ಸರ್ದಾರಾಚೆಂ ಸನ್ನಿಧಾನ್ – 2: ಪ್ರಥಮ್ ಸನ್ನಿಧಾನ್

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 2
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ ದೋನ್: ಪ್ರಥಮ್ ಸನ್ನಿಧಾನ್

ವ್ಹಯ್, ನಿಜಾಯ್ಕೀ ಅಸಲೊ ವಿಚಿತ್ರ್ ಸ್ವಾಗತ್ ತಾಣಿಂ ದೊಗಾಂಯ್ನೀ ಸಪ್ಣಾಂತ್‍ಯೀ ಲೆಖುಂಕ್ ನಾತ್‍ಲ್ಲೊ!

ತಕ್ಲಿ ಹಾಲಯ್ನಾಸ್ತಾಂ ಭೊಂವಾರಿಂ ದೊಳೆ ತಾಣಿಂ ಘುಂವ್ಡಾಯ್ಲೆ. ತಾಂಕಾಂ ಚಿರುಂಕ್ ಆನಿ ತೊಪುಂಕ್ ಮ್ಹಳ್ಳೆಪರಿಂ ಆಯ್ತೆ ಜಾವ್ನ್ ತೆ ಶಿಪಾಯ್ ತಾಂಚೆರ್ ಹಾತೆರಾಂ ಜೊಕುನ್ ರಾವ್‍ಲ್ಲೆ!

ಕಸಲಿ ಜಾವ್ಯೆತ್ ಹಿ ಕಿತಾಫತ್? ಅಶಿ ಕಿತ್ಯಾಕ್ ಆನಿ ಖಂಯ್ಚ್ಯಾನ್ ಪರಿಸ್ಥಿತಿ ಉಳ್ಟಿ ರಾವ್ಲಿ ಮ್ಹಣ್ ಸರ್ದಾರಾಂ ವರ್ವಿಂ ಚಿಂತುಂಕ್ ಜಾಲೆಂ ನಾ. ಹೆರ್ ಖಂಯ್ಚ್ಯಾಯೀ ವೆಳಾರ್ ವಾ ಹೆರ್ ಖಂಯ್ಚ್ಯಾಯೀ ಥಳಾರ್ ಜಾಲ್ಯಾರ್ – ಆಸೊಂ ಆಯುಧಾಂ ವಾ ರಿತೆ ಹಾತ್, ಆಸೊಂ ವಿರೋಧಿ ಬಾರಾ ವಾ ಬ್ಯಾಸತ್ತರ್ – ಪಂಥಾಹ್ವಾನ್ ಘೆನಾಸ್ತಾಂ, ಪ್ರತಿಕ್ರಿಯಾ ದಾಕಯ್ನಾಸ್ತಾಂ, ಕಾನ್ ಕಾತ್ರ್ಯಾಪರಿಂ ಶರಣ್ ಜಾಂವ್ಚೊ ಗ್ರಾಯ್ಕ್ ಸರ್ದಾರ್ ಸಿಮಾಂವ್ ನಹಿಂ. ಪುಣ್ ಬಾದಶಹಾಚ್ಯಾ ಭೆಟೆಕ್ ವೆಚೆ ಖಾತಿರ್ ತಾಚ್ಯಾಚ್ ರಾವ್ಳೆರಾ ಭಿತರ್… ಅಸಲ್ಯಾ ವಿಚಿತ್ರ್ ಸ್ವಾಗತಾ ವರ್ವಿಂ ತೊಯೀ ಘಡಿಭರ್ ಶೆರ್ಮೆವ್ನ್ ಗೆಲೊ, ಪುಣ್ ಥೊಡ್ಯಾಚ್ ವೆಳಾನ್ ತಾಚೆಂ ಧಯ್ರ್ ಪಾಟಿಂ ಆಯ್ಲೆಂ ಆನಿ ತಾಚೊ ಸ್ವರ್ ಸುಟ್ಲೊ:

“ಬಾದಶಹಾಚ್ಯಾ ನಾಂವಾನ್ ಮ್ಹಳ್ಳ್ಯಾ ಖಾತಿರ್ ಆಮ್ಚಿಂ ಹಾತೆರಾಂ ಶರಣ್ ದಿಲಿಂ… ಪುಣ್ ಜಾಣಾಂ ಜಾವ್ಯೆತ್‍ಗೀ ಆಮಿ, ತುಮಿ ಹೆಂ ಕಾಮ್ ಕೆಲಾಂ ಮ್ಹಣ್ ಬಾದಶಹಾಚ್ಯಾ ಹುಕ್ಮೆನ್?” ವಿಚಾರ್ಲೆಂ ತಾಣೆಂ ಚಿಕ್ಕೆ ಅಧಿಕಾರಾನ್‍ಂಚ್.

ರಾಕ್ವಲ್ಯಾಂಚ್ಯಾ ಕೊತ್ವಾಲಾನ್ ತೋಂಡ್ ಕಾಡ್ಚ್ಯಾ ಆದಿಂ ಸರ್ದಾರಾಚ್ಯಾ ಸವಾಲಾಕ್ ಜವಾಬ್ ಮ್ಹಳ್ಳೆಪರಿಂ, ಭಿತರ್ಲ್ಯಾ ಕುಶಿ ಥಾವ್ನ್ ಪರಿಚಿತ್ ಹಾಸೊ ತಾಂಕಾಂ ಆಯ್ಕಲೊ – ಹಾಸೊ – ಜೊ ದಾಂತ್ ಸೊಡಿನಾಸ್ತಾಂ ನಾಕಾಂತ್ಲ್ಯಾನ್ ಆವಾಜ್ ದಿಂವ್ಚೊ – ಟಿಪ್ಪು ಸುಲ್ತಾನಾಚೊ!

ಕೈದಿ ತಶೆ ತಾಂಕಾಂ ವೆಡೊ ಘಾಲ್ನ್ ರಾವ್‍ಲ್ಲೆ ಗ್ರಾಯ್ಕ್ ಥಟಕ್ಲೆ. ತಾಂಚಿ ದೀಶ್ಟ್, ಹಾಸೊ ಆಯ್ಕಲ್ಲ್ಯಾ ತೆವ್ಶಿನ್ ಘುಂವ್ಲಿ.

ಕಮ್ರಾಚ್ಯಾ ಜನೆಲಾಕ್ ಉಮ್ಕಳೊನ್ ಆಸ್‍ಲ್ಲ್ಯಾ ಮಿರಿಯಾಳ್ಯಾ ಇಲೂದೆಚ್ಯಾ ಆನಿ ಝರಿಚ್ಯಾ ತಟ್ಟೆ ಬಗ್ಲೆಂತ್ಲ್ಯಾನ್ ಟಿಪ್ಪು ಸುಲ್ತಾನ್ ಫುಡೆಂ ಆಯ್ಲೊ. ತಾಚ್ಯಾ ಸದಾಂಚ್ಯಾ ಸವಯೆಪರಿಂ ಹೆಬ್ಬೊಟಾಂ ಕಮರ್ ಬಾಂಧಾಂತ್ ಶಿರ್ಕಾವ್ನ್, ಭರ್ಮಾನ್ ಮೆಟಾಂ ಕಾಡ್ನ್ ಹಾಂಚೆ ಸರ್ಶಿನ್ ತೊ ಪಾವ್ಲೊ.

“ಬಾದಶಹಾಚ್ಯಾ ಸೇವಕಾಂಚೆಂ ಖಾಲ್ತೆಂ ವಂದನ್!”

ಉತ್ರಾಂ ಬರಾಬರ್ ಹಾತ್ ಕಪಾಲಾಕ್ ಲಾವ್ನ್, ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್ ಬಾಗಾಲೆ.

ಟಿಪ್ಪು ಸುಲ್ತಾನ್ ತಸೊಚ್ ಪಾಯ್ ರುಂದಾವ್ನ್ ರಾವೊನ್, ಹಾಂಕಾಂ ಪಳೆವ್ನ್ ಆದ್ಲೆಪರಿಂಚ್ ಪರ್ತ್ಯಾನ್ ಹಾಸ್ಲೊ.

ಸಕ್ಕಡ್‍ಯೀ ಶ್ವಾಸ್ ಧರುನ್ ರಾವ್ಲೆ.

“ಆಮಿ ಆದಿಂಯೀ ಮ್ಹಳಾಂ” ಮ್ಹಣಾಲೊ ತೊ. “ಆನಿ ಆತಾಂಯೀ ಮ್ಹಣ್ತಾಂವ್ ತೆಂಚ್ – ಪುರಾಸಾಣ್ ಜಾಲ್ಲ್ಯಾ ಆಮ್ಚ್ಯಾ ಜಿವಾಕ್ ತುಮ್ಚೆಂ ಯೆಣೆಂ ಏಕ್ ಭುಜಾವಣ್.”

ತಾಚ್ಯಾ ಉತ್ರಾಂನಿ ಅತಿಶಯ್ ಆಸ್ಯೆತ್ ಮ್ಹಣ್ – ಆದಿಂ ಘಡ್‍ಲ್ಲೆಪರಿಂಚ್ ಸರ್ದಾರ್ ಸಿಮಾಂವ್ಕ್ ಭೊಗ್ಲೆಂ. ಜಾಲ್ಯಾರೀ-

“ಮ್ಹಜ್ಯಾ ಬಾದಶಹಾ ಟಿಪ್ಪು ಸುಲ್ತಾನ್ ಮನ್ಸೂರ್ ಆಲಿ ಖಾನ್ ಬಹಾದುರಾಂಕ್ ಸೇವಕಾಚೆಂ ಖಾಲ್ತೆಂ ವಂದನ್” ಮ್ಹಣಾಲೊ ತೊ ಪರ್ತ್ಯಾನ್ ಪ್ರಣಾಮ್ ಕರುನ್. ತೊಚ್ ಹಿಸೊ ಘೆವ್ನ್ ಸರ್ದಾರ್ ಯೂಸುಫಾನ್ ತ್ಯಾಚ್ ವಾಕ್ಯಾಚೆಂ ಪುನರುಚ್ಛಾರಣ್ ಕೆಲೆಂ.

“ಬರೆಂ” ಮ್ಹಣಾಲೊ ಮೈಸೂರ್ಚೊ ವಾಗ್. ತೆದೊಳ್ ಹಾತೆರಾಂ ಜೊಕುನ್ ಆಸ್‍ಲ್ಲೆ ತೆ ಜವಾನ್ – ತಾಂಕಾಂ ಟಿಪ್ಪುನ್ ಕಶಿ ಆನಿ ಕೆದಾಳಾ ಹಾತ್‍ಭಾಸ್ ಕೆಲ್ಲಿ ಮ್ಹಣ್ ಖಬರ್ ನಾಸ್ತಾಂ – ಥಂಯ್ ಥಾವ್ನ್ ಪಾಟಿಂ ಸರೊನ್ ಮಾಯಾಗ್ ಜಾಲ್ಲೆ!

“ಲಾಂಬ್ ಪಯ್ಣಾ ಉಪ್ರಾಂತ್ ತುಮ್ಕಾಂ ಪುರಾಸಣ್ ಜಾಲ್ಯಾ ಆಸ್ತೆಲಿ” ಮ್ಹಣಾಲೊ ಟಿಪ್ಪು ಸರ್ದಾರ್. “ಭಿತರ್ ಯೇವ್ನ್ ಚಿಕ್ಕೆ ವಿಶೆವ್ ಘೆಯಾತ್. ತರೀ, ತ್ಯಾ ಪಯ್ಲೆಂ ಆಮ್ಚೆಂ ಏಕ್ ಲ್ಹಾನ್ ಕಾಮ್ ಆಸಾ.”

ಕಿತೆಂ ಗಜಾಲ್ ಮ್ಹಣ್ ಕಳ್ಚ್ಯಾ ಆದಿಂ ಟಿಪ್ಪು ಸುಲ್ತಾನಾನ್ ಹಾತ್‍ಭಾಸ್ ಕೆಲಿ, ಆನಿ ತ್ಯಾ ರಾವ್ಳೆರಾಚ್ಯಾ ಪಹರ್‍ಯಾಗಾರಾಂಚೊ ಕೊತ್ವಾಲ್ ಲಾಗಿಂ ಆಯ್ಲೊ.

“ಮ್ಹಜ್ಯಾ ಸರ್ದಾರಾಂಚಿಂ ಹಾತೆರಾಂ ಪಾಟಿಂ ದೀ” – ಟಿಪ್ಪು ಸುಲ್ತಾನಾನ್ ಹುಕುಮ್ ದಿಲಿ.

ಕೊತ್ವಾಲಾನ್ ತಶೆಂ ಕೆಲೆಂ.

ಸೈರ್‌ಭೈರ್‌ಚ್ ಆಸ್‍ಲ್ಲ್ಯಾ ಸರ್ದಾರಾಂನಿ ತಿಂ ಪಾಟಿಂ ಘೆತ್ಲಿಂ ಆನಿ ಪಯ್ಲೆಂಚೆಪರಿಂ ಆಂಗಾರ್ ನ್ಹೆಸೊನ್ ಘೆತ್ಲಿಂ.

“ಆನಿ – ಖಾಮೋಶ್!” ಟಿಪ್ಪು ಸುಲ್ತಾನಾನ್ ಧೆಂಕ್ಣೊ ಮಾರ್ಲೊ.

“ಜೀ, ಹುಜೂರ್!” ಕೊತ್ವಾಲ್ ಥಟಕ್ ಜಾಲೊ.

“ತುಜ್ಯಾ ಹಾತಾ ಖಾಲ್ ಆಸ್‍ಲ್ಲ್ಯಾಂಕ್ ಆಮ್ಚ್ಯಾ ನಿಯಮಾಂಚಿ ಸಾರ್ಕಿ ವಳಕ್ ನಾ ಮ್ಹಣ್ ದಿಸ್ತಾ” ಮ್ಹಣಾಲೊ ಟಿಪ್ಪು ಸುಲ್ತಾನ್ ಮಿಶ್ಯೊ ಚಾಬೊನ್.

“ಜೀ ಹುಜೂರ್! ತುಮ್ಚಿ ಹುಕುಮ್ ಹುಜೂರ್!”

“ಆಮ್ಚ್ಯಾ ರಾಜ್ವಟ್ಕಾಯೆಂತ್, ಆನಿ ಪ್ರತ್ಯೇಕ್ ಕರ್ನ್ ಆಮ್ಚ್ಯಾ ಸದ್ರೆರ್” ಮ್ಹಣಾಲೊ ಟಿಪ್ಪು ಸುಲ್ತಾನ್… “ಝುಜಾಚ್ಯಾ ಆಯುಧಾಂಕ್ ವರ್ತಿ ಮರ್ಯಾದ್ ಆಸಾ!”

“ಜೀ, ಹುಜೂರ್” ಕೊತ್ವಾಲ್ ಘಾಬರ್ಲೊ.

“ಪುಣ್…” ಮ್ಹಣಾಲೊ ಟಿಪ್ಪು ಸುಲ್ತಾನ್ ರಾಗಾನ್. “ತುಜ್ಯಾ ಠೊಲಿಯೆಂತ್ಲ್ಯಾ ಎಕ್ಲ್ಯಾ ಸೂಅರಾನ್, ಧರ್ಣಿರ್ ಪಡ್ಲೆಲಿಂ ಆಯುಧಾಂ ಹಾತಾನ್ ವಿಂಚುಂಕ್ ನಾಂತ್, ಬಗಾರ್ ಪಾಯಾನ್ ತಿಂ ಚಿಲ್ಲಿಲಿಂ..!”

“ಜೀ, ಜೀ – ಹುಜೂರ್!”

“ತಾಚಿಂ ಹಾತೆರಾಂ ಮೆಕ್ಳಾಯ್ ಆನಿ ತಾಣೆಂ ನ್ಹೆಸ್ಚಿಂ ಆಮ್ಚ್ಯಾ ರಾವ್ಳೆರಾಚಿಂ ಸಮವಸ್ತ್ರಾಂ ನಿಕ್ಳಾಯ್!”

“ಜೀ, ಹುಜೂರ್!”

“ಆನಿ ಪ್ರತ್ಯೇಕ್ ಜಾವ್ನ್, ಆಮ್ಚ್ಯಾ ರಾವ್ಳೆರಾ ಭಿತರ್ ಆಮ್ಚ್ಯಾಚ್ ಸರ್ದಾರಾಂಚಿಂ ಅಸ್ತ್ರಾಂ ಪಾಯಾನ್ ಚಿಲ್ಲಿಲ್ಲ್ಯಾ ಖಾತಿರ್ ತ್ಯಾ ಸೂಅರಾಕ್ ವೊಮ್ತೊ ನಿದಾವ್ನ್ ತಾಚ್ಯಾ ಪಾಯಾ ಥಳ್ವ್ಯಾಂಕ್ ಧಾ ಬೆತಾಂಚೆ ಮಾರ್ ಮಾರಯ್, ಆನಿ ದೋನ್ ದೀಸ್ ತಾಕಾ ಬಂಧಿಂತ್ ಉಪಾಶಿಂ ದವರಯ್!”

“ಜೀ, ಹುಜೂರ್!”

“ಹಿ ಆಮ್ಚಿ – ಆಮ್ಚ್ಯಾ ಸರ್ದಾರಾಂಚ್ಯಾ ನಾಂವಾನ್ ಆಮಿ ಕರ್ಚಿ ಮೆಹರ್ಬಾನಿ” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಚಲ್ ತೆವ್ಶಿನ್!”

ಕೊತ್ವಾಲ್ ನಿಕಳ್ಳೊ.

ಟಿಪ್ಪು ಸುಲ್ತಾನ್ ಹೆವ್ಶಿನ್ ಘುಂವ್ಲೊ, ಆನಿ ಆಪ್ಣಾಚೊ ಪಾಟ್ಲಾವ್ ಕರಾ ಮ್ಹಣ್ ಹಾಂಕಾಂ ಸಂಜ್ಞಾ ದೀವ್ನ್, ಪಾಟಿಂ ಕಮ್ರಾಕ್ ಭಿತರ್ ಗೆಲೊ.

ಕಾಲುಬುಲೆ ಜಾಲ್ಲೆ ಸರ್ದಾರ್ ದೊಗೀ, ಎಕಾಮೆಕಾಕ್ ದಿಷ್ಟಿ ಬದ್ಲುನ್, ತಾಚ್ಯಾ ಪಾಟ್ಲ್ಯಾನ್ ಸವ್ಕಾಸ್ ಭಿತರ್ ಗೆಲೆ.

“ಘಡಿಭರ್ ತುಮ್ಕಾಂ ತಕ್ರಾರ್ ಜಾಲ್ಲ್ಯಾ ಖಾತಿರ್ ಬೆಜಾರ್ ಕರಿನಾಕಾತ್” ಮ್ಹಣಾಲೊ ತೊ. “ಆತಾಂ ಬಸೊನ್ ಥೊಡೆಂ ಉಲಯಾಂ.”

ಥಂಯ್ಚ್ ಗಂಧಾಚ್ಯಾ ಬಾಂಕುಲಾರ್ ಆಸ್‍ಲ್ಲಿ ರುಪ್ಯಾಚಿ ಕಾಂಪಿಣ್ ತಾಣೆಂ ಹಾಲಯ್ಲಿ. ಬಗ್ಲೆಚ್ಯಾ ದಾರಾಂತ್ಲ್ಯಾನ್ ಉದೆಲ್ಲ್ಯಾ ಸೆವಕಾಕ್ ‘ಥೊಡೆಂ ಖಾಂವ್ಕ್ ಆನಿ ಪಿಯೆಂವ್ಕ್’ ಹಾಡುಂಕ್ ತಾಣೆಂ ಫರ್ಮಾಯ್ಲೆಂ. ಮಧ್ಲ್ಯಾ ಪಲ್ಲಂಗಾರ್ ಏಕ್ ಶ್ವಾಸ್ ಸೊಡುನ್ ತೊ ಬಸ್ಲೊ, ಆನಿ ಹಾಂಕಾಂಯೀ, ಬಗ್ಲೆಚ್ಯಾ ಉಶ್ಯಾಂ ಸೊಪ್ಯಾರ್ ಬಸೊಂಕ್ ತಾಣೆಂ ಹಾತ್‍ಭಾಸ್ ಕೆಲಿ.

ಹೆ ದೊಗೀ ಬಸ್ಲೆ.

ರುಪ್ಯಾಚ್ಯಾ ಥಾಲಿಯೆಂತ್ ಫಳ್ಹಾರ್ ಆನಿ ತಸಲ್ಯಾಚ್ ಗಿಂಡ್ಲಾಂನಿ ತಾಪವ್ನ್ ನಿಂವಯಿಲ್ಲೆಂ ದೂದ್ ಸೆವಕ್ ಹಾಡ್ನ್ ದವರ್ನ್ ಗೆಲೊ.

ಫಳ್ಹಾರ್ ಘೆವ್ನ್, ಗಿಂಡ್ಲಾಂತ್ಲೆಂ ದೂದ್ ಪಯ್ಲೆಂ ಚಾಕೊನ್ ತಾಣೆಂಚ್ ತೆಂ ತಾಂಕಾಂ ಪಾಶಾರ್ ಕೆಲೆಂ. ತೆದೊಳ್ ಕೊಣೀ ಉಲಂವ್ಕ್ ನಾಂತ್.

“ತುಮ್ಚೆರ್ ಆಮ್ಚ್ಯಾ ರಾವ್ಳೆರಾಚ್ಯಾ ಜವಾನಾಂನಿ ದಾಡ್ ಘಾಲಿ ಮ್ಹಣ್ ಬೆಜಾರ್ ಕರಿನಾಯೆ. ಹಾಂವೆಂಚ್ ತಶಿ ಹುಕುಮ್ ದಿಲ್ಲಿ” ಮ್ಹಣಾಲೊ ತೊ, ಉಪ್ರಾಂತ್, ಹಾಸೊನ್.

“ಕಿತ್ಯಾಕ್ ಜಾವ್ಯೆತ್ ಹುಜೂರ್?” ಸರ್ದಾರ್ ಸಿಮಾಂವ್ನ್ ವಿಚಾರುಂಕ್ ಧಯ್ರ್ ಘೆತ್ಲೆಂ.

“ತುಮಿ ಜಾಣಾಂತ್” ಟಿಪ್ಪುನ್ ವಿವರ್ ದಿಲೊ. “ಹ್ಯಾ ದಿಸಾಂನಿ ಚಾರಾಂಯ್ ದಿಶಾಂನಿ ಆಮ್ಚೆರ್ ದುಸ್ಮಾನ್ ಚಡ್ಲ್ಯಾತ್. ಆನಿ ಸರ್ದಾರ್ ಸಿಮಾಂವ್ಕ್ ಪ್ರತ್ಯೇಕ್ ಜಾವ್ನ್ ಉಗ್ಡಾಸ್ ಆಸೊಂಕ್ ಪುರೊ – ಲಾಗಿಂ ಲಾಗಿಂ ಎಕಾ ಮಹಿನ್ಯಾ ಆದಿಂ ದರಿಯಾ ದೌಲತಾಚ್ಯಾ ಆಂಗ್ಣಾಂತ್ ತ್ಯಾ ಮೊಬ್ಲಿ ಆಂತೊನ್ ಶೆಣೈನ್ ಮ್ಹಳ್ಳಿಂ ಉತ್ರಾಂ.”

“ಉಗ್ಡಾಸ್ ಆಸಾ ಹುಜೂರ್, ಪುಣ್ ಹಾಂವ್ ತಿಂ ಪಾತ್ಯೆನಾ.”

ತಶಿ ಜವಾಬ್ ದಿಲಿ ತರೀ, ಸರ್ದಾರ್ ಸಿಮಾಂವ್ ಥಂಯ್ ದುಬಾವ್ ಉರ್ಲೊ. ಮೊಬ್ಲಿ ಆಂತೊನ್ ಶೆಣೈನ್ ಥಂಯ್ಚ್ ರಾವೊನ್ ಉಲಯಿಲ್ಲೆಪರಿಂ – ‘…ಆಮ್ಚ್ಯೊ ಕುಡಿ ದುಸ್ಮಾನಾಂನಿ ವಿದ್ರೂಪ್ ಕೆಲ್ಯಾತ್ – ಆಮ್ಚೆ ಅತ್ಮೆ ತಾಣಿಂ ಆಪ್ಡೊಂಕ್ ನಾಂತ್… ಆಬ್ಳೆ! ಕ್ರಿಸ್ತಾಂವ್ ವೀರಾಂಚ್ಯಾ ರಗ್ತಾಂತ್ ಆನಿ ವಿಧ್ವಿಂಚ್ಯಾ ದುಖಾಂತ್ ತುಜೆಂ ದರ್ಬಾರ್ ವ್ಹಾಳೊಂಕ್ ಲಾಗ್ಲಾಂ – ತುಜೆಂ ಸಿಂಹಾಸನ್ ಹಾಲೊಂಕ್ ಲಾಗ್ಲಾಂ..!’ ತಿಂ ಉತ್ರಾಂ ಉಗ್ಡಾಸ್ ಆಯ್ಲಿಂ.

“ತುಂ ಪಾತ್ಯೆ ವಾ ನಾ ಪಾತ್ಯೆ” ಮ್ಹಣಾಲೊ ಟಿಪ್ಪು ಸುಲ್ತಾನ್. “ಪುಣ್ ತ್ಯಾ ದೀಸ್ ಥಾವ್ನ್ ಆಮ್ಚ್ಯಾ ಜಿವಾಂತ್ ಸುಖ್ ನಾ, ಆಮ್ಚ್ಯಾ ಮತಿಂತ್ ಸಮಾಧಾನ್ ನಾ. ಆಮ್ಕಾಂ ಖಬರ್ ಆಸಾ – ಫಿಂರ್ಗಿ ಇಂಗ್ಲೆಜ್ ಮುಂಬೈಂತ್ ಆನಿ ಕರ್ನಾಟಕಾಂತ್, ಆಮ್ಚೆರ್ ದಾಡ್ ಘಾಲ್ಚ್ಯಾ ಇರಾದ್ಯಾನ್ ಖೂಬ್ ಸೈನಾಂ ಜಮಯ್ತಾತ್.”

“ಪುಣ್ ತಾಂಕಾಂ ಜವಾಬ್ ದಿಂವ್ಚಿ ಸಾಮರ್ಥಿ ಆಮ್ಕಾಂ ಆಸಾ” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ಜಾವ್ಯೆತ್” ಮ್ಹಣಾಲೊ ಟಿಪ್ಪು ಸುಲ್ತಾನ್ ಚಿಕ್ಕೆ ವಿರಾರಾಯೆನ್. “ಜಾವ್ಯೆತ್. ಪುಣ್ ಎಕೆ ವಾಟೆನ್, ಪುಡ್ತುಗೆಜಾಂಚಿ ಕರಂದಾಯ್, ದುಸ್ರ್ಯಾ ವಾಟೆನ್ ತ್ಯಾ ಸೂಅರ್ ನಿಜಾಮಾಚೊ ವಿಶ್ವಾಸ್‍ಘಾತ್, ತಿಸ್ರೆ ವಾಟೆನ್ ತ್ಯಾ ಮರಾಠ್ಯಾಂಚೆ ಆನಿ ತ್ಯಾ ಕೊಡ್ಗಾಚ್ಯಾ ಬಡ್ವಾಚೆ ಕರ್ಕರೆ, ಆಮ್ಚೆಂ ಸೈರಾಣ್ ಚುಕಂವ್ಕ್ ಕಾರಣ್ ಜಾಲಾಂ…”

ಸರ್ದಾರಾಂನಿ ಜವಾಬ್ ಕೆಲಿ ನಾ. ಹ್ಯಾ ಪಾವ್ಟಿಂ ಯೆಂವ್ಚ್ಯಾ ವಾಟೆರ್, ದೊಡ್ಡ ವೀರೇಂದ್ರ ರಾಯಾಕ್ ಭೆಟ್ ದೀನಾಸ್ತಾಂ ಆಯಿಲ್ಲೆಂ ಬರೆಂಚ್ ಜಾಲೆಂ ಮ್ಹಣ್ ಸರ್ದಾರ್ ಸಿಮಾಂವ್ಕ್ ಭೊಗ್ಲೆಂ.

“ತ್ಯಾ ಇಡ್ಯಾಂತ್…” ಟಿಪ್ಪು ಸುಲ್ತಾನ್ ಉಲಯಿತ್ತ್ ಗೆಲೊ. “ಕೆನರಾಂತ್ ಆಮಿ ಧರ್‌ಲ್ಲೆಂ ಧೋರಣ್ ಉಲ್ಟೆಂ ಜಾಲಾಂಶೆಂ ದಿಸ್ತಾ. ಕಸಲ್ಯಾ ಉಪಾಯಾಂನಿ ಪುಣೀ ಆಮ್ಚ್ಯಾ ರಾವ್ಳೆರಾಂತ್ ಪ್ರವೇಶ್ ಜಾವ್ನ್ ಆಮ್ಚೊ – ಅಲ್ಲಾಚೊ ಪೈಗಂಬರ್ ಜಾವ್ನಾಸ್ಚ್ಯಾ ಆಮ್ಚೊಚ್ – ಜೀವ್ ಕಾಡುಂಕ್ ದುಸ್ಮಾನಾಂನಿ ನಿಚೆವ್ ಕೆಲಾ ಖಂಯ್!”

“ತೆಂ ಬಿಲ್ಕುಲ್ ಜಾಂವ್ಕ್ ನಜೊ ಹುಜೂರ್!”

“ಬಿಲ್ಕುಲ್ ಜಾಂವ್ಚೆಂ ನಾ” ಟಿಪ್ಪು ಸುಲ್ತಾನ್ ಪರ್ತ್ಯಾನ್ ಹಾಸ್ಲೊ. ಪುಣ್ ತಾಣೆಂ ಹಾಸ್ಚ್ಯಾಂತ್ ಸರ್ದಾರ್ ಸಿಮಾಂವ್ಕ್ ಆನಿ ಸರ್ದಾರ್ ಯೂಸುಫ್ ಆಲಿಕ್ ವಿನೋದ್ ಕಾಂಯ್ ದಿಸ್ಲೊ ನಾ.

“ಬಿಲ್ಕುಲ್ ಜಾಂವ್ಚೆಂ ನಾ” ಮ್ಹಣಾಲೊ ಟಿಪ್ಪು ಸುಲ್ತಾನ್. “ತ್ಯಾ ಖಾತಿರ್ ಎದೊಳ್‍ಚ್ ಸಬಾರ್ ತಕ್ಲ್ಯೊ ಝಡೊನ್ ಗೆಲ್ಯೊ; ತ್ಯಾ ಖಾತಿರ್‌ಚ್ ವರ್ತಿ ಚತ್ರಾಯ್ ಆಮಿ ಘೆತ್ಲ್ಯಾ ಆನಿ ರಾವ್ಳೆರಾಚ್ಯಾ ಸರ್ವ್ ರಾಕ್ವಲ್ಯಾಂಕ್ ಬದ್ಲಿ ಕೆಲ್ಯಾತ್. ತ್ಯಾ ಖಾತಿರ್‌ಚ್ ತುಮ್ಕಾಂಯೀ ಆಮಿ ಸಂಶಯಾಚೆರ್ ನಿರಾಯುಧ್ ಕರಯಿಲ್ಲೆಂ.”

“ಸಂಶಯಾಚೆರ್!”

“ವ್ಹಯ್. ಕೋಣ್‍ಗೀ ದೋಗ್ ಜಣ್, ಮ್ಹಜ್ಯಾ ಸರ್ದಾರಾಂಚೊ ವೇಸ್ ಆನಿ ನಾಂವ್ ಘೆವ್ನ್ ರಾವ್ಳೆರಾಂತ್ ಪ್ರವೇಶ್ ಜಾಂವ್ಕ್ ಪ್ರಯತ್ನ್ ಕರ್ತಾತ್ ಮ್ಹಣ್ ಚಿಂತ್ಲೆಂ ಆಮಿ. ತ್ಯಾ ಶಿವಾಯ್…”

“ತ್ಯಾ ಶಿವಾಯ್ – ಹುಜೂರ್?”

“ತ್ಯಾ ಶಿವಾಯ್, ತುಮಿ ದೊಗೀ ಇತ್ಲೆ ಜರೂರ್ ಯೇವ್ನ್ ಪಾವ್ತೆಲ್ಯಾತ್ ಮ್ಹಣ್ ಚಿಂತುಂಕ್ ನಾ ಆಮಿ. ಆನಿ ತ್ಯಾ ಶಿವಾಯ್…”

“ಹುಜೂರ್?”

“ಸರ್ದಾರ್ ಸಿಮಾಂವ್ಚಿ ಠೊಲಿ ಸೊಡ್ಲ್ಯಾರೀ ಸರ್ದಾರ್ ಯೂಸುಫಾಚೆ ತಾಬೆನ್ ಪಂಚ್ವೀಸ್ ಶಿಪಾಯ್ ಆಸಜಾಯ್ ಆಸ್‍ಲ್ಲೆ. ತುಮಿ ಥೊಡೆಚ್ ಜಣ್ ಆಯಿಲ್ಲೆ ಪಳೆವ್ನ್ ಆಮ್ಕಾಂ ದುಬಾವ್ ಮಾರ್ಲೊ.”

ಹೆಂ ಆಯ್ಕೊನ್ ಸರ್ದಾರ್ ಯೂಸುಫ್ ಆಲಿಚ್ಯಾ ಪಾಟಿಚ್ಯಾ ಕಣ್ಯಾಂತ್ಲ್ಯಾನ್ ಹಿಂವ್ ಚರ್ಲೆಂ. ತ್ಯಾ ತೆಕಿದ್ ಬಾದಶಹಾ ಫುಡೆಂ ಉಲಯ್ಲೊ:

“ಸರ್ದಾರ್ ಯೂಸುಫ್!”

“ಜೀ ಹುಜೂರ್!”

ಯೂಸುಫ್ ಉಬೊ ಜಾಲೊ.

“ಕಾಲ್ದಿ ಕಂಪ್ಣಿ ಶಿಪಾಯಾಂಕ್ ಘೆವ್ನ್ ಜರೂರ್ ಕುರಿಯೆಲಾಕ್ ವಚಜಾಯ್ ಮ್ಹಣ್ ತುಕಾ ಆಮಿ ಹುಕುಮ್ ದಿಲ್ಲಿ…”

“ಜೀ ಹುಜೂರ್! ತ್ಯಾ ಹುಕ್ಮೆ ಪ್ರಕಾರ್ ಕುರಿಯೆಲಾಕ್ ಹಾಂವ್ ಪಾವ್ಲೊಂ.”

“ತೆಂ ಆಮ್ಕಾಂ ಸಮ್ಜತಾ. ಪುಣ್ ಥಂಯ್ಸರ್ ಸರ್ದಾರ್ ಸಿಮಾಂವ್ ಮೆಳ್ತಚ್, ತಾಣೆಂ ಆನಿ ಕೈದ್ಯಾಂನಿ ಸುರಕ್ಷಿತ್ ಪಟ್ಟಣಾಕ್ ಪಾವಸರ್ ತಾಂಚ್ಯಾ ಸಾಂಗಾತಾ ಆಸಜಾಯ್ ಮ್ಹಣ್ ಫರ್ಮಾಯಿಲ್ಲೆಂ ಆಮಿ ಮ್ಹಣ್ ದಿಸ್ತಾ.”

“ವ್ಹಯ್ – ಜೀ ಹುಜೂರ್!”

“ದುಸ್ಮಾನ್ ಆನಿ ಅನ್ವಾರಾಂ ಚಡ್‍ಲ್ಲ್ಯಾ ಹ್ಯಾ ಕಾಳಾರ್ ಆಮ್ಚ್ಯಾ ಮೊಗಾಚ್ಯಾ ಆನಿ ವಿಶ್ವಾಸಿ ಸರ್ದಾರಾಂಚ್ಯಾ ರಕ್ಷಣಾಚಿ ವರ್ತಿ ಗರ್ಜ್ ಆಸಾ ಮ್ಹಣ್ ಸಮ್ಜಲ್ಲ್ಯಾಂವ್ ಆಮಿ.”

“ಮಾಫ್ ಕರಿಜಾಯ್ ಹುಜೂರ್!” ಸರ್ದಾರ್ ಸಿಮಾಂವ್ ಧಯ್ರ್ ಘೆವ್ನ್ ಮಧೆಂ ಉಲಯ್ಲೊ. “ದಕ್ಷಿಣಾಂತ್ ಆಮ್ಚ್ಯಾ ಹಾತಾಂತ್ ಆನ್ಯೇಕ್ಲೊ ಕೈದಿ ಸಾಂಪಡ್ಲೊ. ತಾಕಾ ಹಾಂಗಾಸರ್ ಹಾಡ್ಚಿ ಹುಕುಮ್ ನಾತ್‍ಲ್ಲ್ಯಾನ್, ಬಾದಶಹಾಚೊ ಸಂತೊಸ್ ಸಮ್ಜತಾ ಪರ್ಯಾಂತ್ ತಾಕಾ ಬೋಳೂರ್ ಠಾಣ್ಯಾಕ್ ಧಾಡುಂಕ್ ಹಾಂವೆಂ ಚಿಂತ್ಲೆಂ…”

“ಆನ್ಯೇಕ್ಲೊ ಕೈದಿ? ಕೋಣ್ ತೊ ಜಾವ್ಯೆತ್?”

“ತೊ, ಷೇರ್ ಖಾನ್ ಮ್ಹಳ್ಳ್ಯಾ ನಾಂವಾನ್ ಬಾದಶಹಾಂಚೊ ಠಕ್ಕಿ ಪ್ರತಿನಿಧಿ ಜಾವ್ನ್, ಬೋಳೂರ್ ಠಾಣ್ಯಾಂತ್ ಖಿಲ್ಲೆದಾರಾಚೊ ಅಧಿಕಾರ್ ಚಲಂವ್ಕ್ ಪ್ರಯತ್ನ್ ಕರ್ನ್ ಪರಾರಿ ಜಾಲ್ಲೊ…”

“ಕಿತೆಂ ಆಮಿ ಆಯ್ಕತಾಂವ್!” ಟಿಪ್ಪು ಸುಲ್ತಾನ್ ಉಟೊನ್ ಉಬೊ ಜಾಲೊ. ಧರ್ಣಿಕ್ ತಾಣೆಂ ಖೊಟ್ ಮಾರ್ಲಿ. “ಖಂಯ್ ತೊ ಪರಾರಿ ಜಾಲ್ಲೊ?”

“ದಕ್ಷಿಣಾಕ್” ಸರ್ದಾರ್ ಸಿಮಾಂವ್‍ಯೀ ಉಬೊ ಜಾಲೊ.

“ತಾಚೆಂ ನೀಜ್ ನಾಂವ್?”

“ತಾಚೆಂ ನೀಜ್ ನಾಂವ್ ಲಿಯಾಂವ್ ಜೋಸ್ ದಾಲ್ಮೇದಾ.”

“ಕೊಣಾ ತರ್ಫೆನ್ ಆನಿ ಕೊಣಾ ಖಾತಿರ್ ಖೆಳ್ ತೊ ಖೆಳ್ತಾಲೊ?”

“ತೊ ಆಪ್ಲ್ಯಾಚ್ ಫಾಯ್ದ್ಯಾ ಖಾತಿರ್ ಖೆಳ್ತಾಲೊ. ನಿಬಾಕ್ ಮಾತ್ರ್ ಕಣ್ಣಾನೂರ್ ಬೇಗಮ್ ಜಹಾನಾರಾಚ್ಯಾ ಆಸ್ಥಾನಾಂತ್ ತೊಪಾಸಿ ಜಾವ್ನ್ ಪಾಗ್ ತೊ ಘೆತಾಲೊ” ಮ್ಹಣಾಲೊ ಸರ್ದಾರ್ ಸಿಮಾಂವ್ ಚತ್ರಾಯೆನ್. “ತಾಕಾ, ಆನಿ ಆಮಿ ಹಾಂಗಾ ಕೈದಿ ಕರ್ನ್ ಹಾಡ್‍ಲ್ಲ್ಯಾ ಫಕೀರ್ ಮಹಮ್ಮದಾಕ್ ಸಂಬಂಧ್ ಆಸ್‍ಲ್ಲೊ ಮ್ಹಣ್ ಕಳೊನ್ ಯೆತಾ.”

“ವಿಚಿತ್ರಾಂ ವಯ್ರ್ ವಿಚಿತ್ರಾಂ!”

ಟಿಪ್ಪು ಸುಲ್ತಾನ್ ಪರ್ತ್ಯಾನ್ ಬಸ್ಲೊ.

“ತಸಲ್ಯಾಕ್ ತುವೆಂ ಥಂಯ್ಸರ್‌ಚ್ ಫಾಶಿ ವೊಡ್‍ಲ್ಲಿ ಜಾಲ್ಯಾರೀ ಆಮ್ಕಾಂ ಸಂತೊಸ್ ಜಾತೊ.”

“ತಾಕಾ ಬೋಳೂರ್ ಠಾಣ್ಯಾಚ್ಯಾ ಬಂಧಿಂತ್ ದವರುಂಕ್ ಧಾಡ್ಲಾ.”

“ಸದ್ದ್ಯಾಕ್ ತೊ ಥಂಯ್ ಕುಸೊಂದಿ.”

“ಆನಿ ಫಕೀರ್ ಮಹಮ್ಮದ್…”

“ತೊ ಹಾಂಗಾಸರ್ ಬಂಧಿಂತ್ ಆಸೊಂದಿ. ತಾಚೊ ವಿಚಾರ್ ಪಾಟ್ಲ್ಯಾನ್ ಅಮಿ ಕರ್ತಾಂವ್” ಮ್ಹಣೊನ್ ಟಿಪ್ಪು ಸುಲ್ತಾನ್ ಉಟ್ಲೊ.

“ಖಲೀಫ್ ದೌಲತಾಂತ್ ಆತಾಂ ಕೋಣ್ ಆಸಾ?” ವಿಚಾರ್ಲೆಂ ತಾಣೆಂ ಘುಂವೊನ್.

“ಸದ್ದ್ಯಾಕ್ ಸುಫೆದಾರ್ ಇಸ್ಮಾಯಿಲ್ ಬಾಬಾಕ್ ಅಧಿಕಾರ್ ಚಲಂವ್ಕ್ ತುಮ್ಚ್ಯಾ ನಾಂವಾನ್ ಹಾಂವೆಂ ಸಾಂಗ್ಲಾಂ.”

“ಬರೆಂಚ್. ತಾಚೊ ಹುದ್ದೊ ಆಮಿ ಮಂಜೂರ್ ಕರ್ತಾಂವ್. ಆತಾಂ ಆಮ್ಕಾಂ ಗರ್ಜೆಚ್ಯೊ ಹೆರ್ ಥೊಡ್ಯೊ ರಾಟಾವಳಿ ಆಸಾತ್.”

“ಹುಕುಮ್ ದಿಯಾ ಹುಜೂರ್!”

“ಆತಾಂ ತುಮಿ ತುಮ್ಚ್ಯಾ ಗೃಹಾಂಕ್ ವಚ್ಯೆತ್. ಫಕೀರ್ ಮಹಮ್ಮದಾಕ್ ಚತ್ರಾಯೆನ್ ಬಂಧೀಖಾನ್ಯಾಕ್ ಪಾವಿತ್ ಕರಾ. ಹೆರಾಂ ಕಡೆನ್ ಉಲಂವ್ಚೊ ಆಸ್ಪದ್ ತಾಕಾ ಆಸೊಂಕ್ ನಜೊ.”

“ಜೀ ಹುಜೂರ್!”

“ಆನಿ ತುಮಿ ದೊಗೀ ವಿಶೆವ್ ಘೆಯಾ…” ಮ್ಹಣಾಲೊ ತೊ ಮಿಶ್ಯಾಂಚೆರ್ ಹಾತ್ ಭೊಂವ್ಡಾವ್ನ್. “ಕುರಿಯೆಲ್ ಥಾವ್ನ್ ತುಮ್ಚೆ ಸರ್ವ್ ಶಿಪಾಯ್ ಯೇವ್ನ್ ಪಾವ್ತಾ ಪರ್ಯಾಂತ್ ವಿಶೆವ್ ಘೆಯಾತ್.”

“ಬಾದಶಹಾಂಚಿ ಹುಕುಮ್!”

“ಉಪ್ರಾಂತ್ ಆಮಿ ತುಮ್ಕಾಂ – ಪ್ರತ್ಯೇಕ್ ಜಾವ್ನ್ ಸರ್ದಾರ್ ಸಿಮಾಂವ್ಕ್ ಆಪಂವ್ಕ್ ಧಾಡ್ತಾಂವ್.”

“ಬಾದಶಹಾಂಚಿ ದಯಾ!”

“ತೆದಾಳಾ ತುವೆಂ, ಹ್ಯಾ ತಿಸ್ರೆ ಪಾವ್ಟಿಂಚ್ಯಾ ಜಯ್ತಾಚಿ ಸಗ್ಳಿ ಖಬರ್ ಆನಿ ಸರ್ವ್ ವಿವರ್ ಆಮ್ಕಾಂ ದೀಜಾಯ್ – ಆತಾಂ ವಚಾ.”

ತಿತ್ಲ್ಯಾರ್ ತೆಂ ಪ್ರಥಮ್ ಸನ್ನಿಧಾನ್ ಸಂಪ್ಲೆಂ.

ಸರ್ದಾರ್ ಸಿಮಾಂವ್ ಏಕ್ ಲಾಂಬ್ ಶ್ವಾಸ್ ಸೊಡುನ್ ಆನಿ ಸರ್ದಾರ್ ಯೂಸುಫ್ ಆಲಿ ಘಾಮ್ ಪುಸುನ್ ಭಾಯ್ರ್ ಆಯ್ಲೆ.

ಟಿಪ್ಪು ಸುಲ್ತಾನ್ ತಾಂಚಿ ಪಾಟ್ ಪಳೆವ್ನ್ ಚಿಂತುನ್ ರಾವ್ಲೊ. ಸರ್ದಾರ್ ಸಿಮಾಂವ್ ಹರ್ಯೆಕೆ ವಾಟೆನ್ ಜಯ್ತೆವಂತ್ ಜಾಂವ್ಚೊ ವಿಷಯ್ ತಾಕಾ ಏಕ್ ಸಮಸ್ಯಾಚ್ ದಿಸ್ಲಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel