ಇಂಫೆರ್ನಾಚಿಂ ದಾರಾಂ – 30: ಅಂಧ್ಕಾರಾಂತ್ ಖಂದ್ಕಾಂತ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 30
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 30: ಅಂಧ್ಕಾರಾಂತ್ ಖಂದ್ಕಾಂತ್

ವ್ಹಯ್. ವಯ್ಲೊ ಆವಾಜ್ ಆಯ್ಕೊನ್, ಸಕಯ್ಲ್ ಥಾವ್ನ್ ವಯ್ರ್ ಆಯಿಲ್ಲ್ಯಾ ತ್ಯಾ ಜಮ್ಯಾಕ್, ವಯ್ರ್ ಜೀವನ್ಮರಣಾಚೊ ಖೆಳ್ ಕಸೊ ಆನಿ ಕೊಣಾ ವರ್ವಿಂ ಜಾಲಾ ಮ್ಹಳ್ಳೆಂ ಕಳಿತ್ ನಾತ್‍ಲ್ಲೆಂ.

ವ್ಹಯ್. ಚಡುಣೆಂ ಪಂದ್ರಾ ವೀಸ್ ಲಸ್ಕರಾಂಚ್ಯಾ ತ್ಯಾ ಹಿಂಡಾಂತ್, ಫರೀದಾ ಬೇಗಮ್ ಫುಡೆಂ ಆಸ್‍ಲ್ಲಿ. ತಿಚ್ಯಾ ಬಗ್ಲೆನ್ ತಿ ಚಾಕರ್ನ್‍ಯೀ, ಬುರ್ಖಾ ಘಾಲುನ್, ಆನಿ ಮುಖಾವರಣ್ ದೆಂವವ್ನ್ – ತೋಂಡ್ ಲಿಪವ್ನ್ – ಆಸ್‍ಲ್ಲಿ.

ಸರ್ದಾರ್ ಸಿಮಾಂವ್ನ್ ಹೆಂ ದೆಖ್ಲೆಂ, ಆನಿ ತೊ ಚಿಕ್ಕೆ ವಿಸ್ಮಿತ್ ಪಾವ್ಲೊ.

ಬಹುಶಃ, ಮಧ್ಯಾನೆರ್ ಭಾಯ್ರ್ ವಚೊನ್, ವೆರೊನಿಕಾಕ್ ಭಾಸಾಯಿಲ್ಲೆಪರಿಂ ಭಾಗೆಂತ್, ಮಹಾದ್ವಾರಾ ಲಾಗಿಂ ಭೆಟ್ಚ್ಯಾ ಖಾತಿರ್, ನ್ಹೆಸೊನ್‍ಂಚ್ ಆಯ್ತಿ ತಿ ಆಸ್‍ಲ್ಲಿ ಜಾಯ್ಜಯ್, ಆನಿ ವಯ್ಲೊ ಆವಾಜ್ ಆಯ್ಕೊನ್, ಸಕ್ಕಡ್‍ಯೀ ಹೆವ್ಶಿನ್ ಯೆತಾನಾ, ಬೇಗಮೆ ಸಾಂಗಾತಾ ತಿಯೀ ಆಯ್ಲಿ ಜಾಯ್ಜಯ್ ಮ್ಹಣ್ ಸರ್ದಾರ್ ಸಿಮಾಂವ್ಕ್ ಘಡ್ಯೆನ್ ಝಳ್ಕಲೆಂ, ಆನಿ ಹಾತ್ ಚುಕೊನ್ ಗೆಲ್ಲ್ಯಾ – ಥಂಯ್ ಥಾವ್ನ್ ಭಾಯ್ರ್ ವೆಚ್ಯಾ – ಅವ್ಕಾಸಾ ಖಾತಿರ್ ಘಡಿಭರ್ ತೊ ಚುರ್ಚುರ್ಲೊ.

ಚಿಕ್ಕೆ ಫುಡೆಂ ಸರೊನ್ – “ಕ್ಯಾ ಹೋಗಯಾ ಇದರ್?” ವಿಚಾರ್ಲೆಂ ಬೇಗಮೆನ್.

“ಬದ್ಮಾಶ್ ಪಳೆ ಥಂಯ್!” ಮ್ಹಣಾಲೊ ಫಕೀರ್ ಮಹಮ್ಮದ್, ಆಪ್ಲೊ ಘಾಯೆಲ್ಲೊ ಬಾವ್ಳೊ ದಾಕವ್ನ್.

“ದಗಲ್ಬಾಜ್! ಸರ್ವ್ ಸತ್ಯಾನಾಸ್ ಜಾತೆಂ!” ಉಸ್ವಾಸ್ಲೊ ದಾಲ್ಮೇದಾ. ಕುಮ್ಕೆಕ್ ಆನಿ ಬಚಾವೆ ಖಾತಿರ್, ಬೇಗಮ್ ಆನಿ ತಿಚ್ಯಾ ಸಾಂಗಾತಾ ಚಡ್ ಜಣ್ ಆಯಿಲ್ಲೆ ಪಳೆವ್ನ್. ಥೊಡ್ಯಾ ವೆಳಾ ಆದಿಂ ತಾಚ್ಯಾ ಶಿರಾಂನಿ ಭಿಯಾನ್ ಘೆಟೆ ಜಾಂವ್ಕ್ ಲಾಗ್‍ಲ್ಲೆಂ ರಗತ್, ಆತಾಂ ಪರತ್ ಚಿಕ್ಕೆ ಪಾತಳ್ ಜಾವ್ನ್ ಧಯ್ರಾನ್ ವ್ಹಾಳೊಂಕ್ ಲಾಗ್ಲೆಂ.

“ಕ್ಯಾ?”

“ವ್ಹೊಹೀ ಶೈತಾನ್..!”

“ಕೌನ್..?”

“ತೊಚ್ ತೊ – ಸರ್ದಾರ್ ಸಿಮಾಂವ್!”

“ಕಿತೆಂ ಮ್ಹಣ್ತಾತ್ ತುಮಿ, ಪಿಶೆ!” ಮ್ಹಣತ್ತ್, ಬೇಗಮ್ ಚಿಕ್ಕೆ ಫುಡೆಂ ಸರ್ಲಿ, ಆನಿ ಸುಫೆದಾರ್ ಭು-ಭೂಕ್ ದೊಳೆ ಉರ್ಕುಟಾವ್ನ್ ಪಳೆಂವ್ಕ್ ಲಾಗ್ಲಿ.

“ಪುಣ್ – ಪುಣ್ ಹೊ ಆಮ್ಚೊ ನವೊ ರಾಕ್ವಲಿ – ಸುಫೆದಾರ್ ಭು-ಭೂ!” ಮ್ಹಣಾಲಿ ತಿ ದುಬಾವೊನ್.

“ಬರಾಬರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್, ದಾಂತ್ ಸೊಡುನ್.

“ಕ್ಯಾ!” ಮ್ಹಣಾಲಿ ತಿ, ವಿಜ್ಮಿತ್ ಜಾವ್ನ್. “ಹೊ ಉಲಯ್ತಾ!”

“ಬರಾಬರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್.

“ಅರೇ, ಕಿತೆಂ ಮತ್ಲಬ್?” ವಿಚಾರ್ಲೆಂ ತಿಣೆಂ. “ತುಂ ಕೋಣ್ ಜಾಶಿ?”

“ಥೊಡ್ಯಾ ವೆಳಾ ಆದಿಂ ತುಮ್ಚೊ ರಾಕ್ವಲಿ!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಪುಣ್ ಆತಾಂ ತುಮ್ಚೊ ಮೊರ್ನಾ ದೂತ್!”

“ವ್ಹಾ! ಕೋಣ್ ತುಂ?” ವಿಚಾರ್ಲೆಂ ತಿಣೆಂ ಅಪಧಯ್ರಾನ್.

“ಸುಫೆದಾರ್ ಭು-ಭೂ – ಪುಣ್ ಆತಾಂ ಸರ್ದಾರ್ ಸಿಮಾಂವ್!

“ತುಂ ಮ್ಹಣ್ ದಿಸ್ತಾ, ಹಾಂಗಾಚಿ ಬೇಗಮ್. ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಸರ್ಕಾರಾಂತ್, ಅಪ್ರಾಧಿ ಜಾವ್ನ್, ನಿತಿಚೊ ಹಾತ್ ಚುಕವ್ನ್ ಹಾಂಗಾಸರ್ ಆಯಿಲ್ಲ್ಯಾ ದೊಗಾಂಕ್ ಕೈದ್ ಕರ್ನ್ ವ್ಹರೊಂಕ್ ಹಾಂವ್ ಆಯ್ಲಾಂ. ಜರ್ ತುಂ ಬಾದಶಹಾ ಟಿಪ್ಪು ಸುಲ್ತಾನಾ ಕಡೆನ್ ಶಾಂತ್ ಸಂಬಂಧ್ ಪಾಚಾರ್ತಾಯ್, ತರ್, ತುಜ್ಯಾ ಲಸ್ಕರಾಂಕ್ ಪಾಟಿಂ ಧಾಡ್, ಆನಿ ತ್ಯಾ ದೊಗಾಂ ಚುಕಿದಾರಾಂಕ್ ಮ್ಹಜ್ಯಾ ತಾಬೆನ್ ದೀ.”

ನಿಮಾಣೆಂ ತರೀ, ಧಯ್ರಾಚೆಂ ಪ್ರದರ್ಶನ್ ಉಪ್ಕಾರ್ತಾ ಜಾಲ್ಯಾರ್ ಉಪ್ಕಾರೊಂದಿ ಮ್ಹಣ್ ತಾಣೆಂ ತಶೆಂ ಮ್ಹಳ್ಳೆಂ.

ತಾಚಿಂ ಉತ್ರಾಂ ಆಯ್ಕೊನ್, ಫಕೀರ್ ಮಹಮ್ಮದ್ ಹಾಸ್ಲೊ.

“ವ್ಹಡ್ಲೊ ಸರ್ದಾರ್ ತುಂ, ನಾಂವಾಡ್ದಿಕ್ ವೀರ್ ತುಂ” ಮ್ಹಣಾಲೊ ತೊ. “ಪುಣ್ ಆಜ್ ತುಜಿ ಕಾಣಿ ಕಾಬಾರ್ ಜಾತೆಲಿ – ಆಮ್ಚ್ಯಾ ಹಾತಾಂತ್ ತುಜಿ ನೀತ್ ಜಾತೆಲಿ.”

“ತುಕಾ ಅಧಿಕ್ ಪ್ರಸಂಗ್ ದೀಂವ್ಕ್ ನಾ” ಮ್ಹಣಾಲಿ ಬೇಗಮ್, ಮಧೆಂಚ್. “ಕಿತೆಂ ಆನಿ ಕಶೆಂ ಕರಿಜಾಯ್ ಮ್ಹಳ್ಳೆಂ ಸಾಂಗೊಂಕ್ ಹಾಂವ್ ಆಸಾಂ.”

“ಹಾಂವೆಂ ಸಾಂಗ್‍ಲ್ಲೆಂ ತುವೆಂ ಆಯ್ಕಲೆಂ – ತುಮಿ ಆಯ್ಕಲೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ತುಮ್ಚಿಂ ಹಾತೆರಾಂ ಸಕಯ್ಲ್ ದವರಾ!”

“ಹ್ಹ-ಹ್ಹಾ!” ಹಾಸ್ಲೊ ತೊಪಾಸಿ ದಾಲ್ಮೇದಾ.

ಸಕ್ಕಡ್, ಥೊಡೊ ವೇಳ್ ಶಾಂತ್ ಜಾಲೆ. ತ್ಯಾ ವೆಳಾರ್, ಬೇಗಮ್ ಸರ್ದಾರ್ ಸಿಮಾಂವ್ಕ್ ಪಳೆವ್ನ್ ರಾವ್ಲಿ. ಉಪ್ರಾಂತ್ ಚಿಂತುನ್ ತಿ ಉಲಯ್ಲಿ:

“ಕಸಲ್ಯಾ ಚಿಂತ್ನಾಂಕ್, ಘಡಿತಾಂನಿ ಕಸಲೊ ಪರಿಣಾಮ್!” ಹಾಸ್ಲಿ ತಿ ಮಾಲಿಸಾಯೆನ್. “ಆಮ್ಚ್ಯಾ ರಾವ್ಳೆರಾಂತ್ ಕಾಮ್ ಸೊಧುನ್ ಆಯಿಲ್ಲೊ, ಮೊನೊ, ಸುಫೆದಾರ್ ಭು-ಭೂ! ಆತಾಂ ಪಳೆಲ್ಯಾರ್, ಮನಿಸ್‍ಚ್ ವೆಗ್ಳೊ. ಆನಿ ತೊಯೀ ಕೋಣ್ ನಹಿಂ ಬಗಾರ್ ಟಿಪ್ಪು ಸುಲ್ತಾನಾಚೊ ಪ್ರಸಿದ್ಧ್ ಕಿರಿಸ್ತಾನ್ ಮಿತ್ರ್ ಆನಿ ಹುದ್ದೆದಾರ್ ಸರ್ದಾರ್ ಸಿಮಾಂವ್!”

“ಬರಾಬರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್, ಜಾಗ್ರುತ್ ರಾವೊನ್.

“ಬರಾಬರ್? ಕಿತೆಂ ಬರಾಬರ್!” ಪುಸ್ಪುಸ್ಲಿ ತಿ ವಾಗಿಣ್. “ಸುಲ್ತಾನಾಚೊಚ್ ಮಾನ್ ದೀವ್ನ್, ತಸಲೊಚ್ ಸ್ವಾಗತ್ ಆಮಿ ತುಕಾ ದಿವ್ಯೆತೊ ಆಸ್ತಾಂ, ಎಕಾ ಕೊಡ್ಯಾಪರಿಂ ವೇಸ್ ಬದ್ಲುನ್ ತುಂ ಯೇವ್ನ್ ಆಮ್ಚ್ಯಾ ಪಾಗಾಕ್ ಭಡ್ತಿ ಜಾಲೊಯ್ ಆನಿ ಆಮ್ಚ್ಯಾ ವಿಶ್ವಾಸಾಚೊ ಘಾತ್ ತುವೆಂ ಕೆಲೊಯ್! ತರೀ ಪರ್ವಾ ನಾ – ಆಮ್ಕಾಂ ದಿಸ್ತಾ ತಶೆಂ ಆಮ್ಚೆ ದೋಗ್ ಲಸ್ಕರ್ ಹಾಂಗಾಸರ್ ಕಲಾಸ್ ಜಾಲ್ಯಾತ್ – ತರೀ ಪರ್ವಾ ನಾ. ಸರ್ವ್ ಆಮಿ ವಿಸ್ರೊಂಕ್ ಆಬ್ಳೆ ತಯಾರ್. ತುಜ್ಯಾ ಹಾತಾಂತ್ಲಿ ತಲ್ವಾರ್ ಸಕಯ್ಲ್ ದವರ್ – ಆನಿ…”

“ಆನಿ?”

“ಖರೊ ಮಿತ್ರ್ ಜಾವ್ನ್ ಆಮ್ಚ್ಯಾ ಅಂತಃಪುರಾಂತ್ ಪಾಯ್ ದವರ್…” ಮ್ಹಣಾಲಿ ತಿ, ಲಜ್ ಸಾಂಡುನ್.

ತಿಚ್ಯಾ ಬಗ್ಲೆನ್ ಆಸ್‍ಲ್ಲ್ಯಾ ತ್ಯಾ ಚಾಕರ್ನಿನ್, ಮುಖ್ ಧಾಂಪ್‍ಲ್ಲ್ಯಾ ಆವರಣಾ ಭಿತರ್ ತರೀ, ಸೊಡ್‍ಲ್ಲೊ ಶ್ವಾಸ್, ಸರ್ದಾರ್ ಸಿಮಾಂವ್ಕ್ ಆಯ್ಕಲೊ ಆನಿ ತೊ ಕ್ಷಣಿಂ ಅಜ್ಯಾಪ್ಲೊ.

ಪಾಟ್ಲ್ಯಾನ್, ವೆರೊನಿಕಾ ಕುಂವರ್ನಿನ್‍ಯೀ, ಬೇಗಮೆಚಿಂ ಉತ್ರಾಂ ತಶಿಂ ಆಯ್ಕೊನ್, ಅಜ್ಯಾಪೊನ್ ಆನಿ ಲಜೆನ್ ಶ್ವಾಸ್ ಸೊಡ್ಲೊ.

“ತುಜಿಂ ಉತ್ರಾಂ ಮ್ಹಾಕಾ ಆಯ್ಕಲಿಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. ಇತ್ಲ್ಯಾ ವೆಳಾನ್ ತಾಚಿ ಪುರಾಸಣ್ ನಿಂವ್‍ಲ್ಲಿ, ಪುಣ್ ತಾಚಿ ಮತ್ ಚಡ್ ತೀಕ್ ಜಾಲ್ಲಿ. “ತುವೆಂ ಉಲಯಿಲ್ಲೆಂ ತಶೆಂ ಆಸೊಂ – ತುಜೊ ವಿಚಾರ್ ಕರುಂಕ್ ವೇಳ್ ಪಾಟಿಂ ಆಸಾ. ಪುಣ್ ಪಯ್ಲೆಂ ಹ್ಯಾ ತುಜ್ಯಾ ಕಸಾಯ್‍ಗಾರಾಂಕ್ ಪಾಟಿಂ ಧಾಡ್, ಆನಿ ಹಾಂವೆಂ ವಿಚಾರ್ಚ್ಯಾ ತ್ಯಾ ದೊಗಾಂಕ್ ಮ್ಹಜ್ಯಾ ತಾಬೆನ್ ದೀ…”

ತಶೆಂ ಮ್ಹಣ್ತಾನಾ, ತಾಚಿ ದೀಷ್ಟ್, ಬೇಗಮೆಚ್ಯಾ ಉಜ್ವ್ಯಾಕ್ ಆಸ್‍ಲ್ಲ್ಯಾ ಯುವಕಾ ತೆವ್ಶಿನ್ ಗೆಲಿ. ತ್ಯಾ ಯುವಕಾಚ್ಯಾ ಉಜ್ವ್ಯಾ ಹಾತಾಂತ್ ತಲ್ವಾರ್ ಆಸ್‍ಲ್ಲಿ. ತಾಚ್ಯಾ ಕಮರ್‌ಬಾಂಧಾಂತ್ ದೇಡ್ ಗೇಣ್ ಲಾಂಬಾಯೆಚಿ ಭಾಲಿ ಆಸ್‍ಲ್ಲಿ. ತಿ ಭಾಲಿ ಪೊಶೆಂವ್ಕ್ ತಾಣೆಂ ಆಪ್ಲೊ ದಾವೊ ಹಾತ್ ವಯ್ರ್ ಹಾಡ್ಲೊ.

ತ್ಯಾ ಹಾತಾಕ್ ಆಸ್‍ಲ್ಲಿಂ ಬೊಟಾಂ ಚಾರ್‌ಚ್!

“ತುಂ ಪಿಶ್ಯಾಂಪರಿಂ ಉಲಯ್ತಾಯ್!” ಮ್ಹಣಾಲಿ ಬೇಗಮ್.

“ಜಾಂವ್ಕ್ ಪುರೊ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಪುಣ್ ಉಗ್ಡಾಸ್ ದವರ್ – ಹಾಂವ್, ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ನಾಂವಾನ್ ಉಲಯ್ತಾಂ…”

“ವ್ಹಾ! ಮ್ಹಜ್ಯಾ ಆಸ್ಥಾನಾಂತ್ ಆನಿ ಮ್ಹಜ್ಯಾ ರಾವ್ಳೆರಾಂತ್, ಆನಿ ಪ್ರತ್ಯೇಕ್ ಜಾವ್ನ್ ಹ್ಯಾ ಪ್ರತ್ಯೇಕ್ ವೆಳಾ…” ಮ್ಹಣ್ತಾಲಿ ಬೇಗಮ್.

“ಕಿತ್ಯಾಕ್ ಘಳಾಯ್?” ಮ್ಹಣಾಲೊ ಫಕೀರ್ ಮಹಮ್ಮದ್. “ತಾಕಾ ಮುಗ್ದುನ್ ಸೊಡ್ಯಾಂ!”

ತಲ್ವಾರಿ ಸಮೇತ್ ಮೇಟ್ ತಾಣೆಂ ಫುಡೆಂ ಕಾಡ್ಲೆಂ. ಪುಣ್ ತ್ಯಾಚ್ ವೆಳಾರ್, ಸರ್ದಾರ್ ಸಿಮಾಂವ್ಚ್ಯಾ ಹಾತಾಂತ್ಲಿ ತಲ್ವಾರ್, ಝಗ್ಲಾಣ್ಯಾಪರಿಂ ತಾಚ್ಯಾ ನಾಕಾಕ್ ಉಮೊ ದೀಂವ್ಕ್ ಮ್ಹಳ್ಳೆಪರಿಂ ಝಳ್ಕತಚ್, ಫಕೀರ್ ಮಹಮ್ಮದ್ ಭಿಯಾನ್ ಪಾಟಿಂ ಉಡ್ಲೊ.

“ಖಾಮೋಶ್!”

“ಬದ್ಮಾಶ್!”

“ದಗಲ್ಬಾಜ್!”

“ತುಜೆಂ ಹಾತೆರ್ ಶರಣ್ ದೀ!” ಮ್ಹಣಾಲಿ ಬೇಗಮ್.

“ದಿವ್ಯೆತ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಪುಣ್ ನಹಿಂ ತುಮ್ಚ್ಯಾ ಹಾತಾಂತ್, ಬಗಾರ್ ತುಮ್ಚ್ಯಾ – ಕೋಣ್ ಫುಡೆಂ ಸರ್ತಾ ತಾಂಚ್ಯಾ – ಶರೀರಾಂತ್!”

“ವ್ಹಯ್ಗೀ?”

“ಜರೂರ್!”

“ಚಲೋ! ಧರಾ ತಾಕಾ!” ಬೇಗಮೆನ್ ಫರ್ಮಾಯ್ಲೆಂ.

ಲಸ್ಕರ್ ಫುಡೆಂ ಸರ್ಲೆ.

ಮಾನಿನ್ ವೆರೊನಿಕಾ ಕುವೆಲ್, ಪುರ್ತಿ ಭಿಯೆಲಿ. ಸರ್ದಾರ್ ಸಿಮಾಂವ್ಚೊ ಜೀವ್ ಆಖೇರ್ ಜಾಂವ್ಕ್ ಆನಿ ಚಡ್ ವೇಳ್ ನಾ ಮ್ಹಣ್ ತಿ ಭಿಯೆಲಿ.

“ಚಲೊ! ಯೆಯಾ!” ಮ್ಹಣಾಲೊ ಸರ್ದಾರ್ ಸಿಮಾಂವ್. ತಾಚ್ಯಾ ಜಿಣ್ಯೆಂತ್ ಹೆಂ ಏಕ್ ನಿಮಾಣೆಂ ಪ್ರಕರಣ್ ಜಾಂವ್ಕ್ ಪುರೊ ಮ್ಹಣ್ ತಾಚ್ಯಾ ಮತಿಂತ್‍ಯೀ ಝಳ್ಕಲೆಂ. ತರೀ, ಭಾಯ್ಲ್ಯಾನ್ ತಾಣೆಂ ಭ್ಯೆಂ ದಾಕಂವ್ಕ್ ನಾ.

ಎಕ್‍ಚ್‍ಫರಾ, ತಲ್ವಾರಿ ಝಳ್ಪಾವ್ನ್ ಫುಡೆಂ ಆಯಿಲ್ಲೆ ದೋಗ್ ಜಣ್ ಶಿಪಾಯ್, ಸರ್ದಾರ್ ಸಿಮಾಂವ್ಚ್ಯಾ ಹಾತಾಂತ್ಲ್ಯಾ ತಲ್ವಾರಿಚೊ ಖೆಳ್ ಆನಿ ವೇಗ್ ಸಮ್ಜೊನ್, ಪಾಟಿಂ ಸರ್ಲೆ.

“ಧರಾ ತಾಕಾ!” ಬೇಗಮೆನ್ ಧೆಂಕ್ಣೊ ಮಾರ್ಲೊ.

“ಮಾರಾ ತಾಕಾ!”

“ಕಾತ್ರುನ್ ಕಾಪ್ಯಾ ತಾಕಾ!”

ಶಿಪಾಯ್ ಪರ್ತ್ಯಾನ್ ಫುಡೆಂ ಸರ್ಲೆ.

ಥೊಡ್ಯೊ ಘಡ್ಯೊ ಪಾಶಾರ್ ಜಾಲ್ಯೊ. ಶಿಪಾಯ್ ಫುಡೆಂ ಸರೊಂಕ್ ಸಕನಾ ಜಾಲೆ. ತರೀ, ಸರ್ದಾರ್ ಸಿಮಾಂವ್ ಥಕೊಂಕ್ ಲಾಗ್ಲೊ. ತಸೊಚ್ ಕಿತ್ಲೊ ವೇಳ್ ತಾಣೆಂ ಝುಜ್ಯೆತ್?

“ತಾಚ್ಯಾ ಹಾತಾಂತ್ಲಿ ತಲ್ವಾರ್ ಉಸ್ಳಯಾ, ಆನಿ ಜಿವೊಚ್ ಧರಾ ತಾಕಾ – ತಾಚ್ಯಾ ಸತ್ವಾಚಿ ಆಮ್ಕಾಂ ಪುರ್ತಿ ಪರೀಕ್ಷಾ ಕರಿಜಾಯ್!” ಮ್ಹಣಾಲಿ ಬೇಗಮ್.

ತಾಚ್ಯಾ ಪಾಟ್ಲ್ಯಾನ್, ವೆರೊನಿಕಾ ಪರ್ತ್ಯಾನ್ ಸುಸ್ಕಾರ್ಲಿ.

“ಭಿಯೆನಾಕಾ ಭಯ್ಣಿ!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಹಾಂವ್ ತಾಂಕಾಂ ಜಿವೊಚ್ ಜಾಯ್ ಜಾಲ್ಲ್ಯಾನ್, ಥೊಡ್ಯಾ ಪುಣೀ ಭರ್ವಶ್ಯಾಕ್ ಅವ್ಕಾಸ್ ಆಸಾ.”

ಪರ್ತ್ಯಾನ್ ದೋಗ್ ಜಣ್, ತಲ್ವಾರಿ ಭರಾನ್ ಖೆಳವ್ನ್ ಫುಡೆಂ ಸರ್ಲೆ. ತಾಂಚಿ ಅವಸ್ಥಾ ಪಳೆವ್ನ್ ಸರ್ದಾರ್ ಸಿಮಾಂವ್ಕ್ ಹಾಸೊಂಕ್ ಆಯ್ಲೆಂ. ಎಎಕ್ಲ್ಯಾಕ್ ಫುಡೆಂ ಸರೊಂಕ್ ಧಯ್ರ್ ನಾತ್‍ಲ್ಲೆಂ. ದೊಗೀ ಸಾಂಗಾತಾ ಫುಡೆಂ ಸರ್ತಾನಾ, ತಾಂಕಾಂಚ್ ಎಕಾಮೆಕಾಕ್ ಅಡ್ಕಳ್ ತೆ ಕರ್ತಾಲೆ.

“ಕೋಣ್ ಪುಣೀ ಎಕ್ಲೊ ಭಿತರ್ ವಚಾ!” ಬೇಗಮೆನ್ ತಾಕಿದ್ ದಿಲಿ. ಎಕ್ಲೊ ಚಿಕ್ಕೆ ಫುಡೆಂ ಆಯ್ಲೊ – ತಸೊಚ್ ಜೀವ್ ಉರಂವ್ಚ್ಯಾ ಖಾತಿರ್ ಪಾಟಿಂ ಉಡ್ಲೊ.

ತಸೊಚ್ ಥೊಡೊ ವೇಳ್, ಕಾಂಯ್ ಪ್ರತಿಫಳ್ ನಾಸ್ತಾಂ ಪಾಶಾರ್ ಜಾಲೊ.

ಆತಾಂ ಫಕೀರ್ ಮಹಮ್ಮದ್, ಪಯ್ಲೆಂಚೆಪರಿಂಚ್ ಖೆಳ್ ಚಲಂವ್ಕ್, ಆನ್ಯೇಕ್ಲ್ಯಾಕ್ ಸಾಂಗಾತಾ ಘೆವ್ನ್ ಫುಡೆಂ ಸರ್ಲೊ. ತೊ ಸಾಂಗಾತಿ ಸಟ್ಟ್ ಕರ್ನ್ ದಿಂಬಿಯಾಂನಿ ಪಡ್ಲೊ, ಆನಿ ಮೆಜಾ ಪಂದ್ಲ್ಯಾನ್ ತ್ಯಾ ಮೊಡ್ಯಾ ವಯ್ಲ್ಯಾನ್ ಸರ್ದಾರ್ ಸಿಮಾಂವ್ಚ್ಯಾ ಪಾಯಾಂಕ್ ತೊಪುಂಕ್ ತಾಣೆಂ ಪ್ರಯತ್ನ್ ಕೆಲೆಂ. ತ್ಯಾಚ್ ವೆಳಾರ್ ಫಕೀರ್ ಮಹಮ್ಮದಾನ್ ಮೆಜಾ ವಯ್ಲ್ಯಾನ್ ತಲ್ವಾರ್ ದಾಕಯ್ಲಿ. ಉಪಾಯ್ ನಾಸ್ತಾಂ ಸರ್ದಾರ್ ಸಿಮಾಂವ್ನ್ ಏಕ್ ಮೇಟ್ ಪಾಟಿಂ ಸರಜಾಯ್ ಪಡ್ಲೆಂ.

ತೊ ಸಲ್ವಲೊ, ವಾ, ಸಲ್ವೊಂಕ್ ಲಾಗಿಂ ಜಾಲೊ ಮ್ಹಣ್ ಚಿಂತುನ್, ಮುಖ್ಲ್ಯಾ ಪಕ್ಷೆಕ್ ಥೊಡೆಂ ಧಯ್ರ್ ಆಯ್ಲೆಂ. ತಾಣಿಂ ತಶೆಂ ಚಿಂತುನ್ ಆಸ್ತಾನಾಂಚ್, ಸರ್ದಾರ್ ಸಿಮಾಂವ್ನ್ ದಿಂಬಿ ಮಾರ್ಲಿ. ತಾಚ್ಯಾ ಹಾತಾಂತ್ಲ್ಯಾ ತಲ್ವಾರಿನ್ ಮೆಜಾ ಪಂದಾಕ್ ಏಕ್ ಖೊಂಚ್ ಮಾರ್ಲಿ. ತಲ್ವಾರಿಚೊ ಧೊಮೊಸ್, ತ್ಯಾ ಬಿರ್ಮತ್ ಶಿಪಾಯಾಚ್ಯಾ ಹರ್ದ್ಯಾಚ್ಯಾ ಘುಡಾಂತ್ ಪ್ರವೇಶ್ ಜಾವ್ನ್ ಪಾಟಿಂ ಆಯಿಲ್ಲೊ.

ಪಯ್ಲೆಂ ಆಸ್‍ಲ್ಲ್ಯಾ ಮೊಡ್ಯಾಚೆರ್, ಆನ್ಯೇಕ್ ಮೊಡೆಂ ಪಡ್ಲೆಂ.

ತಶೆಂ ಜಾವ್ನ್, ಸರ್ದಾರ್ ಸಿಮಾಂವ್ ನೀಟ್ ಜಾಂವ್ಚ್ಯಾ ಆದಿಂಚ್ ದುಸ್ರೆಂ ಏಕ್ ಅವ್ಘಡ್ ಸಂಭವ್ಲೆಂ:

ಫಕೀರ್ ಮಹಮ್ಮದಾನ್, ಆಪ್ಲ್ಯಾ ಹಾತಾಂತ್ಲಿ ತಲ್ವಾರ್ ಸಕಯ್ಲ್ ಸೊಡುನ್, ತೆಣೆಂಚ್ ಬಗ್ಲೆಕ್ ಆಸ್‍ಲ್ಲೆಂ ತೆಂ ಸಾಗ್ವಣೆಚೆಂ ದಾಡ್ಡೆಂ ಕದೆಲ್ ಉಕ್ಲುನ್ – ಸರ್ದಾರ್ ಸಿಮಾಂವ್ಚಿ ತಕ್ಲಿ ಭೆಸಾಂ ಕರ್ಚ್ಯಾ ಇರಾದ್ಯಾನ್ – ಉಡವ್ನ್ ಜಾಲ್ಲೆಂ. ಮೆಜಾ ಪಂದಾಕ್ ಸರ್ದಾರ್ ಸಿಮಾಂವ್ ಬಾಗ್ವೊನ್, ವಿದ್ಯುತ್ವೇಗಾನ್ ಉಬೊ ಜಾಲ್ಲ್ಯಾ ವರ್ವಿಂ, ತಾಚ್ಯಾ ತಕ್ಲೆರ್ ಆಪ್ಟೊಂಕ್ ಆಸ್‍ಲ್ಲೆಂ ತೆಂ ಕದೆಲ್, ಹಾಯ್, ತಾಚ್ಯಾ ಭುಜಾಚೆರ್ ಧಪ್ಟಲೆಂ. ಕದೆಲಾಚೊ ಏಕ್ ಪಾಯ್ ತಾಚ್ಯಾ ಬಾವ್ಳ್ಯಾಕ್ ಧಾಡಾಲೊ, ಆನಿ ತೊ ಬಾವ್ಳೊ, ಘಡ್ಯೆ ನಿರ್ಣೆವ್ನ್ ರೂಕ್ ಜಾಲೊ.

ತಾಚ್ಯಾ ಹಾತಾಂತ್ಲಿ ತಲ್ವಾರ್ ಉಸ್ಳೊನ್, ಠಂಠ್ರರೊನ್ ಧರ್ಣಿರ್ ಪಡ್ಲಿ.

ಭಿಯಾನ್ ಕಿಂಕ್ರಾಟ್ ದಿಂವ್ಚ್ಯಾ ಖಾತಿರ್, ವೆರೊನಿಕಾ ಕುವೆಲಿನ್ ತೋಂಡ್ ಉಗ್ತೆಂ ಕೆಲೆಂ. ತರೀ ತಿಚ್ಯಾ ತೊಂಡಾಂತ್ಲ್ಯಾನ್ ಆವಾಜ್ ಭಾಯ್ರ್ ಯೇಂವ್ಕ್ ಸಕ್ಲೊ ನಾ.

ಜಾಲ್ಯಾರೀ, ಕಿಂಕ್ರಾಟೆ ಸಾರ್ಕೊ ಏಕ್ ಉದ್ಗಾರ್ ಆಯ್ಕಲೊ.

ಆಕಾಂತಾಚೊ ತೊ ಆವಾಜ್, ತ್ಯಾ ಚಾಕಿರ್ನಿಚ್ಯಾ ತೊಂಡಾ ಥಾವ್ನ್ ಆಯಿಲ್ಲೊ ಮ್ಹಣ್ ಕೊಣಾಯ್ಕೀ ಸಮ್ಜೊಂಕ್ ನಾ.

ದುಸ್ರ್ಯಾ ಘಡ್ಯೆ ಸರ್ದಾರ್ ಸಿಮಾಂವ್ನ್ ತಲ್ವಾರ್ ಪರತ್ ವಿಂಚ್ಲಿ. ತಾಚೊ ಬಾವ್ಳೊ, ಚಿಕ್ಕೆ ಮುಯೆವ್ನ್ ರೂಕ್‍ಸೊ ಜಾಲ್ಲೊ ಜಾಲ್ಯಾರೀ, ಜೀವ್ ಬಚಾವ್ ಕರ್ಚ್ಯಾ ಖಾತಿರ್ ಆನಿಕ್‍ಯೀ ಝುಜೊಂಕ್ ತೊ ಅತ್ರೆಗ್ಲೊ.

“ಭಯ್ಣಿ, ಭಿತರ್ ಕಸಲೆಂಯೀ ವಸ್ತುರ್ ವಾ ದೊಗ್ಲೊ ಪುಣೀ ಆಸ್ಲ್ಯಾರ್ ಹೆವ್ಶಿನ್ ದೀ” ಮ್ಹಳೆಂ ತಾಣೆಂ. ತಶೆಂಚ್, ಭಾಯ್ಲ್ಯಾ ಆವರಾ ಥಾವ್ನ್, ಕೊಣೆಂಯೀ ಭಿತರ್ ಯೇನಾಶೆಂ ಆಡಾಂವ್ಕ್ ತೊ ಆಯ್ತೊ ಜಾವ್ನ್ ರಾವ್ಲೊ.

ಚಡ್ ವೇಳ್ ಆಸಾಸೊ ನಾ. ಎಕ್‍ಚ್ ಹೆವ್ಶಿನ್ ವಾ ತೆವ್ಶಿನ್ ಮ್ಹಣ್ಪಾಚಿ ಘಡಿ ವೆಗಿಂ ಆಯ್ತಿ ಜಾತೆಲಿ ಮ್ಹಣ್ ತಾಕಾಯೀ ಕಳಿತ್ ಆಸ್‍ಲ್ಲೆಂ.

ವೆರೊನಿಕಾ ಕುವೆಲ್ ಭಿತರ್ ಸರೊನ್, ಥಂಯ್ಸರ್‌ಚ್ ಕದೆಲಾರ್ ಆಸ್‍ಲ್ಲೊ ಏಕ್ ಬುರ್ಖಾ ವಿಂಚುನ್ ಘೆವ್ನ್ ಭಾಯ್ರ್ ಆಯ್ಲಿ. ಆತುರಾಯೆನ್ ಸರ್ದಾರ್ ಸಿಮಾಂವ್ನ್ ಆಪ್ಲ್ಯಾ ದಾವ್ಯಾ ಹಾತಾನ್ ತೊ ಘೆತ್ಲೊ, ಆನಿ ತುರ್ತಾನ್ ಆಪ್ಲ್ಯಾ ದಾವ್ಯಾ ಕೊಂಪ್ರಾಕ್ ರೆವ್ಡಾವ್ನ್, ಪೊಂತಾಂ ಉಮ್ಕಳಾವ್ನ್ ಧರ್ಲೊ.

ಮೆಜಾ ಪಂದ್ಲ್ಯಾನ್ ತಲ್ವಾರ್ ಘುಂವ್ಡಾಂವ್ಚ್ಯಾ ಶಿಪಾಯಾಕ್ ಚಿಕ್ಕೆ ಲಾಗಿಂ ತೊ ಸರ್ಲೊ. ಶಿಪಾಯಾನ್ ಮುಖಾರ್ ತೊಪುಂಕ್ ಲೊಟ್ಲೆಲಿ ತಲ್ವಾರ್, ಸರ್ದಾರಾಚ್ಯಾ ಹಾತಾಕ್ ರೆವೊಡ್ ಘಾಲ್ನ್ ಆಸ್‍ಲ್ಲ್ಯಾ ದಗ್ಲ್ಯಾಚ್ಯಾ ಫಾಳಿಯಾಂನಿ ಶಿರ್ಕಲಿ.

ತ್ಯಾಚ್ ವೆಳಾರ್, ಮೆಜಾ ವಯ್ಲ್ಯಾನ್ ತಾಕಾ ಫಾಪ್ಸುಂಕ್ ಆನಿ ಮೇಜ್ ಪಾಟಿಂ ಲೊಟುಂಕ್ ಪ್ರಯತ್ನ್ ಕೆಲ್ಲ್ಯಾ ಫಕೀರ್ ಮಹಮ್ಮದಾಕ್ ತಾಣೆಂ ಪಾಟಿಂ ಉಸ್ಳಾಯ್ಲೊ.

ತಿತ್ಲ್ಯಾರ್, ದಗ್ಲ್ಯಾಚ್ಯಾ ಫಾಳಿಯಾಂನಿ ಶಿರ್ಕಲ್ಲಿ ತಲ್ವಾರ್ ಪಾಟಿಂ ವೊಡುನ್ ತೊ ಶಿಪಾಯ್ ಆಪ್ಲಿ ಶಿಪಾಯ್ಗಿರಿ ದಾಕಂವ್ಕ್ ಪ್ರಯತ್ನ್ ಕರ್ಚ್ಯಾ ಆದಿಂ, ಸರ್ದಾರ್ ಸಿಮಾಂವ್ನ್ ಆಪ್ಲೆಂ ಮೇಟ್ ಬಗ್ಲೆಕ್ ಕಾಡ್ಲೆಂ – ಬಾಗ್ವಲ್ಲೊ ತೊ ನೀಟ್ ಜಾಂವ್ಚ್ಯಾ ಭಿತರ್ – ತಾಚಿ ತಲ್ವಾರ್ ತ್ಯಾ ಶಿಪಾಯಾಚ್ಯಾ ಆಂಗಾಂತ್ ರಿಗೊನ್ ಪಾಟಿಂ ಆಯಿಲ್ಲಿ.

ತೊ ಶಿಪಾಯ್, ಭಿಯಾನ್ ಏಕ್ ಪಾವ್ಟಿಂ ಘೊಂಕ್ಲೊ, ಖೊಂಕ್ಲೊ ಆನಿ ಹಾತ್ ಪಾಯ್ ನೀಟ್ ಕರ್ನ್ ಕಾಬಾರ್ ಜಾಲೊ. ಪುಣ್ ತೆಂ ಪಳೆಂವ್ಕ್ ವಾ ಸಮ್ಜೊಂಕ್ ಸರ್ದಾರ್ ಸಿಮಾಂವ್ಕ್ ವೇಳ್ ಮೆಳೊಂಕ್ ನಾ. ತೊಚ್ ವೇಳ್ ಆಯಿನ್ನ್ ಮ್ಹಣ್ ಸಮ್ಜೊನ್, ಫಕೀರ್ ಮಹಮ್ಮದ್ ಆನಿ ಹೆರ್ ದೋಗ್ ಶಿಪಾಯ್ ಫುಡೆಂ ಉಡ್ಲೆ, ಆನಿ ಮೇಜ್ ತಾಣಿಂ ಪಾಟಿಂ ಲೊಟ್ಲೆಂ.

ಬಾಗ್ವೊನ್ ಉಬೊ ಜಾಂವ್ಚ್ಯಾ ಸರ್ದಾರ್ ಸಿಮಾಂವ್ಚ್ಯಾ ಆಂಗಾರ್ ತೆಂ ಮೇಜ್ ಆಪ್ಟಲೆಂ. ಮೆಜಾಚೊ ಕೊನ್ಸೊ ತಾಚ್ಯಾ ಭುಜಾಕ್ ಹಾಂಡ್ಲೊ ಆನಿ ತೊ ಪಾಟಿಂ ಶೆವ್ಟಲೊ.

ಮಾನಿನ್ ವೆರೊನಿಕಾ ಕುವೆಲಿನ್ ಕಿಂಕ್ರಾಟ್ ದಿಲಿ.

ಬೇಗಮೆಚ್ಯಾ ಬಗ್ಲೆನ್ ಆಸ್‍ಲ್ಲ್ಯಾ ಚಾಕರ್ನಿನ್‍ಯೀ ಕಿಂಕ್ರಾಟ್ ದಿಲಿ.

ಪುಣ್, ಸರ್ದಾರ್ ಸಿಮಾಂವ್ ಉಟೊನ್ ಉಬೊ ಜಾಲ್ಲೊ, ತರೀ, ವೇಳ್ ಉತ್ರೊನ್ ಗೆಲ್ಲೊ – ಬಾಗ್ಲಾಕ್ ಆಡ್ ಆಸ್‍ಲ್ಲೆಂ ಮೇಜ್ ಹೆವ್ಶಿನ್ ವಾಂಕ್ಡೆಂ ಜಾಲ್ಲ್ಯಾನ್, ಭಾಯ್ಲ್ಯಾನ್ ಆಸ್‍ಲ್ಲ್ಯಾ ಲಸ್ಕರಾಂಚೊ ಜಮೊ, ಹಾಸೊನ್ ಆನಿ ಕೇಕೇವ್ನ್ ಫುಡೆಂ ಯೇಂವ್ಕ್ ಲಾಗ್ಲೊ!

ತಾಂಚ್ಯಾ ಮಧೆಂಗಾತ್, ಆನಿ ಚಿಕ್ಕೆ ಫುಡೆಂ, ಬೇಗಮ್ ಜಹಾನಾರಾ ಆನಿ ತಿ ಚಾಕರ್ನ್ ಆಸ್‍ಲ್ಲಿಂ.

“ಆತಾಂ ಪುಣೀ ಶರಣ್ ಜಾ!” ಮ್ಹಣಾಲಿ ಬೇಗಮ್.

“ಹ್ಹ-ಹ್ಹಾ!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆಬ್ಳೆ, ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ನಾಂವಾನ್, ತುಮ್ಚೆ ತಸಲ್ಯಾಂಕ್ ಶರಣ್ ಜಾಂವ್ಚಿ ರೀತ್ ಹಾಂವ್ ದಾಕಯ್ತಾಂ.”

ತಾಚ್ಯಾ ಹಾತಾಂತ್ಲಿ ತಲ್ವಾರ್, ಥೊಡೊ ವೇಳ್ ಝಗ್ಲಾವ್ನ್ ಕಿಟಾಳಾಂ ಉಬಂವ್ಕ್ ಲಾಗ್ಲಿ. ಫುಡ್ಲಿ ಪಾಟ್ಲಾಮ್, ಚಿಕ್ಕೆ ಪಾಟಿಂ ಸರ್ಲಿ.

ಸರ್ದಾರ್ ಸಿಮಾಂವ್ಚೆ ಹಾತ್ ಪಾಯ್ ವೊಳೊಂಕ್ ಆನಿ ಜಡ್ ಜಾಂವ್ಕ್ ಲಾಗ್ಲೆ.

ತಿತ್ಲ್ಯಾರ್, ತ್ಯಾ ದಿಸಾಚೆಂ ನಿಮಾಣೆಂ ಖುಣ್ ಜಾಲೆಂ:

ತೊಪಾಸಿ ದಾಲ್ಮೇದಾಚ್ಯಾ ಹುಕ್ಮೆನ್, ಎಕ್ಲ್ಯಾ ಶಿಪಾಯಾನ್, ತೆವ್ಶಿಲೆಂ ದಾಡ್ಡೆಂ ಕದೆಲ್ ಉಕ್ಲುನ್, ಸರ್ದಾರ್ ಸಿಮಾಂವ್ಚ್ಯಾ ತಕ್ಲೆಕ್ ಜೊಕುನ್ ಉಡವ್ನ್ ಜಾಲೆಂ!

ಕದೆಲ್, ತಕ್ಲೆಕ್ ಲಾಗಿಂ ಪಾವ್ತಾನಾ, ಸ್ವರಕ್ಷಣಾ ಖಾತಿರ್ ಸ್ವಯಂ ಪ್ರೇರಿತ್ ಜಾವ್ನ್ ಸರ್ದಾರ್ ಸಿಮಾಂವ್ಚೊ ಹಾತ್ ವಯ್ರ್ ಆಯ್ಲೊ. ಕದೆಲ್ ತಾಚ್ಯಾ ಬಾವ್ಳ್ಯಾಕ್ ಆಪ್ಟಲೆಂ ಆನಿ ತಾಚ್ಯಾ ಹಾತಾಂತ್ಲಿ ತಲ್ವಾರ್ ಪರ್ತ್ಯಾನ್ ಉಸಳ್ಳಿ.

ತಲ್ವಾರ್ ವಿಂಚುಂಕ್ ವೇಳ್ ನಾಸ್ತಾಂ, ಸರ್ದಾರ್ ಸಿಮಾಂವ್ನ್ ಪಾಟಿಂ ಸರಜಾಯ್ ಪಡ್ಲೆಂ. ತೊ ಪಾಟಿಂ ಸರ್ಲೊ. ಬೇಗಮೆಚೆ ಶಿಪಾಯ್ ತಾಕಾ ವೆಡೊ ಮಾರ್ಚ್ಯಾ ಇರಾದ್ಯಾನ್ ಫುಡೆಂ ಸರ್ಲೆ.

“ಜಿವೊಚ್ ಧರಾ ತಾಕಾ!” ಬೇಗಮೆನ್ ಪರ್ತ್ಯಾನ್ ಹುಕುಮ್ ದಿಲಿ. ತಿ ಹುಕುಮ್ ಪಾಳುಂಕ್ ತೆ ಶಿಪಾಯ್ ಚಡ್ಪಡ್ತಾಲೆ. ಮಾನಿನ್ ವೆರೊನಿಕಾ ಕುವೆಲ್ ಹೆಂ ಸಮ್ಜೊನ್ ಪುರ್ತಿಚ್ ಭಿಯೆಲಿ.

ತ್ಯಾಚ್ ವೆಳಾರ್, ಬೇಗಮೆಚ್ಯಾ ಬಗ್ಲೆನ್ ಆಸ್‍ಲ್ಲಿ ಚಾಕರ್ನ್ ಚಿಕ್ಕೆ ಫುಡೆಂ ಸರ್ಲಿ. ಬಾಗ್ವೊನ್, ಥಂಯ್ಸರ್ ಪಡೊನ್ ಆಸ್‍ಲ್ಲಿ ತಿ ತಲ್ವಾರ್ ತಿಣೆಂ ವಿಂಚ್ಲಿ. ಹೆರಾಂಕ್ ತೆಂ ಸಮ್ಜೊಂಕ್ ನಾ ಜಾವ್ಯೆತ್, ಪುಣ್ ತಿಣೆಂ ತಶೆಂ ಫುಡೆಂ ರಾವ್‍ಲ್ಲ್ಯಾ ವರ್ವಿಂ, ಸರ್ದಾರ್ ಸಿಮಾಂವ್ಕ್ ಧರುಂಕ್ ಯೆತೆಲ್ಯಾಂಕ್ ಅಡ್ಕಳ್ ಜಾಲ್ಲಿ.

ಫುಡೆಂ ಕಿತೆಂ ಜಾತಾ ಮ್ಹಣ್ ಸಮ್ಜೊಂಚ್ಯಾ ಆದಿಂ, ಸರ್ದಾರ್ ಸಿಮಾಂವ್ನ್ ದುಸ್ರೊ ಏಕ್ ನಿಚೆವ್ ಕೆಲೊ.

ತ್ಯಾ ಕುಡಾಕ್, ಸರಳಾಂಚೆಂ ಜನೆಲ್ ನಾತ್‍ಲ್ಲೆಂ. ಬಗಾರ್, ಚಡುಣೆಂ ಏಕ್ ಆಳ್ ಉಬಾರಾಯೆರ್, ಉದೆಂತಿಚ್ಯಾ ವಣದಿಂತ್, ಏಕ್ ಹಾತಿ ಚೌಕಾಚೊ ಬುರಾಕ್ ಆಸ್‍ಲ್ಲೊ.

ತೆವ್ಶಿನ್ ಪಡೊನ್ ಆಸ್‍ಲ್ಲೆಂ ಕದೆಲ್ ಸರ್ದಾರ್ ಸಿಮಾಂವ್ನ್ ವಣದಿಕ್ ಲಾಗಿಂ ವೊಡ್ಲೆಂ ಆನಿ ತಾಚೆರ್ ಪಾಯ್ ದವರ್ನ್ ವಯ್ರ್ ತೊ ಚಡ್ಲೊ. ತಾಚೊ ಮತ್ಲಬ್ ಕಸಲೊ ಮ್ಹಣ್ ಹೆರಾಂಕ್ ಸಮ್ಜೊಂಚ್ಯಾ ಆದಿಂ, ಉಗ್ತ್ಯಾ ತ್ಯಾ ಕಂತ್ರಾಳಾಂತ್ಲ್ಯಾನ್ ತಾಣೆಂ ಭಾಯ್ರ್ ಪಳೆಲೆಂ.

ಭಾಯ್ಲ್ಯಾನ್ ಕಾಳೊಕ್ ಆನಿ ನಿಶ್ಶಬ್ದ್. ಚಿಕ್ಕೆ ಪಯ್ಶಿಲಿ ದರ್ಯಾಚಿ ಗಾಜ್ ಮಾತ್ರ್ ಆಯ್ಕತಾಲಿ.

“ಆಡಾಯಾ ತಾಕಾ!” ಬೇಗಮೆನ್ ಘೊರೊಜ್ ಘಾಲಿ – ಆನಿ ತಶಿಚ್ ತಿ ಫುಡೆಂ ಉಡ್ಲಿ, ಆನಿ ಸರ್ದಾರ್ ಸಿಮಾಂವ್ಚ್ಯಾ ಪಾಯಾಕ್ ಧರುನ್ ತಾಕಾ ಪಾಟಿಂ ವೊಡುಂಕ್ ಪ್ರಯತ್ನ್ ಕೆಲೆಂ. ಸರ್ದಾರ್ ಸಿಮಾಂವ್ನ್ ಆಪ್ಲ್ಯಾ ಹಾತಾಂಚೆರ್ ಬಳ್ ಘಾಲ್ನ್ ಪಾಯ್ ಫಾಪುಡ್ಲೊ:

“ಮ್ಹಜೆ ಪಾಯ್ ಧರುಂಕ್ ಸಯ್ತ್ ತುಂ ಫಾವೊ ನಹಿಂ!”

ಬೇಗಮ್ ಪಾಟಿಂ ಉಸಳ್ಳಿ, ಆನಿ ತಿಚ್ಯಾ ಸಾಂಗಾತಾ, ಫುಡೆಂ ಸರೊನ್ ಯೆಂವ್ಚೆ ದೋಗ್ ಶಿಪಾಯ್ ಪಾಟಿಂ ಉಸಳ್ಳೆ.

“ತೆಣೆಂ ವಾಟ್ ನಾ – ನೀಜ್ ಜಾವ್ನ್ ತುಂ ಮೊರ್ತಲೊಯ್!”

ತಶೆಂ ಮ್ಹಳ್ಳೊ ಸ್ವರ್ – ಚಾಕರ್ನಿಚೊ – ಸರ್ದಾರ್ ಸಿಮಾಂವ್ಕ್ ಆಯ್ಕಲೊ.

“ಹಾಂಗಾಸರ್ ರಾವ್ಲ್ಯಾರ್, ಖಂಡಿತ್ ಮ್ಹಾಕಾ ಸುಣ್ಯಾಚೆಂ ಮರಣ್” ಚಿಂತ್ಲೆಂ ತಾಣೆಂ. “ಹ್ಯಾ ಜನೆಲಾಂತ್ಲ್ಯಾನ್ ಭಾಯ್ರ್ ಉಡ್ಲ್ಯಾರ್, ಆನಿ ತ್ಯಾ ಉಬಾರಾಯೆರ್ ಥಾವ್ನ್ ಪಡೊನ್ ಮೆಲ್ಯಾರೀ ಪರ್ವಾ ನಾ – ಸ್ವತಂತ್ರ್ ಜಾವ್ನ್ಂಚ್ ಮೆಲ್ಲೆಪರಿಂ ಜಾತೆಲೆಂ… ಎಕಾದಾವೆಳಾ, ಕಾಂಯ್ ನಾಕ್ಷೆಚ್ಯಾ ಇಡ್ಯಾಂತ್ ಥೊಡೆಂ ಆವ್ಕ್ ಆಸೊನ್, ವಾಂಚೊನ್ ಹಾಂವ್ ಉರ್ಲ್ಯಾರ್, ಪರ್ತ್ಯಾನ್ ಫಾವೊ ತ್ಯಾ ಥರಾನ್ ಆನಿ ಫಾವೊ ತ್ಯಾ ಬಳಾನ್ ಹಾಂಗಾಸರ್ ಯೇಂವ್ಕ್ ಅವ್ಕಾಸ್ ಆಸಾ.”

ಜನೆಲಾಂತ್ಲ್ಯಾನ್ ಭಾಯ್ರ್ ತಾಣೆಂ ಪಳೆಲೆಂ.

ಹಾತಾಂಚೆರ್ ಬಳ್ ಘಾಲುನ್, ತಕ್ಲಿ ಆನಿ ಭುಜಾಂ ಭಾಯ್ರ್ ಕಾಡುಂಕ್ ತಾಣೆಂ ಚಿಂತ್ಲೆಂ.

“ಆಡಾಯಾ ತಾಕಾ!”

ಸರ್ದಾರ್ ಸಿಮಾಂವ್ಚಿ ಅರ್ಧಿ ಕೂಡ್ ಭಾಯ್ರ್ ಪಾವ್ಲಿ.

“ರಾವಯಾ ತಾಕಾ!”

ನಿಮಾಣ್ಯಾ ಘಡ್ಯೆ, ಫಕೀರ್ ಮಹಮ್ಮದಾಕ್ ಏಕ್ ಆಲೋಚನ್ ಆಯ್ಲಿ. ಬಗ್ಲೆನ್ ಆಸ್‍ಲ್ಲ್ಯಾ ಎಕಾ ಶಿಪಾಯಾಚ್ಯಾ ಪೆಂಕ್ಡಾಂತ್ಲಿ ಭಾಲಿ ತಾಣೆಂ ತುರ್ತಾನ್ ವೊಡ್ಲಿ ಆನಿ ಸರ್ದಾರ್ ಸಿಮಾಂವ್ಚೆರ್ ಜೊಕುನ್ ಮಾರ್ಲಿ.

ತ್ಯಾಚ್ ಘಡ್ಯೆ, ಎಕ್ಲ್ಯಾ ದೊಗಾ ಸ್ತ್ರೀಯಾಂನಿ ಕಿಂಕ್ರಾಟ್ ದಿಲ್ಲಿ ಬೋಬ್ ಆಯ್ಕಲಿ.

ಫುಡ್ಲ್ಯಾ ಘಡ್ಯೆ ಜನೆಲಾಂತ್ಲ್ಯಾನ್ ಪಾಶಾರ್ ಜಾವ್ನ್, ಸರ್ದಾರ್ ಸಿಮಾಂವ್ಚಿ ಕೂಡ್ ನಪಂಯ್ಚ್ ಜಾಲಿ.

ಹೆವ್ಶಿಲ್ಯಾನ್ ಘುಸ್ಪಡ್, ಗೊಂದೊಳ್, ಗಲಾಟೊ!

ಸಕ್ಕಡ್‍ಯೀ ಎಕ್‍ಚ್ ಪಾವ್ಟಿಂ ಉಲಯ್ತಾಲೆ!

“ಚೂಡಿ, ಉಜ್ವಾಡಿ ಘೆವ್ನ್, ಭೊಂವಾರಿಂ ಸೊಧ್ನಾಂ ಕರಾ!”

“ಬಂದೂಕ್ಯೊ ಹಾಡಾ!”

“ಮಹಾದ್ವಾರಾ ಲಾಗ್ಚೊ ಸೇತುವೊ ದೆಂವವ್ನ್, ಖಂದ್ಕಾ ಭಾಯ್ಲ್ಯಾನ್‍ಯೀ ವೆಡೊ ಘಾಲುನ್ ಸೊಧ್ನಾಂ ಕರ್ಯಾ!”

“ತಾಣೆಂ ಹಾಂಗಾ ಥಾವ್ನ್ ಚುಕವ್ನ್ ಪಾಟಿಂ ವಚನಾಯೆ!”

“ತೀಸ್ ಆಳ್ ಉಬಾರಾಯೆರ್ ಥಾವ್ನ್ ಖಂದ್ಕಾಂತ್ ಪಡ್‍ಲ್ಲೊ ಗ್ರಾಯ್ಕ್ ವಾಂಚೊನ್ ಉರ್ಚೊ ಮ್ಹಳ್ಯಾರ್‌ಯೀ ಕಸೊ?”

“ಮೆಲಾ ಮ್ಹಳ್ಳೆಂಯೀ ಖಂಡಿತ್ ಜಾಯ್ಜಯ್!”

ಹಿಂ ಸರ್ವ್ ಉತ್ರಾಂ, ದೊಗಾಂಕ್ – ವೆರರೊನಿಕಾ ಕುವೆಲಿಕ್ ಆನಿ ‘ಚಾಕರ್ನ್’ ಆಗ್ನೆಸ್ ಸಿಸಿಲಿಯಾಕ್ ಆಯ್ಕನಾತ್‍ಲ್ಲಿಂ.

ತಾಂಚಿ ದೊಗಾಂಯ್ಚಿ ಮತ್ ಚುಕ್‍ಲ್ಲಿ.

ಫಕೀರ್ ಮಹಮ್ಮದಾನ್ ಭಾಲಿ ಉಡಯ್ತಾನಾ, ಬಗ್ಲೆನ್ ಆಸ್‍ಲ್ಲಿ ವೆರೊನಿಕಾ, ಹೆವ್ಶಿನ್ ಉಡೊನ್ – ಭಾಲಿಯೆಕ್ ಆಡ್ ಆಯಿಲ್ಲಿ – ಘಾಯೆವ್ನ್ ಧರ್ಣಿಕ್ ಶೆವ್ಟಲ್ಲಿ. ಹೆವ್ಶಿಲ್ಯಾನ್ ವೆರೊನಿಕಾ, ಆನಿ ತೆವ್ಶಿಲ್ಯಾನ್ ಸರ್ದಾರ್ ಸಿಮಾಂವ್‍ಯೀ ಅಂತರ್ಲೊ ಮ್ಹಳ್ಳ್ಯಾ ಚಿಂತ್ನಾಂಚ್ಯಾ ಧಖ್ಯಾನ್, ಆಗ್ನೆಸ್ ಕುಂವರ್ನಿಚಿಯೀ ಮತ್ ಚುಕ್‍ಲ್ಲಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel