ಸಪ್ತೆಂಬರ್ 20ವೆರ್ ಕೊಂಕ್ಣಿ ಫಿಲ್ಮ್ ‘ಪಯಣ್’ ಥಿಯೇಟರಾಂನಿ ರಿಲೀಸ್
Posted on : September 18, 2024 at 4:36 PM
ಮಂಗ್ಳುರ್: ಸಬಾರ್ ದಿಸಾಂ ಥಾವ್ನ್ ಲೊಕಾನ್ ಆತುರಾಯೆನ್ ರಾಕೊನ್ ಆಸ್‍ಲ್ಲೆಂ ‘ಪಯಣ್’ ಫಿಲ್ಮ್ ಹ್ಯಾಚ್ ಸುಕ್ರಾರಾ, ಸಪ್ತೆಂಬರ್ 20ವೆರ್ ರಿಲೀಸ್ ಜಾತೆಲೆಂ. ಯೊಡ್ಲಿಂಗ್ ಕಿಂಗ್ ಮೆಲ್ವಿನ್ ಪೆರಿಸಾಚ್ಯಾ ಫುಡಾರ್ಪಣಾರ್ ನಿರ್ಮಾಣ್ ಕರುನ್, ಸಂಗೀತ್ ಗುರು ಜೊಯೆಲ್ ಪಿರೇರಾನ್ ನಿರ್ದೇಶನ್ ದಿಲ್ಲೆಂ ಹೆಂ ಪಿಂತುರ್, ಎದೊಳ್‍ಚ್ ಪ್ರೀಮಿಯರ್ ಶೋ ಪ್ರದರ್ಶನ್ ಜಾವ್ನ್ ವೀಕ್ಷಕಾಂನಿ ಮೆಚ್ವಣಿ ವ್ಯಕ್ತ್ ಕೆಲ್ಯಾ.
ಎಕಾ ಸಂಗೀತ್ ತಾಲೆಂತಾಚ್ಯಾ ಜಿವಿತಾ ಭೊಂವ್ತಿಂ ಕಾಣಿ ವಿಣ್‍ಲ್ಲ್ಯಾ ಹ್ಯಾ ಪಿಂತುರಾಚೆಂ ಟ್ರೇಲರ್ ಯೂಟ್ಯೂಬಾಂತ್ ಸಂಚಲನ್ ಉಟಂವ್ಕ್ ಸಕ್ಲಾಂ. ಉಣ್ಯಾ ಆವ್ದೆರ್ ಲಗ್ಬಗ್ 60 ಹಜಾರ್ ಜಣಾಂನಿ ಟ್ರೇಲರ್ ಪಳೆಲಾಂ. ಸಿನೆಮಾಚೆರ್ ಲೊಕಾಕ್ ಕುತೂಹಲ್ ಉಬ್ಜಲಾಂ. ತಾಂಚ್ಯಾ ಆತುರಾಯೆಕ್ ಆತಾಂ ಜಾಪ್ ಮೆಳ್ಚಿ ಘಡಿ ಉದೆಲ್ಯಾ.
ಮೆಲ್ವಿನ್ ಪೆರಿಸಾಚ್ಯಾ ‘ಸಂಗೀತ್ ಘರ್’ ಬ್ಯಾನರಾ ಖಾಲ್ ತಯಾರ್ ಜಾಲ್ಲೆಂ ‘ಪಯಣ್’ ಫಿಲ್ಮ್ ಸಪ್ತೆಂಬರ್ 20ವೆರ್ ಮಂಗ್ಳುರ್ ಆನಿ ಹೆರ್ ಜಾಗ್ಯಾಂನಿ ಪಡ್ದ್ಯಾರ್ ಪಡ್ತೆಲೆಂ. ಮಂಗ್ಳುರ್ ಬಿಜೈಚ್ಯಾ ಭಾರತ್ ಮಾಲಾಂತ್ಲ್ಯಾ ಭಾರತ್ ಸಿನೆಮಾಸಾಂತ್ ಸದಾಂಯ್ ಸಾಂಜೆರ್ 4 ಆನಿ 7 ವೊರಾರ್ ದೋನ್ ಶೋ ಆಸ್ತೆಲೆ. ಸುರತ್ಕಲ್, ಪಡುಬಿದ್ರಿ, ಉಡುಪಿ, ಕುಂದಾಪುರ್ ಆನಿ ಪುತ್ತೂರಾಂತ್ಲ್ಯಾ ಸ್ಥಳೀಯ್ ಥಿಯೇಟರಾಂನಿ ಸಿನೆಮಾ ಪ್ರದರ್ಶನಾರ್ ಆಸ್ತೆಲೆಂ. ಮುಂಬೈ ಆನಿ ಗಲ್ಫಾಂತ್‍ಯೀ ಮುಖ್ಲ್ಯಾ ದಿಸಾಂನಿ ಶೋ ಆಸ್ತೆಲೆ.
ಸಂಗೀತ್ ಗುರು ಜೊಯೆಲ್ ಪಿರೇರಾನ್ ನಿರ್ದೇಶನ್ ದಿಲ್ಲ್ಯಾ ‘ಪಯಣ್’ ಫಿಲ್ಮಾಂತ್ ಪುತ್ತೂರ್ಚ್ಯಾ ಬ್ರಾಯನ್ ಸಿಕ್ವೇರಾನ್ ನಾಯಕ್ ಪಾತ್ರಾಚೆಂ ನಟನ್ ಕೆಲಾಂ. ಜಾಸ್ಮಿನ್ ಡಿಸೋಜ, ಕೇಟ್ ಪಿರೇರಾ ಆನಿ ಶೈನಾ ಡಿಸೋಜ ನಾಯಕಿ ಪಾತ್ರಾರ್ ಸೊಭ್ಲ್ಯಾಂತ್. ಹೆರ್ ಪಾತ್ರಾಂನಿ ರೈನಲ್ ಸಿಕ್ವೇರಾ, ಲೆಸ್ಲಿ ರೇಗೊ, ಜೆರಿ ರಸ್ಕಿನ್ಹಾ, ವಾಲ್ಟರ್ ನಂದಳಿಕೆ, ಜೀವನ್ ವಾಸ್, ಜೊಸ್ಸಿ ರೇಗೊ ಆನಿ ಮೆಲಿಶಾ ಪಿಂಟೊನ್ ನಟನ್ ಕೆಲಾಂ.
ಫಿಲ್ಮಾಚೆಂ ಪರಿಕಲ್ಪನ್ ಮೆಲ್ವಿನ್ ಪೆರಿಸಾಚೆಂ, ಸವೆಂ ಫಿಲ್ಮಾಚಿಂ ಪದಾಂಯೀ ತಾಣೆಂಚ್ ಲಿಖ್ಲ್ಯಾಂತ್. ರೋಶನ್ ಡಿಸೋಜಾನ್ ಸಂಗೀತ್ ದಿಲಾಂ. ನೀಟಾ ಜೊನ್ ಪೆರಿಸ್ ನಿರ್ಮಾಪಕಿ ಜಾವ್ನಾಸೊನ್, ವಿ. ರಾಮಾಂಜನೇಯಾನ್ ಛಾಯಾಗ್ರಹಣ್ ಆನಿ ಶಿರ್ತಾಡಿ ಮೆವಿನ್ ಜೊಯೆಲ್ ಪಿಂಟೊನ್ ಸಂಕಲನ್ ವಾವ್ರ್ ಕೆಲಾ. ಮಂಗ್ಳುರ್, ಉಡುಪಿ ಆನಿ ಹೆರ್ ಜಾಗ್ಯಾಂನಿ ಚಿತ್ರೀಕರಣ್ ಕೆಲಾಂ.
‘ಪಯಣ್’ ಕೊಂಕ್ಣಿ ಸಿನೆಮಾಚೆಂ ಪೋಸ್ಟರ್ ರಿಲೀಸ್
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
