ಸರ್ದಾರಾಚೆಂ ಸನ್ನಿಧಾನ್ – 12: ಫಾರಿಕ್ಪಣಾಚೊ ಮುರ್ಮುರೊ

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 12
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 12: ಫಾರಿಕ್ಪಣಾಚೊ ಮುರ್ಮುರೊ

ತೆಣೆಂ ಬಂಟ್ವಾಳಾಂತ್, ಸರ್ದಾರ್ ಸಿಮಾಂವ್ನ್ ಧಾಡ್‍ಲ್ಲ್ಯಾ ಆದೇಶಾ ಪ್ರಕಾರ್, ಆಗ್ನೆಸ್ ಕುಂವರ್ನಿಚ್ಯಾ ನಿರ್ದೇಶನಾ ಖಾಲ್, ದುಮ್ಗಾ ಪೀಂತ್, ತಾಚೆ ದೋಗ್ ಸಾಂಗಾತಿ ಆನಿ ಬಂಟ್ವಾಳ್ಚ್ಯಾ ಠೊಲಿಯೆಂತ್ಲೆ ಮಾನಾಯ್ ಏಕ್ ಸಾಹಸ್ ಕಾರ್ಯೆಂ ಹಾತಿಂ ಘೆಂವ್ಕ್ ಆತುರಾಯೆನ್ ಆಸ್ತಾನಾ, ಹೆಣೆಂ ಶಿರಿಂಗಪಟ್ಟಣಾಂತ್ ಲಡಾಯೆಕ್ ತಯಾರಾಯ್ ಭರಾನ್ ಚಲ್ತಾಲಿ.

ಸುಲ್ತಾನಾನ್ ಆಪ್ಲೊ ನಿರ್ಧಾರ್ ಉಚಾರ್ಲ್ಯಾ ಉಪ್ರಾಂತ್, ಸೈನ್ ಭಾಯ್ರ್ ಸರೊಂಕ್ ಫುಡ್ಲೊ ಸನ್ವಾರ್ ಪರ್ಯಾಂತ್ ಬಾಕಿ ಆಸ್‍ಲ್ಲೆ ದೋನ್ ದೀಸ್, ಶಿಪಾಯಾಂನಿ ಜಾಯ್ ತಿ ಮಜಾ ಕರುಂಕ್ ರಜಾ ಪಾಚಾರ್‌ಲ್ಲಿ. ತಾಚೊ ಪ್ರತಿಫಳ್ ವಾ ನೀಬ್ ಜಾವ್ನ್ ಸರ್ದಾರ್ ಸಿಮಾಂವ್ಚೊ ಪಾಟ್ಲಾವ್ದಾರ್ ಆನಿ ಕಾಮೆಲಿ ಜಾವ್ನಾಸ್‍ಲ್ಲ್ಯಾ ಜೆಮೆದಾರ್ ಅಂತುಲ್ಯಾ ಪಡ್ವಳಾನ್ ಷೇಕ್ ಆಲಿ ಕಡೆನ್ ಆದ್ಳೊನ್ ಪಡ್ಚೆಂ ಏಕ್ ಪ್ರಸಂಗ್ ಆಯ್ತೆಂ ಜಾಲೆಂ.

ರಾವ್ಳೆರಾಚ್ಯಾ ಅಂತಃಪುರಾಚ್ಯಾ ವಿಭಾಗಾಂತ್, ಖುದ್ ಬೇಗಮೆಚ್ಯಾ ಹಕ್ಕಾ, ಅಧಿಕಾರಾ ಆನಿ ರಕ್ಷಣಾ ಖಾಲ್ ಸೇವಿಕಾಂಚೊ ಆನಿ ನರ್ತಕಿಯಾಂಚೊ ಏಕ್ ಪಂಗಡ್ ಆಸ್‍ಲ್ಲೊ. ತಾಂಕಾಂ, ರಾವ್ಳೆರಾಚ್ಯಾ ಪಾಗೊರಾ ಭಿತರ್ಲ್ಯಾ ವಿಶಾಲ್ ಫುಲಾಂಚ್ಯಾ ಉದ್ಯಾನ್‍ವನಾಂತ್ ಭೊಂವೊಂಕ್ ಸುಟ್ಕಾ ಆಸ್‍ಲ್ಲಿ. ಗರ್ಜ್ ಪಡ್ಲ್ಯಾರ್ ತಾಣಿಂ ಪಶ್ಚಿಮ್ ದಿಶೆನ್ ಆಸ್ಚ್ಯಾ ಲ್ಹಾನ್ ದ್ವಾರಾಂತ್ಲ್ಯಾನ್ – ಹೆರ್ ಚಾಕರ್ನಿಂ ಸಾಂಗಾತಾ – ಭಾಯ್ರ್ ವಚೊನ್ ಯೆವ್ಯೆತಾಲೆಂ. ತ್ಯಾ ಕುಶಿನ್, ಚಡಾವತ್, ರಾಯಾಳ್ ಸೈರ್‍ಯಾಂಚಿ ಪೇಂಟ್ ಆಸ್‍ಲ್ಲಿ.

ಬೇಗಮೆಚ್ಯಾ ಪರಿವಾರಾಂಕ್ ವ್ಹೊರೆವಿಂಗಡ್ ದವರ್‌ಲ್ಲ್ಯಾ ತ್ಯಾ ರಾಣಿ ಭಾಗೆಂತ್ ದಾದ್ಲ್ಯಾಂಕ್ ಪ್ರವೇಶ್ ನಾತ್‍ಲ್ಲೊ. ಜಾಲ್ಯಾರೀ ರಾವ್ಳೆರಾಂತ್ಲ್ಯಾ ಆನಿ ಸೈನಾಂತ್ಲ್ಯಾ ಮೋಗ್ ಸೊಧ್ನಾರ್ ಯುವಕಾಂಕ್ ತಿ ‘ಪಶ್ಚಿಮ್ ಬಜಾರ್’ ಭೆಟೆಚಿ ಆನಿ ಬೊಂಟೆಚಿ ಸುವಾತ್ ಜಾವ್ನಾಸ್‍ಲ್ಲಿ.

ತ್ಯಾ ಬಜಾರಾಂತ್, ರಾವ್ಳೆರಾ ಥಾವ್ನ್ ಚಡುಣೆಂ ಅರ್ಧ್ಯಾ ಮಯ್ಲಾ ಪಯ್ಸ್, ಹೆರ್ ಬಿಡಾರಾಂ ಪ್ರಾಸ್ ವ್ಹಡ್ ಏಕ್ ಮಂಜಿಲ್ ಆಸ್‍ಲ್ಲೆಂ. ಥಂಯ್ಸರ್ ಉತರ್ ಮಧ್ಯಮ್ ಪ್ರಾಯೆಚಿ ಎಕ್ಲಿ ಬೇಗಮ್ ರಾವ್ತಾಲಿ. ಆದಿಂ ತಿಕಾ ಆನಿ ಹೈದರಾಕ್ ಸಂಬಂಧ್ ಆಸ್‍ಲ್ಲೊ ಜಾಲ್ಲ್ಯಾನ್, ಎದೊಳ್‍ಯೀ ತಿ ರಾಯ್ ಕುಳಿಯೆಚೊ ಸ್ಥಾನ್-ಮಾನ್ ಸಾಂಬಾಳ್ನ್ ಮ್ಹಳ್ಳೆಪರಿಂ, ರಾವ್ಳೆರಾಚೆಂಚ್ ಮಹಿನ್ಯಾವಾರ್ ಭಾತೆಂ ಆಸೊನ್ ಜಿಯೆತಾಲಿ. ಪಾರಂಪರ್ಯಾಚ್ಯಾ ದೆಣ್ಯಾನ್ ಆಲ್ಯಾಪಾಲ್ಯಾಚ್ಯಾ ವಕ್ತಾಂನಿ ತಿ ನಾಂವಾಡ್ದಿಕ್. ತಿಚೆಂ ನಾಂವ್ ಆಸ್ಮಾಬಿ.

ತಿಣೆಂ ಬಿಡಾರ್ ಕರ್ನ್ ಆಸ್‍ಲ್ಲ್ಯಾ ‘ಮಂಜಿಲಾ’ ಭೊಂವಾರಿಂಯೀ ಫುಲಾಂ ಆನಿ ವಕ್ತಾಂ-ಝಾಡಾಂ ಆನಿ ಫಳ್-ವಸ್ತುಂಚೆ ರೂಕ್ ಭರ್‌ಲ್ಲೆಂ ಹಿತಾಲ್, ಭಾಯ್ಲ್ಯಾನ್ ಫಾತ್ರಾಂಚೊ ಪಾಗೊರ್ ಆಸ್‍ಲ್ಲೊ. ತಿಚ್ಯಾ ಘರಾಂತ್ ಪ್ರಾಯ್ವಂತ್ ದೊಗಾಂ ಚಾಕ್ರಾಂ ಆನಿ ತಿಚ್ಯಾ ಎಕ್ಲ್ಯಾಚ್ ಧುವೆ ಬಗಾರ್ ಹೆರ್ ದಾದ್ಲೆ ನಾತ್‍ಲ್ಲೆ. ಪುಣ್, ಭೆಟ್ ದಿತೆಲ್ಯಾಂಚೊ ಸಂಖೊ ಉಣೊ ನಾತ್‍ಲ್ಲೊ – ಪಿಡೆ ಶಿಡೆ ಖಾತಿರ್ ಮಾತ್ರ್ ನಹಿಂ, ಹೆರ್ ಮಜತೆ ಖಾತಿರ್‌ಯೀ ಲೋಕ್ ಥಂಯ್ಸರ್ ವೆತಾಲೊ. ತ್ಯಾ ಬ್ರೇಸ್ತಾರಾಚ್ಯಾ ಸಾಂಜೆರ್, ಜೆಮೆದಾರ್ ಅಂತುಲೊ ಪಡ್ವಳ್ ಅವ್ಚಿತ್ ಮ್ಹಳ್ಳೆಪರಿಂ ಆಸ್ಮಾಬಿಗೆರ್ ಪಾವ್ಲೊ. ದುರಾದೃಷ್ಟಾನ್ ಮ್ಹಳ್ಳೆಪರಿಂ ತೊ ಥಂಯ್ಸರ್ ಪಾಂವ್ಚ್ಯಾ ವೆಳಾರ್‌ಚ್ ಷೇಕ್ ಆಲಿಯೀ ಥಂಯ್ಸರ್ ಆಸ್‍ಲ್ಲೊ. ಜೊ, ಹುಂಬ್ರಾಚ್ಯಾ ಪೊಂತಾರ್ ಬಸೊನ್, ಘರ್ಚ್ಯಾ ಸಯ್ರ್ಯಾಪರಿಂ ಹಾಸೊನ್‍ಸೊ ಜನೆಲಾಚ್ಯಾ ಜಾಳ್ಯೆಂತ್ಲ್ಯಾನ್ ಗಜಾಲಿ ಕಾಡ್ತಾಲೊ.

ತಾಕಾ ಪಳೆವ್ನ್ ಅಂತುಲೊ ಪಡ್ವಳ್ ಕಾವ್ಜೆಲ್ಲೆಪರಿಂಚ್ ಹಾಕಾ ಪಳೆವ್ನ್ ತಾಚೆಂ ಮುಖಮಳ್ ವಿಕಾರ್ಲೆಂ. ಗಜಾಲಿ ಬಂದ್ ಪಡ್ಲ್ಯೊ; ಕಿತೆಂಗೀ ಉಗ್ಡಾಸ್ ಕರ್ಚ್ಯಾ ಜಿನ್ಸಾರ್ ತಾಚ್ಯಾ ಕಪಾಲಾರ್ ಮಿರ್‍ಯೊ ಪಡ್ಲ್ಯೊ.

“ತುಕಾ ಖಂಯ್ಗೀ ಪಳೆಲ್ಲೆಪರಿಂ ಜಾಲಾಂ” ತಾಕಾ ಉಗ್ಡಾಸ್ ಆಯ್ಲೊ. “ತುಂ ತ್ಯಾ ಸರ್ದಾರ್ ಸಿಮಾಂವ್ಚೊ ಅಂಗರಕ್ಷಕ್ ನಹಿಂವೇ?”

“ತಾಂತುಂ ತುಕಾ ಕಿತೆಂ?” ಅಂತುಲ್ಯಾನ್ ಪ್ರತಿ ಸವಾಲ್ ಕೆಲೆಂ.

“ಆಹಾಂ! ಸರ್ದಾರ್ ಸಿಮಾಂವ್ ಚಿಕ್ಕೆ ವ್ಹಡ್ ಮನಿಸ್ ಜಾವ್ಯೆತ್ ದೆಕುನ್, ತಾಚೆ ಚೇಲಾಯೀ ವ್ಹಡ್ ಮ್ಹಣ್ ಚಿಂತಾತ್?”

“ತೆ ವ್ಹಡ್ ಮ್ಹಣ್ ಚಿಂತಿನಾಂತ್, ಜಾವ್ಯೆತ್” ಮ್ಹಣಾಲೊ ಅಂತುಲೊ ಪಡ್ವಳ್. “ಪುಣ್ ತಸಲ್ಯಾಂಕ್ ರಾವ್ಳೆರಾ ಥಾವ್ನ್ ಖೊಟಾವ್ನ್ ಭಾಯ್ರ್ ಪಡ್ಚೆ ತಿತ್ಲಿ ಗತ್ ಯೇಂವ್ಕ್ ನಾ.”

ಷೇಕ್ ಆಲಿ, ಖಾಡಾ ಭಿತರ್ ಕಡ್ಕಡ್ಲೊ. “ಉಲಯ್ತಾನಾ ಚತ್ರಾಯ್!” ಮ್ಹಣಾಲೊ ತೊ. “ನಾ ಜಾಲ್ಯಾರ್ ಖೊಟಾವ್ನ್ ದಾಂತ್ ಪೊಟಾಂತ್ ಪಡ್ತಿತ್.”

ಅಂತುಲೊ ಪಡ್ವಳ್ ಹಾಸ್ಲೊ: “ಕೊಣಾಚೆ ಜಾವ್ಯೆತ್?”

ಷೇಕ್ ಆಲಿನ್ ಜವಾಬ್ ದಿಂವ್ಚ್ಯಾ ಆದಿಂ, ಉಲಯ್ಲಿ ಆಸ್ಮಾಬಿ:

“ಕಸಲಿ ಗಜಾಲ್ ಹಿ?” ಮ್ಹಣಾಲಿ ತಿ ಶಿಣೊನ್. “ತುಮಿ ಹಾಂಗಾಸರ್ ಝಗ್ಡೊಂಚ್ಯಾ ಖಾತಿರ್‌ಚ್ ಆಯ್ಲ್ಯಾತ್ ಮ್ಹಣ್ತಿತ್ ಕೊಣೀ!”

“ಮಾಫ್ ಕರಿಜಾಯ್ ಮಾತಾಜಿ” ಮ್ಹಣಾಲೊ ಅಂತುಲೊ ಪಡ್ವಳ್. “ಹಾಂವ್ ಝಗಡ್ಚ್ಯಾಕ್ ನಹಿಂ, ಮ್ಹಜ್ಯಾ ಮಿತ್ರಾಕ್ ವಕತ್ ವಿಚಾರುಂಕ್ ಆಯಿಲ್ಲೊಂ. ಪುಣ್ ಹ್ಯಾ ಮನ್ಶ್ಯಾನ್‍ಂಚ್ ಕೊಡು ಉತ್ರಾಂ ಉಸ್ತಿಲಿಂ ಮ್ಹಳ್ಳೆಂ ತುಮಿ ಜಾಣಾಂತ್.”

“ತೆಂ ಆಮಿ ಜಾಣಾಂವ್.”

ಹೆಂ ಆಯ್ಕೊನ್ ಷೇಕ್ ಆಲಿ ಚಿಕ್ಕೆ ಲಜೆಲೊ, ಜಾಲ್ಯಾರೀ ಸಲ್ವಣಿ ವಳ್ಕೊಂಕ್ ತೊ ಕಬೂಲ್ ನಾ ಜಾಲೊ ಆನಿ ಮ್ಹಣಾಲೊ:

“ಹಾಂವ್ ಜಾವ್ನಾಸಾಂ ಹ್ಯಾ ಘರ್ಚೊ ದೋಸ್ತ್. ಹ್ಯಾ ನಸ್ರಾನಿಕ್ ಹಾಂಗಾ ಕಿತೆಂ ಕಾಮ್ ಆಸಾ ಮ್ಹಣ್ ಚಿಂತ್ಲೆಂ.”

“ತೆಂ ಕಾರಣ್ ತುವೆಂ ಆಯ್ಕಲೆಂ.”

“ತ್ಯಾ ಶಿವಾಯ್ ಮಾಜೀ…” ಭಿತರ್ ಥಾವ್ನ್ ಆಯ್ಕಲೊ ದುಸ್ರೊಚ್ ಎಕಾ ಯುವತಿಚೊ ಸುಮಧುರ್ ಸ್ವರ್, ಜೊ ಜಾವ್ನಾಸ್‍ಲ್ಲೊ ಆಸ್ಮಾ ಬೀಬಿಚಿ ಎಕ್ಲಿಚ್ ಧುವ್ ಜಾವ್ನಾಸ್‍ಲ್ಲ್ಯಾ ಜಮೀಲಾಚೊ: “ಜೆಮೆದಾರ್ ಅಂತುಲೊ ಭಾಯಿಯೀ ಆಮ್ಚೊ ದೋಸ್ತ್‌ಚ್.”

“ದೋಸ್ತ್!” ಥುಕ್‍ಲ್ಲೆಪರಿಂ ಷೇಕ್ ಆಲಿಚೆಂ ಉತಾರ್ ಉಸಳ್ಳೆಂ. “ದೋಸ್ತ್!” ದೋಸ್ತ್ ಮಾತ್ರ್ ನಹಿಂ, ತ್ಯಾ ಯುವತಿನ್ ಹ್ಯಾ ನಸ್ರಾನಿಚೆಂ ನಾಂವ್‍ಯೀ ಉಚಾರ್‌ಲ್ಲೆಂ ಆಯ್ಕೊನ್ ಕಾಫರಾಚೆಂ ಶಿಂತಿದ್ ಫಿರ್ವಲೆಂ.

“ವ್ಹಯ್” ಮ್ಹಣಾಲಿ ಜಮೀಲಾ, ಬಾಕಿ ದವರಿನಾಸ್ತಾನಾ: “ದವಾತ್ ಆನಿ ದೋಸ್ತ್ ತಸಲ್ಯಾ ವಿಷಯಾಂನಿ ಜಾತ್, ಕಾತ್ ವಾ ಮತ್ ಮ್ಹಳ್ಳೊ ಫರಕ್ ನಾ.”

“ಖುದಾ, ಬಚಾವ್ ಕರ್!” ಷೇಕ್ ಆಲಿ ಕಳ್ವಳ್ಳೊ.

“ಬರಾಬರ್!” ವಯ್ಲ್ಯಾನ್ ಮ್ಹಣಾಲಿ ಆಸ್ಮಾಬಿ.

ಅಂತುಲ್ಯಾನ್ ನಾಕ್ ಪೀಳ್ನ್ ಹಾಸೊ ತಡ್ವುನ್ ಧರ್ಲೊ. ಜಾಲ್ಯಾರೀ ತ್ಯಾ ಸ್ತ್ರೀಯಾಂನಿ ತಶೆಂ ಉಲಯಿಲ್ಲ್ಯಾನ್ ಫುಡೆಂ ಚಡಿತ್ ಅನ್ವಾರಾಂಕ್ ವಾಟ್ ಉಗ್ತಿ ಜಾಲಿ ಮ್ಹಳ್ಳಿಂ ಚಿಂತ್ನಾಂಯೀ ತಾಚ್ಯಾ ಮತಿಂತ್ ಪಾಶಾರ್ ಜಾಲಿಂ.

“ತರ್ ವಕ್ತಾ ಖಾತಿರ್ ಫಾಲ್ಯಾಂ ಯೆತಾಂ ಮಾತಾಜೀ” ಮ್ಹಣೊನ್ ತೊ ಉಟ್ಲೊ. “ಕಾಂಯ್ ಬೆಜಾರಾಯ್ ದಿಲ್ಯಾರ್ ಮಾಫ್ ಕರಿಜಾಯ್.”

“ನಾ, ಫಾಲ್ಯಾಂ ಜಾಯ್ನಾ” ಮ್ಹಣಾಲಿ ಆಸ್ಮಾಬಿ. “ಫಾಲ್ಯಾಂ ಸುಕ್ರಾರ್. ಆಜ್‍ಚ್ ಸಾಂಗೊನ್ ವ್ಹರ್.”

ಅಂತುಲೊ ರಾವ್ಲೊ.

“ತರ್, ಹಾಂವ್ ವೆತಾಂ” ಮ್ಹಣೊನ್ ಷೇಕ್ ಆಲಿ ಉಪಾಯ್ ನಾಸ್ತಾಂ ಮ್ಹಳ್ಳೆಪರಿಂ ಉಟ್ಲೊ ಆನಿ ಅಂತುಲ್ಯಾಕ್, “ಪರತ್ ಮೆಳ್ತೆಲ್ಯಾಂವ್!” ಮ್ಹಳ್ಳ್ಯಾ ಉತ್ರಾಂ ಬರಾಬರ್ ದುರ್ದುರಿ ದೀಷ್ಟ್ ದೀವ್ನ್ ಥಂಯ್ ಥಾವ್ನ್ ಚಲ್ತಚ್ ರಾವ್ಲೊ.

ತೊ ಗೆಲ್ಯಾ ಉಪ್ರಾಂತ್ ಥೊಡೊ ವೇಳ್ ಆಸ್ಮಾಬಿ, ಜಮೀಲಾ ಆನಿ ಅಂತುಲೊ ಪಡ್ವಳ್ ಥಂಡ್ ರಾವ್ಲಿಂ. ಉಪ್ರಾಂತ್:

“ಕಿತೆಂ ಚಿಂತುಂಕ್ ಪಡ್ಲೊಯ್?” ಜಮೀಲಾನ್ ಸವಾಲ್ ಕೆಲೆಂ.

“ದುಸ್ರೆಂ ಕಾಂಯ್ ನಾ ದೀದಿ” ಅಂತುಲ್ಯಾನ್ ಜವಾಬ್ ದಿಲಿ. “ತ್ಯಾ ಮನ್ಶ್ಯಾಕ್ ಆನಿ ತಾಚೊ ಸಾಂಗಾತಿ ಜಾವ್ನಾಸ್ಚ್ಯಾ ವೆಂಕಪ್ಪಯ್ಯಾಕ್ ಹ್ಯಾ ದಿಸಾಂನಿ ಆಮ್ಚ್ಯಾ ಸರ್ದಾರಾಚೆಂ ನಾಂವ್ ಆಯ್ಕಲ್ಯಾರ್ ಜಾಯ್ನಾ. ಆಜ್ ಹಾಂಗಾಸರ್ ಷೇಕ್ ಆಲಿ ಆಸ್ತಾನಾ ಹಾಂವ್ ಆಯಿಲ್ಲ್ಯಾ ವರ್ವಿಂ ಫರಾಮಸ್ ಜಾಲಿಗೀ ಮ್ಹಣ್ ಭೊಗ್ತಾ ಮ್ಹಾಕಾ.”

“ಕಾಂಯ್ ಪರ್ವಾ ನಾ” ಮ್ಹಣಾಲಿ ಆಸ್ಮಾಬಿ. “ತುವೆಂ ಆಯಿಲ್ಲೆಂ ಬರೆಂಚ್ ಜಾಲೆಂ. ಆಯ್ಚ್ಯಾ ಉಪ್ರಾಂತ್ ಪುಣೀ ತಾಣೆಂ ಹಾಂಗಾ ಯೇವ್ನ್ ವಿರಾರಾಯ್ ದಿಂವ್ಚಿ ಥೊಡಿ ಉಣಿಂ ಜಾಯ್ತ್ ಮ್ಹಣ್ ಆಶಾ ಕರ್ಯೆತ್.”

“ತಾಣೆಂ ಹಾಂಗಾ ಯೆಂವ್ಚೆಂ ರಾವಯ್ಜಾಯ್ ಮ್ಹಣ್ ಆಮಿ ಏಕ್ ವಾಟ್ ಸೊಧ್ತಾಲ್ಯಾಂವ್” ಮ್ಹಣಾಲಿ ಜಮೀಲಾ.

ಜೆಮೆದಾರ್ ಅಂತುಲ್ಯಾನ್ ಜಾಪ್ ಕೆಲಿ ನಾ. ಷೇಕ್ ಆಲಿ ತ್ಯಾ ಘರಾಕ್ ಸರ್ಕಾರಿ ಕಾಮಾಚ್ಯಾ ನಿಬಾನ್ ವಚನಾತ್‍ಲ್ಲೊ, ಬಗಾರ್ ಜಮೀಲಾ ಮ್ಹಳ್ಳ್ಯಾ ಚಿತ್ಳಾಚಿ ಶಿಕಾರಿ ಸೊಧುನ್ ವೆತಾಲೊ ಆನಿ ತಾಂಕಾಂ ಧೊಸ್ತಾಲೊ ಮ್ಹಣ್ ತಾಕಾ ಸಮ್ಜಲೆಂ, ಆನಿ ಬೆಜಾರ್ ಜಾಲೆಂ. ಕಾರಣ್: ಸರ್ದಾರ್ ಯೂಸುಫ್ ಆಲಿಕ್ ಜಮೀಲಾ ಕಡೆನ್ ವರ್ತಿ ಸಳಾವಳ್ ಆನಿ ಮೋಗ್ ಆಸಾ ಮ್ಹಣ್ ತೊ ತೊ ಜಾಣಾಂಸ್‍ಲ್ಲೊ.

ಉಪ್ರಾಂತ್, ಆಪ್ಣೆಂ ಆಯಿಲ್ಲೆಂ ನೀಜ್ ಕಾರಣ್ ತಾಣೆಂ ಸಾಂಗ್ಲೆಂ:

“ಫಾಲ್ಯಾಂಚೊ ಏಕ್ ದೀಸ್ ಸೊಡ್ನ್, ಪೊರ್ವಾಂ ಫಾಂತ್ಯಾರ್ ಟಿಪ್ಪು ಸರ್ದಾರ್ ಸ್ವತಃ, ಏಕ್ ಹಳ್ತಾಚಿ ಫವ್ಜ್ ಘೆವ್ನ್ ಕೊಡಗು ರಾಜಾಚ್ಯಾ ಗಡಿ ಪ್ರದೇಶಾಚೆರ್ ಲಡಾಯೆಕ್ ವೆತಾ.”

“ಲಡಾಯೆಕ್!”

“ವ್ಹಯ್” ಮ್ಹಣೊನ್ ಜೆಮೆದಾರ್ ಅಂತುಲ್ಯಾನ್ ಕಾರಣಾಂ ದಿಲಿಂ: ಲಡಾಯೆ ಪ್ರಾಸ್, ಫುಡ್ಲ್ಯಾ ತೀನ್ ವಾ ಚಡ್ ಹಫ್ತೆ ಪರ್ಯಾಂತ್, ಮೈಸೂರ್ ಆನಿ ಕೊಡಗು ಪ್ರಾಂತಾಂ ಮಧ್ಲ್ಯೊ ಸರ್ವ್ ವಾಟೊ ಬಂದ್ ಜಾವ್ನ್ ಟಿಪ್ಪುಚ್ಯಾಚ್ ಮುಖೆಲ್ಪಣಾ ಖಾಲ್ ತಪಾಸಣೆರ್ ಆಸ್ತೆಲ್ಯೊ ಮ್ಹಣ್ ತಾಣೆಂ ವಿವರ್ ದಿಲೊ.

ತಾಂಕಾಂ ತೆಂ ಸಮ್ಜಲೆಂ. ಬಂದಡೆಂತ್ಲೆಂ ಸುಟೊನ್ ಪರಾರಿ ಜಾಂವ್ಚ್ಯಾ ಕುಟ್ಮಾಂಕ್ ಮಜತ್ ದೀವ್ನ್ ತಾಂಕಾಂ ಕೊಡಗಾಚ್ಯಾ ಗಡಿ ಪರ್ಯಾಂತ್ ಪಾವಂವ್ಚ್ಯಾ ಸಾಹಸಾಂತ್ ಆಸ್ಮಾಬಿಚೊ ಆನಿ ಜಮೀಲಾಚೊ ಹಾತ್ ಆಸ್‍ಲ್ಲೊ. ಪುಣ್ ಫುಡ್ಲ್ಯಾ ಲಡಾಯೆ ತಿತ್ಲ್ಯಾ ದಿಸಾಂನಿ, ಬಂದಡೆಂತ್ಲೆಂ ಭಾಯ್ರ್ ಹಾಡ್‍ಲ್ಲ್ಯಾ ಕೊಣಾಯ್ಕೀ ತೆವ್ಶಿಲ್ಯಾ ವಾಟೆನ್ ಧಾಡಿನಾಸ್ತಾಂ ವೆಗ್ಳ್ಯಾ ವಾಟಾಂನಿ ಧಾಡುಂಕ್ ಜಾಗಂವ್ಚ್ಯಾ ಖಾತಿರ್ ಜಮೆದಾರ್ ಅಂತುಲೊ ಪಡ್ವಳ್ ಆಯಿಲ್ಲೊ.

“ಲಡಾಯೆ ವೆಳಾರ್ ಹಾಂಗಾಸರ್ (ಪಟ್ಟಣಾಂತ್) ಕೋಣ್ ಆಸ್ತೆಲೆ?” ಜಮೀಲಾನ್ ವಿಚಾರ್ಲೆಂ.

“ತುಮ್ಕಾಂ ಚಡ್ ಕಷ್ಟ್ ಆಸ್ಚೆ ನಾಂತ್ – ಸರ್ದಾರ್ ಯೂಸುಫ್ ಆಲಿ ಆನಿ ತಾಚೆ ಶಿಪಾಯ್ ಹಾಂಗಾಸರ್ ಆಸ್ತೆಲೆ.”

“ಆನಿ ತುಮಿ?”

“ಆಮ್ಚ್ಯಾ ಸರ್ದಾರಾಚಿ ಕಂಪ್ಣಿ, ಬಾದಶಹಾ ಸಾಂಗಾತಾ ವೆತಾ.”

“ತರ್ ಚತ್ರಾಯ್ ಕರಾ ಆನಿ ಬರ್‍ಯಾ ಥರಾನ್ ಪಾಟಿಂ ಯೆಯಾ. ತೆದೊಳ್ ಪರ್ಯಾಂತ್, ಸಾಧ್ಯ್ ಆಸ್‍ಲ್ಲೆಂ ಸರ್ವ್ ಆಮಿ ಕರ್ತಾಂವ್” ಮ್ಹಣಾಲಿ ಆಸ್ಮಾಬಿ.

ಜೆಮೆದಾರ್ ಅಂತುಲೊ ಪಡ್ವಳ್ ಥಂಯ್ ಥಂಯ್ ಥಾವ್ನ್ ಪಾಟಿಂ ಆಯ್ಲೊ. ಸರ್ದಾರ್ ಸಿಮಾಂವ್ಕ್ ಭೆಟೊನ್, ಘಡ್‍ಲ್ಲಿ ಖಬರ್ ತಾಣೆಂ ಸಾಂಗ್ಲಿ.

“ಚತ್ರಾಯ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಘೊಂಕ್ಚಿಂ ಸುಣಿಂ ಘೊಂಕುನ್‍ಂಚ್ ಆಸೊಂದಿತ್. ತೊ ಮನಿಸ್ ಬಾದಶಹಾಚೊ ಗೂಢಚಾರ್ ಜಾವ್ಯೆತ್. ತಿ ಖಬರ್‌ಯೀ ಆಸ್ಮಾಬಿಕ್ ಜಾತಾ ತಿತ್ಲ್ಯಾ ವೆಗಿಂ ಕಳವ್ನ್ ಜಾಗ್ರುತ್ಕಾಯ್ ದೀಂವ್ಕ್ ಸರ್ದಾರ್ ಯೂಸುಫಾ ಕಡೆನ್ ಹಾಂವ್ ಸಾಂಗ್ತಾಂ.”

ತೊ ದೀಸ್ ಪಾಶಾರ್ ಜಾಲೊ.

ಕೊಡಗಾಕ್ ವೆಚ್ಯಾ ಶಿಪಾಯಾಂಚಿ, ಪ್ರಾಣಿಂಚಿ, ಆಯುಧಾಂಚಿ ಆನಿ ಗಾಡಿಯಾಂಚಿ ಸರ್ವ್ ತಯಾರಾಯ್ ಜಾತಚ್ ಆಸ್‍ಲ್ಲಿ.

ದುಸ್ರ್ಯಾ ದಿಸಾ, ದೊನ್ಪಾರ್ ಪರ್ಯಾಂತ್, ಜಾಯ್ ಜಾಲ್ಲಿ ತಯಾರಾಯ್ ಕರುಂಕ್, ಅಂತುಲೊ ಪಡ್ವಳ್ ಸರ್ದಾರ್ ಸಿಮಾಂವ್ ಸಾಂಗಾತಾ ಉರ್ಲೊ. ದೊನ್ಪಾರಾಂ ಉಪ್ರಾಂತ್ ಥೊಡೆ ಗರ್ಜೆಚೆ, ಲಡಾಯೆಕ್ ಸಂಬಂಧ್ ಜಾಲ್ಲೆ ವಿಷಯ್ ಉಲಂವ್ಚ್ಯಾ ಖಾತಿರ್ ಆನಿ ಆಪುಣ್ ನಾತ್ಲೆಲ್ಯಾ ವೆಳಾರ್ ಪಟ್ಟಣಾಚ್ಯಾ ಭದ್ರತೆ ಸಂಬಂಧಿಂ ಥೊಡಿ ಹುಕುಮ್ ದಿಂವ್ಚ್ಯಾ ಖಾತಿರ್, ಸರ್ದಾರ್ ಸಿಮಾಂವ್ಕ್ ಆನಿ ಸರ್ದಾರ್ ಯೂಸುಫಾಕ್ ಟಿಪ್ಪು ಸುಲ್ತಾನಾನ್ ಆಪಯ್ಲೆಂ.

ದುಸ್ರೆಂ ಕಾಮ್ ನಾತ್‍ಲ್ಲೊ ಅಂತುಲೊ ಪಡ್ವಳ್, ಏಕ್ ದೋನ್ ವೊರಾಂಚಿ ನೀದ್ ಕಾಡ್ನ್, ಉಪ್ರಾಂತ್ ಎಕ್ಲ್ಯಾ ದೊಗಾಂ ಸಾಂಗಾತ್ಯಾಂ ಸಾಂಗಾತಾ ಸಾಂಜೆಚ್ಯಾ ಭೊಂವ್ಡೆಕ್ ಭಾಯ್ರ್ ಸರ್ಲೊ. ಆಮೊರೆ ವೆಳಾರ್ ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್ ಪಾಟಿಂ ಯೆತಾನಾ ಅಂತುಲೊ ನಾತ್‍ಲ್ಲೊ.

“ಮ್ಹಾಕಾ ಏಕ್ ದುಬಾವ್ ಮಾರ್ತಾ ಯೂಸುಫ್ ಭಾಯೀ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತುಕಾ ಹಾಂವೆಂ ಅಂತುಲ್ಯಾಚಿ, ಕಾಲ್ಚಿ ಖಬರ್ ಸಾಂಗೊನ್ ಚಡ್ ವೇಳ್ ಜಾಂವ್ಕ್ ನಾ.”

“ತರ್ ಕಾಂಯ್..?”

“ಆಡಾಂವ್ಕ್ ಜಾತಾ ಜಾಲ್ಯಾರ್ ಪಳೆಯಾಂ. ತ್ಯಾ ಬೇವ್‍ಕೂಫಾಕ್ ಆಜ್ ಭಿತರ್‌ಚ್ ರಾವೊಂಕ್ ಹಾಂವೆಂ ಫರ್ಮಾಯ್ಜಾಯ್ ಆಸ್‍ಲ್ಲೆಂ!”

ಸರ್ದಾರ್ ದೊಗ್‍ಯೀ ಪರ್ತ್ಯಾನ್ ಭಾಯ್ರ್ ಸರ್ಲೆ.

ಏಕ್ ದೋನ್ ವೊರಾಂ ಆದಿಂ ಭಾಯ್ರ್ ಸರೊನ್ ಗೆಲ್ಲೆ ಅಂತುಲೊ ಪಡ್ವಲ್, ಸೋಮಯ್ಯ ಆನಿ ವೀರಪ್ಪ ಥೊಡೊ ವೇಳ್ ಹೆಣೆಂ-ತೆಣೆಂ ಭೊಂವೊನ್, ಸಾಂಜ್ ಜಾತಾನಾ, ಪಟ್ಟಣಾಂತ್ಲ್ಯಾ ಪ್ರಮುಖ್ ಖಾನಾವಳಿಕ್ ಪಾವ್‍ಲ್ಲೆ. ಚಿಕ್ಕೆ ವಯ್ಲ್ಯಾ ಮಟ್ಟಾಚ್ಯಾ ಶಿಪಾಯಾಂನಿ ಆನಿ ಉದ್ಯೋಗಸ್ಥಾಂನಿ ಉಪಾಹಾರಾ ಖಾತಿರ್ ಆನಿ ವಿನೋದಾ ಖಾತಿರ್ ಜಮ್ಚೆಂ ಮಂದಿರ್ ತೆಂ.

ಅಂತುಲೊ ಪಡ್ವಳ್ ಆನಿ ಸಾಂಗಾತಿ ಥಂಯ್ಸರ್ ಪಾವ್ತಾನಾ ಕಾಳೊಕ್ ಜಾಲ್ಲೊ. ಮುಖ್ಲ್ಯಾ ಲಾಂಬ್ ಸಾಲಾಂತ್ ತೀನ್ ದಿವೆ ಉಮ್ಕಳ್ತಾಲೆ; ಬಗ್ಲೆಚ್ಯಾ ದೊನೀ ಕುಶಿಂನಿ ಲಾಂಬಾಯೆನ್ ವಣದಿಕ್ ಲಾಗೊನ್ ಆಸ್‍ಲ್ಲ್ಯಾ ಚಾಪ್ಯಾ ಫೊಳ್ಯಾಂನಿ ಗಾಂವ್ಟಿ ವಾತಿ ಜಳ್ತಾಲ್ಯೊ; ಥಂಯ್ ಹಾಂಗಾ ಥೊಡೆ ಜಣ್ ಖೊಲೆ ಖೆಳ್ತಾಲೆ, ಆನಿ ಕೋಣ್ ಗುರ್ಪೊಳ್ಯಾಂನಿ ಗುಲೆ ಚಲಯ್ತಾಲೆ.

ಬಾಗ್ಲಾಕ್ ಚಿಕ್ಕೆ ಲಾಗಿಂ ಆಸ್‍ಲ್ಲ್ಯಾ ದೋನ್ ಮೆಜಾಂಚೆರ್ ಷೇಕ್ ಆಲಿ ಆನಿ ತಾಚೆ ಸಾತಾ’ಟ್ ಜಣ್ ಸಾಂಗಾತಾ ಆಸೊನ್ ಮಝಾ ಮಾರ್ತಾಲೆ. ಪ್ರವೇಶ್ ಜಾಲ್ಲ್ಯಾ ತೆಗಾಂಚೆರ್ ದೀಷ್ಟ್ ಪಡ್ತಚ್ ಷೇಕ್ ಆಲಿಚೆಂ ಮುಖಮಳ್ ಗಂಭೀರ್ ಜಾಲೆಂ. ತೆಂ ಪಳೆವ್ನ್ ತಾಚೆ ಸಾಂಗಾತಿಯೀ ಮೌನ್ ಜಾಲೆ.

“ಥೊಡೆ ಸೂಅರ್, ಆಮಿ ಚಿಂತ್‍ಲ್ಲ್ಯಾ ಪ್ರಾಸ್ ವೆಗಿಂ ಗಳೊ ದೀಂವ್ಕ್ ಯೆತಾತ್!” ಮ್ಹಣೊನ್ ಷೇಕ್ ಆಲಿ ನಂಜ್ಯೊ ಹಾಸ್ಲೊ.

ಹೆಂ ಆಯ್ಕೊನ್ ಅಂತುಲ್ಯಾನ್ ವಗೊಚ್ ರಾವ್ಯೆತ್ ಆಸ್‍ಲ್ಲೆಂ. ಪುಣ್ ತಶೆಂ ರಾಂವ್ಚೊ ಗ್ರಾಯ್ಕ್ ತೊ ನಹಿಂ. ತಾಣೆಂ ಮೇಟ್ ಮುಖಾರ್ ಕಾಡ್ಲೆಂ.

“ಕೊಣಾಕ್ ಚಿಂತುನ್ ಉಲಯ್ಲೊಯ್ ತುಂ?” ವಿಚಾರ್ಲೆಂ ತಾಣೆಂ.

“ಸೂಅರಾಂಕ್ ಪಳೆವ್ನ್ ಕಾಂಯ್ ಉಲಯ್ಜಾಯ್ ಜಾಲ್ಯಾರ್ ಚಿಂತ್ಚಿ ಕಾಂಯ್ ಗರ್ಜ್ ನಾ!” ತೊ ತಸೊಚ್ ಹಾಸ್ಲೊ. ತಾಚೆ ಸಾಂಗಾತಿಯೀ ಕೇಕೆಲೆ.

“ತರ್ ಘೊಂಕ್ಚ್ಯಾ ಕುತ್ತಾಂಕ್ ಆಮಿ ಲೆಕಿನಾಂವ್.”

ಷೇಕ್ ಆಲಿ ಉಟ್ಲೊ: “ಕೋಣ್ ಕುತ್ತಾ?”

“ತಿ ತೊಪಿ ತುಕಾ ಮೆಚ್ವತಾ ಜಾಲ್ಯಾರ್ ಮಾತ್ಯಾಕ್ ದವರ್.”

ಷೇಕ್ ಆಲಿ ಘಡಿಭರ್ ಥಟಕ್ ಜಾಲೊ. ತಾಚೊ ಹಾತ್ ತಲ್ವಾರಿಕ್ ಗೆಲೊ. “ತೆಂ ಉತಾರ್ ಪಾಟಿಂ ಕಾಡ್!” ಮ್ಹಳೆಂ ತಾಣೆಂ.

ಅಂತುಲೊ ವ್ಹಡ್ಲ್ಯಾನ್ ಹಾಸ್ಲೊ ಮಾತ್ರ್. ಸಾಲ್ ಸ್ತಬ್ಧ್ ಜಾಲೆಂ.

“ತರ್, ಹಾಂವ್ ಸಮಾಧಾನ್ ವಿಚಾರ್ತಾಂ!” ಉತ್ರಾಂ ಬರಾಬರ್ ಷೇಕ್ ಆಲಿಚ್ಯಾ ಕೊಶಿಯೆಂತ್ಲಿ ತಲ್ವಾರ್ ಭಾಯ್ರ್ ಆಯ್ಲಿ.

“ಮಾಫ್ ಕರ್‍ಯಾ – ಹಾಂಗಾಸರ್ ತಲ್ವಾರಿಂನಿ ಝುಜನಾಕಾತ್!” ಖಾನಾವಳಿಚ್ಯಾ ಮುಖೆಲ್ಯಾನ್ ಉಪ್ಕಾರ್ ಮಾಗ್ಲೊ.

“ತುಂ ಚುಪ್ ರಾವ್!” ಷೇಕ್ ಆಲಿನ್ ಧೆಂಕ್ಣೊ ಮಾರ್ಲೊ. ಉಪ್ರಾಂತ್ ಅಂತುಲ್ಯಾಕ್ ಪಳೆವ್ನ್: “ಮ್ಹಾಕಾ ಕೆಲ್ಲ್ಯಾ ಅವ್ಮರ್ಯಾದಿ ಖಾತಿರ್ ಸಮಾಧಾನ್ ದಿತಾಯ್‍ಗೀ, ತುಕಾ ರಾವ್‍ಲ್ಲೆಪರಿಂಚ್ ಚಿರಿಜಾಯ್?”

“ಕಿತೆಂ ಮ್ಹಣ್ ಚಿಂತಾಯ್ ತುಂ?” ಅಂತುಲ್ಯಾನ್‍ಯೀ ಆಪ್ಲಿ ತಲ್ವಾರ್ ಭಾಯ್ರ್ ಕಾಡ್ಲಿ. ಸೋಮಯ್ಯಾಕ್ ತಾಣೆಂ ಆಪ್ಣಾಚೊ ಮಧ್ಯಸ್ಥ್ ಜಾಂವ್ಕ್ ಆಪಯ್ಲೊ. ಷೇಕ್ ಆಲಿನ್‍ಯೀ ಆಪ್ಲ್ಯಾ ಮಧ್ಯಸ್ಥಾಕ್ ವಿಂಚ್ಲೊ.

ಹೆರ್ ಸಕ್ಕಡ್ ಪಾಟಿಂ ಸರ್ಲೆ. ಕದೆಲಾಂ ಮೆಜಾಂ ಪಾಟಿಂ ವೊಡ್ಲಿಂ.

ಕೊಂಬೆ ದೊಗ್‍ಯೀ ತಯಾರ್ ಜಾಲೆ. ಷೇಕ್ ಆಲಿಚ್ಯಾ ಖಾಡಾ ಇಡ್ಯಾಂತ್ಲ್ಯಾನ್ ತಾಚೆ ದಾಟ್ ವೋಂಟ್ ಹಾಸ್ತಾಲೆ. ಅಂತುಲೊ ತಲ್ವಾರಿಚ್ಯಾ ಲಡಾಯೆಂತ್ ನಾಂವಾಡ್ಲಲೊ ಗ್ರಾಯ್ಕ್‌ಚ್ ನಹಿಂ. ತಾಚಿ ಕಾಣಿ ಥೊಡ್ಯಾಚ್ ವೆಳಾನ್ ಕಾಬಾರ್ ಜಾತೆಲಿ ಮ್ಹಣ್ ತಾಂಕಾಂ ಕಳಿತ್ ಆಸ್‍ಲ್ಲೆಂ.

ಬಾಗ್ಲಾಕ್ ಕೂಸ್ ಕರ್ನ್, ಆಟ್ ಮೆಟಾಂ ಪಯ್ಸ್ ಥಾವ್ನ್ ಲಡಾಯೆಚ್ಯಾ ಘಡ್ಯೆಕ್ ಮೇಟ್ ತೆಂಕುನ್ ತೆ ರಾವ್ಲೆ. ಆತಾಂ –

“ಬಾದಶಹಾಚ್ಯಾ ನಾಂವಾನ್ ಖಬಡ್ದಾರ್!” ಆಯ್ಕಲಿ ಹುಕುಮ್.

ಸಕ್ಡಾಂಚೆ ದೊಳೆ ಬಾಗ್ಲಾ ತೆವ್ಶಿನ್ ಪರ್ತತಾನಾ ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್ ಫುಡೆಂ ಆಯ್ಲೆ. ಸರ್ದಾರ್ ಸಿಮಾಂವ್ ಫುಡೆಂ ಯೇವ್ನ್ ಮಧೆಂ ರಾವ್ಲೊ.

“ತಲ್ವಾರಿಂಚೆಂ ಹೆಂ ದ್ವಂದ್ವ್ (ದೊಗಾಂಚಿ ಲಡಾಯ್) ಜಾಂವ್ಕ್ ನಜೊ.”

“ಕಿತ್ಯಾಕ್ ನಜೊ?” ಘೊಂಕ್ಲೊ ಷೇಕ್ ಆಲಿ, ತೊಂಡಾಂತ್ಲೆಂ ಹಾಡ್ ವೋಡ್ನ್ ಕಾಡ್‍ಲ್ಲ್ಯಾ ಸುಣ್ಯಾ ಜಿನ್ಸಾರ್. “ಕಿತ್ಯಾಕ್?” ತೊ ಲಾಗಿಂ ಆಯ್ಲೊ.

“ಕಾರಣಾಂ ವಾಜ್ಭಿ ಆಸಾತ್” ಮ್ಹಣಾಲೊ ಸರ್ದಾರ್ ಸಿಮಾಂವ್, ತಾಳೊ ಉಕಲಿನಾಸ್ತಾನಾ. “ಪಯ್ಲೆಂ: ತುಮ್ಚ್ಯಾ ದೊಗಾಂಯ್ಚ್ಯಾ ತಲ್ವಾರಿಂಚಿ ಲಾಂಬಾಯ್ ಏಕ್ ಸಾರ್ಕಿ ನಾ. ದುಸ್ರೆಂ: ಸುಕ್ರಾರಾಚೆಂ, ಪಟ್ಟಣಾಚ್ಯಾ ಆವರಾ ಭಿತರ್ ದ್ವಂದ್ವ್ ಆಡ್ವಾರ್ಲಾಂ ಮ್ಹಣ್…”

“ತೆಂ ದೊಗಾಂ ಮುಸ್ಲಿಮಾಂ ಮಧೆಂ ಮಾತ್ರ್…” ಮಧೆಂಚ್ ಚಾಬ್ಲೊ ಷೇಕ್ ಆಲಿ. “ಹೆಂ ಏಕ್ – ಆಪ್ಲ್ಯಾ ಪಾಟ್ಲಾವ್ದಾರಾಕ್ ವಾಂಚಂವ್ಕ್ ನಾಂವಾಡ್ದಿಕ್ ಮನ್ಶ್ಯಾಂನಿ ದಿಂವ್ಚೆಂ ಪೊಳ್ಕುರೆಂ ಕಾರಣ್!”

ಹೆಂ ಆಯ್ಕೊನ್ ಸರ್ದಾರ್ ಯೂಸುಫ್ ಆಲಿನ್ ಸಹಿತ್ ಆಂಗ್ ಕಾಡ್ಲೆಂ. ತ್ಯಾಚ್ ಕ್ಷಣಾ ಭಿತರ್ ಸರ್ದಾರ್ ಸಿಮಾಂವ್ಚ್ಯಾ ದಾವ್ಯಾ ಹಾತಾಚೆಂ ಏಕ್ ಚಲನ್ ಜಾವ್ನ್ ಗೆಲ್ಲೆಂ. ತಾಚೊ ಹಾತ್ ನೀಟ್ ಜಾವ್ನ್ ಪಾಟಿಂ ಯೆತಾನಾ ತಾಚಿ ಮೂಟ್ ಷೇಕ್ ಆಲಿಚ್ಯಾ ಖಾಡಾ ಭಿತರ್ಲ್ಯಾ ಮುಸ್ಕಾರಾರ್ ಬಸೊನ್ ಜಾಲ್ಲಿ. ಹಾತಾಂತ್ಲಿ ತಲ್ವಾರ್ ಉಸ್ಳೊನ್ ತೊ ಪಾಟಿಂ ಪರ್ತಲ್ಲೊ. ಇಲ್ಲ್ಯಾ ವೆಳಾನ್ ಉಟೊನ್ ತೊ ಬಸ್ತಾನಾ ತಾಚೆ ದೊಳೆ ಗೈರೆ ಜಾಲ್ಲೆ. ಫುಟ್‍ಲ್ಲ್ಯಾ ತಾಚ್ಯಾ ವೊಂಟಾಂತ್ಲ್ಯಾನ್ ಥೊಡೆ ರಗ್ತಾ ಥೆಂಬೆ ಖಾಡಾ ವಯ್ಲ್ಯಾನ್ ಗಳ್ತಾಲೆ.

“ಆತಾಂ ಜಾಲ್ಯಾರ್, ಬಾದಶಹಾಚ್ಯಾ ನಾಂವಾನ್ ಹಾಂವೆಂ ತುಕಾ ಕೈದ್ ಕರ್ಯೆತ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತುಜೆಂ ಸಮಾಧಾನ್ ತುವೆಂ ಹೆರ್ ಕೆದಾಳಾಯೀ ವಿಚಾರ್‍ಯೆತೆಂ. ಬಾದಶಹಾಚಿ ಫವ್ಜ್ ಲಡಾಯೆಕ್ ಭಾಯ್ರ್ ಸರೊಂಕ್ ಆಸ್ಚ್ಯಾ ತೀನ್ ದಿಸಾಂ ಆದಿಂ ಥಾವ್ನ್ ಕೊಣ್‍ಂಚ್ ಶಿಪಾಯಾಂನಿ ತಶೆಂ ಅಧಿಕಾರಿಂನಿ ತರ್ಕಾಂತ್, ನ್ಯಾಯಾಂತ್ ವಾ ಝಗ್ಡ್ಯಾಂತ್ ಬಿಲ್ಕುಲ್ ಮೆತೆರ್ ಜಾಯ್ನಾಯೆ ಮ್ಹಳ್ಳೆಂ ಶಾಸನ್ ಆನಿ ತಾಚಿ ಶಿಕ್ಷಾ ತುಂ ಜಾಣಾಂಸ್ತಲೊಯ್.”

ಷೇಕ್ ಆಲಿ ಘಾಮೆಲೊ.

“ಚೂಕ್ ಜಾಲಿ ಸರ್ದಾರಾ” ಪಿಂರ್ಗಲೊ ತೊ. “ಚೂಕ್ ಜಾಲಿ!”

ಸರ್ದಾರ್ ಸಿಮಾಂವ್ ಆನಿ ಸಾಂಗಾತಿ ಥಂಯ್ ಥಾವ್ನ್ ಭಾಯ್ರ್ ಗೆಲೆ. ಅನ್ವಾರ್ ಏಕ್ ಆಡಾಯ್ಲೆಂ ತರೀ, ಮೊಸ್ರಾಚೊ ಆನಿ ಫಾರಿಕ್ಪಣಾಚೊ ಮುರ್ಮುರೊ ಚಡ್ ಗರಮ್ ಉರ್ತಲೊ ಮ್ಹಣ್ ತಾಂಕಾಂ ಕಳಿತ್ ಆಸ್‍ಲ್ಲೆಂ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel