ಸರ್ದಾರಾಚೆಂ ಸನ್ನಿಧಾನ್ – 3: ಖಂತಿಚೆಂ ಧಾಂಪಣ್

ಸರ್ದಾರಾಚೆಂ ಸನ್ನಿಧಾನ್: ಅಧ್ಯಾಯ್ 3
ಬರಯ್ಣಾರ್: ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)

ಪ್ರಕರಣ್ 3: ಖಂತಿಚೆಂ ಧಾಂಪಣ್

ಸರ್ದಾರ್ ಸಿಮಾಂವ್ ಆನಿ ಸರ್ದಾರ್ ಯೂಸುಫ್ ಆಲಿ ಅಶೆ ಸಿರಿಂಗಪಟ್ಟಣಾಕ್ ಪಾವೊನ್, ಪಯ್ಲೊ ವಿಚಿತ್ರ್ ಸ್ವಾಗತ್ ಅನಿ ಉಪ್ರಾಂತ್ ಬಾದಶಹಾಚೆಂ ಸಮಸ್ಯಾಭರಿತ್ ಸನ್ನಿಧಾನ್ ಲಾಭ್ಲ್ಯಾ ಉಪ್ರಾಂತ್, ತಾಚ್ಯಾ ಹುಕ್ಮೆ ಪ್ರಕಾರ್ ಫಕೀರ್ ಮಹಮ್ಮದಾಕ್ ಬಂಧಿಚ್ಯಾ ಕೊತ್ವಾಲಾ ತಾಬೆನ್ ದೀವ್ನ್, ಶಿಪಾಯಾಂಕ್ ತಾಂತಾಂಚ್ಯಾ ಗುಮ್ಮ್ಯಾಂಕ್ ಧಾಡ್ನ್, ಆಪಾಪ್ಲ್ಯಾ ಆವರಾಂಕ್ ಗೆಲೆ.

ನಿಬಾಕ್ ತಾಣಿಂ ವಿಶೆವ್ ಘೆವ್ಯೆತ್ ಮ್ಹಣ್ ಸಾಂಗ್‍ಲ್ಲೆಂ ಜಾಲ್ಯಾರೀ, ದುಸ್ರ್ಯಾ ದಿಸಾಚ್ಯಾ ವಿಶೆವಾ ಉಪ್ರಾಂತ್ ಘೊಡ್ಯಾಂಚಿ ತರ್ಬೆತಿ, ಶಿಪಾಯಾಂಚಿ ಕವಾಯತ್ ಆನಿ ಶಸ್ತ್ರಾಸ್ತ್ರಾಂಚೊ ಅಭ್ಯಾಸ್, ತಸಲ್ಯಾ ರಾಟಾವಳಿಂನಿ ತಾಣಿಂ ವೇಳ್ ಖರ್ಚಿಲೊ.

ವಿಶೆವ್ ಮ್ಹಳ್ಯಾರ್, ಟಿಪ್ಪುನ್ ಆಪವ್ನ್ ತಾಂಕಾಂ ಫರ್ಮಾಯ್ಲ್ಯಾ ಶಿವಾಯ್ ಸಿರಿಂಗಪಟ್ಟಣಾಚ್ಯಾ ಗಡಿ ಭಾಯ್ರ್ ತಾಣಿಂ ವಚೊಂಕ್ ನಜೊ ಆಸ್‍ಲ್ಲೆಂ – ತಿತ್ಲೆಂಚ್.

ಜಶೆಂ ತ್ಯಾ ವೆಳಾರ್ ಟಿಪ್ಪು ಸುಲ್ತಾನ್ ಆಪ್ಲ್ಯಾ ಫುಡ್ಲ್ಯಾ ಯೋಜನಾಂಚಿ ಮಾಂಡಾವಳ್ ಆನಿ ಪ್ರಚಲಿತ್ ವ್ಯವಸ್ಥಾ ಚಿಂತುನ್ ಆಸ್‍ಲ್ಲೊ, ತಶೆಂಚ್ ಸರ್ದಾರ್ ಸಿಮಾಂವ್ ಆನಿ ಯೂಸುಫ್ ಆಲಿಯೀ ಆಪಾಪ್ಲ್ಯಾ ಫುಡಾರಾ ವಿಷಯಿಂ ದುಬಾವ್ ಚಿಂತುನ್ ಆಸ್‍ಲ್ಲೆ.

ಸರ್ದಾರ್ ಸಿಮಾಂವ್ಕ್ ತಾಚ್ಯಾ ಜಿಣ್ಯೆಂತ್ ವೆಗಿಂಚ್ ಏಕ್ ಮಹಾನ್ ಅವ್ಗಡ್ ಘಡೊಂಕ್ ಆಸಾ ಮ್ಹಳ್ಳೆಪರಿಂ ಭೊಗ್ತಾಲೆಂ. ದಿಸ್ಪಡ್ತ್ಯಾ ರಾಟಾವಳಿಂನಿ ಆನಿ ರಾತ್ಚೆಂ ಮಾಗ್ಣ್ಯಾರ್ ಆಸ್ತಾನಾಂಯೀ ಹಿಂ ಚಿಂತ್ನಾಂ ತಾಕಾ ಧೊಸ್ತಾಲಿಂ. ಕಸಲ್ಯಾ ಸನ್ನಿವೇಶಾಕ್ ಜಾಲ್ಯಾರೀ ಭಿಯೆವ್ನ್ ತೊ ಪಾಟಿಂ ಸರತ್ ಮ್ಹಳ್ಳೆಂ ನಹಿಂ. ಪುಣ್ ಟಿಪ್ಪುಚ್ಯಾ ಹುಕ್ಮೆನ್, ಕಾಂಯ್ ಜರೂರ್ ಗರ್ಜೆಚ್ಯಾ ವೆಳಾರ್, ಕುರಿಯೆಲಾಕ್ ಪಾವನಾಸ್ತಾಂ ಪಾಟಿಂ ಉರನ್ ಮ್ಹಳ್ಳ್ಯಾ ದುಬಾವಾಚೊ ಕಿಡೊ ತಾಕಾ ಕಾಂತಯ್ತಾಲೊ.

ತಸಲೊ ದುಬಾವ್ ಸತ್ ಜಾಂವ್ಚೊ ಕಾಳ್ ಪಯ್ಸ್ ನಾತ್‍ಲ್ಲೊ.

ತೊ ಆನಿ ಯೂಸುಫ್ ಆಲಿ, ಜೆವ್ಣಾ ವೆಳಾರ್ ಆನಿ ಥೊಡೆ ಪಾವ್ಟಿಂ ಕವಾಯತೆಚ್ಯಾ ಮೈದಾನಾರ್ ಮಾತ್ರ್ ಭೆಟ್ತಾಲೆ. ತಾಣಿಂ ತ್ಯಾ ಸಂಬಂಧಿಂ ಕಾಂಯ್ ಉಲವ್ನ್ ನಿರ್ಣಯ್ ಕರುಂಕ್ ನಾತ್‍ಲ್ಲೊ ಜಾಲ್ಯಾರೀ, ಥೊಡೆ ದೀಸ್ ಪುಣಿ ಚಡ್ ಸಳಾವಳಿನ್ ಉಲಂವ್ಕ್ ನಜೊ ವಾ ಖಾಸ್ಗೆನ್ ಭೆಟೊಂಕ್ ನಜೊ – ಟಿಪ್ಪುಚೆ ಗೂಢಚಾರ್ ತಾಂಚೆರ್ ದೊಳೊ ದವರ್ನ್ ಆನಿ ಕಾನ್ ದೀವ್ನ್ ಆಸಾತ್ ಮ್ಹಣ್ ಆಪ್ಲೆಸ್ತಕಿಂ ತಾಂಕಾಂ ಭೊಗ್‍ಲ್ಲೆಂ.

ಮಾನೆಸ್ತ್ ಸಾಲ್ದೊರ್ ಪಿಂತಾನ್‍ಯೀ ಥೊಡ್ಯಾ ದಿಸಾಂಕ್ – ಆಪುಣ್ ಸಾಂಗೊನ್ ಧಾಡ್ತಾ ಪರ್ಯಾಂತ್ – ಆಪ್ಣಾಕ್ ಭೆಟ್ ದೀನಾಯೆ ಮ್ಹಣ್, ಆನಿ ಗಾಂವಾಂತ್ ಇಜಾಬೆಲ್ ತೆರೆಜ್ ಸುರಕ್ಷಿತ್ ಆಸಾ ಮ್ಹಣ್, ಸರ್ದಾರ್ ಸಿಮಾಂವ್ನ್ ತಾಕಾ ಗುಪಿತ್ ಖಬರ್ ಧಾಡ್ಲಿ.

ಹೆರಾ ವೆಳಾರ್, ಸಂದ್ರಾಪ್ ಪಳೆವ್ನ್, ಅಂತುಲ್ಯಾಕ್ ಆನಿ ಆಪ್ಲ್ಯಾ ಠೊಲಿಯೆಂತ್ಲ್ಯಾ ಭೋವ್ ಪಾತ್ಯೆಣೆಚ್ಯಾ ಎಕ್ಲ್ಯಾ ದೊಗಾಂಕ್ ಹೆಣೆಂ ತೆಣೆಂ ಧಾಡ್ನ್, ತ್ಯಾ ದಿಸಾಂನಿ, ಕೆನರಾ ಕ್ರಿಸ್ತಾಂವಾಂಚ್ಯಾ ಬಂದಡೆಚಿ ಖಬರ್, ಮ್ಹಣ್ಜೆ – ಚಾಲು ಆಸ್‍ಲ್ಲಿ ಧಮ್ಕಣಿ, ಶಿಕ್ಷಾ ಆನಿ ಖ್ಯಾಸ್ತ್ ಕಶಿ ರಾವ್ಲ್ಯಾ ಮ್ಹಣ್ ಸರ್ದಾರ್ ಸಿಮಾಂವ್ನ್ ಖಬರ್ ಘೆತ್ಲಿ.

ಪಯ್ಶಿಲ್ಯಾ ಠಾಣ್ಯಾಂನಿ ಆನಿ ಜಹಗೀರೆಂನಿ ದಗ್ದೊಣೆಚೊ ಜೋರ್ ಚಿಕ್ಕೆ ಉಣೊ ಜಾವ್ನ್ ಯೆತಾಸೊ ದಿಸ್ತಾಲೊ ಜಾಲ್ಯಾರೀ, ಸ್ವಾರ್ಥಾನ್ ಆನಿ ಅನ್ಯಾಯಾನ್ ಲೂಟ್, ಮಾರಾಂಫಾರ್ ಆನಿ ನಿತಿಚಿಂ ಖೆಳ್ಕುಳಾಂ ಜಾತಚ್ ಆಸ್‍ಲ್ಲಿಂ.

ತೆದೊಳ್ಚೆ ಭಿತರ್‌ಚ್, ಉಣ್ಯಾರ್ ವೀಸ್ ಹಜಾರ್ ಪುಣೀ ಕ್ರಿಸ್ತಾಂವ್ ದಾದ್ಲೆ, ಸ್ತ್ರೀಯೊ ಆನಿ ಬಾಳ್ಶ್ಯಾಂಚೊ ಜೀವ್ ಸಂಹಾರ್ ಜಾಲ್ಲೊ. ಥೊಡ್ಯಾ ಶೆಂಬೊರಾಂಚೊ ಪುಣೀ ಮಾನ್ ಅಪಹಾರ್ ಜಾಲ್ಲೊ.

ಮೊರ್ನಾ ವರ್ವಿಂ ವಾ ಬಂದಡೆ ವರ್ವಿಂ ವಾ ಪೊಳಾಪಳೆ ವರ್ವಿಂ ವಾರೆಸ್ದಾರ್ ನಾಸ್ತಾಂ ರಿತಿಂ ಪಡ್‍ಲ್ಲಿಂ ಕಿತ್ಲಿಶಿಂ ಕ್ರಿಸ್ತಾಂವ್ ಭುಂಯ್‍ಭಾಟಾಂ ಟಿಪ್ಪುಚ್ಯಾ ಸರ್ಕಾರಾಂತ್ಲ್ಯಾ ಹುದ್ದೆದಾರಾಂನಿ ವಾರ್ ಘಾಲ್ನ್ ವಿಕ್‍ಲ್ಲಿಂ ವಾ ‘ಪಾತ್ಯೆಣೆಚ್ಯಾ’ ದಲಾಲ್ಯಾಂಕ್ ವಾಂಟುನ್ ದಿಲ್ಲಿಂ.

ಪಟ್ಟಣಾಂತ್ ಬಂದಡೆಚೊ ಖಾರ್ ಆನಿ ಜೋರ್ ನಿವೊಂಕ್ ನಾತ್‍ಲ್ಲೊ. ‘ನಸ್ರಾನಿ’ ಲೋಕ್ ಮೊರ್ನಾಕ್ ಭಿಯೆನಾ ಆನಿ ಕಷ್ಟಾಂಕ್ ಬಾಗನಾ ಮ್ಹಳ್ಳೆಂ ಜಾಯ್ ತಶೆಂ ರುಜು ಜಾತಚ್, ಕಾತ್ ನಿಕ್ಳಾಂವ್ಚಿ, ಕಾನ್-ನಾಕ್-ವೋಂಟ್ ವಾ ಹೆರ್ ವಿಶ್ವೆ ಕಾತರ್ಚಿ ವಾ ಸ್ತ್ರೀಯಾಂಚೆರ್ ಅತ್ಯಾಚಾರ್ ಚಲಂವ್ಚೆ ತಸಲಿ ಚಿತ್ರ್‌ಹಿಂಸಾ ಭಾಯ್ಲ್ಯಾ ದೆಖಿಕ್ ತರೀ ಉಣಿಂ ಜಾಲ್ಲಿ.

ಕ್ರಿಸ್ತಾಂವಾಂಚೆಂ ಮನ್ ಬರ್‍ಯಾನ್ ವ್ಹಯ್ ಕರ್ನ್ ಘೆವ್ನ್, ತಾಂಚೆ ಥಾವ್ನ್ ಕಾಂಯ್ ತರೀ ಫಾಯ್ದೊ ಜೊಡ್ಚೆಂ ಬರೆಂ ಮ್ಹಣ್ ಟಿಪ್ಪು ಎಕಾ ವಾಟೆನ್ ಚಿಂತಾಲೊ.

ಸಬಾರ್ ಜಣಾಂಕ್, ಸಿರಿಂಗಪಟ್ಟಣಾಚ್ಯಾ ಚಿಕ್ಕೆ ಪಯ್ಸ್ ಆಸ್ಚ್ಯಾ ಭಾತಾಚ್ಯಾ, ಜಂದ್ಳ್ಯಾಚ್ಯಾ ಆನಿ ಬಟಾಟ್ಯಾಂಚ್ಯಾ ಶೆತಾಂನಿ ವಾವ್ರುಂಕ್ ಸುಫೆದಾರಾಂಚ್ಯಾ ಆನಿ ಜೆಮೆದಾರಾಂಚ್ಯಾ ಮೇಲ್ವಿಚಾರಾ ಖಾಲ್ ಆನಿ ಚಾಟಿಯಾಂ ಖಾಲ್ – ತ್ಯಾಚ್ ಖಾತಿರ್ ಹುಕುಮ್ ಮೆಳ್‍ಲ್ಲಿ.

ತ್ಯಾ ಶಿವಾಯ್ ತ್ಯಾ ಕಾಳಾಚ್ಯಾ ಪರಿಸ್ಥಿತಿ ವರ್ವಿಂ ಟಿಪ್ಪುಚ್ಯಾ ರಿಸಾಲಾಂನಿ ಚಡ್ ಶಿಪಾಯಾಂಚಿ ಗರ್ಜ್ ದಿಸ್‍ಲ್ಲ್ಯಾನ್, ಘಟ್‍ಮುಟ್ ಆಸ್ಚ್ಯಾ ಮಾನಾಯಾಂಕ್ ಲಡಾಯೆಚ್ಯಾ ವಿದ್ಯೆಂತ್ ತರ್ಬೆತಿ ದೀವ್ನ್ ತಾಂಚ್ಯೊಚ್ ಥೊಡ್ಯೊ ಕಂಪ್ಣ್ಯೊ ಘಡ್ಚಿಯೀ ಹುಕುಮ್ ಜಾಲ್ಲಿ.

ತೆದೊಳ್ ಪರ್ಯಾಂತ್ ಸಬಾರ್ ಜಣಾಂಕ್ ಜಬರ್ದಸ್ತೆನ್ ಸುಂತಾ ಕರವ್ನ್ ತಾಂಕಾಂ ದೀಕ್ಷಾ ದಿಲ್ಲಿ. ತಸಲ್ಯಾಂ ಪಯ್ಕಿ ಥೊಡೆ ಫಿಂರ್ಗಿ (ಗೊರೆ) ಆನಿ ಥೊಡೆ ಹೆರ್ ಧರ್ಮಾಂಚೆಯೀ ಆಸ್‍ಲ್ಲೆ. ಆನಿ ತಶಿ ಸುಂತಾ ಜಾವ್ನ್ ಸೈನಾಕ್ ಭರ್ತಿ ಜಾಲ್ಲ್ಯಾ ನಸ್ರಾನಿಂಚ್ಯಾ ಸ್ತ್ರೀಯಾಂಕ್ ಇಜಾ ಆಸ್ಚಿ ನಾ ಮ್ಹಣ್ ಭಾಸಾಯಿಲ್ಲೆಂ ಖಂಯ್. ಖುಶೆನ್ ಮತಾಂತರ್ ಜಾಂವ್ಕ್ ಕಬೂಲ್ ಜಾತೆಲ್ಯಾಂಕ್ ಬರೆ ಹುದ್ದೆಯೀ ಭಾಸಾಯಿಲ್ಲೆ.

ಪುಣ್ ಖಂಯ್ಚ್ಯಾ ವರ್ವಿಂಯೀ ಟಿಪ್ಪು ಸುಲ್ತಾನಾಚೆಂ ಯೋಜನ್ ಫಳಾಧಿಕ್ ಜಾಂವ್ಚಿಂ ಖುಣಾಂ ದಿಸ್ಲಿಂ ನಾಂತ್.

ಮಾನಾಯ್ ಉಪ್ರಾಟ್ಚೆ ಥೊಡೆ ಉಪ್ರಾಟ್ತಾಲೆಚ್.

ಮಾರ್‌ಫಾರ್ ಆನಿ ಮಾಡ್ತಿರ್ ಮೊರ್ನಾಂ ಜಾಂವ್ಚಿಂ ಜಾತಾಲಿಂಚ್.

ಪಟ್ಟಣಾಚ್ಯಾ ತುರಂಗಾಂನಿ ಸಬಾರ್ ಜಣ್ ಕುಸ್ತಾಲೆಚ್.

ಸಶಸ್ತ್ರ್, ಶಿಪಾಯಾಂಚೆ ಬಂದೋಬಸ್ತೆ ಖಾಲ್ ಲಾಂಬಾಯೆರ್ ಉಬಾರ್‌ಲ್ಲ್ಯಾ ತಂಬಾಂನಿ, ಸಿರ್ಸಿರೆ ತಸಲ್ಯಾ ಫೆಸ್ತ್ ಪಿಡೆಂ ಮಧೆಂ ಕಿತ್ಲೊಸೊ ಲೋಕ್ ಕಷ್ಟತಾಲೊಚ್.

ಅಸಲ್ಯಾ ಗೊಂದೊಳಾಂತ್ ಆನಿ ಭಿರಾಂಕುಳ್ ಪರಿಸ್ಥಿತಿಂತ್ ತರೀ, ದಿಸಾ ದಿಸ್ಪಡ್ತೆಂ ಎಕ್ಲೆ ದೋಗ್ ಪುಣೀ ಕ್ರಿಸ್ತಾಂವ್ ಚುಕವ್ನ್ ಫರಾರಿ ಜಾಲ್ಲಿ ಖಬರ್‌ಯೀ ಆಸ್ತಾಲಿಚ್. ತಶೆಂ ಘಡೊಂಕ್, ಭಿತರ್ ಆಸ್‍ಲ್ಲ್ಯಾ ಕೈದ್ಯಾಂಚೆಂ ಧಯ್ರ್ ಆನಿ ಚಲಾಕಿ ಮಾತ್ರ್ ನಹಿಂ ಆಸ್ತಾಂ, ತಾಂಕಾಂ ಭಾಯ್ಲ್ಯಾ ಥೊಡ್ಯಾ ಕ್ರಿಸ್ತಾಂವ್ ವೀರಾಂಚಿ ಮಜತ್‍ಯೀ ಆಸ್‍ಲ್ಲಿ ಮ್ಹಣ್ ಸರ್ದಾರ್ ಸಿಮಾಂವ್ ಜಾಣಾಂಸ್‍ಲ್ಲೊ. ತಸಲ್ಯಾಂ ಪಯ್ಕಿ ಕಾವೂರ್ಚ್ಯಾ ದುಮ್ಗಾ ಪಿಂತಾಚೊ ಆನಿ ತಾಚ್ಯಾ ತ್ಯಾ ಧಯ್ರಾಧಿಕ್ ಸಾಂಗಾತ್ಯಾಂಚೊ ಹಾತ್‍ಯೀ ಆಸ್‍ಲ್ಲೊ ಮ್ಹಣ್ ತಾಕಾ ಕಳೊಂಕ್ ಚಡ್ ವೇಳ್ ಗೆಲೊ ನಾ.

ಪುಣ್ ತಾಣಿಂ ಟಿಪ್ಪುಚ್ಯಾ ಶಿಪಾಯಾಂಚ್ಯಾ ಹಾತಾಂತ್ ಶಿರ್ಕೊನ್ ಪಡನಾತ್ಲ್ಯಾರ್ ಪುರೊ ಮ್ಹಣ್ ಮತಿ ಭಿತರ್‌ಚ್ ಮಾಗ್ಲೆಂ ತಾಣೆಂ. ತ್ಯಾ ವೀರಾಂಕ್ ಆಪ್ಣೆಂ ಪರ್ತ್ಯಾನ್ ಭೆಟ್ಚೊ ಸುಯೋಗ್ ಲಾಭೊಂಕ್ ತೊ ಆಶೆಲೊ. ‘ಸರ್ದಾರಾಂಚಿ ಸಿನೊಲ್’ ಘೆವ್ನ್ ವಾವುರ್ಚೆ ಖರೆ ಸರ್ದಾರ್ ತೆ, ಆನಿ ತಾಂಚೆ ಸಾಂಗಾತಾ –

ತಾಚಿಂ ಚಿಂತ್ನಾಂ ಧಾಂವ್ಲಿಂ –

ಮಾನಿನ್ ವೆರೊನಿಕಾ ಕುವೆಲ್!

ಕಿತ್ಲೆಶೆ ದೀಸ್, ಕಿತ್ಲಿಶಿಂ ವರ್ಸಾಂ ಮ್ಹಳ್ಳೆಪರಿಂ ತಾಕಾ ಭೊಗ್ಲೆಂ.

ತಾಚ್ಯಾ ಕಮರ್‌ಬಂಧಾಂತ್ ಸುರಕ್ಷಿತ್ ಆಸ್‍ಲ್ಲ್ಯಾ ಅರ್ಲುಕೆಚ್ಯಾ ಅರ್ಧಾಚೊ ತಾಕಾ ಉಗ್ಡಾಸ್ ಆಯ್ಲೊ, ಆನಿ ತಾಚೊ ಉಗ್ಡಾಸ್ ಕೊಡಿಯಾಲ್‍ಬೈಲಾಕ್ ಪಾಟಿಂ ಧಾಂವ್ಲೊ, ಆನಿ ಥಂಯ್ಸರ್ ಜಾಲ್ಲ್ಯಾ ಜಮಾತಿಚೆಂ ದೃಶ್ಯ್ ತಾಚ್ಯಾ ನಿಯಾಳಾಕ್ ಆಯ್ಲೆಂ.

“ಆಸೊಂದಿ ತೆಂ ಅರ್ಧ್ ತುಜೆ ಕಡೆನ್” ಮ್ಹಳ್ಳೆಂ ತಾಣೆಂ ತ್ಯಾ ದಿಸಾ. “ಆನಿ ತುಜೆ ಮುಖಾಂತ್ರ್ ಹ್ಯಾ ಮಂಗ್ಳುರಾಂತ್ ಝುಜೊನ್ ವಾವುರ್ಚ್ಯಾ ಸರ್ವ್ ಸರ್ದಾರಾಂ ಕಡೆನ್.”

“ಪುಣ್ ಹಿಂ ಅರ್ಲುಕೆಚಿಂ ಅರ್ಧಾಂ?” ವಿಚಾರ್‌ಲ್ಲೆಂ ತಿಣೆಂ.

“ಸಾಂಗಾತಾ ಮೆಳ್ತೆಲಿಂ” ಭಾಸಾಯಿಲ್ಲೆಂ ತಾಣೆಂ. ‘ಆತಾಂ ತಿಂ ಸಾಂಗಾತಾ ಮೆಳ್ತಿತ್‍ಗೀ?’ ಚಿಕ್ಕೆ ದುಬಾವ್ ಮಾರ್ಲೊ ಆನಿ ತೊ ಚುರ್ಚುರ್ಲೊ.

ದೆವಾಚಿ ಮಾಂಡಾವಳ್ ವಿಚಿತ್ರ್ ಮ್ಹಣ್ ಭೊಗ್ಲೆಂ ತಾಕಾ. ತ್ಯಾ ಅರ್ಲುಕೆಚೆಂ ಅರ್ಧ್ ತಾಚ್ಯಾ ಆವಯ್ ಕಡೆನ್, ಥಂಯ್ ಥಾವ್ನ್ ಮಾನಿನ್ ವೆರೊನಿಕಾ ಕುವೆಲಿ ಕಡೆನ್ ಆನಿ ಆತಾಂ ಆಗ್ನೆಸ್ ಸಿಸಿಲಿಯಾ ಕುಂವರ್ನಿ ಕಡೆನ್!

ಎದೊಳ್ ಸರ್ದಾರಾಂಚಿ ಸಿನೊಲ್ ಖರಿಚ್ ಜಯ್ತೆವಂತ್ ಜಾಲ್ಲಿ..!

‘ಆನಿ ಫುಡೆಂ..?’ ತಾಕಾಚ್ ತಾಣೆಂ ಸವಾಲ್ ಕೆಲೆಂ.

‘ಸಿನೊಲ್ ಸಲ್ವೊಂಚಿ ನಾ – ಸಲ್ವಲ್ಯಾರ್ ಮನ್ಶ್ಯಾನ್‍ಂಚ್ ಸಲ್ವಜಾಯ್’ ತಾಣೆಂಚ್ ತಾಕಾ ಜವಾಬ್ ದಿಲಿ.

ಚಡಿತ್ ಚಿಂತುಂಕ್ ತಾಕಾ ಧಯ್ರ್ ಪಾವ್ಲೆಂ ನಾ.

ಚಡುಣೆಂ ತ್ಯಾಚ್ ವೆಳಾರ್, ತ್ಯಾಚ್ ಸಿನೊಲೆಚೊ ಪ್ರಸ್ತಾಪ್ ಮಂಗ್ಳುರಾಂತ್‍ಯೀ ವಿಚಿತ್ರ್ ಥರಾನ್ ಜಾತಾಲೊ, ಪುಣ್ ತಾಕಾ ತೆಂ ಕಳಿತ್ ನಾತ್‍ಲ್ಲೆಂ.

ತಾಕಾ ನೀದ್ ಆಯ್ಲಿ.

ಸುಕ್ರಾರಾಚಿ ರಾತ್ ತಿ.

ಚಡುಣೆಂ ಮಧ್ಯಾನ್ ರಾತ್ ಲಾಗಿಂ ಜಾಯ್ತ್. ಸರ್ದಾರ್ ಸಿಮಾಂವ್ಕ್ ಎಕಾಚ್‍ಫಾರಾ ನಿದೆಂತ್ಲೊ ಕಾಡ್ನ್ ಉಡಯಿಲ್ಲೆಪರಿಂ ಜಾಲೆಂ. ಮಾರ್ನ್ ಉಟಯಿಲ್ಲೆಪರಿಂ ಹಾಂತುಳ್ನಾರ್ ಉಟೊನ್ ತೊ ಬಸ್ಲೊ. ಸಗ್ಳೊ ತೊ ಘಾಮೆಲ್ಲೊ. ತಾಚ್ಯಾ ಕಾಳ್ಜಾಚಿ ಉಡಿ ಚಿಕ್ಕೆ ಧಡ್ಬಡ್ತಾಶಿ ತಾಕಾ ಭೊಗ್ಲೆಂ.

ಉಟ್ಲೊ ತೊ. ಖಾಟ್ಯೆಚ್ಯಾ ಪೊಂತಾರ್ ಶಿರ್ಕಾಯಿಲ್ಲ್ಯಾ ಕೋಶಿಯೆಂತ್ಲಿ ತಲ್ವಾರ್ ತಾಣೆಂ ಹಾತಾಂತ್ ಘೆತ್ಲಿ. ದಿವ್ಯಾಚಿ ವಾತ್ ಚಿಕ್ಕೆ ವ್ಹಡ್ ಕರ್ನ್ ದಾರಾ ಲಾಗಿಂ ತೊ ಗೆಲೊ, ಆನಿ ಬಂದ್ ಆಸ್‍ಲ್ಲೆಂ ದಾರ್ ಉಗ್ತೆ ಕೆಲೆಂ.

ದಾರ್ವಂತಾ ಭಾಯ್ಲ್ಯಾನ್ ರಾಕ್ವಲ್ ಬಸ್‍ಲ್ಲೊ ಚೆನ್ನಪ್ಪ ಗೌಡ, “ಜೀ ಸರ್ದಾರ್?” ಮ್ಹಣೊನ್ ಹುಶಾರ್ ಜಾಲೊ.

“ಕಸಲೊ ಪುಣೀ ಆವಾಜ್ ಜಾಲೊವೇ?” ಸರ್ದಾರ್ ಸಿಮಾಂವ್ನ್ ವಿಚಾರ್ಲೆಂ.

“ನಾ ಸರ್ದಾರ್ – ಹಾಂವೆಂ ಆಯ್ಕೊಂಕ್ ನಾ. ಮ್ಹಾಕಾ ನೀದ್‍ಯೀ ಪಡೊಂಕ್ ನಾತ್‍ಲ್ಲಿ” ಮ್ಹಣಾಲೊ ಗೌಡ, ಆತುರಾಯೆನ್.

“ವ್ಹಡ್ ನಹಿಂ, ಮ್ಹಾಕಾ ಸ್ವಪಣ್‍ಶೆಂ ಪಡ್ಲೆಂ ಮ್ಹಣ್ ದಿಸ್ತಾ” ಮ್ಹಣಾಲೊ ಸರ್ದಾರ್ ಸಿಮಾಂವ್.

ದಾರ್ ಆಡ್ ಕರ್ನ್ ಪಾಟಿಂ ತೊ ಗೆಲೊ. ತಾಚ್ಯಾ ಜಿವಾಂತ್ ಘಡಿಭರ್ ಕಿತೆಶೆಂ ಭೊಗ್ಲೆಂ. ಸಟ್ಟ್ ಕರ್ನ್ ಆಪ್ಸೊಚ್ ತಾಚೊ ಹಾತ್ ಆಪ್ಣಾಚ್ಯಾ ಆಂಗಾರ್ ಆಸ್‍ಲ್ಲ್ಯಾ ಅರ್ಲುಕೆಚ್ಯಾ ಅರ್ಧಾಕ್ ಸ್ಪರ್ಶ್ ಜಾಲೊ – ತೆಂ ಸುರಕ್ಷಿತ್ ಆಸ್‍ಲ್ಲೆಂ.

“ಜೆಜು, ಮರಿ, ಜುಜೆ…” ಮ್ಹಣಾಲೊ ತೊ ಆನಿ ಪರ್ತ್ಯಾನ್ ನಿದೊಂಕ್ ಗೆಲೊ.

* * * * *

ಸರ್ದಾರ್ ಸಿಮಾಂವ್ಚ್ಯಾ ಹುಕ್ಮೆ ಪ್ರಕಾರ್, ಪಾಟಿಂ ಉರ್‌ಲ್ಲೆ ಶಿಪಾಯ್ ಹಳ್ತಾನ್ ಬಡ್ಗಾಚೆಂ ದರ್ಯಾ ಪಯ್ಣ್ ಕರ್ನ್ ಮಂಗ್ಳುರಾಕ್ ಪಾವ್ಲೆ. ತಾಂಕಾಂ ತಾಕಿದ್ ಆಸ್‍ಲ್ಲೆಪರಿಂ ಬೋಳಾರ್ಚ್ಯಾ ಸಂದಾರ್ ಎಕಾ ರಾತಿಂ ಮಂಜ್ಯೊ ರಾವವ್ನ್, ಪಾಟ್ಲ್ಯಾ ಮಂಜೆರ್ ಥಾವ್ನ್ ಘಾಯೆಲ್ಲ್ಯಾ ಮಾನಿನ್ ವೆರೊನಿಕಾ ಕುವೆಲಿಕ್, ಭಾವಾನ್ ಆನಿ ಮಿವ್ಣ್ಯಾನ್, ಹೆರಾಂಚ್ಯಾ ಮಜತೆನ್ ಭೋವ್ ಚತ್ರಾಯೆನ್ ಸಕಯ್ಲ್ ದೆಂವಯ್ಲೆಂ. ಸಾವ್ಕಾರ್ ಮಾರ್ಸೆಲ್ ಕುವೆಲಿಚ್ಯಾ ವಿನಂತೆ ಪ್ರಕಾರ್, ಮಂಜೆಂತ್ಲೆಂಚ್ ಏಕ್ ಹೊಡೆಂ ಸುಟವ್ನ್ ಹಾಂಕಾಂ ತಡಿಕ್ ಪಾಯ್ಲ್ಯಾ ಉಪ್ರಾಂತ್ ಮಂಜ್ಯೊ ಸುಟ್ಲ್ಯೊ.

ತೊಪಾಸಿ ದಾಲ್ಮೇದಾ ಮುಖ್ಲ್ಯಾ ಮಂಜೆಂತ್ ಕೈದಿ ಜಾವ್ನ್ ಆಸ್‍ಲ್ಲ್ಯಾನ್ ತಾಕಾ ಹೆಂ ಏಕ್‍ಯೀ ಕಳಿತ್ ಜಾಂವ್ಕ್ ನಾ ಮ್ಹಣ್ ದಿಸ್ತಾ.

ಬೋಳಾರ್ ತಡಿರ್ ಥಾವ್ನ್ ಚಿಕ್ಕೆ ಪಯ್ಸ್ – ಠಾಣ್ಯಾ ಥಾವ್ನ್ ಅರ್ಧೆಂ ಮಯ್ಲ್ ಜಾಯ್ತ್ ತಿತ್ಲ್ಯಾ ವಾಟೆನ್, ಸಾವ್ಕಾರ್ ಮಾರ್ಸೆಲ್ ಕುವೆಲಿಚ್ಯಾ ವಳ್ಕಿಚೆಂ ಏಕ್ ಖಾರ್ವ್ಯಾಂಚೆಂ ಘರ್ ಆಸ್‍ಲ್ಲೆಂ. ಆದಿಂ ಲಕ್ಷ್ಮಮ್ಮಣ್ಣಿ ರಾಣಿಯೆಕ್ ತಿರುಮಲರಾಯ ಮುಖಾಂತ್ರ್ ಮಜತ್ ದೀಂವ್ಕ್ ಫಿತೂರಿ ಚಲಂವ್ಚ್ಯಾ ಖಾತಿರ್ ಥಂಯ್ಸರ್‌ಚ್ ಥೊಡೆ ಮಾನಾಯ್ ಜಮ್ತಾಲೆ. ತ್ಯಾ ಖಾರ್ವ್ಯಾಂಚೆರ್ ಟಿಪ್ಪುಚ್ಯಾ ಶಿಪಾಯಾಂಕ್ ದುಬಾವ್ ನಾತ್‍ಲ್ಲೊ. ಆತಾಂ ಫುಡ್ಲಿ ಕಸಲಿಯೀ ಮಾಂಡಾವಳ್ ಕರುಂಕ್ ಪುರ್ಸತ್ ಮೆಳಾಸರ್, ಭಯ್ಣಿಕ್ ಥಂಯ್ಸರ್ ದವರ್ನ್ ಶುಶ್ರೂಶಾ ಕರುಂಕ್ ಭಾವಾನ್ ಚಿಂತ್ಲೆಂ.

ವಾಟೆರ್ ಕಾಂಯ್ ಅಪಾಯ್ ಘಡನಾಸ್ತಾನಾ, ಮಾನಿನ್ ವೆರೊನಿಕಾ ಕುವೆಲಿಕ್ ವ್ಹಾವವ್ನ್ ತ್ಯಾ ಘರಾ ತೆ ಪಾವ್ಲೆ.

ಹಾಂಚಿ ಬರಿ ವಳಕ್ ಆನಿ ಪಾತ್ಯೆಣಿ ಆಸ್‍ಲ್ಲ್ಯಾ ಖಾರ್ವ್ಯಾಂನಿ ಹಾಂಕಾಂ ಸ್ವಾಗತ್ ದಿಲೊ, ಆನಿ ಸರ್ವ್ ಮಜತ್ ಭಾಸಾಯ್ಲಿ.

“ಖಂಯ್ ಆಮಿ ಪಾವ್ಲ್ಯಾಂವ್?” ವೆರೊನಿಕಾ ಕುಂವರ್ನಿನ್ ಕ್ಷೀಣ್ ಸ್ವರಾನ್ ವಿಚಾರ್ಲೆಂ.

“ಆಮಿ ಪಾತ್ಯೆಣೆಚ್ಯಾ ಆನಿ ವಳ್ಕಿಚ್ಯಾಚ್ ಘರಾ ಆಸಾಂವ್ ಭಯ್ಣಿ” ಭಾವಾನ್ ತಿಕಾ ಸಾಂಗ್ಲೆಂ. “ಆತಾಂ ಥೊಡೆಂ ದೂದ್ ಪಿಯೆವ್ನ್ ವಿಶೆವ್ ಘೆ.”

“ಮ್ಹಾಕಾ ಜಾತಾ ತಿತ್ಲ್ಯಾ ವೆಗಿಂ ಆಮ್ಚ್ಯಾಚ್ ಘರಾ ವ್ಹರಾ” ಮ್ಹಣಾಲಿ ತಿ.

“ವ್ಹರ್ತಾಂವ್ ಬಾಯೆ” ಮ್ಹಣಾಲೊ ಗ್ರೆಗೊರ್ ತೆಲ್ಲಿಸ್. “ಕಶಿಯೀ ಆಯ್ಚಿ ರಾತ್ ಆನಿ ಫಾಲ್ಯಾಂಚೊ ದೀಸ್ ಪಾಶಾರ್ ಕರ್‍ಯಾಂ. ತ್ಯಾ ಭಿತರ್ ಅಪಾಯ್ ಆನಿ ವಾಟೊ ಆಮಿ ಸಮ್ಜತಾಂವ್.”

“ಜಾಯ್ತ್” ಪಿಂರ್ಗಲಿ ತಿ. “ಪುಣ್ ಲಾಂಬಾಯ್ ಕರಿನಾಕಾತ್. ಫಾಲ್ಯಾಂ ರಾತಿಂಚ್ ಮ್ಹಾಕಾ ವ್ಹರಿಜಾಯ್.”

“ಜಾಯ್ತ್. ಆತಾಂ ಉಲವ್ನ್ ಪುರಾಸಣ್ ಕರ್ನ್ ಘೆನಾಕಾ.”

ಉಪ್ರಾಂತ್ ತಿ ಕಾಂಯ್ ಉಲಂವ್ಕ್ ನಾ. ಘಟ್ ವಸ್ತ್ ಕಾಂಯ್ ಖಾಂವ್ಕ್ ತಿಕಾ ಜಾಯ್ನಾತ್ಲೆಂ. ತಾಪವ್ನ್ ನಿಂವಯಿಲ್ಲೆಂ ಆಸ್‍ಲ್ಲೆಂ ಇಲ್ಲೆಂ ಬೊಕ್ಡೆಚೆಂ ದೂದ್ ಪಿಯೆವ್ನ್ ತಿ ಭರ್ಮಿದ್ಲಿ.

ತಿ ರಾತ್ ಪಾಶಾರ್ ಜಾಲಿ. ದುಸ್ರೊ ದೀಸ್‍ಯೀ ಪಾಶಾರ್ ಜಾಲೊ.

ತ್ಯಾ ರಾತಿಂಚ್ಯಾ ನೋವ್ ವೊರಾಂ ಉಪ್ರಾಂತ್ – ಸಕ್ಡಾಂನಿ ಮುಸ್ಲಿಮಾಂಚ್ಯಾ ವೆಸಾರ್, ಗಡೀಸ್ ಆಸ್‍ಲ್ಲ್ಯಾ ಬುರ್ಖಾ ಘಾಲ್ಲ್ಯಾ ಸ್ತ್ರೀಯೆಕ್ ಹಕೀಮಾ ಲಾಗಿಂ ವ್ಹರ್ಚ್ಯಾ ಜಿನ್ಸಾರ್, ವೆರೊನಿಕಾ ಕುಂವರ್ನಿಕ್ ತಾಂಚ್ಯಾಚ್ ಕೊಡಿಯಾಲ್‍ಬೈಲ್‍ಚ್ಯಾ ಘರಾಕ್ ವ್ಹಾವವ್ನ್ ವ್ಹೆಲೆಂ.

ಬೋಳೂರಾಂತ್ಲ್ಯಾ ವಿಶೇಸ್ ಘಟನಾಂ ಉಪ್ರಾಂತ್ ತೆಂ ಘರ್ ಆತಾಂ ನಿಜಾಯ್ಕೀ ಪಾಳ್ ಪಡೊನ್ ಬಂಜರ್ ಜಾಲ್ಲೆಂ. ವೆರೊನಿಕಾಕ್ ವ್ಹರ್ನ್ ಭಿತರ್ ನಿದಾಯ್ಲೆಂ. ಭಾಯ್ರ್ ದಿಸಾ ಸಾರ್ಕೊ ರಾತಿಚೊ ದಿವೊ ಪೆಟಯ್ನಾಯೆ ಆನಿ ದಿಸಾಚೊ ಕಸಲೊಚ್ ಆವಾಜ್ ಕರಿನಾಯ್ ಮ್ಹಣ್ ತಾಣಿಂ ಚತ್ರಾಯ್ ಘೆತ್ಲಿ.

ಬೋಳೂರಾಂತ್ ತೆನ್ಕಾ ಥಾವ್ನ್ ಮಂಜ್ಯೊ ಆಯಿಲ್ಲಿ ಆನಿ ಹೆರ್ ಖಬರ್ ತ್ಯಾಚ್ ದಿಸಾ ಹಮೀದಾ ಮುಖಾಂತ್ರ್ ಹಸ್ಸನ್ ಮಹಮ್ಮದಾಗೆರ್ ಪಾವೊನ್, ತ್ಯಾಚ್ ರಾತಿಂ, ಮೋನಿಕಾ ಆನಿ ಮಿರಿಯಮ್, ಹಮೀದಾ ಸಾಂಗಾತಾ ಕೊಡಿಯಾಲ್‍ಬೈಲ್ ಯೇವ್ನ್ ಪಾವ್ಲಿಂ.

ಭಯ್ಣಿಚಿ ಸ್ಥಿತಿಗತ್ ಪಳೆವ್ನ್ ಮೋನಿಕಾ ವರ್ವಿಂ ದುಖಾಂ ತಡ್ವುಂಕ್ ಜಾಲಿಂ ನಾಂತ್.

“ರಡನಾಕಾ ಭಯ್ಣಿ” ಮ್ಹಣಾಲಿ ವೆರೊನಿಕಾ ಕುಂವರ್ನ್. “ಎದೊಳ್ ಪರ್ಯಾಂತ್ ಆಮ್ಚಿಂ ಕಾಮಾಂ ಬರ್‍ಯಾನ್ ಜಾಲ್ಲ್ಯಾನ್ – ಆಬ್ಳೆ ಭಾವೊಜಿ ಆನಿ ಧಾಕ್ಟ್ಯಾಬ್‍ಯೀ ಆಯ್ಲ್ಯಾತ್…”

“ಪುಣ್ ಬಾಯೆ ತುಂ…” ಮೋನಿಕಾ ಸುಸ್ಕಾರ್ಲಿ. ತಿಚೊ ಘರ್ಕಾರ್ ಆನಿ ಭಾವ್ ಆಯ್ಲ್ಯಾತ್ ಮ್ಹಣ್ ಆನಂದ್ ತಿಕಾ ಭೊಗ್‍ಲ್ಲೊ ಸಹಜ್. ಪುಣ್ ಆಪ್ಲಿ ಭಯ್ಣ್ ಆನಿ ಚಡ್ ದೀಸ್ ವಾಂಚನಾ ಮ್ಹಳ್ಳೆಂ ಸತ್ ಖಂಚೊನ್ ವರ್ತಿ ಖಂತ್ ತಿಕಾ ಜಾಲ್ಲಿ.

“ಆಜ್ ಬ್ರೇಸ್ತಾರ್” ಉಲಯ್ಲಿ ವೆರೊನಿಕಾ ಕುಂವರ್ನ್ ಥೊಡ್ಯಾ ವೆಳಾನ್. “ಫಾಲ್ಯಾಂ ರಾತಿಂ ಹಾಂಗಾಸರ್ ಮಾಗ್ಣ್ಯಾಚಿ ಏಕ್ ಜಮಾತ್ ಆಪಂವ್ಕ್ ಪ್ರಯತನ್ ಕರ್‍ಯಾಂ. ಇಜಾಬೆಲ್ ತೆರೆಜಾಕ್‍ಯೀ ಖಬರ್ ದಿಯಾ. ದುಮ್ಗಾಬ್ ಆನಿ ಹೆರ್ ಆಸ್‍ಲ್ಲೆ ಜಾಲ್ಯಾರೀ ಬರೆಂ ಆಸ್‍ಲ್ಲೆಂ.”

“ತೆಯೀ ಖಂಯ್ ಲಾಗ್ಸರ್ ಆಸಾತ್ ಜಾಲ್ಯಾರ್ ತಾಂಕಾಂ ಖಬರ್ ಧಾಡುಂಕ್ ಪ್ರಯತ್ನ್ ಕರ್ತಾಂವ್…”

ತಶೆಂ ತಿಂ ಮೌನ್ ಜಾಲಿಂ.

ಭಯ್ಣ್ ಹರ್ಶೆಂಚ್ಯಾ ಪ್ರಾಸ್ ಸುಡಾಳ್ ಆನಿ ಚಡಿತ್ ಉಲಯ್ತಾ ತೆಂ ಆಯ್ಕೊನ್, ಸಾವ್ಕಾರ್ ಮಾರ್ಸೆಲ್ ಕುವೆಲಿಕ್‍ಯೀ ದುಬಾವ್ ಮಾರ್ಲೊ. ತಿಚಿ ಆಶಾ ಕಸಲಿ ಆಸ್ಲ್ಯಾರೀ ಜಾರಿ ಕರಯ್ತಾಂ ಮ್ಹಣ್ ತಾಣೆಂ ಭಾಸ್ ದಿಲಿ.

“ಧಾಕ್ಟ್ಯಾಬಾ” ಮ್ಹಣಾಲಿ ತಿ ಪರ್ತ್ಯಾನ್. “ಆಮ್ಚ್ಯಾ ಸಿನೊಲೆಚಿ ಕಥಾ ತುಂ ನೆಣಾಂಯ್. ಏಕ್ ದೀಸ್ ಮೋನಿಕಾ ತುಕಾ ತಿ ಸವಿಸ್ತಾರ್ ಸಾಂಗೊಂದಿ. ತೆದಾಳಾ, ಹಾಂವ್ ಗೆಲ್ಯಾ ಉಪ್ರಾಂತ್ ಜಾಲ್ಯಾರೀ ತುಮಿ ಸಕ್ಡಾಂನಿ ಸಾಂಗಾತಾ ಮೆಳೊನ್ ತಿಚಿ ಮಹಿಮಾ ಥಿರ್ ಕರಿಜಾಯ್.”

“ಜರೂರ್ ಬಾಯೆ… ಆತಾಂ ಥೊಡೊ ವಿಶೆವ್ ಘೆ.”

“ಮ್ಹಾಕಾ ವಿಶೆವ್ ಘೆಂವ್ಕ್ ವೇಳ್ ಜಾಯ್ತೊ ಆಸಾ” ಮ್ಹಣಾಲಿ ಅಮ್ರುಕಿ ಹಾಸೊನ್. “ಪುಣ್ ಉಲಂವ್ಕ್ ವೇಳ್ ಉಣೊ ಆಸಾ.”

“ತಶೆಂ ಮ್ಹಣನಾಕಾ ಬಾಯೆ…” ರಡ್ಲಿ ಮೋನಿಕಾ.

ಕಶಿಯೀ ತಿ ರಾತ್ ಪಾಶಾರ್ ಜಾಲಿ. ಸುಕ್ರಾರ್ ಉದೆಲೊ. ಹೆಣೆಂ ತೆಣೆಂ ಸಂದೇಶ್ ದಿಂವ್ಚ್ಯಾ ಖಾತಿರ್, ಹಮೀದ್ ಆನಿ ಹೆರ್ ಥೊಡೆ ಜಣ್ ಫಾಂತೆಂ ಜಾಂವ್ಚ್ಯಾ ಆದಿಂಚ್ ಫಾಸಾಳ್‍ಲ್ಲೆ.

ಸಾಂಜೆರ್‌ಚ್ ಇಜಾಬೆಲ್ ತೆರೆಜ್ ಆನಿ ತಿಮ್ಮಿ ಯೇವ್ನ್ ಪಾವ್ಲಿಂ.

ಹಸ್ಸನ್ ಮಹಮ್ಮದ್ ಆನಿ ತಾಚ್ಯಾ ಮಂಜೆರ್ ಮುಸ್ಲಿಮ್ ನಾಂವಾನ್ ವೇಸ್ ಬದ್ಲುನ್ ಆಸ್‍ಲ್ಲೊ ಜೋಕಿಮ್ ಸಿಲ್ವಾ ಪೈಯೀ ತ್ಯಾಚ್ ದಿಸಾ ತಡಿಕ್ ದೆಂವ್‍ಲ್ಲೆ – ತೆಯೀ ಯೇವ್ನ್ ಪಾವ್ಲೆ. ಆಪ್ಲೆಂ ಥೊಡೆಂ ಕಾಮ್ ಪಳೆವ್ನ್ ಯೆತಾಂ ಮ್ಹಣ್ ಹಸ್ಸನ್ ಮಹಮ್ಮದ್ ಪಾಟಿಂ ವೆಚ್ಯಾರ್ ಆಸ್‍ಲ್ಲೊಯೀ ವಚನಾಸ್ತಾಂ ರಾವ್ಲೊ.

ವಿಶೇಸ್ ಕಿತೆಂ ಮ್ಹಳ್ಯಾರ್, ಕಾಳೊಕ್ ಜಾತಾಂ ಜಾತಾಂ – ಚಿಂತಿನಾತ್‍ಲ್ಲೆಪರಿಂಚ್ ದುಮ್ಗಾ ಪೀಂತ್, ಕಾಲೆಸ್ತ್ ಮಸ್ಕರೆಞ ಆನಿ ಇಲಾರ್ ಸಿಕೆರ್ ಯೇವ್ನ್ ಆಯ್ತೆ ಜಾಲೆ.

ಹರ್ಶೆಂ ಭಾವಾಡ್ತಾಚೊ ಉಮಾಳೊ ಆನಿ ಭಿರಾಂತ್ ಮಾತ್ರ್ ಆಸ್ತಾಲಿಂ. ಆಜ್ ಘರಾಂತ್ ತ್ಯಾ ಭೊಗ್ಣಾಂ ಸಂಗಿಂ ಖಂತಿಚೆಂ ಧಾಂಪಣ್‍ಯೀ ಪಡ್‍ಲ್ಲೆಂ.

(ಮುಂದರುಂಕ್ ಆಸಾ)

ವಿಶೇಸ್ ಚತ್ರಾಯ್: ಹಾಂಗಾಸರ್ ಪ್ರಕಟ್ ಜಾಂವ್ಚಿ ಹಿ ‘ಸರ್ದಾರಾಚೆಂ ಸನ್ನಿಧಾನ್’ ಕೃತಿ ಹರ್ಯೆಕ್ಲ್ಯಾನ್ ವಾಚ್ಯೆತ್. ಪುಣ್ ಜರ್ ಕೊಣಾಯ್ಕಿ ಹಾಂತ್ಲೊ ಖಂಯ್ಚೊಯ್ ಭಾಗ್ ಪ್ರಕಟುಂಕ್ ಜಾಯ್ ತರ್ ತ್ಯಾ ಖಾತಿರ್ ತುಮಿ ಬರ್ಪಿನಿಶಿಂ ಪರ್ವಣ್ಗಿ ಘೆಜೆ. ಗರ್ಜ್ ಆಸ್‍ಲ್ಲ್ಯಾಂನಿ donypereira@gmail.com ವಿಳಾಸಾಕ್ ಇಮೈಲ್ ಕರ್ಚೆಂ.

ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)

Send your Feedback to: budkuloepaper@gmail.com

Like us at: www.facebook.com/budkulo.epaper

Watch wonderful programs in our YouTube Channel