ಕಲಾ ಸಂಪತ್ ಕ್ವಿಜ್ – 4: ಪಾಲಡ್ಕಾಚೆಂ ರೋಶಲ್ ಪ್ರಿಯಾ ಡಿಸೋಜ ಆಪ್ಣಾಯ್ತಾ ಪಯ್ಲೆಂ ಇನಾಮ್

ಮಂಗ್ಳುರ್: ‘ಬುಡ್ಕುಲೊ’ ಇ-ಮಾಧ್ಯಮಾನ್ ಮಾಂಡುನ್ ಹಾಡ್‍ಲ್ಲ್ಯಾ ನವೆಂಬರ್ ಮಹಿನ್ಯಾಚ್ಯಾ ‘ಕಲಾ ಸಂಪತ್ ಕೊಂಕ್ಣಿ ಕ್ವಿಜ್ – 4’ ಸ್ಪರ್ಧ್ಯಾಚೆಂ ಫಲಿತಾಂಶ್ ಹಾಂಗಾ ಆಸಾ. ಬುಡ್ಕುಲೊಂತ್ ಫಾಯ್ಸ್ ಜಾಲ್ಲ್ಯಾ, ಜೆ.ವಿ. ಕಾರ್ಲೊನ್ ಅನುವಾದ್ ಕೆಲ್ಲ್ಯಾ ‘ಎಕಾ ರಾತಿಚೊ ಸಯ್ರೊ’ ಕಾಣಿಯೆಚೆರ್ ಆಮಿ ಸವಾಲಾಂ ವಿಚಾರ್‌ಲ್ಲಿಂ. ಹ್ಯಾ ಸ್ಪರ್ಧ್ಯಾಚಿಂ ನಗದ್ ಇನಾಮಾಂ ಡೊ. ಆಸ್ಟಿನ್ ಡಿಸೋಜ ಪ್ರಭುನ್ ಪ್ರಾಯೋಜಿತ್ ಕೆಲ್ಯಾಂತ್. ಪಯ್ಲೆಂ ಆನಿ ದುಸ್ರೆಂ ಇನಾಮ್ ಜಿಕ್‍ಲ್ಲ್ಯಾಂಕ್ ಕೊಪ್ಪ ಬಸ್ರೀಕಟ್ಟೆಚ್ಯಾ ಹಿಮಗಿರಿ ಹೋಮ್‍ಸ್ಟೇಂತ್ ಎಕಾ ದಿಸಾಚಿ ವಸ್ತಿ-ಸತ್ಕಾರ್ ಫುಂಕ್ಯಾಕ್ ಲಾಭ್ತಲೊ.

‘ಕಲಾ ಸಂಪತ್ ಕೊಂಕ್ಣಿ ಕ್ವಿಜ್ – 4’ ಫಲಿತಾಂಶ್:

ಪಯ್ಲೆಂ ಇನಾಮ್ ಜೊಡ್ತಾ: ರೋಶಲ್ ಪ್ರಿಯಾ ಡಿಸೋಜ, ಪಾಲಡ್ಕ (66 ಅಂಕ್). ದುಸ್ರೆಂ ಇನಾಮ್ ಆಪ್ಣಾಯ್ತಾ: ಶೆರೆಲ್ ಡಿಸೋಜ, ಕೆಲರಾಯ್ (65½ ಅಂಕ್). ತಿಸ್ರೆಂ ಇನಾಮ್ ತೆಗಾಂಕ್ ಫಾವೊ ಜಾಲಾಂ. ತಿಂ ಆಸಾತ್: ಸಿಸ್ಟರ್ ಅಸುಂಪ್ತಾ ಬೆಥನಿ (65 ಅಂಕ್); ಸಿರಿಲ್ ಡಿಸೋಜ, ಆಗ್ರಾರ್ (65 ಅಂಕ್) ಆನಿ ವಯೊಲೆಟ್ ಲೋಬೊ, ಪೆರ್ನಾಲ್ (64 ಅಂಕ್). ಹ್ಯಾ ಸರ್ವ್ 5 ಜಣಾಂಕ್ ನಗದ್ ಇನಾಮಾಂ ಫಾವೊ ಜಾತಾತ್. ಹಾಂಕಾಂ ಅಭಿನಂದನ್.

ಊಂಚ್ ಅಂಕ್ ಆಪ್ಣಾಯಿಲ್ಲಿಂ ಹೆರಾಂ: ಬೀನಾ ರೊಡ್ರಿಗಸ್, ಯುಎಸ್‍ಎ (61½ ಅಂಕ್); ಗ್ರೇಸಿಯಾ ಜಾನೆಟ್ ಡಿಮೆಲ್ಲೊ, ಮೈಸೂರ್ (60 ಅಂಕ್); ಫ್ಲಾವಿಯಾ ಅಲ್ಬುಕರ್ಕ್, ಪುತ್ತೂರ್ (59½ ಅಂಕ್); ದಿವ್ಯಾ ಸುಪ್ರಿತಾ ಡಿಸೋಜ, ಕಾಸರಗೋಡ್ (59½ ಅಂಕ್); ಗ್ರೆಸಿಲ್ಲಾ ಮಿನೇಜಸ್, ಕಣಜಾರ್ (59 ಅಂಕ್); ರಾಬರ್ಟ್ ರೊಡ್ರಿಗಸ್, ನಿತ್ಯಾಧರ್‌ನಗರ್ (55½ ಅಂಕ್); ದಿವ್ಯಾ ಜ್ಯೋತಿ ಡಿಸೋಜ, ಬೆಳ್ತಂಗಡಿ (55 ಅಂಕ್) ಆನಿ ಕ್ರಿಸ್ತಿನ್ ವಿ. ಸಿಕ್ವೇರಾ, ಇಜಯ್, ಮಂಗ್ಳುರ್ (55 ಅಂಕ್). ಹಾಂಕಾಂಯೀ ಉಲ್ಲಾಸಿತಾಂವ್.

ಹ್ಯಾ ಆಮ್ಚ್ಯಾ, ಚವ್ತ್ಯಾ, ಸ್ಪರ್ಧ್ಯಾಕ್ ಒಟ್ಟುಕ್ 16 ಜಣಾಂನಿ ಜಾಪಿ ಧಾಡ್ನ್ ಸ್ಪರ್ಧ್ಯಾಂತ್ ಭಾಗ್ ಘೆತ್ಲಾ. ದೋನ್ ವಿಭಾಗಾಂಚ್ಯಾ 12 ಸವಾಲಾಂಕ್ (ಆನಿ ಉಪ ಸವಾಲಾಂಕ್) ಒಟ್ಟುಕ್ 70 ಅಂಕ್ ಆಸ್‍ಲ್ಲೆ.

ಇನಾಮಾಂ ಜೊಡ್‍ಲ್ಲ್ಯಾಂಕ್ ಉಲ್ಲಾಸ್, ಬರೆ ಅಂಕ್ ಆಪ್ಣಾಯಿಲ್ಲ್ಯಾಂಕ್ ಅಭಿನಂದನ್. ಪಾತ್ರ್ ಘೆತ್‍ಲ್ಲ್ಯಾ ಸರ್ವಾಂಕ್‍ಯೀ ಶಾಭಾಸ್ಕಿ ಪಾಟಯ್ತಾಂವ್. ತುಮ್ಚೆರ್ ಆಮ್ಕಾಂ ವರ್ತೊ ಅಭಿಮಾನ್ ಭೊಗ್ತಾ.

ಸಾರ್ಕ್ಯೊ ಜಾಪಿ:

‘ಎಕಾ ರಾತಿಚೊ ಸಯ್ರೊ’ ಕಾಣಿಯೆಚೆರ್ ಆಮಿ ವಿಚಾರ್ಲೆಲ್ಯಾ ಸವಾಲಾಂಚ್ಯೊ ಸಾರ್ಕ್ಯೊ ಜಾಪಿ ಸಕಯ್ಲ್ ದಿಲ್ಯಾತ್.

ಪಯ್ಲೊ ವಿಭಾಗ್:

1. ಎ. ಬಿಸ್ಪ್ ಆಪ್ಲ್ಯಾ ಉಸ್ಕ್ಯಾರ್ ಏಕ್ ದಾಟೊ ಮೊಟೊ ಬೂಕ್ ಪಾತ್ಳಾವ್ನ್ ತಾಂತ್ಲೆ ವಿಚಾರ್ ಲ್ಹಾನ್ ಲ್ಹಾನ್ ಕಾಗ್ದಾಂ ಕುಡ್ಕ್ಯಾಂಚೆರ್ ನಕಲ್ ಕರ್ಚೆಂ ಕಾಮ್ ಕರ್ತಾಲೊ. ಬಿ. ಬಿಸ್ಪಾಚ್ಯಾ ಖಟ್ಲ್ಯಾ ಬಗ್ಲೆನ್ ಆಸ್ಲೆಲ್ಯಾ ಅಲ್ಮಾರಿಂತ್ಲಿಂ ರುಪ್ಯಾಂಚಿಂ ಆಯ್ದಾನಾಂ ವ್ಹರುಂಕ್ ಮಾಗ್ಗಿಬಾಯ್ ಥಂಯ್ ಗೆಲ್ಲಿ.

2. ಎ. ಕುಂವರ್ನ್ ಬಾಪ್ತಿಸ್ತಿನಿ ಸಂಗಿಂ. ಬಿ. ಬಿಸ್ಪಾಚಿ ಅಂಕ್ವಾರ್ ಭಯ್ಣ್.

3. ಎ. ಗಾಂವಾಂತ್ ಚೋರ್ ಆಯ್ಲಾ ಮ್ಹಳ್ಳಿ ಖಬರ್ ಮಾಗ್ಗಿಬಾಯೆಕ್ ಮೆಳ್‍ಲ್ಲಿ. ಬಿಸ್ಪಾಚ್ಯಾ ಘರ್ಚ್ಯಾ ಮುಖ್ಲ್ಯಾ ದಾರಾಚ್ಯೊ ಖಿಳಿ ಗೆಲ್ಲ್ಯೊ. ಕೊಣೆಂಯೀ ಭಿತರ್ ಪ್ರವೇಶ್ ಕರ್ಯೆತೆಂ ಆಸ್‍ಲ್ಲೆಂ. ಹ್ಯಾ ವರ್ವಿಂ ಮಾಗ್ಗಿಬಾಯ್ ಆಕಾಂತ್‍ಲ್ಲಿ. ಬಿ. ‘ಮೊನ್ಸಿಂಜೊರ್ ಬಾಪಾಕ್ ಕೊಣೆಂ ಮಧ್ಯಾನ್ ರಾತಿರ್ ದಾರ್ ಥಾಪುಡ್ಲ್ಯಾರೀ ‘ಭಿತರ್ ಯೆವ್ಯೆತ್!’ ಮ್ಹಣ್ಚಿ ಸವಯ್ ಆಸಾ!’

4. ಎ. ಜೈಲಾಂತ್ ಎಕುಣೀಸ್ ವರ್ಸಾಂ ಶಿಕ್ಷಾ ಭೊಗುನ್ ಸುಟ್ಕಾ ಲಾಭ್‍ಲ್ಲೊ ಕೈದಿ ಜೀನ್ ವ್ಯಾಲ್‍ಜೀನ್. ಬಿ. ತೊ ಪಾಟ್ಲ್ಯಾ ಚಾರ್ ದಿಸಾಂನಿ ಚಲೊನ್ ಥಕ್‍ಲ್ಲೊ ಆನಿ ಭುಕೆನ್ ವಳ್ವಳ್‍ಲ್ಲೊ. ಖಾಂವ್ಕ್ ಆಹಾರ್ ಆನಿ ವಿಶೆವ್ ಘೆಂವ್ಕ್ ಜಾಗೊ ಸೊಧುನ್ ತೊ ಆಯಿಲ್ಲೊ. ಸಿ. ಎಕ್ಶೆಂ ಆನಿ ನೋವ್ ಫ್ರ್ಯಾಂಕ್.

5. ಎ. ತಾಂಚೆಂ ಘರ್ ಆಲ್ಪ್ಸ್ ಪರ್ವತಾ ಮುಳಿಂತ್ ಆಸ್‍ಲ್ಲ್ಯಾನ್ ಥಂಯ್ ರಾತಿಂಚೆಂ ಹಿಂವ್ ಕಠಿಣ್ ಆಸ್ತಾಲೆಂ. ಬಿ. ಸವೆ ಚಾಳೀಸ್ ವರ್ಸಾಂ.

6. ಎ. ರುಪ್ಯಾಚಿಂ ಆಯ್ದಾನಾಂ ದವರ್‌ಲ್ಲ್ಯಾ ಅಲ್ಮಾರಿಚೆಂ ಬಾಗಿಲ್ ಫೊಡುಂಕ್. ಬಿ. ಜೈಲಾ ಥಾವ್ನ್.

7. ಎ. ರಾತಿಂ ಬಿಸ್ಪಾಚ್ಯಾ ಘರ್ಚಿಂ ರುಪ್ಯಾಚಿಂ ಆಂಯ್ದಾನಾಂ ವ್ಯಾಲ್‍ಜೀನಾನ್ ಚೋರ್ನ್ ವ್ಹೆಲ್ಲಿಂ. ಪೊಲಿಸಾಂಕ್ ತೊ ಪೋಳ್ನ್ ವೆಚೆಪರಿಂ ದಿಸ್ಲೊ ದೆಕುನ್ ತಾಣಿಂ ತಾಕಾ ಧರ್ನ್, ತಲಾಶಿ ಕರ್ತಾನಾ ರುಪ್ಯಾಚಿಂ ಆಯ್ದಾನಾಂ ತಾಚ್ಯಾ ಪೊತ್ಯಾಂತ್ ಮೆಳ್ಳಿಂ. ವಿಚಾರ್ ಕರ್ತಾನಾ ಬಿಸ್ಪಾನ್ ದಿಲ್ಲಿಂ ಮ್ಹಣ್ ತಾಣೆಂ ಸಾಂಗ್‍ಲ್ಲ್ಯಾನ್ ತನ್ಖಿ ಕರುಂಕ್ ತೆ ಬಿಸ್ಪಾಚ್ಯಾ ಘರಾ ತಾಕಾ ಧರ್ನ್ ಹಾಡ್ನ್ ಆಯಿಲ್ಲೆ. ಬಿ. ರುಪ್ಯಾಚ್ಯೊ ವಸ್ತು ಆಪ್ಣೆಂಚ್ ದಿಲ್ಲ್ಯೊ ಮ್ಹಣ್ ಬಿಸ್ಪಾನ್ ಗವಾಯ್ (ಸ್ಟೇಟ್‍ಮೆಂಟ್) ದಿಲ್ಲ್ಯಾನ್ ಪೊಲಿಸಾಂನಿ ವ್ಯಾಲ್‍ಜೀನಾಕ್ ಸೊಡ್ಲೆಂ.

ದುಸ್ರೊ (ಟೈ-ಬ್ರೇಕರ್) ವಿಭಾಗ್:

1. ಎ. ಜೆರಾಲ್ಡ್ ವಿಲಿಯಂ ಕಾರ್ಲೊ. ಬಿ. ವಳಕ್ ಆನಿ ಝಳಕ್. ಸಿ. ಅಪಹರಣ್.

2. ಎ. ಗಾಂಧಿಚೆಂ ಪರ್ಜಳಿಕ್ ಫುಡಾರ್ಪಣ್. ಬಿ. ಪಾಸ್ಕಲ್ ಆಲೆನ್ ನಜ್ರೆತ್. ಸಿ. Gandhi’s Outstanding Leadership. ಡಿ. ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಪುಸ್ತಕ್ ಪುರಸ್ಕಾರ್.

3. ಎ. 1. ಎಕಾ ಚೆಡಿಯೆಚೆಂ ಮೋರ್ನ್, 2. ತೋಬಾ ಟೆಕ್ ಸಿಂಗ್, 3. ನ್ಹಂಯ್ ಆನಿ ಸಾಂಖೊವ್, 4. ಸಾಂಗೊಡಿ ಪಯ್ಣಾರಿ, 5. ಮಯ್ಪಾಸಿ ಮ್ಹಾತಾರಿ, 6. ಮಾಂಕ್ಡಾಚಿ ದಾವ್ಲಿ, 7. ಎಕಾ ರಾತಿಚೊ ಸಯ್ರೊ. (ಹಿಂ ಸಾತ್‍ಯೀ ನಾಂವಾಂ ಸಾರ್ಕಿಂ ದಿಲ್ಲ್ಯಾಂಕ್ ಏಕ್ ಅಂಕ್ ಬೋನಸ್ ದಿಲಾ). ಬಿ. ವಾಲ್ಟರ್ ಲಸ್ರಾದೊ, ನಕ್ರೆ-ಮುಂಬೈ.

4 ಆನಿ 5ವ್ಯಾ ಸವಾಲಾಂಕ್ ಸ್ಪರ್ಧಿಂನಿ ಸ್ವಂತ್ ಜಾಪಿ ದೀಂವ್ಕ್ ಆಸ್‍ಲ್ಲ್ಯೊ. ಚಡಾವತ್ ಜಣಾಂನಿ ಆಪುರ್ಬಾಯೆನ್ ವಿವರುನ್ ಬರಯ್ಲಾಂ. ತ್ಯೊ ಜಾಪಿ ಸಂದರ್ಭಾ ಪರ್ಮಾಣೆಂ ಫಾಯ್ಸ್ ಕರ್ತಾಂವ್.

ನಗದ್ ಆನಿ ಬಂಪರ್ ಇನಾಮಾಂ:

ಪಯ್ಲೆಂ ಸ್ಥಾನ್ ಜೊಡ್ಲೆಲ್ಯಾಕ್ ರು. 3,750 ಐವಜಾಚಿಂ ಇನಾಮಾಂ (ರು. 750 ನಗದ್, ರು. 3,000ಚೆಂ ಲಕ್ಸುರಿ ಹೋಮ್‍ಸ್ಟೇ ಫ್ರೀ), ದುಸ್ರೆಂ ಸ್ಥಾನ್ ಆಪ್ಣಾಯಿಲ್ಲ್ಯಾಕ್ ರು. 3,550 ಐವಜಾಚಿಂ ಇನಾಮಾಂ (ರು. 550 ನಗದ್, ರು. 3,000ಚೆಂ ಲಕ್ಸುರಿ ಹೋಮ್‍ಸ್ಟೇ ಫ್ರೀ) ಫಾವೊ ಜಾತೆಲಿಂ. ತಿಸ್ರೆಂ ಸ್ಥಾನ್ ಆಪ್ಣಾಯಿಲ್ಲ್ಯಾ ತೆಗಾಂಕ್ ರು. 400 ನಗದ್ ದಿತಾಂವ್. ಹ್ಯಾ ಖಚಿತ್ ಇನಾಮಾಂ ಸವೆಂ ಪುಸ್ತಕ್ ಇನಾಮಾಂಯೀ ಆಸಾತ್. ಪುಸ್ತಕಾಂಚ್ಯಾ ಲಭ್ಯತೆ ಪರ್ಮಾಣೆಂ ಕೊಣಾಕ್ ಇನಾಮ್ ಲಾಭ್ಲಾ ಮ್ಹಣ್ ಉಪ್ರಾಂತ್ ಕಳಯ್ತಾಂವ್. (ನಗದ್ ಇನಾಮಾಂ ಗೂಗಲ್ ಪೇ ಕರ್ತಾಂವ್ ಆನಿ ತಾಚೆಂ ಸ್ಕ್ರೀನ್‍ಶಾಟ್ ಆಮ್ಚ್ಯಾ ವಾಟ್ಸಪ್ ಗ್ರೂಪಾಂತ್ ಘಾಲ್ತಾಂವ್).

ನಗದ್ ಇನಾಮ್ ಪ್ರಾಯೋಜನ್ ಕೆಲ್ಲ್ಯಾ ಡೊ. ಆಸ್ಟಿನ್ ಡಿಸೋಜ ಪ್ರಭುಕ್ ಆನಿ ಹಿಮಗಿರಿ ಹೋಮ್‍ಸ್ಟೇಂತ್ ವಸ್ತಿ ಒದಗ್ಸುನ್ ದಿಂವ್ಚ್ಯಾ ಬಸ್ರೀಕಟ್ಟೆಚ್ಯಾ ಪ್ರಮೋದ್ ಪಿಂಟೊಕ್ ಆಮಿ ವಂದಿತಾಂವ್. ತಾಂಚ್ಯಾ ಉದಾರ್ ಮನಾಕ್ ಆನಿ ಸಹಕಾರಾಕ್ ಧಿನ್ವಾಸ್ತಾಂವ್. ಪುಸ್ತಕ್ ಇನಾಮ್ ದಿಲ್ಲ್ಯಾ ಎ.ಟಿ. ಲೋಬೊ ಫೌಂಡೇಶನಾಕ್‍ಯೀ ಆಮಿ ಆಭಾರಿ ಆಸಾಂವ್.

ಆಮಿ ಆಮ್ಚ್ಯಾ ವಾಚ್ಪಿ, ಅಭಿಮಾನಿ ಆನಿ ಹಿತೈಶಿಂ ಖಾತಿರ್ ಬುಡ್ಕುಲೊ ವಾಟ್ಸಪ್ ಗ್ರೂಪ್ ಸ್ಥಾಪನ್ ಕೆಲಾ. ತ್ಯಾ ಗ್ರೂಪಾಂ ಮುಖಾಂತ್ರ್ (ಆ್ಯಡ್ಮಿನ್ ಓನ್ಲಿ ಗ್ರೂಪ್ ತರೀ) ಆಮಿ ಸಾಂದ್ಯಾಂ ಸಂಗಿಂ ಸಂವಾದ್ ಚಲಯ್ತಾಂವ್. ಸ್ಪರ್ಧ್ಯಾಕ್ ಲಗ್ತಿ ಹಿಶಾರೆ, ಸೂಚನಾಂ, ಮಾಹೆತ್ ಥಂಯ್ಚ್ ಘಾಲ್ತಾಂವ್. ಸಾಂದ್ಯಾಂಕ್ ಫಾಯ್ದ್ಯಾ ಭರಿತ್ ಜಾಂವ್ಚ್ಯೊ ಗಜಾಲಿ, ಖಬ್ರೊ, ಚಟುವಟಿಕೊ, ಡೈಲಿ ಕ್ವಿಜ್ ಆನಿ ಜಾಣ್ವಾಯ್ ಪ್ರಸಾರ್ ಕರ್ಚೆಂ ಮಿಸಾಂವ್‍ಯೀ ತಾಂತುಂ ಚಲ್ತಾ. ತುಮ್ಕಾಂ ಹಾಸಂವ್ಕ್‌ಚ್ ಮ್ಹಣ್ ಬಾಲ್ತು ಆಸಾ! ಕೋಣ್ ಆಮ್ಚ್ಯಾ ಗ್ರೂಪಾಂತ್ ನಾಂತ್ ತಾಣಿಂ ಲೇಖನಾಚ್ಯಾ ಆಖೇರಿಕ್ ದಿಲ್ಲೆಂ ಲಿಂಕ್ ಕ್ಲಿಕ್ ಕರ್ನ್ ಭರ್ತಿ ಜಾವ್ಯೆತ್.

ಮುಖ್ಲ್ಯಾ ಡಿಸೆಂಬರ್ ಮಹಿನ್ಯಾಂತ್‍ಯೀ ‘ಕಲಾ ಸಂಪತ್ ಕೊಂಕ್ಣಿ ಕ್ವಿಜ್’ ಸ್ಪರ್ಧೊ ಚಲ್ತಲೊ. ಹ್ಯಾ ಸ್ಪರ್ಧ್ಯಾಚಿ ಕಳವ್ಣಿ ಆಮ್ಚ್ಯಾ ವಾಟ್ಸಪ್ ಗ್ರೂಪಾಂನಿ ಪ್ರಕಟ್ತಾಂವ್.

ಕೊಂಕ್ಣಿ ಭಾಸ್, ಸಾಹಿತ್ಯ್, ಸಾಹಿತಿಂಕ್, ಮನ್ಶ್ಯಾಂಕ್ ತಶೆಂ ಸಂಸ್ಥ್ಯಾಂಕ್ ಊಂಚ್ ಉಬಾರುನ್ ಅಪ್ರತಿಮ್ ಸಾಧನ್ ಕರುನ್ ದಾಖ್ಲೊ ರಚ್‍ಲ್ಲ್ಯಾ ‘ಬುಡ್ಕುಲೊ’ನ್ ಆತಾಂ ವಾಚ್ಪ್ಯಾಂಕ್‍ಯೀ ಊಂಚ್ ಉಬಾರ್ಚೆಂ ಮಿಸಾಂವ್ ಜಾರಿ ಕೆಲಾಂ ಆನಿ ನವಿ ಚರಿತ್ರಾ ಘಡ್ಲ್ಯಾ. ಅಸಲಿಂ ಅದ್ಭುತಾಂ ಆಮಿ ನಿರಂತರ್ ರಚುನ್ ಆಸಾಂವ್. ಹೆಂ ಆಮ್ಕಾಂ ಚಡ್ ದಾದೊಸ್ಕಾಯೆಚೆಂ. ಲೊಕಾಚೊ ಸಹಕಾರ್ ಆನಿ ಪಾಟಿಂಬೊಯೀ ಹ್ಯಾ ದಿಶೆನ್ ಆಮ್ಕಾಂ ಆಧಾರ್ ಜಾಲಾ. ಜೈ ಕೊಂಕಣಿ.