ಇಂಫೆರ್ನಾಚಿಂ ದಾರಾಂ – 1: ಪ್ರಸ್ತಾವನ್ (ಸರ್ದಾರಾಂಚಿ ಸಿನೊಲ್)

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 1
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ವಾಚ್ಪ್ಯಾಂಚ್ಯಾ ಗುಮಾನಾಕ್: ಹಿ ಕಾದಂಬರಿ ‘ಇಂಫೆರ್ನಾಚಿಂ ದಾರಾಂ’ ಚಾರಿತ್ರಿಕ್ ಕಾದಂಬರಿಂಚೊ ಬಾಪಯ್ ಮ್ಹಣ್ ನಾಂವಾಡ್‍ಲ್ಲ್ಯಾ ವಿ.ಜೆ.ಪಿ. ಸಲ್ಡಾನ್ಹಾನ್ ರಚ್‍ಲ್ಲ್ಯಾ ‘ದೆವಾಚ್ಯೆ ಕುರ್ಪೆನ್’ ಶಿಂಕ್ಳೆಂತ್ಲಿ ಚವ್ತಿ ಕಾಣಿ. ಪಯ್ಲಿ ‘ದೆವಾಚ್ಯೆ ಕುರ್ಪೆನ್’, ದುಸ್ರಿ ‘ಬೆಳ್ತಂಗಡಿಚೊ ಬಾಲ್ತಜಾರ್’ ಆನಿ ತಿಸ್ರಿ ‘ಸರ್ದಾರಾಂಚಿ ಸಿನೊಲ್’ ಕಾದಂಬರಿ ಆಮಿ ಎದೊಳ್‍ಚ್ ಸಾಂಕಳ್ ಕಾಣಿಯೆ ರುಪಾರ್ ಪ್ರಕಟ್ ಕೆಲ್ಯಾತ್. ಹ್ಯೊ ಸ್ವತಂತ್ರ್ ಕಾದಂಬರಿಂಪರಿಂ ಆಸಾತ್ ತರೀ, ಸುರ್ವೆರ್ ಥಾವ್ನ್ ತುಮಿ ವಾಚ್ಲ್ಯಾರ್ ಚಡ್ ಬರೆಂ. ತಶೆಂ ಕರುಂಕ್ ಜಾಯ್ನಾತ್ಲ್ಯಾರೀ ‘ಇಂಫೆರ್ನಾಚಿಂ ದಾರಾಂ’ ತುಮಿ ವಾಚ್ಯೆತ್. ಹಿ ಏಕ್ ಅಪ್ರತಿಮ್ ಸಾಹಸಿಕ್ ಕೃತ್ಯಾಂಚಿ ಕೃತಿ.

ದುಸ್ರಿ ಗಜಾಲ್, ಹಾಂತ್ಲಿ ವಿಷಯ್. ವಿ.ಜೆ.ಪಿ. ಸಲ್ಡಾನ್ಹಾನ್ ಕೆನರಾ ಕ್ರಿಸ್ತಾಂವಾಂಚೆರ್ ಟಿಪ್ಪುನ್ ಘಾಲ್ಲ್ಯಾ ಬಂಧಡೆಚ್ಯಾ ಕಾಳಾಚೆರ್ ಹಿ ಕಥಾ ರಚ್ಲ್ಯಾ. ಹಿ ಏಕ್ ಕಾಲ್ಪನಿಕ್ ಕಾದಂಬರಿ ತರೀ ಪಾಟ್‍ಥಳ್ ಆನಿ ಸನ್ನಿವೇಶಾಂ ಚರಿತ್ರೆಂತ್ಲ್ಯಾ ಸತಾಂಕ್ ಆರ್ಸೊ ಧರ್ತಾತ್, ಹಿಶಾರೊ ದಿತಾತ್. ಅಸಲ್ಯಾ ಬರ್ಪಾಂಕ್ ಸೆಮಿ ಫಿಕ್ಷನ್ ಮ್ಹಣ್ತಾತ್. (ವಾಚಾ: ಸೆಮಿಫಿಕ್ಷನ್: ಹೊಲಿವುಡ್ ಸಿನೆಮಾಂ ಆನಿ ಕೊಂಕ್ಣಿ ಕಾದಂಬರಿ). ಆಪ್ಲ್ಯಾ ವಿಶೇಸ್ ಕಾಲ್ಪನಿಕ್ ಸಕ್ತೆನ್ ಅದ್ಭುತ್ ಕಾಣಿಯೊ ವಿಣ್ಲೆಲ್ಯಾ ವಿ.ಜೆ.ಪಿ.ನ್ ತಾಚೆ ಸವೆಂ ಚರಿತ್ರಾಯೀ ವಿವರಾಯ್ಲ್ಯಾ. ಕೆನರಾ ಕ್ರಿಸ್ತಾಂವಾಂಚ್ಯಾ ಚರಿತ್ರೆಂತ್ಲ್ಯಾ ಕರಾಳ್ ಘಡಿತಾಂಚೆರ್ ತಾಣೆಂ ಹ್ಯೊ ಕಾದಂಬರಿ ಲಿಖ್ಲ್ಯಾತ್. ಹೆಂ ಫಕತ್ ಸೃಜನ್‍ಶೀಲ್ ಸಾಹಿತ್ಯ್. ತರೀ ವಾಸ್ತವಿಕ್ ಗಜಾಲಿಂಕ್ ಸಮ್ಜೊಂಕ್ ಆಮ್ಕಾಂ ತಾಣೆಂ ವಾಟ್ ರಚುನ್ ದಿಲ್ಯಾ.

‘ಇಂಫೆರ್ನಾಚಿಂ ದಾರಾಂ’ ಕಾದಂಬರಿ ಪ್ರಕಟ್ ಕರುಂಕ್ ಪರ್ವಣ್ಗಿ ದಿಲ್ಲ್ಯಾ ವಿ.ಜೆ.ಪಿ. ಸಲ್ಡಾನ್ಹಾಚ್ಯಾ ಕುಟ್ಮಾಕ್, ಪ್ರತ್ಯೇಕ್ ಕರ್ನ್ ವಿ.ಜೆ.ಪಿ.ಚ್ಯಾ ಪುತಾಕ್ ರ‍್ಯಾನ್ಸಮ್ ಸಲ್ಡಾನ್ಹಾಕ್ ಆಮಿ ಧಿನ್ವಾಸ್ತಾಂವ್ ಆನಿ ದೇವ್ ಬರೆಂ ಕರುಂ ಮ್ಹಣ್ತಾಂವ್.

-ಸಂಪಾದಕ್

* * * * *    * * * * *    * * * * *

ಕೆನರಾ ಕ್ರಿಸ್ತಾಂವ್ ಸಮಾಜೆಚ್ಯಾ ಮಾಡ್ತಿರ್ಪಣಾಚೊ ಕಾಳ್ ತೊ.

ಕೊಂಕ್ಣಿ ಕ್ರಿಸ್ತಾಂವಾಂಚೆಂ ಬಹಿರಂಗ್ ದೆವಾಸಾಂವ್ ವಾ ಧಾರ್ಮಿಕ್ ಕಾರ್ಯಾವಳ್ ನಿದ್ರೇಸ್ತ್ ಜಾಲ್ಲಿಂ. ತರೀ, ಥೊಡ್ಯಾ ವೀರ್ ಆನಿ ಧಯ್ರಾಧಿಕ್ ಕೊಂಕ್ಣಿ ಸ್ತ್ರೀ-ಪುರುಷಾಂಚ್ಯಾ ಸಾಧನಾ ವರ್ವಿಂ, ಸ್ತ್ರೀಯಾಂಚ್ಯಾ ಆನಿ ಭುರ್ಗ್ಯಾ-ಬಾಳಾಂಚ್ಯಾ ದುಖಾಂತ್, ಮಾಡ್ತಿರಾಂಚ್ಯಾ ರಗ್ತಾಂತ್ ತಶೆಂ ಇಗರ್ಜಾಂ ಬಾಂಧ್ಪಾಂಚ್ಯಾ ಭಸ್ಮಾಂತ್, ಭಾವಾರ್ಥಾಚೆಂ ಬಿಂ ಜಿವಾಳ್ ಉರ್‌ಲ್ಲೆಂ.

ಕೆನರಾ ಕ್ರಿಸ್ತಾಂವ್ ಸಮಾಜೆಚ್ಯಾ ಮಾಡ್ತಿರ್ಪಣಾಚೊ ಕಾಳ್ ತೊ.

ತರೀ, ತಸಲ್ಯಾ ಬಂಧಡೆಂತ್ಲ್ಯಾನ್ – ಉಜೊ ಆನಿ ತಾಲ್ವಾರಿ ಉಚಾಂಬಳ್ ಜಾಲ್ಲ್ಯಾ ತ್ಯಾ ಭಿರಾಂಕುಳ್ ಕಾಳಾಂತ್ಲ್ಯಾನ್ – ಆಮ್ಚಿ ಸಮಾಜ್ ಜಯ್ತೆವಂತ್ ಜಾತೆಲಿ ಮ್ಹಳ್ಳೊ ಭರ್ವಸೊ, ಆನಿ ತಸಲ್ಯಾ ಜಯ್ತಾಂತ್, ಹ್ಯಾ ಆಮ್ಚ್ಯಾ ಕರಾವಳಿಚ್ಯಾ ಜಿಲ್ಲ್ಯಾಂನಿ ಆಮ್ಚ್ಯಾ ಪುರ್ವಜಾಂಚೊ ಭಾವಾರ್ಥ್ ಪಾಲ್ವೊಂಚೊ ನಾ, ವಾ, ರೊಮಾಚಿ ಇಗರ್ಜ್ ಹಾಂಗಾ ಥಾವ್ನ್ ತಡೀಪಾರ್ ಜಾಂವ್ಚಿ ನಾ ಮ್ಹಳ್ಳಿಂ ಖುಣಾಂ ಜಿವಿಂ ಆಸ್‍ಲ್ಲಿಂ.

ಕೆನರಾ ಕ್ರಿಸ್ತಾಂವ್ ಸಮಾಜೆಚ್ಯಾ ಮಾಡ್ತಿರ್ಪಣಾಚೊ ಕಾಳ್ ತೊ.

ಕುರಿಯೆಲಾಂತ್ (ಮಂಗ್ಳುರಾಂತ್), ಬಂಧಡ್ ಆರಂಭ್ ಜಾಲ್ಲ್ಯಾ ದೋನ್ ವರ್ಸಾಂ ಭಿತರ್ (1784-85) ಸಬಾರ್ ವಿಚಿತ್ರ್ ವಿಷಯ್ ಘಡೊನ್ ಗೆಲ್ಲೆ. ಶೆಂಬೊರಾಂತ್ ನೊವೊದ್ ಕ್ರಿಸ್ತಾಂವ್ ಕುಳ್ವಾರಾಂಚೊ ವಿಭಾಡ್ ಜಾಲ್ಲೊ. ಅಂಕ್ವಾರ್ ಮರ್ಯೆಚಿ ವಿಶೇಸ್ ಭಕ್ತ್ ಆಸೊನ್, ಮಂಗ್ಳುರಾಂತ್ ಆನಿ ಭೊಂವಾರಿಂ, ತಿಚ್ಯಾಚ್ ಮಾನಾಕ್ ಸಮರ್ಪುನ್ ಉಬಿಂ ಕೆಲ್ಲಿಂ ಆಮ್ಚಿಂ ದೆವಾಳಾಂ – ಬೋಳಾರಾಂತ್ಲೆಂ ಏಕ್ ಕೊಪೆಲ್ ಆನಿ ರೊಜಾರ್ ಮಾಯೆಚಿ ಇಗರ್ಜ್, ಹಂಪನ್ನಾಚ್ಯಾ ಕಾಟ್ಯಾ ಸಾಮ್ಖಾರ್ ಆಸ್‍ಲ್ಲಿ ಮಿಲಾಗ್ರ್ ಸಾಯ್ಬಿಣಿಚಿ ಇಗರ್ಜ್, ಉಳ್ಳಾಲ್ ಮೆರ್ಸಿ ಸಾಯ್ಬಿಣಿಚಿ ಇಗರ್ಜ್, ಮರ್ಯೆಚ್ಯಾ ಮೊಂತಿಯೆರ್ (ಫಿಂರ್ಗಿಪೆಟ್) ಆಸ್‍ಲ್ಲೆಂ ಕೊವೆಂತ್ ಆನಿ ಸೆಮಿನರಿ, ಮೊಗರ್ನಾಡ್ ದೆವಾಚ್ಯಾ ಮಾಯೆಚಿ, ಮುಲ್ಕಿ ಕೊಸೆಸಾಂವ್ ಸಾಯ್ಬಿಣಿಚಿ, ಕಿರೆಂ ರೆಮೆದ್ ಸಾಯ್ಬಿಣಿಚಿ, ಶಿರ್ವಾಂ ಸಾವುದ್ ಸಾಯ್ಬಿಣಿಚಿ ಇಗರ್ಜ್ ಆನಿ ಹೆರ್ ಸಬಾರ್ – ಪುರ್ತಿಂ ವಾ ಅರ್ಧಿಂ ನಾಸ್ ಜಾಲ್ಲಿಂ.

ಕೆನರಾ ಕ್ರಿಸ್ತಾಂವ್ ಸಮಾಜೆಚ್ಯಾ ಮಾಡ್ತಿರ್ಪಣಾಚೊ ಕಾಳ್ ತೊ.

ತರೀ, ಆಮ್ಚ್ಯಾ ಪುರ್ವಜಾಂಚೆಂ ಪರಾಕ್ರಮ್, ಸಾಹಸ್, ಚಲಾಕಿ, ಬಹಾದುರಿ ಆನಿ ಶಿಪಾಯ್‍ಗಿರಿ ಮಾಜ್ವೊಂಕ್ ನಾ. ಸಲ್ವೊಂಕ್ ನಾ.

ಮಂಗ್ಳುರಾಂತ್, ತಶೆಂ, ಪಯ್ಶಿಲ್ಯಾ ಕ್ರಿಸ್ತಾಂವ್ ಕುಳ್ವಾರಾಂನಿ, ಉರೊನ್ ಆನಿ ಚುಕವ್ನ್ ಆನಿ ಲಿಪೊನ್ ಆಸ್‍ಲ್ಲ್ಯಾ ಮಾನಾಯಾಂನಿ ತಾಂಚಿಂ ಕಾರ್ಬಾರಾಂ ಉಣಿಂ ಕರುಂಕ್ ನಾಂತ್. ತುರ್ಕಿ ಆನಿ ಮಾಪ್ಳಿ ಶಿಪಾಯಾಂಕ್ ಆನಿ ತಾಂಚ್ಯಾ ದಲಾಲ್ಯಾಂಕ್ ಕರ್ಕರೆ ಉಣೆಂ ಜಾಂವ್ಕ್ ನಾಂತ್. ಸಮಾಜೆಚ್ಯಾ ದರ್ಬಾರಾಚೊ ಆನಿ ಸಮೃದ್ಧೆಚೊ ತೀನ್ ಪಾವ್ ಮಾತ್ರ್ ಜೀವ್ ಉರ್‌ಲ್ಲೊ ಜಾಲ್ಯಾರ್‌ಯೀ, ಮಾರಾಂ ಫಾರಾಂಚೊ ತಸೊ ಆಮ್ಚ್ಯಾ ವೀರಾಂಚೊ ದಾವ್ ಉಣೊ ಜಾಂವ್ಕ್ ನಾ.

ಖೊಡೆ ಸಾಂಕ್ಳಿಂನಿ ಸಾಂಪಡ್ಲೆಲ್ಯಾಂ ಖಾತಿರ್ – ಸಮಾಜೆ ಖಾತಿರ್ ಆನಿ ಸಮಡ್ತಿ ಖಾತಿರ್ – ಕಾವೂರ್ಚೊ ದುಮ್ಗಾ ಪೀಂತ್ ಆನಿ ಸಾಂಗಾತಿ, ತಶೆಂಚ್, ಪಯ್ಶಿಲ್ಯಾ ಠಿಕಾಣ್ಯಾಂನಿ ಉರ್ಲೆಲೆ ಆಮ್ಚೆ ವೀರ್ – ಜಾಂವ್ ತೆ ಪ್ರಭುಂಗೆಲೆ, ಕಾಮ್ತಿಂಗೆಲೆ, ಶೆಟಿಂಗೆಲೆ ವಾ ಶೆಣೈಂಗೆಲೆ – ಬಂದಡೆ ವಿರೋಧ್ ಅಜ್ಞಾತ್ ಝುಜ್ ಚಲಯ್ತಾಲೆ ಆನಿ ಪ್ರತ್ಯಕ್ಷ್ ಮೊರ್ನಾ ಕಡೆನ್ ಜುಗಾರ್ ಖೆಳ್ತಾಲೆ.

ಹ್ಯಾ ವೆಳಾರ್, ಮೊರ್ನಾಕ್ ಜಾಂವ್ ಬಂದಡೆಕ್ ಜಾಂವ್ ಸಾಂಪಡ್ನಾಸ್ತಾಂ ಅಥ್ವಾ ಲಿಪೊನ್ ಆಸ್ತಾಂ ಆಮ್ಚ್ಯೊ ಥೊಡ್ಯೊ ವೀರ್ ಸ್ತ್ರೀಯೊ, ಸಮಾಜೆಚ್ಯೆ ಸೆವೆಂತ್ ಜಾಂವ್, ಧರ್ಮಾಚ್ಯೆ ಸೆವೆಂತ್ ಜಾಂವ್ ಅಲಗ್ ಉರೊಂಕ್ ನಾಂತ್. ಕೊಡಿಯಾಲ್‍ಬೈಲ್ ಆನಿ ಭೊಂವಾರಿಂ ಕುಂವರ್ನ್ ಎಲಿಜ್ ವೆರೊನಿಕಾ ಕುವೆಲ್ ಆನಿ ತಿಚಿ ಭಯ್ಣ್ ಮೊನಿಕಾ ಕುವೆಲ್ – ತೆಲ್ಲಿಸ್, ಕಾವೂರಾಂತ್ ಕುಂವರ್ನ್ ಇಜಾಬೆಲ್ ತೆರೆಜ್ ಪೈ, ಒಮ್ಜೂರಾಂತ್ ಆನಿ ಭೊಂವಾರಿಂ ಕುಂವರ್ನ್ ರೆಮೆದ್ ಎಮಿಲಿಯಾನಾ ಪರ್ಬಿಣ್, ಬಂಟ್ವಾಳಾಂತ್ ಕುಂವರ್ನ್ ಆಗ್ನೆಸ್ ಸಿಸಿಲಿಯಾ ಕಾಮತ್ ಆನಿ ಸಾಂಗಾತಿಣ್ ಡೊನಾ ಮರಿಯಾ ತೆರೆಜಾ ಗೋಮ್ಸ್ ದೆ ಲೂತೆಲಿಂ, ಕಲ್ಯಾಣ್‍ಪುರಾಂತ್ ಆನಿ ಭೊಂವಾರಿಂ ಕುಂವರ್ನ್ ಪಾವ್ಲಿನ್ ರೆಬೆಕ್ ಲೈತಾಂವ್ ಆನಿ ತಶೆಂಚ್ ಸಬಾರ್ ಜಣ್ ಬಿದ್ರುಲಾಂತ್, ಬಾರ್ಕೂರಾಂತ್, ಮುಲ್ಕಿಂತ್ ಆನಿ ಕಿರೆಂತ್ – ನಾಂವ್ ನಾಸ್ತಾನಾ ವಾವ್ರುನ್, ಫುಡ್ಲ್ಯಾ ಸಂತತೆಚ್ಯಾ ಉಜ್ವಾಡಾಕ್ ಆನಿ ಉಪ್ಕಾರಾಕ್ ಪಾತ್ರ್ ಜಾಲ್ಯೊ.

* * * * *

ಅಸಲ್ಯಾ ತ್ಯಾ ಅಜ್ಞಾತ್ ಸೈನಾಕ್ ಗುಪಿತ್ ಮೇಲ್ಫಂಕ್ತ್ ಆನಿ ಅಭಿಮಾನಾಚೊ ವೀರ್ ಜಾವ್ನಾಸ್‍ಲ್ಲೊ, ತೊಚ್ ಸರ್ದಾರ್ ಸಿಮಾಂವ್ ಪ್ರಭು. ಸರ್ಕಾರಿ ಕಾಮಾನ್ ಕುರಿಯೆಲಾಕ್ ತೊ ಆಯಿಲ್ಲ್ಯಾ ವೆಳಾರ್, ವಿಚಿತ್ರ್ ಥರಾನ್ ವೆರೊನಿಕಾ ಕುವೆಲಿಚಿ, ದುಮ್ಗಾ ಪಿಂತಾಚಿ ಆನಿ ಸಾಂಗಾತ್ಯಾಂಚಿ ತಾಕಾ ವಳಕ್ ಜಾಲಿ. ತೊಪಾಸಿ ಕಾರ್ಡೊಜಾಚ್ಯಾ ಘಾತಾನ್ ಆನಿ ಕುಞಿಕುಟ್ಟಿಚ್ಯಾ ಹಾತಾನ್, ದುಮ್ಗಾ ಪಿಂತಾಚೆ ಸಾಂಗಾತಿ ಕೈದಿ ಜಾಲೆ. ಸರ್ಕಾರಾಚೊ ಪ್ರತಿನಿಧಿ ಜಾವ್ನ್, ಸರ್ದಾರ್ ಸಿಮಾಂವ್ಕ್ ತಾಂಚಿ ಝಡ್ತಿ ಕರಿಜಾಯ್ ಪಡ್ಲಿ.

ಸಹಜ್ ಜಾವ್ನ್ ತಾಣೆಂ ತಾಂಕಾಂ ಶಿಕ್ಷಾ ಫರ್ಮಾಯ್ಲಿ. ಪುಣ್ ತ್ಯೆಚ್ ರಾತಿಂ, ಭೋವ್ ಚತುರಾಯೆನ್ ತಾಣೆಂಚ್ ತಾಂಕಾಂ ಸುಟ್ಕಾ ಲಾಭಯ್ಲಿ.

…..ತೊಪಾಸಿ ಕಾರ್ಡೊಜ್ ಆನಿ ಕುಞಿಕುಟ್ಟಿ ಕಾಬಾರ್ ಜಾಲೆ. ತೊಪಾಸಿನ್ ಅಪಹರ್ಸುನ್ ವ್ಹಾವಯಿಲ್ಲಿ ಇಜಾಬೆಲ್ ತೆರೆಜ್, ಸುಟ್ಕಾ ಲಾಭೊನ್ ಪಾಟಿಂ ಆಯ್ಲಿ. ಮಾಗ್ಣ್ಯಾಚ್ಯೊ ಜಮಾತಿ ಆನಿ ಖುರ್ಸಾಚ್ಯಾ ಭಕ್ತೆಚಿಂ ಖುಣಾಂ ವಿಸ್ತಾರ್ಲಿಂ.

ಟಿಪ್ಪು ಸುಲ್ತಾನಾಚ್ಯಾ ಹುಕ್ಮೆನ್, ಸರ್ದಾರ್ ಸಿಮಾಂವ್ ಬಾರ್ಕೂರ್ ಥಾವ್ನ್ ಪರತ್ ಪಾಟಿಂ ಆಯ್ಲೊ, ಆನಿ ಬೋಳೂರ್ ಠಾಣ್ಯಾಂತ್ಲ್ಯಾ ಖಲೀಫ್ ದೌಲತಾಂತ್ ದುಸ್ರೆ ಪಾವ್ಟಿಂ ಝಡ್ತೆಕ್ ಬಸ್ಲೊ. ತೀರ್ಪ್ ತಾಣೆಂ ದಿಲೆಂ. ತೆದೊಳ್ ಪರ್ಯಾಂತ್, ಭಾಗೆವಂತ್ ಖುರ್ಸಾಚ್ಯೆ ಮಹಿಮೆನ್ – ತಾಣೆಂಚ್ ದಿಲ್ಲಿ ತಿ ‘ಸರ್ದಾರಾಂಚಿ ಸಿನೊಲ್’ ಜಯ್ತೆವಂತ್ ಜಾಲ್ಲಿ.

ಹುಕ್ಮೆ ಪ್ರಕಾರ್, ವರ್ದಿ ಘೆವ್ನ್, ಸರ್ದಾರ್ ಸಿಮಾಂವ್, ಸಿರಿರಂಗಪಟ್ಟಣಾಕ್ ಪಾಟಿಂ ಗೆಲೊ. ಥಂಯ್ಸರೀ ಏಕ್ ವಿಚಿತ್ರ್ ಆನಿ ಭಿರಾಂಕುಳ್ ದೃಶ್ಯ್ ತಾಣೆಂ ಪಳೆಲೆಂ – ಚಿತ್ರ್‌ಹಿಂಸಾ ಭೊಗುನ್ ವಿದ್ರೂಪ್ ಜಾಲ್ಲೊ ಮೊಬ್ಲಿ ಆಂತೊನ್ ಶೆಣೈ, ಗಾಡ್ವಾಚ್ಯಾ ಪಾಟಿರ್ ಥಾವ್ನ್, ಸುಲ್ತಾನಾಕ್ ಥೊಡಿಂ ಭಿರಾಂಕುಳ್ ಉತ್ರಾಂ ಉಡವ್ನ್, ಶೆವಟಿಂ ತರೀ ಧೈರ್ ಸಾಂಡಿನಾಸ್ತಾಂ, ಮಾಡ್ತಿರಾಂಚೆಂ ಮೋರ್ನ್ ಮೆಲೊ.

ತ್ಯಾ ಮೊರ್ನಾ ವರ್ವಿಂ ಆನಿ ತ್ಯಾ ಉತ್ರಾಂ ವರ್ವಿಂ, ಟಿಪ್ಪು ಸುಲ್ತಾನಾಚೆಂ ಕಠಿಣ್ ಮನ್, ಚಿಕ್ಕೆ ಬದ್ಲೊಂಚಿಂ ಖುಣಾಂ ದಿಸೊನ್ ಆಯ್ಲಿಂ. ಮೊಬ್ಲಿ ಆಂತೊನ್ ಶೆಣೈಕ್ ಶಿಕ್ಷಾ ಲಾಯಿಲ್ಲ್ಯಾ ಕೊತ್ವಾಲಾಕ್ ಆನಿ ಶಿಪಾಯಾಂಕ್ ತಿಚ್ ಶಿಕ್ಷಾ ತಾಣೆಂ ಫರ್ಮಾಯ್ಲಿ.

ಪುಣ್ ಸರ್ದಾರ್ ಸಿಮಾಂವ್ಚೆಂ ಆಯೋಗ್ (ಮಿಸಾಂವ್) ಆಖೇರ್ ಜಾಂವ್ಕ್ ನಾ. ತಾಚೆ ಥಂಯ್ ಬಾದಶಹಾನ್ ಶಿಫಾರಸ್ ಉಚಾರ್ಲಿ ಜಾಲ್ಯಾರೀ, ತಾಚ್ಯಾ ಸುರಕ್ಷಿತಾಯೆಚೊ ಫುಡಾರ್, ಮಿಸ್ತೆರ್‌ಚ್ ಜಾವ್ನ್ ಉರ್ಲೊ.

ದರಿಯಾ ದೌಲತಾಚ್ಯಾ ಚಂದ್ರಕಾಂತ್ ಸೊಭಾಯೆಚೆರ್ ಕಾಳೊಕ್ ಚರ್ಲೊ.

“ಸರ್ದಾರ್ ಸಿಮಾಂವ್!”

“ಜೀ ಹುಜೂರ್…”

“ಆಮ್ಚ್ಯಾ ಸಾಂಗಾತಾ ರಾವ್ಳೆರಾಕ್ ಯೇ. ಕುರಿಯೆಲಾಂತ್ಲ್ಯಾ ಕರಂದಾಯೆಚೊ ಕಿಡೊ ಆಮಿ ಸೊಧುಂಕ್ ಜಾಯ್… ಕಾಡುಂಕ್ ಜಾಯ್” ಮ್ಹಣೊನ್, ಟಿಪ್ಪು ಸುಲ್ತಾನ್, ದರಿಯಾ ದೌಲತಾಚಿಂ ಮೆಟಾಂ ದೆಂವ್ಲೊ.

“ಜೀ” ಮ್ಹಣಾಲೊ ಸರ್ದಾರ್ ಸಿಮಾಂವ್.

ಸರ್ದಾರಾಂಚಿ ಸಿನೊಲ್ ತೆದೊಳ್ ಪರ್ಯಾಂತ್ ಜಯ್ತೆವಂತ್ ಜಾಲ್ಲಿ ಖರಿ. ತಾಣೆಂ ಗಾಂವಾಂತ್ ದುಮ್ಗಾ ಪಿಂತಾಕ್ ದಿಲ್ಲೆಂ ತೆಂ ಅರ್ಲುಕೆಚೆಂ ಅರ್ಧ್ ಆತಾಂ ಗಾಂವಾಂತ್ ವೆರೊನಿಕಾ ಕುಂವರ್ನಿ ಕಡೆನ್ ಆಸಾ. ಆನ್ಯೇಕ್ ಅರ್ಧ್ ಆಪ್ಣಾ ಕಡೆನ್ ಆಸಾ. ತಿಂ ದೊನೀ ಅರ್ಧಾಂ ಸಾಂಗಾತಾ ಖಂಯ್ ಮೆಳ್ತಿತ್ – ತ್ಯಾ ಆದಿಂ ಕಿತೆಂ ಸರ್ವ್ ಘಡೊಂಕ್ ಆಸಾ ಜಾವ್ಯೆತ್ ಮ್ಹಳ್ಳಿಂ ಚಿಂತ್ನಾಂ ತಾಚ್ಯೆ ಮತಿಂತ್ ಧಾಂವ್ಲಿಂ.

ನಿಜಾಯ್ಕೀ, ಬಾರಾ ವರ್ಸಾಂ ಆದಿಂ, ಒಮ್ಜೂರಾಂತ್ ಫಿಂರ್ಗಿ ವಿಗಾರ್ ಜಾವ್ನಾಸ್‍ಲ್ಲ್ಯಾ ಪಾದ್ರ್ ಅಂತೋನಿಯೊ ಮೆಲ್ಖಿಯೊರ್ ಲೋಬೊ ದೆ ಸೆರೂಲಾನ್ ತಾಕಾ ದಿಲ್ಲ್ಯಾ ತ್ಯಾ ವಿಚಿತ್ರ್ ಅರ್ಲುಕೆಚಿಂ ಅರ್ಧಾಂ, ಪರತ್ ಸಾಂಗಾತಾ ಮೆಳ್ಚ್ಯಾ ಆದಿಂ, ಭೊಂವ್ತಿಂ, ಭೊಂವಾರಿಂ ಆನಿ ಪಾಯಾಂ ಥಳಾ ಇಂಫೆರ್ನಾಚಿಂ ದಾರಾಂ ಉಗ್ತಿಂ ಜಾಂವ್ಕ್ ಆಸಾತ್ ಮ್ಹಣ್ ತೊ ನೆಣಾಸ್‍ಲ್ಲೊ.

ಪೈಗಂಬರ್ ಬಾದಶಹಾ ಟಿಪ್ಪು ಸುಲ್ತಾನ್ ಸೈಯ್ಯದ್ ಮನ್ಸೂರ್ ಅಲಿ ಬಹಾದುರಾಚೊ – ತ್ಯಾ ಮೈಸೂರ್ಚ್ಯಾ ವಾಗಾಚೊ – ಪಾಟ್ಲಾವ್ ಕರ್ನ್, ಸರ್ದಾರ್ ಸಿಮಾಂವ್, ಆಪ್ಲ್ಯಾ ಘೊಡ್ಯಾರ್, ರಾವ್ಳೆರಾಕ್ ಪಾವ್ಲೊ.

ಸರ್ದಾರಾಕ್ ಸುಲ್ತಾನಾಚಿ ಹುಕುಮ್

ರಾವ್ಳೆರಾ ಲಾಗಿಂ ಪಾವ್ತಚ್, ಘೊಡ್ಯಾಂಕ್ ಆನಿ ಹೆರಾಂಕ್ ಪಾಟಿಂ ಸೊಡ್ನ್, ಸರ್ದಾರ್ ಮಾಂವ್ಕ್ ಹಾತ್-ಭಾಸ್ ಕರ್ನ್, ಟಿಪ್ಪು ಸುಲ್ತಾನ್ ಆಪ್ಲ್ಯಾ ಖಾಸ್ಗಿ ಕಮ್ರಾಕ್ ಗೆಲೊ.

ಥಂಯ್ಸರ್ ದಿವೆ ಪಯ್ಲೆಚ್ ಪೆಟಯಿಲ್ಲೆ.

ದಿವಾನಾ ಬಗ್ಲೆನ್ ಆಸ್‍ಲ್ಲಿ ಕಾಂಪಿಣ್ ವ್ಹಾಜವ್ನ್, ಪಿಯೆಂವ್ಕ್ ಆನಿ ಥೊಡಿ ಮಿಠಾಯ್ ಹಾಡುಂಕ್ ತಾಣೆಂ ಫರ್ಮಾಯ್ಲೆಂ. ಸರ್ದಾರ್ ಸಿಮಾಂವ್ ದಾರಾ ಥಾವ್ನ್ ಚಿಕ್ಕೆ ಫುಡೆಂ, ಖಾಲ್ತೆಪಣಿಂ ಖಬಡ್ದಾರ್ ರಾವ್ಲೊ. ಟಿಪ್ಪು ಸುಲ್ತಾನಾನ್, ಸಬ್ದ್ ಕಾಡಿನಾಸ್ತಾಂ, ಕಮ್ರಾಚ್ಯಾ (ಕುಡಾಚ್ಯಾ) ಭೊಂವ್ತಿಂ, ಜನೆಲಾಂಕ್ ಆಡ್ ಧಾಂಕುನ್ ಆನಿ ಲಾಂಬಾಯೆನ್ ಮಿರಿಯಾಂನಿ ಉಮ್ಕಳಾವ್ನ್ ಆಸ್‍ಲ್ಲ್ಯೊ ಇಲೂದೆಚ್ಯೆ ಆನಿ ಝರಿಚ್ಯೊ ತಟ್ಟ್ಯೊ ಸಾಸ್ಪತ್ತ್ ಭೊಂವಾಡೊ ಕಾಡ್ಲೊ. ಉಪ್ರಾಂತ್, ಮಧೆಂ ಯೇವ್ನ್ ಸರ್ದಾರ್ ಸಿಮಾಂವ್ಚ್ಯಾ ಹುಜ್ರಿಂ, ಚಿಕ್ಕೆ ಪಾಯ್ ಪಯ್ಸ್ ದವರ್ನ್ ಆನಿ ಕಮರ್‌ಬಾಂಧಾಂತ್ ಹೆಬ್ಬೊಟಾಂ ಶಿರ್ಕಾವ್ನ್, ದೊಳ್ಯಾಕ್ ದೊಳೊ ಧರ್ನ್ ತೊ ರಾವ್ಲೊ.

ಸರ್ದಾರ್ ಸಿಮಾಂವ್ಕ್, ತ್ಯಾ ಘಡಿಯೆ, ಅವಶ್ಯ್ ಜಾವ್ನ್ ಪಾಯಾಂ ಥಳಾ ಧರ್ನ್ ಹುನ್ ಜಾಲ್ಲೆಪರಿಂ ಆನಿ ಆಂಗಾಂತ್ ಮುಯೊ ಚರ್‌ಲ್ಲೆಪರಿಂ ಜಾಲ್ಲೆಂ ವಾಜ್ಭಿಚ್. ಕಿತ್ಯಾಕ್, ಮತ್ ಉಚಾಂಬಳ್ ಜಾಲ್ಲ್ಯಾ ವೆಳಾರ್ ವಾ ಕ್ರೋಧಾನ್ ತಾಪೊನ್, ಕಸಲೆಂಯೀ ಕಠಿಣ್ ಫರ್ಮಾಣ್ ದೀಂವ್ಕ್ ಆಯ್ತೊ ಜಾಲ್ಲ್ಯಾ ವೆಳಾರ್ ಮೈಸೂರ್ಚ್ಯಾ ವಾಗಾಚಿಂ ಭಾಯ್ಲಿಂ ಲಕ್ಷಣಾಂ ತಿಂ ಜಾವ್ನಾಸ್‍ಲ್ಲಿಂ ಮ್ಹಣ್, ಸರ್ದಾರ್ ಸಿಮಾಂವ್ ಜಾಣಾಸ್‍ಲ್ಲೊ.

ಕಿತೆಂ ಕರ್ಚೆಂ ವಾ ಕಿತೆಂ ಉಲಂವ್ಚೆಂ ಮ್ಹಣ್ ಸರ್ದಾರ್ ಸಿಮಾಂವ್ಕ್ ಸಮ್ಜಲೆಂ ನಾ. ತರೀ ಥೊಡೆಂ ಧಯ್ರ್ ಘೆವ್ನ್ ಆನಿ ಅಮ್ರುಕೊ ಚಿಕ್ಕೆ ಹಾಸೊನ್:

“ಬಾದಶಹಾಕ್, ಸೇವಕಾಚೆಂ ಖಾಲ್ತೆಂ ವಂದನ್” ಮ್ಹಳೆಂ ತಾಣೆಂ, ಆನಿ ಹಾಳ್ವಾಯೆರ್, ಪೆಂಕ್ಡಾ ಥಾವ್ನ್ ಕೂಡ್ ಬಾಗಾಯ್ಲಿ.

“ಶಹಭಾಶ್!”

ಟಿಪ್ಪು ಸರ್ದಾರಾನ್ ಆಪ್ಲೆ ದೊನೀ ಹಾತ್ ಸರ್ದಾರ್ ಸಿಮಾಂವ್ಚ್ಯಾ ಭುಜಾಂಚೆರ್ ತೆಂಕುನ್ ತಾಕಾ ನೀಟ್ ಧರ್ಲೊ. ತಾಚಿ ಗಂಭೀರಾಯ್ ಚಿಕ್ಕೆ ಸಡಿಳ್ ಜಾಲಿ. ತಾಚ್ಯಾ ಬೊಟಾಂಚಿ ಚಿಮ್ಟಿ ಮಿಶ್ಯಾಂಚ್ಯಾ ಪೊಂತಾಕ್ ಗೆಲಿ.

ತಿತ್ಲ್ಯಾರ್ ಮಿಠಾಯ್ ಆನಿ ಸರ್ಬತಾಚಿಂ ಗಿಂಡ್ಲಾಂ ಮಾಂಡುನ್ ಧರ್‌ಲ್ಲಿ ರುಪ್ಯಾಚಿ ಥಾಲಿ ದಿವಾನ್‍ಖಾನಾ ಮುಖ್ಲ್ಯಾ ಗಂಧಾಚ್ಯಾ ಆನಿ ದಾಂತಾಚ್ಯಾ ಬಾಂಕುಲಾರ್ ಯೇವ್ನ್ ತೆಂಕ್ಲಿ.

ಟಿಪ್ಪು ಸರ್ದಾರ್, ಸರ್ದಾರ್ ಸಿಮಾಂವ್ಚ್ಯಾ ಬಾವ್ಳ್ಯಾಂತ್ ಬಾವ್ಳೊ ಶಿರ್ಕಾವ್ನ್ ಯೇವ್ನ್ ದಿವಾನ್‍ಖಾನಾಚೆರ್ ವಣ್ಕಲೊ.

ಮಿಠಾಯ್ ಚಾಬ್ತಾನಾ ಜಾಂವ್, ಸರ್ಬತ್ ಚಾಕ್ತಾನಾ ಜಾಂವ್ ತೆ ಉಲಂವ್ಕ್ ನಾಂತ್. ಥೊಡ್ಯಾ ವೆಳಾನ್:

“ಆತಾಂ ಉಲಯಾಂ” ಮ್ಹಣಾಲೊ ಟಿಪ್ಪು ಸರ್ದಾರ್.

“ಜೀ ಹುಜೂರ್!”

“ಪುರಾಸಣ್ ಜಾಲ್ಲ್ಯಾ ಆಮ್ಚ್ಯಾ ಕಾಳ್ಜಾಕ್, ಕೆದಾಳಾಯೀ ತುಜೆಂ ಯೆಣೆಂ ಏಕ್ ಭುಜಾವಣ್; ಅಶಾಂತ್ ಜಾಲ್ಲ್ಯಾ ಆಮ್ಚ್ಯಾ ಮನಾಕ್ ತುಜಿ ದೋಸ್ತಿ ಏಕ್ ಸಮಾಧಾನ್.”

ಹಿಂ ಉತ್ರಾಂ ಆಯ್ಕೊನ್, ಸರ್ದಾರ್ ಸಿಮಾಂವ್ಕ್, ಥೊಡ್ಯಾಚ್ ದಿಸಾಂ ಆದ್ಲೊ, ಬಾರ್ಕೂರ್ ಘಡಾಂತ್ಲೊ ಉಗ್ಡಾಸ್ ಆಯ್ಲೊ. ಥಂಯ್ಸರೀ ಟಿಪ್ಪು ಸುಲ್ತಾನಾನ್ ಚಡುಣೆಂ ಅಸಲಿಂಚ್ ಉತ್ರಾಂ ಉಚಾರ್‌ಲ್ಲಿಂ. ರಶೀಮಾಂತ್ ಗುಟ್ಲಾಯಿಲ್ಲ್ಯಾ ಭಾಲಿಯೆಪರಿಂ, ಭಾಯ್ಲ್ಯಾನ್ ಗೋಡ್ ಉತ್ರಾಂ ಉಲಯ್ತಾನಾ, ಭಿತರ್ಲ್ಯಾನ್ ಶಿಂತ್ರ್ಯೊ ಚಿಂತುನ್ ಪಾಸ್ ಮಾಂಡ್ಚ್ಯಾ ವಿದ್ಯೆಂತ್ ಟಿಪ್ಪು ಸುಲ್ತಾನ್ ಭೋವ್ ಪ್ರವೀಣ್ ಆಸಾ ಮ್ಹಣ್ ಆಪ್ಣೆಂ ಚಿಂತ್‍ಲ್ಲೆಂಯೀ ತಾಕಾ ಪರತ್ ಉಗ್ಡಾಸ್ ಆಯ್ಲೊ.

“ಮ್ಹಜ್ಯಾ ಬಾದಶಹಾಕ್, ಸೆವಕಾಚೆಂ ಖಾಲ್ತೆಂ ವಂದನ್” ಮ್ಹಳೆಂ ತಾಣೆಂ – ದುಸ್ರೆಂ ಕಾಂಯ್ ಮತಿಕ್ ಯೇನಾಸ್ತಾನಾ.

“ಆಸೊಂ” ಮ್ಹಣಾಲೊ ಟಿಪ್ಪು ಸುಲ್ತಾನ್, ಸಟ್ಟ್ ಕರ್ನ್ ಉಟೊನ್. ಉಪ್ರಾಂತ್ ಹಾತ್ ಪಾಟಿಂ ಬಾಂಧುನ್, ಪಿಂಜ್ರ್ಯಾಂತ್ಲ್ಯಾ ವಾಗಾಪರಿಂ, ತ್ಯಾ ಕುಡಾಂತ್ ಮುಖಾರ್ ಪಾಟಿಂ ಪಾಸಾಯೊ ಮಾರುಂಕ್ ತೊ ಲಾಗ್ಲೊ.

ಸರ್ದಾರ್ ಸಿಮಾಂವ್‍ಯೀ ಉಟೊನ್, ಹುಶಾರ್ ರಾವ್ಲೊ.

ಥೊಡ್ಯಾ ವೆಳಾನ್, ಪಾಸಾಯೊ ಮಾರುನ್ ಆಸ್‍ಲ್ಲೆಪರಿಂಚ್, ಟಿಪ್ಪು ಉಲಯ್ಲೊ – ಆಪ್ಣಾಯಿತ್ಲ್ಯಾಕ್‍ಚ್:

“ದೋನ್ ಪಾವ್ಟಿಂ ಆಮ್ಕಾಂ ಸಮಾಧಾನ್ ದೀವ್ನ್ ಜಯ್ತೆವಂತ್ ಜಾಲ್ಲೊ ಗ್ರಾಯ್ಕ್ ತಿಸ್ರೆ ಪಾವ್ಟಿಂಯೀ ಆಮ್ಕಾಂ ಸಮಾಧಾನ್ ದೀಂವ್ಕ್ ಸಕ್ತಲೊ.”

ಸರ್ದಾರ್ ಸಿಮಾಂವ್ಕ್ ಹ್ಯಾ ಉತ್ರಾಂಚಿ ಧಾರ್ ಸಮ್ಜಲಿ ತರೀ:

“ಹುಜೂರ್?” ವಿಚಾರ್ಲೆಂ ತಾಣೆಂ.

ಟಿಪ್ಪು ಸುಲ್ತಾನ್, ಸಟ್ಟ್ ಕರ್ನ್ ಘುಂವೊನ್, ಸರ್ದಾರ್ ಸಿಮಾಂವ್ಕ್ ಫುಡ್ ಕರ್ನ್ ರಾವ್ಲೊ.

“ತುಂ ಜಾಣಾಂಯ್” ಮ್ಹಣಾಲೊ ತೊ. “ಥೊಡ್ಯಾ ದಿಸಾಂ ಆದಿಂ ಆಮ್ಚೊ ಪ್ರತಿನಿಧಿ ಜಾವ್ನ್, ಕುರಿಯೆಲಾಕ್ ತುಂ ಗೆಲ್ಲೊಯ್.”

“ವ್ಹಯ್ ಹುಜೂರ್…”

“ವಸೂಲೆಚೆಂ ಕಾಮ್ ಬರ‍್ಯಾನ್ ಜಾಲಾಂ.”

“ಬಾದಶಹಾ ತಶೆಂ ಚಿಂತಾತ್ ಜಾಲ್ಯಾರ್, ಸೆವಕಾಕ್ ಸಂತೊಸ್.”

“ಆಮ್ಕಾಂಯೀ ಸಂತೊಸ್. ತ್ಯಾ ಶಿವಾಯ್…” ಟಿಪ್ಪು ಸುಲ್ತಾನ್ ಪರ್ತ್ಯಾನ್ ಘುಂವ್ಲೊ, ಆನಿ ಪಾಸಾಯೊ ಮಾರಿತ್ತ್, ಚಿಂತುನ್‍ಸೊ, ಉಲಂವ್ಕ್ ಲಾಗ್ಲೊ:

“ತ್ಯಾ ಶಿವಾಯ್, ತ್ಯಾಚ್ ವೆಳಾರ್, ಕುರಿಯೆಲಾಂತ್ ಆಮ್ಚೆ ಖಬ್ರಿ ಆನಿ ಗೂಢಚಾರ್ ಹುಶಾರ್ ಆಸ್‍ಲ್ಲ್ಯಾನ್, ಥೊಡೆ ಪೊಕ್ರಿ ಆನಿ ರಾಜ್‍ದ್ರೋಹಿ ನಸ್ರಾನಿ ಸಾಂಪಡ್ಲೆ ಆನಿ ಖಲೀಫ್ ದೌಲತಾಂತ್ ಝಡ್ತೆಕ್ ಉಬೆ ಜಾಲೆ.”

“ಜೀ ಹುಜೂರ್…” ಸರ್ದಾರ್ ಸಿಮಾಂವ್ಚ್ಯಾ ಪಾಟಿಚ್ಯಾ ಕಣ್ಯಾಂತ್ಲ್ಯಾನ್, ಸವ್ಕಾಸ್, ಹಿಂವ್ ಚರೊಂಕ್ ಲಾಗ್ಲೆಂ.

“ತ್ಯಾ ವೆಳಾರ್…” ಉಲಂವ್ಕ್ ಲಾಗ್ಲೊ ಮೈಸೂರ್ಚೊ ವಾಗ್. “ಆನಿ ತ್ಯಾ ವೆಳಾರ್, ಆಮ್ಚೊ ಪ್ರತಿನಿಧಿ ಜಾವ್ನ್ ತುವೆಂ ದಿಲ್ಲೆಂ ತೆಂ ಖಡಕ್ಕ್ ನಿತಿಚೆಂ ಫರ್ಮಾಣ್ ಆಮಿ ಭೋವ್ ಮೆಚ್ವಲ್ಯಾಂವ್.”

ಸರ್ದಾರ್ ಸಿಮಾಂವ್ ಉಲಂವ್ಕ್ ನಾ. ತಾಕಾ ಧೈರ್ ಮೆಳೊಂಕ್ ನಾ. ಮತಿ ಭಿತರ್‌ಚ್, ಸರ್ದಾರಾಂಚ್ಯಾ ಸಿನೊಲೆಚೊ ತಾಣೆಂ ಉಡಾಸ್ ಕಾಡ್ಲೊ.

“ಪುಣ್…” ಮುಖಾರ್ಸಿಲೆಂ ಟಿಪ್ಪುನ್. “ಪುಣ್, ಶಿಕ್ಷೆಕ್ ರಾಕೊನ್, ಬೋಳೂರ್ಚ್ಯಾ ಬಂಧೀಖಾನ್ಯಾಂತ್ ಕೈದ್ ಆಸ್‍ಲ್ಲೆ ತೆ ನಸ್ರಾನಿ ಅಪ್ರಾಧಿ ಸಗ್ಳೆ ನಪಂಯ್ಚ್ ಜಾಲೆ!” ಧರ್ಣಿಕ್ ಖೊಟ್ ಮಾರ್ಲಿ ತಾಣೆಂ.

“ಜೀ ಹುಜೂರ್” ಮ್ಹಣಾಲೊ ಸರ್ದಾರ್ ಸಿಮಾಂವ್, ಹಾಳ್ವಾಯೆನ್. “ಭೋವ್ ಲಜೆಚೆಂ ಘಟನ್ ತೆಂ.”

“ವ್ಹಯ್” ಮ್ಹಣಾಲೊ ಸುಲ್ತಾನ್, ರಾವೊನ್. “ತಶೆಂ ಆಮಿ ಬಾರ್ಕೂರಾಂತ್ ಮ್ಹಳ್ಳೆಂ, ಆನಿ ತಸಲ್ಯಾ ಘಟನಾಚೆಂ ಕಾರಣ್ ಸಮ್ಜೊನ್, ಚುಕಿದಾರಾಂಕ್ ಫಾವೊತಿ ಶಿಕ್ಷಾ ಫರ್ಮಾಂವ್ಚ್ಯಾ ಖಾತಿರ್, ಪರ್ತ್ಯಾನ್ ತುಕಾ ಆಮಿ ಮಂಗ್ಳುರಾಕ್, ತುರ್ತಾನ್ ಧಾಡ್‍ಲ್ಲೊ.”

ಸರ್ದಾರ್ ಸಿಮಾಂವ್ ಉಲಂವ್ಕ್ ನಾ. ತಾಚಿ ತಕ್ಲಿ ಚಿಕ್ಕೆ ಘುಂವೊಂಕ್ ಲಾಗ್ಲಿ. ಟಿಪ್ಪು ಸುಲ್ತಾನ್ ಮುಖಾರ್ ಉಲಯ್ಲೊ:

“ಥಂಯ್ಸರೀ ತುವೆಂ ಕೆಲ್ಲೆಂ ಕಾಮ್ ಬರಾಬರ್ ಜಾಲಾಂ – ಝಡ್ತೆ ಪ್ರಕಾರ್ ತೀರ್ಪ್, ಆನಿ ನಿತಿ ಪ್ರಕಾರ್ ಫರ್ಮಾಣ್. ಕುರಿಯೆಲಾಂತ್ ತುವೆಂ ಕೆಲ್ಲಿ ನೀತ್, ಆನಿ ಫರ್ಮಾಯಿಲ್ಲಿ ಶಿಕ್ಷಾ ಆಮ್ಕಾಂ ಪಸಂದ್ ಜಾಲ್ಯಾ. ಪೈಗಂಬರ್ ಟಿಪ್ಪು ಸುಲ್ತಾನ್ ಸೈಯ್ಯದ್ ಬಹಾದುರಾಚ್ಯಾ ರಾಜ್ವಟಾಂತ್, ನಿತಿ ವಿಷಯಿಂ ಜಾತ್ ವಾ ಮತ್ ಬೇಧ್ ಆಸೊಂಕ್ ನಜೊ ಮ್ಹಣ್ ತುವೆಂ ರುಜು ಕೆಲೆಂಯ್ – ದುಸ್ರೆ ಪಾವ್ಟಿಂಯೀ ಆಮ್ಕಾಂ ತುವೆಂ ಸಮಾಧಾನ್ ದಿಲೆಂಯ್. ತರೀ…” ತೊ ಚಿಕ್ಕೆ ರಾವ್ಲೊ.

“ತರೀ ಹುಜೂರ್?”

“ತರೀ – ಆಮಿ ಆದಿಂಚ್ ಮ್ಹಳ್ಳೆಪರಿಂ – ಕುರಿಯೆಲಾಂತ್ ಹ್ಯಾ ಪಾವ್ಟಿಂ ಸಂಭವ್‍ಲ್ಲಿಂ ಘಟನಾಂ, ತ್ಯಾ ಪ್ರದೇಶಾಂತ್ ಆಮ್ಚ್ಯಾ ಅಧಿಕಾರಾಚಿಂ ಖೆಳ್ಕುಳಾಂ ಕರ್ತಾತ್ ಮ್ಹಳ್ಳೆಂ ನೀಜ್. ದೆಕುನ್, ದುಸ್ರೆ ಪಾವ್ಟಿಂ ತುವೆಂ ದಿಲ್ಲೆಂ ಫರ್ಮಾಣ್ ಆನಿ ಆಮ್ಚಿ ಖುಶಿ ಜ್ಯಾರಿ ಕರುಂಕ್ – ತಶೆಂಚ್, ಆಮ್ಚೊ ಮಾನ್ ಭರ್ತಿ ಕರ್ನ್ ಆಮ್ಕಾಂ ಸಮಾಧಾನ್ ದೀಂವ್ಕ್ – ಪರತ್ ತುವೆಂ ಕುರಿಯೆಲಾಕ್ ವಚಜಾಯ್” ಮ್ಹಣಾಲೊ ತೊ, ನಹಿಂ ಹಾಳ್ವಾಯೆನ್, ಬಗಾರ್, ಚಾಟಿಯೆಚ್ಯಾ ಮಾರಾಂಪರಿಂ ಉತ್ರಾಂ ಉಸ್ಳಾವ್ನ್.

ಹೆಂ ಫರ್ಮಾಣ್ ಆಯ್ಕೊನ್ ಸರ್ದಾರ್ ಸಿಮಾಂವ್ಕ್ ಮತಿ ಭಿತರ್ ಚಿಕ್ಕೆ ಸಮಾಧಾನ್ ಮಾತ್ರ್ ನಹಿಂ, ಇಲ್ಲೊ ಸಂತೊಸ್‍ಯೀ ಜಾಲೊ. ನಿಜಾಯ್ಕೀ ಇತ್ಲೆ ಸುಲಭಾಯೆನ್ ಸುಟ್ಚೆಂ ಪ್ರಸಂಗ್ ತಾಣೆಂ ಅಪೇಕ್ಸುಂಕ್ ನಾತ್‍ಲ್ಲೆಂ. ಟಿಪ್ಪುಚ್ಯಾ ಆತಾಂಚ್ಯಾ ಮನೋಭಾವಾಂತ್ ಕೊಣಾಯ್ಚೊ ಜೀವ್ ಸುರಕ್ಷಿತ್ ನಾತ್‍ಲ್ಲೊ. ಅಸಲ್ಯಾ ಉಸ್ಮೊಡೆಚ್ಯಾ ಘೊಟಾಳ್ಯಾಂತ್ಲೊ ಸುಟೊನ್, ಆಪ್ಲ್ಯಾ ಮೊಗಾಚ್ಯಾ ಮಂಗ್ಳುರಾಕ್ ವಚೊನ್, ಥೊಡೊ ಕಾಳ್ ಪುಣೀ ಸ್ವತಂತ್ರ್ ರಾವ್ಯೆತ್ ಮ್ಹಣ್ ತಾಕಾ ಭೊಗ್ಲೆಂ.

ಟಿಪ್ಪುಯೀ ತೆಂಚ್ ಚಿಂತಾಲೊ ಮ್ಹಣ್ ದಿಸ್ತಾ.

“ಬಾದಶಹಾಚೆಂ ಕಸಲೆಂಯೀ ಫರ್ಮಾಣ್ ಜಾರಿ ಕರುಂಕ್, ಖಾಲ್ತೊ ಸೆವಕ್ ಕೆದಾಳಾಯೀ ತಯಾರ್” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ತಯಾರ್ ಆಸ್ಲ್ಯಾರ್ ಮಾತ್ರ್ ಪಾವನಾ. ಹ್ಯಾ ಪಾವ್ಟಿಂಯೀ ತುವೆಂ ಖಂಡಿತ್ ಜಾವ್ನ್ ಜಿಕಜಾಯ್!”

“ಜೀ ಹುಜೂರ್! ಮ್ಹಜೊ ಜೀವ್ ತರೀ ದೀವ್ನ್, ತುಮ್ಚೆಂ ಫರ್ಮಾಣ್ ಜಾರಿ ಕರುಂಕ್ ಹಾಂವ್ ಸಾಧನ್ ಕರ್ತಲೊಂ.”

“ತೆಂ ಆಮಿ ಜಾಣಾಂವ್… ತುಕಾ ಹಾಂವೆಂ ಬಾರ್ಕೂರಾಂತ್ ಹುಕುಮ್ ದಿಲ್ಲೆ ವಿಷಯ್ ಉಗ್ಡಾಸ್ ಆಸಾತ್‍ಮೂ?”

“ಆಸಾತ್ ಹುಜೂರ್!”

“ತುವೆಂ ಬೋಳೂರ್ ಠಾಣ್ಯಾಕ್ ಪಾಟಿಂ ವಚೊನ್, ಠಾಣ್ಯಾಂತ್ಲ್ಯಾ ಹುದ್ದೆದಾರಾಂಚಿ, ಜೈಲಾಚ್ಯಾ ಅಧಿಕಾರಿಂಚಿ ಆನಿ ರಾಕ್ವಲ್ಯಾಂಚಿ ಝಡ್ತಿ ಕರಿಜಾಯ್ – ಥೊಡ್ಯೊ ತಕ್ಲ್ಯೊ ಝಡ್ಲ್ಯಾರೀ ಪರ್ವಾ ನಾ ಮ್ಹಳ್ಳೆಂ ಆಮಿ. ಪ್ರತ್ಯೇಕ್ ಜಾವ್ನ್, ತೆ ಕೈದಿ ಫರಾರಿ ಜಾಂವ್ಕ್ ಕೋಣ್ ಕಾರಣ್ ಮ್ಹಳ್ಳಿ ಸ್ಪಷ್ಟ್ ರುಜ್ವಾತ್ ಸಂಪಾದ್ಸಿಜಾಯ್ ಮ್ಹಣ್ ಆಮಿ ಹುಕುಮ್ ದಿಲ್ಲಿ… ಕಾಣೆ ಜಾಲ್ಲ್ಯಾ ನಸ್ರಾನಿ ಕೈದಿಂಕ್ ತೀನ್ ದಿಸಾಂ ಭಿತರ್ ಪರತ್ ಕುಡಾಂವ್ಚಿ ಜವಾಬ್ದಾರಿ ಬೋಳೂರ್ಚ್ಯಾ ಖಿಲ್ಲೆದಾರಾಚಿ – ಹೆಂ ಸರ್ವ್ ತುವೆಂ ಜಾರಿ ಕೆಲಾಂಯ್. ತರೀ, ಹಾಂತುಂ ಏಕ್ ಗಜಾಲ್ ಮ್ಹಾಕಾ ವಿಚಿತ್ರ್ ದಿಸ್ತಾ…” ಮ್ಹಣೊನ್, ಟಿಪ್ಪು ಮಿಶ್ಯೊ ವೊಳಾಂವ್ಕ್ ಲಾಗ್ಲೊ.

ಸರ್ದಾರ್ ಸಿಮಾಂವ್ನ್ ಜಾಪ್ ಕರುಂಕ್ ನಾ. ಥೊಡ್ಯಾ ವೆಳಾ ಆದಿಂ ತಾಕಾ ಭೊಗ್‍ಲ್ಲೆಂ ಸಮಾಧಾನ್ ಆನಿ ಸಂತೊಸ್, ಭಿತರ್ಲ್ಯಾ ಭಿತರ್ ಇರ್ಲೊ.

“ವ್ಹಯ್” ಉಲಯ್ಲೊ ಟಿಪ್ಪು. “ವಿಚಿತ್ರ್ ಕಿತೆಂ ಮ್ಹಳ್ಯಾರ್, ಹ್ಯಾ ಸರ್ವ್ ಗಲಾಟ್ಯಾಂತ್, ಉರ್ವಾಚ್ಯಾ ಮೊಳ್ಯಾಂತ್ ದಾಡ್ ಘಾಲ್ಚ್ಯಾ ವೆಳಾರ್ ಮೆಲ್ಲ್ಯಾ ಎಕ್ಲ್ಯಾಕ್ ಸೊಡ್ಲ್ಯಾರ್, ಹೆರ್ ನಸ್ರಾನಿ ಕೊಣೀ ಮೊರೊಂಕ್ ನಾಂತ್! ಸಾಂಪಡ್ಲೆಲೆ ಗ್ರಾಯ್ಕ್ ಜಾಲ್ಯಾರೀ, ತುವೆಂ ಫರ್ಮಾಯಿಲ್ಲಿ ಶಿಕ್ಷಾ ಭೊಗುಂಕ್ ಪಾವೊಂಕ್ ನಾಂತ್! ಆನಿ ಆಮ್ಕಾಂ ಮೆಳ್ಳೆಲೆಂ ತರೀ ಕಿತೆಂ?

“ದಾಡ್ ಘಾಲ್ಚ್ಯಾ ವೆಳಾರ್ ಎಕ್ಲೊ ಶಿಪಾಯ್ ಮೆಲೊ, ಆನ್ಯೇಕ್ಲೊ ಕುರ್ಡೊ ಜಾಲೊ! ತುವೆಂ ತ್ಯಾ ಅಪ್ರಾಧಿ ನಸ್ರಾನಿಂಕ್ ಶಿಕ್ಷಾ ಫರ್ಮಾಯಿಲ್ಲ್ಯಾ ಥೊಡ್ಯಾಚ್ ಘಂಟ್ಯಾಂ ಭಿತರ್, ಆಮ್ಚೊ ಖಬ್ರಿ ಜಾವ್ನಾಸ್‍ಲ್ಲೊ ಕುಞÂಕುಟ್ಟಿ ಬಂಧೀಖಾನ್ಯಾ ಲಾಗಿಂ ಮೊರೊನ್ ಪಡ್ಲೊ! ಆಮ್ಚ್ಯಾ ಸರ್ಕಾರಾಕ್ ಜಾಯ್ತೊ ಘುಟ್ ದೀವ್ನ್, ಪಾತ್ಯೆಣೆನ್ ಸೆವಾ ಕರ್ನ್ ಆಸ್‍ಲ್ಲೊ ತೊಪಾಸಿ ಕಾರ್ಡೊಜ್, ತ್ಯೆಚ್ ರಾತಿಂ, ನ್ಹಂಯ್ತ್ ಮೊರೊನ್ ಪಡ್ಲೊ!

“ಉಪ್ರಾಂತ್ ಜಾಲ್ಯಾರೀ, ಎಕಾ ಹಫ್ತ್ಯಾ ಭಿತರ್, ಸಬಾರ್ ವರ್ಸಾಂ ಆಮ್ಚ್ಯಾ ಸರ್ಕಾರಾಂತ್ ಪಾತ್ಯೆಣೆಚೊ ಹುದ್ದೆದಾರ್ ಜಾವ್ನಾಸ್‍ಲ್ಲೊ ಮಹಮ್ಮದಾಲಿಯೀ ಜೀವ್ಘಾತ್ ಕರ್ನ್ ಮೆಲೊ!

“ಇತ್ಲೆಂ ಜಾಲ್ಯಾರೀ, ಕೈದಿ ನಸ್ರಾನಿ ಕಿತೆಂ ಜಾಲೆ, ವಾ, ಕೊಣಾ ವರ್ವಿಂ ತೆ ಫರಾರಿ ಜಾಲೆ ಮ್ಹಳ್ಳೆಂ ಕಳಿತ್ ಜಾಂವ್ಕ್ ನಾ! ಗಜಾಲ್ ವಿಚಿತ್ರ್ ಮಾತ್ರ್ ನಹಿಂ – ತುವೆಂಚ್ ಮ್ಹಳ್ಳೆಪರಿಂ – ಲಜೆಚಿ!”

“ವ್ಹಯ್ ಹುಜೂರ್…” ಪಿಂರ್ಗಲೊ ಸರ್ದಾರ್ ಸಿಮಾಂವ್.

“ದೆಕುನ್, ಫಾಲ್ಯಾಂ…” ಮ್ಹಣಾಲೊ ಟಿಪ್ಪು. “ಫಾಲ್ಯಾಂ ಸುಕ್ರಾರ್, ಫಾಲ್ಯಾಂಚೊ ಏಕ್ ದೀಸ್ ವಿಶೆವ್ ಘೆವ್ನ್, ಪೊರ್ವಾಂ ಭಾಯ್ರ್ ಸರೊನ್ ತುವೆಂ ಕುರಿಯೆಲಾಕ್ ವಚಜಾಯ್, ಆನಿ ಥಂಯ್ಚೊ ಮಿಸ್ತೆರ್ ಉಸ್ತುನ್ ಉಗ್ತೊ ಕರಿಜಾಯ್.”

“ಜೀ, ಹುಜೂರ್!”

“ಖಿಲ್ಲೆದಾರಾಕ್ ತೀಸ್ ದಿಸಾಂಚೊ ವಾಯ್ದೊ ದಿಲಾ. ತೊ ಸಲ್ವತ್ ಜಾಲ್ಯಾರ್ ಪೊಳಾಪಳ್ ಘೆಂವ್ಕ್ ಪುರೊ. ತಾಣೆಂ ನಪಂಯ್ಚ್ ಜಾಯ್ನಾಶೆಂ, ಆನಿ ಜಿವೊಚ್ ಹಾಂಗಾ ಪಾವಶೆಂ, ಪಳೆಂವ್ಚಿ ಜವಾಬ್ದಾರಿ ತುಜಿ!”

“ಜೀ, ಹುಜೂರ್!”

“ಎದೊಳ್ಚೆಪರಿಂಚ್, ತಿಸ್ರೆ ಪಾವ್ಟಿಂಯೀ ಸಲ್ವನಾಕಾ. ಆತಾಂ ವಚ್ಯೆತ್, ತುಕಾ ಪುರಾಸಣ್ ಆಸ್ತೆಲಿ” ಮ್ಹಣೊನ್, ಟಿಪ್ಪುನ್ ಭೆಟ್ ಆಖೇರ್ ಕೆಲಿ.

ಮುಖ್ಲ್ಯಾ ಅವಸ್ವರಾಂತ್…

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಆಮಿ ಫಾಯ್ಸ್ ಕೆಲ್ಲ್ಯೊ ಆದ್ಲ್ಯೊ ಕಾದಂಬರಿ