ಇಂಫೆರ್ನಾಚಿಂ ದಾರಾಂ – 13: ನವಿಚ್ ಶಿರಿಗುಂಡಿ

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 13
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 13: ನವಿಚ್ ಶಿರಿಗುಂಡಿ

“ನಿಜಾಯ್ಕಿ ತುಮ್ಚ್ಯಾ ಭೆಟೆಕ್ ಆಮಿ ಯೇಂವ್ಕ್ ನಾಂವ್” ಮ್ಹಣಾಲೊ ಸರ್ದಾರ್, ಚಿಕ್ಕೆ ಆಂಬೊಟ್ ಸ್ವರಾನ್. “ದಕ್ಷಿಣಾಕ್, ತುರ್ತಾಚ್ಯಾ ಥೊಡ್ಯಾ ಕಾಮಾನ್ ಆಮಿ ವೆತಾಲ್ಯಾಂವ್. ಹಾಂಗಾಸರ್, ತುಮ್ಚೆ ಥಾವ್ನ್ ಆಮ್ಕಾಂ ಉಪ್ಕಾರಾಕ್ ಪಡ್ಚಿ ಕಾಂಯ್ ಖಬರ್ ಮೆಳ್ತಾ ಜಾಲ್ಯಾರ್ ಪಳೆಯಾಂ ಮ್ಹಣ್ ಹಾಂಗಾ ರಾವ್ಲ್ಯಾಂವ್.”

“ಓಹೋ, ಜರೂರ್!” ಹಾಸ್ಲೊ ರಾಜಾ, ಆಪ್ಲ್ಯಾ ಜಾಂಗ್ಲಾಕ್, ಕುಸ್ತೆಗಾರಾಪರಿಂ ಥಾಪ್ ಮಾರ್ನ್. “ಟಿಪ್ಪು ಸುಲ್ತಾನಾ ಖಾತಿರ್ ಕಸಲಿ ಖಬರ್ ಜಾಲ್ಯಾರೀ ಹಾಡವ್ನ್ ದೀಂವ್ಕ್, ಆನಿ ಪ್ರತ್ಯೇಕ್ ಜಾವ್ನ್ ತಾಚ್ಯಾ ಖಾಸ್ಗಿ ಸರ್ದಾರಾನ್ ಆಮ್ಕಾಂ ಭೆಟ್‍ಲ್ಲ್ಯಾ ಖಾತಿರ್ ತಾಕಾ ಖುಶಿ ಕರುಂಕ್ ಆಮಿ ಕೆದಾಳಾಯೀ ತಯಾರ್!”

“ಭೋವ್ ಸಂತೊಸ್” ಮ್ಹಣಾಲೊ ಸರ್ದಾರ್ ಅಮ್ರುಕೊ ಹಾಸೊನ್. “ತುಮ್ಚ್ಯಾ ಬರ‍್ಯಾ ಮನಾ ಖಾತಿರ್, ಬಾದಶಹಾ ತುಮ್ಕಾಂ ಋಣಿ ಜಾವ್ನ್ ಆಸ್ತಲೊ.”

“ಆಸೊಂದಿ” ರಾಜಾ ಚಿಕ್ಕೆ ಮೋವ್ ಜಾಲೊ. “ತುಮಿ ಆಯ್ಕೊಂಕ್ ಆತುರಾಯ್ ದಾಕಯಿಲ್ಲಿ ಖಬರ್ ಕಸಲಿ ಜಾವ್ಯೆತ್?”

“ಬಾದಶಹಾಚ್ಯಾ ಕುರಿಯೆಲ್ ಬಂದ್ರಾಂತ್, ನೀಲೇಶ್ವರ್‌ಚ್ಯಾ ರಾಯಾಚಿ ಮಂಜಿ ಲಂಗರ್ ಮಾರ್ನ್ ಆಸ್‍ಲ್ಲಿ. ತಾಂತುಂ, ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಸರ್ಕಾರಾಚ್ಯಾ ಥೊಡ್ಯಾ ವಿದ್ರೋಹಿಂಕ್ ಆಸ್ರೊ ದಿಲ್ಲೊ ಮ್ಹಣ್ ಆಮ್ಕಾಂ ಖಬರ್ ಆಸಾ…”

“ಆಹಾಂ! ಮ್ಹಳ್ಯಾರ್… ತ್ಯಾ ಆರೋಪಾಕ್ ಆನಿ ಆಮ್ಕಾಂ ಕಿತೆಂ ಸಂಬಂಧ್ ಆಸ್ಯೆತ್?” ವಿಚಾರಿಲಾಗ್ಲೊ ರಾಜಾ, ಚಿಕ್ಕೆ ಗರಮ್ ಜಾಲ್ಲೆಪರಿಂ ನಟನ್ ದಾಕವ್ನ್. ತಾಚೆಂ ನಟನ್‍ಯೀ ಸರ್ದಾರಾಕ್ ಝಳ್ಕಲೆಂ.

“ತುಮ್ಕಾಂ ಕಸಲೊಚ್ ಸಂಬಂಧ್ ನಾ ಮ್ಹಣ್ ಆಮಿ ಪಾತ್ಯೆತಾಂವ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಗಜಾಲ್ ಇತ್ಲಿಚ್: ತ್ಯಾ ರಾಜ್‍ದ್ರೋಹಿಂಕ್ ಕೈದ್ ಕರ್ಚ್ಯಾ ಖಾತಿರ್, ಆಮ್ಚ್ಯಾ ಸರ್ಕಾರಾಚ್ಯಾ ಶಿಪಾಯಾಂನಿ ಪ್ರಯತ್ನ್ ಕರ್ಚ್ಯಾ ಆದಿಂಚ್ ತಾಣಿಂ ಚುಕವ್ನ್ ಕಾಣ್ಗೆಲಾಂ. ತಾಂಚೊ ಮುಖೆಲಿ ಎಕ್ಲೊ ಚುಕಾರಿ ಮಾರ್ನ್ ತೆನ್ಕಾಕ್ ಆಯ್ಲಾ ಮ್ಹಣ್ ಆಮಿ ಆಯ್ಕಲಾಂ. ದೆಕುನ್ ತಾಚಿ ಕಾಂಯ್ ಖಬರ್ ಮೆಳ್ತಾ ಜಾಲ್ಯಾರ್ ತಿ ಘೆಂವ್ಕ್ ಆಮಿ ಆಯ್ಲ್ಯಾಂವ್.”

“ಪುಣ್ ಅಪ್ರಾಧಿ ವ್ಹಯ್ ಜಾಲ್ಯಾರ್, ತಸಲ್ಯಾಂಕ್ ಧರುಂಕ್ ಜಾಯ್ ತಿತ್ಲೆ ಶಿಪಾಯ್ ಸಾಂಗಾತಾ ನಾಸ್ತಾನಾ ತುಮಿ ಆಯಿಲ್ಲೆಂ ಪಳೆಲ್ಯಾರ್…”

“ಆಮಿ ಖಬರ್ ಘೆಂವ್ಕ್ ಆಯಿಲ್ಲ್ಯಾಂವ್ – ಝುಜೊಂಕ್ ಯೇಂವ್ಕ್ ನಾಂವ್” ಮ್ಹಣಾಲೊ ಸರ್ದಾರ್, ಉತ್ರಾಂ ಜೊಕುನ್. “ತ್ಯಾ ಶಿವಾಯ್ ಹಾಂಗಾ ಥಾವ್ನ್ ನೀಲೇಶ್ವರ್ ಉತ್ರೊನ್ ಕಣ್ಣೂರ್ ಪರ್ಯಾಂತ್‍ಯೀ, ಬಾದಶಹಾಚೆ ಮಿತ್ರ್ ಆನಿ ಆಶ್ರಿತ್ ಗಾಂವ್ ಆಸ್‍ಲ್ಲ್ಯಾನ್ – ಗರ್ಜೆ ತೆಕಿದ್ ಪುಣೀ ತಾಂಚ್ಯಾ ಜಣಾಂಚಿ ಸಹಾಯ್ ಆಮ್ಕಾಂ ಮೆಳತ್ ಮ್ಹಣ್ ದಿಸ್ತಾ.”

“ಕೊಣ್ಣಾ’ಬಾ… ತೆಂ ಆಮ್ಚ್ಯಾನ್ ಸಾಂಗೊಂಕ್ ಜಾಯ್ನಾ” ಮ್ಹಣಾಲೊ ರಾಜಾ, ಜಾಗ್ರುತ್ ಜಾವ್ನ್. “ದಕ್ಷಿಣಾಕ್ ಆಸ್ಚೆ ಸರ್ವ್ ತುಂಡು ರಾಯ್ ಗರೀಬ್ ಜಾವ್ನಾಸಾತ್. ತಾಂತಾಂಚ್ಯಾ ರಾಜ್ವಟ್ಕಾಯೆಂತ್ ಆಸ್ಚಿ ಉಚಾಂಬಳಾಯ್ ಆನಿ ಅಕ್ರಮ್ ಆಡಾವ್ನ್, ಗಾಂವ್ಚೆಂ ಸಂರಕ್ಷಣ್ ಕರುಂಕ್‍ಚ್, ತಾಂಚೆ ಕಡೆನ್ ಆಸ್‍ಲ್ಲೆ ಶಿಪಾಯ್ ತಾಂಕಾಂ ಪಾವನಾಂತ್. ತಶೆಂ ಆಸ್ತಾಂ, ಟಿಪ್ಪು ಸುಲ್ತಾನಾಚಿಂ ಕಾಮಾಂ ಕರಂವ್ಕ್ ಜಣ್ ಹಾಡ್ಚೆ ಖಂಯ್ಚೆ?”

“ಸದ್ದ್ಯಾಕ್ ತಸಲಿ ಗರ್ಜ್ ನಾ” ಮ್ಹಣಾಲೊ ಸರ್ದಾರ್. “ಕಾಂಯ್ ಗರ್ಜ್ ಪಡತ್ ಜಾಲ್ಯಾರ್ ಕುಮಕ್ ಕರ್ಚ್ಯಾ ಖಾತಿರ್, ಬಾದಶಹಾಚ್ಯಾಚ್ ಶಿಪಾಯಾಂಕ್ ವ್ಹಾವವ್ನ್ ಘೆವ್ನ್, ಆಮ್ಚ್ಯೊ ತಾರ್ವಿಣಿ ದಕ್ಷಿಣಾಕ್ ಭಾಯ್ರ್ ಸರ್ತಾತ್. ಚಡ್ತಾವ್ ಗರ್ಜ್ ಆಸ್ಲ್ಯಾರ್, ದಖ್ಖಣಾ ಥಾವ್ನ್ ಖಣಿಯೊ ಉತ್ರೊನ್ ಆನಿ ಘಾಟ್ಯೊ ದೆಂವೊನ್ ಕರಾವಳೆಕ್ ವಾ ದಕ್ಷಿಣಾಕ್ ಯೇಂವ್ಕ್ ಆಮ್ಚಿಂ ರಾಹುತ್-ರಿಸಾಲಾಂ ತಯಾರ್ ಆಸಾತ್.”

ಹಾಂಗಾಸರ್ ಸರ್ದಾರ್ ಸಿಮಾಂವ್, ನಿಜಾಯ್ಕೀ ಟಿಪ್ಪು ಸುಲ್ತಾನಾಚ್ಯಾ ಪ್ರತಿನಿಧಿಪರಿಂ ಮಾತ್ರ್ ನಹಿಂ, ಬಗಾರ್ ತವಳ್ಚ್ಯಾ ರಾಜ್‍ನೀತಿಚ್ಯಾ ನೀಜ್ ವಿಜ್ಞಾನಿಪರಿಂ ಉಲಯಿಲ್ಲೊ. ಆಯ್ಕೊನ್, ರಾಜಾ, ಆನಿಕ್‍ಯೀ ಮೋವ್ ಪಡ್ಲೊ.

“ತುಮಿ ಉಲಂವ್ಚೆಂ ಆಯ್ಕತಾನಾ – ತುಮಿ ಲಡಾಯೆಚಿ ವರ್ತಿ ತಯಾರಾಯ್ ಕರ್ನ್‍ಂಚ್ ಆಯಿಲ್ಲೆಪರಿಂ ದಿಸ್ತಾ” ಮ್ಹಣಾಲೊ ತೊ.

“ತಶೆಂ ಕಾಂಯ್ ನಾ. ಪುಣ್ ಟಿಪ್ಪು ಸುಲ್ತಾನಾಚಿ ರಾಜ್ವಟ್ಕಾಯ್ ಮ್ಹಳ್ಯಾರ್ ಖಳ್ಮಿತ್ ನಾತ್‍ಲ್ಲಿ ಲಡಾಯ್ ಮ್ಹಣ್ಚೆಂಯೀ ವಾಜ್ಬಿಚ್. ರಾಜಾ ತಶಿ ಪ್ರಜಾ ಹೆಂ ಸತ್ ಜಾಣಾಂ ಜಾವ್ನಾಸಾತ್” ಮ್ಹಣಾಲೊ ಸರ್ದಾರ್. ತ್ಯಾಚ್ ವೆಳಿಂ, ಕೆನರಾ ಕ್ರಿಸ್ತಾಂವ್ ಸಮಾಜ್‍ಯೀ, ಧಾರ್ಮಿಕ್, ನೈತಿಕ್ ತಶೆಂ ಸಾಮಾಜಿಕ್ ಬಚಾವೆ ಖಾತಿರ್ ಲಡಾಯ್ ಮಾರ್ತಾ ಮ್ಹಳ್ಳಿಂ ಚಿಂತ್ನಾಂ ತಾಚ್ಯಾ ಮತಿಂತ್ ಪಾಶಾರ್ ಜಾಲಿಂ.

“ಜಾವ್ಯೆತ್ ಸರ್ದಾರಾ” ಮ್ಹಣಾಲೊ ರಾಜಾ. ತಾಚ್ಯಾ ಸ್ವರಾಂತ್ ಆತಾಂ ಮರ್ಯಾದ್ ದಿಸೊನ್ ಆಯ್ಲಿ. ಸರ್ದಾರಾ ಕಡೆನ್ ತರ್ಕ್ ಉಲವ್ನ್ ಜಿಕ್ಚೆಪರಿಂ ನಾ ಮ್ಹಣ್ ತಾಕಾ ಸಮ್ಜಲೆಂ. ಸಂಘರ್ಷಣಾಚಿ ಧಾರ್ ಬದ್ಲಿ ಕರುಂಕ್ ತಾಣೆಂ ಚಿಂತ್ಲೆಂ. “ತುಮಿ ಆಯಿಲ್ಲೊ ಉದ್ದೇಶ್ ಪುಣೀ ಆಮ್ಚೆ ವರ್ವಿಂ ಸುಫಳ್ ಜಾಂವ್ದಿ ಮ್ಹಣ್ ಆಮಿ ಆಶೆತಾಂವ್” ಮ್ಹಳೆಂ ತಾಣೆಂ.

“ಆಮ್ಚಿಯೀ ಅಪೇಕ್ಷಾ ತಿಚ್ ಜಾವ್ನಾಸಾ.”

“ಕೋಣ್ ಎಕ್ಲೊ ರಾಜ್‍ದ್ರೋಹಿ ಚುಕಾರಿ ಮಾರ್ನ್ ಹೆವ್ಶಿನ್ ದಕ್ಷಿಣಾಕ್ ಆಯ್ಲಾ ಮ್ಹಳ್ಳೆಂ ತುಮಿ. ತಾಚೆಂ ನಾಂವ್ ಆಮಿ ಆಯ್ಕೊವ್ಯೆತ್‍ವೇ?”

“ನೀಜ್ ಜಾವ್ನ್. ಷೇರ್ ಖಾನ್ ಮ್ಹಣ್ತಾಲೆ ತಾಕಾ” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ಷೇರ್ ಖಾನ್…” ಚಿಂತುಂಕ್ ಪಡ್ಲೊ ರಾಜಾ. “ಷೇರ್ ಖಾನ್ – ನಾ – ಹ್ಯಾ ಗಾಂವಾಂತ್ ಹಾಂವೆಂ ತೆಂ ನಾಂವ್ ಆಯ್ಕೊಂಕ್ ನಾ. ತುಮಿ ಆಮ್ಚೆ ಸಯ್ರೆ ಜಾವ್ನ್ ಹಾಂಗಾಸರ್ ರಾವ್ಲ್ಯಾರ್, ಹಾಂವ್ ಆಮ್ಚ್ಯಾ ಜಣಾಂಕ್ ಸಗ್ಳ್ಯಾನ್ ಧಾಡ್ನ್, ದಾಂಗ್ರೊ ಫೆರಾವ್ನ್…”

“ನಾಕಾ” ಮ್ಹಣಾಲೊ ಸರ್ದಾರ್. “ಕೆವ್ಲ್ಯಾಕ್ ಜಾಗಂವ್ಕ್ ವಾ ಲಿಪೊಂಕ್ ಆಮಿಂಚ್ ವಾಟ್ ದಾಕಯಿಲ್ಲೆಪರಿಂ ಜಾಯ್ತ್.”

“ತರ್ ತುಮ್ಚಿ ಆಲೋಚನ್ ಕಸಲಿ?”

“ಆಲೋಚನ್ ದುಸ್ರಿ ಕಾಂಯ್ ನಾ. ಆಜ್ ರಾತಿಂ ಆಮಿ ಹಾಂಗಾಸರ್ ವಿಶೆವ್ ಘೆವ್ಯೆತ್ ಜಾಲ್ಯಾರ್, ಫಾಲ್ಯಾಂ ಸಕಾಳಿಂ ಪಯ್ಣ್ ಮುಖಾರ್ಸಿತಾಂವ್.”

“ಆಜ್ ರಾತಿಂಚ್ ಕಿತ್ಯಾಕ್, ಫಾಲ್ಯಾಂಚೊ ದೀಸ್‍ಯೀ ರಾವೊನ್, ಪೊರ್ವಾಂ ವಚ್ಯೆತ್. ಟಿಪ್ಪು ಸುಲ್ತಾನಾಚ್ಯಾ ಸರ್ದಾರಾಕ್ ಫಾವೊ ತೊ ಸನ್ಮಾನ್ ಕರುಂಕ್ ಆಮ್ಕಾಂಯೀ ಸುಯೋಗ್ ಮೆಳ್‍ಲ್ಲೆಪರಿಂ ಜಾಯ್ತ್” ಮ್ಹಣಾಲೊ ರಾಜಾ.

“ತುಮ್ಚೊ ಉಪ್ಕಾರ್. ಪುಣ್ ಆಮ್ಕಾಂ ರಾವೊಂಕ್ ಜಾಯ್ನಾ – ಆಮ್ಚ್ಯಾ ಹಾತಾಂತ್ಲೊ ವಾಯ್ದೊ ಮಟ್ವೊ ಆಸಾ” ಸರ್ದಾರಾನ್ ಜಾಪ್ ದಿಲಿ. ನಿಜಾಯ್ಕೀ, ಸಿರಿರಂಗಪಟ್ಟಣಾಂತ್, ಬಾದಶಹಾನ್ ದಿಲ್ಲ್ಯಾ ವಾಯ್ದ್ಯಾಚೊ ಉಗ್ಡಾಸ್ ತಾಕಾ ಆಯ್ಲೊ.

ಉಪ್ರಾಂತ್ ಹೆರ್ ಥೊಡ್ಯಾ ಗಜಾಲಿಂನಿ ವೇಳ್ ಪಾಶಾರ್ ಜಾಲೊ. ತ್ಯಾ ವೆಳಾರ್, ರಾಜಾ ಕಸಲೆಗೀ ಕುಶೆಲ್ ಆನಿ ಶಿಂತ್ರ್ಯೊ ಖೆಳ್ತಾಲೊ ಮ್ಹಣ್ ಸರ್ದಾರ್ ಸಿಮಾಂವ್ಕ್ ದುಬಾವ್ ಮಾರುಂಕ್ ಲಾಗ್ಲೊ. ತಸಲ್ಯಾಚ್ ದುಬಾವಾಂಚಿ ಧಾರ್ ಅಂತುಲ್ಯಾಚ್ಯಾ ಮತಿಂತ್‍ಯೀ ಮಾರ್ ದೀಂವ್ಕ್ ಲಾಗ್ಲಿ.

ತಾಂಚೊ ದುಬಾವ್ ಸತ್ ಜಾಂವ್ಕ್ ಚಡ್ ವೇಳ್ ಗೆಲೊ ನಾ.

ಉಲಯ್ತಾಂ ಉಲಯ್ತಾಂ…

“ಸರ್ದಾರ್ ಸಿಮಾಂವ್ ಪ್ರಭು, ಲಡಾಯೆಚ್ಯಾ ಸರ್ವ್ ವಿದ್ಯೆಂನಿ ಪ್ರಸಿದ್ಧ್ ಆಸ್‍ಲ್ಲೆಪರಿಂ… ಘೊಡ್ಯಾ ಸವಾರಿ ಆನಿ ತಲ್ವಾರಿಚ್ಯಾ ಖೆಳಾ ಪ್ರಾಸ್, ಖಡಾಖಡ್ ಕುಸ್ತೆಚ್ಯಾ ಹಾತಾ ಹಾತ್ ಝಗ್ಡ್ಯಾಂತ್‍ಯೀ ಭೋವ್ ಚತುರ್ ಮ್ಹಣ್ ಆಯ್ಕಲಾಂ ಆಮಿ” ಮ್ಹಣಾಲೊ ರಾಜಾ.

“ವ್ಹಯ್-ವ್ಹಯ್, ಆಮಿ ಆಯ್ಕಲಾಂ” ಕೆಕಾರ್ಲೆ ತಾಚೆ ಎಕ್ಲೊ-ದೋಗ್ ಫಿಶಾಲಿ.

“ವಿಶೇಸ್ ಕಾಂಯ್ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಚಿಕ್ಕೆ ಜಾಗ್ರುತ್ ಜಾವ್ನ್. “ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಸೈನಾಂತ್ ಝುಜಾರಿ ಜಾವ್ನ್ ಆಸ್ಚ್ಯಾ ಕೊಣಾಯ್ಕೀ, ತ್ಯಾ ವಿದ್ಯೆಂನಿ ತರ್ಬೆತ್ ಲಾಭ್ತಾ.”

“ತೆಂ ಜಾವ್ಯೆತ್, ಪುಣ್ ಸರ್ದಾರ್ ಸಿಮಾಂವ್, ತ್ಯಾ ಸರ್ವ್ ವಿದ್ಯೆಂನಿ ಅಜಿತ್ – ಸಲ್ವನಾತ್‍ಲ್ಲೊ ವೀರ್ ಮ್ಹಣ್ ಗಾಂವ್ ತುಮ್ಕಾಂ ಫುಕಾರ್ತಾ.”

“ಹಾಂವ್ ನೆಣಾಂ. ಲೋಕ್ ತಶೆಂ ಮ್ಹಣ್ತಾ ಜಾಲ್ಯಾರ್, ತಾಂತುಂ ಕಾಂಯ್ ಚಡ್ ಸತ್ ಆಸಾ ಮ್ಹಣೊಂಕ್ ಜಾಯ್ನಾ.”

“ಪಾರ್ಕುನ್ ಪಳೆವ್ಯೆತ್ ನಹಿಂವೇ?” ಹಾಸ್ಲೊ, ಬಗ್ಲೆನ್ ರಾವೊನ್ ಆಸ್‍ಲ್ಲೊ, ರಾಜಾಚೊ ಎಕ್ಲೊ ಜವಾನ್.

“ವ್ಹಯ್, ವ್ಹಯ್!” ಹಾಸ್ಲೆ ಹೆರ್ ಥೊಡೆ ಜಣ್.

ಥೊಡೊ ವೇಳ್ ಸಕ್ಕಡ್ ನಿಶ್ಶಬ್ದ್.

“ಮ್ಹಾಕಾಯೀ ತಶೆಂ ಭೊಗ್ತಾ” ಮ್ಹಣಾಲೊ ರಾಜಾ ತೆಲ್ತ್ಯಾ ಸ್ವರಾನ್. “ಮ್ಹಾಕಾ ತ್ಯಾ ಖೆಳಾಂತ್ ಭೋವ್ ಅಭಿರುಚ್ ಆಸಾ. ಅಪ್ರೂಪ್‍ಶೆಂ ಪುಣೀ ಥೊಡೊ ಅಭ್ಯಾಸ್ ಕರ್ಯೆತ್ ಮ್ಹಳ್ಯಾರ್…”

“ವಜಾಣಾಂತ್ ಆನಿ ತ್ರಾಣಾಂತ್ ಆಮ್ಚ್ಯಾ ರಾಯಾಕ್ ತಾಳ್ ಜಾಂವ್ಚೊ ಮನಿಸ್ ಖಂಯೀ ನಾ!” ಮ್ಹಣಾಲೊ ಆನ್ಯೇಕ್ಲೊ.

“ಆಮ್ಚ್ಯಾ ರಾಯಾಕ್ ಸಲ್ವಂವ್ಚೊ ಮನಿಸ್ ಹ್ಯಾ ಯುಗಾಂತ್ ಜಲ್ಮೊಂಕ್ ನಾ ಮ್ಹಳ್ಳೆಂ ಖಂಡಿತ್!” ಮ್ಹಣಾಲೊ ದುಸ್ರೊ ಎಕ್ಲೊ.

“ಛೆ! ಸರ್ದಾರ್ ಸಿಮಾಂವ್ ಪ್ರಭು ಹಾಜರ್ ಆಸ್ತಾನಾ, ತಸಲೆಂ ಉತಾರ್ ಉಚಾರ್ಚೆಂ ಮ್ಹಳ್ಯಾರ್, ಟಿಪ್ಪು ಸುಲ್ತಾನಾಕ್ ಅಕ್ಮಾನ್ ಜಾಯ್ತ್!” ಫೊಣ್ಣ್ ಘಾಲೆಂ ತಿಸ್ರ್ಯಾನ್.

“ಆಮಿ ತಾರಿಫ್ ಉಲಯ್ತಾಂವ್ ಜಾಂವ್ಕ್ ಪುರೊ – ಪುಣ್ ಬಾದಶಹಾ ಟಿಪ್ಪು ಸುಲ್ತಾನಾಚೆಂ ನಾಂವ್ ಮಧೆಂ ಹಾಡ್ಚೆಂ ನಾಕಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಕುಸ್ತೆಚ್ಯಾ ಸ್ಪರ್ಧ್ಯಾಕ್, ಜಾಂವ್ ತ್ರಾಣಾಚ್ಯಾ ಪ್ರದರ್ಶನಾ ಖಾತಿರ್ ಆಮಿ ಹಾಂಗಾಸರ್ ಯೇಂವ್ಕ್ ನಾಂವ್. ತಸಲ್ಯಾ ಖುಶಾಲಾಯೆಕ್, ರಾತಿಂಚೊ ಹೊ ವೇಳ್ ಅಯಿನ್ನ್ ನಹಿಂ.”

ಹೆಂ ಆಯ್ಕೊನ್, ಪಾಟ್ಲ್ಯಾನ್ ರಾವ್‍ಲ್ಲ್ಯಾ ಅಂತುಲ್ಯಾನ್ ಸಮಾಧಾನೆಚೊ ಶ್ವಾಸ್ ಸೊಡ್ಲೊ. ಕುಂಬ್ಳಾಚ್ಯಾ ರಾಜಾ ಕಡೆ ಹಾತ್-ಕುಸ್ತೆಕ್ ರಾವ್‍ಲ್ಲ್ಯಾ ಗ್ರಾಯ್ಕಾಂಚೆ ಹಾತ್ ಪಾಯ್ ಮೊಡ್‍ಲ್ಲಿ ಮಾತ್ರ್ ನಹಿಂ, ಥೊಡ್ಯಾ ಬಳಿಷ್ಟ್ ತರ್ನಾಟ್ಯಾಂಚಿ ಗೊಮ್ಟಿ ಮೊಡೊನ್ ವಾ ಬೊರಿಯೊ ಚೆಂಚೊನ್ ಜೀವ್ ಗೆಲ್ಲಿ ಖಬರ್‌ಯೀ ತೊ ಆಯ್ಕೊನ್ ಜಾಣಾಂಸ್‍ಲ್ಲೊ. ತಶೆಂ ಆಸ್ತಾಂ, ಆಪ್ಲ್ಯಾ ಧನಿಯಾಚ್ಯಾ ಆಂಗಾಕ್ ಗರ್ಜೆ ಶಿವಾಯ್ ಅಪಾಯ್ ಜಾಂವ್ಚೊ ನಾಕಾ ಮ್ಹಣ್ ತಾಣೆಂ ಅಪೇಕ್ಷಿಲ್ಲ್ಯಾಂತ್ ವಿಶೇಸ್ ನಾ.

ಪುಣ್ ಸರ್ದಾರ್ ಸಿಮಾಂವ್ಚ್ಯಾ ಮತಿಂತ್ ತ್ಯಾ ವೆಳಾರ್ ದುಸ್ರೊಚ್ ವಿಚಾರ್ ಉದೆಲೊ. ಕುಸ್ತೆಚ್ಯಾ ವಾ ತಸಲ್ಯಾ ಖೆಳಾಚ್ಯಾ ನಿಬಾನ್ ತಾಕಾ ಪಾಟಿಂ ರಾವಂವ್ಕ್ ವಾ ತಾಚ್ಯಾ ಪಯ್ಣಾಕ್ ಘಳಾಯ್ ಕರುಂಕ್ ರಾಜಾ ಶಿಂತ್ರ್ಯೊ ಖೆಳ್ತಾ ಜಾವ್ಯೆತ್ ಮ್ಹಣ್ ತಾಕಾ ದುಬಾವ್ ಮಾರ್ಲೊ.

ನಿಜಾಯ್ಕೀ, ಥೊಡ್ಯಾ ವೆಳಾ ಆದಿಂ, ರಾವ್ಳೆರಾಚ್ಯಾ ಪಾಟ್ಲ್ಯಾ ವಾಟೆನ್ ಏಕ್ ಘೊಡೊ ಧಾಂವೊನ್ ಪಾಶಾರ್ ಜಾಲ್ಲೆಪರಿಂ ಗೆಳಾಂಚೊ ಆವಾಜ್ ತಾಚ್ಯಾ ಕಾನಾಂಕ್ ಆಯ್ಕಲ್ಲೊ.

“ಆಮ್ಕಾಂ ದುಸ್ರೊಚ್ ಏಕ್ ಉಗ್ಡಾಸ್ ಆಯ್ಲೊ” ಮ್ಹಣಾಲೊ ತೊ. “ಸ್ಪರ್ಧ್ಯಾಕ್ ಜಾಂವ್, ಖೆಳಾಕ್ ವೇಳ್ ವೆಗ್ಳೊ ಆಸ್ತಲೊ. ರಾಜಾನ್ ಬೆಜಾರ್ ಕರಿನಾಯೆ. ಆಮ್ಚೆಂ ಪಯ್ಣ್ ಲಾಂಬ್ ಆಸ್‍ಲ್ಲ್ಯಾನ್, ಸಕಾಳಿಂ ಪರ್ಯಾಂತ್ ಆಮಿ ರಾವನಾಂವ್. ಆಮ್ಚ್ಯಾ ಘೊಡ್ಯಾಂಕ್ ಆನಿ ಆಮ್ಕಾಂ ಲಾಭ್‍ಲ್ಲೊ ವಿಶೆವ್ ಪುರೊ ಮ್ಹಣ್ ದಿಸ್ತಾ. ಚಾಂದ್ನೆಂಯೀ ಆಸಾ. ಆಮಿ ಆತಾಂಚ್ ಭಾಯ್ರ್ ಸರ್ತಾಂವ್.”

“ಆತಾಂಚ್?” ರಾಜಾ ವಿಚಾರಿ ಅಜ್ಯಾಪ್ ಜಾವ್ನ್.

“ವ್ಹಯ್. ಚಡುಣೆಂ ಆನಿ ಎಕಾ ವೊರಾನ್.”

“ಹ್ಹ-ಹ್ಹ-ಹ್ಹಾ!” ಹಾಸ್ಲೊ ರಾಜಾ. “ತುಮ್ಚಿಂ ಕಾರಣಾಂ ಕಸಲಿಂಯೀ ಆಸ್ಯೆತ್. ಪುಣ್ ಸಾಮರ್ಥೆಚ್ಯಾ ಪರೀಕ್ಷೆಕ್ ಆಪವ್ಣೆಂ ಆಯ್ಲೆಂ ದೆಕುನ್ – ಟಿಪ್ಪು ಸುಲ್ತಾನಾಚೊ ನಾಂವಾಡ್ದಿಕ್ ಸರ್ದಾರ್, ಭಿಯಾನ್ ಧಾಂವ್ಲೊ ಮ್ಹಣ್ ಆಮಿ ಮ್ಹಣಶೆನಾಂವ್.”

ಸರ್ದಾರ್ ಸಿಮಾಂವ್, ಅಂತುಲೊ ಆನಿ ರಾಮಪ್ಪ ಸೊಡ್ಲ್ಯಾರ್, ಹೆರ್ ಸಕ್ಕಡ್‍ಯೀ ಹಾಸ್ಲೆ. ರಾಜಾಚ್ಯಾ ಅಸಲ್ಯಾ ಪಂಥಾಚ್ಯಾ ತುಕ್ಲಾವ್ಣ್ಯಾಕ್ ಸರ್ದಾರ್ ಸಿಮಾಂವ್ಚಿ ಪ್ರತಿಕ್ರಿಯಾ ಕಸಲಿ ಆಸ್ಯೆತ್ ಮ್ಹಣ್ ಚಿಂತುನ್, ಅಂತುಲೊ ಭಿಯೆಲೊ.

ಸರ್ದಾರ್ ಸಿಮಾಂವ್ಚ್ಯಾ ದೊಳ್ಯಾಂತ್ಲ್ಯಾನ್ ಕಿಟಾಳಾಂ ಉಸಳ್ಳಿಂ.

“ಕುಸ್ತೆಚ್ಯಾ ವಿದ್ಯೆಂತ್ ರಾಜಾಕ್ ವರ್ತಿ ಆಶಾ ಆಸ್ಯೆತ್” ಮ್ಹಣಾಲೊ ತೊ ಹಾಳ್ವಾಯೆನ್. “ತಸಲ್ಯಾ ದುವಾಳ್ಯಾಂಕ್, ಜಾಯ್‍ಚ್ ಜಾಲ್ಯಾರ್ ಆಮಿ ಆನ್ಯೇಕ್ ಪಾವ್ಟಿಂ ಸಮಾಧಾನ್ ದಿತಾಂವ್. ರಾವೊಂಕ್ ಆಮ್ಕಾಂ ವೇಳ್ ನಾ, ತರೀ, ಭಿಯಾನ್ ಧಾಂವ್ಲ್ಯಾಂವ್ ಮ್ಹಣೊಂಕ್ ತುಮ್ಕಾಂ ಅವ್ಕಾಸ್ ದೀಂವ್ಕ್ ಆಮಿ ತಯಾರ್ ನಾಂವ್.”

“ಮ್ಹಣ್ಜೇ?” ಮ್ಹಣಾಲೊ ರಾಜಾ, ಚಿಕ್ಕೆ ಕಾವ್ಜೆವ್ನ್. “ಕುಸ್ತೆಚ್ಯಾ ಖೆಳಾಂತ್ ಮಾತ್ರ್ ಆಮ್ಕಾಂ ಅಭಿರುಚ್. ತಲ್ವಾರ್ ವಾ ಭಾಲೊ ಘೆವ್ನ್ ಖೆಳ್ಚೆ ತಿತ್ಲೆಂ ಆಮ್ಚೆಂ ಆಂಗ್ ಹಾಳು ನಾ.” ತಾಚೆ ಹುದ್ದೆದಾರ್ ಆನಿ ಠೊಲಿಯೆಂತ್ಲೆ ಹೆರ್ ಜಣ್ ಥಂಡ್ ಜಾಲೆ.

“ತುಜ್ಯಾ ಆಂಗಾಚಿ ಮೊಟಾಯ್ ಆನಿ ಜಡಾಯ್ ಆನಿ ತ್ರಾಣಾಚೆಂ ದರ್ಬಾರ್ ದಾಕಂವ್ಕ್ ಆಮಿ ತುಮ್ಕಾಂ ಅವ್ಕಾಸ್ ದಿತಾಂವ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ನ್ಹೆಸ್‍ಲ್ಲಿ ಮುಸ್ತಾಯ್ಕಿ ಬದ್ಲುಂಚಿ ವಾ ವೇಳ್ ಪಾಡ್ ಕರ್ಚಿ ಗರ್ಜ್ ನಾ. ಹಾತಾಂಚೆಂ ಆನಿ ಬಾವ್ಳ್ಯಾಂಚೆಂ ತ್ರಾಣ್ ಪಾರ್ಕುಂಚ್ಯಾ ‘ಪಂಜಬಂಧೆಂತ್’ ತುಜಿ ಸಾಮರ್ಥಿ ತುವೆಂ ರುಜು ಕರ್ಯೆತ್. ಆನಿ ತಶೆಂ ಜಾಲ್ಯಾರ್, ಆಮಿ ಗೆಲ್ಯಾ ಉಪ್ರಾಂತ್ ಜಾಲ್ಯಾರೀ, ಟಿಪ್ಪು ಸುಲ್ತಾನ್ ಬಾದಶಹಾಚ್ಯಾ ಎಕ್ಲ್ಯಾ ಸರ್ದಾರಾಕ್ ಪಂಜಬಂಧೆಂತ್ ಸಲ್ವಯ್ಲೊ ಮ್ಹಣ್ ಜಾಯ್ ತಸಲೊ ಪ್ರಚಾರ್ ಕರ್ಯೆತ್.”

ಅಸಲ್ಯಾ ಪಂಥಾಹ್ವಾನಾಕ್ ರಾಜಾನ್‍ಯೀ ಕಬೂಲ್ ಜಾಯ್ಜಯ್ ಪಡ್ಲೆಂ. ತಾಚ್ಯಾ ಪಾಟ್ಲಾವ್ದಾರಾಂಕ್‍ಯೀ ಹ್ಯಾ ವರ್ವಿಂ ಸಂತೊಸ್‍ಚ್ ಜಾಲೊ.

ಸರ್ದಾರ್ ಸಿಮಾಂವ್ ಜಿವಾಂತ್ ಧಡಂಗ್ ಆಸ್‍ಲ್ಲೊ ಜಾಲ್ಯಾರೀ, ರಾಜಾಚ್ಯಾ ಮೊಟಾಯೆ ಮುಖಾರ್ ಶಿರ್ಪುಟೊ ದಿಸ್ತಾಲೊ. ಕುಂಬ್ಳಾಚ್ಯಾ ರಾಜಾಚ್ಯಾ ಕುಡಿಚೆಂ ವಜಾಣ್ ಪಂದ್ರಾ ಮಣಾಂಕ್ ಲಾಗಿಂ ಆಸ್‍ಲ್ಲೆಂ. ನಿಜಾಯ್ಕೀ, ದೇಡ್ ವಾರ್ ರುಂದಾಯೆಚೆಂ ತಾಚೆಂ ಹರ್ದೆಂ, ಬಸವಾ ಸಾರ್ಕಿಂ ತಾಚಿಂ ಭುಜಾಂ, ಆನಿ ಸೊರ್ಕೆಲ್ಲ್ಯಾ ಕೆಂಳ್ಬ್ಯಾ ಮುಳಾಚ್ಯಾ ದಾಟಾಯೆಚೆ ತಾಚೆ ಬಾವ್ಳೆ ಮ್ಹಣ್ತಾನಾ ಪಳೆಂವ್ಕ್‌ಯೀ ತೊ ಭಿರಾಂಕುಳ್‍ಚ್ ದಿಸ್ತಾಲೊ.

ತ್ರಾಣ್ ಪಾರ್ಕುಂಚ್ಯಾ ಸರ್ವ್ ಪಂಥಾಂ ಪಯ್ಕಿ, ಸರ್ದಾರಾನ್ ಪಂಜ ಧರ್ಚೊ ಪಂಥಾಟ್ ವಿಚಾರ್‌ಲ್ಲೊ ಆಯ್ಕೊನ್, ರಾಜಾಕ್ ಆನಿ ತಾಚ್ಯಾ ಪಾಟ್ಲಾವ್ದಾರಾಂಕ್ ಅಜ್ಯಾಪ್‍ಯೀ ಜಾಲೆಂ.

ಜಮೆದಾರ್ ಅಂತುಲೊ ಪಡ್ವಳ್ ಆನಿ ಸುಫೆದಾರ್ ರಾಮಪ್ಪ, ಸರ್ದಾರ್ ಸಿಮಾಂವ್ಚ್ಯಾ ನಿಚೆವಾ ಬಾಬ್ತಿನ್ ಚಿಕ್ಕೆ ಕಾವ್ಜೆಲೆ. ರಾಜಾಚ್ಯಾ ಆಂಗಾಚಿ ಆನಿ ಪ್ರತ್ಯೇಕ್ ಜಾವ್ನ್ ತಾಚ್ಯಾ ಬಾವ್ಳ್ಯಾಂಚಿ ಮೊಟಾಯ್ ಪಳೆತಾನಾ ನಿಜಾಯ್ಕೀ ತಾಚ್ಯಾ ವಿರೋಧ್ ಪಂಜಬಂಧೆಕ್ ರಾವ್ತೆಲ್ಯಾಂನಿ ಆಂಗ್ ಕಾಡಿಜಾಯ್ ಆಸ್‍ಲ್ಲೆಂ.

“ವೇಳ್ ಪಾಡ್ ಕರ್ಚೊ ನಾಕಾ” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ವ್ಹಯ್, ತಯಾರಾಯ್ ಕರ್ಯಾಂ” ಮ್ಹಣಾಲೊ ರಾಜಾ.

“ತಯಾರಾಯ್ ಕಸಲಿ? ವಸ್ತುರ್ ಬದ್ಲುಂಚಿ ಗರ್ಜ್ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ಮ್ಹಾಕಾ ಗರ್ಜ್ ಆಸಾ” ಮ್ಹಣಾಲೊ ರಾಜಾ. “ಸಕ್ತೆಚಿ ಪರೀಕ್ಷಾ ವಾ ಪ್ರದರ್ಶನ್ ಕರ್ತಾನಾ, ಆಂಗಾರ್ ಮುಸ್ತಾಯ್ಕಿ ಆಸ್ಲ್ಯಾರ್ ಆಮ್ಕಾಂ ಫುಗಾಸಾಂವ್ ಜಾತಾ” ಮ್ಹಣೊನ್ ಸವ್ಕಾಸ್ ಆಪ್ಲೊ ಪೇಟಾ ಆನಿ ದಗ್ಲೊ ನಿಕ್ಳಾಯ್ಲೊ. ವೀರಕಚ್ಚ್ಯಾ ವಯ್ಲ್ಯಾನ್ ಭಾಣಾ ತೆದೆಂ ಆಸ್‍ಲ್ಲ್ಯಾ ತಾಚ್ಯಾ ಪೊಟಾ ಭೊಂವಾರಿಂ, ಕಮರ್‌ಪಟ್ಟಿ ಅರ್ನುನ್, ರೆವ್ಡಾವ್ನ್ ಪೆಂಕ್ಡಾಕ್ ತಾಣೆಂ ಶಿರ್ಕಾಯ್ಲಿ.

“ಪ್ರತಿಫಳಾಕ್ ದಾವ್ ಕಸಲೊ?” ಎಕ್ಲ್ಯಾನ್ ಮ್ಹಳೆಂ.

“ವ್ಹಯ್, ವ್ಹಯ್!” ಹೆರಾಂನಿ ಉತಾರ್ ಮೆಳಯ್ಲೆಂ.

“ದಾವ್ ಕಿತ್ಯಾಕ್ – ಹಿ ಕಾಂಯ್ ಜುಗಾರ್ ನಹಿಂ – ಜಿಕ್‍ಲ್ಲೊ ಮಾನ್ ಆನಿ ಸಲ್ವಲ್ಲಿ ಲಜ್‍ಚ್ ದಾವ್” ಅಂತುಲ್ಯಾನ್ ತರ್ಕ್ ಕೆಲೆಂ.

ತಶೆಂ ಗರ್ಜೆ ಶಿವಾಯ್ ಘಳಾಯ್ ಜಾವ್ನ್, ಆಖೇರಿಕ್, ಕುತಂತ್ರಿ ರಾಜಾನ್, “ಜಿಕ್ಲೆಲ್ಯಾಂಕ್ ಸಲ್ವಲ್ಲ್ಯಾ ಗ್ರಾಯ್ಕಾನ್ ತಾಂಚೊ ಎಏಕ್ ಘೊಡೊ ದಿಂವ್ಚೊ” ಮ್ಹಣ್ ದಾವ್ ಥಾರಾಯ್ಲೊ.

‘ನಿಜಾಯ್ಕೀ ಸರ್ದಾರ್ ಸಲ್ವತಲೊ – ತಾಚೊ ಹಾತ್ ಪಿಟೊ ಜಾಲ್ಯಾರೀ ಜಾಲೊ, ವಾ ಮೊಡ್ಲ್ಯಾರೀ ಮೊಡ್ಲೊ – ತ್ಯಾ ಭಾಯ್ರ್ ತಾಚೊ ತೊ ವ್ಹಡ್ಲೊ ಘೊಡೊಯೀ ತಾಣೆಂ ಸಾಂಡ್ಚೊ ಪಡ್ಲೊ’ ಮ್ಹಣೊನ್ ಆದಿಂಚ್ ಪಾತ್ಯೆವ್ನ್, ಕುಂಬ್ಳಾಚೆ ಠೊಲಿಯೆಗಾರ್ ಖುಶಿ ಪಾವ್ಲೆ.

ರಾಯಾಚ್ಯಾ ಹುಕ್ಮೆ ಪ್ರಕಾರ್ ದೊಗಾಂ ಚಾಕ್ರಾಂನಿ ಏಕ್ ದಾಟ್ ರೂಂದ್ ಬಾಂಕ್ ವ್ಹಾವವ್ನ್ ಹಾಡ್ನ್ ಚೌಕೆಂತ್ ದವರ್ಲೊ.

“ಬಾಂಕಾರ್ ನಾಕಾ” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ಬಾಂಕಾರ್ ಹೆಣೆಂ ತೆಣೆಂ ಪಾಯ್ ಘಾಲ್ನ್ ಬಸೊನ್ ಪಂಜಬಂಧಿ ಧರ್ಚಿ ನಹಿಂ ಜಾಲ್ಯಾರ್, ಮಾಗಿರ್ ಕಶಿ?” ರಾಜಾನ್ ಸವಾಲ್ ಕೆಲೆಂ.

“ಬಾಂಕಾರ್ ಬಸೊನ್ ಪಂಜಬಂಧಿ ಧರ್ಚಿ ಭುರ್ಗ್ಯಾಂನಿ ಆನಿ ಬಾಯ್ಲ್ ಮನ್ಶ್ಯಾಂನಿ” ಸರ್ದಾರಾನ್ ತಾಕಾ ಜಾಪ್ ದಿಲಿ. “ವ್ಹಡಾಂನಿ, ವೀರಾಂನಿ ಆನಿ ಪಹಿಲ್ವಾನಾಂನಿ ಪಂಜಬಂಧಿ ಧರ್ಚಿ ಧರ್ಣಿಚೆರ್” ಮ್ಹಣೊನ್ ತಾಣೆಂ ದಾವೊ ಪಾಯ್ ಧರ್ಣಿರ್ ಆಸ್ರಾವ್ನ್ ಧೊಂಪ್ರಾರ್ ದೊಡ್ಲೊ. ಉಜ್ವ್ಯಾ ಪಾಯಾಚಿ ದಿಂಬಿ ದೊಡುನ್ ಧೊಂಪರ್ ಧರ್ಣಿಕ್ ತೆಂಕ್ಲೆಂ, ಆನಿ ತಾಚ್ಯಾ ಫುಡೆಂ ಕೊಂಪೊರ್ ತೆಂಕುನ್ ಹಾತ್ ಮುಖಾರ್ ದಿಲೊ.

ಸರ್ದಾರಾಚ್ಯಾ ಹ್ಯಾ ಶರ್ತಾಕ್ ಕುಂಬ್ಳಾಗಾರಾಂನಿ ಮತಾಚಿ ಕಬ್ಲಾತ್ ದಿತಚ್, ನಾ ಖುಶೆನ್ ಜಾಲ್ಯಾರೀ ರಾಜಾನ್ ದಿಂಬಿ ಘಾಲಿಜಾಯ್ ಪಡ್ಲಿ. ಪುಣ್ ತಾಚ್ಯಾ ದೀಗ್ ಪೊಟಾಚ್ಯಾ ವಜಾಣಾ ವರ್ವಿಂ, ಕುಡಿಚೊ ಥಾರೊ ಸಾಂಬಾಳುಂಕ್ ತಾಕಾ ಕಷ್ಟ್ ಮಾರ್ತೆಲೆ ಮ್ಹಳ್ಳೆಂ ಸಮ್ಜೊನ್, ಅಂತುಲ್ಯಾಕ್ ಧಯ್ರ್ ಮೆಳ್ಳೆಂ, ಆನಿ ಮತಿ ಭಿತರ್‌ಚ್ ತೊ ಹಾಸ್ಲೊ.

“ಆಮ್ಚ್ಯಾ ರಾವ್ಳೆರಾಂತ್ ಆಮ್ಚಿ ಹುಕುಮ್ ಜಾಯ್ಜಯ್ ಆಸ್‍ಲ್ಲಿ” ರಾಜಾ ತಾಂಬ್ಡೊ ಜಾಲೊ. “ಅಸಲ್ಯಾ ಮಾಂಕ್ಡಾಚ್ಯಾ ಖೆಳಾಂತ್ ಆಮ್ಕಾಂ ಅಭ್ಯಾಸ್ ನಾ. ಜಾಲ್ಯಾರೀ ಆಖೇರ್ ಕರ್ಯಾಂ ತಮಾಸೊ!”

ಸರ್ದಾರಾನ್ ಆನಿ ರಾಜಾನ್, ಧರ್ಣಿರ್ ಕೊಂಪೊರ್ ತೆಂಕುನ್ ಹಾತ್ ಧರ್ಲೆ. ಚಡ್ ಘಳಾಯ್ ಕರಿನಾಸ್ತಾಂ, ಪೆಟ್ಣ್ಯಾ ಸಾರ್ಕ್ಯಾ ಆಪ್ಲ್ಯಾ ಹಾತಾನ್ ಸರ್ದಾರ್ ಸಿಮಾಂವ್ಚೊ ಹಾತ್ ಚಿಂವಂಡ್ ಕರಿಜಾಯ್ ಮ್ಹಣ್ ರಾಯಾಚಿ ಮ್ಹಣ್ಣಿ ಜಾವ್ನಾಸ್‍ಲ್ಲಿ. ತಾಚ್ಯಾ ಬಳಿಷ್ಟ್ ಹಾತಾಚಿಂ ಬೊಟಾಂ, ದೆಬಾಳ್ಯಾ ಕೆಳ್ಯಾಂಪರಿಂ ಮೊಟಿಂ ಆಸ್‍ಲ್ಲಿಂ ಜಾಲ್ಯಾರೀ, ಲಾಂಬ್ ಆಸೊನ್ ಕೋಮಲ್ ದಿಸ್ಚ್ಯಾ ಸರ್ದಾರ್ ಸಿಮಾಂವ್ಚ್ಯಾ ಬೊಟಾಂನಿ ಮಿಲಾವಾಚ್ಯಾ ಚಿಮ್ಟ್ಯಾ ಸಾರ್ಕಿ ಸಕತ್ ಆಸ್‍ಲ್ಲಿ ಮ್ಹಣ್ ತೊ ನೆಣಾಂಸ್‍ಲ್ಲೊ.

ತಾಣಿಂ ದೊಗಾಂಯ್ನೀ ಹಾತ್ ಧರ್ಲೆ. ಅಂತುಲ್ಯಾನ್ ಆನಿ ರಾಮಪ್ಪಾನ್ ಶ್ವಾಸ್ ಬಾಂಧ್ಲೊ. ಕುಂಬ್ಳಾಚ್ಯಾ ಪಂಗ್ಡಾಚ್ಯಾಂನಿ, ತಾಂಚ್ಯಾ ರಾಯಾನ್ ಹೊ ‘ತಮಾಸೊ’ ನೀಜ್ ಜಾವ್ನ್ ಜಿಕ್ಚೊ ಭರ್ವಸೊ ಮತಿಂತ್ ಧರ್ನ್, ಮುಖಮಳಾಂಚೆರ್ ಹಾಸೊ ಖೆಳಯ್ಲೊ.

ಪುಣ್ ಸ್ಪರ್ಧ್ಯಾಚೊ ಪ್ರತಿಫಳ್ ತಾಣಿಂ ಚಿಂತ್‍ಲ್ಲೆಪರಿಂ ಜಾಂವ್, ತಿತ್ಲ್ಯಾ ವೆಗಿಂ ಜಾಂವ್ ಆಖೇರ್ ಜಾಂವ್ಕ್ ನಾ.

ಹಾತಾಕ್ ಹಾತ್ ಲಾಗ್ತಾನಾಂಚ್, ಸರ್ದಾರ್ ಸಿಮಾಂವ್ನ್ ಆಪ್ಲ್ಯಾ ಹಾತಾಚಿಂ ಬೊಟಾಂ ರೂಕ್ ಕರ್ನ್ ರಾಜಾಚೊ ಹಾತ್ ಆಪ್ಲ್ಯಾ ಕುಡಿ ಹೆವ್ಶಿನ್ ವೋಡ್ನ್ ಧರ್‌ಲ್ಲೊ. ತ್ಯಾ ವರ್ವಿಂಚ್, ರಾಜಾಚೆಂ ಮನ್, ಆಪ್ಲೊ ಥಾರೊ ಸಾಂಬಾಳ್ನ್ ಧರ್ಚ್ಯಾ ಸಮಸ್ಯಾಚೆರ್ ಘುಂವ್ಲೆಂ. ತ್ಯಾಚ್ ಖಿಣಾ ಭಿತರ್ ಸರ್ದಾರ್ ಸಿಮಾಂವ್ಚ್ಯಾ ಪಯ್ಲ್ಯಾ ಬೊಟಾನ್, ರಾಯಾಚ್ಯಾ ಥಳ್ವ್ಯಾಚ್ಯಾ ಉಲ್ಟ್ಯಾ ಕುಶಿನ್, ತಾಚ್ಯಾ ದೋನ್ ಬೊಟಾಂಚ್ಯಾ ಖಾಂಚಿಂತ್ ಆಸ್ಚ್ಯಾ ಎಕಾ ಪ್ರತ್ಯೇಕ್ ಶಿರೆಚೊ ಥಾರೊ ಪಾರ್ಕುನ್ ಥಂಯ್ಸರ್ ಆಪ್ಲ್ಯಾ ಬೊಟಾಚೆಂ ಪೋಂತ್ ದವರ್ನ್ ಜಾಲ್ಲೆಂ.

ಉಪ್ರಾಂತ್ ಥೊಡೊ ವೇಳ್ ತಶೆಚ್ ತೆ ಉರ್ಲೆ – ಎಕ್ಲ್ಯಾಕ್ ಆನ್ಯೇಕ್ಲ್ಯಾಚೊ ಹಾತ್ ಉಲ್ಟೊ ಬಾಗಾವ್ನ್ ಧರ್ಣಿಕ್ ಆಪ್ಡುಂಕ್ ಸಾಧ್ಯ್ ನಾ ಮ್ಹಳ್ಳೆಪರಿಂ ದಿಸ್ಲೆಂ. ರಾಜಾಕ್ ಅಜ್ಯಾಪ್ ಜಾಲೆಂ. ತಾಚ್ಯಾ ಠೊಲಿಯೆಗಾರಾಂಚ್ಯಾ ಮುಖಮಳಾಂಚೆರ್ ಖೆಳೊನ್ ಆಸ್‍ಲ್ಲೊ ಹಾಸೊ ಕ್ರಮೇಣ್ ಉಬೊನ್ ಗೆಲೊ.

ಆತಾಂ ದೊಗಾಂಯ್ನೀ ತಾಂಚೆಂ ಆಸ್‍ಲ್ಲೆಂ ಸಗ್ಳೆಂ ತ್ರಾಣ್ ಪ್ರಯೋಗ್ ಕರ್ಚೆಪರಿಂ ದಿಸ್ಲೆಂ. ತಶೆಂ ಆಸ್ತಾನಾ, ಸರ್ದಾರ್ ಸಿಮಾಂವ್ಚೆಂ ಬೊಟಾ ಪೋಂತ್, ಹೆರಾಂಕ್ ಕಳಿತ್ ನಾಸ್ತಾನಾ ರಾಜಾಚ್ಯಾ ಹಾತಾಚಿ ಶಿರ್ ‘ಮಾರಕ್’ ವಿದ್ಯೆಚ್ಯಾ ವಿಶಿಸ್ಟ್ ರಿತಿನ್ ದಾಂಬುನ್ ಧರ್ನ್ ಆಸ್‍ಲ್ಲೆಂ.

ದೊಗೀ ಜಣ್ ಖರ್ಶೆಂವ್ಕ್ ಲಾಗ್ಲೆ. ರಾಜಾಚೆಂ ತೋಂಡ್ ಶಿರ್ಲ್ಯಾಪರಿಂ ತಾಂಬ್ಡೆಂ ಜಾಲೆಂ. ತಾಚೆಂ ತೋಂಡ್ ಉಗ್ತೆಂ ಜಾವ್ನ್, ನಿಶ್ವಾಸಾ ಸಾಂಗಾತಾ ಜೀಬ್ ಆನಿ ಲಾಳ್ ಭಾಯ್ರ್ ಗಳೊಂಕ್ ಲಾಗ್ಲಿ. ತಾಚೆ ಆಸ್ಥಾನ್‍ಗಾರ್ ಆಕಾಂತ್ಲೆ ಆನಿ ಆಪಾಪ್ಲಿಂ ಹಾತೆರಾಂ ಪೊಶೆಂವ್ಕ್ ಲಾಗ್ಲೆ.

ಪರಿಸ್ಥಿತಿಚಿ ಗಂಭೀರಾಯ್ ಸಮ್ಜೊನ್, ಜಮೆದಾರ್ ಅಂತುಲೊ ಆನಿ ರಾಮಪ್ಪಾಯೀ ಚುರುಕ್ ಜಾವ್ನ್ ರಾವ್ಲೆ.

ರಾಜಾನ್ ಏಕ್ ದುಕಿಚಿ ಘೊರೊಜ್ ದಿಲಿ. ತಾಚೊ ಹಾತ್ ಉಳ್ಟೊ ಧರ್ಣಿಕ್ ಆಪ್ಟೊನ್ ನೀಟ್ ಜಾಲೊ. ತಳ್ಟ್ಯಾಚ್ಯಾ ದೀಗ್ ಕುತಿಯೆಪರಿಂ ಪರ್ತೊನ್ ಧರ್ಣಿರ್ ತೊ ನೀಟ್ ಜಾಲೊ. ಆರ್ ಮಾರ್‌ಲ್ಲ್ಯಾ ಜಿನ್ಸಾರ್ ತಾಚೊ ಬಾವ್ಳೊ ರೂಕ್ ಜಾಲ್ಲೊ. ತಾಚಿ ಮತ್ ಚುಕ್‍ಲ್ಲಿ.

ಬಗ್ಲೆನ್ ದವರ್‌ಲ್ಲಿ ಆಪ್ಲ್ಯಾ ತಲ್ವಾರಿಚಿ ಕೋಶಿ ಘೆವ್ನ್ ಸರ್ದಾರ್ ಸಿಮಾಂವ್ ಉಬೊ ಜಾಲೊ. ಅಂತುಲ್ಯಾನ್ ಆನಿ ರಾಮಪ್ಪಾನ್ ಆಪಾಪ್ಲಿಂ ಹಾತೆರಾಂ ಭಾಯ್ರ್ ಕಾಡ್ಲಿಂ. ರಾಜಾಚೆ ಮಾನಾಯ್ ಉಣೆಂ ಮ್ಹಳ್ಯಾರೀ ಧಾ ಜಣ್ ಪುಣೀ ಥಂಯ್ಸರ್ ಆಸ್‍ಲ್ಲೆ. ಮಟ್ವ್ಯೊ ತಲ್ವಾರಿ ಆನಿ ಭಾಲಿಯೊ ಭಾಯ್ರ್ ಕಾಡ್ನ್, ಚೌಕೆಂತ್ ವಿಸ್ಕಳೊನ್ ಹಾಂಕಾಂ ವೆಡೊ ಮಾರ್ನ್ ಮ್ಹಳ್ಳೆಪರಿಂ ತೆ ರಾವ್ಲೆ.

ಸರ್ದಾರ್ ಸಿಮಾಂವ್ನ್ ಪರಿಸ್ಥಿತಿ ಚಿಂತ್ಲಿ. ನವಿಚ್ ಶಿರಿಗುಂಡಿ!

“ಧನ್ಯಾ! ತುಂ ಜಿಕ್ಲೊಯ್!” ಮ್ಹಣಾಲೊ ಅಂತುಲೊ.

ಘಡಿಭರ್ ಕೊಣೀ ಉಲಂವ್ಕ್ ನಾಂತ್.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel