ಕೊಂಕ್ಣಿ ಭಾಷೆಚಿ ಅಖಂಡ್ ಪ್ರೇಮಿ ಗ್ಲ್ಯಾಡಿಸ್ ರೇಗೊ
Posted on : July 23, 2025 at 1:53 PM
ಪೋರ್ ಸೊಮಾರಾ ಸಕಾಳಿಂ ಅಂತರ್‌ಲ್ಲಿ ಮ್ಹಾಲ್ಗಡಿ ಲೇಖಕಿ ಗ್ಲ್ಯಾಡಿಸ್ ರೇಗೊ ಕೊಂಕ್ಣೆಂತ್ ಏಕ್ ಅಪ್ರೂಪ್ ಮ್ಹಣ್ಯೆತ್ ತಸಲಿ ವಿಶಿಸ್ಟ್ ಸಾಧಕಿ. ತಿ ಏಕ್ ಲೇಖಕಿ ಜಾವ್ನ್ ಮಾತ್ರ್ ಕೊಂಕ್ಣೆಂತ್ ವಳ್ಕಿಚಿ ನ್ಹಯ್. ಕೊಂಕ್ಣಿ ಭಾಸ್ ಆನಿ ಲಗ್ತಿ ಸಂಗ್ತಿಂಚೆರ್ ತಿಚೊ ಮೋಗ್ ಅಖಂಡ್ ಜಾವ್ನಾಸ್‍ಲ್ಲೊ. ತಿ ಏಕ್ ಸಾಧಿ ವ್ಯಕ್ತಿ ಜಾವ್ನಾಸ್‍ಲ್ಲಿ ತರೀ ಕೊಂಕ್ಣಿ ಭಾಸ್ ಆನಿ ಸಾಹಿತ್ಯಾಚ್ಯಾ ಸಂಗ್ತಿಂನಿ ತಿಚಿ ಬದ್ಧತಾ ಆನಿ ಸಂಕಲ್ಪ್ ಹೊಗ್ಳಿಕೆಕ್ ಫಾವೊ.
ಗ್ಲ್ಯಾಡಿಸ್ ರೇಗೊಚ್ಯಾ ವಿಶೇಸ್ ಮ್ಹಿನತೆಚ್ಯಾ ವಾವ್ರಾಕ್ ಏಕ್ ಅವ್ವಲ್ ದೃಷ್ಟಾಂತ್ – ತಿಣೆಂ ಸಂಪಾದನ್ ಕೆಲ್ಲೊ ‘ಕನ್ನಡ ಲಿಪಿಯೆಂತ್ ಕೊಂಕಣಿ ಪುಸ್ತಕಾಂ’ (1858-2010). 152 ವರ್ಸಾಂಚಿ ಚರಿತ್ರಾ ಸಂಗ್ರಹ್ ಕರ್ಚೆಂ ತಿತ್ಲ್ಯಾ ಸಲೀಸಾಯೆಚೆಂ ಕಾಮ್ ಬಿಲ್ಕುಲ್ ನ್ಹಯ್. ದೆಡ್ಶೆಂ ವರ್ಸಾಂಚ್ಯಾ ಲಾಂಬ್ ಕಾಳಾಂತ್ ಪ್ರಕಟ್ ಜಾಲ್ಲೆ ಸಕ್ಕಡ್ ಪುಸ್ತಕ್ ತಿಕಾ ಲಾಭ್ಲ್ಯಾತ್‍ಗೀ ಸಾಂಗೊಂಕ್ ಕಷ್ಟ್. ಪುಣ್ ತ್ಯಾ ಖಾತಿರ್ ತಿಣೆಂ ಕಠಿಣ್ ವಾಂವ್ಟ್ ಕಾಡ್ಲ್ಯಾ, ಅವಿರತ್ ಕಷ್ಟ್ ಭೊಗುನ್, ಪರಿಶ್ರಮ್ ಘಾಲುನ್ ತಿತ್ಲೊ ವಿವರ್ ಸಂಗ್ರಹ್ ಕೆಲಾ. ಅಸಲೆಂ ಕ್ಲಿಷ್ಟ್ ಮಿಸಾಂವ್ ಹಾತಿಂ ಧರುನ್ ಪುಸ್ತಕ್ ರಚನ್ ಕೆಲ್ಲ್ಯಾ ತಿಚೊ ಅಭಿಮಾನ್ ಆನಿ ಕಮಿಟ್‍ಮೆಂಟ್ ಶ್ಲಾಘನೀಯ್.
ಹೊ ಏಕ್ ಫಕತ್ ಬುಕಾಂಚಿಂ ನಾಂವಾಂ ಆಟಾಪ್ಚೊ ಪುಸ್ತಕ್ ನ್ಹಯ್. ಹಿ ಏಕ್ ಅಮೂಲ್ಯ್ ದಸ್ತಾವೇಜ್, ಅದ್ಭುತ್ ರುಜ್ವಾತ್. ಕನ್ನಡ ಲಿಪಿಂತ್ಲ್ಯಾ ಸಾಹಿತ್ಯ್ ಆನಿ ಪ್ರಕಾಶನ್ ತಶೆಂ ಛಾಪ್ಣೆಚೊ ಮಹಾನ್ ವಿವರ್ ಆನಿ ಚರಿತ್ರಾ ಆಟಾಪ್ಚಿ ಕೃತಿ ಹಿ. ಕನ್ನಡ ಲಿಪಿಂತ್ ನಿರ್ಮಾಣ್ ಜಾಲ್ಲ್ಯಾ ಕೊಂಕ್ಣಿ ಸಾಹಿತ್ಯಾಚಿ ವಳಕ್ ಹ್ಯಾ ಮುಖಾಂತ್ರ್ ಅಮೋಘ್ ರಿತಿನ್ ಪ್ರಸ್ತುತ್ ಕೆಲ್ಲ್ಯಾ ಗ್ಲ್ಯಾಡಿಸ್ ರೇಗೊ ಆನಿ ಪುಸ್ತಕ್ ಪ್ರಕಟ್‍ಲ್ಲ್ಯಾ ಮಾಂಡ್ ಸೊಭಾಣಾಕ್ ಹೊಗ್ಳಿಕ್ ಫಾವೊ.
ಗ್ಲ್ಯಾಡಿಸ್ ರೇಗೊನ್ ಸ್ವಂತ್ ಲಿಖಿತ್ ರಚ್ಲಾಂ. ಸವೆಂ ಸಂಗ್ರಹ್/ಸಂಪಾದನ್ ವಾವ್ರ್ ಜಾಯ್ತ್ಯಾ ಪ್ರಮಾಣಾರ್ ಕೆಲಾ. ಆಪ್ಲ್ಯಾ ಆಕಾಶ್ ಪ್ರಕಾಶನಾ ಮುಖಾಂತ್ರ್ ಜಾಯ್ತೆ ಪುಸ್ತಕ್ ತಿಣೆಂ ಪ್ರಕಟ್ ಕೆಲ್ಯಾತ್. (ಹ್ಯಾ ಲೇಖನಾ ಸಂಗಿಂ ದಿಲ್ಲ್ಯಾ ಚಿತ್ರಾಂನಿ ತಿಚ್ಯಾ ಪುಸ್ತಕಾಂಚಿ ಪಟ್ಟಿ ಆಸಾ). ಹೆರಾಂಚ್ಯೊ ಕಾಣಿಯೊ, ಕೃತಿಯೊ, ಜನಪದ್ ಸಾಹಿತ್ಯ್ ತಿಣೆಂ ಪ್ರಕಟ್ಲಾಂ.
ಸಾಂ ಲುವಿಸ್ ಕೊಲೆಜಿಚ್ಯಾ ಕೊಂಕ್ಣಿ ಸಂಸ್ಥ್ಯಾಂತ್ ಗ್ಲ್ಯಾಡಿಸ್ ಸಬಾರ್ ವರ್ಸಾಂ ವಾವುರ್ಲ್ಯಾ. ಪುಸ್ತಕ್ ಆನಿ ಸಾಹಿತ್ಯಾಚೊ ಭರ್ಪೂರ್ ಮೋಗ್ ತಿಕಾ ಆಸ್‍ಲ್ಲೊ. ಖಂಯ್ಸರೀ ಕೊಂಕ್ಣಿ ಕಾರ್ಯಿಂ ಆಸ್ಲ್ಯಾರ್ ತಿ ಹಾಜರ್ ಜಾತಾಲಿ. ಆಪ್ಲ್ಯಾ ನಾತಿಕ್‍ಯೀ ತಿ ಸಾಂಗಾತಾ ಹಾಡ್ನ್ ಯೆತಾಲಿ. ತಿಣೆಂ ತಿಚೆಂ ಪುಸ್ತಕ್ ಭಂಡಾರ್ ಮಾಂಡ್ ಸೊಭಾಣಾಕ್ ದಿಲ್ಲೆಂ. ಹಜಾರಾಂನಿ ಪುಸ್ತಕ್, ಪತ್ರಾಂ, ದಸ್ತಾವೆಜಾಂಚೊ ಸಂಗ್ರಹ್ ತಿಣೆಂ ಮಾಂಡ್ ಸೊಭಾಣಾಕ್ ದಿಲಾ.
ತಿಕಾ ಜೀಣ್‍ಭರ್ ಕಷ್ಟ್ ಸಂಕಷ್ಟ್ ಚುಕ್‍ಲ್ಲೆ ನಾಂತ್ ಮ್ಹಣ್ತಾ ಎಕ್ಲೊ ಮ್ಹಾಲ್ಗಡೊ ವ್ಯಕ್ತಿ, ಜೊ ತಿಕಾ ಲ್ಹಾನ್‍ಪಣಾ ಥಾವ್ನ್ ವಳ್ಕತಾಲೊ. ಚಡ್ ಶಿಕಪ್ ಜೊಡುಂಕ್ ತಿಕಾ ಜಾಂವ್ಕ್ ನಾ. ತ್ಯಾ ವರ್ವಿಂ ತಿಚೆಂ ಬರಪ್ ಶ್ರೇಷ್ಠ್ ಮಟ್ಟಾಚೆಂ ನ್ಹಯ್ ಜಾವ್ಯೆತ್, ಪುಣ್ ಕೊಂಕ್ಣಿ ಭಾಸ್ ಆನಿ ಭಾಶೆಚ್ಯಾ ಸಂಗ್ತಿಂ ಥಂಯ್ ತಿಚಿ ಶ್ರದ್ಧಾ ಆನಿ ಬದ್ಧತಾ ಉತ್ಕøಷ್ಟ್ ಜಾವ್ನಾಸ್‍ಲ್ಲಿ. ಲಾಂಬ್ ಕಾಳ್ ಕೊಂಕ್ಣಿ ವರ್ತುಲಾಂತ್ ತಿ ಆಸ್‍ಲ್ಲಿ. ಆದ್ಲ್ಯಾ ಆನಿ ಸಮಕಾಲೀನ್, ತರ್ನ್ಯಾ ಬರವ್ಪ್ಯಾಂ ಸಂಗಿಂ ತಿಕಾ ಸಳಾವಳ್ ಆಸ್‍ಲ್ಲಿ.
ವಿಶ್ವ ಕೊಂಕ್ಣಿ ಕೇಂದ್ರಾಂತ್ ಏಕ್ ಗಂಭೀರ್ ಕಾರ್ಯಾಗಾರ್ ಆಸ್‍ಲ್ಲೆಂ. ದೋನ್ ದಿಸಾಂಚೆಂ ‘ವಿಮರ್ಶಿಕಾ’ ಕಾಮಾಸಾಳ್ ತೆಂ, ತಾಂತುಂ ಗ್ಲ್ಯಾಡಿಸ್ ರೇಗೊ ಹಾಜರ್ ಆಸ್‍ಲ್ಲಿ. ವಿಂಚ್ಲೆಲ್ಯಾ ಥೊಡ್ಯಾಚ್ ಜಣಾಂಕ್ ಆಪವ್ಣೆಂ ಆಸ್‍ಲ್ಲೆಂ. ದೋನ್ ದೀಸ್‍ಭರ್ ಚಲ್‍ಲ್ಲ್ಯಾ ತ್ಯಾ ಶಿಬಿರಾಂತ್ ಗ್ಲ್ಯಾಡಿಸ್‍ಬಾಯೆನ್ ಆತುರಾಯೆನ್ ಭಾಗ್ ಘೆತ್‍ಲ್ಲೊ. ತಿಚೆಂ ಖಾಲ್ತೆಂಪುಣ್ ಏಕ್ ದೇಖ್ ಜಾವ್ನಾಸ್‍ಲ್ಲೆಂ.
‘ರಾಕ್ಣೊ’ ಪತ್ರಾಂತ್ ತಿಚಿಂ ಬರ್ಪಾಂ ಸರಾಗ್ ವ್ಹಾಳ್ತಾಲಿಂ. ಅಮೆರಿಕಾಂತ್ ಆಸ್ತಾನಾ ‘ಗ್ಲ್ಯಾಡಿಸ್ ರೇಗೊ ವಾಷಿಂಗ್ಟನ್’ ಆನಿ ಗಲ್ಫಾಂತ್ ಆಸ್ತಾನಾ ಥಂಯ್ಚ್ಯಾ ನಾಂವಾರ್ ತಿ ಬರ್ಪಾಂ ಧಾಡ್ತಾಲಿ. ಗ್ಲ್ಯಾಡಿಸ್ ರೇಗೊ ಅತ್ಯುನ್ನತ್ ಸಾಹಿತಿ ನ್ಹಯ್ ಜಾಂವ್ಕ್ ಪುರೊ, ಪುಣ್ ಕೊಂಕ್ಣೆ ಖಾತಿರ್ ಎಕಾ ಗ್ಲ್ಯಾಡಿಯೇಟರಾಪರಿಂಚ್ ತಿ ಝುಜ್ಲ್ಯಾ. ಏಕ್ ಆಪುಟ್ ಸೊಜೆರಾ ಭಾಷೆನ್ ಗ್ಲ್ಯಾಡಿಸ್ ಕೊಂಕ್ಣೆಂತ್ ವಾವುರ್ಲ್ಯಾ. ಉಣೆಂಪಣಾಂ ಆಸ್ತಿತ್, ಪುಣ್ ತಿಚ್ಯಾ ಕಾಳ್ಜೆಕ್ ಮೀತ್ ನಾತ್‍ಲ್ಲಿ.
ಜಿಣ್ಯೆಚ್ಯಾ ನಿಮಾಣ್ಯಾ ಥೊಡ್ಯಾ ವರ್ಸಾಂನಿ ಗ್ಲ್ಯಾಡಿಸ್ ಭಲಾಯ್ಕೆಚ್ಯಾ ಸಮಸ್ಯಾಂ ನಿಮ್ತಿಂ ಕೊನ್ಶ್ಯಾಕ್ ಪಡ್‍ಲ್ಲಿ. ಜುಲೈ 21ವೆರ್ ತಿ ಅಂತರ್ಲಿ. ತಿಚಿ ಕೂಡ್, ತಿಚ್ಯಾ ಅಪೇಕ್ಷೆ ಪರ್ಮಾಣೆಂ, ಮಣಿಪಾಲ್ ಕೆ.ಎಂ.ಸಿ. ಆಸ್ಪತ್ರೆಕ್ ಪಾವಿತ್ ಜಾಲ್ಯಾ. ಖಾಸ್ಗಿ/ಕುಟ್ಮಾ ಜಿವಿತಾಂತ್ ತಿ ಜಾಯ್ತಿ ಕಷ್ಟಲ್ಯಾ ತರೀ ಕೊಂಕ್ಣಿ ಭಾಸ್ ಆನಿ ಸಾಹಿತ್ಯಾಚ್ಯಾ ವಾವ್ರಾಂತ್, ಭಲಾಯ್ಕಿ ಆಸ್ತಾ ವರೇಗ್, ತಿ ನಿರಂತರ್ ವಾವುರ್ಲ್ಯಾ. ತಿಚ್ಯಾ ಅತ್ಮ್ಯಾಕ್ ಸಾಸಣ್ ಸುಖ್ ಫಾವೊ ಜಾಂವ್.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
