ಇಂಫೆರ್ನಾಚಿಂ ದಾರಾಂ – 23: ಭೆಟ್ತಾತ್ – ವೆರೊನಿಕಾ ಆನಿ ಆಗ್ನೆಸ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 23
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 23: ಭೆಟ್ತಾತ್ – ವೆರೊನಿಕಾ ಆನಿ ಆಗ್ನೆಸ್

ಬೇಗಮ್ ಜಹನಾರಾ ಆನಿ ಫಕೀರ್ ಮಹಮ್ಮದ್, ನವ್ಯಾ ಮನ್ಶ್ಯಾ ಕಡೆನ್, ಸಕಯ್ಲ್ ಚೌಕೆಂತ್ ಉಲಯಿಲ್ಲಿಂ. ವೆರೊನಿಕಾ ಕುವೆಲಿಕ್ ರಾವಯಿಲ್ಲೆಂ (ಬಂದ್ ದವರ್‌ಲ್ಲೆಂ) ಕೂಡ್ ಮಾಳಿಯೆರ್ ಆಸ್‍ಲ್ಲೆಂ.

ಸಕಯ್ಲ್ ಉಲವ್ಣೆಂ ಜಾತಾನಾ, ವೆರೊನಿಕಾನ್, ಮನ್ ನಾತ್‍ಲ್ಲೆಂ ಜಾಲ್ಯಾರೀ ಕಾನ್ ದಿಲ್ಲೆ. ಆಪ್ಣಾಕ್ ರಾವಯಿಲ್ಲ್ಯಾ ಕುಡಾ ಭಾಯ್ಲ್ಯಾನ್ ರಾಕ್ವಲ್ಯಾಕ್ ಬಸವ್ನ್, ಖರಿಚ್ ಆಪ್ಣಾಕ್ ಕೈದಿ ಕರ್ನ್ ದವರ್ತಾತ್ ಮ್ಹಣ್ ಸಮ್ಜೊನ್ ತಿಚಿ ಭಿರಾಂತ್ ಆನಿ ಭ್ಯೆಂ ಚಡ್ ಜಾಲೆಂ.

ಆತಾಂ ಪುರ್ತೊ ಕಾಳೊಕ್ ಜಾವ್ನ್ ಆಯಿಲ್ಲ್ಯಾನ್, ರಾವ್ಳೆರಾಂತ್ ಹೆಣೆಂ-ತೆಣೆಂ ಸೊಮಯೊ ಆನಿ ದಿವೆ ಪೆಟಯಿಲ್ಲೆ.

ನವ್ಯಾ ರಾಕ್ವಲ್ಯಾಕ್, ತಾಚೆಂ ಸ್ಥಾನ್ ಆನಿ ಕಾಮಾಂ ವಿವರ್ಸುಂಚ್ಯಾ ಖಾತಿರ್ ಖುದ್ದ್ ಬೇಗಮ್ ಜಹನಾರಾಚ್ ವಯ್ರ್ ಆಯ್ಲಿ. ತಿಚ್ಯಾ ಸಾಂಗಾತಾ ಫಕೀರ್ ಮಹಮ್ಮದ್‍ಯೀ ಆಯ್ಲೊ.

ಏಕ್ ದೋನ್ ಪಾವ್ಟಿಂ ಉಲೊ ದೀವ್ನ್ ಬೇಗಮ್ ಜಹನಾರಾ ಭಿತರ್ ಸರ್ಲಿ. ವೆರೊನಿಕಾ ಥಂಯ್ಸರ್, ಪಶ್ಚಿಮಾಚ್ಯಾ ಜನೆಲಾಂತ್ಲ್ಯಾನ್ ದರ್ಯಾ ತೆವ್ಶಿಲ್ಯಾ ಕಾಳೊಕಾಚೆರ್ ದೀಶ್ಟ್ ದವರ್ನ್ ರಾವ್‍ಲ್ಲಿ. ಬೇಗಮ್ ಭಿತರ್ ಸರ್ತಚ್, ತಿ ಪಾಟಿಂ ಘುಂವ್ಲಿ.

“ತುಜೆ ಕಡೆನ್ ಥೊಡೆಂ ಉಲಂವ್ಕ್ ಆಸಾ” ಮ್ಹಣಾಲಿ ಬೇಗಮ್.

“ತುಮಿ ಜಾಣಾಂತ್, ಮ್ಹಜೆ ಕಡೆನ್ ಉಲವ್ನ್ ತುಮ್ಕಾಂ ಕಾಂಯ್ ಫಾಯ್ದೊ ನಾ” ಮ್ಹಣಾಲಿ ವೆರೊನಿಕಾ.

“ಬರೆಂ ತರ್, ತುಕಾ ಇಲ್ಲೆಂ ಸಾಂಗೊಂಕ್ ಆಸಾ.”

“ಕಿತೆಂ?”

“ಥೊಡ್ಯಾ ವಾಜ್ಭಿ ಕಾರಣಾಂ ಖಾತಿರ್ – ಆನಿ ತುಜ್ಯಾಯೀ ಬಚಾವೆ ಖಾತಿರ್, ಆಮಿ ತುಕಾ ಚಿಕ್ಕೆ ಬಂದೋಬಸ್ತೆರ್ ದವರುಂಕ್ ಚಿಂತ್ಲಾಂ.”

“ತೆಂ ಮ್ಹಾಕಾ ಸಮ್ಜತಾ.”

“ತುವೆಂ ಬೆಜಾರ್ ಕರ್ಚಿ ಗರ್ಜ್ ನಾ.”

“ಮ್ಹಾಕಾ ಬೆಜಾರಾಯ್ ನಾ. ಆಮ್ಚ್ಯಾ ಕುಡಿಂಚೆರ್ ಬಂದೋಬಸ್ತ್ ವಾ ಜುಲುಮ್ ದುಸ್ಮಾನಾಂನಿ ಚಲವ್ಯೆತ್ – ಪುಣ್ ಆಮ್ಚ್ಯಾ ಅತ್ಮ್ಯಾಂಚೆರ್ ಅಧಿಕಾರ್ ಚಲಂವ್ಕ್ ಕೊಣಾಯ್ಕೀ ಸಾಧ್ಯ್ ಜಾಂವ್ಚೆಂ ನಾ.”

“ತುಮ್ಚೆ ಅತ್ಮೆ ಕೊಣಾಕ್ ಜಾಯ್?” ಹಾಸ್ಲೊ ಫಕೀರ್ ಮಹಮ್ಮದ್. “ಆಮ್ಕಾಂ ಫಕತ್ ಜಾಯ್…”

“ಮಧೆಂ ಉಲಯ್ನಾಕಾ!” ಮ್ಹಣಾಲಿ ಬೇಗಮ್. ಉಪ್ರಾಂತ್ ವೆರೊನಿಕಾಕ್ ಪಳೆವ್ನ್, ಚಿಕ್ಕೆ ಪುಸ್ಲಾಂವ್ಚ್ಯಾ ಸ್ವರಾನ್. “ತುಂ ಜಾಣಾಂಯ್ ಬಹೆನ್, ಹಾಂವ್ ತುಜಿ ದುಸ್ಮಾನ್ ನಹಿಂ. ಜೆಂ ಕಿತೆಂ ಹಾಂವ್ ಆತಾಂ ಕರ್ತಾಂ, ತೆಂ ಆಮ್ಚ್ಯಾ ಮಾತ್ರ್ ನಹಿಂ, ತುಜ್ಯಾಯೀ ಬರೆಪಣಾ ಖಾತಿರ್ ಮ್ಹಳ್ಳೆಂ ತುವೆಂ ಸಮ್ಜಜಾಯ್.”

ವೆರೊನಿಕಾ ಥಂಡ್ ರಾವ್ಲಿ.

“ಥೊಡ್ಯಾ ಪ್ರತ್ಯೇಕ್ ಆನಿ ಖಾಸ್ಗಿ ಕಾರಣಾಂ ಖಾತಿರ್ ಹಾಂವೆಂ ಅಶೆಂ ಕರ್ಚಿ ಗರ್ಜ್ ಪಡ್ಲ್ಯಾ. ಆನಿ ಮ್ಹಜೆಂ ಕಾಮ್ ಫಳಾಧಿಕ್ ಜಾಂವ್ಕ್ ತುಜ್ಯಾ ಸಹಕಾರಾಚಿ ಗರ್ಜ್ ಆಸಾ” ಮ್ಹಣಾಲಿ ಬೇಗಮ್.

ಮತ್ಲಬ್ ಕಸಲೊ ಮ್ಹಣ್ ವೆರೊನಿಕಾಕ್ ಸಮ್ಜೊಂಕ್ ನಾ. ತಿ ಉಲಂವ್ಕ್ ನಾ.

“ತುಮ್ಚೊ ತೊ ಸರ್ದಾರ್ ಸಿಮಾಂವ್, ತಾಚೆಸ್ತಕಿಂ ಹಾಂಗಾ ಆಯ್ಲ್ಯಾರ್ ಬರೆಂಚ್. ಎಕಾದಾವೆಳಾ ತೊ ಯೇನಾತ್ಲ್ಯಾರ್ – ವಾ ತೊ ಜೀವ್ ಆಸ್ಲ್ಯಾರ್ – ಆಮಿ ಸಾಂಗ್ಚೆಪರಿಂ ವರ್ದಿ ಧಾಡುನ್ ತುವೆಂ ತಾಕಾ ಹಾಂಗಾ ಹಾಡವ್ಯೆತ್. ದೆಕುನ್, ತಸಲಿಂ ಕಾಮಾಂ ಆಸ್ಯೆತ್ ದೆಕುನ್, ತುಕಾ ಆಮಿ ಸುರಕ್ಷಿತಾಯೆನ್ ಸಾಂಬಾಳ್ತಾಂವ್” ಮ್ಹಣಾಲಿ ಬೇಗಮ್.

ಬೇಗಮೆಚ್ಯಾ ಉಲವ್ಣ್ಯಾಚೊ ಅರ್ಥ್ ಥೊಡೊ ವೆರೊನಿಕಾಕ್ ಸಮ್ಜಲೊ. ತ್ಯಾ ತೆಕಿದ್, ಸರ್ದಾರ್ ಸಿಮಾಂವ್ಕ್ ಆಸ್ಚೊ ಅಪಾಯ್ ಚಿಂತುನ್ ತಿ ಭಿಯೆಲಿ ಆನಿ ಚುರ್ಚುರ್ಲಿ. ಬೇಗಮೆನ್ ಸಾಂಗ್‍ಲ್ಲೆಪರಿಂ – ಪಯ್ಲೆಂ ತೊ ಯೇನಾತ್ಲ್ಯಾರ್ – ತಾಕಾ ವರ್ದಿ ಧಾಡ್ಚೊ ಸಂಭವ್ ಲಾಭತ್, ಆನಿ ತ್ಯಾ ವೆಳಾರ್ ‘ಫಾವೊ ತೆಂ ರಕ್ಷಣ್ ಆಸ್ಲ್ಯಾ ಶಿವಾಯ್ ಯೇವ್ನ್ ಸಾಂಪಡ್ನಾಕಾ’ ಮ್ಹಳ್ಳಿ ಜಾಗ್ವಣ್‍ಯೀ ತಾಕಾ ದಿವ್ಯೆತ್ ಮ್ಹಳ್ಳಿ ಆಶಾ ತಿಚ್ಯಾ ಮತಿಂತ್ ಘುಂವ್ಲಿ.

“ತುಮಿ ಕಿತೆಂ ಮ್ಹಳ್ಯಾರೀ ಸಾರ್ಕೆಂಚ್” ಮ್ಹಣಾಲಿ ತಿ. “ಕಿತ್ಯಾಕ್ ಮ್ಹಳ್ಯಾರ್, ಹಾಂವ್ – ಹಾಂವ್ ತುಮ್ಚಿ ಕೈದಿ ಜಾವ್ನ್ ಆಸಾಂ.”

“ಬಿಲ್ಕುಲ್ ನಹಿಂ” ಮ್ಹಣಾಲಿ ಬೇಗಮ್. “ತುಂ ಆಮ್ಚಿ ಕೈದಿ ನಹಿಂ. ಆಮ್ಚಿಂ ಕಾಮಾಂ ಜಾತಾ ಪರ್ಯಾಂತ್, ಶಾಬಿತಾಯೆನ್ ತುವೆಂ ಆಮ್ಚ್ಯಾ ಸಾಂಗಾತಾ ಉರಜಾಯ್ ಮ್ಹಳ್ಳೊ ಮಾತ್ರ್ ಆಮ್ಚೊ ಇರಾದೊ.”

“ಜಾಯ್ತ್ ತರ್, ಆನಿ ಹಾಂವ್ ಹಾಂಗಾ ಥಾವ್ನ್ ಧಾಂವೊಂಕ್ ಪ್ರಯತ್ನ್ ಕರಿನಾ” ಮ್ಹಣಾಲಿ ವೆರೊನಿಕಾ.

“ತಶೆಂ ಜಾಂವ್ಚೆಂ ನಾಕಾ ಮ್ಹಣ್ ಆಮಿಯೀ ಚತ್ರಾಯ್ ಘೆತಾಂವ್” ಮ್ಹಣಾಲಿ ಬೇಗಮ್. “ಹ್ಯಾ ಉಪ್ರಾಂತ್, ಚಡಾವತ್ ಜಾವ್ನ್ ತುವೆಂ ಹ್ಯಾಚ್ ಕುಡಾಂತ್ ರಾವಜಾಯ್. ತುಜೊ ಆಹಾರ್ ಆನಿ ಪೀವನ್, ಎಕ್ಲಿ ಚಾಕರ್ನ್ ಹಾಂಗಾಚ್ ಹಾಡುನ್ ದಿತೆಲಿ. ಬಾಗಿಲ್ ಆಡ್ ಕರ್ನ್ ಖಿಳ್ ತುವೆಂ ಘಾಲ್ಯೆತ್, ಕಿತ್ಯಾಕ್, ಭಾಯ್ಲ್ಯಾ ಕುಡಾಂತ್, ತುಜ್ಯಾ ಕುಡಾಚ್ಯಾ ದಾರಾರ್, ದೀಸ್ ರಾತ್ ಎಕ್ಲೊ ರಾಕ್ವಲಿ ಆಸ್ತಲೊ.”

“ಸಮ್ಜಲೆಂ.”

“ಘಡಿಭರ್ ಭಾಯ್ರ್ ವಾರ‍್ಯಾಕ್ ವಚೊಂಕ್ ತುಕಾ ಮನ್ ಜಾಲ್ಯಾರ್, ತೊ ರಾಕ್ವಲಿಯೀ ತುಜ್ಯಾ ಸಾಂಗಾತಾ ಯೆತಲೊ.”

ವೆರೊನಿಕಾ ಉಲಂವ್ಕ್ ನಾ. ಉಲಂವ್ಕ್ ತಿಚೆಂ ಮನ್ ಕಾಂಠಾಳ್ಳೆಂ.

ಪುಣ್, ತಿಣೆಂ ಚಿಂತ್‍ಲ್ಲ್ಯಾ ಪ್ರಾಸ್ ಚಡ್ ಕಾಂಠಾಳ್ಯಾಚೆಂ ಕಾರಣ್ ಪಾಟಿಂ ಆಸ್‍ಲ್ಲೆಂ.

“ಚಡಿತ್ ಉಲಂವ್ಕ್ ಆಸ್‍ಲ್ಲೆಂ ಹಾಂವ್ ತುಕಾ ಫಾಲ್ಯಾಂ ಸಾಂಗ್ತಾಂ” ಮ್ಹಣಾಲಿ ಬೇಗಮ್. “ಆತಾಂ ಆಬ್ಳೆ, ತುಜ್ಯಾ ರಾಕ್ವಲ್ಯಾಕ್ ಹಾಂಗಾಚ್ ಭಾಯ್ಲ್ಯಾನ್ ಆಮಿ ಸೊಡ್ತಾಂವ್” ಮ್ಹಣೊನ್, ಹಾತ್ ಭಾಸ್ ಕರ್ನ್, ಸುಫೆದಾರ್ ಭು-ಭುಕ್ ತಿಣೆಂ ಫುಡೆಂ ಆಪಯ್ಲೊ.

ಅಟ್ಟ್ಯಾ ಪಾಯಾಂನಿ ಮೆಟಾಂ ವೊಡಿತ್ತ್, ಸುಫೆದಾರ್ ಭು-ಭು ಫುಡೆಂ ಆಯ್ಲೊ.

ತಸಲಿ ದೀಷ್ಟ್, ಮಾನಿನ್ ವೆರೊನಿಕಾ ಕುವೆಲಿನ್ ಅಪೇಕ್ಸುಂಕ್ ನಾತ್‍ಲ್ಲಿ. ತೊ ಮನಿಸ್, ವಾ ತಿ ವ್ಯಕ್ತಿ ಫುಡೆಂ ಸರೊನ್, ತಿಕಾ ಸಲಾಮ್ ಕರುನ್, ತೋಂಡ್ ಸೊಡುನ್ ಹುಜ್ರಿಂ ರಾವ್ತಚ್ – ಚಿಕ್ಕೆ ಆಂಗ್ ಹಿಂವಾಳೊನ್ ಜಾವ್ಯೆತ್ – ಬೇಗಮ್ ಜಹನಾರಾ, ಆನಿ ಫಕೀರ್ ಮಹಮ್ಮದ್ ಸಹಿತ್, ದೋನ್ ಮೆಟಾಂ ಪಾಟಿಂ ಸರ್ಲಿಂ.

ಆಪ್ಲ್ಯಾಚ್ ದೊಳ್ಯಾಂಕ್ ಮ್ಹಳ್ಳೆಪರಿಂ, ವೆರೊನಿಕಾ ಕುವೆಲ್ ಪಾತ್ಯೆನಾ ಜಾಲಿ. ತ್ಯಾ ಮನ್ಶ್ಯಾಕ್ ಪಳೆವ್ನ್, ಆಪ್ಶೆಚ್ ಉದರಿಂ ಉಟ್‍ಲ್ಲೆ ವೊರೊಡ್ ತಿಣೆಂ ದಾಂಬುನ್ ಧರ್ಲೆ. ತರೀ, ಮಂತ್ರಾಯಿಲ್ಲೆಪರಿಂ ತಾಕಾಚ್ ಪಳೆವ್ನ್ ತಿ ರಾವ್ಲಿ. ಸುಜ್ಚೆ ವೋಂಟ್ ಪಿಂಜಾವ್ನ್ ಆನಿ ಮ್ಹೆಳೆ-ಕಾಳೆ ದಾಂತ್ ದಾಕವ್ನ್ ತೊ ಹಾಸ್ತಾಲೊ.

“ತು-ತುಜೆಂ ನಾಂವ್ ಕಿ-ಕಿತೆಂ?” ವೆರೊನಿಕಾನ್ ವಿಚಾರ್ಲೆಂ.

“ಭು-ಹೂ..! ಭು-ಭು!”

ಬೇಗಮ್ ಹಾಸ್ಲಿ.

“ತುಕಾ ಸಮ್ಜಲೆಂ?” ಮ್ಹಣಾಲಿ ತಿ. “ತಾಚೆಂ ನಾಂವ್ ಭು-ಭು! ಕಾನ್ ತಾಚೆ ಬರೆ ಆಯ್ಕತಾತ್. ಪುಣ್ ಉಲಂವ್ಕ್ ತೊ ಸಕನಾ. ಮ್ಹಣ್ತಚ್, ತಾಚೆ ಕಡೆನ್ ಉಲವ್ನ್ ಭಾಯ್ಲೊ ಘುಟ್ ಕಾಡುಂಕ್, ವಾ ತಾಕಾ ಪುಸ್ಲಾವ್ನ್ ಚುಕಾರಿ ಮಾರುಂಕ್ ತುಕಾ ಸಾಧ್ಯ್ ನಾ.”

“ಭು-ಹೂ! ಭು-ಭು!” ವ್ಹಯ್ ಮ್ಹಣ್ಚ್ಯಾ ಜಿನ್ಸಾರ್, ರಾಕ್ವಲ್ಯಾನ್ ತಕ್ಲಿ ಹಾಲಯ್ಲಿ.

“ತುಜಿ ಬುದ್ವಂತ್ಕಾಯ್ ಆತಾಂ ಸಮ್ಜಲಿ ಬಹೆನ್!” ಮ್ಹಣೊನ್ ಫಕೀರ್ ಮಹಮ್ಮದಾನ್ ಬೇಗಮೆಕ್ ಹೊಗೊಳ್ಸಿಲೆಂ. “ಪುಣ್ ಅಸಲೊ ಸಾಂಗಾತ್ ತಿಕಾ ನಾಕಾ ಜಾಲ್ಯಾರ್…”

“ತಸಲೊ ಸಾಂಗಾತ್ ತಿಕಾ ನಾಕಾ ಜಾಲ್ಯಾರ್, ಆಮ್ಚೆ ಲಾಗಿಂ ತಿ ವೆಗಿಂ ಸಾಂಗ್ತೆಲಿ. ಆನಿ ಸಕ್ಡಾಂಕ್ ಬರೆಂಪಣ್ ಜಾತೆಲೆಂ – ತುಂಯೀ ಸಂತೊಸ್ ಪಾವ್ತಲೊಯ್” ಮ್ಹಣಾಲಿ ಬೇಗಮ್.

“ಬರಾಬರ್!” ಒಪ್ಲೊ ಫಕೀರ್ ಮಹಮ್ಮದ್.

ತಶೆಂ ಥೊಡೊ ವೇಳ್ ಗರ್ಜೆ ಶಿವಾಯ್ ಉಲವ್ನ್, ಬೇಗಮ್ ಆನಿ ಫಕೀರ್ ಮಹಮ್ಮದ್ ಥಂಯ್ ಥಾವ್ನ್ ದೆಂವೊನ್ ಸಕಯ್ಲ್ ಗೆಲಿಂ.

ಸುಫೆದಾರ್ ಭು-ಭು, ರಾಕ್ವಲಿ ಜಾವ್ನ್ ಥಂಯ್ಸರ್‌ಚ್ – ವೆರೊನಿಕಾ ಕುವೆಲ್ ಆಸ್‍ಲ್ಲ್ಯಾ ಕುಡಾ ಭಾಯ್ಲ್ಯಾನ್, ಚಪ್ಕಲ್ ಮಾರ್ನ್ ಬಸ್ಲೊ.

ವೆರೊನಿಕಾ, ಬಾಗಿಲ್ ಬಂದ್ ಕರ್ನ್, ಖಿಳ್ ಘಾಲ್ನ್ ಭಿತರ್ ರಾವ್ಲಿ.

ತಿಚ್ಯಾ ಚಿಂತ್ನಾಂಚೊ ಪುರ್ತೊ ಗೊಂದೊಳ್ ಜಾಲ್ಲೊ.

ಸಂಪೂರ್ಣ್ ಥರಾನ್ ಕೈದಿ ಜಾಲ್ಲಿ ಜಾಲ್ಯಾರೀ, ತಸಲ್ಯಾ ವಿದ್ರೂಪ್ ಮನ್ಶ್ಯಾಕ್ ಆಪ್ಲೊ ರಾಕ್ವಲಿ ಜಾವ್ನ್ ದಿಲ್ಲಿಂ ಚಿಂತ್ನಾಂ ತಿಕಾ ಚಡ್ ಕಾಂಠಾಳ್ಯಾಚಿಂ ಆನಿ ಭಿಯಾಚಿಂ ಜಾಲ್ಲಿಂ. ಸಾಂಗಾತಾಚ್, ಬೇಗಮ್ ಜಹನಾರಾಚೆಂ ವ್ಯಕ್ತಿತ್ವ್‌ಯೀ ತಿಕಾ ಸಮ್ಜನಾ ಜಾಲೆಂ.

ಕಸಲ್ಯಾ ಕಾಸ್ತಾಚಿ ಸ್ತ್ರೀ ಜಾವ್ಯೆತ್, ತಿ, ಬೇಗಮ್?

ಎಕಾ ಘಡ್ಯೆ – ಆರಂಭಾರ್ – ತಿಚಿಂ, ಗರಮ್, ಉಪ್ರಾಂತ್ ಸ್ವಾದಿಕ್ ಆನಿ ಮೊವಾಳ್ ಆನಿ ಧಯ್ರ್ ದಿಂವ್ಚಿಂ.

ಉಪ್ರಾಂತ್ ದೊಡ್ತ್ಯಾ ಅರ್ಥಾಚಿಂ ಆನಿ ಭೆಷ್ಟಾವ್ಣ್ಯಾಚಿಂ!

ಉಪ್ರಾಂತ್ ಸ್ವಾರ್ಥಾಚಿಂ ಆನಿ ಸ್ವಂತ್ ಬಚಾವೆಚಿಂ ಆನಿ ಭೆಷ್ಟಾವ್ಣ್ಯಾಚಿಂ!

ಆತಾಂಚ್ಯಾ ಪರಿಸ್ಥಿತಿಂತ್, ನಿಜಾಯ್ಕೀ ತಿ ಮನಿಸ್ ಕಸಲಿ ಮ್ಹಣ್ ಸಾಂಗೊಂಕ್ ಸಾಧ್ಯ್ ನಾ. ಕೋಣ್ ಜಾಲ್ಯಾರೀ ಕಾಬಾರ್ ಜಾಂವ್ದಿತ್ – ಆಪ್ಣಾಚಿ ಕಾತ್ – ಕಸಲ್ಯಾ ಖೆಳಾನ್ ಪುಣೀ ಆಪುಣ್ ಉರಯ್ತಾಂ ಮ್ಹಣ್ ತಿ ವಾವುರ್ತಾಶಿ ದಿಸ್ತಾ!

ತರ್ ಖರೆಂ!

ಕಣ್ಣಾನೂರ್‍ಚಿ ಬೇಗಮ್ – ಅರ್ಧಿ ಪಿಶಿ!

ಅಸಲಿಂ ಚಿಂತ್ನಾಂ ಮಾನಿನ್ ವೆರೊನಿಕಾ ಕುವೆಲಿಚ್ಯಾ ಮತಿಂತ್ ಖೆಳೊನ್ ಆಸ್ತಾನಾ, ತಿಣೆಂ ಬಂದ್ ಕೆಲ್ಲ್ಯಾ ದಾರಾಕ್ ಭಾಯ್ಲ್ಯಾನ್ ಕೊಣೆಂಗೀ ಖೊರ್ಪಿಲ್ಲೊ ಆವಾಜ್ ಜಾಲೊ.

ತಿ ಘಾಬರ್ಲಿ.

ತಿಣೆಂ ಶ್ವಾಸ್ ಬಾಂಧ್ಲೊ. ಥೊಡೊ ವೇಳ್ ಥಂಡ್ ಜಾವ್ನ್, ರಾಕೊನ್ ತಿ ರಾವ್ಲಿ.

ಪರ್ತ್ಯಾನ್ ದಾರಾಕ್ ಖೊರ್ಪಿಲ್ಲೊ ಆವಾಜ್ ಆಯ್ಕಲೊ.

“ಕೋಣ್ ಆಸಾ?” ವೆರೊನಿಕಾನ್ ವಿಚಾರ್ಲೆಂ.

“ಭು-ಭೂ-ಭು!” ಆಯ್ಕಲೊ ಆವಾಜ್.

ಗಿಮಾಳೆ ದೀಸ್ ಜಾಲ್ಯಾರೀ, ವೆರೊನಿಕಾಚ್ಯಾ ಆಂಗಾಂತ್ ಹಿಂವ್ ಚರೊಂಕ್ ಲಾಗ್ಲೆಂ. ಧಯ್ರ್ ಘೆವ್ನ್ ತಿಣೆಂ ಮ್ಹಳೆಂ:

“ಕೋಣ್ ಆಸಾ ಥಂಯ್! ಸರ್ ಪೆಲ್ಯಾನ್!”

“ಬಹೆನ್!” ಭಾಯ್ಲ್ಯಾನ್ ಆಯ್ಕಲೊ, ಸುಮಧುರ್ ಸ್ವರ್. “ತುಕಾ ಥೊಡೊ ಆಹಾರ್ ಹಾಡ್ಲಾ. ದಾರ್ ಉಗ್ತೆಂ ಕರ್.”

“ಕೋಣ್ ತುಂ?” ವೆರೊನಿಕಾನ್ ವಿಚಾರ್ಲೆಂ.

“ಹಾಂವ್ ವರ್ತವ್ತಾಂ ಹಾಂಗಾಚಿ ಚಾಕರ್ನ್ – ಭಯ್ಣಿ, ತುಕಾ ಖರೆಂಚ್ ಮ್ಹಜೆ ವರ್ವಿಂ ವಾಯ್ಟ್ ಜಾಂವ್ಚೆಂ ನಾ.”

“ಪುಣ್ ತೆಂ ಹಾಂವ್ ಕಶೆಂ ಜಾಣಾಂ?”

“ಹಾಂವ್ ಭಿತರ್ ಯೇಂವ್ಕ್ ದೀ ಭಯ್ಣಿ – ಪವಿತ್ರ್ ಸಿನೊಲೆಚ್ಯಾ ನಾಂವಾ ಖಾಲ್, ತುಕಾ ವಾಯ್ಟ್ ಜಾಂವ್ಚೆಂ ನಾ!”

ಅಸಲಿಂ ವಿಚಿತ್ರ್ ಉತ್ರಾಂ ಆಯ್ಕತಚ್, ವೆರೊನಿಕಾ, ಮಾನಾನ್, ಬಾಗ್ವಲಿ. ಚಡ್ ಘಳಾಯ್ ಕರಿನಾಸ್ತಾಂ, ಫುಡೆಂ ವಚೊನ್ ತಿಣೆಂ ಬಾಗಿಲ್ ಕಾಡ್ಲೆಂ.

ತಿಕಾ ಆಯ್ಕಲ್ಲಿಂ ಉತ್ರಾಂ – ಕೊಂಕ್ಣಿ ಭಾಶೆನ್.

ದಾರಾರ್, ಎಕ್ಲಿ ಮುಸ್ಲಿಮ್ ಯುವತಿ – ಜಿವಾನ್ ಲಾಂಬ್ ಆಸೊನ್ – ಮುಸ್ಲಿಮ್ ಸ್ತ್ರೀಯಾಂಪರಿಂಚ್ ಬುರ್ಖಾ ಘಾಲುನ್, ದೊನೀ ಹಾತಾಂನಿ ಆಹಾರಾಚಿ ಏಕ್ ಥಾಲಿ ಘೆವ್ನ್ ರಾವ್‍ಲ್ಲಿ.

“ಕೊ-ಕೋಣ್ ತುಂ?” ವಿಚಾರ್ಲೆಂ ವೆರೊನಿಕಾನ್.

“ಹಾಂವ್ ಭಯ್ಣಿ, ತುಕಾ ರಾತಿಚೆಂ ಜೆವಣ್ ಹಾಡುನ್ ಆಯ್ಲ್ಯಾಂ.”

“ಮ್ಹಾಕಾ ಜೆವ್ಣಾಚಿ ಗರ್ಜ್ ನಾ.”

“ಆಸಾ ಭಯ್ಣಿ!”

“ತಶೆಂ ತುವೆಂ ಮ್ಹಣೊಂಕ್ ಕಾರಣ್ ಕಿತೆಂ?”

“ಪಯ್ಲೆಂ ಪೊಟಾಕ್ ಇಲ್ಲೆಂ ಘೆ, ಉಪ್ರಾಂತ್ ಸಾಂಗ್ತಾಂ.”

“ಮ್ಹಾಕಾ ತುಂ ವಳ್ಕನಾಂಯ್ – ಶಿವಾಯ್, ತುಂ ಕೋಣ್ ಮ್ಹಣ್ ತುವೆಂ ಮ್ಹಾಕಾ ಸಾಂಗೊಂಕ್ ನಾಂಯ್.”

“ಹಾಂವೆಂ ಮ್ಹಳೆಂ – ಪೊಟಾಕ್ ಘೆ. ಉಪ್ರಾಂತ್ ಸಾಂಗ್ತಾಂ.”

“ಮ್ಹಾಕಾ – ಮ್ಹಜ್ಯಾ ಹ್ಯಾ ಸ್ಥಿತಿಯೆಂತ್ ಕಿತೆಂ ತುಂ ಸಾಂಗ್ಶಿ?”

“ತುಕಾ ಬರ‍್ಯಾಕ್ ಪಡ್ಚೆಂ, ವಾ ತುಜ್ಯಾ ಮತಿಕ್ ಸಮಾಧಾನ್ ದಿಂವ್ಚೆಂ ಹಾಂವ್ ಸಾಂಗನ್. ಪರ್ತ್ಯಾನ್ ತುಜೆ ಕಡೆನ್ ಉಪ್ಕಾರ್ ಮಾಗ್ತಾಂ – ಆಮ್ಕಾಂ ಉಲಂವ್ಕ್ ಪುರ್ಸತ್ ಮೆಳ್ಚ್ಯಾ ಖಾತಿರ್, ತುವೆಂ ಆತಾಂ ಇಲ್ಲೊ ಆಹಾರ್ ಘೆಂವ್ಕ್ ಜಾಯ್.”

“ತಶೆಂ ಜಾಂವ್.”

ಆಯಿಲ್ಲ್ಯಾ ಯುವತಿನ್, ಆಹಾರಾಚಿ ಥಾಲಿ ಖಟ್ಲ್ಯಾರ್ ದವರ್ಲಿ. ದೂದ್, ಚಪಾತಿ ಆನಿ ಥೊಡ್ಯೊ ಫಳ್-ವಸ್ತು, ವೆರೊನಿಕಾನ್ ಥೊಡ್ಯೊ ಚಾಕೊಂಕ್ ಪ್ರಯತ್ನ್ ಕೆಲೆಂ. ತಶೆಂ ಕರ್ತಾನಾ, ಉಲವ್ನ್ಂಚ್ ತಿಂ ರಾವ್ಲಿಂ.

“ತುಜೆಂ ನಾಂವ್ ಆನಿ ತುವೆಂ ಮ್ಹಜೆ ಕಡೆನ್ ಉಲಂವ್ಕ್ ಆಸಾ ಮ್ಹಳ್ಳೆಂ ಕಿತೆಂ ಮ್ಹಣ್ ತುವೆಂ ಮ್ಹಾಕಾ ಸಾಂಗೊಂಕ್ ನಾಂಯ್.”

“ಭಯ್ಣಿ” ಮ್ಹಣಾಲಿ ತಿ ಯುವತಿ. “ಸದ್ದ್ಯಾಕ್ ಮ್ಹಜ್ಯಾ ನಾಂವಾಚಿ ತುಕಾ ಗರ್ಜ್ ನಾ. ಪುಣ್ ಇತ್ಲೆಂ ಜಾಣಾಂ ಜಾ. ಹಾಂವ್‍ಯೀ ತುಜೆಪರಿಂಚ್ ಕ್ರಿಸ್ತಾಂವ್. ಆನಿ, ಹಾಂವ್ ಕ್ರಿಸ್ತಾಂವ್ ಮ್ಹಳ್ಳೆಂ ಹಾಂಗಾಚ್ಯಾ ಬೇಗಮೆಕ್ ಕಳಿತ್ ಆಸಾ.”

“ತರ್..?”

“ತರ್, ಥೊಡ್ಯಾ ಅನಿರೀಕ್ಷಿತ್ ಘಡಿತಾಂ ವರ್ವಿಂ, ಕಾಲ್ ಆಮಿ ಹಾಂಗಾಸರ್ ಪಾವ್ಲ್ಯಾಂವ್. ಹಾಂಗಾಸರ್, ಪರಾರಿ ಜಾಲ್ಲ್ಯಾ ಕ್ರಿಸ್ತಾಂವಾಂಕ್ ಭುಜಾವಣೆಚೊ ಆನಿ ಮಜತೆಚೊ ಆಸ್ರೊ ಆಸಾ ಮ್ಹಣ್ ಆಮಿ ಜಾಣಾಂಸ್‍ಲ್ಲ್ಯಾಂವ್.”

“ತುಂ ಕ್ರಿಸ್ತಾಂವ್! ತುಜೊ ಗಾಂವ್? ದೆವಾ, ಕಿತೆಂ ಆಯ್ಕತಾಂ ಹಾಂವ್!”

“ತುವೆಂ ಭಿಯೆಂವ್ಚಿ ಗರ್ಜ್ ನಾ, ಭಯ್ಣಿ” ಮ್ಹಣಾಲಿ ತಿ ಯುವತಿ. “ಮ್ಹಜೆಂ ನಾಂವ್, ತುಕಾ ಹಾಂವ್ ಆತಾಂ ಸಾಂಗನಾ. ಮ್ಹಜೊ ಗಾಂವ್, ತುಜೆಪರಿಂ ಮಂಗ್ಳುರ್ ನಹಿಂ ತರೀ, ಉಣೊ ನಹಿಂ. ಹ್ಯಾ ಬಂದಡೆ ವೆಳಾರ್ ಮ್ಹಜ್ಯಾ, ಆಮ್ಚ್ಯಾ ಘರಾಣ್ಯಾ ಥಂಯ್ ಜಾಯ್ತೆಂ ಘಡ್ಲಾಂ. ಜಾಯ್ತೆಂ ಆಮಿ ಎದೊಳ್ ಸೊಸ್ಲಾಂ, ಆತಾಂಯೀ ಸೊಸುನ್ ಆಸಾಂವ್.”

“ಪುಣ್, ಮ್ಹಜ್ಯಾ ಭೊಗ್ಣಾರಾಂಕ್, ಆನಿ ಹ್ಯಾ ವೆಳಿಂ, ರಾವ್ಳೆರಾಚಿ ಚಾಕರ್ನ್ ಜಾವ್ನ್ ತುವೆಂ ಹಾಂಗಾಸರ್ ಯೆಂವ್ಚ್ಯಾಕ್ ಸಂಬಂಧ್ ಕಿತೆಂ?”

“ಸಂಬಂಧ್ – ಪ್ರತ್ಯಕ್ಷ್ ಸಮ್ಜನಾತ್ಲ್ಯಾರೀ – ವಿಶೇಸ್ ಆಸಾ!”

“ಮ್ಹಣ್ಜೇ?”

“ಮ್ಹಣ್ಜೇ – ಭಯ್ಣಿ – ಆಮ್ಚೊ ಗಾಂವ್ ಬಂಟ್ವಳ್. ಥೊಡ್ಯಾ ಭೋವ್ ವಿಶೇಸ್ ಘಡಿತಾಂ ವರ್ವಿಂ, ಆನಿ ಲಕ್ಷ್ಮಮ್ಮಣ್ಣಿ ರಾಣಿಯೆಕ್, ತಿರುಮಲರಾಯಾ ಮುಖಾಂತ್ರ್ ಆಮಿ ಅಪಾಲಿಕಾ ಕುಮಕ್ ದಿತಾಂವ್ ಮ್ಹಳ್ಳೊ ಬದ್ಲಾಮ್ ಮ್ಹಜ್ಯಾ ಬಾಪಾಯ್ಕ್ ಲಾಗ್‍ಲ್ಲ್ಯಾ ವರ್ವಿಂ…”

“ತಿರುಮಲರಾಯಾ ಮುಖಾಂತ್ರ್!!” ವೆರೊನಿಕಾ ಆಕಾಂತ್ಲಿ.

“ವ್ಹಯ್. ಕಿತೆಂ ಜಾಲೆಂ? ತುಕಾ ಕಾಂಯ್ ಚಡ್ ಸಂಬಂಧ್ ಆಸಾ?”

“ಕಿತೆಂ ಸಾಂಗ್ಚೆಂ ಮ್ಹಣ್ ಹಾಂವ್ ನೆಣಾಂ! ತಿರುಮಲರಾಯಾಕ್ ಮಜತ್ ದಿಂವ್ಚ್ಯಾ ಖಾತಿರ್ ಗೆಲ್ಲೆ, ಮ್ಹಜೊ ಭಾವ್ ಮಾರ್ಸೆಲ್ ಕುವೆಲ್ ಆನಿ ಮ್ಹಜ್ಯಾ ಭಯ್ಣಿಚೊ ದಾದ್ಲೊ ಗ್ರೆಗೊರ್ ತೆಲ್ಲಿಸ್, ದೊಗೀ ನಪಂಯ್ಚ್ ಜಾಲ್ಯಾತ್! ಆಮ್ಚಿಂ ಘರಾಂ ಬಂಜರ್ ಪಡ್ಲ್ಯಾಂತ್…”

“ತಿ ಥೊಡಿ ಗಜಾಲ್ ಹಾಂವ್ ಜಾಣಾಂ!” ಮ್ಹಣಾಲಿ ತಿ ಯುವತಿ. “ಬಂದಡೆಚ್ಯಾ ಲಾಂಬ್ ಚರಿತ್ರೆಂತ್, ಆನಿ ಆಮಿ – ಬಂಟ್ವಳ್ಚ್ಯಾ ಆಮ್ಚ್ಯಾ ಘರಾಣ್ಯಾನ್ ಖೆಳ್‍ಲ್ಲ್ಯಾ ಪಾತ್ರಾಂತ್, ತುಜ್ಯಾ ಭಾವಾಚೊ ಆನಿ ತುಜ್ಯಾ ಭಯ್ಣಿಚ್ಯಾ ದಾದ್ಲ್ಯಾಚೊಯೀ ಪಾತ್ರ್ ಆಸಾ!”

“ತರ್ ತುಂ…” ಮಾನಿನ್ ವೆರೊನಿಕಾ ಕುವೆಲ್ ಆತುರಾಯೆನ್ ಆಕಾಂತ್ಲಿ ಆನಿ ಅಜ್ಯಾಪ್ಲಿ.

“ವ್ಹಯ್. ತುವೆಂ ಚಿಂತ್‍ಲ್ಲೆಂ ಸಾರ್ಕೆಂ.”

“ತರ್ ತುಂ…”

“ಜಾಣಾಂಯ್ ಜಾಲ್ಯಾರ್ ಸಾಂಗ್…”

“ತರ್ ತುಂ ವರ್ತವ್ತಾಯ್ – ತಿ ಬಂಟ್ವಾಳ್ಚಿ ನಾಂವಾಡ್ದಿಕ್…”

“ಬಂಟ್ವಾಳ್ಚಿ ವ್ಹಯ್, ಪುಣ್, ನಾಂವಾಡ್ದಿಕ್ ನಹಿಂ!”

“ಆಗ್ನೆಸ್ ಕುಂವರ್ನ್!” ಉಸ್ವಾಸ್ಲಿ ವೆರೊನಿಕಾ.

“ವ್ಹಯ್ ಭಯ್ಣಿ!” ತ್ಯಾ ಯುವತಿನ್ ಜವಾಬ್ ದಿಲಿ. “ಆಗ್ನೆಸ್ ಸಿಸಿಲಿಯಾ ಕಾಮತ್ ಮ್ಹಜೆಂ ನಾಂವ್!”

“ಆನಿ ತರ್ ಹಾಂವ್ ಮೆಲ್ಯಾರೀ ವ್ಹಡ್ ನಹಿಂ!”

“ತಶೆಂ ಮ್ಹಣನಾಕಾ ಭಯ್ಣಿ!” ಮ್ಹಣಾಲಿ ಆಗ್ನೆಸ್. “ತುವೆಂ ಮೊರ್ಚೆಂ ಸವಾಲ್ ಹಾಂಗಾಸರ್ ನಾ.”

“ಆನಿ ಜಾಲ್ಯಾರ್ ಹಾಂವೆಂ ಮೆಲ್ಯಾರೀ ವ್ಹಡ್ ನಹಿಂ…” ಮ್ಹಣಾಲಿ ಮಾನಿನ್ ವೆರೊನಿಕಾ ಕುವೆಲ್, ಆಪ್ಣಾಕ್‍ಚ್ ವಿಸ್ರೊನ್. “ತುಜಿ ಖಬರ್ ಹಾಂವೆಂ ಜಾಯ್ತಿ ಆಯ್ಕಲ್ಯಾ. ತುಜ್ಯೆ ವಿಷಯಿಂ ಹಾಂವೆಂ ಜಾಯ್ತೆಂ ಚಿಂತ್ಲಾಂ. ತರೀ, ತುಂಚ್, ಹ್ಯಾ ಜಿನ್ಸಾರ್ ಖುದ್ದ್ ಯೇವ್ನ್ ಮ್ಹಾಕಾ ಹಾಂಗಾಸರ್ – ಹ್ಯಾ ಇಂಫೆರ್ನಾಚ್ಯಾ ಪರಿಸ್ಥಿತೆಂತ್ – ಮ್ಹಾಕಾ ಭೆಟ್ಶಿ ಮ್ಹಣ್ ಹಾಂವೆಂ ಚಿಂತುಂಕ್ ನಾ.”

“ಹಾಂವೆಂಯೀ ಚಿಂತುಂಕ್ ನಾ.”

“ತರ್ ಹೆಂ ಸಂಭವ್ಲೆಂ ಕಶೆಂ?”

“ರಾಜಕೀಯ್ ಕಾರಣಾಂ ಖಾತಿರ್, ಮ್ಹಜೊ ಬಾಪಯ್, ಟಿಪ್ಪು ಸುಲ್ತಾನಾಚ್ಯಾ ದಲಾಲ್ಯಾಂನಿ ತಯಾರ್ ಕೆಲ್ಲ್ಯಾ ರಾಜ್‍ದ್ರೋಹಿಂಚ್ಯಾ ಪಟ್ಟೆಂತ್ ದಾಖಲ್ ಜಾಲೊ…”

“ವ್ಹಯ್, ಹಾಂವೆಂ ಆಯ್ಕಲಾಂ – ಬಂಟ್ವಳ್ಚೊ ನಾಂವಾಡ್ದಿಕ್ ತುಂಡು ರಾಯ್ – ರಫಾಯೆಲ್ ಮಿಂಗೆಲ್ ಕಾಮತ್…”

“ವ್ಹಯ್, ತೊಚ್ ತೊ.”

“ಪುಣ್ ಉಪ್ರಾಂತ್ ತೊ ತಲ್ಚೇರಾಕ್ ತಡೀಪಾರ್ ಜಾಲ್ಲೊ ಖಂಯ್…”

“ತಡೀಪಾರ್ ನಹಿಂ… ರಾಜ್‍ದ್ರೋಹಿಂಚೆಂ, ಪಾಶೆಚೆಂ ಮರಣ್ ತೊ ಮೊರ್ತೊ. ಪುಣ್…” ಉಸ್ವಾಸ್ಲಿ ತಿ ಯುವತಿ… “ಪುಣ್, ದೆವಾಚ್ಯಾ ಆಖ್ಖ್ಯಾ ಸೃಷ್ಟೆಂತ್ ಭೋವ್ ವಿಚಿತ್ರ್ ಆನಿ ಶ್ರೇಷ್ಠ್ ಜಾವ್ನಾಸ್‍ಲ್ಲ್ಯಾ ಎಕಾ ಮಹಾನ್ ಪುರುಷಾಚ್ಯೆ ಮಜತಿ ವರ್ವಿಂ – ಮರಣ್ ಚುಕವ್ನ್, ಫಕತ್, ತಡೀಪಾರ್ ಶಿಕ್ಷೆಕ್ ತೊ ಬಾಧ್ಯ್ ಜಾಲೊ.”

“ಆನಿ…”

“ಆನಿ ಮ್ಹಜ್ಯಾ ಬಾಪಾಯ್ಕ್ ಭೊಗ್‍ಲ್ಲ್ಯಾ ತಡೀಪಾರ್ ಶಿಕ್ಷೆ ಪ್ರಾಸ್ ಚಡ್ ಭಿರಾಂಕುಳ್ ಆನಿ ಎಕ್ಸುರ್ಪಣಾಚಿ ಶಿಕ್ಷಾ ಹಾಂವೆಂ ಭೊಗ್ಲಿ. ಬಹುಶಃ, ದೆವಾಚಿ ಖುಶಿ ಆನಿ, ವಾ, ಆಮ್ಚೆಂ ನಿರ್ಮೊಣೆಂ ತಶೆಂ ಆಸ್‍ಲ್ಲೆಂ.”

“ತಶೆಂ ಮ್ಹಣನಾಕಾ ಭಯ್ಣಿ” ಮ್ಹಣಾಲಿ, ವೆರೊನಿಕಾ ಕುವೆಲ್. ತಿಣೆಂ ಆಹಾರ್ ಘೆತ್‍ಲ್ಲ್ಯಾ ಹಾತಾಚೆಂ ಉಷ್ಟೆಂ ಸುಕ್‍ಲ್ಲೆಂ. ತೊಚ್ ಹಾತ್ ತಿಣೆಂ ಆಗ್ನೆಸ್ ಸಿಸಿಲಿಯಾಚ್ಯಾ ಭುಜಾಚೆರ್ ದವರ್ಲೊ. “ದೆವಾಚ್ಯೊ ವಾಟೊ ವಿಚಿತ್ರ್!”

“ಕಿತ್ಯಾಕ್ ತಶೆಂ ಮ್ಹಳೆಂಯ್ ಭಯ್ಣಿ? ಮ್ಹಜೆ ಭೊಗ್ಣಾರ್ ಆನಿ ಕಳ್ವಳೆ ತುಂ ನೆಣಾಂಯ್. ತುಜಿಯೀ ಖಬರ್ ಹಾಂವೆಂ (ಸರ್ದಾರಾಂಚ್ಯಾ ಸಿನೊಲೆಂತ್) ಜಾಯ್ತಿ ಆಯ್ಕಲ್ಯಾ. ನಿಜಾಯ್ಕೀ ಭಾಗಿ ತುಂ!”

“ಪಿಶ್ಯಾಂಪರಿಂ ಉಲಯ್ನಾಕಾ” ಮ್ಹಣಾಲಿ ವೆರೊನಿಕಾ. “ಮ್ಹಾಕಾ ದಿಸ್ತಾ, ಹ್ಯಾ ಘಡ್ಯೆ ತುಂ ಮ್ಹಾಕಾ ಮೆಳ್‍ಲ್ಲ್ಯಾ ವರ್ವಿಂ ಮ್ಹಜಿ ಜಿಣಿ ಸಾರ್ಥಕ್ ಜಾಲಿ.”

“ಕಿತೆಂ ಮ್ಹಣ್ತಾಯ್ ತುಂ?”

“ಹ್ಯಾ ಘಡಿಯೆ, ಹಾಂವ್ ಕಿತೆಂ ಮ್ಹಣ್ತಾಂ ತೆಂ ಹಾಂವ್ ಬರೆಂ ಜಾಣಾಂ” ಮ್ಹಣಾಲಿ ವೆರೊನಿಕಾ. “ಪುಣ್, ಹ್ಯಾ ವೆಳಾರ್, ಹ್ಯಾ ರಾವ್ಳೆರಾಂತ್ – ಹ್ಯಾ ಇಂಫೆರ್ನಾಂತ್ – ಕುಜ್ನಾಚಿ ಚಾಕರ್ನ್ ಜಾವ್ನ್ ತುವೆಂ ಪಾವ್‍ಲ್ಲಿ ಗಜಾಲ್ ಕಶಿ ಘಡ್ಲಿ ಮ್ಹಳ್ಳಿ ತಿ, ಮ್ಹಾಕಾ ಸಾಂಗ್. ಹೆರ್ ವಿವರ್, ಉಪ್ರಾಂತ್ ತುಕಾ ಹಾಂವ್ ದಿತಾಂ.”

“ಖಂಯ್ಸರ್ ಆರಂಭ್ ಕರ್ಚೆಂ ಮ್ಹಣ್ ಮ್ಹಾಕಾ ಸಮ್ಜನಾ.”

“ಆತಾಂ ರಾತಿಚೊ ವೇಳ್, ಮ್ಹಾಕಾ ಆಜ್‍ಚ್ ನಮ್ಯಾರುನ್ ದಿಲ್ಲೊ ತೊ ರಾಕ್ವಲಿ, ಭಾಯ್ರ್ ನೀದ್ ಕಾಡ್ತಾ ಮ್ಹಣ್ ದಿಸ್ತಾ. ತುಜಿ ಕಥಾ – ಹ್ಯಾ ವೆಳಾರ್, ತುವೆಂ ಹಾಂಗಾಸರ್ ಪಾವ್ತಾ ಪರ್ಯಾಂತ್ – ತುಕಾ ಮನ್ ಆಸ್ಲ್ಯಾರ್ ಸಾಂಗ್. ಸಾಂಗ್ಲ್ಯಾರ್ ತುಕಾ ಬೆಜಾರ್ ಜಾಂವ್ಚೆಂ ನಾ. ಪಶ್ಚಾತ್ತಾಪ್ ಭೊಗುಂಕ್ ತುಕಾ ಇಡೆಂ ಆಸ್ಚೆಂ ನಾ.”

ತಿ ಯುವತಿ – ಆಗ್ನೆಸ್ ಸಿಸಿಲಿಯಾ – ಥೊಡೊ ವೇಳ್ ಚಿಂತುನ್ ಬಸ್ಲಿ.

ಉಪ್ರಾಂತ್ ತಿಣೆಂ ಆಪ್ಲೆಂ ಮುಖಾವರಣ್ ಕಾಡ್ಲೆಂ.

ತಿಚಿ ತಿ ನೈಸರ್ಗಿಕ್ ಸೊಭಾಯ್ ಪಳೆವ್ನ್ ಮಾನಿನ್ ವೆರೊನಿಕಾ ಕುವೆಲ್ ವಿಜ್ಮಿತ್ ಪಾವ್ಲಿ. ಸಂತೊಸ್ ಪಾವ್ಲಿ.

“ಭಾಗಿ ತುಂ ಭಯ್ಣಿ!” ಮ್ಹಣಾಲಿ ತಿ, ಖರ‍್ಯಾ ಕ್ರಿಸ್ತಾಂವ್ ತ್ಯಾಗಾಚ್ಯಾ ಉಮೆದಿನ್ ಆನಿ ಉಮಾಳ್ಯಾನ್. “ತುವೆಂಚ್ ಮ್ಹಳ್ಳೆಪರಿಂ – ಸೃಷ್ಟಿಂತ್ಲ್ಯಾ ಎಕ್ಲ್ಯಾ ವಿಚಿತ್ರ್ ಆನಿ ಶ್ರೇಷ್ಠ್ ಪುರುಷಾನ್ – ತುಜೆರ್ ಮೊಗಾರ್ ಪಡ್‍ಲ್ಲ್ಯಾಂತ್ ಅಜ್ಯಾಪ್ ನಾ.”

“ತುಂ ಉಲಯ್ತಾಯ್ ತೆಂ, ತುಂಚ್ ನೆಣಾಂಯ್…” ಚಿಕ್ಕೆ ಲಜೆವ್ನ್ ಮ್ಹಣಾಲಿ ಆಗ್ನೆಸ್ ಸಿಸಿಲಿಯಾ. “ಮ್ಹಜ್ಯಾ ಹಟಾನ್, ಆನಿ ಮ್ಹಜ್ಯಾ ಅಲಕ್ಷೆ ವರ್ವಿಂ ತೊ ಮೋಗ್ ಮ್ಹಾಕಾ ಸಾಂಡ್ಲಾ…”

“ಆತಾಂ ಜಾಲ್ಯಾರ್, ತುಂ ಎಕಾ ನೆಂಟ್ಯಾ ಭುರ್ಗ್ಯಾಪರಿಂ ಉಲಯ್ತಾಯ್” ಹಾಸ್ಲಿ ವೆರೊನಿಕಾ. ತಿಚ್ಯಾ ಕಷ್ಟಾಂಚಿ ಆನಿ ಆಕಾಂತಾಚಿ ತಿಕಾ ವಿಸರ್ ಪಡ್‍ಲ್ಲಿ. “ಪಯ್ಲೆಂ – ತುಂ ಹಾಂಗಾಸರ್, ಅಶಿ ಪಾವ್‍ಲ್ಲಿ ಗಜಾಲ್ ಮ್ಹಾಕಾ ಸಾಂಗ್.”

ಆಗ್ನೆಸ್ ಸಿಸಿಲಿಯಾನ್ ಗಜಾಲ್ ಸಾಂಗ್ಲಿ.

ರಫಾಯೆಲ್ ಮಿಂಗೆಲ್ ಕಾಮ್ತಿಚಿ, ತಡೀಪಾರ್ ಶಿಕ್ಷೆಚಿ ಆವ್ಧಿ ಆಖೇರ್ ಜಾಲ್ಲಿ (ದೆವಾಚ್ಯೆ ಕುರ್ಪೆನ್). ಬಾಪಾಯ್ಕ್ ಆಪವ್ನ್ ವ್ಹರೊಂಕ್ ಆಗ್ನೆಸ್ ಸಿಸಿಲಿಯಾ ಕುಂವರ್ನ್, ತಲ್ಚೇರಾಕ್ ವಚೊನ್, ಬಾಪಾಯ್ಕ್ ಘೆವ್ನ್ ಪಾಟಿಂ ಯೆತಾನಾ, ಕಣ್ಣಾನೂರ್ ಬೇಗಮೆಕ್ ಭೆಟ್ ದೀಂವ್ಕ್ ಆಯಿಲ್ಲಿ. ಕಿತ್ಯಾಕ್, ಥಂಯ್ಸರ್, ಕೆದಾಳಾಯೀ ತಡೀಪಾರ್ ಜಾಲ್ಲ್ಯಾ ಕ್ರಿಸ್ತಾಂವಾಂಕ್ ಆಸ್ರೊ ಆಸ್‍ಲ್ಲೊ.

ತ್ಯಾಚ್ ಆಯಿನ್ನ್ ವೆಳಾರ್, ಕಣ್ಣಾನೂರಾಂತ್ – ಹ್ಯಾ ಕಾಣ್ಯೆಂತ್ಲಿ – ಕಿತಾಪತ್ ಜಾಲ್ಲಿ. ಪರಿಣಾಮ್ ಜಾವ್ನ್ – ಸಾಡೆಸಾತ್ ಬೇಗಮೆನ್ – “ಥೊಡ್ಯೊ ಗಜಾಲಿ ಶಾಬಿತಾಯೆನ್ ಇತ್ಯರ್ಥ್ ಜಾತಾ ವರೇಗ್, ಕೊಣೆಂಚ್ ಕ್ರಿಸ್ತಾಂವಾಂನಿ ರಾವ್ಳೆರಾಚ್ಯಾ ಘಡಾ ಥಾವ್ನ್ ಭಾಯ್ರ್ ವಚನಾಯೆ” ಮ್ಹಣ್ ತಾಕಿದ್ ದಿಲ್ಲಿ!

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel