ಸರ್ದಾರಾಚೆಂ ಸನ್ನಿಧಾನ್ – 13: ಸಾಹಸಾಚೆಂ ಸೂಚನ್

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 13
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 13: ಸಾಹಸಾಚೆಂ ಸೂಚನ್

ಪಟ್ಟಣಾಂತ್ಲ್ಯಾ ಖಾನಾವಳಿಂತ್ ಘಡ್‍ಲ್ಲ್ಯಾ ಘಟನಾಚಿ ಖಬರ್ ಟಿಪ್ಪು ಸುಲ್ತಾನಾಚ್ಯಾ ಕಾನಾಂತ್ ಪಡ್‍ಲ್ಲಿ ವಾ ನಾ ಮ್ಹಳ್ಳಿ ಖಬರ್ ಸರ್ದಾರ್ ಸಿಮಾಂವ್ಕ್ ಮೆಳೊಂಕ್ ನಾ.

ಪಯ್ಲೆಂಚ್ಯಾ ಯೋಜನಾಪರಿಂಚ್, ಫುಲಾ ಸಾರ್ಕೆಂ ಚಾಂದ್ಣೆಂ ಆಸ್‍ಲ್ಲ್ಯಾ ತ್ಯಾ ಸನ್ವಾರಾ ಫಾಂತ್ಯಾಚ್ಯಾ ಚಾರ್ ವೊರಾಂಚೆರ್, ಧೊಲಿಂಚ್ಯಾ ಆವಾಜಾಕ್ ಆನಿ ತುರ್ಬೆಂತಾಂಚ್ಯಾ ಫುಂಕ್ಣ್ಯಾನ್, ಕೊಡಗಾಚ್ಯಾ ಲಡಾಯೆಕ್ ನಮಿಯಾರ್‌ಲ್ಲಿ ತಿ ಹಳ್ತಾಚಿ ಫವ್ಜ್, ಪಟ್ಟಣಾ ಥಾವ್ನ್ ಭಾಯ್ರ್ ಸರ್ಲಿ.

ತ್ಯಾ ರಿಸಾಲಾಂಚೆ ತೀನ್ ವಾಂಟೆ ಕೆಲ್ಲೆ. ಎಕಾ ಭಾಗಾಕ್ ಭಕ್ಷಿ ಆಯೂಬ್ ಪೋಕ್ರೆ ಆನಿ ಆನ್ಯೇಕಾಕ್ ರಾಯ್ ಕುಂವರ್ ಸೆಲೀಂ ಖಾನ್ ಅಧಿಕಾರಾರ್ ಆಸ್ಲ್ಯಾರ್, ತಿಸ್ರ್ಯಾ ಪ್ರಮುಖ್ ಭಾಗಾಂತ್ ಬಾದಶಹಾಚ್ ಆಸೊನ್ ತಾಚಿ ಮೇಲ್-ಖಬಡ್ದಾರಿ ಸರ್ದಾರ್ ಸಿಮಾಂವ್ಚ್ಯಾ ಹಾತಾಂತ್ ಆಸ್‍ಲ್ಲ್ಯಾ ವರ್ವಿಂ, ಬಾದಶಹಾಚ್ಯಾ ಭದ್ರತೆಚಿ ಜವಾಬ್ದಾರಿಯೀ ತಾಚಿಚ್ ಜಾವ್ನಾಸ್‍ಲ್ಲಿ.

ಬೇಹುಗಾರಾಂಕ್ ಮುಖಾರ್ ಧಾಡ್ನ್ ಪರಿಸ್ಥಿತಿ ಸಮ್ಜೊಂಚಿ ಮಾಂಡಾವಳ್ ಪಯ್ಲಿಚ್ ಕೆಲ್ಲ್ಯಾನ್, ಪಯ್ಲೆಂಚ್ಯಾ ಅವ್ಧೆಂತ್ ಸಗ್ಳಿ ಫವ್ಜ್ ಮಧೆಂ ಖಂಯೀ ರಾವನಾಸ್ತಾನಾ ಸಾತ್ ವೊರಾಂಚೆಂ ಸಂಚಲನ್ ಕರ್ನ್, ಇಕ್ರಾ ವೊರಾಂಚೆರ್ ಭೀಮದೇವ್ ದೊಂಗ್ರೆ ಬಗ್ಲೆಚ್ಯಾ ಫಾಲ್ಕ್ಯಾಂತ್ ಆಹಾರಾ ಖಾತಿರ್ ಆನಿ ವಿಶೆವಾ ಖಾತಿರ್ ರಾವ್ಲಿ.

ಥಂಯ್ಸರ್ ಮುಖೆಲ್ಯಾಂನಿ ಆನಿ ತಾಂಚ್ಯಾ ಹಿಶೆದಾರಾಂನಿ ಟಿಪ್ಪು ಸುಲ್ತಾನಾಚ್ಯಾ ಪಿರ್ಜೆಂತ್ಪಣಾ ಖಾಲ್ ಝುಂತ್ ಚಲಯ್ಲೊ. ತೆದೊಳ್ ಪರ್ಯಾಂತ್ ಕಸಲಿಯೀ ಸಮಸ್ಯಾ ಆಸ್‍ಲ್ಲ್ಯಾಪರಿಂ ದಿಸೊಂಕ್ ನಾತ್‍ಲ್ಲ್ಯಾನ್, ಆಯ್ತಾರಾಚ್ಯಾ ರಾತಿ ಭಿತರ್ ನಿಯೋಜಿತ್ ಪ್ರದೇಶಾಚೆರ್ ಆಕ್ರಮಣ್ ಚಲಯೆತ್ ಆನಿ ಫುಡ್ಲ್ಯಾ ದೋನ್ ದಿಸಾಂ ಭಿತರ್ ಕೊಡಗಾಚೊ ತೊ ತಿತ್ಲೊ ವಾಂಟೊ ಸ್ವಾಧೀನ್ ಕರ್ನ್ ಘೆವ್ಯೆತ್ ಮ್ಹಣ್ ಥೊಡ್ಯಾಂನಿ ಅಭಿಪ್ರಾಯ್ ಉಚಾರ್ಲಿ. ತಸಲಿ ಖಾಲ್ತಿ ಅಭಿಪ್ರಾಯ್ ಉಚಾರ್‌ಲ್ಲ್ಯಾಂ ಪಯ್ಕಿ ಷೇಕ್ ಆಲಿಯೀ ಎಕ್ಲೊ ಜಾವ್ನಾಸ್‍ಲ್ಲೊ. (ರಾತ್‍ಭರ್ ಶುಶ್ರೂಷಾ ಕರ್ನ್, ತ್ಯಾ ಬಾವ್ಡ್ಯಾನ್ ಆದ್ಲ್ಯಾ ದಿಸಾಚ್ಯಾ ಮಾರಾಚೆಂ ಖತ್ ಲಿಪಯಿಲ್ಲೆಂ. ತಾಚೆ ವೋಂಟ್ ಚಿಕ್ಕೆ ಸುಜೊನ್ ಆಸ್‍ಲ್ಲೆ ಮ್ಹಣ್ ಹೆರಾಂಚ್ಯಾ ಲಕ್ಷೆಕ್ ವಚೊಂಕ್ ನಾ).

“ಬರೆಂಚ್” ಮ್ಹಣಾಲೊ ಬಾದಶಹಾ. “ಕಿತ್ಲ್ಯಾ ವೆಗಿಂ ಆಮ್ಚೆಂ ಕಾಮ್ ಜಯ್ತೆವಂತ್ ಜಾಲ್ಲೆ ತಿತ್ಲೆಂ ಬರೆಂ. ಕಿತೆಂ ಮ್ಹಣ್ತಾಯ್, ಸರ್ದಾರ್ ಸಿಮಾಂವ್? ಎದೊಳ್ ತುಂ ಕಾಂಯ್ ಉಲಂವ್ಕ್ ನಾಂಯ್.”

“ಸದ್ದ್ಯಾಕ್ ಉಲಂವ್ಕ್ ಕಾಂಯ್ ವರ್ತೆಂ ನಾ, ಹುಜೂರ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆಮ್ಚೆ ಝುಜಾರಿ ಸುಸಜ್ಜಿತ್ ಆನಿ ಜಿಕ್ಚ್ಯಾ ಆತುರಾಯೆನ್ ಆನಿ ವಿಶ್ವಾಸಾನ್ ಆಸಾತ್. ಜಾಲ್ಯಾರೀ – ಪ್ರತ್ಯೇಕ್ ಜಾವ್ನ್ ಹ್ಯಾ ವೆಳಾರ್ – ಆಮಿ ಚತ್ರಾಯೆನ್ ಆಸಜಾಯ್.”

“ಹ್ಯಾ ವೆಳಾರ್ – ಕಿತ್ಯಾಕ್ ಪ್ರತ್ಯೇಕ್ ಜಾವ್ನ್?”

“ಖುದ್ ಬಾದಶಹಾಚ್ ಸಾಂಗಾತಾ ಆಸೊನ್ ಝುಜಾಕ್ ವೆತಾನಾ ಆಮ್ಚ್ಯಾ ರಿಸಾಲಾಂಚೊ ಸಂಖೊ ಚಡ್ ಆಸ್ತಾಲೊ, ಆನಿ ಆಮ್ಚ್ಯಾ ಝುಜಾ ಸಾಹೆತಿಚೆಂ ಪರಿಮಾಣ್ ವ್ಹಡ್ ಆಸ್ತಾಲೆಂ. ಹ್ಯಾ ಪಾವ್ಟಿಂ ತಶೆಂ ನಾ.”

“ತೊ ಕೊಡಗಾಚೊ ಬಡ್ವಾ, ಆಮ್ಚ್ಯಾ ಎಕಾ ಬೊಟಾಕ್‍ಯೀ ಸಮಾನ್ ಜಾಂವ್ಚೊ ನಾ” ಮ್ಹಣಾಲೊ ಟಿಪ್ಪು ಸುಲ್ತಾನ್. “ತಾಕಾ ಬೂದ್ ಶಿಕಂವ್ಕ್ ಕೆದಿ ವ್ಹಡ್ ಫವ್ಜ್ ಜಾಯ್ ಮ್ಹಣ್!”

“ತ್ಯಾ ಸಂಬಂಧಿಂ ತರ್ಕ್ ನಾ, ಹುಜೂರ್” ಸರ್ದಾರ್ ಸಿಮಾಂವ್ನ್ ಹಾಳ್ವಾಯೆನ್ ಜವಾಬ್ ದಿಲಿ. “ಹ್ಯಾ – ಹ್ಯಾ ಲಡಾಯೆಚೆಂ ಕಾರಣ್ ತಶೆಂ ಥಳ್ ದುಸ್ರೆಂಚ್: ಆಮ್ಚ್ಯಾ ಸವಾರಾಂಚ್ಯಾ ರಿಸಾಲಾಂನಿ ದರ್ಬಾರಾನ್ ಝುಜೊಂಕ್ ಸಹಜ್‍ಲ್ಲಿ ಉಗ್ತಾಡ್ ಸುವಾತ್ ವಾ ಮಯ್ದಾನಾಂ ಹಾಂಗಾಚ್ಯಾ ಪ್ರದೇಶಾಂತ್ ಉಣಿಂ – ರಾನಾಂ ಮೊಲಿಂ, ದೊಂಗೊರ್ ಫಾಲ್ಕಿಂ ಚಡ್.”

“ದೆಕುನ್?”

“ಅಸಲ್ಯಾ ಪ್ರದೇಶಾಂನಿ ಚುಕಾಮುಕಿಂ ಅವ್ಗಡಾಂ ಜಾಂವ್ಚೊ ಸಂಭವ್ ಚಡ್. ಫಕತ್ ಆಮಿಂಚ್ ಜಾಲ್ಯಾರ್ ಪರ್ವಾ ನಾತ್‍ಲ್ಲಿ. ಪುಣ್ ಬಾದಶಹಾಚೆಂ ಸನ್ನಿಧಾನ್ ಆಮ್ಚೆ ಮಧೆಂ ಆಸ್‍ಲ್ಲ್ಯಾನ್, ಆಮಿ ಚಡ್ ಚತ್ರಾಯೆನ್ ಆಸಜಾಯ್ ಮ್ಹಳ್ಳೆಂ ಹಾಂವೆಂ.”

“ಸಮ್ಜಲೆಂ” ಹಾಸ್ಲೊ ಟಿಪ್ಪು ಸುಲ್ತಾನ್. “ಪುಣ್ ಆಮ್ಚ್ಯಾ ಭದ್ರತೆಚಿ ಜವಾಬ್ದಾರಿ ತುಜ್ಯಾ ಆನಿ ಚಡಾವತ್ ತುಜ್ಯಾಚ್ ಕಂಪ್ಣೆಚ್ಯಾ ಹಾತಾಂತ್ ಆಸ್‍ಲ್ಲ್ಯಾನ್ ಆಮ್ಕಾಂ ಭಿರಾಂತ್ ನಾ.”

“ತೊ ಮಾನ್ ಆಮಿ ರಾಕ್ತೆಲ್ಯಾಂವ್ ಹುಜೂರ್!”

“ನಹಿಂ” ವ್ಹಳೂ ಪಾಟ್ಲ್ಯಾನ್, ಟಿಪ್ಪುಕ್ ಆಯ್ಕನಾತ್‍ಲ್ಲೆಪರಿಂ ಮ್ಹಣಾಲೊ ಷೇಕ್ ಆಲಿ. “ಧಯ್ರಾಕ್ ನಾಂವಾಡ್‍ಲ್ಲೊ ಸರ್ದಾರ್ ಖಂಯ್! ಆತಾಂ ಧಯ್ರ್ ಚುಕ್‍ಲ್ಲೆಪರಿಂ ಉಲಯ್ತಾ ಕಿತ್ಯಾಕ್‍ಗೀ ಮ್ಹಣ್ ಚಿಂತ್ಲೆಂ ಹಾಂವೆಂ!”

ಕಶೆಂಯೀ, ತ್ಯಾ ದಿಸಾಚೊ ಝುಂತ್ ಆಖೇರ್ ಜಾಲೊ.

ದೊನ್ಪಾರಾಂ ಉಪ್ರಾಂತ್ಲ್ಯಾ ದೋನ್ ವೊರಾಂಚೆರ್ ಫವ್ಜ್ ಪರ್ತ್ಯಾನ್ ಭಾಯ್ರ್ ಸರ್ಲಿ, ಆನಿ ಸಾಂಜೆಚ್ಯಾ ಸಾತ್ ವೊರಾಂಚೆರ್ ಕೊಡಗಾಚ್ಯಾ ಗಡಿ ಥಾವ್ನ್ ಫಕತ್ ಧಾ ಮಯ್ಲಾಂ ಪಯ್ಸ್ ಪಾವೊನ್ ರಾವ್ಲಿ.

ಥಂಯ್ಸರ್ ಥೊಡೊ ವಿಶೆವ್ ಘೆವ್ನ್, ಫುಡ್ಲಿ ತಯಾರಾಯ್ ಜಾಲಿ. ಆಯ್ತಾರಾಚ್ಯಾ ಫಾಂತ್ಯಾರ್, ಫವ್ಜ್, ಆಕ್ರಮಣ್ ಚಲಂವ್ಕ್ ಯೆವ್ಜಿಲ್ಲ್ಯಾ ಪ್ರದೇಶಾ ಥಾವ್ನ್ ತೀನ್ ಮಯ್ಲಾಂ ಭಿತರ್ ಯೇವ್ನ್ ರಾವ್ಲಿ.

ಥಂಯ್ ತಾಣಿಂ ರಿಸಾಲಾಂಚೆ ತೀನ್ ವಿಭಾಗ್, ವಾಟೊ ಆನಿ ಜವಾಬ್ದಾರಿ ಥಾರಾಯ್ಲಿ: ಟಿಪ್ಪು ಸುಲ್ತಾನ್ ಆನಿ ಸರ್ದಾರ್ ಸಿಮಾಂವ್ ಆಸ್‍ಲ್ಲೊ ಪಂಗಡ್ – ಸವಾರಾಂಚೊ ಮಾತ್ರ್ ಥಂಯ್ ರಾವ್ಲೊ. ದುಸ್ರೊ ಪಂಗಡ್ ಬಡ್ಗಾಚಿ ವಾಟ್ ಧರ್ನ್ ಬೆಟ್ಟದಪುರ ಪರ್ಯಾಂತ್ ವಚೊನ್, ಥಂಯ್ಸರ್ ಕೊಡಗಾಂತ್ ಪ್ರವೇಶ್ ಜಾಂವ್ಚಿ ಹುಕುಮ್ ಘೆವ್ನ್ ಗೆಲೊ; ತಿಸ್ರೊ ಪಂಗಡ್ ದಕ್ಷಿಣಾಚಿ ವಾಟ್ ಧರ್ನ್ ಹೆಗ್ಗಡದೇವನಕೋಟೆಚೆರ್ ದಾಡ್ ಘಾಲ್ನ್ ತೆಂ ಸ್ವಾಧೀನ್ ಕರಿಜಾಯ್ ಮ್ಹಳ್ಳ್ಯಾ ಫರ್ಮಾಣಾ ಖಾಲ್ ಗೆಲೊ.

ಟಿಪ್ಪು ಸುಲ್ತಾನಾನ್ ತಂಬು ಮಾರವ್ನ್ ರಾವಯಿಲ್ಲೆಂ ಫಾಲ್ಕೆಂ, ಪಿರಿಯಾಪಟ್ಟಣಾಚ್ಯಾ ವಾಟೆರ್, ಎಕಾ ಗುಡ್ಯಾಚ್ಯಾ ಬಗ್ಲೆನ್ ಆಸ್‍ಲ್ಲೆಂ. “ಪಯ್ಲೆಂ ಗೆಲ್ಲೆ ಪಂಗಡ್ ಕೊಡಗಾಂತ್ ಪ್ರವೇಶ್ ಜಾವ್ನ್ ತೆ-ತೆ ಪ್ರದೇಶ್ ಹಾತಾಂತ್ ಘೆಂವ್ಕ್ ಪಾವ್ಲೆ ಮ್ಹಳ್ಳೆಂ ಕಳಿತ್ ಜಾತಚ್, ಆಮಿ ಮುಖಾರ್ ವಚೊನ್ ಪಿರಿಯಾಪಟ್ಟಣಾಚೆರ್ ದಾವ್ಲಿ ಮಾರ್ತೆಲ್ಯಾಂವ್” ಮ್ಹಣ್ ಬಾದಶಹಾನ್ ಆಲೋಚನ್ ಉಚಾರ್ಲಿ.

ಬರಿ ವಾ ವಾಯ್ಟ್ ಖಬರ್ ಯೇಂವ್ಕ್ ಸಬಾರ್ ವೊರಾಂಚೊ ವೇಳ್ ಆಸ್‍ಲ್ಲೊ. ತೆದೊಳ್ ಪರ್ಯಾಂತ್, ಸರ್ದಾರ್ ಸಿಮಾಂವ್ಕ್ ಆನಿ ತಾಚ್ಯಾ ಸವಾರಾಂಕ್, ಬಾದಶಹಾಚ್ಯಾ ಹೆರ್ ಅಂಗರಕ್ಷಕಾಂ ಸಾಂಗಾತಾ ರಾಕೊನ್ ರಾಂವ್ಚೆಂ ಕಾಮ್ ಮಾತ್ರ್ ಉರ್ಲೆಂ.

ತಶೆಂ ರಾಕೊನ್ ಆಸ್ತಾನಾ, ಸರ್ದಾರ್ ಸಿಮಾಂವ್, ಸಬಾರ್ ವಿಷಯ್ ಚಿಂತುಂಕ್ ಪಡ್ಲೊ. ಹ್ಯಾ ಆಕ್ರಮಣಾ ಖಾತಿರ್ ಟಿಪ್ಪುನ್ ದಿಲ್ಲಿಂ ಕಾರಣಾಂ ವಾಜ್ಭಿಚ್ ಮ್ಹಳ್ಳೆಂಯೀ ತೊ ಜಾಣಾಂಸ್‍ಲ್ಲೊ. ನಿಜಾಯ್ಕೀ ಬೆಟ್ಟದಪುರ ಥಾವ್ನ್ ದಕ್ಷಿಣಾಕ್ ಹೆಗ್ಗಡದೇವನಕೋಟೆ ಪರ್ಯಾಂತ್ ಲಾಗಿಂ ಲಾಗಿಂ ವೀಸ್ ಮಯ್ಲಾಂಚ್ಯಾ ಲಾಂಬಾಯೆಕ್, ಮೈಸೂರ್ ಥಾವ್ನ್ ಕೊಡಗಾಕ್ ಪ್ರವೇಶ್ ಜಾಂವ್ಚ್ಯೊ ಮಾತ್ರ್ ನಹಿಂ, ಶೀದಾ ತಲ್ಚೇರಾಕ್ ವೆಚ್ಯೊ ವಾಟೊ ಆಸ್‍ಲ್ಲ್ಯೊ. ತಿತ್ಲ್ಯಾ ಲಾಂಬಾಯೆಚೊ ಪ್ರದೇಶ್ ಸ್ವಾಧೀನ್ ಕೆಲ್ಯಾರ್, ಬಂದಡೆಂತ್ ಆಸ್‍ಲ್ಲ್ಯಾ ಕೊಣಾಯ್ಕೀ ತೆಣೆಂ ಚುಕಾರಿ ಮಾರುಂಕ್ ಸಾಧ್ಯ್ ನಾತ್‍ಲ್ಲೆಂ.

ಪುಣ್ ತಿತ್ಲ್ಯಾ ಚಿಲ್ಲರ್ ಕಾರಣಾಂ ಖಾತಿರ್ ರಿಸಾಲಾಂ ಹಾಡ್ನ್ ಲಡಾಯ್ ಮಾರ್ಚೆಂ ಸಾಹಸ್ ಟಿಪ್ಪು ತಸಲ್ಯಾಕ್ ಸಹಜ್‍ಲ್ಲೆಂಗೀ? ತ್ಯಾ ಪ್ರದೇಶಾಂತ್ಲ್ಯಾ ಕೊಡ್ಗ್ಯಾಂಕ್ ಕೈದಿ ಕರ್ನ್ ಹಾಡ್ಲ್ಯಾ ಉಪ್ರಾಂತ್ ತಾಂಕಾಂ ಸೈನಾಂತ್ ಭರ್ತಿ ಕೆಲ್ಯಾರ್, ಸೈನಾಚಿ ಭದ್ರತಿ ಉರತ್‍ಗೀ ಮ್ಹಳ್ಳೆಂಯೀ ಸವಾಲ್ ಯೆತಾ.

ತರ್, ಟಿಪ್ಪುಚ್ಯಾ ಕರ್ತುಬಾಂಚೊ ನೀಜ್ ಮತ್ಲಬ್ ಕಸಲೊ ಜಾವ್ಯೆತ್? ಸಾಂಗೊಂಕ್ ಕಷ್. ತೊ ಮೈಸೂರ್ಚೊ ವಾಗ್ ಜೊಕ್ಚೆ ಕಡೆನ್ ಮಾರಿನಾತ್‍ಲ್ಲೊ, ತಶೆಂಚ್ ಮಾರ್ಚೆ ಕಡೆನ್ ಜೊಕಿನಾತ್‍ಲ್ಲೊ. ಹ್ಯಾ ತಾಚ್ಯಾ ಸಾಹಸಾಂತ್ ಕಿತೆಂ ತರೀ ಖಾಸ್ಗಿ ಇರಾದೊ ಆಸಾ ಮ್ಹಳ್ಳೆಂ ಸರ್ದಾರ್ ಸಿಮಾಂವ್ಕ್ ಖಂಡಿತ್ ಭೊಗುಂಕ್ ಲಾಗ್ಲೆಂ.

ತಾಕಾ ತಶೆಂ ಭೊಗ್‍ಲ್ಲೆಂಯೀ ವಾಜ್ಭಿಚ್.

ಪಾಟ್ಲ್ಯಾ ಥೊಡ್ಯಾ ತೆಂಪಾ ಥಾವ್ನ್ ಮೈಸೂರ್ಚೊ ಪಾಟ್‍ಚ್ ಆಪ್ಣಾಚೊ ಕರ್ನ್ ಘೆಂವ್ಕ್ ಸೆಲೀಮ್ ಖಾನ್ ಫಿತೂರಿ ಚಲಯ್ತಾ ಮ್ಹಳ್ಳೆಂ ಟಿಪ್ಪುಕ್ ಕಳೊನ್ ಆಯಿಲ್ಲೆಂ. ತ್ಯಾ ಖಾತಿರ್ ಸೆಲೀಮಾಚೆರ್ ಪ್ರತ್ಯೇಕ್ ಥರಾನ್ ತೊ ದೊಳೊ ದವರ್ನ್ ಆಸ್‍ಲ್ಲೊ. ಆನಿ ತ್ಯಾಚ್ ವೆಳಾ, ಮಿತ್ರ್ ಕೋಣ್, ದುಸ್ಮಾನ್ ಕೋಣ್, ವಿಶ್ವಾಸಿ ಕೋಣ್, ಘಾತ್ಕಿ ಕೋಣ್ ಮ್ಹಳ್ಳಿಂ ಚಿಂತ್ನಾಂ ತಾಕಾ ತಕ್ಲೆ ಫಡಾಫಡಿಚಿಂ ಜಾಲ್ಲಿಂ. ತಾಚೆಂ ಏಕ್ ಖಾಸ್ಗಿ – ಕೆನರಾ ಕ್ರಿಸ್ತಾಂವಾಂಚ್ಯಾ ಬಂದಡೆಚೆಂ – ಧೋರಣ್ ಪುರ್ತೆಂ ಸಲ್ವಲಾಂ ಮ್ಹಣ್ ತಾಕಾ ದಿಸೊಂಕ್ ಲಾಗ್‍ಲ್ಲೆಂ.

ಪುಣ್ ತಿತ್ಲ್ಯಾ ಸುಲಭಾಯೆನ್ ಸೊಡ್ನ್ ದಿಂವ್ಚೊ ಗ್ರಾಯ್ಕ್ ತೊ ನಹಿಂ – ಸಲ್ವಣಿ ಮಾಂದುನ್ ಘೆಂವ್ಚೊ ಗ್ರಾಯ್ಕ್‌ಯೀ ನಹಿಂ. ದೆಕುನ್ ಜಾವ್ಯೆತ್, ತಾಣೆಂ ಹೆಂ ‘ಗರ್ಜ್ ನಾತ್‍ಲ್ಲೆಂ ಲಡಾಯೆಚೆಂ’ ಸಾಹಸ್ ಹಾತಿಂ ಘೆತ್‍ಲ್ಲೆಂ. ಸಾಂಗಾತಾಚ್, ಆಪ್ಣಾಕ್ ದುಬಾವ್ ಆಸ್‍ಲ್ಲ್ಯಾಂಕ್ ಹ್ಯಾ ಫುಡೆಂ ಆಪ್ಣಾ ಸಾಂಗಾತಾಚ್ ದವರ್ನ್, ತಾಂಚೆರ್ ದೊಳೊ ದವರಿಜಾಯ್ ಮಾತ್ರ್ ನಹಿಂ, ತಾಂಚಿ ಪರೀಕ್ಷಾಯೀ ಕರಿಜಾಯ್ ಮ್ಹಳ್ಳೆಂ ಪಿಶೆಂ ತಾಕಾ ಲಾಗ್‍ಲ್ಲೆಂ. ಸರ್ದಾರ್ ಸಿಮಾಂವ್, ಹೆಂ ಸರ್ವ್ ಚಿಂತುನ್ ಸಮ್ಜಲೊ. ತ್ಯಾ ಆದಿಂ ಖಂಯೀ ಲಡಾಯೆಕ್ ವೆತಾನಾ, ತೊ ಆನಿ ಸರ್ದಾರ್ ಯೂಸುಫ್ ಆಲಿ ಸಾಂಗಾತಾ ಆಸ್ತಾಲೆ. ಹ್ಯಾ ಪಾವ್ಟಿಂ ತೊಯೀ ಸಂದರ್ಭ್ ಟಿಪ್ಪುನ್ ಚುಕಯಿಲ್ಲೊ. ಆಗ್ನೆಸ್ ಕುಂವರ್ನಿಕ್ ಬರಯಿಲ್ಲೆಪರಿಂ ಆತಾಂ ನಿಜಾಯ್ಕೀ ಟಿಪ್ಪು ಸಾಂಗಾತಾ ತೊ ಏಕ್ ಬಂದಿವಾನ್ ಜಾವ್ನಾಸ್‍ಲ್ಲೊ.

* * * * *

ಟಿಪ್ಪುಚೆಂ ಸಾಹಸ್ ಥಂಯ್ಸರ್ ತಿತ್ಲ್ಯಾರ್ ಆಸ್ತಾನಾ ಹಾಂಗಾಸರ್ ಬಂಟ್ವಾಳಾಂತ್ ದುಸ್ರಿಚ್ ಗಜಾಲ್ ಚಲ್ತಾಲಿ. ಸರ್ದಾರ್ ಸಿಮಾಂವ್ನ್ ಅಪೇಕ್ಷಿಲ್ಲೆಂ ಕಾಮ್ ತಾಂಚ್ಯಾ ಹಾತಾಂತ್ ಬಿಲ್ಕುಲ್ ಸಲ್ವನಾಯೆ ಮ್ಹಳ್ಳ್ಯಾ ದೃಢ್ ನಿಚೆವಾನ್ ಆಮ್ಚೆ ಮಾನಾಯ್ ಚತುರ್ ಜಾಲ್ಲೆ.

ಕೊತ್ವಾಲ್ ದೇಜಪ್ಪ ಶೆಟ್ಟಿ ಯೇವ್ನ್ ಗೆಲ್ಲ್ಯಾ ದುಸ್ರ್ಯಾ ದಿಸಾ, ಆಗ್ನೆಸ್ ಕುಂವರ್ನಿನ್ ಆಪ್ಲ್ಯಾ ಎಕ್ಲ್ಯಾ ಕಾಮಾಗಾರಾಕ್ ಠಾಣ್ಯಾಕ್ ಧಾಡ್ನ್, ಜಾಯ್ ಜಾಲ್ಲೊ ಸಗ್ಳೊ ವಿವರ್ ಹಾಡಯ್ಲೊ. ಪಟ್ಟಣಾ ಥಾವ್ನ್ ಆಯಿಲ್ಲ್ಯಾ ಸವಾರಾಂಚಿಂ ನಾಂವಾಂ, ತಾಂಚೆಂ ನ್ಹೆಸಣ್ ಇತ್ಯಾದಿ ಸರ್ವ್ ತಿಣೆಂ ಸಮ್ಜೊನ್ ಘೆತ್ಲೆಂ.

ಫುಡ್ಲೆಂ ಕಾಮ್ ಕಶೆಂ ಕರ್ಚೆಂ ಮ್ಹಳ್ಳೆಂ ಇತ್ಯರ್ಥ್ ಕರುಂಕ್ ರಫಾಯೆಲ್ ಮಿಂಗೆಲ್ ಕಾಮ್ತಿಗೆರ್ ಪರ್ತ್ಯಾನ್ ಲ್ಹಾನ್ ಏಕ್ ಝುಂತ್ ಚಲ್ಲಿ.

“ಕೈದಿ ಎಕ್ಲೊ ಸೊಡ್ಲ್ಯಾರ್, ಆಟ್ ಜಣ್ ಸವಾರ್ ಆಸ್ತೆಲೆ. ತಾಂಚೆ ಕಡೆನ್ ಝಗ್ಡೊನ್ ಕೈದ್ಯಾಕ್ ಅಪಹರ್ಸುಂಕ್ ಸಾಧ್ಯ್ ಆಸಾಗೀ?” ಆಗ್ನೆಸ್ ಕುಂವರ್ನಿನ್ ವಿಚಾರ್ಲೆಂ.

“ತ್ಯಾ ಭಾಯ್ರ್ ತೆ ಸರ್ವ್ ಹಾತೆರಾಂ ಆಸೊನ್ ಘೊಡ್ಯಾಂಚೆರ್ ಸವಾರ್ ಕರ್ನ್ ಯೆತೆಲೆ ಮ್ಹಳ್ಳೆಂ ಉಗ್ಡಾಸ್ ದವರ್ಯಾ.” ಪರ್ತ್ಯಾನ್ ಜಾಗಯ್ಲೆಂ ತಿಚ್ಯಾ ಬಾಪಾಯ್ನ್.

“ಓಸ್! ತಿ ಕಾಂಯ್ ವ್ಹಡ್ಲಿ ಗಜಾಲ್ ನಹಿಂ” ಮ್ಹಣಾಲೊ ದುಮ್ಗಾ ಪೀಂತ್. “ಹಾಚ್ಯಾ ಆದಿಂಯೀ ಆಮಿ ತಸಲಿಂ ಕಾಮಾಂ ಥೊಡಿಂ ಕೆಲ್ಯಾಂತ್. ತ್ಯಾ ಆಟ್ ಜಣಾಂಕ್ ಆಮಿ ಪಂದ್ರಾ-ಆಟ್ರಾ ಜಣ್ ಆಸಾಂವ್.”

“ಕಿತೆಂ ಕರ್ಯೆತ್ ತರ್ ಆಮಿ?” ಆಗ್ನೆಸ್ ಕುಂವರ್ನಿನ್ ವಿಚಾರ್ಲೆಂ. “ಆಮ್ಚ್ಯಾ ಸರ್ದಾರಾಚ್ಯಾ ಸವಾರಾಂಚೊ ಜೀವ್ ಕಾಡುಂಕ್ ನಜೊ ಮ್ಹಳ್ಳೆಂ ಮತಿಂತ್ ದವರ್ಯಾಂ.”

“ಸವಾರಾಂಚೊ ಜೀವ್ ನಾಕಾ – ಗೊಟಾಳ್ಯಾಂತ್ ತ್ಯಾ ತೊಪಾಸಿಕ್ ತೊಪುನ್ ಮಾರ್ಲ್ಯಾರ್ ಜಾಲೆಂ ನಹಿಂವೇ?”

“ತಶೆಂ ಕರ್ಯೆತ್ ಮ್ಹಣ್ ಸರ್ದಾರಾನ್ ಸಾಂಗೊಂಕ್ ನಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ತ್ಯಾ ಶಿವಾಯ್ – ಆಮ್ಚೊ ಜೀವ್ ವಾಂಚಂವ್ಕ್ ಆನಿ ತಸಲ್ಯಾ ಪ್ರಮುಖ್ ಕಾರಣಾಂ ಶಿವಾಯ್, ಪೆಲ್ಯಾಚೊ ಜೀವ್ ಕಾಡ್ಚೆಂ ಕ್ರಮ್ ಯೋಗ್ಯ್ ನಹಿಂ.”

“ತೆಂ ನಹಿಂ ಆಸ್ತಾಂ” ಮ್ಹಣಾಲೊ ಜಾಂಟೊ ಕಾಮತ್. “ಕಾಳೊಕಾಂತ್ ಜಾವ್ಯೆತ್ ಉಜ್ವಾಡಾಂತ್, ಮಾರ್-ಫಾರ್ ಆನಿ ಹಾತೆರಾಂಚಿ ಜಟಾಪಟ್ ಜಾತಾನಾ ಆಮ್ಚ್ಯಾಚ್ ಕಿತ್ಲ್ಯಾ ಮಾನಾಯಾಂಚೊ ಜೀವ್ ವಚ್ಯೆತ್ ಮ್ಹಳ್ಳೆಂ ಚಿಂತುನ್ ಪಳೆಯಾ.”

ತೆ ಚಿಂತುಂಕ್ ಲಾಗ್ಲೆ. ಥೊಡ್ಯಾ ವೆಳಾ ಉಪ್ರಾಂತ್ –

“ಬರ್‍ಯಾ ಕಾಮಾಕ್ ದೆಂವ್ಲ್ಯಾ ಉಪ್ರಾಂತ್, ಜೀವ್ ವಚತ್ ಮ್ಹಳ್ಳ್ಯಾ ಭಿಯಾನ್ ಆಮಿ ಪಾಟಿಂ ಸರನಾಂವ್.”

“ಹಾಂಗಾ ಭಿಯೆಂವ್ಚೆಂ ಸವಾಲ್ ನಹಿಂ – ಭದ್ರತೆಚೆಂ ಸವಾಲ್” ಮ್ಹಣಾಲೊ ಕಾಮತ್. “ಆಟ್ ಜಣ್ ಸವಾರಾಂಚೆರ್ ದಾಡ್ ಘಾಲ್ನ್ ಜಿಕ್ಯೆತ್ ಮ್ಹಣೊಂಕ್ ವಾ ಕೊಣಾಕ್ ಧರ್ಯೆತ್ ಆನಿ ಕೊಣಾಕ್ ಸೊಡ್ಯೆತ್ ಮ್ಹಣೊಂಕ್ ಸಾಧ್ಯ್ ನಾ.”

“ತೆಂ ವ್ಹಯ್. ಪುಣ್…”

“ಆನ್ಯೇಕ್ ವಿಷಯ್. ಜಟಾಪಟೆಂತ್ ಆಮ್ಚೆ ಕೊಣೀ ಮೆಲ್ಯಾರ್, ಘಾಯೆಲ್ಯಾರ್ ವಾ ಶಿಪಾಯಾಂಚ್ಯಾ ಹಾತಾಂತ್ ಪುಣೀ ಪಡ್ಲ್ಯಾರ್ – ವಿಚಾರಣ್ ಜಾತೆಲೆಂ, ಕೋಣ್ ಖಂಯ್ಚೆ ಮ್ಹಳ್ಳೆಂ ಭಾಯ್ರ್ ಪಡ್ತೆಲೆಂ ಆನಿ ಚಡ್ ಭಿರಾಂಕುಳ್ ಫಾರಿಕ್ಪಣ್ ದೀಂವ್ಕ್ ಪಡ್ತೆಲೆಂ. ಸರ್ದಾರಾನ್ ಆಮ್ಕಾಂ ಫರ್ಮಾಯಿಲ್ಲೆಂ ಕಾಮ್ ಜಯ್ತೆವಂತ್ ಜಾಂವ್ಚ್ಯಾ ಬದ್ಲಾಕ್ ಚಡ್ ವಾಯ್ಟಾಕ್ ಪಡ್ತೆಲೆಂ.”

“ಹಾಂವ್‍ಯೀ ತೆಂಚ್ ಚಿಂತುನ್ ಆಸ್‍ಲ್ಲಿಂ ಆನಾ!” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ಜಿವಾಚೆಂ ವಾ ಫಾರಿಕ್ಪಣಾಚೆಂ ಪುಣೀ ಭ್ಯೆಂ ವ್ಹಡ್ ನಹಿಂ. ಸರ್ದಾರಾನ್ ಆಮ್ಚೆ ಥಾವ್ನ್ ಅಪೇಕ್ಷಿಲ್ಲೆಂ ವ್ಯರ್ಥ್ ಜಾಯ್ನಾಯೆ ಮ್ಹಣ್ಚೆಂ ಚಡ್ ಗರ್ಜೆಚೆಂ.”

“ತೆಂ ಆಮಿಯೀ ಒಪ್ತಾಂವ್. ತರ್ ಕರ್ಚೆಂ ಕಿತೆಂ?” ದುಮ್ಗಾ ಪೀಂತ್ ಮಾತೆಂ ಖೊರ್ಪಿಲಾಗ್ಲೊ.

“ಹಾಂವ್ ಸಾಂಗ್ತಾಂ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ತೆ ಸವಾರ್, ಪಾಟಿಂ ವೆತಾನಾ ಬೆಳ್ತಂಗಡಿಚ್ಯಾ ವಾಟೆನ್ ನಹಿಂ, ಬಗಾರ್ ಮಂಜರಾಬಾದ್‍ಚ್ಯಾ ವಾಟೆನ್ ವೆತೆಲೆ. ತಾಂಕಾಂ ಹಾತ್ ದಿಂವ್ಚೊ ಜಾಗೊ ಖಂಯ್ ಮ್ಹಳ್ಳೆಂ ಪಯ್ಲೆಂ ಥಾರಾಯ್ಜಾಯ್.”

“ತೊ ಜಾಗೊ ಘಾಟ್ಯೆಚ್ಯಾ ಸಕಯ್ಲ್ ಜಾಯ್ಜಯ್. ಪುಣ್ ಹಾಂಗಾ ಥಾವ್ನ್ ಚಡ್ ಪಯ್ಸ್ ಜಾಯ್ನಾಯೆ” ಮ್ಹಣಾಲೊ ಬಾಪಯ್.

“ಪುಣ್ ಹಾಂಗಾ ಥಾವ್ನ್ ಚಡ್ ಲಾಗಿಂಯೀ ಜಾಂವ್ಕ್ ಸಾಧ್ಯ್ ನಾ, ಆನಾ” ಮ್ಹಣಾಲಿ ಧುವ್.

“ತರ್, ಖಂಯ್ ಮ್ಹಣ್ ಚಿಂತ್ಲಾಂಯ್ ತುವೆಂ?”

ಆಗ್ನೆಸ್ ಕುಂವರ್ನಿನ್ ತಕ್ಷಣ್ ಜವಾಬ್ ದೀಂವ್ಕ್ ನಾ. ಚಡುಣೆಂ ತ್ಯಾ ದೋನ್ ವರ್ಸಾಂ ಆದಿಂ, ಸರ್ದಾರ್ ಸಿಮಾಂವ್ಕ್ ತಿಣೆಂ ಏಕ್ ಮನವಿ ಧಾಡ್‍ಲ್ಲೊ ಉಗ್ಡಾಸ್ ತಿಕಾ ಆಯ್ಲೊ. ತ್ಯಾ ವೆಳಾರ್ ಸರ್ದಾರ್ ಸಿಮಾಂವ್ನ್ ಡೊನಾ ಆಂಜೆಲಾ ದೆ ಲೂತೆಲಿಮಾಕ್ ಬಚಾವ್ ಕರ್ನ್, ಸೆಲಿಮ್ ಖಾನಾಚ್ಯಾ ಠೊಲಿಯೆಕ್, ಫಿಂರ್ಗಿ ಪೆಂಟೆಂತ್ಲ್ಯಾ ಮೊಂತಿಯೆ ಬಗ್ಲೆನ್ ವ್ಹಾಳ್ಚ್ಯಾ ನ್ಹಂಯ್ತ್ ಪಾಡಾವ್ ಕೆಲ್ಲೊ ಉಗ್ಡಾಸ್ ಯೇವ್ನ್ ಪುಳಕಿತ್ ತಿ ಜಾಲಿ ಆನಿ ಅಂಬುರ್ಕಿ ಹಾಸ್ಲಿ; ತಿಚ್ಯಾ ಮತಿಂತ್ ಧಯ್ರ್‌ಯೀ ಆಯ್ಲೆಂ. ತಿಚ್ಯೆ ಖಾತಿರ್ ತಿಚ್ಯಾ ಸರ್ದಾರಾನ್ ತೆಂ ಸಾಹಸ್ ಕೆಲ್ಲೆಂ ಜಾಲ್ಯಾರ್, ಆತಾಂ ತಾಚಿ ಏಕ್ ಲ್ಹಾನ್ ಅಪೇಕ್ಷಾ ಜಾರಿ ಕರುಂಕ್ ತಸಲೆಂಚ್ ಏಕ್ ಸಾಹಸ್ ಹಾತಿಂ ಘೆಂವ್ಕ್ ಸುಯೋಗ್ ಲಾಭ್ಲಾ ಮ್ಹಣ್ ಚಿಂತ್ಲೆಂ ತಿಣೆಂ.

“ಖಂಯ್ ಮ್ಹಣ್ ಚಿಂತ್ಲಾಂಯ್?” ಬಾಪಾಯ್ನ್ ಪರ್ತ್ಯಾನ್ ವಿಚಾರ್ಲೆಂ.

“ಉಪ್ಪಿನಂಗಡಿ – ಉಬಾರ್‌ಚ್ಯಾ ಕಡ್ವಾರ್!”

“ಉಬಾರ್‌ಚ್ಯಾ ಕಡ್ವಾರ್!” ದುಮ್ಗಾ ಪೀಂತ್ ಘಾಬರ್ಲೊ.

“ವ್ಹಯ್ ದುಮ್ಗಾಬಾ” ಹಾಸ್ಲಿ ತಿ. “ಆದಿಂ ಏಕ್ ಪಾವ್ಟಿಂ, ಫಜೀರ್ ವೆಚ್ಯಾ ವಾಟೆರ್ – ಇನೊಳೆಚ್ಯಾ ಕಡ್ವಾರ್ ತಸಲಿಚ್ ಏಕ್ ವಿಶೇಸ್ ಗಜಾಲ್ ಘಡ್‍ಲ್ಲಿ.”

ಮ್ಹಣೊನ್, ‘ಬೆಳ್ತಂಗಡಿಚೊ ಬಾಲ್ತಜಾರ್’ ಮ್ಹಳ್ಳೆಂ ನಾಂವ್ ಘೆವ್ನ್ ಸರ್ದಾರ್ ಸಿಮಾಂವ್ನ್ ಕೆಲ್ಲ್ಯಾ ಕಾರ್ಬಾರಾಚಿ ಕಥಾ ತಿಣೆಂ ತಾಂಕಾಂ ಮಟ್ವ್ಯಾನ್ ಸಾಂಗ್ಲಿ.

ದುಮ್ಗಾ ಪೀಂತ್ ವಿಜ್ಮಿತ್ ಜಾಲೊ ಆನಿ ಹಾಸ್ಲೊ.

“ಆಮಿ ಆಯ್ಕೊಂಕ್ ನಾತ್‍ಲ್ಲಿಂ, ಆಮ್ಚ್ಯಾ ಸರ್ದಾರಾಚಿಂ ಸಾಹಸಾಂ ಆನಿಕ್‍ಯೀ ಕಿತ್ಲಿಂ ಆಸಾತ್ ಕೊಣ್ಣಾ!” ಮ್ಹಣಾಲೊ ತೊ.

“ಪುಣ್ ತಾಣೆಂ ಥಂಯ್ಸರ್ ತಶೆಂ ಕೆಲೆಂ ಮ್ಹಣ್, ಹಾಂಗಾಸರ್ ಆಮಿ ಕಶೆಂ ಕರ್ಚೆಂ?”

“ತಾಣೆಂ ಕೆಲ್ಲೆಪರಿಂಚ್ ಕರ್ಚೆಂ.”

“ಮ್ಹಣ್ಜೆ, ಉಬಾರ್ ಕಡ್ವಾಚ್ಯಾ ಮಾಪ್ಳ್ಯಾಂಕ್ ಬಾಂಧುನ್ ಘಾಲ್ನ್…”

“ಛೆ, ತಶೆಂ ಕರುಂಕ್ ಜಾಯ್ನಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. “ಹಾಂಗಾಸರ್, ಕೊಣೆಂಯೀ ಪೊಕ್ರ್ಯಾಂನಿ ವಾ ‘ರಾಜ್‍ದ್ರೋಹಿಂ’ನಿ ಕಾರ್ಬಾರ್ ಕೆಲಾಂ ಮ್ಹಳ್ಳ್ಯಾ ದುಬಾವಾಕ್ ಅವ್ಕಾಸ್ ದೀನಾಯೆ.”

“ಮಾಗಿರ್..?”

“ಆತಾಂ ಪಾವ್ಸಾಳೆ ದೀಸ್. ಘಾಟಾಚ್ಯಾ ಉದ್ಕಾನ್ ಭರ್‍ಲ್ಲಿ ನ್ಹಂಯ್. ನಿವಾರುಂಕ್ ಜಾಯ್ನಾತ್‍ಲ್ಲೆಂ ಅವ್ಗಡ್ ಜಾಲ್ಲೆಪರಿಂ ದಿಸಜಾಯ್.”

“ಪುಣ್ ಕಡ್ವಾಗಾರ್ ಮಾಪ್ಳೆ?”

“ತಾಂತುಂ ತುಮಿ ಫಿಕಿರ್ ಕರ್ಚಿ ನಾಕಾ ಪಿಂತಾನೊ” ಹಾಸ್ಲೊ ರಫಾಯೆಲ್ ಮಿಂಗೆಲ್ ಕಾಮತ್. “ಉಬಾರ್ ಕಡ್ವಾಚೊ ಅಧಿಕಾರಿ ಹಸನಬ್ಬ ಮ್ಹಜೊ, ಲ್ಹಾನ್ಪಣಿಂ ಥಾವ್ನ್ ಸಾಂಗಾತಿ ಆನಿ ಮಿತ್ರ್. ತಾಚೆಂ ಘರ್‌ಯೀ ಹಾಂಗಾಚ್ ಲಾಗ್ಸರ್. ಆಮ್ಚೆಂ ಬಾಯ್ ಮ್ಹಳ್ಯಾರ್ ತಾಂಕಾಂ ಪ್ರಾಣ್. ಆತಾಂ ಬಾಯೆನ್ ಚಿಂತ್‍ಲ್ಲೊ ಉಪಾಯ್ ಜಾವ್ಯೆತ್.”

“ತರ್ ಆಮಿ ತಯಾರ್!”

“ಬರೆಂಚ್!” ಹಾಸ್ಲಿ ಆಗ್ನೆಸ್ ಕುಂವರ್ನ್. “ತುಮ್ಕಾಂ ಆಯ್ಚೊ ದೀಸ್ ಉರ್ಲಾ. ರಾತಿಂ ಪಯ್ಣ್ ಕರ್ನ್ ತುಮಿ ಉಪ್ಪಿನಂಗಡಿಕ್ ವಚಜಾಯ್. ಫಾಲ್ಯಾಂ ತುಮಿ ದೊಣ್ಕಾರ್ ಮಾಪ್ಳೆ! ದೆಕುನ್ ಆಜ್ ಹಾಂಗಾಚ್ಯಾ ನ್ಹಂಯ್ತ್ ಥೊಡೆಂ ಉಪ್ಯೆಂವ್ಕ್ ಆನಿ ಬುಡೊನ್ ವಯ್ರ್ ಯೇಂವ್ಕ್ ಅಭ್ಯಾಸ್ ಕರ್‍ಯಾ.”

“ತರ್ ಹಾಂವೆಂ ಆತಾಂಚ್ ಉಪ್ಪಿನಂಗಡಿಕ್ ವಚೊನ್ ಯೆಂವ್ಚೆಂ ಬರೆಂ ನಹಿಂವೇ ಪುತಾ?” ಬಾಪಾಯ್ನ್ ವಿಚಾರ್ಲೆಂ.

“ನಾಕಾ ಆನಾ. ಕೊಣಾ ಎಕ್ಲ್ಯಾಕ್ ಸಾಂಗಾತಾ ಘೆವ್ನ್ ಹಾಂವ್‍ಂಚ್ ಘೊಡ್ಯಾರ್ ವಚೊನ್ ಕಾಳೊಕ್ ಜಾಂವ್ಚ್ಯಾ ಆದಿಂ ಪಾಟಿಂ ಯೆತಾಂ. ದೇಜಪ್ಪಣ್ಣ ರಾತಿಂ ಯೆತಲೊ. ತಾಚೆ ಕಡೆನ್ ತೆದಾಳಾ ಉಲವ್ಯೆತ್.”

ಬಂಟ್ವಾಳ್ಚ್ಯಾ ಹ್ಯಾ ಕುಂವರ್ನಿಚಿ ಶ್ಯಾಥಿ, ದುಮ್ಗಾ ಪಿಂತಾಚ್ಯಾ ಮತಿಕ್ ಗೆಲಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel