ಘಾಟಾಗಾರಾಂಚ್ಯಾ ಮ್ಹಿನತೆಕ್ ಫಳ್: ಜಯ್ತಾಚ್ಯಾ ವಾಟೆರ್ ಕೊಂಕ್ಣಿ ಮಿಸಾಂಚಿ ಚಳ್ವಳ್
Posted on : September 27, 2024 at 12:37 PM
ಘಾಟಾ ವಯ್ರ್ ಕೊಂಕ್ಣಿ ಭಾಶೆಕ್ ವ್ಯವಸ್ಥಿತ್ ರಿತಿನ್ ಲಗಾಡ್ ಕಾಡ್‍ಲ್ಲೆಂ ಥಂಯ್ಚ್ಯಾ ಇಗರ್ಜ್‍ಮಾತೆನ್! ಹಾಂ, ಘುಸ್ಪಡ್ನಾಕಾತ್. ಹೆಂ ಸತ್. ಕರ್ನಾಟಕಾಚ್ಯಾ ಪಶ್ಚಿಮ್ ಘಾಟ್ ಪ್ರದೇಶಾಂನಿ ದೋನ್ ದಿಯೆಸೆಜಿ ಆಸಾತ್ – ಚಿಕ್‍ಮಗ್ಳುರ್ ಆನಿ ಶಿವಮೊಗ್ಗ – ಹ್ಯಾ ದೊನೀ ದಿಯೆಸೆಜಿಂತ್ಲ್ಯಾ ಕ್ರಿಸ್ತಾಂವಾಂ ಪಯ್ಕಿ 90 ಥಾವ್ನ್ 98 ಠಕ್ಕೆ ಭಾವಾಡ್ತಿ ಕೊಂಕ್ಣಿ ಭಾಷೆಚೆ. ತರೀ ಥಂಯ್ ಕೊಂಕ್ಣಿ ಮೀಸ್ ಭೆಟಂವ್ಕ್ ಅವ್ಕಾಸ್ ನಾ!!
ಇಲ್ಲಿ ಚರಿತ್ರಾ ತುಮಿ ಸಮ್ಜಜೆ. ದುಸ್ರ್ಯಾ ವಾತಿಕಾನ್ ಮಹಾಸಭೆನ್ ಸ್ಥಳೀಯ್ ಭಾಶೆಂನಿ ಮಿಸಾಂ ಭೆಟಂವ್ಕ್ ಪರ್ವಣ್ಗಿ ದಿಲ್ಯಾ ಉಪ್ರಾಂತ್ ಮಂಗ್ಳುರಾಂತ್ ಕೊಂಕ್ಣಿ ಭಾಸ್ ಅಲ್ತಾರಿಕ್ ಭರ್ಮಾನ್ ಚಡ್ಲಿ. ಮಂಗ್ಳುರ್ಚ್ಯಾ ತವಳ್ಚ್ಯಾ ಗೊವ್ಳಿ ಬಾಪ್ ಬಿಸ್ಪ್ ಬಾಜಿಲ್ ಸೊಜಾನ್ ಕೊಂಕ್ಣಿ ಭಾಸ್ ಲಿತುರ್ಜಿಂತ್ ಹಾಡ್ಲಿ. ತ್ಯಾ ವರ್ವಿಂಚ್ ದ.ಕ. ಆನಿ ಉಡುಪಿ ಜಿಲ್ಲ್ಯಾಂನಿ ಕೊಂಕ್ಣಿ ಆನಿಕೀ ಗ್ರೇಸ್ತ್ ಜಾಲ್ಲಿ, ಜಿವಾಳ್ ಉರ್‌ಲ್ಲಿ. ಕಾರ್‍ವಾರ್ ದಿಯೆಸೆಜಿಂತ್‍ಯೀ ಕೊಂಕ್ಣಿಚ್ ಲಿತುರ್ಜಿಕ್ ಹಾಡ್ಲಿ.
ತಾಚೆಂ ಮೋಲ್ ಆನಿ ಪರಿಣಾಮ್ ಖಂಡಿತ್ ಉಲ್ಲೇಖ್‍ನೀಯ್. ಪುಣ್ ದುಸ್ರಿ ಏಕ್ ಹಕೀಗತ್ ಆಮ್ಚೆ ಮುಖಾರ್‌ಚ್ ಆಸಾ. ಘಾಟಾ ವಯ್ಲಿ ಪರಿಗತ್ ಸಮ್ಜಲ್ಯಾರ್ ಹೆಂ ವಾಸ್ತವ್ ಕಳ್ತಾ.
ವ್ಹಯ್. ಚಿಕ್‍ಮಗ್ಳುರ್ ಆನಿ ಶಿವಮೊಗ್ಗಾ ದಿಯೆಸೆಜಿಚ್ಯಾ ತವಳ್ಚ್ಯಾ ಬಿಸ್ಪಾಂನಿ ಕೊಂಕ್ಣೆಕ್ ಬಿಲ್ಕುಲ್ ಅಲ್ತಾರ್ ಚಡೊಂಕ್ ಸೊಡ್ಲೆಂ ನಾ! ತೆಂಯೀ ಕೊಂಕ್ಣಿ ಪುರ್ವಿತ್ ಜಾವ್ನಾಸೊನ್‍ಯೀ ತಾಂಚೆಂ ತೆಂ ನಕಾರಾತ್ಮಕ್ ಹಟ್, ಆಪ್ಲ್ಯಾಚ್ ಮಾಂಯ್‍ಭಾಶೆ ಥಂಯ್ ತಿರಸ್ಕಾರ್, ಪಾತ್ಯೆಂವ್ಕ್ ಕಷ್ಟ್. ಲೋಕ್ ಪುರ್ತೊ ಕೊಂಕ್ಣಿ ಪುಣ್ ಮಿಸಾಂ ಆನಿ ಮಾಗ್ಣಿಂ ಸರ್ವ್ ಕನ್ನಡಾಂತ್! ಹೆರ್ ಕಡೆನ್‍ಯೀ (ಬೆಂಗ್ಳುರ್, ಮೈಸೂರ್) ತಿಚ್ ಪರಿಗತ್. ನಿಜಾಯ್ಕೀ ಮಹಾ ಪ್ರಮಾದ್ ಕರುನ್ ಕೊಂಕ್ಣಿ ಭಾಸ್ ಆನಿ ಸಂಸ್ಕೃತಿ ವಾಟೆರ್ ಘಾಲ್ಚಿ ಖರಿಮಸ್ತ್ ಹ್ಯಾ ಧಾರ್ಮಿಕಾಂನಿ ಕೆಲ್ಯಾ.
ತಾಚೊ ಪರಿಣಾಮ್ ಭೋವ್ ಗಂಭೀರ್ ಆನಿ ಮಾರೆಕಾರ್. ಭುರ್ಗ್ಯಾಂಕ್ ದೊತೊರ್ನ್, ಮಿಸಾಂ ಸರ್ವ್ ಕನ್ನಡಾಂತ್ (ವಾ ಇಂಗ್ಲಿಶಾಂತ್) ಜಾಲ್ಲ್ಯಾನ್ ತಾಂಚೆ ಖಾತಿರ್ ಘರಾಂತ್‍ಯೀ ವ್ಹಡಿಲಾಂನಿ ಮಾಗ್ಣಿಂ ಕನ್ನಡಾಂತ್ ಮ್ಹಣಜೆ ಪಡ್ಲೆಂ. ಲಿತುರ್ಜೆಂತ್ ಕೊಂಕ್ಣಿ ನಾತ್‍ಲ್ಲ್ಯಾನ್ ಘರಾಂನಿಯೀ ಕೊಂಕ್ಣಿ ಮಾಯಾಗ್ ಜಾಯ್ಶೆಂ ಕೆಲ್ಲೆಂ ಮಹಾಪ್ರಾಧ್ ಘಡ್ಲಾಂ.
ಆಮಿ ಚಡಾವತ್ ಕೊಂಕ್ಣಿ ಮ್ಹಣ್ತಾನಾ ಮಂಗ್ಳುರ್ ಆನಿ ಉಡುಪಿ ದಿಯೆಸೆಜಿಕ್ ಮಾತ್ರ್ ಲೆಕಾಕ್ ಧರ್ತಾಂವ್. ಉತ್ತರ ಕನ್ನಡಾಂತ್ ಕೊಂಕ್ಣಿ ಆಸಾ. ಸವೆಂ ಘಾಟಾಚ್ಯಾ ಜಿಲ್ಲ್ಯಾಂನಿಯೀ ಕೊಂಕ್ಣಿ ಲೋಕ್ ಆಸಾ. ಲಿತುರ್ಜೆಂತ್ ಕೊಂಕ್ಣೆಕ್ ಇನ್ಕಾರ್ ಕೆಲ್ಲ್ಯಾನ್ ತೆಣೆಂ (ಘಾಟಾರ್) ಕೊಂಕ್ಣಿ ಭಾಸ್ ಫಕತ್ ಲೊಕಾಚ್ಯಾ ಉಲವ್ಪಾಂತ್ ಮಾತ್ರ್ ಉರ್ಲ್ಯಾ.
ಜಾಗೃತಿ, ಝುಜ್ ಅನಿ ಬದ್ಲಾವಣ್
ಹ್ಯಾ ದಿಶೆನ್ ಘಾಟಾರ್ ಬರಿಚ್ ಪ್ರಗತಿ ಜಾಲ್ಯಾ. ಪಾಟ್ಲ್ಯಾ ವರ್ಸಾಂನಿ ಕೊಂಕ್ಣಿ ಮಿಸಾಂಕ್ ಹಕ್ಕೊತ್ತಾಯ್ ಮಂಡನ್ ಭರಾನ್ ಚಲ್ಲಾಂ. ಕಥೊಲಿಕ್ ಕೊಂಕ್ಣಿ ರಾಕಣ್ ಸಂಚಾಲನಾನ್ ಹ್ಯಾ ದಿಶೆನ್ ಜಾಯ್ತೊ ವಾವ್ರ್ ಕೆಲಾ.
ಲೊಕಾ ಥಂಯ್‍ಯೀ ಜಾಗೃತಿ ಉಟ್ಲ್ಯಾ. ಕೊಂಕ್ಣಿ ಮಿಸಾಂ ಹಕ್ಕಾನ್ ಆಪ್ಣಾಂವ್ಚ್ಯಾ ದಿಶೆನ್ ವಾವ್ರುಂಕ್, ಝುಜೊಂಕ್ ಮುಖಾರ್ ಯೆತೆಲ್ಯಾಂಚೊ ಸಂಖೊಯೀ ಚಡ್ಲಾ. ಕೊಡ್ತಿಂತ್ ದಾವೆ ವಾ ಹೆರ್ ವಿಧಾನಾಂ ಮುಖಾಂತ್ರ್ ನ್ಯಾಯ್ ಜೊಡುಂಕ್ ಪೆಚಾಡುನ್ ಆಸಾತ್. ಹ್ಯಾ ವರ್ವಿಂ ಬದ್ಲಾವಣ್ ಜಾತೆಚ್ ಆಸಾ.
ಎದೊಳ್‍ಚ್ ಕಡಬಗೆರೆ, ಕೊಪ್ಪ, ಬಸ್ರೀಕಟ್ಟೆ, ಬಾಳೆಹೊನ್ನೂರ್, ಜಯಪುರ, ಹಿರೇಬೈಲ್, ಮಾಗುಂಡಿ, ಕೂವೆ, ಸುಂಡೆಕೆರೆ, ಸಕ್ಲೇಶ್‍ಪುರ್, ಮಲ್ಲಂದೂರ್ ಫಿರ್ಗಜೆಂನಿ ಆಯ್ತಾರಾಚೆಂ ಕೊಂಕ್ಣಿ ಮಿಸಾಂ ಆಸಾತ್. ಹ್ಯಾ ಪಾಟ್ಲ್ಯಾನ್ ಲಾಂಬ್ ಕಾಳಾಚೆಂ ಝುಜ್ ಆಸಾ.
ಮಿಸಾಂತ್ ಕನ್ನಡ-ಕೊಂಕ್ಣೆಚೆಂ ಮಿಕ್ಸಿಂಗ್!!
ಫಿರ್ಗಜೆಂನಿ 95% ಕೊಂಕ್ಣಿ ಕ್ರಿಸ್ತಾಂವ್ ಲೋಕ್‍ಚ್ ಆಸ್ಲ್ಯಾರೀ ದಿಯೆಸೆಜಿನ್ ಕೊಂಕ್ಣಿ ಮಿಸಾಂ ದೀನಾತ್ಲೆಲ್ಯಾನ್ ಲೊಕಾನ್ ಪ್ರತಿಭಟನ್ ಕರ್ಚೆಂ ಅನಿವಾಯ್ ಜಾಲ್ಲೆಂ. ಥೊಡೆ ಕಡೆನ್ ವಶೀಲಾಯ್ ವಾ ಕಾನೂನ್ ಕ್ರಮಾಂ ವರ್ವಿಂ ಜೀಕ್ ಲಾಭ್ಲ್ಯಾರ್, ಥೊಡ್ಯಾ ಇಗರ್ಜೆಂನಿ ಲೊಕಾನ್ ಮಿಸಾ ವೆಳಾರ್‌ಚ್ ಹಟ್ ದಾಕಯ್ಲೆಂ. ಮೀಸ್ ಭೆಟಂವ್ಚೊ ಯಾಜಕ್ ಕನ್ನಡಾಂತ್ ಲಿತುರ್ಜಿ ಮ್ಹಣ್ತಾನಾ ಲೊಕಾನ್ ಕೊಂಕ್ಣೆಂತ್‍ಚ್ ಜಾಪಿ ದಿಲ್ಯೊ. ಹ್ಯಾ ವರ್ವಿಂ ಥೊಡ್ಯಾ ಫಿರ್ಗಜಾಂನಿ ಕೊಂಕ್ಣಿ ಮಿಸಾಂ ಜಾರಿ ಕರ್ಚೆಂ ಅನಿವಾರ್ಯ್ ಜಾಲೆಂ.
ಕೊಂಕ್ಣಿ ಪರ್ಜೆಚೊ ಸಂಘಟಿತ್ ವಾವ್ರ್
ಚಿಕ್‍ಮಗ್ಳುರ್ ದಿಯೆಸೆಜಿಂತ್ ಹಾಸನ್ ಜಿಲ್ಲೊಯೀ ಯೆತಾ. ಚಿಕ್‍ಮಗ್ಳುರ್ಚ್ಯಾ ಕೊಂಕ್ಣಿ ಬಳ್ವಂತ್ ಆಸ್ಚ್ಯಾ ಪ್ರದೇಶಾಂನಿ ಲೋಕ್ ಎಕ್ವಟ್ಲಾ. ಕೊಂಕ್ಣಿ ಲೋಕ್ ಚಡ್ ಆಸ್ಚ್ಯಾ ಹ್ಯಾ ಫಿರ್ಗಜಾಂನಿ ಕೊಂಕ್ಣಿ ಮಿಸಾಂ ಖಾತಿರ್ ಬಳ್ವಂತ್ ವಾವ್ರ್ ಚಲ್ಲಾ. 18 ವರ್ಸಾಂ ಆದಿಂ ಕೊಂಕ್ಣಿ ರಾಕಣ್ ಸಂಚಾಲನ್ ಅಸ್ತಿತ್ವಾಕ್ ಆಯ್ಲೆಂ. ತ್ಯಾ ವರ್ವಿಂ ಸಕ್ಡಾಂಕ್ ಸಾಂಗಾತಾ ಮೆಳೊನ್ ಸಂಘಟಿತ್ ವಾವ್ರ್ ಕರುಂಕ್ ಬಳ್ ಮೆಳ್ಳೆಂ.
ಘಾಟಾ ವಯ್ಲೊ ಕೊಂಕ್ಣಿ ಝುಜಾರಿ, ಬಸ್ರೀಕಟ್ಟೆಚೊ ಪ್ರಮೋದ್ ಪಿಂಟೊ ರಾಕಣ್ ಸಂಚಾಲನಾಚೊ ಸಕ್ರಿಯ್ ಕಾರ್ಯಕರ್ತ್ ಆನಿ ಪ್ರಮುಖ್ ಲೀಡರ್. 18 ವರ್ಸಾಂ ಆದಿಂ ಬಾಳೆಹೊನ್ನೂರಾಂತ್ ಚಲ್‍ಲ್ಲ್ಯಾ ಎಕಾ ಕೊಂಕ್ಣಿ ಕಾರ್ಯಾಂತ್ ಭಾಗ್ ಘೆತ್‍ಲ್ಲ್ಯಾ ಎರಿಕ್ ಒಝೇರಿಯೊನ್ ಘಾಟಾಗಾರಾಂಕ್ ಎಕ್ವಟಿತ್ ಜಾಂವ್ಕ್ ಪ್ರೇರಣ್ ದಿಲ್ಲೆಂ ಮ್ಹಣ್ತಾ ಪ್ರಮೋದ್. ತ್ಯಾ ಸಂದರ್ಭಾರ್ ಪ್ರಸ್ತುತ್ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ಸ್ಟ್ಯಾನಿ ಅಲ್ವಾರಿಸ್‍ಯೀ ಆಯಿಲ್ಲೊ ಮ್ಹಣ್ತಾ ತೊ. ಲವ್ರೆಂತ್ ಚಿಕ್‍ಮಗ್ಳುರ್ ಘಾಟಾಂತ್ ಕೊಂಕ್ಣಿ ಜಾಗೃತಿ ಉಟವ್ನ್ ದಿಶಾ ದಾಕಯಿಲ್ಲೊ ಪ್ರಭಾವಿ ಬರವ್ಪಿ. ತಾಚ್ಯಾ ನಿರಂತರ್ ಮ್ಹಿನತೆನ್ ಲೊಕಾಕ್ ಉಮೆದ್ ಆನಿ ಪ್ರೇರಣ್ ಮೆಳ್ಳೆಂ ಮ್ಹಣ್ತಾ ಪ್ರಮೋದ್.
ಕೊಪ್ಪಾಚೆಂ ಕೊಲಾಸೊ ಕುಟಮ್ ಭಾರಿಚ್ ನಾಂವಾಡ್ದಿಕ್. ಸುನಿಲ್, ಅನಿಲ್ ಆನಿ ಡ್ಯಾರಿಲ್ ಕೊಲಾಸೊ ಏಕ್ ಸೈನ್‍ಂಚ್ ಮ್ಹಣ್ಯೆತ್. 2008 ಇಸ್ವೆಂತ್ ಚರ್ಚ್ ಎಟ್ಯಾಕಾಚೊ ಸೂತ್ರ್‌ಧಾರಿ, ಬಜರಂಗ ದಳಾಚೊ ಸಂಚಾಲಕ್ ಮಹೇಂದ್ರ ಕುಮಾರ್ ಬಂಧಿ ಜಾಂವ್ಕ್ ತೆಚ್ ಕಾರಣ್, ಹೆರ್ ಕೊಣ್‍ಯೀ ನ್ಹಯ್. ವ್ಹಯ್, ಹಿ ಗಜಾಲ್ ಜಾಯ್ತ್ಯಾಂಕ್ ಕಳಿತ್‍ಚ್ ನಾ. ಕ್ರೆಡಿಟ್ ಕಾಣ್ಗೆಲ್ಲೆ ಸಬಾರ್, ಪುಣ್ ತ್ಯಾ ವೆಳಿಂ ಪ್ರಮುಖ್ ವಾವ್ರ್, ಆಪ್ಲ್ಯಾ ಸಮುದಾಯಾ ಪಾಸತ್, ಕೆಲ್ಲೊ ಹ್ಯಾಚ್ ಕೊಲಾಸೊ ಭಾವಾಂನಿ. ತಾಂಚೆ ಪಯ್ಕಿ ಅನಿಲ್ ಕೊಲಾಸೊ ರಾಜಕೀಯಾಂತ್ ಪ್ರಭಾವಿ. ಕೊಪ್ಪ ಫಿರ್ಗಜೆಂತ್ ಕೊಂಕ್ಣಿ ಮೀಸ್ ಜಾಯ್ ಮ್ಹಳ್ಳ್ಯಾ ಚಳ್ವಳೆಂತ್ ಕೆದ್ನಾಂ ಅನಿಲಾನ್ ಮೆತೆರ್ಪಣ್ ದಾಕಯ್ಲೆಂಗೀ ಸಲೀಸಾಯೆನ್ ಆನಿ ತುರ್ತಾನ್ ಬಿಸ್ಪಾನ್ ಪರ್ವಣ್ಗಿ ದಿಲ್ಲಿ ಮ್ಹಣ್ತಾ ಪ್ರಮೋದ್ ಪಿಂಟೊ. ಅನಿಲಾಚೊ ಪ್ರಭಾವ್ ಆನಿ ಶ್ಯಾಥಿ ಜಾಣಾಂ ಆಸ್‍ಲ್ಲ್ಯಾನ್‍ಂಚ್ ಬಿಸ್ಪಾಕ್ ಫಿರ್ಗಜ್‍ಗಾರಾಂಚೆಂ ಹಕ್ಕ್ ಇನ್ಕಾರ್ ಕರುಂಕ್ ಜಾಂವ್ಕ್ ನಾ ಮ್ಹಣ್ತಾ ಪ್ರಮೋದ್, ಅಭಿಮಾನಾನ್.
ಚಿಕ್‍ಮಗ್ಳುರಾಂತ್ ಕೊಂಕ್ಣಿ ಕ್ರಾಂತಿ ಆನಿ ಮಾಂಯ್‍ಭಾಶೆಂತ್ ಮಿಸಾಂ ಖಾತಿರ್ ಚಳ್ವಳ್ ಚಲಯಿಲ್ಲ್ಯಾ ಮುಖೆಲ್ಯಾಂಚೊ ಸಂಖೊ ವ್ಹಡ್ ಆಸಾ. ಬೆಂಗ್ಳುರ್ ಎಫ್.ಕೆ.ಸಿ.ಎ.ಚೊ ಡೊಲ್ಫಿ ಡಿಕುನ್ಹ ಪ್ರಮುಖ್ ಸಮನ್ವಯಿ ಜಾವ್ನ್ ಆಖ್ಖ್ಯಾ ರಾಜ್ಯಾಂತ್ ವಾವುರ್ತಾ. ಬೆಂಗ್ಳುರ್ ದಿಯೆಸೆಜಿಂತ್ ಕೊಂಕ್ಣಿ ಮಿಸಾಂ ಖಾತಿರ್ ತಾಚೊ ವಾವ್ರ್ ಗಣನೀಯ್. ದೆವಾಧಿನ್ ಎರಿಕ್ ಡಿಸಿಲ್ವಾ ಸುಂಡೆಕೆರೆ ಫಿರ್ಗಜೆಂತ್ ಕೊಂಕ್ಣಿ ಮೀಸ್ ಯೇಂವ್ಕ್ ಕಾರಣ್. ತೊ ಆನಿ ತಾಚೊ ಭಾವ್ ಸ್ಟ್ಯಾನಿ ಡಿಸಿಲ್ವಾ ತಸಲ್ಯಾಂನಿ ಧಯ್ರ್ ಆನಿ ಬದ್ಧತೆನ್ ವಾವ್ರ್ ಕೆಲಾ ಮಾತ್ರ್ ನ್ಹಯ್ ದುಡ್ವಾಚಿ ಮಜತ್‍ಯೀ ದಿಲ್ಯಾ. ಪ್ರಸ್ತುತ್ ಅಧ್ಯಕ್ಷ್ ಜೋಕಿಂ ಸೊಜ್, ಮಾಜಿ ಅಧ್ಯಕ್ಷ್ ಪ್ರಮೋದ್ ಪಿಂಟೊ, ಕಾರ್ಯದರ್ಶಿ ವಿವಿಯನ್ ಸೊಜ್, ಖಜಾಂಚಿ ಸಿಲ್ವೆಸ್ಟರ್ ಸಲ್ಡಾನ್ಹಾ, ಗೌರವ್ ಅಧ್ಯಕ್ಷ್ ಸಿರಿಲ್ ರೆಬೆಲ್ಲೊನ್ ನಿರಂತರ್ ವಾವ್ರ್ ಕೆಲಾ. ರಿಚರ್ಡ್ ಡಿಸೋಜ, ಡೆರಿಕ್ ಡಿಸೋಜ ಆನಿ ಹೆರ್ ಜಾಯ್ತ್ಯಾಂನಿಯೀ ಕೆಲಾ. ಲೋಕ್ ಆನಿ ಪ್ರತ್ಯೇಕ್ ಕರ್ನ್ ಯುವಜಣಾಂಚಿ ಉಮೆದ್‍ಯೀ ಶ್ಲಾಘನೀಯ್. ಕೂದುವಳ್ಳಿ ಇಗರ್ಜೆಂತ್ ಕೊಂಕ್ಣಿ ಮಿಸಾ ಖಾತಿರ್ ಆಯ್ಲೆವಾರ್ ಲೊಕಾನ್ ಬಳ್ವಂತ್ ಝುಜ್ ಚಲಯ್ಲಾಂ. ಪರಿಣಾಮ್ ಜಾವ್ನ್ ಮುಖ್ಲ್ಯಾ ಆಯ್ತಾರಾ ಝುಂತ್ ಆಪಯ್ಲಾ.
ಹೆರ್ ಕಡೆನ್‍ಯೀ ಲೊಕಾನ್ ಕೊಂಕ್ಣೆಂತ್ ಮಿಸಾಂ ಖಾತಿರ್ ಬಳ್ವಂತ್ ವಾವ್ರ್ ಕೆಲಾ. ಬೆಂಗ್ಳುರ್ ದಿಯೆಸೆಜಿಚ್ಯಾ ಫಿರ್ಗಜೆಂನಿ ಕೊಂಕ್ಣಿ ಮಿಸಾಂ ದೀಂವ್ಕ್ ಹೈ ಕೋರ್ಟಾನ್ ಜಡ್ಜ್‌ಮೆಂಟ್ ದಿಲಾಂ. ಶಿವಮೊಗ್ಗ ಆನಿ ಸಾಗರಾಂತ್‍ಯೀ ಕೊಂಕ್ಣಿ ಸಂಘಟನಾಂ ಉದೆಲ್ಯಾಂತ್. ಶಿವಮೊಗ್ಗಾಂತ್ ಕೊಂಕ್ಣಿ ಮಿಸಾಂಕ್ ಪರ್ವಣ್ಗಿ ಮೆಳ್ಳ್ಯಾ ಆನಿ ಜಾಯ್ತ್ಯಾ ಫಿರ್ಗಜಾಂನಿ ಕೊಂಕ್ಣಿ ಮಿಸಾಂ ಭೆಟಯ್ತಾತ್ ಮ್ಹಣ್ತಾ ಪತ್ರಕರ್ತ್ ಜೋಸೆಫ್ ಟೆಲ್ಲಿಸ್.
ವಿಪರ್ಯಾಸ್ ಮ್ಹಳ್ಯಾರ್, ಚಿಮ್ಣೆ ಪಂದಾಚ್ ಕಾಳೊಕ್ ಮ್ಹಳ್ಳೆಪರಿಂ, ಚಿಕ್‍ಮಗ್ಳುರ್ ಶ್ಹೆರಾಂತ್ಲ್ಯಾ ಕಾಥೆದ್ರಾಲ್ ಆನಿ ವಿಜಯಪುರ ಫಿರ್ಗಜಾಂನಿಯೀ ಕೊಂಕ್ಣಿ ಲೋಕ್‍ಚ್ ಚಡ್ ಆಸ್ಚೊ ತರೀ ಥಂಯ್ಸರ್ ಕೊಂಕ್ಣಿ ಮಿಸಾಂಕ್ ಅವ್ಕಾಸ್ ದೀಂವ್ಕ್ ನಾ!
ದರ್ಬಾರಾನ್ ಚಲ್ಲೊ 18ವೊ ಕೊಂಕ್ಣಿ ಉತ್ಸವಾಂತ್
ಕಥೊಲಿಕ್ ಕೊಂಕ್ಣಿ ರಾಕಣ್ ಸಂಚಾಲನಾನ್ ಸಪ್ತೆಂಬರ್ 16ವೆರ್ ಸಕ್ಲೇಶ್‍ಪುರ್ ತಾಲೂಕಾಚ್ಯಾ ಸುಂಡೆಕೆರೆಂತ್ 18ವೊ ಕೊಂಕ್ಣಿ ಉತ್ಸವ್ ಸಂಭ್ರಮ್ಲೊ. ಉದೇವಾರಾಂತ್ ಆಸ್ಚ್ಯಾ ಡಿಸಿಲ್ವ ಕುಟ್ಮಾಚ್ಯಾ ಹಳ್ಳಿಹಿತ್ತಲು ಎಸ್ಟೇಟಿಂತ್ ಸೊಮಾರಾ ಭೋವ್ ಗದ್ದಾಳಾಯೆನ್ ಕೊಂಕ್ಣಿ ಕ್ರಿಸ್ತಾಂವ್ ಲೊಕಾನ್ ಮೊಂತಿ ಫೆಸ್ತ್ ಆನಿ ಕೊಂಕ್ಣಿ ಉತ್ಸವ್ ಆಚರ್ಸಿಲೊ. ಸಕಾಳಿಂ 10 ವೊರಾರ್ ಮೀಸ್ ಆಸ್‍ಲ್ಲೆಂ. ಉಪ್ರಾಂತ್ ವೆದಿ ಕಾರ್ಯೆಂ ಆನಿ ಸಾಂಸ್ಕೃತಿಕ್ ಪ್ರದರ್ಶನ್ ಆಸಾ ಕೆಲ್ಲೆಂ. ಚಡುಣೆಂ 700 ಲೊಕಾನ್ ಭಾಗ್ ಘೆವ್ನ್ ಕೊಂಕ್ಣಿ ಸಂಭ್ರಮ್ ಭರ್ಪೂರ್ ಯಶಸ್ವಿ ಕೆಲೊ.
ಮುಖೆಲ್ ಸಯ್ರೊ ಜಾವ್ನ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ಸ್ಟ್ಯಾನಿ ಅಲ್ವಾರಿಸ್ ಹಾಜರ್ ಆಸ್‍ಲ್ಲೊ. ಲವ್ರೆಂತ್ ಚಿಕ್‍ಮಗ್ಳುರಾನ್ ದಿಕ್ಸೂಚಿ ಭಾಷಣ್ ದಿಲೆಂ. ರಾಕಣ್ ಸಂಚಾಲನಾಚ್ಯಾ ವೆವೆಗ್ಳ್ಯಾ ಘಟಕಾಂನಿ ಸಾಂಸ್ಕೃತಿಕ್ ಪ್ರದರ್ಶನಾಂ ದಿಲಿಂ. ಉತ್ತರ ಕನ್ನಡಾಚ್ಯಾ ಸಿದ್ಧಿ ಪಂಗ್ಡಾನ್ ಸಿದ್ಧಿ ಸಂಗೀತ್-ನಾಚ್ ಸಾದರ್ ಕೆಲೊ.
ರಾಕಣ್ ಸಂಚಾಲನ್ ಅಧ್ಯಕ್ಷ್ ಜೋಕಿಂ ಡಿಸೋಜಾನ್ ಸ್ವಾಗತ್ ಕೆಲೊ. ಎಸ್ಟೇಟಿಚೊ ಧನಿ ಸ್ಟ್ಯಾನಿ ಡಿಸಿಲ್ವಾ, ಅಕಾಡೆಮಿ ಸಾಂದೊ ಆನಿ ರಾಕಣ್ ಸಂಚಾಲನಾಚೊ ಮಾಜಿ ಅಧ್ಯಕ್ಷ್ ಪ್ರಮೋದ್ ಪಿಂಟೊ ವೆದಿರ್ ಆಸ್‍ಲ್ಲೆ. ಅಕಾಡೆಮಿಚೆ ಸಾಂದೆ ನವೀನ್ ಲೋಬೊ, ರೊನಿ ಕ್ರಾಸ್ತಾ, ‘ಬುಡ್ಕುಲೊ’ ಸಂಪಾದಕ್ ಡೊನಾಲ್ಡ್ ಪಿರೇರಾ ಕಾರ್ಯಾಂತ್ ಹಾಜರ್ ಆಸ್‍ಲ್ಲೆ.
ಚಿಕ್‍ಮಗ್ಳುರ್ ಘಟಕಾ ಥಾವ್ನ್ ಸ್ವಾಗತ್ ನೃತ್ಯ್ ಪ್ರಸ್ತುತ್ ಕರುನ್ ಕಾರ್ಯಾಕ್ ಚಾಲನ್ ದಿಲೆಂ. ರಾಕಣ್ ಸಂಚಾಲನಾಚಿ ವಾರ್ಷಿಕ್ ವರ್ದಿ ವಿವಿಯನ್ ಡಿಸೋಜಾನ್ ವಾಚನ್ ಕೆಲಿ. ಸಂಸೆಚ್ಯಾ ದಿವ್ಯ ಕರುಣಾಲಯಾಕ್ ಜಮೊ ಜಾಲ್ಲೆಂ ದಾನ್ ಆನಿ ವರ್ವಿ ಹಸ್ತಾಂತರ್ ಕೆಲಿ. ಆಲ್ವಿನ್ ಡಿಸೋಜಾನ್ ಕಾರ್ಯೆಂ ನಿರ್ವಹಣ್ ಕೆಲೆಂ. ಸಿಲ್ವೆಸ್ಟರ್ ಸಲ್ಡಾನ್ಹಾನ್ ಧಿನ್ವಾಸ್ಲೆಂ. ನೀರ್ಮಾರ್ಗ ಮ್ಯೂಸಿಕಲ್ ಬ್ಯಾಂಡಾಚ್ಯಾ ನಾದಾನ್ ಸಭಾ ನಾಚೊನ್ ಧಲ್ಲಿ.
ಫೆಸ್ತ್ ಜೆವಣ್, ನಾಚ್ ಆನಿ ಗಾಯನಾಂನಿ ಲೊಕಾನ್ ಉತ್ಸವ್ ಸಂಭ್ರಮ್ಲೊ. ಹೆಂ ಕಾರ್ಯೆಂ ಚಲೊಂಕ್ ನಜೊ, ಲೊಕಾನ್ ಹಾಜರ್ ಜಾಂವ್ಕ್ ನಜೊ, ಮೀಸ್ ವಿಫಲ್ ಜಾಯ್ಜೆ ಮ್ಹಣ್ ‘ಧಾರ್ಮಿಕ್’ ಮುಖೆಲ್ಯಾಂನಿ ಕೆಲ್ಲೆಂ ಸರ್ವ್ ‘ಪ್ರಯತನ್’ ನಿರ್ಫಳ್ ಜಾವ್ನ್ ಲೊಕಾಚೊ ಎಕ್ವಟ್‍ಚ್ ಬಳ್, ನಿರ್ಣಾಯಕ್ ಮ್ಹಣ್ ರುಜು ಕರುನ್ ಕೊಂಕ್ಣಿ ಲೊಕಾನ್ ದರ್ಬಾರಾನ್ ದಬಾಜೊ ಚಲಯ್ಲೊ ಮ್ಹಣ್ತಾತ್ ಸಂಘಟಕ್ ಉಲ್ಲಾಸಾನ್ ಆನಿ ಸಂತೃಪ್ತೆನ್.
ತಸ್ವೀರ‍್ಯೊ: ಸ್ಟ್ಯಾನ್ಲಿ ಬಂಟ್ವಾಳ್, ಮಂಗ್ಳುರ್ ಆನಿ ಗಿರೀಶ್ ಚಿಕ್‍ಮಗ್ಳುರ್
ಬಸ್ರಿಕಟ್ಟೆಂತ್ ಜಬರ್ದಸ್ತ್ ಕೊಂಕ್ಣಿ ಉತ್ಸವ್
ಬಸ್ರೀಕಟ್ಟೆಚೆಂ ವಂಡರ್‌ಫುಲ್ ಹಿಮಗಿರಿ ಹೋಮ್‍ಸ್ಟೇ
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
