ಕಲಾ ಸಂಪತ್ ಕೊಂಕ್ಣಿ ಕ್ವಿಜ್ – 1: ಸ್ಪರ್ಧ್ಯಾಚಿಂ ಸವಾಲಾಂ

‘ಬುಡ್ಕುಲೊ’ ಇ-ಮಾಧ್ಯಮಾನ್ ಮಾಂಡುನ್ ಹಾಡ್‍ಲ್ಲ್ಯಾ ಪಯ್ಲ್ಯಾ ‘ಕಲಾ ಸಂಪತ್ ಕೊಂಕ್ಣಿ ಕ್ವಿಜ್’ ಸ್ಪರ್ಧ್ಯಾಚಿಂ ಸವಾಲಾಂ ಹಾಂಗಾಸರ್ ದಿಲ್ಯಾಂತ್. ಎದೊಳ್‍ಚ್ ಕಳಯಿಲ್ಲೆಪರಿಂ ಅಗೋಸ್ತ್ ಮಹಿನ್ಯಾಚ್ಯಾ ಸ್ಪರ್ಧ್ಯಾಕ್ ವಿಂಚ್‍ಲ್ಲಿ ಕಾಣಿ ಐರಿನ್ ಪಿಂಟೊನ್ ಲಿಖ್‍ಲ್ಲಿ ‘ಸೈರಿಕ್’, ಜಿ ಬುಡ್ಕುಲೊಂತ್ ಫಾಯ್ಸ್ ಕೆಲ್ಯಾ.

ಆಮ್ಚ್ಯಾ ಹ್ಯಾ ಸ್ಪರ್ಧ್ಯಾಕ್ ಪಯ್ಲೊ ಪ್ರಾಯೋಜಕ್ ಜಾವ್ನ್ ಫುಡೆಂ ಆಯಿಲ್ಲೊ ‘ವೀಜ್ ಕೊಂಕಣಿ’ ಇ-ಹಫ್ತ್ಯಾಳ್ಯಾಚೊ ಸಂಪಾದಕ್, ಚಿಕಾಗೊಚೊ ಡೊ. ಆಸ್ಟಿನ್ ಡಿಸೋಜ ಪ್ರಭು. ತಾಣೆಂ ಚಾರ್ ‘ಕಲಾ ಸಂಪತ್ ಕೊಂಕ್ಣಿ ಕ್ವಿಜ್’ ಸ್ಪರ್ಧ್ಯಾಂಕ್ ಇನಾಮಾಂ ಸ್ಪೊನ್ಸರ್ ಕೆಲ್ಯಾಂತ್. ತಾಕಾ ಆಮಿ ಆಭಾರಿ ಆಸಾಂವ್ ಆನಿ ಪರತ್ ಸಕ್ಡಾಂ ತರ್ಫೆನ್ ಧಿನ್ವಾಸ್ತಾಂವ್.

ಮುಖ್ಲ್ಯಾ ಸಪ್ತೆಂಬರ್, ಅಕ್ತೋಬರ್ ಆನಿ ನವೆಂಬರ್ ಮಹಿನ್ಯಾಂನಿಯೀ ‘ಕಲಾ ಸಂಪತ್ ಕೊಂಕ್ಣಿ ಕ್ವಿಜ್’ ಸ್ಪರ್ಧೆ ಚಲ್ತೆಲೆ. ಹ್ಯಾ ಸ್ಪರ್ಧ್ಯಾಕ್ ವಿಂಚ್‍ಲ್ಲ್ಯೊ ಕಾಣಿಯೊ ತ್ಯಾ ಸ್ಪರ್ಧ್ಯಾಚ್ಯಾ ಪ್ರಕಟಣಾ ವೆಳಾರ್ ಕಳಯ್ತೆಲ್ಯಾಂವ್.

‘ಸೈರಿಕ್’ ಕಾಣಿ – ಕ್ವಿಜ್ ಸ್ಪರ್ಧ್ಯಾಚಿಂ ಸವಾಲಾಂ:

ಪಯ್ಲೊ ವಿಭಾಗ್:

1. ರೇಶ್ಮಾಚೊ ಬಾಪಯ್ ತಾಚ್ಯಾ (ರೇಶ್ಮಾಚ್ಯಾ) ಆವಯ್ಚೆಂ ಕಿತೆಂ ಪಳೆವ್ನ್ ಕಾಜಾರ್ ಜಾಲ್ಲೊ?

2. ರೇಶ್ಮಾನ್ ಬಸ್ಸಾರ್ ಬಸ್‍ಲ್ಲ್ಯಾ ಸಿಟಿಚ್ಯಾ ಬಗ್ಲೆಚ್ಯಾ ಸಿಟಿಚೆಂ ನಂಬರ್ ಕಿತ್ಲೆಂ?

3. ರೇಶ್ಮಾ ಬೆಂಗ್ಳುರಾಂತ್ ಖಂಯ್ಸರ್, ಕೊಣಾಚ್ಯಾ ಘರಾ ರಾವ್ತಾಲೆಂ?

4. ರೊಬಿನ್ ಖಂಚ್ಯಾ ಕಂಪೆನಿಂತ್, ಕಸಲೆಂ ಕಾಮ್ ಕರ್ತಾಲೊ?

5. ರೇಶ್ಮಾಚೆಂ ಕಸಿನ್ ಖಂಚ್ಯಾ ಚಲ್ಯಾ ಲಾಗಿಂ ಮೊಗಾರ್ ಪಡ್‍ಲ್ಲೆಂ?

6. ರೇಶ್ಮಾ ಆನಿ ರೊಬಿನಾಚ್ಯಾ ಆವಯ್ ಬಾಪಾಯ್ಚೆಂ ನಾಂವ್ ಕಿತೆಂ?

7. ರೇಶ್ಮಾಕ್ ಸೈರಿಕೆಕ್ ಪಳೆಂವ್ಕ್ ಆಯಿಲ್ಲ್ಯಾ ಚಲ್ಯಾಚ್ಯಾ ಕುಟ್ಮಾಚಿಂ ಖಂಚ್ಯಾ ವಾಹನಾರ್ ಆಯಿಲ್ಲಿಂ?

ದುಸ್ರೊ (ಟೈ-ಬ್ರೇಕರ್) ವಿಭಾಗ್:

1. ಸೈರಿಕ್ ಪಳೆಂವ್ಕ್ ಆಯಿಲ್ಲ್ಯಾ ರೊಬಿನಾನ್ ರೇಶ್ಮಾಕ್ ನೆಗಾರುಂಕ್ ಕಾರಣ್ ಕಿತೆಂ? ತುಮ್ಚೆ ಪ್ರಕಾರ್ ಕಾಣಿಯೆಚೆಂ ಅಂತ್ಯ್ ಕಶೆಂ ಜಾಯ್ಜೆ ಆಸ್‍ಲ್ಲೆಂ? (ದೊನಾಯ್ಕೀ, ಜಾಪ್ ಏಕ್ ವಾ ದೋನ್ ವಾಕ್ಯಾಂನಿ ದಿವ್ಯೆತ್).

2. ಬುಡ್ಕುಲೊ ಇ-ಪತ್ರಾಂತ್ ಪ್ರಕಟ್ ಜಾಲ್ಲಿ ಐರಿನ್ ಪಿಂಟೊನ್ ಬರಯಿಲ್ಲಿ ಆನ್ಯೇಕ್ ಮಟ್ವಿ ಕಾಣಿ ಖಂಚಿ? ತಿಚಿ ಏಕ್ ಮಹಾನ್, ಅದ್ಭುತ್ ಕಾದಂಬರಿಯೀ ಬುಡ್ಕುಲೊಂತ್ ಪ್ರಕಟ್ ಜಾಲ್ಯಾ. ಖಂಚಿ ತಿ ಕಾದಂಬರಿ?

3. ಐರಿನ್ ಪಿಂಟೊಕ್ ಸಾಹಿತ್ಯ್ ಬರಂವ್ಕ್ ಪ್ರೋತ್ಸಾಹ್ ದಿಲ್ಲೊ ಸಂಪಾದಕ್ ಕೋಣ್? ತಾಚ್ಯಾ ಖಂಚ್ಯಾ ಪತ್ರಾರ್ ಐರಿನಾಚ್ಯೊ ಸುರ್ವಿಲ್ಯೊ ಕಾದಂಬರಿ ಫಾಯ್ಸ್ ಜಾಲ್ಲ್ಯೊ?

4. ಐರಿನ್ ಪಿಂಟೊಕ್ ಆಯ್ಲೆವಾರ್ ಮೆಳ್‍ಲ್ಲಿ ಪ್ರಶಸ್ತಿ ಖಂಚಿ? ತಾಚೆಂ ಪ್ರಶಸ್ತಿ ಪ್ರದಾನ್ ಕಾರ್ಯೆಂ ಖಂಯ್ಸರ್ ಚಲ್‍ಲ್ಲೆಂ?

5. ಐರಿನ್ ಪಿಂಟೊ ಕೆನಡಾಂತ್ ಆಸ್ಲ್ಯಾರೀ ಬುಡ್ಕುಲೊ ತರ್ಫೆನ್ ತಿಕಾ ಲೈವ್ ಸನ್ಮಾನ್ ಕೆಲ್ಲೊ. ತೆಂ ಸಾಧ್ಯ್ ಜಾಲ್ಲೆಂ ಖಂಚ್ಯಾ ವರ್ಚುವಲ್ ಪ್ಲ್ಯಾಟ್‍ಫೊರ್ಮಾರ್?

ಸ್ಪರ್ಧ್ಯಾಚಿಂ ನಿಯಮಾಂ ಆನಿ ನಿಬಂಧನಾಂ:

1. ವಯ್ರ್ ದಿಲ್ಲ್ಯಾ ಸರ್ವ್ 12 ಸವಾಲಾಂಕ್ ಜಾಪಿ ದೀಜೆ. ಪಯ್ಲ್ಯಾ ವಿಭಾಗಾಂತ್ಲ್ಯಾ ಸರ್ವ್ ಸವಾಲಾಂಚ್ಯೊ ಜಾಪಿ ಸಾರ್ಕ್ಯೊ ಆಸ್ಲ್ಯಾರ್ ಮಾತ್ರ್ ದುಸ್ರೊ ವಿಭಾಗ್ (ಟೈ-ಬ್ರೇಕರ್) ಪರಿಗಣನ್ ಕರ್ತಾಂವ್. ಮ್ಹಣ್ಜೆ ಪಯ್ಲ್ಯಾ ವಿಭಾಗಾಂತ್ ಚೂಕ್ ಜಾಪಿ ದಿಲ್ಯಾರ್ ಸ್ಪರ್ಧಿ ಅನರ್ಹ್ ಜಾತಾ.

2. ಜಾಪಿ ಧಾಡ್ತೆಲ್ಯಾಂನಿ ಸವಾಲಾಂಚ್ಯಾ ನಂಬ್ರಾ ಮುಖಾರ್‌ಚ್ ತ್ಯಾ ತ್ಯಾ ಸವಾಲಾಚಿ ಜಾಪ್ ಲಿಖಿಜೆ. ಪಯ್ಲೊ ಆನಿ ದುಸ್ರೊ ವಿಭಾಗ್ ಕ್ರಮಾ ಪ್ರಕಾರ್ ಆಸಜೆ. ಸಂಗಿಂ ತುಮ್ಚೆಂ ಸಗ್ಳೆಂ ನಾಂವ್, ಗಾಂವ್, ಮೊಬೈಲ್ ನಂಬರ್ ಆನಿ ವಿಳಾಸ್ ಧಾಡಿಜೆ (ವಿಳಾಸ್ ಕಡ್ಡಾಯ್ ನಾ).

3. ಜಾಪಿ ಆಮ್ಚ್ಯಾ ಇಮೈಲಾಕ್ – budkuloepaper@gmail.com – ಮಾತ್ರ್ ಧಾಡಿಜೆ. ವಾಟ್ಸಪಾಂತ್ ಧಾಡ್ಲ್ಯಾರ್ ಪರಿಗಣನ್ ಕರಿನಾಂವ್ (ದಿಸಾಕ್ ಹಜಾರಾಂನಿ ಮೆಸೇಜ್ ವಾಟ್ಸಪಾಂತ್ ಯೇವ್ನ್ ರಾಸ್ ಪಡ್ತಾತ್ ಜಾಲ್ಲ್ಯಾನ್ ತೆಂ ನಿರ್ವಹಣ್ ಕರುಂಕ್ ಅಸಾಧ್ಯ್. ತ್ಯಾ ವರ್ವಿಂ ಇಮೈಲಾರ್ ಮಾತ್ರ್ ಧಾಡಾ).

4. ಜಾಪಿ (ಇಮೈಲಾರ್) ಧಾಡ್ತಾನಾ ಕನ್ನಡ ಲಿಪಿಯೆಂತ್ ಆನಿ ಇಂಗ್ಲಿಶ್ ಅಕ್ಷರಾಂನಿ (ರೋಮಿ ಲಿಪಿ) ಮಾತ್ರ್ ಧಾಡ್ಯೆತ್. ಸಬ್ಜೆಕ್ಟಾರ್ Kala Sampath Quiz 1 Answers ಮ್ಹಣ್ ಬರಯ್ಜೆ. ಸೂಚನ್ 1: ಜರ್ ಟೈಪ್ ಕರುಂಕ್ ಕಳನಾ, ತೆದ್ನಾಂ ಕಾಗ್ದಾಚೆರ್ ಹಾತಾಂತ್ ಬರವ್ನ್ ತಾಚಿ ಫೊಟೊ ಧಾಡ್ಯೆತ್. ಸೂಚನ್ 2: ತುಮಿ ಹೆರಾಂಚಿ ಕುಮಕ್ ಘೆವ್ನ್, ಉದಾ: ಸೈಬರ್ ಸೆಂಟರಾ ಮುಖಾಂತ್ರ್, ಇಮೈಲ್ ಧಾಡ್ತಾತ್ ತರ್ ತುಮ್ಚೊ ಸಂಪರ್ಕ್ ವಿವರ್ ಸಾರ್ಕ್ಯಾನ್ ಲಗ್ತಿ ಕರಾ.

5. ಇನಾಮಾಂ: ಪಯ್ಲೆಂ ಸಾರ್ಕ್ಯೊ ಜಾಪಿ ದಿಲ್ಲ್ಯಾ ಪಾಂಚ್ ಜಣಾಂಕ್ ರು. 2,500-00 ಐವಜಾಚಿಂ ಇನಾಮಾಂ ನಗ್ದೆನ್ ಲಾಭ್ತೆಲಿಂ. ಪಯ್ಲೆಂ ಇನಾಮ್. ರು. 750-00, ದುಸ್ರೆಂ ಇನಾಮ್ ರು. 550-00 ಆನಿ ತಿಸ್ರೆಂ ಇನಾಮ್ ತೆಗಾಂಕ್ ತಲಾ ರು. 400-00 ಕ್ಯಾಶ್ ಪ್ರೈಜ್ ರುಪಾರ್ ದಿತೆಲ್ಯಾಂವ್. (ಇನಾಮ್ ಗೂಗಲ್ ಪೇ ಮುಖಾಂತ್ರ್ ಪಾವಿತ್ ಕರ್ತಾಂವ್).

6. ಜಾಪಿ ಧಾಡುಂಕ್ ನಿಮಾಣಿ ತಾರಿಕ್ ಬ್ರೇಸ್ತಾರ್, 24 ಅಗೋಸ್ತ್, 2023. ತ್ಯಾ ತಾರಿಕೆ ಉಪ್ರಾಂತ್ ಧಾಡ್‍ಲ್ಲ್ಯೊ ಜಾಪಿ ಲೆಕಾಕ್ ಘೆನಾಂವ್.

ಸರ್ವ್ ಸ್ಪರ್ಧಿಕಾಂಕ್ ಆಮ್ಚ್ಯಾ ಬುಡ್ಕುಲೊ ವಾಟ್ಸಪ್ ಗ್ರೂಪಾಂತ್ ಭರ್ತಿ ಜಾಂವ್ಕ್ ಉಲೊ ದಿತಾಂವ್. ಭರ್ತಿ ಜಾಂವ್ಕ್ ನಾತ್ಲೆಲ್ಯಾಂ ಖಾತಿರ್ ಗ್ರೂಪಾಚೆಂ ಲಿಂಕ್ ಸಕಯ್ಲ್ ದಿಲಾಂ.

ಸ್ಪರ್ಧ್ಯಾಚೆಂ ಫಲಿತಾಂಶ್ ಆಮಿ ಸೊಮಾರಾ, 28 ಅಗೋಸ್ತ್, 2023ವೆರ್ ಪ್ರಕಟ್ ಕರ್ತಾಂವ್. ಜಿಕ್‍ಲ್ಲ್ಯಾಂನಿ ಆಪ್ಲೆಂ ಗೂಗಲ್ ಪೇ ನಂಬರ್ ಆಮ್ಕಾಂ ಕಳಂವ್ಚೆಂ. ಹೆರ್ ವಿವರ್ ಫಲಿತಾಂಶಾ ಸಂಗಿಂ ದಿತೆಲ್ಯಾಂವ್. ಇನಾಮ್ ಧಾಡ್‍ಲ್ಲ್ಯಾಚೆಂ ಸ್ಕ್ರೀನ್‍ಶಾಟ್ ಆಮಿ ಆಮ್ಚ್ಯಾ ವಾಟ್ಸಪ್ ಗ್ರೂಪಾಂನಿ ಘಾಲ್ತೆಲ್ಯಾಂವ್.

ಹ್ಯಾ ಅಮೋಘ್ ಸ್ಪರ್ಧ್ಯಾಂತ್ ತುಮಿ ಭಾಗ್ ಘೆಂವ್ಚ್ಯಾ ಸವೆಂ ತುಮ್ಚ್ಯಾ ಲಾಗ್ಶಿಲ್ಯಾಂಕ್ ಆನಿ ಹೆರಾಂಕ್‍ಯೀ ಭಾಗ್ ಘೆಂವ್ಕ್ ಉತ್ತೇಜಿತ್ ಕರಾ. ಹಿ ಖಬರ್ ಸಕ್ಡಾಂಕ್ ಪಾವಯಾ. ಕೊಂಕ್ಣಿ ವಾಚ್ಪ್ಯಾಂಕ್‍ಯೀ ಇನಾಮಾಂ ದೀವ್ನ್ ಬುಡ್ಕುಲೊ ಮಾಧ್ಯಮಾನ್ ಆನ್ಯೇಕ್ ದಾಖ್ಲೊ ರಚ್ಲಾ. ಮುಖಾರಿಂ ಆನಿಕೀ ಬರೆ, ಕ್ರಿಯಾತ್ಮಕ್ ಸ್ಪರ್ಧೆ ಆಮಿ ಮಾಂಡುನ್ ಹಾಡ್ತೆಲ್ಯಾಂವ್. ತುಮ್ಚೆಂ ಭಾಗಿದಾರ್‍ಪಣ್ ಆಮ್ಕಾಂ ಪ್ರೇರಣ್.

ಗುಮಾನಾಕ್ (Disclaimer): ಆಮಿ ಮಾಂಡುನ್ ಹಾಡ್ಚ್ಯಾ ಹ್ಯಾ ‘ಕಲಾ ಸಂಪತ್ ಕೊಂಕ್ಣಿ ಕ್ವಿಜ್’ ಬಾಬ್ತಿಂ ಸರ್ವ್ ಆನಿ ಅಂತಿಮ್ ಹಕ್ಕಾಂ, ನಿಚೆವ್ ಆನಿ ಪರಮಾಧಿಕಾರ್ ‘ಬುಡ್ಕುಲೊ’ ಸಂಪಾದಕಾಚೊ ಜಾವ್ನಾಸ್ತಲೊ. ಹ್ಯಾ ಲಗ್ತಿಂ ಕಸಲ್ಯಾಚ್ ತಕ್ರಾರ್ ವಾ/ಆನಿ ಸಂವಹನಾಕ್ ಆಸ್ಪದ್ ಆಸ್ಚೊ ನಾ.

ಐರಿನ್ ಪಿಂಟೊಚಿ ಕಾಣಿ ‘ಸೈರಿಕ್’ (ಕ್ಲಿಕ್ ಕರಾ)

 

ಬುಡ್ಕುಲೊ ವಾಟ್ಸಪ್ ಗ್ರೂಪಾಕ್ ಭರ್ತಿ ಜಾಂವ್ಕ್ ಲಿಂಕ್ https://chat.whatsapp.com/GVbz61zjpZa8PN1wE7YSSL

 

Send your Feedback to: budkuloepaper@gmail.com

Like us at: www.facebook.com/budkulo.epaper

Subscribe our YouTube Channel