, ಆಪ್ಣಾಕ್‍ಚ್ ‘ಬೊಲ್ಪ್ಯಾ’ಚ್ಯಾ ಪಾಸ್ಳೆಂತ್, ಉಷ್ಟೆಂ, ಹಾಡಾಂ, ಚಿಂವ್ಡಾಂ ಮೆಳ್ತಾತ್ ಮ್ಹಳ್ಳ್ಯಾ ಅಬ್ಲೆಸಾಕ್ ಲಾಗೊನ್ ಫಿಚಾರ್ ಜಾತೆಲ್ಯಾ 420 ಉಂದ್ರಾಂಚೆಂ ಕಿತೆಂ ಮ್ಹಣ್ಚೆಂ? – ತುಂಚ್ ಸಾಂಗ್ ಆಸ್ಟಿನ್. ಹೆ ಎಕೇಕ್ ಪಾವ್ಟಿಂ ‘ಉಂದಿರ್’ಯೀ ಜಾತಾತ್, ಸಂದರ್ಭಾ ತೆಕಿದ್ ರೇಪಿಸ್ಟ್ (ರೇಬೀಸ್) ‘ಪೆಟೆ’ಯೀ ಜಾತಾತ್. ಚೊರುಂಕ್ ಮೆಳ್ಳ್ಯಾರ್ ‘ಮಾಜಾರ್’ಯೀ ಜಾತಾತ್, ಚಡೊಂಕ್ ಮೆಳ್ಳ್ಯಾರ್ ‘ಬೊಕುಲ್’ಯೀ ಜಾತಾತ್! ಹಾಂಚೆಂ ‘ಬಹು ಪಾತ್ರಾಭಿನಯ’ ಇತ್ಲೆಂ ಮಜ್ಭೂತ್‍ಗೀ, ಹಾಂಕಾಂ ಪಾತ್ಯೆಲ್ಲ್ಯಾಂಕ್ ಬರ್ಕತ್ ಮ್ಹಳ್ಳೆಂ ನಾ. ಅಸಲ್ಯಾ ಸುಣ್ಯಾ-ವಾಗ್ಟಾಂಕ್ ಕಸಲೆಂ ಸಿದ್ಧಾಂತ್ ಆಸತ್?! ಹೆ ಆಪ್ಣಾಕ್‍ಚ್ ವಿಕೊನ್ ಗೆಲ್ಲ್ಯಾ ಉಪ್ರಾಂತ್‍ಚ್ ನ್ಹಯ್ವೇ ಅಶೆಂ ಝಾಂಕುಳ್ತಾತ್; ಆಪ್ಲೆಂ ಮ್ಹಳ್ಳೆಂ ಸರ್ವಸ್ವ್ ‘ಸಮರ್ಪುನ್’ ದಿಲ್ಯಾ ಉಪ್ರಾಂತ್‍ಚ್ ನ್ಹಯ್ಗೀ ಹೆ ಅಶೆಂ ಕರ್ತಾತ್!? (ಚೆಡಿಯಾಂಕ್ ವ್ಯಕ್ತಿಚೆರ್ ನಿಷ್ಠಾಗೀ ದುಡ್ವಾಚೆರ್?!). ಆನಿ ತುಂ ಹಾಂಕಾಂ, ಆಲ್ತಾರ್ ಭುರ್ಗ್ಯಾಂಕ್ ಮಾದ್ರಿಂನಿ ಬೂದ್‍ಬಾಳ್ ಸಾಂಗ್‍ಲ್ಲೆಪರಿಂ, ಲಿಸಾಂವ್ ಶಿಕಯ್ತಾಯ್! ಬುಡವ್ನ್ ಭಾಕ್ರಿ ನ್ಹಯ್, ಬಗಾರ್, ಮ್ಹೆಳೆಂಚ್ ಸರ್ಪಡೊನ್ ಖಾತೆಲ್ಯಾಂಕ್, ಮ್ಹೆಳೆಂ ಆರಾವ್ನ್ ತಾಂತುಂಚ್ ಲೊಳ್ತೆಲ್ಯಾ ಜೀನಿಯಸಾಂಕ್ ಕಸಲಿ ಬೂದ್‍ಬಾಳ್ ನಟ್ವತಾ ಮ್ಹಣೊನ್ ತುಜೆಂ ಹೆಂ ರಾಜಾಂವ್-ರುದಾನ್, ಆಸ್ಟಿನ್? ಮ್ಹಾಕಾ ಕಳನಾ!

ತುಕಾ ಉಲ್ಲಾಸಿಜೆ ತುಜ್ಯಾ ಧಯ್ರಾಧಿಕ್ ಆನಿ ಶೀದಾ ಉಲ್ಯಾಕ್, ಆಸ್ಟಿನ್. ಭೋವ್ ವಾಜ್ಭಿ ಆನಿ ಗರ್ಜೆಚೆಂ ಪಂಥಾಹ್ವಾನ್ ದಿಲಾಂಯ್ ತುವೆಂ, ಕನ್ನಡ ಲಿಪಿ ಮುಖಾಂತ್ರ್ ಸಗ್ಳೆಂ ಆಪ್ಣಾವ್ನ್ ಆತಾಂ ನಾಗರಿ ಲಿಪಿಚೆಂ ಪೆಂಪಾರೆಂ ವ್ಹಾಜಯ್ತೆಲ್ಯಾಂಕ್. ತುಜ್ಯಾ ಸಂಪಾದಕೀಯಾ ಮುಖಾಂತ್ರ್ ತುವೆಂ, ನಾಗರಿ ಲಿಪಿ ಖಾತಿರ್ ವಕಾಲತ್ ಕರ್ತೆಲ್ಯಾಂಕ್, ಮ್ಹಣ್ಜೆ ನಾಗರಿ ವಾಪಾರಿಜೆ ಮ್ಹಣೊನ್ ಸೆರ್ಮಾಂವ್ ಸಾಂಗ್ತೆಲ್ಯಾಂಕ್, ‘ತುಮಿ ಕನ್ನಡ ಲಿಪಿಂತ್ ಬರಂವ್ಚೆಂ ಪಯ್ಲೆಂ ರಾವಯಾ ಆನಿ ತುಮ್ಚ್ಯಾಚ್ ನಾಗರಿ ಲಿಪಿಕ್ ವೆಂಗೊನ್ ಧರಾ’ ಮ್ಹಣ್ ಖಡಕ್ಕ್ ಸಾಂಗ್ಲಾಂಯ್. ಶಾಭಾಸ್ ತುಕಾ ಆಸ್ಟಿನ್, ಶಾಭಾಸ್.

ಹಾಂ, ಹೊ ಉಲೊ ಖಂಡಿತ್ ರಾಜಾಂವಿಕ್, ಆನಿ, ಅನಿವಾರ್ಯ್‍ಯೀ ವ್ಹಯ್. ಹಿಚ್ ಗಜಾಲ್ ಹ್ಯಾ ಆದಿಂ, ಮ್ಹಾಕಾ ಧರ್ನ್, ಸಬಾರಾಂನಿ ವ್ಯಕ್ತ್ ಕೆಲ್ಲಿ ಆಸಾ. ‘ಬುಡ್ಕುಲೊ’ ಇ-ಪತ್ರಾಂತ್‍ಯೀ ತಾಚೊ ಉಲ್ಲೇಖ್ ಜಾಲಾ. ಆತಾಂ ತುವೆಂ ತೆಂಚ್ ಶೀದಾ ಉತ್ರಾಂನಿ ಉಚಾರ್ಲಾಂಯ್. ಖಂಡಿತ್ ಜಾವ್ನ್, ‘ನಾಗರಿಚ್ ಕೊಂಕ್ಣೆಚಿ ಅಧಿಕೃತ್ ಲಿಪಿ; ನಾಗರಿಚ್ ಕೊಂಕ್ಣೆಚೆಂ ಅಸ್ತಿತ್ವ್, ಫುಡಾರ್-ಪರಿಹಾರ್; ನಾಗರಿ ಲಿಪಿ ವರ್ವಿಂಚ್ ಕೊಂಕ್ಣಿ ಸಾಹಿತ್ಯಾಚೆಂ, ಭಾಶೆಚೆಂ ಬರೆಂ ಜಾತಾ; ನಾಗರಿ ವರ್ವಿಂ ಕೊಂಕ್ಣೆಂತ್ ಎಕ್ವಟ್ ರುತಾ ಜಾತಾ’ ಇತ್ಯಾದಿ ಮಹಿಮೆಂಚಿ ವ್ಹಡ್ವಿಕಾಯ್ ಉಚಾರ್ತೆಲ್ಯಾಂನಿ ‘ತಿಚ್ ನಾಗರಿ ಲಿಪಿ ಆಪ್ಣಾಯ್ಜೆ’ ಮ್ಹಣೊನ್ ಹೆರಾಂ ಥಾವ್ನ್ ಸಾಂಗಯ್ಜೆ ಪಡ್ತಾ ಮ್ಹಳ್ಳಿ ಗಜಾಲ್ ಮಾತ್ರ್ ನಾಲಿಸಾಯೆಚಿ. ಹ್ಯಾ ಲಜ್ಮಾಂಡ್ಯಾಂಕ್ ಆಪ್ಣೆಂ ಹೆರಾಂಕ್ ಉಪಾದೆಸ್ ಸಾಂಗ್ಚ್ಯಾ ಪಯ್ಲೆಂ ತೆಂ ಖುದ್ ಆಪ್ಣೆಂಚ್ ಪಾಳಿಜೆ ಮ್ಹಳ್ಳೆಂ ಕಳಿತ್ ನಾ ಮ್ಹಳ್ಯಾರ್…!? ಶೀ, ಹಳ್ಶಿಕ್ ಗಜಾಲ್.

ನಿಜಾಯ್ಕೀ ಹೆ ಹಳ್ಶಿಕ್‍ಚ್!

ತುಂಚ್ ಸಾಂಗ್, ಕೊಣೀ ಪುಣೀ ಮ್ಹೆಳೆಂ ಸೆವ್ನ್ ಭಾಶೆಚೆರ್, ಸಾಹಿತ್ಯಾಚೆರ್ ‘ಶೆಣ್’ ಉಡಯ್ತಾತ್‍ಗೀ?! ಕೊಣಾಚಿಗೀ ‘ಸುಪಾರಿ’ ಘೆವ್ನ್ ಕೊಣಾ ಕೊಣಾಚೆರ್ ಮ್ಹೆಳೆಂ ಉಡಯ್ತೆಲೆ, ದೆಸ್ವಾಟ್ ಕರ್ತೆಲೆ ಸಾಹಿತಿಕ್ ವರ್ಗಾಚೆಗೀ ವಾ ಅತ್ಯಾಚಾರಿ ಕ್ರಿಮಿನಲ್ ವರ್ಗಾಚೆಗೀ ಮ್ಹಳ್ಳೆಂ ತುವೆಂ, ಹಾಂವೆಂ ಆನಿ ಲೊಕಾನ್ ನಿಚೆವ್ ಕರ್ಯೆತ್ ನ್ಹಯ್ಗೀ? ವೀಕ್ ವಾಂಟ್ತೆಲ್ಯಾಂಕ್, ಅತ್ಯಾಚಾರಿಂಕ್, ಖುನಿಗಾರಾಂಕ್ ‘ನಾಗರಿಕ್’ ಮ್ಹಣೊಂಕ್ ಜಾತಾಗೀ? ಅಮೆರಿಕಾಂತ್ ಅಸಲ್ಯಾಂಕ್ ಕಶೆಂ ಚಲಯ್ತಾತ್, ಖಂಯ್ ದವರ್ತಾತ್ ಮ್ಹಳ್ಳೆಂ ತುಂಚ್ ಬರೆಂ ಕರ್ನ್ ಜಾಣಾಂಯ್, ನ್ಹಯ್ಗೀ ಆಸ್ಟಿನ್?

ಎಕ್ಲೊ ರಾಜಕಾರಣಿ ಎಕಾ ಪಾಡ್ತಿಂತ್ ಆಸ್ತಾ, ತಾಕಾ ಆಪ್ಲ್ಯಾ ಪಾಡ್ತಿಚೆರ್ ಮೋಗ್ ಆಸ್ತಾ ಆನಿ ತೊ ತ್ಯಾ ಪಾಡ್ತಿಚೊ ಖಾಲ್ತೊ ಸೊಜೆರ್ ಜಾವ್ನಾಸ್ತಾ. ಜರ್ ತಾಕಾ ಆಪ್ಲಿ ಪಾಡ್ತ್ ಪಸಂದ್ ಜಾಯ್ನಾ, ತೆದ್ನಾಂ ತೊ ತಿ ಸೊಡ್ನ್, ಪಸಂದ್ ಆಸ್ಚ್ಯಾ ದುಸ್ರ್ಯಾ ಪಾಡ್ತಿಕ್ ವೆತಾ. ಹೆಂ ಸಹಜ್. ಪುಣ್ ಎಕ್ಲ್ಯಾಕ್ ಪ್ರಚಾರ್-ಹುದ್ದ್ಯಾ ಖಾತಿರ್ ಎಕಾ ಪಾಡ್ತಿಂತ್ ಆಸೊಂಕ್ ಜಾಯ್, ಫಾಯ್ದ್ಯಾ ಖಾತಿರ್ ಅಧಿಕಾರಾರ್ ಆಸ್ಚ್ಯಾ ಪಾಡ್ತಿಂತ್ ರಾವೊಂಕ್ ಜಾಯ್, ಆನಿ ದುಸ್ರ್ಯಾ ಇರಾದ್ಯಾ ಖಾತಿರ್ ವೆಗ್ಳ್ಯಾಚ್ ಎಕಾ ಪಾಡ್ತಿಂತ್ ಜಾಗೊ ಜಾಯ್ ಮ್ಹಳ್ಯಾರ್ ಸಾಧ್ಯ್ ಆಸಾಗೀ? ಖಂಯ್ಸರೀ ಅಶೆಂ ಜಾಂವ್ಕ್/ಕರುಂಕ್ ಸೊಡ್ತಾತ್‍ಗೀ?

ಕೊಣೆಂಯೀ ಖಂಚ್ಯಾಯ್ ಪಾಡ್ತಿಂತ್ ಆಸ್ಯೆತ್, ದುಸ್ರ್ಯಾ ಪಾಡ್ತಿಕ್ ವಚ್ಯೆತ್. ತಿ ತಾ’ತಾಂಚಿ ಮರ್ಜಿ, ಸ್ವಾತಂತ್ರ್ಯ್ ಆನಿ ಹಕ್ಕ್‌ಯೀ ವ್ಹಯ್. ತೆಂ ನೆಗಾರುಂಕ್ ಜಾಯ್ನಾ.

ಪುಣ್, ಎಕಾಚ್ ವೆಳಾರ್ ಎಕ್ಲ್ಯಾನ್ ವೆವೆಗ್ಳ್ಯಾ ಪಾಡ್ತಿಂನಿ ಆಸೊಂಕ್ ಜಾತಾಗೀ, ಆಸ್ಟಿನ್? ಬಿಲ್ಕುಲ್ ನಾ ನೆ? ಜರ್ ತಶೆಂ ಕೊಣೀ ಆಸಾತ್/ಕರ್ರಾತ್ ಮ್ಹಣ್ ಜಾಲ್ಯಾರ್ ತೆ ಎಕ್‍ಚ್ ಗೂಢಚಾರಿ, ಡಬಲ್ ಏಜೆಂಟ್, ವಿಶ್ವಾಸ್‍ಘಾತ್ಕಿ, ದ್ರೋಹಿ, ಸ್ವಾರ್ಥಿ, ದುಷ್ಕರ್ಮಿ, ದುಸ್ಮಾನಾಂನಿ ಪ್ಲಾಂಟ್ ಕೆಲ್ಲೆ ಅನ್ನಾಡಿ, ಭಯೋತ್ಪಾದಕ್….. ತಸಲೆ ಕೊಣೀ ಜಾವ್ನಾಸ್ತಾತ್. ತಿ ಗಜಾಲ್ ಭೋವ್ ಸರಳ್.

ಆಪ್ಣಾಕ್ ಸಗ್ಳೆಂ ಫಾವೊ ಕರ್ನ್ ದಿಲ್ಲ್ಯಾ ಲಿಪಿಕ್ (ಲಿಪಿ ಮ್ಹಳ್ಯಾರ್ ವ್ಯವಸ್ಥಾ, ಗಾಂವ್, ಲೋಕ್, ಸರ್ಕಾರ್ – ಸಕ್ಕಡ್) ಸರ್ವ್ ಅಕ್ಮಾನ್, ಅನ್ಯಾಯ್ ಆನಿ ದ್ರೋಹ್ ಕರ್ತೆಲ್ಯಾಂಚ್ಯಾ ಪಾಯಾಂಕ್ ಪಡೊನ್, ತಾಂಚ್ಯಾ ಹಿಕ್ಮತ್ಯಾಂಕ್, ದುಷ್ಟ್ ಯೋಜನಾಂಕ್ ಖಾಂದ್ ಮಾರ್ನ್ ಜಿಯೆತೆಲ್ಯಾಂಕ್ ಕಸಲಿ ನಾಗರಿಕತಾ, ಸಂಸ್ಕೃತಿ, ಸಂಸ್ಕಾರ್, ಮನ್ಶ್ಯಾಪಣ್ ಆನಿ ಮೌಲ್ಯಾಂ ಆಸಾತ್?! ತುವೆಂ ಸಾಂಗ್‍ಲ್ಲೆಪರಿಂಚ್, ಹೆ ಉಟ್ತಾ ಬಸ್ತಾನಾ ನಾಗರಿ ಖಾತಿರ್ ಝುಜ್ ಮಾಂಡ್ತಾತ್, ತಿಕಾ ವೈಭವ್ ಜೊಡುನ್ ದೀಂವ್ಕ್ ಪೆಚಾಡ್ತಾತ್; ತರೀ ಹಾಂಕಾಂ ತಿಚ್ ನಾಗರಿ ಆಪ್ಣಾಂವ್ಕ್ ಕಿತ್ಯಾಕ್ ನಾಕಾ??? (ತಿ ಫಕತ್ ಪ್ರಶಸ್ತಿ-ಪುರಸ್ಕಾರ್ ಜೊಡ್ಚ್ಯಾ ಪ್ರಕ್ರಿಯೆಂಕ್ ಸೀಮಿತ್!?). ‘ನಾಗರಿಚ್ ಜಾಯ್ಜೆ’ ಮ್ಹಣ್ತೆಲೆ ಹೆ ಕಿತ್ಯಾಕ್ ಕನ್ನಡ ಲಿಪಿಂತ್‍ಚ್ ಬರಯ್ತಾತ್, ಫಾಯ್ಸ್ ಕರ್ತಾತ್? ನಾಗರಿ ಶಿವಾಯ್ ಕೊಂಕ್ಣೆಕ್ ಫುಡಾರ್ ನಾ ಮ್ಹಣ್ ಭಾಸ್ತೆಲೆ ಹೆ ಕಿತ್ಯಾಕ್ ನಾಗರಿಕ್ ಕೆದ್ನಾಂಯೀ ಇಂಪ್ಲಿಮೆಂಟ್ ಕರಿನಾಂತ್.

ತುವೆಂ ಸಾಂಗ್‍ಲ್ಲೆಪರಿಂ, ಹಾಣಿಂ ಜರ್ ತಾಂಕಾಂ ನಾಗರಿ ಲಿಪಿಚೆರ್ ನೀಜ್ ಮೋಗ್, ನಿಯತ್ತ್ ಆಸ್ಲ್ಯಾರ್ ತಾಣಿಂ ಹ್ಯಾ ಫುಡೆಂ ಸಗ್ಳೆಂ ನಾಗರಿ ಲಿಪಿಂತ್‍ಚ್ ಬರಯ್ಜೆ. ನಾಗರಿ ಶಿವಾಯ್ ದುಸ್ರಿ ಲಿಪಿ, ಪ್ರತ್ಯೇಕ್ ಕರ್ನ್ ಕನ್ನಡ, ಉಪಯೋಗ್ ಕರುಂಕ್‍ಚ್ ನಜೊ. ಹೆ ಜೆದ್ನಾಂ ನಾಗರಿ ಲಿಪಿ ವಾಪಾರ್ತಾತ್ ಆನಿ ತಿಚೊ ಪೋಸ್ ಕರ್ತಾತ್, ತೆದ್ನಾಂ ಹಾಂಕಾಂ ಪಳೆವ್ನ್ ಆಮಿಯೀ, ‘ಹಾ, ವ್ಹಯ್ ನಾಗರಿ ವರ್ವಿಂ ಕೊಂಕ್ಣೆಕ್ ಸರ್ವ್ ಬರೆಂ ಜಾತಾ’ ಮ್ಹಳ್ಳೆಂ ಸಮ್ಜತಾನಾ ಸಕ್ಕಡ್‍ಯೀ ನಾಗರಿ ಲಿಪಿ ಆಪ್ಣಾವ್ನ್ ಕೊಂಕ್ಣಿ ಮಾಯೆಕ್ ವೈಭವ್ ಹಾಡುಂಕ್ ಸಾಧ್ಯ್ ಜಾತಾ, ನ್ಹಯ್ಗೀ? (ತೆದ್ನಾಂ ಆಮಿಯೀ ಸ್ವಖುಶೆನ್ ನಾಗರಿ ಲಿಪಿಚೆ ಸೊಜೆರ್ ಜಾವ್ಯಾಂ… ತೆದ್ನಾಂ ಕೊಂಕ್ಣೆಚೊ ‘ನೀಜ್ ಎಕ್ವಟ್’ ಜಾತಾ ಮ್ಹಣ್ತೆಲ್ಯಾಂಕ್ ಖೂಬ್ ಸಂತೊಸ್ ಆನಿ ದಾದೊಸ್ಕಾಯ್ ಲಾಭ್ತೆಲಿ, ನ್ಹಯ್ಗೀ ಆಸ್ಟಿನ್!).

ತರ್ ಹಾಂಚೊ ‘ಸೆರ್ಮಾಂವ್’ ಕೊಣಾಕ್? ಆಸ್ಟಿನ್, ತುವೆಂ ಜೊಕ್ತೆಂ ಸವಾಲ್ ಉಡಯ್ಲಾಂಯ್, ಸೂಕ್ತ್ ಪಂಥಾಹ್ವಾನ್ ದಿಲಾಂಯ್. ಪಳೆಯಾಂ, ಆತಾಂ ಹೆ ನಾಕಾರಿ ಸೊಜೆರ್ ಆಪ್ಲ್ಯಾ ಜಿವಿತಾಂತ್ ನಾಗರಿಕ್ ಕಸಲೆಂ ಸ್ಥಾನ್ ಫಾವೊ ಕರ್ತಾತ್ ಮ್ಹಣ್! ಹಾಂಕಾಂ ನಿಯತ್ತ್, ಸಿದ್ಧಾಂತ್, ಲಜ್, ರೀತ್ ನೀತ್ ಮ್ಹಳ್ಳೆಂ ಕಿತೆಂಚ್ ನಾ ಮ್ಹಳ್ಳೆಂ ಸರ್ವ್ ಜಾಣಾಂತ್. ತರೀ, ಕೊಂಕ್ಣೆಚ್ಯಾ ನಾಂವಾಂನ್ ತುಜೆ ಥಾವ್ನ್ ಡೊಲರಾಂ ಭೊಕಾವ್ನ್ ಚರ್ಬೆಲ್ಲೆ ಹೆ, ತುಜ್ಯಾ ಹ್ಯಾ ಪ್ರಾಮಾಣಿಕ್ ಉಲ್ಯಾಕ್ ಕಿತ್ಲಿ ಮರ್ಯಾದ್ ದಿತಾತ್ ಮ್ಹಳ್ಳೆಂ ಪಳೆಂವ್ಕ್ ಜಾಯ್ತೆ ಜಣ್ ಆತುರಾಯೆನ್ ಆಸಾತ್.

ಹಾಂ, ತುವೆಂ ಆವಯ್ಚೆಂ ಉಲ್ಲೇಖ್ ಕೆಲಾಂಯ್ ಆಸ್ಟಿನ್. ಕೊಂಕ್ಣೆಚ್ಯಾ ಸಂದರ್ಭಾರ್, ಭಾಶೆಕ್ ಆವಯ್ಚೆಂ ಸ್ಥಾನ್-ಮಾನ್ ಮ್ಹಳ್ಳೆಂ ಭೋವ್ ಸ್ವಾಭಾವಿಕ್. ಪುಣ್ ಅನುಪ್ಕಾರ್‍ಯಾಂಕ್, ಘಾತ್ಕ್ಯಾಂಕ್, ಹೆರಾಂಕ್ ಲಗಾಡ್ ಕಾಡ್ನ್ಂಚ್ ಆಪ್ಣೆಂ ಜಿಯೆಜೆ, ಹೆರಾಂಚೆಂ ಫಾರ್ನ್‍ಂಚ್ ಆಪ್ಲೆಂ ಪೋಟ್ ಭರಜೆ, ಅನ್ನಾಡ್ಪಣಾಂ-ಅನೈತಿಕ್ ಕೃತ್ಯಾಂ-ಅನಾಚಾರ್-ಅತ್ಯಾಚಾರ್ ಚಲವ್ನ್ಂಚ್ ಆಪ್ಲೆಂ ‘ತಾಲೆಂತ್’ ದಾಕಯ್ಜೆ, ಆಪ್ಲಿ ‘ಸಾಮರ್ಥಿ’ ಉಜ್ವಾಡಾಯ್ಜೆ ಮ್ಹಳ್ಳೆಂ ಜಿವಿತಾಚೆಂ ‘ಖಾಸ್’ ಧೋರಣ್-ನಿಯಮ್ ಜಾವ್ನ್ ಘೆತ್ಲೆಲ್ಯಾಂಕ್ ಅಸಲಿಂ ಮಾನವೀಯ್, ಭಾವನಾತ್ಮಕ್ ವರ್ಣನಾಂ, ಸಮೀಕರಣಾಂ ಖಂಯ್ ನಟ್ವತಾತ್ ಆಸ್ಟಿನ್? ಕಸಾಯ್‍ಗಾರಾ ಲಾಗಿಂ ಮೊನ್ಜಾತಿಂಚ್ಯಾ ಮಾನವ್ ಹಕ್ಕಾಂ ವಿಶಿಂ, ಅತ್ಯಾಚಾರಿ/ಖುನಿಗಾರಾ ಲಾಗಿಂ ಮನ್ಶ್ಯಾಪಣಾ ವಿಶಿಂ, ಚೊರಾ/ಲುಟ್ಕಾರಾ ಲಾಗಿಂ ಪ್ರಾಮಾಣಿಕ್‍ಪಣಾ ವಿಶಿಂ ಸಾಂಗ್ಲ್ಯಾರ್ ಕಿತೆಂಯೀ ಫಾಯ್ದೊ ಜಾತಾಗೀ, ಆಸ್ಟಿನ್? ಆನಿ, ಮುಖ್ಯ ಜಾವ್ನ್, ತೆ ಬದಲ್ತಾತ್‍ಗೀ? ಆಪ್ಲ್ಯಾ ಸ್ವಾರ್ಥಾ ಖಾತಿರ್, ಫಾಯ್ದೊ ಜೊಡ್ತಾ ಮ್ಹಣ್ ಜಾಲ್ಯಾರ್ ಆವಯ್ಕೀ ವಿಕುಂಕ್ ಪಾಟಿಂ ಸರನಾತ್‍ಲ್ಲ್ಯಾಂ ಲಾಗಿಂ ಆದರ್ಶಾಂ ಉಲವ್ನ್ ಕಿತೆಂ ಬರೆಂಪಣ್ ಜೊಡ್ಯೆತ್…?!

ಆಸೊಂ. ಹೆಂ ಸರ್ವ್ ಉಲಂವ್ಕ್ ಗೆಲ್ಯಾರ್ ತಾಕಾ ಅಂತ್ಯ್ ನಾ. ಹರಾಮಿ, ಪಿಡೇಸ್ತ್, ಕುಸ್ಡ್ಯಾ ಮನಾಚ್ಯಾ ಅನ್ನಾಡಿಂ ಥಾವ್ನ್ ನೀತ್ ಅಪೇಕ್ಸುಂಚೆಂಚ್ ಮೂರ್ಖ್‍ಪಣ್. ತೆಂ ಕಿತೆಂಯೀ ಆಸೊಂ, ಆಮ್ಚೆ ತಸಲ್ಯಾ ಬರಯ್ಣಾರಾಂಕ್, ಆಮ್ಕಾಂ ಭೊಗ್ಚ್ಯೊ ಗಜಾಲಿ ವ್ಯಕ್ತ್ ಕರಿನಾಸ್ತಾನಾ ರಾವೊಂಕ್ ಜಾಯ್ನಾ. ಖೊಟೆ, ಮತ್ಲಬಿ ಮನಿಸ್, ಕೆದ್ನಾಂಯ್, ಆಪ್ಲ್ಯಾ ಫಾಯ್ದ್ಯಾಚೆಂಚ್ ಚಿಂತಾತ್. ತಾಂಕಾಂ ನಿಯತ್ತ್ ಮ್ಹಳ್ಳೆಂ ಬಿಲ್ಕುಲ್ ಆಸನಾ. ಭೋವ್ಶಾ, ಅಸಲೆ ದಗಲ್ಬಾಜಿ ಆಸ್‍ಲ್ಲ್ಯಾನ್, ಆಮಿ ತರೀ ಸಾರ್ಕ್ಯಾ ವಾಟೆನ್ ಚಲ್ಚೆಂ ಚಡ್ ಗರ್ಜೆಚೆಂ ಆನಿ ಅನಿವಾರ್ಯ್ ಮ್ಹಳ್ಳೆಂ ಆಮ್ಕಾಂ ಗಮ್ತಾ.

ಭಾಶೆಕ್ ಜಾಂವ್ ಹೆರ್ ಖಂಯ್ಚ್ಯಾಯ್ ಸಂಗ್ತಿಕ್, ಬರೆಂ ಜಾಂವ್ಚೆಂ ಫಕತ್ ಬರೆಂ ಕರ್ತೆಲ್ಯಾಂ ಥಾವ್ನ್ ಮಾತ್ರ್. ದೆಕುನ್, ಹಾಂವ್ ಆನಿ ತುಂ, ಕೊಂಕ್ಣಿ ಮಾಯೆಕ್ ಕಿತ್ಲೆಂ, ಕಶೆಂ ಬರೆಂ ಕರುಂಕ್ ತಾಂಕ್ತಾ ತೆಂ ಕರುಂಯಾಂ. ಹ್ಯಾ ಮಿಸಾಂವಾಂತ್ ಆಮಿ ಎಕೀನ್ಪಣಾನ್ ವಾವುರ್ಯಾಂ. ಆಮ್ಚ್ಯಾ ಹ್ಯಾ ವಾವ್ರಾಂತ್ ಬರ್‍ಯಾ ಮನಾಚ್ಯಾ ವ್ಯಕ್ತಿಂಚೊ ಸಹಕಾರ್, ಪಾಟಿಂಬೊ ಮೆಳ್ತಾ ಮ್ಹಳ್ಳೊ ಭರ್ವಸೊ ಆನಿ ಪಾತ್ಯೆಣಿ ಆಮಿ ದವರ್ಯಾಂ. ಆಮಿ ಸತ್-ನೀತ್ ಕೆದ್ನಾಂಯೀ ಸಾಂಬಾಳ್ಯಾಂ. ವಾಂಕ್ಡ್ಯಾ ವಾಟೆನ್ ವೆಚೆ ಸಬಾರ್ ಆಸಾತ್ ತರೀ, ಆಮಿ ನೀಟ್ ಆನಿ ಸಾರ್ಕ್ಯಾ ವಾಟೆನ್‍ಂಚ್ ಚಲ್ಯಾಂ.

ದೇವ್ ಬರೆಂ ಕರುಂ.

ಕೊಂಕ್ಣೆ ಥಂಯ್ ಸದಾಂಚ್ ತುಜೊ ಖಾಲ್ತೊ, ವಿಶ್ವಾಸಿ ಮಿತ್ರ್,

-ಡೊನಾಲ್ಡ್ ಪಿರೇರಾ, ಸಂಪಾದಕ್, ಬುಡ್ಕುಲೊ ಇ-ಪತ್ರ್

ಕೊಡು ಕಸಾಯ್!: ಆಸ್ಟಿನ್, ತುಜ್ಯಾ ಬರ್ಪಾಂತ್ ತುವೆಂ ಆವಯ್ ಆನಿ ಭುರ್ಗ್ಯಾ ಮಧ್ಲಿ ಪವಿತ್ರ್ ಗಜಾಲ್ ಉಲ್ಲೇಖ್ ಕೆಲ್ಯಾಯ್. ಪುಣ್, ಹಾ ಕಟಾ..! ಬಾಳ್ಶ್ಯಾನ್ ಪಾನೊ ಚಿಂವ್ತಾನಾ ಆವಯ್ಕ್ ಆಪಡ್ಚೆಂ ತರೀ ನೈಸರ್ಗಿಕ್. ತಿ ಕರ್ನಿ ಭೋವ್ ಅಮೊಲಿಕ್, ನೆಣ್ತಿ, ಮಾಸೂಮ್, ನಿಸ್ಕಳ್ ಆನಿ ನಿಷ್ಕಳಂಕ್. ಪುಣ್ ವ್ಹಡ್ ಜಾಲ್ಲ್ಯಾ ವ್ಯಕ್ತಿನ್ ತಶೆಂ ಕರ್ಚೆಂ ಕಸಲೆಂ ನಡ್ತೆಂ ಜಾವ್ನಾಸ್ತಾ?! ಅಸಲಿಚ್ ವಿಕೃತ್ ಗಜಾಲ್, ಥೊಡ್ಯಾ ಅವ್ಕಾಸ್‍ವಾದಿಂಚಿ. ಹಾಂಕಾಂ ಆವಯ್ಚೆರ್ ಕಸಲೊಚ್ ಮೋಗ್ ಆಸನಾ. ತಿಚೆ ಥಾವ್ನ್ ಕಿತೆಂ ಜೊಡುಂಕ್, ಅಪಹರ್ಸುಂಕ್ ಸಾಧ್ಯ್ ಮ್ಹಳ್ಳಿಚ್ ಖಂತ್ ತಾಂಕಾಂ. ಕೊಂಕಣ್ ಕೊಗುಳೆನ್ ಮಾಂಯ್‍ಭಾಶೆಕ್ ಆವಯ್ ಮ್ಹಣ್ ಆಪಯಿಲ್ಲೆಂ ತೊ ಕಿತ್ಲೊ ಸತ್ತಿ ಮ್ಹಣ್ಚ್ಯಾಕ್ ಅಪ್ರತಿಮ್ ದೃಷ್ಟಾಂತ್. ಪುಣ್ ಹೆ ಆಧುನಿಕ್ ‘ಜುದಾಸ್’ ಭಾಶೆಕ್ ‘ಆವಯ್’ ಮ್ಹಣ್ ಮಾಂದಿನಾಂತ್. ತಾಂಕಾಂ ತಿ ಫಕತ್ ‘ಭೋಗ್’ ಕರುಂಕ್ ಆಸ್ಚಿ ಮೆಟೀರಿಯಲ್. ಹಾಂಕಾಂ ‘ವ್ಯಭಿಚಾರ್’ ಆಧಾರುಂಕ್ ಏಕ್ ‘ಅವ್ಕಾಸ್’ ಜಾಯ್. ಸಕ್ಡಾಂನಿ ‘ಆವಯ್’ ಮ್ಹಣ್ ಆಪಂವ್ಚ್ಯಾ ಸಂಗ್ತಿಕ್ ಹೆ ‘ಬಾಯ್ಲ್’ ಮ್ಹಣ್ತಾತ್..! ಮ್ಹಳ್ಯಾರ್ ಹೆ ಕಿತ್ಲೆ ವಿದ್ರೂಪ್, ವಿಕೃತ್, ವಿಕಾಳ್ ಮ್ಹಳ್ಳೆಂ ಹಾಂತುಂ ಕಳ್ತಾ. ಹಾಂಕಾಂ ಏಕ್ ‘ಬಾಯ್ಲ್’ ಪಾವನಾ; ದೆಕುನ್ ‘ಪಾಂಚ್ ಬಾಯ್ಲೊ’ ಮ್ಹಣ್ ಆಪುಟ್ ಅತ್ಯಾಚಾರಿಂಪರಿಂ ಫೈಸಲ್ ದಿತಾತ್!! ಹಾಂಚಿ ಮನಸ್ಥಿತಿ, ಹಾಂಚೊ ಮನೋಭಾವ್, ಹಾಂಚೆ ಇರಾದೆ ಕಸಲೆ ಮ್ಹಳ್ಳ್ಯಾಕ್ ಹಾಂಚಿಂ ಉತ್ರಾಂಚ್ ರುಜ್ವಾತ್ ದಿತಾತ್ (ಕರ್ನ್ಯೊ ತಾಚ್ಯಾಕೀ ಭಿರಾಂಕುಳ್). ಆನಿ ತುಂ ಎಕ್ಲೊ ತಾಂಕಾಂ ಆವಯ್-ಬಾಳಾಚಿ ಗಜಾಲ್ ಸಾಂಗ್ತಾಯ್. ಹೆ ‘ಆವಯ್ಕ್ ವಿಕುನ್ ಖಾಂವ್ಚ್ಯಾ ಕಾಸ್ತಾಚೆ’ ಮ್ಹಳ್ಳೆಂ ತುಂ ಕಶೆಂ ವಿಸ್ರಲೊಯ್, ಆಸ್ಟಿನ್?!

Send Feedback to: budkuloepaper@gmail.com

Like us at: www.facebook.com/budkulo.epaper

ಆಸ್ಟಿನ್ ಡಿಸೋಜಾಕ್ ವಿ.ರೊ. ಸ್ಮಾರಕ್ ಸಮನ್ವಯ ಪ್ರಶಸ್ತಿ

ಅಮೆರಿಕಾಚ್ಯಾ ಆಸ್ಟಿನ್ ಡಿಸೋಜಾ ಪ್ರಭುಚೆಂ ಸಂದರ್ಶನ್

The post ಶಾಭಾಸ್ ಆಸ್ಟಿನ್! ವೀಜ್ ಸಂಪಾದಕಾಕ್ ಉಗ್ತೆಂ ಪತ್ರ್ appeared first on Budkulo.

ಆಜ್ ಆಮಿ ಫಕತ್ ಎಕಾ ಗಜಾಲಿಚೆರ್ ಉಜ್ವಾಡ್ ಫಾಂಕಯ್ತಾಂವ್. ಪುಣ್ ತ್ಯಾ ಫುಡೆಂ ಥೊಡಿ ಚರಿತ್ರಾ ಆನಿ ಮಹತ್ವಾಚಿಂ ಘಡಿತಾಂ ಜಾಣಾಂ ಜಾಂವ್ಯಾಂ.

ಕೊಂಕ್ಣಿ ಭಾಷೆಚಿ ಗ್ರೇಸ್ತ್‌ಕಾಯ್ ವಾ ದುರ್ದಶಾಯೀ ಮ್ಹಣ್ಯೆತ್, ಕೊಂಕ್ಣಿ ಲೋಕ್ ಸಬಾರ್ ಪ್ರದೇಶಾಂನಿ ಶಿಂಪಡ್‍ಲ್ಲ್ಯಾನ್, ಸಾಹಿತ್ಯಿಕ್ ಗಜಾಲಿಂಕ್ ಯೆತಾನಾ ಜಾಯ್ತೆ ಗೊಂದೊಳ್, ಘುಸ್ಪಡ್ ಆನಿ ಧೊಶಿ ಫುಡ್ ಜಾಲ್ಯಾತ್. ಹೆಂ ಫಕತ್ ಬರವ್ಪಾಕ್ ಸಂಬಂಧ್ ಜಾವ್ನ್ ಮಾತ್ರ್ ಉದೆತಾ ಶಿವಾಯ್ ಜೆರಾಲ್ ಲೊಕಾಕ್ ಹ್ಯೊ ಗಜಾಲಿ ಅನವಶ್ಯ್, ಆನಿ ತಾಂಕಾಂ ಹೆಂ ಸಾಂಗ್ಲ್ಯಾರೀ ಸಮ್ಜನಾ. ಕಿತ್ಯಾಕ್ ಮ್ಹಳ್ಯಾರ್, ಲೋಕ್ ಭೋವ್ ಮೊಗಾನ್ ಆನಿ ಅಭಿಮಾನಾನ್ ಕೊಂಕ್ಣಿ ಭಾಸ್ ಉಲವ್ನ್, ಜಗವ್ನ್ ಆಯ್ಲಾ. ತಾಂಕಾಂ ಅಸಲೆ ಲಾಪ್ಡೆ ಅಪ್ರಸ್ತುತ್ ಆನಿ ಗರ್ಜೆ ಭಾಯ್ಲೆ.

ಸಾಹಿತ್ಯಿಕ್ ವಿಚಾರಾಂಕ್, ಮ್ಹಳ್ಯಾರ್, ಏಕ್ ಭಾಸ್ ಬರಂವ್ಕ್ ಲಿಪಿ ಜಾಯ್ ಪಡ್ತಾ. ಸಂಸಾರಾಂತ್, ಭಾರತಾಂತ್ ಹಜಾರಾಂನಿ ಭಾಸೊ ಆಸಾತ್. ಪುಣ್ ಸಕ್ಕಡ್ ಭಾಸೊ ಬರ್ಪಾಂತ್ ನಾಂತ್. ಥೊಡ್ಯೊ ಪ್ರಮುಖ್ ಭಾಸೊ ಮಾತ್ರ್ ಅಧಿಕೃತ್ ಥರಾನ್ ವಾಪಾರ್ಚ್ಯೊ. ಸಂಸಾರಾಚೆರ್ ಪ್ರಭಾವ್ ಘಾಲ್ಲಿ ಇಂಗ್ಲಿಷ್, ತಶೆಂಚ್ ಹಿಂದಿ, ಮರಾಠಿ ತಸಲ್ಯೊ ಜಾಯ್ತೊ ಭಾಸೊ, ಆಪ್ಲಿಚ್ ಸ್ವಂತ್ ಲಿಪಿ ನಾತ್‍ಲ್ಲ್ಯಾನ್, ಹೆರ್ ಲಿಪಿ ವಾಪಾರ್ತಾತ್. ಇಂಗ್ಲಿಷ್ ಭಾಸ್ ರೋಮನ್ ಸ್ಕ್ರಿಪ್ಟ್ (ರೋಮಿ ಲಿಪಿ) ವಾಪಾರ್ತ್ತಾತ್ ತರ್, ಹಿಂದಿ, ಮರಾಠಿ ನಾಗರಿ (ಆತಾಂ ದೇವ್‍ನಾಗರಿ ಮ್ಹಣ್ತಾತ್!) ಲಿಪಿಂತ್ ಬರಯ್ತಾತ್.

ತಶೆಂಚ್ ಕೊಂಕ್ಣಿ ಭಾಶೆಕ್‍ಯೀ ಸ್ವಂತ್ ಲಿಪಿ ಚಲಾವಣೆರ್ ನಾ. ಪುಣ್ ಕೊಂಕ್ಣಿ ಭಾಸ್ ಪಯ್ಲೆಂ ಬರಯಿಲ್ಲಿ ಕನ್ನಡ ಲಿಪಿಂತ್ ಮ್ಹಣ್ ಜಾಣಾರಿ ಸಾಂಗ್ತಾತ್. ತಾಂತುಂ ಸತ್ ಆಸಾ. ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣಿ ಭಾಸ್ ಆಸ್‍ಲ್ಲಿ ಗೊಂಯಾಂತ್. ಆನಿ ಗೊಂಯ್ ಎಕಾ ತೆಂಪಾರ್ ಕನ್ನಡಾಚ್ಯಾ ಕದಂಬ ರಾಯ್ ಕುಳಿಯೆ ಖಾಲ್ ಆಸ್‍ಲ್ಲೆಂ (ಗೊಂಯ್ಚ್ಯಾ ಸರ್ಕಾರಿ ಬಸ್ಸಾಂಚೊ ಸಂಸ್ಥೊ ಕದಂಬ ಟ್ರಾನ್ಸ್‌ಪೋರ್ಟ್ ಮ್ಹಳ್ಳೆಂ ತುಮಿ ಉಡಾಸ್ ಕರ್ಯೆತ್). ತೆದ್ನಾಂ ಥಂಯ್ಚೊ ಲೋಕ್ ಕೊಂಕ್ಣಿ ಭಾಸ್ ಕನ್ನಡ ಲಿಪಿಂತ್ ಬರಯ್ತಾಲೊ. ಉಪ್ರಾಂತ್ ಪುಡ್ತುಗೆಜಾಂನಿ ಜಾಯ್ತಿ ವೀದ್‍ವಾವ್ಳಿ ಆನಿ ದೆಸ್ವಾಟ್ ಕೆಲ್ಲ್ಯಾನ್ ಕೊಂಕ್ಣಿ ಭಾಶೆಚೆ ದಾಖ್ಲೆಯೀ ಆಳ್ವೊನ್ ಗೆಲ್ಯಾತ್ ಮ್ಹಣ್ತಾತ್.

ಹೆರ್ ವ್ಹಡ್ ಭಾಶೆಂನಿ ಸಾಹಿತ್ಯಾಚೆಂ ನಿರ್ಮಾಣ್ ಭೋವ್ ಆದಿಂ ಥಾವ್ನ್ ಜಾಲಾಂ. ಕೊಂಕ್ಣೆಂತ್ ವ್ಹಡ್ ಮಟ್ಟಾರ್ ಸಾಹಿತ್ಯಾಚಿ ಕೃಷಿ ಜಾಲ್ಲಿ ಪಾಟ್ಲ್ಯಾ ಶೆಕ್ಡ್ಯಾಂತ್. ಆಮಿ ಜಾಣಾಂವ್ ಕನ್ನಡ ಲಿಪಿಂತ್ ಪಯ್ಲೆಂ ಪತ್ರ್ ಸುರ್ವಾತ್ ಜಾಲ್ಲೆಂ 1912 ಇಸ್ವೆಂತ್ (ಕೊಂಕ್ಣಿ ದಿರ್ವೆಂ). ಪಯ್ಲಿ ಕಾದಂಬರಿ ಪ್ರಕಟ್ ಜಾಲ್ಲಿ 1950 ಇಸ್ವೆಂತ್ (ಜೊ.ಸಾ. ಅಲ್ವಾರಿಸಾಚಿ ‘ಆಂಜೆಲ್’). ಹ್ಯಾ ಮೈಲ್‍ಸ್ಟೋನ್ ವಾಡಾವಳಿಂ ನಿಮ್ತಿಂ ಮಂಗ್ಳುರಿ ಕೊಂಕ್ಣೆಂತ್ ಬರ್ಪಾ ಶೆತ್ ವಾಡ್ಲೆಂ, ಚಡ್ಲೆಂ ಆನಿ ಸಂಸಾರ್ ಭರ್ಲೆಂ. ಆತಾಂಚ್ಯಾ ತರ್ನ್ಯಾ ಪಿಳ್ಗೆಕ್ ಹ್ಯೊ ಗಜಾಲಿ ಸಮ್ಜೊಂಕ್ ಕಷ್ಟ್ ಜಾತಿತ್, ಪುಣ್ ಹೆರಾಂಕ್ ಕಳಿತ್ ಆಸಾ, ಆಮಿ ಲ್ಹಾನ್‍ಪಣಾರ್ ಥಾವ್ನ್ ಕಿತ್ಲಿಂ ಕೊಂಕ್ಣಿ ಪತ್ರಾಂ, ಪುಸ್ತಕ್, ಸಾಹಿತ್ಯ್, ಸಂಗಿಂ ಧಾರ್ಮಿಕ್ ಬರ್ಪಾಂಯೀ ವಾಚುನ್ ವಾಡ್‍ಲ್ಲ್ಯಾಂವ್ ಮ್ಹಳ್ಳೆಂ.

ತಿ ಆಮ್ಚಿ ಗಜಾಲ್ ತರ್, ಹೆರ್ ಪ್ರದೇಶಾಂನಿಯೀ ಥಂಯ್ಚ್ಯಾ ರಾಜ್ಯ್ ಭಾಶೆಂಚ್ಯಾ ಲಿಪಿಂನಿ ಕೊಂಕ್ಣಿ ಲೊಕಾನ್ ಬರಂವ್ಕ್ ಧರ್ಲೆಂ. ತಶೆಂ, ಕೇರಳಾಂತ್ಲ್ಯಾಂನಿ ಮಲಯಾಳಂ ಲಿಪಿಂತ್ ಕೊಂಕ್ಣಿ ಕೃಷಿ ಕೆಲಿ. ಮಹಾರಾಷ್ಟ್ರಾಂತ್ ಮರಾಠಿಚ್ಯಾ ಪ್ರಭಾವಾನ್ ನಾಗರಿ ಲಿಪಿ ಉಪ್ಯೋಗ್ ಕೆಲಿ. ಮುಸಲ್ಮಾನ್ ಧರ್ಮಾಚ್ಯಾ ನವಾಯತಾಂನಿ ಪರ್ಸೋ ಅರೇಬಿಕ್ ಲಿಪಿ ಘೆತ್ಲಿ.

ಪುಣ್ ಪ್ರಮುಖ್ ಗಜಾಲ್ ಗೊಂಯಾಂತ್ಲಿ.

ಗೊಂಯಾಂತ್ ದೋನ್ ವರ್ಗಾಚೊ ಕೊಂಕ್ಣಿ ಲೋಕ್ ಆಸ್‍ಲ್ಲೊ/ಆಸಾ – ಮೂಳ್ ಹಿಂದೂ ಆನಿ ಕ್ರಿಸ್ತಾಂವ್. ಥಂಯ್ ಕ್ರಿಸ್ತಾಂವಾಂಕ್, ಪುಡ್ತುಗೆಜಾಂ ವರ್ವಿಂ, ರೋಮಿ ಲಿಪಿ ವಳ್ಕಿಚಿ ಜಾಲ್ಲಿ, ತಾಣಿಂ ತಾಂತುಂಚ್ ಸಾಹಿತಿಕ್ ವಾವ್ರ್ ಕೆಲೊ. ಹಿಂದೂ ಭಾಂವ್ಡಾಂನಿ ತಾಂಚ್ಯಾ ಕಾಲೆತಿಕ್ ಸಹಜ್ ಜಾವ್ನ್ ನಾಗರಿ ಲಿಪಿ ಆಪ್ಣಾಯ್ಲಿ.

ಪುಣ್ ಗುಮಾನಾಕ್ ಧರಿಜೆ ಜಾಲ್ಲಿ ಭೋವ್ ಮಹತ್ವಾಚಿ ಸಂಗತ್ ಮ್ಹಳ್ಯಾರ್ ಅಶೆಂ ಆಪಾಪ್ಲಿ ಲಿಪಿ ಗಳ್ಸುನ್ ಸಾಹಿತ್ಯ್ ರಚ್‍ಲ್ಲ್ಯಾಂ ಪಯ್ಕಿ ಅಪ್ರತಿಮ್ ಸಾಹಿತಿಕ್ ಕೃಷಿ ಆನಿ ಹೆರ್ ಸಾಧನ್ ಕೆಲ್ಲೆಂ ಮಂಗ್ಳುರಿ/ಕೆನರಾ ಕ್ರಿಸ್ತಾಂವಾಂನಿ, ಕನ್ನಡ ಲಿಪಿಂತ್. ದುಸ್ರ್ಯಾ ಸ್ಥಾನಾರ್ ರೋಮಿ ಲಿಪಿಚೆ ಗೊಂಯ್ಕಾರ್ ಆಸ್ಲ್ಯಾರ್, ತಿಸ್ರ್ಯಾ ಸ್ಥಾನಾರ್ ನಾಗರಿ ಲಿಪಿ ಯೆತಾ. ಹೆರ್ ಲಿಪಿಂನಿ ವಿಶೇಸ್ ವಾವ್ರ್ ಜಾಂವ್ಕ್ ನಾ ತರೀ ಥೊಡ್ಯಾ ಮಟ್ಟಾಕ್ ಕಾಮ್ ಚಲ್ಲಾಂ.

ಹೆಂ ಸರ್ವ್ ಸ್ವಾಭಾವಿಕ್‍ಪಣಿ ಚಲೊನ್ ಆಸ್‍ಲ್ಲೆಂ. ಪಾಟ್ಲ್ಯಾ ಎಕಾ ಶೆಕ್ಡ್ಯಾಂತ್ ಕೊಂಕ್ಣೆಂತ್ಲೊ ಬರ್ಪಾ ಸಂಸಾರ್ ಬರೊಚ್ ಗ್ರೇಸ್ತ್ ಆಸ್‍ಲ್ಲೊ. ತಾಂತುಂಯೀ ಕನ್ನಡ ಲಿಪಿಚ್ಯಾ ಕೊಂಕ್ಣಿ ಬರವ್ಪ್ಯಾಂನಿ ರುತಾ ಕೆಲ್ಲೆಂ ಸಾಹಿತ್ಯ್ ಹೆರ್ ವ್ಹಡ್ ಭಾಸಾಂಕ್ ಸ್ಪರ್ಧೊ ದಿಂವ್ಚ್ಯಾ ಮಟ್ಟಾರ್ ಆಸ್‍ಲ್ಲೆಂ ಮ್ಹಳ್ಳೆಂ ವಿಸ್ರನಾಯೆ. ತಶೆಂಚ್ ಪತ್ರಾಂ, ಸಾಂಸ್ಕೃತಿಕ್ ವಾವ್ರ್ ಆನಿ ಹೆರ್ ಸಾಧನಾಂನಿಯೀ ಮಂಗ್ಳುರಿ ಕ್ರಿಸ್ತಾಂವಾಂನಿ ದರಬಸ್ತ್ ಸೆವಾ ದಿಲ್ಯಾ, ಭೋವ್ ಊಂಚ್ ದೇಣ್ಗಿ ದಿಲ್ಯಾ. ಹೆಂ ಸರ್ವ್ ಭಾಶೆಚ್ಯಾ ಮೊಗಾನ್ ತಾಣಿಂ ಕೆಲ್ಲೆಂ, ಆನಿ ತ್ಯಾ ಮುಖಾಂತ್ರ್ ಕೊಂಕ್ಣಿ ಭಾಶೆಕ್ ಸುಂರ್ಗಾರಾವ್ನ್, ಸಮೃದ್ಧ್ ಕೆಲ್ಲೆಂ.

ಕೊಂಕ್ಣಿ ಭಾಷೆಕ್ ಮಾರಕ್ ಜಾಲ್ಲಿ ‘ಮಾನ್ಯತಾ’!?

ಆತಾಂ, ಕೊಂಕ್ಣೆಂತ್ ರಾಜಕೀಯ್, ಲಿಪಿಚೊ ಗೊಂದೊಳ್ ಇತ್ಯಾದಿ ಮ್ಹಣೊನ್ ವಾದ್-ವಿವಾದ್, ಮನಸ್ತಾಪ್-ಝಗ್ಡೆಂ ಇತ್ಯಾದಿ ಕಿತ್ಯಾಕ್ ಮ್ಹಣ್ ಆಮ್ ಲೊಕಾಕ್ ಸವಾಲ್ ಧೊಸುಂಕ್ ಪುರೊ. ವ್ಹಯ್. ತಶೆಂ ಸವಾಲ್ ಉದೆಲ್ಯಾರ್ ಮಾತ್ರ್ ಸತ್ ಆನಿ ಚರಿತ್ರಾ ಕಿತೆಂ ಮ್ಹಣೊನ್ ಸಮ್ಜೊಂಕ್ ಜಾತಾ. ಮಹಿನ್ಯಾ ಆದಿಂ ‘ಕೊಂಕ್ಣಿ ಮಾನ್ಯತಾ ದಿವಸ್’ ಮ್ಹಣ್ ಕಾಂಯ್ ತರೀ ಖಬರ್ ಜಾಲ್ಲಿ ತುಮ್ಚೆ ಪಯ್ಕಿ ಥೊಡ್ಯಾಂಕ್ ತರೀ ಕಳಿತ್ ಆಸತ್. ವ್ಹಯ್. ಅಗೋಸ್ತ್ 20 ತಾರಿಕ್ ಕೊಂಕ್ಣಿ ಮಾನ್ಯತಾ ದಿವಸ್ ಮ್ಹಣ್ ಸಂಭ್ರಮಾನ್ ಆಚರಣ್ ಕರ್ತಾಂವ್. ಹಾಕಾಯೀ ಏಕ್ ಕಾರಣ್ ಆಸಾ.

ಭಾರತಾಚ್ಯಾ ಕರೆನ್ಸಿ ನೋಟಾಚೆರ್ ಕೊಂಕ್ಣಿ ಭಾಶೆಂತ್‍ಯೀ ಲಿಖ್ತಾತ್ ಮ್ಹಳ್ಳೆಂ ತುಮಿ ಜಾಣಾಸ್ತೆಲ್ಯಾತ್. ಹೆರ್ ಸಬಾರ್ ಭಾಶೆಂನಿ ತ್ಯಾ ತ್ಯಾ ನೋಟಾಚೆಂ ಮೋಲ್ ಬರಯಿಲ್ಲೆಂ ತುಮಿ ಪಳೆವ್ಯೆತ್. ಹೆಂ ಕಿತ್ಯಾಕ್‍ಗೀ ಮ್ಹಳ್ಯಾರ್, ದೇಶಾಚ್ಯಾ ಸಂವಿಧಾನಾಚ್ಯಾ ಆಟ್ವೆ ವೊಳೆರಿಂತ್ ಕೊಂಕ್ಣಿ ಭಾಶೆಕ್‍ಯೀ ಸ್ಥಾನ್ ಮೆಳ್ಳೆಲ್ಯಾನ್ (22 ಭಾಶೆಂಕ್ ಹೊ ಮಾನ್ ಫಾವೊ ಜಾಲ್ಯಾರೀ 17 ಭಾಶೆಂಕ್ ಮಾತ್ರ್ ಕರೆನ್ಸಿ ನೋಟಾಂತ್ ಜಾಗೊ ದಿಲಾ. ಹಾಚೆಂ ಕಾರಣ್ ತುಮಿ ಗೂಗಲಾಂತ್ ಸೊಧ್ನಾಂ ಕರ್ಯೆತ್). 1992 ಇಸ್ವೆಂತ್ ಕೊಂಕ್ಣೆಕ್ ಹೊ ಅಪ್ರತಿಮ್ ಗೌರವ್ ಫಾವೊ ಜಾಲ್ಲೊ.

ತ್ಯಾ ಐತಿಹಾಸಿಕ್ ಘಡಿತಾಚ್ಯಾ ಉಡಾಸಾಕ್ ಹರ್ಯೆಕಾ ವರ್ಸಾ ಅಗೋಸ್ತ್ 20 ತಾರಿಕೆರ್ ‘ಕೊಂಕ್ಣಿ ಮಾನ್ಯತಾ ದೀಸ್’ ಆಚರ್ಸಿತಾಂವ್. ಕೊಂಕ್ಣೆಚಿ ವ್ಹಡ್ವಿಕಾಯ್ ಸಂಸಾರಾಕ್ ಪಾಚಾರುಂಕ್ ಆನಿ ಸಂಭ್ರಮುಂಕ್ ಹೊ ದೀಸ್ ಅವ್ಕಾಸ್ ಜೊಡುನ್ ದಿತಾ. ಬರೆಂಚ್.

ಪುಣ್ ಹಾಂವೆಂ ಹ್ಯಾ ಮಹತ್ವಾಚ್ಯಾ, ವ್ಹಡ್ವಿಕಾಯೆಚ್ಯಾ ಘಡಿತಾಕ್ ಕಿತ್ಯಾಕ್ ‘ಮಾರೆಕಾರ್’ ಮ್ಹಳೆಂ ಮ್ಹಣ್ ತುಮ್ಕಾಂ ಭೊಗುಂಕ್ ಪುರೊ. ಭೊಗಜೆಚ್. ‘ನಾತ್‍ಲ್ಲ್ಯಾಕ್ ನಾ ಮ್ಹಳ್ಳಿ ಏಕ್ ಮಾತ್ರ್ ಖಂತ್, ಆಸ್‍ಲ್ಲ್ಯಾಕ್ ಹಜಾರ್ ಖಂತಿ’ ಮ್ಹಣ್ಚೆಪರಿಂ, ಕೊಂಕ್ಣಿ ಭಾಶೆಚಿ, ಹ್ಯಾ ಲಗ್ತಿಂ, ಗಜಾಲ್!

ಹಾಂವೆಂ ವಯ್ರ್ ಸಾಂಗ್‍ಲ್ಲೆಪರಿಂ ಚಾರಾಂಯೀ ಕುಶಿಂನಿ ಕೊಂಕ್ಣೆಚೊ ವಾವ್ರ್ ಸುಶೆಗಾತ್ ಚಲೊನ್ ಆಸ್‍ಲ್ಲೊ. ತೆದ್ನಾಂ, ಮ್ಹಣ್ಜೆ ಎಕಾ ಕಾಳಾರ್ ತ್ಯಾ ತ್ಯಾ ಪ್ರದೇಶಾಂತ್ಲ್ಯಾ ಕೊಂಕ್ಣಿ ವಾವ್ರಾಡ್ಯಾಂಕ್ ಲೊಕಾಚೊ, ವಾಚ್ಪಿ ಆನಿ ಅಭಿಮಾನಿಂಚೊ ಮೋಗ್ ಮೆಳ್ತಾಲೊ. ತೆ ತಾಂತುಂಚ್ ಸುಖಿ, ಸಂತೃಪ್ತಿ ಜಾವ್ನಾಸ್‍ಲ್ಲೆ. ಪುಣ್ ‘ಮಾನ್ಯತಾ’ ಮ್ಹಳ್ಳಿ ಗಜಾಲ್ ಹ್ಯಾ ಸರ್ವಾಂಕ್ ಗೊಂದೊಳಾಂತ್ ಶಿರ್ಕೊಂಕ್ ಆನಿ ಥೊಡ್ಯಾಂಕ್ ಸ್ವಾರ್ಥಾಂತ್ ಪಡೊಂಕ್ ಕಾರಣ್ ಜಾಲಿ. (ತೆಂ ವಿವರುಂಕ್ ಹಜಾರ್ ಪಾನಾಂ ಗರ್ಜ್ ಪಡ್ತಿತ್).

ಹ್ಯಾ ಗೊಂದೊಳಾಕ್ ವಾ ವಿವಾದಾಕ್ ಕಾರಣ್‍ಂಚ್ ಲಿಪಿವಾದ್ ವಾ ಲಿಪಿಚೆಂ ರಾಜಕೀಯ್. ಆನಿ ಹ್ಯಾ ಲಿಪಿ ರಾಜಕೀಯಾಚಿ ವಳಕ್ ಮೆಳಜೆ ಜಾಲ್ಯಾರ್ ‘ಮಾನ್ಯತೆ’ಚ್ಯಾ ನಾಂವಿಂ ಫಾವೊ ಜಾಲ್ಲೊ ಫಾಯ್ದೊ ಕಿತೆಂ ಮ್ಹಣ್ ಸಮ್ಜಜೆ. ಸಾಧ್ಯಾ ಲೊಕಾಕ್ ಆನಿ ಸಬಾರ್ ಕೊಂಕ್ಣಿ ಕಾರ್ಯಕರ್ತಾಂಕ್ ಸಯ್ತ್ ಹ್ಯಾ ಸಂಗ್ತಿಚಿ ಸಾರ್ಕಿ ಗಜಾಲ್ ಕಳಿತ್ ನಾ. ತ್ಯಾ ವರ್ವಿಂ ಅರಾಜಕತಾ ಉಬ್ಜವ್ನ್ ತ್ಯಾ ಮುಖಾಂತ್ರ್ ಆಪ್ಲಿ ದಾಳ್ ಶಿಜಂವ್ಚ್ಯಾಂತ್ ಲಿಪಿ ರಾಜಕೀಯಾಚೆ ಮ್ಹಾತ್ಭಾರಿ ಯಶಸ್ವಿ ಜಾಲ್ಯಾತ್.

ಭಾರತಾಂತ್ ಸಾಹಿತ್ಯಾಕ್ ಸಬಾರ್ ಪ್ರಶಸ್ತ್ಯೊ ಆಸಾತ್. ಹೆಂ ಆಮಿ ಜಾಣಾಂವ್. ಸ್ಥಳೀಯ್ ಆನಿ ಖಾಸ್ಗಿ ಸಂಸ್ಥ್ಯಾಂನಿ ದಿಂವ್ಚ್ಯೊ ಪ್ರಶಸ್ತ್ಯೊ ಎಕಡ್ಚ್ಯಾನ್ ಆಸಾತ್. ಪುಣ್ ಸರ್ಕಾರಿ ಆನಿ ಅಧಿಕೃತ್ ಸಂಸ್ಥ್ಯಾಂಚ್ಯಾ ಪ್ರಶಸ್ತಿ-ಪುರಸ್ಕಾರಾಂಕ್ ಪ್ರತಿಷ್ಠಾ ಆನಿ ಮಾನ್ ಚಡ್. ದಾಖ್ಲ್ಯಾಕ್ ಸಾಂಗ್ಚೆಂ ತರ್, ಸರ್ಕಾರಿ ಅಕಾಡೆಮಿಂಚ್ಯೊ ಪ್ರಶಸ್ತ್ಯೊ, ಸರಸ್ವತಿ ಸಮ್ಮಾನ್ ಪ್ರಶಸ್ತಿ, ಜ್ಞಾನಪೀಠ ಪ್ರಶಸ್ತಿ ಇತ್ಯಾದಿ. ಭಾರತಾಂತ್ ಸಾಹಿತ್ಯಾಕ್ ಆಸ್ಚಿ ಊಂಚ್ ಪ್ರಶಸ್ತಿ ಮ್ಹಳ್ಯಾರ್ ಜ್ಞಾನಪೀಠ ಪ್ರಶಸ್ತಿ.

ಪುಣ್ ಚಡ್ ಮಹತ್ವಾಚಿ ಗಜಾಲ್ ಮ್ಹಳ್ಯಾರ್ ಸಾಹಿತ್ಯ್ ಅಕಾಡೆಮಿಚಿ. ಹಾಕಾ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಮ್ಹಣ್ತಾತ್ ತರೀ ತಾಚೆಂ ನಾಂವ್ ಫಕತ್ ಸಾಹಿತ್ಯ್ ಅಕಾಡೆಮಿ. ಹಾಚೆಂ ದಫ್ತರ್ ಡೆಲ್ಲಿಂತ್ ಆಸಾ. ಕೇಂದ್ರ್ ಸರ್ಕಾರಾನ್ ಸ್ಥಾಪಿತ್ ಕೆಲ್ಲ್ಯಾನ್, ಆನಿ ರಾಜ್ಯಾಂನಿ ಸ್ಥಾಪಿತ್ ಕೆಲ್ಲ್ಯೊ ಅಕಾಡೆಮಿ ಆಸ್‍ಲ್ಲ್ಯಾನ್, ಹಾಕಾ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಮ್ಹಣ್ಚ್ಯಾಂತ್ ಚೂಕ್ ಕಾಂಯ್ ನಾ. ಹ್ಯಾ ಅಕಾಡೆಮಿಚೊ ಮೂಳ್ ಉದ್ದೇಶ್ ಜಾವ್ನಾಸಾ, ಸಾಹಿತ್ಯಾಚೊ ಪೋಸ್ ಕರ್ಚೆಂ. ವರ್ಸಾವಾರ್ ಹ್ಯಾ ಅಕಾಡೆಮಿನ್ ಸರ್ವ್ ಭಾಸಾಂತ್ಲ್ಯಾ ಸಾಹಿತ್ಯಾಕ್-ಸಾಹಿತಿಂಕ್ ದಿಂವ್ಚ್ಯಾ ಪ್ರಶಸ್ತೆಚೆಂ ಮೋಲ್ ರು. 1,00,000/-.

ಅಕಾಡೆಮಿಚೊ ವಾವ್ರ್ ಫಕತ್ ಪ್ರಶಸ್ತಿ ದಿಂವ್ಚೆಂ ಮಾತ್ರ್ ನ್ಹಯ್. ಹ್ಯಾ ವಿಶಿಂಯೀ ಆಸಕ್ತಾಂನಿ ವೀಕಿಪೀಡಿಯಾ ವಾ ಗೂಗಲ್ ಮುಖಾಂತ್ರ್ ಮಾಹೆತ್ ಜೊಡ್ಯೆತ್.

ಲಿಪಿಚ್ಯಾ ರಾಜಕೀಯ್ ಗೊಂದೊಳಾಕ್ ಆನಿ ಹ್ಯಾ ಸಂಸ್ಥ್ಯಾಕ್ ಲಾಗ್ಶಿಲೊ ಸಂಬಂಧ್ ಆಸಾ. ಕೊಂಕ್ಣಿ ಭಾಶೆಕ್‍ಯೀ ಸಾಹಿತ್ಯ್ ಅಕಾಡೆಮಿನ್ ಮಾನ್ಯತಾ ದಿಲ್ಯಾ. 1954 ಇಸ್ವೆಂತ್ ಸ್ಥಾಪನ್ ಜಾಲ್ಲ್ಯಾ ಸಾಹಿತ್ಯ್ ಅಕಾಡೆಮಿನ್ 1955ವ್ಯಾ ವರ್ಸಾ ಥಾವ್ನ್ ಹರ್ಯೆಕಾ ವರ್ಸಾ ಪ್ರಶಸ್ತಿ ದೀಂವ್ಕ್ ಸುರು ಕೆಲೆಂ ಆನಿ ಕೊಂಕ್ಣಿ ಭಾಶೆಕ್ ಏಕ್ ಸ್ವತಂತ್ರ್ ಭಾಸ್ ಮ್ಹಣ್ ಸ್ವೀಕಾರ್ ಕೆಲ್ಲೆಂ 1975 ಇಸ್ವೆಂತ್. ತಶೆಂ 1977ವ್ಯಾ ವರ್ಸಾ ಕೊಂಕ್ಣೆಕ್ ಪಯ್ಲಿ ಪ್ರಶಸ್ತಿ ಮೆಳ್ಳಿ – ರವೀಂದ್ರ ಕೇಳೇಕಾರಾಚ್ಯಾ ‘ಹಿಮಾಲಯಾಂತ್’ ಪುಸ್ತಕಾಕ್. ತ್ಯಾ ಉಪ್ರಾಂತ್ ಸಬಾರ್ ಜಣಾಂಕ್ ಹಿ ಪ್ರಶಸ್ತಿ ಫಾವೊ ಜಾಲ್ಯಾ. 5 ಜಣ್ ಮಂಗ್ಳುರ್ಗಾರಾಂಕ್‍ಯೀ ಮೆಳ್ಳ್ಯಾ, ಸವೆಂ ಎಕಾ ಯುವತಿಕ್ ಯುವ ಪ್ರಶಸ್ತಿ ಲಾಭ್ಲ್ಯಾ. (ತಾಂಕಾಂ ಹಿ ಪ್ರಶಸ್ತಿ ಮೆಳ್‍ಲ್ಲ್ಯಾಚೆಂ ಮಾನ್‍ದಂಡ್ ಕಿತೆಂ/ಕಶೆಂ ಮ್ಹಳ್ಳೆಂ ಸಮ್ಜಲ್ಯಾರ್ ಸಗ್ಳೆಂ ಕಳ್ತಾ!).

ಲಿಪಿಚೆಂ ರಾಜಕೀಯ್ ಮ್ಹಳೆಂ ನೆಂ, ತೆಂ ಹಾಂಗಾಚ್ ಚಡ್ ಪ್ರಮುಖ್ ಜಾತಾ. ಎದೊಳ್‍ಚ್ ಸಾಂಗ್‍ಲ್ಲೆಪರಿಂ, ಕನ್ನಡ ಲಿಪಿಂತ್ ಆಸ್ಚ್ಯಾ ತಿತ್ಲೊ ನ್ಹಯ್ ತರೀ ಜಾಯ್ತ್ಯಾ ಪ್ರಮಾಣಾರ್ ರೋಮಿ ಲಿಪಿಂತ್, ಆನಿ, ಥೊಡ್ಯಾ ಮಟ್ಟಾರ್ ನಾಗರಿ ಲಿಪಿಂತ್ ಸಾಹಿತಿಕ್ ವಾವ್ರ್ ಜಾಲಾ. ಪುಣ್ ಪ್ರಶಸ್ತೆಚಿ ಗಜಾಲ್ ಯೆತಾನಾ, ಡೆಲ್ಲಿಚ್ಯಾ ಸಾಹಿತ್ಯ್ ಅಕಾಡೆಮಿನ್, ಕೊಂಕ್ಣೆಂತ್ ಪರಿಗಣನ್ ಕರ್ಚೆಂ ಸಾಹಿತ್ಯ್ ಬಿಲ್ಕುಲ್ ನ್ಹಯ್! ಹಿ ನಿಜಾಯ್ಕೀ ವಿಪರ್ಯಾಸಾಚಿ ಗಜಾಲ್.

ವ್ಹಯ್. ಡೆಲ್ಲಿಚ್ಯಾ ಸಾಹಿತ್ಯ್ ಅಕಾಡೆಮಿನ್ ಹೆರ್ ಸರ್ವ್ ಭಾಸಾಂಕ್ ಪ್ರಶಸ್ತೆಕ್ ಪರಿಗಣನ್ ಕರ್ಚೆಂ ಸಾಹಿತ್ಯಾಕ್ ತರೀ, ಕೊಂಕ್ಣೆಂತ್ ಮಾತ್ರ್ ತಶೆಂ ನಾ! ತಾಣಿಂ ಕೊಂಕ್ಣೆಂತ್ ಪ್ರಶಸ್ತಿ-ಪುರಸ್ಕಾರ್-ಅನುದಾನ್ ಮ್ಹಳ್ಳೆಂ ಕಿತೆಂಯೀ ದಿಂವ್ಚೆಂ ಫಕತ್ ಎಕಾ ಲಿಪಿಕ್ ಪಳೆವ್ನ್!! ವಿಚಿತ್ರ್ ಭೊಗುಂಕ್ ಪುರೊ ತುಮ್ಕಾಂ. ಪುಣ್ ಹೆಂ ಸತ್. ಫಕತ್ ನಾಗರಿ ಲಿಪಿಕ್ ಮಾತ್ರ್ ಅಕಾಡೆಮಿ ಲೆಕಾಕ್ ಧರ್ತಾ ಆನಿ ತಾಕಾ ಮಾತ್ರ್ ಸಗ್ಳೆಂ ಲಾಭಯ್ತಾ.

ಹೆಂ ಕಶೆಂ, ಕಿತ್ಯಾಕ್ ಮ್ಹಣ್ ಕಳಜೆ ತರ್, ಕೊಂಕ್ಣೆಂತ್ ಆಸ್ಚೊ ಲಿಪಿವಾದ್, ಗೊಂದೊಳ್ ಆನಿ ರಾಜಕೀಯ್ ಸಮ್ಜಜೆ.

ಆತಾಂ, ‘ಲಿಪಿವಾದಿಂಚೆಂ ಗತ್ತಿಗಟ್’ ಕಿತೆಂಗೀ ಮ್ಹಣ್ ಸಾಂಗ್ತಾಂ. ಕರ್ನಾಟಕಾಂತ್, ಆನಿ ತಾಂತ್ಲ್ಯಾ ತಾಂತುಂ ಮಂಗ್ಳುರಾಂತ್‍ಯೀ ನಾಗರಿ ಲಿಪಿಚೆ ಫುಡಾರಿ-ಸೊಜೆರ್ ಆಸಾತ್. ವಿಶೇಸ್ ಕಿತೆಂಗೀ ಮ್ಹಳ್ಯಾರ್ ಹ್ಯಾ ವರ್ಗಾಂತ್ ಜೀಣ್‍ಭರ್ ಫಕತ್ ಕನ್ನಡ ಲಿಪಿಂತ್ ಕೊಂಕ್ಣಿ ವಾವ್ರ್ ಕೆಲ್ಲೆ-ಕರ್ಚೆಯೀ ಆಸಾತ್. ಹೆ ಬರವ್ಪಿ ವಾ ಕಿತೆಂಯೀ ತರೀ ಜಾಲ್ಲೆ ಕನ್ನಡ ಲಿಪಿಂತ್ಲಿ ಕೊಂಕ್ಣಿ ವಾಚುನ್, ಬರವ್ನ್. ಹಾಂಕಾಂ ವಾಗಯಿಲ್ಲೆಂಯೀ ಹಾಂಗಾಚ್ಯಾಚ್ ಲೊಕಾನ್. ಹಾಂಕಾಂ ಕನ್ನಡ ಲಿಪಿಚ್ಯಾ ಕೊಂಕ್ಣೆ ಶಿವಾಯ್ ಅಸ್ತಿತ್ವ್‌ಚ್ ನಾ. ಪುಣ್ ಹಾಣಿಂ ಪೆಂಪಾರೆಂ ವ್ಹಾಜಂವ್ಚೆಂ ನಾಗರಿ ಲಿಪಿಚೆಂ; ಹಾಂಚೆಂ ನಿಯತ್ತ್ ಕನ್ನಡ ಲಿಪಿಚ್ಯಾ ದುಸ್ಮಾನಾಂಕ್!!

ಪೊರ್ಚೆ ಪೋರ್ ಉಡುಪಿಚ್ಯಾ ಎಕಾ ಭುರ್ಗ್ಯಾನ್ ಕೊಂಕ್ಣೆಕ್ ಏಕ್ ಲಿಪಿ ಸಂಶೋಧನ್ ಕೆಲ್ಯಾ ಮ್ಹಣ್ ಖಬರ್ ಜಾಲ್ಲಿ. ಹ್ಯಾ ವಿಚಾರಾಚೆರ್ ಸ್ಪಂದನ್ ಜಾವ್ನ್ ಏಕ್ ಲೇಖನ್ ವಾಚುಂಕ್ ಮೆಳ್ಳೆಂ. ಅಮೆರಿಕಾ ಥಾವ್ನ್ ಆಸ್ಟಿನ್ ಡಿಸೋಜ ಪ್ರಭು ‘ವೀಜ್ ಕೊಂಕಣಿ’ ಮ್ಹಳ್ಳೆಂ ಡಿಜಿಟಲ್ ಹಫ್ತ್ಯಾಳೆಂ ಫಾಯ್ಸ್ ಕರ್ತಾ. ತ್ಯಾ ಪತ್ರಾಂತ್ ಎಕಾ ಯುವಕಾನ್, ಜೊ ನಾಗರಿ ಲಿಪಿಚೊ ಏಕ್ ಸೊಜೆರ್, ಬರಯಿಲ್ಲೆಂ ಏಕ್ ಲೇಖನ್ ಆಸಾ. ‘ಕೊಂಕ್ಣೆಕ್ ಲಿಪಿ ನಾಂಗೀ?’ ಮ್ಹಳ್ಳೆಂ ಸವಾಲ್ ಮುಖಾರ್ ಧರ್ನ್ ತೊ ಆಖೇರಿಕ್ ಕೊಂಕ್ಣೆಕ್ ಅಧಿಕೃತ್ ಲಿಪಿ ಆಸಾ, ಹ್ಯಾ ಲಿಪಿಯೆಕ್ ಸಂವಿಧಾನಾನ್ ಮಾನ್ಯತಾ ದಿಲ್ಯಾ ಮ್ಹಣ್ ಸಾಂಗ್ತಾ. ತಿ ಲಿಪಿ ದೇವ್‍ನಾಗರಿ. (ತೆಂ ಕಶೆಂಯೀ ಜಾಲೆಂ ಮೂ, ಇತ್ಲ್ಯಾರ್‌ಚ್ ರಾವನಾಸ್ತಾನಾ ತೊ ‘ಕೊಂಕ್ಣೆಕ್ ಕನ್ನಡ, ರೋಮಿ ಆನಿ ಮಲಯಾಳಂ ಲಿಪಿ ಆಸಾತ್ ಮ್ಹಣ್ಚೆಂ ಹಾಸ್ಯಾಸ್ಪದ್’ ಮ್ಹಣ್ ಖೆಳ್ಕುಳಾಂಯೀ ಕರ್ತಾ!)

ಆಸೊಂ, ತಾಚೊ ವಾದ್ ತಾಕಾ.

ಪುಣ್ ತಾಣೆಂ ಸಾಂಗ್‍ಲ್ಲೆಂ ಸತ್ ನ್ಹಯ್. ಮುಖ್ಯ್ ಜಾವ್ನ್ ತಾಣೆಂ ಮಾಂಡ್‍ಲ್ಲೊ ವಾದ್ ಬಿಲ್ಕುಲ್ ಸಾರ್ಕೊ ನ್ಹಯ್. ಪುಣ್ ತಾಚ್ಯಾ ಸಮ್ಜಣೆ ಪರ್ಮಾಣೆಂ ಆನಿ ತಾಚ್ಯಾ ಕಾಲೆತಿ ಪರ್ಮಾಣೆಂ ತಾಣೆಂ ಸಾಂಗ್ಚೆಂ ತಾಕಾ ಆನಿ ತಾಚೆ ತಸಲ್ಯಾ ಹೆರ್ ನಾಗರಿವಾದಿಂಕ್ ಸಾರ್ಕೆಂ ಮ್ಹಣ್ ಭೊಗ್ಚ್ಯಾಂತ್ ನವಾಲ್ ನಾ. ಕಿತ್ಯಾಕ್ ಮ್ಹಳ್ಯಾರ್, ತಾಂಚೊ ವಿತಂಡ್‍ವಾದ್ ಜಾಲ್ಯಾರೀ, ತಾಣಿಂ ಮಾಂಡ್ಚ್ಯಾ ಪೊಕೊಳ್ ವಾದಾಕ್ ತಾಂಚೆಲಾಗಿಂ ಥೊಡಿಂ ‘ಹಾತೆರಾಂ’ ಆಸಾತ್!

ವ್ಹಯ್, ಡೆಲ್ಲಿ ಸಾಹಿತ್ಯ್ ಅಕಾಡೆಮಿ ಕೊಂಕ್ಣೆಂತ್ ನಾಗರಿ ಲಿಪಿಚ್ಯಾ ಸಾಹಿತ್ಯಾಕ್ ಮಾತ್ರ್ ಮಾನ್ತಾ. ತಶೆಂಚ್ ಗೊಂಯಾಂತ್‍ಯೀ, ಥಂಯ್ಚೊ ಸರ್ಕಾರ್ ಆನಿ ಅಕಾಡೆಮಿಯೀ ನಾಗರಿ ಲಿಪಿಕ್‍ಚ್ ಪರಿಗಣನ್ ಕರ್ತಾತ್. (ಹೆಂ ಸರ್ವ್ ಏಕ್ ಷಡ್ಯಂತ್ರ್ ಮ್ಹಣ್ ಜಾಯ್ತೆ ನಾಗರಿವಾಲೆಚ್ ನೆಣಾಂತ್!). ಹೆಂಚ್ ಮೂಳ್ ‘ಆಧಾರ್’ ಜಾವ್ನ್ ಘೆವ್ನ್ ನಾಗರಿ ಲಿಪಿಚೆ ತಾಂಡೆಲಿ ಆನಿ ಶಿಸ್ ನಾಗರಿ ಲಿಪಿ ಕೊಂಕ್ಣೆಚಿ ಅಧಿಕೃತ್, ಮಾನುನ್ ಘೆತ್‍ಲ್ಲಿ ಲಿಪಿ ಮ್ಹಣ್ ರಡ್ಕುರ್‍ಯಾ ಭುರ್ಗ್ಯಾಂಪರಿಂ ಸಳ್ ಧರ್ತಾತ್ ಆನಿ ಹೆರ್ ಲಿಪಿಂಕ್ ನೆಗಾರುಂಕ್ ಪೆಚಾಡ್ತಾತ್! ತಾಂಚ್ಯಾ ಹ್ಯಾ ಪೊಳ್ಕುರ್‍ಯಾ ವಾದಾಕ್ ಕುಸ್ಕುಟಾಚಿ ಮರ್ಯಾದ್ ನಾ.

ತರ್ ಹಾಂಚೆಂ ಗತ್ತಿಗಟ್ ಕಸಲೆಂ ಮ್ಹಣ್ತಾತ್‍ಗೀ? ವ್ಹಯ್. ಭೋವ್ ಹಾಸ್ಯಾಸ್ಪದ್ ಪುಣ್ ವಾಸ್ತವಿಕ್ ಗಜಾಲ್ ಮ್ಹಳ್ಯಾರ್ ಅಸಲ್ಯಾ ಜಾಯ್ತ್ಯಾ ನಾಗರಿ ಕಮಾಂಡರಾಂಕ್ ದೀಸ್ ಕಾಡುಂಕ್ ಕನ್ನಡ ಲಿಪಿಚ್ ಜಾಯ್ಜೆ ಮ್ಹಳ್ಯಾರ್ ಕಿತೆಂ ಮ್ಹಣ್ತಾತ್? ಹಾಂಚ್ಯಾ ಗತ್ತಿಗಟಾಕ್ ಆನಿ ಹಿಪೊಕ್ರೆಸಿಕ್ ಊಂಚ್ ನಿದರ್ಶನ್ ಜಾವ್ನ್ ‘ವೀಜ್’ ಪತ್ರಾರ್ ನಾಗರಿ ಲಿಪಿಚಿ ವ್ಹಡ್ವಿಕಾಯ್ ಆನಿ ಅಧಿಕೃತ್‍ಪಣಾಚೆರ್ ಆರಾಬಾಯ್ ದಿತೆಲ್ಯಾಕ್ ಜಾಯ್ ಜಾಲ್ಲಿ ಲಿಪಿ ಕನ್ನಡ ಶಿವಾಯ್ ನಾಗರಿ ನ್ಹಯ್!! ತರ್ ನಾಗರಿ ನಾಗರಿ ಮ್ಹಣ್ ನಾಚ್ಚೆಂ, ಬ್ಯಾಂಡ್ ವ್ಹಾಜಂವ್ಚೆಂ ಕೊಣಾ ಖಾತಿರ್? ಹಾಂಕಾಂಚ್ ನಾಗರಿ ಲಿಪಿ ವರ್ಗನಾ, ತರೀ ಹೆ ಹೆರಾಂಕ್ ನಾಗರಿಚ್ಯಾ ಮಹಿಮೆ ವಿಶಿಂ ಲೆಕ್ಚರ್ ದಿತಾತ್! ನ್ಹಯ್ಗೀ ಹೆಂ ವಿಡಂಬನ್ ಆನಿ ವಿಪರ್ಯಾಸ್???

ಹಿ ಗಜಾಲ್ ಇತ್ಲಿಚ್ ನ್ಹಯ್. ಹ್ಯಾ ನಾಗರಿ ಪ್ರವರ್ತಕ್ ಆನಿ ವಕ್ತಾರಾಂಚೆಂ ಹಣೆಬರಪ್ ಪಳೆಯಾ… ಹಾಂಕಾಂ ಉಟ್ತಾ ಬಸ್ತಾನಾ ನಾಗರಿ ಲಿಪಿಚೆಂ ರುದಾನ್ ಕರ್ಚೆಂ ಸೊಡ್ಲ್ಯಾರ್ ಹೆರ್ ಕಿತೆಂಯೀ ಪಡೊನ್ ಗೆಲ್ಲೆಂ ನಾ. ಕೊಂಕ್ಣಿ ಭಾಷೆಚೊ ಮೋಗ್ ಜಾಂವ್, ಸಾಹಿತ್ಯ್, ಸಂಸ್ಕೃತೆಚೆಂ ಕಿತೆಂಯೀ ಪಡೊನ್ ಗೆಲ್ಲೆಂ ತಿತ್ಲ್ಯಾರ್‌ಚ್ ಆಸಾ. ಹಾಂಕಾಂ ಖಂಯ್ ಮೆಳ್ತಾ ಥಂಯ್, ತೆಂಯೀ ಕನ್ನಡ ರಾಜ್ಯಾಂತ್, ಮಂಗ್ಳುರಾಂತ್, ನಾಗರಿ ಲಿಪಿಚೊ ಬಾವ್ಟೊ ಉಬಂವ್ಚ್ಯಾಕ್ ಆನಿ ಖಂಯ್ ಕನ್ನಡ ಲಿಪಿ ರಾಜ್ ಕರ್ತಾ ಥಂಯ್ ನಾಗರಿ ಲಿಪಿಚೊ ಬಿಲ್ಲೊ ಥಾಪುಂಕ್ ಧ್ಯಾನ್ ಆನಿ ಮನ್. ಹೆ ತಿತ್ಲ್ಯಾಕ್‍ಚ್ ಸೀಮಿತ್. ತೆಂ ಸೊಡ್ನ್ ಕಿತೆಂಯೀ ಕ್ರಿಯಾತ್ಮಕ್, ಧನಾತ್ಮಕ್ ವಾವ್ರ್ ಕೆಲ್ಲೊ ಖಂಯ್ ಪುಣೀ ಆಸಾಗೀ?

ಸತ್ ಕಿತೆಂಗೀ ಮ್ಹಳ್ಯಾರ್ ಕೊಂಕ್ಣೆಚ್ಯಾ ಬರೆಪಣಾಕ್ ಆನಿ ಮಾನ್ಯತಾ ಮೆಳ್ಚ್ಯಾ ಖಾತಿರ್ ಚಲ್‍ಲ್ಲ್ಯಾ, ಗೊಂಯಾಂತ್ ಜಾಂವ್ ಕರ್ನಾಟಕಾಂತ್ ವಾ ಖಂಯ್ಸರೀ, ಆಂದೋಲನಾಂತ್, ಚಳ್ವಳ್ ವಾ ಝುಜಾಂತ್ ಪ್ರಮುಖ್ ದೇಣ್ಗಿ ದಿಲ್ಲಿ ರೋಮಿ ಲಿಪಿಚ್ಯಾಂನಿ ಆನಿ ಕನ್ನಡ ಲಿಪಿಚ್ಯಾಂನಿ. ಗೊಂಯಾಂತ್ ಕೊಂಕ್ಣೆಕ್ ಸರ್ಕಾರಾಚಿ ಅಧಿಕೃತ್ ಭಾಸ್ ಜಾವ್ನ್ ಮಾಂದುಂಕ್ ಜಾಲ್ಲ್ಯಾ ಝುಜಾಂತ್ ಚಡ್ ವಾವ್ರ್, ತ್ಯಾಗ್ ಕೆಲ್ಲೊ ರೋಮಿ ಲಿಪಿಚ್ಯಾಂನಿ. (ಪುಡ್ತುಗೆಜಾಂ ಥಾವ್ನ್ ಗೊಂಯಾಂ ಸ್ವತಂತ್ರ್ ಜಾಂವ್ಚ್ಯಾ ಝುಜಾಂತ್‍ಯೀ ಆಪ್ಣಾಕ್‍ಚ್ ಸಮರ್ಪಿಲ್ಲೆಂ ಚಡ್ ವಾಂಟ್ಯಾನ್ ರೋಮಿ ಲಿಪಿಗಾರಾಂನಿ ಮ್ಹಣ್ ಚರಿತ್ರಾ ಸಾಂಗ್ತಾ). ಕರ್ನಾಟಕಾಂತ್ ಕೊಂಕ್ಣೆಚ್ಯಾ ಸರ್ವ್ ಸವ್ಲತ್-ಮಾನ್ಯತೆಂ ಖಾತಿರ್ ಚಳ್ವಳ್ ಕೆಲ್ಲಿ ಕನ್ನಡ ಲಿಪಿಚ್ಯಾ ಮನ್ಶ್ಯಾಂನಿ. ಹ್ಯಾ ಸರ್ವಾಂತ್ ನಾಗರಿ ಲಿಪಿವಾದಿಂಚೆಂ ಮೆತೆರ್ಪಣ್ ಭೋವ್ ಸೀಮಿತ್ ಮ್ಹಣ್ ಜಾಣಾರಿ ಸಾಂಗ್ತಾತ್. ಹೆಂ ಸರ್ವ್ ದೊಳ್ಯಾಂ ಮುಖಾರ್ ಆಸ್ಚೆಂ ಸತ್.

ಆಯ್ಲೆವಾರ್ಚಿಂ ದೃಷ್ಟಾಂತಾಂ ದಿಂವ್ಚೆಂ ತರ್, ಹಂಪನ್‍ಕಟ್ಟೆ ಮಂಗ್ಳುರ್ ವಿಶ್ವವಿದ್ಯಾನಿಲಯ್ ಕೊಲೆಜಿಂತ್ ಎಂ.ಎ. ಕೋರ್ಸ್ ಸುರ್ವಾತ್ ಜಾಂವ್ಚ್ಯಾಕ್ ಆನಿ ಮಂಗ್ಳುರ್ ವಿಶ್ವವಿದ್ಯಾನಿಲಯಾಂತ್ ಕೊಂಕ್ಣಿ ಅಧ್ಯಯನ ಪೀಠ ಸುರ್ವಾತ್ ಜಾಂವ್ಚ್ಯಾಕ್ ವಾವ್ರ್ ಕೆಲ್ಲೆಂಯೀ ಕನ್ನಡ ಲಿಪಿಚ್ಯಾ ಮನ್ಶ್ಯಾನಿಂಚ್. ಹೆರಾಂಚೆಂ ಕಾಂಯ್ ಆಸಾ ತರ್ ದೆಖಿ ಖಾತಿರ್ ಮಾತ್ರ್?! ಪುಣ್ ಆಜ್ ಕಿತೆಂ ಜಾಲಾಂ? ಹಾಂಗಾಯೀ ಪಾಟಾರ್ ಚಡ್ಲ್ಯಾತ್ ನಾಗರಿವಾಲೆ! ಆನಿ ಹೆ ಥಂಯ್ಸರೀ ಕನ್ನಡ ಲಿಪಿಕ್ ಕೊನ್ಶ್ಯಾಕ್ ಲೊಟುನ್ ಘಾಲುಂಕ್ ಆನಿ ನಾಗರಿಕ್ ಗಾದಿರ್ ಬಸಂವ್ಕ್ ಪೆಚಾಡುನ್ ಆಸಾತ್!

ಇತ್ಲೆಂ ಆಸೊನೀ ಹಾಂಚ್ಯಾ ಗತ್ತಿಗಟಾಕ್ ಕಾಂಯ್ ಉಣೆಂ ನಾ! ಹೆ ಕಿಂಕ್ರಾಟ್ತಾತ್, ರುದಾನ್ ದಿತಾತ್ ಆನಿ ಫರ್ಮಾಯ್ತಾತ್ ಫಕತ್ ನಾಗರಿ ಲಿಪಿ; ಪುಣ್ ಹಾಂತ್ಲ್ಯಾ ಜಾಯ್ತ್ಯಾಂಕ್ ಚಾರ್ ಸಬ್ದ್ ನಾಗರಿಂತ್ ಬರಂವ್ಕೀ ಯೇನಾ. ಬರಯ್ಲ್ಯಾರೀ ತೆಂ ವಾಚ್ತೆಲ್ಯಾಂಚಿ ಗತ್ ನಾ. ಆನಿ ಸಾಹಿತ್ಯ್ ರಚನ್ ಸಪ್ಣಾಂತ್ಲಿ ಗಜಾಲ್‍ಚ್ ಸಯ್.

ನಾಗರಿ ಲಿಪಿಚೆಂ ವ್ಹಡ್ಪಣ್ ಆನಿ ಮಹಿಮಾ ಗಾಜಯ್ತೆಲ್ಯಾಂಚೆಂ ಹಣೆಬರಪ್ ಸಂಸಾರ್ ಜಾಣಾಂ. ತಸಲ್ಯಾ, ಕೊಂಕ್ಣೆಚೆಂ ಕುಳಾರ್ ಮ್ಹಣ್ಚ್ಯಾ ಗೊಂಯಾಂತ್‍ಚ್ ನಾಗರಿವಾಲ್ಯಾಂನಿ ರಚ್‍ಲ್ಲೆಂ ಸಾಹಿತ್ಯ್ ವಾ ಹೆರ್ ಉತ್ಪನ್ನ್ ಕನ್ನಡ ಲಿಪಿಚ್ಯಾ 15% ತಿತ್ಲೆಂಯೀ ನಾ. ಆನಿ ಮಂಗ್ಳುರಾಂತ್ ನಾಗರಿಚೊ ಎಕ್ಲೊ ಬರವ್ಪಿಯೀ ಝಳ್ಕನಾ. ವಾಚ್ಪಿ ಕಶೆಂಯೀ ನಾಂತ್. ಹೆಂ ಕಶೆಂ ಮ್ಹಳ್ಯಾರ್ ತಾಲೂಕ್ ಮಟ್ಟಾರ್ ಸಯ್ತ್ ಏಕ್ ಖೆಳ್ಗಾಡಿ ನಾತ್‍ಲ್ಲ್ಯಾ ರಾಷ್ಟ್ರಾನ್ ಆಪ್ಣೆಂ ಒಲಿಂಪಿಕ್ಸಾಂತ್ ಚಾಂಪಿಯನ್‍ಶಿಪ್ ಆಪ್ಣಾಯ್ಲಾಂ ಮ್ಹಣ್ ಫಟವ್ನ್, ಮಸ್ಕಿರಿ ಕೆಲ್ಲೆಪರಿಂ!

ಹಾಂಚ್ಯಾ ಗತ್ತಿಗಟಾಚೆಂ ದರ್ಶನ್ ದಿಂವ್ಚೆಂ ತರ್, ವಯ್ರ್ ಸಾಂಗ್‍ಲ್ಲೆಪರಿಂ, ನಾಗರಿ ಲಿಪಿಚ್ಯಾ ಮಾನ್ಯತೆ ವಿಶಿಂ ಆರಾಬಾಯ್ ದಿತೆಲ್ಯಾಕ್ ತೆಂ ಉಚಾರುಂಕ್ ಜಾಯ್ ಕನ್ನಡ ಲಿಪಿಚ್ಯಾಂಚೆಂ ಪತ್ರ್, ಆನಿ ತೆಂ ಲಿಖುಂಕ್ ಕನ್ನಡ ಲಿಪಿಚಿಚ್ ಗತ್ ಉದೆತಾ. ಕಿತ್ಯಾ ಹಾಕಾ ಆನಿ ಹಾಚೆ ತಸಲ್ಯಾಂಕ್ ನಾಗರಿ ಲಿಪಿಂತ್‍ಚ್ ಬರಂವ್ಕ್, ಫಾಯ್ಸ್ ಕರುಂಕ್ ಜಾಯ್ನಾ? ಕಿತ್ಯಾಕ್ ಮ್ಹಳ್ಯಾರ್ ನಾಗರಿಂತ್ ಬರಯ್ಲ್ಯಾರ್ ಹಾಂಚೆಂ ಪಳೆತಲೊ ಕೋಣ್ ಆಸಾ? ಹಾಂಚ್ಯಾ ಲಿಪಿಕ್ ಗತ್‍ಯೀ ನಾ ಗಿರಾಯ್ಕ್‌ಯೀ ನಾ! ಮಂಗ್ಳುರಾಂತ್ ಆಸೊನ್, ಹಾಂಗಾಚ್ಯಾ ಮಾತಿಯೆಂತ್ ವಾಡೊನ್, ಕನ್ನಡ ಸರ್ಕಾರಾಚೆಂ-ಲೊಕಾಚೆಂ ಖಾವ್ನ್ ಕನ್ನಡ ಲಿಪಿಕ್‍ಚ್ ಕುರಾಡ್ ಮಾರುಂಕ್ ಪೆಚಾಡ್ತೆಲ್ಯಾಂಚೆಂ ಹಣೆಬರಪ್ ಇತ್ಲೆಂಚ್.

ಮ್ಹಣ್ಜೆ ಹಾಂಕಾಂ ಜಾಯ್ ಆಸ್ಚಿ, ಗರ್ಜ್ ಪಡ್ಚಿ ಲಿಪಿ ಕನ್ನಡ ಶಿವಾಯ್ ನಾಗರಿ ನ್ಹಯ್! ತರೀ ಕಸಲೆಂ ಅನುಪ್ಕಾರ್‍ಪಣ್ ಆನಿ ಖಂಚ್ಯಾ ಮಟ್ಟಾಚೆಂ ಹಿಪೊಕ್ರಿತ್‍ಪಣ್!?

ಹೆರ್ ದೃಷ್ಟಾಂತಾಂ ದಿಂವ್ಚೆಂ ತರ್, ಹ್ಯಾ ನಾಗರಿ ತಾಂಡೆಲ್ಯಾಂ ಪಯ್ಕಿ ಥೊಡ್ಯಾಂಚೆ ವಾಟ್ಸಪ್ ಪಂಗಡ್ ಆಸಾತ್. ಹಾಂತುಂ ಮೂಳ್ ನಾಗರಿವಾಲೆ ಆನಿ ತಾಂಚೆ ದಲಾಲಿ, ಚಮ್ಚಾ ಆನಿ ಗುಲಾಮ್ (ಉಂದಿರ್!) ಆಸಾತ್. ಭರ್ಶಿಕ್ ಮ್ಹಣೊನ್ ಕನ್ನಡ ಲಿಪಿಚ್ಯಾಂಕೀ ಕುಡ್ಸಿಲಾಂ. ಹ್ಯಾ ಪಂಗ್ಡಾಂನಿಯೀ ಅಶೆಂಚ್. ತಾಂತುಂ ನಾಗರಿ ಲಿಪಿಚಿಚ್ ಸ್ತುತಿ ಗಾಂವ್ಚಿ ಆನಿ ತಾಂಚಿಚ್ ಬಡಾಯ್ ಉಲಂವ್ಚೆಂ ಸೊಡ್ಲ್ಯಾರ್ ಹೆರಾಂಕ್ ಮಾನ್, ಗೌರವ್ ದೀಜೆ ಮ್ಹಳ್ಳೆಂಚ್ ಕಳಿತ್ ನಾತ್ಲೆಲೆ, ಕುಸ್ಕುಟಾಚಿ ಸಂಸ್ಕೃತಿ ನಾತ್ಲೆಲೆ ಆಸಾತ್. ಭಾಸ್, ಲಿಪಿ ವಿಶಿಂ ಕೆದ್ನಾಂ ತರೀ ಪ್ರಸ್ತಾಪ್ ಜಾಲ್ಯಾರ್ ನಾಗರಿ ಲಿಪಿಚ್ ಶ್ರೇಷ್ಠ್, ಅಧಿಕೃತ್ ಮ್ಹಣೊನ್ ಝಗ್ಡ್ಯಾಕ್ ದೆಂವ್ತೆಲ್ಯಾಂಕ್ ಥಂಯ್ ಉಣೆಂ ನಾ. ಲಡಾಯೆಕ್ ದೆಂವ್ತಾತ್ ಶಿವಾಯ್ ಮರ್ಯಾದಿನ್ ಉಲಂವ್ಚೆಂ ಕಲ್ಚರ್ ತಾಂಕಾಂ ನಾ.

ಗತ್ತಿಗಟಾಚೆಂ ಊಂಚ್ ನಿದರ್ಶನ್ ಮ್ಹಳ್ಯಾರ್, ಮಂಗ್ಳುರಾಂತ್ ನಾಗರಿಚೆಂ ಕೊಟೆಂ ಬಾಂಧುಂಕ್ ಪೆಚಾಡ್ಚ್ಯಾ ಅತಿರಥ್ ಮಹಾರಥ್ ಮಹಾಜಣಾಂಕ್ ನಾಗರಿಚೆಂ ಆರು ಮೂರುಯೀ ಕಳಿತ್ ನಾ ಮ್ಹಣ್ ತೆಚ್ ಹ್ಯಾ ಗ್ರೂಪಾಂನಿ ಜಾಹೀರ್ ಕರ್ತಾತ್. ನಾಗರಿ ನಾಗರಿ ಮ್ಹಣೊನ್ ಸುರ್ವೆರ್ ವಿಳಾಪ್ ದಿತೆಲ್ಯಾ ಅಸಲ್ಯಾ ಗ್ರೂಪಾಂನಿ ಆಖೇರಿಕ್ ರಾಜ್ ಕರ್ಚೆಂ ಕನ್ನಡ ಲಿಪಿನ್ ಆನಿ ಕನ್ನಡ ಭಾಶೆನ್! ಬರ್ಪಾ ರುಪಾರ್ ಕೊಂಕ್ಣೆಂತ್ ಸಂವಾದ್ ಕರುಂಕ್‍ಯೀ ಜಾಯ್ತ್ಯಾಂಕ್ ತ್ರಾಸ್ ಭೊಗ್ತಾತ್!! ನಾಗರಿ ಕಮಾಂಡರಾಂನಿ ಏಕ್ ಅಕ್ಷರ್ ನಾಗರಿಂತ್ ಬರಯಿಲ್ಲೆಂ ಸೊಧ್ಲ್ಯಾರೀ ದಿಸನಾ. ಥೊಡ್ಯಾಂಕ್ ಕನ್ನಡ ಲಿಪಿ ಸಯ್ತ್ ಟೈಪ್ ಕರುಂಕ್ ಯೇನಾ. ತಾಣಿಂ ಕಿತೆಂಯೀ ಬರಂವ್ಚೆಂ ತರ್ ರೋಮಿ ಲಿಪಿಂತ್. ಹಿ ಜಾವ್ನಾಸಾ ಹಕೀಗತ್! ಆನಿ ಹೆ ನಾಗರಿ ಲಿಪಿಕ್ ವೈಭವ್ ಹಾಡುಂಕ್ ಪೆಚಾಡ್ಚೆ ಪ್ರಚಂಡ್ ಸಾಮ್ರಾಟ್!!!

(ಮುಂದರುಂಕ್ ಆಸಾ)

ಮುಖ್ಲ್ಯಾ ಭಾಗಾಂನಿ:

1. ಕೊಂಕ್ಣೆಂತ್ಲೆಂ ಟುಕ್ಡೇ ಗ್ಯಾಂಗ್ ಆನಿ ತಾಂಚೊ ವ್ಯಭಿಚಾರ್!
2. ಬೊಲ್ಪ್ಯಾಂಚ್ಯಾ ಕುತ್ತಾರೆಂತ್ಲ್ಯಾ ಉಂದ್ರಾಂಚಿ ಗುಲಾಮ್‍ಗಿರಿ!
3. ಹೆರಾಂಚೆಂ ಮ್ಹೆಳೆಂ ವ್ಹಾವವ್ನ್ ಗಾಂವಾರ್ ಭೊಂವ್ಚೆ ಭಿಕಾರಿ!

Send Feedback to: budkuloepaper@gmail.com

Like us at: www.facebook.com/budkulo.epaper

The post ನಾಗರಿ ಲಿಪಿವಾದಿಂಚೆಂ ಗತ್ತಿಗಟ್ ಆನಿ ಪೊಕೊಳ್ ವಾದ್! appeared first on Budkulo.

ತುಮ್ಕಾಂ ಎದೊಳ್‍ಚ್ ‘ಬುಡ್ಕುಲೊ’ ಇ-ಪತ್ರಾನ್ ಕೆಲ್ಲೊ ವಾವ್ರ್, ಆಮ್ಚೆಂ ಧೋರಣ್, ಆಮ್ಚಿ ಆಸಕ್ತ್, ಆಮ್ಚೆಂ ಸಿದ್ಧಾಂತ್ ಆನಿ ಖಂಚ್ಯಾಕ್ ಆಮಿ ಮಹತ್ವ್ ದಿತಾಂವ್, ಕಿತೆಂ ಆಮಿ ಪ್ರತಿಪಾದನ್ ಕರ್ತಾಂವ್, ಖಂಚ್ಯಾಕ್ ಆಮಿ ಪಾಟಿಂಬೊ ದಿತಾಂವ್, ತಶೆಂಚ್ ಖಂಚ್ಯಾಚೊ ಆಮಿ ವಿರೋಧ್ ಕರ್ತಾಂವ್ ಮ್ಹಳ್ಳೆಂ ಸಗ್ಳೆಂ ಕಳಿತ್ ಜಾಲಾಂ ನ್ಹಯ್ಗೀ?

‘ಬುಡ್ಕುಲೊ’ ಮ್ಹಳ್ಯಾರ್ ಕ್ರಿಯೇಶನ್. ಆಮ್ಚೆಂ ಮಾಧ್ಯಮ್ ಕ್ರಿಯೇಟಿವಿಟಿ, ಪ್ರೊಡಕ್ಟಿವಿಟಿ ಆನಿ ಕನ್‍ಸ್ಟ್ರಕ್ಟಿವಿಟಿಕ್ ನಾಂವಾಡ್ಲಾಂ. ಕೊಂಕ್ಣಿ ಸಾಹಿತ್ಯಾಚ್ಯಾ ಸಂಗ್ತಿಂತ್ ಎದೊಳ್ ಕೊಣೆಂಚ್ ಕರಿನಾತ್‍ಲ್ಲೊ ಅದ್ಭುತ್ ವಾವ್ರ್ ಆಮಿ ಕೆಲಾ. ಸವೆಂ ಆಮ್ಚ್ಯಾ ಸಮುದಾಯಾಚ್ಯಾ ಆನಿ ಜೆರಾಲ್ ಸಮಾಜೆಚ್ಯಾ, ಸ್ಥಳೀಯ್, ರಾಜ್ಯ್-ದೇಶಾಚ್ಯಾ ಪ್ರಮುಖ್ ಗಜಾಲಿಂಚೆರ್ ಸಾಧ್ಯ್ ತೆಂ ಕಾಮ್ ಕೆಲಾಂ. ಆಮ್ಚಿಂ ಥರಾವಳ್ ಬರ್ಪಾಂ, ವರ್ದಿ, ಸಂದರ್ಶನಾಂ, ಸಾಹಿತ್ಯ್ ಆನಿ ವಿಶ್ಲೇಷಣಾಂ ತಾಕಾ ಸಾಕ್ಸ್ ದಿತಾತ್.

Our Google Pay – 8277362399

ವಯ್ಲ್ಯಾ ಫೋನ್ ನಂಬ್ರಾಕ್ ತುಮಿ ಆಮ್ಕಾಂ ಗೂಗಲ್ ಪೇ ಮುಖಾಂತ್ರ್ ಕುಮಕ್ ಧಾಡ್ಯೆತ್

ಪ್ರಸ್ತುತ್ ಕೊಂಕ್ಣಿ ಕಥೊಲಿಕ್ ಸಮುದಾಯಾಕ್ ಏಕ್ ಧಯ್ರಾಧಿಕ್, ನಿಷ್ಪಕ್ಷ್‍ಪಾತ್ ಆನಿ ವೃತ್ತಿಪರ್ ಮಾಧ್ಯಮ್ ಕಿತ್ಯಾಕ್ ಗರ್ಜ್ ಆಸಾ ಮ್ಹಳ್ಳೆಂ ಕಳಿತ್ ಜಾಲಾಂ. ತಸಲಿ ಅರ್ಹತಾ ಆಸ್ಚೆಂ, ಕೊಂಕ್ಣಿ ಕ್ರಿಸ್ತಾಂವಾಂಚೆಂ ಏಕ್ ಮಾತ್ರ್ ಮಾಧ್ಯಮ್ ಮ್ಹಣ್ ತುಮಿ ‘ಬುಡ್ಕುಲೊ’ ಇ-ಪತ್ರಾಕ್ ಮಾಂದ್ಲಾಂ. ತ್ಯಾ ಖಾತಿರ್ ಆಮ್ಕಾಂ ಸಂತೃಪ್ತಿ ಉದೆಲ್ಯಾ.

ಆಮ್ಚ್ಯಾ ಸಮುದಾಯಾಚ್ಯಾ ಸಮಗ್ರ್ ಬರೆಪಣಾ ಪಾಸತ್ ವಾವುರ್ಚೆಂ, ಲೊಕಾ ಖಾತಿರ್ ತಾಳೊ ಉಬಾರ್ಚೆಂ, ಪ್ರಜಾಸತ್ತಾತ್ಮಕ್ ಮೌಲ್ಯಾಂನಿ ಭರ್‌ಲ್ಲೆಂ, ಮನ್ಶ್ಯಾಪಣಾಕ್ ಆನಿ ಮನ್ಶ್ಯಾ ಹಕ್ಕಾಂಕ್ ಉಕಲ್ನ್ ಧರ್ಚೆಂ, ಸತ್-ನೀತ್-ನ್ಯಾಯಾ ಖಾತಿರ್ ಝುಜ್ಚೆಂ, ಅನೀತ್-ಅನ್ಯಾಯ್ ಖಂಡನ್ ಕರ್ನ್ ತಾಚೆ ವಿರೋಧ್ ಝುಜ್ಚೆಂ ಏಕ್ ಮಾತ್ರ್ ಮಾಧ್ಯಮ್ ಮ್ಹಳ್ಯಾರ್ ತೆಂ ಫಕತ್ ‘ಬುಡ್ಕುಲೊ’ ಇ-ಪತ್ರ್ ಮ್ಹಳ್ಳೆಂ ತುಮಿ ಜಾಣಾಂತ್. ಆಮ್ಚ್ಯಾ ವಾವ್ರಾಕ್ ತುಮಿ ದಿಲ್ಲಿ ಶಾಭಾಶ್ಕಿ ಆನಿ ಆಮ್ಚೆರ್ ತುಮಿ ದವರ್‌ಲ್ಲಿ ಪಾತ್ಯೆಣಿ ಆಮ್ಕಾಂ ಅಭಿಮಾನ್, ಸಂತೊಸ್ ದಿತಾ.

ತುಮಿ, ವಾಚ್ಪಿ ಆನಿ ಲೋಕ್, ಆಮ್ಚೆ ನೀಜ್ ಹಿತೈಶಿ ಆನಿ ಮಾರ್ಗದರ್ಶಕ್. ಆತಾಂ ತುಮ್ಚೆ ಮುಖಾರ್ ಆಮಿ ಏಕ್ ಮಾಗ್ಣೆಂ ಕರ್ತಾಂವ್ – ದಯಾ ಕರುನ್ ಆಮ್ಕಾಂ ತುಮ್ಚೊ ಆಧಾರ್ ದಿಯಾ ಮ್ಹಣೊನ್. ಆಮಿ ಸಾಧನ್ ಕೆಲಾಂ, ಆತಾಂ ತುಮಿ ಆಮ್ಚಿ ಪಾಟ್ ಥಾಪ್ಡುನ್ ಪಾಟಿಂಬೊ, ಪ್ರೋತ್ಸಾಹ್ ದಿಂವ್ಚೊ ವೇಳ್. ಎದೊಳ್‍ಚ್ ಆಮ್ಚ್ಯಾ ಕಾಮಾ ಮುಖಾಂತ್ರ್ ದಾಕವ್ನ್ ದಿಲಾಂ ಆಮಿ ಕಿತೆಂ ಕರುಂಕ್ ಸಕ್ತಾಂವ್ ಮ್ಹಣ್. ತುಮ್ಚ್ಯಾ ಮಜತೆನ್ ‘ಬುಡ್ಕುಲೊ’ ಆನಿಕೀ ಬಳ್ವಂತ್, ಮಜ್ಭೂತ್ ಆನಿ ಪ್ರಭಾವಿ ಮಾಧ್ಯಮ್ ಜಾವ್ನ್ ಬಾಂಧುನ್ ಹಾಡ್ತಾಂವ್ ಆನಿ ತ್ಯಾ ಮುಖಾಂತ್ರ್ ಆಮ್ಚೊ ಸಮುದಾಯ್ ಸಶಕ್ತ್, ಸುಶಿಕ್ಷಿತ್ ಆನಿ ಸುಭದ್ರ್ ಕರುಂಕ್ ಮ್ಹಿನತ್ ಕಾಡ್ತಾಂವ್. ತುಮಿ ಆಮ್ಕಾಂ ಆಧಾರ್ ದಿಲ್ಯಾರ್ ತಾಚೊ ಫಾಯ್ದೊ ಆಖ್ಖ್ಯಾ ಸಮಾಜೆಕ್‍ಚ್ ಜಾತಾ.

ಆಮ್ಚೆಂ ಕಾಮ್, ಆಮ್ಚೆಂ ಸಾಧನ್ ತುಮ್ಕಾಂ ಪಸಂದ್ ಜಾಲಾಂ ಮ್ಹಣ್ ಆಮಿ ಭರ್ವಸ್ತಾಂವ್. ಜರ್ ತುಮ್ಕಾಂ ‘ಬುಡ್ಕುಲೊ’ ಕೊಂಕ್ಣಿ ಕ್ರಿಸ್ತಾಂವ್ ಸಮಾಜೆಚೆಂ ಮಜ್ಭೂತ್ ಮಾಧ್ಯಮ್ ಆನಿ ತುಮಿ ಅಭಿಮಾನ್ ಪಾಂವ್ಚೆ ತಸಲೊ ವಿಶ್ವಾಸಿ ಸಂಸ್ಥೊ ಜಾಂವ್ಚ್ಯಾಕ್ ಖುಷಿ ಆಸಾ ತರ್ ತುಮ್ಚಿ ಉದಾರ್ ದೇಣ್ಗಿ ದೀವ್ನ್ ಆಮ್ಕಾಂ ಬಳ್ವಂತ್ ಕರಾ. ಫುಲ್ ವಾ ಫುಲಾಚಿ ಪಾಕ್ಳಿ ತರೀ ದೀವ್ನ್ ಆಮ್ಕಾಂ ಆಧಾರ್ ಜಾಯಾ. ತುಮ್ಚಿ ಮಜತ್ ಖಂಡಿತ್ ಜಾವ್ನ್ ತುಮ್ಕಾಂ ವ್ಹರ್ತ್ಯಾ ಧಾದೊಸ್ಕಾಯೆಚಿ ಜಾಂವ್ಚೆಪರಿಂ ಆಮಿ ವಾವುರ್ತಾಂವ್.

ದೇವ್ ಬರೆಂ ಕರುಂ.

ಡೊನಾಲ್ಡ್ ಪಿರೇರಾ, ಸಂಪಾದಕ್

ಸಕಯ್ಲ್ಯಾ ಬ್ಯಾಂಕ್ ಎಕೌಂಟಾಕ್ ತುಮ್ಚಿ ಮಜತ್ ತುಮಿ ಧಾಡುನ್ ದಿವ್ಯೆತ್.

Name: Donald Pereira
Bank: Canara Bank
A/C No: 0977101022194
Hampankatta Branch
Mangaluru 575 001

IFSC Code: CNRB0000612
MICR Code: 575015009

ಮ್ಹಜೆಂ ಮೊಬೈಲ್ ನಂಬರ್: +91 82773 62399
ಮ್ಹಜೊ ಇಮೈಲ್ ವಿಳಾಸ್: donypereira@gmail.com

Send Feedback to: budkuloepaper@gmail.com

Like us at: www.facebook.com/budkulo.epaper

Visit and Watch Videos in our YouTube Channel

The post ಖಾಲ್ತಿ ಮನವಿ: ಕೊಂಕ್ಣಿ ಮಹಾಜಣಾಂನೊ ‘ಬುಡ್ಕುಲೊ’ ಮಜ್ಭೂತ್ ಕರುಂಕ್ ತುಮ್ಚೊ ಆಧಾರ್ ದಿಯಾ appeared first on Budkulo.

ಕೊಂಕ್ಣಿ ನಾಟಕಾಂಕ್ ಪ್ರೇಕ್ಷಕ್ ಮೆಳನಾಂತ್ ಮ್ಹಳ್ಳೆಂ ದುರ್ಸೊಣೆಂ ನಿರಾಧಾರ್ ಮ್ಹಣ್ ಸಾಬೀತ್ ಕರ್ಚೆ ತಸಲೆಂ ಏಕ್ ನಾಟಕ್ ಪ್ರದರ್ಶನ್ ಆಯ್ಲೆವಾರ್ ಮಂಗ್ಳುರಾಂತ್ ಘಡ್ಲೆಂ. ಫಾಮಾದ್ ಸಂಗೀತ್ ನಿರ್ದೇಶಕ್ ತಶೆಂ ನಾಟಕ್ ಬರಯ್ಣಾರ್ ಜೊಯೆಲ್ ಪಿರೇರಿನ್ ಲಿಖ್‍ಲ್ಲೊ, ಸಸ್ಪೆನ್ಸ್ ಥ್ರಿಲ್ಲರ್ ನಾಟಕ್ ‘ಉಚಾರ್ನ್ ಸಾಂಗ್ತಾಂ’ ಆಗೊಸ್ತ್ 15ವೆರ್ ಡೊನ್ ಬೊಸ್ಕೊ ಹೊಲಾಂತ್ ಚಿಕಾರ್ ಭರ್‍ಲ್ಲ್ಯಾ ಆನಿ ಆಖೇರ್ ಪರ್ಯಾಂತ್ ಥ್ರಿಲ್ ಭೊಗ್‍ಲ್ಲ್ಯಾ ಪ್ರೇಕ್ಷಕಾಂ ಸಮೊರ್ ಪ್ರದರ್ಶನ್ ಜಾಲೊ. ಕೊಂಕ್ಣಿ ನಾಟಕ್ ಶೆತಾಕ್ ಹಿ ಏಕ್ ಆಶಾದಾಯಕ್ ವಾಡಾವಳ್ ಆನಿ ಸಮಾಧಾನ್ ಭೊಗ್ಚಿ ಗಜಾಲ್.

ವಿಶೇಸ್ ಪ್ರೇತನಾಂಚೊ ಹೊ ಕೊಂಕ್ಣಿ ನಾಟಕ್ ಕಸೊ ಸಾದರ್ ಜಾಲೊ, ತಾಚೆಂ ಬಳ್ ಆನಿ ಉಣೆಪಣ್ ಕಿತೆಂ ಮ್ಹಣ್ ವಸ್ತುನಿಶ್ಠ್ ಜಾವ್ನ್ ಕೆಲ್ಲೆಂ Exclusive ವಿಶ್ಲೇಶಣ್ ಹಾಂಗಾಸರ್ ದಿಲಾಂ. ಕೊಂಕ್ಣಿ ನಾಟಕ್ ಶೆತ್ ಪರತ್ ಏಕ್ ಪಾವ್ಟಿಂ ಆಂಗ್ ಫಾಪುಡ್ನ್, ಗರ್ವಾನ್ ಆನಿ ಕ್ರಿಯಾತ್ಮಕ್ ಜಾವ್ನ್ ತಶೆಂ ರಚನಾತ್ಮಕ್ ರಿತಿನ್ ಕಾರ್ಯಾಳ್ ಜಾಂವ್ದಿ ಆನಿ ಫುಡೆಂ ಚಲೊಂದಿ ಮ್ಹಳ್ಳೊ ಆಶಯ್ ಘೆವ್ನ್ ‘ಬುಡ್ಕುಲೊ’ ಹೆಂ ವಿಶ್ಲೇಶಣ್ ಪ್ರಕಟ್ ಕರ್ತಾ.

* * * * *     * * * * *     * * * * *     * * * * *     * * * * *

ಮಂಗ್ಳುರಿ ಕೊಂಕಣಿ ನಾಟಕ್ ಶೆತಾಂತ್ ಎಕೀಣ್‍ಪಣಾನ್ ವಾವುರ್ತೆಲ್ಯಾಂಚೊ ತತ್ವಾರ್, ತಾಂಕಿವಂತ್ ನಾಟಕ್ ಕಥಾ ಬರಯ್ತೆಲ್ಯಾಂಚೊ ಉಣವ್, ಸಮರ್ಥ್ ನಿರ್ದೇಶಕಾಂಚೊ ಬೊರ್ಗೊಳ್, ತಾಂತ್ರಿಕ್ ತಜ್ಞ್ ಲಾಬನಾಸ್ಚೆಂ, ಜೊಕ್ತ್ಯಾ ನಟ್-ನಟಿಂಕ್ ಸೊಧುಂಕ್ ಕಶ್ಟ್ ಜಾಂವ್ಚೆ – ಪ್ರಸ್ತುತ್ ಕಾಳಾಚಿಂ ಹಿಂ ಪಂಥಾಹ್ವಾನಾಂ ಮತಿಂತ್ ದವರ್ನ್‍ಚ್ ಹಿ ಅಭಿಪ್ರಾಯ್ ಉಜಾರ್ ಕೆಲ್ಯಾ.

ಕೊಂಕಣಿ ಪ್ರೇಕ್ಷಕ್ ಗಂಭೀರ್ ವಸ್ತು ಪ್ರಾಸ್ ಹಾಸ್ಯ್ ಚಡ್ ಪಸಂದ್ ಕರ್ತಾ? ಉಗ್ತ್ಯಾ ಬೃಹತ್ ಮಯ್ದಾನಾಂನಿ, multiple ವೆದಿಂನಿ ಸಾದರ್ ಜಾಂವ್ಚ್ಯಾ ಧಾರ್ಮಿಕ್ ನಾಟಕಾಂಕ್, ಫಕತ್ ಧಾರ್ಮಿಕ್ ಸಿಂತಿಮೆಂತಾಂಕ್ ಲಾಗೊನ್ ಪ್ರೇಕ್ಷಕ್ ಚಿಕಾರ್ ಭರ್ತಾತ್? – ಮಂಗ್ಳುರಿ ಕೊಂಕಣಿ ನಾಟಕ್ ಶೆತಾನ್ ಕೆನ್ನಾಯ್ ಫುಡ್ ಕರ್ಚಿಂ ಸವಾಲಾಂ ಹಿಂ. ಹ್ಯಾ ಸವಾಲಾಂಚೆ ಘುಸ್ಪಡಿಕ್ ಲಾಗೊನ್‍ಚ್ ಆಮ್ಚ್ಯಾ ಗಾಂವಾಂನಿ ಮಾಂಡಾರ್ ಚಡ್ಚೆ ಚಡ್ತಾವ್ ನಾಟಕ್ `ಸಾಮಾಜಿಕ್ ಹಾಸ್ಯ್’ ಕಾಲೆತಿಚೆ, ವೈಚಾರಿಕ್ ಜಾವ್ನ್ – ಜಾಂವ್ ಧಾರ್ಮಿಕ್ ವಾ ಸಾಮಾಜಿಕ್, ತೀಕ್ಷ್ಣತಾ ನಾ ಆಸ್ಚೆ.

ಹ್ಯಾ ಪಾಟ್‍ಥಳಾರ್, ಪೋಯ್ರ್ ಸೊಂತಾ ದಿಸಾ ಅಗೊಸ್ತ್ 15 ತಾರಿಕೆರ್ ಮಂಗ್ಳುರ್ಚ್ಯಾ ಡೊನ್ ಬೊಸ್ಕೊ ಸಾಲಾಂತ್ ಸಾದರ್ ಜಾಲ್ಲ್ಯಾ `ಉಚಾರ್ನ್ ಸಾಂಗ್ತಾಂ’ ನಾಟಕಾನ್ ಥೊಡೆ cliché ಮೊಡುಂಕ್ ಪ್ರೇತನಾಂ ಕೆಲ್ಲೆಂ ದಿಸೊನ್ ಯೆತಾ. ಪುಣ್ ಆಖ್ಯಾ ನಾಟಕಾಂತ್ ದಿಸೊನ್ ಆಯಿಲ್ಲೆ ದೋಶ್ ಹ್ಯಾ ಪ್ರೇತನಾಂಕ್ ಖಂಯ್‍ಗೀ ದಫನ್ ಕೆಲ್ಲೆಬರಿ ಭೊಗ್ಲೆಂ. ಪುಣ್ ತಶೆಂ ಮ್ಹಣ್ ಹ್ಯಾ ಪ್ರೇತನಾಂಕ್ ಶಾಬಾಸ್ಕಿ ಪಾಟಯ್ನಾತ್ಲ್ಯಾರ್ ತಿ ಹಿಪೊಕ್ರಿಸಿ ಜಾಯ್ತ್. ಹ್ಯಾ ನಾಟಕಾಚೊ ಪ್ರಕಾರ್ ಸಸ್ಪೆನ್ಸ್ ಥ್ರಿಲ್ಲರ್. ಹ್ಯಾ ಪ್ರಕಾರಾಚೆರ್ ಕಥಾ ರಚ್ಚಿಚ್ ವ್ಹಡ್ ಚಾಲೆಂಜಿಂಗ್. ದೆಕುನ್‍ಚ್ ಹ್ಯಾ ದಿಸಾಂನಿ ಅಸಲ್ಯಾ ವಿಶಯಾಂಚೆ ನಾಟಕ್ ಪಳೆಂವ್ಕ್ ಮೆಳನಾಂತ್. ಪುಣ್ `ಕರಾವಳಿ ಕೊಂಕಣಾ’ಚ್ಯಾ ಕಲಾಕಾರಾಂನಿ ಹೆಂ ಚಾಲೆಂಜ್ ಸ್ವೀಕಾರ್ ಕೆಲ್ಲೆಂ ಹೊಗ್ಳಿಕೆಚೆಂ. ಸಾದಿಂ ಉತ್ರಾಂ, ಉತಳ್ ಜೋಕ್ಸ್ ಮಾತ್ರ್ ಪ್ರೇಕ್ಷಕಾಂಕ್ ಆಂವಡ್ತಾತ್, ಸಮ್ಜತಾತ್ ಮ್ಹಳ್ಳೆಂ ಪೂರ್ವ್‍ಗ್ರಾಹಿ ಸಿದ್ಧ್ ಚಿಂತಪ್ ಸಾಂಡುನ್, ಸಂಭಾಷಣಾಂಕ್ ಕಾವ್ಯಾತ್ಮಕ್ ಲಯ್ ದೀಂವ್ಕ್ ಕೆಲ್ಲೆಂ ಆನ್ಯೆಕ್ ಪ್ರೇತನ್ ಹ್ಯಾ ನಾಟಕಾಚೆಂ, ತೆಂಯೀ ಮಾಂದ್ಚೆ ತಸಲೆಂ. ನಾಟಕ್ ಕಥೆಚಿ ಮೂಳ್‍ವಸ್ತ್ – ಜಶೆಂ ಶೇಕ್ಸ್‍ಪಿಯರಾಚ್ಯಾ ನಾಟಕಾಂನಿ ಪಳೆಂವ್ಕ್ ಮೆಳ್ತಾ – ಸಂಬಂಧಾಂನಿ ಕರ್ಚೊ ವಿಶ್ವಾಸ್‍ಘಾತ್, ಲಂಯ್ಗಿಕತಾ ಆನಿ ನಯ್ತಿಕತೆಚಿ ಮುಖಾಮುಖಿ – ವೆದಿರ್ ಸಾದರ್ ಕರ್ಚೆಂ ನಿಜಾಯ್ಕಿ ಏಕ್ ಸಂಕೀರ್ಣ್ task. ಹೆಂ ಪ್ರೇತನ್‍ಯೀ ಗುಮಾನ್ ದೀಂವ್ಕ್ ಫಾವೊ ಜಾಲ್ಲೆಂ.

ಆಮ್ಚ್ಯಾ ಮದೆಂ ತುಳು ನಾಟಕಾಂಚೊ ಪ್ರಭಾವ್ ಚಡ್ ಆಸೊನ್, ತ್ಯಾ ವರ್ವಿಂಚ್ ಆಮ್ಚ್ಯಾ ನಾಟಕಾಂನಿಯೀ ತಾಂಚೊ ಪ್ರಭಾವ್ ಪಡೊನ್ ಆಸ್ಚ್ಯಾ ವಗ್ತಾ, ತ್ಯಾ ಪ್ರಭಾವಾಥಾವ್ನ್ ಮೆಕ್ಳೆಂ ಜಾವ್ನ್ ನಾಟಕ್ ಸಾದರ್ ಕೆಲ್ಲೆಂ ಉಟೊನ್ ದಿಸ್ತಾಲೆಂ. ಎಕೆ ವೆದಿರ್ ದೋನ್-ತೀನ್ ಘರಾಂಚೆಂ ಸೆಟ್ಟಿಂಗ್, ತಾಂಚೆ ಮದೆಂ ಏಕ್ ಗಂಭೀರ್ ದೃಶ್ಯ್, ಉಪ್ರಾಂತ್ ಏಕ್ ಹಾಸ್ಯ್ ದೃಶ್ಯ್, ಉಪ್ರಾಂತ್ ಇಲ್ಲೆಂ emotion, ತಾಚೆ ಪಾಟ್ಲ್ಯಾನ್ ಆಲಾಪ್… ಅಸಲೆಂ ಸಿದ್ಧ್ ರೂಪ್ ಸಾಂಡುನ್ `ಮಾರ್ಮಿಕ್’ ಜಾವ್ನ್ ನಾಟಕ್ ಮಾಂಡುನ್ ಹಾಡ್ಲಾ. ಮದೆಂ ಮದೆಂ ಹಳ್ಟ್ ರುಪಾರ್ ಯೆಂವ್ಚಿಂ witty lines ಪ್ರೇಕ್ಷಕಾಂಚ್ಯಾ ತೊಂಡಾಂತ್ ಖರ್ಯೊ ಹಾಸೊ (genuine laughs) ಹಾಡಂವ್ಚ್ಯಾಂತ್ ಯಶಸ್ವಿ ಜಾಲ್ಯಾತ್. ನಿಮಾಣ್ಯಾ ಹಂತಾಚ್ಯಾ ಎಕಾ ದೃಶ್ಯಾಂತ್ ಜೆನ್ನಾ ಜುಜೆ ಕೋಸ್ತಾಚೊ ವ್ಹಡ್ಲೊ ಪಿಂವ್ಡೊ ಭಾವ್ ನಿಕ್ಕುನ್ (ಆಲ್ವಿನ್ ವೇಗಸ್) ಆಪ್ಣಾಕ್ ಗುರ್ವಾರ್ ಕೆಲೆಂ ಮ್ಹಣ್ (ತಶೆಂ ಮ್ಹಣ್ ನಾಟಕ್ ಕರುಂಕ್ ನಿಕ್ಕುನ್ ಸಾಂಗ್ಚೆಂ) ಮೆಲ್ಲಿನ್ (ಡಿಂಪಲ್ ಪಿಂಟೊ) ಸಾಂಗ್ತಾನಾ, ತೆಂ ಅಪಾರ್ಥ್ ಕರ್ನ್, ಉಡೊನ್ ಪಡ್ಚೆ ನಿಕ್ಕುಚೆ ಆವಯ್ನ್ (ಮೀರಾ ಪಿಂಟೊ), `ಹೆಂ ಕಿತೆಂ ಕೆಲೆಂಯ್‍ರೆ!’ ಮ್ಹಣ್ ರುದಾನ್ ಕರ್ತಾನಾ ಪ್ರೇಕ್ಷಕ್ ಭರ್ಪೂರ್ ಹಾಸ್ಲೆ.

ಧಾರ್ಮಿಕ್ ನಾಟಕಾಂಕ್ ಏಕ್ ಸೊಡ್ನ್, ಹೆರ್ ನಾಟಕಾಂಕ್ ಆಪವ್ನ್ ಆಪವ್ನ್, ಪಾಸ್ ದೀವ್ನ್ ಸಾಲ್ ಭರಂವ್ಕ್ ನಾಟಕ್ ಸಂಘಟಕಾಂನಿ ಕಶ್ಟೊಂಚಿ ಭಿರ್ಮತೆಚಿ ಪರಿಗತ್ ಆಸ್ತಾನಾ, ಹ್ಯಾ ನಾಟಕಾಕ್ ಸಾಲ್‍ಭರ್ ಪ್ರೇಕ್ಷಕ್ ಹಾಜರ್ ಜಾಲ್ಲಿ, ಟಿಕೆಟ್ ಮೆಳನಾಸ್ತಾಂ ಸಬಾರಾಂ ಪಾಟಿಂ ಗೆಲ್ಲಿ, ನಾಟಕಾಚೆ ಆಕೆರಿ ಪರ್ಯಾಂತ್ ಪ್ರೇಕ್ಷಕ್ ಆತುರಾಯೆನ್ ಕದೆಲಾಂಕ್ ಚಿಡ್ಕೊನ್ ಮ್ಹಳ್ಳೆಪರಿಂ ಬಸ್‍ಲ್ಲಿ ಗಜಾಲ್ ಭರ್ವಸೊ ಹಾಡಂವ್ಚೆ ತಸಲಿ.

ಸಾದರ್‍ಪಣಾಚ್ಯಾ ವಿಶಯಾಕ್ ಯೆಂವ್ಚೆಂ ತರ್ ನಾಟಕ್ ನಿರಾಸ್ ಕರ್ತಾ. ಮುಳಾನ್ ನಾಟಕಾಚ್ಯಾ ಸ್ಕ್ರಿಪ್ಟಾಂತ್ ದೋಶ್ ಆಸ್‍ಲ್ಲ್ಯಾನ್ ನಾಟಕ್ ಖರ್ಶೆತಾ. ನಾಟಕಾಚೊ ಮುಕೆಲ್ ಪಾತ್ರ್ ಜುಜೆ ಕೋಸ್ತ್ (ಲೆಸ್ಲಿ ರೇಗೊ) ಹಾಚೆ ಖುನಿಯೆಚೊ ಮಿಸ್ತೆರ್ ಸಾಂಬಾಳ್ನ್, ತೊ ಫೊಡ್ಚೆ ಪರ್ಯಾಂತ್ ಯೆಂವ್ಚಿಂ ದೃಶ್ಯಾಂ ಖಂಯ್‍ಗೀ ಗಾಂಚ್ ಚುಕ್‍ಲ್ಲೆಪರಿಂ ದಿಸ್ತಾತ್. ಮೆಲ್ಯಾ ಉಪ್ರಾಂತ್ ಜುಜೆ ಕೋಸ್ತಾಚೊ ಅತ್ಮೊ ಮದೆಂ ಮದೆಂ ನಿರೂಪಕ್ ಜಾವ್ನ್ ಯೇವ್ನ್ ಮಿಸ್ತೆರಾಕ್ ಥ್ರಿಲ್ ದೀಂವ್ಕ್ ಪ್ರೇತನ್ ಕರ್ತಾ ತರೀ ಸ್ಕ್ರಿಪ್ಟಾಂತ್ಲೆ ಅಸ್ಕತ್ಕಾಯೆಕ್ ಲಾಗೊನ್ ಥ್ರಿಲ್ ಥ್ರಿಲ್ ಜಾವ್ನ್ ಉರನಾ. ತಾಕಾ ಪೂರಕ್ ಮ್ಹಳ್ಳೆಪರಿಂ ವೆದಿಚೆರ್ ಬಾಂದುನ್ ಹಾಡ್‍ಲ್ಲೊ dull ಭೊಂವಾರ್ ಸಸ್ಪೆನ್ಸ್ ಥ್ರಿಲ್ಲರಾಕ್ ಜಾಯ್ ಆಸ್ಚೆಂ essence ದೀಂವ್ಕ್ ಸಲ್ವತಾ. ತ್ಯಾ ಭಾಯ್ರ್ ಆಮ್ಚ್ಯಾ ನಾಟಕಾಂಕ್ ಕಾಂತಂವ್ಚಿ ಕೀಡ್ – ಪ್ರಸ್ತುತ್ ಕಾಳಾಚಿ ವೋಪ್ ನಾ ಆಸ್ಚಿ – ಹ್ಯಾ ನಾಟಕಾಂತ್‍ಯೀ ರಿಗ್ಲ್ಯಾ. ಜಶೆಂ ಜುಜೆ ಕೋಸ್ತಾಚೊ ಅತ್ಮೊ ನಾಟಕಾಚೆ ಆಕೆರಿಕ್ ಮ್ಹಣ್ತಾ – ತವಳ್ ಆದಾಂವ್-ಎವೆ ಮದೆಂ ಘಡ್‍ಲ್ಲೆಂ ಸಂಯ್ಭಾಚೆಂ ಪಾತಕ್ ಆತಾಂಯೀ ಘಡ್ತಾ – ತಶೆಂ ನಾಟಕಾಚೆಂ ಸೆಟ್ಟಿಂಗ್, ಪಾತ್ರಾಂಚಿ embroidery ವೀಸ್-ತೀಸ್ ವರ್ಸಾಂಕ್ ಪಾಟಿಂ ಪಾವಯ್ತಾತ್; ಹ್ಯಾ ಕಾಳಾಚಿ ಸಾಯ್ ಲೆಗುನ್ ದಿಸೊನ್ ಯೇನಾ. ಹಾಕಾ ಬಳ್ ದೀಂವ್ಕ್ ಮ್ಹಳ್ಳೆಪರಿಂ ಸಂಭಾಷಣಾಕ್ ವಾಪರ್‍ಲ್ಲಿ ಭಾಷೆ ಶಯ್ಲಿಯೀ ಆದ್ಲಿ; ದೆಕುನ್ ಆತಾಂ ಕೋಸ್ತ್ ಆಸ್‍ಲ್ಲೆ ಕೋಸ್ಟಾ ಆನಿ ಬಾರೆತ್ ಆಸ್‍ಲ್ಲೆ ಬಾರೆಟ್ಟೊ ಜಾಲ್ಯಾತ್ ತರೀ ನಾಟಕಾಂತ್ ಕೋಸ್ಟಾ ಕೋಸ್ತ್ ಆನಿ ಬಾರೆಟ್ಟೊ ಬಾರೆತ್ ಜಾಲಾ. ಆನಿ ಆಂತಾಂ-ಪಿಂತಾಂ, ಸಾಳಾಂ-ಪಾಳಾಂ, ಶಿಂತಿದ್, ಧವ್ಶೆಂವ್ಚೆಂ – ಅಸಲೆ ಸಬ್ದ್ ಬೋವ್‍ಶಾ ನಾಟಕ್ ಬರವ್ಪ್ಯಾಕ್ ಪಸಂದೆಚೆ ಮ್ಹಳ್ಳೆಪರಿಂ ತವಳ್ ತವಳ್ ಚಡ್ತಾವ್ ಹರ್ ಪಾತ್ರಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಪಡ್ತಾತ್.

ನಾಟಕಾಂತ್ಲ್ಯಾ ಪಾತ್ರೀಕರಣಾಂತ್‍ಯೀ ಸಲ್ವಣಿ ದಿಸೊನ್ ಯೆತಾ. ಆನಿ ಹರ್ ಪಾತ್ರಾಂತ್ ಚಡ್ ಕರುನ್ ಬರವ್ಪ್ಯಾಚ್ಯಾ ವಿಚಾರಾಂಚಿ ಸಾವ್ಳಿಚ್ ದಿಸ್ತಾ. ಹಾಚೆ ಸವೆಂ – ನಾಟಕಾಂತ್ ನಾಟಕೀಯತಾ ಆಸಜೆಚ್ ವ್ಹಯ್ ತರೀ – ಥೊಡೆಕಡೆ ಪಾತ್ರ್, ಸಂಭಾಷಣ್ over dramatic ಜಾತಾತ್. ಸಂಭಾಷಣ್ ಮ್ಹಣ್ತಾನಾ ಏಕ್ ವಿಶಯ್ ಸಾಂಗಾಜೆಚ್ ಪಡ್ಟಾ. ಸಂಭಾಷಣ್ ಕಾವ್ಯಾಳ್ ಜಾವ್ನ್ ಬಾಂದುನ್ ಹಾಡುಂಕ್ ಪ್ರೇತನ್ ಕೆಲಾಂ ತರೀ ತೆಂ ಅಸಲ್ಯಾ ಪ್ರಕಾರಾಂಕ್ ಕಿತ್ಲೆಂ ಜೊಕ್ತೆಂ ಮ್ಹಳ್ಳೆಂಯೀ ಪಳಯ್ಜೆ ಪಡ್ತಾ. ನ್ಹಯ್ ಆಸ್ತಾಂ, ಥೊಡೆ ಕಡೆ ತೆ ಕೃತಕ್ ತಶೆಂ ಉತ್ಪ್ರೇಕ್ಷಿತ್ ದಿಸ್ತಾತ್. ಜಶೆಂ ಎಕಾ ದೃಶ್ಯಾಂತ್, ಘಾತಾಕ್ ಒಳಗ್ ಜಾಲ್ಲೊ ಜುಜೆ ಕೋಸ್ತ್ ಆಪ್ಲೆ ಬಾಯ್ಲೆಕ್ ಪಾವ್ಲೆಟಾಕ್ (ನಿಶಾಲ್ ನಿವ್ಯಾ) ರಾಗಾನ್ ಆಂಕುಡ್ನ್ ಸವಾಲ್ ಕರ್ತಾ, ಮ್ಹಣ್ತಾ: ‘….. ಹಾರ್ ವಿಚಾರ್‍ಲ್ಲ್ಯಾ ತುಕಾ ಸುಂಬ್ ದಿಲೊ’!

ಅಭಿನಯ್ ಆನಿ ತಾಂತ್ರಿಕ್ ಗಜಾಲಿಂಚೆರ್ ನದರ್ ಘಾಲಿ ತರ್ – ವಯ್ರ್ ಸಾಂಗ್‍ಲ್ಲೆಪರಿಂ ವೆದಿ ವಿನ್ಯಾಸ್ ಸಾಂಪ್ರದಾಯಿಕ್, ತ್ಯಾ ತೆಕಿದ್ ಉಜ್ವಾಡಾಚೊ ವಾಪರ್‍ಯೀ ಸಾಂಪ್ರದಾಯಿಕ್. ಪಾಟ್‍ಥಳ್ ಸಂಗೀತ್ impress ಕರಿನಾ. ಥಂಯ್ ಥಂಯ್, ತಾಳ್ ಪಡಾನಾತ್‍ಲ್ಲೆಂ ಪಾಟ್‍ಥಳ್ ಸಂಗೀತ್ ಅಡ್ಕಳ್ ಹಾಡ್ತಾಲೆಂ. ಪಾತ್ರಾಂಚ್ಯಾ ರಂಗ್‍ಚಲನಾಂತ್ (‘ರಂಗಾ ಭಾಯ್ಲೆಂ’, ವೆದಿ ಪಾಟ್ಲೆಂ ಚಲನ್ ಪ್ರೇಕ್ಷಕಾಂಚ್ಯಾ ದೊಳ್ಯಾಂಥಾವ್ನ್ ಆಡಾಂವ್ಚೆವಿಶಿಂ ಗುಮಾನ್ ಗರ್ಜ್), ಆಂಗಿಕಾಭಿನಯಾಂತ್, ಸಂಭಾಶಣ್ delivery ಕರ್ಚ್ಯಾಂತ್ ಆನಿ ಅಭಿವ್ಯಕ್ತ್ ಕರ್ಚ್ಯಾಂತ್ ಸುದ್ರಾವ್ಣಿ ಗರ್ಜ್. ಆಖ್ಯಾ ನಾಟಕಾಂತ್ ಗುಮಾನ್ ವೊಡ್ಚೆಂ ಅಭಿನಯ್ ನಿಕ್ಕು `ಕುಕ್ಕು’ಚೊ ಪಾತ್ರ್ ಖೆಳ್‍ಲ್ಲ್ಯಾ ಆಲ್ವಿನ್ ವೇಗಸ್ ಹಾಚೆಂ. ತ್ಯಾ ಉಪ್ರಾಂತ್ ಸಹಜ್ ನಟನ್ ಜುಜೆ ಕೋಸ್ತಾಚೊ ಎಕಾಂವ್ಟೆಂಟ್ ಮನು ಪಂಡಿತ್ ಹಾಚೊ ಪಾತ್ರ್ ಖೆಳ್‍ಲ್ಲ್ಯಾ ಡೆನಿಸ್ ಮೊಂತೇರೊಚೆಂ.

ಇತ್ಲೆಂ ಸರ್ವ್ ಮ್ಹಣ್ತಾನಾ, `ಕರಾವಳಿ ಕೊಂಕಣ್ಸ್’ ಹಾಂಣಿ ಫುಡಾರಾಂತ್ ಆನಿಕೀ ಚಡಿತ್ ಪ್ರೇತನ್ ಕರುನ್, ಬರ್ಯಾಂತ್ಲೆ ಬರೆ ನಾಟಕ್ ದೀಂವ್ಕ್ ಪಾವೊಂದಿತ್ ಮ್ಹಣ್ `ಬುಡ್ಕುಲೊ’ ಆಶೆತಾ ಆನಿ ಕೊಂಕಣಿ ನಾಟಕ್ ಶೆತಾಕ್ ದೇಣ್ಗಿ ದಿಲ್ಲ್ಯಾ ಮ್ಹಾಲ್ಘಡ್ಯಾ ನಾಟಕಿಸ್ತಾಂಕ್ ಮಾನ್ ಪಾಟಂವ್ಚ್ಯಾ ತಾಂಚ್ಯಾ ವಾವ್ರಾಕ್ ಬರೆಂ ಮಾಗ್ತಾ.

The post ಕ್ಲೀಶೆ ಮೊಡ್ಚ್ಯಾ ಪ್ರೇತನಾಂಕ್ ಸಲಾಮ್, ಧೊಸ್ಚ್ಯಾ ದೋಶಾಂಕ್ ಮುಲಾಮ್ appeared first on Budkulo.

ಎಡಿಟಿಂಗ್ ಏಕ್ ಸ್ಕಿಲ್. ತಾಕಾ ಭಾಷೆಚೆ ಪರಿಣತೆ ಸವೆಂ ವಿಷಯಾಂಚಿ ಜಾಣ್ವಾಯೀ ಆಸಜೆ ಪಡ್ತಾ. ಎಡಿಟಿಂಗ್ ಮ್ಹಳ್ಯಾರ್ ಫಕತ್ ಭಾಸ್, ವ್ಯಾಕರಣ್ ತಿದ್ವುಂಚೆಂ ನ್ಹಯ್, ವಿಷಯಾಚಿ authenticity ಸಾಂಬಾಳ್ಚೆಸವೆಂ, ಚೂಕ್ ಆಸ್ಲ್ಯಾರ್ ಸಾರ್ಕೆಂ ಕರ್ಚೆಂ, ಪತ್ರಾಚ್ಯಾ ಧೋರಣಾಕ್ ಆಡ್ ವೆಚೆಂ ಕಿತೆಂಯ್ ಆಸ್ಲ್ಯಾರ್ ವಾ ಕಾನೂನಾತ್ಮಕ್ ಸಮಸ್ಯೆ ಹಾಡ್ಚೆ ತಸಲೆಂ, ವ್ಯಕ್ತಿಗತ್ ನಿಂದಾ ಕರ್ಚೆ ತಸಲೆಂ ಕಿತೆಂಯ್ ಆಸ್ಲ್ಯಾರ್, ಗರ್ಜ್ ನಾತ್‍ಲ್ಲೆಂ ಆಸ್ಲ್ಯಾರ್ ತೆಂ `ಕಾತರ್ಚೆಂ’ ಇತ್ಯಾದಿ ಇತ್ಯಾದಿ. ಎಡಿಟಿಂಗ್ ಏಕ್ ಸೂಕ್ಷ್ಮ್ ಕಾಮ್. ಪುಣ್ ಏಕ್-ದೋನ್ ಕೊಂಕ್ಣಿ ಪತ್ರಾಂನಿ ಸೊಡ್ಲ್ಯಾರ್, ಉರ್‍ಲ್ಲ್ಯಾ ಪತ್ರಾಂನಿ ಎಡಿಟಿಂಗಾಚೆಂ ಮಟ್ಟ್ ಬೋವ್ ಉತಳ್. ಬರ್ಪಾಂ ಕಶಿಂ ಆಯ್ಲಿಂ, ತಶಿಂಚ್ ಘಾಲ್ಚಿಂ. ಭಾಷೆಚ್ಯೊ, ವ್ಯಾಕರಣಾಚ್ಯೊ ಚುಕಿ ಕಶ್ಯೊಯ್ ಜಾಲ್ಯೊಮೂ, ವಿಷಯಾಂಚ್ಯೊಯ್ ಧಾರಾಳ್ ಚುಕಿ. ಥೊಡಿಂ ಪತ್ರಾಂ ಆಸಾತ್ ತಾಂತುಂ ಭಾಷೆಚಿ ಅಶಿಯ್ ಖುನ್ ಜಾತಾಕೀ, ಕೊಣಿ ಅತಿ ಭಾವುಕ್ ಭಾಷೆ ಮೋಗಿ ಆಸ್ಲ್ಯಾರ್, ತೆಂ ವಾಚುನ್‍ಚ್ ತಾಕಾ ಹಾರ್ಟ್ ಅಟ್ಯಾಕ್ ಜಾಂವ್ಕ್ ಆಸಾ. ಆಯಿಲ್ಲಿಂ ಬರ್ಪಾಂ ಆಯಿಲ್ಲ್ಯಾಪರಿಂಚ್, ಎಡಿಟಿಂಗ್ ಕರಿನಾಸ್ತಾಂ ಅಶಿಯ್ ಛಾಪ್ಚಿ ರೀತ್ ಆಸಾಕೀ ಲೇಖನಾ ಮದೆಂ `ಸಂಪಾದಕ್ ಭೆಂಕ್ರೊ’ ಮ್ಹಣ್ ಏಕ್ ವಾಕ್ಯೆಂ ಆಸ್ಲ್ಯಾರೀ ತಶೆಂಚ್ ಛಾಪುನ್ ಯೇಂವ್ಕ್ ಸಾಧ್ಯ್ ಆಸಾ. ಅಶಿ ಆಸಾ ಪರಿಸ್ಥಿತಿ. (ಹ್ಯೊ ಸರ್ವ್ ಗಜಾಲಿ ಆಯ್ಲೆವಾರ್ ಸುರು ಜಾಲ್ಲ್ಯಾ ಥೊಡ್ಯಾ ಕೊಂಕ್ಣಿ ವೆಬ್‍ಸಾಯ್ಟಿಂಕೀ ಲಾಗು ಕರ್ಯೆತ್.)

ಹಾಕಾ ಕಾರಣ್ ತರೀ ಕಿತೆಂ? ಆದ್ಲೆ ಚಡ್ತಾವ್ ಸಂಪಾದಕ್ ಮುಳಾನ್ ಸಾಹಿತಿ ಜಾವ್ನಾಸ್‍ಲ್ಲೆ; ಸವೆಂ ಆತಾಂಚೆಪರಿಂ ಒರ್ಥೊಗ್ರಫಿಚಿ ಘುಸ್ಪಡ್ ಚಡ್ ಮಟ್ಟಾರ್ ನಾತ್‍ಲ್ಲಿ. ಪುಣ್ ಆತಾಂ ಅಶೆಂಚ್ ಸಂಪಾದಕ್ ಜಾಲ್ಲೆಚ್ ಚಡ್. ಭಾಷೆಚ್ಯಾ ಮೊಗಾನ್, ಸಾಮಾಜಿಕ್ ಹುಸ್ಕ್ಯಾಕ್ ಲಾಗೊನ್ ಜಾಲೊಂ ಮ್ಹಣ್ತೆಲೆ ಆಸಾತ್. ಪುಣ್ ಮುಳಾನ್ ತೆ ಸರ್ವ್ ಬರವ್ಪಿಗಿ? ನ್ಹಯ್. ಸಂಪಾದಕ್ (ಅಶೆಂ ಮ್ಹಣ್ಯೆತ್‍ಗಿ?) ಜಾಲ್ಯಾ ಉಪ್ರಾಂತ್ ತರೀ ಶಿಕ್ತಾತ್‍ಗಿ, ತೆಂಯ್ ನಾ. ಹಾಂಗಾ ಆನ್ಯೇಕ್ ವಿಷಯ್ ಉಲ್ಲೇಕ್ ಕರಿಜೆ ಪಡ್ತಾ. ಏಕ್ ಪತ್ರ್ ಮ್ಹಣ್ತಾನಾ ಥಂಯ್ ವ್ಯವಸ್ಥಿತ್ ರುಪಾರ್ ವಾವ್ರ್ ಚಲ್ತಾ.  ಪತ್ರಾಂತ್ ವೆವೆಗ್ಳೆ ಸಂಪಾದಕೀಯ್ ವಿಭಾಗ್ ಆಸ್ತಾತ್. ದಾಕ್ಲ್ಯಾಕ್: ರಾಜಕೀಯ್ ವಿಭಾಗ್, ಕೃಶಿ ವಿಭಾಗ್, ಸಿನೆಮಾ ವಿಭಾಗ್, ಖೆಳಾ ವಿಭಾಗ್ ಅಶೆಂ. ತ್ಯಾ ತ್ಯಾ ವಿಭಾಗಾಕ್ ಎಕ್ಲೊ ಮುಕೆಲ್ ಡೆಸ್ಕ್ ಎಡಿಟರ್ ಆಸ್ತಾ. ಆಪ್ಲ್ಯಾ ವಿಭಾಗಾಕ್ ಆಯಿಲ್ಲಿಂ ಬರ್ಪಾಂ ವಿಂಚುನ್, ತ್ಯಾ ವಿಭಾಗಾಚೊ ಮುಖ್ಯಸ್ಥ್ ತಾಚೆಖಾಲ್ ಡೆಸ್ಕಾಂತ್ ವಾವುರ್ತೆಲ್ಯಾಂಕ್ ದಿತಾ. ತಾಂಣಿ ಎಡಿಟ್ ಕೆಲ್ಯಾ ಉಪ್ರಾಂತ್, ಮುಖ್ಯಸ್ಥ್ ಫೈನಲ್ ಎಡಿಟಿಂಗ್ ಕರ್ತಾ. ಆದಿಂ ಪ್ರೂಫ್ ರೀಡರ್ ಆಸ್ತಾಲೆ. ತೆ ಸುಕ್ಷ್ಮಾಯೆನ್ ಪ್ರೂಫ್ ಪಳೆತಾಲೆ. ಪುಣ್ ಆತಾಂ ಹೆಂಯ್ ಕಾಮ್ ಡೆಸ್ಕಾಂತ್ಲೆಚ್ ಕರ್ತಾತ್. ಪುಣ್ ಅಸಲಿ ವ್ಯವಸ್ಥಾ ಆಮ್ಚ್ಯಾ ಪತ್ರಾಂನಿ ದಿಸೊನ್ ಯೇನಾ. ತಿ ರೀತ್ ಆಮಿ ಅಪೇಕ್ಸುಂಕ್‍ಯೀ ಜಾಯ್ನಾ. ತಿತ್ಲಿ ವೃತ್ತಿಪರತಾ ಯೇಂವ್ಕ್‍ಯೀ ಸಾಧ್ಯ್ ನಾ. ತಾಕಾ ಸಬಾರ್ ಕಾರಣಾಂ ಆಸಾತ್. ತಿಂ ವೆಗ್ಳೆಂಚ್ ಚರ್ಚಾ ಕರುಂಕ್ ಫಾವೊ. ಆಮ್ಚ್ಯಾ ಪತ್ರಾಂನಿ ಸಂಪಾದಕಾ ಶಿವಾಯ್ ಏಕ್ ಡಿಟಿಪಿ ವಾವ್ರಾಡಿ ಆನಿ ಸಹಸಂಪಾದಕ್ (ಏಕ್ ದೋನ್ ಪತ್ರಾಂನಿ ಸೊಡ್ಲ್ಯಾರ್, ಉರ್ಲ್ಯಾಂತ್ ಆಸ್ಚೆ ಪಾರ್ಟ್‍ಟೈಮ್ ಸಹ ಸಂಪಾದಕ್) ಮಾತ್ರ್ ಆಸ್ತಾ.

ಡಿಟಿಪಿ ಮ್ಹಣ್ತಾನಾ ಏಕ್ ವಿಷಯ್ ಸಾಂಗನಾಸ್ತಾಂ ನಿರ್ವೊಗ್   ನಾ. ಡಿಟಿಪಿ ಖಂಚ್ಯಾಯ್ ಎಕಾ ಪತ್ರಾಚೊ ಪ್ರಮುಖ್ ವಾಂಟೊ. ಆಯಿಲ್ಲಿಂ ಬರ್ಪಾಂ ಟಾಯ್ಪ್ ಕರ್ನ್ ದಿಂವ್ಚೆಂ ಮಾತ್ರ್ ಡಿಟಿಪಿ ವಾವ್ರಾಡ್ಯಾಚೆಂ ಕಾಮ್ ಮ್ಹಣ್ ಚಿಂತೆಲಿಂ ಆಸಾತ್. ಪುಣ್ ಮ್ಹಜೆ ಪ್ರಕಾರ್ ಖಂಚ್ಯಾಯ್ ಬರ್ಪಾಂಚಿಂ ಪಯ್ಲಿಂ ವ್ಹರಯ್ಣಾರಾಂ ತಿಂ. ಏಕ್ ಬರೊ/ಬರಿ ಡಿಟಿಪಿ ವಾವ್ರಾಡಿ ಎಕಾ ಪತ್ರಾಚಿ ಆಸ್ತ್. ತಾಂಕಾಂಯ್ ಭಾಷೆಚಿ, ವಿಷಯಾಂಚಿ ಜಾಣ್ವಾಯ್ ಆಸ್ಚಿ ಗರ್ಜ್. ಆಯಿಲ್ಲಿಂ ಬರ್ಪಾಂ ಆಸಾ ತಶೆಂ ಟಾಯ್ಪ್  ಕೆಲ್ಯಾರ್, ತಿಂ ಎಡಿಟಿಂಗ್ ಕರ್ತೆಲ್ಯಾಂಚೊ ಅನಾವಶ್ಯೆಂ ಜಾಯ್ತೊ ವೇಳ್ ವಿಬಾಡ್ತಾ. ಪುಣ್ ಟಾಯ್ಪ್ ಕರ್ತಾನಾಂಚ್ ಭಾಷೆಂತ್, ವಿಷಯಾಂತ್ ಚುಕಿ ಆಸ್ಲ್ಯಾರ್, ತ್ಯೊ ತಿದ್ವುನ್ ದಿಲ್ಯಾರ್, ಎಡಿಟಿಂಗ್ ಕರ್ತೆಲ್ಯಾಂಕ್ ತೊಚ್ ಏಕ್ ವರ್ತೊ ಆಧಾರ್. ಹಾಂವೆಂ ಆದಿಂ ಅಸಲ್ಯಾ ಡಿಟಿಪಿ ವಾವ್ರಾಡ್ಯಾಂಕ್ ಪಳೆಲಾಂ. ಪುಣ್ ಆತಾಂ ಆಪುರ್ಬಾಯೆಚೆ ಕೊಂಕ್ಣಿ ಡಿಟಿಪಿ ವಾವ್ರಾಡಿ ಪಳೆಂವ್ಕ್ ಮೆಳನಾಂತ್. ವಿಪರ್ಯಾಸ್ ಮ್ಹಳ್ಯಾರ್ ಆಮ್ಚ್ಯಾ ಥೊಡ್ಯಾ ಸಂಪಾದಕಾಂಕ್‍ಚ್ ಡಿಟಿಪಿಚೆಂ ಮಹತ್ವ್ ಕಳಿತ್ ನಾ. ಡಿಟಿಪಿ ಮ್ಹಳ್ಯಾರ್ ತಾಂಕಾಂ ಚಿಲ್ಲರ್. ಪುಣ್ ಅಸಲ್ಯಾಂಕಿ ಡಿಟಿಪಿ ವಾವ್ರಾಡಿ ಜಾಯ್‍ಚ್; ನಾ ತರ್ ತಾಂಚೆಂ ಪತ್ರ್ ಭಾಯ್ರ್ ಯೇನಾ.

ಇತ್ಲೆಂ ಸರ್ವ್ ವಾಚ್ಲ್ಯಾ ಉಪ್ರಾಂತ್ ತುಮ್ಚೆ ಮತಿಂತ್ ಸವಾಲ್ ಉದೆಂವ್ಕ್ ಪುರೊ: ಕೊಂಕ್ಣಿ ಪತ್ರಾಂಕ್ ಯೆಂವ್ಚ್ಯಾ ಆನಿ ತಾಂತುಂ ಫಾಯ್ಸ್ ಜಾಂವ್ಚ್ಯಾ ಬರ್ಪಾಂಚಿ ಸ್ಥಿತಿ ಇತ್ಲಿಯ್ ಪಾಡ್ ಆಸ್ತಾಗಿ?

ತುಮಿ ಸರ್ವ್ ಪತ್ರಾಂಚೆರ್ ಎಕೊಡಿ ನದರ್ ಘಾಲ್ಯಾರ್ ತುಮ್ಕಾಂಚ್ ಜಾಪ್ ಮೆಳ್ತೆಲಿ. ಆಸ್ಚೆಂ ಆಸಾ ತಶೆಂ ಸಾಂಗ್ಲ್ಯಾರ್ ಬೆಜಾರ್ ಜಾತಾ. ತರೀ ಸಾಂಗನಾಸ್ತಾಂ ಉಪಾವ್ ನಾ. ಪತ್ರಾಂಕ್ ಯೆಂವ್ಚ್ಯಾ ಚಡ್ತಾವ್ ಬರ್ಪಾಂಚಿ ಸ್ಥಿತಿ ಅವ್ಘಡಾಂತ್ ಝೆಂಜರ್‍ಲ್ಲೆ ಕುಡಿ ಬರಿ ಆಸ್ತಾತ್. ವ್ಯಾಕರಣ್ ಗುಡ್ಯಾಕ್ ಚಡ್‍ಲ್ಲೆಂ ಆಸ್ತಾ, ವಾಕ್ಯ್ ಸಂರಚನಾಚೆಂ `ಧೂಳೀಪಟ’ ಜಾವ್ನಾಸ್ತಾ, ಖಂಯ್ ಕೊಮಾ ಘಾಲಿಜೆ, ಖಂಯ್ ಪೂರ್ಣ್‍ವಿರಾಮ್ ಘಾಲಿಜೆ ಮ್ಹಳ್ಳೆಂ ನೆಣಾಸ್ಚೆಯ್ ಆಸಾತ್ ಮ್ಹಳ್ಯಾರ್ `ಹೀಗೂ ಉಂಟೆ!’ ಮ್ಹಣ್ ವಿಜ್ಮಿತ್ ಪಾವನಾಕಾತ್. ಮ್ಹಾಕಾ ಅಜ್ಯಾಪ್ ಕರ್ಚಿ ಗಜಾಲ್ ಮ್ಹಳ್ಯಾರ್ ಜಾಯ್ತ್ಯಾ ವರ್ಸಾಂಥಾವ್ನ್ ಬರಂವ್ಚೆಯ್ ಹ್ಯಾ ವರ್ತುಲಾಂತ್ ಯೆತಾತ್ ಮ್ಹಳ್ಳೆಂ. ತಾಂಚ್ಯಾ ಬರ್ಪಾಂತ್ (ಸಕ್ಡಾಂಚ್ಯಾಂತ್ ನ್ಹಯ್) ಥೊಡೆಂ ಪುಣೀ stuff  ಆಸ್ತಾ, ಪುಣ್ ಹಿಂ ಉಣೆಪಣಾಂಯ್ ಆಸ್ತಾತ್. ವಿರೋಧಾಭಾಸ್ ಮ್ಹಳ್ಯಾರ್ ಆಯ್ಲೆವಾರ್ ಬರಂವ್ಕ್ ಸುರು ಕೆಲ್ಲ್ಯಾ ಚಡ್ತಾವಾಂಚ್ಯಾ ಬರ್ಪಾಂನಿ ಹಿಂ ಉಣೆಪಣಾಂ ಉಣಿಂ ಝಳ್ಕತಾತ್. ಕೊಂಕ್ಣೆಚ್ಯಾ ಮಟ್ಟಾಕ್ ಹಿ ಏಕ್ ಬರಿ ವಾಡಾವಳ್ ಮ್ಹಣ್ಯೆತ್.

ಹೆಂ ಸರ್ವ್ ಆಡಾಂವ್ಕ್ ಬರ್ಪ್ಯಾಂನಿ ತಾಚ್ಯಾಚ್ ಬರ್ಪಾಂಚೆ ಸಂಪಾದಕ್ ಜಾಂವ್ಕ್ ಶಿಕಜೆ. ಎಕಾ ಬರ್ಪ್ಯಾಥಂಯ್ ಆಸಜೆ ಜಾಲ್ಲೊ ಮುಕೆಲ್ ಗೂಣ್ ಹೊ. ಅಸಲ್ಯಾ ಗುಣಾಕ್ ಲಾಗೊನ್ ಬೊವ್ ಥೊಡೆ ಬರೆ ಬರವ್ಪಿ ಕೊಂಕ್ಣೆಕ್ ಲಾಬ್ಲ್ಯಾತ್. ಅಸಲ್ಯಾಂಚ್ಯಾ ಬರ್ಪಾಂತ್ accuracy ಆಸ್ತಾ. ಭಾಸ್ ನಿತಳ್ ಆಸ್ತಾ. ಸೊಭಿತ್ ಆಸ್ತಾ. ಪುಣ್ ಅಸಲಿ ನಿಷ್ಠಾ ಪಳೆಂವ್ಕ್ ಮೆಳ್ಚಿ ಬೊವ್ ಉಣಿ. ಸಂಪಾದಕ್ ತಿದ್ವಿತಾ ಮ್ಹಳ್ಳೆ ಸಸಾರಾಯೆನ್ ಏಕ್ ಪಾವ್ಟಿಂ ಬರಯಿಲ್ಲೆಂ ಪರತ್ ಪರತ್ ವಾಚಿನಾಸ್ತಾಂ ಧಾಡ್ತೆಲೆಚ್ ಚಡ್. ಜಾತಾತಿತ್ಲೆಂ ಪೊಲಿಶ್ ಕರುಂಕ್ ಮ್ಹಿನತ್ ಘೆತೆಲೆ ಕಿತ್ಲೆ ಬರವ್ಪಿ ಆಸ್ತಿತ್? ಥೊಡ್ಯಾ ಬರವ್ಪ್ಯಾಂಚಿಂ ಝೆಂಜರ್‍ಲ್ಲಿಂ ಬರ್ಪಾಂ ತ್ರಾಸ್ ಘೆವ್ನ್ ಸೊಭಿತ್ ರೂಪ್ ದೀವ್ನ್ ಫಾಯ್ಸ್ ಕೆಲ್ಯಾ ಉಪ್ರಾಂತ್ ತ್ಯಾ ಬರವ್ಪ್ಯಾಂಕ್ ಇತ್ಲೆಂ ಬರೆಂ ಕರ್ನ್ ಬರಂವ್ಕ್ ಜಾತಾ ಮ್ಹಣ್ ವಾಚ್ಪಿ ಚಿಂತಾತ್. ಪುಣ್ ಎಡಿಟಿಂಗ್ ಕೆಲ್ಲೆಲ್ಯಾನ್ ಆಪ್ಣಾಕ್ ಕ್ರೆಡಿಟ್ ಮೆಳ್ಚೆಂ ಮ್ಹಳ್ಳೆಂ ಚಿಂತಪ್‍ಯೀ ಆಸಾನಾ, regards ತ್ಯಾ ಬರವ್ಪ್ಯಾಂಕ್ ಆಸಾನಾ. ಪರತ್ ಬರವ್ನ್ ಧಾಡ್ತಾನಾ ತ್ಯೊಚ್ ಚುಕಿ ಕರ್ನ್‍ಚ್ ಆಸ್ತಾತ್! ಎಡಿಟ್ ಜಾವ್ನ್, ಛಾಪುನ್ ಆಯಿಲ್ಲಿಂ ಬರ್ಪಾಂ ವಾಚ್ಲ್ಯಾ ಉಪ್ರಾಂತ್ ತೆಂ ಪಳೆವ್ನ್ ಮುಕಾರ್ ಶಿಕ್ಯಾಂ ಮ್ಹಣ್ ಮನ್ ಕರ್ತೆಲೆ ಕಿತ್ಲೆ ಆಸಾತ್?

ತಾಚ್ಯಾಕಿ ವತ್ರ್ಯಾನ್ `ಆಪ್ಲ್ಯಾಚ್ ಬರ್ಪಾಂಚೆ ಸಂಪಾದಕ್’ ಜಾಂವ್ಕ್ ಶಿಕಂವ್ಚೆ ಕಿತ್ಲೆ ಸಂಪಾದಕ್ ಮೆಳ್ತಿತ್?

********

ಆಜ್ ಕೊಂಕ್ಣಿ ಬರ್ಪ್ಯಾಂಕ್, ಪತ್ರಾಂಕ್ ಧೊಸ್ಚ್ಯಾ ಸಮಸ್ಸ್ಯಾಂ ಪಯ್ಕಿ ಒರ್ಥೊಗ್ರಫಿಚೊ (ಬರ್ಪಾ ರೀತ್) ಸಮಸ್ಸೊಯ್ ಏಕ್. ಕೊಂಕ್ಣೆಕ್ ತಾಚಿಚ್ ಮ್ಹಳ್ಳಿ ಏಕ್ ಲಿಪಿ ನಾ ಕಶೆಂಯ್ ಜಾಲೆಂಮೂ, ಕಾನಡಿ ಲಿಪ್ಯೆಂತ್ ಕೊಂಕ್ಣಿ ಬರಂವ್ಚೆ ರಿತಿಂತ್ ಪ್ರಮಾಣಿಕರಣ್ ನಾ ಆಸ್ಚೆಂಚ್ ಏಕ್ ವ್ಹಡ್ಲೊ ಸಮಸ್ಸೊ. ಆಜ್ ಚಾರ್ ಜಣಾಂನಿ ಬರಂವ್ಚಿ ರೀತ್ ಚಾರ್ ನಮುನ್ಯಾಂಚಿ ಆಸ್ತಾ. ಪತ್ರಾಂ ಜಾಲ್ಯಾರೀ ತಶೆಂಚ್, ಎಕಾ ಪತ್ರಾನ್ ವಾಪರ್ಚಿ ಒರ್ಥೊಗ್ರಫಿ ಆನ್ಯೆಕಾ ಪತ್ರಾಂತ್ ಪಳೆಂವ್ಕ್ ಮೆಳನಾ. ದಾಕ್ಲ್ಯಾಕ್: `ಆನ್ಯೆಕ್’ ಹೊ ಸಬ್ದ್  ಅಶೆಂಯ್ ಬರಂವ್ಚೆಂ ಪಳೆಂವ್ಕ್ ಮೆಳ್ತಾ: ಆನ್‍ಏಕ್, ಆನ್ಯೇಕ್. `ಲಾಬಜೆ’ ಮ್ಹಳ್ಳೊ ಸಬ್ದ್ – ಲಾಭಾಜಯ್, ಲಾಬಜಾಯ್ ಅಶೆಂಯ್ ವಾಚುಂಕ್ ಮೆಳ್ತಾ. (ವ್ಯಾಕರಣಾಂತ್‍ಯೀ ಅಸಲಿ ಥೊಡಿ ಘುಸ್ಪಡಾಯ್ ಪಳೆಂವ್ಕ್ ಮೆಳ್ತಾ. ಸಮಾಜ್ ಪುಲ್ಲಿಂಗ್‍ಗೀ, ಸ್ತ್ರೀ ಲಿಂಗ್‍ಗೀ ಮ್ಹಳ್ಳೆ ತಸಲೆ ತರ್ಕ್‍ಯೀ ಚಲ್ತಾತ್.) ಅಸಲೆ ಜಾಯ್ತೆ ದಾಕ್ಲೆ ದಿವ್ಯೆತ್. ಖಂಚಿ ಸಾರ್ಕಿ ರೀತ್ ಮ್ಹಣ್ ವಿಚಾರ್ಯಾಂ ಮ್ಹಳ್ಯಾರ್ ಹಾಂಗಾ ಸಕ್ಕಡೀ ಪಂಡಿತ್‍ಚ್. ಆಕೆರಿಕ್ ಮಾತ್ರ್ ಹಿ ಕರಂದಾಯ್ ಭೊಗ್ಚಿ ಬರ್ಪಾಂ ಎಡಿಟ್ ಕರ್ತೆಲ್ಯಾನ್. ಬರವ್ಪಿ ಸಹಜ್ ಜಾವ್ನ್ ತಾಂಚೆ ಶಯ್ಲೆರ್ (ಕನ್ನಡ ಬರಂವ್ಚೆ ರಿತಿಂತ್) ಬರವ್ನ್ ಧಾಡ್ತಾತ್. ಪುಣ್ ಪತ್ರಾನ್ ವಾಪರ್ಚೆ ಒರ್ಥೊಗ್ರಪಿ ಪರ್ಮಾಣೆ ತಾಣೆ ಸರ್ವ್ ಬರ್ಪಾಂ ಎಡಿಟ್ ಕರ್ನ್, ಏಕ್‍ರೂಪ್ ಸಾಂಬಾಳುಂಕ್ ಒದ್ದಾಡಿಜೆ ಪಡ್ತಾ.

ಆಟ್-ಧಾ ವರ್ಸಾಂ ಆದಿಂ ಭಾಷೆಕ್ ಸಂಬಂಧಿತ್, ವ್ಯಾಕರಣ್ ಶಿಕಂವ್ಚಿಂ ಕಾಮಾಸಾಳಾಂ ತರೀ ಚಲ್ತಾಲಿಂ. ತವಳ್ ದುಬಾವ್ ಪುಣೀ ಪರಿಹಾರ್ ಕರುಂಕ್ ಅವ್ಕಾಸ್ ಮೆಳ್ತಾಲೊ. ಆತಾಂ ತಸಲಿಂ ಕಾಮಾಸಾಳಾಂಚ್ ಚಲನಾಂತ್. ಆಟ್ ವರ್ಸಾಂ ಆದಿಂ ಗೊಂಯ್ಚ್ಯಾ ತೊಮಾಸ್ ಸ್ಟೀಫನ್ಸ್ ಕೊಂಕ್ಣಿ ಕೆಂದ್ರಾಚ್ಯಾ ಮುಕೆಲ್ಪಣಾಖಾಲ್ ಕೊಡ್ಯಾಳಾಂತ್, ಪ್ರಮಾಣಿಕರಣಾವಿಶಿಂ ಏಕ್ ಕಾಮಾಸಾಳ್ ಚಲಯಿಲ್ಲೆಂ. ಪುಣ್ ತಾಕಾ ಹಾಜರ್ ಜಾಲ್ಲೆ ಫಕತ್ ಏಕ್-ದೋನ್ ಪತ್ರಾಂಚೆ ಸಂಪಾದಕ್.

ಆತಾಂಚಿ ಗಜಾಲ್ ಜಾಲ್ಯಾರೀ ತಶಿಚ್ ಆಸೊಂಕ್ ಪುರೊ. ತರ್ ಆತಾಂ ಮಾಜ್ರಾಕ್ ಘಾಂಟ್ ಬಾಂದ್ಚಿ ಕೊಣೆಂ? ಸಂಪಾದಕಾಂನಿ-ಬರ್ಪ್ಯಾಂನಿ ಸಾಂಗಾತಾ ಮೆಳೊನ್ ಹ್ಯಾ ವಿಷಯಾಚೆರ್ ಗಂಭೀರ್ ಜಾವ್ನ್ ಚಿಂತುಂಕ್ ಆತಾಂ ಪುಣೀ ಮನ್ ಕರಿಜೆ. ತಾಕಾ ಇಚ್ಛಾಸಕತ್ ಗರ್ಜ್. ಎಕಾ ಪತ್ರಾಕ್ ಜಾಹಿರಾತಾಂ ಆನಿ ಆರ್ಥಿಕ್ ಅನ್ಕೂಲತೆ ಸವೆಂ ಬರ್ಯಾ ಎಡಿಟಿಂಗಾನ್ ಸೊಭ್ಚಿಂ, ಭಾಷೆ ಕರಂದಾಯ್ ದೀನಾತ್‍ಲ್ಲಿಂ ಬರಿಂ ಬರ್ಪಾಂಯ್ ಗರ್ಜೆಚಿಂ. ಪುಣ್ practically ಹೊ ಭರ್ವಸೊ ದವರ್ಯೆತ್ಗಿ?

(Originally published on June 06, 2012)

The post ಎಡಿಟಿಂಗಾಚಿ ಖುನಿ ಆನಿ ಒರ್ಥೊಗ್ರಫಿಚಿ ಕರಂದಾಯ್ appeared first on Budkulo.