ಸರ್ವ್ ಕೊಂಕ್ಣಿ ಲೊಕಾಕ್ ಉಲೊ: ಸಕ್ಕಡ್ ಸಾಂಗಾತಾ ಮೆಳ್ಯಾಂ…

ಸಂಸಾರ್‌ಭರ್ ಆಸ್ಚ್ಯಾ ಸರ್ವ್ ಮಂಗ್ಳುರಿ/ಕೆನರಾ ಕೊಂಕ್ಣಿ ಕ್ರಿಸ್ತಾಂವಾಂನೊ, ತುಮ್ಕಾಂ ಮೊಗಾಚೆ ಪ್ರಣಾಮ್. ಕಾಲ್ ಏಕ್ ವಿಶೇಸ್ ಲೇಖನ್, ಕನ್ನಡಾಂತ್, ಹಾಂವೆಂ ಬರವ್ನ್ ಪ್ರಕಟ್‍ಲ್ಲೆಂ ನ್ಹಯ್ವೇ? ತಿ ಕಾಂಯ್ ಲ್ಹಾನ್ ಗಜಾಲ್ ವಾ ಚಿಲ್ಲರ್ ಸಂಗತ್ ನ್ಹಯ್. ಹರ್ ಕಾಳಾರ್ ಆಮ್ಚ್ಯಾ ಸಮುದಾಯಾಕ್ ಅನ್ಯಾಯ್ ಜಾವ್ನ್ಂಚ್ ಆಯ್ಲಾ. ಹೆಂ ಚರಿತ್ರೆಂತ್‍ಚ್ ಆಮ್ಕಾಂ ದಿಸ್ತಾ. ಭೋವ್ಶ್ಯಾ, ಆಮ್ಚ್ಯಾ ‘ಕೆನರಾ ಕೊಂಕ್ಣಿ ಸಮುದಾಯಾಕ್ ಗ್ರಾಚಾರ್ ಸುಟ್‍ಲ್ಲೆ ನಾಂತ್’ ಮ್ಹಳ್ಯಾರ್ ಅತಿಶಯ್ ಜಾಯ್ನಾ.

ನಿಜಾಯ್ಕೀ ಆಮ್ಚೊ ಸಮುದಾಯ್ ಸಂಖ್ಯಾನ್ ಮಾತ್ರ್ ನ್ಹಯ್ ವ್ಯಾಪ್ತೆನ್‍ಯೀ ಮಜ್ಭೂತ್ ಆಸ್‍ಲ್ಲೊ, ಆತಾಂಯೀ ಆಸಾ. ಪುಣ್ ಆಮಿ ಕೊಂಕಣ್ ಪ್ರದೇಶ್ ಮ್ಹಣ್ ಫಕತ್ ಕರಾವಳಿ ಜಿಲ್ಲ್ಯಾಂಕ್ ಮಾತ್ರ್ ಲೆಕ್ತಾಂವ್. ತೆಂ ಖಂಡಿತ್ ಚೂಕ್. ಚಿಕ್‍ಮಗ್ಳುರ್ ಆನಿ ಶಿವಮೊಗ್ಗ ಜಿಲ್ಲ್ಯಾಂನಿಯೀ ಆಮ್ಚೊ ಲೋಕ್ ಬರಾಬರ್ ಆಸಾ. ತೆ ಲೆಕಾಕ್‍ಚ್ ನಾಂತ್!? ಆನಿ ಹಾಕಾ ಕಾರಣ್ ಜರೂರ್ ಆಸಾ.

ಕೊಂಕ್ಣೆಂತ್ ಮೀಸ್ ಆನಿ ಭಾಷೆಚೆಂ ಅಸ್ತಿತ್ವ್

ವಾತಿಕಾನ್ ದುಸ್ರ್ಯಾ ಸಭೆನ್ (1965) ಮಾಂಯ್‍ಭಾಶೆಂತ್‍ಚ್ ಮೀಸ್ ಆನಿ ಮಾಗ್ಣಿಂ ಕರುಂಕ್ ಪರ್ವಣ್ಗಿ ದಿಲ್ಯಾ ಉಪ್ರಾಂತ್ ಆಮ್ಚ್ಯಾ ಕೊಂಕ್ಣಿ ಭಾಶೆಕ್ ಜೀವ್ ಭರ್ಲೊ. ತೆದೊಳ್ ಪರ್ಯಾಂತ್ ಕೊಂಕ್ಣಿ ಫಕತ್ ಲೊಕಾನ್ ಉಲಂವ್ಚಿ ಆನಿ ಚಡುಣೆಂ 65 ವರ್ಸಾಂ ಥಾವ್ನ್ (1900 ಥಾವ್ನ್) ಬರ್ಪಾಂತ್ ಇಲ್ಲಿ ವ್ಹಾಳ್ತಾಲಿ. ಪುಣ್ ಲಿತುರ್ಜಿಂತ್ ಹಾಡ್‍ಲ್ಲ್ಯಾನ್ ಮಂಗ್ಳುರ್ ಆನಿ ಕಾರವಾರ್ ದಿಯೆಸೆಜಿಂತ್ ಕೊಂಕ್ಣಿ ಧರ್ಮಾಚಿ ಭಾಸ್‍ಯೀ ಜಾಲಿ. ಭಾಶೆಕ್ ತ್ಯಾ ವರ್ವಿಂ ಫಾಯ್ದೊಚ್ ಜಾಲೊ.

ಫಾಯ್ದೊ ಜಾಲೊ ಕಶೆಂ ಮ್ಹಣ್, ಘಾಟಾರ್ ಕೊಂಕ್ಣಿ ಕಶೆಂ ಅಡ್ಚಲಿ ಮ್ಹಳ್ಳೆಂ ಸಮ್ಜಲ್ಯಾರ್ ಸಾರ್ಕೆಂ ಕಳ್ತಾ. ಸಬಾರ್ ಫಿರ್ಗಜಾಂನಿ 80-98% ಲೋಕ್ ಕೊಂಕ್ಣಿಚ್ ಆಸ್ಲ್ಯಾರೀ ಚಿಕ್‍ಮಗ್ಳುರ್ ದಿಯೆಸೆಜಿಂತ್ ಲಿತುರ್ಜೆಂತ್ ಕೊಂಕ್ಣೆಕ್ ಅವ್ಕಾಸ್ ನೆಗಾರ್ಲೊ. ಅಶೆಂ ಕೆಲ್ಲೆಂ ಮಹಾಪ್ರಾಧ್‍ಚ್ ಮ್ಹಣಜೆ. ತ್ಯಾ ವರ್ವಿಂ ಜಾಲ್ಲೆ ಸಮಸ್ಸೆ ಥಂಯ್ ವಚೊನ್ ಸಮ್ಜಲ್ಯಾರ್ ಮಾತ್ರ್ ಕಳ್ತಾ. ಹಾಂವ್ ತ್ಯಾ ಲೊಕಾ ಸಂಗಿಂ ಸಂಪರ್ಕಾರ್ ಆಸ್‍ಲ್ಲ್ಯಾನ್ ತೀವ್ರತಾ ಸಮ್ಜಲಾಂ.

ಪಾಟ್ಲ್ಯಾ ದಶಕಾಂತ್ ಚಿಕ್‍ಮಗ್ಳುರ್ ಆನಿ ಬೆಂಗ್ಳುರಾಂತ್ ಕೊಂಕ್ಣಿ ಮಿಸಾಂ ಖಾತಿರ್ ಬರಿಚ್ ಜಾಗೃತಿ ಆನಿ ಚಳ್ವಳ್ ಚಲ್ಲ್ಯಾ. ಆನಿ ತಾಕಾ ಜಯ್ತ್‌ಯೀ ಮೆಳ್ಳಾಂ. ಕೊಂಕ್ಣಿ ಮಿಸಾಂ ಭೆಟಂವ್ಕ್ ವಾತಿಕಾನಾನ್ ಪಯ್ಲೆಂಚ್ ಆದೇಶ್ ದಿಲಾ. ಸವೆಂ ಭಾರತಾಚ್ಯಾ ನ್ಯಾಯಾಂಗ್ ವ್ಯವಸ್ಥೆಚೊ ಆಧಾರ್‌ಯೀ ಮೆಳ್ಳಾ. ಸರ್ಕಾರ್‌ಯೀ ಸಹಕಾರ್ ದಿತಾ. ಇತ್ಲೆಂ ಆಸೊನ್‍ಯೀ ಲಾಖೊಂ ಲೊಕಾಚ್ಯಾ ಅಪೇಕ್ಷೆಕ್, ಮಾಗ್ಣ್ಯಾಕ್ ಆಮ್ಚೆಚ್ ಮ್ಹಳ್ಳೆ ಬಿಸ್ಪ್ ಕಾನ್ ಹಾಲಯ್ನಾಂತ್ ಮ್ಹಳ್ಳೆಂ ಪಳೆತಾನಾ ಬೆಜಾರ್ ಜಾತಾ.

ತ್ಯಾ ವರ್ವಿಂಚ್ ಜಾಯ್ತೆ ಸೊಜೆರ್ ಝುಜಾಕ್ ದೆಂವ್ಲೆ. ಕಾನೂನಾಚಿ ವಾಟ್ ಧರ್ಲಿ. ಆನಿ ತ್ಯಾ ವರ್ವಿಂ ಕೊಡ್ತಿಂನಿ ಜೀಕ್ ಮೆಳೊನ್ ಕೊಂಕ್ಣಿ ಮಿಸಾಂಕ್ ವಾಟ್ ಪುರ್ತಿ ಉಗ್ತಿ ಜಾಲಿ. ಬೆಂಗ್ಳುರ್ ಆರ್ಚ್ ಬಿಸ್ಪಾನ್, 2015ವ್ಯಾ ವರ್ಸಾಚ್, ಫಿರ್ಗಜ್‍ಗಾರಾಂನಿ ವಿಚಾರ್ಲೆಲ್ಯಾ ಭಾಶೆಂತ್ ಮೀಸ್ ದಿವ್ಯೆತ್ ಮ್ಹಣ್ ಸರ್ಕ್ಯುಲರ್ (Circular No. 131/2015) ಸಾಂಗ್ಲಾಂ ಸಯ್ತ್. ತರೀ ಥೊಡೆ ಫಿರ್ಗಜ್ ವಿಗಾರ್ ನೆಗಾರ್ತಾತ್. ಚಿಕ್‍ಮಗ್ಳುರ್ ಆನಿ ಶಿವಮೊಗ್ಗಾಚೆ ಬಿಸ್ಪ್ ಕೊಡ್ತಿಕೀ ಮಾನ್ ದೀನಾಂತ್ ಮ್ಹಳ್ಳೆಂ ವಿಪರ್ಯಾಸ್‍ಚ್ ಸಯ್! ಪುಣ್ ಲೊಕಾಚ್ಯಾ ದಬಾವಾಕ್ ಲಾಗೊನ್ ಸಬಾರ್ ಫಿರ್ಗಜಾಂನಿ ಕೊಂಕ್ಣಿ ಮಿಸಾಂ ಚಲ್ತಾತ್ ಮ್ಹಳ್ಳೆಂ ತುಮಿ ಆದ್ಲ್ಯಾ ಲೇಖನಾಂನಿ ವಾಚ್ಲಾಂ.

ಕನ್ನಡ ಕ್ರಿಸ್ತಾಂವ್ ‘ಸಂಘಟನಾಂ’ಚಿ ದಾದಾಗಿರಿ!?

ತೆಂ ದೋನ್ ಪಾನಾಂಚೆಂ ಲೆಟರ್ ಪಳೆಲ್ಲೆಂಚ್ ಹಾಂವ್ ಶೆರ್ಮೆಲೊಂ. ಬೆಂಗ್ಳುರ್ ರಾಮಮೂರ್ತಿ ನಗರ ಇಗರ್ಜೆಂತ್ ಜೂನ್ 15 ಥಾವ್ನ್ (ಮಹಿನ್ಯಾಕ್ ಏಕ್) ಕೊಂಕ್ಣಿ ಮೀಸ್ ಭೆಟಂವ್ಕ್ ಅವ್ಕಾಸ್ ದಿಲ್ಲ್ಯಾ ವಿಗಾರಾಕ್ ಧಮ್ಕಿ ದೀವ್ನ್ ಆನಿ ಫಟ್ಕಿರೆ ಆರೋಪ್ ಘಾಲ್ನ್ ಆದಿಂ ಥಾವ್ನ್ ‘ಗೂಂಡಾಗಿರಿ’ ಕರ್ನ್ ಆಯಿಲ್ಲ್ಯಾ ಎಕಾ ಸಂಘಾಚ್ಯಾಂನಿ ಕೊಂಕ್ಣಿ ಮೀಸ್ ರದ್ದ್ ಕರುಂಕ್ ಭೆಷ್ಟಾಯಿಲ್ಲೆಂ ವಾಚ್ತಾನಾ ರಗತ್ ಖುಬಾಳ್ಳೆಂ… ತಶೆಂ ಕಾಲ್ಚೆಂ ಲೇಖನ್ ಉದೆಲ್ಲೆಂ.

ಹಿ ಗಜಾಲ್ ಚಿಲ್ಲರ್ ನ್ಹಯ್. ಕಾನೂನಿ ವಿರೋಧ್ ಕ್ರಮ್ ತೆಂ. ಕರ್ನಾಟಕ ಹೈ ಕೊಡ್ತಿನ್ ದಿಲ್ಲ್ಯಾ ಆದೇಶಾಕ್ ತಶೆಂಚ್ ಆರ್ಚ್ ಬಿಸ್ಪಾಚ್ಯಾ (ಆನಿ ಪಾಪ್‍ಸಾಯ್ಬಾಚ್ಯಾ) ಅಧಿಕಾರಾಕ್‍ಚ್ ವಿರೋಧ್ ವೆಚೆಂ ಹಂಕಾರಿ ನಡ್ತೆಂ. ಕೊಂಕ್ಣೆಂತ್ ಮೀಸ್ ದಿಯಾ ಮ್ಹಣ್ತಾನಾ ನೆಗಾರುಂಕ್ ಹೆ ಕೋಣ್? ಕೊಂಕ್ಣೆಂತ್ ಮೀಸ್ ಭೆಟಯ್ಲ್ಯಾರ್ ಕೊಣಾಯ್ಕೀ ಕಿತ್ಯಾಕ್ ಅಸಮಾಧಾನ್? ತರೀ ಹಾಂಚೊ ದುರಹಂಕಾರ್ ಪಳೆಯಾ. ಪ್ರಜಾಪ್ರಭುತ್ವ್ ರಾಷ್ಟ್ರಾಂತ್ ಅಸಲ್ಯಾಕ್ ಅವ್ಕಾಸ್ ನಾ ಆನಿ ಅಸಲ್ಯಾಂಕ್ ಭಿಯೆಂವ್ಚಿ ಗಜಾಲ್‍ಚ್ ನಾ.

ಸಕ್ಕಡ್ ಸಾಂಗಾತಾ ಮೆಳ್ಯಾಂ ಆನಿ ಕೊಂಕ್ಣಿ ಅಸ್ಮಿತಾಯ್ ಉಬಾರ‍್ಯಾಂ

ಹೊ ಏಕ್ ಆಪುರ್ಬಾಯೆಚೊ ಅವ್ಕಾಸ್ ಆಮಾ ಸಮೇಸ್ತಾಂನಿ ಎಕ್ವಟೊಂಕ್. ವ್ಹಯ್. ಹಾಚಿ ಅನಿವಾರ್ಯತಾ ಪ್ರಸ್ತುತ್ ಘಾಟಾರ್, ಬೆಂಗ್ಳುರ್, ಮೈಸೂರ್ ವಸ್ತಿ ಕರ್ಚ್ಯಾ ಕೊಂಕ್ಣಿ ಕ್ರಿಸ್ತಾಂವಾಂಕ್ ಸಮ್ಜಲ್ಯಾ. ಹ್ಯಾ ಖಾತಿರ್ ‘ಬುಡ್ಕುಲೊ’ ಇ-ಪತ್ರಾನ್‍ಯೀ ವಾಂವ್ಟ್ ಕಾಡ್ಲ್ಯಾ ಮ್ಹಣೊಂಕ್ ಆಮ್ಕಾಂ ಸಂತೊಸ್. ಆಬ್ಳೆ, ಸ್ಥಳೀಯ್ ಲೊಕಾಕ್ ಸಂಸಾರಾಚ್ಯಾ ಕೊನ್ಶ್ಯಾ ಕೊನ್ಶ್ಯಾಂನಿ ಜಿಯೆಂವ್ಚ್ಯಾ ಕೆನರಾ ಕೊಂಕ್ಣಿ ಕಥೊಲಿಕಾಂನಿ ಸಾಂಗಾತ್ ದೀಜೆ. ತುಮಿ ಕಾಂಯ್ ಹಾಂಗಾ ಯೇವ್ನ್ ಧರಣಿ ಬಸಜೆ, ಪ್ರತಿಭಟನ್ ಕರಿಜೆ, ಗಲಾಟೊ ಕರಿಜೆ ವಾ ದುಡು ದೀಜೆ ಮ್ಹಣ್ ನ್ಹಯ್. ಬಗಾರ್ ಐಕ್ಯತಾ (Solidarity) ಪಾಚಾರಿಜೆ. ಜೆಜುಚ್ಯಾ ‘ಪೆಲ್ಯಾಕ್ ಕಿತೆಂ ಕರ್ತಾಯ್ ತೆಂಚ್ ಮುಖ್ಯ್’ ಉಲ್ಯಾಪರಿಂ ಆಮಿ ಪಾಟಿಂಬೊ ದೀಜೆ. ಝುಜ್ತೆಲ್ಯಾಂಕ್ ಪ್ರೇರಣ್ ದೀಜೆ.

ತೆಂ ಸೊಡ್ನ್ ಫಕತ್ ವಾಟ್ಸಪ್ ಗ್ರೂಪಾಂನಿ ಖೊರೊಜ್ ಕಾಡ್ಲ್ಯಾರ್ ಪ್ರಯೋಜನ್ ನಾ!

ತುರ್ತಾಚಿಂ ಕ್ರಮಾಂ – ಉಪಕ್ರಮಾಂ

ಕೊಂಕ್ಣಿ ಮಿಸಾಂ ಬಾಬ್ತಿನ್ ಶಿವಮೊಗ್ಗ, ಚಿಕ್‍ಮಗ್ಳುರ್ ಆನಿ ಬೆಂಗ್ಳುರ್ ದಿಯೆಸೆಜಿಂನಿ ಪುರ್ತಿ ಜೀಕ್ ಮೆಳಜೆ. ಸಬಾರ್ ಝುಜಾರಿ ಝುಜ್‍ಲ್ಲ್ಯಾನ್ ಜಾಯ್ತ್ಯಾ ಫಿರ್ಗಜೆಂನಿ ಪ್ರಸ್ತುತ್ ಕೊಂಕ್ಣಿ ಮಿಸಾಂ ದವರ್ಲ್ಯಾಂತ್. ಹೆಂ ಕೊಂಕ್ಣಿ ಭಾವಾಡ್ತಿ ಅಧಿಕ್ ಮಾಪಾನ್ ಆಸ್ಚ್ಯಾ ಹರ್ ಫಿರ್ಗಜಾಂನಿ ತುರಂತ್ ಜಾಯ್ಜೆ. ಪ್ರಸ್ತುತ್ ಮಹಿನ್ಯಾಕ್ ಏಕ್ ಮೀಸ್, ಖಂಚ್ಯಾಯೀ ವೆಳಾರ್ ತರೀ ಜಾಂವ್, ಅವ್ಕಾಸ್ ಜೊಡಿಜೆ.

ಹೆಂ ನೆಗಾರುಂಕ್ ಖಂಚ್ಯಾಯೀ ಯಾಜಕಾಕ್ ವಾ ಬಿಸ್ಪಾಕ್ ಕಸಲ್ಯಾಯೀ ರಿತಿನ್ ಅವ್ಕಾಸ್ ನಾ. ಕೊಣೀ ನೆಗಾರ್ತಾತ್ ಮ್ಹಳ್ಯಾರ್ ತೆ ಕ್ರಿಸ್ತೀ ಭಾವಾಡ್ತ್ಯಾಂಕ್ ಆನಿ ಜೆಜು ಕ್ರಿಸ್ತಾಕ್‍ಚ್ ನೆಗಾರ್ತಾತ್ ಮ್ಹಣ್ ಅರ್ಥ್. ತಿತ್ಲೆಂಚ್ ನ್ಹಯ್, ಕೋಣ್ ಕೊಂಕ್ಣಿ ಮಿಸಾಂಕ್ ಅವ್ಕಾಸ್ ದೀನಾ ಮ್ಹಣ್ತಾ, ತೊ ಭಾರತಾಚ್ಯಾ ಕಾನೂನಾಕ್ ಆನಿ ವಾತಿಕಾನಾಕ್‍ಯೀ ವಿರೋಧ್ ವೆತಾ ಆನಿ ಅಗೌರವ್ ದಾಕಯ್ತಾ ಮ್ಹಣ್ ಅರ್ಥ್. ಹೆಂ, ಕೋಣ್ ವಿರೋಧ್ ಕರ್ತಾ, ತಾಂಕಾಂ ಸಮ್ಜಯ್ಲ್ಯಾರ್ ಜಾಲೆಂ.

ಸರ್ವ್ ಸಂಗ್ತಿಂನಿ ಕೊಂಕ್ಣಿ ಲೊಕಾಕ್ ಆಧಾರ್, ಬಳ್ ಆನಿ ಅಧಿಕೃತ್ ಮಾನ್ಯತಾ, ಪರ್ವಣ್ಗಿ ಆನಿ ಪಾಟಿಂಬೊ ಲಾಭ್ಲಾ ಆಸ್ತಾಂ ಆನಿಕೀ ಘಳಾಯ್ ವಾ ಇನ್ಕಾರ್ ಫುಡ್ ಜಾಲ್ಯಾರ್ ವೊಗೆ ಬಸ್ಚ್ಯಾಂತ್ ಅರ್ಥ್ ನಾ. ಉತ್ರಾಂಕ್, ಭಾವನಾಂಕ್ ಆನಿ ರಾಜಾಂವಾಕ್ ಮೋಲ್ ದೀನಾತ್ಲ್ಯಾರ್ ಕೊಡ್ತಿಚೆಂ ಫರ್ಮಾಣ್ ನೆಗಾರ್ಲಾಂ (Contempt of Court) ಮ್ಹಣ್ ಗರ್ಜೆಚೆಂ ಕ್ರಮ್ ಘೆಜೆಚ್.

ಹಾಂ, ಅಶೆಂ ಮ್ಹಳೆಂ ಮ್ಹಣ್ ಕೊಣೀ ಹೆಂ ಕಾಂಯ್ ಸಂಘರ್ಷ್ ಮ್ಹಣ್ ಚಿಂತ್ಚೆಂ ನಾಕಾ. ಕಿತೆಂಯೀ ವಾಯ್ಟ್ ವಾ ಖೊಟೆಂ ಹಾಂತುಂ ನಾ. ಧಾರ್ಮಿಕಾಂ ವಾ ಕೊಣಾಯ್ ವಿರೋಧ್ ವೆಚೆಂಯೀ ಬಿಲ್ಕುಲ್ ನ್ಹಯ್. ಬೆಂಗ್ಳುರಾಂತ್ ಕನ್ನಡ ಗೂಂಡಾಂಕ್ ಥೊಡೆ ಪಾದ್ರಿ ಭಿಯೆತಾತ್! ಹ್ಯಾ ಗೂಂಡಾಂಚೆರೀ ಜೊಕ್ತೆಂ ಕಾನೂನ್ ಕ್ರಮ್ ಘೆಂವ್ಚೆಂ ಬರೆಂ.

ದಿಶ್ಟಾವೊ ವಿಶಾಲ್ ಆಸೊಂದಿ… ಏಕ್ ಆಯ್ತಾರ್ ಪಾವನಾ!

ಪಯ್ಲೆಂ, ಲೊಕಾನ್ ವಿಚಾರ್ಚ್ಯಾ ಫಿರ್ಗಜಾಂನಿ ಕೊಂಕ್ಣಿ ಮೀಸ್ ಲಾಭಜೆ (ಕೊಣೀ ಚಿಂತಿನಾಕಾತ್ ಸಗ್ಳ್ಯಾ ದಿಯೆಸೆಜಿಂತ್ ಕೊಂಕ್ಣಿ ಮಿಸಾಂ ಖಾತಿರ್ ಡಿಮಾಂಡ್ ಮ್ಹಣೊನ್. ಡಿಮಾಂಡ್ ಫಕತ್ ಖಂಯ್ ವ್ಹಡ್ ಮಾಪಾನ್ ಕೊಂಕ್ಣಿ ಫಿರ್ಗಜ್‍ಗಾರ್ ಆಸಾತ್ ಥಂಯ್ ಮಾತ್ರ್. ಹೆಂ ಅವಶ್ಯ್ ಜಾಣಾಂ ಜಾಯಾ). ಹೊ ಪಯ್ಲೊ ದಿಶ್ಟಾವೊ.

ದುಸ್ರೊ, ವರ್ಸಾ ಭಿತರ್ ಹರ್ ಆಯ್ತಾರಾ ಕೊಂಕ್ಣಿ ಮೀಸ್ ಲಾಭ್ಚ್ಯಾಕ್ ಶೆವಟ್ ದವರಿಜಾಯ್. ಆನಿ ಪ್ರೈಮ್ ಟೈಮಾರ್ ಹೆಂ ಮೀಸ್ ಮೆಳಜಾಯ್. ‘ಹರಕೆ ಸಂದಾಯ’ ಜಾಂವ್ಕ್ ನಜೊ! ಮ್ಹಳ್ಯಾರ್ ಕೊಂಪ್ರಾಕ್ ಮ್ಹೊಂವ್ ಸಾರಯಿಲ್ಲೆಪರಿಂ ಜಾಯ್ನಾಯೆ. ಆನಿ ಲೊಕಾನ್‍ಯೀ ಅಲ್ಪ್ ತೃಪ್ತ್ ಜಾಂವ್ಕ್ ನಜೊ. ಹ್ಯಾ ದಿಶೆನ್ ತೆಣೆಂಚ್ಯಾ ಕೊಂಕ್ಣಿ ಯಾಜಕಾಂನಿ ಪುರ್ತೊ ಸಹಕಾರ್ ಆನಿ ಸಾಂಗಾತ್ ದೀಜೆ. ಮಂಗ್ಳುರ್ ವಾ/ಆನಿ ಉಡುಪಿ ದಿಯೆಸೆಜಿಂ ಥಾವ್ನ್ ಜಾಯ್ ತೊ ಸಹಕಾರ್ ಆಪ್ಣಾಂವ್ಕೀ ಪಾಟಿಂ ಸರೊಂಕ್ ನಜೊ. ಹಾಂಗಾಚ್ಯಾ ದಿಯೆಸೆಜಿಂನಿಯೀ ಖುಶೆನ್ ಹ್ಯಾ ಮಿಸಾಂವಾಕ್ ಪಾಟಿಂಬೊ ದೀಜೆ.

ಉಡಾಸ್ ದವರಾ, ಸಂಸಾರಾಂತ್ ಆದಿಂ ಮಾಗಾ ಥಾವ್ನ್ ಆನಿ ಸಗ್ಳ್ಯಾಂನಿ, ಝುಜ್ಲ್ಯಾ ಶಿವಾಯ್ ನ್ಯಾಯ್ ಮೆಳನಾ. ವಾಂವ್ಟ್ ಕಾಡ್ಲ್ಯಾ ಶಿವಾಯ್ ಫಳ್ ಮೆಳನಾ. ಕೊಂಕ್ಣಿ ಮಿಸಾಂ ಖಾತಿರ್ 65 ವರ್ಸಾಂ ಆದಿಂಚ್ ಝುಜ್ ಚಲಜೆ ಆಸ್‍ಲ್ಲೆಂ. ಇತ್ಲಿಂ ವರ್ಸಾಂ ಲಾಂಬಯಿಲ್ಲೆಂ ದುರಂತ್‍ಚ್ ಸಯ್. ‘ಗೊತ್ತಾನಗ ಪೊರ್ತಾಂಡ್’ ಮ್ಹಳ್ಳೆಪರಿಂ ತರೀ ವ್ಹಡ್ ನಾ, ‘ಬೆಟರ್ ಲೇಟ್ ದ್ಯಾನ್ ನೆವರ್’ ಜಶೆಂ ಜಾಲ್ಲೆಂ ಶ್ಲಾಘನೀಯ್.

ಹ್ಯಾ ವಿಶೇಸ್ ಮಿಸಾಂವಾಚ್ಯಾ ಝುಜಾಂತ್ ಸರ್ವ್ ಝುಜಾರಿಂಕ್ ‘ಬುಡ್ಕುಲೊ’ ಸಂಪೂರ್ಣ್ ಪಾಟಿಂಬೊ ದಿತಾ. ತುಮ್ಚೆ ಥಂಯ್ ಆಮ್ಕಾಂ ಭೋವ್ ಅಭಿಮಾನ್ ಆಸಾ. ತುಮ್ಚ್ಯಾ ಸಂಕಲ್ಪಾ ಥಂಯ್ ವರ್ತಿ ದಾದೊಸ್ಕಾಯ್ ಆಮ್ಕಾಂ ಭೊಗ್ತಾ. ಸರ್ವ್ ಬರೆಂ ಜಾಂವ್, ಜಯ್ತ್ ತುಮ್ಚೆಂ ಜಾಂವ್, ತೊ ಸಂತೊಸ್ ಆಮಾ ಸಮೇಸ್ತಾಚೊ ಜಾಂವ್.

ಕೊಂಕ್ಣೆಚೆ ಗ್ರಾಚಾರ್, ಸಮಸ್ಸೆ ಆನಿ ದುರ್ದಶಾ!!

ಆಮ್ಚ್ಯಾ ಸಮುದಾಯಾಕ್ ‘ಗ್ರಾಚಾರ್’ ಪಾಟ್ ಸೊಡಿನಾಂತ್ ಮ್ಹಳೆಂ ನೆ, ತಾಚಿ ಝಳಕ್ ದಿತಾಂ. ಗೊಂಯಾಂತ್ ಪುಡ್ತುಗೆಜಾಂ ಮುಖಾಂತ್ರ್ ಕ್ರಿಸ್ತಾಂವ್ ಜಾಲ್ಲೆ ಆಮ್ಚೆ ಪುರ್ವಜ್ ತ್ಯಾಚ್ ಪುಡ್ತುಗೆಜಾಂಚ್ಯಾ ಕಾಟ್ಕಾಯೆಕ್ ಬಲಿ ಜಾಲೆ. ತಿ ಏಕ್ ದುರ್ದಶಾಚ್. ಪುಣ್, ಜಾಯ್ತ್ಯಾಂನಿ ತೆನ್ಕಾಚಿ ವಾಟ್ ಧರ್ಲಿ. ತ್ಯಾ ವರ್ವಿಂ ಕೊಂಕ್ಣಿ ಕ್ರಿಸ್ತಾಂವ್ ಪರ್ಜಾ ವ್ಹಡ್ ಪ್ರದೇಶಾಕ್ ವಿಸ್ತಾರ್ಲಿ.

ದುಸ್ರೆಂ, ಟಿಪ್ಪು ಸುಲ್ತಾನ್ ಮ್ಹಳ್ಳೊ ಸಯ್ತಾನ್ ರಾಕ್ಕೊಸ್ ಆಮ್ಚ್ಯಾ ಪುರ್ವಜಾಂಕ್ ಯೆಮ್ಕೊಂಡ್ ದಾಕಂವ್ಕ್ ಸಕ್ಲೊ. ಮುಕ್ಕಾಲ್ ವಾಂಟೊ ಕ್ರಿಸ್ತಾಂವ್ ಲೊಕಾಕ್ ತಾಣೆಂ ನಾಸ್ ಕೆಲೆಂ, ಕ್ರಿಸ್ತಾಂವ್ಪಣ್‍ಯೀ ದೆಸ್ವಾಟ್ಲೆಂ.

ಪರತ್ ಫುಲ್‍ಲ್ಲ್ಯಾ ಆಮ್ಚ್ಯಾ ಸಮುದಾಯಾನ್ ಆಧುನಿಕತೆ ಥಂಯ್ ಪಾವ್ಲಾಂ ಕಾಡ್ಲಿಂ, ಪುಣ್ ಸವ್ಕಾಸ್ ಆನಿ ನಿತ್ರಾಣೆಚಿಂ! ಬರ್ಪಾಚಿ ಕ್ರಾಂತಿ ಹೆರ್ ಭಾಶೆಂನಿ, ವಿದೇಶೀ ಕ್ರಿಸ್ತಾಂವ್ ಮಿಶಿನರಿಂ ಮುಖಾಂತ್ರ್, ವಿಶೇಸ್ ಚಲ್ಲಿ ತರೀ ಕೊಂಕ್ಣೆಂತ್ ಬಿಕ್ಕೊನ್ ಆನಿ ಪಾದ್ದೆವ್ನ್ ಆಮ್ಚ್ಯಾಂನಿ ಮೆಟಾಂ ಕಾಡ್ಲಿಂ. ಪಯ್ಲೆಂ ಪತ್ರ್ ಸುರ್ವಾತ್ ಕರುಂಕ್ 1912 ಇಸ್ವೆಕ್ ರಾಕಜೆ ಪಡ್ಲೆಂ ತರ್ (ಕನ್ನಡಾಚೆಂ ಪಯ್ಲೆಂ ಪತ್ರ್ ‘ಮಂಗಳೂರ ಸಮಾಚಾರ’ ಮಂಗ್ಳುರಾಂತ್ 1843 ಇಸ್ವೆಂತ್, ಕ್ರಿಸ್ತಾಂವ್ ಮಿಶಿನರಿನ್‍ಂಚ್ ಸುರ್ವಾತ್‍ಲ್ಲೆಂ), ಪಯ್ಲಿ ಕಾದಂಬರಿ ಪ್ರಕಟ್ ಜಾಂವ್ಕ್ 1950 ಪರ್ಯಾಂತ್ ವರ್ಸಾಂ ಮೆಜಿಜೆ ಪಡ್ಲಿಂ. ತ್ಯಾ ಉಪ್ರಾಂತ್ ಕೊಂಕ್ಣಿ ಸಾಹಿತ್ಯ್ ದರಬಸ್ತ್ ಗ್ರೇಸ್ತ್ ಜಾಲೆಂ.

ಪುಣ್ ಆನ್ಯೇಕ್ ಗ್ರಾಚಾರ್, ಕೊಂಕ್ಣೆಂತ್ 80% ಸಾಹಿತ್ಯ್ (ಪತ್ರಾಂ, ಪುಸ್ತಕ್, ಬರ್ಪಾಂ, ಪದಾಂ, ನಾಟಕ್ ಸರ್ವ್ ಲಿಖಿತಾಂ ಧರುನ್) ಆಮ್ಚ್ಯಾ ಲೊಕಾನ್ ನಿರ್ಮಿಲೆಂ. ತರೀ ಕೊಂಕ್ಣೆಕ್ ಸಾಹಿತ್ಯ್ ಅಕಾಡೆಮಿನ್ ಮಾನ್ಯತಾ ದಿತಾನಾ ಫಕತ್ 5% ಸಾಹಿತ್ಯ್ ರಚ್ಚ್ಯಾ ಲಿಪಿಕ್ ಮಾತ್ರ್ ಪರಿಗಣನ್ ಕೆಲೆಂ. ತೊ ಅನ್ಯಾಯ್ 51 ವರ್ಸಾಂ ಉತರ್ಲ್ಯಾರೀ ನೀತ್ ಮೆಳೊಂಕ್ ನಾ. ಹ್ಯಾ ವರ್ವಿಂ ಅತ್ಯದ್ಭುತ್ ಸಾಹಿತ್ಯ್ ಕೃತಿಯೊ ರಚ್‍ಲ್ಲ್ಯಾ ಆಮ್ಚ್ಯಾ ಮಾಲ್ಗಡ್ಯಾ (ಆನಿ ಆತಾಂಚ್ಯಾಯೀ) ಸಾಹಿತಿಂಕ್ ಮಾನ್ ಮೆಳ್ಳೊ ನಾ. ತ್ಯಾ ವರ್ವಿಂ ಆಮ್ಚ್ಯಾ ಕೊಂಕ್ಣಿ ಭಾಶೆಕ್ ಗಂಭೀರ್ ಮಾರ್ ಪಡ್ಲೊ.

ಆನ್ಯೇಕ್ ಭಿರಾಂಕುಳ್ ಗ್ರಾಚಾರ್, ಕೊಂಕ್ಣಿ ಲೋಕ್ ಆಸೊನ್‍ಯೀ ಚಿಕ್‍ಮಗ್ಳುರ್ ದಿಯೆಸೆಜಿನ್ ಕೊಂಕ್ಣೆಕ್ ಕೆಲ್ಲೊ ಘಾತ್. ಹೊ ಅನ್ಯಾಯ್ ಹೆರ್ ದಿಯೆಸೆಜಿಂನಿಯೀ ಮುಂದರ್ಸಿಲೊ. ಹ್ಯಾ ವರ್ವಿಂ ಜಾಲ್ಲೊ ಲುಕ್ಸಾಣ್ ಅಪರಿಮಿತ್. ಹೆಂ ಆಮ್ಚ್ಯಾಚ್ ಕೊಂಕ್ಣಿ ಬಿಸ್ಪಾಂನಿ ಕೆಲ್ಲೆಂ ಆನ್ಯೇಕ್ ದುರಾದೃಶ್ಟ್.

ಅಸಲೆ ಜಾಯ್ತೆ ‘ಗ್ರಾಚಾರ್’ ಆಮ್ಚ್ಯಾ ಭಾಶೆಕ್ ಆನಿ ಸಮುದಾಯಾಕ್ ಚಿಡ್ಕೊನ್ ಆಸ್‍ಲ್ಲೆ/ಆಸಾತ್. ಆಮ್ಚೊ ಜಾಯ್ತೊ ಲೋಕ್ ‘ಬರೊ’ ಮ್ಹಣ್ ದಾಕಂವ್ಚ್ಯಾ ಇರಾದ್ಯಾನ್ ‘ಭೆರೊ’ ಜಾಲ್ಲೆಂ ವಿಪರ್ಯಾಸ್‍ಚ್ ಸಯ್!!!

ಚಿಮ್ಟೊ: ಕನ್ನಡ ಲಿಪಿಚ್ಯಾ ಆಮ್ಚ್ಯಾ 80% ಕೊಂಕ್ಣಿ ಸಾಹಿತ್ಯಾಕ್ ಮಾನ್ಯತಾ ದೀನಾತ್ಲೆಲ್ಯಾನ್ ಜಾಲ್ಲೊ ಘಾತ್ ಆನಿ ಲುಕ್ಸಾಣ್ ವರ್ಣುಂಕ್ ಜಾಯ್ನಾ ತಿತ್ಲೊ. ಪುಣ್ ಆಮ್ಚೆ ಬರವ್ಪಿ (As Entity) ಮಾತ್ರ್ ಹ್ಯಾ ವಿಶಿಂ ಪುರ್ತೆ ‘ಭೆರೆ’ ಜಾವ್ನ್ ಉರ್ಲೆ. ತ್ಯಾ ತೆಕಿದ್ ಆಮ್ಚೆ ಮಧೆಂ ಬರೆ ಲೇಖಕ್, ಭೆರೆ ಲೇಖಕ್ ಆನಿ ದಗಲ್ಬಾಜಿ ಲೇಖಕ್‍ಯೀ ಜಾಯ್ತೆ! ಥೊಡೆಚ್ ಘಾತ್ಕಿ, ಅನುಪ್ಕಾರಿ ಆನಿ ಸ್ವಾರ್ಥಿ ಬರವ್ಪಿ ಆಪ್ಲ್ಯಾಚ್ ಲಿಪಿಕ್, ಸಾಹಿತ್ಯಾಕ್ ಆನಿ ಆಪ್ಣಾಕ್‍ಚ್ ವಿಕುಂಕ್ ಪಾಟಿಂ ಸರನಾಂತ್!! ಹೆ ಕಿತ್ಲೆ ಅಬ್ಲೆಶಿ ‘ಸಾಹಿತಿ’ ಮ್ಹಳ್ಯಾರ್ ಆಪ್ಲ್ಯಾ ಆವಯ್ಕ್‌ಚ್ ನೆಗಾರ‍್ತಾತ್, ಬಾಪಾಯ್ಕೀ ಬದ್ಲಿತಾತ್; ಅನ್ಕೂಲಾ ಪರ್ಮಾಣೆಂ!!? ಇತ್ಲೆಂ ಆಸೊನೀ, ಹೆರ್ ಸಕ್ಕಡ್ ಝುಜೊನ್ ಆಸಾತ್, ಪುಣ್ ಆಮ್ಚೊ ‘ಕನ್ನಡ ಲಿಪಿಚೆ ಬರವ್ಪಿ’ ಮ್ಹಳ್ಳೊ ವರ್ಗ್, ಕವಿ ಚಾ.ಫ್ರಾ.ನ್ ಸಾಂಗ್‍ಲ್ಲೆಪರಿಂ ನಪುಂಸಕಾಪರಿಂ ವರ್ತನ್ ಕರ್ತಾತ್. ಹೆಂ ಮಹಾನ್ ದುರಂತ್.

ಝುಜ್ಲ್ಯಾ ಶಿವಾಯ್ ಹಕ್ಕಾಂ ಮೆಳನಾಂತ್. ಹೆಂ ಆಮ್ಚ್ಯಾ ಕೊಂಕ್ಣಿ ಲೇಖಕಾಂಕ್, ಆತಾಂ ಪುಣೀ, ಸಮ್ಜೊಂದಿ ದೆವಾ!!!

ಮಾಂಯ್‍ಭಾಶೆಂತ್ ಮೀಸ್ ಅಭಿಯಾನ್ – ಕೊಂಕ್ಣೆಕ್ ಜೀಕ್

ಕೊಂಕ್ಣಿ ಬರವ್ಪ್ಯಾಂಚಿ ಖರಸ್: ಚಾಟಿ ಬಿಜಾಯ್ತಾ ಚಾ.ಫ್ರಾ!

ಕೊಂಕ್ಣಿ ಭಾಂಗಾರ್ ಸಾಹಿತ್ಯಾಚಿ ರುಜ್ವಾತ್

ಕೊಂಕಣಿ ಕ್ರೈಸ್ತರ ಮೂಲಭೂತ ಹಕ್ಕನ್ನು ನಿರಾಕರಿಸಬೇಡಿ

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel