ಹೆಂ ತುಮಿ ವಾಚ್ತಾನಾ ಕೊರೊನಾ ವೈರಸ್ ಆಮ್ಚ್ಯಾ ಘರಾ ಬಾಗ್ಲಾರ್ ಯೇವ್ನ್ ರಾವ್ಲಾಂ. ಚತ್ರಾಯ್ ಘೆನಾಂತ್ ತರ್ ತೆಂ ತುಮ್ಕಾಂ ಗ್ರಾಸುಂಕ್ ಭಿತರ್ ಯೆತೆಲೆಂ. ಚತ್ರಾಯ್ ಸಾಂಬಾಳಾ. ಭಿರಾಂತ್ ಮಾತ್ರ್ ಪಾವನಾ, ಬಗಾರ್ ಚತ್ರಾಯ್‍ಯೀ ಅತೀ ಗರ್ಜ್.

ತುಮ್ಚ್ಯಾ ಘರಾಂತ್ ಮಾಲ್ಘಡಿಂ ಆನಿ ಪಿಡೆಂತ್ ಆಸ್ಚಿಂ ಆಸಾತ್ ತರ್ ಹಿ ಚತ್ರಾಯ್ ಚಡ್ ಗರ್ಜೆಚಿ. ಕೊರೊನಾ ವೈರಸಾ ಥಾವ್ನ್ ಮೊರ್ನಾಂ ಫಕತ್ 3% ಮ್ಹಣ್ ವಿಶ್ವ್ ಭಲಾಯ್ಕೆ ಸಂಸ್ಥ್ಯಾನ್ ಕಳಯ್ಲಾಂ. ಪುಣ್ ಹೊ ಸಂಕೊ ಚಡ್ ಆಸ್ಯೆತಾ ಮ್ಹಣ್ ಆತಾಂ ದುಬಾವ್ ಯೆತಾ. ಉತರ್ ಪ್ರಾಯ್ ವಾ ಹೆರ್ ಕಾರಣಾಂನಿ ಭಲಾಯ್ಕಿ ಬರಿ ನಾತ್‍ಲ್ಲ್ಯಾಂ ಥಂಯ್, ಕುಡಿಂತ್ ಪಿಡೆಂ ವಿರೋಧ್ ಝುಜ್ಚಿ ಸಕತ್ ಉಣಿ ಆಸ್‍ಲ್ಲ್ಯಾಂ ಥಂಯ್ ಮರಣ್ ಪಾವ್ತೆಲ್ಯಾಂಚೊ ಸಂಕೊ ಚಡ್. ಪನ್ನಾಸ್ ವರ್ಸಾಂ ಪ್ರಾಯೆ ಭಿತರ್ಲ್ಯಾಂಕ್ ಕೊರೊನಾ ವೈರಸಾಚಿ ಪಿಡಾ ಲಾಗ್ಲ್ಯಾರ್, ಹಜಾರ್ ಜಣಾಂ ಪಯ್ಕಿಂ 4 ಜಣ್ ಮರಣ್ ಪಾವ್ತಾತ್. 80 ವರ್ಸಾಂ ಪ್ರಾಯೆ ಉಪ್ರಾಂತ್ ಹೊ ಸಂಕೊ 150. ಪಯ್ಲೆಂಚ್ ಭಲಾಯ್ಕಿ ನಾಜೂಕ್ ಆಸ್‍ಲ್ಲ್ಯಾಂನಿ ಹೆರಾಂ ಪ್ರಾಸ್ ಚಡ್ ಚತ್ರಾಯ್ ಘೆಂವ್ಕ್ ಜಾಯ್. ಜೆರಾಲ್ ಥರಾನ್ ಭಲಾಯ್ಕಿ ಬರಿ ಆಸ್‍ಲ್ಲ್ಯಾಂಕ್ ಎಕಾವೆಳಾ ಪಿಡಾ ಲಾಗ್ಲ್ಯಾರೀ ಅನಾಹುತ್ ಘಡ್ಚೊ ಸಂಭವ್ ಉಣೊ.

ಕೊರೊನಾ ತುಕಾ ಕಶಿ ಯೆವ್ಯೆತಾ?

ಕುಡಿ ಭಿತರ್ ಪಾವ್‍ಲ್ಲಿಂ ಪಿಡೆಚಿಂ ವೈರಸಾಂ ನಾಕಾಂತ್, ತಾಳ್ಯಾಂತ್ ಆಸ್ತಾತ್. ವೈರಸಾಂ ಆಸ್‍ಲ್ಲ್ಯಾ ವ್ಯಕ್ತಿನ್ ಶಿಂಕೊ ಕಾಡ್ತಾನಾ ವಾ ಖೊಂಕ್ಲಿ ಕಾಡ್ತಾನಾ, ತಾಚ್ಯಾ ಉಸ್ವಾಸಾ ಸಾಂಗಾತಾ ಭಾಯ್ರ್ ಉಸಳ್ಚ್ಯಾ ದೃವ್ಯಾಚ್ಯಾ ಸೂಕ್ಷ್ಮ್ ಕಣಾಂನಿ (droplets) ವೈರಸಾಂ ಆಸ್ತಾತ್. ಹಿಂ ಕಣಾಂ ಲಾಗ್ಸರ್ ಆಸ್‍ಲ್ಲ್ಯಾ ಖಾಟ್ಲೆಂ, ಕದೆಲ್, ಮೇಜ್, ದಾರಾಂಚ್ಯೆ ಹಾತಾಳೆ ವಾ ಸಾರ್ವಜನಿಕ್ ಸುವಾತೆಂನಿ ವಾಹನಾಂಚ್ಯಾ ಬಸ್ಕೆಂಚೆರ್, ಹಾತೊಳೆಂಚೆರ್ ಅಶೆಂ ಹರ್ ಸುವಾತೆಂನಿ ಪಡೊನ್ ಆಸ್ತಾತ್.

ಸಾರ್ವಜನಿಕ್ ಸುವಾತೆಂನಿ – ಮಾರ್ಕೆಟಿಂತ್, ಆಂಗ್ಡಿಂನಿ, ಸುಪರ್ ಮಾರ್ಕೆಟ್, ಇಗರ್ಜ್, ಇಮಾಜ್ ಅಶೆಂ ಖಂಚ್ಯಾಯ್ ಸುವಾತೆರ್, ಬಸ್ಸಾಚೆರ್, ರಿಕ್ಷಾಚೆರ್, ಲಿಫ್ಟಾಚ್ಯಾ ಬಟನಾಂಚೆರ್… ಖಂಯ್ ವೈರಸಾಂ ಆಸ್ತಾತ್ ಮ್ಹಣೊಂಕ್ ಜಾಯ್ನಾ.

ವೈರಸಾಂ ತ್ಯಾ ಸುವಾತೆಂನಿ ಪಡೊನ್ ಆಸ್‍ಲ್ಲಿಂ ಸೂಕ್ಷಿಮ್ ಕಣಾಂ, ದೊಳ್ಯಾಂಕ್ ದಿಸನಾಂತ್. ಹವ್ಯಾಚೆರ್ ಹೊಂದ್ವೊನ್ ಹಿಂ ವೈರಸಾಂ ಸಬಾರ್ ವೊರಾಂ ವಾಂಚೊಂಕ್ ಸಕ್ತಾತ್. ತ್ಯಾ ಜಾಗ್ಯಾಂನಿ ಹಾತ್ ಭೊಂವ್ಡಾಯ್ಲ್ಯಾರ್ ಹೆರಾಂಚ್ಯಾ ಹಾತಾಕ್ ಕಣಾಂ ಆನಿ ತ್ಯಾ ಮುಕಾಂತ್ರ್ ವೈರಸಾಂ ಲಾಗ್ತಾತ್. ಅಶೆಂ ಪಿಡೆಂಚೆ ವೈರಸ್ ಲಾಗ್‍ಲ್ಲೆ ಹಾತ್ ಭಲಾಯ್ಕೆವಂತ್ ಮನ್ಶ್ಯಾನ್ ಆಪ್ಲ್ಯಾ ನಾಕಾ-ತೊಂಡಾ ಸರ್ಶಿಂ ವ್ಹೆಲ್ಯಾರ್ ವೈರಸ್ ಕುಡಿ ಭಿತರ್ ವೆತಾತ್. ಹಾಕಾ droplet transmission ಮ್ಹಣ್ತಾತ್.

ಹೆ ವೈರಸ್ ಕೊಣಾಯ್ಕೀ ಲಾಗ್ಯೆತಾ. ಅಶೆಂ ಲಾಗ್‍ಲ್ಲ್ಯಾ ಜಾಯಿತ್ತ್ಯಾಂಕ್ ವ್ಹಯ್ಲ್ಯಾಬಾರ್ ಶೆಳ್ ಆನಿ ಮಾತ್ಸೊ ತಾಪ್ ಆಸ್ತಾ. ಆನಿ ತೆ ತ್ಯಾ ವೆಳಾರ್ ಜಾಯಿತ್ತೆ ಕಡೆನ್ ವೈರಸ್ ಶಿಂಪ್ಡಾಂವ್ಕ್ ಸಕ್ತಾತ್. ತುಜ್ಯಾ ಸುತ್ತುರಾಂತ್ ಆಸ್ಚ್ಯಾ ಕೊಣಾಯ್ ಥಂಯ್ ಹಿಂ ವೈರಸಾಂ ಆಸ್ಯೆತಾ.

ಕೊರೊನಾ ಕಶೆಂ ಚುಕವ್ಯೆತಾ?

ಜಾಯಿತ್ತಿಂ ವೈರಸಾಂ ವಯ್ರ್ ವಿವರಾಯಿಲ್ಲ್ಯಾ droplet transmission ರಿತಿಂತ್ ಕುಡಿ ಭಿತರ್ ಸರ್ತಾತ್ ಜಾಲ್ಲ್ಯಾನ್, ಜೆರಾಲ್ ಥರಾನ್ ಹೆರ್ ಥರಾಂಚ್ಯಾ ವೈರಸಾಂಚೊ ಸಂಪರ್ಕ್ ಆಡಾಂವ್ಕ್ ಜಾಗ್ರುತೆನ್ ಆಸೊಂಕ್ ಜಾಯ್. ಸಾಮಾನ್ಯ್ ಶೆಳ್ ವಿಸ್ತಾರೊನ್ ವಚನಾಶೆಂ ಕಿತೆಂ ಚತ್ರಾಯ್ ಘೆವ್ಯೆತಾ ತಿಚ್ ಚತ್ರಾಯ್ ಕೊರೊನಾ ವೈರಸಾಚೊ ಸಮಸ್ಸೊ ಆಡಾಂವ್ಚೆ ಖಾತಿರ್‌ಯೀ ಉಪ್ಕಾರ್ತಾ.

• ಶೆಳ್ ತಾಪ್ ಆಸ್‍ಲ್ಲ್ಯಾ ಪಿಡೆಸ್ತಾಂಚಿ ಭೆಟ್ ಕೆಲ್ಲ್ಯಾಂತ್ ಬಾಧಕ್ ನಾ.
• ತಸಲ್ಯಾ ವ್ಯಕ್ತಿಚ್ಯಾ ಭೋವ್ ಲಾಗ್ಸರ್ ಆಸೊಂಕ್ ನಜೊ. ತಸಲ್ಯಾ ವ್ಯಕ್ತಿಂಕ್ ಹಾತ್ ಮೆಳಂವ್ಕ್ ನಜೊ.
• ವೈರಸ್ ಸಮಸ್ಸೊ ಆಸ್‍ಲ್ಲ್ಯಾಂ ಥಾವ್ನ್ ಲಗ್ಬಗ್ ಏಕ್ ಮೀಟರ್ (ತೀನ್ ಫುಟ್) ತಿತ್ಲೊ ಅಂತರ್ ದವರ್ಚೊ ಬರೊ.
• ಗರ್ಜೆ ಭಾಯ್ರ್ ಕದೆಲ್, ಮೇಜ್ ವಾ ಸಾರ್ವಜನಿಕ್ ಜಾಗ್ಯಾಂನಿ ಹೆರ್ ಸುವಾತೆಂಚೆರ್ – ಕುಂದೊ, ವಣದ್ ಅಶೆಂ ಗರ್ಜ್ ನಾತ್‍ಲ್ಲೆ ಕಡೆನ್ ಹಾತ್ ಭೊಂವ್ಡಾಯ್ನಾಯೆ. ತರೀ ಜಾಯ್ತೆ ಪಾವ್ಟಿಂ ಆಮ್ಚ್ಯಾ ಗುಮನಾ ವಿಣೆಂ ದೊಳ್ಯಾಂಕ್ ದಿಸನಾಸ್ಚ್ಯಾ ಹೆರಾಂಚ್ಯಾ ಉಸ್ವಾಸಾಚ್ಯಾ ಕಣಾಂಕ್ ಆಮ್ಚೆ ಹಾತ್ ಲಾಗ್ತಿತ್. ತೆ ಹಾತ್ ಗುಮಾನ್ ನಾಸ್ತಾಂ ನಾಕಾ ತೊಂಡಾಕ್ ಲಾಗ್ಲ್ಯಾರ್ ವೈರಸ್ ಕುಡಿ ಭಿತರ್ ವೆತಾತ್.

• ವಾರ್‍ಯಾರ್ ಉಬೊನ್ ವೈರಸ್ ಕುಡಿ ಭಿತರ್ ವಚನಾಂತ್.
• ವೈರಸ್ ತಾಪ್ ಆಸ್‍ಲ್ಲ್ಯಾ ವ್ಯಕ್ತಿಚ್ಯಾ ಸುತ್ತುರಾಕ್ ಗೆಲ್ಲ್ಯಾ ತಕ್ಷಣ್, ಸಾಬು ಘಾಲ್ನ್ ಬರ್‍ಯಾನ್ ಹಾತ್ ಧುಂವ್ಕ್ ಜಾಯ್. ಘರಾ ಭಾಯ್ರ್ ಸಾರ್ವಜನಿಕ್ ಸುವಾತೆಂಕ್ ವಚೊನ್ ಆಯಿಲ್ಲ್ಯಾ ತಕ್ಷಣ್ ಹಾತ್ ಧುಂವ್ಚಿ ಸವಯ್ ಬರಿ. ತವಳ್ ತವಳ್ ಹಾತ್ ಧುಂವ್ಚಿ ಸವಯ್ ಕರಾ.
• ಘರಾ ಭಾಯ್ರ್ ವೆತಾನಾ ಹಾತ್ ಧುಂವ್ಕ್ ಸಾಬು ಮೆಳನಾ ಜಾಲ್ಲ್ಯಾನ್ ಸ್ಯಾನಿಟೈಸರ್ಸ್ ವಾಪ್ರಿಯೆತಾ. ಸ್ಯಾನಿಟೈಸರ್ಸಾಂ ಪ್ರಾಸ್ ಸಾಬು ವಾಪ್ರುನ್ ಹಾತ್ ಧುಂವ್ಚೆಂ ಬರೆಂ.
• ಘರಾ ಭಿತರ್ ಆಸ್‍ಲ್ಲ್ಯಾಂನಿ ತವಳ್ ತವಳ್ ಹಾತ್ ಧುಂವ್ಚಿ ಗರ್ಜ್ ನಾ.
• ಪಿಡಾ ನಾತ್‍ಲ್ಲ್ಯಾಂನಿ ಮುಸ್ಕಾರಾಕ್ ಮಾಸ್ಕ್ ಬಾಂಧ್‍ಲ್ಲ್ಯಾಂತ್ ಪ್ರಯೋಜನ್ ನಾ. ಪಿಡೆಸ್ತಾಚಿ ಜತನ್ ಘೆತೆಲ್ಯಾಂನಿ ನಿರ್ದಿಷ್ಟ್ ಥರಾಚೆಂ ಮಾಸ್ಕ್ ಬಾಂಧ್‍ಲ್ಲ್ಯಾಂತ್ ಪಿಡಾ ಲಾಗ್ಚೆ ಸಂದ್ರಾಪ್ ಉಣೆಂ ಕರ್ಯೆತಾ. ಸಾಮಾನ್ಯ್ ಸರ್ಜಿಕಲ್ ಮಾಸ್ಕ್ ಬಾಂಧ್‍ಲ್ಲ್ಯಾಂತ್ ಪಿಡಾ ಲಾಗ್ಚಿ ಆಡಾಂವ್ಕ್ ಜಾಯ್ನಾ.

ಘರಾ ಭಿತರ್ ಕಿತ್ಯಾಕ್ ರಾವಜೆ?

ಕೊರೊನಾ ಪಿಡೆಚ್ಯೆ ವೈರಸ್ ಆಮ್ಚ್ಯಾ ಭೊಂವ್ತಿಂ ಆಸ್ಚೆ ಕಿತ್ಲೆಂ ಚತ್ರಾಯ್ ಘೆತ್ಲ್ಯಾರೀ ಆಮ್ಕಾಂ ಲಾಗ್ಯೆತಾ ದೆಕುನ್ ಆಮಿ ಘರಾ ಭಿತರ್ ರಾಂವ್ಚೆಂ ಸೂಕ್ತ್. ದೋನ್ ಹಫ್ತೆ ಸಕ್ಕಡ್ ಘರಾ ಭಿತರ್‌ಚ್ ರಾವ್ತಿತ್ ತರ್ ಎಕ್ಲ್ಯಾ ಥಾವ್ನ್ ದುಸ್ರ್ಯಾಕ್ ವಿಸ್ತಾರುನ್ ವೆಚೆಂ ಆಡಾವ್ಯೆತಾ. ಮ್ಹಾಕಾ ಕಿತೆಂಯ್ ಜಾಂವ್ಚೆಂ ನಾ ಮ್ಹಣ್ ಆಳ್ಸಾಯ್ ಕರಿನಾಕಾತ್.

ಸರ್ಕಾರಾನ್ ದಿಲ್ಲ್ಯಾ ಸೂಚನಾ ಖಾಲ್ ಘರಾ ಭಿತರ್‌ಚ್ ರಾವಾ.

ಭಲಾಯ್ಕಿ ನಾಜೂಕ್ ಆಸ್‍ಲ್ಲಿಂ, ಸಾಟ್ ವರ್ಸಾಂ ಪ್ರಾಯೆ ವಯ್ಲಿಂ ಕಿತ್ಲ್ಯಾ ಬರ್‍ಯಾ ಭಲಾಯ್ಕೆನ್ ಆಸ್ಲ್ಯಾರೀ ಘರಾ ಭಾಯ್ರ್ ವಚನಾಕಾತ್. ಗರ್ಜೆಚ್ಯೊ ವಸ್ತು ಹಾಡುಂಕ್ ಕೊಣಾಯ್ ತರ್ನಾಟ್ಯಾಂಚಿ ಮಜತ್ ಘೆಯಾ.

ಕೊರೊನಾ ಆಯ್ಲ್ಯಾರ್ ಕಿತೆಂ ಕರಿಜೆ?

• ಜಾಯಿತ್ತ್ಯಾ ಹೆರ್ ವೈರಸಾಂ ಥಾವ್ನ್‌ಯೀ ತಾಳೊ ದೂಕ್, ಶೆಳ್, ತಾಪ್, ಆಂಗ್‍ಪಾಂಗ್ ದೂಕ್ ಯೆವ್ಯೆತಾ ಜಾಲ್ಲ್ಯಾನ್ ಶೆಳ್, ತಾಪ್ ಆಸ್‍ಲ್ಲ್ಯಾ ತಕ್ಷಣ್ ಕೊರೊನಾ ಮ್ಹಣ್ ಭಿರಾಂತ್ ನಾಕಾ. ತುಮ್ಚ್ಯಾ ಸದಾಂಚ್ಯಾ ದಾಕ್ತೆರಾಕ್ ಮೆಳೊನ್ ವಕತ್ ಘೆಯಾ. ಉಸ್ವಾಸ್ ಕಾಡುಂಕ್ ತ್ರಾಸ್ ಜಾಲ್ಯಾರ್ ವಾ ಪಿಡಾ ಚಡ್ ಜಾಯಿತ್ತ್ ಆಸಾ ಮ್ಹಣ್ ಭೊಗ್ಲ್ಯಾರ್ ಮೆಡಿಕಲ್ ಕೊಲೆಜಿಚ್ಯಾ ಆಸ್ಪತ್ರೆಂಕ್ ವಚ್ಯೆತಾ. ಮಂಗ್ಳುರಾಂತ್ ಫಾದರ್ ಮುಲ್ಲರ್ ಆಸ್ಪತ್ರ್, ಕೆ.ಎಂ.ಸಿ. ಆಸ್ಪತ್ರ್, ವೆನ್‍ಲೊಕ್ ಆಸ್ಪತ್ರ್, ಯೆನೆಪೋಯಾ, ಕೆ.ಎಸ್. ಹೆಗ್ಡೆ ಆಸ್ಪತ್ರ್ ; ಉಡುಪಿ, ಮಣಿಪಾಲ್ ಸುತ್ತೂರಾಂತ್ ಮಣಿಪಾಲ್ ಕೆ.ಎಂ.ಸಿ. ಆಸ್ಪತ್ರ್, ಅಜ್ಜರಕಾಡ್ ಸರ್ಕಾರಿ ಆಸ್ಪತ್ರ್ ಅಶೆಂ ವಚ್ಯೆತಾ.

• ಹೆರ್ ಪಿಡಾ ಆಸೊನ್, ನಿರ್ದಿಷ್ಟ್ ಎಕಾ ದಾಕ್ತೆರಾ ಕಡೆನ್ ವಕತ್ ಘೆವ್ನ್ ಆಸಾತ್ ತರ್, ಶೆಳ್, ತಾಪ್ ಆಸ್ತಾನಾಂಯ್ ತಾಚಿ ಸಲಹಾ ಘೆಯಾ. ಕೊರೊನಾ ವೈರಸಾಚೊ ಸಮಸ್ಸೊ ಆಸ್‍ಲ್ಲ್ಯಾ ಪಯ್ಕಿಂ ಶೆಂಬರಾಂತ್ ಧಾ ಜಣಾಂಕ್ ಮಾತ್ರ್ ಆಸ್ಪತ್ರೆಂತ್ ದಾಕಲ್ ಕರುಂಕ್ ಪಡ್ತಾ.
• ಕೊರೊನಾ ಪಿಡೆ ವಿಶಿಂ ಅನಾವಶ್ಯ್ ಪ್ರಚಾರ್ ದಿಲ್ಲ್ಯಾನ್ ಲೋಕ್ ಭಿಯೆಲಾ. ಕೊರೊನಾ ವೈರಸಾಂತ್ ಮೆಲ್ಲ್ಯಾ ಪ್ರಾಸ್ ಚಡ್ ಲೋಕ್ ರಸ್ತ್ಯಾ ಅವ್ಘಡಾಂತ್ ಮೊರ್ತಾತ್. ಹಿ ಪಿಡಾ ಆಯ್ಲ್ಯಾರೀ ಮರಣ್ ಪಾವ್ತೆಲ್ಯಾಂಚೊ ಸಂಕೊ ಭೋವ್ ಲ್ಹಾನ್.
• ಜೆರಾಲ್ ಭಲಾಯ್ಕಿ ಬರಿ ಆಸ್‍ಲ್ಲ್ಯಾಂ ಥಂಯ್ ಅನಾಹುತ್ ಜಾಂವ್ಚಿ ಸಾಧ್ಯತಾಯ್ ಉಣಿ.

Send Feedback to: budkuloepaper@gmail.com

Like us at: www.facebook.com/budkulo.epaper

The post ಕೊರೊನಾ ಆಯ್ಲಾಂ, ಚತ್ರಾಯ್ ಸಾಂಬಾಳಾ appeared first on Budkulo.

ಆಸೊಂ… ಲೋಕ್ ಇಗರ್ಜೆಕ್ ಮ್ಹಣ್ತಾನಾ, ಮನ್ ನಾತ್‍ಲ್ಲೊಯೀ ಅನಿವಾರ್ಯ್ ಮ್ಹಣೊನ್ ಮತಿಂತ್‍ಚ್ ಪುರ್ಪುರೊನ್ ವಾ ಶಿಣೊನ್ ತರೀ ದುಡು ದೀನಾಸ್ತಾನಾ ರಾವನಾ. ಪುಣ್ ಹೊಚ್ ಲೋಕ್ ನೀಜ್ ಜಾವ್ನ್ ಖರ್‍ಯಾ ತಶೆಂ ಬರ್ಯಾ ಇರಾದ್ಯಾಂಕ್ ಕಿತ್ಲೊ ದುಡು ದಿತಾ? ತೆಂಯೀ ಇಗರ್ಜೆ ಥಾವ್ನ್ ಆನಿ ಪಾದ್ರಿಂನಿ ನ್ಹಯ್ ಆಸ್ತಾಂ ಹೆರ್ ಕೊಣೆಂಯೀ ವಿಚಾರ್ಲ್ಯಾರ್ ದಿತಾಗೀ ವಾ ದಿತಾ ತರ್ ಕಿತ್ಲೊ ದಿತಾ ಮ್ಹಳ್ಳೆಂ ಮಿಲಿಯನ್ ಡಾಲರಾಚೆಂ ಸವಾಲ್! (ತ್ಯಾ ವಿಶಿಂಚ್ ಚರ್ಚಾ ಕರ್ಯೆತ್, ತಿತ್ಲೆಂ ಸ್ಟಫ್ ಆಸಾ).

ಹೆಂ ಪೀಠಿಕೆ ವಾ ಚರ್ವಿತ ಚರ್ವಣ (ಥೊಡ್ಯಾಂಕ್ ತಶೆಂ ಭೊಗ್ತಾ!) ರಾಜಾಂವ್ ಕಿತ್ಯಾಕ್ ಮ್ಹಳ್ಯಾರ್, ಲೊಕಾಚ್ಯಾ ಉಪ್ಕಾರಾಕ್ ಆನಿ ಫಾಯ್ದ್ಯಾಕ್ ಪಡ್ಚಿಂ ಯೋಜನಾಂ ಕರ್ಚ್ಯಾಂತ್ ಆಮ್ಚ್ಯಾ ಇಗರ್ಜ್‍ಮಾತೆಕ್ ತಶೆಂ ಪುರ್ವಿತಾಂಕ್ ಕಿತ್ಲಿ ಆಸಕ್ತ್ ಆಸಾ ಮ್ಹಳ್ಳೆಂ ಸಕ್ಕಡ್ ಜಾಣಾಂತ್! ಹ್ಯಾ ವಿಶಿಂ ವೆವೆಗ್ಳಿಂ ದೃಷ್ಟಾಂತಾಂ, ರುಜ್ವಾತಿಂ-ಸಾಕ್ಷೆ ಸವೆಂ, ಆಮ್ಚೆ ಹುಜಿರ್ ಆಸಾತ್. ತಶೆಂ ಮ್ಹಣ್ ಸಕ್ಕಡ್ ಪುರ್ವಿತಾಂಕ್ ಅಸಲ್ಯಾ ಸಂಗ್ತಿಂನಿ ದುರ್ಸೊಂಕ್ ಫಾವೊ ನಾ. ಜನರಲೈಸೇಶನ್ ಕರ್ಚೆಂಯೀ ವಾಜ್ಭಿ ನ್ಹಯ್. ಪುಣ್ ಕೊಣೆಂ ನೆಗಾರ್ಲ್ಯಾರೀ, ಇನ್ಕಾರ್ ಕೆಲ್ಯಾರೀ, ಉಜ್ವಾಡಾಂತ್ ದಿಸ್ಚೆಂ ಸತ್ ಕಿತೆಂಗೀ ಮ್ಹಳ್ಯಾರ್, ಲೊಕಾಕ್, ಪ್ರತ್ಯೇಕ್ ಕರ್ನ್ ಆನಿ ನಿರ್ದಿಶ್ಟ್ ಜಾವ್ನ್ ದುಬ್ಳ್ಯಾಂಕ್, ಗರ್ಜೆವಂತಾಂಕ್, ನಿರಾಧಾರಿಂಕ್ ಬರೆಂ-ಕುಮಕ್-ಮಜತ್ ಕರ್ಚ್ಯಾಂತ್ ಆನಿ ಆಧಾರ್ ಜಾಂವ್ಚ್ಯಾಂತ್ ಆಪ್ಣಾಕ್‍ಚ್ ಸಮರ್ಪುನ್ ದಿಂವ್ಚೆ ಪುರ್ವಿತ್ ಭೋವ್ ಉಣೆಂ! (ಅಶೆಂ ಹಾಂವೆಂ ಮ್ಹಳ್ಳೆಕ್ಷಣ್ ಮ್ಹಾಕಾ ಯೆಟುಂಕ್, ನಿಂದಾ ಕರುಂಕ್ ಆನಿ ‘ಶಿರಾಪ್’ ಘಾಲುಂಕ್ ಫುಡೆಂ ಸರ್ತೆಲೆ ಜಣ್ ಆಸಾತ್ ಮ್ಹಳ್ಳೆಂಯೀ ಹಾಂವ್ ಜಾಣಾಂ. ಶಿವಾಯ್, ಅಪಪ್ರಚಾರ್ ಎಡಿಶನಲ್ ಎಡ್ವಾಂಟೇಜ್!).

ಹ್ಯಾ ಮ್ಹಜ್ಯಾ ರಾಜಾಂವಾಕ್ ಸಾಕ್ಸ್ ದಿಂವ್ಚಿಂ ದೃಷ್ಟಾಂತಾಂ ಪಾಟ್ಲ್ಯಾಚ್ ಹಫ್ತ್ಯಾಂತ್ ಥೊಡ್ಯಾಂನಿ ಮ್ಹಜೆ ಸಾಮ್ಕಾರ್ ದವರ್ಲಿಂ. ತ್ಯಾ ವಿಶಿಂ ಇಲ್ಲೆಶೆಂ ಅಧ್ಯಯನ್ ಕರುಂಕ್ ಆಸಾ ದೆಕುನ್ ತಿ ಗಜಾಲ್ ಆನ್ಯೇಕ್ ಪಾವ್ಟಿಂ ಬರವ್ನ್ ಕಾಡ್ತಾಂ.

ಸಾಟ್ ಸತ್ತರ್ ಫೊಂಡಾ ಭಿತರ್ ಮ್ಹಣೊನ್ ಏಕ್ ಸಾಂಗ್ಣಿ ಆಸಾ. ಭೋವ್ಶಾ ಆದ್ಲ್ಯಾ ಕಾಳಾರ್ ಲೊಕಾಚ್ಯಾ ಜಿವಿತಾಚಿ ಸರಾಸರ್ ಉಣಿಂ ಆಸ್‍ಲ್ಲ್ಯಾನ್ ಅಸಲಿ ಸಾಂಗ್ಣಿ ಉದೆಲ್ಲಿ ಆಸ್ತೆಲಿ. ಪುಣ್, ಹಾಂಗಾ ಆಸಾ ಎಕ್ಲೊ ಮನಿಸ್, ಜೊ ಏಕ್ ಧೀರ್ ಯಾಜಕ್, 87 ವರ್ಸಾಂಚ್ಯಾ ಪ್ರಾಯೆರ್’ಯೀ ವ್ಹಡ್ ವ್ಹಡ್ ಯೋಜನಾಂ ಸಪ್ಣೆವ್ನ್ ತಿಂ ಕಾರ್ಯಾ ರುಪಾಕ್ ಹಾಡುಂಕ್ ತರ್ನಾಟ್ಯಾಂನಿ ಲಜೆಂವ್ಚೆಪರಿಂ ಪೆಚಾಡ್ತಾ. ಹಾಂ, ಏಕ್ ಗಜಾಲ್ ಸ್ಪಷ್ಟ್ ಕರಿಜೆ. ತಾಚಿಂ ಯೋಜನಾಂ ಕಾಂಯ್ ದರ್ಬಾರಾಚಿಂ ವಾ ವ್ಹಡ್‍ಪಣ್ ದಾಕಂವ್ಚಿಂ, ಮಿಜಾಸ್ಕೆಚಿಂ ಬಿಲ್ಕುಲ್ ನ್ಹಯ್. ಹೊ ಪಾದ್ರ್ಯಾಬ್ ದುಬ್ಳ್ಯಾಂಕ್, ಗರ್ಜೆವಂತಾಂಕ್, ಅಸ್ಕತ್ ಆಸ್‍ಲ್ಲ್ಯಾಂಚ್ಯಾ ಗರ್ಜೆಕ್ ಪಾಂವ್ಚಿಂ ಯೋಜನಾಂ ಸಪ್ಣೆತಾ ಆನಿ ತಿಂ ಜಾರಿ ಕರುಂಕ್ ಕಮರ್ ಬಾಂಧ್ತಾ.

ವ್ಹಯ್. ಹೊ ಯಾಜಕ್ ಜಾವ್ನಾಸ್ ಮೊನ್ಸಿಂಜೊರ್ ಎಡ್ವಿನ್ ಸಿ. ಪಿಂಟೊ. ಏಕ್ ಶೀದಾ ಯಾಜಕ್, ಧಯ್ರಾಧಿಕ್ ಮನಿಸ್ ಆನಿ ಕನ್ವಿಕ್ಷನ್ ಆಸ್ಚೊ ದಾರ್ಶನಿಕ್ ವ್ಯಕ್ತಿ ಹೊ. ಪಾಟ್ಲ್ಯಾ 30 ವರ್ಸಾಂ ಥಾವ್ನ್ ಬಾಪ್ ಎಡ್ವಿನ್ ಪಿಂಟೊ ಮೂಡುಬಿದ್ರಿಚ್ಯಾ ಅಲಂಗಾರಾಂತ್ ಆಸ್ಚ್ಯಾ ಮೌಂಟ್ ರೋಜರಿಂತ್ ಸೆವಾ ದೀವ್ನ್ ಆಸಾ. ಹಿ ಸೆವಾ ದೆವಾಚ್ಯಾ ನಾಂವಾನ್, ಮರಿಯೆ ಮಾಂಯ್ಚ್ಯಾ ಮೊಗಾನ್ ತೊ ದಿತಾ ದುಬ್ಳ್ಯಾ-ಧಾಕ್ಟ್ಯಾಂಕ್. ಹ್ಯಾ ತಾಚ್ಯಾ ಮಿಸಾಂವಾಂತ್ ತಾಣೆಂ ಮಾದ್ರಿಂಚೊ ಏಕ್ ಮೇಳ್‍ಚ್ ಘಡುನ್ ಚರಿತ್ರಾ ರಚ್ಲ್ಯಾ.

ಮೌಂಟ್ ರೋಸರಿಂತ್ ಪ್ರಾಯ್ವಂತಾಂಚೊ ಆಸ್ರೊ ಆಸಾ ಮ್ಹಣ್ ಜಾಯ್ತೆ ಜಾಣಾಂತ್. ಸಾಂಗಾತಾ ಹ್ಯಾಚ್ ಮೌಂಟ್ ರೋಜರಿಚ್ಯಾ ಆಸ್ರ್ಯಾ ಖಾಲ್ ಏಕ್ ಆಸ್ಪತ್ರ್‍ಯೀ ಆಸಾ ತೆಂ ತೆಣೆಂಚೊ ಲೋಕ್ ಜಾಣಾಂ. 1936 ಇಸ್ವೆಂತ್ ತವಳ್ ಅಲಂಗಾರ್ ಫಿರ್ಗಜೆಂತ್ ಯಾಜಕ್ ಜಾವ್ನಾಸ್‍ಲ್ಲ್ಯಾ ಮೊನ್ಸಿಂಜೊರ್ ಫ್ರಾನ್ಸಿಸ್ ಎಲಿಯಾಸ್ ಡಿಸೋಜಾನ್ ಟಿ.ಬಿ. ಪಿಡೆಸ್ತಾಂಕ್ ಮೌಂಟ್ ರೋಜರಿ ಟಿ.ಬಿ. ಸೆನೆಟೋರಿಯಂ ಸ್ಥಾಪನ್ ಕೆಲ್ಲೆಂ. ಆಧುನಿಕ್ ಕಾಳಾರ್ ಟಿ.ಬಿ. ಪಿಡಾ ನಿಯಂತ್ರಣಾಕ್ ಆಯ್ಲ್ಯಾ ಉಪ್ರಾಂತ್ ಹಾಂಗಾ ಆಸ್ಪತ್ರ್ ಸ್ಥಾಪನ್ ಜಾಲಿ. ಅಶೆಂ ಪಾಟ್ಲ್ಯಾ 70 ವರ್ಸಾಂ ಥಾವ್ನ್ ಮೌಂಟ್ ರೋಜರಿ ಆಸ್ಪತ್ರ್ ಲೊಕಾಕ್ ಸೆವಾ ದೀವ್ನ್ ಆಸಾ.

ಮೊನ್ಸಿಂಜೊರ್ ಎಡ್ವಿನ್ ಪಿಂಟೊಚಿ ಸೆವಾ, ಕಾರ್ಬಾರಾಂ ಜಾಯ್ತೊ ಲೋಕ್ ಜಾಣಾಂ. ಪ್ರಾಯೆಚೆಂ ಗಣ್ಣೆಂ ಕರಿನಾಸ್ತಾನಾ ವಾವ್ರ್ ಕರ್‍ಚೊ ತಾಚೊ ಸ್ವಭಾವ್ ಹೆರಾಂಕ್ ಆಜ್ಯಾಪ್ ಹಾಡಯ್ತಾ. ಮೂಡುಬಿದ್ರೆಚ್ಯಾ ಆನಿ ಸರ್ಶಿಲ್ಯಾ ಗಾಂವ್ಚ್ಯಾ ಲೊಕಾಕ್ ಉಪ್ಕಾರಾಕ್ ಪಡೊಂಕ್ ತಾಕಾ ಹಿ ಮೌಂಟ್ ರೋಜರಿ ಆಸ್ಪತ್ರ್ ಆನಿಕೀ ವ್ಹಡ್ ಕರ್‍ಚಿ ಆಲೋಚನ್ ಆಯ್ಲಿ ಆನಿ ತ್ಯಾ ದಿಶೆನ್ ತಾಣೆಂ ಮೆಟಾಂ ಕಾಡ್ಲಿಂ. ಹಾಚೊ ಫಳ್ ಜಾವ್ನ್ ನವಿ, ವ್ಹಡ್ಲಿ ಆಸ್ಪತ್ರ್ ಸ್ಥಾಪನ್ ಕರ್ಚೆಂ ಮಿಸಾಂವ್ ಕಾರ್ಯಗತ್ ಜಾಲೆಂ. ಪ್ರಸ್ತುತ್, ನವ್ಯಾ ಆಸ್ಪತ್ರೆಚ್ಯಾ ಬಾಂಧ್ಪಾಚೆಂ ಕಾಮ್ ಭರಾನ್ ಚಲೊನ್ ಆಸಾ. ವೆಗಿಂಚ್ ಉಗ್ತಾವಣ್ ಜಾಂವ್ಚ್ಯಾ ದಿಶೆನ್ ಬಾಪ್ ಎಡ್ವಿನ್ ವಾವ್ರುನ್ ಆಸಾ.

ಮೌಂಟ್ ರೋಜರಿ ಆಸ್ಪತ್ರೆಚೆಂ ಆಡಳ್ತೆಂ ಆನಿ ನಿರ್ವಹಣ್, ಮೊನ್ಸಿಂಜೊರ್ ಎಡ್ವಿನ್ ಪಿಂಟೊನ್ ಘಡ್‍ಲ್ಲ್ಯಾ ರೊಜಾರ್ ಮಾಯೆಚ್ಯೊ ಸೆವಕಿ (Helpers of Mount Rosary) ಮೆಳಾಚಿಂ ಸಿಸ್ಟರಾಂ ಪಳೆವ್ನ್ ಆಸಾತ್. ಪ್ರಸ್ತುತ್ ಸಿ. ಪ್ರೆಸಿಲ್ಲ ಡಿಮೆಲ್ಲೊ ಆಡಳ್ತ್ಯಾಧಿಕಾರಿ ಜಾವ್ನ್ ಸೆವಾ ದಿತಾ.

ಎದೊಳ್ ಪರ್ಯಾಂತ್ ಆಸ್ಪತ್ರ್ ಪರ್ನ್ಯಾ ಬಾಂಧ್ಪಾಂತ್ ಆಸ್‍ಲ್ಲಿ. ವ್ಹಡ್ಲ್ಯಾ ಆಸ್ಪತ್ರೆಚೆಂ ಯೋಜನ್ ಚಾಲು ಜಾತಾನಾ ಹ್ಯಾ ಬಾಂಧ್ಪಾಚೊ ಅರ್ಧೊ ಭಾಗ್ ಕಾಡ್ಲಾ. ಉರ್ಲೆಲ್ಯಾ ಭಾಗಾಂತ್ ಪ್ರಸ್ತುತ್ ಆಸ್ಪತ್ರ್ ಚಲೊನ್ ಆಸಾ. ಶಿವಾಯ್ ನವ್ಯಾನ್ ಆಯುರ್ವೇದಿಕ್ ಆನಿ ಫಿಸಿಯೋಥೆರಪಿ ವಿಭಾಗ್‍ಯೀ ಸುರ್ವಾತ್ ಜಾಲಾ.

ನವ್ಯಾ ಆಸ್ಪತ್ರೆಂತ್ 50 ಬೆಡ್ಡಾಂಚಿ ಜಾವ್ನಾಸ್ತೆಲಿ. ಸವೆಂ ತುರ್ತ್ ಚಿಕಿತ್ಸಾ ವಿಭಾಗ್ (Casualty), ಶಸ್ತ್ರಚಿಕಿತ್ಸಾ (Operation Theatre) ವಿಭಾಗ್, ಕನ್ಸಟ್ಟಿಂಗ್ ರೂಮಾಂ, ಸ್ತ್ರೀಯಾಂಚ್ಯಾ ಪ್ರಸೂತೆಚೊ ವಿಭಾಗ್ ಆಸ್ತೆಲೆ. ಏಕ್ ಸುಸಜ್ಜಿತ್ ಆಸ್ಪತ್ರ್ ಹಿ ಜಾಂವ್ಕ್ ಪಾವ್ತೆಲಿ.

ಸುರ್ವೆರ್ ಹಾಂವೆಂ ‘ಪೀಠಿಕೆ’ ಸಾಂಗ್‍ಲ್ಲ್ಯಾಕ್ ಜೊಕ್ತೆಂ ಕಾರಣ್ ಆಸಾ. ಪ್ರಸ್ತುತ್ 5 ಕೊರೊಡಾಂಚ್ಯಾ ಹ್ಯಾ ಆಸ್ಪತ್ರೆಕ್ ಎದೊಳ್ ಫಕತ್ ರು. 62 ಲಾಕ್ ಜಮೊ ಜಾಲಾ ಮ್ಹಣ್ತಾ ಬಾಪ್ ಎಡ್ವಿನ್. ತಾಕಾ ರೊಜಾರ್ ಮಾಯೆಚೆರ್ ಭರ್ವಸೊ ಆಸಾ; ಆಪ್ಲೆಂ ಯೋಜನ್ ಜಾರಿ ಜಾಂವ್ಕ್ ತಿಚ್ಯಾ ಕುರ್ಪೆನ್ ಜಾಯ್ ಆಸ್‍ಲ್ಲಿ ಮಜತ್ ಫಾವೊ ಜಾತಾ ಮ್ಹಣ್ತಾ ತೊ ಧಯ್ರಾನ್. ದುಬ್ಳ್ಯಾ-ಧಾಕ್ಟ್ಯಾಂಕ್ ಆನಿ ಜಾತ್-ಧರ್ಮ್ ಪಳೆನಾಸ್ತಾನಾ ಪಿಡೆಸ್ತಾಂಕ್ ಸೆವಾ ದಿಂವ್ಚ್ಯಾ, ಭಲಾಯ್ಕಿ ಜೊಡುನ್ ದಿಂವ್ಚ್ಯಾ ಅಸಲ್ಯಾ ಯೋಜನಾಕ್ ಲೊಕಾನ್ ದಾನ್ ದೀಜೆ ಮ್ಹಣ್ ‘ಬುಡ್ಕುಲೊ’ ಉಲೊ ದಿತಾ. ಕ್ರಿಸ್ತಾಂವ್ ಸಮಡ್ತಿಚೊ ಲೋಕ್ ದಾನ್ ದಿಂವ್ಚ್ಯಾಂತ್ ಉದಾರ್ ಮನಾಚೊ ವ್ಹಯ್ ತರೀ, ಜಾಯ್ತೆ ಪಾವ್ಟಿಂ ತಾಣಿಂ ದಿಂವ್ಚೆಂ ದಾನ್ ಲೊಕಾಕ್ ಉಪ್ಕಾರಾಕ್ ಪಡನಾತ್‍ಲ್ಲ್ಯಾ ಸಂಗ್ತಿಂಕೀ (ಸ್ವಾರ್ಥಿಂಚ್ಯಾ ಫಾಯ್ದ್ಯಾಕ್) ವಾಪರ್ ಜಾತಾ ಮ್ಹಳ್ಳೆಂಯೀ ಸತ್. ದೆಕುನ್ ಲೊಕಾನ್ ಚಾರ್ ಜಣಾಂಚ್ಯಾ ಬರೆಪಣಾಕ್ ವಾಪರ್ ಜಾಂವ್ಚ್ಯಾ, ಬಾಪ್ ಎಡ್ವಿನ್ ಪಿಂಟೊನ್ ಬಾಂಧ್ಚ್ಯಾ ಆಸ್ಪತ್ರೆ ತಸಲ್ಯಾ ಯೋಜನಾಂಕ್, ಬರ್ಯಾ ಮನಾನ್ ಮಜತ್ ಕರಿಜೆ.

ಖುಷೆಚಿ ಗಜಾಲ್ ಮ್ಹಳ್ಯಾರ್, ಗರ್ಜೆವಂತಾಂಕ್ ಕೊಣೀ ಮಜತ್ ಕರ್ತಾ ಮ್ಹಣ್ತಾನಾ ಜಾತ್-ಧರ್ಮ್ ಮ್ಹಳ್ಳೊ ಬೇಧ್ ನಾಸ್ತಾನಾ ಲೋಕ್ ಸ್ವಖುಷೆನ್ ದುಡು ದಿತಾ ಮ್ಹಳ್ಳೆಂ ಬೆಳ್ಮಣ್‍ಚ್ಯಾ ರೋಶನ್ ಡಿಸೋಜಾನ್ ಸುರ್ವಾತ್ ಕೆಲ್ಲ್ಯಾ ‘ಹ್ಯೂಮಾನಿಟಿ’ ಸಂಸ್ಥ್ಯಾಕ್ ಲೊಕಾನ್ ದಿಂವ್ಚಿ ಕುಮಕ್‍ಚ್ ಸಾಕ್ಸ್. ಎಕಾ ಕಾಳಾರ್ ಅಸಲೆಂ ಕಾಮ್ ಮಾದ್ರಿಂನಿ ಕರ್‍ಚೆಂ ಆಸ್‍ಲ್ಲೆಂ. ಮದರ್ ತೆರೆಸಾ ಹಾಕಾ ಭೋವ್ ವ್ಹಡ್ ಸಾಕ್ಸ್. ಆಜ್ ಕಾಲ್ ಲಾಯಿಕ್‍ಯೀ ನಿರ್ಗತಿಕಾಂಕ್ ಜಿವಿತ್ ದಿಂವ್ಚ್ಯಾ ಮಿಸಾಂವಾಂತ್ ಮೆತೆರ್ ಜಾವ್ನ್ ಆಸಾತ್.

ಜಶೆಂ ರೋಶನ್ ಬೆಳ್ಮಣ್ ಆಪ್ಲ್ಯಾಚ್ ಶೈಲೆನ್ ಲೊಕಾಕ್ ಪಾವ್ತಾ, ಪಾವೂರಾಂತ್ ‘ಸ್ನೇಹಾಲಯ’ ಮುಖಾಂತ್ರ್ ನಿರ್ಗತಿಕಾಂಕ್-ಅನಾಥಾಂಕ್ ಆಧಾರ್ ದಿಂವ್ಚೊ ಜೋಸೆಫ್ ಕ್ರಾಸ್ತಾ ಆಮ್ಚೆ ಮಧ್ಲೊ ಬರೊ ಸಾಮಾರಿಯಾಗಾರ್. ವೆನ್ಲಾಕ್ ಆಸ್ಪತ್ರೆಚ್ಯಾ ಪಿಡೆಸ್ತಾಂಕ್ ಆನಿ ತಾಂಚ್ಯಾ ಸಾಂಗಾತ್ಯಾಂಕ್ ಹರ್ಯೆಕ್ ಧನ್ಪಾರಾಂ ಜೆವಣ್ ತೊ ಒದಗ್ಸುನ್ ದಿತಾ. ಮಂಗ್ಳುರ್ ಶ್ಹೆರಾಂತ್ ‘ವೈಟ್ ಡೌಸ್’ ಮುಖಾಂತ್ರ್ ಕೊರಿನ್ ರಸ್ಕಿನ್ಹಾಯೀ ವಾಟೆರ್ ಪಡ್ಲೆಲ್ಯಾಂಕ್ ಸ್ವಾಭಿಮಾನಾಚೆಂ ಜಿವಿತ್ ದಿಂವ್ಚೆಂ ಮಿಸಾಂವ್ ಕರುನ್ ಆಸಾ. ಅಸಲ್ಯಾ ಖರ್‍ಯಾ, ಬರ್‍ಯಾ ಆನಿ ಮನ್ಶ್ಯಾಪಣಾಚ್ಯಾ ಸೆವೆಕ್ ಶಾಭಾಸ್ಕಿ ಫಾವೊ ಆನಿ ತಾಂಕಾಂ ಲೊಕಾನ್ ಮಜತ್ ದೀಜೆ.

ಮೌಂಟ್ ರೋಜರಿ ಆಸ್ಪತ್ರ್, ಬಾಪ್ ಎಡ್ವಿನಾನ್ ಸಪ್ಣೆಲ್ಲೆಪರಿಂ ವೆಗಿಂಚ್ ಕಾರ್ಯಗತ್ ಜಾಂವ್ದಿ. ಹ್ಯಾ ಯೋಜನಾಕ್ ದೆವಾಚ್ಯಾ ಕುರ್ಪೆನ್ ಜಾಯ್ ತೊ ಆಧಾರ್ ಫಾವೊ ಜಾಂವ್ ಮ್ಹಣ್ ‘ಬುಡ್ಕುಲೊ’ ಆಶೆತಾ.

ಮೌಂಟ್ ರೋಜರಿ ಆಸ್ಪತ್ರೆಚ್ಯಾ ಬಾಂಧ್ಪಾಕ್ ಆನಿ ಹೆರ್ ಗರ್ಜಾಂ ಖಾತಿರ್ ಲೊಕಾನ್ ದುಡ್ವಾ ಮಜತ್ ದೀಂವ್ಕ್ ಬ್ಯಾಂಕ್ ಎಕೌಂಟಾಂಚೊ ವಿವರ್ ಹಾಂಗಾಸರ್ ದಿಲಾ:

A/C Name: Mount Rosary Charitable Institution

Bank: Corporation Bank
S.B. A/C No.: 520101043928753
IFSC Code: CORP0000167
Branch: Alangar

Bank: Moodbidri Co-Op. Service Bank Ltd.
S.B. A/C No.: 23889
Branch: Moodbidri

Email: mountrosary@rediffmail.com
Mobile: +91 9845 221 907 Sr Prescilla DMello

ಮೊನ್ಸಿಂಜೊರ್ ಎಡ್ವಿನ್ ಪಿಂಟೊಚೆಂ ಮಿನಿ ಸಂದರ್ಶನ್

ಸಂದರ್ಶಕ್: ಡೊನಾಲ್ಡ್ ಪಿರೇರಾ, ಸಂಪಾದಕ್ – ಬುಡ್ಕುಲೊ.ಕೊಮ್

ಡೊನಾಲ್ಡ್: ಬಾಪ್ ಎಡ್ವಿನ್, ಚಡಾವತ್ ಫಿರ್ಗಜ್‍ಗಾರ್ ತಶೆಂಚ್ ಯಾಜಕ್ ವ್ಹಡ್ ವ್ಹಡ್ ಬಿಲ್ಡಿಂಗಾಂ, ಕಮರ್ಶಿಯಲ್ ಕೊಂಪ್ಲೆಕ್ಸಾಂ/ಹೊಲಾಂ ಬಾಂಧ್ಚ್ಯಾಂತ್ ವೆಸ್ತ್ ಆಸ್ತಾನಾ, ತುಂ ಲೊಕಾಚಿ ಸೆವಾ ಕರ್‍ಚ್ಯಾಕ್, ಲೊಕಾಚ್ಯಾ ಗರ್ಜಾಂಕ್ ಪಾಂವ್ಚ್ಯಾಕ್ ಆಸ್ಪತ್ರ್ ಬಾಂಧುನ್ ಆಸಾಯ್. ತುಕಾ ಹ್ಯಾ ದಿಶೆನ್ ಪ್ರೇರಣ್ ಕಸಲೆಂ?

ಬಾಪ್ ಎಡ್ವಿನ್ ಪಿಂಟೊ: ಗರ್ಜೆ ಪರ್ಮಾಣೆಂ ಪಾದ್ರ್ಯಾಬ್. ತ್ಯಾ ತ್ಯಾ ವೆಳಾರ್ ಲೊಕಾಚೆಂ ಮನ್ ವ್ಹಯ್ ಕರ್ನ್ ಜಾಂವ್ದಿ ಇಗರ್ಜ್, ಜಾಂವ್ದಿ ಸಮಾಜ್ ಸೆವಾ, ಜಾಂವ್ದಿ ಇಸ್ಕೊಲಾಂ ಬಾಂಧ್ತಾತ್. ತಿ ಗರ್ಜ್. ಹಾಂಗಾ ಮೌಂಟ್ ರೋಜರಿ ಸಂಸ್ಥೊ ಆಸಾ. ಹಾಂಗಾಚಿ ಗರ್ಜ್, ನಿವಾಸಿಂಕ್ ಘರಾಂ. ದೆಕುನ್ ತಿಂ ಘರಾಂ, ಮ್ಹಜ್ಯಾ ಪಯ್ಲೆಂ ಆಯಿಲ್ಲ್ಯಾ ದಿರೆಕ್ತೊರಾಂನಿ ಕೆಲ್ಯಾಂತ್. ಹಾಂವೆಂ ಪರ್ನಿಂ, 80 ವರ್‍ಸಾಂ ಆದ್ಲಿಂ ತಿಂ, ರಿಪೇರಿ ಕೆಲ್ಯಾಂತ್. ತಾಚ್ಯಾ ಉಪ್ರಾಂತ್ ಹಾಂವೆಂಚ್ ಏಕ್ ಮೇಳ್ ಘಡ್ಲೊ – ರೊಜಾರ್ ಮಾಯೆಚ್ಯೊ ಸೆವಕಿಂಚೊ. ತ್ಯಾ ಮೆಳಾಂತ್ ಎದೊಳ್ 70 ಸಿಸ್ಟರಾಂ ಜಾಲ್ಯಾಂತ್. ತಾಂಕಾಂ ರಾವೊಂಕ್ ನಿವಾಸ್ ಜಾಯ್. ದೆಕುನ್ ತಾಂಚ್ಯೆ ಖಾತಿರ್ ಕೊವೆಂತಾಂ ಬಾಂಧ್ಲಿಂ.

ಆದಿಂ ಹೆಂ ಮೌಂಟ್ ರೋಜರಿ ಟಿ.ಬಿ. ಸ್ಯಾನಿಟೋರಿಯಂ ಜಾವ್ನಾಸ್‍ಲ್ಲೆಂ. ಹ್ಯಾಚ್ ಕ್ಯಾಂಪಾಂತ್ ತಾಂಚೊ ಆಸ್ರೊ ಆಸ್‍ಲ್ಲೊ. ಉಪ್ರಾಂತ್ ಟಿ.ಬಿ. ಪಿಡೆಸ್ತಾಂಕ್ ಚಿಕಿತ್ಸೆಚೆಂ ಕೇಂದ್ರ್ ಗರ್ಜ್ ನಾ ಮ್ಹಣ್ ಭೊಗ್ಲೆಂ. ದೆಕುನ್, ಮೂಡುಬಿದ್ರೆಚ್ಯಾ ಸರ್ವ್ ಲೊಕಾಕ್, ಪ್ರತ್ಯೇಕ್ ಥರಾನ್ ದುಬ್ಳ್ಯಾಂಕ್, ಉಪ್ಕಾರಾಚಿ ಜಾಯ್ಜೆ ಮ್ಹಳ್ಳ್ಯಾ ಭೊಗ್ಣಾಂನಿ ಏಕ್ ಜನರಲ್ ಆಸ್ಪತ್ರ್ ಉಬಾರಿಜೆ ಮ್ಹಣ್ ಮ್ಹಾಕಾ ಏಕ್ ಸಪಣ್ ಆಸ್‍ಲ್ಲೆಂ. ಹಾಂವ್ ಹಾಂಗಾ ಯೇವ್ನ್ 30 ವರ್‍ಸಾಂ ಜಾತಾತ್. ಆದ್ಲ್ಯಾ ವರ್‍ಸಾ ಮ್ಹಜೆಂ ಹೆಂ ಸಪಣ್ ಜ್ಯಾರಿಯೆಕ್ ಹಾಡುಂಕ್ ಸುರ್‍ವಾತ್ ಕೆಲೆಂ.

50 ಬೆಡ್ಡಾಂಚಿ ಆಸ್ಪತ್ರ್, ಸವೆಂ ದಾಕ್ತೆರಾಂ ಆನಿ ನರ್ಸಾಂಚಿ ತಶೆಂ ಮೆಶಿನಾಂಚಿಂ ಕೂಡಾಂ, ಆಪರೇಶನ್ ಥಿಯೇಟರ್, ಸ್ತ್ರೀಯಾಂಚ್ಯಾ ಪ್ರಸೂತೆಚೊ ವಿಭಾಗ್ ಇತ್ಯಾದಿ ಹ್ಯಾ ಆಸ್ಪತ್ರೆಂತ್ ಆಸ್ತೆಲೆ. ಪ್ರಸ್ತುತ್ ಆಸ್ಪತ್ರೆಂತ್ ಎದೊಳ್‍ಚ್ ಚಾರ್ ದಾಕ್ತೆರ್ ಆಸಾತ್, ಲೊಕಾಕ್ ಚಿಕಿತ್ಸಾ ಮೆಳ್ತಾತ್. ಆಯ್ತಾರಾಚೆಂ ಕಂಕ್ನಾಡಿ ಫಾದರ್ ಮುಲ್ಲರ್ಸ್ ಆಸ್ಪತ್ರೆ ಥಾವ್ನ್ ವ್ಹಡ್ಲೆ ದಾಕ್ತೆರ್ ಯೆತಾತ್ -ಓರ್ಥೊಪೆಡಿಕ್, ಸರ್ಜರಿ, ಜನರಲ್ ಫಿಸಿಶಿಯನ್, ರೇಡಿಯೋಲೊಜಿ ಆನಿ ಸೈಕಿಯಾಟ್ರಿಕ್ ವಿಭಾಗಾಚೆ. ಅಶೆಂ ಹರ್ಯೆಕಾ ವಿಭಾಗಾಚ್ಯಾ ತಜ್ಞಾಂ ಥಾವ್ನ್ ಹಾಂಗಾ ಚಿಕಿತ್ಸಾ ಮೆಳೊನ್ ಆಸಾ. ನವ್ಯಾ ಆಸ್ಪತ್ರೆಚೆಂ ಕಾಮ್ ಎದೊಳ್‍ಚ್ ಸುರ್ವಾತ್ ಜಾಲಾಂ. ಯೆಂವ್ಚ್ಯಾ, 2019 ಮೇ ಮಹಿನ್ಯಾಚ್ಯಾ ಪಯ್ಲೆಂ ಉದ್ಘಾಟನ್ ಜಾಯ್ಜೆ ಮ್ಹಳ್ಳಿ ಆಶಾ ಆಸಾ.

ಪಾಂಚ್ ಕೊರೊಡಾಂಚಿ ಹಿ ಆಸ್ಪತ್ರ್ ಬಾಂಧ್ಚೆಂ ಮಿಸಾಂವ್ ಸುಲಭಾಯೆಚೆಂ ನ್ಹಯ್. ಮೂಡುಬಿದ್ರಿ ವಾರಾಡ್ಯಾ ಥಾವ್ನ್ ಕುಮಕ್ ಮೆಳತ್ ಮ್ಹಣ್ ಮ್ಹಾಕಾ ಭರ್ವಸೊ ಆಸ್‍ಲ್ಲೊ. ಎದೊಳ್ ದೊಗಾಂ ಜಣಾಂನಿ ಮಾತ್ರ್ ದೊದೋನ್ ಲಾಕ್ ರುಪಯ್ ದಾನ್ ದಿಲ್ಯಾತ್. ಅಲಂಗಾರ್ ಫಿರ್ಗಜೆಚ್ಯಾ ಲೊಕಾನ್ ಏಕ್ ಹಜಾರ್, ದೋನ್ ಹಜಾರ್, ಪಾಂಚ್ ಹಜಾರ್ ಅಶೆಂ ದಾನ್ ದಿಲ್ಯಾತ್. ಹೆರ್ ಐವಜ್, ಮೌಂಟ್ ರೋಜರಿ ಥಾವ್ನ್ ಆದಿಂ ಉಪ್ಕಾರ್ ಜೊಡ್‍ಲ್ಲ್ಯಾಂನಿ ಉಪ್ಕಾರ್ ದವರುನ್ ದಾನ್ ದಿಲ್ಯಾತ್. ಎದೊಳ್ 62 ಲಾಕ್ ರುಪಯ್ ಜಮೊ ಜಾಲ್ಯಾತ್. 5 ಕೊರೊಡಾಚ್ಯಾ ಯೆವ್ಜಣಾಕ್ ಹೊ ಐವಜ್ ಉಣೊ. ಪುಣ್ ಸಾಯ್ಬಿಣ್ ಮಾಂಯ್ ಆಮ್ಕಾಂ ಮಜತ್ ದಿತೆಲಿ, ಕುಮಕ್ ಕರ್‍ತೆಲಿ ಮ್ಹಳ್ಳೊ ಭರ್ವಸೊ ಆಮ್ಕಾಂ ಆಸಾ.

ಆನಿ, ತುಜ್ಯಾ ವೆಬ್‍ಸೈಟಿಂತ್ ಹಿ ಖಬರ್ ಘಾಲ್ನ್ ಲೊಕಾಕ್ ಮಾಹೆತ್ ದೀಂವ್ಕ್ ಫುಡೆಂ ಸರ್ಲಾಯ್. ಹ್ಯಾ ವರ್ವಿಂ ಕಾಂಯ್ ಆಮ್ಕಾಂ ಉಪ್ಕಾರ್ ಜಾತಲೊ. ಹ್ಯಾ ಖಾತಿರ್ ತುಜೆರ್ ಸಾಯ್ಬಿಣ್ ಮಾಯೆಚಿಂ ಆಶೀರ್ವಾದಾಂ ಮಾಗ್ತಾಂ.

ಡೊನಾಲ್ಡ್: 5 ಕೊರೊಡಾಂಚೆಂ ಮ್ಹಳ್ಯಾರ್ ಭಾರೀ ವ್ಹಡ್ಲೆಂ ಯೋಜನ್. ಆಸ್ಪತ್ರೆಚೆಂ ಕಟ್ವಣ್ ಉಬೆಂ ಕೆಲ್ಯಾರ್ ಪಾವನಾ. ತ್ಯಾ ತೆಕಿದ್ ಯಂತ್ರಾಂ/ಮೆಶಿನಾಂ/ಸವ್ಲತ್ಯೊ ಒದಗ್ಸಿಜೆ. ಶಿವಾಯ್ ದಾಕ್ತೆರ್, ನರ್ಸಾಂ ಆನಿ ಹೆರ್ ಉದ್ಯೋಗಿಂಕ್ ಸಾಂಬಾಳ್, ನಿರ್ವಹಣಾಚೊ ಖರ್ಚ್ ಆಸಾ. ಹ್ಯಾ ದಿಶೆನ್ ಕಸಲಿ ಯೆವ್ಜಣ್ ಕೆಲ್ಯಾ.

ಬಾಪ್ ಎಡ್ವಿನ್: ಫಾಲ್ಯಾಂಚೊ ಆಯ್ತಾರ್ (ನವೆಂಬರ್ 11; ಹೆಂ ಸಂದರ್ಶನ್ ಘೆತ್‍ಲ್ಲೆಂ ನವೆಂಬರ್ 10ವೆರ್) ಸಾಧ್ಯಾ ಕಾಳಾಚೊ 32ವೊ ಆಯ್ತಾರ್. ಫಾಲ್ಯಾಂಚೊ ವಾಂಜೆಲ್ ವಿಧ್ವಿಚ್ಯಾ ಕಾಣಿಕೆಚೊ. ತಿ ತಿಚೆ ಲಾಗಿಂ ಆಸ್‍ಲ್ಲೆ ದೋನ್ ರುಪಯ್ ಜೆರುಜಲೆಮಾಚ್ಯಾ ಚಾಮ್ಡ್ಯಾಚ್ಯಾ ಕಂರ್ಡ್ಯಾಂತ್ ಘಾಲ್ತಾ. ಸೊಮಿ ತಾಕಾ ಮೆಚ್ವತಾ ಆನಿ ತಿಕಾ ಆಶೀರ್ವಾದ್ ದಿತಾ. ಹ್ಯಾ ದುಬ್ಳ್ಯಾ ಸ್ತ್ರೀಯೆನ್ ಕೆಲ್ಲೊ ತ್ಯಾಗ್ ವ್ಹಡ್ ಗ್ರೇಸ್ತ್ ಮನ್ಶ್ಯಾಂಚ್ಯಾಕೀ ವ್ಹರ್ತೊ ದಾನ್ ಮ್ಹಣ್ ಜೆಜು ತಿಕಾ ವಾಖಣ್ತಾ. ಜೆರುಜಲ್ಯಾಚ್ಯಾ ತೆಂಪ್ಲಾಚ್ಯಾ ವಾವ್ರಾಕ್ ತಿ ದಾನ್ ದಿತಾ. ತಶೆಂಚ್, ಹಾಂಗಾಚೊ ಲೋಕ್ ದುಬ್ಳೊ… ದುಬ್ಳೆ ಮ್ಹಣನಾಕಾತ್ ತಾಂಕಾಂ, ಕಾಳ್ಜಾಂತ್ ಉದಾರ್ ತೆ. ಪ್ರಾರ್ಥನಾಚೆಂ ಬಳ್ ಆಸಾ, ತ್ಯಾಗಾಚೆಂ ಬಳ್ ಆಸಾ. ಹನಿಗೂಡಿ ಹಳ್ಳ ಮ್ಹಣ್ಚಿ ಏಕ್ ಸಾಂಗ್ಣಿ ಆಸಾ. ತಶೆಂ, ಸಕ್ಕಡ್ ಲೊಕಾನ್ ಮೆಳೊನ್ ಇಲ್ಲೊಲ್ಲೊ ಮ್ಹಣೊನ್ ಮೂಡುಬಿದ್ರಿ ವಾರಾಡ್ಯಾಚ್ಯಾ ಕುಟ್ಮಾಂನಿ ಕುಮಕ್ ಕೆಲ್ಯಾರ್, ತಶೆಂಚ್ ವಾರಾಡ್ಯಾಚ್ಯಾ ಫಿರ್ಗಜ್ ಪಾದ್ರಿಂನಿ ಎನೌನ್ಸ್ ಕರವ್ನ್ ಕುಮಕ್ ಕೆಲ್ಯಾರ್ ಆಧಾರ್ ಜಾತಾ. ಹಿ ಆಸ್ಪತ್ರ್ ಹ್ಯಾಚ್ ಲೊಕಾಕ್ ಉಪ್ಕಾರ್ಚಿ. ಸರ್ವ್ ಕುಟ್ಮಾಚ್ಯಾಂನಿ ಮನ್ ಕೆಲ್ಯಾರ್ ಸಾಧ್ಯ್ ಜಾತಾ.

ಡೊನಾಲ್ಡ್: ತುವೆಂ ಸಿಸ್ಟರಾಂಚೊ ಮೇಳ್ ಘಡ್ಲೊಯ್. ತಾಕಾ ಕಸಲಿ ಸ್ಫೂರ್ತಿ ಆಸ್‍ಲ್ಲಿ?

ಬಾಪ್ ಎಡ್ವಿನ್: ಮ್ಹಾಕಾ ದುಬ್ಳ್ಯಾಂಚೊ ಮೋಗ್ ಜಾಯ್. ಕುಟ್ಮಾಂನಿ ಅಭಿವೃದ್ಧಿ ದೆಕಜಾಯ್. ಹೆಂ ಜಾಯ್ಜೆ ತರ್ ಮಾಗ್ಣ್ಯಾಚ್ಯಾ ಬಳಾನ್. ತ್ಯಾಗಾಚಿ ಸೆವಾ ಜಾಯ್ಜಯ್. ಇಸ್ಕೊಲಾಂತ್ ಶಿಕಂವ್ಚಿಂ ಸಿಸ್ಟರಾಂ ಜಾಯ್ತಿಂ ಆಸಾತ್. ಪುಣ್ ಘರಾ ಘರಾಂಕ್ ಭೆಟ್ ದೀವ್ನ್ ಲೊಕಾಚ್ಯಾ ಉದರ್ಗತೆಕ್ ವಾವುರ್‍ಚ್ಯಾ ಸಿಸ್ಟರಾಂಚೊ ಮೇಳ್ ಕರ್ನಾಟಕಾಂತ್ ಘಡಿಜೆ ಮ್ಹಣ್ ಮ್ಹಾಕಾ ಚಿಂತಪ್ ಆಸ್‍ಲ್ಲೆಂ. ಅಶೆಂ 1990 ಇಸ್ವೆಚ್ಯಾ ಸಪ್ತೆಂಬರಾಂತ್ ಹಾಂವೆಂ ‘ರೊಜಾರ್ ಮಾಯೆಚ್ಯೊ ಸೆವಕಿ’ ಮೇಳ್ ಘಡ್ಲೊ. ಪ್ರಸ್ತುತ್ 18 ಕೊವೆಂತಾಂ ಆಸಾತ್. ಭಾರತಾಂತ್ 16 ಆನಿ ಯೂರೋಪಾಚ್ಯಾ ಆಸ್ಟ್ರಿಯಾಂತ್ 2 ಕೊವೆಂತಾಂ ಆಸಾತ್. ಹಿಂ ಸಿಸ್ಟರಾಂ ಸಮಾಜ್ ಸೆವಾ ಕರ್‍ಚ್ಯಾ ಸವೆಂ, ಪ್ರಾಯ್ವಂತಾಂಚ್ಯಾ ಘರಾಂನಿ, ಆಸ್ಪತ್ರ್ಯಾಂನಿ ಸೆವಾ ದಿತಾತ್. ಫಿರ್ಗಜಾಂನಿ ಭುರ್ಗ್ಯಾಂಕ್ ದೊತೊರ್ನ್ ಶಿಕಯ್ತಾತ್. ಒಟ್ಟುಕ್ 70 ಸಿಸ್ಟರಾಂ ಆಸಾತ್. ಹಾಂಚಿ ಲ್ಹಾನ್ ಸೆವಾ, ಪುಣ್ ಲೊಕಾಕ್ ಉಪ್ಕಾರಾಚಿ.

ಡೊನಾಲ್ಡ್: ಮೌಂಟ್ ರೋಜರಿ ಆಸ್ಪತ್ರೆಚೆಂ ಆಡಳ್ತೆಂ ತಿಂಚ್ ಚಲವ್ನ್ ವ್ಹರ್ತೆಲಿಂ..?

ಬಾಪ್ ಎಡ್ವಿನ್: ವ್ಹಯ್. ಹಿ ಆಸ್ಪತ್ರ್ ಸಿಸ್ಟರಾಂಚ್ ಚಲವ್ನ್ ವ್ಹರ್‍ತೆಲಿಂ. ಚಾರ್ ಜಣಾಂ ಸಿಸ್ಟರಾಂ ದಾಕ್ತೆರ್ಗಿ ಶಿಕ್ಚ್ಯಾ ಪ್ರಯತ್ನಾರ್ ಆಸಾತ್. ಎಕ್ಲಿ ಸರ್ಜರಿ, ಎಕ್ಲಿ ಜನರಲ್ ಫಿಸಿಶಿಯನ್, ಎಕ್ಲಿ ಗೈನೆಕೊಲೊಜಿ ಆನಿ ಎಕ್ಲಿ ಪೀಡಿಯಾಟ್ರಿಕ್ಸ್ ವಿಭಾಗಾಚೆಂ ಶಿಕಪ್ ಜೊಡುಂಕ್ ಪ್ರವೇಶ್ ಪರೀಕ್ಷೆಕ್ ತಯಾರಿ ಕರುನ್ ಆಸಾತ್. ಮುಖ್ಲೆಂ ಸಾಯ್ಬಿಣ್ ಪಳೆವ್ನ್ ಘೆತೆಲಿ.

ಡೊನಾಲ್ಡ್: ಕೊಡಿಯಾಳಾಂತ್ ಫಾದರ್ ಮುಲ್ಲರ್ ಆಸ್ಪತ್ರ್ ಆಸಾ, ತಾಂಚೆ ಥಾವ್ನ್ ತುಮ್ಕಾಂ ಮಜತ್ ಮೆಳ್ತಾಗೀ?

ಬಾಪ್ ಎಡ್ವಿನ್: ಹಾಂಗಾಚ್ಯಾ ಪಿಡೆಸ್ತಾಂಕ್, ಹಾಂಗಾಚಿ ಚಿಕಿತ್ಸಾ ಪಾವನಾತ್ಲ್ಯಾರ್ ಆಮಿ ತಾಂಕಾಂ ಕಂಕ್ನಾಡಿ ವ್ಹರ್ತಾಂವ್. ತ್ಯಾ ಪಿಡೆಸ್ತಾಂಕ್ ಬರ್‍ಯಾ ಮನಾನ್ ತೆ ಸುಧಾರ್ಶಿತಾತ್. ಆಪ್ರೂಪ್ ಕ್ಯಾಂಪಾಂ ಆಸಾ ಕೆಲ್ಯಾರ್ ಫಾದರ್ ಮುಲ್ಲರ್‍ಸಾಚೆ ಯೇವ್ನ್ ಸುಧಾರ್ಶಿತಾತ್. ಥಂಯ್ಚೆಚ್ ಚಾರ್ ಜಣ್ ದಾಕ್ತೆರ್ ಆಯ್ತಾರಾಚೆಂ ಹಾಂಗಾ ಯೇವ್ನ್ ಸೆವಾ ದಿತಾತ್. ವ್ಹಡ್ಲಿ ಸೆವಾ ತಿ. ತಾಂಚೆ ಥಾವ್ನ್ ಆನಿಕೀ ವ್ಹರ್ತಿ ಸೆವಾ ಆಮ್ಚ್ಯಾ ಆಸ್ಪತ್ರೆಕ್ ಮೆಳ್ತೆಲಿ ಮ್ಹಳ್ಳೊ ಭರ್ವಸೊ ಮ್ಹಾಕಾ ಆಸಾ.

ಡೊನಾಲ್ಡ್: ಹಿ ತುಮ್ಚಿ ಆಸ್ಪತ್ರ್ ಕ್ರಿಸ್ತಾಂವಾಂನಿ ಚಲಂವ್ಚಿ ತರೀ ಸರ್ವ್ ಜಾತ್-ಧರ್ಮಾಂಚ್ಯಾಂಕ್ ಸೆವಾ ಮೆಳ್ತಾ ನ್ಹಯ್ಗೀ?

ಬಾಪ್ ಎಡ್ವಿನ್: ಆಮ್ಚ್ಯಾ ಪ್ರಾಯ್ವಂತಾಂಚ್ಯಾ ನಿವಾಸಾಂತ್ ಕ್ರಿಸ್ತಾಂವ್ ಮಾತ್ರ್ ನ್ಹಯ್, ಹೆರ್ ಧರ್ಮಾಚೆಯೀ ಆಸಾತ್. ಆಸ್ಪತ್ರೆಕ್ ಕ್ರಿಸ್ತಾಂವಾಂಚ್ಯಾಕೀ ಹಿಂದ್ವಾಂಚಿಂ ದುಬ್ಳಿಂ ಚಡ್ ಯೆತಾತ್. ದಾಕ್ತೆರ್’ಯೀ ಕ್ರಿಸ್ತಾಂವಾಂ ಸಂಗಿಂ ಹಿಂದ್ವಾಂಚೆಯೀ ಆಸಾತ್. ಅಶೆಂ ಜಾತ್-ಕಾತ್-ಧರ್ಮಾಚೊ ಬೇಧ್ ನಾಸ್ತಾನಾ ಲೊಕಾಕ್ ಹಾಂಗಾ ಸೆವಾಯೀ ಮೆಳ್ತಾ, ಚಿಕಿತ್ಸಾಯೀ ಮೆಳ್ತಾ. ಕ್ರೀಸ್ತೀ ಮಾಯಾಮೋಗ್ ಸರ್ವ್ ಧರ್ಮಾಂಚ್ಯಾಂಕ್ ಪಾವಂವ್ಚ್ಯಾಕ್ ಆಮ್ಚೊ ಸಂಸ್ಥೊ ಏಕ್ ಸಂಕೇತ್.

ಡೊನಾಲ್ಡ್: ಪ್ರಾಯ್ವಂತಾಂಚ್ಯಾ ನಿವಾಸಿಂತ್ ಕಿತ್ಲೆ ಜಣ್ ಆಸಾತ್?

ಬಾಪ್ ಎಡ್ವಿನ್: ಆಮಿ, ಸಿಸ್ಟರಾಂ ಆನಿ ನಿವಾಸಿ ಧರುನ್ ಒಟ್ಟುಕ್ 250 ಜಣ್ ಆಸಾಂವ್. ಹರ್ಯೆಕ್ಲ್ಯಾಕ್ ದಿಸಾಚಿಂ ತಿನೀ ಜೆವ್ಣಾಂ ಹಾಂಗಾಚ್ ತಯಾರ್ ಕರ್‍ತಾಂವ್. ತಿನೀ ಪಾವ್ಟಿಂ ಹಾಂಗಾ ಕಾಜಾರಾಚೊ ಮಾಟೊವ್‍ಚ್ಚ್! ಥೊಡೆ ಪಾವ್ಟಿಂ ಜೆವ್ಣಾಕ್ ತಾಂದುಳ್ ಆಸನಾ. ಕೊಣಾ ಲಾಗಿಂ ವಚೊನ್ ಮಾಗೊನ್ ಹಾಡ್ಚೊ. ಥೊಡೊ ಲೋಕ್‍ಯೀ ದಾನ್ ದಿತಾ. ಆಮಿಂಚ್ ಹಾಂಗಾ ಕೃಷಿ ಕರ್‍ತಾಂವ್. ರಬ್ಬರಾಚೆಂ, ಮಾಡಿಯಾಂಚೆಂ ತೋಟ್ ಆಸಾ. ಆಮ್ಚಿಂಚ್ ಗೊರ್ವಾಂ, ಆಮ್ಚೆಚ್ ದುಕೊರ್ ಆಸಾತ್. ಜಾಗೊ ಆಸ್‍ಲ್ಲ್ಯಾನ್ ಹಾಂಗಾಚ್ ದೂದ್, ಖಾಣ್-ಜೆವಣ್-ಮಾಸ್ ಮೆಳ್ತಾ. ಪೈಶ್ಯಾಂಚೆಂ, ಲಾಭಾಚೆಂ ಆಮಿ ಚಿಂತುಂಕ್‍ಚ್ ಚಿಂತಿನಾಂವ್. ಆಮ್ಚ್ಯಾ ನಿವಾಸಿಂಕ್ ಸಂತೃಪ್ತೆಚೆಂ ಖಾಣ್ ದಿತಾಂವ್. ಸೆವೆಚೊ ಆನಿ ಕ್ರಿಸ್ತೀ ಮೋಗ್ ವಾಂಟ್ಚೊ – ಹೆಂ ಪಯ್ಲೆಂ ಆಮಿ ಚಿಂತಾಂವ್.

ತುಂ ಹಾಂಗಾ ಆಯ್ಲಾಯ್, ಆಮ್ಚೆಂ ಕಾಮ್ ಜಾಣಾಂ ಜಾಂವ್ಕ್ ಆನಿ ತುಜ್ಯಾ ಮಾಧ್ಯಮಾಂತ್ ಪ್ರಚಾರ್ ದೀಂವ್ಕ್. ಹ್ಯಾ ಖಾತಿರ್ ತುಕಾ ಮಸ್ತ್ ದೇವ್ ಬರೆಂ ಕರುಂ. ರೊಜಾರ್ ಮಾಂಯ್ ತುಕಾ ಆಶೀರ್ವಾದ್ ದೀಂವ್. ಆಮ್ಚ್ಯಾ ಆಸ್ಪತ್ರೆಕ್ ತುಜ್ಯಾ ಮುಖಾಂತ್ರ್ ಮಜತ್ ಫಾವೊ ಜಾಂವ್. ತುಜ್ಯಾ ವಾವ್ರಾಚೆರ್ ದೆವಾಚಿಂ ಆಶೀರ್ವಾದಾಂ ಮಾಗ್ತಾಂ.

Send Feedback to: budkuloepaper@gmail.com

Like us at: www.facebook.com/budkulo.epaper

The post ದುಬ್ಳ್ಯಾ ಧಾಕ್ಟ್ಯಾಂಚೊ ಯಾಜಕ್ ಬಾ. ಎಡ್ವಿನ್ ಪಿಂಟೊಚೆಂ ಸಪಣ್ – ಮೌಂಟ್ ರೋಜರಿ ಆಸ್ಪತ್ರ್ appeared first on Budkulo.

ಸಂಸಾರಾಂತ್ ಸಕ್ಕಡ್ ನಾಗ್ಡೆಚ್. ಪುಣ್ ಮನಿಸ್ ಮಾತ್ರ್ ಆಂಗಾರ್ ಮುಸ್ಕಾಯ್ಕಿ ನ್ಹೆಸ್ತಾ. ಸಂಸಾರಾ ಮುಖಾರ್ ವಸ್ತುರ್ ನ್ಹೆಸ್ಚೆಂ ಗರ್ಜೆಚೆಂಚ್. ತಾಂತುಂ ಉಲಂವ್ಕ್ ನಾ. ಪುಣ್ ಸಗ್ಳೊ ದೀಸ್ ಆಂಗಾರ್ ಚಿಡ್ಕೊಂಚ್ಯಾ ವಸ್ತುರಾಂ ಆನಿ ಬಿಗ್ದೊಂಚ್ಯಾ ಮುಸ್ತಾಯ್ಕೆ ನಿಮ್ತಿಂ ಥರಾವಳ್ ತೊಂದ್ರೆ, ಸಮಸ್ಸೆ ಫುಡ್ ಜಾಂವ್ಚೆಂ ಸಕ್ಡಾಂಕ್ ಕಳಿತ್ ಆಸ್ತೆಲೆಂ.

ಆತಾಂ, ಹಾಂಗಾ ಆಸಾ ಏಕ್ ಬರಿ ಖಬರ್.

ವ್ಹಯ್. ರಾತಿಕ್ ನಿದ್ತಾನಾ ನಾಗ್ಡೆಂಚ್ ನಿದ್ಲ್ಯಾರ್ ಬರೆಂ ಮ್ಹಣ್ ಏಕ್ ಸಮೀಕ್ಷಾ ಸಾಂಗ್ತಾ ಮ್ಹಣ್ ಖಬರ್ ಜಾಲ್ಯಾ. ಅಮೆರಿಕಾಚ್ಯಾ ಎಕಾ ಸಂಸ್ಥ್ಯಾನ್ ಚಲಯಿಲ್ಲ್ಯಾ ಹ್ಯಾ ಸಮೀಕ್ಷೆಂತ್ ಹರ್ಯೆಕಾ ತೆಗಾಂ ಪಯ್ಕಿ ಎಕ್ಲೊ/ಎಕ್ಲಿ ನಾಗ್ಡೆ ನಿದೊನ್ ವಿಶೆವ್ ಘೆತಾತ್ ಖಂಯ್. ಆನಿ ಅಶೆಂ ನಾಗ್ಡೆ ನಿದ್‍ಲ್ಲ್ಯಾನ್ ಭಲಾಯ್ಕೆಕ್‍ಯೀ ಬರೆಂ, ಆರ್ಥಿಕ್ ರಿತಿನೀ ಫಾಯ್ದೊ ಆಸಾ ಮ್ಹಣ್ ಕಳೊನ್ ಆಯ್ಲಾಂ.

ನೀದ್ ಹರ್ಯೆಕಾ ಜಿವಿಕ್ ಭಾರಿಚ್ ಗರ್ಜೆಚಿ. ನೀದ್ ಆಮ್ಕಾಂ ಸಗ್ಳಿ ಜೀಣ್ ಭಲಾಯ್ಕೆಂತ್ ದವರ್ತಾ. ಕುಡಿಕ್ ಖಾಣ್ ಕಿತ್ಲೆಂ ಗರ್ಜೆಚೆಂಗಿ ನೀದ್‍ಯೀ ತಿತ್ಲಿಚ್ ಗರ್ಜೆಚಿ. ಜರ್ ನೀದ್ ಉಣಿ ಜಾತಾ, ವಾ ನೀದ್ ಯೇನಾ ಮ್ಹಣ್ ಜಾಲ್ಯಾರ್ ಭಲಾಯ್ಕೆಚೆ ಸಮಸ್ಸೆ ಆಸಾತ್ ಮ್ಹಳ್ಳೆಂ ಸ್ಪಶ್ಟ್ ಜಾತಾ.

ಪ್ರತ್ಯೇಕ್ ಜಾವ್ನ್ ಸಾಂಗಾತಾ ನಿದ್ಚಿಂ ಜೊಡಿಂ (ಘೊವ್ ಆನಿ ಬಾಯ್ಲ್) ನಾಗ್ಡೆಚ್ ನಿದ್ಲೆಲ್ಯಾ ವರ್ವಿಂ ತಾಂಚೊ ಸಂಬಂಧ್ ಚಡ್ ಬರೊ ಜಾತಾ, ತಾಂಚೆ ಮಧೆಂ ಸಂತೊಸ್ ಚಡೊಂಕ್ ಉಪ್ಕಾರ್ತಾ ಖಂಯ್. ತಶೆಂಚ್ ಬ್ಲಡ್ ಪ್ರೆಶ್ಶರ್, ಉದ್ವೇಗ್, ಟೆನ್ಶನ್ ಉಣೆ ಕರ್ಚೆ ಸವೆಂ ಇಮ್ಯೂನ್ ಸಿಸ್ಟಮ್ ಬಳ್ವಂತ್ ಕರುಂಕ್ ಸಕ್ತಾ.

ಆಂಗಾರ್ ಕಸಲಿಚ್ ಮುಸ್ತಾಯ್ಕಿ ನಾಸ್ತಾನಾ ನಿದ್ಚೆಂಚ್ ಸಂಪೂರ್ಣ್ ಸ್ವಾತಂತ್ರ್ಯಾಚೆಂ ಫೀಲಿಂಗ್ ಹಾಡಯ್ತಾ. ಕಿತೆಂಚ್ ಬಿಗ್ದಿನಾ, ಖಂಚೆಂಯ್ ಘಷ್ಟಿನಾ ಆನಿ ಗುಟ್ಲಾಯ್ನಾ. ಆನಿ ಕಾಜಾರಿ ಜೊಡಿಂ ಉಗ್ತೆಂ ನಿದ್ಲ್ಯಾರ್ ತಾಂಚೊ ಲೈಂಗಿಕ್ ಆಕರ್ಷಣ್ ಚಡ್ತಾ ಆನಿ ತಿಂ ಎಕಾಮೆಕಾಕ್ ಚಡ್ ಅತ್ರೆಗ್ತಾತ್ ಖಂಯ್. ಕುಡಿಕ್ ಚಿಡ್ಕಲ್ಲ್ಯಾ ವಸ್ತುರಾಂನಿ ಎಕಾಮೆಕಾ ಘಷ್ಟೊಂಚ್ಯಾಕೀ ಪತಿ ಪತಿಣೆಚ್ಯಾ ಆಂಗಾಂನಿ ಲಾಗ್ಚೆಂ ಚಡ್ ಸಂತೊಸ್ಭರಿತ್ ಖಂಯ್.

ರಾತಿಚೆಂ ವಸ್ತುರ್, ಪೈಜಾಮಾ, ನೈಟಿ ಆನಿ ಹೆರ್ ಮುಸ್ತಾಯ್ಕಿ ನ್ಹೆಸೊನ್ ನಿದ್ಚ್ಯಾಕೀ ನಾಗ್ಡೆಂಚ್ ನಿದ್ಲ್ಯಾರ್ ಸಾಂಗಾಂತ್ಯಾಂ ಮಧೆಂ ಬರೊ ಸಂಬಂಧ್ ರುತಾ ಜಾತಾ, ತಾಂಚಿ ಜಿಣಿ ಚಡ್ ಸಂತೊಸ್ಭರಿತ್ ಉರ್ತಾ. ಮುಸ್ತಾಯ್ಕೆರ್ ಆಡ್ ಪಡ್ಚ್ಯಾಂ ಥಂಯ್ ಹೊ ಸಂತೊಸ್, ಸಂಬಂಧ್ ತಿತ್ಲೊ ಬರೊ ಆಸನಾ ಮ್ಹಣ್ತಾ ಸರ್ವೆ. ಸೆಕ್ಸ್ ಆನಿ ಮೋಗ್ ಸುಧ್ರಾಂವ್ಚ್ಯಾ ಸವೆಂ, ನಾಗ್ಡೆ ನಿದ್ಲೆಲ್ಯಾಂಕ್ ನೀದ್‍ಯೀ ಬರಿ ಪಡ್ತಾ ಆನಿ ತೆಂ ಜಿವಾಕ್ ಜಾಯ್ತೆಂ ಬರೆಂ ಮ್ಹಣ್ ಸರ್ವೆಂತ್ ಕಳೊನ್ ಆಯ್ಲಾಂ.

ಉಗ್ತೆಂ ನಿದ್‍ಲ್ಲೆ ವರ್ವಿಂ ಕುಡಿಚೆಂ ಟೆಂಪರೇಚರ್ ಉಣೆ ಆಸ್ತಾ. ತ್ಯಾ ವರ್ವಿಂ ನೀದ್ ಬರೀ ಯೆತಾ. ಜನನಾಂಗಾಂಕ್ ಉಗ್ತೆಂ ಸೊಡ್‍ಲ್ಲೆ ವರ್ವಿಂ ಫಾಯ್ದೊಚ್ ಜಾತಾ. ಜ್ಞಾನಿಂನಿ ಸಾಂಗ್ಚೆ ಪ್ರಕಾರ್, ಜನನಾಂಗಾಂ ಉಗ್ತೆ ಸೊಡ್‍ಲ್ಲೆ ವರ್ವಿಂ ಬ್ಯಾಕ್ಟೀರಿಯಾ ಜಮ್ಚೆ ಆವ್ಕಾಸ್ ಉಣೆ ಜಾತಾತ್. ಬಿಗ್ದಿಲ್ಲ್ಯಾ ಮುಸ್ತಾಯ್ಕೆ ವರ್ವಿಂ ತೇವಾಂಶ್, ತಶೆಂಚ್ ಧಗಿ ವರ್ವಿಂ ಬ್ಯಾಕ್ಟೀರಿಯಾ ಚಡ್ತಾತ್. ಉಗ್ತೆಂ ಸೊಡ್‍ಲ್ಲೆ ವರ್ವಿಂ ಸ್ತ್ರೀಯಾಂಚ್ಯಾ ಜನನಾಂಗಾಂನಿ ಇನ್‍ಫೆಕ್ಷನ್ ಜಾಂವ್ಚಿ ಸಾಧ್ಯತಾ ಉಣಿ ಜಾತಾ. ದಾದ್ಲ್ಯಾಂಚ್ಯಾ ವೃಷಣಾಂಕ್ ವಾರೆಂ ಲಾಗೊನ್ ಥಂಡಾಯ್ ಮೆಳ್ಚೆಂ ವೀರ್ಯ್ ಬರ್ಯಾ ಕಾಲೆತಿಚೆಂ ಜಾಂವ್ಕ್ ಉಪ್ಕಾರ್ತಾ ಮ್ಹಣ್ತಾತ್.

ಉಗ್ತೆಂಚ್ ನಿದ್ಚೆಂ ಆಂಗಾಕ್, ಕಾತಿಕ್ ಚಡ್ ಫಾಯ್ದ್ಯಾಭರಿತ್ ಜಾತಾ. ಕಾತಿಚ್ಯೊ ಪಿಡಾ ಉದೆಂವ್ಚ್ಯೊ, ನಾಗ್ಡೆ ನಿದ್ಲೆಲ್ಯಾನ್ ಉಣೆಂ ಕರ್ಯೆತ್. ಸಗ್ಳೊ ದೀಸ್ ಆಂಗಾರ್ ವಸ್ತುರ್, ಪಾಯಾಂಕ್ ಸೊಕ್ಸ್ ಘಾಲ್ನ್ ಆಸ್ಲೆಲ್ಯಾನ್ ಘಾಮ್, ವಸ್ತುರ್ ಉಂಬುಳ್ತಾನಾ ವಾಪಾರ್ಚಿಂ ಕೆಮಿಕಲಾಂ, ಸೊಫ್ಟ್‍ನರಾಂ ಇತ್ಯಾದಿ ಕಾತಿಚ್ಯಾ ಸೂಕ್ಷ್ಮ್ ಬುರಾಕಾಂತ್ಲ್ಯಾನ್ ಪ್ರವೇಶ್ ಜಾತಾತ್. ತ್ಯಾ ವರ್ವಿಂ ನಾನಾಂತ್ಯೊ ಧೊಶಿ, ಪಿಡಾ ಉಬ್ಜೊಂಚೆ ಸಾಧ್ಯತಾ ಆಸ್ತಾತ್. ನ್ಹಾವ್ನ್ ನಿತಳ್ ಜಾವ್ನ್ ಉಗ್ತೆಂಚ್ ನಿದ್ಲೆಲ್ಯಾ ವರ್ವಿಂ ಸಗ್ಳ್ಯಾ ಆಂಗಾಚ್ಯಾ ಕಾತಿಕ್ ಸುಶೆಗ್ ಮೆಳ್ತಾ. ಮತಿಕೀ ಉಲ್ಲಾಸ್ ಜಾತಾ.

ಹ್ಯಾ ಸವಯೆ ವರ್ವಿಂ ತುಮ್ಕಾಂ ಆರ್ಥಿಕ್ ಫಾಯ್ದೊಯೀ ಆಸಾ. ರಾತಿಂ ನ್ಹೆಸ್ಚ್ಯಾ ಥರಾವಳ್ ಮುಸ್ತಾಯ್ಕಿಂ ಖಾತಿರ್ ಖರ್ಚುಂಚೊ ದುಡು ಉರವ್ಯೆತ್. ಚಿಲ್ಲರ್ ದುಡು ಮ್ಹಣ್ ಭೊಗತ್, ಪುಣ್ ತೊ ಉರಯಿಲ್ಲ್ಯಾನ್ ತುಮ್ಚ್ಯಾ ಮಹಿನ್ಯಾಚ್ಯಾ ಬಜೆಟಿಂತ್ ಜಾಯ್ತಿ ಉರವ್ಣಿ ಜಾತಾ. ಉಂಬಳ್ಚೆಂ, ಇಸ್ತ್ರಿ ಘಾಲ್ಚೆಂಯ್ ಉಣೆ ಜಾತಾ, ತಾಕಾ ಸಂಬಂಧಿ ಖರ್ಚ್‍ಯೀ ದೆಂವ್ತಾ. ಥಂಡಾಯೆಚ್ಯಾ ದಿಸಾಂನಿ ವೋಲ್ ವಾಪಾರ್ಲ್ಯಾರ್ ಜಾಲೆಂ.

ನಾಗ್ಡೆ ನಿದ್ಲೆಲೆ ವರ್ವಿಂ ಜಾಂವ್ಚೆ ಫಾಯ್ದೆ

ಕಂಫರ್ಟ್: ತುಮಿ ನಾಗ್ಡೆ ನಿದ್ಚಿ ಸವಯ್ ನಾತ್ಲೆಲೆ ತರ್ ಹೆಂ ನಾಗ್ಡೆಂ ನಿದ್ಚೆಂ ಮ್ಹಣ್ತಾತಾ ತುಮ್ಕಾಂ ಪಸಂದ್ ಜಾಯ್ನಾ ಜಾಂವ್ಕ್ ಪುರೊ ಆನಿ ನಾಗ್ಡೆ ನಿದ್ಲೆಲ್ಯಾನ್ ಜಾಂವ್ಚೊ ಲಾಭ್ ತುಮ್ಕಾಂ ಕಳ್ಚೊ ನಾ. ನಾಗ್ಡೆ ನಿದೊಂಕ್ ಸುರು ಕೆಲ್ಯಾರ್ ಜಾಂವ್ಚೊ ಲಾಭ್ ತುಮ್ಕಾಂ ಸವ್ಕಾಸ್ ಕಳ್ತೊಲೊ. ಬೆಡ್ಡಾರ್ ಸುಶೆಗ್ ಮೆಳ್ಚೊ ಮಾತ್ರ್ ನ್ಹಯ್, ಬಗಾರ್ ಉಂಬುಳ್ಚೊ ಶ್ರಮ್ ಆನಿ ಇಲ್ಲೊಸೊ ದುಡುಯೀ ಉರ್ತಾ. ಬಿಗ್ದಲ್ಲಿಂ ಭಿತರ್ಲಿಂ ವಸ್ತ್ರಾಂ ನ್ಹೆಸೊನ್ ಭೊಗ್ಚ್ಯಾ ಕರಂದಾಯೆ ಥಾವ್ನೀ ತುಮಿ ಮುಕ್ತ್ ಜಾತೆಲ್ಯಾತ್.

ಬರಿ ನೀದ್: ಪೈಜಾಮಾ, ನೈಟಿ ಇತ್ಯಾದಿ ನ್ಹೆಸೊನ್ ನಿದ್ಲೆಲ್ಯಾಂಕ್ ಥೊಡ್ಯೊ ಧೊಶಿ ಕಾಯಾಮ್. ಬರೀ ನೀದ್ ಪಡೊನ್ ಆಸ್ತಾನಾ ಎಕಾಚ್ಛಾಣೆ ವಸ್ತುರ್ ಶಿರ್ಕೊನ್ ರೆವೊಡ್ಚೆಂ, ಬಿಗ್ದೊಂಚೆಂಗಿ ವಾ ವೊಡ್‍ಲ್ಲೆಪರಿಂ ಜಾವ್ನ್‍ಗೀ ಜಾಗ್ ಜಾಂವ್ಚಿ ಸಾಮಾನ್ಯ್. ತ್ಯಾ ವರ್ವಿಂ ಬರಿ ನೀದ್ ಪಡನಾಸ್ತಾನಾ, ಪಾಡ್ ಸಪ್ಣಾಂ ಪಡ್ಚೆಂ ಆನಿ ಸಕಾಳಿಂ ಉಟ್ತಾನಾ ಮತಿಂತ್ ಉಲ್ಲಾಸ್ ಆಸನಾ. ನಾಗ್ಡೆ ನಿದ್ಲೆಲ್ಯಾ ವರ್ವಿಂ ಅಸಲ್ಯೊ ಸರ್ವ್ ಧೊಶಿ ಆಡಾವ್ಯೆತ್. ತ್ಯಾ ವರ್ವಿಂ ಸುಶೆಗಾಚಿ ನೀದ್ ತುಮ್ಕಾಂ ಪಡ್ತೆಲಿ, ಜಿ ಭಲಾಯ್ಕೆಕ್ ಗರ್ಜೆಚಿ.

ಕಾತಿಚಿ ಭಲಾಯ್ಕಿ: ದಿಸಾಕ್ ಏಕ್ ಪಾವ್ಟಿಂ ಪುಣೀ ನಾಗ್ಡೆ ನಿದ್ಲೆಲೆ ವರ್ವಿಂ ತುಮ್ಚಿ ಕೂಡ್ ಫ್ರೆಶ್ ವಾರೆಂ ಸೆಂವ್ಕ್ ಸಕ್ತಾ. ಪ್ರತ್ಯೇಕ್ ಜಾವ್ನ್ ತುಮ್ಚೆ ಖಾಸ್ಗಿ ವಿಸ್ವೆ (ಜನನಾಂಗಾಂ) ವಾರೆಂ ಲಾಗೊನ್ ಸವ್ಕಾಸಾಯ್ ಜೊಡ್ತಾತ್. ತೆಂ ಭಾರಿಚ್ ಬರೆಂ. ತಶೆಂಚ್ ಖಾಕ್ಯೆ ಪಂದಾ ಆನಿ ಪಾಯಾಂಕೀ ವಾರೆಂ ಲಾಗ್ತಾ. ಸಗ್ಳೊ ದೀಸ್ ತ್ಯಾ ಜಾಗ್ಯಾಂಕ್ ಧಾಂಪುನ್, ವಾರೆಂ, ಉಜ್ವಾಡ್ ಪಡನಾಸ್ತಾನಾ ಲಿಪಯಿಲ್ಲೆ ವರ್ವಿಂ ಉಗ್ತೆಂ ನಿದ್ಚೆಂ ತ್ಯಾ ಜಾಗ್ಯಾಂಕ್ ಜಾಯ್ತೆಂ ಬರೆಂಪಣ್ ಹಾಡ್ತಾ. ಗಿಮೆಚ್ಯಾ ದಿಸಾಂನಿ ಹೆಂ ಚಡ್ ಗರ್ಜೆಚೆಂ. ಹ್ಯಾ ವರ್ವಿಂ ಕಾತಿಚಿ ಭಲಾಯ್ಕಿ ಬರಿ ಉರೊಂವ್ಕ್, ಕಾತಿಚ್ಯೊ ಪಿಡಾ ಆಡಾಂವ್ಕ್ ಆಧಾರ್ ಜಾತಾ.

ನಾಗ್ಡೆ ನಿದ್ಲೆಲ್ಯಾನ್ ಕುಡಿಚಿ ಥಂಡಾಯ್ ಭಲಾಯ್ಕೆಭರಿತ್ ಉರ್ತಾ. ತ್ಯಾ ವರ್ವಿಂ ಕುಡಿಂತ್ಲಿಂ ಹಾರ್ಮೋನಾಂ ಬರ್ಯಾ ಪ್ರಮಾಣಾರ್ ಆಸ್ತಾತ್. ಚಡ್ ಹುನ್ಸಾಣ್, ಧಗಿಕ್ ವಳಗ್ ಜಾಲ್ಲಿ ಕುಡ್ ಹಾರ್ಮೋನಾಂಚ್ಯಾ ಉತ್ಪಾದನಾಂತ್ ಚಡುಣೆಂ ಜಾಂವ್ಕ್ ಸಕ್ತಾ. ಥೊಡಿಂ ಹಾರ್ಮೋನಾಂ (cortisol) ಉದ್ವೇಗ್ ಚಡಂವ್ಕ್ ಸಕ್ತಾತ್. ತ್ಯಾ ವರ್ವಿಂ ಜಂಕ್ ಖಾಣಾಂ ಖಾಂವ್ಕ್ ಪ್ರೇರಣ್, ತ್ಯಾ ಮುಖಾಂತ್ರ್ ವಜನ್ ಚಡ್ಚೆಂ ಆನಿ ಥರಾವಳ್ ಪಿಡಾ ಯೇಂವ್ಕ್ ಕಾರಣ್ ಜಾತಿತ್. ನಾಗ್ಡೆ ನಿದ್ಲ್ಯಾರ್ ಹ್ಯೊ ಧೊಶಿಚ್ ಆಸನಾಂತ್ ಆನಿ ಭಲಾಯ್ಕಿ ಬರಿ ಉರ್ತಾ.

ರಾತಿಚೆಂ ನಾಗ್ಡೆ ನಿದ್‍ಲ್ಲೆ ವರ್ವಿಂ ಕುಡಿಚಿ ಥಂಡಾಯ್ 70 ಡಿಗ್ರಿ ಫ್ಯಾರನ್‍ಹೀಟಾಚ್ಯಾ ಸಕಯ್ಲ್ ದವರುಂಕ್ ಸಕ್ತಾ. ಹೆಂ ತುಮ್ಚ್ಯಾ ಕುಡಿಂತ್ಲೆಂ ಮೆಲಟೊನಿನ್ ಆನಿ ವಾಡಾವಳಿಚ್ಯೊ ಹಾರ್ಮೋನ್ ಬರ್ಯಾ ಪ್ರಮಾಣಾರ್ ಆಸೊಂಕ್ ಕುಮೊಕ್ ಜಾತಾ. ಹೆಂ ಕುಡಿಚೆಂ ತರ್ನಾಟ್‍ಪಣ್ ಸಾಂಬಾಳ್ತಾ ಆನಿ ಭಲಾಯ್ಕೆಭರಿತ್ ಜಿವಿತ್ ಆಸಾ ಕರ್ತಾ.

ಹಿ ಪೂರಾ ವ್ಹಡಾಂಚಿ ಗಜಾಲ್ ಜಾಲಿ. ಘರಾಂತ್ ಜೊಡ್ಯಾಂಕ್ ಪ್ರತ್ಯೇಕ್ ಬೆಡ್‍ರೂಮ್ ಆಸ್ಲ್ಯಾರ್ ದಾಕ್ಷೆಣ್, ಕಾವ್ಜೆಣಿ ನಾಸ್ತಾನಾ ಹೆಂ ಪಾಳುಂಕ್ ಸಾಧ್ಯ್. ಪುಣ್ ಚಡ್ ಜಣಾಂನಿ ಸಾಂಗಾತಾ ನಿದ್ಚ್ಯಾ ಘರಾಂನಿ, ಅಶೆಂ ಕರುಂಕ್ ಅಸಾಧ್ಯ್. ಆಜ್‍ಕಾಲ್ ಕಾಜಾರಿ ಜೊಡಿಂ ಆನಿ ಏಕ್ ದೊಗಾಂ ಭುರ್ಗಿಂ ಆಸ್‍ಲ್ಲೆ ಕಡೆನ್ ಸಕ್ಡಾಂಕೀ ಪ್ರತ್ಯೇಕ್ ಕುಡಾಂ ಆಸ್ತಾತ್.

ಫಕತ್ ಕಾಜಾರಿ ಜೊಡ್ಯಾಂನಿ ಮಾತ್ರ್ ನ್ಹಯ್, ಎಕೆಕ್ಲ್ಯಾಂನಿಯ್ ಉಗ್ತೆಂ, ನಾಗ್ಡೆಂ ನಿದ್ಚೆಂ, ತಾಂಕಾಂ ವಯ್ರ್ ಕಳಯಿಲ್ಲೊ ಫಾಯ್ದೊ ಜೊಡುನ್ ದಿತಾ. ಬಾಳ್ಶ್ಯಾಂಕ್ ಆನಿ ಲ್ಹಾನ್ ಭುರ್ಗ್ಯಾಂಕ್ ಚಡಾವತ್ ಗರ್ಜ್ ನಾತ್ಲ್ಯಾರೀ ಬಿಗ್ದಿಲ್ಲಿ ಮುಸ್ತಾಯ್ಕಿ ನ್ಹೆಸೊವ್ನ್ ತಾಂಚ್ಯಾ ಜಿವಾಕ್ ಬಾಧಕ್ ಹಾಡ್ಚಿಂ ವ್ಹಡಿಲಾಂ ಜಾಯ್ತಿಂ ಆಸಾತ್. ಭಾಯ್ರ್ ವ್ಹರ್ಚ್ಯಾ ಸಂದರ್ಭಾಂನಿ ಸೊಡ್ನ್, ಲ್ಹಾನ್ ಭುರ್ಗ್ಯಾಂಕ್ ಉಗ್ತೆಂ ದವರಾ. ಪ್ರತ್ಯೇಕ್ ಕರ್ನ್ ಜನನಾಂಗಾಂಚ್ಯಾ ಭಲಾಯ್ಕೆಕ್ ವಾರೆಂ ಲಾಗ್ಚೆಂ ಬರೆಂ. ಸಗ್ಳೊ ದೀಸ್ ಪ್ಯಾಂಪರಾಂ, ಬಿಗ್ದಿಲ್ಲಿ ಮುಸ್ತಾಯ್ಕಿ ತಾಂಕಾಂ ಘಾಲ್ನ್ ಇನ್‍ಫೆಕ್ಷನ್ ಜಾಂವ್ಚೆಂ ಆಡಾಯಾ.

ತರ್, ಆಜ್ ರಾತಿಕ್ ನಿದ್ತಾನಾ ಉಡಾಸಾನ್ ಕಿತೆಂ ಕರಿಜೆ ಮ್ಹಣ್ ಕಳ್ಳೆಂ ನೆ?!

ಕುರ್ಪಾ: ಆಧಾರಾನ್

Send your opinion, views & feedback to: budkuloepaper@gmail.com

Like our Facebook Page: www.facebook.com/budkulo.epaper

The post ನಾಗ್ಡೆ ನಿದ್ಲ್ಯಾರ್ ಭಲಾಯ್ಕೆಕ್ ಭಾರೀ ಬರೆಂ ಖಂಯ್ appeared first on Budkulo.

ಹಾಂಗಾಸರ್ ಎಕಾ ಸರ್ವೆಚೆಂ ಫಲಿತಾಂಶ್ ಆಸಾ. ಸಂಸಾರ್‌ಭರ್ ಚಲಯಿಲ್ಲ್ಯಾ ಹ್ಯಾ ಸರ್ವೆ ವರ್ವಿಂ ಕಳೊನ್ ಆಯಿಲ್ಲಿ ಗಜಾಲ್ ಸಾಂಪ್ರದಾಯಿಕ್ ಚಿಂತ್ಪಾಚ್ಯಾಂಕ್ ತಕ್ಲೆಕ್ ಕೂಟ್ ಘಾಲ್ಚೆ ತಸಲಿ ಮ್ಹಣ್ಯೆತ್. ಆಧುನಿಕ್ ಕಾಳಾರ್, ಶ್ಹೆರಾಂತ್ಲೊ ಲೋಕ್ ಆಪ್ಲ್ಯಾ ಸೆಕ್ಸ್ ಗಜಾಲಿಂಚೆರ್ ಆಪ್ಲ್ಯಾ ಜೊಡ್ಯಾಲಾಗಿಂ ಉಲಂವ್ಕ್ ನರ್ಗನಾ ಖಂಯ್. ಆನಿ ವಿಜ್ಮಿತ್ ಕರ್ಚಿ ಸಂಗತ್ ಮ್ಹಳ್ಯಾರ್, ಗಿರೇಸ್ತ್, ಅಭಿವೃದ್ಧಿ ಜಾಲ್ಲ್ಯಾ ರಾಷ್ಟ್ರಾಂ ಆನಿ ಸಂಸಾರಾಚ್ಯಾ ಹೆರ್ ಲೊಕಾ ಪ್ರಾಸ್ ಭಾರತೀಯ್ ಹ್ಯಾ ಸಂಗ್ತಿಂತ್ ಮುಖಾರ್ ಆಸಾತ್ ಖಂಯ್.

ಕಾಂಡೋಮ್ ತಯಾರ್ ಕರ್ಚ್ಯಾ ಎಕಾ ಕಂಪೆನಿನ್ ಚಲಯಿಲ್ಲ್ಯಾ ಹ್ಯಾ ಗ್ಲೋಬಲ್ ಸರ್ವೆಂತ್ ಜಾಯ್ತ್ಯೊ ‘ಆಕರ್ಷಕ್’ ಗಜಾಲಿ ಭಾಯ್ರ್ ಪಡ್ಲ್ಯಾತ್. ಭಾರತಾಚೊ ನಗರ್‌ವಾಸಿ ಲೋಕ್ ಅದ್ಭುತ್ ರಿತಿನ್ ಸೆಕ್ಸ್ ಲೈಫ್ ಎಂಜೊಯ್ ಕರ್ತಾ ಖಂಯ್ ಆನಿ ಸಂಸಾರಾಂತ್ಲ್ಯಾ ಹೆರಾಂಕ್ ತುಲನ್ ಕೆಲ್ಯಾರ್ ತಿಂ ಆಪ್ಲ್ಯಾ ಸಾಂಗಾತ್ಯಾ ಸಂಗಿಂ ಸೆಕ್ಸಾ ವಿಶಿಂ ಚಡ್ ಉಗ್ತ್ಯಾನ್ ಗಜಾಲಿ ಕರ್ತಾತ್ ಮ್ಹಣ್ ಕಳೊನ್ ಆಯ್ಲಾಂ.

ಸರ್ವೆ ಕೆಲ್ಲ್ಯಾ ಲೊಕಾ ಪಯ್ಕಿಂ ಮುಕ್ಕಾಲ್ ವಾಂಟೊ (74%) ಭಾರತೀಯ್, ಬೆಡ್ಡಾರ್ ಆಪ್ಲ್ಯಾ ಸಾಂಗಾತ್ಯಾ ಥಾವ್ನ್ ಕಿತೆಂ ಆಶೆತಾತ್ ಮ್ಹಳ್ಳೆಂ ಸಾಂಗ್ತಾತ್ ಖಂಯ್. ಹ್ಯಾ ವಿಶ್ಯಾಂತ್ ಗ್ಲೋಬಲ್ ಎವರೇಜ್ 58% ತರ್, ಇಂಗ್ಲೆಂಡಾಂತ್ ಫಕತ್ 49% ಮ್ಹಣ್ತಾ ಸರ್ವೆ.

68% ಭಾರತೀಯ್, ಮ್ಹಳ್ಯಾರ್ ತೆಗಾಂತ್ ದೋಗ್ ಜಣಾಂ, ಆಪುಣ್ ಅದ್ಭುತ್ ಸೆಕ್ಸ್ ಜೊಡುನ್ ಆಸಾಂ ಮ್ಹಣ್ ಚಿಂತಾತ್ ಖಂಯ್. ಹೊ ಅಂಕೊ ಇಂಗ್ಲೆಂಡಾಂತ್ 38 ತರ್ ಫ್ರಾನ್ಸಾಂತ್ 36 ಮ್ಹಣ್ ಕಳೊನ್ ಆಯ್ಲಾಂ. ಆನ್ಯೇಕ್ ಕುತೂಹಲಾಚಿ ಗಜಾಲ್ ಮ್ಹಳ್ಯಾರ್, 63% ಭಾರತೀಯ್ ಆಪುಣ್ ಸೆಕ್ಸಾಂತ್ ವೈವಿಧ್ಯತಾ ಭೊಗ್ತಾಂವ್ ಮ್ಹಣ್ ಸಾಂಗ್ತಾತ್. ಹ್ಯಾ ಗಜಾಲಿಂತ್ ಇಂಗ್ಲಿಶ್ ಲೋಕ್ 47% ತರ್, ಜಪಾನಾಚೆ ಫಕತ್ 9% ಖಂಯ್.

ಹ್ಯಾ ಸಂಗ್ತಿಂತ್, ಆಪ್ಣೆಂ ಊಂಚಾಯೆಚೆಂ ಸೆಕ್ಸ್ ಲೈಫ್ ಭೊಗುನ್ ಆಸಾಂ ಮ್ಹಣ್ಚ್ಯಾಂತ್ ಗ್ರೀಕ್ (76%) ಅನಿ ಮೆಕ್ಸಿಕನ್ಸ್ (80%) ಮಾತ್ರ್ ಭಾರತೀಯಾಂ ಪ್ರಾಸ್ ಮುಖಾರ್ ಆಸಾತ್.

ಸಂಸಾರಾಚ್ಯಾ 26 ದೇಶಾಂತ್ಲ್ಯಾ 26 ಹಜಾರ್ ಲೊಕಾಂನಿ ಆಪ್ಲ್ಯಾ ಸೆಕ್ಸ್ ಜಿಣ್ಯೆ ವಿಶಿಂ ಹ್ಯಾ ಸರ್ವೆಂತ್ ಭಾಗ್ ಘೆತ್ಲಾ. ಹೊ ಸರ್ವೆ ಓನ್‍ಲೈನ್ ಚಲಯಿಲ್ಲೊ.

ಭಾರತೀಯ್ ಜೊಡಿಂ ಆಪ್ಲ್ಯಾ ಬೆಡ್‍ರೂಮಾಂತ್, ನಮೂನ್ಯಾವಾರ್ ಸೆಕ್ಸ್ ಚಟುವಟಿಕೊ ಕರುಂಕ್ ನರ್ಗನಾಂತ್ ವಾ ಲಜೆನಾಂತ್ ಮ್ಹಣ್ ಹಾಂತುಂ ಕಳೊನ್ ಆಯ್ಲಾಂ.

ಬೆಡ್‍ರೂಮಾಂತ್ ಭಾರತೀಯಾಂಚೆಂ ವರ್ತನ್, ಕರ್‍ನ್ಯೊ ಥರಾವಳ್ ಆಸ್ತಾತ್ ಖಂಯ್. ತಾಂಚೆ ಪಯ್ಕಿಂ ಪ್ರಮುಖ್ ಸೆನ್ಸುವಲ್ ಮಸಾಜ್ (55%), ಸೆಕ್ಸುವಲ್ ಫ್ಯಾಂಟಸಿ (58%), ಉದ್ರೇಕ್‍ಕಾರಿ ವಸ್ತುಂಕ್ ಪಳೆಂವ್ಚೆಂ (55%). ತೀನಾಂತ್ ಏಕ್ ವಾಂಟೊ ಭಾರತೀಯ್ ರೋಲ್ ಪ್ಲೇ (ಹೆರ್ ವ್ಯಕ್ತಿಂಪರಿಂ ವರ್ತನ್ ಕರ್ಚೆಂ) ಕರುಂಕ್ ಖುಶಿ ವ್ಹರ್ತಾತ್. ತಿತ್ಲೊಚ್ ಲೋಕ್ ಸೆಕ್ಸಿ ಮುಸ್ತಾಯ್ಕಿ (ಅಂಡರ್‌ವೇರ್) ನ್ಹೆಸೊನೀ ಉದ್ರೇಕ್ ಪಾವ್ತಾತ್ ಖಂಯ್.

ಆಪ್ಲೆಂ ಸೆಕ್ಸ್ ಜಿವಿತ್ ಆನಿಕೀ ಚಡ್ ಖುಶಾಲಿ ಆನಿ ರುಚಿಚೆಂ ಜಾಂವ್ಚ್ಯಾಕ್ ಮಾರ್ಕೆಟಿಂನಿ ಮೆಳ್ಚಿಂ ಸೆಕ್ಸ್ ಟೊಯ್ಸ್ ವಾಪಾರುಂಕ್ ಮನ್ ಕರ್ಚ್ಯಾ ಭಾರತೀಯ್ ಲೊಕಾಚೊ ಸಂಖೊ ಚಡ್ ಜಾಲಾ ಮ್ಹಣೊನ್ ಹೊ ಸರ್ವೆ ಪಾಚಾರ್ತಾ.

ಧಾ ಜಣಾಂ ಪಯ್ಕಿ ಸ ಜಣ್ (57%) ಭಾರತೀಯ್ ಆಪ್ಲೆಂ ಸೆಕ್ಸ್ ಚಡ್ ಉದ್ರೇಕ್‍ಕಾರಿ ಜಾಂವ್ಚ್ಯಾಕ್ ಮಾರ್ಕೆಟಿಂನಿ ಮೆಳ್ಚ್ಯಾ ಉತ್ಪಾದನಾಂಕ್ ವಾಪಾರ್ಚೆಂ ಸಾರ್ಕೆಂ ಮ್ಹಣ್ ಚಿಂತಾತ್ ಖಂಯ್. ಸರ್ವೆ ಪ್ರಕಾರ್, 9% ಭಾರತೀಯ್ ವೈಬ್ರೇಟರ್ ವಾಪಾರ್ತಾತ್. ಸಂಸಾರಾಂತ್ ಹೊ ಸಂಖೊ 21% ಆಸಾ. 13% ಭಾರತೀಯ್ ವೈಬ್ರೇಟರ್ ವಾಪಾರುಂಕ್ ಆಸಕ್ತ್ ಆಸಾತ್ ಖಂಯ್.

33% ಭಾರತೀಯ್ ಸೆಕ್ಸ್ ಸುಗಮ್ ಆನಿ ಚಡ್ ಸಂತೊಸ್ಭರಿತ್ ಜಾಂವ್ಚ್ಯಾಕ್ ಲ್ಯೂಬ್ರಿಕೆಂಟ್ ವಾಪಾರ್ತಾತ್ ಖಂಯ್. ಜಾಗತಿಕ್ ಮಾಪಾನ್ 34% ಲೋಕ್ ಲ್ಯೂಬ್ರಿಕೆಂಟ್ ಆಪ್ಲ್ಯಾ ಸೆಕ್ಸ್ ಜಿವಿತಾಚೊ ವಾಂಟೊ ಜಾವ್ನ್ ಉಪಯೋಗ್ ಕರ್ತಾತ್ ಮ್ಹಣ್ತಾ ಸರ್ವೆ.

ಎಕ್ಸ್‌ಪೆರಿಮೆಂಟ್ ಕರ್ಚ್ಯಾಂತ್ ಚಡಾವತ್ ರಾಷ್ಟ್ರಾಂಕ್ ತುಲನ್ ಕೆಲ್ಯಾರ್ ಭಾರತೀಯ್ ಪಾಟಿಂ. 22% ಜಣ್ ಮಸಾಜ್ ತೇಲ್ ವಾಪಾರುಂಕ್ ಖುಶಿ ವ್ಹರ್ತಾತ್ ತರ್ ಕೇವಲ್ 9% ಜಣ್ ಸೆಕ್ಸ್ ಅವ್ದಿ ಲಾಂಬಂವ್ಚ್ಯಾ ವಕ್ತಾಂ ಥಂಯ್ ಮನ್ ಕರ್ತಾತ್. ಯಶಸ್ವಿ ಸೆಕ್ಸ್, ಲಾಂಬ್ ಆವ್ದೆಚೊ ಸಂಭೋಗ್ ಭೊಗುಂಕ್ ಕೃತಕ್ ವೊಕ್ತಾಂ ವಾಪಾರ್ತೆಲ್ಯಾಂಚೊ ಸಂಖೊ ಬೋವ್ ಉಣೊ (7%) ಮ್ಹಣ್ತಾ ಸರ್ವೆ.

ಆಧುನಿಕ್ ಸಂಪರ್ಕ್ ಕ್ರಾಂತಿ ವರ್ವಿಂ ಸೆಕ್ಸ್ ಜಿವಿತಾಂತ್ ಚಡ್ ಆನಿ ಚಡ್ ಎಕ್ಸ್‌ಪೆರಿಮೆಂಟ್ ಜಾಂವ್ಚಿ ಸಾಧ್ಯತಾ ಆಸಾ ಮ್ಹಣ್ 57% ಲೊಕ್ ಪಾತ್ಯೆತಾ ಖಂಯ್.

ವಿಶ್ವಾಸ್‍ಪಣಾಂತ್ ಭಾರತೀಯ್ ಮುಖಾರ್ ಆಸಾತ್ ಮ್ಹಣೊನ್ ಹೊ ಸರ್ವೆ ಸಾಂಗ್ತಾ. ಜಾಯ್ತ್ಯಾ ಹೆರ್ ದೇಶಾಂಕ್ ತುಲನ್ ಕೆಲ್ಯಾರ್ ಭಾರತೀಯಾಂಕ್ ಬೋವ್ ಉಣೆಂ ಸೆಕ್ಸ್ ಸಾಂಗಾತಿ/ಣ್ ಆಸಾತ್. ಭಾರತೀಯ್ ದಾದ್ಲ್ಯಾಂಕ್ 6 ಜಣಾಂ ತಶೆಂಚ್ ಸ್ತ್ರೀಯಾಂಕ್ ದೋಗ್ ಜಣ್ ಮೋಗ್ ಕರ್ಣಾರಾಂ ಆಸ್ಲ್ಯಾರ್, ಇಂಗ್ಲೆಂಡಾಂತ್ ದಾದ್ಲ್ಯಾಂಕ್ 16 ತರ್ ಸ್ತ್ರೀಯಾಂಕ್ 10 ಜಣಾಂ ಖಂಯ್. ಸಂಸಾರ್‌ಭರ್ ದಾದ್ಲ್ಯಾಂಕ್ 13 ಜಣಾಂ, ಸ್ತ್ರೀಯಾಂಕ್ 7 ಜಣಾಂ ಮೋಗ್ ಕರ್ಣಾರಾಂ ಆಸಾತ್ ಮ್ಹಣ್ತಾ ಸರ್ವೆ.

ಸೆಕ್ಸ್ ಅನುಭವ್ ಬರೊ ಕರುಂಕ್ ಕಿತೆಂ ಚಡ್ ಉಪ್ಕಾರ್ತಾ ಮ್ಹಣ್ ವಿಚಾರ್ತಾನಾ, 47% ಜಣ್ ಭಾರತೀಯ್, ಮೋಗ್ (ರೊಮ್ಯಾನ್ಸ್) ಚಡ್ ಆಸ್ಲ್ಯಾರ್ ಬರೆಂ ಮ್ಹಣ್ತಾತ್ ತರ್ ಸಾಂಗಾತ್ಯಾ ಸವೆಂ ಚಡ್ ವೇಳ್ ಪಾಶಾರ್ ಕರ್ಚೆಂ ಮ್ಹಣ್ 44% ಜಣ್ ಪಾತ್ಯೆತಾತ್. 45% ಜಣ್ ಆಪ್ಲ್ಯಾ ಸಾಂಗಾತ್ಯಾಕ್ ಚಡ್ ಸಂತೊಸ್ ದಿಂವ್ಚ್ಯಾಕ್ ಜಾಣ್ವಾಯ್ ಆಪ್ಣಾಂವ್ಕ್ ಖುಶಿ ವ್ಹರ್ತಾತ್ ಮ್ಹಣ್ ಹ್ಯಾ ಸರ್ವೆ ವರ್ವಿಂ ಕಳಿತ್ ಜಾಲಾಂ.

(ಆಧಾರಾನ್)

ತುಮ್ಚಿ ಅಭಿಪ್ರಾಯ್, ಸಲಹಾ ವಾ ಸೂಚನಾಂ ಇಮೈಲ್ ಕರಾ: budkuloepaper@gmail.com

Like us at: www.facebook.com/budkulo.epaper

The post ಭಾರತೀಯಾಂಚೆಂ ಸೆಕ್ಸ್ ಲೈಫ್ ವಂಡರ್‌ಫುಲ್ ಖಂಯ್ appeared first on Budkulo.

-ಎಲ್.ಎಂ., ಮಂಗ್ಳುರ್

ಜಾವ್ನ್ ಗೆಲ್ಲ್ಯಾ ದಿಸಾಂಕ್ ಅನಿ ಪರಿಗತೆಕ್ ಬದ್ಲೊಂಕ್ ಜಾಯ್ನಾ. ತ್ಯಾಚ್ ಉಡಾಸಾಂತ್ ಕರ್ಗೊನ್ ರಾವ್‍ಲ್ಲ್ಯಾನ್ ತುಕಾ ಮುಕಾರ್ ಸರೊಂಕ್ ಅಸಾಧ್ಯ್ ಜಾತಾ ತಶೆಂ ದಿಸ್ತಾ. ಆಮ್ಚೆ ಭೊಂವ್ತಿ ಆಸ್ಚೆ ಕಿತ್ಲೆಶೆ ಜಣ್ ತುಜೆಪ್ರಾಸ್ ಪಾಸ್ಟ್ ಸ್ಥಿತೆಚೆರ್ ಆಸಾತ್. ಲ್ಹಾನ್ ಥಾವ್ನ್ ತುಕಾ ವಾಡೊಂಕ್ ಬರೆಂ ವಾತಾವರಣ್ ಮೆಳೊಂಕ್ ನಾ ಜÁವ್ಯೆತ್. ತುಜ್ಯಾ ಸುತ್ತುರಾಂತ್ ಥೊಡ್ಯಾಂಚಿಂ ಆವಯ್ ವಾ ಬಾಪಯ್ ಲ್ಹಾನ್ ಆಸ್ತಾನಾಂಚ್ ಸರೊನ್ ತಿಂ ಸಂಕಶ್ಟಾಂತ್ ಪಡ್‍ಲ್ಲಿಂ ಆಸಾತ್. ತುಕಾ ಜೆಂವ್ಕ್ ಖÁಂವ್ಕ್ ಬರೆಂ ಮೆಳೊಂಕ್ ನಾ ಆಸ್ಯೆತಾ, ಪೂಣ್ ಕಿತೆಂ ತರ್‍ಯಿ ಮೆಳ್ಳಾಂ. ಲ್ಹಾನ್ ಥಾವ್ನ್ ಜೆಂವ್ಕ್ ನಾಸ್ತಾನಾ, ತವಳ್ ತವಳ್ ಉಪಾಶಿಂ ಉರೊನ್ ವಾಡ್‍ಲ್ಲಿಂ ಆಸಾತ್.   ತುಕಾ ಶಿಕಪ್ ಜೊಡುಂಕ್ ಅವ್ಕಾಸ್ ಲÁಬ್ಲಾ, ಪ್ರಸ್ತುತ್ ಕರುಂಕ್ ಕಾಮ್ ಆಸಾ. ಜಾಯಿತ್ತ್ಯಾಂಕ್ ಶಿಕಪ್ ಜೊಡುಂಕ್ ಜÁಲ್ಲೆಂ ನಾ. ಶಿಕ್‍ಪ್ ಆಸ್‍ಲ್ಲ್ಯಾಂಕ್ ಸಯ್ತ್ ತುಜೆ ತಸಲೆಂ ಕಾಮ್ ನಾ. ಥೊಡ್ಯಾ ಸಂಗ್ತಿಂನಿ ತುಂ ಪಾಟಿಂ ಆಸಾಯ್ ಜಾವ್ಯೆತ್, ಪೂಣ್ ಹೆರ್ ಜಾಯಿತ್ತ್ಯಾ ಗಜಾಲೆಂನಿ ತುಂ ಹೆರಾಂ ಪ್ರಾಸ್ ಬರ್ಯಾ ಸ್ಥಾನಾರ್ ಆಸಾಯ್. ದೆವಾಕ್ ಅರ್ಗಾಂ ದಿ. ಹೆ ವಿಚಾರ್ ತುಕಾ ತುಜೆ ಥಂಯ್ ಸಕಾರಾತ್ಮಕ್ ಭೊಗ್ಣಾಂಕ್ ಕಾರಣ್ ಜಾವ್ಯೆತ್.

ಹ್ಯಾ ಸಂಸಾರಾಂತ್ ಜಲ್ಮಲ್ಲ್ಯಾ ಹರ್ಯೆಕ್ಲ್ಯಾಚ್ಯಾ ಜಿವಿತಾಕ್ ಏಕ್ ಆಪವ್ಣೆಂ ವಾ ಶೆವಟ್ ಆಸ್ತಾ ಆನಿ ಸಕ್ಡಾಂಕ್ ಆಪ್ಲ್ಯಾ ಶೆವಟಾಂತ್ ಜಯ್ತ್ ಜೊಡುಂಕ್ ಸಾಧ್ಯ್ ಆಸಾ. ತುಜೆಪರಿಂ ಆಸ್‍ಲ್ಲ್ಯಾನ್ ತುಜ್ಯಾ ಘರಾಂತ್, ತುಜ್ಯಾ ಸೆಜಾರಾಂತ್, ತುಜ್ಯಾ ದಪ್ತರಾಂತ್ ಏಕ್ ಚೀತ್ ದೀವ್ನ್ ಕಾಮ್ ಕರ್ಚಿ, ಪ್ರಾಮಾಣಿಕ್ ವ್ಯಕ್ತಿ, ಹೆರಾಂಚ್ಯಾ ಗರ್ಜಾಂಕ್ ಪಾಂವ್ಚಿ ಬರ್ಯಾ ಸ್ವಭಾವಾಚಿ ಜಾವ್ಯೆತಾ. ಏಕ್ ಬರಿ ಭಯ್ಣ್, ಏಕ್ ಬರಿ ಆವಯ್ ಜಾವ್ನ್ ತುಜೆಂ ಜಿವಿತ್ ಸಾರ್ಥಕ್ ಕರ್ಯೆತಾ. ಕಾಜಾರ್ ಜಾವ್ನ್, ಬರಿ ಸ್ತ್ರಿ ಜಾವ್ನ್, ಭುರ್ಗ್ಯಾಂಕ್ ಬರ್ಯಾನ್ ವಾಗೊವ್ನ್ ತಾಂಣಿಂ ಜಿವಿತಾಂತ್ ಬರ್ಯಾ ಪಾಂವ್ಡ್ಯಾಕ್ ಪಾವಾಶೆಂ ಕರುಂಕ್ ಸಾಧನ್ ಕರ್ಯೆತಾ. ತುಜೆ ಥಂಯ್ ಆಸ್ಚೆಂ ತಾಲೆಂತ್ ತೆಂಚ್ ಜಾವ್ಯೆತಾ. ದೆವಾನ್ ತುಕಾ ತಸಲ್ಯಾ ಎಕಾ ಮಿಸಾಂವಾಂಕ್ ಆಪಯ್ಲಾಂ ಆಸ್ಯೆತಾ. ತುಜೆ ಭೊಂವ್ತಿಂ ತುಜೆಪರಿಂ ಆಸ್ಚೆ, ಲ್ಹಾನ್ ಥಾವ್ನ್ ಕಶ್ಟಾಂತ್ ವಾಗೊನ್ ವಾಡೊನ್ ಆಯ್ಲ್ಯಾರ್‍ಯಿ ಫಕತ್ ಆಪ್ಲ್ಯಾ ಸುತ್ತುರಾಂತ್ ಆನಿ ಪರಿಸರಾಂತ್ ಬರ್ಯಾನ್ ಆಸೊನ್ ಜಿಣ್ಯೆಂತ್ ತೃಪ್ತಿ ಭೊಗ್‍ಲ್ಲಿಂ ಆಸಾತ್.

ಆಮಿ ಜಾಯಿತ್ತೆಪಾವ್ಟಿಂ ಆಮ್ಕಾಂ ಆಮ್ಚೆಪ್ರಾಸ್ ವಯ್ರ್ ಆಸ್ಚ್ಯಾ, ಆಮ್ಚೆ ಪ್ರಾಸ್ ಚಡ್ ಸಾಧನ್ ಕೆಲ್ಲ್ಯಾಂಕ್ ತುಲನ್ ಕರುಂಕ್ ವೆತಾಂವ್. ಮ್ಹಜೆಚ್ ಪ್ರಾಯೆಚೆಂ ಕಿತ್ಲೆಂ ಬರೆಂ ಭಾಷಣ್ ದಿತಾ, ಕಿತ್ಲ್ಯಾ ಆಪೂರ್ಬಾಯೆನ್ ಗಾಯ್ತಾ, ಅಶೆಂ ಆಮ್ಚೆ ಥಂಯ್ ಉಣೆಂಪಣ್ ಆಸಾ ಮ್ಹಣ್ ಲೆಕ್ತಾಂವ್. ತಶೆಂ ಭಾಷಣ್ ದಿತೆಲ್ಯಾಂಕ್ ಆಪ್ಣಾಕ್ ನರೇಂದ್ರಾ ಮೋದಿಪರಿಂ ಉಲೊಂವ್ಕ್ ಜಾಯ್ನಾ ಮ್ಹಣ್ ಬೆಜಾರ್ ಜಾಲ್ಯಾರ್ ವಾ ಗಾಯ್ತೆಲ್ಯಾಕ್ ಆಪ್ಣಾಕ್ ಸೋನು ನಿಗಮಾಪರಿಂ ಗಾಂವ್ಕ್ ಜಾಯ್ನಾ ಮ್ಹಣ್ ಉಣೆಂಪಣ್ ಭೊಗುಂಕ್ ಸಾಧ್ಯ್ ಆಸಾ. ಆಮ್ಚೆ ಥಂಯ್ ಆಸ್ಚೆಂ ತಾಲೆಂತ್ ಆಮಿ ಕಶೆಂ ಆನಿ ಖಂಯ್ ವಾಪ್ರಿಯೆತಾ ಥಂಯ್ ವಾಪ್ರುನ್, ತೆಂ ವೃದ್ಧಿ ಕರುಂಕ್ ಪಳೆಂವ್ಚ್ಯಾಂತ್ ನಿಜಾಯ್ಕಿ ಜಯ್ತ್ ಜೊಡುಂಕ್ ಸಾಧ್ಯ್ ಆಸಾ.

ಆಮಿ ಜಾವ್ನ್ ಮುಕಾರ್ ಗೆಲ್ಲೆ ಶಿವಾಯ್ ಹೆರ್ ಆಮ್ಕಾಂ ತಾಂಚ್ಯಾ ಮೆಳಿಂತ್ ಘೆನಾಂತ್. ಹೆರ್ ಕಿತೆಂ ಚಿಂತಾತ್, ಲೆಕ್ತಾತ್ ಮ್ಹಣ್ ಖಂತ್ ಕರಿನಾಕಾ. ಜೆರಾಲ್ ಥರಾನ್ ಪಂಗ್ಡಾಂತ್ ಆಸ್ತಾನಾ ಆಮಿ ಆಮ್ಚೆವಿಶಿಂ ಮಾತ್ರ್ ಖಂತ್ ಕರ್ತಾಂವ್, ಚತ್ರಾಯ್ ಘೆತಾಂವ್ ಶಿವಾಯ್ ಆನ್ಯೆಕ್ಲ್ಯಾಚಿ ದಾಸ್ತಿ ಕರಿನಾಂವ್.  ತುಂ ಹಿ ಗಜಾಲ್ ಮತಿಂತ್ ದವರ್ ಆನಿ ತುಕಾ ಜಾಯ್ ಮ್ಹಣ್ ಭೊಗ್ತಾ ತರ್ ತುಂಚ್ ಹೆರಾಂ ಸಾಂಗಾತಾ ಮೇಳ್. ತಾಂಚೆಕಡೆ ಉಲಯ್. ಹಳ್ತಾನ್ ತುಕಾ ವಾಸ್ತವೀಕತಾ ಕಳ್ತಲಿ ಆನಿ ಸಮಸ್ಸೊ ಪರಿಯಾರ್ ಜಾತಲೊ.

The post ಮ್ಹಾಕಾ ಉಣೆಂಪಣ್ ಭೊಗ್ತಾ; ವಾಟ್ ದಾಕಯಾ ಪ್ಲೀಸ್ appeared first on Budkulo.

ಮ್ಹಾಕಾ ತೀನ್ ವರ್ಸಾಂಚೊ ಚೆರ್ಕೊ ಆಸಾ. ಸಮಸ್ಸೊ ಕಿತೆಂಗಿ ಮ್ಹಳ್ಯಾರ್ ತೊ ಜೇಂವ್ಕ್‍ಚ್ ಆಯ್ಕಾನಾ. ಘರಾ ಖಾಂವ್ಚೆಂ ಕಿತೆಂಯ್ ಕರ್ನ್ ದಿಲ್ಯಾರ್ ಸಾರ್ಕೆಂ ಖಾಯ್ನಾ. ಬಟಾಟೆ, ಕೆರೆಟ್ ತಸಲಿ ರಾಂದ್ವಯ್ ಘಟಾಯೆಕ್ ಮ್ಹಣ್ ಉಕಡ್ನ್ ದಿಲ್ಯಾರೀ ಖಾಯ್ನಾ. ಫಳ್ ವಸ್ತು ದಿಲ್ಯಾರೀ ತಾಕಾ ರುಚನಾ. ಮಾಸ್-ಮಾಸ್ಳಿ ಆಸ್ಲ್ಯಾರ್ ಇಲ್ಲೆಂ ಜೆವ್ತಾ. ನೂಡಲ್ಸ್ ಮ್ಹಳ್ಯಾರ್ ಜೀವ್ ತಾಕಾ. ಮ್ಹಜಿ ಖಂತ್ ಮ್ಹಳ್ಯಾರ್, ಅಶೆಂಚ್ ಜಾಲ್ಯಾರ್ ತಾಚೆ ಕುಡಿಚಿ ವಾಡಾವಳ್ ಜಾಂವ್ಚಿ ಕಶಿ? ಮ್ಹಜೆ ಎಕೆ ಸೆಜಾರ್ನಿಲಾಗಿಂ ಹೊ ವಿಶಯ್ ಸಾಂಗ್ತಾನಾ, ಆತಾಂಚಿಂ ಭುರ್ಗಿಂಚ್ ತಶಿಂ ಮ್ಹಣಾಲಿ. ಹಾಂವ್ ಕಿತೆಂ ಕರುಂ ದಾಕ್ತೆರಾಬಾ? ಹಾಕಾ ಕಸಲೊಯ್ ಪರಿಹಾರ್ ಆಸಾಗಿ?

-ವಿ.ಎಲ್. ಬಂಟ್ವಾಳ್

ಆಜ್‍ಕಾಲ್ ಜಾಯಿತ್ತ್ಯಾ ವ್ಹಡಿಲಾಂಕ್ ಆಪ್ಲೆಂ ಭುರ್ಗೆಂ ಸಾರ್ಕೆಂ ಖಾಣ್ ಸೆವಿನಾ ಮ್ಹಳ್ಳಿ ಖಂತ್ ಆಸ್ತಾ. ಭುರ್ಗೆಂ ಭಲಾಯ್ಕೆಂತ್ ಬರೆಂ ಆಸಾ ಆನಿ ಸದಾಂಚೆ ಚಾಲಿಂತ್ ಸುಡ್ಸುಡಿತ್ ಆಸ್ಲ್ಯಾರ್‍ಯಿ, ಭುರ್ಗೆಂ ಸಾರ್ಕೆಂ ಖಾಣ್ ಖಾಯ್ನಾ ಜಾಂವ್ಕ್ ಕಿತೆಂ ತರ್‍ಯೀ ಸಮಸ್ಸೊ ಆಸಾ ಮ್ಹಣ್ ಲೆಕ್ಚಿಂ ಆಸ್ತಾತ್.

1. ಭುರ್ಗ್ಯಾಕ್ ಭಲಾಯ್ಕಿ ಗರ್ಜ್: ಕುಡಿಚೆ ಜಡಾಯೆ ಪ್ರಾಸ್ ಭುರ್ಗ್ಯಾಚಿ ಭಲಾಯ್ಕಿ ಗರ್ಜೆಚಿ. ಜಾಯಿತ್ತಿಂ ಭುರ್ಗಿಂ ಭಲಾಯ್ಕೆಂತ್ ಬರಿಂ ಆಸ್ಲ್ಯಾರ್‍ಯಿ ಕುಡಿಂತ್ ಶಿರ್ಪುಟಿಂ ಜಾವ್ನ್ ವಾಡ್ತ್ತಾತ್. ಥೊಡಿಂ ಭುರ್ಗಿಂ ಜಿವಾಂತ್ ಚಡ್ ಮೊಟಿಂ ಜಾವ್ನ್ ವಾಡ್ತಾತ್. ಆವಯ್-ಬಾಪಯ್ ಶಿರ್ಪುಟಿಂ ತರ್ ವಾ ಎಕಾ ಕುಳಾಚಿಂ ಮನ್ಶಾಂ ಭಾಗೆಟಿಂ ಆಸ್ತಾತ್ ತರ್ ತಾಂಚಿಂ ಭುರ್ಗಿಂ ಚಡ್ ಮೊಟಿಂ ಜಾಯ್ನಾಂತ್. ದಾಕ್ಲ್ಯಾಕ್ ಸರ್ದಾರ್ಜಿಂಚ್ಯಾ ದೋನ್ ವರ್ಸಾಂಚ್ಯಾ ಭುರ್ಗ್ಯಾ ತಿತ್ಲಿಂ ಆಮ್ಚಿಂ ದೋನ್ ವರ್ಸಾಂ ಪ್ರಾಯೆಚಿಂ ಭುರ್ಗಿಂ ಪುಡ್ಪುಡಿತ್ ಜಾಯ್ನಾಂತ್. ಥೊಡೆಪಾವ್ಟಿಂ ಆವಯ್-ಬಾಪುಯ್ ಜಿವಾಂತ್ ಪುಡ್ಪುಡಿತ್ ಆಸ್ಲ್ಯಾರ್‍ಯಿ ಕುಟ್ಮಾಂತ್ಲ್ಯಾ ಮ್ಹಾಲ್ಘಡ್ಯಾಂಚೆ ಗೂಣ್ ಯೇವ್ನ್ ಭುರ್ಗೆಂ ಶಿರ್ಪುಟೆಂ ಜಾಂವ್ಕ್ ಸಾಧ್ಯ್ ಆಸಾ. ಕುಡಿಂತ್ ಚಡ್ ವಜನ್ ಆಸ್ಚೆ ಪ್ರಾಸ್ ಭುರ್ಗೆಂ ಭಲಾಯ್ಕೆಂತ್ ಬರೆಂ ಆಸೊನ್ ಆನಿ ತಾಚಿ ಸದಾಂಚಿ ಚಾಲ್ ಸುಡ್ಸುಡಿತ್ ಆಸ್ಚೆಂ ಗರ್ಜೆಚೆಂ. ದಾಕ್ಲ್ಯಾಕ್ ದೋನ್ ವರ್ಸಾಂ ಪ್ರಾಯೆರ್ ಭಾರತಾಂತ್ಲ್ಯಾ ಭುರ್ಗ್ಯಾಂಚಿ ಸರಾಸರ್ ಜಡಾಯ್ 11 ಕಿಲೊಗ್ರಾಮ್ ಆಸ್ತಾ. ತಶೆಂ ಮ್ಹಳ್ಯಾರ್ ಪನ್ನಾಸ್ ಪ್ರತಿಶತ್ ಭುರ್ಗಿಂ ಇಕ್ರಾ ಕಿಲೊಪ್ರಾಸ್ ಉಣಿಂ ತುಕ್ತಾತ್ ತರ್ ಉರ್‍ಲ್ಲಿಂ ಪನ್ನಾಸ್ ಪ್ರತಿಶತ್ ಇಕ್ರಾ ಕಿಲೊಪ್ರಾಸ್ ಚಡ್ ಆಸ್ತಾತ್. ಜಡಾಯ್ ಥೊಡಿ ಉಣಿ ಆಸ್ಚಿ ಅಸ್ವಾಭಾವಿಕ್ ನ್ಹಯ್. ಭುರ್ಗ್ಯಾಚಿ ಜಡಾಯ್ ದಿಸಾನ್ದೀಸ್ ಉಣಿ ಜಾಯಿತ್ ಯೆತಾ, ವಾ ಥೊಡ್ಯಾಚ್ ದಿಸಾಂ ಭಿತರ್ ಭುರ್ಗೆಂ ಕುಡಿಂತ್ ಭಾಗ್ತಾ ತರ್ ವಾ ಭುರ್ಗ್ಯಾಚಿ ಜೆರಾಲ್ ಭಲಾಯ್ಕಿ ಬರಿ ನಾ ತರ್ ಭುರ್ಗ್ಯಾಂಚ್ಯಾ ಪರಿಣತ್ ದಾಕ್ತೆರಾಂಚಿ ಸಲಹಾ ಜೊಡ್ಯೆತ್. ಭಲಾಯ್ಕೆಚೆ ದಿಶ್ಟಿನ್ ಭುರ್ಗ್ಯಾನ್ ಚಡ್ ಮೊಟೆಂ ಜಾವ್ನ್ ವಾಡ್ಚೆಂ ಬರೆಂ ನ್ಹಯ್. ಅಸಲ್ಯಾ ಭುರ್ಗ್ಯಾಂಥಂಯ್ ಚರ್ಬೆಚೆ ಜೀವ್‍ಕಣ್ ಚಡೊನ್ ವ್ಹಡ್ ಜಾತಾನಾ ಪಿಡೆಸ್ತ್ ಮೊಟಾಯ್ (Obesity) ಯೆವ್ಯೆತಾ.

2. ಭುರ್ಗೆಂ ಆನಿ ಭುಕ್: ಭುರ್ಗ್ಯಾಂಚಿ ಭುಕ್ ತಾಂಚೆ ವಾಡಾವಳೆಚೆರ್ ಹೊಂದೊನ್ ಆಸ್ತಾ. ಭುರ್ಗ್ಯಾಂಥಂಯ್ ಸುರ್ವಿಲ್ಯಾ ವರ್ಸಾ (ಏಕ್ ವರ್ಸ್ ಜಾತಾ ಮ್ಹಣಾಸರ್) ಕುಡಿಂತ್ ಜಾಲ್ಲೆ ತಿತ್ಲೆ ವೆಗಾನ್ ವಾಡಾವಳ್ ಉಪ್ರಾಂತ್ಲ್ಯಾ ವರ್ಸಾಂನಿ ಜಾಯ್ನಾ. ಪಯ್ಲ್ಯಾ ವರ್ಸಾ ಉಪ್ರಾಂತ್ ಭುರ್ಗ್ಯಾಂಚಿ ವಾಡಾವಳ್ ಉಣಿ ಜಾಯಿತ್ ಯೆತಾ ಆನಿ ತ್ಯಾ ಪ್ರಮಾಣೆ ತಾಂಚಿ ಭುಕ್‍ಯೀ ಉಣಿ ಜಾತಾ. ಹ್ಯಾ ವೆಳಾರ್ ಜಾಯಿತ್ತಿಂ ಭುರ್ಗಿಂ ಆಪ್ಲ್ಯಾ ವ್ಹಡಿಲಾಂನಿ ಒತ್ತಾಯೆನ್ ಖಾಂವ್ಕ್ ದಿಲ್ಲೆಂ ಖಾಂವ್ಕ್ ಆಯ್ಕಾನಾಂತ್, ತರೀ ಪುಣ್ ತಾಂಚೆ ಕುಡಿಚಿ ವಾಡಾವಳ್ ಕಸಲೆಯ್ ರಿತಿನ್ ಪಾಟಿಂ ಉರಾನಾ.

ಭುರ್ಗೆಂ ಸಾಮಾನ್ಯ್ ಜಾವ್ನ್ ಆಪ್ಲೆ ಕುಡಿಕ್ ಕಿತ್ಲೆಂ ಗರ್ಜ್ ತಿತ್ಲೆಂ ಮಾತ್ರ್ ಖಾಣ್ ಖಾಂವ್ಕ್ ಸಕ್ತಾ. ಏಕ್‍ಪಾವ್ಟಿಂ ಚಡ್ ಖಾಯ್ತ್ ತರ್ ಆನ್ಯೇಕ್ ಪಾವ್ತಿಂ ಭುರ್ಗ್ಯಾಕ್ ಭುಕ್ ಆಸಾನಾ. ಮದೆಂ ಮದೆಂ ಹೆರ್ ಖಾಣ್ ದೀತ್ ಆಸ್ಲ್ಯಾರ್ ವೆಳಾ ವೆಳಾರ್ ಜೇಂವ್ಕ್ ಭುರ್ಗ್ಯಾಂಕ್ ಸಾಧ್ಯ್ ಜಾಯ್ನಾ. ದಾಕ್ಲ್ಯಾಕ್ ಭುರ್ಗೆಂ ಸಕಾಳಿಂ ಉಟ್‍ಲ್ಲೆ ತಕ್ಷಣ್ ದೂದ್ ಪಿಯೆಲೆಂ ತರ್ ಉಪ್ರಾಂತ್ ನಾಶ್ಟೊ ಕರುಂಕ್ ಆಯ್ಕೊಂಚೆಂ ನಾ. ಭುರ್ಗ್ಯಾನ್ ನಾಶ್ಟೊ ಕರುಂಕ್ ನಾ ದೆಕುನ್ ಇಕ್ರಾ ವೊರಾರ್ ಆವಯ್ ಭುರ್ಗ್ಯಾಕ್ ಕಿತೆಂ ಹೆರ್ ಖಾಣ್ (ಬಿಸ್ಕುತ್ಯೊ, ಚೊಕ್ಲೆಟಾಂ ವಾ ಪಿಯೆಂವ್ಕ್ ಹೊರ್ಲಿಕ್ಸ್ ಕೊಂಪ್ಲಾನ್ ಕಿತೆಂಯ್) ದೀತ್. ದೊನ್ಪಾರಾಂ ಭುರ್ಗೆಂ ಜೇಂವ್ಕ್ ಆಯ್ಕಾನಾ! ತೀನ್ ವೊರಾರ್ ಆವಯ್ ಆನಿ ಕಿತೆಂ ದಿತಾ ಆನಿ ರಾತಿಂ ಭುರ್ಗೆಂ ಪರತ್ ಜೇಂವ್ಕ್ ಆಯ್ಕಾನಾ.

ಭುರ್ಗೆಂ ಜೆವಿನಾ ತರ್‍ಯಿ ಭುರ್ಗ್ಯಾಚಿ ವಾಡಾವಳ್ ಸಾರ್ಕಿ ಆಸ್ತಾ, ಭಲಾಯ್ಕಿ ಬರಿ ಆಸ್ತಾ! ಎಕಾವೆಳಾ ಭುರ್ಗ್ಯಾಕ್ ಗರ್ಜ್ ತೆಂ ಖಾಣ್ ಮೆಳೊಂಕ್ ನಾ ತರ್ ಹೆಂ ಸಾಧ್ಯ್‍ಚ್ ನಾ, ಭುರ್ಗೆಂ ಭಾಗೊನ್ ಆಸ್ತಾ. ಚಡ್ತಾವ್ ಪಾವ್ಟಿಂ ಭುರ್ಗೆಂ ಆಡ್ ಖಾಣ್ ಖಾತಾ ದೆಕುನ್ ಜೆವಿನಾ. ಭುರ್ಗ್ಯಾಚೆ ಕುಡಿಕ್ ಜಾಯ್ ತೆಂ ಖಾಣ್ ಜೆವ್ಣಾ ಭಾಯ್ರ್ ಮೆಳತ್ ತರ್ ಭುರ್ಗೆಂ ಕಿತ್ಯಾಕ್ ಜೆವಿತ್? ಭುಕ್ ಸಾರ್ಕಿ ನಾ ಮ್ಹಣ್ ದುರ್ಸೊಂಚ್ಯಾ ಜಾಯಿತ್ತ್ಯಾ ಆವಯಾಂನಿ ಭುರ್ಗ್ಯಾಂಕ್ ಮದೆಂ ಮದೆಂ ಆಡ್ ಖಾಣ್ ದಿಂವ್ಚೆಂ ಆಸ್ತಾ. ಆಡ್ ಖಾಣ್ ಆನಿ ಮದೆಂ ಖಾಣ್ ದಿಲ್ಲೆಂಚ್ ಭುರ್ಗ್ಯಾಂಚಿ ಭುಕ್ ಉಣಿ ಜಾಂವ್ಕ್ ಕಾರಣ್. ಆದಿಂ ಘರಾಂನಿ ಜಾಯಿತ್ತಿಂ ಭುರ್ಗಿಂ ಆಸ್ತಾಲಿಂ. ಭುರ್ಗ್ಯಾಂಕ್ ಖಾಂವ್ಕ್ ಆಡ್ ಖಾಣಾಂ ಮೆಳಾನಾತ್‍ಲ್ಲಿಂ, ದೆಕುನ್ ಭುರ್ಗಿಂ ಪೇಜ್-ಶಿತ್ ಬರ್ಯಾನ್ ಜೆವ್ತಾಲಿಂ. ರಾಂದ್ವಯ್, ಮಾಸ್ಳಿ ಮೆಳ್ಯಾರ್ ಆಶೆನ್ ಖಾತಾಲಿಂ. ಮಾಸ್ ಮೆಳ್ಚೆಂಚ್ ಅಪ್ರೂಪ್ ಆಸ್‍ಲ್ಲೆಂ. ಆತಾಂ ಭುರ್ಗಿಂ ಉಣಿಂ, ಖಾಣಾಂ ಚಡ್ ದೆಕುನ್ ಭುರ್ಗಿಂ ಶಿತ್-ರಾಂದ್ವಯ್ ಖಾಂವ್ಕ್ ಆಯ್ಕಾನಾಂತ್.

ಜಾಯಿತ್ತೆಪಾವ್ಟಿಂ ಭುಕ್ ಲಾಗಾನಾ ತರ್‍ಯಿ ಜೇಂವ್ಕ್-ಖಾಂವ್ಕ್ ಆವಯ್ ಒತ್ತಾಯ್ ಕರ್ತಾ ದೆಕುನ್ ಭುರ್ಗೆಂ ಆವಯ್ನ್ ವಾಡ್‍ಲ್ಲೆಂ/ದಿಲ್ಲೆಂ ಸಕ್ಕಡ್ ಖಾತಾಂ ಮ್ಹಣ್ ಘೆತ್ ಆನಿ ಖಾಂವ್ಕ್ ನೆಗಾರ್ ಕರಿತ್.

3. ಹ್ಯೊ ಥೊಡ್ಯೊ ಸಂಗ್ತಿ ಉಡಾಸ್ ದವರ್:

●   ಭುರ್ಗ್ಯಾಕ್ ಆಡ್ ಖಾಣಾಂ ದಿತಾಯ್ ತರ್ ಭುರ್ಗೆಂ ಜೆವಿನಾ ಮ್ಹಳ್ಳೆಂ ಉಡಾಸಾಂತ್ ಆಸೊಂ. ಜೆವ್ಣಾ ಮದೆಂ ಚೊಕ್ಲೆಟಾಂ ತಸಲಿಂ ಖಾಣಾಂ ದಿಲ್ಯಾರ್ ಪರತ್ ಜೇಂವ್ಕ್ ಒತ್ತಾಯ್ ಕರಿನಾಯೆ. ಜೆವ್ಣಾಚ್ಯಾ ಪಯ್ಲೆಂ ವ್ಹಡಾಂನಿಯಿ ಥೊಡಿಂ ಚೊಕ್ಲೆಟಾಂ ಖೆಲ್ಯಾರ್, ತಾಂಕಾಂ ಸಯ್ತ್ ಸದಾಂಚೆಪರಿಂ ಜೇಂವ್ಕ್ ಜಾಯ್ನಾ! ಭುರ್ಗೆಂ ಜೇಂವ್ಕ್ ಆಯ್ಕಾನಾ ತರ್ ಸೊಡ್ನ್ ಸೊಡ್, ಹೆರ್ ಕಿತೆಂಚ್ ದೀನಾಕಾ. ಥೊಡ್ಯಾ ವೆಳಾನ್ ಪೆÇಟ್ ಖಾಲಿ ಜಾತಾನಾ ಭುರ್ಗೆಂ ಜೇಂವ್ಕ್ ವಿಚಾರ್ತಾಚ್.

●   ಖಂಯ್ಚೆಂಯ್ ಖಾಣ್ ಭುರ್ಗ್ಯಾಕ್ ಬರೆಂ ದೆಕುನ್ ಒತ್ತಾಯೆನ್ ಚಡ್ ಖಾವಯ್ನಾಯೆ. ಭುರ್ಗ್ಯಾಂಕ್ ವ್ಹಡಾಂಪರಿಂಚ್ ವೆಗ್ಗಿಂ ಉಬ್ಗೊಣ್ ಯೆತಾ. ಖಾಣ್ ಥೊಡೆಂ ಥೊಡೆಂಚ್ ದೀಂವ್ಕ್ ಜಾಯ್. ಖಾಣಾಂ ವಿವಿಧ್ ಥರಾಚಿಂ ಆಸೊಂದಿತ್. ಥೊಡಿಂ ವ್ಹಡಿಲಾಂ ಭುರ್ಗ್ಯಾಕ್ ಬರೆಂ ದೆಕುನ್ ದಿಸಾಚ್ಯಾ ತಿನೀ ಪಾವ್ಟಿಂ ಗೋಂವ್ ನಾತ್ನೊ ದಿತಾತ್. ರುಚಿನ್ ರಾಂದ್‍ಲ್ಲೆಂ ಖಾಣ್ ತರ್‍ಯಿ ಪಾಟಾಪಾಟ್ ಖೆಲ್ಯಾರ್ ವ್ಹಡಾಂಕ್ ಸಯ್ತ್ ಉಬ್ಗೊಣ್ ಜಾತಾ. ಭುರ್ಗ್ಯಾಂಕ್‍ಯೀ ರುಚಿ ಆಸಾತ್, ಖಾಣ್-ಜೆವ್ಣಾಂತ್ ಆಶಾ ಆನಿ ಉಬ್ಗೊಣ್ ಜಾವ್ಯೆತಾ.

●   ಸಾಧ್ಯ್ ತಿತ್ಲೆಂ ಭುರ್ಗ್ಯಾಕ್ ಆಪ್ಲೆಂ ಖಾಣ್ ಖುದ್ ಖಾಂವ್ಕ್ ಶಿಕಯ್. 8-10 ಮಯ್ನೆ ಜಾತಾನಾ ಭುರ್ಗ್ಯಾಂಕ್ ಆಪ್ಲ್ಯಾ ಹಾತಾಂತ್ ಖಾಣ್ ಘೆವ್ನ್ ಖಾಂವ್ಕ್ ಸೊಡಿಜೆ. ಆಪ್ಲ್ಯಾ ಹಾತಾಂತ್ ಕಾಡ್ನ್ ಖಾತಾನಾ ಭುರ್ಗೆಂ ಶಿಂಪ್ಡಯ್ತಾ ಮ್ಹಣ್ ಭುರ್ಗ್ಯಾಕ್ ತೊಂಡಾಕ್ ಲಾಯ್ನಾಯೆ. ಜಾಯಿತ್ತಿಂ ವ್ಹಡಿಲಾಂ ಅಪ್ಲಿಂ ಭುರ್ಗಿಂ ಸಾತಾಟ್ ವರ್ಸಾಚಿಂ ಜಾತಾ ಪರ್ಯಾಂತ್ ತೊಂಡಾಕ್ ಲಾಂವ್ಚಿಂ ಆಸ್ತಾತ್. ತೊಂಡಾಕ್ ಲಾಂವ್ಚೆಂ, ಚಡ್ ಖಾಂವ್ಕ್ ಒತ್ತಾಯ್ ಕರ್ಚೆಂ ಭುರ್ಗ್ಯಾಂಚಿ ಭುಕ್ ಉಣಿ ಜಾಂವ್ಕ್ ಕಾರಣ್ ಜಾವ್ಯೆತಾ. ಭುರ್ಗೆಂ ಸ್ವತಾ ಜೆವ್ತಾನಾ ವಾ ಖಾಣ್ ಖಾತಾನಾ ಮಧೆಂ ಪಡಾನಾಕಾ.

●   ಘಟ್ ಖಾಣ್ ಖಾಂವ್ಕ್ ಸಕ್ಚ್ಯಾ ಭುರ್ಗ್ಯಾಕ್ ಜೆವ್ಣಾಚ್ಯಾ ಪಯ್ಲೆಂ ದೂದ್ ದೀನಾಯೆ. ದೂದ್ ಜೆವ್ಣಾ ಉಪ್ರಾಂತ್ ವಾ ದೋನ್ ಜೆವ್ಣಾಂಚ್ಯಾ ಮದೆಂ ದಿವ್ಯೆತ್. ದೂದ್, ಹೊರ್ಲಿಕ್ಸ್ ವಾ ಹೆರ್ ಕಿತೆಂಯ್ ಪಯ್ಲೆಂ ದೀವ್ನ್ ಉಪ್ರಾಂತ್ ಜೇವ್ ಮ್ಹಳ್ಯಾರ್ ಜೇಂವ್ಕ್ ಜಾಯ್ನಾ.

●   ಭುರ್ಗೆಂ ಸಾರ್ಕೆಂ ಜೆವಿನಾ, ಕಿತೆಂಯ್ ಖಾಯ್ನಾ ಮ್ಹಣ್ ಭುರ್ಗ್ಯಾಂಚ್ಯಾ ಮುಕಾರ್ ಆಯಿಲ್ಲ್ಯಾ ಗೆಲ್ಲ್ಯಾಂ ಕಡೆ ಗಜಾಲಿ ಕರ್ಚ್ಯೊ ನಾಕಾತ್. ವ್ಹಡಾಂಚೆಂ ಗುಮಾನ್ ಆಪ್ಣಾಥಂಯ್ ದವರುಂಕ್ ಆಪ್ಲ್ಯಾ ಖಾಣಾ-ಜೆವ್ಣಾಚಿ ಗಜಾಲ್ ಭುರ್ಗೆಂ ಏಕ್ ಸಾಧನ್ ಜಾವ್ನ್ ವಾಪರಿತ್.

-ಡೊ| ಎಡ್ವರ್ಡ್ ನಜ್ರೆತ್

(Originally published on June 06, 2012)

The post ಮ್ಹಜೊ ಭುರ್ಗೊ ಜೆವಿನಾ ದಾಕ್ತೆರಾ! appeared first on Budkulo.

ಆತಾತಾಂ ಮ್ಹಾಕಾ ಏಕ್ ನವಿ ಧೊಸ್ ಸುರು ಜಾಲ್ಯಾ. ಹಾಂವ್ ಅಸ್ಕತ್ ಜಾವ್ನ್ ಆಸಾಂ ಮ್ಹಣ್ ಭೊಗ್ತಾ ಮ್ಹಾಕಾ. ಸಕಾಳಿಂ ಉಟ್ತಾನಾ ತಕ್ಲಿ ಫಡ್ತಾ.  ಕಿತೆಂಗಿ ಪಿಡಾ ಆಸಾ ಮ್ಹಳ್ಳೆಪರಿಂ ಜಾತಾ. ಪುಣ್ ದಾಕ್ತೆರಾಲಾಗಿಂ ವಚೊಂಕ್ ಭ್ಯೆಂ ದಿಸ್ತಾ. ಮ್ಹಾಕಾ ಪಿಡಾ ಆಸೊಂಕ್ ಪುರೊಗಿ?

ಹಾಂವ್ ಮ್ಹಜ್ಯಾ ವ್ಹಡಿಲಾಂಕ್ ಎಕ್‍ಚ್ ಧುವ್. ಮಾಮ್ಮಿ ಮ್ಹಜಿ ಎಕಾ ದಫ್ತರಾಂತ್ ಕ್ಲೆರಿಕಲ್ ಕಾಮ್ ಕರ್ತಾ. ಪುಣ್ ಡ್ಯಾಡಿವಿಶಿಂ ಸಾಂಗೊಂಕ್ ಬೆಜಾರ್ ಜಾತಾ. ತೊ ಎಕೆ ಫ್ಯಾಕ್ಟರಿಂತ್ ಕಾಮ್ ಕರ್ತಾ. ಪುಣ್ ದುಡು ಪೂರಾ ಸೊರ್ಯಾಕ್ ವೊತ್ತಾ. ಲ್ಹಾನ್‍ಥಾವ್ನ್ ಮ್ಹಾಕಾ ತೊ ಕಶ್ಟೊನ್ ಆಸಾ. ಮ್ಹಾಕಾ ಪಳೆಲ್ಯಾರ್ ತಾಕಾ ಜಾಂವ್ಕ್‍ಚ್ ಜಾಯ್ನಾ. ತಾಕಾ ಚೆರ್ಕೊ ಭುರ್ಗೊ ಜಾಯ್ ಆಸ್‍ಲ್ಲೊ ಖಂಯ್. ಮ್ಹಜ್ಯಾ ಪಾಡ್ ನಶಿಬಾನ್ ಉಪ್ರಾಂತ್ ತಾಂಕಾಂ ಭುರ್ಗೆಂ ಜಲ್ಮೊಂಕ್ ನಾ. ಹಾಂವ್ ಘರಾಕ್ ಶಿರಾಪ್ ಖಂಯ್. ತ್ಯಾ ರಾಗಾನ್ ಮಾಮ್ಮಿ ಲಾಗಿಂಯ್ ತೊ ಝಗಡ್ತಾಲೊ. ಆತಾಂ ತೊ ಸಮಾ ಘರಾಯ್ ಯೇನಾ. ಆಯ್ಲ್ಯಾರಿ ಮ್ಹಜೆಲಾಗಿಂ ಉಲಯ್ನಾ. ಹಾಂವ್ ದೆದೆಸ್ಪರ್ ಜಾಲ್ಯಾಂ.

ಮ್ಹಜ್ಯಾ ಜಿವಿತಾಂತ್ ಹಾಂವ್ ಉಜ್ವಾಡ್ ಕಸೊ ದೆಕುಂ?

-ನಾಂವ್ ನಾಕಾ, ಮಂಗ್ಳುರ್

ತುಜೊ ಸಮಸ್ಸೊ ಒಕ್ತಾಂನಿ ವಾ ಹಾಂಗಾಸರ್ ಸಮ್ಜೊವ್ನ್ ಪರಿಹಾರ್ ಕರುಂಕ್ ಕಷ್ಟ್. ತುಂವೆಂ ವಾಡ್‍ಲ್ಲ್ಯಾ ಸಮಸ್ಸ್ಯಾತ್ಮಕ್ ಪರಿಸರಾಥಾವ್ನ್ ತುಜೆರ್ ಉಳ್ಟೊ ಪ್ರಭಾವ್ ಜಾಲಾಸೊ ದಿಸ್ತಾ. ತುಜೆಪ್ರಾಸ್ ಚಡ್ ಸಮಸ್ಸ್ಯಾಂನಿ ಆಸ್ಚ್ಯಾಂಕ್ ಬರಿಂ ಕರುಂಕ್ ಆತಾಂ ಸಾಧ್ಯ್ ಆಸಾ.  ಸಮಸ್ಸ್ಯಾಥಾವ್ನ್ ಪರಿಹಾರ್ ಜೊಡುಂಕ್ ತುಜೆಥಾವ್ನ್ ಥೊಡೆಂ ಪ್ರಯತ್ನ್ ಆನಿ ವಾಂವ್ಟ್ ಜಾಯ್ ಪಡ್ತಾ.

ಪಯ್ಲೆಂಚ್ಯಾ ಪಯ್ಲೆಂ ತುಕಾ ಸಮಸ್ಸೊ ಆಸಾ ಮ್ಹಣ್ ತುಂವೆಂ ಮಾನುನ್ ಘೆಂವ್ಕ್ ಜಾಯ್ ಆನಿ ಹೊ ಸಮಸ್ಸೊ ಪರಿಹಾರ್ ಕರ್ಚ್ಯೊ ವಾಟೊ ಸೊಧುಂಕ್ ಜಾಯ್. ತುಜ್ಯಾ ಸಮಸ್ಸ್ಯಾಕ್ ತುಜ್ಯಾ ಬಾಪಾಯ್ಚೆಂ ನೆಗಾರ್ಪಣ್‍ಚ್ ಕಾರಣ್ ಮ್ಹಣ್ ತುಕಾ ಭೊಗ್ತಾ ತಶೆಂ ತುಂವೆಂ ಬರಯ್ಲಾಂಯ್. ತೆಂ ಆಸುಂಕ್‍ಯಿ ಪುರೊ. ಪೂಣ್ ಆತಾಂ ತುಜ್ಯಾ ಬಾಪಾಯ್ಕ್ ಸಾರ್ಕೆ ವಾಟೆಕ್ ಹಾಡುಂಕ್ ಪ್ರಯತ್ನ್ ಕರ್ಚ್ಯಾಂತ್ ಫಾಯ್ದೊ ನಾ, ನಿಮಾಣೆಂ ತುಜೊ ಸಮಸ್ಸೊ ತಾಚೆಥಾವ್ನ್ ಪರಿಹಾರ್ ಜಾಯ್ನಾ.

ತುಜೆಕಡೆ ಉಲೊವ್ನ್ ತುಕಾ ಪರಿಹಾರಾಚಿ ವಾಟ್ ದಾಕೊಂವ್ಚ್ಯಾಕ್ ಕೌನ್ಸೆಲಿಂಗ್ ಮ್ಹಣ್ತಾತ್. ಮಂಗ್ಳುರಾಂತ್ ನಂತೂರ್ ಜಂಕ್ಶನಾಥಾವ್ನ್ ಹೈವೆಚೆರ್ ಪಂಪ್‍ವೆಲ್‍ಚೆ ವಾಟೆರ್ ದಾವ್ಯಾಕ್ ಬಜ್ಜೋಡಿಂತ್ ಮಂಗ್ಳುರ್ ದಿಯೆಸೆಜಿಚೊ ಪ್ಯಾಸ್ಟರಲ್ ಸೆಂಟರ್ ನಾಂವಾಚೊ ಸಂಸ್ಥೊ ಆಸಾ ಆನಿ ಥಂಯ್ ಕೌನ್ಸಿಲಿಂಗ್ ಕರ್ಚಿ ವೆವಸ್ಥಾ ಆಸಾ. ಸಾಧ್ಯ್ ಜಾತಾ ತರ್ ತುಜ್ಯಾ ಫಿರ್ಗಜ್ ಪಾದ್ರ್ಯಾಬಾಕಡೆ ವಾ ಒಳ್ಕಿಚ್ಯಾ ಸಿಸ್ಟರಾಂಕಡೆ ವಿಚಾರ್ನ್ ತಾಂಚೆ ಮುಕಾಂತ್ರ್ ಥಂಯ್ ವಚುನ್ ಕೌನ್ಸೆಲರಾಕ್ ಭೆಟ್. ತುಜ್ಯಾ ಸಮಸ್ಸ್ಯಾಕ್ ಪರಿಹಾರ್ ದಿಂವ್ಚ್ಯಾಂತ್ ತುಕಾ ಜೊಕ್ತಿ ಮಾಹೆತ್ ಥಂಯ್ ಮೆಳ್ತೆಲಿ.

ಹ್ಯಾ ಬರಾಬರ್ ದಾದ್ಲ್ಯಾಂಥಂಯ್ ತುಜೊ ಮನೋಭಾವ್ ಸಕಾರಾತ್ಮಕ್ ಆಸುಂಕ್ ಜಾಯ್. ಸಂಸಾರಾಂತ್ ಬೋವ್ ಆಪ್ರೂಪ್ ಥೊಡೆ ದಾದ್ಲೆ ಆನಿ ಥೊಡ್ಯೊ ಸ್ತ್ರಿಯೊ ತಾಂಕಾಂ ಆಸ್ಚ್ಯಾ ವ್ಯಕ್ತಿತ್ವಾಚ್ಯಾ ಸಮಸ್ಸ್ಯಾವರ್ವಿಂ ಹೆರಾಂಕ್, ಪ್ರತ್ಯೇಕ್ ಜಾವ್ನ್ ತಾಂಚೆ ತಾಬೆಂತ್ ಆನಿ ಸಾಂಗಾತಾ ಆಸ್ಚ್ಯಾಂಕ್ ಧೊಶಿ ದಿತಾತ್, ಸಮಸ್ಸೊ ಕರ್ತಾತ್, ಬರ್ಯಾನ್ ಉರೊಂಕ್ ಸೊಡಿನಾಂತ್. ತಾಂಕಾಂ ಸೊಡ್ಲ್ಯಾರ್ ಹೆರ್ ಚಡ್ತಾವ್ ದಾದ್ಲೆ ತಶೆಂ ಸ್ತ್ರಿಯೊ ಬರಿಂ ಆಸ್ತಾತ್. ತುಜ್ಯಾ ಬಾಪಾಯ್ಕ್ ಆಸ್ಚ್ಯಾ ಅಸಲ್ಯಾ ವ್ಯಕ್ತಿತ್ವಾಚ್ಯಾ ಸಮಸ್ಸ್ಯಾವರ್ವಿಂ ತುಕಾ ದಾದ್ಲ್ಯಾಂಚೆರ್ ಕಾಂಠಾಳೊ ಯೇಂವ್ಕ್ ಕಾರಣ್ ಜಾಲೊ ತಶೆಂ ಭೊಗ್ತಾ. ತುಜ್ಯಾ ಬಾಪಾಯ್‍ಪರಿಂ ಆಸ್ಚೆ ದಾದ್ಲೆ ಬೋವ್ ಅಪ್ರೂಪ್. ತುಂವೆಂ ತುಜ್ಯಾಚ್ ಸೆಜಾರಾ ಆನಿ ಕುಟ್ಮಾಂತ್ ಹೆರಾಂಚ್ಯಾ ಘರಾಂನಿ ಬರ್ಯಾ ಮನ್ಶಾಂಕ್ ಖಂಡಿತ್ ಪಳೆಲಾಂಯ್. ಫುಡಾರಾಚೆ ವಾಟೆರ್ ತುಕಾ ಅಸಲೊಚ್ ಬರೊ ದಾದ್ಲೊ ಜಿಣ್ಯೆ ಸಾಂಗಾತಿ ಜಾವ್ನ್ ಮೆಳುಂಕ್ ಆಸಾ. ತ್ಯಾ ಪಾಸತ್ ಸಂಸಾರಾಂತ್ ದಾದ್ಲೆ ಸಕ್ಕಡ್ ತುಜ್ಯಾ ಬಾಪಾಯ್‍ಪರಿಂ ಮ್ಹಳ್ಳೆಂ ತುಜೆಂ ಚಿಂತಪ್ ಬದ್ಲೊಂಕ್ ಪಳೆ. ತುಜ್ಯಾ ಬಾಪಾಯ್ಕ್ ಕಿತೆಂ ಸಮಸ್ಸೊ ಆಸಾ, ತಶೆಂ ಸಮಸ್ಸೊ ಆಸ್ಚೆ ದಾದ್ಲೆ ಬೋವ್ ಉಣೆಂ – ಅಶೆಂ ತವಳ್ ತವಳ್ ತುಕಾಚ್ ಸಮ್ಜಯ್ ಆನಿ ದಾದ್ಲ್ಯಾಂಚೆರ್ ತುಕಾ ಆಸ್ಚೊ ಮನೋಭಾವ್ ಬದ್ಲಿ.

ಸಾಧ್ಯ್ ಜಾತಾ ತರ್ ಘರಾಥಾವ್ನ್ ಭಾಯ್ರ್ ಖಂಯ್ ಆಸ್ಲ್ಯಾರ್, ತುಜೆಚ್ ಪ್ರಾಯೆಚ್ಯಾ ಚಲಿಯಾಂ ಸಾಂಗಾತಾ ಭರ್ಸಲ್ಯಾರ್ ತುಜೊ ಮನೋಭಾವ್ ಬದ್ಲೊಂಕ್ ಸಾಧ್ಯ್ ಆಸಾ. ಅವ್ಕಾಸ್ ಮೆಳತ್ ತರ್ ಮಾದ್ರಿಂಚ್ಯಾ ಹೊಸ್ಟೆಲಾಂತ್ ವಾ ಪೇಯಿಂಗ್ ಗೆಸ್ಟ್ ಜಾವ್ನ್ ರಾವುನ್ ಖಂಯ್ ಭಾಯ್ರ್ ಕಾಮ್ ಕರ್ಶಿ ತರ್ ಬರೆಂ. ನಾ ತರ್ ಘರಾ ರಾವೊನ್‍ಚ್ ಭಾಯ್ರ್ ಕಾಮಾಕ್ ಪ್ರಯತನ್ ಕರ್. ಖಂಚೆಂಯ್ ಲ್ಹಾನ್ ವ್ಹಡ್ ಕಾಮ್-ದಫ್ತರಾಂತ್ ಸಹಾಯಕ್ ಜಾವ್ನ್ ವಾ ದುಕಾನಾಂನಿ ಸೇಲ್ಸಾಚ್ಯಾ ಕಾಮಾಚೆ ಅವ್ಕಾಸ್ ಮಂಗ್ಳುರ್ ಶ್ಹೆರಾಂತ್ ಜಾಯಿತ್ತೆ ಆಸಾತ್. ಹೆರಾಂ ಸಾಂಗಾತಾ ಭರ್ಸೊನ್ ಆಸ್ಲ್ಯಾರ್, ಹೆರ್ ಚಲಿಯೊ ದಾದ್ಲ್ಯಾಂಕ್ ಕಶೆಂಲೆಕ್ತಾತ್, ತಾಂಚೆಥಂಯ್ ಚಲಿಯಾಂಚೊ ಜೆರಾಲ್ ಮನೋಭಾವ್ ಕಸೊ ಮ್ಹಣ್ ತುಕಾ ಸಮ್ಜತಲೆಂ ಆನಿ ಹೆಂ ತುಜಿ ಚೂಕ್ ಅಭಿಪ್ರಾಯ್ ಸಾರ್ಕಿ ಕರುಂಕ್ ಆಧಾರ್ ಜಾಯ್ತ್.

-ಡೊ| ಎಡ್ವರ್ಡ್ ನಜ್ರೆತ್

(Originally published on June 06, 2012)

The post ಮ್ಹಾಕಾ ಪಿಡಾ ಆಸೊಂಕ್ ಪುರೊಗಿ? appeared first on Budkulo.

ಹಾಂವ್ ಬರ್ಯಾ ಹುದ್ದ್ಯಾರ್ ಕಾಮ್ ಕರ್ತಾಂ. ಮ್ಹಜಿ ಪತಿಣ್ ಆನಿ ದೊಗಾಂ ಭುರ್ಗಿಂ ಮ್ಹಜ್ಯಾ ಪಪ್ಪಾ ಮಮ್ಮಿ ಸವೆಂ ಘರಾಂತ್ ಆಸಾತ್. ಶ್ಹೆರಾ ಥಾವ್ನ್ ತಿಕ್ಕೆಶೆ ಪಯ್ಸ್ ಆಸ್ಚ್ಯಾ ಆಮ್ಚ್ಯಾ ಜಾಗ್ಯಾಂತ್ ಪಯ್ಲೆಂ ಸಾಗೊಳಿ ಕರ್ತೆಲ್ಯಾಂವ್. ಮ್ಹಜ್ಯಾ ಪಪ್ಪಾ ಮಮ್ಮಿಕ್ ಪ್ರಾಯ್ ಜಾವ್ನ್ ಆಯ್ಲಿ. ತಾಂಕಾಂ ತೊ ಜಾಗೊ ಸೊಡುಂಕ್ ಮನ್ ನಾ. ಮ್ಹಜಿ ಬಾಯ್ಲ್ ಶ್ಹೆರಾಕ್ ಶಿಫ್ಟ್ ಜಾವ್ನ್ ಫ್ಲೆಟಾಂತ್ ಜಿಯೆವ್ಯಾಂ ಮ್ಹಣ್ ಒತ್ತಾಯ್ ಕರ್ತಾ. ಪಪ್ಪಾ ಮಮ್ಮಿಚಾ ಖುಶೆ ವಿರೋಧ್ ವಚೊಂಕ್ ಮ್ಹಾಕಾ ಮನ್ ನಾ. ತಾಂಕಾಂ ತೊಟಾಂತ್, ಘರಾಂತ್ ಕಾಮ್ ಕರ್ನ್‍ಚ್ ಆಸೊಂಕ್ ಜಾಯ್. ಘರ್ ಆನಿ ಜಾಗೊ ತಾಂಚೊ ಪ್ರಾಣ್. ಫ್ಲೆಟಾಂತ್ ಸಗ್ಳೊ ದೀಸ್ ಘರಾಂತ್‍ಚ್ ಬಸಾಜೆ, ಚಲೊಂಕ್, ವಾರೆಂ ಸೆಂವ್ಕ್ ಆವ್ಕಾಸ್ ಜಾಯ್ನಾ ಮ್ಹಣ್ ತಿಂ ಸಾಂಗ್ತಾತ್. ಮ್ಹಾಕಾಯ್ ಫ್ಲೆಟಾಂತ್ ರಾಂವೊಂಕ್ ಕಂಜೆಸ್ಟೆಡ್ ಮ್ಹಣ್ ಭೊಗ್ಚೆಂ ಆಸಾ. ಜಾಗ್ಯಾಕ್ ಬರೆ ಗಿರಾಯ್ಕಿ ಆಸಾತ್, ಮ್ಹಜಿಂ ಭಾಂವ್ಡಾಂ ಜಾಗೊ ವಿಕುಂಕ್ ಒಪ್ಲ್ಯಾಂತ್. ಪಪ್ಪಾ ಮಮ್ಮಿಕ್ ಪಳೆತಾನಾ ಹೊ ಜಾಗೊ ವಿಕುಂಕ್ ಮನ್ ವೊಡಿನಾ. ಬಾಯ್ಲ್ ಫ್ಲೆಟಾಕ್ ವೆಚೆಂಚ್ ಬರೆಂ ಮ್ಹಣ್ ಹಟ್ ಕರ್ತಾ. ಕೃಷಿ ಕರುಂಕ್ ಆಮ್ಕಾಂ ಸಾಧ್ಯ್ ಜಾತೆ ನಾ. ಕಾಮಾಚೆ ಸಾರ್ಕೆಂ ಪಳೆನಾಂತ್. ಆಮ್ಕಾಂ ಪೇಂಟ್ ಆನಿ ಇಗರ್ಜೆಚೆಂ ಇಸ್ಕೊಲ್ ತಿಕ್ಕೆ ಪಯ್ಸ್ ಜಾತಾ. ಜಾಗೊ ವಿಕ್ಚೆಂ ನಾಕಾಚ್, ಕಷ್ಟ್ ಜಾಲ್ಯಾರೀ ಹಾಂಗಾಚ್ ವಿಶಾಲ್ ಜಾಗ್ಯಾಂತ್ ರಾವ್ಯಾಂ ಮ್ಹಣ್ ಪಪ್ಪ ಮಮ್ಮಿ ಸಾಂಗ್ತಾತ್. ತಾಂಚಿ ಭಲಾಯ್ಕಿ ಆನಿ ಪ್ರಾಯ್ ಪಳೆತಾನಾ ಹಾಂಗಾ ದೀಸ್ ಕಾಡ್ಚೆ ಕಷ್ಟಾಂಚೆ ತಶೆಂ ದಿಸ್ತಾತ್, ಫ್ಲೆಟಾಂತ್ ರಾವಯ್ಲ್ಯಾರ್‍ಚ್ ಬರೆಂ ಮ್ಹಣ್ ಮ್ಹಾಕಾ ಆನಿ ಬಾಯ್ಲೆಕ್ ಭೊಗ್ತಾ. ಒತ್ತಾಯೆನ್ ಜಾಗೊ ವಿಕುನ್ ಫ್ಲೆಟಾಂತ್ ರಾವ್ಲ್ಯಾರ್ ತಾಂಚೆ ಮತಿಚೆರ್ ವಾಯ್ಟ್ ಪ್ರಭಾವ್ ಘಾಲುನ್ ತಾಂಚಿ ಭಲಾಯ್ಕಿ ಆನಿಕೀ ಪಾಡ್ ಜಾವ್ನ್ ನಾಕಾ ಜಾಲ್ಲೆ ಸಮಸ್ಸೆ ಆನಿ ತೊಂದ್ರೆ ಜಾತಿತ್‍ಗೀ ಮ್ಹಣ್ ಮ್ಹಾಕಾ ಭೊಗ್ಚೆಂ ಆಸಾ. ಪಪ್ಪಕ್ 62 ವರ್ಸಾಂ, ಮಮ್ಮಿಕ್ 58 ವರ್ಸಾಂ ಪ್ರಾಯ್ ಜಾಲಿ. ಪಪ್ಪಾಕ್ ಡಯಾಬಿಟಿಸ್ ಆಸಾ. ಮಮ್ಮಿಚಿ ಭಲಾಯ್ಕಿ ಬರಿ ಆಸಾ, ಪುಣ್ ತಿಕಾ ಸಗ್ಳೊ ದೀಸ್ ಕಾಮ್ ಕರ್ನ್‍ಚ್ ರಾವಾಜೆ. ವೊಗೆ ಬಸಾನಾ. ಫ್ಲೆಟಾಂತ್ ಬಾಂಧುನ್ ಘಾಲ್ಲೆಬರಿಂ ಜಾವ್ನ್ ಮತಿಂತ್ ಟೆನ್ಶನ್ ಕರ್ನ್ ಪಿಡಾ ಸುರು ಜಾಲ್ಯಾರ್ ಆಸ್‍ಲ್ಲೆಂ ಸಮಾಧಾನ್ ಹೊಗ್ಡಾಯ್ಜೆ ಪಡಾತ್ ಕೊಣ್ಣಾ ಮ್ಹಣೊನೀ ಹಾಂವೆಂ ಚಿಂತ್ಚೆಂ ಆಸಾ. ತಾಂಚ್ಯಾ ಭಲಾಯ್ಕೆವಿಶಿಂ ಆಮ್ಕಾಂ ಭುರ್ಗ್ಯಾಂಕ್ ಮಸ್ತ್ ಜತನ್ ಆಸಾ. ದೆಕುನ್ ತ್ಯಾ ವಿಶಿಂ ತುಮಿ ಮಾರ್ಗದರ್ಶನ್ ದಿಲ್ಯಾರ್ ಆಮಿ ಬರೊ ನಿರ್ಧಾರ್ ಘೆವ್ಯೆತ್ ಮ್ಹಳ್ಳೊ ಭರ್ವಸೊ ಆಮ್ಕಾಂ ಆಸಾ. ತುಮ್ಚೊ ಭಲಾಯ್ಕೆಚೊ ಬೂಕ್ ವಾಚುನ್ ಬರೆಂ ಮಾರ್ಗದರ್ಶನ್ ಮೆಳ್ಳಾಂ. ತಶೆಂಚ್ ಅಸಲ್ಯಾ ಸಂಗ್ತಿಂನಿ ನಿರ್ಧಾರ್ ಘೆಂವ್ಕ್ ಇತ್ಲೆಂ ಚಿಂತುಂಕ್‍ಯೀ ಆವ್ಕಾಸ್ ಜಾಲೊ. ತುಮ್ಕಾಂ ದೇವ್ ಬರೆಂ ಕರುಂ.

-ಎಫ್.ಎಲ್., ಉಡುಪಿ

ತುಜ್ಯಾ ಪಾಪ್ಪಾ ಆನಿ ಮಾಮ್ಮಿನ್ ಆತಾಂ ಶೆತಾಂ-ಭಾಟಾಂನಿ ಘೊಳ್ಚೆಂ/ಕಾಮ್ ಕರ್ಚೆಂ ತಾಂಚೆ ದೀಸ್ ಪಾಶಾರ್ ಕರುಂಕ್ ಶಿವಾಯ್ ತಾಂಕಾಂ ವಾ ತುಮ್ಕಾಂ ಭುರ್ಗ್ಯಾಂಕ್ ಮಾಲ್ಘಡ್ಯಾಂನಿ ಘೊಳುನ್ ಜೊಡಿಜೆ ತಸಲಿ ಆರ್ಥಿಕ್ ಒತ್ತಾಯ್ ನಾ ಮ್ಹಣ್ ಮ್ಹಾಕಾ ಭೊಗ್ತಾ. ತುಮ್ಚಿಂ ವ್ಹಡಿಲಾಂ ತಾಂಣಿಂ ಪೆÇಸುನ್, ಘಾಮ್ ಕಾಡ್ನ್ ವ್ಹಯ್ ಕೆಲ್ಲೆ ಸುವಾತೆರ್‍ಚ್ ಆನಿ ಥೊಡಿಂ ವರ್ಸಾಂ ರಾವುಂಕ್ ಆಶೆತಾತ್ ತೆಂ ವಾಜ್ಬಿ.  ಜೆರಾಲ್ ಥರಾನ್ ತಾಂಚೆ ಆತಾಂಚೆ ಪ್ರಾಯೆಚೆರ್ ತಾಂಕಾಂ ತಾಂಚ್ಯಾ ಸುತ್ತುರಾಂತ್ಲೆಂ ನಿಕ್ಳಾಂವ್ಚೆಂ ಸಾಂಗ್‍ಲ್ಲೆಂ ನ್ಹಯ್. ತಾಂಚ್ಯಾ ಕುಡಿಚ್ಯಾ ಆನಿ ಮತಿಚ್ಯಾ ಭಲಾಯ್ಕೆಕ್ ತಾಂಣಿಂ ಆತಾಂ ಆಸ್ಚೆಕಡೆಚ್ ಉರ್ಚೆಂ ಬರೆಂ. ಶೆರಾಂಕ್ ಫ್ಲೆಟಾಂನಿ ಕಿತ್ಲಿ ಬರಿ ಸವ್ಲತಾಯ್ ದಿಲ್ಯಾರ್‍ಯಿ ನಾಡಾಂತ್ ಘೊಳುನ್, ಕಾಮ್ ಕರ್ನ್, ಸೆಜಾರಾ ಭೊವುಂನ್ ಆಸ್‍ಲ್ಲ್ಯಾಂಕ್ ಶೆರಾಂತ್ಲೆಂ ಜಿವಿತ್ ಜಯ್ಲಾ ಪ್ರಾಸ್ ಫಾಸ್ಟ್ ಜಾತಾ. ಕುಡಿಚೆ ಭಲಾಯ್ಕೆ ಪ್ರಾಸ್ ಮತಿಚಿ ಭಲಾಯ್ಕಿ ವೆಗ್ಗಿಂ ಭಿಗಡ್ತಾ.

ತ್ಯಾ ಪಾಸತ್ ತುಜ್ಯಾ ಪಾಪ್ಪಾ ಆನಿ ಮಾಮ್ಮಿಕ್ ಕಿತ್ಲೆ ದೀಸ್ ಘೊಳೊಂಕ್ ಜಾತಾ, ಕಿತ್ಲಿ ಸುವಾತ್ ಕೃಷಿ ಕರುಂಕ್ ಜಾತಾ, ಕಶಿ ಕೃಷಿ ಕರುಂಕ್ ಜಾತಾ ತಶೆಂ ಕರುಂದಿತ್. ಆಳಾಂ ಮೆಳಾನಾಂತ್, ಕೃಷೆಚ್ಯಾ ಕಾಮಾಕ್ ಜಣ್ ಮೆಳಾನಾಂತ್, ಕೃಷೆಂತ್ ಜೊಡ್‍ಲ್ಲೆಂ ಆಳಾಂಚಿ ಮಜೂರಿ ದೀಂವ್ಕ್‍ಯಿ ಪಾವಾನಾ ಹೆಂ ಸಕ್ಕಡ್ ವಾಸ್ತವೀಕ್, ಆಮಿ ತೆಂ ಬದ್ಲುಂಕ್ ಜಾಯ್ನಾಂ. ಅಸಲೆ ಎಕೆ ಪರಿಗತೆಂತ್ ಕಶೆಂ ಜಾತಾ ತಶೆಂ ತಿಂ ದೀಸ್ ಸಾರುಂದಿತ್. ಘೊಳ್‍ಲ್ಲ್ಯಾಂತ್ಲೆಂ ಪಾವಾನಾ ತರ್ ಪುಂಜಾಯಿಲ್ಲ್ಯಾಂತ್ಲೆಂ ಕಾಡ್ನ್ ಆಳಾಂಕ್ ದೀಂವ್ದಿತ್. ತ್ಯಾ ಗಾದೆ-ಭಾಟಾಂಚ್ಯಾ ಕಾಮಾಂತ್ ಆಸ್ಚೆಂ ಟೆನ್ಶನ್ ಆನಿ ತೆಂ ಟೆನ್ಶನ್ ಪರಿಯಾರ್ ಕರ್ಚೆಂಚ್ ತಾಂಕಾಂ ಖುಶಿ. ತಾಂತುಂಚ್ ತಾಂಚೊ ಸಗ್ಳೊ ದೀಸ್ ಪಾಶಾರ್ ಜಾತಾ. ತಾಂಕಾಂ ಉರ್‍ಲ್ಲ್ಯಾ ಗಜಾಲೆಂಚಿ ತಕ್ಲೆಫಡಾಪಡ್ ನಾ. ಶೆರಾಂತ್ ಫ್ಲ್ಯಾಟಾಂನಿ ಹಾಡ್ನ್ ದವರ್ಲ್ಯಾರ್, ಕರುಂಕ್ ಕಾಮ್, ಚಿಂತುಂಕ್ ವಿಶಯ್, ಗಜಾಲ್ಯೊ ಕರುಂಕ್ ಜಣ್ ಆನಿ ಪರಿಯಾರ್ ಕರುಂಕ್ ಸಮಸ್ಸೊ ನಾಂತ್ ತರ್ ತಾಂಚೆ ದೀಸ್ ಪಾಶಾರ್ ಜಾಯ್ನಾಂತ್.  ಸುಸ್ತಿ ಮತಿವರ್ವಿಂ ಭಲಾಯ್ಕಿ ಅವ್ಯವಸ್ತ್ ಜಾತಾ.

ತುಜಿ ಮಾಂಯ್ ಕಾಮ್ ಕರ್ನ್‍ಂಚ್ ಆಸ್‍ಲ್ಲಿ, ಆತಾಂ ರಿಟಾಯರ್ಡ್ ಜಾ ಮ್ಹಳ್ಯಾರ್ ಆಯ್ಕುಂಚಿ ನಾ. ತಿಣೆಂ ತುಮಿ ಸಾಂಗ್ತಾತ್ ತ್ಯಾ ಖಾತಿರ್ ರಿಟಾಯರ್ಡ್ ಜಾಂವ್ಚೆಂಯಿ ನಾಕಾ. ಥೊಡ್ಯಾ ವರ್ಸಾಂನಿ ತುಜ್ಯಾ ವ್ಹಡಿಲಾಂಚಿ ಪ್ರಾಯ್ ಚಡತ್ತ್ ಯೆತಾನಾ ತಾಂಕಾಂ ಕಾಮ್ ಕರುಂಕ್ ತ್ರಾಸ್ ಜಾತೆಲೆ. ಘೊಳ್ಚಿ ಸುವಾತ್ ಉಣಿ ಕರುಂದಿತ್. ಘರಾ ರಾವುನ್ ಕುಮೊಕ್ ಕರುಂಕ್ ಕೋಣ್ ಜಣ್ ಮೆಳ್ತಾತ್ ತರ್ ಪ್ರಯತ್ನ್ ಕರಾ. ಪುಣ್ ತಾಂಣಿಂಚ್ ವಿಚಾರ್‍ಲ್ಲೆ ಶಿವಾಯ್ ತಾಂಕಾಂ ಶ್ಹೆರಾಕ್ ಹಾಡಿನಾಕಾತ್. ಶ್ಹೆರಾಂತ್ ಫ್ಲೆಟಾಂನಿ ರಾಂವ್ಚಿ ವಿಂಚವ್ಣ್ ತಿಂ ಕರುಂದಿತ್. ಸುರ್ವಾತೆರ್ ಥೊಡೆ ದೀಸ್ ಯೇವ್ನ್ ರಾವುಂದಿತ್. ಬರೆಂ ಜಾತಾ ತರ್, ಉಪ್ರಾಂತ್ ನಾಡಾಂತ್ಲೊ ಘರ್‍ಜಾಗೊ ವಿಕುಂಕ್ ಪಳೆಯಾ.

ನಾಡಾಂತ್ ರಾವುನ್ ತುಮ್ಚೆಪರಿಂ ಶೆರಾಂತ್ ವಾ ಪೆಂಟೆಸಾಲಿಂನಿ ಕಾಮಾಕ್ ಯೆತೆಲ್ಯಾ ಜಾಯಿತ್ತ್ಯಾಂಕ್ ಶೆರಾಂನಿಂಚ್ ಫ್ಲ್ಯಾಟ್ ಕರ್ನ್ ರಾವ್ಯಾಂ ಮ್ಹಣ್ ಭೊಗ್ಚೆಂ ಆಸಾ. ನಾಡಾಂತ್ಲೆ ಸಮಸ್ಸೆ, ಶೆರಾಂತ್ಲ್ಯೊ ಸವ್ಲಾತ್ಯೊ, ಭುರ್ಗ್ಯಾಂಚೊ ಪುಢಾರ್ ಅಸಲ್ಯಾ ಕಾಂಯ್ ಗಜಾಲಿಂ ಖಾತಿರ್ ಆತಾಂಚೆಂ ತರ್ನೆಂ ಜನಾಂಗ್-ತುಜ್ಯಾ ಹೊಕ್ಲೆಪರಿಂ ಶೆರಾಂತ್ ಫ್ಲೆಟ್ ಘೆಂವ್ಕ್ ಆಪೇಕ್ಷಿತಾ. ಹೆಂಯ್ ರಾಜಾಂವಿಕ್.

ತುಮ್ಕಾಂ ಸಾಧ್ಯ್ ಆಸಾ, ಆರ್ಥಿಕ್ ಪರಿಗತ್ ಪೂರಕ್ ಆಸಾ ತರ್, ತುಮಿ ಶ್ಹೆರಾಂತ್ ತುಮ್ಕಾಂ ಏಕ್ ಫ್ಲೆಟ್ ಘೆವ್ಯೆತ್ ಆನಿ ಶೆರಾಂತ್ ರಾವ್ಯೆತಾ. ಪಾಪ್ಪಾ ಮಾಮ್ಮಿಕ್ ನಾಡಾಂತ್ ಸೊಡ್ನ್ ತುವೆಂ ಶ್ಹೆರಾಂತ್ ರಾಂವ್ಚೆಂ ಪಳೆತೆಲ್ಯಾಂಕ್ ಬರೆಂ ದಿಸ್ಚೆಂ ನಾ, ಪೂಣ್ ತುಮ್ಚ್ಯಾ ಪರಿಗತೆಂತ್ ತೆಂ ಅನಿವಾರ್ಯ್ ತಶೆಂ ದಿಸ್ತಾ. ಶೆರಾಂತ್ ರಾವ್ಲ್ಯಾರ್‍ಯಿ ತವಳ್ ತವಳ್ ಆನಿ ಪುರ್ಸತ್ ಜಾತಾನಾ ತುಮಿ ನಾಡಾಂತ್     ಪಾಪ್ಪಾ-ಮಾಮ್ಮಿಕ್ ಪಳೆಂವ್ಕ್, ತಾಂಚೆ ಸಾಂಗಾತಾ ಥೊಡೆ       ದೀಸ್ ರಾವುಂಕ್ ವಚ್ಯೆತಾ. ಪಾಪ್ಪಾ ಆನಿ ಮಾಮ್ಮಿ ಖಾತಿರ್ ತುಂ ನಾಡಾಂತ್ ರಾವ್ಲ್ಯಾರ್ ತುಜ್ಯಾ ಹೊಕ್ಲೆಕ್ ಚಡ್ ಕಾಳ್ ಪಸಂದ್ ಜಾಂವ್ಚೆಂ ನಾ. ಭುರ್ಗ್ಯಾಂಚ್ಯಾ ಶಿಕ್ಪಾಚೆ ದಿಶ್ಟೆನ್‍ಯಿ ಶೆರಾಂತ್ ರಾಂವ್ಚಿ ವಿಂಚವ್ಣ್ ಬರಿಚ್. ನಾಡಾಂತ್ ಬರೆಂ ಶಿಕಪ್ ಮೆಳಾನಾ ಮ್ಹಣ್ ನ್ಹಯ್. ಪೂಣ್ ಫಾಲ್ಯಾಂ ಭುರ್ಗ್ಯಾಂಚೆಂ ಶಿಕಪ್ ಬರೆಂ ಜಾಯ್ನಾಸ್ತಾಂ ತಿಂ ಬರ್ಯಾ ವಾ ತುಮಿ ಅಪೇಕ್ಷಿಲ್ಲ್ಯಾ ಪಾಂವ್ಡ್ಯಾಕ್ ಪಾವಾನಾತ್ಲ್ಯಾರ್ ನಾಡಾಂತ್ಲ್ಯಾ ಶಿಕ್ಪಾಕ್ ಆನಿ ಸಮಸ್ಸ್ಯಾಂಕ್ ಧರ್ನ್ ತುಕಾಚ್ ತುಜ್ಯಾ ಬಾಯ್ಲೆ-ಭುರ್ಗ್ಯಾಂನಿ ಕಾರಣ್ ಕರ್ಚಿ ಸಾಧ್ಯತಾಯ್ ಆಸಾ, ತುಕಾಯ್ ತಶೆಂ ಭೊಗುಂಕ್ ಪುರೊ.

ತುಜೊ ಹೊ ಸಮಸ್ಸೊ ಹಾಂವೆಂ ಹಾಂಗಾ ಬರಯಿಲ್ಲ್ಯಾ ತಿತ್ಲ್ಯಾ ಸುಸೂತ್ರಾಯೇನ್ ಪರಿಯಾರ್ ಜಾಯ್ತ್ ಮ್ಹಣುಂಕ್ ಜಾಯ್ನಾ. ತುವೆಂ ತುಜ್ಯಾ ಹೆರ್ ಭಾಂವ್ಡಾಂಕಡೆಯಿ ಹೆವಿಶಿಂ ಉಲೊವ್ನ್, ತುಜ್ಯಾ ವ್ಹಡಿಲಾಂಚೆಂ ಆನಿ ತುಜ್ಯಾ ಕುಟ್ಮಾಚೆಂ ಬರೆಂಪಣ್ ಮತಿಂತ್ ಘೆವ್ನ್ ಜೊಕ್ತಿ ವಾಟ್ ವಿಂಚ್ಯೆತಾ.

-ಡೊ| ಎಡ್ವರ್ಡ್ ನಜ್ರೆತ್

(Originally published on March 09, 2012)

The post ಶ್ಹೆರಾಂತ್ಲ್ಯಾ ಫ್ಲೆಟಾಕ್ ಶಿಫ್ಟ್ ಜಾಂವ್? appeared first on Budkulo.

ಹ್ಯಾ ವರ್ವಿಂ ಮ್ಹಜಿಂ ವ್ಹಡಿಲಾಂ ಮಸ್ತ್ ದೂಕ್ ಭೊಗ್ತೇ ಆಸಾತ್. ಮ್ಹಾಕಾಯೀ ಕಾಜಾರ್ ನಾಕಾಚ್ ಮ್ಹಣ್ ಭೊಗ್ಲಾಂ. ಸಕ್ಕಡೀ ಮ್ಹಜೆ ಬರೆ ಸಗ್ಳೆ ವಿಶಯ್ ಗುಮಾನಾಕ್ ಧರಿನಾಂತ್. ಹಾಂವ್ ಗಲ್ಫಾಂತ್ ಬರ್ಯಾ ಜೊಡಿರ್ ಆಸಾಂ. ತರೀ ಮ್ಹಾಕಾ ಪಳೆಂವ್ಕ್ ಆಯಿಲ್ಲೆ ಕಿತೆಂಗೀ ಮನ್ಜಾತಿಕ್ ಪಳೆಲ್ಲೆಪರಿಂ ತೋಂಡ್ ಗುಂಡಾಯ್ತಾತ್. ಪಯ್ಲೆಂ ಪಯ್ಲೆಂ ಮ್ಹಾಕಾ ಮೊಸ್ತು ಬೆಜಾರ್ ಜಾಲ್ಲೆಂ, ರಡೊನ್ ಬಸ್ತಾಲಿಂ. ಉಪ್ರಾಂತ್ ತೆಂ ಸವಯ್ ಜಾಲೆಂ.

ಆತಾಂ ಮ್ಹಜೆಂ ಸವಾಲ್, ಕೊಣೆಂಯ್ ಸೈರಿಕ್ ಪಳೆತಾನಾ ಭಾಯ್ಲ್ಯಾ ನದ್ರೆನ್‍ಚ್ ಪಾರ್ಕುನ್ ಚೆಡುಂ ಯಾ ಚೆಡ್ಯಾಕ್ ಜಡ್ಜ್ ಕರುಂಕ್ ಜಾತಾಗಿ? ತಶೆಂ ಕರ್ಚೆಂ ಸಮಾಗಿ? ಮ್ಹಾಕಾ ಮ್ಹಜಿಂ ಕುಟ್ಮಾಚಿಂ, ಸೈರಿಂ ಆನಿ ಕೊಲೀಗ್ಸ್, ಫ್ರೆಂಡ್ಸ್ ಲೈಕ್ ಕರ್ತಾತ್, ಮ್ಹಜ್ಯಾ ಬರ್ಯಾ ಗುಣಾಂಕ್ ಆನಿ ಸವಯೆಂಕ್ ಲಾಗೊನ್. ಆತಾತಾಂ ಮ್ಹಜೆರ್‍ಚ್ ಮ್ಹಾಕಾ ದುಬಾವ್, ಅಪಧಯ್ರ್ ಉಬ್ಜೊಂಕ್ ಸುರು ಜಾಲಾಂ.

ಮ್ಹಾಕಾ ಕ್ರಿಸ್ತಾಂಚ್ ಚಲೆ ಕಿತ್ಯಾಕ್ ಪಸಂದ್ ಕರಿನಾಂತ್? ಹಾಂವ್ ಮೊಟಿಂ ಆಸ್‍ಲ್ಲೆಂಚ್ ಮ್ಹಣ್ಚೆಂ ವ್ಹಡ್ ಅಪ್ರಾಧ್‍ಗಿ? ಮ್ಹಜಿ ಭಲಾಯ್ಕಿ ಬರೀ ಆಸಾ. ತೆಂ ಪಾವಾನಾಂಗಿ? ಸೊಭಿತ್ ದಿಸ್ಚಿಂ, ಫಿಟ್ ಆಸ್ಚಿಂ ಸಕ್ಡಾಂ ಭಲಾಯ್ಕೆಂತ್ ಫಸ್ಟ್ ಕ್ಲಾಸ್ ಆಸ್ತಾತ್‍ಗಿ? ಕಾಜಾರ್ ಜಾಂವ್ಕ್ ಭಲಾಯ್ಕಿ ಬರಿ ಆಸ್ಚಿ ಪ್ಲಸ್ ಪಾಂಯ್ಟ್ ನಂಯ್‍ಗಿ?

ಆತಾಂ ಮ್ಹಜಿಂ ಇಶ್ಟಾಂ ಆನಿ ಹಿತೈಶಿ ಮ್ಹಾಕಾ ಕ್ರಿಸ್ತಾಂವ್ ಚಲ್ಯಾಂಕ್ ಸೊಧ್ಚೆಂ, ಸೈರಿಕ್ ಮ್ಹಣೊನ್ ನಿರಾಶಿ ಜಾಂವ್ಚೆಂ ಸೊಡ್ನ್, ಚಲೊ ಕಂಚೊಯೀ ಜಾಂವ್ದಿ, ಕಸಲಿ ಜಾತ್ ಧರ್ಮ್ ತರೀ ಜಾಂವ್ದಿ, ತುಕಾ ಮೊಗಾನ್ ಪಳೆಂವ್ಚೊ ಚಲೊ ಮೆಳ್ಳ್ಯಾರ್ ತಾಚೆಲಾಗಿಂಚ್ ಕಾಜಾರ್ ಜಾ ಮ್ಹಣ್ ಸಾಂಗೊನ್ ಆಯ್ಲ್ಯಾಂತ್. ಪಯ್ಲೆಂ ಮ್ಹಾಕಾ ದುಸ್ರ್ಯಾ ಜಾತಿಚ್ಯಾ ಚಲ್ಯಾಂವಿಶಿಂ ಚಿಂತಾನಾಂಚ್ ಭೆಂ ದಿಸ್ತಾಲೆಂ. ಸೈರಿಕ್ ಸೊಧುನ್ ಭೊಗ್‍ಲ್ಲ್ಯಾ ಇರಾರಾಯೆ ವರ್ವಿಂ ಆತಾಂ ಮ್ಹಾಕಾ ಹಿ ಸೂಚನ್ ಜಾಯ್ತ್ ಮ್ಹಣ್ ಭೊಗ್ತಾ. ಮ್ಹಜಿಂ ಕುಟ್ಮಾಚಿಂ ಮ್ಹಜ್ಯಾ ಕಾಜಾರಾಚಿ ಖಂತ್ ಕರ್ನ್ ಆಸಾತ್. ಆತಾಂ ಹಾಂವೆಂ ಕಿತೆಂ ಕರಿಜೆ ಮ್ಹಳ್ಳೆಂಚ್ ಮ್ಹಾಕಾ ಕಳಾನಾ. ಪ್ಲೀಸ್ ಮ್ಹಾಕಾ ಬರಿ ವಾಟ್ ದಾಕವ್ನ್ ದಿಯಾ ಡೊಕ್ಟರ್. ಹಾಂವ್ ಮಾಲ್ಘಡಿಂ. ಮ್ಹಜೆಂ ಕಾಜಾರ್ ಜಾಲ್ಯಾ ಶಿವಾಯ್ ಧಾಕ್ಟ್ಯಾಂಚೆಂ ಕಾಜಾರ್ ಕರ್ಚೆಂ ಕಶ್ಟಾಂಚೆಂ ಮ್ಹಣೊನ್ ಪಪ್ಪಾ ಆನಿ ಮಮ್ಮಿ ಸಾಂಗ್ತಾತ್. ಕಿತೆಂ ಕರ್ಯೆತ್. ಕಾಜಾರ್ ಜಾಯ್ನಾಸ್ತಾನಾಂಚ್ ರಾವ್ಲ್ಯಾರ್ ಬರೆಂಗೀ? ಕೊಣೀ ಹೆರ್ ಜಾತಿಚೊ ಚಲೊ ಪಸಂದ್ ಜಾಲ್ಯಾರ್ ಕಾಜಾರಾಕ್ ಮುಖಾರ್ ಸರ್ಯೆತ್‍ಗಿ? ತಶೆಂ ಕಾಜಾರ್ ಜಾಲ್ಯಾರ್ ಪರಿಣಾಮ್ ಬರೊ ಜಾಯ್ತ್‍ಗೀ? ಮ್ಹಾಕಾ ಮೊಸ್ತು ಟೆನ್ಶನ್ ಜಾತಾ. ದಯಾ ಕರುನ್ ಮ್ಹಾಕಾ ಏಕ್ ಬರಿ ವಾಟ್ ದಾಕಯಾ.

-ಎನ್.ಡಿ.ಎಸ್., ಗಲ್ಫ್

ತುವೆಂ ತುಜಿ ಪ್ರಾಯ್ ಕಿತ್ಲಿ, ಕುಡಿಚಿ ಲಾಂಬಾಯ್ ಆನಿ ಜಡಾಯ್ ಕಿತ್ಲಿ ಮ್ಹಣ್‍ಯಿ ಬರಯಿಲ್ಲೆಂಯ್ ತರ್ ಬರೆಂ ಆಸ್‍ಲ್ಲೆಂ. ತುಂ ಆಪ್ಣಾಕ್ ಸಾಧಾರ್ಣ್ ಮೊಟೆಂ ಮ್ಹಣ್ ಲೆಕ್ತಾಯ್ ತರ್ ಚಲೆ ಕಿತ್ಯಾಕ್ ನೆಗಾರ್ ಕರ್ತಾತ್? ಬೊವ್‍ಶ್ಯಾ ತುಂ ಚಡ್ ಮೊಟೆಂ ಆಸಾಯ್ ಆನಿ ಹಿ ಮೊಟಾಯ್‍ಚ್ ತುಕಾ ಸೈರಿಕ್ ಲಾಗೊಂಕ್ ಆಡ್ಕಳ್ ತಶೆಂ ದಿಸ್ತಾ. ತುಂ ಸಾವ್ಳೆಂ ಆಸಾಯ್ ತೆಂ ಮಾತ್ರ್ ಸೈರಿಕ್ ಲಾಗಾನಾಸ್ಚ್ಯಾಕ್ ಕಾರಣ್ ಆಸ್ಚೆಂ ನಾ. ಕ್ರಿಸ್ತಾಂವ್ ಚಲೆ ತುಜೆ ಮೊಟಾಯೆ ಖಾತಿರ್ ತುಜೆಕಡೆ ಕಾಜಾರ್ ಜಾಂವ್ಕ್ ಪಾಟಿಂ ಕರ್ತಾತ್ ತರ್ ಪರ್ಕಿ ಜಾತಿಚೆ ತುಜಿ ಮೊಟಾಯ್ ಆನಿ ಸೊಭಾಯ್ ಮತಿಂತ್ ಘೆನಾಸ್ತಾಂ ತುಜೆಕಡೆ ಕಾಜಾರ್ ಜಾತಿತ್ ಮ್ಹಣ್ ತುಕಾ ಭೊಗ್ತಾ? ಜೆರಾಲ್ ಥರಾನ್ ಕಾಜಾರಾಚಿ ವಿಂಚವ್ಣ್ ಯೆತಾನಾ ಹರ್ ಜಾತಿ-ಕಾತಿಚೆ ಚಲೆ ತಶೆಂ ಚಲಿಯೊ ಥೊಡ್ಯೊ criteria ಅಪೇಕ್ಶಿತಾತ್ ಆನಿ ಹೆಂ ಸ್ವಾಭಾವಿಕ್. ಮೊಟ್ಯಾ ಚಲಿಯೆಕಡೆ ಕಾಜಾರ್ ಜಾವ್ನ್ ಫಾಲ್ಯಾಂ ಆಯಿಲ್ಲ್ಯಾಂ-ಗೆಲ್ಲ್ಯಾಂಥಾವ್ನ್ ಆಯ್ಕುಂಚೆಪ್ರಾಸ್ ವಾ ಕಾಜಾರಾ ಉಪ್ರಾಂತ್ ನಿರಾಸ್ ಜಾಂವ್ಚೆಪ್ರಾಸ್ ಪಯ್ಲೆಂಚ್ ನಾಕಾ ಮ್ಹಣ್ಚೆಂ ಬರೆಂ ಮ್ಹಣ್ ಚಲೆ ಲೆಕ್ತಾತ್ ತರ್ ತೆಂ ಕಶೆಂ ಚೂಕ್ ಮ್ಹಣ್ ಮಾನುನ್ ಘೆಂವ್ಚೆಂ? ಆಜ್‍ಕಾಲ್ ಗಾಂವಾಂತ್ ಜಾಯಿತ್ತ್ಯೊ ಚಲಿಯೊ ಗಲ್ಪಾಂತ್ ಬರ್ಯಾ ಕಾಮಾರ್ ಆಸ್ಚ್ಯಾ ಚಲ್ಯಾಕ್ ಜರ್ ಕಾಜಾರಾ ಉಪ್ರಾಂತ್ ಹೊಕ್ಲೆಕ್ ಗಲ್ಪಾಕ್ ವ್ಹರುಂಕ್ ಜಾಯ್ನಾ ತಸಲ್ಯಾಕಡೆ ಕಾಜಾರ್ ಜಾಂವ್ಕ್ ಪಾಟಿಂ ಕರ್ತಾತ್. ಉಣೆಂ ಶಿಕಪ್ ಆಸ್‍ಲ್ಲ್ಯಾ ಚಲ್ಯಾಂಕ್ ಆತಾಂ ಆತಾಂ ಸೈರಿಕ್ಯೊ ಲಾಗ್ಚ್ಯೊಚ್ ಕಷ್ಟಾಂಚೆ ಜಾಲ್ಯಾತ್. ಕಾಜಾರಾಚ್ಯಾ ವಿಂಚವ್ಣೆಂತ್ ಹರ್ಯೆಕ್ಲ್ಯಾಕ್‍ಯಿ ತಾಚೆಚ್ ಪ್ರಯೋರಿಟಿ ಆಸಾತ್. ತೆ ಆಮಿ ಚಿಲ್ಲರ್ ಕರುಂಕ್ ಜಾಯ್ನಾ.

ತುಜ್ಯಾ ಕುಟ್ಮಾಚಿ, ತುಜ್ಯಾ ಪಾಟ್ಲ್ಯಾ ಭಯ್ಣಿಂಚಿ ತಿತ್ಲಿ ಖಂತ್ ಆಸ್ಚೆಂ ತುಂ ಜಾತಿ ಭಾಯ್ಲ್ಯಾ ಚಲ್ಯಾಕಡೆ ಕಾಜಾರ್ ಜಾಶಿ ತರ್ ತುಜ್ಯಾ ಕುಟ್ಮಾಚ್ಯಾ ಮರ್ಯಾದೆಕ್ ತಿಬೊ ಲಾಗತ್ ಮ್ಹಣ್ ತುಕಾ ಭೊಗಾನಾ? ಜೆರಾಲ್ ಥರಾನ್ ಅಂತರ್‍ಜಾತಿಚಿಂ ಕಾಜಾರಾಂ ಆತಾಂ ಸಾಮಾನ್ಯ್ ಜಾಯಿತ್ತ್ ಆಸಾತ್ ಆನಿ ಸಮಾಜ್ ತೆಂ ಮಾನುನ್ ಘೆತಾ ತರ್‍ಯಿ, ಫಕತ್ ಜಾತಿ ಭಿತರ್ಲೆ ಚಲೆ ಪಸಂದ್ ಕರಿನಾಂತ್ ಮ್ಹಳ್ಳ್ಯಾ ಎಕಾಚ್ ಕಾರಣಾನ್ ಜಾತಿ ಭಾಯ್ಲ್ಯಾ ಕೊಣಾಯ್‍ಕಡೆ ಕಾಜಾರ್ ಜಾಂವ್ಚೆ ತಸಲೊ ದೆಧೆಸ್ಪೊರಿತ್ ನಿರ್ಧಾರ್ ಕರ್ಚೊ ತಿತ್ಲೊ ಜೊಕ್ತೊ ನ್ಹಯ್. ತರ್‍ಯಿ ಖಂಚೊಯ್ ಚಲೊ-ಜಾತಿ ಭಿತರ್ಲೊ ವಾ ಭಾಯ್ಲೊ, ತುಕಾ ಬರೊ ಮ್ಹಣ್ ದಿಸ್ಚೊ ತುಕಾ ಪಸಂದ್ ಕರ್ತಾ ಆನಿ ತಾಚಿ ವಿಂಚವ್ಣ್ ಪ್ರಾಮಾಣಿಕ್ ಮ್ಹಣ್ ತುಕಾಯಿ ಭೊಗ್ತಾ ತರ್ ತುವೆಂ ಮುಕಾರ್ ಸರ್ಯೆತಾ. ಕಾಜಾರಾಚೆ ವಿಂಚವ್ಣೆಂತ್ ದೊಗಾಂಯ್ನಿ ಎಕಾಮೆಕಾಕ್ ಪಸಂದ್ ಜಾಂವ್ಚೆಂ, ಕಸಲಿಂಯಿ ಶರ್ತಾಂ ನಾಸ್ತಾಂ ಎಕಾಮೆಕಾಕ್ ಆಸಾ ತಶೆಂ ಸ್ವೀಕಾರ್ ಕರ್ಚೆಂ ಚಡ್ ಗರ್ಜೆಚೆಂ.

ಮೊಟಾಯ್ ಫಕತ್ ಸೊಭಾಯೆಕ್ ಬಾಧಕ್ ಮಾತ್ರ್ ನ್ಹಯ್, ಜಾಯಿತ್ತ್ಯಾ ಪಿಡೆಂಕ್‍ಯಿ ಪ್ರೇರಣ್ ಜಾತಾ. ಮೊಟಾಯ್ ಗರ್ಬೆಸ್ತ್‍ಪಣಾಕ್‍ಚ್ ಆಡ್ಕಳ್ ಜಾವ್ಯೆತಾ. ಗರ್ಬೆಸ್ತ್ ಜಾಲ್ಯಾರ್‍ಯಿ ಗರ್ಬೆಸ್ತ್‍ಕಾಳಾರ್ ಆನಿ ಪ್ರಸೂತ್ಪಣಾಚ್ಯಾ ವೆಳಾರ್ ಧೊಶಿ ಉಬ್ಜಯ್ತಾ. ತರ್ನೆ ಪ್ರಾಯೆರ್ ಡಯಾಬೆಟಿಸ್, ಬ್ಲಡ್‍ಪ್ರೆಶ್ಶರ್ ಚಡ್ಚೊ, ವೆಗ್ಗಿಂಚ್ ಹಾರ್ಟ್ ಪ್ರೊಬ್ಲೆಮ್ ಸುರು ಜಾಂವ್ಕ್‍ಯಿ ಮೊಟಾಯ್ ಕಾರಣ್ ಜಾತಾ. ಆತಾಂ ಸೈರಿಕ್ ಲಾಗಾನಾಸ್ಚಿ ಕರಂದಾಯ್, ಉಪ್ರಾಂತ್ ಭುರ್ಗಿಂ ಜಾಂವ್ಚ್ಯಾಂತ್ ಸಮಸ್ಸೆ ಆನಿ ತ್ಯಾ ನಂತರ್ ಮಧ್ಯಮ್ ಪ್ರಾಯೆಚೆ ಭಲಾಯ್ಕೆಚೆ ಸಮಸ್ಸೆ ತರ್ನೆ ಪ್ರಾಯೆರ್ ಸುರುಜಾಂವ್ಚೆಂ… ಹೆ ಸರ್ವ್ ಧೊಶಿ ಆಡಾಂವ್ಚೆ ಖಾತಿರ್ ತುವೆಂ ತುಜಿ ಮೊಟಾಯ್ ಉಣಿ ಕರುಂಕ್ ಕಿತ್ಯಾಕ್ ಪ್ರಯತ್ನ್ ಕರುಂಕ್ ನಜೊ? ಮೊಟಾಯ್ ಜೊಡುಂಕ್ ಕಿತ್ಲೆಂ ಸಲೀಸ್, ತಿ ಸಾಂಡುಂಕ್ ತಿತ್ಲೆಚ್ ತ್ರಾಸ್. ಥೊಡ್ಯಾ ದಿಸಾಂನಿ ಆನಿ ಮಯ್ನ್ಯಾಂನಿ ಜಾಂವ್ಚಿ ಗಜಾಲ್ ನ್ಹಯ್. ಪುಣ್ ಸಾಧ್ಯ್ ಆಸಾ. ತುಂ ಮೊಟಾಯ್ ಉಣಿ ಕರುಂಕ್ ಪ್ರಯತ್ನ್ ಕರ್, ಸೈರಿಕೆಚೆ ಸಮಸ್ಸೆಯಿ ಪರಿಯಾರ್ ಜಾತಿತ್.

ಆನಿ ಎಕಾವೆಳಾ ಸೈರಿಕ್‍ಚ್ ಲಾಗಾನಾ ತರ್ ಖುಶಿ ನಾಸ್ತಾಂ ದೆಧೆಸ್ಪೊರ್ ಜಾವ್ನ್ ಕೊಣಾ ಕೊಣಾಕಡೆ ಕಾಜಾರ್ ಜಾವ್ನ್ ಭವಿಷ್ಯ್ ಪಾಡ್ ಕರ್ಚೆ ಬದ್ಲಾಕ್ ಆತಾಂ ಆಸಾಯ್ ತಶೆಂಚ್ ಆಸ್ಯೆತಾ. ದೆಧೆಸ್ಪೊರಾನ್ ವಿಂಚವ್ಣ್ ಕರ್ನ್, ಜಾತಿ ಭಿತರ್ಲೆ ಮೆಳಾನಾಂತ್ ಮ್ಹಳ್ಳ್ಯಾಕ್ ಪ್ರತೀಕಾರ್ ತಶೆಂ ಕಾಜಾರ್ ಜಾಲ್ಯಾರ್ ಕಾಜಾರಿ ಜಿವಿತ್‍ಯಿ ಪಸಂದಾಯೆಚೆಂ ಆಸ್ಚೆಂ ನಾ. ಕಾಯ್ಲಿರ್ ಥಾವ್ನ್ ಉಜ್ಯಾಂತ್ ಉಡ್‍ಲ್ಲೆಪರಿಂ ಜಾಯ್ತ್. ಕಾಜಾರ್ ನಾಸ್ತಾಂಯಿ ಬರ್ಯಾನ್ ಜಿಯೆಂವ್ಕ್ ಸಾಧ್ಯ್ ಆಸಾ. ಎಕಾವೆಳಾ ದೆವಾನ್ ತುಕಾ ಆಂಕ್ವಾರ್ಪಣ್‍ಂಚ್ ನಿರ್ಮಿಲಾಂ ತರ್ ಜಾಲೆಂ, ತೆಂ ಸ್ವೀಕಾರ್ ಕರ್.

-ಡೊ| ಎಡ್ವರ್ಡ್ ನಜ್ರೆತ್

(Originally published on March 09, 2012)

The post ಮೊಟಾಯ್‍ ಸೈರಿಕೆಕ್ ಅಡ್ಕಳ್? appeared first on Budkulo.