ಇಂಫೆರ್ನಾಚಿಂ ದಾರಾಂ – 7: ಚುಕ್ಲೆಂ ಅನ್ವಾರ್ – ತರೀ ಕೋಣ್ ಉತ್ವಾರ್?

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 7
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 7: ಚುಕ್ಲೆಂ ಅನ್ವಾರ್ – ತರೀ ಕೋಣ್ ಉತ್ವಾರ್!

ತಾಣೆಂ, ಫುಡೆಂ ಉಚಾರ್ಚಿಂ ಉತ್ರಾಂ ಜಾಂವ್ ದೃಶ್ಯ್ ಸೊಸುಂಕ್ ಜಾಂವ್ಚಿಂ ನಾಂತ್ ಮ್ಹಳ್ಳೆಪರಿಂ, ಇಜಾಬೆಲ್ ತೆರೆಜಾನ್ ದೊಳೆ ಧಾಂಪುನ್ ಧರ್ಲೆ, ಆನಿ ಕಾನಾಂಚೆರ್ ಆಪ್ಲೆ ಹಾತ್ ದಾಂಬುನ್ ಧರ್ಲೆ.

ಪೊಳ್ಕುರ‍್ಯಾ! ಉರ್ಡಲೊ ಜಾಕುಲೊ ಪೈ, ಬಸ್‍ಲ್ಲೆ ಕಡೆನ್ ದಾಂತ್ ಚಾಬೊನ್. “ಅಬಲ್ ಎಕಾ ಸ್ತ್ರೀಯೆಕ್ ಕಷ್ಟಿತಾಯ್? ತುಕಾ ಧಯ್ರ್ ಆಸ್ಲ್ಯಾರ್ ಮ್ಹಜೆ ಹಾತ್ ಸೊಡಯ್, ಆನಿ ತುಜಿ ಕಾಂಯ್ ನೀಜ್ ಬಹಾದುರಿ ಆಸ್ಲ್ಯಾರ್, ಮ್ಹಜೆ ಕಡೆನ್ ದಾಕಯ್!”

“ಜರೂರ್, ಬದ್ಮಾಶ್… ಜರೂರ್!” ಮ್ಹಣಾಲೊ ಮುಖೆಲಿ. “ಪುಣ್ ಮ್ಹಜೆಂ ತಿಚೆ ಕಡೆನ್ ಉಲವ್ನ್ ಜಾತಾ ವರೇಗ್ ಚಿಕ್ಕೆ ಥಾಂಬ್!” ಜಾಕುಲೊ ಪೈ ಸಾಂಪ್ಡೊನ್ ಆಸ್‍ಲ್ಲ್ಯಾ ಕದೆಲಾ ಸರ್ಶಿನ್ ತೊ ಗೆಲೊ – ತಲ್ವಾರ್ ಪಾಟಿಂ ಬಾಗಾವ್ನ್, ಥೊರ್ವಾಚಿ ಮೂಟ್ ತಾಣೆಂ ಪೈಚ್ಯಾ ಕಪಾಲಾರ್ ಧಾಡಾಯ್ಲಿ. ಪೈ ಥಂಯ್ಚ್ ದೊಳ್ಯಾಂಕ್ ಕಾಳೊಕ್ ಯೇವ್ನ್, ತಕ್ಲಿ ಮುಖಾರ್ ಬಾಗ್ವೊನ್ ಥಂಡ್ ಜಾಲೊ. ಅಕ್ಲಾಸಾನ್ ಆನಿ ಆಕಾಂತೊನ್, ಇಜಾಬೆಲ್ ತೆರೆಜಾನ್ ಏಕ್ ಮೇಟ್ ಮುಖಾರ್ ಕಾಡ್ತಾನಾ…

“ನಾ, ನಾ… ತುವೆಂ ಹಾಲ್ಚಿ ಗರ್ಜ್ ನಾ” ಹಾಸ್ಲೊ ಮುಖೆಲಿ. “ತಾಕಾ ಥೊಡಿ ಜ್ಹೆಮ್ ಆಯ್ಲ್ಯಾ. ತುವೆಂ ಹಾಲ್ಚಿ ಗರ್ಜ್ ಆಸ್ಲ್ಯಾರ್, ಹಾ… ಹಾಂವ್‍ಂಚ್ ತುಕಾ ಧಲಯ್ತಾಂ…” ಹೆರ್‌ಯೀ ಹಾಸ್ಲೆ.

“ನಾಯಿ! ಕತ್ತೆ!” ಮ್ಹಣಾಲೊ ಬೊಮ್ಮಾ. “ಮ್ಹಜೆಂ ತಿಮ್ಮಿ ಆಸ್ಲ್ಯಾರ್… ಆಮ್ಚಿ ಮೆಲ್ಲಿ ಬಾಯಮ್ಮ ಆಸ್ಲ್ಯಾರ್, ಆನಿ ಟಿಪ್ಪು ಸುಲ್ತಾನ್ ಆಸ್ಲ್ಯಾರ್ – ತುಮ್ಚಿ ನೀತ್ ಜಾಲ್ಯಾ ಶಿವಾಯ್ ಉರ್ಚಿ ನಾ!”

“ಬಂದ್ ಕರ್ಯಾ ತಾಚೆಂ ತೋಂಡ್!” ಮ್ಹಣಾಲೊ ಮುಖೆಲಿ. “ಧರ‍್ಯಾ… ಮನ್ಶ್ಯಾಚ್ಯಾ ತೊಂಡಾಂತ್ ತಾಚಿಚ್ ಶೆಂಡಿ ಚೆಪ್ಯಾ!”

ಎಕ್ಲ್ಯಾನ್ ಬೊಮ್ಮಾಚೆಂ ನಾಕ್ ಧರ್ನ್ ವಯ್ರ್ ವೊಡ್ಲೆಂ. ಥೊಡ್ಯಾಚ್ ವೆಳಾನ್ ಫುಗಾರ್ ಜಾವ್ನ್ ಉಗ್ತೆಂ ಜಾಲ್ಲ್ಯಾ ತಾಚ್ಯಾ ತೊಂಡಾಂತ್ ಆನ್ಯೇಕ್ಲ್ಯಾನ್ ಶೆಂಡಿ ಚೆಪ್ಲಿ ಆನಿ ತಾಲ್ವಾರಿಚ್ಯಾ ಥೊರ್ವಾನ್, ಬರಿಚ್ ಭಿತರ್ ಸಾಣ್ಸಿಲಿ. ತೊ ಬಾವ್ಡೊ, ಅರ್ಧೊ ಫುಗಾರ್ ಜಾವ್ನ್, ಉಸ್ತಿರ‍್ಯಾಂ ಘರ್ಘರೊಂಕ್ ಲಾಗ್ಲೊ.

“ದೆವಾ!” ಇಜಾಬೆಲ್ ತೆರೆಜ್, ವ್ಹಡ್ಲ್ಯಾನ್ ವಿಳಾಪ್ ಕರಿಲಾಗ್ಲಿ. “ಆಮ್ಚಿ ಖಬರ್ ಘೆತೆಲೆ ಸಾಯ್ಬಾ… ನಾಂತ್‍ಗೀ ಕೊಣೀ?” ಹಾತಾಂಚೆರ್ ಮಾನ್ ಬಾಗಾವ್ನ್ ತಿ ರಡ್ಲಿ.

“ಜರೂರ್… ದೆವಾಚ್ಯಾ ನಾಂವಾನ್ ಆಸಾತ್ ಭಯ್ಣಿ!” ಸರ್ದಾರ್ ಸಿಮಾಂವ್ ತಲ್ವಾರ್ ಫುಡೆಂ ಆಡ್ ಧರುನ್ ಸಾಲಾಂತ್ ಪಾವ್‍ಲ್ಲೊ!

“ಕೌನ್… ಸೂಆ… ಯ್ಯೋ!” ಮ್ಹಣಾಲೊ ಮುಖೆಲಿ. ತಾಣೆಂ ‘ಸೂಆ… ಮ್ಹಣ್ತಾನಾಂಚ್ ‘ರ್‍ರ್’ ಮ್ಹಣ್ ಜಾಪ್ ದಿಲ್ಲೆಪರಿಂ, ಸರ್ದಾರ್ ಸಿಮಾಂವ್ಚ್ಯಾ ಹಾತಾಂತ್ಲಿ ತಲ್ವಾರ್, ಝಗ್ಲಾಣ್ಯಾಪರಿಂ ಮುಖೆಲ್ಯಾಚ್ಯಾ ಉಜ್ವ್ಯಾ ಬಾವ್ಳ್ಯಾಕ್ ಖೊಂಚ್ ಮಾರ್ನ್ ಪಾಟಿಂ ಆಯ್ಲಿ. ಕೆವ್ಲ್ಯಾಚಿ ‘ಯ್ಯೋ..!” ಆಖೇರ್ ಜಾತಾನಾ, ತಾಚ್ಯಾ ಹಾತಾಂತ್ಲಿ ತಲ್ವಾರ್ ಝಡ್‍ಲ್ಲಿ.

ತಿತ್ಲ್ಯಾಚ್ ವೆಳಾ ಭಿತರ್, ಸರ್ದಾರ್ ಸಿಮಾಂವ್ಚೆ ಸವಾರ್‌ಯೀ ಭಿತರ್ ಪಾವೊನ್, ಚವ್ಗ್ ಪುಂಡಾಂಚಿಂ ಹಾತೆರಾಂ ಥಡಾ ಜಾಲ್ಲಿಂ ಆನಿ ತೆ ಕೈದ್ ಖಡಾ ಜಾಲ್ಲೆ.

ಖಂಯ್ ಥಾವ್ನ್ ಕೋಣ್ ಜಾಣಾಂ… “ದೇವೆರೇ! ಅಮ್ಮಾ!” ಮ್ಹಣೊನ್ ಸಂತೊಸಾಚಿ ಬೋಬ್ ದೀವ್ನ್ ತಿಮ್ಮಿ ಭಿತರ್ ಪಾವ್‍ಲ್ಲೆಂ. ಘಡ್ಯೆ ಭಿತರ್ ಪೈಕ್ ಆನಿ ಬೊಮ್ಮಾಕ್ ಪಾಸಾಂತ್ಲಿ ಆನಿ ಕೇಸಾಂತ್ಲಿಯೀ ಸುಟ್ಕಾ ದೀವ್ನ್, ಉದ್ಕಾಚಿ ಆನಿ ಹೆರ್ ಶುಶ್ರೂಷಾ ಕರಿಲಾಗ್ಲೆಂ.

ಸಕ್ಡಾಂ ಪ್ರಾಸ್ ಚಡ್ ವಿಜ್ಮಿತ್ ಆನಿ ಸಂತೊಸ್ ಪಾವೊನ್ ಥಟಕ್ ಜಾಲ್ಲಿ ಇಜಾಬೆಲ್ ತೆರೆಜ್. ಥೊಡ್ಯಾ ದಿಸಾಂ ಆದಿಂ ‘ಸಂತ ಕತರೀನಾ’ ಮಂಜೆಂತ್, ತೊಪಾಸಿ ಕಾರ್ಡೊಜಾಚ್ಯಾ ಅಬ್ಲೆಸಾಕ್ ಆನಿ ಫಾರಿಕ್ಪಣಾಕ್ ಬಲಿ ಜಾಂವ್ಕ್ ಲಾಗಿಂ ಪಾವ್‍ಲ್ಲ್ಯಾ ಚಡುಣೆಂ ಅಸಲ್ಯಾಚ್ ಪರಿಸ್ಥಿತೆಂತ್ ತೊ ಉದೆಲ್ಲೊ! ಆನಿ ಆಜ್…

“ಜಾವ್ಯೆತ್ ಹೆಂ ನೀಜ್…”

“ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ನಾಂವಿಂ ಖಬಡ್ದಾರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್, ಜೆರಾಲ್ ಥರಾನ್ ತಿಕಾ ಉಲಂವ್ಕ್ ಸೊಡಿನಾಸ್ತಾನಾ. ಹೆರಾಂ ಹುಜ್ರಿಂ ಆಪ್ಲಿ ವಳಕ್ ಆನಿ ಆತ್ಮೀಯ್ ಸಳಾವಳ್ ಆಸಾ ಮ್ಹಣ್ ದಾಕಯ್ನಾಯೆ ಮ್ಹಣ್ ತಾಣೆಂ ದಿಲ್ಲಿ ಜಾಗ್ವಣ್ ತಿಕಾ ಸಮ್ಜಲಿ. ಉಪ್ಕಾರಿ ಮನಾನ್ ತಿಣೆಂ ಮಾನ್ ಬಾಗಾಯ್ಲಿ.

ಪಯ್ಲೆಂಚ್, ಅವ್ಚಿತ್, ಬರ್ಫಾಚ್ಯಾ ಉದ್ಕಾಂತ್ ಬುಡವ್ನ್ ಬುಡವ್ನ್ ವಯ್ರ್ ಕಾಡ್‍ಲ್ಲೆಪರಿಂ ಜಾಲ್ಲೆ ಮುಖೆಲಿ ಆನಿ ಸಾಂಗಾತಿ, ಬಾದಶಹಾಚೆಂ ನಾಂವ್ ಆಯ್ಕೊನ್, ತಶೆಂಚ್ ಸರ್ದಾರಾಚಿ ಆನಿ ತಾಚ್ಯಾ ಸವಾರಾಂಚಿಂ ಸಮವಸ್ತ್ರಾಂ ಆನಿ ವೈಭವ್, ಸೊಮಯೆಚ್ಯಾ ತ್ಯಾ ಗೈರ‍್ಯಾ ಉಜ್ವಾಡಾಂತ್ ಜಾಲ್ಯಾರೀ, ಪಳೆವ್ನ್ ಪುರ್ತೆ ಭಿಜುಡ್ಲೆ.

“ಕಿತ್ಯಾಕ್ ಕೊಣೀ ಉಲಯ್ನಾಂತ್? ಹಾಂಗಾಸರ್ ದೊಗಾಂಕ್ ಬಾಂಧುನ್ ಘಾಲ್ನ್ ಕಿತೆಂ, ಆನಿ ಕಿತ್ಯಾಕ್ ಜಾತಾಲೆಂ ಮ್ಹಣ್ ಆಯ್ಕೊಂಕ್ ಆಮಿ ಖುಶಿ ವ್ಹರ್ತಾಂವ್” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ಹೊ ಏಕ್ ಕಪಿ ಆನಿ ಹಿಂ ಥೊಡಿಂ ಕತ್ತಿಂ…” ಸುರು ಕೆಲೆಂ ಬೊಮ್ಮಾನ್, ಜಾಕಾ ಆತಾಂ ಚಾರ್ ಭುಜಾಂ ಜಾಲ್ಲಿಂ.

“ಹಾಂವ್ ಸಾಂಗ್ತಾಂ” ಮ್ಹಣಾಲೊ ಜಾಕುಲೊ ಪೈ, ಜೊ, ನಹಿಂಚ್ ಸನಿನ್ ಜಾಲ್ಲೊ, ಬಗಾರ್ ಸರ್ದಾರ್ ಸಿಮಾಂವ್ಕ್ ಪಳೆವ್ನ್, ದಿಂಬಿ ಘಾಲ್ನ್, ಹಾತ್ ವಯ್ರ್ ಕರ್ನ್, ಭಾಗೆವಂತ್ ಖುರ್ಸಾಕ್ ನಾಂವಾಡುಂಕ್ ತಯಾರ್ ಜಾಲ್ಲೊ.

“ತುಮ್ಚೆಂ ಹಾಂವ್ ಉಪ್ರಾಂತ್ ಆಯ್ಕತಾಂ. ಪಯ್ಲೆಂ ಹೊ ಮಾನಾಯ್ ಉಲಂವ್ದಿ” ಮ್ಹಣಾಲೊ ಸರ್ದಾರ್, ತ್ಯಾ ಮುಖೆಲ್ಯಾಕ್ ದಾಕವ್ನ್. “ಕೋಣ್ ಹ್ಯಾ ತುಂ? ಕಸಲೆಂ ಜಾವ್ಯೆತ್ ತುಜೆಂ ಕಾಮ್?”

ತ್ಯಾ ಮನ್ಶ್ಯಾನ್ ಏಕ್ ಪಾವ್ಟಿಂ ಆಂಯ್ಡೊ ಘೊಟುನ್ ಸ್ವರ್ ಸಡಿಳ್ ಕೆಲೊ. ದೋನ್ ಪಾವ್ಟಿಂ ತೋಂಡ್ ಉಗ್ತೆಂ ಕೆಲೆಂ. ತಿಸ್ರ್ಯಾ ಪಾವ್ಟಿಂ ಆವಾಜ್ ಭಾಯ್ರ್ ಸರ್ಲೊ.

“ಹಾ-ಹಾಂವ್ ಷೇರ್ ಖಾನ್.”

“ಷೇರ್ ಖಾನ್! ವಿಶೇಸ್ ನಾಂವ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. ತ್ಯಾ ಮನ್ಶ್ಯಾಕ್ ಖಿಲ್ಲೆದಾರ್ ವೀರಪ್ಪ ನಾಯ್ಕಾನ್ ವಿವರ್ಸಿಲ್ಲೊ ಉಗ್ಡಾಸ್ ತಾಕಾ ಆಯ್ಲೊ. ನಿಜಾಯ್ಕೀ ವಾಸ್ಯಾಪರಿಂ ಥೊಡಿ ಲಾಂಬಾಯ್ ತಾಕಾ ಆಸ್‍ಲ್ಲಿ. ಬೊಕ್ಡ್ಯೆಪರಿಂ ಥೊಡಿ ಖಾಡ್-ಮಿಶಿ ಸೊಡ್ಲ್ಯಾರ್, ತಾಚ್ಯಾ ಭುಜಾಂಚಿ ರುಂದಾಯ್, ಉಂದ್ರಾಚ್ಯಾ ಶಿಮ್ಟೆ ಪ್ರಾಸ್ ಚಡ್ ರೂಂದ್ ಜಾತಿ ನಾ.

“ಆನಿ ತುಜೆಂ ಕಾಮ್?”

“ಬಾ-ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಸರ್ಕಾರಾಂತ್ ಎಕ್ಲೊ ಹುದ್ದೆದಾರ್ ಹಾಂವ್.”

“ಕಸಲೊ ಜಾವ್ಯೆತ್?”

“ಮ್ಹಜೆ ಕಡೆನ್ ಸವಾಲಾಂ ವಿಚಾರ್ಚೊ ಗ್ರಾಯ್ಕ್ ಕೋಣ್?” ತಾಣೆಂ ಆಪ್ಲೊ ಹರ್ದ್ಯಾಚೊ ಘುಡ್ ಫುಲಂವ್ಕ್ ಥೊಡೆಂ ಪ್ರಯತ್ನ್ ಕೆಲೆಂ.

“ತೆಂ ಜಾಲ್ಯಾರ್ ಖುಶೆನ್ ಸಾಂಗ್ತಾಂ ಹಾಂವ್” ಮ್ಹಣಾಲೊ ಸರ್ದಾರ್, ರಾಗ್ ದಾಂಬುನ್, ತರೀ, ಅಮ್ರುಕೊ ಹಾಸೊನ್. “ಸರ್ದಾರ್ ಸಿಮಾಂವ್ ಪೆದ್ರು ಮ್ಹಜೆಂ ನಾಂವ್. ತರ್ ಸಾಂಗ್… ಆಮ್ಕಾಂ ಸಬಾರ್ ದುಸ್ರಿ ರಾಟಾವಳ್ ಆಸಾ… ತುಜೊ ಹುದ್ದೊ ಕಸಲೊ ಜಾವ್ಯೆತ್?”

ಸರ್ದಾರ್ ಸಿಮಾಂವ್ಚೆಂ ನಾಂವ್ ಆಯ್ಕೊನ್, ಷೇರ್ ಖಾನಾಕ್ ಆನಿ ತಾಚ್ಯಾ ಸಾಂಗಾತ್ಯಾಂಕ್ ಕುಲ್ಕುಲೊ ಲಾಗ್‍ಲ್ಲೊ.

“ಹಾ-ಹಾಂವ್” ಷೇರ್ ಖಾನ್ ಆತಾಂ ಪಿಂರ್ಗಲೊ. “ಬೋಳೂರ್ ಠಾಣ್ಯಾಂತ್ ಖಿಲ್ಲೆದಾರಾಚೊ ಪ್ರತಿನಿಧಿ.”

“ತುಕಾ ಕೊಣೆಂ ನಮಿಯಾರ್‌ಲ್ಲೊ ಜಾವ್ಯೆತ್?”

“ಖಿ-ಖಿಲ್ಲೆದಾರಾನ್‍ಂಚ್.”

“ಬರಿ ಖಬಾರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಬಾದಶಹಾಚ್ಯಾ ಸರ್ಕಾರಾಂತ್ಲ್ಯಾ ಕೊಣೀ ಹುದ್ದೆದಾರಾಂಕ್ ಭೆಟೊಂಕ್ ಆಮಿ ಖುಶಿ ಪಾವ್ತಾಂವ್. ಪುಣ್…” ಮ್ಹಣ್ತಚ್ ತಾಚೊ ಸ್ವರ್ ಚಿಕ್ಕೆ ಕಠಿಣ್ ಜಾಲೊ. “ಬಂದಡೆ ವೆಳಾರ್ ಥೊಡ್ಯಾ ಪ್ರತ್ಯೇಕ್ ಘರಾಂಚೆರ್ ಅತಿಕ್ರಮಣ್ ಜಾಂವ್ ಕಸಲಿಚ್ ದಾಡ್ ಚಲಯ್ನಾಯೆ ಮ್ಹಣ್ ಬಾದಶಹಾಚಿ ಸ್ಪಷ್ಟ್ ಹುಕುಮ್ ಆಸಾ. ತಸಲ್ಯಾ ರಿಯಾಯ್ತೆಂತ್ ದಾಖಲ್ ಜಾಲ್ಲ್ಯಾಂ ಪಯ್ಕಿ ಹೆಂಯೀ ಘರ್ ಏಕ್ ಜಾವ್ನಾಸಾ. ತರ್, ತುಂ ಆನಿ ತುಜೆ ಹೆ ಸಾಂಗಾತಿ, ಬಾದಶಹಾಚ್ಯಾ ಶಾಸನಾಚೆಂ ಉಲ್ಲಂಘನ್ ಕರ್ನ್, ಹಾಂಗಾಸರ್ ಪಾವ್ಲ್ಯಾತ್ ಕಿತ್ಯಾಕ್ ಜಾವ್ಯೆತ್?”

ಷೇರ್ ಖಾನ್ ಥೊಡೊ ವೇಳ್ ಜಾಪ್ ದೀಂವ್ಕ್ ಸಕ್ಲೊ ನಾ. ಅಂತುಲ್ಯಾಕ್ ಸರ್ದಾರ್ ಸಿಮಾಂವ್ಚ್ಯಾ ಉತ್ರಾಂಚಿ ಧಾರ್ ಆತಾಂ ಸಮ್ಜಲಿ. ಪರಾರಿ ಜಾಲ್ಲ್ಯಾ ಖಿಲ್ಲೆದಾರಾಚಿ, ವೆರೊನಿಕಾ ಕುವೆಲಿಚಿ, ಮೊನಿಕಾಚಿ ವಾ ತಸಲಿ ಕಸಲಿಯೀ ಖಬರ್ ಆಸ್ಲ್ಯಾರ್ ಭೋವ್ ನಾಜೂಕಾಯೆನ್ ಭಾಯ್ರ್ ಕಾಡುಂಕ್ ಅಸೊ ವೇಳ್ ತೊ ಖರ್ಚಿತಾಲೊ.

ಹೆರ್ ವೆಳಾರ್ ಜಾಲ್ಯಾರ್, ಸರ್ದಾರ್ ಸಿಮಾಂವ್ ಅಸಲ್ಯಾ ಸವಾಯ್ ಮನ್ಶ್ಯಾಂಕ್ ಲಾಥ್ ವಾ ಚಾಟಿಯಾಂಚೆ ಮಾರ್ ಫರ್ಮಾವ್ನ್ ಫೈಸಲ್ ಕರ್ತೊ. ಪುಣ್ ಹ್ಯಾ ವೆಳಾರ್ ತಾಚಿಂ ಚಿಂತ್ನಾಂ ಗೂಂಡ್ ಆನಿ ಪಯ್ಸ್ ಆಸ್‍ಲ್ಲಿಂ.

“ಕಿತ್ಯಾಕ್ ಜಾಪ್ ನಾ? ವಾ ತುಮ್ಕಾಂ, ಬಾದಶಹಾಚೆಂ ಶಾಸನ್ ಭಂಗಯಿಲ್ಲ್ಯಾ ಖಾತಿರ್ ಕೈದ್ ಕರ್ನ್ ಝಡ್ತೆಕ್ ಲಾಂವ್ಚಿ ಮಾತ್ರ್…”

“ಹುಜೂರ್!” ಮ್ಹಣಾಲೊ ಷೇರ್ ಖಾನ್, ಪುರ್ತೊ ಥರ್ಥರೊನ್. “ತೆಂ ಶಾಸನ್ ಆಮ್ಕಾಂ ಕಳಿತ್ ನಾತ್‍ಲ್ಲೆಂ. ಮಾ-ಮಾಫ್ ಕರಿಜಾಯ್. ಪುಣ್ ನಿಜಾಯ್ಕೀ ಆಮಿ, ಸಂಶಯಾನ್ ಎಕಾ ರಾಜ್‍ದ್ರೋಹಿ ಯುವಕಾಕ್ ಸೊಧುನ್ ಆಯಿಲ್ಲ್ಯಾಂವ್.”

“ರಾಜ್‍ದ್ರೋಹಿ ಯುವಕಾಕ್… ಕೋಣ್ ತೊ ಜಾವ್ಯೆತ್?”

“ತೊ ಎಕ್ಲೊ ಮುಸ್ಲಿಮ್ ಯುವಕ್.”

“ಮುಸ್ಲಿಮ್?” ಸರ್ದಾರಾಚೆ ಕಾನ್ ಫುಲ್ಲೆ. ತರೀ, ಆತುರಾಯ್ ಭಾಯ್ಲ್ಯಾನ್ ದಾಕಯ್ನಾಸ್ತಾನಾ ತಾಣೆಂ ಮ್ಹಳೆಂ: “ಜಾವ್ಯೆತ್. ರಾಜ್‍ದ್ರೋಹಿಂಕ್ ಮಜತ್ ದಿತೆಲೆ, ಜಾಂವ್ ತೊ ಕ್ರಿಸ್ತಾಂವ್, ಹಿಂದೂ ವಾ ಮುಸ್ಲಿಮ್, ತೊಯೀ ರಾಜ್‍ದ್ರೋಹಿಚ್! ತಾಕಾ ತುಮಿ ಸೊಧುನ್ ಆಯಿಲ್ಲ್ಯಾತ್. ಕಿತೆಂ ಜಾಲೆಂ?”

ಹಾಂಗಾಸರ್ ಜವಾಬ್ ದೀಂವ್ಕ್ ಷೇರ್ ಖಾನ್ ಪರ್ತ್ಯಾನ್ ಕಷ್ಟಲೊ. ನಿಜಾಯ್ಕೀ ತೊ ಭಿಯೆಲ್ಲೊ. ಸರ್ದಾರ್ ಸಿಮಾಂವ್ಚಿ ತಲ್ವಾರ್ ಲಾಗೊನ್ ತಾಚ್ಯಾ ಬಾವ್ಳ್ಯಾಕ್ ಜಾಲ್ಲ್ಯಾ ಘಾಯಾಚಿ ಜಾಂವ್, ವ್ಹಾಂವ್ಚ್ಯಾ ರಗ್ತಾಚಿ ಜಾಂವ್ ತಾಕಾ ಪುರ್ತಿ ವಿಸರ್ ಪಡ್‍ಲ್ಲಿ. ಫಕತ್, ಸರ್ದಾರ್ ಸಿಮಾಂವ್ಚ್ಯಾ ಹಾತಾಂತ್ಲೊ ಸುಟೊನ್, ಏಕ್ ಪಾವ್ಟಿಂ ಬಚಾವ್ ಜಾವ್ನ್ ಪಾಶಾರ್ ಜಾಂವ್ಚಿಚ್ ತಾಕಾ ಖಂತ್ ಜಾವ್ನಾಸ್‍ಲ್ಲಿ.

“ತೊ ಚುಕವ್ನ್ ಧಾಂವ್ಲೊ. ಹ್ಯಾ ಘರಾ ಆಯ್ಲಾ ಜಾವ್ಯೆತ್ ಮ್ಹಣ್ ಆಮಿ ಹಾಂಗಾ ಆಯ್ಲ್ಯಾಂವ್. ಆಮಿ ವಿಚಾರ್‌ಲ್ಲ್ಯಾ ಸವಾಲಾಂಕ್ ಜವಾಬ್ ದಿಂವ್ಚ್ಯಾ ಬದ್ಲಾಕ್ ಹೆ ಆಮ್ಚೆ ಕಡೆನ್ ಝಗ್ಡೊಂಕ್ ಆಯ್ಲೆ…”

“ಫಟ್! ತೆಟ್ಟ್ ಫಟಿ…” ಉಟ್ಲೊ ಬೊಮ್ಮ. ತಾಕಾ ಥಂಡ್ ರಾವೊಂಕ್ ಸರ್ದಾರ್ ಸಿಮಾಂವ್ನ್ ಹಾತ್ ಭಾಸ್ ಕೆಲಿ. ಧಾಂವ್‍ಲ್ಲೊ ಗ್ರಾಯ್ಕ್ ಹಮೀದ್ ಜಾವ್ಯೆತ್ ಮ್ಹಣ್ ತಾಕಾ ಭೊಗ್ಲೆಂ. ಥಂಯ್ಸರ್ ಆಸ್ಯೆತ್ – ಜಾಯ್ ಜಾಲ್ಲ್ಯಾ ಖಬ್ರೆಕ್ ಶೆಳ್ ದಿಂವ್ಚ್ಯಾ ಆಶೆಚೊ ಏಕ್ ಥೆಂಬೊ.

“ತ್ಯಾ ಯುವಕಾಕ್ ಕೈದ್ ಕರುಂಕ್ ಕೊಣೆಂ ಹುಕುಮ್ ದಿಲ್ಲಿ?”

“ಖಿಲ್ಲೆದಾರಾನ್. ಉಪ್ರಾಂತ್ ಹಾಂವೆಂಚ್ ತಿ ಖುದ್ದ್ ಜಾರಿ ಕರುಂಕ್ ಅಧಿಕಾರ್ ಹಾತಾಂತ್ ಘೆತ್ಲೊ.”

“ಬರಾಬರ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಕಿತೆಂ ಜಾಲೆಂ ಮ್ಹಣ್ ಚಿಕ್ಕೆ ಮಟ್ವ್ಯಾನ್ ಸಾಂಗ್. ಸಗ್ಳಿ ರಾತ್, ಹಾಂಗಾಚ್ ರಾವೊಂಕ್ ಆಮ್ಕಾಂ ಪುರ್ಸತ್ ನಾ.”

ಷೇರ್ ಖಾನಾನ್, ಜಿವಾಚ್ಯಾ ಆಶೆನ್ ಮ್ಹಳ್ಳೆಪರಿಂ, ಗಜಾಲ್ ಸಾಂಗ್ಲಿ. ತಾಣೆಂ ಸಾಂಗ್‍ಲ್ಲ್ಯಾಂತ್, ತೀನ್ ಪಾವ್ ಫಟಿಚ್ ಜಾಲ್ಯಾರೀ, ಏಕ್ ಪಾವ್ ಪುಣೀ ಸತ್ ಆಸ್‍ಲ್ಲೆಂ. ತಾಣೆಂ ಸಾಂಗ್‍ಲ್ಲ್ಯಾ ಪ್ರಕಾರ್:

ಪಟ್ಟೆಚೆರ್ ನಾಂವಾಂ ದಾಖಲ್ ಜಾಲ್ಲೆ ಥೊಡೆ ನಸ್ರಾನಿ ಆದ್ಲ್ಯಾ ರಾತಿಂ (ಹಾಂಗಾಸರ್ ತಾಣೆಂ ಏಕ್ ದೀಸ್ ಪಾಟಿಂ ಫುಡೆಂ ಕರ್ನ್ ಫಟ್ ಮಾರ್‌ಲ್ಲಿ) ಕೊಡಿಯಾಲ್‍ಬೈಲ್ ಎಕಾ ಘರಾಂತ್ ಜಮ್ಲ್ಯಾತ್ ಮ್ಹಣ್ ತಾಕಾ ಖಬರ್ ಮೆಳ್ಳಿ. ದೆಕುನ್, ಫಾಂತ್ಯಾರ್ ಪಾಂಚ್ ಜಣಾಂ ಶಿಪಾಯಾಂಕ್ (ತೆ ಶಿಪಾಯ್ ನಹಿಂ, ಬಗಾರ್ ಹೆಚ್ ಪುಂಡುಗಾರ್) ಘೆವ್ನ್ ತೊ ಭಾಯ್ರ್ ಸರ್ಲೊ.

ತೆ ಚಡುಣೆಂ ಕುದ್ರೋಳಿ ಪಾವ್ತಾನಾ, ಎಕ್ಲೊ ಮುಸ್ಲಿಮ್ ಯುವಕ್, ಆನಿ ಬುರ್ಖಾ ಘಾಲ್ಲಿ ಏಕ್ ಸ್ತ್ರೀ, ಮುಖ್ಲ್ಯಾ ವಾಟೆನ್ ಯೇವ್ನ್ ತಾಂಕಾಂ ಉತ್ರೊನ್ ಗೆಲಿಂ. ಥೊಡೊ ವೇಳ್ ಜಾತಾನಾ, ತಾಕಾ ತ್ಯಾ ಯುವಕಾಚೊ ಉಗ್ಡಾಸ್ ಆಯ್ಲೊ, ಖಿಲ್ಲೆದಾರಾನ್ ಸಾಂಗ್‍ಲ್ಲೊ. ದೆಕುನ್, ದೊಗಾಂ ಶಿಪಾಯಾಂಕ್ ತಾಂಚೊ ಪಾಟ್ಲಾವ್ ಕರ್ನ್ ವಚೊನ್, ತಿಂ ಖಂಯ್ ವೆತಾತ್ ಮ್ಹಳ್ಳೆಂ ಸಮ್ಜೊನ್ ಯೇಂವ್ಕ್ ತಾಣೆಂ ಫರ್ಮಾಯಿಲ್ಲೆಂ.

ಉರ್‌ಲ್ಲ್ಯಾ ‘ಶಿಪಾಯಾಂ’ ಸಾಂಗಾತಾ ತೊ ಕೊಡಿಯಾಳ್‍ಬೈಲಾಕ್ ಗೆಲೊ. ಥಂಯ್ಸರ್ ಸಬಾರ್ ಘರಾಂನಿ ಜಪ್ತಿ ಕರ್ನ್ ಪಳೆಲ್ಯಾರೀ, ಲಿಪೊನ್ ವಾ ಪರಾಶ್ರಿತ್ ಜಾವ್ನ್ ಆಸ್‍ಲ್ಲೆ ನಸ್ರಾನಿ ಕೊಣೀ ಮೆಳೊಂಕ್ ನಾಂತ್, ತಾಣೆಂ ಧಾಡ್‍ಲ್ಲೆ ಶಿಪಾಯ್ ಪಾಟಿಂ ಯೇಂವ್ಕ್ ನಾಂತ್. ಲಾಗಿಂ ದೊನ್ಪಾರ್ ಜಾತಾನಾ ತೊ ಬೋಳೂರ್ ಠಾಣ್ಯಾಕ್ ಪಾಟಿಂ ಗೆಲೊ.

ಫುಡ್ಲ್ಯಾ ಅರ್ಧ್ಯಾ ವೊರಾ ಭಿತರ್, ತಾಣೆಂ ಧಾಡ್‍ಲ್ಲ್ಯಾ ಶಿಪಾಯಾಂತ್ಲೊ ಎಕ್ಲೊ, ತುರ್ತಾನ್ ಠಾಣ್ಯಾಕ್ ಆಯ್ಲೊ. ತಾಣಿಂ ಪಾಟ್ಲಾವ್ ಕರ್ನ್ ಗೆಲ್ಲಿಂ ತೊ ಯುವಕ್ ಆನಿ ಸ್ತ್ರೀ, ಪಾಟಿಂ ಪಳೆವ್ನ್ ಪಳೆವ್ನ್, ಭಿಯಾನ್ ಮ್ಹಳ್ಳೆಪರಿಂ ತುರ್ತಾನ್ ಫುಡೆಂಚ್ ಚಲ್ಲಿಂ ಖಂಯ್. ಶೀದಾ, ಉರ್ವಾ ಮೊಳ್ಯಾಚ್ಯಾ ಬಗ್ಲೆನ್ ತಿಂ ವೆತಾಲಿಂ ಖಂಯ್. ಎಕಾಚ್ಛಾಣೆಂ, ಶಿಪಾಯಾಂನಿ ಜಾಗ್ರುತ್ ಜಾಂವ್ಚ್ಯಾ ಆದಿಂಚ್, ಮೊಳ್ಯಾ ಭಿತರ್ ಸರೊನ್ ಮಾಯಾಗ್ ತಿಂ ಜಾಲಿಂ ಖಂಯ್!

“ಶಿಪಾಯ್ ಘಡ್ಬಡ್ಲೆ” ಷೇರ್ ಖಾನಾನ್ ವಿವರ್ ದಿಲೊ. “ಕಿತೆಂ ಕರ್ಚೆಂ ಮ್ಹಣ್ ತಾಂಕಾಂ ಸಮ್ಜೊಂಕ್ ನಾ. ಥೊಡೊ ವೇಳ್, ಥಂಯ್ಚ್ ಭಾಯ್ಲ್ಯಾನ್ ಪಾಸಾಯೊ ಮಾರ್ನ್ ತೆ ರಾವ್ಲೆ. ಉಪ್ರಾಂತ್ ಭಿತರ್ ರಿಗ್ಲೆ. ಥೊಡೊ ವೇಳ್ ಸೊಧುನ್ ತಾಣಿಂ ಪಳೆಲೆಂ. ಪ್ರಯೋಜನ್ ಜಾಲೆಂ ನಾ.”

“ಅಜ್ಯಾಪ್‍ಚ್ ಸಯ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಉಪ್ರಾಂತ್?”

“ಉಪ್ರಾಂತ್ ಥೊಡೊ ವೇಳ್, ಭಾಯ್ರ್ ಯೇವ್ನ್, ರಾಕೊನ್ ತೆ ರಾವ್ಲೆ. ದೀಸ್ ದೊನ್ಪಾರ್ ಜಾಲ್ಲೊ ಪಳೆವ್ನ್, ತಾಂತ್ಲೊ ಎಕ್ಲೊ ಥಂಯ್ ರಾವ್ಲೊ. ಆನ್ಯೇಕ್ಲೊ, ಮ್ಹಾಕಾ ಖಬರ್ ದಿಂವ್ಚ್ಯಾ ಖಾತಿರ್, ಬೋಳೂರ್ ಠಾಣ್ಯಾಕ್ ಆಯ್ಲೊ.

“ಹಾಂತುಂ ಕಿತೆಂ ತರೀ ಶಿರಿಗುಂಡಿ ಆಸಾ ಮ್ಹಣ್ ಮ್ಹಾಕಾ ಸಂಶಯ್ ಮಾರ್ಲೊ. ಉರ್ವಾಚ್ಯಾ ಮೊಳ್ಯಾಂತ್, ಕಾಂಯ್ ನಸ್ರಾನಿ ದುಸ್ಮಾನ್ ಮೆಳೊನ್ ಶಿರಿಗುಂಡಿ ಚಲಯ್ತಾತ್ ಜಾಲ್ಯಾರ್ ಸಮ್ಜೊನ್ ಘೆಂವ್ಯಾಂ ಮ್ಹಣ್, ಹಾಂವ್‍ಂಚ್ ಹ್ಯಾ ಶಿಪಾಯಾಂಕ್ ಘೆವ್ನ್, ದೊನ್ಪಾರಾಂ ಉಪ್ರಾಂತ್ ಥಂಯ್ ಗೆಲೊಂ.”

“ಧೈರಾಧಿಕ್ ಮನಿಸ್ ತುಂ!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಥಂಯ್ ಪಾವೊನ್ ಕಿತೆಂ ಸಮ್ಜೊನ್ ಘೆತ್ಲೆಂಯ್?”

“ಮೊಳ್ಯಾಕ್ ವೆಡೊ ಮಾರ್ನ್, ಭಿತರ್ ಜಾತಾ ತಿತ್ಲೆಂ ಸೊಧುನ್ ಪಳೆಲೆಂ. ಕೊಣೀ ಝಳ್ಕೊಂಕ್ ನಾಂತ್.”

“ತರ್?”

“ಸಾಂಜ್ ಜಾತಾನಾ, ಎಕ್ಲೊ ಯುವಕ್ ಮೊಳ್ಯಾಂತ್ಲೊ ಚೊರಿಯೆಂ ಭಾಯ್ರ್ ಸರೊನ್, ಪಾರ್ಕೊ ಪಾರ್ಕೊ ಜಾವ್ನ್, ಹೆವ್ಶಿಲಿ, ಕಾವೂರ್ಚಿ, ವಾಟ್ ಧರ್ನ್ ಧಾಂವೊನ್ ಯೆಂವ್ಚೊ ಆಮ್ಕಾಂ ಝಳ್ಕಲೊ.”

“ಶಹಭಾಸ್!”

“ತಾಚೊ ಪಾಟ್ಲಾವ್ ಧರ್ನ್ ಆಮಿ ಹೆವ್ಶಿನ್ ಆಯ್ಲ್ಯಾಂವ್. ನಿಮಾಣೆಂ, ಬಹುಶಃ ತೊ ಹ್ಯಾಚ್ ಘರಾಂತ್ ಲಿಪ್ಲಾ ಜಾವ್ಯೆತ್ ಮ್ಹಣ್ ಚಿಂತುನ್, ಆಮಿ ಹಾಂಗಾಸರ್ ಆಯ್ಲ್ಯಾಂವ್.”

“ಸಮ್ಜಲೆಂ. ಉಪ್ರಾಂತ್ಲಿ ತುಜಿ ಆಲೋಚನ್?”

“ಹುಜೂರ್…” ಪಿಂರ್ಗಲೊ ಷೇರ್ ಖಾನ್.

“ಆಸೊಂ” ಮ್ಹಣಾಲೊ ಸರ್ದಾರ್. “ತುಜೊ ಉದ್ದೇಶ್ ಬರೊ ಆಸ್‍ಲ್ಲೊ ಜಾವ್ಯೆತ್. ಪುಣ್, ತುವೆಂ ಸಾಂಗ್ಚ್ಯಾ ತ್ಯಾ ‘ರಾಜ್‍ದ್ರೋಹಿ’ ಯುವಕಾಚೊ ಆನಿ, ತಾಚ್ಯಾ ಸಾಂಗಾತಾ ಅದೃಶ್ಯ್ ಜಾಲ್ಲ್ಯಾ ತ್ಯಾ ಸ್ತ್ರೀಯೆಚೊ ಪತ್ತೊ ಧರ್ನ್ ದಿಂವ್ಚಿ ಜವಾಬ್ದಾರಿ ತುಜಿ.”

“ಹುಜೂರ್…”

“ಬರಾಬರ್! ತೆದೊಳ್ ಪರ್ಯಾಂತ್, ಆನಿ ಚುಕ್ಶಿ ಜಾಲ್ಯಾರ್, ಬಾದಶಹಾಚ್ಯಾ ಹುಕ್ಮೆನ್ ಸುರಕ್ಷಿತ್ ಮ್ಹಣ್ ಪಾಚಾರ್‌ಲ್ಲ್ಯಾ, ಆನಿ ಬಾದಶಹಾಚೊ ಖಾಸ್ಗಿ ಮುನ್ಶಿ ಜಾವ್ನಾಸ್‍ಲ್ಲ್ಯಾ ಮಾನೆಸ್ತ್ ಸಾಲ್ವದೊರ್ ಪಿಂತಾಚ್ಯಾ, ಹ್ಯಾ ಘರಾಂತ್ ಅಕ್ರಮ್ ಚಲಯಿಲ್ಲೊ ಅಪ್ರಾಧ್, ತುಮ್ಚ್ಯಾಚ್ ಗೊಮ್ಟ್ಯಾಕ್ ಪಾಸ್ ಜಾವ್ನ್ ಥಿರ್ ಉರ್ತಲೊ. ಕಳಿತ್ ಆಸೊಂದಿ. ತುಮ್ಕಾಂ ತೀನ್ ದಿಸಾಂಚೊ ವಾಯ್ದೊ… ಆತಾಂಚ್ ತುಮಿ ಹಾಂಗಾ ಥಾವ್ನ್ ಪಾಯ್ ಕಾಡ್ಯೆತ್.”

“ಪುಣ್ ಸರ್ದಾರಾ!” ಅಂತುಲೊ ಘಾಬರ್ಲೊ. “ಹ್ಯಾ ಮನ್ಶ್ಯಾಕ್…”

“ಹಾಂವ್ ಜಾಣಾಂ!” ಸರ್ದಾರಾನ್ ಧೆಂಕ್ಣೊ ಮಾರ್ಲೊ. ಅಂತುಲೊ ಪಡ್ವಳ್ ಥಂಡ್ ಪಡ್ಲೊ.

“ಕಾಳ್ಕಿ ರಾತ್. ಹಾಂಚ್ಯಾ ಸಾಂಗಾತಾ ಆಮ್ಚ್ಯಾ ಚವ್ಗಾಂ ಸವಾರಾಂಕ್ ಧಾಡ್. ಫಾಲ್ಕೆಂ ಉತರ್ಲ್ಯಾ ಉಪ್ರಾಂತ್, ತಾಂಚಿಂ ಹಾತೆರಾಂ ಪಾಟಿಂ ದೀವ್ನ್ ತಾಂಕಾಂ ಸೊಡುನ್, ತೆ ಪಾಟಿಂ ಯೇಂವ್ದಿತ್. ಉಪ್ರಾಂತ್… ಹಾಂಗಾಸರ್ ರಾವೊಂಕ್ ಆಮ್ಕಾಂ ವೇಳ್ ನಾ. ಆಜ್‍ಚ್ ರಾತಿಂ, ಆನ್ಯೇಕಾ ಸೊಧ್ನೆ ಖಾತಿರ್, ದುಸ್ರ್ಯಾಚ್ ವಾಟೆನ್ ಆಮ್ಕಾಂ ವಚೊಂಕ್ ಆಸಾ. ತೀನ್ ದಿಸಾಂನಿ, ಅಮಿ ಪರತ್ ಬೋಳೂರ್ ಠಾಣ್ಯಾಕ್ ಪಾಟಿಂ ಯೆವ್ಯೆತ್.”

ಷೇರ್ ಖಾನ್ ಆನಿ ತಾಚೆ ಸಾಂಗಾತಿ, ಜೀವ್ ದಾನ್ ಜಾಲ್ಲ್ಯಾ ಸಂತೊಸಾನ್ ನವೆಚ್ ಸುಡ್ಸುಡಿತ್ ಜಾವ್ನ್ ಭಾಯ್ರ್ ಸರ್ಲೆ. ಸರ್ದಾರಾಚ್ಯಾ ಹುಕ್ಮೆ ಪ್ರಕಾರ್, ತಾಚೆ ಚವ್ಗ್ ಸವಾರ್, ಬೊಮ್ಮಾ ಕಡ್ಚ್ಯೊ ದೋನ್ ಚೂಡಿ ಪೆಟವ್ನ್ ಘೆವ್ನ್ ಗೆಲೆ.

ತೆ ಸಕಯ್ಲ್ ಪಾವ್ತಚ್, ಸಂತೊಸಾಚಿಂ, ಮೊಗಾಚಿಂ, ಖಂತಿಚಿಂ ಆನಿ ಉಪ್ಕಾರ್ ಬಾವುಡ್ಚಿಂ ಸರ್ವ್ ಚಿಂತನಾಂ ಉಗ್ಡಾಪಿಂ ಜಾಲಿಂ. ಜೋಕಿಮ್ ಸಿಲ್ವಾ ಪೈಕ್, ಉಲಂವ್ಕ್ ಜೀಬ್ ಪರ್ತನಾ ಜಾಲಿ. ಇಜಾಬೆಲ್ ತೆರೆಜ್ ಕುಂವರ್ನಿಕ್ ದುಖಾಂ ತಡ್ವನಾ ಜಾಲಿಂ.

“ಸರ್ದಾರಾ…” ಸುಸ್ಕಾರ್ಲಿ ತಿ. “ಎಕಾ ಮಹಿನ್ಯಾದಿಂ ಉದ್ಕಾಂತ್ಲ್ಯಾ, ಆನಿ ಆಜ್ ಪರತ್ ಧರ್ಣಿ ವಯ್ಲ್ಯಾ ಇಂಫೆರ್ನಾಚ್ಯಾ ದಾಡ್ಯಾಂತ್ಲಿ ಮ್ಹಾಕಾ ತುವೆಂ ರಾಕ್ಲಾಂಯ್. ಹೆರಾಂಕ್‍ಯೀ…” ಮ್ಹಣ್ತಾನಾ, ಮೊಗಾನ್ ತಿಚಿ ದೀಷ್ಟ್ ಏಕ್ ಘಡಿ ಜಾಕುಲ್ಯಾಚೆರ್ ಭೊಂವೊನ್ ಪಾಟಿಂ ಆಯ್ಲಿ. “ಸೊಡ್ವಣೆಚೊ ದೂತ್ ಜಾವ್ನ್ ತುಂ ಉದೆಲೊಯ್…”

“ಆಸೊಂದಿ ಭಯ್ಣಿ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಸರ್ವ್‍ಯೀ, ತುಮ್ಚ್ಯಾ ಪ್ರಾರ್ಥನಾಂಚಿ ಮಹಿಮಾ. ತುಮ್ಚಿ ವೆರೊನಿಕಾಬಾಯ್ ಆನಿ ಮೊನಿಕಾಬಾಯ್ ಪಾಟಿಂ ಯೆತಾತ್ ಪರ್ಯಾಂತ್, ವಾ ತಾಂಚಿ ಬರಿ ಖಬರ್ ಮೆಳ್ತಾ ಪರ್ಯಾಂತ್ – ತುಮ್ಚ್ಯಾ ಬರ‍್ಯಾ ವಾವ್ರಾಂತ್ ನಿರಾಶಿ ಜಾಯ್ನಾಕಾತ್. ತುಮ್ಚ್ಯಾ ಮಾಗ್ಣ್ಯಾಂನಿ ಸುರಾತಿ ಜಾಯ್ನಾಕಾತ್…”

“ಕೆದಿಂಚ್ ನಾ, ಸರ್ದಾರ್ ಭಾವಾ!”

“ಸಕ್ಕಡ್ ವ್ಹಯ್ ದೇವೆರೇ” ಮ್ಹಣಾಲೊ ಬೊಮ್ಮ. “ತುಮಿ ಯೆತಾನಾ ಚಿಕ್ಕೆ ಪಿನೀ ಪುಣೀ ಪಯ್ಲೆಂ ಆಯಿಲ್ಲ್ಯಾತ್ ಜಾಲ್ಯಾರ್, ಮ್ಹಜಿ ಶೆಂಡಿ ಪುಣೀ ಉರ್ತಿ… ನಹಿಂ, ಮ್ಹಾಕಾ ಬೆಜಾರ್ ನಾ…”

“ಪರ್ವಾ ನಾ ಮಿತ್ರಾ” ಹಾಸ್ಲೊ ಸರ್ದಾರ್ ಸಿಮಾಂವ್. ಹೆರಾಂಕ್‍ಯೀ ಹಾಸೊ ತಡ್ವುಂಕ್ ಜಾಂವ್ಕ್ ನಾ. “ಶೆಂಡಿ ಗೆಲ್ಯಾರ್ ಪರ್ವಾ ನಾ. ಹಾಂವ್ ಭಿತರ್ ಯೇಂವ್ಕ್ ನಾತ್‍ಲ್ಲೊಂ ಜಾಲ್ಯಾರ್, ತುಜ್ಯಾಚ್ ಕೆಸಾಂ ವರ್ವಿಂ, ತಾಳೊ ಗಳೊ ನಳೊ ಫುಗಾರ್ ಜಾವ್ನ್, ಭೋವ್ ವಳ್ವಳ್ಯಾಂನಿ…”

“ಸರ್ದಾರ್ ಧನ್ಯಾ!” ಅಂತುಲೊ ಪ್ರಸಂಗಿ ಜಾಲೊ. “ತುವೆಂ ತ್ಯಾ ಷೇರ್ ಖಾನಾಕ್ ಆನಿ ತಾಚ್ಯಾ ಸುಣ್ಯಾಂಕ್, ಹಾಂಗಾಚ್ ಫಾಶಿ ಫರ್ಮಾಯ್ನಾಸ್ತಾಂ ಸೊಡ್ಲೆಂಯ್ ಕಿತ್ಯಾಕ್ ಮ್ಹಣ್…”

“ತುಕಾ ಸಮ್ಜನಾ ಪಡ್ವಳ್” ಸಮ್ಜಯ್ಲೆಂ ಸರ್ದಾರಾನ್. “ತೊ ಮನಿಸ್ ಹ್ಯಾ ಉಪ್ರಾಂತ್ ತಾಚೆ ತೆದಿ ಭಾಂಗಾರಾಚಿ ರಾಸ್ ಭಾಸಾಯ್ಲ್ಯಾರೀ, ಠಾಣ್ಯಾಕ್ ಪಾಟಿಂ ವಚಾಸೊ ನಾ. ಆನ್ಯೇಕ್ ವಿಷಯ್: ಖಂಯ್ ತೊ ಗೆಲ್ಯಾರೀ, ತಾಚೆಂ ತೆಂ ಬೊಕ್ಡಿ ಸೊಂಡ್ ಆನಿ ಶಿರ್ಪುಟೆಂ ಲಾಂಬೆಟೆಂ ರೂಪ್ ತಾಣೆಂ ಲಿಪಂವ್ಚೆಪರಿಂ ನಾ. ಮ್ಹಣ್ತಚ್, ತಾಚ್ಯಾ ಪೊಳಾಪೊಳಿ ವರ್ವಿಂ, ಖಿಲ್ಲೆದಾರಾಕ್ ಧರ್ಚಿ ಆನಿ ಆಮ್ಚ್ಯಾ ಹೆರಾಂಕ್ ಭೆಟ್ಚಿ ವಾಟ್, ತೊಚ್ ದಾಕಂವ್ಕ್ ಪಾವ್ತಲೊ.”

ಅಂತುಲೊ ಅಮ್ರುಕೊ ಹಾಸ್ಲೊ. ತಾಚ್ಯಾ ಧನಿಯಾಚ್ಯಾ ಜಾಣ್ವಾಯೆ ಖಾತಿರ್ ಆಪ್ಲಿಚ್ ಮಿಶಿ ತಾಣೆಂ ವೊಳಾಯ್ಲಿ.

“ಆನಿ ಸರ್ದಾರ್ ಸಾಯ್ಬಾ…” ಜಾಕುಲೊ ಪೈ ಅಜ್ಯಾಪ್ಲೊ. “ತಾಂಕಾಂ ಫಾಲ್ಕ್ಯಾ ಪಲ್ತಡಿ ಪರ್ಯಾಂತ್ ಪಾವ್ನ್ ಯೇಂವ್ಕ್, ಚವ್ಗಾಂ ಸವಾರಾಂಕ್ ತುವೆಂ ಧಾಡ್‍ಲ್ಲೊ ಮತ್ಲಬ್?”

“ಜೋಕಿಮ್ ಸಿಲ್ವಾ ಪೈ, ನೀಜ್ ಝುಜಾರ‍್ಯಾಂಚೆಂ ಸಂರಕ್ಷಣ್ ಶಾಸ್ತ್ರ್ ತುಂವೆಂಯೀ ಥೊಡೆಂ ಅಭ್ಯಾಸ್ ಕರಿಜಾಯ್” ಹಾಸ್ಲೊ ಸರ್ದಾರ್. “ಆಮ್ಚೆ ದೋಗ್ ಸವಾರ್ ಆನಿ ಸರ್ವ್ ಘೊಡೆ, ಸಕಯ್ಲ್ ಫಾಲ್ಕ್ಯಾಂತ್ ಆಸಾತ್. ಯೆಂವ್ಚ್ಯಾ ವೆಚ್ಯಾ ಕೊಣಾಯ್ಕೀ ಆಡಾವ್ನ್ ರಾವಂವ್ಕ್ ಆಮ್ಚ್ಯಾ ಸವಾರಾಂಕ್ ತಾಕಿದ್ ದಿಲ್ಲಿ ಆಸಾ. ಹ್ಯಾ ಪಾಂಚ್ ಜಣಾಂಕ್ ಪಯ್ಲಿಂಚ್ ಹಾತೆರಾಂ ಆನಿ ಹಾಂಗಾ ಥಾವ್ನ್ ಸುಟ್ಕಾ ದೀವ್ನ್ ಧಾಡ್ಲ್ಯಾರ್ – ಆಮ್ಚ್ಯಾ ಸವಾರಾಂಚಿ ಆನಿ ಘೊಡ್ಯಾಂಚಿ ಭದ್ರತಿ ಕಶಿ ರಾವ್ತಿ?”

“ಸಮ್ಜಲೆಂ ಸಾಯ್ಬಾ!” ಜಾಕುಲ್ಯಾನ್ ತಕ್ಲಿ ಹಾಲಯ್ಲಿ. ಜಮೆದಾರ್ ಅಂತುಲ್ಯಾನ್ ಪರ್ತ್ಯಾನ್ ಮಿಶಿ ವೊಳಾಯ್ಲಿ.

“ತ್ಯಾ ಶಿವಾಯ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಹಾಂಗಾ ಥಾವ್ನ್ ಧಾಡ್‍ಲ್ಲ್ಯಾ ಸವಾರಾಂನಿ ತಕ್ಷಣ್ ಪಾಟಿಂ ಯೇನಾಯೆ, ಬಗಾರ್ ಷೇರ್ ಖಾನ್ ಆನಿ ತಾಚೆ ಸಾಂಗಾತಿ, ಫಾಲ್ಕ್ಯಾ ಪಲ್ತಡಿ ಚೂಡಿ ಘೆವ್ನ್ ಗೆಲ್ಯಾ ಉಪ್ರಾಂತ್, ತೆ, ಖಂಚಿ ವಾಟ್ ಧರ್ನ್ ಗೆಲ್ಯಾತ್ ಮ್ಹಳ್ಳೆಂ ಸಮ್ಜೊನ್ ಯೇಜಾಯ್ ಮ್ಹಣ್, ತೆ ಹಾಂಗಾ ಥಾವ್ನ್ ಭಾಯ್ರ್ ಸರ್ತಾನಾ ಹಾಂವೆಂ ತಾಕಿದ್ ದಿಲ್ಯಾ…

“ಅಂತುಲೊ ಪಡ್ವಳ್! ತೆ ಸವಾರ್ ಪಾಟಿಂ ಯೆತಚ್ ಆಮಿ ಫುಡ್ಲಿಂ ಕಾಮಾಂ ತುರ್ತಾನ್ ಕರುಂಕ್ ಆಸಾತ್. ತ್ಯಾ ಆದಿಂ…” ರಾವ್ಲೊ ತೊ.

“ತ್ಯಾ ಆದಿಂ… ಕಿತೆಂ ಧನ್ಯಾ?”

“ಇಜಾಬೆಲ್ ತೆರೆಜ್ ಕುಂವರ್ನ್ ಆನಿ ತಿಮ್ಮಿ ಆಮ್ಕಾಂ ಪಿಯೆಂವ್ಕ್ ಇಲ್ಲಿ ಕಾಫಿ ತಯಾರ್ ಕರುಂದಿ… ತೊ ಯುವಕ್ ಹಮೀದ್ ಪುಣೀ ಹ್ಯಾ ವೆಳಾರ್ ಮ್ಹಾಕಾ ಉಲಂವ್ಕ್ ಮೆಳ್‍ಲ್ಲೊ ಜಾಲ್ಯಾರ್…”

“ಹೋಸ್ ದೇವೆರೆ!” ಹಾಸ್ಲೆಂ ತಿಮ್ಮಿ. “ಕಾಫಿಯೆಕ್ ಉಜೊ ಪೆಟಂವ್ಚ್ಯಾ ಆದಿಂಚ್ ತುಮಿ ತಾಚೆ ಕಡೆನ್ ಉಲವ್ಯೆತ್… ಪಯ್ಲೆಂ ಕಾಫಿ ಕರುಂಕ್ ಜಾಯ್ನಾ… ಹ್ಹ-ಹ್ಹಾ!”

“ಚೆಡ್ವಾಕ್ ಕಿತೆಂ ಗಿರ್ಮಿಟ್ ಪುಣೀ…” ಆಕಾಂತ್ಲೊ ಬೊಮ್ಮ. “ಖಂಯ್ ಆಸಾಗೊ ತೊ ಉಲಂವ್ಕ್! ತ್ಯಾ ಷೇರ್‌ಪಟ್ಟಿ…”

“ಹಮೀದ್ ಆಸಾ… ಆಮ್ಚ್ಯಾ ಉತ್ವಾರ್ ಆಸಾ!” ಹಾಸ್ಲೆಂ ತಿಮ್ಮಿ.

ಕಷ್ಟಾಂತ್ ತರೀ ಹಾಸೊಂಕ್ ಯೆತಾಲೆಂ ಖರೆಂ, ಪುಣ್ ಪಾಟ್ಲ್ಯಾ ದೋನ್ ದಿಸಾಂನಿ, ಹಾಸ್ಚೆ ತಸಲೆಂ ಕಾಂಯ್ ಹಮೀದಾಕ್ ಘಡೊಂಕ್ ನಾ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel

ಆಮಿ ಫಾಯ್ಸ್ ಕೆಲ್ಲ್ಯೊ ಆದ್ಲ್ಯೊ ಕಾದಂಬರಿ