ಇಂಫೆರ್ನಾಚಿಂ ದಾರಾಂ – 33: ಘಾತ್ಕ್ಯಾಂಚೆಂ ನಾಣೆಂ ಘಾತ್ಕ್ಯಾಂಕ್ ಪಾಟಿಂ!

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 33
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 33: ಘಾತ್ಕ್ಯಾಂಚೆಂ ನಾಣೆಂ ಘಾತ್ಕ್ಯಾಂಕ್ ಪಾಟಿಂ!

ಆಗ್ನೆಸ್ ಸಿಸಿಲಿಯಾ ಸನಿನ್ ಜಾವ್ನ್ ಉಟ್ತಾನಾ, ಬೇಗಮ್ ಆನಿ ಫಕೀರ್ ಮಹಮ್ಮದ್, ಜನೆಲಾ ಕಡೆನ್ ಥಾವ್ನ್ ಪಾಟಿಂ ಘುಂವೊನ್, ಫುಡ್ಲ್ಯಾ ಶಿಕಾರೆ ಖಾತಿರ್ ಶಿಪಾಯಾಂಕ್ ಹುಕುಮ್ ದಿತಾಲಿಂ.

ತಿಕಾ ತೆಂ ಕಾಂಯ್ ಆಯ್ಕೊಂಕ್ ನಾ. ಫಕತ್, ಸರ್ದಾರ್ ಸಿಮಾಂವ್ ಭಾಯ್ರ್ ಉಡೊನ್ ಅಂತರ್ಲೊ ಮ್ಹಳ್ಳೊ ಆಕಾಂತ್ ಆನಿ ಅಕ್ಲಾಸ್ ತಿಚೊ ಜಾವ್ನಾಸ್‍ಲ್ಲೊ.

ದುಸ್ರ್ಯಾ ಘಡ್ಯೆ ತಿಚಿ ದೀಷ್ಟ್, ಥಂಯ್ಚ್ ಧರ್ಣಿರ್ ರಗ್ತಾಚ್ಯಾ ಕೊಂಡಾಂತ್ ಶೆವ್ಟೊನ್ ಆಸ್‍ಲ್ಲ್ಯಾ ವೆರೊನಿಕಾ ಕುವೆಲಿಚೆರ್ ಗೆಲಿ. ಅಕ್ಲಾಸಾಚೊ ಆನ್ಯೇಕ್ ಉದ್ಗಾರ್ ದೀವ್ನ್ ಲಾಗಿಂ ತಿ ಗೆಲಿ. ವೆರೊನಿಕಾ ನಿಜಾಯ್ಕೀ ಅಂತರ್ಲ್ಯಾ ಮ್ಹಣ್ ಚಿಂತ್ಲೆಂ ತಿಣೆಂ.

“ದೆವಾ ಆಮ್ಚಿ ಕಾಕ್ಳುತ್ ಕರ್!” ಸುಸ್ಕಾರ್ಲಿ ತಿ. ದುಸ್ರಿ ಕಾಂಯ್ ವಾಟ್ ನಾ ಮ್ಹಣ್ ಚಿಂತುನ್, ವೆರೊನಿಕಾಚಿ ತಕ್ಲಿ ಉಸ್ಕ್ಯಾರ್ ಘೆವ್ನ್ ರಡೊಂಕ್ ತಿ ಲಾಗ್ಲಿ.

ಥೊಡ್ಯಾ ವೆಳಾನ್ ಜಹನಾರಾ ಬೇಗಮ್ ಲಾಗಿಂ ಆಯ್ಲಿ.

“ರಡೊನ್ ಫಾಯ್ದೊ ನಾ” ಮ್ಹಣಾಲಿ ತಿ ಚಿಕ್ಕೆ ಕರುಣಾಯೆನ್. “ತಿಚೊ ಪ್ರಾಣ್ ವಚೊಂಕ್ ನಾ. ಆಮ್ಕಾಂ ತಾಂಕ್ತಾ ತಿತ್ಲಿ ತಿಚಿ ಶುಶ್ರೂಷಾ ಕರ್ಯಾಂ. ಫಾಲ್ಯಾಂ ಜಾಲ್ಯಾರ್, ಹಕೀಮಾಕ್ ಆಪವ್ನ್ ಫಾವೊ ತೆಂ ವಕತ್ ಕರ್ಯೆತ್.”

“ದೆವಾ, ಹಾಂವ್ ನೆಣಾಂ. ಪುಣ್ ಪ್ರಯತನ್ ಕರ್ಯಾಂ” ಮ್ಹಣಾಲಿ ಆಗ್ನೆಸ್ ಕುಂವರ್ನ್.

ತಸೊ ಥೊಡೊ ವೇಳ್ ವೆರೊನಿಕಾಚಿ ತಾಣಿಂ ಜತನ್ ಘೆತ್ಲಿ.

ಆಗ್ನೆಸಾಕ್ ಪ್ರಥಮ್ ಚಿಕಿತ್ಸೆಚಿ ಥೊಡಿ ಮಾಹೆತ್ ಆಸ್‍ಲ್ಲಿ. ಬೇಗಮೆ ಕಡೆನ್ ಉಪ್ಕಾರ್ ಮಾಗೊನ್, ಉದಾಕ್, ಶಿರ್ಕೊ ಆನಿ ನಿತಳ್ ವಸ್ತ್ರಾಂ ತಿಣೆಂ ಹಾಡಯ್ಲಿಂ.

ಪಾಟಿಂತ್, ಭುಜಾ ಸಕಯ್ಲ್ ಚಿಕ್ಕೆ ರೊಂಬೊನ್ ಆಸ್‍ಲ್ಲಿ ಭಾಲಿ ತಾಣಿಂ ಭಾಯ್ರ್ ಕಾಡ್ಲಿ. ಚತ್ರಾಯೆನ್ ಪುಣ್ ಕಷ್ಟಾಂನಿ, ವೆರೊನಿಕಾಚಿಂ ರಗ್ತಾನ್ ಬುಡ್ಲೆಲಿಂ ವಸ್ತ್ರಾಂ ತಾಣಿಂ ಕಾಡ್ಲಿಂ. ಘಾಯ್ ನಿತಳ್ ಕರ್ನ್ ಬಾಂಧ್ಲೊ.

ತರೀ ವೆರೊನಿಕಾ ಮತಿರ್ ಯೇಂವ್ಕ್ ನಾ.

ಭಾಯ್ಲ್ಯಾನ್ ಸಕಯ್ಲ್ ಥಾವ್ನ್ ದಾದ್ಲ್ಯಾಂನಿ ಉಲವ್ನ್ ವಯ್ರ್ ಯೆಂವ್ಚೊ ಆವಾಜ್ ಆಯ್ಕತಚ್, ದಾರ್ ಆಡ್ ಕರುನ್ ಬೇಗಮ್ ಭಾಯ್ರ್ ಗೆಲಿ. ವೆರೊನಿಕಾ ಸಾಂಗಾತಾ ಆಗ್ನೆಸ್ ಕುಂವರ್ನ್ ಉರ್ಲಿ. ಮಾಗ್ಣೆಂ ಕರ್ಚೆಂ ಆನಿ ರಾಕ್ಚೆಂ ಮಾತ್ರ್ ತಿಚೆಂ ಕಾಮ್ ಜಾಲೆಂ.

ಚಡುಣೆಂ ಅಡೇಜ್ ವೊರಾಂಚೊ ವೇಳ್ ತಸೊ ಪಾಶಾರ್ ಜಾಲೊ.

ವೆರೊನಿಕಾನ್ ಲೋವ್ ದೊಳೆ ಉಗ್ತೆ ಕೆಲೆ.

“ಭಯ್ಣಿ!” ಸುಸ್ಕಾರ್ಲಿ ಆಗ್ನೆಸ್.

ವೆರೊನಿಕಾನ್ ಜಾಪ್ ದೀಂವ್ಕ್ ನಾ. ತಿಕಾ ಆಯ್ಕೊಂಕ್ ನಾ.

“ಭಯ್ಣಿ!” ಪರ್ತ್ಯಾನ್ ಆಗ್ನೆಸಾನ್ ಉಲೊ ದಿಲೊ.

ವೆರೊನಿಕಾಚ್ಯೊ ಆಸ್ಡ್ಯೊ ಚಿಕ್ಕೆ ಹಾಲೊಂಕ್ ಲಾಗ್ಲ್ಯೊ.

“ಭಯ್ಣೀ…” ಮ್ಹಣಾಲಿ ಆಗ್ನೆಸ್ ಪರ್ತ್ಯಾನ್.

ವೆರೊನಿಕಾ ಖಂಯ್ಚ್ಯಾಗೀ ಪಯ್ಶಿಲ್ಯಾ ಸಂಸಾರಾಂತ್ ಥಾವ್ನ್ ಚಿಕ್ಕೆ ಪಾಟಿಂ ಆಯಿಲ್ಲೆಪರಿಂ ಸನಿನ್ ಜಾಲಿ. ತಿಚೊ ಸ್ವರ್ ಭೋವ್ ಕ್ಷೀಣ್ ಆಸ್‍ಲ್ಲೊ.

“ಕಿ-ಕಿತೆಂ ಜಾಲೆಂ?” ವಿಚಾರ್ಲೆಂ ತಿಣೆಂ ಕಷ್ಟಾಂನಿ.

“ಜಾಂವ್ಚೆಂ ಜಾಲೆಂ, ಭಯ್ಣಿ. ತುಂ ಉಲಯ್ನಾಕಾ – ವಿಶೆವ್ ಘೆ” ಮ್ಹಣಾಲಿ ಆಗ್ನೆಸ್.

“ಆಮ್ಚೊ ಸರ್ದಾರ್..?”

“ಹ್ಯಾ ಕುಡಾಂತ್ ಭಯ್ಣೀ, ತುವೆಂ ತುಜೊ ಜೀವ್ ಅಪಾಯಾಕ್ ದೀವ್ನ್ ತಾಚೊ ಜೀವ್ ವಾಂಚಯ್ಲೊಯ್ – ಭಾಗಿ ತುಂ!”

“ತರ್, ತೊ ಬಚಾವ್ ಜಾಲಾಮೂ?”

“ತೆಂ ಕಳಿತ್ ನಾ ಭಯ್ಣೀ!”

“ತೊ ಬಚಾವ್ ಜಾತಲೊಚ್. ಕಿತ್ಲೆಶ್ಯಾಂಚೆಂ ಬರೆಂಪಣ್ ಆನಿ ಬಚಾವಿ ತಾಚೆರ್ ಹೊಂದೊನ್ ಆಸ್ತಾನಾ, ತಾಣೆಂ ಮೊರೊಂಕ್ ಸಾಧ್ಯ್ ನಾ…”

“ಆತಾಂ ಉಲವ್ನ್ ಪುರಾಸಣ್ ಘೆನಾಕಾ. ದೆವಾನ್ ನಿರ್ಮಿಲ್ಲೆಪರಿಂ ಜಾತೆಲೆಂ. ತುಂ ಆತಾಂ ವಿಶೆವ್ ಘೆ.”

“ವ್ಹಯ್, ದೆವಾನ್ ಅಶೆಂ ನಿರ್ಮಿಲ್ಲೆಂ” ಮ್ಹಣಾಲಿ ವೆರೊನಿಕಾ. “ಹ್ಯಾ ಸಂಸಾರಾಂತ್, ಮ್ಹಜೆಂ ಮಿಸಾಂವ್ ಅಶೆಂ ಆಖೇರ್ ಜಾಂವ್ಕ್ ಆಸ್‍ಲ್ಲ್ಯಾ ಹ್ಯಾ ವೆಳಾರ್, ಆಮಿ – ತುವೆಂ ಆನಿ ಹಾಂವೆಂ ಭೆಟಜಾಯ್ ಮ್ಹಣೊನ್‍ಯೀ ದೆವಾನ್‍ಂಚ್ ಫಾವೊ ಕೆಲ್ಲೆಂ… ಹಾಯ್! ಉದಾಕ್… ಉದಾಕ್!” ಪಿಂರ್ಗಲಿ ತಿ.

ಆಗ್ನೆಸ್ ಕುಂವರ್ನಿನ್ ತಿಕಾ ಸಾಂಬಾಳುನ್ ಧರ್ಲೆಂ. ಲಾಗ್ಸರ್‍ಚ್ ಆಸ್‍ಲ್ಲೆಂ ಉದ್ಕಾಚೆಂ ಗೀಂಡ್ಲ್ ತಿಣೆಂ ವೆರೊನಿಕಾ ಕುಂವರ್ನಿಚ್ಯಾ ತೊಂಡಾಕ್ ತೆಂಕ್ಲೆಂ.

“ಭಯ್ಣಿ, ಆತಾಂ ಥೊಡೊ ವಿಶೆವ್ ಘೆ” ಮ್ಹಣ್ ತಿಣೆಂ ಉಪ್ಕಾರ್ ಮಾಗ್ಲೊ.

“ಹಾಂವೆಂ ವಿಶೆವ್ ಘೆಂವ್ಕ್ ಆಸಾ ಬಾಯೆ – ಲಾಂಬ್ ವಿಶೆವ್. ತಶೆಂ ತೆಂ ಘಡೊಂಕ್ ಆಸ್‍ಲ್ಲೆಂ ದೆಕುನ್ ಅಶೆಂ ಜಾಲಾಂ” ಮ್ಹಣಾಲಿ ವೆರೊನಿಕಾ.

ತಿಚಿಂ ಉತ್ರಾಂ ಆಯ್ಕೊನ್ ಆಗ್ನೆಸ್ ಕುಂವರ್ನಿಕ್ ನಿಜಾಯ್ಕೀ ಭ್ಯೆಂ ದಿಸೊಂಕ್ ಲಾಗ್ಲೆಂ. ಸಬಾರ್ ಕಾಳ್ ಥಾವ್ನ್ – ಬಂಟ್ವಾಳಾಂತ್ ತಿಕಾ ಸೊಡುನ್ ಸರ್ದಾರ್ ಸಿಮಾಂವ್ ಗೆಲ್ಯಾ ಉಪ್ರಾಂತ್, ಆನಿ ತಾಚ್ಯಾ ಮಜತೆನ್ ಜೀವ್ ವಾಂಚವ್ನ್ ತಿಚೊ ಬಾಪಯ್ ತಡೀಪಾರ್ ಜಾವ್ನ್ ತಲ್ಚೇರಾಕ್ ಗೆಲ್ಯಾ ಉಪ್ರಾಂತ್ – ಪಯ್ಲೆ ಪಾವ್ಟಿಂ ತಿಚ್ಯಾ ಮನಾಂತ್ ತಶೆಂ ಹೃದಯಾಂತ್ ಘುಸ್ಪಡೆಚೆಂ ವಾದಾಳ್ ಪರತ್ ಜಿವೆಂ ಜಾಲೆಂ.

“ಭಯ್ಣಿ” ಮ್ಹಣಾಲಿ ತಿ. “ತುಜಿಂ ಉತ್ರಾಂ ಮ್ಹಾಕಾ ಸಮ್ಜನಾಂತ್. ಪುಣ್, ತುವೆಂ ಭಲಾಯ್ಕೆಂತ್ ಬರಿ ಜಾವ್ನ್ ಆದ್ಲೆಪರಿಂಚ್, ಸಮಾಜೆ ಖಾತಿರ್ ಆನಿ ಸಮಡ್ತಿ ಖಾತಿರ್ ತುಜಿ ಅಮೂಲ್ಯ್ ಸೆವಾ ಲಾಭಯ್ಜಾಯ್ ಮ್ಹಳ್ಳಿ ವರ್ತವ್ತಾ ಮ್ಹಜಿ ಆಶಾ, ಅಪೇಕ್ಷಾ ಆನಿ ಮಾಗ್ಣೆಂ.”

“ಪರ್ವಾ ನಾ. ತುಂ ನಿರಾಶಿ ಜಾಂವ್ಚಿ ನಾಂಯ್” ಮ್ಹಣಾಲಿ ವೆರೊನಿಕಾ. “ತುಜೆ ತಸಲಿಂ ಮಾಣ್ಕಾಂ ಆಮ್ಚ್ಯಾ ಸಮಾಜೆಂತ್ ಆಸಾಸರ್, ತುವೆಂ ಆಶೆಂವ್ಚೆ ತಸಲಿ ಸೆವಾ, ಸಮಾಜೆಕ್ ಉಣಿ ಜಾಂವ್ಚಿ ನಾ. ಆನಿ ಆತಾಂ ಹಾಂವೆಂ ಸಾಂಗ್ಚೆಂ ಬರೆಂ ಕರ್ನ್ ಆಯ್ಕ್…” ಫುಡೆಂ ಉಲಂವ್ಕ್ ಥೊಡೊ ವೇಳ್ ತಿ ಕಷ್ಟಲಿ. ಕಿತ್ಯಾಕ್, ಭೋವ್ ನಿತ್ರಾಣಿ ತಿ ಜಾಲ್ಲಿ.

“ಹಾಂವೆಂ ಮ್ಹಳೆಂ – ಉಲಂವ್ಕ್ ಆಸ್‍ಲ್ಲೆಂ ಕಾಂಯ್ ಫಾಲ್ಯಾಂ ಉಲವ್ಯೆತ್” ಮ್ಹಳೆಂ ಆಗ್ನೆಸ್ ಕುಂವರ್ನಿನ್.

“ಆತಾಂ ಆಮ್ಕಾಂ ಉಲಂವ್ಕ್ ಮೆಳ್‍ಲ್ಲೊ ಸಂದರ್ಭ್, ಫಾಲ್ಯಾಂ ಪರ್ತ್ಯಾನ್ ಮೆಳತ್ ಮ್ಹಣ್ ಕಶೆಂ ಸಾಂಗ್ಯೆತಾ?”

“ಬಾಯ್ – ತಶೆಂ ಮ್ಹಣನಾಕಾ” ಮ್ಹಣಾಲಿ ಆಗ್ನೆಸ್ ಕುಂವರ್ನ್. ಧೈರಾಧಿಕ್ ಯುವತಿ ತಿ ಜಾಲ್ಯಾರೀ, ತಿಚೆ ವರ್ವಿಂ ಆತಾಂ ಆಪ್ಲಿಂ ದುಖಾಂ ಆಡಾವ್ನ್ ಧರುಂಕ್ ಜಾಂವ್ಕ್ ನಾಂತ್.

“ಜಾಯ್ತ್-ಬಾ, ಜಾಯ್ತ್” ಮ್ಹಣಾಲಿ ವೆರೊನಿಕಾ. “ಥೊಡೊ ವೇಳ್, ಸಿಂತಿಮೆಂತ್ ಆಮಿ ಬಗ್ಲೆನ್ ದವರ್‍ಯಾಂ, ಆನಿ ಗರ್ಜೆಚೆಂ ಉಲವ್ಯಾಂ.”

ಆಗ್ನೆಸ್ ಕುಂವರ್ನಿನ್ ಜಾಪ್ ಕೆಲಿ ನಾ.

ವೆರೊನಿಕಾನ್, ಪರ್ತ್ಯಾನ್ ವಿಚಾರ್ನ್ ಉದಾಕ್ ಹಾಡಯ್ಲೆಂ. ಪರ್ತ್ಯಾನ್ ದೋನ್ ಘೊಟ್ ತಿ ಪಿಯೆಲಿ.

ಉಲಯಿಲ್ಲ್ಯಾ ಪುರಾಸಾಣೆ ವರ್ವಿಂ ಜಾವ್ಯೆತ್, ಪಟ್ಟಿ ಮಾರುನ್ ಆನಿ ಶಿರ್ಕ್ಯಾಚ್ಯಾ ಶೆಳಿಂತ್ ಬಾಂಧ್‍ಲ್ಲೊ ತಿಚೊ ಘಾಯ್, ಪರತ್ ಪಾಜಾರೊಂಕ್ ಲಾಗ್ಲೊ.

“ಹಾಯ್! ತುಂ ಉಲಯ್ನಾಕಾ ಮ್ಹಳ್ಯಾರ್ ಕಿತ್ಯಾಕ್ ಆಯ್ಕನಾಂಯ್?” ಮ್ಹಣಾಲಿ ಆಗ್ನೆಸ್, ಚಿಕ್ಕೆ ಶಿಣೊನ್.

“ಹಾಂವೆಂ ಉಲಂವ್ಕ್ ಆಸ್‍ಲ್ಲೆಂ, ಆತಾಂಚ್ – ತುಂ ಹಾಂಗಾಸರ್ ಆಸ್ತಾನಾ, ಆನಿ ಮ್ಹಾಕಾ ಉಲಂವ್ಕ್ ಸಕ್ತಾನಾ – ಹಾಂವ್ ಉಲಯ್ನಾ ಜಾಲ್ಯಾರ್, ಫಾಲ್ಯಾಂ ವೇಳ್ ಉತ್ರೊನ್ ವಚತ್, ಚಡ್ ಚುರ್ಚುರೊಂಕ್ ಕಾರಣ್ ಜಾಯ್ತ್!”

“ದೆವಾ, ತುಂ ಕಿತೆಂ ಉಲಯ್ತಾಯ್ ಮ್ಹಣ್ ಮ್ಹಾಕಾ ಸಮ್ಜನಾ” ಮ್ಹಣಾಲಿ ಆಗ್ನೆಸ್. “ಮ್ಹಾಕಾ, ತುಜ್ಯಾ ಉತ್ರಾಂನಿ ಕಸಲೊ ಪುಣಿ ನಿಗೂಢ್ ಅರ್ಥ್ ವಾ ಭವಿಷ್ಯ್ ವಾಣಿ ಆಸಾ ಮ್ಹಳ್ಳ್ಯಾ ಸಂಶಯಾನ್ ಭಿರಾಂತ್ ದಿಸ್ತಾ!”

“ತುವೆಂ ಭಯ್ಣಿ, ಭಿಯೆಂವ್ಚಿ ಗರ್ಜ್ ನಾ. ಕಿತ್ಯಾಕ್, ಜೆಂ ಕಿತೆಂ ಹಾಂವೆಂ ಸಾಂಗೊಂಕ್ ಆಸಾ, ತಾಂತುಂ ನಿಗೂಢ್ ಅರ್ಥ್ ಕಾಂಯ್ ನಾ. ಭವಿಷ್ಯ್ ವಾಣಿ ಮ್ಹಣಾ ಸಾರ್ಕೆಂ ಉಮಾಣೆಂಯೀ ನಾ” ಮ್ಹಣೊನ್, ವೆರೊನಿಕಾ ಕುವೆಲ್, ಚಿಕ್ಕೆ ಪಿಂರ್ಗಲಿ.

“ತರ್, ಕಿತೆಂ ತುಂ ಸಾಂಗೊಂಕ್ ಅಪೇಕ್ಷಿತಾಯ್?” ವಿಚಾರ್ಲೆಂ ಆಗ್ನೆಸ್ ಕುಂವರ್ನಿನ್, ಚಡುಣೆಂ ಭಿಯಾನ್‍ಂಚ್.

“ಇತ್ಲೆಂಚ್” ಮ್ಹಣಾಲಿ ವೆರೊನಿಕಾ. “ಮ್ಹಜ್ಯಾ ಗಳ್ಯಾಂತ್ ಬಾರೀಕ್ ಏಕ್ ಭಾಂಗಾರಾಚಿ ಸರಿ ಆಸಾಮೂ – ತಿ ಹೆವ್ಶಿನ್ ಕಾಡ್ – ಮ್ಹಜ್ಯಾನ್ ಹಾತ್ ಹಾಲಂವ್ಕ್ ಜಾಯ್ನಾಂತ್.”

“ಆಸಾ, ತಿ ಭಾಂಗಾರಾಚಿ ಸರಿ ಆಸಾ.”

“ತಿ ಸೊಡಯ್ – ಆನಿ ತುಜ್ಯಾ ಗಳ್ಯಾಂತ್ ಘಾಲ್” ಮ್ಹಣೊನ್ ವೆರೊನಿಕಾನ್ ತಾಕಿದ್ ದಿಲಿ.

“ಕಿತ್ಯಾಕ್ – ಕಿತ್ಯಾಕ್ ಭಯ್ಣಿ?” ಆಗ್ನೆಸಾಚೆ ಹಾತ್ ಕಾಂಪ್ಲೆ.

“ತ್ಯಾ ಸರಿಯೆಚ್ಯಾ ಪೊಂತಾರ್ ಪಳೆ, ಏಕ್ ತಾಯಿತ್ ಪೇಟಿ ಆಸಾ. ತಿ ಉಗ್ತಿ ಕರ್…

“ತಾಂತುಂ ಎಕಾ ಅರ್ಲುಕೆಚೆಂ ಅರ್ಧ್ ಆಸಾ…”

“ವ್ಹಯ್ – ತಾಚೆರ್ ಖುರ್ಸಾಚೆಂ ಪಿಂತುರ್ ಆಸಾ!” ಮ್ಹಣ್ತಚ್, ಆಗ್ನೆಸ್ ಕುಂವರ್ನಿಚೊ ಸ್ವರ್ ಕಾಂಪ್ಲೊ.

“ಸರ್ದಾರಾಂಚಿ ಸಿನೊಲ್ ತಿ – ಬಂದಡೆ ವೆಳಾರ್ ಆನಿ ಫುಡೆಂಯೀ, ಕೆನರಾ ಕ್ರಿಸ್ತಾಂವಾಂಚಿ ಬಚಾವಿ ತಿ” ಮ್ಹಣಾಲಿ ವೆರೊನಿಕಾ ಕುಂವರ್ನ್ ಮಾನಾನ್.

“ವ್ಹಯ್… ಹಾಂವೆಂ ಜಾಯ್ತೆಂ ಆಯ್ಕಲಾಂ..!”

“ತಿ, ಸರ್ದಾರ್ ಸಿಮಾಂವ್ನ್ ಮ್ಹಜ್ಯಾ ತಾಬೆನ್ ದಿಲ್ಲಿ…”

“ಹಾಂವ್ ಜಾಣಾಂ…”

“ತಿ, ಆತಾಂ ಹಾಂವ್ ತುಜ್ಯಾ ತಾಬೆನ್ ದಿತಾಂ. ಹ್ಯಾ ಘಡ್ಯೆ ಥಾವ್ನ್ ತುವೆಂ ತಿಚಿ ಜತನ್ ಘೆಜಾಯ್. ಹ್ಯಾ ಘಡ್ಯೆ ಥಾವ್ನ್ ತಿ ರಾಕ್ಚೆಂ ಆನಿ ಸಾಂಬಾಳ್ಚೆಂ ಹಕ್ಕ್ ತುಜೆಂ…”

“ಪುಣ್… ಪುಣ್…” ಆಗ್ನೆಸ್ ಕುಂವರ್ನ್ ಫುಡೆಂ ಉಲಂವ್ಕ್ ಸಕ್ಲಿ ನಾ.

“ಅರ್ಲುಕೆಚಿಂ ಅರ್ಧಾಂ ಪರ್ತ್ಯಾನ್ ಸಾಂಗಾತಾ ಮೆಳ್ತೆಲಿಂ ಮ್ಹಣ್ ಸರ್ದಾರಾನ್ ಭಾಸಾಯಿಲ್ಲೆಂ.”

“ಪುಣ್ ಆತಾಂ…”

“ಆತಾಂ ಜಾಲ್ಯಾರೀ, ತಾಚಿ ತಿ ಭವಿಷ್ಯ್ ವಾಣಿ ಕೆದಿಂಚ್ ವ್ಯರ್ಥ್ ಜಾಂವ್ಚಿ ನಾ ಮ್ಹಣ್ ಮ್ಹಜಿ ಪಾತ್ಯೆಣಿ…”

“ಪುಣ್ ತೊ…”

“ತೊ ಸರ್ದಾರ್ ಪಾಟಿಂ ಯೆತಲೊ… ಶೆಕಿಂ ಸರ್ದಾರಾಂಚಿ ಸಿನೊಲ್ ಜಯ್ತೆವಂತ್ ಜಾತೆಲಿಚ್…”

ಆಗ್ನೆಸ್ ಕುಂವರ್ನಿಕ್ ಉತ್ರಾಂ ಆಯ್ಲಿಂ ನಾಂತ್, ಬಗಾರ್ ತಿಚಿಂ ದುಖಾಂ ವ್ಹಾಳೊಂಕ್ ಲಾಗ್ಲಿಂ.

“ಭಿಯೆನಾಕಾ” ಮ್ಹಣಾಲಿ ವೆರೊನಿಕಾ ಕುವೆಲ್, ಲೋವ್ ಪುಣ್ ಸ್ಪಷ್ಟ್ ಉತ್ರಾಂನಿ. “ಅಶೆಂ ಘಡೊಂಕ್ ಆಸ್‍ಲ್ಲೆಂ. ತ್ಯಾ ವಿಚಿತ್ರ್ ಸಿನೊಲಿಚಿಂ ಅರ್ಧಾಂ, ಫಾವೊ ತ್ಯಾ ವೆಳಾರ್, ಫಾವೊ ತ್ಯಾ ಹಾತಾಂನಿ ಸಾಂಗಾತಾ ಮೆಳಜಾಯ್ ಮ್ಹಳ್ಳಿ ಮಾಂಡಾವಳ್ ದೆವಾಚಿ..!”

“ಪುಣ್ ಭಯ್ಣಿ…”

“ಪುಣ್ ಕಾಂಯ್ ನಾ ಭಯ್ಣಿ!” ಮ್ಹಣಾಲಿ ವೆರೊನಿಕಾ ಕುವೆಲ್ ಅಮ್ರುಕಿ ಹಾಸೊನ್. “ದೆವಾಚಿ ಮಾಂಡಾವಳ್ ಕಶಿ ವೆಗ್ಳಿ ಜಾಯ್ನಾ, ತಶೆಂಚ್ ಪ್ರಕೃತೆಚಿಂ ನಿಯಮಾಂ ಆಮ್ಚ್ಯಾನ್ ಬದ್ಲುಂಕ್ ಜಾಯ್ನಾಂತ್. ನೀಜ್ ಜಾವ್ನ್ ತಿ ಸಿನೊಲ್ ತುಕಾ ರಾಕ್ತೆಲಿ ಆನಿ ಪಾವ್ತೆಲಿ.”

“ಮ್ಹಾಕಾ ಹೆಂ ಸಮ್ಜನಾ.”

“ಆಪ್ಶೆಂಚ್ ಸಮ್ಜತೆಲೆಂ.” ವೆರೊನಿಕಾ ಕುವೆಲ್ ಆತಾಂ ಉಲಂವ್ಕ್ ಕಷ್ಟಲಿ. “ತೆದಾಳಾ ಮ್ಹಜ್ಯಾ ಉತ್ರಾಂಚೊ ಉಗ್ಡಾಸ್ ತುಕಾ ಯೆತಲೊ… ಆತಾಂ ಉಗ್ತಿಂ ಜಾಲ್ಲಿಂ ಹಿಂ ಇಂಫೆರ್ನಾಚಿಂ ದಾರಾಂ, ಆಖ್ರೇಕ್ ಜಾಲ್ಯಾರೀ, ಕೆನರಾ ಕರಾವಳಿಚ್ಯಾ ಕ್ರಿಸ್ತಾಂವ್ಪಣಾಚೆರ್ ಜಯ್ತ್ ವ್ಹರಶಿಂ ನಾಂತ್. ಆಮ್ಚ್ಯಾ ಪುರ್ವಜಾಂಚೊ ಭಾವಾರ್ಥ್ ಥಂಯ್ಸರ್ ಪಾಲ್ವೊಂಚೊ ನಾ…”

ಅಶೆಂ ಉಲಯ್ತಾಂ, ಉಲಯ್ತಾಂ ಮಾನಿನ್ ವೆರೊನಿಕಾ ಕುವೆಲ್ ಪರ್ತ್ಯಾನ್ ಥಂಡ್ ಜಾಲಿ. ಆಗ್ನೆಸ್ ಕುಂವರ್ನ್ ಆತಾಂ ಪುರ್ತಿ ಭಿಯೆಲಿ.

ವೆರೊನಿಕಾ ಕುವೆಲಿಚಿ ಪರ್ತ್ಯಾನ್ ಮತ್ ಚುಕ್‍ಲ್ಲೆಪರಿಂ ಜಾವ್ನ್ ಥಂಯ್ಚ್ ತಿಕಾ ನೀದ್ ಆಯ್ಲಿ.

ಸ್ವಪ್ಣಾಂತ್ ಮ್ಹಳ್ಳೆಪರಿಂ ಆಗ್ನೆಸ್ ಕುಂವರ್ನಿನ್ ಆಪ್ಲ್ಯಾ ಹಾತಾಂತ್ ಆಸ್‍ಲ್ಲ್ಯಾ ತ್ಯಾ ಅರ್ಲುಕೆಚೊ ಉಮೊ ಘೆತ್ಲೊ. ಉಪ್ರಾಂತ್, ತಾಯಿತ್ ಪೇಟ್ ಬಂದ್ ಕರುನ್, ತಿ ಸರಿ ತಿಣೆಂ ಆಪ್ಲ್ಯಾ ಗಳ್ಯಾಂತ್ ಘಾಲಿ, ಆನಿ ಥಂಯ್ಚ್ ದಿಂಬಿ ಘಾಲುನ್ ಮಾಗ್ಣೆಂ ಕೆಲೆಂ.

ಕಿತೆಂ ಮಾಗ್ಲೆಂ ಮ್ಹಣ್ ತಿಚ್ ನೆಣಾಂ.

ತಿಣೆಂ ಚಿಂತಿನಾತ್‍ಲ್ಲೆಪರಿಂ ಆಯ್ತಿಂ ಜಾಲ್ಲಿಂ ಖುಣಾಂ.

ಫುಡ್ಲಿಂ ಥೊಡಿಂ ವೊರಾಂ, ತಶಿಂಚ್ ಮಾಗ್ಣ್ಯಾಂತ್ ಆನಿ ಭ್ರಮಿದೆಂತ್ ಪಾಶಾರ್ ಜಾಲಿಂ.

ವೆರೊನಿಕಾ ಕುವೆಲ್, ಗಾಢ್ ನಿದೆಂತ್ ವಿಶೆವ್ ಘೆತಾಲಿ.

ದುಸ್ರೊ ದೀಸ್ ಉದೆಲೊ. ಆಗ್ನೆಸ್ ಸಿಸಿಲಿಯಾಕ್; ತಿಚ್ಯಾ ಬಾಪಾಯ್ಕ್ ಆನಿ ಹೆರ್ ಥೊಡ್ಯಾ ಕ್ರಿಸ್ತಾಂವಾಂಕ್ ಬೇಗಮೆನ್ ಆಪವ್ನ್, ತಾಣಿಂ ತ್ಯಾಚ್ ದಿಸಾ ಥಂಯ್ ಥಾವ್ನ್ ಪಾಶಾರ್ ಜಾವ್ನ್ ಭಾಯ್ರ್ ವಚ್ಯೆತ್, ವಚಜಾಯ್ ಮ್ಹಣ್ ಫರ್ಮಾಯಿಲ್ಲೊ ದೀಸ್ ತೊ.

* * * * *

ಕಣ್ಣಾನೂರ್‍ಚ್ಯಾ ರಾವ್ಳೆರಾಂತ್ ತಸಲೊ ನಾಟಕ್ ಜಾತಾನಾ, ಪಯ್ಯನೂರ್‍ಚ್ಯಾ ಛತ್ರಾಂತ್‍ಯೀ ತ್ಯಾಚ್ ಸಂಬಂಧಾಚೊ, ಪುಣ್ ದುಸ್ರೊಚ್ ನಾಟಕ್ ಜಾತಾಲೊ.

ದೀಸ್ ಉಜ್ವಾಡ್ಚ್ಯಾ ಭಿತರ್, ಸರ್ದಾರ್ ಸಿಮಾಂವ್, ತಾಣೆಂ ಪಯ್ಲೆಂಚ್ ಫರ್ಮಾಯಿಲ್ಲೆಪರಿಂ, ವೇಸ್ ನಿತ್ಳಾವ್ನ್, ನ್ಹಾವ್ನ್, ಪೊಟಾಕ್ ಜಾಯ್ತೆಂ ಖಾವ್ನ್ ಆನಿ ವಿಶೆವ್ ಘೆವ್ನ್ ಆನಿ ಉಪ್ರಾಂತ್ ಆಪ್ಲ್ಯಾ ನೀಜ್ ಹುದ್ದ್ಯಾ ಸಹಜ್ ಮುಸ್ತಾಯ್ಕೆನ್ ನೆಟೊನ್ ತಯಾರ್ ಜಾಲ್ಲೊ.

ಛತ್ರಾಚ್ಯಾ ತೆವ್ಶಿಲ್ಯಾ ಸಾಲಾಂತ್, ತಾಚಿ ಆನಿ ಸರ್ದಾರ್ ಯೂಸುಫ್ ಆಲಿಚಿ ಭೆಟ್ ಜಾಲ್ಲಿ.

ಸಂತೊಸಾನ್ ಆನಿ ಮೊಗಾನ್ ಎಕಾಮೆಕಾಕ್ ವಂದನ್ ಕರ್ನ್ ಜಾಲ್ಯಾ ಉಪ್ರಾಂತ್, ಯೂಸುಫ್ ಆಲಿನ್ ಆತುರಾಯೆನ್ ವಿಚಾರ್‍ಲ್ಲ್ಯಾ ಸಬಾರ್ ಸವಾಲಾಂಕ್ ಸರ್ದಾರ್ ಸಿಮಾಂವ್ನ್ ಜಾಪ್ ದಿಲ್ಲಿ.

ಸವಿವರಿಂ ಸರ್ದಾರ್ ಸಿಮಾಂವ್ನ್ ವರ್ಣಿಲ್ಲಿ ಕಾಣಿ ಆಯ್ಕೊನ್ ಸರ್ದಾರ್ ಯೂಸುಫ್ ಆಲಿ ಭೋವ್ ವಿಜ್ಮಿತ್ ಪಾವ್ಲೊ, ಉಪ್ರಾಂತ್ ಪೋಟ್‍ಭರ್ ಹಾಸ್ಲೊ. ಸರ್ದಾರ್ ಸಿಮಂವ್ಚ್ಯಾ ಸಾಹಸಾ ಖಾತಿರ್ ಶ್ಲಾಘನ್ ಭೊಗ್‍ಲ್ಲೆಪರಿಂಚ್ ತಾಣೆಂ ಮಸ್ತಿಲ್ಲ್ಯಾ ಅಪಾಯಾಂ ಖಾತಿರ್ ಆನಿ ಸೊಸ್‍ಲ್ಲ್ಯಾ ಕಷ್ಟಾಂ ಖಾತಿರ್ ತೊ ಚುರ್ಚುರ್ಲೊ. ಉಪ್ರಾಂತ್ ತೊ ಮ್ಹಣಾಲೊ:

“ದೋಸ್ತ್, ಹಾಂವೆಂ ಆದಿಂಯೀ ಸಾಂಗ್ಲಾಂ…”

“ಕಿತೆಂ ಸಾಂಗ್ಲಾಂಯ್ ಭಾಯೀ?”

“ತುಜ್ಯಾ ಕಾರ್ಬಾರಾಚಿ ಜಾದೂ ಮ್ಹಾಕಾ ಸಮ್ಜನಾ. ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಸರ್ಕಾರಾಂತ್ ಹುದ್ದೆದಾರ್ ಜಾವ್ನಾಸ್ಚಿಚ್ ಏಕ್ ವರ್ತಿ ಜುಗಾರ್. ತಸಲ್ಯಾ ಜುಗಾರೆಂತ್ ಸಲ್ವಣಿ ಪುಣೀ ಲಾಗತ್ ಜಾಲ್ಯಾರ್…”

“ಪುಣ್ ಎದೊಳ್ ಆಮಿ ಸಲ್ವಲ್ಯಾಂವ್ ಕಿತೆಂ?”

“ನಾ, ತುಜಿ ಕಿಸ್ಮತ್ ಬರಿ ಉರಂವ್ಕ್ ಅಲ್ಲಾ ಕಡೆನ್ ಹಾಂವೆಂ ಮಾಗ್ಲಾಂ. ಪುಣ್ ಹ್ಯಾ ಪಾವ್ಟಿಂ…”

“ಹ್ಯಾ ಪಾವ್ಟಿಂಯೀ, ವಾಯ್ದ್ಯಾ ಭಿತರ್ ತುವೆಂ – ಆನಿ ತುಜ್ಯಾ ಸಾಂಗಾತಾ ಹಾಂವೆಂಯೀ – ಪಟ್ಟಣಾಕ್ ಯೇವ್ನ್ ಪಾವಜಾಯ್ ಮ್ಹಣ್ ಬಾದಶಹಾನ್ ಫರ್ಮಾಯ್ಲಾಂ.”

“ಹಾಂವ್ ಜಾಣಾಂ.”

“ಕಣ್ಣಾನೂರ್ ಘಡಾಂತ್ ಝುಜೊನ್ ತುವೆಂ ಥೊಡ್ಯಾಂಕ್ ಲಗಾಡ್ ಕಾಡ್ಲ್ಯಾಯ್‍ಮೂ?”

“ವ್ಹಯ್.”

“ತಾಂಚೆ ಪಯ್ಕಿ ಆಮ್ಚೊ ಆದ್ಲೊ ಖಿಲ್ಲೆದಾರ್ ಜಾಂವ್, ವಾ, ತೊ ಕಪಟಿ ಖಿಲ್ಲೆದಾರ್ ಜಾಲ್ಲೊ ತೊಪಾಸಿ ದಾಲ್ಮೇದಾ ಜಾಂವ್ ಮೆಲ್ಯಾತ್‍ವೇ?”

“ತೆ ಮೊರೊಂಕ್ ನಾಂತ್.”

“ತರ್ ಪರಾಮಸ್ ಜಾಲಿ!”

“ಕಿತ್ಯಾಕ್ ಪರಾಮಸ್! ತೆ ಮೆಲ್ಯಾರ್, ತಾಂಚಿಂ ಮೊಡಿಂ ಪಟ್ಟಣಾಕ್ ವ್ಹರೊಂಕ್ ಆಮ್ಕಾಂ ಸಾಧ್ಯ್ ಜಾತೆಂ ನಾ. ಜೀವ್ ತೆ ಆಸ್‍ಲ್ಲ್ಯಾನ್, ತಾಂಕಾಂ ಕೈದಿ ಕರ್ನ್ ವ್ಹರೊಂಕ್ ಆಮ್ಕಾಂ ಸಾಧ್ಯ್ ಆಸಾ.”

“ತ್ಯಾ ಘಡಾಕ್ ದಾಡ್ ಘಾಲ್ನ್ ಝುಜೊಂಕ್ ಕಷ್ಟ್ ಆಸಾತ್.”

“ತೆಂ ಹಾಂವ್ ಜಾಣಾಂ.”

“ತರ್?”

“ತರೀ ಆಮಿ ರಾವ್ಳೆರಾಕ್ ಪ್ರವೇಶ್ ಜಾವ್ಯೆತ್.”

“ತೆಂ ಕಶೆಂ?”

“ಹಾಂವ್ ಸಾಂಗ್ತಾಂ” ಮ್ಹಣೊನ್ ಸರ್ದಾರ್ ಸಿಮಾಂವ್ ಹಾಸ್ಲೊ, ಆನಿ ಖುದ್ದ್ ಯೂಸುಫ್ ಆಲಿಕ್‍ಚ್ ಲಗಾಡ್ ಕಾಡುಂಕ್ ಕಶಿ ಮ್ಹಣ್ಣಿ ಜಾಲ್ಯಾ ಮಳ್ಳೆಂ ತಾಣೆಂ ವಿವರ್ಸಿಲೆಂ.

ಆಯ್ಕೊನ್ ಯೂಸುಫ್ ಆಲಿ ಪಯ್ಲೆಂ ಪಾತ್ಯೆಂವ್ಕ್ ನಾ. ಉಪ್ರಾಂತ್ ಸಗ್ಳೊ ವಿವರ್ ಮೆಳ್ತಚ್, ತೊಯೀ ತಾಪ್ಲೊ.

“ಯೇಂವ್ದಿತ್ ತರ್ ತೆ ಆಣ್ವೆ!”

“ಅಮ್ಸೊರ್ ಕರಿನಾಕಾ” ಮ್ಹಣೊನ್, ಸರ್ದಾರ್ ಸಿಮಾಂವ್ನ್, ಫುಡೆಂ ಕಶಿ ತಾರಿಪ್ ಕರಿಜಾಯ್, ಆನಿ ಘಾತ್ಕ್ಯಾಂಚೆಂ ನಾಣೆಂ ಕಶೆಂ ತಾಂಕಾಂಚ್ ಪಾಟಿಂ ದೀಜಾಯ್ ಮ್ಹಳ್ಳೆಂ ಯೋಜನ್ ಮಾಂಡ್ಲೆಂ.

ಹ್ಯಾ ನಾಟಕಾಕ್ ತಾಣಿಂ ವೆಗಿಂ ತಯಾರಾಯ್ ಕೆಲಿ.

ಸಕಾಳಿಂಚ್ಯಾ ನೋವ್ ವೊರಾರ್‍ಶೆಂ, ಪಯ್ಯನೂರ್‍ಚ್ಯಾ ಛತ್ರಾ ಭಾಯ್ಲ್ಯಾನ್ ಘೊಡ್ಯಾಂಚಿಂ ಗೆಳಾಂ ಆಯ್ಕಲಿಂ. ತೇಗ್ ಜಣ್ ಸವಾರ್ ಲಾಗಿಂ ಯೇವ್ನ್ ಉಕ್ಕಡಾ ಲಾಗಿಂ ದೆಂವ್ಲೆ.

ಠಾಣೆದಾರಾನ್ ಆವಾಜ್ ದಿಲೊ:

“ಖಂಯ್ ಥಾವ್ನ್ ಆಯ್ಲ್ಯಾತ್ ತುಮಿ?”

“ಆಮಿ ಕಣ್ಣಾನೂರ್ ಬೇಗಮ್ ಜಹನಾರಾಚ್ಯಾ ರಾವ್ಳೆರಾ ಥಾವ್ನ್ ಆಯ್ಲ್ಯಾಂವ್.” ಆಯಿಲ್ಲ್ಯಾ ಗ್ರಾಯ್ಕಾಂನಿ ಸತ್ ಸಾಂಗ್ಲೆಂ.

“ಖಂಯ್ಸರ್ ವೆತಾತ್?”

“ಹಾಂಗಾಸರ್ ಥೊಡೊ ವಿಶೆವ್ ಘೆವ್ನ್ ಬಡ್ಗಾಕ್ ವೆತಾಂವ್.”

“ಕಿತ್ಯಾಕ್ ಜಾವ್ಯೆತ್?”

“ಬಾದಶಹಾ ಟಿಪ್ಪು ಸುಲ್ತಾನಾಚೊ ಸರ್ದಾರ್ ಎಕ್ಲೊ ದಕ್ಷಿಣಾಕ್ ಆಯ್ಲಾ ಮ್ಹಣ್ ಆಮಿ ಆಯ್ಕಲಾಂ. ತಾಕಾ ಭೆಟೊನ್, ಬೇಗಮೆಚಿ ಏಕ್ ಜರೂರ್ ವರ್ದಿ ಪಾವಿತ್ ಕರುಂಕ್ ಆಸಾ.”

“ಕಿತೆಂ ಜಾವ್ಯೆತ್ ತ್ಯಾ ಸರ್ದಾರಾಚೆಂ ನಾಂವ್?”

“ಸರ್ದಾರ್ ಯೂಸುಫ್ ಆಲಿ.”

“ಸರ್ದಾರ್…”

“ಯೂಸುಫ್ ಆಲಿ.”

“ತರ್ ತುಮ್ಚಿ ಕಿಸ್ಮತ್ ಬರಿ ಆಸಾ!”

“ಕಶೆಂ ಜಾವ್ಯೆತ್?”

“ಸರ್ದಾರ್ ಯೂಸುಫ್ ಆಲಿ ಹಾಂಗಾಸರ್‍ಚ್ ಆಸಾ. ಕಾಲ್‍ಚ್ ತೊ ಯೇವ್ನ್ ಪಾವ್ಲಾ!”

“ವ್ಹಯ್‍ಗೀ! ವರ್ತೊ ಸಂತೊಸ್! ಪುಣ್ ಎಕ್ಲೊಚ್?”

“ವ್ಹಯ್ – ಎಕ್ಲೊಚ್. ತಾಚೆ ಶಿಪಾಯ್, ಪಯ್ಸ್ ದರ್ಯಾಂತ್ ಆಸಾತ್. ಕಸಲ್ಯಾಗೀ ಗರ್ಜೆಚ್ಯಾ ಕಾಮಾನ್ ತೊ ಎಕ್ಲೊಚ್ ಹೆವ್ಶಿನ್ ಆಯ್ಲಾ.”

ಆಯಿಲ್ಲ್ಯಾ ಗ್ರಾಯ್ಕಾಂಕ್ ಭಾಜ್‍ಲ್ಲೆಂಚ್ ಮೆಳ್ಳೆಂ ಮ್ಹಣ್ ದಿಸ್ತಾ. ಥೊಡೊ ವೇಳ್ ತೆ ಥಂಡ್ ಜಾಲೆ. ಉಪ್ರಾಂತ್:

“ತರ್ ತಾಕಾ ಆಮಿ ಹಾಂಗಾಸರ್‍ಚ್ ಭೆಟೊನ್ ಪಾಟಿಂ ವಚ್ಯೆತ್ ಮ್ಹಣ್ ಜಾಲೆಂ. ಚಡಿತ್ ಪಯ್ಣಾಚಿ ವಾಂವ್ಟ್ ಉರ್ಲಿ.”

“ವ್ಹಯ್” ಮ್ಹಣಾಲೊ ಠಾಣೆದಾರ್. “ವಯ್ರ್ ಯೇವ್ನ್ ಬಸಾ. ಸರ್ದಾರಾಕ್ ಖಬರ್ ದಿತಾಂ.” ತೊ ಭಿತರ್ ಗೆಲೊ.

ಆಯಿಲ್ಲೆ ಗ್ರಾಯ್ಕ್, ಎಕಾಮೆಕಾಚೆಂ ತೋಂಡ್ ಪಳೆವ್ನ್ ಹಾಸ್ಲೆ.

ವಯ್ರ್ ಯೇವ್ನ್ ತೆ ಬಸ್ಲೆ.

ಎಕಾಮೆಕಾ ಕಡೆನ್ ಪಿಸ್ಪಿಸೊನ್ ಥೊಡೆಂ ಉಲಯ್ಲೆ.

ಠಾಣೆದಾರ್ ಭಾಯ್ರ್ ಆಯ್ಲೊ:

“ಸರ್ದಾರ್ ಯೂಸುಫ್ ಆಲಿ ತುಮ್ಚೆ ಕಡೆನ್ ಆತಾಂಚ್ ಉಲಂವ್ಕ್ ತಯಾರ್ ಆಸಾ.”

“ವರ್ತೊ ಉಪ್ಕಾರ್!” ದಾಲ್ಮೇದಾನ್ ತೆಲ್ತಿ ಜಾಪ್ ದಿಲಿ.

“ತುಮಿ ಭಿತರ್ ವಚ್ಯೆತ್.”

“ಉಪ್ಕಾರ್” ಮ್ಹಣಾಲೊ ಮಹಮ್ಮದ್. “ಆಮ್ಚೆ ಘೊಡೆ ಅಶೆಚ್ ಆಸೊಂದಿತ್. ಆಮಿ ಚಡ್ ವೇಳ್ ರಾವನಾಂವ್.”

“ತುಮ್ಚಿ ಖುಷಿ!”

ತೆ ಭಿತರ್ ಗೆಲೆ. ಭಿತರ್ ವೆಚ್ಯಾ ಆದಿಂ ಪಾಟಿಂ ಫುಡೆಂ ಆನಿ ದಾವ್ಯಾಕ್ ಉಜ್ವ್ಯಾಕ್ ತಾಣಿಂ ದೀಷ್ಟ್ ಭೊಂವ್ಡಾಯ್ಲಿ.

ಸರ್ದಾರ್ ಯೂಸುಫ್ ಆಲಿ, ಎಕ್ಲೊಚ್, ಮಧ್ಲ್ಯಾ ಕುಡಾಂತ್ಲ್ಯಾ ಮೆಜಾ ಪೆಲ್ಯಾನ್ ಕದೆಲಾರ್ ಬಸೊನ್ ಆಸ್‍ಲ್ಲೊ. ತಾಚ್ಯಾ ತಲ್ವಾರಿಚಿ ಕೋಶಿ ಮೆಜಾಚ್ಯಾ ಬಗ್ಲೆನ್ ಆಸ್‍ಲ್ಲಿ.

ಆಯಿಲ್ಲೆ ತೇಗ್ ಜಣ್ ಫುಡೆಂ ಸರ್ಲೆ.

“ಬಾದಶಹಾ ಪೈಗಂಬರ್ ಟಿಪ್ಪು ಸುಲ್ತಾನ್ ಬಹಾದುರಾಚ್ಯಾ ಸರ್ದಾರಾಕ್ ವಂದನ್ ಆನಿ ಸಮಾಧಾನ್!” ಮ್ಹಣಾಲೊ ದಾಲ್ಮೇದಾ.

“ತುಮ್ಕಾಂಯೀ ಸಮಾಧಾನ್!”

“ತುಮ್ಚಿ ಭೆಟ್ ಸೊಧುನ್ ಆಮಿ ಆಯಿಲ್ಲ್ಯಾಂವ್!”

“ತಶೆಂ ಆಮಿ ಆಯ್ಕಲೆಂ.”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel