ಮಸ್ತ್ ಮಜಾ! ವೆಲಂಕಣಿಕ್ ಏಕ್ ವಂಡರ್‌ಫುಲ್ ಪ್ರವಾಸ್

ಭಾರತೀಯ್ ಲೊಕಾಕ್ ಜಿಣ್ಯೆಂತ್ ಚಡ್ ಪ್ರಮುಖ್ – ಧಾರ್ಮಿಕ್ ಶ್ರದ್ಧಾ. ಮೂಳ್ ಭಾರತೀಯ್, ಹಿಂದ್ವಾಂಕ್, ಆನಿ ಉಪ್ರಾಂತ್ ಆಯಿಲ್ಲ್ಯಾ ವಿದೇಶಿ ಧರ್ಮಾಚ್ಯಾಂಕ್‍ಯೀ (ಕ್ರಿಸ್ತಾಂವ್ ಆನಿ ಮುಸ್ಲಿಮಾಂಕ್) ಧಾರ್ಮಿಕ್‍ಪಣಾ ಶಿವಾಯ್ ಅಸ್ಮಿತಾಯ್ ನಾ. ದೆಕುನ್ ಭಾರತ್‍ಭರ್ ಖಂಯ್ ಗೆಲ್ಯಾರೀ ಧಾರ್ಮಿಕ್ ಕೇಂದ್ರಾಂ ವಾ ಪೂನ್‍ಶೆತಾಂ ಭರ್ಲ್ಯಾಂತ್.

ಭಾರತೀಯ್ ಸಂಸ್ಕೃತೆಚೊ ಪ್ರಭಾವ್ ಹಾಂಗಾಚ್ಯಾ ಸರ್ವ್ ಧರ್ಮಾಂಚೆರ್ ಬರೊಚ್ ಪಡ್ಲಾ. ಕ್ರಿಸ್ತಾಂವ್ ಹಾಕಾ ಅಪ್ವಾದ್ ನ್ಹಯ್. ದಕ್ಷಿಣ್ ಭಾರತಾಂತ್ ಕ್ರಿಸ್ತಾಂವ್, ಪ್ರತ್ಯೇಕ್ ಕರ್ನ್ ಕಥೊಲಿಕಾಂಚೊ ಸಂಖೊ ಚಡ್ ಆಸಾ. ದೆಕುನ್‍ಂಚ್ ಹ್ಯಾ ಪ್ರದೇಶಾಂತ್ ಕಥೊಲಿಕ್ ಪೂನ್‍ಶೆತಾಂ, ಜಿಂ ಸರ್ವ್ ಧರ್ಮಾಂಚ್ಯಾ ಲೊಕಾಕ್ ಆಕರ್ಶಿತಾತ್, ಧಾರಾಳ್ ಆಸಾತ್. ಅಸಲ್ಯಾ ಕ್ರಿಸ್ತಾಂವ್ ಯಾತ್ರಿಕ್ ಕೇಂದ್ರಾಂ ಪಯ್ಕಿ ಅತೀ ಚಡ್ ಫಾಮಾದ್ ಆಸ್ಚೆಂ, ತಮಿಳ್‍ನಾಡುಂತ್ಲೆಂ ವೆಲಂಕಣಿ.

ವೆಲಂಕಣಿ ಮಾಂಯ್ ವಾ ಭಲಾಯ್ಕೆಚಿ ಮಾಂಯ್ ಆಮ್ಕಾಂ ಕ್ರಿಸ್ತಾಂವಾಂಕ್ ಭೋವ್ ಮೊಗಾಚಿ, ಚಡ್ ವಳ್ಕಿಚಿ. ಆದಿಂ ಥಾವ್ನ್ ಕೊಂಕ್ಣಿ ಕಥೊಲಿಕಾಂಕ್ ಜಿಣ್ಯೆಂತ್ ಭೆಟ್ ದೀಜೆಚ್ ಜಾಲ್ಲಿಂ ಪೂನ್‍ಶೆತಾಂ ಮ್ಹಳ್ಯಾರ್ ಏಕ್ ಅತ್ತೂರ್, ದುಸ್ರೆಂ ವೆಲಂಕಣಿ. ಅತ್ತೂರ್ ಲಾಗಿಂಚ್ ಆಸಾ, ಪುಣ್ ವೆಲಂಕಣಿ ಪಯ್ಸ್ ಆಸಾ. ಪುಣ್ ಆಕರ್ಷಣ್ ತಿತ್ಲೆಂಚ್ ಚಡ್.

ಲ್ಹಾನ್‍ಪಣಾರ್ ವೆಲಂಕಣಿ ವಿಶಿಂ ಜಾಯ್ತೆಂ ಆಯ್ಕಲ್ಲೆಂ, ಸಬಾರ್ ಜಣ್ ಥಂಯ್ ವಚೊನ್ ಆಯಿಲ್ಲೆ ವಿಶಿಂ ಸಾಂಗ್ತಾಲೆ. ದೆಕುನ್ ವೆಲಂಕಣಿಕ್ ಏಕ್ ಪಾವ್ಟಿಂ ಭೆಟ್ ದೀಜೆಚ್ ಮ್ಹಣ್ ಮನಾಂತ್ ಅತ್ರೆಗ್ ಆಸ್‍ಲ್ಲೊ. ಏಕ್ ಪಾವ್ಟಿಂ ಅವ್ಚಿತ್ ತೊ ಅವ್ಕಾಸ್ ಫಾವೊ ಜಾತಾನಾ, ಖುಷೆನ್ ಭಾಯ್ರ್ ಸರ್ಲೊಂಚ್. ಆನಿ ಮ್ಹಜ್ಯಾ ಜಿಣ್ಯೆಂತ್ಲೆಂ ಏಕ್ ಭೋವ್ ಸುಮಧುರ್ ಪಯ್ಣ್, ಅದ್ಭುತ್ ಭೊಂವ್ಡಿ ಜಾವ್ನ್ ತೆಂ ವರ್ತವ್ಲೆಂ.

ಮೈಸೂರ್ಚೊ ಕೊಂಕ್ಣಿ ಕ್ರಿಸ್ತಾಂವ್ ಸಂಘ್ (Konkani Christian Association – KCA) ಏಕ್ ಸಕ್ರಿಯ್ ಸಂಘಟನ್. ಹಾಂವ್ ಮೈಸೂರ್ ದೋನ್ ವರ್ಸಾಂ ಆಸ್‍ಲ್ಲ್ಯಾನ್ ತಾಂಚ್ಯೊ ಚಟುವಟಿಕ್ಯೊ ಪ್ರತ್ಯಕ್ಷ್ ಪಳೆಲ್ಯಾತ್. ಉಪ್ರಾಂತ್ ಗಾಂವಾಕ್ ಪಾವ್‍ಲ್ಲ್ಯಾ ತವಳ್, ಏಕ್ ಆಪವ್ಣೆಂ ಮೆಳ್ಳೆಂ. ಹ್ಯಾ ಸಂಘಾನ್ ಆಪ್ಲ್ಯಾ ಸಾಂದ್ಯಾಂಕ್ ಆನಿ ಕುಟ್ಮಾಚ್ಯಾಂಕ್ ವೆಲಂಕಣಿ ಪ್ರವಾಸ್ ದವರ್ಲಾ, ಸಂಬಂಧಿಂನಿಯೀ ಯೆವ್ಯೆತ್ ಮ್ಹಣ್. ತಶೆಂ ಮೈಸೂರ್ ಆಸ್‍ಲ್ಲ್ಯಾ ಮ್ಹಜ್ಯಾ ಮಾಮಾಚ್ಯಾ ಕುಟ್ಮಾ ಸಂಗಿಂ ವೆಲಂಕಣಿ ಪಾವ್ಲೊಂ.

ಮೈಸೂರ್ ಥಾವ್ನ್ ಆಮಿ ರೈಲಾರ್ ಸುಟ್ಲ್ಯಾಂವ್. ಏಕ್ ಬೋಗಿ ಆಮ್ಚಿಚ್! ಗಮ್ಮತ್‍ಚ್ ಗಮ್ಮತ್. ಫಾಂತ್ಯಾರ್ ಟ್ರಿಚ್ಚಿ ಪಾವೊನ್ ಥಂಯ್ ಥಾವ್ನ್ ಬಸ್ಸಾರ್ ವೆಲಂಕಣಿ ಪಾವ್ಲ್ಯಾಂವ್. ದೋನ್ ದೀಸ್ ರಾವೊನ್ ಪಾಟಿಂ ಯೆತಾನಾ, ರೈಲ್ ಧರ್ಚ್ಯಾ ಆದಿಂ ಥೊಡಿಂ ವೊರಾಂ ಟ್ರಿಚ್ಚಿಂತ್ (ತಿರುಚಿನಾಪಳ್ಳಿ) ಇಲ್ಲೆಶೆಂ ಭೊಂವ್ಲ್ಯಾಂವ್. ತೆಂ ಏಕ್ ಯಾದ್‍ಗಾರ್ ಪಯ್ಣ್.

ಮರಿಯೆಚೆಂ ಸಕ್ತೆ ಕೇಂದ್ರ್:

ವೆಲಂಕಣಿಚಿ ಫಾಮಾದ್ ಆನಿ ಸೊಭಿತ್ ಇಗರ್ಜ್ (Basilica of Our Lady of Good Health) ಮರಿಯೆಚ್ಯಾ ಭಕ್ತಿಪಣಾಕ್ ನಾಂವಾಡ್ಲ್ಯಾ. 16ವ್ಯಾ ಶೆಕ್ಡ್ಯಾಂತ್ (1570) ದೂದ್ ವಿಕ್ಚ್ಯಾ ಎಕಾ ಹಿಂದೂ ಬಾಲಕಾಕ್ ಬಾಳ್ಕಾ ಜೆಜು ಸಂಗಿಂ ಮರಿ ದಿಷ್ಟಿಕ್ ಪಡ್‍ಲ್ಲಿ, ಆನಿ ತಿಣೆಂ ತ್ಯಾ ಚೆಡ್ಯಾ ಲಾಗಿಂ ಆಪ್ಲ್ಯಾ ಬಾಳಾಕ್ ದೂದ್ ವಿಚಾರ್‌ಲ್ಲೆಂ. ಚೆಡ್ಯಾನ್ ದೂದ್ ದಿಲೆಂ. ಉಪ್ರಾಂತ್ ಪಳೆತಾನಾ ದುದಾಚ್ಯಾ ಆಯ್ದನಾಂತ್ ದೂದ್ ಭರೊನ್ (ಪಯ್ಲೆಂ ಆಸ್‍ಲ್ಲೆ ತಿತ್ಲೆಂಚ್) ಆಸ್‍ಲ್ಲೆಂ. ತ್ಯಾ ಅಚರ್ಯಾ ಮುಖಾಂತ್ರ್ ಥಂಯ್ ಮರಿಯೆಕ್ ದೆವಾಳ್ ಉಬಾರ್‌ಲ್ಲೆಂ ಮ್ಹಣ್ ಚರಿತ್ರಾ ಸಾಂಗ್ತಾ (ತಸಲಿಂ ಚಡ್ತಿಕ್ ಘಡಿತಾಂ ಆಯ್ಕೊಂಕ್ ಮೆಳ್ತಾತ್). ತ್ಯಾ ಜಾಗ್ಯಾಕ್ ತಮಿಳಾಂತ್ ‘ಮಾತಾ ಕುಳಂ’ (ಮಾಂಯ್ಚಿ ಬಾಂಯ್) ಮ್ಹಣ್ ಆಪಯ್ತಾತ್.

ಪುಡ್ತುಗೆಜಾಂನಿಯೀ ಹ್ಯಾ ಇಗರ್ಜೆಕ್ ದೇಣ್ಗಿ ದಿಲ್ಯಾ. ಗೋಥಿಕ್ ಶೈಲೆಚ್ಯಾ ಪ್ರಸ್ತುತ್ ಇಗರ್ಜೆಚೆಂ ಆಕರ್ಷಣ್ ವಿಶೇಸ್. ಹಾಂಗಾ ವರ್ಸಾಕ್ 20 ಮಿಲಿಯಾ ಯಾತ್ರಿಕ್ ಭೆಟ್ ದಿತಾತ್.

ಮೊಂತಿ ಫೆಸ್ತಾಚೊ ಸಂಭ್ರಮ್:

ಗಾಂವಾಂತ್ ಆಮಿ ಮೊಂತಿ ಫೆಸ್ತ್ ಆಚರಣ್ ಕೆಲ್ಲೆಪರಿಂಚ್ ವೆಲಂಕಣಿಂತ್ ಗದ್ದಾಳಾಯೆನ್ 11 ದೀಸ್ ವಾರ್ಷಿಕ್ ಫೆಸ್ತ್ ಚಲ್ತಾ. 3 ಮಿಲಿಯಾ ಲೋಕ್ ಹ್ಯಾ ವೆಳಾರ್ ಥಂಯ್ ಜಮ್ತಾ. ಅಗೋಸ್ತ್ 29 ಥಾವ್ನ್ ನೊವೆನಾಂ ಚಲೊನ್ ಸಪ್ತೆಂಬರ್ 8ವೆರ್ ಮೊಂತಿ ಫೆಸ್ತಾಚೊ ಮಹೋತ್ಸವ್ ಚಲ್ತಾ. ಹರ್ ಧರ್ಮಾಚೊ ಲೋಕ್ ಹಾಂಗಾ ಮಾಗೊಂಕ್ ತಶೆಂ ಪ್ರತ್ಯುಪ್ಕಾರ್ ಭೆಟಂವ್ಕ್ ಯೆತಾ.

1962 ನವೆಂಬರಾಂತ್ ಪಾಪಾ ಜುವಾಂವ್ ತೆವಿಸಾವ್ಯಾನ್ ಹೆಂ ಪೂನ್‍ಶೆತ್ ಬಾಸಿಲಿಕಾ ಮ್ಹಣ್ ಘೋಷಣ್ ಕೆಲೆಂ. ವೆಲಂಕಣಿ ಮಾಂಯ್ ಮ್ಹಳ್ಯಾರ್ ಭಲಾಯ್ಕೆಚಿ ಶಾರೊತಿಣ್. ಭಾರತಾಚೆಂ ಪ್ರಮುಖ್ ಯಾತ್ರಿಕ್ ಕೇಂದ್ರ್ ಜಾವ್ನಾಸ್ಚೆಂ ವೆಲಂಕಣಿ ‘ಉದೆಂತಿಚೆಂ ಲೂರ್ಡ್ಸ್’ ಮ್ಹಣ್‍ಯೀ ಫಾಮಾದ್ ಜಾಲಾಂ.

ಸುನಾಮಿ ವರ್ವಿಂ ದೆಸ್ವಾಟ್:

2004 ಡಿಸೆಂಬರ್ 26, ಆಯ್ತಾರ್ – ಸಗ್ಳ್ಯಾ ಸಂಸಾರಾನ್ ವಿಸ್ರೊಂಕ್ ಜಾಯ್ನಾತ್ಲೊ ಕರಾಳ್ ದೀಸ್. ತ್ಯಾ ಸಕಾಳಿಂಚ್ ಸಾಗೊರಾ ಮಧೆಂ ಜಾಲ್ಲ್ಯಾ ಕಠಿಣ್ ಭುಂಯ್‍ಕಾಂಪ್ಣೆ ವರ್ವಿಂ ಉಟ್‍ಲ್ಲ್ಯಾ ಸುನಾಮಿ ವರ್ವಿಂ ಭಾರತಾಚಿ ಪೂರ್ವ್ ಕರಾವಳ್, ತೆನ್ಕಾಂತ್, ಧ್ವಂಸ್ ಜಾಲ್ಲಿ. ವೆಲಂಕಣಿಂತ್ ತ್ಯಾ ದೀಸ್ ಮಹಾ ದುರಂತ್ ಘಡ್‍ಲ್ಲೆಂ. ಸಕಾಳಿಂ 9.30 ವೊರಾರ್ ಸುನಾಮಿ ಆಪ್ಟತಾನಾ ಬಾಸಿಲಿಕಾಂತ್ ಮಲಯಾಳಂ ಮೀಸ್ ಚಲ್ತಾಲೆಂ. ಇಗರ್ಜೆ ಭಿತರ್ ಉದಾಕ್ ಯೇಂವ್ಕ್ ನಾ, ಪುಣ್ ಭೊಂವ್ತಿಂ, ತಡಿರ್ ಆನಿ ಸಗ್ಳ್ಯಾ ಗಾಂವಾಂತ್ ಆಸ್‍ಲ್ಲೊ ಲೋಕ್, ಪೇಂಟ್, ಆಂಗ್ಡಿ, ವಸ್ತು, ವಾಹನಾಂ ಸರ್ವ್ ಉದ್ಕಾಂತ್ ವ್ಹಾಳೊನ್ ಗೆಲ್ಲಿಂ. ಚಡುಣೆಂ 600 ಜಣ್ ಮರಣ್ ಪಾವ್‍ಲ್ಲೆ.

ವೆಲಂಕಣಿಚಿ ವಿಶೇಷತಾ:

ವೆಲಂಕಣಿ ಪಾವ್ತಾ ಪರ್ಯಾಂತ್ ಅಂದಾಜ್ ನಾತ್‍ಲ್ಲಿ ಗಜಾಲ್ ಥಂಯ್ ಮ್ಹಾಕಾ ಫುಡ್ ಜಾಲಿ. ಚಡಾವತ್ ಜಾಗ್ಯಾಂಕ್ ಗೆಲ್ಯಾರ್ ರಾವೊಂಕ್ ಆನಿ ಜೆವ್ಣಾಕ್ ಹೊಟೆಲ್‍ಚ್ ಗತ್. ಪುಣ್ ಹಾಂಗಾ ತಶೆಂ ನಾ. ವೆಲಂಕಣಿಂತ್ ಯಾತ್ರಿಕಾಂಕ್ ರಾವೊಂಕ್ ರುಮಾಂ/ಹೊಲಾಂ ಮೆಳ್ತಾತ್. ತಿತ್ಲೆಂಚ್ ನ್ಹಯ್ ಆಮಿಂಚ್ ಆಮ್ಕಾಂ ಜಾಯ್ ಜಾಲ್ಲೆಂ ರಾಂದ್ಯೆತ್.

ವ್ಹಯ್. ವಸ್ತೆಚಿ ವ್ಯವಸ್ಥಾ ಆಸ್‍ಲ್ಲೆ ಕಡೆನ್ ರಾಂದುಂಕ್ ಜಾಯ್ ತಿ ವ್ಯವಸ್ಥಾ ಕೆಲ್ಯಾ. ರಾಂದ್ಣ್ಯೊ, ಆಯ್ದಾನಾಂ, ಲಾಂಕುಡ್ (ಆತಾಂ ಗ್ಯಾಸ್ ಮೆಳ್ತಾ), ಹಾತೆರಾಂ ಸರ್ವ್ ಮೆಳ್ತಾ. ಮಾರ್ಕೆಟಿಂತ್ ತಾಜಾ ಮಾಸ್ಳಿಯೀ ಬರಿಚ್ ಮೆಳ್ತಾ. ಅಶೆಂ ಲಗ್ಬಗ್ 50 ಜಣ್ ಆಸ್‍ಲ್ಲ್ಯಾ ಆಮ್ಚ್ಯಾ ಪಂಗ್ಡಾಂತ್ ಸಬಾರಾಂನಿ ಹಾತ್ ಮೆಳವ್ನ್, ಥೊಡ್ಯಾ ತಜ್ಞ್ ರಾಂದ್ಪ್ಯಾಂಚ್ಯಾ ಮುಖೇಲ್ಪಣಾರ್ ದೋನ್ ದೀಸ್ ರಾಂದುನ್ ಜೆವ್ಲ್ಯಾಂವ್. (ವಾಚ್ಪ್ಯಾಂಚ್ಯಾ ಗುಮಾನಾಕ್: ಯಾತ್ರಿಕಾಂನಿ ರಾಂದ್ಚಿ ವ್ಯವಸ್ಥಾ ತೆದ್ನಾಂ ಆಸ್‍ಲ್ಲಿ, ಆತಾಂ ಆಸಾಗೀ ಕಳಿತ್ ನಾ).

ಕ್ರಿಸ್ತಾಂವ್ಪಣಾಚೆಂ ಪರಿಸರ್:

ವೆಲಂಕಣಿ ನಾಗಪಟ್ಟಣಂ ಜಿಲ್ಲ್ಯಾಂತ್ ಆಸಾ. ಥಂಯ್ ಆದ್ಲಿ ಇಗರ್ಜ್ ಆನಿ ಹೆರ್ ಥೊಡ್ಯೊ ಇಗಜ್ರ್ಯೊ ಆಸಾತ್. ಮಾರ್ನಿಂಗ್ ಸ್ಟಾರ್ ಇಗರ್ಜ್ ತ್ಯಾ ಪಯ್ಕಿ ಏಕ್. ಬಾಸಿಲಿಕಾಚೆಂ ಏಕ್ ಮ್ಯೂಸಿಯಂ ಆಸಾ, ಥಂಯ್ಸರ್ ಭೆಟ್ ದಿವ್ಯೆತ್.

ದರ್ಯಾ ತಡಿರ್…

ವೆಲಂಕಣಿ ದರ್ಯಾ ತಡಿರ್ ಆಸ್ಚೊ ಗಾಂವ್. ತ್ಯಾ ವರ್ವಿಂ ಥಂಯ್ಚಿ ಧರ್ಣ್ ರೆಂವೆನ್ ಭರ್ಲ್ಯಾ. ಖಂಯ್ ಪಾಯ್ ಘಾಲ್ಯಾರೀ ರೇಂವ್. ಬೀಚ್ ಕುಶಿನ್‍ಂಚ್ ಆಸಾ ಜಾಲ್ಲ್ಯಾನ್ ಉದ್ಕಾಂತ್ ಜಾಯ್ ತಿತ್ಲೆಂ ಖೆಳ್ಯೆತ್. ಸಾಂಜೆರ್ ಸನ್‍ಸೆಟ್ ಪಳೆವ್ನ್ ಮಜಾ ಜೊಡ್ಯೆತ್. ವೆಲಂಕಣಿಂತ್ ವ್ಹಾಳ್ಚಿ, ಕಾವೇರಿಚಿ ಉಪನದಿ ವೆಳ್ಳಯ್ಯಾರ್ ನ್ಹಂಯ್ ದರ್ಯಾಕ್ ಮೆಳ್ಚೆ ಕಡೆನ್ ಏಕ್ ಆಕರ್ಷಕ್ ಬೀಚ್ ಆಸಾ.

ಪಯ್ಣಾಚಿ ಸುವಿಧಾ:

ವೆಲಂಕಣಿ ಪಾವೊಂಕ್ ಸಂಪರ್ಕ್ ವ್ಯವಸ್ಥಾ ಬರಿಚ್ ಆಸಾ. ಕೊರೊಡೊಂ ಲೋಕ್ ಥಂಯ್ ವೆತಾ ಜಾಲ್ಲ್ಯಾನ್ ರಾಜ್ಯ್ ಆನಿ ಕೇಂದ್ರ್ ಸರ್ಕಾರಾಂನಿ ರಸ್ತ್ಯಾ ಸಂಪರ್ಕ್ ಆನಿ ರೈಲಾ ಸಂಪರ್ಕ್ ಒದಗ್ಸಿಲ್ಯಾ. ವೆಲಂಕಣಿ ಚೆನ್ನೈ ಥಾವ್ನ್ 350 ಕಿ.ಮೀ. ತೆನ್ಕಾಕ್ ಆಸಾ. ಜಿಲ್ಲಾ ಕೇಂದ್ರ್ ನಾಗಪಟ್ಟಣಂ ಥಾವ್ನ್ 14 ಕಿ.ಮೀ. ಅಂತರ್. ಮಧುರೈ ಥಾವ್ನ್ 275, ಟ್ರಿಚ್ಚಿ ಥಾವ್ನ್ 150 ಕಿ.ಮೀ. ಪಯ್ಸ್ ಆಸಾ. ವಿಮಾನಾರ್ ವೆತೆಲ್ಯಾಂನಿ ಟ್ರಿಚ್ಚಿ ವಾ ಚೆನ್ನೈ ಮುಖಾಂತ್ರ್ ವೆಲಂಕಣಿ ಪಾವ್ಯೆತ್.

ಟ್ರಿಚ್ಚಿಂತ್ ಮಿನಿ ಗಡಾಯ್ ಫಾತೊರ್!

ಆಮಿ ವೆಲಂಕಣಿಚಿ ಭೊಂವ್ಡಿ ಸಂಪವ್ನ್ ಪರತ್ ಟ್ರಿಚ್ಚಿ ಪಾವ್ಲ್ಯಾಂವ್. ಥಂಯ್ ಥಾವ್ನ್ ಸಾಂಜೆರ್ ಮೈಸೂರಾಕ್ ಟ್ರೈನ್ ಸುಟೊಂಕ್. ಅರ್ಧೊ ದೀಸ್ ಸುಟಿ ಆಮ್ಕಾಂ ಮೆಳ್‍ಲ್ಲ್ಯಾನ್ ಟ್ರಿಚ್ಚಿ ಶೆರಾಂತ್ ಭೊಂವ್ಲ್ಯಾಂವ್. ರಸ್ತ್ಯಾಂನಿ ಚಲ್ಲ್ಯಾಂವ್, ಸಿಟಿ ಬಸ್ಸಾಂನಿ ಘುಂವ್ಲ್ಯಾಂವ್, ಶೊಪಾಂನಿ ಘುಸ್ಲ್ಯಾಂವ್. ಕ್ರಿಸ್ತಾಂವ್ ಮ್ಹಣ್ತಾನಾ ಏಕ್ ಇಗರ್ಜ್ ಜಾಯ್ಜೆಚ್ ಪಳೆ! ಥಂಯ್ ಏಕ್ ಫಾತೊರ್ ಆಸಾ, ತಾಕಾ ‘ಗೋಲ್ಡನ್ ರಾಕ್’ ಮ್ಹಣ್ತಾತ್. ತಾಚೆರ್ ಏಕ್ ಇಗರ್ಜ್ ಆಸಾ. ಫಾತ್ರಾಚಿಂ ಮೆಟಾಂ ಚಡೊನ್ ತ್ಯಾ ಇಗರ್ಜೆಕ್ ವಚೊನ್ ಆಯ್ಲ್ಯಾಂವ್.

ವೆಲಂಕಣಿಕ್ ವೆಚ್ಯಾ ವಾಟೆರ್ ಆಸ್ತಾನಾ, ಮಧೆಂ ಖಂಯ್ಗೀ ಎಕಾ ಗಾಂವಾಂತ್ ಆಯ್ತಾರಾ ಸಕಾಳಿಂಚೆಂ ಆಮಿ ಮಿಸಾಕ್ ಗೆಲ್ಲ್ಯಾಂವ್. ತೊ ಖಂಚೊ ಗಾಂವ್ ಮ್ಹಣ್ ಉಡಾಸ್ ಯೇನಾ. ಅಶೆಂ ಪಯ್ಶಿಲ್ಯಾ ಗಾಂವಾಂತ್ ಜಾಯ್ತೆ ಅನೂಹ್ಯ್ ಅನುಭವ್ ಆಮಿ ಜೊಡುನ್ ಆಯ್ಲ್ಯಾಂವ್.

ವೆಲಂಕಣಿ ಪ್ರವಾಸ್ ನಿಜಾಯ್ಕೀ ಭೋವ್ ಮಧುರ್ ಅನುಭವ್ ದಿತಾ. ಏಕ್ ಪಂಗಡ್ ಕರ್ನ್ ಗೆಲ್ಯಾರ್ ಆಪುರ್ಬಾಯ್. ಪ್ರಖ್ಯಾತ್ ಪೂನ್‍ಶೆತಾಂತ್ ಭಕ್ತಿಪಣಾಚೆಂ ಆಚರಣ್ ಕರ್ಚ್ಯಾ ಸವೆಂ ಹೆರ್ ಸಂಭ್ರಮ್, ಮ್ಹಣ್ಜೆ ಮನರಂಜನ್, ಖೆಳ್, ಸಾಹಸ್ ಕರುಂಕೀ ಅವ್ಕಾಸ್ ಮೆಳ್ತಾ. ಆಮ್ಚೊ ಪ್ರವಾಸ್ ಮೈಸೂರ್ ಕೆ.ಸಿ.ಎ.ಚ್ಯಾ ಕಾರ್ಬಾರಿಂನಿ ಆಪುರ್ಬಾಯೆನ್ ಯೋಜಿತ್ ಕೆಲ್ಲೊ. ಹರ್ ಘಡಿ ಆಮಿ ಆಸ್ವಾದನ್ ಕೆಲ್ಲಿ. ಲಾಂಬ್ ಪಯ್ಣಾರ್ ಟ್ರೈನಾರ್ ವೆಚೊ ಅನುಭವ್, ತೆಂಯೀ ತಿತ್ಲ್ಯಾ ಜಣಾಂನಿ ಸಾಂಗಾತಾ, ನಿಜಾಯ್ಕೀ ಅದ್ಭುತ್. ಟ್ರೈನಾರ್ ಪಯ್ಣಾಚೊ ಖರ್ಚ್‍ಯೀ ಜಾಯ್ತೊ ಉಣೊ.

ಪಾಟಿಂ ಯೆತಾಸ್ತಾನಾ ಟ್ರೈನ್ ರಾವಯಿಲ್ಲೆ ಕಡೆನ್ ದೋಗ್ ಜಣ್ ಭಾಯ್ರ್‌ಚ್ ಆಸ್‍ಲ್ಲೆ. ಟ್ರೈನ್ ಸುಟೊನ್ ಜಾಲ್ಲೆಂ. ತೆ ಭಾಯ್ರ್‌ಚ್ ಉರ್‌ಲ್ಲೆ! ಆಮ್ಚ್ಯಾ ಬೋಗಿಂತ್ ಗಲಾಟೊಚ್ ಜಾಲೊ. ತ್ಯಾ ವ್ಯಕ್ತಿಂಚ್ಯಾ ಕುಟ್ಮಾಚ್ಯಾಂಕ್, ಲಾಗ್ಶಿಲ್ಯಾಂಕ್ ಆಕಾಂತ್!! ಅಯ್ಯೋ… ಕಿತೆಂ ಜಾಲೆಂ, ಕಿತೆಂ ಕರ್ಚೆಂ ಮ್ಹಣ್ ಅಕ್ಲಾಸ್! ಟ್ರೈನಾಚೊ ಅನುಭವ್ ಆಸ್‍ಲ್ಲ್ಯಾಂಕ್ ಮಾತ್ರ್ ಖಂತ್ ಜಾಂವ್ಕ್ ನಾ. ತೆ ದೊಗೀ ಪಾಟ್ಲ್ಯಾ ಬೋಗಿಂಕ್ ಚಡೊನ್ ಇಲ್ಲ್ಯಾ ವೆಳಾನ್ ಯೇವ್ನ್ ಪಾವ್ತಾನಾ ಥೊಡ್ಯಾಂಕ್ ಸಮಾಧಾನ್, ಹೆರಾಂಕ್ ಗಮ್ಮತ್ ಜಾಲ್ಲೆಂ.

ಸಾಂಗಾ ಆತಾಂ, ತುಮಿ ಕೆದ್ನಾಂ ವೆಲಂಕಣಿ ವೆತಾತ್?

ಹೆಂ ಲೇಖನ್ ರಾಕ್ಣೊ ಹಫ್ತ್ಯಾಳ್ಯಾಚ್ಯಾ ಎಪ್ರಿಲ್ 4-10, 2025 ಆಂಕ್ಯಾಂತ್ ‘ಭೊಂವ್ಡಿ’ ಅಂಕಣಾಂತ್ ಪ್ರಕಟ್ ಜಾಲಾಂ.

ಗಡಾಯ್ ಫಾತ್ರಾಚೆಂ ಟ್ರೆಕ್ಕಿಂಗ್: ಪ್ರತ್ಯಕ್ಷ್ ವರ್ದಿ

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel