ಸರ್ದಾರಾಚೆಂ ಸನ್ನಿಧಾನ್ – 16: ತರ್ಕಾಂ ವಿತರ್ಕಾಂ
Posted on : May 19, 2026 at 7:13 PM
ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 16
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)
ಪ್ರಕರಣ್ 16: ತರ್ಕಾಂ ವಿತರ್ಕಾಂ
ಕೆನರಾ ಜಿಲ್ಲ್ಯಾಂನಿ ಆಪ್ಲೆಂ ಯೋಜನ್ ಸಲ್ವೊಂಚೆಂ ಆಡಾಯ್ಜಾಯ್, ಆನಿ ತೆದೊಳ್ಚ್ಯಾ ಸಲ್ವಣೆಕ್ ಕಾರಣ್ ಜಾಲ್ಲ್ಯಾಂಕ್ ಬಂದ್ ಕರ್ನ್ ತಾಂಕಾಂ – ಕೋಣ್ಯೀ ತೆ ಜಾಂವ್ದಿತ್ – ವರ್ತಿ ಶಿಕ್ಷಾ ಲಾವ್ನ್ ದೇಖ್ ಆನಿ ಫಾರಿಕ್ಪಣ್ ದೀಜಾಯ್ ಮ್ಹಣ್ ಥೊಡಿಂ ಕಾಮಾಂ ಟಿಪ್ಪು ಸುಲ್ತಾನಾನ್ ಹಾತಿಂ ಘೆತ್ಲ್ಲಿಂ.
ತಾಣೆಂ ತಶೆಂ ಹಾತಿಂ ಘೆವ್ನ್ ಗುಪಿತ್ ಫರ್ಮಾಯಿಲ್ಲ್ಯಾ ಕಾಮಾಂ ಪಯ್ಕಿ, ತೊಪಾಸಿ ದಾಲ್ಮೇದಾಕ್ ಹಾಡಂವ್ಚೆಂ ಏಕ್ ಜಾವ್ನಾಸ್ಲ್ಲೆಂ. ತೆಂ ಸಲ್ವನಾಯೆ ಮ್ಹಣ್ ತಿ ಜವಾಬ್ದಾರಿ, ಪರೋಕ್ಷ್ ಥರಾನ್ ತಾಣೆಂ ಸರ್ದಾರ್ ಸಿಮಾಂವ್ಚೆರ್ – ತಾಚ್ಯಾಚ್ ಸವಾರಾಂಕ್ ದಾಡ್ನ್ – ಥಾಪ್ಲ್ಲಿ. ತಾಂತುಂ ಹೆರ್ ಫಿತೂರಿ ಚಲನಾಯೆ ಮ್ಹಣ್, ಪಾಟಿಂ ಯೆತಾನಾ ಕುರಿಯೆಲಾಂತ್ಲ್ಯಾಯೀ ಚವ್ಗಾಂ ಸವಾರಾಂನಿ ಯೇಜಾಯ್ ಮ್ಹಣ್, ಆನಿ ಮಂಜರಾಬಾದ್ ಘಡಾ ಥಾವ್ನ್ಯೀ ಚವ್ಗಾಂ ಸವಾರಾಂನಿ ಮುಖಾರ್ ವಚಜಾಯ್ ಮ್ಹಣ್ ಗುಪಿತ್ ತಾಕಿದ್ ತಾಣೆಂ ಧಾಡ್ಲ್ಲಿ.
ತ್ಯಾ ಸಂಬಂಧಿಂ ಕಾಂಯ್ ಚಡುಣೆಂ ಜಾಂವ್ಚೆಂ ನಾ ಮ್ಹಳ್ಳೆಂ ಧಯ್ರ್ ತಾಕಾ ಆಸ್ಲ್ಲೆಂ. ಫುಡ್ಲಿಂ ಕಾಮಾಂಯೀ ತಿತ್ಲ್ಯಾಚ್ ಚತ್ರಾಯೆನ್ ಕರಿಜಾಯ್ ಆನಿ ಭಿತರ್ಲ್ಯಾ ಭಿತರ್ ಫಿತೂರಿ ಖೆಳ್ಚೆ ಆಸ್ಲ್ಯಾರ್ ತಾಂಕಾಂ ಸಾಂಪ್ಡಾವ್ನ್ ತಾಂಚೆ ಹಾತ್ ಮೊಡಿಜಾಯ್ ಮ್ಹಣ್ ತೊ ಚಿಂತಾಲೊ ಜಾಲ್ಲ್ಯಾನ್, ಆಪ್ಣಾ ಹುಜ್ರಿಂ ಝಡ್ತಿ ಮಾಗ್ಲ್ಲ್ಯಾ ತೊಪಾಸಿ ವರ್ವಿಂ ಕಾಂಯ್ ಪುಣೀ ಥೊಡ್ಯೊ ಗೂಢ್ ಸಂಗ್ತಿ ಉಗ್ಡಾಪ್ಯೊ ಜಾತಿತ್ ಮ್ಹಳ್ಳೊ ಭರ್ವಸೊ ತಾಕಾ ಆಸ್ಲ್ಲೊ.
ಲಡಾಯೆಕ್ ಆಯ್ತೆಂ ಜಾಂವ್ಚ್ಯಾ ರಾಟಾವಳಿಂನಿ ತೆ ಆಸ್ಲ್ಲೆ ಜಾಲ್ಯಾರೀ ಸರ್ದಾರ್ ಸಿಮಾಂವ್ಚ್ಯಾ ಮತಿಂತ್ಯೀ ತಿಂಚ್ ಚಿಂತ್ನಾಂ ಘುಂವ್ತಾಲಿಂ. ವರ್ದಿ ತಾಣೆಂ ಧಾಡ್ಲ್ಲಿ ಖರಿ, ಪುಣ್ ತಿ ಶಾಬಿತಾಯೆನ್ ಆಗ್ನೆಸ್ ಕುಂವರ್ನಿಚ್ಯಾ ಹಾತಾಕ್ ಮೆಳ್ಳ್ಯಾ ವಾ ನಾ ಮ್ಹಳ್ಳೆಂ ತಾಕಾ ಕಳಿತ್ ನಾತ್ಲ್ಲೆಂ. ಪಾವ್ಲ್ಯಾರೀ ತ್ಯಾ ಸಂಬಂಧಿಂ ಫಾವೊ ತೆಂ ಕಾಮ್ ಕರುಂಕ್ ತಿ ಸಕತ್ ವಾ ನಾ? ಕಾಂಯ್, ಘರಾಂತ್ ಪುಣೀ ತಿ ನಾತ್ಲ್ಯಾರ್ ವಾ ಹೆರ್ ಕಾಂಯ್ ಅಡ್ಕಳಿ ವಾ ಅಡ್ಚಣ್ ಪುಣೀ ಆಸ್ಲ್ಯಾರ್, ಗರ್ಜೆ ಶಿವಾಯ್ ತಿಕಾ ಕಷ್ಟ್ ಆನಿ ಬೆಜಾರಾಯ್ ಆಪ್ಣೆಂ ದಿಲ್ಲೆಪರಿಂ ಜಾಯ್ತ್ ಕೊಣ್ಣಾ ಮ್ಹಣ್ ಚುರ್ಚುರೆಯೀ ತಾಕಾ ಭೊಗ್ತಾಲೆ.
ಪುಣ್ ಕರ್ಯೆತಾ ಕಿತೆಂ? ಜಾಲ್ಲೆಪರಿಂ ಜಾಂವ್, ಪುಣ್ ಆಪ್ಣಾ ವರ್ವಿಂ ಹೆರಾಂಚೆರ್, ಆನಿ ಪ್ರತ್ಯೇಕ್ ಜಾವ್ನ್ ಆಗ್ನೆಸ್ ಕುಂವರ್ನಿಚೆರ್ ಕಷ್ಟ್ ಯೇನಾ ಜಾಂವ್ ಮ್ಹಣ್ ಮತಿ ಭಿತರ್ ತೊ ಮಾಗ್ತಾಲೊ. ಆನ್ಯೇಕ್ ವಿಷಯ್ ತಾಚ್ಯಾ ಮತಿಂತ್ ಕಾಂತಯ್ತಾಲೊ: ತೆಂ ಉತಾರ್ ಉಚಾರುಂಕ್ ತೊ ದಾಕ್ಷೆತಾಲೊ ಜಾಲ್ಯಾರೀ ತವಳ್ ತವಳ್ ಉಗ್ಡಾಸ್ ತಾಕಾ ಯೆತಾಲೊ ತ್ಯಾ ಪಾಟ್ಲ್ಯಾ ತೆಂಪಾಚೊ – ಮೊಗಾ ಖಾತಿರ್ ಶರ್ತಾಂ ಉಡಯಿಲ್ಲೊ, ಆನಿ ಉಪ್ರಾಂತ್ ತಸಲೆಂ ಉಣೆಂಪಣ್ ಸಮ್ಜೊನ್ ತೊಚ್ ಲಜೆಲ್ಲೊ. ಖರೊಚ್, ಮೋಗ್ ವರ್ತವ್ತಾ, ಚಿಂತ್ನಾಂನಿ, ಸಬ್ದಾಂನಿ ಆನಿ ಕರ್ನ್ಯಾಂನಿ – ದಿಂವ್ಚ್ಯಾಂತ್ ಶಿವಾಯ್, ಘೆಂವ್ಚ್ಯಾಂತ್ ವಾ ಪಾಟಿಂ ಅಪೇಕ್ಸುಂಚ್ಯಾಂತ್ ನಹಿಂ… ಎಕಾ ತೆಂಪಾರ್ ತಿಚೆ ಖಾತಿರ್ ತಾಣೆಂ ಕಾಂಯ್ ಕೆಲ್ಲೆಂ ಆಸ್ಯೆತ್. ಆತಾಂ ತಿಚೆ ಥಾವ್ನ್ ಸಾಹಸ್ ವಿಚಾರ್ಲ್ಲ್ಯಾ ವರ್ವಿಂ ಪ್ರತ್ಯುಪ್ಕಾರ್ ವಾ ಮಜೂರಿ ವಿಚಾರ್ಲ್ಲೆಪರಿಂ ಜಾಯ್ತ್ಗೀ ವಾ ತಶೆಂ ತಿ ಚಿಂತಿತ್..?
‘ನಾ, ತಶೆಂ ತಿ ಬಿಲ್ಕುಲ್ ಚಿಂತಿಶಿನಾ, ಬಗಾರ್ ತಸಲೊ ಪ್ರಸ್ತಾಪ್ ವಿಚಾರ್ಲ್ಲ್ಯಾ ವರ್ವಿಂ, ಚಲಿ ತಿ ಜಾಲ್ಯಾರೀ, ಹೆರಾಂ ಪ್ರಾಸ್ ತಿಚೆರ್ ಚಡ್ ವಿಶ್ವಾಸ್ ಹಾಂವೆಂ ದವರ್ಲಾ ಮ್ಹಣ್ ಸಮ್ಜತೆಲಿ – ತಶೆಂ ಸಮ್ಜಯ್ ದೆವಾ…’ ಮ್ಹಣ್ ಆಪ್ಣಾಕ್ಚ್ ಸಮಾಧಾನ್ ದಿಂವ್ಚೆಂ ಪ್ರಯತ್ನ್ ತಾಣೆಂ ಕೆಲೆಂ.
ಖಂಚೆಂಯೀ ಕಾರ್ಯೆಂ ಖುದ್ ಜಾವ್ನ್ ಕರ್ನ್, ಹೆರಾಂಕ್ ಆಸ್ರೊ ಆನಿ ಮಜತ್ ದೀವ್ನ್ ಆಸ್ಲ್ಲಿ ಜಿಣಿ ತಾಚಿ. ಆತಾಂ ತಾಚ್ಯಾ ಗರ್ಜೆ ಖಾತಿರ್ ಹೆರಾಂನಿ ಮಜತ್ ದಿಂವ್ಚಿ ಆನಿ ಕಷ್ಟ್ ಭೊಗ್ಚಿ ಪರಿಸ್ಥಿತಿ ಆಯಿಲ್ಲಿ. ಲಡಾಯೆಚ್ಯಾ ನಿಬಾನ್ ಕರ್ತವ್ಯಾಚೊ ಕೈದಿ ತೊ ಜಾಲ್ಲೊ. ಕರ್ತವ್ಯ್ – ಟಿಪ್ಪು ಸುಲ್ತಾನಾ ಥಂಯ್ ಆನಿ ತಾಚ್ಯಾ ಸರ್ಕಾರಾ ಥಂಯ್ ಮ್ಹಣೊಂಕ್ ಸುಲಭ್. ಪುಣ್ ಆಪ್ಲ್ಯಾ ಹುದ್ದ್ಯಾ ಥಂಯ್ ಕರ್ತವ್ಯ್ ಪಾಳ್ತಾನಾ ತ್ಯಾ ಪ್ರಾಸ್ ಊಂಚ್ ಆನಿ ಆತ್ಮೀಯ್ ಧ್ಯೇಯಾಂ ಖಾತಿರ್ ವಾವ್ರುಂಕ್ ತಾಕಾ ಸುಲಭ್ ಊಂಚ್ ಆನಿ ಆತ್ಮೀಯ್ ಧ್ಯೇಯಾಂ ಖಾತಿರ್ ವಾವ್ರುಂಕ್ ತಾಕಾ ಸುಲಭ್ ಜಾಲ್ಲೆಂ. ತಶೆಂ ಕರುಂಕ್ ಯೆಣ್ಯಾಂ-ವೆಣ್ಯಾಂಚಿ ಸುಟ್ಕಾ ತಾಕಾ ಆಸ್ಲ್ಲಿ. ಪುಣ್ ಆತಾಂ ಬಂದ್ ಜಾಲ್ಲಿ ತಿ ಸುಟ್ಕಾ ತಶಿಚ್ ಫುಡೆಂಯೀ ಬಂದ್ಚ್ ಉರತ್ ಜಾಲ್ಯಾರ್…
ಫುಡೆಂ ಚಿಂತುಂಕ್ ತಾಕಾ ಧಯ್ರ್ ಪಾವ್ಲೆಂ ನಾ. ತಂಬಾ ಭಾಯ್ರ್ ತ್ಯಾ ಫಾಲ್ಕ್ಯಾಚ್ಯಾ ಬಗ್ಲೆನ್ ವ್ಹಾಳ್ಚ್ಯಾ ವ್ಹಾಳ್ಯಾಚ್ಯಾ ತಡಿರ್ ಆಸ್ಲ್ಲ್ಯಾ ಉಬಾರಾಯೆರ್ ರಾವೊನ್ ಘಾಟಾಂ ಪಲ್ತಡಿ ಕೆನರಾ ಕರಾವಳಿ ತೆವ್ಶಿಲ್ಯಾ ದರ್ಯಾಕ್ ದೆಂವ್ಚಿ ತಯಾರಾಯ್ ಕರ್ಚ್ಯಾ, ಸಾಂಜೆಚ್ಯಾ ಸುರ್ಯಾಕ್ ಪಳೆವ್ನ್ ತೊ ರಾವ್ಲ್ಲೊ.
“ಕಿತೆಂ ಚಿಂತುನ್ ರಾವ್ಲಾಯ್ ಸರ್ದಾರ್ ಸಿಮಾಂವ್?”
ಪಾಟ್ಲ್ಯಾನ್ ಅವ್ಚಿತ್ ತೆಂ ಸವಾಲ್ ಆಯ್ಕೊನ್ ಆನಿ ಸ್ವರ್ ಸಮ್ಜೊನ್ ಸರ್ದಾರ್ ಸಿಮಾಂವ್ನ್ ಚಿಕ್ಕೆ ಆಂಗ್ ಕಾಡ್ಲೆಂ ಆನಿ ಪಾಟಿಂ ಘುಂವ್ಲೊ. ಟಿಪ್ಪು ಸುಲ್ತಾನ್ ತಾಚೆ ಥಾವ್ನ್ ದೋನ್ ಮೆಟಾಂ ಪಾಟಿಂ ಉಬೊ ಆಸ್ಲ್ಲೊ.
“ಆಮಿ ವಿಚಾರ್ಲೆಂ – ಕಿತೆಂ ಚಿಂತಾಯ್?”
“ವಿಶೇಸ್ ಕಾಂಯ್ ನಾ ಹುಜೂರ್!” ಸರ್ದಾರ್ ಸಿಮಾಂವ್ನ್ ಜವಾಬ್ ದಿಲಿ. “ಅಶಿಚ್ ಚಿಕ್ಕೆ ಉಬ್ಗೊಣ್ ಜಾಲಿ. ದೆಕುನ್ ಭಾಯ್ರ್ ಯೇವ್ನ್ ಹಾಂಗಾಚ್ಯಾ ಪ್ರಕೃತೆಚಿ ಸೊಭಾಯ್ ನಿಯಾಳ್ತಾಲೊಂ.”
“ಬರೆಂಚ್. ಆಮ್ಕಾಂಯೀ ತಶೆಂಚ್ ಭೊಗ್ಲೆಂ” ಮ್ಹಣಾಲೊ ಟಿಪ್ಪು, ಸ್ವರ್ ಬದ್ಲಿನಾಸ್ತಾನಾ. “ಪುಣ್ ರಾನಾಂ-ಮೊಲ್ಯಾಂಚಿ, ಖಣಿಯಾಂ-ಜಿರಿಯಾಂಚಿ ಸುವಾತ್ – ಅವ್ಘಡಾಂ ಘಡ್ಯೆತ್ ಜಾಲ್ಲ್ಯಾನ್, ತುವೆಂಯೀ ಎಕ್ಸುರ್ಯಾನ್ ಅಶೆಂ ಭಾಯ್ರ್ ಭೊಂವೊಂಕ್ ನಜೊ ಮ್ಹಣ್ ಆಮ್ಕಾಂ ದಿಸ್ತಾ. ಆಮ್ಕಾಂಯೀ ತುವೆಂ ತಸಲಿಚ್ ಚತ್ರಾಯ್ ದಿಲ್ಲಿ.”
ಟಿಪ್ಪುಚ್ಯಾ ಉತ್ರಾಂಚೊ ದೊಡೊ ಅರ್ಥ್ ಸರ್ದಾರ್ ಸಿಮಾಂವ್ಕ್ ಸಮ್ಜಲೊ. ಬಾದಶಹಾಚ್ಯಾ ಅಂಗರಕ್ಷಕಾಂಚಿ ಮೇಲ್-ಜವಾಬ್ದಾರಿ ತಾಚಿ ಜಾವ್ನಾಸ್ಲ್ಲ್ಯಾ ನಿಬಾನ್ ತಾಣೆಂ ಲಾಗಿಂಚ್ ಆಸಜಾಯ್ ಮ್ಹಳ್ಳೊ ಮಾರ್ ತಾಂತುಂ ಆಸ್ಲ್ಲೊ.
“ವ್ಹಯ್ ಹುಜೂರ್!” ಮ್ಹಣಾಲೊ ತೊ. “ಹಾಂಗಾಸರ್ ಆಮಿ ಆಮ್ಚ್ಯಾಚ್ ತಂಬಾಂತ್ ಆಸಾಂವ್. ತ್ಯಾ ಶಿವಾಯ್, ಭೊಂವ್ತೊಣಿಂ ಅರ್ಧ್ಯಾ ಮಯ್ಲಾಚ್ಯಾ ವೃತ್ತಾ ಭಿತರ್ ಆಮ್ಚೆ ಪಹರೆಗಾರ್ ಆಸಾತ್. ಕೊಡಗಾಚಿ ಗಡ್ ಉತರ್ಲ್ಯಾ ಉಪ್ರಾಂತ್ ಮಾತ್ರ್ ಆಮ್ಚಿ ಚತ್ರಾಯ್…”
“ತುಜೆ ಕಡೆನ್ ಉಲವ್ನ್ ಜಿಕ್ಚೆಂ ಸುಲಭ್ ನಹಿಂ ಮ್ಹಣ್ ಆದಿಂಯೀ ಆಮಿ ಸಾಂಗ್ಲಾಂ” ಹಾಸ್ಲೊ ಟಿಪ್ಪು. “ತೆಂ ಆಸೊಂ. ಉತ್ತರಾ (ಬಡ್ಗಾ) ಕ್ ಗೆಲ್ಲ್ಯಾ ಆಮ್ಚ್ಯಾ ಫವ್ಜೆಚೊ ವಾಂಟೊ ಬೆಟ್ಟದಪುರಾ ಗಡಿ ಲಾಗಿಂ ಪಾವ್ಲಾ ಮ್ಹಣ್ತಚ್ ಫಾಲ್ಯಾಂ ಫಾಂತ್ಯಾರ್ಚ್ ಗಡ್ ಉತ್ರಜಾಯ್ ಮ್ಹಣ್ ಆಮಿ ಫೈಸಲ್ ಕೆಲಾಂ.”
“ಪುಣ್ ದಖ್ಖಣಾಕ್ ಗೆಲ್ಲಿ ಆಮ್ಚಿ ಫವ್ಜ್…”
“ಹೆಗ್ಗಡೆದೇವನಕೋಟೆಕ್ ಪಾವೊಂಕ್ ಆನಿಕ್ಯೀ ಏಕ್ ದೀಸ್ ಲಾಗ್ತಲೊ ಮ್ಹಣ್ ಆಮಿ ಜಾಣಾಂವ್. ಕರೀಮ್ ಖಾನಾ ಖಾಲ್ ಆಸ್ಚಿ ಫವ್ಜ್ ಥಂಯ್ಸರ್ ಪೊರ್ವಾಂ ಪ್ರವೇಶ್ ಜಾಂವ್ದಿ ಮ್ಹಣ್ ಫರ್ಮಾಣ್ ಆಮಿ ಧಾಡ್ಲಾಂ.”
“ಪುಣ್ ಹುಜೂರ್…”
“ರಾವ್, ಆಯ್ಕ್” ಮ್ಹಣಾಲೊ ಟಿಪ್ಪು. “ಹೆಗ್ಗಡೆದೇವನಕೋಟೆಕ್ ಪಾವೊನ್ ಆಮ್ಚೆ ಶಿಪಾಯ್ ದಾಡ್ ಘಾಲ್ಚ್ಯಾ ಭಿತರ್, ಹಾಂಗಾ – ಪಿರಿಯಾಪಟ್ಟಣ ಥಾವ್ನ್ ಬೆಟ್ಟದಪುರ ಪರ್ಯಾಂತ್ಲೊ ಪ್ರದೇಶ್ ಆಮಿ ಜಿಕೊನ್ ಆಮಿ ಹಾಸಿಲ್ ಕರ್ತೆಲ್ಯಾಂವ್. ಉಪ್ರಾಂತ್ ರಕ್ಷಣಾ ಖಾತಿರ್ ಥೊಡ್ಯೊ ಕಂಪ್ಣ್ಯೊ ರಾವವ್ನ್ ಉರ್ಲೆಲ್ಯಾಂಕ್ ಆಮಿ ದಖ್ಖಣಾಕ್ ಧಾಡ್ಯೆತ್.”
“ಬಾದಶಹಾಚಿ ಖುಶಿ ಆನಿ ಹುಕುಮ್” ಮ್ಹಣಾಲೊ ಸರ್ದಾರ್ ಸಿಮಾಂವ್. ಚಡಿತ್ ತರ್ಕ್ ಕರುಂಕ್ ತಾಣೆಂ ಖುಶಿ ವ್ಹೆಲಿ ನಾ. ಟಿಪ್ಪುನ್ ಪಟ್ಟಣಾಂತ್ ಸಾಂಗ್ಲೆಲ್ಯಾಕ್ ಆನಿ ಆತಾಂ ನಿರ್ಣಯ್ ಕೆಲ್ಲ್ಯಾಂತ್ ಜಾಯ್ತೊ ತಫಾವತ್ ಆಸ್ಲ್ಲೊ. ಆತಾಂಚ್ಯಾ ಮಾಂಡ್ಣೆ ಪರ್ಮಾಣೆಂ, ಆಕ್ರಮಣ್ ಕರುಂಕ್ ಚಿಂತ್ಲ್ಲ್ಯಾ ಪ್ರದೇಶಾಚಿ ಲಾಂಬಾಯ್ ತಿದೊಡಿ ಜಾಲ್ಲಿ, ಆನಿ ತಸಲೆ ವಾಡಾವಳಿಂತ್ ಅಪಾಯ್ ಚಡ್ ಆಸ್ಲ್ಲೊ.
“ಹೆರ್ ಉಲಂವ್ಕ್ ಆಸ್ಲ್ಲೆಂ, ಪಾಟಿಂ ವಚೊನ್ ಉಲಯಾಂ” ಮ್ಹಣಾಲೊ ಟಿಪ್ಪು, ಆನಿ ಘುಂವ್ಲೊ. “ಹಿ ಲಡಾಯ್ ಆನಿ ಕೊಡ್ಗ್ಯಾ ರಾಜಾಚಿ ಬಡಾಯ್ ಆಖೇರ್ ಕರ್ತಾ ಪರ್ಯಾಂತ್ ಆಮ್ಕಾಂ ನೀದ್ ನಾ.”
ಸರ್ದಾರ್ ಸಿಮಾಂವ್ಚ್ಯಾ ಮತಿಂತ್ ದುಸ್ರೊ ಏಕ್ ದುಬಾವ್ ಘುಂವ್ಲೊ. ಲಡಾಯ್ ಲ್ಹಾನ್ ಜಾಂವ್ ವ್ಹಡ್, ತೊ ಏಕ್ ಖೆಳ್ ನಹಿಂ. ಟಿಪ್ಪು ಸುಲ್ತಾನಾಚ್ಯಾ ರಿಸಾಲಾಂಕ್ ಕೊಡಗಾಚೆರ್ ಝುಜ್ ಮಾಂಡ್ಚಿ ಆನಿ ಜಿಕ್ಚಿ ಕಾಂಯ್ ಚಡ್ ಕಷ್ಟಾಂಚಿ ಗಜಾಲ್ ನಹಿಂ ಜಾವ್ಯೆತ್. ಪುಣ್ ಖುದ್ ಟಿಪ್ಪು ಸುಲ್ತಾನ್ಂಚ್ ಸಾಂಗಾತಾ ಆಸ್ತಾನಾ ತಿತ್ಲಿ ಲ್ಹಾನ್ ಫವ್ಜ್ ಭಾಯ್ರ್ ಸರ್ಲ್ಲಿ ತಿಚ್ ಪಯ್ಲೆ ಪಾವ್ಟಿಂ. ಜಿಕ್ಲ್ಯಾರ್ ಜಾಲೆಂ, ನಾ ಜಾಲ್ಯಾರ್? ನಾಲಿಸಾಯೆಚಿ ಗಜಾಲ್ ಮಾತ್ರ್ ನಹಿಂ, ತಾಚ್ಯಾ ಜಿವಾಕ್ಯೀ ವರ್ತ್ಯಾ ಅಪಾಯಾಚಿ ಗಜಾಲ್ ತಿ ಜಾವ್ನಾಸ್ಲ್ಲಿ.
ತಸಲ್ಯಾ ಉಣ್ಯಾ ಬುದಿಚ್ಯಾ ಸಾಹಸಾ ಖಾತಿರ್ ಕೊಣೆಂ ತಾಚೆ ಕಾನ್ ಫುಂಕ್ಲೆ ಜಾವ್ಯೆತ್? ಟಿಪ್ಪುನ್ಂಚ್ ಉಚಾರ್ಲ್ಲೆಪರಿಂ, ತಾಚ್ಯಾ ಲಾಗ್ಸರ್ಚ್ – ರಾವ್ಳೆರಾಂತ್ ವಾ ಕುಟ್ಮಾ ಭಿತರ್ ಸಂಚ್ ಚಲಂವ್ಚೆ ದ್ರೋಹಿ ಆಸ್ಯೆತ್ ಮ್ಹಳ್ಳೆಂ ಸತ್ ಜಾವ್ಯೆತ್ಗೀ?
ಖಾಸ್ಗಿ ಕಾರಣಾಂ ಆಸೊಂ. ಹಾಂಗಾಸರ್ ಸರ್ದಾರ್ ಸಿಮಾಂವ್ಚಿ ರಾಜ್-ಭಕ್ತ್ ಆನಿ ನಿಷ್ಠಾ ಉದ್ರಿಕ್ತ್ ಜಾಲಿ. ಟಿಪ್ಪುಚ್ಯಾ ಜಿವಾಕ್ ಅಪಾಯ್ ಯೇನಾಶೆಂ ಆಪ್ಣಾಚೆರ್ ಆಸ್ಲ್ಲಿ ಜವಾಬ್ದಾರಿ ಸಂಪೂರ್ಣ್ ಥರಾನ್ ಆನಿ ಜಿತ್ತ್ಯಾನ್ ವಹಿಸುಂಕ್ ತೊ ಹಟ್ಟಿ ಜಾಲೊ.
“ಹುಜೂರ್, ಹಾಂವ್ ಏಕ್ ಸವಾಲ್ ವಿಚಾರುಂ?”
“ಏಕ್ ಕಿತ್ಯಾಕ್, ಧಾ ವಿಚಾರುಂಕ್ಯೀ ತುಕಾ ಆಮ್ಚಿ ಕಬ್ಲಾತ್ ಆಸಾ” ಮ್ಹಣೊನ್, ಟಿಪ್ಪು ರಾವ್ಲೊ.
“ಹ್ಯಾ-ಹ್ಯಾ ದಾಡೆ ವೆಳಾರ್ ಬಾದಶಹಾ ಖಂಯ್ ಆಸ್ತಲೊ?” ಸರ್ದಾರ್ ಸಿಮಾಂವ್ನ್ ವಿಚಾರ್ಲೆಂ.
“ಹೆಂ ಕಸಲೆಂ ಸವಾಲ್!” ಟಿಪ್ಪು ಅಜ್ಯಾಪ್ಲೊ. “ಆಮಿ, ತುಮ್ಚ್ಯಾ ಸಾಂಗಾತಾ – ಆಮ್ಚ್ಯಾ ಶಿಪಾಯಾಂ ಸಾಂಗಾತಾ ಲಡಾಯೆಚ್ಯಾ ಥಳಾರ್ಚ್ ಮಧೆಂ ಆಸ್ತೆಲ್ಯಾಂವ್.”
“ತೆಂ ಸಾರ್ಕೆಂ ನಹಿಂ ಹುಜೂರ್!” ಮ್ಹಣೊಂಕ್ ಸರ್ದಾರ್ ಸಿಮಾಂವ್ನ್ ಧಯ್ರ್ ಘೆತ್ಲೆಂ.
“ಸಾರ್ಕೆಂ ನಹಿಂ!” ಟಿಪ್ಪುಚೊ ಸ್ವರ್ ಗಾರ್ ಜಾಲೊ. ತಾಚಿಂ ನಾಕಾಚಿಂ ಬುಡಾಂ ಚಿಕ್ಕೆ ಫುಲ್ಲಿಂ. ಮಿಶ್ಯೊ ಚಿಕ್ಕೆ ಹಾಲ್ಲ್ಯೊ. “ಸಾರ್ಕೆಂ ನಹಿಂ?”
“ಮಾಫ್ ಕರಿಜಾಯ್ ಹುಜೂರ್. ಹಾಂವೆಂ ತಶೆಂ ಮ್ಹಣೊಂಕ್ ದೋನ್ ಮುಖ್ಯ್ ಕಾರಣಾಂ ಆಸಾತ್.”
“ಆಯ್ಕಯಾಂ. ಬರಿಂ ಜಾವ್ನಾಸಾಜಾಯ್ ತಿಂ!”
“ಹ್ಯಾ ಲಡಾಯೆ ಸಂಬಂಧಿಂ ಬಾದಶಹಾನ್ ಪಯ್ಲೆಂ ವ್ಯಕ್ತ್ ಕೆಲ್ಲೆಂ ತೆಂ ಯೋಜನ್ ಲ್ಹಾನ್ ವರ್ಗಾಚೆಂ ಜಾವ್ನಾಸ್ಲ್ಲೆಂ. ತೆಂ ಯಶಸ್ವಿಂ ಜಾರಿ ಕರುಂಕ್ ಬಾದಶಹಾಚೆ ಪಾತ್ಯೆಣೆಚೆ ಸರ್ದಾರ್ ಆನಿ ಥೊಡೆ ಶಿಪಾಯ್ ಸಕ್ತೆ. ಪುಣ್ ಹಾಂತುಂ ಪಾತ್ರ್ ಘೆಂವ್ಕ್ ಪ್ರತ್ಯೇಕ್ ಜಾವ್ನ್ ಬಾದಶಹಾಚ್ ಝುಜಾ ಥಳಾಕ್ ಆಯ್ಲಾ ಮ್ಹಳ್ಳೆಂ ಆಯ್ಕಲ್ಲೆ ಗ್ರಾಯ್ಕ್ ಹಾಸ್ತಿತ್.”
“ಪುಣ್ ಕಾಡ್ಲ್ಲೆಂ ಮೇಟ್ ಪಾಟಿಂ ಕಾಡ್ಲ್ಯಾರ್, ಟಿಪ್ಪು ಸುಲ್ತಾನ್ ಬಹಾದುರ್ ಭಿಯೆಲೊ ಮ್ಹಣೊನ್ ಸಂಸಾರ್ ಹಾಸ್ತಲೊ ನಹಿಂವೇ?” ವಿಚಾರ್ಲೆಂ ಟಿಪ್ಪುನ್, ಚಿಕ್ಕೆ ನಿಂವೊನ್.
“ಕಾಡ್ಲ್ಲೆಂ ಮೇಟ್ ಪಾಟಿಂ ಕಾಡಿಜಾಯ್ ಮ್ಹಣ್ ಹಾಂವ್ ಬಿಲ್ಕುಲ್ ಸಾಂಗಾಸೊಂ ನಾ. ಆಮ್ಚೆ ಶಿಪಾಯ್ ಫುಡೆಂ ವಚೊನ್ ಬಾದಶಹಾಚೆಂ ಫರ್ಮಾಣ್ ಜಾರಿ ಕರುಂದಿತ್. ಪುಣ್ ಬಾದಶಹಾ ಮಾತ್ರ್ ಆಪ್ಲ್ಯಾಚ್ ಗಡಿ ಭಿತರ್, ಪ್ರತ್ಯಕ್ಷ್ ಝುಜಾ ಥಳಾ ಥಾವ್ನ್ ಏಕ್ ಮಯ್ಲ್ ಪುಣೀ ಪಾಟಿಂ ರಾವೊಂದಿ ಮ್ಹಳ್ಳೆಂ ಮ್ಹಜೆಂ ಖಾಲ್ತೆಂ ಸೂಚನ್. ಹಾಂವ್ ಜಾಲ್ಯಾರ್ ಶಿಪಾಯಾಂ ಸಾಂಗಾತಾ ವಚೊಂಕ್ ತಯಾರ್ ಆಸಾಂ.”
“ನಾ, ವೆಚೆಂ ಜಾಲ್ಯಾರ್ ಆಮಿ ಝುಜಾ ಥಳಾಕ್ ಸಾಂಗಾತಾ ವಚಜಾಯ್. ನಾ ಜಾಲ್ಯಾರ್, ತುವೆಂ ಆಮ್ಚ್ಯಾ ಸಾಂಗಾತಾಚ್ ರಾವಜಾಯ್” ಮ್ಹಣಾಲೊ ಟಿಪ್ಪು ಚಿಕ್ಕೆ ಮೋವ್ ಜಾವ್ನ್. “ಪುಣ್ ಆಮಿ ನಿರ್ಣಯಾಕ್ ಯೇಂವ್ಕ್ ನಾಂವ್. ತುವೆಂ ದಿಲ್ಲ್ಯಾ ಕಾರಣಾಚೆಂ ಸಾಧಾರ್ಣ್ ರಾಜಾಂವ್ ಆಮ್ಕಾಂ ಸಮ್ಜಲೆಂ. ದುಸ್ರೆಂ ಕಾಂಯ್ ಬರೆಂ ಕಾರಣ್ ಆಸ್ಲ್ಯಾರ್ ಭಿತರ್ ವಚೊನ್ ಉಲಯಾಂ.”
ತೆ ಭಿತರ್ ಪಾವ್ಲೆ.
ಥೊಡ್ಯಾಚ್ ವೆಳಾನ್ ಟಿಪ್ಪು ಸುಲ್ತಾನಾನ್ ಥಂಯ್ಸರ್ ಆಸ್ಲ್ಲ್ಯಾ ತಾತ್ಕಾಲಿಕ್ ಹಿಶೆದಾರಾಂಕ್ ಆನಿ ಸರ್ದಾರಾಂಕ್ ಲಾಗಿಂ ಆಪಯ್ಲೆಂ. ಸರ್ದಾರ್ ಸಿಮಾಂವ್ನ್ ಆಪ್ಣಾ ಕಡೆನ್ ಉಲಯಿಲ್ಲೊ ವಿಷಯ್ ತಾಣೆಂ ಸಾಂಗ್ಲೊ. ಉಪ್ರಾಂತ್ ವಿಚಾರ್ಲೆಂ: “ಕಿತೆಂ ತುಮ್ಚಿ ಅಭಿಪ್ರಾಯ್?”
“ಬಾದಶಹಾ ಭಿಯಾನ್ ಪಾಟಿಂ ರಾವ್ಲೊ ಮ್ಹಣೊಂಕ್ ಅವ್ಕಾಸ್ ಜಾಯ್ನಾತ್ಲ್ಯಾರ್ ಪುರೊ!” ಮ್ಹಣಾಲೊ ಷೇಕ್ ಆಲಿ.
“ಬಾದಶಹಾ ಸಾಂಗಾತಾ ಆಸ್ಲ್ಯಾರ್, ಝುಜೊಂಕ್ ದೊಡೊ ಜೀವ್ ಯೆತಾ ಆಮ್ಚ್ಯಾ ಶಿಪಾಯಾಂಕ್” ಮ್ಹಣಾಲೊ ದುಸ್ರೊ ಎಕ್ಲೊ ಸರ್ದಾರ್.
“ತೆಂ ಸೂಚನ್ ಮಾಂದ್ಲ್ಯಾರ್…” ಪರ್ತ್ಯಾನ್ ಉಲಯ್ಲೊ ಷೇಕ್ ಆಲಿ, ಚಿಕ್ಕೆ ಕೊಂಖ್ರನ್ಸೊ. “ಬಾದಶಹಾ ಝುಜಾ ಥಳಾರ್ ಥಾವ್ನ್ ಪಯ್ಸ್ ಆಸ್ಲ್ಯಾರ್, ತಾಂಚೊ ಅಂಗರಕ್ಷಕ್ ಜಾವ್ನ್ ಸರ್ದಾರ್ ಸಿಮಾಂವ್ಯೀ ಪಯ್ಸ್ ಆಸ್ತಲೊ.”
“ಛುಪ್!” ಮ್ಹಣಾಲೊ ಟಿಪ್ಪು ಸುಲ್ತಾನ್. “ವೈಯಕ್ತಿಕ್ ವಿಮರ್ಶ್ಯಾಚಿ ಹಾಂಗಾ ಗರ್ಜ್ ನಾ. ಸರ್ದಾರ್ ಸಿಮಾಂವ್ನ್ ಆಪುಣ್ ಲಡಾಯೆಚ್ಯಾ ಥಳಾಕ್ ವೆತಾಂ ಮ್ಹಳಾಂ, ಪುಣ್ ಆಮ್ಚ್ಯಾ ಬಗ್ಲೆ ಥಾವ್ನ್ ತಾಣೆಂ ಪಯ್ಸ್ ಆಸೊಂಕ್ ನಜೊ ಮ್ಹಣ್ ಆಮಿ ಖುಶಿ ವ್ಹೆಲ್ಯಾ. ಕಿತೆಂ ಮ್ಹಣ್ತಾಯ್ ಸರ್ದಾರ್ ಸಿಮಾಂವ್?”
“ತುಮ್ಚಿ ಹುಕುಮ್ ಹುಜೂರ್! ಬಾದಶಹಾನ್ ಝುಜಾ ಥಳಾರ್ ಥಾವ್ನ್ ಪಾಟಿಂ ಆಸಜಾಯ್ ಕಿತ್ಯಾಕ್ ಮ್ಹಣ್ ಹಾಂವೆಂ ದಿಲ್ಲೆಂ ಕಾರಣ್ ಕೊಣೆಂಯೀ ನಾ ಪಸಂದ್ ಕರುಂಕ್ ನಾ ತೆಂ ಮ್ಹಾಕಾ ಸಂತೊಸ್. ತ್ಯಾ ಶಿವಾಯ್ ಬಾದಶಹಾಚ್ಯಾ ಧಯ್ರಾ ಸಂಬಂಧಿಂ ದುಬಾವ್ ಉಚಾರ್ಚೆ ಗ್ರಾಯ್ಕ್, ತಾಚ್ಯಾ ದುಸ್ಮಾನಾ ಮಧೆಂಯೀ ನಾಂತ್ ಮ್ಹಳ್ಳೆಂ ಆಮಿ ಮತಿಂತ್ ದವರ್ಯಾಂ. ಉಪ್ರಾಂತ್ – ಬಾದಶಹಾ ಬಗ್ಲೆನ್ ಆಸ್ಲ್ಯಾರ್ ಮಾತ್ರ್ ಝುಜೊಂಕ್ ದೊಡೊ ಜೀವ್ ಯೆತಾ ಮ್ಹಣ್ಚೆ ತಿತ್ಲೆ ಪೊಳ್ಕುರೆ ಶಿಪಾಯ್ ಆಮ್ಚ್ಯಾ ರಿಸಾಲಾಂನಿ ಆಸಾತ್ ಮ್ಹಣ್ ಹಾಂವ್ ಬಿಲ್ಕುಲ್ ಪಾತ್ಯೆನಾ.”
ಟಿಪ್ಪು ಸುಲ್ತಾನ್ ಹಾಸ್ಲೊ. ಪಯ್ಲೆಂ ಉಲಯಿಲ್ಲ್ಯಾ ಗ್ರಾಯ್ಕಾಂಕ್, ನಾಜೂಕ್ ಉತ್ರಾಂನಿಂಚ್ ಸರ್ದಾರ್ ಸಿಮಾಂವ್ನ್ ಥಾಪ್ಡಾಯಿಲ್ಲಿ ರೀತ್ ಮೆಚ್ವಲಿ.
“ಸಾರ್ಕೆಂ ಸಾಂಗ್ಲೆಂ ಸರ್ದಾರ್ ಸಿಮಾಂವ್!” ಮ್ಹಣಾಲೊ ತೊ. “ಆತಾಂ, ಆಮಿ ಪಾಟಿಂ ರಾವೊಂಕ್ ದುಸ್ರೆಂ ಏಕ್ ರಾಜಾಂವ್ ಆಸಾ ಮ್ಹಳ್ಳೆಂಯ್ ತುವೆಂ – ತೆಂ ಆಯ್ಕಯಾಂ.”
ಸರ್ದಾರ್ ಸಿಮಾಂವ್ ಕಿತೆಂ ಮ್ಹಣ್ತಾ ತೆಂ ಆಯ್ಕೊಂಕ್, ಸಗ್ಳೆ ಆಯ್ತೆ ಜಾಲೆ. ತೆಂ ನಾಟಕೀಯ್ ಮೌನ್ ಲಾಂಬಂವ್ಕ್ ಮ್ಹಳ್ಳೆಪರಿಂ, ತೊಯೀ ಥೊಡಿಂ ಕ್ಷಣಾಂ ಮೌನ್ ರಾವ್ಲೊ, ಆನಿ ತಕ್ಲಿ ಘುಂವ್ಡಾಯ್ನಾಸ್ತಾನಾ, ಥಂಯ್ ಭೊಂವಾರ್ ಆಸ್ಲ್ಲ್ಯಾಂಚೆರ್ ತಾಚಿ ದೀಷ್ಟ್ ಚರ್ಲಿ.
ಉಪ್ರಾಂತ್ ತೊ ಉಲಯ್ಲೊ:
“ಹಾಂವೆಂ ಸಾಂಗ್ಲ್ಲೆಂ ದುಸ್ರೆಂ ಕಾರಣ್ ಜಾವ್ನಾಸಾ ಖುದ್ ಬಾದಶಹಾಚ್ಯಾ ಮೊಲಾಧಿಕ್ ಜಿವಾಚ್ಯಾ ಸುರಕ್ಷಿತಾಯೆಚೆಂ.”
“ಹಾಂ! ತೆಂ ಕಶೆಂ?”
“ಆಮಿ ಹಾಡ್ಲ್ಲ್ಯಾ ಸೈನಾಂತ್ ಫಕತ್ ತಿನಾಂತ್ಲೊ ಏಕ್ ವಾಂಟೊ ಹಾಂಗಾಸರ್ ಉರ್ಲಾ. ತೊ ವಾಂಟೊ ಪೆಲ್ಯಾ ಗಡಿ ಭಿತರ್ ಪ್ರವೇಶ್ ಜಾವ್ನ್ ಝುಜ್ತಾನಾ, ಬಾದಶಹಾ ತಾಂತುಂ ಆಸಾ ಮ್ಹಣ್ ದುಸ್ಮಾನಾಂಕ್ ಕಳಿತ್ ಜಾಲ್ಯಾರ್, ತಾಣಿಂ ಫಾರಿಕ್ಪಣ್ ಘೆಂವ್ಕ್ – ಜಿವಾಚಿ ಆಶಾ ಸಾಂಡುನ್ ಮ್ಹಳ್ಳೆಪರಿಂ – ತಾಂಕಿ ವರ್ತೆಂ ಪ್ರಯತ್ನ್ ಕರ್ಚಿ ಸಾಧ್ಯತಾ ಆಸಾ.”
“ತಶೆಂ ಮ್ಹಳ್ಯಾರ್?”
“ತಶೆಂ ಮ್ಹಳ್ಯಾರ್?”
“ತಶೆಂ ಮ್ಹಳ್ಯಾರ್ – ತಾಂಚ್ಯಾ ಪ್ರದೇಶಾಂತ್ ತೆ ಧನಿ. ಹರ್ಯೆಕ್ ವ್ಹೊಳಿ, ನ್ಹಂಯ್, ರಾನ್ ಆನಿ ವಾಟ್ ತಾಂಕಾಂ ಕಳಿತ್ ಆಸಾ. ಹಾಂಗಾಸರ್ ಆಮ್ಚೆ ಪಾಂಯ್ಶಿಂ ಶಿಪಾಯ್ ಮಾತ್ರ್ ಆಸಾತ್ ಮ್ಹಳ್ಳೆಂ ತಾಂಕಾಂ ಕಳಿತ್ ಜಾಲ್ಯಾರ್ ಆನಿ ಹಜಾರ್ ಶಿಪಾಯಾಂಕ್ ತೆ ಹಾಂಗಾಚ್ ಝುಜ್ಚ್ಯಾ ಖಾತಿರ್ ಜಮಯ್ತಿತ್ ಜಾಲ್ಯಾರ್, ಬಾದಶಹಾಚ್ಯಾ ಜಿವಾಚ್ಯಾ ಸಂರಕ್ಷಣೆಚೆಂ ಕಾಮ್ ಕಶೆಂ ರಾವತ್ ಮ್ಹಳ್ಳೆಂ ಚಿಂತ್ಯೆತ್.”
ಕೊಣ್ಯೀ ಉಲಂವ್ಕ್ ನಾಂತ್. ಟಿಪ್ಪು ಸುಲ್ತಾನ್ ಹೆಂ ಮತಿಂತ್ ವರವ್ನ್ ಮಿಶ್ಯಾಂಚೆಂ ಪೋಂತ್ ಚಿಂವೊಂಕ್ ಲಾಗ್ಲೊ.
“ಆಮಿ ತೊ ಪ್ರದೇಶ್ ಸ್ವಾಧೀನ್ ಕರುಂಕ್ ವೆತಾಂವ್ ಮ್ಹಣ್ ತಾಂಕಾಂ ಪಯ್ಲೆಂ ಕಶೆಂ ಕಳ್ಚೆಂ?” ಮ್ಹಣಾಲೊ ಷೇಕ್ ಆಲಿ. “ತಾಂಕಾಂ ಪಯ್ಲೆಂ ಖಬರ್ ದಿಂವ್ಚೆ ದ್ರೋಹಿ ಆಮ್ಚೆ ಮಧೆಂ ಆಸ್ತಿತ್ ಮ್ಹಣ್ಚೆಂಗೀ ತುವೆಂ?”
“ಹಾಂವೆಂ ತಶೆಂ ಮ್ಹಣೊಂಕ್ ನಾ” ಸರ್ದಾರ್ ಸಿಮಾಂವ್ನ್ ಜವಾಬ್ ದಿಲಿ. “ತೊ ಪ್ರದೇಶ್, ಆಮ್ಚೆ ಶಿಪಾಯ್ ಸ್ವಾಧೀನ್ ಕರಿನಾಂತ್ ಮ್ಹಣೊನ್ಯೀ ಹಾಂವೆಂ ಸಾಂಗೊಂಕ್ ನಾ.”
“ತರ್?”
“ತರ್, ಪ್ರದೇಶ್ ಸ್ವಾಧೀನ್ ಕರ್ಚೆಂ ಸುಲಭ್ ಕಾಮ್ ಆಮ್ಚ್ಯಾ ಶಿಪಾಯಾಂಕ್ ಸೊಡ್ಯಾಂ, ಉಪ್ರಾಂತ್ ಬಾದಶಹಾಚೊ ಅಧಿಕಾರ್ ಥಂಯ್ ಥಾರಾಯಾಂ. ಪುಣ್ ಪಯ್ಲೆಂಚ್ಯಾ ಜಟಾಪಟೆ ವೆಳಾರ್ ಬಾದಶಹಾನ್ ತ್ಯಾ ಜಾಗ್ಯಾರ್ ನಾ ಆಸ್ಚೆಂಚ್ ತಾಚ್ಯಾ ಮೊಲಾಧಿಕ್ ಜಿವಾಚ್ಯಾ ಭದ್ರತೆ ದೃಷ್ಟೆನ್ ಚಡ್ ಗರ್ಜೆಚೆಂ ಮ್ಹಳ್ಳೆಂ.”
“ತುಜೆಂ ರಾಜಾಂವ್ ಆತಾಂ ಆಮ್ಕಾಂ ಸಮ್ಜಲೆಂ” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಪುಣ್ ಆಮಿ ಆಯಿಲ್ಲಿ ಖಬರ್ ದುಸ್ಮಾನಾಂಕ್ ಪಯ್ಲೆಂಚ್ ಕಳಿತ್ ಆಸತ್ ಮ್ಹಳ್ಳೆಂ ಪಾತ್ಯೆಂವ್ಕ್ ಕಷ್ಟ್.”
“ಪಾತ್ಯೆಂವ್ಕ್ ಕಷ್ಟ್ ಹುಜೂರ್, ಪುಣ್ ಅಸಾಧ್ಯ್ ನಹಿಂ. ‘ಲಡಾಯೆಚ್ಯಾ ಪರಿಸ್ಥಿತೆಂತ್, ಆಮಿ ಕಿತೆಂ ಕರ್ತಾಂವ್ ಮ್ಹಳ್ಳೆಂ ಮಾತ್ರ್ ನಹಿಂ, ದುಸ್ಮಾನ್ ಕಿತೆಂ ಕರಿತ್ ಮ್ಹಳ್ಳೆಂಯೀ ಚಿಂತುನ್ ತ್ಯಾ ಪರ್ಮಾಣೆಂ ಜಾಗ್ರುತ್ ರಾಂವ್ಚೆಂ ಚಡ್ ಗರ್ಜೆಚೆಂ’ ಮ್ಹಣ್ ತುಮಿಂಚ್ ಆಮ್ಕಾಂ ಸಬಾರ್ ಪಾವ್ಟಿಂ ಸಾಂಗ್ಲಾಂ.”
“ಬರಾಬರ್! ತರ್ ಆಮಿ ಪಾಟಿಂ ರಾವ್ತಾಂವ್.” ಬಾದಶಹಾನ್ ಆಪ್ಲೊ ನಿರ್ಣಯ್ ಉಚಾರ್ಲೊ. “ಆಮ್ಚ್ಯಾ ಸಾಂಗಾತಾ, ತುಂ, ರಾವ್ಳೆರಾಂತ್ಲೆ ಧಾ ಜಣ್ ಆನಿ ತುಜ್ಯಾ ಕಂಪ್ಣೆಂತ್ಲೆ ಪಂದ್ರಾ ಜಣ್ ಮಾತ್ರ್ ಅಂಗರಕ್ಷಕ್ ರಾವ್ಲ್ಯಾರ್ ಪುರೊ. ಹೆರ್ ಸರ್ವ್ ಶಿಪಾಯ್ ಫಾಲ್ಯಾಂ ಸಕಾಳಿಂಚ್ ಫುಡೆಂ ಸರೊನ್ ಕಾರ್ಯಾಕ್ ದೆಂವೊಂದಿತ್.”
“ಜೀ, ಹುಜೂರ್!”
ತಸೊ ಝುಂತ್ ಆಖೇರ್ ಜಾಲೊ. ಬಾದಶಹಾಚ್ಯಾ ನೀಜ್ ಭದ್ರತೆ ಖಾತಿರ್ ಪುಣೀ ಸರ್ದಾರ್ ಸಿಮಾಂವ್ಕ್ ಸಮಾಧಾನ್ ಜಾಲೆಂ.
ವಯ್ಲ್ಯಾ ನಿರ್ಣಯಾ ವರ್ವಿಂ ಷೇಕ್ ಆಲಿಕ್ ಸಮಾಧಾನ್ ಜಾಂವ್ಕ್ ನಾತ್ಲ್ಲೆಪರಿಂ ದಿಸ್ಲೆಂ. ರಾವ್ಳೆರಾಂತ್ಲ್ಯಾ ಅಂಗರಕ್ಷಕಾಂ ಸಾಂಗಾತಾ ತಾಣೆಂಯೀ ಪಾಟಿಂ ರಾವಜಾಯ್ ಜಾಲ್ಲೆಂ ಅಸಮಾಧಾನ್ ತಾಣೆಂ ಉಚಾರ್ಲೆಂ.
“ಬೆಜಾರ್ ಕರಿನಾಕಾ, ನೀಜ್ ಲಡಾಯೆಂತ್ ಪಾತ್ರ್ ಘೆಂವ್ಕ್ ಆನಿ ಆಮ್ಚಿ ಶ್ಯಾಥಿ ದಾಕಂವ್ಕ್ ಫುಡೆಂಯೀ ದರಬಸ್ತ್ ಅವ್ಕಾಸ್ ಆಸ್ತಿತ್” ಮ್ಹಣೊನ್ ಸರ್ದಾರ್ ಸಿಮಾಂವ್ನ್ ತಾಕಾ ಸಮಾಧಾನ್ ದಿಲೆಂ. ಟಿಪ್ಪು ಸುಲ್ತಾನ್ ಮಾತ್ರ್ ಹ್ಯಾ ವೆಳಾರ್ ಎಕಾ ಪ್ರತ್ಯೇಕ್ ಥರಾಚ್ಯಾ ಚಿಂತ್ನಾಂನಿ ತಲ್ಲೀನ್ ಜಾಲ್ಲೊ. ತಾಚ್ಯಾ ಮತಿಂತ್ ಸಬಾರ್ ತರ್ಕಾಂ ವಿತರ್ಕಾಂ ಖೆಳೊಂಕ್ ಲಾಗ್ಲ್ಲಿಂ.
(ಮುಂದರುಂಕ್ ಆಸಾ)
ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
