ಎಕಾ ಪೆಟ್ಯಾಚೆಂ ಫಾರಿಕ್ಪಣ್ – 4: ಟೊಮಿಚೆಂ ಜಿವಿತ್

ಎಕಾ ಪೆಟ್ಯಾಚೆಂ ಫಾರಿಕ್ಪಣ್ – ಚವ್ತೊ ಭಾಗ್

ಮ್ಹಜಿ ಮಾಂಯ್ ಕರುಣಾಯೆಚಿ ಪಾತ್ರೊನ್ ಮ್ಹಣ್ಯೆತ್. ಟೊಮಿನ್ ಮಾರಣಾಂತಿಕ್ ಲಡಾಯೆಂತ್ ವಾಂಚೊನ್ ಉರ್ಲ್ಯಾರೀ, ಜರ್ ಮಾಂಯ್ನ್ ತಾಚಿ ಶುಶ್ರೂಚಾ ಕರುಂಕ್ ನಾತ್‍ಲ್ಲಿ ತರ್ ಹೆಂ ಸರ್ವ್ ಸಾಂಗೊಂಕ್ ಕಿತೆಂಚ್ ಆಸ್ತೆಂ ನಾ. ತೆದ್ನಾಂಚ್ ಟೊಮಿ ಮಾತ್ಯೆಂತ್ ಲೀನ್ ಜಾವ್ನ್ ವೆತೊ. ಪುಣ್ ಮ್ಹಜ್ಯಾ ಮಾಂಯ್ನ್ ಪೆಟ್ಯಾಕ್ ಮೊರ್ನಾಂತ್ಲೆಂ ಬಚಾವ್ ಕೆಲ್ಲೆಂ ಮಾತ್ರ್ ನ್ಹಯ್, ತೊ ಬಳ್ವಂತ್ ಜಾವ್ನ್, ನಿರ್ಣಾಯಕ್ ಝುಜಾಕ್ ಆಯ್ತೊ ಜಾಂವ್ಕ್ ಮಜತ್ ದಿಲ್ಲಿ.

ದುಕ್ರಾಂಕ್ ತೇಲ್ ಪುಸ್ಲೆಂ!

ಆದಿಂ ಬಾಬಾಚೆ ಮಾರ್ ಖಾವ್ನ್ ಆಂಗಾರ್ ದಾಡ್ಕ್ಯೊ ಪಡ್ಲ್ಯಾರ್ ನಾರ್ಲೆಲ್ ತೇಲ್‍ಚ್ ವಕತ್. ಘರಾಂತ್ ಭುರ್ಗ್ಯಾಂಕ್ ಬಾಪಾಯ್ಚೆ ಮಾರ್ ಪಡೊನ್‍ಂಚ್ ಆಸ್ತಾಲೆ. ತೆದ್ನಾಂ ಆಮ್ಕಾಂ ಮಾಂಯ್ ತೇಲ್ ಪುಸ್ತಾಲಿ. ತಿಚಿ ಬಿರ್ಮತ್ ಆನಿ ದಯಾಳಾಯ್ ಮನ್ಶ್ಯಾಂಚೆರ್ ಮಾತ್ರ್ ನ್ಹಯ್, ಮೊನ್ಜಾತಿಂಚೆರೀ ಆಸ್ತಾಲಿ.

ಕೃಷಿ ಕುಟಮ್ ಮ್ಹಣ್ತಾನಾ ಗೊರ್ವಾಂ, ಕುಂಕ್ಡಾಂ, ದುಕೊರ್ ಆಸ್ಚೆಂ ಸಾಮಾನ್ಯ್. ತೆದ್ನಾಂ ಆತಾಂಚೆಪರಿಂ ಕೋಲ್ಡ್ ಸ್ಟೋರೇಜ್ ಕೊಣೀ ನೆಣಾಂಸ್‍ಲ್ಲೊ. ಕೆದ್ನಾಂಯೀ ಫ್ರೆಶ್ ಮಾಸ್ (ದುಕ್ರಾಚಿ ವೋಬ್ ಮಾತ್ರ್ ಮಿಟಾಂತ್ ಘಾಲ್ನ್ ಪೊವ್ಲೆಂತ್ ಬಾಂಧ್ಲ್ಯಾರ್ ವರಸ್ ಪರ್ಯಾಂತ್ ಸುರಕ್ಷಿತ್ ಉರ್ತಾಲಿ). ಪೆಂಟೆಚಿಂ ಜಣಾಂ ಕುಂಕ್ಡಾ ಮಾಸ್ ರಾಂದಿಜೆ ಪಡ್ಲ್ಯಾರ್ ಹಳ್ಳೆಂಕ್ ಯೆತಾಲಿಂ. ಗಾಂವ್ಟಿ ಕುಂಕ್ಡಾಂಕ್ ಧಾಂವ್ಡಾವ್ನ್ ಧಾಂವ್ಡಾವ್ನ್ ಧರಿಜೆ ಪಡ್ತಾಲೆಂ. ಅಪ್ರೂಪ್ ಆಯ್ತಾರಾ ಮಾಂಯ್ ಕುಂಕ್ಡಾಂಚಿ ಕಡಿ ಕರ್ತಾಲಿ. ತಿಕಾ ಪಳೆವ್ನ್ ಹಾಂವ್‍ಯೀ ಕುಂಕ್ಡಾಂಚಿ ಗೊಮ್ಟಿ ಲುಂವೊಂಕ್ ಆನಿ ಶಿಂದುಂಕ್ ಶಿಕ್‍ಲ್ಲೊಂ.

ಆಮ್ಕಾಂ ತೆದ್ನಾಂ ಪೊಳಿ ಖಾಯ್ಜೆ ತರ್ ಆಯ್ತಾರಾಚೆಂ ಮಾಂಯ್ನ್ ಮನ್ ಕರಿಜೆ. ಸೀಸನಾ ತೆಕಿದ್ ವೆವೆಗ್ಳ್ಯೊ ಪಾತೊಳ್ಯೊ (ಹಳ್ದಿ ಖೊಲ್ಯಾಂಚ್ಯೊ, ಉಪ್ಪೊಲಿಗೆಚ್ಯಾ ಖೊಲ್ಯಾಂಚ್ಯೊ, ಕೆಂಳ್ಬ್ಯಾ ಖೊಲ್ಯಾಂಚ್ಯೊ ಇತ್ಯಾದಿ), ನಮೂನ್ಯಾವಾರ್ ಮಾಂಡಾಸ್ (ತೊವ್ಶ್ಯಾಚೆಂ, ಪೊಣ್ಸಾ ಘರ‍್ಯಾಂಚೆಂ ಇತ್ಯಾದಿ) ಕೆಲ್ಯಾರ್ ಘರಾಂತ್ ಭರ್ಚೊ ಸುವಾದ್‍ಚ್ ಆಮ್ಕಾಂ ಫೆಸ್ತಾಚೊ ಉಲ್ಲಾಸ್ ದಿತಾಲೊ! ತಾಂತುಂಚ್ ಅರ್ಧೆಂ ಪೋಟ್ ಭರ್ತಾಲೆಂ (ವಾ ಲಾಳ್ ಗಳ್ತಾಲಿ!). ಹರ್ ಪೊಳಿಯೆಂತ್ ವೈವಿಧ್ಯತಾ ಆಸ್ತಾಲಿ. ಸದಾಂಚೆ ಪೊಳೆ, ಪಾನ್ಪಾಳೆ ನ್ಹಂಯ್ ಆಸ್ತಾನಾ ತಾಯ್ಕುಳೆ ಘಾಲ್ನ್ ಪೊಳೆ ಕರ್ತಾಲಿ ಮಾಂಯ್. ವ್ಹಡ್ಲಿಮಾಂಯ್‍ಯೀ ತಾಂದ್ಳಾಚ್ಯೊ ಖಾಸ್ ಭಾಕ್ರ್ಯೊ ಕರ್ತಾಲಿ. ಫುಟ್‍ಲ್ಲೆಂ ಕುಂಡ್ಲೆಂ ವಾ ಭಾಣಾಚ್ಯಾ ಕುಡ್ಕ್ಯಾರ್ (ಕಾಯ್ಲೊಳಿಚೆರ್) ಭಾಜ್‍ಲ್ಲಿ ಪೊಳಿ ವೆಗ್ಳ್ಯಾಚ್ ರುಚಿಚಿ ಆನಿ ಪರ್ಮಳೆಚಿ.

ಸನ್ನಾಂ ಕರ್ಚೆಂ ಫಕತ್ ಫೆಸ್ತಾಂಕ್ ಮಾತ್ರ್. ತಿ ಏಕ್ ರಾಯಾಳ್ ಪೊಳಿ. ದುಕ್ರಾ ಮಾಸ್‍ಯೀ ಫೆಸ್ತಾ ದೀಸ್ ಮಾತ್ರ್. ಕುಂಕ್ಡಾಂ ರಾಸ್‍ಭರ್ ಆಸ್ತಾಲಿಂ ಜಾಲ್ಲ್ಯಾನ್ ಅರ್ಜಂಟಾಕ್ ಕುಂಕ್ಡಾಂನಿಂಚ್ ಪ್ರಾಣ್ ಸಾಕ್ರಿಫಿಸ್ ಕರಿಜೆ! ಸಯ್ರಿಂ, ಮೊಗಾಚಿಂ ಆಯ್ಲ್ಯಾರ್ ಎಕಾ ಕುಂಕ್ಡಾಕ್ ಪುಣೀ ತೊ ದೀಸ್ ನಿಮಾಣೊ ಜಾತಾಲೊ; ರಗತ್ ವ್ಹಾರವ್ನ್ ಜೀವ್ ಭೆಟಯ್ಜೆ ಪಡ್ತಾಲೊ. ತ್ಯಾಗ್ ಆನಿ ಜಿವಾಚೆಂ ಬಲಿದಾನ್ ಕುಂಕ್ಡಾಂಚೆಂ ಜಲ್ಮಾಚೆಂ ಹಕ್ಕ್!!

ಆಮ್ಗೆರ್ ಏಕ್ ದೋನ್ ದುಕೊರ್ ಕೆದ್ನಾಂಯೀ ಆಸ್ತಾಲೆ. ತೆದ್ನಾಂ ದುಕೊರ್ ವ್ಹಡ್ ಜಾತಚ್ ಬಾಬ್ ಕಾರ್ಯಗತ್ ಜಾತಾಲೊ. ದುಕ್ರಾಚಿ ಸರ್ಜರಿ, ಪೋಸ್ಟ್‌ಮಾರ್ಟಮ್ ಕರುಂಕ್‍ಚ್ ಎಕ್ಲೊ ಪೊದೊರ್ನ್ ಯೆತಾಲೊ. ದುಕ್ರಾಕ್ ನಮಿಯಾರ್ಲಲೊ ವೇಳ್ ಯೆತಚ್ ತಾಚೆರ್ ಕ್ಯಾಲ್ಕುಲೇಶನ್ ಚಲ್ತಾಲೆಂ. ಆಮ್ಚೆ ಕಾಟ್ ದುಕೊರ್, ಚಡ್ ಮ್ಹಳ್ಯಾರ್ 20 ಥಾವ್ನ್ 25 ಕಿಲೋ ಜಾಂವ್ಚೆ. ಬಾಬ್ ಪೆಂಟೆಂತ್ ವಳ್ಕಿಚ್ಯಾಂಕ್ ಸಾಂಗೊನ್ ಮಾಸ್ ‘ಬುಕ್’ ಕರ್ತಾಲೊ.

ತಶೆಂ ದುಕ್ರಾಚಿ ಗೊಮ್ಟಿ ಕಾತರ್ಚೊ ದೀಸ್ ಉದೆತಾನಾ ತಾಚೆರ್ ಅತ್ಯಾಚಾರ್, ಅನಾಚಾರ್ ಚಲ್ತಾಲೊ. ಕಾಟ್ ದುಕೊರ್ ಜಾಲ್ಲ್ಯಾನ್ ಸಲೀಸಾಯೆನ್ ಧರುಂಕ್ ಮೆಳನಾತ್‍ಲ್ಲೆ. ತೆಂಯೀ ಪರ್ಕಿ ಮನಿಸ್ ತರ್ ತಾಂಕಾಂ ದುಬಾವ್ ಜಾತಾಲೊ. ಖಾಂವ್ಕ್ ಘಾಲ್ನ್ ಮಸ್ಕಾ ಲಾವ್ನ್ ಘುಡಾಕ್ ವಾ ಗೊಟ್ಯಾಕ್ ಆಂಬ್ಡುಂಕ್ ಕಷ್ಟಜೆ ಪಡ್ತಾಲೆಂ. ದುಕ್ರಾಕ್ ಸರ್ಗಾಕ್ ಧಾಡ್ಚೆಂ ಮಧ್ಯಾನೆ ರಾತಿಂಚ್ ತರೀ, ಕಾಳೊಕ್ ಪಡ್ಚ್ಯಾ ಆದಿಂಚ್ ತಾಕಾ ಬಂಧಿ ಕರಿಜೆ. ಏಕ್ ಪಾವ್ಟಿಂ ‘ಬುಕ್’ ಜಾಲ್ಲೊ ದುಕೊರ್ ಚುಕೊನ್ ಧಾಂವ್‍ಲ್ಲ್ಯಾನ್ ಸಕ್ಡಾಂನಿ ತಕ್ಲೆರ್ ಹಾತ್ ದವರ್ನ್ ರಾತ್ ಪಾಶಾರ್ ಕೆಲ್ಲಿ (ತ್ಯಾ ವಿಶಿಂ ವೆಗ್ಳ್ಯಾನ್ ಸಾಂಗ್ತಾಂ). ದೊನ್ಪಾರಾಂ ವಾ ಸಾಂಜೆ ಭಿತರ್ ದುಕ್ರಾಕ್ ಧರುನ್ ಹಾತ್ ಪಾಯ್ ಬಾಂಧುನ್, ಸೊಂಡಿ ಬಿಗ್ದುನ್ ಫಿಚಾರ್ ಕರ್ತಾಲೆ. ತಾಚಿ ದಗ್ದೊಣಿ ಆನಿ ಪಿಂರ್ಗೊಣಿ ಆಮ್ಕಾಂ ಸೊಸುಂಕ್ ಜಾಯ್ನಾತ್‍ಲ್ಲಿ.

ತ್ಯಾ ವೆಳಿಂ ಮ್ಹಜ್ಯಾ ಮಾಂಯ್ನ್ ದುಕ್ರಾಕ್ ತೇಲ್ ಪುಸ್ಚೆಂ. ವ್ಹಯ್. ದುಕ್ರಾಚಿ ಬೋಬ್, ಕಿಂಕ್ರಾಟ್, ವಿಳಾಪ್ ಆಯ್ಕೊನ್, ವಳ್ವಳೆ ಪಳೆವ್ನ್ ಆಮ್ಕಾಂ ಬಿರ್ಮತ್ ಫುಟ್ತಾಲಿ. ತಿಣೆಂ ಬಾಂಧುನ್ ಬಿಗ್ದಲ್ಲೆ ಕಡೆನ್ ತೇಲ್ ಪುಸುನ್, ಗಳ್ಯಾಕ್ ಉದಾಕ್ ಸೊಡುನ್ ದುಕ್ರಾಕ್ ಸವ್ಕಾಸಾಯ್ ದಿಂವ್ಚೆಂ ಆಸ್‍ಲ್ಲೆಂ. (ಚೆಡೊ ದುಕ್ರಾಕ್, ಲ್ಹಾನ್ ಆಸ್ತಾನಾ ‘ಪಿಚ್ಚ್ಯೊ’ ಕಾಡ್ಚಿ ಸರ್ಜರಿ ಆನಿ ತರ್ನ್ಯಾ ರೆಡ್ಕ್ಯಾಂಕ್ ನಾಕಾಕ್ ದೊರಿ ಘಾಲ್ಚೆಂ ದೃಶ್ಯ್ ಪಳೆಂವ್ಕ್ ಜಾಯ್ನಾ ತಿತ್ಲೆಂ ಕ್ರೂರ್. ತ್ಯಾ ವಿಶಿಂಯೀ ವೆಗ್ಳೆಂಚ್ ಬರಯ್ತಾಂ).

ಅಶೆಂ ಮ್ಹಣ್ತಚ್, ಮ್ಹಜಿ ಮಾಂಯ್ ಕಿತ್ಲಿ ಮೊಗಾಳಿ ಆನಿ ಮಯ್ಪಾಸಿ ವ್ಯಕ್ತಿ ಮ್ಹಣ್ ತುಮ್ಕಾಂ ರುಜು ಜಾಲೆಂ, ನ್ಹಯ್ವೇ?

ಟೊಮಿಚಿ ರಾಜ್ವಟ್ಕಾಯ್

ಟೊಮಿ ಹಾಂವ್ ಲ್ಹಾನ್ ಆಸ್ತಾನಾ ಥಾವ್ನ್ ಸಾಂಗಾತಿ. ತೊ ಏಕ್ ಸಾಧೊ ಪೆಟೊ. ಗರ್ಜೆಕ್ ತೆಕಿದ್ ಘೊಂಕ್ಚೆಂ ಸೊಡ್ಲ್ಯಾರ್ ರಗ್ಳೆ ದಿಂವ್ಚ್ಯಾ ಕಾಲೆತಿಚೊ ತೊ ನ್ಹಯ್. ದೀಸ್‍ಭರ್, ಚಡಾವತ್, ಸಾಂಕ್ಳಿಂತ್‍ಚ್ ಆಸ್ತಾಲೊ, ಹೆರ್ ವೆಳಾರ್ ಬಿಂದಾಸ್. ಕಾಂಯ್ ಆಟಿ-ಸೊಣಾಂತ್ ಕೊಲ್ಗ್ಯಾಂಚಿ ಬೋಂಟ್ ಆಂಬ್ಡುಂಕ್ ಮ್ಹಣ್ ಥೊಡೆ ದೀಸ್ ‘ಗಾಯಬ್’ ಜಾತಾಲೊ ಸೊಡ್ಲ್ಯಾರ್ ಹೆರ್ ದಿಸಾಂನಿ ಶಿಸ್ತೆಚೊ ಶಿಪಾಯ್‍ಚ್. ಕಂಯ್ ಏಕ್ ಪಾವ್ಟಿಂ ಮಾಸ್ಳೆಚೆ ಕಾಂಟೆ ವಾ ಮಾಸಾಚಿಂ ಹಾಡಾಂ ಸೊಡ್ಲ್ಯಾರ್ ತಾಕಾಯೀ ಆಮ್ಚೆಪರಿಂಚ್ ಶಿತ್-ಕಡಿಚ್ ಖಾಣ್. ಕಾಂಯ್ ಅಪ್ರೂಪ್ ತಾಣೆಂಚ್ ಶಿಕಾರಿ ಕರ್ನ್ ಸುಕ್ಣಿಂ ವಾ ಲ್ಹಾನ್ ಮೊನ್ಜಾತಿ ಧರ್ಲ್ಯಾರ್ ತೆಂ ತಾಕಾ ಬೋನಸ್!

ಟೊಮಿ ಮೊಗಾಚೊ ಸಾಂಗಾತಿ ಜಾವ್ನಾಸ್ತಾಲೊ. ಖಂಯ್ ಗೆಲ್ಯಾರೀ ತೊ ಪಾಟ್ಲಾವ್ ಕರ್ತಾಲೊ, ಧಯ್ರಾಕೀ ಜಾತಾಲೊ. ಸೆಜಾರಿ ಪೆಟ್ಯಾಂನಿ ಅಪ್ರೂಪ್ ಚಾಬೊನ್ ಪಡ್ಚೆಂ ಆಸ್ತಾ. ಪುಣ್ ತೆಂ ತಿತ್ಲೆಂ ಸೀರಿಯಸ್ ಆಸನಾ. ಕಾಜಾರ್ ವಾ ಹೆರ್ ಸಂಭ್ರಮಾಂ ಚಲ್ಲ್ಯಾರ್ ಜೆವ್ಣಾಚಿ ಶಿರೊತಿ ಉಡಂವ್ಚ್ಯಾ ಜಾಗ್ಯಾರ್ ಪಯ್ಶಿಲೆ ಪೆಟೆಯೀ ಗಡ್ದ್ ಜೆವಣ್ ಭೊಕಾಂವ್ಕ್ ರಾಸ್ ಪಡ್ತಾಲೆ. ತ್ಯಾ ಜಾಗ್ಯಾರ್ ಪೆಟೆ, ಮಾಜ್ರಾಂ, ಕುಂಕ್ಡಾಂ, ಕಾವ್ಳೆ ಮ್ಹಣ್ ಖಾತಡ್‍ಚ್ ಜಾತಾಲಿ. ಥಂಯ್ ತಾಣಿಂ ಎಕಾಮೆಕಾ ಘಾಸ್ ಘಾಲ್ಚೆಂ ಸಹಜ್. ಹೆರ್ ವೆಳಾರ್ ಪರ್ಕಿ ಪೆಟೆ ಆಮ್ಚ್ಯಾ ಬಯ್ಲಾಕ್ ಯೇನಾತ್‍ಲ್ಲೆ, ಆಯ್ಲ್ಯಾರ್ ಘರ್ಚೆ ಪೆಟೆ ವಾಗ್‍ಚ್ ಜಾತಾಲೆ.

ಟೊಮಿ ಜಾಲ್ಲೊ ಪರಾರಿ

ತುಮಿ ಮ್ಹಜೆಂ ‘ಕಾಜಾರಾಚ್ಯಾ ಮಾಟ್ವಾಂತ್ ಮೊನ್ಜಾತಿಂಚೊ ಗೊಂದೊಳ್’ ಲೇಖನ್ ವಾಚ್ಲಾಂ ತರ್ ಹಿ ರೋಚಕ್ ಕಾಣಿ ಜಾಣಾಂತ್. ಹಾಂವೆಂ ಪಳೆಲ್ಲೆಂ, ಆಮ್ಚ್ಯಾ ಘರಾ ಜಾಲ್ಲೆಂ, ಪಯ್ಲೆಂ ಕಾಜಾರ್ ತೆಂ. ಎಕಾ ಮಾಮಾಚೆಂ ಕಾಜಾರ್ ಆಮ್ಗೆರ್ ಚಲ್‍ಲ್ಲೆಂ. ತ್ಯಾ ವೆಳಿಂ ಚಲ್‍ಲ್ಲ್ಯಾ ಗದ್ದಾಳಾಯೆಂತ್ ಆಮ್ಚೊ ಟೊಮಿ ನಪಂಯ್ಚ್ ಜಾಲ್ಲಿ ಸಂಗತ್ ಭಾರಿಚ್ ಗಮ್ಮತಾಚಿ!

ರೊಸಾಚ್ಯಾ ಸಾಂಜೆರ್ ಮಾಟ್ವಾಕ್ ಬೆಂಡ್ಕಾರ್ ‘ಟಿರಿರಿಂ ಟಿರಿರಿಂ, ಟೆಟೆರೆ ಟೆಟೆರೆ… ಆವಾಜಾನ್ ಪ್ರವೇಶ್ ಜಾತಾನಾಂಚ್ ಸಕ್ಕಡ್ ಉಡೊನ್ ಪಡ್‍ಲ್ಲೆ. ಮನಿಸ್ ಮಾತ್ರ್ ನ್ಹಯ್, ಮೊನ್ಜಾತಿ ವರ್ಗ್‍ಯೀ! ಸರ್ಪಳೆಂತ್‍ಚ್ ಟೊಮಿ ಉಚಾಂಬಳ್ ಜಾವ್ನ್ ಸುಟೊನ್ ಧಾಂವೊಂಕ್ ಉಸ್ಮಡ್ತಾಲೊ… ಗೊಟ್ಯಾಂತ್ಲಿಂ ಗೊರ್ವಾಂ, ರೆಡೆಯೀ ಘುಸ್ಪಡ್‍ಲ್ಲೆ. ತ್ಯಾ ಪ್ರಾಸ್ ವ್ಹಡ್ ದಖೊ ತಾಂಕಾಂ ಲಾಗ್‍ಲ್ಲೊ ಗರ್ನಾಳ್ ಫುಟ್ತಾನಾ.

ಗರ್ನಾಳಿ ಪಾಟಾಪಾಟ್ ಫುಟ್‍ಲ್ಲೆಂಚ್, ಸಾಂಗಾತಾ ಬೆಂಡ್ಕಾರಾಂನಿಯೀ ಕಾಮ್ ಚಾಲು ಕೆಲ್ಲೆಂಚ್ ಪೆಟೊ ಆನಿ ಗೊರ್ವಾಂ ಟೋಟಲ್ಲಿ ಪಿಸಾಂತುರ್ ಜಾಲ್ಲಿಂ. ರೆಡ್ಯಾಂನಿ ಗೊಟ್ಯಾಂತ್ ಹಿಸ್ಟೀರಿಯಾ ಲಾಗ್‍ಲ್ಲೆಪರಿಂ ಗಲಾಟೊ ಕೆಲ್ಲೊ. ಪೆಟ್ಯಾಕ್ ಮಾತ್ರ್ ಆಪ್ಣಾಚೆ ದೀಸ್‍ಚ್ ಮುಗ್ದಲೆ ಮ್ಹಳ್ಳೆಪರಿಂ ಭೊಗ್‍ಲ್ಲೆಂ! ದೆಕುನ್ ತೊ ವಾಂಚೊನ್ ಉರ್ಲ್ಯಾರ್ ಕಿತೆಂಯೀ ಖಾವ್ನ್ ಜಿಯೆನ್ ಮ್ಹಣ್ ಸಾಂಕ್ಳಿಚ್ಯಾ ಬಾಂಧ್ಪಾಸಾ ಥಾವ್ನ್ ಸುಟೊಂಕ್ ಪುರ್ತೆಂ ತ್ರಾಣ್ ಖರ್ಚಿತಾಲೊ. ತಶೆಂ ಕೆದಾಳಾ ತೊ ಪೋಳ್ನ್ ಗೆಲ್ಲೊ ಮ್ಹಣ್ ಕೊಣಾಕೀ ಕಳಿತ್ ನಾ!

ಕಾಜಾರ್, ಪರ್ತಾಪಣ್ ಇತ್ಯಾದಿ ಜಾಲ್ಲೆಂಚ್ ‘ಪೆಟೊ ದಿಸನಾ’ ಮ್ಹಣ್ ಕಳ್ಳೆಂ. ಖಂಯ್ ಸೊಧ್ಲ್ಯಾರೀ ಟೊಮಿ ದಿಸನಾ. ಕಾಂಯ್ ಫುಡ್ ಪಾಯ್ಸನ್ ಜಾವ್ನ್ ಮೆಲಾಗೀ ಮ್ಹಣ್ ಸೊಧ್ಲ್ಯಾರೀ ಕಿತೆಂಚ್ ಮೆಳ್ಳೆಂ ನಾ. ತಾಕಾ ಉಲೊ ಮಾರ್ನ್, ಸೊಧುನ್ ಪುರೊ ಜಾಲೆಂ. ಪೆಟ್ಯಾಕ್ ಚಿಟ್ಟ್ಯಾ ವಾಗಾನ್ ವ್ಹೆಲೊ ಕೊಣ್ಣಾ ಮ್ಹಣ್ ವ್ಹಡಾಂನಿ ಚಿಂತ್ಲೆಂ ಆಸ್ತೆಲೆಂ.

ಹಫ್ತ್ಯಾ ಉಪ್ರಾಂತ್‍ಚ್ ಟೊಮಿ ಘರ್ಚ್ಯಾ ವಠಾರಾಂತ್ ಪ್ರವೇಶ್ ಜಾಲ್ಲೊ. ತೊ ಖಂಯ್ ಗೆಲ್ಲೊ, ಕಿತ್ಯಾಕ್ ಪಾಟಿಂ ಆಯ್ಲೊ ಮ್ಹಣ್ ಕಳೊಂಕ್ ತುಮಿ ಮ್ಹಜೆಂ ತೆಂ ಹಾಸ್ಯ್ ಲೇಖನ್ ವಾಚಿಜೆ (ಲಿಂಕ್ ಸಕಯ್ಲ್ ದಿಲಾಂ).

ಒಟ್ರಾಶಿ, ಮನ್ಶ್ಯಾಂಚೆಂ ಗಮ್ಮತ್ ಮೊನ್ಜಾತಿಂಕ್ ಕಶೆಂ ಧೊಸ್ ಜಾವ್ನ್ ವರ್ತವ್ತಾ ಮ್ಹಣ್ಚ್ಯಾಕ್ ತೆಂ ಘಡಿತ್ ಸಾಕ್ಸ್. ರೆಡ್ಯಾಂಕ್ ಥಾಂಬಂವ್ಚೆಂಚ್ ವ್ಹಡ್ ಮಿಸ್ತೆರ್ ಜಾಲ್ಲೆಂ. ಪೆಟ್ಯಾನ್ ಪರಾರಿ ಜಾಲ್ಲೆಂ ಸಕ್ಡಾಂಕ್ ಅಜ್ಯಾಪ್ ಮ್ಹಣ್ ದಿಸ್‍ಲ್ಲೆಂ.

ಬಯ್ಲಾಂತ್ಲ್ಯಾ ಲಡಾಯೆಕ್ ವೇಳ್-ಘಡಿ ಆಯ್ತಿ…

ಆನಿ ಆಬ್ಳೆ ಆಮಿ ಆಮ್ಚ್ಯಾ ಟೊಮಿ ಆನಿ ತ್ಯಾ ಪರ್ಕಿ ಫಿಂರ್ಗಿ ಪೆಟ್ಯಾಚಿ ‘ಪಯ್ಲಿ ಲಡಾಯ್’ ಕಶೆಂ ಜಾಲ್ಲಿ ಮ್ಹಣ್ ಸಮ್ಜೊಯಾಂ. ಮಲ್ಯಾಳಿಂಚೊ ತೊ ಪೆಟೊ ಟೊಮಿಕ್ ಪ್ರಾಯೆನ್ ಲ್ಹಾನ್. ವಾಡೊನ್ ಯೆತಾಸ್ತಾನಾ, ತ್ಯಾ ಘರ್ಚಿಂ ಮನ್ಶ್ಯಾಂ ಗೆಲ್ಲೆ ಕಡೆನ್ ತೊಯೀ ಪಾಟ್ಲಾವ್ ಕರ್ತಾಲೊ. ತಶೆಂ ಆಮ್ಚ್ಯಾ ಪರಿಸರಾಂತ್ ತೊ ಸಬಾರ್ ಪಾವ್ಟಿಂ ದಿಶ್ಟಿಕ್ ಪಡ್ಲಾ. ತೆದ್ನಾಂ ಟೊಮಿನ್ ಆಕ್ಷೇಪ್ ಉಚಾರ್ನ್ ತಾಕಾ ಧಾಂವ್ಡಾಂವ್ಕ್ ಪ್ರಯತ್ನ್ ಕೆಲ್ಲೆಂ. ಚಡಾವತ್ ತಾಂಚೆ ಮಧೆಂ ಹಳ್ತಾಚಿ ಲಡಾಯ್ ಜಾಲ್ಲಿ ಶಿವಾಯ್, ತಿ ಗಂಭೀರ್ ಜಾಂವ್ಕ್ ಮನ್ಶ್ಯಾಂನಿ ಸೊಡುಂಕ್ ನಾತ್‍ಲ್ಲೆಂ.

ಟೊಮಿ ಸಾಧೊ ಪೆಟೊ ತರೀ, ಆಪ್ಣಾಕ್‍ಚ್ ಹಲ್ಕ್ ಕರ್ಚ್ಯಾ ಪರ್ದೆಶಿ ಪೆಟ್ಯಾಕ್ ಕಶೆಂ ಸೊಸ್ತಲೊ? ಧವ್ಯಾ ಪೆಟ್ಯಾನ್ ತಾಚ್ಯಾ ಸ್ವಾಭಿಮಾನಾಕ್ ತವಳ್ ತವಳ್ ಕೊಲಾಯಿಲ್ಲೆಂ. ಆಪ್ಣಾಕ್ ಅಗೌರವ್ ದಾಕಂವ್ಚ್ಯಾ ಟೊಮಿಚೆರ್ ತ್ಯಾ ಪೆಟ್ಯಾಕೀ ಹಗೆಂ ಉಬ್ಜಲ್ಲೆಂ. ತೆಂ ಆಮ್ಕಾಂ ತರೀ ಕಳ್ಚೆಂ ಕಶೆಂ?

ನಿಮಾಣೆಂ, ಏಕ್ ದೀಸ್ ಉದೆಲೊಚ್, ದೊಗಾಂಯ್ನೀ ಎಕಾಮೆಕಾಚೊ ಜೀವ್ ಕಾಡುಂಕ್ ಮಹಾ ಸಂಗ್ರಾಮ್ ಚಲಂವ್ಚೊ. ದೋಗ್ ಪೆಟ್ಯಾಂಚ್ಯಾ ಮತಿಂತ್ ವಿರೋಧಿಕ್ ಬೂದ್ ಶಿಕಯ್ಜೆ, ಆಪ್ಣಾಚೆಂ ಶ್ರೇಷ್ಠತ್ವ್ ಸಾಬೀತ್ ಕರಿಜೆ ಮ್ಹಣ್ ಮುರ್ಮುರೊ ಉಟ್‍ಲ್ಲೊ. ಕಾಳ್ಜಾಂತ್ಲೊ ದ್ವೇಷ್ ಹಗೆಂ ಜಾವ್ನ್ ಫಾರಿಕ್ಪಣಾಕ್ ಆಂವ್ಡೆತಾಲೊ.

ತ್ಯಾ ದೀಸ್ ಸಕಾಳಿಂಚ್ ವಾತಾವರಣ್ ಸ್ತಬ್ಧ್ ಜಾಲ್ಲೆಂ. ಕಸಲೆಂಗೀ ವಾಯ್ಟ್ ರಾಕೊನ್ ಆಸಾ, ಕಿತೆಂಗೀ ಕರಾಳ್ ಘಡಿತ್ ಜಾಂವ್ಚ್ಯಾರ್ ಆಸಾ ಮ್ಹಣ್ ಪ್ರಕೃತೆಕ್ ಕಳಿತ್ ಆಸ್‍ಲ್ಲೆಂ ಮ್ಹಣ್ ದಿಸ್ತಾ, ಪರಿಸರ್ ಸಗ್ಳೆಂ ಆಕಾಂತಾನ್ ಬುಡ್‍ಲ್ಲೆಂ. ಸುಕ್ಣಿಂ ಕಿತೆಂಗೀ ದುರಂತ್ ಸಂಭವ್ತಾ ಮ್ಹಣ್ ವಿಕಾರ್ ರಿತಿನ್ ವಿಳಾಪ್ ದಿತಾಲಿಂ.

ಟೊಮಿಚ್ಯೊ ಆಸ್ಡ್ಯೊ ಖಳನಾಸ್ತಾನಾ ಉಚಾಂಬಳ್ ಜಾತಾಲ್ಯೊ..!

(ಮುಖ್ಲ್ಯಾ ಭಾಗಾಂತ್ ಪಯ್ಲೆಂ ಝುಜ್…)

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

ಕಾಜಾರಾ ಮಾಟ್ವಾಂತ್ ಮೊನ್ಜಾತಿಂಚೊ ಗೊಂದೊಳ್!

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel