ಸರ್ದಾರಾಚೆಂ ಸನ್ನಿಧಾನ್: ಪ್ರಸ್ತಾಪ್

ಮೊಗಾಳ್ ವಾಚ್ಪ್ಯಾಂನೊ ಆನಿ ಕೊಂಕ್ಣಿ ಅಭಿಮಾನಿಂನೊ, ಆಜ್ ಥಾವ್ನ್ ಹರ್ ಬ್ರೇಸ್ತಾರಾ, ವಿಜೆಪಿ ಸಲ್ಡಾನ್ಹಾಚ್ಯಾ ‘ದೆವಾಚ್ಯೆ ಕುರ್ಪೆನ್’ ಶಿಂಕ್ಣೆಂತ್ಲಿ ಪಾಂಚ್ವಿ ಕೃತಿ ‘ಸರ್ದಾರಾಚೆಂ ಸನ್ನಿಧಾನ್’ ಬುಡ್ಕುಲೊ ಇ-ಪತ್ರಾಂತ್ ಸಾಂಕಳ್ ಕಾಣಿಯೆ ರುಪಾರ್ ಫಾಯ್ಸ್ ಜಾತೆಲಿ. ವಿಜೆಪಿಚ್ಯಾ ಶತಮಾನೋತ್ಸವಾ ಸಂದರ್ಭಾರ್ ಆಮಿ ‘ಇಂಫೆರ್ನಾಚಿಂ ದಾರಾಂ’ ಆದ್ಲ್ಯಾ ವರ್ಸಾ ಪ್ರಕಟ್ ಕೆಲ್ಲಿ. ಆಬ್ಳೆ, ತಾಚ್ಯಾ ಅಭಿಮಾನಿ ವಾಚ್ಪ್ಯಾಂಚ್ಯಾ ವಿನತೆಕ್ ಲಾಗೊನ್, ‘ಸರ್ದಾರಾಚೆಂ ಸನ್ನಿಧಾನ್’ ಪ್ರಕಟ್ತಾಂವ್.

ಹಾಂತುಂಯೀ ಅಪರಿಮಿತ್ ಸಾಹಸಾಂ ಆಸಾತ್. ಪಯ್ಲ್ಯಾ ಅವಸ್ವರಾಂತ್ ಆದ್ಲ್ಯಾ ಕಾಣಿಯಾಂಚೊ ಸಾರಾಂಶ್ (ವಿಜೆಪಿನ್‍ಂಚ್ ಲಿಖ್‍ಲ್ಲೊ) ದಿಲಾ. ಹ್ಯಾ ಕಾಣಿಯೆಂತ್ ಝುಜ್ ಆಸಾ (ಮೈಸೂರ್ ಆನಿ ಕೊಡಗು ಸೈನಾಚಿ ಲಡಾಯ್), ತಲ್ವಾರಿಂ ಸಂಗಿಂ ಬಂದೂಕ್‍ಯೀ ಉಜೊ ವೊಂಕ್ತಾ. ಟಿಪ್ಪುಚ್ಯಾ ರಾವ್ಳೆರಾಚಿಂ ದೃಶ್ಯಾಂ, ತಾಚ್ಯಾ ಬೇಗಮೆ ಸಂಗಿಂ, ಧಾರಾಳ್ ಆಸಾತ್. ಝುಜಾಂತ್ ಕಠಿಣ್ ಘಾಯೆಲ್ಲೊ ಸರ್ದಾರ್ ಸಿಮಾಂವ್ ಭಿರಾಂಕುಳ್ ಪಿಡೆಂತ್ ವಳ್ವಳ್ತಾ. ತಿಶಿಲ್ಯಾನ್ ಟಿಪ್ಪು ಖುಬಾಳ್ತಾ, ಸಕ್ಡಾಂಚೆರ್ ದುಬಾವ್ತಾ. ಸಕ್ಡಾಂಚೆರ್ ಕಡಿವಾಣ್ ಘಾಲ್ತಾ. ತ್ಯಾ ಕರಾಳ್ ಪರಿಸ್ಥಿತೆಂತ್‍ಯೀ ಆಗ್ನೆಸ್ ಕುಂವರ್ನ್ ಟಿಪ್ಪುಕ್‍ಚ್ ಮಾಂಕೊಡ್ ಕರ್ತಾ! ವೆಗ್ಳ್ಯಾಚ್ ರಿತಿಚಿಂ ಸಾಹಸಾಂ, ಅದ್ಭುತ್ ದೃಶ್ಯಾಂ ಹಾಂತುಂ ಖಡಾಪಾನ್ ಸಾದರ್ ಕೆಲ್ಯಾಂತ್.

ಇತ್ಲೆಂ ಅತ್ಯದ್ಭುತ್ ಸಾಹಿತ್ಯ್ ಪ್ರಕಟ್ ಕರುಂಕ್ ಮೆಳ್‍ಲ್ಲೊ ಹೊ ಅವ್ಕಾಸ್ ಆಮ್ಚೊ ಸುಯೋಗ್ ಆನಿ ಆಮ್ಚೆಂ ಅದೃಷ್ಟ್‌ಚ್ ಸಯ್. ವಿಜೆಪಿಚ್ಯೊ ಕೃತಿಯೊ ಪ್ರಕಟ್ ಕರುಂಕ್ ಆಮ್ಕಾಂ ಪರ್ವಣ್ಗಿ ದಿಲ್ಲ್ಯಾ ತಾಚ್ಯಾ ಕುಟ್ಮಾಕ್ ಧಿನ್ವಾಸುನ್, ಆಭಾರ್ ಮಾನ್ತಾಂವ್.

ವಾಚಾ – ಆನ್ಯೇಕ್ ಸಾಹಸಿಕ್, ರೋಚಕ್ ಆನಿ ರೋಮಾಂಚಕ್ ಕೃತಿ, ಸರ್ವಶ್ರೇಷ್ಠ್ ಸಾಹಿತಿ ವಿ.ಜೆ.ಪಿ. ಸಲ್ಡಾನ್ಹಾನ್ ಲಿಖ್‍ಲ್ಲಿ ‘ಸರ್ದಾರಾಚೆಂ ಸನ್ನಿಧಾನ್’.

-ಸಂಪಾದಕ್

---

ಸರ್ದಾರ್ ಟಿಪ್ಪು ಸುಲ್ತಾನಾಚ್ಯಾ ಕಾಳಾರ್ ಕೆನರಾ ಕ್ರಿಸ್ತಾಂವಾಂಚೆರ್ ಆಯಿಲ್ಲೆ ತೆ ನಿಬ್ಬೊರ್ ಕಷ್ಟ್, ತಾಂಚಿ ಬಂದಡ್, ತಾಂಚ್ಯಾ ಭಾವಾಡ್ತಾಚಿ ಪರೀಕ್ಷಾ, ಆನಿ ಮಂಗ್ಳುರ್‍ಚ್ಯಾ ನಂತೂರ್ ಪಂಲ್ಗಾರ್ ಆಸ್ಚ್ಯಾ ತ್ಯಾ ಖುರ್ಸಾನ್ ಆಮ್ಕಾಂ ಉಗ್ಡಾಸ್ ಕರ್ಚೆಂ, ಆಮ್ಚ್ಯಾ ಹಜಾರೊಂ ಮ್ಹಾಲ್ಗಡ್ಯಾಂಚೆಂ ಕರುಣಾಭರಿತ್ ಮೋರ್ನ್ ಇತ್ಯಾದಿ ಆಮ್ಚ್ಯಾ ಕಾಳಾಚ್ಯಾ ಪಿಳ್ಗೆಕ್ ಕಳಿತ್ ವಾ ಉಗ್ಡಾಸಾಂತ್ ನಾತ್‍ಲ್ಲೆಂ. ಅಸಲ್ಯಾ ಸಂದರ್ಭಾರ್, ಲಗ್ಬಗ್ ಧಾ ವರ್ಸಾಂ ಆದಿಂ, ‘ದೆವಾಚ್ಯೆ ಕುರ್ಪೆನ್’ ಕಥಾ ಫಾಯ್ಸ್ ಜಾಲ್ಲಿ. ಉಪ್ರಾಂತ್ ‘ಬೆಳ್ತಂಗಡಿಚೊ ಬಾಲ್ತಜಾರ್’, ‘ಸರ್ದಾರಾಂಚಿ ಸಿನೊಲ್’ ಆನಿ ‘ಇಂಫೆರ್ನಾಚಿಂ ದಾರಾಂ’ ಫಾಯ್ಸ್ ಜಾತಚ್, ಕೆನರಾ ಕ್ರಿಸ್ತಾಂವಾಂಚ್ಯಾ ಬಂದಡೆ ಸಂಬಂಧಿ ಆಮ್ಚ್ಯಾ ಲೊಕಾ ಥಂಯ್ ಏಕ್ ನವೆಂಚ್ ಚೈತನ್ಯ್ ಆನಿ ವಾಜ್ಭಿ ಪ್ರಜ್ಞಾ, ಉದೆಲಿಂ.

ತ್ಯೊ ದೀಗ್ ಕಥಾ, ಐತಿಹಾಸಿಕ್ ತಶ್ಯೊ ಚಾರಿತ್ರಿಕ್ ಜಾಲ್ಲೆ ವರ್ವಿಂ, ಅಂತ್ಯ್ ನಾತ್‍ಲ್ಲ್ಯಾ ಚರಿತ್ರೆಪರಿಂಚ್ ಅಪೂರ್ಣ್ ದೆಕುನ್, ಫುಡ್ಲೆ ಭಾಗ್ ಆಸೊಂಕ್ ಜಾಯ್ ಮ್ಹಳ್ಳಿ ಆಶಾ ಆನಿ ಅಪೇಕ್ಷಾ ದರಬಸ್ತ್ ಆಯ್ಕೊಂಕ್ ಮೆಳ್ಳಿ. ವಾಚ್ಪ್ಯಾಂಚಿ ಹಿ ಆಶಾ ಆನಿ ಅಪೇಕ್ಷಾ ಥಾಂಬಂವ್ಚ್ಯಾಕ್ ಆತಾಂ ಹಿ ಕಾದಂಬರಿ, ‘ಸರ್ದಾರಾಚೆಂ ಸನ್ನಿಧಾನ್’ ಚಾಲು ಜಾತಾನಾ, ಸರ್ದಾರ್ ಸಿಮಾಂವ್ ಪೆದ್ರು ಪ್ರಭುಚ್ಯಾ ಅಪೂರ್ವ್ ಸಾಹಸಾಚ್ಯೊ ಆದ್ಲ್ಯೊ ಚಾರ್‌ಯೀ ಕಥಾ ವಾಚುನ್, ಹೊ ಥೊಡೊ ಸಾರಾಂಶ್ ಉಗ್ಡಾಸ್ ದವರುಂಕ್ ಫಾವೊ.

‘ದೆವಾಚ್ಯೆ ಕುರ್ಪೆನ್’ ಕಥಾ, ಪಟ್ಟಣಾಚ್ಯಾ ಬಂದಡೆ ಪ್ರಾಸ್ ಏಕ್ ದೋನ್ ವರ್ಸಾಂ ಆದ್ಲಿ. ತ್ಯಾ ವೆಳಾರ್ ಟಿಪ್ಪು ಸುಲ್ತಾನಾಚ್ಯಾ ಆಸ್ಥಾನಾಂತ್ ಆನಿ ರಿಸಾಲಾಂನಿ ಆಮ್ಚ್ಯಾ ಒಮ್ಜೂರಾಂತ್ಲೆ, ಮಂಗ್ಳುರಾಂತ್ಲೆ, ಬಾರ್ಕೂರಾಂತ್ಲೆ ಆನಿ ಬಂಟ್ವಾಳಾಂತ್ಲೆ ಮ್ಹಣೊನ್ ಸಬಾರ್ ಯುವಕ್ ಥರಾಂವಳ್ ಹುದ್ದೆ ಸಾಂಬಾಳುನ್ ಆಸ್‍ಲ್ಲೆ.

ತ್ಯಾ ತೆಂಪಾರ್ ಟಿಪ್ಪು ಸರ್ದಾರಾಚ್ಯಾ ಆಸ್ಥಾನಾಂತ್ ಚಡ್ ನಾಂವಾಡ್ದಿಕ್ ಜಾವ್ನ್ ದೋಗ್ ಮಾನಾಯ್ ಆಸ್‍ಲ್ಲೆ. ತಾಚ್ಯಾ ಸಗ್ಳ್ಯಾ ರಾಜ್ಯಾಂತ್ ‘ಸರ್ದಾರ್ ಸಿಮಾಂವ್’ ಆನಿ ‘ಸರ್ದಾರ್ ಆಂತೊನ್’ ಮ್ಹಳ್ಯಾರ್ ವರ್ತ್ಯಾ ಧಯ್ರಾಚಿಂ, ದರ್ಬಾರಾಚಿಂ ಆನಿ ಸಾಹಸಾಚಿಂ ನಾಂವಾಂ ಜಾವ್ನ್ ಆಸ್‍ಲ್ಲಿಂ. ತಾಂತುಂಯೀ, ‘ಸರ್ದಾರ್ ಸಿಮಾಂವ್’ ಮ್ಹಳ್ಯಾರ್ ಬಾದಶಹಾಕ್ ಚಡ್ ಮೊಗಾಚೊ ಆನಿ ಪಾತ್ಯೆಣೆಚೊ ಜಾವ್ನ್ ಆಸ್‍ಲ್ಲೊ.

ದೊಳ್ಯಾಂ ದೆಖಿಕ್ ಆನಿ ಭಾಯ್ಲ್ಯಾ ಸರ್ವ್ ವ್ಯವಹಾರಾಂನಿ, ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಆಂತೊನ್, ಮೊಗಾಚೆ ಮಿತ್ರ್. ಪುಣ್ ಸಂದರ್ಭ್ ಲಾಭ್ಲ್ಯಾರ್ ಸರ್ದಾರ್ ಸಿಮಾಂವ್ಕ್ ಉಸ್ಳಾಂವ್ಕ್, ದುಸ್ರೊ ಮೀಟ್ ಆನಿ ಖೊಲೊ ಘೆವ್ನ್ ಮ್ಹಳ್ಳೆಪರಿಂ ಗುಪಿತ್ ಉಪಾಯ್ ಸೊಧ್ತಾಲೊ.

ತಾಂಚಿಚ್ ತಿ ಐತಿಹಾಸಿಕ್ ಮೊಗಾಚಿ ವೀರ್ ಕಥಾ, ‘ದೆವಾಚ್ಯೆ ಕುರ್ಪೆನ್’, ಜಾಂತುಂ ದರ್ಬಾರಾಚ್ಯಾ ದಾವಾಕ್ ಲಾಗೊನ್, ಸರ್ದಾರ್ ಸಿಮಾಂವ್ ಸರ್ದಾರ್ ಆಂತೊನಿ ಕಡೆನ್ ಪಂಥ್ ಮಾರುನ್, ಬಂಟ್ವಾಳ್ಚ್ಯಾ ಮಹಂತ್ ರಫಾಯೆಲ್ ಮಿಂಗೆಲ್ ಕಾಮ್ತಿಚಿ ಕುಂವರ್ನ್ ಆಗ್ನೆಸ್ ಸಿಸಿಲಿಯಾ ಕಡೆನ್ ಕಾಜಾರ್ ಜಾತಲೊಂ ಮ್ಹಣೊನ್, ಟಿಪ್ಪುಕ್ ಖಬರ್ ನಾಸ್ತಾನಾ, ಪಟ್ಟಣಾ ಥಾವ್ನ್ ಭಾಯ್ರ್ ಸರ್ತಾ ಆನಿ ಪಾಟಾಪಾಟ್ ಚಿಂತಿನಾತ್‍ಲ್ಲ್ಯಾ ಭಿರಾಂಕುಳ್ ಆನಿ ಸಾಹಸಿಕ್ ಸನ್ನಿವೇಶಾಂಕ್ ಉಂಡಿ ಜಾತಾ ತರೀ, ‘ದೆವಾಚ್ಯೆ ಕುರ್ಪೆನ್’ ಬಚಾವ್ ಜಾತಾ.

ಹ್ಯಾ ಅಪೂರ್ವ್ ವಿವರಣಾಂಚಿಂ ಪ್ರಕರಣಾಂ ಕಾಣಿಯೆಂತ್ ವ್ಹಾಳೊನ್ ವೆತಾನಾ, ಸರ್ದಾರ್ ಆಂತೊನಿ ಥಂಯ್ ಆಕರ್ಷಿತ್ ಜಾಲ್ಲಿ ಹ್ಯಾ ಕಥೆಚಿ ನಾಯಕಿ, ಆಗ್ನೆಸ್ ಕುಂವರ್ನ್, ನಿಮಾಣೆಂ ಸರ್ದಾರ್ ಸಿಮಾಂವ್ಚ್ಯಾ ಖರ್‍ಯಾ ಮೊಗಾಕ್ ಆಶೆತಾನಾ, ಥೊಡಿ ಫರಾಮಸ್ ಘಡ್ತಾ. “ಆನಾ!” ಮ್ಹಣೊನ್ ತಡೀಪಾರ್ ಜಾಲ್ಲ್ಯಾ ಬಾಪಾಯ್ಚ್ಯಾ ವೆಂಗೆಂತ್ ಆಗ್ನೆಸ್ ಕುಂವರ್ನಿಚಿ ಮತ್ ಚುಕ್ತಾನಾ, ಬಂಟ್ವಾಳಾಕ್ ಆದೇವ್ಸ್ ಮಾಗ್‍ಲ್ಲೊ ಸರ್ದಾರ್ ಸಿಮಾಂವ್ಚೊ ಘೊಡೊ ಪಾಶಾರ್ ಜಾವ್ನ್ ಕಾಳೊಕಾಂತ್ ಅದೃಶ್ಯ್ ಜಾತಾ!

ಉಪ್ರಾಂತ್ ಥೊಡೊ ಕಾಳ್ ಸರ್ದಾರ್ ಸಿಮಾಂವ್ ಅಜ್ಞಾತ್ ಉರ್ಲೊ.

ತಿತ್ಲ್ಯಾರ್ ಬಂದಡ್ ಆರಂಭ್ ಜಾಲ್ಲಿ.

ವೀರ್‌ಪಣಾಚ್ಯಾ ಉಲ್ಯಾಕ್ ಪಾಳೊ ದೀನಾಸ್ತಾಂ ರಾವೊಂಕ್ ಜಾಯ್ನಾ ಮ್ಹಳ್ಳೆಪರಿಂ ಆನ್ಯೇಕಾ ಸಾಹಸಾಂತ್, ಜೆಂ, ‘ಬೆಳ್ತಂಗಡಿಚೊ ಬಾಲ್ತಜಾರ್’ ಕಥೆಂತ್ ವಾಚುಂಕ್ ಮೆಳ್ತಾ, ಸರ್ದಾರ್ ಸಿಮಾಂವ್ ಪಾತ್ರ್ ಘೆತಾ ಆನಿ ಸಿರಿಂಗಪಟ್ಣಾಕ್ ಪಾಟಿಂ ವೆತಾ ಆನಿ ಟಿಪ್ಪು ಸರ್ದಾರಾಚ್ಯಾ ಸರ್ಕಾರಾಂತ್ ಪಾತ್ರ್ ಘೆತಾ.

ಥಂಯ್ಸರ್ ಆರಂಭ್ ಜಾತಾ ‘ಸರ್ದಾರಾಂಚಿ ಸಿನೊಲ್’.

ಕೆನರಾ ಕ್ರಿಸ್ತಾಂವ್ ಸಮಾಜೆಚ್ಯಾ ಮಾಡ್ತಿರ್ಪಣಾಚೊ ಕಾಳ್ ತೊ.

ಕೊಂಕ್ಣಿ ಕ್ರಿಸ್ತಾಂವಾಂಚೆಂ ಉಗ್ತೆಂ ದೆವಾಸಾಂವ್ ವಾ ಧಾರ್ಮಿಕ್ ಕಾರ್ಯಾವಳ್ ನಿದ್ರೇಸ್ತ್ ಜಾಲ್ಲಿಂ. ತರೀ, ಥೊಡ್ಯಾ ವೀರ್ ಆನಿ ಧಯ್ರಾಧಿಕ್ ಕೊಂಕ್ಣಿ ಸ್ತ್ರೀ-ಪುರುಷಾಂಚ್ಯಾ ಸಾಧನಾ ವರ್ವಿಂ, ಸ್ತ್ರೀಯಾಂಚ್ಯಾ ಆನಿ ಭುರ್ಗ್ಯಾ-ಬಾಳಾಂಚ್ಯಾ ದುಖಾಂತ್, ಮಾಡ್ತಿರಾಂಚ್ಯಾ ರಗ್ತಾಂತ್, ತಶೆಂ ಇಗರ್ಜಾಂ ಬಾಂಧ್ಪಾಂಚ್ಯಾ ಭಸ್ಮಾಂತ್, ಭಾವಾಡ್ತಾಚೆಂ ಬಿಂ ಜಿವಾಳ್ ಉರ್‌ಲ್ಲೆಂ.

ತರೀ, ತಸಲ್ಯಾ ಬಂದಡೆಂತ್ಲ್ಯಾನ್ – ಉಜೊ ಆನಿ ತಲ್ವಾರಿ ಉಚಾಂಬಳ್ ಜಾಲ್ಲ್ಯಾ ತ್ಯಾ ಭಿರಾಂಕುಳ್ ಕಾಳಾಂತ್ಲ್ಯಾನ್ – ಆಮ್ಚಿ ಸಮಾಜ್ ಜಯ್ತೆವಂತ್ ಜಾತೆಲಿ ಮ್ಹಳ್ಳೊ ಭರ್ವಸೊ, ಆನಿ ತ್ಯಾ ಜಯ್ತಾಂತ್ ಹ್ಯಾ ಆಮ್ಚ್ಯಾ ಕರಾವಳಿಚ್ಯಾ ಜಿಲ್ಲ್ಯಾಂನಿ ಆಮ್ಚ್ಯಾ ಪುರ್ವಜಾಂಚೊ ಭಾವಾಡ್ತ್ ಪಾಲ್ವೊಂಚೊ ನಾ, ವಾ ರೊಮಾಚಿ ಇಗರ್ಜ್ ಹಾಂಗಾ ಥಾವ್ನ್ ತಡೀಪಾರ್ ಜಾಂವ್ಚಿ ನಾ, ಮ್ಹಳ್ಳಿಂ ಖುಣಾಂ ಜಿವಿಂ ಆಸ್‍ಲ್ಲಿಂ.

ಕೆನರಾ ಕ್ರಿಸ್ತಾಂವ್ ಸಮಾಜೆಚ್ಯಾ ಮಾಡ್ತಿರ್ಪಣಾಚೊ ಕಾಳ್ ತೊ.

ಕುರಿಯೆಲಾಂತ್ (ಮಂಗ್ಳುರಾಂತ್), ಬಂದಡ್ ಆರಂಭ್ ಜಾಲ್ಲ್ಯಾ ದೋನ್ ವರ್ಸಾಂ ಭಿತರ್ ಸಬಾರ್ ವಿಷಯ್ ಘಡೊನ್ ಗೆಲ್ಲೆ. 1784-85 ಇಸ್ವೆಂತ್ ಶೆಂಬೊರಾಂತ್ ನೊವೊದ್ ಕ್ರಿಸ್ತಾಂವ್ ಕುಳ್ವಾರಾಂಚೊ ವಿಭಾಡ್ ಜಾಲ್ಲೊ. ಅಂಕ್ವಾರ್ ಮರ್ಯೆಚಿ ವಿಶೇಸ್ ಭಕ್ತ್ ಆಸೊನ್, ಮಂಗ್ಳುರಾಂತ್ ಆನಿ ಭೊಂವಾರಿಂ ತಿಚ್ಯಾಚ್ ಮಾನಾಕ್ ಸಮರ್ಪುನ್ ಉಬಿಂ ಕೆಲ್ಲಿಂ ಆಮ್ಚಿಂ ದೆವಾಳಾಂ – ಬೋಳಾರಾಂತ್ಲೆಂ ಏಕ್ ಕೊಪೆಲ್ ಆನಿ ರೊಜಾರ್ ಮಾಯೆಚಿ ಇಗರ್ಜ್; ಹಂಪನ್ನಾಚ್ಯಾ ಕಾಟ್ಯಾ ಸಾಮ್ಕಾರ್ ಆಸ್‍ಲ್ಲಿ ಮಿಲಾಗ್ರ್ ಸಾಯ್ಬಿಣಿಚಿ ಇಗರ್ಜ್; ಉಳ್ಳಾಲ್ ಮೆರ್ಸಿ ಸಾಯ್ಬಿಣಿಚಿ ಇಗರ್ಜ್; ಫಿಂರ್ಗಿಪೆಟ್ ಮರ್ಯೆಚೆ ಮೊಂತಿಯೆರ್ ಆಸ್‍ಲ್ಲಿ ಇಗರ್ಜ್ (ಸೆಮಿನರಿ); ಮೊಗಾರ್ನಾಡ್ ದೆವಾಚ್ಯಾ ಮಾಯೆಚಿ, ಮುಲ್ಕಿ ಕೊಸೆಸಾಂವ್ ಸಾಯ್ಬಿಣಿಚಿ, ಕಿರೆಂ ರೆಮೆದ್ ಸಾಯ್ಬಿಣಿಚಿ, ಶಿರ್ವಾಂ ಸಾವೊದ್ ಸಾಯ್ಬಿಣಿಚಿ, ಆನಿ ಹೆರ್ ಸಬಾರ್, ಪುರ್ತ್ಯೊ ವಾ ಅರ್ಧ್ಯೊ ನಾಸ್ ಜಾಲ್ಲ್ಯೊ. ತರೀ, ಆಮ್ಚ್ಯಾ ಪುರ್ವಜಾಂಚೆಂ ಪರಾಕ್ರಮ್ ಆನಿ ಸಾಹಸ್, ಚಲಾಕಿ ಆನಿ ಬಹಾದುರಿ, ಮಾಜ್ವೊಂಕ್ ನಾ. ಸಲ್ವೊಂಕ್ ನಾ.

ಮಂಗ್ಳುರಾಂತ್, ತಶೆಂ, ಪಯ್ಶಿಲ್ಯಾಯೀ ಥೊಡ್ಯಾ ಬಳಾಧಿಕ್ ಕುಳ್ವಾರಾಂನಿ ಉರೊನ್, ಚುಕವ್ನ್ ಆನಿ ಲಿಪೊನ್ ಆಸ್‍ಲ್ಲ್ಯಾ ಮಾನಾಯಾಂನಿ ತಾಂಚಿಂ ಕಾರ್ಬಾರಾಂ ಉಣಿಂ ಕರುಂಕ್ ನಾಂತ್. ತುರ್ಕಿ ವಾ ಮಾಪ್ಳಿ ಶಿಪಾಯಾಂಕ್ ವಾ ತಾಂಚ್ಯಾ ದಲಾಲ್ಯಾಂಕ್ ಕರ್ಕರೆ ಆನಿ ಧೊಶಿ ಉಣ್ಯೊ ಜಾಂವ್ಕ್ ನಾಂತ್. ಸಮಾಜೆಚ್ಯಾ ದರ್ಬಾರಾಚೊ ಆನಿ ಸಮೃದ್ಧೆಚೊ ತೀನ್ ಪಾವ್ ಮಾತ್ರ್ ಜೀವ್ ಉರ್‌ಲ್ಲೊ ಜಾಲ್ಯಾರೀ ಮಾರಾಂ-ಫಾರಾಂಚೊ ತಸೊ ಆಮ್ಚ್ಯಾ ವೀರಾಂಚೊ ದಾವ್ ಉಣೊ ಜಾಂವ್ಕ್ ನಾ.

ಖೊಡೆ ಸಾಂಕ್ಳಿಂನಿ ಸಾಂಪಡ್ಲೆಲ್ಯಾಂ ಖಾತಿರ್ ಆನಿ ಸಮಡ್ತಿ ಖಾತಿರ್ – ಕಾವೂರ್ಚೊ ದುಮ್ಗಾ ಪೀಂತ್ ಆನಿ ಸಾಂಗಾತಿ, ತಶೆಚ್ ಪಯ್ಶಿಲ್ಯಾ ಠಿಕಾಣ್ಯಾಂನಿ ಉರ್‌ಲ್ಲೆ ಆಮ್ಚೆ ವೀರ್, ಜಾಂವ್ ತೆ ಪ್ರಭುಂಗೆಲೆ, ಕಾಮ್ತಿಂಗೆಲೆ, ಶೆಟಿಂಗೆಲೆ, ಶೆಣೈಂಗೆಲೆ ವಾ ನಾಯ್ಕಾಂಗೆಲೆ – ಬಂದಡೆ ವಿರೋಧ್ ಅಜ್ಞಾತಿಂ ಝುಜ್ ಚಲಯ್ತಾಲೆ ಆನಿ ಪ್ರತ್ಯಕ್ಷ್ ಮೊರ್ನಾ ಕಡೆನ್ ಜುಗಾರ್ ಖೆಳ್ತಾಲೆ.

ತ್ಯಾಚ್ ವೆಳಾರ್ ಮೊರ್ನಾಕ್ ಉಂಡಿ ಜಾಯ್ನಾಸ್ತಾಂ, ವಾ ಬಂದಡೆಂತ್ ಸಾಂಪಡ್ನಾಸ್ತಾಂ, ಅಥ್ವಾ ಲಿಪೊನ್ ಆಸ್ತಾಂ, ಆಮ್ಚ್ಯಾ ಸಮಾಜೆಂತ್ಲ್ಯೊ ಥೊಡ್ಯೊ ವೀರ್ ಸ್ತ್ರೀಯೊ, ಸಮಾಜೆಚೆ ಸೆವೆಂತ್ ಜಾಂವ್, ಧರ್ಮಾಚೆ ಸೆವೆಂತ್ ಜಾಂವ್, ಅಲಗ್ ಉರೊಂಕ್ ನಾಂತ್. ಕೊಡಿಯಾಳ್‍ಬೈಲ್ ಆನಿ ಭೊಂವಾರಿಂ, ಕುಂವರ್ನ್ ಎಲಿಜ್ ವೆರೊನಿಕಾ ಕುವೆಲ್-ತೆಲ್ಲಿಸ್; ಕಾವೂರಾಂತ್ ಸಾಲ್ವದೊರ್ ಆನಿ ದುಮ್ಗಾ ಪಿಂತಾಚಿ ಭಾಚಿ, ಕುಂವರ್ನ್ ರೆಮೆದ್ ಎಮಿಲಿಯಾನಾ ಪರ್ಬಿಣ್; ಬಂಟ್ವಾಳಾಂತ್ ಕುಂವರ್ನ್ ಆಗ್ನೆಸ್ ಸಿಸಿಲಿಯಾ ಕಾಮತ್ ಆನಿ ತಿಚಿ ಸಾಂಗಾತಿಣ್ ಡೊನಾ ಮರಿಯಾ ತೆರೆಜಾ ಗೋಮ್ಸ್ ದೆ ಲೂತೆಲಿಂ; ಕಲ್ಯಾಣ್ಪುರಾಂತ್ ಆನಿ ಭೊಂವಾರಿಂ ಕುಂವರ್ನ್ ಪಾವ್ಲಿನ್ ರೆಬೆಕ್ ಕೈತಾಂವ್ ಆನಿ ಕುಂವರ್ನ್ ಆಂಜೆಲಾ ದೆ ಕೂಟೊ ರೆಬೆಲ್ ಆನಿ ತಶೆಂಚ್ ಸಬಾರ್ ಜಣ್ ಬಿದ್ರುಲಾಂತ್, ಬಾರ್ಕೂರಾಂತ್, ಮುಲ್ಕಿಂತ್ ಆನಿ ಕಿರೆಂತ್, ನಾಂವ್ ನಾಸ್ತಾನಾ ತರೀ ವಾವ್ರುನ್, ಫುಡ್ಲ್ಯಾ ಸಂತತಿಚ್ಯಾ ಉಪ್ಕಾರಾಕ್ ಆನಿ ಉಜ್ವಾಡಾಕ್ ಪಾತ್ರ್ ಜಾಲ್ಲ್ಯೊ.

ತಸಲ್ಯಾ ತ್ಯಾ ಅಜ್ಞಾತ್ ಸೈನಾಕ್ ಗುಪಿತ್, ವರ್ತೆಂ ಧಯ್ರ್ ಆನಿ ಮೇಲ್‍ಫಾಂಕ್ತ್ ಆನಿ ಅಭಿಮಾನಾಚೊ ವೀರ್ ಜಾವ್ನಾಸ್‍ಲ್ಲೊ, ತೊಚ್ ಸರ್ದಾರ್ ಸಿಮಾಂವ್ ಪ್ರಭು.

ಸರ್ಕಾರಿ ಕಾಮಾನ್ ಕುರಿಯೆಲಾಕ್ ತೊ ಆಯಿಲ್ಲ್ಯಾ ವೆಳಾರ್ ವಿಚಿತ್ರ್ ಥರಾನ್ ವೆರೊನಿಕಾ ಕುವೆಲಿಚಿ, ದುಮ್ಗಾ ಪಿಂತಾಚಿ ಆನಿ ಸಾಂಗಾತ್ಯಾಂಚಿ ತಾಕಾ ಭೆಟ್ ಆನಿ ವಳಕ್ ಜಾಲಿ. ತಾಂಚೆಂ ಸಾಧನ್ ಆನಿ ಮನ್ ಸಮ್ಜೊನ್, ಬಿದ್ರುಲ್‍ಚ್ಯಾ ಭಾಗೆವಂತ್ ಖುರ್ಸಾಚೆಂ ಪ್ರತಿರೂಪ್ ತಾಣೆಂ ತಾಂಕಾಂ ಸರ್ದಾರಾಂಚಿ ಸಿನೊಲ್ (ಘುರ್ತ್) ಜಾವ್ನ್ ದಿಲ್ಲೆಂ.

ತೊಪಾಸಿ ಕಾರ್ಡೊಜಾಚ್ಯಾ ಘಾತಾನ್ ಆನಿ ಖಬ್ರಿ ಕುಂಞಿಕುಟ್ಟಿಚ್ಯಾ ಹಾತಾನ್ ದುಮ್ಗಾ ಪಿಂತಾಚೆ ಸಾಂಗಾತಿ ಕೈದಿ ಜಾಲೆ. ಉಪಾಯ್ ನಾಸ್ತಾನಾ, ಸರ್ಕಾರಾಚೊ ಪ್ರತಿನಿಧಿ ಜಾವ್ನ್, ಸರ್ದಾರ್ ಸಿಮಾಂವ್ನ್ ತಾಂಚಿ ಝಡ್ತಿ ಕರಿಜಾಯ್ ಪಡ್ಲಿ.

ಸಹಜ್ ಜಾವ್ನ್ ತಾಣೆಂ ತಾಂಕಾಂ ಮೊರ್ನಾಚಿ ಶಿಕ್ಷಾ ಫರ್ಮಾವ್ನ್ ಬಂಧಿಂತ್ ಘಾಲಯ್ಲೆ. ಪುಣ್ ತ್ಯಾಚ್ ರಾತಿಂ ವೇಸ್ ಬದ್ಲುನ್ ಆನಿ ಜೈಲ್ ಮೊಡುನ್, ಭೋವ್ ಚತುರಾಯೆನ್ ತಾಣೆಂಚ್ ತಾಂಕಾಂ ಸುಟ್ಕಾ ಲಾಭಯ್ಲಿ.

ತೊಪಾಸಿ ಕಾರ್ಡೊಜ್ ಆನಿ ಕುಂಞಿಕುಟ್ಟಿ ಕಾಬಾರ್ ಜಾಲೆ. ತೊಪಾಸಿನ್ ಅಪಹರ್ಸುನ್ ಅಪಾಯಾಂತ್ ಆಸ್‍ಲ್ಲಿ ಇಜಾಬೆಲ್ ತೆರೆಜ್, ಸುಟ್ಕಾ ಲಾಭೊನ್ ಪಾಟಿಂ ಆಯ್ಲಿ. ಮಾಗ್ಣ್ಯಾಚ್ಯೊ ಜಮಾತಿ ಆನಿ ಖುರ್ಸಾಚ್ಯಾ ಚಡಿತ್ ಭಕ್ತಿಚಿಂ ಖುಣಾಂ ವಿಸ್ತಾರ್ಲಿಂ.

ಟಿಪ್ಪು ಸರ್ದಾರಾಚ್ಯಾ ಹುಕ್ಮೆನ್, ಸರ್ದಾರ್ ಸಿಮಾಂವ್ ಬಾರ್ಕೂರ್ ಥಾವ್ನ್ ಪಾಟಿಂ ಕುರಿಯೆಲಾಕ್ ಆಯ್ಲೊ, ಆನಿ ಬೋಳೂರ್ ಠಾಣ್ಯಾಂತ್ಲ್ಯಾ ಖಲೀಫ್ ದೌಲತಾಂತ್ ದುಸ್ರೆ ಪಾವ್ಟಿಂ ಝಡ್ತೆಕ್ ಬಸ್ಲೊ. ಥಂಯ್ಸರ್‌ಯೀ ‘ಕ್ರಿಸ್ತಾಂವ್ ಕೈದಿ ಪರಾರಿ ಜಾಂವ್ಕ್ ಜವಾಬ್ದಾರ್’ ಮ್ಹಳ್ಳ್ಯಾ ವಿಷಯಾಚೆರ್ ಚಲಾಕೆಚೆಂ ತೀರ್ಪ್ ದೀವ್ನ್, ಕ್ರಿಸ್ತಾಂವಾಂಚ್ಯಾ ದಗ್ದೊಣೆಕ್ ಕಾರಣ್ ಜಾಲ್ಲ್ಯಾ ಥೊಡ್ಯಾ ಅಧಿಕಾರಿಂಚೊ ಪಾಡಾವ್ ತಾಣೆಂ ಕೆಲೊ. ಬಾದಶಹಾಕ್ ಮೆಚ್ವೊಂಚೆಂಚ್ ಮ್ಹಳ್ಳ್ಯಾಪರಿಂ ತೀರ್ಪ್ ತಾಣೆಂ ದಿಲೆಂ. ತೆದೊಳ್ ಪರ್ಯಾಂತ್, ಭಾಗೆವಂತ್ ಖುರ್ಸಾಚ್ಯಾ ಮಹಿಮೆನ್, ತಾಣೆಂಚ್ ದಿಲ್ಲಿ ತಿ ‘ಸರ್ದಾರಾಂಚಿ ಸಿನೊಲ್’ ಜಯ್ತೆವಂತ್ ಜಾಲ್ಲಿ.

ಹುಕ್ಮೆ ಪ್ರಕಾರ್, ವರ್ದಿ ಘೆವ್ನ್, ಸರ್ದಾರ್ ಸಿಮಾಂವ್ ಸಿರಿಂಗಪಟ್ಟಣಾಕ್ ಪಾಟಿಂ ಗೆಲೊ. ಥಂಯ್ಸರೀ ಏಕ್ ವಿಚಿತ್ರ್ ಆನಿ ಭಿರಾಂಕುಳ್ ದೃಶ್ಯ್ ತಾಣೆಂ ಪಳೆಲೆಂ. ಚಿತ್ರ್‌ಹಿಂಸಾ ಭೊಗುನ್ ವಿದ್ರೂಪ್ ಜಾಲ್ಲೊ ಮೊಬ್ಲಿ ಆಂತೊನ್ ಶೆಣೈ, ಗಾಡ್ವಾಚ್ಯಾ ಪಾಟಿರ್ ಥಾವ್ನ್, ಶಿಮ್ಟೆಕ್ ಫುಡ್ ಕರ್ನ್, ಸುಲ್ತಾನಾಕ್ ಥೊಡಿಂ ಭಿರಾಂಕುಳ್ ಉತ್ರಾಂ ಉಡವ್ನ್, ಪಡೊನ್ ಮೆಲೊ.

ತ್ಯಾ ಮೊರ್ನಾ ವರ್ವಿಂ, ಆನಿ ತ್ಯಾ ಉತ್ರಾಂ ವರ್ವಿಂ, ಟಿಪ್ಪು ಸುಲ್ತಾನಾಚೆಂ ಕಠಿಣ್ ಮನ್ ಚಿಕ್ಕೆ ಬದ್ಲೊಂಚಿಂ ಖುಣಾಂ ದಿಸೊನ್ ಆಯ್ಲಿಂ. ಮೊಬ್ಲಿ ಆಂತೊನ್ ಶೆಣೈಕ್ ಶಿಕ್ಷಾ ಲಾಯಿಲ್ಲ್ಯಾ ಕೊತ್ವಾಲಾಕ್ ಆನಿ ಶಿಪಾಯಾಂಕ್ ತಿಚ್ ಶಿಕ್ಷಾ ತಾಣೆಂ ಫರ್ಮಾಯ್ಲಿ.

ಪುಣ್ ಸರ್ದಾರ್ ಸಿಮಾಂವ್ಚೊ ಆಯೋಗ್ ತಿತ್ಲ್ಯಾರ್ ಆಖೇರ್ ಜಾಂವ್ಕ್ ನಾ. ಬಾದಶಹಾನ್ ತಾಚೆ ಥಂಯ್ ಶಿಫಾರಸ್ ಉಚಾರ್ಲಿ ಜಾಲ್ಯಾರೀ, ತಾಚ್ಯಾ ಸುರಕ್ಷಿತಾಯೆಚೊ ಫುಡಾರ್ ಮಿಸ್ತೆರ್‌ಚ್ ಜಾವ್ನ್ ಉರ್ಲೊ.

ಸರ್ದಾರಾಂಚಿ ಸಿನೊಲ್ ತೆದೊಳ್ ಪರ್ಯಾಂತ್ ಜಯ್ತೆವಂತ್ ಜಾಲ್ಲಿ ಖರಿ. ತಾಣೆಂ ದುಮ್ಗಾ ಪಿಂತಾಕ್ ದಿಲ್ಲೆಂ ತೆಂ ಅರ್ಲುಕೆಚೆಂ ಅರ್ಧ್ ಗಾಂವಾಂತ್ ಆತಾಂ ವೆರೊನಿಕಾ ಕುವೆಲಿ ಕಡೆನ್ ಆಸ್‍ಲ್ಲೆಂ. ತಿಂ ದೊನೀ ಅರ್ಧಾಂ ಪರತ್ ಸಾಂಗಾತಾ ಕಂಯ್ ಆನಿ ಖಂಯ್ ಮೆಳ್ತಿತ್ ಮ್ಹಳ್ಳೆಂ ಸವಾಲ್ ಉರ್‌ಲ್ಲೆಂ.

ನಿಜಾಯ್ಕೀ, ತ್ಯಾ ಬಾರಾ ವರ್ಸಾಂ ಆದಿಂ ಒಮ್ಜುರಾಂತ್ ಫಿಂರ್ಗಿ ವಿಗಾರ್ ಜಾವ್ನ್ ಆಸ್‍ಲ್ಲ್ಯಾ ಪಾದ್ರ್ ಆಂತೊನಿಯೊ ಮೆಲ್ಖಿಯೊರ್ ಲೋಬೊ ದೆ ಸೆರೂಲಾನ್ ತಾಕಾ ದಿಲ್ಲ್ಯಾ ತ್ಯಾ ವಿಚಿತ್ರ್ ಅರ್ಲುಕೆಚಿಂ ಅರ್ಧಾಂ, ಪರತ್ ಸಾಂಗಾತಾ ಮೆಳ್ಚ್ಯಾ ಆದಿಂ, ಭೊಂವ್ತಿಂ, ಭೊಂವಾರಿಂ, ಆನಿ ಪಾಯಾಂ ಥಳಾ, ‘ಇಂಫೆರ್ನಾಚಿಂ ದಾರಾಂ’ ಉಗ್ತಿಂ ಜಾಂವ್ಕ್ ಆಸಾತ್ ಮ್ಹಣ್ ತೊ ನೆಣಾಸ್‍ಲ್ಲೊ.

ತಶಿ ಉಗ್ತಿ ಜಾಲಿ ‘ಇಂಫೆರ್ನಾಚಿಂ ದಾರಾಂ’ ಕಥಾ.

ವಯ್ಲೆಂ ದೃಶ್ಯ್, ಮೊಬ್ಲಿ ಆಂತೊನ್ ಶೆಣೈಚೆಂ ಮಾಡ್ತಿರಾಚೆಂ ಮೋರ್ನ್, ಜಾಲ್ಯಾ ಉಪ್ರಾಂತ್ ಟಿಪ್ಪು ಸುಲ್ತಾನಾನ್ ಸರ್ದಾರ್ ಸಿಮಾಂವ್ಕ್ ರಾವ್ಳೆರಾಂತ್ಲ್ಯಾ ಆಪ್ಲ್ಯಾ ಖಾಸ್ಗಿ ಕಮ್ರಾಕ್ ಆಪಯ್ಲೊ. ಆನಿ ಥಂಯ್ಸರ್ ಟಿಪ್ಪು ಸುಲ್ತಾನ್ – ಅಶಿ ಥೊಡೆ ಪಾವ್ಟಿಂ ತಾಚಿ ಸವಾಯ್ ಆಸ್‍ಲ್ಲಿ – ರಶೀಮಾಂತ್ ಗುಟ್ಲಾಯಿಲ್ಲ್ಯಾ ಭಾಲಿಯೆಪರಿಂ ಥೊಡಿಂ ಗೋಡ್ ಉತ್ರಾಂ ಉಲಯ್ಲೊ.

“ತುಂ ಜಾಣಾಂಯ್” ಮ್ಹಣಾಲೊ ತೊ. “ಥೊಡ್ಯಾ ತೆಂಪಾ ಆದಿಂ ಆಮ್ಚೊ ಪ್ರತಿನಿಧಿ ಜಾವ್ನ್ ಕುರಿಯೆಲಾಕ್ ತುಂ ಗೆಲ್ಲೊಯ್.”

“ವ್ಹಯ್ ಹುಜೂರ್.”

“ವಸೂಲೆಚೆಂ ಕಾಮ್ ಬರ್‍ಯಾನ್ ಜಾಲಾಂ.”

“ಬಾದಶಹಾ ತಶೆಂ ಚಿಂತಾತ್ ಜಾಲ್ಯಾರ್ ಸೆವಕಾಕ್ ಸಂತೊಸ್.”

“ಆಮ್ಕಾಂಯೀ ಸಂತೊಸ್. ತ್ಯಾ ಶಿವಾಯ್ – ತ್ಯಾಚ್ ವೆಳಾರ್ ಆಮ್ಚೆ ಖಬ್ರಿ ಆನಿ ಗೂಢಚಾರ್, ಕುರಿಯೆಲಾಂತ್ ಹುಶಾರ್ ಆಸ್‍ಲ್ಲ್ಯಾನ್, ಥೊಡೆ ಪೊಕ್ರಿ ಆನಿ ರಾಜ್‍ದ್ರೋಹಿ ನಸ್ರಾನಿ ಸಾಂಪಡ್ಲೆ ಆನಿ ಖಲೀಫ್ ದೌಲತಾಂತ್ ಝಡ್ತೆಕ್ ಉಬೆ ಜಾಲೆ.”

“ಜೀ ಹುಜೂರ್” ಸರ್ದಾರ್ ಸಿಮಾಂವ್ಚ್ಯಾ ಪಾಟಿಚ್ಯಾ ಕಣ್ಯಾಂತ್ಲ್ಯಾನ್ ಹಿಂವ್ ಚರೊಂಕ್ ಲಾಗ್ಲೆಂ.

“ಆನಿ ತ್ಯಾ ವೆಳಾರ್” ಉಲಯ್ಲೊ ತೊ ಮೈಸೂರ್‍ಚೊ ವಾಗ್. “ಆಮ್ಚೊ ಪ್ರತಿನಿಧಿ ಜಾವ್ನ್ ತುವೆಂ ದಿಲ್ಲೆಂ ತೆಂ ಖಡಕ್ ನಿತಿಚೆಂ ಫರ್ಮಾಣ್ ಆಮಿ ಭೋವ್ ಮೆಚ್ವಲ್ಯಾಂವ್.”

ಸರ್ದಾರ್ ಸಿಮಾಂವ್ ಉಲಂವ್ಕ್ ನಾ. ತಾಕಾ ಧಯ್ರ್ ಮೆಳೊಂಕ್ ನಾ.

“ಪುಣ್” ಮುಖಾರ್ಸಿಲೆಂ ಟಿಪ್ಪುನ್. “ಶಿಕ್ಷೆಕ್ ರಾಕೊನ್ ಬೋಳೂರ್‍ಚ್ಯಾ ಬಂಧಿಖಾನ್ಯಾಂತ್ ಕೈದ್ ಆಸ್‍ಲ್ಲೆ ತೆ ನಸ್ರಾನಿ ಅಪ್ರಾಧಿ ಸಗ್ಳೆ ನಪಂಯ್ಚ್ ಜಾಲೆ!” ಧರ್ಣಿಕ್ ಖೊಟ್ ಮಾರ್ಲಿ ತಾಣೆಂ. “ಥಂಯ್ಸರೀ ತುವೆಂ ಕೆಲ್ಲೆಂ ಕಾಮ್ ಪಸಂದ್ ಜಾಲಾಂ – ಝಡ್ತೆ ಪ್ರಕಾರ್ ಫರ್ಮಾಣ್… ತರೀ…”

“ತರೀ… ಹುಜೂರ್?”

“ತರೀ ಆಮಿ ಆದಿಂಚ್ ಮ್ಹಳ್ಳೆಪರಿಂ – ಕುರಿಯೆಲಾಂತ್ ಹ್ಯಾ ಪಾವ್ಟಿಂ ಸಂಭವ್‍ಲ್ಲಿಂ ಘಟನಾಂ ಆಮ್ಚ್ಯಾ ನಿತಿಚಿಂ ಖೆಳ್ಕುಳಾಂ ಕರ್ತಾತ್ ಮ್ಹಳ್ಳೆಂ ನೀಜ್… ದೆಕುನ್ ಪರತ್ ಕುರಿಯೆಲಾಕ್ ತುವೆಂ ವಚಜಾಯ್.”

“ಬಾದಶಹಾಚೆಂ ಕಸಲೆಂಯೀ ಫರ್ಮಾಣ್ ಜಾರಿ ಕರುಂಕ್ ಖಾಲ್ತೊ ಸೆವಕ್ ಕೆದಾಳಾಯೀ ತಯಾರ್.”

“ತಯಾರ್ ಆಸ್ಲ್ಯಾರ್ ಮಾತ್ರ್ ಪಾವನಾ. ಹ್ಯಾ ಪಾವ್ಟಿಂಯೀ ತುವೆಂ ಖಂಡಿತ್ ಜಾವ್ನ್ ಜಿಕಜಾಯ್..! ವಿಚಿತ್ರ್ ಕಿತೆಂ ಮ್ಹಳ್ಯಾರ್ – ಹ್ಯಾ ಸರ್ವ್ ಗಲಾಟ್ಯಾಂತ್ ಉರ್ವಾಚ್ಯಾ ಮೊಳ್ಯಾಂತ್ ದಾಡ್ ಘಾಲ್ಲ್ಯಾ ವೆಳಾರ್ ಮೆಲ್ಲ್ಯಾ ಎಕ್ಲ್ಯಾಕ್ ಸೊಡ್ಲ್ಯಾರ್, ಹೆರ್ ನಸ್ರಾನಿ ಕೊಣೀ ಮೊರೊಂಕ್ ನಾಂತ್! ಸಾಂಪಡ್ಲೆಲೆ ಗ್ರಾಯ್ಕ್ ಜಾಲ್ಯಾರೀ, ತುವೆಂ ಫರ್ಮಾಯಿಲ್ಲಿ ಶಿಕ್ಷಾ ಭೊಗುಂಕ್ ಪಾವೊಂಕ್ ನಾಂತ್..! ದೆಕುನ್ ಪರ್ತ್ಯಾನ್ ತುವೆಂ ಕುರಿಯೆಲಾಕ್ ವಚೊನ್ ಹೊ ಮಿಸ್ತೆರ್ ಉಗ್ತೊ ಕರಿಜಾಯ್!”

“ಜೀ ಹುಜೂರ್!”

“ಎದೊಳ್ಚೆಪರಿಂಚ್ – ತಿಸ್ರೆ ಪಾವ್ಟಿಂಯೀ ಸಲ್ವನಾಕಾ!”

ತಶೆಂ – ಇಂಫೆರ್ನಾಚ್ಯಾ ದಾರಾಂಚೆಂ ಖುಣ್ ಮೆಳೊನ್ ಸರ್ದಾರ್ ಸಿಮಾಂವ್ ಪರತ್ ಕುರಿಯೆಲಾಕ್ ಆನಿ ತೆನ್ಕಾಕ್ ಪಾವ್ಲೊ…. ಪುಣ್ ಜಾಯ್ತೆಂ ಘಡ್ಲೆಂ… ಖಿಲ್ಲೆದಾರ್ ಪರಾರಿ ಜಾಲ್ಲೊ, ಕುಂವರ್ನ್ ವೆರೊನಿಕಾ ಕುವೆಲ್ ನಪಂಯ್ಚ್ ಜಾಲ್ಲಿ, ಇಜಾಬೆಲ್ ತೆರೆಜಾಕ್ ಪರತ್ ಇಜಾ ಮೆಳ್‍ಲ್ಲಿ…

ಇತ್ಯಾದಿ ಆಸ್ತಾಂ, ಭೆಟ್ತಾತ್ ವೆರೊನಿಕಾ ಆನಿ ಆಗ್ನೆಸ್! ಸರ್ದಾರ್ ಸಿಮಾಂವ್ ಜಾತಾ ವಿಚಿತ್ರ್ ರಾಕ್ವಲಿ..! ರುಜು ಜಾತಾ – ‘ವಿಚಿತ್ರ್ ನೀಜ್ ಸ್ತ್ರೀಯೆಚೆಂ ಕಾಳಿಜ್…’ ಜೀವನ್ಮರಣಾಚಿ ಲಡಾಯ್… ಘಡಿತಾಂಚೊ ಗೊಂದೊಳ್… ತರೀ, ಸಿನೊಲೆಚೆಂ ಸಂರಕ್ಷಣ್… ಮೊರ್ನಾಚ್ಯಾ ತಣಿರ್ ಭಯ್ಣಿಚಿ ಭೆಟ್..!

ತಿತ್ಲೆಂ ಸರ್ವ್ ಜಾವ್ನ್, ಟಿಪ್ಪುಚಿ ಹುಕುಮ್ ಸಾರ್ಕಿ ಪಾಳುನ್, ಸರ್ದಾರ್ ಸಿಮಾಂವ್, ಯೂಸುಫ್ ಆಲಿ ಆನಿ ಪಾತ್ಯೆಣೆಚ್ಯಾ ಧಾ ಜಣ್ ಶಿಪಾಯ್, ಫಕೀರ್ ಮಹಮ್ಮದಾಕ್ ಘೆವ್ನ್ ಪಟ್ಟಣಾಕ್ ಭಾಯ್ರ್ ಸರ್ಲೆ.

ಪುಣ್ ಇಂಫೆರ್ನಾಚಿಂ ದಾರಾಂ ಉಗ್ತಿಂಚ್ ಉರ್ಲಿಂ. ಫುಡೆಂ ಜಾಯ್ತೆಂ ಘಡೊಂಕ್ ಆನಿ ‘ಮೊಗಾಚಿಂ ಮಹಿಮಾ’ ಜಾರಿ ಜಾಂವ್ಕ್ ಆಸ್‍ಲ್ಲಿಂ…

ತೆಂ ಕಥನ್ ಆನಿ ವರ್ಣನ್ ದಿತಾ ಹಿ ಕಾದಂಬರಿ – ‘ಸರ್ದಾರಾಚೆಂ ಸನ್ನಿಧಾನ್’ ಜಾಂತುಂ, ‘ದೆವಾಚ್ಯೆ ಕುರ್ಪೆನ್ ಕಾಣಿಯೆಂತ್ ಆರಂಭ್ ಜಾಲ್ಲೊ ತೊ ಮೋಗ್ ತಲ್ವಾರಿಂ ಮಧ್ಲ್ಯಾನ್, ಉಜ್ಯಾಂತ್ಲ್ಯಾನ್ ಆನಿ ಅನ್ವಾರಾಂತ್ಲ್ಯಾನ್ ಪಾಶಾರ್ ಜಾವ್ನ್ ಸಂಪದತಾ!

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel