ಇಂಫೆರ್ನಾಚಿಂ ದಾರಾಂ – 31: ಘಡಿತಾಂಚೊ ಗೊಂದೊಳ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 31
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 31: ಘಡಿತಾಂಚೊ ಗೊಂದೊಳ್

ವ್ಹಯ್, ಸರ್ದಾರ್ ಸಿಮಾಂವ್ ಜನೆಲಾಂತ್ಲ್ಯಾನ್ ಭಾಯ್ರ್ ಉಡೊನ್ ಜಾಲ್ಲೊ.

ಘಡಾಚೆಂ ಪಂಚಾಂಗ್, ಥಳಾಚಿ ಆನಿ ಮಾಳಿಯೆಚಿ ವಣದ್ ಮ್ಹಣ್ತಾನಾ ತೆಂ ವಯ್ಲೆಂ ವಾತಾಯನ್ (ಜನೆಲ್) ಧರ್ಣಿರ್ ಥಾವ್ನ್ ಪಾಂಚ್ ಆಳ್ ಉಬಾರಾಯೆರ್ ಆಸ್‍ಲ್ಲೆಂ.

ಆನಿ, ಉಬ್ರಾಳ್ಯಾ ಆನಿ ಮ್ಹೆಳ್ಯಾ ಆನಿ ಕುಸ್ಡ್ಯಾ ಉದ್ಕಾನ್ ಭರೊನ್ ಆಸ್‍ಲ್ಲೆಂ ತೆಂ ಖಂದಕ್‍ಯೀ ಪಾಂಚ್ ಆಳ್ ಗೂಂಡ್ ಆಸ್‍ಲ್ಲೆಂ. ಜಾಣಾಂಸೊನ್ ತರೀ, ದಿಸಾ ಉಜ್ವಾಡೆಂ ಲೆಗುನ್, ತಿತ್ಲ್ಯಾ ಉಬಾರಾಯೆರ್ ಥಾವ್ನ್ ಸಕಯ್ಲ್ ಉಡೊನ್ ಕೊಣೆಂಯೀ ವಾಂಚೊಂಕ್ ಸಾಧ್ಯ್ ನಾತ್‍ಲ್ಲೆಂ.

ತರ್, ಕಾಳೊಕಾಂತ್ಲ್ಯಾನ್ ಪಡೊನ್ ತರೀ, ಕೊಣೆಂಯೀ ವಾಂಚ್ಯೆತ್ ಕಶೆಂ?

ತಸಲ್ಯಾಂಕ್ ತ್ಯಾ ಪಡ್ಣೆಚೊ ದಖೊ ಪಾವನಾತ್ಲ್ಯಾರ್, ಬುಡೊನ್ ತರೀ ಕಾಬಾರ್ ಜಾಂವ್ಚೆಂ ಭವಿಷ್ಯ್ ಥಿರ್ ಆಸ್‍ಲ್ಲೆಂ.

ತರ್, ಸರ್ದಾರ್ ಸಿಮಾಂವ್ನ್ ವಾಂಚೊನ್ ಉರ್ಚೆಂ ತರೀ ಕಶೆಂ?

ತ್ಯಾ ಗಲಾಟ್ಯಾಂತ್, ತ್ಯಾ ಗೊಂದೊಳಾಂತ್ ಆನಿ ತ್ಯಾ ಘಡ್ಬಡೆಂತ್, ಆನಿ ಮತ್ ಚುಕೊನ್ ಪಡ್ಲೆಲ್ಯಾ ತ್ಯಾ ಸ್ತ್ರೀಯಾಂ ವಯ್ಲ್ಯಾನ್ ಕದಮಾಂ ಕಾಡ್ನ್, ಬೇಗಮ್ ಜಹನಾರಾ ಆನಿ ಫಕೀರ್ ಮಹಮ್ಮದ್ ತ್ಯಾ ಜನೆಲಾ ಲಾಗಿಂ ಪಾವ್ಲಿಂ. ಥಂಯ್ಚ್ ಮೊಡೊನ್ ಪಡೊನ್ ಆಸ್‍ಲ್ಲ್ಯಾ ಕದೆಲಾರ್ ತೆಂಕುನ್, ಫಕೀರ್ ಮಹಮ್ಮದಾನ್, ಆನಿ ಬಗ್ಲೆನ್ ಬೇಗಮೆನ್, ತ್ಯಾ ಕಂತ್ರಾಳಾಂತ್ಲ್ಯಾನ್ ಭಾಯ್ರ್ ಪಳೆಲೆಂ.

ಅಂಧ್ಕಾರ್.

ಪುಣ್, ವಯ್ರ್ ಥಾವ್ನ್ ಸಕಯ್ಲ್, ಜಡಾಯೆನ್, ಏಕ್ ವೊಜೆಂ ಉದ್ಕಾಂತ್ ಪಡ್‍ಲ್ಲೊ ಆವಾಜ್ ತಾಂಕಾಂ ಆಯ್ಕಲೊ. ನಿಜಾಯ್ಕೀ, ತ್ಯಾ ಅಂತ್ರಾಳಾಚ್ಯಾ ಕಂತ್ರಾಳಾಂತ್ಲ್ಯಾನ್ ಭಾಯ್ರ್ ಉಡ್‍ಲ್ಲ್ಯಾ ಸರ್ದಾರ್ ಸಿಮಾಂವ್ಚಿ ಕೂಡ್, ತ್ಯಾ ಖಂದ್ಕಾಂತ್ಲ್ಯಾ ಉದ್ಕಾಂತ್ ಧಪ್ಟೊನ್ ಪಡ್ತಾನಾ ಜಾಲ್ಲೊ ಆವಾಜ್ ತೊ.

“ಸರ್ಯಾ ಭಾಯ್ರ್. ತೊ ಖಂದ್ಕಾಂತ್ ಪಡ್ಲಾ!”

“ಪೆಟಯಾ ದಿವೆ ಆನಿ ಚೂಡಿ! ಖಂದ್ಕಾಕ್ ಘಾಲ್ಯಾತ್ ವೆಡೊ!”

“ಘೆಯಾತ್ ಬಂದೂಕ್ಯೊ! ತಾಣೆಂ ಜೀವ್ ಆಸೊನ್ ಹ್ಯಾ ವಠಾರಾ ಥಾವ್ನ್ ಪಾಟಿಂ ಕೆದಿಂಚ್ ವಚೊಂಕ್ ನಜೊ!”

“ತುರ್ತ್ ಕರ್ಯಾ!”

ಅಶೆಂ ಬೇಗಮೆನ್, ತೊಪಾಸಿನ್, ಫಕೀರ್ ಮಹಮ್ಮದಾನ್ ಆನಿ ಚಾರ್ ಬೊಟಾಂಚ್ಯಾ ತ್ಯಾ ಯುವಕಾನ್, ಪಾಟಾಪಾಟ್ ಆವಾಜ್ ದಿಲೊ.

ಥೊಡ್ಯಾಂನಿ, ಥಂಯ್ಸರ್ ಆಸ್‍ಲ್ಲಿಂ – ಮೊಡಿಂ ಕಾಡುನ್ ಕೂಡ್ ನಿತಳ್ ಕರ್ಚೆಂ – ಕಾಮ್ ಕರಿಜಾಯ್ ಮ್ಹಣ್ ಬೇಗಮೆನ್ ಫರ್ಮಾಯ್ಲೆಂ. ತ್ಯಾ ಕಾಮಾ ಖಾತಿರ್ ಚವ್ಗ್ ಜಣ್ ಥಂಯ್ಸರ್ ರಾವ್ಲೆ. ಹೆರ್ ಸಗ್ಳೆ, ಫುಡ್ಲ್ಯಾ ಶಿಕಾರೆ ಖಾತಿರ್ ತುರ್ತಾನ್ ಭಾಯ್ರ್ ಪಡ್ಲೆ.

ಹಾತಾಂತ್ ಏಕ್ ಲಾಂಟಾನ್ ಘೆವ್ನ್ ಫಕೀರ್ ಮಹಮ್ಮದ್, ಸಕ್ಡಾಂ ವರ್ನಿ ಪಯ್ಲೊ ಮಹಾದ್ವಾರಾಚ್ಯಾ ಸೇತ್ವ್ಯಾ ಲಾಗಿಂ ಪಾವ್ಲೊ. ಥೊಡ್ಯಾಚ್ ವೆಳಾ ಆದಿಂ, ತೊಪಾಸಿ ದಾಲ್ಮೇದಾ ಆಯಿಲ್ಲ್ಯಾ ವೆಳಾರ್, ತಾಣೆಂ ಪ್ರವೇಶ್ ಜಾಂವ್ಚ್ಯಾ ಖಾತಿರ್ ದೆಂವಯಿಲ್ಲೊ ಸೇತ್ವೊ, ಪಹರ‍್ಯಾಗಾರಾನ್ – ತೊಪಾಸಿಕ್ ಪಾಟಿಂ ವಚೊಂಕ್ ಆಸ್ಯೆತ್ ಮ್ಹಳ್ಳ್ಯಾ ನಿಬಾನ್ – ವಯ್ರ್ ವೊಡುಂಕ್ ನಾತ್‍ಲ್ಲೊ. ತ್ಯಾ ನಿಬಾಂತ್, ತ್ಯಾ ರಾಕ್ವಲ್ಯಾಚೊ ದುಸ್ರೊ – ಮ್ಹಾಲ್ಯಾಕ್ ಆನಿ ತಾಚ್ಯಾ ಸಾಂಗಾತ್ಯಾಂಕ್ ಮಜತ್ ದಿಂವ್ಚೊ ಉದ್ದೇಶ್‍ಯೀ ಆಸ್‍ಲ್ಲೊ ಜಾವ್ಯೆತ್.

ತಿ ಆಶಾ ಆನಿ ತೊ ಉದ್ದೇಶ್ ವ್ಯರ್ಥ್ ಜಾಲ್ಲಿಂ.

ಫಕೀರ್ ಮಹಮ್ಮದ್, ಸೇತ್ವ್ಯಾರ್ ರಾವೊನ್, ಲಾಂಟಾನ್ ವಯ್ರ್ ಉಬಾರುನ್ ಧರುನ್, ದೊನೀ ಕುಶಿಂನಿ ಪ್ರಕಾಸ್ ಫಾಂಕ್ತಾ ತಿತ್ಲ್ಯಾ ಪಯ್ಸ್, ಖಂದ್ಕಾಚ್ಯಾ ಉದ್ಕಾಂತ್ ತಪಾಸಣೆಚಿ ದೀಷ್ಟ್ ಭೊಂವ್ಡಾಂವ್ಕ್ ಲಾಗ್ಲೊ. ವಾರೆಂ ನಾತ್‍ಲ್ಲೆಂ ತರೀ, ಉಜ್ವ್ಯಾ ಕುಶಿನ್ ಥೊಡಿಂ ಮೆಟಾಂ ಪಯ್ಸ್ ಉದಾಕ್ ಚಿಕ್ಕೆ ಹಾಲೊನ್, ವಯ್ಲ್ಯಾಬಾರ್ ಲಾರಾಂ ಪರ್ತಲ್ಲೆಪರಿಂ ತಾಕಾ ಭೊಗ್ಲೆಂ.

ತ್ಯಾಚ್ ಕುಶಿನ್, ಸರ್ದಾರ್ ಸಿಮಾಂವ್ ಸಕಯ್ಲ್ ಉಡ್‍ಲ್ಲೆಂ ಜನೆಲ್ ಆಸ್‍ಲ್ಲೆಂ. ಥಂಯ್ಸರ್ ವಚೊನ್ ಸರ್ದಾರ್ ಸಿಮಾಂವ್ಕ್ ಧರಿಜಾಯ್ ವಾ ತಾಚೆಂ ಮೊಡೆಂ ಪಳೆಜಾಯ್ ಮ್ಹಣ್ ಫಕೀರ್ ಮಹಮ್ಮದ್ ಅತ್ರೆಗ್ಲೊ.

ಕಿತ್ಯಾಕ್, ಸರ್ದಾರ್ ಸಿಮಾಂವ್ ನಾಸ್ ಜಾಲ್ಯಾರ್ ಮಾತ್ರ್ ಆಪ್ಣಾಚಿ ಬಚಾವಿ ಮ್ಹಣ್ ಫಕೀರ್ ಮಹಮ್ಮದ್ ಜಾಣಾಂಸ್‍ಲ್ಲೊ.

“ತುರ್ತಾನ್ ಮೆಟಾಂ ಕಾಡ್ಯಾ! ಮ್ಹಜೊ ಪಾಟ್ಲಾವ್ ಕರ್ಯಾ!” ಮ್ಹಣೊನ್ ತಾಣೆಂ ಆವಾಜ್ ದಿಲೊ. ಹೆರಾಂಕ್ ರಾಕನಾಸ್ತಾನಾ ತ್ಯಾ ರೂಂದ್ ಪಾಂಪಾಳ್ಯಾ ಥಾವ್ನ್ ಉತ್ರೊನ್ ಪಲ್ತಡಿ ತೊ ಪಾವ್ಲೊ, ಆನಿ ಉಜ್ವ್ಯಾ ಕುಶಿನ್ ಧಾಂವೊಂಕ್ ಲಾಗ್ಲೊ.

ಸರ್ದಾರ್ ಸಿಮಾಂವ್ ಪಡ್‍ಲ್ಲ್ಯಾ ನಿಟಾಯೆಕ್, ಪೆಲ್ಯಾ ಬಗ್ಲೆನ್ ತೊ ಪಾವ್ಲೊ. ಥೊಡ್ಯಾಚ್ ವೆಳಾನ್ ತೊಪಾಸಿ ದಾಲ್ಮೇದಾ ಆನಿ ಹೆರ್ ಸಾತಾಟ್ ಜಣ್, ದಿವೆ ಆನಿ ದೊಂದ್ಯಾಂಚ್ಯಾ ಉಜ್ವಾಡಾಂತ್, ತಲ್ವಾರಿ ಆನಿ ಭಾಲೆ ಝಳ್ಕಾವ್ನ್ ಥಂಯ್ಸರ್ ಪಾವ್ಲೆ.

ಕಾಳ್ಕ್ಯಾ ತ್ಯಾ ಖಂದ್ಕಾಂತ್ಲೆಂ ಉದಾಕ್, ಬೊಶಿಯೆಂತ್ ನಿಂವ್‍ಲ್ಲ್ಯಾ ಮಾಣಿಯಾಪರಿಂ ಶಾಂತ್ ಆಸ್‍ಲ್ಲೆಂ. ಕಸಲಿಚ್ ಚಾಲ್-ಹಾಲ್ ವಾ ಜಾಗ್-ಮಾಗ್ ಥಂಯ್ಸರ್ ನಾತ್‍ಲ್ಲಿ.

ಫಕೀರ್ ಮಹಮ್ಮದ್ ಆನಿ ತಾಚೆ ಸಾಂಗಾತಿ, ಘಡ್ಯೆ ನಿರಾಶಿ ಜಾಲೆ.

“ವಿಸ್ಕಳೊನ್ ಆನಿ ಫಾಸ್ಳೊನ್ ತಪಾಸಣ್ ಕರ್ಯಾ!” ತಾಕಿದ್ ದಿಲಿ ತಾಣೆಂ.

“ವ್ಹಯ್, ಚಡ್ ಪಯ್ಸ್ ತೊ ಪಾವಾಸೊ ನಾ!”

ತಶೆ ತೆ ಶಿಪಾಯ್ ವಿಸ್ಕಳ್ಳೆ ಆನಿ ಫಾಸಾಳ್ಳೆ. ಹೆಂ ತಾಂಕಾಂ ಏಕ್ ಸ್ವಪಣ್ ಜಾವ್ನಾಸ್‍ಲ್ಲೆಂ. ಕೊಣಾಕ್ ಸೊಧ್ತಾತ್ ಮ್ಹಣ್ – ಜಿವ್ಯಾಕ್ ವಾ ಮೆಲ್ಲ್ಯಾಕ್ ಮ್ಹಣ್ – ತಾಂಕಾಂ ಕಳಿತ್ ನಾತ್‍ಲ್ಲೆಂ. ತರೀ, ಚೂಡಿ ಝಳ್ಕಾವ್ನ್, ಖಂದ್ಕಾ ಭಾಯ್ಲ್ಯಾ ತ್ಯಾ ಉಗ್ತ್ಯಾ ಪದ್ವಾ ಜಿನ್ಸಾಚ್ಯಾ ವಠಾರಾಂತ್ ಬೋಂಟ್ ಆಂಬ್ಡುಂಕ್ ತೆ ಲಾಗ್ಲೆ.

ಕಾಳೊಕ್ ನಹಿಂ ಜಾಲ್ಲೊ ಜಾಲ್ಯಾರ್, ತ್ಯಾ ಉಗ್ತಾಡಾಂತ್ ಲಿಪೊನ್ ರಾವೊಂಕ್ ಕೊಣಾಯ್ಕೀ ಸಾಧ್ಯ್ ನಾತ್‍ಲ್ಲೆಂ.

ಫಕೀರ್ ಮಹಮ್ಮದ್ ಆನಿ ತೊಪಾಸಿ ದಾಲ್ಮೇದಾ ಪಾಟಿಂ ಖಂದ್ಕಾಚ್ಯಾ ದೆಗೆರ್ ರಾವ್ಲೆ. ಮುಖಾರ್ ಆನಿ ಪಾಟಿಂ, ಸಬಾರ್ ಪಯ್ಸ್ ಪರ್ಯಾಂತ್, ತ್ಯಾ ಖಂದ್ಕಾಚ್ಯಾ ಕಡ್ಸ್ಯಾಚಿ ಉಬ್ರಾಳಿ ಆನಿ ಮೋವ್ ಮಾತಿ, ಉಜ್ವಾಡಾಂತ್ ತಪಾಸುನ್ ತಾಣಿಂ ಪಳೆಲಿ.

ಖಂಯ್ಸರೀ, ಖಂದ್ಕಾಚ್ಯಾ ಉದ್ಕಾ ಥಾವ್ನ್ ವಯ್ರ್ ಆಯಿಲ್ಲಿಂ ಮೆಟಾಂ ಜಾಂವ್, ಬೊಟಾಂ ತಾಂಕಾಂ ಝಳ್ಕಲಿಂ ನಾಂತ್.

ತಶೆಂಚ್ ದುಸ್ರ್ಯಾ ವಾಟೆನ್‍ಯೀ ತಪಾಸಣ್ ತಾಣಿಂ ಕೆಲೆಂ. ತೊಚ್ ಫಲಿತಾಂಶ್ – ಉದ್ಕಾಂತ್ಲೆಂ ವಯ್ರ್ ಸರ್‌ಲ್ಲೊ, ಕೊಣಾಯ್ಚೊ ವಾ ಕಸಲೊಯೀ ಘುರ್ತ್ ತಾಂಕಾಂ ಝಳ್ಕಲೊ ನಾ.

ಫಕೀರ್ ಮಹಮ್ಮದ್ ಆನಿ ತೊಪಾಸಿ ದಾಲ್ಮೇದಾ ಎಕಾ ವಾಟೆನ್ ನಿರಾಶಿ ಜಾಲೆ ತರೀ, ದುಸ್ರ್ಯಾ ವಾಟೆನ್ ಖುಷಿ ಪಾವ್ಲೆ. ಸರ್ದಾರ್ ಸಿಮಾಂವ್ಚೆರ್ ಫಾರಿಕ್ಪಣ್ ಕಾಣ್ಗೆಂವ್ಚೊ ಸಂದರ್ಭ್ ಚುಕ್ಲೊ ಮ್ಹಣ್ ತಾಂಕಾಂ ಘಡ್ಯೆ ಚುರ್ಚುರೆ ಭೊಗ್ಲೆ ಜಾಲ್ಯಾರೀ, ತೊ ಕಾಬಾರ್ ಜಾಲ್ಲ್ಯಾನ್, ತಾಂಚೆರ್ ಆಯಿಲ್ಲೆಂ ವ್ಹಡ್ ಏಕ್ ಅನ್ವಾರ್ ಚುಕ್ಲೆಂ ಮ್ಹಳ್ಳ್ಯಾ ಚಿಂತ್ನಾಂನಿ ತಾಂಕಾಂ ಸಮಾಧಾನ್ ದಿಲೆಂ.

“ಬಾವ್ಡೊ ಬುಡೊನ್ ಮೆಲೊ” ಮ್ಹಣಾಲೊ ತೊಪಾಸಿ.

“ವ್ಹಯ್” ಮ್ಹಣಾಲೊ ಫಕೀರ್ ಮಹಮ್ಮದ್. “ತಸೊ ಪುಣೀ ಮೊರೊನ್ ತೊ ಕಾಬಾರ್ ಜಾಲ್ಲೊ ಬರೆಂ ಜಾಲೆಂ.”

ತಾಂಚ್ಯೊ ತಲ್ವಾರಿ ತಾಣಿಂ, ಕೋಶಿಯೆಂತ್ ಪಾಟಿಂ ಘಾಲ್ಯೊ, ಆನಿ ರಾವ್ಳೆರಾಚಿ ವಾಟ್ ಧರುನ್ ತೆ ಪಾಟಿಂ ಗೆಲೆ. ಭಾಯ್ಲ್ಯಾ ಉಗ್ತಾಡಾಂತ್ ಬೋಂಟ್ ಆಂಬುಡ್ತೆಲ್ಯಾಂಚ್ಯೊ ಉಜ್ವಾಡಿ, ಪಯ್ಸ್ ಪಯ್ಸ್, ಕಾಜುಲ್ಯಾಂಪರಿಂ ಝಳ್ಕತಾಲ್ಯೊ.

ಫಕೀರ್ ಮಹಮ್ಮದ್ ಆನಿ ತೊಪಾಸಿ, ರಾವ್ಳೆರಾಕ್ ಪಾಟಿಂ ಯೇವ್ನ್, ಬೇಗಮ್ ಖಂಯ್ಸರ್ ಆಸಾ ಮ್ಹಣ್ ತಾಣಿಂ ವಿಚಾರ್ಲೆಂ. ಬೇಗಮ್ ಆನಿಕ್‍ಯೀ, ವಯ್ರ್, ಝಗ್ಡೆಂ ಜಾಲ್ಲ್ಯಾ ಕುಡಾಂತ್ ಆಸಾ ಮ್ಹಣ್ ಖಬರ್ ಮೆಳ್ತಚ್, ಥಂಯ್ಸರ್ ತೆ ಗೆಲೆ.

ಥೊಡ್ಯಾಚ್ ವೆಳಾ ಆದಿಂ ಜೀವನ್ಮರಣಾಚಿ ಲಡಾಯ್ ಜಾವ್ನ್, ಮೊಡಿಂ ಪಡೊನ್ ಆನಿ ರಗತ್ ವ್ಹಾಳೊನ್ ಮ್ಹೆಳೆಂ ಜಾಲ್ಲೆಂ ತೆಂ ಕೂಡ್ ಆತಾಂ ಸಾಧಾರಣ್ ನಿತಳ್ ಜಾಲ್ಲೆಂ. ಫಕೀರ್ ಮಹಮ್ಮದ್ ಆನಿ ತೊಪಾಸಿ, ಶೀದಾ ಭಿತರ್ ವೆಚ್ಯಾ ಆದಿಂಚ್, ಬೇಗಮೆನ್ ಭಾಯ್ರ್ ಯೇವ್ನ್ ಬಾಗಿಲ್ ಆಡ್ ಕೆಲೆಂ. ಕೆವ್ಲೆ ಚಿಕ್ಕೆ ಅಜ್ಯಾಪ್ಲೆ.

“ಕಿತೆಂ ನವಾಲ್?” ಫಕೀರ್ ಮಹಮ್ಮದಾನ್ ಸವಾಲ್ ಕೆಲೆಂ.

“ನವಾಲ್ ಕಾಂಯ್ ನಾ” ಮ್ಹಣಾಲಿ ಬೇಗಮ್, ಚಿಕ್ಕೆ ಪುರಾಸಣೆನ್. “ಆಮಿ ಹಾಂಗಾಸರ್ ಕೈದಿ ದವರ್‌ಲ್ಲಿ ತಿ ಸ್ತ್ರೀ ಘಾಯೆಲ್ಯಾ – ಮೊರ್ನಾಚ್ಯಾ ತಣಿರ್ ಆಸಾ. ಆಮ್ಚಿ ಚಾಕರ್ನ್ ಆತಾಂ ಸನಿನ್ ಜಾವ್ನ್ ತಿಚಿ ಶುಶ್ರೂಷಾ ಕರ್ತಾ…”

“ಹಾಂ?” ಉದ್ಗಾರ್ಲೆ ತೆ.

“ವ್ಹಯ್, ತೆಂ ಆಸೊಂ” ಮ್ಹಣಾಲಿ ಬೇಗಮ್. “ಪುಣ್ ಕಿತೆಂ – ತ್ಯಾ ಸರ್ದಾರ್ ಸಿಮಾಂವ್ಚೊ ಪತ್ತೊ ಜಾಲೊ?”

“ವ್ಹಯ್.”

“ಖಂಯ್ಸರ್ ಆಸಾ ತೊ?”

“ತೊ ಬುಡೊನ್ ಮೆಲಾ. ತಾಚೆಂ ಮೊಡೆಂ ಜಾಯ್ ಜಾಲ್ಯಾರ್, ತ್ಯಾಚ್ ಜನೆಲಾ ಭಾಯ್ಲ್ಯಾನ್ ಗೂಂಡ್ ಖಂದ್ಕಾಚ್ಯಾ ಉದ್ಕಾಚ್ಯಾ ಥಳಾರ್, ಉಬ್ರಾಂತ್ ಆನಿ ಕುಸಡಾಯೆಂತ್ ಮೆಳ್ತೆಲೆಂ.”

ತಾಚೆಂ ಉತಾರ್ ಬೇಗಮೆನ್, ಆಸಾ ತಶೆಂಚ್ ಪಾತ್ಯೆವ್ನ್ ಸ್ವೀಕಾರ್ ಕೆಲೆಂ.

ತಿಣೆಂ ಏಕ್ ಲಾಂಬ್ ಶ್ವಾಸ್ ಸೊಡ್ಲೊ.

“ತೊ ಜೀವ್ ಆಸ್ಲ್ಯಾರ್ ಮ್ಹಾಕಾ ತಾಚಿ ಗರ್ಜ್ ಆಸ್ತಿ” ಮ್ಹಣಾಲಿ ತಿ. “ಆತಾಂ ತಾಚ್ಯಾ ಮೊಡ್ಯಾಚಿ ಮ್ಹಾಕಾ ಗರ್ಜ್ ನಾ. ತ್ಯಾ ಶಿವಾಯ್, ಹೆರ್‌ಯೀ ಸಬಾರ್ ಮೊಡಿಂ ಭೆಸೊನ್ ಆನಿ ಕುಸೊನ್ ಆಸ್‍ಲ್ಲ್ಯಾ ತ್ಯಾ ಖಂದ್ಕಾಚ್ಯಾ ಥಳಾಕ್ ಪಾವ್‍ಲ್ಲೆಂ ಕಿತೆಂಯೀ ಎದೊಳ್ ವಯ್ರ್ ಯೇಂವ್ಕ್ ನಾ, ವಯ್ರ್ ಹಾಡುಂಕ್ ಜಾಂವ್ಕ್ ನಾ.”

ಹೆಂ ತಾಂಕಾಂಯೀ ಕಳಿತ್ ಆಸ್‍ಲ್ಲೆಂ.

“ಪುಣ್ ಮೆಲ್ಲ್ಯಾಂ ಸಾಂಗಾತಾ ಮೊರೊಂಕ್ ಆಮ್ಕಾಂ ನಾಕಾ, ಸಾಧ್ಯ್ ನಾ” ಮ್ಹಣಾಲಿ ಬೇಗಮ್. “ಆಮ್ಚ್ಯಾ ರಾಜಕೀಯ್ ತಶೆಂ ಖಾಸ್ಗಿ ಪಯ್ಣಾಂತ್ ಆಮಿ ಮುಖಾರ್ ವಚೊಂಕ್ ಆಸಾ. ಫುಡ್ಲಿಂ ಕಾಮಾಂ ಆಮಿ ತುರ್ತಾನ್ ಕರಿಜಾಯ್.”

“ಮ್ಹಣ್ಜೇ?”

“ಮ್ಹಣ್ಜೇ – ಪಯ್ಲೆಂಚ್ ಆಮಿ ಚಿಂತ್‍ಲ್ಲೆಪರಿಂ, ಯೂಸುಫ್ ಆಲಿನ್ ಹಾಂಗಾ ಯೇನಾಶೆಂ ಜರೂರ್ ಆಮಿ ಆಡಾಯ್ಜಾಯ್.”

“ತಶೆಂ ಕರುಂಕ್ ಆಮಿ ಸಕಾಳಿಂ ಭಾಯ್ರ್ ಸರ್ತಾಂವ್.”

“ತುಮಿ ವೆಚೆಂ ಗರ್ಜ್. ಕಿತ್ಯಾಕ್…” ಮ್ಹಣಾಲಿ ಬೇಗಮ್ ಚಿಕ್ಕೆ ಭಿಯಾನ್. “ಸರ್ದಾರ್ ಸಿಮಾಂವ್ ಹಾಂಗಾ ಯೇವ್ನ್ ಕಾಬಾರ್ ಜಾಲಾ ಮ್ಹಳ್ಳಿ ಖಬರ್ ತಾಂಚ್ಯಾ ಕಾನಾಕ್ ಪಡನಾಯೆ.”

“ವ್ಹಯ್, ಸಮ್ಜಲೆಂ” ಮ್ಹಣಾಲೊ ದಾಲ್ಮೇದಾ. “ತ್ಯಾ ಶಿವಾಯ್, ಮಂಜೆಂಚೆರ್ ಆಯಿಲ್ಲ್ಯಾ ತ್ಯಾ ಶಿಪಾಯಾಂನಿ, ದುಸ್ಪಡೊನ್ ವೆಗಿಂ ಪಾಟಿಂ ವೆಚೆಂ ಭೋವ್ ಬರೆಂ.”

“ವ್ಹಯ್, ಸಕಾಳಿಂಚ್ ಆಮಿ ಭಾಯ್ರ್ ಸರ್ತಾಂವ್” ಮ್ಹಣಾಲೊ ಫಕೀರ್ ಮಹಮ್ಮದ್. “ಪುಣ್ ಹಾಂಗಾಚಿ ಗಜಾಲ್ ಕಿತೆಂ?”

“ಹಾಂಗಾಚಿ ಗಜಾಲ್ ಜಾತಾ ತಶಿ ಹಾಂವ್ ಸುಧಾರ್ಸಿತಾಂ. ತುಜೆಂ ನಶಿಬ್ ಕಶೆಂ ಆಸಾ ಪಳೆಜಾಯ್. ಸರ್ದಾರ್ ಸಿಮಾಂವ್ ತಸೊ ಗೆಲೊ” ಮ್ಹಣಾಲಿ ತಿ. “ಪುಣ್ ಹಿ ಕಿತೆಂ ಕರ್ತಾ ಮ್ಹಣ್ ಸಾಂಗೊಂಕ್ ಜಾಯ್ನಾ.”

“ಮ್ಹಳ್ಯಾರ್…”

“ಮ್ಹಳ್ಯಾರ್, ತಿ ವಾಂಚತ್ ವಾ ನಾ ಮ್ಹಳ್ಳೆಂ ಸ್ಪಷ್ಟ್ ಸಾಂಗೊಂಕ್ ಆತಾಂ ಸಾಧ್ಯ್ ನಾ.” ಸಾಂಗ್ಲೆಂ ಬೇಗಮೆನ್.

ಹೆಂ ಆಯ್ಕೊನ್, ತೊಪಾಸಿ ಆನಿ ಫಕೀರ್ ಮಹಮ್ಮದ್ ಘಡ್ಬಡ್ಲೆ.

“ಕಿತೆಂ ಗಜಾಲ್ ಘಡ್ಲ್ಯಾ? ಕಾಂಯ್ ಜೀವ್ಘಾತ್…”

“ಛೆ!” ಮ್ಹಣಾಲಿ ಬೇಗಮ್. “ಜೀವ್ಘಾತ್ ಕರ್ಚೆ ತಿತ್ಲೆಂ ಭಿಂವ್ಕುರೆಂಪಣ್ ಕ್ರಿಸ್ತಾಂವ್ ಸ್ತ್ರೀಯಾಂ ಥಂಯ್ ನಾ.”

“ಮಾಗಿರ್?”

“ಮಾಗಿರ್, ನ್ಯಾಯಾ ಖಾತಿರ್ ವಾ ತಾಂಚೆಂ ಅಂಕ್ವಾರ್ಪಣ್ ಸಾಂಬಾಂಳುಂಕ್, ತಶೆಂಚ್ ಹೆರಾಂಚೊ ಜೀವ್ ಉರಂವ್ಚ್ಯಾ ಖಾತಿರ್ ಆಪ್ಲ್ಯಾಚ್ ಜಿವಾಚೆಂ ಬಲಿದಾನ್ ಕರುಂಕ್ ತಿಂ ಪಾಟಿಂ ಸರನಾಂತ್ ಮ್ಹಣ್ ಹ್ಯಾ ಸ್ತ್ರೀಯೆನ್ ರುಜು ಕೆಲೆಂ.”

“ಕಿತೆಂ-ಕಶೆಂ?” ಫಕೀರ್ ಮಹಮ್ಮದಾನ್ ವಿಚಾರ್ಲೆಂ.

“ತೊ ಸರ್ದಾರ್ ಸಿಮಾಂವ್, ತ್ಯಾ ಜನೆಲಾಂತ್ಲ್ಯಾನ್ ರಿಗೊನ್ ಭಾಯ್ರ್ ಉಡೊಂಕ್ ಪ್ರಯತನ್ ಕರ್ತಾನಾ, ತುವೆಂ ತಾಚೆರ್ ಜೊಕುನ್ ಭಾಲಿ ಮಾರ್ತಾನಾ ತಿ ಸ್ತ್ರೀ ರಾವ್‍ಲ್ಲೆ ಕಡೆನ್ ಥಾವ್ನ್ ಫುಡೆಂ ಉಡ್ಲಿ. ತಿಚಿ ಕೂಡ್ ಭಾಲಿಯೆಕ್ ಆಡ್ ಆಯ್ಲಿ…”

“ತರ್…”

“ತರ್ ತಿ ಮೊರೊಂಕ್ ನಾ, ತರೀ ವಾಂಚತ್ ಮ್ಹಣ್ ಧಯ್ರಾನ್ ಸಾಂಗೊಂಕ್ ಜಾಯ್ನಾ. ತಿ ಮತಿರ್ ಯೇಂವ್ಕ್ ನಾ. ಆಮ್ಚಿ ‘ಚಾಕರ್ನ್’ ಭೋವ್ ನಾಜೂಕಾಯೆನ್ ತಿಚಿ ಶುಶ್ರೂಷಾ ಕರ್ತಾ. ದೆಕುನ್ ಹಾಂವೆಂ ತುಮ್ಕಾಂ ಭಿತರ್ ಪ್ರವೇಶ್ ಜಾಂವ್ಕ್ ಸೊಡುಂಕ್ ನಾ.”

“ಆನಿ ಆತಾಂ…” ತೊಪಾಸಿನ್ ಉಲಂವ್ಕ್ ಪ್ರಯತ್ನ್ ಕೆಲೆಂ.”

“ಆನಿ ಆತಾಂ, ತಿಣೆಂ ಮೊರಜಾಯ್ ಮ್ಹಣ್ ಮ್ಹಾಕಾ ಖುಶಿ ನಾ” ಮ್ಹಣಾಲಿ ಬೇಗಮ್. “ತರೀ, ತಿ ಮೊರತ್ ಜಾಲ್ಯಾರ್ ಆಮ್ಚ್ಯಾ ಫುಡ್ಲ್ಯಾ ರಾಜಕೀಯ್ ವ್ಯವಹಾರಾಂತ್ ಕಾಂಯ್ ತಬ್ದಿಲ್ ಜಾಯ್ತ್ ಮ್ಹಣ್ ಹಾಂವ್ ಚಿಂತಿನಾ. ತ್ಯಾ ದೆಕುನ್, ಆಮಿ ಪಯ್ಲೆಂ ಚಿಂತ್‍ಲ್ಲೆಪರಿಂ ಆಮ್ಚೆಂ ಯೋಜನ್ ಫುಡೆಂ ಚಲಯ್ಜಾಯ್.”

“ಆಮಿ ಜಿಯೆಂವ್ಕ್ ಆಸಾ” ಮ್ಹಣಾಲೊ ಫಕೀರ್ ಮಹಮ್ಮದ್. “ತ್ಯಾ ಕಾರಣಾ ಖಾತಿರ್ ಪುಣೀ, ತೊ ಸೈತಾನ್ ಸರ್ದಾರ್ ಕಾಬಾರ್ ಜಾಲ್ಲೊ ಬರೆಂ ಜಾಲೆಂ.”

“ತುಜಿ ಫಕತ್ ಸ್ವಾರ್ಥಾಚಿ ಆನಿ ಸ್ವತಃ ಬಚಾವೆಚಿ ಎಕೊಡಿ ದೀಶ್ಟ್” ಮ್ಹಣಾಲಿ ಬೇಗಮ್, ಸ್ತ್ರೀ ತರೀ ತಿಚಿ ರಾಜಕೀಯ್ ಚಮತ್ಕಾರಿ ಉಚಾರುನ್. “ಪುಣ್ ಹಾಂವೆಂ, ಮ್ಹಜೊ ಜೀವ್ ಮಾತ್ರ್ ನಹಿಂ, ಹೆಂ ಮ್ಹಜೆಂ ಸಂಸ್ಥಾನ್ ಆನಿ ಫುಡಾರಾಚಿ ಬಚಾವಿ ಸಾಂಬಾಳುಂಕ್ ಆಸಾ…”

“ತೆಂ ಆಮಿ ಜಾಣಾಂವ್ ಬೇಗಮ್ ಸಾಹಿಬಾ” ಮ್ಹಣಾಲೊ ತೊಪಾಸಿ ಕೊಲೊ. “ತ್ಯಾಚ್ ಖಾತಿರ್ ಆಮ್ಚೊ ಜೀವ್, ತುಮ್ಚ್ಯಾ ಚಾಕ್ರೆಂತ್ ಆಡವ್ ದವರ್ಲಾ.”

“ಜಾವ್ಯೆತ್” ಮ್ಹಣಾಲಿ ಬೇಗಮ್. “ಮ್ಹಜಿಂ ಯೋಜನಾಂ ತುಮಿ ಜಾಣಾಂತ್. ಪುನ್ ಮ್ಹಜಿಂ ಸ್ವಪ್ಣಾಂ ಜಾರಿ ಕರುಂಕ್ ತುಮಿ ಸಕನಾಂತ್.”

“ಸಕ್ತೆಲ್ಯಾಂವ್ ಮೇಮ್ ಸಾಹಿಬಾ, ಜರೂರ್ ಸಕ್ತೆಲ್ಯಾಂವ್. ಆಮ್ಕಾಂ ಥೊಡೊ ಸಮಯ್ ದಿಯಾತ್” ಮ್ಹಣಾಲೊ ತೊಪಾಸಿ.

“ಸಮಯ್ ಜರೂರ್ ದಿತಾಂ – ತುಮ್ಚ್ಯಾಚ್ ಬಚಾವೆ ಖಾತಿರ್!” ಮ್ಹಣಾಲಿ ಬೇಗಮ್, ಚಿಕ್ಕೆ ತಾಪೊನ್. “ಆತಾಂ ಚಡಿತ್ ಹಾಂವ್ ಉಲಯ್ನಾ. ವಚಾತ್, ಥೊಡೊ ವಿಶೆವ್ ಘೆಯಾತ್, ಆನಿ ಫಾಂತ್ಯಾಫಾರಾರ್ ಘೊಡೆ ಆನಿ ಸಾಂಗಾತಿ ಜಾಯ್ ತೆ ಘೆವ್ನ್ ಪಯ್ಯನೂರಾಕ್ ವಚೊನ್, ಜಯ್ತೆವಂತ್ ಜಾವ್ನ್ ಪಾಟಿಂ ಯೇಜಾಯ್. ಆನಿ ಮ್ಹಜೆಂ ಬಿಲ್ಕುಲ್ ಏಕ್ ಶರ್ತ್ ಆಸಾ.”

“ಕಸಲೆಂ ಜಾವ್ಯೆತ್ ತೆಂ ಶರ್ತ್?” ತಿಚ್ಯಾ ಬಾಪುಲ್ ಭಾವಾನ್, ಚಿಕ್ಕೆ ಕಾವ್ಜೆವ್ನ್ ವಿಚಾರ್ಲೆಂ. ತೊಪಾಸಿಚ್ಯಾ ಮತಿಂತ್‍ಯೀ ತೆಂ ಸವಾಲ್ ಉಬ್ಜಲೆಂ.

“ಶರ್ತ್ ಇತ್ಲೆಂಚ್…” ಮ್ಹಣಾಲಿ ಬೇಗಮ್. “ತುಮಿ ದೊಗಾಂಯ್ನೀ, ಹೆರ್ ಕೊಣ್‍ಯೀ ದೊಗಾಂಕ್ ಸಾಂಗಾತಾ ಘೆವ್ನ್ ಪಯ್ಯನೂರಾಕ್ ವಚಜಾಯ್…”

“ತಶೆಂ ಕರುಂಕ್ ಆಮಿ ಜರೂರ್ ಚಿಂತ್ಲಾಂ.”

“ಥಂಯ್ಸರ್ ವಚೊನ್, ಜಾಯ್ತೆ ಉಪಾಯ್ ವಾಪಾರುನ್ ತ್ಯಾ ಯೂಸುಫ್ ಆಲಿಕ್ ತುಮಿ ಲಗಾಡ್ ಕಾಡಿಜಾಯ್. ನಾ ಜಾಲ್ಯಾರ್…

“ನಾ ಜಾಲ್ಯಾರ್ ತಾಕಾ ಕೈದಿ ಕರುನ್ ತುಮಿ ಹಾಂಗಾಸರ್ ಹಾಡಿಜಾಯ್. ತ್ಯಾ ಯುವಕಾನ್ ಹಾಂಗಾಸರ್ ಯೇವ್ನ್ ಆಮ್ಚ್ಯಾ ಯುವಕಾಂಕ್ ತರ್ಬೆತಿ ದೀವ್ನ್ ಹಾಂಗಾಸರ್ ಏಕ್ ಬಳಾಧಿಕ್ ಶಿಪಾಯಾಂಚಿ ಕಂಪ್ಣಿ ಸ್ಥಾಪನ್ ಕರಿಜಾಯ್ ಮ್ಹಣ್, ಹ್ಯಾ ಆದಿಂ ತಾಕಾ ಹಾಂವೆಂ ಮನವಿ ಧಾಡ್‍ಲ್ಲಿ ಆಸಾ – ತಿ ತಾಣೆಂ ಇನ್ಕಾರ್ ಕೆಲ್ಲೊ ಉಗ್ಡಾಸ್‍ಯೀ ಮ್ಹಾಕಾ ಆಸಾ!”

ತಿತ್ಲೆಂ ಮ್ಹಣೊನ್, ತಿಣೆಂ ತಾಂಕಾಂ ವಚೊಂಕ್ ರಜಾ ದಿಲಿ.

ಚಡಿತ್ ಉಲಂವ್ಕ್ ಮನ್ ಜಾಂವ್ ಧಯ್ರ್ ನಾಸ್ತಾನಾ ತೆ ಪಾಟಿಂ ಘುಂವ್ಲೆ, ಆನಿ ಮೆಟಾಂ ದೆಂವೊನ್ ಸಕಯ್ಲ್ ಆಯ್ಲೆ.

ತಿತ್ಲ್ಯಾರ್, ಭಾಯ್ರ್ ಸೊಧ್ನೆಕ್ ಗೆಲ್ಲೆ ಶಿಪಾಯ್, ತ್ಯಾ ಚಾರ್ ಬೊಟಾಂಚ್ಯಾ ಯುವಕಾಚ್ಯಾ ಮುಖೇಲ್ಪಣಾ ಖಾಲ್, ಬೋಂಟ್ ವ್ಯರ್ಥ್ ಜಾವ್ನ್ ಪಾಟಿಂ ಯೇವ್ನ್ ಚೌಕಾಂಗಣಾಂತ್ ಪಾವ್‍ಲ್ಲೆ. ಸುಫೆದಾರ್ ಭು-ಭೂ ಯಾನೆ ಸರ್ದಾರ್ ಸಿಮಾಂವ್ ಖಂದ್ಕಾಂತ್ ಪಡೊನ್, ಉದ್ಕಾಚ್ಯಾ ಅಡಿಯೆಂತ್ ಸಮಾಧ್ ಜಾಲಾ ಮ್ಹಳ್ಳಿ ವರ್ದಿ ದೀವ್ನ್, ಫಕೀರ್ ಮಹಮ್ಮದಾನ್ ಶಿಪಾಯಾಂಕ್ ವಿಶೆವ್ ಘೆಂವ್ಕ್ ಧಾಡ್ಲೆ.

ಫಕತ್ ಫಕೀರ್ ಮಹಮ್ಮದ್, ತೊಪಾಸಿ ದಾಲ್ಮೇದಾ ಆನಿ ತೊ ಯುವಕ್ ಥಂಯ್ಸರ್ ಉರ್ಲೆ. ದಾಲ್ಮೇದಾನ್ ಯುವಕಾಕ್ ಸಲಾಮ್ ದಿಲೊ. ಫಕೀರ್ ಮಹಮ್ಮದಾನ್‍ಯೀ ಚಿಕ್ಕೆ ತಕ್ಲಿ ಬಾಗಯ್ಲಿ. ಫಾಂತ್ಯಾರ್ ಪಯ್ಯನೂರಾಕ್ ವೆಚ್ಯಾ ಯೋಜನಾಚೊ ಆನಿ ಕಾರಣಾಚೊ ವಿವರ್ ತಾಣಿಂ ತಾಕಾ ದಿಲೊ.

“ತರ್, ಹಾಂವೆಂಯೀ ತುಮ್ಚ್ಯಾ ಸಾಂಗಾತಾ ಯೇಜಾಯ್ ಕಿತೆಂ?” ವಿಚಾರ್ಲೆಂ ತ್ಯಾ ಯುವಕಾನ್.

ಸವಾಲಾಕ್ ಜಾಪ್ ದಿಂವ್ಚ್ಯಾ ಆದಿಂ ಫಕೀರ್ ಮಹಮ್ಮದಾನ್ ತೊಪಾಸಿ ದಾಲ್ಮೇದಾಚ್ಯಾ ತೊಂಡಾಕ್ ಪಳೆಲೆಂ. ತೊಪಾಸಿಚ್ ಪಯ್ಲೊ ಉಲಯ್ಲೊ:

“ವ್ಹಯ್, ತುವೆಂ ಅವಶ್ಯ್ ಜಾವ್ನ್ ಯೇಂವ್ಕ್ ಜಾಯ್! ಕಿತ್ಯಾಕ್ ಮ್ಹಳ್ಯಾರ್, ಪಟ್ಟಣಾಂತ್ ತುಂ ಆಸ್ತಾನಾ, ಸರ್ದಾರ್ ಸಿಮಾಂವ್ಕ್ ಜಿವ್ಶಿಂ ಮಾರುಂಕ್ ತುವೆಂ ಕೆಲ್ಲೆಂ ಪ್ರಯತ್ನ್ ಫಳಾಧಿಕ್ ಜಾಂವ್ಕ್ ನಾ ಜಾಲ್ಯಾರೀ ವ್ಹಡ್ ನಹಿಂ – ತಾಚಿ ಕಾಣಿ ಕಾಬಾರ್ ಜಾಲಿ…”

“ಎಕಾ ಲೆಕಾನ್, ಹಾಂವೆಂ ತಾಚ್ಯಾ ಹಾತಾಂತ್ಲೊ ಬಚಾವ್ ಜಾವ್ನ್, ಪಟ್ಟಣಾಂತ್ಲೊ ಚುಕವ್ನ್, ಶೆಕಿಂ ಹಾಂಗಾ ಯೇವ್ನ್ ಪಾವ್‍ಲ್ಲೆಂ ಅಜ್ಯಾಪ್ ಮ್ಹಣಜಾಯ್” ಮ್ಹಣಾಲೊ ತೊ ಯುವಕ್, ಪಾಟ್ಲೆಂ ಚಿಂತುನ್.

“ಅಲ್ಲಾನ್‍ಂಚ್ ತುಕಾ ಹಾಡಯ್ಲೊ ಮ್ಹಣ್ಯೆತ್” ಮ್ಹಣಾಲೊ ತೊಪಾಸಿ. “ಸರ್ದಾರ್ ಸಿಮಾಂವ್ಚ್ಯಾ ಉಪ್ರಾಂತ್, ಆತಾಂ ನಿಜಾಯ್ಕೀ ತುಜ್ಯಾ ಭವಿಷ್ಯಾಚ್ಯಾ ಬರೆಪಣಾಕ್ ಅಡ್ಕಳ್ ಆಸಾ ಜಾಲ್ಯಾರ್ – ಸರ್ದಾರ್ ಯೂಸುಫ್ ಆಲಿ ಮಾತ್ರ್. ತಾಕಾ ಖತಮ್ ಕೆಲ್ಯಾರ್, ವಾ, ಬಂಧಿವಾನ್ ಕರುನ್ ಹಾಂಗಾ ದವರ್ಲ್ಯಾರ್ ತುಜ್ಯಾ ಫುಡಾರಾಕ್ ಬರೆಂಪಣ್ ಆಸಾ. ತಾಚಿ ಕಥಾಯೀ ಖತಮ್ ಕರುಂಕ್ ತುವೆಂಚ್ ಪ್ರಮುಖ್ ಪಾತ್ರ್ ಘೆತ್ಲೊಯ್ ಮ್ಹಣ್ ಸಮ್ಜಲ್ಯಾರ್, ತುಜ್ಯಾ ಆವಯ್ಕ್ – ಸುಲ್ತಾನಾ ಬೇಗಮ್ ಸಾಹಿಬಾಕ್ – ವರ್ತೊ ಸಂತೊಸ್ ಆನಿ ಅಭಿಮಾನ್ ಭೊಗತ್…”

“ತೆಂ ವ್ಹಯ್. ಮ್ಹಜೆ ವರ್ವಿಂ ಕಾಂಯ್ ಶಿಜನಾ ಮ್ಹಣ್ತಾ ತಿ.”

“ತುವೆಂ ಕಾಂಯ್ ಪುಣೀ ಶಿಪಾಯ್ಗಿರೆಚಿಂ ವಾ ವೀರಾವೇಶಾಚಿಂ ಕಾಮಾಂ ಆಧಾರಿಜಾಯ್ ಮ್ಹಳ್ಳಿ, ತಿಚಿ ಸಂಯ್ಭಿಕ್ ಆಶಾ. ತವಳ್ ಮಾತ್ರ್ ಕಣ್ಣಾನೂರಾಂತ್ ಏಕ್ ಬಳಾಧಿಕ್ ಆನಿ ಸ್ವತಂತ್ರ್ ರಾಜ್ಯ್ ಸ್ಥಾಪನ್ ಕರ್ಯೆತ್ ಮ್ಹಳ್ಳೆಂ ತಿ ಜಾಣಾಂ.”

“ತರ್ ಹಾಂವ್ ತುಮ್ಚ್ಯಾ ಬರಾಬರ್ ಯೆತಾಂ. ಪುಣ್ ಆಮ್ಚ್ಯಾ ಕಾಮಾಂತ್ ಆಮಿ ಬಿಲ್ಕುಲ್ ಜಿಕ್ತೆಲ್ಯಾಂವ್‍ಮೂ?”

“ಬಿಲ್ಕುಲ್! ಸರ್ವ್ ರಾಟಾವಳಿ ಆಮ್ಚೆರ್ ಸೊಡ್!” ಮ್ಹಣೊನ್ ಫಕೀರ್ ಮಹಮ್ಮದಾನ್‍ಯೀ ಧಯ್ರ್ ದಿಲೆಂ.

ನಿಜಾಯ್ಕೀ, ತ್ಯಾ ವೆಳಾರ್ ಫಕೀರ್ ಮಹಮ್ಮದಾಕ್ ಆನಿ ತೊಪಾಸಿಕ್ ತ್ಯಾ ಯುವಕಾಚಿ ಚಡ್ ಗರ್ಜ್ ಆಸ್‍ಲ್ಲಿ. ಕಿತ್ಯಾಕ್, ತೊ ಜಾವ್ನಾಸ್‍ಲ್ಲೊ ಕಣ್ಣಾನೂರ್ಚೊ ಫುಡ್ಲೊ ಸುಲ್ತಾನ್. ಹೆಂ ಹೆರ್ ಕೊಣಾಯ್ಕೀ ಕಳಿತ್ ನಾತ್‍ಲ್ಲೆಂ.

ಚೌಕಾಂಗಣಾಂತ್ ಹೆ ಅಶೆಂ ಉಲವ್ನ್ ಆನಿ ಮ್ಹಣ್ಣಿ ಕರುನ್ ಆಸ್ತಾನಾ, ವಯ್ಲ್ಯಾ ಕಮ್ರಾಂತ್ ಜಹನಾರಾ ಬೇಗಮ್‍ಯೀ ಥೊಡ್ಯಾ ಖಾಸ್ಗಿ ಚಿಂತ್ನಾಂನಿ ತಲ್ಲೀನ್ ಜಾವ್ನಾಸ್‍ಲ್ಲಿ.

ಸರ್ದಾರ್ ಸಿಮಾಂವ್ಚಿ, ಕ್ರಮೇಣ್ ತರೀ ತಶಿ ಭೆಟ್ ಜಾವ್ನ್, ತಶಿಚ್ ಆಖೇರ್ ಜಾಲ್ಲ್ಯಾ ಖಾತಿರ್ ತಿಕಾ ಅಸಮಾಧಾನ್ ಜಾಲ್ಲೆಂ. ತಾಚಿ ವಳಕ್ ಕರಿಜಾಯ್, ಇಷ್ಟಾಗಾತ್ ಕರಿಜಾಯ್, ಆನಿ ಸಾಧ್ಯ್ ಜಾಲ್ಯಾರ್…

‘ಛೆ! ಆತಾಂ ತಶೆಂ ಚಿಂತುನ್ ಕಿತೆಂ ಫಾಯ್ದೊ?’ ಚಿಂತ್ಲೆಂ ತಿಣೆಂ. ‘ತಸಲೊ ಎಕ್ಲೊ ನೀಜ್ ವೀರ್ ಮ್ಹಜ್ಯಾ ಬಗ್ಲೆನ್ ಆಸ್‍ಲ್ಲೊ ಜಾಲ್ಯಾರ್, ಹಾಂಗಾಸರ್ ಏಕ್ ಬಳಾಧಿಕ್ ಸೈನ್ ಸ್ಥಾಪನ್ ಕರ್ನ್, ಭೊಂವಾರಿಂಚ್ಯಾ ಸರ್ವ್ ಸಾಮಂತಾಂಕ್ ಆನಿ ಪಾಳಯ್‍ಗಾರಾಂಕ್ ಸಲ್ವವ್ನ್, ಸ್ವಾಧೀನ್ ಕರ್ನ್…

‘ಆಸೊಂ. ತಸಲಿಂ ಚಿಂತ್ನಾಂ ಸದ್ದ್ಯಾಕ್ ಪುಣೀ ಉಪ್ಕಾರ್ಲಿ ನಾಂತ್. ಮ್ಹಜ್ಯಾ ರಹೀಮಾನ್ ಆನಿಕ್‍ಯೀ ಥೊಡಿಂ ವರ್ಸಾಂ ಅಜ್ಞಾತ್ ರಾವಜಾಯ್…’

ವ್ಹಯ್. ತೊ ರಹೀಮ್ ಜಾವ್ನಾಸ್‍ಲ್ಲೊ ಬೇಗಮ್ ಜಹನಾರಾಚೊ ಎಕ್ಲೊಚ್ ಪೂತ್…

ಹೈದರಾಲಿಚ್ಯಾ ತೆಂಪಾರ್ ಕಣ್ಣಾನೂರಾಂತ್ ಪ್ರಸಿದ್ಧ್ ಶಿಪಾಯ್ ಆನಿ ಪಾಳಯ್‍ಗಾರ್ ಜಾವ್ನಾಸ್‍ಲ್ಲ್ಯಾ ಸುಲ್ತಾನ್ ಆಲಿ ಖಾನಾಕ್, ಹೈದರಾಲಿನ್ ಆಪ್ಲ್ಯಾ ನೌಕಾ ದಳಾಚೊ ನಾಯಕ್ ಕೆಲ್ಲೊ. ತೊ ನಾಯಕ್ ದೋನ್ ವರ್ಸಾಂ ಭಿತರ್ ಕಾಳ್ಜೊರಾ ವರ್ವಿಂ ಮೋರ್ನ್ ಪಾವ್‍ಲ್ಲ್ಯಾ ವರ್ವಿಂ, ಹೈದರಾಲಿನ್ ಕಣ್ಣಾನೂರ್‍ಚೆಂ ರಾವ್ಳೆರ್ ಆನಿ ಪಾಳಯ್, ಅಲಿ ಖಾನಾಚ್ಯಾ ವಿಧ್ವಿಕ್, ಜಹನಾರಾಕ್ – ತಿ ಆಸ್ತಾ ಪರ್ಯಾಂತ್ ತಿಣೆಂ ಅನ್ಭೋಗ್ ಕರ್ಚ್ಯಾ ಖಾತಿರ್ – ಸೊಡ್ನ್ ದಿಲ್ಲೆಂ. ತೆಂ ಶರ್ತ್ ಉಪ್ರಾಂತ್ ಬೇಗಮ್ ಜಹನಾರಾ ಥಂಯ್ ಟಿಪ್ಪು ಸುಲ್ತಾನ್‍ಯೀ ಮಾಂದುನ್ ಘೆತ್‍ಲ್ಲೆಂ…

ಸುಲ್ತಾನ್ ಆಲಿ ಖಾನ್ ಮೆಲ್ಯಾ ಉಪ್ರಾಂತ್, ಬೇಗಮ್ ಜಹನಾರಾ ಕಣ್ಣಾನೂರಾಂತ್ ರಾಜ್ವಟ್ ಚಲಂವ್ಕ್ ಲಾಗ್ಲಿ. ತ್ಯಾ ಮಧೆಂ ತಿಕಾ ಏಕ್ ಭುರ್ಗೊ ಜಲ್ಮಲ್ಲೊ – ತೊಚ್ ರಹೀಮ್. ವಾಜ್ಭಿ ಕಾರಣಾ ಖಾತಿರ್, ತಾಚೆಂ ಜನನ್ ತಿಣೆಂ ಗುಪಿತ್ ದವರ್‌ಲ್ಲೆಂ. ಭೋವ್ ಥೊಡ್ಯಾಂಕ್ ಹಿ ಖಬರ್ ಕಳಿತ್ ಆಸ್‍ಲ್ಲಿ. ತ್ಯಾ ಯುವಕಾಚ್ಯಾ ಫುಡಾರಾ ಥಂಯ್ ಆಶಾ ಜಿವಿ ದವರ್ನ್, ತಾಕಾ ಎಕ್ಲೊ ಪ್ರವೀಣ್ ಝುಜಾರಿ ಆನಿ ಫುಡಾರಿ ಕರಿಜಾಯ್ ಮ್ಹಣ್ ತಿ ಅತ್ರೆಗ್ತಾಲಿ. ತ್ಯಾಚ್ ಆಶೆನ್, ತಾಕಾ ತಿಣೆಂ ಶ್ರೀರಂಗಪಟ್ಟಣಾಕ್ ಧಾಡ್‍ಲ್ಲೊ…

ಥಂಯ್ಸರ್ ದುಸ್ರ್ಯಾ ಶಿರಿಗುಂಡಿಯೆಂತ್ ಸಾಂಪ್ಡೊನ್, ದಾವ್ಯಾ ಹಾತಾಚೆಂ ಏಕ್ ಬೋಟ್ ಹೊಗ್ಡಾವ್ನ್, ತರೀ, ಜೀವ್ ಘೆವ್ನ್ ತೊ ಪಾಟಿಂ ಆಯಿಲ್ಲೊ…

ಆನಿ ಆತಾಂ ಹೊ ಘೊಟಾಳೊ..!

ಸರ್ದಾರ್ ಸಿಮಾಂವ್, ಎಕಾ ಮೊನ್ಯಾ ಶಿಪಾಯಾಚೊ ವೇಸ್ ಘೆವ್ನ್ ರಾವ್ಳೆರಾಂತ್ ಪ್ರವೇಶ್ ಜಾವ್ನ್ – ಥೊಡೆ ಜೀವ್ ಬಲಿ ಘೆವ್ನ್ – ಪಾಶಾರ್ ಜಾಲೊ. ತಶೆಂ ತಾಣೆಂ ಮೊರನಾಯೆ ಆಸ್‍ಲ್ಲೆಂ! ಪುಣ್ ಕರ್ಯೆತಾ ಕಿತೆಂ… ಆನಿ ಆತಾಂ, ತಾಚೊ ಜೀವ್ ವಾಂಚಂವ್ಕ್ ಪ್ರಯತ್ನ್ ಕರ್ನ್ ಎಕ್ಲಿ ಸ್ತ್ರೀ, ಮೊರ್ನಾಚ್ಯೆ ದೆಗೆರ್!

ಅಸಲ್ಯಾ ಘುಸ್ಪಡ್ಯಾ ಚಿಂತ್ನಾಂಚ್ಯಾ ಗೊಂದೊಳಾಂತ್, ಬೇಗಮ್ ಭಿತರ್ ಆಯ್ಲಿ. ವೆರೊನಿಕಾ ಮತಿರ್ ಯೇಂವ್ಕ್ ನಾತ್‍ಲ್ಲಿ.

ತ್ಯಾಚ್ ವೆಳಾರ್, ಸರ್ದಾರ್ ಸಿಮಾಂವ್, ತಾಚ್ಯಾ ಜಿಣಿಯೆಂತ್ಲ್ಯಾ ಎಕಾ ಅಪೂರ್ವ್ ಅನುಭವಾಚಿ ರೂಚ್ ಪಳೆತಾಲೊ!

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel