ಇಂಫೆರ್ನಾಚಿಂ ದಾರಾಂ – 6: ಇಜಾಬೆಲ್ ತೆರೆಜಾಕ್ ಪರತ್ ಇಜಾ!

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 6
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 6: ಇಜಾಬೆಲ್ ತೆರೆಜಾಕ್ ಪರತ್ ಇಜಾ!

“ಹ್ಯಾ ಠಾಣ್ಯಾಂತ್, ಹ್ಯಾ ವೆಳಾರ್ ಚಾಕ್ರೆಂತ್ ಆಸ್ಚ್ಯಾ ಸರ್ವ್ ಶಿಪಾಯಾಂಕ್, ಎಕೆಕ್ಲ್ಯಾಕ್, ತ್ಯಾಚ್ ವಾಯ್ದ್ಯಾ ಥಾವ್ನ್ ಅರ್ಧೊ ಹೂನ್ ಪಗಾರ್ ಚಡಯ್ಲಾ.

“ಹ್ಯಾ ಘಡಿಯೆ ಥಾವ್ನ್, ಪರಾರಿ ಜಾಲ್ಲೊ ಖಿಲ್ಲೆದಾರ್, ರಾಜ್‍ದ್ರೋಹಿ ಆನಿ ಪರಾರಿ ಅಪ್ರಾಧಿ ಜಾವ್ನಾಸಾ. ತಾಕಾ ಧರ್ಚಿ ವಾ ತಾಚಿ ಖಬರ್ ಹಾಡ್ಚಿ ಜವಾಬ್ದಾರಿ ತುಮ್ಚಿ.

“ಸರ್ಕಾರಾಚಿ ಮಂಜೂರಾತಿ ನಾಸ್ತಾನಾ, ಮಾಜಿ ಖಿಲ್ಲೆದಾರಾನ್, ಷೇರ್ ಖಾನ್ ಮ್ಹಳ್ಳ್ಯಾ ಎಕ್ಲ್ಯಾಕ್ ‘ಸಹಾಯಕ್’ ಕರ್ನ್ ದವರ್ಲಾ ಖಂಯ್. ತೊ ಪರತ್ ಹ್ಯಾ ಠಾಣ್ಯಾಂತ್ ಝಳ್ಕತ್ ಜಾಲ್ಯಾರ್, ತಾಕಾ ಕೈದ್ ಕರ್ನ್ ಬಂಧೆಂತ್ ಘಾಲ್ಚಿ ಜವಾಬ್ದಾರಿ ತುಮ್ಚಿ!

“ಆನಿ – ಫುಡ್ಲ್ಯಾ ಸರ್ವ್ ವ್ಯವಹಾರಾಂಕ್ – ಬಾದಶಹಾಚ್ಯಾ ನಾಂವಾನ್, ಹ್ಯಾ ಠಾಣ್ಯಾಕ್, ಭಕ್ಷಿ ಮಿಯಾ ಇಸ್ಮಾಯಿಲ್ ಬಾಬಾ, ಖಿಲ್ಲೆದಾರ್ ಮ್ಹಣ್ ಆಮಿ ಹ್ಯಾ ಮುಖಾಂತ್ರ್ ಪಾಚಾರ್ತಾಂವ್.”

ಖಲೀಫ್ ದೌಲತಾಂತ್ ದೀಕ್ಷಾ ಆನಿ ಪುರಸ್ಕಾರ್ ಉಚಾರ್ನ್ ಜಾತಚ್, ಸರ್ದಾರ್ ಸಿಮಾಂವ್, ಚಡ್ ವೇಳ್ ಠಾಣ್ಯಾಂತ್ ರಾವೊಂಕ್ ನಾ. ಕಿತೆಂ ಜಾಲ್ಯಾರೀ, ಪರಾರಿ ಖಿಲ್ಲೆದಾರಾಕ್ ಧರ್ಚ್ಯಾ ಆದಿಂ, ವೆರೊನಿಕಾ ಕುಂವರ್ನಿಚಿ ಆನಿ ತಿಚ್ಯಾ ಭಯ್ಣಿಚಿ ಖಬರ್ ಸಮ್ಜಜಾಯ್, ಆನಿ ಅಪಾಯಾಂತ್ ತಿಂ ಆಸ್ಲ್ಯಾರ್ ತಾಂಕಾಂ ರಾಕಜಾಯ್ ಮ್ಹಣ್ ತಾಚೆಂ ಮನ್ ಅತ್ರೆಗ್ತಾಲೆಂ.

ಠಾಣ್ಯಾಂತ್, ಗರ್ಜೆಚೆ ಆನಿ ಕಾರ್ಯಾಬಾರಾಚೆ ಥೊಡೆ ಹಿಶಾರೆ ದೀವ್ನ್, ತುರ್ತಾನ್ ತೊ ಭಾಯ್ರ್ ಸರ್ಲೊ. ಜಮೆದಾರ್ ಅಂತುಲೊ ಪಡ್ವಳ್ ಆನಿ ತಾಚೆ ಹೆರ್ ಸವಾರ್, ತಾಚ್ಯಾ ಸಾಂಗಾತಾ ಆಸ್‍ಲ್ಲೆ.

ಪಯ್ಲೆಂ ಖಂಯ್ ವೆಚೆಂ ಮ್ಹಣ್ ತೊ ನೆಣಾಸ್‍ಲ್ಲೊ. ತಾಚೊ ಉದ್ದೇಶ್, ಸರ್ಕಾರಾಚ್ಯಾ ಹೆರ್ ಹುದ್ದೆದಾರಾಂ ಥಾವ್ನ್ ಆನಿ ಖಬ್ರಿ ದಲಾಲ್ಯಾಂ ಥಾವ್ನ್ ಲಿಪಂವ್ಚಿಯೀ ಗರ್ಜ್ ವರ್ತಿ ಜಾವ್ನಾಸ್‍ಲ್ಲಿ.

“ಮೇಟ್ ಕಶೆಂಯೀ ಕಾಡ್, ಪುಣ್ ಜಿವಾಕ್ ಸಂಚಿಕಾರ್” ಮ್ಹಣಾಲೊ ತೊ, ಅಂತುಲ್ಯಾ ಲಾಗಿಂ.

“ಕಿ-ಕಿತೆಂ ಸರ್ದಾರಾ?” ಅಂತುಲೊ ಘುಸ್ಪಡ್ಲೊ.

“ಕಾಂಯ್ ನಾ, ಚಿಂತಾಲೊಂ ಹಾಂವ್” ಮ್ಹಣಾಲೊ ಸರ್ದಾರ್, ಚಡುಣೆಂ ಆಪ್ಣಾ ಕಡೆನ್‍ಂಚ್ ಉಲವ್ನ್. “ಹ್ಯಾ ವೆಳಾರ್, ಜಾಂವ್ ದುಮ್ಗಾ ಪೀಂತ್ ಆನಿ ತಾಚೆ ಮಾನಾಯ್, ಅವ್ಚಿತ್ ಆನಿ ಗುಪಿತ್ ಪುಣೀ ಮೆಳ್‍ಲ್ಲೆ ಜಾಲ್ಯಾರ್, ಉಪ್ಕಾರ್ತೆ.”

“ಆಮಿ ಪಾವನಾಂವ್‍ಗೀ ಸರ್ದಾರಾ?” ಶಿಣ್ಲೊ ಅಂತುಲೊ.

“ಆಮಿ ಪಾವ್ತ್ಯಾಂವ್… ಸರ್ಕಾರಾಚೆಂಚ್ ಕಾಮ್ ಜಾಲ್ಲೆಂ ಜಾಲ್ಯಾರ್ ಪಾವ್ತ್ಯಾಂವ್.” ಸರ್ದಾರಾನ್ ಹಿಸೊ ದಿಲೊ. “ಪುಣ್ ಹ್ಯಾ ವೆಳಾರ್, ಭೋವ್ ತುರ್ತಾನ್ ಜಾಂವ್ಕ್ ಆಸ್‍ಲ್ಲ್ಯಾ ಥೊಡ್ಯಾ ವಿಷಯಾಂನಿ, ಜಾಯ್ತ್ಯಾ ಅಪಾಲಿಪಾ ವಾವ್ರಾಚಿ ಗರ್ಜ್ ಆಸಾ.”

“ಸರ್ದಾರಾನ್ ಮನ್ ಕೆಲ್ಯಾರ್, ಆನಿ ಹುಕುಮ್ ದಿಲ್ಯಾರ್, ಅಸಾಧ್ಯ್ ಕಸಲೆಂಯೀ ನಾ.”

ಅಂತುಲ್ಯಾಚೊ ಅಭಿಮಾನ್ ಆಯ್ಕೊನ್, ಸರ್ದಾರ್ ಸಿಮಾಂವ್, ನಾಕಾಂತ್ಲ್ಯಾನ್ ಹಾಸ್ಲೊ. ಫುಡೆಂ ತೊ ಉಲಂವ್ಕ್ ನಾ. ತಿತ್ಲ್ಯಾ ವೆಳಾನ್ ತಾಂಚೆ ಘೊಡೆ, ಉರ್ವಾ ಮಯ್ದಾನಾ ಲಾಗಿಂ ಪಾವ್‍ಲ್ಲೆ. ಚಿಕ್ಕೆ ಮುಖಾರ್ ವೆತಚ್, ಸರ್ದಾರ್ ಸಿಮಾಂವ್ನ್, ಫುಡ್ಲ್ಯಾ ಕಾರ್ಯಾ ಸಂಬಂಧಿಂ ನಿರ್ಣಯ್ ಘೆಂವ್ಕ್ ತೆಕಿದ್ ಏಕ್ ನೀಬ್ ಮೆಳ್ಳೆಂ.

ಪಾಗ್ಗು ಮಹಿನ್ಯಾಂತ್ಲೆ ಉಬಾಳೆಚೆ ದೀಸ್ ತೆ. ದೀಸ್ ದೊನ್ಪಾರ್ ಪರ್ತಲೊ ಜಾಲ್ಯಾರೀ, ಆಡ್ವ್ಯಾ ಕಿರ್ಣಾಂಚಿ ದಾವ್ ನಿವೊಂಕ್ ನಾತ್‍ಲ್ಲಿ.

ಸಟ್ಟ್ ಕರ್ನ್, ಸರ್ದಾರ್ ಸಿಮಾಂವ್ಚಿ ದೀಷ್ಟ್, ಅಂತ್ರಳಾಕ್ ಗೆಲಿ.

“ದಾವ್ಯಾಕ್ ಘುಂವ್ಯಾಂ” ತಾಕಿದ್ ದಿಲಿ ತಾಣೆಂ. “ಫುಡ್ಲೆಂ ಕಾಮ್ ಕರ್ಚ್ಯಾ ಆದಿಂ, ಉರ್ವಾಚ್ಯಾ ಮೊಳ್ಯಾಂತ್, ಕಿತೆಂ ತರೀ ಖುಣ್ ಮೆಳೊಂಕ್…”

“ವ್ಹಯ್ ಧನ್ಯಾ!” ಅಕ್ಲಾಸ್ಲೊ ಅಂತುಲೊ, ಮಧೆಂಚ್. ಸರ್ದಾರ್ ಸಿಮಾಂವ್ನ್ ತಾಕಿದ್ ದಿಲ್ಲ್ಯಾಚೆಂ ಕಾರಣ್, ತಾಕಾ ಸುಸ್ತಾಲ್ಲೆಂ. ಉರ್ವಾಚ್ಯಾ ಮೊಳ್ಯಾ ವಯ್ರ್, ಏಕ್ ದೋನ್ ಗೀದ್ ಭೊಂವಾರ್ತಾಲೆ.

“ಕಾಂಯ್ ಜಾನ್ವಾರ್ ಪುಣೀ ಮೆಲಾಂ ಆಸ್ತೆಲೆಂ…”

“ಜಾನ್ವಾರ್ ಜಾಂವ್ ಮನಿಸ್, ಪಳೆವ್ನ್ ಸಾಂಗ್ಯಾಂ ನೀಜ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಘೊಡ್ಯಾಂಕ್, ತ್ಯಾ ಪಿಂಪ್ಳಾಚ್ಯಾ ರುಕಾ ಮುಳಾಂತ್ ರಾವಯಾ. ಉಪ್ರಾಂತ್ ಸಗ್ಳೆ ವಿಸ್ಕಳೊನ್, ತಪಾಸಣೆನ್, ಮೊಳ್ಯಾಂತ್ ಮಧೆಂಗಾತ್ ಆಸ್ಚ್ಯಾ ತ್ಯಾ ದೀಗ್ ರುಕಾ ಮುಳಾಕ್ ಯೆಯಾ!”

ತಾಚಿ ಹುಕುಮ್ ಪಾಳ್ಚ್ಯಾ ಖಾತಿರ್, ಸವಾರ್ ಸಗ್ಳೆ, ಮೊಳ್ಯಾ ಭೊಂವಾರಿಂ ಶಿಂಪಡ್ಲೆ ಆನಿ ಹುಶಾರ್ ಜಾವ್ನ್, ನದರ್ ದೀವ್ನ್ ಭಿತರ್ ಸರ್ಲೆ.

ಸರ್ದಾರ್ ಸಿಮಾಂವ್ ಮಾತ್ರ್, ಘೊಡ್ಯಾ ವಯ್ಲೊ ದೆಂವನಾಸ್ತಾಂ, ಥಂಯ್ಚ್ ರಾವ್ಲೊ. ತಾಚ್ಯಾ ಮತಿಂತ್ ನಾಣಾಂತಿಂ ಚಿಂತ್ನಾಂ ಘುಂವೊಂಕ್ ಲಾಗ್ಲಿಂ. ಅಂತುಲ್ಯಾನ್ ಉಚಾರ್‌ಲ್ಲೆಪರಿಂ, ಕಾಂಯ್ ಜಾನ್ವಾರ್‌ಚ್ ಮೆಲಾಂ ಜಾಲ್ಯಾರ್ ಪುರೊ ಆಸ್‍ಲ್ಲೆಂ ಮ್ಹಣ್ ತಾಕಾ ಭೊಗ್ತಾಲೆಂ. ಪುಣ್ ಕಶೆಂ ಸಾಂಗ್ಯೆತಾ?

ಕೆನರಾ ಕ್ರಿಸ್ತಾಂವಾಂಚ್ಯಾ ಬಂದಡೆ ವೆಳಾರ್, ಮಂಗ್ಳುರಾಂತ್ ತೊ ಉರ್ವಾಚೊ ಮೊಳೊ ಥೊಡ್ಯಾ ವಿಶೇಸ್ ಆನಿ ದುಖಾಭರಿತ್ ಘಡಿತಾಂಚೊ ದೊಳೊ ಜಾಲ್ಲೊ. ಚಡುಣೆಂ ಎಕಾ ಮಹಿನ್ಯಾ ಆದಿಂ, ತ್ಯಾಚ್ ಮೊಳ್ಯಾಂತ್, ದುಮ್ಗಾ ಪಿಂತಾಚೆ ವೀರ್ ಮಾನಾಯ್ ಕೈದಿ ಜಾಲ್ಲೆ. ತ್ಯಾಚ್ ಘಡ್ಯೆ, ತ್ಯಾಚ್ ಮೊಳ್ಯಾಂತ್, ‘ಜಿಯೊಂ ಕ್ರಿಸ್ತ್!’ ಮ್ಹಳ್ಳೊ ಆವಾಜ್ ದೀವ್ನ್ ಎಕ್ಲ್ಯಾಕ್ ಕುರ್ಡೊ ಕರ್ನ್, ಆನ್ಯೇಕ್ಲ್ಯಾಚೊ ಖಡ್ಡೊ ಭೆತುನ್, ಉರ್ಲೆಲ್ಯಾಂಚ್ಯೊ ತಾಲ್ವಾರಿ ತೊಪೊನ್, ಮೊನ್ನಾ ಕಾಮತ್ ಮ್ಹಳ್ಳೊ ಮಾನಾಯ್ ಮಾಡ್ತಿರ್ ಮೆಲ್ಲೊ…

“ಓಹೋ… ಹೋಯ್!”

ಮೊಳ್ಯಾ ಭಿತರ್ ಥಾವ್ನ್ ಆಯಿಲ್ಲ್ಯಾ ಆವಾಜಾಕ್, ಸರ್ದಾರ್ ಸಿಮಾಂವ್ ಜಾಗೊ ಜಾಲೊ. ಘೊಡ್ಯಾಕ್ ಥಂಯ್ಚ್ ಸೊಡುನ್, ಥೊಡ್ಯಾಚ್ ವೆಳಾನ್, ಆವಾಜ್ ಜಾಲ್ಲ್ಯಾ ಜಾಗ್ಯಾಕ್ ತೊ ಪಾವ್ಲೊ. ಹೆರ್ ಸವಾರ್‌ಯೀ ಥಂಯ್ಸರ್ ಪಾವ್‍ಲ್ಲೆ.

ರುಕಾ ಮುಳಾಂತ್ ಪಡೊನ್ ಆಸ್‍ಲ್ಲ್ಯಾ ವಸ್ತುಚೆರ್ ತಾಣಿಂ, ಆಂಗ್ ಸಿರ್ಸಿರೊನ್, ದೀಷ್ಟ್ ಘಾಲಿ. ಸಮ್ಜೊಂಕ್ ಚಡ್ ಕಷ್ಟ್ ನಾತ್ಲೆ, ಎಕಾ ಮನ್ಶ್ಯಾಚೆಂ, ಕುಡಿಚೆಂ ರೂಪ್ ಭಂಗಯಿಲ್ಲೆಂ ಮೊಡೆಂ ತೆಂ ಜಾವ್ನಾಸ್‍ಲ್ಲೆಂ.

ಸರ್ದಾರ್ ಸಿಮಾಂವ್ನ್ ತೆಂ ದೃಶ್ಯ್ ಖಿಣಾನ್ ಪಾರ್ಕಿಲೆಂ ಆನಿ ಸಾರ್ಕೊ ಅಂದಾಜ್ ಕೆಲೊ. ರಗ್ತಾನ್ ದಾಟ್ಲೆಲಿಂ ಥೊಡಿಂ ವಸ್ತ್ರಾಂ ಲಾಗ್ಸರ್ ಶಿಂಪ್ಡೊನ್ ಆಸ್‍ಲ್ಲಿಂ. ಗೀದಾಂ-ಕಾವ್ಳ್ಯಾಂನಿ ವಾ ಕೊಲ್ಯಾಂ-ಸುಣ್ಯಾವಾಗ್ಟಾಂನಿ ಭೆಟ್ ದೀವ್ನ್ ಉರ್ಲೆಲ್ಯಾ ತ್ಯಾ ಘಡ್ವಳೆಕ್, ವಸ್ತ್ರಾಂಚಿ ಗರ್ಜ್ ನಾತ್‍ಲ್ಲಿ. ತಿಂ ವಸ್ತ್ರಾಂ ವಿಂಚವ್ನ್ ಆನಿ ಲಾಗಿಂ ಕರವ್ನ್, ಸರ್ದಾರಾನ್ ಪೊಟ್ಲಿ ಬಾಂಧಯ್ಲಿ.

ಖೊಲಿಯೊ, ಮಾತಿ, ಫಾತೊರ್ ಆನಿ ಕಾಂಟಿ ಜಮವ್ನ್, ತ್ಯಾ ಮೊಡ್ಯಾಕ್ ಸಮಾಧ್ ದಿಲ್ಯಾ ಉಪ್ರಾಂತ್, ಸರ್ದಾರ್ ಆನಿ ಸವಾರ್ ಪಾಟಿಂ ಭಾಯ್ರ್ ಸರ್ತಾಲೆ. ತ್ಯಾಚ್ ಘಡಿಯೆ, ಸರ್ದಾರಾಚಿ ದೀಷ್ಟ್, ಚಡುಣೆಂ ತೀಸ್ ಕದಮಾಂ ಪಯ್ಸ್ ಆಸ್‍ಲ್ಲ್ಯಾ ಎಕಾ ಬೊಲ್ಯಾಚೆರ್ ಖಂಚ್ಲಿ. ಕೊಣಾಯ್ ಕಡೆನ್ ಉಲಯ್ನಾಸ್ತಾನಾ ತ್ಯಾ ಬೊಲ್ಯಾ ಸರ್ಶಿನ್ ತೊ ಗೆಲೊ. ಕಾಟ್ ಖಾಜ್ರಾ ಕಾಂಟ್ಯೆಚೆಂ ಬೊಲೆಂ ತೆಂ. ತಾಚೆರ್ ಶಿರ್ಕೊನ್ ಆಸ್‍ಲ್ಲೊ ವಸ್ತ್ರಾಚೊ ಲ್ಹಾನ್ ಏಕ್ ತೀರ್ ತಾಣೆಂ ಹೆವ್ಶಿನ್ ಕಾಡ್ಲೊ, ಆನಿ ಪರೀಕ್ಷಾ ಕರ್ನ್ ಪಳೆಲೆಂ.

ತಾಚ್ಯಾ ದೊಳ್ಯಾಂತ್ಲ್ಯಾನ್, ಸಮ್ಜಣೆಚೆ ಕಾಜುಲೆ ಆನಿ ಕ್ರೋಧಾಚಿಂ ಕಿಟಾಳಾಂ ಉಸಳ್ಳಿಂ. ತೊ ತೀರ್ ಜಾವ್ನಾಸ್‍ಲ್ಲೊ ಜಾಂಬ್ಳಿ ವರ್ಣಾಚ್ಯಾ ಮೊಲಾಧಿಕ್ ರಶೀಮ್ ಕಾಪ್ಡಾಚೊ. ತಾಂತುಂ ಬಗ್ಲೆಕ್ ಭೋವ್ ಥೊಡಿ ರುಪ್ಯಾಚ್ಯಾ ಝರಿಚಿ ದೇಗ್‍ಯೀ ಆಸ್‍ಲ್ಲಿ. ಜಾವ್ಯೆತೊ ತೊ ಕಾಪ್ಡಾಚೊ ತೀರ್, ವಾ ಜಾವ್ಯೆತೊ ತೊ – ಧನ್ವಂತ್ ಮುಸ್ಲಿಮ್ ಸ್ತ್ರೀಯಾಂನಿ ನ್ಹೆಸ್ಚ್ಯಾ ಬುರ್ಖಾಚೊ ತೀರ್. ಚತ್ರಾಯೆನ್ ದೊಡುನ್, ಆಪ್ಲ್ಯಾ ಕಮರ್‌ಬಾಂಧಾಂತ್ ತಾಣೆಂ ತೊ ಶಿರ್ಕಯ್ಲೊ.

ರುಕಾ ಮುಳಾಕ್ ಪಾಟಿಂ ಯೇವ್ನ್, ಪರ್ತ್ಯಾನ್ ತ್ಯಾ ಬೊಲ್ಯಾಕ್ ತಾಣೆಂ ದೀಷ್ಟ್ ಲಾಯ್ಲಿ. ಮತಿಂತ್ಲೆಂ ತಾಣೆಂ ಉಚಾರುಂಕ್ ನಾ.

“ಭಾಯ್ರ್ ಸರಾ” ತಾಣೆಂ ತಾಕಿದ್ ದಿಲಿ.

“ಮೊಳ್ಯಾ ಭಾಯ್ರ್, ಘೊಡ್ಯಾಂಕ್ ರಾವಯಿಲ್ಲೆ ಕಡೆನ್ ಪಾವ್ತಚ್, ಆಪ್ಲ್ಯಾ ಘೊಡ್ಯಾರ್ ಚಡೊನ್, ವಸ್ತ್ರಾಚಿ ಪೊಟ್ಲಿ ತಾಣೆಂ ಘೆತ್ಲಿ. ಅಂತುಲ್ಯಾಕ್ ಅಶೆಂ ತಾಣೆಂ ಫರ್ಮಾಯ್ಲೆಂ:

“ಸೋಮಯ್ಯ ಆನಿ ಹೆರ್ ತೇಗ್ ಸವಾರ್, ಮ್ಹಜ್ಯಾ ಸಾಂಗಾತಾ ಯೇಂವ್ದಿತ್. ತುಂ, ಹೆರ್ ಜವಾನಾಂಕ್ ಘೆವ್ನ್, ಕಾವೂರ್ಚಿ ವಾಟ್ ಧರ್. ದುಮ್ಗಾ ಪಿಂತಾಚ್ಯಾ ಘರಾ ಥಾವ್ನ್ ಚಿಕ್ಕೆ ಪಯ್ಸ್ ಆಸ್ಚ್ಯಾ ತ್ಯಾ ಫಾಲ್ಕ್ಯಾಂತ್ ಲಂಗರ್ ಮಾರ್ನ್, ಮ್ಹಜಿ ವಾಟ್ ರಾಕಾ. ರುಕಾಂಚ್ಯಾ ಆಡೊಸಾಕ್ ರಾವೊನ್, ದುಮ್ಗಾ ಪಿಂತಾಚ್ಯಾ ಘರಾ ಥಾವ್ನ್ ವಾ ಘರಾಕ್ ವೆಚೆ ಕೋಣ್ ದಿಸ್ಲ್ಯಾರೀ, ಬಾದಶಹಾಚ್ಯಾ ನಾಂವಾನ್ ತಾಂಕಾಂ ಖಡಾಯಾ. ಆನಿ ಹಾಂವ್ ಯೇವ್ನ್ ಪಾವ್ತಾಂ ಪರ್ಯಾಂತ್ ರಾವಯಾ. ಆಮ್ಕಾಂ ಜಣಾಂಚಿ ಗರ್ಜ್ ಆಸಾ.”

“ಆನಿ, ತುಂ ಧನ್ಯಾ…”

“ಹಾಂವ್, ಬೊಕ್ಕಪಟ್ಟಣಾಕ್ ವಚೊನ್ ಜರೂರ್ ಯೆತಾಂ. ಥಂಯ್ಸರ್ ಥೊಡೆ ವಿಷಯ್ ಸ್ಪಷ್ಟ್ ಕರ್ನ್ ಘೆಂವ್ಕ್ ಆಸಾತ್” ಮ್ಹಣೊನ್, ರಾಕುಸಾಕ್ ತಾಣೆಂ ಘುಂವ್ಡಾವ್ನ್, ಹಳ್ತಾನ್ ಧಾಂವ್ಡಾಯ್ಲೆಂ. ತಾಣೆಂ ಫರ್ಮಾಯಿಲ್ಲೆ ಸವಾರ್, ತಾಚೊ ಪಾಟ್ಲಾವ್ ಕರ್ನ್ ಗೆಲೆ.

ಅಂತುಲೊ ಪಡ್ವಳ್ ಆನಿ ಹೆರ್ ಸಾತ್ ಜಣ್, ಕಾವೂರ್ಚಿ ವಾಟ್ ಧರ್ನ್ ಗೆಲೆ.

ಬೊಕ್ಕಪಟ್ಟಣಾಕ್ ಪಾವ್ತಚ್, ಸರ್ದಾರ್ ಸಿಮಾಂವ್ನ್ ಚಡ್ ವೇಳ್ ಕಾಡುಂಕ್ ನಾ. ಹಸ್ಸನ್ ಮಹಮ್ಮದಾಚ್ಯಾ ಘರಾ ಫುಡ್ಲ್ಯಾ ಪಾಗೊರಾಚೆಂ ದಾರ್, ತಾಲ್ವಾರಿಚ್ಯಾ ಥೊರ್ವಾನ್ ತಾಣೆಂ ಠೊಕ್ಲೆಂ.

ಬಗ್ಲೆಚ್ಯಾ ಜನೆಲಾ ಇಡ್ಯಾಂತ್ಲ್ಯಾನ್ ಕೊಣೆಂಗೀ ಚತ್ರಾಯೆನ್ ತಿಳ್ಳೆಂ. ಉಪ್ರಾಂತ್ ತುರ್ತಾನ್ ಯೇವ್ನ್ ದಾರ್ ಉಗಡ್ಲೆಂ.

“ಸರ್ದಾರ್ ಸಾಹೇಬ್! ಸಲಾಮ್… ಸ್ವಾಗತ್!”

“ಸಲಾಮ್, ಫರೀದಾ ಬೇಗಂ-ಬಹೆನ್!” ಮ್ಹಣಾಲೊ ಸರ್ದಾರ್ ಆನಿ ಘಳಾಯ್ ಕರಿನಾಸ್ತಾಂ, ರಾಕುಸಾಚೊ ಲಗಾಮ್ ಧರ್ನ್ ಭಿತರ್ ಸರ್ಲೊ. ಲಾಗ್ಶಿಲ್ಯಾ ಜನೆಲಾಚ್ಯಾ ಸರಳಾಕ್ ಲಗಾಮ್ ತಾಣೆಂ ಸಾಂಪ್ಡಾಯ್ಲೊ.

ತಿತ್ಲ್ಯಾ ಭಿತರ್ “ಚಾಂದ್ ಬೀಬೀ… ಸರ್ದಾರ್ ಸಾಹೇಬ್!” ಮ್ಹಣೊನ್ ಉಲೊ ದೀವ್ನ್, ಫರೀದಾ ಬೇಗಂ ಭಿತರ್ ಧಾಂವ್‍ಲ್ಲಿ. ಸರ್ದಾರ್ ಮೆಟಾಂ ಚಡ್ಚ್ಯಾ ಭಿತರ್, ಭಿತರ್ ಥಾವ್ನ್ ಚಾಂದ್‍ಬೀಬಿ ಆನಿ ಮಿರಿಯಮ್ ಭಾಯ್ರ್ ಯೇವ್ನ್ ಪಾವ್ಲಿಂ.

“ಸಲಾಮ್ ಸರ್ದಾರ್ ಭಾಯೀ! ಹಾಂವ್ ಸಮ್ಜತಾಂ ಈಸಾನ್‍ಂಚ್ ತುಕಾ ಹಾಡಯ್ಲಾ. ಆಮ್ಚೊ ಯೆಜ್ಮಾನಿ ಘರಾ ನಾತ್‍ಲ್ಲ್ಯಾ ವೆಳಾರ್‌ಚ್ ಭೋವ್ ವ್ಹಡ್ ಮುಷ್ಕಿಲ್ ಜಾಲಾಂ!” ಸಂತೊಸಾನ್ ಆನಿ ದುಖಾನ್ ತಿಚೆ ದೊಳೆ ಭರ್ಲೆ.

“ಮ್ಹಾಕಾ ಸಗ್ಳಿ ಖಬರ್ ಆಸಾ ಬೀಬಿ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಬಗ್ಲೆಚ್ಯಾ ಬಾಂಕಾರ್ ತೆಂಕೊನ್. “ರಾವೊಂಕ್ ಮ್ಹಾಕಾ ಚಡ್ ವೇಳ್ ನಾ. ಘಡ್‍ಲ್ಲಿ ಗಜಾಲ್ ತುಮ್ಚೆ ಥಾವ್ನ್ ಖುದ್ ಆಯ್ಕಯಾಂ ಮ್ಹಣ್ ಆಯ್ಲೊಂ.”

“ಸಾಂಗ್ತಾಂ ಸರ್ದಾರ್ ಭಾಯೀ… ಫರೀದಾ ಬಹೆನ್, ಸರ್ದಾರಾಕ್ ಇಲ್ಲೆಂ ಪಿಯೆಂವ್ಕ್…”

“ಪಿಯೆಂವ್ಕ್ ನಾಕಾ… ಪ್ರಸ್ತಾಪ್ ಆಯ್ಕಯಾಂ” ಅಮ್ಸರ್ಲೊ ಸರ್ದಾರ್, ಲಾಗಿಂ ಆಯಿಲ್ಲ್ಯಾ ಬಾಳ್ ಮಿರಿಯಮಾಕ್ ಉಕ್ಲುನ್ ಉಸ್ಕ್ಯಾರ್ ತಾಣೆಂ ಬಸಯ್ಲೆಂ.

ಚಾಂದ್‍ಬೀಬಿನ್ ಆನಿ ಮಧೆಂ ಮಧೆಂ ಫರೀದಾನ್, ವೆರೊನಿಕಾಬಿ ಆನಿ ಮೊನಿಕಾಬಿ ನಪಂಯ್ಚ್ ಜಾಲ್ಲಿ ಖಬರ್, ತಾಂಕಾಂ ಕಳಿತ್ ಆಸ್‍ಲ್ಲೆಪರಿಂ, ಸುಸ್ಕಾರ್ನ್ ಆನಿ ನಾಕ್ ಪೀಳ್ನ್ ಸಾಂಗ್ಲಿ.

“ತಿತ್ಲಿಚ್ ಖಬರ್ ಮ್ಹಾಕಾ ವೀರಪ್ಪ ನಾಯ್ಕಾನ್ ಸಾಂಗ್ಲ್ಯಾ” ಮ್ಹಣಾಲೊ ಸರ್ದಾರ್. ಉಪ್ರಾಂತ್, “ಜಾಕುಲೊ ಪೈ ಮ್ಹಾಕಾ ಮೆಳತ್‍ವೇ?” ವಿಚಾರ್ಲೆಂ ತಾಣೆಂ.

“ತೊ ಕಾಂಯ್ ಮೆಳ್ಳ್ಯಾರ್, ಕಾವೂರ್ ಲಾಗಿಂ ಮೆಳತ್. ವೆರೊನಿಕಾಬಿಕ್ ಆನಿ ಮೊನಿಕಾಬಿಕ್ ಅಪಾಯ್ ಘಡ್ಲ್ಯಾ ಉಪ್ರಾಂತ್, ತೆರೆಜಾಬಿಕ್‍ಯೀ ಅಪಾಯ್ ಆಸ್ಯೆತ್ ದೆಕುನ್, ಹೆರಾಂಕ್ ಕಳವ್ನ್, ತೆಣೆಂಚ್ ಲಿಪೊನ್ ರಾವ್ತಾಂ ಮ್ಹಣ್ ಗೆಲಾ ತೊ.

“ಸಮ್ಜಲೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆನ್ಯೇಕ್ ವಿಷಯ್, ಆಯ್ತಾರಾಚ್ಯಾ ರಾತಿಂ ಭಾಯ್ರ್ ಸರೊನ್ ವೆತಾನಾ, ಮೊನಿಕಾಬಿ ಆನಿ ಹಮೀದಾನ್ ಕಸಲಿಂ ಕಾಪ್ಡಾಂ ಘಾಲ್ಲಿಂ ಜಾವ್ಯೆತ್?”

“ಮೊನಿಕಾಬಿಚೊ…”

“ಮ್ಹಾಕಾ ಉಗ್ಡಾಸ್ ಆಸಾ” ಮ್ಹಣಾಲಿ ಫರೀದಾ. “ಹರ್ಶೆಂಚೆಪರಿಂ ನ್ಹೆಸ್‍ಲ್ಲ್ಯಾ ಕಾಪ್ಡಾಚೆರ್, ಹಾಂವೆಂ ದಿಲ್ಲೊ, ಜಾಂಬ್ಳಿ ವರ್ಣಾಚೊ ಬುರ್ಖಾ.”

ಸರ್ದಾರ್ ಸಿಮಾಂವ್ಕ್, ತಾಣೆಂ ಕಮರ್‌ಬಾಂಧಾಂತ್, ತೀರಾಚಿ ಕೊವ್ಳಿ ಶಿರ್ಕಯಿಲ್ಲೆ ಕಡೆನ್, ಕಾನ್ವೆತೆನ್ ಕೊಂಕ್‍ಲ್ಲೆಪರಿಂ ಭೊಗ್ಲೆಂ. ಪುಣ್ ಹ್ಯಾ ದೊಗೀ ಸ್ತ್ರೀಯಾಂಕ್ ಚಡ್ ಆಕಾಂತೊಂಕ್ ಆನಿ ದುಖ್ ಪಾವೊಂಕ್ ಅವ್ಕಾಸ್ ಜಾಯ್ನಾ ಜಾಂವ್ಚ್ಯಾ ಖಾತಿರ್, ಮೊನೊ ತೊ ರಾವ್ಲೊ.

“ಆನಿ ಹಮೀದಾನ್…” ಉಗ್ಡಾಸ್ ಕರಿಲಾಗ್ಲಿ ಚಾಂದ್‍ಬೀಬಿ. “ಸಾಚಾ ಕಾಳೆಂ ಖೊಮಿಸ್ ಘಾಲ್ಲೊ ಉಗ್ಡಾಸ್ ಆಸಾ ಮ್ಹಾಕಾ.”

“ತುಮ್ಚಿ ಮೆಹರ್ಬಾನಿ – ಖಂತ್ ಕರಿನಾಕಾತ್” ಮ್ಹಣೊನ್ ಸರ್ದಾರ್, ಮಿರಿಯಮಾಕ್ ಸಕಯ್ಲ್ ಉಬೆಂ ಕರ್ನ್ ಉಟ್ಲೊ. ರಾಕುಸಾಚ್ಯಾ ಜೀನಾಕ್ ಶಿರ್ಕಯಿಲ್ಲ್ಯಾ ತ್ಯಾ ವಸ್ತ್ರಾಂಚ್ಯಾ ಪೊಟ್ಲೆಂತ್, ಮ್ಹೆಳೆಂ ಜಾಲ್ಲೆಂ ಆನಿ ರಗ್ತಾಂತ್ ದಾಟ್ಲೆಲೆಂ ಪುಣ್ ‘ಕಾಳೆಂ’ ವಸ್ತುರ್ ಆಸ್‍ಲ್ಲೆಂ. ತಿಂ ವಸ್ತ್ರಾಂ ಹ್ಯಾ ಸ್ತ್ರೀಯಾಂಕ್ ದಾಕವ್ನ್, ತಾಂಕಾಂ ಚಡಿತ್ ದುಖಂವ್ಚೆಂ ನಾಕಾ ಮ್ಹಣ್ ತಾಣೆಂ ನಿಚೆವ್ ಕೆಲೊ. “ಆಮಿ ಆತಾಂಚ್ ವಚಜಾಯ್… ಕಾಮ್ ಆಸಾ… ಹಸ್ಸನ್ ಭಾಯೀ ತರ್ ಆಯ್ಲ್ಯಾರ್, ಹಾಂವ್ ಆಯ್ಲಾಂ ಮ್ಹಣ್ ಖಬರ್ ದಿಯಾ… ಸಲಾಮ್.”

“ಸಲಾಮ್, ಸರ್ದಾರ್ ಸಾಹೇಬ್… ಅಲ್ಲಾ ತುಕಾ ರಾಕೊಂದಿ!”

ಸರ್ದಾರ್ ಸಿಮಾಂವ್, ಥಂಯ್ ಥಾವ್ನ್ ಭಾಯ್ರ್ ಯೇವ್ನ್ ಆಪ್ಲ್ಯಾ ಸವಾರಾಂ ಸಾಂಗಾತಾ ತುರ್ತಾನ್ ಕಾವೂರ್ ವೆಚ್ಯಾ ವಾಟೆಕ್ ಲಾಗ್ಲೊ. ದೀಸ್ ಸಾಂಜ್ ಜಾವ್ನ್ ಯೆತಾಲೊ. ಸರ್ದಾರ್ ಸಿಮಾಂವ್ಕ್ ಆನಿ ತಾಚ್ಯಾ ಸವಾರಾಂಕ್ ಸಾರ್ಕೊ ವಿಶೆವ್ ನಾತ್‍ಲ್ಲೊ. ತರೀ, ತಾಣಿಂ ಸದ್ದ್ಯಾಕ್ ವಿಶೆವ್ ಘೆಂವ್ಚೆಪರಿಂ ನಾತ್‍ಲ್ಲೆಂ.

ಘೊಡ್ಯಾಚ್ಯಾ ಧಾಂವೆ ಪ್ರಾಸ್ ಚಡ್ ವೆಗಾನ್ ಆನಿ ಚಡ್ ಫುಡೆಂ ಸರ್ದಾರ್ ಸಿಮಾಂವ್ಚಿಂ ಚಿಂತ್ನಾಂ ಉಬ್ತಾಲಿಂ. ಹಸ್ಸನ್ ಮಹಮ್ಮದಾಗೆರ್ ಚಾಕ್ರೆಕ್ ಆಸೊನ್, ವೆರೊನಿಕಾ ಕುಂವರ್ನಿಚಿ ಆನಿ ಮೊನಿಕಾಚಿಯೀ ಸೆವಾ ಕರ್ನ್ ಆಸ್‍ಲ್ಲೊ ತೊ ಯುವಕ್, ನಿಜಾಯ್ಕೀ ಮೆಲಾ ಮ್ಹಣ್ ಪಾತ್ಯೆಂವ್ಕ್, ಕಿತ್ಯಾ ಖಾತಿರ್‌ಗೀ, ತಾಚೆಂ ಮನ್ ಕಬೂಲ್ ಜಾಯ್ನಾತ್‍ಲ್ಲೆಂ. ಹಮೀದಾಚ್ಯಾ ಸ್ಥಾನಾರ್, ಪಯ್ಲೊ ಆಸ್‍ಲ್ಲೊ ಕುಞಿಕುಟ್ಟಿ, ಧನಾಚ್ಯೆ ಆಶೆನ್ ಜುದಾಸ್ ಜಾಲ್ಲೊ. ಶೆಕಿಂ, ಬೋಳೂರ್ ಜಯ್ಲಾಂತ್, ಕ್ರಿಸ್ತಾಂವ್ ಕೈದಿ ಸ್ವತಂತ್ರ್ ಜಾಲ್ಲ್ಯಾ ಕಾರಣಾಚೊ ಘುಟ್ ಉರಂವ್ಚ್ಯಾ ಖಾತಿರ್, ಸರ್ದಾರ್ ಸಿಮಾಂವ್ಚ್ಯಾಚ್ ಹಾತಾಂತ್ ಕಾಬಾರ್ ಜಾಲ್ಲೊ… ತರ್ ಹಮೀದ್? ಕಾಂಯ್, ಮೊನಿಕಾ ಖಾತಿರ್, ತಿಕಾ ಅಪಹರ್ಸಿಲ್ಲ್ಯಾ ದುಸ್ಮಾನಾಂ ಲಾಗಿಂ ಝಗ್ಡೊನ್ ಮೆಲಾ ಜಾವ್ಯೆತ್..? ಬಂದಡೆ ವರ್ವಿಂ, ಕ್ರಿಸ್ತಾ ಖಾತಿರ್ ಥೊಡೆ ಕ್ರಿಸ್ತಾಂವ್ ಮೊರ್ತಾನಾ, ತ್ಯಾ ಕ್ರಿಸ್ತಾಂವಾಂ ಖಾತಿರ್ ಥೊಡ್ಯಾ ಮುಸ್ಲಿಮಾಂನಿ ಜೀವ್ ದಿಲಾ ಮ್ಹಳ್ಳ್ಯಾ ಸತಾಕ್ ಸಾಕ್ಸ್ ದಿಲ್ಲೆಪರಿಂ ಜಾಯ್ತ್! ಖರೆಂಚ್, ನಿತಿ ಖಾತಿರ್ ಆನಿ ವಾಜ್ಭಿ ತೆಂ ಉತಾರ್: ಖರ‍್ಯಾ ವಿಶ್ವಾಸಾಕ್, ಮಾಯಾಮೊಗಾಕ್ ಆನಿ ಮಯ್ಪಾಸಾಕ್ ಜಾತ್ ವಾ ಮತ್ ಮ್ಹಳ್ಳೊ ಬೇಧ್ ನಾ..!

ಸರ್ದಾರ್ ಸಿಮಾಂವ್ಚ್ಯಾ ಜಾಣ್ವಾಯೆ ಪರ್ಮಾಣೆಂ – ತ್ಯಾ ದೀಸ್ ತಾಣಿಂ ಮೊಳ್ಯಾಂತ್ ಪಳೆಲ್ಲ್ಯಾ ಮೊಡ್ಯಾಚಿ ಘಡ್ವಳ್, ಸತ್ರಾ-ಆಟ್ರಾ ವರ್ಸಾಂ ಭಿತರ್ಲ್ಯಾ ಯುವಕಾಚಿ ನಹಿಂ, ಬಗಾರ್, ಜೂನ್ ಜಾಲ್ಲ್ಯಾ ಧಡಂಗ್ ದಾದ್ಲ್ಯಾಚಿ..! ದುಸ್ರೊ ವಿಷಯ್: ಮೆಳ್ಳೆಲಿಂ ರಗ್ತಾಚಿಂ ವಸ್ತ್ರಾಂ, ಮೊಡ್ಯಾರ್ ಥಾವ್ನ್ ಫಾಪ್ಸಲ್ಲೆಪರಿಂ ನಾತ್‍ಲ್ಲಿಂ, ಬಗಾರ್ ಬೇಪಿಂಜ್ಕರ್ ಆಸ್‍ಲ್ಲಿಂ..!

ಅಸಲೆ ಸರ್ವ್ ವಿಚಾರ್, ಜಾಂವ್ ಅಭಿಪ್ರಾಯೊ, ಸರ್ದಾರ್ ಸಿಮಾಂವ್ನ್ ತ್ಯಾ ವೆಳಾ ಕೊಣಾಯ್ ಕಡೆನ್ ಉಚಾರ್ಚೆಪರಿಂ ನಾತ್‍ಲ್ಲೆಂ. ಉಚಾರ್ಚೆಂ ಮನ್ ವಾ ಭರ್ವಸೊಯೀ ತಾಚೆ ಥಂಯ್ ನಿದ್ರೇಸ್ತ್ ಜಾಲ್ಲೊ. ಪರಿಸ್ಥಿತಿಚ್ಯಾ ಆನಿ ಸನ್ನಿವೇಶಾಂಚ್ಯಾ ಖಳಾಂತ್ ಆನಿ ಖೆಳಾಂತ್ ತೊ ಎಕ್ಸುರೊ ಜಾಲ್ಲೊ. ಎದೊಳ್ ಶಿಕ್‍ಲ್ಲ್ಯಾ ಲಿಸಾಂವಾಂನಿ ಆನಿ ಜಿಕ್‍ಲ್ಲ್ಯಾ ಖೆಸ್ತಾಂವಾಂನಿ ಉರೊನ್, ಎಕ್ಸುರ್ಪಣಿಂ ಪಯ್ಣ್ ತೊ ಕರ್ತಾಲೊ. ತಸಲೆಂ ಪಯ್ಣ್ ಚಡ್ ಲಾಂಬಾಜಾಯ್ ಮ್ಹಳ್ಳಿ ಆಶಾ ತಾಕಾ ನಾತ್‍ಲ್ಲಿ… ಟಿಪ್ಪುಚ್ಯಾ ರಾಜಕೀಯ್ ಗುರ್ಪೊಳ್ಯಾಂತ್ ಫಕತ್ ಏಕ್ ಗುಲೊ ತೊ ಜಾವ್ನಾಸ್ತಾಂ, ಸಮಾಜ್-ಭಕ್ತೆಚೊ ಆನಿ ಧಾರ್ಮಿಕ್ ಶ್ರದ್ಧೆಚೊ ನಿಗೂಢ್ ಉಲೊ ಮಾತ್ರ್ ತಾಕಾ ಉಬೊ ದವರ್ನ್ ಆಸ್‍ಲ್ಲೊ.

ಅಸಲ್ಯಾ ಚಿಂತ್ನಾಂನಿ, ಸರ್ದಾರ್ ಸಿಮಾಂವ್, ಬಿಲ್ಕುಲ್ ಎಕ್ಸುರೊ ಜಾವ್ನಾಸ್‍ಲ್ಲೊ ಮ್ಹಣ್ಚ್ಯಾಂತ್ ದುಬಾವ್ ನಾ. ಕಾವೂರ್ ವೆಚ್ಯಾ ತ್ಯಾ ವಾಟೆರ್, ರಾಕುಸಾಚ್ಯಾ ಪಾಟಿರ್, ಸ್ವಯಂಚಾಲಿತ್ ಸವಾರಿ ಕರ್ನ್ ತೊ ವೆತಾನಾ, ಹಿಂ ಚಿಂತ್ನಾಂ ತಾಕಾ ತುಕ್ಲಾಯ್ತಾಲಿಂ. ಪುಣ್ ‘ಸಮಸ್ಸೆ ಜಾಂವ್ ತೆ ಕಿತ್ಲೆಯೀ ವಿಕಟ್, ಅಪಾಯಾಚಿಂ ಕುಪಾಂ ತಿಂ ಜಾಂವ್ ಕಿತ್ಲಿಂಯೀ ದಾಟ್ – ಕರ್ತವ್ಯಾಚಿ ಮಾತ್ರ್ ಏಕ್ ವಾಟ್ ನೀಟ್, ಅಮರ್ ಸುಖಾಚೊ ಮುಕುಟ್!’ – ತೊ ಭುರ್ಗೊ ಜಾವ್ನಾಸ್ತಾನಾ, ಒಮ್ಜೂರಾಂತ್ ವಿಗಾರ್ ಜಾವ್ನಾಸ್‍ಲ್ಲ್ಯಾ ಪಾದ್ರ್ ಇನಾಸ್ ಕೈತಾನ್ ದೆ ಸಿಲ್ವಾ ದೆ ಗ್ರಾಕಾನ್, ಢೊಕೊ ಠೊಕುನ್ ಗಾಯನ್ ಕೆಲ್ಲ್ಯಾ ಶ್ಲೋಕಾಚೊ ಉಗ್ಡಾಸ್ ತಾಕಾ ಆಯ್ಲೊ..!

ಕಾವೂರ್ ಫಾಲ್ಕ್ಯಾ ಲಾಗಿಂ ತೆ ಯೇವ್ನ್ ಪಾವ್ಲೆ. ದೀಸ್ ಆಮೊರಿ ಜಾಲ್ಲೊ. ಕಡ್ಸ್ಯಾ ಬಗ್ಲೆಚ್ಯಾ ತೆವ್ಶಿಲ್ಯಾ ಗುಂರ್ಪ್ಯಾ ಥಾವ್ನ್, ಸಾಂಗಾತಿಣ್ ಸಾಂಡ್‍ಲ್ಲ್ಯಾ ಇಟ್ಟೆರಿ ಸುಕ್ಣ್ಯಾಪರಿಂ ಆವಾಜ್ ಜಾಲೊ… ಜಮೆದಾರ್ ಅಂತುಲ್ಯಾನ್ ದಿಲ್ಲೊ ಸ್ವರಾ ಸಂಕೇತ್ ತೊ, ಸರ್ದಾರಾನ್ ಪಾಟಿಂ ವ್ಹಾಜಯ್ಲೊ.

ಕ್ಷಣಾ ಭಿತರ್ ಅಂತುಲೊ ಪ್ರತ್ಯಕ್ಷ್ ಜಾಲೊ. ಸರ್ದಾರ್ ಆನಿ ಸಾಂಗಾತಿ, ದೆಂವ್ಲೆ.

“ಕಿತೆಂ ಖಬರ್?” ಸವಾಲ್.

“ವಿಶೇಸ್ ಕಾಂಯ್ ನಾ… ಆಯಿಲ್ಲೆ ಗೆಲ್ಲೆ ಕೊಣೀ ನಾಂತ್” – ಅಂತುಲ್ಯಾನ್ ವ್ಹಳೂ ಜಾಪ್ ದಿಲಿ.

“ಹೆರ್ ಕಾಂಯ್?”

“ಆಮ್ಚ್ಯಾ ದೊಗಾಂ ಸವಾರಾಂಕ್ ಹಾಂವೆಂ, ಪಿಂತಾಚ್ಯಾ ಘರಾಕ್ ಜಾತಾ ತಿತ್ಲ್ಯಾ ಲಾಗಿಂ ಪರ್ಮಳ್ ಪಾರ್ಕುನ್ ಯೇಂವ್ಕ್ ಧಾಡ್‍ಲ್ಲೆಂ” ಮ್ಹಣಾಲೊ ಅಂತುಲೊ ಪಡ್ವಳ್. “ತೆ ಯೇವ್ನ್ ಸಾಂಗ್ತಾತ್…”

“ಕಿತೆಂ ಸಾಂಗ್ತಾತ್?”

“ಪಿಂತಾಗೆರ್ ತೇಗ್ ಚವ್ಗ್ ಕಾಟ್ ಶಿಪಾಯ್ ಆಸ್‍ಲ್ಲೆಪರಿಂ ತಾಂಕಾಂ ದಿಸ್ಲೆಂ ಖಂಯ್. ಹಾಸ್ಚೆಂ ಆನಿ ತಾರಿಫೊ ಕರ್ಚೆಂ ಆಯ್ಕಲೆಂ ಖಂಯ್.”

“ತರ್, ಹುಶಾರ್ ಜಾಯಾ!” ಸರ್ದಾರ್ ಸಿಮಾಂವ್ಚೊ ಜಿನೊಸ್ ಬದ್ಲೊನ್ ಆವೇಶ್‍ಭರಿತ್ ಜಾಲೊ. “ಘೊಡ್ಯಾಂಕ್ ಹಾಂಗಾಸರ್ ಭದ್ರ್ ದವರ್ನ್, ಪಹರ‍್ಯಾಕ್ ಕೊಣೀ ದೋಗ್ ಸವಾರ್ ರಾವೊಂದಿತ್. ಉರ್ಲೆಲ್ಯಾಂ ಸಾಂಗಾತಾ, ಪಿಂತಾಚ್ಯಾ ಘರಾಕ್ ಆಮಿ ಭೆಟ್ ದಿತಾಂವ್. ಆತಾಂಚ್, ಹಾತೆರಾಂ ಸಮೇತ್ ಸವಾರ್ ಸಗ್ಳೆ ತಯಾರ್ ಜಾಂವ್ದಿತ್…”

ಮ್ಹಣ್ತಾನಾಂಚ್, ತ್ಯಾ ಕಾಳೊಕಾಂತ್ಲ್ಯಾನ್ ತಾಂಕಾಂ ಏಕ್ ಆವಾಜ್ ಆಯ್ಕಲೊ – ಜೊ, ಥೊಡ್ಯಾ ದಿಸಾಂ ಆದಿಂ, ಸರ್ದಾರ್ ಸಿಮಾಂವ್ ಆಯ್ಕೊನ್ ಜಾಣಾಂಸ್‍ಲ್ಲೊ – ಏಕ್ ಘುಗ್, ದೋನ್ ಪಾವ್ಟಿಂ ಮಟ್ವ್ಯಾನ್, ತಿಸ್ರೆ ಪಾವ್ಟಿಂ ಲಾಂಬಾಯೆನ್, ಆನಿ ಉಪ್ರಾಂತ್ ಪರ್ತುನ್ ದೋನ್ ಪಾವ್ಟಿಂ ಮಟ್ವ್ಯಾನ್ ಘುಗೆಲಿ!

“ಜಾಗ್ರುತ್!” ಮ್ಹಣಾಲೊ ಸರ್ದಾರ್, ವ್ಹಳೂ ಚಿಂತುನ್. “ಹಾಂವ್ ಜಾಣಾಂಸ್‍ಲ್ಲ್ಯಾ ಪರ್ಮಾಣೆಂ, ತೊ ವರ್ತವ್ತಾ, ಕಿತೆಂಯೀ ಆಸೊಂ… ಘುಗ್-ಘುಗ್ – ಘೂ…ಗ್ – ಘುಗ್ ಘುಗ್!” ತಾಣೆಂಯೀ ಆವಾಜ್ ಕೆಲೊ.

ತೆವ್ಶಿಲ್ಯಾ ಕಾಳೊಕಾಂತ್ಲ್ಯಾನ್, ಕಾಳ್ಕುರಿ ಏಕ್ ವ್ಯಕ್ತಿ ಹೆವ್ಶಿನ್ ಆಯ್ಲಿ.

“ನಾಂವ್?” ವಿಚಾರ್ಲೆಂ ಸರ್ದಾರ್ ಸಿಮಾಂವ್ನ್.

“ತಿ… ತಿಮ್ಮಿ!” ಆಯ್ಲಿ ಜಾಪ್, ಮೆಳೊನ್ ಸವಾಲ್, “ತುಮಿ, ಹೆಂ… ಕೋಣ್ ಜಾವ್ಯೆತ್?”

“ಆಮಿ, ದುಸ್ಮಾನ್ ನಹಿಂ ತಿಮ್ಮಿ” ಮ್ಹಣಾಲೊ ಸರ್ದಾರ್ – ತಿಮ್ಮಿ ಆನಿ ಬೊಮ್ಮಾ ವಿಷಯಿಂ ತೊ ಆಯ್ಕೊನ್ ಜಾಣಾಂಸ್‍ಲ್ಲೊ. “ಕಿತೆಂ ಜಾಲಾಂ?”

“ಜಾಲಾಂ… ಫಾಲಾಂ!” ಸುಸ್ಕಾರ್ಲೆಂ ತಿಮ್ಮಿ. “ತುರ್ಕಿ ಶಿಪಾಯಾಂಚೆಂ ಮೊಡೆಂ ಆಯ್ಲಾಂ… ಇಜ್ಜಮ್ಮಾಕ್ ತಾಣಿಂ ಉಬಿ ಕೆಲ್ಯಾ… ಅಬ್ಬಾಕ್ ಆನಿ ಜಾಕುಲೊ ನಾಗೆರೆಕ್ ಬಾಂಧುನ್ ಘಾಲಾಂ! ದೇವೆರೆ..! ಕೊಣೀ ಯೇನಾಂಡಾ, ತಾಂಕಾಂ ತೆ ಕೆರ್ಪೆರ್! ಇಜ್ಜಮ್ಮಾಕ್…” ರಡ್ಲೆಂ ತೆಂ. “ಪಾಂಚ್ ಜಣ್!”

“ಭಿಯೆನಾಕಾ ಭುರ್ಗ್ಯಾ… ಪಾಟಿಂ ಚಲ್, ಆನಿ ಪಯ್ಸ್ ರಾವ್” ಮ್ಹಣಾಲೊ ಸರ್ದಾರ್ ಸಿಮಾಂವ್, ಜಟ್ಪಟ್ ಹುಕುಮ್ ದೀವ್ನ್. “ಅಂತುಲೊ ಪಡ್ವಳ್, ಆನಿ ಹೆರ್ ನೋವ್ ಜಣ್… ಹಾತೆರಾಂ ಹಾತಿಂ… ಪಾಟ್ಲಾವ್ ಕರಾ… ಆವಾಜ್ ಬಂದ್!”

ಚಾಂದ್ಣೆಂ ಉದೆಂವ್ಕ್ ನಾತ್‍ಲ್ಲೆಂ. ಅರ್ಕ್‍ಮರ್ಕ್ ಉಜ್ವಾಡಾಂತ್, ಮೇರ್ ಉತ್ರೊನ್ ಆನಿ ಲ್ಹಾನ್ ಘಾಟಿ ಚಡೊನ್, ಪಿಂತಾಗೆಲ್ಯಾ ಆಂಗ್ಣಾಕ್ ತೆ ಪಾವ್ಲೆ. ತ್ಯಾ ಘಡ್ಬಡೆಂತ್, ಸರ್ದಾರಾಕ್ ಏಕ್ ಸಬ್ದ್ ಸಾಂಗೊನ್, ತಿಮ್ಮಿ ಲಿಪ್ಲೆಂ.

“ಖಡಾ!” ಮ್ಹಣಾಲೊ ಸರ್ದಾರ್ ಸಿಮಾಂವ್.

ಭಾಯ್ಲ್ಯಾನ್ ಕಾಳೊಕ್ ಆಸ್‍ಲ್ಲೊ. ಸಾಲಾಂತ್, ಉಮ್ಕಳ್ಚ್ಯಾ ಸೊಮಯೆಚ್ಯಾ ಉಜ್ವಾಡಾಂತ್ ಚಲ್ಚೆಂ ದೃಶ್ಯ್, ಮಸ್ಕೆಂ ಮಸ್ಕೆಂ ತಾಂಕಾಂ ದಿಸ್ಲೆಂ.

ಸರ್ದಾರ್ ಸಿಮಾಂವ್ನ್ ವ್ಹಳೂ ಮೆಟಾಂ ಮುಖಾರ್ ಕಾಡ್ಲಿಂ.

“ಸೊಪ್ಯಾ ಸಕಯ್ಲ್, ಕಾಳೊಕಾಂತ್ ರಾವಾ” ತಾಕಿದ್ ದಿಲಿ ತಾಣೆಂ. “ಪಾಂಚ್‍ಚ್ ಜಣ್ ಆಸಾತ್. ಹಾಂವ್ ಭಿತರ್ ಸರ್ತಚ್, ಜಟ್ಪಟ್ ಫುಡೆಂ ಯೇವ್ನ್ ಕಾಮ್ ಕರಾ. ಜೀವ್ ಕಾಡ್ಚಿ ಗರ್ಜ್ ನಾ. ಅಶಕ್ತ್ ವಾ ಹಾತೆರಾಂ ವಿಣ್ಗೆ ಮಾತ್ರ್ ಕೆಲ್ಯಾರ್ ಪುರೊ.”

ಭಿತರ್ ಥಾವ್ನ್, ಎಕಾ ಸ್ತ್ರೀಯೆಚಿ – ಭಿಯಾಚಿ – ಕಿಂಕ್ರಾಟ್ ಆಯ್ಕಲಿ. ಭಿತರ್ ಉಡ್ಕಿ ಮಾರುಂಕ್, ಸರ್ದಾರ್ ಸಿಮಾಂವ್, ಆವೇಶಾನ್ ಆಯ್ತೊ ಜಾಲೊ.

ನದರ್ ಮಾರ್ನ್, ಭಿತರ್ಲೆಂ ಪ್ರಸಂಗ್, ಖಿಣಾನ್ ತಾಣೆಂ ಪಾರ್ಕಿಲೆಂ: ಸಾಲಾಂತ್, ಅಲ್ತಾರಿ ಸಕಯ್ಲ್ ಆಸ್‍ಲ್ಲ್ಯಾ ಕಂಳ್ಬೆಕ್ ತೆಂಕೊನ್ ಇಜಾಬೆಲ್ ತೆರೆಜ್ ರಾವ್‍ಲ್ಲಿ. ತಿಚೆ ದೊಳೆ, ಭಿಂಯಾನ್ ರುಂದಾಲ್ಲೆ. ಕಾಳ್ಜಾಚೆ ಧಡ್ದಡೆ ಥಾಂಬಂವ್ಕ್ ಮ್ಹಳ್ಳೆಪರಿಂ ದೊನೀ ಹಾತ್ ಆಪ್ಲ್ಯಾ ಹೃದಯಾರ್ ದಾಂಬುನ್ ತಿಣೆಂ ಧರ್‌ಲ್ಲೆ.

ಬಗ್ಲೆಚ್ಯಾ ಕದೆಲಾರ್ ಜಾಕುಲೊ ಪೈ ಬಸೊನ್ ಆಸ್‍ಲ್ಲೊ – ತಾಚೆ ದೊನೀ ಪಾಯ್, ಕದೆಲಾಚ್ಯಾ ಪಾಯಾಂಕ್, ಆನಿ ಹಾತ್ ಪಾಟ್ಲ್ಯಾನ್ ಬಾಂಧುನ್, ತಸೊ ತಾಕಾ ಬಸಯಿಲ್ಲೊ.

ತೆವ್ಶಿಲ್ಯಾನ್ ಬೊಮ್ಮಾಕ್ ದುಕ್ರಾಪರಿಂ ಬಾಂಧುನ್ ಘಾಲ್ಲೊ, ಜೊಯೀ ಭಿಂಯಾನ್ ಆನಿ ದುಕಿನ್ ಪಿಂರ್ಗತಾಲೊ ಆನಿ ಪಂಚಾಂಗಾಂತ್ಲ್ಯಾ ಸಾಂತಾಂಚಿಂ ಆನಿ ಇಂಫೆರ್ನಾಂತ್ಲ್ಯಾ ಭುತಾಂಚಿಂ ನಾಂವಾಂ ಮ್ಹಣ್ಮುಣ್ತಾಲೊ. ಅಸಲೆಂ ದೃಶ್ಯ್ ತಿತ್ಲ್ಯಾರ್‌ಚ್ ಆಖೇರ್ ಕರ್ಯಾಂ ಮ್ಹಣ್, ಆನಿ ಇಜಾಬೆಲ್ ತೆರೆಜಾಕ್, ಪರ್ತ್ಯಾನ್ ಏಕ್ ಪಾವ್ಟಿಂ ಆಕಾಂತಾಚ್ಯಾ ಪರಿಸ್ಥಿತೆಂತ್ಲಿ ಸುಟಯಾಂ ಮ್ಹಣ್, ಸರ್ದಾರ್ ಸಿಮಾಂವ್ಚೆಂ ಮನ್ ಚಡ್ಪಡ್ತಾಲೆಂ ಜಾಲ್ಯಾರೀ, ತೊ ಚಿಕ್ಕೆ ಪಾಟಿಂ ರಾವ್ಲೊ.

ಭಿತರ್ ಆಸ್‍ಲ್ಲ್ಯಾ ತ್ಯಾ ಪುಂಡಾಂಕ್, ಭಾಯ್ಲ್ಯಾನ್ ಕೋಣ್ ಆಸಾತ್ ಮ್ಹಣ್ ಕಳಿತ್ ನಾತ್‍ಲ್ಲೆಂ. ಭಾಯ್ಲ್ಯಾನ್ ನದರ್ ದವರುಂಕ್ ತಾಣಿಂ ಕೊಣಾಕ್‍ಯೀ ರಾವಯ್‍ನಾತ್‍ಲ್ಲ್ಯಾ ವರ್ವಿಂ, ತೆ ನಿಜಾಯ್ಕೀ ತರ್ಬೆತ್ ಜಾಲ್ಲೆ ಶಿಪಾಯ್ ನಹಿಂ ಮ್ಹಳ್ಳೆಂ ಸ್ಪಷ್ಟ್ ಜಾತಾಲೆಂ. ತಾಂಚ್ಯಾ ಮುಖೆಲ್ಯಾಚೊ ಖೆಳ್ ಪಳೆವ್ನ್ ತಾಂಕಾಂ ಮಝಾ ಭೊಗ್ತಾಲಿ. ತೆ ಹಾಸ್ತಾಲೆ.

ಇಜಾಬೆಲ್ ತೆರೆಜಾಚ್ಯಾ ಮಾನಾಕ್ ವಾ ಜಾಕುಲೊ ಪೈ ಆನಿ ಬೊಮ್ಮಾಚ್ಯಾ ಜಿವಾಂಕ್ ಅಪಾಯ್ ಆಸ್ಲ್ಯಾರ್ ತಕ್ಷಣ್ ಕಾರ್ಯಾಕ್ ದೆಂವ್ಚೆಂ – ತೆದೊಳ್ ಪರ್ಯಾಂತ್ ಮುಖೆಲ್ಯಾಕ್ ಉಲಂವ್ಕ್ ಸೊಡ್ಚೆಂ – ಜಬರ್ದಸ್ತಿ ವಾ ದುಬಾವಾಕ್ ಇಡೆಂ ನಾಸ್ತಾಂ, ನಪಂಯ್ಚ್ ಜಾಲ್ಲ್ಯಾ ಸ್ತ್ರೀಯಾಂಚೊ ವಾ ಖಿಲ್ಲೆದಾರಾಚೊ ಪತ್ತೊ ಧರುಂಕ್ ಹಿಶೆ ಕಾಂಯ್ ಮೆಳ್ಳ್ಯಾರೀ ಮೆಳ್ತಿತ್ ಮ್ಹಣ್, ಸರ್ದಾರ್ ಸಿಮಾಂವ್ ಪಾಟಿಂ ರಾವ್‍ಲ್ಲೊ.

“ಹ-ಹ್ಹ-ಹ್ಹಾ! ನಸ್ರಾನಿ ಬಾಯ್ಲೇ” ಮ್ಹಣಾಲೊ ಮುಖೆಲಿ. “ತುಜ್ಯಾ ಚಾಕ್ರಾಚಿ ಗೊಮ್ಟಿ ಹಾಂವೆಂ ಲುಂವೊಂಕ್ ನಾ… ತುವೆಂ ಭೆಷ್ಟಿಚ್ ಕಿಂಕ್ರಾಟ್ ದಿಲಿ… ಹಾಂವೆಂ ಕಾಪ್ಲಿ ತಾಚಿ ಶೆಂಡಿ ಮಾತ್ರ್!” ಮ್ಹಣೊನ್, ಕಾಪ್‍ಲ್ಲಿ ಬೊಮ್ಮಾಚಿ ಶೆಂಡಿ, ದಾವ್ಯಾ ಹಾತಾಚ್ಯಾ ಬೊಟಾಂನಿ ಉಕ್ಲುನ್ ತಾಣೆಂ ಉಜ್ವಾಡಾಕ್ ಧರ್ಲಿ.

“ಹಾಂವೆಂ ವಿಚಾರ್‌ಲ್ಲ್ಯಾ ಸವಾಲಾಂಕ್ ವೆಗಿಂ ಜಾಪ್ ದೀ. ನಾ ಜಾಲ್ಯಾರ್… ತುಜ್ಯಾ ದೊಳ್ಯಾಂ ಮುಖಾರ್‌ಚ್ ಹಾಂಕಾಂ ದೊಗಾಂಯ್ಕೀ…”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಆಮಿ ಫಾಯ್ಸ್ ಕೆಲ್ಲ್ಯೊ ಆದ್ಲ್ಯೊ ಕಾದಂಬರಿ