ಇಂಫೆರ್ನಾಚಿಂ ದಾರಾಂ – 18: ತಿಸ್ರೆ ಪಾವ್ಟಿಂ ತಿಸ್ರೊ ತೊಪಾಸಿ

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 18
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 18: ತಿಸ್ರೆ ಪಾವ್ಟಿಂ ತಿಸ್ರೊ ತೊಪಾಸಿ

ನೀಲೇಶ್ವರ್‍ಚೊ ರಾಯ್, ಸರ್ದಾರ್ ಸಿಮಾಂವ್ ಆನಿ ತಾಚ್ಯಾ ಸಾಂಗಾತ್ಯಾಂ ಕಡೆನ್ ತಶೆಂ ಉಲವ್ನ್, ಆಖ್ರೇಕ್ “ತುಮ್ಚಿ ಖುಶಿ” ಮ್ಹಣತ್ತ್, ಬಸ್‍ಲ್ಲೆ ಕಡೆನ್ ಥಾವ್ನ್ ಉಟ್ಲೊ.

ತ್ಯಾಚ್ ವೆಳಾರ್ ಸರ್ದಾರ್ ಸಿಮಾಂವ್ಚಿ ದೀಷ್ಟ್, ರಾಯಾಚ್ಯಾ ಭೊಂವಾರಿಂ ಆಸ್‍ಲ್ಲ್ಯಾ ಹುದ್ದೆದಾರಾಂಚೆರ್ ಭೊಂವ್ಲಿ. ತಾಂಚೆ ಪಯ್ಕಿ ಕೊಣಾಯ್ಚಿ ವಳಕ್ ತಾಕಾ ನಾತ್‍ಲ್ಲಿ. ಜಾಲ್ಯಾರೀ, ಚಿಕ್ಕೆ ಪಾಟ್ಲ್ಯಾನ್ ರಾವೊನ್, ಅಮ್ರುಕೊ ಹಾಸ್ಚ್ಯಾ ಎಕ್ಲ್ಯಾಚ್ಯಾ ಮುಖಮಳಾಚೆರ್ ತಾಚಿ ದೀಶ್ಟ್ ಥೊಡೊ ವೇಳ್ ಥಾಂಬ್ಲಿ.

ಕೋಣ್ ಜಾವ್ಯೆತ್?

ತ್ಯಾ ಮನ್ಶ್ಯಾಕ್ ಖಂಯ್ಗೀ ಪಳೆವ್ನ್ ಜಾಣಾಂಸ್‍ಲ್ಲೆಪರಿಂ ತಾಕಾ ಭೊಗ್ಲೆಂ – ಪುಣ್ ಉಗ್ಡಾಸ್ ಯೇನಾ ಜಾಲೊ.

ಕೋಣ್ ಜಾವ್ಯೆತ್?

ನೀಲೇಶ್ವರ್ ರಾಯಾಚ್ಯಾ ಹೆರ್ ಹುದ್ದೆದಾರಾಂಪರಿಂ ನ್ಹೆಸೊನ್ ತೊ ಆಸ್‍ಲ್ಲೊ ಖರೆಂ. ತರೀ, ತಾಚೆ ಥಂಯ್ ಎಕಾ ಥರಾಚೆಂ ವಿಲಕ್ಷಣ್ ಸರ್ದಾರ್ ಸಿಮಾಂವ್ಕ್ ಭೊಗ್ಲೆಂ.

ತೆ ಹುದ್ದೆದಾರ್ ಸಗ್ಳೆ ಖಾಡ್ಯಾಳೆ ಜಾವ್ನಾಸ್‍ಲ್ಲೆ. ಹರ್ಯೆಕ್ಲ್ಯಾಚ್ಯಾ ಮಾತ್ಯಾಕ್ ಉರ್ಮಾಲ್ (ಪೇಟಾ) ಆಸ್‍ಲ್ಲೊ. ಪುಣ್ ತ್ಯಾ ಎಕ್ಲ್ಯಾ ಮನ್ಶ್ಯಾಚೊ ಖಡ್ಡೊ ಮ್ಹಾಂಡೊ ರಿತೊಚ್ ಆಸ್‍ಲ್ಲೊ. ಶಿವಾಯ್, ಅಶೀರ್ ತೊಂಡಾಚಿ ತಾಚಿ ಖಾಡ್ಕಿ, ತಾಸುನ್ ತೆಲ್ತಿ ಆಸ್‍ಲ್ಲಿ.

ಅಶೀರ್ ತೊಂಡಾಚಿ!

ಸರ್ದಾರ್ ಸಿಮಾಂವ್ಕ್ ಸಟ್ಟ್ ಕರ್ನ್ ಸಮ್ಜಲೆಂ. ತಾಚಿ ದೀಶ್ಟ್ ತ್ಯಾ ಮನ್ಶ್ಯಾಚ್ಯಾ ಉಜ್ವ್ಯಾ ಬಾವ್ಳ್ಯಾರ್ ಗುಪಿತ್ ಥರಾನ್ ಪಡ್ಲಿ. ಘಾಯ್ ಲಿಪಂವ್ಚ್ಯಾ ಜಿನ್ಸಾರ್ ವಸ್ತ್ರಾಚಿ ಪಟ್ಟಿ ಆಸ್‍ಲ್ಲಿ. ತೆಂ ಅಶೀರ್ ತೋಂಡ್ ಜಾವ್ನಾಸ್‍ಲ್ಲೆಂ – ಷೇರ್ ಖಾನಾಚಿ, ಬೊಕ್ಡೆಚಿ ಸೊಂಡಿ!

ಷೇರ್ ಖಾನ್! ಮಾನಿನ್ ಮೊನಿಕಾ ಕುವೆಲಿಕ್ ಅಪಹರ್ಸುನ್ ವ್ಹಾವಂವ್ಕ್ ಆನಿ ಕಷ್ಟುಂಕ್ ಪ್ರಯತ್ನ್ ಕೆಲ್ಲೊ ತೊಚ್ ಷೇರ್ ಖಾನ್ ಆಬ್ಳೆ, ನೀಲೇಶ್ವರ್‍ಚ್ಯಾ ರಾವ್ಳೆರಾಂತ್!

ತಿತ್ಲೆಂ ಸಮ್ಜಲೆಂ ಜಾಲ್ಯಾರೀ ಸರ್ದಾರ್ ಸಿಮಾಂವ್ನ್ ಆಪ್ಲ್ಯಾ ತ್ಯಾ ಸಮ್ಜಣೆಚಿಂ ಖುಣಾಂ ಭಾಯ್ರ್ ದಾಕಂವ್ಕ್ ನಾಂತ್. ಹೆರಾಂಕ್ ಸಮ್ಜನಾಶೆಂ, ವ್ಹಳೂ ಜಮೆದಾರ್ ಅಂತುಲ್ಯಾಕ್ ತಾಣೆಂ ದೊಳೊ ಮೊಡ್ಲೊ. ತ್ಯಾ ಮಾನಾಯಾಕ್ ಬಿರ್ಮತ್, ಸರ್ದಾರಾಚೊ ಮತ್ಲಬ್ ಕಿತೆಂ ಮ್ಹಣ್ ಸಮ್ಜನಾ ಜಾಲೊ.

“ಬರೆಂ ತರ್” ಮ್ಹಣಾಲೊ ರಾಯ್, ಭಿತರ್ ವಚೊಂಕ್ ಘುಂವೊನ್. “ತುಮ್ಕಾಂ ಖಂಯ್ಸರ್ ವಿಶೆವ್ ಘೆಂವ್ಕ್ ಮ್ಹಳ್ಳೆಂ ಆಮ್ಚೆ ಚಾಕೊರ್ ದಾಕಯ್ತೆಲೆ. ಆಮ್ಚಿ ಆತಿಥ್ಯ ಸ್ವೀಕಾರ್ ಕರ್ನ್ ಥೊಡೆ ದೀಸ್ ತುಮಿ ಹಾಂಗಾಸರ್ ರಾವಜಾಯ್ ಮ್ಹಳ್ಳಿ ಆಮ್ಚಿ ಅಪೇಕ್ಷಾ ತರೀ, ತುಮಿ ರಾವನಾಂತ್ ಮ್ಹಣ್ತಾತ್.”

“ಆಮಿ ಸಾಂಗ್ಲೆಂ – ಆಮ್ಕಾಂ ಉಪಾಯ್ ನಾ.” ಸರ್ದಾರ್ ಸಿಮಾಂವ್ನ್ ಜಾಪ್ ದಿಲಿ.

“ಬರೆಂ ತರ್, ಸುಶೆಗಾತ್ ವಿಶೆವ್ ಘೆಯಾತ್” ಮ್ಹಣಾಲೊ ರಾಯ್, ಖಾಲ್ತಿಮಾನ್ ಆನಿ ಪ್ರಾಮಾಣಿಕತೆಚೆಂ ಅಭಿನಯನ್ ಕರ್ನ್. “ತುಮಿ ಸಕಾಳಿಂ ಭಾಯ್ರ್ ಸರೊಂಕ್ ದರ್ವಡ್ನಾಕಾತ್. ಇಲ್ಲೆಂ ಪೊಟಾಕ್ ಆನಿ ಜಾಯ್ ತಿತ್ಲೊ ಫಳಾಹಾರ್ ಘೆವ್ನ್ಂಚ್ ವಚ್ಯೆತ್. ಆಮಿ ತುಮ್ಕಾಂ ತರ್ ತ್ಯಾ ವೆಳಾರ್ ಮೆಳ್ತಾಂವ್.”

“ರಾಯಾಚೊ ವ್ಹಡ್ ಉಪ್ಕಾರ್” ಮ್ಹಣಾಲೊ ಸರ್ದಾರ್ ಸಿಮಾಂವ್.

ರಾಯ್ ಆನಿ ತಾಚೆ ಸಾಂಗಾತಿ ಭಿತರ್ ಗೆಲೆ.

ಎಕ್ಲೊ ಚಾಕೊರ್ ಲಾಂಟಾನ್ ಘೆವ್ನ್ ಸರ್ದಾರ್ ಸಿಮಾಂವ್ಕ್ ರಾವ್ಳೆರಾಚ್ಯಾ ದುಸ್ರ್ಯಾ ಪೊಂತಾಕ್ ಆಪವ್ನ್ ವ್ಹರ್ನ್ ಗೆಲೊ. ಥಂಯ್ಸರ್ ತಾಣೆಂ ಹಾಂಕಾಂ ಏಕ್ ಕೂಡ್ ದಾಕಯ್ಲೆಂ. ತಾಂತುಂ ತೀನ್ ಖಾಟ್ಯೊ ಆಸ್‍ಲ್ಲ್ಯೊ. ಚಾಕ್ರಾನ್ ಉಜ್ವಾಡ್ ಥಂಯ್ಸರ್ ದವರ್ಲೊ. ಪಾಂಗ್ರುಂಕ್ ಹಾಡ್ಚ್ಯಾ ಖಾತಿರ್ ತೊ ಪರ್ತ್ಯಾನ್ ಭಾಯ್ರ್ ಗೆಲೊ.

“ಜಾಗ್ರುತ್!” ಅಂತುಲ್ಯಾಕ್ ಸರ್ದಾರ್ ಸಿಮಾಂವ್ನ್ ಜಾಗ್ವಣ್ ದಿಲಿ. “ಕಾನ್ ದೊಳೆ ಉಗ್ತೆ ದವರ್ಯಾ. ಕಿತೆಂ ತರೀ ಅಪಾಯ್ ಆಸ್ಯೆತ್ ಮ್ಹಣ್ ಮ್ಹಾಕಾ ಭೊಗ್ತಾ.”

“ಮ್ಹಾಕಾಯೀ ತಶೆಂಚ್ ಭೊಗ್ತಾ” ಮ್ಹಣಾಲೊ ರಾಮಪ್ಪ.

ಅಂತುಲೊ ಪಡ್ವಳ್‍ಯೀ ಕಿತೆಂಗೀ ಸಾಂಗೊಂಕ್ ತೋಂಡ್ ಕಾಡ್ತಾ ಮ್ಹಣ್ತಾನಾ, ಚಾಕೊರ್ ತೀನ್ ಕಾಂಬ್ಳಿ ಘೆವ್ನ್ ಆಯ್ಲೊ. ಅಂತುಲ್ಯಾನ್ ತ್ಯೊ ಘೆತ್ಲ್ಯೊ ಆನಿ ಮಾಂಚ್ಯಾಂಚೆರ್ ಸೊಡಯ್ಲ್ಯೊ.

“ರಾತ್ಚೆಂ ತುಮ್ಕಾಂ ತಾನ್ ಪುಣೀ ಲಾಗತ್ ಜಾಲ್ಯಾರ್ ಪಿಯೆಂವ್ಕ್ ಕಿತೆಂ ಹಾಡ್ನ್ ದವರಿಜಾಯ್?” ಚಾಕ್ರಾನ್ ವಿಚಾರ್ಲೆಂ.

“ತಾಪಯಿಲ್ಲೆಂ ಉದಾಕ್ ಹಾಡ್ನ್ ದವರ್” ಸರ್ದಾರ್ ಸಿಮಾಂವ್ನ್ ಫರ್ಮಾಯ್ಲೆಂ.

“ಜಾವ್ಯೆತ್” ಮ್ಹಣೊನ್, ಸರ್ದಾರ್ ಸಿಮಾಂವ್ಕ್ ಸಲಾಮ್ ಕರ್ನ್, ಚಾಕೊರ್ ಪರ್ತ್ಯಾನ್ ಪಾಟಿಂ ಗೆಲೊ.

“ಮ್ಹಾಕಾ ಹೆಂ ಬರೆಂ ಲಾಗನಾ ಧನ್ಯಾ” ಮ್ಹಣಾಲೊ ಅಂತುಲೊ ಸ್ವರ್ ದೆಂವವ್ನ್. “ಹೆಂ ಕೂಡ್ ಮ್ಹಾಕಾ ಎಕಾ ಬಂಧಿಖಾನ್ಯಾಪರಿಂ ದಿಸ್ತಾ.”

“ವ್ಹಡ್ ನಹಿಂ, ಪುಣ್ ತುಂ ಎದೊಳ್ ಬಂಧಿವಾನ್ ಜಾಂವ್ಕ್ ನಾಂಯ್” ಸರ್ದಾರ್ ಸಿಮಾಂವ್ನ್ ತಾಕಾ ಧಯ್ರ್ ದಿಲೆಂ.

ನಿಜಾಯ್ಕೀ ತ್ಯಾ ಕುಡಾಂತ್, ತೀನ್ ಖಾಟಿಯಾಂ ಬಗಾರ್ ಹೆರ್ ಕಸಲಿಯೀ ಸಾಹೆತ್ ನಾತ್‍ಲ್ಲಿ. ಎಕ್‍ಚ್ ಬಾಗಿಲ್ ಶಿವಾಯ್ ತ್ಯಾ ತೆಕಿದ್ ಏಕ್‍ಯೀ ಜನೆಲ್ ನಾತ್‍ಲ್ಲೆಂ. ಬಗಾರ್, ವಾರೆಂ ಯೆಂವ್ಚ್ಯಾ ಖಾತಿರ್, ಫಾತ್ರಾಂಚ್ಯಾ ತ್ಯಾ ವಣದಿಂನಿ, ಉಬಾರಾಯೆರ್ ಥೊಡೆ ಅಶೀರ್ ತೂಂಬ್ ವಾ ಬುರಾಕ್ ಆಸ್‍ಲ್ಲೆ. ಬಾಗ್ಲಾಚ್ಯಾ ದಾರಾಂಕ್ ಭಿತರ್ಲ್ಯಾನ್ ಖಿಳ್ ಘಾಲ್ಚಿ ವ್ಯವಸ್ಥಾ ನಾತ್‍ಲ್ಲಿ. ಬಗಾರ್, ಭಾಯ್ಲ್ಯಾ ಕುಶಿನ್ ಸಾಂಕಳ್ ಶಿರ್ಕಾವ್ನ್ ಥಾಲೆಂ ಮಾರಿ ಸಾರ್ಕೊ ಗಾಂಚ್ ಆಸ್‍ಲ್ಲೊ.

ಹೆಂ ಸರ್ವ್ ಸರ್ದಾರ್ ಸಿಮಾಂವ್ನ್ ಘಡ್ಯೆನ್ ಪಾರ್ಕಿಲೆಂ.

ಗೆಲ್ಲೊ ಚಾಕೊರ್, ಪಿತುಳ್ಚ್ಯಾ ಕೊಳ್ಸುಲಾಂತ್, ತಾಪಯಿಲ್ಲೆಂ ಉದಾಕ್ ಆನಿ ಏಕ್ ಗೀಂಡ್ಲ್ ಹಾಡ್ನ್ ಆಯ್ಲೊ. ಬಾಗ್ಲಾಚ್ಯಾ ಭಿತರ್ಲ್ಯಾನ್ ವಣದಿ ದೆಗೆರ್ ತಾಣೆಂ ತಿಂ ದವರ್ಲಿಂ.

“ಹೆರ್ ಕಿತೆಂಯೀ ಜಾಯ್?”

“ಕಿತೆಂಯೀ ನಾಕಾ.”

“ಬರೆಂ ಸಾಯ್ಬಾ” ಮ್ಹಣಾಲೊ ಚಾಕೊರ್. “ರಾಯಾಚ್ಯಾ ರಜೆನ್ ಆನಿ ಗೌರವಾನ್ ತುಮಿ ಆತಾಂ ವಿಶೆವ್ ಘೆಯಾತ್. ದೀಸ್ ಉಜ್ವಾಡ್ತಾನಾ ತುಮ್ಕಾಂ ಖಾಂವ್ಕ್ ಆನಿ ಪಿಯೆಂವ್ಕ್ ಕಿತೆಂ ಜಾಯ್ ತೆಂ ಆಮಿ ಹಾಂಗಾಸರ್ ಹಾಡ್ನ್ ಯೆತಾಂವ್. ತ್ಯಾ ವೆಳಾರ್ ರಾಯ್ ತುಮ್ಕಾಂ ಭೆಟೊನ್ ಉಲ್ಲಾಸಿತಲೊ.”

“ರಾಯಾಚೊ ಉಪ್ಕಾರ್ – ತುವೆಂ ಆತಾಂ ವಚ್ಯೆತ್” ಮ್ಹಣಾಲೊ ಸರ್ದಾರ್ ಸಿಮಾಂವ್, ಚಿಕ್ಕೆ ಗರಮ್ ಜಾವ್ನ್. ಚಾಕ್ರಾಚ್ಯಾ ಉಲವ್ಣ್ಯಾಚಿ – ಬೇಮರ್ಯಾದಿಚಿ – ಧಾರ್ ತಾಕಾ ರುಚೊಂಕ್ ನಾ.

ಜಾಲ್ಯಾರೀ ಚಾಕೊರ್ ವಚೊಂಕ್ ನಾ. ಬಗಾರ್…

“ತುಮ್ಕಾಂ ಉಜ್ವಾಡಾಚಿ ಗರ್ಜ್ ನಾ ಮ್ಹಣ್ ದಿಸ್ತಾ – ಹಾಂವ್ ತೊ ವ್ಹರ್ತಾಂ” ಮ್ಹಣಾಲೊ ತೊ.

ಹೆಂ ಆಯ್ಕೊನ್ ಸರ್ದಾರ್ ಸಿಮಾಂವ್ ನಿಜಾಯ್ಕೀ ತಾಪ್ಲೊ. ನ್ಹೆಸ್‍ಲ್ಲಿ ಮುಸ್ತಾಯ್ಕಿ ಆಂಗಾರ್ ತಶಿಚ್ ಆಸಾ. ಕಸಲಿ ವಸ್ತ್ ಖಂಯ್ಸರ್ ಆಸಾ ಮ್ಹಣ್ ಕಳಿತ್ ನಾ. ತಶೆಂ ಆಸ್ತಾಂ ‘ಉಜ್ವಾಡಾಚಿ ಗರ್ಜ್ ನಾ’ ಮ್ಹಳ್ಳೆಂ ಆಪ್ಲೆಂಚ್ ಮತ್ ಉಚಾರ್ನ್ ‘ಉಜ್ವಾಡ್ ವ್ಹರ್ತಾಂ’ ಮ್ಹಣ್ಚ್ಯಾ ತ್ಯಾ ಚಾಕ್ರಾಚ್ಯಾ ಬಸ್ಕೆರ್ ಏಕ್ ಲಾಥ್ ದೀವ್ನ್ ತಾಕಾ ಉಸ್ಳಾಂವ್ಕ್ ಫಾವೊ ಮ್ಹಣ್ ತಾಕಾ ಮನ್ ಆಯ್ಲೆಂ. ದುಸ್ರ್ಯಾ ಘಡ್ಯೆ ಸಂಯಮ್ ತಾಣೆಂ ಘೆತ್ಲೆಂ. ಮೋಸ್ ಆಸ್ಯೆತ್, ಪಾಸ್ ಜಾವ್ಯೆತ್ ಮ್ಹಳ್ಳ್ಯಾ ಚಿಂತ್ನಾಂನಿ ತಾಕಾ ಜಾಗ್ವಣ್ ದಿಲಿ. ದೆಕುನ್:

“ನಾಕಾ – ಉಜ್ವಾಡಾ ಶಿವಾಯ್ ಆಮ್ಕಾಂ ನೀದ್ ಪಡನಾ” ಮ್ಹಳೆಂ ತಾಣೆಂ ವೊಂಟಾಂಚೆರ್ ಹಾಸೊ ದಾಕವ್ನ್.

ಚಾಕೊರ್ – ತೊ ನಿಜಾಯ್ಕೀ ಚಾಕ್ರಾಪರಿಂ ನಹಿಂ, ಬಗಾರ್ ಎಕಾ ಶಿಪಾಯಾಪರಿಂ ದಿಸ್ತಾಲೊ – ಥೊಡೊ ವೇಳ್ ನರ್ಗಲೊ, ಉಪ್ರಾಂತ್, ಉಪಾಯ್ ನಾಸ್ತಾಂ ಥಂಯ್ ಥಾವ್ನ್ ಪಾಂಯ್ ಕಾಡ್ನ್ ತೆವ್ಶಿನ್ ಪಾಟಿಂ ಗೆಲೊ.

ಚಾಕೊರ್ ತೆವ್ಶಿನ್ ಗೆಲ್ಲ್ಯಾ ಥೊಡ್ಯಾ ವೆಳಾನ್, ಸರ್ದಾರ್ ಸಿಮಾಂವ್ಚೆ ಹುಕ್ಮೆ ಪ್ರಕಾರ್ ರಾಮಪ್ಪಾನ್ ಕುಡಾಚೆಂ ದಾರ್ ಆಡ್ ಕೆಲೆಂ ಆನಿ ದಾರಾಕ್ ಕಾನ್ ದೀವ್ನ್ ತೊ ರಾವ್ಲೊ.

“ಅಂತುಲೊ ಪಡ್ವಳ್, ಆಮ್ಕಾಂ ವಸ್ತುರ್ ಕಾಡ್ಪಾಚಿ ಜಾಂವ್ ನಿದ್ಪಾಚಿ ಗರ್ಜ್ ನಾಶಿ ದಿಸ್ತಾ” ಮ್ಹಣಾಲೊ ಸರ್ದಾರ್ ಸಿಮಾಂವ್ ಗಂಭೀರ್ ಜಾವ್ನ್. “ತಾಣಿಂ ಆಮ್ಚಿ ತಾನ್ ಭಾಗಂವ್ಕ್ ಹಾಡ್ನ್ ದವರ್‌ಲ್ಲ್ಯಾ ತ್ಯಾ ಕೊಳ್ಸುಲ್ಯಾಂತ್ಲ್ಯಾ ಉದ್ಕಾಚೊ ವಾಸ್ ಘೆವ್ನ್ ಪಳೆ.”

“ಹುಕ್ಮೆ ಪ್ರಕಾರ್ ಜಾಂವ್” ಮ್ಹಣೊನ್ ಅಂತುಲೊ ಪಡ್ವಳ್ ಕೊಳ್ಸುಲ್ಯಾ ಸರ್ಶಿಂ ವಚೊನ್ ಉಕಡ್ಯಾಂ ಬಸ್ಲೊ. ಬಾಗ್ವೊನ್ ಉದ್ಕಾಚೊ ವಾಸ್ ತಾಣೆಂ ಘೆತ್ಲೊ. ಥೊಡ್ಯಾ ವೆಳಾನ್, ಗಂಭೀರ್ ವದನಿಂ ತೊ ಉಟ್ಲೊ ಆನಿ ಸರ್ದಾರಾಕ್ ಪಳೆವ್ನ್ ರಾವ್ಲೊ.

“ವ್ಹಯ್‍ಮೂ?” ಸರ್ದಾರಾನ್ ಸವಾಲ್ ಕೆಲೆಂ.

“ಸಾಂಗೊಂಕ್ ಕಷ್ಟ್, ಪುಣ್ ದುಬಾವ್ ಮಾರ್ತಾ.”

ಇತ್ಲೆಂ ಆಯ್ಕೊನ್ ಸರ್ದಾರ್ ಸಿಮಾಂವ್ ಫುಡೆಂ ಗೆಲೊ. ಕೊಳ್ಸುಲ್ಯಾಂತ್ಲ್ಯಾ ಉದ್ಕಾಚೊ ತಾಣೆಂ ವಾಸ್ ಘೆತ್ಲೊ. ಥೊಡ್ಯಾ ವೆಳಾನ್ ತೊ ಉಟ್ಲೊ ಆನಿ ಮ್ಹಣಾಲೊ:

“ವ್ಹಯ್, ವೀಕ್ ಘಾಲುಂಕ್ ತಾಂಕಾಂ ಧಯ್ರ್ ಪಾವೊಂಕ್ ನಾ. ಫಕತ್, ಭ್ರಮಿದೆಪರಿಂ ಮತ್ ಚುಕಂವ್ಚ್ಯಾ ತ್ಯಾ ಪಾಲ್ಯಾಚೊ ರೋಸ್ ಥೊಡೆ ಥೆಂಬೆ ತಾಣಿಂ ಹಾಂತುಂ ಪಿಳ್ಳಾ. ತುಂ ಜಾಣಾಂಯ್, ಹ್ಯಾ ದಿಸಾಂನಿ ಹ್ಯಾ ರೊಸಾಚೊ ಪ್ರಯೋಗ್ ಆಮ್ಚ್ಯಾ ವಾಟೆನ್ ಹ್ಯಾ ಆದಿಂ ದೋನ್ ಪಾವ್ಟಿಂ ಅಡ್ಕಳ್ಳಾ. ಆನಿ ಹೆಂ ತಿಸ್ರೆ ಪಾವ್ಟಿಂ!”

“ಖಂಯ್ ಧನ್ಯಾ..?”

“ಥೊಡ್ಯಾ ತೆಂಪಾ ಆದಿಂ, ಗೋಳಿತೊಟ್ಟು ಠಾಣ್ಯಾಂತ್. ಥಂಯ್ಸರ್ (ದೆವಾಚ್ಯೆ ಕುರ್ಪೆನ್) ಆಮಿ ಬಚಾವ್ ಜಾಲ್ಲ್ಯಾಂವ್.”

“ಆನಿ ದುಸ್ರೆ ಪಾವ್ಟಿಂ?”

“ತೆಂ ತುಕಾ ಕಳಿತ್ ನಾ. ದುಸ್ರೆಂ ಪಾವ್ಟಿಂ, ಥೊಡ್ಯಾಚ್ ದಿಸಾಂ ಆದಿಂ ಕಾವೂರ್‍ಚೊ ಸಿಂಹ್ ಜಾವ್ನಾಸ್ಚ್ಯಾ ಮಾನೆಸ್ತ್ ದುಮ್ಗಾ ಪಿಂತಾಚಿ ಭಾಚಿ ಜಾವ್ನಾಸ್ಚ್ಯಾ ಇಜಾಬೆಲ್ ತೆರೆಜ್ ಕುಂವರ್ನಿಕ್ ಅಪಹರ್ಸುನ್ ವ್ಹರ್ಚ್ಯಾ ಖಾತಿರ್, ತೊಪಾಸಿ ಕಾರ್ಡೊಜಾನ್ ದುಮ್ಗಾ ಪಿಂತಾಚ್ಯಾ ಆವಯ್ಚೆರ್, ಅಸಲ್ಯಾಚ್ ರೊಸಾಚೆ ಥೆಂಬೆ ಭರ್ಸುನ್ ನೀಸ್ ದಿಲ್ಲೊ. ಥಂಯ್ಸರೀ ‘ಸರ್ದಾರಾಂಚಿ ಸಿನೊಲ್’ ಜಯ್ತೆವಂತ್ ಜಾಲ್ಲಿ.

“ಆನಿ ಆತಾಂ…” ವಿಜ್ಮಿತ್ ಜಾವ್ನ್ ಅಂತುಲೊ ವಿಚಾರಿಲಾಗ್ಲೊ.

“ಆನಿ ಆತಾಂ, ತಸಲ್ಯಾಚ್ ರೊಸಾಚೊ ಪ್ರಯೋಗ್ ಆಮ್ಚೆರ್ ಕರುಂಕ್ ಪ್ರಯತ್ನ್ ಕೆಲಾಂ.”

“ಜೆಜೂಸ್, ಮರಿ, ಜುಜೆ!”

“ವಿಶೇಸ್ ಕಿತೆಂ ಮ್ಹಳ್ಯಾರ್…” ಸರ್ದಾರ್ ಸಿಮಾಂವ್ ಮುಖಾರ್ ಪಾಟಿಂ ಪಾಸಾಯೊ ಮಾರಿಲಾಗ್ಲೊ.

“ವಿಶೇಸ್ ಕಿತೆಂ ಧನ್ಯಾ?” ಅಂತುಲ್ಯಾಚಿ ಆತುರಾಯ್ ಚಡ್ಲಿ.

“ವಿಶೇಸ್ ಕಿತೆಂ ಮ್ಹಳ್ಯಾರ್” ಮ್ಹಣಾಲೊ ಸರ್ದಾರ್, ಚಿಂತುನ್. “ಪಯ್ಲೆಂಚ್ಯಾ ದೊನೀ ಪ್ರಸಂಗಾಂನಿ ತಸಲೊ ಪ್ರಯೋಗ್ ಕೆಲ್ಲೊ ತೊ, ತೊಪಾಸಿಂನಿ ಕೆಲ್ಲೊ ವಾ ಕರಯಿಲ್ಲೊ.”

“ಹಾಂ?” ಅಂತುಲ್ಯಾನ್ ತೋಂಡ್ ಸೊಡ್ಲೆಂ.

“ವ್ಹಯ್. ಪಯ್ಲೆ ಪಾವ್ಟಿಂ, ಬಂಟ್ವಳ್ಚ್ಯಾ ರಫಾಯೆಲ್ ಮಿಂಗೆಲ್ ಕಾಮ್ತಿಗೆರ್ ಕಿರ‍್ಯಾಲ್ ಜಾವ್ನಾಸ್‍ಲ್ಲ್ಯಾ ತೊಪಾಸಿ ದೊತೊರ್ ಮರ್ಯಾಣಾನ್ ತೊ ಪ್ರಯೋಗ್ ಕರಯಿಲ್ಲೊ.”

“ಆನಿ…”

“ಆನಿ ದುಸ್ರೆ ಪಾವ್ಟಿಂ, ಕೊಡಿಯಾಳ್‍ಬೈಲ್ ಆನಿ ಆಸ್‍ಪಾಸ್ ಖಬ್ರಿ ಜಾವ್ನಾಸ್‍ಲ್ಲ್ಯಾ ತೊಪಾಸಿ ಒಬೆರ್‌ವಿಲ್ ಜುವಾಂವ್ ಕಾರ್ಡೊಜಾನ್ ಖುದ್ದ್ ತೊ ಕೆಲ್ಲೊ.”

“ತರ್…”’

“ತರ್ ಆತಾಂಚ್ಯಾ, ಆನಿ ಹ್ಯಾ ದಿಸಾಂಚ್ಯಾ ಘಡಿತಾಂ ಪಾಟ್ಲ್ಯಾನ್‍ಯೀ ಕೋಣ್ ಎಕ್ಲ್ಯಾ ತೊಪಾಸಿಚೊ ಹಾತ್ ಆಸ್ಯೆತ್ ಮ್ಹಣ್ ಮ್ಹಾಕಾ ದುಬಾವ್ ಮಾರ್ಲೊ. ತಿತ್ಲೆಂಚ್.”

“ಜೆಜುಸ್, ಮರಿ, ಜುಜೆ!” ಅಕ್ಲಾಸ್ಲೊ ಅಂತುಲೊ.

“ಆತಾಂ ಘಳಾಯ್ ಕರುಂಕ್ ವೇಳ್ ನಾ. ಹಾಂಗಾಸರ್ ಆಮ್ಕಾಂ ಬಂದ್ ದವರ್ನ್ ಫಾರಿಕ್ಪಣ್ ಘೆಂವ್ಚೆಂ ಕಸಲೆಂಗೀ ಪ್ರಯತ್ನ್ ಚಲ್ತಾ. ಆತಾಂಚ್ ಆಮಿ ಹಾಂಗಾ ಥಾವ್ನ್ ಪಾಯ್ ಕಾಡ್ನ್ ಪಯ್ಸ್ ಪಾವಜಾಯ್!”

“ಶ್ಹೂ-ಶ್ಹೂ..!” ಜಾಗ್ವಯ್ಲೆಂ, ದಾರಾಕ್ ಕಾನ್ ದೀವ್ನ್ ರಾವ್‍ಲ್ಲ್ಯಾ ರಾಮಪ್ಪಾನ್.

ಸರ್ದಾರ್ ಆನಿ ಜಮೆದಾರ್ ದೊಗೀ ಘಡಿಭರ್ ಸ್ತಬ್ದ್ ಜಾಲೆ.

ಸರ್ದಾರ್ ಸಿಮಾಂವ್ಚ್ಯಾ ಮತಿಂತ್ ವಿದ್ಯುತ್ವೇಗಾನ್ ಚಿಂತ್ನಾಂ ಪಾಶಾರ್ ಜಾಲಿಂ.

ಪಯ್ಸ್ ಥಾವ್ನ್ ತಾಂಚ್ಯಾ ಕುಡಾ ಹೆವ್ಶಿನ್ ಚಲೊನ್ ಯೆಂವ್ಚಿಂ ಮೆಟಾಂ ತಾಂಕಾಂ ಆಯ್ಕತಾಲಿಂ.

ರಾಮಪ್ಪಾಕ್ ಬಾಗಿಲ್ ಉಗ್ತೆಂ ಕರುಂಕ್ ಆನಿ ಥಂಯ್ಚ್ ರಾವೊಂಕ್, ಸರ್ದಾರಾನ್ ಲೋವ್ ತಾಳ್ಯಾನ್ ತಾಕಿದ್ ದಿಲಿ.

ತಾಣೆಂ ತಶೆಂಚ್ ಕೆಲೆಂ.

ಸರ್ದಾರಾನ್ ಅಂತುಲ್ಯಾಕ್ ಹಾತ್-ಭಾಸ್ ಕರ್ನ್ ಮಧ್ಲಿ ಜಡ್ ಖಾಟ್ ತಾಣಿಂ ಮುಖಾರ್ ಹಾಡ್ನ್ ಬಾಗ್ಲಾಕ್ ಲಾಗಿಂ ಆಡ್ ದವರ್ಲಿ.

ಲಾಗಿಂ ಯೆಂವ್ಚಿಂ ಮೆಟಾಂ ಸ್ತಬ್ದ್ ಜಾಲಿಂ.

“ಭಿತರ್ ವಾರೆಂ ಭೋವ್‍ಚ್ ಉಣೆಂ ಆಸಾ” ಮ್ಹಣಾಲೊ ಸರ್ದಾರ್ ಸಿಮಾಂವ್ ಚಿಕ್ಕೆ ವ್ಹಡ್ಲ್ಯಾನ್. “ದಾರ್ ಉಗ್ತೆಂ ಆಸೊಂದಿ. ಹಾಂವ್ ಬಾಗ್ಲಾ ಕಡೆನ್ ನಿದ್ತಾಂ.”

ರಾಮಪ್ಪಾನ್ ಆನಿ ಅಂತುಲ್ಯಾನ್, ದಾರಾಚ್ಯಾ ಭಿತರ್ಲ್ಯಾ ಕುಶಿನ್ ದೋನ್‍ಯೀ ಬಗ್ಲೆಂನಿ ಸಜ್ಜ್ ರಾವೊಂಕ್ ಸರ್ದಾರ್ ಸಿಮಾಂವ್ನ್ ಹಾತ್ ಭಾಸ್ ಕೆಲಿ.

ತಾಣಿಂ ತಶೆಂಚ್ ಕೆಲೆಂ.

ನ್ಹೆಸ್‍ಲ್ಲಿ ಮುಸ್ತಾಯ್ಕಿ ಕಾಡ್ಚ್ಯಾ ಜಿನ್ಸಾರ್, ಸರ್ದಾರ್ ಸಿಮಾಂವ್ ಅಭಿನಯನ್ ಕರುಂಕ್ ಲಾಗ್ಲೊ. ಕಮರ್‌ಬಾಂಧಾಂತ್ಲಿ ತಲ್ವಾರ್ ಭಾಯ್ರ್ ಕಾಡ್ನ್, ಹಾತಾಕ್ ಲಾಗಿಂ ಮೆಳಶಿ ಖಾಟಿಯೆರ್ ತಾಣೆಂ ದವರ್ಲಿ. ಉಪ್ರಾಂತ್, ಪೆಂಕ್ಡಾಕ್ ರೆವ್ಡಾಯಿಲ್ಲ್ಯಾ ಕಮರ್‌ಬಾಂಧಾಚೊ ವಿರೆವೊಡ್ ಕರುಂಕ್ ತೊ ಲಾಗ್ಲೊ.

ರಾಮಪ್ಪ ಆನಿ ಅಂತುಲೊ, ಹಾತ್ ಆಪ್ಲ್ಯಾ ತಲ್ವಾರಿಂಚ್ಯಾ ಥೊರ್ವಾಂಚೆರ್ ದವರ್ನ್ ಶ್ವಾಸ್ ಧರ್ನ್ ರಾವ್ಲೆ.

ಭಾಯ್ರ್, ಪಯ್ಲೆಂ ಆಯ್ಕೊನ್ ಸ್ತಬ್ದ್ ಜಾಲ್ಲಿಂ ಮೆಟಾಂ ಪರತ್ ಆಯ್ಕೊಂಕ್ ಲಾಗ್ಲಿಂ. ಪುಣ್ ಲಾಗಿಂ ಯೆಂವ್ಚೆಪರಿಂ ನಹಿಂ, ಬಗಾರ್, ಆಯಿಲ್ಲ್ಯಾ ವಾಟೆನ್ ಪಾಟಿಂ ವೆಚಿಂ ತಿಂ ಆಯ್ಕಲಿಂ. ಥೊಡ್ಯಾ ವೆಳಾನ್ ಆವಾಜ್ ಬಂದ್ ಜಾಲೊ, ಆನಿ ಸಕ್ಕಡ್ ಶಾಂತ್ ಜಾಲೆಂ.

“ಹೆವ್ಶಿನ್ ಯೆಯಾ” ಹಾಸ್ಲೊ ಸರ್ದಾರ್ ಸಿಮಾಂವ್, ಆಪ್ಲ್ಯಾ ಸಾಂಗಾತ್ಯಾಂಕ್ ಆಪವ್ನ್. “ಆಮಿ ಆಕಾಂತಾನ್ ಕೆಲ್ಲಿ ತಯಾರಾಯ್ ಪುರ್ತಿ ವ್ಯರ್ಥ್ ಜಾಲಿ. ಕೋಣ್ ಬಾವ್ಡೆ ಆಮ್ಚೆರ್ ದಾಡ್ ಘಾಲುಂಕ್ ಆಯ್ಲೆ ಮ್ಹಣ್ ಹಾಂವೆಂ ಚಿಂತ್ಲೆಂ.”

“ಪುಣ್ ಖಾಟ್ ಕಿತ್ಯಾಕ್ ಧನ್ಯಾ ದಾರಾಕ್ ಲಾಗಿಂ ವೊಡ್‍ಲ್ಲಿ?”

“ದಿಸನಾಂವೇ ತುಮ್ಕಾಂ? ತ್ಯಾ ದಾರಾಕ್ ಭಿತರ್ಲ್ಯಾನ್ ಖಿಳ್ ಘಾಲುಂಕ್ ಅವ್ಕಾಸ್ ನಾ, ಪುಣ್ ಭಾಯ್ಲ್ಯಾನ್ ಖಿಳೊ ಶಿರ್ಕಾಂವ್ಕ್ ಮಾತ್ರ್ ಸಾಧ್ಯ್ ಆಸಾ. ಆಮ್ಕಾಂ ಬಂದ್ ಕರುಂಕ್ ಕೊಣೀ ಆಯ್ಲ್ಯಾರ್, ಖಾಟ್ ಆಡ್ ಆಸ್‍ಲ್ಲ್ಯಾನ್, ತಶೆಂ ಕರುಂಕ್ ಸಾಧ್ಯ್ ನಾ. ತಾಣಿಂ ಭಿತರ್ ಯೇಂವ್ಕ್ ಪ್ರಯತ್ನ್ ಕೆಲ್ಯಾರ್ ಎಕ್‍ಚ್, ಖಾಟ್ ಉತ್ರೊನ್, ವಾ, ಮ್ಹಜ್ಯಾ ತಲ್ವಾರಿಚೊ ಧೊಮೊಸ್ ಚುಕವ್ನ್ ಯೇಜಾಯ್ ಆಸ್‍ಲ್ಲೆಂ.”

“ಹಾ! ತೆ ಯೇಂವ್ಕ್ ನಾಂತ್!” ಅಂತುಲ್ಯಾಕ್ ಧಯ್ರ್ ಆಯ್ಲೆಂ.

“ಪರ್ತ್ಯಾನ್ ತೆ ಯೆಂವ್ಚೆ ನಾಂತ್ ಮ್ಹಣೊಂಕ್ ಜಾಯ್ನಾ. ಆಮಿ ನಿದ್ಲ್ಯಾಂವ್ ವಾ ತ್ಯಾ ಕೊಳ್ಸುಲ್ಯಾಂತ್ಲೆಂ ಉದಾಕ್ ಪಿಯೆಲ್ಯಾಂವ್ ಮ್ಹಳ್ಳೆಂ ಸಮ್ಜೊಂಕ್ ತೆ ಆಯಿಲ್ಲೆ ಮ್ಹಣ್ ದಿಸ್ತಾ. ದೊನಾಂ ಪಯ್ಕಿ ಖಂಯ್ಚೆಂಯೀ ಏಕ್ ಘಡ್‍ಲ್ಲೆಂ ಜಾಲ್ಯಾರ್ ತಾಂಚೊ ಇರಾದೊ ಜಾರಿ ಜಾತೊ.”

“ವ್ಹಾ! ತರ್ ಯೇಂವ್ದಿತ್ ತೆ!”

“ನಾ, ತಾಣಿಂ ಪರ್ತ್ಯಾನ್ ಯೆಂವ್ಚ್ಯಾ ಆದಿಂ ಆಮಿ ಹಾಂಗಾ ಥಾವ್ನ್ ಪಾಶಾರ್ ಜಾಯ್ಜಯ್.”

“ಕಿತ್ಯಾಕ್?”

“ಗರ್ಜೆ ವಿಣೆಂ ಝುಜೊಂಕ್ ಆಮ್ಕಾಂ ನಾಕಾ. ಭಿತರ್ ರಾವೊನ್ ಆಮಿ ಝುಜ್ಯೆತ್, ಪುಣ್ ಕಿತ್ಲೊ ವೇಳ್ ತಶೆಂ ರಾವ್ಯೆತ್?”

“ವ್ಹಯ್, ಫಾತ್ರಾಂಚ್ಯೊ ವಣದಿ ಹ್ಯೊ. ಅರ್ಧಿಂ ವೊಲಿಂ ನಾರ್ಲಾ ಸೊಣ್ಣಾಂ ಆನಿ ಥೊಡೊ ಮಿರ್ಸಾಂಗೆ ಪಿಟೊ ಉಜೊ ಲಾವ್ನ್ ಭಿತರ್ ಉಡಯ್ಲ್ಯಾರ್ – ಆಮ್ಚಿ ಗತ್, ಆಗೊಟೆಂ ಘಾಲ್ಲ್ಯಾ ಮಾಟ್ಯಾಂತ್ಲ್ಯಾ ವೀರ್ ಕೊಳೆಂದ್ರಾಪರಿಂ ಜಾಯ್ತ್!” ಮ್ಹಣಾಲೊ ರಾಮಪ್ಪ.

“ಬರಾಬರ್!” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆಮಿ ಹಾಂಗಾ ಥಾವ್ನ್ ಆತಾಂಚ್ ಭಾಯ್ರ್ ಪಡಜಾಯ್.”

ತಶೆಂ ಮ್ಹಣ್ತಾನಾ, ಚಿಂತಿನಾಸ್ತಾನಾ ಮ್ಹಳ್ಳೆಪರಿಂ ತಾಚೊ ಹಾತ್ ತಾಚ್ಯಾ ಖೊಮ್ಸಾಚ್ಯಾ ಭಿತರ್ಲ್ಯಾ ಜೇಬಾಂತ್ ಪಾವ್ಲೊ. ಸರ್ದಾರ್ ಯೂಸುಫ್ ಆಲಿನ್ ತಾಕಾ ಲಿಖ್‍ಲ್ಲೆಂ ಪತ್ರ್ ಆಸ್‍ಲ್ಲಿ ಲ್ಹಾನ್ ಪಿಶ್ವಿ ತಾಚ್ಯಾ ಬೊಟಾಂಕ್ ಆದಳ್ಳಿ. ತಿ ವಾಚುಂಕ್ ನಾ ಮ್ಹಣ್ ತಾಕಾ ಉಗ್ಡಾಸ್ ಆಯ್ಲೊ ಆನಿ ಸಟ್ಟ್ ಕರ್ನ್ ತಾಣೆಂ ತಿ ಭಾಯ್ರ್ ಕಾಡ್ಲಿ. ತಲ್ವಾರಿಚ್ಯಾ ಧೊಮೊಸಾನ್ ಪಿಶ್ವಿ ಉಗ್ಡುನ್, ಲಾಂಟಾನಾಚ್ಯಾ ಲಾಗಿಂ ವಚೊನ್ ತಾಣೆಂ ತಿ ವಾಚ್ಲಿ:

“ಮೊಗಾಚೊ ಮಿತ್ರ್ ಆನಿ ಸರ್ದಾರ್ ಸಿಮಾಂವ್ ಪೆದ್ರು ಭಾಯಿಕ್, ಮಿತ್ರ್ ಯೂಸುಫ್ ಆಲಿಚೊ ಸಲಾಮ್ ಆನಿ ಸನ್ಮಾನ್…

“ತುಂ ಪಟ್ಟಣಾ ಥಾವ್ನ್, ಬಾದಶಹಾಚ್ಯಾ ಹುಕ್ಮೆ ಪ್ರಕಾರ್ ಜರೂರ್ ಭಾಯ್ರ್ ಸರೊನ್ ವೆತಾನಾ, ತುಕಾ ಭೆಟೊಂಕ್ ಸಾಧ್ಯ್ ಜಾಂವ್ಕ್ ನಾ – ಬೆಜಾರ್ ಪಾವನಾಕಾ, ದುಬಾವ್ ಕರಿನಾಕಾ. ತುವೆಂ ಮ್ಹಾಕಾ ಧಾಡ್‍ಲ್ಲ್ಯಾ ಬೊಟಾ ಕುಡ್ಕ್ಯಾಚ್ಯಾ ಆನಿ ಪೇಟಾಚ್ಯಾ ಮ್ಹಾಲಕಾಕ್ ಹಾಂವೆಂ ಹಾಂಗಾಸರ್ ಸೊಧುಂಕ್ ಜಾಯ್ತೆಂ ಪ್ರಯತ್ನ್ ಕೆಲೆಂ. ಪುಣ್ ತೊ ಹ್ಯಾ ವಾಟೆನ್ ನಾ. ಕವಾತೆ ವೆಳಾರ್ ಗೆಣ್ತಿ ಉಲೊ ಕರ್ತಾನಾ ತೊ ಹಾಜರ್ ನಾತ್‍ಲ್ಲೊ ಪಳೆವ್ನ್ ತಾಚ್ಯಾ ಸೊಧ್ನೆಕ್ ಹಾಂವೆಂ ಜಣ್ ಸೊಡ್ಲೆ. ಸೈನಾಂಚ್ಯಾ ಶಿಬಿರಾಂತ್ ಜಾಂವ್ ಪಟ್ಟಣಾಂತ್ ತೊ ನಾ – ಪರಾರಿ ಜಾಲಾ. ಧಾಂವ್ಲ್ಯಾರ್ ತಾಣೆಂ ಬಾದಶಹಾಚ್ಯಾ ರಾಜ್ಯಾಂತ್ ರಾವೊಂಕ್ ಸಾಧ್ಯ್ ನಾ ದೆಕುನ್ ತಾಚ್ಯಾಚ್ ಮಾಂಯ್‍ಗಾಂವಾಕ್ ತೊ ಗೆಲಾ ಮ್ಹಣ್ ದಿಸ್ತಾ. ತಾಚೊ ಮಾಂಯ್‍ಗಾಂವ್ ಆಸಾ ಕಣ್ಣಾನೂರ್. ಥಂಯ್ಚಿ ಬೇಗಮ್ ಜಾವ್ನಾಸ್ಚ್ಯಾ ಫರೀದಾ ಜಹನಾರಾಚೊ ಸಯ್ರೊ ಖಂಯ್ ತೊ. ತಸಲ್ಯಾ ಮನ್ಶ್ಯಾನ್ ತುಜೊ ಜೀವ್ ಕಾಡುಂಕ್ ಕಿತ್ಯಾಕ್ ಪ್ರಯತ್ನ್ ಕೆಲಾಂ ಮ್ಹಣ್ ಮ್ಹಾಕಾ ಸಮ್ಜನಾ. ತುಕಾ ಸಮ್ಜಲಾಂ ಜಾಲ್ಯಾರ್ ಫುಡ್ಲಿ ವಾಟ್ ತುವೆಂ ಧರ್ಯೆತ್. ತೊ ಮ್ಹಜ್ಯಾ ಕಂಪ್ಣೆಂತ್ ಸುಫೆದಾರ್ ಜಾವ್ನಾಸ್‍ಲ್ಲೊ. ಲಡಾಯೆಚ್ಯಾ ವಿದ್ಯೆಂತ್ ಪ್ರವೀಣ್ ಜಾಂವ್ಚ್ಯಾ ಖಾತಿರ್ ಆಮ್ಚ್ಯಾ ಸೈನಾಂತ್ ತೊ ಭರ್ತಿ ಜಾಲ್ಲೊ ಮ್ಹಣ್ ದಿಸ್ತಾ.

“ವಿ.ಸೂ.: ಆದ್ಲ್ಯಾ ಮಹಿನ್ಯಾಂತ್ ಆಮಿ ಬಾರ್ಕೂರ್ ಥಾವ್ನ್ ಕುರಿಯೆಲಾಕ್ ಗೆಲ್ಲ್ಯಾ ವೆಳಾರ್ (ಕ್ರಿಸ್ತಾಂವ್ ಕೈದಿ ಪರಾರಿ ಜಾಲ್ಲ್ಯಾ ಖಾತಿರ್ ದುಸ್ರ್ಯಾ ಪಾವ್ಟಿಂ ತೀರ್ಪ್ ಆನಿ ಫರ್ಮಾಣ್ ತುವೆಂ ದಿಲ್ಲ್ಯಾ ತೆದಾಳಾ) ತೊಯೀ ಸುಟಿ ಘೆವ್ನ್ ಆಯಿಲ್ಲೊ ಥಂಯ್ಸರ್ ಆಸ್‍ಲ್ಲೊ.

“…ತುಜೊ ಮಿತ್ರ್ ಯೂಸುಫ್.”

ವಾಚುನ್ ಜಾತಚ್, ಸರ್ದಾರ್ ಸಿಮಾಂವ್ನ್ ಏಕ್ ದೀರ್ಘ್ ಶ್ವಾಸ್ ಹಾಸೊನ್ ಸೊಡ್ಲೊ.

“ಆತಾಂ ಹಾಂವ್ ಜಾಣಾಂ” ಮ್ಹಣಾಲೊ ತೊ. “ಆತಾಂಚ್ ಆಮಿ ಭಾಯ್ರ್ ಸರಜಾಯ್ ಆನಿ ಕಣ್ಣಾನೂರ್‌ಚಿ ವಾಟ್ ಧರಿಜಾಯ್. ಆಮ್ಕಾಂ ಜಾಯ್ ತೆಂ ಸರ್ವ್ ಥಂಯ್ಚ್ ಜಮ್ಲಾಂ ಮ್ಹಳ್ಳ್ಯಾಕ್ ದುಬಾವ್ ನಾ.”

ತಾಳ್‍ಮೂಳ್ ನೆಣಾಂಸ್‍ಲ್ಲೆ ಅಂತುಲೊ ಆನಿ ರಾಮಪ್ಪ ಎಕಾಮೆಕಾಕ್ ಪಳೆವ್ನ್ ಕಾಲುಬುಲೆ ಜಾಲೆ.

“ಆಯ್ಚ್ಯಾ ಉದ್ಕಾಂತ್, ಮತ್ ಚುಕಂವ್ಚೊ ರೋಸ್ ಘಾಲ್ಲೊ ಹಾತ್‍ಯೀ ಎಕಾ ತೊಪಾಸಿಚೊ!”

“ಹಾಂ?”

“ಥೊಡ್ಯಾ ವೆಳಾ ಆದಿಂ ಹಾಂವೆಂ ಪಳೆಲ್ಲೊ ತೊ ಖಡ್ಡ್ಯಾ ತಕ್ಲೆಚೊ, ಬಾರೀಕ್ ಸೊಂಡ್ಯೆಚೊ ಆನಿ ತೆಲ್ತ್ಯಾ ಖಾಡ್ಕೆಚೊ ಮನಿಸ್, ಮಂಗ್ಳುರಾಂತ್ ಮಂಜೆರ್ ಥಾವ್ನ್ ಉಡೊನ್ ಧಾಂವ್‍ಲ್ಲೊ ಷೇರ್ ಖಾನ್!”

“ಕಿತೆಂ?”

“ಪುಣ್ ತೊ ಷೇರ್ ಖಾನ್‍ಯೀ ನಹಿಂ!”

“ನಹಿಂ!!”

“ತೊ ಜಾವ್ನಾಸಾ ಕಣ್ಣಾನೂರ್ ರಾಣಿಯೆಚೊ ಗುಪ್ತಚರ್ ಎಕ್ಲೊ ತೊಪಾಸಿ!”

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel