Hurray! ಕೂದುವಳ್ಳಿಂತ್ ಕೊಂಕ್ಣಿ ಮೀಸ್ ಪ್ರಾರಂಭ್ ಜಾತಾ
Posted on : July 4, 2025 at 4:17 PM
ಚಿಕ್‍ಮಗ್ಳುರ್ ದಿಯೆಸೆಜಿಂತ್ ತಶೆಂಚ್ ಬೆಂಗ್ಳುರ್ ಆನಿ ಹೆರ್ ಕಡೆನ್ ಕೊಂಕ್ಣಿ ಲೊಕಾನ್ ಆಪ್ಲ್ಯಾ ಮಾಂಯ್‍ಭಾಶೆಂತ್ ಮಿಸಾಂ ಖಾತಿರ್ ಕೆಲ್ಲಿ ಚಳ್ವಳ್ ಹಂತಾ ಹಂತಾನ್ ಯಶಸ್ವಿ ಜೊಡುನ್ ಆಸಾ. ಆಬ್ಳೆ, ಲೇಟೆಸ್ಟ್ ಖಬರ್, ಕೂದುವಳ್ಳಿ ಥಾವ್ನ್ ಆಯ್ಲ್ಯಾ.
ಪೊರ್ವಾಂ ಜುಲೈ 6 ತಾರಿಕೆರ್, ಆಯ್ತಾರಾ, ಕೂದುವಳ್ಳಿ ಲೂರ್ದ್ ಮಾಯೆಚ್ಯಾ ಇಗರ್ಜೆಂತ್, ಸಕಾಳಿಂ 10.30 ವೊರಾರ್ ಪಯ್ಲೆಂ ಕೊಂಕ್ಣಿ ಮೀಸ್ ದವರ್ಲಾಂ. ಹೆಂ ‘ಖಾಸ್ಗಿ’ ಮೀಸ್ ಮ್ಹಣ್ ಠರಾಯ್ಲಾಂ, ತರೀ, ಸದ್ದ್ಯಾಕ್ ಕೊಂಕ್ಣೆಂತ್‍ಚ್ ಮೀಸ್ ಮೆಳ್ತಾ ಮ್ಹಳ್ಳಿ ಎಕಾ ಹಂತಾಚಿ ಜೀಕ್‍ಚ್ ಮ್ಹಣಜೆ.
ಕೂದುವಳ್ಳಿ, ಚಿಕ್‍ಮಗ್ಳುರ್ ತಾಲೂಕಾಂತ್ಲಿ ಏಕ್ ಫಿರ್ಗಜ್. ಚಿಕ್‍ಮಗ್ಳುರ್ ಥಾವ್ನ್ ಮೂಡಿಗೆರೆಚ್ಯಾ ವಾಟೆರ್ ಮೆಳ್ತಾ. ಆಲ್ದೂರು ಥಾವ್ನ್ ಚಡುಣೆಂ 5 ಕಿ.ಮೀ. ಪಯ್ಸ್ ಆಸಾ. ಹ್ಯಾ ಫಿರ್ಗಜೆಂತ್ 35 ಕುಟ್ಮಾಂ ಆಸೊನ್, ತಾಂತ್ಲಿಂ 27 ಕುಟ್ಮಾಂ ಕೊಂಕ್ಣಿ ಮಾಂಯ್‍ಭಾಶೆಚಿಂ! ಹ್ಯಾ ಇಗರ್ಜೆಂತ್ ಆಯ್ತಾರಾಚೆಂ ಎಕ್‍ಚ್ ಮೀಸ್ – ಕನ್ನಡಾಂತ್ – ಸಕಾಳಿಂ 9.30 ವೊರಾಂಕ್ ಆಸ್ಚೆಂ. ಬಹುಸಂಖ್ಯಾತ್ ಲೋಕ್ ಕೊಂಕ್ಣಿ, ತರೀ ಮೀಸ್ ಕನ್ನಡಾಂತ್!!
ಪ್ರಸ್ತುತ್, ಫಿರ್ಗಜ್ ವಿಗಾರ್ ಫಾ. ಡೆನ್ಜಿಲ್ ಲೋಬೊನ್ ಕೊಂಕ್ಣಿ ಲೊಕಾ ಖಾತಿರ್, ಬಿಸ್ಪಾಚಿ ‘ಪರ್ವಣ್ಗಿ’ ಮೆಳೊಂಕ್ ‘ನಾ’ ತರೀ, ಲೊಕಾಚ್ಯಾ ಅಪೇಕ್ಷೆ ಪರ್ಮಾಣೆಂ, ಖಾಸ್ಗಿ ತರೀ, ಕೊಂಕ್ಣೆಂತ್ ಮೀಸ್ ಭೆಟಂವ್ಕ್ ಚಾಲನ್ ದಿಲಾಂ.
ಹಾಸನ್ ಆನಿ ಚಿಕ್‍ಮಗ್ಳುರ್ ಜಿಲ್ಲೆ ಮೆಳೊನ್ ಚಿಕ್‍ಮಗ್ಳುರ್ ದಿಯೆಸೆಜ್ ಜಾತಾ. ಹ್ಯಾ ದಿಯೆಸೆಜಿಂತ್ 19 ವರ್ಸಾಂ ಆದಿಂ ಸ್ಥಾಪನ್ ಜಾಲ್ಲೆಂ ಕೊಂಕ್ಣಿ ರಾಕಣ್ ಸಂಚಾಲನ್, ಕೊಂಕ್ಣಿ ಕಥೊಲಿಕ್ ಪರ್ಜಾ ಬಹುಮತಾನ್ ಆಸ್‍ಲ್ಲ್ಯಾ ಫಿರ್ಗಜೆಂನಿ ಕೊಂಕ್ಣಿ ಮಿಸಾಂ ಖಾತಿರ್ ಸಬಾರ್ ವರ್ಸಾಂ ಥಾವ್ನ್ ಆಂದೋಲನ್ ಚಲವ್ನ್ ಆಸಾ. ಹ್ಯಾ ಚಳ್ವಳೆ ಮುಖಾಂತ್ರ್ ಎದೊಳ್‍ಚ್ ಥೊಡ್ಯಾ ಫಿರ್ಗಜಾಂನಿ ಕೊಂಕ್ಣಿ ಮಿಸಾಂ ಸುರ್ವಾತ್ ಜಾಲ್ಯಾಂತ್.
ಸದ್ದ್ಯಾಕ್ ಕೊಂಕ್ಣೆಂತ್ ‘ಪ್ರೈವೇಟ್ ಮೀಸ್’ ಕರುಂಕ್ ಏಕ್ ಅವ್ಕಾಸ್ ಉಗ್ತೊ ಜಾಲಾ. ಹೆಂ ಎಕಾ ಥರಾನ್ ‘ಸೆಕೆಂಡ್ ಕ್ಲಾಸ್ (ಸಿಟಿಜನ್ಸ್) ಟ್ರೀಟ್‍ಮೆಂಟ್’ ಆಸ್‍ಲ್ಲೆಪರಿಂ. ತೆಂ ಕಿತೆಂಯೀ ಆಸ್ಲ್ಯಾರೀ, “ಆಮ್ಕಾಂ ಕೊಂಕ್ಣೆಂತ್ ಮೀಸ್ ಜಾಯ್. ಹಿ ಏಕ್ ಸುರ್ವಾತ್. ಫುಡೆಂ ಸಕ್ಕಡ್ ಸಾರ್ಕೆಂ ಜಾತೆಲೆಂ ಮ್ಹಣ್ ಆಮಿ ಭರ್ವಸ್ತಾಂವ್” ಮ್ಹಣ್ತಾತ್ ಥಂಯ್ಚೆ ಕೊಂಕ್ಣಿ ಮಿಸಾಚೆ ಝುಜಾರಿ.
ಆನಿ ಆಬ್ಳೆ, ಹ್ಯಾ ಕೊಂಕ್ಣಿ ಮಿಸಾಕ್, ಕಸಲೊ ವಿರೋಧ್, ಕೊಣಾ ಥಾವ್ನ್, ಖಂಚ್ಯಾ ರುಪಾರ್ ಉದೆತಾ ಆನಿ ತೊ ಖಂಯ್ ಪಾವ್ತಾ ಮ್ಹಳ್ಳೆಂ ಕುತೂಹಲಾಚೆಂ ಸವಾಲ್. ಲೊಕಾ ವಿರೋಧಿ, ಪ್ರಜಾಪ್ರಭುತ್ವಾ ಆನಿ ವಾತಿಕಾನಾ ವಿರೋಧಿ ಧೋರಣ್ ಕಿತ್ಲೊ ತೇಂಪ್ ಪರ್ಯಾಂತ್ ಚಲ್ತಾ ತೆಂ ಪಳೆಜೆ. ಕಿತೆಂಯೀ ಜಾಂವ್, ಚಿಕ್‍ಮಗ್ಳುರ್ ದಿಯೆಸೆಜಿಚ್ಯಾ ಕೊಂಕ್ಣಿ ಲೊಕಾನ್ ಎಕ್ವಟೊನ್ ಆಸ್ಚೆಂ ಆನಿ ಬದ್ಧತೆನ್ ಝುಜೊನ್ ಖಾಯಾಮ್ ಮಿಸಾಂ ಕೊಂಕ್ಣೆಂತ್‍ಚ್, ವೆಗಿಂಚ್, ಆಪ್ಣಾಂವ್ಚಿ ಗರ್ಜ್ ಆಸಾ. ತಾಂಚೆಂ ಎದೊಳ್ಚೆಂ ಝುಜ್ ತೆಂಚ್ ರುಜು ಕರ್ತಾ.
ಗುಮಾನಾಕ್: ಆಮಿ ಮಂಗ್ಳುರ್‍ಗಾರ್ ‘ಚಿಕ್‍ಮಗ್ಳುರ್’ ವಾ ‘ಚಿಕ್‍ಮ್ಯಾಂಗಲೋರ್’ ಮ್ಹಣ್ತಾಂವ್. ತೆಂ ನಿಜಾಯ್ಕೀ ಚೂಕ್. ಖರ್ಯಾನ್ ತೆಂ ‘ಚಿಕ್ಕಮಗಳೂರು’ ಜಾಯ್ಜೆ. ಕಿತ್ಯಾಕ್ ಮ್ಹಳ್ಯಾರ್ ತೆಂ ತಶೆಂಚ್ ಆಸ್ಚೆಂ. ಆದಿಂ ತೆಣೆಂಚ್ಯಾ ಎಕಾ ರಾಯಾನ್ (ಸಖರಾಯ ಮಹಾರಾಜ) ಆಪ್ಲ್ಯಾ ಧಾಕ್ಟ್ಯಾ ಧುವೆಕ್, ಮ್ಹಣ್ಜೆ ಚಿಕ್ಕ ಮಗಳನ್ನು, ಕಾಜಾರ್ ಕರ್ನ್ ದಿಲ್ಲ್ಯಾ ಗಾಂವಾಕ್ ‘ಚಿಕ್ಕ ಮಗಳ ಊರು’ ಮ್ಹಣ್ ವೊಲಾಯ್ಲೆಂ. ತೆಂಚ್ ಕ್ರಮೇಣ್ ಚಿಕ್ಕಮಗಳೂರು ಜಾಲೆಂ. ತಾಚ್ಯಾ ವ್ಹಡ್ಲ್ಯಾ ಧುವೆಕ್ ಕಾಜಾರ್ ಕರ್ನ್ ದಿಲ್ಲ್ಯಾ ಗಾಂವಾಕ್ ‘ಹಿರೇಮಗಳೂರು’ ಮ್ಹಣ್ ಆಪಯ್ತಾತ್.
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
ಕೊಂಕ್ಣಿ ಮೀಸ್ ಅಭಿಯಾನ್ – ಕೊಂಕ್ಣೆಕ್ ಲಾಭ್ಲಿ ಜೀಕ್
ಕೊಂಕ್ಣಿ ಲೊಕಾಕ್ ಉಲೊ: ಸಕ್ಕಡ್ ಸಾಂಗಾತಾ ಮೆಳ್ಯಾಂ
Send your Feedback to: budkuloepaper@gmail.com
