ಇಂಫೆರ್ನಾಚಿಂ ದಾರಾಂ – 32: ಸಿನೊಲೆಚೆಂ ಸಂರಕ್ಷಣ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 32
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 32: ಸಿನೊಲೆಚೆಂ ಸಂರಕ್ಷಣ್

ಸರ್ದಾರ್ ಸಿಮಾಂವ್ ಅಂಧ್ಕಾರಾಂತ್ಲ್ಯಾನ್ ಭಾಯ್ರ್ ಉಡ್ತಾನಾ, ಆಪುಣ್ ಹ್ಯಾ ಸಂಸಾರಾಂತ್ಲೊ ದುಸ್ರ್ಯಾಚ್ ಸಂಸಾರಾಕ್ ಉಡ್ತಾಂ ಜಾವ್ಯೆತ್ ಮ್ಹಣ್ ಚಿಂತುನ್‍ಂಚ್ ಉಡ್‍ಲ್ಲೊ. ಭಾಯ್ರ್ ಉಡ್ತಾನಾ, ಸ್ತ್ರೀಯೆನ್, ಜಾವ್ಯೆತ್ ದುಕಿನ್ ವಾ ಆಕಾಂತಾನ್, ದಿಲ್ಲೊ ಚಿತ್ಕಾರ್ ತಾಚ್ಯಾ ಕಾನಾಂತ್ ಪಡ್‍ಲ್ಲೊ. ಪುಣ್ ತ್ಯಾ ಘಡ್ಯೆ ಕೊಣಾಯ್ಕೀ ಮಜತ್ ದೀಂವ್ಕ್ ಅವ್ಕಾಸ್ ನಾತ್‍ಲ್ಲ್ಯಾ ಅಸಹಾಯಕ್ ಪರಿಸ್ಥಿತೆಂತ್ ತೊ ಆಸ್‍ಲ್ಲೊ.

ನಿಜಾಯ್ಕೀ, ಅದೃಷ್ಟಾಚ್ಯಾ ಮಜತೆಚಿ ತಾಕಾ ಗರ್ಜ್ ಆಸ್‍ಲ್ಲಿ.

ವಾರ್‍ಯಾರ್ ದೋನ್ ಪಾವ್ಟಿಂ ತಾಣೆಂ ಪಲ್ಟಿ ಮಾರ್ಲಿ. ತಾಚೆ ಪಾಯ್ ಉದ್ಕಾಕ್ ಆಪ್ಟಲೆ. ಧಖೊ ಆನಿ ಝಿಂಟ್ ಮಾರ್‌ಲ್ಲೆಪರಿಂಚ್, ತ್ಯಾ ಥಂಡ್ ಉದ್ಕಾಂತ್ ತೊ ಪಂದಾಕ್ ಗೆಲೊ. ಘಡ್ಯೆ ಭಿತರ್ ತಾಚೆ ಪಾಯ್, ನಹಿಂಚ್ ಥಳಾಕ್ ಲಾಗ್ಲೆ, ಬಗಾರ್ ತ್ಯಾ ಜಿಗಟ್ ಉಬ್ರಾಂತ್ ಚಿಕ್ಕೆ ರೊಂಬ್ಲೆ. ಬಳಾನ್ ಥಳಾಕ್ ತಾಣೆಂ ಖೊಟ್ ಮಾರ್ಲಿ, ಆನಿ ತಳ್ವ್ಯಾಂಚ್ಯಾ ಆಧಾರಾನ್ ವಯ್ರ್ ಯೇಂವ್ಕ್ ತೊ ಲಾಗ್ಲೊ.

ಸಗ್ಳೊ ಸನಿನ್ ಆಸ್‍ಲ್ಲೆಪರಿಂಚ್, ಮತಿಂತ್ ಪುರ್ತೊ ಚುರುಕ್ ತೊ ಜಾಲೊ.

ಉದ್ಕಾಂತ್ ಬುಡೊನ್ ಮೊರ್ಚ್ಯಾ ಮನ್ಶ್ಯಾಕ್ ಎಕಾಚ್ ಕ್ಷಣಾಕ್ ಸಗ್ಳಿ ಜಿಣಿ ಝಳ್ಕತಾ ಮ್ಹಳ್ಳೆಪರಿಂ, ತ್ಯಾ ಘಡ್ಯೆ ಸರ್ದಾರ್ ಸಿಮಾಂವ್ಕ್ ಭೊಗ್ಲೆಂ.

ಪರ್ತ್ಯಾನ್ ತಾಚಿ ತಕ್ಲಿ ಉದ್ಕಾ ವಯ್ರ್ ಆಯ್ಲಿ. ಜಾತಾ ತಿತ್ಲೊ ಆವಾಜ್ ಉಣೊ ಕರುನ್, ಉಬೊಚ್ ಉಪ್ಯೆವ್ನ್ ತೊ ರಾವ್ಲೊ. ಆನಿ ವರ್ತ್ಯಾ ಉಪ್ಕಾರ್ ಮನಾನ್ ಗೂಂಡ್ ವಾರೆಂ ತಾಣೆಂ ಘೆತ್ಲೆಂ. ಆಪುಣ್ ಮೊರೊಂಕ್ ನಾ, ಜೀವ್‍ಚ್ ಆಸಾಂ ಮ್ಹಣ್ ತೊ ಸಮ್ಜಲೊ.

ಇತ್ಲ್ಯಾ ಕಷ್ಟಾಂ ಮಧೆಂಯೀ ವಾಂಚ್‍ಲ್ಲ್ಯಾ ಜಿವಾಚೆಂ ಆತಾಂ ಸಂರಕ್ಷಣ್ ಕರ್ನ್ ಘೆಂವ್ಚೆಂ ಅಧಿಕ್ ಗರ್ಜ್. ಪಲ್ತಡ್ಚ್ಯಾ ತಡಿಕ್ ಉಪ್ಯೆವ್ನ್ ವಚೊನ್, ವಯ್ರ್ ಚಡೊನ್ ಧಾಂವ್ಯಾಂ ಮ್ಹಣ್ ತಾಕಾ ದಿಸ್ಲೆಂ. ಪುಣ್ ತಶೆಂ ಕೆಲ್ಯಾರ್, ತ್ಯಾ ಉಗ್ತಾಡಾಂತ್ ಎಕಾ ಉಂದ್ರಾಪರಿಂ ಸಾಂಪಡ್ಚೊ ಅಪಾಯ್ ಆಸಾ ಮ್ಹಣ್ ತಾಕಾ ಸಮ್ಜಲೆಂ.

ಸೊಧ್ನೆಕ್ ಯೆಂವ್ಚೆ ಗ್ರಾಯ್ಕ್, ತೊ ಪಡ್‍ಲ್ಲ್ಯಾ ಸುವಾತೆಕ್ – ತ್ಯಾ ಜನೆಲಾಚ್ಯಾ ನಿಟಾಯೆಕ್ – ಪಯ್ಲೆ ಯೆತೆಲೆ ಮ್ಹಳ್ಳೆಂ ಚಿಂತುನ್, ಥಂಯ್ ಥಾವ್ನ್ ಪಾಟಿಂ, ಘಡಾಚ್ಯಾ ವಣದಿ ಲಾಗಿಂ ಉಪ್ಯೆವ್ನ್ ತೊ ಗೆಲೊ, ಆನಿ, ಆನಿ ವಣದ್ ಸಾಸ್ಪೊನ್, ತ್ಯಾ ಜನೆಲಾ ಥಾವ್ನ್ ಜಾತಾ ತಿತ್ಲ್ಯಾ ಪಯ್ಸ್ ಸರೊಂಕ್ ತಾಣೆಂ ಪ್ರಯತ್ನ್ ಕೆಲೆಂ.

ಹಾತ್ ಪಾಯ್ ತಾಚೆ ರೂಕ್ ಜಾಂವ್ಕ್ ಲಾಗ್ಲೆ. ಪುರಾಸಾಣೆಚೆಂ ಫುಗಾಸಾಂವ್ ತಾಕಾ ಫುಮಾರ್ ಕರುಂಕ್ ಲಾಗ್ಲೆಂ. ಉದೆಂತಿಚ್ಯಾ ಕೊನ್ಶ್ಯಾಕ್, ಬಾಂಧ್ಪಾಚ್ಯಾ ಪಂಚಾಂಗಾಂತ್ ಚಿಕ್ಕೆ ಭಾಯ್ರ್ ಆಸ್‍ಲ್ಲ್ಯಾ ಫಾತ್ರಾಚ್ಯಾ ಇಡ್ಯಾಂತ್ ಬೊಟಾಂ ಶಿರ್ಕಾವ್ನ್ ಥೊಡೊ ವೇಳ್ ತೊ ರಾವ್ಲೊ. ಭೋವ್ ಕಷ್ಟಾಂಚಿ ಪರಿಸ್ಥಿತಿ ಜಾಲ್ಯಾರೀ, ಸಗ್ಳಿ ಕೂಡ್, ಬಗಾರ್ ನಾಕ್ ಮಾತ್ರ್ ವಾರ್‍ಯಾಕ್ ದೀವ್ನ್, ಬುಡೊನ್ ಉಬೊ ತೊ ರಾವ್ಲೊ. ಪಯ್ಸ್, ಸ್ವಪ್ಣಾಂತ್ ಮ್ಹಳ್ಳೆಪರಿಂ ಚೂಡಿ ಆನಿ ಉಜ್ವಾಡಿ ತಾಕಾ ದಿಸ್ಲ್ಯೊ. ಶ್ವಾಸ್ ಧರುನ್ ರಾವ್‍ಲ್ಲೆಪರಿಂಚ್, ಫಕೀರ್ ಮಹಮ್ಮದ್ ಆನಿ ಹೆರ್, ಪಲ್ತಡ್ಚ್ಯಾ ತಡಿ ವಯ್ಲ್ಯಾನ್, ತೊ ಕಾಂಯ್ ವಯ್ರ್ ಚಡೊನ್ ಗೆಲ್ಲಿಂ ಖುಣಾಂ ದಿಸ್ತಾತ್ ಜಾಲ್ಯಾರ್ ಪಾರ್ಕುಂಚ್ಯಾ ಖಾತಿರ್ ತಪಾಸಣ್ ಕರ್ತಾಲೆ.

ತಾಕಾ, ಪಯ್ಲೆಂ ದಿಸ್‍ಲ್ಲೆಪರಿಂ ಪೆಲ್ಯಾ ತಡಿಕ್ ಚಡನಾತ್‍ಲ್ಲ್ಯಾ ವರ್ವಿಂ ತೊ ತೆದೊಳ್ ಪರ್ಯಾಂತ್ ಬಚಾವ್ ಜಾಲ್ಲೊ. ಫುಡೆಂ ತರೀ ಬಚಾವ್ ಜಾಯ್ತ್ ಮ್ಹಣ್ ಸಾಂಗೊಂಕ್ ಸಾಧ್ಯ್ ನಾತ್‍ಲ್ಲೆಂ. ವೇಳ್ ಪಾಶಾರ್ ಜಾಯ್ನಾತ್‍ಲ್ಲೊ. ಪುಣ್ ತಾಚೆಂ ತ್ರಾಣ್ ಗಾರ್ ಜಾತಾಲೆಂ.

ಪುರಾಸಾಣೆ ಸಾಂಗಾತಾ ನಿರಾಶಾಯೀ ತಾಕಾ ಧೊಸುಂಕ್ ಲಾಗ್ಲಿ.

ಕಸಲ್ಯಾ ಸ್ವಪ್ಣಾಕ್ ಕಸಲಿ ಜಾಗ್ವಣ್?

ಕಸಲ್ಯಾ ಜಿಣ್ಯೆಕ್, ಕೋಣ್ ಜಾಣಾಂ, ಕಸಲೆಂ ಮರಣ್? ಮಾಗ್ಣೆಂ ಕರುಂಕ್‍ಯೀ ತಾಕಾ ಸೈರಾಣ್ ನಾತ್‍ಲ್ಲೆಂ. ಫುಡ್ಲ್ಯಾ ಥೊಡ್ಯಾ ವೆಳಾ ಭಿತರ್, ಪುರ್ತೊ ನಿತ್ರಾಣ್ ಜಾವ್ನ್, ಥಾರೊ ಚುಕೊನ್ ಬುಡೊನ್ ಮೊರೊಂಕ್ ಫಾವೊ ಜಾತಾ ಕೊಣ್ಣಾ ಮ್ಹಳ್ಳೆಂ ಭ್ಯೆಂ ತಾಕಾ ಕಾಂತಂವ್ಕ್ ಲಾಗ್ಲೆಂ.

ತೆವ್ಶಿಲ್ಯಾನ್ ಚೂಡಿ ಭೊಂವ್ತಾಲ್ಯೊ. ಹಾಳ್ವಾಯೆನ್ ಆನಿ ಪ್ರಯತ್ನಾನ್ ಹೆವ್ಶಿಲ್ಯಾನ್ ತಾಣೆಂ ದೀಶ್ಟ್ ಭೊಂವ್ಡಾಯ್ಲಿ. ಹ್ಯಾ ವಾಟೆನ್ ಉಜ್ವಾಡ್ ಝಳ್ಕನಾತ್‍ಲ್ಲೊ, ಜಾಂವ್, ಕಸಲೊಯೀ ಆವಾಜ್ ಆಯ್ಕನಾತ್‍ಲ್ಲೊ. ಘಡ್ಯೆ ಮನ್ ತಾಣೆಂ ಸ್ಥಿರ್ ಕೆಲೆಂ, ಆನಿ ಆಪುಣ್ ಆಸ್‍ಲ್ಲೆ ಕಡೆನ್ ಥಾವ್ನ್, ಘಡಾಚೆಂ ಪ್ರವೇಶ್ ದ್ವಾರ್ ಕಿತ್ಲ್ಯಾ ಪಯ್ಸ್ ಆಸ್ಯೆತ್ ಮ್ಹಳ್ಳೆಂ ಚಿಂತುನ್ ಪಳೆಲೆಂ. ವ್ಹಯ್, ಥಂಯ್ ಥಾವ್ನ್ ಉದೆಂತ್ಯಾ ಕೋನಾಕ್ ಚಡುಣೆಂ ಸಾಟ್ ಸತ್ತರ್ ವಾಂವಾಂ ಪಯ್ಸ್ ಪ್ರವೇಶ್ ದ್ವಾರ್ ಆನಿ ಸೇತ್ವೊ ಆಸ್ಯೆತ್ ಮ್ಹಣ್ ತಾಣೆಂ ಅಂದಾಜ್ ಕೆಲೊ.

ಜಿವಾಚ್ಯಾ ಬಚಾವೆ ಖಾತಿರ್, ಹಾತೆರಾಂ ಜಾಂವ್ ಹೆರ್ ಕಾಂಯ್ ಸಹಾಯ್ ನಾತ್‍ಲ್ಲೊ ಮನಿಸ್ ಪೊಳಾಪಳ್ ಘೆತಾನಾ, ಚಡ್ ಲೋಕ್ ಆಶಾರ್ ಪಾಶಾರ್ ಜಾಂವ್ಚ್ಯಾ ಪ್ರವೇಶ್ ದ್ವಾರಾ ಥಾವ್ನ್ ಜಾತಾ ತಿತ್ಲ್ಯಾ ಪಯ್ಸ್ ಸರೊಂಕ್ ಪ್ರಯತ್ನ್ ಕರ್ಚೆಂ ವಾಜ್ಬಿ. ಪುಣ್ ಸರ್ದಾರ್ ಸಿಮಾಂವ್ನ್ ದುಸ್ರೆಂಚ್ ಚಿಂತ್ಲೆಂ. ಕಿತ್ಯಾಕ್, ಪೊಳಾಪಳ್ ನಹಿಂ, ಬಗಾರ್ ಆಪ್ಲ್ಯಾ ಆನಿ ಹೆರಾಂಚ್ಯಾ ಬಚಾವೆ ಖಾತಿರ್ ತೊ ಏಕ್ ಝುಜ್ ಚಲಯ್ತಾಲೊ.

ಉರ್ಲೆಲೆಂ ನಿಮಾಣೆಂ ಥೊಡೆಂ ತ್ರಾಣ್ ಆನಿ ಮನ್ ತಾಣೆಂ ಆರಾಯ್ಲೆಂ. ಆವಾಜ್ ಕರಿನಾಸ್ತಾನಾ ಆನಿ ಪಂಚಾಂಗಾಚಿ ದೇಗ್ ಸೊಡಿನಾಸ್ತಾನಾ, ಉಬೊಚ್ ಉಪ್ಯೆವ್ನ್ ಉದೆಂತಿಚ್ಯಾ ವಾಟೆನ್ ತೊ ಫುಡೆಂ ಸರ್ಲೊ. ರಾತ್ಚೊ ವೇಳ್ ಜಾಲ್ಲ್ಯಾನ್, ಬಾಂಧ್ಪಾಚ್ಯಾ ಸಾವ್ಳೆಂತ್, ಅಟ್ಟಾಂಗ್ ಅಂಧ್ಕಾರಾಚೆಂ ತಾಕಾ ಬರೆಂಚ್ ಸಂರಕ್ಷಣ್ ಲಾಭ್ಲೆಂ.

ತಶ್ಯೊ ಥೊಡ್ಯೊ ಪುರಾಸಾಣೆಚ್ಯೊ ಆನಿ ಆತುರಾಯೆಚ್ಯೊ ಘಡಿಯೊ ಪಾಶಾರ್ ಜಾತಚ್, ಉದ್ಕಾ ಥಾವ್ನ್ ಚಡುಣೆಂ ಏಕ್ ಆಳ್ ಉಬಾರಾಯೆಚೆರ್ ಆಡ್ ಧಾಂಪೊನ್ ಆನಿ ನಿದೊನ್ ಆಸ್‍ಲ್ಲ್ಯಾ ಸೇತುವ್ಯಾ ಪಂದಾಕ್ ತೊ ಪಾವ್ಲೊ. ಕಾಳೊಕಾಂತ್ ಸಾಸ್ಪತಚ್, ಅಸ್ಥಿವಾರಾಚ್ಯಾ ಫಾತ್ರಾಂಕ್ ಚಾಬಯಿಲ್ಲಿ ಆನಿ ತ್ಯಾ ದೀಗ್ ಪಾಂಪಾಳ್ಯಾಚ್ಯಾ ಮುಳಾಕ್ ಶಿರ್ಕಾಯಿಲ್ಲಿ ಸಾಂಕಳ್ ತಾಚ್ಯಾ ಹಾತಾಕ್ ಮೆಳ್ಳಿ. ತಿಕಾ ಮೊಗಾನ್‍ಶೆಂ ಧರುನ್, ತ್ಯಾ ಗುಪಿತ್ ಆನಿ ಸುರಕ್ಷಿತ್ ಜಾಗ್ಯಾರ್ ತೊ ರಾವ್ಲೊ.

ಥೊಡ್ಯಾಚ್ ವೆಳಾನ್, ಭಾಯ್ರ್ ಥಾವ್ನ್ ಘಡಾಕ್ ಭಿತರ್ ಯೆಂವ್ಚಿಂ ಮೆಟಾಂ, ಆನಿ ಉಲಯಿಲ್ಲೊ ಆವಾಜ್ ಆಯ್ಕಲ್ಲೆಪರಿಂಚ್, ವಯ್ಲ್ಯಾನ್ ಪಾಶಾರ್ ಜಾಂವ್ಚ್ಯಾ ಮನ್ಶ್ಯಾಂಚ್ಯಾ ಹಾತಾಂತ್ಲ್ಯಾ ಲಾಂಟಾನಾಂಚೊ ಪ್ರಕಾಸ್, ಸೇತುವ್ಯಾಚ್ಯಾ ದೊನೀ ಬಗ್ಲೆಂನಿ, ಖಂದ್ಕಾಚ್ಯಾ ಉದ್ಕಾಚೆರ್ ಫಾಂಕ್ಲೊ.

ಸರ್ದಾರ್ ಸಿಮಾಂವ್ನ್ ಶ್ವಾಸ್ ಧರ್ಲೊ. ಭಿಯಾಚ್ಯಾ ಧಡ್ದಡ್ಯಾಂನಿ ನಹಿಂ ಜಾಲ್ಯಾರೀ, ತಾಚ್ಯಾ ಕಾಳ್ಜಾಂತ್ ಆತುರಾಯೆಚ್ಯಾ ಉಡ್ಯೆಂನಿ, ನಾಳಿ ಗುಳ್ಯಾಂಚೊ ಆವಾಜ್ ಕೆಲ್ಲೆಪರಿಂ ತಾಕಾ ಭೊಗ್ಲೆಂ.

ವಯ್ಲೊ ಆವಾಜ್ ಚಿಕ್ಕೆ ರಾವ್ಲೊ. ಥೊಡೊ ವೇಳ್ ಉಜ್ವಾಡ್ ತ್ಯಾ ಉದ್ಕಾಚೆರ್ ಖೆಳ್ಳೊ.

“ಆಮಿ ಮ್ಹಳ್ಳೆಂ ಸಾರ್ಕೆಂ – ತೊ ಖರೊಚ್ ಬುಡೊನ್ ಮೆಲಾ” ಮ್ಹಳೆಂ ಎಕ್ಲ್ಯಾನ್.

“ತಶೆಂ ತೊ ಗೆಲ್ಲೊ ಬರೆಂಚ್ ಜಾಲೆಂ” ಮ್ಹಣಾಲೊ ಆನ್ಯೇಕ್ಲೊ. “ನಾ ಜಾಲ್ಯಾರ್ ಆಮ್ಕಾಂ ಎಕ್ಲ್ಯಾಕ್‍ಯೀ ತೊ, ಜಿವಂತ್ ವಾ ಸ್ವತಂತ್ರ್ ಜಾವ್ನ್ ಸೊಡ್ತೊ ನಾ.”

“ಪಾಟಿಂ ರಾವ್ಳೆರಾಕ್ ಯಾ. ಬೇಗಮೆಚಿ ಫುಡ್ಲಿ ಹುಕುಮ್ ಕಶಿಂ ಮ್ಹಳ್ಳಿ ಸಮ್ಜೊಂಕ್ ಜಾಯ್.”

“ಫುಡ್ಲಿ ಹುಕುಮ್ ಕಶಿ ಆಸ್ಲ್ಯಾರ್ ಕಿತೆಂ? ಆಮ್ಕಾಂ ಆಸ್‍ಲ್ಲೆಂ ಲಾಗ್ಶಿಲೆಂ ಅನ್ವಾರ್ ಚುಕ್ಲೆಂ.”

“ಆನಿ ತೊ ಯೂಸೂಫ್ ಆಲಿ ಆಸಾ ನಹಿಂವೇ?”

“ಪಯ್ಲಿಚ್ ಆಲೋಚನ್ ಕೆಲ್ಲೆಪರಿಂ, ತಾಕಾ-ತಾಣೆಂ ಹಾಂಗಾ ಯೇನಾಶೆಂ ಬಂದೋಬಸ್ ಕೆಲ್ಯಾರ್ ಜಾಲೆಂ.”

“ಮ್ಹಳ್ಯಾರ್…”

“ಮ್ಹಳ್ಯಾರ್, ತಾಕಾ ಎಕ್ಲ್ಯಾಕ್ ಉಸ್ಳಾಯ್ಲ್ಯಾರ್ ಜಾಲೆಂ.”

“ತರ್…”

“ತರ್, ಬೇಗಮ್ ಸಾಂಗೊಂದಿ, ನಾ ಸಾಂಗೊಂದಿ – ಫಾಂತ್ಯಾರ್ ಭಾಯ್ರ್ ಸರೊನ್ ಪಯ್ಯನೂರಾಕ್ ಆಮಿ ವಚಜಾಯ್, ಆನಿ ತ್ಯಾ ಯೂಸುಫ್ ಆಲಿಕ್ ಲಗಾಡ್ ಕಾಡಿಜಾಯ್. ಉಪ್ರಾಂತ್ಲಿ ಖಬರ್ ಮಾಗಿರ್ ಪಳೆಯಾಂ.”

ತಿತ್ಲೆಂ ಉಲವ್ನ್ ತೆ ಥಂಯ್ ಥಾವ್ನ್ ಪಾಶಾರ್ ಜಾಲೆ. ಉಜ್ವಾಡ್‍ಯೀ ಲಿಪ್ಲೊ.

ಸರ್ದಾರ್ ಸಿಮಾಂವ್ಕ್ ತಾಂಚೊ ಮತ್ಲಬ್ ಸಮ್ಜಲೊ ಜಾಲ್ಲ್ಯಾನ್, ಥಂಯ್ ಥಾವ್ನ್ ಜೀವ್ ಘೆವ್ನ್ ಉರ್ಲ್ಯಾರ್, ಪಯ್ಯನೂರಾಕ್ ವಚೊನ್, ಯೂಸುಫ್ ಆಲಿಕ್ ಜಾಗ್ವಂವ್ಚೆಂ, ಆನಿ ಘಾತ್ಕ್ಯಾಂಚೆಂ ನಾಣೆಂ ತಾಂಕಾಂಚ್ ಪಾಟಿಂ ದಿಂವ್ಚೆಂ ಮ್ಹಣ್ ತಾಣೆಂ ನಿಚೆವ್ ಕೆಲೊ.

ಪುಣ್ ತಕ್ಷಣ್ ಥಂಯ್ ಥಾವ್ನ್ ಪಾಶಾರ್ ಜಾಂವ್ಚೆಂ ಕಶೆಂ? ಹೆರ್ ಥೊಡೆ ಶಿಪಾಯ್ ಆನಿಕ್‍ಯೀ ತಾಚ್ಯಾ ಸೊಧ್ನೆರ್ ಆಸ್ತೆಲೆ ಮ್ಹಣ್ ತೊ ಜಾಣಾಂಸ್‍ಲ್ಲೊ.

ತಶೆಂ, ಚಡ್ಪಡೊನ್ ಆನಿ ಕಷ್ಟಾಂನಿ ಆನಿಕ್‍ಯೀ ಥೊಡೊ ವೇಳ್ ತಸೊಚ್ ತೊ ರಾವ್ಲೊ.

ಥೊಡ್ಯಾ ವೆಳಾ ಉಪ್ರಾಂತ್, ಭಾಯ್ರ್ ಆಸ್‍ಲ್ಲೆ ಹೆರ್ ಗ್ರಾಯ್ಕ್‌ಯೀ ಭಿತರ್ ಆಯಿಲ್ಲೆಂ ತಾಕಾ ಸಮ್ಜಲೆಂ. ಆನಿಕ್‍ಯೀ ತಶೆಂ ರಾವೊಂಕ್ ಸಾಧ್ಯ್ ನಾ – ಕಾಂಯ್ ಸೇತ್ವೊ ವಯ್ರ್ ಉಕಲ್ತಿತ್, ನಹಿಂ ಜಾಲ್ಯಾರ್ ಉದ್ಕಾಂತ್ ಹಾತ್ ಪಾಯ್ ಪುರ್ತೆ ರೂಕ್ ಜಾವ್ನ್ ಕಿತಾಪತ್ ಜಾಯ್ತ್ ಮ್ಹಳ್ಳೆಂ ಚಿಂತುನ್ ಫುಡ್ಲ್ಯಾ ಕಾರ್ಯಾಕ್ ತೊ ದೆಂವ್ಲೊ.

ಫುಡೆಂ ಕಿತೆಂ ಕರ್ಚೆಂ?

ರಾವ್ಳೆರಾಂತ್, ಮಾನಿನ್ ವೆರೊನಿಕಾ ಕುವೆಲ್ ಅಪಾಯಾಂತ್ ಆಸಾ, ಪುಣ್ ಆಯ್ಚ್ಯಾ ರಾತಿಂ ಪುಣೀ ತೆ ತಿಕಾ ಪರ್ತ್ಯಾನ್ ಧೊಸುಂಕ್ ಮನ್ ಕರಿಶೆನಾಂತ್ ಮ್ಹಣ್ ತೊ ಪಾತ್ಯೆಲೊ.

ಪಾಟ್ಲ್ಯಾ ಘಡಿತಾಂಚೊ ಪರ್ತ್ಯಾನ್ ತಾಕಾ ಉಗ್ಡಾಸ್ ಆಯ್ಲೊ. ಜರ್ ತ್ಯಾ ಕಾಮುಕಾಂನಿ ವೆರೊನಿಕಾ ಕುವೆಲಿಕ್ ಧೊಸುಂಕ್ ನಾತ್‍ಲ್ಲೆಂ, ತರ್ ತಿಕಾ ಆನಿ ಹೆರಾಂಕ್ ಘೆವ್ನ್, ಇತ್ಲ್ಯಾ ವೆಳಾ ಭಿತರ್ ತೊ ಪಯ್ಸ್ ಪಾವ್ತೊ ಆಸ್‍ಲ್ಲೊ.

ಪುಣ್ ಆತಾಂ ಚುರ್ಚುರೊನ್ ಕಿತೆಂ ಫಾಯ್ದೊ?

ಸೇತುವ್ಯಾ ಪಂದ್ಲ್ಯಾನ್‍ಂಚ್, ಭೋವ್ ಚತ್ರಾಯೆನ್, ಧರ್ಣಿಚ್ಯಾ ಬಗ್ಲೆಕ್ ತೊ ಉಪ್ಯೆಲೊ. ಉಜ್ವಾಡ್ ನಾತ್‍ಲ್ಲೊ ತರೀ, ಕಾಳೊಕಾಂತ್ ಪ್ರಯತ್ನಾನ್ ಸಾಸ್ಪೊನ್, ಹಾತಾಂ-ಪಾಯಾಂನಿ ತೊ ವಯ್ರ್ ಪಡ್ಲೊ.

ಚತ್ರಾಯೆನ್ ತಾಣೆಂ ದೀಷ್ಟ್ ಭೊಂವ್ಡಾಯ್ಲಿ. ಹ್ಯಾ ವಾಟೆನ್ ಮನ್ಶ್ಯಾಚಿ ಜಾಗ್‍ಮಾಗ್ ನಾತ್‍ಲ್ಲಿ. ಹೆರ್ ಕಾಂಯ್ ಚಿಂತುಂಕ್‍ಯೀ ವೇಳ್ ನಾತ್‍ಲ್ಲೊ. ಕಾಳೊಕಾಂತ್ ತರೀ, ತ್ಯಾ ಉಗ್ತ್ಯಾ ಪ್ರದೇಶಾಂತ್, ನೆಕೆತ್ರಾಂಚ್ಯಾ ಉಜ್ವಾಡಾಂತ್, ವಾಟ್ ಆನಿ ವಠಾರ್ ಚಿಕ್ಕೆ ಝಳ್ಕೊಂಕ್ ಲಾಗ್ಲೆಂ.

ಉದಾಕ್ ವ್ಹಾಳ್ತಾಲೆಂ ಜಾಲ್ಯಾರೀ, ನ್ಹೆಸ್‍ಲ್ಲಿಂ ವಸ್ತ್ರಾಂ ನಿಕ್ಳಾವ್ನ್ ಉಡಂವ್ಕ್ ತೊ ರಾವ್ಲೊ ನಾ. ಸವ್ಕಾಸ್ ಚಲೊಂಕ್‍ಯೀ ಸಾಧ್ಯ್ ನಾತ್‍ಲ್ಲೆಂ ಜಾಲ್ಲ್ಯಾನ್, ಧಾಂವೊಂಕ್ ತಾಣೆಂ ಸುರು ಕೆಲೆಂ. ಥಂಯ್ ಥಾವ್ನ್ ಬಡ್ಗಾ-ಉದೆಂತಿಕ್ ವೆಚಿ ವಾಟ್ ಚಡುಣೆಂ ಪಯ್ಯನೂರಾಚ್ಯಾ ದಿಕ್ಕಾಕ್ ವೆತಾ ಮ್ಹಣ್ ತೊ ಜಾಣಾಂಸ್‍ಲ್ಲೊ. ತಿಚ್ ವಾಟ್ ತಾಣೆಂ ಧರ್ಲಿ, ಆನಿ ಧಾಂವೊಂಕ್ ತೊ ಲಾಗ್ಲೊ.

ಹೆರ್ ಕಾಂಯ್ ತಾಣೆಂ ಚಿಂತುಂಕ್ ನಾ.

ವಾಟೆರ್ ಕೋಣ್ ಭೆಟ್ಲ್ಯಾರ್, ವಾ ಹೆರ್ ಕಾಂಯ್ ಅಪಾಯ್ ಸಂಭವ್ಲ್ಯಾರ್, ಝಜೊಂಕ್ ತಾಚೆ ಕಡೆನ್ ಹಾತೆರಾಂ ನಾತ್‍ಲ್ಲಿಂ. ತರೀ ಪರ್ವಾ ಕರಿನಾಸ್ತಾಂ, ಪಯ್ಲೆಂ ಚಿಕ್ಕೆ ವೆಗಾನ್ ಆನಿ ಉಪ್ರಾಂತ್ ಹಳ್ತಾನ್ ಧಾಂವೊಂಕ್ ತೊ ಲಾಗ್ಲೊ. ತಶೆಂ ಧಾಂವ್‍ಲ್ಲ್ಯಾ ವರ್ವಿಂ ತಾಚ್ಯಾ ಆಂಗಾಂತ್ ಊಬ್ ಚರ್ಲಿ ಆನಿ ಧಯ್ರ್ ಪಾಟಿಂ ಆಯ್ಲೆಂ.

ವಾಟೆರ್ ಕೊಣ್‍ಯೀ ತಾಕಾ ಭೆಟ್ಲೆ ನಾಂತ್. ಹೆರ್ ಕಸಲೊಯೀ ಅಪಾಯ್ ಸಂಭವ್ಲೊ ನಾ.

ತಶೆಂ, ಚಡುಣೆಂ ದೋನ್ ವೊರಾಂಚೊ ವೇಳ್, ರಾವನಾಸ್ತಾನಾ ಧಾಂವೊನ್, ಪಯ್ಯನೂರ್ ಛತ್ರಾ ಲಾಗಿಂ ತೊ ಪಾವ್ಲೊ. ಥಂಯ್ಸರ್ ಅಪಾಯಾಕ್ ಇಡೆಂ ನಾತ್‍ಲ್ಲ್ಯಾ ವರ್ವಿಂ, ಆನಿ ತಾಚೆಚ್ ಜಣ್ ಆಸಾತ್ ಮ್ಹಣ್ ತೊ ಜಾಣಾಂಸ್‍ಲ್ಲ್ಯಾ ವರ್ವಿಂ, ಶೀದಾ ಛತ್ರಾ ಲಾಗಿಂ ತೊ ಗೆಲೊ.

ಆತಾಂ, ಪರ್ತ್ಯಾನ್ ತಾಕಾ ಪುರಾಸಣ್ ಸಮ್ಜಲಿ. ತಾಚೆ ಹಾತ್ ಪಾಯ್ ಸಾರ್ಕೆ ಗಳಾನಾತ್‍ಲ್ಲೆ; ಶ್ವಾಸ್ ಸೊಡುಂಕ್ ತಾಕಾ ಭೋವ್ ಕಷ್ಟ್ ಮಾರ್ತಾಲೆ.

“ಕೋಣ್ ಥಂಯ್?”

“ಹಾಂವ್.”

“ಹಾಂವ್ ಮ್ಹಳ್ಯಾರ್?”

“ಕೋಣ್ ಉಲಯ್ತಾ?” ಸರ್ದಾರ್ ಸಿಮಾಂವ್ನ್, ಕಷ್ಟಾಂನಿ ಪುಣ್ ಅಧಿಕಾರಾಚ್ಯಾ ಸ್ವರಾನ್ ವಿಚಾರ್ಲೆಂ.

“ಹಾಂವ್ – ಹಾಂಗಾಚೊ ಠಾಣೆದಾರ್” ಮ್ಹಣೊನ್, ಠಾಣೆದಾರ್ ಎಕಾ ಹಾತಾಂತ್ ಲಾಂಪ್ಯಾಂವ್ ಆನಿ ಆನ್ಯೇಕಾ ಹಾತಾಂತ್ ದಾಂಡೊ ಘೆವ್ನ್ ಫುಡೆಂ ಆಯ್ಲೊ. ತಾಚ್ಯಾ ಹಾತಾಂತ್ಲೊ ಉಜ್ವಾಡ್, ಪಿಂಜ್ಕರ್ ಆನಿ ಭಿಜ್‍ಲ್ಲಿಂ ವಸ್ತ್ರಾಂ ನ್ಹೆಸೊನ್ ಆಸ್‍ಲ್ಲ್ಯಾ ಹ್ಯಾ ವಿದ್ರೂಪ್ ವ್ಯಕ್ತಿಚೆರ್ ಪಡ್ತಚ್ ಪಯ್ಲೆಂ ತೊ ಚಿಕ್ಕೆ ಆಕಾಂತ್ಲೊ, ಉಪ್ರಾಂತ್ ಖುಬಾಳ್ಳೊ.

“ಕೊ-ಕೋಣ್ ಹ್ಯಾ ತುಂ? ಹಾಂಗಾಸರ್ ಜಾಗೊ ಭರ್ತಿ ಜಾಲಾ – ಕೊಣಾಯ್ಕೀ ಸುವಾತ್ ನಾ” ಮ್ಹಳೆಂ ತಾಣೆಂ.

“ತೆಂ ಮಾಗಿರ್ ಪಳೆಯಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಸದ್ದ್ಯಾಕ್, ಹಾಂವೆಂ ವಿಚಾರ್‌ಲ್ಲ್ಯಾ ಸವಾಲಾಂಕ್ ಜಾಪ್ ದೀ.”

“ಹಾಂ?” ಠಾಣೆದಾರ್ ಅಜ್ಯಾಪ್ಲೊ.

“ಸರ್ದಾರ್ ಯೂಸುಫ್ ಆಲಿ ಹಾಂಗಾಸರ್ ಆಸಾಮೂ?”

ಠಾಣೆದಾರಾಚೆಂ ಅಜ್ಯಾಪ್ ಚಿಕ್ಕೆ ಚಡ್ ಜಾಲೆಂ.

“ತೊ ಆಸಾ” ತಾಣೆಂ ಜಾಪ್ ದಿಲಿ. “ಪುಣ್ ಹ್ಯಾ ವೆಳಾರ್ ಉಲಂವ್ಕ್…”

“ತೆಂ ಉಪ್ರಾಂತ್ ಪಳೆಯಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್ ಮಧೆಂಚ್. “ಆತಾಂ ತುವೆಂ ಮಾತ್ರ್ ಉಲಯ್ಲ್ಯಾರ್ ಪುರೊ.”

“ಮ್ಹಳ್ಯಾರ್?”

“ಜಮೆದಾರ್ ಅಂತುಲೊ ಪಡ್ವಳ್ ಆನಿ ತಾಚೊ ಸಾಂಗಾತಿ ಜಮೆದಾರ್ ರಾಮಪ್ಪ ಹಾಂಗಾಸರ್ ಆಸಾತ್‍ಮೂ?”

“ಕೋಣ್ ವಿಚಾರ್ತಾ ಮ್ಹಣ್ ಸಮ್ಜಲ್ಯಾ ಶಿವಾಯ್…”

“ಮ್ಹಜ್ಯಾ ಸವಾಲಾಂಕ್ ಜಾಪ್ ದೀಂವ್ಕ್ ತುಕಾ ಖುಷಿ ನಾ. ಪರ್ವಾ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಜಮೆದಾರ್ ಅಂತುಲೊ ಪಡ್ವಳಾಕ್ ಹಾಂವ್ ಆಪಯ್ತಾಂ ಮ್ಹಣ್ ಸಾಂಗ್.”

ಠಾಣೆದಾರ್ ಹಾಸ್ಲೊ.

“ಕೋಣ್ ಎಕ್ಲೊ ವಾಟ್ಸುರ್ ವಾ ಭಿಕಾರಿ ಯೇವ್ನ್, ಹ್ಯಾ ರಾತಿಂ ತಾಕಾ ಆಪಯ್ತಾ ಮ್ಹಣ್ ಸಾಂಗ್ಲ್ಯಾರ್, ತೊ ಮ್ಹಜಿ ಕಾತ್ ಕಾಡುಂಕ್ ಆಸಾ!”

“ತೆಂ ಉಪ್ರಾಂತ್ ಪಳೆಯಾಂ. ಪಯ್ಲೆಂ, ಹಾಂವ್ ತಾಕಾ ಆಪಯ್ತಾಂ ಮ್ಹಣ್ ವಚೊನ್ ಸಾಂಗ್.”

“ಕೋಣ್ ಆಪಯ್ತಾ ಮ್ಹಣಜಾಯ್?”

“ತಾಚೊ ಧನಿ.”

“ಕೋಣ್?”

“ತಾಚೊ ಧನಿ!”

ಠಾಣೆದಾರ್ ಪರ್ತ್ಯಾನ್ ಹಾಸ್ಲೊ.

“ತಾಚೊ ಧನಿ ಕೋಣ್ ಮ್ಹಣ್…” ಮ್ಹಣ್ತಾಲೊ ತೊ.

“ಹಾಂವ್ ಜಾಣಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಗರ್ಜೆಚಿ ಆನಿ ಭೋವ್ ತುರ್ತಾಚಿ ಖಬರ್ ಹಾಂವೆಂ ಹಾಡ್ಲ್ಯಾ ಮ್ಹಣ್ ಸಾಂಗ್.”

“ಕೊಣ್ಣಾ…”

“ವೇಳ್ ಕಾಡಿನಾಕಾ!” ಸರ್ದಾರ್ ಸಿಮಾಂವ್ನ್ ಧೆಂಕ್ಣೊ ಮಾರ್ಲೊ.

“ಹಾಂವ್ ನೆಣಾಂ – ತುವೆಂ ಹಾಡ್‍ಲ್ಲಿ ಖಬರ್, ನಿಜಾಯ್ಕೀ ಗರ್ಜೆಚಿ ಆನಿ ತುರ್ತಾಚಿ ಜಾಲ್ಯಾರ್ ಬರೆಂ ಆಸಾ” ಮ್ಹಣ್ ಪುರ್ಪುರೊನ್ ಠಾಣೆದಾರ್, ಸರ್ದಾರ್ ಸಿಮಾಂವ್ಕ್ ಬರೆಂ ಕರ್ನ್ ಪಳೆವ್ನ್ – ತಾಚೆ ಕಡೆನ್ ಹಾತೆರಾಂ ನಾಂತ್ ಮ್ಹಳ್ಳೆಂ ಪಾರ್ಕುನ್ – ಭಿತರ್ ಗೆಲೊ.

ಸೊಸ್ಣಿಕಾಯ್ ಉಣಿ ಜಾವ್ನ್ ಯೆಂವ್ಚೊ ಸರ್ದಾರ್ ಸಿಮಾಂವ್, ಏಕ್ ಲಾಂಬ್ ಶ್ವಾಸ್ ಸೊಡುನ್, ಥಂಯ್ಸರ್ ರಾವ್ಲೊ. ಥೊಡ್ಯಾ ವೆಳಾನ್, ಠಾಣೆದಾರಾ ಪಾಟ್ಲ್ಯಾನ್, ದೊಳೆ ಪುಸುನ್ ಆನಿ ಪುರ್ಪುರೊನ್ ಅಂತುಲೊ ಪಡ್ವಳ್ ಆಯ್ಲೊ.

“ಹ್ಯಾ ರಾತಿಂ – ಕಸಲಿ ಖಬರ್ ಹ್ಯಾ?” ವಿಚಾರ್ಲೆಂ ತಾಣೆಂ.

ಸರ್ದಾರ್ ಸಿಮಾಂವ್ಕ್ ಹಿ ಚಿಕ್ಕೆ ತಾರಿಪ್ ದಿಸ್ಲಿ. ಆಪ್ಲ್ಯಾ ಪುರಾಸಾಣೆಚಿ ತಾಕಾ ವಿಸರ್ ಪಡ್ಲಿ. ಅಂತುಲ್ಯಾಕ್ ಪಳೆವ್ನ್ ತೊ ಚಿಕ್ಕೆ ರಾವ್ಲೊ.

“ಬರ್‍ಯಾನ್ ಉಲಯ್-ಹಾಂ” ಮ್ಹಣಾಲೊ ಠಾಣೆದಾರ್‌ಯೀ ಸರ್ದಾರ್ ಸಿಮಾಂವ್ಕ್ ಪಳೆವ್ನ್. ತಿತ್ಲ್ಯಾರ್, ತಾಂಚ್ಯಾ ಪಾಟಾಪಾಟ್ ಆಯಿಲ್ಲ್ಯಾ ರಾಮಪ್ಪಾನ್ ಸರ್ದಾರ್ ಸಿಮಾಂವ್ಕ್ ಪಳೆಲೆಂ – ಚಿಕ್ಕೆ ಫುಡೆಂ ಸರೊನ್ ಬರೆಂ ಕರ್ನ್ ತಾಣೆಂ ಪಳೆಲೆಂ. ದುಸ್ರ್ಯಾ ಘಡ್ಯೆ –

“ಧನ್ಯಾ! ದೇವೆರೇ! ತುಂ ಜೀವ್ ಆಸಾಯ್!” ಮ್ಹಣೊನ್ ಸಂತೊಸಾನ್ ಉದ್ಗಾರೊನ್ ತೊ ಫುಡೆಂ ಉಡ್ಲೊ, ಆನಿ ಸರ್ದಾರ್ ಸಿಮಾಂವ್ಚೆ ಪಾಯ್ ತಾಣೆಂ ಆಪಡ್ಲೆ.

ಠಾಣೆದಾರ್ ಕಾಲುಬುಲೊ ಜಾಲೊ.

ಘಡಿಭರ್, ಅಂತುಲೊ ಘಾಬರ್ಲೊ. ಉಪ್ರಾಂತ್ ತೊಯೀ –

“ಧನ್ಯಾ ಮ್ಹಾಕಾ ಮಾಫ್ ಕರ್!” ಮ್ಹಣೊನ್ ಸರ್ಪಡ್ಲೊ. “ಧನ್ಯಾ, ಮ್ಹಾಕಾ ಮಾಫ್ ಕರ್ – ಮ್ಹಾಕಾ ವಳಕ್ ಮೆಳೊಂಕ್ ನಾ!”

“ವ್ಹಡ್ ನಹಿಂ!”

“ಆನಿ ಧನ್ಯಾ ಮ್ಹಾಕಾ ಮಾಫ್ ಕರ್!”

“ಕಿತ್ಯಾಕ್, ಪರ್ತ್ಯಾನ್ ತೆಂಚ್ ವೊರೆಸಾಂವ್!” ಮ್ಹಣಾಲೊ ಸರ್ದಾರ್ ಸಿಮಾಂವ್ ಚಿಕ್ಕೆ ವಿರಾರ್ ಜಾವ್ನ್.

“ಧನ್ಯಾ!” ಪಿಂರ್ಗಲೊ ಅಂತುಲೊ. “ತುವೆಂ ಮ್ಹಜ್ಯಾ ತಾಬೆನ್ ದಿಲ್ಲೊ ತೊ ಬದ್ಮಾಶ್, ದಗಲ್ಬಾಜ್, ಕಣ್ಣೊಜಿ ತೊಪಾಸಿ ದಾಲ್ಮೇದಾ – ಮ್ಹಜ್ಯಾ ಅಜಾಗ್ರುತ್ಕಾಯೆ ವರ್ವಿಂ ಚುಕವ್ನ್ ಧಾಂವ್ಲೊ!”

“ವ್ಹಡ್ ನಹಿಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತಾಕಾ ಆಮಿ ಪರತ್ ಧರ್ಯೆತ್. ಪುಣ್ ತುಕಾ ಲಗಾಡ್ ಕಾಡ್ನ್ ತೊ ಧಾಂವ್ಲಾ ಮ್ಹಣ್ ಆಯ್ಕಲ್ಲೆಂ ಹಾಂವೆಂ.”

“ವ್ಹಯ್ ಧನ್ಯಾ! ಹಾಂವ್ ನಿಜಾಯ್ಕೀ – ಮ್ಹಜ್ಯಾ ಚುಕಿ ಖಾತಿರ್ – ಕಾಬಾರ್ ಜಾವ್ನ್ ಗೆಲ್ಲೊಂ. ಕಿತೆಂಗೀ ಮ್ಹಜ್ಯಾ ಘರ್ಚ್ಯಾ ಆಲ್ಮಾಂಚ್ಯಾ ಮಾಗ್ಣ್ಯಾನ್, ಆನಿ ಆನಿಕ್‍ಯೀ ಥೊಡೊ ಕಾಳ್ ತುಜಿ ಚಾಕ್ರಿ ಕರುಂಕ್ ಋಣ್ ಆಸ್‍ಲ್ಲ್ಯಾನ್ – ಉರ್ಲೊಂ.”

“ತೆಂ ಆಸೊಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆಮ್ಕಾಂ ಭೋವ್ ತುರ್ತಾಚೆಂ ಕಾಮ್ ಆಸಾ!”

“ಹುಕುಮ್ ದೀ ಧನ್ಯಾ!”

“ಸರ್ದಾರ್ ಯೂಸುಫ್ ಆಯ್ಲಾಮೂ?”

“ವ್ಹಯ್ ಧನ್ಯಾ!” ಮ್ಹಣಾಲೊ ರಾಮಪ್ಪ. “ತುಜ್ಯಾ ಹುಕ್ಮೆ ಪ್ರಕಾರ್ ಹಾಂವ್ ತಾಕಾ ಭೆಟ್ಲೊಂ. ಸರ್ದಾರ್ ಯೂಸುಫ್ ಹಾಂಗಾಸರ್ ಆಯ್ಲಾ.”

“ಆನಿ ಆಮ್ಚ್ಯೊ ಮಂಜ್ಯೊ?”

“ಆಮ್ಚ್ಯೊ ಮಂಜ್ಯೊ ಆನಿ ಅರ್ಧಿ ಕಂಪ್ಣಿ ಶಿಪಾಯ್ ಯೇವ್ನ್ ಪಾವ್ಲ್ಯಾತ್. ಹಾಂಗಾ ಥಾವ್ನ್ ದೇಡ್ ಮಯ್ಲಾ ಭಿತರ್, ಫುಡ್ಲಿ ಹುಕುಮ್ ರಾಕೊನ್ ದರ್ಯಾಂತ್ ತೆ ಆಸಾತ್!”

“ದೀಸ್ ಉಜ್ವಾಡ್ತಾನಾ, ತಾಣಿಂ – ಮಂಜ್ಯೊ ರಾಕೊಂಕ್ ಥೊಡೆ ಬರೆ ಹಾತ್ ಸೊಡುನ್ – ತಡಿಕ್ ದೆಂವಜಾಯ್. ಶಸ್ತ್ರಾಂನಿ ಸಜ್ಜಿತ್ ಜಾವ್ನ್ ಕಣ್ಣಾನೂರಾಕ್ ವಚೊನ್ ದಾಡ್ ಘಾಲಿಜಾಯ್.”

“ತರ್ ಹಾಂವ್ ಆತಾಂಚ್, ಸರ್ದಾರ್ ಯೂಸುಫಾಕ್ ಉಟವ್ನ್ ಭಾಯ್ರ್ ಸರ್ತಾಂ!” ಮ್ಹಣಾಲೊ ರಾಮಪ್ಪ.

“ತಿತ್ಲೊ ಅಮ್ಸೊರ್ ಕರಿನಾಕಾತ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತೆಂ ಕಾಮ್ ಉಪ್ರಾಂತ್ ಕರ್ಯೆತ್. ಪಯ್ಲೆಂ, ಅಂತುಲೊ ಪಡ್ವಳ್!”

“ಜೀ ಧನ್ಯಾ!”

“ಏಕ್ ಭಾಣ್ ಉದಾಕ್ ತಾಪವ್ನ್, ಮ್ಹಾಕಾ ನ್ಹಾವ್ಪಾಚಿ ತಯಾರಾಯ್ ಕರ್.”

“ಜರೂರ್ ಧನ್ಯಾ!”

“ಆನಿ ತುರ್ತಾನ್, ಮ್ಹಾಕಾ ಇಲ್ಲೊ ಕಾಲ್ದ್ ಆನಿ ಹುನ್ಶೆಂ ಥೊಡೆಂ ಪೊಟಾಕ್ ಘಾಲುಂಕ್ ತಯಾರಾಯ್ ಕರ್!”

“ಭೇಷೆಗ್ ಧನ್ಯಾ! ಕುಂಕ್ಡಾಚೊ ಕಾಲ್ದ್ ಕರ್ತಾಂ – ಭಾಕ್ರ್ಯೊ ಭಾಜ್ತಾಂ…”

“ಆನಿ ರಾಮಪ್ಪ!”

“ಜೀ ಹುಜೂರ್ – ಧನ್ಯಾ ದೇವೆರೆ!”

“ಮ್ಹಜೊ ಹೊ ಮಾಂಕ್ಡಾಚೊಗೀ ಕೊಡ್ಯಾಚೊ ವೇಸ್ ವೆಗಿಂ ಧುವ್ನ್ ಕಾಡ್. ಉಪ್ರಾಂತ್ ಹಾಂವ್ ವೆಗಿಂ ನ್ಹಾತಾಂ ಆನಿ ಥೊಡೊ ಆಹಾರ್ ಘೆತಾಂ ಆನಿ ಫಕತ್ ದೋನ್ ವೊರಾಂಚೊ ವಿಶೆವ್ ಘೆತಾಂ. ಫಾಂತ್ಯಾರ್‌ಚ್ ಉಟೊನ್, ಆಮ್ಚ್ಯಾ ಹುದ್ದ್ಯಾಚ್ಯಾ ನೀಜ್ ವೆಸಾನ್ ನೆಟೊನ್ ಕಾರ್ಯಾಕ್ ದೆಂವಜಾಯ್! ಆಮ್ಚೆ ಘೊಡೆ ಬರೆ ಆಸಾತ್‍ಮೂ?”

“ಬರೆ ಆಸಾತ್ ಧನ್ಯಾ!”

“ತಾಂಚಿಯೀ ಸಕಾಳಿಂ ಆಮ್ಕಾಂ ಗರ್ಜ್ ಆಸಾ. ಆತಾಂ ಕಾಮಾಕ್ ದೆಂವ್ಯಾ!”

ಅಂತುಲೊ ಪಡ್ವಳ್, ರಾಮಪ್ಪ, ಲೆಗುನ್ ವಿಜ್ಮಿತ್ ಆನಿ ಸಂತೊಸ್ ಪಾವ್‍ಲ್ಲೊ ಠಾಣೆದಾರ್ ಆನಿ ಥಂಯ್ಚೆ ದೋಗ್ ಚಾಕೊರ್, ಸರ್ದಾರ್ ಸಿಮಾಂವ್ಚಿ ಹುಕುಮ್ ಜಾರಿ ಕರ್ಚ್ಯಾ ಖಾತಿರ್ ಚುರುಕ್ ಜಾಲೆ. ತ್ಯಾ ಇಡ್ಯಾಂತ್ –

“ಮಾನಿನ್ ವೆರೊನಿಕಾ ಕುವೆಲಿಚಿ ಖಬರ್ ಕಾಂಯ್ ಆಸಾ ಧನ್ಯಾ?” ವಿಚಾರ್ಲೆಂ ಅಂತುಲ್ಯಾನ್, ತಾಚಿ ಸದಾಂಚಿ ಆತುರಾಯ್ ತಡ್ವುಂಕ್ ತಾಂಕನಾಸ್ತಾನಾ.

“ತಿ, ಕಣ್ಣಾನೂರ್ ರಾವ್ಳೆರಾಂತ್ ಆಸಾ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಚಿಕ್ಕೆ ಚುರ್ಚುರೊನ್. “ತಿ ಕಶಿ ಆಸಾ, ವಾ, ತಿಕಾ ಕಿತೆಂ ಜಾಲಾಂ ಮ್ಹಳ್ಳೆಂ ಆಮಿ ಫಾಲ್ಯಾಂ ಥಂಯ್ ಪಾವ್ಲ್ಯಾ ಉಪ್ರಾಂತ್ ಸಮ್ಜತೆಲೆಂ.”

ತಶೆಂ ಮ್ಹಣೊನ್, ವೆರೊನಿಕಾ ಕುವೆಲಿ ವಿಷಯಿಂ, ಆನಿ ಕಣ್ಣಾನೂರ್‍ಚ್ಯಾ ರಾವ್ಳೆರಾಂತ್ ಚಾಕರ್ನಿಚೆಂ ಕಾಮ್ ಕರ್ನ್ ಆಸ್‍ಲ್ಲ್ಯಾ ತ್ಯಾ ಯುವತಿ ವಿಷಯಿಂ ಹಠಾತ್ ಚಿಂತುಂಕ್ ತೊ ಲಾಗ್ಲೊ…

ಆಪುಣ್ ಭಾಯ್ರ್ ವೆಚೆಂ ಜಾಲ್ಯಾರ್, ತ್ಯಾ ಚಾಕರ್ನಿಕ್ ಆನಿ ತಿಚ್ಯಾ ಬಾಪಾಯ್ಕ್‌ಯೀ ಥಂಯ್ ಥಾವ್ನ್ ವ್ಹರಿಜಾಯ್ ಮ್ಹಣ್ ವೆರೊನಿಕಾನ್ ಶರ್ತ್ ದಿಲ್ಲೆಂ…

ಕೋಣ್ ಜಾವ್ಯೆತ್ ತಿ ಚಾಕರ್ನ್ ಆನಿ ತಿಚೊ ಪ್ರಾಯ್ವಂತ್ ಬಾಪಯ್..?

ಸಾಯ್ಬಾ, ಭೊಗೊಸ್..! ತಳ್ಮಾಟ್ಯಾಕ್ ಮಾರ್‌ಲ್ಲೆಪರಿಂ ತಾಕಾ ಉಗ್ಡಾಸ್ ಆಯ್ಲೊ – ತ್ಯಾ ಚಾಕರ್ನಿಚೊ ಸ್ವರ್, ಆದಿಂ ತಾಣೆಂ ಆಯ್ಕೊನ್ ಆನಿ ಮೊಗಾನ್ ವಳ್ಕಲ್ಲೊ ತಸಲೊ – ಬಂಟ್ವಾಳ್‍ಚ್ಯಾ ಕುಂವರ್ನಿಚೊ… ಆಗ್ನೆಸ್ ಸಿಸಿಲಿಯಾಚೊ..! ಕಸಲಿ ಗಜಾಲ್ ಜಾವ್ಯೆತ್..?

ಕಾಂಯ್ – ತಿ ‘ಚಾಕರ್ನ್’ ಆಗ್ನೆಸ್ ಸಿಸಿಲಿಯಾ, ಆನಿ ತಿಚೊ ಪ್ರಾಯ್ವಂತ್ ಬಾಪಯ್ ಮ್ಹಳ್ಳೊ ತೊ ಕಾಂಯ್, ಬಂಟ್ವಾಳ್ಚೊ ರಫಾಯೆಲ್ ಮಿಂಗೆಲ್ ಕಾಮತ್? ಹಿಂ ಸವಾಲಾಂ ಸರ್ದಾರ್ ಸಿಮಾಂವ್ಕ್ ಜಬ್ಬೊರ್ ಧೊಸುಂಕ್ ಲಾಗ್ಲಿಂ. ತ್ಯಾ ಬರಾಬರ್, ದುಸ್ರ್ಯಾ ದಿಸಾ ಕಣ್ಣಾನೂರಾಕ್ ವೆಚಿ ತಾಚಿ ಆತುರಾಯ್ ಆನಿ ಅಪೇಕ್ಷಾ ಚಡ್ ಬಳಾಧಿಕ್ ಜಾಲಿ.

ತ್ಯಾ ವೆಳಾರ್, ಆಗ್ನೆಸ್ ಸಿಸಿಲಿಯಾ ಆನಿ ವೆರೊನಿಕಾ ಕುವೆಲ್, ಕಸಲ್ಯಾ ಸ್ಥಿತೆರ್ ಆಸ್‍ಲ್ಲಿಂ ಮ್ಹಣ್ ತೊ ನೆಣಾಂಸ್‍ಲ್ಲೊ. ಸರ್ದಾರಾಂಚ್ಯಾ ಸಿನೊಲೆಚೊ ಉಗ್ಡಾಸ್‍ಯೀ ತಾಕಾ ನಾತ್‍ಲ್ಲೊ.

* * * * *

ಸರ್ದಾರ್ ಸಿಮಾಂವ್, ಕಣ್ಣಾನೂರ್ ರಾವ್ಳೆರಾಚ್ಯಾ ತ್ಯಾ ವಯ್ಲ್ಯಾ ಮಾಳ್ಯೆರ್ ಚಾರ್-ಪಾಂಚ್ ಮೊಡಿಂ ನಿದಾವ್ನ್, ಆಖ್ರೇಕ್, ಕಸಲಿಚ್ ವಾಟ್ ನಾಸ್ತಾಂ, ತ್ಯಾ ಕಾಳ್ಕ್ಯಾ ಕಂತ್ರಾಳಾಂತ್ಲ್ಯಾನ್ ಭಾಯ್ರ್ ಉಡ್ತಾನಾ, ದೊಗಾಂಚಿ ಕಿಂಕ್ರಾಟ್ ತಾಕಾ ಆಯ್ಕಲ್ಲಿ. ಪಯ್ಲಿ ಕಿಂಕ್ರಾಟ್ ದಿಲ್ಲಿ ದುಕಿನ್ ಆನಿ ಭಿಯೆವ್ನ್ – ಮಾನಿನ್ ವೆರೊನಿಕಾ ಕುವೆಲಿನ್. ಫಕೀರ್ ಮಹಮ್ಮದಾನ್ ಸರ್ದಾರ್ ಸಿಮಾಂವ್ಚೆರ್ ಭಾಲಿ ಉಡಯ್ತಾನಾ ತಿ ಆಡ್ ಉಡ್‍ಲ್ಲಿ – ತಿ ಭಾಲಿ ತಿಚ್ಯಾ ಪಾಟಿಂತ್, ಖಾಂದಾಚ್ಯಾ ಸಂದಾರ್ ರೊಂಬೊನ್ ಧರ್ಣಿಕ್ ತಿ ಶೆವ್ಟಲ್ಲಿ. ತೆಂ ಪಳೆವ್ನ್, ಆನಿ ಸಾಂಗಾತಾಚ್, ಸರ್ದಾರ್ ಸಿಮಾಂವ್ ಮೊರ್ನಾಕ್ ಉಂಡಿ ಜಾವ್ನ್ ಉಡ್ಲೊ ಮ್ಹಣ್ ಸಮ್ಜೊನ್, ದುಸ್ರಿ ಕಿಂಕ್ರಾಟ್ ದಿಲ್ಲಿ – ಚಾಕರ್ನಿಚ್ಯಾ ವೆಸಾರ್ ಆಸ್‍ಲ್ಲ್ಯಾ ಆಗ್ನೆಸ್ ಸಿಸಿಲಿಯಾನ್.

ಘಡಿಭರ್ ಮತ್ ಚುಕೊನ್ ಪಡ್‍ಲ್ಲಿ ತಿ ಉಟ್ಲ್ಯಾ ಉಪ್ರಾಂತ್, ಸರ್ದಾರಾಂಚ್ಯಾ ಸಿನೊಲೆಚ್ಯಾ ಅರ್ಲುಕೆಚೆಂ ಸಂರಕ್ಷಣ್ ಕರ್ಚಿ ಜವಾಬ್ದಾರಿ ತಿಕಾ ರಾಕೊನ್ ಆಸ್‍ಲ್ಲಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel