ಸರ್ದಾರಾಚೆಂ ಸನ್ನಿಧಾನ್ – 17: ಲಡಾಯ್
Posted on : May 29, 2026 at 4:18 PM
ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 17
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)
ಪ್ರಕರಣ್ 17: ಲಡಾಯ್
ತಿ ರಾತ್ ಕಶಿಯೀ ಪಾಶಾರ್ ಜಾಲಿ. ದುಸ್ರೊ ದೀಸ್ ಉದೆಂವ್ಚ್ಯಾ ಆದಿಂಚ್, ಆದ್ಲ್ಯಾ ದಿಸಾ ನಿರ್ಣಯ್ ಕೆಲ್ಲ್ಯಾ ಪರ್ಮಾಣೆಂ, ಪದಾತಿ ಆನಿ ರಾಹುತಾಂಚಿಂ ರಿಸಾಲಾಂ, ಪಿರಿಯಾಪಟ್ಟಣ ಥಾವ್ನ್ – ಕೊಡಗಾಚ್ಯಾ ಗಡಿ ಭಿತರ್ ಪ್ರವೇಶ್ ಜಾಂವ್ಕ್ ಫುಡೆಂ ಸರ್ಲಿಂ. ಟಿಪ್ಪು ಸುಲ್ತಾನ್, ಸರ್ದಾರ್ ಸಿಮಾಂವ್ ಆನಿ ಷೇಕ್ ಆಲಿ, ಪಂಚ್ವೀಸ್ ಮಾತ್ರ್ ಅಂಗರಕ್ಷಕ್ ಸಾಂಗಾತಾ ಆಸೊನ್ ಚಿಕ್ಕೆ ಪಾಟಿಂ ಉರ್ಲೆ, ಪುಣ್ ರಿಸಾಲಾಂ ಪಾಟ್ಲ್ಯಾನ್ ಚಿಕ್ಕೆ ಫುಡೆಂ ಸರ್ಲೆ.
ಕೊಡಗಾಚ್ಯಾ ಗಡಿ ಥಾವ್ನ್ ಚಡುಣೆಂ ಏಕ್ ಮಯ್ಲ್ ಆರೊ ಆಸ್ಲ್ಲ್ಯಾ ಕೆಂಪುರಾಜ ಮ್ಹಳ್ಳ್ಯಾ ಲ್ಹಾನ್ ದೊಂಗ್ರೆರ್, ಟಿಪ್ಪು ಸುಲ್ತಾನ್ ಆನಿ ತಾಚೆ ಅಂಗರಕ್ಷಕ್ ರಾವ್ಲೆ. ಥಂಯ್ ಥಾವ್ನ್ ಫುಡ್ಲಿಂ ದೋನ್-ತೀನ್ ಚೌಕ್ ಮಯ್ಲಾಂ ಸುವಾತ್ ಉಗ್ತಿ ದಿಸ್ತಾಲಿ.
ಬೆಟ್ಟದಪುರಾ ತೆವ್ಶಿನ್ ಧಾಡ್ಲ್ಲೆ ಶಿಪಾಯ್, ತಿತ್ಲ್ಯಾ ಭಿತರ್ಚ್ ಕೊಡಗಾಂತ್ ಪ್ರವೇಶ್ ಜಾಲ್ಲೆ ಜಾಂವ್ಕ್ ಪುರೊ. ತೆಂಚ್ ಚಿಂತುನ್, ಪಿರಿಯಾಪಟ್ಟಣಾಚ್ಯಾ ವಾಟೆಚೆ ಶಿಪಾಯ್ – ಪಾಟ್ಲ್ಯಾನ್ ಖುದ್ ಟಿಪ್ಪು ಸುಲ್ತಾನ್ ಆಸೊನ್ ಫುಡೆಂ ಸರ್ಲೆ. ಪುಣ್ ಹಿ ದಾಡ್ ವಾ ಹಿ ಲಡಾಯ್, ಟಿಪ್ಪು ಸುಲ್ತನಾನ್ ವಾ ತಾಚ್ಯಾ ಹೆರ್ ಸಲಹಾದಾರಾಂನಿ ಚಿಂತ್ಲ್ಲೆಪರಿಂ ಜಾಂವ್ಕ್ ನಾ. ಸರ್ದಾರ್ ಸಿಮಾಂವ್ನ್ ದುಬಾವ್ ಉಚಾರ್ಲ್ಲೆಪರಿಂಚ್ ತಿ ಜಾಲಿ.
ಟಿಪ್ಪು ಸುಲ್ತಾನಾನ್ ಕೊಡಗಾಂತ್ ಪ್ರವೇಶ್ ಕರ್ಚಿ ಖಬರ್, ದೊಡ್ಡ ವೀರೇಂದ್ರ ರಾಜಾಕ್ ಪಯ್ಲೆಂಚ್ ಕಳಿತ್ ಜಾಲ್ಲಿ. ತ್ಯಾ ತೆಕಿದ್, ತಾಚಿಂ ರಿಸಾಲಾಂಯೀ ಹಾಂಕಾಂ ರಾಕೊನ್ಂಚ್ ಮ್ಹಳ್ಳೆಪರಿಂ ಆಯ್ತಿಂ ಆಸ್ಲ್ಲಿಂ. ತಿತ್ಲೆಂಚ್ ನಹಿಂ, ಸುಲ್ತಾನಾಚೆ ಕಿತ್ಲೆ ಶಿಪಾಯ್ ಆಯ್ಲ್ಯಾತ್, ತಾಂಕಾಂ ಕಶೆಂ ವಾಂಟೆ ಕರ್ನ್ ಖಂಯ್ಚ್ಯಾ ವಾಟೆನ್ ಧಾಡ್ಲ್ಯಾತ್ ಮ್ಹಳ್ಳೆಂಯೀ ಕೊಡಗಾಚ್ಯಾ ಝುಜಾರ್ಯಾಂಕ್ ಸಾರ್ಕೆಂ ಕಳಿತ್ ಆಸ್ಲ್ಲೆಂ ಮ್ಹಣ್, ತಾಣಿಂ ಕೆಲ್ಲ್ಯಾ ಮಾಂಡಾವಳಿ ವರ್ವಿಂಚ್ ದಿಸೊನ್ ಆಯ್ಲೆಂ.
ಟಿಪ್ಪು ಸುಲ್ತಾನಾನ್ ಸುಲಭಾಯೆನ್ ಜಿಕ್ಯೆತ್ ಮ್ಹಣ್ ಚಿಂತುನ್ ಹಾಡ್ಲ್ಲ್ಯಾ ದೇಡ್ ಹಜಾರ್ ಶಿಪಾಯಾಂಕ್ ಜಾಪ್ ದೀಂವ್ಕ್ ತಾಂಚ್ಯಾ ಫವ್ಜೆಂತ್ ದೋನ್ ಹಜಾರ್ ಜವಾನ್ ಆಸ್ಲ್ಲೆ. ತಾಂಕಾಂ ಸಾರ್ಕೆ ಚಾರ್ ವಾಂಟೆ ಕರ್ನ್ ಚಾರ್ ಮುಖಾಂನಿ ಸಂಚಲನಾರ್ ದವರ್ಲ್ಲೆ. ತಾಂತುಂಯೀ, ನ್ಹಂಯೊ ವಾ ಆಯಕಟ್ಟಾಚ್ಯೊ ಖಣಿಯೊ ಉತರ್ತಾನಾ ಫಾವೊ ತೆಂ ರಕ್ಷಣ್ ವಾ ಪ್ರತಿಭಟನ್ ಕರುಂಕ್ ಧೊಣ್ವಾಂ-ಬಾಣಾಂ ಘೆವ್ನ್ ಝುಜ್ಚೆ ಕಿರಾತ್ಯೀ ಆಸ್ಲ್ಲೆ ಮ್ಹಣ್ತಚ್ ಪರಿಸ್ಥಿತಿ ಗಂಭೀರ್ ರಾವ್ಲಿ. ಮುಖಾರ್ ಹಾಡ್ಲ್ಲ್ಯಾ ಪಹರ್ಯಾಚ್ಯಾ ಬೇಹುಗಾರಾಂನಿ ವಯ್ಲಿ ಖಬರ್ ಹಾಡ್ಲ್ಲಿ ಆಯ್ಕೊನ್ ಟಿಪ್ಪು ಸುಲ್ತಾನ್ ಆನಿ ತಾಚೆ ಸಾಂಗಾತಿ ಅಜ್ಯಾಪ್ಲೆ. ನಿಜಾಯ್ಕೀ ಭಿತರ್ಲ್ಯಾಚ್ ಕೊಣೆಂಗೀ ಘಾತ್ ಕರ್ನ್ ದುಸ್ಮಾನಾಕ್ ಖಬರ್ ದಿಲ್ಯಾ ಮ್ಹಳ್ಳೆಂ ಸ್ಪಷ್ಟ್ ಜಾಲೆಂ. ಅಪಾಯ್ ಚಡ್ಲೊ.
ಭಿತರ್ಲ್ಯಾ ರಾಟಾವಳಿಂತ್ ಹಾತ್ ಘಾಲ್ಚ್ಯಾ ಆದಿಂ, ಆತಾಂ, ಭಾಯ್ಲಿಂ ಕಾಮಾಂ ಬರ್ಯಾನ್ ಚಲಂವ್ಚಿ ಚಡ್ ಗರ್ಜ್ ಆಸ್ಲ್ಲಿ. ಟಿಪ್ಪು ಸುಲ್ತಾನಾನ್ ಸರ್ದಾರಾಂಕ್ ಲಾಗಿಂ ಆಪಯ್ಲೆಂ. ರಿಸಾಲಾಂ ವಾಂಟೆ ಕೆಲ್ಲ್ಯಾ ವರ್ವಿಂ, ಕೊಡಗಾಚಿ ಫವ್ಜ್ ವ್ಹಡ್ ಆಸ್ಲ್ಲ್ಯಾ ತಿತ್ಲೊಚ್ ಅಪಾಯ್ ಚಡ್ ಆಸಾ ಮ್ಹಣ್ಚ್ಯಾಕ್ ಆತಾಂ ತರ್ಕ್ ನಾತ್ಲ್ಲೆಂ. ಸಾಂಗಾತಾಚ್, ಬಾದಶಹಾನ್ ಆಪ್ಲ್ಯಾ ಭದ್ರತೆ ಖಾತಿರ್ ಪಾಟಿಂ ರಾವಜಾಯ್ ಮ್ಹಣ್, ಆದ್ಲ್ಯಾಚ್ ದಿಸಾ ಸರ್ದಾರ್ ಸಿಮಾಂವ್ನ್ ದಿಲ್ಲೆಂ ರಾಜಾಂವ್ – ಲಡಾಯೆ ಆದಿಂಚ್ – ಜಿವೆಂ ಜಿವೆಂ ರುಜು ಜಾಲ್ಲೆಂ.
“ದಕ್ಷಿಣಾಕ್ ಗೆಲ್ಲಿಂ ರಿಸಾಲಾಂ ಪಯ್ಸ್ ಆಸಾತ್” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಆಮಿ ತಾಂಚ್ಯಾ ಕುಮ್ಕೆಕ್ ವಚ್ಯೆತೆಂ ಮ್ಹಳ್ಯಾರೀ ಸುಲಭ್ ನಹಿಂ. ಸರ್ದಾರ್ ಸಿಮಾಂವ್ಕ್ ಆಮಿ ಲಾಗಿಂ ರಾವಯಿಲ್ಲೆಂ ಬರೆಂ ಜಾಲೆಂ. ಜಾಯ್ತೊ ನಿರ್ಣಯ್ ಆಮಿ ತುರ್ತಾನ್ ಕರ್ಯೆತ್. ದುಸ್ಮಾನಾಂಚೆಂ ಬಳ್ ಆನಿ ಫುಡ್ಲೆಂ ಮೇಟ್ ಸಮ್ಜಯಾಂ. ತೆದೊಳ್ ಪರ್ಯಾಂತ್ ತುಮ್ಚಿಂ ಕಾಂಯ್ ವ್ಯಾವಹಾರಿಕ್ ಸೂಚನಾಂ ಆಸ್ಲ್ಯಾರ್ ಆಯ್ಕಯಾಂ.”
“ಮ್ಹಜಿ ಆಶಾ ಆನಿ ಅಭಿಪ್ರಾಯ್ ಇತ್ಲಿಚ್ ಹುಜೂರ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಗಡಿ ಪ್ರದೇಶಾಂತ್ಚ್ ಕೊಡಗಾಚಿ ಎದಿ ವ್ಹಡ್ ಫವ್ಜ್ ಜಮೊ ಜಾಲ್ಲಿ ಖಬರ್ ನೀಜ್ ಜಾಲ್ಯಾರ್, ಹಾಂಗಾಸರ್ ಆಸ್ಚ್ಯಾ ವಾಂಟ್ಯಾನ್ ಚಡ್ ಫುಡೆಂ ವಚೊಂಕ್ ಜಾಯ್ಶೆಂ ನಾ. ತುಮಿ ಸಾಂಗ್ಲ್ಲೆಪರಿಂ, ಹೆಗ್ಗಡದೇವನಕೋಟೆಚೆರ್ ದಾಡ್ ಘಾಲುಂಕ್ ಗೆಲ್ಲಿಂ ರಿಸಾಲಾಂ ಪಯ್ಸ್ ಆಸಾತ್. ಜಶೆಂ ತಾಂಕಾಂ ಹಾಂಗಾ ಪಾಟಿಂ ಆಪಂವ್ಕ್ ವೇಳ್ ನಾ, ತಶೆಂಚ್ ಆಮಿ ಬೆಟ್ಟದಪುರಾಕ್ ಧಾಡ್ಲ್ಲ್ಯಾ ರಿಸಾಲಾಂಚಿ ಖಬರ್ ಮೆಳ್ಳ್ಯಾ ಶಿವಾಯ್ ಆಮ್ಕಾಂ ದಕ್ಷಿಣಾಕ್ ವಚೊಂಕ್ಯೀ ಸಾಧ್ಯ್ ನಾ.”
“ತೆಂ ವ್ಹಯ್, ಪುಣ್ ಕಿತೆಂ ಸಾಂಗ್ತಾಯ್?”
“ಬೆಟ್ಟದಪುರಾಕ್ ಆಮಿ ಧಾಡ್ಲ್ಲಿಂ ರಿಸಾಲಾಂ ಎದೊಳ್ಚ್ ಗಡಿ ಭಿತರ್ ಪ್ರವೇಶ್ ಜಾಂವ್ಕ್ ನಾತ್ಲ್ಯಾರ್, ಆನಿ ಬಾದಶಹಾಚಿ ಖುಶಿ ಜಾಲ್ಯಾರ್ ತಿಂ ಹ್ಯಾ ವಾಟೆಕ್ ಪಾಟಿಂ ಆಪವ್ಯೆತ್. ತಿಂ ಹಾಂಗಾ ಪಾವ್ತಚ್ ಹಾಂಗಾಚಿ ಫವ್ಜ್ ಬಳಾಧಿಕ್ ಜಾತಾ, ಆನಿ ಹ್ಯಾ ವಾಟೆನ್ ಪುಣೀ ಫಾವೊ ತೆಂ ಕ್ರಮ್ ಘೆಂವ್ಕ್ ಆಮ್ಕಾಂ ಸಾಧ್ಯ್ ಜಾತಾ.”
“ತರ್ಕ್ ವಾಜ್ಭಿ ಆನಿ ಬರೆಂಚ್” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಪರಿಸ್ಥಿತಿ ಆಮಿ ಚಿಂತ್ಲ್ಲ್ಯಾ ಪ್ರಾಸ್ ವೆಗ್ಳಿ ರಾವ್ಲ್ಲ್ಯಾನ್, ತ್ಯಾ ಪರ್ಮಾಣೆಂಚ್ ಕ್ರಮ್ ಘೆವ್ಯಾಂ. ಬೆಟ್ಟದಪುರಾಕ್ ದೋಗ್ ಸವಾರ್ ತುರ್ತಾನ್ ವಚೊಂದಿತ್ ಆನಿ ಆಮ್ಚಿ ಖುಶಿ ಸಮ್ಜಂವ್ದಿತ್.”
“ಆನಿ ದಖ್ಖಣಾಕ್ಯೀ ಖಬರ್ ಧಾಡ್ಲ್ಯಾರ್ ಬರೆಂ ಆಸ್ಲ್ಲೆಂ ನಹಿಂಗೀ?” ಷೇಕ್ ಆಲಿಚ್ಯಾ ಬಗ್ಲೆನ್ ಆಸ್ಲ್ಲ್ಯಾ ಸರ್ದಾರಾನ್ ವಿಚಾರ್ಲೆಂ.
“ಗರ್ಜ್ ನಾ” ಮ್ಹಣಾಲೊ ಟಿಪ್ಪು ಸುಲ್ತಾನ್. “ರಾಯ್ ಕುಂವರ್ ಕರೀಮ್ ಖಾನ್ ಲಡಾಯೆಚ್ಯಾ ಶಾಸ್ತ್ರಾಂತ್ ಆನಿ ಸಾಹಸಾಂತ್ ಹೆರಾಂ ಪ್ರಾಸ್ ಉಣೊ ಮ್ಹಣೊಂಕ್ ಕಬೂಲ್ ನಾ. ತಾಚ್ಯಾ ಪಹರ್ಯಾಚೆ ಬೇಹುಗಾರ್, ದುಸ್ಮಾನಾಂಚ್ಯಾ ಬಳಾಚಿ ಆನಿ ಚಲನಾಚಿ ಖಬರ್ ಹಾಡ್ತಚ್, ಕಿತೆಂ ಕರಿಜಾಯ್ ಮ್ಹಣ್ ತಾಕಾ ಸಮ್ಜತೆಲೆಂ.”
ದೋಗ್ ಸವಾರ್ ಭಾಯ್ರ್ ಸರೊನ್, ಬಾದಶಹಾಚೆಂ ತಬ್ದೀಲ್ ಜಾಲ್ಲೆಂ ಫರ್ಮಾಣ್ ಘೆವ್ನ್ ಬೆಟ್ಟದಪುರಾಕ್ ಗೆಲೆ. ಚಡ್ ಮ್ಹಳ್ಯಾರ್ ಚಾರ್ ವೊರಾಂ ಭಿತರ್ ತೆ ಪಾಟಿಂ ಯೇವ್ನ್ ಪಾವ್ತಿತ್ ಮ್ಹಳ್ಳೊ ಭರ್ವಸೊ ಆಸ್ಲ್ಲೊ.
ತೊ ಭರ್ವಸೊ ವ್ಯರ್ಥ್ ಜಾಲೊ.
ಸುಲಭಾಯೆನ್ ಜೀಕ್ ಜೊಡುನ್ ಪಾಟಿಂ ಯೆವ್ಯೆತ್ ಮ್ಹಣ್ ಹಾಡ್ಲ್ಲಿಂ ಹಿಂ ರಿಸಾಲಾಂ, ಮಾನ್ ಆನಿ ಪ್ರಾಣ್ ದವರ್ನ್ ಪಾಟಿಂ ಯೇಂವ್ಕ್ ಕಷ್ಟೊಂಚೆ ಗತಿಕ್ ಪಾವ್ಲ್ಲಿಂ ಮ್ಹಳ್ಳೆಂ ಸಮ್ಜೊಂಕ್ ಚಡ್ ವೇಳ್ ಗೆಲೊ ನಾ.
ಟಿಪ್ಪು ಸುಲ್ತಾನಾಕ್ ಆನಿ ತಾಚ್ಯಾ ಅಂಗರಕ್ಷಕಾಂಕ್ ಕೆಂಪುರಾಜ ದೊಂಗ್ರೆರ್ ಸೊಡುನ್ ಫುಡೆಂ ಗೆಲ್ಲಿಂ ರಿಸಾಲಾಂ ಕೊಡಗಾಚ್ಯಾ ಗಡಿರ್ ಪಾವೊನ್, ಫುಡ್ಲ್ಯಾ ಹುಕ್ಮೆಕ್ ರಾಕೊನ್, ಫಾವೊ ತಿ ತಯಾರಾಯ್ ಕರುಂಕ್ ಲಾಗ್ಲಿಂ. ಕೊಡಗಾಚಿಂ ರಿಸಾಲಾಂ ಖಂಯ್ಚ್ಯಾ ವಾಟೆನ್ ಆಸಾತ್ ಮ್ಹಳ್ಳೆಂ ಸಮ್ಜೊಂಚ್ಯಾ ಖಾತಿರ್, ಆನಿ ಬೆಟ್ಟದಪುರ ಥಾವ್ನ್ ಶಿಪಾಯಾಂಕ್ ಪಾಟಿಂ ಯೇಂವ್ಕ್ ಪುರ್ಸತ್ ಮೆಳೊಂದಿ ಮ್ಹಣ್ ಚಿಂತುನ್ ‘ಪ್ರವೇಶ್ ಜಾಂವ್ಕ್’ ದಿಂವ್ಚಿ ನಿಮಾಣಿ ಹುಕುಮ್ ಟಿಪ್ಪು ಸುಲ್ತಾನಾನ್ ಪಾಟಿಂ ಘಾಲಿ. ದೀಸ್ ದೊನ್ಪಾರ್ ಉತ್ರೊನ್ ಸಾಂಜ್ ಜಾಲಿ.
ಬೆಟ್ಟದಪುರ ಥಾವ್ನ್ ಕಸಲಿಯೀ ಖಬರ್ ಯೇಂವ್ಕ್ ನಾ. ವರ್ದಿ ವ್ಹರ್ನ್ ಗೆಲ್ಲೆ ಸವಾರ್ಯೀ ಪಾಟಿಂ ಯೇಂವ್ಕ್ ನಾಂತ್. ತೆ ಬೆಟ್ಟದಪುರಾಕ್ ಪಾವೊಂಕ್ ಅಡೇಜ್ ಮಯ್ಲಾಂಚಿ ವಾಟ್ ಆಸ್ತಾನಾ, ತಾಂಕಾಂ ಏಕ್ ಲ್ಹಾನ್ ವ್ಹಾಳ್ ಉತ್ರೊಂಕ್ ಆಸ್ಲ್ಲೊ. ಮೈಸೂರ್ಚ್ಯಾ ಪ್ರದೇಶಾ ಭಿತರ್ಚ್ ತೆ ಆಸ್ಲ್ಲೆ ಜಾಲ್ಲ್ಯಾನ್, ದುಸ್ಮಾನಾಂಚೆಂ ಭ್ಯೆಂ ನಾತ್ಲ್ಲ್ಯಾ ಜಿನ್ಸಾರ್ ಘೊಡ್ಯಾಂಕ್ ಧೊಂಪರ್ಭರ್ ಜಾಯ್ತ್ ತಿತ್ಲ್ಯಾ ಉದ್ಕಾಂತ್ ದೆಂವವ್ನ್ ಪಲ್ತಡಿ ವೆತಾನಾ…
‘ಝುಂಯ್ಪ್!’ ತ್ಯಾ ಆವಾಜಾ ಬರಾಬರ್, ಫುಡೆಂ ಆಸ್ಲ್ಲ್ಯಾ ಘೊಡ್ಯಾನ್ ಏಕ್ ಖಿಳಂಚ್ ಮಾರ್ಲಿ, ಮುಖ್ಲೆ ಪಾಯ್ ವಾರ್ಯಾರ್ ಉಡಯ್ಲೆ ಆನಿ ಸವಾರಾ ಸಮೇತ್ ಉದ್ಕಾಂತ್ ತೊ ಆಡ್ ಪಡ್ಲೊ. ಬಗ್ಲೆಚ್ಯಾ ಮೊಳ್ಯಾ ಥಾವ್ನ್ ಆಯಿಲ್ಲೊ ಲೊಂಕ್ಡಾಚೊ ತೀರ್ ಘೊಡ್ಯಾಚ್ಯಾ ಪೊಟಾಂತ್ ರೊಂಬೊನ್ ಘೊಡೊ ಪರ್ತತಾನಾ, ವಾಂಕ್ಡೊ ಉಡೊಂಕ್ ಅವ್ಕಾಸ್ ನಾತ್ಲ್ಲೊ ಸವಾರ್ ತ್ಯಾ ಮಾಸಾಚ್ಯಾ ಆನಿ ಹಾಡಾಂಚ್ಯಾ ವ್ಹಜಾನಾ ಪಂದಾಕ್ ಅಡ್ಚಲ್ಲೊ.
‘ಝುಂಯ್ಪ್!’ ಪಯ್ಲೆಂಚ್ಯಾ ಘೊಡ್ಯಾಚಿ ಆನಿ ಸವಾರಾಚಿ ಗತ್ ತಶಿ ಜಾಲ್ಲ್ಯಾ ಪಾಟಾಪಾಟ್ – ವಾ ಚಡುಣೆಂ ತ್ಯಾಚ್ ವೆಳಾರ್ – ಆನ್ಯೇಕ್ ಬಾಣ್ ಯೇವ್ನ್ ಪಾಟ್ಲ್ಯಾ ಘೊಡ್ಯಾಚ್ಯಾ ಗೊಮ್ಟ್ಯಾಂತ್ ರೊಂಬೊನ್, ತೊ ಆವಾಜಾ ವಿಣೆಂ ಪರ್ತಲೊ, ಆನಿ ಸವಾರ್ ಝಡೊನ್ ಉದ್ಕಾಂತ್ ಪಡ್ಲೊ.
ಫುಡ್ಲ್ಯಾ ಥೊಡ್ಯಾ ಘಡಿಯಾಂ ಭಿತರ್, ಹೆಣೆಂ ತೆಣೆಂ ಥಾವ್ನ್ ಚವ್ಗ್-ಪಾಂಚ್ ಕಿರಾತ್ ಯೇವ್ನ್ ಉದ್ಕಾಂತ್ ದೆಂವ್ಲೆ. ಸವಾರಾಂಕ್ ತಾಣಿಂ ಘಡ್ಯೆ ಭಿತರ್ ಉದ್ಕಾಂತ್ಲೆ ಭಾಯ್ರ್ ಕಾಡ್ನ್ ನಿರಾಯುಧ್ ಕೆಲೆ. ಪಯ್ಲೆಂಚ್ಯಾ ಸವಾರಾಚೊ ಪಾಯ್ ಏಕ್ ವ್ಯರ್ಥ್ ಜಾಲ್ಲೊ. ತಾಕಾ ಎಕ್ಲ್ಯಾನ್ ಖಾಂದ್ಯಾರ್ ಶಿರ್ಕಾಯ್ಲೊ. ಆನ್ಯೇಕ್ಲ್ಯಾಕ್ ತಾಣಿಂ ದೊಗಾಂ ಧನುರ್ಧಾರಿಂ ಮಧೆಂ ಚಲವ್ನ್ ವ್ಹೆಲೊ.
ಅರ್ಧ್ಯಾ ಘಂಟ್ಯಾ ಭಿತರ್, ವಾಂಕ್ಡ್ಯಾ ವಾಟೆನ್ ಕಾಂಟ್ಯಾಂ ಖುಂಟ್ಯಾಂತ್ಲ್ಯಾನ್ ಆನಿ ಬೊಲ್ಯಾಂ ಪಾಲ್ಯಾಂ ಇಡ್ಯಾಂತ್ಲ್ಯಾನ್ ಪಾಶಾರ್ ಜಾವ್ನ್ ಕೊಡಗ್ ಪ್ರದೇಶಾ ಭಿತರ್ ತೆ ಲಿಪ್ಲೆ. ಬೆಟ್ಟದಪುರ ವಾಟೆನ್ ಧಾಡ್ಲ್ಲ್ಯಾ ರಿಸಾಲಾಂಚ್ಯಾ ಸರ್ದಾರಾಕ್ ಟಿಪ್ಪು ಸುಲ್ತಾನಾನ್ ಧಾಡ್ಲ್ಲೆಂ ನವೆಂ ಫರ್ಮಾಣ್ ಕೊಡಗ್ ರಾಜಾಚ್ಯಾ ಶಿಪಾಯಾಂಚ್ಯಾ ಹಾತಾಕ್ ಮೆಳ್ಳೆಂ. ತಾಂಚ್ಯಾ ಮುಖೆಲ್ಯಾನ್ ತಾಚೊ ಪ್ರಯೋಗ್ ಕರುಂಕ್ ಚಿಂತುನ್, ತಿ ವರ್ದಿ ತಶಿಚ್ ಪಾಟಿಂ ದಿಲಿ. ಸವಾರಾಂಕ್ ಪ್ರಥಮ್ ಚಿಕಿತ್ಸಾ ಆನಿ ಇಲ್ಲೊ ಫಳ್ಹಾರ್ ದೀವ್ನ್, ಕಾಳೊಕ್ ಜಾತಾ ಪರ್ಯಾಂತ್ ಎಕಾ ಗುಪಿತ್ ಜಾಗ್ಯಾರ್ ತಾಣಿಂ ರಾವಯ್ಲೆ, ಆನಿ ಉಪ್ರಾಂತ್ ತಾಂಕಾಂ ತಾಂಕ್ತಾ ತ್ಯಾ ಭಾಷೆನ್ ತಾಣಿಂ ಬೆಟ್ಟದಪುರ ವಚ್ಯೆತ್ ಮ್ಹಣ್ ಧಾಡ್ಲೆ.
ತಶೆಂ ಜಾಲ್ಲ್ಯಾನ್, ಪಿರಿಯಾಪಟ್ಟಣ ಲಾಗ್ಶಿಲ್ಯಾ ತಂಬಾಕ್ ತೆ ಪಾವೊಂಕ್ ನಾಂತ್. ಬಗಾರ್, ಕಿತ್ಲೆಶ್ಯಾ ವೊರಾಂ ಉಪ್ರಾಂತ್ – ರಾತಿಂ – ಬೆಟ್ಟದಪುರಾಕ್ ಪಾವೊನ್, ತಾಂಕಾಂ ಜಾಲ್ಲಿ ಅವಸ್ಥಾ ತಾಣಿಂ ಸಾಂಗ್ಲಿ. ರಾತ್ ಜಾಲ್ಲ್ಯಾ ವರ್ವಿಂ ಕೊಣೆಂಯೀ ಕಾಂಯ್ ಕರುಂಕ್ ಸಾಧ್ಯ್ ನಾತ್ಲ್ಲೆಂ. ಜಾಲ್ಯಾರೀ, ವೇಳ್ ಕರ್ನ್ ತರೀ, ಪಾವ್ಲ್ಲಿ ಟಿಪ್ಪು ಸುಲ್ತಾನಾಚಿ ಹುಕುಮ್ ಪಾಳುಂಕ್ ಘಳಾಯ್ ಕರ್ಚೆಂ ಧಯ್ರ್ ತಾಚ್ಯಾ ಸಯ್ನಾಂತ್ಲ್ಯಾ ಹುದ್ದೆದಾರಾಂ ಪಯ್ಕಿ ಕೊಣಾಯ್ಕೀ ನಾತ್ಲ್ಲೆಂ. ದೆಕುನ್, ಥಂಯ್ಸರ್ ಚಿಕ್ಕೆ ಗಡಿ ಪಲ್ತಡಿ ಪ್ರವೇಶ್ ಜಾವ್ನ್ ಆಸ್ಲ್ಲ್ಯಾ ಶಿಪಾಯಾಂಕ್ ಪಾಟಿಂ ಆಪವ್ನ್, ಮಧ್ಯಾನೆರ್ಚ್ ಪಿರಿಯಾಪಟ್ಟಣಾಕ್ ಪಾಟಿಂ ಸಂಚಲನ್ ಕರುಂಕ್, ಥಂಯ್ಸರ್ ಆಸ್ಲ್ಲ್ಯಾ ಭಕ್ಷಿಂನಿ ಆನಿ ಸರ್ದಾರಾಂನಿ ನಿರ್ಣಯ್ಸಿಲೆಂ.
ತಿ ಖಬರ್ ತಾಣಿಂ, ತ್ಯಾಚ್ ಘಡಿಯೆ ಧ ಜಣಾಂ ಸವಾರಾಂಕ್ ನಮಿಯಾರ್ನ್ – ಬಾದಶಹಾಕ್ ದಿಂವ್ಚ್ಯಾ ಖಾತಿರ್ – ಪಯ್ಲೆಂ ಆಯಿಲ್ಲ್ಯಾ ಸವಾರಾಂಕ್ಯೀ ಸಾಂಗಾತಾ ದೀವ್ನ್, ರಾತಾರಾತ್ ಪಿರಿಯಾಪಟ್ಟಣಾಕ್ ಧಾಡ್ಲೆ.
ದೀಸ್ಭರ್ ರಾಕ್ಲ್ಯಾ ಉಪ್ರಾಂತ್, ರಾತಿಂ ಆಯಿಲ್ಲಿ ಹಿ ಖಬರ್ ಆಯ್ಕೊನ್ ಟಿಪ್ಪು ಸುಲ್ತಾನ್ ಕ್ರೋಧಾನ್ ಭರ್ಲೊ. ನಿಜಾಯ್ಕೀ, ಕೊಡಗಾಚ್ಯಾ ರಾಯಾನ್ ಹ್ಯಾ ಮೈಸೂರ್ಚ್ಯಾ ವಾಗಾಕ್ ಚಿಡಾಯಿಲ್ಲೆಪರಿಂ ಜಾಲ್ಲೆಂ.
“ಥಂಯ್ಚೆ ಶಿಪಾಯ್ ಮಧ್ಯಾನೆರ್ ಭಾಯ್ರ್ ಸರ್ತಿತ್ ಜಾಲ್ಯಾರ್, ಫಾಂತ್ಯಾಚ್ಯಾ ತೀನ್ ವೊರಾಂ ಭಿತರ್ ಹಾಂಗಾ ಯೇವ್ನ್ ಪಾವ್ತೆಲೆ – ಪಾವಜಾಯ್” ಮ್ಹಣಾಲೊ ತೊ ದಾಂತ್ ಚಾಬೊನ್. “ತರ್, ದೀಸ್ ಉಜ್ವಾಡ್ಚ್ಯಾ ಆದಿಂ ಹಾಂಗಾ ಯೇವ್ನ್ ಪಾಂವ್ಚ್ಯೊ ತ್ಯೊ ಪಾಂಚ್ ಕಂಪ್ಣ್ಯೊ, ಆನಿ ಎದೊಳ್ಚ್ ಹಾಂಗಾ ರಾಕೊನ್ ಆಸ್ಚ್ಯೊ ಪಾಂಚ್ ಕಂಪ್ಣ್ಯೊ ಕೊಡಗಾಕ್ ಪ್ರವೇಶ್ ಜಾವ್ನ್, ಹಾಂಗಾಚ್ಯೊ ವಾಟೊ ಆನಿ ಲಿಂಬ್ಯಾ ತೊಟಾಂಚೊ ಹೊ ಪ್ರದೇಶ್ ಸ್ವಾಧೀನ್ ಕರುಂದಿತ್. ತ್ಯಾ ಬಡ್ವಾ ರಾಯಾಚೆಂ ದರ್ಬಾರ್ ಆನಿ ತಾಚ್ಯಾ ತುಂಡು ಠೊಲಿಯೆಂಚೆಂ ಕಾರ್ಬಾರ್ ಕಿತ್ಲೆಂ ಆಸಾ ಮ್ಹಣ್ ಏಕ್ ಹಾತ್ ಪಳೆಲ್ಲೆಪರಿಂ ಜಾಲೆಂ! ಜಾಯ್ನಾವೇ ಸರ್ದಾರ್ ಸಿಮಾಂವ್?”
“ಜಾವ್ಯೆತ್ ಹುಜೂರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಬಾದಶಹಾನ್ ಕಬ್ಲಾತ್ ದಿಲ್ಯಾರ್ ಹಾಂವ್ಂಚ್ ಝುಜಾ ಥಳಾಕ್ ವಚೊಂಕ್ ತಯಾರ್.”
“ತೆಂ ಆಮಿ ಉಪ್ರಾಂತ್ ಸಾಂಗ್ತಾಂವ್!” ಟಿಪ್ಪುನ್ ಧೆಂಕ್ಣೊ ಮಾರ್ಲೊ. “ಸದ್ದ್ಯಾಕ್, ಲಡಾಯೆಕ್ ದೆಂವ್ಚ್ಯಾ ಆದಿಂಚ್ ಲಡಾಯ್ ಜಿಕ್ಲ್ಲೆಪರಿಂ ದಾಕಯ್ತಾ ತೊ ದಡ್ಡ (ದೊಡ್ಡ) ವೀರೇಂದ್ರ!”
ತ್ಯಾ ಉಪ್ರಾಂತ್, ಸಕ್ಡಾಂನಿ ಥೊಡೊ ವಿಶೆವ್ ಘೆಂವ್ಕ್ ಜಾಯ್ ಮ್ಹಣ್ ಟಿಪ್ಪು ಸುಲ್ತಾನಾನ್ ತಾಕಿದ್ ದಿಲಿ. ದುಸ್ರ್ಯಾ ದಿಸಾ ಕಿತೆಂ ರಾಕೊನ್ ಆಸಾ ಕೊಣ್ಣಾ ಮ್ಹಣ್ ಚಿಂತುನ್ ಸರ್ದಾರ್ ಸಿಮಾಂವ್ಯೀ, ವಿಶೆವ್ ಘೆಂವ್ಕ್ ಗೆಲೊ.
ದುಸ್ರ್ಯಾ ಫಾಂತ್ಯಾಚೆಂ ಕಾರ್ಬಾರ್ ತಾಣಿಂ ಚಿಂತ್ಲ್ಲೆಪರಿಂ ಜಾಂವ್ಕ್ ನಾ.
ಬೆಟ್ಟದಪುರ ಥಾವ್ನ್ ಯೇಂವ್ಕ್ ಆಸ್ಲ್ಲಿ ಫವ್ಜ್ ಯೇವ್ನ್ ಪಾವೊಂಕ್ ನಾ. ತಾಚ್ಯಾ ಬದ್ಲಾಕ್ ದುಸ್ರಿಚ್ ಖಬರ್ ಆಯ್ಲಿ: ತಿ ಫವ್ಜ್, ಪಿರಿಯಾಪಟ್ಟಣಾಕ್ ಪಾಟಿಂ ಆಪಯ್ಲ್ಯಾ ಮ್ಹಳ್ಳೆಂ ವೀರೇಂದ್ರ ರಾಜಾಚ್ಯಾ ನಾಯಕಾಂಕ್ ಕಳಿತ್ ಜಾತಚ್ ತಾಣಿಂ ಚತುರ್ ಏಕ್ ಕಾಮ್ ಕೆಲೆಂ. ಪ್ರೇಜರ್ ಪೇಟ್ ಥಾವ್ನ್ ತಾಂಚಿ ಪಾಂಯ್ಶಿಂ ಶಿಪಾಯಾಂಚಿ ಫವ್ಜ್ ಉಟಾಉಟಿಂ ಬೆಟ್ಟದಪುರಾಚೆರ್ ದೆಂವಯ್ಲಿ. ತಾಂತ್ಲ್ಯಾ ಧನುರ್ಧಾರಿಂಕ್ ತಾಣಿಂ ದಾವ್ಯಾ ಕುಶಿಚ್ಯಾ ಖಣಿಯೆಂತ್ಲ್ಯಾನ್ ಮುಖಾರ್ ಧಾಡ್ನ್, ಟಿಪ್ಪುಚಿಂ ಸಯ್ನಾಂ ನ್ಹಂಯ್ಚೊ ಫಾಂಟೊ ಉತ್ರೊಂಕ್ ಆಸ್ಲ್ಲ್ಯಾ ವಾಟೆರ್ ಲಿಪಯ್ಲೆ. ತಶೆಂ ಜಾಲ್ಲ್ಯಾನ್, ಮಧ್ಯಾನೆರ್ ಪಾಟಿಂ ಪರ್ತಲ್ಲ್ಯೊ ಠೊಲಿಯೊ, ಉದ್ಕಾಚಿ ತಿ ವಾಟ್ ಉತ್ರೊಂಕ್ ಪ್ರಯತ್ನ್ ಕರ್ತಾನಾ, ಕಾಳೊಕಾಂತ್ಲ್ಯಾನ್ ತಾಂಚೆರ್ ಲೊಂಕ್ಡಾಚೆ ಕಣೆ ಉಬ್ಲೆ – ಥೊಡೆ ಜೀವ್ ಗೆಲೆ, ಥೊಡೆ ಘೊಡೆ ಮೆಲೆ, ಆನಿ ಚಿಂತ್ಲ್ಲ್ಯಾ ಸಂಚಲನಾಂತ್ ಘುಸ್ಪಡ್ ಜಾಲಿ.
ತಾಣಿಂ ಉತ್ರೊಂಚಿ ಆಲೋಚನ್ ಸಾಂಡಿಜಾಯ್ ಪಡ್ಲಿ. ಎಕಾದಾವೆಳಾ ಜಬರ್ದಸ್ತೆನ್ ಉತ್ರೊನ್ ಯೇಂವ್ಕ್ ಪ್ರಯತ್ನ್ ಕೆಲ್ಲೆಂ ಜಾಲ್ಯಾರೀ ಜೀವ್ಘಾತ್ ಜಾತೊ – ಫ್ರೇಜರ್ ಪೇಟೆ ಥಾವ್ನ್ ದೆಂವ್ಲ್ಲಿ ಕೊಡಗಾಂಚಿ ಫವ್ಜ್ ತಾಂಚ್ಯಾ ಪಾಟ್ಲ್ಯಾನ್ ಯೇವ್ನ್ ತಾಂಕಾಂ ಕಾತ್ರಿಂತ್ ಸಾಂಪ್ಡಾವ್ನ್ ಮಾರ್ತಿ.
ತಸಲ್ಯಾ ಪರಿಸ್ಥಿತೆಂತ್ ತಾಣಿಂ ಪಿರಿಯಾಪಟ್ಟಣಾಕ್ ವೆಚೆಂ ಅಸಾಧ್ಯ್ ಜಾಲೆಂ. ದೆಕುನ್ ತಾಣಿಂ ತಾಂಚಿ ವಾಟ್ ಚಿಕ್ಕೆ ಉಜ್ವ್ಯಾಕ್ ಘುಂವ್ಡಾವ್ನ್, ಮೈಸೂರ್ಚ್ಯಾ ಪ್ರದೇಶಾ ಭಿತರ್ಚ್ ಪಾಟಿಂ ರಾವೊನ್ ರಾತ್ ಫಾಲ್ಯಾಂ ಕೆಲ್ಲ್ಯಾ ಶಿವಾಯ್ ದುಸ್ರೊ ಉಪಾಯ್ ತಾಂಕಾಂ ನಾ ಜಾಲೊ. ತೆಂಯೀ ಸುಲಭಾಯೆಚೆಂ ಕಾಮ್ ನಹಿಂ ಆಸ್ಲ್ಲೆಂ. ರಾತಿಚ್ಯಾ ವೆಳಾರ್, ರಾನ್ವಟ್ ತ್ಯಾ ಪ್ರದೇಶಾಂತ್, ಲಡಾಯ್ ಕರುಂಕ್ ಅವ್ಕಾಸ್ ನಾಸ್ತಾಂ, ಪ್ರಾಣ್ ಆನಿ ಪ್ರಾಣಿಂಚೆರ್ ಕಣೆ ಉಬೊನ್ಂಚ್ ರಾವ್ಲೆ.
ಹಿ ಖಬರ್ ಆಯ್ಕೊನ್ ಟಿಪ್ಪು ಸುಲ್ತಾನ್ ಪುರ್ತೊ ಉಚಾಂಬಳ್ ಜಾಲೊ. ಪಿರಿಯಾಪಟ್ಟಣಾಂತ್ಲ್ಯಾ ಫವ್ಜೆಕ್ ಭರ್ ದೀಂವ್ಕ್ ಯೇಜಾಯ್ ಆಸ್ಲ್ಲಿ ತಾಚಿ ಫವ್ಜ್ ಯೇಂವ್ಕ್ ನಾತ್ಲ್ಲಿ ಮಾತ್ರ್ ನಹಿಂ, ತಿಚ್ ಜಾವ್ನ್ ಖುದ್ ಅಪಾಯಾಂತ್ ಚಿಡ್ಕಲ್ಲಿ. ನಿಜಾಯ್ಕೀ ತಿಚ್ಯಾ ಮಜತೆಕ್ ವೆಚಿ ಗರ್ಜ್ ಚಡ್ ಆಸಾ ಮ್ಹಣ್ ತಾಕಾ ಸಮ್ಜಲೆಂ.
ಧುಂವ್ರಿ ವಚೊನ್ ಸುವ್ಯಾಂ ಜಿನ್ಸಾಚೊ ಬಾರೀಕ್ ಪಾವ್ಸ್ ಲಾಗ್ಲ್ಲೊ. ತಸಲ್ಯಾ ವೆಳಾರ್, ಟಿಪ್ಪು ಸುಲ್ತಾನಾಚ್ಯಾ ಸಯ್ನಾಂಚೆಂ ಸ್ಥಾನ್ ಆನಿ ಚಲನ್ ಕೊಡ್ಗ್ಯಾಂಕ್ ಕಳಿತ್ ಆಸ್ಲ್ಲೆಪರಿಂ, ತಾಂಚೆಂ ಸ್ಥಾನ್ ಆನಿ ಚಲನ್ ಹಾಂಕಾಂ ಕಳಿತ್ ನಾತ್ಲ್ಲೆಂ.
“ಆಮ್ಚ್ಯಾ ಬೇಹುಗಾರಾಂಚೆಂ ಕಾಮ್ ಯೋಗ್ಯ್ ಜಾಂವ್ಕ್ ನಾ” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಅಸಲ್ಯಾ ಕ್ರಮಾಂ ವೆಳಾರ್ ಗರ್ಜ್ ಆಸ್ಚಿ ಆದ್ಲಿ (ಪೂರ್ವ್) ಸಮ್ಜಣಿ ಆಮ್ಕಾಂ ನಾ ಜಾಲ್ಯಾ. ಹಾಕಾ ಕಿತೆಂ ಮ್ಹಣ್ತಾತ್?”
“ಸರ್ವ್ ದಿಶಾಂನಿ ಬೇಹುಗಾರಾಂಕ್ ಧಾಡ್ಲ್ಲೆ, ಹುಜೂರ್!” ಪಿಂರ್ಗಲೊ ಷೇಕ್ ಆಲಿ. “ತಾಂತ್ಲೆ ಥೊಡೆ ಪಾಟಿಂ ಆಯ್ಲ್ಯಾತ್ – ಚಡಾವತ್ ಯೇಂವ್ಕ್ ನಾಂತ್. ತೆ ವಿರೋಧ್ ಪಕ್ಷೆಚ್ಯಾ ಹಾತಾಂತ್ ಸಾಂಪಡ್ಲ್ಯಾತ್ ಜಾವ್ಯೆತ್…”
“ಖಾಮೋಶ್!” ಬಾದಶಹಾನ್ ಧರ್ಣಿಕ್ ಖೊಟ್ ಮಾರ್ಲಿ. “ತರ್ ತುಮಿ ಕರ್ಚೆಂ ಕಿತೆಂ? ಆಮ್ಚೆ ಬೇಹುಗಾರ್ ತಾಂಚ್ಯಾ ಹಾತಾಂತ್ ಸಾಂಪಡ್ಲ್ಯಾತ್ ಜಾವ್ಯೆತ್ ಖಂಯ್! ತರ್ ತಾಂಚೆ ಬೇಹುಗಾರ್ ಕಿತ್ಲೆ ಆಮ್ಚ್ಯಾ ಹಾತಾಂತ್ ಪಡ್ಲ್ಯಾತ್? ಸರ್ದಾರ್ ಸಿಮಾಂವ್!”
“ಜೀ, ಹುಜೂರ್!”
“ತುವೆಂ ಆಮ್ಚ್ಯಾ ಸಾಂಗಾತಾಚ್ ಆಸಜಾಯ್ ಮ್ಹಳ್ಳೆಂ ಪುಣೀ ಆಮ್ಕಾಂ ಉಪ್ಕಾರ್ಲೆಂ. ಆಮ್ಚ್ಯಾ ಭದ್ರತೆ ಖಾತಿರ್ ತುವೆಂ ದಿಲ್ಲ್ಯಾ ರಾಜಾಂವಾಚೆಂ ಮಹತ್ವ್ ಆತಾಂ ಆಮ್ಕಾಂ ಸಮ್ಜತಾ. ನಾ ಜಾಲ್ಯಾರ್, ಆಮ್ಚ್ಯಾ ಠೊಲಿಯೆಂತ್ ಹ್ಯಾ ತೆಂಪಾರ್ ಗದ್ದಾ ಆನಿ ಬುದ್ದುಚ್ ಭರ್ಲ್ಯಾತ್ ಮ್ಹಣ್ ಚಿಂತುಂಕ್ ಆಮ್ಕಾಂ ಲಜ್ ಭೊಗ್ತಾ! ಆಮ್ಕಾಂ ದಿಸ್ತಾ ಕೊಡ್ಗ್ಯಾಂಚಿಂ ಚಡಾವತ್ ರಿಸಾಲಾಂ ಪ್ರೇಜರ್ ಪೇಟೆಚ್ಯಾ ವಲಯಾಂನಿ ಜಮ್ಲ್ಯಾಂತ್. ತಶೆಂ ಜಾಲ್ಲ್ಯಾನ್ ಬೆಟ್ಟದಪುರ ತೆವ್ಶಿನ್ ಗೆಲ್ಲ್ಯಾ ಆಮ್ಚ್ಯಾ ರಿಸಾಲಾಂಕ್ ತುಕ್ಲಾಂವ್ಚೆಂ ಧಯ್ರ್ ತಾಣಿಂ ಘೆತ್ಲೆಂ.”
“ಜಾವ್ಯೆತ್, ಹುಜೂರ್” ಸರ್ದಾರ್ ಸಿಮಾಂವ್ನ್ ದುಬಾವ್ ಉಚಾರ್ಲೊ. “ತಶೆಂ ಜಾಲ್ಯಾರ್, ಹೆಗ್ಗಡದೇವನ ಕೋಟೆಚೆರ್ ದಾಡ್ ಘಾಲ್ನ್, ಮೈಸೂರ್ ಥಾವ್ನ್ ತಲ್ಚೇರ್ ಪಾಶಾರ್ ಜಾಂವ್ಕ್ ಸುಲಭ್ ಆಸ್ಲ್ಲಿ ತಿ ವಾಟ್ಯೀ ಬಂದ್ ಜಾವ್ನ್ ಆಮ್ಚ್ಯಾ ಶಿಪಾಯಾಂಕ್ ಜೀಕ್ ಲಾಭ್ತೆಲಿ.”
“ಬರಾಬರ್! ಪುಣ್ ತಸಲ್ಯಾ ಜಯ್ತಾಚಿ ಕೀರ್ತ್ ಪುರ್ತಿ ಕರೀಮ್ ಖಾನಾಚಿ ಜಾಯ್ನಾಯೆ ಮ್ಹಳ್ಳೆಂಯೀ ನೀಜ್” ಮ್ಹಣಾಲೊ ಟಿಪ್ಪು ಸುಲ್ತಾನ್ ಚಿಂತುನ್ಸೊ. “ದೆಕುನ್ ಆಮ್ಚ್ಯಾ ಮತಿಂತ್ ಅಶೆಂ ದಿಸ್ತಾ: ಹಾಂಗಾಚಿಂ ರಿಸಾಲಾಂ ಆಮಿ ಪಾಟಿಂ ಕಾಡ್ನ್ ಬೆಟ್ಟದಪುರಾಕ್ ಸಕಾಳಿಂಚ್ ಧಾಡಿಜಾಯ್. ಥಂಯ್ಸರ್ ಆಸ್ಲ್ಲ್ಯಾ ಕೊಡ್ಗ್ಯಾಂಕ್ ಬೂದ್ ಶಿಕವ್ನ್ ಉಪ್ರಾಂತ್ ದಕ್ಷಿಣಾಕ್ ಯೇವ್ನ್, ಹೆಗ್ಗಡದೇವನ ಕೋಟೆ ಪರ್ಯಾಂತ್ ತಾಂಚಿ ಶಿಕಾರ್ ಕರಿಜಾಯ್!”
“ಜಾವ್ಯೆತ್, ಪುಣ್…”
“ಪುಣ್?”
“ಪುಣ್ ತಶೆಂ ಕರ್ಚ್ಯಾಂತ್ಯೀ ಅಪಾಯ್ ಆಸ್ಯೆತ್ ಹುಜೂರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್, ಧಯ್ರ್ ಘೆವ್ನ್. “ಹಾಂಗಾಚಿಂ ರಿಸಾಲಾಂ – ವಿರೋಧ್ ಪಕ್ಷೆಚೆಂ ಚಲನ್ ಸಮ್ಜನಾಸ್ತಾನಾ – ಪಾಟಿಂ ಕಾಡ್ಲ್ಯಾರ್, ತಾಂಚಿ ಕಾಂಯ್ ಲಿಪೊನ್ ಆಸ್ಲ್ಲಿ ಫವ್ಜ್, ನಂಜರಾಜ ಪಟ್ಟಣಾಚ್ಯಾ ವಾಟೆನ್ ಯೇಂವ್ಕ್ ವಾಟ್ ಆಮಿ ಉಗ್ತಿ ದಿತಾಂವ್. ತೆದಾಳಾ…”
“ತೆದಾಳಾ..? ಸಮ್ಜಲೆಂ. ತೆದಾಳಾ ಆಮ್ಕಾಂ, ನಹಿಂಚ್ ಆಮ್ಕಾಂ, ಹಾಂಗಾಸರ್ ತಾಂಚ್ಯಾ ಪ್ರದೇಶಾ ಭಿತರ್ ಪ್ರವೇಶ್ ಜಾಂವ್ಕ್ ಕಷ್ಟ್ ಜಾತೆಲೆ, ಬಗಾರ್, ಆಮ್ಚಿ ಹಿ ಫವ್ಜ್ಯೀ ಮಧೆಂ ಸಾಂಪಡ್ಚೊ ಅಪಾಯ್ ಆಸಾ.”
“ವ್ಹಯ್ ಹುಜೂರ್.”
“ಬರಾಬರ್ ಸರ್ದಾರ್ ಸಿಮಾಂವ್. ಕಿತೆಂ ಕರ್ಚೆಂ ಮ್ಹಣ್ ಆಮ್ಕಾಂ ಆತಾಂ ಸ್ಪಷ್ಟ್ ದಿಸನಾ” ಮ್ಹಣಾಲೊ ಬಾದಶಹಾ, ಮಿಶ್ಯೊ ಚಿಂವೊನ್. “ಹ್ಯಾ ದಿಸಾಂನಿ, ಝುಜಾಚ್ಯಾ ಶಾಸ್ತ್ರಾಂತ್ ಆಮ್ಚಿ ಮತ್ಯೀ ಮಸ್ಕ್ ಜಾಲ್ಲೆಪರಿಂ ದಿಸ್ತಾ! ತರ್, ಉತ್ತರಾಂತ್ ಆನಿ ದಖ್ಖಣಾಂತ್ ಜಾಲ್ಲೆಪರಿಂ ಜಾಂವ್. ಹಾಂಗಾಸರ್ ಆಸ್ಚಿಂ ಆಮ್ಚಿಂ ರಿಸಾಲಾಂ ಫಾಲ್ಯಾಂಚ್ ಪಲ್ತಡಿ ಉತ್ರೊಂದಿತ್ ಆನಿ ಆಕ್ರಮಣ್ ಕರುಂದಿತ್. ಉಪ್ರಾಂತ್ ಕಿತೆಂ ಕರ್ಚೆಂ ಮ್ಹಣ್ ಅಲ್ಲಾ ಮತಿಂತ್ ಘಾಲ್ತಲೊ.”
“ಜಾವ್ಯೆತ್ ಹುಜೂರ್. ಪುಣ್ ಪರ್ತ್ಯಾನ್ ಸಾಂಗ್ತಾಂ ಮ್ಹಣ್ ದಿಸ್ತಾ ಜಾಲ್ಯಾರ್ ಮಾಫ್ ಕರಿಜಾಯ್ – ಬಾದಶಹಾನ್ ಮಾತ್ರ್ ಪಯ್ಸ್, ಪಾಟಿಂ ರಾವಜಾಯ್!”
“ಕಬೂಲ್. ಹಾಂಗಾಚಿಂ ರಿಸಾಲಾಂ ಫಾಲ್ಯಾಂ ಹೆಣೆಂಚೊ ಪ್ರದೇಶ್ ಸ್ವಾಧೀನ್ ಕರುಂದಿತ್. ತಾಂಕಾಂ ತಾಂಚಿ ರಾಟಾವಳ್ ದೀವ್ನ್ ಆಮಿ ಫಾಲ್ಯಾಂಚ್ ಪಟ್ಟಣಾಚಿ ವಾಟ್ ಧರುಂಕ್ಯೀ ಕಬೂಲ್!”
ರಾತ್ ಪಾಶಾರ್ ಜಾಲಿ. ಆಳ್ಸಾಯೆನ್ ಆಸ್ಲ್ಲ್ಯಾ ಶಿಪಾಯಾಂಕ್ ನವೆಂ ಉತ್ತೇಜನ್ ಆಯ್ಲೆಂ. ದಿಸಾಚ್ಯಾ ಯೆಣ್ಯಾ ಸಾಂಗಾತಾ ನವಿ ಸಮಸ್ಯಾಯೀ ಆಯ್ಲಿ. ತುಂರ್ಬೆಂತಿಂಚ್ಯಾ ನಾದಾನ್ ಆನಿ ಧೊಲಿಂಚ್ಯಾ ಧಮ್ಕೆನ್, ಟಿಪ್ಪುಚಿಂ ರಿಸಾಲಾಂ ಕೊಡಗಾಂತ್ ಪ್ರವೇಶ್ ಜಾಲಿಂ ಮ್ಹಣ್, ದೇಡ್ ಮಯ್ಲ್ ಪಾಟಿಂ ಥಾವ್ನ್ ಬಾದಶಹಾನ್ ದೆಖ್ಲ್ಲೆಪರಿಂಚ್, ನಂಜರಾಜ ಪಟ್ಟಣಾಚ್ಯಾ ವಾಟೆನ್ ಆಯಿಲ್ಲಿ ಬಳಾಧಿಕ್ ಫವ್ಜ್, ವಾರ್ಯಾ ವೇಗಾನ್ ತಾಂಚೆರ್ ದೆಂವ್ಲಿ.
(ಮುಂದರುಂಕ್ ಆಸಾ)
ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
