ಗಡಾಯ್ ಫಾತೊರ್: ಕ್ರಿಸ್ತಾಂವ್ ಚರಿತ್ರೆಚಿ ಭವ್ಯ್ ರುಜ್ವಾತ್
Posted on : April 5, 2025 at 12:16 PM
‘ರಾಕ್ಣೊ’ ಪತ್ರಾಚ್ಯಾ ‘ಭೊಂವ್ಡಿ’ ಅಂಕಣಾಕ್ ಲಿಖ್‍ಲ್ಲೆಂ ಬರಪ್
ಆಜ್ ಆಮಿ ಆಮ್ಚ್ಯಾಚ್ ಗಾಂವಾಂತ್ ಭೊಂವ್ಯಾಂ. ಪ್ರವಾಸಿ ಜಾಗೆ ಆಮ್ಚ್ಯಾ ಸುತ್ತೂರಾಂತ್‍ಯೀ ಜಾಯ್ತೆ ಆಸಾತ್. ದಕ್ಷಿಣ ಕನ್ನಡ ಜಿಲ್ಲ್ಯಾಂತ್ ಗೆಲ್ಲೆ ಗೆಲ್ಲೆ ಕಡೆನ್ ಪ್ರವಾಸಿಧಾಮ್ ಆಸಾತ್. ಪುಣ್ ‘ಹಿತ್ತಲ ಗಿಡ ಮದ್ದಲ್ಲ’ ಮ್ಹಳ್ಳ್ಯಾ ಗಾದಿಪರಿಂ ಆಮ್ಕಾಂ ಆಮ್ಚ್ಯಾಚ್ ಭೊಂವ್ತಿಲೆ ಜಾಗೆ ಸಸಾರ್. ಥೊಡ್ಯಾಂಕ್ ಪಯ್ಸ್, ಪ್ರಸಿದ್ಧ್ ಜಾಗ್ಯಾಂಕ್ ವಚೊನ್ ಆಯ್ಲ್ಯಾರ್ ಮಾತ್ರ್ ಸುಖ್! ಥಂಯ್ಚ್ಯೊ ತಸ್ವೀರ‍್ಯೊ, ಸೆಲ್ಫಿ ಕಾಡ್ನ್ ಸೋಶಿಯಲ್ ಮೀಡಿಯಾಂತ್ ಪ್ರದರ್ಶನ್ ಕೆಲ್ಯಾರ್‌ಚ್ ತಾಂಕಾಂ ಆಪ್ಲಿ ಪ್ರೆಸ್ಟೀಜ್ ಸಂಸಾರಾಕ್ ದಾಕಯ್ಲಿ ಮ್ಹಣ್ ಸ್ಯಾಟಿಸ್‍ಫ್ಯಾಕ್ಷನ್!?
ಪಶ್ಚಿಮ್ ಘಾಟಾಚ್ಯಾ ಮುಳಾಂತ್ಲ್ಯಾ ಕರಾವಳಿ ಪ್ರದೇಶಾಂನಿ ಪ್ರಾಕೃತಿಕ್ ಪ್ರವಾಸಿಧಾಮ್ ಜಾಯ್ತೆ ಆಸಾತ್. ಬೆಳ್ತಂಗಡಿ, ಘಾಟಾಕ್ ಲಾಗೊನ್ ಆಸ್ಚೊ ಸಮೃದ್ಧ್ ನೈಸರ್ಗಿಕ್ ಪ್ರದೇಶ್. ಗಡಾಯ್ ಫಾತೊರ್ ಹಾಂಗಾಚೆಂ ಪ್ರಮುಖ್ ಆಕರ್ಷಣ್. ಆಖ್ಖ್ಯಾ ಕರ್ನಾಟಕಾಂತ್ಲ್ಯಾ ಸಾಹಸಿಂಕ್ ಆಪ್ಣಾಶಿಂ ವೋಡ್ನ್ ಘೆಂವ್ಚ್ಯಾ ‘ಟ್ರೆಕ್ಕಿಂಗ್’ ತಾಣಾಂ ಪಯ್ಕಿ ಗಡಾಯ್ ಫಾತೊರ್ ಪ್ರಮುಖ್ ಜಾವ್ನಾಸಾ.
ಆಮ್ಕಾಂ, ಕೊಂಕ್ಣಿ ಕ್ರಿಸ್ತಾಂವಾಂಕ್, ಗಡಾಯ್ ಫಾತೊರ್ ಏಕ್ ಪ್ರವಾಸಿ ಜಾಗೊ ಜಾವ್ನ್ ಮಾತ್ರ್ ವಳ್ಕಿಚೊ ನ್ಹಯ್, ಬಗಾರ್ ತೊ ಆಮ್ಚ್ಯಾ ಭಾವನಾಂಕ್, ಧಾರ್ಮಿಕ್ ಭೊಗ್ಣಾಂಕ್ ಆನಿ ಅಸ್ಮಿತಾಯೆಕ್‍ಯೀ ಜಾಗಂವ್ಕ್ ಸಕ್ಚೊ ಮಜ್ಭೂತ್ ಫಾತ್ರಾ ದೊಂಗೊರ್.
ಬೆಳ್ತಂಗಡಿಚೆಂ ಫಾತ್ರಾ ಪರ್ವತ್
ಬೆಳ್ತಂಗಡಿ ಮ್ಹಜೊ ಮಾಂಯ್ ಗಾಂವ್ (ಬಾಬಾಚೊಯೀ). ಬೆಳ್ತಂಗಡಿ ಬಸ್‍ಸ್ಟೇಂಡಾ ಥಾವ್ನ್ ಬಂಗಾಡಿ/ಇಂದಬೆಟ್ಟು ತೆವ್ಶಿನ್ 8 ಕಿ.ಮೀ. ಚಮ್ಕಲ್ಯಾರ್ ನಡ ಜಂಕ್ಷನ್ (ಸರ್ಕಲ್) ಮೆಳ್ತಾ. ಥಂಯ್ ದಾವ್ಯಾಕ್ ಘುಂವ್ಲ್ಯಾರ್ ಎಕಾ ಮಯ್ಲಾನ್ ಗಡಾಯ್ ಫಾತ್ರಾಚ್ಯಾ ಮುಳಾಕ್ ಪಾವ್ಯೆತ್. ಸುಮಾರ್ 25 ಕಿ.ಮೀ. ಪಯ್ಸ್ ಥಾವ್ನ್‍ಂಚ್ ಹರ್ ಗಾಂವಾಂನಿ ಗಡಾಯ್ ಫಾತೊರ್ ಉಬೊ ಆಸ್ಚೊ ದಿಸ್ತಾ. ಲಾಗಿಂ ಲಾಗಿಂ ವೆತಾನಾ ತಾಚೆಂ ಭವ್ಯ್ ದರ್ಶನ್ ತುಮ್ಕಾಂ ರೋಮಾಂಚಿತ್ ಕರ್ತಾ.
ನಡ ಥಾವ್ನ್ ಇಲ್ಲೆಶೆಂ ಮುಖಾರ್ ಗೆಲ್ಯಾರ್ (ಸಾಂಖೊವ್ ಉತ್ರೊನ್) ಜಯ್ತ್ ಫಾತ್ರಾಚೆಂ ಏಕ್ ದ್ವಾರ ಮೆಳ್ತಾ. ರಸ್ತ್ಯಾರ್ ರಾವೊನ್ ಥಂಯ್ ವಚೊನ್ ತಸ್ವೀರ‍್ಯೊ ಕಾಡ್ಯೆತ್. ಥಂಯ್ಸರ್‌ಚ್ ತುಮ್ಕಾಂ ಮಂಜೊಟ್ಟಿಚಿ ಇಗರ್ಜ್ ದಿಸ್ತಾ. ಬೆಳ್ತಂಗಡಿಚೊಚ್ ವಾಂಟೊ ಜಾವ್ನಾಸೊನ್, 2018 ಇಸ್ವೆಂತ್ ನವಿ ಫಿರ್ಗಜ್ ಜಾವ್ನ್ ಮಂಜೊಟ್ಟಿ ಅಸ್ತಿತ್ವಾಕ್ ಆಯಿಲ್ಲಿ. ಭಾಗೆವಂತ್ ಖುರ್ಸಾಕ್ ಸಮರ್ಪಿಲ್ಲಿ ಹಿ ಇಗರ್ಜ್ ಗಡಾಯ್ ಫಾತ್ರಾಚ್ಯಾ ಸಾಮ್ಕಾರ್ ಆನಿ ಮುಳಾಂತ್‍ಚ್ ಆಸಾ.
ತುಮಿ ‘ಜಮಲಾಬಾದ್ ಕೊಟೆಂ’ ವಾ ‘ನರಸಿಂಗಡ’ ಮ್ಹಣ್ ವಾಚ್ಲಾಂ ವಾ ಆಯ್ಕಲಾಂ ಆಸ್ತೆಲೆಂ. ಕೆಳದಿ ರಾಯಾಂಚ್ಯಾ ಸ್ವಾಧೀನ್ ಆಸ್‍ಲ್ಲೊ ಹೊ ಕೆನರಾ ಪ್ರದೇಶ್, ಹೈದರಾಲಿನ್ ಬಿದನೂರ್ ಕೊಟೆಂ ಶೆವ್ಟಾಂವ್ಚ್ಯಾ ಮುಖಾಂತ್ರ್ ಆಪ್ಲ್ಯಾ ತಾಬೆನ್ ಘೆತ್ಲೊ. ತಾಚ್ಯಾ ಪುತಾನ್ ಅಧಿಕಾರ್ ಘೆತ್ಲ್ಯಾ ಉಪ್ರಾಂತ್, ಫ್ರೆಂಚ್ ಇಂಜಿನಿಯರಾಂಚ್ಯಾ ಮಜತೆನ್ ಜಾಯ್ತಿಂ ಅದ್ಭುತ್ ಬಾಂಧ್ಪಾಂ ಬಾಂಧಯಿಲ್ಲಿಂ. ತಾಂಚೆ ಪಯ್ಕಿ ಸಕ್ಲೇಶ್‍ಪುರ್ಚೆಂ ಮಂಜರಾಬಾದ್ ಕೊಟೆಂ ಏಕ್. ಗಡಾಯ್ ಫಾತ್ರಾಚ್ಯಾ ತುದಿಯೆರ್ ಖಡಾಪ್ ಪೊಕೊರ್ನ್ ಮೆಟಾಂ ಕಾತರ್‌ಲ್ಲಿಂಯೀ ಟಿಪ್ಪುಚ್ಯಾಚ್ ಕಾಳಾರ್.
ತ್ಯಾ ಕಾಳಾರ್ ಗಡಾಯ್ ಫಾತ್ರಾಚ್ಯಾ ಮುಳಾಂತ್ ಸೈನಿಕಾಂಚೆಂ ಕ್ಯಾಂಪ್ ಆಸ್ತಾಲೆಂ. ಸವೆಂ ಅಧಿಕಾರಾಚಿಂ ದಫ್ತರಾಂ ಆಸೊನ್, ಗರ್ಜೆಕ್ ತೆಕಿದ್ ಕೋಡ್ತ್ ಚಲಯ್ತಾಲೆ. ಗಡಾಯ್ ಫಾತ್ರಾಚ್ಯಾ ಉಂಚಾಯೆ ವರ್ವಿಂ, ತೊ ಏಕ್ ಆಪುರ್ಬಾಯೆಚೆಂ ರಕ್ಷಣಾತ್ಮಕ್ ಸೈನಿಕ್ ಕೇಂದ್ರ್ ಜಾಂವ್ಕ್ ಕಾರಣ್ ಜಾಲೆಂ. ತ್ಯಾಚ್ ವರ್ವಿಂ ಟಿಪ್ಪುನ್ ಥಂಯ್ ಕೊಟೆಂ ಬಾಂಧ್‍ಲ್ಲೆಂ. ತೆಂ ತಾಣೆಂ ಆಪ್ಲ್ಯಾ ಆವಯ್ಕ್ ಸಮರ್ಪಿಲ್ಲೆಂ, ದೆಕುನ್ ಜಮಲಾಬಾದ್ ಕೊಟೆಂ ನಾಂವ್ ತಾಚೆ ಮುಖಾಂತ್ರ್ ಆಯ್ಲೆಂ.
ಟಿಪ್ಪುಕ್ ವಿರೋಧ್ ಕರ್ಚ್ಯಾ ಹಿಂದೂ ಮೂಳ್‍ಭೂತ್‍ವಾದಿಂನಿ ಮುಸ್ಲಿಮಾಂಚೆಂ ನಾಂವ್ ಉಚಾರುಂಕ್ ನೆಗಾರುನ್, ಗಡಾಯ್ ಫಾತ್ರಾಕ್ ‘ಚರಿತ್ರೆಚೆಂ’ ನೀಬ್ ದೀವ್ನ್ ತೆಂ ಆದಿಂ ಥಾವ್ನ್ ಆಸ್‍ಲ್ಲೆಂ ‘ನರಸಿಂಹಗಡ’ ಮ್ಹಣ್ ಆಪಂವ್ಕ್ ಧರ್ಲೆಂ (ಹ್ಯಾ ವಾದಾಕ್ ಆಧಾರ್ ನಾ). ಅಶೆಂ ಗಡಾಯ್ ಫಾತೊರ್ ರಾಜಕೀಯ್ ಆನಿ ಮತೀಯ್ ಸಂಘರ್ಷಾಕ್‍ಯೀ ಏಕ್ ಹಾತೆರ್ ಜಾಲಾ.
ಸತ್ ಮ್ಹಳ್ಯಾರ್ ಜಮಲಾಬಾದ್ ಕೊಟೆಂ ಜಾಂವ್ ನರಸಿಂಹಗಡ ಜಾಂವ್ ತೆದ್ಯಾ ಜಯ್ತ್ ಗಡಾಯ್ ಫಾತ್ರಾ ಮುಖಾರ್ ಕಿತೆಂಚ್ ನ್ಹಯ್.
ಭೊಂವ್ತಿಂ ಭವ್ಯ್, ರಮಣೀಯ್ ದೃಶ್ಯಾಂ
50 ಮಿಲಿಯ ವರ್ಸಾಂ ಆದಿಂ ಭುಂಯ್ತ್ ಜಾಲ್ಲ್ಯಾ ಬದ್ಲಾವಣೆ ವರ್ವಿಂ ಆಮಿ ಆಮಿ ಆತಾಂ ಪಳೆಂವ್ಚೊ ಭೂಪಟ ಉದೆಲ್ಲೊ. ಮ್ಹಣ್ಜೆ ದರ್ಯಾ ಥಾವ್ನ್ ಭುಂಯ್ ವಯ್ರ್ ಯೇವ್ನ್ ವಾ ಹೆರ್ ಕಡೆನ್ ಭುಂಯ್ ದರ್ಯಾಂತ್ ಬುಡೊನ್ ಮಹತ್ತರ್ ಪರಿವರ್ತನ್ ಜಾಲ್ಲೆಂ. ಅಶೆಂ ಭಾರತಾಚ್ಯಾ ಪಶ್ಚಿಮ್ ಕುಶಿನ್ ಕರಾವಳಿ ಆನಿ ಪಶ್ಚಿಮ್ ಘಾಟ್ ಉದೆಲ್ಲೆಂ. ಹ್ಯಾಚ್ ಕಾಳಾರ್ ಗಡಾಯ್ ಫಾತೊರ್ ವಯ್ರ್ ಪಡ್‍ಲ್ಲೊ ಆನಿ ತವಳ್ ಥಾವ್ನ್ ಎಕ್ಸುರೊ ಆಸೊನ್ ಗಂಭೀರ್‍ಪಣಾಕ್ ಸಾಕ್ಸ್ ಜಾಲಾ. 1700 ಫೀಟ್ ಉಬಾರಾಯೆಚೊ ಗಡಾಯ್ ಫಾತೊರ್ ಬೆಳ್ತಂಗಡಿ ತಾಲೂಕಾಚೆಂ ಮುಖ್ಯ್ ಪ್ರವಾಸಿ ಆಕರ್ಷಣ್.
ಗಡಾಯ್ ಫಾತ್ರಾಚ್ಯಾ ಉದೆಂತಿಕ್ ಪಳೆಲ್ಯಾರ್ ಮಹಾನ್ ಪರ್ವತ್ ದಿಸ್ತಾ. ತೆಂಚ್ ಪಶ್ಚಿಮ್ ಘಾಟ್. ಹ್ಯಾ ಪರಿಸರಾಂತ್ ಸಾಮ್ಕಾರ್ ದಿಸ್ಚೆಂ ಕುದುರೆಮುಖ್ ಪರ್ವತ್ ಶ್ರೇಣಿ. ಗಡಾಯ್ ಫಾತೊರ್ ಚಡೊನ್ ವೆತಾಸ್ತಾನಾ ತುಮ್ಕಾಂ ಭೊಂವ್ತೊಣಿಂ ಅದ್ಭುತ್ ದೃಶ್ಯಾಂ ದಿಸ್ತಾತ್. ವಯ್ರ್ ವಯ್ರ್ ಗೆಲ್ಲೆಂಚ್ ಸಕಯ್ಲ್ ಧರ್ಣಿರ್ ಆಸ್‍ಲ್ಲಿಂ ಘರಾಂ, ಗಾದೆ, ರೂಕ್ ಇತ್ಯಾದಿ ಲ್ಹಾನ್ ಲ್ಹಾನ್ ದಿಸ್ತಾತ್. ಸವೆಂ ಪಶ್ಚಿಮ್ ಘಾಟಾಚಿ ರಮಣೀಯ್ ಸೊಭಾಯ್ ತುಮ್ಕಾಂ ಪ್ರಫುಲ್ಲಿತ್ ಕರ್ತಾ.
ತುದಿಯೆರ್ ತಳೆಂ, ಫಿರಂಗಿ
ಮನ್ಶ್ಯಾಚ್ಯಾ ಅಪ್ರತಿಮ್ ಸಾಹಸ್ ಕೃತ್ಯಾಂಕ್ ಗಡಾಯ್ ಫಾತ್ರಾರ್ ರುಜ್ವಾತಿ ಮೆಳ್ತಾತ್. ತಿತ್ಲ್ಯಾ ಕಠಿಣ್ ವಾಟೆರ್ ಚಡೊನ್ ಮೆಟಾಂ ಪೊಕೊರ್‍ಲ್ಲೆಂ ಏಕ್ ವಿಜ್ಮಿತ್ ತರ್, ಥಂಯ್ಸರ್ ಬಾಂಧ್‍ಲ್ಲಿಂ ಬಾಂಧ್ಪಾಂ, ಕೊಟೆಂ, ದೊರೆ ಇತ್ಯಾದಿ ಮನ್ಶ್ಯಾನ್ ಚರಿತ್ರೆಂತ್ ಕಾಡ್‍ಲ್ಲೆ ಕಷ್ಟ್ ವಿವರಿತಾತ್. ತಾಚ್ಯಾಕೀ ಅಜ್ಯಾಪಾಂಚೆಂ ಮ್ಹಳ್ಯಾರ್ ಬೃಹತ್ ಫಿರಂಗಿ ವ್ಹಾವವ್ನ್ ವ್ಹೆಲ್ಲೆಂ! ಥಂಯ್ ಥಂಯ್ ಪಡೊನ್ ಆಸ್‍ಲ್ಲ್ಯೊ (ನಿರ್ವಹಣ್ ನಾಸ್ತಾನಾ) ಫಿರಂಗಿ ಗಡಾಯ್ ಫಾತ್ರಾರ್ ಮೆಳ್ತಾತ್.
ಗಡಾಯ್ ಫಾತೊರ್ ನಾಂವಾಂತ್‍ಚ್ ಏಕ್ ಖಡ್ಪಾ ಪರ್ವತ್ ಮ್ಹಣ್ ಕಳಯ್ತಾಮೂ? ಪುಣ್ ಹಾಚ್ಯಾ ತುದಿಯೆರ್ ಏಕ್ ತಳೆಂ ಆಸಾ! ಹೆಂ ಕಶೆಂ ಮ್ಹಳ್ಯಾರ್ ಗಡಾಯ್ ಫಾತೊರ್ ಏಕ್ ಬೃಹತ್ ಪರ್ವತ್. ತೀನ್ ಕುಶಿಂನಿ ಖಡ್ಪಾಚಿ ಕೂಸ್ ತರ್ ಎಕಾ ಕುಶಿನ್ ಥಾವ್ನ್ ಲಾಂಬಾಯೆಕ್ ಪರ್ವತ್ ಆಸಾ. ಹ್ಯಾ ವರ್ವಿಂ ಜಾಯ್ತೆಂ ರಾನ್, ರೂಕ್ ಝಾಡಾಂ ಆಸಾತ್. ತುದಿಯೆಕ್ ಪಾವ್ಲ್ಯಾರ್ ಥಂಯ್ ಆಸ್ಚೆಂ ತಳೆಂ ಮೆಳ್ತಾ. (ತೆಂ ಉದಾಕ್ ಪಿಯೆಂವ್ಕ್ ಫಾವೊ ನ್ಹಯ್. ಪ್ರವಾಸಿಂನಿ ಪಿಯೆಂವ್ಚೆಂ ಉದಾಕ್ ಘೆವ್ನ್ಂಚ್ ಚಡಜೆ).
ಅಶೀರ್ ಮೆಟಾಂಚೆಂ ರಿಸ್ಕ್ ಆನಿ ಥ್ರಿಲ್!
1880 ಮಾನವ್ ನಿರ್ಮಿತ್ ಮೆಟಾಂ ಆಸ್ಚ್ಯಾ ಗಡಾಯ್ ಫಾತ್ರಾಕ್ ಚಡೊಂಕ್ ದೋನ್ ಹಂತ್ ಆಸಾತ್. ಪಯ್ಲ್ಯಾ ಹಂತಾರ್ ಗುಡೊ ಚಡಜೆ. ವ್ಹಡ್ ಫಾತೊರ್ ದವರ್ನ್ ಮೆಟಾಂ ಕೆಲ್ಯಾಂತ್. ಮೆಟಾಂಚಿ ಉಬಾರಾಯ್ ಚಡ್ ಆಸಾ ಆನಿ ತೆ ಹಾಲ್ತಿತ್ ವಾ ನಿಸ್ರತಿತ್ ಜಾಲ್ಲ್ಯಾನ್ ಹ್ಯಾ ಸುವಾತೆರ್ ಚತ್ರಾಯ್ ಘೆಜೆ ಪಡ್ತಾ. ಅಧ್ರ್ಯಾರ್ ಪಾವ್ತಾನಾ ರಾನ್, ಬಾಂಧ್ಪಾಂ ಇತ್ಯಾದಿ ಮೆಳ್ತಾತ್. ಥಂಯ್ ವಿಶೆವ್ ಘೆವ್ಯೆತ್. ಉಪ್ರಾಂತ್ಲೊ ಹಂತ್ ನಿಜಾಯ್ಕೀ ಕಠಿಣ್ ಆನಿ ರೋಚಕ್.
ವ್ಹಯ್. ಖಡಾಪ್ ಕಾತರ್ನ್ ಮೆಟಾಂ ಕೆಲ್ಲಿಂ ತಿಂ ಹಾಂಗಾ ತುಮಿ ಚಡೊಂಕ್ ಆಹ್ವಾನ್ ದಿತಾತ್. ವಯ್ರ್ ಪಳೆತಾನಾಂಚ್ ಏಕ್ ಪಾವ್ಟಿಂ ಝಿಂಟ್ ಉಡ್ತಾ! ಪುಣ್ ಭಿಯೆಂವ್ಚಿ ಗರ್ಜ್ ನಾ. ಖಂಡಿತ್ ಜಾವ್ನ್ ಭ್ಯೆಂ ವಿಸ್ರೊನ್ ವಯ್ರ್ ಚಡಾ, ಪುಣ್ ಏಕ್‍ದಮ್ ಜಾಗ್ರುತ್ಕಾಯ್ ಸಾಂಬಾಳಾ. ಅನಾವಶ್ಯ್ ಪೊಕ್ರಿಪಣಾಂ, ಗರ್ಜ್ ನಾತ್‍ಲ್ಲೆ ಖೆಳ್ ಹ್ಯಾ ಸುವಾತೆರ್ ನಾಕಾತ್; ತಶೆಂ ಕೆಲ್ಯಾರ್ ತುಮ್ಚ್ಯಾ ಹಾಡಾಂಚಿ ಪೊಟ್ಲಿಚ್ ಹೆರಾಂನಿ ವ್ಹಾವಯ್ಜೆ ಪಡತ್!!
ವಯ್ರ್ ಪಾವೊನ್ ಸಕಯ್ಲ್ ಪಳೆತಾನಾ ಆಂಗ್ ಕಾಂಪ್ಚೆಂ ಗ್ಯಾರಂಟಿ! ತುಮ್ಚೆರ್ ತುಮ್ಕಾಂಚ್ ಅಭಿಮಾನ್‍ಯೀ ಭೊಗ್ತಲೊ. ಹೊ ಅನುಭವ್ ನಿಜಾಯ್ಕೀ ಅದ್ಭುತ್. ಆಯ್ಚ್ಯಾ ಕಾಳಾರ್ ಅಸಲೆಂ ಚಾರಣ್ ಕರುಂಕ್ ಸಕ್ಡಾಂಕ್ ಸಾಧ್ಯ್ ಆಸ್ಚೆಂ ನಾ. ದೆಕುನ್ ಭಲಾಯ್ಕಿ ಆನಿ ಪ್ರಾಯ್ ಬರಿಚ್ ಆಸ್ತಾನಾ ಗಡಾಯ್ ಫಾತ್ರಾಕ್ ಚಡ್ಚೆಂ ಬರೆಂ. ತಿಕ್ಕೆ ವ್ಹಡ್ ಭುಗ್ರ್ಯಾಂಕ್ ಅವಶ್ಯ್ ಜಾವ್ನ್ ಹಾಂಗಾ ವ್ಹರ್ಯೆತ್.
ಗಡಾಯ್ ಫಾತ್ರಾಕ್ ಚಡೊಂಕ್ ಜಾಯ್ತೆ ಪ್ರವಾಸಿ ಆತುರಾಯೆನ್ ಯೆತಾತ್. ಪ್ರಸ್ತುತ್ ಕುದುರೆಮುಖ ಅಭಯಾರಣ್ಯಾಚ್ಯಾ ವ್ಯಾಪ್ತೆಂತ್ ಯೆತಾ ಜಾಲ್ಲ್ಯಾನ್ ಫಕತ್ ದಿಸಾಚೆಂ ಚಡೊಂಕ್ ಆನಿ ಸಾಂಜೆ ಭಿತರ್ ಪಾಟಿಂ ಯೇಂವ್ಕ್ ಮಾತ್ರ್ ಅವ್ಕಾಸ್. ಆದ್ಲ್ಯಾ ಕಾಳಾರ್ ರಾತಿಂ ರಾವ್ತಾಲೆ. ಚಡಾವತ್ ಫಿರ್ಗಜೆಂಚ್ಯಾ ಯುವಕ್ ಸಂಘಾಚೆ ಹಾಂಗಾ ತಂಬು ಮಾರ್ತಾಲೆ. ಆತಾಂ ತೆಂ ನಿಷಿದ್ಧ್.
ಪಾವ್ಶಿಲ್ಯಾ ದಿಸಾಂನಿ ಸೊಡ್ನ್ ಅಕ್ತೋಬರ್ ಥಾವ್ನ್ ಮೇ ಮಹಿನ್ಯಾಂನಿ ಗಡಾಯ್ ಫಾತ್ರಾಕ್ ವಚೊಂಕ್ ಸುರಕ್ಷಿತ್. ಸಕಾಳಿಂ ವೆಗಿಂಚ್ ಗೆಲ್ಯಾರ್ ಬರೆಂ. ಗರ್ಜೆಕ್ ಖಾಣ್, ಪೀವನ್ ವ್ಹರ್ನ್ ವಚಾ, ಪುಣ್ ಕೋಯ್ರ್ ಪಾಟಿಂಚ್ ಹಾಡಾ. ಪರಿಸರ್ ಮ್ಹೆಳಯ್ನಾಕಾತ್.
ಕ್ರಿಸ್ತಾಂವ್ ರಗ್ತಾಚೊ ವ್ಹಾಳ್!
ಕೆನರಾ ಕ್ರಿಸ್ತಾಂವಾಂಚ್ಯಾ ಚರಿತ್ರೆಂತ್ ಗಡಾಯ್ ಫಾತ್ರಾನ್ ಮಹತ್ವಾಚೊ ಪಾತ್ರ್ ಖೆಳ್ಳಾ. ಟಿಪ್ಪುಚ್ಯಾ ಬಂದಡೆ ವೆಳಾರ್ ಕ್ರಿಸ್ತಾಂವಾಂಕ್ ದಗ್ದಿಲ್ಲೆಂ ತುಮಿ ಜಾಣಾಂತ್. ಘಾಟ್ ಚಡಂವ್ಚ್ಯಾ ಪಯ್ಲೆಂ ಕುಡಾಯಿಲ್ಲ್ಯಾ ಕ್ರಿಸ್ತಾಂವಾಂಕ್ ಹಾಂಗಾಸರ್ ಜಮಯಿಲ್ಲೆಂ. ಉಪ್ರಾಟ್ಲೆಲ್ಯಾಂಕ್ ಹಾಂಗಾಚ್ಯಾ ಕೊಡ್ತಿಂತ್ ಶಿಕ್ಷಾ ಫರ್ಮಾವ್ನ್ ಸಬಾರಾಂಕ್ ಗಡಾಯ್ ಫಾತ್ರಾಚ್ಯಾ ತುದಿಯೆರ್ ಥಾವ್ನ್ ಸಕಯ್ಲ್ ಲೊಟುನ್ ಘಾಲ್ನ್ ಜಿವೆಶಿಂ ಮಾರ್ಲಾಂ. ಚಾರಿತ್ರಿಕ್ ಕಾದಂಬರಿಂಚೊ ಬಾಪಯ್ ವಿ.ಜೆ.ಪಿ. ಸಲ್ಡಾನ್ಹಾನ್ ಆಪ್ಲ್ಯಾ ಕಾದಂಬರಿಂನಿ ಗಡಾಯ್ ಫಾತ್ರಾಚಿಂ ಜಾಯ್ತಿಂ ದೃಶ್ಯಾಂ ವಿಣ್ಲ್ಯಾಂತ್. ಸರ್ದಾರ್ ಸಿಮಾಂವ್ನ್ ಹಾಂಗಾ ಕರ್ಚಿಂ ಸಾಹಸಾಂ ವಾಚ್ಪ್ಯಾಂಕ್ ರೋಮಾಂಚಿತ್ ಕರ್ತಾತ್.
ಹಿಮಾಲಯಾಚೆಂ ಮೌಂಟ್ ಎವರೆಸ್ಟ್ ಆನಿ ಸಂಸಾರಾಂತ್ಲಿಂ ಊಂಚ್ ಪರ್ವತಾಂ ಚಡೊಂಕ್ ತಿತ್ಲೆಂ ಸಲೀಸ್ ನಾ. ತಾಕಾ ಖರ್ಚ್‍ಯೀ ತಿತ್ಲೊಚ್ ಬಸ್ತಾ. ಆಮ್ಚ್ಯಾಚ್ ಗಾಂವಾಂತ್ಲ್ಯಾ ಹ್ಯಾ ಅದ್ಭುತ್ ಪರ್ವತಾಕ್ ಚಡೊನ್, ಉಪ್ರಾಂತ್ ಎವರೆಸ್ಟ್ ಚಡ್ಚ್ಯಾಕ್ ಯೆವ್ಜಿಯೆತ್. ಸಾಹಸ್ ಮನೋಭಾವಾಚ್ಯಾಂನಿ ಜಿಣ್ಯೆಂತ್ ಏಕ್ ಪಾವ್ಟಿಂ ಪುಣೀ ಗಡಾಯ್ ಫಾತೊರ್ ಚಡಜೆಚ್. ವೆಗಿಂಚ್ ಜಾಂವ್ ತುಮ್ಚೆಂ ಆರೋಹಣ್.
ಹೆಂ ಲೇಖನ್ ರಾಕ್ಣೊ ಪತ್ರಾಚ್ಯಾ ಜನೆರ್ 10-16, 2025 ಆಂಕ್ಯಾಂತ್ ಪ್ರಕಟ್ ಜಾಲಾಂ
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
