ಸರ್ದಾರಾಚೆಂ ಸನ್ನಿಧಾನ್ – 15: ಕೈದ್ ಕೆಲ್ಲೆ ಕೈದಿ ಜಾಲೆ

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 15
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 15: ಕೈದ್ ಕೆಲ್ಲೆ ಕೈದಿ ಜಾಲೆ

ಮಂಜರಾಬಾದ್ ಥಾವ್ನ್ ಆಯಿಲ್ಲೆ ಸವಾರ್‌ಯೀ ಘಾಬರ್‌ಲ್ಲೆ. ತಾಂಚ್ಯಾ ಜಮೆದಾರಾನ್ ಛತ್ರಾಂತ್‍ಚ್ ಸಂಪೂರ್ಣ್ ವಿಚಾರ್ ಕೆಲೊ. ತಾಣೆಂ ಪಾಟಿಂ ವಚೊನ್ ಕೊತ್ವಾಲಾಕ್ ವರ್ದಿ ದೀಂವ್ಕ್ ಆಸ್‍ಲ್ಲಿ.

ಕಡ್ವಾಚೊ ಅಧಿಕಾರಿ ಹಸನಬ್ಬ ಥಂಯ್ಸರ್ ಆಸ್‍ಲ್ಲೊ. ತಾಚೆ ಹರ್ಶೆಂಚೆ ಸಾಂಗಾತಿ ದೊಣ್ಕಾರ್ ಮಾಪ್ಳೆಯೀ ಆಸ್‍ಲ್ಲೆ. ಆಟ್ ಘೊಡೆ, ಆನಿ ಕುರಿಯೆಲ್ ಥಾವ್ನ್ ಆಯಿಲ್ಲೆ ಚವ್ಗ್‌ಯೀ ಸವಾರ್ ಸುರಕ್ಷಿತ್ ಆಸ್‍ಲ್ಲೆ.

ಹಾಜರ್ ಆಸ್‍ಲ್ಲ್ಯಾ ಚಡುಣೆಂ ಸಕ್ಡಾಂನಿ ದಿಲ್ಲ್ಯಾ ವಾಖ್ಮೂಲಾ ಪರ್ಮಾಣೆಂ: ಕೈದ್ಯಾಕ್ ಘೆವ್ನ್ ತಿ ಠೊಲಿ ಥಂಯ್ ಪಾವ್ತಾನಾ ಕಾಳೊಕ್ ಜಾಲ್ಲೊ. ಮನ್ಶ್ಯಾಂನಿ ಆನಿ ಪ್ರಾಣಿಂನಿ ವಿಶೆವ್ ಘೆಂವ್ಚ್ಯಾ ಖಾತಿರ್ ನ್ಹಂಯ್ ಉತ್ರೊಂಕ್ ತಾಣಿಂ ನಿಚೆವ್ ಕೆಲೊ. ಜಂಗಲಾರ್ ದೋನ್ ಪಯ್ಣಾಂ ಜಾತಚ್, ಫಕತ್ ತೇಗ್ ಸವಾರ್ ಆನಿ ಕೈದಿ ಮಾತ್ರ್ ಪಾಟಿಂ ಉರ್‌ಲ್ಲೆ. ತಾಣಿಂ ದೋಣಿರ್ ಪಯ್ಣ್ ಕರುಂಕ್ ಚಿಂತ್ಲೆಂ. ತಿ ದೋಣ್, ನ್ಹಂಯ್ಚ್ಯಾ ಮಧೆಂಗಾತ್ ಪಾವ್ತಾನಾ ಹಾಲೊನ್ ವೊಮ್ತಿ ಪಡ್ಲಿ… ಹಿ ಖಬರ್ ಕಳಿತ್ ಜಾಲಿ.

“ದೋಣ್ ಹಾಲ್‍ಲ್ಲೆಂ ಕಾರಣ್?” ಜೆಮೆದಾರಾನ್ ವಿಚಾರ್ಲೆಂ.

“ಪ್ರವಾಹಾಚೊ ವೇಗ್ ಚಡ್ ಆಸ್‍ಲ್ಲೊ, ಖರೆಂ” ಮ್ಹಣಾಲೊ ದೋಣ್ ಚಲಯಿಲ್ಲ್ಯಾಂತ್ಲೊ ಎಕ್ಲೊ ಮಾಪ್ಳೊ. “ಪುಣ್ ತಿತ್ಲ್ಯಾ ಉದ್ಕಾಂತ್ ದೋಣ್ ಚಲವ್ನ್ ಆಮ್ಕಾಂ ಅನುಭವ್ ಆಸಾ.”

“ತರ್ ಕಾರಣ್ ಕಸಲೆಂ ಜಾವ್ಯೆತ್?”

“ತೊ ಕೈದಿ ಭಿಯಾನ್ ಆಸ್‍ಲ್ಲೊ” ಮ್ಹಣಾಲೊ ದುಸ್ರೊ ತುರ್ಕಿ ಯುವಕ್. “ತ್ಯಾ ಅಸ್ಪಷ್ಟ್ ಉಜ್ವಾಡಾಂತ್ ತೊ ಉಟೊನ್ ಉಬೊ ಜಾಲ್ಲೆಪರಿಂ ದಿಸ್ಲೆಂ ಮ್ಹಾಕಾ.”

“ಬ-ಬಹುಶಃ ತಶೆಂಚ್ ಜಾಯ್ಜಯ್” ಕುಡ್ಕುಡ್ಲೊ ನಾಯ್ಕ್ ಅಬ್ಬಾಸ್. “ತ್ಯಾ ವೆಳಾರ್ ಮುಖೆಲಿ ನಾಯ್ಕ್ ಲೊರೆಸಾನ್ ಏಕ್ ಹಾಕ್ ದಿಲಿ. ತಾಚ್ಯಾ ಹಾತಾಕ್, ಕೈದ್ಯಾಚ್ಯಾ ಖೊಡ್ಯಾಚಿ ಸಾಂಕಳ್ ಫಿಚಾರ್ ಆಸ್‍ಲ್ಲಿ. ಆಮಿಂಯೀ ಘಡ್ಬಡ್ಲ್ಯಾಂವ್ ಆನಿ ಉಟ್ಲ್ಯಾಂವ್. ದುಸ್ರ್ಯಾ ಘಡ್ಯೆ ಆಮಿ ಸಗ್ಳೆ ಉದ್ಕಾಂತ್ ಉದಾಕ್ ಪಿಯೆವ್ನ್ ಚಡ್ಪಡ್ತಾಲ್ಯಾಂವ್. ಕೊಣೆಂ-ಖಂಯ್-ಕಿತೆಂ ಮ್ಹಳ್ಳೆಂ ದಿಸನಾತ್‍ಲ್ಲೆಂ.”

“ಬಹುಶಃ, ಬಾದಶಹಾಚ್ಯಾ ಹಾತಾಂತ್ಲೆಂ ಭಿರಾಂಕುಳ್ ಮೋರ್ನ್ ಚುಕಂವ್ಚ್ಯಾ ಖಾತಿರ್ ತ್ಯಾ ಕೈದ್ಯಾನ್ ಸುಲಭಾಯೆಚೆಂ – ಉದ್ಕಾಚೆಂ ಮೋರ್ನ್ ವಿಂಚ್ಲೆಂ ಮ್ಹಣ್ ದಿಸ್ತಾ.”

“ಜಾವ್ಯೆತ್. ಪುಣ್ ಬಾದಶಹಾಕ್ ವರ್ದಿ ದಿತಾನಾ, ತ್ಯಾ ಕೈದ್ಯಾಕ್ ‘ಜಿವೊ ವಾ ಮೆಲ್ಲೊ’ ದಾಖಲ್ ಕರಿಜಾಯ್ ನಹಿಂವೇ? ತಶೆಂ ಜಾಲ್ಲ್ಯಾನ್ ತಾಚೆಂ ಮೊಡೆಂ ಪುಣೀ ಮೆಳಜಾಯ್” ಮ್ಹಣಾಲೊ ಜೆಮೆದಾರ್.

“ತೆಂ ವ್ಹಯ್. ತಾಚ್ಯಾ ಸಾಂಗಾತಾ ಬುಡೊನ್ ಗೆಲ್ಲ್ಯಾ ಆಮ್ಚ್ಯಾ ಪಟ್ಟಣಾಚ್ಯಾ ಸವಾರಾಂಚಿಂಯೀ ಮೊಡಿಂ ಮೆಳಜಾಯ್ ನಹಿಂಗೀ?” ಸುಸ್ಕಾರ್ಲೊ ನಾಯ್ಕ್ ಅಬ್ಬಾಸ್. “ಸರ್ಕಾರಾಚೆಂ ಕಾಮ್ ನಿರ್ವಹಿಸುನ್ ಆಸ್ತಾನಾಂಚ್ ತಾಣಿಂ ಪ್ರಾಣ್ ದಿಲೊ. ತಾಂಚ್ಯಾ ಸಾಂಗಾತಾ ಹಾಂವೆಂಯೀ ಗೆಲ್ಯಾರ್ ಬರೆಂ ಆಸ್‍ಲ್ಲೆಂ!”

ತಾಕಾ ತಶೆಂ ಭೊಗ್‍ಲ್ಲೆಂ ವಾಜ್ಭಿ. ಹಿ ಖಬರ್ ವ್ಹರ್ನ್ ಬಗಾರ್ ರಿತ್ಯಾ ಹಾತಾಂನಿ ಪಟ್ಟಣಾಕ್ ಪಾಟಿಂ ವಚೊಂಕ್ ತಾಕಾ ಕುಸ್ಕುಟ್ ಪುಣೀ ಮನ್ ವಾ ಧಯ್ರ್ ನಾತ್‍ಲ್ಲೆಂ.

“ತಾಂಚೆಂ ಮೋರ್ನ್ ಆಮಿ ಥಾರಾವ್ಯೆತ್. ಪುಣ್ ತಾಂಚಿಂ ಮೊಡಿಂ ಮೆಳ್‍ಲ್ಲಿಂ ಪುಣೀ ರುಜ್ವಾತ್ ಜಾಯ್ ಆಸ್‍ಲ್ಲಿ.”

“ತರ್ ಕಿತೆಂ ಕರ್ಚೆಂ?” ಆನ್ಯೇಕ್ಲ್ಯಾನ್ ಸವಾಲ್ ಕೆಲೆಂ.

“ಹಾಂವ್‍ಂಯೀ ಚಿಂತಾಂ ತೆಂಚ್” ಮ್ಹಣಾಲೊ ಜೆಮೆದಾರ್. “ತಾಂಚೊ ಪತ್ತೊ ಧರುಂಕ್ ಸಾಧ್ಯ್ ಜಾಯ್ತ್‌ವೇ?” ತಾಣೆಂ ಕಡ್ವಾಚ್ಯಾ ಮಾಪ್ಳ್ಯಾ ಕಡೆನ್ ವಿಚಾರ್ಲೆಂ.

“ಕಶೆಂ ಸಾಂಗ್ಚೆಂ ಸಾಹೇಬ್” ಮ್ಹಣಾಲೊ ಹಸನಬ್ಬ ಏಕ್ ಜಾಂಬಾಯ್ ಕಾಡ್ನ್. ಸಗ್ಳಿ ರಾತ್ ನೀದ್ ನಾಸ್ತಾನಾ ತಾಚೆ ದೊಳೆ ತಾಂಬ್ಡೆ ಜಾಲ್ಲೆ. “ಸಗ್ಳಿ ರಾತ್ ಅನಿ ಆಜ್ ಸಕಾಳಿಂ, ಹಾಂಗಾ ಥಾವ್ನ್ ನ್ಹಂಯ್ತ್ ಸಕಯ್ಲ್ ದೋನ್ ಮಯ್ಲಾಂಚ್ಯಾ ಲಾಂಬಾಯೆಕ್ ಸರ್ವ್ ಸೊಧ್ನಾಂ ಕರ್ನ್ ಆಮ್ಚೆ ಜಣ್ ಥಕ್ಲೆ. ತಾಂಚಿಂ ಮೊಡಿಂ ಖಂಯ್ ಪುಣೀ ಗುಂಡಿಯೆಂತ್ ಫಾತ್ರಾಂಕ್ ಶಿರ್ಕೊನ್ ಆಸ್ತೆಲಿಂ. ನಾ ಜಾಲ್ಯಾರ್…”

“ನಾ ಜಾಲ್ಯಾರ್?”

“ನಾ ಜಾಲ್ಯಾರ್, ಉದ್ಕಾಚ್ಯಾ ವೆಗಾಕ್ ಸಾಂಪ್ಡೊನ್-ಹಾಂಗಾ ಥಾವ್ನ್ ಕುರಿಯೆಲ್ ಪರ್ಯಾಂತ್ ಖಂಯ್ ಪುಣೀ ತಡಿರ್ ತಿಂ ವೊಂದಾನಾತ್ಲ್ಯಾರ್ ಆಳ್ವ್ಯಾಚ್ಯಾ ಬಾಗ್ಲಾಕ್ ಪಾವ್ತೆಲಿಂ.”

“ತಿತ್ಲ್ಯಾ ಪಯ್ಸ್ ಪಾಂವ್ಚ್ಯಾ ಆದಿಂ ತಿಂ ಭೆಸಾಂ ಜಾವ್ನ್ ತಾಂಚ್ಯಾ ಎಕಾ ಕುಡ್ಕ್ಯಾಚೊಯೀ ಪತ್ತೊ ಮೆಳ್ಚೊ ಸಂಭವ್ ನಾ. ಹಾಚ್ಯಾ ಆದಿಂಯೀ ಹಾಂಗಾಸರ್ ಪಾವ್ಸಾಚ್ಯಾ ಉದ್ಕಾಂತ್ ಪಡೊನ್ ಮೆಲ್ಲ್ಯಾಂಚೊ ಪತ್ತೊ ಜಾಂವ್ಕ್ ನಾ” ಮ್ಹಣಾಲೊ ಹಸನಬ್ಬ.

“ಜಾಲ್ಯಾರೀ ಆಮ್ಚೆಂ ಪ್ರಯತ್ನ್ ಸಾಂಡ್ಚೆಂ ನಾಕಾ” ಮ್ಹಣಾಲೊ ಜೆಮೆದಾರ್. “ಆಮಿ ಹಾಂಗಾಸರ್ ರಾವಾಜಾಯ್. ಆಜ್ ಸಗ್ಳೊ ದೀಸ್ ಪ್ರಯತ್ನ್ ಕರ್ನ್ ಪಳೆಯಾಂ. ಫಾಲ್ಯಾಂ ಎಕ್ಲ್ಯಾ ಸವಾರಾಕ್ ಧಾಡ್ನ್ ಹ್ಯಾ ಅವ್ಘಡಾಚಿ ಖಬರ್ ಮಂಜರಾಬಾದ್‍ಚ್ಯಾ ಕೊತ್ವಾಲಾಕ್ ಹಾಂವ್ ಕಳಯ್ತಾಂ ಆನಿ ಫುಡ್ಲಿ ಹುಕುಮ್ ಹಾಡಯ್ತಾಂ.”

“ತರ್ ಆಮಿ ಕಿತೆಂ ಕರಿಜಾಯ್?” ಕುರಿಯೆಲಾಂತ್ಲ್ಯಾ ಠಾಣ್ಯಾ ಥಾವ್ನ್ ಆಯಿಲ್ಲ್ಯಾ ಸವಾರಾಂ ಪಯ್ಕಿಲ್ಯಾಂ ಎಕ್ಲ್ಯಾನ್ ವಿಚಾರ್ಲೆಂ.

“ತುಮಿಂಯೀ ಆಜ್ ಹಾಂಗಾಸರ್ ರಾವೊನ್ ಹ್ಯಾ ಕಾಮಾಂತ್ ಕುಮಕ್ ಕರಿಜಾಯ್. ಪಾಣೇರ್ ಆನಿ ಬಂಟ್ವಾಳ್ಚ್ಯಾ ಛತ್ರಾಂಕ್ ಖಬರ್ ಧಾಡ್ನ್, ತಾಣಿಂಯೀ ಸಗ್ಳ್ಯಾ ಲಾಂಬಾಯೆಚ್ಯಾ ನ್ಹಂಯ್ ತಡಿಂನಿ ತಪಾಸಣ್ ಕರ್ನ್ ಪಳೆಂವ್ಕ್ ಆನಿ ಸಾಂಜೆ ಭಿತರ್ ಖಬರ್ ದೀಂವ್ಕ್ ಸಾಂಗಜಾಯ್.”

ತ್ಯಾ ಪ್ರಕಾರ್ ತೆ ಕಾಮಾಕ್ ಭಾಯ್ರ್ ಸರ್ಲೆ.

ಪಾಣೇರ್ ಆನಿ ಬಂಟ್ವಾಳ್ ಛತ್ರಾಂಕ್ ಖಬರ್ ಗೆಲಿ.

ಉಪ್ಪಿನಂಗಡಿಂತ್ ಜಾಲ್ಲ್ಯಾ ಅವ್ಘಡಾಚಿ ಖಬರ್ ಬಂಟ್ವಾಳ್ ಛತ್ರಾಕ್ ಪಾಂವ್ಚ್ಯಾ ಆದಿಂಚ್, ಆಗ್ನೆಸ್ ಕುಂವರ್ನ್ ವಚೊನ್ ತಿಚ್ಯಾ ಘರಾ ಪಾವ್‍ಲ್ಲಿ. ಅವ್ಘಡ್, ತಿಣೆಂ ಚಿಂತುನ್ ಮಾಂಡುನ್ ಹಾಡ್‍ಲ್ಲೆಪರಿಂಚ್ ಘಡ್‍ಲ್ಲಿ ಖಬರ್ ತಿಚ್ಯೆ ಥಾವ್ನ್ ತಿಚ್ಯಾ ಬಾಪಾಯ್ಕ್ ಕಳಿತ್ ಜಾಲ್ಲಿ.

ಬಂಟ್ವಾಳ್ಚ್ಯಾ ಮಾನಾಯಾಂಕ್ – ಫುಡ್ಲಿ ತಪ್ಶೀಲ್ ಖಬರ್ ಕಳಿತ್ ಜಾಂವ್ಚ್ಯಾ ಖಾತಿರ್ – ಆನಿ ಫುಡ್ಲಿಂ ಕಾಮಾಂ ಫಾವೊ ತ್ಯಾ ಥರಾನ್ ಕರ್ಚ್ಯಾ ಖಾತಿರ್, ಫಾವೊ ತೆ ಹಿಶಾರೆ ದೀವ್ನ್ ತಿಣೆಂ ಪಾಟಿಂ ರಾವಯಿಲ್ಲೆಂ.

“ಕೊಣ್ಣಾ ಪುತಾ” ಮ್ಹಣಾಲೊ ರಫಾಯೆಲ್ ಮಿಂಗೆಲ್ ಕಾಮತ್. “ವರ್ತ್ಯಾ ಸಾಹಸಾಕ್ ತುವೆಂ ಹಾತ್ ಘಾಲಾಯ್. ದೆವಾಚ್ಯೆ ದಯೆನ್ ಎದೊಳ್ಚೆಂ ಕಾಮ್ ಬರ್‍ಯಾ ಥರಾನ್ ಜಾಲೆಂ. ಫುಡ್ಲೆಂ ಕಾಮ್‍ಯೀ ಪೋಂತ್ ಪರ್ಯಾಂತ್ ಶಾಬಿತಾಯೆನ್ ಜಾಲ್ಯಾರ್ ಪುರೊ.”

“ಜಾತೆಲೆಂ ಆನಾ” ಮ್ಹಣಾಲಿ ತಿ, ಅಂಬುರ್ಕಿ ಹಾಸೊನ್. “ತ್ಯಾ ಕೈದ್ಯಾ ಥಾವ್ನ್‌ಯೀ ಆಮ್ಕಾಂ ಸಹಕಾರ್‌ಚ್ ಲಾಭ್ಲಾ.”

“ಕಿತ್ಲೆಂ ಮ್ಹಳ್ಯಾರೀ ತ್ಯಾ ತೊಪಾಸಿಂಚ್ಯಾ ಜಾತಿಕ್ ಪಾತ್ಯೆನಾಕಾ” ಮ್ಹಣಾಲೊ ಬಾಪಯ್. “ದೂದ್ ಒತ್‍ಲ್ಲ್ಯಾ ಹಾತಾಕ್‍ಚ್ ಖೊಂಚ್ ಮಾರ್ಚೆಂ ಆನಿ ಜೆವ್‍ಲ್ಲ್ಯಾ ಘರಾಕ್‍ಚ್ ವಾಯ್ಟ್ ಮಾಗ್ಚೆಂ ಸಂತಾನ್ ತೆಂ!”

“ತೆಂ ಹಾಂವ್ ಜಾಣಾಂ, ಆನಾ” ಮ್ಹಣಾಲಿ ತಿ. “ತ್ಯಾ ಖಾತಿರ್‌ಚ್, ತಾಚೆ ಥಾವ್ನ್ ಆಮ್ಕಾಂ ಕಸಲೊಚ್ ಅಪಾಯ್ ಘಡನಾಸ್ತಾನಾ ಸುರಕ್ಷಿತ್ ವಾಟ್ ಘೆಂವ್ಚಿ ಜವಾಬ್ದಾರಿ ದುಮ್ಗಾಬಾನ್ ಆನಿ ತಾಚ್ಯಾ ಸಾಂಗಾತ್ಯಾಂನಿ ಸಂತೊಸಾನ್ ವಹ್ಸಿಲ್ಯಾ.”

ತಿಣೆಂ ವಿವರ್ ದಿಲೊ:

ತೊಪಾಸಿಕ್ ಘೆವ್ನ್ ನಾಯ್ಕ್ ಲೊರೆಸ್ ಆನಿ ತಾಚೆ ದೋಗ್ ಸಾಂಗಾತಿ ನ್ಹಂಯ್ತ್ ಮಧೆಂ ಪಾವ್ತಾನಾ ದೋಣ್ ಭೋವ್ ಚಡ್ ಹಾಲೊಂಕ್ ಲಾಗ್ಲಿ – ತಶೆಂ ಜಾಂವ್ಕ್ ದೋಣ್ ಚಲವ್ನ್ ಆಸ್‍ಲ್ಲೆ ‘ಮಾಪ್ಳೆ’ಚ್ ಕಾರಣ್. ತೊಪಾಸಿ ಕಾಂಪ್ಲೊ ಆನಿ ಉಟ್ಲೊ. ಹೆರ್‌ಯೀ ಭಿಯೆಲೆ. ತ್ಯಾ ಘಡ್ಬಡೆಂತ್ ದೋಣ್ ವೊಮ್ತಿ ಪಡ್ಲಿ. ದೊಗಾಂ ಮಾಪ್ಳ್ಯಾಂನಿ ದೋಣ್ ಸಾಂಬಾಳುನ್ ಸಾರ್ಕಿ ಕರ್ತಾನಾ ತಿಸ್ರ್ಯಾನ್ ನಾಯ್ಕ್ ಅಬ್ಬಾಸಾಕ್ ಬಚಾವ್ ಕೆಲೊ.

ದೋಣಿರ್ ಕಿತ್ಲೆ ಜಣ್ ಮಾಪ್ಳೆ ಆಸ್‍ಲ್ಲೆ ಮ್ಹಣ್ ಸಾರ್ಕೆಂ ಕೊಣಾಯ್ಕೀ ಕಳಿತ್ ನಾತ್‍ಲ್ಲೆಂ. ಆಲ್ತಡಿ-ಪಲ್ತಡ್ಚ್ಯೊ ದೋಣಿ ಯೆತಾನಾ ದೊಗಾಂ ಸವಾರಾಂಚೊ ಆನಿ ಕೈದ್ಯಾಚೊ ಪತ್ತೊ ನಾ ಜಾಲ್ಲೊ.

ಚಡುಣೆಂ ಸರ್ವಾಂಚೆಂ ಗುಮಾನ್ ಉದಾಕ್ ವ್ಹಾಳ್ಚ್ಯಾ, ಸಕಯ್ಲ್ಯಾ ವಾಟೆನ್ ಆಸ್ತಾನಾ, ಪಾಟ್ಲ್ಯಾನ್ ಉಜ್ವಾಡ್ ನಾಸ್ತಾನಾ ಆಯಿಲ್ಲೆಂ ಏಕ್ ಹೊಡೆಂ, ಪ್ರವಾಹಾಚ್ಯಾ ವಿರೋಧ್ ವಾಟೆನ್ ಝುಜೊನ್ ಆಲ್ತಡ್ಚ್ಯಾ ತಡಿಕ್, ಪುಣ್ ಕಡ್ವಾ ಥಾವ್ನ್ ಚಡುಣೆಂ ಪನ್ನಾಸ್ ವಾವಾಂ ವಯ್ರ್ ತಡಿಕ್ ಲಾಗ್ಲೆಂ. ತಾಂತುಂ ಉದಾಕ್ ಪಿಯೆವ್ನ್ ಮತಿವಿಹೀನ್ ಜಾಲ್ಲೊ ತೊಪಾಸಿ ಆನಿ ತಶೆಚ್ ಅರ್ಧೆಖುರೆ ಜಾಲ್ಲೆ ನಾಯ್ಕ್ ಲೊರೆಸ್ ಆನಿ ನಾಯ್ಕ್ ಚಂದು ಆಸ್‍ಲ್ಲೆ.

ಧಡಂಗ್ ಕುಡಿಚ್ಯಾ ತ್ಯಾ ಮಾಪ್ಳ್ಯಾಂನಿ ತೊಪಾಸಿಕ್ ಖಾಂದ್ಯಾರ್ ವ್ಹಾವವ್ನ್ ಆನಿ ಹೆರಾಂಕ್ ಆಧಾರ್ಸುನ್, ಥೊಡೊ ವೇಳ್ ಕಾಳೊಕಾಂತ್ ಬಡ್ಗಾಚಿ ವಾಟ್ ಧರ್ಲಿ. ತ್ಯಾ ಉಪ್ರಾಂತ್ ಥಂಯ್ಸರ್ ರಾಕೊನ್ ಆಸ್‍ಲ್ಲ್ಯಾ ಎಕ್ಲ್ಯಾನ್ ಲಾಂಟಾನಾಚ್ಯಾ ಲ್ಹಾನ್ ವಾತಿಚೊ ಮಸ್ಕ್ ಉಜ್ವಾಡ್ ದಾಕಯ್ಲೊ.

ಉಪ್ರಾಂತ್‍ಯೀ, ಕಣ್ಕಿಚ್ಯಾ ಮೊಳ್ಯಾಂಚಿ ಆನಿ ಕಾಂಟ್ಯಾಂ-ಬೊಲ್ಯಾಂಚಿ ಚಡುಣೆಂ ಎಕಾ ಮಯ್ಲಾಚಿ ವಾಟ್ ಚಮ್ಕೊನ್, ರಾನಾಂತ್ಲ್ಯಾ ಆಡೊಸಾಕ್ ಆಸ್‍ಲ್ಲ್ಯಾ ಎಕಾ ಖೊಮ್ಟಾಕ್ ತೆ ಪಾವ್ಲೆ.

ಥಂಯ್ಸರ್ ಲ್ಹಾನ್ ಏಕ್ ಪಂಟಿ ಜಳ್ತಾಲಿ.

ತೊಪಾಸಿ ಮತಿರ್ ನಾತ್‍ಲ್ಲೊ. ದೋಣಿರ್ ಥಾವ್ನ್ ಸಕಯ್ಲ್ ಪಡ್ತಾನಾ, ವಾ ಪಡ್ಚ್ಯಾ ಆದಿಂಚ್ ತಾಚ್ಯಾ ಕಾನಾ ಪ್ರಾಸ್ ಚಿಕ್ಕೆ ಪಾಟಿಂ ಆನಿ ವಯ್ರ್ ಎಕಾ ತೆಲ್ತ್ಯಾ ಫಾತ್ರಾಚೊ ಹಳ್ತ್ ಮಾರ್ ಬಸ್‍ಲ್ಲ್ಯಾನ್, ಆನಿಕ್‍ಯೀ ಥೊಡೊ ವೇಳ್ ತಾಣೆಂ ಮತಿರ್ ಯೆಂವ್ಚೆಪರಿ ನಾತ್‍ಲ್ಲೆಂ.

ತಯಾರ್ ಆಸ್‍ಲ್ಲಿ ಹುನ್ ಕಾಫಿ ಘೊಟ್ತಚ್, ನಾಯ್ಕ್ ಲೊರೆಸ್ ಆನಿ ನಾಯ್ಕ್ ಚಂದು ಘಡ್ಯೆನ್ ಸನಿನ್ ಆನಿ ಸುಡ್ಸುಡಿತ್ ಜಾಲೆ.

ಅಶೆಂ ಕಿತೆಂ ತರೀ ಜಾಂವ್ಕ್ ಆಸ್ತೆಲೆಂ ಮ್ಹಳ್ಳೊ ಹಿಸೊ, ನಾಯ್ಕ್ ಲೊರೆಸಾಕ್ ಥೊಡೊ ಪಯ್ಲೊಚ್ ಆಸ್‍ಲ್ಲೊ. ಪುಣ್ ತಾಚೊ ಸಾಂಗಾತಿ ಮಾತ್ರ್ ಪುರ್ತೊ ಘಡ್ಬಡ್‍ಲ್ಲೊ.

ತಾಣಿಂ ಭಿಯೆಂವ್ಚಿ ಗರ್ಜ್ ನಾ, ತಾಂಚ್ಯಾ ಜಿವಾಕ್ ಬಾಧಕ್ ನಾ ಆನಿ ತಾಂಚ್ಯಾ ಫುಡಾರಾಚ್ಯಾ ಸವ್ಕಾಸಾಯೆಕ್ ಅಪಾಯ್ ನಾ ಮ್ಹಣ್ ಆಗ್ನೆಸ್ ಕುಂವರ್ನಿನ್ ತಾಂಕಾಂ ಮಟ್ವ್ಯಾನ್ ವಿವರ್ ದಿಲೊ.

“ಪುಣ್” ಮ್ಹಣಾಲಿ ತಿ. “ಹ್ಯಾ ಘಡ್ಯೆ ಥಾವ್ನ್, ಫುಡ್ಲೆ ಥೊಡೆ ದೀಸ್ ಪರ್ಯಾಂತ್, ತೊಪಾಸಿ ತುಮ್ಚೊ ಕೈದಿ. ಪುಣ್ ದುರಾದೃಷ್ಟಾನ್ ತುಮಿ ಹೆರಾಂಚೆ ಕೈದಿ ಮ್ಹಳ್ಳೆಪರಿಂ ನಟನ್ ತುಮಿ ಕರಿಜಾಯ್.”

“ತಶೆಂ ಕರುಂಕ್…” ದುಬಾವ್ಲೊ ನಾಯ್ಕ್ ಲೊರೆಸ್.

“ತಶೆಂ ಕರುಂಕ್ ಮಾತ್ರ್ ನಹಿಂ, ತಶೆಂ ತುಮಿ ಕರಿಜಾಯ್ ಮ್ಹಣ್ ತುಮ್ಚ್ಯಾಚ್ ವ್ಹಡಿಲಾಚಿ ಅಪೇಕ್ಷಾ ಜಾವ್ನಾಸಾ.”

“ಆಮ್ಚ್ಯಾ ವ್ಹಡಿಲಾಚಿ?”

“ವ್ಹಯ್ – ನಾಂವ್ ಕಾಡ್ಚಿ ಗರ್ಜ್ ನಾ. ಸರ್ವ್ ಫುಡೆಂ ತುಮ್ಕಾಂ ಕಳಿತ್ ಜಾತೆಲೆಂ.”

ಉಪ್ರಾಂತ್, ಫುಡ್ಲ್ಯಾ ನಾಟಕಾಕ್ ಸ್ವಾಭಾವಿಕ್ ರೂಪ್ ದಿಂವ್ಚ್ಯಾ ಇರಾದ್ಯಾನ್, ಸವಾರಾಂಚಿಂ ಹಾತೆರಾಂ ‘ಮಾಪ್ಳ್ಯಾಂನಿ’ ಸ್ವಾಧೀನ್ ಕೆಲಿಂ. ಆನಿ ತಾಂಚೆ ಹಾತ್ ಬಾಂಧ್ಲೆ. ತೊಪಾಸಿಚ್ಯಾ ಪೆಂಕ್ಡಾಕ್‍ಯೀ ತಾಣಿಂ ಪಾಸ್ ಘಾಲೊ.

ಥೊಡ್ಯಾ ವೆಳಾನ್, ಉದಾಕ್ ವೊಂಕವ್ನ್, ಕೃತಕ್ ಶ್ವಾಸ್ ದೀವ್ನ್ ಆನಿ ಸಳ್ಸಳಿ ಕಾಫಿ ಭರವ್ನ್ ತೊಪಾಸಿಕ್ ತಾಣಿಂ ಮತಿರ್ ಹಾಡ್ಲೊ.

ತಾಣೆಂ ದೊಳೆ ಸೊಡ್ಲೆ, ತೋಂಡ್ ಉಗ್ತೆಂ ಕೆಲೆಂ, ಥೊಡೊ ಶ್ವಾಸ್ ಘೆತ್ಲೊ ಆನಿ…

“ಕೋಣ್..? ಹಾಂವ್ ಖಂಯ್ ಆಸಾಂ?” ಉರ್ಡಲೊ ತೊ.

“ಆವಾಜ್ ಕರಿನಾಕಾ! ತುಂ ಬರ್‍ಯಾ ಜಾಗ್ಯಾರ್ ಆಸಾಯ್” ಮ್ಹಣಾಲೊ, ಮಾಪ್ಳ್ಯಾಚ್ಯಾ ವೆಸಾರ್ ಆಸ್‍ಲ್ಲೊ ದುಮ್ಗಾ ಪೀಂತ್. “ಕಾಯ್ಲಿಂತ್ಲೊ ಉಸ್ಳೊನ್ ಉಜ್ಯಾಂತ್ ತುಂ ಪಡ್ಲಾಯ್.”

“ಮ್ಹಣ್ಜೆ?”

“ಮ್ಹಣ್ಜೆ – ಕುರಿಯೆಲಾಂತ್ ಆನಿ ಹೆರ್ ಕಡೆನ್ ತುವೆಂ ಕೆಲ್ಲ್ಯಾ ಅಕ್ರಮಾಂ ಖಾತಿರ್ ತುಕಾ ಆಮಿ – ಫಾಶಿ ದಿಂವ್ಚ್ಯಾ ಖಾತಿರ್ ಸೊಧ್ತಾಲ್ಯಾಂವ್. ಆಜ್ ತುಂ ಆಮ್ಚ್ಯಾ ಹಾತಾಂತ್ ಪಡ್ಲೊಯ್.”

“ಹಾಂ? ಹಾಂವ್…”

“ನಾ” ಮ್ಹಣಾಲೊ ನಾಯ್ಕ್ ಲೊರೆಸ್. “ತೊ ತುಮ್ಚ್ಯಾ ಹಾತಾಂತ್ ಪಡೊಂಕ್ ನಾ. ಆಮ್ಚ್ಯಾ ಹಾತಾಂತ್ – ಬಾದಶಹಾಚೊ ಕೈದಿ ತೊ ಜಾವ್ನಾಸಾ.”

“ಹ್ಹ-ಹ್ಹಾ!” ಹಾಸ್ಲೊ ದುಮ್ಗಾ ಪೀಂತ್. “ತೊ ತುಮ್ಚ್ಯಾ ಹಾತಾಂತ್ ಆಸಾ. ಆನಿ ತುಮಿ ಆಮ್ಚ್ಯಾ ಹಾತಾಂತ್ ಆಸಾತ್! ಎಕ್ಲ್ಯಾಕ್ ಉಮ್ಕಳಾಯ್ತಾನಾ ಹೆರ್ ದೊಗಾಂಯ್ಕೀ ಉಮ್ಕಾಳಾಂವ್ಕ್ ಆಮ್ಕಾಂ ಚಡ್ ತ್ರಾಸ್ ಜಾಂವ್ಚೆ ನಾಂತ್.”

“ಪುಣ್ ಹೆಂ ಅಕ್ರಮ್!”

“ಅಕ್ರಮ್ ಕಾಂಯ್ ನಾ. ತುಮಿ ಹ್ಯಾ ಮನ್ಶ್ಯಾಕ್ ಆಮ್ಚ್ಯಾ ಹಾತಾಂತ್ ದಿಲ್ಯಾರ್ ತುಮಿ ಬರ್‍ಯಾ ಭಾಶೆನ್ ವಚ್ಯೆತ್.”

“ಪುಣ್ ಕೈದ್ಯಾಕ್ ವ್ಹರ್ನ್ ಒಪ್ಸಿನಾತ್ಲ್ಯಾರ್ ಆಮ್ಚ್ಯಾ ಜಿವಾಕ್ ಮೋಲ್ ನಾ – ಆಮಿ ಪಾಟಿಂ ವೆಚೆಪರಿಂ ನಾ!”

“ವಚನಾಕಾತ್. ಪುಣ್ ಹ್ಯಾ ಮನ್ಶ್ಯಾಕ್ ಆಮಿ ಸೊಡ್ನ್ ದಿಂವ್ಚೆಪರಿಂ ನಾ. ತಾಚೊ ಜೀವ್ ಆಮ್ಕಾಂ ಜಾಯ್.”

“ಕೋಣ್ ತುಮಿ ಜಾವ್ಯೆತ್?” ಮ್ಹಣಾಲೊ ತೊಪಾಸಿ, ಜೊ ಆತಾಂ ಪುರ್ತೊ ಭಿಯೆಲ್ಲೊ. “ಕಿತೆಂ ಹಾಂವೆಂ ಕೆಲಾಂ?”

“ಆಮಿ ಕೋಣ್ ಮ್ಹಳ್ಳೆಂ ತುಕಾ ಉಪ್ರಾಂತ್ ಸಾಂಗ್ತಾಂವ್. ತ್ಯಾ ಆದಿಂ ತುವೆಂ ಕುರಿಯೆಲಾಂತ್ ಕೆಲ್ಲ್ಯಾ ಕರ್ಮಾಂಚೊ ಉಗ್ಡಾಸ್ ಕರ್.”

“ಹಾಚೆ ಕಡೆನ್ ಉಲವ್ನ್ ವೇಳ್ ಕಿತ್ಯಾಕ್ ಪಾಡ್ ಕರ್ಚೊ?” ಶಿಣ್ಲೊ ಸಿಕೇರ್. “ಹಾಕಾ ಮುಗ್ದುನ್ ಸೊಡ್ಯಾಂ!”

“ಸಾಯ್ಬಾ, ಭೊಗೊಸ್!” ಅಕ್ಲಾಸ್ಲೊ ತೊಪಾಸಿ.

“ಮುಗ್ದುನ್ ಸೊಡುಂಕ್ ಕಷ್ಟ್ ನಾಂತ್” ಮ್ಹಣಾಲೊ ದುಮ್ಗಾ ಪೀಂತ್. “ಪುಣ್ ಅಸಲ್ಯಾಂನಿ ಆಧಾರ್‌ಲ್ಲ್ಯಾ ಅಕ್ರಮಾಂಚೆಂ ಫಾರಿಕ್ಪಣ್ ದಿಂವ್ಚ್ಯಾ ಖಾತಿರ್, ವಳ್ವಳೊನ್ ಪುಣೀ ಥೊಡೊ ಕಾಳ್ ವಾಂಚಜಾಯ್.”

“ಉಪ್ಕಾರ್ ತುಮ್ಚೊ!” ಪರಾತ್ತಿಲಾಗ್ಲೊ ತೊಪಾಸಿ. “ತುಮ್ಕಾಂ ಜಾಯ್ ತಿತ್ಲೆಂ ದಿರ್ವೆಂ ದಾಕಯ್ತಾಂ. ಉಪ್ರಾಂತ್ ಪುಣೀ ಮ್ಹಾಕಾ ಹ್ಯಾ ಗಾಂವಾ ಥಾವ್ನ್ ಭಾಯ್ರ್ ವಚೊಂಕ್ ಸೊಡ್ಯಾತ್.”

“ದಿರ್ವೆಂ ದಾಕಯ್ತಾಯ್! ಖಂಯ್ ಆಸಾ ತೆಂ ದಿರ್ವೆಂ?”

“ಕುರಿಯೆಲಾಂತ್ ಆಸಾ. ಮ್ಹಾಕಾ ತುಮಿ ಸುಟ್ಕಾ ದಿಂವ್ಚಿ ಭಾಸ್ ದಿಲ್ಯಾರ್, ಹಾಂವ್ ತುಮ್ಕಾಂ ತೆಂ ಲಿಪಯಿಲ್ಲೊ ಜಾಗೊ ಸಾಂಗ್ತಾಂ. ತೆದೊಳ್ ಪರ್ಯಾಂತ್ ಹಾಂವ್ ತುಮ್ಚೊ ಕೈದಿ ಜಾವ್ನ್ ರಾವ್ತಾಂ.”

“ಉಪ್ರಾಂತ್?”

“ಉಪ್ರಾಂತ್ ಹಾಂವ್ ಗೊಂಯಾಂ ವೆತಾಂ…”

“ತಶೆಂ ಜಾಲ್ಯಾರ್, ಪಳೆಯಾಂ…”

“ಪುಣ್ ಆಮ್ಚಿ ಗತ್?” ಪಿಂರ್ಗಲೊ ನಾಯ್ಕ್ ಲೊರೆಸ್.

“ತುಮ್ಚಿ ಗತ್ ತುಮಿಂಚ್ ವಿಂಚ್ಯೆತ್. ತುಮ್ಚೊ ಜೀವ್ ಆಮಿ ಪಾಟಿಂ ದಿತಾಂವ್. ಪುಣ್ ಹ್ಯಾ ಮನ್ಶ್ಯಾನ್ ಭಾಸಾಯಿಲ್ಲೆಂ ದಿರ್ವೆಂ ಆಮ್ಚ್ಯಾ ಹಾತಾಕ್ ಮೆಳ್ತಾ ಪರ್ಯಾಂತ್, ಆನಿ ಹೊ ಮನಿಸ್ ಆಮ್ಚ್ಯಾ ಗಾಂವಾ ಥಾವ್ನ್ ಭಾಯ್ರ್ ಪಾವ್ತಾ ಪರ್ಯಾಂತ್ ತುಮಿ ಆಮ್ಚೆ ಕೈದಿ ಜಾವ್ನ್ ರಾವಜಾಯ್.”

“ಪುಣ್ ತ್ಯಾ ಉಪ್ರಾಂತ್ ಆಮ್ಚ್ಯಾ ಜಿವಾಕ್‍ಯೀ ಹಾಂಗಾಸರ್ ಮೋಲ್ ಆಸಾಶೆಂ ನಾ ನಹಿಂಗೀ?”

“ತರ್ ತುಮಿಂಯೀ ತಾಚ್ಯಾ ಸಾಂಗಾತಾ ವಚ್ಯೆತ್” ಮ್ಹಣಾಲೊ ದುಮ್ಗಾ ಪೀಂತ್. ಉಪ್ರಾಂತ್ ತೊಪಾಸಿಕ್ ಪಳೆವ್ನ್, “ಹ್ಯಾ ಮನ್ಶ್ಯಾಂನಿ ತುಕಾ ವಾಯ್ಟ್ ಕರುಂಕ್ ನಾ. ತುಕಾ ಸುಟ್ಕಾ ಲಾಭ್ಲ್ಯಾರ್ ತಾಂಕಾಂ ಲಾಭನಾ. ತರ್ ತಾಂಕಾಂಯೀ ತುಂ ತುಜ್ಯಾ ಸಾಂಗಾತಾ ಗೊಂಯಾಂ ವ್ಹರ್ಶಿವೇ?”

“ಹಾಂವ್ ಕಬೂಲ್ ಆಸಾಂ.” ಆಪ್ಲೊ ಜೀವ್ ವಾಂಚಂವ್ಚ್ಯಾ ಖಾತಿರ್ ತೊ ಕಿತ್ಯಾಕ್‍ಯೀ ಕಬೂಲ್ ಆಸ್‍ಲ್ಲೊ.

“ತರ್ ಆನಿ ಥೊಡ್ಯಾ ವೆಳಾನ್ ಆಮ್ಕಾಂ ಏಕ್ ಲ್ಹಾನ್ ಪಯ್ಣ್ ಕರುಂಕ್ ಆಸಾ. ತೆದೊಳ್ ಪರ್ಯಾಂತ್ ವಿಶೆವ್ ಘೆಯಾ. ಪುಣ್ ಉಗ್ಡಾಸ್ ಆಸೊಂದಿ. ತುಮ್ಚ್ಯಾ ಜಿವಾಚಿ ತುಮ್ಕಾಂ ಆಶಾ ಆಸ್ಲ್ಯಾರ್, ಹರ್ಯೆಕಾ ಥರಾನ್ ಆಮ್ಚೆ ಕೈದಿ ಜಾವ್ನ್ ತುಮಿ ಸಹಕಾರ್ ದೀಜಾಯ್. ಆತಾಂ ತುಮ್ಚಿಂ ವಸ್ತ್ರಾಂ ಸುಕಂವ್ಕ್ ಆಮಿ ತುಮ್ಕಾಂ ಅವ್ಕಾಸ್ ದಿತಾಂವ್.”

ತಶಿ ತಿ ಲ್ಹಾನ್ ಸಭಾ ಆಖೇರ್ ಜಾಲಿ.

ತ್ಯಾ ವೆಳಾರ್ ಆಗ್ನೆಸ್ ಕುಂವರ್ನ್ ಕೈದ್ಯಾಂಚ್ಯಾ ಝಳ್ಕೆಕ್ ಪಡೊಂಕ್ ನಾ. ಉಪ್ರಾಂತ್ ದುಮ್ಗಾ ಪಿಂತಾಕ್ ತಿಣೆಂ ವ್ಹೊರೆವಿಂಗಡ್ ಆಪವ್ನ್ ಥೊಡೆ ಹಿಶೆ ದಿಲೆ. ತೊ ಸಗ್ಳೊ ದೀಸ್ ತಾಣಿಂ ಥಂಯ್ ಪಾಶಾರ್ ಕರಿಜಾಯ್, ಆನಿ ಅಪಾಯ್ ಉಣೊ ಜಾಲ್ಲೊ ಸಮ್ಜೊನ್, ರಾನಾಂಚ್ಯಾ ಪಾಯ್ ವಾಟೆನ್, ಫಲಾಣ್ಯಾ ಜಾಗ್ಯಾಕ್ ಪಯ್ಣ್ ಕರಿಜಾಯ್ ಮ್ಹಣ್ ಸಾಂಗೊನ್ ಬಂಟ್ವಾಳಾಕ್ ತಿ ಪಾಟಿಂ ಗೆಲಿ.

ದುಮ್ಗಾ ಪೀಂತ್ ಆನಿ ಹೆರ್ ಮಾನಾಯ್, ಕೈದ್ಯಾಂಚೊ ಪಹರೊ ಕರ್ನ್ ದೀಸ್‍ಭರ್ ರಾವ್ಲೆ.

ಕಡ್ವಾ ಲಾಗ್ಚಿ ಖಬರ್ ತಾಂಕಾಂ ಮೆಳ್ತಚ್ ಆಸ್‍ಲ್ಲಿ:

ದೀಸ್‍ಭರ್ ಸೊಧ್ನಾಂ ಕೆಲ್ಯಾರೀ, ಆದ್ಲ್ಯಾ ರಾತಿಂ ಉದ್ಕಾಂತ್ ಪಡೊನ್ ಗೆಲ್ಲ್ಯಾ ಸವಾರಾಂಚೊ ಜಾಂವ್ ಕೈದ್ಯಾಚೊ ಪತ್ತೊ ಜಾಂವ್ಕ್ ನಾ. ಮೆಳ್‍ಲ್ಲೆಂ ಮ್ಹಳ್ಯಾರ್, ಎಕಾ ಮಯ್ಲಾ ಸಕಯ್ಲ್ ನ್ಹಂಯ್ ದೆಗೆರ್ ಆಸ್‍ಲ್ಲ್ಯಾ ಎಕಾ ಕಣ್ಕಿಚ್ಯಾ ಕಣ್ಯಾಕ್ ‘ಶಿರ್ಕೊನ್’ ಆಸ್‍ಲ್ಲೆಂ, ಸರ್ದಾರ್ ಸಿಮಾಂವ್ಚ್ಯಾ ಕಂಪ್ಣೆಂತ್ಲ್ಯಾ ಸವಾರಾಂನಿ ಮಾತ್ಯಾಕ್ ಬಾಂಧ್ಚೆ ತಸಲ್ಯಾ ಪೇಟಾಚೆಂ ಭಿಜ್‍ಲ್ಲೆಂ ವಸ್ತುರ್ ಮಾತ್ರ್.

ಮಂಜರಾಬಾದ್ ಥಾವ್ನ್ ಆಯಿಲ್ಲ್ಯಾ ಜೆಮೆದಾರಾನ್, ಪಟ್ಟಣಾಚ್ಯಾ ಘೊಡ್ಯಾಂಕ್ ಆನಿ ಉರ್ಲೆಲ್ಯಾ ದೊಗಾಂ ಸವಾರಾಂಕ್ ಆಪ್ಲ್ಯಾ ಸಾಂಗಾತಾ ಆಪವ್ನ್ ವ್ಹರುಂಕ್ ಚಿಂತ್ಲೆಂ. ಬೋಳೂರ್‍ಚ್ಯಾ ಸವಾರಾಂಕ್ ತಶಿಚ್ ವರ್ದಿ ದೀವ್ನ್ ಪಾಟಿಂ ತಾಣೆಂ ಧಾಡ್ಲೆ.

ಸಕ್ಡಾಂನಿ ಚಿಂತ್‍ಲ್ಲೆಂ ಏಕ್, ಜಾಲ್ಲೆಂ ದುಸ್ರೆಂಚ್.

ದುಮ್ಗಾ ಪಿಂತಾನ್ ಆನಿ ಸಾಂಗಾತ್ಯಾಂನಿಯೀ ಚಿಂತ್‍ಲ್ಲೆಂ ಯೋಜನ್ ಬದ್ಲುನ್ ಸದ್ದ್ಯಾಕ್ ಆಗ್ನೆಸ್ ಕುಂವರ್ನಿಚಿ ಹುಕುಮ್ ಆನಿ ಖುಶಿ ಜಾರಿ ಕರಿಜಾಯ್ ಪಡ್ಲೆಂ.

ದುಮ್ಗಾ ಪಿಂತಾಕ್ ಸ್ವಾತಂತ್ರ್ಯ್ ದಿಲ್ಲೆಂ ಜಾಲ್ಯಾರ್, ತೊ ತೊಪಾಸಿಚ್ಯಾ ಮಾತ್ಯಾರ್ ಏಕ್ ಫಾತೊರ್ ಉಕ್ಲುನ್ ಘಾಲ್ನ್ ತಾಚಿ ಕಾಣಿ ಕಾಬಾರ್ ಕರ್ತೊ. ಪುಣ್ ಖರೆಮಸ್ತಿನ್ ಕೊಣಾಯ್ಚೊ ಜೀವ್ ಕಾಡುಂಕ್ ನಜೊ ಮ್ಹಣ್, ಸರ್ದಾರ್ ಸಿಮಾಂವ್ಚ್ಯಾ ಅಪೇಕ್ಷೆ ಪ್ರಕಾರ್ ಆಗ್ನೆಸ್ ಕುಂವರ್ನಿಚಿಯೀ ಸ್ಪಷ್ಟ್ ತಾಕಿದ್ ಆಸ್‍ಲ್ಲ್ಯಾನ್ ಕೈದ್ ಕೆಲ್ಲೆಯೀ ಕೈದಿ ಜಾಲ್ಲೆ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel