ಸರ್ದಾರಾಚೆಂ ಸನ್ನಿಧಾನ್ – 28: ಸ್ಪರ್ಧೊ ಆನಿ ಭಿಗಡಾಯ್

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 27
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 28: ಸ್ಪರ್ಧೊ ಆನಿ ಭಿಗಡಾಯ್

ಟಿಪ್ಪು ಸುಲ್ತಾನಾಚ್ಯಾ ಸ್ವಭಾವಾ ತೆಕಿದ್, ತಾಣೆಂ ತಾಪ್‍ಲ್ಲ್ಯಾಂತ್ ಅಜ್ಯಾಪ್ ನಾ. ಸರ್ದಾರ್ ಯೂಸುಫ್ ಆಲಿಕ್ ಆನಿ ಜಮೀಲಾಕ್ ಕಾಜಾರ್ ಜಾಂವ್ಕ್ ಕಬ್ಲಾತ್ ದಿಲ್ಯಾರ್, ರಾಜ್‍ದ್ರೋಹಿಂಕ್ ಸಂಬಂಧ್ ಜಾಲ್ಲೊ ಕಾಂಯ್ ಘುಟ್ ಭಾಯ್ರ್ ಪಡತ್, ನಾ ಜಾಲ್ಯಾರ್ ಭದ್ರತೆಚ್ಯಾ ದಿಷ್ಟಿನ್ ಕಾಂಯ್ ಪುಣೀ ಪ್ರಯೋಜನ್ ಜಾಯ್ತ್ ಮ್ಹಣ್ ತಾಣೆಂ ಚಿಂತ್‍ಲ್ಲೆಂ.

ಆತಾಂ ಗಜಾಲ್ ಬೊತ್ಲಿಚ್ ಜಾಲ್ಲಿ. ತಾಣೆಂ ಚಿಂತ್‍ಲ್ಲೆಪರಿಂ ಜಾಂವ್ಕ್ ನಾತ್‍ಲ್ಲೆಂ ಮಾತ್ರ್ ನಹಿಂ, ತ್ಯಾ ಬಾಯ್ಲ್ ಮನ್ಶ್ಯಾಂನಿ ತಾಚ್ಯಾ ಖುಶೆಚೆಂ ಉಲ್ಲಂಘನ್‍ಯೀ ಕೆಲ್ಲೆಂ! ದುಸ್ರ್ಯಾಚ್ ದಿಸಾ ಸಾಂಜೆರ್, ವಾರೆಂ ಘೆಂವ್ಚ್ಯಾ ನಿಬಾನ್, ದೊಗಾಂ ಅಂಗರಕ್ಷಕಾಂಕ್ ಸಾಂಗಾತಾ ಘೆವ್ನ್, ಆಸ್ಮಾಬಿಚ್ಯಾ ಘರಾ ವಠಾರಾಕ್ ತೊ ಪಾವ್ಲೊ. ನೀಜ್ ಗಜಾಲ್ ಸಮ್ಜಜಾಯ್ ಆನಿ ಆಪ್ಲ್ಯಾ ನಿತಿಚಿ ರೂಚ್ ತಾಂಕಾಂ ದೀಜಾಯ್ ಮ್ಹಣ್ ನಿಚೆವ್ ತಾಣೆಂ ಕೆಲ್ಲೊ.

ಹರ್ಶೆಂಚೆಪರಿಂ ಘೊಡ್ಯಾಂಕ್ ಆನಿ ಅಂಗರಕ್ಷಕಾಂಕ್ ಚಿಕ್ಕೆ ಪಯ್ಸ್ ರಾವವ್ನ್ ಆಸ್ಮಾಬಿಚ್ಯಾ ಘರ್ಚಿಂ ಮೆಟಾಂ ತೊ ಚಡ್ಲೊ. ತಿ, ಹರ್ಶೆಂಚೆಪರಿಂಚ್, ಸೊಪ್ಯಾಚ್ಯಾ ಪೊಂತಾರ್ ಬಸೊನ್ ಆಸ್‍ಲ್ಲಿ. ಟಿಪ್ಪುಕ್ ದೆಖ್ತಚ್, ಪಯ್ಲೆ ಪಾವ್ಟಿಂ ತಿಕಾ ಭಿರಾಂತ್ ಭೊಗ್ಲಿ, ಪುಣ್ ಭಾಯ್ಲ್ಯಾನ್ ತಿಣೆಂ ದಾಕಂವ್ಕ್ ನಾ.

“ಮ್ಹಜ್ಯಾ ಬಾದಶಹಾ ಬೇಟಾಕ್ ವಂದನ್ ಆನಿ ಸ್ವಾಗತ್” ಮ್ಹಳೆಂ ತಿಣೆಂ. “ಭಲಾಯ್ಕಿ ಬರಿ ಆಸಾಮೂ ಬೇಟಾ?”

“ವಂದನ್ ಧಾಕ್ಟೆ ಆವಯ್” ಮ್ಹಣಾಲೊ ತೊ, ತೆಲ್ತ್ಯಾ ಸ್ವರಾನ್, ಆನಿ ತೆವ್ಶಿಲ್ಯಾ ಪಲ್ಲಂಗಾಚೆರ್ ಬಸ್ಲೊ. ಉಪ್ರಾಂತ್ ತಾಣೆಂ ವಿಚಾರ್ಲೆಂ:

“ಜಮೀಲಾ-ಜಮೀಲಾ ಬಹೆನ್ ನಾಂವೇ? ತಿಚಿ ಭಲಾಯ್ಕಿ ಬರಿ ಆಸಾ ಮ್ಹಣ್ ಆಮಿ ಪಾತ್ಯೆತಾಂವ್.”

“ಜಮೀಲಾ ಆಸಾ ಬೇಟಾ – ತಿ ಕೆದಾಳಾಯೀ ಹಾಂಗಾಚ್ ಆಸ್ತಾ. ತಿಚಿ ಭಲಾಯ್ಕಿಯೀ ಆತಾಂ ಬರಿ ಆಸಾ” ಮ್ಹಣಾಲಿ ಆಸ್ಮಾಬಿ. “ಖಂಯ್ ಭಿತರ್ ಕಾಮಾರ್ ಆಸಾ ಮ್ಹಣ್ ದಿಸ್ತಾ. ಆಪಯ್ತಾಂ” ಮ್ಹಣೊನ್ ಉಟೊನ್ ಸವ್ಕಾಸ್ ಭಿತರ್ ತಿ ಗೆಲಿ.

ಆಸ್ಮಾಬಿಕ್ ಭಿರಾಂತ್ ಭೊಗ್‍ಲ್ಲೆಪರಿಂಚ್, ಟಿಪ್ಪು ಸುಲ್ತಾನಾಚ್ಯಾ ಯೆಣ್ಯಾಚಿ ಖಬರ್ ಆಯ್ಕೊನ್, ಭಿತರ್ ಆಗ್ನೆಸ್ ಕುಂವರ್ನಿಚಿಯೀ ಕೂಡ್ ಕಾಂಪ್ಲಿ. ಕಾಂಯ್, ಯೂಸುಫ್ ಆಲಿ ಥಾವ್ನ್, ಪರಾಮಶೆನ್ ಪುಣೀ ಘುಟ್ ಭಾಯ್ರ್ ಪಡ್ಲಾ ಜಾವ್ಯೆತ್‍ಗೀ ಮ್ಹಳ್ಳೊ ದುಬಾವ್ ತಾಂಚ್ಯಾ ಮತಿಂತ್ ಪಾಶಾರ್ ಜಾಲೊ. ಆಸ್ಮಾಬಿನ್ ಆಗ್ನೆಸ್ ಕುಂವರ್ನಿಕ್ ಥೊಡೆಂ ಧಯ್ರ್ ದೀಂವ್ಕ್ ಪ್ರಯತ್ನ್ ಕೆಲೆಂ. ಆಗ್ನೆಸ್ ಕುಂವರ್ನಿನ್ ‘ಅನ್ವಾರಾಂತ್ಲೆಂ ನಿವಾರ್’ ಮ್ಹಣೊನ್, ಆಪ್ಲ್ಯಾ ಆಂಗಾರ್ ಆಸ್‍ಲ್ಲೆಂ ಸಿನೊಲೆಚೆಂ ಅರ್ಧ್ ಆಪ್ಡೊನ್ ಮತಿಂತ್ ಮಾಗ್ಣೆಂ ಕೆಲೆಂ. ಉಪ್ರಾಂತ್ ತಿಂ ದೊಗಾಂಯೀ ಭಾಯ್ರ್ ಆಯ್ಲಿಂ.

ಆಸ್ಮಾಬಿ, ಆಪ್ಲ್ಯಾ ಜಾಗ್ಯಾರ್ ವಚೊನ್ ಬಸ್ಲಿ.

ಆಗ್ನೆಸ್ ಕುಂವರ್ನ್ ಆಪ್ಲ್ಯಾ ಕಾಳ್ಜಾಚೆ ಧಡ್ದಡೆ ದಾಂಬುನ್ ಧರ್ನ್, ಟಿಪ್ಪು ಸುಲ್ತಾನಾಕ್ ಫುಡ್ ಕರ್ನ್ ಬಸ್ಲಿ. ಶುದ್ಧ್ ಉರ್ದುಂತ್ ತಿ ಉಲಯ್ಲಿ:

“ಮ್ಹಜ್ಯಾ ಬಾದಶಹಾ ಭೈಯ್ಯಾಕ್, ಬಹೆನ್ ವಂದಿತಾ” ಮ್ಹಳೆಂ ತಿಣೆಂ, ಆನಿ ಧಯ್ರಾನ್, ಟಿಪ್ಪು ಸುಲ್ತಾನಾಕ್ ದುಬಾವಾಕ್ ಇಡೆಂ ದಿಂವ್ಚೆಂ ನಾಕಾ ಮ್ಹಣ್ ಆಪ್ಲೆಂ ಮುಖಾವರಣ್ ಪಾಟಿಂ ಪರ್ತಿಲೆಂ.

ತಿಚ್ಯಾ ಮುಖಾಮಳಾಚಿ ಸೊಭಾಯ್ ಪಳೆವ್ನ್ ವಿಸ್ಮಿತ್ ಪಾವ್‍ಲ್ಲೆಪರಿಂಚ್, ಟಿಪ್ಪು ಸುಲ್ತಾನಾನ್ ವಂದನ್ ಪಾಟಿಂ ದಿಲೆಂ, ಆನಿ ಶೀದಾ ಪ್ರಸ್ತಾಪಾಕ್ ತೊ ಆಯ್ಲೊ. ತಾಂಚೊ ಸಯ್ರೊ ಜಾವ್ನ್ ನಹಿಂ, ಬಗಾರ್ ಬಾದಶಹಾಚ್ ಮ್ಹಳ್ಳ್ಯಾ ಗಂಭೀರಾಯೆನ್ ತೊ ಉಲಯ್ಲೊ:

“ಸರ್ದಾರ್ ಯೂಸುಫ್ ಆಲಿ, ಕಾಲ್ ಆಮ್ಚ್ಯಾ ಭೆಟೆಕ್ ಆಯಿಲ್ಲೊ” ಮ್ಹಣಾಲೊ ತೊ. “ತಾಣೆಂ ದಿಲ್ಲಿ ವರ್ದಿ ಆಮ್ಕಾಂ ಬಿಲ್ಕುಲ್ ಸಮಾಧಾನ್ ದೀನಾ. ದೆಕುನ್ ಹಿ ಭೆಟ್.” ರಾವಯ್ಲೆಂ ತಾಣೆಂ.

ಆಸ್ಮಾಬಿನ್ ಆನಿ ಆಗ್ನೆಸ್ ಕುಂವರ್ನಿನ್ ಶ್ವಾಸ್ ಧರ್ಲೊ. ತಾಂಚೆರ್ ನಿಜಾಯ್ಕೀ ಮೊರ್ನಾಚೆಂ ಫರ್ಮಾಣ್ ಜಾರಿ ಜಾತಾಶೆಂ ತಾಂಕಾಂ ಭೊಗ್ಲೆಂ. ಥೊಡ್ಯಾ ವೆಳಾ ಉಪ್ರಾಂತ್, ಆಸ್ಮಾಬಿ ಕಷ್ಟಾಂನಿ ಉಲಯ್ಲಿ:

“ಸರ್ದಾರ್ ಯೂಸುಫ್ ಆಲಿ, ಕಾಲ್ ಹಾಂಗಾಸರ್‌ಯೀ ಯೇವ್ನ್ ಗೆಲಾ – ಬೇಟಾ” ಮ್ಹಳೆಂ ತಿಣೆಂ. ಫುಡೆಂ ಕಿತೆಂ ಉಲಂವ್ಚೆಂ ಮ್ಹಣ್ ತಿಕಾಯೀ ಸಮ್ಜೊಂಕ್ ನಾ.

“ಆಮಿ ಮ್ಹಳೆಂ…” ಮ್ಹಣಾಲೊ ಟಿಪ್ಪು, ಆಗ್ನೆಸ್ ಕುಂವರ್ನಿಕ್ ಪಳೆವ್ನ್. “ತಾಣೆಂ ದಿಲ್ಲಿ ವರ್ದಿ ಆಮ್ಕಾಂ ಬಿಲ್ಕುಲ್ ಸಮಾಧಾನ್ ದೀನಾ. ಆಮಿ ಆಯ್ಕಲ್ಲೆಂ ಸತ್ ಜಾವ್ಯೆತ್‍ಗೀ?”

“ಬಾದಶಹಾ ಭೈಯ್ಯಾನ್ ಕಿತೆಂ ಆಯ್ಕಲಾಂ ಜಾವ್ಯೆತ್?” ಆಗ್ನೆಸ್ ಕುಂವರ್ನಿನ್ ಹಾಳ್ವಾಯೆನ್ ವಿಚಾರ್ಲೆಂ.

“ಜಾಣಾಂಸೊನ್‍ಯೀ ನೆಣಾಂ ಜಾಲ್ಲೆಪರಿಂ ಉಲಂವ್ಚ್ಯಾ ವಿದ್ಯೆಂತ್ ಆಮ್ಚಿ ಜಮೀಲಾ ಬಹೆನ್ ಪ್ರವೀಣ್ ಮ್ಹಣ್ ದಿಸ್ತಾ!” ಟಿಪ್ಪು ಸುಕೊ ಹಾಸೊ ಹಾಸ್ಲೊ. “ಆಸೊಂ, ಯೂಸುಫ್ ಆಲಿಚ್ಯೊ ವ್ಹಡ್ ಚುಕಿ ನಾತ್ಲ್ಯಾರ್ ಪಂದ್ರಾ ದಿಸಾಂ ಭಿತರ್ ತುಮ್ಚಿ ಶಾದಿ ಜಾವ್ಯೆತ್ ಮ್ಹಳ್ಳೆಂ ಆಮಿ. ಆತಾಂ ತುಮ್ಚೆಂ ಲಗ್ನ್ ಸಾಧ್ಯ್ ನಾ ಮ್ಹಣ್ ಆಮಿ ಆಯ್ಕತಾಂವ್. ಕಾರಣ್ ಕಿತೆಂ ಜಾವ್ಯೆತ್? ಯೂಸುಫ್ ಆಲಿ ಕಾಂಯ್ ಅಯೋಗ್ಯ್ ಮ್ಹಣ್ ತುಮ್ಕಾಂ ದಿಸ್ಲೊ?”

“ನಾ, ತೊ ಆಮ್ಕಾಂ ಅಯೋಗ್ಯ್ ದಿಸೊಂಕ್ ನಾ” ಮ್ಹಣಾಲಿ ಆಸ್ಮಾಬಿ. “ಆನಿ ತಾಚೆ ಥಂಯ್ ಕಸಲಿಚ್ ಚೂಕ್ ಆಮ್ಕಾಂ ದಿಸೊಂಕ್ ನಾ.”

“ಬರೆಂಚ್” ಮ್ಹಣಾಲೊ ಟಿಪ್ಪು. “ತೊ ಅಯೋಗ್ಯ್ ನಹಿಂ, ಅಕ್ರಮಿ ನಹಿಂ. ತರ್ ಕಿತೆಂ ಜಾಲೆಂ? ತೊ ಅತ್ರೆಗಾನ್ ಆಸ್‍ಲ್ಲೊ ನಹಿಂವೇ?” ವಿಚಾರ್ಲೆಂ ತಾಣೆಂ ‘ಜಮೀಲಾ’ ಕಡೆನ್.

“ವ್ಹಯ್, ಬಾದಶಹಾ, ಭೈಯ್ಯಾ” ಆಗ್ನೆಸ್ ಕುಂವರ್ನಿನ್ ಹಾಳ್ವಾಯೆನ್ ಜವಾಬ್ ದಿಲಿ. “ತೊ ಅತ್ರೆಗಾನ್ ಆಸ್‍ಲ್ಲೊ. ಪುಣ್ ಶಾದಿಚೆಂ ಸವಾಲ್ ಯೆತಾನಾ – ಹಾಂವ್ ತಾಚೊ ತಿತ್ಲೊ ಮೋಗ್ ಕರಿನಾ ಮ್ಹಣ್ ಮ್ಹಾಕಾ ದಿಸ್ಲೆಂ. ಆನಿ, ಪಂದ್ರಾ ದಿಸಾಂಚೊ ವಾಯ್ದೊ ಭೋವ್ ಮಟ್ವೊ ಮ್ಹಣ್ ಮ್ಹಾಕಾ ಭೊಗ್ಲೆಂ.”

“ದಿಸ್ಲೆಂ ಆನಿ ಭೊಗ್ಲೆಂ! ಆಮಿ ಪಯ್ಲೆ ಪಾವ್ಟಿಂ ಹೊ ವಿಷಯ್ ಉಲಯ್ತಾನಾ ತಶೆಂ ಕಿತ್ಯಾಕ್ ಜಾಂವ್ಕ್ ನಾ?”

ಆಗ್ನೆಸ್ ಕುಂವರ್ನಿನ್ ಜವಾಬ್ ದೀಂವ್ಕ್ ನಾ.

“ಅಸಲ್ಯಾ ವಿಷಯಾಂನಿ ಅಮ್ಸೊರ್ ಕರುಂಕ್ ಜಾಯ್ನಾ, ಬೇಟಾ” ಮ್ಹಣಾಲಿ ಆಸ್ಮಾಬಿ.

“ಅಮ್ಸೊರ್ ಕರುಂಕ್ ಜಾಯ್ನಾ!” ಮ್ಹಣಾಲೊ ತೊ, ತಿಚ್ಯಾಚ್ ಉತ್ರಾಂಚೆಂ ಅನುಕರಣ್ ಕರ್ನ್, ಆನಿ ಧೆಂಕ್ಣೊ ಮಾರ್ನ್. “ತರ್, ‘ಲಗ್ನ್ ಸಾಧ್ಯ್ ನಾ’ ಮ್ಹಳ್ಳ್ಯಾ ತೀಪಾಕ್ ತುಮಿ ಕಶೆಂ ಅಮ್ಸೊರ್ಲ್ಯಾತ್?”

“ಬಾದಶಹಾ, ಬೇಟಾ” ಮ್ಹಣಾಲಿ ಆಸ್ಮಾಬಿ. “ಅಸಲ್ಯಾ ಪ್ರಮುಖ್ ವಿಷಯಾಂನಿ ಸ್ತ್ರೀಯೆಚೆಂ ಕಾಳಿಜ್ ಸ್ಪಷ್ಟ್ ಸಾಂಗ್ತಾ.”

“ಸ್ತ್ರೀಯೆಚೆಂ ಕಾಳಿಜ್ ಖಂಯ್!” ಥುಕ್ಲೊ ಟಿಪ್ಪು. “ಸ್ತ್ರೀಯೆಚೆಂ ಕಾಳಿಜ್ ಮ್ಹಳ್ಳ್ಯಾ ನಿಬಾನ್, ಪೈಗಂಬರ್ ಬಾದಶಹಾಚಿ ಖುಶಿ ಜಾಲ್ಯಾರೀ ಮಸ್ತುಂಕ್ ತುಮಿ ತಯಾರ್ ಆಸಾತ್?”

“ತಶೆಂ ಕಾಂಯ್ ನಾ, ಬೇಟಾ!”

“ತರ್ ಪಳೆಯಾಂ” ಮ್ಹಣಾಲೊ ಟಿಪ್ಪು ಎಕಾಚ್‍ಫಾರಾ ಹಟ್ಟಿ ಜಾವ್ನ್. “ಹ್ಯಾ ಎಕಾ ವಿಷಯಾಂತ್ ಪುಣೀ ಆಮ್ಚಿಚ್ ಖುಶಿ ಜಾಯ್ಜಯ್. ಸರ್ದಾರ್ ಯೂಸುಫ್ ಆಲಿ ಕಡೆನ್ ಕಾಜಾರ್ ಜಾತಾಂ ಮ್ಹಳ್ಳಿ ಜವಾಬ್, ಫುಡ್ಲ್ಯಾ ಚಾಳೀಸ್ ಆನಿ ಆಟ್ ವೊರಾಂ ಭಿತರ್ ಆಮ್ಕಾಂ ಪಾವಜಾಯ್. ತ್ಯಾ ಜವಾಬಿಚೆರ್ ಹೊಂದ್ವೊನ್ ಆಸ್ತಲೊ ಆಮ್ಚೊ ನಿಚೆವ್.”

“ಬಾದಶಹಾ, ಬೇಟಾ..!”

“ಬಾದಶಹಾ, ಭೈಯ್ಯಾ..!”

ಪುಣ್ ಏಕ್‍ಯೀ ಆಯ್ಕೊಂಕ್ ತೊ ರಾವೊಂಕ್ ನಾ. ಭಾಯ್ರ್ ತೊ ಸರೊನ್, ಚಲ್ತಚ್ ರಾವ್ಲೊ. ಪುಣ್ ವೆಚ್ಯಾ ಆದಿಂ, ಫುಡೆಂ ತಾಣೆಂಚ್ ಪರ್ವಣ್ಗಿ ದಿಲ್ಲ್ಯಾ ಖರಿತ್ ತಾಣಿಂ ತ್ಯಾ ಬಿಡಾರಾಚೆಂ ಆವರ್ ಸೊಡ್ನ್ ಭಾಯ್ರ್ ವಚನಾಯೆ ಮ್ಹಳ್ಳಿ ತಾಕಿದ್ ತಾಣೆಂ ದಿಲಿ.

ಆಸ್ಮಾಬಿ ಆನಿ ಆಗ್ನೆಸ್ ಕುಂವರ್ನ್ ಎಕಾಮೆಕಾಕ್ ಪಳೆವ್ನ್ ಉರ್ಲಿಂ. “ಬೇಟೀ” ಮ್ಹಣಾಲಿ ಆಸ್ಮಾಬಿ. “ಮ್ಹಜ್ಯಾ ಉಣ್ಯಾ ಧಯ್ರಾನ್ ಆನಿ ಸ್ವಂತ್ ಫಾಯ್ದ್ಯಾಚ್ಯಾ ಆಶೆನ್ ಹಾಂವೆಂಚ್ ತುಕಾ ಸಾಂಪ್ಡಾಯ್ಲೆಂ. ಉಬ್ರಾಂತ್ ಪಡ್‍ಲ್ಲೊ ಪಾಯ್ ಭಾಯ್ರ್ ಕಾಡುಂಕ್ ಪೆಚಾಡ್ನ್ ಆನಿಕ್‍ಯೀ ಚಡ್ ರೊಂಬ್‍ಲ್ಲೆಪರಿಂ ಆಮ್ಚಿ ಗತ್ ಜಾಲಿ.

“ತಶೆಂ ಮ್ಹಣನಾಕಾ ಬೀಬಿ ಸಾಹಿಬಾ” ಆಗ್ನೆಸ್ ಕುಂವರ್ನಿನ್ ಧಯ್ರ್ ಘೆತ್ಲೆಂ. “ಹಾಂವೆಂಯೀ ಜಾಣಾಂಸೊನ್‍ಂಚ್ ಹ್ಯಾ ಗೊಂದೊಳಾಂತ್ ಪಾಯ್ ಘಾಲಾ. ಕಿತೆಂ ಪುಣೀ ಜಾತೆಲೆಂ. ತಾಣೆಂ ಸಾಂಗ್‍ಲ್ಲ್ಯಾ ಪುರ್ಸತೆ ಭಿತರ್ ಆಮಿ ನಕಾರ್ ದಿತಚ್, ತೊ ಬಹುಶಃ ಮ್ಹಾಕಾ, ರಾವ್ಳೆರಾಂತ್ ಬೇಗಮ್ ಸುಲ್ತಾನಾಚಿ ಸಖಿ ಜಾಂವ್ಕ್ ಅವ್ಕಾಸ್ ದಿತಲೊ. ಆಮ್ಕಾಂ ಪುರ್ಸತ್‍ಯೀ ಮೆಳ್ತೆಲಿ. ಆನಿ… ರಾವ್ಳೆರಾಂತ್ ಆಸ್‍ಲ್ಲ್ಯಾ ಕೊಣೀ ಆಮ್ಚ್ಯಾ ಚಲಿಯಾಂಕ್ ಭಾಯ್ರ್ ಹಾಡುಂಕ್ ಮ್ಹಾಕಾ ಅವ್ಕಾಸ್ ಲಾಭ್ಲ್ಯಾರ್‌ಯೀ ಲಾಭ್ಲೊ…” ತಿ ಸಪ್ಣೆಲಿ.

“ತುವೆಂ ಆತಾಂಚ್ ಹಾಂಗಾ ಥಾವ್ನ್ ಚುಕವ್ನ್ ಕೊಡಗಾಚಿ ವಾಟ್ ಧರ್ಯೆತ್ ನಹಿಂವೇ ಬೇಟೀ?”

“ನಾ, ತುಕಾ ಅಪಾಯಾಂತ್ ಶಿರ್ಕಾವ್ನ್ ಪೊಳಾಪಳ್ ಘೆಂವ್ಕ್ ಹಾಂವ್ ತಯಾರ್ ನಾ. ತ್ಯಾ ಶಿವಾಯ್, ಬಾದಶಹಾನ್ ಜಾಗಯಿಲ್ಲ್ಯಾ ಪರ್ಮಾಣೆಂ ಆಮ್ಕಾಂ ಕಳಿತ್ ನಾಸ್ತಾನಾ, ಆಜ್ ಥಾವ್ನ್ಂಚ್ ಹ್ಯಾ ಘರಾಚೆರ್ ಪಹರೊ ಆಸೊಂಕ್ ಪುರೊ.”

ಆಗ್ನೆಸ್ ಕುಂವರ್ನಿಚೆಂ ಧಯ್ರ್ ಆನಿ ತ್ಯಾಗ್ ಸಮ್ಜೊನ್ ಆಸ್ಮಾಬಿ ವಿಸ್ಮಿತ್ ಪಾವ್ಲಿ ಆನಿ ಥಂಡ್ ರಾವ್ಲಿ.

ಟಿಪ್ಪು ಸುಲ್ತಾನಾನ್ ನಿಜಾಯ್ಕೀ, ತ್ಯಾಚ್ ರಾತಿಂ ಥಾವ್ನ್ ಆಸ್ಮಾಬಿಚ್ಯಾ ಘರಾಚ್ಯಾ ಆವರಾ ಭೊಂವಾರಿಂ ಗುಪಿತ್ ಪಹರೊ ದವರಯ್ಲೊ. ಆಪ್ಣಾಚ್ಯಾ ಅಧಿಕಾರಾಚೆಂ ಆನಿ ಖುಶೆಚೆಂ ಉಲ್ಲಂಘನ್ ಜಾಲಾಂ ಮ್ಹಣ್ ಮತಿಕ್ ಗೆಲ್ಯಾ ಉಪ್ರಾಂತ್ ಕೊಣಾಯ್ಚಿಯೀ ದಾಕ್ಷೆಣ್ ವಾ ಬಿರ್ಮತ್ ತಾಕಾ ನಾತ್‍ಲ್ಲಿ.

ಫುಡ್ಲ್ಯಾ ಘಟನಾಂಚೊ ವೇಗ್ ಚಡ್ಲೊ. ತಾಣೆಂ ಸಾಂಗ್‍ಲ್ಲಿ ಅಟ್ಟಾ ಚಾಳೀಸ್ ವೊರಾಂಚಿ ಅವ್ಧಿ ಜಾತಾನಾ, ಜವಾಬ್ ಕಿತೆಂ ಮ್ಹಣ್ ವಿಚಾರ್ಚ್ಯಾ ಖಾತಿರ್ ಎಕಾ ದೂತಾಕ್ ಬಾದಶಹಾನ್ ಆಸ್ಮಾಬಿಚ್ಯಾ ಘರಾ ಧಾಡ್ಲೊ.

“ಬಾದಶಹಾಚಿ ಅಪೇಕ್ಷಾ ಜಾರಿ ಕರುಂಕ್ ಜಾಯ್ನಾತ್‍ಲ್ಲ್ಯಾ ಖಾತಿರ್ ದುಖ್ ಪಾವ್ತಾಂವ್” ಮ್ಹಣೊನ್ ವಂದನಾ ಸಮೇತ್ ತಾಕಾ ಜವಾಬ್ ಆಯ್ಲಿ. ಕ್ರೋಧಾನ್ ತೊ ಭರ್ಲೊ.

ದುಸ್ರ್ಯಾ ಪಾವ್ಟಿಂ ಆಪ್ಲಿ ಖುಶಿ ಇನ್ಕಾರ್ ಜಾಯ್ತ್ ಮ್ಹಣ್ ತಾಣೆಂ ಚಿಂತುಂಕ್ ನಾತ್‍ಲ್ಲೆಂ. ಆತಾಂ ತಶೆಂ ಜಾಲ್ಲೆಂ ಪಳೆವ್ನ್ ನಾನಾಂತೆ ದುಬಾವ್ ತಾಚ್ಯಾ ಮತಿಂತ್ ಘುಂವೊಂಕ್ ಲಾಗ್ಲೆ. ಸರ್ದಾರ್ ಯೂಸುಫ್ ಆಲಿ ಕಡೆನ್ ಮೊಗಾರ್ ಆಸಾ ಮ್ಹಣೊನ್‍ಯೀ ಕಾಜಾರಾಕ್ – ತೆಂಯೀ ಆಪ್ಣಾಚ್ಯಾಚ್ ಖುಶೆ ವಿರೋಧ್ – ಕಬೂಲ್ ಜಾಯ್ನಾತ್‍ಲ್ಲೆಂ ಪಳೆವ್ನ್ ಜಮೀಲಾಚ್ಯಾ ಶೆಗುಣಾಂಚೊಯೀ ತಾಕಾ ಸಂಶಯ್ ಮಾರ್ಲೊ. ತ್ಯಾ ಘರಾಕ್, ವಕ್ತಾಂಚ್ಯಾ ನಿಬಾನ್ ತರೀ ಸಬಾರ್ ಜಣ್ ಭೆಟ್ ದೀವ್ನ್ ಆಸಾತ್ ಮ್ಹಳ್ಳಿ ಖಬರ್ ತಾಕಾ ಆಸ್‍ಲ್ಲಿ. ತೊ ಏಕ್ ಖೆಳ್. ಮೋಗ್ ಮ್ಹಳ್ಳೆಂ ವಕತ್ ಆಯಿಲ್ಲ್ಯಾ ಗೆಲ್ಲ್ಯಾಂಕ್ ವಾಂಟುನ್ ತಿ ದೀಸ್ ಕಾಡ್ತಾ ದೆಕುನ್ ಕಾಜಾರಾಕ್ ತಿ ತಯಾರ್ ನಾ ಮ್ಹಳ್ಳಿ ಚೂಕ್ ತೊ ಪಾತ್ಯೆಲೊ.

ತಾಚ್ಯಾ ಸಿಂಹಾಸಣಾಚೆರ್ ಸಬಾರ್ ಜಣಾಂಕ್ ದೊಳೊ ಆಸಾ ಮ್ಹಣ್ ತಾಣೆಂ ಆಯ್ಕಲ್ಲೆಂ. ತಸಲ್ಯಾ ವೆಳಾರ್, ತಾಚ್ಯಾ ಲಾಗ್ಶಿಲ್ಯಾ ಜಾಂವ್ ಪಯ್ಶಿಲ್ಯಾ ಕೊಣೀ ಸಯ್ರ್ಯಾಂಚೊ – ದಾದ್ಲೆ ಜಾಂವ್ ಸ್ತ್ರೀಯಾಂಚೊ – ಪಾಡಾವ್ ಕರುಂಕ್ ಸಂದರ್ಭ್ ಮೆಳ್ಳ್ಯಾರ್ ತಾಕಾ ವಿಕಟ್ ವಿನೋದ್ ಭೊಗ್ತಾಲೊ, ಆನಿ ತಸಲೊ ಸಂದರ್ಭ್ ದೊನೀ ಹಾತಾಂನಿ ತೊ ಘೆತಾಲೊ.

ಹ್ಯಾ ಸಂದರ್ಭಾರ್‌ಯೀ, ಕೊಣಾಯ್ಕೀ ಸಾಂಗನಾಸ್ತಾನಾ ವಾ ಕೊಣಾಯ್ ಕಡೆನ್ ವಿಚಾರಿನಾಸ್ತಾನಾ ತಶೆಂ ತಾಣೆಂ ಕೆಲೆಂ.

ದುಸ್ರ್ಯಾಚ್ ದಿಸಾ, ಕವಾಯತೆ ವೆಳಾರ್ ತಾಣೆಂ ತಾಚ್ಯಾ ಪ್ರಮುಖ್ ಆಟ್ ಜಣಾಂ ಸರ್ದಾರಾಂಕ್ ಆಪಯ್ಲೆಂ, ಆನಿ ತಾಂಚೆ ಪಯ್ಕಿ, ಝುಜಾಚ್ಯಾ ವಿದ್ಯೆಂತ್ ಆನಿ ಕುಸ್ತೆಚ್ಯಾ ಪಂದ್ಯಾಟಾಂತ್ ನಾಂವಾಡ್ಲೆಲ್ಯಾ ಆಟ್ ಜಣಾಂಕ್ ವಿಂಚುನ್ ಕಾಡ್ಲೆಂ. ತಾಂಚ್ಯಾ ಮಧೆಂ ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್‍ಯೀ ಆಸ್‍ಲ್ಲೆ.

“ಎಕಾ ಪ್ರತ್ಯೇಕ್ ಕಾರಣಾ ಖಾತಿರ್, ಆನಿ ಎಕಾ ಪ್ರತ್ಯೇಕ್ ಇನಾಮಾ ಖಾತಿರ್, ತಲ್ವಾರಿಂಚೊ ದ್ವಂದ್ವ್ ಸ್ಪರ್ಧೊ ದವರುಂಕ್ ಆಮಿ ಚಿಂತ್ಲಾಂ” ಬಾದಶಹಾನ್ ಪಾಚಾರ್ಲೆಂ. “ತುಮಿ ಭಿಯೆಂವ್ಚಿ ಗರ್ಜ್ ನಾ. ತುಮ್ಚ್ಯಾ ಜಿವಾಕ್ ಅಪಾಯ್ ನಾ. ತಲ್ವಾರಿಂಕ್ ಧೊಮೊಸ್-ಬಂಧನ್ ಘಾಲ್ನ್ ತುಮಿ ಝುಜಜಾಯ್. ಎಎಕಾ ಜೊಡ್ಯೆನ್ ಸಾರ್ಕಿಂ ಪಾಂಪಾಂಚ್ ಮಿನುಟಾಂ ಝುಜಜಾಯ್. ಮುಖವಟ್ ಆಸ್‍ಲ್ಲ್ಯಾನ್ ಕೊಣಾಯ್ಕೀ ಘಾಯ್ ಜಾಂವ್ಚೆ ನಾಂತ್. ಪುಣ್ ಕೋಣ್ ಪ್ರತಿಸ್ಪಧಿಚ್ಯಾ ಆಂಗಾಕ್ ಚಡ್ ಪಾವ್ಟಿಂ ತಲ್ವಾರಿಚೊ ಧೊಮೊಸ್ ಲಾಯ್ತಾ ತೊ ಜಿಕ್ತಾ. ನಿಮಾಣೊ ಜಿಕೊನ್ ಉರ್ಚ್ಯಾ ಸರ್ದಾರಾಕ್ ಕಸಲೆಂ ಇನಾಮ್ ಮ್ಹಣ್ ಆಮಿ ಆಖೇರಿಕ್ ಮಾತ್ರ್ ಪಾಚಾರ್ತೆಲ್ಯಾಂವ್.”

ಹೆಂ ಆಯ್ಕೊನ್ ಸಕ್ಡಾಂಕ್ ಅಜ್ಯಾಪ್ ಜಾಲೆಂ. ಆಪ್ಣಾಚ್ಯಾ ಅಪೇಕ್ಷೆಚೆಂ ಉಲ್ಲಂಘನ್ ಜಾಲ್ಲ್ಯಾ ಖಾತಿರ್ ಶಿಕ್ಷಾ ದಿಂವ್ಚ್ಯಾ ಪ್ರಥಮ್ ಉದ್ದೇಶಾನ್ ತಾಣೆಂ ತೊ ಸ್ಪರ್ಧೊ ಆಪಯ್ಲೊ ಮ್ಹಣ್ ಕೊಣಾಯ್ಕೀ ಕಳಿತ್ ನಾತ್‍ಲ್ಲೆಂ. ಸ್ಪರ್ಧಿ-ಪ್ರತಿಸ್ಪರ್ಧಿಂ ಖಾತಿರ್ ಸೊಡ್ತಿ ಕಾಡ್ಲಿ. ಸ್ಪರ್ಧ್ಯಾಂತ್ ಸರ್ವ್ ಜಾತಿಂಚೆ ಸರ್ದಾರ್ ಆಸ್‍ಲ್ಲೆ. ಕರೀಮ್ ಖಾನಾಕ್ ಸ್ಪರ್ಧ್ಯಾಂತ್ ಪಾತ್ರ್ ಘೆಂವ್ಕ್ ಆಪಂವ್ಕ್ ನಾ. ತಾಕಾ ನ್ಯಾಯಾಧೀಶಾಚೆಂ ಕಾಮ್ ಕರುಂಕ್ ಬಾದಶಹಾನ್ ರಾವಯ್ಲೊ.

ಪಯ್ಲೆಂಚ್ಯಾ ಅರ್ಧ್ಯಾ ವೊರಾ ಭಿತರ್ ಚವ್ಗ್ ಜಣ್ ಸಲ್ವೊನ್, ಚವ್ಗ್ ಜಣ್ ಉರ್ಲೆ. ಥೊಡ್ಯಾ ವೆಳಾಚೊ ವಿಶೆವ್ ಜಾತಚ್ ದುಸ್ರೆಂ ವೃತ್ತ್ ಸುರು ಜಾಲೆಂ. ಫುಡ್ಲ್ಯಾ ಕಾಲ್ದ್ಯಾ ವೊರಾನ್ ಹೆರ್ ದೋಗ್ ಪರಾಜಿತ್ ಜಾಲೆ.

ಸಕ್ಡಾಂನಿ ಚಡುಣೆಂ ಅಪೇಕ್ಷಿಲ್ಲೆಪರಿಂ ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್ ಆಲಿ, ನಿಮಾಣೆಂ ಉರ್ಲೆ! ನಿಮಾಣೊ ಕೈವಾರಿ ವೀರ್ ಕೋಣ್ ಜಾಯ್ತ್ ಮ್ಹಳ್ಳೆಂ ಕುತೂಹಲ್ ಸಕ್ಡಾಂ ಥಂಯ್ ಫುಲ್ಲೆಂ. ಚಡಾವತ್ ಜಾವ್ನ್ ತಸಲ್ಯಾ ಪಂದ್ಯಾಂನಿ ಸರ್ದಾರ್ ಸಿಮಾಂವ್‍ಂಚ್ ಜಿಕ್ತಾಲೊ ಜಾಲ್ಯಾರೀ, ಪಾಟ್ಲ್ಯಾ ತೆಂಪಾರ್ ಘಾಯೆವ್ನ್ ತೊ ಅಸ್ವಸ್ಥ್ ಆಸ್‍ಲ್ಲ್ಯಾ ವರ್ವಿಂ, ಹ್ಯಾ ದಿಸಾಚ್ಯಾ ಸ್ಪರ್ಧ್ಯಾಂತ್ ಸರ್ದಾರ್ ಯೂಸುಫ್ ಆಲಿ ಜಿಕತ್ ಮ್ಹಣ್ ಥಂಯ್ಸರ್ ಆಸ್‍ಲ್ಲ್ಯಾಂಕ್ ಭೊಗ್ಲೆಂ.

ಸಟ್ಟ್ ಕರ್ನ್ ಟಿಪ್ಪು ಸುಲ್ತಾನ್ ಉಲಯ್ಲೊ:

“ಇನಾಮ್, ಆಖೇರಿಕ್ ಪಾಚಾರ್ತಾಂವ್ ಮ್ಹಳ್ಳೆಂ ಆಮಿ, ಪುಣ್ ಆತಾಂಚ್ ಆಮಿ ತೆಂ ಪಾಚಾರ್ತಾಂವ್” ಮ್ಹಣಾಲೊ ತೊ. “ನಿಮಾಣ್ಯಾ ಹ್ಯಾ ವೃತ್ತಾಂತ್ ಜಿಕ್‍ಲ್ಲ್ಯಾಕ್, ರಾಯ್-ಕುಂವರ್ನ್ ಜಮೀಲಾ ಕಡೆನ್ ಕಾಜಾರ್ ಜಾಂವ್ಚೆಂ, ಆನಿ ತಿ ಕಬೂಲ್ ನಾತ್ಲ್ಯಾರ್ ಜಬರ್ದಸ್ತೆನ್ ತಿಕಾ ಚಾಕರ್ನ್ ಕರ್ನ್ ಘೆಂವ್ಚೆಂ ಹಕ್ಕ್ ಆಮಿ ದಿತಾಂವ್..!”

ಆಯ್ಕಲ್ಲೆ ಗ್ರಾಯ್ಕ್ ಘಡ್ಬಡ್ಲೆ. ಸರ್ದಾರ್ ಯೂಸುಫ್ ಆನಿ ಸರ್ದಾರ್ ಸಿಮಾಂವ್ ಆಕಾಂತ್ಲೆ. ರಾಯ್-ಕುಂವರ್ ಕರೀಮ್ ಖಾನ್ ರಾಗಾನ್ ತಾಂಬ್ಡೊ ಜಾಲೊ. ಪುಣ್ ಉಲಂವ್ಕ್ ಕೊಣಾಯ್ಕೀ ಧಯ್ರ್ ಮೆಳ್ಳೆಂ ನಾ. ತಿಸ್ರ್ಯಾ ವೃತ್ತಾಕ್ ಟಿಪ್ಪುನ್ ಹುಕುಮ್ ದಿಲಿ.

ತ್ಯಾಚ್ ವೆಳಾರ್ ಸರ್ದಾರ್ ಸಿಮಾಂವ್ಚಿ ಆನಿ ಸರ್ದಾರ್ ಯೂಸುಫಾಚಿ ಮತ್ ವೆವೆಗ್ಳ್ಯಾ ವಾಟೆನ್ ಧಾಂವ್ಲಿ. ಸರ್ದಾರ್ ಸಿಮಾಂವ್ ಜಿಕ್ಲ್ಯಾರ್ ಆಗ್ನೆಸ್ ಕುಂವರ್ನ್ ತಾಕಾ ಮೆಳ್ತೆಲಿ – ಮೆಳಜಾಯ್ ಮ್ಹಣ್ ಸರ್ದಾರ್ ಯೂಸುಫಾನ್ ಚಿಂತ್ಲೆಂ. ಆಪ್ಲೆಂ ಪ್ರಮಾಣ್ ಮೊಡ್ಚೊ ಸಂಭವ್ ತಸೊ ಚುಕ್‍ಲ್ಲ್ಯಾ ಖಾತಿರ್ ತಾಕಾ ಸಮಾಧಾನ್ ಭೊಗ್ಲೆಂ. ಆನ್ಯೇಕಾ ವಾಟೆನ್, ಸರ್ದಾರ್ ಯೂಸುಫ್ ಜಿಕ್ಲ್ಯಾರ್, ತಾಣೆಂ ಮೋಗ್ ಕರ್ಚಿ ಜಮೀಲಾಚ್ ತಾಕಾ ಮೆಳ್ತೆಲಿ – ಮೆಳಜಾಯ್ ಮ್ಹಣ್ ಸರ್ದಾರ್ ಸಿಮಾಂವ್ನ್ ಚಿಂತ್ಲೆಂ!

ತಶೆಂ ಜಾಲ್ಲ್ಯಾನ್ ಎಕಾಮೆಕಾಕ್ ಜೀಕ್ ದಿಂವ್ಚ್ಯಾ ಖಾತಿರ್ ತೆ ಝುಜ್ಲೆ. ದೊಗಾಂಯ್ನೀ ರಕ್ಷಣ್ ವಿದ್ಯೆಚೆಂ ಪ್ರದರ್ಶನ್ ದಿಲೆಂ ಶಿವಾಯ್ ಆಪಾಪ್ಲ್ಯಾ ತಲ್ವಾರಿಚೊ ಧೊಮೊಸ್ ಆನ್ಯೇಕ್ಲ್ಯಾಚ್ಯಾ ಆಂಗಾಕ್ ಲಾಂವ್ಚೆಂ ಪ್ರಯತ್ನ್ ತಾಣಿಂ ಕೆಲೆಂ ನಾ. ಮ್ಹಣ್ತಚ್ ವೃತ್ತ್ ಸಂಪ್ಲೆಂ.

“ದೊಗ್‍ಯೀ ಸಮಾಸಮ್!” ಮ್ಹಣಾಲೊ ಟಿಪ್ಪು ಸುಲ್ತಾನ್. ಪುಣ್ ತೊ ಚಿಂತುಂಕ್ ಪಡ್ಲೊ. ಹೆರ್ ಪ್ರೇಕ್ಷಕ್ ಕಾಲುಬುಲೆ ಜಾಲೆ.

“ಆನ್ಯೇಕ್ ವೃತ್ತ್ ಖೆಳ್ತಾತ್‍ಗೀ?”

“ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಬಾದಶಹಾ ಕಡೆನ್ ಸೆವಕಾಚಿ ಏಕ್ ಖಾಲ್ತಿ ವಿನತಿ ಆಸಾ.”

“ಆಯ್ಕಯಾಂ” ಟಿಪ್ಪು ಕಬೂಲ್ ಜಾಲೊ.

“ಬಾದಶಹಾಚ್ಯಾ ಕೃಪೆನ್, ಹ್ಯಾ ಸ್ಪರ್ಧ್ಯಾಂತ್ ಸಲ್ವಣಿ ಒಪ್ವೊಂಕ್ ಖುಶಿ ವ್ಹರ್ತಾಂ.”

“ಕಾರಣ್?”

“ಕಾರಣಾಂ ದೋನ್ ಆಸಾತ್” ಮ್ಹಣಾಲೊ ತೊ, ಖಾಲ್ತೆಪಣಿಂ. “ಪಯ್ಲೆಂ: ಆತಾಂಚ್ಯಾ ಪರಿಸ್ಥಿತೆಂತ್, ಕಾಜಾರ್ ಜಾಂವ್ಕ್ ಹಾಂವ್ ತಯಾರ್ ನಾ – ಆನಿ ಆಮ್ಚ್ಯಾ ಧರ್ಮಾಚೆಂ ಸವಾಲ್ ಥಂಯ್ಸರ್ ಉಬ್ಜತಾ.” ತಾಚ್ಯಾ ವಿಶ್ವಾಸಾನ್ ಉಚಾರುಂಕ್ ಧಯ್ರ್ ಘೆತ್ಲೆಂ. “ದುಸ್ರೆಂ: ಬಾದಶಹಾಕ್ ಕಿತ್ಲ್ಯಾಯೀ ಪಯ್ಶಿಲ್ಯಾನ್ ತರೀ ಸಂಬಂಧ್ ಆಸ್‍ಲ್ಲ್ಯಾಂಕ್ ಮ್ಹಜಿ ಚಾಕರ್ನ್ ಕರ್ನ್ ಘೆಂವ್ಕ್ ಹಾಂವ್ ಫಾವೊ ನಾ!”

“ಪಿಶ್ಯಾ!” ವೊಂಟಾ ಭಿತರ್ ಪುಸ್ಪುಸ್ಲೊ ಯೂಸುಫ್ ಆಲಿ. ಹೆರಾಂಕ್ ಸರ್ದಾರ್ ಸಿಮಾಂವ್ಚೆಂ ತರ್ಕ್ ರುಚ್ಲೆಂ. ಟಿಪ್ಪುಕ್‍ಯೀ ತೆಂ ಮೆಚ್ವಲೆಂ. ಇಸ್ಲಾಮ್ ಧರ್ಮಾಚೊ ಪೈಗಂಬರ್ ಜಾವ್ನಾಸ್‍ಲ್ಲ್ಯಾ ತಾಣೆಂ – ಕಸಲಿ ಚೂಕ್ ಆಸ್ಲ್ಯಾರೀ – ಭಯ್ಣಿಕ್ ನಸ್ರಾನಿಚ್ಯಾ ಹಾತಾಂತ್ ಸೊಡ್ಲೆಂ ಮ್ಹಳ್ಳೊ ಅಪವಾದ್, ತಾಚೆಚ್ ಖಾಜಿ ಉಸ್ವಾಸ್ತೆ!

“ಬರೆಂಚ್!” ಮ್ಹಣಾಲೊ ತೊ. “ತುಜೆಂ ರಾಜಾಂವ್ ಆಮಿ ಸಮ್ಜತಾಂವ್… ತರ್, ಆಮಿ ಪಾಚಾರ್‍ಲ್ಲೆಂ ಇನಾಮ್ ಸರ್ದಾರ್ ಯೂಸುಫ್ ಆಲಿಕ್ – ಹ್ಯಾ ಪಾವ್ಟಿಂ ಹಕ್ಕಾನ್ ಆನಿ ಆಮ್ಚ್ಯಾ ಹುಕ್ಮೆನ್ ಫಾವೊ ಜಾತಾ. ಹೊ ಫಾಯ್ದೊ ಜೊಡ್ಚ್ಯಾ ಖಾತಿರ್ ತುಕಾ ಎಕಾ ಮಹಿನ್ಯಾಚಿ ಪುರ್ಸತ್ ಆನಿ ರಜಾ ಆಮಿ ದಿತಾಂವ್.”

“ಹುಜೂರ್..!” ಪಿಂರ್ಗೊಂಕ್ ಲಾಗ್ಲೊ ಯೂಸುಫ್.

“ಚಲ್!” ಟಿಪ್ಪುನ್ ಧೆಂಕ್ಣೊ ಮಾರ್ಲೊಚ್. “ಏಕ್ ಪಾವ್ಟಿಂ ತುಂ ಸಲ್ವಲಾಯ್. ಹ್ಯಾ ಪಾವ್ಟಿಂ ಸಲ್ವೊಂಕ್ ವಾ ಇನ್ಕಾರ್ ಜಾಂವ್ಕ್ ಕಾರಣಾಂ ನಾಂತ್. ಎಕಾ ಮಹಿನ್ಯಾನ್ ಆಮ್ಕಾಂ ವರ್ದಿ ದೀ.”

ಉಪ್ರಾಂತ್ ಬಾದಶಹಾನ್ ತ್ಯಾ ದಿಸಾಚೊ ಸ್ಪರ್ಧೊ, ಫಲಿತಾಂಶ್, ಶರ್ತಾಂ ಆನಿ ಹುಕುಮ್ ಮೆಳವ್ನ್ ಆಸ್ಮಾಬಿಗೆರ್ ವರ್ದಿ ಧಾಡ್ಲಿ.

ಸಭಾ ಫಾಸಾಳ್ಳಿ. ಆಪ್ಣೆಂ ಇಷ್ಟಾಕ್ ಉಪ್ಕಾರ್ ಕೆಲ್ಯಾರೀ, ಸರ್ದಾರ್ ಯೂಸುಫಾನ್ ಕಿತ್ಯಾಕ್ ನಾ ಖುಶಿ ದಾಕಯ್ಲಿ ಮ್ಹಳ್ಳಿಂ ಚಿಂತ್ನಾಂ ಸರ್ದಾರ್ ಸಿಮಾಂವ್ಕ್ ಧೊಸುಂಕ್ ಲಾಗ್ಲಿಂ.

ತೆವ್ಶಿಲ್ಯಾನ್ ಆಪ್ಲ್ಯಾ ಇಷ್ಟಾನ್ ಜಿಕ್ಲ್ಯಾರ್ ಸರ್ವ್ ಸಾರ್ಕೆಂ ಜಾತೆಂ ಆಸ್ತಾಂ, ಘಡಿತಾಂಚ್ಯಾ ಖೆಳಾ ವರ್ವಿಂ, ಗಜಾಲ್ ಆನಿಕ್‍ಯೀ ಭಿಗಡ್ಲಿ ಮ್ಹಣ್ ಸರ್ದಾರ್ ಯೂಸುಫ್ ಶಿರಿಂ ಚುಕ್ಲೊ!

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel