ಜಾನ್ ಮೊಂತೇರೊ ರಚನಾಚೊ ನವೊ ಅಧ್ಯಕ್ಷ್

ವರ್ದಿ: ಡೊನಾಲ್ಡ್ ಪಿರೇರಾ, Budkulo.com ಸಂಪಾದಕ್
ತಸ್ವಿರ್‍ಯೊ: ಸ್ಟ್ಯಾನ್ಲಿ ಬಂಟ್ವಾಳ್, ಬಿಕರ್ನಕಟ್ಟೆ

ಮಂಗ್ಳುರ್: ಕಥೊಲಿಕ್ ಉದ್ಯಮಿ ಆನಿ ವೃತ್ತಿಪರಾಂಚೆಂ ಸಂಘಟನ್ ರಚನಾಕ್ ನವ್ಯಾ ಹುದ್ದೆದಾರಾಂಚಿ ವಿಂಚವ್ಣ್ ಚಲ್ಲಿ. ಹಂಪನ್‍ಕಟ್ಟಾ ಮಿಲಾಗ್ರಿಸ್ ಕಂಪೆನಿಚೊ ಮಾಲಕ್ ಜಾನ್ ಬಿ. ಮೊಂತೇರೊ ನವೊ ಅಧ್ಯಕ್ಷ್ ಜಾವ್ನ್ ಚುನಾಯಿತ್ ಜಾಲಾ.

ಬೆಂದುರ್ ಜುಬಿಲಿ ಹೊಲಾಂತ್ ಸೆಪ್ತೆಂಬರ್ 23ವೆರ್ ಸಾಂಜೆರ್ ಚಲ್‍ಲ್ಲ್ಯಾ ವಾರ್ಷಿಕ್ ಜಮಾತೆಂತ್ ನವ್ಯಾ ಹುದ್ದೆದಾರಾಂಚಿ ವಿಂಚವ್ಣ್ ಚಲ್ಲಿ. ಜ್ಯೋ ಕುವೆಲ್ಲೊ ಚುನಾವಣ್ ಅಧಿಕಾರಿ ಜಾವ್ನಾಸ್‍ಲ್ಲೊ. ಚುನಾಯಿತ್ ಜಾಲ್ಲೆ ಹೆರ್ ಹುದ್ದೆದಾರ್: ಉಪಾಧ್ಯಕ್ಷ್ ನವೀನ್ ಕೆನ್ಯೂಟ್ ಲೋಬೊ, ಕಾರ್ಯದರ್ಶಿ ವಿಜಯ್ ವಿಶ್ವಾಸ್ ಲೋಬೊ, ಸಹ ಕಾರ್ಯದರ್ಶಿ ವಾಲ್ಟರ್ ಡಿಕುನ್ಹ ಆನಿ ಖಜಾನ್ದಾರ್ ನೆಲ್ಸನ್ ಮೊಂತೇರೊ.

ಆಡಳ್ತ್ಯಾ ಸಮಿತಿಚೆ ಸಾಂದೆ ಜಾವ್ನ್ ಆಲ್ವಿನ್ ಪ್ರಕಾಶ್ ಪಿರೇರಾ, ಯೂಲಾಲಿಯಾ ಮರಿಯಾ ಡಿಸೋಜ, ಜೋಕಿಮ್ ಸ್ಟ್ಯಾನಿ ಅಲ್ವಾರಿಸ್, ಲವಿನಾ ಸಿಲ್ವಿಯಾ ಮೊಂತೇರೊ, ರೋಶನ್ ಆ್ಯಂಟನಿ ಡಿಸೋಜ ಆನಿ ಸಿಎ ವಿಕ್ರಮ್ ಜೂಡ್ ನೊರೋನ್ಹಾ ವಿಂಚೊನ್ ಆಯ್ಲೆ. ಪೂರ್ವ್ ಅಧ್ಯಕ್ಷ್ ವಿನ್ಸೆಂಟ್ ಕುಟಿನ್ಹಾ ಆನಿ ಕಥೊಲಿಕ್ ಸಭಾ ಕೇಂದ್ರೀಯ್ ಅಧ್ಯಕ್ಷ್ ಆಲ್ವಿನ್ ಡಿಸೋಜ ಹುದ್ದ್ಯಾ ಹಕ್ಕಾನ್ ಸಮಿತಿಚೆ ಸಾಂದೆ ಜಾವ್ನಾಸ್ತೆಲೆ.

ಚುನಾವಾ ಪಯ್ಲೆಂ 2022-23ವ್ಯಾ ವರ್ಸಾಚಿ ವಾರ್ಷಿಕ್ ಜಮಾತ್ ಚಲ್ಲಿ. ಯೂಲಾಲಿಯಾ ಡಿಸೋಜಾನ್ ಮಾಗ್ಣ್ಯಾ ಮುಖಾಂತ್ರ್ ಸುರ್ವಾತ್ ಕೆಲಿ. ಅಧ್ಯಕ್ಷ್ ವಿನ್ಸೆಂಟ್ ಕುಟಿನ್ಹೊನ್ ಸ್ವಾಗತ್ ಕರ್ನ್ ಸಭಾ ಚಲಯ್ಲಿ. ಕಾರ್ಯದರ್ಶಿ ಲವಿನಾ ಮೊಂತೇರೊನ್ ವರ್ದಿ ವಾಚ್ಲಿ. ಖಜಾನ್ದಾರ್ ಯೂಲಾಲಿಯಾ ಮರಿಯಾ ಡಿಸೋಜಾನ್ ಲೇಕ್‍ಪಾಕ್ ಮಂಡನ್ ಕೆಲೆಂ. ರಚನಾ ಆಪ್ಲ್ಯಾ 25ವ್ಯಾ ವರ್ಸಾಕ್ ಪಾಂಯ್ ತೆಂಕುನ್ ಆಸ್ಚ್ಯಾ ವಗ್ತಾ ಚಡ್ ಪರಿಣಾಮ್‍ಕಾರಿ ವಾವ್ರ್ ಚಲಂವ್ಕ್ ಚರ್ಚಾ ಚಲ್ಲಿ.

ಆಪ್ಲ್ಯಾ ದೋನ್ ವರ್ಸಾಂಚ್ಯಾ ಆವ್ದೆಂತ್ ಚಲ್‍ಲ್ಲ್ಯಾ ಕಾರ್ಯಕ್ರಮಾಂಚೊ ವಿವರ್ ದಿಲ್ಲ್ಯಾ ವಿನ್ಸೆಂಟ್ ಕುಟಿನ್ಹೊನ್ ಸಹಕಾರ್ ದಿಲ್ಲ್ಯಾ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ. ಸಭೆಂತ್ ಮಾಜಿ ಅಧ್ಯಕ್ಷ್ ಮಾರ್ಜರಿ ಟೆಕ್ಸೇರಾ, ರೊಯ್ ಕಾಸ್ತೆಲಿನೊ, ಮಾರ್ಸೆಲ್ ಮೊಂತೇರೊ, ರೊನಾಲ್ಡ್ ಗೋಮ್ಸ್, ಸ್ಟ್ಯಾನಿ ಅಲ್ವಾರಿಸ್, ಜಾನ್ ಬಿ. ಮೊಂತೇರೊ, ಗಿಲ್ಬರ್ಟ್ ಡಿಸೋಜ ಹಾಜರ್ ಆಸ್‍ಲ್ಲೆ. ಮಾಜಿ ಶಾಸಕ್ ಜೆ.ಆರ್. ಲೋಬೊ, ಮಾಂಡ್ ಸೊಭಾಣ್ ಅಧ್ಯಕ್ಷ್ ಲುವಿ ಜೆ. ಪಿಂಟೊ, ಜೆರೊಸಾ ಕಂಪೆನಿಚ್ಯಾ ಉಲ್ಲಾಸ್ ರಸ್ಕಿನ್ಹಾ, ಲೆಸ್ಲಿ ರೇಗೋ, ಟೈಟಸ್ ನೊರೊನ್ಹಾ, ಸ್ಟ್ಯಾನಿ ಅಲ್ವಾರಿಸ್ ಆನಿ ಹೆರಾಂನಿ ಸಲಹಾ ಸೂಚನಾಂ ಮಂಡನ್ ಕರ್ನ್ ಪ್ರಮುಖ್ ಗಜಾಲಿಂಚೆರ್ ಆಪುರ್ಬಾಯೆಚಿ ಚರ್ಚಾ ಚಲಯ್ಲಿ. ಉಪ್ರಾಂತ್ ನವ್ಯಾ ಸಮಿತಿನ್ ಹುದ್ದೆ ಸ್ವೀಕಾರ್ ಕೆಲೆ.

ದುಸ್ರೆ ಪಾವ್ಟಿಂ ರಚನಾಚೊ ಅಧ್ಯಕ್ಷ್ ಜಾಲ್ಲ್ಯಾ ಜಾನ್ ಮೊಂತೇರೊನ್ ರಚನಾನ್ ಪಾಟ್ಲ್ಯಾ 25 ವರ್ಸಾಂನಿ ಕೆಲ್ಲೆಂ ಸಾಧನ್ ಉಲ್ಲೇಖ್ ಕರುನ್ ಸರ್ವ್ ಅಧ್ಯಕ್ಷಾಂಕ್ ಆನಿ ತಾಂಚ್ಯಾ ಸಾಂಗಾತ್ಯಾಂಕ್ ವಾಖಣ್ಲೆಂ. ರುಪ್ಯಾಳ್ಯಾ ಸಂಭ್ರಮಾಂತ್ ಆಸ್ಚ್ಯಾ ರಚನಾಕ್ ಬಳ್ವಂತ್ ಕರುಂಕ್ ಸರ್ವಾಂಚೊ ಸಹಕಾರ್ ತಾಣೆಂ ಮಾಗ್ಲೊ. ನವೊ ಕಾರ್ಯದರ್ಶಿ ವಿಜಯ್ ವಿಶ್ವಾಸ್ ಲೋಬೊನ್ ಧಿನ್ವಾಸ್ಲೆಂ.