ವ್ಹಾವ್ ಊಟಿ ವ್ಹಾವ್! ಸರ್ಗಾಚೊ ಅನುಭವ್ ದಿಂವ್ಚೊ ಭುಮಿ ವಯ್ಲೊ ಅದ್ಭುತ್ ಜಾಗೊ

ಊಟಿ! ಹೆಂ ನಾಂವ್ ಆಯ್ಕನಾತ್‍ಲ್ಲೊ ಕೊಣೀ ಆಸ್ಚೊ ನಾ. ತಾಂತುಂಯೀ ತರ್ನ್ಯಾ ಕಾಳ್ಜಾಂನಿ ಊಟಿ ಮ್ಹಳ್ಯಾರ್ ಥಾಂಬನಾತ್‍ಲ್ಲೆ ಉಮಾಳೆ ಉಬ್ಜಂವ್ಕ್ ಸಕ್ಚೆಂ ಆಕರ್ಷಣ್ ಹ್ಯಾ ಗಾಂವಾಚೆಂ. ಎಕಾ ಕಾಳಾರ್ ಕಾಜಾರಿ ಜೊಡ್ಯಾಂಕ್ ಹನಿಮೂನಾಕ್ ವಚೊಂಕ್ ಆಸ್‍ಲ್ಲಿ ಪ್ರಮುಖ್ ವಿಂಚವ್ಣ್ ಊಟಿ! ಆಜೂನ್ ದಕ್ಷಿಣ್ ಭಾರತಾಂತ್ ಅತೀ ಚಡ್ ಪ್ರವಾಸಿಂಕ್ ಆಪ್ಣಾ ಥಂಯ್ ಹಾಡ್ಚೆಂ ಊಟಿ ಭಾರತಾಚೆಂ ಪ್ರಮುಖ್ ಪ್ರವಾಸಿಧಾಮ್.

ತರ್ ಊಟಿಂತ್ ಕಿತೆಂ ಆಸಾ, ಕಿತ್ಯಾಕ್ ಲೋಕ್ ಥಂಯ್ ವಚೊಂಕ್ ಅತ್ರೆಗ್ತಾ ಮ್ಹಣ್ ಜಾಣಾಂ ಜಾವ್ಯಾಂ. ಥೊಡ್ಯಾ ವರ್ಸಾಂ ಆದಿಂ ಹಾಂವ್ ಥಂಯ್ ಪಾವ್‍ಲ್ಲೊಂ. ತ್ಯಾ ವರ್ವಿಂ ಊಟಿ ವಿಶಿಂ ಪ್ರತ್ಯಕ್ಷ್ ಮಾಹೆತ್, ಮಾರ್ಗದರ್ಶನ್ ತುಮ್ಕಾಂ ದಿತಾಂ.

ನೀಲ್‍ಗಿರಿ ಪರ್ವತ್ ಶ್ರೇಣಿ

ಉತ್ತರ್ ಭಾರತಾಂತ್ಲಿಂ ಶಿಮ್ಲಾ, ಮನಾಲಿ, ನೈನಿತಾಲ್, ಡಾರ್ಜಿಲಿಂಗ್ ತಸಲಿಂ ಹಿಲ್ ಸ್ಟೇಶನಾಂ ತುಮಿ ಜಾಣಾಂತ್. ದಕ್ಷಿಣ್ ಭಾರತಾಂತ್ಲೆಂ ಪ್ರಖ್ಯಾತ್ ಹಿಲ್ ಸ್ಟೇಶನ್ ಊಟಿ. ಪಶ್ಚಿಮ್ ಘಾಟಾಂತ್ಲೆಂ ಭೋವ್ ಪ್ರಸಿದ್ಧ್ ಪ್ರವಾಸಿ ತಾಣ್ ಹೆಂ. ತಮಿಳುನಾಡು ರಾಜ್ಯಾಚ್ಯಾ ನೀಲ್‍ಗಿರೀಸ್ ಜಿಲ್ಲ್ಯಾಚೆಂ ಕೇಂದ್ರ್ ಸ್ಥಾನ್. 2240 ಮೀಟರ್ ದರ್ಯಾ ಮಟ್ಟಾ ಥಾವ್ನ್ ಉಬಾರಾಯೆಚೆಂ ಊಟಿ ಥಂಡ್ ಹವ್ಯಾಕ್, ನೈಸರ್ಗಿಕ್ ಸೊಭಾಯೆಕ್ ನಾಂವಾಡ್ಲಾಂ.

ಆಮಿ ಮೇ ಮಹಿನ್ಯಾಚ್ಯಾ ಪಯ್ಲ್ಯಾ ಹಫ್ತ್ಯಾಂತ್ ಊಟಿ ಗೆಲ್ಲ್ಯಾಂವ್. ಗಿಮಾಂತ್ ದಕ್ಷಿಣ್ ಭಾರತ್ ಉಕಡ್ತಾ. ಥಂಯ್ಚಿ ಖರಿ ಸ್ಥಿತಿ ಕುತೂಹಲಾಚಿ ಜಾಲ್ಲಿ. ನಿರೀಕ್ಷೆಕ್ ವ್ಯತಿರಿಕ್ತ್ ಮ್ಹಳ್ಳೆಪರಿಂ ಊಟಿ ಪಾವ್ತಚ್ ಪಾವ್ಸಾನ್ ಆಮ್ಕಾಂ ಸ್ವಾಗತ್ ಕೆಲೆಂ. ರಾತಿಕ್ ಹಿಂವ್ ಕಠಿಣ್. ಥಂಯ್ಚ್ಯಾ ಹೊಟೆಲಾಂನಿ ಫ್ಯಾನಾಂ, ಎ.ಸಿ. ಪಳೆಂವ್ಕ್ ಮೆಳನಾಂತ್. ಬದ್ಲಾಕ್, ಹೀಟರಾಂ ಅನಿವಾರ್ಯ್. ಉದಾಕ್ ಇತ್ಲೆಂ ಥಂಡ್ ಆಸ್ತಾಗೀ ಆಪ್ಡೊಂಕೀ ಕಷ್ಟ್. ತ್ಯಾಚ್ ಕಾರಣಾಕ್ ಲಾಗೊನ್ ಬ್ರಿಟಿಶಾಂನಿ ಊಟಿಕ್ ಗಿಮಾಚಿ ರಾಜಧಾನಿ ಕರ್ನ್ ಘೆತ್‍ಲ್ಲಿ.

ಗಿಮೆಚ್ಯಾ ಸೀಸನಾಂತ್ ರಜೆರ್ ಲೋಕ್ ಪ್ರವಾಸಾಕ್ ವೆತಾ. ಉತ್ತರ್ ಭಾರತಾಂತ್ ಜಾಯ್ತೆ ಗಿರಿಧಾಮ್ ಆಸಾತ್. ದಕ್ಷಿಣ್ ಭಾರತಾಚ್ಯಾ ಪಶ್ಚಿಮ್ ಘಾಟಾಂನಿಯೀ ಅದ್ಭುತ್ ಗಿರಿಧಾಮ್ ಆಸಾತ್. ಚಿಕ್‍ಮಗ್ಳುರ್, ಮಡಿಕೇರಿ, ವಯನಾಡ್, ಮುನ್ನಾರ್, ಕೊಡೈಕನಾಲ್ ಆನಿ ಊಟಿ ನಾಂವಾಡ್ದಿಕ್ ಆಸೊನ್ ವರ್ಸಾಕ್ ಲಾಖೊಂ ಪ್ರವಾಸಿ ಭೆಟ್ ದಿತಾತ್. ಹಿಮಾಚಲ, ಕಾಶ್ಮೀರಾಕ್ ವಚೊಂಕ್ ಪಯ್ಣ್ ಲಾಂಬ್ ಆನಿ ಖರ್ಚ್ ಚಡ್. ಐಸ್ ಏಕ್ ಸೊಡ್ಲ್ಯಾರ್ ಹೆರ್ ಸರ್ವ್ ಅನುಭವ್ ತುಮಿ ಊಟಿಂತ್ ಜೊಡ್ಯೆತ್.

ಊಟಿಚಿ ವಾಟ್ ಸಲೀಸ್

ಆಮಿ ಕಾರಾರ್ ಕೊಡ್ಯಾಳ್ ಥಾವ್ನ್ ಗೆಲ್ಲ್ಯಾಂವ್. ಮಡಿಕೇರಿ ಜಾವ್ನ್ ಮೈಸೂರ್ಚ್ಯಾ ವಾಟೆರ್ ಹುಣ್ಸೂರ್ ಮೆಳ್ತಾ. ಥಂಯ್ ಉಜ್ವಾಕ್ ಗುಂಡ್ಲುಪೇಟೆಕ್ ಘುಂವೊನ್, ಮುಖಾರ್ ಗೆಲ್ಯಾರ್ ಬಂಡೀಪುರ ಅಭಯಾರಣ್ಯ ಮುಖಾಂತ್ರ್ ಊಟಿಕ್ ಪಾವ್ಯೆತ್. ದೋನ್ ವಾಟೆಂನಿ ಊಟಿ ವಚ್ಯೆತ್. ಏಕ್ ಪ್ರಮುಖ್ ಹೈವೇ ತರ್, ಪರ್ನೊ ರಸ್ತೊ ಏಕ್ ಆಸಾ. ಭಿರಾಂಕುಳ್ ವಾಟ್ ತಿ. 36 ಹೇರ್‍ಪಿನ್ ಕರ್ವ್ ಆಸ್ಚೊ ಆನಿ ಉಬಾರ್ ಘಾಟಿ ರಸ್ತೊ ತೊ. ಆಮಿ ಚುಕೊನ್ ತೆಣೆಂ ಗೆಲ್ಲ್ಯಾಂವ್! ಅಂತರ್ ಉಣೊ, ಪುಣ್ ಪಯ್ಣ್ ರಿಸ್ಕೆಚೆಂ, ಅಪಾಯ್‍ಕಾರಿ ವಾಟ್. ಪಾಟಿಂ ಯೆತಾನಾ ಹೈವೇಂತ್ಲ್ಯಾನ್‍ಂಚ್ ಆಯ್ಲ್ಯಾಂವ್.

ಮೈಸೂರ್, ಬೆಂಗ್ಳುರ್ ಆನಿ ಹೆರ್ ಪ್ರಮುಖ್ ಶ್ಹೆರಾಂ ಥಾವ್ನ್ ಬಸ್ಸಾಂಯೀ ಮೆಳ್ತಾತ್. ಸ್ವಂತ್ ವಾಹನಾರ್ ವೆತಾತ್ ತರ್ ಬಂಡೀಪುರ ರಕ್ಷಿತಾರಣ್ಯಾಂತ್ ವೆಳಾಚಿ ಬಂದಡ್ ಆಸಾ. ತ್ಯಾ ವಿಶಿಂ ಸಮ್ಜೊನ್ ಪಯ್ಣ್ ಸುರು ಕರಾ. ಹುಣ್ಸೂರ್ ಥಾವ್ನ್ ಮುಖಾರ್ ಉಜ್ವ್ಯಾಕ್ ಏಕ್ ಬೃಹತ್ ಸರೋವರ್ ಪಳೆಂವ್ಕ್ ಮೆಳ್ತಾ. ವಿಶೆವಾಕ್ ಆನಿ ಫೊಟೊ ಕಾಡುಂಕ್ ಬರೊ ಜಾಗೊ ತೊ.

ರೈಲಾಚೊ ಸಂಪರ್ಕ್‍ಯೀ ಆಸಾ. ಲಾಗ್ಶಿಲೆಂ ಸ್ಟೇಶನ್ ಮೆಟ್ಟುಪಾಳ್ಯಂ. ಥಂಯ್ ಥಾವ್ನ್ ರಸ್ತ್ಯಾರ್ ವಾ ನೀಲ್‍ಗಿರಿ ಮೌಂಟೆನ್ ರೈಲ್ವೆ (ಓಒಖ) ಮುಖಾಂತ್ರ್ ಊಟಿ ವಚ್ಯೆತ್. ವಿಮಾನಾರ್ ಯೆತೆಲ್ಯಾಂನಿ ಕೊಯಮತ್ತೂರು ಏರ್‍ಪೋರ್ಟ್ ಪಾವೊನ್ ಥಂಯ್ ಥಾವ್ನ್ ರೈಲ್ ವಾ ರಸ್ತ್ಯಾರ್ ಊಟಿ ಪಾವ್ಯೆತ್.

ಬ್ರಿಟಿಶಾಂನಿ ಉಜ್ವಾಡಾಯಿಲ್ಲೆಂ ಶ್ಹೆರ್

ಊಟಿಂತ್ (ನೀಲ್‍ಗಿರೀಸ್ ಪ್ರದೇಶಾಂತ್) ಆದಿಂ ಥಾವ್ನ್ ವೆವೆಗ್ಳ್ಯಾ ಆದಿವಾಸಿ ಜನಾಂಗಾಂಚೊ ಲೋಕ್ ಜಿಯೆತಾಲೊ. ಸ್ಥಳೀಯ್ ಲೋಕ್ ಉದಕಮಂಡಲ (ತಮಿಳ್) ಮ್ಹಣ್ತಾಲೆ. ಊಟಕಮಂಡ್ ಮ್ಹಳ್ಳೆಂ ನಾಂವ್‍ಯೀ ಆಸಾ. 1818 ಇಸ್ವೆಂತ್, ಕೊಯಮತ್ತೂರು ಕಲೆಕ್ಟರ್ ಜಾವ್ನಾಸ್‍ಲ್ಲ್ಯಾ ಜಾನ್ ಸಲ್ಲಿವಾನಾಚ್ಯಾ ಕಾಳಾರ್, ಊಟಿ ಲಾಗ್ಸರ್ಚೆ ಜಾಗೆ ಅಭಿವೃದ್ಧಿ ಜಾಲೆ. ರಸ್ತೆ ನಿರ್ಮಿಲೆ. 1868ವ್ಯಾ ವರ್ಸಾ ನೀಲ್‍ಗಿರೀಸ್ ವೆಗ್ಳೊಚ್ ಜಿಲ್ಲೊ ಜಾಲೊ. ಮದ್ರಾಸ್ ಪ್ರೆಸಿಡೆನ್ಸಿಚ್ಯಾ ಅಧೀನ್ ಆಸ್‍ಲ್ಲೆಂ ಊಟಿ ಫಿಂಗ್ರ್ಯಾಂಚೆಂ ಸಮ್ಮರ್ ಕ್ಯಾಪಿಟಲ್ ಜಾಲೆಂ. ಸ್ವಾತಂತ್ರ್ಯಾ ಉಪ್ರಾಂತ್ ಊಟಿ ಪ್ರಸಿದ್ಧ್ ಪ್ರವಾಸಿಧಾಮ್ ಜಾಲೆಂ.

ಊಟಿ ಪ್ರಾಕೃತಿಕ್ ಸೊಭಾಯೆಚಿ ರಾಣಿ

ಊಟಿಂತ್ ಕಿತೆಂ ಆಸಾ ಮ್ಹಳ್ಯಾರ್ ಪಯ್ಲಿ ಜಾಪ್‍ಚ್ ಆಪುರ್ಬಾಯೆಚಿಂ ಗಾರ್ಡನಾಂ. ಬೊಟಾನಿಕಲ್ ಗಾರ್ಡನ್ ಆನಿ ರೋಸ್ ಗಾರ್ಡನ್ ಹಾಂಗಾಚೆಂ ಪ್ರಮುಖ್ ಆಕರ್ಷಣ್. ನೀಲಗಿರಿ ಪರ್ವತಾಂಚ್ಯಾ ಸುಂದರ್ ದೊಂಗ್ರಾಂಚೊ ಪ್ರದೇಶ್ ಹೊ. ಖಂಯ್ ಪಳೆಲ್ಯಾರೀ ಪಾಚ್ವೆಂ. ಕೊಂಕ್ರಿಟ್ ಬಿಲ್ಡಿಂಗಾಂ ಉಣಿಂ, ಹರ್ ಗುಡೆ ರಾಂದ್ವಯ್ ವಾ ಚಾಯೆಚ್ಯಾ ತೊಟಾಂನಿ ಭರ್ಲ್ಯಾತ್. ಕ್ಯಾಬೇಜ್, ಕ್ಯಾರೆಟ್, ಬಟಾಟೆ, ಕಾಲಿಫ್ಲವರ್ ಇತ್ಯಾದಿ ಹಾಂಗಾ ದರಬಸ್ತ್ ಜಾತಾ. ಪೀಚ್, ಪ್ಲಮ್, ಪಿಯರ್, ಸ್ಟ್ರಾಬೆರಿ ತಸಲಿಂ ಫಳಾಂಯೀ ಜಾತಾತ್. ನೀಲ್‍ಗಿರಿ ಆನಿ ಪೈನ್ ರೂಕ್ ಸಗ್ಳ್ಯಾಂನಿ ಧಲ್ತಾತ್.

ಕೂನೂರ್ ತುಮಿ ಆಯ್ಕಲಾಂ. 2021 ಡಿಸೆಂಬರಾಂತ್ ಕೂನೂರ್ ಪರ್ವತಾ ತುದಿಯೆರ್ ಹೆಲಿಕಾಪ್ಟರ್ ಅವ್ಗಡ್ ಘಡ್‍ಲ್ಲೆಂ. ತಾಂತುಂ ಭಾರತಾಚೊ ಚೀಫ್ ಆಫ್ ಡಿಫೆನ್ಸ್ ಸ್ಟಾಫ್ ಜನರಲ್ ಬಿಪಿನ್ ರಾವತ್ ಆನಿ ಹೆರಾಂ ಮರಣ್ ಪಾವ್‍ಲ್ಲಿಂ. ಕೂನೂರ್ ಊಟಿಚ್ಯಾ ಲಾಗಿಂಚ್ ಆಸಾ. ತುಮ್ಕಾಂ ಥೊಡೆ ದೀಸ್ ರಾವೊಂಕ್ ಸಾಧ್ಯ್ ಆಸ್ಲ್ಯಾರ್ ಜಾಯ್ತೆ ಜಾಗೆ ಪಳೆವ್ಯೆತ್.

ಲವ್ಲಿ ಬೊಟಾನಿಕಲ್ ಗಾರ್ಡನ್

ಊಟಿಚೆಂ ಪ್ರಮುಖ್ ಆಕರ್ಷಣ್ ಹೆಂ. 1847ಂತ್ ಸ್ಥಾಪನ್ ಜಾಲ್ಲೆಂ, ಹೆಂ ತೋಟ್ ಥರಾವಳ್ ಜಾತಿಂಚ್ಯಾ ರೂಕ್-ಝಾಡಾಂ ಆನಿ ಫುಲಾಂಚೆಂ ಸಂಗಮ್. ಮೇ ಮಹಿನ್ಯಾಂತ್ ಫ್ಲವರ್ ಶೋ ಚಲ್ತಾ. 20 ಮಿಲಿಯ ವರ್ಸಾಂ ಆದ್ಲ್ಯಾ ಎಕಾ ರುಕಾಚೆಂ (ಫಾಸಿಲ್) ಪ್ರದರ್ಶನ್ ಥಂಯ್ ಆಸಾ. ಲ್ಹಾನಾ ವ್ಹಡಾಂಕ್, ಮೋಗ್ ಕರ್ಣಾರಾಂಕ್ ಆನಿ ಕುಟ್ಮಾ ಸವೆಂ ವೆತೆಲ್ಯಾಂಕ್ ಹ್ಯಾ ಪಾರ್ಕಾಂತ್ ದೀಸ್‍ಭರ್ ವೇಳ್ ಪಾಶಾರ್ ಕರ್ಯೆತ್. ಫೊಟೊ ಕಾಡುಂಕ್, ಸೆಲ್ಫಿಂಕ್ ಅದ್ಭುತ್ ಜಾಗೊ.

ಅದ್ಭುತ್ ರೋಸ್ ಗಾರ್ಡನ್

ತುಮಿ ಚಡ್ ಮ್ಹಳ್ಯಾರ್ ಕಿತ್ಲೆ ಗುಲೊಬ್ ಪಳೆಲ್ಯಾತ್? ಹ್ಯಾ ರೋಸ್ ಗಾರ್ಡನಾಂತ್ 20,000 ನಮೂನ್ಯಾಂಚೆಂ ವೆವೆಗ್ಳೆ ಗುಲೊಬ್ ಆಸಾತ್! ಫಕತ್ ಗುಲೊಬಾಂಚೆಂಚ್ ಗಾರ್ಡನ್ ಹೆಂ. 2006 ಇಸ್ವೆಂತ್ ವಲ್ರ್ಡ್ ಫೆಡರೇಶನ್ ಆಫ್ ರೋಸ್ ಸೊಸೈಟಿನ್ ಹ್ಯಾ ತೊಟಾಕ್ ‘ಗಾರ್ಡನ್ ಆಫ್ ಎಕ್ಸೆಲೆನ್ಸ್’ ಮ್ಹಣ್ ಮಾನ್ಯತಾ ದಿಲ್ಯಾ. ಮ್ಹಣ್ತಚ್ ಹಾಚಿಂ ಮಹಿಮಾಂ ಕಸಲಿಂ ಮ್ಹಣ್ ಅಂದಾಜ್ ಕರ್ಯೆತ್. ಊಟಿಂತ್ ತುಮಿ ಚುಕನಾಸ್ತಾನಾ ಹಾಂಗಾ ಭೆಟ್ ದಿಯಾ.

ರೊಮ್ಯಾಂಟಿಕ್ ಬೋಟ್ ಹೌಸ್

ಊಟಿಂತ್ಲೆಂ ಆನ್ಯೇಕ್ ಆಕರ್ಷಣ್ ಬೋಟ್ ಹೌಸ್. ಹಾಂಗಾ ನಿರ್ಮಿಲ್ಲ್ಯಾ ಕೃತಕ್ ಸರೋವರಾಂತ್ (ಊಟಿ ಲೇಕ್) ಪ್ರವಾಸಿಂಕ್ ನಿರ್ಮಳ್ ಪರಿಸರಾಂತ್ ಬೋಟಿಂಗಾಕ್ ಅವ್ಕಾಸ್ ಆಸಾ. ಚಡಾವತ್ ಹನಿಮೂನಾಕ್ ಆಯಿಲ್ಲ್ಯಾಂಕ್ ಹೆಂ ಫೇವರಿಟ್ ತಾಣ್. ಭುರ್ಗ್ಯಾಂಚೆಂ ಗಾರ್ಡನ್‍ಯೀ ಆಸಾ. ಪೈಕಾರಾ ಫಾಲ್ಸ್ ಆನಿ ಡ್ಯಾಮ್ ಲಾಗಿಂಚ್ ಆಸಾತ್.

ಬಲಿಷ್ಠ್ ಸ್ಟೋನ್ ಹೌಸ್

ಊಟಿಂತ್ ನಿರ್ಮಾಣ್ ಜಾಲ್ಲೆಂ ಪಯ್ಲೆಂ ಆಧುನಿಕ್ ಕಟ್ವಣ್ ಸ್ಟೋನ್ ಹೌಸ್ (ತಮಿಳ್: ಕಲ್ ಬಂಗ್ಲಾ). 1822ಂತ್ ಜಾನ್ ಸಲ್ಲಿವಾನಾನ್ ‘ತೋಡಾ’ ಜನಾಂಗಾ ಥಾವ್ನ್ ಮೊಲಾಕ್ ಘೆತ್‍ಲ್ಲ್ಯಾ ಜಾಗ್ಯಾರ್ ಬಾಂಧ್‍ಲ್ಲೊ ಪಯ್ಲೊ ಬಂಗ್ಲೊ ಹೊ. ತೆಂ ತಾಚೆಂ ಘರ್ ಜಾವ್ನಾಸ್‍ಲ್ಲೆಂ. ದಕ್ಷಿಣ್ ಭಾರತಾಂತ್ಲ್ಯಾ ಅದ್ಭುತ್ ಯುರೋಪಿಯನ್ ಆರ್ಕಿಟೆಕ್ಟಾಚಿ ಪುರಾತನ್ ರುಜ್ವಾತ್ ಹಿ. ಪ್ರಸ್ತುತ್ ಸರ್ಕಾರಾಚ್ಯಾ ಅಧೀನ್ ಆಸಾ.

ನೀಲ್‍ಗಿರಿ ಮೌಂಟೆನ್ ರೈಲ್ವೆ

ನೀಲ್‍ಗಿರಿ ಪರ್ವತಾಂಚ್ಯಾ ತುದಿಯೆರ್ ಬ್ರಿಟಿಶಾಂನಿ ನಿರ್ಮಿಲ್ಲಿ ರೈಲ್ವೆ ವ್ಯವಸ್ಥಾ ಪ್ರಸ್ತುತ್ ಯುನೆಸ್ಕೊಚ್ಯಾ ವಲ್ರ್ಡ್ ಹೆರಿಟೇಜ್ ಸೈಟ್ ಮಾನ್ಯತೆಕ್ ಪ್ರಾಪ್ತ್ ಜಾಲ್ಯಾ. ಹಾಕಾ ‘ಟಾಯ್ ಟ್ರೈನ್’ ಮ್ಹಣ್ತಾತ್. ಅದ್ಭುತ್ ಅನುಭವ್ ಜೊಡುಂಕ್ ತುಮಿ ಹಾಂತುಂ ಪಯ್ಣ್ ಕರಿಜೆ. ಮೆಟ್ಟುಪಾಳ್ಯಂ ಥಾವ್ನ್ ಕೂನೂರ್-ಊಟಿಚ್ಯಾ (46 ಕಿ.ಮೀ.) ಸಾಡೆ ಚಾರ್ ವೊರಾಂಚ್ಯಾ ಪಯ್ಣಾರ್ 16 ಟನೆಲಾಂ, 250 ಸಾಂಖೆ, 208 ಘುಂವ್ಡ್ಯೊ ಮೆಳ್ತಾತ್. ಭೋವ್ ಸುಂದರ್, ಅದ್ಭುತ್ ಅನುಭವ್ ಜೊಡ್ಯೆತ್.

ಸೈಂಟ್ ಸ್ಟೀಫನ್ಸ್ ಚರ್ಚ್

ಬ್ರಿಟಿಶಾಂನಿ ಬಾಂಧ್‍ಲ್ಲೆಂ ಶ್ಹೆರ್ ಜಾಲ್ಲ್ಯಾನ್ ಊಟಿಂತ್ ಜಾಯ್ತ್ಯೊ ಇಗಜ್ರ್ಯೊ ಆಸಾತ್ (14). ಸೈಂಟ್ ಸ್ಟೀಫನ್ಸ್ ಚರ್ಚ್ ಭೋವ್ ಪರ್ನಿ. ಟಿಪ್ಪುಕ್ ಸಲ್ವವ್ನ್ ಮೈಸೂರ್ ಪ್ರಾಂತ್ಯ್ ಜಿಕ್‍ಲ್ಲ್ಯಾ ಬ್ರಿಟಿಶಾಂನಿ ಶ್ರೀರಂಗಪಟ್ಟಣಾಚೆಂ ಟಿಪ್ಪುಚೆಂ ರಾವ್ಳೆರ್ ಕೊಸ್ಳಾಯಿಲ್ಲೆಂ. ಥಂಯ್ಚೆಂ ರುಕಟ್ ಊಟಿಕ್ ಸಾಗ್ಸುನ್ ಹ್ಯಾ ಇಗರ್ಜೆಂತ್ ವಾಪರ್ಲಾಂ. ವಣದಿರ್ ಲಾಸ್ಟ್ ಸಪ್ಪರ್, ಜೆಜುಚ್ಯಾ ಖುರ್ಸಾವ್ಣೆಚೆಂ ಆನಿ ಹೆರ್ ಗ್ಲಾಸ್ ಪೈಂಟಿಂಗ್ಸ್ ಆಸಾತ್.

ಊಟಿಚ್ಯಾ ಭೊಂವ್ತಣಿಂ ಭೊಂವ್ಯೆತ್ ಕಿತ್ಲೆಂಯೀ

ಖಂಯ್ಚೊಯೀ ಪ್ರವಾಸ್ ತುಮ್ಚ್ಯಾ ವೇಳ್ ಆನಿ ಬಜೆಟಿಚೆರ್ ಹೊಂದ್ವೊನ್ ಆಸ್ತಾ. ಊಟಿಂತ್ ಪ್ರವಾಸಿಂಚಿ ಖೆಟ್ ಆಸ್‍ಲ್ಲ್ಯಾನ್ ಹರ್ಯೆಕ್‍ಯೀ ಮ್ಹಾರಗ್. ಎಕಾ ದಿಸಾಂತ್ ಥೊಡೆಚ್ ಜಾಗೆ ಪಳೆವ್ಯೆತ್. ಚಡ್ ಭೊಂವೊಂಕ್ ಆನಿ ಅಪೂರ್ವ್ ಜಾಗೆ ಪಳೆಂವ್ಕ್ ಚಡ್ ದೀಸ್ ರಾವಜೆ. ಊಟಿಚ್ಯಾ ಆಸ್‍ಪಾಸ್ ಆನಿ ಪಯ್ಸ್, ಪಳೆಜೆ ಜಾಲ್ಲೆ ಜಾಗೆ ಜಾಯ್ತೆ ಆಸಾತ್.

ಊಟಿ ಶ್ಹೆರಾಂತ್ ಆನಿ ಭೊಂವ್ತಣಿಂ ಪಳೆಂವ್ಕ್ ಜಾಯ್ತಿಂ ಕಟ್ವಣಾಂ ಆನಿ ಜಾಗೆ ಆಸಾತ್. ಮೈಸೂರ್ ರಾಯಾಂನಿ ಬಾಂಧಯಿಲ್ಲೆಂ ಫರ್ನ್‍ಹಿಲ್ಸ್ ಪ್ಯಾಲೇಸ್ ಏಕ್ ಸೊಭಿತ್ ರಾವ್ಳೆರ್. ಕಾಮರಾಜ ಸಾಗರ್ ಸರೋವರ್, ಮದುಮಲೈ ರಾಷ್ಟ್ರೀಯ್ ಉದ್ಯಾನ್, ವೆನ್ಲಾಕ್ ಡೌನ್ಸ್, ಚಾಯೆಚಿಂ ತೊಟಾಂ ಧರುನ್ ತುಮ್ಚ್ಯಾ ತಾಂಕಿ ಪರ್ಮಾಣೆಂ ಜಾಯ್ ತಿತ್ಲೆಂ ಭೊಂವ್ಯೆತ್.

ಊಟಿ, ಕೂನೂರಾಂತ್ ಖಂಯ್ ಪಳೆಲ್ಯಾರೀ ಫುಲಾಂಚಿಂ ತೊಟಾಂ ಆಸಾತ್. ಕೂನೂರಾಂತ್‍ಯೀ ಏಕ್ ಫುಲಾಂಚೆಂ ಗಾರ್ಡನ್ ಆಸಾ. ದೊಡ್ಡಬೆಟ್ಟ ಶಿಖರಾಕ್ ವೆಚಿ ವಾಟ್‍ಚ್ ರೋಚಕ್ ಆನಿ ರಮಣೀಯ್. ತುದಿಯೆಕ್ ಪಾವ್ಲ್ಯಾರ್ ಮುಖ್ಲ್ಯಾನ್ ಜಯ್ತ್ ಖಣಿ. ಪಲ್ತಡಿಚೆಂ ಪರ್ವತ್ ಆನಿ ಭೊಂವ್ತಿಂಚಿಂ ದೃಶ್ಯಾಂ ರಮಣೀಯ್. ಥಂಯ್ಸರ್ ಆಸ್ಚ್ಯಾ ಟೆಲಿಸ್ಕೋಪಾಂತ್ ಪಯ್ಶಿಲಿಂ ದೃಶ್ಯಾಂ ಪಳೆವ್ಯೆತ್.

ಸರೋವರಾಂಚಿ ದವ್ಲತ್

ಊಟಿ ಆನಿ ಲಾಗ್ಸರ್ಚ್ಯಾ ಪ್ರದೇಶಾಂನಿ ಜಾಯ್ತಿಂ ಸರೋವರಾಂ ಆಸಾತ್. ಎಮರಾಲ್ಡ್ ಆನಿ ಅವಳಾಂಚಿ ಸರೋವರಾಂ ಹಾಂಗಾಚಿಂ ಪ್ರಮುಖ್ ಆಕರ್ಷಣಾಂ. ಆಮಿ ಅವಳಾಂಚಿ ಸರೋವರಾಕ್ ಗೆಲ್ಲ್ಯಾಂವ್. ಥಂಯ್ಸರ್ ಖಾಸ್ಗಿ ವಾಹನಾಂಕ್ ಅವ್ಕಾಸ್ ನಾ. ತಾಂಚ್ಯಾಚ್ ವಾಹನಾರ್ ಗಣ್ಣ್ ರಾನ್, ಅಶೀರ್ ಆನಿ ಕಠಿಣ್ ರಸ್ತ್ಯಾಂನಿ ಮೊನ್ಜಾತಿಂಚ್ಯಾ ಆವಾಜಾಂ ಮಧೆಂ ಪಯ್ಣ್ ಕರಿಜೆ. ತಿತ್ಲ್ಯಾ ಕಷ್ಟಾಂಚಿ ವಾಟ್ ಸಾರ್ಥಕ್ ಭೊಗ್ತಾ ಸರೋವರ್ ದೆಖ್ತಾನಾ. ಹ್ಯಾ ಸರೋವರಾಚಿ ವಣದ್ ಲೇಯರಾಂನಿ ಆಸಾ ದೆಕುನ್ ‘ಅವಳಾಂಚಿ’ ನಾಂವ್ ದವರ್ಲಾಂ. ಗಿಮಾಂತ್ ಗೆಲ್ಲ್ಯಾನ್ ಉದಾಕ್ ಥಳಾಕ್ ದೆಂವ್‍ಲ್ಲೆಂ.

ಪಳೆಂವ್ಕ್ ಹಜಾರ್ ಕೇಂದ್ರಾಂ

ಊಟಿ ವಚೊನ್ ಫಕತ್ ಶ್ಹೆರಾಂತ್ ಭೊಂವೊನ್ ಆಯ್ಲ್ಯಾರ್ ಕಿತೆಂ ಫಾಯ್ದೊ! ಕುಟ್ಮಾ ವಾ ಇಷ್ಟಾಂ ಸಂಗಿಂ ವೆತಾತ್ ತರ್ ಪಯ್ಲೆಂಚ್ ಪ್ಲ್ಯಾನ್ ಕರ್ನ್ ವಚಾ. ಥಂಯ್ ಭೆಟ್ ದೀಂವ್ಕ್, ಪಳೆಂವ್ಕ್ ಆನಿ ಚಾಕೊಂಕ್ ಹೆರ್ ದರಬಸ್ತ್ ಸಂಗ್ತಿ, ಜಾಗೆ ಆಸಾತ್. ತಾಂಚಿ ಇಲ್ಲಿ ಪಟ್ಟಿ: ಟೀ ಮ್ಯೂಸಿಯಂ, ಥಂಡರ್ ವಲ್ರ್ಡ್ ಮ್ಯೂಸಿಯಂ, ಸರ್ಕಾರಿ ಮ್ಯೂಸಿಯಂ, ಥ್ರೆಡ್ ಗಾರ್ಡನ್, ಡಿಯರ್ ಪಾರ್ಕ್, ಕಲ್ಲತ್ತಿ ಫಾಲ್ಸ್, ಮುಕೂರ್ತಿ ನ್ಯಾಶನಲ್ ಪಾರ್ಕ್, ನೀಡಲ್ ರಾಕ್ ವ್ಯೂ ಪಾಂಯ್ಟ್, ಟ್ರೈಬಲ್ ರೀಸರ್ಚ್ ಸೆಂಟರ್, ಪಾರ್ಸನ್ಸ್ ವ್ಯಾಲಿ ಜಲಾಶಯ್, ತೋಡಾ ಹಟ್ಸ್, ವ್ಯಾಕ್ಸ್ ವಲ್ರ್ಡ್, ಪೈನ್ ಟ್ರೀ ರಾನ್ ಇತ್ಯಾದಿ.

ತುಮಿ ಎಕಾ ದಿಸಾಕ್ ವಚಾ ವಾ ಹಫ್ತೊಭರ್ ರಾವಾ. ಊಟಿ ಕೊಣಾಯ್ಕೀ ನಿರಾಸ್ ಕರಿನಾ. ವೆಚ್ಯಾ ಪಯ್ಲೆಂಚ್ ಜಾಯ್ ಪುರ್ತೆಂ ಅಧ್ಯಯನ್ ಕರುನ್ ಗೆಲ್ಯಾರ್ ಬರೆಂ. ಸ್ವಂತ್ ವಾಹನಾರ್ ಗೆಲ್ಯಾರ್ ಚಡ್ ಭೊಂವ್ಯೆತ್. ಪುಣ್ ತುಮ್ಚೆಂ ಡ್ರೈವಿಂಗ್ ಬರೆಂ ಆಸ್ಲ್ಯಾರ್ ಮಾತ್ರ್ ಗಾಡಿ ವ್ಹರಾ. ಥಂಯ್ ಕಠಿಣ್ ಚಡ್ಣ್ಯೊ, ದೆಂವ್ಣ್ಯೊ, ಘುಂವ್ಡ್ಯೊ ಆಸಾತ್.

ಜಿಣ್ಯೆಂತ್ ಏಕ್ ಪಾವ್ಟಿಂ ತರೀ ಪಳೆಜೆಚ್ ಜಾಲ್ಲ್ಯಾ ಅದ್ಭುತ್ ತಾಣಾಂ ಪಯ್ಕಿ ಊಟಿ ಏಕ್. ಊಟಿ ವಚನಾತ್ಲೆಲ್ಯಾಂನೊ ಆತಾಂಚ್ ಪಯ್ಣಾಕ್ ತಯಾರಿ ಕರಾ.

ಊಟಿ ಥಾವ್ನ್ ಪಾಟಿಂ ಯೆತಾನಾ ಆಮಿ ಮೈಸೂರ್ ಗೆಲ್ಲ್ಯಾಂವ್. ಥಂಯ್ ಮಾಮಾಕೆರ್ ರಾವೊನ್ ದುಸ್ರ್ಯಾ ದಿಸಾ ಝೂಂತ್ ಭೊಂವೊನ್ ಗಾಂವಾಕ್ ಪಾಟಿಂ ಆಯ್ಲ್ಯಾಂವ್.

ಗುಮಾನಾಕ್: ಹೆಂ ಲೇಖನ್ ‘ರಾಕ್ಣೊ’ ಹಫ್ತ್ಯಾಳ್ಯಾಚ್ಯಾ ಸಪ್ತೆಂಬರ್ 13-19, 2024 ಆಂಕ್ಯಾಂತ್ ಪ್ರಕಟ್ ಜಾಲಾಂ.

 

Read our previous Travelogues 👇👇

ಚಾರಿತ್ರಿಕ್ ಶ್ರೀರಂಗಪಟ್ಟಣಾಚಿ ಏಕ್ ಭೆಟ್

ಬಿದ್ನೂರ್ ಕೊಟೆಂ ಖಂಯ್ ಆಸಾ ಜಾಣಾಂತ್‍ವೇ?

ಐತಿಹಾಸಿಕ್ ಬಿಜಾಪುರಾಕ್ ಏಕ್ ಪಯ್ಣ್

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel