ಕಲಾ ಸಂಪತ್ ಕ್ವಿಜ್ – 6 ಫಲಿತಾಂಶ್: ಜಾನ್ ಸಿರಿಲ್ ಸೊಜ್ ಜಿಕ್ತಾ ಪಯ್ಲೆಂ ಇನಾಮ್
Posted on : March 31, 2024 at 11:45 AM
ಮಂಗ್ಳುರ್: ‘ಬುಡ್ಕುಲೊ’ ಇ-ಮಾಧ್ಯಮಾನ್ ಮಾಂಡುನ್ ಹಾಡ್‍ಲ್ಲ್ಯಾ ಜನವರಿ 2024 ‘ಕಲಾ ಸಂಪತ್ ಕೊಂಕ್ಣಿ ಕ್ವಿಜ್ – 6’ ಸ್ಪರ್ಧ್ಯಾಚೆಂ ಫಲಿತಾಂಶ್ ಹಾಂಗಾ ಆಸಾ. ಬುಡ್ಕುಲೊಂತ್ ಫಾಯ್ಸ್ ಜಾಲ್ಲಿ, ಡೊ. ಎಡ್ವರ್ಡ್ ನಜ್ರೆತಾನ್ ಲಿಖ್‍ಲ್ಲಿ ‘ಬಾಂಧುಂಕ್ ಜಾಯ್ನಾತ್‍ಲ್ಲೊ ಫೊಂಡ್’ ಕಾಣಿ ಆಮಿ ಸ್ಪರ್ಧ್ಯಾಕ್ ವಿಂಚ್‍ಲ್ಲಿ. ಹ್ಯಾ ಸ್ಪರ್ಧ್ಯಾಚಿಂ ನಗದ್ ಇನಾಮಾಂ ಡೊ. ಆಸ್ಟಿನ್ ಡಿಸೋಜ ಪ್ರಭುನ್ ಪ್ರಾಯೋಜಿತ್ ಕೆಲ್ಯಾಂತ್. ಪಯ್ಲೆಂ ಆನಿ ದುಸ್ರೆಂ ಇನಾಮ್ ಜಿಕ್‍ಲ್ಲ್ಯಾಂಕ್ ಕೊಪ್ಪ ಬಸ್ರೀಕಟ್ಟೆಚ್ಯಾ ಹಿಮಗಿರಿ ಹೋಮ್‍ಸ್ಟೇಂತ್ ಎಕಾ ದಿಸಾಚಿ ವಸ್ತಿ-ಸತ್ಕಾರ್ ಫುಂಕ್ಯಾಕ್ ಲಾಭ್ತಲೊ.
‘ಕಲಾ ಸಂಪತ್ ಕೊಂಕ್ಣಿ ಕ್ವಿಜ್ – 6’ ಫಲಿತಾಂಶ್:
ಪಯ್ಲೆಂ ಇನಾಮ್ ಜೊಡ್ತಾ: ಜಾನ್ ಸಿರಿಲ್ ಡಿಸೋಜ, ಆಗ್ರಾರ್ (36½ ಅಂಕ್), ದುಸ್ರೆಂ ಇನಾಮ್ ಆಪ್ಣಾಯ್ತಾ: ಸಿಸ್ಟರ್ ಅಸುಂಪ್ತಾ ಬಿ.ಎಸ್. (36 ಅಂಕ್). ತಿಸ್ರೆಂ ಇನಾಮ್ ತೆಗಾಂಕ್ ಫಾವೊ ಜಾಲಾಂ. ತಿಂ ಆಸಾತ್: ರೋಶಲ್ ಪ್ರಿಯಾ ಡಿಸೋಜ, ಪಾಲಡ್ಕ (31 ಅಂಕ್); ವನಿತಾ ಮಾರ್ಟಿಸ್, ಬಾರ್ಕೂರ್ (31 ಅಂಕ್) ಆನಿ ವಯೊಲೆಟ್ ಲೋಬೊ, ಪೆರ್ನಾಲ್ (30½ ಅಂಕ್). ಹ್ಯಾ ಸರ್ವ್ 5 ಜಣಾಂಕ್ ನಗದ್ ಇನಾಮಾಂ ಫಾವೊ ಜಾತಾತ್. ಹಾಂಕಾಂ ಅಭಿನಂದನ್.
ಊಂಚ್ ಅಂಕ್ ಆಪ್ಣಾಯಿಲ್ಲಿಂ ಹೆರಾಂ: ಹೆನ್ರಿ ಡಿಸೋಜ, ಕಾಟಿಪಳ್ಳ (29 ಅಂಕ್); ಫ್ರೀಡಲ್ ಡಿಸೋಜ, ಪೆರ್ಮನ್ನೂರ್ (28 ಅಂಕ್); ಗ್ರೆಸಿಲ್ಲಾ ಮಿನೇಜಸ್, ಕಣಜಾರ್ (26 ಅಂಕ್); ದಿವ್ಯಾ ಜ್ಯೋತಿ ಡಿಸೋಜ, ಬೆಳ್ತಂಗಡಿ (25 ಅಂಕ್) ಆನಿ ಲವಿಟ ಡಿಸೋಜ, ನಕ್ರೆ (24 ಅಂಕ್). ಹಾಂಕಾಂಯೀ ಉಲ್ಲಾಸಿತಾಂವ್.
ಹ್ಯಾ ಆಮ್ಚ್ಯಾ, ಸವ್ಯಾ, ಸ್ಪರ್ಧ್ಯಾಕ್ ಒಟ್ಟುಕ್ 12 ಜಣಾಂನಿ ಜಾಪಿ ಧಾಡ್ನ್ ಸ್ಪರ್ಧ್ಯಾಂತ್ ಭಾಗ್ ಘೆತ್ಲಾ. ದೋನ್ ವಿಭಾಗಾಂಚ್ಯಾ 12 ಸವಾಲಾಂಕ್ (ಆನಿ ಉಪ ಸವಾಲಾಂಕ್) ಒಟ್ಟುಕ್ 42 ಅಂಕ್ ಆಸ್‍ಲ್ಲೆ.
ಇನಾಮಾಂ ಜೊಡ್‍ಲ್ಲ್ಯಾಂಕ್ ಉಲ್ಲಾಸ್, ಬರೆ ಅಂಕ್ ಆಪ್ಣಾಯಿಲ್ಲ್ಯಾಂಕ್ ಅಭಿನಂದನ್. ಪಾತ್ರ್ ಘೆತ್‍ಲ್ಲ್ಯಾ ಸರ್ವಾಂಕೀ ಶಾಭಾಸ್ಕಿ ಪಾಟಯ್ತಾಂವ್. ತುಮ್ಚ್ಯಾ ಉಮೆದಿಕ್ ಉಲ್ಲಾಸಿತಾಂವ್.
ಸಾರ್ಕ್ಯೊ ಜಾಪಿ:
‘ಬಾಂಧುಂಕ್ ಜಾಯ್ನಾತ್‍ಲ್ಲೊ ಫೊಂಡ್’ ಕಾಣಿಯೆಚೆರ್ ಆಮಿ ವಿಚಾರ್ಲೆಲ್ಲ್ಯಾ ಸವಾಲಾಂಚ್ಯೊ ಸಾರ್ಕ್ಯೊ ಜಾಪಿ:
ಪಯ್ಲೊ ವಿಭಾಗ್:
1. ದಿಸಾಳೆಂ ಪತ್ರ್ ವಾಚುನ್ ಆಸ್‍ಲ್ಲೊ.
2. ರೊಬು ಆನಿ ಮಾರ್ಸೆಲ್.
3. ಮಿಂಗೆಲ್ ಪೀಂತ್; ಮೊರ್ನಾ ಪೆಟೆಚೊ, ಫೊಂಡ್ ಬಾಂಧ್ಚೊ ಆನಿ ಲಗ್ತಿ ವ್ಯವಹಾರ್.
4. ಉಣ್ಯಾರೀ ಏಕ್ ಲಾಖ್ ರುಪಯ್.
5. ಎ. ಆಲಿಸ್‍ಬಾಯ್, ಬಿ. ಗೊಲಿಮಾರ್ ಇಸ್ಕೊಲಾಚ್ಯಾ ವಾಚ್‍ಮ್ಯಾನಾ ಥಾವ್ನ್.
6. ಬಾಹ್ರೇಯ್ನ್.
7. ರುಪಯ್ 2,80,000.
ದುಸ್ರ್ಯಾ ವಿಭಾಗಾಚ್ಯೊ ಜಾಪಿ ಸಕ್ಡಾಂಚ್ಯೊ ಸ್ವಂತ್. ಉತ್ತೀಮ್ ಆನಿ ನಿಖರ್ ಜಾಪಿಂಕ್ ಚಡ್ ಅಂಕ್ ದಿಲ್ಯಾತ್.
ನಗದ್ ಆನಿ ಬಂಪರ್ ಇನಾಮಾಂ:
ಪಯ್ಲೆಂ ಸ್ಥಾನ್ ಜೊಡ್ಲೆಲ್ಯಾಕ್ ರು. 3,750 ಐವಜಾಚಿಂ ಇನಾಮಾಂ (ರು. 750 ನಗದ್, ರು. 3,000ಚೆಂ ಲಕ್ಸುರಿ ಹೋಮ್‍ಸ್ಟೇ ಫ್ರೀ), ದುಸ್ರೆಂ ಸ್ಥಾನ್ ಆಪ್ಣಾಯಿಲ್ಲ್ಯಾಕ್ ರು. 3,550 ಐವಜಾಚಿಂ ಇನಾಮಾಂ (ರು. 550 ನಗದ್, ರು. 3,000ಚೆಂ ಲಕ್ಸುರಿ ಹೋಮ್‍ಸ್ಟೇ ಫ್ರೀ) ಫಾವೊ ಜಾತೆಲಿಂ. ತಿಸ್ರೆಂ ಸ್ಥಾನ್ ಆಪ್ಣಾಯಿಲ್ಲ್ಯಾ ತೆಗಾಂಕ್ ರು. 400 ನಗದ್ ದಿತಾಂವ್. (ನಗದ್ ಇನಾಮಾಂ ಗೂಗಲ್ ಪೇ ಕರ್ತಾಂವ್ ಆನಿ ತಾಚೆಂ ಸ್ಕ್ರೀನ್‍ಶಾಟ್ ಆಮ್ಚ್ಯಾ ವಾಟ್ಸಪ್ ಗ್ರೂಪಾಂತ್ ಘಾಲ್ತಾಂವ್).
ನಗದ್ ಇನಾಮ್ ಪ್ರಾಯೋಜನ್ ಕೆಲ್ಲ್ಯಾ ಡೊ. ಆಸ್ಟಿನ್ ಡಿಸೋಜ ಪ್ರಭುಕ್ ಆನಿ ಹಿಮಗಿರಿ ಹೋಮ್‍ಸ್ಟೇಂತ್ ವಸ್ತಿ ಒದಗ್ಸುನ್ ದಿಂವ್ಚ್ಯಾ ಬಸ್ರೀಕಟ್ಟೆಚ್ಯಾ ಪ್ರಮೋದ್ ಪಿಂಟೊಕ್ ಆಮಿ ವಂದಿತಾಂವ್. ತಾಂಚ್ಯಾ ಉದಾರ್ ಮನಾಕ್ ಆನಿ ಸಹಕಾರಾಕ್ ಧಿನ್ವಾಸ್ತಾಂವ್.
ಆಮಿ ಆಮ್ಚ್ಯಾ ವಾಚ್ಪಿ, ಅಭಿಮಾನಿ ಆನಿ ಹಿತೈಶಿಂ ಖಾತಿರ್ ಬುಡ್ಕುಲೊ ವಾಟ್ಸಪ್ ಗ್ರೂಪ್ ಸ್ಥಾಪನ್ ಕೆಲಾ. ತ್ಯಾ ಗ್ರೂಪಾಂ ಮುಖಾಂತ್ರ್ (ಆ್ಯಡ್ಮಿನ್ ಓನ್ಲಿ ಗ್ರೂಪ್ ತರೀ) ಆಮಿ ಸಾಂದ್ಯಾಂ ಸಂಗಿಂ ಸಂವಾದ್ ಚಲಯ್ತಾಂವ್. ಸ್ಪರ್ಧ್ಯಾಕ್ ಲಗ್ತಿ ಹಿಶಾರೆ, ಸೂಚನಾಂ, ಮಾಹೆತ್ ಥಂಯ್ಚ್ ಘಾಲ್ತಾಂವ್. ಸಾಂದ್ಯಾಂಕ್ ಫಾಯ್ದ್ಯಾ ಭರಿತ್ ಜಾಂವ್ಚ್ಯೊ ಗಜಾಲಿ, ಖಬ್ರೊ, ಚಟುವಟಿಕೊ, ಡೈಲಿ ಕ್ವಿಜ್ ಆನಿ ಜಾಣ್ವಾಯ್ ಪ್ರಸಾರ್ ಕರ್ಚೆಂ ಮಿಸಾಂವ್‍ಯೀ ತಾಂತುಂ ಚಲ್ತಾ. ತುಮ್ಕಾಂ ಹಾಸಂವ್ಕ್‌ಚ್ ಮ್ಹಣ್ ಬಾಲ್ತು ಆಸಾ! ಕೋಣ್ ಆಮ್ಚ್ಯಾ ಗ್ರೂಪಾಂತ್ ನಾಂತ್ ತಾಣಿಂ ಲೇಖನಾಚ್ಯಾ ಆಖೇರಿಕ್ ದಿಲ್ಲೆಂ ಲಿಂಕ್ ಕ್ಲಿಕ್ ಕರ್ನ್ ಭರ್ತಿ ಜಾವ್ಯೆತ್.
ಫೆಬ್ರವರಿ-ಮಾರ್ಚ್ 2024 ಮಹಿನ್ಯಾಚೊ ‘ಕಲಾ ಸಂಪತ್ ಕೊಂಕ್ಣಿ ಕ್ವಿಜ್’ ಸ್ಪರ್ಧೊ ಎದೊಳ್‍ಚ್ ಪ್ರಕಟ್ ಕೆಲಾ. ಸವೆಂ ವಿ.ಜೆ.ಪಿ. ಸಲ್ಡಾನ್ಹಾಚ್ಯಾ ‘ಸೊವೊ ಸುಂರ್ಗಾರುನ್’ ಕಾದಂಬರಿಚೆರ್ ಆಮಿ ಕ್ವಿಜ್ ಸ್ಪರ್ಧೊ ಆಸಾ ಕೆಲಾ. ಮಂಗ್ಳುರ್ಚ್ಯಾ ಫಾಮಾದ್ ‘ಸನ್-ರೇ ಸೋಲಾರ್’ ಕಂಪೆನಿನ್ ಹ್ಯಾ ಸ್ಪರ್ಧ್ಯಾಚಿಂ ನಗದ್ ಇನಾಮಾಂ ಸ್ಪಾನ್ಸರ್ ಕೆಲ್ಯಾಂತ್. ವಿವರಾಕ್ ಸಕಯ್ಲ್ ಲಿಂಕ್ ದಿಲ್ಯಾತ್, ಉಗ್ತೆ ಕರ್ನ್ ವಾಚಾ.
ಕೊಂಕ್ಣಿ ಭಾಸ್, ಸಾಹಿತ್ಯ್, ಸಾಹಿತಿಂಕ್, ಮನ್ಶ್ಯಾಂಕ್ ತಶೆಂ ಸಂಸ್ಥ್ಯಾಂಕ್ ಊಂಚ್ ಉಬಾರುನ್ ಅಪ್ರತಿಮ್ ಸಾಧನ್ ಕರುನ್ ದಾಖ್ಲೊ ರಚ್‍ಲ್ಲ್ಯಾ ‘ಬುಡ್ಕುಲೊ’ನ್ ಆತಾಂ ವಾಚ್ಪ್ಯಾಂಕ್‍ಯೀ ಊಂಚ್ ಉಬಾರ್ಚೆಂ ಮಿಸಾಂವ್ ಜಾರಿ ಕೆಲಾಂ ಆನಿ ನವಿ ಚರಿತ್ರಾ ಘಡ್ಲ್ಯಾ. ಅಸಲಿಂ ಅದ್ಭುತಾಂ ಆಮಿ ನಿರಂತರ್ ರಚುನ್ ಆಸಾಂವ್. ಹೆಂ ಆಮ್ಕಾಂ ಚಡ್ ದಾದೊಸ್ಕಾಯೆಚೆಂ. ಲೊಕಾಚೊ ಸಹಕಾರ್ ಆನಿ ಪಾಟಿಂಬೊಯೀ ಹ್ಯಾ ದಿಶೆನ್ ಆಮ್ಕಾಂ ಆಧಾರ್ ಜಾಲಾ. ಜೈ ಕೊಂಕಣಿ.
ಕಲಾ ಸಂಪತ್ ಕೊಂಕ್ಣಿ ಕ್ವಿಜ್ – 7: ಸವಾಲಾಂ
ಸೊವೊ ಸುಂರ್ಗಾರುನ್ ಕಾದಂಬರಿಚೆರ್ ಕ್ವಿಜ್
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್
Send your Feedback to: budkuloepaper@gmail.com
