ಮೊನ್ನೆಯ ಅಪಘಾತದಲ್ಲಿ ಓರ್ವ ವ್ಯಕ್ತಿ ಆಶ್ಚರ್ಯಕರ ರೀತಿಯಲ್ಲಿ ಹೊರ ಬಿದ್ದು ಬಚಾವಾಗಿದ್ದು ಬಿಟ್ಟರೆ, 241 ಪ್ರಯಾಣಿಕರು ಕ್ಷಣ ಮಾತ್ರದಲ್ಲಿ ಸುಟ್ಟು ಭಸ್ಮವಾಗಿದ್ದಾರೆ. ಅಷ್ಟೇ ಅಲ್ಲದೆ, ವಿಮಾನ ಬಿದ್ದ ಸ್ಥಳದಲ್ಲಿದ್ದವರೂ ಮಡಿದಿದ್ದಾರೆ. ಮಂಗಳೂರಿನ ಅಪಘಾತದಲ್ಲಿ ವಿಮಾನದ ರೆಕ್ಕೆ ಮುರಿದಿದ್ದರಿಂದ 8 ಜನರು ಬಚಾವಾಗಿ, ಉಳಿದ 158 ಜನರು ಸುಟ್ಟು ಕರಕಲಾಗಿದ್ದರು. ಸಾಮಾನ್ಯವಾಗಿ ವಿಮಾನ ಅಪಘಾತವೆಂದರೆ ಇಂತಹ ದುರಂತ ತಪ್ಪಿದ್ದಲ್ಲ. ಅಂತಹ ಗಟ್ಟಿ ಅದೃಷ್ಟವಿದ್ದಲ್ಲಿ ಮಾತ್ರ ವಿಮಾನ ಪ್ರಯಾಣಿಕರು ಬಚಾವಾಗಲು ಸಾಧ್ಯ.

ಅಂತಹ ಅತ್ಯಪರೂಪದ, ನಂಬಲು ಕಷ್ಟಕರವಾದ, ಅದೃಷ್ಟದ ಜೊತೆಗೆ ಪೈಲಟ್‍ನ ಸಮಯಪ್ರಜ್ಞೆ ಮತ್ತು ಅಮೋಘ ಸಾಹಸದಿಂದ, ಅವಘಡಕ್ಕೀಡಾದ ವಿಮಾನವು ಕ್ಷೇಮಕರವಾಗಿ ಬಚಾವಾದ ಕಥೆ ಇದು. 2009ರಲ್ಲಿ ನಡೆದ ಈ ಘಟನೆ ಅತ್ಯಂತ ವಿಸ್ಮಯಕರವೂ, ವಿಮಾನಯಾನದ ಚರಿತ್ರೆಯಲ್ಲಿ ಅತೀ ಮಹತ್ವದ ಬೆಳವಣಿಗೆಯಾಗಿಯೂ ದಾಖಲಾಗಿದೆ.

ಅದೇ, ಹಡ್ಸನ್ ವಿಮಾನ ದುರಂತ! Hudson Air Crash.

ಹೌದು. 16 ವರ್ಷಗಳ ಹಿಂದೆ ಅಮೆರಿಕದ ನ್ಯೂಯಾರ್ಕ್ನಲ್ಲಿ ಈ ಘಟನೆ ನಡೆದಿತ್ತು. 2009ರ ಜನವರಿ 15ರಂದು ಗಗನಕ್ಕೇರಿದ ಕೆಲವೇ ಕ್ಷಣಗಳಲ್ಲಿ ಆ ವಿಮಾನಕ್ಕೆ ಹಕ್ಕಿಗಳ ಹಿಂಡು ಎದುರಾಗಿತ್ತು. ಕೂಡಲೇ ಎರಡೂ ಎಂಜಿನ್‍ಗಳು ಸ್ತಬ್ದವಾದವು. ವಿಮಾನ 3000ಕ್ಕಿಂತಲೂ ಹೆಚ್ಚು ಅಡಿ ಮೇಲೆ ಇತ್ತು. ತುರ್ತು ಲ್ಯಾಂಡಿಂಗ್ ಮಾಡುವ ಪ್ರಯತ್ನ ನಡೆಸಿದರೂ, ಅದು ಸಾಧ್ಯವಾಗಲಿಲ್ಲ. ಆದರೂ ವಿಮಾನ ಕ್ಷೇಮವಾಗಿ ಲ್ಯಾಂಡ್ ಆಗಿತ್ತು, ನೆಲದ ಮೇಲಲ್ಲ, ನೀರಿನ ಮೇಲೆ!!! Most successful ditching in aviation history ಎಂದು ತಜ್ಷರು ಇದನ್ನು ಬಣ್ಣಿಸಿದ್ದರು. ಪ್ರಪಂಚದಾದ್ಯಂತ ಬಹಳಷ್ಟು ಚರ್ಚೆ ಮತ್ತು ಸಂಶೋಧನೆಗೆ ಈ ಘಟನೆ ಈಡಾಯಿತು.

ನಿಮಿಷ ಕಳೆಯುವುದರಲ್ಲಿ ಹಕ್ಕಿಗಳ ಡಿಕ್ಕಿ!

ಅಂದು ಮಧ್ಯಾಹ್ನ ಸುಮಾರು ಮೂರುವರೆ ಗಂಟೆಗೆ ನ್ಯೂಯಾರ್ಕ್‍ನ ಲಾ-ಗಾರ್ಡಿಯಾ ವಿಮಾನ ನಿಲ್ದಾಣದಿಂದ ಯುಎಸ್ ಏರ್‌ವೇಸ್ ಫ್ಲೈಟ್ 1549 ವಿಮಾನವು ತನ್ನೊಡಲಲ್ಲಿ 155 ಜನರನ್ನು ಹೊತ್ತು ಟೇಕ್‍ಆಫ್ ಆಗಿತ್ತಷ್ಟೇ. ಅದರ ಕ್ಯಾಪ್ಟನ್ 57 ವರ್ಷದ ಚೆಸ್ಲಿ ಸಲ್ಲಿ ಸಲ್ಲನ್‍ಬರ್ಗರ್ ಮತ್ತು ಫಸ್ಟ್ ಆಫೀಸರ್ ಜೆಫ್ರಿ ಬಿ. ಸ್ಕೈಲ್ಸ್ ಕರ್ತವ್ಯದಲ್ಲಿದ್ದರು. ಒಂದು ನಿಮಿಷದಲ್ಲಿ, ಅಂದರೆ ವಿಮಾನ 700 ಅಡಿ ಎತ್ತರ ತಲುಪಿದಾಗ, ಮೊದಲ ವರದಿಯನ್ನು ಕಳುಹಿಸಲಾಗಿತ್ತು. 3000 ಅಡಿ ತಲುಪುವಾಗ ಕೆನಡಾ ಗೂಸ್ ಹಕ್ಕಿಗಳ ಹಿಂಡು ಎದುರಾಯಿತು. ಕ್ಷಣಮಾತ್ರದಲ್ಲಿ ಹಕ್ಕಿಗಳು ಡಿಕ್ಕಿಯಾಗಿ ಎಂಜಿನ್‍ಗಳಲ್ಲಿ ಬೆಂಕಿ ಕಾಣಿಸಿಕೊಂಡು ಕೂಡಲೇ ಎರಡೂ ಎಂಜಿನ್‍ಗಳು ವಿಫಲವಾದವು.

ಕೂಡಲೇ ಪೈಲಟ್ ಇಂಜಿನ್ ಮತ್ತೆ ಸ್ಟಾರ್ಟ್ ಮಾಡಲು ಮಾಡಿದ ಯತ್ನ ಸಫಲವಾಗಲಿಲ್ಲ. “ಹಕ್ಕಿಗಳು ಬಡಿದಿವೆ. ಎರಡೂ ಇಂಜಿನ್ ಫೈಲ್ ಆಗಿವೆ. ನಾವು ಲಾ-ಗಾರ್ಡಿಯಾಗೆ ಮರಳುತ್ತಿದ್ದೇವೆ” ಎಂದು ಕ್ಯಾಪ್ಟನ್ ಏರ್ ಟ್ರಾಫಿಕ್ ಕಂಟ್ರೋಲ್‍ಗೆ ಕರೆ ಮಾಡಿ ತುರ್ತು ಸಂದೇಶ ಕಳಿಸಿದರು. ಲಾ-ಗಾರ್ಡಿಯಾದ 3ನೇ ರನ್‍ವೇಯಲ್ಲಿ ವಿಮಾನದ ತುರ್ತು ಲ್ಯಾಂಡಿಂಗ್ ಮಾಡಬಹುದೆಂಬ ಸೂಚನೆ ದೊರಕಿತು. ಆದರೆ ಮರು ಕ್ಷಣವೇ ಕ್ಯಾಪ್ಟನ್ ಸಲ್ಲಿ, “ನನಗದು ಸಾಧ್ಯವಿಲ್ಲ” ಎಂದರು. ವಿಮಾನವು ತಕ್ಷಣ ಎಡಕ್ಕೆ ತಿರುಗಿತು.

ಎಂಜಿನ್ ಸ್ತಬ್ದವಾದರೂ ವಿಮಾನ 19 ಸೆಕೆಂಡುಗಳ ಕಾಲ ಮೇಲಕ್ಕೇರಿತ್ತು. ನಂತರ ಕೆಳಮುಖವಾಗಿ ಹೆಚ್ಚು ವೇಗವಾಗಿ ಮುನ್ನುಗ್ತುತ್ತಿತ್ತು. ಕ್ಯಾಪ್ಟನ್ ಸಲ್ಲಿಯ ಮೆದುಳು ಮಿಂಚಿನ ವೇಗದಲ್ಲಿ ಕಾರ್ಯ ನಿರ್ವಹಿಸುತ್ತಿತ್ತು. ಏನೇ ಮಾಡುವುದಿದ್ದರೂ ಕೆಲವೇ ಸೆಕೆಂಡುಗಳ ಸಮಯವಷ್ಟೇ ಉಳಿದಿತ್ತು. ಎಲ್ಲರ ಜೀವ ಹೋಗುವ ಸಾಧ್ಯತೆಯಿತ್ತು. ಆದರೆ ಕ್ಯಾ. ಸಲ್ಲಿಯ ಮನಸ್ಸಿನಲ್ಲಿದ್ದದ್ದು ಒಂದೇ – ‘ಯಾರಿಗೂ ಯಾವುದೇ ತೊಂದರೆಯಾಗದೆ ಎಲ್ಲರನ್ನೂ ಸುರಕ್ಷಿತವಾಗಿ ಉಳಿಸುವುದು’ – ಇದೊಂದೇ ಚಿಂತೆ. ಶರವೇಗದಲ್ಲಿ ಆತ ನ್ಯೂಜೆರ್ಸಿ ವಿಮಾನ ನಿಲ್ದಾಣಕ್ಕೆ ಕರೆ ಮಾಡಿ ಎಮರ್ಜೆನ್ಸಿ ಲ್ಯಾಂಡಿಂಗ್ ಮಾಡುವ ಸಾಧ್ಯತೆಯನ್ನೂ ವಿಚಾರಿಸಿದರು. ಆದರೆ ಅದೂ ಅಸಾಧ್ಯವೆಂದು ಕಂಡುಕೊಂಡ ಕ್ಯಾಪ್ಟನ್, ತಾನು ಹಡ್ಸನ್ ನದಿಯ ಕಡೆಗೆ ವಿಮಾನವನ್ನು ಒಯ್ಯುತ್ತೇನೆಂದು ಹೇಳಿದರು.

ಹಡ್ಸನ್ ನದಿಯೆಂಬ ಆಪತ್ಬಾಂಧವ!

ಹಡ್ಸನ್ ನದಿ 315 ಮೈಲು ಉದ್ದವಿದ್ದು ನ್ಯೂಯಾರ್ಕ್ ಮತ್ತು ನ್ಯೂಜೆರ್ಸಿ ಮಧ್ಯೆ ಗಡಿಯಂತೆ ಹರಿಯುತ್ತದೆ. ಸಣ್ಣ ನದಿಯಾದರೂ ವಿಶಾಲವಾಗಿದ್ದು, ಅಟ್ಲಾಂಟಿಕ್ ಸಾಗರವನ್ನು ಸೇರುತ್ತದೆ. ಕ್ಯಾಪ್ಟನ್ ವಿಮಾನವನ್ನು ಹಡ್ಸನ್ ನದಿಯತ್ತ ತಿರುಗಿಸುತ್ತಿದ್ದಾಗಲೇ ಕ್ರೂ ಮೆಂಬರ್‌ಗಳಿಗೆ ಏನೇನು ಮಾಡಬೇಕೆಂಬುದನ್ನು ತ್ವರಿತವಾಗಿ ತಿಳಿಸಿದ್ದರು. ಪ್ರಯಾಣಿಕರಿಗೆ ಈಗಾಗಲೇ ಅಪಾಯದ ಅರಿವಾಗಿತ್ತು. ಹಕ್ಕಿಗಳ ಬಡಿದಾಟ ಮತ್ತು ನಂತರದ ಶಬ್ದಗಳಿಂದ ಅವರಿಗೆ ಅಗಿರಬಹುದಾದ ಅಪಘಾತದ ಅಂದಾಜು ಲಭಿಸಿತ್ತು.

ಕ್ಯಾಪ್ಟನ್ ಮತ್ತು ಸಿಬಂದಿಗಳು ಪ್ರಯಾಣಿಕರಲ್ಲಿ ಧೈರ್ಯ ತುಂಬಿಸಿದರು ಮತ್ತು ತುರ್ತಾಗಿ ಮಾಡಬೇಕಾದುದನ್ನು ತಿಳಿಸಿದರು.

150 ಮೈಲು ವೇಗದಲ್ಲಿದ್ದ ವಿಮಾನವನ್ನು ಪೈಲಟ್ ಮ್ಯಾನ್‍ಹಟನ್ ಬಳಿ ನದಿಯಲ್ಲಿ ಇಳಿಸಿದರು. ನಂತರ ಆತ ಹೇಳಿದ್ದರು: “ನನಗೆ ಲಭಿಸಿದ ತರಬೇತಿಯ ಕಾರಣ, ಜನರನ್ನು ಉಳಿಸಲು ಸುಲಭವಾಗುವ ಹಾಗೆ ದೋಣಿಗಳಿದ್ದ ಜಾಗದ ಹತ್ತಿರವೇ ವಿಮಾನವನ್ನು ಇಳಿಸಿದೆ.”

ದೇವರಾದ ಕ್ಯಾಪ್ಟನ್ ಚೆಸ್ಲಿ ಸಲ್ಲಿ ಸಲ್ಲನ್‍ಬರ್ಗರ್

ಕ್ಯಾಬಿನ್ ಕ್ರೂ ಸದಸ್ಯರು ಎಲ್ಲಾ ಪ್ರಯಾಣಿಕರನ್ನು ತುರ್ತು ಬಾಗಿಲ ಮೂಲಕ ಹೊರ ತರಲು ಪ್ರಾರಂಭಿಸಿದರು. ಓರ್ವ ಪಯಣಿಗ ವೀಲ್‍ಚೇರಿನಲ್ಲಿದ್ದ. ನೀರಿನ ಪ್ರವಾಹ ಹೆಚ್ಚಾಗಿದ್ದರಿಂದ ವಿಮಾನವು ನಿಧಾನವಾಗಿ ಮುಳುಗಲಾರಂಭಿಸಿತ್ತು. ಉದ್ವೇಗದಲ್ಲಿದ್ದ ಓರ್ವ ಪ್ರಯಾಣಿಕ ಗಡಿಬಿಡಿಯಿಂದ ಹಿಂದಿನ ಬಾಗಿಲನ್ನು ತೆರೆದಿದ್ದರಿಂದ ಇನ್ನಷ್ಟು ನೀರು ಒಳಗೆ ನುಗ್ಗಿತು. ನೀರಿನಲ್ಲಿ ಮುಳುಗುತ್ತಿದ್ದ ವಿಮಾನದಿಂದ ಎಲ್ಲರನ್ನು ರಕ್ಷಿಸಿದ ಮೇಲೂ ಕ್ಯಾಪ್ಟನ್ ಚೆಸ್ಲಿ ಎರಡು ಬಾರಿ ವಿಮಾನದೊಳಗೆ ಪ್ರವೇಶಿಸಿ ಯಾರೂ ಒಳಗೆ ಉಳಿದಿಲ್ಲವೆಂಬುದನ್ನು ಖಚಿತಪಡಿಸಿ, ಕೊನೆಯವರಾಗಿ ಮೇಲೆ ಬಂದರು.

ಕೊರೆಯುವ ಚಳಿಯಿಂದ ಕೂಡಿದ ಅಲ್ಲಿನ ವಾತಾವರಣದಲ್ಲಿ, ತಂಪು ನೀರಿನಲ್ಲಿ ನಿಲ್ಲುವುದೂ ಕಠಿಣಕರವಾಗಿತ್ತು. ಗಾಳಿ -2 ಡಿಗ್ರಿ ಸೆಂಟಿಗ್ರೇಡ್ ಮತ್ತು ನೀರು 2 ಡಿಗ್ರಿ ಸೆಂಟಿಗ್ರೇಡ್‍ನಷ್ಟಿತ್ತು. ಹೆಚ್ಚಿನ ಜನರು ವಿಮಾನದ ರೆಕ್ಕೆಗಳ ಮೇಲೆ ಹತ್ತಿ ನಿಂತರು. ಕೆಲವರು ವಿಮಾನ ಸ್ಫೋಟವಾಗಬಹುದೆಂದು ಭೀತಿಗೊಳಗಾಗಿ ನೀರಿಗೆ ಹಾರಿ ಈಜಿ ದೂರ ಸರಿದರು.

ತ್ವರಿತವಾಗಿ ಅಲ್ಲಿ ತಲುಪಿದ ರಕ್ಷಣಾ ಸಿಬಂದಿ ಎಲ್ಲರನ್ನೂ ಬಚಾವು ಮಾಡಿದರು ಮತ್ತು ಅಗತ್ಯವಿದ್ದವರಿಗೆ ತುರ್ತು ಚಿಕಿತ್ಸೆಯನ್ನೂ ಒದಗಿಸಿದರು.

6 ನಿಮಿಷ: ತ್ವರಿತಗತಿಯ ಅದ್ಭುತ ಕಾರ್ಯಾಚರಣೆ

ಅಷ್ಟರಲ್ಲಾಗಲೇ ಕ್ಯಾಪ್ಟನ್ ಚೆಸ್ಲಿಯ ಸೂಚನೆಯಂತೆ ಕಂಟ್ರೋಲ್ ರೂಮ್ ಮತ್ತು ಇತರ ಅಗತ್ಯ ವ್ಯವಸ್ಥೆಗಳು ತುರ್ತಾಗಿ ಕಾರ್ಯಾಚರಣೆ ಪ್ರಾರಂಭಿಸಿದ್ದವು. ವಿಮಾನ ಇಳಿಯುವ ಜಾಗದಲ್ಲಿ ಕ್ಯಾಪ್ಟನ್ ನಿರ್ದೇಶನದ ಮೇರೆಗೆ, ಕೇವಲ 4 ನಿಮಿಷಗಳಲ್ಲಿ 30 ಆ್ಯಂಬುಲೆನ್ಸ್‌ಗಳು, 140 ಫೈರ್ ಎಂಜಿನ್‍ಗಳು, ಹಡಗುಗಳು, ಪೊಲೀಸರ 2 ಹೆಲಿಕಾಪ್ಟರ್‌ಗಳು, ಕೋಸ್ಟ್‌ಗಾರ್ಡ್ ಟೀಮ್ ಮತ್ತು ಇತರ ತುರ್ತು ಅಗತ್ಯದ ಸವಲತ್ತುಗಳು ತಯಾರಾಗಿದ್ದವು. ಇತರ 30 ಆ್ಯಂಬುಲೆನ್ಸ್‌ಗಳೂ ಬೇರೆ ಸಂಸ್ಥೆಗಳಿಂದ ಒದಗಿಸಲಾಗಿ ಅಲ್ಲಿಗೆ ತಲುಪಿದ್ದವು.

ನಂಬ್ತೀರಾ, ಇಷ್ಟೆಲ್ಲಾ ನಡೆದದ್ದು ಕೇವಲ 6 ನಿಮಿಷಗಳಲ್ಲಿ! ಅತ್ಯಾಶ್ಚರ್ಯಕರವಲ್ಲವೇ? ನಂಬಲು ನಿಜಕ್ಕೂ ಕಷ್ಟಕರವೇ. ಆದರೆ ಇದು ನಿಜ, ಸತ್ಯ ಸಂಗತಿ. ಅದರಿಂದಾಗಿಯೇ ವೈಮಾನಿಕ ಚರಿತ್ರೆಯಲ್ಲಿಯೇ ಈ ವಿಸ್ಮಯಕರ ಘಟನೆಯನ್ನು ‘ಆಶ್ಚರ್ಯ’ ಎಂದು ಹೆಸರಿಸಲಾಗಿದೆ. ವಿಮಾನ ಅಪಘಾತಗಳೆಂದರೆ ವಿಮಾನದ ಜೊತೆಗೆ ಪ್ರಯಾಣಿಕರೂ ಸುಟ್ಟು ಹೋಗುವುದು ಸಾಮಾನ್ಯ. ಆದರೆ ಈ ಅಪಘಾತ ‘ಸುಖಾಂತ್ಯ’ ಕಂಡಿದ್ದು, ಒಂದು ಚಾರಿತ್ರಿಕ ಘಟನೆಯಾಗಿ ದಾಖಲಾಗಿದೆ.

ಕ್ರೈಸಿಸ್ ಮ್ಯಾನೇಜ್‍ಮೆಂಟ್ ಅಂದರೆ ಬಿಕ್ಕಟ್ಟು ನಿರ್ವಹಣೆಗಾಗಿ ಇದನ್ನು ಅಪ್ರತಿಮ ನಿದರ್ಶವೆಂಬುದಾಗಿ ಪ್ರಪಂಚದಾದ್ಯಂತ ಬಣ್ಣಿಸಲಾಗಿದೆ. ‘ಹಡ್ಸನ್ ಏರ್ ಕ್ರ್ಯಾಶ್’ ಅಂತಹ ಶ್ಲಾಘನೆಗೆ ಒಳಗಾದ ಅಪೂರ್ವ ಘಟನೆ.

ಇಡೀ ಘಟನೆಯಲ್ಲಿ 78 ಜನರಿಗೆ ಸಣ್ಣ ಪ್ರಮಾಣದ ಗಾಯವಾಗಿತ್ತು. ಐವರಿಗೆ ಸ್ವಲ್ಪ ಗಂಭೀರ ಸ್ವರೂಪದ ಗಾಯವಾಗಿತ್ತು. ಯಾವುದೇ ಜೀವಹಾನಿಯಾಗಿರಲಿಲ್ಲ. ಘಟನೆಯಿಂದ ಹಲವರಿಗೆ ಮಾನಸಿಕ ಆಘಾತ ಉಂಟಾದ ಕಾರಣ ಅವರನ್ನು ಕೌನ್ಸೆಲಿಂಗ್‍ಗೆ ಒಳಪಡಿಸಲಾಗಿತ್ತು.

ಆ ಸುರಕ್ಷಿತ ಮತ್ತು ಯಶಸ್ವಿ ಕಾರ್ಯಾಚರಣೆಗಾಗಿ ಕ್ಯಾಪ್ಟನ್ ಚೆಸ್ಲಿ ಸಲ್ಲಿ ಸಲ್ಲನ್‍ಬರ್ಗರ್ ಮತ್ತವರ ಸಂಗಡಿಗರಿಗೆ ಪ್ರಪಂಚದಾದ್ಯಂತ ಶ್ಲಾಘನೆ ಮತ್ತು ಸನ್ಮಾನ ದೊರೆಯಿತು. ಅಂದಿನ ಅಮೆರಿಕದ ಅಧ್ಯಕ್ಷ ಜಾರ್ಜ್ ಬುಶ್ ಮತ್ತು ನೂತನ ಅಧ್ಯಕ್ಷರಾಗಿ ಚುನಾಯಿತರಾಗಿದ್ದ ಬರಾಕ್ ಒಬಾಮಾ ಕ್ಯಾಪ್ಟನ್ ಮತ್ತು ತಂಡದ ಧೈರ್ಯ ಮತ್ತು ಸಾಹಸವನ್ನು ಹೊಗಳಿದ್ದರು. ‘ಗಿಲ್ಡ್ ಆಫ್ ಏರ್ ಪೈಲಟ್ಸ್ ಎಂಡ್ ಏರ್ ನೇವಿಗೇಟರ್ಸ್’ ಜನವರಿ 22, 2009ರಂದು ಇವರನ್ನು ಸನ್ಮಾನಿಸಿ ‘ಮಾಸ್ಟರ್ಸ್ ಮೆಡಲ್’ ಕೊಟ್ಟು ಗೌರವಿಸಿ, “ಸ್ಪ್ಲಿಟ್ ಸೆಕೆಂಡುಗಳಲ್ಲಿ ಅವರು ತೆಗೆದುಕೊಂಡ ನಿರ್ಧಾರಗಳು ಮತ್ತು ತುರ್ತು ಸಂದರ್ಭದಲ್ಲಿ ನಿರ್ವಹಿಸಿದ ರೀತಿ ಒಂದು ‘ಪಠ್ಯ ಪುಸ್ತಕ’ವಾಗಿದೆ ಮತ್ತು ನಡೆದುಕೊಂಡ ರಕ್ಷಣಾ ಕಾರ್ಯ ಶ್ಲಾಘನೀಯ” ಎಂದು ಬಣ್ಣಿಸಿ, ಪ್ರಶಂಸೆ ವ್ಯಕ್ತಪಡಿಸಿತು.

ಹೀಗೆ, ಹಡ್ಸನ್ ನದಿಯ ಕಾರಣ ಮತ್ತು ಪೈಲಟ್ ಹಾಗೂ ಅವರ ತಂಡದ ತ್ವರಿತ ಕಾರ್ಯಾಚರಣೆಯಿಂದಾಗಿ ನೆಲಕ್ಕೆ ಅಪ್ಪಳಿಸಿ ಭಸ್ಮವಾಗಬಹುದಾಗಿದ್ದ ವಿಮಾನವು ನೀರಿಗಿಳಿದು ಎಲ್ಲರೂ ಸುರಕ್ಷಿತವಾಗಿ ಬದುಕುಳಿದರು. ಅಂತಹ ಕ್ಲಿಷ್ಟ ಮತ್ತು ಅಪಾಯಕರ ಸನ್ನಿವೇಶದಲ್ಲಿಯೂ ಧೃತಿಗೆಡದೆ ಎಲ್ಲರನ್ನೂ ಬಚಾವು ಮಾಡಬೇಕೆಂಬ ಸಂಕಲ್ಪದಿಂದ ಅತ್ಯದ್ಭುತವಾಗಿ ವಿಮಾನವನ್ನು ನಿಯಂತ್ರಣಕ್ಕೆ ತೆಗೆದುಕೊಂಡು ಸಂಭವನೀಯ ದುರಂತವನ್ನು ಸಹನೀಯ ಘಟನೆಯನ್ನಾಗಿಸಿದ ಕ್ಯಾಪ್ಟನ್ ಚೆಸ್ಲಿ ಸಲ್ಲಿಯವರಿಗೆ ಎಷ್ಟು ನಮನ ಸಲ್ಲಿಸಿದರೂ ಕಡಿಮೆಯೇ.

ಅಷ್ಟು ಮಾತ್ರವಲ್ಲ, ಅಮೆರಿಕದಂತಹ ಮುಂದುವರಿದ ರಾಷ್ಟ್ರಗಳಲ್ಲಿ ಸಾರ್ವಜನಿಕ ಸೇವೆಯಲ್ಲಿರುವ ಚಾಕಚಕ್ಯತೆ, ಶಿಸ್ತು ಮತ್ತು ಸಾಮರ್ಥ್ಯ ಹಾಗೂ ತುರ್ತು ಸಂದರ್ಭಗಳಲ್ಲಿ, ಕ್ಲಿಷ್ಟ-ಪ್ರತಿಕೂಲ ಪರಿಸ್ಥಿತಿಗಳಲ್ಲಿ ಕಿಂಚಿತ್ತೂ ಧೃತಿಗೆಡದೆ, ಧೈರ್ಯ ಮತ್ತು ವೇಗದಿಂದ ಕಾರ್ಯನಿರ್ವಹಿಸುವ ರೀತಿ ನಿಜಕ್ಕೂ ಅದ್ಭುತ ಮತ್ತು ಮಾದರಿ. ಅಷ್ಟು ಕಡಿಮೆ ಸಮಯದಲ್ಲಿ ಅಷ್ಟೆಲ್ಲಾ ವ್ಯವಸ್ಥೆಯನ್ನು ಚೂರೂ ಎಡವಟ್ಟಿಲ್ಲದೆ ನಿರ್ವಹಿಸಿದ ರೀತಿ ನಿಜಕ್ಕೂ ಅಮೋಘ.

ಇದೇ ಘಟನೆಯನ್ನು ಆಧರಿಸಿ ಒಂದು ಹಾಲಿವುಡ್ ಸಿನೆಮಾ ತಯಾರಾಗಿದ್ದು ನಿಮಗೆ ತಿಳಿದಿರಬಹುದು. ಕ್ಲೈಂಟ್ ಈಸ್ಟ್‌ವುಡ್ ನಿರ್ದೇಶಿಸಿದ ‘Sully: Miracle on the Hudson’ ಸಿನೆಮಾದಲ್ಲಿ ಟಾಮ್ ಹ್ಯಾಂಕ್ಸ್ ಪೈಲಟ್ ಸಲ್ಲಿಯ ಪಾತ್ರದಲ್ಲಿ ನಟಿಸಿದ್ದರು.

ಎಲ್ಲಿಯೂ ವಿಮಾನ ಅಪಘಾತಗಳು ನಡೆಯದಿರಲಿ ಮತ್ತು ಏನಾದರೂ ಆದರೆ ಅದು ಮೇಲಿನಂತೆ ಸುಖಾಂತ್ಯಗೊಳ್ಳಲಿ ಎಂದು ನಾವು ಹಾರೈಸೋಣ.

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

The post ಸುಖಮಯ ದುರಂತ! ಅಪಘಾತಕ್ಕೀಡಾದರೂ ವಿಮಾನ ಸುರಕ್ಷಿತವಾಗಿ ಇಳಿಯಿತು, ಜನರೂ ಬಚಾವಾದರು!! appeared first on Budkulo.

ಆಲ್‍ರೆಡಿ ‘ಪುಳಿಮುಂಚಿ’ ಸಿನೆಮಾ ನಿರ್ದೇಶನ್ ಮಲ್ತ್‌ದ್ ಪುದರ್ ಮಲ್ತಿನ ತ್ರಿಶೂಲ್ ಶೆಟ್ಟಿ ‘ಲೈಫ್ ಇಸ್ ಜಿಂಗಾಲಾಲ’ ಸಿನೆಮಾನ್ ನಿರ್ದೇಶನ ಮಲ್ತೊಂದುಲ್ಲೆರ್. ಹರಿಪ್ರಸಾದ್ ರೈ ನೇತೃತ್ವದ ಎಚ್‍ಪಿಆರ್ ಫಿಲ್ಮ್ಸ್ ಪ್ರೊಡಕ್ಷನ್ಸ್ ಸಂಸ್ಥೆ ಮುಖಾಂತರ ನಿರ್ಮಾಣ ಆಪಿನ ಈ ಸಿನೆಮಾಡ್ ತ್ರಿಶೂಲ್ ಶೆಟ್ಟಿ ನಾಯಕ ಪಾತ್ರಡ್‍ಲಾ ನಟನೆ ಮಲ್ತೊಂದುಲ್ಲೆರ್.

ಸಿನೆಮಾದ ಪ್ರಥಮ ಹಂತದ ಚಿತ್ರೀಕರಣ ಕರಾವಳಿ ಭಾಗಡ್ ಮಲ್ತ್‌ದ್ಂಡ್, ಒರಿದ್‍ನ ಭಾಗ ಮರಿಯಲ ಮುಗಿ ಬೊಕ್ಕ ಮಲ್ಪರೆ ಉಂಡು ಪಣ್ಪೆರ್ ನಿರ್ದೇಶಕೆ ತ್ರಿಶೂಲ್ ಶೆಟ್ಟಿ. ಈ ವರ್ಷದ ಅಕ್ಟೋಬರ್ ತಿಂಗೊಲುಡ್ ಸಿನೆಮಾ ಪ್ರದರ್ಶನ್‍ಗ್ ಬರ್ಪುನ ಸಾಧ್ಯತೆ ಉಂಡು.

ಪೊಸ ನಮುನೆದ ಕಥೆ ಇಪ್ಪುನ ಈ ಸಿನೆಮಾ ತುಳು ಭಾಷೆದೊಟ್ಟಿಗೆ ಕನ್ನಡ ಭಾಷೆಡ್‍ಲಾ ನಿರ್ಮಾಣ ಆವೊಂದುಂಡು.

ಚಿತ್ರದ ನಾಯಕಿ ಆದ್ ನವ್ಯಾ ಪೂಜಾರಿ ಅಭಿನಯ ಮಲ್ತ್‌ದೆರ್. ಸಿನೆಮಾದ ಮುಖ್ಯ ಪಾತ್ರೊಡ್ ದಿಯಾ ಶಾರದಾ, ಡಾ. ದೇವದಾಸ್ ಕಾಪಿಕಾಡ್, ನವೀನ್ ಡಿ. ಪಡೀಲ್, ಅರವಿಂದ ಬೋಳಾರ್, ಭೋಜರಾಜ್ ವಾಮಂಜೂರ್, ಸಾಯಿಕೃಷ್ಣ ಕುಡ್ಲ, ರಾವಿ ರಾಮಕುಂಜ, ಪ್ರಕಾಶ್ ಶೆಟ್ಟಿ ಧರ್ಮನಗರ, ದೀಪಕ್ ಪಾಲಡ್ಕ, ಶ್ವೇತಾ, ಪ್ಲ್ಯಾನಿ ಡಿಸೋಜ, ರೋಶನ್ ಶೆಟ್ಟಿ, ಪ್ರಜ್ವಲ್ ಶೆಟ್ಟಿ, ರೂಪಾ ಡಿ. ಶೆಟ್ಟಿ, ರೂಪಾ ವರ್ಕಾಡಿ, ಶಿಲ್ಪಾ ಶೆಟ್ಟಿ, ಪಿಂಕಿರಾಣಿ, ನಿತ್ಯಾ, ಮಿಮಿಕ್ರಿ ಶರಣ್, ರಂಜನ್ ಬೋಳೂರು, ಸದಾಶಿವ ಅಮೀನ್ ಅಭಿನಯ ಮಲ್ತ್‌ದೆರ್.

ತಾಂತ್ರಿಕ ವಿಭಾಗ: ಕ್ಯಾಮರಾಮ್ಯಾನ್ ಮಯೂರ್ ಆರ್. ಶೆಟ್ಟಿ, ಸಂಗೀತ ಕಿಶೋರ್ ಕುಮಾರ್ ಶೆಟ್ಟಿ, ಸಂಕಲನ ಗಣೇಶ್ ನೀರ್ಚಾಲ್, ಸಂಭಾಷಣೆ ಡಿಬಿಸಿ ಶೇಖರ್, ಗೀತೆ ಸಾಹಿತ್ಯ ಮಯೂರ್ ಆರ್. ಶೆಟ್ಟಿ, ಕೀರ್ತನ್ ಭಂಡಾರಿ, ಕಲಾ ನಿರ್ದೇಶನ ಹರೀಶ್ ನಾಯ್ಕ್ ಬಜಪೆ, ಸ್ಥಿರ ಚಿತ್ರಣ ಕರುಣಾಕರ ಮಂಜೇಶ್ವರ, ಮ್ಯಾನೇಜರ್ ಪ್ರಜ್ವಲ್ ಶೆಟ್ಟಿ, ವಿಶ್ವನಾಥ, ಪಿಆರ್‍ಒ ಬಾಳ ಜಗನ್ನಾಥ ಶೆಟ್ಟಿ, ಡಿಸೈನ್ ದೇವಿ ರೈ, ಸಹ ನಿರ್ದೇಶನ ವಿನಯ್ ಪ್ರೀತಮ್, ಅಕ್ಷಿತ್ ವಿಟ್ಲ, ಸಹಾಯಕ ನಿರ್ದೇಶಕೆ ಪ್ರಜ್ವಲ್ ಕೆ.ಆರ್., ಚಿನ್ನು ಆರ್ಯನ್, ಯಶೋಧರ್ ನಿರ್ವಹಣೆ ಮಲ್ತೊಂದುಲ್ಲೆರ್.

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

The post ಬರೊಂದುಂಡು ಪೊಸತ್ತ್ ತುಳು-ಕನ್ನಡ ಸಿನೆಮಾ ‘ಲೈಫ್ ಇಸ್ ಜಿಂಗಾಲಾಲ’ appeared first on Budkulo.

ಬೆಂಗಳೂರಿನ ಕೊಂಕಣಿ ಕ್ರೈಸ್ತರ ಮೂಲಭೂತ ಹಕ್ಕನ್ನು ನಿರಾಕರಿಸಬೇಡಿ

ಮೇಲಿನ ಸಂಘದಿಂದ ಬೆಂಗಳೂರಿನ ರಾಮಮೂರ್ತಿನಗರದ ಪವಿತ್ರ ಕುಟುಂಬದ ದೇವಾಲಯದ ಧರ್ಮಗುರುಗಳಿಗೆ ಮೇ 30ರಂದು ಬರೆದ ಪತ್ರ ನೋಡಿದೆ. ಅಜ್ಞಾನ ಮತ್ತು ದುರಹಂಕಾರದಿಂದ ಬರೆದ ಆ ಪತ್ರಕ್ಕೆ ಉತ್ತರವಾಗಿ ಈ ಬಹಿರಂಗ ಪತ್ರವನ್ನು ಬರೆದಿದ್ದೇನೆ.

ಅಖಿಲ ಕರ್ನಾಟಕ ಕಥೋಲಿಕ ಕ್ರೈಸ್ತ ಕನ್ನಡ ಸಂಘದ ಪದಾಧಿಕಾರಿಗಳೇ, ನಿಮ್ಮ ಸದ್ರಿ ಪತ್ರವು ಅಕ್ಷಮ್ಯವಾಗಿದ್ದು ನಿಮ್ಮ ವರ್ತನೆ ಅತಿರೇಕತನದ್ದಾಗಿದೆ. ಉಲ್ಲೇಖಿಸಿರುವ ಚರ್ಚಿನಲ್ಲಿ ಜೂನ್ 15ರಿಂದ ಪ್ರಾರಂಭವಾಗಬೇಕಿದ್ದ ಕೊಂಕಣಿ ಪೂಜೆಗೆ ನೀವು ವಿರೋಧಿಸಿದ್ದೇ ಅಲ್ಲದೆ ಧಮ್ಕಿಯನ್ನೂ ಹಾಕಿದ್ದೀರಿ. ನಿಮ್ಮ ಬೆದರಿಕೆಗೆ ಮಣಿದ ಧರ್ಮಗುರುಗಳು ಕೊಂಕಣಿ ಪೂಜೆ ಆರಂಭಿಸುವುದನ್ನು ರದ್ದುಪಡಿಸಿದ್ದಾರೆಂದು ತಿಳಿದು ಬಂದಿದೆ.

ಇದು ಖಂಡನೀಯ ಮಾತ್ರವಲ್ಲ ಸರ್ವಥಾ ನಡೆಯಬಾರದಿದ್ದ ಬೆಳವಣಿಗೆ. ಇದು ಸಂವಿಧಾನ ವಿರೋಧಿಯೂ ಧರ್ಮ ವಿರೋಧಿಯೂ ಹೌದು.

ಸ್ನೇಹಿತರೇ, ನಿಮ್ಮ ಪತ್ರದಲ್ಲಿರುವ ಮೂರ್ಖ ಮತ್ತು ಅಪ್ರಬುದ್ಧ ಅಂಶಗಳಿಗೆ ಸೂಕ್ತ ಉತ್ತರ ನೀಡಲೇಬೇಕಾಗಿದೆ. ಆದುದರಿಂದ, ದಯವಿಟ್ಟು, ಕೆಳಗಿನ ಅಂಶಗಳನ್ನು ಓದಿ ಅರ್ಥ ಮಾಡಿಕೊಳ್ಳಬೇಕಾಗಿ ವಿನಂತಿ.

1. ಕೊಂಕಣಿ ಭಾಷೆಯಲ್ಲಿ ಪ್ರತ್ಯೇಕ ಪೂಜೆಯ ಅಗತ್ಯ ಇದೆಯೇ ಎಂದು ಕೇಳಿದ್ದೀರಿ! ನಿಮಗೂ ಒಂದು ಪ್ರಶ್ನೆ – ‘ಕನ್ನಡ ಭಾಷೆಯಲ್ಲಿ ಪೂಜೆಯ ಅಗತ್ಯವೇಕೆ?’ – ಇದಕ್ಕೇನನ್ನುತ್ತೀರಿ? ಅದು ನಿಮ್ಮ ಹಕ್ಕು, ಅಲ್ಲವೇ? ಅದೇ ರೀತಿ ಕೊಂಕಣಿ ಜನರಿಗೆ ಕೊಂಕಣಿ ಪೂಜೆ ಅವರ ಹಕ್ಕು. ಅಷ್ಟೇ.

ನಿಮಗೆ ತಿಳಿದಿದೆಯೋ ಗೊತ್ತಿಲ್ಲ, ಹಿಂದೆ ಪ್ರಪಂಚದಾದ್ಯಂತ ಕೇವಲ ಲ್ಯಾಟಿನ್‍ನಲ್ಲಷ್ಟೇ ಪೂಜೆ-ಪ್ರಾರ್ಥನೆ ನಡೆಯುತ್ತಿತ್ತು. 1965ರ ಎರಡನೇ ವ್ಯಾಟಿಕನ್ ಸಭೆಯು ಸ್ಥಳೀಯ/ಪ್ರಾದೇಶಿಕ ಭಾಷೆಗಳಲ್ಲಿ, ಅಂದರೆ ಜನರ ಮಾತೃಭಾಷೆಯಲ್ಲಿ ಧಾರ್ಮಿಕ ವಿಧಿ ವಿಧಾನಗಳನ್ನು ನಡೆಸಲು ಅವಕಾಶ ಕೊಟ್ಟಿತು. ಅದರ ನಂತರವಷ್ಟೇ ಎಲ್ಲೆಡೆ ಅವರವರ ಭಾಷೆಗಳಲ್ಲಿ ಪೂಜೆ ಪ್ರಾರಂಭವಾಗಿದ್ದು.

ಅಂದಿನಿಂದ ಭಾರತೀಯ ಭಾಷೆಗಳಲ್ಲಿ, ಚರ್ಚುಗಳಲ್ಲಿ, ಪೂಜೆ ಶುರುವಾಗಿದ್ದು. ಹಾಗಾಗಿ ಕನ್ನಡ, ಕೊಂಕಣಿ, ತಮಿಳು, ಮಲಯಾಳಂ, ತೆಲುಗು ಸೇರಿದಂತೆ ದೇಶೀಯ ಭಾಷೆಗಳಲ್ಲಿ ಜನರಿಗೆ ಪೂಜೆ ದೊರಕಿತು.

2. ಕೊಂಕಣಿ ಭಾರತದ ರಾಷ್ಟ್ರ ಭಾಷೆ

ಕೆನರಾ-ಕರಾವಳಿ ಮೂಲದ ಕೊಂಕಣಿ ಕ್ರೈಸ್ತರ ಜನಾಂಗ ಬಹಳ ದೊಡ್ಡದಿದೆ. ರಾಜ್ಯ, ದೇಶ ಮತ್ತು ಪ್ರಪಂಚದಾದ್ಯಂತ ಕೊಂಕಣಿ ಕ್ರೈಸ್ತರು ನೆಲೆಸಿದ್ದಾರೆ. ಮಂಗಳೂರು, ಉಡುಪಿ ಮತ್ತು ಕಾರವಾರ ಧರ್ಮಪ್ರಾಂತ್ಯಗಳಲ್ಲಿ ಎಲ್ಲವೂ ಕೊಂಕಣಿಯಲ್ಲಿಯೇ ನೆರವೇರುತ್ತದೆ. ಯಾಕೆಂದರೆ ಇಲ್ಲಿನ ಎಲ್ಲಾ ಕ್ರೈಸ್ತರು ಕೊಂಕಣಿಗರು. ಕೊಂಕಣಿ ಕ್ರೈಸ್ತರು ಬೆಂಗಳೂರು ಸೇರಿದಂತೆ ಕರ್ನಾಟಕದ ಎಲ್ಲಾ ಕಡೆಯೂ ಇದ್ದಾರೆ. ದುರದೃಶ್ಟವಶಾತ್ 50%ದಿಂದ 98% ಕೊಂಕಣಿ ಕ್ರೈಸ್ತರಿರುವ ಹಲವಾರು ಚರ್ಚುಗಳಿದ್ದರೂ ಕರಾವಳಿ ಹೊರತು ಬೇರೆ ಡಯಾಸಿಸ್‍ಗಳಲ್ಲಿ ಕೊಂಕಣಿ ಪೂಜೆಗೆ ಅವಕಾಶ ನೀಡದೇ ಹೋಗಿದ್ದರಿಂದ ಇಷ್ಟು ದಶಕಗಳ ಕಾಲ ಕೊಂಕಣಿ ಕ್ರೈಸ್ತರು ತಮ್ಮ ಹಕ್ಕಿನಿಂದ ವಂಚಿತರಾಗಿದ್ದರು.

ತಮ್ಮ ಮೂಲಭೂತ ಹಕ್ಕಿನಿಂದ ವಂಚಿತರಾಗಿದ್ದ ಕ್ರೈಸರಲ್ಲಿ ಅನೇಕರು ಈ ನಿಟ್ಟಿನಲ್ಲಿ ಜಾಗೃತರಾಗಿ, ಕಾರ್ಯಪ್ರವೃತ್ತರಾಗಿದ್ದರಿಂದ ಕಳೆದ ಕೆಲವು ವರ್ಷಗಳಿಂದ ರಾಜ್ಯದ ಅಲ್ಲಲ್ಲಿ ಕೊಂಕಣಿಗರಿಗೆ ಕೊಂಕಣಿಯಲ್ಲಿಯೇ ಪೂಜೆಗೆ ಅವಕಾಶಗಳು ದೊರಕುತ್ತಾ ಬಂದಿದೆ. ಬೆಂಗಳೂರು ಧರ್ಮಪ್ರಾಂತ್ಯದಲ್ಲಿಯೂ ಹಲವು ಚರ್ಚ್‍ಗಳಲ್ಲಿ ಕೊಂಕಣಿ ಪೂಜೆ ನಡೆಯುತ್ತಿದೆ. ಈ ನಿಟ್ಟಿನಲ್ಲಿ ಕಾನೂನು ಹೋರಾಟವೂ ನಡೆದಿದೆ.

ಕೊಂಕಣಿಯು ಭಾರತದ 22 ರಾಷ್ಟ್ರೀಯ ಭಾಷೆಗಳಲ್ಲಿ ಒಂದು. ಗೋವಾ ರಾಜ್ಯದ ರಾಜ್ಯ ಭಾಷೆಯೂ ಆಗಿದೆ. ರಾಷ್ಟ್ರದ ಸಂವಿಧಾನದ ಎಂಟನೇ ಪರಿಚ್ಛೇದದಲ್ಲಿ ಸ್ಥಾನ ಪಡೆದಿರುವ ಮತ್ತು ಕೇಂದ್ರ ಸಾಹಿತ್ಯ ಅಕಾಡೆಮಿಯಲ್ಲಿ ಸ್ಥಾನ ಪಡೆದಿರುವ ಭಾಷೆಯೂ ಆಗಿದೆ. ರಾಜ್ಯದಲ್ಲಿಯೂ ಕೊಂಕಣಿ ನಾಡಿನ ಪ್ರಬಲ ಸಹೋದರ ಭಾಷೆ. ಅದರಿಂದಾಗಿಯೇ ರಾಜ್ಯ ಸರ್ಕಾರದಿಂದ 31 ವರ್ಷಗಳ ಹಿಂದೆಯೇ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಸ್ಥಾಪಿಸಲ್ಪಟ್ಟಿದೆ.

ನಮ್ಮದು ಪ್ರಜಾಪ್ರಭುತ್ವ ದೇಶ. ನೀವು ಯಾವ ಆಧಾರದಲ್ಲಿ ಮತ್ತು ಯಾವ ಉದ್ದೇಶದಿಂದ ಕೊಂಕಣಿ ಪೂಜೆಗೆ ವಿರೋಧಿಸುತ್ತೀದ್ದೀರಿ? ಕೊಂಕಣಿ ಜನರಿಗೆ ಕೊಂಕಣಿಯಲ್ಲಿ ಪೂಜೆ ದೊರೆತರೆ ನಿಮಗ್ಯಾಕೆ ಹೊಟ್ಟೆ ಉರಿ? ಅಥವಾ ನಿಮಗೇನು ನಷ್ಟ? ದಯವಿಟ್ಟು ಸ್ಪಷ್ಟಪಡಿಸಿ.

ಕೊಂಕಣಿ ಪೂಜೆಗೆ ವಿರೋಧಿಸುವ ನೀವು, ಬೆಂಗಳೂರಿನ ಚರ್ಚುಗಳಲ್ಲಿ ಕನ್ನಡ ಹೊರತು ಬೇರೆ ಭಾಷೆಗಳಲ್ಲಿ ಪೂಜೆ ನಡೆಯುತ್ತದೆಯಲ್ವೇ, ಅದನ್ನು ಯಾಕೆ ವಿರೋಧಿಸಿಲ್ಲ? ಇಂಗ್ಲಿಷ್ ಸೇರಿದಂತೆ, ತಮಿಳು, ತೆಲುಗು ಇನ್ನಿತರ ಭಾಷೆಗಳಲ್ಲಿಯೂ ನಡೆಯುವ ಪೂಜೆಗಳನ್ನು ಯಾಕೆ ನೀವು ತಡೆದಿಲ್ಲ? ಹೇಳುತ್ತೀರಾ?

ಹೇಗೆ ನಿಮಗೆ ನಿಮ್ಮ ಮಾತೃಭಾಷೆ ಕನ್ನಡದಲ್ಲಿ ಪೂಜೆ ಇದೆಯೋ ಮತ್ತು ಬೇಕಾಗಿದೆಯೋ ಹಾಗೆಯೇ ಕೊಂಕಣಿ ಕ್ರೈಸ್ತರಿಗೆ ಅವರ ಮಾತೃಭಾಷೆಯಲ್ಲಿ ಪೂಜೆ ಬೇಕಾಗಿದೆ. ಅವರೇನಾದರೂ ಕೊಂಕಣಿಯಲ್ಲಿ ಮಾತ್ರ ದಿನಾಲೂ ಪೂಜೆ ಇರಬೇಕೆಂದು ಕೇಳಿದ್ದರಷ್ಟೇ ಯಾರಾದರೂ ವಿರೋಧಿಸಬೇಕು. ಅವರು ತಮ್ಮ ಸಹಜ ಹಕ್ಕನ್ನು ಕೇಳಿದ್ದಾರೆಯೇ ಹೊರತು ಇತರರ ಹಕ್ಕನ್ನು ಕಸಿಯುವ ಹುನ್ನಾರ ನಡೆಸಿಲ್ಲ. ಅಂತಹ ಹುನ್ನಾರ ಮತ್ತು ದುಷ್ಟತನವನ್ನು ಮಾಡುತ್ತಿರುವುದು ನೀವೇ ಹೊರತು ಕೊಂಕಣಿ ಕ್ರೈಸ್ತರಲ್ಲ.

ಈ ಕೂಡಲೇ ಕೊಂಕಣಿ ಭಾಷೆ ಮತ್ತು ಅದನ್ನಾಡುವ ಜನರಿಗೆ ವಿರೋಧ ಮಾಡುವುದನ್ನು ಬಿಟ್ಟು ಬಿಡಿ. ನಿಮ್ಮ ಮನಸ್ಸಿನಲ್ಲಿನ ಕೊಳೆ ಮತ್ತು ದುರಹಂಕಾರವನ್ನು ಸ್ವಚ್ಛಗೊಳಿಸಿ.

2. ಕೊಂಕಣಿ ಜನರು ಕನ್ನಡಿಗರೂ ಹೌದು

ಕೊಂಕಣಿ ಜನರು ಕರ್ನಾಟಕದ ಅವಿಭಾಜ್ಯ ಅಂಗವಾಗಿದ್ದಾರೆಯೇ ಹೊರತು ಹೊರಗಿನವರಲ್ಲ. ಶತಮಾನಗಳಿಂದ ನಾವು ಇಲ್ಲಿನವರು. ಇದೇ ಮಣ್ಣಿನ ಜನರು ನಾವು. ನಮಗೆ ಕೊಂಕಣಿಯೂ ಕನ್ನಡವೂ ಒಂದೇ. ಕೊಂಕಣಿ ನಮ್ಮ ಮಾತೃಭಾಷೆಯಾಗಿ ಎಷ್ಟು ಮಹತ್ವದ್ದೋ ಕನ್ನಡವೂ ಅಷ್ಟೇ ಮಹತ್ವವುಳ್ಳದ್ದು. ಬಹು ಭಾಷೆ ಎಂಬುದು ಭಾರತದ ವಿಶಿಷ್ಟತೆ. ನಾವು ಕರ್ನಾಟಕದ ನಾಗರಿಕರು, ಕನ್ನಡ ನಾಡಿನ ಜನರು. ನಾವು ಕೊಂಕಣಿಗರೂ ಹೌದು ಕನ್ನಡಿಗರೂ ಹೌದು. ಇದನ್ನೆಲ್ಲಾ ತಿಳಿಯದ ನಿಮ್ಮಂತಹ ಬುದ್ಧಿಗೇಡಿಗಳಿಂದ ನಮಗೆ ಪಾಠ ಕಲಿಯುವ ಅವಶ್ಯಕತೆಯಿಲ್ಲ, ತಿಳಿಯಿತೇ?

‘ಕನ್ನಡ ಬಾರದ ಕೊಂಕಣಿಗನ್ಯಾರು?’ ಎಂದು ಕೇಳಿದ್ದೀರಿ. ನಿಮಗೇಕೆ ಅದರ ಉಸಾಬರಿ? ಯಾರಾದನೊಬ್ಬ ಕೊಂಕಣಿಗನಿಗೆ ಕನ್ನಡ ಬಾರದೇ ಇದ್ದರೂ ನಿಮಗೇನು ಸಮಸ್ಯೆ? ಕೊಂಕಣಿಗರು ಯಾವತ್ತೂ ಕನ್ನಡಿಗರೇ ಆಗಿದ್ದಾರೆಯೇ ಹೊರತು ಎಂದಿಗೂ ಕನ್ನಡಕ್ಕೆ ವಿರೋಧಿಗಳಲ್ಲ. ನಿಮಗೆ ಅಷ್ಟು ಧೈರ್ಯವಿದ್ದರೆ, ತಮಿಳು ಮತ್ತು ಇತರ ಭಾಷೆಯ ಕ್ರೈಸ್ತರನ್ನೂ ಹೀಗೆಯೇ ಕೇಳುತ್ತೀರಾ? ನಿಮ್ಮ ಉದ್ಧಟತನ ಅತಿಯಾಯಿತು.

ಭಾಷೆಯ ಹೆಸರಿನಲ್ಲಿ ಕ್ರೈಸ್ತರಲ್ಲಿ ಬಿರುಕು ಮೂಡಿಸುವ ನಿಮ್ಮ ಹುನ್ನಾರ ನಿಲ್ಲಿಸಿರಿ. ಬೆಂಗಳೂರಿನ ಕ್ರೈಸ್ತರಲ್ಲಿ ಒಡಕು, ವಿರಸ ಮತ್ತು ವೈಮನಸ್ಯ ಹುಟ್ಟಿಸುವ ನೀಚ ಕೆಲಸವನ್ನು ನೀವು ಮಾಡುತ್ತಿದ್ದೀರಿ. ದಯವಿಟ್ಟು ಅದನ್ನು ತಕ್ಷಣ ನಿಲ್ಲಿಸಿ.

3. ಸಮುದಾಯವನ್ನು ವಿಭಜಿಸುವ ಹುನ್ನಾರ ನಿಮ್ಮದೇ

ಕೊಂಕಣಿ ಪೂಜೆಗೆ ಅವಕಾಶ ಮಾಡಿ ಕೊಟ್ಟಿದ್ದಕ್ಕೆ ಧರ್ಮಗುರುಗಳಿಗೆ ‘ಒಗ್ಗಟ್ಟಾಗಿರುವ ಕ್ರೈಸ್ತ ಸಮುದಾಯವನ್ನು ವಿಂಗಡಿಸುವ ವಿಭಜಿಸುವ ನೀಚ ಹುನ್ನಾರ ನಿಮ್ಮದು’ ಎಂದು ಧಿಕ್ಕಾರ ಕೂಗುತ್ತಿದ್ದೀರಲ್ಲಾ, ನಿಮಗೇನು ತಲೆಗೆ ಮದವೇರಿದೆಯೇ? ಹೇಗೆ ಕನ್ನಡಿಗರಿಗೆ ಕನ್ನಡದಲ್ಲಿ, ತಮಿಳರಿಗೆ ತಮಿಳಿನಲ್ಲಿ ಪೂಜೆ ಇದೆಯೋ ಕೊಂಕಣಿಗರಿಗೂ ಕೊಂಕಣಿಯಲ್ಲಿ ಪೂಜೆ ಸ್ವಾಭಾವಿಕ, ಪ್ರಜಾಸತ್ತಾತ್ಮಕ ಮತ್ತು ಶಾಸನಾತ್ಮಕವೂ ಹೌದು. (ಪೋಪ್ ಅವರೇ ಆದೇಶ ನೀಡಿದ ಮೇಲೆ ಅದು ಶಾಸನಾತ್ಮಕ).

‘ಕನ್ನಡಿಗರ ಏಕತೆಗೂ ಐಕ್ಯತೆಗೂ ಧಕ್ಕೆ’ ಎಂದಿದ್ದೀರಿ. ಇದು ನೀವೆಷ್ಟು ಅಲ್ಪರು, ನೀಚರು ಮತ್ತು ಮತಿಗೆಟ್ಟವರು ಎಂಬುದನ್ನಷ್ಟೇ ಸೂಚಿಸುತ್ತದೆ. ಸ್ವತಃ ಕನ್ನಡಿಗರೂ ಆಗಿರುವ ಕೊಂಕಣಿ ಕ್ರೈಸ್ತರು ಕನ್ನಡದ ಬಗ್ಗೆ ಅಕ್ಷೇಪವನ್ನೇ ಎತ್ತಿಲ್ಲ. ವಿರೋಧವನ್ನೂ ಮಾಡಿಲ್ಲ. ಹಾಗಿರುವಾಗ ಹೀಗೆ ಹುಚ್ಚುಚ್ಚಾಗಿ ಯಾಕೆ ಹೇಳಿಕೆ ಕೊಡುತ್ತಿದ್ದೀರಿ? Letterhead ಇದೆಯೆಂದು ಯದ್ವಾತದ್ವಾ ಹೇಳಿಕೆ ನೀಡುವ, ಸುಳ್ಳು ಆರೋಪಗಳನ್ನು ಹೊರಿಸುವ ಚಪಲವೇ ನಿಮಗೆ?

ಕೊಂಕಣಿ ಕ್ರೈಸ್ತರು ಇತರ ಅಥವಾ ಕನ್ನಡ ಭಾಷೆಯ ಪೂಜೆ ರದ್ದು ಮಾಡಿ ಕೊಂಕಣಿ ಪೂಜೆಗೆ ಅವಕಾಶ ಕೇಳಿಲ್ಲವಲ್ಲ. ಮತ್ಯಾಕೆ ನಿಮ್ಮ ವಿರೋಧ? ಯಾವ ಆಧಾರ ಮತ್ತು ಕಾರಣದಿಂದ ನಿಮ್ಮ ವಿರೋಧ ಮತ್ತು ಪ್ರತಿಭಟನೆ ಎನ್ನುವುದನ್ನು ತಿಳಿಯಪಡಿಸಿ. ನಿಮ್ಮ ಅಪಸ್ವರವನ್ನು ಯಾವ ರೀತಿ ಸಮರ್ಥಿಸಿಕೊಳ್ಳುತ್ತೀರಿ?

4. ‘ಕೊಂಕಣಿ ಪೂಜೆಯಿಂದ ವಿಶ್ವಾಸ ಪ್ರೀತಿ ಭಕ್ತಿಗೆ ಮಾರಕ’ ಎಂದಿದ್ದೀರಿ. ಇದು ನಿಮ್ಮ ಮಾನಸಿಕ ಅಸ್ವಸ್ಥತೆಯನ್ನೂ ಮೂರ್ಖತನವನ್ನೂ ಸಾಬೀತುಪಡಿಸುತ್ತದೆ. ನಿಮ್ಮ ವಿಚಾರ ದೌರ್ಬಲ್ಯ ಮತ್ತು ಸಂಕುಚಿತ ಮನಸ್ಸನ್ನು ಇದು ದೃಢೀಕರಿಸುತ್ತದೆ. ಕೊಂಕಣಿ ಕ್ರೈಸ್ತರು ಭಕ್ತರೂ, ಕ್ರೈಸ್ತ ಧರ್ಮವನ್ನು ಪ್ರೀತಿಸುವವರೂ ದೇವರಲ್ಲಿ ವಿಶ್ವಾಸ ಇಟ್ಟವರೂ ಆಗಿರುವಾಗ ಯಾರ ವಿಶ್ವಾಸ ಪ್ರೀತಿ ಭಕ್ತಿಗೆ ಮಾರಕವಾಗುತ್ತಾರೆ ಮಾರಾಯ್ರೇ? ನಿಮಗೆ ತಲೆ ಕೆಟ್ಟಿದೆಯೆಂದು ವಾಚಾಮಗೋಚರವಾಗಿ ಪ್ರಲಾಪಿಸುತ್ತೀರಲ್ಲಾ? ಹುಚ್ಚರಂತೆ ಇತರರನ್ನು ಯಾಕೆ ಹೀಗಳೆಯುತ್ತೀರಿ? ಚರ್ಚಿನ ಸದಸ್ಯರು, ಕ್ರೈಸ್ತ ಭಕ್ತಾದಿಗಳು ಚರ್ಚಿನಲ್ಲಿ ಪೂಜೆ ಮಾಡುವುದು ನಿಮಗೆ ‘ಮಾರಕ’ ಎಂಬುದಾಗಿ ಕಾಣುತ್ತದೆಯಾದರೆ ನಿಮ್ಮ ಮಾನಸಿಕ ಆರೋಗ್ಯದಲ್ಲಿ ಸಮಸ್ಯೆ ಇರುವಂತೆ ಕಾಣುತ್ತದೆ. ಮೊದಲು ಅದನ್ನು ಸರಿಪಡಿಸಿಕೊಳ್ಳಿ. ನಿಮ್ಮ ಅಧಃಪತನಕ್ಕೀಡಾದ ಚಿಂತನಾಶಕ್ತಿಗೆ ಚಿಕಿತ್ಸೆ ಪಡೆದುಕೊಳ್ಳಿ.

5. ‘ಆರ್ಥಿಕ ಲಾಭ, ಆಧ್ಯಾತ್ಮಿಕ ನಷ್ಟ’ದ ಕುರಿತು ಹೇಳಿದ್ದೀರಿ. ಧಾರ್ಮಿಕತೆ ಮತ್ತು ಭಕ್ತಿ ನಿಮಗೆ ಆರ್ಥಿಕ ವ್ಯವಹಾರದಂತೆ ಗೋಚರಿಸುತ್ತದೆ ಎಂದಾಯಿತು! ನೀವೇನು ಹಣಕಾಸಿನ ವ್ಯವಹಾರಸ್ಥರೇ? ಗೂಂಡಾಗಳಂತೆ ವರ್ತಿಸುವ ನಿಮಗೆ ಆಧ್ಯಾತ್ಮಿಕತೆಯ ಗಂಧಗಾಳಿಯೂ ಇಲ್ಲ. ನಿಮ್ಮ ಹೇಳಿಕೆ, ಆರೋಪಗಳಿಂದ ಅದು ರುಜುವಾತಾಗಿದೆ. ಅಷ್ಟೇ. ಪ್ರಾಮಾಣಿಕ ಕ್ರೈಸ್ತ ಭಕ್ತರಾದ ಕೊಂಕಣಿಗರನ್ನು ರೋಗಗ್ರಸ್ತ ಮನಸ್ಸಿನಿಂದಲೂ ಕಾಮಾಲೆ ಕಣ್ಣಿನಿಂದಲೂ ನೋಡುವುದನ್ನು ಬಿಟ್ಟು ಬಿಡಿ.

6. ‘ವಿಭಜಿಸಿ ಆಳುವ ನೀತಿ’ ಮತ್ತು ‘ನಾಡಿನ ಅಸ್ಮಿತೆಗೆ ಕೊಳ್ಳಿ’ ಎಂದೆಲ್ಲಾ ಊಳಿಟ್ಟಿದ್ದೀರಿ. ನಿಮ್ಮ ದುರಹಂಕಾರ ಅತಿಯಾಯಿತು. ಭಾಷೆಯ ಮತಾಂಧತೆಯನ್ನು ಪ್ರಯೋಗಿಸಿ ಕ್ರೈಸ್ತರನ್ನು ವಿಭಜಿಸುತ್ತಿರುವವರು ನೀವೇ. ನಾಡಿನ ಅಸ್ಮಿತೆಗೆ ಕೊಳ್ಳಿ ಇಡುತ್ತಿರುವುದೂ ನೀವೇ. ಸ್ವಭಾವತಃ ಶಾಂತಿಪ್ರಿಯರಾದ, ಸರಳ ವ್ಯಕ್ತಿತ್ವದ ಕೊಂಕಣಿ ಕ್ರೈಸ್ತರನ್ನು ಭಯೋತ್ಪಾದಕರಂತೆ ನೋಡುತ್ತಿರುವ ನಿಮಗೆ ದೃಷ್ಟಿ ವೈಕಲ್ಯವಿರುವುದು ಸ್ಪಷ್ಟ. ನಿಮ್ಮ ಮನೋರೋಗಕ್ಕೆ ಚಿಕಿತ್ಸೆ ಪಡೆದುಕೊಳ್ಳಿ, ಪ್ಲೀಸ್.

7. ‘ಧರ್ಮದ ಹೆಸರಿನಲ್ಲಿ ಭಾಷಾ ರಾಜಕೀಯ ಸಲ್ಲದು’ ಎಂದು ಉಪದೇಶ ಬೇರೆ ನೀಡಿದ್ದೀರಿ. ಧಾರ್ಮಿಕ ಸಂಗತಿಗಳಲ್ಲಿ ರಾಜಕೀಯವಷ್ಟೇ ಅಲ್ಲ ಗೂಂಡಾಗಿರಿ ಮಾಡುತ್ತಿರುವುದೇ ನೀವು. ಇತರರಿಗೆ ರಗಳೆ ನೀಡದ, ಕೇಡನ್ನು ಬಯಸದ ಕೊಂಕಣಿ ಕ್ರೈಸ್ತರ ವಿರುದ್ಧ ಷಡ್ಯಂತ್ರ ರೂಪಿಸಿರುವುದು ನೀವೇ. ನೀವು ಕೈಕೊಂಡಿರುವ ಅಕ್ರಮ, ನೀಚ, ಅನೈತಿಕ ಕಾರ್ಯಗಳನ್ನು ಇತರರ ಮೇಲೆ ಆರೋಪಿಸಬೇಡಿ.

8. ನಿಮ್ಮ ಭಾಷಾ ಪ್ರಯೋಗ ಮತ್ತು ಬೆದರಿಕೆಯ ಮಾತುಗಳನ್ನು ಓದುವಾಗ ನೀವು ಕ್ರೈಸ್ತರಲ್ಲ, ಬದಲಾಗಿ ಭಯೋತ್ಪಾದಕರಂತೆ ಕಾಣುತ್ತದೆ. ಕ್ರೈಸ್ತರ ಮುಖವಾಡದಲ್ಲಿರುವ ರೌಡಿಗಳು ನೀವೆಂಬಂತೆ ತೋರುತ್ತದೆ. ಶಾಂತಿ, ಸೌಹಾರ್ದತೆ ಮತ್ತು ಸಭ್ಯತೆಗೆ ಹೆಸರುವಾಸಿಯಾಗಿರುವ ಕೊಂಕಣಿ ಕ್ರೈಸ್ತರನ್ನು ಶತ್ರುಗಳೆಂಬಂತೆ ಬಿಂಬಿಸಿ, ಶಾಂತಿ ಕದಡುವ ಪ್ರಯತ್ನ ಮಾಡುತ್ತಿದ್ದೀರಿ. ಅಹಿತಕರ ಘಟನೆ ನಡೆಸಲು ಹುನ್ನಾರ ನಿಮ್ಮಲ್ಲಿರುವುದು ನಿಮ್ಮ ಮಾತುಗಳಿಂದ ಗೋಚರವಾಗುತ್ತದೆ. ಇಲ್ಲದ ಸಮಸ್ಯೆಗಳನ್ನು ಕಲ್ಪಿಸಿ, ಸುಳ್ಳು ಆರೋಪಗಳನ್ನು ಹೇರಿ ಗೊಂದಲ ಮತ್ತು ಗಲಾಟೆ ಉಂಟಾಗಿಸುವುದು ನಿಮ್ಮ ಅಪೇಕ್ಷೆಯೆಂಬಂತೆ ಕಾಣುತ್ತದೆ. ನೀವು ನಿಜವಾಗಿಯೂ ಒಳ್ಳೆಯ ಕ್ರೈಸ್ತರೇ ಆಗಿದ್ದರೆ, ಇಂತಹ ಕೀಳು ಮಾತು ಮತ್ತು ಕೃತ್ಯಗಳನ್ನು ತ್ಯಜಿಸಿ.

ಸಾಂವಿಧಾನಿಕ ಮೂಲಭೂತ ಹಕ್ಕು – ತಡೆಯಲು ನೀವ್ಯಾರು?

ಕೊಂಕಣಿ ಕಥೋಲಿಕ ಕ್ರೈಸ್ತರಿಗೆ ಕೊಂಕಣಿಯಲ್ಲಿಯೇ ಪೂಜೆಯ ವ್ಯವಸ್ಥೆ ದೊರಕಿಸಲು ಪೋಪ್ ನೇತೃತ್ವದ ವ್ಯಾಟಿಕನ್‍ನಿಂದಲೇ ಆದೇಶ ಇದೆ. ಅಲ್ಲದೇ ಈ ನಿಟ್ಟಿನಲ್ಲಿ ಕರ್ನಾಟಕದ ವಿವಿಧ ಕೋರ್ಟ್‍ಗಳು ಮತ್ತು ಉಚ್ಚ ನ್ಯಾಯಾಲಯವೂ ಆದೇಶ ನೀಡಿದೆ. ಭಾರತದ ಸಂವಿಧಾನವೂ ಸಮಾನ ಹಕ್ಕನ್ನು ಎಲ್ಲರಿಗೂ ನೀಡಿದೆ. ಅದಕ್ಕೆ ಅರ್ಹರಿರುವ ಕೊಂಕಣಿ ಕ್ರೈಸ್ತರೂ ದೊಡ್ಡ ಸಂಖ್ಯೆಯಲ್ಲಿ ಇದ್ದಾರೆ. ಇಷ್ಟೆಲ್ಲಾ ಇರುವಾಗ ಕೊಂಕಣಿ ಕ್ರೈಸ್ತರಿಗೆ ದೊರಕಬೇಕಾದ ಅರ್ಹ, ನೈಜ ಮತ್ತು ಕಾನೂನುಬದ್ಧ ಹಕ್ಕನ್ನು ತಡೆಯಲು, ನಿರಾಕರಿಸಲು ನೀವ್ಯಾರು ಮತ್ತು ನಿಮಗೆ ಆ ಅಧಿಕಾರ ನೀಡಿದವರು ಯಾರು? ನಮ್ಮ ಜನರು ತಮ್ಮ ಹಕ್ಕು ಕೇಳುವಾಗ ಅದನ್ನು ತಡೆಯಲು ಹೋರಾಡುವ ನೀವು ಯಾವ ಸೀಮೆ ದೊಣೆನಾಯಕರು?

ಕ್ರೈಸ್ತರೆಂದು ಹೇಳಿಕೊಳ್ಳುವ ನೀವು ನಮ್ಮ ಜಗದ್ಗುರುಗಳಾದ ಪೋಪ್ ಅವರನ್ನೂ, ವ್ಯಾಟಿಕನ್ ಚರ್ಚನ್ನೂ ವಿರೋಧಿಸುತ್ತೀರೆಂದರೆ ಏನರ್ಥ? ಅಷ್ಟಲ್ಲದೆ, ದೇಶದ ಸಂವಿಧಾನ ಮತ್ತು ನ್ಯಾಯಾಂಗ ವ್ಯವಸ್ಥೆಯನ್ನೂ ನೀವು ಧಿಕ್ಕರಿಸುತ್ತೀರೆಂದರೆ ನಿಮಗೆಲ್ಲಿಯ ಧೈರ್ಯ? ಎಲ್ಲಾ ರೀತಿಯಿಂದಲೂ ನೀವು ಅನಾಗರಿಕರೂ, ದುರುಳರೂ ಎಂಬುದಾಗಿ ಕಾಣುತ್ತದೆ. ನಿಮ್ಮ ದರ್ಪ ಮತ್ತು ದಾರ್ಷ್ಟ್ಯತನವನ್ನು ಕೂಡಲೇ ನಿಲ್ಲಿಸಿ.

ಕರ್ನಾಟಕ ಅಥವಾ ದೇಶದ ಎಲ್ಲೇ ಆದರೂ ನೆಲೆಸಿರುವ ಕೊಂಕಣಿ ಕ್ರೈಸ್ತರು ನಿಷ್ಠಾವಂತ ಭಾರತೀಯರೂ ಅಪ್ಪಟ ಕನ್ನಡಿಗರೂ ಆಗಿದ್ದಾರೆ. ನಾವು ಹೆಮ್ಮೆಯ ದೇಶೀಯ ಸಮುದಾಯದವರು. ನಮ್ಮ ರಾಷ್ಟ್ರಭಕ್ತಿ, ಕನ್ನಡಿಗತನ ಮತ್ತು ಧರ್ಮನಿಷ್ಠೆ ಪ್ರಶ್ನಾತೀತ. ನಿಮ್ಮಂತಹ ಗೂಂಡಾ ಮನಸ್ಥಿತಿಯವರಿಂದ ನಾವು ತಿಳಿದುಕೊಳ್ಳಬೇಕಾದುದೇನೂ ಇಲ್ಲ. ದಯವಿಟ್ಟು ನಿಮ್ಮ ಕೆಲಸ ನೀವು ನೋಡಿಕೊಳ್ಳಿ ಮತ್ತು ಮಾತುಗಳನ್ನು ಹತೋಟಿಯಲ್ಲಿಡಿ. ಅನಾವಶ್ಯಕ ಸಮಸ್ಯೆ, ವೈಮನಸ್ಸು ಮತ್ತು ಅಹಿತಕರ ಸಂಗತಿಗಳನ್ನು ಸೃಷ್ಟಿಸಬೇಡಿ. ನೈಜ ಕ್ರೈಸ್ತರಾಗಿ ನಡೆದುಕೊಳ್ಳಿ.

ಸಮಗ್ರ ಕೊಂಕಣಿ ಕ್ರೈಸ್ತರ ಪರವಾಗಿ,

ಡೊನಾಲ್ಡ್ ಪಿರೇರಾ
ಸಂಪಾದಕ – ಬುಡ್ಕುಲೊ ಇ-ಪತ್ರಿಕೆ
www.Budkulo.com

ನ್ಯಾಯಾಲಯಗಳಲ್ಲಿ ಕೊಂಕಣಿ ಪೂಜೆಗೆ ಆದೇಶ – ಪ್ರಕರಣಗಳ ವರದಿಗಾಗಿ ಕೆಳಗಿನ ಲಿಂಕ್‍ಗಳನ್ನು ತೆರೆದು ಓದಿ 👇👇

Karnataka High Court has upheld an Appellate court order

Language Within The Purview Of Civil Law: Holds Karnataka HC

Indian court rejects bishop’s plea on Mass change

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

The post ಅಖಿಲ ಕರ್ನಾಟಕ ಕಥೋಲಿಕ ಕ್ರೈಸ್ತ ಕನ್ನಡ ಸಂಘಕ್ಕೆ ಬಹಿರಂಗ ಪತ್ರ appeared first on Budkulo.

ಮಂಗಳೂರು: ಭಾರತ ದೇಶವನ್ನು ಸಮೃದ್ಧವಾಗಿ ಕಟ್ಟಲು ಎಲ್ಲರೂ ಒಗ್ಗೂಡಿ ಶ್ರಮಿಸುವುದು ಅಗತ್ಯ ಎಂದು ಎನ್‌ಆರ್‌ಐ ಉದ್ಯಮಿ, ಕೊಡುಗೈ ದಾನಿ ಮೈಕಲ್ ಡಿಸೋಜ ಕರೆ ನೀಡಿದ್ದಾರೆ. ದೇಶಪ್ರೇಮ, ಸಾಮರಸ್ಯ ಮತ್ತು ಶಾಂತಿ, ಸೌಹಾರ್ದತೆಯನ್ನು ಹೆಚ್ಚಿಸುವುದರ ಜೊತೆಗೆ ಮಾನವತೆಯ ಧರ್ಮವು ಮುಖ್ಯ ಎಂದು ಅವರು ಪ್ರತಿಪಾದಿಸಿದರು.

ಅವರು ಮಂಗಳೂರಿನ ಸಂತ ಮದರ್ ತೆರೇಸಾ ವಿಚಾರ ವೇದಿಕೆಯ ಆಶ್ರಯದಲ್ಲಿ, ಕುಲಶೇಖರ ಹೋಲಿಕ್ರಾಸ್ ಕೋರ್ಡೆಲ್ ಚರ್ಚ್‌ನ ಸಹಕಾರದಲ್ಲಿ ಮಂಗಳವಾರ ಕುಲಶೇಖರದ ಕಲ್ಪನೆ ಮೈದಾನದಲ್ಲಿ ನಡೆದ ‘ಬೆಳಕಿನ ಹಬ್ಬ ದೀಪಾವಳಿ ಸಮಾರಂಭ 2024’ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಮಾತನಾಡುತ್ತಿದ್ದರು.

ಅತಿಥಿಯಾಗಿದ್ದ ಚಿತ್ರನಟ ಅರವಿಂದ್ ಬೋಳಾರ್ ಮಾತನಾಡಿ, ದೀಪಾವಳಿಯು ಖುಷಿಯ, ಎಲ್ಲಾ ಧರ್ಮದವರು ಆಚರಿಸುವ ಹಬ್ಬವಾಗಿದೆ, ಸೌಹಾರ್ದತೆಯನ್ನು ಪಸರಿಸುವ ಇಂತಹ ಕಾರ್ಯಕ್ರಮಗಳು ನಿರಂತರವಾಗಿ ನಡೆಯಲಿ ಎಂದು ಶ್ಲಾಘಿಸಿದರು.

ಅತಿಥಿಯಾಗಿದ್ದ ಬಿಕರ್ನಕಟ್ಟೆ ಅಹ್ಸನುಲ್ ಮಸಾಜಿದ್ ಸದಸ್ಯರಾದ ಸರ್ಫುದ್ದೀನ್ ಬಿ.ಎಸ್. ಮಾತನಾಡಿ, ಭಾರತವು ಶತಮಾನಗಳಿಂದ ಶಾಂತಿ ಮತ್ತು ಒಳಿತು ಮಾಡಲು ಪ್ರೋತ್ಸಾಹಿಸಿದ ಬಹುತ್ವದ ನೆಲ, ವಿವಿಧತೆಯೇ ಏಕತೆ ಎಂದು ಸಂದೇಶ ನೀಡಿದರು. ದೇಶದ ಪ್ರಗತಿಗೆ ಎಲ್ಲಾ ಧರ್ಮಗಳ ಕೊಡುಗೆ ಇದೆ ಎಂದರು. ಮಂಗಳೂರಿಗೆ ಶಾಂತಿಯ, ಸೌಹಾರ್ದತೆಯ ಹಣೆಪಟ್ಟಿ ತರುವಲ್ಲಿ ಎಲ್ಲರೂ ಶ್ರಮಿಸಿ ಕರಾವಳಿಯ ಅಭಿವೃದ್ಧಿ ಹೆಚ್ಚಿಸಲು ಕರೆ ನೀಡಿದರು.

ಹಬ್ಬಗಳು ದೇಶದ ಸಮೃದ್ಧಿಯನ್ನು ಹೆಚ್ಚಿಸುವ ಅವಕಾಶ ಒದಗಿಸುತ್ತವೆ ಎಂದ ಕೊರ್ಡೆಲ್ ಚರ್ಚಿನ ಧರ್ಮಗುರುಗಳಾದ ವಂದನೀಯ ಕ್ಲಿಫರ್ಡ್ ಫೆರ್ನಾಂಡಿಸ್ ಶುಭಾಶಂಸನೆಗೈದರು.

ಮದರ್ ತೆರೆಸಾ ವೇದಿಕೆಯ ಅಧ್ಯಕ್ಷ ರೊಯ್ ಕ್ಯಾಸ್ತೆಲಿನೊ ಮಾತನಾಡಿ, ವ್ಯತ್ಯಾಸ, ಭಿನ್ನತೆಗಳನ್ನು ಅರ್ಥ ಮಾಡಿ ಸಂಭ್ರಮಿಸಲು ಕರೆ ನೀಡಿದರು. ಪ್ರೀತಿಯಿಂದಲೇ ಸಹಬಾಳ್ವೆ ಸಾಧ್ಯ, ಸರ್ವರ ಒಗ್ಗಟ್ಟಿನಿಂದಲೇ ನಾಡು, ರಾಷ್ಟ್ರ ಕಟ್ಟಲು ಸಾಧ್ಯವೆಂದರು.

ಸ್ಥಳೀಯ ಕಾರ್ಪೋರೇಟರ್ ಕಿಶೋರ್ ಕೊಟ್ಟಾರಿ, ಶ್ರೀ ಧರ್ಮಶಾಸ್ತಾ ಮಂದಿರ ಟ್ರಸ್ಟ್ (ರಿ) ಜ್ಯೋತಿನಗರ ಕುಲಶೇಖರದ ಅಧ್ಯಕ್ಷ ವಕೀಲ ರಾಮಪ್ರಸಾದ್ ಎಸ್. ಮಾತನಾಡಿದರು. ಅನಿವಾಸಿ ಉದ್ಯಮಿ ಜೇಮ್ಸ್ ಮೆಂಡೋನ್ಸಾ, ಸಾಮರಸ್ಯ ಮಂಗಳೂರು ಅಧ್ಯಕ್ಷೆ ಮಂಜುಳಾ ನಾಯಕ್, ಬಿಕರ್ನಕಟ್ಟೆ ಅಹ್ಸನುಲ್ ಮಸಾಜಿದ್ ಅಧ್ಯಕ್ಷ ಸಯ್ಯದ್ ಮಹಮ್ಮದ್ ಸಯೀದ್ ಉಪಸ್ಥಿತರಿದ್ದರು.

ಮದರ್ ತೆರೆಸಾ ವೇದಿಕೆಯ ಕಾರ್ಯದರ್ಶಿ ಸುನಿಲ್ ಕುಮಾರ್ ಬಜಾಲ್ ಸ್ವಾಗತಿಸಿ ಪ್ರಾಸ್ತಾವಿಕ ಮಾತುಗಳನ್ನಾಡಿದರು. ವಿಶಿಷ್ಟವಾಗಿ ದೀಪವನ್ನು ಬೆಳಗಿಸುವುದರ ಮೂಲಕ ಸಭಾ ಕಾರ್ಯಕ್ರಮಕ್ಕೆ ಚಾಲನೆ ನೀಡಲಾಯಿತು.

ಫಾ. ವಾಲ್ಟರ್ ಅಲ್ಬುಕರ್ಕ್ ಎಸ್‍ಜೆ ಗಾಯನ ವೃಂದ, ಮಂಗಳೂರು ಹಾಗೂ ಕಲಾ ಸರಸ್ವತಿ ಡ್ಯಾನ್ಸ್ ಅಕಾಡೆಮಿ ತಂಡಗಳಿಂದ ಸಾಂಸ್ಕೃತಿಕ ಕಾರ್ಯಕ್ರಮ ನಡೆಯಿತು. ಮನೋಜ್ ವಾಮಂಜೂರ್ ಕಾರ್ಯಕ್ರಮ ನಿರ್ವಹಿಸಿದರು. ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಡಾಲ್ಫಿ ಡಿಸೋಜ ನಡೆಸಿ ಕೊಟ್ಟರು. ಕೊರ್ಡೆಲ್ ಚರ್ಚಿನ ಉಪಾಧ್ಯಕ್ಷೆ ರೂತ್ ಸಿಲ್ವಿಯಾ ಕ್ಯಾಸ್ತೆಲಿನೊ ಧನ್ಯವಾದ ಸಮರ್ಪಿಸಿದರು.

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

The post ಸಮೃದ್ಧ ಭಾರತದ ನಿರ್ಮಾಣಕ್ಕಾಗಿ ಸರ್ವ ಧರ್ಮೀಯರು ಒಗ್ಗೂಡಿ ಶ್ರಮಿಸಲು ಎನ್‌ಆರ್‌ಐ ಉದ್ಯಮಿ ಮೈಕಲ್ ಡಿಸೋಜ ಕರೆ appeared first on Budkulo.

ಮಂಗಳೂರಿನ ಸಂತ ಮದರ್ ತೆರೆಸಾ ವಿಚಾರ ವೇದಿಕೆ, ಟೌನ್‍ಹಾಲ್‍ನಲ್ಲಿ ಮದರ್ ತೆರೆಸಾರ 27ನೇ ಸಂಸ್ಮರಣಾ ದಿನದ ಪ್ರಯುಕ್ತ ‘ಸಂವಿಧಾನದ ಆಶಯಗಳಲ್ಲಿ ಪ್ರೀತಿ ಸಹಬಾಳ್ವೆಯ ಪಯಣ’ ವಿಚಾರ ಸಂಕಿರಣ ಏರ್ಪಡಿಸಿದ್ದು, ಉದ್ಘಾಟಕರಾಗಿ ಸಸಿಕಾಂತ್ ಸೆಂಥಿಲ್ ಭಾಗವಹಿಸುವರು. ವಿಧಾನ ಪರಿಷತ್ ಸದಸ್ಯ ಬಿ.ಕೆ. ಹರಿಪ್ರಸಾದ್ ವಿಷಯ ಮಂಡನೆ ಮಾಡಲಿದ್ದಾರೆ. ಸಾಹಿತಿ ಯು.ಟಿ. ಆಯಿಶಾ ಫರ್ಜಾನಾ ಪ್ರತಿಕ್ರಿಯೆ ನೀಡಲಿದ್ದಾರೆ. ರಾಯ್ ಕಾಸ್ತೆಲಿನೊ ಅಧ್ಯಕ್ಷತೆ ವಹಿಸಲಿದ್ದಾರೆ.

ಕಾರ್ಯಕ್ರಮ ಸಪ್ಟೆಂಬರ್ 3ರ ಮಂಗಳವಾರದಂದು ಕುದ್ಮುಲ್ ರಂಗರಾವ್ ಪುರಭವನದಲ್ಲಿ ಬೆಳಿಗ್ಗೆ 10 ಗಂಟೆಗೆ ಪ್ರಾರಂಭವಾಗಲಿದೆ. ಬೆಳಿಗ್ಗೆ 8.15ರಿಂದ ಕಾಲೇಜು ವಿದ್ಯಾರ್ಥಿಗಳಿಂದ ಪ್ರೀತಿಯ ಸಿಂಚನ ಸೌಹಾರ್ದ ಗಾಯನ ಸ್ಪರ್ಧೆ ನೆರವೇರಲಿದೆ. ಕಾರ್ಯಕ್ರಮವನ್ನು ಸಂತ ಮದರ್ ತೆರೆಸಾ ವಿಚಾರ ವೇದಿಕೆ ಹಾಗೂ ಸಾಮರಸ್ಯ ಮಂಗಳೂರು ಇವರ ಜಂಟಿ ಆಶ್ರಯದಲ್ಲಿ ಹಮ್ಮಿಕೊಳ್ಳಲಾಗಿದೆ.

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

The post ದ.ಕ. ಜಿಲ್ಲಾ ಮಕ್ಕಳ ಮೆಚ್ಚಿನ ಡಿ.ಸಿ.ಯಾಗಿದ್ದ ಸಂಸದ ಸಸಿಕಾಂತ್ ಸೆಂಥಿಲ್ ಸೆ. 3ರಂದು ಮಂಗಳೂರಿಗೆ appeared first on Budkulo.

-ಸಂಪಾದಕ

ಸಂದರ್ಶನ: ಡೊನಾಲ್ಡ್ ಪಿರೇರಾ, ಸಂಪಾದಕ Budkulo.com

ಕರಾವಳಿಯಲ್ಲಿ ತನ್ನದೇ ವೈಯಕ್ತಿಕ ವರ್ಚಸ್ಸಿನಿಂದ ಚುನಾವಣೆಗಳಲ್ಲಿ ಗೆದ್ದು ತಾನಿರುವ ಪಕ್ಷಕ್ಕೆ ಗಟ್ಟಿ ನೆಲೆ ಒದಗಿಸಿದ ಅಪರೂಪದ ರಾಜಕಾರಣಿ ಬೆಳ್ತಂಗಡಿಯ ವಸಂತ ಬಂಗೇರ. ಬಿಜೆಪಿ, ಜನತಾ ದಳ ಮತ್ತು ಕಾಂಗ್ರೆಸ್ ಪಕ್ಷಗಳಿಂದ ಶಾಸಕರಾಗಿ ಆಯ್ಕೆಯಾದ ಹೆಗ್ಗಳಿಕೆ ಅವರೊಬ್ಬರದು ಮಾತ್ರ. ತನ್ನದೇ ವರ್ಚಸ್ಸು ಹೊಂದಿರುವ ಮತ್ತು ಛಲಗಾರನೆಂದು ಹೆಸರುವಾಸಿಯಾದ ಬಂಗೇರ ಅವರು ಮತ್ತೆ ಚುನಾವಣೆಯನ್ನು ಎದುರಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಅವರ ಅನುಭವ, ಕ್ಷೇತ್ರಕ್ಕೆ ನೀಡಿದ ಕೊಡುಗೆ, ಚುನಾವಣಾ ಹೋರಾಟ ಮುಂತಾದ ವಿಚಾರಗಳನ್ನು ತಿಳಿದುಕೊಳ್ಳಲು ಅವರನ್ನು ಸಂದರ್ಶಿಸಲಾಯಿತು. ಅವರೇನು ಹೇಳಿದ್ದಾರೆಂಬುದನ್ನು ತಿಳಿದುಕೊಳ್ಳಲು ಈ ಸಂದರ್ಶನವನ್ನು ಓದಿ.

ಡೊನಾಲ್ಡ್ ಪಿರೇರಾ: ನಿಮಗೆ ಈ ಬಾರಿಯೂ ಚುನಾವಣೆಯಲ್ಲಿ ಗೆಲ್ಲುವ ವಿಶ್ವಾಸವಿದೆಯೇ?

ವಸಂತ ಬಂಗೇರ: ನನಗೆ ವಿಶ್ವಾಸವಿದೆ. ಕಳೆದ 4 ವರ್ಷ 10 ತಿಂಗಳಲ್ಲಿ ಮಾಡಿದ ಕೆಲಸ ಕಾರ್ಯಗಳು, 1000 ಕೋ.ರೂ.ಗೆ ಮಿಕ್ಕಿ ಆರ್ಥಿಕ ನೆರವು ತರಿಸಿ 91 ಗ್ರಾಮಗಳಲ್ಲಿಯೂ ಅಭಿವೃದ್ಧಿ ಕಾಮಗಾರಿ ನಡೆಸಲಾಗಿದೆ. ಅದರ ಆಧಾರದಲ್ಲಿ ನಾನು ಗೆಲ್ಲುವ ವಿಶ್ವಾಸ ನನಗಿದೆ.

ಡೊನಾಲ್ಡ್: ಹಲವು ವರ್ಷಗಳಿಂದ ಸತತವಾಗಿ ಶಾಸಕರಾಗಿದ್ದವರು ನೀವು. ಬೆಳ್ತಂಗಡಿಗೆ ನಿಮ್ಮ ವಿಶೇಷ ಕೊಡುಗೆ ಏನು?

ಬಂಗೇರ: 1982-83ರಲ್ಲಿ ನಾನು ಪ್ರಥಮವಾಗಿ ಶಾಸಕನಾಗಿದ್ದೆ. ಆ ಸಂದರ್ಭ ಬೆಳ್ತಂಗಡಿಯ ಹೆಚ್ಚಿನ ರಸ್ತೆಗಳಿಗೆ ಡಾಮರೀಕರಣ ಆಗಿರಲಿಲ್ಲ. ಸೇತುವೆಗಳಿರಲಿಲ್ಲ, ಆಸ್ಪತ್ರೆಗಳಿರಲಿಲ್ಲ, ಹೈಸ್ಕೂಲ್‍ಗಳಿರಲಿಲ್ಲ, ಜೂನಿಯರ್ ಕಾಲೇಜ್ ಇರಲಿಲ್ಲ, ಪ್ರಥಮ ದರ್ಜೆ ಕಾಲೇಜುಗಳಿರಲಿಲ್ಲ. ಬೇಡಿಕೆಯಿತ್ತು. ಗ್ರಾಮೀಣ ಪ್ರದೇಶದ, ಜಿಲ್ಲಾ ಪಂಚಾಯತ್ ರಸ್ತೆಗಳಿಗೂ ಡಾಮರೀಕರಣವಾಗಿರಲಿಲ್ಲ. ಹಿಂದೆ ವೈಕುಂಠ ಬಾಳಿಗಾರು ಶಾಸಕರಾಗಿದ್ದಾಗ ಅನುದಾನ ತರಿಸಿದ್ದರು. 1982ರಿಂದ 2018 ಆಗುವಾಗ ಎಲ್ಲಾ ಮನೆ ಮನೆಗಳಿಗೆ ತಲುಪುವ ಕಾರ್ಯ ನಡೆಸಿದ್ದೇನೆ. ಹಿಂದೆ ಟೆಲಿಫೋನ್, ಸರಕಾರಿ ಬಸ್ಸುಗಳಿರಲಿಲ್ಲ. ಹಳ್ಳಿಗಳಿಗೆ ಖಾಸಗಿ ಬಸ್ಸುಗಳೂ ಹೋಗುತ್ತಿರಲಿಲ್ಲ. ಈಗ 2018ರಲ್ಲಿ ಆಗಿರುವ ಬದಲಾವಣೆ ಏನೆಂದರೆ ರಾಷ್ಟ್ರೀಯ ಹೆದ್ದಾರಿಗೆ ಪೂರ್ಣವಾಗಿ ಹೊಸದಾಗಿ ಡಾಮರೀಕರಣವಾಗಿದೆ. ಪಿಡಬ್ಲ್ಯುಡಿಯ ಎಲ್ಲಾ ರಸ್ತೆಗಳಿಗೆ ಡಾಮರೀಕರಣವಾಗಿದೆ. ಗ್ರಾಮೀಣ ಪ್ರದೇಶಗಳ ಜಿ.ಪಂ. ರಸ್ತೆಗಳಿಗೆ ಡಾಮರೀಕರಣವಾಗಿದೆ. ಈ ಒಂದೇ ವರ್ಷದಲ್ಲಿ 29 ಸೇತುವೆಗಳಿಗೆ ಮಂಜೂರಾತಿ ದೊರಕಿಸಿಕೊಂಡಿದ್ದೇನೆ. ಬೆಳ್ತಂಗಡಿ ಸರಕಾರಿ ಆಸ್ಪತ್ರೆ 100 ಬೆಡ್‍ನ ಆಸ್ಪತ್ರೆಯಾಗಿ ಮೇಲ್ದರ್ಜೆಗೇರಿದೆ. ಆಸ್ಪತ್ರೆ ಕಟ್ಟಡಕ್ಕೆ ರೂ. 6 ಕೋಟಿ ಮಂಜೂರಾಗಿದೆ. 2 ಡಯಾಲಿಸಿಸ್ ಯಂತ್ರಗಳನ್ನು ಸರಕಾರದಿಂದ ಮಂಜೂರಾತಿ ದೊರಕಿಸಿ ತರಿಸಿದ್ದೇನೆ. ಕತಾರ್‍ನಲ್ಲಿನ ಮುಸ್ಲಿಮ್ ಬಂಧುಗಳು ಒಂದು ಯಂತ್ರವನ್ನು ಉಚಿತವಾಗಿ ಒದಗಿಸಿದ್ದಾರೆ. ಇನ್ನೊಂದು ಯಂತ್ರವನ್ನೂ ಅವರು ಒದಗಿಸಲಿದ್ದಾರೆ. ಒಟ್ಟಿಗೆ 4 ಯಂತ್ರಗಳಾಗುತ್ತವೆ. ಇಲ್ಲಿ ಒಟ್ಟು 60 ಡಯಾಬಿಟಿಕ್ ರೋಗಿಗಳಿದ್ದಾರೆ. ಅವರಿಗೆ ಇಲ್ಲಿಯೇ ಚಿಕಿತ್ಸೆ ಕೊಡಿಸುವ ವ್ಯವಸ್ಥೆ ಆಗಿದೆ. ಇಲ್ಲದಿದ್ದರೆ ಅವರು ಮಂಗಳೂರಿಗೇ ತೆರಳಬೇಕಿತ್ತು.

ಮಿನಿ ವಿಧಾನಸೌಧ ಈಗಾಗಲೇ ನಿರ್ಮಾಣಗೊಂಡಿದ್ದು, ಡಿಸೆಂಬರ್‌ನಲ್ಲಿ ಮುಖ್ಯಮಂತ್ರಿಗಳು ಅದನ್ನು ಉದ್ಘಾಟಿಸಿದ್ದಾರೆ. ಎಲ್ಲಾ ಸರಕಾರಿ ಇಲಾಖೆಗಳನ್ನು ಈ ಒಂದೇ ಕಟ್ಟಡಕ್ಕೆ ವರ್ಗಾಯಿಸಲಾಗುತ್ತಿದೆ.

ನಾನು ಶಾಸಕನಾಗಿ ಮಾಡಿದ ಪ್ರಮುಖ ಸಾಧನೆಯೆಂದರೆ ಬೆಳ್ತಂಗಡಿಯಲ್ಲಿ ಖಾಸಗಿ ಬಸ್ ನಿಲ್ದಾಣವಾಗುವಂತೆ ಮಾಡಿದ್ದು. ಮೊದಲು ಖಾಸಗಿ ಬಸ್ಸುಗಳು ಗುರುವಾಯನಕೆರೆ ತನಕ ಮಾತ್ರ ಬಂದು ಹೋಗುತ್ತಿದ್ದವು. ಚುನಾವಣೆಯಲ್ಲಿ 6 ತಿಂಗಳಲ್ಲಿ ಖಾಸಗಿ ಬಸ್‍ಗಳು ಬೆಳ್ತಂಗಡಿಗೆ ಬರುವಂತೆ ಮಾಡುತ್ತೇನೆಂದು ಭರವಸೆ ನೀಡಿದ್ದೆ. ಆದರೆ ಅದು ಅಷ್ಟು ಸುಲಭದ ಕೆಲಸವಾಗಿರಲಿಲ್ಲ. ಚುನಾವಣೆಯಲ್ಲಿ ನಾನು ಗೆದ್ದು, ಪ್ರಯತ್ನಪಟ್ಟು ಒಂದೂವರೆ ವರ್ಷವಾದರೂ ಆಗಿರಲಿಲ್ಲ. ಕೋರ್ಟಿನಲ್ಲಿ ಕೇಸ್ ಕೂಡ ದಾಖಲಾಯಿತು. ನಾನು ಎಲ್ಲರ ಸಭೆ ಕರೆದು ಬಸ್ಸುಗಳನ್ನು ಬೆಳ್ತಂಗಡಿಗೆ ತರುವಂತೆ ವಿನಂತಿ ಮಾಡಿದೆ. ಈ ನಿಟ್ಟಿನಲ್ಲಿ ಏನೇ ಸಮಸ್ಯೆ ಎದುರಾದರೂ ಅದನ್ನು ನಾನು ಬಗೆಹರಿಸುತ್ತೇನೆಂದು ಹೇಳಿದೆ. ಏನೇ ಅಡೆತಡೆ ಎದುರಾದರೂ ನಾನು ಅದನ್ನು ಎದುರಿಸುತ್ತೇನೆಂದು ಹೇಳಿದೆ. ಉಸ್ತುವಾರಿ ಸಚಿವರ ಸಮ್ಮುಖದಲ್ಲಿ ಎಲ್ಲಾ ಅಧಿಕಾರಿ ವರ್ಗದವರು ಭಾಗವಹಿಸಿ ಭರ್ಜರಿ ಕಾರ್ಯಕ್ರಮ ಏರ್ಪಡಿಸಿ ಉದ್ಘಾಟನೆಯೂ ಆಯಿತು. ಆದರೆ ಆರೇಳು ತಿಂಗಳು ಕಳೆದರೂ ಬಸ್ಸುಗಳು ಸರಿಯಾಗಿ ಬರುತ್ತಿರಲಿಲ್ಲ. ಕೊನೆಗೆ ಎಲ್ಲಾ ಅಗತ್ಯತೆಗಳನ್ನು ಪೂರೈಸಿ ಕ್ರಮಪ್ರಕಾರವಾಗಿ ಸಂಚಾರ ನಡೆಯುತ್ತಿದೆ. ಈಗ ಎರಡು ನಿಮಿಷಕ್ಕೊಂದರಂತೆ ಬಸ್ಸುಗಳು ಇಲ್ಲಿಂದ ಹೊರಡುತ್ತವೆ.

ಡೊನಾಲ್ಡ್: ಬೆಳ್ತಂಗಡಿಯಲ್ಲಿ ಸರಕಾರಿ ಬಸ್ ಡಿಪೋ ಸ್ಥಾಪನೆಯಾಗುವ ಕುರಿತು…

ಬಂಗೇರ: ಬಸ್ ಡಿಪೋ ಈಗ ಧರ್ಮಸ್ಥಳದಲ್ಲಿದೆ. ಅಲ್ಲಿ ಸ್ಥಳಾವಕಾಶದ ಕೊರತೆ ಇದೆ. ಉಜಿರೆಯಲ್ಲಿ ಮೂರು ಕಡೆ ಸ್ಥಳ ಪರಿಶೀಲನೆ ನಡೆದಿತ್ತು. ಉಜಿರೆ ಅಥವಾ ಕುವೆಟ್ಟು ಗ್ರಾಮದಲ್ಲಿ ಜಾಗ ಪರಿಶೀಲನೆ ನಡೆಯುತ್ತಿದೆ. ಶೀಘ್ರದಲ್ಲಿ ಪ್ರಾರಂಭವಾಗಲಿದೆ.

ಡೊನಾಲ್ಡ್: ಮೂರೂ ಪಕ್ಷಗಳಿಂದ ಚುನಾವಣೆಯಲ್ಲಿ ನಿಂತು ಗೆದ್ದು ಶಾಸಕರಾದ ವಿಶಿಷ್ಟ ದಾಖಲೆ ನಿಮ್ಮದು. ಕಳೆದ 10 ವರ್ಷಗಳಿಂದ ಕಾಂಗ್ರೆಸ್ಸಿನಲ್ಲಿದ್ದೀರಿ. ನೀವೀಗ 100% ಕಾಂಗ್ರೆಸ್ಸಿಗರಾಗಿದ್ದೀರಾ..?

ಬಂಗೇರ: ಹೌದು. ಅದರಲ್ಲಿ ಯಾವುದೇ ಸಂಶಯವಿಲ್ಲ.

ಡೊನಾಲ್ಡ್: ಹಿಂದೊಮ್ಮೆ ನಿಮ್ಮನ್ನು ಬಿಜೆಪಿಯವರು ಆಮಿಷಕ್ಕೊಡ್ಡಿದ್ದರು ಎಂದು ನೀವೇ ಆಪಾದಿಸಿದ್ದಿರಿ…

ಬಂಗೇರ: ನಾನು ಮೊದಲು ಬಿಜೆಪಿಯಿಂದ ಚುನಾವಣೆಯಲ್ಲಿ ಸ್ಪರ್ಧೆ ಮಾಡಿದ್ದೆ. ಮೊದಲು ನಾನು ಸ್ವತಂತ್ರವಾಗಿ ಸ್ಪರ್ಧಿಸಿದ್ದೆ. ಆದರೆ ಬಿಜೆಪಿಯಿಂದ ಎನ್ನಲಾಯಿತು. ಹೀಗೆ 2 ಸಲ ಗೆದ್ದಿದ್ದೆ. 1989ರಲ್ಲಿ ಜನತಾ ಪಕ್ಷಕ್ಕೆ ಹೋದೆ. ಕಡಿಮೆ ಅಂತರದಿಂದ ಸೋತೆ. 1994ರಲ್ಲಿ ಮತ್ತೆ ಗೆದ್ದೆ. ಮುಖ್ಯ ಸಚೇತಕನಾದೆ. ಕಾಂಗ್ರೆಸ್ ಪಕ್ಷಕ್ಕೆ ಬಂದು 2008 ಮತ್ತು 2013ರಲ್ಲಿ ಗೆದ್ದು ಶಾಸಕನಾಗಿದ್ದೇನೆ.

ಡೊನಾಲ್ಡ್: ಬೆಳ್ತಂಗಡಿಯಲ್ಲಿ ಚುನಾವಣೆಯ ಹೊಸ್ತಿಲಲ್ಲಿ ಕಾಂಗ್ರೆಸ್ ಪಕ್ಷದ ಸಂಘಟನೆ ಹೇಗಿದೆ?

ಬಂಗೇರ: ಕಾರ್ಯಕರ್ತರ ಮನಸ್ಸಿನಲ್ಲಿ ಕಾಂಗ್ರೆಸ್ ಪಕ್ಷವೇ ಗೆಲ್ಲುತ್ತದೆ ಎಂಬ ಮನೋಭಾವವಿದೆ. ಸ್ವಲ್ಪ ಅತಿ ಆತ್ಮವಿಶ್ವಾಸವಿದೆ. ಮೂರು ತಿಂಗಳಿಂದ ಮನೆ ಮನೆಗೆ ಕಾಂಗ್ರೆಸ್ ಅಭಿಯಾನ ನಡೆಯುತ್ತಿದೆ. ಎಲ್ಲಾ 238 ಬೂತ್‍ಗಳ ಮಟ್ಟದಲ್ಲಿ ಚುನಾವಣಾ ತಯಾರಿಗೆ ಅಭಿಯಾನ ನಡೆಸುತ್ತಿದ್ದೇನೆ.

ಡೊನಾಲ್ಡ್: ಬೆಳ್ತಂಗಡಿಯಲ್ಲಿ ಕಾಂಗ್ರೆಸ್‍ನಲ್ಲಿ ನೀವು ಹೊರತುಪಡಿಸಿ ದ್ವಿತೀಯ ಸ್ತರದಲ್ಲಿ ಯಾರೆಲ್ಲಾ ನಾಯಕರಿದ್ದಾರೆ?

ಬಂಗೇರ: ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಹರೀಶ್ ಕುಮಾರ್ ಇದ್ದಾರೆ. ಈ ಬಾರಿಯ ಚುನಾವಣೆಯಲ್ಲಿ ನಿಲ್ಲುವಂತೆ ಅವರನ್ನು ಒತ್ತಾಯಪಡಿಸಿದರೂ ಅವರು ಕೇಳಲಿಲ್ಲ, ಅದುದರಿಂದ ನಾನೇ ಮತ್ತೆ ನಿಲ್ಲುತ್ತಿದ್ದೇನೆ. ನಿವೃತ್ತ ಎಸ್‍ಪಿ ಪೀತಾಂಬರ ಹೇರಾಜೆ, ಮುಂಡಾಜೆಯ ಶ್ರೀಧರ ಭಿಡೆ ಮುಂತಾದ ನಾಯಕರು ಕಾಂಗ್ರೆಸ್‍ನಲ್ಲಿದ್ದಾರೆ.

ಡೊನಾಲ್ಡ್: ಗಡಾಯಿಕಲ್ಲು ಬೆಳ್ತಂಗಡಿಯ ಪ್ರಮುಖ ಪ್ರವಾಸಿ ತಾಣ. ನಾನು ಶಾಲಾ ದಿನಗಳಿಂದ ಪ್ರತಿ ಚುನಾವಣೆಯಲ್ಲಿ ಇದರ ಅಭಿವೃದ್ಧಿಯ ಆಶ್ವಾಸನೆಗಳನ್ನು ಕೇಳುತ್ತಾ ಬಂದಿದ್ದೇನೆ. ಆದರೆ ಏನೂ ಅಭಿವೃದ್ಧಿಯಾಗಿಲ್ಲವಲ್ಲಾ?

ಬಂಗೇರ: ಹೌದು. ಇದಕ್ಕೆ ಕೇಂದ್ರ ಸರಕಾರ, ಅದರಲ್ಲೂ ಈಗಿನ ಸರಕಾರ, ಸ್ಪಂದಿಸುವುದೇ ಇಲ್ಲ. ಅಲ್ಲಿಗೆ ಲಿಫ್ಟ್ ಮಾಡುವ ಯೋಜನೆ ಸಿದ್ಧಪಡಿಸಿ ಕಳುಹಿಸಲಾಗಿದೆ. ಆದರೆ ಅದಕ್ಕೆ ಸೂಕ್ತ ಸ್ಪಂದನೆ ಇಲ್ಲ. ಪ್ರಾಚ್ಯವಸ್ತು ಇಲಾಖೆಯ ಅಡಿಯಲ್ಲಿ ಅದು ಬರುವುದರಿಂದ ಅವರ ಒಪ್ಪಿಗೆಯಿಲ್ಲದೆ ಏನೇನೂ ಮಾಡುವಂತಿಲ್ಲ.

ಡೊನಾಲ್ಡ್: ಬೆಳ್ತಂಗಡಿಯ ಮುಖ್ಯ ರಸ್ತೆ (ಬೆಳ್ತಂಗಡಿ-ಚಿಕ್ಕಮಗಳೂರು) ಈಗ ರಾಷ್ಟ್ರೀಯ ಹೆದ್ದಾರಿಯಾಗಿದೆ. ಇದರ ಅಗಲೀಕರಣವೇನಾದರೂ ಮಾಡುವ ಪ್ರಸ್ತಾಪವಿದೆಯಾ?

ಬಂಗೇರ: ಚತುಷ್ಪಥ ರಸ್ತೆ ಮಾಡುವ ಚಿಂತನೆಯಿತ್ತು. ಆದರೆ ಹಾಗೆ ಮಾಡುವುದರಿಂದ ಬಹಳಷ್ಟು ಮನೆಗಳು ಹೋಗುತ್ತವೆ ಮತ್ತು ಅರಣ್ಯ ಸಂಪತ್ತು ನಾಶವಾಗುತ್ತದೆ. ಆದ ಕಾರಣ ಎರಡು ಏಕಮುಖ ರಸ್ತೆಗಳ ನಿರ್ಮಾಣಕ್ಕೆ ಯೋಜನೆ ಮಾಡಲಾಗಿದೆ. ಗುರುವಾಯನಕೆರೆಯಿಂದ ಮುಂಡಾಜೆವರೆಗೆ ಬೈಪಾಸ್ ರಸ್ತೆ ನಿರ್ಮಸಲಾಗುವುದು. ಮುಂಡಾಜೆಯಲ್ಲಿ 18 ಕೋ.ರೂ. ಸೇತುವೆ ನಿರ್ಮಾಣವಾಗುತ್ತಿದೆ.

ಡೊನಾಲ್ಡ್: ಕಾಂಗ್ರೆಸ್‍ನಲ್ಲಿ ಸಿದ್ಧರಾಮಯ್ಯನವರು ಹೈಕಮಾಂಡ್ ಮಟ್ಟದಲ್ಲಿ ಬಹಳ ಪ್ರಭಾವಶಾಲಿ ನಾಯಕರಾಗಿ ಹೊರಹೊಮ್ಮಿದ್ದಾರೆ. ರಾಜ್ಯದಲ್ಲಿ ಸಾಕಷ್ಟು ಅಭಿವೃದ್ಧಿ ಕೂಡ ನಡೆದಿದೆ…

ಬಂಗೇರ: ಹೌದು. ನಾವು ಕಳೆದ ಚುನಾವಣೆಯಲ್ಲಿ ನೀಡಿದ್ದ ಎಲ್ಲಾ ಭರವಸೆಗಳನ್ನು ಈಡೇರಿಸಿದ್ದೇವೆ. ಪ್ರಣಾಳಿಕೆಯಲ್ಲಿ ನೀಡಿದ ಎಲ್ಲಾ ಆಶ್ವಾಸನೆಗಳನ್ನು ಈಡೇರಿಸಿದ ಪ್ರಥಮ ಸರಕಾರ ಈ ಕಾಂಗ್ರೆಸ್ ಸರಕಾರ. ಅಲ್ಲದೆ ಇಂದಿರಾ ಕ್ಯಾಂಟೀನ್ ಸೇರಿದಂತೆ ಪ್ರಣಾಳಿಕೆಯಲ್ಲಿಲ್ಲದ ಹಲವು ಹೆಚ್ಚುವರಿ ಯೋಜನೆಗಳನ್ನು ಜಾರಿಗೊಳಿಸಿದ್ದು ನಮ್ಮ ಹೆಚ್ಚುಗಾರಿಕೆ.

ಡೊನಾಲ್ಡ್: ಅದರ ಆಧಾರದಲ್ಲಿ ಕಾಂಗ್ರೆಸ್ ಮತ್ತೆ ಅಧಿಕಾರಕ್ಕೆ ಬರುತ್ತದೆಯೇ?

ಬಂಗೇರ: ಬರಬೇಕು. ನಾವು ಇಷ್ಟೊಂದು ಭಾಗ್ಯ, ಹಲವು ಯೋಜನೆಗಳನ್ನು ಕೊಟ್ಟಿದ್ದೇವೆ. ಪ್ರಚಾರದಲ್ಲಿ ನಾವು ಸ್ವಲ್ಪ ಹಿಂದೆ ಇದ್ದೇವೆ ಎನ್ನುವುದು ನಿಜ. ಕೇಂದ್ರದ ಬಿಜೆಪಿ ಸರಕಾರ ಮಾಡಿದ್ದು ಏನೂ ಇಲ್ಲ. ಆದರೆ ಅವರು ನಮ್ಮ ರಾಜ್ಯ ಸರಕಾರ ಮಾಡಿದ ಯೋಜನೆಗಳೆಲ್ಲವನ್ನೂ ತಾವು ಮಾಡಿದ್ದು ಎಂಬಂತೆ ಬಿಂಬಿಸುತ್ತಾರೆ. ಮೊದಲು ಠೀಕೆ ಮಾಡುತ್ತಿದ್ದವರು ಈಗ ಇದೆಲ್ಲವನ್ನೂ ತಾವೇ ಮಾಡಿದ್ದು ಎಂದು ಹೇಳುತ್ತಿದ್ದಾರೆ.

ಡೊನಾಲ್ಡ್: ಕಾಂಗ್ರೆಸ್ ಪಕ್ಷ ಪ್ರಚಾರದಲ್ಲಿ ಯಾಕೆ ಹಿಂದೆ? ಬಿಜೆಪಿಯವರು ಸುಳ್ಳನ್ನು ಸಾವಿರ ಬಾರಿ, ಲಕ್ಷ ಬಾರಿ ಹೇಳುತ್ತಾರೆ ಎಂದು ಕಾಂಗ್ರೆಸ್ಸಿನವರು ಹೇಳುತ್ತಾರೆ. ಆದರೆ ಬಿಜೆಪಿಯವರ ಸುಳ್ಳಿಗೆ ಕಾಂಗ್ರೆಸ್ಸಿನವರು ಯಾಕೆ ಪ್ರತಿಕ್ರಿಯೆ ನೀಡುವುದಿಲ್ಲ? ಕಾಂಗ್ರೆಸ್ಸಿಗರ ಈ ನಿಷ್ಕ್ರಿಯತೆಗೆ ಕಾರಣವೇನು? ಅಪಪ್ರಚಾರದಿಂದ ನಿಮಗೆ ಹಿನ್ನಡೆಯಾಗುವುದಿಲ್ಲವೇ?

ಬಂಗೇರ: ಹೌದು. ಇದರಲ್ಲಿ ನಮ್ಮ ಕಾಂಗ್ರೆಸ್ಸಿಗರು ಸ್ವಲ್ಪ ಹಿಂದೆ ಇದ್ದದ್ದು ನಿಜ. ಈಗ ನಮ್ಮ ಕಾರ್ಯಕರ್ತರು ಮನೆ ಮನೆಗಳಿಗೆ ತೆರಳಿ ಕಾಂಗ್ರೆಸ್ಸಿನ ಯೋಜನೆಗಳನ್ನು ವಿವರಿಸುತ್ತಿದ್ದಾರೆ. ದೇಶದಲ್ಲಿ ಇಷ್ಟು ಭಾಗ್ಯಗಳನ್ನು, ಅಭಿವೃದ್ಧಿ ಕಾರ್ಯಗಳನ್ನು ಕೊಟ್ಟ ಸರಕಾರ ದೇಶದಲ್ಲಿಯೇ ಬೇರೆ ಇಲ್ಲ. ಅನ್ನಭಾಗ್ಯ ಬಹು ದೊಡ್ಡ ಕೊಡುಗೆ. ಬೆಳ್ತಂಗಡಿಯಲ್ಲಿ 35 ಸಾವಿರ ಬಿಪಿಎಲ್ ಕಾರ್ಡ್‍ದಾರು ಅನ್ನಭಾಗ್ಯದ ಫಲಾನುಭವಿಗಳಿದ್ದಾರೆ. ಸುಮಾರು 35 ಸಾವಿರ ಜನರಿಗೆ ಅಕ್ರಮ ಸಕ್ರಮ ಹಕ್ಕು ಪತ್ರ ನೀಡಲಾಗಿದೆ. 94ಸಿ, 94ಸಿಸಿ ಮುಖಾಂತರ 50-60 ವರ್ಷಗಳಿಂದ ಮನೆಯ ಹಕ್ಕು ಪತ್ರ ಸಿಗದಿದ್ದವರಿಗೆ ಹಕ್ಕು ಪತ್ರ ಒದಗಿಸಲಾಗಿದೆ. ಅವರಿಗೆ ಯಾವುದೇ ದಾಖಲೆ ಪತ್ರಗಳು ಸಿಗುತ್ತಿರಲಿಲ್ಲ. ಈಗ ಅವರಿಗೆ ನೆಮ್ಮದಿ ಸಿಕ್ಕಿದೆ. ಬಿಪಿಎಲ್ ಕಾರ್ಡ್ ಕೊಡಲಾಗುತ್ತಿದೆ. ಸ್ವಾಭಿಮಾನದಿಂದ ಬದುಕು ನಡೆಸುವಂತಾಗಲು ನೆರವಾಗಿದ್ದೇವೆ.

ಡೊನಾಲ್ಡ್: ಬಿಜೆಪಿಯವರು ಧರ್ಮವನ್ನು ರಾಜಕಾರಣಕ್ಕೆ ಬಳಸುತ್ತಿದ್ದಾರಲ್ಲಾ? ಅವರಿಗೆ ಹಿಂದೂ ಧರ್ಮವನ್ನು ಯಾರು ಗುತ್ತಿಗೆಗೆ ನೀಡಿದ್ದಾರೆ?

ಬಂಗೇರ: ನೋಡಿ, ನಾನು ಕೂಡ ಹಿಂದೂವೇ. ಸಿದ್ಧರಾಮಯ್ಯನವರೂ ಹಿಂದೂವೇ, ರಾಹುಲ್ ಗಾಂಧಿಯವರೂ ಹಿಂದೂವೇ ಆಗಿದ್ದಾರೆ. ಬಿಜೆಪಿಯವರು ಹಿಂದುತ್ವವನ್ನು ಹಿಡಿದುಕೊಂಡು ಹಿಂದೂಗಳ ಮತ ಸೆಳೆಯುವ ಹವಣಿಕೆ ನಡೆಸುತ್ತಾರೆ, ಸ್ವಲ್ಪ ಮಟ್ಟಿಗೆ ಅವರು ಅದರಲ್ಲಿ ಯಶಸ್ವಿಯಾಗಿದ್ದಾರೆ. ಯುವಜನರು ಅವರಿಗೆ ಹೆಚ್ಚು ಆಕರ್ಷಿತರಾಗಿದ್ದಾರೆ. ಯುವಜನರಿಗೆ ವಿವೇಚನೆ ಅಷ್ಟೊಂದಿರುವುದಿಲ್ಲ.

ಡೊನಾಲ್ಡ್: ಬೆಳ್ತಂಗಡಿ ಸಮೃದ್ಧ ಕೃಷಿ ಪ್ರದೇಶ. ಉತ್ತಮ ನೀರಾವರಿ ಕೂಡ ಇದೆ. ಇಲ್ಲಿಯೂ ಸಹ, ಹಲವು ಸಕಾರಣ, ಸಮಸ್ಯೆಗಳಿಂದಾಗಿ, ಕೃಷಿ ಚಟುವಟಿಕೆ ಕುಂಠಿತವಾಗಿದೆ…

ಬಂಗೇರ: ಇಲ್ಲಿ ಮಳೆಗಾಲದಲ್ಲಿ ಉತ್ತಮ ಮಳೆಯಾಗುತ್ತದೆ ಹೌದಾದರೂ, ಬೇಸಿಗೆಯಲ್ಲಿ ಕುಡಿಯುವ ನೀರಿನ ಸಮಸ್ಯೆ ಉದ್ಭವಿಸುತ್ತದೆ. ನಾನು, ದೇವೇಗೌಡರು ಮುಖ್ಯಮಂತ್ರಿಯಾಗಿದ್ದಾಗ, ಅವಿಭಜಿತ ದಕ್ಷಿಣ ಕನ್ನಡದಲ್ಲಿ ಅಲ್ಲಲ್ಲಿ ಚೆಕ್‍ಡ್ಯಾಂ ನಿರ್ಮಿಸಬೇಕೆಂದು ಬೇಡಿಕೆ ಇಟ್ಟಿದ್ದೆ. ಅದನ್ನು ಈಗಿನ ನಮ್ಮ ಸರಕಾರ ಈಡೇರಿಸುವ ನಿಟ್ಟಿನಲ್ಲಿದೆ (ಚುನಾವಣೆ ಘೋಷಣೆಯಾಗಿದ್ದರಿಂದ ಅದನ್ನು ಪ್ರಕಟಿಸಲಾಗಿಲ್ಲ). ಚೆಕ್‍ಡ್ಯಾಂ ನಿರ್ಮಿಸುವುದರಿಂದ ನೀರು ಭೂಮಿಯಲ್ಲಿ ಇಂಗುತ್ತದೆ, ಅದರಿಂದಾಗಿ ಮೇಲ್ಮಟ್ಟದಲ್ಲಿಯೇ ನೀರು ದೊರಕುತ್ತದೆ. ಇದರಿಂದಾಗಿ ಕೃಷಿ ಹಾಗೂ ಕುಡಿಯುವ ನೀರಿಗೆ ಕೊರತೆ ಆಗುವುದಿಲ್ಲ.

ಡೊನಾಲ್ಡ್: ನಮ್ಮಲ್ಲಿನ ಯುವ ಜನತೆ ಉದ್ಯೋಗಕ್ಕಾಗಿ ಬೇರೆಡೆ ತೆರಳುತ್ತಾರೆ. ಇಲ್ಲಿಯೇ ಉದ್ಯೋಗದ ಅವಕಾಶಗಳ ರಚನೆ ಸಾಧ್ಯವಿದೆಯೇ?

ಬಂಗೇರ: ಸ್ವ ಉದ್ಯೋಗ ಮಾಡಲು ನಾನು ಎಲ್ಲಾ ಕಡೆ ಕರೆ ಕೊಡುತ್ತೇನೆ. ಉದ್ಯೋಗದಿಂದ ಗಳಿಕೆ ಸಾಧ್ಯವಾದರೂ, ಸ್ವ ಉದ್ಯೋಗದಿಂದ ಹೆಚ್ಚು ಗಳಿಕೆ ಸಾಧ್ಯ. ಕೃಷಿ ಕೂಡ ಸ್ವ ಉದ್ಯೋಗವೇ. ಹೈನುಗಾರಿಕೆ ತುಂಬಾ ಲಾಭದಾಯಕ. ಸಣ್ಣ ಕೈಗಾರಿಕೆ ಸ್ಥಾಪನೆಗೂ ಅವಕಾಶವಿದೆ. ಐಟಿಐನಿಂದ ಹೊರ ಬಂದ ವಿದ್ಯಾರ್ಥಿಗಳು ಸ್ವ ಉದ್ಯೋಗ ಸ್ಥಾಪಿಸಲು ಅವಕಾಶವಿದೆ.

ಡೊನಾಲ್ಡ್: ಮಂಗಳೂರಿನಿಂದ ಗಲ್ಫ್ ರಾಷ್ಟ್ರಗಳಿಗೆ ನೇರ ವಿಮಾನ ಸಂಪರ್ಕವಿರುವುದರಿಂದ ಇಲ್ಲಿನ ಕೃಷಿ ಉತ್ಪನ್ನ, ತರಕಾರಿ ಬೆಳೆಗೆ ಉತ್ತಮ ಮಾರುಕಟ್ಟೆ ಅವಕಾಶವಿದೆ. ಇದಕ್ಕೇನಾದರೂ ಪ್ರೋತ್ಸಾಹ, ಬೆಂಬಲ ಕೊಡುವ ಸಾಧ್ಯತೆ ಇದೆಯಲ್ಲವೇ?

ಬಂಗೇರ: ಅದನ್ನು ಮಾಡಬಹುದು. ಆದರೆ ರಾಸಾಯನಿಕ ಗೊಬ್ಬರ ಮತ್ತು ಮದ್ದು ಸಿಂಪಡಣೆಯಾದಲ್ಲಿ ಅದರಿಂದ ಆರೋಗ್ಯಕ್ಕೆ ಹಾನಿಯಿದೆ. ಸಾವಯವ ಗೊಬ್ಬರ ಬಳಸಿ ಆರೋಗ್ಯಯುತವಾಗಿ ಕೃಷಿ ಮಾಡಿದರೆ ಅದರಿಂದ ಒಳಿತಾಗುತ್ತದೆ. ಒಳ್ಳೆಯ ಕೃಷಿ ಬೆಳೆ ಬೆಳೆದರೆ ಉತ್ತಮ ಉತ್ಪತ್ತಿ ಮತ್ತು ಆದಾಯ ಗಳಿಸಲು ಸಾಧ್ಯವಿದೆ.

ಡೊನಾಲ್ಡ್: ವಸಂತ ಬಂಗೇರ ಅವರು ಮುಂದಿನ ಸರಕಾರದಲ್ಲಿ ಸಚಿವರಾಗುತ್ತಾರೆಯೆ?

ಬಂಗೇರ: ಅವಕಾಶ ಕೊಟ್ಟರೆ ತೆಗೆದುಕೊಳ್ಳುತ್ತೇನೆಯೇ ಹೊರತು ಡಿಮಾಂಡ್ ಮಾಡುವವನಲ್ಲ ನಾನು.

ಡೊನಾಲ್ಡ್: ಕ್ರೈಸ್ತ ಧರ್ಮೀಯರಿಗೆ ವಿಶೇಷ ಅನುದಾನ, ಯೋಜನೆಯೇನಿದೆ?

ಬಂಗೇರ: ಎಲ್ಲಾ ಜಾತಿ, ಧರ್ಮದವರಿಗೆ ಸರಕಾರದಿಂದ ಯೋಜನೆ, ಅನುದಾನ ಕೊಡಲಾಗಿದೆ. ಕ್ರೈಸ್ತರೂ ಸೇರಿದಂತೆ ಎಲ್ಲರನ್ನು ಸಮಾನವಾಗಿ ನೋಡಿದ್ದೇವೆ. ಮುಸ್ಲಿಮರು, ಜೈನರು, ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ ಸೇರಿದಂತೆ ಪ್ರತಿಯೊಬ್ಬರಿಗೂ ನಮ್ಮ ಸರಕಾರದಿಂದ ಕೊಡುಗೆ ನೀಡಲಾಗಿದೆ. ಇದು ನಮ್ಮ ಸರಕಾರದ ದೊಡ್ಡ ಸಾಧನೆ. ಬಿಜೆಪಿಯವರಂತೆ ಬರೀ ಹಿಂದೂ ಹಿಂದೂ ಎಂದು ಹೇಳಿಕೊಂಡು ನಾವು ಓಡಾಡುವುದಿಲ್ಲ. ನಮ್ಮ ಜೊತೆ ಹಿಂದೂಗಳು ಹೆಚ್ಚಾಗಿ ಇದ್ದಾರೆ. ಬಿಜೆಪಿಯವರು ನಮ್ಮನ್ನು ಹಿಂದೂಗಳು ಎಂದು ಕರೆಯುವುದಿಲ್ಲ ಅಷ್ಟೇ!

ಡೊನಾಲ್ಡ್: ಅಂದರೆ ಬಿಜೆಪಿಯವರಿಗೆ ಅಭಿವೃದ್ಧಿ ವಿಷಯದಲ್ಲಿ ಆಸಕ್ತಿ ಇಲ್ಲ? ಕೇವಲ ಧರ್ಮವನ್ನು ರಾಜಕೀಯಕ್ಕೆ ಬಳಸುವುದರಲ್ಲಿಯೇ ಅವರ ಉದ್ದೇಶ..?

ಬಂಗೇರ: ಬಿಜೆಪಿಯವರಿಗೆ ಅಭಿವೃದ್ಧಿಯಲ್ಲಿ ಆಸಕ್ತಿ ಇಲ್ಲ. ಧರ್ಮ, ಕೋಮುವಾದ ಬಳಸಿ ಘರ್ಷಣೆ ಹುಟ್ಟು ಹಾಕುತ್ತಾರೆ. ಹಿಂದೂಗಳಿಗೆ ನಾವು ರಕ್ಷಣೆ ಕೊಡುತ್ತೇವೆ ಎನ್ನುವ ಬಿಜೆಪಿಯವರು ನಿಜವಾಗಿ ಹಿಂದೂ ಯುವಕರನ್ನು ಜೈಲಿಗೆ ಅಟ್ಟುತ್ತಾರೆ. ಸುಮಾರು ಒಂದೂವರೆ ಸಾವಿರ ಜನರು ಜಿಲ್ಲೆಯಲ್ಲಿ ಜೈಲು ಸೇರಿದ್ದಾರೆ. ಅದು ಹಿಂದೂಗಳಿಗೆ ಬಿಜೆಪಿಯ ನಿಜವಾದ ಕೊಡುಗೆ!

Send your Feedback to: budkuloepaper@gmail.com

Like us at: www.facebook.com/budkulo.epaper

Watch our TV Interviews – Click Here

ಬಸ್ರೀಕಟ್ಟೆಯ ಸುಂದರ ಹಿಮಗಿರಿ ಹೋಮ್‍ಸ್ಟೇ

The post ಹಿಂದೂ ಯುವಕರನ್ನು ಜೈಲಿಗಟ್ಟುವುದೇ ಬಿಜೆಪಿಯ ಕೊಡುಗೆ: ವಸಂತ ಬಂಗೇರ appeared first on Budkulo.

ಅದುವೇ ಬಸ್ರೀಕಟ್ಟೆಯ ಬಿಳಾಲುಕೊಪ್ಪದಲ್ಲಿರುವ ಹಿಮಗಿರಿ ಹೋಮ್‍ಸ್ಟೇ.

ಕರ್ನಾಟಕದ ಕಾಶ್ಮೀರವೆಂದು ಕರೆದುಕೊಳ್ಳುವ ಚಿಕ್ಕಮಗಳೂರು ಜಿಲ್ಲೆಯ ಕೊಪ್ಪ ತಾಲೂಕಿನಲ್ಲಿದೆ ಬಸ್ರೀಕಟ್ಟೆ. ಅಲ್ಲಿಂದ ಸ್ವಲ್ಪವೇ ದೂರದಲ್ಲಿದೆ ಬಿಳಾಲುಕೊಪ್ಪ. ಅಲ್ಲಿನ ವಿಶಾಲ ಕಾಫಿ ತೋಟಗಳ ನಡುವೆ ಶೋಭಿಸುತ್ತಿದೆ ರಮಣೀಯ ಹಿಮಗಿರಿ ಎಸ್ಟೇಟ್. ಅದರ ನಡುವೆ ಭವ್ಯವಾಗಿ ತಲೆ ಎತ್ತಿ ನಿಂತಿದೆ ಹಿಮಗಿರಿ ಹೋಮ್‍ಸ್ಟೇ.

ಬಸ್ರೀಕಟ್ಟೆಯಲ್ಲಿ ಶೋಭಿಸುತ್ತಿರುವ ಉನ್ನತ ಪರ್ವತ ಮೆರ್ತಿಗುಡ್ಡದ ಬಗ್ಗೆ ನೀವು ಕೇಳಿಯೇ ಇರುತ್ತೀರಿ. ಮೆರ್ತಿಗುಡ್ಡವು ಪ್ರವಾಸಿಗರನ್ನು, ಚಾರಣಿಗರನ್ನು ಕೈಬೀಸಿ ಕರೆಯುವ, ಚಿಕ್ಕಮಗಳೂರು ಜಿಲ್ಲೆಯ ಪ್ರಮುಖ ಪ್ರವಾಸಿಧಾಮಗಳಲ್ಲಿ ಒಂದು. ಅದರ ಸೌಂದರ್ಯ, ಭವ್ಯತೆಗೆ ಮಾರು ಹೋಗದವರೇ ಇಲ್ಲ. ಈ ಸುಂದರ ಬೆಟ್ಟದ ಎದುರಲ್ಲಿಯೇ ಇದೆ ಹಿಮಗಿರಿ ಹೋಮ್‍ಸ್ಟೇ.

ಹೌದು. ಬಿಳಾಲುಕೊಪ್ಪಕ್ಕೆದುರಾಗಿ ವಿರಾಜಮಾನವಾಗಿದೆ ಮೆರ್ತಿಗುಡ್ಡ. ಹಿಮಗಿರಿ ಹೋಮ್‍ಸ್ಟೇ ಪ್ರದೇಶದಿಂದ ಕಾಣುವ ಅದ್ಭುತ, ರಮಣೀಯ ದೃಶ್ಯಗಳಲ್ಲಿ ಮೆರ್ತಿಗುಡ್ಡವೂ ಒಂದು. ಅದರ ಸೊಬಗನ್ನು ಕಣ್ಣಾರೆ ಕಂಡರಷ್ಟೇ ಸುಖ. ಅಂತಹ ದಿವ್ಯ ಅನುಭೂತಿಯನ್ನು ಪಡೆದುಕೊಳ್ಳಬೇಕಾದರೆ ನೀವು ಹಿಮಗಿರಿ ಹೋಮ್‍ಸ್ಟೇಗೆ ಭೇಟಿ ನೀಡಬೇಕು. ಸುತ್ತಲೂ ಕಂಗೊಳಿಸುವ ಕಾಫಿ ತೋಟಗಳು, ಮುಗಿಲೆತ್ತರದ ಮರಗಳು, ನೀರಿನ ತೊರೆಗಳು ನಿಮ್ಮ ಪ್ರವಾಸವನ್ನು ಮತ್ತಷ್ಟು ರೋಚಕಗೊಳಿಸುತ್ತವೆ. ಅಗಾಧ ಪ್ರಾಕೃತಿಕ ಸಂಪತ್ತು ನಿಮ್ಮ ಮೈನವಿರೇಳಿಸುತ್ತದೆ.

ಹಲವು ಸಿನೆಮಾಗಳು ಇಲ್ಲಿ ಚಿತ್ರೀಕರಣಗೊಂಡಿವೆ. ಒಂದು ಕಾಲದಲ್ಲಿ ಇಲ್ಲಿನ ಪ್ರದೇಶಕ್ಕೆ ಆಡಿನಕೆರೆ, ಹರಸಿನ ಹಾಡ್ಲು ಎಂಬ ಹೆಸರಿದ್ದವು. ಇಲ್ಲಿನ ಹಚ್ಚ ಹಸಿರಿನ ತಾಣವು ತಂಪಾಗಿದ್ದು, ಹಿಮ ಬೀಳುತ್ತಿದ್ದರಿಂದ ಇಲ್ಲಿಗೆ ಹಿಮಗಿರಿ ಎಂಬ ಹೆಸರು ಬಂತು. ಇದೇ ಹಿಮಗಿರಿ ಎಸ್ಟೇಟ್‍ನಲ್ಲಿರುವ ಈ ಹೋಮ್‍ಸ್ಟೇ ಅದೇ ಹೆಸರಿನಿಂದ ಪ್ರಖ್ಯಾತಿಗೊಂಡಿದೆ.

ಚಿಕ್ಕಮಗಳೂರು ಜಿಲ್ಲೆ ಪ್ರಸಿದ್ಧ ದೇವಸ್ಥಾನಗಳಿಗೂ ತವರೂರು. ನೀವು ಹಿಮಗಿರಿಗೆ ಬಂದರೆ, ಇಲ್ಲಿಂದ ನಿಮ್ಮ ನೆಚ್ಚಿನ ಪ್ರವಾಸಿಧಾಮಗಳಿಗೂ ತೆರಳಬಹುದು, ಜೊತೆಗೆ ಪ್ರಮುಖ ದೇವಾಲಯಗಳಿಗೂ ಭೇಟಿ ನೀಡಬಹುದು. ಶೃಂಗೇರಿಯ ಶಾರದಾಂಬಾ ದೇವಸ್ಥಾನ, ಹೊರನಾಡಿನ ಅನ್ನಪೂರ್ಣೇಶ್ವರಿ ದೇವಸ್ಥಾನಗಳಿಗೆ ನೀವು ಇಲ್ಲಿಂದ ತೆರಳಬಹುದು. ಅಕ್ಕಪಕ್ಕದ ಜಿಲ್ಲೆಗಳಲ್ಲಿ ಸುಬ್ರಹ್ಮಣ್ಯ, ಧರ್ಮಸ್ಥಳ, ಉಡುಪಿ, ಕೊಲ್ಲೂರು ಸೇರಿದಂತೆ ಹಲವು ಪುಣ್ಯಕ್ಷೇತ್ರಗಳಿಗೂ ನೀವು ಪ್ರವಾಸ ಕೈಗೊಳ್ಳಬಹುದು.

ಹಿಮಗಿರಿ ಹೋಮ್‍ಸ್ಟೇಗೆ ತೆರಳುವ ದಾರಿ:

ನೀವು ಬೆಂಗಳೂರು, ಮೈಸೂರು ಕಡೆಯಿಂದ ಬರುವುದಾದರೆ, ಚಿಕ್ಕಮಗಳೂರಿನ ಬಾಳೆಹೊನ್ನೂರು ಮೂಲಕ ಬಿಳಾಲುಕೊಪ್ಪ ತಲುಪಬಹುದು. ಶಿವಮೊಗ್ಗ ಕಡೆಯಿಂದ ಬರುವುದಾದರೆ ಕೊಪ್ಪ ಮುಖಾಂತರ ಆಗಮಿಸಬಹುದು. ದಕ್ಷಿಣ ಕನ್ನಡ, ಉಡುಪಿ ಜಿಲ್ಲೆಗಳಿಂದ ಬರುವುದಾದರೆ ಎಸ್.ಕೆ. ಬಾರ್ಡರ್ ಅಥವಾ ಆಗುಂಬೆ ಘಾಟಿ ಮೂಲಕ ಶೃಂಗೇರಿಗೆ ತೆರಳಿ ಅಲ್ಲಿಂದ ಜಯಪುರದಿಂದ 14 ಕಿ.ಮೀ. ಸಾಗಿದರೆ ಬಿಳಾಲುಕೊಪ್ಪ ಸಿಗುತ್ತದೆ. ಬೆಳ್ತಂಗಡಿ, ಧರ್ಮಸ್ಥಳ ಮೂಲಕ ಸಾಗುವುದಾದರೆ ಚಾರ್ಮಾಡಿ ಘಾಟಿ ಮೂಲಕ ಕೊಟ್ಟಿಗೆರೆ-ಬಾಳೆಹೊನ್ನೂರು ರಸ್ತೆಯಲ್ಲಿ ಬರಹುದು.

ಸಂಪರ್ಕ ವಿವರ:

ಹಿಮಗಿರಿ ಹೋಮ್‍ಸ್ಟೇ ನೀವು ಭೇಟಿ ನೀಡಲೇಬೇಕಾದ ಸುಂದರ ಪ್ರವಾಸಿ ತಾಣ. ಅದ್ಭುತ ಅನುಭವ ಗಳಿಸಲು ಇಲ್ಲಿನ ಮತ್ತು ಸುತ್ತಮುತ್ತಲಿನ ನೈಸರ್ಗಿಕ ತಾಣಗಳಲ್ಲಿ ನೀವು ಸಮಯ ಕಳೆಯಬಹುದು. ಗುಡ್ಡ ಬೆಟ್ಟಗಳನ್ನೇರಿ ಖುಷಿ ಪಡಬಹುದು, ನೀರಿನಲ್ಲಿ ಆಟವಾಡಬಹುದು, ಸಾಹಸ ಮೆರೆಯಬಹುದು. ತಂಗಲು ಬೇಕಾದಷ್ಟು ರೂಮುಗಳು ಲಭ್ಯವಿದ್ದು, ಸಕಲ ವ್ಯವಸ್ಥೆಯಿದೆ. ಮುಂಗಡ ಬುಕ್ಕಿಂಗ್ ಮೂಲಕವೇ ನಿಮ್ಮ ಭೇಟಿಯನ್ನು ಖಚಿತಪಡಿಸಿಕೊಳ್ಳಿ. ಬುಕ್ಕಿಂಗ್ ಮತ್ತು ಹೆಚ್ಚಿನ ಮಾಹಿತಿಗಾಗಿ ಸಂಪರ್ಕ ವಿವರಗಳನ್ನು ಕೆಳಗೆ ನೀಡಲಾಗಿದೆ.

ಫೋನ್: +91 8088247519, +91 9449471921
ವಿಳಾಸ: Himagiri Home Stay, Bilalukoppa Post 577114, Basrikatte, Koppa Taluk, Chickmagalur Dist, Karnataka.
ಇಮೈಲ್: info@himagirihomestay.in
ವೆಬ್‍ಸೈಟ್: himagirihomestay.in
ಗೂಗಲ್ ಸರ್ಚ್ ಮಾಡಿ: Himagiri Home Stay, Bilalukoppa, Basrikatte

www.himagirihomestay.in

The post ಪ್ರವಾಸಿಗರನ್ನು ಕೈಬೀಸಿ ಕರೆಯುತ್ತಿದೆ ಬಸ್ರೀಕಟ್ಟೆಯ ಸುಂದರ ಹಿಮಗಿರಿ ಹೋಮ್‍ಸ್ಟೇ appeared first on Budkulo.

ವಿದ್ಯುತ್ ‘ಕದ್ದು’ ಸಿಕ್ಕಿ ಬಿದ್ದ ಮಾಜಿ ಮುಖ್ಯಮಂತ್ರಿ ಎಚ್.ಡಿ. ಕುಮಾರಸ್ವಾಮಿಯವರು ವಿರೋಧಿಗಳಿಂದ ‘ಕರೆಂಟ್ ಕಳ್ಳ’ ಎಂಬ ಬಿರುದನ್ನು ಪಡೆದು ಕುಖ್ಯಾತಿಗೆ ಈಡಾಗಿದ್ದಾರೆ! ರಾಜ್ಯದ ವಿಧಾನಸಭಾ ಚುನಾವಣೆಯ ಫಲಿತಾಂಶ ಬಂದು ಆರು ತಿಂಗಳು ಸಂದರೂ ಇನ್ನೂ ಸೋತ ದುಃಖದಲ್ಲಿರುವವರಲ್ಲಿ ಕುಮಾರಸ್ವಾಮಿಯೇ ಮೊದಲಿಗರು. ಏನೇನೋ ಕನಸು ಕಟ್ಟಿ, ಅಪಾರ ಭರವಸೆ ಇಟ್ಟುಕೊಂಡಿದ್ದ ಅವರಿಗೆ ತೀರಾ ನಿರಾಶೆಯಾಗಿದ್ದು ಮಾತ್ರವಲ್ಲ ಎಲ್ಲ ಅಪೇಕ್ಷೆ, ನಿರೀಕ್ಷೆಗಳೂ ಭಗ್ನಗೊಂಡಿದ್ದರಿಂದ ಸಂಪೂರ್ಣವಾಗಿ ಭ್ರಮನಿರಸನಗೊಂಡಿದ್ದು ಅವರಿಗಿನ್ನೂ ಕಾಡುತ್ತಿದೆ. ಅದಕ್ಕಿಂತಲೂ ಹೆಚ್ಚಾಗಿ ತನ್ನ ಪ್ರಾಥಮಿಕ ವಿರೋಧಿಗಳು ಅಧಿಕಾರ ಪಡೆದು ರಾರಾಜಿಸುತ್ತಿರುವುದನ್ನು ಅರಗಿಸುವ ಸಾಮರ್ಥ್ಯವಿಲ್ಲದೆ ಅವರು ಮತ್ತಷ್ಟು ಕಂಗೆಟ್ಟಿದ್ದಾರೆ.

ಪ್ರತಿದಿನವೆಂಬಂತೆ ಮುಖ್ಯಮಂತ್ರಿ ಸಿದ್ಧರಾಮಯ್ಯ, ಉಪ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಸೇರಿದಂತೆ ರಾಜ್ಯ ಸರಕಾರ ಮತ್ತು ಕಾಂಗ್ರೆಸ್ ಮುಖಂಡರ ವಿರುದ್ಧ ಸಿಡಿದೇಳುತ್ತಿದ್ದಾರೆ. ಮೊದಲಿಗೆ ಅವರ ಕೋಪ ಸಚಿವ ಚಲುವರಾಯಸ್ವಾಮಿ ಮೇಲೆ ಭುಗಿಲೆದ್ದಿತ್ತು. ಫಲಿತಾಂಶ ಬಂದು ಆರು ತಿಂಗಳಾದರೂ ಕುಮಾರಸ್ವಾಮಿ ವಾಸ್ತವಕ್ಕೆ ಬಂದಂತಿಲ್ಲ. ಅವರ ಆಕ್ರೋಶ, ಹತಾಶೆ ಇನ್ನೂ ಶಮನಗೊಂಡಿಲ್ಲ.

ಅಷ್ಟಕ್ಕೂ ಇತರರತ್ತ ಸದಾ ಆರೋಪ ಹೊರಿಸುತ್ತಾ ಬೆರಳು ತೋರಿಸುವ ಈ ಕುಮಾರಸ್ವಾಮಿ ಏನು ಸುಬಗರೇ? ಸಾಕ್ಷಾತ್ ಸತ್ಯ ಹರಿಶ್ಚಂದ್ರರೇ?

ಎರಡು ಬಾರಿ ಮುಖ್ಯಮಂತ್ರಿ ಆಗಿದ್ದರೆಂಬ ಹೆಗ್ಗಳಿಕೆ ಪಡೆದುಕೊಂಡಿರುವ ಕುಮಾರಸ್ವಾಮಿ ‘ಹೇಗೆ’ ಆ ಹುದ್ದೆಗೇರಿದ್ದರು ಎಂಬುದನ್ನು ನೆನಪಿಸಬೇಕಿದೆ. ಸದ್ಯ ‘ವಿದ್ಯುತ್ ಕಳ್ಳ’ ಎಂದು ಲೇವಡಿಗೊಳಗಾಗಿರುವ ಇವರು ಎಂಎಲ್‍ಎಗಳನ್ನೂ ‘ಕದ್ದಿದ್ದರು’ ಮಾತ್ರವಲ್ಲ ಸರಕಾರವನ್ನೇ ‘ಅಪಹರಿಸಿದ್ದರು’ ಎಂಬುದನ್ನು ಮರೆಯಲಾದೀತೇ?

2004ರ ವಿಧಾನಸಭಾ ಚುನಾವಣೆಯಲ್ಲಿ ಅತಂತ್ರ ಫಲಿತಾಂಶ ಬಂದಿತ್ತು. ಆಗ ಬಿಜೆಪಿ ‘ಜಾತ್ಯತೀತ’ ಪಕ್ಷಗಳಿಗೆ ‘ಅಸ್ಪೃಶ್ಯ’ವಾಗಿದ್ದರಿಂದ, ಮತ್ತು ಮುಖ್ಯವಾಗಿ ಕೇಂದ್ರದಲ್ಲಿ ವಾಜಪೇಯಿ ನೇತೃತ್ವದ ಎನ್‍ಡಿಎ ಸರಕಾರ ಪತನಗೊಂಡು ಡಾ. ಮನಮೋಹನ್ ಸಿಂಗ್ ನೇತೃತ್ವದ ಯುಪಿಎ ಸರಕಾರ ಅಧಿಕಾರಕ್ಕೇರಿದ್ದರಿಂದ 79 ಸ್ಥಾನ ಗಳಿಸಿದ ಬಿಜೆಪಿ ಏಕಾಂಗಿಯಾಗಬೇಕಾಯಿತು. 65 ಸ್ಥಾನ ಗಳಿಸಿದ ಕಾಂಗ್ರೆಸ್ ಮತ್ತು 58 ಸ್ಥಾನ ಗಳಿಸಿದ ಜೆಡಿಎಸ್ ಹಲವು ದಿನಗಳ ಹಗ್ಗ ಜಗ್ಗಾಟ ನಡೆಸಿ ಸಮ್ಮಿಶ್ರ ಸರಕಾರ ಪ್ರಾರಂಭಿಸಿದ್ದವು. ಹಾಗೆ ಕಾಂಗ್ರೆಸ್ಸಿನ ಧರ್ಮಸಿಂಗ್ ಮುಖ್ಯಮಂತ್ರಿ ಮತ್ತು ಜೆಡಿಎಸ್‍ನಿಂದ ಸಿದ್ಧರಾಮಯ್ಯನವರು ಉಪ ಮುಖ್ಯಮಂತ್ರಿ ಆದರು. ಅದೇ ಸಂದರ್ಭ ಕುಮಾರಸ್ವಾಮಿ ಮೊದಲ ಬಾರಿಗೆ ಶಾಸಕರಾಗಿ ಆಯ್ಕೆಯಾಗಿದ್ದರು (ಅದಕ್ಕೂ ಹಿಂದೊಮ್ಮೆ ಅವರು ಲೋಕಸಭಾ ಸದಸ್ಯರಾಗಿದ್ದರು. ನಂತರ ಮೂರು ಚುನಾವಣೆಗಳಲ್ಲಿ ಸೋತಿದ್ದರು). ಹಾಗೆ ಜೆಡಿಎಸ್ ಬೆಂಬಲದಿಂದ ಮುಖ್ಯಮಂತ್ರಿಯಾಗಿದ್ದ ಧರ್ಮಸಿಂಗ್ ನೇತೃತ್ವದ ಸರಕಾರ ಪತನಗೊಳಿಸಿದ್ದು ಇದೇ ಕುಮಾರಸ್ವಾಮಿ.

ಮೊದಲು ಸಿದ್ಧರಾಮಯ್ಯನವರನ್ನು ಅಧಿಕಾರದಿಂದ ಇಳಿಸಿ ನಂತರ ಪಕ್ಷದಿಂದ ಹೊರಗೋಡಿಸಲಾಯಿತು. ಅಷ್ಟಕ್ಕೆ ತೃಪ್ತರಾಗದ ಕುಮಾರಸ್ವಾಮಿ ಹಲವು ಅತೃಪ್ತರನ್ನು ಒಂದುಗೂಡಿಸಿ ಇಡೀ ಸರಕಾರವನ್ನೇ ಹೈಜಾಕ್ ಮಾಡಿದರು. ಅವರಿಗೆ ಸಾಥ್ ನೀಡಿದ್ದು ಬಿಜೆಪಿಯ ಯಡಿಯೂರಪ್ಪ, ಅಧಿಕಾರದ ಹಪಾಹಪಿಯಿಂದ. ಹೀಗೆ ಜೆಡಿಎಸ್ ಶಾಸಕರನ್ನು ಪಕ್ಷದ ನಿಲುವಿಗೆ ವಿರುದ್ಧವಾಗಿ ತನ್ನ ಜೊತೆ ‘ಸೆಳೆದುಕೊಂಡು’ ಅಧಿಕೃತ ಸರಕಾರ ಬೀಳಿಸಿ ನಂತರ ಬಿಜೆಪಿ ಜೊತೆಗೂಡಿ ತಾನೇ ಮುಖ್ಯಮಂತ್ರಿಯಾದರು. ಪಕ್ಷಕ್ಕೆ ‘ವಿರುದ್ಧವಾಗಿ’ ನಡೆದುಕೊಂಡರೆಂದು ‘ಆರೋಪಿಸಿ’ ಸ್ವತಃ ಅವರ ತಂದೆ ದೇವೇಗೌಡರು ಕುಮಾರಸ್ವಾಮಿಯನ್ನು ಪಕ್ಷದಿಂದ ‘ಹೊರ ಹಾಕುವ’ ಘೋಷಣೆಯನ್ನೂ ಮೊಳಗಿಸಿದ್ದರು (ಅದು ಕೇವಲ ನಾಟಕವಾಗಿತ್ತೆನ್ನುವುದನ್ನು ಬಹಳ ಜನ ಅರಿತಿದ್ದರು).

ಹಾಗೆ ಎಂಎಲ್‍ಎಗಳನ್ನು ‘ಕಳ್ಳತನ’ ಮಾಡಿ, ಕುತಂತ್ರದಿಂದ ತಾನೇ ಅಧಿಕಾರ ಪಡೆದುಕೊಂಡು ಪರ್ಯಾಯ ಸರಕಾರ ರಚಿಸಿಕೊಂಡ ಕುಮಾರಸ್ವಾಮಿ ಆಮೇಲೆ ಮನ ಬಂದಂತೆ ನಡೆದುಕೊಂಡರು. ಕೊನೆಗೆ ಕೊಟ್ಟ ಮಾತನ್ನು ಧಿಕ್ಕರಿಸಿ ಬಿಜೆಪಿ/ಯಡಿಯೂರಪ್ಪನವರಿಗೆ ವಿಶ್ವಾಸದ್ರೋಹ ಮಾಡಿ ಅಧಿಕಾರ ವಂಚಿಸಿದರು. ‘ವಚನಭೃಷ್ಟ’ ಎಂಬ ಬಿರುದು ಗಳಿಸಿದರು. ಆ ಮೂಲಕ ಬಿಜೆಪಿಯನ್ನು ರಾಜ್ಯದಲ್ಲಿ ಬೇರೂರುವಂತೆ ಮಾಡಿದ್ದೇ ಕುಮಾರಸ್ವಾಮಿ ಮತ್ತು ದೇವೇಗೌಡ.

ಹಾಗೆ ಧರ್ಮಸಿಂಗ್ ಅವರಿಗೂ ಯಡಿಯೂರಪ್ಪನವರಿಗೂ ಮೋಸ ಮಾಡಿ ಅಧಿಕಾರ ವಂಚಿಸಿದ ಖ್ಯಾತಿ ಇದೇ ಕುಮಾರಸ್ವಾಮಿಯವರದ್ದಲ್ಲವೇ? ಉಪ ಮುಖ್ಯಮಂತ್ರಿ ಸ್ಥಾನದಿಂದ ಸಿದ್ಧರಾಮಯ್ಯನವರನ್ನು ಇಳಿಸಿದ್ದು ಯಾವ ಉದ್ದೇಶದಿಂದ? ತನ್ನ ಸ್ವಾರ್ಥಕ್ಕಾಗುವಾಗ ನಿರ್ಭಿಡೆಯಿಂದ ಎಲ್ಲವನ್ನೂ ಗಳಿಸಿ, ಇತರರಿಗೆ ಅನ್ಯಾಯ ಮಾಡುವಾಗ ಎಲ್ಲವನ್ನೂ ಮರೆಯುವುದು ಪ್ರಾಮಾಣಿಕ ರಾಜಕಾರಣವೇ ಕುಮಾರಸ್ವಾಮಿಯವರೇ? ನಿಮ್ಮಲ್ಲಿ ಕನಿಷ್ಠ ನೈತಿಕತೆ ಎಂಬುದಾದರೂ ಇದೆಯೇ?

ಮುಂದಿನ ಚುನಾವಣೆಯಲ್ಲಿ ಕುಮಾರಸ್ವಾಮಿ ಮಾಡಿದ ದ್ರೋಹವನ್ನೇ ಪ್ರಚಾರಕ್ಕೆ ಬಳಸಿ ಬಿಜೆಪಿಗೆ 110 ಸ್ಥಾನಗಳು ದೊರೆತು ಯಡಿಯೂರಪ್ಪ ಮುಖ್ಯಮಂತ್ರಿಯಾದರು (ಪೂರ್ಣ ಬಹುಮತ ದೊರಕದಿದ್ದರೂ ಪಕ್ಷೇತರರ ಬೆಂಬಲ ಪಡೆದು). ಆಮೇಲೆ ಗಣಿಧಣಿಗಳ ಭ್ರಷ್ಟ ಹಣ ಬಳಸಿ ಶಾಸಕರನ್ನೇ ‘ಖರೀದಿಸಿ’ ಬಿಜೆಪಿ ಬಹುಮತ ಪಡೆದುಕೊಂಡಿದ್ದು ಕರ್ನಾಟಕದ ಚರಿತ್ರೆಯಲ್ಲೇ ಅತ್ಯಂತ ಹೇಯ ಬೆಳವಣಿಗೆ. ಐದು ವರ್ಷ ಮೂರು ಮುಖ್ಯಮಂತ್ರಿಗಳನ್ನು ನೀಡಿ 2013ರಲ್ಲಿ ಬಿಜೆಪಿ ಹೀನಾಯವಾಗಿ ಸೋತು, ಕಾಂಗ್ರೆಸ್ ನಿಚ್ಚಳ ಬಹುಮತ ಪಡೆದು ಮತ್ತೆ ಅಧಿಕಾರಕ್ಕೇರಿತು.

ಹಾಗೆ ಸಿದ್ಧರಾಮಯ್ಯನವರು ಮುಖ್ಯಮಂತ್ರಿ ಆದರು. ಅದು ಬಹುಶಃ ದೇವೇಗೌಡ ಮತ್ತವರ ಕುಟುಂಬ ಎಂದೆಂದೂ ಬಯಸದ ಬೆಳವಣಿಗೆಯಾಗಿತ್ತು. ಜೆಡಿಎಸ್‍ನಲ್ಲಿ ಎರಡು ಬಾರಿ ಮುಖ್ಯಮಂತ್ರಿ ಸ್ಥಾನದಿಂದ ತಮ್ಮನ್ನು ದೇವೇಗೌಡರು ವಂಚಿಸಿದ್ದರೆಂದು ಸಿದ್ಧರಾಮಯ್ಯನವರು ಯಾವಾಗಲೂ ಹೇಳುತ್ತಿದ್ದರು. ಕೊನೆಗೆ ಪಕ್ಷದಿಂದಲೇ ಕಿತ್ತು ಹಾಕಿದಾಗ ಕಾಂಗ್ರೆಸ್ ಸೇರಿದ ಸಿದ್ಧರಾಮಯ್ಯನವರು ಮುಖ್ಯಮಂತ್ರಿಯಾಗಿಯೇ ಬಿಟ್ಟರು. ಐದು ವರ್ಷ ಸೊಗಸಾಗಿ ಅಧಿಕಾರ ನಡೆಸಿದರು.

2018ರ ಚುನಾವಣೆಯಲ್ಲಿ ಕಾಂಗ್ರೆಸ್‍ಗೆ ಸೋಲುಂಟಾಯಿತು. ಕೇಂದ್ರದಲ್ಲಿ ಮೋದಿ ಸರಕಾರ ಬಲಿಷ್ಠವಾಗಿತ್ತು. ಬಿಜೆಪಿಗೆ 104 ಸ್ಥಾನಗಳೂ, ಕಾಂಗ್ರೆಸ್‍ಗೆ 80 ಮತ್ತು ಜೆಡಿಎಸ್‍ಗೆ 37 ಸ್ಥಾನಗಳೂ ಒಲಿದಿದ್ದವು. ಮತ್ತೊಮ್ಮೆ ಜೆಡಿಎಸ್ ಕಿಂಗ್‍ಮೇಕರ್ ಆಗುವುದರಲ್ಲಿತ್ತು. ಆದರೆ ಯಾರೂ ಊಹಿಸದ ರೀತಿ, ಕೇವಲ ಬಿಜೆಪಿಗೆ ಅಧಿಕಾರ ಸಿಗಬಾರದೆಂಬ ಏಕೈಕ ಕಾರಣದಿಂದ, ಕಾಂಗ್ರೆಸ್ ಹೈಕಮಾಂಡ್ ಕುಮಾರಸ್ವಾಮಿಯನ್ನೇ ಮುಖ್ಯಮಂತ್ರಿ ಮಾಡಲು ಮುಂದಾಯಿತು. ಅನಾಯಾಸವಾಗಿ ಮತ್ತೆ ಕುಮಾರಸ್ವಾಮಿ ಮುಖ್ಯಮಂತ್ರಿಯಾದರು. ಅದು ಬಯಸದೇ ಬಂದ ಭಾಗ್ಯವಾಗಿತ್ತು. ದೇಶಾದ್ಯಂತ ನಿರಂತರ ಸೋಲಿನಿಂದ ಕಳೆಗುಂದಿದ್ದ ಕಾಂಗ್ರೆಸ್‍ಗೆ ಬಿಜೆಪಿಯನ್ನು ದೂರ ಇಡುವುದು ಮಹತ್ತರ ಉದ್ದೇಶವಾಗಿತ್ತು. ಹಾಗಾಗಿಯೇ ಕಡುವೈರಿ ಸಿದ್ಧರಾಮಯ್ಯ ಸೇರಿದಂತೆ ರಾಜ್ಯದ ಕಾಂಗ್ರೆಸ್ ನಾಯಕರು ಸಂತೋಷದಿಂದಲೇ ಜೆಡಿಎಸ್ ಜೊತೆ ಸೇರಿದರು. ಕುಮಾರಸ್ವಾಮಿಯನ್ನು ಮುಖ್ಯಮಂತ್ರಿಯಾಗಿ ಒಪ್ಪಿ, ಅಪ್ಪಿಕೊಂಡರು!

ಹೀಗೆ ಎರಡು ಬಾರಿ ‘ಸಾಂದರ್ಭಿಕ ಶಿಶು’ ಕುಮಾರಸ್ವಾಮಿ ಮುಖ್ಯಮಂತ್ರಿ ಆಗಿದ್ದು ಸ್ವಂತ ಬಲದಿಂದಲೂ ಅಲ್ಲ, ಸಾಧನೆಯಿಂದಲೂ ಅಲ್ಲ. ಮೊದಲ ಬಾರಿ ಕುತಂತ್ರ ನಡೆಸಿ, ಹಿಂಬಾಗಿಲ ಮೂಲಕ ಮೂಲಕವೇ ಮುಖ್ಯಮಂತ್ರಿಯಾದ ಕುಮಾರಸ್ವಾಮಿಯವರು ಸ್ವಾರ್ಥವೇ ತನ್ನ ಉಸಿರು, ಅಧಿಕಾರವೇ ತನ್ನ ಗುರಿಯೆಂಬುದನ್ನು ಆಗಲೇ ಸಾಬೀತುಪಡಿಸಿದ್ದರು. ದ್ವಿತೀಯ ಬಾರಿಯೂ ಅವರು ಬಿಜೆಪಿ ಜೊತೆಯೇ ಹೋಗುವ ಸಾಧ್ಯತೆಗಳಿದ್ದವು. ಆದರೆ ಸೋನಿಯಾ ಗಾಂಧಿ ವಿವೇಚನೆಯಿಲ್ಲದೆ ಮತ್ತು ಅನಿವಾರ್ಯವೆಂಬಂತೆ ದೇವೇಗೌಡರನ್ನು ಒಲಿಸಿಕೊಂಡು ಕುಮಾರಸ್ವಾಮಿಯನ್ನು ಅವಸರದಿಂದ ಮುಖ್ಯಮಂತ್ರಿ ಮಾಡಿದ್ದೇ ಹೊರತು ಅದರಲ್ಲಿ ಕುಮಾರಸ್ವಾಮಿಯ ಯೋಗ್ಯತೆ ಕಿಂಚಿತ್ತೂ ಇರಲಿಲ್ಲ. ಹಾಗೆ ಪರಮ ವಿರೋಧಿಯೆನಿಸಿಕೊಂಡಿದ್ದ, ಸ್ವತಃ ತಂದೆಯಿಂದಲೇ ಮಾರು ದೂರ ಇಟ್ಟುಕೊಂಡಿದ್ದ ಬಿಜೆಪಿ ಜೊತೆ ಸೇರಿ ಅಧಿಕಾರದ ಸುಖ ಅನುಭವಿಸಿದ್ದ ಕುಮಾರಸ್ವಾಮಿ ಕಾಂಗ್ರೆಸ್ ಜೊತೆಯೂ ಅಧಿಕಾರ ಅನುಭವಿಸಿದರು.

ಹಾಗಂತ ಒಂದು ಮೆಚ್ಚಬೇಕಾದ ಸಂಗತಿಯೆಂದರೆ ಕುಮಾರಸ್ವಾಮಿಯೇನೂ ಕದ್ದು ಮುಚ್ಚಿ ಹೀಗೆಲ್ಲ ಮಾಡಿದ್ದಲ್ಲ. ಎಲ್ಲವನ್ನು ನೇರವಾಗಿ, ಬಹಿರಂಗವಾಗಿಯೇ ಮಾಡಿದ್ದಾರೆ. ತನಗೆ ತತ್ವ, ಸಿದ್ಧಾಂತ, ಧೋರಣೆಯೆಂಬುದೆಲ್ಲಾ ನಗಣ್ಯ, ಅನಗತ್ಯವೆಂಬುದಾಗಿ ಅವರು ತಮ್ಮ ನಡೆ-ನುಡಿಗಳಿಂದ ರುಜುವಾತುಪಡಿಸುತ್ತಾ ಬಂದಿದ್ದಾರೆ. ಅನುಕೂಲಸಿಂಧು ರಾಜಕಾರಣವನ್ನೇ ಉಸಿರಾಗಿಸಿಕೊಂಡ ರಾಜಕಾರಣಿ ಅವರು.

ಆದರೆ ಬಿಜೆಪಿಯವರು ಮತ್ತೆ ಅನೈತಿಕವಾಗಿ ಸರಕಾರ ಸ್ಥಾಪಿಸಿದ್ದರಿಂದ, ಕುಮಾರಸ್ವಾಮಿ ಬಹು ಬೇಗನೇ, ಮತ್ತೊಮ್ಮೆ, ಅಧಿಕಾರ ಕಳೆದುಕೊಂಡರು. ಅಕ್ರಮವಾಗಿ ಬಹುಮತ ಸಾಧಿಸಿದ್ದರಿಂದ ಬಿಜೆಪಿಗೆ ಜೆಡಿಎಸ್‍ನ ಹಂಗು ಇರಲಿಲ್ಲ. ತನ್ನ ಪಕ್ಷವನ್ನು ‘ಜಾತ್ಯತೀತ’ ಪಕ್ಷವೆಂದೇ ತೋರ್ಪಡಿಸುತ್ತಾ ಅಗತ್ಯ ಬಂದಲ್ಲಿ ಬಿಜೆಪಿ ಜೊತೆ ಸೇರುವ ಹವಣಿಕೆ ಕುಮಾರಸ್ವಾಮಿಯಲ್ಲಿ ಯಾವಾಗಲೂ ಇತ್ತು. ಅದು ಎಲ್ಲರಿಗೂ ಗೊತ್ತಿದ್ದದ್ದೇ.

ಆದರೆ ಮೊನ್ನೆಯ ಅಸೆಂಬ್ಲಿ ಚುನಾವಣೆಯಲ್ಲಿ ಒದಗಿದ ಮರ್ಮಾಘಾತ ಕುಮಾರಸ್ವಾಮಿಯವರನ್ನು ಪೂರ್ಣವಾಗಿ ಕಂಗೆಡಿಸಿದೆ ಎಂಬುದು ಅವರ ನಿರಂತರ ನಡವಳಿಕೆಯಿಂದ ಸಾಬೀತಾಗುತ್ತಿದೆ. ಅವರಿಗೂ, ದೇವೇಗೌಡರಿಗೂ ಈ ಚುನಾವಣೆ ಹಲವು ರೀತಿಯ ಆಘಾತ ನೀಡಿದೆ. ನಿರಾಶೆಯಷ್ಟೇ ಅಲ್ಲದೆ ಕ್ರೋಧ, ಭ್ರಮನಿರಸನಕ್ಕೂ ಕಾರಣವಾಗಿದೆ. ತಮಗೆದುರಾದ ಸೋಲು ಎಷ್ಟು ಅಸಹನೀಯವೋ ಅದಕ್ಕಿಂತಲೂ ಹೆಚ್ಚು ತಮ್ಮ ವಿರೋಧಿಗಳಾದ, ಕಾಂಗ್ರೆಸ್ ಮುಖಂಡರಿಗೆ ಒದಗಿದ ಗೆಲುವು ಇದೆಯಲ್ಲಾ ಅದನ್ನವರಿಗೆ ಇನ್ನೂ ಅರಗಿಸಿಕೊಳ್ಳಲಾಗುತ್ತಿಲ್ಲ.

ಚುನಾವಣೆ ಸೋಲಿನಿಂದ ಕಂಗೆಟ್ಟಿದ್ದ ಜೆಡಿಎಸ್ ವರಿಷ್ಠರು ರಾಜ್ಯದ ಮತದಾರರ ತೀರ್ಪಿನಿಂದ ಸಂಪೂರ್ಣವಾಗಿ ವಿಚಲಿತರಾಗಿದ್ದಾರೆ. ಅತ್ತ ಜಾತ್ಯತೀತ ನಿಲುವನ್ನೂ ಜನರು ನಂಬಲಿಲ್ಲ. ಇತ್ತ ಅಲ್ಪಸಂಖ್ಯಾತರ ಪರವೆಂಬ ಒಲವನ್ನೂ ಉಳಿಸಿಕೊಳ್ಳಲಾಗದೆ ಜೆಡಿಎಸ್ ತನ್ನ ಭದ್ರ ನೆಲೆಯಲ್ಲೇ ನೆಲಕಚ್ಚಿದೆ. ಕುಮಾರಸ್ವಾಮಿಯೇನೋ ಗೆದ್ದರು. ಆದರೆ ಅವರ ಮಗ ನಿಖಿಲ್‍ಗೊದಗಿದ ಹೀನಾಯ ಸೋಲು ದೇವೇಗೌಡರ ಕುಟುಂಬಕ್ಕೆ ದೊಡ್ಡ ಹಿನ್ನಡೆ ಮತ್ತು ಅವಮಾನ ಕೂಡ.

ಅಷ್ಟೇ ಆಗಿದ್ದರೆ ಏನೋ ಪರವಾಗಿಲ್ಲ ಎನ್ನಬಹುದಿತ್ತು. ಆದರೆ ತಮ್ಮ ಕಡುವೈರಿಗಳಾದ ಸಿದ್ಧರಾಮಯ್ಯ ಮತ್ತು ಡಿ.ಕೆ. ಶಿವಕುಮಾರ್ ಅವರು ಅದ್ಭುತವಾಗಿ ಗೆದ್ದು ವಿಜೃಂಭಿಸಿ ಮತ್ತೆ ಸರಕಾರದ ಚುಕ್ಕಾಣಿ ಹಿಡಿದದ್ದನ್ನು ಕಂಡು ಕುಮಾರಸ್ವಾಮಿಯಾಗಲೀ ದೇವೇಗೌಡರಾಗಲೀ ಕನಸು ಮನಸಿನಲ್ಲೂ ಅರಗಿಸಿಕೊಳ್ಳುವಂಥದ್ದಲ್ಲ. ಹಿಂದೆ ತಮ್ಮದೇ ಪಕ್ಷದಲ್ಲಿದ್ದ ಜಮೀರ್, ಚಲುವರಾಯಸ್ವಾಮಿ ಮುಂತಾದವರು ಸಚಿವರಾಗಿದ್ದು ಅವರ ಅಸಹನೆ ಹೆಚ್ಚಿಸಿತು. ಒಂದೆಡೆ ತಮಗಾದ ಹೀನಾಯ ಸೋಲು, ಒಟ್ಟಾರೆ ಹಿನ್ನಡೆ ಮತ್ತು ಆ ಪರಾಜಯದ ಬೆಂಕಿಗೆ ತುಪ್ಪ ಸುರಿಯುವಂತೆ ಸಿದ್ದು-ಡಿಕೆಶಿಯ ದಿಗ್ವಿಜಯ ಅವರನ್ನು ಸಂಪೂರ್ಣವಾಗಿ ಜಿಗುಪ್ಸೆಗೆ ದೂಡಿತು.

ಜನರಿಂದ ಪೂರ್ಣವಾಗಿ ತಿರಸ್ಕರಿಸಲ್ಪಟ್ಟು, ಇನ್ನು ಐದು ವರ್ಷ ಅಧಿಕಾರ ಇಲ್ಲವೆಂಬುದು ಖಂಡಿತವಾದಾಗ ಬೇರೇನೂ ದಾರಿ ಕಾಣದೆ ಜೆಡಿಎಸ್ ಪಕ್ಷವನ್ನು ಗೌಡರು ಬಿಜೆಪಿ ಜೊತೆಗೆ ‘ಅಧಿಕೃತವಾಗಿ’ ಹೊಂದಾಣಿಕೆ ಮಾಡುವ ಹೆಜ್ಜೆಯಿಟ್ಟಿದ್ದಾರೆ. ಹಿಂದೆ ಕದ್ದು ಮುಚ್ಚಿ ಒಂದಾಗಿ, ತೋರಿಕೆಗೆ ಅದನ್ನು ನಿರಾಕರಿಸುತ್ತಿದ್ದ, ಕಾಂಗ್ರೆಸ್ ಪಕ್ಷದ ಬೆಂಬಲದಿಂದಲೇ ಪ್ರಧಾನಿಯಾಗಿದ್ದ ದೇವೇಗೌಡರು, ಈಗ ಲಜ್ಜೆಯಿಲ್ಲದೆ ಬಿಜೆಪಿಯನ್ನು ಬರಸೆಳೆದಿದ್ದಾರೆ.

ಯಾವುದೇ ಪಕ್ಷಕ್ಕೆ ಬಹುಮತ ಬರದೇ ತಮ್ಮ ಪಕ್ಷಕ್ಕೆ 25ರಿಂದ 35 ಸ್ಥಾನ ಬಂದರೂ ಸಾಕು, ತಾವೇ ಕಿಂಗ್‍ಮೇಕರ್ ಆಗಿ, ಬಿಜೆಪಿ-ಕಾಂಗ್ರೆಸ್‍ಗಳೆರಡನ್ನೂ ಕುಣಿಸಿ, ಮುಂದಿನ ಐದು ವರ್ಷ ಸರಕಾರದಲ್ಲಿ ಹಿಡಿತ ಸಾಧಿಸುವ ಅಪೇಕ್ಷೆ, ನಿರೀಕ್ಷೆ ಹೊಂದಿ ಕನಸಿನ ಸೌಧ ಕಟ್ಟಿದ್ದ ಗೌಡರ ಫ್ಯಾಮಿಲಿಗೆ ಚುನಾವಣೆಯ ಫಲಿತಾಂಶದಿಂದ ಎಂಥಾ ಹೊಡೆತ ಬಿದ್ದಿತ್ತೆಂದರೆ ಅದನ್ನು ಜೀರ್ಣಿಸಲು ಈಗಲೂ ಅವರಿಗೆ ಆಗುತ್ತಿಲ್ಲವೆಂಬುದು ಅವರ ವರ್ತನೆಯಿಂದ ದಿನಂಪ್ರತಿ ಸಾಬೀತಾಗುತ್ತಿದೆ. ಪಂಚ ಗ್ಯಾರಂಟಿಗಳ ದೆಸೆಯಿಂದ ಕಾಂಗ್ರೆಸ್ ಪಕ್ಷ ಮತ್ತಷ್ಟು ಭದ್ರವಾಗುತ್ತಿರುವುದನ್ನು ಅರಿತುಕೊಂಡ ಜೆಡಿಎಸ್ ಧುರೀಣರು ಅಲ್ಪಸಂಖ್ಯಾತರ ಮತಗಳಿನ್ನು ಕೈಗೆಟುಕದ ದ್ರಾಕ್ಷಿ ಎಂಬರಿವಾಗಿ ಬಿಜೆಪಿ ಜೊತೆ ಸೇರಿ ಹಿಂದೂ ಮತ ಬ್ಯಾಂಕ್‍ನಿಂದಾದರೂ ಜೀವಕಳೆ ಗಳಿಸಿಕೊಳ್ಳುವ ಹವಣಿಕೆಯಲ್ಲಿದ್ದಾರೆ.

ರಾಜ್ಯ ಬಿಜೆಪಿಯಲ್ಲಿ ಯಡಿಯೂರಪ್ಪ ಹೊರತುಪಡಿಸಿದರೆ ಮಾಸ್ ಲೀಡರ್ ಮತ್ತು ಪ್ರಭಾವಿ ನಾಯಕರೇ ಇಲ್ಲದಿರುವುದನ್ನು ಪರಿಗಣಿಸಿರುವ ಚಾಣಾಕ್ಷ ಗೌಡರು ಆ ಕೊರತೆಯನ್ನು ತಮ್ಮ ಮಗನಿಗೆ ಅವಕಾಶವಾಗಿ ಗಳಿಸಿಕೊಳ್ಳಲು ಬಿಜೆಪಿಯ ಜೊತೆ ಮೈತ್ರಿಯನ್ನು ಬಳಸಿಕೊಳ್ಳುವ ತಂತ್ರಗಾರಿಕೆ ನಡೆಸಿದ್ದಾರೆ ಎನ್ನಬಹುದು. ಮುಂದಿನ ಲೋಕಸಭಾ ಚುನಾವಣೆಯಲ್ಲಿಯಾದರೂ ಅಲ್ಪಸ್ವಲ್ಪ ಯಶಸ್ಸು ಪಡೆಯದಿದ್ದರೆ ತಮ್ಮ ಪಕ್ಷಕ್ಕೂ ಕುಟುಂಬಕ್ಕೂ ಅಸ್ತಿತ್ವವೇ ಇಲ್ಲದಾಗುವ ಆತಂಕದಿಂದ ಅವರು ಬಸವಳಿದಿದ್ದಾರೆನ್ನುವುದು ಸ್ಪಷ್ಟ.

ಈ ಹಿಂದೆ ಬಿಜೆಪಿ ಜೊತೆಗಿನ ತೆರೆಯ ಹಿಂದಿನ ಮೈತ್ರಿ ಮತ್ತು ಸಹಕಾರದಿಂದಾಗಿ ತಮ್ಮ ಜಾತ್ಯತೀತ ಇಮೇಜ್‍ಗೆ ಧಕ್ಕೆಯಾಗಿತ್ತೆಂಬಂತೆ ತೋರ್ಪಡಿಸಿ, ದೇಶದ ಜಾತ್ಯತೀತ (ಬಿಜೆಪಿ ವಿರೋಧಿ) ಪಕ್ಷಗಳ ನಾಯಕರ ಸ್ನೇಹ ಉಳಿಸಿಕೊಂಡಿದ್ದ ದೇವೇಗೌಡರು, ಇದೀಗ ಅವೆಲ್ಲವನ್ನು ಸಮುದ್ರಕ್ಕೆಸೆದು ತಮ್ಮ ಹಿತಾಸಕ್ತಿಗಾಗಿ ಬಹಿರಂಗವಾಗಿ ‘ಕೋಮುವಾದಿ’ ಬಿಜೆಪಿ ಜೊತೆ ಕೂಡಿಕೆ ಮಾಡಿಕೊಂಡಿದ್ದಾರೆ! ಅದರಿಂದ ಅವರ ಕುಟುಂಬವೂ ಪಕ್ಷವೂ ಏನನ್ನು ಗಳಿಸುತ್ತದೆ ಎಂಬುದನ್ನು ಕಾಲವೇ, ಅತೀ ಶೀಘ್ರದಲ್ಲಿ, ಉತ್ತರಿಸಲಿದೆ.

The post ಎಂಎಲ್‍ಎಗಳನ್ನೇ ಕದ್ದು, ಸರಕಾರವನ್ನೇ ಹೈಜಾಕ್ ಮಾಡಿ ಮುಖ್ಯಮಂತ್ರಿ ಆಗಿದ್ದ ಕುಮಾರಸ್ವಾಮಿಯವರೇ, ನೀವೇನು ಸುಬಗರೇ?!? appeared first on Budkulo.

-ಸಂಪಾದಕ

ಮೇಲಿನ ಶೀರ್ಷಿಕೆ ನನ್ನಲ್ಲಿ ಅನೇಕ ಭಾವನೆಗಳನ್ನು ಸಮುದ್ರದ ಅಲೆಗಳು ಪುಟಿದೇಳುವಂತೆ ಮಾಡುತ್ತದೆ. ಪ್ರಥಮತಃ ನನಗೆ ವಿದ್ಯಾ ದಾನ ಮಾಡಿದ ನನ್ನ ಶ್ರೇಷ್ಠ ಗುರುಗಳು, ಒಂದನೇ ತರಗತಿಯಂದ ಎಸ್.ಎಸ್.ಎಲ್.ಸಿ. ವರೆಗೆ ನನ್ನನ್ನು ಬಹಳವಾಗಿ ಪ್ರೇರಣೆ ನೀಡಿ ನಾನೋರ್ವ ಉತ್ತಮ ಮಾನವಳಾಗಿ ಮಾಡಿದವರನ್ನು ನೆನಪಿಸಿ, ಅವರಿಗೆ ಹೃದಯದಿಂದ ದೀರ್ಘ ನಮಸ್ಕಾರ ಮಾಡುತ್ತಿದ್ದೇನೆ. ಅವರಿಗೆ ನಾನೇನೂ ಕಾಣಿಕೆ ಅಥವಾ ಗುರುದಕ್ಷಿಣೆ ನೀಡಲು ಸಾಧ್ಯವಿಲ್ಲ. ಏಕೆಂದರೆ ಅವರ್ಯಾರೂ ಈ ಜಗತ್ತಿನಲ್ಲಿ ಇಲ್ಲ. ದೇವರ ಪಾದವನ್ನು ಅವರು ಸೇರಿ ಆಗಿದೆ.

ಎರಡನೆಯದಾಗಿ ಸಂತ ತೆರೆಸಾ ಪ್ರೌಢ ಶಾಲೆಯಲ್ಲಿ ನಲ್ವತ್ತು ವರ್ಷಗಳಿಂದ ನನ್ನ ಬೋಧನೆಯನ್ನು ತಾಳ್ಮೆಯಿಂದ ಆಲಿಸಿ ಕಲಿತು, ಜ್ಞಾನಿಗಳಾಗಿ ಬೆಳೆದ ನನ್ನ ಸಹಸ್ರಾರು ವಿದ್ಯಾರ್ಥಿ ವಿದ್ಯಾರ್ಥಿನಿಯರಿಗೆ ನಮ್ರತೆಯಿಂದ ಸಮಸ್ಕರಿಸುತ್ತಾ ಅವರಿಂದ ನನ್ನ ವ್ಯಕ್ತಿತ್ವದಲ್ಲಿಯೂ ವಿದ್ಯಾ ಕ್ಷೇತ್ರದಲ್ಲಿಯೂ ಅಭಿವೃದ್ಧಿ ಆಗಿದೆ ಎಂದು ದೃಢಪಡಿಸುತ್ತಿದ್ದೇನೆ.

ಮೊದಲಾಗಿ ನಾನು ಶಿಕ್ಷಕಿಯಾಗಿ ಸೇರಿದ್ದು ಸಂತ ತೆರೆಸಾ ಬಾಲಕಿಯರ ಪ್ರೌಢ ಶಾಲೆ ಬೆಳ್ತಂಗಡಿ ಇಲ್ಲಿ, 1969ರಲ್ಲಿ. ಬಿ.ಎಡ್. ತರಬೇತಿ ಇಲ್ಲದೇ ನನ್ನನ್ನು ಶಿಕ್ಷಣ ಬೋಧನೆ ಮಾಡುವ ಕ್ಷೇತ್ರಕ್ಕೆ ನನ್ನಲ್ಲಿ ಉತ್ಸಾಹ ಮೂಡಿಸಿ ನನಗೆ ಪ್ರೋತ್ಸಾಹ ಕೊಟ್ಟ ಅರ್ಸುಲೈನ್ ಫ್ರಾನ್ಸಿಸ್ಕನ್ ಕೂಟದ ಧರ್ಮಭಗಿನಿಯರಾದ ವಂದನೀಯ ಕ್ಲಾಡಿಯಾರವರಿಗೆ ನನ್ನ ಕೊನೆ ಇಲ್ಲದ ನಮನಗಳು. 19ರ ವಯಸ್ಸಿನ ನಾನು ಬಲು ಉತ್ಸಾಹದಿಂದ ನನ್ನ ವಿದ್ಯಾರ್ಥಿನಿಯರಿಗೆ ವಿಜ್ಞಾನ ಹಾಗೂ ಇಂಗ್ಲಿಷ್ ಭಾಷೆಯನ್ನು ವಿವರಿಸಿ ಬೋಧಿಸಿದೆ. ಆ ಸಮಯದಲ್ಲಿ ವಿದ್ಯಾರ್ಥಿನಿಯರು ಮಾತ್ರ ಇದ್ದು, ವಿಧೇಯತೆ, ಮೌನತೆ ಆ ಮುಗ್ಧ ಮಕ್ಕಳಲ್ಲಿ ಧಾರಾಳವಾಗಿ ಇತ್ತು.

ಶಾಲೆ ನಡೆಯುವ ರೀತಿ, ವಿವಿಧ ದಾಖಲೆಗಳನ್ನು ಪರಿಶೀಲಿಸಲು ನಮ್ಮ ಶಾಲೆಗೆ ಬಂದ ಮಂಗಳೂರು ವಿದ್ಯಾ ಕ್ಷೇತ್ರದ (D.D.P.I. Office) ಪರಿವೀಕ್ಷಕರು ಬಿ.ಎಡ್. ತರಬೇತಿ ಇಲ್ಲದ ಶಿಕ್ಷಕಿಗೆ ಎಸ್.ಎಸ್.ಎಲ್.ಸಿ. ಮಕ್ಕಳಿಗೆ ಇಂಗ್ಲಿಷ್ ಬೋಧನೆ ಮಾಡಲು ಕೊಡುವುದು ಸರಿಯಲ್ಲ ಎಂದು ಮುಖ್ಯೋಪಾಧ್ಯಾಯಿನಿಯವರಲ್ಲಿ ತನ್ನ ಅಭಿಪ್ರಾಯ ಸೂಚಿಸಿದಾಗ (ಮಾನ್ಯ ಮುಖ್ಯೋಪಾಧ್ಯಾಯಿನಿ ವಂದನೀಯ ಧರ್ಮಭಗಿನಿ ಕ್ಲಾಡಿಯರವರು) ಆ ಧರ್ಮಭಗಿನಿಯು ನನಗೆ ಆ ಪರಿವೀಕ್ಷಕರ ಎದುರಿನಲ್ಲೇ ಇಂಗ್ಲಿಷ್ ಬೋಧನೆ ಮಾಡಲು ಆಜ್ಞಾಪಿಸಿದರು. ಅಂದಿನ ಪದ್ಯ ಈಗಲೂ ನೆನಪಿದೆ. Where the mind is without fear… ರವೀಂದ್ರನಾಥ್ ಟಾಗೋರರ ದೇಶ ಪ್ರೇಮದ ಗೀತೆಯನ್ನು ನನ್ನಿಂದಾದಷ್ಟು ಪರಿಣಾಮಕಾರಿಯಾಗಿ ವಿವರಿಸಿದೆ. ನನ್ನ ಪಾಠದ ಕೊನೆಯಲ್ಲಿ ಪರಿವೀಕ್ಷಕರ ಅಭಿಪ್ರಾಯ ಹೀಗಿತ್ತು – “ಇಂಗ್ಲಿಷ್ ಬೋಧನೆ ಪರಿಣಾಮಕಾರಿಯಾಗಿದೆ. ಈ ಶಿಕ್ಷಕಿ ಬಿ.ಎಡ್. ಮಾಡಿದರೆ ಅತ್ಯುತ್ತಮ.” ನನ್ನ ಉತ್ಸಾಹ, ಸಂತೋಷ ಗರಿಗೆದರಿತ್ತು. ಜೊತೆಗೆ ಬಿ.ಎಡ್. ಮಾಡಲು ನಿರ್ಧಾರ ತೆಗೆದುಕೊಳ್ಳಲು ಸಹಾಯ ಮಾಡಿತ್ತು.

ಬಿ.ಎಡ್. ಮಾಡಲು ನನ್ನ ಅಣ್ಣನ ಪ್ರೋತ್ಸಾಹ, ಅಕ್ಕಂದಿರ ಪ್ರಾರ್ಥನೆ, ತಂದೆ ತಾಯಿಯವರ ಆಶೀರ್ವಾದ ಕಾರಣವಾಗಿತ್ತು. ಮೊದಲೇ ಮೂರು ವರುಷದ ಬೋಧನೆ ಮಾಡಿದ ಅನುಭವ ಇದ್ದುದರಿಂದ ಬಿ.ಎಡ್. ಕಲಿಕೆ ಅಷ್ಟೊಂದು ಕಷ್ಟವಾಗಲಿಲ್ಲ. ಸುಮಾರು 100 ಮಂದಿ ತರುಣಿಯರು ಒಟ್ಟು ಸೇರಿ ಬಿ.ಎಡ್. ವ್ಯಾಸಂಗ ಚೆನ್ನಾಗಿ ಮುಗಿಸಿದೆವು. ಬಿ.ಎಡ್.ನಲ್ಲಿ ಅತ್ಯುತ್ತಮ ಫಲಿತಾಂಶ ನನ್ನದಾಯಿತು. ಪರೀಕ್ಷೆಯ ಬರವಣಿಗೆಯಲ್ಲಿಯೂ, ಬೋಧನಾ ಕ್ರಮದಲ್ಲಿಯೂ ನನಗೆ ರಾಜ್ಯ ಮಟ್ಟದಲ್ಲಿ ರ್‍ಯಾಂಕ್ ಸಿಕ್ಕಿತು.

ಅಂದಿನಿಂದ ನನ್ನ ಬೋಧನಾ ದಿನಚರಿ ಅದೇ ಶಾಲೆಯಾದ ಸಂತ ತೆರೆಸಾ ಪ್ರೌಢ ಶಾಲೆಯಲ್ಲಿಯೇ ಪ್ರಾರಂಭವಾಯಿತು. ಸುಮಾರು 37 ವರುಷ ನಿರಂತರವಾಗಿ ಸಾಗಿತು. ಬಹು ಬೇಗನೇ ಹುಡುಗರ ಆಗಮನದಿಂದ ಸಂತ ತೆರೆಸಾ ಬಾಲಕಿಯರ ಪ್ರೌಢ ಶಾಲೆಯು ಸಂತ ತೆರೆಸಾ ಪ್ರೌಢ ಶಾಲೆಯಾಗಿ ಬದಲಾಯಿತು. ಆರಂಭದಲ್ಲಿ, ‘ಅಯ್ಯೋ, ಹುಡುಗರನ್ನು ಹೇಗೆ ಅಂಕಿತದಲ್ಲಿಡುವುದು? ಅವರಿಗೆ ಪಾಠಗಳ ಬೋಧನೆ ಹೇಗೆ ಮಾಡುವುದು?’ ಎಂಬ ಅಳುಕಿನ ಪ್ರಶ್ನೆಗಳು ನನ್ನ ಮನಸ್ಸಿನಲ್ಲಿ ಉದ್ಭವಿಸಿದವು. ಆದರೆ ಆ ಭಯ ಅನಗತ್ಯ ಎಂದು ನನ್ನ ದೀರ್ಘ ಅವಧಿಯಲ್ಲಿ ಮನದಟ್ಟಾಯಿತು. ಹುಡುಗರನ್ನು ಪ್ರೀತಿಯಿಂದ, ತಿಳುವಳಿಕೆಯಿಂದ, ಸರಿಯಾದ ಶಿಸ್ತು ನಡತೆಯಿಂದ ವರ್ತಿಸುವಂತೆ ಮಾಡಬಹುದು ಎಂದು ನನಗೆ ಮನವರಿಕೆಯಾಯಿತು. ಹುಡುಗರ ಆಗಮನದಿಂದ ತರಗತಿಯಲ್ಲಿ ಬೋಧನೆ ಚೆನ್ನಾಗಿ ನಡೆಯುತ್ತಿತ್ತು. ನನ್ನ ಗಟ್ಟಿ ಸ್ವರ ಹಾಗೂ ನನ್ನ ಬೆತ್ತದ ರುಚಿ ಹುಡುಗರನ್ನೂ ಹುಡುಗಿಯರನ್ನೂ ಶಿಸ್ತಿನಲ್ಲಿಡಲು ಸಹಕರಿಸಿತು!

ನನ್ನ ಬೆತ್ತದ ರುಚಿ ಮತ್ತದರ ಪರಿಣಾಮ!

ಇಲ್ಲೊಂದು ಘಟನೆ ನಾನು ಉಲ್ಲೇಖಿಸುತ್ತಿದ್ದೇನೆ. ನನ್ನ ತರಗತಿಯ ವಿದ್ಯಾರ್ಥಿಯೋರ್ವ ಶಾಲೆಗೆ ಹಾಜರಾಗುವ ಬದಲು ಅವನ ಕೌಟುಂಬಿಕ ವ್ಯವಹಾರಕ್ಕಾಗಿ ಕಾಸರಗೋಡಿಗೆ ಹೋದ. ಮಾರನೇ ದಿನ ರಜೆ ಅರ್ಜಿ ತಂದ. “ಸೌಖ್ಯವಿರಲಿಲ್ಲ” ಎಂದು ಬರೆದ ಸುಳ್ಳು ಕಾರಣ ನನ್ನನ್ನು ಕೆಂಡಾಮಂಡಲ ಆಗುವಂತೆ ಮಾಡಿತು. ಅವನ ಎರಡೂ ಅಂಗೈ ಹಾಗೂ ಕೈಗಳಿಗೆ ಸರಿಯಾಗಿ ಪೆಟ್ಟು ಕೊಟ್ಟೆ. ಅನಂತರ ಪಾಠ ಮುಗಿಸಿ ತರಗತಿಯಿಂದ ಹೊರ ನಡೆದೆ. ವಿರಾಮದ ಒಂದು ಅವಧಿ ಮುಗಿದ ನಂತರ ಆ ವಿದ್ಯಾರ್ಥಿ ಏನು ಮಾಡುತ್ತಾನೆ ನೋಡೋಣ ಎಂದು ಅವನ ತರಗತಿಗೆ ಹೋಗಿ ಅವನನ್ನು ಹೊರಗೆ ಕರೆದೆ. ಅವನ ಎರಡೂ ಕೈಗಳ ಬಿಳಿಯ ಚರ್ಮವು ಕೆಂಪು ಕೆಂಪಾಗಿತ್ತು. ನಾನೇ ಹೆದರಿದೆ. ಆಫೀಸು ಕೋಣೆಯಿಂದ ಐಯೋಡೆಕ್ಸ್ ತಂದು ಅವನ ಎರಡೂ ಕೈಗಳಿಗೆ ಸವರಿದೆ. ಆಗ ಅವನು ಹೇಳಿದ ಮಾತು, “ಪರವಾಗಿಲ್ಲ ಟೀಚರ್. ನನ್ನ ತಪ್ಪಿಗಾಗಿ ನೀವು ಹೊಡೆದದ್ದಲ್ಲವೇ?” ಆ ಮಾತುಗಳು ಅವನ ಹಿರಿತನ ನನಗೆ ಸಾಬೀತುಪಡಿಸಿದವು. ಮನದಲ್ಲಿ ಅವನ ಕ್ಷಮಾ ಗುಣ ಅವನನ್ನು ಮೇಲಿನ ಸ್ಥಾನದಲ್ಲಿಟ್ಟಿತು. ಇನ್ನೂ ಮೂರು ನಾಲ್ಕು ಮಂದಿ ಹುಡುಗರಿಗೆ ಇದೇ ರೀತಿ ಪೆಟ್ಟು ಕೊಟ್ಟು ನನ್ನ ಕೋಪವನ್ನು ಹೊರ ಹಾಕಿದ್ದೇನೆ. ಈ ಸನ್ನಿವೇಶಗಳಲ್ಲಿ ನಾನು ಮಾಡಿದ ಒಂದೇ ಒಂದು ಒಳ್ಳೆಯ ಕೆಲಸವೆಂದರೆ ನಾನು ಹೊಡೆದಂತಹ ವಿದ್ಯಾರ್ಥಿಗಳನ್ನು ಮಾರನೇ ದಿನ ಕರೆದು ನನಗೆ ಕೋಪ ಬರಲು ಕಾರಣವೇನೆಂದು ಅವರಿಗೆ ತಿಳಿಯಪಡಿಸುತ್ತಿದ್ದೆ. ಹೀಗೆ ಜೋರಾಗಿ ಹೊಡೆದದ್ದು ನನ್ನ ತಪ್ಪು. ಇದರ ಬಗ್ಗೆ ನಾನು ನೊಂದುಕೊಂಡಿದ್ದೇನೆ. ನನ್ನ ಕೋಪಕ್ಕೆ ಬಲಿಯಾದ ಈ ಹುಡುಗರು ಬದುಕಿನಲ್ಲಿ ಯಶಸ್ವಿ ಜೀವನ ನಡೆಸಲಿ ಎಂದು ದೇವರೊಡನೆ ಪ್ರಾರ್ಥಿಸುತ್ತಲೇ ಇದ್ದೇನೆ.

ನನ್ನ ತಪ್ಪಿನ ಬಗ್ಗೆ ಹೇಳಿದಾಗ ನನ್ನ ವಿದ್ಯಾರ್ಥಿ ವಿದ್ಯಾರ್ಥಿನಿಯರ ಪ್ರತಿಭೆಗಳನ್ನು ಹೊರ ತರಲು ನಾನು ಮಾಡಿದ ಪ್ರಯತ್ನ ನನಗೆ ನೆನಪಿಗೆ ಬರುತ್ತಾ ಇದೆ. ನನ್ನ ತರಗತಿಯಲ್ಲಿ ವಿಶೇಷವಾಗಿ ನೀತಿಬೋಧೆಯ ಅವಧಿಯಲ್ಲಿ ಹಾಗೂ ಇಂಗ್ಲಿಷ್ ಕವನದ ಪಠನ, ಒಂದೇ ಮಾತಿನಲ್ಲಿ ಅಥವಾ ರಾಗದಲ್ಲಿ ಹಾಡುವಂತೆ ನಾನು ಪ್ರಯತ್ನಿಸಿದ್ದೇನೆ. ಅನೇಕ ನನ್ನ ವಿದ್ಯಾರ್ಥಿ ವಿದ್ಯಾರ್ಥಿನಿಯರು ಇದರ ಬಗ್ಗೆ ನನಗೆ ತಿಳಿಸಿದ್ದಾರೆ. ಖಂಡಿತವಾಗಿಯೂ ನನ್ನ ಶಿಕ್ಷಕ ವೃತ್ತಿಯ ಸಂತೋಷಗಳಲ್ಲಿ ಇದೊಂದಾಗಿದೆ. ಓರ್ವ ವಿದ್ಯಾರ್ಥಿ (ಈಗ ಅವನು ಸ್ಟುಡಿಯೋ ಇಟ್ಟುಕೊಂಡಿದ್ದಾನೆ) ತರುಣನಾಗಿ ನನಗೊಮ್ಮೆ ಸಿಕ್ಕಿದ. ಅವನೇ ಪರಿಚಯ ಮಾಡಿಸಿ ಹೀಗೆ ಹೇಳಿದ: “ಟೀಚರ್ ನೀವು ಮಾಡಿದ ಇಂಗ್ಲಿಷ್ ಪಾಠ ಇಲ್ಲವೇ ಜೀವಶಾಸ್ತ್ರ ಪಾಠ ನನಗೆ ನೆನಪಿಲ್ಲ. ಆದರೆ ನೀತಿಬೋಧೆಯ ಅವಧಿಗೆ ನೀವು ಹೇಳುತ್ತಿದ್ದ ಬುದ್ಧಿವಾದ, ಕಿರು ನಾಟಕಗಳ ಮೂಲಕ ನಮ್ಮಲ್ಲಿ ಅಳವಡಿಸಿದ ಸದ್ಗುಣಗಳು, ದೇವರಲ್ಲಿ ಭಕ್ತಿ, ವಿಶ್ವಾಸವನ್ನು ಸದಾ ನೆನಪಿಸುತ್ತಲೇ ಇದ್ದೇನೆ.”

ಹೀಗೆ ವರುಷಗಳು ಉರುಳಿದವು. 1975ರ ನವೆಂಬರ್‍ನಲ್ಲಿ ನನ್ನ ಮದುವೆಯಾಗಿ ನಾಲ್ಕು ಮಂದಿ ಮಕ್ಕಳು ನನಗೆ ಜನಿಸಿದರು. ನನ್ನವರು ಅವರ ಪ್ರೀತಿ ಹಾಗೂ ಸಹನೆಯಿಂದ ನನಗೆ ಅತ್ಯುತ್ತಮ ಸಾಂಗತ್ಯ ನೀಡಿದ್ದಾರೆ. ನಾಲ್ಕು ಮಂದಿ ಮಕ್ಕಳೂ ಕೂಡಾ ಪದವೀಧರರು ಮಾತ್ರ ಅಲ್ಲ ಉನ್ನತ ಶಿಕ್ಷಣವನ್ನೂ ಪಡೆದರು.

ಇನ್ನು ನನ್ನ ಎಲ್ಲಾ ವಿದ್ಯಾರ್ಥಿ ವಿದ್ಯಾರ್ಥಿನಿಯರು ಅವರವರ ಜೀವನದಲ್ಲಿ ಯಶಸ್ವಿಯನ್ನು ಪಡೆದು ಅರ್ಥಭರಿತ, ಸ್ವಾರಸ್ಯಪೂರ್ಣ ಜೀವನವನ್ನು ನಡೆಸಲಿ ಎಂದು ಹಾರೈಸುತ್ತೇನೆ. ಇಲ್ಲಿ ನನಗೆ ತುಂಬಾ ತೃಪ್ತಿ ಕೊಡುವ ವಿಚಾರವೆಂದರೆ ನಿವೃತ್ತಿಯಾಗಿ ಎಪ್ಪತ್ತರ ಪ್ರಾಯದಲ್ಲಿ ನಾನಿದ್ದರೂ ನನಗೆ ಭೇಟಿಯಾದ ಎಲ್ಲಾ ನನ್ನ ವಿದ್ಯಾರ್ಥಿಗಳು, ಯಶಸ್ವಿ, ಅರ್ಥಪೂರ್ಣ ಜೀವನ ನಡೆಸುತ್ತಿದ್ದಾರೆ ಎಂದು ತಿಳಿದು ನಾನು ಸದಾ ನಗುನಗುತ್ತಲೇ ಇರುತ್ತೇನೆ. ನಾನು ನನ್ನ ಬಳಿ ಬಂದ ನನ್ನ ವಿದ್ಯಾರ್ಥಿ, ವಿದ್ಯಾರ್ಥಿನಿಯರು ಸದಾ ನೆಮ್ಮದಿ, ಶಾಂತಿಯಿಂದ ಬಾಳಲಿ ಎಂದು ಹಾರೈಸುತ್ತೇನೆ. ಶಿಸ್ತುಬದ್ಧ ಜೀವನ ಅವರ ಭವಿಷ್ಯದಲ್ಲಿ ಅವರು ಉತ್ತಮವಾಗಿ ಜೀವಿಸಲು ನೆರವಾಗುವಂತೆ ನಾನು ಕಠಿಣವಾಗಿ ಅವರೊಡನೆ ವರ್ತಿಸಿದ್ದೇನೆ. ಈ ನನ್ನ ನಡತೆಗೆ ಅವರ ಕ್ಷಮೆ ಇರಲೆಂದು ಆಶಿಸುತ್ತೇನೆ.

ನನ್ನ ಮೆಚ್ಚಿನ ಸಹೋದ್ಯೋಗಿಗಳ ನೆನಪು

ಈಗ ಇನ್ನೊಂದು ಪುಟ ತೆರೆಯುತ್ತದೆ. ನನಗೆ ಶಿಕ್ಷಕಿಯಾಗಲು ಪ್ರೇರಣೆ ಕೊಟ್ಟ, ಮಾರ್ಗದರ್ಶನ ನೀಡಿದ ಅರ್ಸುಲೈನ್ ಫ್ರಾನ್ಸಿಸ್ಕನ್ ವಿದ್ಯಾ ಸಂಸ್ಥೆಗೆ, ನನ್ನನ್ನು ಉತ್ತಮ ಶಿಕ್ಷಕಿಯಾಗಿ ರೂಪಿಸಿದ ಮುಖ್ಯೋಪಾಧ್ಯಾಯಿನಿಯವರಾಗಿ ಆಡಳಿತ ಮಂಡಳಿ, ನನ್ನ ಅನೇಕ ಮುಖ್ಯೋಪಾಧ್ಯಾಯಿನಿಯವರಿಗೆ ನಾನು ಶಿರಬಾಗಿ ನಮಸ್ಕರಿಸುತ್ತೇನೆ. ಇಲ್ಲೊಂದು ಇನ್ನೊಂದು ಆಳವಾದ ನೆನಪು, ಕೃತಜ್ಞತೆಯಿದೆ. ಪ್ರೀತಿ, ಸಂತೋಷದಿಂದ ಮುಂದಿಡುತ್ತೇನೆ. ನನ್ನ ಜೊತೆ ಅಧ್ಯಾಪಕರಾಗಿ, ತಮ್ಮ ವೈವಿಧ್ಯಮಯ ಬೋಧನೆಯಿಂದ ಈ ಎಳೆಯ ವಿದ್ಯಾರ್ಥಿ ವಿದ್ಯಾರ್ಥಿನಿಯರನ್ನು ರೂಪಿಸಿದ ನನ್ನ ಆತ್ಮೀಯ ಸಹೋದ್ಯೋಗಿಗಳನ್ನು ನಾನು ಸದಾ ಶಿರಬಾಗಿ ನಮಿಸುತ್ತೇನೆ. ಅವರ ಸಾಂಗತ್ಯಕ್ಕಾಗಿ ವಿನಯತೆಯಿಂದ ದೇವರಿಗೆ ಕೃತಜ್ಞತೆ ಸಲ್ಲಿಸುತ್ತೇನೆ. ಥಟ್ಟನೇ ನೆನಪಿಗೆ ಬರುವುದು ಬಹುಮುಖ ಪ್ರತಿಭೆಯ ಸರ್ ನೀಲಕಂಠ ಭಟ್, ಮುಂಡಾಜೆ ಇವರು. ಇವರು Self made man. ನಳಪಾಕನಾಗಿ ಕೆಲಸ ಮಾಡಿದರೂ ಪರೀಕ್ಷೆಯಲ್ಲಿ ಮುಗ್ಗರಿಸಿದರೂ ಹಠದಿಂದ ಎಸ್.ಎಸ್.ಎಲ್.ಸಿ. ಮುಗಿಸಿ ಕನ್ನಡ ಮತ್ತು ಹಿಂದಿ ಭಾಷೆಗಳಲ್ಲಿ ಪಾಂಡಿತ್ಯ ಪಡೆದರು. ಅವರು ಬೆಳೆದು ಬಂದ ರೀತಿ ಒಂದು ಯಶೋಗಾಥೆ. ಅವರ ಹೃದಯ ಕೂಡಾ ವಿಶಾಲವಾಗಿದ್ದು, ನನ್ನನ್ನು ಪ್ರೇರೇಪಿಸಿದ ಸದ್ಗುಣಗಳಿಂದ ಕೂಡಿತ್ತು. ಅನೇಕ ಉದಾಹರಣೆಗಳಲ್ಲಿ ಒಂದು ಕೊಡುವುದಾದರೆ ಒಮ್ಮೆ (ನಾವಿಬ್ಬರು ಶಾಲೆಗೆ ಬೆಳಿಗ್ಗೆ ಅಸೆಂಬ್ಲಿಗೆ ತಡ ಮಾಡಿ ಬರುವುದೇ ಜಾಸ್ತಿ) ಮಾನ್ಯ ಸಿಸ್ಟರ್ ಕ್ಲಾಡಿಯಾ ಅವರ ಶಿಸ್ತುಬದ್ಧತೆಯನ್ನು ಉದಾಹರಣೆಯಾಗಿ ಕೊಟ್ಟು ನಾವು ಶಾಲಾ ಅಸೆಂಬ್ಲಿಗೆ ಮಕ್ಕಳಿಗೆ ಶಿಸ್ತಿನ ಮಹತ್ವ ತೋರಿಸಲು ತಡ ಮಾಡದೇ ಅಸೆಂಬ್ಲಿಗೆ ಕ್ಲಪ್ತ ಸಮಯಕ್ಕೆ ಹಾಜರಿರಬೇಕೆಂದು ಕಟ್ಟುನಿಟ್ಟಿನ ಮಾತಿನಿಂದ ಹೇಳುತ್ತಿದ್ದರು. ಆದರೆ ನಾವು ಅವರಿಗೆ ನಿರಾಶೆ ಕೊಟ್ಟಿದ್ದೇ ಜಾಸ್ತಿ. ಒಂದು ದಿನ, ನಾನೇನೋ ಅಸೆಂಬ್ಲಿಗೆ ಬೇಗ ತಲುಪಿದ್ದೆ. ಆದರೆ ನಮ್ಮ ಕನ್ನಡ ಪಂಡಿತರು ಅವರ ದ್ವಿಚಕ್ರ ವಾಹನ ಚಲಾಯಿಸಿ, ಅಸೆಂಬ್ಲಿಗೆ ತಡ ಮಾಡಿ ಸೇರಿದರು. ನಮ್ಮ ಮಾನ್ಯ ಸಿಸ್ಟರ್ ಕ್ಲಾಡಿಯಾ ಕೋಪದಿಂದ ಕಿಡಿಕಿಡಿಯಾಗಿ, ಅವರಿಗೆ ಕಟುವಾಗಿ ಬೈದರು. ಸಾಯಂಕಾಲ ಆಗುವಾಗ ಶ್ರೀ ಕೆ.ಎನ್. ಭಟ್ ನನ್ನ ಹತ್ತಿರ ಬಂದು, “ನಾನು ಮಧ್ಯಾಹ್ನ ಪೇಟೆಗೆ ಹೋಗಿ ಪ್ರಭಾತ್ ಸ್ಟೋರಿಗೆ ಹೋಗಿ ಬಂದೆ” ಅಂದರು. ಮಾತ್ರವಲ್ಲ ಮುಖ್ಯೋಪಾಧ್ಯಾಯಿನಿಯವರ ಮನ ಒಲಿಸಿ ಚಿಕ್ಕ ಚಹಾ ಕೂಟ ಏರ್ಪಡಿಸಲಾಗಿದೆ ಎಂದರು. ಕಾರಣವೇನೆಂದು ಕೇಳಿದಾಗ ಇಂದು ಅವರ ಜನ್ಮ ದಿನ. ಅವರಿಗೆ ಶುಭವನ್ನು ಕಾಣಿಕೆಯ ಮೂಲಕ ಅರ್ಪಿಸಬೇಕು ಎಂದರು. ಸರ್‌ರವರ ವಿಶಾಲ ಮನೋಭಾವ, ಕ್ಷಮಾಗುಣ, ಮಗುವಿನಂತಹ ಮುಗ್ಧತೆ ನಾನೆಂದಿಗೂ ಮರೆಯಲಿಕ್ಕಿಲ್ಲ.

ಇನ್ನೊಮ್ಮೆ ನಾನು ಒಂಬತ್ತನೇ ತರಗತಿಗೆ ಇಂಗ್ಲಿಷ್ ಬೋಧನೆ ಮಾಡುತ್ತಿದ್ದೆ. ಆಂಗ್ಲ ಭಾಷೆಯಲ್ಲಿ ನನ್ನ ವಿದ್ಯಾರ್ಥಿನಿಯರು ಪಾಂಡಿತ್ಯ ಪಡೆಯಬೇಕೆಂದು ನನ್ನ ಆಸೆಯಾಗಿತ್ತು. ಹಾಗಾಗಿ ಕಟ್ಟುನಿಟ್ಟಿನಿಂದ ಅವರೊಡನೆ ನಾನು ಇಂಗ್ಲಿಷ್‍ನಲ್ಲೇ ಮಾತನಾಡುತ್ತಿದ್ದೆ. ಅವರು ನನಗೆ ಇಂಗ್ಲಿಷ್‍ನಲ್ಲಿಯೇ ಉತ್ತರ ಕೊಡಬೇಕೆಂದು ಆಜ್ಞಾಪಿಸಿದ್ದೆ. ಒಮ್ಮೆ ಆಂಗ್ಲ ಭಾಷೆಯ ಕಾಪಿ ಬರೆಯುವ ಅಭ್ಯಾಸವನ್ನು ಎಲ್ಲರ ಕಾಪಿ ಪುಸ್ತಕದಲ್ಲಿ ಕಂಡಾಗ ಒಂದಿಬ್ಬರು ಏನೂ ತಪ್ಪಿಲ್ಲದೆ ಅಚ್ಚುಕಟ್ಟಾಗಿ ಬರೆದಿದ್ದರು. ಅದರಲ್ಲಿ ಗುಲಾಬಿ ಎಂಬವರ ಕೈ ಬರಹ ಬಹಳ ಚೆನ್ನಾಗಿತ್ತು. ಅವಳನ್ನು ಹತ್ತಿರ ಕರೆದು, “Congrats. You have written well. From which school do you come?” ಎಂದು ವಿಚಾರಿಸಿದೆ. ಪಾಪ ಆ ಹುಡುಗಿಗೆ ನನ್ನ ಇಂಗ್ಲಿಷ್ ಪ್ರಶ್ನೆಗಳಿಗೆ ದೀರ್ಘ ಉತ್ತರ ಕೊಡಲಿಕ್ಕಾಗಲಿಲ್ಲ. ಅವಳು ‘ಕುವೆಟ್’ ಎಂದು ಉತ್ತರಿಸಿದಳು. ನಾನು ಆಗ ಇಂಗ್ಲಿಷ್‍ನಲ್ಲಿಯೇ, “You write so beautifully. But why don’t you get good marks in English?” ಎಂದು ಕೇಳಿದೆ. ಅವಳು ಪಾಪ ಕಕ್ಕಾಬಿಕ್ಕಿಯಾಗಿ ತಲೆ ಕೆಳಗೆ ಹಾಕಿ ನಿಂತುಕೊಂಡಳು. ಆ ಪೀರಿಯೆಡ್‍ನ ಗಂಟೆ ಬಾರಿಸಲ್ಪಟ್ಟಿತ್ತು. ನಾನು ಸ್ಟಾಫ್ ರೂಮ್‍ಗೆ ಶಿಕ್ಷಕರ ಕೊಠಡಿಗೆ ಹೋದೆ. ಅಲ್ಲಿ ನನಗೆ ಮೊದಲು ಸಿಕ್ಕಿದ್ದೇ ಶ್ರೀ ಶಿರಾಡಿಸಾಲ್ ಅವರು. ಅವರೊಡನೆ ನಾನು ಹುಡುಗಿಯೊಡನೆ ಇಟ್ಟ ಪ್ರಶ್ನೆಯನ್ನೇ ಕೇಳಿದೆ. ಅವರು ನನಗೆ ಉತ್ತರ ಕೊಡುವ ಬದಲು ಬಿದ್ದು ಬಿದ್ದು ನಕ್ಕರು. ನನಗೆ ಕಸಿವಿಸಿಯಾಯಿತು, ನನ್ನ ನಿರಾಶೆಯನ್ನು ಅವರು ಅರ್ಥ ಮಾಡಿಕೊಳ್ಳುವುದಿಲ್ಲವಲ್ಲಾ ಎಂದು. ಅವರ ನಗು ಕಡಿಮೆಯಾದ ನಂತರ ಅವರು ಹೇಳಿದ ಉತ್ತರ ಕೇಳಿ ನಾನೂ ಧಾರಾಳವಾಗಿ ನಕ್ಕೆ. ಅವರು ಹೇಳಿದ್ದು: “ಅಯ್ಯೋ ಮೇರಿ, ಇದು ಹೊರ ದೇಶದ ಕುವೈಟ್ ಅಲ್ಲ. ಇದು ನಮ್ಮ ಶಾಲೆಯ ಪಕ್ಕದಲ್ಲಿರುವ ಗುರುವಾಯನಕೆರೆಯ ಬಳಿಯ ಕುವೆಟ್ಟು ಗ್ರಾಮ.” ನಾನೂ ಬಿದ್ದು ಬಿದ್ದು ನಕ್ಕೆ. ಇಂತಹ ಅನೇಕ ಹಾಸ್ಯಭರಿತ ಘಟನೆಗಳು, ಮಾತುಗಳು ನನ್ನ ಮನದಲ್ಲಿವೆ. ಎಲ್ಲಾ ಬರೆಯಲು ಹೋದರೆ ಹತ್ತು ಪುಸ್ತಕಗಳಲ್ಲ ನೂರಾರು, ಇನ್ನೂರು ಪುಟದ ಪುಸ್ತಕಗಳು ಬೇಕೋ ಏನೋ!

ಒಂದು ಮಾತಂತೂ ನಿಜ. ನನ್ನ ಸಹೋದ್ಯೋಗಿ ಬಂಧುಗಳಿಂದ ನಾನು ತುಂಬಾ ಕಲಿತಿದ್ದೇನೆ. ಇನ್ನೂ ಇತರ ಸಹೋದ್ಯೋಗಿಗಳ ನೆನಪು ಮಾಡುವುದಾದರೆ, ವಿಜ್ಞಾನವೇ ಸರ್ವಸ್ವ ಎಂದು ಭಾವಿಸುತ್ತಿದ್ದ, ಈಗಲೂ ಭಾವಿಸುವ ಸರ್ ಜಾಯ್ ಪಿ.ಪಿ. ಎಲ್ಲಾ ವಿದ್ಯಾರ್ಥಿಗಳು ಅವರ ಪಾಠಕ್ಕೆ ಹಾತೊರೆಯುತ್ತಿದ್ದರು. ಒಂದು ಕಾರಣ ಅವರ ತರಗತಿ ಎಂಬ ಜೈಲಿನಿಂದ ಮಕ್ಕಳೆಲ್ಲಾ ಪ್ರಯೋಗ ಶಾಲೆಗೆ ದೌಡಾಯಿಸುತ್ತಿದ್ದರು. ಬಹಳ ರಸಮಯವಾಗಿ, ಶಿಸ್ತುಬದ್ಧವಾಗಿ ಸೂರ್ಯ ಮತ್ತು ಗ್ರಹಗಳು, ಸಾಂದ್ರತೆ, ಸಾಪೇಕ್ಷ ಸಾಂದ್ರತೆ, ನ್ಯೂಟನ್ನನ ನಿಯಮಗಳು, ಪ್ರಯೋಗಗಳು ಹಾಗೂ ಇನ್ನಿತರ ಜಟಿಲ ವಿಷಯಗಳನ್ನು ಮಕ್ಕಳಲ್ಲಿ ಆಸಕ್ತಿ ಹುಟ್ಟಿಸುವಂತೆ ಅವರು ಬೋಧನೆ ಮಾಡುತ್ತಿದ್ದರು.

ಮತ್ತೊಬ್ಬರು ನನ್ನ ಸಹೋದ್ಯೋಗಿ ಶ್ರೀ ವೈ. ಮುರುಳೀಧರ್ ರಾವ್. ಇವರು ಪ್ರಾರಂಭದಲ್ಲಿ ಜೀವಶಾಸ್ತ್ರ ಹೇಳಿ ಕೊಟ್ಟರು. ಅವರ ಹಿಂದಿ ಬೋಧನೆ ಮಕ್ಕಳಿಗೆ ರಸದೂಟವಾಗಿರುತ್ತಿತ್ತು. ನಾನು ವಿವರಿಸುವುದಕ್ಕಿಂತ, ನಮ್ಮ ಶಾಲೆಯ ಅವರ ವಿದ್ಯಾರ್ಥಿ, ವಿದ್ಯಾರ್ಥಿನಿಯರ ಅನುಭವ ಕೇಳಿದರೆ ಇನ್ನೂ ಅನೇಕ ರಸಮಯ ಘಟನೆಗಳು ನಿಮಗೆ ಗೊತ್ತಾಗುತ್ತವೆ.

ಅನಂತರದ ಸಾಲಿನಲ್ಲಿ ಇರುವವರು ದಿವಂಗತ ತಾರಾಮಲೆ ಟೀಚರ್. ನಮ್ಮ ಶಾಲೆಯಲ್ಲಿ ಅನೇಕ ವರುಷಗಳ ಸಾರ್ಥಕ ಸೇವೆ ಸಲ್ಲಿಸಿ, ತೊಕ್ಕೊಟ್ಟುವಿನ ಚೆಂಬುಗುಡ್ಡೆ ಪ್ರದೇಶದಲ್ಲಿ ಮಕ್ಕಳ ಜೊತೆ ನಿವೃತ್ತರಾಗುವ ತನಕ ಸೇವೆ ಸಲ್ಲಿಸಿದರು. ಇವರದು ಗಂಭೀರ ಸ್ವಭಾವ, ಆದರ್ಶ ಗೃಹಿಣಿ, ಮೆದು ಮಾತು. ಅವರ ಮಕ್ಕಳು ಅವರ ಸಮಾಜ ವಿಜ್ಞಾನದ ವಿವರಣೆ, ಭೂಪಟ, ಭೋಗೋಳ ಎಲ್ಲವನ್ನೂ ಮೌನವಾಗಿ ಆಲಿಸುತ್ತಿದ್ದರು. ಶ್ರೀ ಬೆಲ್ಚಡ್‍ರವರ ಧರ್ಮಪತ್ನಿಯಾಗಿ ಸಾರ್ಥಕ ಜೀವನ ನಡೆಸಿದ್ದಾರೆ. ಎರಡು ವರುಷಗಳ ಹಿಂದೆ ಅವರು ದೈವಾಧೀನರಾದರು ಎಂದು ಹೇಳಲು ಬಹಳ ಬೇಸರ. ಆದರೆ ಒಂದು ತೃಪ್ತಿ. ದೇವರೊಡನೆ ಪ್ರತಿದಿನ ಅವರು ಅವರ ಕುಟುಂಬಕ್ಕಾಗಿ, ನಮಗಾಗಿ, ಪರಿಚಯವಿರುವ ಎಲ್ಲರಿಗಾಗಿ ವಿನಂತಿಸುತ್ತಾರೆ ಎಂಬುದು ಖಂಡಿತ.

ಇನ್ನೂ ಅನೇಕ ಶಿಕ್ಷಕ ಶಿಕ್ಷಕಿಯರು ವೃತ್ತಿ ಬಾಂಧವ್ಯದಿಂದ ನನ್ನೊಟ್ಟಿಗೆ ಪ್ರೀತಿಯ, ಸಹಕಾರದ ಜೀವನ ನಡೆಸಿದ್ದಾರೆ. ಅದರಲ್ಲಿ ಕೆಲವರು ದೇವರ ಪಾದ ಸೇರಿದ್ದಾರೆ. ದೈವಾಧೀನರಾದವರಲ್ಲಿ ಸಿಸ್ಟರ್ ಮಾರಿ ತೆರೆಸಾ ಒಬ್ಬರು. ಅವರು ನಮ್ಮ ಶಾಲೆಯಲ್ಲಿದ್ದಾಗ ಪರಸ್ಪರ ಒಡನಾಟ ಸ್ವಲ್ಪ ಬಿರುಕುಗಳಿಂದ ಕೂಡಿತ್ತು. ಆದರೆ ಅವರಲ್ಲಿ ನಾನು ಬಹಳವಾಗಿ ಮೆಚ್ಚುವ ಗುಣವೆಂದರೆ ಗಣಿತ ಮತ್ತು ವಿಜ್ಞಾನದ ಶಿಕ್ಷಕಿಯಾಗಿ ಮಕ್ಕಳಿಗೆ ಬೋಧನೆ ಮಾಡುತ್ತಿದ್ದರು. ಇದರಲ್ಲೇನು ವಿಶೇಷ ಎಂದು ನಿಮಗೆ ಪ್ರಶ್ನೆ ಮೂಡಬಹುದು. ಮಲಯಾಳಂ ಅವರ ತಾಯಿ ಭಾಷೆ ಆಗಿದ್ದರೂ, ಕಾನ್ವೆಂಟಿನಲ್ಲಿ ಇಂಗ್ಲಿಷ್ ಮಾತನಾಡುತ್ತಿದ್ದರೂ, ಶಾಲೆಯಲ್ಲಿ ಅವರು ಮಕ್ಕಳಿಗೆ ಕನ್ನಡದಲ್ಲಿಯೇ, ನಿಧಾನವಾಗಿ, ಪಾಠ ಹೇಳಿ ಕೊಡುತ್ತಿದ್ದರು. ಗಣಿತದ ಎಷ್ಟೇ ಕ್ಲಿಷ್ಟ ಸಮಸ್ಯೆಗಳಿದ್ದರೂ, ಕ್ಷಣ ಮಾತ್ರದಲ್ಲಿ ಅವುಗಳನ್ನು ಬಿಡಿಸಿ, ವಿದ್ಯಾರ್ಥಿಗಳಿಗೆ ಮನ ಮುಟ್ಟುವಂತೆ ಹೇಳಿ ಕೊಡುತ್ತಿದ್ದರು. ಉಪಕಾರಿ ಮನೋಭಾವದಿಂದ ನಾನಿಲ್ಲಿ ಸ್ಮರಿಸಬೇಕಾದುದು, ಆಂಗ್ಲ ಮಾಧ್ಯಮದಲ್ಲಿ ಕಲಿಯುತ್ತಿದ್ದ ನನ್ನ ಸ್ವಂತ ಮಕ್ಕಳಿಗೆ ಜಟಿಲ ಅಥವಾ ಕಠಿಣ ಗಣಿತದ ಸಮಸ್ಯೆಗಳನ್ನು ಅವರಿಗೆ ಅರ್ಥವಾಗುವಂತೆ ಮನದಟ್ಟು ಮಾಡುತ್ತಿದ್ದರು. ಅವರಿಗೆ ನನ್ನ ಅನಂತಾನಂತ ಧನ್ಯವಾದಗಳು. “God loves the young and He takes them to be His own.” ಅಂತೆಯೇ ಅವರು ಬಹು ಬೇಗನೇ ದೇವರ ಪಾದ ಸೇರಿದರು.

ಇನ್ನೋರ್ವ ನನ್ನ ಸಹೋದ್ಯೋಗಿ, ನನ್ನ ಆತ್ಮೀಯ ಸಿಸ್ಟರ್ ಸುಶೀಲಾರವರು. ಇಂದವರು ಅರ್ಸುಲೈನ್ ಫ್ರಾನ್ಸಿಸ್ಕನ್ ಸಭೆಯ ಮಹಾ ಮಾತೆ ಆಗಿದ್ದಾರೆ. ಅವರನ್ನು ವಿಶೇಷವಾಗಿ ನೆನಪಿಸುವುದಕ್ಕೆ ಕಾರಣ, ಅವರ ಚಿಂತನೆ ಮತ್ತು ನನ್ನದು ಬಹಳ ಸಾಮ್ಯತೆಯಿಂದ ಕೂಡಿತ್ತು. ಅವರೆಲ್ಲರ ಮನೆತನದ ಪರಿಚಯ ಕೂಡಾ ನನಗಿದೆ. ಅವರ ಕುಟುಂಬಕ್ಕೆ ಅವರ ತಾಯಿಯವರು ಮನೆಯಲ್ಲಿನ್ನು ತಾನು ಓರ್ವ ಕನ್ಯಾಸ್ತ್ರೀ ಎಂದು ತಿಳಿದು, ನನ್ನೊಡನೆ ಅವರಿಗೆ ಬೇಕಾದ ಔಷಧಿಗಳನ್ನು ಕೊಡಲು ವಿನಂತಿಸುತ್ತಿದ್ದರು. ಮಾತಿನ ಮಲ್ಲಿಯಾದ ನನಗೆ ಅದು ಅಮೃತ ಸವಿದಂತೆ. ಹಾಗೆಯೇ ಅನೇಕ ಬಾರಿ ಮುಖ್ಯೋಪಾಧ್ಯಾಯಿನಿಯವರಿಂದ, ನನ್ನ ಸಹೋದ್ಯೋಗಿ ಬಂಧುಗಳಿಂದ ನನ್ನ ಬಗೆಗಿನ ಹರಿತವಾದ ಅಭಿಪ್ರಾಯಗಳು ನನಗೆ ಕೇಳಿ ನಾನು ಬಹಳವಾಗಿ ನೊಂದಿದ್ದಾಗ ಅವರ ಸಾಂತ್ವನದ ಮಾತುಗಳನ್ನು ಕೇಳಿ ನಾನು ತುಂಬಾ ಸಮಾಧಾನದಲ್ಲಿರುತ್ತಿದ್ದೆ.

ಅನೇಕ ವಿದ್ಯಾರ್ಥಿನಿಯರ, ವಿದ್ಯಾರ್ಥಿಗಳ ಜಟಿಲವಾದ ಸಮಸ್ಯೆ ಬಂದಾಗ ಅವರು ನನಗೆ ಜೊತೆ ಕೊಟ್ಟು, ಆ ವಿದ್ಯಾರ್ಥಿಗಳ, ವಿದ್ಯಾರ್ಥಿನಿಯರ ಮನೆಗೆ ಭೇಟಿ ನೀಡಲು ಎಷ್ಟೇ ಕತ್ತಲಾದರೂ ಬರುತ್ತಿದ್ದರು. ಅವರ ಸಮಸ್ಯೆಗಳಿಗೆ ಪರಿಹಾರ ನೀಡಲು ಕನ್ಯಾ ಮಠದಲ್ಲಿರುವ ಸಮಸ್ಯೆಗಳು, ಪರಿಸ್ಥಿತಿಗಳನ್ನು ನಿಭಾಯಿಸಲು ಬುದ್ಧಿ ಶಕ್ತಿಯನ್ನು ನೀಡಲೆಂದು ದೇವರಲ್ಲಿ ಬೇಡುತ್ತೇನೆ.

ಹೀಗೆ ಬರೆಯುತ್ತಿರುವಾಗ ನನಗೆ ನೆನಪಿಗೆ ಬರುವುದು ಇನ್ನೋರ್ವ ಮಹಾನ್ ವ್ಯಕ್ತಿ ಮಾನ್ಯ ಶ್ರೀ ಆರ್.ಎನ್. ಭಿಡೆಯವರು. ಅವರೊಂದು ತಳವಿಲ್ಲದ ಸರೋವರದಂತೆ ಅಗಾಧ ಜ್ಞಾನ, ಮಕ್ಕಳನ್ನು ಅರ್ಥ ಮಾಡಿಕೊಳ್ಳುವ ಆಳ ಶಕ್ತಿ ಅವರಲ್ಲಿ ವಿಪುಲವಾಗಿತ್ತು. ನನ್ನ ಅಣ್ಣ ಶ್ರೀ ಎನ್.ಎಂ. ಶೆಣೈಯವರು ಮೆಚ್ಚುವ ಅತೀ ವಿರಳ ವ್ಯಕ್ತಿಗಳಲ್ಲಿ ಇವರೊಬ್ಬರು. ಅವರಿಗೆ ಗೊತ್ತಿಲ್ಲದ ವಿಚಾರಗಳೇ ಇರಲಿಲ್ಲ. ಒಂದು ವೇಳೆ ತಿಳಿಯದಿದ್ದರೂ ಕೂಡಲೇ ಜ್ಞಾನ ಗ್ರಂಥಗಳ (ಎನ್‍ಸೈಕ್ಲೋಪೀಡಿಯಾ) ಸಹಾಯ ಪಡೆದು ವಿವರಣೆ ಕೊಡುತ್ತಿದ್ದರು. ಅವರ ಅತೀ ಸರಳ ಜೀವನದಿಂದಲೂ ನಾನು ಪ್ರೇರಿತಳಾಗಿದ್ದೇನೆ.

ಒಮ್ಮೆ ನನಗೂ ನನ್ನ ಮುಖ್ಯೋಪಾಧ್ಯಾಯಿನಿಯವರಿಗೂ ಭಿನ್ನಾಭಿಪ್ರಾಯ ತಲೆದೋರಿ ಅವರ ಮಾತುಗಳಿಂದ ನಾನು ಬಹಳವಾಗಿ ನೊಂದುಕೊಂಡೆ. ಮಾನ್ಯ ಶ್ರೀ ಕೆ.ಎನ್. ಭಟ್‍ರವರು (ಶ್ರೀ ನೀಲಕಂಠ ಭಟ್) ನನಗೆ ಜೊತೆ ಕೊಟ್ಟು ಮಾನ್ಯ ಶ್ರೀ ಆರ್.ಎನ್. ಭಿಡೆಯವರಲ್ಲಿ ನನ್ನನ್ನು ಕರೆದುಕೊಂಡು ಹೋಗಿ, ನನಗಾದ ನೋವು, ನಾನು ನೊಂದುಕೊಂಡ ಅನುಭವವನ್ನು ಅವರಿಗೆ ತಿಳಿಸಿದರು. ನನ್ನ ಮುಂದಿನ ನಿರ್ಧಾರ, ಬೇಗಲೇ ಬರಲಿರುವ ಸ್ಕೂಲ್ ಡೇಯಲ್ಲಿ ಯಾವುದೇ ರೀತಿಯ ಸಹಕಾರ ತೋರಿಸದೇ ಇರುವುದು, ನಾನು ನನ್ನಷ್ಟಕ್ಕೇ ಇರುವುದು ಎಂದು ತಿಳಿಸಿದೆ. ಆಗ ಅವರು ಕೊಟ್ಟ ಅಭಿಪ್ರಾಯ, ಸೂಚನೆ ನನ್ನ ಮೇಲೆ ಗಾಢವಾದ ಪ್ರಭಾವ ಬೀರಿತು. ಅವರು ಹೇಳಿದ್ದು ಇಷ್ಟೇ, “ಮೇರಿಯವರೇ ನಿಮ್ಮ ನೋವು ನನಗೆ ತಿಳಿಯುತ್ತದೆ. ಆ ಪ್ರಕಾರ ನಿಮ್ಮ ನಿರ್ಧಾರ ಸರಿ. ಆದರೆ ನೀವು ಯೋಚಿಸಿ. ಈ ಮುಗ್ಧ ಮಕ್ಕಳು ಅವರ ವಿದ್ಯಾರ್ಥಿ ಜೀವನದಲ್ಲಿ ಇದೇ ಒಂದು ಸಂದರ್ಭವನ್ನು ಅನುಭವಿಸಲಿದ್ದಾರೆ. ಅವರ ಜೀವನ ಪರ್ಯಂತ ಅವರ ಕುಣಿತ, ಇಂಗ್ಲಿಷ್ ನಾಟಕದಲ್ಲಿ ಅವರ ಪಾತ್ರ ಸದಾ ಕಾಲ ನೆನಪಿಸಿ ನಗುವರು. ಈ ಸಂದರ್ಭದಲ್ಲಿ ನೀವು ಅವರನ್ನು ಅದರಿಂದ ವಂಚನೆಗೆ ಒಳಪಡಿಸಿದಂತಾಗುತ್ತದಲ್ಲವೇ?” ಎಂದು ಹೇಳಿದಾಗ ನನ್ನ ಮನ ಪರಿವರ್ತನೆಯಾಯಿತು.

ನನ್ನ ಮಕ್ಕಳಿಂದ ಕಲಿತ ಜೀವನದ ಪಾಠಗಳು

ಇನ್ನೂ ಅನೇಕ ಘಟನೆಗಳು ನನ್ನ ಶಿಕ್ಷಕತನದ ಜೀವನದಲ್ಲಿ ನಡೆದಿವೆ. ಎಲ್ಲವನ್ನೂ ಹೇಳಿದರೆ ಈ ಪುಸ್ತಕ ಸಾಲದು ಹಾಗೂ ನನ್ನ 73 ವರ್ಷಗಳು ಸಾಕಾಗಲಿಕ್ಕಿಲ್ಲ. ನನ್ನ ನಾಲ್ಕು ಮಂದಿ ಮಕ್ಕಳು ಕೂಡಾ ನನಗೆ ಅನೇಕ ಬಾರಿ ಪ್ರೇರಣೆಯಾಗಿದ್ದಾರೆ. ದೊಡ್ಡವಳು ಭಷ್ಮಿ ಅವಳ ಶಾಂತ ಸ್ವಭಾವ, ನಗುಮುಖದ ಮಾತುಕತೆಯಿಂದ ನನಗೆ ಪ್ರೇರಣೆಯಾದರೆ, ನನ್ನ ಮಗ ಬಿಜೊಯ್ ಅವನ ಯೋಚಿಸಿ ತೆಗೆದುಕೊಳ್ಳುವ ನಿರ್ಧಾರಗಳು ಇನ್ನೊಂದು ದಿಕ್ಕಿನಲ್ಲಿ ನನಗೆ ಪ್ರೇರಣೆ ನೀಡುತ್ತಿದ್ದವು. ಮಡಂತ್ಯಾರಿನಲ್ಲಿ ಬಿ.ಕಾಂ. ಹಂತದಲ್ಲಿ ಕಲಿಯುತ್ತಿದ್ದಾಗ, ಮನೆಗೆ ಹಿಂತೆರಳಲು ಬಹಳ ಸಮಯ ತೆಗೆದುಕೊಂಡ. ಕಾಯ್ನ್ ಫೋನ್‍ನಿಂದ ಸಂದೇಶವನ್ನೂ ಕಳುಹಿಸಲಿಲ್ಲ. ನಾನು ಬಹಳ ನೊಂದುಕೊಂಡು ಅವನ ಪ್ರಾಂಶುಪಾಲರಿಗೆ ಮೇಲಿಂದ ಮೇಲೆ ಫೋನ್ ಮಾಡಿ ಅವನ ಬಗ್ಗೆ ವಿಚಾರಿಸಿದೆ. ಅವರು ನನಗೆ, ಅವನು ಅವನ ಗೆಳೆಯರ ಜೊತೆಗೆ ಅಂತರ್ ವಿಶ್ವವಿದ್ಯಾನಿಲಯದ ವಾಲಿಬಾಲ್ ಆಟವನ್ನು ವೀಕ್ಷಿಸುತ್ತಾ ಇದ್ದಾನೆ ಎಂದು ತಿಳಿದುಕೊಂಡು ಮಾಹಿತಿ ನೀಡಿದರು. ನನ್ನ ಮಗನಾದರೋ ನನ್ನ ಅವಸರದ ಗಡಿಬಿಡಿಯ ಚಟುವಟಿಕೆಯಿಂದ ಬಹಳಷ್ಟು ನೊಂದುಕೊಂಡಿದ್ದ. ಜಾಸ್ತಿ ಕೋಪ ತೋರಿಸದೇ, ಸಿಡಿಮಿಡಿಗೊಳ್ಳದೇ, “ಮಮ್ಮಿ ನಾನೀಗ ಬಿ.ಕಾಂ. ಎರಡನೇ ವರ್ಷದಲ್ಲಿ ಕಲಿಯುತ್ತಿದ್ದೇನೆ. ನನ್ನ ಮೇಲೆ ನಿನಗೆ ನಂಬಿಕೆ ಇಲ್ಲವೇ” ಎಂದು ಕೇಳಿದ. ನಾನಂತೂ ಅವನ ಜವಾಬ್ದಾರಿಯ ಉತ್ತರದಿಂದ ಸಂಕೋಚಗೊಂಡೆ. ಆದರೆ ಅವನು ಜಾಸ್ತಿ ಸಿಡಿಮಿಡಿಗೊಳ್ಳದೇ, “ಇನ್ನೊಮ್ಮೆ ಇಂತಹ ಸಂದರ್ಭದಲ್ಲಿ ನಾನು ನೀವಷ್ಟು ತಳಮಳಗೊಳ್ಳದಂತೆ ಕಾಯ್ನ್ ಫೋನ್‍ನಿಂದ ಫೋನ್ ಮಾಡುವೆ” ಎಂದ. ಇಂತಹ ಜವಾಬ್ದಾರಿಯುತ ಮಗನನ್ನು ಪಡೆದಿದ್ದು ನನ್ನ ಭಾಗ್ಯ ಅಲ್ಲವೇ?

ಮೂರನೇ ಮಗಳು ಭಕ್ತಿ. ನೇರ ಮಾತಿನವಳು. ಅವಳಿಗೆ ನನ್ನ ಅಮ್ಮ ಅವರ ಎಲ್ಲಾ ನೆನಪಿನ ಶಕ್ತಿಯನ್ನೂ ಮುಂಗೋಪವನ್ನೂ ಧಾರೆ ಎರೆದು ಕೊಟ್ಟಿದ್ದಾರೆ. 7ನೇ ತರಗತಿಯಲ್ಲಿ ಅವಳು ಕೇಳಿದ ಕನ್ನಡ ಅಥವಾ ಹಿಂದಿ ಪದ್ಯಗಳು, ಅವುಗಳಿಗೆ ಸಂಬಂಧಿಸಿದ ಚಲನಚಿತ್ರ ಅವಳು ಪಟಪಟನೆ ಈಗಲೂ, 40 ವರ್ಷ ದಾಟಿದ ಮೇಲೂ ಎಲ್ಲವನ್ನೂ ಹೇಳುತ್ತಿದ್ದಾಳೆ. ಅವಳ ಜೀವನದಲ್ಲಿ ಶಾಲೆಯಲ್ಲಿ ಇಲ್ಲವೇ ಮನೆಯಲ್ಲಿ ನಡೆದ ಹಿತಕರ ಇಲ್ಲವೇ ಅಹಿತಕರ ಘಟನೆಗಳನ್ನು ಚಾಚೂ ತಪ್ಪದೆ ಅವಳು ಈಗಲೂ ಹೇಳುತ್ತಾಳೆ. ಅವಳ ನೇರ ಮಾತು ನನಗೆ ಹಿಡಿಸಿದೆ ಹಾಗೂ ಅವಳ ಮುಂದೆ ನೇರ ಮಾತಿನಿಂದಲೇ ಮಾತನಾಡಲು ನಾನು ಪ್ರಯತ್ನಪಟ್ಟಿದ್ದೇನೆ. ಕೊನೆಯ ನನ್ನ ಮುದ್ದಿನ ಮಗಳು ಬಿನುತಾ. ನಾನು ನನ್ನ ಅಮ್ಮನಿಗೆ ಅವರ 42ನೇ ವರ್ಷದಲ್ಲಿ ಹುಟ್ಟಿದ ಹಾಗೆ ಬಿನುತಾ ಕೂಡಾ ನನಗೆ ನನ್ನ 42ನೇ ವರ್ಷದಲ್ಲಿ ಹುಟ್ಟಿದಳು. ಅವಳ ಬಾಲ್ಯ ಜೀವನ ಚೆನ್ನಾಗಿ ಸರಿದು ಹೋಯಿತು. ನಾನು ಶಾಲೆಗೆ ಹೋದಾಗ ನನ್ನ ಸಾಮಾಜಿಕ ಚಟುವಟಿಕೆಗಳನ್ನು ಮಾಡುತ್ತಿರುವಾಗ ಅವಳನ್ನು ಪ್ರೀತಿಯಿಂದ ತನ್ನ ಅನುಭವದ ಪ್ರಕಾರ ನನ್ನ ಸಹಾಯಕಿ, ಈಗ ಶ್ರೀಮತಿ ಐರಿನ್ (ಫೆರ್ನಾಂಡಿಸ್) ಮಾಡ್ತಾರವರು ನನಗೆ ನೀಡಿದ ಸಹಾಯ, ನನ್ನ ಮಗಳು ತನ್ನ ಪುಟ್ಟ ತಂಗಿಯನ್ನು ಪ್ರೀತಿಯಿಂದ ನೋಡಿದ ರೀತಿಗೆ ನನಗೆ ಉಪಕಾರ ಸ್ಮರಿಸುವ ಶಬ್ದಗಳೇ ಬರುವುದಿಲ್ಲ.

ಅವಳ ಬಗ್ಗೆ ಎರಡು ಮಾತುಗಳು. ಪ್ರಥಮವಾಗಿ ಅವಳಿಗೆ ಶಾಲೆಗೆ ಹೋಗಲು, ಅವಳ ತರಗತಿಯಲ್ಲಿ ಕುಳಿತುಕೊಳ್ಳಲು ಮನಸ್ಸೇ ಇರಲಿಲ್ಲ. ಅವಳ ಇಬ್ಬರೂ ಅಕ್ಕಂದಿರು ಮತ್ತು ಅಣ್ಣನ ಸಾಂಗತ್ಯದಲ್ಲಿ ಹೇಗೋ ಶಾಲೆಗೆ ಹೋದಳು. ಇಲ್ಲಿ ನನ್ನ ಒಂದು ದೊಡ್ಡ ತಪ್ಪು ಹೇಳಲೇಬೇಕು. ಅವಳಿಗೆ ಗಣಿತ ಎಂದರೆ ಕಬ್ಬಿಣದ ಕಡಲೆಕಾಯಿ. ನಾನು ಶಿಕ್ಷಕಿಯಾಗಿ ಅವಳಿಗೆ ತಾಳ್ಮೆಯಿಂದ, ಪ್ರೀತಿಯಿಂದ ಆ ಗಣಿತದ ಸಮಸ್ಯೆಗಳ ವಿವರಣೆ ನೀಡಬೇಕಿತ್ತು. ಆದರೆ ನಾನು ಊರಿಗೆಲ್ಲಾ ಉಪಕಾರಿಯಾಗಿ ಅವಳಿಗೆ ಸಮಯ ಕೊಡಲು ಅಸಾಧ್ಯವಾಯಿತು. ಹಾಗಾಗಿ ಪರೀಕ್ಷೆ ಹತ್ತಿರ ಬರುವಾಗ ಅವಳನ್ನು ಸಮೀಪ ಕೂತುಕೊಳ್ಳಿಸಿ ಪೆಟ್ಟಿನ ರುಚಿ ತೋರಿಸಿಯೇ ನಾನು ಅವಳಿಗೆ ಗಣಿತದ ಸಮಸ್ಯೆಗಳನ್ನು ಬಗೆಹರಿಸುವಂತೆ ಮಾಡುತ್ತಿದ್ದೆ. ಹೀಗೆ ತಿಂಗಳ ಪರೀಕ್ಷೆ, ತ್ರೈಮಾಸಿಕ, ವಾರ್ಷಿಕ ಪರೀಕ್ಷೆಗಳು ಬಂದಾಗ, ಬಿನುತಾಳಿಗಂತೂ ಥರ ಥರ ನಡುಗು. ಮಮ್ಮಿಯ ಎಷ್ಟು ಪೆಟ್ಟು ಬೀಳುತ್ತದೋ ಏನೋ ಎಂದು.

ಆದರೆ ದೇವರು ದಯಾಮಯ. ಹೈಸ್ಕೂಲಿನಲ್ಲಿ ಕಲಿಸಿ ನಿವೃತ್ತಳಾಗಲು ಕೆಲವೇ ವರ್ಷಗಳಿದ್ದಾಗ, ಬಹಳ ಅನುಭವಸ್ಥ, ಮಕ್ಕಳ ತಜ್ಞರಾದ ವಂದನೀಯ ಧರ್ಮ ಭಗಿನಿಯೊಬ್ಬರು, ಮಕ್ಕಳನ್ನು ವಿದ್ಯಾಭ್ಯಾಸ ಮಾಡಲು ಇರುವ ವಿವಿಧ ವಿಧಗಳನ್ನು ತಿಳಿಸಿ, ಬೆತ್ತ, ಹೊಡೆತ ಇರಲೇಬಾರದು ಎಂದು ಹೇಳಿದಾಗ, ನನ್ನ ತಲೆಗೆ ಏಟು ಕೊಟ್ಟಂತಾಯಿತು. ಈ ವಿಧಾನವೇ ಸರಿ ಎಂದು ಮೊದಲ ಬಾರಿಗೆ ಆ ನನ್ನ ಮಗಳ ತಿಂಗಳ ಪರೀಕ್ಷೆಗೆ ಗಣಿತ ಕಲಿಸುವಾಗ ಬೆತ್ತವನ್ನೇ ತೆಗೆದಿಟ್ಟೆ. ಗಣಿತದ ಸಮಸ್ಯೆಗಳನ್ನು ಚೆನ್ನಾಗಿ ವಿವರಿಸಿದೆ. ಅವಳಿಗದು ಅರ್ಥವಾಗಿದೆಯೋ ಇಲ್ಲವೋ, ಅವಳು ಉತ್ತೀರ್ಣಳಾಗುತ್ತಾಳೋ ಇಲ್ಲವೋ ಎಂಬ ತವಕ ನನ್ನಲ್ಲಿತ್ತು. ಸಂಜೆ ಮನೆಗೆ ಬಂದಾಗ ಅವಳು ನಸುನಗುತ್ತಾ ನನ್ನನ್ನು ಅಪ್ಪಿಕೊಂಡು ನನಗೆ ಹೇಳಿದ ಮಾತು ನನ್ನನ್ನು ಸಂಪೂರ್ಣವಾಗಿ ಬದಲಾಯಿಸಿತು. “ಮಮ್ಮಿ ಇವತ್ತು ನನಗೆ ಗಣಿತ ಕಲಿಸುವಾಗ ಹೊಡೆಯಲೇ ಇಲ್ಲ. ಪೆಟ್ಟಿನ ರುಚಿ ತೋರಿಸಲೇ ಇಲ್ಲ” ಎಂದು ಕುಣಿದಳು. ಅವಳ ಸಂತೋಷ, ಮಾನಸಿಕ ಬಿಡುಗಡೆ ನನ್ನ ಬಗ್ಗೆ ತುಂಬಾ ಬೇಸರ ತರಿಸಿತು.

ಅದೇ ಸಮಯದಲ್ಲಿ LPB ಅಂದರೆ Love for People; Love for Books ಎಂಬ ಪುಸ್ತಕದ ಕಂತೆ ನನಗೆ ಸಿಕ್ಕಿತು. ನಾನು ನನ್ನಲ್ಲಿಯೇ ಮಾಡಿದ ಬದಲಾವಣೆ ‘ಇನ್ನೆಂದಿಗೂ ಬೆತ್ತದ ಉಪಯೋಗ ಮಾಡುವುದಿಲ್ಲ’ ಎಂಬುದಾಗಿತ್ತು. ರಾತ್ರಿ ಮಲಗುವ ಮೊದಲು ಯಾವುದೇ ಫೋನ್ ಕಾಲ್ ಅಥವಾ ಕೆಲಸ ಇದ್ದರೂ, ನನ್ನುಳಿದ ಮಕ್ಕಳಿಗೆ ನನ್ನೊಂದಿಗೆ ಹೇಳಲು ಸಮಸ್ಯೆಗಳಿದ್ದರೂ, ಅವುಗಳನ್ನೆಲ್ಲಾ ಬದಿಗೊತ್ತಿ ನನ್ನ ಈ ಕೊನೆಯ ಮಗಳ ಜೊತೆಗೆ 30 ನಿಮಿಷಗಳಾದರೂ, ಅವಳನ್ನು ನನ್ನ ತೊಡೆಯ ಮೇಲೆ ಕೂತುಕೊಳ್ಳಿಸಿ ಅವಳು ಓದುವಂತೆ ಮಾಡುತ್ತಿದ್ದೆ. ಈ ಕ್ರಮದಿಂದ ಅವಳಲ್ಲಿ ಆದ ಬದಲಾವಣೆ ಆಶ್ಚರ್ಯಕರವಾಗಿತ್ತು. ಅವಳೇ ಆಸಕ್ತಿಯಿಂದ ಕಲಿಯುವಂತೆ ಅದು ಪ್ರೇರೇಪಿಸಿತು. ಬಹು ಬೇಗನೇ ಪಠ್ಯ ವಿಷಯ ಚೆನ್ನಾಗಿ ಅರ್ಥ ಮಾಡಿ ಕೇಳಿದ ಪ್ರಶ್ನೆಗಳಿಗೆ ಉತ್ತರಗಳನ್ನು ಸಲೀಸಾಗಿ ಅವಳು ಕೊಡಲು ಸಾಧ್ಯವಾಯಿತು. ತರಗತಿಯಲ್ಲಿ ಮುಂದಾಳತ್ವ, ಪ್ರಶ್ನೆಗಳಿಗೆ ತಟಕ್ಕನೆ ಅವಳು ಉತ್ತರ ಕೊಟ್ಟು, ಚುರುಕು ವಿದ್ಯಾರ್ಥಿಗಳಲ್ಲಿ ಒಬ್ಬಳೆಂದು ಹೆಸರು ಪಡೆದಳು. ತಾಯಿಯಾಗಿ, 40-45 ವರುಷಗಳ ಕಲಿಸುವಿಕೆಯ ಅನುಭವವಿದ್ದರೂ ಇನ್ನೂ ಎಷ್ಟೋ ಸುಧಾರಣೆಗಳನ್ನು ಮಾಡಬೇಕಿದೆ. ಪೆಟ್ಟು, ಶಿಕ್ಷೆ ದೂರ ಆಗಿ ವಿವಿಧ ರೀತಿಗಳಲ್ಲಿ ಈ ಪುಟಾಣಿಗಳ ಮನಸ್ಸನ್ನು ಜ್ಞಾನದ ಕಡೆ ಆಸಕ್ತಿ ಕೆರಳಿಸಲು ಬಹಳಷ್ಟು ವಿಧಾನಗಳಿವೆ. ನಾವು ಈ ಪುಟ್ಟ, ಬೆಳೆಯುತ್ತಿರುವ ವಿದ್ಯಾರ್ಥಿಗಳ ಮನಸ್ಸನ್ನು ನಮ್ಮೆಡೆಗೆ ಜ್ಞಾನದ ಕಡೆಗೆ ಆಕರ್ಷಿಸುವ ಪ್ರಯತ್ನಗಳನ್ನು ಮಾಡಿ ಜ್ಞಾನದ ತೃಷೆ ಅವರಲ್ಲಿ ಮೂಡುವಂತೆ ಮಾಡಿದರೇನೇ ನಾವು ಸಾರ್ಥಕ ಶಿಕ್ಷಕರಾಗಲು ಸಾಧ್ಯ ಎಂದು ನನಗೆ ಮನದಟ್ಟಾಯಿತು. ಈಗ ನಾನು ನಿವೃತ್ತಳಾಗಿದ್ದರೂ ಈ ದಿಶೆಯಲ್ಲಿ ಶಿಕ್ಷಕರೆಲ್ಲರೂ ಎಚ್ಚೆತ್ತು ಅವರು ಕಲಿಸುತ್ತಿರುವ ಪುಟಾಣಿ ಮನಸ್ಸು ಹಾಗೂ ಹೃದಯಗಳು ಜ್ಞಾನದ ತೃಷೆಯನ್ನು ಅನುಭವಿಸಿ ಅವರವರ ಮನಸ್ಸಿನೊಳಗೆ ಈ ಆಸಕ್ತಿಯನ್ನು ಬೆಳೆಸಿ ಜ್ಞಾನಭರಿತ ವಿದ್ಯಾರ್ಥಿಗಳಾಲಿ ಎಂದು ನಾನು ಹಾರೈಸುತ್ತೇನೆ ಹಾಗೂ ಭಗವಂತನಲ್ಲಿ ಪ್ರಾರ್ಥಿಸುತ್ತೇನೆ.

ಬರೀ ಹುಡುಗಿಯರು ಮಾತ್ರ ಪ್ರಾರಂಭದಲ್ಲಿ ನನಗೆ ಬೋಧನೆಗೆ ಸಿಕ್ಕಿದ್ದು ನನ್ನ ಪುಣ್ಯ ಎನಿಸುತ್ತದೆ. ನನ್ನ ಜೋರಾದ ಗೌಜಿ ಮಾತುಗಳಿಗೆ ಪ್ರತಿಕ್ರಿಯೆ ಅವರ ಕಣ್ಣುಗಳಲ್ಲಿ ತುಂಬಿದ್ದ ಕಣ್ಣೀರು. ಅದನ್ನು ನೋಡಿ ನಾನೂ ಸುಮ್ಮನಾಗುತ್ತಿದ್ದೆ. ನನ್ನ ಹಂಬಲದ ಪ್ರಕಾರ ನಾನು ಇಂಗ್ಲಿಷ್ ಕಲಿಸಿದ ಎಲ್ಲಾ ಪ್ರೌಢಶಾಲೆಯ ವಿದ್ಯಾರ್ಥಿನಿಯರು ಸಲೀಸಾಗಿ ಇಂಗ್ಲಿಷಿನಲ್ಲಿ ಸಂಭಾಷಣೆ ಮಾಡಬೇಕೆಂಬುದಾಗಿತ್ತು. ತರಗತಿಯ ಒಳಗೆ ಇಂಗ್ಲಿಷ್ ಮಾತ್ರ ಮಾತನಾಡಬೇಕೆಂದು ಜೋರಾಗಿ ಹೇಳಿದ್ದೆ. ಆ ಪ್ರಕಾರ ಒಬ್ಬಳು ವಿದ್ಯಾರ್ಥಿನಿಗೆ ಗಾಂಧೀಜಿಯವರ ಬಗ್ಗೆ ಇಂಗ್ಲಿಷ್‍ನಲ್ಲಿಯೇ ಏಳೆಂಟು ವಾಕ್ಯ ಮಾತನಾಡಲು ಹೇಳಿದೆ. ಅವಳೋ ಪಾಪ ಥರಥರ ನಡುಗುತ್ತಾ I am Mohandas Karamchand Gandhi ಎಂದು ಹೇಳಿದಳು. ಆ ವಾಕ್ಯ ಅರ್ಥವಾದ ಬೆರಳೆಣಿಕೆಯ ವಿದ್ಯಾರ್ಥಿನಿಯರು ಅವರ ಕರವಸ್ತ್ರ ಬಾಯಿಗೆ ಅಡ್ಡ ಹಿಡಿದು ನಕ್ಕರು. ಆ ಪಾಪದ ವಿದ್ಯಾರ್ಥಿನಿಗೆ ಸುಸ್ತೋ ಸುಸ್ತು. ಪಾಠದ ಅವಧಿ ಮುಗಿದು ಮನೆಗೆ ಹೊರಡುತ್ತಿರುವಾಗ ಆ ವಿದ್ಯಾರ್ಥಿನಿಯನ್ನು ಬೆನ್ನು ತಟ್ಟಿ ನೀನು ಚೆನ್ನಾಗಿ ಕಲಿತು ಅಭ್ಯಾಸ ಮಾಡಿಕೊಂಡು ಬಂದವಳು ತಾನೇ, ಯಾಕೆ ಮುಜುಗರ ಉಂಟಾಯಿತು? ಎಂದು ಕೇಳಿದಾಗ, ಅವಳು ಪಾಪ ಕಣ್ಣೀರ ಕೋಡಿ ಹರಿಸಿ, ಅವಳು ಕಲಿತುಕೊಂಡು ಬಂದ ಗಾಂಧೀಜಿಯವರ ಬಗ್ಗೆ ಹಲವಾರು ವಾಕ್ಯಗಳನ್ನು ಇಂಗ್ಲಿಷ್‍ನಲ್ಲಿ ಪಟ ಪಟ ಎಂದು ಹೇಳಿದಳು. ನಾನು ಅವಳ ಬೆನ್ನು ತಟ್ಟಿ ಹೀಗೆಯೇ ಬಿದ್ದು ಎದ್ದು ಇಂಗ್ಲಿಷಿನಲ್ಲಿ ಉತ್ತಮ ಸಾಧನೆ ಮಾಡು ಎಂದೆ. ಭಯದಿಂದ ಅವಳು ಕಲಿತದ್ದನ್ನೆಲ್ಲಾ ಮರೆತು ಬಿಟ್ಟಿದ್ದಳು. ವಿದ್ಯಾರ್ಥಿಗಳನ್ನು ವಿಪರೀತ ಹೆದರಿಸುವುದು ಸರಿ ಅಲ್ಲ ಎಂದು ನನಗೆ ದೃಢವಾಯಿತು. ಈ ಮುಗ್ಧ ಬಾಲಕಿಯರ ಜೊತೆಗೆ ಕೋಕೋ ಆಟ, ತ್ರೋಬಾಲ್, ಓಟ ಇತ್ಯಾದಿ ನಾನು ಸಲೀಸಾಗಿ ಆಡಿ ಸಂತೋಷಪಡುತ್ತಿದ್ದೆ. ಇಲ್ಲಿ ನನ್ನ ಸಹೋದ್ಯೋಗಿ ಹಾಗೂ ಸ್ನೇಹಿತೆ ವಂದನೀಯ ಧರ್ಮಭಗಿನಿ ಜೆನೆವೆರಾ ಅವರನ್ನು ಪ್ರೀತಿಯಿಂದ ನೆನಪಿಸುತ್ತೇನೆ. ಅನೇಕ ಬಾರಿ ಮುಖ್ಯೋಪಾಧ್ಯಾಯಿನಿಯವರಿಂದ ನನಗೆ ಕಠಿಣ ಮಾತುಗಳು ಸಿಗದ ಹಾಗೆ ಅವರು ನನ್ನನ್ನು ರಕ್ಷಿಸಿದ್ದಿದೆ. ಈಗಲೂ ಅವರನ್ನು ನಾನು ಸಂಪರ್ಕಿಸುತ್ತಲೇ ಇದ್ದೇನೆ.

ಆ ಸಮಯದಲ್ಲಿ ನಮ್ಮ ಹೈಸ್ಕೂಲಿನಲ್ಲಿ ಹೆಣ್ಮಕ್ಕಳಿಗೆ ಮಾತ್ರ ಪ್ರವೇಶವಿತ್ತು. ಅವರ ನಡತೆ, ಕಲಿಯುವುದರಲ್ಲಿ ಅವರ ಆಸಕ್ತಿ ಕಂಡ ಅನೇಕ ಹೆತ್ತವರಿಗೆ ನಮ್ಮ ಗಂಡು ಮಕ್ಕಳು ಕೂಡಾ ಈ ಸಿಸ್ಟರ್‍ಗಳ ಕೈಯಲ್ಲಿ ಉತ್ತಮ ಗುಣ ನಡತೆ, ನಿರಂತರ ಕಲಿಕೆ ಪಡೆದು ಸಮಾಜದಲ್ಲಿ ಅವರೆಲ್ಲ ಅತ್ಯುತ್ತಮ ಪ್ರಜೆಗಳಾಗಬೇಕು, ಹೆಸರು ಪಡೆಯಬೇಕೆಂದು ಮನಸ್ಸಾಗಿ ಮಾನ್ಯ ಅರ್ಸುಲೈನ್ ಸಿಸ್ಟರ್‌ಗಳ ಗೌರವದಿಂದ ಅಭಿಮಾನದಿಂದ ಒತ್ತಡ ಹಾಕಿದರು. ಇದರ ಫಲವಾಗಿ 1981ರಿಂದ ಸಂತ ತೆರೆಸಾ ಬಾಲಿಕೆಯರ ಪ್ರೌಢಶಾಲಾ ಇದ್ದದ್ದು ಸಂತ ತೆರೇಸಾ ಪ್ರೌಢಶಾಲೆ ಎಂದು ತನ್ನ ಹೆಸರನ್ನು ಬದಲಾಯಿಸಿತು.

ಹೊಸತಾಗಿ ಸೇರಿದ ಗಂಡು ಮಕ್ಕಳು ಪ್ರಾರಂಭದಲ್ಲಿ ಮೌನವಾಗಿಯೇ ಇದ್ದರು. ಸಮಯ ಕಳೆದಂತೆ ಅವರ ಹತ್ತು ಹನ್ನೆರಡು ತುಂಟ ಕೆಲಸಗಳು ಗೋಚರವಾದವು. ಇವರನ್ನು ಹಿಡಿತದಲ್ಲಿಡಲು ನಾನು ಉಪಯೋಗಿಸಿದ್ದು ಎರಡೇ ಅಸ್ತ್ರಗಳು. ಒಂದು ನನ್ನ ಗಟ್ಟಿಯಾದ ಜೋರು ಸ್ವರ ಮತ್ತು ಗೌಜಿ. ಮತ್ತೊಂದು ಅಸ್ತ್ರವೆಂದರೆ, ಈ ಗಂಡು ಮಕ್ಕಳ ತಂದೆ ತಾಯಂದಿರಿಗೆ ಚೆನ್ನಾಗಿ ನನ್ನ ಪರಿಚಯವಿತ್ತು. ಹಾಗಾಗಿ ಚೆನ್ನಾಗಿ ವ್ಯಾಸಂಗ ಮಾಡದಿದ್ದರೆ, ತರಗತಿಗೆ ಬಾರದೇ ಇದ್ದರೆ, ನನ್ನ ಮಾತಿಗೆ ಬೆಲೆ ಜಾಸ್ತಿ ಸಿಗುತ್ತಿತ್ತು. ಅವರ ಮುಂದೆಯೇ ನಾನು ಧೈರ್ಯವಾಗಿ ಬೆತ್ತದ ಒಂದೆರಡು ಪೆಟ್ಟುಗಳ ರುಚಿ ತೋರಿಸಲು ಅವರೇ ಮುಕ್ತ ಒಪ್ಪಿಗೆ ಕೊಡುತ್ತಿದ್ದರು. ಆದರೆ ಈಗಂತೂ ಪರಿಸ್ಥಿತಿ ವಿರುದ್ಧವಾಗಿದೆ. ನನ್ನ ಅದೃಷ್ಟಕ್ಕೆ ಶಾಲಾ ಶಿಕ್ಷಕಿಯಾಗಿ ನನ್ನ ಜೀವನ ನಿವೃತ್ತವಾಗಿತ್ತು. ಆದರೆ ಒಂದಂತೂ ಸತ್ಯ. ನಾನೇ ಸ್ವಲ್ಪ ಹೆಚ್ಚಿನ ತಾಳ್ಮೆ, ಮಕ್ಕಳ ಮನೆ ಪರಿಸ್ಥಿತಿ ಇವೆಲ್ಲದಕ್ಕೂ ಹೆಚ್ಚಿನ ಗಮನ ಕೊಟ್ಟಿದ್ದಿದ್ದರೆ ಇನ್ನಷ್ಟು ವಿದ್ಯಾರ್ಥಿಗಳನ್ನು ಚೆನ್ನಾಗಿ ವ್ಯಾಸಂಗಕ್ಕೆ ಪ್ರೋತ್ಸಾಹಿಸಬಹುದಿತ್ತು. ಈಗಂತೂ ಭಗವಂತನಲ್ಲಿ ಪ್ರಾರ್ಥಿಸುವುದು ಒಂದೇ, ನಾನು ಶಿಕ್ಷಕಿಯಾಗಿ ಶಿಕ್ಷೆ, ಪೆಟ್ಟು ಇತ್ಯಾದಿ ಕೊಟ್ಟಿದ್ದೇನೆ ಎಂಬುದು ನಿಜ, ಆದರೆ ಅಂತಹ ವಿದ್ಯಾರ್ಥಿ, ವಿದ್ಯಾರ್ಥಿನಿಯರೆಲ್ಲ ತಮ್ಮ ವ್ಯಕ್ತಿತ್ವವನ್ನು ಉತ್ತಮಗೊಳಿಸಿ, ಸಮಾಜದ ಗಣ್ಯ ವ್ಯಕ್ತಿಗಳಾಗಿ ಸಮಾಜ ಹಿತ ಕಾರ್ಯಗಳನ್ನು ಮಾಡಬೇಕು. ಹಾಗೆಯೇ ಅವರವರ ವ್ಯಕ್ತಿತ್ವವನ್ನು ಬೆಳೆಸಿ, ವೃದ್ಧಿಪಡಿಸಿ ಸಮಾಜವನ್ನು ಅಭಿವೃದ್ಧಿಪಡಿಸುವ ಹಿರಿದಾದ ಜವಾಬ್ದಾರಿಯನ್ನು ಸದಾ ತಮ್ಮ ಜೀವನದ ಗುರಿಯಾಗಿ ಇಡಲೆಂದು ನನ್ನ ಪ್ರಾರ್ಥನೆ ಆಗಿದೆ.

ನಾನು ಉತ್ತಮ, ವಿದ್ವತ್‍ಪೂರ್ಣ ಶಿಕ್ಷಕಿಯಾಗಲು ನಾನು ಪ್ರಯೋಗಿಸಿದ ಮತ್ತೊಂದು ಸಾಧನೆ ಪುಸ್ತಕಗಳನ್ನು ಓದುವ ಅಭ್ಯಾಸ. ಶ್ರೀ ಶಿವರಾಮ ಕಾರಂತರ ಆತ್ಮಚರಿತ್ರೆ, ಬೀಚಿಯವರ ಹರಿತ ಹಾಸ್ಯಭರಿತ ಪುಸ್ತಕಗಳು, ತ್ರಿವೇಣಿಯವರ ಮನೋಜ್ಞ ಕಥೆಗಳು, ಶ್ರೀ ಪರಮಹಂಸ, ವಿವೇಕಾನಂದರ ಅನೇಕ ಹೃದಯ, ಮನಸ್ಸಿಗೆ ನಾಟುವ ಪುಸ್ತಕಗಳು. ಇದರಿಂದ ನನ್ನ ವ್ಯಕ್ತಿತ್ವದ ಬೆಳವಣಿಗೆ ಆಯಿತೆಂಬುದು ಖಂಡಿತ. ಜೊತೆಗೆ ನಾನು ಕೊನೆಯವಳಾಗಿದ್ದು, ನನ್ನ ಹಿರಿಯ ಅಕ್ಕ ಅಣ್ಣಂದಿರ ಮಾರ್ಗದರ್ಶನ, ಅವರ ಜೀವನ ಕ್ರಮ, ಯೇಸುಕ್ರಿಸ್ತರ ಜೀವನ ಚರಿತ್ರೆ, ರಾಮಾಯಣ, ಮಹಾಭಾರತ ಇತ್ಯಾದಿ ನನ್ನ ವ್ಯಕ್ತಿತ್ವ ವಿಕಸನಕ್ಕೆ ಹಿರಿದಾದ ಕಾರಣ ಎಂದರೆ ತಪ್ಪಾಗಲಾರದು.

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

The post 50 ವರುಷ ಶಿಕ್ಷಕಿಯಾಗಿ ನನ್ನ ಅನುಭವ: ಮೇರಿ ಟೀಚರ್‌ರ ಕೊನೆಯ ಬರಹ appeared first on Budkulo.

ಮಂಗಳೂರು: ಸಮಾಜದ ಸ್ವಾಸ್ಥ್ಯಕ್ಕಾಗಿ ಮೈತ್ರಿಯ ಭಾವನೆ ಅಗತ್ಯ ಎಂದು ಸಾಹಿತಿ, ವಿಮರ್ಶಕ ಪ್ರೊ. ಕೆ. ಫಣಿರಾಜ್ ಪ್ರತಿಪಾದಿಸಿದರು. ನಗರದ ಪುರಭವನದಲ್ಲಿ ಗುರುವಾರ ಸಂತ ಮದರ್ ತೆರೆಸಾರ 26ನೇ ಸಂಸ್ಮರಣಾ ದಿನದ ಪ್ರಯುಕ್ತ ಸಂತ ಮದರ್ ತೆರೆಸಾ ವಿಚಾರ ವೇದಿಕೆಯ ಆಶ್ರಯದಲ್ಲಿ ವೈವಿಧ್ಯ ಭಾರತದಲ್ಲಿ ಪ್ರೀತಿಯ ಸೆಲೆಗಳು ಎಂಬ ತತ್ವದಡಿ ನಡೆದ ವಿಚಾರ ಸಂಕಿರಣವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ದ್ವೇಷ ಎನ್ನುವುದು ಬಹಳ ಸರಳವಾದ ವಿಷಯ, ಪ್ರೀತಿಯೆಂಬುವುದು ಸರಳವಲ್ಲ. ಅಧಿಕಾರಕ್ಕಾಗಿ, ಹಣಕ್ಕಾಗಿ ವೇಷ ಮಾಡುವುದು ಸುಲಭ, ಅದಕ್ಕೆ ಪ್ರಚೋದನೆ ನೀಡಲು ಹಲವರಿದ್ದಾರೆ. ಅಂತಹ ಸಂದರ್ಭಲ್ಲಿ ಪ್ರೀತಿಸುವ ಗುಣವು ನಿಜವಾದ ಒಂದು ಆಧ್ಯಾತ್ಮವಾಗಿದೆ. ಭಾರತ ಬಹಳ ದೊಡ್ಡ ಕೋಮು ಹಿಂಸೆಯನ್ನು ಅನುಭವಿಸಿದೆ, ಮತೀಯ ದ್ವೇಷದಿಂದ ಒಬ್ಬರನ್ನು ಒಬ್ಬರು ಕೊಂದಿದ್ದಾರೆ, ಅತ್ಯಾಚಾರ ಎಸಗಿದ್ದಾರೆ. ಭಾರತದಲ್ಲಿ ಸಹೋದರತ್ವ ಎನ್ನುವ ಭಾವನೆ ದಿನ ನಿತ್ಯ ಮಾಡುವ ಊಟ, ನಿದ್ದೆಯ, ಉಸಿರಾಡುವ ಗಾಳಿಯ ಹಾಗೇ ದಿನ ನಿತ್ಯದ ಮೌಲ್ಯವಾಗದೆ ಹೋದರೆ ಸಾಮಾಜಿಕ ಪ್ರಜಾಪ್ರಭುತ್ವ ಇರಲು ಸಾಧ್ಯವಿಲ್ಲ. ಕಾನೂನಿನ ಆಸರೆಯಲ್ಲಿ ಸಮಾನತೆಯನ್ನು ರಕ್ಷಿಸಲು ಸಾಧ್ಯವಿಲ್ಲ ಮತ್ತು ಬಹಳ ದಿವಸ ಉಳಿಯುವುದಿಲ್ಲ. ಸಮಾನತೆ, ಭ್ರಾತೃತ್ವ ಬಹಳ ದಿನ ಉಳಿಯಬೇಕಾದರೆ ಸಮಾನ ಸಂಪನ್ಮೂಲ ಹಂಚಿಕೆಯಾಗುವ ಕ್ರಮವಾಗಬೇಕು. ಸ್ನೇಹದ ಭಾವನೆ ಅಂದರೆ ಮೈತ್ರಿಯ ಭಾವವನ್ನು ಕೆಡಿಸುವವರಿಂದ ಸಂಘರ್ಷ ಉಂಟಾಗುತ್ತಿದೆ ಎಂದು ಪ್ರೊ. ಫಣಿರಾಜ್ ಹೇಳಿದರು.

ಸಂವಿಧಾನದ ಮೂಲ ತತ್ವ ಅರಿತುಕೊಳ್ಳಿ: ಗಣನಾಥ ಶೆಟ್ಟಿ

ಹಲವು ಜಾತಿ, ಧರ್ಮ, ಸಂಸ್ಕೃತಿ, ಭಾಷೆ ಹೀಗೆ ಹಲವುಗಳನ್ನು ಒಪ್ಪಿಕೊಂಡು ಬದುಕುವುದೇ ಬಹುತ್ವ, ಈ ವೈವಿಧ್ಯತೆಯನ್ನು ಮತ್ತು ಭಾರತೀಯ ಸಂವಿಧಾನದ ಮೂಲ ತತ್ವಗಳನ್ನು ಅರ್ಥ ಮಾಡಿಕೊಂಡರೆ ನಾವು ಪ್ರೀತಿಯ ಸೆಲೆಯಲ್ಲಿ ಮೊಳಗುವುದಕ್ಕೆ ಸಾಧ್ಯವಾಗುತ್ತದೆ ಎಂದು ಜನಪದ ವಿದ್ವಾಂಸ, ನಿವೃತ್ತ ಎನ್‍ಎಸ್‍ಎಸ್ ಅಧಿಕಾರಿ ಡಾ. ಗಣನಾಥ ಶೆಟ್ಟಿ ಎಕ್ಕಾರು ಹೇಳಿದರು.

ವಿಷಯ ಮಂಡನೆ ಮಾಡಿ ಮಾತನಾಡಿದ ಅವರು, ಗಾಂಧೀಜಿ ಹೇಳುತ್ತಾರೆ ನಿಜವಾದ ಕ್ರಾಂತಿ ಎಂಬುವುದು ನಮ್ಮ ಅಂತರಂಗದಿಂದ ಆರಂಭವಾಗುತ್ತದೆ ಎಂದು. ನೈಜತೆಯನ್ನು ಅರ್ಥ ಮಾಡಿಕೊಂಡಾಗ ಅಂತರಂಗದ ಕ್ರಾಂತಿಯಾಗಲು ಸಾಧ್ಯವಾಗುತ್ತದೆ. ಇದರಿಂದಾಗಿ ನಮ್ಮ ಯೋಚನಾ ಕ್ರಮ, ನಮ್ಮ ಮತ್ತು ನಾಡಿನ ಬೆಳವಣಿಗೆ ಮಾತ್ರವಲ್ಲ ದೇಶದ ಬೆಳವಣಿಗೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.

ಭಾರತ ಸಂವಿಧಾನದ ಮೂಲ ತಿರುಳುಗಳಾದ ಸಮಾನತೆ, ಸ್ವಾತಂತ್ರ್ಯ, ಭ್ರಾತೃತ್ವ ಹಾಗೂ ಸಾಮಾಜಿಕ ನ್ಯಾಯವನ್ನು ಅರ್ಥ ಮಾಡಿಕೊಳ್ಳಬೇಕು. ನನಗೆ ಸಮಾನತೆ, ಸ್ವಾತಂತ್ರ್ಯ ಇರುವಾಗ ಇನ್ನೊಬ್ಬರಿಗೂ ಸಮಾನತೆ, ಸ್ವಾತಂತ್ರ್ಯ ಇದೆ ಎಂಬುದನ್ನು ಅರಿತುಕೊಂಡು ಪರಸ್ಪರ ಗೌರವದಿಂದ ಬದುಕುವ ಅನಿವಾರ್ಯತೆ ಮತ್ತು ಅಗತ್ಯವಿದೆ. ಸಮಾನತೆಗೆ ತೊಂದರೆ ಆದಾಗ ಮದರ್ ತೆರೆಸಾರಂತಹ ಮಹನೀಯರು ಪ್ರತಿಕ್ರಿಯೆ ನೀಡಿದ್ದಾರೆ. ನಾವು ಇಂದು ಪ್ರೀತಿಯ ಬೋಧನೆಗಳಿಗಿಂತ ಆಚರಣೆಗಳಿಗೆ ಹೆಚ್ಚು ಮಹತ್ವ ನೀಡುತ್ತಿದ್ದೇವೆ. ಮಾನವೀಯತೆ ಎಂದರೆ ಪ್ರೀತಿಯ ಸೆಲೆ. ಇದರ ಅಗತ್ಯ ಬಹಳಷ್ಟಿದೆ. ಮದರ್ ತೆರೆಸಾ ಅವರು ತನ್ನನ್ನು ತಾನು ಸೇವೆಗಾಗಿ ಸಮರ್ಪಿಸಿಕೊಂಡು ಬದುಕಿದರು. ಹೊಟ್ಟೆ ಬಟ್ಟೆಗೆ ಇಲ್ಲದವರು, ಸೂರಿಲ್ಲದವರು, ಅಂಗವಿಕಲರು, ಕುರುಡರು, ಕುಷ್ಠ ರೋಗಿಗಳು, ಸಮಾಜಕ್ಕೆ ಬೇಡವಾದವರು, ಪ್ರೀತಿ ವಂಚಿತರು ಇವರೆಲ್ಲರ ಸೇವೆ ಮಾಡುವ ಮೂಲಕ ಅವರಲ್ಲಿ ದೇವರನ್ನು ಕಂಡವರು ಹಾಗೂ ತನ್ನನ್ನು ಟೀಕೆ ಮಾಡಿದವರಿಗೆ ಕೂಡ ಜನಸೇವೆಯನ್ನು ಮಾಡಿದ ಮಹನೀಯರು ಮದರ್ ತೆರೇಸಾರವರು.

ಆಸೆಯೇ ದುಃಖಕ್ಕೆ ಕಾರಣ, ಆದರೆ ಆಸೆಯೆಂದರೆ ಯಾವುದೋ ವಸ್ತುವಿನ ಮೇಲಿನ ಆಸೆಯಲ್ಲ ನಮ್ಮ ಮನಸ್ಸಿನಲ್ಲಿರುವ ಸ್ವಾರ್ಥ, ದ್ವೇಷ, ಕೋಪ, ಕೋಮುವಾದ ಇವೆಲ್ಲವೂ ಆಸೆಗಳು. ಅದನ್ನು ಬಿಟ್ಟು ನಾವು ಹೊರ ಬಂದಾಗ ಕುವೆಂಪು ಹೇಳಿದಂತೆ ನಾವು ವಿಶ್ವ ಮಾನವರಾಗುತ್ತೇವೆ ಎಂದರು.

ಮದರ್ ತೆರೇಸಾ ಮನುಕುಲಕ್ಕೆ ಇಂದಿಗೂ ಪ್ರೇರಕಿ: ರಾಯ್ ಕ್ಯಾಸ್ಟೆಲಿನೊ

ಅಧ್ಯಕ್ಷತೆ ವಹಿಸಿದ್ದ ಸಂತ ಮದರ್ ತೆರೇಸಾ ವಿಚಾರ ವೇದಿಕೆಯ ಅಧ್ಯಕ್ಷ ರಾಯ್ ಕ್ಯಾಸ್ಟೆಲಿನೊ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಯುವಜನರು ಭಾರತದ ಭವಿಷ್ಯ, ದೇಶದ 60% ಜನರು 30ರ ವಯಸ್ಸಿನ ಒಳಗಿನವರು. ಯುವಕರು ಮುಂದಿನ ತಾರೆಗಳು. ಮದರ್ ತೆರೆಸಾ ನಾವು ಕಂಡ ಮಹಾನ್ ಮಾನವತಾವಾದಿ. ಸಮಾಜದ ಕಟ್ಟಕಡೆಯ ವ್ಯಕ್ತಿಯಲ್ಲಿ ಪರಮಾತ್ಮನನ್ನು ಕಂಡವರು. ಭಾರತವನ್ನು ಅವರು ಕರ್ಮಭೂಮಿಯನ್ನಾಗಿಸಿದವರು. ಮರಣ ಹೊಂದಿ 26 ವರ್ಷಗಳ ನಂತರವೂ ಮನುಕುಲಕ್ಕೆ ಪ್ರೇರಣೆ ನೀಡುತ್ತಿರುವ ಹಿರಿಮೆ ಅವರದು. ಅವರ ಸ್ಫೂರ್ತಿ ಪಡೆದು ಪ್ರೀತಿ ಹರಡಲಿ ಎಲ್ಲೆಡೆ ಎಂಬ ಧ್ಯೇಯದೊಂದಿಗೆ ಸಂತ ಮದರ್ ತೆರೆಸಾ ವಿಚಾರ ವೇದಿಕೆ ಸ್ಥಾಪಿಸಲ್ಪಟ್ಟಿದೆ ಎಂದು ಅವರು ವಿವರಿಸಿದರು.

ಮಂಗಳೂರಿನ ಮಾಜಿ ಮೇಯರ್ ಕೆ. ಅಶ್ರಫ್ ಹಾಗೂ ನಿವೃತ್ತ ಪ್ರಾಂಶುಪಾಲ ಡಾ. ವಸಂತ್ ಕುಮಾರ್ ಪ್ರತಿಕ್ರಿಯೆ ನೀಡಿದರು. ಮಂಗಳೂರು ಧರ್ಮಪ್ರಾಂತ್ಯದ ಪಿಆರ್‍ಒ ಫಾ. ಜೆ.ಬಿ. ಸಲ್ದಾನ, ಸಿಸ್ಟರ್ ಶಾಂತಿಧನ್, ಸಿಸ್ಟರ್ ರೋನಾ, ಫಾ. ಪ್ರವೀಣ್, ಫಾ. ರೂಪೇಶ್ ಮಾಡ್ತಾ, ಎಂಸಿಸಿ ಬ್ಯಾಂಕ್ ಅಧ್ಯಕ್ಷ ಅನಿಲ್ ಲೋಬೊ, ಮಾಜಿ ಸಚಿವ ರಮಾನಾಥ ರೈ, ಕುದ್ರೋಳಿ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್., ಕಥೊಲಿಕ್ ಸಭಾ ಅಧ್ಯಕ್ಷ ಆಲ್ವಿನ್ ಡಿಸೋಜ ಉಪಸ್ಥಿತರಿದ್ದರು. ವೇದಿಕೆಯ ಜಂಟಿ ಕಾರ್ಯದರ್ಶಿ ಮಂಜುಳಾ ನಾಯಕ್ ಸ್ವಾಗತಿಸಿದರು. ಪ್ರಧಾನ ಕಾರ್ಯದರ್ಶಿ ಸುನಿಲ್ ಕುಮಾರ್ ಬಜಾಲ್ ನಿರೂಪಿಸಿದರು. ಸ್ಟ್ಯಾನಿ ಅಲ್ವಾರಿಸ್ ವಂದಿಸಿದರು. ಪ್ರಾರಂಭದಲ್ಲಿ ಏಕತಾರಿ ಹಾಡುಗಾರ ನಾದ ಮಣಿನಾಲ್ಕೂರು ಬಳಗ ಹಾಗೂ ಜನಪ್ರೀತಿ ಬಳಗದವರಿಂದ ಪ್ರೀತಿಯ ಸಿಂಚನ ಸೌಹಾರ್ದ ಗಾಯನ ಕಾರ್ಯಕ್ರಮ ನಡೆಯಿತು.

Join our WhatsApp Group exclusively for Konkani Catholics by this Link: https://chat.whatsapp.com/B5USoC1zjx2CTYn0l20s0l

Join our WA Group for Kannada Readers by this Link: https://chat.whatsapp.com/CxzVPIf7DAIBDtNI53fgme

The post ಮಂಗಳೂರಿನಲ್ಲಿ ಸಂಭ್ರಮದಿಂದ ನೆರವೇರಿದ ಮದರ್ ತೆರೇಸಾ ವೇದಿಕೆಯ ವಿಚಾರ ಸಂಕಿರಣ appeared first on Budkulo.