ಇಂಫೆರ್ನಾಚಿಂ ದಾರಾಂ – 12: ದಕ್ಷಿಣಾಚ್ಯೆ ವಾಟೆರ್

ಇಂಫೆರ್ನಾಚಿಂ ದಾರಾಂ: ಅಧ್ಯಾಯ್ 12
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 12: ದಕ್ಷಿಣಾಚ್ಯೆ ವಾಟೆರ್

ಇಸ್ಮಾಯಿಲ್ ಬಾಬಾ, ಆನಿ ತಾಚ್ಯಾ ಪಾಟ್ಲ್ಯಾನ್ ದೋಗ್ ಶಿಪಾಯ್, ಶಿಡಿ ಚಡೊನ್ ಮಂಜೆಚ್ಯಾ ಹುಂಬ್ರಾರ್ ಪಾಯ್ ದವರ್ತಾನಾ, ಖುದ್ದ್ ಸರ್ದಾರ್ ಸಿಮಾಂವ್ ತಾಂಕಾಂ ಭೆಟ್ಲೊ.

“ಬಾದಶಹಾಚ್ಯಾ ನವ್ಯಾ ಖಿಲ್ಲೆದಾರಾಕ್ ಸ್ವಾಗತ್!” ಮ್ಹಳೆಂ ಸರ್ದಾರ್ ಸಿಮಾಂವ್ನ್ ಪಯ್ಲೆಂ.

“ಅಲ್ಲಾ ಹೋ ಅಕ್ಬರ್! ಬಾದಶಹಾಚ್ಯಾ ಪ್ರತಿಭಾವಂತ್ ಪ್ರತಿನಿಧಿ ಸರ್ದಾರಾಕ್ ಸೆವಕಾಚೆಂ ಗರೀಬ್ ವಂದನ್!” ಮ್ಹಣಾಲೊ ಇಸ್ಮಾಯಿಲ್ ಬಾಬಾ, ಕಾನ್ವೆತೆಪರಿಂ ದೊಡೊನ್. ತಾಚ್ಯಾ ಪಾಟ್ಲಾವ್ದಾರಿಂನಿಯೀ ತಸೊಚ್ ಪ್ರಣಾಮ್ ಕೆಲೊ.

“ಆಸೊಂ…” ಮ್ಹಣಾಲೊ ಸರ್ದಾರ್, ಭಾಯ್ಲ್ಯಾನ್ ಅಮ್ರುಕೊ ಹಾಸೊ ಪ್ರದರ್ಸುನ್. “ಪುಣ್, ಕಿತ್ಯಾಕ್ – ಸಕಾಳಿಂ ಫುಡೆಂ – ಜರೂರ್ ಭೆಟ್? ಕಾಂಯ್ ತರೀ ಆಸಾ ಜಟಾಪಟ್?”

“ಹುಜೂರ್!” ಮ್ಹಣಾಲೊ ಇಸ್ಮಾಯಿಲ್ ಜಾಪ್ ದೀವ್ನ್, ಆನಿ ಸಕಾಳಿಂ ತರೀ, ತಾಚ್ಯಾ ಪೇಟಾಚ್ಯಾ ಸಡಿಳ್ ಪೊಂತಾನ್ ಘಾಮ್ ಪುಸುನ್. “ಜರೂರ್ ಖಬರ್ ಆಸಾ – ಜಟಾಪಟ್ ವಾ ಕಿತಾಫತ್ ಮ್ಹಣ್ ಮ್ಹಾಕಾ ಕಳಿತ್ ಜಾಯ್ನಾ. ದೆಕುನ್ ಹಿ ಖಬರ್ ಪಯ್ಲೆಂ ತುಮ್ಕಾಂ ಪಾವಿತ್ ಕರ್ನ್ ಹುಕುಮ್ ಘೆವ್ಯಾಂ ಮ್ಹಣ್ ಹಾಂವ್ ಆಯ್ಲಾಂ.”

“ತುಮಿ ಆಯಿಲ್ಲೆಂಚ್, ಪಯ್ಲಿ, ಬರಿ ಖಬರ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಬಸ್ಕಾ ಘೆಯಾತ್. ಜಮೆದಾರ್ ಪಡ್ವಳ್! ಭೆಟ್ಕಾರಾಂಕ್ ಥೊಡೆಂ ಪಿಯೆಂವ್ಕ್ ಆನಿ ಚಾಬೊಂಕ್ ತಯಾರ್ ಕರಯ್!” ಮ್ಹಣೊನ್ ಅಂತುಲ್ಯಾಕ್ ತಾಣೆಂ ದೊಳೊ ಮಾರ್ಲೊ.

“ಜೀ ಸರ್ದಾರ್… ಹುಜೂರ್!” ಮ್ಹಣೊನ್, ಅಂತುಲೊ ಸಕಯ್ಲ್ ಗೆಲೊ. ಸರ್ದಾರಾಚೊ ಮತ್ಲಬ್ ತಾಕಾ ಘಡ್ಯೆನ್ ಸಮ್ಜಲೊ. ಮಂಜೆಂತ್ ಭಿತರ್ ಮಾನಿನ್ ಮೋನಿಕಾ ಆಸಾ ಮ್ಹಳ್ಳೆಂ, ಆಯಿಲ್ಲ್ಯಾ ಗ್ರಾಯ್ಕಾಂಕ್ ಕಳಿತ್ ಜಾಯ್ನಾಯೆ ದೆಕುನ್, ತಾಂಕಾಂ ವಯ್ರ್‌ಚ್ ಬಸವ್ನ್ ಆನಿ ಉಲವ್ನ್ ಪಾಟಿಂ ಧಾಡಿಜಾಯ್ ಮ್ಹಣ್ ಸರ್ದಾರಾಚಿ ಖುಶಿ ಜಾವ್ನಾಸ್‍ಲ್ಲಿ.

ಇಸ್ಮಾಯಿಲ್ ಬಾಬಾ ಆನಿ ತಾಚೆ ಸಾಂಗಾತಿ ಉಬೆಚ್ ರಾವ್ಲೆ.

“ಬಸೊಂಕ್ ವೇಳ್ ನಾ, ಆನಿ ಉಪಾಹಾರಾಚಿ ಗರ್ಜ್ ನಾ ಹುಜೂರ್” ಮ್ಹಣಾಲೊ ಖಿಲ್ಲೆದಾರ್. “ವೇಳ್ ಕಾಡುಂಕ್ ಬಿಲ್ಕುಲ್ ಸಾಧ್ಯ್ ನಾ.”

“ಬಿಲ್ಕುಲ್? ಮ್ಹಣ್ಜೇ..?”

“ಮ್ಹಣ್ಜೆ, ಆಮಿ – ಹಾಂವೆಂ ಹಾಡ್‍ಲ್ಲಿ ಖಬರ್, ಭೋವ್‍ಚ್ ಆತುರಾಯೆಚಿ ಜಾವ್ನಾಸಾ!” ಪರ್ತ್ಯಾನ್ ತಾಣೆಂ ಘಾಮ್ ಪುಸ್ಲೊ.

“ತಶೆಂ? ಆಯ್ಕಯಾಂ ತರ್!” ಸರ್ದಾರ್ ಸಿಮಾಂವ್‍ಯೀ, ಕಮರ್‌ಬಂಧಾಂತ್ ಬೊಟಾಂ ಶಿರ್ಕಾವ್ನ್ ರಾವ್ಲೊ.

“ಹುಜೂರ್” ಖಬರ್ ದಿಲಿ ಖಿಲ್ಲೆದಾರಾನ್. “ತುಮಿ ರಾತಿಂ ಅಪೇಕ್ಷಾ ಉಚಾರ್ನ್ ಹುಕುಮ್ ದಿಲ್ಲ್ಯಾ ಪ್ರಕಾರ್, ಹಾಂವೆಂ ರಾತಿಂಚ್, ಬಂದ್ರಾರ್ ಆನಿ ಲಾಗಿಂ ಉದ್ಕಾಂತ್ ಆಸ್‍ಲ್ಲ್ಯಾ ಸರ್ವ್ ವಾಹನಾಂಕ್, ಸರ್ಕಾರಾಚೆಂ ಫರ್ಮಾಣ್ ದಾಂಗ್ರೊ ಫೆರಾಯಿಲ್ಲೆಂ.”

“ಬರಾಬರ್!”

“ಮ್ಹಾಕಾ ಆಯಿಲ್ಲ್ಯಾ ವರ್ದೆ ಪ್ರಕಾರ್ – ಏಕ್ ಮಂಜಿ ಮಾತ್ರ್ ತಪಾಸಣೆಕ್ ಕಬೂಲ್ ನಾತ್‍ಲ್ಲಿ ಮ್ಹಣ್ ಕಳೊನ್ ಆಯ್ಲೆಂ.”

“ಖಂಯ್ಚಿ ಆನಿ ಕೊಣಾಚಿ ತಿ ಜಾವ್ಯೆತ್?” ಸರ್ದಾರ್ ವಿಚಾರಿಲಾಗ್ಲೊ – ಆತುರಾಯ್ ದಾಕಯಿಲ್ಲೆಪರಿಂ, ತರೀ, ದೊಳ್ಯಾಚಿ ಆಸ್ಡಿ ಹಾಲಯ್ನಾಸ್ತಾನಾ.

“ತ್ಯಾ ಮಂಜೆಚೆಂ ನಾಂವ್ ‘ಜಲಬಾಲೆ’”

“ಜಲಬಾಲೆ?” ಮ್ಹಣಾಲೊ ಸರ್ದಾರ್. “ಆಮ್ಚ್ಯಾ ಉಗ್ಡಾಸಾ ಪರ್ಮಾಣೆಂ, ತಿ ಮಂಜಿ, ನೀಲೇಶ್ವರ್‌ಚ್ಯಾ ಚಂದ್ರ ರಾಜಾಕ್ ಸಂಬಂಧ್ ಆಸ್‍ಲ್ಲಿ ಜಾವ್ನಾಸಾ…”

“ಬರಾಬರ್ ಹುಜೂರ್!” ಮ್ಹಣಾಲೊ ಖಿಲ್ಲೆದಾರ್ ಮಧೆಂಚ್. ತೊ ಆನಿ ತಾಚೆ ಸಾಂಗಾತಿ, ಹ್ಯಾ ಸರ್ದಾರಾಚೊ ‘ಉಗ್ಡಾಸ್’ ಆಯ್ಕೊನ್ ಭಿತರ್ಲ್ಯಾ ಭಿತರ್ ವಿಜ್ಮಿತ್ ಪಾವ್ಲೆ. “ಬರಾಬರ್! ಆಮ್ಚ್ಯಾ ಶಿಪಾಯಾಂನಿ ಆಮ್ಚಿ – ಆಮ್ಚ್ಯಾ ಸರ್ಕಾರಾಚಿ – ಹುಕುಮ್ ಪಾಚಾರ್ತಾನಾ, ತ್ಯಾ ಮಂಜೆಂತ್ಲ್ಯಾ ಮನ್ಶ್ಯಾಂನಿ ಅಸಮಾಧಾನ್ ವ್ಯಕ್ತ್ ಕೆಲೆಂ ಖಂಯ್!”

“ಆಹಾಂ! ಕಾರಣ್?”

“ಕಾರಣ್ ಕಳಿತ್ ನಾ. ‘ಟಿಪ್ಪು ಸುಲ್ತಾನಾಚ್ಯಾ ನವ್ಕರಾಂನಿ ಅವ್ಮರ್ಯಾದೆನ್ ಜುಲುಮ್ ಚಲಯ್ಲ್ಯಾರ್, ನೀಲೇಶ್ವರ್‌ಚೊ ರಾಜಾ ಥಂಡ್ ರಾಂವ್ಚೊ ನಾ’ ಮ್ಹಣೊನ್ ಮಂಜೆಂತ್ಲ್ಯಾಂನಿ ಭೆಷ್ಟಾಂಯ್ಲೆಂ ಖಂಯ್!”

“ವಿಚಿತ್ರ್‌ಚ್ ಸಯ್! ಉಪ್ರಾಂತ್?”

“ತಿ ಖಬರ್ ಮ್ಹಾಕಾ ಪಾವ್ತಚ್, ಚಿಕ್ಕೆ ಕಾವ್ಜೆಣಿ ಭೊಗ್ಲಿ. ಲೇಕಿನ್, ತುಮ್ಚಿ ಹುಕುಮ್ ಸ್ಪಷ್ಟ್ ಆಸ್‍ಲ್ಲ್ಯಾನ್, ಆಜ್ ಫಾಂತ್ಯಾರ್ ಹಾಂವೆಂ ಬಂದ್ರಾಚ್ಯಾ ಥೊಡ್ಯಾ ಶಿಪಾಯಾಂ ಸಾಂಗಾತಾ ಮಂಜೆಕ್ ಭೆಟ್ ದಿಲಿ.”

“ಭೋವ್ ಬರೆಂ ಜಾಲೆಂ” ಮ್ಹಣಾಲೊ ಸರ್ದಾರ್, ಹಾಳ್ವಾಯೆನ್. “ಕಾಂಯ್ ತರೀ ದುಬಾವಾಕ್…”

“ದುಬಾವಾಕ್ ನಹಿಂ, ಭಿಯಾಕ್ ಕಾರಣ್ ಜಾಲಾಂ. ದೆಕುನ್ ಹಾಂವ್ ಹಾಂಗಾಸರ್ ಧಾಂವೊನ್ ಆಯ್ಲಾಂ.”

“ಕಿತೆಂ ಜಾಲಾಂ?”

“ಹುಜೂರ್” ಮ್ಹಣಾಲೊ ಖಿಲ್ಲೆದಾರ್, ಪರ್ತ್ಯಾನ್ ಘಾಮ್ ಪುಸುನ್. “ಆಮಿ ತ್ಯಾ ಮಂಜೆಕ್ ದಾಡ್ ಘಾಲ್ಚ್ಯಾ ಥೊಡ್ಯಾ ವೆಳಾ ಆದಿಂ ಥಂಯ್ಸರ್ ಏಕ್ ಝುಜ್ ಜಾಲ್ಲೆಪರಿಂ ದಿಸ್ತಾ…”

“ಮುಂದರ್ಸಿ…”

“ಮಂಜೆಂತ್, ವಯ್ರ್ ದೋನ್ ಆನಿ ಭಿತರ್ಲ್ಯಾ ಆವರಾಂತ್ ಏಕ್ – ಅಶೆಂ ತೀನ್ ಮೊಡಿಂ ಆಸ್‍ಲ್ಲಿಂ…”

“ತೀನ್ ಮೊಡಿಂ!” ಮ್ಹಣಾಲೊ ಸರ್ದಾರ್ ಸಿಮಾಂವ್ ಚಿಕ್ಕೆ ಆಶ್ಚರ್ಯ್ ದಾಕವ್ನ್. “ಮಂಜೆಂತ್ ವಕಾಲ್ ನಾತ್‍ಲ್ಲೆಂ ವಾ ಫುಡ್ಲೊ ವಿವರ್ ಕಾಂಯ್ ಮೆಳೊಂಕ್ ನಾ?”

“ಹುಜೂರ್, ತಿಚ್ ಗಜಾಲ್ ವಿಚಿತ್ರ್…”

“ಮ್ಹಣ್ಜೆ?”

“ಮ್ಹಣ್ಜೆ, ಹುಜೂರ್ – ಮಂಜೆಂತ್ಲೊ ತಾಂಡೆಲ್ ಮುಖೆಲಿ ಮತ್ ಚುಕೊನ್ ಪಡ್‍ಲ್ಲೊ. ತಾಚೆ ದೋಗ್ ಕಲಾಸಿ ಕಲಾಸ್ ಜಾಲ್ಲೆ. ಭಿತರ್ಲ್ಯಾ ಆವರಾಂತ್ ಮೊರೊನ್ ಪಡ್‍ಲ್ಲೊ ಗ್ರಾಯ್ಕ್, ಆಮ್ಚ್ಯಾ ಠಾಣ್ಯಾಕ್ ತುಮಿ ಯೆಂವ್ಚ್ಯಾ ಆದಿಂ ಪರಾರಿ ಜಾಲ್ಲ್ಯಾ ಷೇರ್ ಖಾನಾಚೊ ಎಕ್ಲೊ ಪೊಟ್ಟು ಶಿಪಾಯ್!”

“ಆಹಾಂ! ಆನಿ ಷೇರ್ ಖಾನ್?”

“ಷೇರ್ ಖಾನ್‍ಯೀ ತ್ಯಾ ಮಂಜೆಂತ್ ಆಸ್‍ಲ್ಲೊ ಖಂಯ್. ಕೋಣ್‍ಗೀ ಎಕ್ಲ್ಯಾ ಮುಸ್ಲಿಮ್ ಸ್ತ್ರೀಯೆಕ್ ಘೆವ್ನ್, ತೆನ್ಕಾಕ್ ಪಯ್ಣ್ ಕರ್ಚ್ಯಾ ಖಾತಿರ್ ತೊ ಆಯಿಲ್ಲೊ ಖಂಯ್!”

“ಕಿತೆಂ ಜಾಲೆಂ?”

“ಮಧ್ಯಾನೆ ಉಪ್ರಾಂತ್, ಕೊಣೆಂಗೀ ಧಾ ಪಂದ್ರಾ ಜಣಾಂನಿ, ಮಂಜೆಕ್ ದಾಡ್ ಘಾಲ್ನ್ ಆಕ್ರಮಣ್ ಚಲಯ್ಲೆಂ ಖಂಯ್. ತೇಗ್ ಜಣ್ ಮೆಲೆ. ಥೊಡೆ ಘಾಯೆಲೆ ಆನಿ ಮತ್ ಚುಕೊನ್ ಪಡ್ಲೆ. ಉರ್ಲೆಲೆ ಥೊಡೆ, ಜೀವ್ ಹಾತಾಂತ್ ಧರ್ನ್ ಉದ್ಕಾಕ್ ಉಡ್ಲೆ. ತ್ಯಾ ಗಲಾಟ್ಯಾಂತ್ ಷೇರ್ ಖಾನ್‍ಯೀ ಉದ್ಕಾಕ್ ಉಡೊನ್ ನಪಂಯ್ಚ್ ಜಾಲೊ ಖಂಯ್!”

“ಆನಿ, ತಾಣೆಂ ಹಾಡ್‍ಲ್ಲಿ ಮ್ಹಣ್ತಾತ್, ತಿ ಸ್ತ್ರೀ?”

“ಆಕ್ರಮಣ್ ಚಲಯಿಲ್ಲ್ಯಾ ಗ್ರಾಯ್ಕಾಂನಿ ತಿಕಾ ವ್ಹಾವಯ್ಲೆಂ ಖಂಯ್!”

“ನಿಜಾಯ್ಕೀ, ಕಾಣಿ ವಿಚಿತ್ರ್. ಆಕ್ರಮಣ್ ಚಲಿಯಲ್ಲೆ ಗ್ರಾಯ್ಕ್ ಕೋಣ್ ಜಾವ್ಯೆತ್ ಮ್ಹಣ್ ಕಾಂಯ್…”

“ಖಬರ್, ವಾ ಸಂಶಯ್ ಲೆಗುನ್ ನಾ ಹುಜೂರ್. ತರೀ…”

“ತರೀ?”

“ತರೀ, ಬಾದಶಹಾ ಟಿಪ್ಪು ಸುಲ್ತಾನಾಚ್ಯಾ ಕುರಿಯೆಲ್ ಬಂದ್ರಾಂತ್ ಭದ್ರತಿ ಮೆಳೊಂಕ್ ನಾ ಮ್ಹಣ್, ನೀಲೇಶ್ವರ್‌ಚೊ ರಾಯ್ ಉಚಾಂಬಳ್ ಜಾತಾ ಕೊಣ್ಣಾ!”

“ತಾಣೆಂ ಉಚಾಂಬಳ್ ಜಾವ್ನ್ ಕರ್ಚೆಂ ಕಾಂಯ್ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಬಾದಶಹಾಚ್ಯಾ ಘಾತ್ಕಿ ದುಸ್ಮಾನಾಂಕ್ – ತಾಚ್ಯಾ ಮಂಜೆ ಮುಖಾಂತ್ರ್ – ಆಸ್ರೊ ದಿಲ್ಲೊ ವಾ ನಾ ಮ್ಹಳ್ಳೆಂ ತೊಚ್ ಪಯ್ಲೆಂ ರುಜು ಕರುಂದಿ. ತ್ಯಾ ರುಜ್ವಾತೆ ಖಾತಿರ್ ಖುದ್ದ್ ಆಮಿಂಚ್ ತೆನ್ಕಾಕ್ ಪಯ್ಣ್ ಕರುಂಕ್ ಚಿಂತಾಂವ್. ಮಂಜೇಶ್ವರ್, ನೀಲೇಶ್ವರ್ ಆನಿ ವಿಟ್ಲಾಚೆ ರಾಯ್, ಭಿತರ್ಲ್ಯಾ ಭಿತರ್ ಇಂಗ್ಲೆಜಾಂಕ್‍ಚ್ ಸಹಾಯ್ ದೀಂವ್ಕ್ ವಾವುರ್ತಾತ್ ಮ್ಹಳ್ಳಿ ಖಬರ್ ಬಾದಶಹಾಕ್ ಆಸಾ.”

“ತರ್, ತುಮ್ಚಿ ಕಿತೆಂ ಹುಕುಮ್ ಹುಜೂರ್?”

“ಚಡಿತ್ ಕಾಂಯ್ ನಾ. ‘ಜಲಬಾಲೆ’ ಭಾಯ್ರ್ ಸರೊನ್ ವೆತಾ ಜಾಲ್ಯಾರ್ ವಚೊಂದಿ. ಆಡಾಯ್ನಾಕಾತ್. ಆಯ್ಚೊ ಏಕ್ ದೀಸ್ ವಿಶೆವ್ ಘೆವ್ನ್ ಫಾಲ್ಯಾಂ ಆಮಿ ತೆನ್ಕಾಕ್ ವೆತಾಂವ್. ತುಮಿ, ಕಾಂಯ್ ವಿಶೇಸ್ ಘಡೊಂಕ್ ನಾತ್‍ಲ್ಲೆಪರಿಂ ಠಾಣ್ಯಾಂತ್ ತುಮ್ಚೆಂ ಕಾಮ್ ಆನಿ ಅಧಿಕಾರ್ ಮುಂದರ್ಸಿಯೆತ್.”

ಖಿಲ್ಲೆದಾರ್ ಇಸ್ಮಾಯಿಲ್ ಬಾಬಾನ್, ಸಮಾಧಾನೆಚೊ ಏಕ್ ಶ್ವಾಸ್ ಸೊಡ್ಲೊ. “ತುಮ್ಕಾಂ ಅಲ್ಲಾ ಬರೆಂ ಕರುಂದಿ ಹುಜೂರ್! ಆಮಿ ತರ್ ಆತಾಂ ವಾಪಸ್ ವೆತಾಂವ್.”

“ಭೋವ್ ಬರೆಂ. ಆಮಿಯೀ ಆಜ್ ವಿಶೆವ್ ಘೆತಾಂವ್. ಪುಣ್ ಬಂದ್ರಾರ್ ಲಂಗರ್ ಮಾರ್ನ್ ಆಸ್‍ಲ್ಲ್ಯಾ ಆನಿ ಭಾಯ್ರ್ ವೆಚ್ಯಾ ಸರ್ವ್ ವಾಹನಾಂಚೆಂ ತಪಾಸಣ್ ಚತ್ರಾಯೆನ್ ಚಾಲು ದವರಿಜಾಯ್.”

“ಜೀ ಹುಜೂರ್!” ಮ್ಹಣೊನ್, ಇಸ್ಮಾಯಿಲ್ ಬಾಬಾನ್ ಆನಿ ತಾಚ್ಯಾ ಸಾಂಗಾತ್ಯಾಂನಿ ರಜಾ ಘೆತ್ಲಿ. ಜಾಲ್ಯಾರ್, ಆಮೊರೆಚ್ಯಾ ವೆಳಾ ಠಾಣ್ಯಾಕ್ ಆಪುಣ್ ಭೆಟ್ ದಿತಾಂ ಮ್ಹಣ್ ಭಾಸಾವ್ನ್ ಸರ್ದಾರ್ ಸಿಮಾಂವ್ನ್ ತಾಂಕಾಂ ಧಾಡ್ಲೆಂ.

ಉಪ್ರಾಂತ್ಲಿಂ ವೊರಾಂ, ‘ರೆಜಿನಾ’ ಮಂಜೆಂತ್, ಸವ್ಕಾಸಾಯೆನ್ ಪಾಶಾರ್ ಜಾಲಿಂ.

ಮಾನಿನ್ ಮೋನಿಕಾಯೀ, ಜಾಯ್ತೊ ವಿಶೆವ್ ಘೆವ್ನ್, ಬರಿ ಜಾವ್ನ್, ಸರ್ದಾರಾಚ್ಯಾ ಫುಡ್ಲ್ಯಾ ಹುಕ್ಮೆಕ್ ರಾಕ್ತಾಲಿ.

“ಭಯ್ಣೀ, ತುವೆಂ ಆನಿ ಭಿಯೆಂವ್ಚಿ ಗರ್ಜ್ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಸಾಂಜ್ ಜಾವ್ನ್ ಯೆತಾನಾ. “ಆದ್ಲೊ ಖಿಲ್ಲೆದಾರ್ ಆನಿ ತಾಚೆ ಥೊಡೆ ಚಾಕೊರ್, ಪರಾರಿ ಜಾಲ್ಯಾತ್. ತಾಚೊ ದಲಾಲಿ ಜಾವ್ನಾಸ್‍ಲ್ಲ್ಯಾ ಷೇರ್ ಖಾನಾನ್‍ಯೀ – ತೊ ರಾತಿಂ ನ್ಹಂಯ್ತ್ ಬುಡೊನ್ ಮೊರೊಂಕ್ ನಾ ಜಾಲ್ಯಾರ್ – ಪೊಳಾಪಳ್ ಘೆತ್ಲ್ಯಾ ಮ್ಹಳ್ಳೆಂ ಖಂಡಿತ್.”

“ಪುಣ್, ವೆರೊನಿಕಾಬಾಯ್?”

“ತಿಚ್ಯಾ ಸೊಧ್ನೆಕ್ ಹಾಂವ್ ಫಾಲ್ಯಾಂ ಭಾಯ್ರ್ ಸರ್ತಾಂ.”

“ಆನಿ ಹಾಂವೆಂ ಕಿತೆಂ ಕರಿಜಾಯ್?” ವಿಚಾರ್ಲೆಂ ಮೋನಿಕಾನ್.

“ಹಾಂವ್ ಆಜ್ ಸಾಂಜೆರ್, ಬೋಳೂರ್ ಠಾಣ್ಯಾಕ್ ವಚೊನ್ ಥಂಯ್ಸರ್ ರಾವ್ತಾಂ. ರಾತಿಂ, ಆಮ್ಚೆ ಪಾತ್ಯೆಣೆಚೆ ದೋಗ್ ಸವಾರ್, ತುಕಾ ವ್ಹರ್ನ್, ಹಸ್ಸನ್ ಮಹಮ್ಮದಾಗೆರ್ ಪಾವಯ್ತೆಲೆ. ಥಂಯ್ಸರ್, ಹಮೀದ್‍ಯೀ ಪಾಟಿಂ ಪಾವ್ಲಾ. ತುಮ್ಕಾಂ ಹ್ಯಾ ಉಪ್ರಾಂತ್ ಥಂಯ್ಸರ್ ಕಸಲೊಚ್ ಅಪಾಯ್ ಆಸಾಸೊ ನಾ.”

“ತಶೇಂ ಜಾಂವ್, ಸರ್ದಾರ್ ಭಾವಾ!” ಸುಸ್ಕಾರ್ಲಿ ಮೋನಿಕಾ. ತಿಚೆ ದೊಳೆ ಭಿಜ್ಲೆ. “ತುಜೆಂ ಋಣ್ ಕಶೆಂ ಫಾರಿಕ್ ಕರ್ಚೆಂ ಮ್ಹಣ್ ಆಮಿ ನೆಣಾಂವ್. ಪುಣ್ ದೀಸ್ ರಾತ್, ತುಜೆ ಖಾತಿರ್ ಆಮಿ ಮಾಗ್ತೆಲ್ಯಾಂವ್.”

“ತೆಂಚ್ ವರ್ತೆಂ ಆನಿ ಗರ್ಜೆಚೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್.

* * * * *

ಕಾಳೊಕ್ ಜಾಂವ್ಚ್ಯಾ ಆದಿಂ, ಸರ್ದಾರ್ ಸಿಮಾಂವ್ ಆಪ್ಲ್ಯಾ ಚಡಾವತ್ ಸವಾರಾಂಕ್ ಘೆವ್ನ್ ಠಾಣ್ಯಾಕ್ ಆಯ್ಲೊ. ಯೆಂವ್ಚ್ಯಾ ಆದಿಂ, ರಾತಿಂ ನೋವ್ ವೊರಾಂ ಉತರ್ಲ್ಯಾ ಉಪ್ರಾಂತ್, ಮೋನಿಕಾಕ್ ಚತ್ರಾಯೆನ್ ವ್ಹರ್ನ್ ಬೊಕ್ಕಪಟ್ಟಣಾಕ್ ಪಾವಯ್ಜಾಯ್ ಮ್ಹಣ್ ತಾಣೆಂ ತಾಕಿದ್ ದಿಲಿ.

ತ್ಯಾಚ್ ಪ್ರಕಾರ್, ರಾತಿಂಚ್ಯಾ ಧಾ ವೊರಾರ್‌ಶೆಂ, ಸರ್ದಾರಾಚೆ ದೋನ್ ಸವಾರ್, ಮಾಪ್ಳ್ಯಾಂಪರಿಂ ನ್ಹೆಸೊನ್, ಆನಿ ಮೋನಿಕಾಕ್‍ಯೀ ಬುರ್ಖಾ ಘಾಲವ್ನ್, ತಿಕಾ ಹೊಡ್ಯಾರ್ ಬಸವ್ನ್ ತಡಿಕ್ ಪಾವ್ಲೆ. ಉಪ್ರಾಂತ್, ಉರ್ವಾ ಮೊಳ್ಯಾ ಬಗ್ಲೆಚಿ – ಭೊಂವಾಡ್ಯಾಚಿ, ಪುಣ್ ಶಾಬಿತ್ – ವಾಟ್ ಧರ್ನ್ ಬೊಕ್ಕಪಟ್ಟಣಾಕ್ ಯೇವ್ನ್ ಪಾವ್ಲೆ.

ತಿತ್ಲ್ಯಾರ್, ರಾತ್ ಮಧ್ಯಾನ್ ಜಾಲ್ಲಿ.

ಭಾಯ್ಲ್ಯಾನ್ ತೀನ್ ಪಾವ್ಟಿಂ ಸಾಂಕೇತಿಕ್ ಆವಾಜ್ ಕರ್ತಚ್, ಹಮೀದ್, ಲಾಂಟಾನ್ ಘೆವ್ನ್ ಭಾಯ್ಲ್ಯಾ ದಾರಾ ಕಡೆನ್ ಆಯ್ಲೊ.

“ಕೋಣ್ ಆಸಾ?” ವಿಚಾರ್ಲೆಂ ತಾಣೆಂ.

“ಹಾಂವ್ ಹಮೀದ್” ಮ್ಹಣಾಲಿ ಮೋನಿಕಾ.

ಹಮೀದ್, ಆಪ್ಲ್ಯಾಚ್ ಕಾನಾಂಕ್ ಪಾತ್ಯೆನಾ ಜಾಲೊ.

“ಕೋಣ್?” ಪರ್ತ್ಯಾನ್ ವಿಚಾರ್ಲೆಂ ತಾಣೆಂ ಭಿಯಾನ್‍ಶೆಂ.

“ಹಾಂವ್ ಹಮೀದ್ – ಮೋನಿಕಾ” ಮೋನಿಕಾನ್ ಜಾಪ್ ದಿಲಿ.

“ಕೋಣ್… ಕೋಣ್..?” ಭಿತರ್ ಥಾವ್ನ್ ಕಾವ್ಜೆಣೆನ್ ಪುಣ್ ಸಂತೊಸಾಚ್ಯಾ ಆತುರಾಯೆನ್ ಚಾಂದ್‍ಬೀಬಿ ಆನಿ ಫರೀದಾ ಬೇಗಂ ವಿಚಾರಿಲಾಗ್ಲಿಂ.

“ಮೋನಿಕಾಬಿ! ದೀದಿ! ಅಮ್ಮಾ!” ಮ್ಹಣ್ ಗದ್ದಗೊನ್, ಹಮೀದಾನ್ ಖಿಳ್ ಕಾಡ್ಲಿ. ದುಸ್ರೆಂ ಕಾಂಯ್ ಉಲಂವ್ಕ್ ಜಾಯ್ನಾಸ್ತಾಂ, ಲಾಂಟಾನ್ ಸಕಯ್ಲ್ ದವರ್ನ್, ಮೋನಿಕಾಚ್ಯಾ ಪಾಯಾಂಕ್ ಪಡೊನ್, ಸಂತೊಸಾನ್ ಸುಸ್ಕಾರೊನ್ ತೊ ರಡೊಂಕ್ ಲಾಗ್ಲೊ.

ತಿತ್ಲ್ಯಾರ್ ಚಾಂದ್‍ಬೀಬಿ ಆನಿ ಫರೀದಾ ಬೇಗಂ ಲಾಗಿಂ ಪಾವ್‍ಲ್ಲಿಂ.

ತ್ಯೊ ತೆಗೀ ಸ್ತ್ರೀಯೊ ಎಕಾಮೆಕಾಕ್ ಪೊಟ್ಲುನ್ ಧರ್ನ್, ಎಕಾಮೆಕಾಚ್ಯಾ ಭುಜಾಂಚೆರ್ – “ಬಹೆನ್! ದೀದಿ! ಬೇಟೀ!” ತಸಲಿಂ ಉತ್ರಾಂ ಉಮಾಳೊನ್ ರಡ್ಚಿ ತಿ ದೀಷ್ಟ್ ಪಳೆಂವ್ಕ್ ತಾಂಕನಾತ್‍ಲ್ಲ್ಯಾ ಸಂತೊಸಾಂತ್ – ಮೋನಿಕಾಕ್ ಪಾಂವ್ಕ್ ಆಯಿಲ್ಲೆ ಮಾನಾಯ್, ಥಂಯ್ ಥಾವ್ನ್ ಗಪ್‍ಚುಪ್ ಪಾಶಾರ್ ಜಾವ್ನ್ ಪಾಟಿಂ ಗೆಲೆ.

“ಬಹೆನ್, ಕೊಣೆಂ..?” ವಿಚಾರ್ಲೆಂ ಚಾಂದ್‍ಬೀಬಿನ್, ಮೋನಿಕಾಕ್ ಪರ್ತ್ಯಾನ್ ಆರಾವ್ನ್ ಧರ್ನ್.

“ಸರ್ದಾರಾನ್…” ಸುಸ್ಕಾರ್ಲಿ ಮೋನಿಕಾ.

“ಅಲ್ಲಾ ತಾಕಾ ಮಜತ್ ದೀಂವ್ದಿ!” ಮ್ಹಣೊನ್ ತಿಂ ಭಿತರ್ ಪಾವ್ಲಿಂ.

ತ್ಯಾಚ್ ಘಡ್ಯೆ, ಸರ್ದಾರ್ ಸಿಮಾಂವ್, ಬೋಳ್ ಠಾಣ್ಯಾಂತ್ಲ್ಯಾ ಖಲೀಫ್ ದೌಲತಾಂತ್ ವಿಶೆವ್ ಘೆತಾಲೊ. ನೀದ್ ತಾಕಾ ಪಡೊಂಕ್ ನಾತ್‍ಲ್ಲಿ. ತ್ಯಾ ವೆಳಾರ್, ಕಾಂಯ್ ಮೋನಿಕಾ, ಶಾಬಿತಾಯೆನ್ ಹಸ್ಸನ್ ಮಹಮ್ಮದಾಗೆರ್ ಪಾವ್ಲ್ಯಾ ಜಾವ್ಯೆತ್ ಮ್ಹಣ್ ತಾಕಾ ಭೊಗ್ಲೆಂ.

ತ್ಯಾ ಬರಾಬರ್, ವೆರೊನಿಕಾಕ್, ಆನಿ ಪರಾರಿ ಖಿಲ್ಲೆದಾರಾಕ್ ಸೊಧುನ್ ಕಾಡುಂಕ್ ಖಂಯ್ಚಿ ವಾಟ್ ಧರ್ಚಿ, ಆನಿ ಕಸಲೊ ಉಪಾಯ್ ಘೆಂವ್ಚೊ ಮ್ಹಳ್ಳಿಂ ಚಿಂತ್ನಾಂ ತಾಕಾ ಧೊಸುಂಕ್ ಲಾಗ್ಲಿಂ.

ಉಜ್ವಾಡ್ಲ್ಯಾ ಉಪ್ರಾಂತ್ ತಾಣೆಂ ಇಸ್ಮಾಯಿಲ್ ಬಾಬಾಕ್ ಆನಿ ತಾಚ್ಯಾ ದೊಗಾಂ ಹುದ್ದೆದಾರಾಂಕ್ ಆಪವ್ನ್ ಝುಂತ್ ಚಲಯ್ಲೊ. ತಾಣಿಂ ತರ್ಕ್ ವಿತರ್ಕ್ ಕೆಲ್ಲ್ಯಾ ಪರ್ಮಾಣೆಂ, ಆದ್ಲೊ ಖಿಲ್ಲೆದಾರ್ ನಿಜಾಯ್ಕೀ ಕುರಿಯೆಲಾಂತ್ ನಾ, ಬಗಾರ್ ಖಂಯ್ಸರ್ ಪುಣೀ ಪಯ್ಸ್ ಲಿಪ್ಲಾ ಮ್ಹಣ್ ತಾಣಿಂ ಠರಾಯ್ಲೆಂ.

“ಪುಣ್ ಹುಜೂರ್” ಮ್ಹಣಾಲೊ ಇಸ್ಮಾಯಿಲ್ ಬಾಬಾ ಆಪ್ಲೆಂ ಖಾಡ್ ಪುಸುನ್. “ಜಿವಾಚ್ಯಾ ಬಚಾವೆ ಖಾತಿರ್, ಆನಿ ಪ್ರತ್ಯೇಕ್ ಜಾವ್ನ್, ಬಾದಶಹಾಚಿ ಶಿಕ್ಷಾ ಚುಕಂವ್ಚ್ಯಾ ಖಾತಿರ್ ತಾಣೆಂ ಪೊಳಾಪಳ್ ಘೆವ್ನ್, ಟಿಪ್ಪು ಸುಲ್ತಾನ್ ಬಹಾದುರಾಚ್ಯಾ ಸಾಮ್ರಾಜ್ಯಾ ಭಾಯ್ರ್ ವಚೊನ್ ಅಜ್ಞಾತ್ ಆಸ್ರೊ ಘೆಂವ್ಚೆಂ ವಾಜ್ಭಿ. ಪುಣ್ ಷೇರ್ ಖಾನಾಕ್ ಹಾಂಗಾ ಹುದ್ದೊ ದೀವ್ನ್…”

“ಥಂಯ್ಸರ್ ಕಳ್ತಾ, ತಾಣೆಂ ಭರ್ವಸೊ ಸಾಂಡುಂಕ್ ನಾ ಮ್ಹಣ್” ಮ್ಹಣಾಲೊ ಸರ್ದಾರ್ ಸಿಮಾಂವ್. ತಾಚ್ಯಾ ಮತಿಂತ್ ಆತಾಂ ಥೊಡೆ ಹಿಶೆ ಸೊವ್ ದೀಂವ್ಕ್ ಲಾಗ್ಲೆ.

“ಕಸಲೊ ಭರ್ವಸೊ ಜಾವ್ಯೆತ್ ಹುಜೂರ್?”

“ಪರಾರಿ – ಹಾಂಗಾಚ್ಯಾ ಬಂಧಿಖಾನ್ಯಾಂತ್ಲೆ ನಪಂಯ್ಚ್ – ಜಾಲ್ಲೆ ಕ್ರಿಸ್ತಾಂವ್ ಕೈದಿ ಪರತ್ ಮೆಳ್ತಿತ್ ಮ್ಹಳ್ಳೊ ಭರ್ವಸೊ. ಪುಣ್, ಹುಕ್ಮೆ ಪ್ರಕಾರ್ ತಾಂಚೊ ಪತ್ತೊ ಧರ್ಚೆಂ ಪ್ರಯತ್ನ್ ಕರುಂಕ್ ತೊಚ್ ರಾವೊಂಕ್ ನಾ. ಬಗಾರ್, ಆಪ್ಲ್ಯಾ ಜಾಗ್ಯಾರ್ ದುಸ್ರ್ಯಾ ಎಕ್ಲ್ಯಾ ಹರಾಮ್‍ಖೋರಾಕ್ ನಮಿಯಾರ್ನ್ ತೊ ಧಾಂವ್ಲೊ.”

“ತರ್, ಆದ್ಲೊ ಖಿಲ್ಲೆದಾರ್ ಖಂಯ್ ಆಸಾ ಮ್ಹಳ್ಳಿ ಖಬರ್, ಷೇರ್ ಖಾನಾಕ್ ಖಂಡಿತ್ ಕಳಿತ್ ಆಸ್‍ಲ್ಲಿ!”

“ಬಿಲ್ಕುಲ್!”

“ಯಾಲ್ಲಾ! ಪುಣ್ ತೊಯೀ ಆಮ್ಚ್ಯಾ ಹಾತಾಂತ್ಲೊ ಚುಕ್ಲೊ ನಹಿಂವೇ! ತಾಕಾ ಪುಣೀ…”

“ಆಮಿ ಧರ್‌ಲ್ಲೊ ಜಾಲ್ಯಾರ್ ಬರೆಂ ಜಾತೆಂ. ವ್ಹಡ್ ನಹಿಂ. ಜಾಂವ್ಕ್ ನಾತ್‍ಲ್ಲ್ಯಾ ಕಾಮಾಂ ಖಾತಿರ್ ಚುರ್ಚುರೊನ್ ಫಾಯ್ದೊ ನಾ. ಆಮ್ಕಾಂ ಥೊಡೆ ಸ್ಪಷ್ಟ್ ಹಿಶಾರೆ ಮೆಳ್ಳ್ಯಾತ್. ತ್ಯಾ ಪ್ರಕಾರ್ ಕಾಮ್ ಕೆಲ್ಯಾರ್, ನಿಮಾಣೆಂ ಜಯ್ತ್ ಆಮ್ಚೆಂ – ಬಾದಶಹಾಚ್ಯಾ ಸರ್ಕಾರಾಕ್ ಲಾಭ್ತೆಲೆಂ” ಮ್ಹಣಾಲೊ ಸರ್ದಾರ್ ಸಿಮಾಂವ್.

ಆನಿ ತಶೆಂ, ಫುಡ್ಲ್ಯಾ ಕಾಮಾಂಚೆಂ ಕ್ರಮ್ ತಾಣೆಂ ಥಾರಾಯ್ಲೆಂ.

‘ಜಲಬಾಲೆ’ ದಕ್ಷಿಣಾಕ್ ಪಯ್ಣ್ ಕರುಂಕ್ ತಯಾರಾಯ್ ಕರ್ತಾಲಿ ಮ್ಹಣ್ ಕಳಿತ್ ಆಸ್‍ಲ್ಲ್ಯಾನ್, ಅವಶ್ಯ್ ಜಾವ್ನ್ ದಕ್ಷಿಣಾಕ್, ನೀಲೇಶ್ವರ್ ಪರ್ಯಾಂತ್ ಪಯ್ಣ್ ಕೆಲ್ಯಾರ್ ಜಾಯ್ತೊ ಘುಟ್ ಮೆಳ್ತಲೊ, ಆನಿ ದೆವಾಚಿ ಖುಶಿ ಜಾಲ್ಯಾರ್, ಪರಾರಿ ಖಿಲ್ಲೆದಾರಾಕ್ ಧರ್ನ್ ಹಾಡ್ಚಿ ವಾ ವೆರೊನಿಕಾಕ್ ಭೆಟ್ಚಿ ಖಬಾರ್‌ಯೀ ಜಾರಿ ಜಾತೆಲಿ ಮ್ಹಣ್ ತಾಕಾ ಭೊಗ್ಲೆಂ.

ತಸಲ್ಯಾ ಕಾಮಾಂತ್ ಜಾಲ್ಯಾರೀ ಭೋವ್ ಚತ್ರಾಯೆನ್, ಪ್ರತ್ಯೇಕ್ ಜಾವ್ನ್ ವೆರೊನಿಕಾ ಕುವೆಲಿಚಿ ಖಬರ್ ಹೆರಾಂ ಥಾವ್ನ್ ಗುಪಿತ್ ಉರಂವ್ಚ್ಯಾ ಖಾತಿರ್ ಮೇಟ್ ಕಾಡಿಜಾಯ್ ಮ್ಹಣ್ ತೊ ಜಾಣಾಸ್‍ಲ್ಲೊ. ತ್ಯಾಚ್ ಕಾರಣಾ ವರ್ವಿಂ, ತಾಚ್ಯಾ ಫುಡ್ಲ್ಯಾ ಸಾಹಸಾಕ್ ದೋನ್ ಮುಖಾಂ ರಚುನ್ ಸಾಂಬಾಳ್ಚಿ ತಾಕಾ ಗರ್ಜ್ ಪಡ್ಲಿ.

“ಕುರಿಯೆಲಾಂತ್, ಬೋಳಾರ್ಚ್ಯಾ ಖಿಲ್ಲೆದಾರ್ ವೀರಪ್ಪ ನಾಯ್ಕಾಚೊ ಸಹಕಾರ್ ಘೆವ್ನ್, ಪರಾರಿ ಜಾಲ್ಲ್ಯಾಂಚಿ ಖಬರ್ ಜಾತಾ ತಿತ್ಲಿ ಪುಂಜಾಂವ್ಕ್ ತುಮಿ ಪ್ರಯತ್ನ್ ಕರಿಜಾಯ್” ಮ್ಹಳೆಂ ತಾಣೆಂ ಇಸ್ಮಾಯಿಲ್ ಬಾಬಾ ಕಡೆನ್.

“ಆನಿ, ತುಮ್ಚಿ ಫುಡ್ಲಿ ಖುಶಿ ಹುಜೂರ್?”

“ಶಿಪಾಯಾಂಕ್ ಸಾಂಗಾತಾ ಘೆವ್ನ್ ಭೊಂವ್ಲ್ಯಾರ್ ಆಮ್ಚೆಂ ಕಾಮ್ ಸಲೀಸ್ ಜಾಂವ್ಚೆಂ ನಾ. ದೆಕುನ್ ಆಮಿ ಆಮ್ಚ್ಯಾ ಎಕ್ಲ್ಯಾ ದೊಗಾಂ ಸವಾರಾಂಕ್ ಸಾಂಗಾತಾ ಘೆವ್ನ್ ಘೊಡ್ಯಾಂಚೆರ್ ದಕ್ಷಿಣಾಕ್ ವೆತಾಂವ್.”

“ದೊಗಾಂ ತೆಗಾಂನಿಂಚ್ ವೆಚೆಂ ಭೋವ್ ಅಪಾಯಾಚೆಂ ಹುಜೂರ್!”

“ಬಾದಶಹಾ ಟಿಪ್ಪು ಸುಲ್ತಾನ್ ಸೈಯ್ಯದ್ ಬಹುದುರಾಚ್ಯಾ ಸಾಮ್ರಾಜ್ಯಾಂತ್, ತಾಚ್ಯಾ ನಾಂವಾನ್ ಭೊಂವೊಂಕ್ ಅಪಾಯ್ ಆಸಾ ಮ್ಹಣ್ ಆಮಿ ಚಿಂತಿನಾಂವ್” ಮ್ಹಣಾಲೊ ಸರ್ದಾರ್ ಸಿಮಾಂವ್. ಆಪ್ಲಿಂ ನೀಜ್ ಚಿಂತ್ನಾಂ ತಾಣೆಂ ಲಿಪಯ್ಲಿಂ. ಸರ್ಕಾರಿ ಹುದ್ದೆದಾರ್ ಆನಿ ಶಿಪಾಯಾಂ ಹುಜ್ರಿಂ, ಸರ್ಕಾರಿ ಕಾಮಾಂ ಖಾತಿರ್ ಮಾತ್ರ್ ಆಪುಣ್ ಮೆತೆರ್ ಜಾತಾಂ ಮ್ಹಣ್ ದಾಕಂವ್ಚೊ ತಾಚೊ ಇರಾದೊ ಜಾವ್ನಾಸ್‍ಲ್ಲೊ.

ಅಂತುಲ್ಯಾನ್ ಆಪ್ಣಾ ಸಾಂಗಾತಾ, ದುಸ್ರ್ಯಾ ಎಕ್ಲ್ಯಾಕ್ ಸಾಂಗಾತಾ ಘೆವ್ನ್ ಯೆಂವ್ಚಿ ತಯಾರಾಯ್ ಕರುಂಕ್, ಆನಿ ಆಪ್ಲ್ಯಾ ರಾಕುಸಾಕ್‍ಯೀ ಸಜ್ಜ್ ಕರುಂಕ್ ತಾಣೆಂ ಹುಕುಮ್ ದಿಲಿ.

“ಉರ್ಲೆಲ್ಯಾ ಸವಾರಾಂನಿ, ಬೋಳಾರ್ಚ್ಯಾ ಆನಿ ಬೋಳೂರ್ಚ್ಯಾ ಹೆರ್ ಥೊಡ್ಯಾಂಕ್ ಘೆವ್ನ್, ಕಾಲ್ದಿ ಕಂಪೆನಿ ಭರ್ತಿ ಕರ್ನ್ ‘ರೆಜೀನಾ’ ಮಂಜೆಂತ್ ವಚಜಾಯ್. ಎಕಾ ದಿಸಾ ಉಪ್ರಾಂತ್ ದಕ್ಷಿಣಾಕ್ ತಿಣೆಂ ಪಯ್ಣ್ ಧರ್ನ್ – ಕುಂಬ್ಳಾ, ಕಾಸರಗೋಡ್, ಬೇಕಲ್ ಆನಿ ನೀಲೇಶ್ವರ್ ಪರ್ಯಾಂತ್ ಆಮ್ಚಿ ಹುಕುಮ್ ರಾಕಜಾಯ್. ಮಂಜೆಂತ್ ಯೆಂವ್ಚ್ಯಾ ಸರ್ವ್ ಜವಾನಾಂಚಿ ಖಬಡ್ದಾರಿ ಜಮೆದಾರ್ ಸೋಮಯ್ಯ ಪಳೆಂವ್ದಿ” ಮ್ಹಣ್ ತಾಣೆಂ ಫರ್ಮಾಣ್ ದಿಲೆಂ.

ಉಪ್ರಾಂತ್ ತಾಣೆಂ ದೋನ್ ವರ್ದ್ಯೊ ಲಿಖುನ್, ಇಲೂದೆಂತ್ ರೆವ್ಡಾವ್ನ್ ಬಂದ್ ಕರ್ನ್, ಮುದಿಯೆಚಿ ಮ್ಹೊರ್ ಮಾರ್ನ್ ಇಸ್ಮಾಯಿಲ್ ಬಾಬಾ ಕಡೆನ್ ದಿಲ್ಯೊ.

“ಹ್ಯೊ ಚತ್ರಾಯೆನ್ ಸಾಂಬಾಳಿಜಾಯ್. ಬಾದಶಹಾಚಿ ವರ್ದಿ, ಫಾಲ್ಯಾಂ ತಾರ್ ಸವಾರಾಕ್ ಧಾಡ್ನ್ ಪಟ್ಟಣಾಕ್ ಪಾವಿತ್ ಕರಿಜಾಯ್. ದುಸ್ರಿ ವರ್ದಿ ಸರ್ದಾರ್ ಯೂಸುಫ್ ಆಲಿಕ್. ಬಾದಶಹಾಚೊ ತೊ ಸರ್ದಾರ್ ಆಜ್ ಫಾಲ್ಯಾಂ ಹಾಂಗಾಸರ್ ಯೇವ್ನ್ ಪಾವ್ತಲೊ. ತಿ ವರ್ದಿ ಜರೂರ್ ತಾಕಾ ಪಾವಿತ್ ಕರಿಜಾಯ್” ಮ್ಹಣ್ ತಾಣೆಂ ತಾಕಿದ್ ದಿಲಿ.

ತಶೆಂ, ತ್ಯಾಚ್ ದಿಸಾ, ಸಕಾಳಿಂಚ್ಯಾ ವೊರಾರ್‌ಶೆಂ ಸರ್ದಾರ್ ಸಿಮಾಂವ್, ಜಮೆದಾರ್ ಅಂತುಲೊ ಪಡ್ವಳ್ ಆನಿ ರಾಮಪ್ಪ ನಾಯಕ್ ನಾಂವಾಚೊ ಎಕ್ಲೊ ಸುಫೆದಾರ್, ಘೊಡೆ ಧಾಂವ್ಡಾವ್ನ್ ಬೋಳಾರ್ ಠಾಣ್ಯಾಕ್ ಪಾವ್ಲೆ. ಟಿಪ್ಪು ಸುಲ್ತಾನಾಚ್ಯಾ ಸೈನಾಂತ್ಲ್ಯಾ ಹುದ್ದೆದಾರಾಂಚ್ಯಾ ಸಮವಸ್ತ್ರಾಂನಿ ಆನಿ ಶಸ್ತ್ರಾಂನಿ ಸಜ್ಜ್ ಜಾವ್ನ್ ತೆ ಆಸ್‍ಲ್ಲೆ.

ಖಿಲ್ಲೆದಾರ್ ವೀರಪ್ಪ ನಾಯ್ಕಾಕ್ ಬಗ್ಲೆಕ್ ಆಪವ್ನ್ ಸರ್ದಾರ್ ಸಿಮಾಂವ್ನ್ ಥೊಡಿ ಮಾಹೆತ್ ದಿಲಿ ಆನಿ ಘೆತ್ಲಿ. ಅಂತುಲ್ಯಾಕ್ ಭಿತರ್ ಧಾಡ್ನ್, ಗರ್ಜೆಚ್ಯೊ ಥೊಡ್ಯೊ ವಸ್ತು ಭರ್‌ಲ್ಲೆಂ ಏಕ್ ಪೊತೆಂ ಘೆಂವ್ಕ್ ಸಾಂಗ್ಲೆಂ.

ದೊನ್ಪಾರಾಂಚೊ ಆಹಾರ್ ಆನಿ ಥೊಡೊ ವಿಶೆವ್ ಘೆವ್ನ್, ಕೀರ್ಣ್ ಚಿಕ್ಕೆ ಆಡ್ ಜಾತಚ್, ತೆ ಭಾಯ್ರ್ ಸರ್ಲೆ. ಕಾಫ್ರಿಗುಡ್ಯಾಚ್ಯಾ ವಾಟೆನ್, ಹಳ್ತಾನ್ ಘೊಡೆ ಧಾಂವ್ಡಾವ್ನ್ ತೆ ಗೆಲೆ.

ತ್ಯಾ ವಾಟೆನ್ ವೆತಾನಾ, ಸರ್ದಾರ್ ಸಿಮಾಂವ್ಕ್, ಎಕಾ ಮಹಿನ್ಯಾ ಆದಿಂ, ತ್ಯಾ ವಠಾರಾಂತ್ ಮಾನಿನ್ ವೆರೊನಿಕಾ ಕುವೆಲ್ ಭೆಟ್‍ಲ್ಲೊ, ಉಪ್ರಾಂತ್ಲ್ಯಾ ಘಡಿತಾಂಚೊ ಆನಿ ಆತಾಂಚ್ಯಾ ಪರಿಸ್ಥಿತೆಚೊ ಉಗ್ಡಾಸ್ ಆಯ್ಲೊ.

ಜಪ್ಪುಚ್ಯಾನ್ ದೆಂವೊನ್, ಉದಾಕ್ ಉಣೆಂ ಆಸ್‍ಲ್ಲೊ ಕಡವ್ ಉತ್ರೊನ್, ದಕ್ಷಿಣಾಚಿ ವಾಟ್ ತಾಣಿಂ ಧರ್ಲಿ. ಸರ್ದಾರ್ ಸಿಮಾಂವ್ನ್ ಚಿಂತ್‍ಲ್ಲೆಪರಿಂ, ರಾತ್ ಜಾಂವ್ಚ್ಯಾ ಆದಿಂಚ್ ಕುಂಬ್ಳಾ ರಾಜಾಚ್ಯಾ ರಾವ್ಳೆರಾಕ್ ತೆ ಪಾವ್ಲೆ.

ತಿ ರಾತ್ ಥಂಯ್ಸರ್ ಪಾಶಾರ್ ಕರುಂಕ್ ಸರ್ದಾರ್ ಸಿಮಾಂವ್ನ್ ಚಿಂತ್ಲೆಂ. ತಾಣೆಂ ತಶೆಂ ಚಿಂತ್‍ಲ್ಲೆಂಯೀ ಬರ‍್ಯಾಕ್‌ಚ್ ಪಡ್ಲೆಂ ಮ್ಹಣ್ಯೆತ್. ನಹಿಂ ಜಾಲ್ಯಾರ್ ದುಸ್ರ್ಯಾ ದಿಸಾ ಚಡ್ ತುರ್ತಾನ್ ಪಯ್ಣ್ ಮುಖಾರ್ಸುಂಕ್ ತಾಕಾ ಕಾರಣ್ ಮೆಳ್ತೆಂ ನಾ.

ಭಾತೆಣಾಚ್ಯಾ ಕುಡ್ಯಾ ಸಾಕ್ರ್ಯಾ ದಾಟಾಯೆಚ್ಯಾ ರಾಜಾನ್ ‘ಸುಲ್ತಾನಾಚ್ಯಾ’ ಪ್ರತಿನಿಧಿಂಕ್, ಭಾಯ್ಲ್ಯಾ ದೆಖಿ ತೆಕಿದ್ ಸ್ವಾಗತ್ ದಿಲೊ:

“ಸುಲ್ತಾನಾಚೊ ಪ್ರಸಿದ್ಧ್ ಸರ್ದಾರ್ ವೀರ್ ಖುದ್ದ್ ಸರ್ದಾರ್ ಸಿಮಾಂವ್ ಪ್ರಭುಚ್ ಆಮ್ಚ್ಯಾ ಭೆಟೆಕ್ ಆಯ್ಲಾ ಮ್ಹಣ್ ಸಮ್ಜೊಂಕ್ ಆಮಿ ಭೋವ್ ದರ್ಬಾರ್ ಪಾವ್ತಾಂವ್.”

ರಾಜಾನ್ ಉಲಯಿಲ್ಲಿ ರೀತ್ ಜಾಂವ್ ಸ್ವರ್, ಸರ್ದಾರ್ ಸಿಮಾಂವ್ಕ್ ಪಸಂದ್ ಲಾಗೊಂಕ್ ನಾಂತ್. ಕುಂಬ್ಳಾ, ವಿಟ್ಲ ಆನಿ ನೀಲೇಶ್ವರ್‌ಚೆ ರಾಯ್, ಭಿತರ್ಲ್ಯಾ ಭಿತರ್ ಟಿಪ್ಪುಕ್ ಕಾಂಠಾಳ್ತಾಲೆ ಆನಿ ತಾಚ್ಯಾ ವಿರೋಧ್ ವಾವುರ್ತಾಲೆ ಮ್ಹಣ್ ಸರ್ದಾರ್ ಸಿಮಾಂವ್ಕ್ ಕಳಿತ್ ಆಸ್‍ಲ್ಲೆಂ. ತ್ಯಾ ಶಿವಾಯ್, ಹೊ ಕುಂಬ್ಳಾಚೊ ತುಂಡು ರಾಜಾ ಕುಸ್ತೆಂತ್ ಅಜೇಯ್ ಮ್ಹಣ್ ನಾಂವಾಡ್‍ಲ್ಲೊ. ಕೊಣಾಯ್ ಕಡೆನ್ ಜಾಂವ್, ಆಪ್ಲೆಂ ತ್ರಾಣ್ ದಾಕಂವ್ಚೆಂ ತಾಚೆಂ ಚಟ್ ಜಾವ್ನಾಸ್‍ಲ್ಲೆಂ ಮ್ಹಣೊನ್‍ಯೀ ಸರ್ದಾರ್ ಜಾಣಾಂಸ್‍ಲ್ಲೊ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಇಂಫೆರ್ನಾಚಿಂ ದಾರಾಂ’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel