ಸರ್ದಾರಾಚೆಂ ಸನ್ನಿಧಾನ್ – 29: ಮೊರ್ನಾ ಕಡೆನ್ ಝುಜ್

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 29
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 29: ಮೊರ್ನಾ ಕಡೆನ್ ಝುಜ್

ಸಭಾ ಫಾಸಾಳ್ಳ್ಯಾ ಉಪ್ರಾಂತ್ ಸರ್ದಾರ್ ಯೂಸುಫ್ ಆಲಿ ಸರ್ದಾರ್ ಸಿಮಾಂವ್ಕ್ ಭೆಟೊಂಕ್ ನಾ. ತಶೆಂ ಕೆಲ್ಯಾರ್ ಆಪ್ಣೆಂ ಖುರಾನಾಚ್ಯಾ ನಾಂವಾನ್ ದಿಲ್ಲೊ ಸೊಪುತ್ ಭಂಗಂವ್ಚೆಂ ಪ್ರಸಂಗ್ ಯೆವ್ಯೆತ್ ಮ್ಹಣ್ ತೊ ಭಿಯೆಲೊ. ತಿತ್ಲೊಯೀ ದೆವಾಕ್ ಭಿಯೆಂವ್ಚೊ ಆಪ್ವಂತ್ ಯುವಕ್ ತೊ ಜಾವ್ನಾಸ್‍ಲ್ಲೊ. ಸ್ಪರ್ಧ್ಯಾಂತ್ ಜಿಕೊನ್ ಘೆತ್‍ಲ್ಲೆಂ ಇನಾಮ್ ಆಪ್ಣಾ ವರ್ವಿಂ ಘೆಂವ್ಕ್ ಸಾಧ್ಯ್ ನಾ ಮ್ಹಣ್ ಕಳಿತ್ ಆಸ್‍ಲ್ಲ್ಯಾನ್, ಎಕಾ ಮಹಿನ್ಯಾನ್ ಟಿಪ್ಪುಕ್ ಕಿತೆಂ ಸಾಂಗ್ಚೆಂ ಮ್ಹಳ್ಳೆಂ ಚಿಂತುನ್‍ಂಚ್ ತಾಚಿ ತಕ್ಲಿ ವಿರಾರ್ ಜಾಲಿ. ಜಮೀಲಾ ಅಂತರ್‌ಲ್ಲ್ಯಾ ವರ್ವಿಂ ಜಿಣಿಯೆ ಬಾಬ್ತಿನ್ ತೊ ನಿರಾಶಿ ಜಾಲ್ಲೊ. ಲಡಾಯ್ ಪುಣೀ ಆಸ್ಲ್ಯಾರ್ ಫುಡೆಂ ವಚೊನ್ ಜೀವ್ ದಿವ್ಯೆತ್ ಮ್ಹಣ್ ತಾಕಾ ದಿಸ್ತಾಲೆಂ. ಸಂದರ್ಭ್ ಮೆಳ್ಳ್ಯಾರ್ ಪಟ್ಟಣಾ ಥಾವ್ನ್ ಪೊಳಾಪಳ್ ಘೆವ್ನ್, ಖಂಯೀ ಪಯ್ಶಿಲ್ಯಾ ತುಂಡು ರಾಯಾಂ ಖಾಲ್ ದೀಸ್ ಕಾಡ್ಯೆತ್ ಮ್ಹಳ್ಳಿ ತಾಳ್ಣಿಯೀ ತಾಕಾ ಯೆತಾಲಿ.

ಪುಣ್ ತಾಚೆ ದೀಸ್ ದುಸ್ರ್ಯಾಚ್ ರಿತಿರ್ ಆಖೇರ್ ಜಾಂವ್ಕ್ ಆಸ್‍ಲ್ಲೆ. ತ್ಯಾ ಖಾತಿರ್, ಜಾವ್ಯೆತ್, ಪಟ್ಟಣಾಂತ್‍ಚ್ ತೊ ಉರ್ಲೊ. ದುಸ್ರ್ಯಾ ಜಾಂವ್ ತಿಸ್ರ್ಯಾ ದಿಸಾ ಆಸ್ಮಾಬಿಗೆರ್ ವೆಚೆಂ ಮನ್ ತಾಣೆಂ ಕೆಲೆಂ ನಾ.

ಸರ್ದಾರ್ ಸಿಮಾಂವ್ಕ್ ಆಗ್ನೆಸ್ ಕುಂವರ್ನಿಚಿ ಕಾಂಯ್ ಖಬರ್ ಮೆಳನಾ ಜಾವ್ನ್ ತಾಚಿಯೀ ಆತುರಾಯ್ ಆನಿ ಮತಿಂತ್ಲಿ ಅಶಾಂತ್ ಸ್ಥಿತಿ ಚಡ್ ಜಾವ್ನ್ ಆಯ್ಲಿ. ಅಂತುಲ್ಯಾನ್ ಖಂಯ್ ಖಂಯ್ ಜಣ್ ಧಾಡ್ನ್ ಖಬರ್ ಕಾಡಯ್ಲ್ಯಾರೀ, ಕೊಡಗಾ ಥಾವ್ನ್ ತಿ ಪಟ್ಟಣಾಕ್ ವೆತಾ ಮ್ಹಣೊನ್ ಭಾಯ್ರ್ ಸರೊನ್ ಗೆಲ್ಲಿ ಶಿವಾಯ್, ತ್ಯಾ ಫುಡ್ಲಿ ಕಸಲಿಯೀ ಖಬರ್ ಮೆಳನಾ ಮ್ಹಳ್ಳಿ ಜವಾಬ್ ಯೆತಾಲಿ.

“ತರ್, ಪಟ್ಟಣಾಂತ್‍ಚ್ ಖಂಯ್ಸರ್ ಪುಣೀ ತಿ ಆಸಾ ಜಾಲ್ಯಾರ್ ಖಬರ್ ಕಾಡಿಜಾಯ್” ಮ್ಹಣಾಲೊ ಸರ್ದಾರ್ ಸಿಮಾಂವ್, ಅಂತುಲ್ಯಾ ಕಡೆನ್, “ಹ್ಯಾ ಆದಿಂಯೀ – ಆಮಿ ಕೆನರಾಂತ್ ರಾಟಾವಳಿರ್ ಆಸ್ತಾನಾ – ಹಾಂಗಾಸರ್ ಕೈದಿ ಆಸ್‍ಲ್ಲ್ಯಾ ಪಯ್ಕಿಂತ್ಲ್ಯಾ ಥೊಡ್ಯಾಂಕ್ ಉಸ್ಳಾವ್ನ್ ವ್ಹರುಂಕ್ ತಿಚ್ ಯೇವ್ನ್ ಗೆಲ್ಯಾ ಖಂಯ್.”

“ಹಾಂಗಾ ಯೇವ್ನ್ ಜಾಲ್ಯಾರೀ ತಿಣೆಂ ರಾವ್ಯೆತ್ ಖಂಯ್?”

“ಹಾಂವ್‍ಯೀ ತೆಂಚ್ ಚಿಂತಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆದ್ಲೆಪರಿಂ ಜಾಲ್ಯಾರ್ ಆಸ್ಮಾಬಿಗೆರ್ ಪುಣೀ ತಿಣೆಂ ಭೆಟ್ ದಿಂವ್ಚಿ ಸಾಧ್ಯತಾ ಆಸ್‍ಲ್ಲಿ. ಆತಾಂ ತಿಣೆಂ ಥಂಯ್ಸರ್ ಭೆಟ್ ದೀಂವ್ಕ್ ಪ್ರಯತ್ನ್ ಕೆಲ್ಯಾರ್ ಚಡ್ ಅಪಾಯ್ ಆಸಾ.”

“ವ್ಹಯ್ ಧನ್ಯಾ. ಆತಾಂ ತ್ಯಾ ಘರ್ಚ್ಯಾ ಆವರಾಕ್ ಬಾದಶಹಾನ್ ಪಹರೊ ದವರಯ್ಲಾ ಖಂಯ್!”

“ಹಾಂವೆಂಯೀ ತೆಂ ಆಯ್ಕಲಾಂ. ಪುಣ್ ತಿಕಾ – ಆಗ್ನೆಸ್ ಕುಂವರ್ನಿಕ್ ಜಾಗ್ವಯೆತೆಂ ಮ್ಹಳ್ಯಾರ್, ತಿ ಖಂಯ್ ಆಸಾ ಮ್ಹಳ್ಳೆಂಯೀ ಕಳಿತ್ ನಾ. ದೆಕುನ್ ತುಜೆ ಕಾನ್-ದೊಳೆ ಉಗ್ತೆ ದವರ್… ತಿಕಾ ಜಾಗ್ವಂವ್ಚೆಂ ಮಾತ್ರ್ ನಹಿಂ, ಆಮ್ಚೊ ಜೀವ್ ಜಾಲ್ಯಾರೀ ದೀವ್ನ್, ತಿಚೆಂ ರಕ್ಷಣ್ ಕರ್ಚೆಂ ಚಡ್ ಗರ್ಜೆಚೆಂ ಮ್ಹಳ್ಳೆಂ ಉಗ್ಡಾಸ್ ದವರ್.”

“ಜಾಯ್ತ್ ಧನ್ಯಾ, ಸರ್ದಾರಾ!” ಮ್ಹಣೊನ್ ಅಂತುಲೊ ಥಂಯ್ ಥಾವ್ನ್ ಪಾಶಾರ್ ಜಾಲೊ.

ಸ್ಪರ್ಧ್ಯಾಚಿ, ಇನಾಮಾಚಿ ಆನಿ ಟಿಪ್ಪುಚ್ಯಾ ಹುಕ್ಮೆಚಿ ಖಬರ್ ಆಸ್ಮಾಬಿಗೆರ್ ಪಾವ್ತಚ್, ಆಸ್ಮಾಬಿ ಆನಿ ಆಗ್ನೆಸ್ ಕುಂವರ್ನ್ ಚಡ್ ಚಿಂತೇಸ್ತ್ ಜಾಲಿಂ.

“ಆನಿ ಆಮ್ಕಾಂ ಬಚಾವೆಚಿ ವಾಟ್ ನಾ, ಬೇಟೀ” ಆಸ್ಮಾಬಿನ್ ದುಖಾಂ ಗಳಯ್ಲಿಂ. “ಹಾಂವ್ ಜಾಣಾಂ, ಯೂಸುಫ್ ಆಮ್ಕಾಂ ವಾಯ್ಟ್ ಕರಿಸೊ ನಾ. ಗರ್ಜೆ ಶಿವಾಯ್, ತೊಯೀ ಹ್ಯಾ ಫಾರಿಕ್ಪಣಾಚ್ಯಾ ಪಾಸಾಂತ್ ಸಾಂಪಡ್ಲೊ ಮ್ಹಣ್ ಹಾಂವ್ ಚುರ್ಚುರ್ತಾಂ.”

“ವ್ಹಯ್, ಬೀಬಿ ಸಾಹಿಬಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ಹಾಂವ್, ದುಸ್ರೆಂಚ್ ಚಿಂತುನ್ ಆಯಿಲ್ಲಿಂ. ಆತಾಂ ಗಜಾಲ್ ದುಸ್ರಿಚ್ ಜಾಲಿ. ಪೋಳ್ನ್ ಧಾಂವೊಂಕ್‍ಯೀ ವಾಟ್ ನಾ!”

“ಸರ್ದಾರ್ ಸಿಮಾಂವ್ಕ್ ಆಮಿ ಪಯ್ಲೆಂಚ್ ಖಬರ್ ದೀಜಾಯ್ ಆಸ್‍ಲ್ಲಿ. ತೊ ಕಿತೆಂ ಪುಣೀ ಉಪಾಯ್ ದಾಕಯ್ತೊ.”

“ತಾಕಾಚ್ ರೆವೊಡ್ ಘಾಲ್ನ್ ಆಸ್‍ಲ್ಲೆ ಅಪಾಯ್ ವರ್ತೆ ಆಸ್ತಾನಾ, ಆಮಿ ತಶೆಂ ಕರಿನಾತ್‍ಲ್ಲೆಂ ಬರೆಂಚ್ ಜಾಲೆಂ.”

“ತರ್, ಆತಾಂ ಆಮಿ ಕಿತೆಂ ಕರ್ಚೆಂ?”

“ಆಮ್ಚೆ ವರ್ವಿಂ ಕಾಂಯ್ ಕರುಂಕ್ ಸಾಧ್ಯ್ ನಾತ್‍ಲ್ಲ್ಯಾ ಹ್ಯಾ ವೆಳಾರ್, ದೇವ್‍ಚ್ ಆಮ್ಚೆ ಖಾತಿರ್ ಜಾಯ್ ತೆಂ ಕರ್ತಲೊ” ಮ್ಹಳ್ಳೊ ದೃಢ್ ವಿಶ್ವಾಸ್ ಆಗ್ನೆಸ್ ಕುಂವರ್ನಿನ್ ಉಚಾರ್ಲೊ. “ಆನಿ, ಬೀಬಿ ಸಾಹಿಬಾ, ತುವೆಂ ಮ್ಹಾಕಾ ಏಕ್ ಉಪ್ಕಾರ್ ಕರಿಜಾಯ್.”

“ಕಸಲೊ ಭೇಟೀ?”

“ಧರ್ಮಾ ಖಾತಿರ್ ಆನಿ ಮಾನಾ ಖಾತಿರ್ ಹಾಂವೆಂ ಮೊರಜಾಯ್ ಮ್ಹಳ್ಳೆಂ ಸ್ಪಷ್ಟ್ ಜಾಲ್ಯಾರ್…”

“ತಶೆಂ ಮ್ಹಣನಾಕಾ ಭೇಟೀ!”

“…ಸ್ಪಷ್ಟ್ ಜಾಲ್ಯಾರ್, ಆನಿ ದುಸ್ರಿ ವಾಟ್ ಮ್ಹಾಕಾ ನಾ ಜಾಲ್ಯಾರ್, ಮ್ಹಜೆ ಕಡೆನ್ ಆಸ್ಚಿ ಏಕ್ ಲ್ಹಾನ್ ವಸ್ತ್ (ಸಿನೊಲೆಚಿ ಅರ್ಲುಕ್) ಹಾಂವ್ ತುಜೆ ಕಡೆನ್ ದಿತಾಂ. ತಿ ತುವೆಂ ಖಂಚ್ಯಾ ಥರಾನ್ ಪುಣೀ ಸರ್ದಾರ್ ಸಿಮಾಂವ್ಕ್ ಪಾವಿತ್ ಕರಿಜಾಯ್.”

ತಶೆಂ ಕರ್ತೆಲಿಂ ಮ್ಹಣ್ ಆಸ್ಮಾಬಿನ್ ಭಾಸ್ ದಿಲಿ.

ಪುಣ್ ಸಿನೊಲೆಚಿಂ ಅರ್ಧಾಂ, ವೆಗ್ಳ್ಯಾಚ್ ವಾಟೆನ್ ಸಾಂಗಾತಾ ಮೆಳೊಂಕ್ ಆಸ್‍ಲ್ಲಿಂ. ಪುಣ್ ವೇಳ್ ಸನ್ನಿಹಿತ್ ಜಾಂವ್ಕ್ ನಾತ್‍ಲ್ಲೊ.

ದುಸ್ರ್ಯಾ ದಿಸಾ ಸಾಂಜೆರ್, ರಾವ್ಳೆರಾಚೊ ಹಕೀಮ್, ತುರ್ತಾನ್ ಬಾದಶಹಾಚ್ಯಾ ಭೆಟೆಕ್ ಆಯ್ಲೊ. ಬಾದಶಹಾನ್ ಕಾರಣ್ ವಿಚಾರ್ಲೆಂ.

“ಖಬರ್ ಸರ್ದಾರ್ ಸಿಮಾಂವ್ಚಿ ಹುಜೂರ್!”

“ಕಿತೆಂ ಜಾಲೆಂ?”

“ತೊ ಪರ್ತ್ಯಾನ್ ಅಸ್ವಸ್ಥ್ ಜಾಲಾ. ತಾಕಾ ತಾಪ್ ಯೆತಾ ಮ್ಹಣ್ ತಾಚ್ಯಾ ಸೆವಕಾನ್ ಮ್ಹಾಕಾ ಆಪಯ್ಲೊ. ತಿಂ ಲಕ್ಷಣಾಂ ಪಳೆವ್ನ್ ಹಾಂವ್ ಭಿಯೆಲೊಂ, ಆನಿ ತುಮ್ಕಾಂ ಖಬರ್ ದೀಂವ್ಕ್ ಆಯ್ಲೊಂ.”

“ಕಸಲಿಂ ಲಕ್ಷಣಾಂ?”

“ಬಚಾವಿ ನಾತ್‍ಲ್ಲ್ಯಾ ಭಯಂಕರ್ ಮಾರಿ ರೋಗಾಚಿಂ!”

“ಮಾ…!” ಟಿಪ್ಪುನ್ ಸಹಿತ್, ತೆಂ ನಾಂವ್ ಉಚಾರ್ಚೆಂ ಧಯ್ರ್ ನಾಸ್ತಾನಾ ದೋನ್ ಮೆಟಾಂ ಪಾಟಿಂ ಕಾಡ್ಲಿಂ. “ತ್ಯಾ ಪಿಡೆಕ್ ಕಸಲೆಂಯೀ ವಕತ್ ನಾಂಗೀ?”

“ವಕತ್ ಆಸಾ ಹುಜೂರ್. ಜಾಲ್ಯಾರೀ ತೊ ರೋಗ್ ಆಯಿಲ್ಲ್ಯಾ ಹರ್ಯೆಕಾ ಧಾ ಜಣಾಂ ಪಯ್ಕಿ ನೋವ್ ಜಣ್ ಖಂಡಿತ್ ವಾಂಚನಾಂತ್. ವಾಂಚೊಂಕ್ ಕಷ್ಟ್ ಕಿತೆಂ ಮ್ಹಳ್ಯಾರ್ ತಸಲ್ಯಾ ಪಿಡೇಸ್ತಾಚಿ ಸ ದೀಸ್ ಆನಿ ಸ ರಾತಿಂ ಖಳ್ಮಿತ್ ನಾಸ್ತಾನಾ ಚಾಕ್ರಿ ಕರಿಜಾಯ್ – ಚಾಕ್ರಿ ಕರ್ಚಿ ಜಾಲ್ಯಾರೀ, ಆದಿಂ ತೊ ರೋಗ್ ಯೇವ್ನ್ ಬಚಾವ್ ಜಾಲ್ಲ್ಯಾನಿಂಚ್ ಕರಿಜಾಯ್. ಹೆರಾಂಕ್ ಖಂಡಿತ್ ಜಾವ್ನ್ ತೊ ರೋಗ್ ಲಾಗ್ತಾ ಆನಿ ತಾಂಚಿ ಬಲಿ ಘೆತಾ!”

“ಪುಣ್ ಸರ್ದಾರ್ ಸಿಮಾಂವ್ಕ್ ಬಚಾವ್ ಕರಿಜಾಯ್!” ಟಿಪ್ಪುಚೆಂ, ಸರ್ದಾರ್ ಸಿಮಾಂವ್ ಥಂಯ್ ಬರೆಂ ಮನ್ ಆನಿ ಮಿತ್ರತ್ವ್ ಜಿವೆಂ ಜಾಲೆಂ. “ತಾಚಿ ಚಾಕ್ರಿ ಕರುಂಕ್ ಕೊಣೀ ಮೆಳಶಿಂ ನಾಂತ್‍ಗೀ?”

“ಮ್ಹಜ್ಯಾ ಸಮ್ಜಣೆ ಪರ್ಮಾಣೆಂ, ತಸಲಿ ಚಾಕ್ರಿ ಕರುಂಕ್ ಆನಿ ತೊ ರೋಗ್ ವಿಸ್ತಾರಿನಾಸೊ ಆಡಾಂವ್ಕ್ ತಾಂಕ್ ಆಸ್‍ಲ್ಲಿ, ಎಕ್ಲಿಚ್ ಆಸಾ…”

“ಕೋಣ್?”

“ಮಾಫ್ ಕರಿಜಾಯ್ ಹುಜೂರ್! ಪುಣ್ ತಿ…”

“ಕೋಣ್?”

“ತಿ…” ಹಕೀಮನ್ ಆಂಯ್ಡೊ ಘೊಟ್ಲೊ: “ತಿ, ಆಸ್ಮಾ ಬೀಬಿ.”

“ತಿ ಜಾಲ್ಯಾರ್ ಬರೆಂಚ್ ಜಾಲೆಂ. ಆಮ್ಚೆ ಖಾತಿರ್ ಇಲ್ಲೆಂ ಕಾಮ್ ಕರುಂದಿ. ತಿಕಾ ಆಮ್ಚೆ ಥಾವ್ನ್ ಆಪಂವ್ಕ್ ಲಾಯ್ ಆನಿ ಸರ್ದಾರ್ ಸಿಮಾಂವ್ಚಿ ಜತನ್ ಘೆವ್ನ್ ಚಿಕಿತ್ಸಾ ಕರ್ಚಿ ವ್ಯವಸ್ಥಾ ಕರಯ್.”

ತಶೆಂ ತೆಂ ಘಡೊನ್ ಗೆಲೆಂ. ಆಸ್ಮಾಬಿನ್ ಯೇವ್ನ್ ಸರ್ದಾರ್ ಸಿಮಾಂವ್ಚಿ ಪರೀಕ್ಷಾ ಕೆಲಿ. ತಾಕಾ ತಾಪ್ ಯೆತಾಲೊ. ತಾಚ್ಯಾ ಗೊಮ್ಟ್ಯಾಚೆರ್, ಹರ್ದ್ಯಾಚೆರ್ ಆನಿ ಖಾಖಿಯೆಂತ್ ರುಪ್ಯಾ ತೆದಿಂ ತಾಂಬ್ಡಿಂ ಖತಾಂ ಉದೆಲ್ಲಿಂ. ಚಿಕಿತ್ಸಾ ತುರ್ತಾನ್ ಆರಂಭ್ ಕರ್ಚಿ ಗರ್ಜ್ ಆಸ್‍ಲ್ಲಿ. ಲಾಗಿಂ ಕೊಣ್‍ಯೀ ನಾತ್‍ಲ್ಲೆಂ.

ಸರ್ದಾರ್ ಸಿಮಾಂವ್ ಕಷ್ಟಾಂನಿ ಉಲಯ್ಲೊ:

“ಹಿ ಮ್ಹಜಿ ನಿಮಾಣಿ ಪಿಡಾ ಜಾವ್ಯೆತ್..?”

“ಭಿಯೆನಾಕಾ ಬೇಟಾ. ತುಕಾ ಬರೊ ಕರುಂಕ್ ಹಾಂವ್ ಪ್ರಯತ್ನ್ ಕರ್ತಾಂ.”

“ಬೀಬೀ…”

“ಸರ್ದಾರ್ ಬೇಟಾ..?”

“ಹಾಂವ್ ಮೊರನ್ ಜಾಲ್ಯಾರ್ – ಮ್ಹಜ್ಯಾ ಆಂಗಾರ್ ಏಕ್ ತಾಯಿತ್ ಆಸಾ… ತಿ ತುವೆಂ ಕಶೆಂ ಪುಣೀ, ಬಂಟ್ವಾಳ್ಚ್ಯಾ ಆಗ್ನೆಸ್ ಸಿಸಿಲಿಯಾ ಕುಂವರ್ನಿಕ್ ಪಾವಿತ್ ಕರಿಜಾಯ್…”

“ಭಿಯೆನಾಕಾ ಬೇಟಾ…” ಆಸ್ಮಾಬಿಚೆ ದೊಳೆ ಭಿಜ್ಲೆ. “ತುಂ ಬರೊ ಜಾತಲೊಯ್, ಆನಿ ತುಜ್ಯಾಚ್ ಹಾತಾಂನಿ ತಿ ತುಂ ತಿಕಾ ದಿತಲೊಯ್!”

ಸರ್ದಾರ್ ಸಿಮಾಂವ್ಕ್ ಬರೊ ಕರ್ಚ್ಯಾ ಖಾತಿರ್, ಆನಿ ಮಾರಿ ರೋಗ್ ವಿಸ್ತಾರಾನಾ ಜಾಂವ್ಚ್ಯಾಕ್ ಜಾಯ್ ತೆಂ ಸರ್ವ್ ಕರಿಜಾಯ್ ಮ್ಹಣ್ ಆಸ್ಮಾಬಿಕ್ ಹುಕುಮ್ ಆನಿ ಸರ್ವ್ ಸ್ವಾತಂತ್ರ್ಯ್ ಟಿಪ್ಪು ಸುಲ್ತಾನಾನ್ ದಿಲ್ಲೆಂ – ತಾಂಚೊ ತಿಣೆಂ ಬರೊ ಪ್ರಯೋಗ್ ಕೆಲೊ.

ಹೆರ್ ಸಾಂಕ್ರಾಮಿಕ್ ಆನಿ ಫೆಸ್ತ್ ಪಿಡಾ ಲಾಗ್‍ಲ್ಲ್ಯಾ ಪಿಡೇಸ್ತಾಂಕ್ ದವರ್ಚ್ಯಾ ಬಹಿಷ್ಕøತ್ ವಠಾರಾಕ್ ಸರ್ದಾರ್ ಸಿಮಾಂವ್ಕ್ ವ್ಹರ್ನ್ ದವರ್ಚೆಪರಿಂ ನಾತ್‍ಲ್ಲೆಂ. ತಾಚ್ಯಾಚ್ ಬಿಡಾರಾಂತ್ – ರಾವ್ಳೆರಾಕ್ ಲಾಗಿಂ ತೆಂ ಜಾಲ್ಲ್ಯಾ ವರ್ವಿಂ – ಸೊಡ್ಚೆಂಯೀ ಸಾಧ್ಯ್ ನಾತ್‍ಲ್ಲೆಂ. ದೆಕುನ್ ಆಸ್ಮಾಬಿನ್ ತಾಕಾ – ಬಿಡಾರ್ ಆನಿ ವಾರೆಂ, ಫಾವೊ ತ್ಯಾ ಧುಂವ್ರಾಂನಿ ಆಲ್ಯಾ-ಪಾಲ್ಯಾಂನಿ ನಿತ್ಳಾವ್ನ್ – ಆಪ್ಲೆಂಚ್ ಬಿಡಾರ್ ಆಸ್‍ಲ್ಲ್ಯಾ ಆವರಾಕ್ ವ್ಹರಯ್ಲೊ.

ತ್ಯಾ ವಠಾರಾಂತ್, ಹಿತ್ಲಾಚ್ಯಾ ಕೊನ್ಶ್ಯಾಕ್ ವ್ಹೊರೆ ವಿಂಗಡ್ ಆನಿ ಬಂದೋಬಸ್ತೆಚೆಂ ಲ್ಹಾನ್ ಏಕ್ ಖಾಲಿ ಬಿಡಾರ್ ಆಸ್‍ಲ್ಲೆಂ. ತೆಂಚ್ ತಿಣೆಂ ಸರ್ದಾರ್ ಸಿಮಾಂವ್ಚೆಂ ನಿರಾಳೆಂ ಚಿಕಿತ್ಸಾಲಯ್ ಕೆಲೆಂ. ಬಾದಶಹಾಕ್ ತಿಳ್ಸುನ್ ಫುಡ್ಲೆ ತೀನ್ ಹಫ್ತೆ ಕೊಣೆಂಚ್ ವಠಾರಾಚ್ಯಾ ಭಿತರ್ ವಾ ಭಿತರ್ ಥಾವ್ನ್ ಭಯ್ರ್ ವಚನಾಶೆಂ ಆಡಾಂವ್ಕ್ ಪಹರೊ ದವರಯ್ಲೊ.

ಸಾತ್ವ್ಯಾ ದಿಸಾ, ಸರ್ದಾರ್ ಸಿಮಾಂವ್ ಜೀವ್ ಆಸಾ ವಾ ನಾ ಮ್ಹಳ್ಳೆಂ ಪಳೆಂವ್ಕ್ ರಾವ್ಳೆರಾಚ್ಯಾ ಹಕೀಮಾನ್ ಮಾತ್ರ್ ಯೆವ್ಯೆತ್ ಮ್ಹಣ್ ಥಾರಾಯ್ಲೆಂ.

ಆಗ್ನೆಸ್ ಕುಂವರ್ನಿಕ್ ಪಿಡೆಚೊ ಆನಿ ಚಾಕ್ರೆಚೊ ಪರಿಪೂರ್ಣ್ ವಿವರ್ ತಿಣೆಂ ದಿಲೊ.

“ಸರ್ವ್ ಆಸಾ ಚಾಕ್ರೆಂತ್ ಆನಿ ಚತ್ರಾಯೆಂತ್ ಬೇಟೀ…”

“ಹಾಂವ್ ಜಾಣಾಂ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. ತಿಕಾಯೀ ಪಿಡೆ-ಶಿಡೆಚಿ ಆನಿ ವಕ್ತಾಂಚಿ ಮಾಹೆತ್ ಆಸ್‍ಲ್ಲಿ. “ಮ್ಹಾಕಾ ವಕ್ತಾಂಚಿ, ವೆಳಾಚಿ ಆನಿ ಹೆರ್ ನಿಯಮಾಂಚಿ ಪಟ್ಟಿ ದೀ. ಉರ್‌ಲ್ಲೆಂ ಹಾಂವ್ ಕರ್ತಾಂ.”

“ಪುಣ್ ಬೆಟೀ, ತಿ ಭಿರಾಂಕುಳ್ ವೊಸ್ಯಾಚಿ ಪಿಡಾ!”

“ವ್ಹಡ್ ನಹಿಂ. ತ್ಯಾ ಖಾತಿರ್ ಮ್ಹಾಕಾಯೀ ಪ್ರತಿಬಂಧಕ್ ವಕ್ತಾಂ ದೀ. ತಿಂ ಉಪ್ಕಾರ್ನಾತ್ಲ್ಯಾರ್ ಕಾಂಯ್ ಪರ್ವಾ ನಾ. ತಾಚಿ ನಿಮಾಣಿ ಚಾಕ್ರಿ ಪುಣೀ ಕೆಲ್ಲೊ ಸಂತೊಸ್ ಮ್ಹಾಕಾ ಆಸೊಂ.”

ಆಸ್ಮಾಬಿನ್ ಫುಡೆಂ ತರ್ಕ್ ಕರುಂಕ್ ನಾ. ತ್ಯಾ ವರ್ವಿಂ ಪುಣೀ ತಾಂಕಾಂ ಫುಡ್ಲ್ಯಾ ತೀನ್ ಹಫ್ತ್ಯಾಂಕ್ ಭಾಯ್ಲಿ ಕರಂದಾಯ್ ಆಸಾಶಿ ನಾ ಮ್ಹಣ್ ತೀಯೀ ಜಾಣಾಂಸ್‍ಲ್ಲಿ. ತ್ಯಾ ಶಿವಾಯ್, ಆಪ್ಲ್ಯಾ ವಕ್ತಾಂ ವರ್ವಿಂ ಆನಿ ಆಗ್ನೆಸ್ ಕುಂವರ್ನಿಚ್ಯಾ ಚಾಕ್ರೆ ವರ್ವಿಂ ಸರ್ದಾರ್ ಸಿಮಾಂವ್ ವಾಂಚತ್ ಜಾಲ್ಯಾರ್, ಆಗ್ನೆಸ್ ಕುಂವರ್ನಿಕ್ ಕಸಲ್ಯಾ ಪುಣೀ ಧಯ್ರಾಧಿಕ್ ಉಪಾಯಾನ್ ಬಚಾವ್ ಕೆಲ್ಯಾ ಶಿವಾಯ್ ತೊ ರಾವಸೊ ನಾ ಮ್ಹಳ್ಳೆಂಯೀ ತಿಕಾ ಭೊಗ್ಲೆಂ.

ಎಕಾದಾವೆಳಾ ಸರ್ದಾರ್ ಸಿಮಾಂವ್ ತ್ಯಾ ಪಿಡೆಕ್ ಬಲಿ ಜಾಯ್ತ್ ಜಾಲ್ಯಾರ್, ತ್ಯಾಚ್ ಖಂತಿನ್ ಆಗ್ನೆಸ್ ಕುಂವರ್ನಿಚೆಂ ಸ್ಥೈರ್ಯ್ ಚುಕ್ತೆಲೆಂ, ವಾಂಚಜಾಯ್ ಮ್ಹಳ್ಳಿ ಆಶಾ ತಿಚೆ ಥಾವ್ನ್ ಪಯ್ಸ್ ವೆತೆಲಿ, ಆನಿ ತಿಯೀ ತ್ಯಾಚ್ ಭಿರಾಂಕುಳ್ ರೊಗಾಚೊ ವೊಸೊ ಘೆವ್ನ್ ಅಂತರ್ತೆಲಿ ಮ್ಹಣೊನ್‍ಯೀ ಖಂತಿನ್ ತಿಣೆಂ ಚಿಂತ್ಲೆಂ… ಟಿಪ್ಪುಚ್ಯಾ ಹಾತಾಂತ್ ಸಾಂಪಡ್ಚ್ಯಾ ಪ್ರಾಸ್ ಆಶೆಂ ಜಾಂವ್ಚೆಂಚ್ ಬರೆಂ ಮ್ಹಣ್ ಮತಿಂತ್ ತಿಣೆಂ ತರ್ಕ್ ಕೆಲೆಂ.

ಪರ್ತ್ಯಾನ್ ವಯ್ಜಿಣ್ ತಿ ಜಾಲಿ.

“ಹಿ ಪಿಡಾ ಕಿತ್ಲಿ ಭಿರಾಂಕುಳ್, ಆನಿ ತಿಚಿ ಚಾಕ್ರಿ ಕಿತ್ಲ್ಯಾ ಕಷ್ಟಾಂಚಿ ಮ್ಹಳ್ಳೆಂ ತುಂ ಜಾಣಾಂಯ್‍ಮೂ ಬೇಟೀ?”

“ಸಾಧಾರ್ಣ್ ಜಾಣಾಂ, ಪುಣ್ ಪರ್ವಾ ನಾ – ಹಾಂವ್ ಭಿಯೆನಾ!”

“ಜಾಯ್ತ್ ತರ್. ತಾಚೊ ಜೀವ್ ಆಮಿ ವಾಂಚಯಾಂ.”

ತಶೆಂ ತ್ಯೊ ದೊಗೀ ಸ್ತ್ರೀಯೊ – ಎಕ್ಲಿ ಪ್ರಾಯ್ವಂತ್ ಆನಿ ಆನ್ಯೇಕ್ಲಿ ಯುವತಿ – ಮಾರಿ ರೋಗಾ ಕಡೆನ್ ಝುಜೊಂಕ್ ದೆಂವ್ಲ್ಯೊ.

ಆಗ್ನೆಸ್ ಕುಂವರ್ನಿನ್ ಆದಿಂ ಏಕ್ ಪಾವ್ಟಿಂ – ಬಂಟ್ವಾಳಾಂತ್ ಗ್ರೆಗೊರ್ ತೆಲ್ಲಿಸ್ ಮ್ಹಳ್ಳ್ಯಾ ನಾಂವಾ ಖಾಲ್ ಘಾಯೆವ್ನ್ ಆನಿ ಮತ್ ಚುಕೊನ್ ಆಸ್‍ಲ್ಲ್ಯಾ ವೆಳಾರ್ ತಾಚಿ ಚಾಕ್ರಿ ಕೆಲ್ಲಿ. ಪುಣ್ ಆತಾಂ ತಿಣೆಂ ಕರ್ಚಿ ಚಾಕ್ರಿ ಚಡ್ ಮಹತ್ವಾಚಿ ಆನಿ ಚಡ್ ಕಷ್ಟಾಂಚಿ ಜಾವ್ನಾಸ್‍ಲ್ಲಿ. ಕಿತ್ಯಾಕ್, ಆತಾಂ ತಾಚೆ ಖಾತಿರ್ ತಿಣೆಂ ಝುಜ್ಚೊ ದುಸ್ಮಾನ್ ಚಡ್ ಭಿರಾಂಕುಳ್ ಜಾವ್ನಾಸ್‍ಲ್ಲೊ.

ತಾಪಾನ್ ಅರ್ಧ್ಯಾ ಮತಿರ್ ಆಸ್‍ಲ್ಲ್ಯಾ ಸರ್ದಾರ್ ಸಿಮಾಂವ್ಕ್ ಆಸ್ಮಾಬಿನ್ ನಿದಾಯ್ಲೊ. ತಾಕಾ ಕೆದಾಳಾಯೀ ಊಬ್ ವಸ್ತ್ರಾಂನಿ ಗುಟ್ಲಾವ್ನ್ ಆಂಗಾಕ್ ವಾರೆಂ ಲಾಗನಾಶೆಂ ಚತ್ರಾಯ್ ಘೆಜಾಯ್ ಮ್ಹಣ್ ತಿಣೆಂ ಜಾಗ್ವಣ್ ದಿಲಿ. ದೋನ್ ವೊರಾಂಕ್ ಏಕ್ ಪಾವ್ಟಿಂ ಖತಾಂಕ್ ಮುಲಾಮ್ ಪುಸುಂಕ್, ದೋನ್ ವೊರಾಂಕ್ ಏಕ್ ಪಾವ್ಟಿಂ ವಕ್ತಾಚೊ ಕಸಾಯ್, ಅರ್ಧ್ಯಾ ವೊರಾಕ್ ಏಕ್ ಪಾವ್ಟಿಂ ತಾನೆಚೊ ಕಸಾಯ್ ಆನಿ ಗಂಧಕಾಚೊ ಸೊರೊ ಖಳನಾಸ್ತಾನಾ ದೀಂವ್ಕ್ ಆಸ್‍ಲ್ಲೆಂಚ್ ವರ್ತೆಂ ಕಾಮ್ ಶಿವಾಯ್, ಖಟ್ಲ್ಯಾ ಪಂದಾಕ್ ಗಂಧಾಚ್ಯಾ ಲಾಂಕ್ಡಾಂಚೊ ಉಜೊ ಆನಿ ಧುಂವೊರ್ ಖಳನಾಸ್ತಾನಾ ಆಸಜಾಯ್ ಆಸ್‍ಲ್ಲೊ. ಪಿಡೆಸ್ತಾಕ್ ಘಡ್ಯೆ ಘಡ್ಯೆ ಪೊಲ್ಟಿಸಾಂ ಬದ್ಲುಂಕ್ ಆಸ್‍ಲ್ಲಿಂ.

ಚಿಕ್ಕೆ ಮತಿರ್ ಆಸ್‍ಲ್ಲ್ಯಾ ವೆಳಾರ್ ಜಾಲ್ಯಾರೀ ಸರ್ದಾರ್ ಸಿಮಾಂವ್ಕ್ ಉಲಂವ್ಕ್ ವಾ ಹಾಲೊಂಕ್ ಪರ್ಯಾಂತ್ ಜಾಯ್ನಾತ್‍ಲ್ಲೆಂ. ಖತಾಂಕ್ – ತಿಂ ಸುಜೊನ್, ವ್ಹಾಂವೊನ್ ರುಂವಾಂ ಜಾಯ್ನಾಶೆಂ – ವಕತ್ ಪುಸ್ತಾನಾ ತಾಕಾ ಕಠಿಣ್ ದೂಕ್ ಭೊಗ್ತಾಲಿ. ತ್ಯಾ ದುಕಿನ್ ಮತ್ ಚುಕ್ತಾಲಿ ಆನಿ ಹೆರ್ ವೆಳಾರ್ ಸಪ್ಣಾಂನಿ ಭರ್‌ಲ್ಲಿ ಭೃಮಿದ್ ಯೆತಾಲಿ. ತ್ಯಾ ಪಿಡೆನ್ ಜೀವ್ ವಚೊಂಕ್ ಕಸಲೆಂಯೀ ಚಿಲ್ಲರ್ ಕಾರಣ್ ಪಾವ್ತಾಲೆಂ. ಅಸೊ ಪಾಂಚ್ ದೀಸ್, ಹ್ಯಾ ಆನಿ ತ್ಯಾ ಸಂಸಾರಾ ಮಧೆಂ ದುಬಾವಾಚ್ಯಾ ಅಸ್ತಿತ್ವಾಂತ್ ತೊ ಉರ್ಲೊ.

ತೆ ಪಾಂಚ್ ದೀಸ್, ಆಗ್ನೆಸ್ ಕುಂವರ್ನಿಕ್ ಅಕ್ಲಾಸಾಚಿಂ ಪಾಂಚ್ ವರ್ಸಾಂಶಿಂ ಜಾಲಿಂ. ತ್ಯಾ ಪಾಂಚ್ ಸಗ್ಳ್ಯಾ ದಿಸಾಂನಿ ದೊಳ್ಯಾಕ್ ದೊಳೊ ತಿಣೆಂ ಲಾಂವ್ಕ್ ನಾ. ಗಂಧಕಾಚ್ಯಾ ಕಸಾಯಾ ಬಗಾರ್ ಆನಿ ತಾಪಯಿಲ್ಲ್ಯಾ ಉದ್ಕಾ ಶಿವಾಯ್ ದುಸ್ರೊ ಆಹಾರ್ ತಿಣೆಂ ಘೆಂವ್ಕ್ ನಾ. ಆಸ್ಮಾಬಿಕ್‍ಯೀ ತಿಚೆಂ ಭ್ಯೆಂ ದಿಸೊಂಕ್ ಲಾಗ್ಲೆಂ.

ಪಾಂಚ್ವ್ಯಾ ದಿಸಾ, ರುಂವಾಂ ಜಾಯ್ನಾಸ್ತಾಂ ಆಂಗಾಂತ್ ಉರ್‍ಲ್ಲೆಂ ನಂಜಿ ರಗತ್ ಸಗ್ಳೆಂ ಘಾಮ್ ಜಾವ್ನ್ ಭಾಯ್ರ್ ಗೆಲ್ಲಿಂ ಖುಣಾಂ ದಿಸೊಂಕ್ ಲಾಗ್ಲಿಂ. ಸರ್ದಾರ್ ಸಿಮಾಂವ್ಕ್ ಸ್ವಾಭಾವಿಕ್ ಆನಿ ವಿಶೆವಾಭರಿತ್ ನೀದ್ ಆಯ್ಲಿ. ತೀನ್ ವೊರಾಂಕ್ ಏಕ್ ಪಾವ್ಟಿಂ ಭೆಟ್ ದೀವ್ನ್ ವೆಚ್ಯಾ ಆಸ್ಮಾಬಿಕ್ ಹೆಂ ಪಳೆವ್ನ್ ವ್ಹಡ್ ಸಂತೊಸ್ ಜಾಲೊ.

“ತುಜ್ಯಾ ಸೆವೆ ಚಾಕ್ರೆ ವರ್ವಿಂ ಬೇಟೀ” ಮ್ಹಣಾಲಿ ತಿ. “ತುವೆಂ ಏಕ್ ಅಜ್ಯಾಪ್ ಕೆಲೆಂಯ್.”

“ಕಿತೆಂ ಕೆಲೆಂ?” ವಿಚಾರ್ಲೆಂ ಆಗ್ನೆಸ್ ಕುಂವರ್ನಿನ್, ಪುರಾಸಣೆನ್.

“ತುವೆಂ ತಾಚೊ ಜೀವ್ ವಾಂಚಯ್ಲೊಯ್ – ಪಾಟಿಂ ತುವೆಂ ಹಾಡ್ಲೊಯ್!”

ಆಗ್ನೆಸ್ ಕುಂವರ್ನಿನ್ ಜವಾಬ್ ದೀಂವ್ಕ್ ನಾ. ದೆವಾಕ್ ತಿಣೆಂ ಮತಿ ಭಿತರ್ ಅರ್ಗಾಂ ದಿಲಿಂ. ಕಸಲೆಂಯೀ ವಾಜ್ಭಿ ಕಾರಣ್ ನಾಸ್ತಾಂ ತರೀ ಆಪುಣ್ ಭಾಯ್ರ್ ಸರೊನ್ ಪಟ್ಟಣಾಕ್ ಆಯಿಲ್ಲೆಂ ವ್ಯರ್ಥ್ ಜಾಂವ್ಕ್ ನಾ ಮ್ಹಣ್ ತಿಕಾ ಭೊಗ್ಲೆಂ. ಖಟ್ಲ್ಯಾ ಬಗ್ಲೆನ್ ದಿಂಬಿ ಘಾಲ್ನ್ ಆಸ್‍ಲ್ಲೆಪರಿಂಚ್ ತಕ್ಲಿ ತಿಣೆಂ ಬಾಗಾಯ್ಲಿ ಆನಿ ಖಟ್ಲ್ಯಾರ್ ತೆಂಕ್ಲಿ ಆನಿ ತಿ ಸುಸ್ಕಾರ್ಲಿ. ಥೊಡ್ಯಾಚ್ ವೆಳಾನ್ ತಿಚೆ ಸುಸ್ಕಾರ್ ರಾವ್ಲೆ – ಥಂಯ್ಚ್ ತಿಕಾ ನೀದ್ ಪಡ್ಲಿ.

ಪಾಂಚ್ ದೀಸ್ ಥಾವ್ನ್ ನೀದ್ ತಿಕಾ ನಾತ್‍ಲ್ಲಿ. ಸರ್ದಾರ್ ಸಿಮಾಂವ್ ಅಪಾಯಾಂತ್ಲೊ ಮುಕ್ತ್ ಜಾಲೊ ಮ್ಹಳ್ಳೆಂ ಆಯ್ಕೊನ್, ಅರ್ನುನ್ ಧರ್‌ಲ್ಲೆಂ ಸಂಯಮ್ ತಿಚೆಂ ಚುಕ್ಲೆಂ. ಪ್ರಕೃತೆಚ್ಯಾ ನಿಯಮಾಂ ಪ್ರಕಾರ್, ನಿದೆಕ್ ಆಶೆವ್ನ್ ಆಸ್‍ಲ್ಲಿ ತಿಚಿ ಕೂಡ್ ವಿಶೆವ್ ಘೆಂವ್ಕ್ ಲಾಗ್ಲಿ.

ಆಸ್ಮಾಬಿಕ್ ತೆಂ ಸಮ್ಜಲೆಂ. ತಿಚೆಂ ಕಾಳಿಜ್ ಲಾಸ್ಲೆಂ. ಹ್ಯಾ ಕ್ರಿಸ್ತಾಂವ್ ಚಲಿಯೆನ್ ದಾಕಯಿಲ್ಲ್ಯಾ ಮೊಗಾಚ್ಯಾ ಮಹಿಮಾಂನಿ ತಿಕಾ ವಿಸ್ಮಿತ್ ಕೆಲ್ಲೆಂ. ಆಗ್ನೆಸ್ ಕುಂವರ್ನಿಕ್ ತಶಿಚ್ ಸೊಡುನ್ ತಿ ಭಾಯ್ರ್ ಗೆಲಿ.

ಆಸ್ಮಾಬಿನ್ ಆಗ್ನೆಸ್ ಕುಂವರ್ನಿ ಕಡೆನ್ ಉಲಯಿಲ್ಲಿಂ ಉತ್ರಾಂ ಸರ್ದಾರ್ ಸಿಮಾಂವ್ನ್ ನಿದ್‍ಲ್ಲೆ ಕಡೆನ್ ಥಾವ್ನ್ ಆಯ್ಕಲಿಂ. ತೆದಾಳಾ ತಾಕಾ ಜಾಗ್ ಜಾಲ್ಲಿ ಮಾತ್ರ್. ಪುಣ್ ತಾಣೆಂ ದೊಳೆ ಉಗ್ತೆ ಕರುಂಕ್ ನಾತ್‍ಲ್ಲೆ. ತಸೊಚ್ ಥೊಡೊ ವೇಳ್ ತೊ ರಾವ್ಲೊ. ಉಪ್ರಾಂತ್ ಸವ್ಕಾಸ್ ದೊಳೆ ಉಗ್ತೆ ಕೆಲೆ. ಆಪುಣ್ ಸಪ್ಣಾಂತ್ ಆಸಾಂ ವಾ ಜಾಗ್ಣ್ಯಾಂತ್ ಮ್ಹಳ್ಳೆಂ ಪಾರ್ಕುಂಚ್ಯಾ ಖಾತಿರ್, ಹಾತ್ ವ್ಹಳೂ ತಾಣೆಂ ಮುಖಾರ್ ವ್ಹೆಲೊ, ಆನಿ ಬಗ್ಲೆನ್ ಆಸ್‍ಲ್ಲ್ಯಾ ತಕ್ಲೆರ್ ದವರ್ಲೊ.

ತಿ ತಕ್ಲಿ ಚಿಕ್ಕೆ ಹಾಲ್ಲಿ. ಥೊಡ್ಯಾ ವೆಳಾನ್ ನೀಟ್ ಜಾಲಿ.

ತಾಂಚೆ ದೊಳೆ ಭೆಟ್ಲೆ.

ಸರ್ದಾರ್ ಸಿಮಾಂವ್ ಆಪ್ಲ್ಯಾಚ್ ದೊಳ್ಯಾಂಕ್ ಪಾತ್ಯೆನಾ ಜಾಲೊ.

“ಆ… ಆಗ್ನೆಸ್!” ಉಸ್ವಾಸ್ಲೊ ತೊ. “ತುಂ… ತುಂ ಹಾಂಗಾಸರ್!”

“ವ್ಹಯ್ ಸರ್ದಾರಾ” ತಿ ಅಂಬುರ್ಕಿ ಹಾಸ್ಲಿ. “ತುಂ ಆಸ್‍ಲ್ಲೆ ಕಡೆನ್ ನಹಿಂ ಜಾಲ್ಯಾರ್ ಆನಿ ಖಂಯ್ಸರ್?” ಮ್ಹಣ್ತಾನಾ ಆಸ್ಮಾಬಿ ಭಿತರ್ ಸರ್ಲಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel