ಎ.ಟಿ. ಲೋಬೊನ್ ಕೊಂಕ್ಣೆಂತ್ ಶ್ರೇಶ್ಟ್ ಸಾಹಿತ್ಯ್ ರಚ್ಲಾಂ: ಡೊ. ಎಡ್ವರ್ಡ್ ನಜ್ರೆತ್

ಮಂಗ್ಳುರ್: ಕೊಂಕ್ಣಿ ಸಾಹಿತಿ ಎ.ಟಿ. ಲೋಬೊ ಏಕ್ ದಾರ್ಶನಿಕ್ ಜಾವ್ನಾಸ್‍ಲ್ಲೊ ಆನಿ ತಾಣೆಂ ಜಿಣ್ಯೆಚಿ ಮೊಲಾಂ ಆಪ್ಲ್ಯಾ ಸಾಹಿತ್ಯಾ ಮುಖಾಂತ್ರ್ ದಾಕವ್ನ್ ದಿಲ್ಯಾಂತ್ ಮ್ಹಣಾಲೊ ಫಾಮಾದ್ ಕೊಂಕ್ಣಿ ಸಾಹಿತಿ ಡೊ. ಎಡ್ವರ್ಡ್ ನಜ್ರೆತ್. ಮಂಗ್ಳುರ್ಚ್ಯಾ ಬಿಸ್ಪಾಚ್ಯಾ ನಿವಾಸಾಚ್ಯಾ ಸಾಲಾಂತ್ ಚಲ್‍ಲ್ಲ್ಯಾ ‘ಎಟ್ಯೆಲ್ ಸಾಹಿತ್ಯಾವಲೋಕನ್’ ಸಾಹಿತ್ಯ್‌ಗೋಷ್ಠಿ ವೆಳಿಂ Power Point ಪ್ರೆಸೆಂಟೇಶನ್ ಮುಖಾಂತ್ರ್ ಎ.ಟಿ. ಲೋಬೊಚ್ಯಾ ಸಾಹಿತ್ಯಾಚೆರ್ ಪತ್ರ್ ಮಂಡನ್ ಕರ್ನ್ ತೊ ಉಲಯ್ಲೊ. ಕೊಂಕ್ಣಿ ಸಾಹಿತ್ಯಾಕ್ ವ್ಹಡ್ವಿಕಾಯ್ ಹಾಡ್ನ್ ದಿಲ್ಲ್ಯಾ ಎ.ಟಿ. ಲೋಬೊ ತಸಲ್ಯಾ ಮಾಲ್ಗಡ್ಯಾ ಸಾಹಿತಿಂನಿ ಕೊಂಕ್ಣಿ ಸಾಹಿತ್ಯಾಕ್ ಊಂಚ್ಲೆಂ ಸ್ಥಾನ್ ಜೊಡುನ್ ದಿಲಾಂ ಮ್ಹಣ್ ತಾಣೆಂ ಉಡಾಸ್ ಕಾಡ್ಲೊ.

‘ಲ್ಯುಮಿನ್ ಫೌಂಡೇಶನ್’ ಮಂಗ್ಳುರ್ ಹಾಣಿಂ ಹೆಂ ಕಾರ್ಯೆಂ ಮಾಂಡುನ್ ಹಾಡ್‍ಲ್ಲೆಂ. ‘ರಾಕ್ಣೊ’ ಸಾತೊಳೆಂ ಆನಿ ಎ.ಟಿ. ಲೋಬೊ ಫೌಂಡೇಶನ್ ಹಾಂಚ್ಯಾ ಜೋಡ್ ಆಸ್ರ್ಯಾ ಖಾಲ್ 2013 ಅಕ್ತೋಬರ್ 13ವೆರ್ ಆಯ್ತಾರಾ ಆಸಾ ಕೆಲ್ಲ್ಯಾ ಹ್ಯಾ ಸೆಮಿನಾರಾಚಿ ಉಗ್ತಾವಣ್ ಮಾ| ಬಾ| ಮ್ಯಾಕ್ಸಿಂ ರೊಜಾರಿಯೊನ್ ಕೆಲಿ. ಕಾರ್ಯಾಕ್ ಬರೆಂ ಮಾಗೊನ್ ಉಲಯಿಲ್ಲೊ ತೊ, ಕೊಂಕ್ಣಿ ಸಾಹಿತ್ಯಾಕ್ ಮಾಲ್ಗಡ್ಯಾ ಸಾಹಿತಿಂನಿ ವ್ಹಡ್ ಮಾಪಾನ್ ದೇಣ್ಗಿ ದಿಲ್ಯಾ ಮ್ಹಳೆಂ.

ಲ್ಯುಮಿನ್ ಫಾಂವ್ಡೇಶನ್ ಹಾಚೊ ಸ್ಥಾಪಕ್ ಡೊನಾಲ್ಡ್ ಪಿರೇರಾನ್ `ಎ.ಟಿ. ಲೋಬೊ – ಶ್ರೇಷ್ಠ್ ಸಾಹಿತಿ, ಶ್ರೇಷ್ಠ್ ಸಾಹಿತ್ಯ್’ ಮ್ಹಳ್ಳ್ಯಾ ವಿಶಯಾಚೆರ್ ಪತ್ರ್ ಮಂಡನ್ ಕೆಲೆಂ.

ಕಾರ್ಯಾಕ್ ಮುಕೆಲ್ ಸಯ್ರೊ ಜಾವ್ನ್ ಜೆಪ್ಪು ಸೆಮಿನರಿಚೊ ಪ್ರಾಧ್ಯಾಪಕ್ ತಶೆಂ ಬರವ್ಪಿ ಬಾ| ಮೆಕ್ಸಿಮ್ ರೊಜಾರಿಯೊ (ಮೇಜರ್ ಕುಪ್ಪೆಪದವ್) ಹಾಜರ್ ಆಸ್‍ಲ್ಲೊ. ದಿವೊ ಪೆಟವ್ನ್ ಕಾರ್ಯಾಚಿ ಸುರ್ವಾತ್  ಕರ್ನ್ ಉಲಯಿಲ್ಲ್ಯಾ ತಾಣೆಂ, “ಮ್ಹಾಕಾ ಲ್ಹಾನ್ಪಣಾರ್‌ಚ್ ಎಟ್ಯೆಲಾಚ್ಯಾ ಕಾಣಿಯಾಂಚಿ ರೂಚ್ ಲಾಗ್‍ಲ್ಲಿ. ಆಮ್ಚ್ಯಾ ಘರಾ ವ್ಹಡಿಲಾಂ ಕೊಂಕ್ಣಿ ಪತ್ರಾಂ ಹಾಡಯ್ತಾಲಿಂ. ತಾಂತುಂ ಯೆಂವ್ಚ್ಯೊ ಎಟ್ಯೆಲ್ ಆನಿ ಹೆರ್ ವ್ಹಡ್ ಸಾಹಿತಿಂಚ್ಯೊ ಕಾಣಿಯೊ, ಕಾದಂಬರಿ ವಾಚುನ್ ಮ್ಹಾಕಾಯ್ ಬರಂವ್ಚಿ ಉರ್ಬಾ ಆಯಿಲ್ಲಿ. ಎಟ್ಯೆಲ್ ತಸಲ್ಯಾ ಸಾಹಿತಿಂ ವರ್ವಿಂ ಆಮ್ಕಾಂ ಪ್ರೇರಣ್ ಮೆಳ್ಳೆಂ” ಮ್ಹಣೊನ್, ಎ.ಟಿ. ಲೋಬೊಚೆಂ ಸಾಹಿತ್ಯ್ ವಾಚುನ್ ಜೊಡ್ಲೆಲ್ಯಾ ಪ್ರೇರಣಾಚೊ ತಾಣೆಂ ಉಡಾಸ್ ಕಾಡ್ಲೊ.

ಎ.ಟಿ. ಲೋಬೊ ಫೌಂವ್ಡೇಶನ್ ಅಧ್ಯಕ್ಷಿಣ್ ಆಲಿಸ್ ಲೋಬೊನ್ ಫೌಂವ್ಡೇಶನಾಚೆ ಉದ್ದೇಶ್, ಸಾಧನ್ ಆನಿ ಮುಕ್ಲ್ಯಾ ಯೋಜನಾಂಚೊ ವಿವರ್ ದಿಲೊ. ಕಾರ್ಯದರ್ಶಿಣ್ ಸಿಲೆಸ್ತಿನ್ ಸಿಕ್ವೇರಾನ್ ಎಟ್ಯೆಲಾಚ್ಯಾ ಸಾಹಿತಿಕ್ ಜಿವಿತಾಚಿ ವಳಕ್ ದಿಲಿ. ಸಯ್ರೊ ಜಾವ್ನ್ ಹಾಜರ್ ಆಸಜೆ ಆಸ್‍ಲ್ಲೊ ರಾಕ್ಣೊಚೊ ಆದ್ಲೊ ಸಂಪಾದಕ್ ಬಾ| ಮಾರ್ಕ್ ವಾಲ್ಡರ್ ಕಾರಣಾಂತರ್ ಗೈರ್ ಹಾಜರ್ ಜಾಲ್ಲ್ಯಾನ್, ತಾಣೆಂ ಎಟ್ಯೆಲಾಚ್ಯಾ ಕಾಣಿಯಾಂ ಬುಕಾಕ್ ಬರಯಿಲ್ಲ್ಯಾ ಪ್ರಸ್ತಾವನಾಂತ್ಲೊ ಥೊಡೊ ವಾಂಟೊ, ಲೊಕಾಮೊಗಾಳ್ ವಿಡಂಬನ್‍ಕಾರ್ ಸಿಜ್ಯೆಸ್ ತಾಕೊಡೆನ್ ವಾಚುನ್ ಸಾಂಗ್ಲೊ. ರಾಕ್ಣೊ ಪತ್ರಾಚೊ ಸಹ ಸಂಪಾದಕ್, ಲ್ಯುಮಿನ್ ಫೌಂವ್ಡೇಶನ್ ಹಾಚೊ ಸಹ ಸ್ಥಾಪಕ್  ಟೊನಿ ಫೆರೊಸಾನ್ ವಂದಿಲೆಂ. ನೀರ್ಮಾರ್ಗ ಸಂತೋಷ್ ಡಿಕೋಸ್ತಾನ್ ಕಾರ್ಯೆಂ ಚಲಯ್ಲೆಂ.

ಕೊಂಕಣಿ ಪ್ರಚಾರ್ ಸಂಚಾಲನಾಚೊ ಅಧ್ಯಕ್ಷ್ ರೊಯ್ ಕಾಸ್ತೆಲಿನೊ, ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ್ ಮೆಲ್ವಿನ್ ರೊಡ್ರಿಗಸ್, ಬಹುಭಾಷೆ ವಿದ್ವಾಂಸ್ ದೊ| ವಿಲ್ಯಮ್ ದಸಿಲ್ವಾ, ದಾಯ್ಜಿವರ್ಲ್ಡ್ ವೀಕ್ಲಿಚೊ ಸಂಪಾದಕ್ ಹೇಮಾಚಾರ್ಯ ಆನಿ ಹೆರ್ ಸಬಾರ್ ಜಣಾಂ ಹಾಜರ್ ಆಸ್‍ಲ್ಲಿಂ.

ತುಮ್ಚಿ ಅಭಿಪ್ರಾಯ್, ಸಲಹಾ ವಾ ಸೂಚನಾಂ ಇಮೈಲ್ ಕರಾ: budkuloepaper@gmail.com