ಸರ್ದಾರಾಚೆಂ ಸನ್ನಿಧಾನ್ – 9: ಉಳ್ಟ್ಯೊ ವರ್ದ್ಯೊ

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 9
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 9: ಉಳ್ಟ್ಯೊ ವರ್ದ್ಯೊ

ನಿಜಾಯ್ಕೀ ಸರ್ದಾರ್ ಸಿಮಾಂವ್ ಕಡೆನ್ ಟಿಪ್ಪುನ್ ಉಲಯಿಲ್ಲ್ಯಾ ತ್ಯಾ ಥೊಡ್ಯಾ ಉತ್ರಾಂ ವರ್ವಿಂ, ಮೈಸೂರ್ಚ್ಯಾ ವಾಗಾನ್ – ಆಪ್ಲಿ ಮರ್ಯಾದ್ ಆನಿ ಘನ್ ಸಾಂಬಾಳ್ಚ್ಯಾ ಖಾತಿರ್ – ಕೆನರಾ ಕ್ರಿಸ್ತಾಂವಾಂಚೆರ್ ದಗ್ದೊಣೆಚೊ ಆನಿ ಬಂದಡೆಚೊ ನಿಮಾಣೊ ಚೊಬ್ಕೊ ಮಾರುಂಕ್ ದಾವ್ಲಿ ಫುಲಯಿಲ್ಲಿ ಮ್ಹಳ್ಳೆಂ, ಚರಿತ್ರೆ ಪ್ರಕಾರ್‌ಯೀ ಸ್ಪಷ್ಟ್ ಜಾತಾ.

ಸರ್ದಾರ್ ಸಿಮಾಂವ್ಕ್‌ಯೀ ತೆಂ ಭೊಗ್‍ಲ್ಲೆಂ ವಾಜ್ಭಿಚ್.

ತ್ಯಾ ವೆಳಾರ್ ರಾಜಕೀಯ್ ಗೊಂದೊಳ್ ಕಸೊಯೀ ಆಸೊಂದಿ, ಪುಣ್ ಸರ್ದಾರ್ ಸಿಮಾಂವ್ಕ್, ತ್ಯಾ ವೆಳಾರ್ ತೆಂ ಸ್ವತಃ ತಾಚೆಂ ಮಾತ್ರ್ ನಹಿಂ, ಬಗಾರ್, ಗುಪಿತ್ ಥರಾನ್ ತಾಚೆರ್ ಪಾತ್ಯೆವ್ನ್ ಆಸ್‍ಲ್ಲ್ಯಾ ಆಮ್ಚ್ಯಾ ಕುರಿಯೆಲಾಂತ್ಲ್ಯಾ ಹೆರ್‌ಯೀ (ಹ್ಯಾ ಕಾಣಿಯೆಂತ್ಲ್ಯಾ) ಸಬಾರ್ ಜಣಾಂಕ್, ಜಿಣೆಯೆ ಮರ್ಣಾಚೆಂ ಸವಾಲ್ ಜಾವ್ನಾಸ್‍ಲ್ಲೆಂ.

ಆನಿ, ಆತಾಂ ಪ್ರತ್ಯೇಕ್ ಥರಾನ್, ಬಂಟ್ವಾಳ್ಚೆಂ – ಮುಖ್ಯ್ ಜಾವ್ನ್ ಆಗ್ನೆಸ್ ಸಿಸಿಲಿಯಾಚೆಂ – ಸವಾಲ್ ಟಿಪ್ಪು ಸುಲ್ತಾನಾನ್ ಉಟಯಿಲ್ಲ್ಯಾ ವರ್ವಿಂ, ಸರ್ದಾರ್ ಸಿಮಾಂವ್ ಆಕಾಂತ್‍ಲ್ಲ್ಯಾಂತ್ ಅಜ್ಯಾಪ್ ನಾ. ತಾಚ್ಯಾ ವೀರ್ ಸಹಜ್ ಚಲಾಕಿ ಆನಿ ಸ್ವಭಾವಾ ತೆಕಿದ್ ತೊ ಕಾರ್ಯಾಕ್ ದೆಂವ್ಲೊ.

ರಾವ್ಳೆರಾ ಥಾವ್ನ್ ಪಾಟಿಂ ಯೆತಚ್, ಶೀದಾ ಆಪ್ಲ್ಯಾ ಬಿಡಾರಾಕ್ ತೊ ಗೆಲೊ. ಫುಡ್ಲೆಂ ಕಾಮ್ ಕರ್ಚ್ಯಾ ಆದಿಂ, ದುಸ್ರ್ಯಾ ದಿಸಾಚ್ಯಾ ಭೆಟೆಂತ್ ಬಾದಶಹಾ ಕಿತೆಂ ಮ್ಹಣ್ತಾ ಮ್ಹಳ್ಳೆಂ ಪಳೆಂವ್ಕ್ ರಾಕೊನ್ ತೊ ರಾವೊಂಕ್ ನಾ.

ಜೆಮೆದಾರ್ ಅಂತುಲೊ ಪಡ್ವಳಾಕ್ ತಾಣೆಂ ಲಾಗಿಂ ಆಪಯ್ಲೊ.

“ಜೆಮೆದಾರ್, ಆಮ್ಚೆರ್ ಆಕಾಂತಾಚಿಂ ಆನಿ ಚಡ್ ಅನ್ವಾರಾಚಿಂ ಕುಪಾಂ ವೊಂದಾತಾತ್‍ಶಿಂ ದಿಸ್ತಾ. ದೆಕುನ್, ಆತಾಂ ಆನಿ ಹ್ಯಾ ಉಪ್ರಾಂತ್ ಆನಿಕ್‍ಯೀ ಚಡ್ ಚತ್ರಾಯೆನ್ ಆನಿ ತುರ್ತಾನ್ ಆಮಿ ಕಾಮ್ ಕರಿಜಾಯ್.”

“ಜರೂರ್ ಸಾಯ್ಬಾ!” ಮ್ಹಣಾಲೊ ಅಂತುಲೊ ಪಡ್ವಳ್, ಚುರುಕ್ ಜಾವ್ನ್. “ಕಿತೆಂ ಹುಕುಮ್ ತಿ ಸಾಂಗಾ.”

“ಬರೆಂ ಕರ್ನ್ ಆಯ್ಕ್ – ಆನಿ ಆಯ್ಚ್ಯಾ ದಿಸಾ ಭಿತರ್ ಆಮ್ಚ್ಯಾ ಖಾಸ್ಗಿ ಜವಾನಾಂಕ್‍ಯೀ ಹೆಂ ಸಾಂಗ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಕೊಡಗಾಂತ್ಲೊ ಆನಿ ಭಾಯ್ಲೊ ಸೊಡ್ಲ್ಯಾರೀ, ಆಮ್ಚ್ಯಾ ಕೆನರಾಂತ್ಲೊಚ್ ಧಾ-ಪಂದ್ರಾ ಹಜಾರ್ ಲೋಕ್ ಹಾಂಗಾಸರ್ ಕೈದಿ ಜಾವ್ನ್ ಕಷ್ಟತಾ.”

“ತೆಂ ವ್ಹಯ್ ಸರ್ದಾರ್ ಸಾಯ್ಬಾ.”

“ಆದ್ಲೆಪರಿಂ ಚಿತ್ರ್‌ಹಿಂಸಾ ಆನಿ ಭಿರಾಂಕುಳ್ ಶಿಕ್ಷಾ ಹ್ಯಾ ದಿಸಾಂನಿ ಪಳೆಂವ್ಕ್ ಮೆಳನಾಂತ್ ಜಾಲ್ಯಾರೀ, ಮತಾಂತರ್ ಕರ್ಚೆಂ, ಆನಿ ಆಮ್ಚ್ಯಾ ಸಮಾಜೆಂತ್ಲ್ಯಾ ಚಲಿಯಾಂಕ್ ರಾವ್ಳೆರಾಚ್ಯಾ ಜೆನಾನ್‍ಖಾನಾಕ್ ಮುಸ್ಲಿಮ್ ಅಧಿಕಾರಿಂಚ್ಯಾ ಅಂತಃಪುರಾಕ್ ಜಬರ್ದಸ್ತೆನ್ ವಾ ಪುಸ್ಲಾವ್ನ್ ವ್ಹರ್ಚೆಂ ಪ್ರಯತನ್ ಚಲ್ತಚ್ ಆಸಾ.”

“ವ್ಹಯ್ ಸಾಯ್ಬಾ…”

“ಆನಿ ಹ್ಯಾಚ್ ವೆಳಾರ್ – ನಿಮಾಣೆ ಪಾವ್ಟಿಂ ಜಾವ್ಯೆತ್ – ಆಪ್ಲೆಂ ಯೋಜನ್ ಸಲ್ವೊಂಕ್ ನಾ ಮ್ಹಣೊಂಕ್, ವಾ ಆಪ್ಲಿ ಮರ್ಯಾದ್ ರಾಕೊಂಕ್ – ಕೆನರಾ ಕ್ರಿಸ್ತಾಂವಾಂಚೆರ್, ಪ್ರತ್ಯೇಕ್ ಜಾವ್ನ್ ಕುರಿಯೆಲಾಂತ್ ಕಠಿಣ್ ಕ್ರಮ್ ಘೆಂವ್ಕ್ ಟಿಪ್ಪು ಸುಲ್ತಾನ್ ‘ನಿಬಾಕ್ ಏಕ್ ನಿವ್ಣೆಂ’ ಸೊಧ್ತಾ ಮ್ಹಳ್ಳೆಂ ಮ್ಹಾಕಾ ಸ್ಪಷ್ಟ್ ಜಾಲಾಂ.”

“ಸಾಯ್ಬಾ?”

“ವ್ಹಯ್. ತಾಚ್ಯಾ ಆಯ್ಚ್ಯಾ ಉಲೊಣ್ಯಾ ವರ್ವಿಂ ಮ್ಹಾಕಾ ತೆಂ ಸ್ಪಷ್ಟ್ ಜಾಲಾಂ. ದೆಕುನ್ ತುಮಿ ಆಮ್ಚ್ಯಾ ಠೊಲಿಯೆಂತ್ಲ್ಯಾಂನಿ ಚಡ್ ಚತ್ರಾಯೆನ್ ಆಸಜಾಯ್… ಹಾಂಗಾ ಥಾವ್ನ್ ಚುಕವ್ನ್ ಪೊಳಾಪಳ್ ಘೆಂವ್ಚ್ಯಾ ಕೈದ್ಯಾಂಕ್ ಖಂಯ್ಚ್ಯಾಯ್ ಥರಾನ್ ಆಮಿ ಮಜತ್ ದಿತಾಂವ್ ಮ್ಹಳ್ಳೆಂ ಕಳನಾಯೆ – ವಣದಿಂಕ್ ಕಾನ್ ಆಸಾತ್ ಆನಿ ಕಾಳೊಕಾಕ್ ದೊಳೆ ಆಸಾತ್ ಮ್ಹಳ್ಳೆಂ ಸಕ್ಡಾಂಕ್‍ಯೀ ಸಾಂಗೊನ್ ಮ್ಹಜಿ ಹಿ ಜಾಗ್ವಣ್ ದೀ.”

“ಜಾಯ್ತ್ ಸರ್ದಾರಾ.”

“ಪ್ರತ್ಯೇಕ್ ಜಾವ್ನ್ ಆತಾಂ ಮ್ಹಜೆರ್ ಬಂದಡ್ ಆಯ್ಲ್ಯಾ, ಆನಿ ಆಮ್ಚ್ಯಾ ಕುರಿಯೆಲಾಂತ್ಲ್ಯಾ ಕೊಣಾಯ್ಚೆರ್ ಅನ್ವಾರ್ ಆಯ್ಲ್ಯಾರ್ ಕಾಂಯ್ ಮಜತ್ ಪ್ರತ್ಯಕ್ಷ್ ಜಾವ್ನ್ ದೀಂವ್ಕ್ ಜಾಯ್ನಾತ್‍ಲ್ಲೆಪರಿಂ ಮ್ಹಾಕಾ ಭೊಗ್ತಾ – ಟಿಪ್ಪು ಸುಲ್ತಾನಾನ್ ಮ್ಹಜೆ ಹಾತ್ ಬಾಂಧ್ಲ್ಯಾತ್…”

“ಸರ್ದಾರಾ!” ಅಂತುಲೊ ಆಕಾಂತ್ಲೊ.

“ಪರ್ವಾ ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಆಮಿ ಕರುಂಕ್ ಚಿಂತ್‍ಲ್ಲೆಂ ಕರ್ತೆಲ್ಯಾಂವ್ ಮ್ಹಳ್ಳೆಂ ಖಂಡಿತ್. ದೆಕುನ್ ತುಮಿ ಚಡ್ ಚತ್ರಾಯೆನ್ ಆಸಜಾಯ್, ಆನಿ ಹಾಂವೆಂ ಅಪೇಕ್ಷಿಲ್ಲೆಂ ಕಿತೆಂಯೀ, ಕಶೆಂಯೀ ಪೊಂತಾಕ್ ಪಾವಯ್ಜಾಯ್.”

“ಸರ್ದಾರ್ ಸಾಯ್ಬಾ, ತುಜ್ಯಾ ಸೆವೆಂತ್ ಎದೊಳ್ ಆಮಿ ಸಲ್ವೊಂಕ್ ನಾಂವ್, ಆನಿ ಆಮ್ಚೊ ಜೀವ್ ಆಸ್ಲ್ಯಾರ್ ಫುಡೆಂಯೀ ಸಲ್ವೊಂಚೆ ನಾಂವ್.”

“ಜೀವ್ ಗೆಲ್ಯಾರೀ, ಆಮ್ಚೆಂ ಧರ್‌ಲ್ಲೆಂ ಕಾಮ್ ಸಲ್ವನಾಯೆ – ಏಕ್ ಜೀವ್ ಗೆಲ್ಯಾರ್ ಆನ್ಯೇಕ್ಲ್ಯಾನ್ ತೆಂ ಕಾಮ್ ಜಾರಿ ಕರಿಜಾಯ್!”

“ಖಂಡಿತ್ ಸಾಯ್ಬಾ!” ಅಂತುಲೊ ಪಿಂರ್ಗಲೊ.

ಕಿತ್ಲೊ ಅಪಾಯ್ ಆಸ್ಲ್ಯಾರೀ, ಆನಿ ಕೆದೆಂ ವ್ಹಡ್ಲೆಂ ಸಾಹಸ್ ಜಾಲ್ಯಾರೀ, ಸರ್ದಾರ್ ಸಿಮಾಂವ್ ಪಯ್ಲೆಂ ಇತ್ಲ್ಯಾ ಲಾಂಬಾಯೆಚಿ ಜಾಗ್ವಣ್ ದೀನಾತ್‍ಲ್ಲೊ. ಆಜ್ ತಾಣೆಂ ತಶೆಂ ಕೆಲ್ಲೆಂ ಪಳೆವ್ನ್, ನಿಜಾಯ್ಕೀ, ಫುಡೆಂ ಕಿತೆಂ ಪುಣೀ ಭಿರಾಂಕುಳ್ ಘಡೊಂಕ್ ಆಸಾ ಮ್ಹಣ್ ಅಂತುಲೊ ಪಡ್ವಳಾಕ್‍ಯೀ ಭೊಗ್ಲೆಂ.

“ತರ್ ಆತಾಂ ಕಾಮಾಕ್ ಲಾಗ್ಯಾಂ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಮ್ಹಜ್ಯಾ ಕುಡಾ ಭಾಯ್ಲ್ಯಾನ್ ಜೆಮೆದಾರ್ ಚೆನ್ನಪ್ಪ ಆನಿ ಲೊರೆಸ್ ನಾಯ್ಕ್ ರಾಕ್ವಲಿ ಜಾವ್ನ್ ಬಸೊಂದಿತ್. ಮ್ಹಾಕಾ ಆತಾಂ ಏಕ್ ದೋನ್ ಜರೂರ್ ವರ್ದ್ಯೊ ತಯಾರ್ ಕರುಂಕ್ ಆಸಾತ್. ಪಯ್ಲೆಂ ಹಿಶಾರೊ ದಿಲ್ಯಾ ಶಿವಾಯ್ ಕೊಣೆಂಚ್ ಭಿತರ್ ಪ್ರವೇಶ್ ಜಾಂವ್ಕ್ ನಜೊ.”

“ಜಾಯ್ತ್ ಸರ್ದಾರಾ, ಆನಿ ಹಾಂವೆಂ ಕಿತೆಂ ಕರಿಜಾಯ್?”

“ಫಾಲ್ಯಾಂ ವಾ ಪೊರ್ವಾಂ ಭಿತರ್, ಆಮ್ಚೆ ಚವ್ಗ್ ಜಣ್ ಸವಾರ್ ಬಾದಶಹಾಚ್ಯಾ ಹುಕ್ಮೆ ಪ್ರಕಾರ್ ಕುರಿಯೆಲಾಕ್ ವಚೊಂಕ್ ಆಸಾತ್. ತ್ಯಾ ಆದಿಂಚ್, ಆಪ್ಲಿ ಹುಕುಮ್ ದೀವ್ನ್, ಟಿಪ್ಪು ಸುಲ್ತಾನ್‍ಂಚ್ ಆಪ್ಲ್ಯಾ ತಾರ್ ಸವಾರಾಂಕ್ ಕುರಿಯೆಲಾಕ್ ಧಾಡಿಸೊ ನಾ ಮ್ಹಣ್ ಪಾತ್ಯೆಯಾಂ. ಪುಣ್ ಆಮ್ಚ್ಯಾ ಸವಾರಾಂ ಕಡೆನ್ ಮ್ಹಾಕಾ ಧಾಡ್ನ್ ದೀಂವ್ಕ್ ಆಸ್‍ಲ್ಲಿಂ ಪತ್ರಾಂ, ಕಿತ್ಲೆಂ ತಪಾಸ್ಲ್ಯಾರೀ ಹೆರಾಂಚ್ಯಾ ಹಾತಾಂಕ್ ಮೆಳನಾಯೆ. ತ್ಯಾ ಖಾತಿರ್, ಆಮ್ಚ್ಯಾ ಚತುರ್ ಚವ್ಗಾಂ ಸವಾರಾಂಕ್ ತಯಾರ್ ಕರ್.”

“ಹಾಂವೆಂಚ್ ವಚಜಾಯ್‍ವೇ ಧನಿಯಾ?”

“ತುವೆಂ ವೆಚೆಂ ನಾಕಾ, ತುಜಿ ಹಾಂಗಾ ಗರ್ಜ್ ಆಸಾ. ತ್ಯಾ ಶಿವಾಯ್ ಕುರಿಯೆಲಾಕ್ ಧಾಡ್ಚ್ಯಾ ಸವಾರಾಂಕ್ ಬಾಯ್ಲ್ ಭುರ್ಗಿಂ ಆಸನಾಯೆ.”

“ಹಾಂ..?” ಅಂತುಲೊ ಘಾಬರ್ಲೊ.

“ತೆಂ ಉಪ್ರಾಂತ್ ಸಾಂಗ್ತಾಂ” ಸರ್ದಾರ್ ಹಾಸ್ಲೊ. “ಆತಾಂ ವಚ್. ಆನಿ, ತ್ಯಾ ಸವಾರಾಂನಿ, ಹೆರಾಂಕ್ ಕಳನಾತ್‍ಲ್ಲೆಪರಿಂ ಪತ್ರಾಂ ವ್ಹರುಂಕ್ ಫಾವೊ ತಿ ತಯಾರಾಯ್ ಕರ್ – ಪುಣ್ ಚತ್ರಾಯ್!”

“ಜರೂರ್ ಧನಿಯಾ, ಸರ್ದಾರ್ ಸಾಯ್ಬಾ!” ಮ್ಹಣೊನ್ ಜೆಮೆದಾರ್ ಅಂತುಲೊ ಪಡ್ವಳ್ ಭಾಯ್ರ್ ಸರ್ಲೊ. ತಾಚ್ಯಾ ಚಿಂತ್ನಾಂನಿಯೀ ವಾದಾಳ್ ಉಟ್‍ಲ್ಲೆಂ. ಕುರಿಯೆಲಾಕ್ ಧಾಡ್ಚ್ಯಾ ಸವಾರಾಂಕ್ ಬಾಯ್ಲ್ ಭುರ್ಗಿಂ ಆಸನಾಯೆ ಮ್ಹಣ್ ಸರ್ದಾರ್ ಸಿಮಾಂವ್ನ್ ಕಿತ್ಯಾಕ್ ಸಾಂಗ್ಲೆಂ ಮ್ಹಳ್ಳೆಂ ಸವಾಲ್ ತಾಚ್ಯಾ ಮತಿಂತ್ ಕಾಂತಂವ್ಕ್ ಲಾಗ್ಲೆಂ. ಬಹುಶಃ ತೆ ಸವಾರ್ ಪಾಟಿಂ ಯೆಂವ್ಚೆ ನಾಂತ್ – ಮೊರ್ನಾಕ್ ಸಾಂಪಡ್ತೆಲೆ ಮ್ಹಳ್ಳೊ ಅರ್ಥ್ ಜಾವ್ಯೆತ್ ಮ್ಹಣ್ ಚಿಂತುನ್ ತಾಕಾ ಭಿರಾಂತ್ ದಿಸ್ಲಿ.

ಕೋಣ್ ಜಾಣಾಂ ಸರ್ದಾರ್ ಸಿಮಾಂವ್ಚ್ಯಾ ವಿಚಿತ್ರ್ ಮಾಂಡಾವಳಿಂಚಿ ಗುಂಡಾಯ್?

ಸರ್ದಾರ್ ಸಿಮಾಂವ್ ಆಪ್ಲ್ಯಾ ಕುಡಾಂತ್ ಬಸೊನ್ ಬರಂವ್ಕ್ ಲಾಗ್ಲೊ. ಕೊಣೆಂಯೀ ವಿಚಾರ್ಲ್ಯಾರ್ ಆಪುಣ್ ಭಲಾಯ್ಕಿ ಚಿಕ್ಕೆ ಘುಸ್ಪಡೊನ್ ತಕ್ಲಿ ಫಡ್ತಾ ದೆಕುನ್ ವಿಶೆವ್ ಘೆತಾಂ ಮ್ಹಣ್ ಸಾಂಗಜಾಯ್ ಮ್ಹಣ್ ಆಪ್ಲ್ಯಾ ರಾಕ್ವಲ್ಯಾಂಕ್ ತಾಣೆಂ ತಾಕಿದ್ ದಿಲಿ.

ನಿಜಾಯ್ಕೀ ಕಿತೆಂ ಬರಂವ್ಚೆಂ ಮ್ಹಣ್ ತಾಕಾ ಸಾರ್ಕೆಂ ಕಳಿತ್ ನಾತ್‍ಲ್ಲೆಂ. ಟಿಪ್ಪು ಸುಲ್ತಾನಾಚ್ಯಾ ಮತಿಂತ್ ಕಿತೆಂ ಆಸಾ ಮ್ಹಣ್ ತೊ ನೆಣಾಂಸ್‍ಲ್ಲೊ. ದುಸ್ರ್ಯಾ ದಿಸಾಚಿ ಭೆಟ್ ಜಾಲ್ಯಾ ಉಪ್ರಾಂತ್ ಬರವ್ಯೆತೆಂ, ಪುಣ್ ಸವಾರಾಂನಿ ತಕ್ಷಣಾ ಭಾಯ್ರ್ ಸರಜಾಯ್ ಮ್ಹಣ್ ಟಿಪ್ಪು ಫರ್ಮಾಯ್ತ್ ಜಾಲ್ಯಾರ್ ವರ್ದಿ ಲಿಖುಂಕ್ ವೇಳ್ ಮೆಳಾಸೊ ನಾ.

ಅಶೆಂ ಚಿಂತುನ್, ತೆದೊಳ್ ಪರ್ಯಾಂತ್ ತಾಕಾ ಕಳಿತ್ ಜಾಲ್ಲ್ಯಾ ಅಪಾಯಾಚ್ಯಾ ಸೂಚನಾಂಚೊ ಹಿಸೊ ದೀವ್ನ್, ಸದ್ದ್ಯಾಕ್ ಕಿತೆಂ ಕರಿಜಾಯ್ ಮ್ಹಳ್ಳೊ ವಿವರ್ ಸಾಂಗೊನ್ ತಾಣೆಂ ವರ್ದಿ ಲಿಖ್ಲಿ. ತಿ ಬರವ್ನ್ ಆಖೇರ್ ಕರುಂಕ್ ತಾಣೆಂ ಚಿಂತ್‍ಲ್ಲ್ಯಾ ಪ್ರಾಸ್ ಇಲ್ಲೊ ಚಡ್‍ಚ್ ವೇಳ್ ತಾಕಾ ಲಾಗ್ಲೊ.

ಉಪ್ರಾಂತ್ ತಾಣೆಂ ತಿ ಕೊವ್ಳುನ್, ರಶೀಮಾಂತ್ ರೆವ್ಡಾವ್ನ್ ಆಪ್ಲ್ಯಾಚ್ ಆಂಗಾರ್ ದವರ್ಲಿ – ಹೆರ್ ಖಂಯೀ ತಿ ಸೊಡುಂಕ್ ತಾಕಾ ಧಯ್ರ್ ನಾತ್‍ಲ್ಲೆಂ.

ಕಾಳೊಕ್ ಜಾಲ್ಯಾ ಉಪ್ರಾಂತ್ ಅಂತುಲೊ ಪಡ್ವಳ್ ಆಯ್ಲೊ.

“ಸಾಂಗ್‍ಲ್ಲೆಂ ಕಾಮ್ ಸಗ್ಳೆಂ ಕರ್ನ್ ಆಯ್ಲೊಯ್?”

“ವ್ಹಯ್ ಧನ್ಯಾ.”

“ವರ್ದಿ ವ್ಹರುಂಕ್ ಗುಪಿತ್ ತಯಾರಾಯ್..?”

“ಅಶಿ ಕೆಲ್ಯಾ” ಮ್ಹಣೊನ್, ಅಂತುಲ್ಯಾನ್ ಚಿಕ್ಕೆ ಪಾಟಿಂ ಫುಡೆಂ ಪಳೆವ್ನ್ ಆಪ್ಲ್ಯಾ ಪೆಂಕ್ಡಾಚಿ ಭಾಲ್ ಕಾಡ್ನ್ ಸರ್ದಾರಾಚ್ಯಾ ಹಾತಾಂತ್ ದಿಲಿ.

ಸರ್ದಾರಾನ್ ತಿ ಭಾಲ್ ಘೆವ್ನ್ ಪರೀಕ್ಷಾ ಕೆಲಿ. ತವಳ್ ಶಿಪಾಯಾಂನಿ ಉಪಯೋಗ್ ಕರ್ಚಿ ಸಾಧಿ ಭಾಲ್ ತಿ. ಮೂಟ್ ಆನಿ ಧಾರ್ ಮೆಳೊನ್ ಚಡುಣೆಂ ದೇಡ್ ಗೇಣ್ ತಿಚಿ ಲಾಂಬಾಯ್. ಸರ್ದಾರ್ ಸಿಮಾಂವ್ ಚಿಕ್ಕೆ ಅಮ್ರುಕೊ ಹಾಸ್ಲೊ. ಧಾರ್ ದಾವ್ಯಾ ಹಾತಾಚ್ಯಾ ಬೊಟಾಂನಿ ಧರ್ನ್ ಮೂಟ್ ಘುಂವ್ಡಾವ್ನ್ ಥೊರುಂ ತಾಣೆಂ ನಿಕ್ಳಾಯ್ಲೆಂ. ಘುಂವ್ಣ್ಯಾ ಸಕಯ್ಲ್ ಥೊರುಂ ಪೊಕೊಳ್ ಜಾವ್ನಾಸ್‍ಲ್ಲೆಂ!

“ಜಾವ್ಯೆತ್” ಸರ್ದಾರಾನ್ ಸಮಾಧಾನ್ ಉಚಾರ್ಲೆಂ.

ಆಪ್ಲ್ಯಾ ಕಮರ್‌ಬಾಂಧಾಂತ್ಲಿ ಕೊವ್ಳಿ ತಾಣೆಂ ಕಾಡ್ಲಿ ಆನಿ ತ್ಯಾ ಥೊರ್ವಾಂತ್ ರಿಗವ್ನ್, ಸುರಿ ಘುಂವ್ಡಾವ್ನ್ ಪಯ್ಲೆಂಚೆಪರಿಂಚ್ ಭಾಲ್ ಸಾರ್ಕಿ ಕೆಲಿ.

“ಕುರಿಯೆಲಾಕ್ ವಚೊಂಕ್ ಕೊಣಾಕ್ ವಿಂಚುನ್ ಕಾಡ್ಲ್ಯಾಯ್?”

“ನಾಯ್ಕ್ ಲೊರೆಸ್, ನಾಯ್ಕ್ ಚಂದು, ನಾಯ್ಕ್ ಅಂಗರ ಆನಿ ನಾಯ್ಕ್ ಅಬ್ಬಾಸಾಕ್ ವಿಂಚುನ್ ಕಾಡ್ಲ್ಯಾತ್.”

“ಬರೆಂಚ್; ಹಿ ಭಾಲ್ ನಾಯ್ಕ್ ಲೊರೆಸಾ ಕಡೆನ್ ದೀ. ಆನಿ ಆಜ್ ರಾತಿಂ ಹಾಂಗಾ ರಾಕ್ವಲ್ ಕರ್ಚ್ಯಾ ನಿಬಾನ್ ತಾಕಾ ಹಾಂಗಾ ಯೇಂವ್ಕ್ ಫರ್ಮಾಯ್.”

“ಜಾಯ್ತ್ ಸಾಯ್ಬಾ” ಮ್ಹಣೊನ್ ಅಂತುಲೊ ಭಾಯ್ರ್ ಗೆಲೊ.

ರಾತಿಚೆಂ ಜೆವಣ್ ಜಾಲ್ಯಾ ಉಪ್ರಾಂತ್ ನಾಯ್ಕ್ ಲೊರೆಸ್ ಆಯ್ಲೊ. ವೀಸ್ ಬಾವೀಸ್ ವರ್ಸಾಂಚೊ ಘಟ್‍ಮೂಟ್ ಮಾನಾಯ್ ತೊ, ಧಯ್ರಾಧಿಕ್‍ಯೀ ತಸೊಚ್.

“ಆತಾಂ ಚತ್ರಾಯೆನ್ ಆಯ್ಕ್; ಫಾಲ್ಯಾಂ ತುಮ್ಚೆ ಕಡೆನ್ ಉಲಂವ್ಕ್ ಮ್ಹಾಕಾ ಸಂದ್ರಾಪ್ ಮೆಳತ್ ಮ್ಹಣೊಂಕ್ ಜಾಯ್ನಾ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಕುರಿಯೆಲಾಂತ್ಲ್ಯಾ ಬೋಳೂರ್ಚ್ಯಾ ಜಯ್ಲಾಂತ್ ಆತಾಂ ಕೈದಿ ಜಾವ್ನಾಸ್‍ಲ್ಲ್ಯಾ ತೊಪಾಸಿ ದಾಲ್ಮೇದಾಕ್ ಹಾಂಗಾಸರ್ ಹಾಡುಂಕ್ ಬಾದಶಹಾಚ್ಯಾ ಹುಕ್ಮೆ ಸಮೇತ್ ತುಮ್ಕಾಂ ಧಾಡ್ತಾಂವ್. ಥಂಯ್ ಥಾವ್ನ್ ಪಾಟಿಂ ಯೆತಾನಾ ತುಮ್ಚೆ ಸಾಂಗಾತಾ ಬೋಳೂರ್ ಠಾಣ್ಯಾಂತ್ಲೆ ಚವ್ಗ್ ಜಣ್ ಶಿಪಾಯ್ ಆಸ್ತೆಲೆ. ಸಮ್ಜಲೆಂ?”

“ವ್ಹಯ್ ಸಾಯ್ಬಾ!”

“ಪಾಟಿಂ ಯೆತಾನಾ ತುಮ್ಕಾಂ ಭೋವ್ ಕಷ್ಟ್ ಆಸೊಂಕ್ ಪುರೊ ಮ್ಹಳ್ಳೆಂ ಉಡಾಸ್ ದವರ್.”

“ಜಾಯ್ತ್ ಸಾಯ್ಬಾ. ಪುಣ್ ಕಸಲ್ಯಾ ಕಷ್ಟಾಂಕ್ ಜಾಲ್ಯಾರೀ ಆಮಿ ಭಿಯೆನಾಂವ್.”

“ತೆಂ ಹಾಂವ್ ಜಾಣಾಂ. ಆತಾಂ ಆಯ್ಕ್, ತುಮಿ ಪಾಟಿಂ ಯೆತಾನಾ ವಾಟೆರ್ ಏಕ್ ಅವ್ಗಡ್ ಘಡೊಂಕ್ ಪುರೊ.”

“ಅವ್ಗಡ್? ವ್ಹಯ್. ಆಯ್ಕಲೆಂ – ಪುಣ್…”

“ಮಧೆಂ ಉಲಯ್ನಾಕಾ ಆಯ್ಕ್! ತಶೆಂ ಅವ್ಗಡ್ ಘಡೊನ್ ತೊ ಕೈದಿ ತುಮ್ಚ್ಯಾ ಹಾತಾಂತ್ಲೊ ಚುಕತ್ ಜಾಲ್ಯಾರ್ ತುಮಿ ಹಾಂಗಾ ಪಾಟಿಂ ಆಯ್ಲ್ಯಾರ್ ತುಮ್ಕಾಂ ವಾಂಚ್ ಆಸಾಶಿ ನಾ – ದೆಕುನ್ ತುಮಿ ಪಾಟಿಂ ಯೇಂವ್ಕ್ ನಜೊ.”

“ಧನ್ಯಾ!”

“ವ್ಹಯ್ – ತುಮಿ ತೆಗಾಂನಿ ಮಾತ್ರ್. ನಾಯ್ಕ್ ಅಬ್ಬಾಸಾಕ್ ಹಿ ಖಬರ್ ಸಾಂಗನಾಕಾತ್. ತುಮ್ಚ್ಯಾ ಮೊರ್ನಾಚಿ ಖಬರ್ ಘೆವ್ನ್ ತೊ ಪಾಟಿಂ ಯೇಂವ್ದಿ. ತುಮ್ಚ್ಯಾ ಫುಡಾರಾಚಿ ಫಾವೊ ತಿ ಬಂದೋಬಸ್ತ್ ಹಾಂವ್ ಕರಯ್ತಾಂ. ಪುಣ್ ಹಾಂವೆಂ ಕಳಯ್ತಾ ಪರ್ಯಾಂತ್ ತುಮಿ ತಕ್ಲಿ ಚುಕವ್ನ್ – ಸಾಧ್ಯ್ ಜಾಲ್ಯಾರ್ ಸುಲ್ತಾನಾಚ್ಯಾ ರಾಜಾ ಭಾಯ್ರ್ ರಾವಜಾಯ್.”

ನಾಯ್ಕ್ ಲೊರೆಸ್ ಘಾಬರ್ಲೊ!

“ತುಜಿ ಸೆವಾ ಚಾಕ್ರಿ ಸೊಡ್ನ್ ಧನ್ಯಾ…” ಮ್ಹಣಾಲೊ ತೊ.

“ತುಮಿ ಹಾಂವೆಂ ಸಾಂಗ್‍ಲ್ಲೆಪರಿಂಚ್ ಚಲ್ಲ್ಯಾರ್, ತಿಯೀ ತುಮಿ ಕರ್ಚಿ ಮ್ಹಜಿಚ್ ಸೆವಾ ಚಾಕ್ರಿ ಮ್ಹಳ್ಳೆಂ ಉಡಾಸ್ ದವರಾ” ಮ್ಹಣಾಲೊ ಸರ್ದಾರ್ ಸಿಮಾಂವ್, ಚಿಕ್ಕೆ ಮೊವಾಳಾಯೆನ್.

“ಸಮ್ಜಲೆಂ ಧನ್ಯಾ” ಮ್ಹಣಾಲೊ ನಾಯ್ಕ್ ಲೊರೆಸ್. ಕಿತೆಂಗೀ ಗುಂಡಾಯ್ ಆಸಾ ಆನಿ ಸಾಹಸ್ ಆಸಾ ಜಾಯ್ಜಾಯ್ ಮ್ಹಣ್ ತಾಚ್ಯಾ ಮತಿಂತ್ ಗೆಲೆಂ. ಸರ್ದಾರ್ ಸಿಮಾಂವ್ ಖಾಲ್, ತಶೆಂಚ್ ತಾಚ್ಯಾ ಉತ್ರಾಂ ಖಾಲ್ ಕಸಲೆಂಚ್ ವಾಯ್ಟ್ ಘಡಶೆಂ ನಾ ಮ್ಹಳ್ಳಿ ದೃಢ್ ಪಾತ್ಯೆಣಿ ತಾಕಾ ಆಸ್‍ಲ್ಲಿ.

“ಆಬ್ಳೆ, ಹಿ ಭಾಲ್ ಚಿಕ್ಕೆ ಚತ್ರಾಯೆನ್ ಸಾಂಬಾಳ್” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಹಾಂತುಂ ಏಕ್ ಕೊವ್ಳಿ ಆಸಾ. ತುಮಿ ಬಂಟ್ವಾಳ್ ಪಾವ್ತಚ್ – ಜೋಡು ಮಾರ್ಗ ಠಾಣ್ಯಾದಾರಾಕ್ ತುಂ ವಳ್ಕತಾಯ್…”

“ವ್ಹಯ್, ತೊ ಆಮ್ಚೊ ದೇಜಪ್ಪ ಸೆಟ್ಟಿ.”

“ತೊಚ್, ತಾಚೆ ಕಡೆನ್ ಘುಟಾನ್ ತುವೆಂ ಹಿ ವರ್ದಿ ದೀಜಾಯ್, ಆನಿ ಘುಟಾನ್ ತಿ ರಫಾಯೆಲ್ ಮಿಂಗೆಲ್ ಕಾಮ್ತಿಗೆರ್ ಪಾವಯ್ಜಾಯ್ ಮ್ಹಣ್ ಹಾಂವೆಂ ಉಪ್ಕಾರ್ ಮಾಗ್ಲಾ ಮ್ಹಣ್ ಸಾಂಗಜಾಯ್.”

“ಸಮ್ಜಲೆಂ ಧನ್ಯಾ – ಜಾಯ್ತ್ ಧನ್ಯಾ.”

“ಚಿಕ್ಕೆ ರಾವ್” ಮ್ಹಣಾಲೊ ಸರ್ದಾರ್, ಚಿಂತುನ್.

ಹಾತಾಂತ್ಲಿ ಭಾಲ್ ತಾಣೆಂ ನಿಕ್ಳಾಯ್ಲಿ ಆನಿ ಭಿತರ್ಲಿ ವರ್ದಿ ಭಾಯ್ರ್ ಕಾಡ್ನ್ ಭಾಲ್ಯೆಚ್ಯಾ ಪೊಂತಾನ್ ತಿ ಉಗ್ತಿ ಕರ್ನ್ ಸೊಡಯ್ಲಿ.

“ಚಿಕ್ಕೆ ಭಾಯ್ರ್ ಜಾಗ್ರುತ್ ರಾವ್” ಮ್ಹಣೊನ್ ಲೊರೆಸಾಕ್ ತಾಣೆಂ ತಾಕಿದ್ ದಿಲಿ. ಮೆಜಾ ಕಡೆನ್ ವಚೊನ್ ಪಾಕಾಚಿ ಲಿಖ್ಣಿ ಘೆವ್ನ್, ತ್ಯಾ ವರ್ದೆಂತ್ ಸಕಯ್ಲ್ ಥೊಡ್ಯೊ ಫಂಗ್ತಿ ತಾಣೆಂ ಬರಯ್ಲ್ಯೊ. ತೀಂತ್ ಸುಕವ್ನ್, ಪಯ್ಲೆಂಚೆಪರಿಂಚ್ ತಿ ಕೊವ್ಳುನ್ ತಾಣೆಂ ಫಿಚಾರ್ ಕೆಲಿ ಆನಿ ಭಾಲ್ಯೆಚ್ಯಾ ಥೊರ್ವಾಂತ್ ದವರ್ಲಿ, ಆನಿ ಲೊರೆಸಾಕ್ ಭಿತರ್ ಆಪಯ್ಲೊ.

“ಧರ್, ಹಿ ಭಾಲ್ ತುಜ್ಯಾ ತಾಬೆನ್ ಘೆ” ಮ್ಹಳೆಂ ತಾಣೆಂ. “ಹಾಂವೆಂ ಸಾಂಗ್‍ಲ್ಲೆಂ ಬರೆಂ ಉಗ್ಡಾಸ್ ದವರ್ – ಕೊತ್ವಾಲ್ ದೇಜಪ್ಪ ಕಡೆನ್ ತಿ ಪಾವಾಸರ್, ತುಜೊಚ್ ಜೀವ್ ಮ್ಹಳ್ಳೆಪರಿಂ ತಿ ಸಾಂಬಾಳ್.

“ಜರೂರ್, ಸರ್ದಾರ್ ಸಾಯ್ಬಾ!”

“ದೇವ್ ಆಮ್ಕಾಂ ರಾಕೊಂದಿ” ಮ್ಹಣಾಲೊ ಸರ್ದಾರ್ ಸಿಮಾಂವ್. “ಆತಾಂ ವಿಶೆವ್ ಘೆ. ಸಕಾಳಿಂ ಗೆಣ್ತೆಚಿ ಢಾಲ್ ವ್ಹಾಜ್ತಾನಾ ಗೆಲ್ಯಾರ್ ಜಾಲೆಂ. ಹಾಂವೆಂ ಸಾಂಗ್‍ಲ್ಲಿ ಖಬರ್ ಆನಿ ದಿಲ್ಲಿ ಜಾಗ್ವಣ್, ಸಂದ್ರಾಪ್ ಪಳೆವ್ನ್ ನಾಯ್ಕ್ ಚಂದು ಆನಿ ನಾಯ್ಕ್ ಅಂಗರಾಕ್ ಮಾತ್ರ್ ಸಾಂಗ್. ಜಾಂವ್ಕ್, ನಾಯ್ಕ್ ಅಬ್ಬಾಸ್‍ಯೀ ಬರೊ ಆನಿ ಪಾತ್ಯೆಣೆಚೊ ಶಿಪಾಯ್. ಪುಣ್ ಅಸಲ್ಯಾ ವೆಳಾರ್ ಕಿತ್ಲಿ ಚತ್ರಾಯ್ ಘೆತ್ಲ್ಯಾರೀ ಪಾವನಾ.”

ಉಪ್ರಾಂತ್ ತಾಣಿಂ ವಿಶೆವ್ ಘೆತ್ಲೊ.

ಫುಡ್ಲ್ಯಾ ಘಡಿತಾಂ ವರ್ವಿಂ, ನಾಯ್ಕ್ ಲೊರೆಸಾನ್ ಶಿರಿಂಗಪಟ್ಟಣಾಂತ್ ವಿಶೆವ್ ಘೆಂವ್ಚಿ ನಿಮಾಣಿ ರಾತ್ ತಿ ಜಾಂವ್ಕ್ ಪಾವ್ಲಿ.

ದುಸ್ರ್ಯಾ ದಿಸಾ ಸಕಾಳಿಂ ಸರ್ದಾರ್ ಸಿಮಾಂವ್, ಬಾದಶಹಾಚ್ಯಾ ಭೆಟೆಕ್ ವೆಚ್ಯಾ ಆದಿಂ ದುಸ್ರಿ ಏಕ್ ಲ್ಹಾನ್ ವರ್ದಿ ಲಿಖುನ್, ತಶಿಚ್ ತಿ ದೊಡುನ್, ಮೆಜಾರ್ ತಿಂತೆರಾ ಪಂದಾಕ್ ದವರ್ನ್ ಗೆಲೊ.

ರಾವ್ಳೆರಾಕ್ ಪಾವ್ತಚ್, ಕೊಣಾಯ್ಚಿ ಅಡ್ಕಳ್ ನಾಸ್ತಾಂ ಭಿತರ್ ತೊ ಗೆಲೊ. ಟಿಪ್ಪು ಸುಲ್ತಾನ್ ತಾಕಾ ರಾಕೊನ್ ರಾವ್‍ಲ್ಲೊ.

“ಕುರಿಯೆಲಾಕ್ ಧಾಡುಂಕ್ ಆಮಿ ಫರ್ಮಾಣ್ ತಯಾರ್ ಕೆಲಾಂ” ಮ್ಹಣಾಲೊ ತೊ, ಸರ್ದಾರ್ ಸಿಮಾಂವ್ಚೆಂ ವಂದನ್ ಜಾತಚ್. “ಆಮ್ಚೆ – ತುಜೆ ಸವಾರ್, ಆಜ್‍ಚ್ ಭಾಯ್ರ್ ಸರೊಂದಿತ್. ತುಜೊ ಜೆಮೆದಾರ್?”

“ಭಾಯ್ರ್ ಆಸಾ ಹುಜೂರ್.”

ತಾಕಾ ಭಿತರ್ ಆಪಂವ್ಚ್ಯಾ ಖಾತಿರ್ ಟಿಪ್ಪುನ್ ಎಕಾ ರಾಕ್ವಲ್ಯಾಕ್ ಧಾಡ್ಲೊ.

ಥೊಡ್ಯಾಚ್ ವೆಳಾನ್, ಕಾವ್ಜೆಲ್ಲೊ ಅಂತುಲೊ ಪಡ್ವಳ್ ಭಿತರ್ ಯೇವ್ನ್ ಪಯ್ಸ್ ಥಾವ್ನ್ ಪ್ರಣಾಮ್ ಕರಿಲಾಗ್ಲೊ.

“ಹ್ಯಾ ಜೆಮೆದಾರಾಕ್ ಧಾಡ್ನ್, ತುಜ್ಯಾ ಚವ್ಗಾ ಸವಾರಾಂಕ್ ಪಯ್ಣಾರ್ ವಚೊಂಕ್ ಸಜ್ಜ್ ಜಾವ್ನ್ ಯೇಂವ್ಕ್ ಸಾಂಗ್” ಮ್ಹಣಾಲೊ ಟಿಪ್ಪು ಸರ್ದಾರ್ ಸಿಮಾಂವ್ ಕಡೆನ್.

ಸರ್ದಾರ್ ಸಿಮಾಂವ್ನ್ ಅಂತುಲ್ಯಾ ಕಡೆನ್ ತಶೆಂಚ್ ಸಾಂಗ್ಲೆಂ.

“ಕೋಣ್ ಜಾತಿತ್ ಸರ್ದಾರಾ?” ವಿಚಾರ್ಲೆಂ ಕಣ್ಣೊಜಿ ಅಂತುಲ್ಯಾನ್.

“ಕೊಣೀ ಜಾತಿತ್. ಪುಣ್ ಹುಶಾರ್ ಆಸೊಂದಿತ್” ಮ್ಹಣಾಲೊ ಸರ್ದಾರ್ ಸಿಮಾಂವ್, ಆಸ್ಡಿ ಹಾಲಯ್ನಾಸ್ತಾಂ. ಆಪ್ಣೆಂ ಚಿಂತ್‍ಲ್ಲೆಂ ಕಾಮ್ ತಿತ್ಲ್ಯಾ ಸುಲಭಾಯೆನ್ ಜಾಲ್ಲ್ಯಾ ಖಾತಿರ್ ದೆವಾಕ್ ತಾಣೆಂ ಅರ್ಗಾಂ ದಿಲಿಂ.

“ಖಜಾಂಚಿ ಕಡ್ಚೆಂ ಪಯ್ಣಾಚೆಂ ಭಾತೆಂ ಹರ್ಶೆಂಚ್ಯಾ ಪ್ರಾಸ್, ಇಲ್ಲೆಂ ಚಡ್ ತೆ ಕಾಣ್ಗೆಂವ್ದಿತ್, ಆನಿ ಆಯ್ತೆ ಜಾವ್ನ್ ಹಾಂಗಾ ಯೇಂವ್ದಿತ್.”

ಜೆಮೆದಾರ್ ಅಂತುಲೊ ಪಡ್ವಳ್ ಪ್ರಣಾಮ್ ಕರ್ನ್ ಬಾದಶಹಾಚಿ ಹುಕುಮ್ ಪಾಳುಂಕ್ ಗೆಲೊ.

ಸರ್ದಾರ್ ಸಿಮಾಂವ್ ಆನಿ ಬಾದಶಹಾ ಥೊಡೊ ವೇಳ್ ಉಲವ್ನ್ ಬಸ್ಲೆ. ಬಂಟ್ವಾಳ್ಚಿ ವಾ ಕುರಿಯೆಲ್ಚಿ ಖಬರ್ ಕಾಂಯ್ ಯೇಂವ್ಕ್ ನಾ!

ಎಕಾ ವೊರಾ ಭಿತರ್ ಸವಾರ್ ಆಯ್ತೆ ಜಾವ್ನ್ ಆಯ್ಲೆ. ಬಾದಶಹಾನ್ ತಾಂಚಿಂ ನಾಂವಾಂ ವಿಚಾರ್ಲಿಂ. ತಾಕಾ ಸಮಾಧಾನ್ ಜಾಲೆಂ.

ಬೋಳೂರ್ಚ್ಯಾ ಖಿಲ್ಲೆದಾರಾಕ್ ದೀಂವ್ಕ್, ಮ್ಹೊರ್ ಮಾರ್‌ಲ್ಲಿ ವರ್ದಿ ತಾಂಚ್ಯಾ ಹಾತಾಂತ್ ಪಾವ್ಲಿ.

“ಹುಶಾರ್ ಕಾಮ್ ಕರಿಜಾಯ್! ವೆತಾನಾ ಜಮಲಾಬಾದ್‍ಚ್ಯಾ ವಾಟೆನ್ ವಚಾ. ಪಾಟಿಂ ಯೆತಾನಾ ಮಂಜರಾಬಾದ್‍ಚ್ಯಾ ವಾಟೆನ್ ಯೆಯಾ” ಬಾದಶಹಾನ್ ತಾಕಿದ್ ದಿಲಿ. ಸವಾರ್ ಭಾಯ್ರ್ ಸರ್ಲೆ.

ಅಶೆಂ ಎಕಾಚ್ ದಿಸಾ ದೋನ್ ವರ್ದ್ಯೊ, ಪುಣ್ ಉಳ್ಟ್ಯೊ, ಸಾಂಗಾತಾಚ್ – ಮಂಗ್ಳುರಾಕ್ ಭಾಯ್ರ್ ಸರ್ಲ್ಯೊ!

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel