ಇಂಫೆರ್ನಾಚಿಂ ದಾರಾಂ – 21: ವಾದಾಳಾಚ್ಯೊ ಯೆಣೊ

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 21
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 21: ವಾದಾಳಾಚ್ಯೊ ಯೆಣೊ

ಸರ್ದಾರ್ ಸಿಮಾಂವ್ ಆನಿ ರಾಮಪ್ಪ, ಪಯ್ಲೆಂ ಪಯ್ಯನೂರ್ ಛತ್ರಾಕ್ ಮ್ಹಣೊನ್ ಭಾಯ್ರ್ ಸರೊನ್ ಗೆಲ್ಲೆ ಜಾಲ್ಯಾರೀ, ಥೊಡ್ಯಾ ವೆಳಾನ್ ಸರ್ದಾರ್ ಸಿಮಾಂವ್ಚ್ಯಾ ಅಪೇಕ್ಷೆ ಪ್ರಕಾರ್ ತಾಣಿಂ ವಾಟ್ ಬದಲ್ ಕೆಲಿ. ಛತ್ರಾಕ್ ವಚನಾಸ್ತಾಂ, ರಾನ್ ಚಡ್ ಗಣ್ಣ್ ಆಸ್‍ಲ್ಲೆ ಕಡೆನ್ ಫುಡೆಂ ವಚೊನ್ ಎಕಾ ವ್ಹಡ್ ರುಕಾ ಮುಳಾಂತ್ ತೆ ರಾವ್ಲೆ.

ಸರ್ದಾರ್ ಸಿಮಾಂವ್ ಫುಡೆಂ ಚಿಂತುಂಕ್ ಲಾಗ್ಲೊ. ಉಪ್ರಾಂತ್ ರಾಮಪ್ಪಾಕ್ ಅಶೆಂ ತಾಣೆಂ ಸಾಂಗ್ಲೆಂ:

“ಆಮಿ ಆನಿಕ್‍ಯೀ ಚಡ್ ಘಳಾಯ್ ಕೆಲ್ಯಾರ್ ಜಾಯ್ನಾ. ಕಿತ್ಲೆ ಕಷ್ಟ್ ಆಯ್ಲ್ಯಾರೀ, ಕಸಲೊ ಪುಣೀ ಉಪಾಯ್ ಘೆವ್ನ್, ಕಣ್ಣಾನೂರಾಕ್ ಆಮಿ ವಚಜಾಯ್ – ಹಾಂವೆಂ ವಚಜಾಯ್.”

“ಪುಣ್ ಫಾವೊತಿ ಸಶಸ್ತ್ರ್ ಸಿಬಂದಿ ನಾಸ್ತಾನಾ, ತುಮಿ ಎಕ್ಲ್ಯಾನ್ ವೆಚೆಂ ಭೋವ್ ಅಪಾಯಾಚೆಂ ನಹಿಂವೇ ಧನ್ಯಾ?”

“ಹಾಂವ್‍ಯೀ ತೆಂಚ್ ಚಿಂತಾಲೊಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಪಯ್ಲೆಂ ಹಾಂಗಾಸರ್ ಆಮ್ಚೆಂ ಕಾಮ್ ಕಶೆಂ ಪುಣೀ ಫುಡೆಂ ಸರೊಂದಿ. ಹಾಂವ್ ಕಣ್ಣಾನೂರಾಕ್ ಗೆಲ್ಯಾ ಉಪ್ರಾಂತ್, ತುವೆಂ ತುರ್ತಾನ್ ಅಂತುಲೊ ಆಸ್‍ಲ್ಲೆ ಕಡೆನ್ ಪಾಟಿಂ ವಚಜಾಯ್.”

“ಉಪ್ರಾಂತ್?”

“ಏಕ್ ಘೊಡೊ ಘೆವ್ನ್, ನೀಲೇಶ್ವರ್ ತಡಿಕ್ ವಚೊನ್, ಘೊಡ್ಯಾಕ್ ಲಿಪವ್ನ್, ಕೊಣೀ ಎಕ್ಲ್ಯಾ ಮೊಗ್ರಾಕ್ ರುಸುಂ ದೀವ್ನ್ ದರ್ಯಾಕ್ ವಚಜಾಯ್.”

“ದರ್ಯಾಕ್!” ರಾಮಪ್ಪ ಘಾಬರ್ಲೊ.

“ವ್ಹಯ್. ಥಂಯ್ಸರ್ ಆಮ್ಚ್ಯೊ ಮಂಜ್ಯೊ ಘೆವ್ನ್ ಯೂಸುಫ್ ಆಲಿ ಯೆತಲೊ. ತಾಕಾ ತುವೆಂ ಭೆಟಜಾಯ್, ಆನಿ ಹಾಂಗಾಚಿ ಗಜಾಲ್ ವಿವರ್ಸುನ್, ತಾಣೆಂ ತುರ್ತಾನ್ ಪಯ್ಯನೂರಾಕ್ ಯೇಂವ್ಕ್ ಸಾಂಗಜಾಯ್. ತುಂ ಆನಿ ಜಮೆದಾರ್ ಅಂತುಲೊ ಪಡ್ವಳ್, ಆಮ್ಚ್ಯಾ ಹೆರ್ ಜವಾನಾಂ ಸಾಂಗಾತಾ ಪಯ್ಯನೂರ್ ಛತ್ರಾಂತ್ ರಾವಾತ್ ಆನಿ ಮ್ಹಜಿ ವಾಟ್ ಪಳೆಯಾತ್.

“ಆನಿ ಜರ್ ತರ್ ಸಾತ್ ದಿಸಾಂ ಭಿತರ್ ಹಾಂವ್ ಯೇವ್ನ್ ತುಮ್ಕಾಂ ಥಂಯ್ಸರ್ ಮೆಳನಾ – ಸರ್ದಾರ್ ಯೂಸುಫ್ ಆಲಿನ್, ಬಳಾನ್, ಕಣ್ಣೂರಾಕ್ ಪ್ರವೇಶ್ ಜಾಯ್ಜಯ್ ಮ್ಹಣ್, ತುವೆಂ ಮ್ಹಜೊ ಒತ್ತಾಯೆಚೊ ಸಂದೇಶ್ ದೀಜಾಯ್.”

“ಮ್ಹಾಕಾ ಕಸಲೆಂಗೀ… ತಶೆಂ ಜಾಂವ್ ಧನ್ಯಾ” ಮ್ಹಣಾಲೊ ರಾಮಪ್ಪ, ಆಂಯ್ಡೊ ಘೊಟುನ್. ತಾಕಾ ಕಸಲೆಂಗೀ ಅಪಧಯ್ರ್ ಭೊಗ್ತಾ ಮ್ಹಣೊಂಕ್ ತಾಣೆಂ ತೋಂಡ್ ಕಾಡ್‍ಲ್ಲೆಂ. ಪುಣ್ ತಶೆಂ ಉಚಾರುಂಕ್ ತಾಕಾ ಧಯ್ರ್ ಮೆಳೊಂಕ್ ನಾ.

“ಆನಿ ಆತಾಂ…” ಮ್ಹಣಾಲೊ ಸರ್ದಾರ್ ಸಿಮಾಂವ್, ಚಿಂತುನ್.

“ಕಿತೆಂ ಧನ್ಯಾ?”

“ಆನಿ ಆತಾಂ – ಪಡ್ವಳಾ ಸರ್ಶಿನ್ ವೆಚ್ಯಾ ಆದಿಂ ದುಸ್ರೆಂ ಏಕ್ ಕಾಮ್ ತುವೆಂ ಕರಿಜಾಯ್.”

“ಹುಕುಂ ದೀ, ಧನ್ಯಾ!”

“ಪಯ್ಯನೂರ್ ಛತ್ರಾಕ್ ಹಾಂಗಾ ಥಾವ್ನ್ ಚಡ್ ಮ್ಹಳ್ಯಾರ್ ದೋನ್ ಮಯ್ಲಾಂಚಿ ವಾಟ್ ಆಸಾ. ತುವೆಂ ಥಂಯ್ಸರ್ ವಚಜಾಯ್.”

“ವಚೊನ್?”

“ವಚೊನ್, ಪಯ್ಶಿಲ್ಯಾ ವಾಟ್ಸುರ‍್ಯಾಪರಿಂ, ಏಕ್ ದೋನ್ ವೊರಾಂಚೊ ವೇಳ್ ತುವೆಂ ಥಂಯ್ಸರ್ ಪಾಶಾರ್ ಕರಿಜಾಯ್, ಆನಿ, ಕಣ್ಣಾನೂರ್ ಥಾವ್ನ್ ಯೆತೆಲೆ ವಾ ಥಂಯ್ ವೆಚೆ ಕೊಣೀ ಮೆಳ್ತಿತ್ ಜಾಲ್ಯಾರ್ – ಕಾಂಯ್ ಪುಣೀ ಖಬರ್ ಘೆಂವ್ಕ್ ತುವೆಂ ಪ್ರಯತ್ನ್ ಕರಿಜಾಯ್.

“ಖಬರ್ ಮೆಳ್ಳ್ಯಾರ್ ಬರೆಂಚ್. ಖಬರ್ ಮೆಳನಾತ್ಲ್ಯಾರ್ ತುವೆಂ ಚಡ್ ವೇಳ್ ಥಂಯ್ಸರ್ ರಾಂವ್ಚಿ ಗರ್ಜ್ ನಾ. ಪಾಟಿಂ ಯೇ. ಫುಡ್ಲಿ ಮಾಂಡಾವಳ್ ಹಾಂವ್ ಕರ್ತಾಂ. ಆತಾಂ ಭಾಯ್ರ್ ಸರ್. ತುಜಿ ಮುಸ್ತಾಯ್ಕಿ ಬದ್ಲಿ. ಹಾಂವ್, ಹಾಂಗಾಸರ್ ರಾಕೊನ್ ರಾವ್ತಾಂ.”

ತಾಳ್‍ಮೂಳ್ ಸಮ್ಜೊಂಕ್ ನಾ ಜಾಲ್ಯಾರೀ ರಾಮಪ್ಪ, ಸರ್ದಾರಾಚ್ಯಾ ಹುಕ್ಮೆ ಪ್ರಕಾರ್ ಭಾಯ್ರ್ ಸರೊನ್ ಗೆಲೊ.

ಷೇರ್ ಖಾನಾಕ್ ಆನಿ ಅಂತುಲ್ಯಾಕ್ ಪಾಟಿಂ ಸೊಡುನ್ ವೆತಾನಾ, ಅಶೆಂಚ್ ಜಾತೆಲೆಂ ವಾ ಆಪುಣ್ ಅಶೆಂಚ್ ಕರ್ತಲೊಂ ಮ್ಹಣ್ ಸರ್ದಾರ್ ಸಿಮಾಂವ್ ನೆಣಾಸ್‍ಲ್ಲೊ. ಪುಣ್ ಕಿತೆಂ ಪುಣೀ ಘಡ್ತೆಲೆಂ ವಾ ಕಸಲಿ ಪುಣೀ ವಾಟ್ ಝಳ್ಕತೆಲಿ ಮ್ಹಳ್ಳ್ಯಾ ಭರ್ವಶ್ಯಾನ್ ಮೇಟ್ ಕಾಡ್ಚಿ ತಾಚಿ ಸವಯ್ ಜಾವ್ನಾಸ್‍ಲ್ಲಿ.

ಆನಿ ತಶೆಂಚ್ ಜಾಲೆಂ.

ರುಕಾಚ್ಯಾ ಮುಳಾಕ್ ಪಾಟ್ ತೆಂಕುನ್ ಸರ್ದಾರ್ ಸಿಮಾಂವ್, ಪಾಟ್ಲ್ಯಾ ಥೊಡ್ಯಾ ದಿಸಾಂಚಿಂ ಘಡಿತಾಂ ಮತಿಂತ್ ಆಟಯ್ತಾಲೊ. ಷೇರ್ ಖಾನಾಕ್ ಕೈದಿ ಕೆಲಾ ಜಾಲ್ಯಾರೀ, ತಾಕಾ ಫುಡೆಂ ಕಸೊ ಆಟಾಪ್ಚೊ ಆನಿ ಕಸೊ ತಾಕಾ ನಿತಿಕ್ ಉಬೊ ಕರ್ಚೊ ಮ್ಹಳ್ಳೆಂ ಸವಾಲ್ ತಾಕಾ ಧೊಸುಂಕ್ ಲಾಗ್ಲೆಂ. ಕಿತ್ಲೆ ಕಷ್ಟ್ ಆಯ್ಲ್ಯಾರೀ ಷೇರ್ ಖಾನಾನ್ ಪರ್ತ್ಯಾನ್ ಚುಕವ್ನ್ ಧಾಂವನಾಯೆ ಮ್ಹಳ್ಳೆಂ ತೊ ಜಾಣಾಂಸ್‍ಲ್ಲೊ. ಕಿತ್ಯಾಕ್ – ವೆರೊನಿಕಾ ಕುವೆಲಿ ಕಡೆನ್, ಆನಿ ತಶೆಂಚ್ ಹೆರ್ ಅಪಾಲಿಪಾ ಕ್ರಿಸ್ತಾಂವಾಂ ಕಡೆನ್ ಆಪ್ಣಾಕ್ ಆಸ್‍ಲ್ಲೊ ಗುಪಿತ್ ಸಂಬಂಧ್, ತ್ಯಾ ತೊಪಾಸಿ ದಾಲ್ಮೇದಾಕ್ ಸ್ಪಷ್ಟ್ ಕಳಿತ್ ಜಾಲ್ಲೊ.

ಪುಣ್, ನಿತಿ ಖಾಲ್ ಶಿವಾಯ್ ಗರ್ಜೆ ಶಿವಾಯ್ ಕೊಣಾಯ್ಚೊ ಜೀವ್ ಕಾಡುಂಕ್ ಸರ್ದಾರ್ ಸಿಮಾಂವ್ ನೆಣಾಂಸ್‍ಲ್ಲೊ. ಜಾಲ್ಲ್ಯಾನ್ ಷೇರ್ ಖಾನಾಚೊ (ತೊಪಾಸಿ ದಾಲ್ಮೇದಾಚೊ) ಜೀವ್ ಉರ್‌ಲ್ಲೊ. ತ್ಯಾ ವರ್ವಿಂ, ಸದ್ದ್ಯಾಕ್ ಪುಣೀ ಸರ್ದಾರ್ ಸಿಮಾಂವ್ಕ್ ವಾ ಜಮೆದಾರ್ ಅಂತುಲೊ ಪಡ್ವಳಾಕ್ ಪ್ರಯೋಜನ್ ಜಾಂವ್ಕ್ ನಾ, ಬಗಾರ್, ಅಪಾಯ್ ಚಡ್ ಜಾಲ್ಲೊ.

ತಿ ಗಜಾಲ್ ವೆಗ್ಳಿಚ್.

ಅಶೆಂ-ತಶೆಂ, ಸರ್ದಾರ್ ಸಿಮಾಂವ್, ಚಿಂತ್ನಾಂಚ್ಯಾ ಈಳೆಂತ್ ತಲ್ಲೀನ್ ಜಾವ್ನ್ ಆಸ್ತಾನಾ, ಚಡುಣೆಂ ದೋನ್ ವೊರಾಂಚೊ ವೇಳ್ ಪಾಶಾರ್ ಜಾಲೊ.

ಖರ್ಶೆವ್ನ್ ಖರ್ಶೆವ್ನ್ ರಾಮಪ್ಪ ಪಾಟಿಂ ಧಾಂವೊನ್ ಆಯ್ಲೊ.

“ಹುಜೂರ್!” ಮ್ಹಣಾಲೊ ತೊ, ಘಾಮ್ ಪುಸುನ್.

“ಕಿತೆಂ ಖಬರ್?”

“ಕಣ್ಣಾನೂರಾಂತ್ ಘೊಟಾಳೊ ಜಾಲ್ಲಿಂ ಖುಣಾಂ ದಿಸೊನ್ ಯೆತಾತ್!”

“ಮ್ಹಣ್ಜೇ?”

“ರಾಣಿಯೆನ್ (ಬೇಗಮೆನ್) ಆನಿ ತಿಚ್ಯಾ ಸಯ್ರ್ಯಾಂನಿ ಚಿಂತ್‍ಲ್ಲಿಂ ಸರ್ವ್ ಯೋಜನಾಂ ನಿರ್ಫಳ್ ಜಾವ್ನ್ ಭುಂಯ್ ಪಡ್ಲ್ಯಾಂತ್ ಮ್ಹಣ್ಚೆ ತಿತ್ಲಿ ಉಚಾಂಬಳಾಯ್ ಆನಿ ಆತುರಾಯ್ ಥಂಯ್ಸರ್ ದಿಸೊನ್ ಯೆತಾ!”

“ಮುಂದರ್ಸಿ…”

“ಹಾಂವ್ ಛತ್ರಾಂತ್ ಪಾವ್ತಾನಾ, ಥಂಯ್ಸರ್ ಥೊಡೆ ಪಯ್ಣಾರಿ ಆನಿ ಗಾಂವ್ಟಿ ಸೋಮಾರಿ ಜಮೊ ಜಾಲ್ಲೆ ಹಾಂವೆಂ ದೆಖ್ಲೆಂ.”

“ಕಾರಣ್?”

“ಕುರಿಯೆಲ್ ಥಾವ್ನ್ ವರ್ದಿ ಆಯಿಲ್ಲ್ಯಾ ಪ್ರಕಾರ್, ಬೇಗಮೆಚ್ಯಾ ಸಯ್ರ್ಯಾಂನಿ ಹಾತಿಂ ಘೆತ್‍ಲ್ಲಿಂ ಕಾಮಾಂ ನಿರ್ಫಳ್ ಜಾಲ್ಯಾಂತ್ ಮಾತ್ರ್ ನಹಿಂ, ಬೇಗಮೆಚ್ಯಾ ರಾವ್ಳೆರಾಚೆರ್ ಬಲಾತ್ಕಾರ್ ಚಲಂವ್ಕ್, ಟಿಪ್ಪುಚ್ಯಾ ಸರ್ದಾರಾಂ ಖಾಲ್ ಏಕ್ ಕಂಪ್ಣಿ ಶಿಪಾಯ್ ಭಾಯ್ರ್ ಸರ್ಲ್ಯಾತ್ ಮ್ಹಣ್ ವರ್ದಿ ಆಯ್ಲ್ಯಾ ಖಂಯ್. ಹಿ ಗಜಾಲ್ ಮ್ಹಾಕಾ, ಛತ್ರಾಚ್ಯಾ ರಾಕ್ವಲ್ಯಾನ್ ಘುಟಾನ್ ಸಾಂಗ್ಲಿ.”

“ತರ್?”

“ತರ್ ತುಮಿ – ಸರ್ದಾರ್ ಸಿಮಾಂವ್ ಆನಿ ಯೂಸುಫ್ ಆಲಿ – ಖಂಡಿತ್ ಜಾವ್ನ್ ಕಣ್ಣಾನೂರಾಕ್ ಯೆತೆಲ್ಯಾತ್ ಮ್ಹಣ್ ತಾಣಿಂ ಅಂದಾಜ್ ಕೆಲಾ, ಆನಿ ಕೊಣೀ ಆಯ್ಲ್ಯಾರೀ ಝುಜಾನ್ ಆಡಾಂವ್ಕ್ ನಿಚೆವ್ ಕೆಲಾ.”

“ಹೆಂ ಕಶೆಂ ಸಮ್ಜಲೆಂ?”

“ರಾಣ್ಯೆಚ್ಯಾ ರಾಕ್ವಲ್ಯಾಂಚೊ ಸುಫೆದಾರ್ ಎಕ್ಲೊ, ರಾವ್ಳೆರಾಚ್ಯಾ ಚಾಕ್ರೆಕ್ ನವೆ ಜಣ್ ಮೆಳ್ತಾತ್ ಜಾಲ್ಯಾರ್ ಜಮಂವ್ಕ್, ಛತ್ರಾಂತ್ ಯೇವ್ನ್ ವಾವುರ್ತಾ. ದರಬಸ್ತ್ ಸೊರೊ ಆನಿ ಪೈಶೆ ಭಾಸಾಯ್ಲ್ಯಾರೀ, ಎದೊಳ್ ಕೊಣೀ ನವೆ ಜಣ್ ಮೆಳೊಂಕ್ ನಾಂತ್ ಮ್ಹಣ್ ಖಬರ್.”

ಹೆಂ ಆಯ್ಕೊನ್, ಸರ್ದಾರ್ ಸಿಮಾಂವ್ ಥೊಡೊ ವೇಳ್ ಚಿಂತುಂಕ್ ಪಡ್ಲೊ. ಥೊಡ್ಯಾ ವೆಳಾ ಉಪ್ರಾಂತ್:

“ಪರಿಸ್ಥಿತಿ, ಚಿಂತ್‍ಲ್ಲ್ಯಾ ಪ್ರಾಸ್ ಚಡ್ ಗಂಭೀರ್ ರಾವ್ಲಿ ತರ್” ಮ್ಹಣಾಲೊ ತೊ. “ಆತಾಂ ಹಾಂವ್ ಕಣ್ಣಾನೂರಾಕ್ ಎಕ್ಲೊಂಚ್ ಗೆಲ್ಯಾರ್, ಜಾಣಾಂಸೊನ್‍ಂಚ್ ಸಿಂಹಾಚ್ಯಾ ಧೊಲಿಕ್ ರಿಗ್‍ಲ್ಲ್ಯಾಪರಿಂ ಜಾತೆಲೆಂ. ಪುಣ್ ಗೆಲ್ಯಾ ಶಿವಾಯ್ ದುಸ್ರಿ ವಾಟ್ ನಾ, ಆನಿ ಆಮ್ಚ್ಯಾಂಕ್ ಬಚಾವಿಯೀ ನಾ.”

“ಪುಣ್ ಧನ್ಯಾ” ಘಾಬರ್ಲೊ ರಾಮಪ್ಪ. “ಆಮ್ಚೆ ಹೆರ್ ಶಿಪಾಯ್ ಸಾಂಗಾತಾ ನಾತ್ಲ್ಯಾ ಶಿವಾಯ್, ತುಮಿ ಎಕ್ಲ್ಯಾನ್‍ಂಚ್ ಥಂಯ್ಸರ್ ವೆಚೆಂ…”

“ಚಡ್ ಗರ್ಜೆಚೆಂ – ದುಸ್ರಿ ವಾಟ್ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ಮ್ಹಾಕಾ ಹೆಂ ಏಕ್‍ಯೀ ಸಮ್ಜನಾ” ಆಕಾಂತ್ಲೊ ರಾಮಪ್ಪ.

“ತುಜಿ ತಿ ಪೊಟ್ಲಿ ಹೆವ್ಶಿನ್ ಕಾಡ್.” ಸರ್ದಾರ್ ಸಿಮಾಂವ್ನ್ ತಾಕಿದ್ ದಿಲಿ. ತುರ್ತಾನ್, ಹಾಂವೆಂ ಸಾಂಗ್‍ಲ್ಲೆಪರಿಂ ತುಜೆಂ ಕಾಮ್ ಕರ್. ಮ್ಹಾಕಾ ಜಾತಾ ತಿತ್ಲ್ಯಾ ವೆಗಿಂ ಛತ್ರಾಕ್ ಪಾವಜಾಯ್.”

ಪುರ್ತೊ ಆಕಾಂತೊನ್, ಜಾಲ್ಯಾರೀ ಅವಿಧೇಯ್ಪಣ್ ದಾಕಂವ್ಚೆಂ ಧಯ್ರ್ ನಾಸ್ತಾನಾ, ರಾಮಪ್ಪಾನ್, ಸರ್ದಾರ್ ಸಿಮಾಂವ್ಚಿ ಹುಕುಮ್, ಭೋವ್ ಚಲಾಕೆನ್ ಜಾರಿ ಕೆಲಿ, ಆನಿ ಆಪ್ಲ್ಯಾ ಮತಿ ಭಿತರ್ ಭೊಗ್ಚಿ ಭಿರಾಂತ್ ಲಿಪಯ್ಲಿ.

ಅಮಿಲ್ದಾರ್ ರಾಮಪ್ಪ ನಾಯ್ಕ್, ಟಿಪ್ಪು ಸುಲ್ತಾನಾಚ್ಯಾ ಪಾಟ್ಲಾಮೆಂತ್ ರಿಗ್ಚ್ಯಾ ಆದಿಂ, ಹಿಂದೂ ಭಾವಾಂಚ್ಯಾ ಯಕ್ಷಗಾನ ಆನಿ ಬಯಲಾಟಾಂತ್ ಎಕ್ಲೊ ನಾಂವಾಡ್ದಿಕ್ ಖೆಳ್ಗಾಡಿ ಜಾವ್ನಾಸ್‍ಲ್ಲೊ ಮಾತ್ರ್ ನಹಿಂ, ಪ್ರಸಿದ್ಧ್ ಕೆಲ್ಶಿ ಆನಿ ವೇಸ್ ಬದ್ಲಾವ್ಣಾರ್ ಆನಿ ಪಿಂತ್ರಾಯ್ಣಾರ್ ತೊ ಜಾವ್ನಾಸ್‍ಲ್ಲೊ.

ಹ್ಯಾ ವೆಳಾರ್ ರಾಮಪ್ಪಾಚೆಂ ಕಾಮ್ ಜಾಲ್ಯಾ ಉಪ್ರಾಂತ್, ಸರ್ದಾರ್ ಸಿಮಾಂವ್ಕ್ ಪಳೆಲ್ಯಾರ್, ಸರ್ದಾರಾಚ್ಯಾ ಲಾಗ್ಶಿಲ್ಯಾ ಮಿತ್ರಾಂಕ್‍ಯೀ ತಾಚಿ ವಳಕ್ ಧರುಂಕ್ ಜಾತಿ ನಾ.

“ಧನ್ಯಾ” ಮ್ಹಣಾಲೊ ತೊ ಆಪ್ಣೆಂ ಕೆಲ್ಲ್ಯಾ ಕಾಮಾ ಥಂಯ್ ಅಭಿಮಾನ್ ಪಾವೊನ್. “ಮ್ಹಾಕಾ ತಾಂಕ್‍ಲ್ಲೆಂ ಕಾಮ್, ತುಮ್ಚ್ಯಾ ಅಪೇಕ್ಷೆ ಪ್ರಕಾರ್ ಬರ‍್ಯಾ ಥರಾನ್ ಹಾಂವೆಂ ಕೆಲಾಂ. ಆನಿ ಸಾತ್ ದೀಸ್ ತುಮಿ ನ್ಹಾಂವ್ಕ್ ಸಾಧ್ಯ್ ನಾ. ಸಾತ್ ದೀಸ್ ಪರ್ಯಾಂತ್, ನ್ಹಾಯ್ನಾಸ್ತಾನಾ ತುಮಿ ರಾವ್ಲ್ಯಾರ್, ಹೊ ವೇಸ್ ಹಾಲ್ಚೆಪರಿಂ ನಾ. ಉಪ್ರಾಂತ್ಲಿ ಗಜಾಲ್ ಸಾಂಗೊಂಕ್ ಮ್ಹಜ್ಯಾನ್ ಸಾಧ್ಯ್ ನಾ. ಸಾಂಗೊಂಕ್ ಧಯ್ರ್ ಮ್ಹಾಕಾ ಪಾವನಾ.”

“ವ್ಹಡ್ ನಹಿಂ. ಇತ್ಲೆಂಚ್ ಮಸ್ತ್ ಜಾಲೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆಮ್ಚೆಂ ಕಾಮ್ ಜಾಲ್ಯಾರೀ, ಫುಡ್ಲ್ಯಾ ಸಾತ್ ದಿಸಾಂ ಭಿತರ್ ಬರ‍್ಯಾ ಥರಾನ್ ಆಖೇರ್ ಜಾಯ್ಜಯ್. ಜಾಯ್ನಾ ಜಾಲ್ಯಾರ್ ದೆವಾಚಿ ಖುಶಿ.”

ತಿತ್ಲೆಂ ಮ್ಹಣೊನ್, ಪರ್ತ್ಯಾನ್ ತಾಚ್ಯಾ ಕಾಮಾಚಿ ಚತ್ರಾಯ್ ಆನಿ ಉಗ್ಡಾಸ್ ದೀವ್ನ್, ರಾಮಪ್ಪಾಕ್ ತಾಣೆಂ ನಾ ಖುಶೆನ್, ಅಂತುಲ್ಯಾ ಸರ್ಶಿನ್ ಪಾಟಿಂ ಧಾಡ್ಲೊ.

ಸರ್ದಾರ್ ಸಿಮಾಂವ್, ಪಯ್ಯನೂರ್ ಛತ್ರಾಚಿ ವಾಟ್ ಧರುನ್ ಗೆಲೊ.

ಆಪ್ಲ್ಯಾ ಧನ್ಯಾಚ್ಯಾ ಸುರಕ್ಷಿತಾಯೆಚೆಂ ಧಯ್ರ್ ನಾಸ್ತಾಂ, ಮನ್ ನಾತ್‍ಲ್ಲಿಂ ಮೆಟಾಂ ಕಾಡುನ್ ಆನಿ ಫುಡ್ಲಿಂ ಕಾಮಾಂ ಚಿಂತುನ್, ರಾಮಪ್ಪ, ಪಯ್ಲೆಂಚಿ ವಾಟ್ ಧರುನ್, ಷೇರ್ ಖಾನಾಚಿ ಪಹರಜ್ ಕರುನ್ ಆನಿ ಘೊಡ್ಯಾಂಚಿ ಜತನ್ ಘೆವ್ನ್ ಆಸ್‍ಲ್ಲ್ಯಾ ಅಂತುಲ್ಯಾ ಸರ್ಶಿನ್ ಪಾಟಿಂ ಗೆಲೊ.

ಥಂಯ್ಸರ್ ದುಸ್ರೆಂಚ್ ಅನ್ವಾರ್ ರಾಕೊನ್ ಆಸ್‍ಲ್ಲೆಂ.

ಅಂತುಲ್ಯಾಕ್ ಆನಿ ತೊಪಾಸಿ ದಾಲ್ಮೇದಾ ಷೇರ್ ಖಾನಾಕ್ ಸೊಡ್ನ್ ಆಯಿಲ್ಲ್ಯಾ ಜಾಗ್ಯಾಕ್ ಲಾಗಿಂ ಪಾವ್ತಾನಾ, ಥಂಯ್ಚೆಂ ದೃಶ್ಯ್ ಪಳೆವ್ನ್ ರಾಮಪ್ಪಾನ್ ಏಕ್ ಪಾವ್ಟಿಂ ಆಂಗ್ ಕಾಡ್ಲೆಂ.

ಪಯ್ಸ್ ಥಾವ್ನ್, ಬೊಲ್ಯಾಂಚ್ಯಾ ಇಡ್ಯಾಂತ್ಲ್ಯಾನ್ ಪಳೆತಾನಾ, ಚಿಕ್ಕೆ ಆದಿಂ ಉಜೊ ಕೆಲ್ಲೆಪರಿಂ ಥೊಡೊ ಧುಂವೊರ್ ಉಕಲ್ಚೊ ತಾಕಾ ಝಳ್ಕಲೊ. ಪುಣ್ ಮನಿಸ್ ಆಸ್‍ಲ್ಲೆ ಕೊಣೀ ಝಳ್ಕೊಂಕ್ ನಾಂತ್. ಘೊಡೆಯೀ ದಿಸೊಂಕ್ ನಾಂತ್.

“ಜಮೆದಾರ್ ಪಡ್ವಳ್!” ರಾಮಪ್ಪಾನ್ ಲೋವ್ ಉಲೊ ದಿಲೊ.

ಜಾಪ್ ನಾ.

ರಾಮಪ್ಪ ಘಡ್ಬಡ್ಲೊ.

“ಜಮೆದಾರ್ ಪಡ್ವಳ್!” ತಾಣೆಂ ಚಿಕ್ಕೆ ವ್ಹಡ್ಲ್ಯಾನ್ ಉಲೊ ದಿಲೊ.

ಜಾಪ್ ನಾ.

ರಾಮಪ್ಪ ಬಾವ್ಡೊ, ಪುರ್ತೊ ಆಕಾಂತ್ಲೊ. ಚಿಕ್ಕೆ ಮುಖಾರ್ ವಚೊನ್ ಪಳೆತಚ್ ತಾಚಿ ಕೂಡ್ ಕಾಂಪ್ಲಿ.

“ಏ ರಾಮಾ!” ಅಕ್ಲಾಸ್ಲೊ ತೊ.

ಲಾಗಿಂ ವಚೊನ್ ಪಳೆತಾ ಜಾಲ್ಯಾರ್ – ಚಿಕ್ಕೆ ಆದಿಂ ಪಾಲ್ವಲ್ಲ್ಯಾ ಉಜ್ಯಾ ಲಾಗಿಂ – ಜಮೆದಾರ್ ಅಂತುಲೊ ಪಡ್ವಳ್, ಮೆಲ್ಲೆಪರಿಂ ಪಡೊನ್ ಆಸ್‍ಲ್ಲೊ. ರಾಮಪ್ಪಾಚಿ ತಕ್ಲಿ ಗಿರ್ಗಿರ್ಲಿ.

ಲಾಗಿಂ ವಚೊನ್, ಬಾಗ್ವೊನ್ ತಾಣೆಂ ಪಳೆಲೆಂ. ಅಂತುಲ್ಯಾಚೆಂ ಮುಖಮಳ್ ವಿಕಾರ್‌ಲ್ಲೆಪರಿಂ ವಿವರ್ಣ್ ಜಾಲ್ಲೆಂ. ಶ್ವಾಸ್ ಆಸ್‍ಲ್ಲೊ ಪಳೆವ್ನ್, ಲಾಗ್ಸರ್ ಒಮ್ತೊನ್ ಪಡ್‍ಲ್ಲೊ – ಪಯ್ಣಾ ವೆಳಾರ್ ವ್ಹರ್ಚೊ ಚೆಂಬು ಘೆವ್ನ್, ರಾಮಪ್ಪ ವ್ಹೊಳಿಯೆ ಲಾಗಿಂ ಧಾಂವೊಂನ್ ಉದಾಕ್ ಹಾಡ್ನ್ ಆಯ್ಲೊ.

ಥೊಡೊ ವೇಳ್ ಶುಶ್ರೂಷಾ ಕರ್ತಚ್, ಅಂತುಲೊ ಸನಿನ್ ಜಾವ್ನ್ ಉಟೊನ್ ಬಸ್ಲೊ. ಗಳೊ ನಳೊ ಪೊಶೆವ್ನ್ ದೀರ್ಘ್ ಶ್ವಾಸ್ ತಾಣೆಂ ಸೊಡ್ಲೊ, ಆನಿ ಕಷ್ಟಾಂನಿ ವಿಚಾರ್ಲೆಂ:

“ಸರ್ದಾರ್ – ಧನಿ ಖಂಯ್ ಆಸಾ?”

“ಧನಿ ಖಂಯ್ ಆಸಾ ಮ್ಹಣ್ತಾಯ್ ಪಾಪ್ಯಾ! ತುಜಿ ಗಜಾಲ್ ಕಿತೆಂ? ಧನಿ ಧನ್ಯಾಚ್ಯಾ ಕಾಮಾನ್ ಗೆಲಾ. ಮ್ಹಾಕಾ ತಾಣೆಂ ದುಸ್ರ್ಯಾ ಕಾಮಾನ್ ಧಾಡ್ಲಾ. ಪುಣ್ ತುಜಿ ಗಜಾಲ್ ಕಿತೆಂ? ತೊ – ಕೈದಿ ಖಂಯ್ ಆಸಾ?”

“ಮ್ಹಜೆ ಗ್ರಾಚಾರ್! ಸರ್ದಾರಾಕ್ ಕಶೆಂ ತೋಂಡ್ ದಾಕಂವ್ಚೆಂ ಆನಿ ಕಶೆಂ ವಿವರ್ಸುಂಚೆಂ ಮ್ಹಣ್ ಹಾಂವ್ ನೆಣಾಂ!” ಅಂತುಲೊ ಪಿಂರ್ಗಲೊ.

“ತೆಂ ಆಸೊಂದಿ. ತುಜೊ ಜೀವ್ ಉರ್ಲಾ ನಹಿಂವೇ – ತೆಂಚ್ ವ್ಹಡ್ಲೆಂ. ಸಾಂಗ್, ಕಿತೆಂ ಜಾಲೆಂ?”

“ಜಾಲಿಂ ಮ್ಹಜಿಂ ಕರ್ಮಾಂ! ತೊ ಕಣ್ಣೊಜಿ ಕೈದಿ, ಮ್ಹಾಕಾ ಮೋಸ್ ಕರ್ನ್ ಪಿಡ್ಚ್ಯೊ ಜಾಲೊ!”

“ಕಿತೆಂ ಜಾಲೆಂ ಸಾಯ್ಬಾ?”

ಲಜೆ ಭಿಕಾರಿ ಜಾವ್ನ್ ಅಂತುಲ್ಯಾನ್ ವಿವರ್ ದಿಲೊ:

ಘಡ್‍ಲ್ಲಿ ಗಜಾಲ್ ಚಿಲ್ಲರ್. ಪುಣ್ ಥೊಡೆ ಪಾವ್ಟಿಂ, ತಸಲ್ಯಾ ಚಿಲ್ಲರ್ ವಿಷಯಾಂನಿ ಜೀವನ್ ವಾ ಮರಣಾಚೆಂ ಸವಾಲ್ ಆಟಾಪ್ತಾ. ತಶೆಂ ಅಂತುಲ್ಯಾಕ್‍ಯೀ ಮರಣ್ ಲಾಗಿಂ ಯೇವ್ನ್ ಪಯ್ಸ್ ಗೆಲ್ಲೆಂ.

ಸರ್ದಾರ್ ಸಿಮಾಂವ್ ಆನಿ ರಾಮಪ್ಪ ಪಯ್ಸ್ ಗೆಲ್ಲ್ಯಾ ಥೊಡ್ಯಾ ವೆಳಾನ್, ಸುಕ್ಯಾ ಮಾಸಾಚೊ ಏಕ್ ಕುಡ್ಕೊ ಭಾಜ್ಚ್ಯಾ ಖಾತಿರ್, ಅಂತುಲ್ಯಾನ್ ಇಲ್ಲೊ ಉಜೊ ಪೆಟಯ್ಲೊ. ಉಪ್ರಾಂತ್ ಚೆಂಬು ಘೆವ್ನ್ ತೊ ವ್ಹೊಳಿಯೆ ಕಡೆನ್ ಗೆಲೊ. ತೊಪಾಸಿ ದಾಲ್ಮೇದಾ ತ್ಯಾ ವೆಳಾರ್ ಅರ್ಧೊ ಸನಿನ್ ಆನಿ ಅರ್ಧೊ ನಿದ್ರೇಸ್ತ್ ಜಾಲ್ಲೆಪರಿಂ ಪಡೊನ್ ಆಸ್‍ಲ್ಲೊ.

ಉದ್ಕಾ ಕಡೆನ್ ವಚೊನ್ ಪಾಟಿಂ ಯೇಂವ್ಕ್ ತಾಕಾ ಥೊಡೊ ವೇಳ್ ಜಾಲೊ. ತಿತ್ಲ್ಯಾ ವೆಳಾ ಭಿತರ್, ತೊಪಾಸಿ ದಾಲ್ಮೇದಾನ್ ಆಪ್ಲ್ಯಾ ಬಚಾವೆ ಖಾತಿರ್ ಜುಗಾರೆಚೆಂ ಏಕ್ ಕಾರ್ಬಾರ್ ಕೆಲೆಂ.

ಅಂತುಲೊ ತೆವ್ಶಿನ್ ಗೆಲ್ಲ್ಯಾ ತಕ್ಷಣ್, ತೊಪಾಸಿ ದಾಲ್ಮೇದಾ ಹುಶಾರ್ ಜಾವ್ನ್, ಲೊಳೊನ್ ಉಜ್ಯಾ ಸರ್ಶಿನ್ ಗೆಲೊ. ಉಜ್ಯಾಕ್ ತಾಣೆಂ ಪಾಟ್ ಕೆಲಿ, ಆನಿ ಪಾಟ್ಲ್ಯಾನ್ ಹಾತಾಂಕ್ ಬಾಂಧ್‍ಲ್ಲಿ, ವೊಳಾಯಿಲ್ಲ್ಯಾ ವಸ್ತ್ರಾಚಿ ಗಾಂಟ್ ಉಜ್ಯಾಚೆರ್ ದರ್ಲಿ. ತಾಚೆ ಹಾತ್ ಚಿಕ್ಕೆ ಹುಲ್ಪಲ್ಯಾರೀ, ವಸ್ತ್ರಾಕ್ ಉಜೊ ಲಾಗೊನ್ ಗಾಂಟ್ ಸುಟ್ಲಿ. ತುರ್ತಾನ್ ರುಕಾಚ್ಯಾ ಮುಳಾಕ್ ತೊ ಲೊಳ್ಳೊ, ಆನಿ ಪಾಯಾಂಚೊ ಪಾಸ್‍ಯೀ ತಾಣೆಂ ನಿಸ್ರಾಯ್ಲೊ. ತಿತ್ಲ್ಯಾರ್ ಅಂತುಲೊ ಪಡ್ವಳ್ ಪಾಟಿಂ ಯೆಂವ್ಚೊ ಆವಾಜ್ ತಾಕಾ ಆಯ್ಕಲೊ.

ಖುಶೆಲಾಂನಿ ಹಾತ್ ಪಾಟಿಂ ಬಾಂಧುನ್, ಆನಿ ವಯ್ರ್ ದಿಸ್ಚ್ಯಾ ಪಾಯಾಚೊ ಪಾಸ್ ದಿಸಾಸೊ ತಸೊಚ್ ದವರ್ನ್, ಪಯ್ಲೆಂಪರಿಂಚ್ ಆಡ್ ಪಡೊನ್ ತೊ ರಾವ್ಲೊ.

ಅಂತುಲೊ ಪಡ್ವಳ್ ಲಾಗಿಂ ಯೆತಾನಾ, ವಸ್ತುರ್ ಹುಲ್ಪಲ್ಲೊ ಥೊಡೊ ಪರ್ಮಳ್ ತಾಚ್ಯಾ ನಾಕಾಕ್ ಆದಾಳ್ಳೊ. ತೊ ಚಿಕ್ಕೆ ದುಬಾವ್ಲೊ ಖರೊ, ಪುಣ್ ಚೆಂಬು ತಸೊಚ್ ಹಾತಾಂತ್ ಘೆವ್ನ್, ತೊಪಾಸಿ ಸರ್ಶಿಂ ವಚೊನ್, ತಾಕಾ ಬಾಂಧ್‍ಲ್ಲೆ ಪಾಸ್ ತಪಾಸ್ಚ್ಯಾ ಖಾತಿರ್ ಬಾಗ್ವಲೊ.

ತೊಪಾಸಿ ದಾಲ್ಮೇದಾಯೀ ತಿತ್ಲ್ಯಾಕ್‍ಚ್ ರಾಕ್ತಾಲೊ ಮ್ಹಣ್ ದಿಸ್ತಾ: ಪೆಂಕ್ಡಾರ್ ತಾಣೆಂ ಭರ್ ದಿಲೊ, ಆನಿ ಆಸ್‍ಲ್ಲ್ಯಾ ಸರ್ವ್ ಬಳಾನ್ ಧೊಂಪ್ರಾಂ ನೀಟ್ ಕರ್ನ್ ಪಾಯ್ ವಯ್ರ್ ಮಾರ್ಲೆ. ಕಿತೆಂ ಜಾತಾ ಮ್ಹಣ್ ಸಮ್ಜೊಂಚ್ಯಾ ಆದಿಂಚ್ ತಾಚ್ಯೊ ಖೊಟೊ, ಅಂತುಲ್ಯಾಚ್ಯಾ ಪೊಟಾ ಸಕಯ್ಲ್ ಆಪ್ಟೊನ್, ಪಾಯ್ ಚುಕೊನ್ ಅಂತುಲೊ ಪಾಟಿಂ ಧಪ್ಟಾಲೊ. ತಾಚಿ ತಕ್ಲಿಯೀ ಭರಾನ್ ಧಾಡಾಲಿ ಆನಿ ತಾಚೊ ಶ್ವಾಸ್ ಬಾಂಧ್ಲೊ. ತಾಚ್ಯಾ ದೊಳ್ಯಾಂತ್ಲ್ಯಾನ್ ಹಜಾರ್ ಕಾಜುಲೆ ಆನಿ ಕಾನಾಂತ್ಲ್ಯಾನ್ ಭೊಂವ್ರೆ ಧಾಂವ್ಲೆ. ಥಂಯ್ ಥಾವ್ನ್‌ಯೀ ಸ್ವರಕ್ಷಣೆಚ್ಯಾ ಆಶೆನ್ ಉಟೊನ್ ಆನಿ ಝುಜೊಂಕ್ ತಾಣೆಂ ಮನ್ ಕೆಲೆಂ – ಪುಣ್ ವ್ಯರ್ಥ್.

ತೊಪಾಸಿ ತಾಚ್ಯಾ ಆಂಗಾರ್ ಉಡ್ಲೊ. ದೊನೀ ಹಾತಾಂನಿ ಅಂತುಲ್ಯಾಚೊ ಗಳೊ ದಾಂಬುನ್ ತಾಣೆಂ ಧರ್ಲೊ ಆನಿ ತಾಚಿ ತಕ್ಲಿ ಧರ್ಣಿಕ್ ಆಪ್ಟಿಲಿ. ಹ್ಯಾ ಸಂಸಾರಾಂತ್ಲೆ ದೀಸ್ ಆಪ್ಲೆ ಕಾಬಾರ್ ಜಾಲೆ ಮ್ಹಣ್ ಘಡಿಭರ್ ತಾಣೆಂ ಚಿಂತ್ಲೆಂ. ಮತ್ ಚುಕ್ಚ್ಯಾ ಆದಿಂ ದೆವಾಕ್ ತಾಣೆಂ ಉಲೊ ದಿಲೊ.

ಅಂತುಲೊ ಪಡ್ವಳ್ ಮೆಲೊ ಮ್ಹಣ್ ತೊಪಾಸಿನ್ ಚಿಂತ್ಲೆಂ ಆನಿ ಥಂಯ್ ಥಾವ್ನ್ ಪೋಳ್ನ್ ಧಾಂವ್ಚಿಂ ಚಿಂತ್ನಾಂ ಮಾತ್ರ್ ತಾಚ್ಯಾ ಮತಿಂತ್ ಉರ್ಲಿಂ. ನಹಿಂ ಜಾಲ್ಯಾರ್, ಅಂತುಲ್ಯಾಚ್ಯಾ ಪೆಂಕ್ಡಾಕ್ ಆಸ್‍ಲ್ಲಿ ಭಾಲಿ ಕಾಡ್ನ್ ತಾಕಾ ತೊ ತೊಪ್ತೊ, ವಾ ಕೋಶಿಯೆಂತ್ಲಿ ತಲ್ವಾರ್ ಕಾಡ್ನ್ ತಾಕಾ ತೊ ಕಾಪ್ತೊ.

ತಿತ್ಲೆಂ ಕರಿನಾಸ್ತಾಂ, ಘೊಡ್ಯಾಂಕ್ ಸಾಂಪ್ಡಯಿಲ್ಲೆ ಕಡೆನ್ ತೊ ಗೆಲೊ. ಕಿತೆಂ ಪುಣೀ ಅವ್ಗಡ್ ಜಾಲಾ ಮ್ಹಣ್ ತಿತ್ಲ್ಯಾ ಭಿತರ್ ಘೊಡ್ಯಾಂಕ್‍ಯೀ ಸಮ್ಜಲ್ಲೆಂ. ತೊಪಾಸಿ ಲಾಗಿಂ ಯೆತಾನಾ, ನಾಕಾ ಬುಡಾಂ ಫುಲವ್ನ್ ಆನಿ ದಾಂತ್ ದಾಕವ್ನ್ ಆನಿ ಗೆಳಾಂ ಮಾರ್ನ್ ಉಚಾಂಬಳ್ ತೆ ಜಾಲೆ. ತೊ ತಾಂಕಾಂ ಲಾಗಿಂ ವಚೊಂಕ್ ಸಕನಾ ಜಾಲೊ. ದೆಕುನ್, ಪಾಯ್ ವಾಟೆನ್ ರಾನಾಂತ್ಲ್ಯಾನ್ ಪಾಶಾರ್ ಜಾವ್ನ್ ಪರಾರಿ ತೊ ಜಾಲೊ.

ಅಂತುಲೊ ಪಡ್ವಳ್ ಸಾರ್ಕೊ ಜಾಲ್ಯಾ ಉಪ್ರಾಂತ್, ರಾಮಪ್ಪಾನ್ ಆಪ್ಣಾಕ್ ಸರ್ದಾರ್ ಸಿಮಾಂವ್ನ್ ದಿಲ್ಲಿ ತಾಕಿದ್ ಸಾಂಗ್ಲಿ.

“ಪುಣ್ ತುಕಾ ಅಸಲ್ಯಾ ಸ್ಥಿತೆರ್ ಸೊಡುನ್ ಹಾಂವೆಂ ವೆಚೆಂ ಕಶೆಂ?” ಚುರ್ಚುರ್ಲೊ ತೊ.

“ಕೋಣ್ ಮ್ಹಣ್ ವಾ ಕಿತೆಂ ಮ್ಹಣ್ ಸಮ್ಜಲೊಯ್ ತುಂ ಅಂತುಲೊ ಪಡ್ವಳ್ ಮ್ಹಳ್ಯಾರ್!” ಹುಂಕಾರ್ಲೊ ಅಂತುಲೊ. “ತುಕಾ ಆಮ್ಚ್ಯಾ ಸರ್ದಾರಾನ್ ಫರ್ಮಾಯಿಲ್ಲೆಂ ಕಾಮ್ ತುರ್ತಾನ್ ಕರ್. ತುಮಿ ಪಾಟಿಂ ಯೇವ್ನ್ ಪಾವಸರ್ ಹಾಂವ್ ಹಾಂಗಾಚೊ ಹಾಲ್ಚೊಂ ನಾ – ಏಕ್ ಪಾವ್ಟಿಂ ಫರಾಮಶೆನ್ ಸಲ್ವಲೊಂ ಮ್ಹಣ್, ಜಮೆದಾರ್ ಅಂತುಲೊ ಪಡ್ವಳ್ ದುಸ್ರೆ ಪಾವ್ಟಿಂ ಸಲ್ವೊಂಚೊ ನಾ. ಕೊಣೀ ಯೇಂವ್ದಿ ತೆ – ಫಿಂರ್ಗ್ಯಾಂಕ್ ವಾ ಕಾಫೀರಾಂಕ್ ವಾ ಬೇವ್‍ಕೂಫಾಂಕ್ ಜಾಲ್ಲೆ!” ತಾಣೆಂ ಹರ್ದೆಂ ಪೆಟ್ಲೆಂ.

ತಶೆಂ, ತ್ಯಾಚ್ ದಿಸಾ ಭಿತರ್, ನೀಲೇಶ್ವರ್ಚಿ ತಡ್ ಪಾವೊನ್, ದರ್ಯಾಂತ್ಲ್ಯಾನ್ ಪಯ್ಣ್ ಥೊಡೆಂ ಕರ್ನ್, ಯೂಸುಫ್ ಆಲಿಕ್ ಆನಿ ಸರ್ದಾರ್ ಸಿಮಾಂವ್ಚ್ಯಾ ಹೆರ್ ಮಾನಾಯಾಂಕ್ ಭೆಟೊನ್, ಜಾತಾ ತಿತ್ಲ್ಯಾ ವೆಗಿಂ ತಾಂಕಾಂ ಆಪವ್ನ್ ಹಾಡ್ನ್, ಅಂತುಲ್ಯಾಕ್ ಘೆವ್ನ್, ಪಯ್ಯನೂರ್ ಛತ್ರಾಕ್ ಪಾವಜಾಯ್ ಮ್ಹಳ್ಳಿ ಆಶಾ ಮತಿಂತ್ ಧರುನ್, ರಾಮಪ್ಪ ಆಪ್ಲ್ಯಾ ಘೊಡ್ಯಾಕ್ ಘೆವ್ನ್, ನೀಲೇಶ್ವರ್ ತಡಿಚ್ಯಾ ದಿಕ್ಕಾನ್ ತುರ್ತಾನ್ ಪಯ್ಣ್ ಕರ್ನ್ ಗೆಲೊ.

ಹೆವ್ಶಿಲ್ಯಾನ್, ಆಪ್ಣೆಂ ಸಲ್ವಲ್ಲೆಂ, ಆನಿ ತೊಪಾಸಿ ದಾಲ್ಮೇದಾನ್ ಚುಕವ್ನ್ ಧಾಂವ್‍ಲ್ಲೆಂ ಖತ್ ಕಶೆಂ ಪುಣೀ ಧುವ್ನ್ ಕಾಡುಂಕ್ ಫಾವೊ ಕರ್ ದೆವಾ ಮ್ಹಣ್ ಮಾಗೊನ್ ಕಾನಾ ದೊಳ್ಯಾಂಕ್ ತೇಲ್ ಘಾಲ್ನ್ ಮ್ಹಳ್ಳೆಪರಿಂ ಅಂತುಲೊ ಪಡ್ವಳ್ ಥಂಯ್ಸರ್ ಪಹರಜ್ ಕರ್ನ್ ರಾವ್ಲೊ.

ದೀಸ್ ಅಸ್ತಮ್ಲೊ, ಆನಿ ರಾತ್ ಆಯ್ಲಿ.

ತ್ಯಾಚ್ ದಿಸಾ ಸಾಂಜೆರ್ ಕಣ್ಣಾನೂರ್‍ಚ್ಯಾ ರಾವ್ಳೆರಾಂತ್ ವಾತಾವರಣ್ ಗರಮ್ ಜಾಲ್ಲೆಂ. ಪಟ್ಟಣಾಂತ್ ಸರ್ದಾರ್ ಸಿಮಾಂವ್ ಮೊರೊಂಕ್ ನಾಸ್ತಾನಾ ಕುರಿಯೆಲಾಕ್ ಆಯ್ಲಾ ಮ್ಹಳ್ಳಿ ಖಬರ್ ತಾಂಕಾಂ ಪಯ್ಲಿ ಮೆಳ್‍ಲ್ಲಿ. ತಾಂಚ್ಯಾ ಯೋಜನಾ ಪ್ರಕಾರ್ ಮಾನಿನ್ ವೆರೊನಿಕಾ ಕುವೆಲ್ ಮಾತ್ರ್ ರಾವ್ಳೆರಾಕ್ ಪಾವ್‍ಲ್ಲಿ. ಇಜಾಬೆಲ್ ತೆರೆಜಾಕ್ ಧರ್ಚೆಂ ಕಾಮ್ ನಿರ್ಫಳ್ ಜಾಲ್ಲೆಂ; ಮೊನಿಕಾಕ್ ಧರ್ನ್ ‘ಜಲಬಾಲೆ’ ಮಂಜೆಂತ್ ವ್ಹರ್ನ್ ದವರ್‌ಲ್ಲೆಂ ಜಾಲ್ಯಾರೀ ರಾತಿಂ ತಿಕಾ ಕೊಣೆಂಗೀ ಸುಟಯ್ಲೆಂ; ಪಾವನಾತ್‍ಲ್ಲ್ಯಾಕ್ ತಸಲ್ಯಾ ಆಯಿನ್ನ್ ವೆಳಾರ್ ಸರ್ದಾರ್ ಸಿಮಾಂವ್ ಕುರಿಯೆಲಾಂತ್ ಆಸಾ, ಆನಿ ದಕ್ಷಿಣಾಕ್ ಭಾಯ್ರ್ ಸರ್ಲಾ; ಪಾಟಾಪಾಟ್ ಸರ್ದಾರ್ ಯೂಸುಫ್ ಆಲಿಯೀ ಆಯ್ಲಾ, ಮಂಜ್ಯಾಂಚೆರ್ ಶಿಪಾಯಾಂಕ್ ಘೆವ್ನ್ ತೊಯೀ ದಕ್ಷಿಣಾಕ್ ಪಾವ್ಲಾ ಮ್ಹಳ್ಳಿ ಸರ್ವ್ ಖಬರ್ ಬೇಗಮೆಕ್ ಪಾವ್ಲಿ. ವಾದಾಳಾಚ್ಯೊ ಯೆಣೊ ಸುರು ಜಾಲ್ಯೊ.

ಹ್ಯಾ ಗೊಂದೊಳಾಂತ್ ಆಪುಣ್ ಚುಕಿದಾರ್ ಮ್ಹಣ್ ಟಿಪ್ಪುಕ್ ಸಮ್ಜನಾಯೆ, ಆನಿ ತಾಚ್ಯಾ ಶಿಪಾಯಾಂಕ್ ಕಣ್ಣಾನೂರಾಂತ್ ಪ್ರವೇಶ್ ದೀನಾಯೆ – ಗರ್ಜ್ ಪಡ್ಲ್ಯಾರ್ ಝುಜೊನ್ ಜಾಲ್ಯಾರೀ ಕಣ್ಣಾನೂರಾಚಿ ಮರ್ಯಾದ್ ಉರಯ್ಜಾಯ್ ಮ್ಹಣ್ ತಿಣೆಂ ನಿಚೆವ್ ಕೆಲೊ.

ತಿಚ್ಯಾ ಹ್ಯಾ ನಿಚೆವಾಕ್ ಫಕೀರ್ ಮಹಮ್ಮದಾನ್ ಆನಿ ಹೆರಾಂನಿ ವಾರೆಂ ಘಾಲೆಂ. ಕಣ್ಣಾನೂರ್‍ಚ್ಯಾ ರಾವ್ಳೆರಾ ಖಾಲ್ ಚಡ್ ಮ್ಹಳ್ಯಾರ್ ಪಂಚ್ವೀಸ್ ಜಣ್ ಶಿಪಾಯ್ ಆನಿ ಚಾಕೊರ್ ಆಸ್‍ಲ್ಲೆ. ತ್ಯಾ ವರ್ವಿಂ ಸದ್ದ್ಯಾಚ್ಯೆ ಬಚಾವೆ ಖಾತಿರ್ ಚಡಿತ್ ಜಣಾಂಕ್ ಭರ್ತಿ ಕರ್ಚ್ಯಾ ಖಾತಿರ್ ಥೊಡ್ಯಾ ದಲಾಲ್ಯಾಂಕ್ ಬೇಗಮೆನ್ ಭೊಂವಾರಿಂ ಧಾಡ್‍ಲ್ಲೆ. ಪುಣ್ ಅಸಲ್ಯಾ ಸಂದಿಗ್ದ್ ಆನಿ ಅಪಾಯಾಚ್ಯಾ ಪರಿಸ್ಥಿತೆಂತ್ ಕೊಣೀ ನವೆ ಜಣ್ ರಾವ್ಳೆರಾಚ್ಯಾ ಚಾಕ್ರೆಂತ್ ಭರ್ತಿ ಜಾಂವ್ಕ್ ಕಬೂಲ್ ನಾಂತ್ ಮ್ಹಳ್ಳಿ ಅಸಮಾಧಾನೆಚಿ ಖಬರ್ ಆಯ್ಲಿ.

ಶೆಕಿಂ, ಆಮೊರೆಚ್ಯಾ ಕಾಳೊಕಾರ್, ಪಯ್ಯನೂರ್ ಛತ್ರಾಂತ್ ಭರ್ತಿ ಜಾಲ್ಲ್ಯಾ ಎಕ್ಲ್ಯಾ ಮನ್ಶ್ಯಾಕ್ ಹಾಡ್ನ್ ಬೇಗಮೆಚ್ಯಾ ಸದ್ರೆರ್ ದಾಖಲ್ ಕೆಲೊ. ಮನಿಸ್‍ಯೀ ನಹಿಂ, ಮೊನ್ಜಾತ್‍ಯೀ ನಹಿಂ ಮ್ಹಳ್ಳ್ಯಾ ಜಿನ್ಸಾರ್ ದಿಸ್ಚ್ಯಾ ತ್ಯಾ ವ್ಯಕ್ತಿಕ್ ಪಳೆವ್ನ್ ಬೇಗಮ್ ರಾಗಾನ್ ಪಿಶಿ ಜಾಲಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel