ಇಂಫೆರ್ನಾಚಿಂ ದಾರಾಂ – 29: ಜೀವನ್ಮರಣಾಚಿ ಲಡಾಯ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 29
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 29: ಜೀವನ್ಮರಣಾಚಿ ಲಡಾಯ್

ನಿಜಾಯ್ಕೀ, ಕೊಣೆಂಚ್ ಚಿಂತುಂಕ್ ನಾತ್‍ಲ್ಲೆಂ ವಾ ಅಪೇಕ್ಸುಂಕ್ ನಾತ್‍ಲ್ಲೆಂ ಸನ್ನಿವೇಶ್.

ಖರೊಚ್, ಸರ್ದಾರ್ ಸಿಮಾಂವ್ನ್ ತ್ಯಾ ರಾತಿಂ, ಮಾನಿನ್ ವೆರೊನಿಕಾ ಕುವೆಲಿಕ್, ಜಾಂವ್, ಹೆರಾಂಕ್ ಥಂಯ್ ಥಾವ್ನ್ ಭಾಯ್ರ್ ವ್ಹರೊಂಕ್ ಕೆಲ್ಲೆಂ ಯೋಜನ್, ಆನಿ ತ್ಯಾ ಪ್ರಕಾರ್ ಆಯ್ತೊ ಜಾಲ್ಲೊ ಅವ್ಕಾಸ್ ಉಬೊನ್ ಗೆಲೊ.

ದಿವ್ಯಾಂಚ್ಯಾ ತ್ಯಾ ಗೈರ‍್ಯಾ ಉಜ್ವಾಡಾಂತ್, ರಾತಿಂಚ್ಯಾ ತ್ಯಾ ಹವ್ಯಾಂತ್ ಆನಿ ಬಳ್ವಷ್ಟಿಂ ಉದೆಲ್ಲ್ಯಾ ತ್ಯಾ ಘಡಿಯೆ, ಫಕೀರ್ ಮಹಮ್ಮದ್ ಆನಿ ತೊಪಾಸಿ ದಾಲ್ಮೇದಾ, ದೊಗ್‍ಯೀ, ಕುಮಕ್ ಆಪಯ್ತಾಂ ಆಪಯ್ತಾಂ, ಸರ್ದಾರ್ ಸಿಮಾಂವ್ಚ್ಯಾ ಆಂಗಾರ್ ಪಡೊನ್, ಜಾತಾ ತಿತ್ಲ್ಯಾ ವೆಗಿಂ ತಾಕಾ ತೊಪುನ್ ಖಲಾಸ್ ಕರುಂಕ್, ವರ್ತ್ಯಾ ಉಮೆದಿನ್ ಫುಡೆಂ ಸರ್ಲೆ.

ಫಕೀರ್ ಮಹಮ್ಮದಾಚ್ಯಾ ಹಾತಾಂತ್ ತಲ್ವಾರ್ ಆಸ್‍ಲ್ಲಿ. ತರೀ, ತೊ ಭಿಯಾನ್ ಚಿಕ್ಕೆ ಪಾಟಿಂ ರಾವೊನ್, ರಾಕ್ವಲ್ಯಾಕ್ ತೊಪುಂಕ್ ಸಂದರ್ಭ್ ಸೊಧ್ತಾಲೊ, ಆನಿ ಸಾಂಗಾತಾಚ್, “ಹೇಯ್ಲಾ! ಜಲ್ದಿ ಕರೋ!” ಮ್ಹಣೊನ್ ಹೆರಾಂನಿ ತಾಚ್ಯಾ ಕುಮ್ಕೆಕ್ ಧಾಂವೊನ್ ಯೆಂವ್ಚ್ಯಾ ಖಾತಿರ್ ಆವಾಜ್ ದಿತಾಲೊ.

ತ್ಯಾಚ್ ವೆಳಾರ್ ತೊಪಾಸಿ ದಾಲ್ಮೇದಾ, ಉಂದ್ರಾಪರಿಂ ತೆವ್ಶಿನ್ ಘುಸೊನ್, ದಾವ್ಯಾ ಹಾತಾನ್ ಆಪ್ಲಿ ಭಾಲ್ ವಿಂಚುನ್, ಪುಣ್ ಪಾಟಿಂ ರಾವೊನ್ ಬೊಬಾಟ್ ದಿತಾಲೊ.

ಪುಣ್ ತ್ಯಾಚ್ ವೆಳಾರ್, ಸರ್ದಾರ್ ಸಿಮಾಂವ್ ಆಪ್ಲೆ ವಿಶ್ವೆ ಸಡಿಳ್ ಕರ್ನ್, ಉಜ್ವೆಂ ಧೊಂಪರ್ ಬಾಗಾವ್ನ್, ತಲ್ವಾರಿಚ್ಯಾ ಲಡಾಯೆಕ್ ಆಯ್ತೊ ಜಾವ್ನ್ ರಾವ್‍ಲ್ಲೆಪರಿಂಚ್, ಫುಡೆಂ ಕಿತೆಂ ಕರ್ಚೆಂ ಮ್ಹಣ್ ಚಿಂತಾಲೊ.

ಸಾಧ್ಯ್ ಆಸಾ – ಫಕೀರ್ ಮಹಮ್ಮದಾಕ್ ಆನಿ ತೊಪಾಸಿಕ್ ಥಂಯ್ಚ್ ಮುಗ್ದುನ್ – ವೆರೊನಿಕಾಕ್ ಘೆವ್ನ್, ಥಂಯ್ ಥಾವ್ನ್ ಸಕಯ್ಲ್ ಧಾಂವ್ಚಿ ಆಲೋಚನ್ ತಾಕಾ ಆಯ್ಲಿ.

ದುಸ್ರ್ಯಾ ಘಡ್ಯೆ ತಿ ಆಲೋಚನ್ ಬಂದ್ ಪಡ್ಲಿ. ತಶೆಂ ಧಾಂವೊಂಕ್ ಪ್ರಯತ್ನ್ ಕರ್ಚೆಂ ಪಿಶೆಂಪಣ್ ಮ್ಹಣ್ ತಾಕಾ ಭೊಗ್ಲೆಂ.

ದುಸ್ರೆ ದೋಗ್ ಜಣ್ ಶಿಪಾಯ್, ಅರ್ಧುಕುರೆಂ ನ್ಹೆಸೊನ್ ತರೀ, ಹಾತಾಂತ್ ತಲ್ವಾರಿ ಝಳ್ಪಾವ್ನ್, ಮೆಟಾಂ ಚಡೊನ್ ವಯ್ರ್ ಆಯ್ಲೆ. ಲಾಗಿಂ ಪಾವ್ತಚ್, ಹಾಂಗಾಚಿ ಅವಸ್ಥಾ ಪಳೆವ್ನ್ ತೆ ಥಟಕ್ ಜಾಲೆ.

“ಸುಫೆದಾರ್ ಭು-ಭೂ!” ಅಕ್ಲಾಸ್ಲೊ ಎಕ್ಲೊ.

“ವ್ಹಯ್! ಸುಫೆದಾರ್ ಭು-ಭು!” ಹಾಸ್ಲೊ ಸರ್ದಾರ್ ಸಿಮಾಂವ್. ಅಸಲ್ಯಾ ಅಪಾಯಾಂತ್ ಆಸ್ಲ್ಯಾರೀ ತೊ ಹಾಸ್ಚೆಂ ಪಳೆವ್ನ್ ವೆರೊನಿಕಾ ಸಂತೊಸ್ ಪಾವ್ಲಿ, ಪುಣ್ ಭಿಯೆಲಿ ಆನಿ ತಾಚ್ಯಾ ಬಚಾವೆ ಖಾತಿರ್ ಮತಿಂತ್‍ಚ್ ಮಾಗ್ಣೆಂ ಕರಿಲಾಗ್ಲಿ.

“ಅರೇ-ವ್ಹೊ ಉಲಯ್ತಾ! ಹಾಕಾ ಮೊನೊ ಮ್ಹಣ್ತಾಲೆ!” ಮ್ಹಣಾಲೊ ಆನ್ಯೇಕ್ಲೊ ಶಿಪಾಯ್.

“ತುಮ್ಕಾಂ ಅಧಿಕ್ ಪ್ರಸಂಗ್ ನಾಕಾ!” ಮ್ಹಣಾಲೊ ಫಕೀರ್ ಮಹಮ್ಮದ್. “ಫುಡೆಂ ಸರಾತ್ ಆನಿ ತಾಕಾ ಕೈದ್ ಕರಾತ್!”

“ಕೈದ್ ಕೆಲ್ಯಾರೀ ಜಾಲೆಂ, ಕಾಬಾರ್ ಕೆಲ್ಯಾರೀ ಜಾಲೆಂ – ಪುಣ್ ಕರ್ಚೆಂ ಕಾಮ್ ತುರ್ತಾನ್ ಜಾರಿ ಕರಿಜಾಯ್” ಮ್ಹಣಾಲೊ ತೊಪಾಸಿ.

“ತರ್ ವೇಳ್ ಪಾಡ್ ಕರಿನಾಕಾತ್ – ಫುಡೆಂ ಯೆಯಾತ್!” ಪರತ್ ಹಾಸ್ಲೊ ಸರ್ದಾರ್ ಸಿಮಾಂವ್.

ತೆ ಚತ್ರಾಯೆನ್ ಫುಡೆಂ ಸರೊಂಕ್ ಲಾಗ್ಲೆ.

ಚವ್ಗ್ ಜಣ್, ಹಾತೆರಾಂ ಸಮೇತ್ ಫುಡೆಂ ಸರೊನ್ ಯೆತಾನಾ, ನಿಜಾಯ್ಕೀ, ಸರ್ದಾರ್ ಸಿಮಾಂವ್ಕ್ ಮರಣ್ ಸನ್ನಿಹಿತ್ ಜಾಲಾಂ ಮ್ಹಣ್, ಮಾನಿನ್ ವೆರೊನಿಕಾ ಕುವೆಲ್ ಪಾತ್ಯೆಲಿ, ಆಕಾಂತ್ಲಿ ಆನಿ ಫುಡೆಂ ಸರ್ಲಿ.

ಸರ್ದಾರ್ ಸಿಮಾಂವ್ಕ್ ಸಮ್ಜೊಂಚ್ಯಾ ಆದಿಂಚ್, ಬಾಗ್ಲಾರ್ ಥಾವ್ನ್ ಹೆವ್ಶಿನ್ ಯೇವ್ನ್, ಫಕೀರ್ ಮಹಮ್ಮದಾಚ್ಯಾ, ದೊಗಾಂ ಶಿಪಾಯಾಂಚ್ಯಾ ಆನಿ ತೊಪಾಸಿ ದಾಲ್ಮೇದಾಚ್ಯಾ ಕ್ರೂರ್ ಹಾತೆರಾಂಕ್ ಆಡ್ ತಿ ರಾವ್ಲಿ.

“ತುಮ್ಚಿಂ ಹಾತೆರಾಂ ರಾವಯಾ” ಮ್ಹಣಾಲಿ ತಿ, ತಾಂಕಾಂ ತ್ಯಾ ವಿಚಿತ್ರ್ ಉತ್ರಾಂನಿ ಘಡ್ಬಡಾವ್ನ್. “ತುಮ್ಕಾಂ ಜಾಯ್ ತೆಂ ದೀಂವ್ಕ್ ಆನಿ ತುಮಿ ಅಪೇಕ್ಷಿಲ್ಲೆಪರಿಂ ಚಲೊಂಕ್ ಹಾಂವ್ ಕಬೂಲ್ ಆಸಾಂ – ಪುಣ್ – ಹ್ಯಾ ಮನ್ಶ್ಯಾಚಿ ಖುನಿ ಆಧಾರಿನಾಕಾತ್.”

ಸರ್ದಾರ್ ಸಿಮಾಂವ್ ಘಡಿಭರ್ ಘುಸ್ಪಡ್ಲೊ.

ತಾಚೆ ತೆ ವೈರಿಯೀ, ಘಡಿಭರ್ ಘಡ್ಬಡ್ಲೆ.

“ಹಾಂ??” ಹಾಂಕ್ರೆಲೊ ಫಕೀರ್ ಮಹಮ್ಮದ್.

“ಹ್ಹೆ-ಹ್ಹೆ-ಹ್ಹೇ!” ಘಕ್ರೆಲೊ, ಪೊಜ್ಡೊ ತೊಪಾಸಿ ದಾಲ್ಮೇದಾ.

“ಕ್ಯಾ..?” ಅಜ್ಯಾಪ್ಲೆ ತೆ ಶಿಪಾಯ್.

“ಭಯ್ಣೀ ಪಾಟಿಂ ಸರ್ ಆನಿ ಪಾಟಿಂ ರಾವ್” ಉಸ್ವಾಸ್ಲೊ ಸರ್ದಾರ್ ಸಿಮಾಂವ್. “ತುಜ್ಯಾ ಹ್ಯಾ ಪಿಶ್ಯಾ ವರ್ತನಾನ್ – ಲಡಾಯೆಚ್ಯಾ ದೃಷ್ಟೆನ್ – ತುಕಾ ಆನಿ ಮ್ಹಾಕಾ ಅಪಾಯ್ ತುಂ ಚಡಯ್ತಾಯ್!”

“ಪು-ಪುಣ್ ಭಾವಾ..!”

“ಪಾಟಿಂ ರಾವ್!” ಸ್ವರ್ ಉಬಾರಿನಾಸ್ತಾಂ ಧೆಂಕ್ಣೊ ಮಾರ್ಲೊ ತಾಣೆಂ. ಆನಿ ಆಪ್ಲ್ಯಾ ದಾವ್ಯಾ ಹಾತಾನ್ ತಿಕಾ ಆರಾವ್ನ್ ತಾಣೆಂ ಪಾಟ್ಲ್ಯಾ ಕುಶಿಕ್ ವೊಂದಾಯ್ಲೆಂ.

ತ್ಯಾಚ್ ಘಡ್ಯೆ, ತೆ ಚವ್ಗ್ ಜಣ್ ಫುಡೆಂ ಉಡ್ಲೆ.

ತ್ಯಾ ಚವ್ಗಾಂಚ್ಯಾ ಹಾತೆರಾಂಕ್ ಚಾಳೀಚ್ ಹಾತೆರಾಂ ಜವಾಬ್ ದಿತಾತ್ ಮ್ಹಣ್ಚೆ ತಿತ್ಲ್ಯಾ ವೆಗಾನ್ ಸರ್ದಾರ್ ಸಿಮಾಂವ್ಚಿ ತಲ್ವಾರ್ – ಮುಖಾರ್ ಪಾಟಿಂ, ದಾವ್ಯಾಕ್ ಆನಿ ಉಜ್ವ್ಯಾಕ್ – ವಯ್ರ್ ಆನಿ ಪಂದಾಕ್ ಖೊಂಚ್ ಮಾರುನ್ ಖೆಳೊಂಕ್ ಲಾಗ್ಲಿ.

ಪಯ್ಲೆಚ್ ಪಾರ್ಕೆವ್ನ್ ಆನಿ ದುಬಾವಾನ್ ಆಸ್‍ಲ್ಲೆ ಶಿಪಾಯ್, ಫಕೀರ್ ಮಹಮ್ಮದ್ ಆನಿ ತೊಪಾಸಿ ಆತಾಂ ಪುರ್ತೆ ಭಿಯೆಲೆ.

ಸಕಯ್ಲ್ ಥಾವ್ನ್ ಚಡಿತ್ ಸಹಾಯ್ ಯೆಂವ್ಚ್ಯಾ ಖಾತಿರ್ ಅಪವ್ಣ್ಯಾಚಿ ಬೋಬ್ ತಾಣಿಂ ದಿಲಿ.

ರಾವ್ಳೆರಾಚ್ಯಾ ಹೆರ್ ಸಂಧಾ ಥಾವ್ನ್ ಆನಿ ಕೊನ್ಶ್ಯಾಂ ಥಾವ್ನ್ ಚಡಿತ್ ಆವಾಜ್ ಆಯ್ಕಲೊ. ಚಡ್ತಾವ್ ಜಣಾಂನಿ ಧಾಂವೊನ್ ವಯ್ರ್ ಯೆಂವ್ಚಿಂ ಖುಣಾಂ ಕಾನಾಕ್ ಪಡ್ಲಿಂ.

ಸನ್ನಿವೇಶ್ ಅಸಾಧ್ಯ್ ಜಾಲೆಂ ಮ್ಹಣ್ ಸರ್ದಾರ್ ಸಿಮಾಂವ್ಕ್ ಭೊಗ್ಲೆಂ.

ಆಪ್ಣಾಕ್ ಬಚಾವ್ ಕರ್ಚ್ಯಾ ಖಾತಿರ್, ವೇಸ್ ಬದ್ಲುನ್ ಆಯಿಲ್ಲೊ ಮನಿಸ್ – ಟಿಪ್ಪು ಸುಲ್ತಾನಾಚೊ ಹುದ್ದೆದಾರ್ ತರೀ – ಕ್ರಿಸ್ತಾಂವ್ ಸಮಾಜೆಚೊ ಅಭಿಮಾನ್ ಆನಿ ಅಲಂಕಾರ್, ಹ್ಯಾಚ್ ಜಿನ್ಸಾರ್ ಎಕಾ ಸುಣ್ಯಾಪರಿಂ, ತಿಚ್ಯಾಚ್ ದೊಳ್ಯಾಂ ಹುಜ್ರಿಂ ಕಾತ್ರೊನ್ ನಾಸ್ ಜಾಂವ್ಚೆಂ ಪ್ರಸಂಗ್ ಖರೆಂಚ್ ಆಯ್ತೆಂ ಜಾಲೆಂ ಮ್ಹಣ್ ಪಾತ್ಯೆವ್ನ್, ಮಾನಿನ್ ವೆರೊನಿಕಾ ಕುವೆಲ್ ಪುರ್ತಿ ಘಾಬರ್ಲಿ, ದುಖ್ಲಿ, ಆನಿ ನಿರಾಶಿ ಜಾಲಿ.

ಬಾಗ್ಲಾರ್ ಥಾವ್ನ್ ಪರ್ತ್ಯಾನ್ ತಿ ಫುಡೆಂ ಆಯ್ಲಿ.

“ತುಮ್ಚೊ ಉಪ್ಕಾರ್” ಮ್ಹಣಾಲಿ ತಿ ಪರ್ತ್ಯಾನ್. “ತುಮ್ಕಾಂ ಜಾಯ್ ಜಾಲ್ಲೆಪರಿಂ ಚಲೊಂಕ್ ಹಾಂವ್ ತಯಾರ್ ಆಸಾಂ. ಪುಣ್ ಹ್ಯಾ ಮನ್ಶ್ಯಾಚೊ ಜೀವ್ ಉರಯಾ. ದಯಾ ಕರುನ್, ಬೇಗಮ್ ಸಾಹಿಬಾಕ್ ಹಾಂಗಾಸರ್ ಆಪಯಾ – ತಿಚ್ಯಾ ನಾಂವಾನ್ ತುಮ್ಚೆ ಹಾತ್ ರಾವಯಾ!”

ಸರ್ದಾರ್ ಸಿಮಾಂವ್, ಝಜ್ತಚ್ ಆಸ್‍ಲ್ಲೊ.

ಬೇಗಮೆಚೆಂ ನಾಂವ್ ಆಯ್ಕತಚ್ ತೆ ದೋಗ್ ಶಿಪಾಯ್ ಚಿಕ್ಕೆ ಕಾವ್ಜೆಲೆ, ಆನಿ ಪಾಟಿಂ ಸರ್ಲೆ.

“ಸೂಅರಾಂನೊ!” ಮ್ಹಣಾಲೊ ಫಕೀರ್ ಮಹಮ್ಮದ್. “ವಿಶ್ವಾಸ್‍ಘಾತ್ ಕರುನ್ ಆಮ್ಕಾಂ ಸಕ್ಡಾಂಕ್ ಬೂದ್ ಶಿಕಂವ್ಕ್ ಆಯಿಲ್ಲ್ಯಾ ಹ್ಯಾ ದ್ರೋಹಿ ನಸ್ರಾನಿಚಿ ಕಾಣಿ ಹಾಂಗಾಸರ್ ಮುಗ್ದುಂಕ್, ಬೇಗಮೆಚ್ಯಾ ಹುಕ್ಮೆಚಿ ಗರ್ಜ್ ನಾ. ತಿಚ್ಯಾ ತರ್ಫೆನ್ ಹಾಂವ್‍ಂಚ್ ತುಮ್ಕಾಂ ಹುಕುಮ್ ದಿತಾಂ – ಖತಮ್ ಕರಾತ್ ತಾಕಾ!”

ಶಿಪಾಯ್, ಪರ್ತ್ಯಾನ್ ಫುಡೆಂ ಉಡ್ಲೆ.

“ತ್ಯಾ ಶಿವಾಯ್…” ಹಾಸ್ಲೊ ತೊಪಾಸಿ. “ಅಸಲ್ಯೊ – ಕುರಿಯೆಲಾಂತ್ಲ್ಯಾ ದೊಮ್‍ಫಿದಾಲ್ ಕುಟ್ಮಾಂತ್ಲ್ಯೊ ನಸ್ರಾನಿ ಸ್ತ್ರೀಯೊ ಆಮ್ಕಾಂ ಜಾಯ್ ತಿತ್ಲ್ಯೊ ಮೆಳ್ತಿತ್! ಪುಣ್ ಅಸಲೊ ದುಸ್ಮಾನ್ ಸೈತಾನ್ ಸರ್ದಾರ್ ದುಸ್ರೊ ಮೆಳಸೊ ನಾ – ಸಾಯ್ಬಾ ಭೊಗೊಸ್ – ದುಸ್ರೊ ನಾಕಾ… ಕಾಪ್ಯಾ ತಾಕಾ! ತೊಪ್ಯಾ ತಾಕಾ!”

ಸರ್ದಾರ್ ಸಿಮಾಂವ್ಚೊ ವೀರಾವೇಶ್ ಪುರ್ತೊ ಜಿವೊ ಜಾಲ್ಲೊ.

ಪರ್ತ್ಯಾನ್ ವೆರೊನಿಕಾಕ್ ಪಾಟಿಂ ಆರಾವ್ನ್ ತೊ ಝುಜ್ತಾಲೊ.

ಹೆಂ ಝುಜ್ ಚಡ್ ಲಾಂಬಶೆಂ ನಾ – ತಾಂತುಂ ಆಪ್ಣಾಚಿ ಕಥಾ ಖತಮ್ ಜಾತೆಲಿ ಮ್ಹಣ್ ತಾಕಾ ಭೊಗ್ತಾಲೆಂ ಜಾಲ್ಯಾರೀ, ಹ್ಯಾ ನಿಮಾಣ್ಯಾ ವಗ್ತಾರ್ ಪುಣೀ, ಜಾತಾ ತಿತ್ಲ್ಯಾ ಕಾಫರಾಂಕ್ ಕಾಪುನ್ ಆಪುಣ್ ಮೊರ್ತಲೊಂ – ಉರ್ಲೆಲೆಂ ಕಾಮ್, ಸರ್ದಾರ್ ಯೂಸುಫ್ ಆಲಿ ಯೇವ್ನ್ ಜಾರಿ ಕರ್ತಲೊ – ಮ್ಹಣ್ ಚಿಂತುನ್ ಪಯ್ಲೆಂಚ್ಯಾ ಪ್ರಾಸ್ ಚಡ್ ಗಂಭೀರಾಯೆನ್ ಆನಿ ಕಠಿಣಾಯೆನ್ ತಾಚೊ ಹಾತ್ ಚಾಲು ಜಾಲೊ. ತ್ಯಾಚ್ ಮಾಪಾನ್, ಅಧಿಕ್ ಚುರುಕಾಯೆನ್, ತಾಚ್ಯಾ ಹಾತಾಂತ್ಲಿ ತಲ್ವಾರ್ ಖೆಳೊಂಕ್ ಲಾಗ್ಲಿ.

ನಿಜಾಯ್ಕೀ, ತ್ಯಾ ತೆಂಪಾರ್, ತಲ್ವಾರಿಚ್ಯಾ ಖೆಳಾಂತ್ ಆನಿ ಝುಜಾಂತ್, ಸರ್ದಾರ್ ಸಿಮಾಂವ್ಚ್ಯಾಕ್‍ಯೀ ವರ್ತೊ ಬುದ್ವಂತ್ ವಾ ಚುರುಕ್ ಮಾನಾಯ್ ದುಸ್ರೊ ನಾ ಮ್ಹಳ್ಳೆಂ ಉತಾರ್ ಚಾಲು ಆಸ್‍ಲ್ಲೆಂ. ತ್ಯಾ ಉತ್ರಾಚ್ಯಾ ಸತಾಕ್ ಆಜ್ ಪರ್ತ್ಯಾನ್ ರುಜ್ವಾತ್ ಮೆಳೊಂಕ್ ಆಸ್‍ಲ್ಲಿ. ಪುಣ್…

ಹರ್ಶೆಂಚೆಪರಿಂ, ವಾ ತ್ಯಾ ಆದಿಂ ಜಾಲ್ಲೆಪರಿಂ, ಹಿ ಲಡಾಯ್ ಫಕತ್ ದೊಗಾಂ ಲಡಾಯ್ ಕರ್ಣಾರಾಂ ಮಧೆಂ ಖಡಾಖಡ್ ಮಾರಾಮಾರಿ ನಹಿಂ ಜಾವ್ನಾಸ್‍ಲ್ಲಿ. ಬಗಾರ್, ಎಕಾ ವಾಟೆನ್ ತೊ ಎಕ್ಸುರೊ ಖಡಾ ಆಸ್ತಾನಾ, ಫುಡ್ಲ್ಯಾ ವಾಟೆನ್ ತಾಕಾ ವೆಡೊ ಮಾರುನ್, ತಾಕಾ ಮುಗ್ದುಂಚ್ಯಾ ಆತುರಾಯೆನ್ ಆನಿ ತಾನೆನ್ ಚವ್ಗ್ ಜಣ್ ಆಸ್‍ಲ್ಲೆ.

ಪಾವನಾತ್‍ಲ್ಲ್ಯಾಕ್, ಹೆರ್‌ಯೀ ಚಡ್ ಜಣ್ ಧಾಂವೊನ್ ಯೆತಾಲೆ.

ಫುಡ್ಲ್ಯಾ ಥೊಡ್ಯಾ ಘಡಿಯಾಂನಿ ಥಂಯ್ಸರ್ ಜಾಲ್ಲೊ ಗಲಾಟೊ ಆನಿ ಆವಾಜ್ – ಭರ್ಸೊನ್ ತಾಂಚಿ ಖರಸ್, ತಾಂಚಿ ಘೊರೊಜ್ ಆನಿ ಗಾಳಿ ಸೊವೆ, ತಾಂಚೊ ನಾಚ್, ತಾಂಚ್ಯಾ ಪಾಯಾಂಚ್ಯೊ ಥಾಪಿ ಆನಿ ಉಡ್ಕಣಾಂ – ಆನಿ ಪ್ರತ್ಯೇಕ್ ಜಾವ್ನ್, ತಲ್ವಾರಿಚೆರ್ ತಲ್ವಾರ್ ಬಸೊನ್ ಪಾಟಿಂ ಉಸಳ್ಚೊ ತೊ ಆವಾಜ್, ಸಗ್ಳ್ಯಾ ವಠಾರಾಕ್ ಆಯ್ಕತಾಲೊ. ಉಸಳ್ಚಿಂ ಕಿಟಾಳಾಂಯೀ – ತಿ ಜೀವನ್ಮರಣಾಚಿ ಲಡಾಯ್ ನಹಿಂ, ಬಗಾರ್ ಫಕತ್ ಭುರ್ಗ್ಯಾಂಚೊ ಖೆಳ್ ಮ್ಹಳ್ಳೆಪರಿಂ ಖೆಳ್ಕುಳಾಂ ಕರ್ತಾತ್‍ಶಿಂ ದಿಸ್ತಾಲಿಂ.

ಘಡ್ಯೊ ಪಾಶಾರ್ ಜಾಲ್ಯೊ.

ತರೀ, ಹ್ಯಾ ಎಕ್ಸುರ್‍ಯಾ ಮನ್ಶ್ಯಾಚೆರ್, ತ್ಯಾ ಚವ್ಗಾಂನಿ ಕಾಯಿಂಚ್ ಪರಿಣಾಮ್ ಕೆಲ್ಲಿಂ ಖುಣಾಂ ದಿಸೊಂಕ್ ನಾಂತ್.

ರಾವ್‍ಲ್ಲೆ ಕಡೆಂಚ್ ರಾವೊನ್ ತೊ ಝುಜ್‍ಲ್ಲೊ ಜಾಲ್ಯಾರ್, ತಾಚಿ ಕಾಣಿ ವೆಗಿಂ ಕಾಬಾರ್ ಜಾತಿ ಕೊಣ್ಣಾ. ಪುಣ್, ಝುಜ್ತಾಂ ಝುಜ್ತಾಂ – ಹೆರಾಂಕ್ ಕಳನಾತ್‍ಲ್ಲೆಪರಿಂ ವೆರೊನಿಕಾ ಕುವೆಲಿಕ್ ರಾವಯಿಲ್ಲ್ಯಾ ಕುಡಾಚ್ಯಾ ದಾರ್ವಟ್ಯಾ ತೆವ್ಶಿನ್, ಸವ್ಕಾಸ್ ತೊ ಪಾಟಿಂ ಸರ್ತಾಲೊ. ತ್ಯಾ ಫುಡ್ಲ್ಯಾ ಕುಡಾಂತ್ ರಾವೊನ್ ಝುಜ್ಲ್ಯಾರ್, ತಾಚೆ ದುಸ್ಮಾನ್, ಫುಡ್ಲ್ಯಾ ಥೊಡ್ಯಾ ವೆಳಾ ಭಿತರ್ ತಾಕಾ ವೆಡೊ ಘಾಲುನ್ ತಾಕಾ ಸಲ್ವಂವ್ಕ್ ಸಕ್ತೆ. ತಶೆಂ ಜಾಯ್ನಾಯೆ ಮ್ಹಳ್ಳೆಂ ಚಿಂತುನ್‍ಂಚ್ ತೊ ಪಾಟಿಂ ಸರ್ತಾಲೊ. ಏಕ್ ಪಾವ್ಟಿಂ ದಾರ್ವಟ್ಯಾರ್ ಪಾವ್ಲ್ಯಾರ್, ಥಂಯ್ಸರ್ ರಾವೊನ್ – ತಾಂಕ್ತಾ ತಿತ್ಲೊ ವೇಳ್ ಪುಣೀ – ಝುಜೊನ್, ದುಸ್ಮಾನಾಂಕ್ ಖರ್‍ಯಾ ಲಡಾಯೆಚಿ ರೂಚ್ ದಿವ್ಯೆತ್ ಮ್ಹಳ್ಳಿಂ ತಾಚಿಂ ಚಿಂತ್ನಾಂ ಜಾವ್ನಾಸ್‍ಲ್ಲಿಂ.

ಪುಣ್ ತಸಲಿ ಲಡಾಯ್ ಜಾಲ್ಯಾರೀ ಚಡ್ ವೇಳ್ ಲಾಂಬಾಶಿನಾ – ಕ್ರಮೇಣ್ ತಾಣೆಂ ಸಲ್ವೊಂಚೆಂ ಆನಿ ಮೊರ್ಚೆಂ ಖಂಡಿತ್ ಮ್ಹಣ್ ತಾಕಾ ಭೊಗ್ತಾಲೆಂ. ತ್ಯಾ ಖಾತಿರ್, ತೆಂ ಆಪ್ಲ್ಯಾ ಜಿಣಿಯೆಂತ್ಲೆಂ – ಜಾವ್ಯೆತ್ ಭಾವಾಡ್ತಾ ಖಾತಿರ್, ಜಾವ್ಯೆತ್ ಸಮಾಜೆಂತ್ಲ್ಯಾ ಭಾಂವ್ಡಾಂ ಖಾತಿರ್, ವಾ, ಜಾವ್ಯೆತ್ ಸ್ವತಃ ಖಾತಿರ್ – ನಿಮಾಣೆಂ ಝುಜ್ ದೆಕುನ್, ಜಾತಾ ತಿತ್ಲ್ಯಾ ಜಣಾಂಕ್ ಮುಗ್ದುನ್‍ಂಚ್ ವಚಜಾಯ್ ಮ್ಹಳ್ಳೆಂಯೀ ಹಟ್ ತಾಕಾ ದಿಸ್ಲೆಂ.

ಸ್ವರಕ್ಷಣೆಚೆಂ ಸಮಸ್ಸೆಂ ಭೋವ್ ಭಿಗಡ್ ಜಾಲ್ಲೆಂ.

ಇತ್ಲ್ಯಾ ವೆಳಾರ್, ವೆರೊನಿಕಾ ಭಿತರ್ ಸರೊನ್, ಭಿತರ್ ಆಸ್‍ಲ್ಲೊ ದಿವೊ ಘೆವ್ನ್, ಪರ್ತ್ಯಾನ್ ಬಾಗ್ಲಾರ್ ರಾವ್‍ಲ್ಲಿ. ತಿಣೆಂ ತಶೆಂ ರಾವ್‍ಲ್ಲ್ಯಾ ವರ್ವಿಂ, ತಿಚ್ಯಾ ಹಾತಾಂತ್ಲ್ಯಾ ದಿವ್ಯಾಕ್ ಸರ್ದಾರ್ ಸಿಮಾಂವ್ಚಿ ಪಾಟ್ ಆಸ್‍ಲ್ಲಿ. ಆನಿ ತ್ಯಾ ದಿವ್ಯಾಚೊ ಉಜ್ವಾಡ್, ದುಸ್ಮಾನಾಂಚ್ಯಾ ದೊಳ್ಯಾಂಕ್ ಮಾರ್ತಾಲೊ.

ಸರ್ದಾರ್ ಸಿಮಾಂವ್ ಸವ್ಕಾಸ್ ಪಾಟಿಂ ಯೇವ್ನ್ ದಾರಾರ್ ರಾವೊಂಕ್ ಚಿಂತಾ ಮ್ಹಣ್ ತಿಕಾ ಸಮ್ಜಲೆಂ. ತಾಕಾ ಸುವಾತ್ ಆನಿ ಸಹಾಯ್ ದಿಂವ್ಚಿಂ ಚಿಂತ್ನಾಂ ಮಾತ್ರ್ ಮತಿಕ್ ಯೇವ್ನ್, ತಿ ತೆವ್ಶಿನ್ ಘುಂವ್ಲಿ. ತ್ಯಾ ವರ್ತನಾ ವರ್ವಿಂ, ದುಸ್ಮಾನಾಂಚ್ಯಾ ದೊಳ್ಯಾಂಕ್ ಆಡ್ ಆಸ್‍ಲ್ಲೊ ಉಜ್ವಾಡ್ ಘಡ್ಯೆ ಲಿಪ್ಲೊ. ಫಕೀರ್ ಮಹಮ್ಮದ್ ಚುರುಕಾಯೆನ್ ಫುಡೆಂ ಉಡ್ಲೊ. ತಾಚ್ಯಾ ಹಾತಾಂತ್ಲಿ ತಲ್ವಾರ್ ನೀಟ್ ಜಾವ್ನ್, ತಿಚೊ ಧೊಮೊಸ್ ತಾಚ್ಯಾ ಹರ್ದ್ಯಾಂತ್ ರಿಗೊಂಕ್ ಭೋವ್ ಲಾಗಿಂ ಪಾವ್ಲೊ, ಆನಿ ಭೋವ್ ಲಾಗಿಂ ಆಸ್ತಾನಾಂಚ್ ಸರ್ದಾರ್ ಸಿಮಾಂವ್ನ್ ಮೇಟ್ ಚುಕವ್ನ್ ಆಪ್ಲಿ ಕೂಡ್ ಪಾಟಿಂ ಲಕಯ್ಲಿ.

ತಾಚೊ ಜೀವ್ ಉರ್ಲೊ.

ತ್ಯಾಚ್ ಘಡ್ಯೆ – ಆಯಿನ್ನ್ ವೇಳ್ ಮ್ಹಣ್ ಚಿಂತುನ್ – ತೆವ್ಶಿಲೊ ಶಿಪಾಯ್ ಏಕ್ ಮೇಟ್ ಫುಡೆಂ ಉಡ್ಲೊ. ಸರ್ದಾರ್ ಸಿಮಾಂವ್ಕ್ ತೊಪುನ್ ಮಾರುಂಕ್ ತಾಚೊ ಹಾತ್ ತಲ್ವಾರಿ ಸಮೇತ್ ನೀಟ್ ಜಾಲೊ. ಥಂಯ್ಸರ್‌ಯೀ, ಸದೃಷ್ಟಾನ್ ಮ್ಹಳ್ಳೆಪರಿಂ, ತ್ಯಾ ಮಾರಕ್ ತಲ್ವಾರಿಚೊ ಧೊಮೊಸ್, ಸರ್ದಾರ್ ಸಿಮಾಂವ್ಚ್ಯಾ ತಲ್ವಾರಿನ್ – ತಿಚ್ಯಾ ಮುಳಾನ್ – ನಿಮಾಣ್ಯಾ ಕ್ಷಣಾರ್ ವಾಂಕ್ಡೊ ನಿಸ್ರಾಯ್ಲೊ. ತಶೆಂಚ್ ನೀಟ್ ಜಾಲ್ಲ್ಯಾ ತಾಚ್ಯಾ ಹಾತಾಂತ್ಲ್ಯಾ ತಲ್ವಾರಿಚೊ ಧೊಮೊಸ್, ತ್ಯಾ ಶಿಪಾಯಾಚ್ಯಾ ಖಾಡ್ಕೆ ಪಂದಾಕ್ ತಾಚ್ಯಾ ಸುಕುರ್ನಳಿಯೆಂತ್ ರೊಂಬೊನ್ ಜಾಲೊ.

ಶಿಪಾಯಾನ್ ಬೋಬ್ ದೀಂವ್ಕ್ ಪ್ರಯತ್ನ್ ಕೆಲೆಂ.

ತಾಚಿ ಬೋಬ್, ರಗ್ತಾಚ್ಯಾ ಬುಡ್ಬುಡ್ಯಾ ವೊರೊಡಾಂನಿ ಬುಡೊನ್ ಗರ್ಗರ್‍ಯಾಂನಿ ಆಖೇರ್ ಜಾಲಿ.

ತಸೊಚ್ ವೊಮ್ತೊ ತೊ ಪಡ್ಲೊ. ತಾಚ್ಯಾಚ್ ರಗ್ತಾಂತ್ ಥೊಡೊ ವೇಳ್ ತೊ ಶಿರ್ಶಿರ್ಲೊ, ಆನಿ ಥಂಡ್ ಜಾಲೊ. ತಾಚೊ ಜೀವ್ ಉಬೊನ್ ಗೆಲೊ.

ತ್ಯಾ ಮೊಡ್ಯಾ ವಯ್ಲ್ಯಾನ್ ತರೀ ಸರ್ದಾರ್ ಸಿಮಾಂವ್ಕ್ ತೊಪುಂಕ್ ಫಕೀರ್ ಮಹಮ್ಮದಾನ್ ಪ್ರಯತ್ನ್ ಕೆಲೆಂ. ತಶೆಂ ಜಾತೆಲೆಂ ಮ್ಹಣ್ ಸರ್ದಾರ್ ಸಿಮಾಂವ್ಕ್ ಪಯ್ಲೆಂಚ್ ಕಳಿತ್ ಆಸ್‍ಲ್ಲೆಂ. ತ್ಯಾಚ್ ಖಾತಿರ್ ತಾಚ್ಯಾ ಹಾತಾಂತ್ಲಿ ತಲ್ವಾರ್, ಆಪ್ಲೆಸ್ತಕಿಂ ಆಡ್ ಘುಂವೊನ್ ಉಬಿ ಜಾಲಿ. ಜಿವಾಚ್ಯಾ ಅಕ್ಲಾಸಾಕ್ ಫಕೀರ್ ಮಹಮ್ಮದ್ ಪಾಟಿಂ ಉಡ್ಲೊ. ತರೀ – ತಾಚೊ ಜೀವ್ ಉರ್ಲೊ – ಪುಣ್ ಸರ್ದಾರ್ ಸಿಮಾಂವ್ಚ್ಯಾ ತಲ್ವಾರಿಚ್ಯಾ ಧೊಮೊಸಾನ್ ತಾಚ್ಯಾ ಖಾಡ್ಕೆಕ್ ಹಳ್ತಾಚೊ ಏಕ್ ಘಾಯ್ ಕರ್ನ್ ಜಾಲ್ಲೊ. ಖಾಡ್ಕೆಚೆ ಥೊಡೆ ರಗ್ತಾ ಥೆಂಬೆ ತಾಚ್ಯಾ ಹರ್ದ್ಯಾರ್ ಗಳ್ಳೆ. ಚಿಂತ್‍ಲ್ಲ್ಯಾ ಸೊವ್ಯಾ ಬದ್ಲಾಕ್, ಭಿಯಾಚಿ ಏಕ್ ಬೋಬ್ ದೀವ್ನ್, ಫಕೀರ್ ಮಹಮ್ಮದ್, ದೋನ್ ಮೆಟಾಂ ಪಾಟಿಂ ಧಾಂವೊನ್ ರಾವ್ಲೊ.

ಸರ್ದಾರ್ ಸಿಮಾಂವ್ ಆತಾಂ, ಭಿತರ್ಲ್ಯಾ ದಾರ್ವಂತಾರ್ ಆಸ್‍ಲ್ಲ್ಯಾ ವರ್ವಿಂ ಭಾಯ್ಲ್ಯಾನ್ ಎಎಕ್ಲ್ಯಾನ್‍ಂಚ್ ಯೇವ್ನ್ ತಾಚೆ ಕಡೆನ್ ಝುಜಜಾಯ್ ಆಸ್‍ಲ್ಲೆಂ ಮ್ಹಳ್ಳೆ ಸಮ್ಜೊನ್ ತಾಚೆಂ ಧಯ್ರ್ ಚಡ್ಲೆಂ. ವೆರೊನಿಕಾಕ್‍ಯೀ ತಾಣೆಂ ಥೊಡೆಂ ಧಯ್ರ್ ದಿಲೆಂ. ಜಿ ಬಾವ್ಡಿ, ಧಯ್ರಾನ್ ರಾವೊಂಕ್ ಪೆಚಾಡ್ತಾಲಿ ಜಾಲ್ಯಾರೀ, ಕೋಮಲ್ ಸ್ತ್ರೀ ಸಹಜ್ ಸ್ವಭಾವಾಕ್ ಸರಿ ಜಾವ್ನ್, ತ್ಯಾ ಬಾಗ್ಲಾ ಭಾಯ್ಲ್ಯಾನ್ ರಗ್ತಾಚ್ಯಾ ಕೊಂಡಾಂತ್ ಪಡೊನ್ ಆಸ್‍ಲ್ಲೆಂ ಮೊಡೆಂ ಚಿಂತುನ್ ಥರ್ಥರ್ತಾಲಿ.

“ಭಯ್ಣಿ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಪಾಟಿಂ ಘುಂವನಾಸ್ತಾನಾ, “ತುಜ್ಯಾ ಹಾತಾಂತ್ಲಿ ಉಜ್ವಾಡಿ ಥಂಯ್ ಸಕಯ್ಲ್ ದವರ್, ಆನಿ ಮ್ಹಾಕಾ ಏಕ್ ಉಪ್ಕಾರ್ ಕರ್.”

“ಉಪ್ಕಾರ್? ಕಿತ್ಯಾಕ್ ಉಪ್ಕಾರ್?” ಮ್ಹಣಾಲಿ ತಿ ಧಯ್ರಾನ್. “ಕಿತೆಂಯೀ ವಿಚಾರ್. ತಶೆಂ ಕರುಂಕ್ ಹಾಂವ್ ಆಸಾಂ ತಯಾರ್.”

“ಚಡಿತ್ ಕಾಂಯ್ ನಾ” ಸಾಂಗ್ಲೆಂ ಸರ್ದಾರ್ ಸಿಮಾಂವ್ನ್. “ತ್ಯಾ ಕುಶಿನ್ ಆಸ್‍ಲ್ಲೆಂ ತೆಂ ಸಾಗೊಣೆಚೆಂ ಮೇಜ್ ವೊಡುನ್ ಹ್ಯಾ ಬಾಗ್ಲಾ ಲಾಗಿಂ ಹಾಡುಂಕ್ ತುಜ್ಯಾನ್ ಜಾಯ್ತ್‍ವೇ?”

“ಪ್ರಯತ್ನ್ ಕರ್ತಾಂ” ಮ್ಹಣಾಲಿ ತಿ. ತೆಂ ಮೇಜ್ ಬಾಗ್ಲಾ ಕಡೆನ್ ಹಾಡ್ನ್ ಆಡ್ ದವರ್ಲ್ಯಾರ್, ಭಾಯ್ರ್ ಥಾವ್ನ್ ಬಲಾತ್ಕಾರಿಂ ಭಿತರ್ ಯೇಂವ್ಕ್ ಕೊಣಾಯ್ಕೀ ಕಷ್ಟ್ ಆಸ್‍ಲ್ಲೆ, ಆನಿ ತಶೆಂ ಜಾಲ್ಯಾರ್, ಸರ್ದಾರ್ ಸಿಮಾಂವ್ಕ್ ಝುಜೊಂಕ್‍ಯೀ ಚಿಕ್ಕೆ ಸಸಾರ್ ಜಾತೆಲೆಂ.

ತೆಂ ಜಡ್ ಮೇಜ್ ವೊಡುನ್ ತಿಣೆಂ ಬಾಗ್ಲಾ ಲಾಗಿಂ ಹಾಡ್ಲೆಂ. ಭಾಯ್ರ್ ಆಸ್‍ಲ್ಲ್ಯಾ ಗ್ರಾಯ್ಕಾಂಕ್ ಮತ್ಲಬ್ ಮತಿಕ್ ಗೆಲೊ. ತಾಣಿಂ ಪರ್ತ್ಯಾನ್ ಭರಾನ್ ಯೇವ್ನ್ ಭಿತರ್ಲ್ಯಾ ಕುಡಾಕ್ ಪ್ರವೇಶ್ ಜಾಂವ್ಕ್ ಚಿಂತ್ಲೆಂ. ಪುಣ್ ಸರ್ದಾರ್ ಸಿಮಾಂವ್ಚ್ಯಾ ತಲ್ವಾರಿ ಮುಖಾರ್, ಪರ್ತ್ಯಾನ್ ಪಾಯ್ ಪಾಟಿಂ ಕಾಡಿಜಾಯ್ ಪಡ್ಲೆಂ.

ತಿತ್ಲ್ಯಾ ವೆಳಾನ್, ಸರ್ದಾರಾಚ್ಯಾ ಕುಮ್ಕೆನ್, ವೆರೊನಿಕಾನ್ ಮೇಜ್ ಬಾಗ್ಲಾಕ್ ಆಡ್ ದವರ್ಲೆಂ. ಸರ್ದಾರಾನ್ ಆನ್ಯೇಕ್ ಕದೆಲ್ ತ್ಯಾ ಮೆಜಾ ಪಂದಾಕ್ ಉಡಯ್ಲೆಂ.

ಭಾಯ್ಲ್ಯಾನ್ ಆಸ್‍ಲ್ಲೆ ಗ್ರಾಯ್ಕ್ ಆತಾಂ ನಿಜಾಯ್ಕೀ ಚಡ್ ಚಡ್ಪಡ್ಲೆ.

“ಪಡ್ಪಶ್ಯಾ!” ಮ್ಹಣಾಲೊ ತೊಪಾಸಿ ಧಯ್ರಾನ್‍ಶೆಂ. “ತುವೆಂ ಕಿತೆಂ ಕೆಲ್ಯಾರೀ ಫಾಯ್ದೊ ನಾ. ಉಂದ್ರಾಪರಿಂ ತುಕಾ ಆಮಿ ಮಾರ್ತೆಲ್ಯಾಂವ್. ಬರ್‍ಯಾನ್ ಆಮ್ಕಾಂ ಖಾಲ್ತೊ ಜಾ.”

“ಆನಿ ತುಜಿ ತಲ್ವಾರ್ ಆಮ್ಚ್ಯಾ ಹಾತಾಂತ್ ಶರಣ್ ದೀ!” ಮ್ಹಣಾಲೊ ಫಕೀರ್ ಮಹಮ್ಮದ್.

ಹೆ ಆಯ್ಕೊನ್ ಸರ್ದಾರ್ ಸಿಮಾಂವ್ ಖುಬಾಳ್ಳೊ.

“ಘಾತ್ಕ್ಯಾಂನೊ ಆನಿ ಪಾಪಿಯಾಂನೊ!” ಮ್ಹಣಾಲೊ ತೊ ಭರ್ಮಾಚೊ ಆವಾಜ್ ದೀವ್ನ್. “ಕಿತೆಂ ಮ್ಹಣಾಂತ್? ತಲ್ವಾರ್ ಶರಣ್ ದೀಂವ್ಕ್ ಜಾಯ್? ವ್ಹಾ!” ಹಾಸ್ಲೊ ತೊ, ನಹಿಂ ತಾರಿಪೆನ್ ಬಗಾರ್ ತಾಪೊನ್. “ಜರ್ ತುಮ್ಕಾಂ ತಾಂಕ್ ಆಸಾ ಆನಿ ಧಯ್ರ್ ಆಸಾ, ಯೆಯಾತ್ ಆನಿ ಘೆಯಾತ್. ಮ್ಹಜಿ ತಲ್ವಾರ್ ದೀಂವ್ಕ್ ಹಾಂವ್ ಕಬೂಲ್ ಆಸಾಂ. ಮ್ಹಜಿ ತಲ್ವಾರ್ ದೀಂವ್ಕ್ ಹಾಂವ್ ಕಬೂಲ್ ಆಸಾಂ. ಪುಣ್ ನಹಿಂ ತುಮ್ಚ್ಯಾ ಹಾತಾಂತ್ – ಬಗಾರ್ ತುಮ್ಚ್ಯಾ ಹರ್ದ್ಯಾಂತ್!”

ಇತ್ಲೆಂ ಆಯ್ಕೊನ್, ಭಾಯ್ರ್ ಆಸ್‍ಲ್ಲೆ ಗ್ರಾಯ್ಕ್ ತಾಪ್ಲೆ. ಫಕೀರ್ ಮಹಮ್ಮದಾನ್ ತ್ಯಾ ಶಿಪಾಯಾಚ್ಯಾ ಕಾನಾಂತ್ ಕಸಲೊಗೀ ಉಪಾಯ್ ಫುಂಕ್ಲೊ.

ಶಿಪಾಯ್ ಫುಡೆಂ ಆಯ್ಲೊ, ಆನಿ ಮೆಜಾ ವಯ್ಲ್ಯಾನ್ ಸರ್ದಾರ್ ಸಿಮಾಂವ್ ಕಡೆನ್ ಝುಜೊಂಕ್ ಆಯ್ತೊ ಜಾಂವ್ಚೆಪರಿಂ ತಾಣೆಂ ಅಭಿನಯನ್ ಕೆಲೆಂ. ಫಕೀರ್ ಮಹಮ್ಮದ್ ತಾಚ್ಯಾ ಪಾಟ್ಲ್ಯಾನ್‍ಂಚ್ ರಾವ್‍ಲ್ಲೊ.

ಜಪ್ ಕರ್ನ್ ಶಿಪಾಯಾನ್ ದಿಂಬಿ ಘಾಲಿ, ಆನಿ ಮೆಜಾ ಪಂದ್ಲ್ಯಾನ್ ಸರ್ದಾರ್ ಸಿಮಾಂವ್ಕ್ ತೊಪುಂಕ್ ತಾಣೆಂ ಪ್ರಯತ್ನ್ ಕೆಲೆಂ. ತಸಲ್ಯಾ ಕುಸ್ಡ್ಯಾ ಮಾರಾಂಚಿ ಮೂರ್ ಸರ್ದಾರ್ ಸಿಮಾಂವ್ಕ್ ಬರಿ ಕಳಿತ್ ಆಸ್‍ಲ್ಲಿ. ಝಗ್ಲಾಣ್ಯಾಚ್ಯಾ ವೆಗಾನ್ – ಮೆಜಾಚ್ಯಾ ಹೆವ್ಶಿಲ್ಯಾನ್ – ತೊಯೀ ಬಾಗ್ವಲೊ. ಪುಣ್ ತ್ಯಾಚ್ ಘಡ್ಯೆ ಉಜ್ವ್ಯಾಕ್ ಬಗ್ಲೆನ್ ಉಡ್ಲೊ ಆನಿ ವಣದಿ ಬಗ್ಲೆನ್ ರಾವ್ಲೊ.

ತ್ಯಾಚ್ ಘಡ್ಯೆ ವೆರೊನಿಕಾನ್ ಆಕಾಂತಾಚಿ ಕಿಂಕ್ರಾಟ್ ದೀವ್ನ್ ಜಾಲ್ಲಿ.

ಕಿತ್ಯಾಕ್ ದಿಂಬಿಯಾಂನಿ ಪಡ್‍ಲ್ಲ್ಯಾ ಶಿಪಾಯಾಚ್ಯಾ ಆಂಗಾ ವಯ್ಲ್ಯಾನ್ ಸರ್ದಾರ್ ಸಿಮಾಂವ್ಕ್ ಫಾಪ್ಸುಂಕ್ ಫಕೀರ್ ಮಹಮ್ಮದಾನ್‍ಯೀ ಬುದ್ವಂತ್ಕಾಯ್ ಚಿಂತ್‍ಲ್ಲಿ.

ತ್ಯಾಚ್ ಘಡ್ಯೆ ಫಕೀರ್ ಮಹಮ್ಮದಾನ್‍ಯೀ ಕ್ರೋಧ್ ಆನಿ ದುಖಾ ಭರ್ಶೆಚಿ ಬೋಬ್ ದಿಲಿ. ಆನಿ ಮೆಜಾ ಲಾಗ್ಸರ್ ಥಾವ್ನ್ ತೊ ಪಾಟಿಂ ಉಸಳ್ಳೊ. ಜಾಲ್ಲೆಂ ಇತ್ಲೆಂಚ್:

ಸರ್ದಾರ್ ಸಿಮಾಂವ್ಕ್ ತೊಪುಂಕ್ ಮ್ಹಣ್, ದಾವ್ಯಾ ಹಾತಾನ್ ತಾಣೆಂ ಫುಡೆಂ ಉಡಯಿಲ್ಲಿ ತಲ್ವಾರ್ ಮೆಜಾಂತ್ ರೊಂಬೊನ್ ರಾವ್ಲಿ. ತಿ ತಾಣೆಂ, ನಿರಾಶಿ ಆನಿ ವಿಜ್ಮಿತ್ ಜಾವ್ನ್ ಪಾಟಿಂ ಕಾಡ್ಚ್ಯಾ ಭಿತರ್, ಲಡಾಯೆಚ್ಯಾ ಸ್ವಯಂ ಪ್ರೇರಿತ್ ಸ್ವಭಾವಾನ್, ಸರ್ದಾರ್ ಸಿಮಾಂವ್ಚಿ ತಲ್ವಾರ್ ತಾಚೊ ಹಾತ್ ಕೊಂಕುನ್ ಪಾಟಿಂ ಸರ್‌ಲ್ಲಿ. ತಸೊ, ಫಕೀರ್ ಮಹಮ್ಮದ್ ಪಾಟಿಂ ಉಸಳ್‍ಲ್ಲೊ.

ಗಜಾಲ್, ತಿತ್ಲ್ಯಾರ್‌ಚ್ ಆಖೇರ್ ಜಾಂವ್ಕ್ ನಾ.

ವಯ್ರ್ ಥಾವ್ನ್ ತಶಿ ಪಾಟಿಂ ಆಯಿಲ್ಲಿ ಸರ್ದಾರ್ ಸಿಮಾಂವ್ಚಿ ತಲ್ವಾರ್ ತ್ಯಾ ವಣದಿ ಬಗ್ಲೆರ್ ಥಾವ್ನ್ ವಿದ್ಯುತ್ ವೆಗಾನ್ ಮೆಜಾ ಪಂದಾಕ್ ಪಾಶಾರ್ ಜಾವ್ನ್, ದಿಂಬಿಯಾಂನಿ ಆಸ್‍ಲ್ಲ್ಯಾ ತ್ಯಾ ಶಿಪಾಯಾಚ್ಯಾ ಪೊಟಾಂತ್ ರಿಗೊನ್, ತಾಚಿ ಆನ್ಕಿಟಿ ಸಿಂಜುನ್ ಪಾಟಿಂ ಗೆಲ್ಲಿ.

ಶಿಪಾಯಾನ್ ಬೋಬ್ ಘಾಲಿ – ಘಾಲುಂಕ್ ಪ್ರಯತ್ನ್ ಕೆಲೆಂ. ಆವಾಜಾ ಬದ್ಲಾಕ್ ತಾಚ್ಯಾ ತೊಂಡಾಂತ್ಲ್ಯಾನ್ ರಗತ್ ಉಮಾಳೊನ್ ಭಾಯ್ರ್ ಆಯ್ಲೆಂ. ಥೊಡ್ಯಾಚ್ ವೆಳಾನ್, ತೊಯೀ ಕಾಂಪ್ಲೊ, ಥಾಂಬ್ಲೊ ಆನಿ ನೀಟ್ ಜಾಲೊ.

ಹೆಂ ಸರ್ವ್, ಸಾಂಗ್ಚ್ಯಾ ಪ್ರಾಸ್ ಭೋವ್ ಉಣ್ಯಾ ವೆಳಾನ್ ಘಡೊನ್ ಆಖೇರ್ ಜಾಲೆಂ.

ಥೊಡ್ಯಾ ವೆಳಾ ಆದಿಂ, ದರ್ಬಾರಾನ್ ಆವಾಜ್ ದಿಲ್ಲೊ ತೊಪಾಸಿ ದಾಲ್ಮೇದಾ ಸಗ್ಳೊ ಬೆಳ್ಶೆಲೊ.

ಮಾನಿನ್ ವೆರೊನಿಕಾ ಕುವೆಲ್, ಭಿಯಾನ್ ಆನಿ ಆಕಾಂತಾನ್ ತರೀ, ಅಭಿಮಾನಾನ್ ಆನಿ ಅಜ್ಯಾಪ್ ಪಾವೊನ್ ತಟಸ್ಥ್ ಜಾಲಿ.

ಸಕಯ್ಲೊ, ರಾವ್ಳೆರಾಚ್ಯಾ ಆಖ್ಯಾ ವಠಾರಾಂತ್ಲೊ ಆವಾಜ್ ಆತಾಂ ಬಳ್ ಜಾಲೊ ಆನಿ ಸ್ಪಷ್ಟ್ ಜಾಲೊ. ಸಬಾರ್ ಜಣಾಂಚ್ಯಾ ಮೆಟಾಂಚೊ ಆನಿ ಉಲೊಣ್ಯಾಂಚೊ ಆನಿ ಗಲಾಟ್ಯಾಚೊ ಗುಜ್ಗುಜೊ, ಪಯ್ಶಿಲೆಂ ಏಕ್ ಬಳಾಧಿಕ್ ಲಾರ್ ಯೇವ್ನ್ ತಡಿಕ್ ಆಪ್ಟೊಂಚ್ಯಾ ಜಿನ್ಸಾರ್ ವಯ್ರ್ ಆಯ್ಲೊ.

ಚಿಂತಿನಾಸ್ತಾಂ ಮ್ಹಳ್ಳೆಪರಿಂ, ಮಾನಿನ್ ವೆರೊನಿಕಾ ಕುವೆಲ್ ಬಾವ್ಡಿ ಸುಸ್ಕಾರೊಂಕ್ ಲಾಗ್ಲಿ.

“ಭಿಯೆನಾಕಾ ಭಯ್ಣಿ!” ಮ್ಹಣಾಲೊ ಸರ್ದಾರ್ ಸಿಮಾಂವ್. ತೊ ಆತಾಂ ಸಗ್ಳೊ ಘಾಮೆವ್ನ್ ಖರ್ಶೆತಾಲೊ. ಪುಣ್ ತಲ್ವಾರ್ ಧರ್ಣಿಕ್ ತೆಂಕುನ್ ಥೊಡೊ ವಿಶೆವ್ ಘೆತಾಲೊ. “ಸರ್ವ್ ಆಖೇರ್ ಜಾಂವ್ಕ್ ನಾ. ದೆವಾಧಿನ್ ಜಾಲ್ಲೆ ಆಮ್ಚೆ ಮ್ಹಾಲ್ಗಡೆ ಆನಿ ಬಾಂಧವ್ ಜಿವೆಚ್ ಆಸಾತ್. ಆಮ್ಚ್ಯಾ ಪುರ್ವಜಾಂಚೊ ಭಾವಾಡ್ತ್ ಭಯ್ಣಿ ಜಿವೊಚ್ ಆಸಾ – ಜಿವೊಚ್ ಉರ್ತಲೊ!”

ಕಸಲಿಂ ಉತ್ರಾಂ!

ಆನಿ ತಸಲಿಂ ಉತ್ರಾಂ ಉಚಾರ್‌ಲ್ಲೊ ಹೊ ವೀರ್, ತಿಚೊ ಆನಿ ಕೆನರಾಂತ್ಲ್ಯಾ ಹಜಾರೊಂ ಕ್ರಿಸ್ತಾಂವಾಂಚೊ ಸರ್ದಾರ್ ಫುಡೆಂ ಕಿತ್ಲೊ ವೇಳ್ ಜೀವ್ ಆಸ್ತಲೊ?

ನಹಿಂಗೀ, ತಿಂ ಉತ್ರಾಂ ಅಮರ್ ಉರಂವ್ಚ್ಯಾ ಖಾತಿರ್, ತಾಚೊಯೀ ತೊ ವೀರ್ ಆನಿ ಧೀರ್ ಜೀವ್ ತೊ ಬಲಿ ದಿತಲೊ..?

ಚಿಂತ್ಲೆಂ ತಿಣೆಂ.

ಪುಣ್ ಕರ್ಗಲಿ ತಿ. ಧಯ್ರ್ ಘೆತ್ಲೆಂ ತಿಣೆಂ.

ಸಕಯ್ಲಿ ಪಾಟ್ಲಾಮ್ ವಯ್ರ್ ಪಾವ್ಲಿ. ದಿವ್ಯಾಂ ಆನಿ ಚೂಡಿಂಚ್ಯಾ ಉಜ್ವಾಡಾಂತ್ ಆನಿ ಧುವ್ರಾಂತ್ – ಜೆಜೂ! ಭಾಲೆ ಆನಿ ತಲ್ವಾರಿ ತಿಕಾ ಝಳ್ಕಲ್ಯೊ!

ಚಡುಣೆಂ ಪಂದ್ರಾ ವೀಸ್ ಲಸ್ಕರಾಂಚ್ಯಾ ಹಿಂಡಾಂತ್, ಜಹನಾರಾ ಫರಿದಾ ಬೇಗಮ್ ಆಸ್‍ಲ್ಲಿ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel