ಹ್ಯಾಪ್ಪಿ 75ವೊ ಬರ್ತ್‍ಡೇ: ಕೊಂಕ್ಣೆಚೊ ಯೂನಿವರ್ಸಲ್ ರಾಯ್‍ಭಾರಿ – ಡೊ. ಆಸ್ಟಿನ್ ಸೊಜ್ ಪ್ರಭು
Posted on : August 8, 2025 at 5:19 PM
ಗುಮಾನಾಕ್: ಆಸ್ಟಿನ್ ಸೊಜಾಕ್ ಗೌರವಾರ್ಪಣ್ ಕರ್ನ್, ತಾಚ್ಯಾ 75ವ್ಯಾ ಜಲ್ಮಾ ದಿಸಾಚ್ಯಾ ಸಂದರ್ಭಾಕ್, ವೀಜ್ ಕೊಂಕಣಿಚೊ ವಿಶೇಸ್ ಆಂಕೊ ತಯಾರ್ ಜಾಲಾ. ತಾಕಾ ಧಾಡ್‍ಲ್ಲೆಂ ಮ್ಹಜೆಂ ಲೇಖನ್ ಹೆಂ.
ಆಸ್ಟಿನ್ ಡಿಸೋಜಾಕ್ 75 ವರ್ಸಾಂಚಿ ಪ್ರಾಯ್ ಭರ್ತಾ, ಅಗೋಸ್ತಾಂತ್ ತಾಚೆ ವಿಶಿಂಚ್ ವಿಶೇಸ್ ವೀಜ್ ಆಂಕೊ ಕಾಡ್ತಾಂವ್ ಮ್ಹಣ್ ತ್ಯಾ ಆಂಕ್ಯಾಚೊ ಗೌರವ್ ಸಂಪಾದಕ್, ಮಿತ್ರ್ ಜಾನ್ ಸಿರಿಲ್ ಸೊಜಾನ್ ಸಾಂಗ್ತಾನಾ ಖುಷೆ ಸಾಂಗಾತಾ ಏಕ್ ವಿಜ್ಮಿತ್‍ಕಾಯ್ ಭೊಗ್ಲಿ. ಆಸ್ಟಿನಾಕ್ 75 ಜಾಲಿಂಗೀ? ನಿಜಾಯ್ಕೀ, ಆಸ್ಟಿನಾಕ್ ಪ್ರಾಯ್‍ಚ್ ಭರನಾ! ಕಿತ್ಯಾಕ್ ಮ್ಹಳ್ಯಾರ್ ತೊ ಸದಾಂಚ್ ತರ್ನಾಟೊ, ಪೊಕ್ರಿ ಚೆಡೊ. ಹಾಸ್ಕುರೊ ಆನಿ ಸುಡ್ಸುಡಿತ್ ಯುವಕ್. ಪ್ರಾಯ್ ಮ್ಹಳ್ಯಾರ್ ಫಕತ್ ಏಕ್ ಸಂಖೊ ಮಾತ್ರ್. ಆಸ್ಟಿನಾ ಥಂಯ್ ಹೆಂ ಖರೋಖರ್ ಸತ್.
ಪ್ಲಾಟಿನಂ ಜ್ಯುಬಿಲಿಚ್ಯಾ ಹ್ಯಾ ಮಹತ್ವಾಚ್ಯಾ ಸಂದರ್ಭಾರ್ ಆಸ್ಟಿನಾಕ್ ಅಭಿನಂದನ್. ಗೌರವ್ ಸಂಪಾದಕಾನ್ ಮ್ಹಾಕಾ ವೆವೆಗ್ಳೆ ವಿಷಯ್ ದಿಲ್ಲೆ, ಆಸ್ಟಿನಾಚೆರ್ ಬರಂವ್ಕ್, ಪುಣ್ ತೆ ಹೆರಾಂಕ್ ಪ್ರಾಪ್ತ್ ಜಾಲೆ. ದೆಕುನ್ ಹಾಂವ್ ಮ್ಹಜ್ಯಾ ನದ್ರೆಂತ್ಲ್ಯಾ ಆಸ್ಟಿನಾಕ್ ತುಮ್ಚೆ ಸಮೊರ್ ಪ್ರಸ್ತುತ್ ಕರ್ತಾಂ. ಹೆಂಚ್ ಚಡ್ ಸಂಪೆಂ ಮ್ಹಣ್ ಮ್ಹಾಕಾ ಭೊಗ್ತಾ. ತುಮ್ಕಾಂಯೀ ಪಸಂದ್ ಜಾಂವ್ಕ್ ಪುರೊ.
‘ಆಸ್ಟಿನ್ ಡಿಸೋಜ ಪ್ರಭು, ಚಿಕಾಗೊ’ ಮ್ಹಳ್ಳೆಂ ನಾಂವ್ ವಿಶೇಸ್ ಆಕರ್ಷಣಾಚೆಂ. ಲ್ಹಾನ್ ಪ್ರಾಯೆರ್ ಥಾವ್ನ್ ಕೊಂಕ್ಣಿ ಪತ್ರಾಂ, ಪುಸ್ತಕ್ ವಾಚುನ್ ಆಯಿಲ್ಲ್ಯಾನ್ ಜಾಯ್ತ್ಯಾ ಸಾಹಿತಿ, ಸಂಗೀತ್‍ಗಾರ್, ಕಲಾಕಾರಾಂಚಿಂ ನಾಂವಾಂ ವಳ್ಕಿಚಿಂ ಜಾಲ್ಲಿಂ. ತಾಂತ್ಲ್ಯಾ ಚಡಾವತಾಂಕ್ ಏಕ್ ನಾ ಏಕ್ ಸಂದರ್ಭಾರ್ ಪಳೆಲ್ಲೆಂಯೀ ಆಸಾ. ಪುಣ್ ಆಸ್ಟಿನಾಕ್ ಪಳೆಜೆ ತರ್ ಲಾಂಬ್ ಕಾಳ್ ರಾಕಜೆ ಪಡ್‍ಲ್ಲೆಂ.
ಆಸ್ಟಿನ್ ಹುಳ್ವುಳೊ ತರ್ನಾಟೊ. ಲ್ಹಾನ್ ಪ್ರಾಯೆರ್‌ಚ್ ತಾಚಿಂ ಕಾರ್ಬಾರಾಂ ಮಂಗ್ಳುರಿ ಕ್ರಿಸ್ತಾಂವ್ ಸಮಾಜೆಂತ್ ಫಾಮಾದ್ ಜಾಲ್ಲಿಂ. ಹಾಂವ್ ಪಯ್ಶಿಲ್ಯಾ ಬೆಳ್ತಂಗಡಿಚೊಂ ತರೀ, ಕೊಡ್ಯಾಳ್ ಕಾಂಯ್ ಅಪರಿಚಿತ್ ನ್ಹಯ್. ತವಳ್ ತವಳ್ ಭೆಟ್ ಆನಿ ಕೊಂಕ್ಣಿ ಪತ್ರಾಂಚ್ಯಾ ಸಹವಾಸಾನ್ ಕೊಂಕ್ಣಿ ಗಜಾಲಿ ಚಡಾವತ್ ಜಾಣಾಂಸ್ತಾಲೊಂ. ಮಧೆಂ ದೋನ್ ವರ್ಸಾಂ ಕೆ.ಪಿ.ಟಿಂತ್ ಖರ್ಚಿಲ್ಯಾಂತ್. ಉಪ್ರಾಂತ್, ಥೊಡ್ಯಾ ವರ್ಸಾಂ ಉಪ್ರಾಂತ್ 1998 ಸಪ್ತೆಂಬರ್ ಥಾವ್ನ್ ಹಾಂವ್ ಕೊಡ್ಯಾಳ್ಚೊಂಚ್ ಜಾಲಾಂ.
ಆಸ್ಟಿನ್ ಸೊಜಾಚೆಂ ನಾಂವ್ ಗೊತ್ತಾಸ್‍ಲ್ಲೆಂ, ಕಾರ್ಬಾರಾಂ ಥೊಡಿಂ ಕಳ್‍ಲ್ಲಿಂ, ಪುಣ್ ತ್ಯಾ ಮನ್ಶ್ಯಾಕ್ ಪಳೆಂವ್ಕ್ ನಾತ್‍ಲ್ಲೆಂ. ಜಾಯ್ತಿಂ ವರ್ಸಾಂ ಅಮೆರಿಕಾಂತ್‍ಚ್ ತೊ ರೊಂಬ್‍ಲ್ಲೊ. ಕೊಂಕ್ಣಿ ಮಾಯೆಚಿ, ಕ್ರಿಸ್ತಾಂವ್ ಪರ್ಜೆಚಿ ಖತ್ಕತಿ ಸೆವಾ ಕರ್ನ್ ತೀನ್, ಚಾರ್ ಪತ್ರಾಂ ಎಕ್‍ಚ್ ಪಾವ್ಟಿಂ ಸಂಪಾದನ್, ಪ್ರಕಟನ್ ಕರ್ನ್ ನಿಮಾಣೆಂ ಕೊಡ್ತಿ ಮುಖಾಂತ್ರ್, ತೆಂಯೀ ಎಕಾ ಪಾದ್ರಿ ವರ್ವಿಂ, ಟಾರ್ಚರ್ ಭೊಗ್‍ಲ್ಲ್ಯಾ ಆಸ್ಟಿನಾಕ್ ಕಾಜಾರಾ ಮುಖಾಂತ್ರ್ ಸುಟ್ಕಾ ಲಾಭ್‍ಲ್ಲಿ! ಚಿಂತಿನಾಸ್ತಾನಾಂಚ್ ತೊ ಲಗ್ನಾಂತ್ ಬಂಧಿ ಜಾಲೊ ಆನಿ ಕೊಂಕ್ಣಿ ಸಂಸಾರಾಚ್ಯಾ ಕಾಟ್ಕಾಯೆ ಥಾವ್ನ್ ಮುಕ್ತಿ ಜೊಡುಂಕ್ ಪಾವ್ಲೊ!!
ತಶೆಂ ಆಸ್ಯೆತ್, ಅಮೆರಿಕಾಚ್ಯಾ ಚಿಕಾಗೊ ದೆಂವ್‍ಲ್ಲೊ ನಂತೂರ್ಚೊ ‘ವೀಕ್‍ನೆಸ್’ ಆಪ್ಲೆಂ ಕೊಂಕ್ಣೆಚೆಂ ವೀಕ್‍ನೆಸ್ ಸಾಂಡುನ್, ಮಂಗ್ಳುರಿ ಲೊಕಾಚೆಂ ಪಿಶೆಂ ಸೊಡುನ್ ಜಿವಿತಾಂತ್ ಸೆಟ್ಲ್ ಜಾಂವ್ಚ್ಯಾ ಹೊಡ್ಯಾರ್ ಬಸ್ಲೊ. ದೋಣ್ ವೊಚ್ಚುನ್ ವೊಚ್ಚುನ್ ಅಮೆರಿಕಾಚಿ ಬಿಸ್ನೆಸ್ ಮೆಂಟಾಲಿಟಿ ಶಿಕ್ಲೊ. ಪದ್ವ್ಯೊಯೀ ಜೊಡುನ್ ವೃತ್ತಿ ಜಿವಿತಾಂತ್ ಉಂಚಾಯೆಕ್ ಪಾವ್ಲೊ, ಮ್ಯಾನೇಜ್‍ಮೆಂಟ್ ಗುರು ಜಾಲೊ. ಘರಾಂತ್ ಭುರ್ಗಿಂ-ಬಾಳಾಂ ಆವಾಜ್ ಕರ್ತಾನಾ, ಕುಟ್ಮಾ ಜಿವಿತಾಚ್ಯಾ ಜಂಜಾಟಾಂನಿ ಭರ್ಲೊ.
ಪುಣ್ ಸೆವೆಚಿ, ಕಲೆಚಿ, ತಾಲೆಂತಾಂಚಿ ಖೊರೊಜ್ ಆಸಾ ಪಳೆ, ತಿ ಕಿತ್ಲಿ ಧಾಂಪುನ್ ದವರ್ಲ್ಯಾರೀ ಭಾಯ್ರ್ ಯೇಜೆಚ್ – ಉದಾಕ್ ಪಾಜರ್‌ಲ್ಲೆಪರಿಂ, ಉಜ್ವಾಡ್ ತಿಳ್‍ಲ್ಲೆಪರಿಂ! ಬಾಂಧುನ್ ಘಾಲ್ಲ್ಯಾ ಸುಣ್ಯಾನ್, ಸರ್ಪಳೆ ಥಾವ್ನ್ ಸುಟೊಂಕ್ ದಮ್ಮು ಬಾಂಧುನ್ ಹುಳ್ವುಳ್ಚೆಪರಿಂ, ಆಮ್ಕಾಂ ಹಿ ಖೊರೊಜ್ ವೊಗೆ ರಾವೊಂಕ್ ಸೊಡಿನಾ. ಆರ್ಟಿಸ್ಟ್ ಮ್ಹಳ್ಯಾರ್ ಅಶೆಂಚ್. ತಶೆಂಚ್ ಆಸ್ಟಿನಾಕ್ ಸೆವೆಚಿ ಖೊರೊಜ್ ಉಚಾಂಬಳ್ ಕರಿಲಾಗ್ಲಿ, ಅಮೆರಿಕಾಂತ್. ದೆಕುನ್ ಲಯನ್ಸ್ ಕ್ಲಬ್ ಇಂಟರ್‍ನ್ಯಾಶನಲ್ ಭರ್ತಿ ಜಾಲೊ, ಶೈನ್ ಜಾಲೊ.
ಅಶೆಂ ಕೊಡ್ಯಾಳ್ಚೊ ವೀಕ್‍ನೆಸ್ ನಂತೂರ್, ಅಮೆರಿಕಾಚೊ ಲಯನ್ ಕಿಂಗ್ ಜಾಲೊ!
ಮಾಂಯ್‍ಗಾಂವಾಕ್ ಪಾಂಯ್ ತೆಂಕ್ತಾನಾ
ತಶೆಂ ರೂಪಾಂತರ್ ಜಾಲ್ಲೊ ಆಸ್ಟಿನ್ ಮಾಂಯ್‍ಗಾಂವಾಕ್ ಯೆತಾ ಮ್ಹಣ್ ಖಬರ್ ಜಾಲ್ಲಿ. ತಾಚಿ ಖ್ಯಾತಿ ಆಯ್ಕಲ್ಲ್ಯಾನ್ ತೊ ಏಕ್ ವ್ಹಡ್ ವ್ಯಕ್ತಿತ್ವಾಚೊ, ಆಧುನಿಕ್, ಅಮೆರಿಕನ್ ಶೈಲೆಚೊ ಮನಿಸ್, ಟಿಪ್‍ಟಾಪ್ ಸೂಟ್-ಬೂಟ್ ನ್ಹೆಸೊನ್ ಯೆತಲೊ ಮ್ಹಣ್ ಕಲ್ಪನ್ ಕೆಲ್ಲೆಂ ಹಾಂವೆಂ, ಸಹಜ್‍ಪಣಿಂ.
ಪುಣ್ ಅಜ್ಯಾಪ್! ಖಂಚೊ ದೀಸ್ ಖಂಚೊ ಜಾಗೊ ತೊ ಮ್ಹಣ್ ಉಡಾಸ್ ನಾ (ಭೋವ್ಶ್ಯಾ ಮಿಲಾರ್ ಎಕಾ ಧಾಕ್ಟ್ಯಾ ಹೊಲಾಂತ್). ಚಡಾವತ್ ಕೊಂಕ್ಣಿ ಕಾರ್ಯಾಂಕ್ ಹಾಂವ್ ಹಾಜರ್ ಜಾತಾಲೊಂ, ತಶೆಂ ಜಾಯ್ತ್ಯಾ ಕೊಂಕ್ಣಿ ಮಾನಾಯಾಂಚಿ ವಳಕ್ ಆಸ್‍ಲ್ಲಿ. ಹಾಂವ್ ಹಾಜರ್ ಜಾಲ್ಲೊಂ, ಕೊಂಕ್ಣಿ ಲೇಖಕಾಂಚ್ಯಾ ಎಕಾ ಕಾರ್ಯಾಕ್ ಆಸ್ತೆಲೆಂ. ಥಂಯ್ ಆಸ್ಟಿನಾಕ್ ಪಳೆವ್ನ್ ಮ್ಹಾಕಾ ಅಜ್ಯಾಪ್. ತಾಚೆಂ ವ್ಯಕ್ತಿತ್ವ್ ದಿಗಂತಾಕ್ ಪಾಂವ್ಚೆ ತಸಲೆಂ ಮ್ಹಣ್ ಅಂದಾಜ್ ಕೆಲ್ಲ್ಯಾನ್, ಸಿನೆಮಾಂನಿ ಹೀರೊಯಿನಾಚೊ ಬಾಪಯ್ ವಿಮಾನಾ ಥಾವ್ನ್ ದೆಂವ್ಲೆಲಿಂ ದೃಶ್ಯಾಂ ಚಿಂತುನ್ ಆಸ್‍ಲ್ಲ್ಯಾ ಮ್ಹಾಕಾ, ಎಕ್ಲೊ ಮಟ್ವೊ ಆನಿ ಸಾಧ್ಯಾ ನ್ಹೆಸ್ಣಾಚೊ ಸರಳ್ ವ್ಯಕ್ತಿ ಪಳೆಂವ್ಕ್ ಮೆಳ್‍ಲ್ಲೊ. ತೊ ಆಸ್ಟಿನ್‍ಂಚ್ ಮ್ಹಣ್ ಖಚಿತ್ ಕರುಂಕ್ ಮ್ಹಾಕಾ ಜಾಯ್ತೊ ವೇಳ್ ಲಾಗ್‍ಲ್ಲೊ.
ಟೈಲರಾಚೊ ಶಾಣೊ, ಪೊಕ್ರಿ ಪೂತ್!
ತ್ಯಾ ಉಪ್ರಾಂತ್ ಆಸ್ಟಿನ್ ತವಳ್ ತವಳ್ ಗಾಂವಾಕ್ ಆಯ್ಲಾ. ಕೊಂಕ್ಣಿ ಕಾರ್ಯಾಂನಿ ತಾಕಾ ಲಾಗ್ಶಿಲ್ಯಾನ್ ಪಳೆಲ್ಲೆಂ, ಆಯ್ಕಲ್ಲೆಂ ಶಿವಾಯ್ ಖಾಸ್ಗಿ ಸಂಪರ್ಕ್ ನಾತ್‍ಲ್ಲೊಚ್. ತಾಚೊ ಸಂಪರ್ಕ್ ಜಾಲ್ಲೊ ಹಾಂವ್ ಬರವ್ಪಿ ಜಾವ್ತ್ ವರ್ತವ್ಲ್ಯಾ ಉಪ್ರಾಂತ್‍ಚ್! ಆಧುನಿಕ್ ಸಂಪರ್ಕ್ ಕ್ರಾಂತಿ ಸಂಸಾರಾಚ್ಯಾ ಕೊನ್ಶ್ಯಾ ಕೊನ್ಶ್ಯಾರ್ ಆಸ್ಲೆಲ್ಯಾಂಕ್ ಸಯ್ತ್ ಸಾಂಗಾತಾ ಹಾಡುಂಕ್ ಸಕ್ಲಿ. ಮ್ಹಾಕಾ ಆಸ್ಟಿನಾಚೊ ಸಂಪರ್ಕ್ ಜಾಂವ್ಕ್ ಹಿ ಕ್ರಾಂತಿಚ್ ಕಾರಣ್.
ಇ-ಮೈಲ್ ಮುಖಾಂತ್ರ್ ಆಸ್ಟಿನಾ ಲಾಗಿಂ ಹಾಂವ್ ಪಯ್ಲೆಂ ಡೈರೆಕ್ಟ್ ಉಲಯಿಲ್ಲೊಂ. 2008 ಸಪ್ತೆಂಬರ್ ‘ಚರ್ಚ್ ಎಟ್ಯಾಕ್’ ಮ್ಹಾಕಾ ಬರವ್ಪಿ ಜಾವ್ನ್ ಬದ್ಲುಂಕ್ ಸಕ್‍ಲ್ಲೆಂ ಘಡಿತ್. ‘ರಾಕ್ಣೊ’ ಮುಖಾಂತ್ರ್ ಮ್ಹಾಕಾ ಬರವ್ಪ್ಯಾಚೆಂ ಸ್ಥಾನ್‍ಮಾನ್ ಫಾವೊ ಜಾಲ್ಲೆಂ. ತಶೆಂ ಬರವ್ಪ್ಯಾಂಚ್ಯಾ ವರ್ತುಲಾಂತ್ ಪ್ರವೇಶ್ ಜಾಲ್ಲ್ಯಾನ್ ಗ್ರೂಪ್ ಇಮೈಲಾಂಚಿ ರಾಸ್ ಮ್ಹಜ್ಯಾ ಇಮೈಲಾಕ್ ರಿಗ್ತಾನಾ ಆಸ್ಟಿನಾಚೊ ಸಂಪರ್ಕ್ ಕರುಂಕ್ ಸಾಧ್ಯ್ ಜಾಲ್ಲೆಂ. ತ್ಯಾ ಉಪ್ರಾಂತ್ ಆಜೂನ್ ಆಮ್ಚಿ ಸಳಾವಳ್ ದಾಟ್ ಜಾವ್ನ್ ಬರಿಚ್ ಫುಲ್ಲ್ಯಾ, ಸೊಭ್ಲ್ಯಾ ಆನಿ ಘಟ್ ಜಾಲ್ಯಾ.
ಏಕ್ ಪಾವ್ಟಿಂ ಆಸ್ಟಿನಾನ್ ಆಪ್ಲ್ಯಾ ಬಾಪಾಯ್ ವಿಶಿಂ ಕಾಡ್‍ಲ್ಲೊ ಪ್ರಸ್ತಾಪ್ ಮ್ಹಾಕಾ ಕೆದ್ನಾಂಯೀ ವಿಸ್ರನಾ. ತಾಣೆಂ ಸಾಂಗ್‍ಲ್ಲೆಂ ಕಾಮೆಡಿ ಪ್ರಸಂಗ್ ಸ್ವಾರಸ್ಯಾಚೆಂ. ತಾಚೊ ಬಾಪಯ್ ಟೈಲರ್, ಸ್ತ್ರೀಯಾಂಚಿ ಮುಸ್ತಾಯ್ಕಿ ಶಿಂವ್ಚ್ಯಾಂತ್ ಉಸ್ತಾದ್. ತಾಣೆಂ, ಸ್ತ್ರೀಯೊ ತಾಚ್ಯಾ ಆಂಗ್ಡಿಕ್ ಪ್ರವೇಶ್ ಜಾತಾನಾಂಚ್ ಬಾಪಾಯ್ಕ್ ತಾಂಚೆಂ ‘ಸೈಜ್’ ಕಳ್ತಾಲೆಂ ಮ್ಹಣ್ ಜೋಕ್ ಕಾತರ್‌ಲ್ಲೊ! (ಸೈಜ್ ಖಂಚ್ಯಾಚೆಂ ಮ್ಹಣ್ ತಾಣೆಂ ಸಾಂಗೊಂಕ್ ನಾ, ಹಾಂವೆಂಯೀ ವಿಚಾರುಂಕ್ ನಾ. ಆಬ್ಳೆ ಕೊಣೆಂಯೀ ಅಪಕ್ವ್/ವಿಕೃತ್ ‘ಫೆಮಿನಿಸ್ಟ್’ ಚಿಂತ್ಪಾಚ್ಯಾಂನಿ ‘ಸ್ತ್ರೀಯಾಂಕ್ ಅಕ್ಮಾನ್/ಹಲ್ಕ್ ಕೆಲಾಂ’ ಮ್ಹಣ್ ವಿಳಾಪ್ ದಿಂವ್ಚೆಂ ನಾಕಾ! ಇಲ್ಲೆಂ ಭಲಾಯ್ಕೆಭರಿತ್ ವಾಚಪ್ ತಾಂಚೆಂ ಜಾಂವ್).
ಹೆಂ ಶಿಂವ್ಣೆಚೆಂ ಘಡಿತ್ ಮ್ಹಾಕಾ ಉಡಾಸಾಂತ್ ಉರೊಂಕ್ ಕಾರಣ್, ಮ್ಹಜೊ ಬಾಬ್‍ಯೀ ಟೈಲರ್.
ಮ್ಹಜೊ ಬಾಬ್ ಬೆಳ್ತಂಗಡಿ ಪೆಂಟೆಚ್ಯಾ, ತೀನ್ ಮಾರೊಗ್ ಮ್ಹಳ್ಳ್ಯಾ ಜಂಕ್ಷನಾಂತ್ ಫಾಮಾದ್ ‘ಕಾಮತ್ ಕ್ಲೋತ್ ಸ್ಟೋರ್ಸ್’ ಜವ್ಳೆ ಆಂಗ್ಡಿಂತ್ ಜಾಯ್ತಿಂ ವರ್ಸಾಂ ಟೈಲರ್ ಜಾವ್ನಾಸ್‍ಲ್ಲೊ. ಪ್ರಾಯ್, ಪಿಡಾ ಮ್ಹಣ್ ಬಾಬ್ ನಿವೃತ್ತ್ ಜಾಲೊ. ಘರಾ ಏಕ್ ಟೈಲರಿಂಗ್ ಮೆಶೀನ್ ಆಸ್‍ಲ್ಲೆಂ. ಆಮ್ಕಾಂ ಶಿಂವ್ಣೆಚಿ ಕಲಾ ತಶೆಂ ಪ್ರಾಪ್ತ್ ಜಾಲ್ಲಿ. ಬಾಬ್ ಚಡ್ತಿಕ್ ಡ್ರೆಸ್ ಘರಾ ಹಾಡ್ನ್ ಭುರ್ಗ್ಯಾಂ ಕರ್ನಾ ಬೈಂದರ್, ಬುತಾಂವ್ ಶಿಂವ್ಚೆಂ ಇತ್ಯಾದಿ ಕಾಮ್ ಕರಯ್ತಾಲೊ.
ನಿವೃತ್ತ್ ಜಾಲ್ಯಾರೀ ಬಾಬಾಕ್ ಡಿಮಾಂಡ್ ಬರೆಂಚ್ ಆಸ್‍ಲ್ಲೆಂ. ಪೆಂಟೆ ದೆಗೆಚಿಂ ಥೊಡಿಂ ಚಲೊನ್‍ಂಚ್, ಪಯ್ಸ್ ತರೀ, ಆಮ್ಗೆರ್ ಯೆತಾಲಿಂ. ತಾಂತುಂಯೀ ಸ್ತ್ರೀಯೊ ಚಡ್. ಬ್ರಾಹ್ಮಣಾಂಚಿಂಯೀ ಯೆತಾಲಿಂ. (ಆತಾಂ ಹೆಂ ಪುರಾ ಚಿಂತುಂಕೀ ಸಾಧ್ಯ್ ನಾ!). ಮ್ಹಜೊ ಬಾಬ್ ಸತ್ತಿ ಆನಿ ನಿತಿಚೊ ಮನಿಸ್.
ಅಶೆಂ ಬರ್ಪಾ ಸವೆಂ ಟೈಲರಿಂಗ್‍ಯೀ ಮ್ಹಾಕಾ ಆನಿ ಆಸ್ಟಿನಾಕ್ ಚಡ್ತಿಕ್ ಏಕ್ ಗಾಂಚ್ ಮ್ಹಣ್ಯೆತ್.
ಸದಾಂಚ್ ಮೊಗಾಚೊ ಖಾಲ್ತೊ ಮಿತ್ರ್!
ಆಸ್ಟಿನಾಕ್ ಸುರ್ವೆರ್ ಹಾಂವೆಂ ಮೈಲ್ ಘಾಲ್ತಾನಾ ‘ಸರ್’ (Sir) ಮ್ಹಣ್ ಸಂಬೋಧನ್ ಕೆಲ್ಲೆಂ. ಪುಣ್ ತಾಚಿ ಖಡಕ್ಕ್ ತಾಕಿದ್. ‘ತುವೆಂ ಮ್ಹಾಕಾ ಆಸ್ಟಿನ್’ ಮ್ಹಣ್ ಆಪವ್ಯೆತ್, ತಶೆಂಚ್ ಆಪಯ್ ಮ್ಹಣ್. ಹಾಂವ್ ಮುಯೆ ತೆದೊ ಜಾಲೊಂ. ತೆದೆ ವ್ಹಡ್ ಮನ್ಶ್ಯಾಕ್ ಹಾಂವ್ ಕಶೆಂ ಏಕವಚನಾಂತ್ ಉಲೊ ಮಾರುಂ!? ಮ್ಹಾಕಾ ಕಷ್ಟ್ ಮಾರ್ಲೆ. ಪುಣ್ ತೊ ಹಟ್ ಸೊಡಿನಾ. ಉಪ್ರಾಂತ್ ತಾಣೆಂ ಸಾಂಗ್‍ಲ್ಲೆಂ ಏಕ್ ಉತಾರ್ ಮ್ಹಾಕಾ ನಟ್ವಲೆಂ, ತಾಚೆಂ ರಾಜಾಂವ್ ಕನ್ವಿನ್ಸ್ ಜಾಲೆಂ.
“ಆಮಿ ಫ್ರೆಂಡ್ಸ್, ಆಮ್ಚೆ ಮಧೆಂ ಬಹುವಚನ್ ಪ್ರಯೋಗ್ ಗರ್ಜ್ ನಾ” ಮ್ಹಣಾಲೊ ತೊ. ಆಸ್ಟಿನಾಚಿಂ ಉತ್ರಾಂ ಪಳೆಯಾ: “Dear Donald, First of all, please call me Austin. I like friendship more than those titles. I am a very simple person just like you.” ತ್ಯಾ ಉಪ್ರಾಂತ್‍ಚ್ ‘ಓಕೆ ಆಸ್ಟಿನ್ ಸರ್…’ ಮ್ಹಣ್ ಆಸ್‍ಲ್ಲೆಂ, ಕಾವ್ಜೆಣೆನ್ ತರೀ, ‘ಓಕೆ ಆಸ್ಟಿನ್’ ಮ್ಹಣ್ ಬದ್ಲಿಲೆಂ. ಕೆದ್ನಾಂ ತೆಂ, ಇಷ್ಟಾಗಾತೆಚೆಂ ಭಾವನ್, ವಿಶ್ವಾಸ್ಪಣಾಚೆಂ ಭೊಗಪ್ ಮತಿಂತ್ ಖಂಚ್ಲೆಂಗೀ, ತವಳ್ ಥಾವ್ನ್ ಆಮಿ ಎಕಾಮೆಕಾ ಆತ್ಮೀಯತೆನ್, ಸಳಾವಳೆನ್ ಉಲಂವ್ಚೆಂ. ಶಿವಾಯ್, ಸರ್, ಗಿರ್, ಗುರ್, ಘುರ್‍ರ್ ಸಕ್ಕಡ್ ಬಿಲ್ಕುಲ್ ನಾಂಚ್ ನಾ.
ಆಸ್ಟಿನಾಚ್ಯಾ ಇಮೈಲಾಂನಿ ಏಕ್ ಉತಾರ್ ಖಾಯಾಮ್ ಆಸ್ತಾಲೆಂ, ನಿಮಾಣೆಂ – ಸದಾಂಚ್ ಖಾಲ್ತೊ ಮಿತ್ರ್. ತೆಂ ತಾಚೆಂ ಟ್ರೇಡ್ ಮಾರ್ಕ್! ‘ಮಿತ್ರ್’ ಪತ್ರ್ ಚಲಯಿಲ್ಲೊ ಆಸ್ಟಿನ್, ನಿಜಾಯ್ಕೀ ಹರ್ಯೆಕ್ಲ್ಯಾಂಚೊ ಆಪ್ತ್ ಮಿತ್ರ್‌ಚ್.
ವಿಮಾನ್ ಪೈಲೆಟ್ ‘ಆಸ್ಟಿನ್’
ಹೆಂ ಏಕ್ ಕುತೂಹಲಾಚೆಂ ಪ್ರಕರಣ್. 2010 ಇಸ್ವೆಂತ್ ಬಜ್ಪೆ-ಕೆಂಜಾರಾಂತ್ ವಿಮಾನ್ ದುರಂತ್ ಘಡ್‍ಲ್ಲ್ಯಾನ್, ರಾಕ್ಣೊಂತ್ ಮ್ಹಜೆಂ ‘ಹಡ್ಸನ್ ಏರ್ ಕ್ರ್ಯಾಶ್’ ವಿಮಾನ್ ಅವ್ಗಡಾಚೆಂ ಲೇಖನ್ ಉದೆಲ್ಲೆಂ ನೆ, ತೆದ್ನಾಂಚೆಂ ಘಡಿತ್ ಹೆಂ. ನ್ಯೂಯಾರ್ಕಾಂತ್ ವಿಮಾನ್ ಹಡ್ಸನ್ ನ್ಹಂಯ್ತ್ ದೆಂವ್‍ಲ್ಲೆಂ, ಅವ್ಗಡ್ ಸುಖಾಂತ್ಯ್ ಜಾಲ್ಲೆಂ ಸಂಸಾರಾಂತ್ಲೆಂ ಏಕ್ ಮಹಾನ್ ಅಚರ್ಯೆಂ. ತೆಂ ಲೇಖನ್ ಬರಂವ್ಕ್ ಸ್ಟಡಿ ಕರ್ತಾನಾ, ವಿಮಾನಾಚೊ ಕ್ಯಾಪ್ಟನ್ ಸಲ್ಲನ್‍ಬರ್ಗಾರಾ ವಿಶಿಂಯೀ ವಿವರ್ ಸೊಧ್ತಾನಾ ತಾಚಿ ತಸ್ವೀರ್ ಮ್ಹಾಕಾ ವಿಶೇಸ್ ದಿಸ್‍ಲ್ಲಿ. ತೊ ಪಳೆಂವ್ಕ್ ಆಮ್ಚ್ಯಾ ಆಸ್ಟಿನಾಪರಿಂಚ್ ದಿಸ್ತಾಲೊ!
ಗೂಗಲಾಂತ್ ಜಾಯ್ ತರ್ ಸೊಧಾ. Captain Chesley Sully Sullenberger ಮ್ಹಣ್ ದಿಲ್ಯಾರ್ ಯೆಂವ್ಚ್ಯೊ ತಾಚ್ಯೊ ಫೊಟೊ ಪಳೆಯಾ. ತೆದ್ನಾಂಚೊ, ಮಿಶ್ಯೊ ಆಸ್‍ಲ್ಲೊ ಚೆಸ್ಲಿ ಆಸ್ಟಿನಾಪರಿಂಚ್ ಸೇಮ್ ಟು ಸೇಮ್! ತೆಂ ಹಾಂವೆಂ ಆಸ್ಟಿನಾಕ್ ಸಾಂಗ್‍ಲ್ಲೆಂ ಸಯ್ತ್.
‘ಬುಡ್ಕುಲೊ’ ಆನಿ ಆಸ್ಟಿನ್
ಹಾಂವೆಂ ರಾಕ್ಣೊಂತ್ಲಿಂ ಮ್ಹಜಿಂ ಬರ್ಪಾಂ ಆಸ್ಟಿನಾಕ್ ಧಾಡ್‍ಲ್ಲ್ಯಾ ವೆಳಾರ್ ತೊ ಮೆಚ್ವತಾಲೊ, ಪ್ರೋತ್ಸಾಹಾಚಿಂ ಉತ್ರಾಂ ಲಿಖುನ್ ಪಾಟ್ ಥಾಪುಡ್ತಾಲೊ. ಹಾಂವೆಂ ‘ಬುಡ್ಕುಲೊ’ Budkulo.com ಇ-ಮ್ಯಾಗಜಿನ್ ಪ್ರಕಟ್ತಾನಾ ಪಯ್ಲೆಂ ಶಾಭಾಸ್ಕಿ ಉಚಾರ್ಲೆಲ್ಯಾಂ ಪಯ್ಕಿ ಆಸ್ಟಿನ್‍ಯೀ ಎಕ್ಲೊ. ಏಕ್ ಪಾವ್ಟಿಂ ಹಾಂವ್ ಕಠಿಣ್ ಕಷ್ಟಾಂಕ್ ಸಾಂಪಡ್‍ಲ್ಲ್ಯಾ ವೆಳಾರ್ ಮ್ಹಾಕಾ ಆಸ್ಟಿನಾನ್‍ಂಚ್ ರಾಕ್‍ಲ್ಲೊ. ತೆದ್ನಾಂ ಘರಾ ಭಾಯ್ರ್ ಆಸ್ಲ್ಯಾರ್ ಫೇಸ್‍ಬುಕ್ ಮೊಬೈಲಾಂತ್ ಮೆಸೆಂಜರಾಂತ್‍ಚ್ ಚಾಟ್ ಕರ್ಚೆಂ. ವಾಟ್ಸಪ್ ಉಪ್ರಾಂತ್ ಆಯಿಲ್ಲೆಂ.
ವಾಟ್ಸಪ್ ಯೆತಾಸ್ತಾನಾ, ತೆಂ ಆಪ್ಣಾಯ್ಲ್ಯಾ ಉಪ್ರಾಂತ್ ಬರವ್ಪ್ಯಾಂಚೊ ಏಕ್ ಆಪ್ತ್ ಗ್ರೂಪ್ ಹಾಂವೆಂ ಸುರ್ವಾತ್‍ಲ್ಲೊ. ತಾಂತುಂ ಆಸ್ಟಿನಾಕ್‍ಯೀ ಹಾಂವೆಂ ಭರ್ತಿ ಕೆಲ್ಲೆಂ. ದೋನ್ ವರ್ಸಾಂ ಆದಿಂ ಹಾಂವೆಂ ‘ಬುಡ್ಕುಲೊ ವಾಟ್ಸಪ್ ಗ್ರೂಪ್’ ಸ್ಥಾಪನ್ ಕೆಲ್ಲೆ. ತ್ಯಾ ವರ್ವಿಂ ಮ್ಹಜ್ಯಾ ಬರ್ಪಾಚಿ ತಾಂಕ್ ಆನಿ ವ್ಯಾಪ್ತ್ ವಿಸ್ತಾರ್ ಆನಿ ಮಜ್ಭೂತ್ ಜಾಲ್ಯಾ. ತ್ಯಾ ಗ್ರೂಪಾಂತ್ ಹಾಂವೆಂ ಆಮ್ಚ್ಯಾ ವಾಚ್ಪ್ಯಾಂ ಖಾತಿರ್ ಏಕ್ ‘ಸ್ಪರ್ಧೊ’ ಆಸಾ ಕರಿಜೆ ಮ್ಹಣ್ ಪ್ರಕಟ್ ಕರ್ನ್, ಕೊಣೀ ಸ್ಪೊನ್ಸರ್ ಆಸ್ಲ್ಯಾರ್ ಇನಾಮಾಂ ದವರ್ಯೆತ್ ಮ್ಹಣ್ ಉಗ್ತೊ ಉಲೊ ದಿತಾನಾ, ಆಸ್ಟಿನ್ ಫುಡೆಂ ಆಯಿಲ್ಲೊ. ತಾಣೆಂ ಐವಜ್ ಸ್ಪೊನ್ಸರ್ ಕರ್ತಾಂ ಮ್ಹಳೆಂ. ತಶೆಂ ನಗದ್ ಇನಾಮಾಂ ಸವೆಂ ‘ಕಲಾ ಸಂಪತ್ ಕೊಂಕ್ಣಿ ಕ್ವಿಜ್’ ಸ್ಪರ್ಧೆ ಆಸಾ ಕೆಲೆ. ವಾಚ್ಪ್ಯಾಂಕ್ ಕ್ವಿಜ್ ದವರ್ನ್ ಇನಾಮಾಂ ದಿಲಿಂ. ಕೊಂಕ್ಣೆಂತ್ ತೊ ಏಕ್ ವಿನೂತನ್ ದಾಖ್ಲೊ ಜಾಲೊ. ಜಾಯ್ತ್ಯಾಂನಿ ಇಸ್ಕೊಲ್ ಕೊಲೆಜ್ ಜಾವ್ನ್, 25-30 ವರ್ಸಾಂ ಉಪ್ರಾಂತ್, ಪೆನ್ನ್, ಕಾಗದ್ ಹಾತಿಂ ಧರ್ನ್, ಕಾಣಿಯೊ ವಾಚುನ್ ಜಾಪಿ ಬರಂವ್ಕ್ ಸುರ್ವಾತ್ ಕೆಲೆಂ. ಹ್ಯಾ ಕ್ರಾಂತೆಕ್ ಆಸ್ಟಿನಾಚೊ ಸಾಂಗಾತ್/ಆಧಾರ್ ವಿಶೇಸ್.
ಆಸ್ಟಿನಾಚಿಂ ಸಂದರ್ಶನಾಂ
ಮ್ಹಜೆಂ ‘ಬುಡ್ಕುಲೊ’ ಇ-ಪತ್ರ್ ಸಂದರ್ಶನಾಂ (Interviews) ಖಾತಿರ್ ನಾಂವಾಡ್ಲಾಂ. ಆಸ್ಟಿನ್ 2017ವ್ಯಾ ವರ್ಸಾ ಗಿಮಾಂತ್ ಮಂಗ್ಳುರಾಕ್ ಆಯಿಲ್ಲ್ಯಾ ವೆಳಾರ್ ತಾಚೆಂ ಮುಖಾಮುಖಿ ಸಂದರ್ಶನ್ ಹಾಂವೆಂ ಘೆತ್‍ಲ್ಲೆಂ. ಉಪ್ರಾಂತ್ 2019 ಇಸ್ವೆಂತ್ ತಾಕಾ ‘ವಿಕ್ಟರ್ ರೊಡ್ರಿಗಸ್ ಸ್ಮಾರಕ್ ಸಮನ್ವಯ ಪ್ರಶಸ್ತಿ’ ಘೋಷಿತ್ ಜಾತಾನಾ ಬರ್ಪಿನಿಶಿಂ ಮಟ್ವೆಂ ಸಂದರ್ಶನ್ ಕೆಲ್ಲೆಂ. ಅಶೆಂ ಹಾಂವೆಂ ಆಸ್ಟಿನಾಚಿಂ ದೋನ್ ಅಧಿಕೃತ್ ಸಂದರ್ಶನಾಂ ಘೆತ್ಲ್ಯಾಂತ್ ಮ್ಹಳ್ಳಿ ದಾದೊಸ್ಕಾಯ್ ಮ್ಹಜಿ.
ವೀಜ್ – ಕೊಂಕ್ಣೆಕ್ ಇಲೆಕ್ಟ್ರಿಕ್ ಸ್ಪರ್ಶ್
ಆಸ್ಟಿನಾನ್ ಆಪ್ಣಾಕ್, ಉದ್ಯೋಗಾ ಥಾವ್ನ್ ನಿವೃತ್ತಿ ಘೆತಚ್ ಸಕ್ರಿಯ್ ದವರುಂಕ್ ಪಯ್ಲೆಂಚ್ ಯೆವ್ಜಿಲ್ಲೆಂ ಮ್ಹಣ್ ದಿಸ್ತಾ. ಎಕಾ ಕಾಳಾರ್ Letterpress ಪ್ರಿಂಟಿಂಗಾಚ್ಯಾ ತೆಂಪಾರ್ ಚಾರ್ ಪತ್ರಾಂಚೊ ಸಂಪಾದಕ್ ಜಾವ್ನಾಸ್ಲೆಲ್ಯಾ ಆಸ್ಟಿನಾಕ್, ಅತ್ಯಾಧುನಿಕ್ ಡಿಜಿಟಲ್ ಕಾಳಾರ್ ಕೊಂಕ್ಣಿ ಪತ್ರ್ ಚಲಂವ್ಕ್ ಉಮೆದ್ ಭರೊನ್ ಆಯ್ಲಿ. ಬದ್ಲಲ್ಲ್ಯಾ ಕಾಳಾಕ್ ತೆಕಿದ್ ಆನಿ ದೊಳ್ಯಾಂ ಮುಖಾರ್ ಆಸ್ಚೆಂ (Digital/Online ಪಬ್ಲಿಕೇಶನ್) ಪಳೆವ್ನ್ ಪ್ರೇರಿತ್ ಜಾವ್ನ್ ತಾಣೆಂ ಇ-ಪತ್ರ್ ಸುರು ಕೆಲೆಂಚ್. ಲಯನ್ಸ್ ಕ್ಲಬ್ಬಾಚ್ಯಾ ಬುಲೆಟಿನಾಂಚೊ, ಮ್ಯಾಗಜಿನಾಂಚೊ ಸಂಪಾದಕ್ ಜಾವ್ನ್ ತೊ ಹೆಳ್‍ಲ್ಲೊ. ‘ಎಮರ್ಜೆನ್ಸಿ’ ಕಾಳಾಂತ್ ಆನಿ ಆತಾಂ ‘ಆನ್‍ಲೈನ್’ ಯುಗಾಂತ್‍ಯೀ ಕೊಂಕ್ಣಿ ಪತ್ರಾಂಚೊ ಸಂಪಾದಕ್ ಜಾಲ್ಲೊ ವಿಶೇಸ್ ದಾಖ್ಲೊ ಆಸ್ಟಿನಾಚೊಚ್!
ತಶೆಂ ಸುರ್ವಾತ್ ಜಾಲ್ಲೆಂ ‘ವೀಜ್ ಕೊಂಕಣಿ’ ಹಫ್ತ್ಯಾಳೆಂ. ‘ವೀಜ್’ ಮ್ಹಳ್ಯಾರ್ ‘ಇಲೆಕ್ಟ್ರಿಸಿಟಿ’. ಆಸ್ಟಿನಾಚ್ಯಾ ಹ್ಯಾ ‘ವೀಜ್’ ಇ-ಮ್ಯಾಗಜಿನಾಚೆಂ ಮಾಸ್ಟ್‌ಹೆಡ್ ಡಿಸೈನ್ ಹಾಂವೆಂಚ್ ಕರುಂಕ್ ತಾಣೆಂ ಅವ್ಕಾಸ್ ದಿಲ್ಲೊ. ತೆಂ ಚಿತ್ರ್ ತಾಣೆಂಚ್ ಧಾಡ್‍ಲ್ಲೆಂ. ‘ವೀಜ್ ಕೊಂಕಣಿ’ ಟೈಟಲ್ (ಮಾಸ್ಟ್‌ಹೆಡ್) ಫೊಟೊಶೊಪಾಂತ್ ಇಲ್ಲೆಂ ಡಿಸೈನ್ ಕರ್ನ್ ಧಾಡ್‍ಲ್ಲೆಂ ತಾಣೆಂ ತಶೆಂಚ್ ಉರಯ್ಲಾಂ. ಉಪ್ರಾಂತ್ ತಾಣೆಂ ಆಮ್ಕಾಂ ಥೊಡ್ಯಾಂಕ್ ಸಹ ಸಂಪಾದಕ್ ಮ್ಹಣ್ ತಸ್ವೀರ್ ಘಾಲ್ನ್ ಪ್ರಕಟ್ ಕೆಲ್ಲೆಂಯೀ ಆಸಾ. ಸತ್ ಮ್ಹಳ್ಯಾರ್ ಸರ್ವ್ ಕಾಮ್, ಜವಾಬ್ದಾರ್ ತೊಚ್ ಸಾಂಬಾಳ್ತಾ. ತರ್ ಆಮ್ಚಿಂ ನಾಂವಾಂ ಕಿತ್ಯಾಕ್ ಮ್ಹಣ್ ತಿಂ ಬಿರುದಾಂ ಕಾಡಯ್ಲಿಂ.
ಸ್ವತಃ ತಾಣೆಂಚ್ ಸಾಂಗ್‍ಲ್ಲೆಪರಿಂ, ಆಸ್ಟಿನಾಕ್ ಕೊಂಕ್ಣೆಚಿ ಖೊರೊಜ್ ನಿವಾರುಂಕ್ ಜಾಯ್ನಾ! ಮ್ಯಾನೇಜ್‍ಮೆಂಟ್ ವೃತ್ತೆಂತ್ ಭೋವ್ ಉಂಚಾಯೆಕ್ ತೊ ಪಾವ್‍ಲ್ಲೊ, ಡೊಕ್ಟರೇಟ್‍ಯೀ ತಾಣೆಂ ಜೊಡ್ಲ್ಯಾ. ಮಧೆಂ ಲಾಂಬ್ ಕಾಳ್ ತೊ ಕೊಂಕ್ಣೆಂತ್ ಸಕ್ರಿಯ್ ನಾತ್‍ಲ್ಲೊ ತರೀ ತಾಚೊ ಸಂಪರ್ಕ್-ಸಹವಾಸ್ ಕೊಂಕ್ಣಿ ಮನ್ಶ್ಯಾಂ ಥಾವ್ನ್ ತುಟೊಂಕ್ ನಾತ್‍ಲ್ಲೊ. ತವಳ್ ತವಳ್ ಮಂಗ್ಳುರಾಕ್ ಯೆತಾನಾಂಯೀ ಕೊಂಕ್ಣಿ ಮನ್ಶ್ಯಾಂ ಸಂಗಿಂಚ್ ತಾಚಿ ಮುಲಾಖಾತ್ ಚಲ್ತಾಲಿ. ವಾಟ್ಸಪ್ ಗ್ರೂಪಾಂ ವರ್ವಿಂ ವರ್ಚುವಲ್ ರಿತಿನ್ ಸಕ್ಕಡ್ ಎಕಾಮೆಕಾ ದೀಸ್ ರಾತ್ ಲಾಗ್ಶಿಲೆ (ಲೈವ್) ಜಾಲೆ. ವೆಬ್‍ಸೈಟಿಂನಿ, ಫೇಸ್‍ಬುಕ್ ಆನಿ ವಾಟ್ಸಪಾಂತ್ ಕೊಂಕ್ಣಿ ದರಬಸ್ತ್ ಪರ್ಜಳ್ಳ್ಯಾ.
ಹೆಂ ಸರ್ವ್ ಆಸ್ಟಿನಾಕ್ ಸ್ಫೂರ್ತಿ ದೀಂವ್ಕ್ ಸಕ್ಲೆಂ. ಅಶೆಂ ತಾಣೆಂ ಪಾಟ್ಲ್ಯಾ ವರ್ಸಾಂನಿ ಖಳನಾಸ್ತಾನಾ ನಿರಂತರ್ ಹಫ್ತ್ಯಾನ್ ಹಫ್ತೊ ‘ವೀಜ್’ ಆಂಕೆ ಪ್ರಕಟ್ಲ್ಯಾತ್. ಮಧೆಂ ವಿಶೇಸ್ ಸಂದರ್ಭಾಂನಿ ಚಡ್ತಿಕ್ ಆಂಕೆ ಜಟ್‍ಪಟ್ ತಯಾರ್ ಕೆಲ್ಲೆಯೀ ಆಸಾತ್. ಕಿತ್ಲಿಂಗೀ ವರ್ಸಾಂ ಹರ್ ಆಂಕೊ ಎಕೇಕ್ ಕೊಂಕ್ಣಿ ಮನ್ಶ್ಯಾಕ್ ಸಮರ್ಪುನ್ ತಾಂಚೆ ವಿಶಿಂ ವ್ಹಡ್ವಿಕಾಯ್ ಪ್ರಸಾರ್ಲ್ಯಾ ಆಸ್ಟಿನಾನ್. ಹರ್ ಥರಾಚ್ಯಾ ಬರ್ಪಾಂಕ್ ಆನಿ ಬರವ್ಪ್ಯಾಂಕ್ ತಾಣೆಂ ಜಾಗೊ ದಿಲಾ.
ಏಕ್ ಥಾವ್ನ್ ಚಾರ್ ಲಿಪಿ, ದೋನ್ ಭಾಸೊ!
ಆಸ್ಟಿನಾನ್ ‘ವೀಜ್ ಕೊಂಕಣಿ’ ಕನ್ನಡ ಲಿಪಿಂತ್ ಸುರ್ವಾತ್‍ಲ್ಲೆಂ ತರೀ, ಉಪ್ರಾಂತ್ ಕೊಂಕ್ಣೆಚ್ಯಾ ಹೆರ್ ಲಿಪಿಂನಿಯೀ ಸಗ್ಳೊ ಆಂಕೊ ಪ್ರಕಟ್ ಕೆಲೊ. ಜಾಯ್ತೊ ಕಾಳ್ ತಾಣೆಂ ಕನ್ನಡ ಸವೆಂ ನಾಗರಿ, ರೋಮಿ, ಮಲಯಾಳಿ ಲಿಪಿಂತ್‍ಯೀ ‘ವೀಜ್’ ಪ್ರಕಟಣ್ ಕೆಲ್ಲೆಂ. ಉಪ್ರಾಂತ್ ತೆಂ ತಾಣೆಂ ರಾವಯ್ಲೆಂ. ಪರತ್ ಆನ್ಯೇಕ್ ಪ್ರಯೋಗ್ ತಾಣೆಂ ಸುರ್ವಾತುನ್ ತೊ ಚಾಲು ಆಸಾ – ಇಂಗ್ಲಿಶಾಂತ್ ವೀಜ್! ಪ್ರಮುಖ್ ಬರ್ಪಾಂ ಇಂಗ್ಲಿಶಾಂತ್‍ಯೀ ಪ್ರಕಟ್ ಕರ್ನ್ ಆನ್ಯೇಕ್ ದಾಖ್ಲೊ ಆಸ್ಟಿನಾನ್ ರಚ್ಲಾ.
ನಾಗ್ಡೆ ಜಾಲ್ಲೆ ಹಿಪೊಕ್ರಿತ್!
ಆಸ್ಟಿನಾಚ್ಯಾ ‘ವೀಜ್’ ಮುಖಾಂತ್ರ್ ಥೊಡ್ಯಾ ಹಿಪೊಕ್ರಿತಾಂಚೆಂ ಅಸ್ಲಿ ರೂಪ್ ಭೋವ್ ಗದ್ದಾಳಾಯೆನ್ ಸಾಬೀತ್ ಜಾಲಾಂ. ಆಸ್ಟಿನ್ ಸರ್ವ್ ಕೊಂಕ್ಣಿ ಲೊಕಾಕ್ ‘ವೀಜ್’ ಪಾವಂವ್ಚ್ಯಾ ಉದಾರ್ ಮನಾನ್, ಚಡ್ತಿಕ್ ಮ್ಹಿನತ್ ಘಾಲ್ನ್ ಚಾರ್ ಲಿಪಿಂನಿ ಪ್ರಕಟ್ ಕರ್ತಾಲೊ. ತಾಣೆಂಚ್ ಉಗ್ತ್ಯಾನ್ ಉಚಾರ್‌ಲ್ಲ್ಯಾ ಪರ್ಮಾಣೆಂ, ತೊ ನಿರಾಶೆನ್ ಭರ್‌ಲ್ಲೊ, ಆನಿ ಹೆರ್ ಲಿಪಿಂಕ್ ಘಾಲ್ಚೆಂ ರಾವಯ್ಜೆ ಪಡ್‍ಲ್ಲೆಂ. ಪ್ರತ್ಯೇಕ್ ಕರ್ನ್ ನಾಗರಿ ಲಿಪಿಚೆ ‘ದಲಾಲಿ’ ಆನಿ ‘ಸೊಜೆರ್’ ಕಾಂಯ್ ಉಣೆಂ ನಾಂತ್ ಮಂಗ್ಳುರಾಂತ್. ತ್ಯಾ ವಯ್ರ್ ನಾಗರಿಚ್ ಕೊಂಕ್ಣೆಚೊ ಫುಡಾರ್, ತಿಚ್ ಕೊಂಕ್ಣೆಚಿ ಸಹಜ್ ಲಿಪಿ, ಏಕ್ ಭಾಸ್ ಏಕ್ ಲಿಪಿ, ನಾಗರಿ ಶಿವಾಯ್ ಕೊಂಕ್ಣಿ ನಾ ಮ್ಹಣ್ ಫಟ್ಕಿರಿ ಬಡಾಯ್ ಸೊಡ್ಚೆ ಪೊಕ್ಳೆ ನಾಗರಿವಾಲೆ ಗೊಂಯಾಂ ಥಾವ್ನ್ ಮಂಗ್ಳುರಾ ಪರ್ಯಾಂತ್ ಪಳೆಂವ್ಕ್ ಮೆಳ್ತಾತ್. ಆಮ್ಚ್ಯಾಚ್ ಕನ್ನಡ ಲಿಪಿ ವರ್ವಿಂಚ್ ಬರವ್ಪಿ ಜಾಲ್ಲೆ, ಆನಿ ನಾಂವ್ ಜೊಡ್‍ಲ್ಲೆ ಕಪಟಿ, ಆಪ್ಲ್ಯಾ ಸ್ವಾರ್ಥಾಕ್ ಲಾಗೊನ್ ಕನ್ನಡ ಲಿಪಿಕ್ ನೆಗಾರ್ತಾತ್ ಮಾತ್ರ್ ನ್ಹಯ್ ನಾಗರಿ ಲಿಪಿಚೆಂ ಪೆಂಪಾರೆಂ ವ್ಹಾಜಯ್ತಾತ್.
ಅಸಲೆ ಮನಿಸ್ ಕಿತ್ಲೆ ‘ಯೋಗ್ಯ್’ ಮ್ಹಣ್ ‘ವೀಜ್’ ಮುಖಾಂತ್ರ್ ಬಹಿರಂಗ್ ಜಾಲ್ಲೆಂ. “ನಾಗರಿ ಲಿಪಿಚ್ಯಾಂಕ್ ರಂದುನ್ ರಂದುನ್ ಪುರೊ ಜಾಲೆಂ, ಕಿತ್ಲೆಂ ಆಡ್ದೊಸ್ ಮಾಗ್ಲ್ಯಾರೀ ಎಕ್‍ಚ್ ಏಕ್ ಬರಪ್ ತಾಣಿಂ, ಕೊಣೆಂಯೀ ಎಕ್ಲ್ಯಾನ್ ಸಯ್ತ್, ಮ್ಹಾಕಾ ಧಾಡುನ್ ದಿಲೆಂ ನಾ” ಮ್ಹಣ್ ಆಸ್ಟಿನಾನ್ ತೀನ್ ಕಡೆನ್ ಸಾಂಗ್‍ಲ್ಲೆಂ, ನಾಗರಿ ಆನಿ ಹೆರ್ ದೋನ್ ಲಿಪಿಂನಿ ‘ವೀಜ್’ ಪ್ರಕಟ್ ಕರ್ಚೆಂ ರಾವಯಿಲ್ಲ್ಯಾಚೆಂ ಕಾರಣ್ ವಿವರುನ್. ತೆಂಯೀ ಲಿಪೊನ್ ನ್ಹಯ್. ಹ್ಯಾ ನಾಗರಿ ದಲಾಲಿಂ ಮುಖಾರ್‌ಚ್ ತಾಣೆಂ ಘೋಷಣ್ ಕೆಲಾಂ! ನಾಗರಿಚೆ ದಲಾಲಿ, ಆನಿ ಸ್ವತಃ ನಾಗರಿವಾಲೆ, ಎಕ್‍ಚ್ ಏಕ್ ಲೇಖನ್ ಸಯ್ತ್ ಬರಂವ್ಕ್ ಸಕನಾಂತ್ ಮ್ಹಳ್ಳೆಂ ಅಶೆಂ ಸಂಸಾರಾಕ್ ಕಳ್ಳೆಂ.
ಕಪಟಿ ಸಂಸಾರಾಂತ್ ಆಸ್ಟಿನಾ ತಸಲೆ ಧಯ್ರಾಧಿಕ್ ಮನಿಸ್ ಗರ್ಜ್ ಆಸಾತ್. ಪೆಂಕ್ಡಾಂತ್ ಬಳ್ ನಾತ್‍ಲ್ಲೆ, ಚಾರ್ ಸಬ್ದ್ ಬರಂವ್ಕ್ ಯೋಗ್ಯತಾ ನಾತ್‍ಲ್ಲೆ ಮನಿಸ್ ಭಾಶೆ ವಿಶಿಂ, ಲಿಪಿಚೆರ್ ಡಿಕ್ಟೇಟ್ ಕರ್ತಾತ್. ಅಸಲ್ಯಾಂಚಿ ಅರ್ಹತಾ ಭಾಯ್ರ್ ಪಡೊಂಕ್ ಆಸ್ಟಿನಾ ತಸಲೆ ಲೀಡರ್ಸ್ ಜಾಯ್.
ಕೊಂಕ್ಣಿ ಸಮಾಜೆಕ್ ಡಾಲರಾಂಚೆಂ ಜೀವ್‍ಸತ್ವ್
ಆಸ್ಟಿನ್ ಅಮೆರಿಕಾ ಪಾವೊನ್ ಗ್ರೇಸ್ತ್ ಜಾಲೊ. ಜಾಯ್ತಿಂ ವರ್ಸಾಂ ಹಿಶಿನ್ ಯೇಂವ್ಕ್ ನಾ ತರೀ, ಮಾಂಯ್‍ಗಾಂವ್ ಆನಿ ಮಾಂಯ್‍ಭಾಸ್ ತೊ ವಿಸ್ರೊಂಕ್ ನಾ. ಸದಾಂಚ್ ಇಂಗ್ಲಿಶ್ ಆನಿ ಹೆರ್ ವಿದೇಶಿ ಭಾಸಾಂ ಮಧೆಂ ತಾಚೆಂ ಜಿವಿತ್ ತರೀ ತಾಚ್ಯಾ ಕಾಳ್ಜಾ-ಮನಾಂತ್ ಆನಿ ಜಿಬೆಂತ್-ಉಸ್ವಾಸಾಂತ್ ಕೊಂಕ್ಣಿ ಜಿವಾಳ್ ಉರ್ಲಿ. ದಶಕಾಂ ಉಪ್ರಾಂತ್ ಮಂಗ್ಳುರಾಕ್ ತೊ ಆಯ್ಲೊ ತರೀ, ತಾಚಿ ಕೊಂಕ್ಣಿ ಬಿಲ್ಕುಲ್ ಫ್ರೆಶ್ ಆಸ್‍ಲ್ಲಿ. ಆಪ್ಲ್ಯಾ ಭಾಸ್-ಸಂಸ್ಕೃತೆ ಥಂಯ್ ಖರೋಖರ್ ಮೋಗ್ ಆಸ್ಲೆಲ್ಯಾಂಕ್ ಮಾತ್ರ್ ಹೆಂ ಸಾಧ್ಯ್.
ಅಸಲೊ ನೀಜ್ ಮೋಗ್ ಹಾಂವೆಂ ದುಸ್ರ್ಯಾ ಎಕಾ ವ್ಯಕ್ತಿ ಥಂಯ್ ಪಳೆಲ್ಲೊ. ತೊ ಜಾವ್ನಾಸ್‍ಲ್ಲೊ ಬಿಸ್ಪ್ ಅಂಬ್ರೋಜ್ ಮಾಡ್ತಾ. ತೀನ್ ದಶಕಾಂ ತೊ ವಿದೇಶಾಂನಿ ಯಾಜಕ್ ಜಾವ್ನಾಸ್‍ಲ್ಲೊ ತರೀ ತಾಚಿ ಕೊಂಕ್ಣಿ ಜಿವಾಳ್ ಆಸ್‍ಲ್ಲಿ. (ಐವರಿ ಕೋಸ್ಟ್ ದೇಶಾಚೊ ಆರ್ಚ್ ಬಿಸ್ಪ್ ಆನಿ ಪಾಪಾಲ್ ನುನ್ಸಿಯೊ ತೊ ಆಸ್‍ಲ್ಲೊ). ಜಾಯ್ತೆ ಜಣ್ ಥೊಡೊಚ್ ಕಾಳ್ ವಿದೇಶಾಂನಿ ರಾವ್‍ಲ್ಲೆಂಚ್ ಮಾಂಯ್‍ಭಾಸ್ ವಿಸ್ರಲ್ಲೆಪರಿಂ ಕರ್ತಾತ್. ತರೀ ಆಸ್ಟಿನ್, ಬಿಸ್ಪ್ ಮಾಡ್ತಾ ತಸಲೆ ಖರೆ ಮೊಗಿ, ಅದ್ಭುತ್ ಮನಿಸ್‍ಯೀ ಆಸಾತ್ ಮ್ಹಳ್ಳೊ ಅಭಿಮಾನ್ ಮ್ಹಾಕಾ.
ಸಬಾರಾಂಕ್ ಖಂಡಿತ್ ಕಳಿತ್ ಆಸ್ತೆಲೆಂ, ಆಸ್ಟಿನ್ ಸೊಜ್ ಕಿತ್ಲೆಶ್ಯಾ ಲೊಕಾಕ್ ಖಬ್ರೆ ವಿಣೆಂ ಮಜತ್ ದಿತಾ ಮ್ಹಣ್. 17 ವರ್ಸಾಂ ಆದಿಂಚ್ ಆಸ್ಟಿನಾನ್ ಮ್ಹಾಕಾ ಸಾಂಗ್‍ಲ್ಲೆಂ, ತೊ ವರ್ಸಾಕ್ 5 ಥಾವ್ನ್ 6-7 ಲಾಕ್ ರುಪಯ್ ದಾನ್ ದಿತಾಲೊ ಮ್ಹಣ್ (ತಾಕಾ ತಿತ್ಲಿಂ ಎಪೀಲಾಂ ಯೆತಾಲಿಂ). ತೆಂ ತೆದ್ನಾಂ. ಮ್ಹಣ್ಜೆ ಪಾಟ್ಲ್ಯಾ ತಿತ್ಲ್ಯಾ ಸರ್ವ್ ವರ್ಸಾಂನಿ ತಾಣೆಂ ದಿಲ್ಲೊ ಐವಜ್ ಕಿತ್ಲೊ ಕೊರೊಡ್ ಜಾಯ್ತ್ ಮ್ಹಣ್ ಅಂದಾಜ್ ಕರ್ಯೆತ್. ಆನಿ ತಾಚೆ ಥಾವ್ನ್ ದುಡು ಘೆತ್ಲೆಲ್ಯಾಂಚೊ ಸಂಖೊಯೀ ಅಗಣಿತ್. ಪುಣ್ ಹೆಂ ಆವಾಜಾ ವಿಣೆಂ ತೊ ಕರ್ನ್ ಆಯ್ಲಾ. ಸ್ವತಃ ಏಕ್ ಬರವ್ಪಿ ಜಾವ್ನಾಸ್ಲೆಲ್ಯಾನ್ ಇತ್ಲ್ಯಾ ಅಗಾಧ್ ಪ್ರಮಾಣಾರ್ ದುಡ್ವಾ ಕುಮಕ್ ದಿಲ್ಲಿ ತಾಣೆಂ ಎಕ್ಲ್ಯಾನ್‍ಂಚ್ ಮ್ಹಣ್ ದಿಸ್ತಾ.
ಧಯ್ರಾಕ್ ಪ್ರಾಮಾಣಿಕ್ಪಣಾಚೊ ದಿಗೊ
ಆಸ್ಟಿನ್ ಧಯ್ರಾಧಿಕ್ ಮನಿಸ್. ತ್ಯಾ ಪ್ರಾಸ್ ಚಡ್ ಪ್ರಾಮಾಣಿಕ್. ತಾಣೆಂ ನಿತಿನ್, ನಿಷ್ಕಪಟಿ ಜಿವಿತ್ ಜಿಯೆಲ್ಲ್ಯಾನ್ ತೊ ಕೊಣಾಕ್‍ಚ್ ಭಿಯೆನಾ. ತಾಚೆಂ ಪ್ರಾಮಾಣಿಕ್ಪಣ್ ತಾಚ್ಯಾ ಧಯ್ರಾಕ್ ತ್ರಾಣ್ ದಿತಾ. ಹ್ಯಾ ವರ್ವಿಂ ಆಸ್ಟಿನ್ ಖಡಾಖಡ್. ತಾಚಿಂ ಸಂಪಾದಕೀಯಾಂ ವಾಚ್ಲೆಲ್ಯಾಂಕ್ ಹೆಂ ಖಂಡಿತ್ ಸಮ್ಜತಾ. ತೊ ಮೋದಿಕ್‍ಯೀ ಬೆಂಡ್ತಾ, ಟ್ರಂಪಾಕ್‍ಯೀ ಖೆಂಡ್ತಾ. ಪಾದ್ರಿ-ಬಿಸ್ಪಾಂಕೀ ಸೊಡಿನಾ, ರಾಜಕಾರಣಿಂಕೀ ಬಾಕಿ ದವರಿನಾ. ಅನ್ಯಾಯ್ ಮ್ಹಣ್ ಭೊಗ್‍ಲ್ಲೆಂ, ಚೂಕ್ ಮ್ಹಣ್ ದಿಸ್‍ಲ್ಲೆಂ ದಾಕ್ಷೆಣ್ ನಾಸ್ತಾಂ ವಿರೋಧ್ ಕರ್ಚೊ, ಪ್ರತಿಭಟನ್ ದಾಕಂವ್ಚೊ ಅಪ್ರೂಪ್ ಭಾರತೀಯ್ ಪತ್ರಕರ್ತ್ ತೊ. (ಬುಡ್ಕುಲೊ ವೆಬ್‍ಸೈಟಿಂತ್ಲೆಂ ತಾಚೆಂ ಪಯ್ಲೆಂ ಸಂದರ್ಶನ್ ವಾಚ್ಲ್ಯಾರ್ ತೊ ಕಸಲೊ ಆನಿ ಕಿತ್ಲೊ ಶೀದಾ ಮನಿಸ್ ಮ್ಹಣ್ ಸಮ್ಜತಾ).
ಅಮೆರಿಕಾಂತ್ ರಸ್ತೊ, ಮಂಗ್ಳುರಾಂತ್ ಖಬರ್!
ನಿಮಾಣೆಂ ಏಕ್ ಸ್ವಾರಸ್ಯಕರ್ ಘಡಿತ್. ಸಂಪಂವ್ಚ್ಯಾ ಪಯ್ಲೆಂ ಆಸ್ಟಿನಾಕ್ ಲಗ್ತಿ ಏಕ್ ಖಬರ್. ಲಯನ್ಸ್ ಕ್ಲಬ್ ಮುಖಾಂತ್ರ್ ಥಂಯ್ಚ್ಯಾ ಸಮಾಜ್-ಲೊಕಾಕ್ ಲಾಂಬ್ ಕಾಳಾಂತ್ ದಿಲ್ಲ್ಯಾ ವಿಶೇಸ್ ಸೆವೆ ಖಾತಿರ್ ಆಸ್ಟಿನಾಚೆಂ ನಾಂವ್ ಚಿಕಾಗೊಂತ್ ಎಕಾ ರಸ್ತ್ಯಾಕ್ ನಾಮಕರಣ್ ಕೆಲ್ಲೆಂ ತುಮಿ ಜಾಣಾಂತ್. ತಿ ಖಬರ್ ತಾಣೆಂ ಮ್ಹಾಕಾಯೀ ಧಾಡ್‍ಲ್ಲಿ.
ಆಸ್ಟಿನ್ ಕ್ರಿಸ್ತಾಂವ್ ಸಮಾಜೆಂತ್ ಊಂಚ್ಲೊ ವ್ಯಕ್ತಿ. ತಾಚೆರ್ ಮೋಗ್, ಅಭಿಮಾನ್ ನಾತ್‍ಲ್ಲೊ ಕೊಂಕ್ಣಿ ಕಾರ್ಯಕರ್ತ್ ಆಸ್ಚೊ ನಾ. ತಾಕಾ ಮುಖ್ಯ್ ಕಾರಣ್ ತಾಣೆಂ ಅರ್ಪಿಲ್ಲೆ ಡಾಲರ್ಸ್! ದೆಕುನ್ ಜೀಣ್‍ಭರ್ ಕೊಂಕ್ಣಿ ಕಾರ್ಯಾಂಕ್ ಹಾಜರ್ ಜಾಯ್ನಾತ್ಲೆಲೆ ಸಯ್ತ್, ಕುಟ್ಮಾ ಸಮೇತ್, ಆಸ್ಟಿನ್ ಗಾಂವಾಕ್ ಯೇವ್ನ್ ಖಂಚ್ಯಾ ಕಾರ್ಯಾಂತ್ ರಿಗ್ತಾ, ಥಂಯ್ ಹೆ ಪ್ರವೇಶ್ ಕರ್ತಾತ್. ಹೆಂ ಇತ್ಲೆಂಚ್ ಪುರೊ, ಹಕೀಗತ್ ಸಮ್ಜೊಂಕ್.
ಅಶೆಂ ಆಸ್ತಾಂ, ಆಸ್ಟಿನಾಚ್ಯಾ ನಾಂವಾರ್ ‘ಅಮೆರಿಕಾಂತ್ ರಸ್ತೊ ಜಾತಾ’ ಮ್ಹಳ್ಳಿ ಖಬರ್, ಆಸ್ಟಿನಾ ಥಾವ್ನ್ ಮೆಳ್‍ಲ್ಲಿಚ್ (ಇಮೈಲ್) ಆಮ್ಚ್ಯಾ ಸಮುದಾಯಾಚ್ಯಾ ವೆಬ್ ಮಾಧ್ಯಮಾಂನಿ ‘ಆಮಿಂಚ್ ಫಸ್ಟ್’ ಮ್ಹಳ್ಳೆಪರಿಂ ಘಾಲ್ಲಿಚ್ ಘಾಲ್ಲಿ. ಕ್ರಿಸ್ತಾಂವ್ ಸರ್ಕಲಾಂನಿ ತಿ ಖಬರ್ ಬರಿಚ್ ಥಳ್ಥಳ್ಳಿ. ಮ್ಹಾಕಾಯೀ ಇಮೈಲಾರ್ ತಿ ಖಬರ್ ಆಯಿಲ್ಲಿ. ಮ್ಹಜೊ ‘ಬುಡ್ಕುಲೊ’ ನ್ಯೂಸ್ ಮಾಧ್ಯಮ್ ನ್ಹಯ್, ದೆಕುನ್ ಹಾಂವೆಂ ಅಮ್ಸೊರ್ ಕರುಂಕ್ ನಾ. ಹೆರಾಂನಿ ಆಲ್‍ರೆಡೀ ನ್ಯೂಸ್ ಘಾಲ್ಯಾ ಆಸ್ತಾಂ, ಏಕ್ ಆಕರ್ಷಕ್ ಲೇಖನ್ ಕರುನ್ ಘಾಲುಂಕ್ ಹಾಂವೆಂ ನಿಚೆವ್ ಕೆಲ್ಲೊ.
ತೆದ್ನಾಂ ಹಾಂವ್ ಆನ್ಯೇಕ್ ಕನ್ನಡ ವೆಬ್‍ಸೈಟಿಚೊ ಬರಯ್ಣಾರ್ ಜಾವ್ನಾಸ್‍ಲ್ಲೊಂ. ಮ್ಹಾಕಾ ಏಕ್ ಐಡಿಯಾ ಆಯ್ಲಿ, ಆಸ್ಟಿನಾಚ್ಯಾ ನಾಂವಾರ್ ಅಮೆರಿಕಾಂತ್ ಎಕಾ ರಸ್ತ್ಯಾಕ್ ನಾಂವ್ ದವರ್ತಾತ್ ತರ್, ತಿ ಫಕತ್ ಆಮ್ಚ್ಯಾ ಕೊಂಕ್ಣಿ ಕಥೊಲಿಕಾಂಕ್ ಸಂಬಂಧ್ ಜಾಲ್ಲಿ ಖಬರ್ ಜಾಯ್ನಾ, ಆಖ್ಖ್ಯಾ ಸಮಾಜೆಕ್ ಅಭಿಮಾನಾಚಿ ಜಾತಾ ಮ್ಹಣ್ ಭೊಗ್ಲೆಂ. ಇಂಗ್ಲಿಶ್ ವೆಬ್‍ಸೈಟಿಂನಿ ತಿ ಖಬರ್ ಗಾಜ್ಲ್ಯಾ. ಆಸೊಂದಿ, ಹಾಂವ್ ಕನ್ನಡಾಂತ್ ಖಬರ್ ಪ್ರಕಟ್ ಕರ್ತಾಂ, ಕೊಂಕ್ಣೆಂತ್ ಉಪ್ರಾಂತ್ ಮ್ಹಣ್ ಬಸ್ಲೊಂ.
ಹಾಂವೆಂ ಕನ್ನಡಾಂತ್ ನ್ಯೂಸ್ ಪ್ರಕಟ್ ಕರ್ನ್ ಸೋಶಿಯಲ್ ಮೀಡಿಯಾಂತ್ (ಫೇಸ್‍ಬುಕಾಂತ್ ಆನಿ ವಾಟ್ಸಪಾಂತ್) ಪ್ರಸಾರ್ ಕೆಲೆಂ. ಅಧ್ರ್ಯಾ ಘಂಟ್ಯಾನ್ ಕನ್ನಡ ದಿಸಾಳ್ಯಾಚ್ಯಾ ಎಕಾ ರಿಪೋರ್ಟರಾನ್ ಮ್ಹಾಕಾ ಫೋನ್ ಕೆಲೆಂ. ಮ್ಹಾಕಾ ಅಜ್ಯಾಪ್. ತಾಕಾ ತಿ ಖಬರ್ ತೆದೊಳ್ ಪರ್ಯಾಂತ್ ಕಳಿತ್ ನಾತ್‍ಲ್ಲಿ!! ತಾಣೆಂ ಹಾಂವೆಂ ಪ್ರಕಟ್ ಕೆಲ್ಲ್ಯಾ ಖಬ್ರೆಕ್ ‘ಅಥೆಂಟಿಸಿಟಿ’ ವಿಚಾರ್ಲಿ. ಹಾಂವೆಂ ಆಸ್ಟಿನಾನ್ ಧಾಡ್‍ಲ್ಲಿ, ಥಂಯ್ಚ್ಯಾ ಸರ್ಕಾರಾಚಿ ಸರ್ಟಿಪಿಕೇಟ್ ತಾಕಾ ಧಾಡ್ಲಿ. ತಿ ಆಪ್ಣಾವ್ನ್ ತಾಣಿಂ ದುಸ್ರ್ಯಾ ದಿಸಾಚ್ಯಾ ಪತ್ರಾರ್ ತಿ ಖಬರ್ ಪರ್ಗಟ್ಲಿ. ಹೆರ್ ಕನ್ನಡ ದಿಸಾಳ್ಯಾಂಚಿ ಗಜಾಲ್‍ಯೀ ತಿತ್ಲಿಚ್.
ಕನ್ನಡ ಪತ್ರಕರ್ತಾಂಕ್ ಹಿ ಖಬರ್ ಕಶೆಂ ಕಳ್ಳಿ? ತಾಕಾ ಹಾಂವೆಂ ಘಾಲ್ಲ್ಯಾ ಖಬ್ರೆಚೆಂ ತಕ್ಲೆ ನಾಂವ್ (ಟೈಟಲ್) ಕಾರಣ್. ‘ಅಮೆರಿಕದ ರಸ್ತೆಗೆ ಮಂಗಳೂರಿಗನ ಹೆಸರು’ ಮ್ಹಣ್ ಹಾಂವೆಂ ಹೆಡ್ಡಿಂಗ್ ದೀವ್ನ್ ಖಬರ್ ಪ್ರಕಟ್‍ಲ್ಲಿ. ತೆಂ ಟೈಟಲ್ ಪತ್ರಿಕೋದ್ಯಮ್/ಮಾಧ್ಯಮ್ ಶೆತಾಂತ್ಲ್ಯಾಂಕ್ ಇತ್ಲೆಂ ಕ್ಯಾಚಿ ಭೊಗ್ಲೆಂಗೀ, ತಾಣಿಂ ತೆಂ ವಾಚುನ್ ಆಪ್ಣಾಕೀ ಮಾಹೆತ್ ಜಾಯ್ ಮ್ಹಣ್ ತೆ ಮುಖಾರ್ ಆಯಿಲ್ಲೆ.
ಮ್ಹಾಕಾ ಆಸ್ಟಿನ್ ಫಕತ್ ಏಕ್ ಕೊಂಕ್ಣಿ ಮನಿಸ್, ವಳ್ಕಿಚೊ, ಮೊಗಾಚೊ, ಆಪ್ತ್ ಮ್ಹಣೊನ್ ಭೊಗ್ಚ್ಯಾ ಪ್ರಾಸ್, ತಾಕಾ ಲಾಭ್‍ಲ್ಲೊ ಗೌರವ್ ತೊ ಎಕಾ ಭಾರತೀಯ್ ಮನ್ಶ್ಯಾಕ್, ಮಂಗ್ಳುರಿ ವ್ಯಕ್ತಿಕ್ ಮೆಳ್‍ಲ್ಲೊ ಮಾನ್ ಮ್ಹಣ್ ಹಾಂವೆಂ ವ್ಯಾಖ್ಯಾನ್ ಕೆಲ್ಲ್ಯಾನ್‍ಂಚ್ ತೆಂ ಟೈಟಲ್ ಉದೆಲ್ಲೆಂ. ದೆಕುನ್ ಹೆರ್ ಪತ್ರಿಕಾ ಭಾಂವ್ಡಾಂಕ್ ತಿ ಖಬರ್ ಸಮ್ಜಲಿ ಆನಿ ತೆಯೀ ಆಕರ್ಷಿತ್ ಜಾಲ್ಲೆ.
ತ್ಯಾ ವರ್ವಿಂ ಅಕ್ರಿಸ್ತಾಂವಾಂಕ್‍ಯೀ ಆಸ್ಟಿನಾಚಿ ಖಬರ್/ಸಾಧನ್ ಕಳಿತ್ ಜಾಲ್ಲೆಂ.
ಅಶೆಂ, ಸಾಂಗೊಂಕ್ ಗೆಲ್ಯಾರ್ ಆನಿಕೀ ಜಾಯ್ತ್ಯೊ ಗಜಾಲಿ, ಮ್ಹಾಕಾ ಆನಿ ಆಸ್ಟಿನಾಕ್ ಲಗ್ತಿ ಜಾಲ್ಲ್ಯೊ, ಆಸಾತ್. ಆಸ್ಟಿನ್ ಪರಿಪೂರ್ಣ್ ಕೊಂಕ್ಣಿ ಮನಿಸ್. ತಾಚೆ ತಿತ್ಲೊ ಕೊಂಕ್ಣಿ ಮೊಗಿ ದುಸ್ರೊ ನಾ. ನಿವೃತ್ತೆ ಉಪ್ರಾಂತ್ ಸಂಸಾರ್ ಭೊಂವೊನ್ ದೀಶ್ ಪಾಶಾರ್ ಕರ್ಯೆತೆ ತರೀ, ಕೊಂಕ್ಣಿ ಪತ್ರ್ ಪರ್ಗಟುನ್ ಸಗ್ಳೊ ವೇಳ್ ತ್ಯಾ ಖಾತಿರ್ ಖರ್ಚಿತಾ. ತಾಚಿ ಬದ್ಧತಾ ಶ್ಲಾಘನೀಯ್. ತಾಚ್ಯಾ ಮುಖ್ಲ್ಯಾ ಜಿವಿತಾಂತ್ ಆನಿಕೀ ವರ್ತಿಂ ಸಾಧನಾಂ ತೊ ಕರುಂದಿ ಮ್ಹಣ್ ಮಾಗ್ತಾಂ.
ಹ್ಯಾಪ್ಪಿ ಬರ್ತ್ ಡೇ ಡಿಯರ್ ಆಸ್ಟಿನ್. ಲವ್ ಯೂ. ಚೀಯರ್ಸ್.
ತುಜ್ಯಾ ಮೊಗಾಚೊ, ಸದಾಂಚ್ ಖಾಲ್ತೊ ಮಿತ್ರ್, ಡೊನಿ ಪಿರೇರ್.
Read Previous Posts on Austin DSouza 👇
ಆಸ್ಟಿನ್ ಸೊಜಾಚೆಂ ಏಕ್ ಚುಟುಕ್ ಸಂದರ್ಶನ್
ಆಸ್ಟಿನಾ ಸಂಗಿಂ ಚಲಯಿಲ್ಲೆಂ ಸಂದರ್ಶನ್
ಅಮೆರಿಕಾಂತ್ ಆಸ್ಟಿನ್ ಸೊಜಾಚ್ಯಾ ನಾಂವಾರ್ ರಸ್ತೊ
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
I would like to have the information you have published in Budkulo (which should have been buddkulo, with dd and not d alone) on VJP and Ms Rego. As much as I can. I am collecting it for publication in two books with life, writings and publications and also their unfinished MSS on Konkanni. Only, if you choose to send. Thanks.
Dr. William Robert Da Silva
No one seems to have access to R. Sabatini, the source of romance in VJPs books on Bondhodd and Inquisition. That will change the review of Sardar romance.