ಇಂಫೆರ್ನಾಚಿಂ ದಾರಾಂ – 24: ವಿಚಿತ್ರ್ ರಾಕ್ವಲಿ

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 24
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 24: ವಿಚಿತ್ರ್ ರಾಕ್ವಲಿ

“ತಿಣೆಂ ತಾಕಿದ್ ದಿಲ್ಯಾ ಜಾವ್ಯೆತ್, ಪುಣ್ ತುಮಿ ಕಿತ್ಯಾಕ್ ರಾವ್ಲ್ಯಾತ್‍ಬಾ?” ಆಗ್ನೆಸ್ ಸಿಸಿಲಿಯಾಕ್ ಪಳೆವ್ನ್, ವೆರೊನಿಕಾಚೆಂ ಮನ್ ಪುರ್ತೆಂ ಪಿಸ್ವಲೆಂ.

“ಹಾಂವೆಂ ಸಾಂಗ್ಲೆಂ ನಹಿಂವೇ?” ಮ್ಹಣಾಲಿ ಆಗ್ನೆಸ್. “ರಾವೊಂಕ್ ಆಮಿ ಚಿಂತುಂಕ್ ನಾ. ಪುಣ್, ಹಾಂಗಾ ಕಸಲೊಗೀ ವಿಶೇಸ್ ಘೊಟಾಳೊ ಜಾಲಾ ಖಂಯ್. ತ್ಯಾ ದೆಕುನ್ ಹಾಂಗಾಸರ್ ಆಸ್‍ಲ್ಲ್ಯಾ, ಆನಿ ಹಾಂಗಾ ಯೇವ್ನ್ ಪಾವ್‍ಲ್ಲ್ಯಾ ಕೊಣೀ ಕ್ರಿಸ್ತಾಂವಾಂನಿ ಹೆಂ ಘಡ್ ಸೊಡುನ್ ಭಾಯ್ರ್ ವಚನಾಯೆ ಮ್ಹಣ್ ತಿಣೆಂ ಫರ್ಮಾಯ್ಲಾಂ.”

“ತರ್ ತುಂ…”

“ಹಾಂವ್, ತ್ಯಾ ಫರ್ಮಾಣಾಕ್ – ನೆಣಾಸ್ತಾಂ – ಖಾಲ್ ಜಾಲಿಂ. ಕಿತೆಂ ತರೀ ಕಾಮ್ ಕರುಂಕ್ ಜಾಯ್ ಮ್ಹಣ್ ಹಾಂವೆಂ ವಿಚಾರ್ಲೆಂ. ಕರ್ತಾಯ್ ಜಾಲ್ಯಾರ್, ಕುಜ್ನಾಂತ್ಲ್ಯಾ ಸೆವಕಿಚೆಂ ಕಾಮ್ ಕರ್ ಮ್ಹಣ್ ಮ್ಹಾಕಾ ಪರ್ವಣ್ಗಿ ಮೆಳ್ಳಿ.”

“ಪುಣ್ ಹಾಂವ್…”

“ತುಂ ಹಾಂಗಾ ಆಸಾಯ್ ಮ್ಹಣ್ ಆಮಿ ಆಯ್ಕಲ್ಲೆಂ. ತರೀ, ಆಮಿ ಅಶೆಂ ಭೆಟ್ತೆಲ್ಯಾಂವ್ ಮ್ಹಣ್ ಹಾಂವೆಂ ಚಿಂತುಂಕ್ ನಾತ್‍ಲ್ಲೆಂ.”

“ಭಾಗಿ ಹಾಂವ್!”

“ಕಿತ್ಯಾಕ್?”

“ಮ್ಹಜ್ಯಾ ದೊಳ್ಯಾಂನಿ ಹಾಂವೆಂ ಪಳೆಲೆಂ – ಪಳೆಲೆಂ ದೆಕುನ್ ಹಾಂವ್ ಪಾತ್ಯೆತಾಂ.”

“ಕಿತೆಂ ಪಾತ್ಯೆತಾಯ್?”

“ಸಂಸಾರಾಂತ್, ಖರೊ ಮೋಗ್ ಆಸಾ ಮ್ಹಣ್ ಪಾತ್ಯೆತಾಂ.”

“ತುಜ್ಯಾ ಉತ್ರಾಂಚ್ಯಾ ಗರ್ಭಾಂತ್, ಕಸಲೊ ಗೂಂಡ್ ಅರ್ಥ್ ಆಸಾ ಮಣ್ ಮ್ಹಾಕಾ ಸಮ್ಜನಾ, ಭಯ್ಣಿ!”

“ಕಾಂಯಿಂಚ್ ಪರ್ವಾ ಕರಿನಾಕಾ. ಸರ್ದಾರ್ ಸಿಮಾಂವ್ ಹಾಂಗಾಸರ್ ಯೆಂವ್ಚೊ ಆಸಾ – ತಶೆಂ, ಹಿ ಪಿರ್ಕಿ ಬೇಗಮ್ ಫಿತೂರಿ ಖೆಳ್ತಾ.”

“ಪುಣ್…”

“ಪುಣ್ ಕಿತೆಂ?”

“ಹಾಂವ್ ಹಾಂಗಾ ಆಸಾಂ ಮ್ಹಣ್ ತಾಕಾ ಕಳನಾತ್ಲ್ಯಾರ್ ಬರೆಂ. ಆಮ್ಚೊ ಸಂಬಂಧ್ ಕುಡ್ಕೆ ಜಾಲಾ.”

“ತುಂ ಚಿಂತಾಯ್ ತಶೆಂ – ಲ್ಹಾನ್ ಭುರ್ಗ್ಯಾಪರಿಂ! ಮೊಗಾಚಿ ಮಹಿಮಾ ತುಂ ನೆಣಾಂಯ್!”

“ಹಾಂವ್ ಜಾಣಾಂ! ದೆವಾ ಜಾಣಾಂ! ಪುಣ್ ತೆಂ ದಾಯ್ಜ್ ಹಾಂವೆಂ ಹೊಗ್ಡಾಯ್ಲಾಂ. ನಹಿಂ ತರ್…”

“ನಹಿಂ ತರ್?”

“ನಹಿಂ ತರ್ – ಮಾಫ್ ಕರ್ – ತುಜೆ ಖಾತಿರ್, ತಿತ್ಲಿಂ ವರ್ತಿಂ ಸಾಹಸಾಂ (ಸರ್ದಾರಾಂಚಿ ಸಿನೊಲ್) ತೊ ಆಧಾರ್ತೊ ನಾ…”

ಹೆಂ ಆಯ್ಕೊನ್, ಮಾನಿನ್ ವೆರೊನಿಕಾ ಕುವೆಲ್, ಥೊಡೊ ವೇಳ್ ಚಿಂತುಂಕ್ ಪಡ್ಲಿ.

“ಹಾಂವೆಂ ಉಲಯಿಲ್ಲ್ಯಾಂತ್ ಚೂಕ್ ಆಸ್ಲ್ಯಾರ್ ಮ್ಹಾಕಾ ಮಾಫ್ ಕರ್ ಭಯ್ಣಿ!” ಮ್ಹಣಾಲಿ ಆಗ್ನೆಸ್ ಕುಂವರ್ನ್.

ಇತ್ಲ್ಯಾರ್, ಮಾನಿನ್ ವೆರೊನಿಕಾಚೆಂ ಮನ್ ಪುರ್ತೆಂ ಮೊವಾಳ್‍ಲ್ಲೆಂ. ಲಾಗಿಂ ಯೇವ್ನ್ ಆಗ್ನೆಸ್ ಕುಂವರ್ನಿಕ್ ಆರಾವ್ನ್ ತಿಣೆಂ ಧರ್ಲೆಂ. ಗಂಭೀರಾಯೆನ್ ಅಶೆಂ ತಿಣೆಂ ಮ್ಹಳೆಂ:

“ಭಯ್ಣಿ, ಹಾಂವ್ ಪಿಶ್ಯಾಂಪರಿಂ ಉಲಯ್ತಾಂ ಮ್ಹಣ್ ಚಿಂತಿನಾಕಾ. ತುಜೆರ್ ದೀಶ್ಟ್ ಘಾಲ್ತಚ್ ಹಾಂವ್ ಸಮ್ಜಲಿಂ – ತುಂ ವರ್ತವ್ತಾಯ್, ತ್ಯಾ ಮಹಾನ್ ಪುರುಷಾಕ್ ಫಾವೊ ತಿ ಚಲಿ!”

“ಚೂಕ್! ತೊ ಮ್ಹಜೆರ್ ಭಿಗ್ಡೊನ್, ಮ್ಹಜ್ಯಾ ಜಿಣ್ಯೆಂತ್ಲೊ ಭಾಯ್ರ್ ಗೆಲಾ.”

“ಭಾಯ್ರ್ ಗೆಲಾ?”

“ವ್ಹಯ್! ಮ್ಹಜ್ಯಾ ಪಾತ್ಕಾಕ್ ಮ್ಹಾಕಾ ಮೆಳ್ಳೆಲಿ ಶಿಕ್ಷಾ ತಿ!”

“ಭಾಯ್ರ್ ಗೆಲಾ ಮ್ಹಣ್ಚೆಂ ಕಶೆಂ? ಬೆಳ್ತಂಗಡಿಚೊ ಬಾಲ್ತಜಾರ್ ಜಾವ್ನ್ ತಾಣೆಂ ತುಕಾ ಮಜತ್…”

“ಕೆಲ್ಯಾ! ಧನಿಯಾ ದೆವಾ – ಕೆಲ್ಯಾ!”

“ತರ್…”

“ತರ್, ಹಾಂವೆಂ ಆಯ್ಕಲಾಂ – ಸ್ತ್ರೀಯಾಂಚ್ಯಾ ಸಮಾಜೆಕ್ ತೊ ಕಾಂಠಾಳ್ತಾಲೊ. ಥೊಡೊ ತೇಂಪ್, ಟಿಪ್ಪು ಸುಲ್ತಾನಾಚ್ಯಾ ನದ್ರೆಕ್ ಪಡನಾಸ್ತಾಂ ಗಪ್‍ಚಿಪ್ ತೊ ರಾವ್ಲೊ.”

“ತ್ಯಾಚ್ ವೆಳಾರ್ ನಹಿಂಗೀ – ತುಜ್ಯಾ ಉಲ್ಯಾಕ್ ಪಾಳೊ ದೀವ್ನ್ – ಬಂಟ್ವಳಾಂತ್, ಡೊನಾ ಮರಿಯಾ ತೆರೆಜಾಕ್ ತಾಣೆಂ ಬಚಾವ್ ಕೆಲ್ಲೆಂ?”

“ವ್ಹಯ್!”

“ತರ್?”

“ತರ್, ತಾಂತುಂ ಚಡ್ ಅಜ್ಯಾಪ್ ನಾ! ಎಕ್ಲೊ ಮಹಾನ್ ಪುರುಷ್ – ಬರೊ ಮನಿಸ್ – ಉಲೊ ದಿಲ್ಲ್ಯಾ ವೆಳಾರ್, ಖೊಡೆ ಸಾಂಕ್ಳಿಂತ್ ವಾ ಕಷ್ಟಾನ್ವಾರಾಂತ್ ಸಾಂಪಡ್ಲೆಲ್ಯಾಂಕ್ ಬಚಾವ್ ಕರುಂಕ್ ವೆತಾ!”

“ಆಹಾಂ!”

“ಖರೆಂಚ್ ವ್ಹಯ್! ತಶೆಂಚ್, ತ್ಯಾ ಉಪ್ರಾಂತ್, ಮಂಗ್ಳುರಾಂತ್, ಕ್ರಿಸ್ತಾಂವಾಂ ಖಾತಿರ್ ವ್ಹಡ್ ಕಾರ್ಬಾರ್ ತಾಣೆಂ ಕೆಲೆಂ.”

“ಆಹಾಂ!”

“ಆನಿ ತ್ಯಾಚ್ ವೆಳಾರ್, ತುಮ್ಚಿ ಸಳಾವಳ್ ಜಾಲ್ಲಿ ಮ್ಹಣ್ ಹಾಂವೆಂ ಆಯ್ಕಲಾಂ.”

“ತುವೆಂ ಜಾಯ್ತೆಂ ಆಯ್ಕಲಾಂ ಆಸ್ಯೆತ್. ಪುಣ್ ನಿಜಾಯ್ಕೀ ತುವೆಂ ಚಿಂತ್ಲಾಂಯ್ ಕಿತೆಂ ಮ್ಹಳ್ಳೆಂ ಸಾಂಗ್.”

“ಭಯ್ಣಿ, ಮ್ಹಜೆರ್ ರಾಗಾರ್ ಜಾಯ್ನಾಕಾ – ಹಾಂವೆಂ ಆಯ್ಕಲ್ಲ್ಯಾ ಪ್ರಕಾರ್, ಆನಿ ಚಿಂತ್‍ಲ್ಲ್ಯಾ ಪ್ರಕಾರ್ – ತುಮಿ ಎಕಾಮೆಕಾ ಮೊಗಾರ್ ಪಡ್ಲ್ಯಾತ್.”

ವೆರೊನಿಕಾ ಕುವೆಲ್ ಹಾಸ್ಲಿ.

“ತುವೆಂ ತಶೆಂ ಚಿಂತ್‍ಲ್ಲ್ಯಾಂತ್ ಅಜ್ಯಾಪ್ ನಾ” ಮ್ಹಣಾಲಿ ತಿ ಥೊಡ್ಯಾ ವೆಳಾನ್. “ತುಂ ಜಾಣಾಂಯ್ – ಮೋಗ್ ಮ್ಹಳ್ಳೆಂ ಉತಾರ್ ಭೋವ್ ವ್ಹಡ್ ಆನಿ ವ್ಯಾಪಕ್. ತಾಕಾ ಆಸಾತ್ ಹಜಾರ್ ಮುಖಾಂ ಆನಿ ಹಜಾರ್ ಅರ್ಥ್. ತುಕಾ ಸಮಾಧಾನ್ ಜಾಂವ್ಚ್ಯಾ ಖಾತಿರ್…”

“ಕಿತೆಂ?”

“ತುಕಾ ಸಮಾಧಾನ್ ಜಾಂವ್ಚ್ಯಾ ಖಾತಿರ್ ಹಾಂವ್ ಹೆಂ ಸಾಂಗ್ತಾಂ – ಸತ್ ಸಾಂಗ್ತಾಂ…”

ಹೆಂ ಆಯ್ಕೊನ್, ಆಗ್ನೆಸ್ ಸಿಸಿಲಿಯಾಕ್ ಫುಗಾರ್ ಜಾಲೆಂ.

“ಸಾಂಗ್ ಭಯ್ಣಿ” ಉಸ್ಮಡ್ಲಿ ತಿ.

“ಸರ್ದಾರ್ ಸಿಮಾಂವ್ಚೊ ಹಾಂವ್ ಮೋಗ್ ಕರ್ತಾಂ – ಪುಣ್ ಖಂಡಿತ್ ಜಾವ್ನ್ ತುವೆಂ ಚಿಂತ್ಚೆಪರಿಂ ನಹಿಂ!”

“ಮ್ಹ-ಮ್ಹಣ್ಜೇ?”

“ಮ್ಹಣ್ಜೆ… ಹಾಂವೆಂ ಪಯ್ಲೆಂಚ್ ಮ್ಹಳ್ಳೆಪರಿಂ; ತೊ, ಆಮ್ಚ್ಯಾ ಸಮಾಜೆಂತ್ಲೊ ಎಕ್ಲೊ ಶ್ರೇಷ್ಠ್ ಪುರುಷ್.”

“ಹಾಂವ್ ಜಾಣಾಂ.”

“ತಶೆಂ ಆಸ್ತಾಂ, ಹಾಂವ್ ಆನಿ ಹೆರ್‌ಯೀ ಸಬಾರ್ ಜಣ್ – ತೊ ಆಮ್ಕಾಂ ಸಮೇಸ್ತಾಂಕ್ ಏಕ್ ಅಭಿಮಾನಾಚೊ ವೀರ್ ಜಾವ್ನಾಸೊನ್ – ಆಮಿ ತಾಚೊ ದೆವಾಪರಿಂ ಆನಿ ಮ್ಹಾಲ್ಗಡ್ಯಾ ಭಾವಾಪರಿಂ ಮೋಗ್ ಕರ್ತಾಂವ್. ಆನಿ ಹೆಂ ಸತ್, ದಿಸಾಂದೀಸ್ ಚಡ್ ಆನಿ ಚಡ್ ಮ್ಹಾಕಾ ಸುಸ್ತತಾ.”

ಆಗ್ನೆಸ್ ಸಿಸಿಲಿಯಾ ಉಲಂವ್ಕ್ ನಾ.

“ಆನಿ ತುಕಾ ಹಾಂವೆಂ ಆಜ್ ಮುಖಾಮುಖ್ ಪಳೆಲ್ಯಾ ಉಪ್ರಾಂತ್, ಮ್ಹಜ್ಯಾ ಅಭಿಪ್ರಾಯೆಚೊ ಆನಿ ಸಮ್ಜಣೆಚೊ ಅರ್ಥ್ ಚಡ್ ಸ್ಪಷ್ಟ್ ಜಾತಾ” ಮ್ಹಣಾಲಿ ವೆರೊನಿಕಾ.

“ಮ್ಹಳ್ಯಾರ್…:”

“ಮ್ಹಳ್ಯಾರ್ – ಜೆಂ ಕಿತೆಂ ದೆವಾನ್ ಸಾಸ್ಣಾ ಥಾವ್ನ್ ಜೊಡಿಲಾಂ ಜಾವ್ಯೆತ್, ತೆಂ ಆಮಾ ಕಿರ್ಕೊಳ್ ಮನ್ಶ್ಯಾಂ ವರ್ವಿಂ ಮೊಡುಂಕ್ ಸಾಧ್ಯ್ ನಾ.”

ಭಾಯ್ಲ್ಯಾನ್ ಕೊಣೆಂ ಬಾಗ್ಲಾರ್ ಠೊಕ್ಲೆಂ.

“ಕೋಣ್ ಥಂಯ್?” ವೆರೊನಿಕಾನ್ ವಿಚಾರ್ಲೆಂ.

“ಭು-ಭೂ-ಭು!”

“ಸಾಯ್ಬಾ ಭೊಗೊಸ್!” ಉಸ್ವಾಸ್ಲಿ ವೆರೊನಿಕಾ. ಉಪ್ರಾಂತ್ ಚಿಕ್ಕೆ ವ್ಹಡ್ ಸ್ವರಾನ್, “ಕಿತೆಂ ಜಾಯ್?” ವಿಚಾರ್ಲೆಂ ತಿಣೆಂ.

“ಭು-ಭೂ-ಭು!”

“ಹಾಂವ್ ಯೇವ್ನ್ ಮಸ್ತ್ ವೇಳ್ ಜಾಲೊ. ಎದೊಳ್‍ಯೀ ಕಿತೆಂ ಕರ್ತಾಂ ಮ್ಹಣ್ ತಾಂಕಾಂ ದುಬಾವ್ ಮಾರ್ಲೊ ಮ್ಹಣ್ ದಿಸ್ತಾ” ಮ್ಹಣಾಲಿ ಆಗ್ನೆಸ್ ಸಿಸಿಲಿಯಾ. “ವೆತಾಂ ಭಯ್ಣಿ – ತುವೆಂ ಉಲಯಿಲ್ಲ್ಯಾ ಖಾತಿರ್ ಆನಿ ಸಾಂಗ್‍ಲ್ಲ್ಯಾ ಖಾತಿರ್ ದೇವ್ ಬರೆಂ ಕರುಂ!”

“ತುಕಾಯೀ ದೇವ್ ಬರೆಂ ಕರುಂ. ಹ್ಯಾ ಇಂಫೆರ್ನಾಚ್ಯಾ ಅಂಧ್ಕಾರಾಂತ್ ತುಜ್ಯಾ ಯೆಣ್ಯಾ ಆನಿ ಉಲವ್ಣ್ಯಾ ವರ್ವಿಂ ಥೊಡೊ ಪ್ರಕಾಸ್ ಫಾಂಕ್ಲೊ.”

“ತರ್ ಹಾಂವ್ ಪರ್ತ್ಯಾನ್ ಸಕಾಳಿಂ ಯೆತಾಂ” ಮ್ಹಣಾಲಿ ಆಗ್ನೆಸ್.

ಮಾತೆಂಗೊಳ್ ತಿಣೆಂ ಬುರ್ಖಾ ವೊಡ್ಲೊ. ಖಾಲಿ ಜಾಲ್ಲೆಂ ಆಹಾರಾಚೆಂ ಹರಿವಾಣ್ ತಿಣೆಂ ಹಾತಾಂತ್ ಘೆತ್ಲೆಂ.

“ದೇವ್ ಬರಿ ರಾತ್ ದೀಂವ್, ಭಯ್ಣಿ!”

“ದೇವ್ ಬರಿ ರಾತ್ ದೀಂವ್, ಭಯ್ಣಿ!” ಮ್ಹಣೊನ್ ವೆರೊನಿಕಾನ್ ಆಗ್ನೆಸಾಕ್ ಏಕ್ ಘಡಿ ಪೊಟ್ಲುನ್ ಧರ್ಲೆಂ. “ಆಮ್ಕಾಂ ಆನಿಕ್‍ಯೀ ಜಾಯ್ತೆಂ ಉಲಂವ್ಕ್ ಆಸಾ” ಮ್ಹಣಾಲಿ ತಿ.

“ಜಾಯ್ತ್. ಹಾಂವ್ ಯೆತಾಂ.”

ವೆರೊನಿಕಾನ್ ದಾರ್ ಕಾಡ್ಲೆಂ. ಭಾಯ್ಲ್ಯಾನ್, ಲಾಂಟಾನಾಚ್ಯಾ ಉಜ್ವಾಡಾಂತ್, ಸುಫೆದಾರ್ ಭು-ಭು ರಾವೊನ್ ದಾಂತ್ ದಾಕಯ್ತಾಲೊ – ದಾಂತ್ ಖಿರ್ಲಿತಾಸೊ ದಿಸ್ತಾಲೊ. ತಾಕಾ ಪಳೆವ್ನ್ ಹ್ಯಾ ದೊಗೀ ಸ್ತ್ರೀಯಾಂಚೆಂ ಆಂಗ್ ಹಿಂವಾಳ್ಳೆಂ.

ಆಹಾರ್ ಹಾಡ್ನ್ ಆಯಿಲ್ಲಿ ಯುವತಿ ದೆಂವೊನ್ ಸಕಯ್ಲ್ ಗೆಲಿ.

ವೆರೊನಿಕಾ ಕುವೆಲಿನ್, ತುರ್ತಾನ್ ದಾರ್ ಬಂದ್ ಕೆಲೆಂ. ಭಿತರ್ ಸರೊನ್, ಖಟ್ಲ್ಯಾರ್ ತಿ ಬಸ್ಲಿ. ತಿಚ್ಯಾ ಚಿಂತ್ನಾಂನಿ ನವೊಚ್ ಗೊಂದೊಳ್ ಉಬ್ಜಲ್ಲೊ.

ತಸಲ್ಯಾ ಗೊಂದೊಳಾಕ್, ಕಾರಣ್‍ಯೀ ಬರೆಂಚ್ ಆಸ್‍ಲ್ಲೆಂ.

ಚಿಂತಿನಾಸ್ತಾನಾ, ಆಗ್ನೆಸ್ ಸಿಸಿಲಿಯಾ ಕುವರ್ನ್!

ಇತ್ಲೆಂ ಉಲಯ್ಲ್ಯಾರೀ, ವಾ ಉಲಯ್ನಾಸ್ತಾನಾಂಯೀ, ಸರ್ದಾರ್ ಸಿಮಾಂವ್ಚೊ ಖರೊ ಮೋಗ್, ಬಿಲ್ಕುಲ್ ಆಗ್ನೆಸಾ ಥಂಯ್ ಬಂಧಿವಾನ್ ಜಾವ್ನ್ ರಾವ್ಲಾ ಮ್ಹಣ್ ತಿ ಸಮ್ಜಲಿ, ಸಂಸೊಸ್ ಪಾವ್ಲಿ. ತರೀ, ತಿಕಾ ನೀದ್ ಯೇಂವ್ಕ್ ನಾ. ಚಿಂತ್ಲೆಂ, ಚಿಂತ್ಲೆಂ, ಚಿಂತುನ್‍ಂಚ್ ತಿ ಉರ್ಲಿ. ತರ್, ಆನಿ ಕಿತೆಂ ಉರ್ಲಾಂ ಹ್ಯಾ ಸಂಸಾರಾಂತ್?

ತಿಣೆಂಚ್ ವಿಚಾರ್‌ಲ್ಲ್ಯಾ ಸವಾಲಾಕ್ ಜಾಪ್ ಜಾವ್ನ್ ಮ್ಹಳ್ಳೆಪರಿಂ, ಬಂದ್ ಕೆಲ್ಲ್ಯಾ ದಾರಾರ್, ಭಾಯ್ಲ್ಯಾನ್, ಖೊರ್ಪಿಲ್ಲೊ ಆವಾಜ್ ಆಯ್ಕಲೊ!

“ಕೊ-ಕೋಣ್?” ಮ್ಹಳೆಂ ತಿಣೆಂ ಕಷ್ಟಾಂನಿ.

“ಭು-ಭೂ-ಭೂ!”

“ಕೋಣ್?”

“ಭು-ಭೂ-ಭು!”

“ಅಯ್ಯೋ ದೆವಾ!” ಚಿಂತ್ಲೆಂ ತಿಣೆಂ.

“ಭು-ಭೂ-ಭು!”

“ಕಿತೆಂ ಜಾಯ್?” ತಿಣೆಂ ಆಪ್ಲೆಂ ಹೃದಯ್ ದಾಂಬುನ್ ಧರ್ಲೆಂ.

“ಭು-ಭೂ-ಭು!”

“ಅಯ್ಯೋ!” ಮ್ಹಣಾಲಿ ತಿ ಆಪ್ಣಾಯಿತ್ಲ್ಯಾಕ್.

“ಭಯ್ಣೀ… ಬಾಗಿಲ್ ಕಾಡ್.”

“ಕೋಣ್?” ವೆರೊನಿಕಾಚಿಂ ಅಂತರ್ಮಳಾಂ ಉಡ್ಲಿಂ. ಕೊಣಾಚೊ ಜಾವ್ಯೆತ್ ತೊ ಸ್ವರ್?

ಪುಣ್ ತೊಚ್ ಸ್ವರ್ – ಸುಮಧುರಾಯೆನ್ – ಆಯ್ಕಲೊ.

“ಭಯ್ಣೀ… ತುವೆಂ ಭಿಯೆಂವ್ಚಿ ಗರ್ಜ್ ನಾ… ಬಾಗಿಲ್ ಕಾಡ್.”

ಆಪ್ಣಾಕ್ ಪಿಶೆಂ ಲಾಗ್ಲಾಂ, ವಾ, ಆಪುಣ್ ಸಪ್ಣೆತಾಂ ಮ್ಹಣ್ ತ್ಯಾ ಘಡ್ಯೆ ಮಾನಿನ್ ವೆರೊನಿಕಾಕ್ ಭೊಗ್ಲೆಂ. ತಿಚ್ ನೆಣಾಂ ಮ್ಹಣ್ಚ್ಯಾ ಜಿನ್ಸಾರ್ ಬಾಗ್ಲಾ ಕಡೆನ್ ತಿ ಗೆಲಿ.

ಕಾಂಪೆರ‍್ಯಾ ಹಾತಾಂನಿ ದಾರ್ ತಿಣೆಂ ಉಗ್ತೆಂ ಕೆಲೆಂ.

ಥಂಯ್ಸರ್ ಆಸ್‍ಲ್ಲೊ – ದೆವಾ ಭೊಗೊಸ್ – ಸುಫೆದಾರ್ ಭು-ಭು!

“ಕಿ-ಕಿತೆಂ..? ಕೊ-ಕೋಣ್?” ಮ್ಹಳೆಂ ತಿಣೆಂ ಆಕಾಂತೊನ್.

“ಭಯ್ಣಿ, ಭಿಯೆನಾಕಾ!”

“ತುಂ-ತುಂ…”

“ವ್ಹಯ್ – ಹಾಂವ್… ತೋಂಡ್ ಯೇನಾತ್‍ಲ್ಲೊ ಪೊಟ್ಟಾ!”

“ಕಿತೆಂ – ಕಿತೆಂ ಹೆಂ..?” ವೆರೊನಿಕಾಚೆ ಪಾಯ್ ಕಾಂಪ್ತಾಲೆ.

“ಹಾಂವೆಂ ಮ್ಹಳೆಂ – ಭಯ್ಣಿ ಭಿಯೆನಾಕಾ!”

“ಕಿ-ಕಿತೆಂ ಗಜಾಲ್ ಹಿ? ತುಂ – ತುಂ ಕೋಣ್?”

“ಭಯ್ಣಿ – ಹಾಂವ್ ಕೋಣ್ ಮ್ಹಣ್ ಸಾಂಗೊಂಕ್ ಲಜ್ ದಿಸ್ತಾ. ಪುಣ್, ತುವೆಂ ಭಿಯೆಂವ್ಚಿ ಗರ್ಜ್ ನಾ ಮ್ಹಣ್ ಪರ್ತ್ಯಾನ್ ತುಜೆ ಕಡೆನ್ ಹಾಂವ್ ಉಪ್ಕಾರ್ ಮಾಗ್ತಾಂ.”

“ನಾ, ಹಾಂವ್ ಭಿಯೆನಾ – ಪುಣ್ ತುಂ…”

“ವ್ಹಯ್ – ತುಜೊ ರಾಕ್ವಲಿ ಜಾವ್ನ್ ಆಯ್ಲಾಂ…”

“ತರ್…”

“ತರ್ ತುವೆಂ ಫಿಕಿರ್ ಕರ್ಚಿ ಗರ್ಜ್ ನಾ!”

“ತರ್… ಕಿತೆಂ ಹಾಂವ್ ಪಳೆತಾಂ..?”

“ಫಿಕಿರ್ ಕರಿನಾಕಾ – ಭಿಯೆನಾಕಾ!”

“ಯೇ ಮಾ…”

“ಹಾಂವೆಂ ಮ್ಹಳೆಂ – ಫಿಕಿರ್ ಕರಿನಾಕಾ – ಭಿಯೆನಾಕಾ!”

“ಸರ್ವೆಸ್ಪರಾ ಸೊಮಿಯಾ!”

“ಬರಾಬರ್…”

“ತರ್ ತುಂ…”

“ಹಾಂವ್ ವರ್ತವ್ತಾಂ – ಚಿಂತಿನಾತ್‍ಲ್ಲ್ಯಾ ಜಿನ್ಸಾರ್ ತುಕಾ ಸಾಲ್ವಾರ್ ಕರುಂಕ್ ಆಯಿಲ್ಲೊ…”

“ಸರ್ದಾರ್ ಸಿಮಾಂವ್!”

“ತುವೆಂ ಮ್ಹಳ್ಳೆಂ ಸಾರ್ಕೆಂ – ತೊಚ್ ಹಾಂವ್!”

“ಅಯ್ಯೊ ದೆವಾ!”

“ಭಿಯೆನಾಕಾ ಭಯ್ಣಿ..!”

“ದೇವ್ ಜಾಣಾಂ – ಹಾಂವ್ ಭಿಯೆನಾ – ಪುಣ್…”

“ಪುಣ್ ಅಸಲ್ಯಾ ವೆಸಾನ್ ಹಾಂವೆಂ ಹಾಂಗಾ ಯೆಂವ್ಚೆಂ ಪಡ್ಲೆಂ.”

“ತರೀ, ಮ್ಹಾಕಾ ಪಾತ್ಯೆಂವ್ಕ್ ಕಷ್ಟ್ ಮಾರ್ತಾತ್ – ಸರ್ದಾರ್ ಸಿಮಾಂವ್!”

“ವ್ಹಯ್ ಭಯ್ಣಿ, ತೊಚೊ ತೊ – ಹಾಂಗಾ ಆಸಾ ಹಾಂವ್!”

“ಪುಣ್, ಹೊ ವೇಸ್?”

“ಗರ್ಜೆಕ್ ಪಡ್ಲೊ.”

“ತೆಂ ಖರೆಂ” ಮ್ಹಣಾಲಿ ವೆರೊನಿಕಾ. “ತುಂ ಅಸೊ ಹಾಂಗಾಸರ್ ಯೇವ್ನ್ ಪಾವ್ಲಾಯ್ ಮ್ಹಣ್ ಪಾತ್ಯೆಂವ್ಕ್ ಮ್ಹಾಕಾಚ್ ಕಷ್ಟ್ ಮಾರ್ತಾತ್. ತ್ಯಾ ಶಿವಾಯ್…”

“ತ್ಯಾ ಶಿವಾಯ್?”

“ತ್ಯಾ ಶಿವಾಯ್ – ತುಂ ನೆಣಾಂಯ್.”

“ಆಸೊಂ, ತ್ಯೊ ಸರ್ವ್ ಗಜಾಲಿ. ತುಮ್ಕಾಂ ಹಾಂಗಾ ಥಾವ್ನ್ ಭಾಯ್ರ್ ವ್ಹರೊಂಕ್ ಹಾಂವ್ ಅಸೊ ಆಯ್ಲಾಂ.”

“ಜಾಂವ್ಕ್ ಪುರೊ” ಮ್ಹಣಾಲಿ ವೆರೊನಿಕಾ, ಚಿಂತುನ್. “ತುಂ ಹಾಂಗಾಸರ್ – ಕಸಲ್ಯಾಯೀ ವೆಸಾನ್ ಜಾಂವ್ – ಯೇವ್ನ್ ಪಾವ್ಲಾಯ್ ಮ್ಹಳ್ಳಿ ಗಜಾಲ್ ಭೋವ್ ದರ್ಬಾರಾಚಿ ಆನಿ ದಬಾಜ್ಯಾಚಿ!”

“ಆಹಾಂ?”

“ಪುಣ್, ಆಮಿ, ಹಾಂಗಾ ಥಾವ್ನ್ ಭಾಯ್ರ್ ಕಶೆಂ ವೆಚೆಂ ಮ್ಹಣ್ ತುವೆಂ ಚಿಂತ್ಲಾಂಯ್‍ವೇ?”

“ತ್ಯಾಚ್ ಖಾತಿರ್ ನಹಿಂವೇ ಹಾಂವ್ ಆಯ್ಲಾಂ?”

“ಜಾವ್ಯೆತ್. ಪುಣ್ ಅಪಾಯ್ ಭೋವ್ ಚಡ್ ಆಸಾ.”

“ಆಸೊಂದಿ” ಮ್ಹಣಾಲೊ ಸರ್ದಾರ್ ಸಿಮಾಂವ್.

ತ್ಯಾ ಘಡಿಯೆ – ಎಕಾ ಕೊಡ್ಯಾಪರಿಂ ತೊ ದಿಸ್ತಾಲೊ ಜಾಲ್ಯಾರೀ – ಮಾನಿನ್ ವೆರೊನಿಕಾ ಕುವೆಲಿಕ್ ತಾಣೆಂ ಧಯ್ರ್ ದಿಲೆಂ:

“ತುಂ ಜಾಣಾಂಯ್ – ಟಿಪ್ಪು ಸರ್ದಾರಾಚ್ಯಾ ಹುದ್ದೆದಾರಾಪರಿಂ ಹಾಂವೆಂ ಯೇವ್ನ್, ಕೊಣೀ ಕ್ರಿಸ್ತಾಂವಾಂಕ್ ಸುಟವ್ನ್ ವ್ಹರೊಂಕ್ ಮ್ಹಾಕಾ ಸಾಧ್ಯ್ ನಾ.”

“ವ್ಹಯ್. ಪುಣ್ ಅಸೊ ತುಂ ಆಯ್ಲಾಯ್. ದೇವ್‍ಚ್ ತುಜ್ಯಾ ಬಾವ್ಳ್ಯಾಂಕ್ ಬಳ್ ದೀಂವ್ದಿ…”

“ತುಂ ಪರ್ವಾ ಕರಿನಾಕಾ. ಕಿತೆಂ ತರೀ ಉಪಾಯ್ ಚಿಂತುನ್… ಶೂ! ಕಸಲೊ ಆವಾಜ್? ಕೋಣ್‍ಗೀ ಹಾಂಗಾಸರ್ ಯೆತಾತ್!”

“ದೆವಾ! ಕೋಣ್ ಜಾವ್ಯೆತ್?” ವೆರೊನಿಕಾ ಆಕಾಂತ್ಲಿ.

“ಕೊಣೀ ಜಾಂವ್ದಿತ್. ಬಾಗಿಲ್ ಬಂದ್ ಕರ್ನ್ ಖಿಳ್ ಘಾಲ್. ಹಾಂವ್ ಅಸೊಚ್ ರಾಕ್ವಲಿ ಜಾವ್ನ್ ಉರ್ತಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್.

ವೆರೊನಿಕಾನ್ ಬಾಗಿಲ್ ಬಂದ್ ಕೆಲೆಂ. ಸರ್ದಾರ್ ಸಿಮಾಂವ್ (ಸುಫೆದಾರ್ ಭು-ಭು) ದಾರಾ ಭಾಯ್ಲ್ಯಾನ್ ಉದಾರೊಚ್ ನಿದೊನ್ ಘೊರೆಂವ್ಕ್ ಲಾಗ್ಲೊ.

ಸಕಯ್ಲ್ಯಾ ಚೌಕೆ ಥಾವ್ನ್, ಮೆಟಾಂ ಚಡೊನ್ ಕೊಣೆಂಗೀ ವಯ್ರ್ ಯೆಂವ್ಚೊ ಆವಾಜ್ ಆಯ್ಕಲೊ. ಸರ್ದಾರ್ ಸಿಮಾಂವ್ನ್ ದೊಳೆ ಉಗ್ತೆ ಕರುಂಕ್ ನಾಂತ್. ತೋಂಡ್ ಮಾತ್ರ್ ಉಗ್ತೆಂ ದವರ್ನ್, ಸ್ವಾಭಾವಿಕ್ ಘೊರೆಣೊಚೊ ಆವಾಜ್ ದೀವ್ನ್ ತೊ ರಾವ್ಲೊ.

ಮೆಟಾಂ ಲಾಗಿಂ ಆಯ್ಲಿಂ.

“ಅಹೋ ಬದ್ಮಾಶ್!” ಸ್ವರ್ ಫಕೀರ್ ಮಹಮ್ಮದಾಚೊ. “ಪಹರಜ್ ಕರ್ತಾ ಮ್ಹಳ್ಯಾರೀ ಕಿತ್ಲ್ಯಾ ಚತ್ರಾಯೆನ್!” ಮ್ಹಳ್ಳ್ಯಾ ಉತ್ರಾಂ ಬರಾಬರ್, ರಾಕ್ವಲ್ಯಾಕ್ ಪಾಯಾನ್ ತಾಣೆಂ ಚಿಲ್ಲಿಲೊ.

“ಭು-ಭೂ-ಭು!” ರಾಕ್ವಲ್ಯಾಕ್ ಜಾಗ್ ಜಾಲಿ.

“ಇತ್ಲ್ಯಾಚ್ ಚತ್ರಾಯೆನ್ ರಾಕ್ವಲ್ಯಾಚೆಂ ಕಾಮ್ ಕರ್ತಾಯ್ ಕಿತೆಂ?”

“ಭು-ಭೂ-ಭು!” ಮ್ಹಣೊನ್ ರಾಕ್ವಲ್ಯಾನ್ ದಾಂತ್ ಸೊಡ್ಲೆ ಆನಿ ಬಂದ್ ಆಸ್‍ಲ್ಲೆಂ ದಾರ್ ದಾಕಯ್ಲೆಂ.

“ದಾರ್ ಬಂದ್ ಆಸಾ ಮ್ಹಣ್ ಬರೆಂ ಆಸಾ! ಸರ್ ಪೆಲ್ಯಾನ್!” ಮ್ಹಣಾಲೊ ಫಕೀರ್ ಮಹಮ್ಮದ್.

ಸರ್ದಾರ್ ಸಿಮಾಂವ್ಚೆಂ ರಗತ್ ಕಡ್ಲೆಂ. ಜಾಲ್ಯಾರೀ ಖಾಲ್ತೆಪಣಾನ್ ಮ್ಹಳ್ಳೆಪರಿಂ ದಾಂತ್ ಸೊಡುನ್ ತೊ ಪಾಟಿಂ ಸರ್ಲೊ. ಫಕೀರ್ ಮಹಮ್ಮದಾನ್, ವೆರೊನಿಕಾ ಆಸ್‍ಲ್ಲ್ಯಾ ಕುಡಾಚೆಂ ದಾರ್, ಪಯ್ಲೆಂ ಚಿಕ್ಕೆ ಹಾಳ್ವಾಯೆನ್, ಉಪ್ರಾಂತ್ ಬಳಾನ್ ಠೊಕ್ಲೆಂ.

“ಕೊ-ಕೋಣ್ ಥಂಯ್?”

“ಹಾಂವ್. ಬಾಗಿಲ್ ಕಾಡ್ – ತುಜೆ ಕಡೆನ್ ಥೊಡೆಂ ಗರ್ಜೆಚೆಂ ಉಲಂವ್ಕ್ ಆಸಾ.”

“ಉಲಂವ್ಕ್ ಆಸ್ಲ್ಯಾರ್, ದೀಸ್ ಉಜ್ವಾಡ್ಲ್ಯಾ ಉಪ್ರಾಂತ್ ಆನಿ ಬೇಗಮ್ ಆಸ್ತಾನಾ ಉಲವ್ಯೆತ್.”

“ತುವೆಂ ಭಿಯೆಂವ್ಚಿ ಗರ್ಜ್ ನಾ. ಹಾಂವ್ ಜುಲುಮ್ ಚಲಂವ್ಕ್ ಕಾಂಯ್ ಯೇಂವ್ಕ್ ನಾ. ತ್ಯಾ ಶಿವಾಯ್, ತುಜೊ ರಾಕ್ವಲಿಯೀ ಹಾಂಗಾ ಆಸಾ.”

“ಮ್ಹಾಕಾ ಉಲಂವ್ಕ್ ಕಾಂಯ್ ನಾ.”

“ಆಸಾ – ತುಕಾ ಏಕ್ ಬರಿ ಖಬರ್ ದೀಂವ್ಕ್ ಆಸಾ.”

“ಕಸಲಿ?”

“ದಾರ್ ಕಾಡ್. ಸಾಂಗ್ತಾಂ.”

ತಸೊ ಥೊಡೊ ವೇಳ್ ಗೆಲೊ. ಫಕೀರ್ ಮಹಮ್ಮದಾಚಿ ಗೊಮ್ಟಿ ವೊಳಾಯ್ಜಾಯ್ ಮ್ಹಣ್ಚ್ಯಾ ಜಿನ್ಸಾರ್, ಸರ್ದಾರ್ ಸಿಮಾಂವ್ಚೆ ಹಾತ್ ಖೊರ್ಜುತಾಲೆ. ಫಕೀರ್ ಮಹಮ್ಮದಾನ್ ಪರ್ತ್ಯಾನ್ ದಾರ್ ಠೊಕ್ಲೆಂ. ತಾಕಾ ಗರ್ಜೆ ಶಿವಾಯ್ ರಾಗ್ ಹಾಡಂವ್ಚೊ ನಾಕಾ ಮ್ಹಣ್ ಚಿಂತುನ್ ಜಾವ್ಯೆತ್, ವೆರೊನಿಕಾನ್ ದಾರ್ ಕಾಡ್ಲೆಂ.

“ಕಿತೆಂ ಸಾಂಗೊಂಕ್ ಆಸಾ? ಮ್ಹಾಕಾ ಕೈದಿ ಕರ್ನ್ ದವರ್‌ಲ್ಲೆಂ ಪಾವನಾಂಗೀ?”

“ತುವೆಂ ಕೈದಿ ಜಾವ್ನ್ ರಾವಜಾಯ್ ಮ್ಹಣ್ ನಾ. ಮನ್ ಕೆಲ್ಯಾರ್ ಮ್ಹಜಿ ರಾಣಿ ಜಾವ್ನ್ ತುವೆಂ ರಾವ್ಯೆತ್. ಕಿತೆಂ ಮ್ಹಣ್ತಾಯ್?”

“ಹಾಂವೆಂ ಮ್ಹಣ್ಚೆಂ ಕಾಂಯ್ ನಾ.”

“ವೆಗಿಂಚ್ ತುವೆಂ ಮ್ಹಣ್ಚೆಂ ಪಡ್ತೆಲೆಂ.”

“ಹಾಂವೆಂ ಮ್ಹಣ್ಚೆಂ ಕಾಂಯ್ ನಾ. ಉಪ್ಕಾರ್ ಕರ್ನ್ ಮ್ಹಾಕಾ ಥೊಡೊ ವಿಶೆವ್ ಘೆಂವ್ಕ್ ಸೊಡ್ಯಾ. ಆನಿ ದಯಾ ಕರ್ನ್…”

“ದಯಾ ಕರ್ನ್?”

“ದಯಾ ಕರ್ನ್ – ತ್ಯಾ ಮನ್ಶ್ಯಾಕ್ ಹಾಂಗಾ ಥಾವ್ನ್ ಪಯ್ಸ್ ಕಾಡ್ಯಾ” ಮ್ಹಣಾಲಿ ತಿ, ಭು-ಭುಕ್ ಬೋಟ್ ದಾಕವ್ನ್.

ಫಕೀರ್ ಮಹಮ್ಮದ್ ಹಾಸ್ಲೊ.

“ತ್ಯಾ ಮನ್ಶ್ಯಾಕ್ ಪಯ್ಸ್ ಕಾಡ್ಯೆತ್ – ತೆಂ ತುಜೆರ್‌ಚ್ ಹೊಂದೊನ್ ಆಸಾ. ತುಂ ಮ್ಹಜಿ ರಾಣಿ ಜಾಂವ್ಕ್ ಕಬೂಲ್ ಜಾ. ನಾ ಜಾಲ್ಯಾರ್ ತೊ ಕೊಡ್ಕಾರ್ ತುಜೊ ರಾಕ್ವಲಿ ಜಾವ್ನ್ ಉರ್ತಲೊ.”

“ಮ್ಹಾಕಾ ತಿತ್ಲೆಂ ಸಾಂಗೊಂಕ್ ತುಂ ಆಯಿಲ್ಲೊಯ್ಗೀ? ತರ್ ತುವೆಂ ವಚ್ಯೆತ್” ಮ್ಹಣಾಲಿ ತಿ ಪಾಟಿಂ ಘುಂವೊನ್.

“ನಾ, ಆನಿಕೀ ಆಸಾ. ತುಮ್ಚೊ ತೊ ಸರ್ದಾರ್ ಸಿಮಾಂವ್, ಆಮಿ ಚಿಂತ್‍ಲ್ಲ್ಯಾ ಪ್ರಾಸ್ ವೆಗಿಂ ಹೆವ್ಶಿನ್ ಯೇವ್ನ್ ಪಾವ್ಲಾ.”

“ಕೊ-ಕೋಣ್?”

“ಸರ್ದಾರ್ ಸಿಮಾಂವ್. ಆಯ್ಕೊನ್ ತುವೆಂ ಸಂತೊಸ್ ಪಾಂವ್ಚಿ ಗರ್ಜ್ ನಾ. ತಾಣೆಂ ಕೈದ್ ಕೆಲ್ಲೊ ಷೇರ್ ಖಾನ್, ತಾಚ್ಯಾ ಚಾಕ್ರಾಕ್ ಕಾಬಾರ್ ಕರ್ನ್ ಹಾಂಗಾ ಯೇವ್ನ್ ಪಾವ್ಲಾ, ಆನಿ ಸರ್ದಾರ್ ಸಿಮಾಂವ್ಚಿ ಬೋಂಟ್ ಆಂಬುಡ್ನ್ ತಾಕಾ ಲಗಾಡ್ ಕಾಡುಂಕ್ ವಾ ತಾಕಾ ಧರ್ನ್ ಹಾಂಗಾ ಹಾಡುಂಕ್ ಚಡ್ ಕಷ್ಟ್ ಜಾಂವ್ಚೆ ನಾಂತ್.”

“ತುಮ್ಕಾಂ ಜಾಯ್ ತಶೆಂ ತುಮಿ ಕರುಂಕ್ ತರ್ ಸಕ್ತಾತ್, ತರ್ ಮ್ಹಾಕಾ ಕಿತ್ಯಾಕ್ ಸಾಂಗ್ತಾತ್?”

“ತುಕಾ ಸಾಂಗೊಂಕ್‍ಚ್ ಹಾಂವ್ ಆಯಿಲ್ಲೊಂ. ಸರ್ದಾರ್ ಸಿಮಾಂವ್ಕ್ ಸೊಧುನ್ ಕಾಡ್ನ್, ತಾಕಾ ಲಗಾಡ್ ಕಾಡಿನಾಯೆ ಜಾಲ್ಯಾರ್ ತುವೆಂ ಮ್ಹಜೆ ಕಡೆನ್ ಲಗ್ನ್ ಜಾಂವ್ಕ್ ಘಳಾಯ್ ಕರಿನಾಯೆ. ಚಡ್ ಮ್ಹಳ್ಯಾರ್ ಎಕಾ ಹಫ್ತ್ಯಾಚೊ ವಾಯ್ದೊ ತುಕಾ. ತ್ಯಾ ವಾಯ್ದ್ಯಾ ಭಿತರ್ ತುಂ ಬಾಗ್ವನಾಂಯ್ ಜಾಲ್ಯಾರ್ – ಉಪ್ರಾಂತ್ ಮ್ಹಾಕಾ ಜಾಯ್ ತಶೆಂ ಕರ್ಚಿ ಮರ್ಜಿ ಮ್ಹಜಿ!”

ವೆರೊನಿಕಾ ಕುವೆಲ್ ಉಲಂವ್ಕ್ ನಾ.

ಫಕೀರ್ ಮಹಮ್ಮದ್ ಪಾಟಿಂ ಘುಂವ್ಲೊ. ಹುಶಾರಾಯೆನ್ ಪಹರಜ್ ಕರಿಜಾಯ್ ಮ್ಹಣ್ ರಾಕ್ವಲ್ಯಾಕ್ ತಾಕಿದ್ ದೀವ್ನ್, ಸಕಯ್ಲ್ ದೆಂವೊನ್ ತೊ ಚಲ್ಲೊ. ತ್ಯಾಚ್ ಘಡ್ಯೆ ರಾಕ್ವಲ್ಯಾನ್ ತಾಚಿ ಗೊಮ್ಟಿ ಮೊಡುಂಕ್ ನಾತ್‍ಲ್ಲೆಂ ತಾಚೆಂ ಬರೆಂ ಅದೃಶ್ಟ್ ಮ್ಹಣ್ಯೆತ್.

ತಾಚಿಂ ಮೆಟಾಂ ಪಯ್ಸ್ ಪಾವ್ತಚ್, ಸರ್ದಾರ್ ಸಿಮಾಂವ್ ಪಾಟಿಂ ಘುಂವ್ಲೊ.

“ಭಿಯೆನಾಕಾ ಭಯ್ಣಿ” ಮ್ಹಣಾಲೊ ತೊ. “ಕಸಲೊ ಪುಣೀ ಉಪಾಯ್ ಚಿಂತುನ್ ಹಾಂಗಾ ಥಾವ್ನ್ ಪಾಟಿಂ ವೆಚಿ ವಾಟ್ ಹಾಂವ್ ಸೊಡಯ್ತಾಂ.”

“ದೇವ್ ತುಜ್ಯಾ ಬಾವ್ಳ್ಯಾಂಕ್ ಬಳ್ ದೀಂವ್ದಿ” ಮ್ಹಣಾಲಿ ತಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel