ಎಕಾ ಪೆಟ್ಯಾಚೆಂ ಫಾರಿಕ್ಪಣ್ – 3: ಕುಟ್ಮಾಂ ಆನಿ ಮನ್ಶ್ಯಾಂಚ್ಯೊ ಚಟುವಟಿಕ್ಯೊ
Posted on : June 6, 2025 at 4:57 PM
ಎಕಾ ಪೆಟ್ಯಾಚೆಂ ಫಾರಿಕ್ಪಣ್! – ತಿಸ್ರೊ ಭಾಗ್
ಗಾಂವ್ ರಚ್ಚೆಂ ಮನ್ಶ್ಯಾಂನಿ. ಘರ್ ಉಬಾರ್ಚೆಂಯೀ ಮನ್ಶ್ಯಾಂನಿಂಚ್. ಮ್ಹಣ್ತಚ್, ಮನಿಸ್ ಕಿತೆಂ ಕರ್ತಾಲೊ, ತಾಚೆ ಸಂಗಿಂ ಮೊನ್ಜಾತಿ ಕಿತ್ಯಾಕ್ ಆಯ್ಲ್ಯೊ ಮ್ಹಳ್ಳೆಂ ಸಾಂಗಜೆಚ್.
ಆಮ್ಚೆಂ ಬಯ್ಲ್ ಕೊಣೆಂ, ಕೆದಾಳಾ ಖೊಂಡುನ್, ಕಾತರ್ನ್ ತೆಂ ರಚ್‍ಲ್ಲೆಂ ಹಾಂವ್ ನೆಣಾಂ. ಆದ್ಲಿ ಚರಿತ್ರಾ ಚಡ್ ಕೊಣೆಂಯೀ ಸಾಂಗ್‍ಲ್ಲಿ ನಾ. ಮ್ಹಜೊ ಆಬ್ ಮಡಂತ್ಯಾರ್‌ಚೊ, ಪುಂಜಾಲ್‍ಕಟ್ಟೆ ಘರಾಣೆಂ ಖಂಯ್. ತಾಣೆಂ ಹಾಂಗಾ ಯೇವ್ನ್ ಎಕಾ ಬ್ರಾಹ್ಮಣಾಚೊ ಜಾಗೊ ಗೇಣಿಕ್ ಘೆತ್‍ಲ್ಲೊ. ಆಬಾಚೆಂ ನಾಂವ್ ಧಾನ್ವೆಲ್ ಪಿರೇರಾ. ವ್ಹಡ್ಲಿಮಾಂಯ್ ಫ್ಲೋರಿನ್ ಲೋಬೊ. ಮ್ಹಜ್ಯಾ ಲ್ಹಾನ್ ಪ್ರಾಯೆರ್ ಆಬ್ ಸರ್‌ಲ್ಲೊ. ವ್ಹಡ್ಲಿಮಾಂಯ್ ಹೈಸ್ಕೂಲಾಂತ್ ಆಸ್ತಾನಾ ಸರ್‌ಲ್ಲಿ. ತಿಣೆಂ ಥೊಡ್ಯೊ ಆದ್ಲ್ಯೊ ಕಾಣಿಯೊ ಸಾಂಗ್ಲ್ಯಾತ್. ಚಲೊನ್‍ಂಚ್ ಆಗ್ರಾರ್ ಮಿಸಾಕ್ ಗೆಲ್ಲಿ ತಿ!
ತಾಂಕಾಂ ದೋಗ್ ಪೂತ್. ಮ್ಹಜೊ ಬಾಬ್ ಲುವಿಸ್ ಪಿರೇರಾ ದುಸ್ರೊ. ಬಾಪ್ಪುಚೆಂ ಘರ್ ಸಕಯ್ಲ್ (ಧನ್ಯಾಚ್ಯಾ ಘರಾ ಉಪ್ರಾಂತ್). ಬಾಬ್ ಪೆಂಟೆಂತ್ ಟೈಲರ್. ಭೂ ಸುಧಾರಣೆ ಕಾನೂನ್ ಯೇವ್ನ್ ಮ್ಹಜ್ಯಾ ಬಾಬಾಚ್ಯಾ ನಾಂವಾರ್ ಜಾಗೊ ಆಯ್ಲೊ. ಘರಾಚಿ ಆಡಿ, ಜ್ಹಾಲ್, ಪಾಟ್ಲ್ಯಾನ್ ದೋನ್ ದಿಡ್ಡಿಂ (ಸಕಯ್ಲೆಂ ಆನಿ ವಯ್ಲೆಂ ದಿಡ್ಡೆಂ), ಕುಶಿನ್ ಥೊಡೊ ಜಾಗೊ ಆನಿ ಸಕಯ್ಲ್ ತೀನ್ ಗಾದೆ, ಕುಳೆಂಜಿ ಆಮ್ಚ್ಯೊ ಜಾಲ್ಲ್ಯೊ. ಪಲ್ತಡಿಚೊ ಜಾಗೊ ಕುಮ್ಕಿ. ಫಾತ್ರಾ ಗಾದ್ಯಾ ಸಕಯ್ಲೊ ಗಾದೊ ಎಕಾ ಮಾಪ್ಳ್ಯಾಚೊ. ವಯ್ಲೆ ವ್ಹಡ್ ಗಾದೆ ಕಿಟ್ಟಣ್ಣಾಚೆ (ತೊ ಬೊಣ್ಕೊ). ಆಮ್ಕಾಂ ಲಾಗೊನ್ ಆಸ್‍ಲ್ಲೊ ಜಯ್ತ್ ಗಾದೊ ತಾಣೆಂ ಎಕಾ ಭಟಾಕ್ ವಿಕ್ಲೊ. ಆಮ್ಚ್ಯಾ ದಾವ್ಯಾಕ್ ದೋನ್ ಘರಾಂ.
ಹ್ಯಾ ಆಮ್ಚ್ಯಾ ಸರ್ವ್ ಪ್ರದೇಶಾಕ್ ಟೊಮಿ ಎಕ್ಲೊಚ್ ಪೆಟೊ, ಹಕ್ಕಾಚೊ!
ಸಾಗೊಳಿಚೆಂ ಮಿಸಾಂವ್
ತ್ಯಾ ಕಾಳಾರ್ ಸಗ್ಳ್ಯಾ ಬಯ್ಲಾಂತ್ ಭಾತಾಚಿಚ್ ಕೃಷಿ. ಸಕಯ್ಲ್, ನ್ಹಂಯ್ ತಡಿಚ್ಯಾ ಪರ್ವತಾರ್ ಎಕ್ಲೊ ಮಲಯಾಳಿ ಆಯ್ಲ್ಯಾ ಉಪ್ರಾಂತ್ ಥೊಡಿಂ ಸಮೀಕರಣಾಂ ಬದ್ಲಲಿಂ. ಮಲ್ಬಾರಿ ಕೃಷೆಂತ್ ಪಂಟರ್. ಖಂಚೊ ಕಾಟ್ ಗುಡೊ ಮೆಳ್ಳ್ಯಾರೀ ತಾಂತುಂ ಅವ್ವಲ್ ಕೃಷಿ ತೆ ಕರ್ತಾತ್. ಆಲೆಂ, ಕಣ್ಗಿ ಆನಿ ಕಿತೆಂ ಸರ್ವ್ ಕರ್ಯೆತ್ ಮ್ಹಣ್ ಕೇರಳಾಚ್ಯಾಂನಿಂಚ್ ದಾಕವ್ನ್ ದಿಲ್ಲೆಂ. ಹ್ಯಾ ಕುಟ್ಮಾನ್ ನೇಂದ್ರ ಕೆಂಳ್ಬೆ ಲಾಯ್ಲೆ. ಕ್ರಿಸ್ಮಸಾಕ್ ಕುಸ್ವಾರ್ ಕರ್ತಾನಾ ಚಿಪ್ಸ್ ಕರುಂಕ್ ತಾಂಗೆಲಿಂಚ್ ಕೆಳಿಂ (ನೇಂದ್ರ) ಆಮ್ಕಾಂ!
ಆಮ್ಚೊ ಬಾಬ್ ಸಕಾಳಿಂ ಗೆಲ್ಯಾರ್ ರಾತ್ ತಡವ್ ಜಾವ್ನ್ ಘರಾ ಪಾವ್ತಾಲೊ. ತಾಕಾಯೀ ಏಕ್ ಪಾವ್ಟಿಂ ಸಕಯ್ಲ್ಯಾ ಫಾತ್ರಾ ಗಾದ್ಯಾಂತ್ (ತಾಕಾ ‘ಕೊಂಕಾ’ ನಾಂವ್) ನೇಂದ್ರಾ ಕೆಂಳ್ಬೆ ಲಾಂವ್ಕ್ ಮನ್ ಜಾಲೆಂ, ಆನಿ ತಶೆಂಚ್ ಕೆಲೆಂ. ತೊ ಎಕಾ ವರ್ಸಾಚೊ ಪ್ರಯೋಗ್. ವಯ್ಲ್ಯಾ ಬೊಣ್ಕ್ಯಾನ್ ಮಾಡಿ ದವರ್ತಚ್, ತಾಚೊ ಜಾಗೊ ಘೆತ್‍ಲ್ಲ್ಯಾ ನಾರಾಯಣ ಭಟಾನ್‍ಯೀ ಮಾಡಿ ದವರ್ಲಿ. ದೆಕುನ್ ಬಾಬಾನ್‍ಯೀ ವಯ್ಲ್ಯಾ ಅರ್ಧ್ಯಾ ಗಾದ್ಯಾಂತ್ ಮಾಡಿ ಲಾಯ್ಲಿ. ಉಪ್ರಾಂತ್ ತ್ಯಾಚ್ ಗಾದ್ಯಾಚ್ಯಾ ದಾವ್ಯಾಕ್ ಇಲ್ಲಿ ಮಾಡಿ ದವರ್ಲಿ (ಆದ್ಲ್ಯಾ ಅವಸ್ವರಾಂತ್ ದಿಲ್ಲ್ಯಾ ಮ್ಯಾಪಾಂತ್ ಆಸ್‍ಲ್ಲೆಪರಿಂ).
ಇತ್ಲೆಂ ಸೊಡ್ಲ್ಯಾರ್ ಹೆರ್ ಗಾದ್ಯಾಂನಿ ದೋನ್ ಬೆಳಿಂ ಭಾತಾಚಿಂಚ್. ಕೊಳ್ಕೆಂ ತಳೆಂ ಆಸ್‍ಲ್ಲ್ಯಾ ಗಾದ್ಯಾಂತ್ ಮಾತ್ರ್. ನಾತ್ಲ್ಯಾರ್ ತಾಂತುಂಯೀ ಅಪ್ರೂಪ್ ಧಾನಿಚ್ ಕೆಲ್ಲಿ. ಕುಳೆಂಜಿಂನಿ ಗಿಮಾಂತ್ ಕಡ್ಡಾಯ್ ಜಾವ್ನ್ ಧಾನಿ ಆನಿ ಮೊಗ್ಣಿ. ವಯ್ಲ್ಯಾ ಗಾದ್ಯಾಂತ್ ವಾ ಸಾಧ್ಯ್ ಜಾಲ್ಲೆ ಕಡೆನ್ ರಾಂದ್ವಯ್. ಪಾವ್ಸಾಂತ್ ದಿಡ್ಡ್ಯಾರ್, ಹಿತ್ಲಾಂತ್ ತೊವ್ಶಿಂ, ಗೊಸಾಳಿಂ, ಅಲ್ಸಾಂದೆ ಇತ್ಯಾದಿ ಪರ್ಮನೆಂಟ್. ಮೊಂತಿ ಫೆಸ್ತಾಕ್ ಜಾಯ್ ತಿ ರಾಂದ್ವಯ್ ಘರ್ಚಿಚ್.
ಇತ್ಲೆಂ ಸದಾಂಚೆಂ ಆಸ್‍ಲ್ಲೆಂ. ತೆಂ ಸೊಡ್ಲ್ಯಾರ್ ಮೈಸೂರ್, ಬೊಂಗಾಳೆ, ಗಾಳಿ, ಪೂಬಾರೆ (ಊಂಚಿ ಕೆಳಿಂ) ತಸಲೆ ಘಡಾಯ್ ಥಂಯ್ ಹಾಂಗಾ ಆಸ್ತಾಲೆ. ಮೆರೆಂನಿ ಮಾಡ್, ಮಾಡಿಯೊ ಆನಿ ಹೆರ್ ರೂಕ್. ಮಾಡಿಯೆ ತೊಟಾಂತ್ ಮಧೆಂ ಮಧೆಂ ಥೊಡೆ ರೂಕ್ (ಕೊಕ್ಕೊ ರೂಕ್ ಲಾಯಿಲ್ಲೆ ಬಾಬಾನ್). ತಳ್ಯಾ ಕಡೆನ್ ಆಸ್‍ಲ್ಲೊ ಊಂಚಿ ಪೆರಾಂ ರೂಕ್ ಅಪ್ರತಿಮ್ ಪೆರಾಂಕ್ ಬೆಳ್ತಂಗಡಿ ಪೆಂಟೆ ಪರ್ಯಾಂತ್ ಫಾಮಾದ್! ತಶೆಂಚ್ ಕಾಸುಳ್, ಆಳುಂ, ಹಳದ್, ಚಿನೆಂ ಇತ್ಯಾದಿ. ಜೋಳ ಝಾಡಾಂಯೀ ಆಸ್‍ಲ್ಲಿಂ. ಗಾಂವ್ಟಿ ಕೊಬುಯೀ ಆಸ್‍ಲ್ಲೊ. ಮೊಂತಿ ಫೆಸ್ತಾಕ್ ಮೆಳ್ಚ್ಯಾ ಘಾಟಿ ಕೊಬಾಚಿ ಶಿವ್ಡಿ ಲಾವ್ನ್ ವಾಡಯಿಲ್ಲಿಯೀ ಆಸಾ.
ಮ್ಹಜಿ ಮಾಂಯ್ ಮ್ಹಳ್ಳಿ ದಯಾಳ್ ದೇವಿ!
ಮ್ಹಜಿ ಮಾಂಯ್, ಸೆವ್ರಿನ್ ಸೊಜ್, ಘಾಟಾ ಮುಳಾಚಿ. ಲ್ಹಾನ್ ಪ್ರಾಯೆರ್ ಕಾಜಾರ್ ಜಾಲ್ಲಿ. ತಿಕಾ ಮಾಂಯ್ ಮ್ಹಣ್ ಆಮಿ ಆಪಂವ್ಚೆಂ ಸೊಡ್ಲ್ಯಾರ್ ಘರಾಂತ್ ತಿ ಏಕ್ ನೌಕರ್ ತಶೆಂ ಆಸ್‍ಲ್ಲಿ! ಮ್ಹಳ್ಯಾರ್ ದೀಸ್ ರಾತ್ ಘೊಳ್ಚೆಂಚ್ ತಿಚೆಂ ಕಾಮ್. ಕುಜ್ನಾಂತ್, ಗೊಟ್ಯಾಂತ್, ಹಿತ್ಲಾಂತ್, ಗಾದ್ಯಾಂತ್, ಗುಡ್ಯಾರ್ (ಗೊಟ್ಯಾಕ್ ಸೊಪ್ ಸದಾಂಯ್ ಹಾಡಿಜೆ, ಲಾಂಕುಡ್‍ಯೀ ಕರಿಜೆ), ತೊಟಾಂತ್ ಮ್ಹಣ್ ಬಾರಾ ಮಹಿನೆಯೀ ತಿಕಾ ಫುಲ್ ಡ್ಯೂಟಿ. ನಾ ರಜಾ, ನಾ ವಿಶೆವ್. ಪುಣ್ ಆದ್ಲ್ಯಾ ಸಕ್ಡಾಂಪರಿಂ ತಿಣೆಂ ಏಕ್ ಪಾವ್ಟಿಂಯೀ ಶಿಣ್‍ಲ್ಲೆಂ ನಾ. ಪುರಾಸಣ್ ಮ್ಹಣ್ ಬಸ್‍ಲ್ಲೆಂ ನಾ. ಕ್ಯಾನ್ಸರಾಕ್ ಬಲಿ ಜಾವ್ನ್ ನಿಮಾಣೆ ಥೊಡೆ ಮಹಿನೆ ತಿ ಅಸಹಾಯಕ್‍ಪಣಿಂ ಸ್ತಬ್ಧ್ ಜಾಲ್ಲಿ ಸೊಡ್ಲ್ಯಾರ್ ಜೀಣ್‍ಭರ್ ತಿಣೆಂ ವಿಶೆವ್ ಘೆನಾಸ್ತಾನಾ ಚಾಕ್ರಾಪರಿಂ ಘೊಳ್‍ಲ್ಲೆಂಚ್ ಮ್ಹಣ್ಯೆತ್. ವಾವುರ್ಚೆಂ ತಿಕಾ ಪಸಂದೆಚೆಂಚ್ ಜಾವ್ನಾಸ್‍ಲ್ಲೆಂ.
ಮ್ಹಜಿ ಮಾಂಯ್ ಶಿಕ್‍ಲ್ಲಿ ನ್ಹಯ್. ಶಿಕ್ಚೆಂ ಸೊಡ್ಯಾಂ, ಸರ್ಕಾರಿ ಇಸ್ಕೊಲಾಕ್ ಥೊಡೆ ದೀಸ್ ವಚೊನ್ ಅಕ್ಷರಾಂಚಿ ಇಲ್ಲಿ ವಳಕ್ ಜೊಡ್‍ಲ್ಲಿ ಸೊಡ್ಲ್ಯಾರ್ ಹೆರ್ ಕಿತೆಂಯೀ ತಿಕಾ ಕಳಿತ್ ನಾತ್‍ಲ್ಲೆಂ. ಸಂಸಾರಾಚಿ ಸಮ್ಜಣಿ ತಿಕಾ ನಾತ್‍ಲ್ಲಿ, ಪುಣ್ ಕುಟ್ಮಾಚಿ ಆನಿ ಘರ್‌ದಾರಾಚಿ ಜಾಣ್ವಾಯ್ ತಿಕಾ ಜರೂರ್ ಆಸ್‍ಲ್ಲಿ. ತಿಕಾ ಏಕ್ ಕಾನ್ ಸಾರ್ಕೊ ಆಯ್ಕನಾತ್‍ಲ್ಲೊ ಮ್ಹಣ್ ಕೆದ್ನಾಂಯ್ ಉಣೆಂಪಣಾಚ್ಯಾ ಚಿಂತ್ನಾಂನಿ ತಿ ಕರ್ಗತಾಲಿ.
ಕುಸ್ವಾರ್ ಭಾಜ್ತಾನಾ ಉಜೊ ಪೆಟ್ಲೊ!
ಮಾಂಯ್ಚಿ ಸಮ್ಜಣಿ ಮ್ಹಾಕಾ ಕಳೊಂಕ್ ಏಕ್ ದುರಂತ್ ಸಾಕ್ಸ್ ಜಾಲ್ಲೆಂ. ಬಾಬಾನ್ ಆನಿ ವ್ಹಡ್ಲಿಮಾಂಯ್ನ್ (ಮಾಂಯ್ಚ್ಯಾ ಸಾಸುಮಾಂಯ್ನ್) ಮಾಂಯ್ಕ್ ಕೀಳ್ ರಿತಿನ್ ಪಳೆಂವ್ಚೆಂ ಆಸ್‍ಲ್ಲೆಂ. ಸಕ್ಡಾಂ ಮುಖಾರ್ ಹಲ್ಕ್ ಕರ್ನ್ ನಿಂದಾ ಕರ್ಚೆಂ ಬಾಬಾಕ್ ಸದಾಂಚೆಂ. ದೆಕುನ್ ಮಾಂಯ್ಕ್ ಕಿತೆಂಯೀ ಕಳಿತ್ ನಾ ಮ್ಹಣ್ಚೆಪರಿಂ ಸಕ್ಡಾಂಚೆಂ ನಡ್ತೆಂ. ತಿಕಾ ಸಾರ್ಕೊ ಮಾನ್, ಗೌರವಾಚೆಂ ಸ್ಥಾನ್ ಬಾಬಾನ್ ದಿಲ್ಲೆಂಚ್ ನಾ.
ಏಕ್ ಪಾವ್ಟಿಂ ಕ್ರಿಸ್ಮಸಾಕ್ ಕುಸ್ವಾರ್ ಭಾಜುನ್ ಆಸ್‍ಲ್ಲ್ಯಾಂವ್. ಆಮ್ಚೆಂ (ಭುರ್ಗ್ಯಾಂಚೆಂ) ಇಲ್ಲೆಂ ಪ್ರಯೋಗ ಆನಿ ಅಧಿಕ ಪ್ರಸಂಗ ಸೊಡ್ಲ್ಯಾರ್ ಸಕ್ಕಡ್ ವಾವ್ರ್ ಮಾಂಯ್ಚೊ. ತ್ಯಾ ದೀಸ್ ದೋಗ್ ತರ್ನಾಟೆ (ತೆ ಕೋಣ್ ಮ್ಹಣ್ ಸಾಂಗ್ಲ್ಯಾರ್ ಅಕ್ಮಾನ್ ಕೆಲಾ ಮ್ಹಣ್ ದುರ್ಸತಿತ್, ತಸಲೊ ಇರಾದೊಚ್ ಮ್ಹಾಕಾ ನಾ) ಘರಾಂತ್ ಆಸ್‍ಲ್ಲೆ. ಕಾಳೊಕ್ ಜಾಲ್ಲೊ. ಸಾಂಜೆ ಥಾವ್ನ್ ರಾಂದ್ಪಾ ಕುಡಾಂತ್ ಕುಸ್ವಾರ್ ದಾಸ್ತಾನ್ ಜಾತಾಲೊ. ಘರ್‌ಭರ್ ತೇಲ್, ಪೀಟ್, ಭಾಜ್‍ಲ್ಲೊ ಪರ್ಮಳ್.
ತವಳ್ ಸ್ಟವ್ ಆಮಿ ಪಳೆಂವ್ಕ್ ನಾತ್‍ಲ್ಲೆ. ರಾಂದ್ಣಿಂತ್‍ಚ್ ಸಗ್ಳೆಂ ರಾಂದಪ್. ವಯ್ರ್ ಕರಿ ಲಾಗೊನ್ ಫಾತ್ರಾಪರಿಂ ಜಾಲ್ಲೊ ಉತೊವ್. ತಾಚೆರ್ ಕಾಂಯ್ ರಾಸ್ ಸಾಮಾನ್ ಆಸ್ತಾಲೊ. ಉಜ್ವಾಡಾಕ್ ಚಿಮ್ಣಿಂಚ್ ಆಮ್ಕಾಂ, ವಾಚುಂಕೀ-ಬರಂವ್ಕೀ.
ಬಾಣಾಲ್ಯಾಂತ್ ಎಕೇಕ್ ಕುಸ್ವಾರ್ ಭಾಜೊನ್ ತೇಲ್ ಸಳ್ಸಳ್ತಾಲೆಂ. ರಾತ್ ಜಾತಾನಾ ಎಕಾಚ್ಛಾಣೆಂ ಬಾಣಾಲ್ಯಾಕ್ ಉಜೊ ಪಡ್ಲೊ. ತೇಲ್ ಚಡ್ ತಾಪ್‍ಲ್ಲ್ಯಾನ್ ಆನಿ ರಾಂದ್ಣಿಂತ್ ಉಜೊ ಅನಿಯಮಿತ್ ರಿತಿನ್ ಪೆಟ್ತಾಲೊ ಜಾಲ್ಲ್ಯಾನ್ ಉಜೊ ತೆಲಾಕ್ ಲಾಗ್ಲೊ. ಭಗ್ಗ್ ಕರ್ನ್ ಬಾಣಾಲೆಂ ಉಜ್ಯಾಚೆಂ ಆಗ್ಟೆಂ ಜಾಲೆಂ. ಆಮ್ಕಾಂ ಭುರ್ಗ್ಯಾಂಕ್ ಕಾಂಪ್ ಸುಟ್ಲಿ. ತಿತ್ಲ್ಯಾರ್ ಥಂಯ್ ‘ಸಂಸಾರ್ ಭೊಂವೊನ್’ ಆಯಿಲ್ಲೆ ತರ್ನಾಟೆ, “ಉದಾಕ್… ಉದಾಕ್ ಘಾಲ್” ಮ್ಹಣ್ ಬೊಬಾಟ್ಲೆ. ಆಮ್ಕಾಂ ಕಿತೆಂ ಜಾತಾ, ಕಿತೆಂ ಘಡ್ತಾ ಏಕ್‍ಯೀ ಸಮ್ಜನಾ. ಮಾಂಯ್ ಕಿತೆಂಗೀ ಮ್ಹಣ್ಮುಣ್ತಾನಾಂಚ್ ಎಕ್ಲ್ಯಾನ್ ಉದಾಕ್ ಉಸ್ಪಿಲೆಂಚ್!
ತಿತ್ಲೆಂಚ್. ಉದ್ಕಾಚೊ ಸ್ಪರ್ಶ್ ಜಾಲ್ಲೆಂಚ್ ಬಾಣಾಲ್ಯಾಂತ್ಲೊ ಉಜೊ ನ್ಯೂಕ್ಲಿಯರ್ ಬಾಂಬ್ ಸ್ಫೋಟ್ ಜಾಲ್ಲೆಪರಿಂ ವಿಸ್ತಾರ್ಲೊ. ಮ್ಹಾಕಾ ಘರ್ ಹುಲ್ಪಲೆಂಚ್ ಮ್ಹಣ್ ಭಿರಾಂತ್ ಖಿಣಾನ್ ಶಿರಾಂ ಶಿರಾಂನಿ ರಿಗ್ಲಿ. ಉಜೊ ಬಾಣಾಲ್ಯಾಂತ್ಲೊ ವಿಸ್ಫೋಟ್ ಜಾಲ್ಲೊ. ಘರ್ ಹುಲ್ಪಲೆಂಚ್ ಮ್ಹಣ್ಚೊ ಆಕಾಂತ್…
ಪುಣ್ ಮಾಂಯ್ಚೆಂ ಸಮಯಪ್ರಜ್ಞೆ ಧರ್ಮಾನ್ ಘರ್ ಉರ್ಲೆಂ. ತಿಣೆಂ ಆಯ್ದಾನಾಂ ಧುಂವ್ಚ್ಯಾ ವ್ಹಡ್ಲ್ಯಾ ಕಡಾಯೆಂತ್ಲೆಂ ಉದಾಕ್ ಉಡವ್ನ್ ತುರ್ತಾನ್ ತಿ ಬಾಣಾಲ್ಯಾಚೆರ್ ಧಾಂಪ್ಲಿ. ರಡ್ಕುರ‍್ಯಾ ಬಾಳ್ಶ್ಯಾನ್ ಆವಯ್ನ್ ಹಾತಿಂ ಘೆತಚ್ ರಡ್ಣೆಂ ಸ್ಥಗಿತ್ ಕೆಲ್ಲೆಪರಿಂ ವಾ ವೆಗಾನ್ ಧಾಂವ್ಚಿ ಗಾಡಿ ಹ್ಯಾಂಡ್ ಬ್ರೇಕ್ ಘಾಲ್ನ್ ರಾವಯಿಲ್ಲೆಪರಿಂ ಉಚಾಂಬಳ್ ಜಾಲ್ಲೊ ಉಜೊ ಬಾಣಾಲ್ಯಾಕ್‍ಚ್ ಪಾಟಿಂ ಪರ್ತಲೊ! ಸುಂಯ್ಪುಂಚ್ಯಾ ಪೆಟ್ಯಾನ್ ಧನ್ಯಾನ್ ಫರ್ಮಾಯ್ತಚ್ ಘುಡಾ ಭಿತರ್ ರಿಗ್‍ಲ್ಲೆಪರಿಂ! ಸಕ್ಡಾಂಕ್ ಅಜ್ಯಾಪ್.
ದೋನ್ ಸಂಗ್ತಿ ತ್ಯಾ ದೀಸ್ ಅವ್ಗಡ್ ಜಾಯ್ನಾತ್‍ಲ್ಲೆಪರಿಂ ರಾಕೊಂಕ್ ಕಾರಣ್ ಜಾಲ್ಲ್ಯೊ. ಏಕ್ ಮಾಂಯ್ಚೆಂ ಸಂಯಮ್, ತುರ್ತ್, ಸಕಾಲಿಕ್ ಕ್ರಮ್. ದುಸ್ರೆಂ ರಾಂದ್ಣಿಚೆಂ ನಿರ್ಮಾಣ್. ಆಮ್ಚೆ ಪುರ್ವಜ್ ಕಿತ್ಲ್ಯಾ ಸಮ್ಜಣೆಚೆ ಮ್ಹಣ್ ಹಾಂತುಂ ಕಳ್ತಾ. ಆಮ್ಚ್ಯಾ ಕುಜ್ನಾ ಭಿತರ್ ರಾಂದ್ಣಿಚ್ಯಾ ಕುಶಿನ್ ವಣದ್ ಬಾಂಧುನ್ ತಾಚೆರ್ ಉತೊವ್ ರಚ್‍ಲ್ಲೊ. ತ್ಯಾ ವರ್ವಿಂ ಉಜ್ಯಾಚಿಂ ಕಿಟಾಳಾಂ ಭಿತರ್‌ಚ್ ಉರ್ತಾಲಿಂ, ಧುಂವರ್ ಮಾತ್ರ್ ಸಗ್ಳ್ಯಾಂನಿ ವೆತಾಲೊ. ತ್ಯಾ ವರ್ವಿಂ ತ್ಯಾ ದೀಸ್ ಉಜೊ ಭಾಯ್ರ್ ಪಡೊಂಕ್ ನಾತ್‍ಲ್ಲೊ. ಜರ್ ಉತೊವ್ ಅಸ್ಕತ್ ಆಸೊನ್ ಪೆಟ್‍ಲ್ಲೊ ತರ್ ಕಿತೆಂ ಜಾತೆಂ ಮ್ಹಣ್ ಸಾಂಗೊಂಕ್ ಕಷ್ಟ್. ಮ್ಹಜಿ ಮಾಂಯ್ ಕಿತ್ಲಿ ಶ್ರೇಷ್ಠ್ ಮ್ಹಣ್ ತ್ಯಾ ಘಡಿತಾ ವರ್ವಿಂ ರುಜು ಜಾಲ್ಲೆಂ. (ತ್ಯಾ ಉಪ್ರಾಂತ್ ತಿಕಾ ಉಜ್ಯಾಚೆಂ ಭ್ಯೆಂ ಲಾಗ್‍ಲ್ಲೆಂ ಆನಿ ಚಡ್ ಜಾಗ್ರುತ್ಕಾಯ್ ಸಾಂಬಾಳ್ತಾಲಿ).
ಮಾಂಯ್ – ಬಿರ್ಮತಿಚೊ ಸಾಗೊರ್
ಜರ್ ಹಾಂವ್ ಮ್ಹಜ್ಯಾ ಮಾಂಯ್ ವಿಶಿಂ ಸಾಂಗನಾ, ತೆದ್ನಾಂ ಹಿ ಕಾಣಿ ಅಪೂರ್ಣ್! ವ್ಹಯ್ ಪೆಟ್ಯಾಂಚ್ಯಾ ಝುಜಾಂತ್ ತಿಣೆಂ ನಿರ್ಣಾಯಕ್ ಪಾತ್ರ್ ಘೆತ್ಲಾ. ತಿಚೆಂ ದಯಾಳಿ ವ್ಯಕ್ತಿತ್ವ್ ಆನಿ ತಿಚಿ ಮಜತ್ ನಾ ತರ್ ಟೊಮಿ ಪಯ್ಲ್ಯಾ ಝುಜಾಂತ್‍ಚ್ ಕಾಬಾರ್ ಜಾತೊ ಕೊಣ್ಣಾ. ತಶೆಂ ಜಾಲ್ಲೆಂ ತರ್ ಹಿ ಕಾಣಿಂಚ್ ಉದೆತಿ ನಾ.
ಹ್ಯಾ ಕಾಣಿಯೆಂತ್ ಮಾಂಯ್ ನಿಜಾಯ್ಕೀ ಫ್ಲಾರೆನ್ಸ್ ನೈಟಿಂಗೇಲಾಚೊ ಪಾತ್ರ್ ಖೆಳ್ಳ್ಯಾ.
ಟೊಮಿ ಝುಜಾಂತ್ ಸಂಪೂರ್ಣ್ ಘಾಯೆವ್ನ್ ಪಡ್‍ಲ್ಲೊ. ಕಶೆಂ ನೈಟಿಂಗೇಲಾನ್ ಝುಜಾಂತ್ ಕಾತರ್ನ್ ಪಡ್‍ಲ್ಲ್ಯಾ ಸೊಜೆರಾಂಚಿ ಶುಶ್ರೂಶಾ ಕರುನ್ ಚಿಕಿತ್ಸಾ ದಿಲ್ಲಿಗೀ ತಶೆಂಚ್ ಮಾಂಯ್ನ್ ಟೊಮಿಕ್ ಸಾಂಬಾಳ್‍ಲ್ಲೆಂ. ತಿಣೆಂಚ್ ತಾಕಾ ಜಿವಿತ್ ಪಾಟಿಂ ದಿಲ್ಲೆಂ. ತಶೆಂ ಕೆಲ್ಲ್ಯಾನ್ ಟೊಮಿ ವಾಂಚೊನ್ ಉರ್ಲೊ ಮಾತ್ರ್ ನ್ಹಯ್ ಪೂರ್ಣ್ ಬರೊ ಜಾವ್ನ್ ಹ್ಯಾ ಕಾಣಿಯೆಚೆಂ ಕ್ಲೈಮ್ಯಾಕ್ಸ್ ಜಾವ್ನಾಸ್ಚ್ಯಾ ಅಂತಿಮ್ ಝುಜಾಕ್ ತಾಣೆಂ ತಯಾರ್ ಜಾಯ್ಶೆಂ ಕೆಲ್ಲೆಂ!
(ಚವ್ತ್ಯಾ ಭಾಗಾಂತ್ ಮುಂದರಿಲಾಂ)
ಆಮ್ಚ್ಯಾ ವಾಟ್ಸಪ್ ಗ್ರೂಪಾಚೆಂ ಲಿಂಕ್ (Click to Join)
Send your Feedback to: budkuloepaper@gmail.com
