ಮಂಗ್ಳುರಿ ಯುವಕ್ ಡೆನ್ಮಾರ್ಕಾಚೊ ಹ್ಯೂಗೊ ಅಲ್ಮೇಡಾ ಜಿಕ್ಲೊ ‘ಎಕ್ಸ್ ಫ್ಯಾಕ್ಟರ್ ಡೆನ್ಮಾರ್ಕ್ 2026’
Posted on : April 18, 2026 at 6:59 PM
ಸೊಂಡರ್ಬೋರ್ಗ್, ಡೆನ್ಮಾರ್ಕ್: ಅಂತರಾಷ್ಟ್ರೀಯ್ ಸಂಗೀತ್ ಸಂಸಾರಾಂತ್ ಹ್ಯೂಗೊ ಅಲ್ಮೇಡಾನ್ ಏಕ್ ನವೊ ಇತಿಹಾಸ್ ರಚುನ್ ಸಕ್ಡಾಂಚೆಂ ಗುಮಾನ್ ವೊಡ್ಲಾಂ. ಹ್ಯೂಗೊ ಎ ಮ್ಹಣ್ಂಚ್ ಖ್ಯಾತಿ ಜೊಡ್ಲ್ಲೊ ಹೊ ಫಕತ್ 16 ವರ್ಸಾಂಚೊ ಹೊ ತರ್ನಾಟೊ, ಮಂಗ್ಳುರಿ ಮುಳಾಚೊ ಭಾರತೀಯ್ ಗಾವ್ಪಿ. ಸೊಂಡರ್ಬೋರ್ಗ್ ಶಹರಾಚೊ ಏಕ್ ವಿದ್ಯಾರ್ಥಿ ಜಾವ್ನ್ ಆಸ್ಲ್ಲೊ ಹ್ಯೂಗೊ, ಆತಾಂ ಡೆನ್ಮಾರ್ಕಾಚ್ಯಾ ಘರಾಂ-ಘರಾಂನಿ ಫಾಮಾದ್ ಜಾಲಾ. ಎಪ್ರಿಲ್ 10, 2026ವೆರ್ ಚಲ್ಲ್ಲ್ಯಾ ‘ಎಕ್ಸ್ ಫ್ಯಾಕ್ಟರ್ ಡೆನ್ಮಾರ್ಕ್’ ಸೀಸನ್ 19ಚ್ಯಾ ಫೈನಲಾಂತ್ ತಾಣೆಂ ಬೃಹತ್ ಬಹುಮತಾನ್ ಜೀಕ್ ಆಪ್ಣಾಯ್ಲಿ.
ಜೂನ್ 20, 2009ವೆರ್ ಯು.ಎ.ಇಂತ್ ವಿಲ್ಸನ್ ಆನಿ ಮೊಲಿನ್ ಅಲ್ಮೇಡಾಚೊ ಪೂತ್ ಜಾವ್ನ್ ಹ್ಯೂಗೊ ಜಲ್ಮಲೊ. ತಾಚಿಂ ಆವಯ್-ಬಾಪಯ್ ಎಕಾ ಮಲ್ಟಿನ್ಯಾಶನಲ್ ಕಂಪೆನಿಂತ್ ಕಾಮ್ ಕರ್ತಾತ್. ಡಿಸೆಂಬರ್ 2016-ಂತ್ ಹ್ಯೂಗೋ ಡೆನ್ಮಾರ್ಕಾಕ್ ಆಯ್ಲೊ. ಸೊಂಡರ್ಬೋರ್ಗ್ ಇಂಟರ್ನ್ಯಾಶನಲ್ ಸ್ಕೂಲ್, ಹುಮ್ಲೆಹೋಯ್ ಸ್ಕೂಲ್ ಆನಿ ಡಿಬ್ಬೋಲ್ ಸ್ಕೂಲಾಂತ್ ತಾಚೆಂ ಶಿಕ್ಷಣ್ ಜಾಲೆಂ. ಆತಾಂ ತೊ ಹಾಪ್ಟ್ರಪ್ ಎಫ್ಟರ್ಸ್ಕೋಲೆಂತ್ 10ವ್ಯಾ ಕ್ಲಾಸಿಂತ್ ಸಂಗೀತಾಂತ್ ಶಿಕ್ತಾ.
ಆಟ್ ವರ್ಸಾಂಚಿ ತಪಸ್ಯಾ
ಹ್ಯೂಗೊಚಿ ಹಿ ಯಶಸ್ವಿ ಅಕಸ್ಮಾತ್ ಮೆಳ್ಳೆಲಿ ನ್ಹಯ್. ಸೊಂಡರ್ಬೋರ್ಗ್ ಮ್ಯೂಸಿಕ್ ಸ್ಕೂಲಾಂತ್ ತಾಣೆಂ ಆಟ್ ವರ್ಸಾಂ ಕೆಲ್ಲೆಲ್ಯಾ ಕಠಿಣ್ ತರ್ಬೆತಿಚೆಂ ಫಲಿತಾಂಶ್ ಹೆಂ. ತೊ ಪಾಪ್ ಆನಿ ರಾಕ್ ಸಂಗೀತಾಂತ್ ನೈಪುಣ್ಯತಾ ಆಪ್ಣಾಯಿಲ್ಲೊ ಗಾವ್ಪಿ. ತಾಣೆಂ ಫ್ಲೆನ್ಸ್ಬರ್ಗ್ ಮ್ಯೂಸಿಕ್ ಫೆಸ್ಟಿವಲ್, ನಾರ್ಡ್-ಆಲ್ಸ್ ಮ್ಯೂಸಿಕ್ ಫೆಸ್ಟಿವಲ್ ಆನಿ ಡೆನ್ಮಾರ್ಕಾಚ್ಯಾ ವೆವೆಗ್ಳ್ಯಾ ಜಾಗ್ಯಾಂನಿ ಸಂಗೀತ್ ಪ್ರದರ್ಶನ್ ದಿಲ್ಲೆಂ ಆಸಾ. 2023ಂತ್ ಡೆನ್ಮಾರ್ಕಾಚ್ಯಾ ರಾಷ್ಟ್ರೀಯ್ ಟಿವಿ ಚಾನೆಲ್ ‘DR’ ಚ್ಯಾ ಎಂಜಿಪಿ ಕಾರ್ಯಕ್ರಮಾಂತ್ ತಾಣೆಂ ಪಯ್ಲೆ ಪಾವ್ಟಿಂ ರಾಷ್ಟ್ರೀಯ್ ಮಟ್ಟಾರ್ ಪ್ರದರ್ಶನ್ ದಿಲ್ಲೆಂ.
ಘರಾಂತ್ಚ್ ಸಂಗೀತ್
ಅಲ್ಮೇಡಾ ಕುಟ್ಮಾಂತ್ ಸಂಗೀತಾಕ್ ಮಹತ್ವ್ ಆಸಾ. ತಾಣಿಂ ಕುಟ್ಮಾಚ್ಯಾಂಕ್ ಆನಿ ಇಷ್ಟಾಂ ಖಾತಿರ್ ಸರಾಗ್ ಸಂಗೀತ್ ಆಸಾ ಕೆಲಾಂ. ಹ್ಯೂಗೊಚ್ಯಾ ಬಾಪಾಯ್ನ್ ಘರಾಂತ್ ಏಕ್ ಮ್ಯೂಸಿಕ್ ಸ್ಟುಡಿಯೋ ತಯಾರ್ ಕರ್ನ್, ವೆವೆಗ್ಳಿಂ ವ್ಹಾಜಾಂತ್ರಾಂ ಹಾಡುನ್ ಪುತಾಕ್ ತರ್ಬೆತಿ ಲಾಭಯ್ಲಿ. ಹ್ಯೂಗೊಚೊ ಬಾಪಯ್ ಭಾರತೀಯ್ ಸೆಮಿ ಕ್ಲಾಸಿಕಲ್ ಗಜಲ್ ಗಾಯ್ತಾ ತರ್, ತಾಚಿ ಆವಯ್ ಪೈಂಟಿಂಗ್ ಆನಿ ಶಿಂವ್ಣೆಂತ್ ಹೆಳ್ಳ್ಯಾ ತಶೆಂಚ್ ಗಾಯನಾಚಿ ಉರ್ಬಾಯೀ ತಿಕಾ ಆಸಾ. ಅಸಲ್ಯಾ ಪರಿಸರಾಂತ್ ಹ್ಯೂಗೋಚಿ ಸೃಜನಶೀಲತಾ ವಾಡ್ಲಿ.
ಬಾಳ್ಪಣಾ ಥಾವ್ನ್ಂಚ್ ಪ್ರತಿಭಾವಂತ್
ಹ್ಯೂಗೊಕ್ ಭುರ್ಗೆಪಣಾ ಥಾವ್ನ್ ಸಂಗೀತಾಂತ್ ಆಸಕ್ತ್ ಆಸ್ಲ್ಲಿ. ಕೇವಲ ದೇಡ್ ವರ್ಸಾಂಚೊ ಆಸ್ತಾನಾ ತೊ ಜನೆಲಾ ಲಾಗಿಂ ಉಬೊ ರಾವೊನ್ ಆಪ್ಲೆಚ್ ರಾಗ್ ರಚ್ತಾಲೊ. ತೆದ್ನಾಂಚ್ ಗಾಯನಾಚೆಂ ದೆಣೆಂ ತಾಕಾ ಫಾವೊ ಜಾಲ್ಲೆಂ. ಕಸಲೆಂಯ್ ಪದ್ ವಾ ಕಸಲಿಯ್ ಭಾಸ್ ಆಸೊಂ, ತೊ ತೆಂ ಆಯ್ಕೊನ್ ತಶೆಂಚ್ ಗಾಂವ್ಕ್ ಸಕ್ತಾಲೊ. ಸಂಭಾಷಣಾಂನಿ ಸಂಗೀತ್ ಆಟಾಪುನ್ ಆಸ್ಲ್ಲೊ ‘ಸ್ಟೀವನ್ ಯೂನಿವರ್ಸ್’ ಆ್ಯನಿಮೇಶನ್ ಶೋ ಪಳೆವ್ನ್ ತಾಕಾ ಸಂಗೀತಾಂತ್ ಚಡ್ ಆಸಕ್ತ್ ಆಯ್ಲಿ. ಡೆನ್ಮಾರ್ಕಾಕ್ ಯೆತಚ್, ವ್ಹಡಿಲಾಂನಿ ಸುರ್ವೆರ್ ತಾಕಾ ಕ್ಲಾಸಿಕಲ್ ತರ್ಬೆತಿಕ್ ದಾಖಲ್ ಕೆಲ್ಲೆಂ ತರೀ, ತಾಚ್ಯಾ ಮೆಸ್ತ್ರಿಂನಿ ತಾಚೊ ತಾಳೊ ರಿದಮಿಕ್ ಸಂಗೀತಾಕ್ ಜೊಕ್ತೊ ಆಸಾ ಮ್ಹಣ್ ಸಮ್ಜೊನ್ ತಾಕಾ ತ್ಯಾ ವಾಟೆನ್ ಮಾರ್ಗದರ್ಶನ್ ದಿಲೆಂ.
ಹ್ಯೂಗೊ ಸದ್ಯಾಕ್ ಇಂಗ್ಲಿಷ್ ಆನಿ ಡ್ಯಾನಿಶ್ ಭಾಶೆಂತ್ ಗಾಯ್ತಾ ತರೀ, ಘರಾಂತ್ ತೊ ಹಿಂದಿ, ಕನ್ನಡ ಆನಿ ಕೊಂಕ್ಣಿ ಭಾಶೆಂತ್ ಗಾಂವ್ಕ್ ಪ್ರಯತ್ನ್ ಕರ್ತಾ. ಆಪ್ಲ್ಯಾ ಮುಳಾಚಿ ಭಾಸ್ ಶಿಕೊಂಕ್ ತಾಕಾ ಅಭಿಮಾನ್ ಆಸಾ.
ಬಹುಮುಖಿ ತಾಲೆಂತ್
ಹ್ಯೂಗೊ ಏಕ್ ಖಾಲ್ತೊ ತರ್ನಾಟೊ. ತೊ ಸಕ್ಡಾಂ ಕಡೆನ್ ಮಯ್ಪಾಸಾನ್ ಜಿಯೆತಾ. ಶಿಸ್ತೆಚೆಂ ಜಿವಿತ್ ಜಿಯೆತಾ. ಸಮಾಧಾನಾ ಖಾತಿರ್ ಆಂವ್ಡೆತಾ. ತಾಕಾ ಚೆಸ್, ಬ್ಯಾಡ್ಮಿಂಟನ್ ಖೆಳೊಂಕ್ ಆ ಉಪ್ಯೆಂವ್ಕ್ ಭಾರೀ ಪಸಂದ್. ತಶೆಂಚ್ ತಾಕಾ ಸಕ್ಕಡಾ ಪ್ರಕಾರಾಚೆಂ ಖಾಣ್ ಮೊಗಾಚೆಂ. ಸದ್ಯಾಕ್ ತೊ ಲಂಡನಾಂತ್ ಸ್ಕೂಲ್ ಪ್ರವಾಸಾರ್ ಆಸಾ. ಆಪ್ಲ್ಯಾ ಸದರ್ನ್ ಜುಟ್ಲ್ಯಾಂಡ್ ಪ್ರದೇಶಾಚೊ ವಿನಮ್ರ್ ಪ್ರತಿನಿಧಿ ಜಾವ್ನಾಸಾ.
‘ಯಂಗ್ ಸೋಲೊಯಿಸ್ಟ್’ ವಿಭಾಗಾಂತ್ ಫಾಮಾದ್ ಡ್ಯಾನಿಶ್ ರ್ಯಾಪರ್ ಬೆಂಜಮಿನ್ ಹಾವ್ ಹಾಣೆಂ ಹ್ಯೂಗೊಕ್ ತರಬೇತಿ ದಿಲ್ಲಿ. ಹ್ಯೂಗೊಚ್ಯಾ ನಿರಂತರ್ ಪದಾಂನಿ ಆಖ್ಖ್ಯಾ ಡೆನ್ಮಾರ್ಕಾಚ್ಯಾ ಲೊಕಾಂಚಿಂ ಕಾಳ್ಜಾಂ ಜಿಕ್ಲ್ಯಾಂತ್.
ತಾಚೆಂ ಜಿಕ್ಲಲೆಂ ಪದ್ ‘Golden 24’, ಲೂಕಸ್ ಗ್ರಹಾಮ್ ಫೇಮ್ ಲೂಕಸ್ ಫೋರ್ಚಮರ್ ಆನಿ ಪ್ರೊಡ್ಯೂಸರ್ ಎಮಿಲ್ ಫಾಕ್ ಹಾಣಿಂ ತಯಾರ್ ಕೆಲಾಂ. ಡೆನ್ಮಾರ್ಕಾಂತ್ ಹೆಂ ಪದ್ ಲೊಕಾಮೊಗಾಳ್ ಜಾಲಾಂ. ಹ್ಯೂಗೊಕ್ ‘ಯುನಿವರ್ಸಲ್ ಮ್ಯೂಸಿಕ್ ಡೆನ್ಮಾರ್ಕ್’ ಸಾಂಗಾತಾ ರೆಕಾರ್ಡಿಂಗ್ ಕಾಂಟ್ರ್ಯಾಕ್ಟ್ ಆನಿ ಘರಾಂತ್ ಏಕ್ ಪ್ರೊಫೆಶನಲ್ ಸ್ಟುಡಿಯೋ ಸೆಟಪ್ ಮೆಳ್ಳಾ.
ಹ್ಯೂಗೋ ಫಕತ್ ಗಾವ್ಪಿ ಮಾತ್ ನ್ಹಂಯ್, ತೊ ಸ್ವತಃ ಪದಾಂ ಬರಯ್ತಾ ಆನಿ ತಾಚೆಂ ಸಂಗೀತ್ಯೀ ರಚ್ತಾ. ಇಂಗ್ಲಿಷ್ ಆನಿ ಡ್ಯಾನಿಷ್ ಭಾಶೆಂನಿ ಗಾಂವ್ಚ್ಯಾಂತ್ ತೊ ಪರಿಣತ್ ಜಾಲಾ. ಮುಖಾರಿಂ ತೊ ಸಂಗೀತ್ ಸಂಸಾರಾಂತ್ ಆನಿಕೀ ಚಡ್ ಸಾಧನಾಂ ಕರುಂಕ್ ಆಶೆತಾ.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
