ಎಕಾ ಪೆಟ್ಯಾಚೆಂ ಫಾರಿಕ್ಪಣ್ – ಫೈನಲ್: ಫಾರಿಕ್ಪಣಾಚ್ಯಾ ತಾನೆಚೆಂ ಝುಜ್

ಎಕಾ ಪೆಟ್ಯಾಚೆಂ ಫಾರಿಕ್ಪಣ್ – ಸಾತ್ವೊ, ನಿಮಾಣೊ ಭಾಗ್

ಎದೊಳ್ ಪರ್ಯಾಂತ್: ಆಮ್ಚ್ಯಾ ಬಯ್ಲಾಚೆಂ ದರ್ಶನ್ ತುಮಿ ಘೆತ್ಲೆಂ… ಮನ್ಶ್ಯಾಂಕ್ ನಿಯತ್ತೆಚೊ ಸಾಂಗಾತ್ ದಿಂವ್ಚ್ಯಾ ಪೆಟ್ಯಾಂಚಿ ಗಜಾಲ್‍ಯೀ ಸಮ್ಜಲ್ಯಾತ್… ಆಮ್ಚ್ಯಾ ಘರ್ಚೊ ಪೆಟೊ ಟೊಮಿ ವಿಶಿಂ ಸಮ್ಜಲ್ಯಾತ್… ಪಲ್ತಡಿಚ್ಯಾ ಮಲಯಾಳಿಂಚ್ಯಾ ಘರ್ಚೊ ಪರ್ಕಿ ಪೆಟೊ ಟೊಮಿಚೆರ್ ಹಲ್ಲೊ ಕರ್ತಾ. ಪೆಟ್ಯಾಂಚ್ಯಾ ತ್ಯಾ ಪಯ್ಲ್ಯಾ ಲಡಾಯೆಂತ್ ಆಮ್ಚೊ ಟೊಮಿ ಸಲ್ವೊನ್, ಘಾಯೆವ್ನ್ ಮರ್ಣಾಚ್ಯಾ ದಾಡ್ಯಾಂಕ್ ಸಾಂಪಡ್ತಾ. ಮ್ಹಜ್ಯಾ ಮಾಂಯ್ನ್ ಕೆಲ್ಲ್ಯಾ ಸುಶ್ರೂಷೆ ವರ್ವಿಂ ಟೊಮಿ ಬರೊ ಜಾತಾ. ಬರೊ ಜಾಲ್ಲೊ ಟೊಮಿ ಮತಿಂತ್ ಸಂಕಲ್ಪ್ ಘೆತಾ… ಕೊಣಾಯ್ಕೀ ಕಳಿತ್ ನಾತ್‍ಲ್ಲೆಪರಿಂ ತೊ ಏಕ್ ದೃಢ್ ನಿಚೆವ್ ಘೆತಾ… ಆಪ್ಣಾಕ್ ಜಾಲ್ಲ್ಯಾ ಸಲ್ವಣೆಕ್, ಅಕ್ಮಾನಾಕ್, ಘಾತಾಕ್ ಫಾರಿಕ್ಪಣ್ ಘೆಂವ್ಕ್, ರುಸ್ತುರುಸಾಂವ್ ಆಪ್ಣಾಂವ್ಕ್ ತೊ ಲಾಲೆತಾ…

ಆನಿ ಆಬ್ಳೆ, ಫಾರಿಕ್ಪಣಾಚ್ಯಾ ನಿರೀಕ್ಷೆಂತ್, ನಿಮಾಣಿ ಪರೀಕ್ಷಾ!

ಟೊಮಿಚೆಂ ಮನ್ ಆಮ್ಕಾಂ ಕಳಿತ್ ನಾತ್‍ಲ್ಲೆಂ. ಸದಾಂಚ್ಯಾ ರಾಟಾವಳಿಂನಿ ವ್ಯಸ್ತ್ ಆಸ್‍ಲ್ಲ್ಯಾಂಕ್ ಎಕಾ ಮೊನ್ಜಾತಿಚಿಂ ಚಿಂತ್ನಾಂ ಕಶೆಂ ಕಳ್ಚಿಂ ನ್ಹಯ್ವೇ? ತ್ಯಾ ಭಿರಾಂಕುಳ್ ಪರಿಸ್ಥಿತೆಂತ್ ಪಡೊನ್ ತರೀ ತೊ ವಾಂಚ್‍ಲ್ಲೊಚ್ ಏಕ್ ಅಚರ್ಯೆಂ, ಆನಿ, ತಾಣೆಂ ಸುಧ್ರೊನ್ ಬರೊ ಜಾಲ್ಲೆಂಯೀ ಏಕ್ ಅಜ್ಯಾಪ್‍ಚ್. ತ್ಯಾ ಶಿವಾಯ್ ಹೆರ್ ಕಿತೆಂ ಚಿಂತ್ಯೆತ್ ಕೊಣೆಂಯೀ!?

ಪುಣ್, ಟೊಮಿ ಹಟಾಕ್ ಪಡ್‍ಲ್ಲೊ. ಜಿವಿತಾಂತ್ ಅತೀ ಕ್ರೂರ್ ಅಕ್ಮಾನ್ ತಾಣೆಂ ಸೊಸ್‍ಲ್ಲಿ. ಎಕಾ ಪರ್ಕಿ ಪೆಟ್ಯಾ ಥಾವ್ನ್ ಸಲ್ವೊನ್ ಹತಾಶ್ ಜಾಲ್ಲೊ ತೊ. ತಾಚ್ಯಾ ಅದೃಶ್ಟಾನ್, ದೆವಾಚ್ಯಾ ನಿರ್ಮೊಣ್ಯಾನ್, ತೊ ಬಚಾವ್ ಜಾಲ್ಲೊ ಆನಿ ಪರತ್ ಪಯ್ಲೆಂಚಿ ಭಲಾಯ್ಕಿ ಜೊಡ್‍ಲ್ಲಿ ತಾಣೆಂ. ತೆಂ ಭಾಯ್ಲ್ಯಾ ದೆಖಿಕ್ ತರ್, ಭಿತರ್ಲ್ಯಾನ್ ತಾಚಿಂ ಚಿಂತ್ನಾಂ ಎಕ್‍ಚ್ ಜಾವ್ನಾಸ್‍ಲ್ಲಿಂ – ರಗ್ತಾಕ್ ರಗತ್ ವ್ಹಾರಯ್ಜೆ, ಹಗೆಂ ತಿರ್ಸಿಜೆ, ಫಾರಿಕ್ಪಣ್ ಘೆಜೆ – ತ್ಯಾಚ್ ಧ್ಯಾನಾಂತ್ ತೊ ದೀಸ್ ಮೆಜ್ತಾಲೊ.

ಪರತ್ ಪ್ರವೇಶ್, ದುಸ್ಮಾನಾಚೊ!

ಟೊಮಿಚೆಂ ಸಂಕಲ್ಪ್ ಜಾರಿ ಜಾಂವ್ಕ್ ಮುಹೂರ್ತ್ ಉದೆಲ್ಲೆಂ. ಸಬಾರ್ ಮಹಿನ್ಯಾಂ ಉಪ್ರಾಂತ್ ಪಲ್ತಡಿಚೊ ಗೊರೊ ಪೆಟೊ ಏಕ್ ದೋನ್ ಪಾವ್ಟಿಂ ಆಮ್ಚ್ಯಾ ಬಯ್ಲಾಕ್ ಯೇವ್ನ್ ಗೆಲ್ಲೊ. ತ್ಯಾ ದೀಸ್, ಪರತ್, ಪ್ರಕೃತಿ ಸ್ತಬ್ಧ್ ಜಾಲ್ಲಿ. ಏಕ್ ಪಾವ್ಟಿಂ ಕರಾಳ್ ವಾತಾವರಣಾಂತ್ ದೀಸ್ ಸುರ್ವಾತ್ ಜಾಲ್ಲೊ, ಆನಿ, ಚಡುಣೆಂ ಟೊಮಿಚೊ ಸಂಹಾರ್ ಜಾಲ್ಲೊ. ಪುಣ್, ಹ್ಯಾ ದಿಸಾ, ಕರಾಳತಾ ದಿಸನಾತ್‍ಲ್ಲಿ ತರೀ, ವಿಚಿತ್ರ್ ಕುತೂಹಲ್ ಉಬ್ಜಂವ್ಚಿಂ ಖುಣಾಂ ದಿಸ್ತಾಲಿಂ. ಮೋಡ್ ನಾತ್‍ಲ್ಲೆಂ, ಪುಣ್ ಪರಿಸರ್ ಥಂಡ್ ಆನಿ ಸ್ತಬ್ಧ್ ಜಾಲ್ಲೆಂ. ಸರ್ವ್ ಜೀವಿಂಕ್ ಆಜ್ ಕಿತೆಂ ತರೀ ವಿಶೇಸ್ ಪಳೆಂವ್ಕ್ ಮೆಳ್ತಾ ಮ್ಹಳ್ಳೆಪರಿಂ ಆತುರಾಯ್…

ಸಕಾಳಿಂಚೊ ಆದೇಸ್ ಉತ್ರೊನ್, ವೋತ್ ತಾಪೊಂಕ್ ಲಾಗ್ತಾನಾ ವಾತಾವರಣ್ ಬದ್ಲೊಂಕ್ ಸುರ್ವಾತ್ಲೆಂ. ಸವ್ಕಾಸ್ ವಾರೆಂ ವ್ಹಾಳೊಂಕ್ ಲಾಗ್ಲೆಂ. ತಿತ್ಲ್ಯಾರ್, ಪಲ್ತಡಿಚ್ಯಾ ಮೆರೆಂತ್ಲ್ಯಾನ್ ಮಲಯಾಳಿಂಗೆಲೊ ಧವೊ ಪೆಟೊ ಸವ್ಕಾಸ್ ತಿಶಿನ್ ಹಿಶಿನ್ ಹುಂಗೊನ್ ಹುಂಗೊನ್ ಚಲೊನ್ ಆಯ್ಲೊ. ಏಕ್ ದೋನ್ ಸುಕ್ಣಿಂ ಆವಾಜ್ ದೀಂವ್ಕ್ ಲಾಗ್ಲಿಂ… ಹೆವ್ಶಿಲ್ಯಾನ್ ಟೊಮಿ ಜ್ಹಾಲಾ ಥಾವ್ನ್ ಬಯ್ಲಾಕ್ ಪಾವ್‍ಲ್ಲೊ. ಗಂಭೀರ್ ಪಾವ್ಲಾಂನಿ, ಭರ್ಲೆಲ್ಯಾ ಆತ್ಮ್‌ವಿಶ್ವಾಸಾನ್ ಯೆಂವ್ಚೊ ದುಸ್ಮಾನ್, ಟೊಮಿಕ್ ಸೊಧ್ತಾಲೊ. ಟೊಮಿ ಬಯ್ಲಾಂತ್ ಪ್ರತ್ಯಕ್ಷ್ ಜಾಲ್ಲೆಂಚ್ ಥೊಡೊ ವೇಳ್ ರಾವ್‍ಲ್ಲೆ ಕಡೆನ್ ಥಾವ್ನ್ ಕಿತೆಂಗೀ ತಜ್ವೀಜ್ ಕರಿಲಾಗ್ಲೊ.

ಟೊಮಿ ಬರೊ ಜಾವ್ನ್ ಪಯ್ಲೆಂಚೆಪರಿಂ ದಿಸ್ತಾಲೊ, ತರೀ, ಆಪ್ಣೆಂ ತಾಕಾ ಚಿಂವಡ್ ಕರ್ನ್ ಘಾಲ್ಲೆಂ ಉಡಾಸಾಕ್ ಯೆತಾನಾ, ಅಪ್ರಯತ್ನ್‌ಪೂರ್ವಕಿಂ ದುಸ್ಮಾನಾಕ್ ಧಯ್ರ್ ಚಡ್ಲೆಂ. ಆದ್ಲೆ ಪಾವ್ಟಿಂ ಝುಜಾಂತ್ ತಡವ್ ಜಾವ್ನ್, ಆಪ್ಣೆಂಯೀ ಜಾಯ್ತೆಂ ಘಾಯೆಲ್ಲೆಂ ಆನಿ ಟೊಮಿ ವಾಂಚೊನ್ ಉರ್‌ಲ್ಲೆಂ ತಾಕಾ ಸೊಸುಂಕ್ ಜಾಂವ್ಕ್ ನಾತ್‍ಲ್ಲೆಂ. ಆಜ್ ತೊ ಸಂದರ್ಭ್ ಆಯ್ಲಾ, ಟೊಮಿಕ್ ಹ್ಯಾ ಸಂಸಾರಾ ಥಾವ್ನ್ ವಯ್ರ್ ಧಾಡ್ಚಿ ಘಡಿ ಆಯ್ಲ್ಯಾ, ಆಪ್ಣೆಂ ತಾಕಾ ಕಾಬಾರ್ ಕರಿಜೆ… ಹ್ಯಾ ಆಲೋಚನೆಂನಿ, ಸದೃಢ್ ಮೆಟಾಂನಿ ದುಸ್ಮಾನ್ ಆಮ್ಚ್ಯಾ ಮೆರೆರ್ ಯೇವ್ನ್ ಪಾವ್‍ಲ್ಲೊ.

ಟೊಮಿ ಹ್ಯಾಚ್ ಘಡಿಯೆಕ್ ರಾಕ್ತಾಲೊ ಮ್ಹಣ್ ದಿಸ್ತಾ. ತಾಣೆಂ ನವ್ಯಾನ್ ಚಿಂತ್ಚೆಂ ಕಿತೆಂಯೀ ನಾತ್‍ಲ್ಲೆಂ. ತಾಚೆಂ ತನ್ ಮನ್ ಎದೊಳ್‍ಚ್ ಬದ್ಧತೆನ್ ಆಪ್ಲ್ಯಾ ಶೆವಟಾಕ್ ರಾಕ್ತಾಲೆಂ. ಆಜ್ ದುಸ್ಮಾನ್ ಸ್ವತಃ ಯೇವ್ನ್ ಝುಜಾ ಥಳಾಕ್ ಪಾವ್ಲಾ. ವೇಳ್-ಘಡಿ ಹುಂಬ್ರಾರ್ ರಾವ್ಲ್ಯಾ. ಸ್ಪರ್ಧಿ ಮೀಟ್ ಆನಿ ಖೊಲೊ ಘೆವ್ನ್ ರಾಕ್ತಾ… ತರ್, ತಡವ್ ಕಿತ್ಯಾಕ್..?

ಝುಜ್ ನಿಮಾಣೆಂ, ಅಂತ್ಯ್ ಕೊಣಾಚೆಂ?!

ಹಾಂವ್ ತ್ಯಾ ದೀಸ್ ಘರಾಚ್ ಆಸ್‍ಲ್ಲೊಂ. ಪೆಟ್ಯಾಂನಿ ಪಯ್ಲೊ ಘಾಸ್ ಮಾರ್ತಾನಾಂಚ್ ಕಳ್‍ಲ್ಲೆಂ ಪರತ್ ಲಡಾಯ್ ಸುರು ಜಾಲ್ಯಾ ಮ್ಹಣ್. ತೊಟಾಕ್ ಧಾಂವ್ತಾನಾ, ತೆಂಚ್ ಆದ್ಲೆಂ ದೃಶ್ಯ್. ತೆಚ್ ಪೆಟೆ, ತ್ಯಾಚ್ ಜಾಗ್ಯಾರ್, ಪರತ್ ಲಡಾಯೆಂತ್ ಫುಡ್ ಜಾಲ್ಲೆ. ಅನಿರೀಕ್ಷಿತ್ ಘಡಿತ್. ಆದ್ಲೊ ಆಕಾಂತ್ ಉಡಾಸ್ ಜಾವ್ನ್ ಭಿರಾಂತ್‍ಯೀ ಭೊಗ್ಲಿ.

ಆದ್ಲ್ಯಾ ಪಾವ್ಟಿಂ ಆಪ್ಣೆಂ ಜಿಕ್‍ಲ್ಲ್ಯಾನ್ ಪಲ್ತಡಿಚ್ಯಾ ಪೆಟ್ಯಾಕ್, ಹ್ಯಾ ಪಾವ್ಟಿಂ ಸಲೀಸಾಯೆನ್ ಟೊಮಿಕ್ ಮುಗ್ದುನ್ ಸೊಡ್ಯೆತ್ ಮ್ಹಳ್ಳೆಂ ಧಯ್ರ್ ಆಸ್‍ಲ್ಲೆಂ. ಆಪ್ಣಾಚ್ಯಾ ಗಾತ್ರ್ ಆನಿ ಬಳಾ ಮುಖಾರ್ ಟೊಮಿ ಲೇಕ್‍ಚ್ ನ್ಹಯ್ ಮ್ಹಣ್ ತಾಚೆಂ ಚಿಂತಾಪ್. ದೆಕುನ್ ಚಡ್ ಶ್ರಮ್ ಘಾಲಿನಾಸ್ತಾನಾ ಟೊಮಿಕ್ ಕಾಬಾರ್ ಕರ್ತಾಂ ಮ್ಹಣ್ ತೊ ಝುಜಾಕ್ ದೆಂವ್‍ಲ್ಲೊ.

ಆದ್ಲೆ ಪಾವ್ಟಿಂ ಆಪ್ಲೆಂ ಮಿಸಾಂವ್ ಅಪೂರ್ಣ್ ಜಾಲ್ಲೆಂ, ತೆಂ ಹ್ಯಾ ಪಾವ್ಟಿಂ ಸಂಪೂರ್ಣ್ ಕರ್ಚ್ಯಾ ಉರ್ಬೆನ್ ತೊ ಆಯಿಲ್ಲೊ. ಪುಣ್…

ಟೊಮಿಚೆಂ ಸಂಕಲ್ಪ್ ತೊ ಕಿತೆಂ ಜಾಣಾಂ!?

ಆಪ್ಲ್ಯಾಚ್ ಘರ್ಚ್ಯಾ ಜಾಗ್ಯಾರ್, ತ್ಯಾ ಪರ್ಕಿ ದುಸ್ಮಾನಾ ಥಾವ್ನ್ ಪಿಟೊ ಜಾಲ್ಲ್ಯಾ ಉಪ್ರಾಂತ್ ಟೊಮಿಕ್ ಫಾರಿಕ್ಪಣಾ ಶಿವಾಯ್ ದುಸ್ರೆಂ ಕಿತೆಂಚ್ ಮತಿಂತ್ ನಾತ್‍ಲ್ಲೆಂ. ಆಪ್ಣಾಚ್ಯಾ ಮರ್ಯಾದಿಚೆಂ ಸವಾಲ್, ಜೀವ್ ಗೆಲ್ಯಾರೀ ಪರ್ವಾ ನಾ, ದುಸ್ಮಾನಾಕ್ ಬೂದ್ ಶಿಕಯ್ಜೆಚ್ ಮ್ಹಣ್ ತೊ ರಾಕ್ತಾಲೊ. ತ್ಯಾ ತೆಕಿದ್ ಪ್ರತಿಜ್ಞೆನ್ ತೊ ತಯಾರ್ ಜಾಲ್ಲೊ.

ಅಪೇಕ್ಷಿಲ್ಲಿ ಘಡಿ ಅಚಾನಕ್ ಫುಡ್ ಜಾತಾನಾ, ಟೊಮಿ ಚುರುಕಾಯೆನ್‍ಂಚ್ ಫುಡೆಂ ಗೆಲ್ಲೊ. ದುಸ್ಮಾನಾಚೊ ಆತ್ಮ್‌ವಿಶ್ವಾಸ್ ತಾಕಾ ಸಮ್ಜಲೊ. ಆಪ್ಣೆಂ ಆದ್ಲೆ ಪಾವ್ಟಿಂ ಕೆಲ್ಲಿ ಚೂಕ್ ಪರತ್ ಜಾಂವ್ಕ್ ಆಸ್ಪದ್ ದೀನಾಯೆ ಮ್ಹಣ್ ತಾಣೆಂ ಚತ್ರಾಯೆನ್, ಪುಣ್ ಚಾಲಾಕೆಚಿಂ ಮೆಟಾಂ ಕಾಡ್ಲಿಂ.

ಪಯ್ಲೊ ಘಾಸ್ ದುಸ್ಮಾನಾನ್‍ಂಚ್ ಘಾಲ್ಲೊ, ಟೊಮಿಚೆರ್. ಪುಣ್ ಆದ್ಲೆ ತಿತ್ಲೊ ತೊ ಆಕ್ರಮಣ್‍ಕಾರಿ ನಾತ್‍ಲ್ಲೊ ಕಳ್ಳೆಂ ಟೊಮಿಕ್. ಆಪ್ಣೆಂ ಹ್ಯಾ ಪಾವ್ಟಿಂ ಝುಜ್ಚೆಂ ಆತ್ಮ್‌ರಕ್ಷಣಾ ಖಾತಿರ್ ನ್ಹಯ್, ಬಗಾರ್ ದುಸ್ಮಾನಾಕ್ ಸಂಹಾರ್ ಕರುಂಕ್‍ಚ್ ಮ್ಹಳ್ಳೆಂ ತಾಕಾ ಕಳಿತ್ ಆಸ್‍ಲ್ಲೆಂ. ದೆಕುನ್ ತ್ರಾಣ್ ವಿಭಾಡ್ ಜಾಂವ್ಕ್ ನಜೊ ಮ್ಹಣ್ ಟೊಮಿಚೆಂ ಪ್ರಯತನ್ ಚಲ್ತಾಲೆಂ.

ಸದಾಂಚೆಪರಿಂ ಥೊಡೊ ವೇಳ್ ಲಡಾಯ್ ಜಾಲಿ. ಚಡ್ ಕರ್ನ್ ಟೊಮಿಚೆರ್ ದುಸ್ಮಾನಾನ್ ಆಕ್ರಮಣ್ ಕೆಲೆಂ. ತ್ಯಾ ವರ್ವಿಂ ಆಪ್ಣಾಚಿ ಜೀಕ್ ಸಲೀಸ್ ಮ್ಹಳ್ಳ್ಯಾ ಚಿಂತ್ನಾಂನಿ ದುಸ್ಮಾನಾನ್ ಟೊಮಿಕ್ ಚೂಕ್ ಚಿಂತ್ಲೆಂ. ಟೊಮಿಕ್ ವೆಗಿಂಚ್ ಲಗಾಡ್ ಕಾಡ್ಯೆತ್ ಮ್ಹಣ್ ತೊ ಚಿಂತಾಲೊ, ಪುಣ್, ಟೊಮಿ ಸೂಕ್ತ್ ಸಂದರ್ಭಾಕ್ ರಾಕ್ತಾಲೊ.

ಲಡಾಯೆಂತ್ ದುಸ್ಮಾನಾಕ್ ಮಾರ್ಚ್ಯಾ ಬರಾಬರ್ ಆಪ್ಣೆಂಯೀ ಮಾರ್ ಖಾಂವ್ಚೆಂ ಸಹಜ್. ಆದ್ಲೆ ಪಾವ್ಟಿಂ ತಿತ್ಲ್ಯಾ ಮಾರಣಾಂತಿಕ್ ಮಾರಾಂ ಉಪ್ರಾಂತ್ ತರೀ ಆಪುಣ್ ಬಚಾವ್ ಜಾವ್ನ್ ಹ್ಯಾ ದಿಸಾ ಪರ್ಯಾಂತ್ ಉರ್ಲಾಂ, ತರ್, ತಾಕಾ ಏಕ್ ಅರ್ಥ್, ಕಾರಣ್ ಆನಿ ಶೆವಟ್ ಆಸ್ತಲೊಚ್ ಮ್ಹಳ್ಳೆಂ ಟೊಮಿಚೆಂ ರಾಜಾಂವ್. ಆಪ್ಲ್ಯಾ ಜಿವಾಚೆಂ ತಾಕಾ ಪಡೊನ್ ವಚೊಂಕ್ ನಾತ್‍ಲ್ಲೆಂ. ಆಪ್ಣಾಕ್ ಕಿತ್ಲೊಯೀ ಮಾರ್ ಜಾಂವ್, ವಾ ಆಪ್ಲೊಚ್ ಜೀವ್ ತರೀ ವಚೊಂ, ತ್ಯಾ ಆದಿಂ ಆಪ್ಲಿ ಏಕ್ ಆಶಾ, ಅಂತಿಮ್ ಆಕಾಂಕ್ಷಾ, ನಿಮಾಣೊ ಏಕ್ ಮಾತ್ರ್ ಅತ್ರೆಗ್ ಜಾರಿ ಜಾಯ್ಜೆ ಮ್ಹಳ್ಳ್ಯಾ ಖಾತಿರ್ ಮಾತ್ರ್ ತಾಚಿ ಲಕ್ಷ್ಯಾ ಆಸ್‍ಲ್ಲಿ.

ದೆಕುನ್ ಎದೊಳ್ ತಾಣೆಂ ಆಕ್ರಮಣ್ ಕರುಂಕ್ ನಾತ್‍ಲ್ಲೆಂ. ತ್ಯಾ ವರ್ವಿಂ ಪ್ರಾರಂಭಾಚ್ಯಾ ಜಯ್ತಾನ್ ಚಡ್ತಿಕ್ ಉತ್ಸಾಹಾನ್ ದುಸ್ಮಾನಾಕ್‍ಚ್ ಚಡ್ ಪುರಾಸಣ್ ಜಾಲ್ಲಿ. ವೆಗಿಂಚ್ ಮುಗ್ದುಂಚ್ಯಾ ಲಡಾಯೆಚ್ಯಾ ಚಿಂತ್ನಾಂನಿ ತೊ ಘಾಸ್ ಘಾಲುಂಕ್ ಪೆಚಾಡ್ತಾಲೊ. ಪುಣ್ ಸಂಪೂರ್ಣ್ ರಿತಿನ್ ತಯಾರ್ ಜಾಲ್ಲೊ ಟೊಮಿ, ರಕ್ಷಣಾತ್ಮಕ್ ರಿತಿನ್ ಝುಜ್ತಾಲೊ.

ತೆದೊಳ್‍ಚ್ ಟೊಮಿಚೆರ್ ಥೊಡೆ ಮಾರ್ ಪಡ್‍ಲ್ಲೆ, ಪುಣ್ ತಾಕಾ ತೆಂ ಪಡೊನ್ ವಚೊಂಕ್ ನಾತ್‍ಲ್ಲೆಂ. ತಾಚೆಂ ಗುಮಾನ್ ಫಕತ್ ಎಕಾ ಅಯಿನ್ನ್ ಸಂದರ್ಭಾಕ್ ರಾಕ್ತಾಲೆಂ.

ದುಸ್ಮಾನಾನ್ ಪರಿಸ್ಥಿತಿ ಅರ್ಥ್ ಕರ್ಚ್ಯಾ ಫುಡೆಂಚ್ ಟೊಮಿ ಚುರುಕ್ ಜಾಲೊ. ಎದೊಳ್ ಕೊಣಾಯ್ಕೀ ಘಾಲಿನಾತ್‍ಲ್ಲೊ ಘಾಸ್ ಘಾಲುಂಕ್ ತೊ ಉಡ್ಲೊ. ಟೊಮಿಕ್ ಚಿಲ್ಲರ್ ಪೆಟೊ ಮ್ಹಣ್ ಪಲ್ತಡಿಚೊ ದುಸ್ಮಾನ್ ಚಿಂತುನ್ ಆಸ್‍ಲ್ಲೊ. ಟೊಮಿನ್ ಆಪ್ಣಾಚೆರ್ ಆಕ್ರಮಣ್ ಕೆಲ್ಯಾರ್ ಫರಕ್ ಪಡನಾ ಮ್ಹಣ್ ತಾಣೆಂ ಚೂಕ್ ಚಿಂತ್‍ಲ್ಲೆಂ. ಪುಣ್ ಟೊಮಿಚೊ ಸಂಕಲ್ಪ್ ತಾಕಾ ಕಳ್ಚ್ಯಾ ಫುಡೆಂ ಟೊಮಿನ್ ತಾಚ್ಯಾ ಗೊಮ್ಟೆಕ್ ಘಾಸ್ ಘಾಲ್ನ್ ಜಾಲ್ಲೆಂ. ಆಸ್‍ಲ್ಲೆಂ ಸರ್ವ್ ಬಳ್, ಪುರ್ತೆಂ ತ್ರಾಣ್ ಟೊಮಿನ್ ವಾಪಾರ್ಲೆಂ. ತ್ಯಾ ಮಾರಾಚಿ ನಿರೀಕ್ಷಾ ನಾತ್‍ಲ್ಲೊ ದುಸ್ಮಾನ್ ಆಕಾಂತ್ಲೊ, ನಿಯಂತ್ರಣ್ ಚುಕೊನ್ ಆಡ್ ಪರ್ತಲೊ. ಜೊಕ್ತಿ ಪ್ರತಿಕ್ರಿಯಾ ದಿಂವ್ಚ್ಯಾ ಫುಡೆಂಚ್ ಟೊಮಿನ್ ಪರತ್ ತಾಚೆರ್ ಆನ್ಯೇಕ್ ಪ್ರಹಾರ್ ಕೆಲ್ಲೊ.

ಟೊಮಿಚೊ ಜೋಶ್ ಪಳೆವ್ನ್ ಹಾಂವೆಂ, “ಟೊಮಿ, ಸೊಡಿನಾಕಾ, ಸೊಡಿನಾಕಾ…” ಮ್ಹಣೊನ್ ತಾಕಾ ಪ್ರೇರಿತ್ ಕೆಲೆಂ. ನಿರೀಕ್ಷಾ ಕರಿನಾತ್‍ಲ್ಲ್ಯಾ ಮಾರಾನ್ ದುಸ್ಮಾನ್ ಕಾವ್ಜೆಲೊ ಆನಿ ಕಾಲುಬುಲೊ ಜಾಲೊ. ಟೊಮಿ ರಾಕ್ಕೊಸಾಪರಿಂ ಬದ್ಲಲ್ಲೊ. ಆದ್ಲೊ ಸರ್ವ್ ರಾಗ್, ಹಗೆಂ ಕಾಡ್ಚ್ಯಾ ಮಿಸಾಂವಾರ್ ತೊ ಬುಡ್‍ಲ್ಲೊ. ಮೆಳ್‍ಲ್ಲ್ಯಾ ಮೆಳ್‍ಲ್ಲ್ಯಾ ಜಾಗ್ಯಾರ್ ತಾಚೆರ್ ಟೊಮಿನ್ ಚಾಬೊನ್ ಮಾಸ್ ಪಿಂದ್ಲೆಂ. ಗೊಮ್ಟಿ, ತೋಂಡ್ ಚಾಬೊನ್ ಧರ್ನ್ ಧರ್ಣಿರ್ ಲೊಳವ್ನ್, ವೋಡ್ನ್ ವ್ಹೆಲೆಂ. ತಾಚ್ಯಾ ದಾಂತಾಂನಿ ದುಸ್ಮಾನಾಚೆಂ ಆಂಗ್ ಶಿಂದ್ಲೆಂ. ಅರ್ಜುನಾಕ್ ಸುಕ್ಣ್ಯಾಚ್ಯಾ ದೊಳ್ಯಾಂ ಶಿವಾಯ್ ಹೆರ್ ಕಿತೆಂಚ್ ದಿಸನಾತ್‍ಲ್ಲೆಪರಿಂ, ಟೊಮಿ ತ್ಯಾ ಮಲಯಾಳಿ ಪೆಟ್ಯಾಕ್ ಲಗಾಡ್ ಕಾಡ್ಚೆಂ ಏಕ್ ಮಾತ್ರ್ ಮನ್ ಘೆವ್ನ್ ಹಲ್ಲೊ ಕರ್ತಾಲೊ. ತಾಚ್ಯಾ ಉಚಾಂಬಳಾಯೆ ಮುಖಾರ್ ಮಲಯಾಳಿಂಚೊ ಸೊರ್ಕೆಲ್ಲೊ ಪೆಟೊ ಆತಾಂ ಭಿಯಾನ್ ವಿಳಾಪ್ ದಿತಾಲೊ.

ಟೊಮಿಕ್ ಸಲೀಸಾಯೆನ್ ಲಗಾಡ್ ಕಾಡ್ಯೆತ್, ವೆಗಿಂಚ್ ತಾಚೊ ಸಂಹಾರ್ ಕರ್ನ್ ಜೀಕ್ ಜೊಡುನ್ ಪಾಟಿಂ ಪಾಂವ್ಚ್ಯಾ ಚಿಂತ್ನಾಂನಿ ಆಯಿಲ್ಲೊ ಗೊರೊ ಪೆಟೊ, ಕಲ್ಪನ್ ಕರುಂಕೀ ನಾತ್‍ಲ್ಲ್ಯಾ ಸನ್ನಿವೇಶಾಂತ್ ಪಡ್‍ಲ್ಲೊ. ಟೊಮಿನ್ ದಿಲ್ಲ್ಯಾ ಕಠಿಣ್ ಮಾರಾಂನಿ ತೊ ಹದಾ ಜಾಲ್ಲೊ. ತಾಚೆಂ ಆಂಗ್ ತಲ್ವಾರಿನ್ ಶಿಂದ್‍ಲ್ಲೆಪರಿಂ ಭೆಸಾಂ ಜಾಲ್ಲೆಂ. ಟೊಮಿ ಪಯ್ಲೆಂಚ್ಯಾ ಟೊಮಿಪರಿಂ ದಿಸನಾತ್‍ಲ್ಲೊ. ತೊ ಎಕಾಚ್ಛಾಣೆಂ ಆಂಗಾರ್ ಭುತ್ ಆಯಿಲ್ಲ್ಯಾ ಜಿನ್ಸಾರ್, ತೊಂಡಾಂತ್ ರಗತ್ ಭರೊನ್ ವಿದ್ರೂಪ್ ದಿಸ್ತಾಲೊ. ತಾಚೆ ದಾಂತ್ ವಾಗಾಚ್ಯಾ ದಾಂತಾಂಪರಿಂ ಭೆಷ್ಟಾಯ್ತಾಲೆ. ತಸಲ್ಯಾ ದೃಶ್ಯಾ ವರ್ವಿಂ ತೊ ಭಿಯೆಲೊ, ಟೊಮಿಚೆರ್ ಪ್ರತ್ಯಾಕ್ರಮಣ್ ಚಲಯ್ಜೆ ಮ್ಹಳ್ಳೆಂಯೀ ವಿಸ್ರಲೊ.

ದುಸ್ಮಾನ್ ಭಿಯೆವ್ನ್, ಕಂಗಾಲ್ ಜಾಂವ್ಚ್ಯಾ ಸ್ಥಿತೆಕ್ ಪಾವ್‍ಲ್ಲೆಂ ಸಮ್ಜೊನ್ ಟೊಮಿ ಪರತ್ ಉಡ್ಲೊ. ಹ್ಯಾ ಪಾವ್ಟಿಂ ತಾಚೆಂ ಧಯ್ರ್ ಆನಿ ವಿಶ್ವಾಸ್ ದೊಡ್ತೊ ಜಾಲ್ಲೊ. ದುಸ್ಮಾನಾನ್ ಮುಖ್ಲೆಂ ಮೇಟ್ ಕಾಡ್ಚ್ಯಾ ಆದಿಂಚ್ ಟೊಮಿನ್ ಸತತ್ ಪ್ರಹಾರ್ ಚಲಯ್ಲೊ. ತಾಕಾ ಆತಾಂ ಆಪ್ಣಾಕ್ ಕಿತೆಂ ಜಾತಾ ವಾ ಜಾಯ್ತ್ ಮ್ಹಳ್ಳಿ ಪರ್ವಾ ನಾತ್‍ಲ್ಲಿ. ಆಪ್ಲೊ ಸ್ವಾಭಿಮಾನ್ ತಾಕಾ ಮುಖ್ಯ್ ಜಾಲ್ಲೊ. ದುಸ್ಮಾನಾಕ್ ಉಟೊಂಕ್ ಇಡೆಂ ದೀಂವ್ಕ್ ಸೊಡಿನಾಸ್ತಾನಾ ತೊ ಘಾಸ್ ಘಾಲ್ತಾಲೊ.

ಘೊರೊಜ್ ಘಾಲ್ನ್ ಜಿಕ್ಚ್ಯಾ ವಿಶ್ವಾಸಾಂತ್ ಆಯಿಲ್ಲೊ ದುಸ್ಮಾನ್ ಆತಾಂ ಜೀವ್ ವಾಂಚಂವ್ಚ್ಯಾ ರುದಾನಾಚಿ ಪಿಂರ್ಗೊಣಿ ಸೊಡ್ತಾಲೊ.

ತೆದೊಳ್‍ಚ್ ಘಾಯೆವ್ನ್ ರಗ್ತಾಚ್ಯಾ ಕೊಂಡಾಂತ್ ವಳ್ವಳ್ಚ್ಯಾ ಮಲಯಾಳಿ ಪೆಟ್ಯಾಕ್ ಸುಧ್ರೊಂಕ್ ಅವ್ಕಾಸ್ ನಾತ್‍ಲ್ಲೊ. ಫಕತ್ ಫಾಪ್ಸುಂಚ್ಯಾ ಆನಿ ಘಾಸ್ ಘಾಲ್ಚ್ಯಾ ಕೃತ್ಯಾಂತ್ ಟೊಮಿ ತಲ್ಲೀನ್ ಜಾಲ್ಲೊ. ಗೊಮ್ಟಿ ಪುರ್ತಿ ಪಿಂದ್ಚ್ಯಾ ಸ್ಥಿತೆಕ್ ಪಾವ್ತಾನಾ ದುಸ್ಮಾನ್ ಚಡುಣೆಂ ತಟಸ್ಥ್ ಜಾಲೊ. ತರೀ ಸೊಡಿನಾಸ್ತಾನಾ ತಾಚೆಂ ಸಗ್ಳೆಂ ಆಂಗ್ ಫಾಪ್ಸುನ್ ಘಾಲ್ಚ್ಯಾಂತ್ ಟೊಮಿ ಸಂಸಾರ್ ವಿಸ್ರಲ್ಲೊ. ಚಾಬೊನ್ ಧರ್ನ್ ವೋಡ್ನ್ ವ್ಹರ್ತಾನಾ ದುಸ್ಮಾನಾಚೆಂ ರಗತ್ ಧರ್ಣಿರ್ ಉಸ್ಪತಾಲೆಂ.

ತಶೆಂ ವೋಡ್ನ್ ವ್ಹರ್ನ್ ಟೊಮಿ ಪಲ್ತಡಿಚ್ಯಾ ತೊಡಾಕ್ ಪಾವ್‍ಲ್ಲೊ. ತೊ ಆತಾಂ ಸದಾಂಚ್ಯಾ ಟೊಮಿಪರಿಂ ದಿಸನಾತ್‍ಲ್ಲೊ. ಪಿಶೆಂ ಪುಣೀ ಲಾಗ್ಲಾಂಗಾಯ್ ಮ್ಹಣ್ ಹಾಂವ್ ಸಯ್ತ್ ಭಿಯೆಲೊಂ. ತಿತ್ಲ್ಯಾರ್ ದುಸ್ಮಾನಾಚೆಂ ಆಂಗ್ ಭೆಸಾಂ ಜಾಲ್ಲೆಂ. ತರೀ ಸಮಾಧಾನ್ ನಾಸ್ತಾನಾ ಟೊಮಿ ಪ್ರಹಾರ್ ಚಲಯ್ತಾಲೊ. ಫಾರಿಕ್ಪಣಾಚಿ ತಾನ್ ತಾಚಿ ತಿತ್ಲಿ ಕಠಿಣ್ ಜಾವ್ನಾಸ್‍ಲ್ಲಿ.

ಟೊಮಿ ಜಿಕ್‍ಲ್ಲೊ! ಆಖ್ರೇಕ್ ತರೀ, ಆಮಿ ಕೊಣೆಂಯೀ ಸಪ್ಣಾಂತೀ ಚಿಂತುಂಕ್ ನಾತ್‍ಲ್ಲಿ ಘಡಿ ಉದೆಲ್ಲಿ. ಟೊಮಿಚೊ ಸಂಕಲ್ಪ್ ಪೂರ್ಣ್ ಜಾಲ್ಲೊ. ಗೊರೊ ಪೆಟೊ ಇತ್ಲೊ ಪಿಟೊ ಜಾಲ್ಲೊಗೀ ತಾಚ್ಯಾ ಆಂಗಾ ಭಿತರ್ಲೆ ವಿಶ್ವೆ ಭಾಯ್ರ್ ಗಳ್ತಾಲೆ. ತೆಂ ದೃಶ್ಯ್ ಪಳೆಂವ್ಕ್ ಸಕನಾಸ್ತಾನಾ ಹಾಂವ್ ಪಾಟಿಂ ಪರ್ತಲೊಂ. ಟೊಮಿ ಖರ್ಶೆತಾಲೊ.

ಭಿಯಾನ್ ಟೊಮಿಕ್ ಆಪಯ್ನಾಸ್ತಾನಾ ಹಾಂವ್ ಪಯ್ಸ್ ರಾವ್ಲೊಂ. ದುಸ್ಮಾನಾಚೊ ಸಂಹಾರ್ ಜಾಲಾ, ಆನಿ ಕೆದಿಂಚ್ ತಾಚೆ ರಗ್ಳೆ ನಾಂತ್ ಮ್ಹಣ್ ಟೊಮಿಕ್ ಸುಸ್ತತಾನಾ ತೊ ಥಂಡ್ ಜಾಲೊ. ಗೀಮ್ ಜಾಲ್ಲ್ಯಾನ್ ತೊಡಾಂತ್ ಉದಾಕ್ ನಾತ್‍ಲ್ಲೆಂ. ರೇಂವ್ ಸಗ್ಳಿ ತಾಂಬ್ಡಿ ಜಾಲ್ಲಿ.

ಆಪ್ಲೊ ಇರಾದೊ ಜಾರಿ ಜಾಲ್ಲೊ ಪಳೆವ್ನ್ ಟೊಮಿ ಸಂತೃಪ್ತೆನ್ ಕಾಂಪೊನ್‍ಶೆಂ ಎಕಾ ಜಾಗ್ಯಾರ್ ಗಳ್ಳೊ. ಜಾಲ್ಲೆಂ ಘಡಿತ್ ನಿಯಾಳುನ್, ಲಡಾಯೆಂತ್ ಆಪುಣ್ ಜಿಕ್ಲಾಂ ಮ್ಹಳ್ಳೆಂ ಜಿರಂವ್ಕ್ ತಾಕಾ ಪುರ್ಸತ್ ಜಾಯ್ ಆಸ್‍ಲ್ಲಿ. ಥಂಯ್ಚ್ ಆಂಗ್ ಫಾಪ್ಡುನ್ ತೊ ಪಾತ್ಳಲೊ. ಸುಕ್ಯಾ ಮಾತ್ಯೆಂತ್ ಲೊಳೊನ್ ಆಂಗಾಚೆರ್ ಆಸ್‍ಲ್ಲೆಂ ರಗತ್ ತಾಣೆಂ ನಿವ್ರಾಯ್ಲೆಂ.

ಇಂಗ್ಲಿಶ್ ಗಾದ್ ಖರಿ ಜಾಲಿ!

ಹಾಂವ್ ಪತ್ರಾಂ ಜಾಯ್ತಿಂ ವಾಚ್ತಾಲೊಂ. ತಶೆಂ ವಾಚ್ತಾನಾ, “Every dog has its day” ಮ್ಹಳ್ಳಿ ಗಾದ್ ಲೇಖನಾಂನಿ ಉಲ್ಲೇಖ್ ಜಾತಾಲಿ. ತೆದ್ನಾಂ, ನಿಜಾಯ್ಕೀ, ತಿ ಗಾದ್ ಆಮ್ಚ್ಯಾ ಟೊಮಿ ವಿಶಿಂಚ್ ಕೊಣ್ಣಾ ಮ್ಹಣ್ ಹಾಂವೆಂ ಚಿಂತ್‍ಲ್ಲೆಂ. ತಾಚೊ ನೀಜ್ ಅರ್ಥ್ ನೆಣಾಂಸ್‍ಲ್ಲೊಂ. ಪುಣ್ ಮ್ಹಜ್ಯಾ ಪೆಟ್ಯಾ ವಿಶಿಂ ಜಾಣಾಂಸ್‍ಲ್ಲ್ಯಾನ್, ಹಾಂವೆಂ ಟೊಮಿಕ್‍ಚ್ ರಿಲೇಟ್ ಕೆಲ್ಲೆಂ. ಟೊಮಿ ಏಕ್ ಪಾವ್ಟಿಂ ಸಲ್ವಲ್ಲೊ, ಪುಣ್ ಏಕ್ ದೀಸ್ ತಾಣೆಂ ಫಾರಿಕ್ಪಣ್ ಘೆತ್‍ಲ್ಲೆಂ ಆನಿ ಜೀಕ್ ಆಪ್ಣಾಯಿಲ್ಲಿ. ದೆಕುನ್ ತಿ ಗಾದ್ ಪೆಟ್ಯಾಂ ವಿಶಿಂಚ್ ಮ್ಹಣ್ ಹಾಂವ್ ಘಟ್ಟ್ ಪಾತ್ಯೆಲ್ಲೊಂ.

ಪತ್ರಿಕೋದ್ಯಮಾ ಸವೆಂ, ಸಾಹಿತ್ಯಾಚೊ ವಿದ್ಯಾರ್ಥಿಯೀ ಜಾತಾಸ್ತಾನಾ ಮ್ಹಾಕಾ ತ್ಯಾ ಗಾದಿಚೊ ಖರೊ ಅರ್ಥ್ ಸಮ್ಜಲ್ಲೊ. ತಿ ಗಾದ್ ಪೆಟ್ಯಾಂಕ್ ನ್ಹಯ್, ಮನ್ಶ್ಯಾಂಚೆರ್ ರಚ್‍ಲ್ಲಿ. ಮ್ಹಣ್ಜೆ, ‘ಹರ್ಯೆಕ್ಲ್ಯಾಕೀ ತಾಚೊಚ್ ಏಕ್ ದೀಸ್ ಮ್ಹಳ್ಳೊ ಖಂಡಿತ್ ಆಸಾ, ಸಕ್ಡಾಂಕೀ ಏಕ್ ಅವ್ಕಾಸ್ ಮೆಳ್ತಾ’ ಮ್ಹಣ್ ತಾಚೊ ಅರ್ಥ್. ಮ್ಹಳ್ಯಾರ್, ಆಶಾ ಸಾಂಡಿನಾಸ್ತಾನಾ, ನಿರಾಸ್ ಜಾಯ್ನಾಸ್ತಾನಾ ನಿರಂತರ್ ಪ್ರಯತ್ನ್ ಕೆಲ್ಯಾರ್ ಜೀಕ್ ಮೆಳ್ತಾಚ್ ಮ್ಹಳ್ಳೊ ಭರ್ವಸೊ, ಸ್ಫೂರ್ತಿ ದಿಂವ್ಚಿ ಗಾದ್ ತಿ.

ಪುಣ್ ತಿ ಗಾದ್, ಆಸಾ ತಶೆಂ (Literally) ಆಮ್ಚ್ಯಾ ಟೊಮಿ ಥಂಯ್‍ಯೀ ಸತ್ ಜಾಲ್ಲಿ. ತ್ಯಾಚ್ ವರ್ವಿಂ ಮ್ಹಾಕಾ ತೆಂ ಘಡಿತ್ ಆಜೂನ್ ಉಡಾಸ್ ಆಸಾ. ಚಿಂತಾನಾ ವಿಚಿತ್ರ್ ದಿಸ್ತಾ, ನಿಜಾಯ್ಕೀ ಟೊಮಿನ್ ಸಂಕಲ್ಪ್ ಘೆತ್‍ಲ್ಲೊಗೀ ದೇವ್ ಜಾಣಾಂ. ಪುಣ್ ತಾಣೆಂ ಆಪ್ಣಾಕ್ ಜಾಲ್ಲ್ಯಾ ಜಖಮ್ ಆನಿ ಸಲ್ವಣೆಕ್ ಪ್ರತೀಕಾರ್ ದಿಲ್ಲೆಂ. ಜಿವಾನ್ ಬಲಿಶ್ಟ್ ಆಸ್‍ಲ್ಲ್ಯಾ ಮಲಯಾಳಿ ಪೆಟ್ಯಾಚೆರ್ ಜಯ್ತ್ ವ್ಹರಿಜೆ ತರ್ ಸಂಕಲ್ಪ್ ನಾಸ್ತಾನಾ ಸಾಧ್ಯ್‌ವೇ? ಏಕ್ ಪಾವ್ಟಿಂ ಸಲ್ವೊನ್ ಮರ್ಣಾಕ್ ತೆಂಕ್‍ಲ್ಲ್ಯಾ ಉಪ್ರಾಂತೀ ಪರತ್ ಲಡಾಯೆಕ್ ಸಜ್ಜ್ ಜಾಂವ್ಚೆಂ ಮ್ಹಳ್ಯಾರ್ ಕಿತೆಂ ಅರ್ಥ್! ದೆಕುನ್ ಹಾಂವ್, ಟೊಮಿ ಖಚಿತ್ ಜಾವ್ನ್ ಫಾರಿಕ್ಪಣಾಕ್ ಆಂವ್ಡೆಲ್ಲೊ ಮ್ಹಣ್‍ಂಚ್ ಪಾತ್ಯೆತಾಂ. ನಿಮಾಣೆಂ ತರೀ ತೊ ಫಾರಿಕ್ಪಣ್ ಘೆಂವ್ಕ್ ಸಕ್‍ಲ್ಲೊ. ತಾಚೊ ನಿಚೆವ್ ಜಯ್ತೆವಂತ್ ಜಾಲ್ಲೊ.

ಹಿ ಜಾವ್ನಾಸ್‍ಲ್ಲಿ ನೀಜ್ ಕಾಣಿ. ಆಮ್ಚ್ಯಾಚ್ ಬಯ್ಲಾಂತ್ ಘಡ್‍ಲ್ಲೆಂ ತೆಂ. ಉಪ್ರಾಂತ್ ಹಾಂವ್ ಪಯ್ಸ್ ಪಾವ್‍ಲ್ಲ್ಯಾನ್ ಟೊಮಿಚೊ ಸಾಂಗಾತ್ ಚುಕ್‍ಲ್ಲೊ. ಏಕ್ ಭೋವ್ ಸಾಧೊ ಆನಿ ಪ್ರಾಮಾಣಿಕ್ ಪೆಟೊ ತೊ. ಪುಣ್ ತಾಚೆಂ ಜಿವಿತ್ ನಿಜಾಯ್ಕೀ ಎಕಾ ಸಿನೆಮಾಕ್ ಯೋಗ್ಯ್. ತಾಚೆಂ ಖಾಲ್ತೆಂಪಣ್, ದುಸ್ಮಾನಾನ್ ದಿಲ್ಲೊ ಮಾರ್, ತಾಚಿ ಬಚಾವಿ ಆನಿ ಪುನಶ್ಚೇತನ್ ಆನಿ ಫಾರಿಕ್ಪಣಾಚಿ ಲಡಾಯ್… ಹೆಂ ಕೆದ್ನಾಂ ಥಾವ್ನ್ ಬರವ್ನ್ ಕಾಡುಂಕ್ ಆಶೆತಾಲೊಂ. ಆಬ್ಳೆ ತಿ ಕಾಣಿ, ನೀಜ್ ಜಿಣಿ, ತುಮ್ಚೆ ಮುಖಾರ್ ಪ್ರಸ್ತುತ್ ಕೆಲ್ಲಿ ಸಂತೃಪ್ತಿ ಮ್ಹಜಿ.

ಯೂನಿವರ್ಸಲ್ ಪೆಟೆ: ತುಮ್ಕಾಂ ಆದಿಂಚ್ ಹಾಂವೆಂ ಕಳಯಿಲ್ಲೆಂ, ಜೆ.ವಿ. ಕಾರ್ಲೊನ್ ಕನ್ನಡಾಕ್ ಅನುವಾದ್ ಕೆಲ್ಲ್ಯಾ ಬುಕಾಂತ್‍ಯೀ ಪೆಟ್ಯಾಂಚಿಚ್ ಕಾಣಿ ಆಸ್‍ಲ್ಲಿ ಮ್ಹಣ್. ‘ದ ಕಾಲ್ ಆಫ್ ದ ವೈಲ್ಡ್’ ಕಾದಂಬರಿಯೀ ನೀಜ್ ಘಡಿತಾಂಚೆರ್ ವಿಣ್ಲ್ಯಾ. ‘ಬಕ್’ ಮ್ಹಳ್ಳೊ ಪೆಟೊಚ್ ತ್ಯಾ ಕೃತಿಯೆಚೊ ಹೀರೊ. ಕೆನಡಾಚ್ಯಾ ಬರ್ಫಾಚ್ಯಾ ಜಾಗ್ಯಾರ್ ಗಾಡಿ ವೊಡುಂಕ್ ಪೆಟ್ಯಾಂಕ್ ಬಾಂಧ್ತಾತ್. ಥಂಯ್ಸರ್ ಪೆಟ್ಯಾಂನಿ ಎಕಾಮೆಕಾ ಝಗಡ್ಚೆಂ, ಆನಿ ಬಕ್ ಎಕಾ ವ್ಹಡ್ ಗಾತ್ರಾಚ್ಯಾ ದುಸ್ಮಾನಾಚೆ ಮಾರ್ ಖಾವ್ನ್ ನಿಮಾಣೆಂ ಅಶೆಂಚ್ ಫಾರಿಕ್ಪಣ್ ಕಾಣ್ಗೆತಾ. ಹೆಂ ಏಕ್ ಕಾಕತಾಳೀಯ್ ಮ್ಹಣ್ಯೆತ್. ಹಾಂವೆಂ ಮ್ಹಜ್ಯಾ ಟೊಮಿಚಿ ಕಾಣಿ ಬರಂವ್ಕ್ ಧರ್ಲ್ಯಾ ಉಪ್ರಾಂತ್ ತೊ ಬೂಕ್ ಹಾತಿಂ ಮೆಳ್‍ಲ್ಲೊ. ಪೋರ್ ‘ಮಿಶನ್ ಇಂಪಾಸಿಬಲ್ 8’ ಸಿನೆಮ್ ಪಳೆಲೆಂ. ತಾಂತುಂಯೀ ಪೆಟ್ಯಾಂನಿ ಗಾಡಿ ವೊಡ್ಚೆಂ ತೆಂಚ್ ದೃಶ್ಯ್ ಆಸಾ. ತ್ಯಾ ವ್ಹಡ್ ಪೆಟ್ಯಾಂಕ್ ಬಾಂಧುನ್ ಘಾಲ್ಲೆಂ ಆನಿ ಉಪ್ರಾಂತ್ ಗಾಡಿ ವೊಡ್ಚೆಂ ದೃಶ್ಯ್ ಪಳೆತಾನಾ, ಬುಕಾಂತ್ಲಿಂ ದೃಶ್ಯಾಂ ಉಡಾಸಾಕ್ ಆಯ್ಲಿಂ.

ಫೀಡ್‍ಬ್ಯಾಕ್ ಧಾಡಾ: ತುಮ್ಕಾಂ ಮ್ಹಜಿ ಹಿ ಪೆಟ್ಯಾಚಿ ಕಾಣಿ ರುಚ್ಲಿ ಮ್ಹಣ್ ಪಾತ್ಯೆತಾಂ. ಧಾ ಬಾರಾ ವರ್ಸಾಂ ಟೊಮಿ ಜಿಯೆಲ್ಲೊ. ತೊ ಮೊರ್ತಾನಾ ಹಾಂವ್ ಘರಾ ನಾತ್‍ಲ್ಲೊಂ ಮ್ಹಣ್ ಉಡಾಸ್. ತಾಚೊ ಉಡಾಸ್ ಶಾಶ್ವತ್, ತಾಚೆಂ ಸಾಹಸ್ ವಿಸ್ರೊಂಕ್ ಸಕನಾ. ವಾಚುನ್ ತುಮ್ಕಾಂ ಕಿತೆಂ ಭೊಗ್ಲೆಂ ತೆಂ ಕಳಯಾ.

___ಸಮಾಪ್ತ್___

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel