ಸರ್ದಾರಾಚೆಂ ಸನ್ನಿಧಾನ್ – 18: ಸಂರಕ್ಷಣ್
Posted on : June 11, 2026 at 2:06 PM
ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 18
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)
ಪ್ರಕರಣ್ 18: ಸಂರಕ್ಷಣ್
ಟಿಪ್ಪು ಸುಲ್ತಾನಾಚಿ ಫವ್ಜ್, ಸಕಯ್ಲ್ ಥಾವ್ನ್ ಚಿಕ್ಕೆ ವಯ್ರ್ ಚಡೊನ್ ತೆಂ ಫಾಲ್ಕೆಂ ಉತ್ರಜಾಯ್ ಆಸ್ಲ್ಲಿ. ತಿತ್ಲ್ಯಾ ಲಾಗಿಂ ಕೊಡಗಾಚಿ ಫವ್ಜ್ ಆಸಾ ಮ್ಹಳ್ಳೆಂ ತಾಂಕಾಂ ಕಳಿತ್ ನಾತ್ಲ್ಲ್ಯಾನ್, ಅವ್ಚಿತ್ ಮುಖ್ಲಿ, ಚಡುಣೆಂ ಅರ್ಧ್ಯಾ ಮಯ್ಲಾ ಪಯ್ಶಿಲಿ ಉಬಾರಾಯ್, ಆನಿ ತೆವ್ಶಿಲೊ ಮೊಳೊ ಉತ್ರೊನ್, ಮಹಾನ್ ಉದ್ಕಾಚೆಂ ಏಕ್ ಲ್ಹಾರ್ ಆಯಿಲ್ಲ್ಯಾ ಜಿನ್ಸಾರ್ ತೆ ಶಿಪಾಯ್ ಭರಾನ್ ಯೆಂವ್ಚೆಂ ತೆಂ ಅವ್ಚಿತ್ ದೃಶ್ಯ್ ಪಳೆವ್ನ್ ಹೆವ್ಶಿಲ್ಯಾಂಕ್ ಥಾರೊ ಚುಕ್ಲೊ. ಜೆಮೆದಾರಾಂಚಿ ಆನಿ ಭಕ್ಷಿಂಚಿ ತುರ್ತಾಚಿ ಹುಕುಮ್ ಆಯ್ಕೊನ್ ಮುಖಾರ್ ಆಸ್ಲ್ಲ್ಯಾ ಪದಾತಿಂನಿ ತಾಂಚಿ ಫಂಗತ್ ಸಾಂಬಾಳುಂಕ್ ಪಳೆಲೆಂ.
ದೇಡ್-ದೋನ್ ಮಯ್ಲಾಂ ಥಾವ್ನ್ ಟಿಪ್ಪು ಸುಲ್ತಾನ್ ಆನಿ ಅಂಗರಕ್ಷಕ್ ಹೆಂ ದೃಶ್ಯ್ ಪಳೆವ್ನ್ ವಿಸ್ಮಿತ್ ಜಾಲೆ ಆನಿ ಆಕಾಂತ್ಲೆ. ಸಕಯ್ಲ್ ಆಸ್ಲ್ಲ್ಯಾಂಚ್ಯಾ ಸುವಾತೆಚಿ ಅಡ್ಚಣ್, ಆನಿ ವಯ್ರ್ ಥಾವ್ನ್ ಸಕಯ್ಲ್ ಯೆತೆಲ್ಯಾ ಕೊಡ್ಗ್ಯಾಂಕ್ ದೆಂವ್ಣೆಚಿ ಸುಲಭಾಯ್ ಆಸ್ಲ್ಲಿ ಮ್ಹಣ್ ಸ್ಪಷ್ಟ್ ದಿಸ್ತಾಲೆಂ.
“ಪ್ರಮಾದ್!” ಮ್ಹಣಾಲೊ ಟಿಪ್ಪು ಸುಲ್ತಾನ್, ರಾವ್ಲ್ಲೆ ಕಡೆನ್ ಥಾವ್ನ್ಂಚ್ ತ್ಯಾ ವಿರೋಧ್ ಪಾಡ್ತಿಚ್ಯಾ ರಾಹುತಾಂಕ್ ಕಾತರ್ನ್ ಮಾರುಂಕ್ ಆಯ್ತೊ ಜಾಲ್ಲ್ಯಾ ಜಿನ್ಸಾರ್ ಆಪ್ಲಿ ತಲ್ವಾರ್ ಭಾಯ್ರ್ ಕಾಡ್ನ್. “ತುವೆಂ ಉಚಾರ್ಲ್ಲೊ ದುಬಾವ್ಚ್ ಭೋವ್ ಜರೂರ್ ಸತ್ ಜಾಲೊ. ಆಮ್ಚೆ ಪಹರೆಗಾರ್ ಆನಿ ಬೇಹುಗಾರ್ ನಿದ್ರೇಸ್ತ್ ವಾ ನಿಷ್ಕ್ರಿಯಾಳ್ ಜಾಲ್ಲೆ ಮ್ಹಳ್ಳೆಂ ಸ್ಪಷ್ಟ್.”
ಸರ್ದಾರ್ ಸಿಮಾಂವ್, ಜಾಪ್ ಕರಿನಾಸ್ತಾಂ ತೆಂ ಸಕಯ್ಲೆಂ ದೃಶ್ಯ್ ಪಳೆತಾಲೊ. ಮೈಸೂರ್ಚೆ ಶಿಪಾಯ್ ವಿಶೇಸ್ ಧಯ್ರ್ ಘೆವ್ನ್ ಝುಜನಾತ್ಲ್ಯಾರ್ ವಾ ಕಸಲೆಂ ಪುಣೀ ಅಜ್ಯಾಪ್ ಜಾಯ್ನಾತ್ಲ್ಯಾರ್, ಥೊಡ್ಯಾಚ್ ವೆಳಾನ್ ತಾಂಚೆಂ ಪರಾಜಯ್ ಜಾವ್ನ್, ಉರ್ಲೆಲೆ ಚೆಲ್ಲಾಪಿಲ್ಲಿ ಜಾವ್ನ್ ಪೊಳಾಪಳ್ ಘೆತೆಲೆ ಮ್ಹಣ್ ತಾಚ್ಯಾ ಅನುಭವಿ ದೊಳ್ಯಾಂಕ್ ಅರ್ಥ್ ಜಾಲೊ.
ಫಾಲ್ಕ್ಯಾಚ್ಯಾ ದೆಂವ್ಣೆರ್, ಕಣ್ಗೆಚ್ಯಾ ವೊಳಿಂಪರಿಂ ಕೊಡ್ಗ್ಯಾ ರಾಹುತಾಂಚಿ ಫಂಗ್ತಿ ಪಾಟ್ಲ್ಯಾನ್ ಫಂಗತ್, ವೆಗಾನ್ ತರೀ ಶಿಸ್ತಾನ್ ಮೈಸೂರ್ಚ್ಯಾ ಠೊಲಿಯಾಂಚೆರ್ ಪಡೊಂಕ್ ಲಾಗಿಂ ಪಾವ್ತಾಲಿ. ತಾಂಚೆ ಕಡೆನ್ ಆಸ್ಲ್ಲ್ಯಾ ಲಾಂಬ್ ಭಾಲ್ಯಾಂಚೆ ಧೊಮೊಸ್, ತಿತ್ಲ್ಯಾ ಪಯ್ಸ್ ಥಾವ್ನ್ ಜಾಲ್ಯಾರೀ, ತ್ಯಾ ಸಕಾಳಿಂಚ್ಯಾ ಕಿರ್ಣಾಂತ್ ಝಳ್ಕತಾಲೆ. ತಶೆಂಚ್ ದೊನೀ ಬಗ್ಲೆಂನಿ ಆಸ್ಲ್ಲ್ಯಾ ಫುಡ್ಲ್ಯಾ ಪದಾಂತಿ ಕಡೆನ್ ಭಾಲೆ ಆನಿ ಪಾಟ್ಲ್ಯಾ ಪದಾತಿಂ ಕಡೆನ್ ತಲ್ವಾರಿ ಝಳ್ಕತಾಲ್ಯೊ.
ವೇಳ್ ವಚೊಂಕ್ ನಾ. ಪಯ್ಸ್ ಥಾವ್ನ್ ಜಾಲ್ಯಾರೀ ಬೋಬ್ ಆಯ್ಕಲಿ. ಫವ್ಜೆಂಚಿಂ ಪೊಂತಾಂ ಎಕಾಮೆಕಾಕ್ ಹಾಂಡ್ಲಿಂ.
ವಯ್ರ್ ಥಾವ್ನ್ ಆಯಿಲ್ಲ್ಯಾಂಚೊ ಭರ್, ಸಕಯ್ಲ್ ಆಸ್ಲ್ಲ್ಯಾಂಕ್ ಧಾಡಾವ್ನ್, ಮುಖಾರ್ ಆಸ್ಲ್ಲ್ಯಾ ಅರ್ಧುಖುರೆ ಫಂಗ್ತಿಂಕ್ ಶೆವ್ಟಾಂವ್ಕ್ ಪಾವ್ಲೊ.
ಬೊಕ್ರ್ಯಾಂಚ್ಯಾ ಹಿಂಡಾಂತ್ ಬೊಲ್ಪೆ ರಿಗ್ಲ್ಲ್ಯಾ ಜಿನ್ಸಾರ್ ಕೊಡ್ಗ್ಯಾ ಸವಾರಾಂಚೆ ಘೊಡೆ, ಮೈಸೂರ್ಚ್ಯಾ ರಿಸಾಲಾಂನಿ ರಿಗ್ಲೆ. ಘುಸ್ಪಡ್ ಗೊಂದೊಳ್ ಆನಿ ಹಾಕ್ ಬೊಬೊ ಚಡ್ ಜಾಲ್ಯೊ. ಫುಡೆಂ ಆಸ್ಲ್ಲಿಂ ರಿಸಾಲಾಂ ಫಾಸ್ಳೊನ್ ಪಾಟಿಂ ಪಾಯ್ ಕಾಡ್ತಾನಾ, ಪಾಟಿಂ ಆಸ್ಲ್ಲ್ಯೊ ಕಂಪ್ಣ್ಯೊ ಫುಡೆಂ ಸರ್ತಾಲ್ಯೊ ಜಾಲ್ಲ್ಯಾನ್ ಸರ್ವ್ ಅಸ್ತವ್ಯಸ್ತ್ ಜಾಲೆಂ. ರಾವೊನ್ ಝಜ್ಚೊ ಅವ್ಕಾಸ್ ಹಾತ್ ಚುಕ್ಲ್ಲ್ಯಾನ್, ಮರಣ್ ಸದ್ದ್ಯಾಕ್ ಚುಕಂವ್ಚ್ಯಾ ಇರಾದ್ಯಾನ್, ಮೈಸೂರ್ಚೆ ಶಿಪಾಯ್ ಪಾಯ್ ಕಾಡುಂಕ್ ಲಾಗ್ಲೆ. ಧಾಂವೊಂಕ್ ಲಾಗ್ಲೆ.
“ರಾವಾ ಥಂಯ್, ಸೂಅರಾಂನೊ! ರಾವಾ ಆನಿ ಝುಜಾ!” ಟಿಪ್ಪು ಸುಲ್ತಾನ್, ತಿತ್ಲ್ಯಾ ಪಯ್ಸ್ ಥಾವ್ನ್ ಆಪ್ಲಿ ಹುಕುಮ್ ಝುಜಾ ಥಳಾಕ್ ಆಯ್ಕತೆಲಿ ಮ್ಹಳ್ಳ್ಯಾ ಜಿನ್ಸಾರ್ ಬೊಬಾಟ್ಲೊ. “ಪಾಟಿಂ ಆಯಿಲ್ಲ್ಯಾಂಕ್ ಫಾಶಿ!” ತಾಚೆ ದೊಳೆ ಕ್ರೋಧಾನ್ ತಾಂಬ್ಡೆ ಜಾಲ್ಲೆ. ತಾಚ್ಯಾ ತೊಂಡಾಂತ್ಲ್ಯಾನ್ ಥಿಂಪಿ ಉಸಳ್ತಾಲಿ. ಭೊಂವಾರಿಂ ಆಸ್ಲ್ಲ್ಯಾ ಅಂಗರಕ್ಷಕಾಂಚ್ಯಾ ತೊಂಡಾರ್ ಭಿಯಾಚಿಂ ಖುಣಾಂ ಚರೊಂಕ್ ಲಾಗ್ಲ್ಲಿಂ.
ಷೇಕ್ ಆಲಿ ಥಂಡ್ ದಿಸ್ತಾಲೊ. ಸರ್ದಾರ್ ಸಿಮಾಂವ್, ಪರಿಸ್ಥಿತಿ ತಿತ್ಲ್ಯಾ ವೆಗಿಂ ತಶಿ ರಾವ್ಲ್ಲೆಂ ಚಿಂತುನ್ ಚಿಕ್ಕೆ ಘಾಮೆತಾಲೊ.
“ಸರ್ದಾರ್ ಸಿಮಾಂವ್!”
“ಜೀ, ಹುಜೂರ್!”
“ಆಮ್ಚ್ಯಾ ಘೊಡ್ಯಾಂಕ್ ಧಾಂವ್ಡಾವ್ನ್ ಥಂಯ್ ಯಾಗೀ ಕಿತೆಂ ಮ್ಹಣ್ ಭೊಗ್ತಾ’ಮ್ಕಾಂ!” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಥಂಯ್ ಆಸ್ಲ್ಲ್ಯಾ ಬದ್ಮಾಶಾಂಕ್ ಝುಜ್ಚೆಂ ಕಶೆಂ ಮ್ಹಣ್ ದಾಕವ್ಯೆತೆಂ!”
“ವ್ಹಯ್. ಹಾಂವೆಂ ಪಯ್ಲೆಂಚ್ ತಶೆಂ ಚಿಂತ್ಲ್ಲೆಂ” ಮ್ಹಣಾಲೊ ಷೇಕ್ ಆಲಿ. “ಆತಾಂ ಪುಣೀ…”
“ಹೋಶ್ಯಾರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್, ಅಂಗರಕ್ಷಕಾಂಕ್ ತಾಕಿದ್ ದೀವ್ನ್. “ತುಮ್ಚೆ ಕಾನ್ ದೊಳೆ ಉಗ್ತೆ ದವರ್ಯಾ!” ಷೇಕ್ ಆಲಿಚೆಂ ಉತಾರ್ ತಾಣೆಂ ಗಣ್ಣೆಂ ಕರುಂಕ್ ನಾ. ಬದ್ಲಾಕ್ ಟಿಪ್ಪು ಸುಲ್ತಾನಾ ಕಡೆನ್, ದಾಕ್ಷೆಣ್ ನಾಸ್ತಾನಾ ತೊ ಮ್ಹಣಾಲೊ: “ಹುಜೂರ್, ತುಮ್ಚೊ ವೀರಾವೇಶ್ ಹಾಂವ್ ಜಾಣಾಂ, ಪುಣ್ ಗರ್ಜೆಚ್ಯಾ ವೆಳಾರ್ ತುಮ್ಚೆಂ ಶಿಂತಿದ್ ಫಿರ್ವಲ್ಲೆಂ ಹಾಂವ್ ನೆಣಾಂ. ತುಮ್ಚ್ಯಾ ಭದ್ರತೆಚಿ ಜವಾಬ್ದಾರಿ, ತುಮ್ಚ್ಯಾ ಖುಶೆನ್ ಮ್ಹಜಿ ಜಾಲ್ಯಾರ್ – ಆತಾಂ ಹಾಂವೆಂ ಸಾಂಗ್ಲ್ಲೆಂ ತುಮಿ ಆಯ್ಕಜಾಯ್.”
“ಕಿತೆಂ?” ಟಿಪ್ಪು ನೀಟ್ ಜಾಲೊ.
“ತಕ್ಲಿ ಉರ್ಲ್ಯಾರ್ ಹಜಾರ್ ಉರ್ಮಾಲ್ ಬಾಂಧ್ಯೆತ್ ಮ್ಹಳ್ಳಿ ಏಕ್ ಆದ್ಲಿ ಗಾದ್ ಆಸಾ. ತುಮಿ ಸುರಕ್ಷಿತ್ ಉರ್ಲ್ಯಾರ್ ಅಸಲಿಂ ಹಜಾರ್ ಝುಜಾಂ ತುಮ್ಚೆ ವರ್ವಿಂ ಝುಜೊಂಕ್ ಆನಿ ಜಿಕೊಂಕ್ ಸಾಧ್ಯ್ ಆಸಾ. ಪುಣ್ ಆತಾಂ ತುಮ್ಚ್ಯಾ ಖಾಸ್ಗಿ ಭದ್ರತೆಚಿ ಚಡ್ ಗರ್ಜ್ ಆಸಾ. ಥಂಯ್ ಪಳೆಯಾ…”
ಝುಜಾ ಥಳಾಚ್ಯಾ ಉಜ್ವ್ಯಾಕ್ ತಾಣೆಂ ಹಾತ್ ದಾಕಯ್ಲೊ. ಥೊಡೆ, ಸವಾರ್ ಆಸ್ಲ್ಲೆ ಆನಿ ಥೊಡೆ ಸವಾರ್ ನಾತ್ಲ್ಲೆ ಘೊಡೆ, ಆನಿ ಥೊಡ್ಯಾಂಚೆರ್ ಘಾಯೆಲ್ಲ್ಯಾ ವಿವಿಧ್ ಅವಸ್ಥ್ಯಾ ಪರ್ಮಾಣೆಂ ಸವಾರ್ ನಿದೊನ್ ವಾ ಶಿರ್ಕೊನ್ ಉಮ್ಕಳೊನ್ ಆಸೊನ್ – ಸಕ್ಕಡ್ಯೀ ಪೊಳಾಪಳ್ ಘೆತಾಲೆ. ಬಾದಶಹಾ ವಾ ಹೆರ್ ಕೋಣ್ ಖಂಯ್ ಆಸಾ ಮ್ಹಣ್ ತಾಂಕಾಂ ಪರ್ವಾ ನಾತ್ಲ್ಲಿ.
“ಅಲ್ಲಾಕ್ ಅಕ್ಮಾನ್! ಆಮ್ಕಾಂ ಅವಮಾನ್!” ಮ್ಹಣಾಲೊ ಟಿಪ್ಪು.
“ಆತಾಂ ಪುಣೀ ಬಾದಶಹಾನ್ ಹಾಂಗಾ ಥಾವ್ನ್ ಜಾತಾ ತಿತ್ಲ್ಯಾ ಪಾಟಿಂ ವಚೊಂಕ್ ಆನಿ ಸುರಕ್ಷಿತ್ ಜಾಂವ್ಕ್ ಪ್ರಯತ್ನ್ ಕರ್ಚೆಂ ಬರೆಂ.”
“ಕಿತೆಂ ಮ್ಹಣ್ತಾಯ್ ಸರ್ದಾರ್ ಸಿಮಾಂವ್ ತುಂ!” ಅಜ್ಯಾಪ್ಲೊ ಟಿಪ್ಪು ಸುಲ್ತಾನ್. “ಆಮ್ಚ್ಯಾ ಸಾಮ್ರಾಜ್ಯಾ ಭಿತರ್ಚ್ ಆಮಿ ಪೊಳಾಪಳ್ ಘೆಜಾಯ್?”
“ಪೊಳಾಪಳ್ ಮ್ಹಳ್ಳೆಂ ಉತಾರ್ ಹಾಂವ್ ವಾಪಾರಿನಾ, ಹುಜೂರ್” ಮ್ಹಣಾಲೊ ಸರ್ದಾರ್ ಸಿಮಾಂವ್, ನಮೃತೆನ್. “ಪ್ರಜೆಕ್ ಅಮೂಲ್ಯ್ ಜಾವ್ನ್ ಆನಿ ಲಾಗ್ಶಿಲ್ಯಾಂಕ್ ಮೊಗಾಚೊ ಜಾವ್ನಾಸ್ಲ್ಲೊ ಜೀವ್ ಸಾಂಬಾಳುಂಕ್ ಬಾದಶಹಾಚೊ ಅಸಹಕಾರ್ ಆಸನಾಯೆ ಮ್ಹಣ್…”
ತಿತ್ಲ್ಯಾರ್ ಖಂಯ್ ಏಕ್ ದೊಂಗೊರ್ ಲೊಳ್ಲ್ಲೆಪರಿಂ ವಾ ಏಕ್ ದಾಂಡ್ ಪರ್ತಲ್ಲೆಪರಿಂ ಪಯ್ಸ್ ಥಾವ್ನ್ ಆವಾಜ್ ಆಯ್ಕಲೊ. ಕಿತೆಂ ಜಾವ್ಯೆತ್ ಮ್ಹಣ್ ಆತುರಾಯೆನ್ ತೆವ್ಶಿನ್ ಪಳೆತಾತ್ ಜಾಲ್ಯಾರ್, ಕಾರಣ್ ತಾಂಕಾಂ ಕಳಿತ್ ಜಾಲೆಂ: ಫಾಲ್ಕ್ಯಾಚ್ಯಾ ದಾವ್ಯಾಕ್ ಧಾಂವೊನ್ ತೆವ್ಶಿಲ್ಯಾ ರಾನಾಂತ್ ಲಿಪೊಂಕ್ ಆಶೆತೆಲ್ಯಾಂಚೆರ್, ಕಿರಾತಾಂಚ್ಯಾ ಕಣ್ಯಾಂಚೊ ಪಾವ್ಸ್ ಆರಂಭ್ ಜಾಲ್ಲೊ.
ತ್ಯಾಚ್ ವೆಳಾರ್, ತೆನ್ಕಾ ಪಡ್ಲಾಚ್ಯಾ ದೊಂಗ್ರಾ ಬಗ್ಲೆಂತ್ಲ್ಯಾನ್, ಸಿದ್ಧಾಪುರಾಚ್ಯಾ ದಿಕ್ಕಾನ್ ಆಯಿಲ್ಲಿ ದುಸ್ರಿ ಫವ್ಜ್ ದಿಷ್ಟಿಕ್ ಪಡ್ಲಿ. ಆತಾಂ ದೋನ್ ವಾಟಾಂನಿ, ದುಬಾರಿ ಸಂಖೊ ಆಸೊನ್ ದೆಂವ್ಲ್ಲ್ಯಾ ಹ್ಯಾ ಶಿಪಾಯಾಂ ಥಾವ್ನ್ ಮೈಸೂರ್ಚ್ಯಾ ರಿಸಾಲಾಂಕ್ ಬಚಾವೆಚಿ ವಾಟ್ ನಾ ಮ್ಹಳ್ಳೆಂ ಸ್ಪಷ್ಟ್ ಜಾಲೆಂ.
ರಾಶಿಂ ರಾಶಿಂನಿ ಶಿಪಾಯ್ ಘಾಯೆಲೆ. ತಶೆ ಮೆಲೆ, ತಶೆ ಕೈದಿ ಜಾಲೆ. ಉರ್ಲೆಲೆ ಆನಿ ತಾಂಕ್ ಆಸ್ಲ್ಲೆ, ದಿಕ್ಕಾಪಾಲ್ ಜಾವ್ನ್ ಮೈಸೂರ್ಚ್ಯಾ ಪ್ರದೇಶಾಕ್ ರಿಗೊನ್ ಲಿಪ್ಲೆ ವಾ ಧಾಂವೊಂಕ್ಚ್ ಲಾಗ್ಲೆ.
“ದುಖ್ ಪಾವ್ತಾಂವ್ ಹುಜೂರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ನೀಜ್ ಜಾವ್ನ್ – ಹ್ಯಾ ಲಡಾಯೆ ಮಟ್ಟಾಕ್ ಪುಣೀ – ರಾಜ್ದ್ರೋಹ್ ಆನಿ ವಿಶ್ವಾಸ್ಘಾತ್ ಜಾಲಾ ಮ್ಹಣ್ ದಿಸ್ತಾ. ತೆಂ ಮೂಳ್ ಸೊಧುನ್ ಕಾಡುಂಕ್ ಆಮಿ ಪಾಟಿಂ ವಚೊನ್ ವಾವುರ್ಯೆತ್. ಪುಣ್ ಆತಾಂ, ಬಾದಶಹಾನ್ ಆನಿ ಅಂಗರಕ್ಷಕಾಂನಿ ಘೊಡ್ಯಾಂಚೆರ್ ಚಡೊನ್, ಹಾಂಗಾ ಥಾವ್ನ್ ಚಡುಣೆಂ ಧಾ ಮಯ್ಲಾಂ ಪುಣೀ ಪಾಟಿಂ ವಚೊನ್ ಆಮ್ಚ್ಯಾ ಪ್ರದೇಶಾಂತ್ ರಾವಜಾಯ್.”
“ತಶೆಂ ಕರ್ಚೆಂ ಗರ್ಜ್ಚ್ಗೀ ಸರ್ದಾರ್ ಸಿಮಾಂವ್?”
“ವ್ಹಯ್, ಹುಜೂರ್!” ಸರ್ದಾರ್ ಸಿಮಾಂವ್ನ್ ಜಾಪ್ ದಿಲಿ: “ದೊಡ್ಡ ವೀರೇಂದ್ರ ರಾಜಾಚಿಂ ಆಯ್ಚಿಂ ರಿಸಾಲಾಂ ಪಳೆತಾನಾ, ತಾಂತುಂ ಪ್ರಾಂತೀಯ್ ಶಿಪಾಯ್ ಮಾತ್ರ್ ನಹಿಂ, ವಿದೇಶೀ ಫಿಂರ್ಗಿ – ಆರ್ಕಾಟ್ ಥಾವ್ನ್ ಆಯಿಲ್ಲೆ ಬ್ರಿಟಿಷ್ ಶಿಪಾಯ್ ವಾ ಸೊಜೆರ್ಯೀ ಆಸ್ಯೆತ್…”
“ಮ್ಹಾಕಾಯೀ ತಶೆಂಚ್ ದಿಸ್ತಾ” ಮ್ಹಣಾಲೊ ಷೇಕ್ ಆಲಿ, ಜಾಕಾ ಆತಾಂ, ಸರ್ದಾರ್ ಸಿಮಾಂವ್ಕ್ ಲಡಾಯೆಚ್ಯಾ ಶಾಸ್ತ್ರಾಂತ್ ಆಸ್ಲ್ಲ್ಯಾ ಪರಿಜ್ಞಾನಾಚೊ ಅರ್ಥ್ ಜಾಲ್ಲೊ.
“ಜಾವ್ಯೆತ್” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಪುಣ್ ಬೆಟ್ಟದಪುರಾಕ್ ಆನಿ ಹೆಗ್ಗಡದೇವನ ಕೋಟೆಕ್ ಗೆಲ್ಲಿಂ ಆಮ್ಚಿಂ ರಿಸಾಲಾಂ ಪಾಟಿಂ ಆಯ್ಲ್ಯಾ ಶಿವಾಯ್ ಆಮಿ ಪಟ್ಟಣಾಕ್ ಗೆಲ್ಯಾರ್…”
“ಪಟ್ಟಣಾಕ್ ಪಾಟಿಂ ವಚಜಾಯ್ ಮ್ಹಣ್ ಹಾಂವೆಂ ಸಾಂಗೊಂಕ್ ನಾ. ಹಾಂಗಾ ಥಾವ್ನ್ ಆಟ್-ಧಾ ಮಯ್ಲಾಂ ಪಾಟಿಂ ಪಾಟಿಂ ವಚೊನ್ ರಾವ್ಲ್ಯಾರ್ ಜಾಲೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತುಮಿ ಸಾಂಗ್ಲ್ಲಿಂ ರಿಸಾಲಾಂ ತಾಂಚೆಂ ಕಾಮ್ ಕರ್ತೆಲಿಂ ವಾ ಪಾಟಿಂ ಆಮ್ಚ್ಯಾ ಪ್ರದೇಶಾಕ್ ಯೇವ್ನ್ ಸುರಕ್ಷಿತ್ ಜಾತೆಲಿಂ ಆನಿ ಫುಡ್ಲಿ ಹುಕುಮ್ ರಾಕ್ತೆಲಿಂ. ಪುಣ್ ಬಾದಶಹಾನ್ ಹಾಂಗಾ ಚಡ್ ವೇಳ್ ರಾಂವ್ಚೆಂ ಬರೆಂ ನಹಿಂ” ಮ್ಹಣೊನ್ ತಾಣೆಂ ವಾಜ್ಭಿ ಕಾರಣಾಂ ದಿಲಿಂ:
ನಿಜಾಯ್ಕೀ, ಹೆರ್ ವಾಟಾಂನಿ ಗೆಲ್ಲಿಂ ರಿಸಾಲಾಂ ಯಶಸ್ವಿ ಜಾಯ್ನಾತ್ಲ್ಯಾರ್ ಪಾಟಿಂ ಯೆಂವ್ಚಿ, ಆನಿ ತಾಂಚಿ ಪಾಟ್ ಧರುಂಕ್ ಕೊಡಗಾಚ್ಯಾ ಶಿಪಾಯಾಂನಿ ಮೈಸೂರ್ಚ್ಯಾ ಪ್ರದೇಶಾಂತ್ ಪ್ರವೇಶ್ ಜಾಯ್ನಾಸ್ತಾಂ ರಾಂವ್ಚಿ ಸಾಧ್ಯತಾ ಚಡ್ ಜಾವ್ನಾಸ್ಲ್ಲಿ. ಪುಣ್ ಪಿರಿಯಾಪಟ್ಟಣಾಚ್ಯಾ ವಠಾರಾಂತ್ ತಶೆಂಚ್ ಜಾಯ್ತ್ ಮ್ಹಣ್ ಸಾಂಗೊಂಕ್ ಸಾಧ್ಯ್ ನಾತ್ಲ್ಲೆಂ. ಥಂಯ್ಸರ್ಚ್ಯಾ ಜಟಾಪಟೆಂತ್ ಮೈಸೂರ್ಚ್ಯಾ ರಿಸಾಲಾಂಚೊ ಪಾಡಾವ್ ಜಾಲ್ಲೊ ಆನಿ ಪಯ್ಲೆಂ ತಶೆಂ ಉಪ್ರಾಂತ್ ಕೊಡಗಾಚ್ಯಾ ಶಿಪಾಯಾಂಚೊ ಸಂಖೊ ಜಾಯ್ತೊ ಚಡ್ ಆಸ್ಲ್ಲೊ.
ಚಡ್ ಪ್ರಮುಖ್ ಕಾರಣ್ ಮ್ಹಳ್ಯಾರ್: ಟಿಪ್ಪು ಸುಲ್ತಾನ್ಯೀ ಥಂಯ್ಸರ್ಚ್ ಲಾಗಿಂ ಆಸಾ ಮ್ಹಣ್ ಕಳಿತ್ ಆಸ್ಲ್ಯಾರ್, ಮೈಸೂರ್ಚ್ಯಾ ಪ್ರದೇಶಾ ಭಿತರ್ ಪ್ರವೇಶ್ ಜಾವ್ನ್ ತರೀ, ತಾಕಾ ಅಪಹರ್ಸುಂಕ್ ವಾ ತಾಚ್ಯಾ ಜಿವಾಚೆರ್ ಪ್ರಯತ್ನ್ ಕರುಂಕ್ ತೆ ಪಾಟಿಂ ಸರಾಶೆನಾಂತ್ ಮ್ಹಳ್ಳೆಂಯೀ ನೀಜ್ ಜಾವ್ನಾಸ್ಲ್ಲೆಂ.
ಹೆಂ ಸರ್ವ್ ಟಿಪ್ಪು ಸುಲ್ತಾನ್ ಸಮ್ಜಲೊ. ತಾಚ್ಯಾ ಭದ್ರತೆ ಖಾತಿರ್ ಸರ್ದಾರ್ ಸಿಮಾಂವ್ಕ್ ಆಸ್ಲ್ಲಿ ಆತುರಾಯ್ ನೀಜ್ ಮ್ಹಣೊನ್ಯೀ, ಮತಿ ಭಿತರ್ ತೊ ಮೆಚ್ವಲೊ. ಘೊಡ್ಯಾಂಕ್ ಆಯ್ತೆ ಕರುಂಕ್ ತಾಣೆಂ ಫರ್ಮಾಯ್ಲೆಂ. ಸರ್ದಾರ್ ಸಿಮಾಂವ್ನ್ಯೀ ಆಪ್ಣಾ ಸಾಂಗಾತಾ ಆಸಜಾಯ್ ಮ್ಹಣ್ ತೊ ಥಿರ್ ರಾವ್ಲೊ. ತಿತ್ಲ್ಯಾರ್, ಪಯ್ಲೆಂ ಚುಕವ್ನ್ ಪಾಟಿಂ ಆಯಿಲ್ಲೆ ಧಾ-ತೀಸ್ ಸವಾರ್ ಯೇವ್ನ್ ಥಂಯ್ ಪಾವ್ಲ್ಲೆ. ತಾಂಚೆ ಘೊಡೆಯೀ ಬರೆ ಆಸ್ಲ್ಲೆ. ತಾಂತ್ಲ್ಯಾ ಧಾ ಜಣಾಂನಿ ಬಾದಶಹಾ ಸಾಂಗಾತಾ ರಾವಜಾಯ್ ಮಣ್ ಬಾದಶಹಾನ್ ಖುಶಿ ವ್ಹೆಲಿ. ತಶೆಂ ತೆ ಪಾಟಿಂ ವಚೊಂಕ್ ಭಾಯ್ರ್ ಸರ್ಲೆ.
ದೋನ್ ಮಯ್ಲಾಂಭರ್ ವೆತಚ್ ಪ್ರಮುಖ್ ವಾಟ್ ಫಾಂಟೆ ಜಾಂವ್ಚೆ ಕಡೆನ್ ಚಿಕ್ಕೆ ರಾವೊಂಕ್ ಸರ್ದಾರ್ ಸಿಮಾಂವ್ನ್ ಸೂಚನ್ ದಿಲೆಂ. ಥಂಯ್ ಥಾವ್ನ್ ಗಾಡಿಯೊ, ಹೆರ್ ಸವಾರ್ ಆನಿ ಶಿಪಾಯಾಂನಿ ನೀಟ್ ವಾಟೆನ್ ವಚಜಾಯ್ ಮ್ಹಣ್ ಆನಿ ಬಾದಶಹಾನ್ ಅಂಗರಕ್ಷಕಾಂ ಸಾಂಗಾತಾ, ಆನಿ ಉಪ್ರಾಂತ್ ಥಾರಾಯಿಲ್ಲ್ಯಾ ಧಾ ಸವಾರಾಂ ಸಾಂಗಾತಾ, ಭಿತರ್ಲ್ಯಾ ಆಡ್ ವಾಟೆನ್ ವೆಚೆಂ ಬರೆಂ ಮ್ಹಣ್ ತಾಣೆಂ ಸಮ್ಜಯ್ಲೆಂ.
“ಸರ್ದಾರ್ ಭಾಯೀ” ಮ್ಹಣಾಲೊ ಟಿಪ್ಪು ಸುಲ್ತಾನ್, ಖುಶೆನ್. “ಸದ್ದ್ಯಾಕ್ ತುವೆಂ ಕಸಲೆಂ ಸೂಚನ್ ದಿಲ್ಯಾರೀ ಆಮಿ ಕಬೂಲ್. ತುವೆಂ ಸಾಂಗ್ಲ್ಲೆಂ ಪಯ್ಲೆಂಚ್ ಆಮಿ ಮಾನುನ್ ಘೆತ್ಲ್ಲೆಂ ತರ್, ಹೆಂ ಮುಷ್ಕಿಲ್ ಆಮ್ಚೆರ್ ಯೆತೆಂ ನಾ.”
“ತಶೆಂ ಕಾಂಯ್ ನಾ, ಹುಜೂರ್. ಹಾಂವೆಂ ಮ್ಹಜೆಂ ಕರ್ತವ್ಯ್ ಕೆಲಾಂ.”
“ಆಸೊಂ. ವಾಟ್ ಧರ್ಯಾಂ” ಮ್ಹಣೊನ್ ಪಯ್ಣಾಕ್ ತೆ ಲಾಗ್ಲೆ.
ಟಿಪ್ಪು ಸುಲ್ತಾನ್, ಗಡಿ ಕಡೆನ್ ಥಾವ್ನ್ ಪಾಟಿಂ ಗೆಲಾ ಮ್ಹಳ್ಳಿ ಖಬರ್ ಆಯ್ಕೊನ್, ಕೊಡಗಾಚೆ ಸವಾರ್ ಧಯ್ರ್ ಘೆವ್ನ್ ಥೊಡಿ ವಾಟ್ ಪಾಟ್ ಧರ್ನ್ ವೆತಿತ್ ಜಾಲ್ಯಾರ್, ಬಹುಶಃ ರೂಂದ್ ವಾಟೆನ್ ತೆ ವೆತಿತ್ ಮ್ಹಳ್ಳ್ಯಾ ಅಂದಾಜಾನ್, ಸರ್ದಾರ್ ಸಿಮಾಂವ್ನ್ ವಯ್ಲೊ ನಿರ್ಣಯ್ ಕೆಲ್ಲೊ.
ತೆಂಯೀ ಬರ್ಯಾಕ್ಚ್ ಪಡ್ಲೆಂ.
ಫುಡ್ಲೆಂ ಏಕ್ ಮಯ್ಲ್ ಚಮ್ಕಜಾಯ್ ಜಾಲ್ಯಾರ್, ಪಾಟ್ಲ್ಯಾ ವಾಟೆನ್ ಚಡುಣೆಂ ಪನ್ನಾಸ್-ಸಾಟ್ ಜಾತಿತ್ ತಿತ್ಲ್ಯಾ ಘೊಡ್ಯಾಂನಿ ಧಾಂವೊನ್ ಯೆಂವ್ಚೊ ಆವಾಜ್ ಪಯ್ಸ್ ಥಾವ್ನ್ ಆಯ್ಕಲೊ.
“ತುಜೊ ಅಂದಾಜ್ ಪರ್ತ್ಯಾನ್ ಸತ್ ಜಾಲೊ ಮ್ಹಣ್ ದಿಸ್ತಾ” ಮ್ಹಣಾಲೊ ಟಿಪ್ಪು ಸುಲ್ತಾನ್. ತಾಕಾ ಆತಾಂ ಆಪ್ಲ್ಯಾ ಜಿವಾಚೆಂ ಮೋಲ್ ಕಿತ್ಲೆಂ ಆಸಾ ಮ್ಹಣ್ ಕಳಿತ್ ಜಾಲ್ಲೆಂ.
“ಸಾಂಗೊಂಕ್ ನಜೊ, ಹುಜೂರ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತೆ, ಪಾಟಿಂ ಉರ್ಲ್ಲೆ ಆಮ್ಚೆಚ್ ಥೊಡೆ ಸವಾರ್ ಜಾವ್ಯೆತ್. ಹಾಂಗಾಸರ್ ಚಿಕ್ಕೆ ರಾವೊನ್ ಪಾರ್ಕಿಯಾಂ” ಮ್ಹಣೊನ್ ತೆ ರಾವ್ಲೆ. ತಾಣಿಂ ಚಿಂತ್ಲ್ಲೆಪರಿಂ ಜಾಲೆಂ.
ಚಡುಣೆಂ, ಫಾಂಟೆ ಫುಟ್ಲ್ಲ್ಯಾ ತ್ಯಾ ವಾಟೆಂಚ್ಯಾ ಸಂಗಮಾರ್, ತಿತ್ಲ್ಯಾಯೀ ಸವಾರಾಂಚ್ಯಾ ಘೊಡ್ಯಾ-ಗೆಳಾಂಚೊ ಆವಾಜ್ ಥೊಡೊ ವೇಳ್ ಮೌನ್ ಜಾಲೊ. ಉಪ್ರಾಂತ್ ಚಡ್ ಸವಾರಾಂನಿ ಶೀದಾ ವಾಟ್ ಧರ್ಲ್ಲೊ ಆವಾಜ್ ಆಯ್ಕಲೊ.
“ಥೊಡೆ ಸವಾರ್ ಹ್ಯಾ ವಾಟೆನ್ ಯೆತಾತ್ಶೆ ದಿಸ್ತಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಕೊಣ್ಯೀ ತೆ ಜಾಂವ್ದಿತ್. ಕೋಣ್ ಮ್ಹಣ್ ಸಮ್ಜೊಂಚ್ಯಾ ಆದಿಂ ಆಮಿ ಹಾಂಗಾ ಥಾವ್ನ್ ಮುಖಾರ್ ಸರ್ಚೆಂ ಬರೆಂ.”
ಮುಖಾರ್ ತೆ ಸರ್ಲೆ.
ಪಾಟ್ಲೊ ಆವಾಜ್ಯೀ ತಾಂಚೊ ಪಾಟ್ಲಾವ್ ಕರ್ನ್ ಆಯ್ಲೊ.
ಥೊಡ್ಯೊ ಘಡ್ಯೊ ತಶೆಂ ಪಯ್ಣ್ ಕರ್ತಚ್, ಚಡುಣೆಂ ಅರ್ಧ್ಯಾ ಮಯ್ಲಾ ತಿತ್ಲ್ಯಾ ಲಾಂಬಾಯೆಚಿ ವಾಟ್, ಪೀಠಭೂಮಿಚ್ಯಾ ಉಗ್ತಾಡಾಂತ್ಲ್ಯಾನ್ ಪಾಶಾರ್ ಜಾಂವ್ಕ್ ಆಸ್ಲ್ಲಿ. ತೆವ್ಶಿಲ್ಯಾ ಪೊಂತಾರ್ ಲ್ಹಾನ್ ಫಾಲ್ಕೆಂ ದೆಂವೊನ್, ಉಪ್ರಾಂತ್ಲಿ ವಾಟ್ ಥೊಡ್ಯಾ ರುಕಾಂ ಝಾಡಾಂಯಿಡ್ಯಾಂತ್ಲ್ಯಾನ್ ಧಾಂವ್ತಾಲಿ.
ತ್ಯಾ ಸುವಾತೆರ್, ಟಿಪ್ಪು ಸುಲ್ತಾನ್, ಸರ್ದಾರ್ ಸಿಮಾಂವ್ ಆನಿ ತಾಂಚೆ ಸಾಂಗಾತಿ ಪರ್ತ್ಯಾನ್ ಚಿಕ್ಕೆ ಆಡೊಸಾಕ್ ರಾವ್ಲೆ. ಅರ್ಧ್ಯಾ ಮಯ್ಲಾ ತಿತ್ಲಿ ಪಾಟ್ಲಿ ವಾಟ್, ಥಂಯ್ ಥಾವ್ನ್ ರುಕಾಂಚ್ಯಾ ಇಡ್ಯಾಂತ್ಲ್ಯಾನ್ ತಾಂಕಾಂ ದಿಸ್ತಾಲಿ.
ಥೊಡ್ಯಾಚ್ ವೆಳಾನ್, ಪಾಟ್ಲಾವ್ ಕರ್ನ್ ಆಯಿಲ್ಲೆ ಸವಾರ್ ಆನ್ಯೇಕಾ ಪೊಂತಾರ್ ದಿಷ್ಟಿಕ್ ಪಡ್ಲೆ. ಹೆವ್ಶಿಲ್ಯಾಂಚೊ ಆವಾಜ್ ಬಂದ್ ಜಾಲ್ಲೊ ಆಯ್ಕೊನ್ ತೆಯೀ ಥಂಯ್ಚ್ ರಾವೊನ್ ಚಿಂತುಂಕ್ ಪಡ್ಲೆ.
“ಆಮ್ಚ್ಯಾ ರಿಸಾಲಾಂತ್ಲೆ ಸವಾರ್ ನಹಿಂ ತೆ!” ಮ್ಹಣಾಲೊ ಷೇಕ್ ಆಲಿ.
“ಬರಾಬರ್!” ಸರ್ದಾರ್ ಸಿಮಾಂವ್ನ್ ಮತ್ ದಿಲೆಂ. “ಕೊಡಗಾಚೆ ಸವಾರ್ ತೆ. ಪುಣ್ ತಾಂಚೆ ಮಧೆಂ ದೋಗ್ ಧನುರ್ಧಾರಿ ಆಸಾತ್. ಉರ್ಲ್ಲ್ಯಾ ಹರ್ಯೆಕ್ಲ್ಯಾ ಕಡೆನ್ ಮಟ್ವ್ಯೊ ತಲ್ವಾರಿ ಆನಿ ಎಕಾ ಫಾರಾಚ್ಯೊ ಲ್ಹಾನ್ ಬಂದೂಕ್ಯೊ ಆಸಾತ್!”
“ಪುಣ್ ತೆ ಬಾರಾ ಜಣ್ ಮಾತ್ರ್ ಆಸಾತ್!” ಮ್ಹಣಾಲೊ ಟಿಪ್ಪು ಸುಲ್ತಾನ್, ಆತುರಾಯೆನ್. “ಆಮಿ ಝುಜೊಂಕ್ ರಾವೊನ್ ತಾಂಚೊ – ಸೂಅರಾಂಚೊ ಪಾಡಾವ್ ಕರ್ಯೆತ್!”
“ತಸಲ್ಯಾ ಕ್ಷುಲ್ಲಕ್ ಥೊಡ್ಯಾಂ ಕಡೆನ್ ಬಾದಶಹಾನ್ ಝುಜಜಾಯ್ ಮ್ಹಳ್ಳಿ ಗರ್ಜ್ ನಾ” ಸರ್ದಾರ್ ಸಿಮಾಂವ್ನ್ ಸಾಂಗ್ಲೆಂ. “ತಾಂಚ್ಯಾ ಹಾತೆರಾಂಕ್ ಆನಿ ಆಮ್ಚೆ ಕಡೆನ್ ಆಸ್ಲ್ಲ್ಯಾ ಆಯುಧಾಂಕ್ ಫರಕ್ ಆಸಾ. ತ್ಯಾ ಭಾಯ್ರ್ ತಾಂಚ್ಯಾ ಪಾಟಾಪಾಟ್ ತಾಂಚೆ ದುಸ್ರೆ ಸವಾರ್ಯೀ ಯೆಂವ್ಚೊ ಸಂಭವ್ ಆಸಾ. ದೆಕುನ್ ಬಾದಶಹಾನ್ ಆನಿ ಅಂಗರಕ್ಷಕಾಂನಿ ಹಾಂಗಾ ಥಾವ್ನ್ ಫುಡೆಂ ವಚೊನ್, ಆಮಿ ಪಯ್ಲೆಂ ಥಾರಾಯಿಲ್ಲ್ಯಾ ಛತ್ರಾಂತ್ ಸುರಕ್ಷಿತ್ ರಾಂವ್ಚೆಂ ಬರೆಂ.”
“ಆನಿ ತುಂ ಕಿತೆಂ ಕರ್ತಾಯ್?” ಟಿಪ್ಪುನ್ ವಿಚಾರ್ಲೆಂ.
“ಹಾಂವ್ ಆನಿ ಹೆ ಧಾ ಸವಾರ್ ಹಾಂಗಾಸರ್ ರಾವೊನ್, ತಾಣಿಂ ಹಾಂಗಾ ಥಾವ್ನ್ ಫುಡೆಂ ಯೇನಾಶೆಂ ತಾಂಚಿ ಜತನ್ ಘೆತಾಂವ್. ತ್ಯಾ ವೆಳಾರ್ ತುಮ್ಕಾಂ ಹಾಂಗಾ ಥಾವ್ನ್ ಪಯ್ಸ್ ಪಾವೊಂಕ್ ಅವ್ಕಾಸ್ ಮೆಳ್ತಾ.”
“ಪುಣ್ ತುಜ್ಯಾ ಜಿವಾಕ್ ಅಪಾಯ್ ಆಸಾ ತೆಂ ಚಿಂತುಂಕ್ ಆಮ್ಕಾಂ ಬರೆಂ ಲಾಗನಾ…”
“ಘಳಾಯ್ ಕರ್ಚಿ ನಾಕಾ, ಹುಜೂರ್!” ಚಡ್ಪಡ್ಲೊ ಸರ್ದಾರ್ ಸಿಮಾಂವ್. “ತುಮ್ಚ್ಯಾ ಭದ್ರತೆಚಿ ಅಧಿಕ್ ಗರ್ಜ್ ಆಸ್ಲ್ಲ್ಯಾ ಅಸಲ್ಯಾ ವೆಳಾರ್ ಹೆರಾಂಚ್ಯಾ ಜಿವಾಚೆಂ ಮೋಲ್ ಲೆಖುನ್ ಫಾಯ್ದೊ ನಾ. ತುಮಿ ಗೆಲ್ಲೊ ಆವಾಜ್ ಆಯ್ಕೊನ್ ತೆ ಪಾಟಾಪಾಟ್ ಹೆವ್ಶಿನ್ ಯೇಂವ್ಕ್ ತುರ್ತ್ ಕರ್ತೆಲೆ. ತೆ ಹಾಂಗಾ ಪಾವ್ತಾನಾ ತಾಂಕಾಂ ಆಮಿ ಫಾವೊ ತೊ ಸ್ವಾಗತ್ ದಿತಾಂವ್. ಜಾಯ್ ತಿತ್ಲೊ ವೇಳ್ ಜಾಲ್ಯಾ ಉಪ್ರಾಂತ್ ಆನಿ ಸರ್ವ್ ಸುರಕ್ಷಿತ್ ಮ್ಹಳ್ಳೆಂ ಥಾರಾವ್ನ್, ಆಮಿ ತುಮ್ಚೊ ಪಾಟ್ಲಾವ್ ಕರ್ನ್ ಯೇವ್ನ್ ತುಮ್ಕಾಂ ಭೆಟ್ತಾಂವ್.”
ಸರ್ದಾರ್ ಸಿಮಾಂವ್ಚೆಂ ತರ್ಕ್ ಟಿಪ್ಪು ಸುಲ್ತಾನಾಕ್ ಪಸಂದ್ ದಿಸ್ಲೆಂ ತರೀ, ಅಸಲ್ಯಾ ಸಂದರ್ಭಾರ್ ಅಪಾಯಾಂಕ್ ಹರ್ದೆಂ ದೀವ್ನ್ ಜೀವ್ ರಿಸ್ಕೆರ್ ಘಾಲ್ಚ್ಯಾ ಖಾತಿರ್ ತಾಕಾ ಪಾಟಿಂ ಸೊಡ್ನ್ ವಚೊಂಕ್ ಟಿಪ್ಪು ಸುಲ್ತಾನಾಕ್ ಮನ್ ಆಯ್ಕನಾ ಜಾಲೆಂ.
“ವಚಜಾಯ್ ಮ್ಹಣ್ತಾಯ್ಗೀ ಸರ್ದಾರ್ ಭಾಯೀ?” ವಿಚಾರ್ಲೆಂ ತಾಣೆಂ.
“ವೆಚಿ ಆನಿ ತುರ್ತ್ ಕರ್ಚಿ ಗರ್ಜ್ ಆಸಾ, ಹುಜೂರ್!”
“ಬರೆಂ ತರ್. ಆಮ್ಚ್ಯಾ ಸಂರಕ್ಷಣಾ ಖಾತಿರ್ ತುವೆಂ ಕಾಡ್ಚಿ ಮ್ಹಿನತ್ ಆನಿ ತುವೆಂ ಉಪಯೋಗ್ ಕರ್ಚಿ ಬಹಾದೂರಿ ಆಮ್ಚ್ಯಾ ಮತಿಂತ್ ಆಸ್ತೆಲಿ. ಪುಣ್ ಹ್ಯಾ ಅಪಾಯಾ ವೆಳಾರ್…”
“ತುರ್ತ್ ಕರ್ಯಾ ಹುಜೂರ್!”
“ತರ್, ಷೇಕ್ ಆಲಿಯೀ ತುಜೆ ಸಾಂಗಾಂತಾ ರಾವೊಂದಿ.”
“ಹಾಂವ್ ತಯಾರ್, ಹುಜೂರ್!” ಮ್ಹಣಾಲೊ ಷೇಕ್ ಆಲಿ.
“ಅಲ್ಲಾ ತುಮ್ಕಾಂ ಸಾಂಬಾಳುಂದಿ!”
ಸರ್ದಾರ್ ಸಿಮಾಂವ್ಕ್, ಷೇಕ್ ಆಲಿಕ್ ಅನಿ ಧಾ ಜಣಾಂ ಸವಾರಾಂಕ್ ಥಂಯ್ ಸೊಡುನ್, ಟಿಪ್ಪು ಸುಲ್ತಾನ್ ಆನಿ ತಾಚೆ ಅಂಗರಕ್ಷಕ್, ಘೊಡೆ ಧಾಂವ್ಡಾವ್ನ್ ಫುಡೆಂ ಗೆಲೆ. ತಾಂಚ್ಯಾ ಧಾಂವ್ಣೆಚೊ ಆವಾಜ್, ಪಯ್ಸ್ ರಾವ್ಲ್ಲ್ಯಾಂಕ್ ಆಯ್ಕಲೊ. ಶಿಕಾರ್ ಚುಕನಾಯೆ ಮ್ಹಣ್, ಪಾಟ್ಲಾವ್ ಕರುಂಕ್ ತಾಣಿಂ ಮನ್ ಕೆಲೆಂ.
ಸರ್ದಾರ್ ಸಿಮಾಂವ್ನ್ ಆಪ್ಣಾ ಸಾಂಗಾತಾ ಆಸ್ಲ್ಲ್ಯಾಂ ಕಡ್ಚಿಂ ಹಾತೆರಾಂ ಪಳೆಲಿಂ. ತಾಚೆ ಕಡೆನ್ ಆನಿ ಷೇಕ್ ಆಲಿ ಕಡೆನ್ ಸೊಡ್ಲ್ಯಾರ್, ಹೆರ್ ಚವ್ಗಾಂ ಕಡೆನ್ ಮಾತ್ರ್ ಧಾಕ್ಟ್ಯೊ ಬಂದೂಕ್ಯೊ ಆಸ್ಲ್ಲ್ಯೊ, ಆನಿ ಹರ್ಯೆಕ್ಲ್ಯಾ ಕಡೆನ್ ಲಾಂಬ್ ಅಶೀರ್ ತಲ್ವಾರಿ ಆಸ್ಲ್ಲ್ಯೊ.
“ಚತ್ರಾಯೆನ್ ಆಯ್ಕಾ!” ಮ್ಹಣಾಲೊ ತೊ “ತೆ ಲಾಗಿಂ ಪಾವ್ತಾತ್. ತಾಂಕಾಂ ಘೊಡ್ಯಾಂ ವಯ್ಲೆ ಝಡಂವ್ಚೆಂ ಚಡ್ ಗರ್ಜೆಚೆಂ. ಮುಖಾರ್ ಯೆಂವ್ಚ್ಯಾ ಚವ್ಗಾಂಚೆರ್ ನದರ್ ದವರ್ನ್, ತೆ ಲಾಗಿಂ ಪಾವ್ತಾನಾ ತಾಂಚೆರ್ ಫಾರ್ ಸೊಡ್ಯಾ. ಉಪ್ರಾಂತ್ ದೋನ್ ಕುಶಿಂನಿ ವಚೊನ್ ತಾಂಚೆರ್ ಪಡ್ಯಾಂ. ತಾಂಚ್ಯಾ ಬಂದೂಕೆಚ್ಯಾ ನಳಿಯೆ ಮುಖಾರ್ ಪಡನಾಶೆಂ ನಾಚೊಂಕ್ ಚತ್ರಾಯ್ ಘೆಯಾ! ಹಾಂವ್, ಉಜ್ವ್ಯಾಕ್ ಆಸ್ಚ್ಯಾ ಧನುರ್ಧಾರಿಚಿ ಚತ್ರಾಯ್ ಘೆತಾಂ. ದಾವ್ಯಾಕ್ ಆಸ್ಲ್ಲ್ಯಾಚಿ ಖಬರ್, ಷೇಕ್ ಆಲಿ ಘೆ. ಹುಶಾರ್! ಆಮಿ ಸಲ್ವನಾಯೆ. ಆಮ್ಚ್ಯಾ ಜಯ್ತಾಂತ್, ನಹಿಂಚ್ ಆಮ್ಚೆಂ, ಬಗಾರ್ ಆಸಾ ಬಾದಶಹಾಚೆಂಚ್ ಸಂರಕ್ಷಣ್!”
(ಮುಂದರುಂಕ್ ಆಸಾ)
ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
