ಸರ್ದಾರಾಚೆಂ ಸನ್ನಿಧಾನ್ – 14: ಉದ್ಕಾಂತ್ಲೆಂ ಅವ್ಘಡ್

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 14
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 14: ಉದ್ಕಾಂತ್ಲೆಂ ಅವ್ಘಡ್

ತಾಣಿಂ ಪಯ್ಲೆಂ ಚಿಂತ್‍ಲ್ಲೆಪರಿಂಚ್, ಪಾವ್ಸಾಳೆ ದೀಸ್ ತೆ, ನೇತ್ರಾವತಿ ಆನಿ ಕುಮಾರಾಧಾರಾ ನ್ಹಂಯಾಂನಿ ಘಾಟಾಚೆಂ ಖದ್ವಳ್ ಉದಾಕ್ ಉಚಾಂಬಳ್ ಜಾವ್ನ್ ವ್ಹಾಳ್ತಾಲೆಂ.

ಆಗ್ನೆಸ್ ಕುಂವರ್ನ್, ಫಾವೊ ತ್ಯಾ ವೆಳಾರ್ ಉಪ್ಪಿನಂಗಡಿ ಪಾವೊನ್, ಕಡ್ವಾಚೊ ಮುಖದ್ದಮ್ ಜಾವ್ನಾಸ್‍ಲ್ಲ್ಯಾ ಹಸನಬ್ಬಾಕ್ ಭೆಟೊನ್, ಫಾವೊ ತಿ ಮಾಂಡಾವಳ್ ಕರ್ನ್ ಆಯ್ಲಿ. ತಿಣೆಂ ಸಾಂಗ್‍ಲ್ಲಿ ಗಜಾಲ್ ಆಯ್ಕೊನ್ ಹಸನಬ್ಬ ಪಯ್ಲೆಂ ಭಿಯೆಲೊ ಜಾಲ್ಯಾರೀ, ಸರ್ವ್ ಕೃತ್ಯಾಂಚಿ, ಜಣಾಂಚಿ ಆನಿ ಪರಿಣಾಮಾಂಚಿ ಜವಾಬ್ದಾರಿ ತಾಚೆರ್ ಆಸ್ಚಿ ನಾ ಮ್ಹಣ್ ಸಮ್ಜತಚ್, ಖುಶೆನ್ ಕಬೂಲ್ ಜಾಲೊ. ತ್ಯಾ ಶಿವಾಯ್, ಜೋಡ್ ಉಣಿಂ ಆಸ್‍ಲ್ಲ್ಯಾ ತ್ಯಾ ದಿಸಾಂನಿ ಹಾತಾರ್ ಥೊಡಿಂ ನಾಣಿಂಯೀ ಪಡ್ಲಿಂ ಮ್ಹಣ್ತಚ್ ತಾಚಿ ಉರ್ಬಾ ದೊಡ್ತಿ ಜಾಲಿ.

ಆಗ್ನೆಸ್ ಕುಂವರ್ನ್ ತ್ಯಾಚ್ ಸಾಂಜೆರ್ ಪಾಟಿಂ ಆಯ್ಲಿ. ಕಾಳೊಕಾರ್ ಕೊತ್ವಾಲ್ ದೇಜಪ್ಪ ಸೆಟ್ಟಿಯೀ, ರಫಾಯೆಲ್ ಮಿಂಗೆಲ್ ಕಾಮ್ತಿಗೆರ್ ಆಯ್ಲೊ. ತಾಚೆ ಕಡ್ಚೆ ಆನಿ ಥೊಡೆ ವಿಷಯ್ ಸಮ್ಜೊನ್ ಘೆವ್ನ್, ತಾಣೆಂ ಥೊಡಿಂ ಕಾಮಾಂ ಕಶಿಂ ಜಾರಿ ಕರಿಜಾಯ್ ಮ್ಹಣ್ ಆಗ್ನೆಸ್ ಕುಂವರ್ನಿನ್ ತಾಕಾ ಹಿಶಾರೆ ದಿಲೆ.

ಕಾಳೊಕ್ ಜಾತಚ್, ದುಮ್ಗಾ ಪೀಂತ್, ಇಲಾರ್ ಸಿಕೇರ್ ಆನಿ ಕಾಲೆಸ್ತ್ ಮಸ್ಕರೆಞ, ಬಂಟ್ವಾಳ್ಚ್ಯಾ ಆಟ್-ಧಾ ಮಾನಾಯಾಂ ಸಾಂಗಾತಾ ಅವ್ವಲ್ ಮಾಪ್ಳ್ಯಾಂಪರಿಂ ವೇಸ್ ಬದ್ಲುನ್, ಪಾಣೇರ್ ಛತ್ರಾ ಬಗ್ಲೆಚಿ ಭಿತರ್ಲಿ ವಾಟ್ ಧರ್ನ್ ಉಪ್ಪಿನಂಗಡಿಕ್ ಭಾಯ್ರ್ ಸರೊನ್ ಗೆಲೆ. ವಾಜ್ಭಿ ಕಾರಣಾಂ ಖಾತಿರ್, ತಾಂಚೆ ಕಡೆನ್ ದಿಲ್ಲಿಂ ಹಾತೆರಾಂ ಲ್ಹಾನ್ ಆನಿ ಗುಪಿತ್ ಜಾವ್ನಾಸ್‍ಲ್ಲಿಂ. ತಾಣಿಂ ಕರುಂಕ್ ಜಾಯ್ ಜಾಲ್ಲ್ಯಾ ಕಾಮಾಂಚೊ ವಿವರ್, ಆಗ್ನೆಸ್ ಕುಂವರ್ನಿನ್ ತಾಂಕಾಂ ಸೂಕ್ಷ್ಮ್ ಥರಾನ್ ದಿಲ್ಲೊ.

“ಆನಿ, ತುಂ ಬಾಯೆ?” ವಿಚಾರ್ಲೆಂ ದುಮ್ಗಾ ಪಿಂತಾನ್.

“ಹಾಂವ್ ತುಮ್ಕಾಂ ಫಾಲ್ಯಾಂ ಸಾಂಜೆರ್ ಮೆಳ್ತಾಂ” ಸಾಂಗ್ಲೆಂ ತಿಣೆಂ. “ಪುಣ್ ಕಡ್ವಾ ಲಾಗಿಂ ಹಾಂವ್ ತುಮ್ಕಾಂ ಮೆಳ್ಚಿಂ ನಾ. ಥಂಯ್ಸರ್ ಜಾಂವ್ಕ್ ಆಸ್ಚಿಂ ಸರ್ವ್ ತಿಂ ಕಾಮಾಂ ಹಸನಬ್ಬಾಚ್ಯಾ ಮಜತೆನ್ ಜಾತೆಲಿಂ. ಥಂಯ್ ತುಮಿ ಪಾವ್‍ಲ್ಲ್ಯಾ ವೆಳಾರ್ ಸಕ್ಕಡ್‍ಯೀ ಎಕ್‍ಚ್ ಪಾವ್ಟಿಂ ಝಳ್ಕೆಕ್ ಪಡನಾಕಾತ್. ಪಯ್ಲೆಂ ಕೊಣೆಂಯೀ ದೊಗಾಂನಿ ಮಾತ್ರ್ ವಚೊನ್ ತಾಚೆ ಕಡೆನ್ ಉಲಯ್ಲ್ಯಾರ್ ಪುರೊ. ಉಪ್ರಾಂತ್ಲೆ ಹಿಶಾರೆ, ತೊಚ್ ತುಮ್ಕಾಂ ದಿತಲೊ.”

“ಜಾಯ್ತ್ ಬಾಯೆ. ತೊಚ್ ಭಾಗೆವಂತ್ ಖುರಿಸ್ ಆಮ್ಚೆಂ ಕಾಮ್ ಬರ್‍ಯಾ ಥರಾನ್ ಪೊಂತಾಕ್ ಪಾವಂವ್ದಿ” ಮ್ಹಣಾಲೊ ದುಮ್ಗಾ ಪೀಂತ್. ತಾಚ್ಯಾ ಜಿಣಿಯೆಂತ್ ಹೆಂ ಏಕ್ ದುಸ್ರ್ಯಾಚ್ ರಿತಿಚೆಂ ಸಾಹಸ್ ಜಾವ್ನಾಸ್‍ಲ್ಲೆಂ.

ತೆ ಮಾನಾಯ್ ಭಾಯ್ರ್ ಸರೊನ್ ಗೆಲೆ. ತಿ ರಾತ್ ಪಾಶಾರ್ ಜಾಲಿ.

ದುಸ್ರ್ಯಾ ದಿಸಾಚ್ಯಾ ಚಡುಣೆಂ ದೊನ್ಪಾರಾರ್‌ಶೆಂ, ಮಂಗ್ಳುರ್ ಥಾವ್ನ್ ಆಟ್ ಸವಾರಾಂಚಿ ಠೊಲಿ ಜೋಡುಮಾರ್ಗ ಠಾಣ್ಯಾಕ್ ಪಾವ್ಲಿ. ತಾಂಚೆ ಪಯ್ಕಿಂತ್ಲ್ಯಾ ಎಕಾ ಘೊಡ್ಯಾಚೆರ್ ಮಾತ್ರ್ ದೋಗ್ ಸವಾರ್ ಆಸ್‍ಲ್ಲೆ. ಎಕ್ಲೊ ಜಾವ್ನಾಸ್‍ಲ್ಲೊ ತ್ಯಾ ಲ್ಹಾನ್ ಠೊಲಿಯೆಚೊ ಮುಖೆಲಿ. ತಾಚ್ಯಾ ಪಾಟ್ಲ್ಯಾನ್ ಬಸವ್ನ್ ಆಸ್‍ಲ್ಲೊ ತೊಚ್ ಕೈದಿ, ತೊಪಾಸಿ ದಾಲ್ಮೇದಾ ಯಾನೆ ಷೇರ್ ಖಾನ್. ತಾಚೆ ಪಾಯ್, ಘೊಡ್ಯಾಚ್ಯಾ ಪೊಟಾ ಪಂದ್ಲ್ಯಾನ್ ಗಾಂಟಾವ್ನ್ ಬಾಂಧ್‍ಲ್ಲೆ.

ರಿವಾಜಿ ಪರ್ಮಾಣೆಂ ತಿ ಠೊಲಿ, ಆವಾಜ್ ದೀವ್ನ್ ಠಾಣ್ಯಾ ಲಾಗಿಂ ರಾವ್ಲಿ. ಘೊಡ್ಯಾಂಕ್ ಉದಾಕ್ ದೀಂವ್ಕ್ ಆನಿ ಸವಾರಾಂನಿ ಆಹಾರ್ ಆನಿ ಥೊಡೊ ವಿಶೆವ್ ಘೆಂವ್ಕ್ ತೊ ವೇಳ್ ಜಾವ್ನಾಸ್‍ಲ್ಲೊ.

ಸವಾರ್ ದೆಂವ್ಲೆ. ಕೈದ್ಯಾಕ್‍ಯೀ ದೆಂವಯ್ಲೊ.

“ಭೋವ್ ತುರ್ತಾನ್ ಭಾಯ್ರ್ ಸರ್ಲ್ಯಾತ್” ಮ್ಹಣಾಲೊ ಕೊತ್ವಾಲ್ ದೇಜಪ್ಪ ಶೆಟ್ಟಿ.

“ವ್ಹಯ್. ಕುರಿಯೆಲಾಂತ್ ಆಮ್ಕಾಂ ದುಸ್ರೆಂ ಕಾಮ್ ನಾ” ಮ್ಹಣಾಲೊ ನಾಯ್ಕ್ ಲೊರೆಸ್. “ಕೈದ್ಯಾಕ್ ಹಾಡ್ನ್, ಜಾತಾ ತಿತ್ಲ್ಯಾ ವೆಗಿಂ ಪಟ್ಟಣಾಕ್ ಪಾವಜಾಯ್ ಮ್ಹಣ್ ಬಾದಶಹಾನ್ ಹುಕುಮ್ ದಿಲ್ಯಾ. ತ್ಯಾ ಶಿವಾಯ್ ಕೊಡಗಾಚಿ ಲಡಾಯ್ ಆಸಾ.”

“ಕೊಡಗಾಚಿ ಲಡಾಯ್!” ದೇಜಪ್ಪ ಅಜ್ಯಾಪ್ಲೊ.

“ವ್ಹಯ್. ತಶೆಂ ಮ್ಹಣ್ ಆಮಿ ಸಕಯ್ಲ್ ಯೆಂವ್ಚ್ಯಾ ಆದಿಂ ಆಯ್ಕಲ್ಲೆಂ. ಆಮ್ಚೊ ಸರ್ದಾರ್ ಆನಿ ಆಮ್ಚೆ ಸಾಂಗಾತಿ ಥಂಯ್ ಆಸ್ತಾನಾ, ಆಮ್ಕಾಂಯೀ ಜಾತಾ ತಿತ್ಲ್ಯಾ ವೆಗಿಂ ಪಾಟಿಂ ವಚೊನ್ ಪಾವೊಂಕ್ ಆತುರಾಯ್ ಭೊಗ್ತಾ.”

“ತೆಂ ವಾಜ್ಭಿಚ್” ಮ್ಹಣಾಲೊ ಶೆಟ್ಟಿ. “ಪುಣ್ ವಾಟ್ ಕಷ್ಟಾಂಚಿ. ತುಮ್ಕಾಂ ಆಜ್‍ಚ್ ವಚೊನ್ ಮಂಜರಾಬಾದ್ ಪಾವೊಂಕ್ ಜಾಯ್ನಾ. ಆಜ್ ತುಮಿ ಸವ್ಕಾಸಾಯೆನ್ ವಚೊನ್ ಗೋಳಿತೊಟ್ಟು ರಾವ್ಲ್ಯಾರ್ ಜಾಲೆಂ. ಆತಾಂ ಇಲ್ಲೆಂ ಪೊಟಾಕ್ ಘಾಲ್ನ್ ವಿಶೆವ್ ಘೆಯಾ.”

“ತಶೆಂಚ್ ಕರ್ತಾಂವ್. ಗರ್ಜೆಚೊ ಕೈದಿ ಎಕ್ಲೊ ಸಾಂಗಾತಾ ಆಸ್ತಾನಾ, ಕಾಳೊಕಾಂತ್ಲ್ಯಾನ್ ಘಾಟ್ಯೆಚಿ ವಾಟ್ ಧರ್ನ್ ವೆಚೆಂಯೀ ಚಿಕ್ಕೆ ಅಪಾಯಾಚೆಂ.”

“ಹಾಂವೆಂ ಸಾಂಗ್ಲೆಂಯೀ ತೆಂಚ್.”

ತಶೆಂ ತೆ, ಚಿಂತ್‍ಲ್ಲ್ಯಾ ಪ್ರಾಸ್ ಇಲ್ಲಿ ಚಡ್ ಸವ್ಕಾಸಾಯ್ ಕರ್ನ್ ರಾವ್ಲೆ.

ತಾಂಚ್ಯಾ ತ್ಯಾ ಘಳಾಯೆಕ್, ಕೊತ್ವಾಲ್ ದೇಜಪ್ಪ ಶೆಟ್ಟಿಚಿಯೀ ಗುಪ್ತ್ ಉಮೆದ್ ಆನಿ ಕಾರಣ್ ಆಸ್‍ಲ್ಲೆಂ. ಆಗ್ನೆಸ್ ಕುಂವರ್ನಿನ್‍ಯೀ ತಾಕಾ ತಶೆಂ ಕರುಂಕ್ ಹಿಸೊ ದಿಲ್ಲೊ. ಪಟ್ಟಣಾ ಥಾವ್ನ್ ಆಯಿಲ್ಲ್ಯಾ ಆನಿ ತಾಂಚೆ ಸಾಂಗಾತಾ ಕುರಿಯೆಲ್ ಥಾವ್ನ್ ಆಯಿಲ್ಲ್ಯಾ ಸವಾರಾಂಕ್ ಸರ್ಬರಾಯ್ ಕರ್ತಾನಾ, ದೇಜಪ್ಪ ಶೆಟ್ಟಿನ್ ತಾಂಚಿಂ ನಾಂವಾಂ ಸಮ್ಜೊನ್ ಘೆತ್ಲಿಂ. ಹೆರಾಂನಿ ಆಯ್ಕನಾತ್‍ಲ್ಲೆಪರಿಂ, ತಾಣೆಂ ನಾಯ್ಕ್ ಲೊರೆಸಾಕ್ ವ್ಹೊರೆವಿಂಗಡ್ ಆಪವ್ನ್ ಥೊಡ್ಯೊ ಸಂಗ್ತಿ ಫುಂಕ್ಲ್ಯೊ.

ತ್ಯಾ ವೆಳಾರ್ ತೊಪಾಸಿ ದಾಲ್ಮೇದಾಕ್‍ಯೀ ತಾಣಿಂ ಚಿಕ್ಕೆ ಮೊವಾಳಾಯೆನ್ ಚಲಯ್ಲೊ. ತೊಯೀ ಆಪ್ಲೊ ಫುಡಾರ್ ಚಿಂತುನ್ ಚಿಕ್ಕೆ ಕಾವ್ಜೆಲ್ಲೊ. ಖುದ್ ಟಿಪ್ಪು ಸುಲ್ತಾನಾನ್‍ಂಚ್ ತಾಚಿ ಝಡ್ತಿ ಕರಿಜಾಯ್ ಮ್ಹಣ್ ತಾಣೆಂ ಮ್ಹಳ್ಳೆಂ, ಫಕತ್ ವೇಳ್ ಲಾಂಬಯ್ಜಾಯ್ ಮ್ಹಳ್ಳ್ಯಾ ಇರಾದ್ಯಾನ್. ಪುಣ್ ತ್ಯಾ ಖಾತಿರ್ ತಾಕಾ ಪಟ್ಟಣಾಕ್‍ಚ್ ವ್ಹಾವಯ್ತೆಲೆ ಮ್ಹಣ್ ತಾಣೆಂ ಸಪ್ಣಾಂತ್‍ಯೀ ಚಿಂತುಂಕ್ ನಾತ್‍ಲ್ಲೆಂ.

ತ್ಯಾ ಶಿವಾಯ್, ಪಯ್ಲೆಂಚ್ ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್ ಆಲಿ ಸಾಂಗಾತಾ ಕೈದಿ ಜಾವ್ನ್ ಪಟ್ಟಣಾಕ್ ಪಾವ್‍ಲ್ಲ್ಯಾ ಬೋಳೂರ್ಚ್ಯಾ ಖಿಲ್ಲೆದಾರಾಕ್ ತೆದೊಳ್‍ಚ್ ಫಾಶಿ ವೋಡ್ನ್ ಜಾಲ್ಯಾ ಮ್ಹಳ್ಳೆಂ ಆಯ್ಕೊನ್ ತೊ ಪುರ್ತೊ ಕಂಗಾಲ್ ಜಾಲ್ಲೊ. ಕಸಲೆಂ ಪುಣೀ ‘ಮಿಲಾಗ್ರ್’ ಜಾವ್ನ್ ಬಚಾವ್ ಜಾಲ್ಯಾರ್ ಗೊಂಯಾಂ ಪುಣೀ ಧಾಂವೊನ್ ಭಿಕ್ ಮಾಗೊನ್ ಪರತ್ ಜಿಣಿ ಆರಂಭ್ ಕರ್ಯೆತ್ ಮ್ಹಣ್ ತೊ ಚಿಂತಾಲೊ. ಪುಣ್ ಆತಾಂ ವರ್ತ್ಯಾ ಬಂದೋಬಸ್ತೆರ್ ತಾಕಾ ತೆ ಪಟ್ಟಣಾಕ್ ವ್ಹರ್ತಾಲೆ ಜಾಲ್ಲ್ಯಾನ್, ಘಡ್ಯೆನ್ ಘಡಿ ಆಪ್ಲ್ಯಾ ಬಚಾವೆಚಿ ವಾಟ್ ಮಟ್ವಿ ಜಾವ್ನ್ ಯೆತಾಶಿ ತಾಕಾ ಭೊಗ್ತಾಲೆಂ.

ಅಶೆಂ ತಶೆಂ ಮ್ಹಣ್ತಾನಾ, ಬಂಟ್ವಾಳ್ಚ್ಯಾ ಠಾಣ್ಯಾ ಥಾವ್ನ್ ತಾಣಿಂ ಭಾಯ್ರ್ ಸರ್ತಾನಾ, ವೊರಾಂ ಸಾಂಜೆಚಿಂ ಪಾಂಚ್ ಜಾಲಿಂ. ಆಗ್ನೆಸ್ ಕುಂವರ್ನಿಕ್ ಜಾಯ್ ಜಾಲ್ಲೊ, ನಾಂವಾಂಚೊ ಆನಿ ಹೆರ್ ವಿವರ್ ಕೊತ್ವಾಲಾನ್ ತಿಕಾ ತ್ಯಾ ತೀನ್ ವೊರಾಂ ಆದಿಂಚ್ ಆಪ್ಲ್ಯಾ ಎಕ್ಲ್ಯಾ ಜವಾನಾ ಮುಖಾಂತ್ರ್ ಧಾಡ್ನ್ ದಿಲ್ಲೊ. ತೊ ಮೆಳ್ತಚ್, ಆಗ್ನೆಸ್ ಕುಂವರ್ನ್ ಉಟಾಉಟಿಂ ಭಾಯ್ರ್ ಸರೊನ್, ಉಪ್ಪಿನಂಗಡಿಚ್ಯಾ ವಾಟೆನ್ ಹಾಂಚ್ಯಾ ಪ್ರಾಸ್ ಧಾ-ಪಂದ್ರಾ ಮಯ್ಲಾಂ ಮುಖಾರ್ ಪಾವ್‍ಲ್ಲಿ. ನಹಿಂಚ್ ಹ್ಯಾ ಠೊಲಿಯೆಚಿ, ಕೈದ್ಯಾಚಿ ಬಂದೋಬಸ್ತ್ ಕರುಂಕ್ ಫಾವೊ ತಿ ತಯಾರಾಯ್ ಕರ್ಚಿ ಜವಾಬ್ದಾರಿ, ಬಗಾರ್ ತ್ಯಾ ಉಪ್ರಾಂತ್ಲಿ ಥೊಡಿ ಮಾಂಡಾವಳ್ ಕರ್ಚೆಂ ಕಾಮ್‍ಯೀ ತಿಚ್ಯೆ ಥಾವ್ನ್ ಜಾಂವ್ಕ್ ಆಸ್‍ಲ್ಲೆಂ.

ತ್ಯಾ ದಿಸಾ ಜಾಂವ್ಕ್ ಆಸ್‍ಲ್ಲ್ಯಾ ಕಾಮಾಚ್ಯಾ ಪ್ರತಿಫಳಾ ವಿಷ್ಯಾಂತ್ ಖುದ್ ದುಮ್ಗಾ ಪಿಂತಾಕ್ ಆನಿ ತಾಚ್ಯಾ ಸಾಂಗಾತ್ಯಾಂಕ್‍ಚ್ ಥೊಡೊ ದುಬಾವ್ ಆಸ್‍ಲ್ಲೊ. ತರೀ, ಆಗ್ನೆಸ್ ಕುಂವರ್ನಿಕ್ ಕುಸ್ಕುಟ್ ಅಪಧಯ್ರ್ ನಾತ್‍ಲ್ಲೆಂ. ಘುಟ್ ಸಾಂಬಾಳ್ಚ್ಯಾ ಇರಾದ್ಯಾನ್, ಪಯ್ಲೊಚ್ ಸಗ್ಳೊ ವಿವರ್ ತಿಣೆಂ ಆಪ್ಲ್ಯಾ ಬಾಪಾಯ್ಕ್ ಮಾತ್ರ್ ದಿಲ್ಲೊ ಶಿವಾಯ್ ಹೆರಾಂಕ್ ಸಾಂಗೊಂಕ್ ನಾತ್‍ಲ್ಲೊ. ಪುಣ್ ತ್ಯಾ ಸಾಹಸಾಚ್ಯಾ ಯೋಜನಾಚೆಂ ಹರ್ಯೆಕ್ ಮೇಟ್, ಖರ್‍ಯಾ ಝುಜಾರ್‍ಯಾಪರಿಂ ತಿಣೆಂ ಮಾಂಡುನ್ ಹಾಡ್‍ಲ್ಲೆಂ.

ಪ್ರತ್ಯೇಕ್ ಜಾವ್ನ್ ತೆಂ ಸಾಹಸ್ ತಿಣೆಂ ಸರ್ದಾರ್ ಸಿಮಾಂವ್ಚ್ಯಾ ಅಪೇಕ್ಷೆ ಪ್ರಕಾರ್, ಆನಿ ತಾಚ್ಯೆ ಖಾತಿರ್ ಹಾತಿಂ ಘೆತ್ಲಾಂ ಮ್ಹಳ್ಳಿ ಸಮ್ಜಣಿ ತಿಕಾ ವರ್ತೊ ಸಂತೊಸ್ ಆನಿ ದೊಡ್ತೆಂ ಧಯ್ರ್ ದಿತಾಲಿ. ತ್ಯಾ ಇಡ್ಯಾಂತ್‍ಯೀ, ಕೊಡಗಾಚಿ ಲಡಾಯ್ ಆಸಾ, ಆನಿ ಸರ್ದಾರ್ ಸಿಮಾಂವ್ಕ್ ಬಾದಶಹಾನ್ ಥಂಯ್ಸರ್ ಸಾಂಗಾತಾ ವ್ಹೆಲಾ ಮ್ಹಳ್ಳಿಂ ಚಿಂತ್ನಾಂ ತಿಕಾ ಧೊಸ್ತಾಲಿಂ. (ತಿ ಖಬರ್ ತಿಕಾ ದೇಜಪ್ಪ ಶೆಟ್ಟಿನ್ ಉಗ್ಡಾಸಾನ್ ಸಾಂಗೊನ್ ಧಾಡ್‍ಲ್ಲಿ). ವಾಜ್ಭಿಚ್ ಜಾವ್ನ್ – ದೋನ್ ಅಡೇಜ್ ವರ್ಸಾಂ ತಿ ತಾಕಾ ಭೆಟೊಂಕ್ ನಾತ್‍ಲ್ಲಿ. ತಾಚಿ ಭೆಟ್ ತಿಕಾ ಜಾಲ್ಲಿ, ಚಿಂತಿನಾಸ್ತಾನಾ ಮ್ಹಳ್ಳೆಪರಿಂ, ಕಣ್ಣಾನೂರ್ಚ್ಯಾ ರಾವ್ಳೆರಾಂತ್. ತೆದಾಳಾಯೀ ತಿಂ ಎಕಾಮೆಕಾ ಕಡೆನ್ ಉಲಂವ್ಕ್ ನಾತ್‍ಲ್ಲಿಂ. ಪುಣ್ ಚುಕ್ಲಲೊ ಗಾಂಚ್, ಆನಿ ವಿಸ್ರೊಂಕ್ ನಾತ್‍ಲ್ಲೊ ಉಗ್ಡಾಸ್, ಮಾನಿನ್ ವೆರೊನಿಕಾ ಕುವೆಲಿನ್ ದಿಲ್ಲೊ..!

ಸರ್ದಾರಾಂಚಿ ಸಿನೊಲ್ ತಿಚ್ಯೆ ತಾಬೆನ್ ಪಾವ್‍ಲ್ಲಿ.

ತ್ಯಾ ವಯ್ರ್, ತಾಚಿಚ್ ತಿಕಾ ವರ್ದಿ ಆಯಿಲ್ಲಿ.

ಹ್ಯಾ ಉಪ್ರಾಂತ್ ಚಡ್ ದೀಸ್ ವಾ ತಾಚೆ ಥಾವ್ನ್ ಚಡ್ ಪಯ್ಸ್ ರಾವೊಂಕ್ ಕಶಿ ತಿ ಸಕತ್? ನಾ, ತಿ ಸಕಶಿ ನಾ ಮ್ಹಳ್ಳೆಂ ಸತ್ ಆತಾಂ ತಿಚ್ಯೆ ಥಂಯ್ ಖಂಚ್‍ಲ್ಲೆಂ. ತರೀ, ಬಂದಡೆಚ್ಯಾ ತ್ಯಾ ದಿಸಾಂನಿ ಪೆಲ್ಯಾಂಚಿಚ್ ಚಡ್ ಶಿವಾಯ್, ಸ್ವಥಾಚಿ ಖಬರ್ ಚಿಂತುಂಕ್ ಅವ್ಕಾಸ್ ನಾತ್‍ಲ್ಲೊ; ತಿತ್ಲೊ ಸ್ವಾರ್ಥ್‍ಯೀ ನಾತ್‍ಲ್ಲೊ. ಪುಣ್ ಮನ್ಶ್ಯಾ ಸಂಯ್ಭಾಕ್ ದೆವಾನ್ ದಿಲ್ಲ್ಯಾ ಪ್ರತ್ಯೇಕ್ ದೆಣ್ಯಾಂಚಿ ಸಕತ್ ಕಶಿ ವರ್ಣಿಯೆತ್?

ಆಮೊರೆಚ್ಯಾ ವೆಳಾ ಆದಿಂಚ್ ಆಗ್ನೆಸ್ ಕುಂವರ್ನ್ ಉಬಾರ್ ಕಡ್ವಾ ಲಾಗಿಂ ಪಾವ್ಲಿ. ಹಸನಬ್ಬ ಕಡೆನ್ ಉಲಯ್ಲ್ಯಾ ಉಪ್ರಾಂತ್ ದುಮ್ಗಾ ಪಿಂತಾಕ್ ಆನಿ ಜವಾನಾಂಕ್ ತಿಣೆಂ ಚತ್ರಾಯೆಚೆ ಥೊಡೆ ಹಿಶಾರೆ ದಿಲೆ. ಸರ್ದಾರ್ ಸಿಮಾಂವ್ಚ್ಯಾ ಸವಾರಾಂಚಿಂ ನಾಂವಾಂ, ತಾಂಚ್ಯಾ ನ್ಹೆಸ್ಣಾಚೊ ವಿವರ್ ಆನಿ ಕೊಣೆಂ ಕೊಣೆಂ ಕೊಣಾ ಕೊಣಾಚಿ ಜವಾಬ್ದಾರಿ ಕಶಿ ವಹ್ಸಿಜಾಯ್ ಮ್ಹಳ್ಳೆಂ ಥಾರಾಯ್ಲೆಂ. ಉಪ್ರಾಂತ್ ಆಪುಣ್ ಖಂಯ್ ಆಸ್ತೆಲಿಂ ಮ್ಹಳ್ಳೆಂ ಸಾಂಗೊನ್ ಥಂಯ್ ಥಾವ್ನ್ ತಿ ಪಾಶಾರ್ ಜಾಲಿ.

ಹಾಂಚೆ ಪಯ್ಕಿಲೆ ಚವ್ಗ್ ಜಣ್ ಮಾತ್ರ್ ಕಡ್ವಾ ಲಾಗಿಂ ರಾವ್ಲೆ. ಹೆರ್ ಸಕ್ಕಡ್ ಪಯ್ಸಾ ಪಯ್ಸ್, ತಾ’ತಾಂಕಾಂ ನಮಿಯಾರ್‌ಲ್ಲ್ಯಾ ಸುವಾತ್ಯಾಂನಿ ಆಡೊಸಾಕ್ ರಾವ್ಲೆ. ಬಿರ್ಬಿರೊ ಪಾವ್ಸ್ ಯೆತಾಲೊ. ಪಾವ್ಸಾಚೆಂ ಮೋಡ್‍ಯೀ ದಾಟ್ ಆನಿ ಧುಂವ್ರಿ ಆಸ್‍ಲ್ಲ್ಯಾನ್, ವೆಳಾ ಆದಿಂಚ್ ಕಾಳೊಕ್ ಚರ್ಲೊ.

ಚಡುಣೆಂ ಸಾಡೆ ಸಾತ್ ಜಾತಿತ್ ತಿತ್ಲ್ಯಾ ವೆಳಾರ್ ಘೊಡ್ಯಾಂಚಿಂ ಗೆಳಾಂ ಲಾಗಿಂ ಯೆಂವ್ಚಿಂ ಆಯ್ಕಲಿಂ. ಕಡ್ವಾ ಬಗ್ಲೆನ್ ಆಸ್‍ಲ್ಲ್ಯಾ ಗುಡ್ಸುಲಾ ಥಾವ್ನ್ ಲಾಂಟಾನ್ ಹಾತಾಂತ್ ಘೆವ್ನ್ ಹಸನಬ್ಬ ಭಾಯ್ರ್ ಆಯ್ಲೊ.

“ಕೋಣ್ ಥಂಯ್?” ವಿಚಾರ್ಲೆಂ ತಾಣೆಂ ಕುಕಾರ್ ಲಾಂಬವ್ನ್.

“ಸರ್ಕಾರಾಚೆ ಸವಾರ್!” ಜವಾಬ್ ಆಯ್ಲಿ. ಸವಾರ್ ಮುಖಾರ್ ಆಯ್ಲೆ. ತೆವ್ಶಿಲ್ಯಾನ್ ಆನಿ ಏಕ್ ದೋನ್ ಲಾಂಟಾನ್ ಆಯ್ಲೆ.

“ಹ್ಯಾ ಕಾಳೊಕಾಕ್ – ಯಾ’ಲ್ಲಾ!”

“ತೆಂ ಆಮಿಂಯೀ ಜಾಣಾಂವ್” ಮ್ಹಣಾಲೊ ಸವಾರಾಂಚೊ ಮುಖೆಲಿ. “ಆಮ್ಕಾಂ ಆಮಿ ಚಿಂತ್‍ಲ್ಲ್ಯಾ ಪ್ರಾಸ್ ಇಲ್ಲೊ ಚಡ್ ವೇಳ್ ಜಾಲೊ – ಎಕಾ ಘೊಡ್ಯಾಚಿ ಲಾಳ್ ಉಸಳ್ಳಿ.”

“ಪುಣ್ ಹಾಂಗಾ ರಾವೊಂಕ್ ಜಾಗೊ ನಾ, ಫಾವೊ ತಿ ಬಂದೋಬಸ್ತ್ ನಾ. ಆಸ್ಚೆಂ ಏಕ್ ಛತ್ರ್, ಪೆಲ್ಯಾ ತಡಿರ್ ಥಾವ್ನ್ ಚಡುಣೆಂ ದೊನ್ಶಿಂ ವಾವಾಂ ಪಯ್ಸ್ ಆಸಾ…”

“ತೆಂ ಆಮಿ ಜಾಣಾಂವ್. ದೆಕುನ್ ಆಮ್ಕಾಂ ಪಲ್ತಡಿ ವಚಜಾಯ್‍ಚ್.”

“ಯಾ’ಲ್ಲಾ…!”

“ಘೊಡೆ ಉಪ್ಯೆತಿತ್ ನಹಿಂವೇ?”

“ಕೆದಿಂಚ್ ಸಾಧ್ಯ್ ನಾ. ಉದ್ಕಾಚೊ ಲೋಟ್ ಚಡ್ ಆಸಾ. ತ್ಯಾ ಭಾಯ್ರ್ ಖೊರ್ವಂತಾ ಸಾರ್ಕೆ ಖೊಜಂಕ್ ಫಾತೊರ್ ಆಸಾತ್. ದಿಸಾ ಉಜ್ವಾಡೆಂ ಜಾಲ್ಯಾರ್ ಜಂಗಲಾರ್…”

“ಆತಾಂ ಜಂಗಲ್ ಸೊಡುಂಕ್ ತಯಾರ್ ಕರ್.”

“ಪುಣ್ ಹ್ಯಾ ರಾತಿಂ…”

“ತುಂ ಸಾಂಗ್‍ಲ್ಲೆಂ ಕಾಮ್ ಕರ್. ಥೊಡೊ ವೇಳ್ ಗೆಲ್ಯಾರೀ ವ್ಹಡ್ ನಹಿಂ. ತುಕಾ ಇಲ್ಲೆಂ ರುಸುಮ್‍ಯೀ ಚಡ್ ದಿತಾಂವ್. ಸರ್ಕಾರಾಚೆಂ ಕಾಮ್ ಹೆಂ.”

“ಯಾ’ಲ್ಲಾ! ಅಪಾಯ್ ಆಸಾ!”

“ಅಪಾಯ್ ಆಸ್ಲ್ಯಾರ್ ದೋನ್ ಪಾವ್ಟಿಂ ವ್ಹರ್.”

“ಹಾಂವ್ ತುಮ್ಕಾಂ ನಹಿಂ ಮ್ಹಣನಾ. ಪುಣ್…”

“ತುಂ ಗರ್ಜೆ ಶಿವಾಯ್ ಘಳಾಯ್ ಕರ್ತಾಯ್!” ನಾಯ್ಕ್ ಲೊರೆಸಾನ್ ಧೆಂಕ್ಣೊ ಮಾರ್ಲೊ. “ಆಮಿ ಕಿತೆಂ, ಪಾವ್ಸಾಂತ್ ಭಿಜೊನ್ ಆನಿ ಹಿಂವಾನ್ ಆಂಕ್ಡೊನ್ ಮೊರಜಾಯ್ ಮ್ಹಣ್ ಮತ್ಲಬ್!”

“ನಾ ಅಬಾ! ಯಾ’ಲ್ಲಾ!” ಮ್ಹಣೊನ್ ಕಡ್ವಾಗಾರಾನ್ ಹೆರ್ ಥೊಡ್ಯಾ ಮಾಪ್ಳ್ಯಾಂಕ್ ಉಲೊ ದಿಲೊ.

ನಾ ಖುಶೆನ್ ಮ್ಹಳ್ಳೆಪರಿಂ ಸಾತಾ’ಟ್ ಮಾಪ್ಳೆ ಎಕ್ಟಾಂಯ್ ಜಾಲೆ. ಹೆರ್ ದೋನ್ ತೀನ್ ಲಾಂಟಾನ್‍ಯೀ ಲಾಗಿಂ ಆಯ್ಲೆ.

ಹಳ್ತಾಚ್ಯಾ ತೀನ್ ದೋಣಿಂಚೆರ್ ಆಡ್ವೆ ವಾಶೆ ಅರ್ನುನ್ ತಯಾರ್ ಕೆಲ್ಲೆಂ ಜಂಗಲ್ ತೆಂ ತಡಿಕ್ ಲಾಯ್ಲೆಂ. ವರ್ತ್ಯಾ ಮ್ಹಿನತೆನ್ ಘೊಡ್ಯಾಂಕ್ ಚಡವ್ನ್ ಪಳೆತಾನಾ ಏಕ್ ಪಾವ್ಟಿಂಚ್ಯಾ ಪಯ್ಣಾಕ್ ಚವ್ಗಾಂ ಘೊಡ್ಯಾಂಚೆಂ ವ್ಹಜಾಣ್ ಪುರೊ ಜಾಲೆಂ. ತಾಂಚ್ಯಾ ಸಾಂಗಾತಾ ದೊಗಾಂ ಸವಾರಾಂಕ್ ಆನಿ ದೊಗಾಂ ಮಾಪ್ಳ್ಯಾಂಕ್ ಧಾಡ್ಲೆ.

ದುಸ್ರ್ಯಾ ಪಾವ್ಟಿಂಚ್ಯಾ ಪಯ್ಣಾರ್ ಕಷ್ಟಾಂನಿ ಮ್ಹಳ್ಳೆಪರಿಂ, ಉರ್ಲೆಲ್ಯಾ ಘೊಡ್ಯಾಂಕ್ ಆನಿ ತೆಗಾಂ ಸವಾರಾಂಕ್ ಚಡಯ್ಲೆ.

ನಾಯ್ಕ್ ಲೊರೆಸ್, ನಾಯ್ಕ್ ಚಂದು ಆನಿ ನಾಯ್ಕ್ ಅಬ್ಬಾಸ್, ಕೈದ್ಯಾಕ್ ಘೆವ್ನ್ ಪಾಟಿಂ ಉರ್ಲೆ. ತೊಪಾಸಿಚ್ಯಾ ಹಾತಾಂಕ್ ಖೊಡೊ ಘಾಲ್ನ್ ನಾಯ್ಕ್ ಲೊರೆಸಾನ್ ತೊ ಆಪ್ಲ್ಯಾ ಹಾತಾಕ್ ಶಿರ್ಕಾಯಿಲ್ಲೊ. ಹೆರ್ ದೊಗ್‍ಯೀ ಜಣ್ ಚತ್ರಾಯೆನ್ ಪಹರಜ್ ಕರ್ತಾಲೆ. ತೆದಾಳಾ, ಥಂಯ್ ಆಸ್‍ಲ್ಲ್ಯಾ ಎಕ್ಲ್ಯಾ ಧಡಂಗ್ ಜಿವಾಚ್ಯಾ ಮಾಪ್ಳ್ಯಾನ್ ಏಕ್ ಸೂಚನ್ ದಿಲೆಂ:

“ಜಂಗಲಾರ್ ತಿಸ್ರೆ ಪಾವ್ಟಿಂ ವಚಜೆ ಮ್ಹಣ್ ನಾ. ಘೊಡ್ಯಾಂಕ್ ಕಶೆಂಯೀ ಪಾಶಾರ್ ಕೆಲೆ. ಆತಾಂ ಉರ್ಲೆಲ್ಯಾ ಹ್ಯಾ ಚವ್ಗಾಂನಿ ಪಾಟಾಪಾಟ್ ಎಕಾ ದೊಣಿರ್ ಗೆಲ್ಯಾರ್ ವೆಗಿಂ ಪಾವ್ಯೆತ್ ನಹಿಂವೇ?”

“ತೆಂಯೀ ಜಾವ್ಯೆತ್.” ವಯ್ಲೆಂ ಸೂಚನ್ ನಾಯ್ಕ್ ಲೊರೆಸಾಕ್ ಮೆಚ್ವಲೆಂ. “ಕಿತೆಂ ಮ್ಹಣ್ತಾಯ್?” ತಾಣೆಂ ಕಡ್ವಾಚ್ಯಾ ಮಾಪ್ಳ್ಯಾ ಕಡೆನ್ ವಿಚಾರ್ಲೆಂ.

“ಸೂಚನ್ ಬರೆಂಚ್” ಮ್ಹಣಾಲೊ ಹಸನಬ್ಬ. “ಪುಣ್ ರಾತಿಚೊ ವೇಳ್. ಉದಾಕ್‍ಯೀ ಚಡ್ ಆಸಾ. ಸವ್ಕಾಸಾಯೆನ್ ಜಂಗಲಾರ್ ವೆಚೆಂಚ್ ಬರೆಂ ಮ್ಹಣ್…”

“ತುವೆಂ ಭಿಯೆಂವ್ಚಿ ಗರ್ಜ್ ನಾ” ಮ್ಹಣಾಲೊ ನಾಯ್ಕ್ ಲೊರೆಸ್. “ಅಪಾಯಾಚಿ ವಾಟ್ ಆಮ್ಕಾಂ ಸೊಡ್ ಆನಿ ದೋಣ್ ಸೊಡ್.”

“ಮ್ಹಾಕಾ ದೊಣಿರ್ ವಚೊಂಕ್ ಭಿರಾಂತ್ ದಿಸ್ತಾ” ಪಿಂರ್ಗಲೊ ತೊಪಾಸಿ. ತಾಕಾ ಉದ್ಕಾಚೊ ಲೋಟ್ ಪಳೆವ್ನ್ ಆನಿ ಪ್ರವಾಹಾಚೊ ಆವಾಜ್ ಆಯ್ಕೊನ್ ತಕ್ಲಿ ಘುಂವೊಳ್ ಯೇಂವ್ಕ್ ಲಾಗ್‍ಲ್ಲಿ.

“ತೆಂಯೀ ಬರೆಂಚ್!” ಹಾಸ್ಲೊ ನಾಯ್ಕ್ ಅಬ್ಬಾಸ್. “ತುಜ್ಯಾ ಗೊಮ್ಟ್ಯಾಕ್ ಪಾಸ್ ಅರ್ನೊಂಚೊ ದೀಸ್ ಚಡ್ ಪಯ್ಸ್ ನಾ. ಜಾಲ್ಯಾರೀ ಆತಾಂ ದೊಣಿರ್ ವಚೊಂಕ್ ತುಕಾ ಭಿರಾಂತ್ ದಿಸ್ತಾ ಜಾಲ್ಯಾರ್, ತುಜ್ಯಾ ಪೆಂಕ್ಡಾಕ್ ದೊರಿ ಘಾಲ್ನ್ ತುಕಾ ನ್ಹಂಯ್ತ್‌ಲ್ಯಾನ್ ವೋಡ್ನ್ ವ್ಹರುಂಕ್ ಆಮಿ ತಯಾರ್!”

ದೋಣ್ ಲಾಗಿಂ ಆಯ್ಲಿ. ತೇಗ್ ಸವಾರ್ ಆನಿ ಕೈದಿ ತಿಚೆರ್ ಚಡ್ಲೆ. ತಾಂಚ್ಯಾ ಸಾಂಗಾತಾ, ಥಂಯ್ಸರ್ ಪಾಟಿಂ ಉರ್‌ಲ್ಲೆ ಚವ್ಗ್-ಪಾಂಚ್ ಜಣ್ ಮಾಪ್ಳೆಯೀ ಚಡ್ಲೆ. ದೋಣ್ ಸುಟ್ಲಿ.

ದುಸ್ರೆ ಪಾವ್ಟಿಂ ಸುಟ್‍ಲ್ಲ್ಯಾ ಜಂಗಲಾಚೊ ಉಜ್ವಾಡ್, ಪಲ್ತಡ್ಚ್ಯಾ ತಡಿಕ್ ಲಾಗಿಂ ಪಾವ್‍ಲ್ಲೊ.

ಉಪ್ರಾಂತ್ಲ್ಯಾ ಥೊಡ್ಯಾ ವೆಳಾ ಭಿತರ್ ಅವ್ಘಡ್ ಘಡೊನ್ ಗೆಲೆಂ. ನ್ಹಂಯ್ಚ್ಯಾ ಮಧೆಂಗಾತ್ ಥಾವ್ನ್ ಜಿವಾಚ್ಯಾ ಅಕ್ಲಾಸಾ ಖಾತಿರ್ ಬೊಬೊ ಆಯ್ಕಲ್ಯೊ.

ತ್ಯಾ ತೆಗಾಂ ಸವಾರಾಂಕ್ ಆನಿ ತೊಪಾಸಿಕ್ ವ್ಹರ್ನ್ ಗೆಲ್ಲಿ ದೋಣ್, ನ್ಹಂಯ್ಚ್ಯಾ ಮಧೆಂಚ್ ವೊಮ್ತಿ ಪಡ್‍ಲ್ಲಿ.

ನ್ಹಂಯ್ಚ್ಯಾ ದೊನೀ ತಡಿಂನಿ ಗಲಾಟೊ ಆನಿ ಗೊಂದೊಳ್ ಜಾಲೊ; ಥೊಡೆ ಮಾಪ್ಳೆ ನ್ಹಂಯ್ಕ್ ಉಡ್ಲೆ. ತಡಿಂಚೆರ್ ಚಡಿತ್ ಚೂಡಿ ಆನಿ ಉಜ್ವಾಡಿ ದಿಸ್ಲ್ಯೊ; ಮುಖಾರ್ ಪಾವ್‍ಲ್ಲೆಂ ಜಂಗಲ್, ಘೊಡ್ಯಾಂಕ್ ಆನಿ ಸವಾರಾಂಕ್ ದೆಂವವ್ನ್ ಮಾಪ್ಳ್ಯಾ ಸಾಂಗಾತಾ ಪಾಟಿಂ ಆಯ್ಲೆಂ.

ಥೊಡ್ಯಾಂಕ್ ಉದ್ಕಾಂತ್ಲೆ ಕಾಡ್ನ್ ವಯ್ರ್ ಪಲ್ತಡಿ ತಡಿಕ್ ವ್ಹೆಲೆ. ಹೆರ್ ಥೊಡ್ಯಾಂಚಿಂ ರಾತ್‍ಭರ್ ಸೊಧ್ನಾಂ ಜಾಲಿಂ.

ದುಸ್ರ್ಯಾ ದಿಸಾ ಸಕಾಳಿಂಚ್ಯಾ ನೋವ್ ವೊರಾರ್ ಮಂಜರಾಬಾದ್ ಘಡಾಂತ್ಲೊ ಎಕ್ಲೊ ಜೆಮೆದಾರ್, ಹೆರ್ ತೆಗಾಂ ಸವಾರಾಂ ಸಾಂಗಾತಾ ಯೇವ್ನ್ ಉಪ್ಪಿನಂಗಡಿಕ್ ಪಾವ್ಲೊ. ‘ಮಂಗ್ಳುರ್ ಥಾವ್ನ್ ಎಕ್ಲ್ಯಾ ಕೈದ್ಯಾಕ್ ಹಾಡ್ನ್ ಆಟ್ ಜಣ್ ಸವಾರ್ ಯೆತೆಲೆ, ತಾಂಕಾಂ ಭೆಟೊಂಕ್ ಸವಾರಾಂಕ್ ಮುಖಾರ್ ಧಾಡಿಜಾಯ್ ಆನಿ ಪ್ರತ್ಯೇಕ್ ಜಾವ್ನ್ ಶಿರಾಡಿಚ್ಯಾ ವಾಟೆರ್ ಕಾಂಯ್ ಅವ್ಘಡ್ ಜಾವ್ನ್ ಕೈದಿ ಪರಾರಿ ಪುಣೀ ಜಾಯ್ನಾತ್‍ಲ್ಲೆಪರಿಂ ಚತ್ರಾಯ್ ಘೆಜಾಯ್’ ಮ್ಹಣ್ ಟಿಪ್ಪುನ್ – ಸರ್ದಾರ್ ಸಿಮಾಂವ್ಕ್ ಕಳಿತ್ ನಾಸ್ತಾನಾ – ಮಂಜರಾಬಾದ್‍ಚ್ಯಾ ಕೊತ್ವಾಲಾಕ್ ಫರ್ಮಾಣ್ ಧಾಡ್‍ಲ್ಲೆಂ. ತ್ಯಾ ಪ್ರಕಾರ್ ಆದ್ಲ್ಯಾ ದಿಸಾ ಭಾಯ್ರ್ ಸರೊನ್ ಆಯಿಲ್ಲೆ ತೆ ಸವಾರ್ ಸಾಂಜೆರ್ ಗೋಳಿತೊಟ್ಟು ಪಾವ್‍ಲ್ಲೆ.

ಥಂಯ್ ರಾತ್ ಪಾಶಾರ್ ಕರ್ನ್, ಫಾಂತ್ಯಾರ್ ಭಾಯ್ರ್ ಸರೊನ್ ಉಪ್ಪಿನಂಗಡಿಕ್ ತೆ ಪಾವ್‍ಲ್ಲೆ.

ತಾಣಿಂ ಯೆತಾನಾ ವೇಳ್ ಉತ್ರಲ್ಲೊ.

ಉಬಾರ್ಚ್ಯಾ ನ್ಹಂಯ್ತ್ ಅವ್ಘಡ್ ಜಾವ್ನ್ ಗೆಲ್ಲೆಂ.

ನ್ಹಂಯ್ ಆಲ್ತಡಿಚ್ಯಾ ಛತ್ರಾಂತ್ ಜಮ್ಲೆಲ್ಯಾಂಚೊ ಆನಿ ಪ್ರಥಮ್ ಚಿಕಿತ್ಸಾ ಘೆತೆಲ್ಯಾಂಚೊ ಸಂಖೊ ಪಳೆತಾನಾ, ತಾಂಚೆ ಮಧೆಂ ನಾಯ್ಕ್ ಲೊರೆಸ್, ನಾಯ್ಕ್ ಚಂದು ಆನಿ ತೊಪಾಸಿ ದಾಲ್ಮೇದಾ ನಾತ್‍ಲ್ಲೆ – ತೆ ಆದ್ಲ್ಯಾ ರಾತಿಂ ಉದ್ಕಾಚ್ಯಾ ಕ್ರೋಧಾಕ್ ಬಲಿ ಜಾಲ್ಲೆ. ತೆದೊಳ್ ಪರ್ಯಾಂತ್ ತಾಂಚಿಂ ಮೊಡಿಂಯೀ ಮೆಳೊಂಕ್ ನಾತ್‍ಲ್ಲಿಂ.

ನಾಯ್ಕ್ ಅಬ್ಬಾಸಾಕ್ ದುಸ್ರ್ಯಾ ಮಾಪ್ಳ್ಯಾಂನಿ ವೋಡ್ನ್ ವಯ್ರ್ ಘಾಲ್ಲೊ. ತೊ ನಹಿಂಚ್ ಹಿಂವಾನ್, ಬಗಾರ್ ಕೈದಿ ನಾಸ್ತಾನಾ ಪಾಟಿಂ ಪಟ್ಟಣಾಕ್ ಕಶೆಂ ವೆಚೆಂ ಮ್ಹಳ್ಳೆಂ ಚಿಂತುನ್ ಭಿಯಾನ್ ಥರ್ಥರ್ತಾಲೊ. ನಾಯ್ಕ್ ಅಂಗರಾಕ್‍ಯೀ ತೆಂ ಭ್ಯೆಂ ಆಸ್‍ಲ್ಲೆಂ, ಪುಣ್ ತೊ ಉದ್ಕಾಂತ್ ಪಡೊಂಕ್ ನಾತ್‍ಲ್ಲ್ಯಾನ್, ತಾಚೆಂ ಹಿಂವ್ ಭಾಯ್ಲ್ಯಾನ್ ದಿಸನಾತ್‍ಲ್ಲೆಂ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel